\id TIT - shell for translator's use
\ide UTF-8
\h Taytus
\toc1 Pol Taytus Nop Mɨj Tɨkak
\toc2 Taytus
\toc3 Tat
\mt1 TAYTUS
\mt2 Pol Taytus Nop Mɨj Tɨkak
\c 1
\p
\v 1 Yad Pol, bɨ God nop wog gɨñeb ne, bɨ Jisas Klays takaw nop dad ameb ak mɨdebin. Binɨb God ne kɨlop dɨnɨg aglak okok, kɨlop agtep gen, kɨli kɨles gɨl nop gos lɨnɨgɨnɨgel. Lɨnɨŋɨd, takaw nɨŋɨd yɨbɨl ak nɨgɨlɨg, God anɨgup tek ak nɨŋɨd kɨdek gɨnɨgel. 
\v 2 \x - \xo 1.2 \xo*\xt Lom 16.25, Kol 1.27, 2 Ti 1.1, 1.9, 1 Pi 1.20\xt*\x* Pen takaw nɨŋɨd yɨbɨl ne ak nɨgɨlɨg, pel pelnep yonɨgabun agɨl nop kod mɨdebal. God bɨ takaw nɨŋɨd yɨbɨl nep agup ak, bɨlel man ma alwol gɨlak ñɨn ak, binɨb kɨlop gen pel pelnep yenɨgabal aglak. Aglek nɨm, ne yepɨs ma agup tek, 
\v 3 \x - \xo 1.3 \xo*\xt Epe 1.9-10, 1 Te 2.4, 1 Ti 1.1, 1.11, 2.3, 2 Ti 1.10, Tat 2.10, 3.4\xt*\x* ñɨn ne ke aglup ak apek, bɨ ogɨnap takaw ne agñel, takaw anɨb ak mɨseŋ lak. Pen God bɨ kasɨn gep chɨn ak, yɨp dɨl kɨles gɨl agek, takaw ne ak dad amɨl agñɨbin.
\p
\v 4 \x - \xo 1.4 \xo*\xt Lom 1.7, 2 Ko 8.23, Gal 2.3, 2 Ti 1.2, 4.10\xt*\x* Taytus, nad yad ayɨp, chɨlapɨl Klays nop gos lɨnopul ak tek, nad ñɨ yad mɨdeban. Pen mɨj anɨb ak ñu kɨl tɨkɨl nep ñebin. Bapi God chɨn ayɨp, Klays Jisas bɨ kasɨn gep chɨn ak ayɨp, nep yɨmug nɨŋɨd gɨtep gel mɨdtep gɨnɨmɨn.
\s Bɨ Klays binɨb ne okok kɨlop kod mɨdebal okok kɨlop aglɨnɨmɨn
\p
\v 5 Yad anɨgɨl gos nepin, wog ogɨnap ma gɨlok ak, nad dɨtep gɨnɨmɨn. Dɨtep gɨl, bɨ Klays binɨb ne okok kɨlop kod mɨdep ogɨnap, taun keke mɨdebal tek aglɨnɨmɨn, yad nep agɨnek tek. Anɨgɨl gos nɨŋɨd, man ñɨg tɨb kus gak Klit ak nep kelɨgɨl amnɨnek. 
\v 6 \x - \xo 1.6 \xo*\xt 2 Ti 2.24-26\xt*\x* Pen bɨ Klays binɨb ne okok kɨlop kod mɨdep olap, ne anɨgɨl yonɨmuŋ.\x - \xo 1.6-9 \xo*\xt 1 Ti 3.2-7\xt*\x* Bɨ tep yɨbɨl mɨdek, binɨb ogɨnap nop nɨgel tep gɨnɨmuŋ. Bin nokom dɨnɨmuŋ. Ñɨpay ne Klays nop gos lɨnɨgel, binɨb ogɨnap bɨ ak ñɨpay ne ak sawl sek lek monmon gebal agɨl ma agɨnɨgel tek lup. 
\v 7 \x - \xo 1.7 \xo*\xt Wkp 10.9, 1 Ko 4.1, Epe 5.18, 1 Pi 5.2\xt*\x* Bɨ Klays binɨb ne okok kɨlop kod mɨdep ak, God wog ne kod mɨdtep gɨnɨmuŋ. Bɨ tep yɨbɨl mɨdek, binɨb ogɨnap nop nɨgel tep gɨnɨmuŋ. Ne yad yɨb awl yɨbɨl dɨl, binɨb okok kɨlop kodin agɨl gos ma nɨgɨnɨmuŋ. Bɨ ogɨnap kɨlop takaw tɨmel ogɨnap kasek ma agɨnɨmuŋ. Ñɨg kɨles ñɨbɨl sawl ma lɨl, kabɨyam tɨmel ma junɨmuŋ. Mani tap okok yad nokom din agɨl gos ak ma nɨgɨnɨmuŋ. 
\v 8 Pen binɨb kɨlop ag dap kal mɨgan ne lɨnɨmuŋ. Ne wog teplep gek nop tep gɨnɨmuŋ. Bɨ takaw sayn tep agɨl, gos nɨgtep gɨnɨmuŋ. Bɨ teplep mɨdtep gɨl mɨdɨl, bɨ suŋtep God agup tek nep gɨl, gos tɨmud nab ne ayaŋ ke kod mɨdtep gɨnɨmuŋ. 
\v 9 \x - \xo 1.9 \xo*\xt 1 Ti 1.10, 1.15, 2 Ti 1.13, 2.15, 4.3, Tat 2.1\xt*\x* Takaw yɨpɨd gɨl pel agñɨbun ak dɨ mɨdonɨmuŋ. Kɨles gɨl dɨ mɨdɨl nɨm, binɨb okok kɨlop takaw yɨpɨd gup ak nep agñɨ tep gɨl, kɨlop kɨles ñɨnɨmuŋ tek lup. Pen binɨb takaw yɨpɨd gɨl ak tɨbɨlɨkɨpal okok, kɨlop tɨmud wukɨlɨg kɨles gɨl agñɨ tep gonɨmuŋ, takaw pen agɨnɨgel tek olap ma yenɨgab.
\s Man Klit ak, bɨ kuŋay takaw tɨmel agel, ogɨnap Klays nop gos nepal ak kelɨgɨpal
\p
\v 10 \x - \xo 1.10 \xo*\xt 1 Ti 1.6, 4.7\xt*\x* Pen Klays binɨb ne pelpel apnan gɨpal man ñɨg tɨb kus gak Klit okok, kɨli kuŋay takaw tep yɨbɨl ak tɨbɨlɨkɨl, God nop kɨdek ma gɨpal. Takaw yokɨp kuŋay agɨlɨg, binɨb okok kɨlop nebneb gɨlɨg yepɨs apal. Bɨ anɨb okok ogɨnap bɨ Juda kay, wak tɨbɨlɨkɨnɨgun agɨl kɨles tɨmel gɨl apal. Anɨb ak tek, nad bɨ Klays binɨb ne okok kɨlop kod mɨdebal okok, kɨlop aglɨnɨmɨn. 
\v 11 \x - \xo 1.11 \xo*\xt Mat 23.14, Jon 10.12, 1 Ti 6.5, 2 Ti 3.6, 1 Pi 5.2\xt*\x* Bɨ takaw tep yɨbɨl ak tɨbɨlɨkɨpal okok, mani tap okok dun agɨl, binɨb yokɨp okok kɨlop anɨgɨl anɨgɨl gɨnɨmɨb agɨl, takaw apal ak yepɨs apal. Agel, apɨlɨgon amɨlɨgon ñapay kɨli ogɨnap Klays nop gos nepal ak kelɨgɨl apyap pakɨpal. Anɨb ak kɨlop agenɨmɨb, takaw agebal anɨb ak kelɨgɨnɨgel. 
\v 12 Bɨ gos nɨgep kɨli ak, man Klit nɨb olap, ne bɨlel anɨb agak, Binɨb man Klit nɨb okok, pelpel yepɨs yɨbɨl nep agɨl, kɨlop yɨlɨk gek wog ma gɨl tap ak nep ñɨŋun agɨl gos nepal agak. Gos anɨb ak nɨŋɨd, tap ladek binɨb su ñɨŋeb tek ak mɨdebal agak. 
\v 13-14 \x - \xo 1.13-14 \xo*\xt 1 Ti 4.7, 2 Ti 4.2, 4.4, Tat 2.2\xt*\x* Takaw gos nɨgep agak anɨb ak, nɨŋɨd yɨbɨl agak. Anɨb ak kɨli anɨgɨpal okok, nad kɨlop tɨmud wukɨl kɨles gɨl agɨnɨmɨn. Agenɨmɨn, bɨ Juda kesɨm yokɨp apal okok sek, takaw nɨŋɨd yɨbɨl ak kelɨgɨl takaw kɨles adek apal okok sek, ma nɨŋɨd dɨnɨgel. Pen takaw yɨpɨd gɨl ak dɨlɨg, Klays nop gos lɨnɨgɨnɨgel. 
\v 15 \x - \xo 1.15 \xo*\xt Mat 15.11, Luk 11.39-41, Lom 14.14, 14.20, 14.23, 1 Ko 6.12\xt*\x* Binɨb kɨli God wɨdɨn adek sɨŋak gach sek ma yenɨgel okok, tap okok mɨdupsek dɨnɨgel ak tap gach sek ma dɨnɨgel. Pen binɨb God wɨdɨn adek sɨŋak gach sek mɨdɨl, Klays nop gos ma nɨgɨnɨgel okok, tap okok mɨdupsek dɨnɨgel ak tap asɨŋ. Takaw kɨli nepal ayɨp, gos kɨli ayɨp gach sek mɨdeb. Binɨb anɨb okok tek, gos tɨmud kɨli pɨsnep tɨmel gek, nɨgtep ma gɨpal. 
\v 16 \x - \xo 1.16 \xo*\xt Lom 1.28, 2 Ti 3.5, 3.8, 1 Jo 1.6, 2.4, Jud 4\xt*\x* God binɨb ne mɨdobun apal ak pen, gɨpal tek nɨgon, kɨli God yɨl ma mɨdebal. God kɨlop nɨgek tep ma yɨbɨl gup. Takaw ne tɨbɨlɨkɨl, tap teplep olap ma gɨnɨgel tek lup.
\c 2
\s Taytus ne bɨ mɨlep bin mɨlep okok kɨlop takaw agñɨnɨmuŋ
\p
\v 1 \x - \xo 2.1 \xo*\xt 1 Ti 1.10, 6.3, 2 Ti 1.13, Tat 1.9\xt*\x* Pen nad, binɨb okok kɨlop God takaw yɨpɨd gɨl adek ak nep agñɨnɨmɨn. 
\v 2 Bɨ mɨlep okok kɨlop age, takaw sayn tep agɨl, gos nɨgtep gɨnɨgel. Gɨtep gel binɨb nɨgel tep gɨnɨmuŋ. Tɨtay gonɨmuŋ, kɨli Klays nop nokom gos lɨnɨŋɨd, binɨb okok kɨlop mapen lɨl, kɨles tɨmel gɨl mɨŋel okok dɨl, anɨb okok dɨtep gɨnɨgel. 
\v 3 \x - \xo 2.3 \xo*\xt 1 Ti 3.11, 2 Ti 2.9-10, 1 Pi 3.3-4\xt*\x* Bin mɨlep okok kɨlop abe agñe, God gos ne nɨgup pal ak ajenɨgel. Binɨb ogɨnap kɨlop ma agjuwɨl, ñɨg wayn kuŋay ñɨŋun agɨl gos ak ma nɨgɨnɨgel. Gɨtep gɨl mɨdtep gɨnɨgun agɨl gos nɨgtep gɨl, agñɨ tep gɨnɨgel. 
\v 4 Anɨgɨl nɨm, bin tob agen kɨdek lɨpal okok kɨlop agñɨ tep gel, nɨgɨmɨl sek ñapay sek kɨlop mapen yɨbɨl lɨnɨgel. 
\v 5 \x - \xo 2.5 \xo*\xt Epe 5.22, Kol 3.18, 1 Ti 2.11, 6.1, 1 Pi 3.1, 3.5\xt*\x* Bin takaw sayn tep agɨl, gos nɨgtep gɨnɨgel. God wɨdɨn adek sɨŋak gach sek ma yenɨgel. Wog kal kɨli ke ak gɨl, binɨb okok dɨtep gɨl, nɨgɨmɨl sɨkop muk okok mɨdɨl gɨnɨgel. Tap anɨb okok anɨgenɨgabal, binɨb ogɨnap nɨŋɨd, God takaw ne ak ma agjunɨgabal.
\s Taytus ne bɨ pɨlaj okok kɨlop takaw agñɨnɨmuŋ
\p
\v 6 Pen nad bɨ pɨlaj okok kɨlop abe agñɨ tep ge, bɨ takaw sayn tep agɨl, gos nɨgtep gɨnɨgel. 
\v 7 \x - \xo 2.7 \xo*\xt Epe 6.24, 1 Ti 4.12, 1 Pi 5.3\xt*\x* Tap okok mɨdupsek gɨnɨgaban ak, gɨtep nep genɨmɨn, kɨli nep nɨŋɨd gɨtep gɨpan tek gɨnɨgel. Pen binɨb okok kɨlop God takaw ak agñenɨgaban, yepɨs agɨlɨg yɨmel yɨmel agɨlɨg ma agɨnɨmɨn. Takaw nɨŋɨd yɨbɨl ak nɨgtep gɨl, 
\v 8 \x - \xo 2.8 \xo*\xt 1 Ti 6.3, 2 Ti 3.14, 1 Pi 2.12, 2.15\xt*\x* yɨpɨd gɨl agñɨ tep gɨnɨmɨn. Yɨpɨd gɨl nep agenɨmɨn, takaw olap ma mɨdeb, binɨb chɨnop mɨlɨk nepal okok, takaw ogɨnap pɨyow mel nɨŋɨd, nebeŋ dɨnɨgel.
\s Bɨ wog gɨñeb okok, bɨawl kɨli ak takaw kɨlop agɨnɨgel nɨŋɨd kɨdek gɨnɨgel
\p
\v 9 \x - \xo 2.9 \xo*\xt 1 Ti 6.1-2\xt*\x* Pen binɨb wog gɨñeb okok kɨlop age, tap okok mɨdupsek gɨnɨgabal ak, bɨawl kɨli muk okok yenɨgel. Bɨawl kɨli okok agɨnɨgel tek nep gel, kɨlop tep yɨbɨl gɨnɨgabal. Bɨawl takaw kɨlop pen ma agɨl, 
\v 10 \x - \xo 2.10 \xo*\xt Mat 5.16, Plp 2.15, Tat 1.3\xt*\x* tap kɨlop si ma dɨnɨgel. Anɨgɨl anɨgɨl gɨtep gɨnɨgel ak nɨm, bɨawl kɨli okok, kɨli bɨ wog gɨñeb chɨn okok gɨtep yɨbɨl gɨl apun tek nep gɨpal agɨl nɨgɨnɨgabal. Anɨb ak nɨŋɨd, kɨli God bɨ kasɨn gep chɨn ak takaw tep ne agñɨbun ak nɨŋɨd, takaw teplep yɨbɨl ak nɨŋɨd yɨbɨl mɨdeb agɨnɨgabal.
\s Chɨn God gup ak kɨdek gɨl, Klays ne ownɨgab ñɨn ak kod yonɨgabun
\p
\v 11 \x - \xo 2.11 \xo*\xt Jon 1.9, Lom 5.15, 1 Pi 5.12\xt*\x* Chɨn nopun, God binɨb okok kɨlop yɨmug nɨŋɨd gɨtep gep ak mɨseŋ lup. Pen yɨmug nɨŋɨd gɨtep gep anɨb ak kɨlop gek, mɨdupsek tɨg asɨk dɨnɨmuŋ tek lup. 
\v 12 \x - \xo 2.12 \xo*\xt Lom 6.19, Epe 1.4, Kol 1.22, 1 Te 4.7, 1 Jo 2.16\xt*\x* Chɨn God nop kud ñɨl, ne anɨgup tek kɨdek ma gep ak sek, tap lum awl dun agɨl gos nɨgep ak sek, pɨsnep kelɨgɨnɨgun. Chɨn pen takaw sayn tep agɨl, gos nɨgtep gɨl gɨnɨgun. Teplep mɨdɨl mɨdtep gɨl, God anɨgup tek gun agɨl gos nɨŋɨd gɨnɨgun. Binɨb lum awl nab okok mɨdobun ak pen, God yɨmug nɨŋɨd gɨtep gep ne ak nɨŋɨd, chɨnop takaw tep anɨb ak agñek, gos ne ak kɨdek gɨnɨgabun. 
\v 13 \x - \xo 2.13 \xo*\xt 1 Ko 1.7, Plp 3.20, Kol 3.4, Hib 9.28, 1 Jo 3.2\xt*\x* Pen kɨdek gɨl, mɨd dad amɨl, tap teplep nɨŋɨd mɨñmɨñ gɨnɨgabun ak, chɨn kod mɨdobun. Tap teplep anɨb ak nɨm awl, Jisas Klays ne mɨlek awl sek kɨles awl sek dɨl, mɨseŋ sɨŋak ownɨgab. Ne God bɨawl yɨbɨl mɨdeb, bɨ kasɨn gep chɨn ak mɨdeb. 
\v 14 \x - \xo 2.14 \xo*\xt Kis 19.5, Lo 4.20, 7.6, 14.2, Sng 130.8, Ese 37.23, Gal 1.4, 1 Pi 2.9\xt*\x* Ne binɨb dɨl God ayɨp jɨmñɨl lin agɨl kumak. Chɨnop nen agɨl kumek nɨm, God takaw tɨbɨlɨkɨpun ak kelɨgɨl, binɨb ne ke yɨbɨl okok mɨdobun. Tap tɨmel anɨb okok mɨdupsek wik yokɨlɨg yek, binɨb ne ke yɨbɨl mɨdobun ak, chɨn tap teplep yɨbɨl gɨnɨgun agɨl gos nɨŋɨd gɨnɨgabun.
\p
\v 15 \x - \xo 2.15 \xo*\xt 1 Ti 4.12, 2 Ti 4.2\xt*\x* Takaw agesɨpin anɨb awl, binɨb okok kɨlop agñɨl, pel agñɨ tep gɨnɨmɨn. Pen binɨb takaw tɨbɨlɨkɨpal okok kɨlop, tɨmud wukɨnɨmɨn. God ne nep dɨl agek, takaw kɨles gɨl agenɨmɨn, joŋɨb kɨd nep ak sɨpsɨp ma nɨgɨnɨgel.
\c 3
\s Chɨn tap teplep ak gɨtep gɨnɨgun
\p
\v 1 \x - \xo 3.1 \xo*\xt Lom 13.1-7, Kol 1.10, Hib 13.21, 1 Pi 2.13-14\xt*\x* Binɨb okok kɨlop age, takaw anɨb ak gos nɨgɨnɨgel. Gapman bɨawl okok sek, bɨawl kɨli okok sek kɨlop muk okok mɨdɨl, takaw agɨnɨgel ak nɨŋɨd kɨdek gɨnɨgel. Pen mɨnek mɨnek wog teplep ak gɨtep gɨnɨg yenɨgel. 
\v 2 \x - \xo 3.2 \xo*\xt Epe 4.2, 4.31, Plp 4.5, Kol 3.12, 2 Ti 2.24-25\xt*\x* Bɨ olap nop ma agjuwɨl, penpen ma agɨnɨgel. Bɨ ogɨnap kɨlop kɨmɨgel jɨmñɨl mɨdɨl, mɨdupsek ayɨp kɨmɨgel mɨdon agɨl, gɨtep yɨbɨl gɨnɨgel. 
\v 3 \x - \xo 3.3 \xo*\xt 1 Ko 6.11, Epe 2.1-2, 5.8, Kol 1.21, 1 Pi 4.3\xt*\x* Nɨbi nepɨm, chɨn abe ned binɨb sawl mɨdɨl, takaw tep tɨbɨlɨkɨl, chɨnop tay yepɨs agelɨgɨpal takaw nɨŋɨd gɨtep ma golɨgɨpun. Tap lum awl dun agɨl gos nɨŋɨd mɨñmɨñ golɨgɨpun ak, tap anɨb okok wog gɨñeb kɨli tek yolɨgɨpun. Tap si tap tɨmel gɨnɨgun agɨl gos nɨŋɨd, tap kɨli okok yad tek mɨdobɨkop agɨl golɨgɨpun. Binɨb okok chɨnop mɨlɨk nɨŋɨd, penpen yɨlɨk nɨgolɨgɨpun. 
\v 4 \x - \xo 3.4 \xo*\xt 1 Ti 2.3, Tat 1.3, 2.11\xt*\x* Anɨgolɨgɨpun ak pen, God ne bɨ kasɨn gep chɨn ak, chɨnop mapen yɨbɨl lɨl, yɨmug nɨgup. Anɨb ñɨn ak, tap teplep anɨb okok mɨseŋ lek, 
\v 5 \x - \xo 3.5 \xo*\xt Jon 3.3-5, Lom 11.6, Epe 5.26, 2 Ti 1.9, 1 Pi 3.21\xt*\x* God chɨnop tɨg asɨk dup. Chɨn gɨtep yɨbɨl gon nɨŋɨd, chɨnop tɨg asɨk ma dup. Ne ke pen chɨnop mapen nɨgup tek tɨg asɨk dup. Won anɨb ak kɨlop tɨg asɨk din agɨl, gach chɨnop ak wik yokɨl, Kawnan ne ak chɨnop agyokek apɨl chɨnop gek, ñapay ne yɨbɨl mɨdɨl, koŋɨm nep mɨdobun. 
\v 6 \x - \xo 3.6 \xo*\xt Jol 2.28, Apo 2.17-18, 2.33, Lom 5.5\xt*\x* Pen Klays Jisas, bɨ kasɨn gep chɨn ak, wog ne gek, God ne Kawnan ne ak chɨnop monmon tɨg sogak. 
\v 7 \x - \xo 3.7 \xo*\xt Lom 3.24, 8.23-24, Gal 2.16, Tat 2.11\xt*\x* Monmon tɨg sogek, pel pelnep yonɨgun agɨl nopun tek nep, God aglɨl agak tek kod mɨdobun. Klays chɨnop yɨmug nɨŋɨd gɨtep gek, God nɨgek binɨb suŋtep ne okok mɨdobun anɨb ak tek, pel pelnep yonɨgabun ak kod mɨdobun. 
\v 8 \x - \xo 3.8 \xo*\xt 1 Ti 1.14-15, Tat 2.14\xt*\x* Takaw anɨb ak nɨŋɨd yɨbɨl yek.
\p Pen binɨb God nop gos lɨnepal okok, kɨli pelnep kɨles gɨl gɨtep gɨnɨgel. Anɨb ak, takaw anɨb awl kɨles gɨl agɨnɨmɨn agɨl gos nepin. Tap anɨb okok teplep yɨbɨl, binɨb anɨb okok kɨlop gek mɨdtep gɨnɨgabal. 
\v 9 \x - \xo 3.9 \xo*\xt 1 Ti 1.4, 2 Ti 2.14-16, 2.23, Tat 1.14\xt*\x* Nad pen, takaw nɨgep ma nɨgep ag amɨl apɨl gɨpal ak, apɨs based chɨn takaw agebal ak, takaw penpen ag amɨl apɨl gɨpal ak, takaw Mosis ñu kɨl tɨkak ak nɨŋɨd ag gɨl penpen yɨbɨl apal ak, takaw anɨb okok mɨdupsek kud ñɨnɨmɨn. Jɨj olap ma mɨdeb, binɨb okok kɨlop gek mɨdtep gɨnɨgel tek ma lup. 
\v 10 \x - \xo 3.10 \xo*\xt Mat 18.15-17, 2 Ko 13.2, 2 Te 3.6, 3.14, 2 Ti 3.5, 2 Jo 10\xt*\x* Anɨb ak bɨ olap, Klays binɨb okok kɨlop tɨg asɨk keke lenɨgab, ñɨn olap agɨl, nop gos tɨmud wukɨnɨmɨn. Pen ma nɨgek, mɨnek ak abe agɨnɨmɨn. Mɨnek ak abe ma nɨgek, nop kud ñɨnɨmɨn. 
\v 11 \x - \xo 3.11 \xo*\xt Apo 13.46, 1 Ti 6.3-5\xt*\x* Nad nepan, bɨ anɨb ak tek, bɨ gos tɨmel nɨŋɨd, tap nɨgep ma nɨgep gup. Pel tap si tap tɨmel gup ak nɨm, tap tɨmel anɨb okok, nop ke pen adɨkɨd amub.
\s Takaw day won ogɨnap
\p
\v 12 \x - \xo 3.12 \xo*\xt Apo 20.4, Epe 6.21-22, Kol 4.7-8, 2 Ti 4.12\xt*\x* Yad Atemas nop akaŋ, Tikikus nop agyoken, nep am nɨgɨnɨgab. Nɨgek won anɨb ak, kasek apɨl taun Nikopolis yɨp nɨgɨnɨmɨn. Yobup lɨl takɨl gɨnɨgab ñɨn ak, yad am man anɨb ak yenɨgayn agɨl gos nepin. 
\v 13 \x - \xo 3.13 \xo*\xt Apo 18.24, 1 Ko 3.5-6, 16.12\xt*\x* Bɨ Senas, takaw tɨg asɨkep olap ayɨp, bɨ Apolos ayɨp, kɨlop dɨtep gɨnɨmɨn. Kanɨb amnɨg gel, tap anɨb okok mɨdupsek ñɨtep ge dad amnɨmil. Nad anɨge, tap olap kɨlop bɨ omɨŋal kul ma gup. 
\v 14 \x - \xo 3.14 \xo*\xt Mat 7.19, Lom 15.28, Epe 4.28, Plp 1.11, Kol 1.10, Tat 2.14\xt*\x* Binɨb chɨn okok monmon mɨdɨl, yokɨp ma yenɨgel. Wog tep gɨnɨgun agɨl gos nɨŋɨd, gɨtep gɨlɨg tap mɨdaknɨŋ, binɨb tap ma mɨdeb okok kɨlop ogɨnap ñɨnɨgel. 
\v 15 Binɨb mɨdupsek yad ayɨp mɨdobun okok, nep ag dɨdeg lebal. Pen nad takaw chɨn ak dɨl, binɨb Klays nop gos lɨnɨŋɨd chɨnop mapen lɨpal okok, kɨlop ag dɨdeg lɨnɨmɨn.
\p God nɨbop mɨdupsek yɨmug nɨŋɨd gɨtep gɨnɨmuŋ.