\id 1TI Rough: OB, BW. Rework: Nov 02. Checked with team: Dec 02.
\ide UTF-8
\h تِمٌتٍ عِ
\toc1 عَلَ شَ مَسٍنيِ سِنفٍ عَننَبِ ثْلُ نَشَن سّبّ تِمٌتٍ مَ
\toc2 تِمٌتٍ عِ
\mt عَلَ شَ مَسٍنيِ سِنفٍ
\mt عَننَبِ ثْلُ نَشَن سّبّ تِمٌتٍ مَ
\imt مَسٍنيِ ندٍ يِ كِتَابُي شَ قٍ رَ
\ip عَننَبِ ثْلُ تٌ لِسِتِرٍ لِ، عَ نَشَ دَنشَنِيَتْي ندٍ تٌ نَشَن نُ شِلِ تِمٌتٍ. هَلِ تِمٌتٍ تٌ مُ نُ قِندِشِ قٌرِ رَ، عَننَبِ ثْلُ نَشَ عَ شَنِن عَ شُن مَ عَ شَ بِيَاسِ كُي عَلَكٌ عَ شَ عَ مَلِ عَلَ شَ مَسٍنيِ كَوَندِدٍ. تِمٌتٍ نَشَ نَ وَلِ سُشُ عَ قَنيِ رَ. عَ نَشَ بِرَ عَ كَرَ مْشْ قْشْ رَ يِرٍ بِرِن، عَلَكٌ عَ شَ دَنشَنِيَ شَ سَبَتِ، عَ مَن شَ قَتَ كَوَندِ تِدٍ. عَننَبِ ثْلُ نَشَ لَ عَ رَ، عَ عَ شّي عَ شَ سَ وَلِ ندٍ رَبَ عَ يّتّ رَ. عَلَ نُ بَرَ نَ مَسٍن ثْلُ بّ نَمِحْنمّ شَ مَسٍنيِ ندٍ رَ.
\ip تِمٌتٍ تٌ سِفَ عٍقّسّ دَنشَنِيَتْي حَمَ مَلِدٍ، عَننَبِ ثْلُ نَشَ بَتَاشّ سّبّ عَ مَ، نَشَن قِندِشِ يِ كِتَابُي رَ. نَ كُي، ثْلُ نَشَ مَرَ سِ فبٍفبٍ قِ تِمٌتٍ مَ عَلَكٌ عَ شَ مَسٍنيِ هَفِفّ تِ عٍقّسّكَيٍ بّ عَلَ شَ سّرِيّ شَ قٍ رَ. مِشِ حَاشِ ندٍيٍ نُ نَ مّننِ نَشٍيٍ نُ وَ مَ عَلَ شَ وَلِ شُن نَكَنَقٍ. ثْلُ نَشَ عٍ شَ قٍ بِرِن مَكّنّن تِمٌتٍ بّ، عَلَكٌ عَ شَ نْندِ مَسٍن عٍ بّ سّنبّ رَ. ثْلُ مَن نَشَ مَرَ سِ ندٍ قِ تِمٌتٍ مَ دَنشَنِيَتْي حَمَ حّرّ كِ شَ قٍ رَ.
\ip سّرِيّ فبٍفبٍ نَ يِ كِتَابُي كُي نَشٍيٍ نْمَ تٌ دَنشَنِيَتْييٍ قَن مَلِدٍ. عَننَبِ ثْلُ نُ وَ مَ تِمٌتٍ نُن عٍقّسّكَيٍ مَلِقٍ عَلَكٌ عٍ شَ لُ عَلَ شَ كِرَ شْن مَ. وٌن قَن نَ مّننِ نّ. عَلَ شَ وٌن مَلِ عَلَكٌ يِ كِتَابُي شَ قِندِ لْننِ قَنيِ رَ وٌن بّ وٌن نَشَن نَبَتُمَ وٌن مَ دُنِحّءِفِرِ كُي. وٌن مَ دَنشَنِيَتْي حَمَيٍ شَ لُ عَلْ عَلَ نُ عَ مَسٍنشِ تِمٌتٍ بّ كِ نَشّ عَننَبِ ثْلُ سَابُي رَ. عَمِنَ.
\imte عَلَ شَ مَسٍنيِ سِنفٍ
\imte عَننَبِ ثْلُ نَشَن سّبّ تِمٌتٍ مَ
\cl سٌرَ
\c 1
\s تِمٌتٍ شَ شّيرَيَ
\p
\v 1 وٌن نَكِسِمَ عَلَ نُن عِسَ، وٌن شَشِلِ تِمَ نَشَن نَ، عٍ ﭑ تَن ثْلُ تِشِ عَلَ شَ مِشِ سُفَندِشِ عِسَ شَ شّيرَ نَن نَ. 
\v 2 ﭑ نَ يِ بَتَاشّ سّبّقٍ تِمٌتٍ نَن مَ، نَشَن قِندِشِ ﭑ مَ دِ يَتِ رَ عَ دَنشَنِيَ كِ مَ. بَبَ عَلَ نُن وٌن مَرِفِ عِسَ، عَلَ شَ مِشِ سُفَندِشِ، عٍ شَ هِننّ نُن بْحّسَ قِ عِ مَ، عٍ شَ كِنِكِنِ عِ مَ.
\p
\v 3 ﭑ تٌ كٍلِ سِفَدٍ مَسٍدٌن، ﭑ نَشَ عِ رَ سِ عِ شَ لُ عٍقّسّ عَلَكٌ عِ شَ مِشِ ندٍيٍ يَمَرِ عٍ نَشَ شَرَنيِ فبّتّيٍ مَسٍن مِشِيٍ بّ، 
\v 4 عٍ نَشَ كِينِيٍ مَدْشْ، عٍ مَن نَشَ بُ عٍ بٍنبَيٍ شِلِيٍ مَتّنفّقٍ رَ. نَ قٍ مْولِ وْيّنيِ رَوُيَمَ نّ، عَ مُ عَلَ شَ وَلِ رَ سِفَمَ يَرٍ مَ دَنشَنِيَ كُي.
\p
\v 5 ﭑ نَ يَامَرِ قِ نّ عَلَكٌ شَنُنتٍيَ شَ فبٌ، شَنُنتٍيَ نَشَن قَتَنشِ بْحّ سّنِيّنشِ رَ، عَ نُن حَنِفٍ تِنشِنشِ، نُن دَنشَنِيَ قِيشّ رَ. 
\v 6 مِشِ ندٍيٍ بَرَ فبِلٍن دَنشَنِيَ قْشْ رَ، عٍ قَ لْي، نَ وْيّنيِ قُقَقُ سَابُي رَ. 
\v 7 عٍ وَ مَ قِندِقٍ سّرِيّ كَرَ مْشْيٍ نَن نَ، كْنْ عٍ وْيّنمَ قَهَامُتَرٍحَ نَن كُي. عٍ مُ سٌشِ قٍيٍ كُي عٍ نَشٍيٍ مَسٍنمَ سّنبّ رَ. 
\v 8 وٌن عَ كٌلٌن عَلَ شَ سّرِيّ قَن، شَ عَ رَوَلِمَ عَ سّرِيّ كِ مَ. 
\v 9 وٌن مَن عَ كٌلٌن عَلَ مُ عَ شَ سّرِيّ قِشِ تِنشِنتْييٍ شَ قٍ شَ رَ. عَ عَ قِشِ تِنشِنتَرٍيٍ نَن مَ قٍ رَ، عَ نُن عَلَ مَتَندِلَيٍ. عَ عَ قِشِ كَاقِرِيٍ، يُنُبِتْييٍ، دِينّتَرٍيٍ، عَلَ مَبٍرٍلَيٍ نَن مَ قٍ رَ. عَ عَ قِشِ مِشِيٍ نَن مَ قٍ رَ نَشٍيٍ عٍ بَبَ نُن عٍ نفَيٍ قَشَمَ. قَشَتِيٍ، 
\v 10 يّنّلَيٍ، شّمّ نَشٍيٍ نُن شّمّيٍ كَقُمَ، مِشِ سُشُييٍ، وُلٍ قَلّيٍ، مِشِ نَشٍيٍ كَلِ تِمَ وُلٍ شُن، عَ نُن مِشِ بِرِن نَشٍيٍ عَلَ شَ سّرِيّ مَتَندِ مَ، عَ عَ قِشِ نٍيٍ نَن مَ قٍ رَ. 
\v 11 عَلَ شِلِ شُنفبٍ كَنيِ شَ سّرِيّ لَنشِ عَ شَ شِبَارُ قَنيِ نْرْشِ نَن مَ، عَ نَشَن تَشُشِ ﭑ نَ.
\p
\v 12 ﭑ بَرَ وٌن مَرِفِ عِسَ تَنتُ، عَلَ شَ مِشِ سُفَندِشِ نَشَن بَرَ سّنبّ قِ ﭑ مَ، عَ بَرَ لَ ﭑ نَ هَن عَ نَشَ ﭑ نَسٌ عَ شَ وَلِ كُي. 
\v 13 سِنفٍ ﭑ نُ عَ رَ سْتْمَ نّ، ﭑ عَ تْورْ، ﭑ عَ كٌنبِ. كْنْ عَ نَشَ كِنِكِنِ ﭑ مَ، بَرِ مَ عَ عَ كٌلٌن ﭑ نُ نَ بِرِن نَبَمَ كٌلٌنتَرٍيَ نُن دَنشَنِيَتَرٍحَ نَن كُي. 
\v 14 مَرِفِ شَ هِننّ بَرَ فبٌ يّ. عَ دَنشَنِيَ نُن شَنُنتٍيَ قِشِ ﭑ مَ عِسَ نَن سَابُي رَ، عَ شَ مِشِ سُفَندِشِ. 
\v 15 نْندِ مَسٍنيِ نَن يَ وٌن بِرِن لَن وٌن شَ لَ نَشَن نَ؛ عَلَ شَ مِشِ سُفَندِشِ عِسَ قَشِ دُنِحَ مَ يُنُبِتْييٍ نَن نَكِسِدٍ. ﭑ تَن ثْلُ نُ قِندِشِ يُنُبِتْي نَن نَ نَشَن دَنفِ مِشِ بِرِن نَ، 
\v 16 كْنْ عَلَ نَشَ كِنِكِنِ ﭑ مَ هَلِ ﭑ قِندِشِ يُنُبِتْي رَ نَشَن دَنفِ بِرِن نَ، عَلَكٌ عَلَ شَ مِشِ سُفَندِشِ عِسَ شَ دِحّ فبٍفبٍ شَ قِندِ مِسَالِ رَ مِشِيٍ بّ نَشٍيٍ دَنشَنِيَمَ عَ مَ عَلَكٌ عٍ شَ كِسِ سْتْ نَشَن مُ حْنمَ عَبَدَن. 
\v 17 مَنفّ عَلَ كٍرٍنيِ، نَشَن مُ قَشَمَ، نَشَن مُ تٌمَ، بِنيّ نُن نْرّ شَ لُ عَ بّ عَبَدَن. عَمِنَ.
\p
\v 18 ﭑ مَ دِ تِمٌتٍ، ﭑ بَرَ يِ مَرَ سِ قِ عِ مَ، نَشَن لَنشِ نَ نَمِحْنمّ مَسٍنيِيٍ مَ نَشٍيٍ نُ قَلَشِ عِ شَ قٍ رَ. عِ شَ نَ مَسٍنيِ رَكَمَلِ، عِ شَ فٍرٍ قَنيِ سٌ 
\v 19 دَنشَنِيَ نُن حَنِفٍ تِنشِنشِ رَ. ندٍيٍ بَرَ نَ رَبٌلٌ، عٍ شَ دَنشَنِيَ قَ كَنَ. 
\v 20 هُمٍنٍيٌ نُن عَلٍسَندِرٍ نَ نَ مِشِيٍ نَن يَ مَ. ﭑ نٍيٍ سٌشِ نّ سٍنتَنّ يِ رَ، عَلَكٌ عٍ شَ عَ تِنكَن عَ مُ لَن عٍ شَ عَلَ رَ سْتْ.
\c 2
\s سَلِ سّرِيّ
\p
\v 1 ﭑ مَ مَرَ سِ سِنفٍ نَ يِ نَن نَ؛ وٌ شَ عَلَ مَكُلَ، وٌ شَ عَلَ مَشَندِ، وٌ شَ مِشِيٍ شَ كْنتْقِلِ مَسٍن عَلَ بّ، وٌ شَ عَلَ تَنتُ مِشِ بِرِن شَ قٍ رَ. 
\v 2 وٌ شَ نَ رَبَ مَنفّيٍ نُن يَرٍرَتِ بِرِن بّ، عَلَكٌ وٌن شَ لُ بْحّسَ كُي، وٌن مَ دُنِحّءِفِرِ شَ رَشَرَ، وٌن شَ لُ عَلَ شَ كِرَ شْن مَ، وٌن شَ شِلِ قَنيِ سْتْ. 
\v 3 نَ نَن قَن، نَ نَن لَنشِ وٌن نَكِسِمَ عَلَ وَشْنقٍ مَ.
\p
\v 4 عَلَ وَ مَ عَدَ مَدِيٍ بِرِن شَ كِسِ، عٍ شَ نْندِ كٌلٌن. 
\v 5 عَلَ كٍرٍن نَ عَ رَ. شَرِ سَ قَن كٍرٍن نَن عَ رَ، عَلَ نُن عَدَ مَدِيٍ تَفِ. نَ شَرِ سَ قِندِشِ عَلَ شَ مِشِ سُفَندِشِ عِسَ نَن نَ، نَشَن قِندِ عَدَ مَدِ رَ، 
\v 6 عَ قَ عَ يّتّ قِ شُنسَرٍ رَ مِشِ بِرِن بّ. نَ نُ قِندِشِ سٍيدٍحْشْيَ نَن نَ عَلَ نُ وَ مَ عَ شْن مَ تّمُي نَشّ. 
\v 7 عَ ﭑ تَن نَن تِشِ كَوَندِلَ، شّيرَ، نُن كَرَ مْشْ رَ سِ فبّتّيٍ بّ دَنشَنِيَ نُن نْندِ شَ قٍ رَ. ﭑ نَ نَ نْندِ نَن قَلَقٍ، وُلٍ مُ عَ رَ.
\p
\v 8 نَ نَن عَ تٌشِ، عَ شْلِ ﭑ مَ عَدَ مَدِيٍ شَ عٍ بّلّشّ سّنِيّنشِيٍ عِتَلَ عَلَ مَشَندِ كُي يِرٍ بِرِن شْنّ نُن سْنشْ مُ نَشَن نَ. 
\v 9 ﭑ مَن وَ مَ نّ فِنّيٍ شَ دُفِيٍ نَن سٌ نَشٍيٍ عٍ سُتُرَ مَ. عٍ نَشَ عٍ يّتّ رَشُنمَ شُنسّشّ دّنبّشِ رَ، شّيمَ رَ، فّمّ تٌقَنيِيٍ رَ، شَ نَ مُ عَ رَ دُفِيٍ رَ، نَشٍيٍ سَرٍ شْرْشْ. 
\v 10 عَ لَنمَ عٍ شَ عٍ يّتّ رَشُنمَ كّوَلِ قَنيِ نَن نَ، نَشَن لَنمَ فِنّيٍ مَ نَشٍيٍ بِرَ مَ عَلَ قْشْ رَ. 
\v 11 فِنّيٍ شَ نُ قٍ شَرَن سَبَرِ نُن مَفٌرٍ كُي. 
\v 12 ﭑ مُ عَ لُمَ فِنّيٍ شَ شّمّيٍ شَرَن، شَ نَ مُ عَ رَ عٍ شَ عٍ يَمَرِ. فِنّيٍ شَ لُ سَبَرِ كُي، 
\v 13 بَرِ مَ عَدَ مَ نَن سِنفٍ دَا، بٍينُن مَهَوَ شَ دَا. 
\v 14 عَدَ مَ شَ مُ مَدَشُ. فِنّ نَن مَدَشُ، عَ قَ قِندِ يُنُبِتْي رَ. 
\v 15 كْنْ عَلَ فِنّ رَكِسِمَ عَ شَ دِ بَرِ نَن كُي، شَ عَ لُمَ دَنشَنِيَ، شَنُنتٍيَ، نُن سّنِيّنيِ كُي، عَلْ عَ لَنمَ كِ نَشّ.
\c 3
\s دَنشَنِيَتْي حَمَيٍ شَ يَرٍرَتِيٍ
\p
\v 1 نْندِ نَن يَ؛ مِشِ نَشَن وَ مَ قِندِقٍ دَنشَنِيَتْي حَمَ شُنمَتِ رَ، عَ وَ مَ وَلِ قَنيِ شْن. 
\v 2 عَ لَنمَ دَنشَنِيَتْي حَمَ شُنمَتِ شَ قِندِ مِشِ رَ مِشِيٍ مُ نْمَ قٍ حَاشِ ندٍ يٌ قَلَدٍ نَشَن شُن مَ. عَ شَ عَ لِ عَ فِنّ كٍرٍن فبَنسَن نَن دْشْشِ، عَ قِندِ تَشَسِ مِشِ رَ، نَشَن عَ يّتّ شَنِنمَ شَشِلِمَيَ رَ، بِنيّ نَ نَشَن مَ، نَشَن قَتَ شْحّ مَسُشُدٍ، نَشَن قَتَ مِشِ شَرَندٍ. 
\v 3 عَ مُ لَنمَ عَ شَ قِندِ سِيسِلَ رَ، عَ مُ لَنمَ عَ شَ مَوٌلٍن. عَ لَنمَ نّ عَ شَ قِندِ مِشِ رَ نَشَن لَنيِ قٍنمَ، نَشَن بْحّ شِنبٍلِ، نَشَن مُ مِلَ. 
\v 4 عَ شَ قَتَ عَ يّتّ شَ دٍنبَيَ رَحّرّدٍ، عَ شَ دِيٍ شَ لُ عَ شَ يَامَرِ بُن مَ شُرُي كُي، 
\v 5 بَرِ مَ شَ مِشِ مُ قَتَ عَ يّتّ شَ دٍنبَيَ رَحّرّدٍ، عَ قَ مّينِمَ عَلَ شَ دَنشَنِيَتْي حَمَ مَ دِ؟ 
\v 6 عَ نَشَ قِندِ دَنشَنِيَتْي نّينّ رَ دٍ، عَلَكٌ عَ نَشَ عَ يّتّ عِفبٌ، عَ قَ حَشَنكَتّ سْتْ عَلْ عِبُلِسَ عَ سْتْشِ كِ نَشّ. 
\v 7 عَ مَن شَ قِندِ شِلِ قَنيِ كَنيِ نَن نَ دَنشَنِيَتَرٍيٍ تَفِ، عَلَكٌ مِشِيٍ نَشَ يٌ عَ مَ، عَ نَشَ سُشُ عِبُلِسَ شَ فَنتَنيِ رَ.
\p
\v 8 مِشِ نَشٍيٍ قِندِشِ دَنشَنِيَتْي حَمَ مَلِيٍ رَ، عٍ قَن شَ قِندِ شِلِ قَنيِ كَنيِيٍ نَن نَ. عٍ شَ عٍ مَكُيَ قِلَنكَقُيحَ رَ، عٍ نَشَ سِيسِ، عٍ نَشَ بِرَ كْبِرِ قْشْ رَ يَافِتَرٍيَ كُي. 
\v 9 عٍ شَ عَلَ شَ دَنشَنِيَ مَسٍنيِ رَفَتَ عٍ شَشِلِ قَنيِ كُي. 
\v 10 عٍ شَ مَتٌ سِندٍن. شَ عٍ تِنشِن، عٍ نْمَ قِندِدٍ دَنشَنِيَتْي حَمَ مَلِيٍ رَ.
\p
\v 11 فِنّيٍ قَن شَ قِندِ شِلِ قَنيِ كَنيِيٍ رَ. عٍ نَشَ قِندِ نَاقِشِيٍ رَ، عٍ شَ قِندِ تَشَسِ مِشِ رَ، عٍ شَ تِنشِن قٍ بِرِن كُي. 
\v 12 دَنشَنِيَتْي حَمَ مَلِيٍ شَ فِنّ كٍرٍن فبَنسَن نَن دْشْ، عٍ شَ عٍ شَ دِيٍ نُن عٍ شَ قْشْي رَحّرّ عَ قَنيِ رَ. 
\v 13 مِشِ نَشٍيٍ دَنشَنِيَتْي حَمَ مَلِمَ عَ قَنيِ رَ، عٍ بِنيّ نُن لِمَنِيَ نَن سْتْمَ عٍ شَ دَنشَنِيَ كُي عَلَ شَ مِشِ سُفَندِشِ عِسَ مَ.
\p
\v 14 ﭑ نَ يِ بَتَاشّ سّبّقٍ نّ عِ مَ، هَلِ ﭑ تٌ لَشِ عَ رَ عَ فبٍ مُ لُشِ ﭑ شَ عِ يِرٍ لِ. 
\v 15 شَ عَ سَ لِ ﭑ نَشَ دُفُندِ، عِ شَ عَلَ شَ مِشِيٍ حّرّ كِ قَنيِ كٌلٌن. عَلَ نَشَن نَ نَ، عَ شَ مِشِيٍ لَنشِ عَ شَ دَنشَنِيَتْي حَمَ نَن مَ، نَشَن نَ نْندِ شَ كِنكِ رَ.
\p
\v 16 قٌ وٌن شَ عَ كٌلٌن نّ عَ عَلَ حّرّ كِ سّنبّ فبٌ. عَ فُندٌ مَكّنّنشِ نَن يَ؛
\q عَلَ شَ مِشِ سُفَندِشِ مَسٍنشِ عَدَ مَ قَتٍ نَن نَ،
\q عَ شَشِلِ نَن تِنشِن.
\q عَ مِنِ نّ مَلٍكّيٍ مَ،
\q عَ كَوَندِشِ حَمَنّيٍ نَن تَفِ.
\q دُنِحَ دَنشَنِيَشِ عَ تَن نَن مَ،
\q عَ تٍشِ نْرّ نَن كُي.
\c 4
\s نْندِ كَنَقٍ
\p
\v 1 عَلَ شَشِلِ عَ مَسٍنمَ نّ وٌن بّ عَ قِيشّ رَ، عَ ندٍيٍ قَمَ نّ دَنشَنِيَ رَبٌلٌدٍ وَشَتِ دْنشْي كُي، عٍ قَ بِرَ حِننّ وُلٍ قَلّيٍ نُن عٍ شَ شَرَنيِيٍ قْشْ رَ. 
\v 2 وُلٍ قَلّ قِلَنكَقُييٍ مِشِيٍ مَدَشُمَ. عٍ شَشِلِ بَلَنشِ فبٍن. 
\v 3 عٍ تْنيِ دْشْمَ قُتِ شِرِقٍ رَ، عَ نُن دٌنسٍ ندٍيٍ دٌنقٍ رَ، عَلَ نَشٍيٍ دَاشِ عَلَكٌ دَنشَنِيَتْييٍ نُن نْندِ قَلّيٍ شَ عٍ دٌن تَنتُي رَ. 
\v 4 عَلَ سٍ نَشَن بِرِن دَاشِ، عَ قَن. عَ مُ رَهَرَ مُشِ مِشِيٍ بّ نَشٍيٍ عَ دٌنمَ تَنتُي رَ، 
\v 5 بَرِ مَ عَلَ شَ مَسٍنيِ نُن عَلَ مَشَندِ نَ رَ سّنِيّنمَ.
\p
\v 6 شَ عِ نَ نْندِ مَسٍن عِ نفَشَكٍرٍنيِيٍ بّ، عِ بَرَ قِندِ عَلَ شَ مِشِ سُفَندِشِ عِسَ شَ وَلِكّ قَنيِ رَ، نَشَن عِ بَلٌمَ دَنشَنِيَ مَسٍنيِ نُن شَرَنيِ قَنيِ رَ، عِ بِرَ مَ نَشَن قْشْ رَ. 
\v 7 عِ نَشَ قٍ قُقَقُ مَدْشْ كِينِ رَ دَنشَنِيَ مُ نَشَن كُي. عِ شَ عَلَ قٍ سُشُ سْوبّ رَ. 
\v 8 مِشِيٍ مّينِقٍ عٍ قَتٍ مَ، نَ تِدٍ مُ فبٌ عَلْ عٍ نَ عٍ شَشِلِ يَكَ بَ. نَ شَشِلِ يَكَ بَ نَن قَمَ قِندِدٍ مِشِيٍ بّ مُنَقَنيِ رَ دُنِحَ نُن عَلِفِيَمَ. 
\v 9 نْندِ مَسٍنيِ نَن يَ وٌن بِرِن لَن وٌن شَ لَ نَشَن نَ؛ 
\v 10 وٌن وَلِمَ تُننَبّشِ نَن نَ، بَرِ مَ وٌن شَشِلِ تِشِ عَلَ حِحّ رَ، نَشَن قِندِشِ عَدَ مَدِ بِرِن نَكِسِمَ رَ، عَ فبٍنفبٍنيِ دَنشَنِيَتْييٍ. 
\v 11 نَ نَن نَ كِ، عِ شَ نَ يَامَرِ بِرِن مَسٍن مِشِيٍ بّ، عِ شَ عٍ شَرَن نَ سّرِيّيٍ رَ.
\p
\v 12 مِشِ يٌ نَشَ يٌ عِ شَ قٌنِكٍيَ مَ. عِ نَشَن نَبَمَ، عِ شَ قِندِ مِسَالِ رَ دَنشَنِيَتْييٍ بّ عَ لَنمَ عٍ شَ وْيّن كِ نَشّ، عٍ شَ حّرّ كِ نَشّ، عٍ شَ عٍ بٌرٍ شَنُ كِ نَشّ، عٍ شَ دَنشَنِيَ نُن عٍ شَ سّنِيّنيِ شَ لُ كِ نَشّ. 
\v 13 هَن ﭑ سَ قَمَ تّمُي نَشّ، عِ شَ كِتَابُي شَرَن مِشِيٍ بّ، عِ شَ عٍ رَلِمَنِيَ، عِ شَ عٍ شَرَن. 
\v 14 عِ نَشَ وَلِ بّحِن نَشَن سٌشِ عِ يِ رَ، مَسٍنيِ تِشِ عَلَ شِلِ رَ عِ شَ قٍ رَ نَشَن مَ، قٌرِيٍ تٌ عٍ بّلّشّ سَ عِ شُنيِ مَ. 
\v 15 عِ شَ نَ رَبَتُ سّنبّ رَ، عَلَكٌ مِشِ بِرِن شَ عِ حّرّ كِ تٌ عِ سِفَمَ يَرٍ كِ نَشّ. 
\v 16 مّينِ عِ يّتّ مَ، نُن نَ شَرَنيِ مَ عِ نَشَن تِمَ تُننَبّشِ رَ. شَ عِ نَ رَبَ عِ كِسِمَ نّ، عِ تَن نُن نَشٍيٍ عِ شُي رَ مّمَ.
\c 5
\s دَنشَنِيَتْي حّرّ كِ
\p
\v 1 عِ نَشَ وْيّن شْرْشْي قَلَ قٌرِيٍ بّ. عِ شَ عٍ رَلِمَنِيَ عَلْ عِ بَبَ. عِ شَ شّمّ قٌنِكٍيٍ رَلِمَنِيَ عَلْ عِ شُنيَ شّمّمَيٍ. 
\v 2 عِ شَ حّلّشّقٌرِيٍ رَلِمَنِيَ عَلْ عِ نفَ. عِ شَ قٌنِكٍ فِنّمَيٍ رَلِمَنِيَ عَلْ عِ مَافِنّيٍ سّنِيّنيِ كُي.
\p
\v 3 عِ شَ كَاحّ فِنّيٍ بِنيَ، نَشٍيٍ نَ عٍ كٍرٍنيِ مَ. 
\v 4 شَ كَاحّ فِنّ شَ دِيٍ نَ نَ، شَ نَ مُ عَ رَ عَ شَ مَمَدِيٍ، عٍ تَن شَ عَلَ وَشْنقٍ مَتِنكَن عٍ شَ دٍنبَيَ بّ. دِيٍ بَرِ مِشِيٍ نَشَن نَبَشِ عٍ بّ، عٍ شَ نَ سَرٍ رَفبِلٍن عٍ مَ. عَلَ وَ مَ نَ نَن شْن.
\p
\v 5 كَاحّ فِنّ يَتِ يَتِ، نَشَن لُشِ عَ كٍرٍن، عَ عَ شَشِلِ تِمَ عَلَ نَن نَ. عَ سَلِمَ، عَ عَلَ مَشَندِ مَ تّمُي بِرِن. 
\v 6 كْنْ كَاحّ فِنّ نَشَن بِرَ مَ عَ يّتّ وَشْنقٍ قْشْ رَ، عَ تَن بَرَ قَشَ هَلِ عَ حِحّ تٌ عَ رَ.
\p
\v 7 عِ شَ يِ يَامَرِيٍ مَسٍن مِشِيٍ بّ، عَلَكٌ عٍ شَ لُ تِنشِنيِ كُي. 
\v 8 مِشِ نَشَن مُ مّينِمَ عَ شَ مِشِيٍ مَ، عَ فبٍنفبٍنيِ عَ شَ دٍنبَيَ مَ، نَ كَنيِ بَرَ دَنشَنِيَ بّحِن. عَ حَاشُ دَنفِقٍ كَاقِرِ رَ.
\p
\v 9 كَاحّ فِنّ نَشَن شِلِ لَنمَ عَ شَ سّبّ كَاحّ فِنّيٍ شِلِيٍ يَ مَ، عَ لَنمَ عَ شَ سِمَيَ شَ دَنفِ حّ تٌنفٌ سٍننِ رَ. عَ شَ عَ لِ عَ نُ دْشْشِ شّمّ كٍرٍن فبَنسَن نَن شْن مَ، 
\v 10 عَ نُن مَن عَ كٌلٌنشِ تِنشِنتْي رَ عَ شَ وَلِ قَنيِيٍ شَ قٍ رَ، عَلْ دِ شُرُقٍ، شْحّ رَ سّنّقٍ، سّنِيّنتْييٍ سَنيِ مَشَقٍ، تْورْ مِشِيٍ مَلِقٍ، عَ نُن بِرَقٍ قٍ قَنيِ مْولِ بِرِن قْشْ رَ.
\p
\v 11 كْنْ كَاحّ فِنّ نَشٍيٍ قِندِشِ سُنفبُتُنيِيٍ رَ، عٍ شِلِ نَشَ سّبّ، بَرِ مَ شَ عَ سَ لِ عٍ وَشْنقٍيٍ عٍ رَفبِلٍنمَ نّ عَلَ شَ مِشِ سُفَندِشِ قْشْ رَ، عٍ قَ دْشْ شّمّ تَا، 
\v 12 نَ تّمُي عٍ بَرَ يُنُبِ سْتْ، بَرِ مَ عٍ بَرَ عٍ شَ لَايِدِ سِنفٍ كَنَ. 
\v 13 بَقٍ نَ رَ، عٍ مَن قِندِ مَ تُننَشْنّيٍ نَن نَ، عٍ نُ قَ لُ عٍ مَحّرّ رَ نَاقِشِيَ رَبَدٍ، عٍ مِشِ مَقَلَمَ، عٍ قٍ قَلَ نَشَن مُ لَنمَ عَ شَ قَلَ. 
\v 14 نَ كُي، عَ شْلِ ﭑ مَ كَاحّ فِنّ سُنفبُتُنيِيٍ شَ دْشْ شّمّ تَا، عٍ قَ دِيٍ بَرِ، عٍ مّينِ عٍ شَ دٍنبَيَ مَ، عَلَكٌ وٌن يَشُييٍ نَشَ نْ قٍ حَاشِ قَلَدٍ عٍ شُن مَ. 
\v 15 ندٍيٍ حَن بَرَ عٍ كٌبٍ رَ سٌ، عٍ بِرَ سٍنتَنّ قْشْ رَ.
\p
\v 16 شَ دَنشَنِيَتْي فِنّ بَرَ كَاحّ فِنّ ندٍيٍ سْتْ عَ شَ مِشِيٍ يَ مَ، عَ شَ عَ يِفِيَ عَلَكٌ عَ نَشَ قِندِ كٌتٍ رَ دَنشَنِيَتْي حَمَ بّ. نَ كُي، دَنشَنِيَتْي حَمَ نْمَ نّ كَاحّ فِنّيٍ مَلِدٍ نَشٍيٍ نَ عٍ كٍرٍنيِ مَ.
\p
\v 17 دَنشَنِيَتْي حَمَ شَ قٌرِيٍ، نَشٍيٍ قٍيٍ رَحّرّ مَ عَ قَنيِ رَ، عٍ شَ بِنيّ شُنفبٍ سْتْ، عَ فبٍنفبٍنيِ نَشٍيٍ كَوَندِ نُن شَرَنيِ تِمَ. 
\v 18 عَ سّبّشِ كِتَابُي كُي، «نِنفٍ نّ مّنفِ تُرُشُنمَ، وٌ مُ لَن وٌ شَ عَ دّ شِرِ.» عَ مَن سّبّشِ، «وَلِكّ شَ عَ وَلِ سَرٍ سْتْ.» 
\v 19 عِ نَشَ كَلَمُي رَ مّ دَنشَنِيَتْي حَمَ شَ قٌرِ ندٍ شَ قٍ رَ، شَ سٍيدٍ قِرِن، شَ نَ مُ عَ رَ سَشَن، مُ نَ قٍ تٌشِ. 
\v 20 نَشٍيٍ بَرَ يُنُبِ رَبَ، عِ شَ عِ يَشَسٍرِ مَسَ عٍ شَ قٍ رَ، بِرِن يَ شْرِ، عَلَكٌ بٌورٍيٍ قَن شَ فَاشُ.
\p
\v 21 ﭑ بَرَ يِ يَامَرِيٍ قِ عِ مَ، عَلَ، عَ شَ مِشِ سُفَندِشِ عِسَ، نُن مَلٍكّ سُفَندِشِيٍ يَ شْرِ. عِ شَ يِ يَامَرِيٍ رَبَتُ تِنشِنيِ كُي. عِ نَشَ مِشِ يٌ رَقِسَ عَ بٌورٍ بّ. 
\v 22 عِ نَشَ فبَتَ مِشِيٍ سُفَندِدٍ، عِ قَ عِ بّلّشّ سَ عٍ مَ، شَ نَ مُ عَ رَ عِ قَن لُمَ نّ عٍ شَ يُنُبِيٍ كُي. عِ شَ لُ سّنِيّنيِ كُي. 
\v 23 عِ نَشَ يٍ فبَنسَن شَ مِن. عِ شَ وّنِ ندٍ مِن سٍرِ رَ عِ قُرِ شَ قٍ رَ، بَرِ مَ عِ لُمَ قُرَ رَ. 
\v 24 مِشِ ندٍيٍ شَ يُنُبِيٍ مَكّنّنشِ بٍينُن عٍ شَ مَكِيتِدٍ لِ، كْنْ بٌورٍ فبٍيٍ مُ تٌمَ قٌ يَرٍ. 
\v 25 وَلِ قَنيِ قَن مَكّنّنمَ نَ كِ نّ، وَلِ حَاشِ مُ نْشُنمَ.
\c 6
\s عَلَ شَ سّرِيّ دَنشَنِيَتْييٍ بّ
\p
\v 1 دَنشَنِيَتْي نَشٍيٍ نَ كٌنيِيَ كُي، عٍ شَ عٍ مَرِفِيٍ بِنيَ، عَلَكٌ بِنيّ يٌ نَشَ بَ عَلَ شِلِ رَ، عَ نُن عَ شَ سّرِيّ رَ. 
\v 2 كٌنيِ نَشٍيٍ مَرِفِ قِندِشِ دَنشَنِيَتْييٍ رَ، نَ كٌنيِيٍ نَشَ يٌ عٍ مَرِفِ مَ، عَ قَلَقٍ رَ عَ عٍ نفَشَكٍرٍنيِيٍ نَن عٍ رَ. عَ لَنمَ عٍ شَ عٍ شَ يَامَرِ رَبَتُ عَ قَنيِ رَ دَنفِقٍ عَ سِنفٍ رَ، بَرِ مَ عٍ نَ وَلِقٍ عٍ نفَشَكٍرٍنيِ شَنُشِيٍ نَن بّ.
\p عِ شَ مِشِيٍ شَرَن يِ يَامَرِيٍ رَ. 
\v 3 شَ عَ سَ لِ مِشِ ندٍ شَرَنيِ فبّتّ نَن تِمَ، عَ مُ بِرَ وٌن مَرِفِ عِسَ، عَلَ شَ مِشِ سُفَندِشِ شَ مَسٍنيِ تِنشِنشِ قْشْ رَ، نُن شَرَنيِ نَشَن قِندِشِ عَلَ فبٍ رَ، 
\v 4 نَ كَنيِ بَرَ عَ يّتّ عِفبٌ، عَ مُ سٍسٍ كٌلٌن. عَ شَشِلِ مُ قَن. عَ شَ وْيّنيِ فبٌ، سْنشْي رَقَن عَ مَ. نَ قِندِ مَ تْونّ، لَنتَرٍيَ، تْوحّفّ، سِيكّ، 
\v 5 تِنشِنتَرٍيٍ شَ سْنشْ سْنشْي، نُن نْندِ كٌلٌنتَرٍيَ. عٍ دِينّ رَوَلِمَ كْبِرِ قٍ نَن نَ. 
\v 6 دِينّ نَن قِندِ مَ فٍينِ رَ مِشِيٍ بّ، نَشٍيٍ عٍ وَ سَسٌمَ عٍ سْتْسٍ. 
\v 7 وٌن قَشِ دُنِحَ مَ وٌن بّلّشّيٍ عِفٍلِ نَن نَ، وٌن مَن سِفَمَ نَ كِ نّ. 
\v 8 شَ بَلٌي نُن سٌسٍ نَ وٌن يِ رَ، وٌن شَ وٌن وَ سَسٌ نَ رَ. 
\v 9 كْنْ مِشِ نَشَن وَ مَ بَننَقٍ، نَ كَنيِ تَنتَنمَ نّ، عَ سُشُ فَنتَنيِ رَ، عَ قَ مِلَ عَ وَشْنقٍ حَاشِيٍ مَ. نَ وَشْنقٍ حَاشِيٍ نَن مِشِيٍ شُن نَكَنَمَ، عٍ قَ لْي. 
\v 10 كْبِرِ شْلِ قِندِشِ قٍ كٌبِ بِرِن سَنكٍ نَن نَ. ندٍيٍ تٌ مِلَ كْبِرِ مَ، عٍ نَشَ دَنشَنِيَ بّحِن، عٍ قَ تْورْ عَ حَاشِ رَ.
\p
\v 11 كْنْ عِ تَن نَشَن قِندِشِ عَلَ شَ مِشِ رَ، عِ شَ فبِلٍن نَ قٍ مْولِيٍ قْشْ رَ. عِ شَ بِرَ تِنشِنيِ، عَلَ قٍ، دَنشَنِيَ، شَنُنتٍيَ، دِحّ، نُن بْحّ بّشِيَ قْشْ رَ. 
\v 12 دَنشَنِيَ فٍرٍ قَنيِ سٌ. كِسِ سُشُ، عِ شِلِشِ نَشَن مَ، عِ سٍيدٍحْشْيَ تِشِ نَشَن مَ قٍ رَ سٍيدٍ وُيَشِ يَ شْرِ. 
\v 13 ﭑ بَرَ عِ يَمَرِ عَلَ يَ شْرِ، نَشَن نِمَسٍ بِرِن نَبَلٌمَ، ﭑ بَرَ عِ يَمَرِ عَلَ شَ مِشِ سُفَندِشِ عِسَ يَ شْرِ، نَشَن بَرَ سٍيدٍحْشْيَ قَنيِ تِ ثٌنسِ ثِلَتِ بّ، 
\v 14 عِ شَ عَلَ شَ سّرِيّ رَبَتُ تِنشِنيِ سّنِيّنشِ رَ هَن وٌن مَرِفِ عِسَ، عَلَ شَ مِشِ سُفَندِشِ قَ تّمُي. 
\v 15 عَلَ نَن قَمَ عِسَ رَ مِنِدٍ عَ وَ مَ عَ شْن مَ وَشَتِ نَشّ.
\q تَنتُي كَنيِ،
\q مَنفّ سّنبّمَ،
\q قِرِن مُ كَقُشِ نَشَن مَ،
\q مَنفّيٍ شَ مَنفّ،
\q مَرِفِيٍ مَرِفِ عَلَ،
\q
\v 16 نَشَن كٍرٍن مُ قَشّ كٌلٌن،
\q نَشَن شْنيِ نَ نَءِيَلَنيِ رَ،
\q عَدَ مَدِيٍ مُ نَشَن تٌشِ،
\q عَدَ مَ مُ نْمَ نَشَن تٌدٍ.
\q بِنيّ نُن سّنبّ نَ عَ بّ عَبَدَن.
\q عَمِنَ.
\p
\v 17 عِ شَ تٌ بَننَمِشِيٍ يَمَرِ عَ عٍ نَشَ عٍ يّتّ عِفبٌ، عٍ مَن نَشَ عٍ شَشِلِ تِ نَاقُلِ رَ، بَرِ مَ نَاقُلِ مُ بُمَ. عٍ شَ عٍ شَشِلِ تِ عَلَ نَن نَ، نَشَن وٌن كِمَ سٍ بِرِن نَ عَلَكٌ وٌن شَ سّيوَ. 
\v 18 عٍ شَ قٍ قَنيِ رَبَ. عٍ شَ كّوَلِ قَنيِ نَن شَ قِندِ عٍ شَ بَننَيَ رَ. عٍ شَ مِشِ كِ عٍ هَرِفٍ رَ عٍ شَ قٌنِسِرٍيَ شَ قٍ رَ. 
\v 19 نَ بِرِن كُي عٍ هَرِفٍ سْتْمَ نّ يَرٍ نَشَن قِندِ مَ كِسِ يَتِ يَتِ رَ عٍ بّ.
\p
\v 20 تِمٌتٍ، عِ شَ مّينِ قٍ مَ نَشَن تَشُشِ عِ رَ. عِ شَ وْيّنيِ قُقَقُ نُن وُلٍ مَتَنفَ. 
\v 21 مِشِ ندٍيٍ نَ قَلَمَ عَ لْننِ، كْنْ لْننِ مُ عَ رَ. نَ بَرَ عَ نِيَ عٍ شَ عٍ كٌبٍ سٌ دَنشَنِيَ رَ.
\p عَلَ شَ هِننّ وٌ رَ.