\id MIC 
\ide UTF-8
\h Annabi Mika
\toc1 Ala xa masenyi Annabi Mika bɛ
\toc2 Annabi Mika
\toc3 Mik
\mt Ala xa masenyi Annabi Mika bɛ
\imt Masenyi nde yi Kitaabui xa fe ra
\ip Annabi Mika xa kitaabui nɔndi hagigɛ masenma to mixie bɛ. Ala mu wama fe ɲaaxi xɔn, a yunubi birin xɔnma a bɔɲɛ birin na. Na kui ibunadama na keli Ala xa kira xɔn ma, Ala xa tinxinyi a niyama nɛ a xa na mixie ɲaxankata e xa fe rabaxi ma. E na findi a xa ɲama ra, e na findi ɲama ra naxan mu a kolon, e birin halakima nɛ na yunubie xa fe ra.
\ip Na fahaamufe mu xɔrɔxɔ adamadie bɛ, barima e fan na fe ɲaaxi nde to, e bɔɲɛ tema nɛ han. E na a to e xa mangɛe na setaree tɔɔrɔfe alako nde xa sa e yɛtɛ xa naafuli xɔn ma, e xɔnɔma nɛ. Na xɔnɛ maniya Ala xa xɔnɛ tinxinxi ra. Fe naxan mu rafan Ala ma, fe fanyi mu a ra. A mixi tɔɔrɔma nɛ!
\ip Kɔnɔ Ala xa xɔnɛ fatanxi a xa bɔɲɛ fanyi nan na. A to wa ibunadama xa fe xa sɔɔnɛya, a na Sentanɛ xa kasarɛ wali to, a xɔnɔma nɛ, a man gere ti na xili ma. Yunubi raba ɲaxankatafe kelixi na nan ma. Kɔnɔ na bɔɲɛ fanyi man a niyama nɛ Alatala xa katɛ birin naba alako a xa ibunadama ragbilen a xa kira fanyi ma. A mu wama e ɲaxankatafe tun. A wama nɛ e xa gbilen a ma, e xa kisi sɔtɔ kira fanyi xɔn ma.
\ip Annabi Mika nu Ala xa masenyi tife Isirayila nun e yaxuie bɛ, kɔnɔ a tide gbo to mixie fan bɛ. Won fan xa fahaamui sɔtɔ yi masenyi kui: a yunubi mu rafan Ala ma, a fama yunubitɔɛe ɲaxankatade, a nun a wama mixi rakisife e xa yunubie ma alako e xa ɲɛrɛ a waxɔnfe fanyi kui. Ala xa won mali na kisi tinxinxi sɔtɔfe ra. Amina.
\imte Ala xa masenyi Annabi Mika bɛ
\c 1
\s Ala xa xɔnɛ Isirayila nun Yudaya bɛ
\p
\v 1 Alatala xa masenyi nan ya a naxan ti Annabi Mika Moresetika bɛ Samari nun Darisalamu xa fe ra. A a ti a bɛ Yudaya mangɛ Yotami, Axasi, nun Xesekiya xa waxati nɛ.
\q
\v 2 Duniɲa si birin, wo xa wo tuli mati n na.
\q Ibunadama birin naxee na yi bɛndɛ fuɲi fari,
\q wo xa n ma masenyi ramɛ,
\q won Marigi Alatala fama wo kalamude naxan na,
\q kelife a xa hɔrɔmɔbanxi sɛniyɛnxi kui.
\b
\q
\v 3 Wo xa a mato, Alatala na fafe kelife a xa lingira,
\q a na gorofe geyae fari, a a ɲɛrɛ.
\q
\v 4 Geyae na xunufe a sanyi bun ma,
\q alɔ kumi dole naxan sama tɛ fɛ ma,
\q alɔ ye naxan susufe kelife yire itexi.
\q Geyae na ibɔɔfe, e findi gulunbae ra.
\q
\v 5 Na birin kelixi Yaxuba bɔnsɔɛ xa murutɛ nan ma,
\q a fatanxi Isirayila ɲama xa yunubie nan ma.
\q Nde Yaxuba bɔnsɔɛe ramurutaxi?
\q Samari xa mu a ra?
\q Nde kuye batude tixi yire itexi fari Yudaya?
\q Darisalamu xa mu a ra?
\b
\q
\v 6 Na kui n fama Samari findide gɛmɛ malanxie nan na,
\q n a findi wɛni sansi side ra.
\q N a xa gɛmɛ bilie rabira, n e radin gulunbae kui,
\q han a xa banxie bunyi lu kɛnɛ ma.
\q
\v 7 N a xa kuyee butuxunma nɛ, n a xa batu see ganma nɛ tɛ ra,
\q n a xa ala masolixie xun nakanama nɛ.
\q Nee fɔlɔxi bafata nan na naxan nawalixi langoe sare ra,
\q nee man findima bafata nan na langoe sare fima naxan na.
\b
\q
\v 8 N fama sunnunde na nan ma, n na n kui iwa.
\q N na n ɲɛrɛma nɛ n sanyi nun n fate mageli ra,
\q n na n gbelegbele xui itema nɛ alɔ wulai bare,
\q n na n kui iwa alɔ xundi.
\q
\v 9 Samari xa fure ɲaaxi mu nɔma dandande,
\q a man bara din Yudaya bɔxi ra,
\q han a bara Darisalamu masɔtɔ n ma ɲama sabatixi dɛnnaxɛ.
\b
\q
\v 10 Wo naxa na fe rakolon Gatikae ra de wo wa xui ra.
\q N dɔxɔxi xube xɔɔra sunnunyi kui Beti Leyafera.
\q
\v 11 Safirikae, wo xa dangi wo mageli ra yaagi kui.
\q Saanan ɲama mu suusama minide.
\q Wo mu nɔma wo xaxili tide Beti Eseli ra, e fan na wafe.
\q
\v 12 Marotikae bara lu kɔntɔfili kui,
\q barima gbaloe bara goro kelife e Marigi Alatala ma,
\q a Darisalamu naadɛ li.
\q
\v 13 Lakisikae, wo xa sɔɔri ragisee yailan.
\q Wo bara a niya Siyonikae xa muruta Ala ma,
\q Isirayila bara bira wo xa yunubie fɔxɔ ra.
\q
\v 14 I tan nun Moreseti Gatikae fatanma na nan ma,
\q Akisibukae fama nɛ Isirayila mangɛe yanfade.
\q
\v 15 Maresakae, n gerefa gbɛtɛ xɛɛma nɛ a xa wo gere.
\q Isirayila mangɛ ɲalama sigama nɛ Adulama.
\q
\v 16 Wo wo xunyie bi alɔ yubɛ, sunnunyi xa fe ra,
\q barima wo xa di xanuxie fama xaninde konyiya kui ɲamanɛ ma.
\c 2
\s Ɲaxankatɛ nun kisi
\q
\v 1 Ɲaxankatɛ na mixie bɛ,
\q naxee e maɲɔxunma maifuya nun fe ɲaaxi rabafe ma e sa tɛmui,
\q kuye nɛfɛ iba, e fa fe kobie raba,
\q barima na nɔɛ na e yi ra.
\q
\v 2 E na milɛ xɛe ma, e nee ba e kanyie yi ra.
\q E na milɛ banxie ma, e nee tongo e sɛnbɛ ra.
\q E fu mixi ma, e a xa banxi muɲa.
\q E fu mixi ma, e a kɛ rasuxu a yi.
\q
\v 3 Na xa fe ra, Marigi Alatala naxɛ,
\q «N ɲaxankatɛ dɔxɔma nɛ na mixi mɔɔli ma,
\q wo mu nɔma wo ratangade naxan ma.
\q N fama wo xun gorode na ɲaxankatɛ tɛmui.
\q
\v 4 E wo xa fe ifalama taali daaxi nɛ na lɔxɔɛ,
\q e wo masigi a mayele ki ma,
\q e nu fa a fala,
\q ‹Muxu xa fe bara kana feo.
\q Muxu xa bɔxie bara ba muxu yi ra.
\q A bara e ba muxu yi, a e so muxu yaxuie yi ra.›»
\b
\q
\v 5 Na nan a ra, wo mu mixi yo sɔtɔma Alatala xa ɲama ya ma,
\q naxan nɔma bɔxi itaxunde wo bɛ Ala xa tɔnxumae saabui ra.
\q
\v 6 E xa namiɲɔnmɛe a falama,
\q «Ba yi masenyi mɔɔli tife,
\q namiɲɔnmɛ mu lanma a xa na fala.
\q Won mu fama lude yaagi yo kui.
\q
\v 7 Yaxuba bɔnsɔɛ, a lanma a xa fala,
\q Alatala xɔnɔma a bɔɲɛ ma?
\q A darixi na wali mɔɔli raba ra?»
\b
\q Alatala naxa e yaabi,
\q «N ma masenyie mu fanxi xɛ tinxintɔɛe bɛ?
\q
\v 8 Yi waxati n ma ɲama bara lu alɔ n yaxui.
\q Wo donma fanyi bama dangi mixie ma,
\q naxee fafe bɔɲɛsa kui kelife gere sode.
\q
\v 9 Wo n ma ɲama xa ginɛe kerima e xa banxi fanyie kui,
\q wo e xa die xa xunnakeli bama e yi ra n naxan fi e ma.
\q
\v 10 Wo keli, wo siga,
\q n bara yi bɔxi ba wo yi ra sabatide ra,
\q barima a mu sɛniyɛn, a bara kana kerenyi ra.
\q
\v 11 Xa wule falɛ nun mixi madaxui fa a fala wo bɛ,
\q ‹Wo fama beere nun wɛni sɔtɔde›,
\q na mixi mɔɔli nan nafan wo ma namiɲɔnmɛ ra.»
\b
\q
\v 12 «Yaxuba bɔnsɔɛ, n wo birin malanma nɛ.
\q Isirayila mixi dɔnxɔɛe, n wo xun lanma nɛ.
\q N wo malanma nɛ, alɔ yɛxɛɛe naxee malanma gɔɔrɛ kui,
\q alɔ xurusee naxee na fiili ma e dɛ madonde.
\q Ɲama gbegbe sabatima nɛ naa.
\q
\v 13 E xa mangɛ fama nɛ taa tɛtɛ ibɔɔde,
\q a fa ti ɲama ya ra,
\q a e birin naminima nɛ naa.
\q Alatala nan findi e xunyi ra.»
\c 3
\s Isirayila yareratie xa yunubie
\q
\v 1 N naxɛ, «Yaxuba bɔnsɔɛ mangɛe,
\q Isirayila yareratie, wo xa wo tuli mati.
\q Wo tan xa mu daxa wo xa sɛriyɛ kolon?
\q
\v 2 Kɔnɔ wo fe fanyie xɔnma, fe ɲaaxie nan nafan wo ma.
\q Wo mixie tɔɔrɔma han,
\q a luxi nɛ alɔ wo e xa kiri nun sube bama e fatee ma,
\q
\v 3 wo na ibolon a xuntunyie ra,
\q wo a ɲin tunde kui, wo fa a don.»
\b
\q
\v 4 Na mixi mɔɔli fama nɛ Alatala xilide,
\q kɔnɔ a mu e yaabima.
\q Na lɔxɔɛ a a kobe soma nɛ e ra,
\q barima e ɲɛrɛ ki mu fan.
\q
\v 5 Alatala xa masenyi nan ya,
\q «Wo tan namiɲɔnmɛ naxee n ma ɲama ratantanma,
\q naxee bɔɲɛsa masenma mixie bɛ naxee wo kima,
\q kɔnɔ wo mixie tan gere naxee wo kuma.
\q
\v 6 Na xa fe ra, kɔɛ soma nɛ wo xun,
\q wo mu toe tima, wo mu laamatunyie sɔtɔma, wo luma dimi nan kui tun.
\q Soge dulama nɛ na namiɲɔnmɛe xun,
\q yanyi fan ifɔɔrɔ e bɛ.
\q
\v 7 Se matoe yaagima nɛ, naxee yare toma, e xun sinma nɛ,
\q e e yatagi nɔxun,
\q barima n tan Ala mu e yaabima.»
\b
\q
\v 8 Kɔnɔ Ala Xaxili Sɛniyɛnxi bara sɛnbɛ fi n ma,
\q tinxinyi nun limaniya bara lu n yi ra,
\q alako n xa Yaxuba bɔnsɔɛe rakolon e xa murutɛ ra,
\q n xa Isirayila xa yunubie masen a bɛ.
\q
\v 9 Wo tan Yaxuba bɔnsɔɛe yareratie,
\q wo tan Isirayila ɲama xa mangɛe,
\q wo xa wo tuli mati n na.
\q Wo na tinxinyi xɔnfe,
\q wo a mafindi.
\q
\v 10 Wo na mixie nii bafe Siyoni tife ra,
\q wo na Darisalamu tife tinxintareya kui.
\q
\v 11 E xa mangɛe kiiti sama kɔbiri sɔtɔfe nan ma.
\q E xa sɛrɛxɛdubɛe xaranyi tima naafuli xa fe nan na.
\q E xa namiɲɔnmɛe masenyie tima e xa geeni nan ma.
\q Kɔnɔ e birin e ya tima Alatala ra,
\q e nu a fala mixie bɛ,
\q «Alatala mu na xɛ won ya ma?
\q Ɲaxankatɛ yo mu won lima.»
\q
\v 12 Wo xa fe nan yati a niyama Siyoni fama buxade alɔ xɛ,
\q Darisalamu findima nɛ gɛmɛ malanxie ra,
\q fɔtɔnyi fa bula hɔrɔmɔbanxi rabilinyi ma.
\c 4
\s Alatala xa xunnakeli
\q
\v 1 Tɛmui fama a lide,
\q Alatala xa banxi tixi geya naxan fari,
\q na fama nɛ tide geya birin xun ma.
\q A itema nɛ tentenyi birin bɛ,
\q ɲamae luma nɛ siga ra mɛnni.
\q
\v 2 Si gbegbe e xun tima nɛ naa ra, e a fala,
\q «Won xa siga Alatala xa geya fari,
\q Yaxuba Marigi Ala xa banxi.
\q A won xaranma nɛ a xa sɛriyɛ ra,
\q alako won xa won ɲɛrɛ a xa kira xɔn ma.»
\b
\q Sɛriyɛ fatanma Siyoni nan na,
\q Alatala xa masenyi kelima Darisalamu nan kui.
\q
\v 3 A findima nɛ kiitisa ra si gbegbe tagi,
\q a fa si sɛnbɛmae xa gere raɲɔnde duniɲa birin kui.
\q E e xa santidɛgɛmae xabuma sari xa kerie nan na,
\q e e xa wɔrɔtɛe yailan tanbɛe ra.
\q Si yo mu a xa santidɛgɛma itema si gbɛtɛ xili ma sɔnɔn.
\q Na waxati, mixie mu gere mɔɔli yo matinkanma.
\q
\v 4 E tima e xa wɛni sansi nan sɛɛti ma,
\q e dɔxɔ e xa xɔrɛ bili niini bun ma.
\q Mixi yo mu fama e bɔɲɛ raminide,
\q barima Alatala Sɛnbɛma bara wɔyɛn.
\q
\v 5 Si birin nɔma ɲɛrɛde e xa alae waxɔn ki nɛ,
\q kɔnɔ won tan won ɲɛrɛma Alatala nan waxɔn ki abadan.
\b
\q
\v 6 Alatala naxa a masen,
\q «Lɔxɔɛ nde fama, n lanyurutɔɛe malanma nɛ.
\q N mixie xunlanma nɛ, n naxee rayensenxi tɔɔrɛ kui.
\q
\v 7 N lanyurutɔɛe findima nɛ mixi kisixi dɔnxɔɛe ra,
\q n mixi rayensenxie findima nɛ si sɛnbɛma ra.
\q Alatala nan tima e xun ma Siyoni geya fari abadan.
\q
\v 8 I tan Siyoni, naxan a ɲɔxɔ sama ɲama xɔn ma,
\q naxan findixi taa makanta xi ra,
\q nɔɛ fisamante gbilenma i tan nan ma,
\q mangɛya fa lu Darisalamu yi ra.»
\b
\q
\v 9 Wo fa gbelegbelema munfe ra?
\q Mangɛ mu na wo xɔnyi sɔnɔn?
\q Wo rasima bara faxa?
\q Na bara a niya wo xa tɔɔrɔ alɔ ginɛ naxan na ditinyi ra?
\q
\v 10 Siyonikae, wo furie xa wo matolin alɔ furi ginɛ,
\q barima e wo raminima nɛ taa kui, wo fa xi burunyi.
\q E wo xaninma Babilɔn konyiya kui,
\q kɔnɔ mɛnni wo fama nɛ fulunde.
\q Alatala wo bama nɛ wo yaxuie bɛlɛxɛ i.
\b
\q
\v 11 Kɔnɔ yakɔsi si gbegbe tixi wo xili ma,
\q a falafe ra, «Siyoni xa yaagi won ya xɔri!»
\q
\v 12 Nee mu Alatala xa maɲɔxunyi kolonxi, e mu a xa wali fahaamuxi.
\q Alatala bara e malan lonyi ma maale bɔnbɔma dɛnnaxɛ.
\q
\v 13 Siyonikae, wo keli wo xa e bɔnbɔ.
\q N wo sɛnbɛ gboma nɛ alɔ tuura,
\q naxan ferie yailanxi wure ra, naxan tore findixi wure gbeeli ra.
\q Na kui wo ɲamanɛ wuyaxi butuxunma nɛ,
\q wo e xa naafuli findima n tan Duniɲa Marigi Alatala nan gbe ra.
\c 5
\b
\q
\v 1 Yakɔsi wo xa wo fatee mabɔɔ sunnunyi ma,
\q barima e na won ma taa suxufe,
\q e na Isirayila ɲama xa mangɛ bɔnbɔfe a yatagi ma wuri ra.
\s Isirayila Nakisima
\q
\v 2 «I tan, Bɛtɛlɛɛmu Efarata, naxan xurun Yuda xabilɛe ya ma,
\q mixi nde minima nɛ i ya ma naxan Isirayila yamarima n bɛ.
\q A xa fe fɔlɔxi tɛmui dangixi nɛ naxan makuya pon.»
\b
\q
\v 3 Na na a toma, Alatala Isirayila raboloma,
\q han furi ginɛ fa a xa di baride.
\q Na tɛmui, na di ngaxakerenyie dɔnxɔɛe fama nɛ gbilende Isirayila.
\q
\v 4 A kelima nɛ, a ti a xa xurusee ya ra,
\q a e dɛ madon a Marigi Alatala Xili Xungbe Kanyi sɛnbɛ ra.
\q E sabatima nɛ a fanyi ra,
\q barima a xa xunnakeli duniɲa birin lima nɛ.
\q
\v 5 A tan nan findima won ma bɔɲɛsa ra.
\q Asiriyakae na fa won ma bɔxi ma,
\q e so won ma yire makantaxie kui,
\q won kantama solofere nun mangɛ solomasaxan nan kelima e xili ma.
\q
\v 6 E Asiriya bɔxi yamarima nɛ santidɛgɛma ra,
\q e dɔxɔ Nimirodi xa bɔxi xun ma tanbɛ ra.
\q Won ma mangɛ won bama nɛ Asiriyakae yi ra,
\q e na tugan won ma naaninyi xun ma, e so won ma bɔxi kui.
\b
\q
\v 7 Yaxuba bɔnsɔɛ dɔnxɔɛe luma nɛ duniɲa sie ya ma,
\q alɔ xini naxan kelima Alatala ma,
\q alɔ tunɛ ye naxan dɔxɔma burɛxɛ ra.
\q E mu e xaxili tima ibunadama ra,
\q e mu e yɛtɛ taxuma mixi yo ra.
\q
\v 8 Yaxuba bɔnsɔɛ dɔnxɔɛe luma nɛ duniɲa si gbegbe ya ma,
\q alɔ yɛtɛ naxan tima wulai subee tagi,
\q alɔ yɛtɛ yɔrɛ naxan ɲɛrɛma xurusee ya ma,
\q a fa dutun ndee ma, a e ibɔɔ, mixi yo mu nɔma e bade a yi ra.
\q
\v 9 I xun nakelima nɛ i yaxuie ya i, e birin sɔntɔ.
\b
\q
\v 10 Alatala naxa a masen,
\q «Lɔxɔ nde fama a lide,
\q n wo xa soee nun wo xa sɔɔri ragisee xa fe kanama nɛ.
\q
\v 11 N wo xa bɔxi xa taae kanama nɛ,
\q n wo xa yire makantaxie rabira.
\q
\v 12 N wo xa duureya kanama nɛ,
\q n wo xa se matoe rayensen yɛ.
\q
\v 13 N wo xa kuyee nun wo xa gɛmɛ masolixi birin kanama nɛ.
\q Na tɛmui, wo mu suyidima se yailanxie bɛ sɔnɔn.
\q
\v 14 N wo xa Aseri wuri masolixie talama nɛ wo tagi,
\q n wo xa taae kanama nɛ,
\q
\v 15 n n gbeɲɔxɔma xɔnɛ nan kui, sie ma
\q naxee mu tin n xui suxude.»
\c 6
\s Alatala xa kalamui
\q
\v 1 Wo wo tuli mati Alatala xa masenyi ra:
\q «Keli, wo xa wo xa kalamui ti geyae ya xɔri,
\q duniɲa birin xa i xui mɛ.
\q
\v 2 Geya naxee na duniɲa ma kabi a fɔlɛ,
\q wo xa n tan Alatala xa kalamui mɛ,
\q n naxan tima n ma ɲama Isirayila xili ma.»
\b
\q
\v 3 «N ma ɲama, n munse rabaxi wo ra?
\q N kote mundun dɔxɔxi wo xun ma?
\q Wo xa n yaabi.
\q
\v 4 N wo raminixi nɛ Misira bɔxi ra,
\q n wo xun sara konyiya kui.
\q N naxa Munsa, Haruna, nun Mariyama xɛɛ wo raminide.
\q
\v 5 N ma ɲama, wo xa wo ratu a ma,
\q Mowaba mangɛ Balaki nu wama naxan nabafe wo ra,
\q a nun Beyori xa di Balami xa yaabi.
\q Wo xa wo ratu wo xa biyaasi ma kelife Sitimi han Giligali,
\q Alatala xa fe tinxinxie a naxee rabaxi wo bɛ.»
\b
\q
\v 6 N fama munse ra Alatala bɛ n xa Mangɛ Ala batu?
\q A lanma n xa fa sɛrɛxɛ nan na a bɛ,
\q sɛrɛxɛ gan daaxi alɔ ninge naxee bara ɲɛ keren sɔtɔ?
\q
\v 7 Alatala wama yɛxɛɛ kontonyi gali nan xɔn ma,
\q xa na mu a ra, ture gbegbe naxan mu ɲɔnma?
\q A lanma n xa n ma di singe ba sɛrɛxɛ ra n ma yunubi sare ra?
\q N di naxan sɔtɔ, na nɔma findide na xafari se ra?
\q
\v 8 Ala bara adamadi rakolon fe ra naxan fan,
\q a wama i xa naxan naba?
\q A wama nɛ i xa tinxin, dugutɛgɛya xa rafan i ma,
\q i man xa bira Alatala fɔxɔ ra yɛtɛ magore kui.
\b
\q
\v 9 Alatala na taakae xilife.
\q Xaxilima fama na tode, a fa gaaxu Ala ya ra.
\q «Wo wo tuli mati a xa kiiti ra,
\q wo naxa wo kobe so na kiitisa ra.
\q
\v 10 Naafuli na wo xɔnyi wo naxan sɔtɔ tinxintareya kui?
\q Maniya se kamalitaree na wo xɔnyi n naxee xɔnxi?
\q
\v 11 N nɔma diɲɛde maniya se tinxintaree kanyi ma?
\q
\v 12 Taa bannae findixi fe kobi rabae nan na,
\q taakae wule nan tun falama, e mixie madaxu.»
\b
\q
\v 13 «Na kui n bara wo tɔɔrɔ fɔlɔ,
\q n xa wo halaki wo xa yunubie xa fe ra.
\q
\v 14 Wo wo dɛgema nɛ, kɔnɔ wo mu fama lugade,
\q wo donse ragatama nɛ, kɔnɔ a mu luma naa.
\q Na bama nɛ wo yi ra santidɛgɛma ra.
\q
\v 15 Wo xɛ sama nɛ, kɔnɔ wo mu a xabama,
\q wo oliwi bogi bunduma nɛ, kɔnɔ wo mu a ture donma,
\q wo wɛni bogi dunduma nɛ, kɔnɔ wo mu a minma.
\q
\v 16 Wo bira nɛ Omiri xa yaamarie fɔxɔ ra,
\q wo Akabu xa naamunyie findi wo gbe ra.
\q N wo sɔntɔma na nan ma,
\q n wo xa ɲama findima nɛ mayele se ra duniɲa ya xɔri,
\q n wo luma nɛ yaagi kui sie tagi.»
\c 7
\s Ala xa ɲaxankatɛ nun a xa kisi
\q
\v 1 N na tɔɔrɔfe yi ki!
\q N luxi nɛ alɔ mixi naxan sigama sansi bogi bade a ba tɛmui,
\q kɔnɔ a mu wɛni bogi toma naa,
\q a mu xɔrɛ fanyi lima wuri kɔn na alɔ a wama a xɔn ma ki naxɛ.
\q
\v 2 Ala xanuntenyie bara ɲɔn bɔxi ma,
\q tinxintɔɛ keren mu luma naa.
\q E birin na e boore tɔɔrɔfe a ɲaaxi ra,
\q kankan gantanyi tema a ngaxakerenyi bɛ.
\q
\v 3 E birin fata fe ɲaaxi rabade.
\q Mangɛe, nee wama buɲa tinxintare xɔn ma.
\q Kiitisae, nee kiiti sama kɔbiri nan tun ma fe ra.
\q Kuntigie, nee fan e xa wasabaliya masenma.
\q E birin na fe keren nɛ.
\q
\v 4 Naxan na fisamante ra wo ya ma,
\q na tan luma nɛ alɔ tunbe xɔnɛ.
\b
\q Ala xa kiiti lɔxɔɛ bara a li,
\q alɔ ɲama makantɛ a fala ki naxɛ.
\q Ɲama bɔɲɛ mini tɛmui bara fa.
\q
\v 5 Wo naxa la wo dɛ fan boore ra,
\q wo naxa la wo xanuntenyi ra,
\q hali wo xa ginɛ naxan a sama wo fɛ ma,
\q wo naxa wo xa gundo birin masen a bɛ.
\q
\v 6 Na waxati di xɛmɛ a baba maberema nɛ,
\q di ginɛ ti a nga kanke i,
\q mamadi nun a xa mɔri nga kɔnɲɛma nɛ.
\q Kankan yaxui findima a bari boore yati nan na.
\q
\v 7 Kɔnɔ n tan, n ya tima Alatala nan na,
\q n na n xaxili tima n nakisima Ala nan na,
\q barima n Marigi n xui suxuma nɛ.
\b
\q
\v 8 I tan Isirayila yaxui,
\q i naxa ɲɛlɛxin n ma tɔɔrɛ ra.
\q Hali n bira nɛ, n man kelima nɛ.
\q Hali n lu nɛ dimi xɔɔra, Alatala nan na n ma yanbɛ ra.
\q
\v 9 N to yunubi raba Alatala ra,
\q n fama nɛ a xa xɔnɛ sɔtɔde han a kamali,
\q a fa n xun mafalade, a a xa tinxinyi masen n bɛ.
\q
\v 10 N yaxuie na na to, e yaagima nɛ.
\q Singe e nu a falama, «I Marigi Alatala na minden?»
\q Kɔnɔ na tɛmui n tan nan e xa birɛ toma,
\q e maboron sanyi ra alɔ boora naxan na kira ra.
\b
\q
\v 11 I tan Isirayila, wo xa tɛtɛ rakeli lɔxɔɛ fama nɛ,
\q wo xa naaninyie igboma nɛ.
\q
\v 12 Na lɔxɔɛ mixie fama nɛ wo yire,
\q kelife Asiriya nun Misira taae kui,
\q kelife Misira bɔxi han Efirati xure,
\q kelife baa nde ma a sa dɔxɔ baa gbɛtɛ ra,
\q kelife geya nde ma a sa dɔxɔ geya gbɛtɛ ra.
\q
\v 13 Duniɲa bɔxi fama nɛ kanade mixie xa wali ɲaaxie xa fe ra.
\b
\q
\v 14 Mɛɛni i xa ɲama ma,
\q barima e findixi i kɛ nan na,
\q naxee sabatixi e kerenyi ma fɔtɔnyi kui fiili fanyi sɛɛti ma.
\q E xa e dɛ madon a fanyi ra,
\q alɔ e nu a rabaxi Basan nun Galadi bɔxi ma tɛmui dangixi ki naxɛ.
\q
\v 15 N kaabanakoe masenma nɛ e bɛ,
\q alɔ e mini Misira bɔxi ra lɔxɔɛ naxɛ.
\q
\v 16 Sie na wo sɛnbɛ to, e yaagima nɛ e xa sɛnbɛtareya kui.
\q
\v 17 E xube donma nɛ alɔ bɔximase,
\q e luma gaaxui nan kui won Marigi Alatala ya ra, e fa sɛrɛn.
\q
\v 18 Ala mundun na naxan maniya i ra,
\q naxan yunubi xafarima,
\q naxan diɲɛma a xa kɛ tongomae dɔnxɔɛe ma?
\q I mu xɔnɛ ragatama abadan,
\q barima dugutɛgɛya masenfe muxu bɛ a rafan i ma.
\q
\v 19 I man kinikinima nɛ muxu ma,
\q i fama nɛ muxu xa yunubie lude naa,
\q i fa e woli baa bɔtini ma.
\q
\v 20 I i xui rakamalima nɛ Yaxuba bɔnsɔɛ bɛ,
\q i hinnɛma nɛ Iburahima bɔnsɔɛ ra,
\q alɔ i i kali a ra muxu benbae bɛ ki naxɛ tɛmui dangixi.