\id JOS  
\ide UTF8
\h IOSUA 
\toc1 Iosua Bukana 
\toc2 Iosua 
\toc3 Iosua 
\mt1 IOSUA BUKANA.  
\c 1  
\p
\v 1 Mose, Guiau ena heaheari, ena mate murina eai, Guiau i ribalau Iosua, Nuna natuna, Mose ena heaheari arinai, i ene,   
\p
\v 3 Dimo gamagaridi aemiu aba utu ena, iaede ea lediva, doha Mose ea heriba va.   
\p
\v 4 Barabara, eo teina Lebanani eai ie tubu, i lau e saga lai Eupatari eai, Hitaiti edi tano gamagaridi, i lau e gabogabo lailai mahana ena aba dui va, emi geregere meta.   
\p
\v 5 Em mauri asubenadi gamagaridi taba nige tau esau matam eai i toro: doha eau Mose maedana, eau hinage maedam: taba nige ea boraim, taba nige ea nuagabaem.   
\p
\v 6 U adidiri abo, eo u nuakipikipi: paana oea va teina tatao enadi abo u soi, doha tamadieao aridi eai ea aigoraeao, ea ne abo ea mosedi.   
\p
\v 7 Oa mo u adidiri abo, eo u nuakipikipi ariri, bena laugagaeo ohina egu heaheari Mose i lauhesom abo u abivataidi: laugagaeo va teha tutu, eo teha seuseuri tabu u lausuaraei, em aba lau gamagamagaridi eai abo u tubu bena.   
\p
\v 8 Teina laugagaeo bukana avam eai tabu i lautom: asubena to maieona, riba va u nuanuatuidi, abo u abivataidi hinage: abo em dobila i masaraha, eo em ginauri abo se loroesegai.   
\p
\v 9 Eau ea lauhesom va, e nigee? U adidiri abo, eo u nuakipikipi: tabu u matausi, tabu aruam se loi; paana ede Guiau em Eaubada maem, em aba lau gamagamagaridi ena.   
\pi1
\v 10-11 Iosua edi babada i heribakomakomanidi, i ene, Aiai au abinonohai, asubena haiona matada eai Ioridano abo au gaeoavasi, oea va abo au abi, Guiau emi Euabada abo i reava enamiu.   
\pi1
\v 12-15 Iosua i ribalau Reubena, eo Gada, eo Manasa boganaeao tupona aridi eai, i ene, Eaubada i heaiavasimiuo, emi tano i ledivao: monemiueao, eo nanatumiueao, eo emi sarai se ota va teina oea eai ta Mose i ledivao Ioridano teina teha eai: ma alahiamiu omi tauiala gamagarimiu au gaeoavasi emi tataoeao matadi eai, au saguidi i lau e, Guiau emi tataoeao i heaiavasidi hinage, edi tano hinage se abi Guiau emi Eaubada abo i mosedi. E, abotai abo au uioma, emi tupo eai au miakomani.   
\p
\v 16 Isi Iosua se heuio, si ene, Ginauri gamagaridi u lauhesomai abo ai abidi: hari teha, hari teha u hetamarimai abo hinage ai lau.   
\p
\v 17 Doha Mose ena riba gamagaridi ai ataiedi, em riba hinage abo ai ataiei: Guiau ema Eaubada abo maem, doha hinage ia Mose maena.   
\p
\v 18 Eai to eai em laugagaeo i avaeagaraei, em riba gamagaridi aridi eai u lauhesomai nige i ataiedi, abo se unuhemate: oa mo u adidiri, eo u nuakipikipi abo.   
\c 2  
\p
\v 1 Iosua, Nuna natuna, Sitimi eai tatao labui i hetamarimodigaui, i ene, Au lau Ieriko eai, oea va au itasipoi. Isi se lau sine baaea esau, esana Rahaba, ena numa eai se lage, arinai se eno.   
\p
\v 2 Ieriko edi vasavasa se heriba si ene, Maieona ta tatao labui, Isaraela nanatunaeao se lagema, eda oea se itasipoi.   
\p
\v 3 Ieriko edi vasavasa, headi i hetamaridi Rahaba arinai i ene, Tatao va se laoma em numa eai se avasae, u woeaidima, se laoma bena eda eanua se itasipoi.   
\p
\v 4 Sine va taodi‐labui i laedi i toreamuidi, abo enaba, Tatao va se laoma arigu eai, edi aba laoma nige ea nuatui:   
\p
\v 5 Dobila guduna edi huia gudugudui va, i maieonao tatao va se pesa murimuri eai: edi lau hinage nige ea nuatui: au hemurivataheulaidi; abo au hemuridi nuana.   
\p
\v 6 Ia mo numa evana eai i woeaidi, eba, numa evana eai i torenonohaidi, boeana eai i toreamuidi.   
\p
\v 7 Tatao headi taodi‐labui va se hemuritaidi Ioridano edana eai, i lau e saga aba gaeoavasina eai: tau lau va se pesa eanua murimuri eai, gudu abo se gudui.   
\p
\v 8 Taodi‐labui sora nige se eno, sine va i avasae i laoma aridi eai numa evana eai.   
\p
\v 9 I ribalau tatao aridi eai i ene, Ea nutuiao Guiau tano ta i leava, debamiu eai matausi lailai ai hearo, eanua ta tataodi se beruberu ariri paana se matausiemiu.   
\p
\v 10 Vasa va ai ataieao doha Guiau Gabogabo Buiabuiana i hepitari matamiu eai, omi Aigupito eai au laoma va: emi laulau hinage Amoraiti edi vasavasa labui, Sihona eo Oga aridi eai, Ioridano hari teha eai, au hebaaeaaririedi va.   
\p
\v 11 Vau va ai ataieao atemai se taigari, eo nige tau esau arimai eai i adidiri, se matausiemiu: paana Guiau emi Eaubada ia gareva evana edi Eaubada, eo tanoubu hinage edi Eaubada.   
\p
\v 12 Arinai ea aibodaimiu, Guiau debana eai arigu eai au aigora, doha ea bobodiemiu ta omi abo tamagu ena numa tataodi au nuatuidi hinage, heiheinoi mamohoi abo au reama.   
\p
\v 13 Tamagu eo sinagu, rougueao eo egu dodogaeao, enadi tatao hinage abo au hemaurimai, mate eai abo au hemaurimai.   
\p
\v 14 Tatao va ia se heuio si ene, Ema mauri doha emi mauri, vau ema laoma paana taba nige u ribaribaemai va. Mamohoi Guiau oea ta i reama enamai abo ai nuatuim, mamohoi ema abi abo se loro mo arim eai.   
\p
\v 15 Arinai tomlapai eai i hedavedobedi: ena numa eanua ganana eai se abi, gana evana eai ie mia.   
\p
\v 16 I ribalau aridi eai i ene, Au lau oea tupina eai au mia, ata tatao se henaumiu va se lobaimiu, nei eai asubena haiona au miaeamui, vau tatao va se lauo hesabamiu va se uioma, abotai abo emi dobila eai au lau.   
\p
\v 17 Tatao va ia se heriba si ene, Vau aigora va ai aigora arim eai taba nige u hegirumai.   
\p
\v 18 U nuatui ai laoma oea eai ta, tomlapai eai arinai u hedavedobemai teina maina buiabuia ta u auhepatui: tamam eo sinam, eo roumeao, tamam ena numa tataodi hinage, gamagaridi u heoigogodima arim eai.   
\p
\v 19 E, esa, esa em numa eai i pesa murimuri eai i lau eda eai, ia osinana iabom i heboriri, ai nige ama giru: esa, eo esa maem numa eai aue mia ena nimadi eai se hebaaeadi ama giru meta   
\p
\v 20 Ema laoma paana ena u vasavasaei vau aigora va besi i ota va.   
\p
\v 21 Ia abo i ene, Taiede, emi riba ta nuatuvatai. Abo i hetamaridi se lau: maina buiabuiana abo i auhepatunonohai tomlapai eai.   
\p
\v 22 Se lau e, abo se lage oea tupina eai, asubena haiona nei eai se mia, i lau e tauaihenau se uio: tauhenaudi va dobila se lau e, sigasigana eai, se eooasaaidi.   
\p
\v 23 Taodi‐labui abo se uio, oea tupina eai se leta, se gaeoavasi, se laoma Iosua, Nuna natuna arinai, vasa gamagaridi ia arinai se vasavasaei.   
\p
\v 24 Se ribalau Iosua arinai si ene, Mamohoi, oea maudoudoina Guiau nimada eai i ledima, eanua tataodi gamagaridi debada eai se beruberu ariri.   
\c 3  
\p
\v 1 Mara ie uiari Iosua ie toro; Sitimi se laugabaei abo Ioridano eai se lagema, ia eo Isaraela nanatunaeao gamagaridi hinage, nei eai se bava, sora nige se gaeoavasi.   
\p
\v 2 Asubena haiona se ohi, edi babadaeao se lau edi oigogo boeadi eai:   
\p
\v 3 Tatao se lauhesomdi, si ene, Guiau emi Eaubada ena ribahesunuma akena au ita, eo kohena eo Levi tataodi se bahebahei, dimo va arinai au bava au laugabaei ake va murina eai au lau.   
\p
\v 4 Tabu au lau gegesina eai, emi dobila abo i heitamiu: paana nabada va teina dobila eai ta nige au laulau arinai.   
\p
\v 5 Iosua i ribalau tatao aridi eai, i ene, Au hetabuemiu: maraitom laulau noonoodi Guiau abo i hetubudi boeamiu eai.   
\p
\v 6 Iosua i ribalau kohena tataodi aridi eai i ene, ribahesunuma akena au abi, tatao matadi au gaeoavasi. Isi ribahesunuma akena se abi tatao matadi eai se lau.   
\p
\v 7 Guiau i ribalau Iosua arinai, i ene, Vau ta Isaraela gamagaridi matadi eai abo ea hedebasaem, abo se nuatui doha eau Mose maena, eau hinage abo maem.   
\p
\v 8 Kohena tataodi ribahesunuma akena taubahebahei u lauhesomdi u ene, Ioridano goilana laopaana eai au lage, abo au totoro Ioridano eai.   
\p
\v 9 Iosua i ribalau Isaraela nanatunaeao aridi eai i ene, Au laoma, Guiau emi Eaubada ena riba au ataiei.   
\p
\v 10 Teina ta arinai abo au nuatui Eaubada maumaurina maemiu: hari tatao, hari tatao, matamiu eai taba i henaudi, Kanana tataodi, eo Haivaiti, eo Peresaiti, eo Gegasaiti, eo Amoraiti, eo Gebusaiti, abo i hetatagorigoridi.   
\p
\v 11 Ia ede tanoubu maudoudoina edi Guiau ena ribahesunuma akena Ioridano eai se heavasi matamiu eai.   
\p
\v 12 Isaraela adi bogao aridi eai tatao saudoudoi‐labui au hetorodi, hari boga tau esau, hari boga tau esau.   
\pi1
\v 13 Iosua tatao i heribadi i ene, kohena Guiau ena ake taubahebahei aedi se hebutadi Ioridano goilana eai, goila va abo i didilautom, i pei esega tupo saesaena eai.   
\pi1
\v 14 Tatao edi numa se abihaidio bena Ioridano se gaeoavasi, kohena, matadi eai ake se bahei.   
\pi1
\v 15-16 Ioridano goilana eai se lagema aedi se hebutadi, goila abo i didilautom, goila tupo dobidobi eai abo i guma: tatao abo se gaeoavasi Ieriko hanahanauna eai.   
\pi1
\v 17 Ioridano duaduarina eai kohena ake taubahebahei se totoro. Isaraela gamagaridi tano pitapitarina eai se gaeoavasi, i lau e, se gaeoavasiohi.   
\c 4  
\p
\v 1 Tatao gamagaridi Ioridano eai se gaeoavasieao, Guiau i ribalau Iosua arinai, i ene.   
\p
\v 2 Tatao saudoudoi‐labui u hetorodi hari bogao tau esega, hari bogao tau esega.   
\p
\v 3 U lauhesomdi, u ene, Ioridano duaduarina eai kohena va edi aba totoro, veu saudoudoi‐labui au abidi, au bahedi, iboni emi aba eno au toredi.   
\p
\v 4 Iosua tatao‐saudoudoi‐labui va i eogaidi, isi Isaraela nanatunaeao aridi eai i hetorodi va, hari bogao tau esega, hari bogao tau esega.   
\p
\v 5 Iosua ie ribalau aridi eai, i ene, Guiau emi Eaubada ena ake matana eai au gaeoavasi, esau, esau ena veu dobaiarona eai i laei, doha Isaraela nanatunaeao adi bogao ta hasiridi:   
\p
\v 6 Emi heiheinoi teina, maraitom‐asubena nanatumiueao se oimuri si ene, Teina veu aisana?   
\p
\v 7 Abo au heuioidi, au ene, Guiau ena ribahesunuma akena se heavasi Ioridano eai, goila i didilautom, teina veu ta Isaraela nanatunaeao edi aba nuanuatuina i lau e, nige nosina.   
\p
\v 8 Isaraela nanatunaeao Iosua ena riba se lauvataidi, Ioridano duaduarina eai veu saudoudoi‐labui se abidi, doha Guiau Iosua i heriba, adi bogao saudoudoi‐labui se hegonoahidi, se laedi edi aba eno eai, nei eai se toredi.   
\p
\v 9 Iosua veu saudoudoi‐labui Ioridano duaduarina eai i tarinidi, kohena va ribahesunuma akena taubahebahei edi abo totoro va arinai se otahai, i laoma, i laoma e, huia ta.   
\p
\v 10 Kohena ake taubahei Ioridano duaduarina eai se totoro i lau e, ginauri gamagaridi Guiau Iosua i lauhesom va tatao i heribaheohi, eo Mose hinage Iosua i lauhesom va i heribaheohidi: abo tatao se gaeoavasiheulai.   
\p
\v 11 Tatao gamagaridi se gaeoavasiohieao abo Guiau ena ake se laei, eo kohena tataodi se gaeoavasi hinage tatao matadi eai.   
\p
\v 12 Reubena nanatunaeao, eo Gada nanatunaeao, eo Manasa boganaeao tupona, Isaraela nanatunaeao matadi eai se gaeoavasi, doha Mose i heribadi.   
\p
\v 13 Tatao tausani tatao‐labui Guiau matana eai se gaeoavasi, se lau Ieriko gonuna eai.   
\p
\v 14 Nei asubenana ne Guiau Iosua i hedebasae Isaraela gamagaridi matadi eai, ia se heasisiei, doha Mose se heasisiei ena mauri asubena gamagaridi eai.   
\p
\v 15 Guiau i ribalau Iosua arinai, i ene,   
\p
\v 16 Kohena, ribahesunuma akena taubahebahei u lauhesomdi, isi Ioridano eai se gaeosaema.   
\p
\v 17 Arinai Iosua kohena i lauhesomdi, i ene, Ioridano eai au gaeosaema.   
\p
\v 18 Kohena, Guiau ena ribahesunuma akena taubahebahei, Ioridano duaduarina eai se gaeosaema se totoro tano pitapitarina eai, Ioridano goilana edi dobila abo se lauvatai, laopaana se heboriri doha bagubaguna va.   
\p
\v 19 Navarai heesegana eai, asubena hesaudoudoina eai, tatao Ioridano eai se gaeosaema Giligali eai se mia, Ieriko tupo aruabo eai.   
\p
\v 20 Veu va saudoudoi‐labui Ioridano eai se abidi va, Iosua Giligali eai i tarinidi.   
\p
\v 21 I ribalau Isaraela nanatunaeao aridi eai i ene, Maraitom‐asubena nanatumiueao tamadi se oimuridi si ene, Teina veu aisadi?   
\p
\v 22 Nanatumiueao abo au heribadi au ene, Teina Ioridano eai Isaraela tano pitapitarina eai se gaeoavasi.   
\p
\v 23 Paana Guiau emi Eaubada, matamiu eai Ioridano goiladi i hegumadi, i lau e, au gaeoavasi, doha hinage Guiau emi Eaubada ena laulau matamai eai Gabogabo Buiabuia i hepitari i lau e, ai gaeoavasi:   
\p
\v 24 Bena tatao gamagaridi tanoubu eai ta Guiau nimana abo se nuatui, si ene i didiga, omi hinage bena Guiau emi Eaubada au matausiei nige nosina.   
\c 5  
\p
\v 1 Amoraiti tataodi edi vasavasa gamagaridi Ioridano teha lalasi eai, so Kanana edi vasavasa gamagaridi hinage gabogabo tehana eai, vasa va se ataieao Guiau Isaraela nanatunaeao matadi eai Ioridano goiladi i hepitaridi, i lau e, se gaeoavasieao, nuadi se beruberu ariri, eo arudi se loi; Isaraela nanatunaeao se matausidi.   
\pi1
\v 2-9 Isaraela nanatunaeao Aigupito se laugabaei se heperetomedio: isi gamagaridi barabara eai se mateo va. Isi Kanana taulagema barabara eai se labasidi sora nige se heperetomedi. Arinai Guiau i ribalau Iosua arinai i ene, Isaraela nanatunaeao u heperetomedi. Gamagaridi abo se heperetomedi.   
\p
\v 10 Isaraela nanatunaeao Giligali eai se miamia, asubena hesaudoudoi‐hasina eai pasova se ai Ieriko gonuna eai.   
\p
\v 11 Pasova se ai e, maraitom nei eanua godibuna se aidi, keki nige obue se tore hinage, eo godibu se gabu hinage nei asubenana eai.   
\p
\v 12 Maraitom hinage nei eanua godibuna se ai, mana abo i lautom, Isaraela nanatunaeao mana nige se aiuio: Kanana tanona aiaina meta borimai abo se aidi.   
\p
\v 13 Iosua Ieriko hanahanauna eai i toro, i sanaloro, tau esau i ita nuanuana eai i totoro ena elepa nimana eai i abi nonohai. Iosua i lau ia arinai, i ribalau i ene, Abo u saguimai e, ama vaiunu abo u saguidi?   
\p
\v 14 I ene, Nigee, eau Guiau moutuana edi kapena ede ea laoma ta. Iosua tano eai ie guri matana eai i aihelahui, i ribalau ia arinai i ene, Egu Guiau ena heaheari arinai i ene edoha?   
\p
\v 15 Guiau moutuana edi kapena Iosua i heriba i ene, Em aeum u abihaidi: em aba toro ta ie tabuna. Iosua ena aeum i abihaidi.   
\c 6  
\p
\v 1 Ieriko gudadi se guduguduidi paana Isaraela nanatunaeao: nige tau esau i pesa, eo nige tau esau i avasae.   
\p
\v 2 Guiau i ribalau Iosua arinai i ene, Ieriko nimam eai abo ea reava, eo edi vasavasa hinage, edi tatao iala adidiri hinage.   
\p
\v 3 Omi tauiala gamagarimiu eanua va abo au hetaiiri. Asubena haligigi‐esega hinage eanua abo u hetaiiri.   
\p
\v 4 Kohena tataodi haligigi‐labui ake matana eai bogigi haligigi‐labui mamoe taumoana donadi se laedi: asubena hehaligigi‐labuina eai eanua abo au hetaiiri ma haligigi‐labui, kohena va bogigi se iuhidi.   
\p
\v 5 Isi mamoe donadi bogigidi se iuhidi adidiri, arinana au ataiei tatao gamagaridi abo se wowo adidiri: eanua ganana abo i beugorigoriesegai, tatao abo se avasae, esau, esau, matana eai i laududurai.   
\p
\v 6 Iosua, Nuna natuna, kohena i eogaidi i ribalau aridi eai i ene, Ribahesunuma akena au abihai, kohena haligigi‐labui au hetorodi bogigi mamoe donadi haligigilabui Guiau ena ake matana eai se laedi.   
\p
\v 7 Eo i ribalau tatao aridi eai i ene, Au lau eanua au hetaiiri, isi tatao ma alahiadi se lau Guiau ena ake matana eai.   
\p
\v 8 Iosua tatao aridi eai i ribalautom abo kohena haligigi‐labui mamoe donadi bogigidi se abidi va Guiau matana eai se lau, bogigi se iuhidi: Guiau ena ribahesunuma akena i hemuridi.   
\p
\v 9 Tauiala ma alahiadi, kohena bogigi se iuhidi matadi eai se lau, isi se murimurita ake murina eai se laoma, kohena va se baguna bogigi se iuhidi.   
\p
\v 10 Iosua tatao i lauhesomdi i ene, Tabu au wowo, tabu arinamiu, tabu avamiu au dabari i lau e, asubena esau ea heribamiu ea ne au wowo, e abo au wowo.   
\p
\v 11 Guiau ena ake eanua i hetaiiri ma esega: se uioma edi aba miamia eai, arinai se bava.   
\p
\v 12 Mara‐ie‐tom Iosua i toro heuheula, kohena Guiau ena ake se abihai.   
\p
\v 13 Kohena haligigi‐labui mamoe donadi bogigidi se abidi, huia gamagari se lau Guiau ena ake matana eai, bogigi se iuhidi: eo tatao ma alaalahiadi se bagubagunaedi, isi se murimuritama, Guiau ena ake murina eai se laoma, kohena se laulau, eo bogigi se iuhidi.   
\p
\v 14 Asubena helabuina eai ma esega eanua se hetaiiri abo se uio edi aba mia eai: hinage se abi doha nei asubena haligigi‐labui.   
\p
\v 15 Asubena hehaligigi‐labuina eai, mara‐ie‐tom se toro heuheula, ma haligigi‐esega eanua se hetaiiri, nei asubenana ne ma haligigi‐labui eanua se hetahetaiiri.   
\p
\v 16 Se hetaiiri ma haligigi‐labui va kohena bogigi abo se iuhidi, Iosua i ribalau tatao aridi eai i ene, Au wowo: Guiau eanua ta i reava.   
\p
\v 17 Eanua ta abo se goraei, eanua, eo ginauri gamagaridi boeana eai Guiau enana: Rahaba, sine baaea va, iabom abo i mauri, ia, eo helena tau mia gamagaridi hinage, paana tatao ta hetamaridi va i toreamuidi.   
\p
\v 18 Au nuatui ginauri se goraidio tabu au abidi, ginauri baaea au abidi ata au baaea hinage, Isaraela maudoudoina ata au hebaaeadi hinage.   
\p
\v 19 Ario, eo auro, barasi, eo poasi kaputi gamagaridi Guiau arinai se hetabuedi: Guiau ena aba pei eai abo ta toredi.   
\p
\v 20 Kohena bogigi se iuhidi va, tatao abo se wowo: tatao bogigi arinadi, ea tatao se wowo adidiri arinadi se ataiei, eanua ganana i talopagorigori, arinai tatao eanua se avasae gaibui, esau, esau i lau dudurai matana eai, eanua va abo se girihai.   
\p
\v 21 Ginauri gamagaridi eanua eai se hebaaeadi, tau eo sine, hevahevari, eo tautaubada, bulumakau, eo mamoe, eo asina se lauelepaidi.   
\p
\v 22 Iosua tatao‐labui va nabada oea va se itasipoi, i heribadi i ene, Au avasae sine baaea va ena numa eai, sine va, eo ena ginauri gamagaridi au woealaei murimuri eai, doha ia arinai au aigorao.   
\p
\v 23 Hevahevari va, tauitasipo, se avasae numa alona eai Rahaba se woealaei murimuri eai: eo tamana, eo sinana hinage, eo rounaeao, eo ena ginauri gamagaridi, helena taumia gamagaridi se woealaedi murimuri eai, Isaraela edi aba mia murina eai se toredi.   
\p
\v 24 Eanua va oeagi alaalasina eai se gabu, eo ginauri gamagaridi boeana eai: ario, eo auro, eo barasi, eo poasi kaputi, Guiau ena numa aba peina eai se toredi.   
\p
\v 25 Iosua Rahaba, sine baaea, i abihemauri, tamana ena numa tataodi hinage, eo ena ginauri gamagaridi, Isaraela aridi eai ie mia i laoma, i laoma, e, teina asubena eai ta, paana tauitasipo Iosua i hetamaridi Ieriko bena se itasipoi, i toreamuidi.   
\p
\v 26 Nei huiana ne Iosua i lauhesomdi i ene, Ena tau esau maraitom asubena teina eanua, Ieriko, i abiuio, Guiau matana eai tau va abo i baaea, numa paadi i ginauri abo natuna taubaguna i taueamui, hinage dobila gududi i toredi natuna taumurita abo i taueamui.   
\p
\v 27 Guiau Iosua maena: oea se hetaiiri ia vasana se ribaribaei.   
\c 7  
\p
\v 1 Isaraela nanatunaeao gora va laugagaeona se utusi: Akana, Kami natuna, Sabidi natuna, Seraha natuna, boga Iuda, ginauri se aigoraidi va esau i abi: Guiau Isaraela nanatunaeao i ouealaealaidi.   
\p
\v 2 Ieriko eai Iosua tatao headi i hetamaridi se lau Eae eai, Bete‐avena hanahanauna eai, Betele teha aruabo eai. I heribadi i ene, Au sae abo oea au itasipoi.   
\p
\v 3 Isi se uio Iosua arinai ia se heriba si ene, Tatao gamagaridi tabu se sae: tatao tausani labui, e tausani haiona abo se sae Eae abo se ialaidi, paisoa lailai tatao gamagaridi se sae, paana isi nige se gamagari.   
\p
\v 4 Arinai tatao doha tausani haiona abo se sae nei eai: Eae tataodi matadi eai abo se dagogorigori.   
\p
\v 5 Eae tataodi Isaraela tataodi 36 se unuidi: edi eanua va guduna eai i lau e Sibarima eai se dobi se henaudi, se unuidi: arinai tatao nuadi se vero, doha se hemala goila.   
\p
\v 6 Iosua ana ruru i purisidi, matana eai i gurisalaoba tano eai Guiau ena ake nuanuana eai, I lau e i maimailahi, ia eo Isaraela edi babada hinage ahu urudi eai se tore.   
\p
\v 7 Iosua i ene, Kapore, Guiau Eaubada e, saha hesabana teina tatao ta Ioridano eai au woeaidima Amoraiti tataodi nimadi eai u mosedi, bena u hebaaeamai? Eaubada e, i loro ena Ioridano hari teha eai ai miakomakomani.   
\p
\v 8 Guiau e, abo ea ene edoha, Isaraela se dago adi vaiunu matadi eai?   
\p
\v 9 Kanana tataodi, eo oea lailai ta taumiaidi vasa va abo se ataiei, isi abo se hetaiirimai, esamai tanoubu eai abo i lautom: saha esam lailai debana eai abo u ginauri?   
\p
\v 10 Guiau i ribalau Iosua arinai i ene, U torohai: ue saha u ota matam eai doha nei?   
\p
\v 11 Isaraela se abibaaeaemiu, egu riba hesunuma laugagaeona ea lauhesomdi va se utusi: mamohoi ginauri se goraedio se abidi, se aieahari, se boraauri hinage, ginauri va se tore edi gogo boeana eai.   
\p
\v 12 Arinai ede Isaraela nanatunaeao nige se toro adi vaiunu matadi eai, adi vaiunu se dagogabaedi paana se baaea, taba nige ea saguuioimiu sora ginauri se aigoraei va boeamiu eai se gabaebagunaei.   
\p
\v 13 U toro, tatao u heaadi, u ene, Au heaanonohaimiu i lau e maraitom: Guiau i ene ina doha, Isaraela e, ginauri se aigoraeao esau se abi edi gogo boeana eai taba nige au toro ami vaiunu matadi, eai, i lau e, ginauri va se aigoraeao boeamiu eai au abigabaei.   
\p
\v 14 Maraitom hari boga, hari boga au laoma, boga esau Guiau i abi abo se oigogo, hari bada, hari bada, abo Vasavasa Guiau i abi, se laoma hari numa, hari numa, eo abo numa va Guiau i abi, abo se laoma hari tau, hari tau,   
\p
\v 15 E, abo ia se abi ginauri va i abiao abo se gabu oeagi alaalasina eai, ia, eo ena ginauri gamagaridi hinage, paana Guiau ena ribahesunuma laugagaeona i utusi, Isaraela eai ena laulau eaueauri i abi.   
\p
\v 16 Mara‐ie‐tom Iosua i torohai Isaraela i woeaidima hari boga, eo hari boga, abo Iuda boganaeao se abi.   
\p
\v 17 Iuda edi Vasavasa i woeaidima, abo Vasavasa esau esana Saraiti se abi: Saraiti tataodi i woeaidima hari numa, hari numa, abo Sabidi se abi:   
\p
\v 18 Sabidi ena numa tataodi i abidi, tau esau, tau esau, abo Akana se abi, Sabidi natuna, Seraha natuna, Iuda boganaeao.   
\p
\v 19 Iosua i ribalau Akana arinai i ene Natugu e, Isaraela edi Guiau Eaubada u hedebasae, ia arinai em baaea ta u ribahemasaraha, em laulau aisana arigu eai u ribaei, tabu u toreamui.   
\p
\v 20 Akana Iosua i heuio i ene, Mamohoi Isaraela edi Guiau matana eai ea baaea, egu laulau doha ede ina:   
\p
\v 21 Ada vaiunu edi ginauri nimada eai se laoma va, Babalonia edi ruru lorona esau ea ita, eo ario sekela hanere labui, eo auro tupi esega, porohena sekela 50: ea henuaaririedi abo ea abidi: egu numa eai ea toreamuidi, ario va ubuna eai ea tore.   
\p
\v 22 Tatao Iosua i hetamaridi se aitautau se lau ena numa ruru eai: ginauri va numa eai se toreamuidi, eo ario va ubuna eai.   
\p
\v 23 Numa ruru va boeana eai se abidi, se laedi Iosua arinai, eo Isaraela nanatunaeao gamagaridi aridi eai, Guiau matana eai se toredi.   
\p
\v 24 Iosua, Isaraela gamagari maenaeao Akana Seraha natuna se laei, eo ario hinage, eo ruru lorona va, eo auro tupina, ia nanatunaeao, tatao eo sisine, eo ena bulumakau, ena asina, eo ena mamoe, eo numa ruru hinage se laedi Akora gonuna eai.   
\p
\v 25 Iosua i ene, Ue saha u hebaaeamai? Teina asubena ta Guiau oa hinage abo i hebaaeam: Isaraela gamagaridi veu eai ia se lauveui, abo oeagi alaalasina eai se gabudi, eo veu eai se lauveuidi.   
\p
\v 26 Ia potana eai veu se tarini peina lailai, arinai se ota i laoma e, teina huia ta. Arinai Guiau ena ouealaeala i lausuara. Arinai hinage nei dimo ne esana se tore Akora gonuna, esana i ota i laoma e, huia ta.   
\c 8  
\p
\v 1 Guiau i ribalau Iosua arinai, i ene, Tabu u matausi, tabu aruam se loi, u torohai tauiala gamagaridi maemeao au se Eae eai, Eae edi Vasavasa nimam eai abo ea reava, ena eanua tataodi hinage eo ena eanua, eo ena tano.   
\p
\v 2 Eae, eo ena Vasavasa aridi eai au abi doha hinage au abi Ieriko eo ena Vasavasa aridi eai, gogo mo abo au abi gaibui omi enamiu; eanua murina eai au vese.   
\p
\v 3 Iosua abo i torohai, iala tataodi gamagaridi maenaeao hinage, bena se sae Eae eai, se ialaidi, Iosua tataoadiadidiri 30,000 i hileidi maieona eai i hetamaridi,   
\p
\v 4 I lauhesomdi, i ene. Au lau au bavaeamui eanua murimurina eai, tabu eanua au laugabaei ariri, gamagarimiu au bava nonohai.   
\p
\v 5 Eau, eo tatao gamagaridi maegueao abo ai sae eanua ai abi: e, isi se pesama se laoma hesabamai doha lahinae va, abo ai dagogorigori matadi eai.   
\p
\v 6 (Isi abo se laolaoma se henaumai) i lau e ai woeaidi eanua murimurina eai, si ene, se dago matada eai doha lahinae va; arinai bena ai dagoedi.   
\p
\v 7 Omi emi aba vesei eai abo au torohai, eanua au girihai, paana Guiau emi Eaubada nimamiu eai eanua abo i reava.   
\p
\v 8 Eanua va abo au girihai, eanua au gabu, doha Guiau ena laugagaeo i ene abo au gabu; au nuatui, ea lauhesomiuo.   
\p
\v 9 Iosua abo i hetamaridi se lau, se lau Betele, eo Eae duaduaridi eai se bavaeamui Eae tupo lalasi eai: nei maieonana ne Iosua tatao boeadi eai ie mia.   
\p
\v 10 Maraitomtom, mahana sora, Iosua i toro tatao i hasiridi, ia maena Isaraela edi babada se sae Eae tataodi matadi eai.   
\p
\v 11 Tatao gamagaridi, tauiala gamagaridi maenaeao se sae se lage eanua hanahanauna eai, e, se abi numa Eae teha bauri eai: edi aba mia eo Eae arotauna duaduari eai.   
\p
\v 12 Tatao 5000 i laedi Beteli eo Eae duaduari eai i hebavaeamuidi eanua tupo lalasi eai.   
\p
\v 13 Tatao va se toredi, moutuadi va eanua teha bauri eai, eo tatao eanua teha lalasi eai se bavaeamui, Iosua maieona eai i dobi arotau gonuna duaduarina eai.   
\p
\v 14 Eae edi Vasavasa Isaraela i itadi abo se toroheuheula, eanua tataodi se lau Isaraela se ialaidi, ia, eo ena eanua tataodi gamagaridi hinage, gonu eai se lauesega: tatao va se bavaeamui eanua murimurina eai nige se nuatuidi.   
\p
\v 15 Iosua eo Isaraela gamagaridi se boraauridi, se woeawoeaidi arinai se dago barabara dobilana eai.   
\p
\v 16 Eae tataodi adi sasagueao gamagaridi se eogaidi bena Isaraela se henaudi, Iosua se henau arinai eanua va se laugabaei.   
\p
\v 17 Beteli eo Eae eai nige tau esega i mia, gamagaridi se lau Isaraela hesabadi: eanua se laugabaei, edi eanua dobiladi nige se gududi, Isaraela se aihenaudi, se lau.   
\p
\v 18 Guiau i ribalau Iosua arinai, i ene, Alahia nimam eai u abiisini Eae matana eai, Eae nimam eai abo ea reava. Iosua alahia nimana eai abo i abiisini Eae matana eai.   
\p
\v 19 Nimana i abiisini va tau vaseina edi aba bavaeamui eai se toroheuheula se aitautau, se avasae eanua eai, se girihai, se gabuheulai.   
\p
\v 20 Eae tataodi abo se sinibui edi eanua asuasuna se ita i sae gareva eai, nige edi dobila bena se dago, se sae, se dobi, Isaraela se dago borabora va barabara eai abo se uio tauhenaudi matadi eai.   
\p
\v 21 Iosua eo Isaraela gamagaridi se itaeao tauvesevesei eanua se girihaiao, eanua asuasuna i sae, se uio Eae tataodi se unuidi.   
\p
\v 22 Isi hinage eanua eai se lage se laoma hesabadi: arinai Isaraela Eae tataodi se hetaiiridi hari teha, hari teha se unuidi, nige esega i mia, eo nige esega i dago.   
\p
\v 23 Eae edi Vasavasa se toai abo se laei Iosua arinai.   
\p
\v 24 Isaraela tataodi oea eai Eae tataodi se unuohidi barabara eai va se henaudi va, gamagaridi se lauelepaidi abo se mateohi, Isaraela gamagaridi abo se uio Eae eai, hinage tatao eanua eai se lauelepaidi.   
\p
\v 25 Nei asubenana ne gamagaridi se mate, tatao eo sisine tausani saudoudoi‐labui, Eae tataodi abo se ohi.   
\p
\v 26 Iosua nimana eai alahia i abiisini va nige i abiuio i lau e, Eae taumiaidi gamagaridi se unuheohidi.   
\p
\v 27 Edi bulumakau, eo edi gogo mo Isaraela se abigaibuidi, doha riba va arinai Guiau Iosua i lauhesom va.   
\p
\v 28 Iosua Eae i gabuohi, eanua va i hemala venu peina, i hebaaeaaririei i laoma e, huia ta.   
\p
\v 29 Eae edi Vasavasa oeagi eai i hegadosoha i lau e, i maimailahi: mahana i dui Iosua abo i lauhesomdi i ene, Sinarena oeagi eai au abihai au gabalaei eanua dobila aba avaavasaena eai; arinai veu gamagaridi au tarinidi, hinage nei eai se ota i laoma e, huia ta.   
\p
\v 30 Ebali tupina eai Iosua hatahata tabuna i ginauri Guiau Isaraela edi Eaubada arinai,   
\p
\v 31 Doha Mose, Guiau ena heaheari, Isaraela nanatunaeao i lauhesomdi, doha Mose ena laugagaeo bukana eai se uri va, hatahata tabuna va veu tau maudoudoidi eai au ginauri, aridi eai nige tau esau poasi eai i paisoa: potana eai aitalasam gabugabudi Guiau arinai se ginauri: eo labini aitalasamdi hinage.   
\p
\v 32 Mose ena laugagaeo, Isaraela matadi eai i uridi va, Iosua vau veu eai i urivataidi.   
\p
\v 33 Isaraela gamagaridi, eo edi babada hinage, eo adi tanuaga, eo edi tauhekiraino, ake hari teha, hari teha eai se totoro: kohena, boga Levi, Guiau ena ribahesunuma akena se laei, laolaoma tataodi, eo headi boeadi eai se labasidi hinage, tupona Geresima tupina hasarina eai se totoro, eo tupona Ebali tupina hasarina eai: doha Mose Guiau ena heaheari i lauhesomnonohaidi, i ene, Isaraela tataodi arinai se aihelahuidi.   
\p
\v 34 Murina eai laugagaeo ribadi gamagaridi i hasiridi, riba lorodi, eo riba hemahematausiedi, doha laugagaeo bukana eai riba gamagaridi se uridi.   
\p
\v 35 Mose laugagaeo i lauhesomdi, nige riba esau Iosua i hebeu Isaraela tataodi aridi eai i hasiriheohidi, eo sisine, eo merumeru gagaridi, eo laolaoma tataodi maedi se sae, se dobi, riba va hinage se ataiedi.   
\c 9  
\p
\v 1 Vasavasa gamagaridi Ioridano teina teha eai, headi oea tupidi eai, eo headi gonudi eai, eo gabogabo lailai hasarina eai, Lebanona tehana eai, Hitaite, eo Amoraiti, eo Kanana, eo Peresaiti, eo Haivaiti, eo Iebusaiti, isi vasa va se ataiei.   
\p
\v 2 Abo se oigogo esega, bena Iosua eo Isaraela se ialaidi, nuadi esega mo.   
\p
\v 3 Gibeona taumiaidi Iosua ena laulau Ieriko, eo Eae aridi eai, vasana se ataiei.   
\p
\v 4 Edi nuatu borabora se nuatui arinai bena se hemala hari eanua tataodi, baeki beabeadi se toredi edi asina potadi eai, edi uaina opidi se abidi se beabea, eo se puripurisi, eo se bodibodi,   
\p
\v 5 Aedi eai ae‐um beabeadi, eo se poasidi se abidi, ruru beabeadi se ruidi, edi areto hinage i kokoeagi, eo i pohupohu.   
\p
\v 6 Isi se lau Iosua arinai, ena aba mia Giligali eai, se ribalau ia arinai, eo Isaraela aridi eai, si ene, Ema eanua eda roharoha eai ai laoma, bena ta labini.   
\p
\v 7 Isaraela tataodi se ribalau vau Hitaiti tataodi aridi eai, si ene Nuana boeamai eai aue mia, edohana abo ta labini?   
\p
\v 8 Se ribalau Iosua arinai, si ene, Em heaheari ai. Iosua aridi eai i ene, Omi haedi eai au laoma?   
\p
\v 9 Se ribalau ia arinai si ene, Em heaheari oea esau eda roharoha eai se laoma, paana Guiau em Eaubada esana ai ataiei: ia vasalaulau ai ataieao, eo ena laulau gamagaridi Aigupito eai.   
\p
\v 10 Ena abiabi gamagaridi hinage Amoraiti edi Vasavasa labui aridi eai, Ioridano hari tupo eai Sihona, Hesebona edi Vasavasa, eo Oga, Basana edi Vasavasa, Asatarota eai.   
\p
\v 11 Arinai ema babada, eo ema eanua tataodi gama garidi se ribalaoma arimai eai, si ene, Emi adaadausi alaena nimamiu eai au abi, au laubagibagiedi, au ribalau aridi eai, au ene, Emi heaheari ai: ta labini.   
\p
\v 12 Teina areto ta ema eda alaena ema numa eai ai abi ma gigiborina asubenana ne ai laoma arimiu eai, hage au ita i kokoeagi, eo i pohupohu:   
\p
\v 13 Eo teina uaina iledi hinage ma harihariudi ai hemonaudi: eo teina ama ruru, eo ae‐um ta se beabea paana ema dobila i roha ariri.   
\p
\v 14 Adi aiai ribana tatao se ataiei, nige se lau Guiau avana eai edi dobila se hesioi.   
\p
\v 15 Iosua i ava‐ehaedi, eo se labini, to se abihemauridi; Isaraela edi vasavasa aridi eai se riba aigora aridi eai,   
\p
\v 16 I lau e, asubena haiona se ohi vasa abo se ataiei isi heledi taumia, edi eanua hinage hanahanaudi eai.   
\p
\v 17 Isaraela tataodi se lau, asubena hehaionana eai edi eanua eai se lage. Edi eanua va esadi ede Gibeona, eo Sepaira, Birota, eo Keriga‐gerimi.   
\p
\v 18 Isaraela nanatunaeao nige se unuidi paana edi Vasavasa, Guiau, Isaraela edi Eaubada debana eai se aigora aridi eai. Isaraela gamagaridi edi vasavasa se monunuedi.   
\p
\v 19 Vasavasa va se ribalau Isaraela aridi eai si ene, Aridi eai ai aigora, Guiau, Isaraela edi Eaubada, debana eai: tabu ta abilau aridi eai.   
\p
\v 20 Teina mo ta abi aridi eai: ta abihemauridi baaea lailai ata ta hearo, paana aigora va arinai ta aigora aridi eai.   
\p
\v 21 Vasavasa se ribalau aridi eai si ene, Abo ta abihemauridi: taiede isi abo Isaraela edi oeagi taugedari eai se lau, eo adi goila tauoioi eai se lau: doha hinage vasavasa va se heribadi.   
\p
\v 22 Iosua i eogaidi i ribalau aridi eai, i ene, Omi saha au boraimai ta, au ene, ema eanua edadi se roha ariri, emi aba‐mia momohoi gegesimai eai?   
\p
\v 23 Taiede abo au baaea, abo ai hepaisoaimiu, omi abo egu Eaubada ena numa oeagi taugedari, eo goila tauoioi eai au lau.   
\p
\v 24 Iosua se heuio si ene, Mamohoi, ai em heaheari si heribamai si ene, Guiau, em Eaubada ena heaheari Mose i heriba oea maudoudoina abo se rediva, oea va taumiai hinage gamagaridi matamiu eai abo au unuidi, arinai ai matausiaririemiu, teina laulau ta hinage ai abi.   
\p
\v 25 Taiede, ai ede ina nimam eai, oabom em abi sahu u ene i loro, eo i dudurai u abi arimai eai.   
\p
\v 26 Arinai hinage Isaraela nanatunaeao nimadi eai i abihemauridi, nige se unuidi.   
\p
\v 27 Nei asubenana ne Iosua i hetorodi Isaraela edi oeagi taugedari, eo adi goila tauoioi, eo Guiau ena hatahata tabuna oeagina eo goilana se abi, i laoma e, teina asubena ta, dimona edi aba‐paisoa hinage i heribadi.   
\c 10  
\p
\v 1 Adonisedeka, Ierusalema edi Vasavasa, vasana i ataiei Iosua Eae i abi, eo i hebaaeaaririei: ena laulau Ieriko eo edi Vasavasa aridi eai, doha ede hinage ena laulau Eae eo edi Vasavasa aridi eai, Gibeona tataodi maedi Iosua se haiavaeha, eo se miamia Isaraela boeadi eai vasana hinage i ataiei:   
\p
\v 2 Se matausi ariri paana Gibeona eanua lailai, eo Vasavasa ena eanua esau, Eae i gagiri, Gibeona tataodi hinage se adidiri ariri.   
\p
\v 3 Arinai Adonisedeka, Ierusalema edi Vasavasa, headi i hetamaridi se lau Hohamu arinai, Heberona edi Vasavasa, eo Pirama arinai, Iamuta edi Vasavasa, eo Iapia arinai, Lakisi edi Vasavasa, eo Debira arinai, Egalona edi Vasavasa, i ene.   
\p
\v 4 Au saema arigu eai, au saguigu bena Gibeona ta ialaidi, paana ede isi maena Iosua eo Isaraela nanatunaeao se haiavaehaei.   
\p
\v 5 Arinai Amoraiti edi Vasavasa haligigi, Ierusalema edi Vasavasa, eo Heberona edi Vasavasa, eo Iamuta edi Vasavasa, eo Lakisi edi Vasavasa, eo Egalona edi Vasavasa, se lauheagogo, se sae, eo edi tauiala gamagaridi hinage, Gibeona matana eai se abi numa, se ialaidi.   
\p
\v 6 Gibeona tataodi headi se hetamaridi Iosua arinai, Giligali eai, edi aba numa‐abi, si ene, Em heaheari debadi eai tabu nimam u nuahi: u saema heula u abihemaurimai, eo u saguimai paana Amoraiti edi Vasavasa gamagaridi oea tupidi eai se mia se oigogoesegama hesabamai.   
\p
\v 7 Giligali eai Iosua i sae tauiala gamagaridi maenaeao, eo tauiala adidiri gamagaridi hinage.   
\p
\v 8 Guiau i ribalau Iosua arinai i ene, Tabu u matausidi: isi nimam eai ea lediva: taba nige tau esau matam eai i toro.   
\p
\v 9 Arinai Iosua i heula, maieona eai i lau e, mara‐i‐tom Giligali eai i sae.   
\p
\v 10 Isaraela matadi eai Eaubada i hebaaeadi: Gibeona eai gamagaridi se unuidi, se henaudi Belehorana dobilana eai, Aseka eai hinage se unuidi, i lau e, se lage Makeda eai.   
\p
\v 11 Isi Isaraela matadi eai se dagodago, se dobi Bete‐horana eai, Guiau gareva eai veu lailaidi i tudobedi potadi eai i lau e, Aseka eai, arinai se mate: tatao vau veu va aridi eai se mate se gamagari: isi Isaraela se lauelepaidi, nige doha.   
\p
\v 12 Asubenana ne Guiau Amoraiti tataodi i mosedi Isaraela tataodi aridi eai Iosua i ribalau Guiau arinai, Isaraela matadi eai i ene, Mahana e u otaesegai Gibeona potana eai; eo navarai e Agaloni arotauna eai.   
\p
\v 13 Mahana abo i otaesegai, eo navarai nige i dalasae hinage, i lau e tatao adi vaiunu se hemaisadi. Iasa ena buka eai vasa va se uri, e nigee? To mahana gareva duaduarina eai i otaesegai, asubena maudoudoina nige i dui.   
\p
\v 14 Nige asubena esau mugamugaina eo murimuritana nei doha, tau esau arinana Guiau i ataiei: paana Guiau Isaraela i ialasaguidi.   
\p
\v 15 Iosua Isaraela gamagaridi maenaeao se uio edi aba numa‐abi Giligali eai.   
\p
\v 16 Vasavasa haligigi va se dago duhana esau eai Makeda eai se bavaeamui.   
\p
\v 17 Iosua se heriba, si ene, Vasavasa haligigi va se lobaidi Makeda gudana eai.   
\p
\v 18 Iosua abo i ene, Veu nabunabutuadi au buihai guda avana eai, tatao au hetorodi bena se itavataidi.   
\p
\v 19 Omi tabu au bava inai, ami vaiunu au henaudi murina eai se dago au lubidi: edi eanua tabu se lagedi paana Guiau emi Eaubada nimamiu eai i lediva.   
\p
\v 20 I lau e, Iosua eo Isaraela nanatunaeao se iala lautom, tatao se unuidi se gamagari ariri, doha se mate ohi, headi mo se mia se lau edi eanua se ganaidi.   
\p
\v 21 Tatao gamagaridi se uio edi aba numa eai, Iosua arinai, Makeda eai, eo se labini, nige esau avana eai Isaraela i ribahebaaea.   
\p
\v 22 Iosua abo i ene, guda avana au soe, Vasavasa haligigi duha eai abo au woeaidima arigu eai.   
\p
\v 23 Ena riba se lauvatai, Vasavasa haligigi se woeaidima ia arinai: Ierusalema edi Vasavasa, eo Heberona edi Vasavasa, Iamuta edi Vasavasa, eo Lakisi edi Vasavasa, eo Egalona edi Vasavasa.   
\p
\v 24 Teina Vasavasa se woeaidi Iosua arinai, Iosua Isaraela tataodi gamagaridi i eogaidi, edi iala kapena maena se lau ia i heribadi, i ene, au laoma gegesigu eai, aemiu teina Vasavasa gedugedudi eai au ututavaidi. Si laoma ia gegesina eai aedi gedugedudi eai se ututavaidi.   
\p
\v 25 Iosua i heribadi i ene, Tabu au matausi, tabu aruamiu se loi, au adidiri eo au nuakipikipi, ina doha hinage Guiau abo i abi ami vaiunu gamagaridi aridi ena.   
\p
\v 26 Murina eai Iosua i lubidi, eo i unuidi oeagi haligigi aridi eai i hegadosohadi, se ota i lau e, i maimailahi.   
\p
\v 27 Mahana i dui Iosua i lauhesomdi, oeagi eai se abihaidi, se gabalaedi vau duha va alona eai, arinai se bavaeamui veu nabunabutuadi duha avana eai se toredi, hinage nei eai se ota i laoma e asubena ta.   
\p
\v 28 Nei asubenana ne Iosua Makeda i abi i lauelepaidi, edi Vasavasa hinage i unui, isi tatao gamagaridi, nige esega i mia: ena laulau Makeda edi Vasavasa arinai doha hinage ena laulau Ieriko edi Vasavasa arinai.   
\p
\v 29 Iosua eo Isaraela gamagaridi maenaeao Makeda se laugabaei se lau Libina, Libina se ialaidi.   
\p
\v 30 Guiau Isaraela nimadi eai Libina i mosei, eo edi Vasavasa hinage: se lauelepaidi, tatao gamagaridi boeana eai si unuidi; nige tau esau arinai ie mia: ena laulau edi Vasavasa arinai doha hinage ena laulau Ieriko edi Vasavasa arinai.   
\p
\v 31 Iosua, eo Isaraela gamagaridi maenaeao Libina se laugabaei, Lakisi eai se lagema matadi eai se abi‐numa, se ialaidi.   
\p
\v 32 Guiau Lakisi Isaraela nimadi eai i mosei, asubena helabuina eai se abi se lauelepaidi, tatao gamagaridi hinage boeana eai se unuidi, doha edi laulau Libina eai.   
\p
\v 33 Horama, Gesa edi Vasavasa abo i laoma Lakisi bena i saguidi: Iosua ia hinage, eo ena eanua tataodi i lauelepaidi nige esau i mia.   
\p
\v 34 Iosua, eo Isaraela gamagaridi maenaeao Lakisi se laugabaei, Egalona eai se lagema, matadi eai se abi‐numa, eo se ialaidi.   
\p
\v 35 Nei asubenana ne Egalona se abi, se lauelepaidi, tatao gamagaridi eanua boeana eai se unuheohidi, doha hinage edi laulau Lakisi aridi eai.   
\p
\v 36 Iosua eo Isaraela gamagaridi maenaeao Egalona eai se sae, se lau Heberona eai se ialaidi.   
\p
\v 37 Heberona se girihai, edi Vasavasa, eo edi eanua gamagaridi, eo tatao gamagaridi boeadi eai se lauelepaidi, nige tau esau ie mia, i hebaaeaaririedi tatao gamagaridi i unuidi, ena laulau doha hinage ena laulau Egalona aridi eai.   
\p
\v 38 Iosua, eo Isaraela gamagaridi maenaeao abo se uio: se lagema Debiri eai se ialaidi   
\p
\v 39 Debiri se girihai eo edi Vasavasa, eo edi eanua gamagaridi hinage: se lauelepaidi, tatao gamagaridi se unuidi, nige tau esau ie mia: ena laulau Debiri aridi eai eo edi Vasavasa arinai, doha hinage ena laulau va Libina aridi eai eo edi Vasavasa arinai.   
\p
\v 40 To Iosua oea tupidi eanuadi i heguridi, eo eanua headi teha eavana eai eo gonu eanuadi, eo goila i bunubunuasi eanuadi, eo edi Vasavasa hinage, nige tau esau i mia, isi gamagaridi se eahua i unuhematedi, doha Guiau Isaraela edi Eaubada i lauhesomdi.   
\p
\v 41 Iosua i lauelepaidi Kadesa‐banea sigasigana i lau e Gasa eai, eo Gosena oea maudoudoina eai i lau e Gibeona eai.   
\p
\v 42 Teina Vasavasa gamagaridi, eo edi tano hinage huia esega Iosua i abidi paana ede Guiau, Isaraela edi Eaubada, Isaraela i ialasaguidi.   
\p
\v 43 Iosua, eo Isaraela gamagaridi maenaeao se uio, edi aba numa‐abi Giligali eai.   
\c 11  
\p
\v 1 Iabini, Hasoa edi Vasavasa va i ataiei headi i hetamaridi Iobaha, Madona edi Vasavasa, eo Simirona edi Vasavasa, eo Asapa edi Vasavasa aridi eai.   
\p
\v 2 Vasavasa headi hinage oea tupi roharoha teha bauri eai, eo Vasavasa headi gonu eai Sinerota teha eavana eai, eo headi hinage arotau eai, eo Doa sigasigana eai, teha lalasi eai.   
\p
\v 3 Eo Kanana teha aruabo, eo teha lalasi, eo Amoraiti, eo Hitaiti, eo Peresaiti, eo Iebusaiti oea tupidi eai, eo Haivaiti Hemoni ubuna eai, Misepa oeana eai.   
\p
\v 4 Isi se lau, isi eo edi tauiala moutuadi hinage, tatao se gamagari, mamohoi isi doha geregere gabogabo hasarina eai se gamagari ariri, eo hosi, eo kariota se gamagari ariri.   
\p
\v 5 Teina Vasavasa gamagaridi se oigogo‐esega se laoma se abi‐numa Meroma goilana eai, Isaraela bena se ialaidi.   
\p
\v 6 Guiau i ribalau Iosua arinai i ene, Isi tabu u matausiedi; maraitom, mahana doha ede ina, se mateohi abo ea mosedi Isaraela matadi eai; edi hosi abo au nigoidi, edi kariota abo oeagi eai au gabudi.   
\p
\v 7 Iosua abo i laoma, eo tauiala gamagaridi maenaeao, i hetagugudi Meroma goilana eai, se ialaidi.   
\p
\v 8 Guiau Isaraela nimadi eai i mosedi, to se lauelepaidi, eo se henaudi se lau e Sidona eai se lage, eo Misirepota‐maima eai se lage, eo Misepa teha aruabo arotauna eai se lage, se lauelepaidi i lau e nige esega i mia.   
\p
\v 9 Iosua Guiau ena riba gamagaridi i lauvataidi: edi hosi i nigoidi, eo edi kariota oeagi eai i gabudi.   
\p
\v 10 Nei asubenana ne Iosua i uio abo Hasoa i girihai, elepa eai edi Vasavasa i unui: beabeana Hasoa va teina basileia gamagaridi i sae tavatavaidi.   
\p
\v 11 Isi tatao gamagaridi boeana eai se lauelepaidi se unuhematedi: nige esau i mia i eahua: Hasoa hinage i gabu.   
\p
\v 12 Vau Vasavasa va edi eanua gamagaridi, eo edi Vasavasa hinage Iosua i girihaidi i lauelepaidi, i hebaaeaaririedi, doha Mose, Guiau ena heaheari, i lauhesomdi.   
\p
\v 13 Eanua lailai headi Isaraela sora nige se gabudi, Iosua Hasoa mo i gabu.   
\p
\v 14 Teina eanua edi gogo, eo edi bulumakau, Isaraela nanatunaeao se abigaibuidi isi isibom edi ginauri: tatao mo gamagaridi se lauelepaidi, nige tau esau i mia i eahua.   
\p
\v 15 Doha Guiau ena heaheari Mose i lauhesom, Mose hinage Iosua i lauhesom, Iosua hinage i abivatai: ginauri gamagaridi Guiau Mose i lauhesom va Iosua i abiheohidi.   
\p
\v 16 Arinai Iosua oea i girihaiohi, oea tupidi, eo oea maudoudoina teha eavana eai, Gosena oeana maudoudoina, eo arotau eo gonu, eo Isaraela edi oea, eo edi gonu.   
\p
\v 17 Halaki tupina eai i sae Seia eai, i lau e Balagada eai, Labanona arotauna eai, Heamona tupina ubuna eai: edi Vasavasa gamagaridi i abidi, i lauelepaidi, i unuidi hinage.   
\p
\v 18 Teina Vasavasa gamagaridi aridi eai Iosua huia roharoha eai i ialaidi.   
\p
\v 19 Nige eanua esau Isaraela maena se labini: Haivaiti tataodi isibom Gibeona taumiaidi: gamagaridi se ialaidi, eo se girihaidi.   
\p
\v 20 Paana ede Guiau nuadi i heoiuradi, bena se laoma Isaraela se ialaidi, ia abo i hebaaeaaririedi, nige i nuatuidi; bena i hebaaeadi mo, doha Guiau Mose i lauhesom.   
\p
\v 21 Nei huiana ne Iosua i laoma Anakimi tataodi bena i helautomdi oea tupidi eai, eo Heberona eai, Debiri hinage, eo Anabi, eo Iueda oea tupidi eai, eo Isaraela oea tupidi eai: Iosua i hebaaeaariedi, eo edi eanua hinage.   
\p
\v 22 Isaraela nanatunaeao edi tano eai nige Anakimi esau i mia; headi mo se mia Gasa eai, eo Gati eai, eo Asidodi eai.   
\p
\v 23 Tano maudoudoina Iosua i girihai, doha hinage riba gamagaridi Guiau i ribalau Mose arinai: Iosua abo i mosei Isaraela aridi eai, boga esau enana, eo boga esau enana, oea eai va se iala lautom.   
\c 12  
\pi1
\v 1-5 Teina peina eai Vasavasa gamagaridi va Isaraela se unuidi, eo edi tano se girihaidi va esadi se uridi.  
\pi1 Ioridano hari tupo eai, Sihona, Amoraiti edi Vasavasa, eo Oga, Basana edi Vasavasa.   
\p
\v 6 Mose Guiau ena heaheari, eo Isaraela nanatunaeao se unuidi: Mose Guiau ena heaheari, edi tano i mosei Reubena, eo Gada, eo Manasa tupona aridi eai.   
\p
\v 7 Iosua eo Isaraela nanatunaeao teina Vasavasa gamagaridi se unuidi Ioridano teina teha eai, teha lalasi, Balagada eai, Lebanona arotauna eai, i lau e Halaki tupina eai, i sae Seia eai: edi tano va Iosua abo i mosei Isaraela adi bogao aridi eai, hari boga enana, hari boga enana.   
\pi1
\v 8-24 Ieriko edi Vasavasa,  
\li1 Eae edi Vasavasa, (Betele hanahanauna eai)  
\li1 Ierusalema edi Vasavasa,  
\li1 Heberona edi Vasavasa,  
\li1 Iamuta edi Vasavasa,  
\li1 Lakisi edi Vasavasa,  
\li1 Egalona edi Vasavasa,  
\li1 Gesa edi Vasavasa  
\li1 Debiri edi Vasavasa,  
\li1 Gederi edi Vasavasa,  
\li1 Hoama edi Vasavasa,  
\li1 Aradi edi Vasavasa,  
\li1 Libina edi Vasavasa,  
\li1 Adulama edi Vasavasa,  
\li1 Makeda edi Vasavasa,  
\li1 Betele edi Vasavasa,  
\li1 Tapua edi Vasavasa,  
\li1 Hepera edi Vasavasa,  
\li1 Apeka edi Vasavasa,  
\li1 Lasarona edi Vasavasa,  
\li1 Madona edi Vasavasa,  
\li1 Hasoa edi Vasavasa,  
\li1 Simirona merona edi Vasavasa,  
\li1 Asapa edi Vasavasa,  
\li1 Tanako edi Vasavasa,  
\li1 Megido edi Vasavasa,  
\li1 Kedesa edi Vasavasa,  
\li1 Tokanaim edi Vasavasa,  
\li1 Doa edi Vasavasa,  
\li1 Giligali edi Vasavasa,  
\li1 Tirisa edi Vasavasa,  
\m gamagaridi tauesega‐i‐mate‐saudoudoi‐esega.   
\c 13  
\p
\v 1 Iosua i tautaubadao, ena borimai se gamagari: Guiau i ribalau ia arinai i ene, U tautaubadao, eo em borimai se gamagari, sora tano lailai nige au abiheohi.   
\pi1
\v 2-6 Tano va sora nige se abi va anasigasiga Guiau Iosua i heriba.   
\p
\v 7 Tano ta abo au soi boga haligigi‐hasi aridi eai, eo Manasa boganaeao tupona arinai.   
\p
\v 8 Reubena, eo Gada, eo Manasa boganaeao tupona, edi oea se abiao, Mose i mosedi va, Ioridano hari teha eai, tupo aruabo eai, doha Mose Guiau ena heaheari i mosedi.   
\pi1
\v 9-13 Vau Reubena, eo Gada, eo Manasa boganaeao tupona, edi oea sigasigadi Iosua i ribaedi.   
\p
\v 14 Levi boganaeao mo oea nige i mosedi, Guiau, Isaraela edi Eaubada ena aitalasam oeagi alaalasina eai se ginauridi enadi meta, doha hinage i heribadi.   
\pi1
\v 15-23 Reubena boganaeao edi oea sigasigadi se uridi.   
\pi1
\v 24-28 Gada boganaeao edi oea sigasigadi se uridi.   
\pi1
\v 29-32 Manasa boganaeao tupona edi oea sigasigadi se uridi.   
\p
\v 33 Mose Levi boganaeao oea nige i mosedi, Guiau, Isaraela edi Eaubada, edi oea ede, doha hinage i heribadi.   
\c 14  
\p
\v 1 Teina oea gamagaridi Isaraela nanatunaeao Kanana eai se abidi, Eleasa kohena tauna, eo Iosua Nuna natuna, eo Isaraela edi bogao edi babada se soi isi enadi.   
\p
\v 2 Kelero eai se abidi doha Guiau Mose nimana eai i lauhesomdi, boga haligigi‐hasi enadi, eo boganaeao tupona.   
\p
\v 3 Paana Mose boga labui eo tupona edi tano i mosedi Ioridano hari teha eai: Levi tataodi tano enadi nige i mosedi.   
\p
\v 4 Paana Iosepa nanatunaeao boga labui, Manasa, eo Iperima, arinai Levi tataodi oea enadi nige se mosedi, edi eanua headi mo edi aba mia, eo eanua va murimuridi eai edi bulumakau, eo edi aba aibai.   
\p
\v 5 Doha Guiau Mose i lauhesom, Isaraela nanatunaeao se ginauri, tano abo se soi.   
\p
\v 6 Giligali eai Iuda nanatunaeao Iosua arinai se laoma: Kaleba Iepuna natuna, Kenese tauna, i ribalau ia arinai, i ene, Riba va Kadesa‐banea eai Guiau Mose. Eaubada tauna, i heriba va u nuatui, enagu i riba va.   
\p
\v 7 Egu borimai tatao labui Mose, Guiau ena heaheari, Kadesa‐banea eai i hetamarigu oea va bena ea itasipoi; abo ea uio ia arinai nuagu ea hemasaraha.   
\p
\v 8 Agu sasagueao maegu ai sae va tatao nuadi se hevelodi: eau Guiau egu Eaubada, ea hemurivatai ma nuagu i ohi.   
\p
\v 9 Nei asubenana ne Mose i aigora i ene, Mamohoi, oea va arinai aem se utu abo em oea, eo am isimurita edi oea i lau e nige nosina, paana ma nuam i ohi Guiau em Eaubada u hemurivatai.   
\p
\v 10 Hage u ita Guiau egu mauri i heroha, doha i ribaei, teina borimai 45, nabada va Guiau teina riba ta Mose i heriba, Isaraela nanatunaeao sora se tautausi barabara eai, teina asubena ta eau egu borimai 85.   
\p
\v 11 Hinage teina asubena ta ea adidiri doha egu adidiri nei asubenana ne arinai Mose i hetamarigu, ea iala, eo ea pesa, eo ea avasae, egu adidiri ta doha egu adidiri nei huiana ne.   
\p
\v 12 Arinai ea ne teina oea tupina ta u reama doha Guiau nei asubenana eai ie ribaei, paana nei asubenana ne u ataiei Anakimi metai, eo edi eanua se lai, eo se ganaidi: taiede ena Guiau maegu abo ea henaudi se lau, doha Guiau i ribaei.   
\p
\v 13 Iosua ia i aihelahui, Kaleba, Iepuna natuna, Heberona i mosei ena oea.   
\p
\v 14 Arinai Heberona, Kaleba, Iepuna natuna, Kenese tauna i abi i laoma e huia ta, paana Guiau, Isaraela edi Eaubada, i hemurivatai, ma nuana i ohi.   
\p
\v 15 Heberona esana bagubaguna ede Kiriata‐araba, Araba Anaki tau adidiri esau esana, oea va boeana eai se labini.   
\c 15  
\pi1
\v 1-12 Iuda boganaeao edi tano, hari bada, hari bada enadi se soi, Iuda edi tano sigasigadi se uridi.   
\p
\v 13 Kaleba, Iepuna natuna, Iuda nanatunaeao edi oea tupona i mosei, doha Guiau Iosua i heriba, Araba Anaki tamana ena eanua, esana Heberona.   
\p
\v 14 Kaleba, Anaki nanatunaeao haiona, Sesai, eo Aimano, eo Talemai i henaudi.   
\p
\v 15 Ia abo i sae Debiri tataodi aridi eai: Debiri esana beabeana ede Kiriata‐sepa.   
\p
\v 16 Kaleba i ene, Tau esau Kiriata‐sepa i lubi, eo i girihai, abo Akesa, natugu siu, ia monena ea mosei.   
\p
\v 17 Otinielu, Kinasa natuna, eanua abo i girihai, abo Akesa i mosei ia monena.   
\p
\v 18 Se tavasorao abo Akesa Otinielu i heriba bena tamana arinai oea gagirina esau i aiboda: ena asina eai i pesa: Kaleba i ribalau ia arinai i ene, saha bena u abi?   
\p
\v 19 I heuio i ene, u hewoiwoinagu, oea esau tupo eavana u reamao, ea ne bena goila se bunubunuasi hinage u reama. Goila bunubunuasi tupo saesaena, eo tupo dobidobina abo i mosei ia arinai.   
\pi1
\v 20-62 Iuda boganaeao hari bada, hari bada edi oea se soi eanua gamagaridi, eo oea sigasigadi se uridi.   
\p
\v 63 Iebusaiti tataodi, Ierusalema taumiaidi, Iuda se aipateasa nige se henaudi: Iebusaiti tataodi, Iuda nanatunaeao maedi se miaesega Ierusalema eai, i laoma e teina huia ta.   
\c 16  
\pi1 Iosepa nanatunaeao Manasa, eo Iperima, edi tano sigasigadi se uridi.  
\c 17  
\pi1
\v 1-11 Manasa edi tano sigasigana se uridi.   
\p
\v 12 Manasa nanatunaeao eanua taumiaidi nige se hetatagorigoriohidi, nige abina se ata: Kanana tataodi oea eai se miahai.   
\p
\v 13 Taiede Isaraela nanatunaeao se hetadadao, Kanana tataodi se hetaxiedi nige se hetatagorigoriohidi,   
\p
\v 14 Iosepa nanatunaeao se ribalau Iosua arinai si ene, Paana saha tano esega mo u reama, eau ea sae, eo egu tatao se gamagari ariri, doha lahinae Guiau i hedebasaegu.   
\p
\v 15 Iosua i heuio i ene, Ena mamohoi oa u sae, eo em tatao se gamagari, eo em tano Iperima eai nige susuana, abo u sae nuura eai, Peresaiti edi tano eai em oeagi u oidi.   
\p
\v 16 Iosepa nanatunaeao si ene, Tupina nige gonogonoamai: Kanana tataodi gonu eai se mia edi kariota poasi se abidi, Betaseana tataodi, eo eanua headi hinage, eo isi se miahai Ieserela gonuna eai.   
\p
\v 17 Iosua i ribalau Iosepa nanatunaeao Iperima eo Manasa aridi eai, i ene, Mamohoi u sae, u gamagari, eo u adidiri ariri: taba nige tano esega mo u abi.   
\p
\v 18 Oea tupina abo enam: oeagi metai se gamagari abo u oidi, aniona abo enam: Kanana tataodi va edi kariota poasi se abidi va eo se adidiri, abo u henaudi, eo u hetatagorigoriohidi hinage.   
\c 18  
\p
\v 1 Isaraela nanatunaeao moutuadi lailai maudoudoina Siloa eai se oigogo, numa bahebaheusi edi aba oigogo se hetoro. Oea va tataodi matadi eai se heiluedi.   
\p
\v 2 Isaraela nanatunaeao boga haligigi‐labui sora edi tano nige se soiedi.   
\p
\v 3 Iosua i ribalau Isaraela nanatunaeao aridi eai i ene, i lau e huia esana, emi beruberu abo i lautom, abo au lau tano au abi, Guiau tamamiueao edi Eaubada i reava va?   
\p
\v 4 Hari boga, hari boga, tatao haiona, haiona, au hineridi, abo ea hetamaridi, se torohai se lau oea va se dioi, abo se soi gonogonoadi, e abo se uioma arigu eai.   
\p
\v 5 Abo se soi haligigi‐labui: Iuda abo se miahai geregere eai teha eavana eai, boga Iosepa abo se miahai teha bauri eai.   
\p
\v 6 Oea va abo au soi, haligigi‐labui, sigasigadi va abo au heribagu, Guiau emi Eaubada matana eai, enamiu abo ta hekelero.   
\p
\v 7 Boga Levi mo nige edi tano, isi Guiau ena kohena eai se lau: eo Gada eo Reubena, eo Manasa tupona, enadi se abieao tupo aruabo eai, Ioridano hari teha eai, doha Mose Guiau ena heaheari, i mosedi.   
\p
\v 8 Tatao va abo se torohai, se lau, Iosua i lauhesomdi i ene, tano sigasigadi au uridi, au lau tano au taudadai, au uri, abo au uioma arigu eai, Guiau matana eai Siloa eai enamiu abo ea hekelero.   
\p
\v 9 Tatao va se lau oea va se taudadai, buka eai eanua haligigi‐labui se uridi, abo se uioma Iosua arinai, Siloa eai.   
\p
\v 10 Guiau matana eai Iosua i hekelero, arinai Iosua tano i soi Isaraela nanatunaeao enadi.   
\pi1
\v 11-28 Beniamina edi kelero se abi edi tano sigasigadi se uri komakomanidi, eo edi eanua headi hinage.   
\c 19  
\pi1
\v 1-9 Simeona boganaeao kelero helabuina se abi, edi tano sigasigadi se uridi.   
\pi1
\v 10-16 Sebulona boganaeao kelero hehaionana se abi, edi tano sigasigadi se uridi.   
\pi1
\v 17-23 Isakara boganaeao kelero hehasina se abi, edi tano sigasigadi se uridi.   
\pi1
\v 24-31 Asa boganaeao kelero hehaligigina se abi, edi tano sigasigana se uridi.   
\pi1
\v 32-39 Napatali boganaeao hehaligigi‐esegana se abi, edi tano sigasigadi se uridi.   
\pi1
\v 40-48 Dana boganaeao kelero hehaligigi‐labui se abi, edi tano sigasigadi se uridi.   
\p
\v 49 Tano se soiheohi, Isaraela nanatunaeao abo tano se mosei Iosua, Nuna natuna arinai.   
\p
\v 50 Doha Guiau i ribaei eanua va i aibodai Timinatisera, Iperima tupina eai se mosei ia arinai, eanua i ginauri, arinai abo i mia.   
\p
\v 51 Tano ede teina se soi va: tausoina Eleasa kohena tauna, eo Iosua, Nuna natuna, eo Isaraela nanatunaeao, hari boga, hari boga, edi babada hinage, Siloa eai, Guiau matana eai se hekelero, se soi numa bahebaheusi dobilana eai. Oea va abo se soi lautom.   
\c 20  
\pi1
\v 1-6 Guiau, Iosua i heriba eanua headi Isaraela nanatunaeao se hetorodi, tauaiunugaibu ena aba dago. Ena tau esau helena taumia i unuigaibu, nige nuana aiunu, abo i dago, eanua esau va edi aba dagodagolau arinai i lage, abo i mauri.   
\pi1
\v 7-9 Eanua va se hineridi ede teina, esadi abadagodagolau eanuadi,  
\li1 Kedesa, Galilaia eai.  
\li1 Sekema, Iperima eai.  
\li1 Kirigata‐aba, Heberona eai.  
\li1 eo Ioridano hari teha eai,  
\li1 Besa, Reubena edi gonu eai.  
\li1 Ramota, Giliadi eai.  
\li1 Golani, Basana eai.   
\c 21  
\p
\v 1 Levi boganaeao edi babadaeao abo se laoma Eleasa kohena tauna arinai, eo Iosua, Nuna natuna hinage arinai, eo Isaraela nanatunaeao hari boga, hari boga, tamadieao aridi eai;   
\p
\v 2 Siloa, Kanana eai se ribalau aridi eai, si ene, Mose avana eai, Guiau i lauhesomiu, i ene, ema eanua, ema aba mia au ledima, eo oea begana hanahanaudi eai hinage emi burumakau edi aba aibai.   
\p
\v 3 Isaraela nanatunaeao edi tano tupona Levi tataodi se mosedi doha Guiau i lauhesomdi, eanua headi, eo tano begana eanua va hanahanaudi eai.   
\pi1
\v 4-42 Levi tataodi edi eanua se mosedi esadi se lautoredi.   
\p
\v 43 Guiau tano gamagari i mosei Isaraela aridi eai, doha i riba aigora tamadieao aridi eai, se abiao, eo arinai se miahai.   
\p
\v 44 Guiau abo i heaiavasidi tupo saesae, eo tupo dobidobi, doha hinage tamadieao i riba aigora, adi vaiunu gamagaridi aridi eai nige tau esau matadi eai ie toro: Guiau nimadi eai adi vaiunu i mosedi.   
\p
\v 45 Ginauri lorodi, Guiau Isaraela nanatunaeao i ribahesunumadi va, nige begana se dabu: gamagaridi se abiheohidi.   
\c 22  
\p
\v 1 Iosua Reubena, eo Gada, eo Manasa boganaeao tupona i eogaidi.   
\p
\v 2 I ribalau aridi eai, i ene, riba gamagaridi Mose, Guiau ena heaheari i lauhesomiu au sogohidio, riba gamagaridi hinage ea lauhesomiu aridi ena au avaabiegu.   
\p
\v 3 Asubena gamagaridi emi tataoeao nige au laugabaedi i laoma e teina asubena ta, Guiau emi Eaubada ena riba arinai i lauhesomiu va au sogohidi.   
\p
\v 4 Guiau, emi Eaubada, emi tataoeao abo i heaiavasidi doha hinage i ribahesunumadi: abo au uio emi numa ruru eai, eo emi tano va Mose Guiau ena heaheari i reava, Ioridano hari teha eai.   
\p
\v 5 Riba va, eo laugagaeo, Mose, Guiau ena heaheari i rediva, au nuatukomanidi eo au abivataidi; Guiau, emi Eaubada, au gadosisiei, ena dobila gamagaridi au lauvataidi, ena laugagaeo au sogohidi, au patulau ia arinai, au heaeaiei, ma nuamiu eo ma earuamiu.   
\p
\v 6 Iosua i aihelahuidi, abo i hetamaridi se lau: se lau edi numa ruru aridi eai.   
\p
\v 7 Manasa boganaeao tupona edi tano Mose Basana eai i mosedi: Manasa tupona esau edi tano Iosua i mosedi Ioridano teina teha eai, tupo lalasi eai, Iosua i hetamaridi hinage se lau edi numa ruru aridi eai, i aihelahuidi.   
\p
\v 8 I ribalau aridi eai i ene, au uio emi numa ruru aridi eai, emi gogo gamagari au laei, eo emi bulumakau gamagaridi, eo ario, eo auro, eo barasi, eo poasi, eo emi ruru gamagaridi: ami vaiunu edi gogo au girihai emi tataoeao maemiu au soiei.   
\p
\v 9 Reubena nanatunaeao, eo Gada nanatunaeao, eo Manasa boganaeao tupona se uio, Siloa, Kanana eai, Isaraela nanatunaeao se laugabaedi, se lau Giliadi oeana eai, edi tano mamohoi eai, doha Guiau i ribaei Mose avana eai.   
\p
\v 10 Isi abo se lage Ioridano sigasigana eai, Kanana oeana eai, Reubena nanatunaeao, eo Gada nanatunaeao, eo Manasa boganaeao tupona, hatahata tabuna se ginauri, hatahata va i lai ariri,   
\p
\v 11 Isaraela nanatunaeao vasana se ataiei, nige se ataiei komakomani, si ene Reubena nanatunaeao, eo Gada nanatunaeao, eo Manasa boganaeao tupona, hatahata tabuna se abi Kanana hari tupo eai, Ioridano sigasigana eai, Isaraela nanatunaeao edi aba gaeoavasi eai.   
\p
\v 12 Isaraela nanatunaeao se ataieao, maudoudoidi se oigogoesega Siloa eai, bena se sae se ialaidi.   
\p
\v 13 Isaraela nanatunaeao Piniasi, Eleasa kohena natuna, se hetamari Reubena nanatunaeao, eo Gada nanatunaeao eo Manasa boganaeao tupona aridi eai.   
\p
\v 14 Vasavasa nanatudieao saudoudoi maena, Isaraela hari boga, hari boga, Vasavasa nanatudio, Isaraela moutuadi edi Vasavasa esau, esau.   
\p
\v 15 Abo se lagema Giliadi eai Reubena nanatunaeao, eo Gada nanatunaeao, eo Manasa boganaeao tupona aridi eai, se ribalau aridi eai, si ene.   
\p
\v 16 Guiau nanatunaeao se ribagogoesega, si ene, Teina baaea ta aisana omi au abi Isaraela edi Guiau matana eai: teina asubena ta au lau suara Guiau nige au hemurivatai, hatahata tabuna au hetero bena asubena ta Guiau au nuagabaei?   
\p
\v 17 Peoa eai baaea ta abi, au ene i gagiri; baaea eai va sora nige se heaada, i laoma teina asubena eai ta, hinage Guiau nanatunaeao moutuadi boeadi eai baaea lailai se hearo va.   
\p
\v 18 Omi teina asubena eai ta au lau suara, Guiau nige au hemurivatai? Vau ta Guiau au avaeagaraei, maraitom Isaraela moutuadi maudoudoidi abo i ouealaealaedi.   
\p
\v 19 Taiede ena au ene emi tano va arinai au mia i baaea, au gaeoavasi au lau Guiau ena tano eai, Guiau ena numa bahebaheusi ena aba mia, abo au miahai boeamai eai: tabu Guiau au isuevaei, eo tabu au isuevaemai hinage, doha hatahata esau au hetero Guiau eda Eaubada ena hatahata tabuna hasarina eai.   
\p
\v 20 Akana, Seraha natuna ena baaea i abi, e nigee? Isaraela maudoudoidi arinai se ouealaealaedi, e nigee? nei tau ne nige iabom mo ie mate ena baaea debana eai.   
\p
\v 21 Reubena nanatunaeao, eo Gada nanatunaeao, eo Manasa boganaeao tupona se heuio se ribalau Isaraela moutuadi edi babadaeao aridi eai, si ene,   
\p
\v 22 Guiau, eaubada edi Eaubada, eaubada edi Eaubada i nuatui, hinage Isaraela abo se nuatui: ena Guiau ai avaeagaraei, eo ai nuagabaei (teina asubena ta tabu au nuatoatoaimai).   
\p
\v 23 Hatahata tabuna va ai hetero bena Guiau ai lausuaraei, eo nige ai hemurivatai; bena sarai alagorugoru, eo aitalasam arinai ai toredi, e bena ema roni ainauiadi ai toredi, Guiau ia i nuatui.   
\p
\v 24 Nigee, ai hetoro paana ai matausi, ai ene, Huia murida eai ata nanatumiueao abo se ribalau nanatumaieao aridi eai, si ene, Guiau Isaraela edi Eaubada au sahai?   
\p
\v 25 Paana Guiau Ioridano doha sigasigana i tore duaduarida eai, ai ede ina, omi ede nei, omi Reubena nanatunaeao, eo Gada nanatunaeao arinai nige emi tupo: arinai abo nanatumiueao nanatumaieao se heberuberudi, Guiau nige se matausiei, abo se lautom.   
\p
\v 26 Arinai ede ai ene, Hatahata tabuna enada ta hetero, alagorugoru, eo aitalasam nige ai nuatui.   
\p
\v 27 Ema nuatu mo bena omi, eo ai, eda heiheinoi ede, eo ada isimurita edi heiheinoi hinage, ai bena Guiau ena heaeaiei ai abi, ema alagorugoru, eo ema aitalasam, eo ema roni ainauiadi: na huia murida eai nanatumiueao nanatumaieao aridi eai taba nige se ene, Guiau arinai omi nige emi saha.   
\p
\v 28 Arinai ai ene huia murida eai taba arimai eai eo ama isimurita aridi eai si ene doha nei, ai ene, Guiau ena hatahata tabuna tamadaeao se ginauri ana ao au ita, nige se ginauri bena se alagorugoru, eo se aitalasam: eda heiheinoi mo enamai eo enamiu.   
\p
\v 29 Eaubada bena i nuahimai Guiau tabu ai ouealaealaei asubena ta ai lau suaraei, eo ia nige ai hemurivatai, bena hatahata tabuna ai ginauri ema alagorugoru, eo ema aitalasam; Guiau eda Eaubada ena hatahata tabuna hasarina eai, ena numa bahebaheusi matana eai, se tore.   
\p
\v 30 Piniasi, kohena tauna, eo Isaraela moutuadi maudoudoidi edi babada, eo edi Vasavasa maenaeao Reubena nanatunaeao, eo Gada nanatunaeao, eo Manasa nanatunaeao edi riba se ataiei, nuadi se loro.   
\p
\v 31 Piniasi, Eleasa kohena tauna natuna, i ribalau Reubena nanatunaeao, eo Gada nanatunaeao, eo Manasa nanatunaeao aridi eai, i ene Vau asubena ta ai itaeao Guiau boeada eai i mia, paana teina baaea va nige au abi Guiau matana eai, Guiau nimana eai Isaraela nanatunaeao abo au abihemauridi.   
\p
\v 32 Piniasi, Eleasa kohena natuna, eo Vasavasa maenaeao, Reubena nanatunaeao, eo Gada nanatunaeao, se laugabaedi, oea Giliadi eai se lau Kanana eai, Isaraela nanatunaeao aridi eai, Vasavasa se heribadi.   
\p
\v 33 Isaraela nanatunaeao vasa va se ataiei abo nuadi se loro: Isaraela nanatunaeao Eaubada se aihelahui, nige se sae se ialaidi va, Reubena, eo Gada nanatudieao edi oea, edi aba mia hinage nige se hebaaea.   
\p
\v 34 Reubena, eo Gada nanatudieao hatahata tabuna va esana se tore Ede, paana si ene hatahata va eda heiheinoi, Guiau ia Eaubada.   
\c 23  
\p
\v 1 I lau e, huia muriaririna eai Guiau Isaraela i heaiavasidi, edi vaiunu se hetaiiridi, nige se hebaaeadi: Iosua abo i tautaubada, ena borimai se gamagari.   
\p
\v 2 Iosua Isaraela maudoudoidi i eogaidi edi babada, eo edi vasavasa, edi tauhekiraino, adi tanuaga hinage, aridi eai i ribalau i ene, Ea tautaubadao, eo egu borimai se gamagari:   
\p
\v 3 Guiau, emi Eaubada, ena laulau teina basileia gamagaridi aridi eai omi debamiu eai au itaeao: Guiau emi Eaubada emi iala i ialaidi.   
\p
\v 4 Teina basileia kelero eai enamiu ea soi, ami bogao edi tano Ioridano ie tubu, basileia headi ea torehesuaradi, i lau gabogabo lailai eai, tupo lalasi eai.   
\p
\v 5 Guiau, emi Eaubada, matamiu eai abo i helautomdi, abo i henaudi taba nige au itadi, tano va abo au abi enamiu, doha Guiau emi Eaubada i ribahesunumamiu va.   
\p
\v 6 Au nuakipikipi abo, ginauri gamagari se uridi Mose ena laugagaeo bukana eai au sogohidi, eo au abivataidi, tabu au lau suaraidi, tabu au lau teha tutuna, e teha seuseurina.   
\p
\v 7 Teina basileia headi se mia boeamiu eai va tabu u lau boeadi eai: eo edi eaubada esadi tabu au ataidi, tabu au aigora aridi eai, tabu au heaeaiedi, eo tabu au tabaohu nuanuadi eai.   
\p
\v 8 Guiau, emi Eaubada, au patudidini arinai, doha emi laulau asubena ta.   
\p
\v 9 Paana basileia lailaidi, eo adidiridi matamiu eai i hetatagorigoridi, nige tau esau i toro matamiu eai i laoma e asubena ta.   
\p
\v 10 Tau esega arimiu eai, tausani esega abo i henaudi: paana ede Guiau, emi Eaubada, emi iala i ialaidi, doha hinage i ribahesunumamiu.   
\p
\v 11 Au nuatukomakomaniuioimiu: Guiau emi Eaubada abo au gadosisiei.   
\p
\v 12 Ata au sinibui, eo au patulau teina basileia headi boeamiu eai se mia aridi eai, eo au tavasoraidi, eo boeadi eai au sae, eo au dobi.   
\p
\v 13 Eamoisa, abo au nuatui, Guiau, emi Eaubada, taba nige basileia esau matamiu eai abo i hetatagorigori, isi abo se miahai boeamiu eai doha sa e, eo lisilisimiu edi pidipidiri, eo matamiu edi nurinuri, i lau e, teina oea lorona, Guiau emi Eaubada i leava, arinai abo au mateohi.   
\p
\v 14 Teina asubena ta tanoubu dobilana abo ea lauei: gamagarimiu nuamiu eai, eo earuamiu eai au nuatuiao, nige ginauri esega ue dabu, ginauri lorodi gamagaridi Guiau, emi Eaubada, i heribamiu: gamagaridi i ledivao enamiu; nige ginauri esega ue dabu.   
\p
\v 15 Ginauri lorodi gamagaridi Guiau, emi Eaubada, i ribahesunumamiu va i ledivao; hinage doha, Guiau abo ginauri baaeadi gamagaridi i hetubudi arimiu eai, i lau e, oea lorona Guiau, emi Eaubada, i reava va arinai abo i hemateohimiu.   
\p
\v 16 Ena Guiau, emi Eaubada, ena riba i ribahesunumamiu au utusi, eo au lau hari eaubada au heaeaiedi, eo au tabaohu nuanuadi eai, nei huiana ne Guiau ena ouealaeala arimiu eai abo ie hetubu, tano lorona eai i reava enamiu abo au mateheula.   
\c 24  
\p
\v 1 Iosua, Isaraela adi bogao gamagaridi Sekema eai i heoigogoidi; Isaraela edi babadaeao, eo edi vasavasaeao, eo edi taukirainoeao, eo edi tanuagaeao: Eaubada matana eai se laoma.   
\p
\v 2 Iosua i ribalau tatao gamagaridi aridi eai, i ene, Guiau, Isaraela edi Eaubada i ene ina doha, mumuga eai tamamiueao goila hari teha eai se miahai, ia ede Teraha, Aberahama tamana, eo Nahora tamana, hari eaubada se heaeaiedi.   
\p
\v 3 Tamamiu Aberahama goila hari teha eai ea abi, ea woeai Kanana oeana eai, i taudadai, tumanaeao ea helai, abo Isaako ea mosei ia arinai.   
\p
\v 4 Isaako, Iakobo eo Isoa ea mosei: Seia tupina ea mosei Isoa arinai, arinai i mia, Iakobo maena nanatunaeao se dobi Aigupito eai.   
\p
\v 5 Mose, eo Arona ea hetamaridi, Aigupito ea hebaaeadi doha egu laulau gamagaridi aridi eai: e murina eai ea woeaimiu murimuri eai.   
\p
\v 6 Tamamiueao Aigupito eai murimuri eai ea woeadima: abo gabogabo eai au lagema: Aigupito tataodi tamamiueao edi kariota, eo edi tauiala hosi potadi eai se geru se henaumiu, i lau e Gabogabo Buiabuiana eai.   
\p
\v 7 Se eogalau Guiau arinai, abo omi, eo Aigupito tataodi duaduarimiu eai masigiri ea hetubu, gabogabo hinage i saema, i buburidi, matamiu eai egu laulau Aigupito eai au itadi, huia roharoha barabara eai aue mia.   
\p
\v 8 Ea woeaimiu, Amoraiti tataodi edi oea eai au lagema, Ioridano hari teha eai se mia: se ialaimiu, abo nimamiu eai ea toredi, edi oea bena au abi enamiu; matamiu eai ea hematedi.   
\p
\v 9 Abotai Balaki, Sipoa natuna, Moaba edi Vasavasa i toro Isaraela i ialaidi headi i hetamaridi Balama, Beoa natuna, i eogai bena i hebaaeamiu.   
\p
\v 10 Balama ena riba nige ea ataiei arinai i aihelahuimiu mo: ia nimana eai ea abihemaurimiu.   
\p
\v 11 Ioridano abo au gaeoavasi, abo Ieriko eai au lage, Ieriko tataodi se ialaimiu; eo Amoraiti hinage, eo Peresaiti, eo Kanana, eo Hitaiti, eo Gagavaiti, eo Haivaiti tataodi se ialaimiu; isi nimamiu eai ea lediva.   
\p
\v 12 Gumo ea hetamari i eda bagunaimiu, matamiu eai i hetatagorigoridi: Amoraiti edi vasavasa labui, emi elepa eai mo nigee, eo emi alahia eai nigee.   
\p
\v 13 Oea va ea reava arinai nige au paipaisoai, eo eanua nige au ginauridi ea lediva, boeadi eai aue mia: oea va nige au umaidi hinage aridi eai ami aiai au abi au ai.   
\p
\v 14 Arinai ede Guiau au matausiei, au heaeaiei ma nuamiu se ohi, au heaeaiei mamohoi: eaubada tamamiueao se heaeaiedi goila hari teha eai, eo Aigupito eai, au toresuaraidi; Guiau abo au heaeaiei.   
\p
\v 15 Ena au ene Guiau ta heaeaiei i baaea, teina asubena ta au nuatui, eai abo au heaeaiei: eaubada va tamamiueao se heaeaiedi goila hari teha eai, Amoraiti tataodi edi oea arinai au miahai edi eaubadaeao: eau mo, eo egu numa taumiaina, ai Guiau abo ai heaeaiei.   
\p
\v 16 Tatao abo se heuio si ene, Eaubada taba i nuahimai, Guiau abo ai nuagabaei bena hari eaubada ai heaeaiedi:   
\p
\v 17 Guiau, ema Eaubada, ai, eo tamamaieao Aigupito eai i woeaidima, numa tutugudui eai ai laoma, heiheinoi lailaidi matamai eai i ginauridi, dobila gamagaridi eai ai laoma, eo tatao gamagaridi boeadi eai ai laoma, i itavataimai:   
\p
\v 18 Matamai eai hinage Guiau tatao gamagaridi i hetatagorigoridi, doha Amoraiti tataodi oea eai se mia: arinai ede ai hinage Guiau abo ai heaeaiei: paana ia ema Eaubada.   
\p
\v 19 Iosua i ribalau tatao aridi eai i ene, Guiau taba nige au heaeaiei: paana ede ia Eaubada tabuna, eo ia Eaubada aiaromagigirina ede: laugagaeo au utusidi, eo emi baaea taba nige i ribagigiridi.   
\p
\v 20 Ena Guiau au nuagabaei, hari eaubada, hari eaubada bena au heaeaiei abo i hebaaeamiu, eo i helautomiu, abiabi lorodi i abidi arimiu eai va abo se lautom.   
\p
\v 21 Tatao abo si ene, Nigee, Guiau mo abo ai heaeaiei.   
\p
\v 22 Iosua abo i ribalau tatao aridi eai i ene, Au witinesiuioimiu, Guiau au hineri, ia abo au heaeaiei. Si ene Ai witinesi ede.   
\p
\v 23 I ene, hari eaubada boeamiu eai au gabaedi, Guiau Isaraela edi Eaubada nuamiu abo se lauei.   
\p
\v 24 Tatao se ribalau Iosua arinai, si ene, Guiau eda Eaubada abo ai heaeaiei, ia arinana abo ai avaabiei.   
\p
\v 25 Arinai nei asubena eai ne Iosua tatao i ribahesunumadi, laugagaeo, eo sanapu esau Sekema eai i toredi.   
\p
\v 26 Iosua Eaubada ena laugagaeo bukana eai teina riba ta i uridi: veu tau lailai i abi, i hetoro oeagi paana eai, Guiau ena numa tabuna hasarina eai.   
\p
\v 27 Iosua i ribalau tatao gamagaridi aridi eai, i ene, Au ita, arida eai teina veu ta abo eda witinesi: paana riba gamagaridi Guiau i ribalau arida eai i ataiei: arinai abo ia eda witinesi, ata emi Eaubada au morui.   
\p
\v 28 Iosua tatao abo i hetamaridi se lau, esau, esau, i lau ena tano arinai.   
\p
\v 29 Teina ginauri se ohi, e abotai abo Iosua, Nuna natuna, Guiau ena heaheari i odalele, ena borimai tataohaligigi‐se‐mate‐saudoudoi.   
\p
\v 30 Ena tano Timinata‐sera sigasigana eai se tore, Iperima tupina eai, Gasa tupina, teha bauri eai.   
\p
\v 31 Iosua ena huia eai Isaraela Guiau se heaeaiei, eo babadaeao gamagaridi Iosua se hemuri edi huia eai, isi Guiau ena paisoa gamagaridi i abidi Isaraela aridi eai, se nuatuiao.   
\p
\v 32 Iosepa siadana va Isaraela nanatunaeao Aigupito eai se abidima Sekema eai se toredi, oea va Iakobo i uneune Sekema tamana, Hamora nanatunaeao aridi eai, maisana i mosedi ario tatao haligigi‐se‐mate va: oea va Iosepa nanatunaeao abo se abi enadi.   
\p
\v 33 Eleasa, Aarona natuna abo i odalele: ia natuna Piniasi ena oea tupina eai se tore, oea va se mosei ia arinai, Iperima tupina eai.