\id JAS - Mupun NT
\ide UTF-8
\h Jemis
\toc3 Jem
\toc2 Jemis
\toc1 Pwoo ɗe Jemis ran
\mt1 Pwoo ɗe Jemis ran
\c 1
\p
\v 1 Lepran ɗesǝ nǝ put a nsar Jemis kǝrem mǝ Naan kǝ Daa Jesu Kristi, tokshik mpee nenyil kǝ Naan, ɗe mo a titiit shipee shipee nɗǝǝn yil ɗese.
\s1 Shinzeen kǝ ɗyeen
\p
\v 2 Ɗyemnaa mo, wu chìn retnyit, katɗang wu ɗel nɗǝǝn jwaan mo shini-shini. 
\v 3 Mɓeɗi wu man nǝ, katɗang mo kam shinzeen fuu ni, ɓe nǝn nle kǝ gung fuu nǝ ɗee a ɗeɓal. 
\v 4 Wu yit kǝ gung fuu nǝ sat a nwurang ɗak, mbǝkǝ wun ɗee ɗe a ɗiigǝgam nɗǝǝn mbii mo jir.
\p
\v 5 Katɗang mee gwar nɗǝǝn wun ɗe baa wu kǝ ɗyeen kas, ɓe wu yit kǝ gwar mǝnǝ ɗang pǝ Naan, mbǝkǝ Naan shin ɗyeen ɗe nwur. Naan wur zum zam, wu naa nchin mbii ngurum mo jir, baa wur chakpwo mɓe shin mbii ngurum mo kas. Naan wu nshin ɗyeen mun jir ɗe mo ɗang pǝ wu. 
\v 6 Katɗang mee gwar ɗang mee mbii pee Naan ɗe, ɓe nǝ a tǝng gwar nǝ shinzeen nǝ, Naan wu ncin mbii nǝ nwur. Taji gwar mǝnǝ pan kyetwa nɗǝǝn pǝtuup fǝr kas. Mɓeɗi gwar ɗewur pan kyetwa nɗǝǝn pǝtuup fǝr, ɓe wu ɗee a kaa am ɗe kut kǝ cut nǝ dǝm kǝ ni, koo a pee ɗeɗangyi sǝ. 
\v 7 Mbǝmǝnǝ, ɓe taji gwar mǝnǝ lepan nnǝ, wuɗin nkat mee mbii pǝ Daa ɗe kas. 
\v 8 Gwar mǝnǝ a ngupan mo vǝl-vǝl, kǝ baa wur ɗar a pee mǝndong kas, koo dǝɓen.
\s1 Pwoo nkaa long kǝ jeel
\p
\v 9 Nguso nɗang Jesu Kristi, ɗe baa wu kǝ long kas, ɓe wu chìn retnyit, mɓeɗi Naan kǝ ten shin ɗǝǝɗes nwur. 
\v 10 Nguso nɗang Jesu Kristi, ɗe wu kǝ long, ɓe nǝ ret kǝ wu chìn retnyit zak, mɓeɗi Naan kǝ le kǝ wu sham kǝ káa fǝr. Mɓeɗi gwar mǝnǝ man nǝ, jir kǝ long wu ni, ɓe wur nɗel dǝm kǝlak-kǝlak, a kaa pel mǝ ɗem ɗe nii kǝlak kǝ fii sǝ. 
\v 11 Puus nǝ kàa yaapee nkaa pel mo, ɓe nǝ le kǝ mo fii. Pel nǝ mo ɗong, ɓe men fun nǝ kyes mmǝnǝ vit. Ni aasǝ zak, ɓe ngulong wur muut kaaɗi wu nkaa tang long nǝ ɗikǝ.
\s1 Jwaan ɗe moo jì
\p
\v 12 Ngwar ɗe wu gung jwaan mo, ɓe wu nkat ɗeret. Mɓeɗi katɗang wu se koorong nkaa jwaan nǝ mo jir, ɓe Naan nshin seen nwur, ɗe nǝn nɗee a koppee kǝ kwat ni, kaaɗi Naan wu kǝ ten sat nǝ, wuɗin nshin ngurum mo jir, ɗe mo nwal nwuɗi.
\p
\v 13 Katɗang jwaan kat mee gurum, ɓe taji gwar mǝnǝ sat nǝ, a Naan jwaan wuɗi kas. Baa mee mbii ɗe nǝn mmak jwaan Naan, mbǝkǝ wu chìn mbii ɗebish ɗe kas. Naan shikáa fǝr, baa wu cham jwaan mee gurum, mbǝkǝ gwar mǝnǝ chìn mbii ɗebish ɗe kas. 
\v 14 A shoor ɗebish ɗe nǝ nɗǝǝn pǝtuup gurum, a nii jwaan gurum, mbǝkǝ wu chìn mbii ɗebish mo ɗe. 
\v 15 Kyoor ɗebish ɗesǝ ni, a nii le kǝ gurum chìn mbii ɗebish mo. Katɗang mbii ɗebish nǝ wurang, ɓe peekyes nǝ a muut. 
\v 16 Ɗyemnaa fen mo, taji wu le kǝ mee gurum ngwom wun ɗe kas. 
\v 17 Mbii ɗeret mo, kǝ ɗe azeen mo jir, moo tong a pee Naan jì. Mbii ɗesǝ mo jir, a zuum ɗe moo pwat a pee Naan ɗe, ɗe wu lepuus, kǝ zar mo, kǝ tar nɗǝǝn ɗengnaan. Naan wu shikáa fǝr, baa wur cham sheeɗi kas, kǝ nǝ le kǝ mǝ ɗee ɗe nkòo kas. 
\v 18 A mɓut pan mǝ káa fǝr, ɗang wu naa nǝ ret wun nyit, nɗǝǝn pwoo wu ɗe nǝ azeen, ɓe wu shin seen mmun, mbǝkǝ mun ɗee ɗe a jep ɗenshee mo nɗǝǝn mbii ɗe wu kǝ ten le mo nɗǝǝn yil ɗese.
\s1 Kǝlǝng mbii kǝ chìn ni
\p
\v 19 Ɗyemnaa mo, ɗe wen nwal nwun. Ni ret kǝ wu man mbii ɗesǝ mo, koo a weye, ɓe wu lekom mɓe kǝlingpee kǝlak-kǝlak, ɗang ɓe nǝ ret kǝ koo a weye, ɓe taji wu lappwoo kǝlak-kǝlak kas. Taji mee mbii kǝlak láa nwun mɓut kas. 
\v 20 Ngwar ɗe wu kǝlak kǝ langtuup, ɓe baa gwar mǝnǝ mak chìn mbii ɗe mo ret nNaan nyit kas. 
\v 21 Mɓǝmǝnǝ nghan kǝn sat nwun nǝ, wu baa kǝ mbii ɗebish mo jir nɗǝǝn tong fuu mo. Wu fwo mo sí. Wu chii mbii ɗebish mo jir, wu sham kǝ káa fuu mo ntoom Naan. Wu kǝlǝng pwoo ɗe Naan wu kǝ ten kop nɗǝǝn pǝtuup fuu mo, mɓeɗi a nɗǝǝn ɓal kǝ pwoo wu, ɗangɓe wu mɓam seen fuu mo. 
\v 22 Ɗangɓe nǝ a tǝng ƙǝn wu chìn mbii ɗe pwoo Naan nǝ sat nnǝ wu chìn ni, baa nǝ, wu kǝlǝng a shi kom ɓejee ɗak kas. Nen ɗe mo kǝlǝng pwoo Naan, ɗangɓe baa mo chìn mbii ɗe pwoo nǝ sat nnǝ mo chìn kas, ɓe nen mǝnǝ moo ngwom a sut fur ɓejee. 
\v 23 Katɗang gurum kǝ kǝlǝng a pwoo nǝ ɓejee, ɗangɓe baa gwar nǝ chìn mbii ɗe pwoo nǝ sat kas, ɓe nǝ ɗee a kaa gwar ɗe wu naa shin fǝr nɗǝǝn mbii naayit sǝ. 
\v 24 Ɗe aɓwoon ɗe wu kǝ ten naa shin nɗǝǝn mbii naayit ni, ɓe kaaɗi wu chiir kǝɓwoon mbii naayit ni, ɓe wu chiir muunshik nyit fǝr ɗe wu kǝ naa ni. 
\v 25 Ɗangɓe gwar ɗe wu tap bǝlǝp wàar kǝ Naan, ɗangɓe wu chìn mbii ɗe wàar nǝ mo sat, baa wu kǝkǝlǝng ɓejee kas, ɗe nǝn nle kǝ wu muunshik mbii nǝ mo kas, ɗang ɓe wu tap chìn mbii ɗe wàar nǝ sat, ɓe Naan wu nle ɗeret nkaa gwar mǝnǝ hakyeng. Mɓeɗi wàar kǝ Naan mo a ɗin ndǝre-ndǝre, mo ɓál mɓe chínpee mmun, mbǝkǝ mu ɗee ɗe a mukáa fun. 
\v 26 Katɗang mee gurum leshin a kaa nguso ndang Naan sǝ, ɗangɓe baa gwar mǝnǝ tap kǝ liis fǝr kas, ɓe gwar mǝnǝ ngwom a káa fǝr ɓejee. Mwaan wur ɗe nǝ a mǝ nenɗǝm ndang Naan mo, nǝ ɗee a buu. 
\v 27 Nyit kǝ Naan ɗe wu a puun fun jir, ɓe mwaan ɗe mǝnǝ a mǝ nen mwaan ndang Naan ɗe nǝ azeen-nzeen, ɓe a gwar ɗewur tap kǝ lukáa mo, kǝ matkaa mo, ɗe mo nkaa shwaajeel, kǝzak, gwar mǝnǝ tap kǝ káa fǝr, mbǝkǝ taji mbii ɗebish mǝ yil ɗesǝ mo ngwom wu, kǝ mo le kǝ wu cìn shikbish kas.
\c 2
\ms Naan wur nwal mun nchiit-nchiit jir
\p
\v 1 Ɗyemnaa fen mo, kaaɗi wun a nyemcínzeen nɗǝǝn Daa fun Jesu Kristi sǝ, ɗe wu a ɗǝǝɗes met jir, ɓe taji wu bakyit ngurum mo kas. 
\v 2 Katɗang mee gwar jì ɗel nɗǝǝn kuur fuu kǝ kawan mǝ zinariya nkaa nǝkongsar fǝr, kǝ nlǝr ɗeret mo, ɗang kat mee ngujeel jì ɗel nɗǝǝn kuur fuu, kǝ goklee. 
\v 3 Katɗang wu tap wu kaat gwar ɗe wu loplee ɗeret sí, kǝ wu sat nwur nǝ, a jì a tong a peetong ɗeret sǝ, ɗang ɓe wu sat ngujeel nǝ nǝnee, waa ɗar sǝ, koo wu sat nwur nǝ, a tong nyil mpesi nder shii fen. 
\v 4 Katɗang wuu cìn mbii kaa mǝnǝ sǝ, ɓe wu cìn a shikbish. Wuu baakyit ngurum mo nnaar fuu, ɓe wu ɗee a nentokɗyeel mo, shi pan ɗebish mo. 
\v 5 Ɗyemnaa mo, ɗe wen nwal nwun, wu lekom, Naan wur bǝlǝp a nenjeel mo nɗǝǝn yil ɗese, mbǝkǝ mo shinzeen ɗe nDaa Jesu Kristi, kǝ mbǝkǝ mo kat mulki/ɗehai ɗe gyet Naan wu kǝ ten sat nnǝ, wuɗin ncin nenyil ɗe mo nwal nwuɗi mo. 
\v 6 Ɗangɓe wun, wu bakseen nenjeel nǝ mo. A nenlong moo seen a wun, ɗangɓe mo dul wun dǝm kǝ nǝ nluɗiyeel. 
\v 7 Kǝ, a nenlong nǝ moo satpwoo ɗebish nkaa sim ɗeret, ɗe Naan wur le kǝ mo pet wun ɗishik, kaa nen fǝr mo sǝ zak.
\p
\v 8 Katɗang wu fes wu gam wàar, ɗe nǝ put a pee Naan ɗe azeen-nzeen, ɗe mo kǝ ten ran nǝ nɗǝǝn ɓǝǝt haal Naan nǝnee: <<<<A nwal ngǝnang fwaa kaa sak fwaa sǝ.>> <<Ɓe wu cìn a mbii ɗeret hakyeng.
\m
\v 9 Ɗangɓe katɗang wuu shin ɗǝǝɗes ngurum mo, a shi baakyit, ɓe mon nkat wun a ɗebish, mɓeɗi wu tep wàar Naan. 
\v 10 Koo ɗang ɗe gurum gam wàar Naan nǝ mo jir, ɗang ɓe wu taa kat nɗǝǝn memee mǝndong ɓejee ɗak, ɓe wu kǝ ɗee a ɗiipǝpal ntom Naan mɓut kor wàar nǝ mo jir. 
\v 11 Ngwar ɗe wu sat nǝ: <<<<Taji wu chìn ngaa kas, <<kǝ <taji wu tukáa kas.> >>
\m Ɗangɓe katɗang mee gwar tukáa, ɓe gwar mǝnǝ kǝ tep wàar Naan nǝ mmǝnǝ, koo ɗe baa wu chìn ngaa kas, ɓe nǝ ɗee nǝ, gwar mǝnǝ taa pal nɗǝǝn mbii ɗe Naan kǝ ten sat nnǝ taji wu cìn kas.
\p
\v 12 Mbǝmǝnǝ, ɓe nghan kǝn sat nwun nǝ, nɗǝǝn mbii mo jir, ɗe wuu sat, kǝ ɗe wuu cìn, ɓe taji wu muunshik nǝ, a Naan wun ntokɗyeel mmun shi wàar fǝr, ɗe nǝ chínpee mmun, kǝ mǝ ɗee ɗe a mukáa fun mo.
\p
\v 13 Katɗang mee gurum chii naajeel niyee mo, ɓe Naan wu nchii naajeel ngwar mǝni, parɗi Naan wu ntokɗyeel ngwar mǝnǝ zak. Ɗangɓe naajeel kǝ Naan nǝ se koorong nkaa ɗiyeel.
\ms Shinzeen ɗe baa nǝ kǝ ɗak kas
\p
\v 14 Ɗyemnaa mo, katɗang mee gurum sat nǝnee, wuɗi shinzeen nNaan, ɗang ɓe, baa wur chìn ɗak ɗe Naan sat nnǝ mǝ chìn mo kas, ɓe baa shinzeen mǝnǝ kǝ mee kwoop nǝ kas. Chinarang ɗangɓe shinzeen mǝnǝn mɓam wu ye? 
\v 15 Katɗang ɓe, mee ɗyemnǝǝn ɗemish koo ɗe mat, baa mo kǝ leelop, koo mbiise kas. 
\v 16 Ɗangɓe wu sat nwur nǝ, <<A seet ryang, Naan le kǝ a kat mbiise kǝ leelep mo zak.>> Ɗangɓe baa wu shin leelep, koo mbiise nwur kas, ɓe kwoop mǝnǝ a meye? 
\v 17 Ni aasǝ zak, kǝ shinzeen ɗe baa nǝ ashak kǝ ɗak kas, ɓe nǝ a ɗiimumuut. 
\v 18 Ɗangɓe mee gurum mmak sat nǝnee, <<Mee gwar kǝ shinzeen, kǝ memee kǝ chìn ɗak ɗeret mo,>> Wen nlap gwar mǝnǝ a nǝnee, <<A kám shinzeen kǝ mee gurum nghan, ɗe baa nǝ ashak kǝ ɗak kas ɗe! Ɓe wen nkám shinzeen fen ngha, shi ɗak fen mo.>>
\p
\v 19 Waa shinzeen nǝ, Naan ɗe azeen, wu a mǝndong, kaaɗi a sat aasǝ, ɓe nǝ ret. Ɗangɓe koo a riin ɗebish mo, ɓe mo shinzeen nǝ, Naan wu a mǝndong, ɗangɓe kǝǝrmuut kǝ yaa mo, kǝ moo ɗaar zak. 
\v 20 Waa mwen, baa a man nǝ, katɗang gurum shinzeen nNaan, ɗangɓe baa gwar mǝnǝ kǝ chìn ɗak ɗeret kas, ɓe shinzeen fǝr nǝ ɗee a buu mmǝnǝ kas aa? 
\v 21 A yee puun fun Abraham, gyet a me le ɗangɓe Naan naa Abraham kaa gwar ɗe ɗeret sǝ ye? A mɓe ɗe gyet wu mang làa fǝr Aizik, mbǝkǝ wu shin mbiizuum ɗe nNaan, kaaɗi gyet Naan kǝ ten sat nnǝ wu chìn sǝ. 
\v 22 Ni agaak nǝ, gyet nɗǝǝn tong Abraham, ɓe shinzeen, kǝ chìn mbii ɗeret mo, moo set a ndangshak. Mbii ɗe gyet wu chìn ni, nǝ gam shinzeen nwur. 
\v 23 Ni gam mbii ɗe gyet mo kǝ ten ran nǝ nɗǝǝn ɓǝǝt haal Naan sǝ nǝnee: <<<<Abraham wu shinzeen nNaan, mpeemǝnǝ ɓe <<Abraham wu ɗee a gwar ɗe ɗeret nyit <<Naan.>>
\m ɗang gyet gurum moo pet wu a shaar Naan. 
\v 24 Yaksi ɓe gha naa agaak nǝnee, a nɗǝǝn ɗak ɗeret ɗe gurum kǝ cìn, ɗangɓe gurum kǝ mak ɗee a ɗeret nyit Naan, baa a shinzeen nNaan ɓejee ɗak kas.
\p
\v 25 Ni aasǝ zak Rahab, mat ngaa sǝ, gyet waa lap nyemcoghol mo, kǝzak, gyet waa tap bwet mo a mee ar ɗiiɗik. Baa gyet a mɓe ɗak ɗeret ɗese, ɗangɓe waa ɗee a ɗeret nyit kǝ Naan kas aa? 
\v 26 Ni aasǝ zak, kat baa riin kuɗi nɗǝǝn gurum kas, ɓe gwar mǝnǝ ɗee a kúm nǝ. Aasǝ, shinzeen nɗin nchìn ɗak ɗeret mo, ɓe nǝ a ɗiimumuut zak.
\c 3
\ms Gurum tap kǝ liis fǝr
\p
\v 1 Ɗyemnaa mo, taji gurum mo ɗes mo ɗee a nenkám mo kas. Wu man nǝnee, ɗyeel ɗe Naan wu ntok nǝ mmun nenkám mo, ntoon met mǝ kor gurum mo. 
\v 2 Mun jir muu ɗel ɗikǝ. Katɗang baa mee gwar ɗe wu ɗel ɗikǝ nɗǝǝn leeshaap kas, ɓe gwar mǝnǝ a ɗin ɗeret, wu mak yaashin nɗǝǝn mbii mo jir. 
\v 3 Wu pan shool bǝring ɗe muu lep nǝ mbǝring mo mpwo. Katɗang mǝ rǝɓet kǝ mo chìn mbii ɗe muu rǝɓet, mǝ mak dul teng shool bǝring ni, mǝ dǝm kǝ nǝ mpee ɗe muu rǝɓet kǝ bǝring nǝ dǝm ɗe. 
\v 4 Wu naa jirgi am mo, koo ɗe mo ɗes zam, ɓe kut ɗǝǝɗes mak mang mo dǝm kǝ ni, ɗang ɓe jir kǝsǝ, ɓe ngutung nǝ wur shin ciir kǝ nǝ a shi rep mee làa sitiyari dǝm nkwang ɗewur rǝɓet dǝm ɗe. 
\v 5 Ni aasǝ zak, liis nǝ a rep memee nɗǝǝn ɓeep ɗe nǝ nɗǝǝn fwoshik fun mo, (nǝ kǝ ɓal nɗǝǝn seen kǝ gurum) nii canjagham ɗǝǝɗes nkaa mbii mo. Wu man nǝ, a rep wus ɗiidiɓen kǝ caan lǝhǝt ɗǝǝɗes. 
\v 6 Liis fun nǝ a kaa wus sǝ. Mbii ɗebish moo tong a ɗe, mbii ɗebish ɗesǝ nǝ mo, mo mak mwaan dǝm koo a pee ɗeɗangyi nɗǝǝn ɓeep fun mo, ɗangɓe nǝ wat gurum. Liis nǝ mak lewus lap, ɗe nǝn ncaan seen kǝ gurum hakyeng. Yaa nkaaɗi gurum ɗe a làa, ɗangɓe parmuut fǝr, har dǝm nluwus ɗe Naan kǝ ɗak nǝ mɓe nenshikbish mo. 
\v 7 Gurum kǝ mak yaa koo a luwayil ɗeɗang ye, kǝ nǝ jì ɗee kaa longlu sǝ, har koo a nyer mo, kǝ luwa ɗe moo mwaan shii ɓut mo, kǝ luwa ɗe mo nɗǝǝn am mo. Luwa mo jir, ɓe gurum kǝ ten le mo ɗee nder fǝr. 
\v 8 Ɗangɓe baa mee gurum kǝ cham fwang liis kas. Ni a mee mbii ɗebish ɗe pǝder chíi yaa nyil nǝ. Ni gam kǝ yen ɗe nǝ a mǝ muut. 
\v 9 Muu chìn ɗak kǝ liis, mbǝkǝ mun kwoop Naan ɗe wu a Daa, kǝ puun fun, kǝzak muu waa mu chiir mu satpwoo ɗebuu nkaa gurum mo kaa mun sǝ a shii liis. Gurum ɗe Naan wu le mo kaa shin fǝr sǝ. 
\v 10 Pwoo mǝ kwoop, kǝ pwoo mǝ fǝleep, moo pwat a nɗǝǝn pwoo ɗemǝndong. Ɗyemnaa mo, mbii kaa ɗesǝ sǝ, baa nǝ ret kas. 
\v 11 Baa am ɗiiɗeet kǝ ɗiishang mon mmak put a mɓut tuɓut ɗemǝndong kas. 
\v 12 Ɗyemnaa mo, baa tingkeen ncham làa paat kas, kǝzak, baa nǝn mmak chìn kǝ mo kat am ɗeret nɗǝǝn tuun ɗemǝndong ashak kǝ am ɗebish kas.
\ms Seen ɗe Naan shin mmun
\p
\v 13 A wii a gwar ɗe wu kǝ seen, kǝ wur man mbii mo nɗǝǝn wun ye? Ɓe nǝ ret kǝ wu kám nǝ agaak shi mwaan fǝr ɗeret, kǝ shi ɗak fǝr ɗeret mo, ɗe wu cìn mo nɗǝǝn seen, kǝ sham kǝ káa fǝr zak. 
\v 14 Ɗangɓe katɗang pǝtuup fuu mo gam aa zuur ɗiiɗeet, kǝ rɨɓetkáa, ɓe baa nǝ ret kǝ wu canjagham, kǝ wu chìn ɗung nkaa zeen nǝ kas. 
\v 15 Kiyeet kǝ seen ɗe nii cìn mbii ɗesǝ mo, ɓe baa nǝ tong a pee Naan sham ɗe kas, ɗang ɓe nǝ a mǝ yil44 ɗǝsi. Baa Riin Naan ɗe nɗǝǝn nǝ kas, ɗang ɓe nǝ put a pǝ ngujwaan jì ɗe. 
\v 16 Koo a pee ɗeɗang ye, ɗe zuur, kǝ rǝɓetkáa mo ɗe, ɓe ɓwanbish, kǝ watpee, kǝ mbii ɗebish mo jir moo tong a mpee mǝni. 
\v 17 Ɗangɓe gwar ɗe wu kǝ seen ɗe nǝ tong a pee Naan sham ɗe, ɗenshee ni, ɓe gwar nǝ a ɗin ɗeret, kǝ nii jì kǝ tongryang, nii le kǝ gurum mo chìn mbii nɗǝǝn ɗyen ɗeret, baa nii le gurum mo ɗee a nyemciishik mo kas. Nii le gwar mǝnǝ ɗee a ngutap kǝ niyee mo, kǝ shidaar-shidaar ɓe wur naa nchìn ɗak ɗeret mo, niyee mo. Pǝtuup kǝ gwar mǝni, baa nǝn cham chiir kas, kǝzak, baa wur chìn ɗung ngurum mo kas. 
\v 18 Ɗiiret, a nǝ a mbii ɗe nen ɗe moo kop cirem mǝ tongryang nɗǝǝn pǝtuup kǝ gurum mo, mon nɗiip ni.
\c 4
\ms Wu lekáa fuu mo nsar Naan
\p
\v 1 A me moo jì kǝ lek, kǝ jǝǝr nwun ye? Wuu lek kǝ shak, a mɓeɗi choor ɗebish mo nkaa lek nɗǝǝn pǝtuup fuu mo. 
\v 2 Wuu choor mbii mo, ɗang ɓe baa wuu kat kas, mpeemǝnǝ, ɓe wuu tukáa. Wuu chìn zuur kǝ mbii mo, ɗang ɓe baa wu kat kas, mpeemǝnǝ ɓe wuu jǝǝr kǝ shak. Wuu lek kǝ shak zak. Baa wu kat mbii ɗesǝ mo kas, a mɓeɗi baa wu ɗang mo pee Naan ɗe kas. 
\v 3 Mmee naar ɓe wuu ɗang pee Naan ɗe, ɗang ɓe baa wu kat kas, a mɓeɗi wuu ɗang mo a nɗǝǝn ar ɗebish. Wuu ɗang mo a mbǝkǝ wu tu ɗe nɗǝǝn ar ɗe nkan, ɗe mo a mǝ shoor kǝ nan fuu mo. 
\v 4 Wun a kaa mat ɗe moo chìn ngaa sǝ. Wu man nǝ, katɗang gurum kǝ rǝɓet ɗee a shaar mǝ yil ɗese, ɓe gwar mǝnǝ kǝ rǝɓet ɗee a shaarlek Naan. Mbǝmǝnǝ, koo a weye, ɗe wu rǝɓet ɗee a shaar mǝ yil ɗese, ɓe wu leshin ɗee a shaarlek Naan mmǝnǝ. 
\v 5 Wu pan nǝ, pwoo ɗe mo kǝ ten ran nǝ nɗǝǝn ɓǝǝt haal kǝ Naan, nǝn nɗee a buu aa? Ɗe mo ran nǝ: <<<<Riin ɗe Naan wu le nɗǝǝn pǝtuup fuu mo, <<nǝ gam kǝ zuur hakyeng.>>
\m
\v 6 Ɗangɓe ɗeret ɗe Naan wu shin mmun, nǝ ɓal met choor ɗebish ɗe mo nɗǝǝn pǝtuup fun mo. Ni a kaaɗi mo kǝ ten ran nɗǝǝn ɓǝǝt haal Naan sǝ nǝ: <<<<Naan wu chii nyemroop mo, <<ɗang ɓe wu chìn ɗeret nenyil ɗe mo sham kǝ káa fur mo.>>
\m
\v 7 Mbǝmǝnǝ, wen kǝn sat nwun nǝ, wu sham kǝ káa fuu mo ntoom Naan. Wu chii ngujwaan, ɓe wun nsu yit wun ɗe. 
\v 8 Wu jì kus kǝ Naan, ɓe Naan wu njì kus kǝ wun zak. Wu vwang sar fuu mo, wun nenshikbish mo. Wun nen ɗe wun kǝ pǝtuup mo vǝl-vǝl, wu pwat kǝ mbii ɗebish ɗe mo nɗǝǝn pǝtuup fuu mo, kǝ wun ɗee ɗe a ɗeɓang. 
\v 9 Ni ret kǝ wu kat pǝtuup ɗewuwat, kǝ wu nwal mɓe shikbish ɗe wuu ten wu nchìn mo. Wu yit kǝ shwar fuu mo chiir ɗee a maap, kǝ retnyit fuu mo ɗee a mbii wàt pǝtuup. 
\v 10 Wu sham kǝ káa fuu mo ntoom Naan, ɓe wun nɗyeep wun zak.
\ms Taji wu tokɗyeel nshak kas
\p
\v 11 Ɗyemnaa fen mo, taji wu leeshaap ɗebish duk shak kas, koo a weye ɗewur leeshaap ɗebish nkaa ɗyemnǝǝn fǝr, koo tokɗyeel nwur, ɓe gwar mǝnii katpwoo ɗebish a nkaa wàar nǝ. Kǝ wur ɗee a ngutokɗyeel nkaa nwàar nǝ zak. Ɗangɓe katɗang mee gurum tokɗyeel wàar ni, ɓe baa gwar mǝnǝ cìn mbii ɗe wàar nǝ sat kas, ɗang ɓe wu leshin a ngutokɗyeel mmǝnǝ. 
\v 12 A Naan ɓishin, ɗewur shin wàar ngurum, kǝ a wur ɓishin, ɗewur ntokɗyeel ngurum mo jir. A wur a ɗewur kǝ ɓal mɓe ɓam gurum mo, kǝ wur kǝ ɓál mɓe le kǝ gurum mo muut zak. Waa a weye ɗe aa tokɗyeel ɗyemnǝǝn fwaa ye?
\ms Taji wu canpo nkaa daɗaar kas
\p
\v 13 Wu kǝlǝng pwoo fen, wun nenyil ɗe wuu sat nǝ, <<Ɓit bang, koo ɓitsi, ɓe mun nyool mɓít-mɓít kǝ mǝ dǝm nɗǝǝn bǝrnǝ ɗesí, kǝ mǝ hos ɓit ɗe, kǝ mǝ cìn nwor, kǝ mǝ kat shool ɗe.>> 
\v 14 Ɗangɓe wun shikáa fuu, baa wu man mbii ɗe nǝn ncìn daɗaar kas. Seen fuu nǝ a kaa me sǝ ye? Seen fuu nǝ mo a kaa vuun sǝ, ɗe nǝ jì put, amma nɗǝǝn rep pee lee, ɓe nǝ ɗel dǝm loom. 
\v 15 Amma nǝ ret kǝ wu sat a nǝnee, katɗang Naan rǝɓet kǝ, katɗang ɓe mun ɗe kǝ seen, ɓe mun ncìn mbii ɗese, koo ɗesí. 
\v 16 Har yaksi, wuu sat a ɗiyeepkáa ɗak, kǝ wuu sat a canjagham ɗak. Kiyeet kǝ canjagham ɗese, baa nǝ ret kas koo dǝɓen. 
\v 17 Koo a weye ɗe wu man mbii ɗǝ nǝ ret kǝ wu cìn, ɗang baa wur cìn kas, ɓe gwe mǝnǝ cìn a shikbish mmǝnǝ.
\c 5
\ms Nenlong mon nshwaajeel
\p
\v 1 Wu kǝlǝng nghan yaksi, wun nenlong mo. Ni ret kǝ wu nwal kǝ maap mɓe jeel ɗe mo mbǝ jì nkaa wun. 
\v 2 Long fuu nǝ mon nɗee a ɗiiwam, kǝ ndukup mon nse nlǝr fuu ɗeret nǝ mo. 
\v 3 Azurfa, kǝ zinariya kǝ shool fuu nǝ mon nnaatnjileng. Naatnjileng kǝ shool fuu ɗǝsi nǝ mo, mmo ɗee a mbǝǝkám nǝnee, kaaɗǝ shool fuu ɗǝsi nǝ mon nnaatnjileng sǝ, ɓe nan fuu mon ncaan a kaaɗǝ wus kǝ caan mbii mo sǝ zak. Wuu sok long fuu mo yaksi, ntiit kǝ ɗǝ yil nǝ kus kǝ kyes. 
\v 4 Wuu cìn ɗung nenyil ɗe moo cìn ɗak nɗǝǝn maar fuu mo, wu chii kwat mo nchiit-nchiit kǝ ɗak ɗe mo cìn nwun. Mbǝmǝnǝ, ɓe moo nwal pee Daa Naan ɗe, mbǝkǝ wur ɓam mo ɗe. Yaksi, wal fur nǝ kǝ wul nkom Naan ɗe a wur kǝ mbii mo jir nsar fin. 
\v 5 Wuu ten wu tong nɗǝǝn long mǝ yil ɗǝsi, kǝ wuu ten wu cìn mbii ɗe wu naa nǝ ret nwun nyit. Wuu ɗak suk, kǝ wu mwaal kaa randong ɗe moo gong parpuus ɗe mon nfet mo sǝ. 
\v 6 Wuu tokɗyeel ɗebish nkaa nen ɗe baa mo cìn mee mbii ɗebish kas. Wuu twe nen ɗe baa di mmo mak ɓam sut kas.
\ms Gung Kǝ Cìn Aduwa
\p
\v 7 Mbǝmǝnǝ, ɗyemnaa mo, an kǝn sat nwun nǝnee, wu gung har parɗi Daa Jesu Kristi wu mbaajì nɗǝǝn yil ɗǝsi. Wu yee nenmaar mo, wu naa kaaɗǝ moo gung ɗe sǝ, moo gongpee, kǝ moo tap kǝ maar fur mo, har parɗi fwan jì wul, kǝ parɗǝ ɗǝǝp ɗǝɓen nǝ jì wul zak. 
\v 8 Ni ret kǝ wun, wu gung kaa nenmaar mo sǝ. Wu ɗak pǝtuup fuu mo, kǝ wu ɗar ɓalɓal, mɓeɗǝ puus ɗǝ Jesu Kristi wu mbaajì nǝ wul kus. 
\v 9 Ɗyemnaa mo, taji wu leeshaap nɗoom-nɗoom nkaa shak kas, mbǝkǝ taji mo tokɗyeel nwun kas. Wu naa, ngutokɗyeel nǝ wur ɗar kus. 
\v 10 Ɗyemnaa mo, wu yee nensatpwo Naan ɗe gyet yam sǝ mo. Gyet mo satpwoo nɗǝǝn sim Naan, mo shwaajeel, amma jir kǝsǝ, ɓe gyet mo gung nɗǝǝn shwaajeel nǝ. Ni ret kǝ wun, wu gung nɗǝǝn jeel nǝ kaaɗǝ gyet mo gung sǝ. 
\v 11 Muu sat nǝ, mo a nenyil ɗǝ mo kat retnyit, mɓeɗǝ gyet mo gung har peekyes nǝ. Wu man pwoo nkaa gung kǝ Joob, kaaɗi gyet kam nǝ jì taa nkaa wu sǝ. Wu man zak nǝnee, gyet Naan le kǝ shwaajeel kǝ Joob nǝ waa jì kǝ ɗeret nwur. Azeen - nzeen Naan wur kǝ pǝtuup ɗeret mɓe mun jir, kǝ wur naajeel nenyil fin mo zak. 
\v 12 Ɗangɓe mee mbii ɗǝ nǝ met koor nǝ mo jir, ɗyemnaa mo. Taji wu tweer shi ɗengnaan, koo shi yil ɗǝsi kas. Taji wu cìn tweerpwo, koo shi sim mee mbii kas. Ɗangɓe wu yit kǝ ii, fuu mo ɗee a ii, kǝ waash, fuu mo ɗee a waash, ɓejee ɗak, mbǝkǝ taji mo tokɗyeel ɗebish nwun kas. 
\v 13 Katɗang memee nɗǝǝn wun nkaa shwaajeel, ɓe nǝ ret kǝ wu cìn aduwa nNaan. Katɗang memee nɗǝǝn wun kat retnyit, ɓe wu yit kǝ wu kwoop Naan. 
\v 14 Katɗang memee nɗǝǝn wun, ɗe baa wur nkoom kas, ɓe wu yit kǝ wur pet nennan mǝ (Ekǝlisya) nen mwaan ndang Naan mo, mbǝkǝ mo cìn aduwa ɗin nNaan mɓe wur. Katɗang mo ɗoom cìn aduwa ni, ɓe mo pwes mwoor nkaa wur nɗǝǝn sǝm kǝ Daa. 
\v 15 Aduwa ɗǝ gurum moo cìn nǝ a shi zeen azeen-nzeen, ɓe nǝn nle kǝ nguchiinkom nǝ wu bar. Naan wu nle kǝ nguchiinkom nǝ kat koom hakyeng; kǝ katɗang nguchiinkom nǝ wur kǝ cìn shikbish, ɓe Naan wur nfwo shikbish nǝ mo nwur zak. 
\v 16 Mbǝmǝnǝ, nghan kǝn sat nwun nǝ, wu woo shikbish fuu mo nshak, kǝ wu cìn aduwa mɓe shak zak. Mbǝkǝ wu kat koom ɗǝ nɗǝǝn shwal fuu mo. 
\v 17 Gyet, Ilaija wu a gurum kaa mun sǝ, ɓe wur cìn aduwa azeen-nzeen, mbǝkǝ taji fwan jì kas. Ɓe aduwa ɗe gyet wu cìn ni, ɓe mɓe ɓit ƙen an kǝ kaghar, ɓe baa fwan jì kas. 
\v 18 Mɓwoon mǝni, ɓe wu waa cìn aduwa zak, mbǝkǝ fwan jì ɗe, ɓe Naan le kǝ fwan nǝ jì, nyil nǝ lok, har mbii mo yaa kàa.
\p
\v 19 Ɗyemnaa mo, katɗang memee nɗǝǝn wun taa mer nɗǝǝn ar ɗǝ nǝ a mǝ zeen ni, ɓe nǝ ret kǝ memee fuu mo fwang wu waaji kǝ wur ɗe, nɗǝǝn ar ɗǝ nǝ a mǝ zeen nǝ. 
\v 20 Nǝ ret kǝ wu man nǝ, koo a weye, ɗǝ wur waaji kǝ mee ngushikbish nɗǝǝn ar ni, ɓe gwar mǝnǝ ɓam seen kǝ ngushikbish nǝ nɗǝǝn muut, kǝzak, ɓe gwar mǝnǝ le kǝ Naan wur nfwo shikbish ɗe mo ɗes ngwar ni.