\id 2JN – Mandara [TBF consultant checked] 
\h 2 IOANES 
\toc3 2 IOANES 
\toc2 2 Ioanes 
\toc1 2 IOANES 
\mt2 Ken pakapaka rorou vuluongan  
\mt1 E Ioanes (2)  
\c 1  
\p
\v 1 Eou mi komosi ka ni tsientsang,  
\b  
\p O vavataor rakot sevoi mi vevien ese e Raban ta nga vile no meie bu natu. O tovie nga ngan mi tuktuk. Kap va eou mo eiekesen egie kokouk gi ta telekiran mi tuktuk, gi tovie nga buer,  
\v 2 simi vunan ine mi tuktuk a tino segiet nge mon meie giet sibu ra bu ra.   
\b  
\p
\v 3 Mi tentoiv, mi aor molous ma mi molu se Raban mi Tam, ma se Iesu Karisito, e Natuon mi Tam, ta mon meie giet ese giet ta tino ngan mi tuktuk ma mi tentoiv.   
\b  
\p
\v 4 O nga res beitsak nia vorotan ba mei mene sibu natu ese gituo ta tino vemusurie mi tuktuk, malan mo mi Tam ta nga oeng ngeisngeis segiet nia tino ven.  
\v 5 Vevien, ine, o nongie no va giet ta ngas totoiv ververkis. Ine kap va mi vinuor vour o vataro rakot senga eiekesen mi vuna vinuor giet tate nga suvuon vakaek simi tsuoktsuok vakaek.  
\v 6 Ma ine arie mi tentoiv. Giet ta ngas tino vemusurie ken vuna vinuor e Raban. Ken vuna vinuor a pevien va giet ta ngas tino simi tentoiv malan nga tate nga rongomie vakaek simi tsuoktsuok vakaek.   
\p
\v 7 Palan bu mei nguts bitbit gi ta kap vakokoit katsep ngan e Iesu Karisito va a nga tsorubeit ka, gi te vesingie mi mangmagoso enaenamon kokouk. Mi suada mei malan ne, eie mi nguts bitbit ma man matakorot e Karisito.  
\v 8 Nga ta nenei kalei va nga ta masi rivie misa nga tate nga biroik surie, terengien nga ta mang so poro mi voirvoir pu.   
\p
\v 9 Eie ese ken vinasengei ta solongenge sibu vinasengei se Iesu Karisito, eie a kap suvuon e Raban. Eie ese ta tino vemusurie ken vinasengei e Iesu Karisito, eie a suvuon kokouk mi Tam ma mi Nout.  
\v 10 Sien va ka mei ta nemei senga eiekesen a kap vavasengei ngan ken vinasengei e Iesu Karisito, kian va nga ta marangatan si kenga sar vonuo, o, resmatan.  
\v 11 Eie ese ta resmatan, eie a tuir meie si ken sar sinavei tsokor.   
\p
\v 12 O suvuon bu kepineits palan o ta lalaro vataro rakot senga, eiekesen o kap lalaron nia vataro simi pakapaka rorou. Simi vunan o lalaron beitsak va eou ngas te o ta ra vorota nga nge vakokoit meie nga, terengien kegiet nires ta mang tsorubeit pu.   
\b  
\p
\v 13 Bu natuon e kasi vevien ese e Raban ta nga vile, gi terie kegi ni vuot kalei buer rakot sevoi.