\id JON 
\ide UTF-8
\h Annabi Yunusa
\toc1 Annabi Yunusa xa taruxui
\toc2 Annabi Yunusa
\toc3 Yun
\mt Annabi Yunusa xa taruxui
\imt Masenyi nde yi Kitaabui xa fe ra
\ip Annabi Yunusa xa taruxui findixi masenyi belebele nan na ibunadama bɛ. Alatala bara si wuyaxi daa, a e rasabati yire keren duniɲa ma. E to findi a xa daalisee ra, a wama nɛ e xa fe birin xa sɔɔnɛya, e xa lu bɔɲɛsa kui, e man xa a xa nɔndi kolon. Ala mu tinma si yo xa fisa boore bɛ. E birin lan a ya i.
\ip Kɔnɔ adamadie luma tantan na mɛnni nɛ, e fa a maɲɔxun e fisa e boore bɛ, e man Ala kolon dangife booree ra. Na yɛtɛ igboɲa findixi fe ɲaaxi nan na Ala mabiri. A wama nɛ a xa xibaarui xa yensen duniɲa birin ma, kɔnɔ ndee mu tinma na ra. Annabi Yunusa findixi na misaali nan na.
\ip Alatala to Annabi Yunusa xɛɛ Asiriya bɔxi ma a xa nɔndi kawandi e bɛ, Annabi Yunusa mu tin na rabade xɔnnanteya xa fe ra. Asiriyakae nu findixi Isirayilakae yaxuie nan na. Na nan a toxi, Annabi Yunusa naxa natɛ tongo a xa a gi, alako a naxa Ala xa xɛɛraya raba. Tondife Ala waxɔnfe ra, na findi nɛ fe xɔrɔxɔɛ ra Annabi Yunusa bɛ, a fa a kolon a nu lan nɛ a xa bira Ala xa yaamari nan fɔxɔ ra.
\ip Annabi Yunusa to na raba, kaabanakoe belebele naxa raba. Asiriya ɲama naxa fa bora Alatala fɔxɔ ra, e fa a batu. Annabi Yunusa fan naxa a kolon a bɔɲɛ kui a Ala xa xanunteya gbo si birin bɛ. E rafan a ma, a man wama e rakisife e xa yunubie ma.
\ip A lanma won tan fan xa na masenyi hagigɛ fahaamu, a xa so won sondonyi kui. Xɔnnanteya gbo sie tagi to lɔxɔɛ. Na mu findima fe fanyi ra ibunadama bɛ. Ala mu wama na xɔn, barima a kolon na gere nan tun naminima naxan findima tɔɔrɛ xungbe ra. Xanunteya nan fan. Won si birin lan Alatala ya i. Won birin xa won xinbi sin a bun ma. Ala xa a niya won xa kafu won boore ma xanunteya kui. Amina.
\imte Annabi Yunusa xa taruxui
\c 1
\s Annabi Yunusa a gife Ala xa xɛɛraya ma
\p
\v 1 Alatala naxa a masen Amitayi xa di Yunusa bɛ, 
\v 2 «Keli, i siga taa xungbe naxan xili Ninewe, i xa n ma natɛ xɔrɔxɔɛ masen e bɛ naxan fatanxi e xa fe ɲaaxie ra n naxee toxi n na dɛnnaxɛ.» 
\v 3 Kɔnɔ Annabi Yunusa to wa a gife Ala xa xɛɛraya ma, a naxa natɛ tongo a xa siga Tarasisi. A naxa goro Yafa wafu ra, a kunkui to naxan nu sigafe Tarasisi. A naxa kunkui masundi fi, a baki kunkui kui mixie xun ma sigafe ra Tarasisi, alako a xa a makuya Alatala ra.
\p
\v 4 Na kui Alatala naxa foye xungbe ramini baa ma, a findi turunnaadɛ ra, a kunkui imaxa han a wa a kanafe. 
\v 5 Kunkuimae naxa gaaxu, kankan naxa a dɛ rawa a xa ala bɛ. E naxa nde ba kunkui xa kote ra, e a woli baa ma alako nde xa ba a binyɛ ra. Yunusa naxa goro kunkui bɔtini ma, a a sa mɛnni, a xi paxi. 
\v 6 Kunkui kɛpini naxa siga a yire, a a fala a bɛ, «I tan na xife nɛ? Keli, i xa i xa ala maxandi. Tɛmunde a nɔma nɛ kinikinide won ma, a won natanga yi gbaloe ma.»
\p
\v 7 Kunkuimae naxa a fala e booree bɛ, «Won xa kanda bun alako won xa a kolon, naxan yi gbaloe bɛndunxi won ma.» E to na raba, a naxa ilan Yunusa ra. 
\v 8 E naxa a maxɔrin, «Nde yi gbaloe bɛndunxi muxu ma? I munse wali rabama? I kelixi minden? Si mundun na i ra?» 
\v 9 Annabi Yunusa naxa e yaabi, «Eburu nan n na. N Alatala nan batuma, Ala naxan na koore ma, naxan baa nun bɔxi daa.» 
\v 10 Na kui kunkuimae naxa gaaxu ki fanyi ra, e a fala a bɛ, «I yi rabaxi munfe ra?» A naxa a fala e bɛ a nu a gife Alatala nan ma.
\p
\v 11 Baa xa xaaɲɛ to nu gboma nan tun, e naxa a maxɔrin, «Muxu xa munse raba i ra, alako baa xa a raxara muxu bɛ?» 
\v 12 Annabi Yunusa naxa e yaabi, «N a kolon a yi turunnaadɛ xungbe xun tixi wo ra n tan nan ma fe ra. Wo xa n woli baa ma. Na kui a raxarama nɛ.»
\p
\v 13 Kunkuimae naxa kata laala bade e xa xare masɔtɔ, kɔnɔ na mu sɔɔnɛya. Baa nu sigama xaaɲɛ ra nan tun e xili ma. 
\v 14 Na tɛmui e naxa Alatala maxandi, «Alatala, muxu bara i maxandi i xa muxu ratanga yi xɛmɛ xa faxɛ ma. Mixi fanyi nii bafe kote naxa dɔxɔ muxu xun ma, barima i tan Alatala na i waxɔnfe nan tun nabafe yi ki.» 
\v 15 Na fala xanbi, e naxa Yunusa tongo fa, e a woli baa ma. Baa xa xaaɲɛ naxa dan. 
\v 16 Na fe naxa na mixie ragaaxu Alatala ya ra ki fanyi ra. E naxa sɛrɛxɛ ba Alatala bɛ, e kɛrɛ tongo a bɛ.
\s Annabi Yunusa xa Ala maxandi
\p
\v 17 Alatala naxa yɛxɛ xungbe nde yamari baa ma a xa Yunusa gerun. Yunusa naxa lu yɛxɛ furi kui fɛɛɲɛn saxan, kɔɛ saxan. 
\c 2
\p
\v 1 A naxa a Marigi Alatala maxandi yɛxɛ furi kui yi ki:
\q
\v 2 «Alatala, n to n xui rate i ma n ma bɔɲɛ mini kui,
\q i bara n yaabi.
\q N to i xili kelife aligiyama,
\q i bara n xui mɛ.
\q
\v 3 I to n woli baa bɔtini ma,
\q ye bara n makoto, i nu fa i xa mɔrɔnyie radin n ma.
\q
\v 4 N naxa a maɲɔxun i bara n keri,
\q kɔnɔ n a kolon n man fama nɛ i xa banxi sɛniyɛnxi tode.
\q
\v 5 N naxa madula ye xɔɔra, baa naxa nɔ n na.
\q Baa ɲooge naxa filin filin n kɔnyi ma.
\q
\v 6 N goro nɛ baa bɔtini ma han geyae fɔlɔde.
\q N nu na geeli aligiyama,
\q kɔnɔ i tan Marigi Alatala, i naxa n namini na yili tilinxi kui n ɲiɲɛ ra.
\b
\q
\v 7 N nii to nu na bafe n fate i,
\q n naxa n maɲɔxun Alatala ma.
\q N ma maxandi naxa siga han a sa i li,
\q i xa hɔrɔmɔbanxi sɛniyɛnxi.
\b
\q
\v 8 Mixi naxee e nii taxu kuye sɛnbɛtare ra,
\q nee e yɛtɛ raganma hinnɛ fanyi nan na.
\q
\v 9 Kɔnɔ n tan tantui bɛɛti nan bama i bɛ sɛrɛxɛ ra,
\q n na n ma kɛrɛ tongoxi rakamalima nɛ.
\q Kisi fatanxi Alatala nan na.»
\p
\v 10 Na dangi xanbi, Alatala naxa yɛxɛ yamari, a xa sa Annabi Yunusa bɔxun xare ma.
\c 3
\s Annabi Yunusa Alatala xui rabatufe
\p
\v 1 Alatala naxa gbilen masenyi ti ra Yunusa bɛ, a naxɛ, 
\v 2 «Keli, i siga yi taa xungbe naxan xili Ninewe. I xa sa n ma xɛɛra iba e bɛ, n i tixi naxan na.» 
\v 3 Annabi Yunusa naxa keli a siga Ninewe, alɔ Alatala a masen a bɛ ki naxɛ. Taa nan nu Ninewe ra naxan xungbo ki fanyi ra xi saxan ɲɛrɛ rabama dɛnnaxɛ.
\p
\v 4 Annabi Yunusa to fɛɛɲɛn keren ɲɛrɛ raba taa kui, a naxa yi masenyi ti fɔlɔ, «Xi tongo naani nan luxi, Ninewe taa xa kana.» 
\v 5 Ninewekae naxa la Ala ra, e birin fa sunyi suxu, e sunnunyi dugi ragoro e ma tuubi fe ra, keli bannae ma han misikiinɛe. 
\v 6 Yi xibaarui to Ninewe mangɛ li, a fan naxa keli a xa kibanyi kui, a a xa mangɛ donma rate a ma, a a sunnun dugi ragoro a ma, a fa sa dɔxɔ tɛ xube xɔɔra tuubi fe ra.
\p
\v 7 Na kui a naxa yi masenyi ti Ninewe bɛ, «Mangɛ nun a xa kuntigie xili ra, sunyi bara maxandi mixie nun xurusee birin ma. 
\v 8 Mixie nun xurusee birin xa sunnun dugi ragoro e ma, e xa Alatala xili sɛnbɛ ra, birin xa gbilen a xa kira ɲaaxi nun e xa kobiɲa fɔxɔ ra. 
\v 9 Nde a kolon xa Ala mu a xa natɛ tongoxi masarama, a won natanga a xa xɔnɛ gbe ma, a fa won nakisi faxɛ ma?»
\p
\v 10 Ala to a to Ninewekae bara tuubi, e bara e kobe so e xa kira ɲaaxi ra, a naxa kinikini e ma, a mu gbaloe ragoro e ma sɔnɔn, alɔ a nu bara a ɲanige ki naxɛ.
\c 4
\s Annabi Yunusa xɔnɔfe
\p
\v 1 Na fe mu nu rafanxi Annabi Yunusa ma fefe ma, a fa xɔnɔ. 
\v 2 A naxa a fala Alatala bɛ, «Alatala, n mu nu yi fe xa falama n to nu na n xɔnyi tɛmui naxɛ? N na n gi yi nan ma sigafe ra Tarasisi, barima n nu a kolon Ala nan i ra, naxan hinnɛ nun kinikini masenma mixie bɛ, naxan mu xɔnɔma mafuren, naxan xa xanunteya gbo, naxan gbilenma a xa natɛ tongoxi fɔxɔ ra, a gbaloe lu na a nu wama naxan nabafe. 
\v 3 Yakɔsi Alatala, n nii tongo, barima n faxaxi nan fisa n baloxi bɛ.» 
\v 4 Alatala naxa a maxɔrin, «A lanma i xa xɔnɔ yi fe ma yi ki nɛ?»
\p
\v 5 Annabi Yunusa naxa mini taa fari ma, a sa dɔxɔ taa sogetede mabiri leele bun ma, a naxan yailan a yɛtɛ bɛ. A nu wama a tofe nɛ fe naxan fama rabade Ninewe ra.
\p
\v 6 Alatala naxa wuri bili nde rabula a a ti Yunusa xun ma, alako a niini xa ti a xun, a naxa soge xa xɔnɛ kolon. Yunusa naxa ɲɛlɛxin ki fanyi ra na wuri bili niini xa fe ra. 
\v 7 Kɔnɔ na lɔxɔɛ kuye iba, Ala naxa a niya kuli nde xa sa na wuri bili don, a xa xara. 
\v 8 Soge to mini, Ala naxa foye fure ramini kelife sogetede, a soge xɔrɔxɔɛ ti Yunusa ma. Na naxa a niya Yunusa ya naxa ifɔɔrɔ, a fa wa faxafe. A naxa Ala maxandi, «N faxaxi fisa n baloxi bɛ to.»
\p
\v 9 Ala naxa Annabi Yunusa maxɔrin, «A lanma i xa xɔnɔ yi wuri bili xa fe ma yi ki?» Yunusa naxa a yaabi, «Iyo. N xɔnɔxi han n ɲan wama nɛ n xa faxa!» 
\v 10 Alatala naxa a masen a bɛ, «I tan mɛɛnixi yi wuri bili nan ma, i mu naxan sixi, i mu naxan namɔxi. A bulaxi kɔɛ keren nan na, na kuye iba, a man naxa faxa. 
\v 11 A mu lanma xɛ n tan xa kinikini Ninewe ma, yi taa xungbe, mixi wulu kɛmɛ mɔxɔɲɛn nun a xanbi na dɛnnaxɛ, naxee mu fe fanyi nun fe ɲaaxi tagi raba kolon, xurusee gbegbe fan na dɛnnaxɛ?»