\id EPH  
\ide UTF8
\h Epeso 
\toc1 Paulo Ena Uriuri Epeso Enadi 
\toc2 Epeso 
\toc3 Ep. 
\mt1 Paulo Ena Uriuri Epeso Enadi  
\c 1  
\p
\v 1 Eau Paulo, Iesu Keriso ena Aposotolo esau Eaubada ena nuatu debana eai, ea uriuri hetabu tataodi isi Epeso eai se miamia enadi, eo tauataiena Keriso debana eai enadi hinage:   
\p
\v 2 Ainauia abo au abi, eo loni, ita Tamada Eaubada arinai se laowa, eo Guiau Iesu Keriso arinai se laowa hinage.   
\p
\v 3 Eda Guiau Iesu Keriso ena Eaubada eo Tamana, ia ta aihelahui, earua ena ainauia gamagamagari i ainauiaida galewa dimodi eai Keriso boeana eai,  
\v 4 doha hinage ia i hinerida ia boeana eai tanoubu paana sora nige se hetubu, ita abo ta hetahetabueda, eo ia matana eai abo nige edi aba hegiruda.  
\v 5 Gadosisi boeana eai i nuatunonohaidao, i gigiorieda iabom nanatunayao, Iesu Keriso debana eai, ia ena nuatu lolona debana eai.  
\v 6 Ena ainauia namanamarina aba aihelahuina ede, arinai hinage i abida Taugadosisieda boeana eai.  
\v 7 Ia arinai mauri ta aabi ia osinana debana eai, baaea abaribagigiridi ena ainauia lailai debana eai,  
\v 8 arinai sonoga gamagamagari eo nuasibasiba gamagamagari i hegoigabaedima arida eai.  
\v 9 Ena nuatuyamuyamui i heitadao, iabom ena nuatu lolona i nuatuwatai,  
\v 10 huia wa i nuatuauriyao wa, ena i lagema, ia ginauri gamagamagari abo i heoiesegaidi Keriso boeana eai, galewa ginauridi, eo tanoubu ginauridi hinage; iabom mo boeana eai.   
\p
\v 11 Ia arinai ita hinage eda gogo ta lobaiyao, nabada ariri eai iabom ena nuatu eai, enada i nuatuauriyao,  
\v 12 ita ia ena namanamari aba‐aihelahuina ede, ita wa Keriso tausunuma‐bagunaina.  
\v 13 Riba mamohoina, emi mauri evaneliana, au ataiei, murina eai ia au sunumalau arinai, hinage Earua Tabuna, se ribahesunumaei wa, heiheinoina se tore arimiu eai.  
\v 14 Iaede ginauri lolodi enada wa, eda aba‐sunumaena i lau e ta abidi, ia ena namanamari aba‐aihelahuina ede.   
\p
\v 15 Arinai ede eau hinage, emi sunuma Guiau Iesu boeana eai, eo emi gadosisi hetabu tataodi gamagamagari aridi eai, wasadi ea ataiedi,  
\v 16 enamiu ea laulautoidaoi nige ea lautom, egu uura aridi eai ea ribaribaemiu bena  
\v 17 eda Guiau Iesu Keriso ena Eaubada, namanamari Tamana, sonoga eo ribahemasaraha earuana abo i leawa, ia emi abanuanuatuina.  
\v 18 Nuamiu matadi i hemaradi; arinai i eogahaimiu wa sunumana abo au ita, eo hinage ia ena ginauri wasawasa ariridi wa abo au nuatui se lolo ariariri, i abidi hetabu tataodi boeadi eai,  
\v 19 eo gigibori lailai taba nige ta nonoi ita tauataiena arida eai, ena gigibori ena paipaisoa wa, iaede,  
\v 20 Keriso arinai i paisoa, ia mate eai wa i abihetoro, abo iabom nimatutuna eai i hebawa bigabiga galewa dimodi eai.  
\v 21 Ia gavamani teposaesaeariri tataodi, eo gigibori tataodi, eo tanutanuaga, eo esadi gamagamagari se ribaedi teina tanoubu eai ta mo nige’e, na tanoubu esau eai wa iaede abo i tubuma, ia mo i saetawatawaidi.  
\v 22 Ginauri gamagamagari se torelaedi ia aena ubudi eai, ia abo se hetoro ginauri gamagamagari uruurudi ede ekalesia enana,  
\v 23 ia ede ia tauna, eo ena monau, arinai ginauri gamagamagari i hemonauboriboriridi.   
\c 2  
\p
\v 1 Omi hinage i hemaurimiu, laugagaeo au utusidi eo emi baaea debadi eai aue mate;  
\v 2 nabada wa omi teina tanoubu laulaudi au lauwataidi, eo malagaibu gigiborina ena wasawasa debana eai, earua wa teina huia ta i paipaisoa awayagara nanatunayao nuadi eai.  
\v 3 Boeadi eai ita nabada wa ta mimia, bulumada gadosisidi eai, tauda eo nuada lelehidi ta laulauwataidi, arinai ita hinage ouyalayala nanatunayao, doha tatao gamagari.  
\v 4 Na Eaubada ia nuatoatoa ana gogo, ena gadosisi lailai arinai i gadosisieda,  
\v 5 ita baaea boeana eai ta mamate wa, maeda Keriso i hemauriesegaida (ainauia debana eai au mauri),  
\v 6 maeda i hetoroesegaida, i hebawabigabiga‐esegaida Keriso Iesu boeana eai, galewa dimodi eai.  
\v 7 Isidi matada eai ena ainauia, nige aba nonoina wa, bena i heitadi, ena abilolo arida eai, Keriso Iesu boeana eai.  
\v 8 Paana ainauia debana eai au mauri, sunuma debana eai; hinage omi emi abiabi eai nige’e, Eaubada ena ainauia ede.  
\v 9 Nige laulau debadi eai, ata tau esau i ribapasipasiei.  
\v 10 Paana ita ia nimana ginaurina, Keriso Iesu boeana eai i hetubuda bena paisoa lolodi ta paisoaidi, Eaubada i nuatu nonohaidio enada, aridi eai bena ta laulau.   
\p
\v 11 Arinai abo au henuaisini, omi nabada wa murimuritataomiu, bulumamiu eai, isi tau‐peritome, iaede tatao nimadi eai se ginauri wa, omi esamiu se ribaei nige‐peritome,  
\v 12 hage au henuaisini, nei huiana ne omi Keriso au miamurimuriei, Isaraela edi miagogo eai omi taowawa udodoi, eo ribahesunuma ribadi aridi eai omi dagodagora, nige emi sunuma eo tanoubu eai ta nige emi Eaubada.  
\v 13 Na Keriso Iesu boeana eai omi nabada wa eaaawamiu se loha ariri, huia ta au hanahanauma Keriso osinana debana eai.  
\v 14 Paana ia eda loni ede, ia labui wa i heoiesegaidi, eo gana wa duaduarida eai i peilabuieda i hetatagorigorio;  
\v 15 ia bulumana eai eda hewaiunu nuatudi i helautomdi, lauhesom laugagaeodi edi uriuri eai se uridi; iabom mo boeana eai wau labui wa aridi eai tau harihariuna esega i hetubu, loni ena abatubu meta  
\v 16 Taudi labui ia abo Eaubada arinai i laubiriedi se hemala tau esega mo satauro debana eai, hewaiunu nuatudi wa arinai i helautomyao.  
\v 17 Eo i laoma loni lauguguiaeyawa omi eaaawamiu se loha arimiu eai, eo isi hinage se hanahanau aridi eai.  
\v 18 Paana ede ia debana eai, tauda labui, Earua esegana debana eai, ta lulage Tamada arinai.  
\v 19 Na huia ta omi nige taowawa eo omi nige dagodagora, na hetabu tataodi au hepatuesegaimiu maidamiu, omi edi eanua tataomiu ede, eo omi Eaubada ena numa tataomiu,  
\v 20 aposotolo eo peroveta paana eai se hetoromiu, Iesu Keriso iabom we’u saesaena kona eai,  
\v 21 ia boeana eai numa se tubei komakomani se toreesegai abo ie tubu i hemala numa tabuna Guiau boeana eai,  
\v 22 arinai hinage omi se hetoroesegaimiu Eaubada ena abamia ede, Earua debana eai.   
\c 3  
\p
\v 1 Paana ede teina eau Paulo, Iesu Keriso ena tauauaugu omi Murimuri‐tataomiu debamiu eai,  
\v 2 au ataieyao wa Eaubada ena ainauia hepahepaisoaina i leama arigu eai omi enamiu,  
\v 3 riba eamuyamui arigu eai i hemasarahadimao; doha hinage nabada wa egu leta begana arinai ea uridiwa.  
\v 4 Arinai, ena au hasiri, egu sonoga Keriso ena ribayamuyamui arinai abo au nuatui,  
\v 5 nabada wa hari isi eai wa, nige i masaraha tatao nanatudiyao aridi eai, doha ina huia ta Earua i hemasarahayama ena aposotolo eo peroveta tabudi aridi eai.  
\v 6 Murimuri‐tataodi abo se hemala ginauri saesaedi helemai tauabidi, eo tauda esega mo, eo ena ribahesunuma tauabidi hinage Keriso boeana eai evanelia debana eai.   
\p
\v 7 Arinai eau heaheari se hetorogu ta Eaubada ena ainauia debana eai, se leama arigu eai wa, gigiborina paipaisoana eai.  
\v 8 Eau hetabu tataodi gamagamagari aridi eai ea hegagiriaririegu, teina ainauia se leama eau arigu eai, Keriso ena ginauri saesaeariridi abo ea lauguguiaei Murimuri‐tataodi aridi eai,  
\v 9 eo tatao gamagamagari ribayamuyamuidi heoiesegaina abo ea heitadi, ia ede tanoubu se hetuhetubu wa Eaubada boeana eai se toreyamui, ia ginauri gamagamagari i hetubudi,  
\v 10 bena huia ta teposaesaeariri tataodi eo gigibori tataodi galewa sonogana udoi udoi abo se itadi ekalesia arinai.  
\v 11 Ena nuatu nige ena abalautom wa ia ede eda Guiau Iesu Keriso arinai i hemamahoiei.  
\v 12 Ia boeana eai ta nuakipikipi, eo ia boeana eai hinage eda abalau ma nuaadidirida ta abi, eda sunuma eai ia debana eai.  
\v 13 Arinai ea henua omi tabu nuamiu se beruberu paana baaea lailai ea hearodi debamiu eai, meta emi abahedebasae paana ede.   
\p
\v 14 Paana ede teina ea turibono eda Guiau, Iesu Keriso Tamana, matana eai,  
\v 15 ia arinai boga gamagamagari galewa eo tanoubu eai, esadi se ata’o,  
\v 16 ia abo i ainauiaimiu, ena namanamari lolo ariridi debadi eai, nuaboeamiu eai abo se headidirimiu ia ena gigibori eai, ia ena Earua eai;  
\v 17 Keriso bena abo i miamia nuamiu eai, sunuma eai; omi lam’miu se toredobiedi eo paamiu se heotaesegai gadosisi boeana eai.  
\v 18 Abo au ita, maemiu hetabu tataodi gamagamagari, Keriso ena gadosisi laina, eo lohana, eo uihana ie dobi, eo saesaena;  
\v 19 eo Keriso ena gadosisi abo au nuatui, nuatuina nige abina se ata, Eaubada ena monauboriboriri gamagamagari hinage arinai abo se hemonaumiu.   
\p
\v 20 Ginauri gamagamagari ta aiboda, eo ginauri gamagamagari ta nuatui, ia abina ie ata i ledimaaririedi, gigibori wa boeada eai i paipaisoa debana eai,  
\v 21 ia se hedebasae, ekalesia arinai Keriso Iesu debana eai, isi gamagamagari i lau e, huia nige nosina. Amen.   
\c 4  
\s1 Tauataiena ena lau, Keriso boeana eai eo Earua ena woeawoea eai.  
\p
\v 1 Eau Guiau ena tauauaugu, ea awanori‐laowa omi abo au laukomakomani emi abalaulau eai arinai se eogahaimiu wa,  
\v 2 ma nuatudobidobiuioimiu eo ma iilalolomiu, eo emi nuatoatoa se laulau mo, au hainuatuuioimiu gadosisi boeana eai,  
\v 3 au aipate Earua ena nuaheoiesega abo au sogohi loni ena abaaudidinimiu eai.  
\v 4 Tauna esega mo, eo Earua esega mo, doha hinage se eogahaimiu wa edi eogahaimiu sunuma esega mo boeana eai;  
\v 5 Guiau esega mo, eo sunuma esega mo, eo bapatiso esega mo.  
\v 6 Eaubada hinage tatao gamagamagari Tamadi esega, ia tatao gamagaridi i saetawatawaidi, eo ia tatao gamagaridi i nuhuridi eo ia ginauri gamagaridi boeadi eai ie mia.  
\v 7 Na, ita gamagarida esau ana, esau ana, ainauia se leamao enada Keriso ena ainauia nonoina se heaigonogonoaieda.  
\v 8 Arinai i ene, “Ia i awasae ewa eai, tauauau gamagaridi i toaidi i woealaedi, ainauia abo i mosedi tatao aridi eai.”  
\v 9 (Na, si ene i awasae wa, arinai ta nuatui ia i dobibagunama wa tanoubu ubuna eai, e nige’e wa?  
\v 10 Ia i dobima ia ede hinage i awasae, galewa gamagaridi i saetawatawaidi, ginauri gamagamagari bena abo i hemonaudi.)  
\v 11 Ia tatao headi i ainauiaidi aposotolo eai se lau; tatao headi peroveta; eo tatao headi, evanelia taulauguguiaena, eo tatao headi, taulaulausui eo taulaulauheata;  
\v 12 hetabu tataodi bena abo se helolodumadumaesegaidi, eo heaeai paisoana bena abo se paisoaei, eo Keriso tauna bena abo se tarinisae:  
\v 13 Ita gamagarida eda sunuma esega eo Eaubada Natuna ta nuatui wa, arinai abo ta hemala taulolodumaduma, i lau e Keriso ena monauboriboriri lailaina wa ita hinage abo gonogonoada;  
\v 14 i lau, i lau e tabu ita merumeru, hari lauheata, hari lauheata se earusaeda se earudobeda, doha mana i eohoida, eo tatao mo edi sibasiba, eo edi lauheata borabora, arinai se weseida ita bena se boraida.  
\v 15 Na riba mamohoina mo ta ribaribaei gadosisi boeana eai, ginauri gamagamagari aridi eai ta tubu ia boeana eai, ia wa, Keriso uruuruna ede;  
\v 16 ia arinai tauna se ohihai se tubei komakomani eo se heoiesegai, eau esau ana paisoa eo eau esau ana paisoa, doha eau gamagamagari se paisoa komakomani abo tauna se ohihai arinai abo se helai, eo sibasiba arinai ie tubu gadosisi boeana eai.   
\p
\v 17 Teina ea heribamiu ta, eo Guiau boeana eai ea ribahemasarahaeawa, omi tabu au laulau doha Etene isi edi nuatu gaibu eai se laulau.  
\v 18 Edi nuasibasiba se hemasigiri, isi edi supusupu debana eai Eaubada ena mauri se miamurimuriei paana ede nuamatadi se gibugibu;  
\v 19 nuadi se tomatoma arinai nuadi se lau esegadumaduma baaea arinai, eo laulau biibii gamagamagari se lauwataidi ma adidiridi.  
\v 20 Na, omi Keriso nige se heatamiu doha meta:  
\v 21 ena au ene ia au ataiei, eo i heatamiuo riba mamohoina eai Iesu boeana eai.  
\v 22 Tau beabea wa, emi laulau nabada wa au lauhaidi au gabahesuaradi, ia i baaea doha nuaboeamiu eai i boraboraimiu;  
\v 23 omi nuamiu earuadi bena se heharihariudi;  
\v 24 eo tau harihariuna au lui, iaede se hetubu Eaubada ana ao eai, laulau dudurai mamohoina eai wa eo tabuna eai.   
\p
\v 25 Arinai riba borabora au gabahesuara, tau esau esau, ma helena‐taumia, riba mamohoina mo taba se ribaei, paana ita tau esega eauna udoi udoi ede.  
\v 26 Ena au ouyalayala tabu emi laulau se baaea, tabu emi ouyalayala i otahai i lau e mahana i dui,  
\v 27 tabu diabolo ena sorasora au mosei.  
\v 28 Tauaiyahari tabu i aiyahari uio, na taba nimana eai i paisoa mo, paisoa mamohoi i paisoa, abo enana i abi, gonoana taudeha enadi i mosedi.  
\v 29 Tabu riba baaea esau awamiu eai i lulagema, riba lolodi mo, arinai tatao au riba hesibasibadi, eo riba wa tauataiena emi aba ainauiaidi.  
\v 30 Eaubada ena Earua Tabuna tabu u henuaamamna, ia debana eai heiheinoimiu se toreyao, i lau e abihemauri asubenana i lagema.  
\v 31 Kalapi gamagamagari, eo siaiau, eo ouyalayala, eo heasiwolewole, eo arina baaea, au gabaudoiedi, eo nuatu baaea gamagamagari,  
\v 32 esau, esau au abiloloei, ma nuabigabigamiu, emi baaea au hainuatugabaedi, doha hinage Eaubada Keriso debana eai emi baaea i nuatugabaedio.   
\c 5  
\s1 Tauataiena ena lau: ia Eaubada natuna lolona.  
\p
\v 1 Omi Eaubada au laulauwatai, doha merumeru lolodi,  
\v 2 eo gadosisi boeana eai au laulau, doha hinage Keriso i gadosisieda, eo iabom i moseuioi ita debada eai, ena ainauia panena i amna eo ena aitalasam Eaubada arinai.   
\p
\v 3 Na laulau baaea, eo laulau bii, eo ginauri se lelehiedi, tabu esadi se ribaedi arimiu eai, doha omi hetabu tataomiu.  
\v 4 Eo riba bii hinage, eo riba eauyaure, eo talawasi, teina laulau ta nige se lolo; na taba au aihelahui mo.  
\v 5 Paana ede teina ta au nuatui, tauitaitadio, eo taubiibii, eo taulelelelehi (oitau aihelahuina meta), isi taba nige edi tupo Keriso eo Eaubada edi basileia eai.  
\v 6 Tabu tau esau ena ribaribagaibu aridi eai i boraimiu; paana teina ginauri ta debadi eai awayagara nanatunayao Eaubada ena ouyalayala abo se hearo.  
\v 7 Arinai tabu au patulau aridi eai,  
\v 8 paana omi beabeana wa au masigiri, na huia ta omi au marao Guiau boeana eai: au laulau doha marana nanatunayao  
\v 9 (paana mara aniona ta lobai lolo gamagamagari eo laulau dudurai, eo riba mamohoina eai),  
\v 10 au aipate emi laulau eai Guiau nuana au helolo.  
\v 11 Masigiri ena paipaisoa nige aniodi, tabu au patulau aridi eai, na taba au hemasarahadi mo.  
\v 12 Paana ta taumaeamaea ena edi laulau eamuyamui se ribaribaedi.  
\v 13 Na ginauri gamagamagari se hemasarahadi marana eai abo se masamasaraha: ginauri gamagamagari edi aba hemasaraha wa ia ede marana.  
\v 14 Arinai si ene,  
\q1 “Oa taueno e, u toro, mate eai u torohai,  
\q1 abo Keriso mara i leawa.”   
\p
\v 15 Au itakomakomani na au laulau, nige doha tatao eauyaure na doha tatao sonoga,  
\v 16 emi huia au miahelolo, paana asubenadi se baaea.  
\v 17 Arinai tabu au supusupu, na Guiau nuana au ita lobai.  
\v 18 Tabu waina i heyauyauremiu, doha au nomnomdaoi; na Earua taba i hemonaumiu;  
\v 19 om. au hairibagogo ma nuamiu, salamo eo wana, eo galewa wanadi au wanawanaedi Guiau arinai;  
\v 20 huia gamagamagari ginauri gamagamagari aridi eai Eaubada, eo Tamana, au aiaitoiei, eda Guiau Iesu Keriso esana eai.  
\v 21 Esau esau au haiawaabiuioimiu Eaubada matausina boeana eai.  
\v 22 Sisine maitawasora omi monemiuyao mamohoi au awaabiedi doha Guiau au awaabiei.  
\v 23 Paana tau monena wa uruuruna ede, doha hinage Keriso, ekalesia, ia tauna wa, ia uruuruna ede, eo tauhemaurina.  
\v 24 Arinai doha ekalesia Keriso se awaabiei, hinage sisine wa monediyao mamohoi ginauri gamagamagari aridi ea se awamamohoiedi hinage.  
\v 25 Tatao maitawasora monemiuyao au gadosisiedi doha hinage Keriso ekalesia i gadosisiei, eo debana eai iabom i moseuioilaei,  
\v 26 ia bena i hetabuei, eo i heaa, goila eai i deuri, eo riba debana eai hinage,  
\v 27 iabom bena i ainauiauioi ekalesia lolodumadumana, nige biina begana, eo nige wowoeana begana, nige ariariri, na ekalesia wa ia i hetabuei, eo nige ena baaea.  
\v 28 Hinage doha ede meta tatao monediyao taba se gadosisiedi doha ede taudi se gadosisiuioidi. Ia monena i gadosisiei iabom hinage i gadosisiuioi.  
\v 29 Paana ede nabada wa i laoma ina huia ta nige tau esega iabom bulumana i ouyalayalauioi; na i heai, eo i hebiga, doha hinage Guiau ekalesia ena abiabina.  
\v 30 Ia tauna eaudi ede ita, eo ia bulumana hinage, eo ia siadana.  
\v 31 Arinai ede tau wa tamana sinana i laugabaedi, abo i patulau ia monena arinai, isi taudi labui abo bulumadi esega dumaduma mo.  
\v 32 Riba ta ribayamuyamui lailai; na Keriso eo ekalesia ribana wa ea ribaribaei.  
\v 33 Taiede omi gamagarimiu, esau eo esau, tau wa ia monena abo i gadosisiei doha iabom i gadosisiuioi; eo sine wa hinage monena abo i nanabuei.   
\c 6  
\p
\v 1 Omi merumeru, tamamiuyao sinamiuyao Guiau boeana eai au awaabiedi; meta laulau me i dudurai.  
\v 2 “Tamam eo sinam u heasisiedi (ia ede laugagaeo bagubagunana ma ribahesunumana hinage),  
\v 3 oa abo u lolo, eo tanoubu eai ta em mauri abo se helohayawa.”  
\v 4 Omi tamadiyao hinage, nanatumiuyao tabu au heouyalayaladi na au eogoeogoidi mo, bena se tubu Guiau ena sibasiba eo ena guguia boeana eai.   
\p
\v 5 Omi heaheari tauauau, ami tanuagayao, tatao wa, au awaabiedi ma matamatausimiu eo ma tabutabubumiu, eo nuamiu esega, doha Keriso au awaabiei;  
\v 6 tabu au abiabi kailiu matadi eai mo, bena tatao au henualolodi, na doha Keriso ena heaheari, Eaubada nuana au abi ma‐nuamiu;  
\v 7 au paisoa ma nuatulolomiu, doha hinage Guiau arinai, nige doha tatao aridi eai.  
\v 8 Au nuatui hinage paisoa lolona esau tau esau i abi, meta abo i abiuioi Guiau arinai, tau wa ena ia tauauauna e taugaibu mo.  
\v 9 Omi tanutanuaga, au abi hinage doha nei aridi eai, tabu au ribahematausi: au nuatui hinage ami tanuaga galewa eai; ia hinage tatao nige i heasisinapaidi.   
\s1 Tauataiena ena iala, eo ena aba adidiri.  
\p
\v 10 Egu tataoyao e, riba ohina ede ina, au adidiri Guiau boeana eai, eo ena adidiri gigiborina eai.  
\v 11 Eaubada ena iala luludi maudoidi au luidi, omi diabolo ana sanapu baaea abo au guduguduidi.  
\v 12 Paana ede ita nige ta haipoipoi tatao aridi eai, na tepo saesae tataodi, eo gigibori tataodi, eo teina tanoubu ta masigirina guiaudi, eo earua baaeadi galewa dimodi eai, meta mo maeda ta haipoipoi.  
\v 13 Arinai ede Eaubada ena iala luludi au abiheohidi; ena asubena baaea ie lage abo au adidiri au gudugudui, au guduguduheohidi abo au totoro.  
\v 14 Au totoro riba mamohoina au auau duaduariedi taumiu eai, eo nuapoumiu eai laulau dudurai arinai au heopeaei.  
\v 15 Aelaulaumiu loni evaneliana arinai au sumadi i henonohamiu.  
\v 16 Teina mo ie sae ariri, sunuma opeana au abi arinai baaea tauna ena alahia alaalasidi gamagamagaridi abo au unuhebosodi.  
\v 17 Abihemauri ououna au abi, eo Earua ena elepa, ia ede Eaubada ena riba.  
\v 18 Au uura huia gamagamagari, uura gamagamagaridi eo aiaiboda Earua boeana eai, arinai hinage au nuatu komakomani hetabu tataodi gamagamagari enadi au aiboda samasamadudu.  
\v 19 Eo eau enagu hinage, au lau‐uura bena riba wa abo se leama awagu abo ea dabari ma nuakipikipigu evanelia eamuyamuina abo ea hemasaraha,  
\v 20 debana eai eau tauwasaduaiena ma auaugu; bena ea riba ma nuakipikipigu, i lolo ea riba doha nei.  
\v 21 Na, eau wasagu bena au ataiei, eo edohagu, Tukiko, egu tau ea gadosisiei, ia hinage heaheari tauna lolona Guiau boeana eai, ginauri gamagamagari abo i heribakomakomanimiu.  
\v 22 Hesabana ede ina ia ea hetamariyawa wasamai bena au ataiei, eo arinai nuamiu se biga.   
\p
\v 23 Ema tataoyao e loni bena au abi, eo gadosisi hinage ma sunumana, Eaubada, Tamana, arinai i laoma, eo Guiau Iesu Keriso arinai hinage.  
\v 24 Isi gamagamagari, eda Guiau Iesu Keriso se gadosisi mamohoiei, ainauia bena abo se abi.\f + \fr 6.24 \ft Roma eai se uri, Epeso tataodi enadi, Tukiko nimana eai.\f*