\id COL  
\h कलस्‍सी 
\toc1 कलस्‍सी 
\toc2 कलस्‍सी 
\toc3 कल 
\mt1 पावलसे कलस्‍सीला विश्‍वासीगदेदा भ्रिबा चिठी 
\imt1 चु चिठीला बारेरी पाङ्‌तोःमा 
\ib  
\ili \bd भ्रिबा म्‍हि:\bd* येशूला मुल चेला पावलसे भ्रिबा मुबा। चु चिठी भ्रिबाला लागिरी पावलदा तिमोथी भिबा म्‍हिसे ह्रो लबा मुबा (कलस्‍सी १:१)। 
\ib  
\ili \bd भ्रिबा ग्‍ला:\bd* रोम शहरला झ्‍याल्‍खानग्‍याम भ्रिबा मुबा। 
\ib  
\ili \bd भ्रिबा साल:\bd* ओस्‍पन ईश्‍‍वी संवत् ६१-६३ (विक्रम संवत् ११८-१२०) सालला गुङरी भ्रिबा मुबा। 
\ib  
\ili \bd खाल्‍दा भ्रिबा:\bd* कलस्‍सी शहररी मुबा विश्‍वासीगदेदा भ्रिबा मुबा। 
\ib  
\ip कलस्‍सी भिबा शहर एफिसस भिबा शहरला स्‍यारपट्टि परब तबा एशिया अञ्‍चलला शहर गिक मुबा। चु मण्‍डली पावलसे शुरु लबा मण्‍डली चा आहिन, तसैनोन चु शहर थे बास चिबा ग्‍लाला ङामरीन मुबासे लमा ङाइ ह्रो लतोःला भिसी थेसे म्‍हन्‍बा मुबा। चु मण्‍डलीरी प्रभुला गे लबाला लागिरी पावलसे एफिसस शहरग्‍याम म्‍हिगदे पुइबा मुबा। कलस्‍सीला मण्‍डलीरी लुसीला ताम लोप्‍बा म्‍हिगदेसे परमेश्‍वरदा ङोसेबाला लागिरीदेन थार्बा याङ्बाला लागिरी स्‍य्‍हान्‍दो आत्‍मादेन शक्तिगदेदा तेन्‍तोःला भिसी पाङ्मुबा। चु ताम पावलदाएनोन था मुबा। चु तामगदे बाहेक थे लुसीला ताम लोप्‍बा म्‍हिगदेसे खतना लतोःला, ओच्‍छे चबा थुङ्बादेन अर्गु तामगदेलाएनोन ठिम अन्‍छार लतोःला भिसी लोप्‍मुबा। 
\ip पावलसे कलस्‍सीला विश्‍वासीगदेदा थेह्रङ्बा लुसीला तामला बिरोध चा सत्‍य विश्‍वासग्‍याम लतोःला भिसी चिठी भ्रिबा मुबा। थेसे भ्रिबा चु चिठीला मुल ताम चा येशू ख्रीष्‍टसे पूरान थार्ना लखम्‍ला, ओच्‍छे अर्गु तामदेन ठिमसे चा म्‍हिगदेदा ख्रीष्‍टग्‍याम थारेङ तना लमुला। परमेश्‍वरसे जम्‍बुलिङला म्‍हिगदे येशूग्‍यामसेन स्‍होजी ओच्‍छे येशूग्‍यामनोन थेनीगदेदा ह्राङ मुबा ग्‍लारी भजी। थेतबासेलमा येशू ख्रीष्‍टग्‍याम जे जम्‍बुलिङला जम्‍मान म्‍हिगदेसे थार्बा याङ्ला। ओच्‍छे पावलसे जम्‍मान विश्‍वासीगदेदा विश्‍वासरी भ्रबाला लागिरी तोःबा जम्‍मान तामगदे घोना लबा मुला। 
\ip चु चिठी तुखिकस भिबा म्‍हिसे कलस्‍सी शहररी भोर्सी निबा मुबा। ओच्‍छे थेदेन छ्‌याम फिलेमोनना नोकर ओनेसिमसएनोन निबा मुबा। थेला लागिरी पावलसे फिलेमोनदा चिठीएनोन भ्रिबा मुबा। 
\iot मुल तामगदे 
\io1 फ्‍याफुल्‍बादेन प्रार्थना १:१-१४ 
\io1 ख्रीष्‍ट जम्‍मान भन्‍दा घ्रेन १:१५–२:१९ 
\io1 ख्रीष्‍टदेन छ्‌याम गिक तसी याङ्बा छार जुनी २:२०–४:६ 
\io1 चिठीला थुमरी भ्रिबा ताम ४:७-१८ 
\mt1 पावलसे कलस्‍सीला विश्‍वासीगदेदा भ्रिबा चिठी 
\c 1  
\p  
\v 1-2 लास्‍सो, कलस्‍सेरी मुबा परमेश्‍वरला म्‍हिगदेदा परमेश्‍वरसे ह्राङला समाचार थेःना लबारी धम्‍बा ङा ख्रीष्‍ट येशूला मुल चेला पावलदेन य्‍हाङला आले तिमोथीग्‍याम फ्‍याफुल्‍ला! थेरी मुबा परमेश्‍वरला म्‍हिगदे ख्रीष्‍टदेन छ्‌याम गिक तबा विश्‍वासी ज्‍योज्‍यो आले नाना आङागदेदा य्‍हाङला परमेश्‍वर आबादेन ख्रीष्‍ट प्रभुग्‍याम दयामायादेन शान्‍ति तगै। 
\s1 धन्‍यवाददेन प्रार्थना 
\p  
\v 3 ङन्‍से एनीगदेला लागिरी प्रार्थना लबा धुइरी य्‍हाङला प्रभु येशू ख्रीष्‍टला आबा परमेश्‍वरदा सदन धन्‍यवाद पिन्‍बा मुला।  
\v 4 तिग्‍दा भिसम एनीगदेसे ख्रीष्‍ट येशूदा विश्‍वास लबा तामदेन परमेश्‍वरला जम्‍मान म्‍हिगदे न्‍हङरी माया लसी ढिक्‍सी चिबा मुला भिबा ताम ङन्‍से थेःबा मुला।  
\v 5 परमेश्‍वरसे स्‍वर्गरी एनीगदेला लागिरी जुकजुकधोनाला जुनी थान्‍बा मुला भिसी एनीगदेसे आश लबा मुला। थेतबासेलमा एनीगदे चुह्रङ् लसी विश्‍वास लसी ह्राङ ह्राङ न्‍हङरी माया लसी ढिक्‍सी चिबा हिन्‍ना। एनीगदेसे लबा आशला तामला बारेरी एनीगदेसे ङाच्‍छान थार्बा पिन्‍बा समाचार सत्‍य बचनग्‍याम थेःबा मुला।  
\v 6 चुनोन थार्बा पिन्‍बा समाचार थेःसी, परमेश्‍वरला दयामायाला बारेरी सत्‍य ताम ज्‍यना लसी घोमाकुनुहेन्‍से एनीगदे न्‍हङरी ख्रीष्‍टदा विश्‍वास लबा म्‍हिगदे बढब तबा मुला। थेह्रङ् लसीन जम्‍बुलिङला जम्‍मान ग्‍लारी थार्बा पिन्‍बा समाचार थेःसी ख्रीष्‍टदा विश्‍वास लबा म्‍हिगदे बढब तबान मुला।  
\v 7 चु थार्बा पिन्‍बा समाचार एनीगदेसे ङन्‍से माया लबा ह्रो इपाफ्रासग्‍यामसेन था याङ्सी जिन्‍बा मुला। थे ङन्‍देन छ्‌यामनोन ढिक्‍सी गे लमुला। थेतबासेलमा ङन्‍ना साटोरी थेसे एनीगदेला गुङरीनोन सेमहेन्‍सेन ख्रीष्‍टला गे लबा विश्‍वास लखम्‍बा म्‍हि हिन्‍ना।\x * \xo 1:7 \xt कल ४:१२; फिले २३\x* 
\v 8 ओच्‍छे परमेश्‍वरला आत्‍माग्‍याम एनीगदेसे ह्राङ ह्राङ न्‍हङरी लबा मायाला बारेरी थेसे ङन्‍दा पाङ्बा मुला। 
\p  
\v 9 थेतबासेलमा चु ताम थेःमाकुनुहेन्‍से ङन्‍से एनीगदेला लागिरी प्रार्थना लबारी ख्‍लाबा आरे। परमेश्‍वरला आत्‍मासे पिन्‍बा ज्ञान बुद्धिग्‍याम एनीगदेसे तिग लगै भिसी परमेश्‍वरसे म्‍हन्‍बा मुला, थे जम्‍मान ताम ज्‍यना लसी घोबारी खम्‍गै भिसी बिन्‍ती लबा मुला।  
\v 10 थेह्रङ् लसीन एनीगदेसे प्रभुदा सेम निबा बानीबेहोर थोसी सदन ज्‍यबा गे लखम्‍गै। एनीगदेला थेह्रङ्बा गेग्‍याम प्रभु ताङ्‌गै। ओच्‍छे परमेश्‍वरला बारेरी झन ज्‍यना लसी घोखम्‍गै।  
\v 11 एनीगदेदा जस्‍तोन दुख तसैनोन ताङ्सी ताङ्सी नाबाला लागिरी परमेश्‍वरला घ्रेन शक्ति याङ्सी भङ्‍सी चिउ।  
\v 12 परमेश्‍वरसे य्‍हाल य्‍हाल्‍बा य्‍हुल्‍सारी चिबा ह्राङला म्‍हिगदेदा पिन्‍बा हक एनीगदेदाएनोन पिन्‍बा मुला। थेतबासेलमा थेह्रङ्बा हक पिन्‍बा परमेश्‍वर आबादा सदन धन्‍यवाद पिन्‍गो।  
\v 13 थेनोन परमेश्‍वरसे य्‍हाङदा शैतानना धोपधोप्‍बा य्‍हुल्‍साग्‍याम फेसी ह्राङसेन माया लबा झा ख्रीष्‍टला य्‍हुल्‍सारी भसी थान्‍जी।  
\v 14 ख्रीष्‍टसेन य्‍हाङला पापला दोष मेटब लसी य्‍हाङदा पापग्‍याम फेबा मुला।\x * \xo 1:14 \xt एफि १:७\x* 
\s1 जम्‍मान भन्‍दा घ्रेन ख्रीष्‍टनोन हिन्‍ना 
\p  
\v 15 खालैसेन म्राङ्आखम्‍बा परमेश्‍वरला रुप ख्रीष्‍टनोन हिन्‍ना। थे परमेश्‍वरसे स्‍होबा जम्‍मान स्‍हे भन्‍दा ङाच्‍छाहेन्‍सेन मुबा। थेतबासेलमा परमेश्‍वरसे स्‍होबा जम्‍मान स्‍हे भन्‍दा घ्रेन ख्रीष्‍टनोन हिन्‍ना।  
\v 16 तिग्‍दा भिसम स्‍वर्गदेन जम्‍बुलिङरी मुबा म्राङ्‌खम्‍बा म्राङ्आखम्‍बा जम्‍मान स्‍हेगदे, ग्‍लेगदे मुसै, य्‍हुल्‍सागदे मुसै, शासन लबागदे मुसै, अधिकार याङ्बागदे मुसै परमेश्‍वरसे ख्रीष्‍टग्‍याम स्‍होबा हिन्‍ना। ओच्‍छे परमेश्‍वरसे चु जम्‍मान ख्रीष्‍टलान लागिरी स्‍होबा हिन्‍ना।  
\v 17 जम्‍मान स्‍हे स्‍होबा भन्‍दा ङाच्‍छाहेन्‍सेन ख्रीष्‍ट मुबा। थेतबासेलमा जम्‍मान स्‍हेगदे ख्रीष्‍ट येशूरीन छ्‌याबा मुला।  
\v 18 ख्रीष्‍ट ह्राङला ल्‍हुइ मण्‍डलीला थोबो हिन्‍ना। ओच्‍छे ल्‍हुइला मुल ह्रङ्‌बा जम्‍मान स्‍हेला मुल थेनोन हिन्‍ना। थेह्रङ् लसीन सिबागदे न्‍हङ‍ग्‍याम जम्‍मान भन्‍दा ङाच्‍छा सोबाएनोन ख्रीष्‍टनोन हिन्‍ना। थेतबासेलमा जम्‍मान स्‍हेगदे भन्‍दा घ्रेन ख्रीष्‍टनोन हिन्‍ना।\x * \xo 1:18 \xt एफि १:२२-२३\x* 
\v 19 परमेश्‍वरसे म्‍हन्‍बा अन्‍छार परमेश्‍वर ह्राङनोन थेला झा ख्रीष्‍ट न्‍हङरी तसी धन्‍छ्‌याबा मुला।  
\v 20 ह्राङला झा ख्रीष्‍ट क्रुसरी सिसी बगब लबा काग्‍यामसेन परमेश्‍वरसे स्‍वर्गदेन जम्‍बुलिङरी मुबा जम्‍मान स्‍हेदा शान्‍ति पिन्‍जी। ओच्‍छे ख्रीष्‍टग्‍यामसे जम्‍मान स्‍हेदा ह्राङलान स्‍होजी।\x * \xo 1:20 \xt एफि २:१६\x* 
\p  
\v 21 ङाच्‍छा एनीगदेला पापी सेमदेन पाप गेसे लमा एनीगदे परमेश्‍वरला शत्रु मुबा। थेतबासेलमान थे धुइरी एनीगदे परमेश्‍वरग्‍याम थारेङ मुबा।  
\v 22 तर दान्‍दे परमेश्‍वरसे म्‍हन्‍बा अन्‍छार परमेश्‍वरला झा म्‍हि दोसी सिजी। चुग्‍यामसेन परमेश्‍वरसे एनीगदेदा ह्राङला ह्रोदेन तिगै दोष आरेबा चोखो म्‍हि स्‍होसी ह्राङला ङामरी भबारी हिन्‍ना।  
\v 23 थेतबासेलमा एनीगदेसे लबा विश्‍वास आख्‍लाना विश्‍वासरी कोङ्‌सी चिउ। ओच्‍छे एनीगदेसे थार्बा पिन्‍बा समाचार थेःबा धुइरी याङ्बा आशदा थाम्‍लेःगो। तिग्‍दा भिसम चु समाचार जम्‍बुलिङला जम्‍मासेन थेःसी जिन्‍बा मुला। थेतबासेलमा ङा पावलएनोन चुनोन समाचार थेःना लबा म्‍हि दोबा मुला। 
\s1 मण्‍डलीला लागिरी पावलसे लबा गे 
\p  
\v 24 दान्‍दे एनीगदेला लागिरी दुख नातोःसै ङा ताङ्‍बा मुला। तिग्‍दा भिसम ङाइ ख्रीष्‍टसे नाबा ह्रङ्‌बा दुख अझ नातोःसेला मुला। थेतबासेलमा थेला ल्‍हुइ मण्‍डलीला लागिरी ङाइ नातोःबा जम्‍मान दुख नाला।  
\v 25 परमेश्‍वरसे थेला मण्‍डलीरी गे लबा जिम्‍मा ङादा पिन्‍बा मुला। ङादा पिन्‍बा जिम्‍मा चा एनीगदेला लागिरी परमेश्‍वरला समाचार पूरान थेःना लबा हिन्‍ना।  
\v 26 चु दङबोहेन्‍सेन खालैसे घोबारी आखम्‍बा परमेश्‍वरला सेमला ताम हिन्‍ना। तर दान्‍दे चु परमेश्‍वरसेन ह्राङला म्‍हिगदेदा घोना लबा मुला।  
\v 27 म्‍हिसे था आयाङ्‍बा परमेश्‍वरला सेमला ताम अर्गु य्‍हुलला म्‍हिगदेला लागिरी गाते उदेकला मुबा भिबा ताम घोना लबारी थेनीगदेदा धम्‍बा हिन्‍ना। थे परमेश्‍वरला सेमला ताम चा एनीगदेला सेमरी मुबा ख्रीष्‍ट हिन्‍ना। ओच्‍छे एनीगदेसे परमेश्‍वरदेन छ्‌यामनोन चिम्‍याङ्ला भिसी लबा आश हिन्‍ना। 
\p  
\v 28 थेतबासेलमा ङन्‍से जम्‍मान म्‍हिगदेदा ख्रीष्‍टला बारेरी पाङ्बा मुला। ओच्‍छे ख्रीष्‍टदेन छ्‌याम गिक तबागदेदा पाको म्‍हि स्‍होसी परमेश्‍वरला ङामरी भोर्बाला लागिरी थेनीगदेदा ङन्‍ना ज्ञान बुद्धिसे खम्‍तेधोना लोप्‍सी होशियार तना लबा मुला।  
\v 29 चुला लागिरी ङा न्‍हङरी मुबा ख्रीष्‍टला घ्रेन शक्तिग्‍याम ङाइ दुख लसी चु गे लबा हिन्‍ना। 
\c 2  
\p  
\v 1 एनीगदेदेन लाउडिकिया भिबा शहररी मुबा विश्‍वासीगदेला लागिरी ओच्‍छे ङादेन छ्‌याम ह्रुप आतबा म्‍हिगदेला लागिरी ङाइ गाते दुख लसी गे लबा मुला भिबा ताम एनीगदेसे था याङ्‌गै।  
\v 2 ङाइ चुह्रङ् लसी गे लबा चा एनीगदेसे आँट याङ्सी ह्राङ ह्राङ न्‍हङरी माया लसी ढिक्‍सी चिखम्‍गै भिसी हिन्‍ना। ओच्‍छे एनीगदेसे परमेश्‍वरला बचन पूरान घोसी परमेश्‍वरला सेमला ताम ख्रीष्‍टदा ज्‍यना लसी ङोसेगै, घोगै भिसीएनोन हिन्‍ना।  
\v 3 य्‍हाङदा आरेनान आतबा परमेश्‍वरला ज्ञान बुद्धि ख्रीष्‍टदेन छ्‌याम जे मुला।  
\v 4 थेतबासेलमा खालैसेन एनीगदेदा लुसीला ताम लोप्‍सी झुक्‍याब लबारी थाखम्‍गै भिसी चु ताम ङाइ एनीगदेदा पाङ्बा हिन्‍ना।  
\v 5 ङा ल्‍हुइरी एनीगदेदेन छ्‌याम आरेसै ङाला सेम मी सदन एनीगदेदेन छ्‌यामनोन मुला। ओच्‍छे एनीगदेला बानीबेहोरदेन ख्रीष्‍टदा लबा विश्‍वासरी एनीगदे कोङ्‌सी चिबा म्राङ्सी ङा ल्‍हानान ताङ्‍बा मुला। 
\s1 थार्बा पिन्‍बा ख्रीष्‍टनोन हिन्‍ना 
\p  
\v 6 थेतबासेलमा एनीगदेसे ख्रीष्‍ट येशूदा प्रभु भिसी विश्‍वास लबासे लमा सदन ख्रीष्‍टदेन छ्‌याम गिक तसी भ्रउ।  
\v 7 ङाच्‍छा एनीगदेदा लोप्‍बा अन्‍छार विश्‍वासरी अझ कोङ्बान निउ। थेह्रङ् लसीन ख्रीष्‍टदा लबा विश्‍वासरी याङयोङ आतना ख्रीष्‍टदेन छ्‌याम गिक तसी विश्‍वासरी बढब तबान निउ। ओच्‍छे परमेश्‍वरदा सदन धन्‍यवाद पिन्‍गो। 
\p  
\v 8 च्‍यागो, एनीगदेदा खालै म्‍हिसे थेनीगदे ह्राङ ह्राङसे म्‍हन्‍सी लोप्‍बा गे आखेल्‍बा लुसीला ताम लोप्‍सी फसब थालगै। तिग्‍दा भिसम चु जम्‍मान ताम जम्‍बुलिङदेन मुरी मुबा म्‍हङ म्‍हुङ, ल लुग्‍याम खबा ताम हिन्‍ना। तर ख्रीष्‍टग्‍याम खबा आहिन। 
\p  
\v 9 ख्रीष्‍ट म्‍हि दोसी फेप्‍खसै थेनोन परमेश्‍वर हिन्‍ना।  
\v 10 एनीगदे ख्रीष्‍टरी गिक तबासे लमा एनीगदेसे पूरा थार्बा याङ्बा मुला। ओच्‍छे जम्‍मान शक्तिगदेदेन अधिकार याङ्बागदेथोरी शासन लबाएनोन ख्रीष्‍टनोन हिन्‍ना।  
\v 11 ख्रीष्‍ट येशूदेन छ्‌याम गिक तबासे लमा एनीगदे खतना लबा म्‍हि ह्रङ्‌बान दोबा मुला। तर यहूदीगदेला ठिम अन्‍छार एनीगदेला ल्‍हुइला तिगै स्‍हे थासी आहिन। तर ख्रीष्‍ट येशूसे एनीगदेला पापी बानीबेहोर भ्‍याङ्‍सी खतना लबा हिन्‍ना।  
\v 12 तिग्‍दा भिसम बप्‍तिस्‍मा किन्‍मा एनीगदे ख्रीष्‍टदेन छ्‌यामनोन ल्‍हुबा मुबा। ओच्‍छे परमेश्‍वरला शक्तिसे ख्रीष्‍टदा सिबाग्‍याम सोना लबा हिन्‍ना, थेनोन शक्तिथोरी विश्‍वास लबासे लमा एनीगदेदाएनोन ख्रीष्‍टदेन छ्‌यामनोन सोना लबा मुला।\x * \xo 2:12 \xt रोमी ६:४\x* 
\v 13 ङाच्‍छा एनीगदे ह्राङला पापदेन पापी बानीबेहोर आख्‍लाबासे लमा एनीगदे सिबा तेबान मुबा। तर दान्‍दे परमेश्‍वरसे य्‍हाङ जम्‍मालान पाप माफ लसी ख्रीष्‍टदेन छ्‌यामनोन सोना लबा मुला।\x * \xo 2:13 \xt एफि २:१-५\x* 
\v 14 य्‍हाङला आज्‍यबा गेसे लमा परमेश्‍वरसे मोशादा पिन्‍बा ठिम अन्‍छार याङ्तोःबा सजायदा परमेश्‍वरसे क्रुसरी खिल ठोक्‍सी नाश लजी।\x * \xo 2:14 \xt एफि २:१५\x* 
\v 15 चुह्रङ् लसी ख्रीष्‍ट क्रुसरी सिसी जम्‍मान शक्तिगदेदेन अधिकार याङ्बागदेदा भ्रेना लजी। ओच्‍छे थेनीगदेदा जम्‍मालान ओन्‍छाङरी पेःना लजी। 
\p  
\v 16 थेतबासेलमा एनीगदेदा खालै म्‍हिसे तिग चबा थुङ्बा लबा चीम, खाह्रङ्बा खाह्रङ्बा चाड धङ्बा चीम, औंसी धङ्बा चीम कि धङ्बा चीम ओच्‍छे ब्‍लप्‍बा न्‍हबा धिन धङ्बा चीम कि धङ्बा चीम भिसी दोष थालगै।\x * \xo 2:16 \xt रोमी १४:१-६\x* 
\v 17 चु जम्‍मान ठिमगदे चा सत्‍य तामला चिनु जे हिन्‍ना। थे सत्‍य ताम भिबा चा ख्रीष्‍टनोन हिन्‍ना।  
\v 18 एनीगदेदा खालैसे लुसीला ताम लोप्‍सी फसब थालगै। तिग्‍दा भिसम थेह्रङ्बा म्‍हिगदेसे एनीगदेदा फसब लबारी य्‍हाङ तिगै आहिन, य्‍हाङसे स्‍वर्गदूतगदेदा तेन्‍तोःला भिसी लोप्‍मुला। चु जम्‍मान ताम ङन्‍दा परमेश्‍वरसे उन्‍बा हिन्‍ना भिसी थेनीगदेसे पाङ्सैनोन थेन्‍ना सेमरी म्‍हन्‍सी लोप्‍बा ताम जे हिन्‍ना। थेतबासेलमा एनीगदेसे थेनीगदेला ताम ङ्‌यान्‍जी भिसम एनीगदेसे याङ्तोःबा इनाम आयाङ्। थेनीगदेसे ह्राङला सेमरी म्‍हन्‍सी लोप्‍बा तामरी घमण्‍ड लसी भ्रमुला। तर थेनीगदेसे घमण्‍ड लतोःबा ताम तिगै आरे।  
\v 19 थेह्रङ्बा म्‍हिगदे चा ह्राङला ल्‍हुइला थोबो ह्रङ्‌बा ख्रीष्‍टदेन छ्‌याम आचिना, फेसी चिमुला। ख्रीष्‍टदेन छ्‌याम गिक तसी चिजी भिसम जे य्‍हाङला ल्‍हुइला जोर्नी जोर्नीरी भङ वाङ्सी परमेश्‍वरसे म्‍हन्‍बा अन्‍छार य्‍हाङ ल्‍हेबान निला।\x * \xo 2:19 \xt एफि ४:१६\x* 
\p  
\v 20 एनीगदे ख्रीष्‍टदेन छ्‌यामनोन सिसी जम्‍बुलिङदेन मुरी शासन लबा म्‍हङ म्‍हुङदेन ल लुग्‍याम फेसी जिन्‍बा मुला। चुदे एनीगदे फेसी जिन्‍बा हिन्‍सम जम्‍बुलिङरी चिबा ह्रङ् लसी थेह्रङ्बा ठिमदा तिग्‍दा ख्‍लाबारी आखम्‍बा? ओच्‍छे अझ तिग्‍दा थेह्रङ्बा ठिमला लिच्‍छा भ्रबा?  
\v 21 ओच्‍छे अझ तिग्‍दा चु लबारी आत, चु चबारी आत, चु थुर्बारी आत भिसी पाङ्सी भ्रबा?  
\v 22 चु जम्‍मान तामगदे चा य्‍हाङसे लना लनान म्‍हासी निबा ताम हिन्‍ना। तिग्‍दा भिसम चु तामगदे चा म्‍हिगदेसे स्‍य्‍हान्‍दो म्‍हिदा कुल्‍बारीदेन लोप्‍बारी स्‍होबा ठिम जे हिन्‍ना।  
\v 23 थेह्रङ्बा रिमठिम तेन्‍बा म्‍हिगदेसे चा “ङनी धर्म कर्म लबा सोजो म्‍हि हिन्‍ना” भिसी ल्‍हानान सेबा दोसी ह्राङला ल्‍हुइदा दुख पिन्‍मुला। तर थेनीगदेसे ह्राङला पापी सेमदा चा तहरी थान्‍बारी आखम्‍मुला। 
\c 3  
\s1 परमेश्‍वरदा सेम निबा बानीबेहोर 
\p  
\v 1 एनीगदे ख्रीष्‍टदेन छ्‌यामनोन सिबाग्‍याम सोबा मुला। थेतबासेलमा स्‍वर्गरी मुबा स्‍हेगदे म्‍हाइगो। थेनोन स्‍वर्गरी परमेश्‍वरला दाहिने छ्‌यापट्टि मुल ठिरी ख्रीष्‍ट धन्‍छ्‌यामुला।\x * \xo 3:1 \xt भजन ११०:१\x* 
\v 2 एनीगदेसे जम्‍बुलिङरी मुबा तामगदेला बारेरी आहिन तर स्‍वर्गरी मुबा तामगदेला बारेरी म्‍हन्‍गो।  
\v 3 तिग्‍दा भिसम एनीगदे ख्रीष्‍टदेन छ्‌यामनोन सिबा मुला। ओच्‍छे एनीगदेला जुनी ख्रीष्‍टदेन छ्‌याम परमेश्‍वर मुबा ग्‍लारी थान्‍बा मुला।  
\v 4 ओच्‍छे एनीगदेला जुनी ख्रीष्‍टनोन हिन्‍ना। थेतबासेलमा ख्रीष्‍ट दोःसी फेप्‍खबा धुइरी थेला घ्रेन य्‍हालदेन शक्तिरी एनीगदेएनोन थेदेन छ्‌यामनोन तला। 
\p  
\v 5 थेतबासेलमा एनीगदेसे जम्‍बुलिङरी लबा आज्‍यबा बानीबेहोर ख्‍लागो। थेह्रङ्बा आज्‍यबा बानीबेहोर भिबा चा स्‍य्‍हान्‍दोदेन छ्‌याम ब्रेल्‍सी भ्रबा, स्‍य्‍हान्‍दोदेन छ्‌याम ब्रेल्‍बा सेम लबा, पापी सेम थोबा, आज्‍यबा ताम म्‍हन्‍बादेन लोभ लबा हिन्‍ना। लोभ लबा चा मूर्तिदा परमेश्‍वर भिसी तेन्‍बा हिन्‍ना।  
\v 6 थेह्रङ्बा गेगदेसे लमान परमेश्‍वर थेनीगदे म्राङ्सी बोमो खबा मुला ओच्‍छे परमेश्‍वरसे कुल्‍बा ताम आङ्‌यान्‍बा\f † \fr 3:6 \ft परमेश्‍वरसे कुल्‍बा ताम आङ्‌यान्‍बागदेदा भिबा ताम चा कोइ ग्रीक बाइबलरी मुला कोइ ग्रीक बाइबलरी आरे।\f* थेह्रङ्बा म्‍हिगदेदा थेसे सजाय पिन्‍ना।  
\v 7 ङाच्‍छा मी एनीगदेएनोन थेह्रङ्बा तामला लिच्‍छा भ्रमुबा। 
\p  
\v 8 तर दाहेन्‍से एनीगदेसे म्‍हिदा बोमो लबा, म्‍हिदा बिरोध लबा, स्‍य्‍हान्‍दोला बेइज्‍जत लबा, नइबा ताम लबा चु जम्‍मान आज्‍यबा ताम ख्‍लागो।  
\v 9 ओच्‍छे खालैदेन एनीगदेसे लुसीला ताम थालउ। तिग्‍दा भिसम एनीगदेसे ङाच्‍छाला जम्‍मान आज्‍यबा बानीबेहोर ख्‍लासी जिन्‍बा मुला।\x * \xo 3:9 \xt एफि ४:२२\x* 
\v 10 दाहेन्‍से परमेश्‍वरसे एनीगदेदा छार जुनी पिन्‍बासे लमा एनीगदेसे परमेश्‍वरदा ज्‍यना लसी ङोसेगै भिसी अझन परमेश्‍वरसे एनीगदेदा ह्राङ ह्रङ्‌बान स्‍होबान मुला।\x * \xo 3:10 \xt उत्‍प १:२६; एफि ४:२४\x* 
\v 11 छार म्‍हि दोमाहेन्‍से अर्गु य्‍हुलला म्‍हि मुसै, यहूदी मुसै, खतना लसै आलसै, पढब लबारी आसेसै, बानीबेहोर आरेसै नोकर मुसै मालिक मुसै तिगै घ्रेन ताम आहिन। तर ख्रीष्‍टसे जम्‍मानथोरी शासन लबादेन ख्रीष्‍ट य्‍हाङ जम्‍मानदेन छ्‌याम तबा चा घ्रेन ताम हिन्‍ना। 
\p  
\v 12 ह्राङलान म्‍हिगदे स्‍होबारी परमेश्‍वरसे माया लसी एनीगदेदा धम्‍बा हिन्‍ना। थेतबासेलमा एनीगदे सेमहेन्‍सेन दया लबा, दुख नाखम्‍बादेन घ्रेन म्‍हि आदोना सोजो म्‍हि दोसी भ्रउ।\x * \xo 3:12 \xt एफि ४:२\x* 
\v 13 ओच्‍छे एनीगदे ह्राङ ह्राङ न्‍हङरी सेम नासी चिउ। खालैसे एनीगदेदा बिरोध लसम प्रभुसे एनीगदेदा माफ लबा ह्रङ् लसी थेनीगदेदाएनोन माफ लउ।\x * \xo 3:13 \xt एफि ४:३२\x* 
\v 14 चु जम्‍मान तामगदे भन्‍दा घ्रेन चा एनीगदे न्‍हङरी लबा माया हिन्‍ना। तिग्‍दा भिसम जम्‍मान स्‍हेदा गिक स्‍होबा चा माया हिन्‍ना।  
\v 15 ओच्‍छे ख्रीष्‍टसे पिन्‍बा शान्‍तिसे एनीगदेला सेम न्‍हङरी सदन गे लगै। चुनोन शान्‍तिला लागिरी परमेश्‍वरसे एनीगदेदा ख्रीष्‍टग्‍याम ल्‍हुइ गिक ह्रङ्‌बान स्‍होसी ङ्‌योइबा हिन्‍ना। ओच्‍छे सदन परमेश्‍वरदा धन्‍यवाद पिन्‍गो।  
\v 16 एनीगदेला सेम सदन ख्रीष्‍टला बचनसे प्‍लिङ्‌सी गिकसेम गिकदा ह्राङला जम्‍मान ज्ञान बुद्धिसे लोप्‍गो। ओच्‍छे परमेश्‍वरला आत्‍मासे पिन्‍बा व्‍हाइ सेमहेन्‍से गोसी परमेश्‍वरदा धन्‍यवाद पिन्‍गो।  
\v 17 एनीगदेसे खजिबै गेदेन ताम लसै प्रभु येशूला मिनग्‍यामसेन लउ। ओच्‍छे प्रभु येशूग्‍यामसेन परमेश्‍वर आबादा धन्‍यवाद पिन्‍गो।\x * \xo 3:17 \xt एफि ५:१९-२०\x* 
\s1 ख्रीष्‍टदा विश्‍वास लबागदेसे लतोःबा ताम 
\p  
\v 18 जम्‍मान म्रिङम्‍हेमेगदे ह्राङ ह्राङला ह्रेम्‍बोला तहरी चिउ। तिग्‍दा भिसम चु प्रभुदा सेम निबा ताम हिन्‍ना।\x * \xo 3:18 \xt एफि ५:२२; १ पत्रु ३:१\x* 
\v 19 ओच्‍छे जम्‍मान ह्रेम्‍फेबेगदेसेनोन ह्राङ ह्राङला म्रिङदा आज्‍यबा व्‍यवहार आलना माया लउ।\x * \xo 3:19 \xt एफि ५:२५; १ पत्रु ३:७\x* 
\p  
\v 20 कोलागदे, एनीगदेसे ह्राङला आबा आमासे कुल्‍बा जम्‍मान ताम ङ्‌यान्‍गो। चुह्रङ् लसम परमेश्‍वर ताङ्ला।\x * \xo 3:20 \xt एफि ६:१\x* 
\p  
\v 21 थेह्रङ् लसीन आबागदेसेनोन ह्राङ ह्राङला कोलागदेदा बोमो खना थालउ। बोमो खना लजी भिसम थेनीगदेला सेम स्‍हु खला।\x * \xo 3:21 \xt एफि ६:४\x* 
\p  
\v 22 नोकरगदे, एनीगदेसे जम्‍बुलिङरी मुबा ह्राङ ह्राङला मालिकगदेदा ताङ्ना लबारी थेनीगदेला ङाच्‍छा जे गे लबा आहिन। तर प्रभुदा मान लबा ह्रङ् लसी एनीगदेला मालिकदाएनोन मान लउ। ओच्‍छे एनीगदेसे सदन थेनीगदेसे कुल्‍बा ताम ङ्‌यान्‍गो। ओच्‍छे ह्राङला सेमहेन्‍से गे लउ।\x * \xo 3:22 \xt एफि ६:५-८\x* 
\v 23 ओच्‍छे एनीगदेसे जुन गे लसै म्‍हिला लागिरी गे लबा ह्रङ् लसी आहिन, तर प्रभुला लागिरी गे लबा ह्रङ् लसी सेमहेन्‍सेन झन्‍सी गे लउ।  
\v 24 तिग्‍दा भिसम प्रभुसे ह्राङला म्‍हिगदेदा इनाम पिन्‍ना भिसी लबा कबुल एनीगदेदा थानोन मुला। ओच्‍छे एनीगदेसे तेन्‍बा प्रभु चा ख्रीष्‍ट जे हिन्‍ना।  
\v 25 जुन म्‍हिसे आज्‍यबा गे लला थेसे लबा आज्‍यबा गेला सजाय याङ्नोन याङ्ला। तिग्‍दा भिसम परमेश्‍वरसे खालैला ली आच्‍याना निसाफ लला।\x * \xo 3:25 \xt व्‍यव १०:१७; एफि ६:९\x* 
\c 4  
\p  
\v 1 मालिकगदे, एनीगदेसेनोन ह्राङला नोकरगदे न्‍हङरी खालैला ली आच्‍याना ज्‍यना लउ। ओच्‍छे एनीगदेसेनोन ह्राङला मालिक स्‍वर्गरी मुला भिबा ताम थाम्‍लेःगो।\x * \xo 4:1 \xt एफि ६:९\x* 
\s1 ख्रीष्‍टियानगदेसे लतोःबा ताम 
\p  
\v 2 एनीगदे सदन परमेश्‍वरदा धन्‍यवाद पिन्‍बान झन्‍सी प्रार्थना लसी चिउ।  
\v 3 एनीगदेसे प्रार्थना लबा धुइरी अझ ख्रीष्‍टला बारेरी परमेश्‍वरला सेमरी मुबा ताम म्‍हिगदेदा थेःना लबारी परमेश्‍वरसेन ग्‍याम स्‍होसी पिन्‍गै भिसी ङन्‍ना लागिरी प्रार्थना लसी पिन्‍गो। ख्रीष्‍टला समाचार थेःना लबासे लमान दान्‍दे ङा झ्‍याल्‍खानरी परब तबा हिन्‍ना।  
\v 4 ओच्‍छे ङाइ घोना लतोःबा चु ताम ज्‍यना लसी घोना लबारी खम्‍गै। 
\p  
\v 5 ख्रीष्‍टदा विश्‍वास आलबा म्‍हिदेन होस लसी ज्‍यबा व्‍यवहार लउ। ओच्‍छे एनीगदेसे याङ्बा खजिबै मौका स्‍योर्ना थालउ।\x * \xo 4:5 \xt एफि ५:१६\x* 
\v 6 थेतबासेलमा एनीगदेसे पाङ्बा ताम म्‍हिगदेदा ङ्‌यान्‍गे म्‍हन्‍बा खाल्‍ला तगै। ओच्‍छे म्‍हिगदेदेन छ्‌याम ताम लमा खाह्रङ् लसी जोहाब पिन्‍तोःला भिसी घोउ। 
\p  
\v 7 ङन्‍से माया लबा आले तुखिकससेन एनीगदेदा ङाला बारेरी जम्‍मान ताम पाङ्ला। थेएनोन ङन्‍देन छ्‌यामनोन प्रभुला गे लबा विश्‍वास लखम्‍बा म्‍हि हिन्‍ना।\x * \xo 4:7 \xt मुल २०:४; २ तिमो ४:१२\x* 
\v 8 ङाइ थेदा एनीगदे मुबा ग्‍लारी पुइखबा चा थेसे ङन्‍ना बारेरी पाङ्सी एनीगदेसे आँट याङ्‌गै भिसी हिन्‍ना।\x * \xo 4:8 \xt एफि ६:२१-२२\x* 
\v 9 थेदेन छ्‌याम ओनेसिमसएनोन खबान मुला। ङन्‍से विश्‍वास लखम्‍बा सेम निबा आले ओनेसिमस चा एनीगदेलान म्‍हि हिन्‍ना। एनीगदेदा ङन्‍ना बारेरी थेन्‍से जम्‍मान ताम पाङ्ला।\x * \xo 4:9 \xt फिले १०-१२\x* 
\p  
\v 10 ङादेन छ्‌यामनोन झ्‍याल्‍खानरी मुबा ह्रो आरिस्‍तार्खससे एनीगदेदा फ्‍याफुल्‍ला भिसी पाङ्बा मुला। ओच्‍छे बारनाबासला कोन मर्कूससेनोन एनीगदेदा फ्‍याफुल्‍ला भिसी पाङ्बा मुला। मर्कूस एनीगदे मुबा ग्‍लारी खजी भिसम एनीगदेसे थेदा मान लतोःला भिबा ताम था याङ्सी जिन्‍बा मुला।\x * \xo 4:10 \xt मुल १९:२९; २७:२; फिले २४; मुल १२:१२, २५; १३:१३; १५:३७-३९\x* 
\v 11 युस्‍तस भिबा येशूसेनोन एनीगदेदा फ्‍याफुल्‍ला भिसी पाङ्बा मुला। यहूदी विश्‍वासीगदे न्‍हङला चु सोमसे जे परमेश्‍वरला य्‍हुल्‍साला समाचार थेःना लबारी ङादेन छ्‌याम गे लबा मुला। चु सोमसे लमान ङाइ ल्‍हानान भङ याङ्बा मुला। 
\p  
\v 12 थेह्रङ् लसीन प्रभु ख्रीष्‍ट येशूला गे लबा एनीगदेलान आले इपाफ्राससेनोन एनीगदेदा फ्‍याफुल्‍ला भिसी पाङ्बा मुला। एनीगदेसे परमेश्‍वरसे म्‍हन्‍बा जम्‍मान ताम घोसी विश्‍वासरी पाकोदेन ढुक्‍क तसी चिबारी खम्‍गै भिसी थेसे सदन एनीगदेला लागिरी प्रार्थना लबा मुला।\x * \xo 4:12 \xt कल १:७; फिले २३\x* 
\v 13 थेसे लाउडिकिया भिबा शहरदेन हिरापोलिस भिबा शहररी मुबागदेला लागिरी ओच्‍छे एनीगदेला लागिरी ल्‍हानान दुख लसी गे लबा मुला भिबा ताम ङाइ म्राङ्बा मुला। 
\p  
\v 14 थेह्रङ् लसी ङन्‍ना सेम निबा आले डाक्‍टर लूकादेन डेमाससेनोन एनीगदेदा फ्‍याफुल्‍ला भिसी पाङ्बा मुला।\x * \xo 4:14 \xt २ तिमो ४:१०, ११; फिले २४\x* 
\v 15 लाउडिकिया भिबा शहरला विश्‍वासी ज्‍योज्‍यो आले नाना आङागदेदेन नुम्‍फास भिबा म्रिङम्‍हेमेदा ओच्‍छे थेला दिमरी मुबा मण्‍डलीदाएनोन ङाइ फ्‍याफुल्‍बा मुला भिसी पाङ्सी पिन्‍गो। 
\p  
\v 16 चु चिठी एनीगदेसे पढब लसी जिन्‍माहेन्‍से लाउडिकिया भिबा शहररी मुबा मण्‍डलीदाएनोन पढब लपुङ्‍गो। ओच्‍छे लाउडिकियारी ङाइ पुइबा चिठीएनोन एनीगदेसे पढब लउ।  
\v 17 ओच्‍छे “प्रभुसे एदा पिन्‍बा गे पूरा लनोन तोःला” भिसी अर्खिप्‍पसदा पाङ्‍गो।\x * \xo 4:17 \xt फिले २\x* 
\p  
\v 18 एनीगदे जम्‍मादान फ्‍याफुल्‍ला भिसी ङा पावलसेन भ्रिबा हिन्‍ना। ओच्‍छे ङा झ्‍याल्‍खानरी मुला भिबा ताम एनीगदेसे थाम्‍लेःगो। एनीगदेदेन छ्‌याम परमेश्‍वरला दयामाया सदन तगै।