\id ZEP 
\ide UTF-8
\h Annabi Sofoni
\toc1 Ala xa masenyi Annabi Sofoni bɛ
\toc2 Annabi Sofoni
\toc3 Sof
\mt Annabi Sofoni xa kitaabui
\imt Masenyi nde yi Kitaabui xa fe ra
\ip Annabi Sofoni naxa kawandi ti mangɛ Yosiya xa waxati Yudaya bɔxi ma. Isirayilakae nu bara so fe ɲaaxi kui na waxati, han Alatala nu wama e ɲaxankatafe. Beenu a xa na raba, a naxa Annabi Sofoni xɛɛ alako a xa na tagi raba e bɛ, a xa kata Isirayilakae ragbilende e waxɔnfe ɲaaxi fɔxɔ ra.
\ip Na masenyi maniyaxi Isirayila namiɲɔnmɛ gbegbe xa masenyi nan na. Na kui e mixie xa yunubie masenma e bɛ a fiixɛ ra, alako e xa a kolon e na fe nan kui na ki naxan mu rafanxi Ala ma. Isirayilakae nu birama kuyee nan fɔxɔ ra, e naxee lixi Kanaan bɔxi ma e mini Misira bɔxi ra tɛmui naxɛ. Na fe naxa Ala raxɔnɔ, barima a mu wama a firin nde xɔn ma. Isirayilakae man nu fe ɲaaxi raba ra e booree ra. Mixi naxan nu bara sɛnbɛ sɔtɔ mangɛya kui, xa na mu a ra naafuli fe kui, a nu setaree tɔɔrɔ ma. Na fe mɔɔli mu rafan Ala ma, barima a a ɲɛngi saxi adamadi xa fe xɔn ma, a mu tinma a xa tɔɔrɔ.
\ip Annabi Sofoni to gɛ na yunubi masende Isirayilakae bɛ, a naxa a fala a Alatala fama nɛ e ɲaxankatade na xa fe ra. Na kiiti magaaxu. Ala xa xɔnɛ sɛnbɛ gbo. Ala xa ɲaxankatɛ mu nɔma mixi nde rafisade a boore bɛ. Na kui Isirayilakae nun si gbɛtɛ birin na na kiiti bun ma. Adama birin naxan Alatala matandima, e fama nɛ a xa xɔnɛ kolonde kiiti waxati.
\ip Kɔnɔ masenyi gbɛtɛ fan nu saxi na wɔyɛnyi xɔrɔxɔɛ fari. Annabi Sofoni naxa a fala a Alatala wama mixi rakisife. A wama e malife alako e xa gbilen fe ɲaaxi fɔxɔ ra, e xa lu Ala xa kira xɔn ma naxan nɔma findide bɔɲɛsa ra e bɛ. Ala xɔnɔma nɛ mixi ɲaaxie ma barima e xa yunubie mu rafanxi a ma, kɔnɔ a man e xanuma nɛ a bɔɲɛ birin na. Na nan a toxi Annabi Sofoni bara kisi masenyi sa ɲaxankatɛ masenyi fari. Won xa a kolon Ala yunubie xɔnxi, kɔnɔ a yunubitɔɛe xanuma nɛ, a wama e ragbilenfe e xa fe ɲaaxie fɔxɔ ra. Ala xa na lɔnni raso won sondonyi kui. Amina.
\imte Annabi Sofoni xa kitaabui
\c 1
\s Alatala xa xɔnɛ Yudaya bɛ
\p
\v 1 Alatala xa masenyi nan ya, a naxan tixi Annabi Sofoni bɛ. Sofoni findi Kuusi xa di nan na, Gɛdalaya xa mamadi, Amaraya tolobitɛ, Xesekiya bɔnsɔɛ. A masenyi ti nɛ Yudaya mangɛ Yosiya xa waxati, naxan findixi Amon xa di ra.
\q
\v 2 «Alatala xa masenyi nan ya:
\q N birin ɲɔnma nɛ duniɲa bɛndɛ fuɲi fari.
\q
\v 3 N adama nun sube ɲɔnma nɛ,
\q n xɔni ba koore ma,
\q n yɛxɛ ba baa ma.
\q N maratantanyi nun mixi ɲaaxi ɲɔnma nɛ,
\q n adamadie ba duniɲa bɛndɛ fuɲi fari.
\q Alatala xa masenyi nan na ki.»
\b
\q
\v 4 «N nan n bɛlɛxɛ italama nɛ Yudaya nun Darisalamukae xili ma.
\q N Bali kuye bama nɛ, naxee luxi bɔxi ma.
\q N e xa batui yareratie nun sɛrɛxɛdubɛe sɔntɔma nɛ.
\q
\v 5 N mixie halakima nɛ,
\q naxee tunbuie batuma e xa banxi fari.
\q N filankafuie ɲaxankatama nɛ,
\q naxee e kali Alatala xili ra,
\q e man e kali Mɔlɔkɔ kuye xili ra.
\q
\v 6 N mixie rabɛɲinma nɛ naxee bara gbilen Alatala fɔxɔ ra,
\q naxee mu Alatala fenma,
\q naxee mu birama a xa marasi fɔxɔ ra.»
\b
\q
\v 7 «Wo sabari Marigi Alatala bɛ,
\q barima a xa lɔxɔɛ xungbe na fafe.
\q Alatala tan sɛrɛxɛ nan bama.
\q A mixi ndee sugandixi na nan ma.
\q
\v 8 Alatala xa sɛrɛxɛ lɔxɔɛ,
\q n mangɛ xa die nun kuntigie halakima nɛ,
\q a nun mixi naxee si gbɛtɛ xa dugie ragoroma e ma.
\q
\v 9 N mixie halakima nɛ naxee tuganma sode dɛ ra,
\q naxee e marigi xa banxi rafema gere nun yanfanteya ra.»
\b
\q
\v 10 «Alatala xa masenyi nan ya:
\q Na lɔxɔɛ mixi gbelegbelema nɛ,
\q kelife taa naadɛ ma naxan xili Yɛxɛ Naadɛ,
\q han taa nɛɛnɛ,
\q kelife taa fari geyae ma,
\q
\v 11 han makiti yire,
\q barima yulɛe xa fe bara kana,
\q n bara e birin faxa.
\q
\v 12 Na waxati n Darisalamu yire birin matoma nɛ a fanyi ra,
\q alako n xa mixi sɔntɔ,
\q naxee dɔxɔxi e xa naafuli makantafe ra,
\q e a falafe e bɔɲɛ kui,
\q ‹Fe fanyi yo, fe ɲaaxi yo,
\q Ala mu fama fefe rabade n na.›
\q
\v 13 E xa naafuli lɔɛma nɛ,
\q e xa banxie kana.
\q E bara banxi ti, kɔnɔ e mu sabatima na kui.
\q E bara wɛni bogi si, kɔnɔ e mu na wɛni minma sɔnɔn.»
\b
\q
\v 14 Alatala xa lɔxɔɛ xungbe bara makɔrɛ,
\q a gbe mu luxi a xa fa.
\q Sɛnbɛmae fama nɛ gbelegbelede
\q Alatala xa lɔxɔɛ magaaxuxi ma.
\q
\v 15 Xɔnɛ lɔxɔɛ na a ra, tɔɔrɛ lɔxɔɛ na a ra,
\q gbaloe lɔxɔɛ na a ra, dimi lɔxɔɛ na a ra,
\q nuxui ifɔɔrɔxi lɔxɔɛ na a ra.
\q
\v 16 Gere xui minima nɛ na lɔxɔɛ taa sɛnbɛmae xili ma,
\q e xa yire makantaxie xili ma.
\b
\q
\v 17 Alatala naxɛ,
\q «N adamadie tɔɔrɔma nɛ na lɔxɔɛ,
\q e fa ɲɛrɛ alɔ dɔnxuie,
\q barima e bara yunubi raba Alatala ra.
\q Na kui e sɔntɔma nɛ a ɲaaxi ra,
\q e wuli ramini bɔxi ma a gbegbe ra,
\q e binbie wɔlɛ ɲooge xɔɔra.
\q
\v 18 E xa xɛɛma nun gbeti mu nɔma e ratangade
\q Alatala xa xɔnɛ lɔxɔɛ ma.
\q Duniɲa birin ganma nɛ na lɔxɔɛ a ɲaaxi ra
\q Alatala xa xɔnɛ xa fe ra,
\q barima a xa ɲama bara bira ala gbɛtɛe fɔxɔ ra.
\q Na kui duniɲa mixi birin sɔntɔma nɛ.»
\c 2
\s Alatala xa xɔnɛ Yudaya nun si gbɛtɛe ma
\q
\v 1 «Si yaagitare, wo xa wo yɛtɛ mato,
\q
\v 2 beenu waxati xa kamali,
\q beenu Alatala xa xɔnɛ xa wo li,
\q beenu Alatala xa lɔxɔɛ xɔrɔxɔɛ xa fa wo ma.
\q Na lɔxɔɛ dangima nɛ alɔ maale lagi foye naxan tutunma.
\q
\v 3 Wo tan mixi magoroxi naxee na Isirayila,
\q wo xa Alatala fen, wo xa a xa sɛriyɛ rabatu,
\q wo xa tinxinyi, nun yɛtɛ magore fen.
\q Tɛmunde na kui wo nɔma nɛ ratangade
\q Alatala xa xɔnɛ lɔxɔɛ ma.»
\b
\q
\v 4 «Gasa rabɛɲinma nɛ, Asikalɔn kana,
\q Asidodi keri ɲama ya xɔri, Ekiron tala.
\q
\v 5 Ɲaxankatɛ na wo bɛ,
\q wo tan naxee sabatixi baa dɛ ra,
\q wo tan naxee kelixi Kirɛti.
\q Alatala bara natɛ tongo wo xa fe ra,
\q Kanaanka naxee na Filisita bɔxi ma,
\q n wo xun nakanama nɛ han mixi birin ɲɔn wo yi.
\q
\v 6 Xurusee fama nɛ lude wo xa bɔxi ma,
\q wo xɔnyi findi gɔɔrɛ ra xuruse dɛmadonyie bɛ.
\q
\v 7 Na bɔxi findima Yudayaka mixi dɔnxɔɛe nan gbe ra,
\q e fa e xa xurusee dɛ madonde naa.
\q Nunmare tɛmui e e malabuma nɛ Asikalɔn xa banxie kui,
\q barima e Marigi Alatala fama nɛ e malide,
\q a e xa mixi suxuxie ragbilen e xɔnyi.»
\b
\q
\v 8 «N bara Mowabakae xa konbie mɛ,
\q Amonikae xa wɔyɛn bɛxuxie bara n li.
\q E bara n ma ɲama rayaagi,
\q e bara dangi naaninyi ra.»
\b
\q
\v 9 «N tan Isirayila Marigi Alatala, Xili Xungbe Kanyi,
\q n bara n kali Mowaba luma nɛ alɔ Sodoma,
\q Amonikae lu alɔ Gomorakae,
\q e xa bɔxi kana, ɲooge ɲaaxi nun fɔxɛ lu naa.
\q
\v 10 E na sɔtɔma e xa yɛtɛ igboɲa nan ma.
\q E bara Alatala Xili Xungbe Kanyi xa ɲama rayaagi,
\q e bara te a xa ɲama xili ma.
\q
\v 11 Alatala magaaxu, a e ɲaxankatama nɛ a ɲaaxi ra.
\q A kuye birin kanama nɛ duniɲa ma,
\q si birin fa Alatala batu e xɔnyi.»
\b
\q
\v 12 «Wo tan Kusikae,
\q wo fan sɔxɔma nɛ n ma santidɛgɛma ra.»
\b
\q
\v 13 «Ala a sɛnbɛ raminima nɛ kɔɔla ma,
\q a fa Asiriya sɔntɔ.
\q A Ninewe xun nakanama nɛ, a na findi gbengberen yire ra.
\q
\v 14 Xurusee luma nɛ e dɛ madon na na taa kui,
\q a nun wulai sube mɔɔli birin.
\q Yubɛ nun xundi kɔɛ radangima nɛ na banxi kanaxie fari.
\q Naadɛ nun wundɛri birin kanaxi, e xa wuri bara bɔrɔ.
\q
\v 15 Yi taa xungbe naxan nu luma ɲɛlɛxin na,
\q naxan bɔɲɛ nu saxi,
\q naxan nu bara a fala a yɛtɛ bɛ,
\q ‹N keren nan tide gbo,›
\q a xun bara rakana han a bara findi wulai subee xɔnyi ra.
\q Dangi mixi birin yoma nɛ a ma sɔnɔn,
\q a findi dɛi sigi ra e bɛ.»
\c 3
\s Alatala xa xanunteya
\q
\v 1 «Ɲaxankatɛ na i bɛ, taa matandila sɛniyɛntare,
\q naxan luma mixi tɔɔrɔ ra.
\q
\v 2 A mu n xui suxuma, a mu n ma marasi rabatuma,
\q a mu a xaxili tima Alatala ra, a mu makɔrɛxi a Marigi Ala ra.
\q
\v 3 A xa kuntigie luma nɛ alɔ yɛtɛ
\q naxee e xui raminima ɲama tagi,
\q a xa kiitisamae luxi alɔ wulai bare
\q naxee sube donma keren na.
\q
\v 4 A xa namiɲɔnmɛe findixi yɛtɛ igboee nun yanfantee nan na,
\q a xa sɛrɛxɛdubɛe bara fe sɛniyɛnxie nɔxɔ,
\q a bara Ala xa sɛriyɛ matandi.
\q
\v 5 Kɔnɔ Ala nan tinxin na mixie ya ma.
\q A mu mixi madaxuma, lɔxɔ yo lɔxɔ a xa nɔndi yanbama.
\q A tan mu lanlanteya kanama,
\q kɔnɔ tinxintare mu yaagi kolon.»
\b
\q
\v 6 «N bara sie ɲaxankata,
\q n bara e xa yire makantaxie rabira,
\q n bara e xa kirae kana.
\q Mixi yo mu na e xa taae kui sɔnɔn,
\q e birin xun nakanaxi.
\q
\v 7 N nu bara a fala e bɛ,
\q ‹Xa wo gaaxu n ya ra,
\q xa wo n ma marasi suxu,
\q wo xun mu rakanama.›
\q Kɔnɔ e gbata fe ɲaaxi rabade.
\q Na nan a toxi n bara e ɲaxankata.
\q
\v 8 Alatala xa masenyi nan ya:
\q Wo xa mamɛ ti, lɔxɔɛ fama a lide
\q n ma natɛ kamalima tɛmui naxɛ.
\q N bara a fala wo bɛ,
\q na lɔxɔɛ n sie ɲaxankatama nɛ n ma xɔnɛ ɲaaxi ra,
\q duniɲa birin xa kana.»
\b
\q
\v 9 «N fama sie rasɛniyɛnde,
\q alako e xa Alatala xili fala,
\q e birin xa a rabatu lanyi kui.
\q
\v 10 Kelife yire makuye dangife Kusi xuree ra,
\q n batulae fama nɛ sɛrɛxɛe ra n bɛ.
\q
\v 11 Na lɔxɔɛ wo mu yaagima sɔnɔn wo xa fe rabaxie ra,
\q wo fe ɲaaxi naxee rabaxi n na,
\q barima n yɛtɛ igboee bama nɛ wo ya ma,
\q alako yɛtɛ igboɲa xa ɲɔn n ma geya sɛniyɛnxi yire.
\q
\v 12 N tɔɔrɔmixie nun mixi magoroxie luma nɛ wo ya ma,
\q naxee xaxili tima Alatala ra.
\q
\v 13 Isirayila dɔnxɔɛ mu fe ɲaaxi rabama sɔnɔn,
\q e mu wule falama, e mu mixi madaxuma.
\q E luma nɛ e malabu ra bɔɲɛsa kui,
\q mixi yo mu e tɔɔrɔma sɔnɔn.»
\b
\q
\v 14 Siyon mixie, wo xa Ala matɔxɔ.
\q Isirayila, wo xa sɛɛwa.
\q Darisalamu, wo xa ɲɛlɛxin wo bɔɲɛ birin na.
\q
\v 15 Alatala xa xɔnɛ bara gbilen wo fɔxɔ ra,
\q a bara wo yaxuie ragbilen e xɔnyi.
\q Isirayila Mangɛ Alatala bara lu wo tagi.
\q Wo naxa gaaxu, wo mu tɔɔrɔma sɔnɔn.
\q
\v 16 Na lɔxɔɛ a a falama nɛ Darisalamu bɛ,
\q «Siyon mixie, wo naxa gaaxu,
\q limaniya naxa ba wo yi ra.»
\q
\v 17 Wo Marigi Alatala wo Rakisima na wo ya ma.
\q A sɛɛwama nɛ wo xa fe ra,
\q a wo madundu a xa xanunteya ra,
\q a ɲɛlɛxin wo ra a xui itexi ra.
\b
\q
\v 18 Alatala naxɛ, «N sunnunyi bama nɛ wo xa salie kui,
\q n wo ba wo xa yaagi xɔrɔxɔɛ kui.
\q
\v 19 Na lɔxɔɛ n wo yaxuie ɲaxankatama nɛ,
\q n tɔɔrɔmixie rakisi,
\q n mixi kerixie ragbilen e xɔnyi.
\q N e xa yaagi ɲɔxɔma nɛ matɔxɔɛ nun binyɛ ra yire birin.
\q
\v 20 Na lɔxɔɛ n wo ragbilenma nɛ wo xɔnyi.
\q N wo malanma nɛ alako wo xa matɔxɔɛ nun binyɛ sɔtɔ,
\q duniɲa ɲamanɛ birin kui.
\q N wo ragbilenma nɛ, wo fa na tode.
\q Alatala xa masenyi nan na ki.»