\id ZEC 
\ide UTF-8
\h Annabi Sakari
\toc1 Ala xa masenyi Annabi Sakari bɛ
\toc2 Annabi Sakari
\toc3 Sak
\mt Annabi Sakari xa Kitaabui
\imt Masenyi nde yi Kitaabui xa fe ra
\ip Ala naxa Annabi Sakari xɛɛ Darisalamu Perise mangɛ Dariyusi xa waxati. Isirayilakae nu bara ɲɛ tongo solofere raba konyiya kui Perise bɔxi ma e xa kuye batui xa fe ra, kɔnɔ Ala naxa a niya Dariyusi xa e bɛɲin gbilenfe ra Isirayila bɔxi ma. E to mɛnni li e xa taae nun Ala xa hɔrɔmɔlingira banxi birin nu bara kana. E naxa wali suxu nee yailanfe ra, kɔnɔ e yaxuie naxa e tɔɔrɔ. Na kui Ala naxa Annabi Sakari nun Annabi Hage xɛɛ Darisalamu alako e xa Isirayilakae ralimaniya.
\ip Annabi Sakari xa masenyi fɔlɔma laamatunyi solomasaxan nan ma, naxee a masenma a Ala fama nɛ Isirayilakae malide e xa wali kui. A man a masenma a Ala fama nɛ sie ɲaxankatade naxee na a xa ɲama tɔɔrɔfe. Ala limaniya fima nɛ a xa mixie ma Annabi Sakari xa masenyi saabui ra.
\ip Isirayila xa xunnakeli mu findima fe fanyi ra e tan gbansan bɛ. Duniɲa na a to Ala mɛɛnima Isirayila ma ki naxɛ, e fan danxaniyama nɛ Ala ma, e bira Isirayilakae fɔxɔ ra. Ala Isirayilaka nde rakelima naxan misaalima sɛrɛxɛdubɛ kuntigi ra. Na xɛmɛ findima Isirayila mangɛ xungbe nan na, Ala xa Mixi Sugandixi, naxan e xun tima Ala xa kira ma.
\ip Yi saatɛ Ala naxan tongoxi Isirayila bɛ a findima nɛ lɔnni belebele ra to mixie bɛ. Ala wama nɛ duniɲa birin xa bira a xa sɛriyɛ fɔxɔ ra, e xa la Ala xa xanunteya ra alako e xa kisi sɔtɔ. Xa a sa li adamadie tondima Ala xa mali ra, e sare ɲaaxi sɔtɔma nɛ e ɲɛrɛ ki xa fe ra. Ala wama mixi rakisife. Na nan a ra a naxa Marakisima xɛɛ won ma alako lanyi xa lu Alatala nun adama tagi. Ala xa na sɔɔnɛya won birin bɛ, won fan xa tin na ra. Amina.
\imte Annabi Sakari xa Kitaabui
\c 1
\s Laamatunyi singe: Gbilenfe Ala ma
\p
\v 1 Dariyusi xa mangɛya ɲɛ firin nde kike solomasaxan nde kui, Alatala naxa a masen Annabi Sakari bɛ, Bɛrɛkaya xa di, Ido xa mamadi fanyi, a naxɛ, 
\v 2 «Alatala bara xɔnɔ wo benbae ma. 
\v 3 Kɔnɔ, i xa a fala, Mangɛ Alatala xa masenyi nan ya: ‹N tan Mangɛ Alatala bara a fala wo bɛ, wo xa gbilen n ma. Na tɛmui n fan gbilenma nɛ wo ma. 
\v 4 Wo naxa lu alɔ wo benbae. Singe namiɲɔnmɛe nu bara a masen e bɛ, «Mangɛ Alatala xa masenyi nan ya, wo gbilen wo xa fe ɲaaxie nun wo xa kɛwali ɲaaxie fɔxɔ ra.» Kɔnɔ e mu e tuli mati n ma masenyi ra, e mu n xui suxu. N tan Alatala xa masenyi nan na ki. 
\v 5 Wo benbae na minden? Namiɲɔnmɛe go? E mu faxama xɛ? 
\v 6 N ma masenyi nun n ma sɛriyɛ, a mu wo benbae lixi?›»
\p A to gɛ na masenyi ra, ɲama naxa tuubi, e fa a fala e boore bɛ, «Mangɛ Alatala bara won ma fe rabaxie sare ragbilen won ma.»
\p
\v 7 Kike fu nun keren nde xi mɔxɔɲɛn nun naani nde, Sebati kike, Dariyusi xa mangɛya ɲɛ firin nde, Alatala naxa a masen Annabi Sakari bɛ, Bɛrɛkaya xa di, Ido xa mamadi, 
\v 8 «To kɔɛ ra n bara yi laamatunyi to. Xɛmɛ nde nu na soe gbeeli fari, a nu tixi miriti wurie tagi fole kui. Soe gbeelie, soe fɔɔrɛe, nun soe fiixɛe nu na a xanbi ra. 
\v 9 N naxa a maxɔrin, ‹N Marigi, munse na yee tan na?› Malekɛ naxan nu wɔyɛnma n na, a naxa a fala, ‹N a masenma nɛ i bɛ.› 
\v 10 Mixi naxan nu tixi miriti wurie tagi, a naxa a fala, ‹Alatala xa xɛɛrae nan e ra naxee duniɲa iɲɛrɛma.› 
\v 11 E naxa dɛntɛgɛ sa Alatala xa malekɛ bɛ naxan nu tixi miriti wurie tagi, ‹Muxu bara duniɲa birin iɲɛrɛ, duniɲa mixi birin raxaraxi, e na bɔɲɛsa kui.› 
\v 12 Alatala xa malekɛ naxa a fala, ‹Mangɛ Alatala, i fama kinikinide Darisalamu nun Yudaya xa taae ma mun tɛmui? I xɔnɔxi e ma kabi ɲɛ tongo solofere.› 
\v 13 Alatala naxa na malekɛ ralimaniya, a a madundu, malekɛ naxan nu wɔyɛnma n na.»
\p
\v 14 «Na malekɛ naxa a fala n bɛ, ‹I xa a fala, Mangɛ Alatala xa masenyi nan ya: Darisalamu nun Siyon rafan n ma. N mu tinma e xa bira xanuntenyi gbɛtɛ fɔxɔ ra. 
\v 15 N bara xɔnɔ si gbɛtɛe ma naxee ɲɔxɔ a ma tɔɔrɛ yo mu nɔma e lide. Singe n nu xɔnɔxi dondoronti n ma ɲama ma, kɔnɔ sie tan bara nde sa n ma ɲama xa tɔɔrɛ xun ma.›»
\p
\v 16 «Na nan a ra, Alatala naxa a masen, ‹N man kinikinima nɛ Darisalamu ma, n man n ma banxi tima nɛ. Luuti ibɛndunma nɛ Darisalamu taa xun ma alako na xa maniya, na taa man xa gbilen ti ra.› Mangɛ Alatala xa masenyi nan na ki. 
\v 17 I man xa a fala, ‹Mangɛ Alatala xa masenyi nan ya: Harige man luma n ma taae kui, n man Siyon madundu ma nɛ, n man Darisalamu sugandima nɛ.›»
\s Laamatunyi firin nde: Ferie nun xabuie
\p
\v 18 N naxa yi laamatunyi to: N bara feri naani to. 
\v 19 N bara malekɛ maxɔrin, naxan nu wɔyɛnma n na, «Munse na yee ra?» A naxa n yaabi, «Sɛnbɛmae nan yee ra naxee Yudaya, Isirayila, nun Darisalamu rayensenxi.»
\p
\v 20 Na tɛmui, Alatala naxa xabui naani masen n bɛ. 
\v 21 N naxa maxɔrinyi ti, «Yee faxi munse rabade be?» A naxa n yaabi, «Yi feri naani misaalixi sɛnbɛmae nan na naxee Yudaya rayensenxi mixi yo mu nɔ a xunyi rakelide. Kɔnɔ yi xabuie faxi e magaaxude nɛ, e si gbɛtɛ sɛnbɛmae rabira, naxee kelixi Yudaya bɔxi xili ma alako e xa Yudayakae rayensen.»
\c 2
\s Laamatunyi saxan nde: Maniya luuti
\p
\v 1 N naxa yi laamatunyi to: Xɛmɛ nde nu na, maniya luuti nu suxuxi a yi ra. 
\v 2 N naxa a maxɔrin, «I siga minden?» A naxa n yaabi, «N Darisalamu nan maniyafe, alako n xa a gboe nun a kuyɛya kolon.»
\p
\v 3 Malekɛ naxan nu wɔyɛnma n na, a naxa siga yare, malekɛ gbɛtɛ naxa fa a ralande. 
\v 4 A naxa a fala a bɛ, «I gi, sa a fala yi sɛgɛtala bɛ, a Darisalamukae nun xurusee fama nɛ wuyade han tɛtɛ mu nɔ e rabilinde sɔnɔn.» 
\v 5 Alatala xa masenyi nan ya: «N tan yati e makantama nɛ. N luma nɛ e bɛ alɔ tɛtɛ tɛ daaxi, n ma nɔrɛ fa lu e tagi.»
\p
\v 6 Alatala xa masenyi nan ya:
\q «Wo wo gi, wo wo gi!
\q Wo xa keli ɲamanɛ ma
\q naxan na kɔɔla ma.»
\q Alatala xa masenyi nan ya:
\q «Singe n nu bara wo rayensen yɛ duniɲa ma.
\q
\v 7 Siyon mixie, wo wo gi.
\q Wo tan naxee na Babilɔn,
\q wo xa keli naa.»
\q
\v 8 Mangɛ Alatala naxa a masen n bɛ,
\q a naxan xɛɛxi binyɛ kui,
\q fe falafe yi sie xa fe ra naxee wo tɔɔrɔxi:
\q «Naxan a bɛlɛxɛ dinma wo ra,
\q a luxi nɛ alɔ na kanyi bara a bɛlɛxɛ din Ala ra.»
\q
\v 9 N na keli e xili ma,
\q e findi e xa konyie xa konyie ra.
\q Na kui wo a kolonma nɛ
\q a Mangɛ Alatala nan n xɛɛxi.
\b
\q
\v 10 «Darisalamukae, wo wo xui ite sɛɛwɛ kui,
\q barima n fama nɛ lude wo tagi.»
\q Alatala xa masenyi nan na ki.
\q
\v 11 Si wuyaxi fama nɛ Alatala ma na lɔxɔɛ,
\q e fa findi n ma ɲama ra.
\q N luma nɛ wo tagi,
\q wo fa a kolon
\q a Mangɛ Alatala nan n xɛɛxi wo ma.
\q
\v 12 Yudaya man findima Alatala gbe nan na
\q a xa bɔxi sɛniyɛnxi kui.
\q A man fama nɛ Darisalamu sugandide.
\q
\v 13 Adamadi birin xa a sabari Alatala bɛ,
\q a na kelife a xa yire sɛniyɛnxi.
\c 3
\s Laamatunyi naani nde: Sɛrɛxɛdubɛ kuntigi
\p
\v 1 A naxa sɛrɛxɛdubɛ kuntigi Yosuwe masen n bɛ, a nu tixi Alatala xa malekɛ ya i. Sentanɛ nu tixi a yirefanyi ma a xa a tɔɔɲɛgɛ. 
\v 2 Alatala naxa a fala Sentanɛ bɛ, «N tan, Alatala naxan Darisalamu sugandixi, n bara a fala i bɛ Sentanɛ, i sabari! Yege xuntunyi xa mu na yi xɛmɛ ra naxan baxi tɛ dɛ i?»
\p
\v 3 Yosuwe nu tixi malekɛ ya i, dugi nɔxɔxi nan nu ragoroxi a ma. 
\v 4 Malekɛ naxa a fala a booree bɛ naxee nu tixi Yosuwe sɛɛti ma, «Wo dugi nɔxɔxie ba a ma.» A man naxa a fala Yosuwe bɛ, «A mato, n bara i xa yunubi ba, n bara dugi tofanyie ragoro i ma.» 
\v 5 N naxa a fala, «Wo xa xunyi ratofan se sɛniyɛnxi dɔxɔ a xunyi ma.» E naxa xunyi ratofan se sɛniyɛnxi dɔxɔ a xunyi ma, e naxa dugie ragoro a ma. Alatala xa malekɛ nu tixi naa.
\p
\v 6 Alatala xa malekɛ naxa yi masenyi ti Yosuwe bɛ, 
\v 7 «Mangɛ Alatala xa masenyi nan ya: Xa i ɲɛrɛ n ma kirae xɔn, xa i n ma yaamarie suxu, i fama nɛ n ma banxi raɲɛrɛde, i fa n ma tɛtɛ makantade. Na tɛmui i yire sɔtɔma nɛ be yee tagi. 
\v 8 Sɛrɛxɛdubɛ kuntigi Yosuwe, i tan nun naxee dɔxɔxi i ya i, wo wo tuli mati. Wo bara findi misaali ra. N fama n ma konyi xɛɛde, naxan xili ‹Salonyi.› 
\v 9 Wo xa gɛmɛ mato n naxan dɔxɔxi Yosuwe ya i. Ya solofere na na gɛmɛ kerenyi ma. N sɛbɛli tima nɛ a ma, n man fa yi bɔxi xa yunubi ba lɔxɔɛ keren kui.» Mangɛ Alatala xa masenyi nan na ki. 
\v 10 «Na lɔxɔɛ, wo wo boore xilima nɛ, wo xa lu yire keren wo xa wɛni bili nun xɔrɛ bili bun ma.» Mangɛ Alatala xa masenyi nan na ki.
\c 4
\s Laamatunyi suuli nde: Lanpui dɔxɔ se
\p
\v 1 Malekɛ naxan nu wɔyɛnma n na, a naxa fa n naxunude, alɔ e mixi raxunuma ki naxɛ xixɔli ma. 
\v 2 A naxa n maxɔrin, «I munse toxi?» N naxa a yaabi, «N lanpui dɔxɔ se xɛɛma daaxi nan toxi, bitirɛ na a xuntagi, ture ra a kui. Lanpui solofere gbakuxi a ma, ture gorode solofere, ture rasoma na lanpui soloferee kui. 
\v 3 Oliwi wuri bili firin tixi ture bitirɛ sɛɛti firinyie ma, keren a yirefanyi ma, keren a kɔɔla ma.» 
\v 4 N naxa malekɛ maxɔrin, naxan nu wɔyɛnma n na, «N marigi, munse na yee ra?» 
\v 5 A naxa a fala n bɛ, «I mu a kolon?» N naxa a yaabi: «N marigi, n mu a kolon.» 
\v 6 Na tɛmui a naxa a masen n bɛ, «Alatala xa masenyi nan ya, a naxan tixi Sorobabeli bɛ, ‹Wo sɛnbɛ mu nɔma sese ra. N tan nan Xaxili nɔma a rabade.› Mangɛ Alatala xa masenyi nan ya.»
\p
\v 7 «Geya xungbe naxan na Sorobabeli ya ra, n na findima nɛ fiili ra. A fama nɛ gɛmɛ fanyi raminide banxi ti se ra, ɲama fa a fala e xui itexi ra, ‹Ala xa hinnɛ a ra, Ala xa hinnɛ a ra!›»
\p
\v 8 Alatala naxa yi masenyi ti n bɛ, 
\v 9 «Sorobabeli bara yi banxi ti fɔlɔ, a man a raɲɔnma nɛ.» Na kui wo a kolonma nɛ a Mangɛ Alatala nan n xɛɛxi wo yire. 
\v 10 Nde yoma fe fɔlɛ xuri ma? Ɲama na wali se to Sorobabeli bɛlɛxɛ, e ɲɛlɛxinma nɛ.
\p Malekɛ naxa a fala n bɛ, «Na lanpui solofere findixi Alatala yae nan na naxee duniɲa iɲɛrɛma.» 
\v 11 N naxa a maxɔrin a ma, «Munse na na oliwi wuri bili firinyi ra, naxee na lanpui dɔxɔ se yirefanyi ma nun a kɔɔla ma?» 
\v 12 N man naxa a maxɔrin a ma, «Munse na na oliwi salonyi firinyie ra, naxee na ture gorode xɛɛma daaxi firinyie sɛɛti ma, oliwi ture dangima naxee kui?» 
\v 13 A naxa a fala n bɛ, «I mu a kolon e naxee misaalixi?» N naxa a yaabi, «N marigi, n mu a kolon.» 
\v 14 A naxa a fala n bɛ, «Mixi firin nan e ra Ala naxee sugandixi, a ture ifili e xunyie ma, e xa wali duniɲa birin Marigi bɛ.»
\c 5
\s Laamatunyi senni nde: Dankɛ kɛɛdi
\p
\v 1 N man naxa laamatunyi to naxan findixi kɛɛdi makuntanxi ra koore ma. 
\v 2 Malekɛ naxa n maxɔrin, «I munse toxi?» N naxa a yaabi, «N kɛɛdi makuntanxi nan toxi koore ma, a kuya nɔngɔn ya mɔxɔɲɛn, a igbo nɔngɔn ya fu.» 
\v 3 A naxa a fala n bɛ, «Dankɛ sɛbɛxi na kɛɛdi ma naxan masenxi bɔxi yire birin. A sɛbɛxi muɲɛti nun mixie nan bɛ, naxee e kalima wule ra, e birin fama nɛ keride yi bɔxi ma. 
\v 4 Mangɛ Alatala xa masenyi nan ya, ‹N yi dankɛ rasoma nɛ muɲɛtie xa banxie kui, a nun mixi naxee e kalima n xili ra kɔnɔ e fa wule fala. Na dankɛ luma nɛ e xa banxie kui han a birin kana.›»
\s Laamatunyi solofere nde: Ginɛ na busali kui
\p
\v 5 Malekɛ naxan nu wɔyɛnma n na, a naxa makɔrɛ n na, a fa a fala n bɛ, «A mato naxan na minife yakɔsi.» 
\v 6 N naxa a maxɔrin, «Munse a ra?» A naxa n yaabi, «Busali nan a ra, ɲama xa fe ɲaaxie na naxan kui.» 
\v 7 Dɛrakote binye to ba a dɛ ra, a naxa a to ginɛ nde dɔxɔxi a kui. 
\v 8 Malekɛ naxa a fala n bɛ, «Fe ɲaaxi misaali nan yi ginɛ ra.» A man naxa ginɛ radin busali kui, a fa a dɛ rakoto dɛrakote binye ra.
\p
\v 9 N to n ya rakeli, n naxa ginɛ firin to. Gabutenyi gbongboe daaxie nu na e ma, e nu na ɲɛrɛfe koore ma. E naxa na busali tongo, e a xanin koore ma. 
\v 10 N naxa malekɛ maxɔrin, naxan nu wɔyɛnma n na, «E na busali xaninfe minden?» 
\v 11 A naxa n yaabi, «E na a xaninfe Babilɔn bɔxi nan ma, e banxi tima a bɛ dɛnnaxɛ, a xa lu naa.»
\c 6
\s Laamatunyi solomasaxan nde: Sɔɔri ragise naani
\p
\v 1 N man naxa laamatunyi to. Sɔɔri ragise naani nu na minife geya firinyie longori ra. Na geyae nu yailanxi yɔxui nan na. 
\v 2 Soe gbeelie nan nu na sɔɔri ragise singe bɛndunfe, soe fɔɔrɛe nan nu na sɔɔri ragise firin nde bɛndunfe, 
\v 3 soe fiixɛe nan nu na sɔɔri ragise saxan nde bɛndunfe, soe makatunxie nan nu na sɔɔri ragise naani nde bɛndunfe. 
\v 4 N naxa malekɛ maxɔrin, naxan nu wɔyɛnma n na, «N marigi, munse yee ra?»
\p
\v 5 Malekɛ naxa n yaabi, «Foye naani nan e ra, Duniɲa Marigi na naxee raminife. 
\v 6 Soe fɔɔrɛe sigama ɲamanɛ kɔɔla nan ma, soe fiixɛe sigama ɲamanɛ sogegorode nan ma, soe makatunxie sigama ɲamanɛ yirefanyi nan ma.» 
\v 7 Yi soe sɛnbɛmae to nu wama sigafe duniɲa iɲɛrɛde, malekɛ nde naxa a fala e bɛ, «Wo siga bɔxi iɲɛrɛde.» E naxa keli keren na. 
\v 8 Ala naxa a fala n bɛ a xui itexi ra, «I bara a mato, naxee sigaxi ɲamanɛ kɔɔla ma, e bara n waxɔnfe raba naa.»
\s Yosuwe xa mangɛya
\p
\v 9 Alatala xa masenyi nan ya: 
\v 10 «Xeledayi, Tobiya, nun Yɛdaya na fa kelife konyiya kui Babilɔn bɔxi ma, i xa e xa fangadamae rasuxu. Na lɔxɔɛ i xa siga Sofoni xa di Yosiya yire 
\v 11 na gbeti nun na xɛɛma ra. I xa mangɛya tɔnxuma rafala na ra, i fa a dɔxɔ sɛrɛxɛdubɛ kuntigi Yosuwe xun ma, Yehosadaki xa di. 
\v 12 I xa a fala a bɛ, ‹Mangɛ Alatala xa masenyi nan ya: Yi mixi naxan xili «Salonyi.» Na salonyi bulama nɛ, a fa Alatala xa hɔrɔmɔbanxi ti. 
\v 13 A tan nan Alatala xa hɔrɔmɔbanxi tima, mangɛya tɔnxuma luma nɛ a yi, a dɔxɔ a xa kibanyi kui, a ɲama yamari. Sɛrɛxɛdubɛ nde fan dɔxɔma nɛ a xa kibanyi kui. Bɔɲɛsa lu e firinyi tagi.› 
\v 14 Mangɛya tɔnxuma luma nɛ Alatala xa hɔrɔmɔbanxi kui Helemi, Tobiya, Yɛdaya, nun Sofoni xa di Heni yi ra.»
\p
\v 15 «Mixi naxee makuya, nee fama nɛ Alatala xa hɔrɔmɔbanxi tide. Na kui wo a kolonma nɛ a Mangɛ Alatala nan n xɛɛxi wo ma. Na birin fama nɛ rabade xa wo wo Marigi Alatala xui suxu a fanyi ra.»
\c 7
\s Sunyi
\p
\v 1 Dariyusi xa mangɛya ɲɛ naani nde, Kisilewi kike solomanaani nde, xi naani nde lɔxɔɛ, Alatala naxa masenyi ti Annabi Sakari bɛ. 
\v 2 Betelikae nu bara Sareseri nun Regemi Meleki nun e xa mixie xɛɛ Alatala maxandide. 
\v 3 E man xa Mangɛ Alatala xa sɛrɛxɛdubɛe, naxee nu na hɔrɔmɔbanxi kui, a nun namiɲɔnmɛe maxɔrin, «Muxu lan muxu xa muxu wa xui ramini kike suuli nde ra, muxu xa sunyi suxu alɔ muxu a rabaxi ɲɛ wuyaxie ra ki naxɛ?»
\p
\v 4 Mangɛ Alatala naxa masenyi ti n bɛ yi ki, 
\v 5 «Ɲama nun sɛrɛxɛdubɛe maxɔrin n bɛ, ‹Wo to nu sunyi suxuma sunnunyi kui na kike suuli ndee nun na kike solofere ndee ɲɛ tongo solofere bun ma, wo nu sunma n tan nan bɛ? 
\v 6 Wo to nu wo dɛgema nun wo wo minma, wo mu a rabaxi wo yɛtɛ xa bɛ? 
\v 7 Alatala mu na masenyi mɔɔli ti a xa namiɲɔnmɛ singee saabui xa ra, Darisalamu nun a rabilinyi nu sabatixi bɔɲɛsa kui tɛmui naxɛ? Na tɛmui, mixie nu na Negewi nun Sefela bɔxi ma.›»
\p
\v 8 Alatala naxa masenyi ti Annabi Sakari bɛ yi ki, 
\v 9 «Mangɛ Alatala xa masenyi nan ya: ‹Wo xa kiiti sa tinxinyi kui. Wo xa hinnɛ wo boore ra kinikini kui. 
\v 10 Wo naxa kaaɲɛ ginɛe, kiridie, bɔxi xɔɲɛe, nun setaree tɔɔrɔ. Wo naxa natɛ ɲaaxi tongo wo bɔɲɛ kui wo booree xa fe ra.› 
\v 11 Kɔnɔ e mu tin na masenyi ra, e naxa e kobe so, e mu e tuli mati na ra. 
\v 12 E bɔɲɛe naxa xɔrɔxɔ alɔ diyaman, e naxa tondi Mangɛ Alatala xa sɛriyɛ suxude, a Xaxili Sɛniyɛnxi nu bara naxan nasanba namiɲɔnmɛ singee ma. Na nan a ra Mangɛ Alatala naxa xɔnɔ e ma a belebele ra. 
\v 13 A to e xili, e naxa tondi a xui suxude. Yakɔsi, xa e tan bara a xili, a mu e xa maxandi suxuma de.» Mangɛ Alatala xa masenyi nan ya, 
\v 14 «N e rayensen nɛ sie birin ya ma e mu naxee kolon. E to keli e xa bɔxi ma, dɛnnaxɛ nu bara rabɛɲin, mixi yo mu dangima dɛnnaxɛ, mixi yo mu sigama dɛnnaxɛ. Bɔxi fanyi findi gbaloe bɔxi ra e tan nan saabui ra.»
\c 8
\s Ala xa laayidi Darisalamu xa fe ra
\p
\v 1 Mangɛ Alatala xa masenyi nan ya: 
\v 2 Mangɛ Alatala naxa a masen, «N mu wama n firin nde xɔn Siyon. N ma ɲama xa fe xɔrɔxɔ n ma ki fanyi.» 
\v 3 Alatala naxa a masen, «N man fama nɛ Siyon, n xa lu wo tagi Darisalamu. Darisalamu fama nɛ xilide ‹Taa nɔndila.› Mangɛ Alatala xa geya fama nɛ xilide ‹Geya Sɛniyɛnxi.›»
\p
\v 4 Mangɛ Alatala xa masenyi nan ya: «Xɛmɔxie nun ɲɛlɛxɛforie man luma nɛ Darisalamu malan yire, yisuxuwuri suxu e yi e xa simaya xɔnnakuye xa fe ra. 
\v 5 Dimɛdie fan luma nɛ bere ra taa malandee.»
\p
\v 6 Mangɛ Alatala xa masenyi nan ya, «Hali a fa findi tɛrɛnna ra yi waxati ɲama dɔnxɔɛ bɛ, Mangɛ Alatala mu nɔma kaabade na fe ma.»
\p
\v 7 Mangɛ Alatala xa masenyi nan ya, «N nan n ma ɲama rakisima nɛ ɲamanɛe ma naxee kelima sogetede nun sogegorode. 
\v 8 N e ragbilenma nɛ Darisalamu. E findima nɛ n ma ɲama ra, n fan findi e Marigi Ala ra nɔndi nun tinxinyi kui.»
\p
\v 9 Mangɛ Alatala xa masenyi nan ya, «Wo wo sɛnbɛ so, wo tan naxee nu bara yi masenyi mɛ namiɲɔnmɛe saabui ra Mangɛ Alatala xa banxi kɔɔrin tɛmui naxɛ. Wo wo sɛnbɛ so alako yi banxi xa ɲɔn. 
\v 10 Beenu na wali xa fɔlɔ, wali sare yo mu nu na walikɛe bɛ. Hali ningee mu donse sɔtɔ e xa wali kui. Wali birin mu nu nɔma sɔɔnɛyade, barima n nu bara yaxuiɲa ramini mixie tagi. 
\v 11 Kɔnɔ yakɔsi n mu yi ɲama dɔnxɔɛ tɔɔrɔma alɔ singe.» Mangɛ Alatala xa masenyi nan na ki.
\p
\v 12 «Bɔɲɛsa luma nɛ bɔxi ma. Wɛni bilie bogima nɛ, bɔxi daxamui raminima nɛ, tunɛ ye fama nɛ. N na birin soma nɛ yi ɲama dɔnxɔɛ yi ra e kɛ ra. 
\v 13 Singe Yudaya bɔnsɔɛ nun Isirayila bɔnsɔɛ findi nɛ dankɛ ra sie tagi, kɔnɔ yakɔsi, n to wo rakisi, wo findima nɛ e bɛ saabui ra e barakɛ sɔtɔ. Wo naxa gaaxu, wo wo sɛnbɛ so.»
\p
\v 14 Mangɛ Alatala xa masenyi nan ya, «Wo benbae to n naxɔnɔ, n naxa natɛ tongo n xa wo ɲaxankata. N mu tin gbilende na natɛ fɔxɔ ra. 
\v 15 Kɔnɔ yakɔsi n bara natɛ tongo, n xa fe fanyi raba wo bɛ, Darisalamu nun Yudaya bɔnsɔɛ. Wo naxa gaaxu. 
\v 16 Wo xa yi masenyi rabatu: Wo xa nɔndi fala wo boore bɛ, wo xa kiiti sa nɔndi nun tinxinyi kui. 
\v 17 Ɲaaxuiɲa naxa lu wo bɔɲɛ kui wo booree mabiri. Wo naxa wo kali wule kui, barima na fe mɔɔli mu rafan n ma.» Mangɛ Alatala xa masenyi nan na ki.
\p
\v 18 Mangɛ Alatala xa masenyi nan ya, 
\v 19 «Mangɛ Alatala naxa a masen wo sunyi naxee suxuma kike naani nde, kike suuli nde, kike solofere nde, nun kike fu nde ra, nee xa findi sali sɛɛwɛ daaxie ra. Nɔndi nun bɔɲɛsa xa rafan wo ma.»
\p
\v 20 Mangɛ Alatala xa masenyi nan ya, «Mixi gbegbe fama nɛ fade kelife ɲamanɛ gbɛtɛe ma. 
\v 21 Mixie luma siga ra yire gbɛtɛ e sa a fala mɛnnikae bɛ, ‹Won xɛɛ Mangɛ Alatala maxandide, won birin na a ra.› 
\v 22 Sɛnbɛma wuyaxie kelife ɲamanɛ gbɛtɛe ma, e fama nɛ Mangɛ Alatala fende Darisalamu, e a maxandi.»
\p
\v 23 Mangɛ Alatala xa masenyi nan ya, «Na lɔxɔɛe ɲamanɛ gbɛtɛe mixi fu fama nɛ kankande Yuwifi keren ma, e fa a fala a bɛ, ‹Won birin na a ra, barima muxu bara a kolon Ala na wo fɛ ma.›»
\c 9
\s Si gbɛtɛe xa kiiti
\p
\v 1 Alatala bara masenyi xɔrɔxɔɛ ti
\q Xadaraki xa bɔxi xa fe ra.
\q Na masenyi bara Damasi taa fan li.
\q Alatala gbe nan adamadi birin na,
\q Isirayila bɔnsɔɛe fan a gbe.
\q
\v 2 Na masenyi bara Xamata taa li,
\q naxan na Damasi naaninyi mabiri.
\q A bara Tire nun Sidɔn fan li,
\q hali lɔnnilae nan to e ra.
\q
\v 3 Tire bara taa makantaxi ti,
\q a xa gbeti bara gbo alɔ mɛyɛnyi,
\q a xa xɛɛma bara gbo alɔ boora.
\q
\v 4 Kɔnɔ Marigi na birin bama nɛ a yi,
\q a a xa tɛtɛ radin baa ma, a fa taa gan.
\q
\v 5 Asikalɔn na na to,
\q a fan luma nɛ gaaxui kui.
\q Gasa nun Ekiron fan gaaxuma nɛ,
\q e sɛrɛnma nɛ barima e xa xunnakeli bara findi yaagi ra.
\q Gasa mangɛ faxama nɛ,
\q mixi yo mu luma Asikalɔn sɔnɔn.
\q
\v 6 Si masunbuxi fama nɛ sabatide Asidodi.
\q «N Filisitakae xa yɛtɛ igboɲa ragoroma nɛ.
\q
\v 7 N faxɛ tife ɲɔnma nɛ mɛnni.»
\q Ɲama dɔnxɔɛ fama nɛ birade muxu Marigi Ala fɔxɔ ra.
\q E sabatima nɛ Yudaya xabilɛe ya ma.
\q Ekiron luma nɛ alɔ Yebusu.
\q
\v 8 «N na n ma banxi kanta ma nɛ,
\q alako sɔɔri gali yo naxa a kana.
\q Naxan fama, naxan dangima,
\q e mu nɔma sese ra,
\q barima yakɔsi n ɲɛngi saxi a xɔn ma.»
\b
\q
\v 9 Siyonkae, wo xa ɲɛlɛxin.
\q Darisalamukae, wo xa wo xui ite sɛɛwɛ kui.
\q Wo xa mangɛ na fafe wo yire.
\q A tinxin. A kisixi.
\q A mu a yɛtɛ igboma,
\q a soma taa kui sofale nan fari,
\q sofale xɛmɛma, sofale ginɛma xa di.
\q
\v 10 «N sɔɔri ragise bama nɛ Efirami bɔxi ma,
\q n soee bama nɛ Darisalamu.
\q Gereso xalie mu luma naa.»
\q A bɔɲɛsa nan masenma sie bɛ.
\q A xa mangɛya xungboma nɛ yire birin,
\q kelife baa xungbe ma, a sa dɔxɔ xure xungbe ra.
\q
\v 11 «N bara wo xa mixi suxuxie xun sara
\q won ma saatɛ xa fe ra
\q naxan xirixi sɛrɛxɛ wuli daaxi ra.
\q E nu na fe xɔrɔxɔɛ kui,
\q alɔ mixi naxee ragoroxi kɔlɔnyi nde kui, ye mu na naxan kui.
\q
\v 12 Wo xa gbilen taa makantaxi kui,
\q wo tan geelimani naxee xaxili tixi n na.
\q To n xa a fala wo bɛ,
\q n wo harige ragbilenma nɛ wo ma,
\q n man fa a xunmasa.
\q
\v 13 Yudaya findima nɛ n ma xali ra.
\q Efirami luma nɛ alɔ n ma tanbɛe.
\q Siyonikae findima nɛ n ma sɔɔrie ra
\q Girɛkikae xili ma.
\q N ma santidɛgɛma nan i ra.»
\b
\q
\v 14 Alatala a yɛtɛ makɛnɛnma nɛ e bɛ,
\q a xa tanbɛ lu alɔ seyamakɔnyi.
\q Marigi Alatala sara fema nɛ,
\q a lu alɔ turunnaadɛ.
\q
\v 15 Mangɛ Alatala e makantama nɛ.
\q E xa geresosee kanari rabama nɛ,
\q e wuli ifili alɔ sɛrɛxɛdubɛe
\q naxan xuruse kɔn naxabama,
\q e fa na wuli kasan sɛrɛxɛbade ma.
\q
\v 16 E Marigi Alatala e rakisima nɛ na lɔxɔɛ,
\q alɔ xuruse dɛmadonyi a xa xurusee kantama ki naxɛ.
\q Ala xa ɲama luma nɛ alɔ diyaman naxan yanbama bɔxi ma.
\q
\v 17 E tofanma nɛ, e rayabu.
\q Baloe fanyi sɛgɛtalae xungboma nɛ,
\q minse fanyie sungbutunyie rayabu.
\c 10
\s Ala xa hinnɛ
\q
\v 1 Wo xa Alatala maxandi ɲɛmɛ tɛmui.
\q Alatala fama nɛ tunɛ belebele ra wo bɛ,
\q alako wo xa xɛe xa fan.
\q
\v 2 Kuyee wule falama,
\q sematoee mu nɔndi toma,
\q e xiyee fasarima wule ra,
\q e xa madundui fufafu na a ra.
\q Na birin bara a niya ɲama xa lɔɛ alɔ xurusee.
\q E na tɔɔrɛ kui barima xuruse dɛmadonyi mu na e bɛ.
\q
\v 3 N bara xɔnɔ na xuruse dɛmadonyie ma.
\q N e xa yareratie ɲaxankatama nɛ.
\q Yudaya luma nɛ alɔ Mangɛ Alatala xa xurusee,
\q a mɛɛnima nɛ e ma.
\q E fama nɛ binyɛ sɔtɔde,
\q alɔ sɔɔri mangɛ xa soe.
\q
\v 4 Mixi nde kelima nɛ Yudaya
\q naxan misaalima gɛmɛ ra banxi tixi naxan fari,
\q naxan misaalima wuri ra kiri banxi xirixi naxan na,
\q naxan misaalima xali geresose ra.
\q Mangɛ birin fatanxi Yudaya bɔnsɔɛ nan na.
\q
\v 5 Yudayakae findima nɛ sɛnbɛmae ra,
\q naxee e yaxuie maboronma gere kui,
\q barima Alatala na e fɛ ma.
\q E yaxuie xa soe ragimae luma nɛ yaagi kui.
\b
\q
\v 6 «N Yudaya bɔnsɔɛ xun nakelima nɛ,
\q n Yusufu bɔnsɔɛ rakisi,
\q n e xa taae yailan,
\q barima n bara kinikini e ma.
\q E fama nɛ lude alɔ n mu e rabɛɲin.
\q E Marigi Alatala nan n na,
\q n e xa duba suxuma nɛ.
\q
\v 7 Efirami bɔnsɔɛ fan findima nɛ sɛnbɛmae ra.
\q E sɛɛwama nɛ dangife siisilae ra.
\q E xa die na birin toma nɛ, e fan ɲɛlɛxin.
\q E birin bɔɲɛ sɛɛwama nɛ Alatala xa fe ra.
\q
\v 8 N nan n ma ɲama maxilima nɛ, n xa e xun sara,
\q e xa wuya dangife singe ra.
\q
\v 9 Hali n to e rayensenxi sie ya ma,
\q e e ratuma nɛ n ma fe ma yire makuye.
\q E tan nun e xa die kisima nɛ,
\q e man fa gbilen e xɔnyi.
\q
\v 10 N e rafama nɛ kelife Misira bɔxi ma,
\q n e malan kelife Asiriya bɔxi ma.
\q N man Galadi nun Liban bɔxi fima nɛ e ma,
\q kɔnɔ e kɔnti dangima nɛ na birin na.
\q
\v 11 E xa tɔɔrɛ bara lu alɔ baa mɔrɔnyie,
\q kɔnɔ Ala na mɔrɔnyie ragoroma nɛ.
\q Nili xure bara a niya e xa lu konyiya kui,
\q kɔnɔ na xure bara xɔri.
\q Asiriya xa yɛtɛ igboɲa goroma nɛ,
\q Misira xa mangɛya ɲɔn.
\q
\v 12 N tan nan e sɛnbɛ soma,
\q e fama nɛ ɲɛrɛde n xili ra.»
\q Alatala xa masenyi nan na ki.
\c 11
\s Xuruse dɛmadonyie
\q
\v 1 Liban bɔxi, i xa wuri birin fama nɛ gande.
\q
\v 2 Wo fama nɛ wade wo xui itexi ra,
\q barima sipirɛ, sɛdiri, nun konde bilie fama nɛ birade.
\q Basan wondi belebele bara kana.
\q
\v 3 Xuruse dɛmadonyie wama nɛ,
\q barima fiili bara kana.
\q Yɛtɛe xaaɲɛma nɛ,
\q barima Yurudɛn fɔtɔnyi bara kana.
\q
\v 4 N Marigi Alatala a masen nɛ,
\q «Wo xa xurusee dɛ madon,
\q naxee fama faxade.
\q
\v 5 Mixi naxee e sarama
\q e fama nɛ e kɔn naxabade kinikinitareɲa kui.
\q Naxee e matima e a falama nɛ,
\q ‹Ala tantu.
\q N bara banna.›
\q Xuruse dɛmadonyie mu kinikinima e ma.»
\q
\v 6 Alatala xa masenyi nan ya:
\q «N fan mu kinikinima yi ɲama ma.
\q N bara e birin lu e boore yi ra,
\q e xa mangɛ yi ra,
\q alako ɲama xa ɲaxankata.
\q N mu mixi yo ratangama na ma.»
\b
\p
\v 7 Na kui n naxa xurusee tɔɔrɔxi dɛ madon, naxee nu lanxi e xa faxa. N naxa yisuxuwuri firin tongo. N naxa keren xili sa «Hinnɛ,» boore «Lanyi.» N naxa xurusee dɛ madon. 
\v 8 N naxa xuruse dɛmadonyi saxan keri kike keren bun, barima e mu rafanxi n ma sɔnɔn, n fan mu rafanxi e ma. 
\v 9 N naxa a fala xurusee bɛ, «N mu wo dɛ madonma sɔnɔn. Naxan lan a xa faxa, a xa faxa. Naxan lan a xa siga, a xa siga. Naxan lan a xa lu be, a xa a boore faxa.» 
\v 10 N naxa n ma yisuxuwuri tongo naxan xili «Hinnɛ,» n naxa a igira. Na misaalixi saatɛ nan na naxan xirixi n tan nun sie birin tagi. Na saatɛ bara kana. 
\v 11 N to na kana xurusee tɔɔrɔxi ya xɔri, e naxa a kolon n nu bara Alatala xa masenyi fala. 
\v 12 N naxa a fala e bɛ, «Xa a wo kɛnɛn, wo n ma wali sare fi n ma, xa na mu a ra wo a lu na.» E naxa kɔbiri kole tongo saxan fi n ma wali sare ra. 
\v 13 Alatala naxa a fala n bɛ, «Xa e n ma wali tide toma na ki nɛ, a sare mu gbo, a wɔlɛ. Fɛɲɛ yailanma xa na tongo.» N naxa na kɔbiri kole tongo saxan tongo, n naxa e wɔlɛ Alatala xa banxi kui mixi nde bɛ naxan fɛɲɛe yailanma. 
\v 14 Na dangi xanbi, n naxa n ma yisuxuwuri igira naxan nu xili «Lanyi,» barima lanyi mu na Yudaya nun Isirayila tagi sɔnɔn.
\p
\v 15 Alatala naxa a fala n bɛ, «I man xa xuruse dɛmadonyi xaxilitare xa walisee tongo. 
\v 16 N xuruse dɛmadonyi rakelima nɛ yi bɔxi ma naxan mu a ɲɛngi sama xurusee xɔn ma. Xa xuruse keren bara lɔɛ, a mu sigama a fende. Xa keren bara maxɔnɔ, a mu a dandanma. Xa keren bara xungbo fɔlɔ, a a sube birin donma nɛ han a a tore li.»
\b
\q
\v 17 «Ɲaxankatɛ na xuruse dɛmadonyi ɲaaxi bɛ,
\q naxan xurusee rabɛɲinma.
\q Santidɛgɛma xa a bɛlɛxɛ sɛgɛ,
\q a xa a ya sɔxɔ.
\q A bɛlɛxɛ naxa nɔ fefe ra,
\q a ya naxa fe yo to.»
\c 12
\s Yudaya xa xunnakeli
\q
\v 1 Alatala bara masenyi xɔrɔxɔɛ ti Isirayila xa fe ra.
\q Alatala xa masenyi nan ya,
\q naxan koore nun bɔxi daaxi,
\q naxan xaxili so adamadi yi ra:
\q
\v 2 «N fe xungbe rabama nɛ Darisalamu bɛ, duniɲa sie tagi.
\q Mixi na fa Darisalamu gerede,
\q n kaabanako rabama nɛ Yudaya bɛ.
\q
\v 3 Na lɔxɔɛ, n Darisalamu findima nɛ gɛmɛ binye ra si birin bɛ.
\q Naxan katama na itefe ra,
\q na kanyi maxɔnɔma nɛ.
\q Duniɲa si birin malanma nɛ a xili ma.»
\q
\v 4 Alatala xa masenyi nan ya:
\q «Na lɔxɔɛ, n sɔɔri nun a xa soe radaxuma nɛ.
\q N nee findi dɔnxui ra.
\q N Yudaya bɔnsɔɛ matoma nɛ,
\q n nan n ɲɛngi sa e xɔn ma.
\q
\v 5 Yudaya mangɛe a falama nɛ e bɔɲɛ kui,
\q ‹Darisalamukae sɛnbɛ gboxi
\q e Marigi Alatala nan saabui ra.›
\q
\v 6 Na lɔxɔɛ, n Yudaya mangɛe luma nɛ
\q alɔ tɛ wolenxi yege xɔɔra,
\q xa na mu alɔ tɛ na din sɛxɛ ra.
\q E fama nɛ si birin halakide naxan na e rabilinyi.
\q Darisalamu mu kanama.
\q
\v 7 Alatala Yudaya taae nan singe rakisima,
\q alako Dawuda xabilɛ nun Darisalamukae
\q xa binyɛ naxa dangi Yudaya mixie ra.
\q
\v 8 Na lɔxɔɛ, Alatala Darisalamukae makantama nɛ.
\q Ala a niyama nɛ mixi taganxi xa Dawuda sɛnbɛ sɔtɔ.
\q Dawuda xabilɛ sɛnbɛ gboma nɛ Ala saabui ra.
\q Alatala xa malekɛ a ɲɛrɛma nɛ e ya ra.
\q
\v 9 Na lɔxɔɛ, n si birin halakima nɛ
\q naxee Darisalamu gerema.
\b
\q
\v 10 N hinnɛ nun kinikini luma nɛ
\q Dawuda xabilɛ nun Darisalamukae xaxili ma.
\q E fama nɛ e ya rafindide n ma, e n tan naxan sɔxɔxi.
\q E sunnunma nɛ n ma fe ra,
\q alɔ mixi naxan xa di singe bara faxa.
\q E e wa xui raminima na ki nɛ.
\q
\v 11 Na lɔxɔɛ, sunnunyi gboma nɛ Darisalamu,
\q alɔ Hadada Rimɔn sunnunxi Megido gulunba kui ki naxɛ.
\q
\v 12 Ɲama birin sunnunma nɛ xabilɛ ki ma.
\q Dawuda xabilɛ luma nɛ a xati ma.
\q Natan xabilɛ fan luma nɛ a xati ma.
\q Xɛmɛe nun ginɛe mu sunnunma yire keren.
\q
\v 13 Lewi xabilɛ luma nɛ a xati ma.
\q Simeyi xabilɛ luma nɛ a xati ma.
\q Xɛmɛe nun ginɛe mu sunnunma yire keren.
\q
\v 14 Xabilɛ birin luma nɛ a xati ma.»
\c 13
\s Ɲama sɛniyɛnxi
\q
\v 1 Na lɔxɔɛ, dulonyi minima nɛ
\q naxan nɔma Dawuda xabilɛ nun Darisalamukae
\q yunubi bade.
\q
\v 2 Mangɛ Alatala xa masenyi nan ya:
\q «Na lɔxɔɛ, n kuyee xili bama nɛ wo dɛ kui,
\q wo nɛɛmu e ma.
\q N e xa namiɲɔnmɛe nun e xa sɛniyɛntareɲa kerima nɛ.
\q
\v 3 Xa mixi nde suusama namiɲɔnmɛ masenyi tide,
\q a nga nun a baba naxan a barixi e a falama a bɛ,
\q ‹I xa faxa, barima i bara wule fala Alatala xili ra.›
\q A nga nun a baba naxan a barixi,
\q e a sɔxɔma nɛ na masenyi xa fe ra.
\q
\v 4 Na lɔxɔɛ, namiɲɔnmɛe birin yaagima nɛ
\q e xa masenyie xa fe ra.
\q E mu namiɲɔnmɛ dugi ragoroma e ma sɔnɔn
\q alako e xa mixi madaxu.
\q
\v 5 E birin a falama nɛ,
\q ‹Namiɲɔnmɛ mu n na.
\q Kabi n dimɛdi tɛmui n xɛ nan tun safe.›
\q
\v 6 Kɔnɔ e a maxɔrinma nɛ,
\q ‹Munse na yi nari ra i bɛlɛxɛe ma?›
\q A e yaabima nɛ:
\q ‹N xanuntenyi nan n maxɔnɔxi.›»
\b
\q
\v 7 «Santidɛgɛma, keli n ma xuruse dɛmadonyi xili ma,
\q keli mixi xili ma naxan na n sɛɛti ma.»
\q Mangɛ Alatala xa masenyi nan ya:
\q «Santidɛgɛma, xuruse dɛmadonyi faxa,
\q yɛxɛɛe rayensen yɛ.
\q N fama nɛ yɛxɛɛyɔrɛe ɲaxankatade.»
\q
\v 8 Alatala xa masenyi nan ya:
\q «Ɲama dɔxɔ firin faxama nɛ,
\q kɔnɔ a dɔxɔ saxan nde baloma nɛ.
\q
\v 9 N na dɔxɔ saxan nde sama nɛ tɛ i,
\q n e raxunu alɔ gbeti.
\q N xa e mato alɔ xɛɛma.
\q A na n maxandi, n a xa duba suxuma nɛ.
\q N fama nɛ a masende, ‹N ma ɲama nan ya,›
\q a fan a masen, ‹Alatala nan muxu Marigi Ala ra.›»
\c 14
\s Alatala fa lɔxɔɛ
\p
\v 1 Alatala xa lɔxɔɛ fafe.
\q Wo yaxuie wo harige itaxunma nɛ e boore ma wo ya xɔri.
\q
\v 2 N si birin malanma nɛ Darisalamu gere xili ma.
\q E soma nɛ taa kui, e banxi kana, e dutun ginɛe ma.
\q E ɲama sɛɛti xaninma nɛ konyiya kui,
\q e boore sɛɛti lu taa kui.
\b
\q
\v 3 Alatala kelima nɛ a sa na sie gere a gere ki ma.
\q
\v 4 Na lɔxɔɛ Ala tima nɛ Oliwi geya fari,
\q naxan na Darisalamu ya ra sogetede mabiri.
\q Oliwi geya ibɔɔma nɛ a tagi,
\q kelife sogetede han sogegorode.
\q Gulunba luma nɛ geya firin tagi,
\q keren na kɔɔla ma, keren na yirefanyi ma.
\q
\v 5 Na tɛmui wo wo gima nɛ gulunba kui
\q n ma geyae tagi han Aseli.
\q Wo wo gima nɛ
\q alɔ wo wo gixi bɔxi xa sɛrɛnyi ya ra ki naxɛ,
\q Yudaya mangɛ Yusiya xa waxati.
\q Na tɛmui n Marigi Alatala fama nɛ,
\q a nun a xa sɛniyɛntɔɛe ra.
\q
\v 6 Na lɔxɔɛ, naiyalanyi mu luma duniɲa ma,
\q yanbasee xunuma nɛ.
\q
\v 7 Yanyi nun kɔɛ mu na na lɔxɔɛ.
\q Alatala nan na lɔxɔɛ mɔɔli kolon.
\q Kɔnɔ nunmare tɛmui naiyalanma nɛ.
\b
\q
\v 8 Na lɔxɔɛ, kisi ye minima nɛ Darisalamu,
\q sɛɛti te sogetede baa mabiri,
\q sɛɛti goro sogegorode baa mabiri.
\q A minima nɛ soge fure nun ɲɛmɛ tɛmui.
\q
\v 9 Alatala nan findima duniɲa birin mangɛ ra.
\q Na lɔxɔɛ, Alatala nan keren fama batude,
\q a xili nan gbansan falama.
\q
\v 10 Darisalamu bɔxi rabilinyi birin
\q findima nɛ mɛrɛ ra,
\q kelife Geba, sa dɔxɔ Rimɔn na,
\q Darisalamu yirefanyi ma.
\q Darisalamu xa fe itema nɛ, a xa nɔɛ fa yensen yɛ
\q kelife Bunyamin naadɛ ma, sa dɔxɔ naadɛ singe ra,
\q han tunxui naadɛ, han Xananɛli koore banxi,
\q han mangɛ xa wɛni yailande.
\q
\v 11 Mixie sabatima nɛ taa kui,
\q e mu halakima sɔnɔn.
\q Darisalamu luma nɛ bɔɲɛsa kui.
\b
\q
\v 12 Alatala fama nɛ fure ɲaaxi sinde sie ma
\q naxee Darisalamu gerexi.
\q E fate kiri birin bɔrɔma nɛ beenu e xa faxa.
\q E yae bɔrɔma nɛ e ya yili kui,
\q e nɛnyi bɔrɔma nɛ e dɛ kui.
\q
\v 13 Na lɔxɔɛ, Alatala mixie ya isoma nɛ,
\q e e boore suxu, e e boore bɔnbɔ.
\q
\v 14 Yudayakae gere tima nɛ Darisalamu.
\q E naafuli bama nɛ sie yi ra naxee na e rabilinyi,
\q xɛɛma, gbeti, nun dugi gbegbe.
\q
\v 15 Na fure ɲaaxi mɔɔli nde fan sinma nɛ xuruse birin ma:
\q soee, sofalee, ɲɔxɔmɛe.
\b
\q
\v 16 Darisalamu yaxui naxee mu faxaxi na kui,
\q nee luma nɛ te ra ɲɛ birin Mangɛ Alatala batude,
\q e xa Bage Ti Sali raba na.
\q
\v 17 Xa duniɲa xabilɛ nde tondi sigade Darisalamu
\q Mangɛ Alatala batude,
\q tunɛ mu sinma e xa bɔxi ma.
\q
\v 18 Xa Misira xabilɛ nde tondi sigade,
\q tunɛ mu goroma mɛnni.
\q Alatala xa fure ɲaaxi nan na ki,
\q a naxan nagoro sie ma,
\q naxee tondixi sigade Bage Ti Sali rabade.
\q
\v 19 Alatala Misira nun si birin ɲaxankatama na ki nɛ,
\q naxee tondi sigade Bage Ti Sali rabade.
\b
\q
\v 20 Na lɔxɔɛ, birin findima Alatala gbe nan na.
\q A fama nɛ sɛbɛde tɔlɔnyie ma naxee gbakuxi soee ra,
\q «Alatala gbe.»
\q Tunde naxee sube gbansan ɲinma
\q Alatala xa hɔrɔmɔbanxi kui,
\q nee sɛniyɛnma nɛ alɔ yirabasee
\q naxee rawalima sɛrɛxɛbade sɛɛti ma.
\q
\v 21 Tunde birin naxee na Darisalamu nun Yudaya,
\q nee birin sɛniyɛnma nɛ,
\q nee birin findima nɛ Mangɛ Alatala gbe ra.
\q Mixi birin naxee fama sɛrɛxɛ bade,
\q nee fama nɛ tunde ndee ra alako e xa kuri so.
\q Na lɔxɔɛ, Kanaan kaafiri yo mu soma
\q Mangɛ Alatala xa banxi kui.