\id EPH  
\h एफिसी 
\toc1 एफिसी 
\toc2 एफिसी 
\toc3 एफिसी 
\mt1 एफिसी 
\ip \bd ब्रेक्‍ब मुर:\bd* एको चिठी पावलमी ब्रेक्‍शो बाक्‍ब। 
\ip \bd गेना ब्रेक्‍शो:\bd* एको चिठी नु कलस्‍सी आन कली चिठी कालेमी ब्रेक्‍शो बाक्‍ब। मारदे हना तिखीकसम एको चिठी निक्‍शी चाक्‍शो बाक्‍त। एको चिठी रोम सहर रे ६२ ए. डी. नुप्‍‍ची ना कि ६३ ए. डी. गोची ना ब्रेक्‍शो बाक्‍त। 
\ip \bd मारदे ब्रेक्‍शो:\bd* तेइ तेइ थमा सुइक्‍बपुकी श्‍येत जशा, आन योव़चा पुंइसीतीके नु येसु नु बाक्‍शा परमप्रभु यावे आ ङोंइती ठीक दुम्‍तीके तुइश्‍शा मिम्‍चा माल्‍नीम। एको चिठीम थमा सुइक्‍ब आन ग्रुम्‍तीकेम मार पचा नु मार मपचा, दे शेंशो बाक्‍ब। एको का निक्‍शी ग्रुम्‍तीक कली ब्रेक्‍शो चिठी बाक्‍त हना यो, अरु क्‍येङा ङोंइती एफिसी ङा ग्रुम्‍तीक ङा थमा सुइक्‍ब कली पढेचा कली चाक्‍शो बाक्‍त। 
\c 1  
\s1 ङोंइती ङा लोव़ 
\p  
\v 1 गो पावल नङ। ख्रीस्‍त येसुम आं कली सोइक्‍ताक्‍यी। मेको परमप्रभु यावे आ दाक्‍शो बाक्‍त। मिनु गो एको चिठी एफिसस सहरम बाक्‍ब येसु ख्रीस्‍त कली थमा सुइक्‍ब, परमप्रभु यावे आ मुर इन कली ब्रेक्‍ताक्‍न्‍नी।  
\v 2 इं आफ परमप्रभु यावे नु इं प्रभु येसु ख्रीस्‍तमी इन कली शिशी पा थुं नाइश्‍शा बाक्‍चा गेम्‍सेक्‍ल। 
\s1 परमप्रभु कली ठेयब सेल्‍शो 
\p  
\v 3 इं प्रभु येसु ख्रीस्‍त आ आफ परमप्रभु यावे कली “गे ठेयब बाक्‍नीनी” देंय। मारदे हना मेकोमी स्‍वर्गम आ सोक्‍तीम पतीके इं कली आसीक गेप्‍तु। मेको नेल्‍ल ख्रीस्‍तम बाक्‍ब।  
\v 4 मोपतीके रागी सेल्‍चा क्‍येङा ङोंइती परमप्रभु यावेमी इं कली योव़तु। मार कली योव़तु देंशा हना, गोपुकी परमप्रभु यावे आ मुर दुम्‍शा, दोस मताइब नु दाक्‍ब दुम्‍यल, दे योव़तु। \em रोमी ८:२८-३०; एफिसी ५:२७\em* 
\v 5 मिनु परमप्रभु यावेमी इं कली दाक्‍शा “येसु ख्रीस्‍त कली थमा सुइक्‍ब दुम्‍नीम” दे आंम आ तमी तौ सेल्‍तु। मेकोन परमप्रभु यावे आ दाक्‍शो बाक्‍त।  
\v 6 मिनु मेकोमी इं कली आ दाक्‍शो तौ आ पतीक रे मुरुमी मिम्‍ने मचाप्‍चा ङा शिशीम ठेयब सेल्‍चा कली आ तमी तौ सेल्‍तु। \em मत्ती ३:१७\em* 
\v 7 मोपा गोपुकी येसु ख्रीस्‍त आ हुशेम पतीके माफ तशा ब्रोंइशा बाक्‍नय। इं हेंथे पशो आ पर्बम माफ ताइनय। दोपा माफ तशा ब्रोंइशा बाक्‍नय देंशा हना, मुरुमी मिम्‍ने मचाप्‍चा ङा आ शिशी रे पा माफ ताइनय। \em कलस्‍सी १:१४; एफिसी २:७; एफिसी ३:८,१६\em* 
\v 8 मिनु मेको आ जोक्‍तीक तुइक्‍तीक नेल्‍लेमी आ शिशी इं तारी मोइश्‍शो बाक्‍त। \em एफिसी ३:३-६,९; रोमी १६:२५; कलस्‍सी १:२६-२७\em* 
\v 9 परमप्रभु यावेमी इं कली ङोंइती ख्रीस्‍त रे आ थुंमी ख्रुइश्‍शा वोइश्‍शो लोव़ तुइक्‍पाइक्‍चा दाक्‍ताक्‍व।  
\v 10 मिनु मेको नेल्‍ल ठीक दुम्‍मेनु, परमप्रभु यावेमी ख्रीस्‍त कली रागीमी सोइक्‍ताक्‍व। मोपा रागी नु स्‍वर्गमी बाक्‍ब, इस्राएली नु अर्को रागी ङा मुर नेल्‍ल आन कली ख्रीस्‍तमी का सेल्‍तु। \em गलाती ४:४\em* 
\p  
\v 11 परमप्रभु यावेमी ख्रीस्‍त रे पा आ आल सेल्‍शा, इं कली योव़तु। मारदे हना ङोंइती रे योव़नुङमी, दे मिम्‍शो बाक्‍माक्‍त। मेकोन पाप्‍तु। \em कलस्‍सी १:१२\em* 
\v 12 गोपुकी ङोंइती “ख्रीस्‍तमी आंइ कली मरिम्‍शो रे प्रोंइब” दे आस पाइतक। मोपतीके परमप्रभु यावेमी आंइ कली “आ सक्ति ठेयब बाक्‍ब” दे ब्रोंइचा गेचा कली योव़तीकी। 
\p  
\v 13 मिनु गेपुकीमी यो “येसु ख्रीस्‍तमी पाप रे प्रोंइब” देंशो थमा ग्‍येरपाइक्‍ब लोव़ नेंतीनी। ख्रीस्‍त कली थमा सुइक्‍तीनी। मिनु परमप्रभु यावेमी ङोंइती देंशो खोदेंशो पा आ सोक्‍तीमी छाप थोक्‍सीशो बाक्‍तीनी। \em एफिसी ४:३०\em* 
\v 14 आ सोक्‍त चहिं गोपुकी परमप्रभु यावे नु बाक्‍ची मजाक्‍म सम्‍म कली परमप्रभु यावे आ तमी तौ दुम्‍ने थुम्‍शो नय, दे कोंइतीक बाक्‍ब। मोपतीके “परमप्रभु यावे आ सक्ति ठेयब बाक्‍ब” देंनय। 
\s1 पावलम पशो प्रार्थना 
\p  
\v 15 गेपुकी प्रभु येसु कली थमा सुइक्‍तीनी। अरु थमा सुइक्‍ब आन कली दाक्‍ताक्‍नी, दे गो इन पर्बम लोव़ नेंता।  
\v 16 मोपतीके गो इन कली मिम्‍शा, परमप्रभु यावे कली “गे एफिसस ङा मुर आन कली रिम्‍शो पाइतीनी” दे ठेयब सेल्‍शा, लोव़ पना पन बाक्‍नुङ। \em कलस्‍सी १:४,९\em* 
\v 17 मार लोव़ पना पन बाक्‍नुङ देंशा हना “परमप्रभु यावे, आंइ प्रभु येसु ख्रीस्‍त आ आफ ननी। गे नेल्‍ल छेङछेङ ङा आफ बाक्‍नीनी। गे एफिसस ङा थमा सुइक्‍ब आन कली येसु ख्रीस्‍त कली तुइक्‍तीकेमी रिम्‍शो गेय पस जोक्‍तीके नु नोले मार दुम्‍बा तुइक्‍तीक सोक्‍त गेने।  
\v 18 गे मेको आन कली मार कली ब्रेश्‍शो बाक्‍नीनी, थमा सुइक्‍ब आन ततीक मार बाक्‍बा, इन छेङछेङ गिश ठेयब बाक्‍बा, मेको नेल्‍ल रुप्‍तीक थुं गेने।  
\v 19 मिनु गो थमा सुइक्‍ब आंइ कली इन ठेयब सक्तिम मार पाइनीनी नु इन गेशो बोल गिश ठेयब बाक्‍मे, मेको रुप्‍तीक थुं यो गेने।  
\v 20 मेको सक्तिमी ख्रीस्‍त कली बेक्‍शो रे सेंशा, स्‍वर्ग ङा इन बाक्‍तीकेमी इन ग्‍युरा गे निप्‍पाइक्‍तीनी। \em भजन संग्रह ११०:१\em* 
\v 21 मिनु हुकुम पाइब, अधिकार पाइश्‍शो, सक्ति पाइश्‍शो ठेयब दुम्‍शो नेल्‍लेमी ख्रीस्‍त कली प्रभु देंचा माल्‍नीमी। मेको नेल्‍ल आन क्‍येङा ठेयब नें बाक्‍ब। मुल ला ममाइ, नोले यो मोदेंशोन बाक्‍ब। \em रोमी ८:३८-३९; फिलिप्‍पी २:९; कलस्‍सी २:१०\em* 
\v 22 मिनु गेमी मारेइ मारेइ आन कली येसु ख्रीस्‍त आ खोइलीमी दिम्‍पाइक्‍तीनी। थमा सुइक्‍बपुकी रां का खोदेंशो सेल्‍शा, येसु ख्रीस्‍त कली मेको रां आ पिया सेल्‍तीनी। \em भजन संग्रह ८:७; मत्ती २८:१८; एफिसी ४:१५ \em* 
\v 23 मोपा थमा सुइक्‍बपुकी येसु ख्रीस्‍त आ रां दुम्‍तेक्‍म। मिनु मेको रां आ पिया येसु ख्रीस्‍त आंमान दुम्‍शा, मारेइ मारेइ खाप्‍शो बाक्‍त” दे लोव़ पाइनुङ। \em एफिसी ३:३०; १कोरिन्‍थी १२:२७; कलस्‍सी १:१९\em* 
\c 2  
\s1 बेक्‍शो रे ब्रोंइशो 
\p  
\v 1 गेपुकी ङोंइती बेक्‍शो मुर खोदेंशो बाक्‍तीनी। दोपा मोदेंशो बाक्‍तीनी देंशा हना, मरिम्‍शो पशा, परमप्रभु यावे कली मटिथु, हेंथे गाक्‍शो बाक्‍तीनी। \em लूका १५:२४,३२; कलस्‍सी २:१३ \em* 
\v 2 मिनु रागी ङा मुर आन लां खोइक्‍तीनी। मोपा फशेम हुकुम पाइब, सैतान आ देंशो टीब बाक्‍तीनी। मेको आ सोक्‍ती परमप्रभु परमप्रभु यावे कली मटीब आन आगाम बाक्‍ब। \em तीतस ३:३; एफिसी ६:१२; यूहन्‍ना १२:३१\em* 
\v 3 मिनु ङोंइती गो नेल्‍ल मोदेंशो रागी ङा मुर बाक्‍तय। गोपुकी यो मार दाक्‍तय, मेकोन पाइतय। इं रां नु थुंमी मार दाक्‍ता, मेकोन पाइतय। मोपतीके गोपुकी यो अरु मुर खोदेंशो पा गाइक्‍ब आ आल दुम्‍‍तय। \em १पत्रुस ४:३; कलस्‍सी ३:६\em* 
\v 4 तन्‍न परमप्रभु यावे शुश शिशी पाइब दुम्‍तीके इं कली तशा, शिशी पा दाक्‍ताक्‍व।  
\v 5 मेना गोपुकी मटिथु बेक्‍शो बाक्‍तय हना यो, मेकोमी इं कली ख्रीस्‍त नु कालेम सेंताक्‍व। मोपा आ शिशी रे गोपुकी ब्रोंइशो बाक्‍तय।  
\v 6 मिनु परमप्रभु यावेमी इं कली ख्रीस्‍त येसु नु सेंशा, मेको नु स्‍वर्गमी काथा बाक्‍पाइश्‍शा, \em फिलिप्‍पी ३:२०\em* 
\v 7 मुरुमी मिम्‍ने मचाप्‍चा ङा ठेयब शिशी आंम आ दाक्‍तीकेमी ख्रीस्‍त येसु रे नोले ङा मुर आन कली कोंइचा कली पाप्‍तु। \em एफिसी १:७\em* 
\p  
\v 8 मिनु गेपुकी परमप्रभु यावे आ शिशी तशा, थमा सुइक्‍तीके पाप रे ब्रोंइतीनी। मेको इन पतीके ममाइ, परमप्रभु यावेमी मोशा गेशो बाक्‍ब। \em रोमी ३:२३-२४; गलाती २:१६\em* 
\v 9 मेको मुरुम पशो ममाइ, मोपतीके सुइ ठेयब लेन्‍ने मचाप्‍नीम। \em रोमी ३:२८; १कोरिन्‍थी १:२९\em* 
\v 10 गोपुकी परमप्रभु यावे रे ख्रीस्‍त येसु आ पतीकेमी सेल्‍शो बाक्‍नय। परमप्रभु यावेमी इं कली रिम्‍शो गेय वोइश्‍शो बाक्‍त। मेको पचा माल्‍नय। \em तीतस २:१४\em* 
\s1 ख्रीस्‍तमी नेल्‍ल का बाक्‍नीम 
\p  
\v 11 ङोंइती गेपुकी परमप्रभु यावे आ देंशो लोव़ मतुइक्‍ब बाक्‍तीनी। मुर आन गुइ रे ख्रोइक्‍तीक चिनु ख्रोइश्‍शो, इस्राएलीपुकीमी इन कली “ख्रोइक्‍तीक चिनु मख्रोइश्‍शो मुर नम” देंतेक्‍म। मेको मप्रेंदीन। \em एफिसी ५:८\em* 
\v 12 मेना गेपुकी ख्रीस्‍त रे ङोन बाक्‍तीनी। इस्राएल ङा मुरपुकी रे यो ङोन बाक्‍तीनी। मोपा परमप्रभु यावेमी पशो कबल मतुइक्‍थु, आस मपाइश्‍शो नु परमप्रभु यावे कली मतुइक्‍ब मुर बाक्‍तीनी। \em रोमी ९:४; १थिस्‍सलोनिकी ४:१३\em* 
\v 13 मुल चहिं गे ख्रीस्‍त येसु रे ङोन बाक्‍बपुकी ख्रीस्‍त आ हुशेम पतीके मेको आ नेक्‍था दुम्‍तीनी। 
\p  
\v 14 मेको इं कली दुशा बाक्‍चा गेब बाक्‍ब। मेकोमी इस्राएली नु अर्को रागी ङा थमा सुइक्‍ब आन कली का सेल्‍तु। मिनु मेको आन दातेमी बाक्‍शो दुचा मगेब गारो प्रेश्‍शा, जितीक खेतीक नेल्‍ल साम्‍तु। \em यसैया ९:५; गलाती ३:२८\em* 
\v 15 दोपा साम्‍तु देंशा हना, यहूदी आन कली अरेशो, शेंशो, फुल्‍लुम मुशा ब्रेक्‍शो लोव़ ङा गेय नेल्‍ल आ रां साइक्‍चा गेशा साम्‍तु। मिनु मेकोमी जात निक्‍शी के जात का सेल्‍शा, नक मुर सेल्‍तु। मोपा दुशा बाक्‍चा गेप्‍तु। \em कलस्‍सी २:१४\em* 
\p  
\v 16 येसु ख्रीस्‍तमी इं कली परमप्रभु यावे नु गारपाइक्‍चा कली शीम कांटी थोक्‍चा पुंइसीशा बेक्‍त। मोपा इस्राएली नु अर्को रागी ङा जिचा खे‍चा साम्‍शा, निम्‍फा आस कली परमप्रभु यावे नु गारपाइक्‍तु।  
\v 17 मिनु येसु ख्रीस्‍त रागीमी जाक्‍शा, ङोन बाक्‍ब इन कली नु परमप्रभु यावे आ नेक्‍था बाक्‍ब आन कली परमप्रभु यावे नु दोपा दुशा बाक्‍चा, मेको शेंताक्‍व। \em यसैया ५७:१९\em* 
\v 18 मोपा गोपुकी परमप्रभु यावे आ सोक्‍तीम पतीके नेल्‍ल येसु ख्रीस्‍त रे पा इं आफ परमप्रभु यावे आ नेक्‍था जाक्‍दीत्‍नय। \em एफिसी ३:१२\em* 
\v 19 मोपतीके गेपुकी मुल रे ङोन बाक्‍ब अर्को रागी ङा मुर मननी। परमप्रभु यावे आ राज्‍य ङा, अरु थमा सुइक्‍बपुकी नु आ खिं ङा मुर बाक्‍नीनी। \em एफिसी ३:६; हिब्रू १२:२२-२३\em* 
\v 20 मिनु ख्रीस्‍त आ सोइश्‍शो नु साइ ङा परमप्रभु यावे आ लोव़ पाइबपुकी जग खोदेंशो दुम्‍तेक्‍म। गेपुकी चहिं मेको तारी सेल्‍शो खिं खोदेंशो ननी। ख्रीस्‍त येसु मेको खिं ङा ङोंइती वोइश्‍शो जग फुल्‍लु खोदेंशो बाक्‍ब। \em मत्ती १६:१८; यसैया २८:१६; १पत्रुस २:४-६\em*\em मत्ती १६:१८ \em* 
\v 21 मेको तारी फुल्‍लु नेल्‍ल प्रोव़सीशा, परमप्रभु यावे आ खिं दुम्‍चा कली बारना बारन लाइब।  
\v 22 मिनु गेपुकी यो परमप्रभु यावे आ सोक्‍तीम पतीके परमप्रभु यावे आ खिं बाक्‍नीनी। 
\c 3  
\s1 पावलम अरु आन कली पशो गेय 
\p  
\v 1 मिनु गो पावल अर्को रागी ङा मुर इन कली ख्रीस्‍त येसु आ लोव़ शेंतीके साङलोम पाइक्‍‍साक्‍यी। \em फिलिप्‍पी १:७,१३\em* 
\v 2 परमप्रभु यावेमी “अर्को मुर आन कली आं शिशी आ पर्बम शेंदो” दे आं कली गेय पाइब सेल्‍ती। गेपुकीम एको लोव़ नेंशो बाक्‍नी माइ, दे मिम्‍नुङ। \em गलाती २:७\em* 
\v 3 दोपा परमप्रभु यावेमी आ ख्रुइश्‍शो लोव़ आं कली तुइक्‍पदा, मोपा ङोंइतीन इन कली इचइच्‍का ब्रेक्‍ने थुम्‍शो बाक्‍ती। \em एफिसी १:९-१०; गलाती १:१२\em* 
\v 4 मिनु गेपुकीमी मेको पढेनीनु, ख्रीस्‍त आ पर्बम ख्रुइश्‍शो लोव़ ङा गेय दोपा पवा, दे आं तुइश्‍शो लोव़ रुप्‍ने चाप्‍नीनी।  
\v 5 मुल परमप्रभु यावे आ सोक्‍तीमी येसु ख्रीस्‍त आ सोइश्‍शो नु परमप्रभु यावे आ लोव़ पाइब आन कली परमप्रभु यावे आ ख्रुइश्‍शो मार बाक्‍बा, दे शेंताक्‍ङमी। ङोंइती ङा मुरपुकीमी चहिं मतुइश्‍शो बाक्‍तेक्‍म। \em कलस्‍सी १:२६\em* 
\v 6 मिनु मेको ख्रुइश्‍शो लोव़ मार बाक्‍ब देंशा हना, अर्को रागी ङा मुरपुकी यो इस्राएली नु खाल का ङा दुम्‍शा, अङस ताइब बाक्‍नीम। मेको नेल्‍ल रां का नम। ग्‍येरपाइक्‍ब लोव़मी मार देंब देंशा हना, ख्रीस्‍त येसु कली थमा सुइश्‍शा, मेकोपुकी यो परमप्रभु यावे आ कबल ताइब बाक्‍नीम। \em एफिसी ३:१३,१८-१९; प्रेरित १५:७-९\em* 
\p  
\v 7 मोपा अर्को रागी ङा मुर आन कली ग्‍येरपाइक्‍ब लोव़ शेंचा, दे शेंब सेल्‍ती। परमप्रभु यावे आ सक्तिम पतीके आ शिशी मोशा गेप्‍तु।  
\v 8 गो परमप्रभु यावे आ मुर नेल्‍ल आन क्‍येङा आइक्‍च बाक्‍नुङ। मिनु परमप्रभु यावेमी आ शिशी रे आं कली “अर्को रागी ङा मुर आन कली ख्रीस्‍त आ शिशी गिश ठेयब बाक्‍बा तुइक्‍पाइक्‍मी” दे शेंब सेल्‍ती। \em १कोरिन्‍थी १५:९-१०; गलाती १:१६; एफिसी १:७\em* 
\v 9 मिनु मारेइ मारेइ सेल्‍ब परमप्रभु यावेमी रागी सेल्‍शो रे ख्रुइश्‍शा वोइश्‍शो नेल्‍ल आन कली त‍पाइक्‍चा, दे कोंइब सेल्‍ती। \em एफिसी १:९-१०; रोमी १६:२५-२६; कलस्‍सी १:१६\em* 
\v 10 मारदे आं कली मोदेंशो सेल्‍ती देंशा हना, येसु ख्रीस्‍त कली थमा सुइक्‍बपुकीमी परमप्रभु यावे आ मिम्‍शो मार बाक्‍बा, मेको स्‍वर्गम बाक्‍ब हुकुम नु अधिकार पाइब आन कली तुइक्‍पदमेक्‍ल, दे आं कली कोंइब सेल्‍ती। \em १पत्रुस १:१२\em* 
\v 11 मेको परमप्रभु यावे आ गेना हना यो मिम्‍शो लोव़ बाक्‍त। मेको मुल इं प्रभु ख्रीस्‍त येसु रे खाप्‍शो बाक्‍त।  
\v 12 मोपा येसु ख्रीस्‍त कली थमा सुइक्‍तीकेमी गोपुकी महिंथु, इं कली दाक्‍ब, दे तुइश्‍शा, परमप्रभु यावे आ नेक्‍था जाक्‍दीत्‍नय। \em रोमी ५:२\em* 
\v 13 इन पर्बम गो श्‍येत जशो बाक्‍नुङ। मेको इन कली रिम्‍शो दुम्‍ब। मोपतीके आं कली श्‍येत जशो तशा महिनीन। \em कलस्‍सी १:२४\em* 
\p  
\v 14 मोदेंशो पा गो इं आफ परमप्रभु यावे आ ङोंइती बाप्‍शा, पोक्‍च थेक्‍शा, इन कली मिम्‍शा पुंइशा बाक्‍नुङ।  
\v 15 परमप्रभु यावे सरीङ नु रागीम बाक्‍ब नेल्‍ल आन आफ बाक्‍ब।  
\v 16 मिनु गोमी परमप्रभु यावे कली “इन शुश छेङछेङ नु सक्तिम, एफिसस ङा थमा सुइक्‍ब आन थुं बोल्‍यो से‍लीन। मिनु इन सोक्‍त आन थुंमी बाक्‍मेनु, महिंब दुम्‍नीम। \em एफिसी १:७; एफिसी ६:१०; २कोरिन्थी ४:१६‍\em* 
\v 17 मोपा थमा सुइक्‍तीके ख्रीस्‍त मेको आन थुंमी बाक्‍ब। मिनु ‘येसु ख्रीस्‍तमी आं कली दाक्‍ब’ दे शाक्‍श ग्रुक्‍शो रवा खोदेंशो पा इन दाक्‍तीकेमी ख्रुम्‍शो मुरपुकी से‍लीन। \em यूहन्‍ना १४:२३; कलस्‍सी २:७\em* 
\v 18 मो दुम्‍मेनु, मेकोपुकी नु नेल्‍ल थमा सुइक्‍बपुकीमी येसु ख्रीस्‍त आ मुर आन कली दाक्‍तीके गिश ब्रेम्‍शो, गिश दुइश्‍शो, गिश लाइश्‍शो नु गिश लुक्‍च लशो बाक्‍मे, मेको नेल्‍ल रुप्‍तीक थुं गेने।  
\v 19 ख्रीस्‍त आ दाक्‍तीके गिश ठेयब बाक्‍बा, मेको रुप्‍‍ने मचाप्‍चा ङा बाक्‍त हना यो, मेको आन कली रुप्‍पतीन। मिनु परमप्रभु यावे, गे दोपा मारेइ मारेइमी गाप्‍शो बाक्‍नीनी, मोपा मेको आन कली यो इन सक्तिमी प्रिंदीन। \em कलस्‍सी २:२-३\em* 
\v 20 गे नेल्‍ल आन क्‍येङा ठेयब सक्ति पाइश्‍शो बाक्‍नीनी। मोपतीके इन सक्ति रे आंइ पुंइशो नु मिम्‍शो क्‍येङा यो शुश गेने चाप्‍नीनी।  
\v 21 मिनु थमा सुइक्‍ब आंइ दातेमी येसु ख्रीस्‍त आ नेंमी नेल्‍ल पाला ङा मुरपुकीमी इन कली गेना हना यो ठेयब सेल्‍नीकी, आमेन” दे इन पर्बम पुंइनुङ। 
\c 4  
\s1 ख्रीस्‍तमी पपाइश्‍शो गेय 
\p  
\v 1 गो प्रभु आ पर्बम ग्‍याइक्‍चा पुंइसीब, इन कली अरेनुङ। गेपुकी परमप्रभु यावे आ ब्रेश्‍शो दुम्‍शो बाक्‍नीनी। मोपतीके परमप्रभु यावे कली शिरशो गेय पने।  
\v 2 गेपुकी ब्रेम्‍शो दुम्‍शा, सुइ नु मचुरथु, रिम्‍शो पा बाक्‍कीन। मुर आन कली फाल्‍शा, मेकोपुकी नु रिम्‍शो पा दाक्‍मुने। \em कलस्‍सी ३:१२-१३\em* 
\v 3 मिनु दोपा परमप्रभु यावे आ सोक्‍तीमी थुं का सेल्‍बा, मोपा थुं का दुम्‍शा दुशा बाक्‍कीन। \em कलस्‍सी ३:१५; फिलिप्‍पी २:२\em* 
\v 4 दोपा रां नु सोक्‍त का बाक्‍नीसी, मोपा थुं का दुमीन। गे नेल्‍ल इन आस कान बाक्‍ब। मोपा ब्रेत्‍चा पुंइसाक्‍नी। \em रोमी १२:५\em* 
\v 5 मोपा प्रभु का, थमा सुइक्‍तीक का नु ब्‍वाक्‍कुमी ख्रुम्‍शा ग्रुंइचा यो का ला बाक्‍ब। \em १कोरिन्‍थी ८:६ \em* 
\v 6 मिनु नेल्‍ल इं आफ परमप्रभु यावे यो का ला बाक्‍ब। मेको नेल्‍ल आन क्‍येङा ठेयब बाक्‍ब। नेल्‍ल पतीकेमी नु नेल्‍ल आन आगाम बाक्‍ब। \em १कोरिन्‍थी १२:६\em* 
\p  
\v 7 इं कली नेल्‍ल शिशी गेशो बाक्‍ब। मेको ख्रीस्‍तमी “आं गेय पचा कली गिश माल्‍बा” दे मो गेशो बाक्‍ब। \em रोमी १२:३-६; १कोरिन्‍थी १२:१\em* 
\v 8 मिनु मार ब्रेक्‍शो बाक्‍त देंशा हना “मेको इर परमप्रभु यावे आ बाक्‍तीक लमेनु, चोक्‍सीशो शुश आन कली लाइक्‍तु। मिनु मुर आन कली गेय पतीक सक्ति गेप्‍तु” दे ब्रेक्‍शो बाक्‍ब। \em भजन संग्रह ६८:१९; कलस्‍सी २:१५\em* 
\v 9 मिनु इर लचा देंशो, मार रुम्‍सीब देंशा हना, मेको ङोंइती रागी आगा तोंइसीशो बाक्‍ब, दे रुम्‍सीब। \em यूहन्‍ना ३:१३\em* 
\v 10 मिनु मेको रागी आगा तोंइ‍सीब सरीङ क्‍येङा ता लाइब यो बाक्‍ब। मोपा मेकोमी मारेइ मारेइ खाप्‍तु। 
\p  
\v 11 मिनु येसु ख्रीस्‍तम मुर आन कली गेशो गेय मार बाक्‍ब देंशा हना, का निक्‍शी आ सोइश्‍शो दुम्‍नीम, का निक्‍शी परमप्रभु यावे आ लोव़ पाइब दुम्‍नीम, का निक्‍शी ग्‍येरपाइक्‍ब लोव़ नेंपाइक्‍ब दुम्‍नीम, का निक्‍शी थमा सुइक्‍ब आन कली कोव़ब नु शेंब दुम्‍नीम। \em १कोरिन्‍थी १२:२८; प्रेरित २१:८\em* 
\v 12 मेको गेय मार कली बाक्‍ब देंशा हना, परमप्रभु यावे आ मुर आन थमा सुइक्‍तीके बारपाइक्‍चा कली बाक्‍ब। थमा सुइक्‍ब आन ग्रुम्‍तीक, ख्रीस्‍त आ रां दुम्‍शा, मेकेर ङा मुर बोल्‍यो सेल्‍चा कली गेशो गेय बाक्‍ब। \em १कोरिन्‍थी १४:२६; १पत्रुस २:५\em* 
\v 13 मोपा गो नेल्‍ल थमा सुइश्‍शा, का दुम्‍तीके परमप्रभु यावे आ तौ कली तुइक्‍ब दुम्‍नय। मिनु मोदेंशो पा गोपुकी आइक्‍च आल ममाइ, कोल्‍शा चोक्‍शो मुर दुम्‍शा, ख्रीस्‍त दोदेंशो बाक्‍मे, मोदेंशो दुम्‍नय।  
\v 14 गोपुकीम आल खोदेंशो पा मुर आन शेंशो हेंथे लोव़ थमा सुइक्‍चा मदुम्‍नय। दूली शेंबपुकीमी निप्‍स खाप्‍शा, मुर आन कली जोल पा फश लोव़ शेंशा, दूली लां खोइक्‍पाइक्‍नीम। \em १कोरिन्‍थी १४:२०; हिब्रू १३:९; याकूब १:६\em* 
\v 15 गोपुकी चहिं मुर आन कली दाक्‍शा, थमा शेंतीक लोव़ शेंशा, मारेइ मारेइमी इं पिया ख्रीस्‍त खोदेंशो दुम्‍नय। \em एफिसी १:२२; एफिसी ५:२३; कलस्‍सी १:१८\em* 
\v 16 मोपा येसु ख्रीस्‍त पिया दुम्‍तीके रां नेल्‍ल का खोदेंशो पा गारपाइक्‍ब। थमा सुइक्‍बपुकीमी ठीक गेय पाम्‍तेक्‍म हना, मेको रां बारना बारन लशा, थमा सुइक्‍बपुकी दाक्‍मुइनीम। \em कलस्‍सी २:१९\em* 
\s1 माइत नु नक मुर 
\p  
\v 17 परमप्रभु यावे कली मतुइक्‍ब मुरपुकी जाम्‍शा लाइब गेय ला मिम्‍शा पाइनीम। मिनु गेपुकी मुल रे मेको आन खोदेंशो मपने, दे प्रभु आ नेंमी इन कली रिम्‍शो पा अरेनुङ। \em रोमी १:२१-२४\em* 
\v 18 मेको आन थुं फुल्‍लु खोदेंशो पा खकटा दुम्‍तीके परमप्रभु यावे कली मतुइक्‍ब बाक्‍तेक्‍म। मोपतीके मेकोपुकी छिङछिङमी बाक्‍शो खोदेंशो पा परमप्रभु यावे कली रुम्‍ने मचाप्‍नीम। मिनु मोपा परमप्रभु यावे रे ङोन बाक्‍नीम। \em एफिसी २:१२\em* 
\v 19 मेकोपुकी रिम्‍शो मुर दुम्‍शा बाक्‍चा ताइश्‍शा, आन दला दाक्‍स पा, ग्रांग्रा दिचा ङा गेय नेल्‍ल शुश दाक्‍नीम।  
\v 20 गेपुकी चहिं ख्रीस्‍त कली तुइश्‍शा, मोदेंशो मशेंसीनी।  
\v 21 थमा पा येसु ख्रीस्‍त आ पर्बम लोव़ नेंतीनी। मिनु येसु आ थमा लोव़ तुइश्‍शो बाक्‍तीनी।  
\v 22 मोपतीके इन ङोंइती ङा ग्रांग्रा दिचा ङा दला दाक्‍स पाइब माइत थुं ङा मुर दुम्‍शा बाक्‍चा ताइक्‍तीने। मारदे हना मेकोम इन कली खतम सेल्‍ब। \em कलस्‍सी ३:९-१०; रोमी ८:१३; गलाती ६:८\em* 
\v 23 मिनु इन थुंमी बाक्‍शो माइत सोक्‍त नक सेल्‍चा गेने। \em रोमी १२:२\em* 
\v 24 परमप्रभु यावे आ थुं खोदेंशो पा थमा पा ठीक पतीकेमी परमप्रभु यावे आ मुर दुम्‍शा बाक्‍कीन। \em उत्‍पत्ती १:२६-२७\em* 
\s1 नक मुरुमी पचा माल्‍शो गेय 
\p  
\v 25 मारदे हना गो नेल्‍ल रां का नय, मुर आन कली जोल पचा ताइक्‍तीने। थमा लोव़ ला पने। \em जकरिया ८:१६\em* 
\v 26 गाइक्‍ताक्‍नी हना, पाप मपने। मिनु नां रिक्‍चा क्‍येङा ङोंइती इन गाइक्‍चा थुमीने। \em भजन संग्रह ४:४; याकूब १:१९-२०\em* 
\v 27 मोपा सैतान कली गेय पचा मगेने।  
\v 28 खुइ पाइबमी लेंशा खुइ मपथु, ठीक गेय पचा माल्‍ब। मिनु मेकोमी रिम्‍शो गेय पवानु, श्‍येत जाइब आन कली यो वारच पने चाप्‍ब। \em प्रस्‍थान २०:१५; १थिस्‍सलोनिकी ४:११\em* 
\v 29 गेपुकी नना ओल लोव़ काइ मपने। मुर आन कली रिम्‍शो दुम्‍ब नु गारचा ङा लोव़ ला पने। मुरपुकीमी इन रिम्‍शो लोव़ नेन्‍मेनु, परमप्रभु यावे आ शिशी रुप्‍मेक्‍ल। \em एफिसी ५:४; कलस्‍सी ४:६\em* 
\v 30 परमप्रभु यावे आ सोक्‍त कली थुं मखाइक्‍पतीन। मारदे हना गेपुकी परमप्रभु यावे आ बाक्‍तीके मजाक्‍दीन्‍नी सम्‍म परमप्रभु यावे आ सोक्‍तीमी छाप थोक्‍सीशो बाक्‍नीनी। \em यसैया ६३:१०; एफिसी १:१३-१४\em* 
\v 31 मिनु ईख कुरचा, चुरचा, गाइक्‍चा, ग्रीचा, मरिम्‍शो लोव़ पचा नु मरिम्‍शो पचा नेल्‍ल ताइक्‍तीने। \em कलस्‍सी ३:८\em* 
\v 32 मिनु रिम्‍शो पा कोव़मुने। दोपा परमप्रभु यावेमी ख्रीस्‍त मिम्‍शा, इन कली माफ गेवा, मोपा गेपुकी यो माफ गेमुने। \em मत्ती ६:१४; मत्ती १८:२२-३५; कलस्‍सी ३:१३\em* 
\c 5  
\s1 छेङछेङम ब्रोंइशो मुर 
\p  
\v 1 गेपुकी परमप्रभु यावे आ दाक्‍शो तमी तौ दुम्‍तीके मेकोमी दोदेंशो पवा, मोदेंशो पने। \em लूका ६:३६\em* 
\v 2 मिनु येसु ख्रीस्‍तमी इं कली दाक्‍शो खोदेंशो पा दाक्‍मुने। मेकोमी दोपा दाक्‍ताक्‍व देंशा हना, आंम कली ममिम्‍थु, ब्रोव़शो रिना पाइश्‍शो धूप नु क्‍योरशा चढ़ेशो खोदेंशो पा, इं पाप क्‍याम्‍चा कली बेक्‍शा, परमप्रभु यावे कली जिम्‍मा गेंसाक्‍व।  
\v 3 मोपतीके गेपुकी परमप्रभु यावे आ मुर दुम्‍शा, इन दातेमी तेल्‍लेम पचा, ग्रांग्रा दिचा ङा गेय पचा नु शिंम पचा आ पर्बम लोव़ सम्‍म यो मपने। मेको परमप्रभु यावे आ मुर आन कली रिम्‍शो दुम्‍ब। \em कलस्‍सी ३:५ \em* 
\v 4 गेपुकी मुने दोक्‍चा ङा हेंथे लोव़ नु मूर्ख लोव़ पचा इन कली मगारब। मेको आ पा ङा परमप्रभु यावे कली “गे आंइ कली रिम्‍शो पाइतीनी” देंचा माल्‍नीनी। \em एफिसी ४:२९\em* 
\v 5 तेल्‍लेम पाइब, ग्रांग्रा दिचा ङा गेय पाइब नु शिंम पाइबपुकी ख्रीस्‍त नु परमप्रभु यावे आ राज्‍यमी ओव़चा मताइनीम, दे रिम्‍शो पा तुइक्‍चा माल्‍नीनी। मेको नेल्‍ल मूर्ति पूजा पचा खोदेंशो बाक्‍ब। \em १कोरिन्‍थी ६:९-१०; प्रकाश २१:८; प्रकाश २२:१५\em* 
\v 6 सुइ मुरुमी इन कली फश लोव़ पा, हेंथे लां खोइक्‍पाइक्‍चा मगेने। मारदे हना परमप्रभु यावे आ कली मटीब आन कली तशा गाइक्‍ब। \em कलस्‍सी ३:६\em* 
\p  
\v 7 मिनु गेपुकी मोदेंशो मुर नु वारच्‍बु मदुमीन।  
\v 8 गेपुकी यो ङोंइती छिङछिङ ङा गेय पाइब बाक्‍तीनी। मुल चहिं प्रभु कली थमा सुइश्‍शा, छेङछेङ ङा गेय पाइब दुम्‍तीनी। मोपतीके गेपुकी छेङछेङ ङा तमी तौ खोदेंशो दुम्‍शा बाक्‍कीन। \em एफिसी २:१; १पत्रुस २:९; मत्ती ५:१४; यूहन्‍ना १२:३६; १थिस्‍सलोनिकी ५:५\em* 
\v 9 छेङछेङ ङा फल दोदेंशो बाक्‍ब देंशा हना, नेल्‍ल शिशी पतीकेमी, ठीक पतीकेमी नु थमा पतीकेमी बाक्‍ब। \em गलाती ५:२२; फिलिप्‍पी १:११\em* 
\v 10 मिनु गेपुकीमी प्रभु आ दाक्‍शो मार बाक्‍बा, मेको तुइक्‍चा माल्‍नीनी। \em रोमी १२:२; फिलिप्‍पी १:१०\em* 
\p  
\v 11 छिङछिङ ङा गेयमी काइ फल मथिंसीब। मोदेंशो गेय पाइबपुकी नु मबाक्‍कीन। मेको गेय यो मपने। तन्‍न मेको गेय मरिम्‍शो बाक्‍ब, दे कोंइदीन।  
\v 12 मिनु मेको आन ख्रुइश्‍शा पशो आ पर्बम लोव़ पचा यो मुने बाक्‍ब। \em रोमी १:२४\em* 
\v 13 तन्‍न मेको ख्रुइश्‍शा पशो गेय छेङछेङमी तांइसीब।  
\v 14 मोपतीके “ए निन्‍द्रा पाइब, बोक्‍को। मिनु बेक्‍शो रे सेंसीशा बाक्‍को। मो पवीनु, ख्रीस्‍तमी इ कली आ छेङछेङ गेब” देंशो बाक्‍ब। \em यूहन्‍ना ३:२०-२१; रोमी १३:११; यसैया ६०:१; यूहन्‍ना ८:१२\em* 
\v 15 मोपतीके होस पा बाक्‍कीन। मतुइक्‍ब ममाइ, तुइक्‍ब मुर दुम्‍शा बाक्‍कीन। \em मत्ती १०:१६; कलस्‍सी ४:५\em* 
\v 16 मुरपुकीमी मरिम्‍शो गेय पना पन बाक्‍तेक्‍म हना यो, गेपुकीमी नेल्‍ल नाक्‍त रिम्‍शो गेय पने।  
\v 17 मोपतीके गेपुकी मूर्ख मदुमीन, प्रभु आ दाक्‍शो मार बाक्‍मे मेको रुपीन।  
\v 18 राकसी शांबुमी मदुक्‍कीन। मारदे हना दुक्‍ब मुरपुकी ग्‍येत्‍थ मलाइनीम। तन्‍न गेपुकी परमप्रभु यावे आ सोक्‍तीम ब्रीशो दुमीन। \em लूका २१:२४\em* 
\v 19 परमप्रभु यावे आ लोव़ ङा कुम्‍सो, परमप्रभु यावे कली ठेयब सेल्‍ब कुम्‍सो नु परमप्रभु यावे आ सोक्‍तीम इन कली शेंशो कुम्‍सो पने। मोपा इन थुं बार पमुशा, प्रभु कली कुम्‍सो पना पन बाक्‍कीन। \em भजन संग्रह ३३:२-३; कलस्‍सी ३:१६\em* 
\v 20 मिनु गेपुकीमी मार दुम्‍त हना यो, गेना हना यो इं आफ परमप्रभु यावे कली “गे रिम्‍शो पाइतीनी” दे प्रभु येसु ख्रीस्‍त आ नेंमी देंचा माल्‍नीनी। \em थिस्‍सलोनिकी ५:१८\em* 
\s1 थमा सुइक्‍ब आन कली लोव़ 
\p  
\v 21 गेपुकी ख्रीस्‍त कली मान पा हिंशा बिम्‍मुने। \em १पत्रुस ५:५\em* 
\v 22 गे मीश मुरपुकी, प्रभु कली टिशो खोदेंशो पा आंम वोंइश कली यो टिने। \em उत्‍पत्ती ३:१६; तिमोथी २:११-१२; तीतस २:५\em* 
\v 23 मारदे हना वोंइश मुर मीश मुर आन पिया बाक्‍नीम। मिनु ख्रीस्‍त थमा सुइक्‍ब आन पिया बाक्‍ब। थमा सुइक्‍बपुकी ख्रीस्‍त आ रां बाक्‍नीम। मिनु येसु ख्रीस्‍त थमा सुइक्‍ब आन कली पाप रे प्रोंइब बाक्‍ब। \em १कोरिन्‍थी ११:३; एफिसी १:२२-२३\em* 
\v 24 दोपा थमा सुइक्‍बपुकीमी ख्रीस्‍त कली टीनीमी, मोपा मीश मुरपुकीमी आंम वोंइश आ देंशो नेल्‍ल टिचा माल्‍नीमी। 
\p  
\v 25 गे वोंइश मुरपुकी, आंम मीश कली दाक्‍तीने। दोपा ख्रीस्‍तमी थमा सुइक्‍ब आन कली दाक्‍शा, मेको आन कली पाप रे प्रोंइचा, दे आंम रां जिम्‍मा गेवा, मोपा वोंइश मुरुमी आंम मीश कली दाक्‍चा माल्‍नीमी।  
\v 26 मारदे ख्रीस्‍तमी मो पाप्‍तु देंशा हना, थमा सुइक्‍बपुकी परमप्रभु यावे आ ङोंइती शिरशो मुर दुम्‍मल, दे मो पाप्‍तु। ङोंइती ख्रीस्‍तमी मेको आन कली लोव़ रे पा चिक्‍शो खोदेंशो पाप्‍तु। \em तीतस ३:५; हिब्रू १०:२२\em* 
\v 27 मोदेंशो पा थमा सुइश्‍शा, छेङछेङ पाइश्‍शो मुरपुकी आंम कली वोइश्‍शो बाक्‍त। मेकोपुकी मारेइ मलुम्‍सीशो, मरोम्‍सीशो, थम दारशो नु परमप्रभु यावे आ मुर दुम्‍शा, दोस मताइब मुरपुकी बाक्‍नीमी। \em २कोरिन्‍थी ११:२; कलस्‍सी १:२२\em* 
\v 28 मेको खोदेंशो पा वोंइश मुरपुकीमी आंम मीश कली “आंम रां बाक्‍ब” दे मेको कली दाक्‍चा माल्‍नीमी। सु आंम मीश कली दाक्‍बा, मेकोमी आंम कली यो दाक्‍ब।  
\v 29 सुइमी आंम रां कली खेदा मपाइनीम, थुल्‍शा रिम्‍शो पाइनीम। ख्रीस्‍तमी यो थमा सुइक्‍ब आन कली मोदेंशो पाइब। \em एफिसी १:२३\em* 
\v 30 मिनु गोपुकी आ रां ङा गुइ खोइल बाक्‍नय।  
\v 31 मो दुम्‍तीके वोंइश मुरुमी आ आम आफ आस कली प्रोंइब। मिनु आ मीश नु काथा बाक्‍ब। मेको निक्‍शी रां का दुम्‍नीसी। \em उत्‍पत्ती २:२४\em* 
\v 32 मेको आ ख्रुइश्‍शो अर्थ ठेयब बाक्‍ब। मिनु मार बाक्‍ब देंशा हना, गो ख्रीस्‍त नु थमा सुइक्‍ब आन पर्बम लोव़ पाइनुङ।  
\v 33 मार दुम्‍त हना यो, गे नेल्‍लेमी आंम मीश कली आंम कली दाक्‍शो खोदेंशो पा दाक्‍तीन। मीश मुरपुकीमी चहिं आंम वोंइश कली मान पा हिक्‍‍चा माल्‍नीमी। 
\c 6  
\p  
\v 1 गे आलपुकी, प्रभु कली मिम्‍शा, इन आम आफ आन देंशो टिने। मारदे हना मेको इन कली रिम्‍शो बाक्‍ब। \em मर्कूस ७:१-१३\em* 
\v 2 मिनु गे इन आम आफ कली मान पने। मेको ङोंइती ङा आसीक पाइश्‍शो अरेतीक लोव़ बाक्‍ब। \em प्रस्‍थान २०:१२\em* 
\v 3 मेको आसीक मार बाक्‍ब देंशा हना “गे मो पाइतीनी हना, इन कली रिम्‍शो दुम्‍ब। मिनु गे शुश बर्स ब्रोंइचा ताइनीनी” दे ब्रेक्‍शो बाक्‍ब। \em ब्‍‍यवस्‍था ५:१६\em* 
\p  
\v 4 गे आफपुकी, इन आल आन कली मगाइक्‍पतीन। तन्‍न मेको आन कली रिम्‍शो थुल्‍शा कोल्‍पतीन। मिनु मेको आन कली शेंशा, प्रभु सु बाक्‍बा मेको तुइक्‍पतीन। \em ब्‍‍यवस्‍था ६:२०-२५\em* 
\p  
\v 5 गे वाइलीम वाइलपुकी, इन रागी ङा होव़प कली टिने। दोपा टिचा माल्‍नीनी देंशा हना, गेपुकी ख्रीस्‍त कली टिशो खोदेंशो पा, मेको आन क्‍येङा हिंशा ख्रिंख्रि पा, थुं का पा रिम्‍शो गेय पने। \em तिमोथी ६:१२; तीतस २:९-१०; १पत्रुस २:१८\em* 
\v 6 होव़पमी इन कली गेय पशो कोव़तेक्‍म हना यो, मकोव़तेक्‍म हना यो, ठीक पा गेय पने। गेपुकीमी मुर कली ग्‍येरपाइक्‍चा ममाइ, ख्रीस्‍त आ वाइलीम वाइल दुम्‍शा, इन थुं नेल्‍लेमी परमप्रभु यावे आ दाक्‍शो पने।  
\v 7 मो पनीनु, गेपुकीमी मुर आन कली ममाइ, प्रभु कली रिम्‍शो थुंमी गेय पाइनीनी।  
\v 8 मिनु मुरुमी दोपा रिम्‍शो पाइबा, मेको खोदेंशो पा प्रभु रे ताइब, दे तुइक्‍चा माल्‍नीनी। प्रभुमी वाइलीम वाइल नु ठेयब मुर आन कली खाल का ङा पा कोव़ब। \em २कोरिन्‍थी ५:१०\em* 
\p  
\v 9 गे होव़पपुकी, इन वाइलीम वाइल आन कली प्रभुम पशो खोदेंशो पा पने। हिंच कोंइचा प्रोनीन। मारदे हना मेको आन के नु इन के प्रभु स्‍वर्गमी बाक्‍ब। मिनु प्रभुमी मुर नेल्‍ल आन कली उइक्‍थ मिम्‍ब। 
\s1 परमप्रभु आ गेशो या 
\p  
\v 10 मिनु आं नोले ङा लोव़, प्रभु कली तुइश्‍शा सक्ति पाइश्‍शो मुर दुमीन। मोपा प्रभु आ सक्तिमी बोल्‍यो दुम्‍शा बाक्‍कीन। \em एफिसी ३:१६; १कोरिन्‍थी १६:१३; २तिमोथी २:१; १यूहन्‍ना २:१४\em* 
\v 11 मिनु परमप्रभु यावे आ गेशो या नेल्‍ल लतीन। सैतानमी आ मरिम्‍शो थुंमी इन कली खतम सेल्‍चा माल्‍तु हना, गेपुकी परमप्रभु यावे आ गेशो यामी ग्रानीनी।  
\v 12 गोपुकी मुर नु लडाइ मपाइनय। हुकुम पाइबपुकी, अधिकार पाइबपुकी नु रागी कली मुल छिङछिङमी गेय पाइब वोल नु लडाइ पाइनय। मेको स्‍वर्गम बाक्‍ब सैतान आ गेय पाइबपुकी बाक्‍नीम। \em एफिसी २:२; लूका २२:३१\em* 
\v 13 मोपतीके परमप्रभु यावे आ गेशो या नेल्‍ल लतीन। मेकोमी ला मरिम्‍शो नाक्‍त ग्राशा राप्‍ने चाप्‍नीनी। 
\p  
\v 14 गेपुकी थमा शेंतीकेमी किप्‍शुर किप्‍शो खोदेंशो पा राप्‍शा बाक्‍कीन। मिनु ठीक दुम्‍तीकेमी पीतल के भोटो फेक्‍शो खोदेंशो पा बाक्‍कीन। \em लूका १२:३५; १पत्रुस १:१३; १थिस्‍सलोनिकी ५:८\em* 
\v 15 परमप्रभु यावे नु दुपाइक्‍ब ग्‍येरपाइक्‍ब लोव़ पा, जुत्ता मुइश्‍शो खोदेंशो पा बाक्‍कीन।  
\v 16 मिनु नेल्‍ल क्‍येङा ठेयब या येसु ख्रीस्‍त कली थमा सुइक्‍तीके तेक्‍तीक खोदेंशो पा इन ङोंइती वोतीन। सैतानमी आप्‍शो ब्रशो ब्रा कली मेकोमी तेक्‍ने चाप्‍नीनी। \em १पत्रुस ५:९; १यूहन्‍ना ५:४\em* 
\v 17 मिनु येसु ख्रीस्‍तम इन कली पाप रे प्रोंइशो तुइक्‍तीक पीतल के ताक्‍की खोदेंशो पा गुम्‍सीने। मिनु परमप्रभु यावे आ लोव़ लतीन। मेको चहिं परमप्रभु यावे आ सोक्‍त ङा तरवार बाक्‍ब। \em १थिस्‍सलोनिकी ५:८; हिब्रू ४:१२\em* 
\p  
\v 18 मिनु गेपुकीमी गेना हना यो परमप्रभु यावे आ सोक्‍तीमी पतीके परमप्रभु यावे नु लोव़ पशा पुनीन। पुंइचा मदथु, परमप्रभु यावे आ मुर नेल्‍ल आन पर्बम पुनीन।  
\v 19 आं पर्बम यो पुनीन। आं कली मिम्‍शा, मार पुनीन देंशा हना, येसु ख्रीस्‍त आ पर्बम ङोंइती ख्रुइश्‍शो ग्‍येरपाइक्‍ब लोव़ मुल गो महिंथु, शेंने चबुल, दे पुनीन। \em कलस्‍सी ४:३; २थिस्‍सलोनिकी ३:१; प्रेरित ४:२९\em* 
\v 20 गो मेको लोव़ शेंचा कली साङलोम फ्रेंशा सोइश्‍शो मुर दुम्‍ती। गेपुकीमी आं पर्बम “महिंथु शेंदल” दे परमप्रभु यावे कली पुनीने। मोपा महिंथु, लोव़ पचा परमप्रभु यावे आ दाक्‍शो बाक्‍ब। \em २कोरिन्‍थी ५:२०; प्रेरित २८:३१\em* 
\s1 नोले ङा लोव़ 
\p  
\v 21 मिनु गो दोपा बाक्‍ङा, मार पङा मेको नेल्‍ल प्रभु आ रिम्‍शो गेय पाइब, इं दाक्‍शो थमा सुइक्‍ब लोक्‍ब तिखीकसमी इन कली देंब। \em प्रेरित २०:४; कलस्‍सी ४:७-८; २तिमोथी ४:१२; तीतस ३:१२\em* 
\v 22 गोपुकी दोपा बाक्‍का तुइक्‍पाइक्‍चा नु इन थुं बारपाइक्‍चा कली इन बाक्‍तीके सोइक्‍ताक्‍ङ। 
\p  
\v 23 मिनु इं आफ परमप्रभु यावे नु प्रभु येसु ख्रीस्‍तमी इन कली थुं नाइश्‍शा बाक्‍चा गेम्‍सेक्‍ल।  
\v 24 सु सुमी इं प्रभु येसु ख्रीस्‍त कली गेना हना यो दाक्‍नीमी, मेको नेल्‍लेमी शिशी तामेक्‍ल।