\id TIT - Mupun NT
\ide UTF-8
\h Titus
\toc3 Tit
\toc2 Titus
\toc1 Pwoo ɗe Pool ran nTitus
\mt2 Pwoo ɗe Pool ran
\mt1 nTitus
\c 1
\p
\v 1 A ghan Pool kǝrem nDaa Naan, kǝ laalep mǝ Daa Jesu Kristi, ran wasika ɗesǝ nǝ. A Jesu wur bilip ghan, mbǝkǝ nghan ɓam nen ɗe Naan wur kǝ ten bilip mo, mbǝkǝ shinzeen mo wurang ɗe nɗǝǝn Naan, kǝzak, mbǝkǝ mo man zeen nǝ ɗe jir nkaa ar kǝ Naan. 
\v 2 Kǝ mo leyit fur mo ɗe nkaa seen ɗe nǝ azeen, ɗe ngha-ngha. Naan ɗe baa wur cìn ɗung kas, wur kǝ ten sat nǝ, wur shin seen mǝnǝ ngurum mo. 
\v 3 Nciit-nciit kǝgam pee nǝ, ɓe wur nwoo seen ɗesǝ nǝ agaak shi pwoo wur, ɗewur kǝ ten le nǝ nsar fen. A Naan ɗewur ɓam mun, a wur a ngwe ɗewur ten lep nghan, mbǝkǝ ghan satpwoo wur ɗe ngurum mo. 
\v 4 Wen nkaa ran wasika ɗesǝ nghan Titus, làa fen ɗe azeen-nzeen nɗǝǝn shinzeen, ɗe mun kǝ nǝ vǝl. Ɗeret, kǝ ryang pee Naan puun nJesu Kristi Nguɓam fun, mo tong ashak kǝ waa.
\s Ɗak ɗe Titus Nkaa Cìn Nǝ Nyil nKrit
\p
\v 5 Mbii ɗe nǝ le kǝ nghan yit waa nyil nKrit, a mbǝkǝ gha sǝǝt a ɗak mbii mo ɗe ndǝre-ndǝre, kǝ gha bilip nennan mo ɗe mbee jir lu nNaan ɗeɗang ghi, ɗe nǝ nɗǝǝn nyil nKrit. Taji a mundǝr mbii ɗe dǝ nsat nghan kas. 
\v 6 Jir we ɗe a bilip kaa ngunan sǝ, ɓe nǝ a tǝng kǝ gwar mǝnǝ kǝ mǝse ɗeret, ngwe ɗewur kǝ mat a mǝndong ɓejee ɗak. Kǝ jep wur mo zak, nǝ a tǝng kǝ mo ɗen a nen ɗe mo shinzeen. Ngwe ɗe mǝse wur nǝ mak le kǝ gurum mo naa nǝ, baa wur a ngucìn mbii ɗebish kas, kǝzak, baa a ngukáaɓál kas. 
\v 7 Jir a wii ɗewur a ɗeɗes nɗǝǝn nendǝm ndang Naan mo, ɓe wur naa a mbii ɗe mo a mǝ Naan. Mbǝmǝnǝ, ɓe mǝse wur nǝ a tǝng kǝ nǝ ɗee a ɗeret. Baa wur nɗee a nguroop, jir a ngwe ɗe mbii kǝkǝlak làa wur mɓut kas. Baa wur nshwaa am anab (filip) kǝ nǝ yuur wur ɗe kas, baa wur a nguɓwanbish kas. Baa wur a ngurǝɓet mbii mbee kat lǝɓet ɗebuu kas. 
\v 8 Ni ret kǝ wur ɗee a ngula gurum mo nɗǝǝn tulu wur. Nǝ a tǝng kǝ wur wal mbii ɗeret mo. Nǝ ret kǝ wur ɗee a ngwe ɗe mwaan wur nǝ a ndǝre-ndǝre, kǝ mǝse wur nǝ ɗee a ɗe nǝ shang nNaan zak. Nguyaashin. 
\v 9 A ngwe ɗewur ɗar ɓalɓal nɗǝǝn shinzeen ɗe mu kám nǝ, mbǝkǝ wur mak kám ɗe ngurum mo zak. Mɓe kǝ mo katɓal ɗe nɗǝǝn pǝtuup fur mo, kǝzak, mbǝkǝ wur man mbii ɗewur nkám ɗe nen ɗe moo satpwoo ɗebuu mo, kǝ wur kám ɗe mmo, pee ɗe mo taa ɗel ɗe. 
\v 10 Gurum mo ɗǝɗes, ɗe mo a nen tǝkook kǝ pee met jir, ɓe a pak nen Yahudi ɗe mo ɗee a nendǝm nɗang Kristi. Mo sat nǝ, jir nen ɗe mo ɗee a nendǝm nɗang Daa Jesu, ɓe tǝng mo can mo akuɗang, kaaɗi nen Yahudi moo cìn sǝ zak. Mo a nen satpwoo ɗebuu moo, cìn ɗung ɗe ngurum mo zak. 
\v 11 A le kǝ mo ɗok tǝtǝk, mbǝɗe moo kám a mbii ɗe baa nǝ ret kǝ mo kám kas, mbǝkǝ mo kat lǝɓet ɗebuu ɗe nɗǝǝn cìn mbii ɗebish. Mo nkaa dǝm ntul mo ɗes nɗǝǝn ar ɗebish. 
\v 12 Mee gurum wur ɗe mɓut nen Krit nǝ mo, ɗewur leshin a kaa ngusatpwoo Naan sǝ, wur sat nǝ, <<Nen Krit mo a nenɗung mo, a kaa luwayil mo sǝ, nenrǝɓet mbii mo, kǝ seer zak.>> 
\v 13 Pwoo ɗesǝ nǝ azeen. 
\v 14 Taji mo lekom mbee kǝlǝng pwoo ɗebuu mǝ nen Yahudi mo, kǝ Wàar gurum mo, ɗe mo cii zeen zak kas. 
\v 15 Katɗang pǝtuup gurum mo a ɗeɓang, ɓe mbii mo jir, mon nɗee a ɗeɓang pee nen mǝnǝ mo ɗe zak. Ɗang nen ɗe pǝtuup mo a ɗebish kǝ ɗe baa mo kǝ shinzeen kas, ɓe baa mee mbii ɗe nǝ a ɗeɓang pee mo ɗe kas, mbǝɗe pan mo a ɗebish, baa mo man mbii ɗeret kas. 
\v 16 Mo lekáa fur mo, a kaa nen ɗe mo man Naan sǝ, ɗangɓe mbii ɗe moo cìn nǝ, nǝ kám ngurum mo nǝnee, baa mo man Naan kas jir dǝɓen. Mo a nencii gurum mo, nencii kǝlǝngpee mo, baa mo mak cìn mee mbii ɗe nǝ ret kas jir dǝɓen.
\c 2
\s Kám ɗe Nǝ Azeen
\p
\v 1 Ɗang waa, a kám ngurum mo mbii ɗe mo a nɗǝǝn kám ɗe nǝ azeen-nzeen. 
\v 2 A kám nen ɗekukun mo nǝnee, << nǝ ret kǝ mo ɗee a nen ɗe mo ya sut, kǝ mo le pǝtuup fur mo ɗar a pee mǝndong. Taji mo ɗee ntan kas, ɗangɓe mo ɗee a nen ɗe mo ɗar ɓalɓal nɗǝǝn shinzeen nǝ. Nen ɗe mo wal ngurum mo, kǝ nengung nɗǝǝn mbii mo zak. 
\v 3 A sat mmat ɗenan mo nǝnee, << nǝ ret kǝ mo kǝ mwaan kaa nen ɗe mo man Naan sǝ. Taji mo satpwoo ɗebish nkaa gurum mo kas. Taji mo ɗee a kǝrem mǝ shwaa mwes kas. Nǝ ret kǝ mo kám mbii ɗeret ngurum mo. 
\v 4 Mɓe kǝ mo kám ɗe mmat ɗeɗyeen mo, kǝ mo wal ɗe mmish fur mo, kǝ jep fur mo zak. 
\v 5 Nen yaasut mo, mbǝkǝ mo ɗee ɗe a ɗeɓang nɗǝǝn pǝtuup fur mo, mbǝkǝ mo naa tulu fur mo ɗe rǝret, kǝ mo ɗee ɗe a ɗeret, kǝ mo lekáa fur mo ndǝr mish fur mo. Mɓe kǝ taji mee gurum katpee satpwoo ɗebish nkaa pwoo Naan kas.
\p
\v 6 A sat jepzǝlang mo nǝnee, << nǝ ret kǝ mo yaasut. 
\v 7 nƊǝǝn mbii mo jir, ɓe nǝ ret kǝ mo ɗee a nen ɗe moo mǝse ɗeret mo. A kám ngurum mo. A kám ngurum mo mbii ɗe nǝ nɗǝǝn pǝtuup fwa ɗe nǝ azeen-nzeen, kǝ taji a ɗee ntan kas. 
\v 8 A cìn ɗak shi pwoo ɗeret mo, mbǝkǝ taji mee gurum katpee, mbee sat mee mbii nkaa pwoo ɗe aa sat nǝ mo kas, mbǝkǝ nen ɗe mo cii nǝ, ɓe naashweep ya mo ɗe, mbǝɗe baa mo naa mee mbii ɗebish, mbǝkǝ mo satpwoo ɗe nkaa mun kas.
\p
\v 9 A sat kǝrem mo nǝnee, << mo sham kǝ káa fur mo ndǝr nen ɗe mo sǝrep mo, kǝ mo cìn mbii ɗeret nen ɗe moo mo zak. Taji kǝrem mo lapwoo nen ɗe mo sǝrep mo shiɓal kas. 
\v 10 Taji mo cìn wat kas, ɗangɓe nǝ ret kǝ jir a pǝranghe, ɓe mo ɗee a nenzeen mo, mbǝkǝ mbii ɗe moo cìn jir, ɓe nǝ le kǝ gurum mo satpwoo ɗeret ɗe nkaa kám ɗe nǝ nkaa Naan Nguɓam fun.
\p
\v 11 Naan wur kám ɗeret wur mmun, mbǝkǝ gurum mo jir mo kat ɓam ɗe. 
\v 12 Ɗeret Naan nǝ kám mmun ar ɗe mun nnook cìn mbii ɗebish mo ɗe nyit Naan, kǝ coor mǝ yil ɗesǝ. Ɗang nǝ ret kǝ mun yaasun kǝ mun mwaan ɗe ndǝre-ndǝre zak, mbǝkǝ nɗǝǝn mbii ɗe muu cìn mo jir, ɓe nǝ ret ɗe nNaan nyit. 
\v 13 Kaaɗi mun nkaa naa puus ɗeret parɗi mbii ɗe muu leyit nkaa mo nǝ ngam, nciit kǝ mǝnǝ, ɓe mun nnaa ɗeɗes nNaan fun. Ɗeɗes met jir mǝ Nguɓam fun Jesu Kristi zak. 
\v 14 Mbǝ mun ɓe wur shin seen wur mbǝkǝ, wur can mun ɗe nɗǝǝn mbii ɗebish mo jir, kǝ mbǝkǝ wur le mun ɗee ɗe a nen ɗe pǝtuup fun mo a ɗeɓang. Kǝ mun ɗee ɗe a nen wur mo, nen ɗe mo coor cìn mbii ɗeret mo jir.
\p
\v 15 Mbii ɗesǝ mo, a mbii ɗe waa nkám ngurum mo. A cìn ɗak kǝ ram ɗe Naan kǝ shin ngha, mbǝkǝ nghan caa gurum mo ɗe, kǝ nghan gwak mo ɗe zak. Taji a yit kǝ mee gurum ɓák gha kas.
\c 3
\s Tong kǝ Nendǝm nƊang Jesu Mo
\p
\v 1 A lepan nen fwa mo nǝnee, << nǝ ret kǝ mo sham kǝ káa fur mo ndǝr mishkoom mo, kǝ nen ɗe mo kǝ ram jir. Nǝ ret kǝ mo kǝlǝng mo, kǝzak mo tong shi ɗak sut, mbee cìn jir ɗak ɗeɗang ɗe nǝ a ɗeret. 
\v 2 Baa nǝ ret kǝ mo satpwoo ɗebish nkaa mee gurum kas. Taji mo cìn jǝr kas, ɗangɓe mo sham kǝ káa fur mo ndǝr gurum mo jir.
\p
\v 3 Gyet mun shikáa fun, ɓe mun a mwen mo, nenbaashik mo, nen cìn mbii ɗe nǝkan mo. Gyet mun a kǝrem mo, mbee shang mǝ nan ɗesǝ. Pan fun mo jir a ɗebish shidaar-shidaar, kǝ coor mbii gurum mo shi yit ɗebish. Gurum mo cii mun, ɓe mun zak, muu cii mo. 
\v 4 Ɗang kaaɗi Naan, ɗewur a Nguɓam fun, wur kám ɗeret wur kǝ nwalshak wur mmun, 
\v 5 ɓe wur ɓam mun. Ɓam ɗesǝ, baa nǝ a mbee mee mbii ɗeret ɗe muu cìn shikáa fun kas, ɗangɓe a mbee naajeel wur, ɗangɓe wur ɓam mun shi Riin Ɗeɓang. Wur wang pǝtuup fun mo, kǝ mo ɗee a ɗeɓang, kǝzak, wur shin seen ɗepoo mmun. 
\v 6 Wur ɗoo Riin wur nkaa mun nɗǝǝn Jesu Kristi Nguɓam fun. 
\v 7 Mɓe kǝ shi ɗeret wur, ɓe mu ɗee ɗe a nenɗeret mo, kǝ mun kat seen ɗe ngha-ngha, ɗe muu leyit nkaa nǝ. 
\v 8 Pwoo ɗesǝ nǝ azeen. Wen kǝn rǝɓet kǝ nghan sat mbii ɗesǝ mo nen fwa mo shidaar-shidaar, mbǝkǝ nen ɗe mo shinzeen nNaan, ɓe mo lepan fur mo mbee cìn mbii ɗe ndǝre mo shidaar-shidaar. Mbii ɗesǝ mo a ɗeret, kǝzak, mo kǝkoop nǝ mbee gurum mo. 
\v 9 A nok sat mee pwoo ɗebuu taji a watpee buu, kǝ nwun ɗee ntang sǝm puun fuu ɗe mo kǝ murep mo kas. Kaji wu jǝr kǝ shak kas, jir wu ɗee mɓeetshik nkaa Wàar mǝ Mosis mo kas. Mbii kaa mǝnǝ mo sǝ, baa mo kǝ mee koop nǝ kas, jir dǝɓen. 
\v 10 Katɗang mee gwar ɗewur cii kám fwa nǝ, ɓe a gwak wur yit mǝndong, jir yit vǝl, katɗang baa gwar nǝ kǝlǝng gha kas, ɓe a yit wur ɗe. 
\v 11 A man nǝnee, << gurum kaa mǝnǝ sǝ, ɓe pan wur mo jir a ɗebish, a ngushikbish, wur shikáa wur, kǝ ten man nǝ; ɗyin a ɗebish.
\s Pwoo Ɗe Mu Kyes Nǝ Mo
\p
\v 12 Katɗang wen lep a Artimas, a ɗang a Tikikus shidǝm pee gha ɗe, ɓe a gung, kǝ nghan jì a kat nghan ɗe nɗǝǝn Nikapolis, mbǝɗe nghan ntong ɗe, mbe kyes tar kut. 
\v 13 A gung kǝ nghan ɓam Zinas ɗe, ɗewur a nguman wàar mo, kǝ Apolos nɗǝǝn ɗak sut mbee mwaan mmo, mbǝkǝ taji mo kat mee mbii jee kas. 
\v 14 Nǝ ret kǝ nen fun sǝ mo shin sut mbee cìn ɗak ɗeret mbee ɓam nen ɗe mo nɗǝǝn jeel mo. Kaji mo tong buu shi sar ɗe nfii kas.
\s Le Ɗeret
\p
\v 15 Nen ɗe mo ashak kǝ an jir, moo tok kǝ gha. A tok kǝ nen ɗe mo wal mmun nɗǝǝn shinzeen nNaan jir. Naan wur le ɗeret nkaa wun.