\id JAS James Takia, James, Meng Maguna, Bruce Waters, 3 Sep 1998 
\h Jems 
\toc1 Jems 
\toc2 Jems 
\mt1 Jems  
\c 1  
\p
\v 1 Ŋai Jems, Anut iŋanen urat tamol, agod Tubun en Jesus Kristus san dam mi a. Ilo uyan Anut san gugoi 12 tan gidigidad lo dumado den sad na girek en ŋigane yau da.   
\s1 Kubianek id dabai ipanad da  
\p
\v 2 O teig muroug, muruan naon dugo dugo yak asini dop ilom uyan oŋ a.  
\v 3 Man dugo, aŋ aloŋ ak saen aŋsam ilo rumok kubianek lo digane dan san nuŋon ilom lo igane ilasa dop lo atur sakar pe muruan asini san a.  
\v 4 Dabai agane dop aŋsam kagin uyanan an, nuŋon uyan uyan ak ilom lo igane ilasa wa, an lo aŋsam ilo rumok idaisuda geig a. Agop fun an lo aŋ itaot atur ak, Anut san kagin kisaek ta lo adu san tia geig a.   
\s1 Tamol maŋau tia dop igudani wa  
\p
\v 5 Aŋ luluŋam lo ta iŋ maŋau uyan ak lo katukan tap, Anut isumiani dop iŋ an ipani wa. Man dugo, Anut tamolpein fidian iŋ dugudani den lo melmel uyanan ak ipidinai da. Iŋ dam tamolpein dusumiani dan ta ipidai na da.  
\v 6 Ak man iŋ buben fidian Anut mi ipani dop igudani wa, man dugo, tamol buben raru raru den iŋsan ilon nek ibol tim beig ifunip beig yau imul oŋ dak igo ya.  
\v 7 Tamol naok ago man Tubun en mel ipani wak ago ilon ta isou na wa.  
\v 8 Iŋ ilon gidgidad yau dak, iŋsan kagin fidian dam lo, dal kisaek ta iri na da.   
\s1 Tamol yaŋad tia, tamol filiad da yak sad ru kagin  
\p
\v 9 Kris tamol ta iŋ yaŋan tia man ilon ka uyan a, man dugo, murnap Anut yabisap yaŋak tubun ak ipani wa.  
\v 10 Kris tamol ta iŋ melmel wei mi aman da man dam ka ilon uyan a, man dugo, murnap iŋ nek ibol tamol yaŋan tia yak ilasa woŋ a. Anut iŋ tamol filian anda yak aben tan en lo malan te yak ibisei san ago igane wa, nek ibol garaŋ san ai bob an ilasad itapas yau kisaek oŋ dak ago mi a.  
\v 11 Id taloŋ ak, ad tubun idu dan ad luon sakar ak ilasa da. Saen an ai rouk fidian imagar yau dop sad bob ad itapas yau pe leil lo dam uyan tia ya. Nek ago mi tamol iŋ filian aman da yak iŋsan urat fidian igane yan yabi idup yen dop ibisei yau a.   
\s1 Kubianek san fun  
\p
\v 12 Tamol iŋ itur sakar pe, ate suek lo muruan isini tap iŋ dam ka ilon uyan a. Iŋ ate suek an iriŋani pasik tap, Anut iŋ murnap naon madok pempem san ipani wa, madok an kumaen panu lo yen da. Anut wagam ibol la ya, tamol iŋ ilon ipani mok tap iŋ kumaen imadop milaen a, an itout san tia ya.   
\p
\v 13 Tamol ta ate suek lo idu dop igo ta ibol na wa, “Anut ateg isue da.” Man dugo, aupasek Anut lo ta ipalu na da, agod Anut dam iŋ tamol aupasek lo ta idirai na da.  
\v 14 Tamol kisaek kisaek aupasek lo diau dudu dan san fun man, iŋsiganed ilo saiak an ilod iŋanep aupasek digane da.  
\v 15 Agop iŋsan buben imasa yan yaup nuŋon aupasek ilasa da, aupasek an yaup tubun mi ilasa dop mateŋ ile wa.   
\p
\v 16 Ago yak niŋen o, ŋai teig muroug, mel en ale dop niŋen o sem ta irawaŋ na wa.  
\v 17 Melmel fidian uyanan iŋ kagin fidian itaot ak da sad fudi man lak na dien da, Tamad iŋ an idirai idsad na dudu ya. Patui keit lo dided dumat da. Ak man id Tamad man ago tia ya, iŋ lilaman san, agog dam ta ibilso ibilila na da. Iŋ lo man tidom tia, pempem itaot ago mi imado da.  
\v 18 Iŋsen ilon ibol go, iŋsan ru rumok an lo, id idiradsig iŋanen nanuk mok tilasa ya. Ago dugo Anut san melmel igane yan luluŋad lo id imug tilasa ya. Nek ibol ai ta malan malan nuŋon ifu dak igo woŋ a.   
\s1 Uloŋ dop gane  
\p
\v 19 Ŋai teig muroug, aŋ ru kagin en aloŋ uyan. Aŋ fidian kududom agurep ru aloŋ uyanan, ilo isou agane gup ru abol a, agod tiŋaem dam ta saian kisaek oŋ na wa.  
\v 20 Fun dugo, tamol san tiŋae saiak an Anut san kagin uyan ta igane ilasa na da.  
\v 21 Ago yak niŋen o aŋsam kagin saiak saiak fidian, aŋsam aupasek san naok naok fidian abiau dop sem ibiaŋ adup Anut san ru a bubem lo yen den ilom isoup ari wa, man dugo, ru an iŋ dabai anda, an lo murnap mateŋ san saen lo ŋutum ka ibinawi wa.   
\p
\v 22 Ru an kawan ta aloŋ oŋ na wa, aloŋ dop nuŋon dam agane kisaek a. Aŋ kawan aloŋ oŋ tap, sem irawaŋ da.  
\v 23 Tamol ru iloŋ oŋ dop ta iri na tap, iŋsen naon tig lo ile igo woŋ a.  
\v 24 Iŋsen mitilaen ile wo uyan gup yau a. Ago gug iŋsen naon dugo yan ilon iŋaoŋ kisaek oŋ a.  
\v 25 Ak man kubiaeŋ Kristus awan lo ilasa yan itaotan geig, agod kubiaeŋ en subanek lo ipasad tilasag kawan tumado da. Enti kubiaeŋ an tig igo woŋ lo naon ilep lo Kristus awan iri dop man, bar iŋane wa. Gug iŋ kubiaeŋ an kawan ta iri na wa, tia, Kristus awan iloŋ gup iri uyanan o maeg igane wa. Iŋ Kristus awan iloŋ pe ilon iŋaoŋ kisaek oŋ san tia ya, tia, iŋ awan iloŋ gup iloŋ san nuŋon an itaot fo mi igane ilasa wa. Tamol naok an Anut san bar iŋane wa.   
\p
\v 26 Tamol iŋ ilo isou lo iŋ Anut san tamol ibol dak pempem igudani dak man awan kagin ta ipani na dan iŋsan ilo rumok an kawan a, an lo iŋsen irawi da. Agog iŋsan ubou leil an dam kawan a.  
\v 27 Ubou san kagin ikok agod uyanan da Bai Anut malan lo man igo ya: nanuk bigabeg, pein suos, kaginad tigane dop iŋsad muruan lo tibinawai a, agod tan en san kagin tile dop bubed ta igane saian na wa.   
\c 2  
\s1 Id tamol yaŋan tia yan ta tabi idu na wa  
\p
\v 1 Ŋai teig muroug aŋ idsad Tubun ak Jesus Kristus, kumaen panu san gurman an ilom lo rumok, ago tap man tamolpein yaŋad anda yak mi kagin ta apidinai na wa, tia, tamol saiak saiak adi dam kagin apidinai a.  
\v 2 Tamol ta damag uyan uyan ak idirip aŋsam ubou ab lo ipalu dop, tamol ta biouŋ saiak saiak ak idirip dam ipalu wa.  
\v 3 Oŋ tamol biouŋ uyan uyan ak idiri an kagin pani wo uyan pe iŋ rupei, “Aben uyanan en ŋanep masi,” ago dop tamol neinta an rupei, “Ago ila utur, tia dop igo tan na ŋieg fun na masi.”  
\v 4 Aŋ kagin ago agane tap, aŋ luluŋam lo biatitek agane da. Aŋ gurman oŋ alasag aŋsiganem ilo saiak saiak lo abititai da.   
\p
\v 5 Aloŋ, ŋai teig muroug, Anut tamolpein yaŋad tan en lo tia yan yaŋad iŋane wa, agod iŋ ilo rumok lo idaisuda yan ipilianai la ya, an lo Anut dam san madok aben lo filian fidian ipidinai a. Man dugo, fidian enti iŋ niŋedi wo imat den, Anut promis ipidinai ak ago igane wa.  
\v 6 Ak man aŋ tamol melmel ad tia yan abiai dudu da. Aŋ aloŋ ak tamol melmel wei mi ad da yan aŋ dibiaŋ adu dop muruan dupanaŋ da. Iŋsed mi diŋiliaŋ pe gurman naod na atur a.  
\v 7 Iŋsed mi Kristus san yaŋan uyanan ipanaŋ go, lo digiaŋ se yan lo, ru saiak saiak dubol ilasa da.   
\p
\v 8 Anut san girek lo kubiaeŋ malan te yen dan lo igo ibol, “Oŋse niŋe wo umat dak ago mi, tei murou siŋire na dam niŋedi wo umat a.” Oŋ an rumok uri tap, an nek uyanan mi a.  
\v 9 Go aŋ aenta ael saiadi dop, aŋ au apas da, an lo kubiaeŋ ibol ago aŋ kubiaeŋ malan asue ya.  
\v 10 Tamol ta kubiaeŋ fidian iri uyan dugo kisaek ipitiŋini tap iŋ kubiaeŋ fidian ipitiŋini mok a.  
\v 11 An san fun man igo woŋ. Anut ibol, “Tamol ta sen turan san iwon da aupasek ta digane na wa.” Agog iŋ fon ibol da, “Tamol ta fini imat na wa.” Oŋ kubiaeŋ kisaek an uri dop, turan ta lo tamol funi imat tap, oŋ kubiaeŋ fidian pitiŋini a. Man dugo, Anut iŋsen kubiaeŋ an fidian ibol dilasa ya.   
\p
\v 12 Aŋ dugo aŋiŋeŋ dop kagin agane wak i? Aloŋ uyan, saen Anut id bitinaek lo idirad an, iŋ malan ipalug turad bubed tupidinai dop iliad o malan ipalu da. Nek fun an niŋen o, oŋsa madok lo kagin ganep mado tap, ilo panek san dal uri wa.  
\v 13 Saen Anut bitinaek lo idirad dop, talpein a aenta ilon ta imuŋanai na yan, Anut talpein an ilon ta imuŋani na wa. Ilo muŋanek an tubun kasik, an niŋen o oŋ Anut ibio udu wo umoi tap, aenta ilo imuŋanai mok a.   
\s1 Kagin naok naok en ilo rumok san nuŋon mok  
\p
\v 14 Ŋai teig muroug, tamol ta iŋ ibol, ŋai ilog lo rumok a. Ago ibol ak gug, iŋsan ilo rumok an iŋanen naok naok lo yan nuŋon tia ya. Ak dugo, iŋsan ilo rumok nuŋon an tia yan ka ibinawi wak i? Man tia geig a.  
\v 15 Isop tei murou boi, lu murou boi, iŋ tinid san biouŋ, tia, agod anaŋ diani san dam tia tap man,  
\v 16 oŋ melmel anaŋ boi, biouŋ direk san boi, an iŋ lo tia yak ta pidinai na, ago gug rupidaig ubol, “Awo, aŋ ilom maror anda amado. Ilom isoup kulos wananan san ak adiri gup, anaŋ tubun mok ani wa.” Kagin an ta uyan na, agod nuŋon an tia ya.  
\v 17 Nek ago mi, ilo rumok kawan yen dop iŋanen naok naok lo nuŋon tia tap, ilo rumok an imat a.   
\p
\v 18 Ak man tamol ta iŋ igo ibol, “Oŋ ilo rumok ama da, gug ŋai kagin naok naok uyan ak amag da ya.”  
\p Ŋaisag ru naon man igo, “Oŋsa ilo rumok a kagin naok naok an tia yan kubiai dop ŋile. Ago dop, ŋai kagin naok naok uyan ak ŋigane dan lo ŋaisag ilo rumok ŋukubiai dop ule wa.”  
\v 19 Oŋ Anut kisaek mok an niŋen o ilo rumok di? Uyan a, ak man an ta idaisuda na ya. Nek ago mi ur saiak saiak dam ilo rumok lo Anut kisaek dubol go dirut direr da.   
\p
\v 20 Oŋ burau tamol! Oŋ dag ŋai ŋukubiai dop ule o boi, ilo rumok naok an nuŋon tia kawan i?  
\v 21 Wagam en dugo woŋ Anut iŋ malan lo id tubud baged Abraham iganeg itaot ilasa yak i? Abraham iŋsiganen kagin naok naok lo iŋanen nanun ifuni imat pe utut fo imarip Anut ilo uyan ipani wo ago igane ya.  
\v 22 Oŋ ule, iŋsan ilo rumok iŋ kagin naok naok da sisem urat digane kisaek da. Iŋsan kagin naok naok an lo iŋsan ilo rumok ilasa siŋaokan a.  
\v 23 Agog dal an lo ru a girek lo yen dan rumok ilasag ibol, “Abraham iŋ Anut mi ilon lo rumok a, agog iŋsan ilo rumok an Anut ileg ibol, iŋ tamol itaot a.” Ago yak niŋen o Anut ibol, “Abraham iŋ ŋaisag turag mok.”  
\v 24 Oŋ ule yak, an iŋsiganen kagin naok naok amaiak lo man iŋ Anut malan lo tamol itaot ilasa ya. An iŋsiganen ilo rumok lo mi tia ya.   
\p
\v 25 Nek ago mi dal san pein Rahab iŋ dam Anut malan lo iŋsiganen kagin naok naok lo itaot ilasa ya. Iŋsen mi ru sinek san tamol ilo uyan ipidinaig idinaig dal senamo lo dusol go diau a.  
\v 26 Ago yak niŋen o tinid ur an tia man imat a, nek ago mi, ilo rumok urat an tia yan dam imat a.   
\c 3  
\s1 Bale tirni wo uyan a  
\p
\v 1 Ŋai teig muroug aŋ wei mi girek maŋau ta alasa na wa. Aŋ aloŋ ak maŋ girek maŋau man aenta luluŋad lo Anut san bitinaek dabai mok ak lo mumado wa.  
\v 2 Id fidian aupasek funfun tigane da. Tamol ta iŋ ŋiŋeŋ lo aupasek ta igane na den, iŋ itaotan, agog iŋsen tinin fidian dam ka iturni wa.   
\p
\v 3 Saen id bafolo ŋudun lo kam nanun tiganep tirae tap, bafolo tinin fidian mi itilanip ŋied abad iri wa.  
\v 4 Tia dop, wog tubun ak ilom isou. Gidad tim tubun ak ifurep wog an ididip yau a, agod wog an dam tubun mok, gug fei nanunan an nam unbek tamol mi, iŋ ka wog dugo yau o imat dan igirip ago yau a.  
\v 5 Baled dam nek ago mi, sen ka nanunan a, ak man iŋ dabai a, iŋ ka melmel tutubun ak igane ilasa wa. Yai balen nanunan ak ka imasap dagui tubun ak igane inani yau a.  
\v 6 Id baled dam yai oŋ a, iŋ tinid san boi luluŋad lo kagin sisaiak sad gurman imado da. Baled an kagin saiak saiak funfun igane ilasa da. Iŋ iganep tinid ilon fidian nun ipani da. Ago iganep tinid san kagin yai wananan oŋ a, agop idsad tureŋ ilasa saian da. Agod Ades san yai amaiak baled lo yai igane ilasa da.   
\p
\v 7 Tamol iŋ ka melmel funfun itirnai a, agog wei mi kagin ipidinai la ya. Anakanak, bor kasik, goun kasik, kuseŋ funfun agog beig lo fon da mi a.  
\v 8 Ak man tamol ta iŋsen balen itirni san tia ya. Balen yaes ta ibal na da, ru saiak saiak ibol yau woŋ da. Iŋsan balen dam ibol mot wagai ak oŋ, agod iŋsan dabai tubun mok an lo tamol ka iginiai dumat a.   
\p
\v 9 Id baled lo idsiganed Bai Tubud tabol dan yaŋan tabisa da, ago gug afon idsiganed teid taod tupudai saian da. Gug teid taod an Anut idirai dilasag ibol iŋsen ago mi woŋ a.  
\v 10 Ru ilo uyan san iŋ ru saiak saiak da sisem awak kisaek lo mi dilasa da. Ŋai teig taog, kagin an ta mok ilasa na wa.  
\v 11 Ka you ibanaip dal kisaek lo mi, gigen iŋ bulbal da dilasa wak i?  
\v 12 Nek ago mi papai ka aŋar lo ilasa wak i? Aria, ka woi lo fud ilasa wak i? Nek ago mi beig lo you mok tiŋane san tia ya.   
\s1 Maŋau uyan Anut san na idu ya  
\p
\v 13 Enti aŋ luluŋam lo iŋ kankan milaen anda, agod maŋau uyan anda yak i? Tamol ago tap, iŋsan madok uyan ak lo sen ikubiai dop tile wa. Iŋsan kankan milaen an nuŋon tap, san nuŋon man mos kagin. Ago tap, mos kagin an lo urat sensen igane dop tile wa.  
\v 14 Ak man aŋ turak lo aenta eil saian dugo, ŋai-ŋai kagin lo yaŋam tubun ilasa wo agane da. Aria, kagin an bubem iŋanefute tap, se pitianoi ru ta abol na wa. Kabelan sem irawaŋ dop ru rumok san aben lo ru sewak agane banau.  
\v 15 Kankan milaen naok ago yan sewak a. An kumaen panu lo ta idu na ya. Tia, kankan an tan en san, an Urgun san tia, an ur saiak san mi a.  
\v 16 Man dugo, aben a ate turak susai agod ŋai-ŋai kagin dien dan, ante dam abaŋ pitiŋinek san kagin, agod kagin sisaiak fidian dien da.   
\p
\v 17 Ak man kankan milaen a lak na yak idu yan man igo ya: iŋsan ilo isou fidian man ikok, iŋ tamol maror igansi san, iŋ tamol mos an, iŋ ilon dabai an tia ya, ilo muŋanek tinan, iŋsan kagin nuŋon uyan uyan ak mi, iŋ kagin kisaek ak mi iwae dak, agod ru rumok san a.  
\v 18 Tamol a maror digansi dan, maror lo sad ai patun dupae yan, sad urat san nuŋon man iŋ tamolpein didiraip Anut malan lo itaot dilasa wa.   
\c 4  
\s1 Anut mi awan wabi wa  
\p
\v 1 Fun ata mel niŋen o aŋ luluŋam lo wagai agane dugo nug apei adiri di? Bube imasa san kagin aŋ kisaek kisaek ilom lo yen da, agog aŋ tinim ilon fidian lo wagai igane dugo mel ta niŋen o amat den dam aŋane wo da.  
\v 2 Aŋ melmel niŋedi wo malam isi dak ta aŋane na da. Aŋ tamol afu dumat agod iŋsad melmel apasi asini wo ilom tubun mok imasa da, gug ta aŋane na da. Ago agane dan fun dugo aŋ Anut ta asumiani na da.  
\v 3 Agog saen aŋ asumiani dubo man ta ipanaŋ na wa, fun dugo aŋ asumiani saian da. Melmel aŋsiganem bubem lo aganep siganem tinim mi lo urat apani wo da.   
\p
\v 4 Aŋ Anut abisei ak ibol dal dal pein iwon ibisei ak igo woŋ a. Aŋ ta aloŋ na yak, aŋ tan en niŋen o amat tap, aŋ Anut san ager. Agog tamol enti tan en san turan imado wo tap, iŋ Anut patun ipanip Anut san ager igo woŋ a.  
\v 5 Girek an sen kawan ago abol banau, Anut san ru rumok girek lo igo ibol, “Anut iŋ tura susai kagin lo tamol sad ur ilod lo idiri an itargiranig imado da.”  
\v 6 Ak man binawek Anut id ipanad an san dabai idsad aupasek san dabai iriŋani a. Ago yan lo girek an igo ibol, “Tamol sed yaŋad disini den Anut patun ipidinai a, gug tamol sed ibiai dudu den iŋ ilon ipidinai a.”   
\p
\v 7 Ago yak niŋen o Anut paen na au a. Ago dop Satan patum apani wa. Ago tap iŋ aŋ ibisawaŋ pe isol yau a.  
\v 8 Anut siŋiren na au dop iŋ aŋ siŋirem na ipalu wa. Aŋ aupasek tinami, banim afulani. Aŋ bubem raru raru amami, bubem akubune pasik pe ikok yen a.  
\v 9 Ilom idup tinaŋ aru agane wa. Aŋsiganem sileŋ an abilisap tinaŋ oŋ a. Ilo uyan amoi dop ilo muruan agane ilasa wa.  
\v 10 Aŋ Anut naon na sem ibiaŋ adu wa, ago dop iŋ aŋ ibiaŋsap lak na iginiaŋ a.   
\s1 Tei tao ta biai dudu na wa  
\p
\v 11 Awo, ŋai teig muroug, nug patun fo aŋiŋeŋ amoi. Tamol enti tein patun fo iŋiŋeŋ dop tein bitinaek lo igane tap, an ta igane uyan na da. Iŋ kubiaeŋ patun fo iŋiŋeŋ, agog iŋsen tamol gurman oŋ ilasag, kubiaeŋ bitinaek lo igane ya. Oŋ ago gane tap, oŋ kubiaeŋ paen na man tia ya. Kubiaeŋ an oŋ paen na yen o gane da. An lo oŋ tamol kubiaeŋ ta iri na dak igo woŋ lasa ya.  
\v 12 Tamol kisaek o lian kubiaeŋ ipanad dak ibitiniad a, Anut iŋsen mi a. Iŋsen mi dabai anda, an lo na kagin ipanad dak agod an dam lo malad isue wa. Ak man oŋsa ilo isou lo oŋ tubu ubol di? Oŋ urat ta lo oŋsa tura murou bitinaek lo ta dirai na wa.   
\s1 Ŋiŋeŋ lo se yaŋa ta wabisa na wa  
\p
\v 13 Aria, ŋaisag ru aloŋ, aŋ tamolpein igo aŋiŋeŋ den, “Gamu boi gabulo boi panu ta tubun geig ak lo taup anaŋar kisaek tumado wa. Ate tumado dop moni san urat biabi tigane dop sed niŋed o moni wei mi tiŋane wa.”  
\v 14 Ata wo aŋ ago abol dak i? Aŋ gabulo san mel ilasa san an ta aloŋ na ya. Aŋsam madok dugudo, an man nek ibol kakao ilasap kitekan ka yen dop itout yau kisaek oŋ dak igo woŋ a.  
\v 15 Tia, aŋ igo mi abol a, “Anut iŋsen mi siganen ilo isou lo, maŋ mumado dop en migane wo, tia, an migane wo, ago ibol dop migane wa”  
\v 16 Ak man aŋ silei kagin lo sem mi abol da, agog yaŋam asini dugo tubun mi aŋiŋeŋ da. Aŋ ago aŋiŋeŋ dan saian geig a.  
\v 17 Tamol enti mel uyan ak igane san iloŋ, go ta igane na tap, kagin naon ago man aupasek anda ya.   
\c 5  
\s1 Filian tamol adi sad ru kagin  
\p
\v 1 Agog gamu aŋ tamolpein filiam amam da yan ŋaisag ru aloŋ. Madai funfun tinim lo ilasa wan niŋen o ilom saian dop malam turon idu dop asasai a.  
\v 2 Aŋsam filian fidian igan yau dop tinim san biouŋ simirer diani wa.  
\v 3 Agop aŋsam pat fidian dam teirteir lo isuda wa. Teirteir an aŋ tamolpein fidian sam kagin saiak saiak ikubiai dop dile wa. Teirteir an aŋsam mudam mi yai inani woŋ a. Fun dugo, tan en san nal wadan lo aŋsam filiami an atumani da.  
\v 4 Aŋ tamol a aŋsam abi urat digane dan arawaig tinid ta adad na ya. Agog sad padau dam ta aloŋ na ya. Aloŋ, saen dipadaug diwagiŋ an asau mi geig yaug, Anut iŋ eŋel sad Gurman an kududon lo ilasa ya.  
\v 5 Aŋsam madok tan en lo man melmel funfun amam da, aŋsam madok uyanan, agog aŋ melmel naod lak lak ak idaisuda, agod aŋ dugo agane wo man ka agane woŋ da. Aŋ mateŋ san nal iŋ muruan san saen lo dam aŋsem ifutuwaŋ dugo sem tinim bulbal apani uyan da.  
\v 6 Aŋ tamolpein uyadi ak bitinaek lo adirai dak muruan apidinai dop kadi dam afu dumat da, man dugo, iŋ dabai ad tia yan lo aŋsam dabai an diabiani san tia ya. Ago yak niŋen o muruan tubun ak aŋsam na ilasa wan niŋen o asasai dop atata wa.   
\s1 Muruan lo atur sakar  
\p
\v 7 Ŋai teig muroug, muruan lo atur sakar, ago mi yen yau dop Tubun en ipalu wa. Aŋ ale yak, tamol abi lo urat igane dak iŋsan abi ititianip imado yau dop anaŋ ibes idu da. Iŋ saen milaen mok tok ibol imado dop ui san saen ititiani da.  
\v 8 Aŋ dam tok abol atur sakar a. Man dugo, Tubun en ipalu wo sumeik da.  
\v 9 Ŋai teig muroug, nug patun fo ta aŋurŋur na wa, kabelan Anut aŋ bitinaek lo idiraŋ banau. Ale, Bitinaek Tamol sumeikan dalawan ate itur da.   
\p
\v 10 Ŋai teig muroug, Anut san profet ilom isou, iŋ Tubun en yaŋan lo diŋiŋeŋ da. Iŋ muruan iŋ madai dam disini bo man dile dugo disini woŋ se ya, ago yak niŋen o aŋ dam dal kisaek an ari wa.  
\v 11 Tamol a dutur sakar go muruan lo ta dibiakik na dan, id taloŋ ak, iŋ ilo uyan san tamolpein a. Aŋ Job san madok itaot an aloŋ a. Job saen iŋ madai ile dop muruan isini se man iŋ tok ibol imado se ya. Agod iŋsan wadan a Anut iŋ niŋen o igane ilasa yan dam aloŋ a. Job Tubun en ilo panek agod ilo muŋanek dam tinin iŋanefute yan ile ya.   
\p
\v 12 Ak man, ŋai teig muroug, mel tubun geig man igo, aŋ Anut yaŋan lo boi, ta tan yaŋan lo boi, ta mel gidad gidad ta boi lo siŋanem ru dabai ta apani na wa. Aŋsam awok man nek mel nuŋon niŋen o gup awok abol a, ago dop tia man nek tia mok abol a. Kabelan Anut aŋ ibitianaŋ dop muruan ipanaŋ banau.   
\s1 Ilo rumok san guduanek  
\p
\v 13 Aŋ ta luluŋam lo muruan isini di? Ago tap iŋ Anut san na igudani wa. Dugo, aŋ ta luluŋam lo ilon uyan di? Ago tap iŋ Anut yaŋan yabisa dop bar yabi wa.  
\v 14 Tamol ta luluŋam lo subam ifuni di? Ago tap midaeŋ sad matu igiaip, dupalup, niŋen o dugudani dop Anut yaŋan lo gureŋ tinin diamisi wa.  
\v 15 Fun an lo gudanek ilo rumok san, an tamol subam anda yan iganep uyan ilasa wa. Agod gubak mi aupasek igane yak tap, Anut tamol an san aupasek ipasi yau pasik dop ilon ipani wa.  
\v 16 Ago yak niŋen o nug naon na siŋanem aupasek afulale dop nug niŋen o agudani wa, ago dop an lo Anut ikubuniaŋ a. Tamol itaot aman ak san gudanek dabai tinan, agog dam ka urat dabai ak igane ilasa wa.   
\p
\v 17 Nek ibol Elaija oŋ, Elaija man nek idsed oŋ a. Iŋ Anut san na ui ta idu na wo igudani, agog nuŋon ilasa ya. Ui tan na anaŋar utol wadan da, ta isi na ya.  
\v 18 An itout go fon igudani da, agog ui idu dag, tan na anaŋ nuŋon idiri ilasa ya.   
\p
\v 19-20 Ŋai teig muroug, tamol ta aŋ luluŋam lo kagin rumok ak ibisei dop aŋsam ta iŋanep dal uyan ak lo imul ipalu tap, tamol uyan an tein san ŋutun mateŋ lo yak iŋane imul a. Aria, kagin en ilom isou wa, tamol enti turan dal saian ak lo itor den ibinawi tap, tamol an turan san ŋutun ta imat na san ago igane ya, agog san aupasek fidian dam imiamai pasik a.