\id JON 
\ide UTF-8
\h عَننَبِ يُنُسَ
\toc1 عَننَبِ يُنُسَ شَ تَرُشُي
\toc2 عَننَبِ يُنُسَ
\toc3 يُن
\mt عَننَبِ يُنُسَ شَ تَرُشُي
\imt مَسٍنيِ ندٍ يِ كِتَابُي شَ قٍ رَ
\ip عَننَبِ يُنُسَ شَ تَرُشُي قِندِشِ مَسٍنيِ بٍلٍبٍلٍ نَن نَ عِبُنَدَ مَ بّ. عَلَتَلَ بَرَ سِ وُيَشِ دَا، عَ عٍ رَ سَبَتِ يِرٍ كٍرٍن دُنِحَ مَ. عٍ تٌ قِندِ عَ شَ دَالِسٍيٍ رَ، عَ وَ مَ نّ عٍ شَ قٍ بِرِن شَ سْونّيَ، عٍ شَ لُ بْحّسَ كُي، عٍ مَن شَ عَ شَ نْندِ كٌلٌن. عَلَ مُ تِنمَ سِ يٌ شَ قِسَ بٌورٍ بّ. عٍ بِرِن لَن عَ يَ عِ.
\ip كْنْ عَدَ مَدِيٍ لُمَ تَنتَن نَ مّننِ نّ، عٍ قَ عَ مَحْشُن عٍ قِسَ عٍ بٌورٍ بّ، عٍ مَن عَلَ كٌلٌن دَنفِقٍ بٌورٍيٍ رَ. نَ يّتّ عِفبٌحَ قِندِشِ قٍ حَاشِ نَن نَ عَلَ مَبِرِ. عَ وَ مَ نّ عَ شَ شِبَارُي شَ يٍنسٍن دُنِحَ بِرِن مَ، كْنْ ندٍيٍ مُ تِنمَ نَ رَ. عَننَبِ يُنُسَ قِندِشِ نَ مِسَالِ نَن نَ.
\ip عَلَتَلَ تٌ عَننَبِ يُنُسَ شّي عَسِرِيَ بْشِ مَ عَ شَ نْندِ كَوَندِ عٍ بّ، عَننَبِ يُنُسَ مُ تِن نَ رَبَدٍ شْننَنتٍيَ شَ قٍ رَ. عَسِرِيَكَيٍ نُ قِندِشِ عِسِرَيِلَكَيٍ يَشُييٍ نَن نَ. نَ نَن عَ تٌشِ، عَننَبِ يُنُسَ نَشَ نَتّ تٌنفٌ عَ شَ عَ فِ، عَلَكٌ عَ نَشَ عَلَ شَ شّيرَيَ رَبَ. تٌندِقٍ عَلَ وَشْنقٍ رَ، نَ قِندِ نّ قٍ شْرْشْي رَ عَننَبِ يُنُسَ بّ، عَ قَ عَ كٌلٌن عَ نُ لَن نّ عَ شَ بِرَ عَلَ شَ يَامَرِ نَن قْشْ رَ.
\ip عَننَبِ يُنُسَ تٌ نَ رَبَ، كَابَنَكٌي بٍلٍبٍلٍ نَشَ رَبَ. عَسِرِيَ حَمَ نَشَ قَ بٌرَ عَلَتَلَ قْشْ رَ، عٍ قَ عَ بَتُ. عَننَبِ يُنُسَ قَن نَشَ عَ كٌلٌن عَ بْحّ كُي عَ عَلَ شَ شَنُنتٍيَ فبٌ سِ بِرِن بّ. عٍ رَقَن عَ مَ، عَ مَن وَ مَ عٍ رَكِسِقٍ عٍ شَ يُنُبِيٍ مَ.
\ip عَ لَنمَ وٌن تَن قَن شَ نَ مَسٍنيِ هَفِفّ قَهَامُ، عَ شَ سٌ وٌن سٌندٌنيِ كُي. شْننَنتٍيَ فبٌ سِيٍ تَفِ تٌ لْشْي. نَ مُ قِندِ مَ قٍ قَنيِ رَ عِبُنَدَ مَ بّ. عَلَ مُ وَ مَ نَ شْن، بَرِ مَ عَ كٌلٌن نَ فٍرٍ نَن تُن نَمِنِمَ نَشَن قِندِ مَ تْورّ شُنفبٍ رَ. شَنُنتٍيَ نَن قَن. وٌن سِ بِرِن لَن عَلَتَلَ يَ عِ. وٌن بِرِن شَ وٌن شِنبِ سِن عَ بُن مَ. عَلَ شَ عَ نِيَ وٌن شَ كَقُ وٌن بٌورٍ مَ شَنُنتٍيَ كُي. عَمِنَ.
\imte عَننَبِ يُنُسَ شَ تَرُشُي
\c 1
\s عَننَبِ يُنُسَ عَ فِقٍ عَلَ شَ شّيرَيَ مَ
\p
\v 1 عَلَتَلَ نَشَ عَ مَسٍن عَمِتَيِ شَ دِ يُنُسَ بّ، 
\v 2 «كٍلِ، عِ سِفَ تَا شُنفبٍ نَشَن شِلِ نِنٍوٍ، عِ شَ ﭑ مَ نَتّ شْرْشْي مَسٍن عٍ بّ نَشَن قَتَنشِ عٍ شَ قٍ حَاشِيٍ رَ ﭑ نَشٍيٍ تٌشِ ﭑ نَ دّننَشّ.» 
\v 3 كْنْ عَننَبِ يُنُسَ تٌ وَ عَ فِقٍ عَلَ شَ شّيرَيَ مَ، عَ نَشَ نَتّ تٌنفٌ عَ شَ سِفَ تَرَ سِسِ. عَ نَشَ فٌرٌ يَقَ وَقُ رَ، عَ كُنكُي تٌ نَشَن نُ سِفَقٍ تَرَ سِسِ. عَ نَشَ كُنكُي مَسُندِ قِ، عَ بَكِ كُنكُي كُي مِشِيٍ شُن مَ سِفَقٍ رَ تَرَ سِسِ، عَلَكٌ عَ شَ عَ مَكُيَ عَلَتَلَ رَ.
\p
\v 4 نَ كُي عَلَتَلَ نَشَ قٌيٍ شُنفبٍ رَ مِنِ بَا مَ، عَ قِندِ تُرُننَادّ رَ، عَ كُنكُي عِمَشَ هَن عَ وَ عَ كَنَقٍ. 
\v 5 كُنكُيمَيٍ نَشَ فَاشُ، كَنكَن نَشَ عَ دّ رَوَ عَ شَ عَلَ بّ. عٍ نَشَ ندٍ بَ كُنكُي شَ كٌتٍ رَ، عٍ عَ وٌلِ بَا مَ عَلَكٌ ندٍ شَ بَ عَ بِنيّ رَ. يُنُسَ نَشَ فٌرٌ كُنكُي بْتِنِ مَ، عَ عَ سَ مّننِ، عَ شِ ثَشِ. 
\v 6 كُنكُي كّثِنِ نَشَ سِفَ عَ يِرٍ، عَ عَ قَلَ عَ بّ، «عِ تَن نَ شِقٍ نّ؟ كٍلِ، عِ شَ عِ شَ عَلَ مَشَندِ. تّمُندٍ عَ نْمَ نّ كِنِكِنِدٍ وٌن مَ، عَ وٌن نَتَنفَ يِ فبَلٌي مَ.»
\p
\v 7 كُنكُيمَيٍ نَشَ عَ قَلَ عٍ بٌورٍيٍ بّ، «وٌن شَ كَندَ بُن عَلَكٌ وٌن شَ عَ كٌلٌن، نَشَن يِ فبَلٌي بّندُنشِ وٌن مَ.» عٍ تٌ نَ رَبَ، عَ نَشَ عِلَن يُنُسَ رَ. 
\v 8 عٍ نَشَ عَ مَشْرِن، «ندٍ يِ فبَلٌي بّندُنشِ مُشُ مَ؟ عِ مُنسٍ وَلِ رَبَمَ؟ عِ كٍلِشِ مِندٍن؟ سِ مُندُن نَ عِ رَ؟» 
\v 9 عَننَبِ يُنُسَ نَشَ عٍ يَابِ، «عٍبُرُ نَن ﭑ نَ. ﭑ عَلَتَلَ نَن بَتُمَ، عَلَ نَشَن نَ كٌورٍ مَ، نَشَن بَا نُن بْشِ دَا.» 
\v 10 نَ كُي كُنكُيمَيٍ نَشَ فَاشُ كِ قَنيِ رَ، عٍ عَ قَلَ عَ بّ، «عِ يِ رَبَشِ مُنقٍ رَ؟» عَ نَشَ عَ قَلَ عٍ بّ عَ نُ عَ فِقٍ عَلَتَلَ نَن مَ.
\p
\v 11 بَا شَ شَاحّ تٌ نُ فبٌمَ نَن تُن، عٍ نَشَ عَ مَشْرِن، «مُشُ شَ مُنسٍ رَبَ عِ رَ، عَلَكٌ بَا شَ عَ رَشَرَ مُشُ بّ؟» 
\v 12 عَننَبِ يُنُسَ نَشَ عٍ يَابِ، «ﭑ عَ كٌلٌن عَ يِ تُرُننَادّ شُنفبٍ شُن تِشِ وٌ رَ ﭑ تَن نَن مَ قٍ رَ. وٌ شَ ﭑ وٌلِ بَا مَ. نَ كُي عَ رَشَرَ مَ نّ.»
\p
\v 13 كُنكُيمَيٍ نَشَ كَتَ لَالَ بَدٍ عٍ شَ شَرٍ مَسْتْ، كْنْ نَ مُ سْونّيَ. بَا نُ سِفَمَ شَاحّ رَ نَن تُن عٍ شِلِ مَ. 
\v 14 نَ تّمُي عٍ نَشَ عَلَتَلَ مَشَندِ، «عَلَتَلَ، مُشُ بَرَ عِ مَشَندِ عِ شَ مُشُ رَتَنفَ يِ شّمّ شَ قَشّ مَ. مِشِ قَنيِ نِي بَقٍ كٌتٍ نَشَ دْشْ مُشُ شُن مَ، بَرِ مَ عِ تَن عَلَتَلَ نَ عِ وَشْنقٍ نَن تُن نَبَقٍ يِ كِ.» 
\v 15 نَ قَلَ شَنبِ، عٍ نَشَ يُنُسَ تٌنفٌ قَ، عٍ عَ وٌلِ بَا مَ. بَا شَ شَاحّ نَشَ دَن. 
\v 16 نَ قٍ نَشَ نَ مِشِيٍ رَفَاشُ عَلَتَلَ يَ رَ كِ قَنيِ رَ. عٍ نَشَ سّرّشّ بَ عَلَتَلَ بّ، عٍ كّرّ تٌنفٌ عَ بّ.
\s عَننَبِ يُنُسَ شَ عَلَ مَشَندِ
\p
\v 17 عَلَتَلَ نَشَ يّشّ شُنفبٍ ندٍ يَمَرِ بَا مَ عَ شَ يُنُسَ فٍرُن. يُنُسَ نَشَ لُ يّشّ قُرِ كُي قّيحّن سَشَن، كْي سَشَن. 
\c 2
\p
\v 1 عَ نَشَ عَ مَرِفِ عَلَتَلَ مَشَندِ يّشّ قُرِ كُي يِ كِ؛
\q
\v 2 «عَلَتَلَ، ﭑ تٌ ﭑ شُي رَتٍ عِ مَ ﭑ مَ بْحّ مِنِ كُي،
\q عِ بَرَ ﭑ يَابِ.
\q ﭑ تٌ عِ شِلِ كٍلِقٍ عَلِفِيَمَ،
\q عِ بَرَ ﭑ شُي مّ.
\q
\v 3 عِ تٌ ﭑ وٌلِ بَا بْتِنِ مَ،
\q يٍ بَرَ ﭑ مَكٌتٌ، عِ نُ قَ عِ شَ مْرْنيِيٍ رَدِن ﭑ مَ.
\q
\v 4 ﭑ نَشَ عَ مَحْشُن عِ بَرَ ﭑ كٍرِ،
\q كْنْ ﭑ عَ كٌلٌن ﭑ مَن قَمَ نّ عِ شَ بَنشِ سّنِيّنشِ تٌدٍ.
\q
\v 5 ﭑ نَشَ مَدُلَ يٍ شْورَ، بَا نَشَ نْ ﭑ نَ.
\q بَا حٌوفٍ نَشَ قِلِن قِلِن ﭑ كْنيِ مَ.
\q
\v 6 ﭑ فٌرٌ نّ بَا بْتِنِ مَ هَن فٍيَيٍ قْلْدٍ.
\q ﭑ نُ نَ فٍيلِ عَلِفِيَمَ،
\q كْنْ عِ تَن مَرِفِ عَلَتَلَ، عِ نَشَ ﭑ نَمِنِ نَ يِلِ تِلِنشِ كُي ﭑ حِحّ رَ.
\b
\q
\v 7 ﭑ نِي تٌ نُ نَ بَقٍ ﭑ قَتٍ عِ،
\q ﭑ نَشَ ﭑ مَحْشُن عَلَتَلَ مَ.
\q ﭑ مَ مَشَندِ نَشَ سِفَ هَن عَ سَ عِ لِ،
\q عِ شَ هْرْ مْبَنشِ سّنِيّنشِ.
\b
\q
\v 8 مِشِ نَشٍيٍ عٍ نِي تَشُ كُيٍ سّنبّتَرٍ رَ،
\q نٍيٍ عٍ يّتّ رَفَنمَ هِننّ قَنيِ نَن نَ.
\q
\v 9 كْنْ ﭑ تَن تَنتُي بّيتِ نَن بَمَ عِ بّ سّرّشّ رَ،
\q ﭑ نَ ﭑ مَ كّرّ تٌنفٌشِ رَكَمَلِمَ نّ.
\q كِسِ قَتَنشِ عَلَتَلَ نَن نَ.»
\p
\v 10 نَ دَنفِ شَنبِ، عَلَتَلَ نَشَ يّشّ يَمَرِ، عَ شَ سَ عَننَبِ يُنُسَ بْشُن شَرٍ مَ.
\c 3
\s عَننَبِ يُنُسَ عَلَتَلَ شُي رَبَتُقٍ
\p
\v 1 عَلَتَلَ نَشَ فبِلٍن مَسٍنيِ تِ رَ يُنُسَ بّ، عَ نَشّ، 
\v 2 «كٍلِ، عِ سِفَ يِ تَا شُنفبٍ نَشَن شِلِ نِنٍوٍ. عِ شَ سَ ﭑ مَ شّيرَ عِبَ عٍ بّ، ﭑ عِ تِشِ نَشَن نَ.» 
\v 3 عَننَبِ يُنُسَ نَشَ كٍلِ عَ سِفَ نِنٍوٍ، عَلْ عَلَتَلَ عَ مَسٍن عَ بّ كِ نَشّ. تَا نَن نُ نِنٍوٍ رَ نَشَن شُنفبٌ كِ قَنيِ رَ شِ سَشَن حّرّ رَبَمَ دّننَشّ.
\p
\v 4 عَننَبِ يُنُسَ تٌ قّيحّن كٍرٍن حّرّ رَبَ تَا كُي، عَ نَشَ يِ مَسٍنيِ تِ قْلْ، «شِ تٌنفٌ نَانِ نَن لُشِ، نِنٍوٍ تَا شَ كَنَ.» 
\v 5 نِنٍوٍكَيٍ نَشَ لَ عَلَ رَ، عٍ بِرِن قَ سُنيِ سُشُ، عٍ سُننُنيِ دُفِ رَفٌرٌ عٍ مَ تُوبِ قٍ رَ، كٍلِ بَننَيٍ مَ هَن مِسِكِينّيٍ. 
\v 6 يِ شِبَارُي تٌ نِنٍوٍ مَنفّ لِ، عَ قَن نَشَ كٍلِ عَ شَ كِبَنيِ كُي، عَ عَ شَ مَنفّ دٌنمَ رَتٍ عَ مَ، عَ عَ سُننُن دُفِ رَفٌرٌ عَ مَ، عَ قَ سَ دْشْ تّ شُبٍ شْورَ تُوبِ قٍ رَ.
\p
\v 7 نَ كُي عَ نَشَ يِ مَسٍنيِ تِ نِنٍوٍ بّ، «مَنفّ نُن عَ شَ كُنتِفِيٍ شِلِ رَ، سُنيِ بَرَ مَشَندِ مِشِيٍ نُن شُرُ سٍيٍ بِرِن مَ. 
\v 8 مِشِيٍ نُن شُرُ سٍيٍ بِرِن شَ سُننُن دُفِ رَفٌرٌ عٍ مَ، عٍ شَ عَلَتَلَ شِلِ سّنبّ رَ، بِرِن شَ فبِلٍن عَ شَ كِرَ حَاشِ نُن عٍ شَ كٌبِحَ قْشْ رَ. 
\v 9 ندٍ عَ كٌلٌن شَ عَلَ مُ عَ شَ نَتّ تٌنفٌشِ مَسَرَ مَ، عَ وٌن نَتَنفَ عَ شَ شْنّ فبٍ مَ، عَ قَ وٌن نَكِسِ قَشّ مَ؟»
\p
\v 10 عَلَ تٌ عَ تٌ نِنٍوٍكَيٍ بَرَ تُوبِ، عٍ بَرَ عٍ كٌبٍ سٌ عٍ شَ كِرَ حَاشِ رَ، عَ نَشَ كِنِكِنِ عٍ مَ، عَ مُ فبَلٌي رَفٌرٌ عٍ مَ سْنْن، عَلْ عَ نُ بَرَ عَ حَنِفٍ كِ نَشّ.
\c 4
\s عَننَبِ يُنُسَ شْنْقٍ
\p
\v 1 نَ قٍ مُ نُ رَقَنشِ عَننَبِ يُنُسَ مَ قٍقٍ مَ، عَ قَ شْنْ. 
\v 2 عَ نَشَ عَ قَلَ عَلَتَلَ بّ، «عَلَتَلَ، ﭑ مُ نُ يِ قٍ شَ قَلَمَ ﭑ تٌ نُ نَ ﭑ شْنيِ تّمُي نَشّ؟ ﭑ نَ ﭑ فِ يِ نَن مَ سِفَقٍ رَ تَرَ سِسِ، بَرِ مَ ﭑ نُ عَ كٌلٌن عَلَ نَن عِ رَ، نَشَن هِننّ نُن كِنِكِنِ مَسٍنمَ مِشِيٍ بّ، نَشَن مُ شْنْمَ مَقُرٍن، نَشَن شَ شَنُنتٍيَ فبٌ، نَشَن فبِلٍنمَ عَ شَ نَتّ تٌنفٌشِ قْشْ رَ، عَ فبَلٌي لُ نَ عَ نُ وَ مَ نَشَن نَبَقٍ. 
\v 3 يَكْسِ عَلَتَلَ، ﭑ نِي تٌنفٌ، بَرِ مَ ﭑ قَشَشِ نَن قِسَ ﭑ بَلٌشِ بّ.» 
\v 4 عَلَتَلَ نَشَ عَ مَشْرِن، «عَ لَنمَ عِ شَ شْنْ يِ قٍ مَ يِ كِ نّ؟»
\p
\v 5 عَننَبِ يُنُسَ نَشَ مِنِ تَا قَرِ مَ، عَ سَ دْشْ تَا سٌفٍتٍدٍ مَبِرِ لٍيلٍ بُن مَ، عَ نَشَن يَءِلَن عَ يّتّ بّ. عَ نُ وَ مَ عَ تٌقٍ نّ قٍ نَشَن قَمَ رَبَدٍ نِنٍوٍ رَ.
\p
\v 6 عَلَتَلَ نَشَ وُرِ بِلِ ندٍ رَبُلَ عَ عَ تِ يُنُسَ شُن مَ، عَلَكٌ عَ نِينِ شَ تِ عَ شُن، عَ نَشَ سٌفٍ شَ شْنّ كٌلٌن. يُنُسَ نَشَ حّلّشِن كِ قَنيِ رَ نَ وُرِ بِلِ نِينِ شَ قٍ رَ. 
\v 7 كْنْ نَ لْشْي كُيٍ عِبَ، عَلَ نَشَ عَ نِيَ كُلِ ندٍ شَ سَ نَ وُرِ بِلِ دٌن، عَ شَ شَرَ. 
\v 8 سٌفٍ تٌ مِنِ، عَلَ نَشَ قٌيٍ قُرٍ رَ مِنِ كٍلِقٍ سٌفٍتٍدٍ، عَ سٌفٍ شْرْشْي تِ يُنُسَ مَ. نَ نَشَ عَ نِيَ يُنُسَ يَ نَشَ عِقْورْ، عَ قَ وَ قَشَقٍ. عَ نَشَ عَلَ مَشَندِ، «ﭑ قَشَشِ قِسَ ﭑ بَلٌشِ بّ تٌ.»
\p
\v 9 عَلَ نَشَ عَننَبِ يُنُسَ مَشْرِن، «عَ لَنمَ عِ شَ شْنْ يِ وُرِ بِلِ شَ قٍ مَ يِ كِ؟» يُنُسَ نَشَ عَ يَابِ، «عِيٌ. ﭑ شْنْشِ هَن ﭑ حَن وَ مَ نّ ﭑ شَ قَشَ!» 
\v 10 عَلَتَلَ نَشَ عَ مَسٍن عَ بّ، «عِ تَن مّينِشِ يِ وُرِ بِلِ نَن مَ، عِ مُ نَشَن سِشِ، عِ مُ نَشَن نَمْشِ. عَ بُلَشِ كْي كٍرٍن نَن نَ، نَ كُيٍ عِبَ، عَ مَن نَشَ قَشَ. 
\v 11 عَ مُ لَنمَ شّ ﭑ تَن شَ كِنِكِنِ نِنٍوٍ مَ، يِ تَا شُنفبٍ، مِشِ وُلُ كّمّ مْشْحّن نُن عَ شَنبِ نَ دّننَشّ، نَشٍيٍ مُ قٍ قَنيِ نُن قٍ حَاشِ تَفِ رَبَ كٌلٌن، شُرُ سٍيٍ فبٍفبٍ قَن نَ دّننَشّ؟»