\id 2TI  
\ide UTF8
\h 2 TIMOTEO 
\toc1 PAULO ENA URIURI HELABUINA TIMOTEO ENANA 
\toc2 2 Timoteo 
\toc3 2 Tim 
\mt1 PAULO ENA URIURI HELABUINA TIMOTEO ENANA  
\c 1  
\p
\v 1 Eau Paulo, Iesu Keriso ena aposotolo, Eaubada ena nuatu eai, mauri ribahesunumana eai, ia ede Keriso Iesu boeana eai.   
\p
\v 2 Timoteo, natugu ea gadosisiaririei enana; Ainauia, eo nuatoatoa, eo loni, Eaubada, Tamada, eo eda Guiau Keriso Iesu, arinai se laoma.   
\p
\v 3 Eaubada ea lautoiei, urutubuguyao aridi eai i laoma e huia ta hinage ea heaheayaiei ma nualelelelegu nige lautomgu, egu uura eai ea henuaisinim maiona eo asubena.  
\v 4 Ea henua ariri bena abo ea itam, matasulum ea nuatuidi, eau bena kode lailai i hemonaugu.  
\v 5 Em sunuma mamohoi boeam eai wa ea nuatui, oa tubum sine Loi ia hinage i abi bagunaeyao, eo sinam Euniki i abiwatai; ea nuatui hinage oa boeam eai.  
\v 6 Arinai wau ea ribaei wa abo u henuaisinidi Eaubada ena ainauia nimagu ea tore potam eai arinai ue abi, abo u healabalebalelem.  
\v 7 Paana ede Eaubada matausi earuana nige i leama arida eai; na gigibori earuana mo, eo gadosisi hinage, eo nuaadidirina.   
\p
\v 8 Arinai ede Guiau wasaduaina tabu taumaeamaeana u taumaeamaea, eo eau hinage ena tauauauina tabu u taumaeamaeaegu; na oa mo evanelia ena amamna tupona hinage u abi Eaubada ena gigibori eai.  
\v 9 Ia i hemaurida, i eogahaida paisoa tabuna ta arinai, ita nige ada paisoa debadi eai, ia mo ena nuatu eo ena ainauia debadi eai, sora tanoubu nige se hetubu se leama arida eai Keriso Iesu boeana eai.  
\v 10 Huia ta i masaraha gorigorio Tauhemaurida Iesu Keriso ena lagema eai, ia mate i helautomyao, eo mauri, eo mauri nige nosina i hemasarahadio evanelia debana eai.  
\v 11 Arinai ede se hetorogu ea hemala taulauguguia ta, eo aposotolo, eo Murimuri‐tataodi tauheaheatadi hinage.  
\v 12 Isi debadi eai ede teina amamna ta ea hearodi; taiede nige ea taumaeamaea, paana ede ia ea sunumaei wa ea nuatuiyao, hinage ea nuanuatukomakomani ginauri wa ea moseyao ia arinai ia sogohina abina ie ata i lau e nei asubenana eai ne.  
\v 13 Riba mamohoina ribadi arigu eai u ataiedio wa u sogohidi ma sunumam, eo ma gadosisim Keriso Iesu boeana eai.  
\v 14 Ginauri lolona se leawa wa Earua Tabuna i miamia boeam eai debana eai u sogohiei.   
\p
\v 15 Teina ta u nuatuiyao, isi gamagaridi se miamia Asia eai se laugabaegu; Pukero eo Hemogeni maediyao.  
\v 16 Onesipero, eo ena numa tataodi, Guiau abo i nuatoatoaidi; paana huia gamagamagari i heaiyawasigu, agu auau poasi nige i taumaeamaeaei:  
\v 17 na ia Roma eai ie mia wa, i eoodadaigu e abo i lobaigu.  
\v 18 Guiau ia abo i sagui, abo Guiau ena nuatoatoa i lobai nei asubenana eai ne, ena laulau gamagamagari Epeso eai arinai i bobodiegu wa u nuatuidio.   
\c 2  
\p
\v 1 Natugu e, ainauia wa Keriso Iesu boeana eai arinai abo u adidiriei.  
\v 2 Riba wa arigu eai u ataiedi wa hinage tauitana gamagamagari boeadi eai, abo u mosei tatao lolodi aridi eai, isi hari tatao abo hinage se heatadi.  
\v 3 U heurauram, u hepaipaim, doha Iesu Keriso ena iala tauna lolona.  
\v 4 Nige tauiala esau teina mauri ta ginauridi i nuatuidi, tanuagana tau wa i eogai wa bena i hemala tauiala, ia abo nuana i lolo.  
\v 5 Taba tau esau i aipate bena i haitau hailako, ia korona taba nige i abi, ena haitau laugagaeodi nige i nuatuidi.  
\v 6 Oea tauitawataina ia i paisoa arinai aiai wa tupona abo i abibagunai.  
\v 7 Egu riba u nuatuidi; Guiau sonoga abo i leawa ginauri gamagaridi abo abidi u ata.   
\p
\v 8 U henuaisini egu evanelia ribana eai Iesu Keriso, Davida tumana, mate eai se hetorouioi:  
\v 9 wau wa debana eai amamna ea hearo, doha taulaulaubaaea, mamohoi se augu: na Eaubada ena riba mo nige se auaui.  
\v 10 Arinai ginauri gamagaridi ea nuapaipaiedi tatao se hetorodi debadi eai, isi hinage mauri bena abo se abi ia ede Iesu Keriso boeana eai ie ota ma namanamarina nige nosina.  
\v 11 Riba tohotohona ede ina: ena ia maeda ta mamate, ia hinage maeda abo ta mauri.  
\v 12 Ena ta amamna, ia maeda abo ta hemala wasawasa: ena ia ta harerei, ia abo i harereda hinage.  
\v 13 Ena taba ita nige ta toroesegaida: ia mo i toroesegai, iabom taba nige i harereuioi.   
\p
\v 14 Teina ribadi ta oa abo u henuaisinidi, eo u lauhesomdi Guiau matana eai riba gaibu aridi eai tabu se haiawayagara, tautaiena ata hinage nuadi se heponoponodi.  
\v 15 U aipate komakomani abo am paisoa Eaubada ie ita i lolo, oa taupaisoa abo nige u taumaemaea, riba mamohoina ta u heonakomakomani u laei.  
\v 16 Edi ribariba gaibu eo edi riba talawasi u otaotaedi: isi abo se lau baaea abo se hetadada.  
\v 17 Isi edi riba abo ie tubu mo ie lau doha bonu: isi ede Humenio eo Pileto.  
\v 18 Isi riba mamohoina wa se riba ponori, si ene mate torouiona ta abiyao; headi edi sunuma se hetatagorigori.  
\v 19 Taiede Eaubada paapaana i otadumadumaesegai, eo heiheinoina ede ina, Guiau enanayao i nuatuidi; hinage isi gamagamagaridi Keriso esana se atai baaea abo se laugabaei.   
\p
\v 20 Numa lailai alona eai ginauri headi \tl gold\tl* eo \tl silver\tl* aridi eai se ginauridi, na ginauri headi hinage oeagi eo tano aridi eai se ginauridi: headi se heasisiedi: headi nige se heasisiedi.  
\v 21 Ena tau esau teina ginauridi aridi eai nuana i deurihaidi, ia abo i hemala ginauri heaheasisina, abo se hetabuei tanuaga ana paisoa abo i abiloloei, eo paisoa lolodi gamagamagaridi aridi i nonohao.  
\v 22 Hewari, hasara, edi lelehi kamanidi u dagogabaedi: na laulaududurai, eo sunuma, eo gadosisi, eo loni u laulauwataidi maidamyao isi Guiau esana se atai ma nua‐aadi.  
\v 23 Edi hesio eauyaure eo supusupu u otaotaedi, u nuatui meta lulu abahetubuna ede.  
\v 24 Guiau ena heaheari nige i lululu; na tatao gamagaridi i manamanabigaedi, eo lauheata abina ie ata, eo nuana i hepaipai.  
\v 25 Isi ena se guduguduim u guguiaedi ma manabigabigam: bena Eaubada abo ena henuabui i mosedi, riba mamohoina abotai se ita.  
\v 26 Isi abo nihinihidi se uiouioma diabolo ena sa’i abo se dagogabaei, ia ena nuatu eai isi se toaidi wa.   
\c 3  
\p
\v 1 Teina hinage abo u nuatui, asubena murimuritana eai huia baabaaeaariridi abo se lagema.  
\v 2 Paana ede tatao isibom abo se gadogadosisiuiodi, eo ginauri abo se gadosisiedi, eo se ribapasipasiedi, eo se ribatausaedi, eo Eaubada se ribabaaeaei, tamadiyao, sinadiyao se awayagaraedi, laulautoi nige abina se ata, nige se hetabu.  
\v 3 Nige edi gadosisi, nige nuadi si ene ai laubiriedi, se hegirunapaidi mo, laulau baaea se nuahaiedi, eo se manamanabara, eo tatao lolodi se isuewaedi.  
\v 4 Isi taumoru, eo nuadi se heuheula, se awapokiedi, laulaugaibu mo se kodedi, edi gadosisi meta, Eaubada nige se gadosisiei doha.  
\v 5 Nenedi doha Eaubada ena laulau se nuatuidi, na ena gigibori mo se hekahekau; tatao meta doha u lauudoiedi.  
\v 6 Ia ede teina doha se awasae mahimahihi numa alodi eai, sisine eauyauredi ma baabaaeadi se woealaedi, nuatu gerogeromadi se laulauwataidi.  
\v 7 Huia gamagamagari se lauheataedi, riba mamohoina nige abina se ata.  
\v 8 Doha Iani eo Iameri taudi labui Mose se gudugudui, teina ta hinage riba mamohoina se gudugudui, tatao wa nuadi se bii, eo sunuma wa ribana arinai nuadi nige se dudurai.  
\v 9 Isi taba nige se lau darudaru se lau mo, tatao gamagaridi edi eauyaure abo se ita, doha hinage wau tataodi labui isi enadi wa.   
\p
\v 10 Egu riba u itakomakomaniyao, eo egu laulau hinage, eo egu nuatu adidirina, eo egu sunuma, eo egu nuatoatoa i laulau mo, eo egu gadosisi, eo egu nuapaipai,  
\v 11 egu amamna hinage, eo egu nuadubu ea hearodi Anitioka eai, eo Ikonio eai, eo Luseta eai, amamna ea hearodi wa gamagamagaridi ne aridi eai Guiau i hemaurigu.  
\v 12 Mamohoi isi gamagaridi Eaubada ena laulau tauabidi, Keriso Iesu boeana eai, amamna abo se hearodi.  
\v 13 Na tatao baaea, eo tatao borabora abo edi baaea se hetubu helailai, tatao se boraidi, eo isibom hinage se borauioidi.  
\v 14 Ginauri wa se heatamo eo abidi u ataaririo u laulauwataidi, u nuatui hinage eai arinai ue abidi.  
\v 15 Eo ma gagirim eai wa uriuri tabudi abidi ue ata, isi ede abo se hesonogam mauri arinai, sunuma debana eai, ia ede Keriso Iesu boeana eai.  
\v 16 Uriuri tabuna gamagamagari Eaubada i mosemosedi tauurina aridi eai, lauheata arinai abo i lolo, eo ribasuu, eo ribahedudurai, eo laulaududurai lauheatana hinage.  
\v 17 Eaubada ena tau abo i loloesegai, paisoa lolodi gamagamagari abo i abikomakomaniesegaidi.   
\c 4  
\p
\v 1 Eaubada matana eai, eo Guiau Iesu Keriso matana eai oa ea lauhesom ta, ia ena huia taulagema eo ena basileia eai taumaumauri eo taumatemate abo i heduduraidi.  
\v 2 Riba u lauguguiaei; huia gamagamagari, huia lolo eo huia baaea, riba u lauguguiaei mo; u hegiru, u ribasuu, eo u ribahepaipai ma nuatoatoam i laulau mo, eo lauheata.  
\v 3 Paana ede huia wa abo i lagema laulauheata duduraina taba nige se ataiei; isibom edi nuatu baaeana eai taulauheata gamagaridi abo se hetorodi enadi, isi beadi se hinahinana;  
\v 4 riba mamohoina beadi abo se laeudoiedi, riba gaibu mo abo se ataiwataidi.  
\v 5 Na ginauri gamagamagari aridi eai u nuapaipai, amamna ginauridi u healapaipaim, evanelia wasaduaina ta u paisoaei, am heaeai paisoana u hemasarahaheohi.   
\p
\v 6 Osinagu doha se heboririyao, egu huia laugabaemiu i hanahanaumao.  
\v 7-8 Iala lolona ea ialayao, egu haitau ie ohi ede, sunumana ea sogohididiniyao, ie lau, ie lau e, laulaududurai koronana, enagu se torenonohaiyao, Guiau tauhedudurai tauna duduraina nei asubenana eai ne abo i leama; nige eaubom mo enagu, na isi gamagaridi hinage ena taumasarahama se gadosisiei.   
\p
\v 9 U adidiri abo u heulama arigu eai.  
\v 10 Dema i laugabaeguo, teina tanoubu ta i gadosisiei, ia i lauo Tesalonia; eo Kerese hinage i lauo Galatia, eo Tito hinage i lauo Dalamatia  
\v 11 Luka iabom mo maegu. Mareko u heriba maem au laoma, paana ia i lolo i heaheayaiegu.  
\v 12 Tukiko ea hetamarilaei Epeso eai.  
\v 13 Agu pereue lailai Tiroa eai ea laugabaei Karepo arinai, ena u laoma u abiyama, buka hinage u ledima, eo uriuri mamoe opina eai u abikomakomanidima.  
\v 14 Alesania \tl copper\tl* taupaipaisoaina i hebaaeaaririegu; ana paisoa baabaaea Guiau abo i hemaisawatai.  
\v 15 Tau wa oa hinage u komakomaniei; paana ede ema guguia ribadi i ribaguduguduaririedi.   
\p
\v 16 Se helauhetala‐bagubaguna wa, nige tau esau i ribasaguigu, na tatao gamagaridi se laugabaegu. Ea lau‐uura Eaubada arinai tabu i hegirudi.  
\v 17 Taiede Guiau maegu, ia i totoro eau gegesigu eai, eo i headidirigu; eau debagu eai guguia ribana se ataohi, eo Murimuri‐tataodi gamagamagari abo se ataiei hinage. Arinai liona awana eai wa se girihaigu.  
\v 18 Hinage Guiau paisoa baabaaea gamagamagari aridi eai abo i girihaigu, eo ia abo i hemaurigu ena basileia galewa eai abo ea abi wa. Ia i namanamari ede, i lau e huia nige nosina. Amen.   
\p
\v 19 Peresila, eo Akula, eo Onesepero, eo ena numa tataodi hinage ea lautoiedi.  
\v 20 Eraseto Korinito eai miamiana; na Telopimo i asiebo to ia ea laugabaei Mileto eai.  
\v 21 U aipate adidiri wao’o huiana sora nige i tubu u laoma arigu eai. Eubulu i lautoiem, Pudena hinage, eo Lino, eo Kalaudia hinage, eo ena tataoyao gamagaridi.   
\p
\v 22 Guiau Iesu Keriso earuam ia abo maena. Ainauia abo u abi. Amen.