\id 2TH  
\ide UTF8
\h 2 TESALONIA 
\toc1 PAULO ENA URIURI HELABUINA TESALONIA ENADI 
\toc2 2 Tesalonia 
\toc3 2 Tes. 
\mt1 PAULO ENA URIURI HELABUINA TESALONIA ENADI  
\c 1  
\p
\v 1 Ai Paulo, eo Silevano, eo Timoteo, ai uriuri Tesalonia edi ekalesia aridi eai, Eaubada ita Tamada boeana eai, eo Guiau Iesu Keriso boeana eai:   
\p
\v 2 Ainauia omi arimiu eai, eo loni, Eaubada ita Tamada, eo Guiau Iesu Keriso aridi eai se laowa.   
\p
\v 3 Ema tataoyao e, huia gamagamagari nuamai se adidiri Eaubada ai lautoiei omi debamiu eai, meta hinage i lolo, paana ede emi sunuma i tadada lailai, omi gamagarimiu esau eo esau, emi haigadosisi hinage i tadada.  
\v 4 Ai mo ema nuatu omi debamiu eai Eaubada ena ekalesia ai ribapasipasiedi, paana baaea eo nuadubu gamagamagari au hearodi wa, emi nuapaipai eo emi sunuma se ita.   
\p
\v 5 Eaubada ena hekiraino dudurai heiheinoina ede meta arinai ie masaraha, omi abo si ene au lolo Eaubada ena basileia abo au abi, ia wa debana eai hinage amamna ta au hearodi.  
\v 6 Eaubada ena nuatu i ene laulau dudurai ede tauhebaaeamiu isi abo baaea se hearo, maisana.  
\v 7 Omi hinage baaea wa au hearo wa maemai abo se heaiyawasimiu, huiana ne Guiau Iesu Keriso se hemasarahayama, galewa eai i laoma, maena aneru gigigiboridi hinage.  
\v 8 Eo oeagi balebalelemna eai, isi Eaubada nige abina se ata abo i hemaisadi, eo isi hinage eda Guiau Iesu Keriso ena evanelia nige se awaabiei.  
\v 9 Edi maisa ede isi abo se sabom ariariri nige nosina, Guiau matana eo ena gigibori namanamarina eai se lausuara.  
\v 10 Nei asubenana eai ne ia abo i laoma ena hetabu tataodi boeadi eai ia abo se henamanamari, tauataataiena gamagamagari ia abo se nooei (paana ema riba arimiu eai se ataieyao).  
\v 11 Arinai hinage huia gamagamagari ai lau‐uura enamiu, eda Eaubada i eogahaimiu wa ai ene bena abo i ene au lolo, eo ena nualolo gamagamagari, ena laulau lolo aridi eai, abo i hemamohoiei, sunuma abiabina ma gigiborina abo i hemamohoiei hinage.  
\v 12 Eda Guiau Iesu Keriso esana abo se hedebasaei omi boeamiu eai, eo omi hinage ia boeana eai abo se hedebasaemiu, eda Eaubada eo Guiau Iesu Keriso ena ainauia debana eai.   
\c 2  
\s1 Guiau ena asubena, eo Baaea Tauna.  
\p
\v 1 Na ema tataoyao e, ai awanorilaowa arimiu eai, eda Guiau Iesu Keriso arinai ena laoma debana eai, eo eda oigogoesega ia arinai debana eai.  
\v 2 Omi nuamiu tabu se moimoiu heuheula, eo tabu au nuadubu earua, e riba, e uriuri doha si ene ai enamai, debadi eai, abo au ene Guiau ena asubena i hanahanauaririmao.  
\v 3 Tabu tau esau i boraimiu, paana nei asubenana ne taba nige i laoma sora se uiouio baguna, eo nei tau baaeana ne hinage abo i taumasaraha, ia ede mate natuna.  
\v 4 Ginauri gamagamagari Eaubada esana se torelaedi eo se aiaihelahui ia i guduguduidi eo i ribatausaeuioi hinage; arinai ia doha Eaubada i babawa mo Eaubada ena dubu eai, i awa‐Eaubadauioi.  
\v 5 Au henuaisini e nige’e, eau maemiu ta mimia wa, teina ginauridi ta ea heribamiuo?  
\v 6 Au nuatuiyao saha ede tau ta i nuanuahi i lau e ena huia i masaraha.  
\v 7 Laulau baaea i laulauyamuyamuidi ie paisoa hetubuyao; na tauguduguduina abo i gudugudui i lau e ia abo se laeudoiei;  
\v 8 abotai abo Tau Baaea wa se hemasarahayama Guiau ia abo i healagorugoru ia awana earuana eai, eo ena laoma namanamarina eai arinai abo i hebaaeaohi.  
\v 9 Ia ede ia ena laoma Satani ena paisoa arinai, eo ma gigibori gamagamagari, eo heiheinoidi eo noonoo boraboradi,  
\v 10 eo laulau baaea ena borabora gamagamagari isi taumatemate boeadi eai; paana isi riba mamohoina gadosisina nige se abi, ata se mauri.  
\v 11 Paana ede teina Eaubada nuatu borabora abo i mosei aridi eai riba borabora bena se ataiei.  
\v 12 Isi gamagaridi riba mamohoina nige se ataiei abo se baaea dumaduma, isi laulau baaea wa se kodei.   
\s1 Lauhasahasa ribadi.  
\p
\v 13 Ema tataoyao e, Guiau i gadosisiemiu wa, ai nuamai esega mo, huia gamagamagari Eaubada ai lautoiei omi debamiu eai, paana huia bagubaguna eai Eaubada i ribahinehinerimiuo abihemauri arinai, Earua ena hetabu hinage debana eai, eo riba mamohoina wa abanuatuina.  
\v 14 Aridi eai wa eda evanelia debana eai i eogahaimiu, eda Guiau Iesu Keriso ena namanamari abo au abi.  
\v 15 Ema tataoyao e, arinai au torotahitahinei, riba wa se heatamiu wa, awamai ribadi e ema uriuri ai uridiwa, au sogohidi.   
\p
\v 16 Na Guiau Iesu Keriso iabom, eo Eaubada, ita Tamada, ia i gadosisieda, eo i henuabigada, i lau e nige nosina, eo ainauia debana eai, sunuma lolo i ledima hinage,  
\v 17 ia nuamiu i hetarudi, eo riba lolodi eo paisoa lolodi gamagamagari aridi eai abo i hetoroadidiriesegaimiu.   
\c 3  
\p
\v 1 Ema tataoyao e, ai ribalautom ede ina: au lau‐uura enamai, Guiau ena riba bena abo i hetadada heula, ma aniona, doha hinage boeamiu eai.  
\v 2 Ai, tatao eauyauredi eo tatao laulau baaeadi nimadi eai bena abo se abihemaurimai; paana ede tatao gamagaridi edi sunuma nige’e.  
\v 3 Na, Guiau mo i lolo, ia abo i henuapaipaimiu eo Tau Baaea arinai abo i abihemaurimiu.  
\v 4 Debamiu eai Guiau ai nuatuadidiriei, ginauri wa ai lauhesommiu wa au abiabiwataidi, abotai abo au abiwataidi hinage.  
\v 5 Guiau nuamiu abo i woealaedi Eaubada ena gadosisi boeana eai, eo Keriso au bagiwatai ma nuapaipaimiu hinage.   
\p
\v 6 Na ema tataoyao e, eda Guiau Iesu Keriso esana eai ai lauhesommiu, eda tataoyao ena esau i laulau gaibu mo, eo riba wa arimai eai i ataiei wa nige i abiwatai, ia au lausuaraei, i otawa.  
\v 7 Paana ede omi au itayao taba au lauwataimai: ai ema laulau boeamiu eai ai miamia nige ai laulau gaibu mo,  
\v 8 eo nige tau esau ana aiai ai aiai gaibu, na paisoa ai paipaisoa dumaduma ma amamnamai, maiona ai paisoa eo asubena ai paisoa, ata ami ai abi arinai abo ai hedehamiu.  
\v 9 Tabu nuamiu au ene ema dobila nige’e, na iilamai mo bena abo au lauwatai.  
\v 10 Paana ai maemiu ta miamia, teina ai lauhesommiu ta, ai ene ena tau esau nige i paisoa, hinage tabu i aiai.  
\v 11 Na ai ataieyao headi boeamiu eai se laulau gaibu mo, nige se paipaisoa, isi manamanatatahai tataodi.  
\v 12 Na isi nei doha ai lauhesomdi eo ai henuapaipaidi eda Guiau Iesu debana eai, isi abo se paisoa tautaubiga, eo isibom adi aiai abo se aiai.  
\v 13 Na omi, ema tataoyao e, laulau lolodi eai tabu amnamiu se tomatoma.   
\p
\v 14 Ema riba ta, teina uriuri eai ta ena tau esau nige i awaabiei meta tau me au itasipoi, eo ia tabu au awaehaei, bena abo i taumaeamaea.  
\v 15 Taiede ia tabu au hewaiunuei, na au hedudurai mo doha ia eda tau esau.   
\p
\v 16 Na, loni ena Guiau iabom loni i leawa huia gamagamagari, eo dobila gamagamagari eai, Guiau abo gamagarimiu maemiu.   
\p
\v 17 Eau Paulo, egu lautoi ede ina eaubom nimagu eai, uriuri gamagamagari ia ede heiheinoina: eau egu uriuri ede meta.  
\v 18 Eda Guiau Iesu Keriso ena ainauia omi gamagarimiu maemiu. Amen.\f + \fr 3.18 \ft Leta helabuina ta Atenai eai hinage se uri.\f*