\id TIT  
\ide UTF8
\h TITO 
\toc1 Paulo ena uriuri tito enana 
\toc2 Tito 
\toc3 Tit 
\mt1 PAULO ENA URIURI TITO ENANA  
\c 1  
\s1 Hari dubu hari dubu, itaitawataidi eo woeawoeaidi lauheatana.  
\p
\v 1 Paulo, Eaubada ena heaheari tauna, eo Iesu Keriso ena aposotolo, Eaubada ena hinehineri tataodi edi sunuma bena ea sagulaei, eo mamohoina edi itaitalobaina hinage, arinai Eaubada ta nanabuei,  
\v 2 mauri i lau e nige nosina ta sunsunumaei wa, doha Eaubada ia taba nige i boraida, ia ede i ribahesunumaedao, mumuga eai i laoma ina;  
\v 3 abotai, iabom ena huia eai, ena riba i hemasaraha, iaede se leama eau bena tauhemasarahana, doha Eaubada Tauhemaurida i lauhesomgu ta;   
\p
\v 4 Tito enam ina, natugu mamohoi e, eda sunuma esegana ede:  
\q1 Ainauia eo loni enam, Eaubada arinai i laoma, eo Keriso Iesu Tauhemaurida hinage.   
\p
\v 5 Kerete eai ea laugabaem paana ede ina, ginauri headi metai se abihedeha, oa bena u heduduraidi, eo babadayao bena u tauribaedi, hari eanua hari eanua eai, doha am paisoa ea hetorom;  
\v 6 aitea tau nige edi aba‐hegiruna, sine esega mo monena, nanatunayao hinage se awaabi eo taba nige se hegirudi si ene se hemanabara e se miamia gaibu.  
\v 7 Paana Tau‐woeawoea tabu edi aba‐hegiruna, ia Eaubada ena ginauri tauhepahepaisoaina, bena nige i tanuagauioi, nige i ouyalayala heula, nige taunomnomdaoi, nige i aiaipidiri, taba nige moni biibiina arinai se hegadolesa.  
\v 8 Na ena laulau mo tatao i haihaitalaidi, ia abilolo taugadosisiena, eo iabom ena gadosisi abina i ata i tanuagaedi, ena abi se dudurai, tau tabuna, miamia lolo taunanabuena.  
\v 9 Riba mamohoina se heatada wa i sogohididini, arinai abo abina i ata lauheata mamohoi i laulauheata, eo ena riba tauheuio edi riba i hemaisadi to se italobai.  
\v 10 Paana tauawayagara se gamagari, tauribariba gaibu, tauboraborasom, tauperitome pelena wa boeana eai se gamagari ariri;  
\v 11 bena ta oihemonoudi, isi numa headi taumiaidi maudoidi se heasibuidi, ginauri nige i lolo se ribaribaedi iaede se laulauheata, moni biibiina debana eai.  
\v 12 Doha isi edi eanua tauna i ribaei, isibom edi peroveta wa, ena riba i ene, “Kerete tataodi kamanidi se boraborasom, sarai baaeadi isi, se miamia gaibu, se aiaisom.”  
\v 13 Ina riba sanapu ta mamohoi. Arinai u ribasuuidi, u riba adidiri, bena sunuma ta se abi‐mamohoiei,  
\v 14 tabu Iudea edi piripiridae se ataatai‐lau aridi eai, e tatao dobila mamohoi se tausuaraeyao edi riba‐hesom se awaabiedi.  
\v 15 Tau‐nuaaa arinai ginauri gamagaridi se aa mo, na tatao nuadi se hebiidio, eo nige se awaawamamohoi, isi matadi eai nige ginauri esau i aa; nuadi eo nuatu aba‐heduduraina nuaboeadi eai, se bii gogo.  
\v 16 Edi riba si ene Eaubada abina se ata, na edi paipaisoa eai ia se harerei; isi taukabakabaleadi, tauawayagara, nige gonoadi paisoa lolona esau se ginauri.   
\c 2  
\s1 Lauheata: Eaubada ena pele suina eo woeaina.  
\p
\v 1 Na oa mo ginauri saha eo saha se patulau lauheata mamohoina arinai, te‐meta abo u ribaribaedi.  
\v 2 Tautaubada bena se mia komakomani, se italobai, nuadi se taru, sunuma eo gadosisi eo taubiga se abimaodaidi.  
\v 3 Sinesinebada hinage doha, bena edi laulau eai se heaheasisi, nige dodoga se hebahebaaeadi edi gigimasi eai, nige nomnom‐waina i auaudi; na saha i lolo mo, iaede bena se laulauheataei,  
\v 4 abo isimurimurita sisinedi se heata komakomanidi bena monediyao se gadosisiedi eo nanatudiyao se gadosisiedi.  
\v 5 Bena se sibasiba, tau‐miamia aa, isibom edi numa‐alo eai se paipaisoa, edi abi se lolo, isibom monediyao se awaabiedi, arinai Eaubada ena riba bena tabu tatao edi aba‐ribabaaeaina.  
\v 6 Hinage doha, tatao hewahewari u lauhasahasaidi bena isi nuadi se tanuagaedi.  
\v 7 Ginauri gamagaridi eai oa iilam eo em paipaisoa lolodi bena i hemala edi tautau; em lauheata eai abi mamohoi eo nuatu duduraina eai u hemasarahauioim,  
\v 8 em ribariba se lolo arinai taba nige se hepilipilidi, arinai ena esau bena i tauguduim abo i taumaeamaea, nige aba‐ribabaaeaida esau i lobai.  
\v 9 Tauauau tataodi u lauhasahasaidi bena ginauri gamagaridi aridi eai tanuagadiyao se awaabiedi eo nuadi se helolodi, eo tabu se oioipili.  
\v 10 Tabu edi ginauri se abi gaibuidi, na adi paisoa lolodi debadi eai abo tanuagadiyao se sunumaedi, eo Eaubada Tauhemaurida lauheatana abo se mia helolo.   
\p
\v 11 Paana Eaubada ena ainauia i taumasarahao, tatao gamagaridi edi mauri i leama,  
\v 12 i heatada bena Eaubada mia‐murimuriena, eo tanoubu ta gadosisina, nuada eai ta aiduiedi, na ina huia ta ta mia komakomani, ta mia dudurai, Eaubada ta nanabuei tanoubu eai ta.  
\v 13 Sunuma nua woiwoinana wa, iaede eda Eaubada lailaina, Tauhemaurida Iesu Keriso, ana tepo namanamarina abo i taumasaraha, ede ta bagibagiei.  
\v 14 Ia i moseuioi ita debada eai, bena baaea gamagamagari aridi eai i unehaida, i heaada iabom enana, iabom ena tataoyao mamohoi, iabom ana gogo, ita wa paisoa lolodi aridi eai taunuahai.   
\p
\v 15 Ginauri ta u lauhasahasaidi, u ribasuu, u riba doha tanuaga ena ribariba. Tabu tau esau i nuatuhegagirim.   
\c 3  
\p
\v 1 Nuadi u hesae, basileia tanuagadi eo aidobudi emi tanutanuaga, se awaabiedi. Se nonoha paisoa lolo gamagaridi aridi eai bena se soasoari,  
\v 2 tabu tau esau se ribabaaeai, tabu se haihaiawayagara, na se taubiga mo, edi manabiga abo i masaraha tatao gamagaridi aridi eai.  
\v 3 Paana ita hinage nabada wa ribada se walolo, ta awayagara hinage, se woea‐ponorida, hari gadosisi eo aba‐kode udoi udoi ta heayaiedi, nua‐ealayala boeana eai ta mimia eo aiaromagigiri, se hewaiunueda ita hinage tauhewahewaiunu.  
\v 4 Na Guiau Tauhemaurida ena taubiga, eo ena gadosisi abiabilolona i masaraha eo ta ita,  
\v 5 i tua‐hemaurida wa, nige ita eda paipaisoa e eda laulau dudurai debadi eai, na ia ena nuatoatoa debana eai mo, se labauioida wa deuri‐heaana eai, eo heharihariu Earua Tabuna boeana eai,  
\v 6 iaede i hegoi‐auri potada eai, ta abi‐helai Tauhemaurida Iesu Keriso debana eai;  
\v 7 ena ainauia debana eai se heduduraidao, ta hemala ena gogo taubina, iaede eda sunusunuma mauri nige nosina.  
\v 8 Riba mia‐tahitahina ina.  
\p Ea henua riba ta u riba‐headidiri, arinai abo Eaubada tauataiena se komani se moseuioidi paisoa lolodi se laelaedi. Ginauri ta se lolo, tatao aba‐saguidi ede.  
\v 9 Na hesio eauyaure si otawa, eo isi‐baguna esadi leledi, eo haisaesae, eo laugagaeo ribadi haiawayagaradi: meta nige tatao aba‐saguidi, nige aniodi.  
\v 10 Aitea tau lauheata borabora i hetubu, ma‐esega, ma‐labui u ribahesanapuei, murina eai tau doha ina besi, u laugabaei.  
\v 11 U nuatui ena laulau se gewagewa, baaea i ginaginauri, iabom ribahematena i ribaeuioi.   
\p
\v 12 Sora ena Aretema ea hetamariyawa, e Taikika, abo u aipate adidiri u laoma arigu eai Nikapoli eai; nuagu i adidiri bena huia gogoma eau nei eai abo ea mia.  
\v 13 U aipate hinage Senasi, laugagaeo‐tauna, eo Apolo, u hegeru komakomanidi ena se torohai edi adau eai; tabu ginauri esau se deha.  
\v 14 Eda tataoyao bena abina se ata se paisoa lolo, abo gonoadi porohe udoi udoi se baheidi, ma‐uauadi eai se laulau.   
\p
\v 15 Isi gamagaridi wau‐ta maeguyao ina se lautoiem. Metai hinage taugadosisiemai sunuma boeana eai ta, enamai u lautoiedi.  
\p Ainauiana i mia‐taunimiu, omi gamagarimiu. Amen.\f + \fr 3.15 \ft Nikapoli, Makedonia eai, se uri Tito enana. Ia se hetoro Tau‐woeawoea bagubagunana ekalesia Kerete eai i itawataidi.\f*