\id 2PE Tay NT Hayward September 15 2012
\ide UTF-8
\h 2 Pita
\toc1 Pita Mɨj Kɨdek Ak Tɨkak
\toc2 2 Pita
\toc3 2 Pi
\mt1 2 PITA
\mt2 Pita Mɨj Kɨdek Ak Tɨkak
\c 1
\p
\v 1 \x - \xo 1.1 \xo*\xt 2 Ko 4.13, Epe 4.5, Tat 1.4\xt*\x* Yad Saymon Pita, Jisas Klays bɨ wog gɨñeb ne mɨdɨl, bɨ takaw nop dad ameb ak mɨdebin. Mɨñɨl yad mɨj anɨb ak ñu kɨl tɨkebin. Tɨkɨl, nɨbi Klays nop gos lɨnepɨm okok nɨbop ñebin. Jisas Klays, ne God chɨn ak mɨdɨl, bɨ kasɨn gep chɨn ak mɨdeb. Ne yɨpɨd gɨl gɨtep gup. Chɨn nop kɨles gɨl gos lɨnopun tek, nɨbi abe nop kɨles gɨl gos lɨnepɨm. 
\v 2 \x - \xo 1.2 \xo*\xt Jud 2\xt*\x* Nɨbi God ayɨp Bɨawl chɨn Jisas ayɨp kɨlop gos nɨgtep gɨl mɨdebɨm. Ak nɨm kɨli nɨbop yɨmug nɨŋɨd gɨtep gek, kɨmɨgel mɨdtep gɨnɨmɨb.
\s God ne ke chɨnop aglɨl dup
\p
\v 3 \x - \xo 1.3 \xo*\xt Jon 17.3, 2 Te 2.14, 2 Ti 1.9, 1 Pi 2.9\xt*\x* Jisas ne kɨles ne ak dɨl, tap tep ne ak chɨnop ñak. Ñek, pel mɨdtep gɨl God anɨgup tek ak nɨŋɨd, kɨdek gɨnɨgun tek lup. Chɨn God nop nopun, anɨb ak tek anɨgɨnɨgun tek lup. Ne chɨnop suk agak. Agek, yɨb awl ne dup ak sek, ne gɨtep yɨbɨl gup ak sek, chɨn abe dɨnɨgabun. 
\v 4 \x - \xo 1.4 \xo*\xt 2 Ko 7.1, Epe 4.24, 2 Pi 2.18-20, 1 Jo 3.2\xt*\x* God chɨnop tap okok mɨdupsek ñub ak, tap awl yɨbɨl tap teplep yɨbɨl mɨdeb. Tap anɨb okok, nɨbop anɨb okok ñɨnɨgayn agɨl bɨlel aglak. Nɨgɨm. Chɨn binɨb lum awl mɨdobun okok, mubwak gos nab ayaŋ nedil ak kɨdek gɨnɨgun agɨl gos nopun. Gos nɨgon, chɨnop gɨ tɨmel yɨbɨl gup. God pen tap tep ne anɨb okok nɨbop ñak. Ñek, nɨbi tap tɨmel yɨbɨl ak nɨbop gɨ tɨmel gup ak, tap anɨb okok dɨdeg lɨnɨmɨb tek lup. Tap anɨb okok dɨdeg lɨl, God ne koŋɨm mɨdep tek yenɨgabɨm, ne gɨtep gup tek gɨnɨgabɨm.
\p
\v 5 \x - \xo 1.5 \xo*\xt 1 Pi 3.7, 2 Pi 3.18\xt*\x* Pen nɨbi anɨgɨl mɨdtep gɨnɨg, tap anɨb okok adek anɨb ak nep gɨ yenɨmɨb. Klays nop gos lɨnɨgɨnɨmɨb. Klays nop gos lɨnɨŋɨd, abe gɨtep yɨbɨl gɨnɨmɨb. Gɨtep yɨbɨl gɨl, abe God nop gos nɨgtep gɨnɨmɨb. 
\v 6 \x - \xo 1.6 \xo*\xt Gal 5.22-23\xt*\x* God nop gos nɨgtep gɨl, abe takaw sayn tep agɨl gos nɨgtep gɨnɨmɨb. Takaw sayn tep agɨl gos nɨgtep gɨl, abe mɨŋel awl apek jak kɨles gɨl mɨdɨl mɨŋel okok dɨnɨmɨb. Mɨŋel awl apek jak kɨles gɨl mɨdɨl mɨŋel okok dɨl, abe God gup tek ak nɨŋɨd kɨdek gɨnɨmɨb. 
\v 7 \x - \xo 1.7 \xo*\xt Gal 6.10, 1 Te 5.15, 1 Jo 4.21\xt*\x* God gup tek ak nɨŋɨd kɨdek gɨl, abe mam ay okok ayɨp penpen mapen lɨlɨg dɨnɨmɨb. Mam ay okok ayɨp penpen mapen lɨlɨg dɨl, abe binɨb okok kɨlop mapen yɨbɨl lɨnɨmɨb. 
\v 8 \x - \xo 1.8 \xo*\xt Jon 15.2, Tat 3.14\xt*\x* Bɨawl chɨn Jisas Klays nop gos nɨgtep gɨpɨm. Anɨb ak gɨtep gɨnɨmɨb apin ak, adek anɨb ak nep genɨgabɨm, nop gos nɨgtep gɨpɨm anɨb ak yokɨp tek ma yenɨgab. Wog ak gem am tep yɨbɨl gɨnɨgab. 
\v 9 \x - \xo 1.9 \xo*\xt Hib 9.14, 1 Jo 1.7, 2.9-11\xt*\x* Binɨb takaw mɨñɨl apin ak kɨli kɨdek ma gɨpal okok, kɨli tap pal okok mɨdeb ak ma nɨgɨnɨgel tek lek, kɨli wɨdɨn koy tek mɨdebal. Binɨb anɨb okok tek, God tap si tap tɨmel gelɨgɨpal ak tɨg walɨg gɨyokɨl gach kɨlop wik yokak ak pen, kɨli sawl gɨl, God kɨlop gak anɨb ak gos nɨg nep ma mɨdebal.
\p
\v 10 \x - \xo 1.10 \xo*\xt 2 Pi 3.17, 1 Jo 3.19\xt*\x* Mam ay sɨkop, God ne nɨbi binɨb yad yenɨmɨb agɨl, nɨbop suk agɨl aglak. Anɨb ak tek nɨbi kɨles tɨmel yɨbɨl gɨl, binɨb ne yɨbɨl okok yenɨmɨb. Apin anɨb ak genɨgabɨm, ma apyap pakɨnɨgabɨm. Mel yɨbɨl. 
\v 11 Ne pen kanɨb yɨkɨl owɨm agek, nɨbi Klays binɨb dɨl kɨlop kod yenɨgab ak amnɨgabɨm. Man anɨb ak Klays kod mɨdeb ak, pel pelnep yenɨgab. Jisas Klays ne Bɨawl chɨn ak mɨdɨl, ne bɨ kasɨn gep chɨn ak abe mɨdeb.
\p
\v 12 \x - \xo 1.12 \xo*\xt Plp 3.1, 1 Pi 5.12, 2 Pi 3.1, 3.17, 1 Jo 2.21, Jud 5\xt*\x* Anɨb ak yad nɨbop tap anɨb okok tepayaŋ agɨl, agɨlɨg nep yenɨgayn. Yad nepin, nɨbi anɨb ak nɨgjuwɨl, takaw nɨŋɨd yɨbɨl ak dɨl jak kɨles gɨl mɨdɨl mɨdtep gɨpɨm. 
\v 13-14 \x - \xo 1.13-14 \xo*\xt Jon 21.18-19, 2 Ko 5.1, 2 Ti 4.6, 2 Pi 3.1\xt*\x* Bɨawl chɨn Jisas Klays pen yɨp agñek nepin, wulep mɨdeb yad mubwak yad ak kelɨgɨnɨgebin. Anɨb ak mubwak yad ak mɨdebin won ak, nɨbop tepayaŋ agñen, tap anɨb okok gos ak tepayaŋ nɨgɨnɨmɨb. Yad anɨgɨnɨgayn ak, tep mɨdeb. 
\v 15 Yad kumnɨgayn ñɨn ak, nɨbi takaw agebin anɨb okok sawl ma gɨnɨmɨb, nɨgɨlɨg yenɨmɨb agɨl gos nepin. Anɨb ak tek kɨles tɨmel yɨbɨl gɨl nɨbop pel agñɨ tep gebin. Anɨgen, kɨdek abe anɨb okok sawl ma gɨl, gos nɨgɨlɨg yenɨgabɨm.
\s God mɨlek awl ne ak Klays nop pakek nopun
\p
\v 16 \x - \xo 1.16 \xo*\xt 1 Ko 1.17, 1 Jo 1.1\xt*\x* Chɨn Bɨawl chɨn Jisas Klays ne kɨles sek adɨkɨd ownɨgab takaw ak nɨbop agon nepek. Pen takaw anɨb ak, aŋoj yokɨp okok bɨ gos kɨli ak nep apal ak, ma agɨnok. Ned God mɨlek tep ne sek kɨles awl ne sek Klays nop lek, wak ne ke yɨbɨl lak ak, wɨdɨn chɨn ke nɨŋɨd nɨbop agɨnok.\f + \fr 1.16 \fr*\ft Kesɨm anɨb awl, Jisas wak nop ak ke lak kesɨm ak. Matyu 17.1-13 ayɨp, Mak 9.2-13 ayɨp, Luk 9.28-36 ayɨp nɨgɨnɨmɨn.\ft*\f* 
\v 17 \x - \xo 1.17 \xo*\xt Mat 3.17\xt*\x* Ñɨn anɨb ak, Bapi God ne nop yɨb awl ñɨl, mɨlek tep ne ak nop lak.\x - \xo 1.17-18 \xo*\xt Mat 17.1-5, Mak 9.2-7, Luk 9.28-35\xt*\x* Lek, God ne mɨlek sek man ne alaŋ mɨdaknɨŋ, Klays nop agak, Ñɨ mapen yad yɨbɨl nɨm awl agak. Nop nɨgen yɨp tep yɨbɨl gup agak. 
\v 18 Chɨn Klays ayɨp amɨl dum God yek ak yonoknɨŋ, takaw God man ne alaŋ nɨb anɨb agek nɨgɨnok.
\p
\v 19 \x - \xo 1.19 \xo*\xt Sng 119.105, Jon 5.35, Lep 2.28\xt*\x* Anɨb ak tek bɨ God gos ñek agñeb takaw agɨlak okok, takaw pɨsnep dep okok nep agɨlak ak nɨm, kɨles gɨl gos nɨgɨnok. Nɨbi abe takaw kɨli ak nɨgtep gɨl pɨsnep denɨmɨb, tep mɨdeb. Takaw agɨlak anɨb ak, sup maynab ayaŋ dagɨlel, mɨlek yomub ak tek gup. Mɨlek anɨb ak, nɨg dad amɨl, kɨdek Klays mɨlek ne ak gos nɨbi nab ayaŋ tɨkjakɨnɨgab. Tɨkjakek nɨm, gap pogɨlɨn man tɨkaknɨŋ aplan jakup tek ak gɨnɨgab. 
\v 20-21 \x - \xo 1.20-21 \xo*\xt Apo 1.16, 3.18, Lom 12.6, 2 Ti 3.16, 1 Pi 1.11\xt*\x* Nɨgɨm. Bɨ God gos ñek agñeb okok, kɨli buk Baybol takaw ak mɨj tɨkɨnɨg, bɨ olap gos ne nɨgak akaŋ gos kɨli ke nɨgɨlak tek tɨkɨl ma agɨlak. Mel. God Kawnan ne ak kɨlop kod mɨdɨlɨg gos ñaknɨŋ, anɨb ak nep God takaw ne nep tɨkɨl agɨlak. Anɨb ak tek takaw nokom olap nɨgtep gɨnɨmɨb. Bɨ God gos ñek agñeb okok, God kɨlop gos ñek takaw ne ak nep tɨkɨlak. Gos kɨli ke nɨŋɨd tɨg asɨkɨl ma tɨkɨlak.
\c 2
\s Bɨ ogɨnap kɨli God takaw agñobun agɨl yepɨs apal
\p
\v 1 \x - \xo 2.1 \xo*\xt Mat 24.11, Apo 20.30, 1 Ko 6.20, Epe 1.7, 1 Ti 4.1, 2 Ti 3.1-5, 1 Pi 1.18, Jud 4\xt*\x* Pen bɨlel, bɨ ogɨnap kɨli bɨ God gos ñek agñeb mɨdobun agɨlak ak pen, yepɨs agɨlak okok, kɨli Yislel binɨb nab okok yelɨgɨpal. Mɨñɨl anɨb ak nep, bɨ ogɨnap kɨli nɨbop takaw tep agñobun agɨl yepɨs agɨnɨgabal okok, kɨli nab nɨbi okok ap yenɨgabal. Mɨdɨl, gos kɨli nɨg we gɨl, takaw yepɨs yepɨs agɨnɨgabal. Takaw agɨnɨgabal anɨb ak, Klays nop gos lɨnepɨm ak gɨ tɨmel gɨnɨmuŋ tek lɨnɨgab. Bɨ anɨb okok, kɨli Bɨawl ne kɨlop tawɨl tɨg asɨk dup ak, ne Bɨawl mel agɨl agju mɨdɨlɨg, kud ñɨnɨgabal. Kɨli anɨgɨnɨgabal won ak, God kɨlop gek, kasek yul awl yɨbɨl dɨl kul gɨnɨgabal. 
\v 2 Pen Klays binɨb ne kuŋay yɨbɨl takaw kɨlop ak dɨl, tap si tap tɨmel okok monmon yɨbɨl gɨnɨgabal. Anɨgel, binɨb ogɨnap takaw nɨŋɨd yɨbɨl kɨdek gɨpun pal ak agjunɨgabal. 
\v 3 \x - \xo 2.3 \xo*\xt Lom 16.18, 2 Ko 12.17-18, 1 Te 2.5, 1 Ti 6.5, Tat 1.11, 2 Pi 1.16\xt*\x* Bɨ kɨli takaw tep agñobun agɨl yepɨs agɨnɨgabal anɨb okok, tap chɨn ke kuŋay yɨbɨl dun agɨl gos nɨgɨnɨgabal. Mani tap nɨbi ak dɨnɨgun agɨl, nɨbop takaw yepɨs yepɨs kuŋay yɨbɨl agɨnɨgabal. Anɨgɨnɨgabal ak pen, bɨlel God ne kɨlop tɨg asɨk bɨlokɨnɨgayn agɨl, ñɨn anɨb ak aglak mɨdeb. Aglɨl mɨdɨl, mɨd dad amɨl, ñɨn aglak anɨb ak apek, God kɨlop tɨg asɨk bɨlokek yul awl yɨbɨl dɨl kul gɨnɨgabal. Pen bɨ anɨb okok, kɨli God chɨnop tɨg asɨk ma bɨlokɨnɨgab agɨl, gos anɨb ak ma nɨgɨnɨgel. Mel yɨbɨl.
\p
\v 4 \x - \xo 2.4 \xo*\xt Luk 8.31, Jon 8.44, 1 Jo 3.8, Jud 6, Lep 20.2-3\xt*\x* Nɨb nepɨm, bɨlel bɨlel God ne ensel tap si tap tɨmel gɨlak okok kɨlop ma kelɨgak. Nag kɨles tɨmel ak kɨlop lɨl, mab ke yɨneb mɨgan ak dɨyokek, kaw mɨgan kɨsɨlɨm owup ayaŋ anɨb ak yelak. Nag lek mɨdɨl, God kɨlop tɨg asɨk bɨlokɨnɨgab ñɨn ak kod mɨdebal. 
\v 5 \x - \xo 2.5 \xo*\xt Stt 6.1–7.24, 8.18, Hib 11.7, 1 Pi 3.20, 2 Pi 3.6\xt*\x* Pen binɨb bɨlel God nop kud ñɨl kɨdek ma gɨlak okok, kɨlop abe ma kelɨgak. Kɨlop gɨ tɨmel gek kul gɨlak. God gek man awl ak pakɨl ñɨg tan aplanek, mɨdupsek ñɨg ñɨbɨl kum dɨlak. Nowa pen, ne bɨ yɨpɨd gɨl gɨtep gɨl takaw agñak ak yek. God Nowa ayɨp, binɨb ne anep kugul ak ayɨp, kɨlop nep kod yek mɨdtep gɨlak. 
\v 6 \x - \xo 2.6 \xo*\xt Stt 19.24, Nam 26.10, Jud 7\xt*\x* Pen binɨb bɨlel taun Sodom ayɨp taun Gomola ayɨp yelak okok, God kɨlop bɨlokɨl nɨbi binɨb kumeb agak. Anɨb ak taun Sodom ayɨp taun Gomola ayɨp, pɨsnep yɨn sɨbok amnak, tun kab ak nep yek. Anɨgek, binɨb God nop kud ñɨl kɨdek ma gɨnɨgun agɨl nepal okok, kɨli Sodom Gomola gak tek chɨnop abe gɨnɨgab agɨl, gos nɨgtep gɨnɨgel. 
\v 7 \x - \xo 2.7 \xo*\xt Stt 19.1-16\xt*\x* Pen bɨlel Sodom Gomola anɨgak ñɨn ak, God ne bɨ yɨpɨd gep Lot ak nop dɨl kod yek, tap olap nop gɨnɨmuŋ tek ma lak. Lot ne binɨb tɨtɨmel anɨb okok, tap si tap tɨmel okok monmon yɨbɨl gelɨgɨpal ak nɨŋɨd, chɨbol nop tɨmel gak. 
\v 8 Yaw, bɨ yɨpɨd gep anɨb ak, ne nab kɨli okok mɨdɨl, mɨnek mɨnek tɨmel gɨlak ak ayɨp takaw tɨmel agɨlak ak ayɨp nɨgak. Gos ne nab ayaŋ abe yɨpɨd gup ak nɨm, kɨli monmon gɨlɨg God agak ak pɨsnep kelɨgɨlak ak nɨgek, chɨbol nop tɨmel yɨbɨl gak. 
\v 9 \x - \xo 2.9 \xo*\xt Sng 34.17-19, 1 Ko 10.13, Jud 6\xt*\x* Anɨb ak tek nep chɨn nopun, binɨb God nop gos nɨŋɨd kɨdek gɨpal okok, mɨŋel ogɨnap kɨlop apek, ne kɨlop dɨl kod yek, tap olap kɨlop gɨnɨmuŋ tek ma lup. Pen ne binɨb tap si tap tɨmel nep gɨpal okok kɨlop gek, mɨŋel dɨlɨg yul dɨnɨgabal. Mɨŋel dɨlɨg yul daknɨŋ, mɨdɨl mɨd dad amɨl, binɨb kɨlop tɨg asɨk bɨlokep ñɨn ak ownɨgab. 
\v 10 \x - \xo 2.10 \xo*\xt Jud 4-10, 16\xt*\x* Pen binɨb ogɨnap kɨli yul awl tɨmel yɨbɨl dɨnɨgabal. Binɨb anɨb okok, kɨli pelpel bin si bɨ si gɨ dad amɨl keke tɨmel yɨbɨl gɨl, nab kɨli ak ke tap gach gɨ tɨmel gɨpal. Anɨgɨl gɨ tɨmel gɨl, Bɨawl takaw ak kelɨgɨl, ak takaw yokɨp tek lup agɨl gos nepal.
\p Kɨli chɨn yɨb awl yɨbɨl mɨdobun agɨl, gos kɨli ke kɨdek gel jel ma gak. Anɨgɨl mɨdɨl, ensel kɨles tɨmel okok kɨlop monmon agjupal. 
\v 11 \x - \xo 2.11 \xo*\xt Jud 9\xt*\x* Ensel ogɨnap sek pen anɨb ak tek ma gɨpal. Kɨli abe kɨles mɨdebal ak pen, Bɨawl ne nɨg mɨdeb ak, kɨli binɨb anɨb okok kɨlop ma agjupal. Mel yɨbɨl. 
\v 12 \x - \xo 2.12 \xo*\xt Jud 10\xt*\x* Binɨb anɨb okok pen, kɨli tap tɨtay dɨl mɨdeb agɨl ma nepal okok monmon agjupal. Gos tɨmud kɨli ak ke pal ak pal ak mɨdɨl, chen ladek chag ladek okok gos kɨli mɨdebal tek mɨdebal. Mɨdebal anɨb ak, sab chag gon lel, dek paklel kubal tek ak kɨlop gɨnɨgab. God kɨlop gɨ tɨmel yɨbɨl gɨnɨgab. 
\v 13 \x - \xo 2.13 \xo*\xt Lom 13.13, 1 Ko 11.20-21, Plp 3.19, Jud 12\xt*\x* Kɨli tap tɨmel gup okok nep gel amub, bɨ ogɨnap kɨlop pen abe gɨ tɨmel gɨnɨgabal. Chɨn subnab tap awl ñɨbɨlɨg, ñɨg kɨles ñɨbɨlɨg monmon mɨñmɨñ gɨnɨgun agɨl nepal. Kɨli nɨb ayɨp apnan gɨl tap jɨmñɨl ñɨbɨl, gach sek mɨdɨl nɨbop gel, yɨb nɨbop gɨ tɨmel gɨpal. Tap yepɨs anɨb okok gɨlɨg mɨñmɨñ gɨpal. 
\v 14 Kɨli bin si dun agɨl, wɨdɨn lɨl nep ajɨpal. Tap si tap tɨmel pel gɨpun ak kelɨgɨnɨgun agɨl gos ma nepal. Binɨb Klays nop gos kɨles ma nepal okok, kɨlop nebneb gɨ dad kɨd kɨli ak amel, tap si tap tɨmel gɨpal. Tap chɨn ke kuŋay yɨbɨl dun agɨl, gos kɨli nab ayaŋ anep lup. God kɨlop yul awl yɨbɨl ak ñɨnɨgab. 
\v 15 \x - \xo 2.15 \xo*\xt Jud 11, Lep 2.14\xt*\x* Kɨli kanɨb yɨpɨd gɨl adek ak kelɨgɨl, am sawl sek lɨpal.\x - \xo 2.15-16 \xo*\xt Nam 22.4-35\xt*\x* Balam, Beyol ñɨne, ne kanɨb tɨmel adek ak kɨdek gak tek, kɨli abe gɨpal. Yad gɨ tɨmel gen yɨp mani tap okok ñel din agɨl, gos anɨb ak kɨdek gak. Pen bɨ anɨb okok kɨli anɨgɨpal. 
\v 16 Pen Balam ne anɨgɨl gɨ tɨmel gek, chag donki ne ak nop ag gak. Chag donki okok, takaw yɨbɨl ma apal ak pen, chag donki ne ak Balam nop bɨ apal tek ag gak. Ag gek, bɨ God gos ñek agñeb Balam ak, ne gɨ tɨmel gɨl sawl lɨnɨg gek anɨb ak kelɨgak.
\p
\v 17 \x - \xo 2.17 \xo*\xt Jud 12-13\xt*\x* Bɨ anɨb okok, kɨli ñɨg kɨlam jup ak mɨlep gup tek mɨdebal. Pen man pakɨnɨg gek, yɨgen awl apɨl lɨg yokek ma pakup tek mɨdebal. Anɨgɨl mɨdel, God tep kɨli kɨsɨlɨm owup mɨgan olap gɨlek, kɨli amɨl anɨb mɨgan ayaŋ yenɨgabal. 
\v 18 \x - \xo 2.18 \xo*\xt Apo 2.40, 2 Pi 1.4, 2.20, Jud 16\xt*\x* Kɨli ke suk agɨlɨg takaw yokɨp agɨlɨg, yɨb kɨli ke dad aplanɨbal. Binɨb kɨlop nebneb gɨ dad kɨd kɨli ak amel, kɨli bin si bɨ si gɨ dad amɨl keke tɨmel yɨbɨl gɨpal. Bɨ anɨb okok kɨli anɨgel, binɨb ogɨnap mɨñɨl nep binɨb tap si tap tɨmel gɨpal okok kɨlop kelɨgɨpal okok, kɨlop lɨpɨg dad amek tepayaŋ tap si tap tɨmel gɨpal. 
\v 19 \x - \xo 2.19 \xo*\xt Jon 8.34, Lom 6.16, 1 Pi 2.16\xt*\x* Pen kɨli anɨb apal, Chɨnop kɨdek gem, nag lup ak kelɨgɨl koŋɨm amɨl, gos chɨn ke kɨdek gun agɨl ak nep gɨnɨgabɨm apal. Anɨb apal ak pen, kɨli ke pel gɨ tɨmel gɨpal ak kɨlop pen gɨ tɨmel gek, bɨ yokɨp wog gɨñeb tek mɨdebal. Chɨn nopun, bɨ olap ne kelɨgek tap ogɨnap nop kodek, bɨ anɨb ak ne tap anɨb okok bɨ wog gɨñeb tek mɨdeb. 
\v 20 \x - \xo 2.20 \xo*\xt Mat 12.45, Luk 11.26, Hib 6.4, 2 Pi 1.2-4\xt*\x* Nɨŋɨd apun, binɨb ogɨnap Bɨawl chɨn Jisas Klays, ne bɨ kasɨn gep chɨn mɨdeb ak, kɨli nop gos nɨgtep gɨpal. Nɨgtep gel, kɨlop gek, tap lum awl gach gɨ tɨmel gup ak pɨskɨd abal. Kɨli tap tɨmel gup anɨb ak pɨskɨd amɨl, mɨdtep gɨpal ak pen, tepayaŋ gel amek, kɨlop dɨ nag lɨl gɨ tɨmel yɨbɨl gɨnɨgab. Ned mɨd tɨmel gɨlak ak pen, tap gach anɨb ak kɨlop dɨl tepayaŋ nag lek, pelpel mɨd tɨmel yɨbɨl gɨnɨgabal. 
\v 21 \x - \xo 2.21 \xo*\xt Luk 12.47-48, Jon 9.41\xt*\x* Kɨli binɨb suŋtep mɨdep kanɨb ak ma nepɨlap ak, tep gɨpɨkop. Pen kanɨb anɨb ak nɨŋɨd, God takaw suŋtep ne ak dɨl, kɨdek kelɨgɨpal. Anɨgɨpal anɨb ak, mɨñɨl mɨdtep ma yɨbɨl gɨpal. 
\v 22 \x - \xo 2.22 \xo*\xt Snd 26.11\xt*\x* Kɨlop anɨgup ak, takaw wulep olap, takaw nɨŋɨd yɨbɨl mɨdeb nepal ak agak, Chen okok yakɨl amɨl, adɨkɨd apɨl tap yakɨpal ak ñɨbal agak. Pen takaw olap abe anɨb agak, Chag okok ñɨg pakɨl, adɨkɨd amɨl tepayaŋ wuleb kolkol gɨpal agak.
\c 3
\s Nɨŋɨd agup, Bɨawl ak ne adɨkɨd ownɨgab
\p
\v 1 \x - \xo 3.1 \xo*\xt 2 Pi 1.13\xt*\x* Binɨb mapen yad okok, nɨbop mɨj olap ned tɨk yokɨl, mɨñɨl olap tɨkebin. Nɨbop tepayaŋ agñen, tap anɨb okok gos ak tepayaŋ nɨŋɨd, gos tep yɨbɨl ak nɨgɨlɨg yenɨgabɨm agɨl, ak tep mɨdeb mɨj omɨŋal anɨb ak tɨkɨpin. 
\v 2 \x - \xo 3.2 \xo*\xt Jud 17\xt*\x* Bɨ God gos ñek agñeb okok takaw kɨli bɨlel agñɨlak ak nɨŋɨd, gos anɨb ak nɨgɨlɨg yenɨmɨb agɨl gos nepin. Pen Bɨawl ak, ne bɨ kasɨn gep chɨn mɨdeb ak, takaw kɨles ne ak abe nɨŋɨd, gos anɨb ak nɨgɨlɨg yenɨmɨb agɨl gos nepin. Takaw anɨb ak, bɨ Jisas takaw nop dad ameb okok kɨli nɨbop agñɨlak.
\p
\v 3 \x - \xo 3.3 \xo*\xt 1 Ti 4.1, 2 Ti 3.1, 2 Pi 2.10, Jud 18\xt*\x* Pen takaw nokom olap ned nɨgtep gɨnɨmɨb. Ñɨn kɨdek ak ownɨgab ñɨn ak, bɨ agjuwep okok mɨdɨl, gos kɨli ke nab ayaŋ nepal tek kɨdek gɨl, agjuwɨl agɨnɨgabal, 
\v 4 \x - \xo 3.4 \xo*\xt Ais 5.19, Jer 17.15, Ese 12.22, 12.27, Mat 24.48, Luk 12.45\xt*\x* Bɨ ownɨgayn agɨl aglak ak, ownɨgab mɨgan akal nɨb agɨnɨgabal? Based yes kɨli bɨlel okok mɨdɨl kumɨlak ñɨn ak, gɨ dad amɨl mɨñɨl owup, lum awl ak alwol gɨlak ñɨn ak yek tek nep mɨdeb agɨnɨgabal. 
\v 5 \x - \xo 3.5 \xo*\xt Stt 1.6-9, Sng 33.6, Kol 1.17, Hib 11.3\xt*\x* Bɨ anɨb okok, kɨli nɨgtep gɨpal ak pen, ñɨnen kelɨgɨpal. Bɨlel bɨlel God agek, wɨsɨp adekab alaŋ lum awl ayaŋ apjakak. Ne agek, wɨsɨp alaŋ lɨl, ñɨg ayaŋ ak kuskus gɨl, lum ak nab ayaŋ lɨl gak. 
\v 6 \x - \xo 3.6 \xo*\xt Stt 7.11, 7.21, 2 Pi 2.5\xt*\x* Kɨdek agek, ñɨg tan aplanɨl lum awl yu gek, pɨsnep tɨmel gak. 
\v 7 \x - \xo 3.7 \xo*\xt Mat 25.41, 2 Te 1.8, 2 Pi 3.10\xt*\x* Mɨñɨl pen ne anɨgɨl agek, wɨsɨp adekab alaŋ lum awl ayaŋ kod mɨdeb. Kod yek, kɨdek God gek mab mɨŋɨlaŋ lum sek adekab sek pɨsnep dagɨlɨnɨgab. Ñɨn anɨb ak, God binɨb kɨlop tɨg asɨk bɨlokɨl, binɨb God nop kud ñɨl kɨdek ma gɨlak okok, kɨlop gɨ tɨmel gek kul gɨnɨgabal.
\p
\v 8 \x - \xo 3.8 \xo*\xt Sng 90.4\xt*\x* Pen binɨb mapen yad okok, tap nokom anɨb ak sawl ma gɨnɨmɨb. Bɨawl ak ne anɨgɨl gos nɨgup. Ñɨn nokom olap, ak sub kuŋay yɨbɨl anep 1,000 tek lup, sub kuŋay yɨbɨl anep, ak ñɨn nokom olap tek lup. 
\v 9 \x - \xo 3.9 \xo*\xt Ais 30.18, Hab 2.3, Lom 2.4, 1 Ti 2.4, Hib 10.37, 1 Pi 3.20\xt*\x* Bɨ ogɨnap kɨli apal, Bɨawl ak ne takaw ne aglak ak, saynsayn geb apal. Pen mel ak. Bɨawl ak ne takaw ne aglak ak saynsayn ma geb. Ne pen binɨb olap pɨsnep tɨmel gɨl kul gɨnɨmuŋ agɨl ma nɨgup. Binɨb mɨdupsek kɨli tap si tap tɨmel gɨpal ak taynen anɨgɨpun agɨl kelɨgɨnɨgel agɨl gos nɨgup. Anɨb ak yɨp yɨl ownɨmɨb agɨl, nɨbop yɨlɨk ma nɨŋɨd kod mɨdeb.
\s Wɨsɨp adekab alaŋ lum awl ayaŋ tɨmel gɨl kul gɨnɨgab
\p
\v 10 \x - \xo 3.10 \xo*\xt Mat 24.29, 24.35, 24.43, Mak 13.31, Luk 12.39, 1 Te 5.2, Hib 1.11, Lep 16.15, 20.11\xt*\x* Pen Bɨawl ne ownɨgab ñɨn ak, bɨ tap si dep okok nɨg mɨdel ma opal tek ak ownɨgab. Ñɨn anɨb ak, wɨsɨp adekab alaŋ gu awl agɨl pɨsnep kul gɨnɨgab. Lum awl tap tɨtay mɨdeb okok mɨdupsek, yɨn gɨl ñɨg bad lɨl, kul gɨnɨgab. Anɨb ak lum awl sek tap gɨlak okok sek, mɨdupsek ma yenɨgab. 
\v 11 Anɨb okok mɨdupsek yɨn gɨnɨgab, anɨb ak tek nɨbi gɨtep gɨnɨmɨb akaŋ monmon gɨnɨmɨb? Anɨgɨl gɨnɨmɨb. Yɨpɨd gɨl gɨtep gɨl, God gup tek ak nɨŋɨd kɨdek gɨnɨmɨb. 
\v 12 \x - \xo 3.12 \xo*\xt Ais 34.4, Mai 1.4, 1 Ko 1.7, Tat 2.13, 2 Pi 3.10\xt*\x* Nɨbi anɨgɨl gɨ dad amɨl, God binɨb kɨlop tɨg asɨk bɨlokɨnɨgab ñɨn ak kod yenɨmɨb. Ñɨn anɨb ak kasek ownɨmuŋ agɨl, wog kɨles tɨmel gɨl kod yenɨmɨb. Ñɨn anɨb ak, wɨsɨp adekab alaŋ yɨn gɨl, tɨmel gɨl kul gɨnɨgab. Pen lum awl tap tɨtay mɨdeb okok mɨdupsek, yɨn gɨl ñɨg bad lɨnɨgab. 
\v 13 \x - \xo 3.13 \xo*\xt Ais 65.17, 66.22, Lep 21.1, 21.27\xt*\x* God pen aglɨl agak, Wɨsɨp adekab alaŋ sek lum awl sek ke kɨdeyɨl nɨb lɨnɨgayn agak. Agɨl, aglak anɨb ak kod mɨdobun. Nab anɨb ak, tap yɨpɨd gɨl gɨtep gep ak nep yenɨgab.
\s Chɨn nɨgtep gɨl mɨdɨl, Bɨawl ak nop kod yonɨgun
\p
\v 14 \x - \xo 3.14 \xo*\xt 1 Ko 15.58, Plp 1.10, 1 Te 3.13\xt*\x* Anɨb ak tek binɨb mapen yad okok, tap anɨb okok kɨdek ownɨgab ak gos nɨŋɨd, Bɨawl ak nop kod yenɨmɨb. Nɨbi kɨles tɨmel yɨbɨl gɨl, binɨb suŋtep ne takaw ma mɨdeb okok mɨdɨl, tap tɨmel olap ma mɨdɨl gach sek ma yenɨmɨb. Pen abe kɨles tɨmel yɨbɨl gɨl, Bɨawl ak ayɨp kɨmɨgel mɨdtep gɨnɨmɨb. 
\v 15 \x - \xo 3.15 \xo*\xt Lom 2.4, 1 Pi 3.20, 2 Pi 3.9\xt*\x* Bɨawl ak ne binɨb kɨlop tɨg asɨk dɨnɨgayn agɨl, chɨnop yɨlɨk ma nɨŋɨd kod mɨdeb. Anɨb ak gos nɨgɨlɨg yenɨmɨb. Pen Bɨawl ak ne mam tep chɨn Pol nop gos tep ñek, ne abe takaw nokom anɨb ak tek nɨbop mɨj tɨkak. 
\v 16 \x - \xo 3.16 \xo*\xt Lom 10.3, 1 Ko 15.51, 1 Te 4.15\xt*\x* Mɨj ne tɨkup okok mɨdupsek, tap anɨb okok nep agup. Nɨŋɨd apun, takaw ogɨnap ne tɨkup ak, takaw koslam nɨgep tek agup. Anɨgɨl agek, binɨb gos sɨkol sɨkol nɨŋɨd, Klays nop gos kɨles ma nepal okok, kɨli takaw anɨb ak tɨg adɨkɨl, monmon agñɨbal. Pen Pol takaw ne tɨkup ak nep anɨb ma gɨpal, God takaw kuŋay bɨ ogɨnap tɨkɨlak ak abe gɨpal. Anɨgel, God kɨlop gek, yul awl yɨbɨl dɨl kul gɨnɨgabal.
\p
\v 17 \x - \xo 3.17 \xo*\xt Mak 13.5, 13.23, 13.33, 1 Ko 10.12, Epe 4.14, 2 Pi 1.10-12\xt*\x* Binɨb mapen yad okok, tɨtay kɨdek gɨnɨgab ak nepɨm, anɨb ak nɨgtep gɨnɨmɨb. Mel ak, binɨb tɨtɨmel gɨl yepɨs agɨl monmon gɨpal okok, kɨli gɨpal adek anɨb ak kɨdek gɨl apyap pakɨnɨmɨb tek lup. Nɨbi pen, Klays nop gos kɨles gɨl lɨnɨŋɨd, jak kɨles gɨl mɨdebɨm. Anɨb ak anɨgɨl yonɨgun agɨl, nɨgtep gɨnɨmɨb. 
\v 18 \x - \xo 3.18 \xo*\xt Epe 4.15, 2 Ti 4.18, 1 Pi 2.2, Jud 25, Lep 1.6\xt*\x* Jisas Klays, ne Bɨawl chɨn ak mɨdɨl, bɨ kasɨn gep chɨn ak mɨdeb. Ne nɨbop pel yɨmug nɨŋɨd gɨtep gaknɨŋ, nop nepɨm. Nɨbop yɨmug nɨŋɨd gɨtep gup anɨb ak, nɨbop gek jak kɨles gɨl yenɨmɨb. Nop nɨgtep gɨpɨm ak, nɨbi kɨles gɨl gem amek, nop nɨgtep yɨbɨl gɨnɨmɨb. Pen mɨñɨl nop yɨb awl ñɨnɨgun, pel pelnep abe ñɨlɨg yonɨgun. Yaw.