\id REV NT0004.RE Suena NT Wilson dp transfer 11-JUN-87 
\h Kereninua 
\toc1 NENA AMA KEI AWAMUNOYA AWA YOHANE MENI KERENINUA 
\toc2 Kereninua 
\mt1 NENA AMA KEI AWAMUNOYA AWA YOHANE MENI KERENINUA  
\ip \it Yohane meni gutu zo zazo Patimos amira benai sora itago inoise atua ine wero itinu Yesu meni nena eure-taure numore kereninu ginua. Are Tuara dubu meni iwo soe noise zewai wero Tuara ge ziro tata-tata inoise nuarise sero Yohane meni ge ei awa gaenua. Yesu meni iwo nuso dapikarago puro osero baitiro Satan dai puro osamunoya. Ago wero amire dubu nusore nena ewa-gaewa potamunoya. Susu awa ge emi kerenitinoya. Noko tani eni ama zebura ena kei awamunora awa dai ge emi kerenitinoya. \it*  
\c 1  
\p
\v 1 Nena Yesu Kristo meni kereninua amira uge.  
\p Nena be apunu-kakana kei awamunoya awa dubu nuso namorekai kerenaise Anutu meni Yesure gipenua. Are Yesu meni kerenamu sero angelo zo iyetinu na bua mai nuso Yohane naso nana muro sero gipero awenua awa.  
\v 2 Ago wenu nane nena gina. Are Anutura ge ata Yesu Kristora ge ninina awa ge me memeka asinona.  
\v 3 Ge emi nena ama kei awamunoya amira ge awa. Are zo nu ge gayai ei awa kereniro pena-pana azimamunoya, nu ata azipitinuai eni meni niniro dube potiro dimamunora, nukare ami yawa sara warise. Nera kota, ge emi me waira be nuso zora awinoya.  
\v 4-5 Na Yohane meni Tuara dubu 7 Asia zebura itewewa nimorekare ge ei awa gainona.  
\p Anutu, nu gita itisonua, itewia, itamunoya, ata Ozana 7 nuso nana benaura itewera, ata Yesu Kristo nu Anutura ge sai ema me, o nu gita betaira ena erinua, o nu zebura ema tua amira giti kopi wero nowia, nukare Anutu Mama, Mai, Ozana amira nana ena dumi yagabare duba-ozaire meni semu nisokare nana niro itaise.  
\p Nu namorekai dubara dumi pupinowia. Noko orara nuso meni pasina nasokai disenua.  
\v 6 Ago wero dubu nuso wanisekai sero pumunua. Awa Anutu Mama nuso amira pris dubu wanisekai ago wenua awa. Are zazo bamure putoure nuso nana itai gege itewia. Iyo.  
\v 7 Ei giu! Nu berezere dai tupiai ema bamubamu ami giti moka nusokare meni gamunora. Nukare nu gaewa ami dai nu gamunora. Ema dubu giti ami numore duba naire di saire wamunora. Ge awa me memeka awa.  
\v 8 Tua Anutu putoure nu itisonua, itewia, itamunoya ami ego toya awa, “Na nena zaawaira ata tepo waira mama.”   
\s1 Yohane meni atua wago inoise Emara Mai ginua.  
\p
\v 9 Na gera otao nisokare Yohane ami Yesu nana susumuro nimorekare dai iwora tame wititinoise Anutura nuai seka puro noise zewai wero nowena. Na Anutura ge ata Yesura ge uge awa tugata inoina giro na puro beniro gutu zazo Patimos amira potiwa itisona awa.  
\v 10 Ago itina Tuara pura kei awenu Ozana meni duba naso pumunu naso nana atune ena ge awi zo so meni sago wenu ninina awa.  
\v 11 Ge ego ine kei awenua awa, “Nena gosinosa awa bukura gaero potiyo dubu naso 7 ego emira nana bayae: Efeso natara ata Semena natara ata Pegamam natara ata Tayataira natara ata Sadis natara ata Filadefia natara ata Leodisia natara.”  
\v 12 Ema ge namore toinua awa gamu sero ewesemuna awa. Ewesemuro damanara dapai susu 7 gol meni wai awa gina.  
\v 13 Damanara dapai susu amira soe ena nena zo awa benau Emara Maira ine ami dopero itinu gina. Nu tama woi iboi-tatana wosunai, ota ami susura ena ipu gei gol meni wai awa diai.  
\v 14 Giti benau nusore giti ture kapa me kapawai, wo sipsipra tama tu ine, ota poraga ine; giti moka nuso awa niao awero wuru-wuru inowia ago ine awa;  
\v 15 te nuso awa aen niaora awinoise kaewa inowia ago ine awa; ota ge nusora awi meni awa ou bamu urugu-urugu toise ge towia ago ine.  
\v 16 Wana me nuso meni kuna 7 awa ziro dopenua; ota be so nusora ena bogi waira kasiwa zo di enibare enibare dire-dare kei awenua; ota benaure giti moka nusore meni awa waiko zewai-zawai zasi-karasipitinowia ago ine zasimunua awa.  
\v 17 Nama ititi nuso ago giro duro te nusora zorage betero itago wena. Itina nu wana me nuso meni naso nana tame potiro ego senua awa, “Ni azu oko wase! Na nena zaawaira ata tepo waira mama awa.  
\v 18 Na nuaira mama. Nama betero seka zina ami nuai gege nowena nuamunona. Ago wero betai ata betai nata amira s be nusotora ki awa nane puro nowena.  
\v 19 Are ni nena gesa awa ata nena zeme zemeke kei awinoya amire nena ama kei awamunoya amire awa dapikarago gaero tepo weyo.  
\v 20 Are wana me nasora kuna 7 gesa ata damanara dapai susu 7 gol meni wai gesa awa nena bezai awa. Are amira susu sana nini. Kuna 7 awa dubu 7 amira angelo nusokare awa. Ata damanara dapai susu 7 awa dubu 7 awa.”   
\c 2  
\s1 Tuara dubu Efeso nate noisowa amira ge.  
\p
\v 1 Yesu meni ago sero ge susumuro namore ego senua awa, “Dubu naso Efeso nate nowera amira angelore* ge ego gaero potiyo bayae: Kuna 7 wana me naso meni puro dopinoise damanara dapai susu 7 gol meni wai amira soe muro baro awinowena ami nimorekare ego tona:  
\v 2 Na wai nisokare gosinowena. Bua bamubake inowewa ata berea tepo zewai inowewa amira susu awa gosinowena. Ninekare ema waya-kawaya awa gawewa waya inowia. Noko ema eni meni opi toise nutopekare “Nakare aposolo” asinowera, amira opi nusokare niniwa kei awenu nukare opi sai ema awa giwa.  
\v 3 Ago wero putoure dai noise na emo wero iwora tame timara tepo nowewa, awa gosinona.  
\v 4 Ata na nena ego emira nimorekare gawena waya inowia awa: Nikare gita na yaba bamu inoisowa awa doro nowewa.  
\v 5 Are nikare amira kotumuro duba nisokare kapeteniro eba nisokare matu awa noko patiwo. Ago kaka wamu wawa giro na nisokare nana kei awero damanara dapai susu nisokare pumuro demese potamunona. Duba nisokare kaka kapetenamu wawa giro ago ine wamunona.  
\v 6 Ota susu zo meni awa wawewa gawena te inowia: Nikola awisore pasina inowera amira iwo inowewa, na da ago ine inowena awa.  
\v 7 Ozana meni Tuara dubure ge toya awa danare meni niniro baitarise. Zo numa Satanre bogi inoise pugeu wamunoya na numore nuai me ewanana amira ni me awa potana namunoya awa. Ni me awa zanatiaira masi zazo Paradais Anutu meni potinua amira kei awinowia awa.   
\s1 Tuara dubu Semena nate noisowa amira ge.  
\p
\v 8 Dubu naso Semena nate nowera amira angelore ge ego gaero potiyo bayae: Na nena zaawaira ata tepo waira mama. Na betero seka ziro erina ami nimorekare ego tona ewa:  
\v 9 Nikare iwora mokara bogamasa nowewa, awa na gosinona. Ata wau nisokare itia. Ota ema eni meni nutopekare “Nakare Yuda ema” asinoise ge waya nimorekare towera, awa ninitinona. Nukare Yuda ema me oko aewa. Nukare Satanra ema dubu awa.  
\v 10 Be apunu-kakana yaya-buyaya nisokare nana kei awamunoya, amira azu oko wawe. Satan meni nikare gaero gamu sero nisokare nana eni benai sora potamunoya awa. Ago wai nisokare nana waiko be 10* amira mokara ena iwo kei awamunoya awa. Are nikare zewai wero ge naso puro noma betawa na nuai me nimorekare potamunona.  
\v 11 Ozana meni Tuara dubure ge toya awa danare meni niniro baitarise. Zo nu Satanre bogi inoise pugeu wamunoya, nu awa betai namba tu meni oko gera wamunoya. Tepo awa.   
\s1 Tuara dubu Pegamam nate noisowa amira ge.  
\p
\v 12 Dubu naso Pegamam nate nowera amira angelore ge ego gaero potiyo bayae: Bogi waira kasiwa di enibare enibare dire-dare puro nowena ami nimorekare ego tona ewa:  
\v 13 Nata nikare nowewa amira susu gosinona. Nata amira Satan meni ema tua wero itia. Ata nikare zazo bowire naso ziro puro nowewa. Sai dimai naso ewanana Antipa nu nata nisokare Satan meni itai-matai inowia amira ana iwo meni dewa ata saineba nikare be amira ana na ziro tata-tata wero oko beyata wewa.  
\v 14 Ata na ge nisokare nana eni itia. Nisokare nana natara ema eni nora, nukare porofete Belamra ebata patitinowera awa. Belam meni ema Yudakora ema tua Belek amire kotumai zo potinu nu Isreli ema pasina warise eteteninua. Etetenitinoise tua opi amira ana-bonare bamere meni zumunu amira mokara toiro pasina wewa awa.  
\v 15 Noko nisokare nana natara ema eni meni Nikola awisore amira ebata awa patitinoise tani da ago ine inowera awa.  
\v 16 Are nikare duba kapeteniwo. Ago kaka wamu wawa giro nama nisokare nana eyane kei awago wero ema dubu amire iwo inoise bogi waira kasiwa be so nasora ena kei awinowia ami nukare damunona awa.  
\v 17 Ozana meni Tuara dubure ge toya awa danare meni niniro baitarise. Zo nu Satanre bogi inoise pugeu wamunoya amire nena nai bezai utura itewi zazo nuso “mana” awa potana namunoya awa. Ago wero omata kapawai zo numore potamunona, amira tame zazo seka zo gayai itamunoya. Zazo seka amira susu awa ema omata pumamunoya ami nu nutope gege gamunoya awa.   
\s1 Tuara dubu Tayataira nate noisowa amira ge.  
\p
\v 18 Dubu naso Tayataira nate nowera amira angelore ge ego gaero potiyo bayae: Na Anutura Mai, giti moka naso niao beriberi wai ine, ata te naso aen kaewa wai ine, ami nimorekare ego tona ewa:  
\v 19 Na wai nisokare ata dumi pumai nisokare ata ziro tata-tata wai nisokare ata bua nisokare ata yaya dimaira putou nisokare amira susu gosinona. Nikare gita bua kokopai inoisowa, ata zeme ewa bua matu awa dainiro bua koko-kakopai inowewa, awa gosinona.  
\v 20 Ata na ge nisokare nana eni itia ewa: Nikare bama zazo Zesabel awa giro awa-diawewa nune “na porofete bama” asinoise soumai dubu naso ge gipinoise awa-gayawi eba bamere noise tua opi amira ana-bona wero ninowera awa.  
\v 21 Nu duba kapetenaise nu awa-dina itewia. Ata nune meni awa duba nuso kapeteniro pasina nuso duamu oko towia.  
\v 22 Are sana giu. Na amira sana yaya bamubake nuso nana kei awero itamunoya awa. Ota numore dai bewana inowera ami yaya tame nuarise samunona. Bama ami bua zaawenua awa kaka duamu wara giro ago ine wamunona awa.  
\v 23 Ota mai awiso nuso meni awa sana yaya waya zo meni dai bebetenamunora awa. Ago wana dubu naso nata sero nowera ami nane duba nusokare dago giro tepo inona ago gamunora awa. Na ema bamubamu dago amira nuaire wai nisokarere amira ina te tere-tare potamunona.  
\v 24 Tayataira natara ema eni nikare opi ge awa azu towewa, na nimorekare ge ego tona ewa: Nena eni Satanra uwiwi moka amira nena bezai asinowera, awa nikare kaka giro puro nuamu inowewa, are nimorekare sana niniu. Na bua mou eni nimorekare oko potitinona.  
\v 25 Daimata gege ewa potitinona. Ge naso nisokare nana itia awa zewai wero puro nuawa amire na mane.  
\v 26 Zo nu Satanre bogi inoise pugeu wero bua waise towena awa wero susawai be tepo wamunoya, nu nane putou potana ema dubu sero amira giti kopi wero  
\v 27 bogi aen meni wai awa potana puro noise nukare dia wamunoya awa. Ago inoise au puro noise dawenakai zasinowia ago ine numorekare wamunoya.  
\v 28 Na Mama naso meni putou namore potinua ago ine na numore potamunona. Ago wero moroa numore potamunona.  
\v 29 Ozana meni Tuara dubure ge toya awa danare meni niniro baitarise.   
\c 3  
\s1 Tuara dubu Sadis nate noisowa amira ge.  
\p
\v 1 Dubu naso Sadis nate nowera amira angelore ge ego gaero potiyo bayae: Na Anutura Ozana 7 ata kuna 7 puro nowena ami nimorekare ego tona ewa: Na wai nisokarera susu awa gosinona awa. Ema meni nikare gawera seka nowewa ine inowia awa. Ota duba nisokare meni awa betai ine itewia, awa gosinona.  
\v 2 Are nikare seka zisero uma weu. Tani ewa-gaewa eni nisokare nana soe itewera awa tepo wamu sero inora, ami emo duba awa-uzinoise puro noiwo. Nera kota, na Anutura nana benaura ena wai nisokare gena te kaka wamu inoya.  
\v 3 Ge gita nimorekare tugata wero gipewa giwa awa kotumuwo. Kotupitinoise dia wero baitiro puro noise duba nisokare kapeteniwo. Nikare kaka seka zisero uma wamu wawa giro na bewana ema meni wago wero nisokare nana tutamu mamunona. Nikare be naso maira bowi oko ninamunowa.  
\v 4 Sadis natara ema mamai nisokare eni nora, nukare zebura waya meni zumamu wawi oko ninitinowera. Awa ema zo mo wosuniro pukaki soe nowia ata mo oko inagainowia, ago ine nukare awa. Are ago ine ami noma tama woi kapawai potana puro noise namore dai itai-matai wamunora awa. Nukare ago warise ninawena te inowia.  
\v 5 Zo nu Satanre bogi inoise pugeu wamunoya amire tama woi kapawai potana puro nuamunoya awa. Ema bama nuai me topetamunora amira zazo nusokare nuai bukura gayai itera. Are zo nu pugeu wamunoya amira zazo awa buku amira ana oko disamunona. Tepo awa. Nu mai naso me wero nowia amira susu awa na Mama nasora benaura ata angelo dubu nusora benaura sero kerenamunona awa.  
\v 6 Ozana meni Tuara dubure ge toya awa danare meni niniro baitarise.   
\s1 Tuara dubu Filadefia nate noisowa amira ge.  
\p
\v 7 Dubu naso Filadefia nowera amira angelore ge ego gaero potiyo bayae: Na saramai nuai ata me gege wai amira mama. Na Dawidira ki puro noise so be piakanana ai meni dai gamamunoi? Ota dana gamai ai meni piakanamunoi? Nane ami nimorekare ego tona ewa:  
\v 8 Na wai nisokarera susu gosinona. Ei giu! Na nisokare nana benaura ge naso tugata waira ebata awa so be piai ine potina itia. Ebata awa zo meni gazai ine tepo. Nikare putou mai pei-kaka gege itia awa gosinona, ata saineba, nikare ge naso dia wero baitiro puro noise zazo bowira naso oko begi wisewa.  
\v 9 Satan nana dubura ena ema eni nukare nutopekare Yuda ema asinowera, ata opi awa. Are na nukare sana na nimorekare otao wena amira susu awa giro baitamunora. Giro baitiro nisokare nana kei awero menitinoise bawa diamunora.  
\v 10 Nikare putoure wero dia wawise sena amira ge naso awa dimuro puro nowewa, are yaya bamubake meni ema zebu sero awa zipero gamu wamunoya be amire nane nikare soero pumamunona. Yaya ami zebu sero ema bamubamu dapikarago amira nana te kei awamunoya.  
\v 11 Na be apunu-kaka gege mamunona. Are utura wau nimorekare sai awa zo meni pumai azu, ge puro nowewa awa ziro tata-tata inoise noiwo.  
\v 12 Zo nu Satanre bogi inoise pugeu wamunoya, nu awa Anutu nasora ibu amira zasiwi waise nane urana dopero itamunoya. Ago wana nu keina-pusuna oko wamunoya. Nu ago itai gege itamunoya awa. Na nuso nana tame Anutu nasora zazo gayamunona. Ago wero Anutu nasora nata amira zazo awa da ago ine nuso nana tame gayamunona. Awa Yerusalem nata seka awa. Nata ami Anutu nasora nana utura ena osamunoya. Ata na zazo naso seka awa dai nuso nana tame gayamunona.  
\v 13 Ozana meni Tuara dubure ge toya awa danare meni niniro baitarise.   
\s1 Tuara dubu Leodisia nate noisowa amira ge.  
\p
\v 14 Dubu naso Leodisia nate nowera amira angelore ge ego gaero potiyo bayae: Na ge me saira mama. Na Anutura sai dimai ema noise ge me daba sero kere damu nitinowena. Na nena Anutura nana ena kei awenua amira susu nowena, ami nimorekare ego tona ewa:  
\v 15 Na wai nisokarera susu gosinona. Erama meni ou uza wawi giro ou me ninowera, ata ou ewa uza awa niro giro tuginowera. Agoro nikare ge naso awa puro putoure oko inowewa. Noko oko azu towewa. Are nikare ou ewa uza ine wero nowewa awa.  
\v 16 Nikare ge nasora putoure wamewa, awa te wamia. Noko ge azu samewa, awa te wamia. Ata nikare ago kaka wamu inowewa, are nikare ou ewa uza ine wetewa giro tugamu inoise inona.  
\v 17 Nikare nitopekare ego towewa awa, “Nakare zamai dainiro nasokare nana itia. Nakare nena eto oko pumunakare. Are nakare nena zo kau wai ine tepo.” Nikare susu nisokare oko gosinowewa. Nikare kezia wero itewewa. Are ema bama meni nikare giro zo amamunora. Nikare bogamasa. Nikare giti guma wai. Nikare mo dero uzai nowewa, awa oko giro baititinowewa.  
\v 18 Are na nimorekare sana niniu. Nikare gol gita niaora potina wowo awero tepo wenu me gege itewia awa naso nana ena zuma gaero pumuro amire nikare waure wamunowa awa. Ota tama woi kapawai naso nana ena zuma gaero wosuniro menai nisokare gogowewo. Ago wero giti moka panaira gawi naso nana ena zuma gaero giti moka nisokare anewo pumai giti panawe.  
\v 19 Na otao-gamao inowena nukare awa sero kora wise doise kora wise awero tepo inowena awa. Are nikare putoure wero duba nisokare kapeteniwo.  
\v 20 Ei giu! Na so bera atune dopinoise tai-tai doinona awa. Are zo nu ge naso niniro so be piakanai amire na so nusora toiro nena numore dai namunona. Noko nune namore dai nena namunoya.  
\v 21 Zo nu Satanre bogi inoise pugeu wamunoya, nu awa nane pumu naso nana niro masi arumai simaire naso amira namore dai arumamunonato. Na da ago ine bogira pugeu wero noe Mama nasora masi arumai simaire amira arumuna itewena awa.  
\v 22 Ozana meni Tuara dubure ge toya awa danare meni niniro baitarise.”   
\c 4  
\s1 Yohane meni Anutura arumai simaire ginua, ata bowi wai  
\s1 yere dai nininua.  
\p
\v 1 Na nena awa giro tepo wero amire iri niro utura toyai be zo piakanai itinu gina awa. Are gera awi gita sora awi ine ninina awa da ami kei awero namore ge ego ine tugata wenua awa, “Ni ego witasa amire nena ama kei awamunoya awa nimore sero gipero awana gase.”  
\v 2 Ago tuaise Ozana meni duba naso pumunu utura ena arumai simaire zo itinu amira tame zo meni itinu gina awa.  
\v 3 Ota arumai simaire amira itinua, nu benau nuso sina neire-neire izai ginata-ganata wai awa. Ota giti atu nusora ena mozi uwiwai buge ine ami zimuro itinua awa.  
\v 4 Are arumai simaire bamu amira demabera arumai simaire 24 ami nuso nana zimuro itiwa awa. Arumai masi amira bua ema zezewenai 24 ami arumuro itiwa awa. Nukare tama woi kapawai gege wosuniro itiwa awa. Ota ema tuara giti simaira nena zo gol meni wai ami giti nusokarera itinua awa.  
\v 5 Ota arumai simaire bamu amira ana piri-piri awasai tarara bezasai awi duruka sasai awinoinua awa. Ota arumai simaire amira benaura bana 7 awero beriberi inoiwa gina. Awa Anutura Ozana 7 awa.  
\v 6 Ota arumai simaire amira benaura meni awa nena zo ewa nazi ine, gasa ziwamunoya, ami itinua awa.  
\p Nena seka itai 4 ami arumai simaire awa zimuro itiwa. Nukare zazanare tipare awa dapikarago giti moka daba.  
\v 7 Ota zo meni awa wo layonra benau ine. Ota zo awa wo bulimakaora benau ine. Ota zo awa emara benau ine. Amira zo meni awa ni bouga upinowia amira benau ine.  
\v 8 Nena seka itai 4 nukare zora wabu 6, zora wabu 6 ago gege awa. Ata tama nusokare turere tamere awa giti mokare daba itinua. Are pi waiko awa zawa sero ego towera awa, “Tua Anutu nu putoura mama. Nu saramai daba. Nu noisonua, nowia, nuamunoya.”  
\v 9 Nena seka itai 4 meni arumai simaire amira arumuro itewia, nu nuai gege nowia, nu amire kokopai asero bowi inoise yawa sara wawera te  
\v 10 bua ema zezewenai 24 meni arumai simaire amira arumuro itewia, nu nuai gege nowia, amira nana benaura bawa diro koiniro nu bowi inowera. Ago inoise ema tuara giti simaira nena nusokare dutuniro te nusora potiro ego towera awa,  
\v 11 “O Tua nasokare Anutu, simai ata zazo bowire ata putou awa nimore gege potawenakare te wero baititinowia. Nera kota, nine gege nena bamubamu awa tamuro tepo wesa. Ota be nisora nena bamubamu kei awewa itewera.”   
\c 5  
\s1 Yohane meni papia winai zo ginua.  
\p
\v 1 Are arumai simaire amira itewia ami wana me meni papia winai zo ziro puro itinu gina. Papia awa tipare zazanare dago owere gege itinua. Ota pika meni takimai 7 ami itiwa.  
\v 2 Ata angelo bamu zo ginaawa. Nu arero ego senua awa, “Ai meni papia amira pika awa piakaniro papia zazai te inoi?”  
\v 3 Ago senu amire uturata zebura, ota zebura bage ena papiara pika piakaniro zazero gai ine zo oko kei awenua awa.  
\v 4 Are zo meni piakaniro gai ine te kaka wamu wenu giro na duba naso waya wenu di bamu sena awa.  
\v 5 Ago wena bua ema zezewenai nana zo meni namore ego senua awa, “Di oko sase. Ei giyo! Yudara saisibuna amira wo layon nu Dawidira sibuna ami bogira pugeu wero daininua, are nune da ami papiara pika 7 piakaniro papia zazai te inoya.”   
\s1 Yohane meni Lama mai ginua.  
\p
\v 6 Are nama giti ziwataniro arumai simaire ata nena seka itai 4 amira nana soe, ota bua ema zezewenai nana awa Lama zo dewa betero seka wenua ami dopero itinu gina awa. Koe nuso 7, ata giti moka nuso da ago ine 7. Giti moka nuso 7 awa Anutura Ozana 7 nukare zebu sero iyetai awa.  
\v 7 Are Lama meni baro arumai simaire amira itinua amira wana me nusora ena papia winai awa pumunua awa.  
\v 8 Papia winai awa pumunu nena seka itai 4 ata bua ema zezewenai 24 nukare Lamara nana zora baro bawa diro koiniwa awa. Nukare gita yere gamaira nusokare ata akou nusokare gol meni wai awa dai puro nuso nana bamuwa awa. Akoura mokara ena ibosi zama ewananare bemuro itinua. Ibosi awa Anutura ema dubu amira isa awa.  
\v 9 Are nukare yere seka o ego gamuwa awa, “Nine papia nuso puro pika nuso piakanasa te wamunoya. Nera kota, ni dewa orara niso meni ema dubu sero zebu sero, tama aiso neire-neire ata ge duba neire-neire, nukare awa zuma wesa Anutura seronai wewa awa.  
\v 10 Ago wero poti dara nisa Anutu nasokaira pris dubu wewa awa. Are nukare zebura ena ema bamu wero itamunora awa.”   
\s1 Utura ena bowi waire yawa sarare kei awenua.  
\p
\v 11 Na iri niro angelo dainiro-bake gosinoise amire gera awi nusokare ninina. Nukare arumai simaire ata nena seka itai ata bua ema zezewenai awa zipinoise dopewa awa. Namba nusokare gai te wai ine tepo, ami ten tausen dubu giti dubu giti, wan tausen dubu giti dubu giti dopinoise amire  
\v 12 ge ego ine zawa sero sewa awa, “Putoure zamaire kotumaire zewai waire zazo bowire simaire sero de ike naire awa Lama dewa betenua ami pumai te wero baitamunoya.”  
\v 13 Ota utura, zebura, zebu bage, ata ewara noiwa nukare dago ami ego sewa ninina awa, “Arumai simaire amira itia, nu ata Lama dai bowi waire zazo bowire ata simaire ata putou itia da ami itai gege itaise.”  
\v 14 Ago sewa nena seka itai 4 nukare ego sewa awa, “Iyo, me awa.” Ota bua ema zezewenai meni awa bawa diro koiniro bowi wewa awa.   
\c 6  
\s1 Lama meni papiara pika 6 piakaninua.  
\p
\v 1 Are na giti ziwataniro ego gina awa: Lama meni papiara pika 7 itiwa amira zo piakaninua. Piakaninu nena seka itai 4 amira nana zo meni duba nuso tarara bibiara ine zawa sero ego senua awa, “Mu!”  
\v 2 Ago tuaise wo osi kapawai zo meni kei awenu gina. Amira tame ema zo itinu gina awa nu tai wibare. Numore ema tuara giti simaira nena zo potiwa pumuro goroba wero iwo damu bamunua awa.  
\v 3 Are Lama meni pika namba 2 piakaninu nena seka itai namba 2 meni zawa sero ego senua awa, “Mu!”  
\v 4 Ago senu wo osi izai zo kei awenua awa. Amira tame ema itinua nu awa zebura bega soero pumai amire ema ina-da wero bebetenarise amira putou numore potai awa. Ata bogi waira kasiwa bamubake awa numore potiwa pumunua awa.  
\v 5 Lama meni pika namba 3 awa piakaninu nena seka itai namba 3 meni zawa sero ego senua awa, “Mu!” Ago senu na iri niro gosinoina wo osi inagayai zo meni kei awenua. Ema zo tame itinua nu awa sikeri nena sikeri wai zo puro itinua.  
\v 6 Are na nena seka itai 4 nusokare nana soe ena emara ge ine ego senu ninina awa, “Ma eto zuma nuso meni awa 10 kina. Ota ame da ago ine moyai 6 amira zuma nuso 10 kina. Ota gawire ou wainre ami meni awa awa-diyo itae.”  
\v 7 Are Lama meni pika namba 4 piakaninu nena seka itai namba 4 meni zawa sero ego senua awa, “Mu!”  
\v 8 Are na iri niro gosinoina wo osi tama oiwo wai zo kei awenua. Amira tame ema itinua awa zazo nuso Betai. Ata Dega meni nu ama ganinoise kei awenua. Are nuto zebura erama awa saumarato dubu zoeto-zoeto wara amire dubu zora erama awa iwora gi amire dora botiyore yaya mou-maure zebura wo gorobare ami gera wariseto sero amira putou numoreto potiwa awa.   
\p
\v 9 Are amire Lama meni pika namba 5 piakaninua. Ago wenu amire ema Anutura ge puro noise oziga nuso kere damu nasara dasara bebetenitinoisowa amira ititi nusokare alta susura itiwa gina awa.  
\v 10 Nukare zawa sero ego sewa awa, “O Tua, ni saramai gege, ata sai putoure wai. Ni me gege inowesa. Be nazo tepo wai amire nakare dewa amira ge sero tepo wero pasina awa ema zebura nowera amira nana ina potamunosi?”  
\v 11 Ago sewa nu tama woi kapawai tere-tare potiro tepo wero amire ego senua awa, “Bua mai otao mamai nisokare eni da ago ine dara bebetenara namba nisokare gita sena zewai wenua awa witiro te waise zanatitinoise dia pei-kaka wewo.”  
\v 12 Are na nena ego ine awa gina awa. Lama nu pika namba 6 awa piakaninu duwi bamu sumunua; ota waiko inagaero aura tama ago ine wenua; ota inua meni awa orara ine izai wenua;  
\v 13 ota kuna nukare bisi meni nemuya me zipawi ururugaitiro osisinowera ago ine utura ena tetekeniro zebura osewa;  
\v 14 ota utu meni awa papia wininowenakai ago ine winero baro tepo wenua; ota dirumure guture meni awa itai nusokare awa dowa awa.  
\v 15 Nena ago ine kei awenu zebu sero ema tuare ema babezinomare ata soldiara giti kopi ata wau zamaire ata putoure, ema witaita osai dapikarago ami bezamu sero omata sorata awai banara toiro  
\v 16 zebuto omatare begomo sero ego sewa awa, “Osero nakare gogowawa arumai simaire amira itia amira nana giti mokara oko bayanekare. Ota Lamara tini kapai meni awa oko ganekare.  
\v 17 Tini kapai nusotora be meni zora awinoya, are ema ai meni dopero dainai te inoi?”   
\c 7  
\s1 Isreli ema 144,000 Anutura owere wamunora.  
\p
\v 1 Na nena awa giro tepo wero amire angelo 4 gina awa. Nukare zebu agewa sero amira dopero itise zebura bisi 4 soinoise itiwa awa. Awa bisi zo zeburata ewarata nira oko sumaise ago wewa.  
\v 2 Ata na gosinoina waiko witaira ena angelo zo kei awero munua. Nu Anutu putoure amira owe waira nena puro noise amire angelo 4 zebure eware usi-besi warise asai nukare awa zawa sero ego senua awa,  
\v 3 “Nikare zebuta ewata ni awa eya oko usi-besi wawe. Nakare gita Anutura soumai dubu mewa nusokarera owe potanakare amire wewo.”  
\v 4 Ago senu amire ema owere amira namba nusokare ego ine sewa ninina awa: Isreli emara dubu giti amira nana 144,000 owere wai awa.  
\v 5 Nukare ego ine wewa awa:  
\li2 Yudara dubu amira nana 12,000 owere wewa;  
\li2 Rubenra dubu amira nana 12,000 owere wewa;  
\li2 Gadera dubu amira nana 12,000 owere wewa;   
\li1
\v 6 Asera dubu amira nana 12,000 owere wewa;  
\li2 Naftalira dubu amira nana 12,000 owere wewa;  
\li2 Manasara dubu amira nana 12,000 owere wewa;   
\li1
\v 7 Simionra dubu amira nana 12,000 owere wewa;  
\li2 Lewira dubu amira nana 12,000 owere wewa;  
\li2 Isakara dubu amira nana 12,000 owere wewa;   
\li1
\v 8 Sebulonira dubu amira nana 12,000 owere wewa;  
\li2 Yosefera dubu amira nana 12,000 owere wewa;  
\li2 Benzaminra dubu amira nana 12,000 owere wewa.   
\s1 Ema dubu witai ami Anutura nana benaura dopewa.  
\p
\v 9 Na dubu awa giro tepo wero amire noko zo da ago ine gina awa. Zebu serora ema dubu giti tama aiso nusokare neire-neire, ota ge nusokare da ago ine neire-neire, amira nana agewara dubu witai-bake, ema zo meni azimai ine tepo, nukare ami arumai simaire ata noko Lamara nana zorage damu dopero itiwa gina awa. Nukare mo tama woi kapawaire gege. Ata wana nusokare meni simia puro dopero  
\v 10 ge arero ike-kake damu toise ego sewa awa, “Korawai awa Anutu nasokai arumai simaire amira itewia amira nana ena, ata Lamara nana ena tupewia.”  
\v 11 Are angelo dapikarago arumai simaire ata bua ema zezewenai ata nena seka itai 4 awa zimuro dopewa awa. Dopero arumai simaire amira nana bawa diro koiniro Anutu bowi inoise ego sewa awa,  
\v 12 “Iyo, me awa. Sero de ike naire bowi waire kotumaire kokopai saire zazo bowire putoure zewai-zawaire awa Anutu nasokaira nana itewia itamunoya. Iyo, me awa.”   
\s1 Nukare yaya tamaire zo amaire ena mai.  
\p
\v 13 Are bua ema zezewenai nana zo meni nama atata wero ego senua awa, “Mo tama woi kapawai puro nora nukare arekare ni? Nukare nana muu?”  
\v 14 Na atata wenu ge ina ego ine sena awa, “Ema tua naso, na amira susu awa kaka gamu. Ni nitope gosinosa.” Ago sena nu namore ego senua awa, “Nukare yaya tamaire zo amaire bamubake amira mokara ena muwa awa. Nukare more tama woire nusokare awa Lamara orara meni sewewa sara-kisaramunua awa.  
\v 15 Are zeme nukare Anutura arumai simaire amira zora noise pi waiko awa ibu nusora ena sou bua nuso inoise nowera awa. Are arumai simaire amira itewia ami nukare doena-doeti inoise nuamunoya.  
\v 16 Nukare wo ma emo meri betaita ou uza betai awa ama noko oko wamunora. Waiko meni nukare oko awamunoya. Ota bisi mena-mana oko nusokare nana kei awamunoya.  
\v 17 Nera kota, Lama nu arumai simaire amira soe sieniro dopinoya ami nukare wo sipsip ine dia wamunoya. Ago inoise nuai zewaira ou suru amira nu gita susawai nukare nu ama ganamunora. Ago wai Anutu meni diriu nusokare gaero tepo wamunoya awa.”   
\c 8  
\s1 Lama meni pika namba 7 piakaninua.  
\p
\v 1 Are Lama nu pika namba 7 piakaninu utura ena pasi-kuasi zo tepo-tapo so sowiwi dimunua. Ago wenu be 30 minit kenara tepo wenua awa.  
\v 2 Tepo wenu angelo 7 Anutura nana benaura itewera nukare gosinoina eni meni so 7 ago awa numorekare potiwa awa.  
\v 3 Ago wewa angelo zo meni ibosi zamare dimaira akou gol meni wai awa puro baro altara zorage dopenu eni meni ibosi zama ewananare dainiro numore potiwa. Awa arumai simaire amira benaura alta gol meni wai itinua amira tame potitinoise ge ninai ema dapikarago amira isara susumaise ago wewa awa.  
\v 4 Are nu niaora potinu wana nusora ena ibosi zama ewananare ami ge ninai emara isare dara sirero otao wero Anutura nana witinua awa.  
\v 5 Angelo ami ago wero amire altara ena niao pumuro poti akou nusora ninu akou be munu zebura wiekeninu osenua awa. Osenu piripiri awenu tarara awi durukare gatenu duwi sumunua awa.   
\s1 Angelo 4 nukare so pisewa.  
\p
\v 6 Are angelo 7 numorekare so wanera potai ami so pisamu sia wewa.  
\v 7 Ago wero angelo namba wan meni so pisenu wa ais zewai-zawai ata niao orarare dara siro siro wai ami zebura osenua awa. Osenu zebu agewa 1/3 niao meni awero tepo wenua awa. Ota ni agewa 1/3 niao meni awero tepo wenua. Ota yekere zewakare dapikarago niao meni awero tepo wenua awa.  
\v 8 Ago wenu angelo namba tu meni so nuso pisenua awa. So pisenu nena zo dirumu bamu niaore zo ine awa apewa ewara dagimunua awa.  
\v 9 Dagimunu ewa agewa 1/3 orara gege wero tepo wenua awa. Ago wenu ewa wo agewa 1/3 dago betero tepo wewa awa. Ota wa agewa 1/3 bebezeniro tepo wewa awa.  
\v 10 Angelo namba 3 meni so nuso pisenu kuna bamu zo utura ena tekero osero bana ine awero beriberi wero ou ipu enira 1/3 ata ou gomira ena dagimunua awa.  
\v 11 Kuna amira zazo nuso awa Dokaka. Are ou eni awa dokaka wenu ema meni niwa dokaka wenu dainiro ami bebeteniro tepo wewa awa.  
\v 12 Angelo namba 4 meni so nuso pisenu waiko agewa 1/3 ata inua agewa 1/3 ata kuna eni 1/3 amira waru kei awenu zasimai nusokare agewa 1/3 mume wenua. Zasimai nusokare inagaenua, are pina atasai waiko meni waya-waya zasipitinoisonua awa. Are pi da ago ine inuare kunare waya-waya zasipitinoisowa awa.  
\v 13 Are na iri ike niro ni bouga bamu zo gina. Nu ike-kake damu upinoise amire zawa sero ego senua awa, “Yei, Yei, Yei. Angelo etorobarara so itia, awa pisara zebura ema nukare nogo wamunori?”   
\c 9  
\s1 Angelo namba 5 meni so pisenua.  
\p
\v 1 Are angelo namba 5 meni so pisenu na iri niro kuna zo utura ena tekero osero mu zebura niro itinua awa gina awa. Nu degara so be piaise ki numore potiwa awa.  
\v 2 Are nu degara so be pienu ibosi bamu erinua awa. Bua awawi ibosi eritinowia amira te ibosi eriro witiro waikore uture gogo wero tepo wenua awa.  
\v 3 Ibosira mokara ena ariri babezinoma di nusokare mai wekimaira ine ami kei awero zebura osewa awa.  
\v 4 Ata nukare zebura yekere nenare ni gomire awa iwo warise sai oko aewa. Ema Anutura owe mewa nusokarera tepo awa gege iwo warise sai.  
\v 5 Ata dara betarise oko aewa. Tepo gamara inua 5 ago yaya tapinoise nuarise amira daba sai awa. Yaya tamai meni awa guye meni mai gayawi yaya tapinowera ago ine.  
\v 6 Are be amira ana ema nukare betamu samunora, ata oko betamunora. Betai zumamunora, ata betai meni nukare doro azu bayamunoya.  
\v 7 Ariri babezinoma awa gina wo osira noise zuzuna wamu sero nena durerenawera pupinowera ago ine wewa awa. Giti kopi nusokarera nena zo itinua awa gina giti simaira nena gol meni wai ago ine wenua awa. Ota giti benau nusokare meni awa emara ine.  
\v 8 Giti tu nusokare awa bama kapawaira giti tu ine iboi-tatana. Di nusokare awa wo layonra ine.  
\v 9 Zazana nusokarera beri kapa meni wai ine ami itinua awa. Wabu nusokarera awi duruka meni awa wo osi dainiro ami iwora bayamu sero kares zumuro puro sumawera awi towia ago ine.  
\v 10 Awa-zimi nusokare meni awa gugumi meni mai uwinowia ago ine awa. Di nusokare awa awa-zimi amira itia, ami inua 5 amira mokara ema gapinoise yaya potitinoise nuamunora awa.  
\v 11 Ata ema tua nusokare noya. Nu degara angelo awa. Zazo nuso Yuda gera Abadon, ota Grik emara gera meni awa Apolion. (Ge nasokaira awa nena sisero tepo wai ema.)  
\v 12 Ni bouga meni be etorobara ago Yei asenua, awa zo tepo weti eto iterato.   
\s1 Angelo namba 6 meni so pisenua.  
\p
\v 13 Are angelo namba 6 meni so pisenua. Alta gol meni wai Anutu nana giti mokara itia dumu nuso zoeto-zoeto  
\v 14 amira ana ge zo kei awero angelo namba 6 so puro dopero itinua amire ge ego tugata wenu ninina awa, “Ou Yufretis bamu amira paora ena angelo 4 mui wai itewera, nukare awa bese bayare.”  
\v 15 Nukare ami zepa awa, o inua awa, o waiko awa, o aua awa zora awai zebu sero ema agewa 1/3 dara betarise amira be mai gamu sia inoise itisowa, nukare awa besenua awa.  
\v 16 Are goroba ema nusokare wo osi tame itai amira namba nusokare 200 milion asewa ninina.  
\v 17 Na atua wago inoise ema ata wo osi amira benau nusokare awa ego ine gina awa. Ema nukare tama woi nusokare kapa meni wai ata izaire uwiwaire nozawaire awa wosuniro noiwa awa. Ota wo osira giti kopi meni awa wo layonra giti kopi ine. Be so nusokarera ena niaore ibosire zebu awero beriberi wai zazo sopa dai kei awenua awa.  
\v 18 Are nena mena-mana etorobara ami zebura ema agewa 1/3 gera-gaira wero tepo wewa awa. Wo osira nana be sora ena niaore ibosire zebu awero beriberi waire kei awenua ami ago wenua awa.  
\v 19 Wo osira putou nusokare awa be nusokarera ata awa-zimi nusokarera itinua awa. Awa-zimi nusokare awa zi ine giti kopire ami yaya eramare potitinoise noisowa awa.  
\v 20 Are ema agewa sisero tepo wewa ema agewa meni dago noise nuai nusokare waya awa kaka duba kapeteniro duamu wewa. Tepo awa. Nukare saineba bi puro noisowa awa. Ago wero tua opi — gol meni waita silva meni waita kapa meni waita omata meni waita ni meni wai — nena amira sou bua awa kaka duamu wewa. Nena ami gai ine tepo, ge ninai ine tepo, ata izima sauma wai ine tepo.  
\v 21 Awa daba kota, ema ami tani nusokare waya eni — mai dai betai, o kayota goe wai, o bama bewana wai, o nena bewana wai — tani waya awa oko dowa.   
\c 10  
\s1 Angelo zo meni papia zazai zo Yohanere potinu ninua.  
\p
\v 1 Na nena awa giro tepo wena amire angelo bamu zo utura ena osenu gina. Numa bereze mo meni sawago wai. Ota giti gomira mozi meni zimuro dopenua awa. Benau nuso waiko diti ine. Te nuso eto niao beriberi ine awa.  
\v 2 Nu wana meni papia pei-kaka zo zazai awa puro dopenua. Ago wero te me nuso meni ewa tame potiro te anika meni awa zebura potiro dopenua.  
\v 3 Dopinoise zawa bamu wo layon meni sago wenua. Zawa senu tarara 7 nukare ge sewa awa.  
\v 4 Ge toise sewa niniro gayamu sero inoina utura ena naso nana zawa ego ine osenua awa, “Tarara 7 ge sesera awa oko gayase. Tepo abana we itae.”  
\v 5 Ago wenu amire angelo ewara ata zebura te potiro dopenua ami wana me nuso uzuzu we utura nitinoise  
\v 6 Anutu nuai gege nowia, nu nena tamuro tepo wenua — utu ata nena utura itia, o zebu ata nena zebura itia, o ewa ata nena ewara itia — amira nana ikonitinoise ego ine senu zewai wenua awa, “Be noko zo oko itia.  
\v 7 Angelo namba 7 so nuso pisai awi kei awamunoya be amire Anutura ge bezai porofete dubu nusore kereniro senua amira me kei awero tepo wamunoya.”   
\p
\v 8 Ago senu ge gita utura ena osenu ninina da ami noko kei awero namore ge ego tugata wenua awa, “Ni bamu, papia zazai angelo ewara ata zebura tame dopero ziro puro itia, awa pumase.”  
\v 9 Ago senu na angelo nana bamuro papia potaise sena namore ego senua awa, “Puro ni. Nasa be nisora zozowa pika ine wamunoya, ata tini nisora dokaka wamunoya.”  
\v 10 Ago sero papia potinu puro nina awa. Nina be nasora pika ine wero zozowa wenua awa, ata nukunina tini nasora ena dokaka wenua awa.  
\v 11 Are namore ego sewa awa, “Ni ema dubu witai, tama aiso nusokare neire-neire ata ge duba neire-neire amire ema tua nusokarere dai ge noko kereniro seyo.”   
\c 11  
\s1 Tuara ge kerenai ema eto.  
\p
\v 1 Are zo meni tega waira utu zo bogi ine awa namore potitinoise ego senua awa, “Ni eri, Anutura ibu ata alta nuo amira tega wero erama mokara ena isa bua inoise nowera nukare awa azimase.  
\v 2 Ata ibura kakamo amira tega awa oko wase. Tepo doyo itae. Awa diga emare potai awa. Nukare ami nata saramai Yerusalem awa inua 42 amira mokara usi-besi inoise nuamunora.  
\v 3 Are nama ge kerenai ema naso eto sana bek agewa meni mo awago wero ema ge potitinoise nuarato waiko be 1,260 ago tepo wamunoya.”  
\v 4 Nuto ni oliwa eto ata damana piai amira dapai susu eto zebura Tuara nana benaura dopinowera ago ine awa.  
\v 5 Ema zo nu numoreto iwo wamu sai nusoto nana be sora ena niao kei awero ema awa awero tepo wamunoya awa. Are ema zo meni numoreto iwo wamunoya ami ago ine betamunoya.  
\v 6 Ema eto awa wa osisinowia awa gazai amira putou numoreto potai, are sarato wa kaka wamu tepo itai Tuara potai ge toise nuamunorato awa. Ata sarato ou meni orara waise amira putou awa dai numoreto potai. Ota sarato zebura yaya-buyaya kei awaise amira putou numoreto potai. Are kotumai nusotora tuarato te kei awinuamunoya.  
\v 7 Are utura ge sero kerenai be nusoto tepo wai amire degara wo gorobare ami kei awero nuto iwo wero puro osero dai betamunorato.  
\v 8 Betarato ema meni woi nusoto awa duara nata bamura nata kakame itamunorato awa. Nata amira zazo bezero Sodom asinowera, ota noko Izip asinowera. Tua nusoto nata da amira ana ni pasinaira dewa betenua awa.  
\v 9 Are zebu sero amira ema eni tama aiso neire-neire, ge duba neire-neire, ami woi nusoto awa waiko be etorobara amire zo ageware ago awa gosinoise nuamunora. Ago wero eni meni gowamu sara, eni meni azu samunora awa.  
\v 10 Ata porofete eto yaya mou-mau emare potamunorato ami betarato amire zebura ema meni yawa sara bamu inoise ana-bona inoise wau ina-pota wamunora awa.   
\p
\v 11 Are waiko be etorobara amire zo ageware tepo wenu amire Anutura nana ena nuai tamaira ozana meni woi nusotora toinu seka ziro eriwato. Eriwato ema nukare giro azu bamu wewa awa.  
\v 12 Ago wewa amire utura ena zawa bamu ego ine nusoto nana osenu niniwato awa, “Nito ego witiro muuto!” Ago senu iwo dubu nusoto nuto gosinoiwa amire nuto bereze meni pumunu utura witiwato awa.  
\v 13 Nuto utura witiwato be da amire ana duwi bamu sumunua awa. Sumunu nata bamura ibu mara eni (1/10) zasero osero ema bama 7,000 dewa betewa awa. Ago wenu seka noiwa awa nukare azu wero Anutu utura Mama awa bowi wewa awa.   
\p
\v 14 Ni bouga meni be etorobara ago Yei asenua, awa etora me kei aweti daimatara daba itia. Ata eya kei awamunoya.   
\s1 Angelo namba 7 meni so pisenua.  
\p
\v 15 Are angelo namba 7 meni so pisenua. So pisenu utura ena ge bamu gunewa awa. Guninoise ego sewa awa, “Tua nasokai ata Kristo Anutu meni Ema Tuara buara gegeninua, nuto zeme Tua waira putou puro zebu serora Tua wero norato. Agoro Tua wero nuai gege nuamunorato.”  
\v 16 Ago sewa bua ema zezewenai 24 Anutura nana benaura arumai simaire nusokarera arumuro itewera ami bawa diro koiniro Anuture ego toise nu bowi wewa awa,  
\v 17 “O Tua Anutu, ni putoura mama, nuai gege nowesa. Ni putou bamubake niso ami Tua waira bua niso zaawetesa, are nakare kokopai nimore toise ni bowi inonakare.  
\v 18 Ema bamubamu ami nimore tini kapaire nowera amira tini kapai niso meni kei awetia. Ema bebetenai amira ge sasa tepo waise amira be zora awinoya awa. Mai sou dubu niso porofete ata ge ninai ema — ema witaita osai nima samo doinowera — numorekare zuma potaira be zora awinoya. Ota zebu gera inowera nukare awa ina gera wamunosa amira be zora awinoya awa.”   
\p
\v 19 Nukare ago sewa amire utura ena Anutura ibu zaumunu tairo nuaira maguru ibu mokara itewia awa damu kei awenua awa. Ago wenu piripirire ge gunaire tararare duwire wa boruza ais ine awa kei awenua awa.   
\c 12  
\s1 Bama zo ata ugama bamubake amira uge.  
\p
\v 1 Utura ena kotumai tamaira etete zo ego ine kei awenua awa. Bama zo dopenua, nu awa waiko mo meni awago wai, te nusora bage awa inua itinua, ota giti nusora meni awa kuna 12 ami zimuro giti simaira nena nuso wago wero itiwa awa.  
\v 2 Nu wasou wero mai pumamu sero yaya tamuro di zawa gatero toise itinua awa.   
\p
\v 3 Nu ago inoise dopinoinu amire utura ena kotumai tamaira etete zo noko kei awenua, ami meni awa ugama bamu itinua. Awa tama nuso izai me izai; giti kopi nuso 7; ota koe nuso meni awa 10; ota giti kopi nusora ema tuara giti simaira nena 7 te wero potai itiwa awa.  
\v 4 Nu towa nuso meni utura kuna eni 1/3 denu tekewa zebura apenu osewa. Ugama nu ago wero bama mai pumamu sero inoinu giro ego kotumuro bamuro zorage itinua awa: “Mai pumai nukamunona awa.”  
\v 5 Are mai mata diri pumunua, awa nu zebu serora ema dubu giti awa bogi aen meni dia waise sai awa. Are mai kei awenu puro witiro Anutura nana arumai simaire amira zora potiwa awa.  
\v 6 Ota bama meni awa azu sumuro ware me ware bamunua awa. Nu waiko be 1,260 ago nuai numore bayao wero nena potitinuarise Anutu meni itai masi zo tamunua awa.   
\s1 Satan utura ena musuniwa osenua.  
\p
\v 7 Are utura ena bogi-zuzuna bamubake kei awenua. Maikel ata angelo dubu nusore nukare ugama dero tunero awamu sero bogi-zuzuna wewa awa, eniba ugama ata angelo dubu nusore nukare da ago ine bogi-zuzuna wewa awa.  
\v 8 Ata zewai oko wewa. Maikel dubu nusore meni ugama dubu nusore awa puro osero utu soewa.  
\v 9 Ago inoise ugama bamu awa musuniwa ose zebura ninua awa. Nu awa zi gita ona noisonua nowia. Nu awa erama gera potai ema. Zazo nuso Satan asinowera. Nu zebu sero amira ema etetenitinoise nowia. Nu musuniro angelo dubu nuso dai musuniwa ose zebura niwa awa.   
\p
\v 10 Are utura ena zawa zo ego ine kei awenu ninina awa, “Anutu nasokaira korawai ata putou ata tua wai bua awa zeme kei damu nitinoya ewa. Ota ema tua nuso Kristo amira tua waira bua dai zeme kei damu nitinoya ewa. Nera kota, otao mamai nasokaire iwo inoise Anutura nana benaura dopero pi waiko nukare gera potitinowia, nu awa zeme musunera osesia awa.  
\v 11 Otao mamai nasokai nukare Lamara orara meni ata utura ge azu tepo kereniro sewa ami zewai wero nu puro osewa awa. Ota nukare nuai nusokare oko soewa. Nuai doro betamu peu wewa.  
\v 12 Are utu moka sero ata ago nora ami dai yawa sara warise. Ata ewato zebure, yei, nito nogo wamunowito? Zeme ewa Satan meni nisokare nana osisinoya. Osero be nuso eya tepo wamunoya awa gosinoise tini kapai bamure dai noya awa.”   
\s1 Ugama meni bama iwo wenua.  
\p
\v 13 Are ugama nu musuniwa ose zebura niro ginu kei awenu nu bama mai mata diri pumunua awa iwo wero zinu sumunua.  
\v 14 Are bama nu ni bouga bamu amira wabu eto potiwa pumuro zi azu upinoise itai masi nuso ware itinua amira bamuro bezenua awa. Ana dumi pupinuara itai zepa etorobara amire zo ageware tepo wamunoya awa.  
\v 15 Are bama azu bamunu zi meni nuso nana atune tupise ou tugenu be nusora ena osero wama bamu osago wenua awa. Awa bama ou wama meni daise sero ago wenua awa.  
\v 16 Ata zebu meni bama soinoise be nuso zaumunu ou ugama meni tugenua awa amira baro tepo wenua awa.  
\v 17 Are ugama nu bamere tini kapai bamu tamunua. Ago wero bamera awiso dubu awa damu sero bamunua awa. Anutura potai ge dipinoise Yesu kere damu nitinowera nukare awa damu sero bamunua awa.  
\v 18 Ago inoise ose kora niro dopenua awa.   
\c 13  
\s1 Ewa tura ena wo goroba bamu zo kei awenua.  
\p
\v 1 Are na gosinoina ewa tura ena wo goroba bamu zo meni kei awenua. Nu koe nuso 10, ota giti nuso meni awa 7. Ata koe nuso awa te wero ema tuara giti simaira nena 10 ami itiwa awa. Ata giti nuso awa te wero zazo waya-kawaya gayai itiwa awa.  
\v 2 Wo goroba bamu gina awa benau nuso abu pusi zazo lepat amira ine awa. Te-wana nuso meni awa abu wo zazo bea amira ine awa. Ota be nuso meni awa wo layonra ine. Are ugama nu putou nuso ata ema tuara arumai nuso ata dia wai bua nuso bamubake awa wo bamure potinua awa.  
\v 3 Ata wo goroba bamu amira giti zo dai betai ine gina. Are ami boya nuso wawa wenu ewanana wenua. Ago wenu amire zebu sero ema nukare wo awa giro di tainiro yaba inoise nuso nana ame noisowa.  
\v 4 Ugama nu goroba bamure putoure potinua, are erama meni ugama bowi wewa awa. Ago inoise wo goroba bamu awa dai bowi inoise ego sewa awa, “Wo goroba bamu awa nu ago ine zo meni oko noya. Are ai meni numore iwo wai te inoi? Tepo awa.”  
\v 5 Anutu meni wo awa awa-diai wo ami ge waya-kawaya toise Anutura zazo dena-betena inoise dia bua nuso inuai inua 42 tepo waise sai awa.  
\v 6 Are wo ami Anutu nu nutope ata zazo bowire nuso ata utura itai-matai inowera nukare amira zazo awa puro dena-betena inoise noisonua awa.  
\v 7 Ago wero Anutura ema dubure iwo wero dero sisero awaise Anutu meni nininua. Are zebu sero ema tama nusokare neire-neire ata ge duba neire-neire amira ema tua waise sero amira putou potai.  
\v 8 Are zebura ema dago ami nu bowi wamunora. Ema zazo nusokare Lama dewa betenua amira bukura kaka gayai itamu, nukare ami wore ago wamunora awa. Buku awa ema nuai me pumarise sai amira zazo awa zebu kaka tamamure ago gayai awa.  
\v 9 Danare meni ge ei awa niniro baitarise.   
\li1
\v 10 Zo nu benaira gegenai noya ami benai sora toyamunoya. Zo nu duba kapaira gegenai wero noya ami duba kapara betamunoya. Ge ami Tuara dubu nukare be amira ana zewaire putoure ziro taka asaire nuarise toya.   
\s1 Zebu du ena wo bamu zo kei awenua.  
\p
\v 11 Be amire wo bamu* zo zebu du ena kei awenu gina. Nu lama ine, koe etore awa. Ge nuso meni awa ugama gita kei awenua amira ge ine awa.  
\v 12 Are wo ami wo goroba bamu gita kei awenua amira nana benaura itise dia bua nuso gege wenua. Ago inoise sasai zebura ema meni wo bamu gita boyare noe betero ewanana wero erinua nu awa bawa diro bowi wewa.  
\v 13 Wo bamu zebu du ena kei awenua ami tani putoure eni wenua. Ago inoise senu zebura ema gosinoiwa utura ena niao osenua awa.  
\v 14 Tani putoure ago ine awa waise Anutu nininua, are wo ami wo goroba bamu gita kei awenua amira nana benaura tani putoure inoise zebura ema dapikarago eteteninua awa. Ago inoise senu wo goroba bamure awa kasiwa meni dewa betago wero erinua amira ititi zo kewewa awa.  
\v 15 Ititi awa puro potiwa dopenu Anutu meni nininu wo ama ami ozana pisenu ititi kewaira toinu seka ziro eriro ge senua awa. Ge toise sasai ema nu bawa kaka diamu wewa nukare awa dasai bebetenitinoisowa awa.  
\v 16 Ago inoise ema witaita osai, waureta bogamasa, ota ema tuata soumai ni, awa dago senu wana me nusokarerata mewa nusokarera tagi owere zo potiwa awa.  
\v 17 Tagi owere awa wo goroba bamu amira zazota namba nuso awa. Are ema tagi awa kaka puro nuamu wewa ami nena ina-pota wai ine tepo wewa awa.  
\v 18 Ema zo kotumai itai giro wora namba tamaise. Namba awa emara zazo ine awa. Namba awa 666.   
\c 14  
\s1 Lama dubu nusore dai Zion dirumura dopewa.  
\p
\v 1 Are na iri niro Lama Zion dirumura dopero itinu gina. Ata numore dai ema 144,000 meni dopero itiwa gina. Mewa nusokarera Lamara zazore Mama nusora zazore gayai itinua awa.  
\v 2 Are utura ena ge zo ninina, awa ou urugu-urugu sero awi bamu towia ago ine, ata tarara gatinowia ago ine. Noko gera awi awa ema saisai meni gita yere gamaira dawera ge towia te ago ine ninina awa.  
\v 3 Nukare arumai simaire ata nena seka itai 4 ata bua ema zezewenai nana benaura dopero yere seka zo gamuwa. Yere awa ema eni meni gamuro ninai ine tepo wenua awa. Ema 144,000 zebura ema enira nana ena zuma wai nukare ami gege ninai ine te awa.  
\v 4 Nukare ami bamere kaka tayamu noisowa. Nukare ami Lama nago nago nowi, awa te ama ganero nowera. Nukare awa Anutu meni zebura ema enira nana ena zuma wenu nukare Anutu ata Lamara dubu gita wero pumai awa.  
\v 5 Ata be nusokarera ena opi ge zo oko kei awenua. Nukare ema moka.   
\s1 Angelo etorobara meni ge zawa sewa.  
\p
\v 6 Are na iri ike niro angelo zo ike-kake damu umuro susaunu gina awa. Nu oziga ewanana zo itai gege itai awa zebu sero ema, tama nusokarere ge nusokarere neire-neire, numorekare samu sero puro noinua awa.  
\v 7 Nune ami arero ego senua awa, “Nikare Anutu azu wero zazo nuso de ike niwo. Nera kota, ina waira be nuso kei awinoya awa. Uture zebure eware ou gomire tamunua, nu awa bowi weu!”   
\p
\v 8 Ago sero bamunu nuso nana atune angelo zo meni muro zawa ego ine senua awa, “Babilon* nata bamu awa zasero tepo wetia. Zasero tepo me tepo wetia. Nata amira mamana nukare zebu sero amira ema dago awa pasinara uzutitinoise noisowa. Are nukare ata ge nusokare niniwa ami Anutura ina tamamunora, awa ema imaya mu niro waya inowera ago ine wamunora.”   
\p
\v 9 Ago sero bamunu nuso nana atune angelo otao nuso zo meni muro arero ge ego senua awa, “Zo nu wo goroba amire ititi nusore bowi wamunoya, ota mewa nusorata wana nusora tagi owere pumamunoya,  
\v 10 nu ami Anutura ina awa tamuro ou imaya mu ine namunoya. Imaya mu awa ou mere dai kaka siro-siro wamu, are imayara putou awa dago itia. Anutu meni tini kapai bamu inoise ina nuso awa imaya mu ine ema amira akoura zozai namunoya. Niro amire angelo dubu saramai amira nana ata Lamara nana benaura niaore zebu awero beriberi waire amira mokara bamuro yaya-buyaya tapinoise nuamunoya.  
\v 11 Are niao meni ema ago ine awa yaya potitinuai amira ibosi awa witai gege wititinoise itamunoya awa. Are ema wo goroba ata wora ititi awa bowi wamunora nukare ata ema eni wora tagi owere puro nuamunora, nukare awa yaya meni oko duamunoya. Be giti pi waiko awa yaya mokara zanatiai tepo itai gege itamunora awa.”   
\p
\v 12 Are ge ami susu ego ine gipinoya: “Anutura dubu ge nuso dipinoise Yesu ziro baititinowera nukare ami betata tepo zewai wero nuarise.”  
\v 13 Are na utura ena ge zo ego ine osenu ninina awa, “Nima ge ei awa gaeyo: Be zeme emire zaawero Tua ziro tata-tata inoise betamunora, nukare yawa sara wamunora.” Ozana meni da ago toya, “Iyo. Awa me memeka awa. Nukare yaya tamai bua nusokare doro zanatitinoise ewanana wamunora. Nera kota, nuai nusokarera me meni bayara da ago bayamunoya awa.”   
\s1 Zebura ena ema asumuro pumamunoya amira etete kei awenua.  
\p
\v 14 Are na iri ike niro bereze kapawai tutamu kei awenu gina. Bereze tame zo itinua, nu benau nuso emara ine. Giti nusora ema tuara giti simaira nena gol meni wai puro itinua awa. Ota wana nuso meni awa kasiwa orosowai zo dire-dare awa puro itinua awa.  
\v 15 Are ibu du ena angelo zo meni kei awero bereze tame itinua numore zawa sero ego senua awa, “Ni kasiwa niso meni buara me kapero pumuro awe! Zebura bua amira me izero itia, are kapero pumaira be zora awinoya awa.”  
\v 16 Ago senu bereze tame itinua ami kasiwa nuso apenu zebura me dago kapero tepo wenua awa.   
\p
\v 17 Ago wenu amire angelo zo meni utura ibu du ena kei awenua. Nu da ago kasiwa orosowai dire-dare zo puro noinua.   
\p
\v 18 Are nu tupinu angelo otao nuso zo meni alta itinua ana munua awa. Nu niaora dia meni otao nuso kasiwa dire-dare puro noinua amire zawa sero ego ine senua awa, “Ni kasiwa niso dire-dare puro nosa ami zebura wain me kapero tepo we! Me nuso izero tepo wero itia.”  
\v 19 Ago senu angelo otao nuso meni kasiwa apenu zebura wain me kapenu Anutu tini kapai nusora tenk bamu amira toiro tepo wenua awa.  
\v 20 Ago wenu nata atura ena patiwa zasero tenk mokara ena orara bamu bemuro toto zora ena osisinoinua. Osisinomite suru bamu wero wo osi te-wana kukuniro so topetiro 320 km ago bamunua awa.   
\c 15  
\s1 Angelo 7 nukare putou erama dainiro sisaira awa puro dopewa.  
\p
\v 1 Are na utura ena kotumai tamaira etete bamu zo giro di tainina. Awa angelo 7 nukare putou erama dainiro sisaira 7 awa puro dopewa awa. Nena awa Anutura ina gita kei awisia amira agewa nuso awa. Nena awa kei awero tepo wai amire Anutura tini kapai tepo waise sai awa.   
\p
\v 2 Are na ewa nazi zo gina, awa glas meni wago wai niaore dai siro-siro wai ine itinu gina. Are ema bogira pugeu wero wo goroba bamu ata ititi nuso ata zazo nusora tagi owere awa azu sero puro osewa ami ewa nazi glas ine amira tame dopero gita yere gamaira Anutu meni numorekare potinua awa puro itiwa gina awa.  
\v 3 Nukare Anutura bua mai Mose amira yere ata Lamara yere ego toise gapinoiwa awa,  
\li2 O Tua Anutu, ni putoura Mama,  
\li2 ni bua witai wawesa gawenakare ewanana inowia.  
\li2 O ema sero amira ema tua,  
\li2 ni opi tepo tani me gege inowesa.   
\li1
\v 4 O Tua, ema dapikarago ni samo darise sai awa.  
\li2 Ota ema dapikarogo zazo niso de ike narise sai awa.  
\li2 Ni daimata ami saramai awa.  
\li2 Ema dubu giti ami niso nana muro ni bowi wamunora;  
\li2 nera kota, ni ina potai bua me wetesa susu kei damu nitinoya.  
\v 5 Are na iri niro gosinoina utura ena Anutura seli ibu amira masi sara-kisaramai amira toyai be zaumunua awa.  
\v 6 Zaumunu angelo 7 nukare putou erama dainiro sisaira 7 awa puro noiwa ami masi sara-kisaramai amira du ena kei awewa awa. Nukare tama woi saramai kapawai puro noiwa awa. Ota ipu sapi diai nusokare gol meni wago wai awa zazana nusokarera itinua awa.  
\v 7 Are nena seka itai 4 dopewa amira nana zo meni akou 7 gol meni wai awa angelo 7 amire potinu pumuwa awa. Akou 7 amira mokara Anutu nuai gege nowia amira tini kapai awa be muro kasaba dero itinua awa.  
\v 8 Are ibura masi sara-kisaramai amira ena Anutura zasimaire Anutura putoure amira ibosi kei awero be munua awa. Are zo nu masi sara-kisaramai amira toyai ine tepo wenua. Angelo 7 nukare putou erama dainiro sisaira 7 awa zozara kei awero tepo wai amire toyai ine te wamunoya.   
\c 16  
\s1 Angelo 7 nukare Anutura tini kapai awa akou nusokarera ena  
\s1 zozewa ose zebura ninua.  
\p
\v 1 Are na ibura masi sara-kisaramai amira mokara ena ge zawa sai bamu osenu ninina. Awa angelo 7 ego tugata wenua awa, “Nikare bamuro akou 7 zozawa Anutura tini kapai meni zebura osae.”   
\p
\v 2 Are angelo namba wan meni baro akou nusora nena zozenu zebura osenua awa. Osenu ema wo goroba bamura tagi owere puro noise ititi nuso bowi inoisowa nusokare nana tamara boya aya neire-neire witai kei awenua awa.   
\p
\v 3 Are angelo namba 2 meni akou nusora nena zozenu ewara osenua. Osenu ewa meni orara erama betaira ine wero tepo wenua awa. Ago wenu ewara wo dapikarago betero tepo wewa awa.   
\p
\v 4 Ago wenu angelo namba 3 meni akou nusora nena zozenu ose ou ipure gomire amira ninu orara daba wero tepo wenua awa.  
\v 5 Ago wenu angelo oura dia sai ami ego senu ninina awa, “O Tua saramai, ni daimata noisosa nowesa. Ina numorekare potitinoise opi tepo me gege inosa.  
\v 6 Nera kota, nukare ema dubu niso ata porofete dubu niso amira orara gera wewa, are nine ina orara potesa ninora awa. Are awa te numorekare inosa awa.”  
\v 7 Are alta meni ge ego senu ninina awa, “O Tua Anutu, putoura mama. Awa me awa. Ina wai ina wai niso opi tepo, me gege awa!”   
\p
\v 8 Are angelo namba 4 meni akou nusora nena zozenu waikora osenua. Amira osenu Anutu meni nininu waiko mena-manare nina-nina wero erama awenua awa.  
\v 9 Ago wenu ema waikora sina meni pena-pana awenu nukare Anutu be nusora yaya waya-kawaya awa kei awenua amira zazo bowire nuso dena-betena wewa awa. Ago inoise duba nusokare oko kapeteniro Anutu bowi wewa.   
\p
\v 10 Are angelo namba 5 meni akou nusora nena zozenu ose wo goroba bamu amira ema tuara masira ninua awa. Osenu ema dubu nuso amira nana dago mume gege wero donua awa. Ago wenu ema nukare yaya-buyaya tapinoise iwawa di gamuwa awa.  
\v 11 Ago inoise yaya-buyaya nusokarere boya neire-neire nusokarere amira sero Anutu utura mama amira zazo dena-betena wewa awa. Ata nukare wai nusokare waya amira duba nusokare oko kapeteniwa.   
\p
\v 12 Are angelo namba 6 meni akou nusora nena zozenu ose ou Yufretis bamu amira ninua awa. Nena awa oura osenu ou gasero tepo wenua awa. Awa eba kei awai waiko witaira ena ema tua kei awarise amire ago kei awenua awa.  
\v 13 Are nama gosinoina ugamara be sora ena ata wo gorobara be sora ena ata porofete oira* be sora ena bi waya me waya etorobara gaya ine ami kei awewa awa.  
\v 14 Awa nukare bi me. Nukare tani putoure neire-neire waira putou itia. Nukare ami ge timuro zebu sero amira ema tua duba gayara Anutu putoura mama amira be bamura ena iwo pumuro puro kei awero bogi-zuzuna wamunora.   
\p
\v 15 “Ei giu! Na bewana wai ema meni tutamu kei awago wamunona. Zo nu tama woi tepo noma menai tamai azu, duba sekare noise tama woi nuso dia wero baitaise. Ago wai amire gana yawa sara wamunoya.”   
\p
\v 16 Are bi nukare garawi zo zazo nuso Yuda gera Amagedon asai amira ana ema tua babezinoma awa poti dara niwa.   
\p
\v 17 Are angelo namba 7 meni akou nusora nena zozenu bisi bera ena osenua. Ago wenu ibura arumai simaire itinua amira ana ge zo ego ine osenua, “Tepo-tapo wetia!”  
\v 18 Are piripirire awi durukare tararare kei awenu amire duwi bamubake sumunua. Gita duwi ago ine zo ema kei awero noisowa nowera amira nana ago kaka sumamu awa.  
\v 19 Are nata bamu awa zaumunu etorobara wenua awa. Ota zebu sero emara nata disero tepo wenua awa. Ota Babilon nata bamu amira mamana awa Anutu meni kaka nuwenamu inoise tini kapai nusora imaya mu potinu niro tepo wewa awa.  
\v 20 Ago wewa gutu dapikarago tepo wewa, ata dirumu dapikarago tara awewa awa.  
\v 21 Are utura ena ais wa ine buroro-baroro, mou nuso bek rais ine 50 kilo, ami wa meni osago wero erama denua awa. Ago wenu nukare ais waya me waya amira yaya bamu tapinoise Anuture ge waya-kawaya sewa awa.   
\c 17  
\s1 Pasina wai bama bamu ami yaya waya pumunua.  
\p
\v 1 Are angelo 7 akou 7 puro noiwa amira nana zo meni naso nana muro namore ego senua awa, “Pasina bama bamu ou saisai amira arumuro itewia, nu ina nuso kei awamunoya, are mu, gipana gase.  
\v 2 Zebu serora ema tua meni numore dai pasina inowera. Ota zebu serora ema nukare nuso nana ena pasina nusora ou wain niro duba dau inowera.”  
\v 3 Ago senu Ozana meni duba naso pumunu angelo meni na uzumuro puro zebu erama tepora bamunua awa. Are ana nama bama zo gina, nu goroba wo zo izai amira nana tame arumuro itinua. Wora tamara zazo neire-neire waya ami te wero gayai itinua. Wo amira giti 7 ata koe nuso meni awa 10.  
\v 4 Ota bama awa nu tama woi zuma bamure — izaire bewa ditore — awai awa. Ata simai neire-kaire golre omata ewa-awananare biuze wau bamure meni wai awa durerenai awa. Wana nuso meni akou zo gol meni wai puro itinua, awa pasina nusora nena waya gugumure ami bera mai.  
\v 5 Mewa nusora zazo zo susu nuso bezai awa ego gayai itinua awa, “Babilon nata bamu, pasina bama dapikarago amira mia. Ota zebu serora pasina waya-kawaya amira mia.”  
\v 6 Ata bama ami Tuara ema Yesura bowi sai ema noiwa dewa bebeteniwa amira orara ninoe dau me dau wero itinu gina awa.  
\p Giro na titibi awero wana di gamuna awa.  
\v 7 Ago wena angelo meni na ego atata wenua awa, “Nogoro wana di gapinosi? Na bamera susu ata wo giti kopi nuso 7 o koe 10 ami bama dipinoya amira susu dago sana ninamunosa.  
\v 8 Goroba wo bamu gesa awa gita noisonua, ata zeme oko noya, ama meni awa degara ena ewesemuro witiro muro gera wai zewai-zawai tamamunoya. Are wo gita noisonua, zeme meni awa oko noya, noma ama ewesemamunoya, awa zebura ema nu giro di tainiro yaba dasiga wamunora. Zebu zaawero kei awenua be amire zazo nusokare nuai bukura kaka gayamu ema dubu ami ago wamunora awa.   
\p
\v 9 Ema kotumai bamure meni gege susu ei awa ninai ine te awa: Wora giti kopi 7 awa dirumu 7 awa. Bama meni amira tame arumuro itia awa.  
\v 10 Noko giti kopi 7 awa ema tua 7 awa. Amira nana ema tua 5 emoko kei awero noe tepo wewa awa, ata zo meni awa zeme emire noya awa, ota zo meni awa ama noma kei awamunoya. Kei awero be apunu-kaka gege nuaise sai awa.  
\v 11 Wo gita noisonua, zeme oko noya, ami ema tua 7 amira nana susumuro namba 8 wamunoya awa. Ago wero gera wai tamamunoya awa.   
\p
\v 12 Wora koe 10 gesa awa ema tua 10 awa. Ata nukare dia bua nusokare be zeme emire kaka zaawamu. Nukare noma ema tuara putou pumuro dia bua nusokare zaawero goroba wore dai be apunu-kaka gege wamunora.  
\v 13 Nukare kotumai nusokare daimata, are nukare dia bua waira putou nusokare awa wo gorobare dirienamunora awa.  
\v 14 Ago inoise amire Lamare iwo wero bogi-zuzuna wamunora awa. Ago wara Lama meni zewai wero nukare puro osero damunoya awa. Nune ami ema babezinomara Ema Bamu, ata noko ema tuara Ema Tua. Ota dubu nuso nu zawa sero pumunu nu ziro tata-tata inowera, nukare ami numore dai noise iwo puro osero damunora.”   
\p
\v 15 Ago sero amire ego susumuro namore senua awa, “Pasina bama nu ou saisai amira arumuro iti gesa, ou awa ema dubu giti zebu giti tama neire-neire ge neire-neire awa.  
\v 16 Ota koe 10 gesa, nukare ata wo goroba ami pasina bama awa iwo inoise gera wero mo nuso dago soero pumuro pisi nuso niro tepo wero niaora moyamunora awa.  
\v 17 Ata awa tepo oko wamunora. Nena Anutu meni kei awaise towia awa nu duba nusokarera sai, te nukare ge nuso dimago wero wamunora. Nukare duba daimata wero ema tuara putou nusokare awa wo gorobare potiro sou bua nuso inoise nuara Anutura ge awa me wamunoya awa.   
\p
\v 18 Ata ni bama gesa, awa nata bamu awa. Nune ami zebu sero amira ema tua dia inowia.”   
\c 18  
\s1 Babilon nata sisamunoya amira ge.  
\p
\v 1 Are nena awa kei awenu gina amire angelo zo utura ena osenu gina. Nu putou bamu itinua, ota zasimai nuso meni zebu zasimuro tepo wenua.  
\v 2 Nu zawa toise ego senua awa, “Babilon nata bamu awa sisero tepo-tapo wetia. Zeme nata awa bira itai masi inoya. Bi waya-kawaya meni wara motu nuso amira bezinora. Ni mamai waya-kawaya amira papamo inoya awa.  
\v 3 Zebu sero amira ema meni pasina nusora ou wain gorobare ninoise noisowa, ota zebu serora ema tua nukare muro numore dai noise ema meni bama soa patago inoise noisowa awa. Zebu serora bisnis ema muro zamai nusora erenitinoise bua wero wau moni witai tamuwa.”   
\p
\v 4 Are na utura ena zawa sai zo ego osenu ninina awa, “O ema dubu naso, nikare nata awa doro bozeu! Ago noma pasina nuso waya soremamewaya, ota nisokare nana ina nusora yaya-buyaya meni semamia.  
\v 5 Nata amira pasina dauta awero utura kei awinoya, are Anutu meni pasina nuso oko dotinoya.  
\v 6 Are bama meni nimorekare wenua da ago ine ina weu. Ago inoise ina puro witiro weu. Nune imaya mu nimorekare potinu niwa, amira ina potamu sero imaya mu zewai-zawai potiu nae.  
\v 7 Nu tama puro wititinoise ara tamai nuso inoise noisonua, are amira te yaya-buyayare duba naire tamuwo pumae. Nu duba nuso meni ego toya awa, ‘Na bama tua bamu wero nona. Na bama kumata bogamasa tepo. Duba nai meni naso nana kei awai ine tepo.’  
\v 8 Ago ine towia, are waiko be daimata amira ana nuso nana nena waya — yaya betai ata duba nai ata be dora botiyo — ami kei awamunoya awa. Ota noko niao meni nu awai tepo wamunoya. Nera kota, Tua Anutu nu putoura mama meni pasina nusora ina potitinoya.”   
\p
\v 9 Zebu serora ema tua numore dai pasinare ana-bonare wero bamuwa nukare ami niaora ibosi nuso witai giro dire-buare wamunora awa.  
\v 10 Ago inoise gera wai nuso giro azu inoise aike dopinoise ego samunora awa, “Yei, Yei. Nata bamu Babilon. Nata zewai. Ina niso eyane kei awago inoya awa.”   
\p
\v 11 Ota zebu serora bisnis ema nukare “Ai meni nena nasokai zuma wamunoi?” asero da ago ine di saire zo amaire wamunora awa.  
\v 12 Wau meni awa ego ine ina-pota wewa awa: Golre, silvare, biuze zuma bamure, mo simaire bamubamu dago kapawaire bewa ditore, mo siligare, mo izaire, ni neire-neire zama ewananare, nena elefant di meni wai, nena ni zuma bamureta barasta aenta omata owere-kawere meni wai.  
\v 13 Nena ago ine ata ni posa tatare, nena nai zamare, nena ibosi zama ewananare, ou zamare amire ou wainre, gawire, plawa ewananare, wuitre, wo bulimakaore wo sipsipre, wo osi kares nusore amire soumaira tamare ititire.   
\p
\v 14 “Nena yaba wero pumamu inowesa ami ni doro tepo wetia. Noko nena nai ewa-gaewa ata simai bamubamu puro nowesa awa tara awero tepo wetia. Kau inoma noko oko tamamunosa!”   
\p
\v 15 Are bisnis ema nena ago ine awa numore dai ina-pota inoise wau bamu tamuwa, nukare ami sisai nuso awa giro azu inoise asikera dopinoise di saire zo amaire inoise ego samunora awa,  
\v 16 “Yei, Yei. Nata bamu. Ni tama woi ewanana — kapawaire izaire bewa ditore — awa wosuniro noisosa. Ago wero simai neire-kaire — golre omata owere biuze zuma bamura — nena ami tama niso sipinoise noisosa.  
\v 17 Zeme meni awa wau zamai niso dago tutamu tepo wetia.” Are wara mamana ata wara kapten soumaire ata bua ema ewara muro baro awinowera nukare da ago aikera dopero  
\v 18 niaora ibosi erinu giro di zawa gatero toise ego sewa awa, “Nata bamu ago ine zo oko itia.”  
\v 19 Ago sero awetu gutero di toise ego sewa awa, “Yei, Yei. Nata bamu. Wara mamana meni zamai nisora wau monire wewa awa. Are zeme ei awa sisero waya eyane wago wetesa.”   
\p
\v 20 “Are uture Tuara emare aposolore porofetere ninekare meni awa sisai nuso emo yawa sara weu. Nera kota, nata bamura pasina nisokare nana itisonua, awa Anutu meni ina weti tepo inoya awa.”   
\p
\v 21 Ge ago ine kei awenu amire angelo zewai-zawai zo meni omata bamu zo puro ewara apenu dagimunua awa. Dagimunu ego senua awa, “Babilon nata bamu da ago ine pena-pana musunara osai erama kau inoma noko oko tamamunora.  
\v 22 Be amire so pisaire boi daire dubu amira awi awa niso nana noko oko kei awamunoya. Noko omata bua neire-kaire awa da ago ine bisi binono dero tepo wamunoya. Noko uso araira awi noko oko kei awamunoya.  
\v 23 Damanara zasimai niso nana noko oko kei awamunoya. Ota ema bamera gewire ozinare da ago ine zo oko kei awamunoya. Nera kota, bisnis ema niso meni zebu serora baro amira ema babezinoma wero goe niso meni zebu serora ema eteteniro puro tepo wewa.  
\v 24 Porofete ata Tuara ema eni ata zebu sero ema dago dasara bebetenitinoisowa amira orara awa niso nana itewia, are nimore ago ine wamunoya awa.”   
\c 19  
\s1 Yohane nu utura ena yawa sara bamu kei awenu nininua.  
\p
\v 1 Are na utura ena ema dubu bamura ge duruka ninina. Nukare bowi inoise ego sewa awa, “Haleluya! Korawaire simai zasimaire putoure awa Anutu nasokaira nana itia.  
\v 2 Nune ina potitinoise opi tepo me gege inowia. Pasina bama bamu nu zebu sero amira ema pasina gipinoise gera wenua amira pasina nuso ina potia awa. Ago inoise soumai dubu nusora orara awa bama meni gera wenua amira ina weti te wetia.”  
\v 3 Ago sero amire ego sewa awa, “Haleluya! Nata bamu amira ibosi meni be giti witai gege wititinoise itamunoya.”  
\v 4 Ago sewa bua ema zezewenai 24 ata nena seka itai 4 nukare bawa diro koiniro Anutu arumai simaire amira itewia awa bowi inoise ego sewa awa, “Me memeka awa. Haleluya!”   
\p
\v 5 Are arumai simaire amira ena ge ego ine kei awenua awa, “Anutura sou ema nikare, nikare dago nu bowi wero tepo weu! Witai osai ami nu azu inoise ago wawe.”   
\s1 Lama meni dubu nuso bama ine pumunu ana-bona bamu inoise  
\s1 yawa sara wewa.  
\p
\v 6 Are erama diti bamu ge gunewa ninina, awa ou urugu-urugu sero awi towia ago ine, ata noko tararara awi ine wenua awa. Nukare ge ego sewa awa, “Haleluya! Tua nasokai Anutu nu putoura mama ami dia wai bua nuso damu-damuke zaawinoya.  
\v 7 Are nakai yawa sara inoise zazo nuso de ike nitinoise nu sanakai ewanana wae. Nera kota, Yesu nu Anutura Lama ami dubu nuso bama ine atamu sero inoya amira ana-bonara be zora awinoya. Are bama nuso meni nutope sia wero itia.  
\v 8 Anutu meni tama woi kapawai ewanana sara-kisaramai awa wosuniro puro nuaise potinua awa.” Tama woi kapawai awa Tuara ema dubu amira nuai sara-kisaramai awa etete inoya.  
\v 9 Are angelo meni ge zo namore ego senua awa, “Ni ego ine gaeyo: Lamara ana-bonara marise sai nukare ami yawa sara warise.” Ago sero senua awa, “Ge nimore tugata inona awa Anutura ge me memeka awa.”  
\v 10 Ago senu na nuso nana bawa diro nu bowi wamu wena azu sero ego senua awa, “Ago oko wase! Na soumai otao niso gege. Otao mamai niso eni azu tepo Yesu ziro tata-tata inoise nowera amira otao na dai awa. Ni Anutu gege bowi weyo.” Ozana meni porofete awa-uzawi ge towera da ami erama soremawi Yesura zazo kerenitinowera awa.   
\s1 Yohane meni Yesu ata goroba ema dubu nusore ginua.  
\p
\v 11 Are na giti ziwataniro utu zaumunu wo osi kapawai zo gina. Amira tame itinua nu zazo nuso ego ine itinu gina: “Ema bua nuso dia wero baitai,” ata, “Ema tani me daba me wai.” Nu emare bamere gera potiro me gege towia. Ata nu bogi-zuzuna wamu wero giro erama siana-katana inoise bogi inowia.  
\v 12 Giti moka nuso eto awa niao beriberi inowia ago ine, ata giti nusora ema tuara giti simaira nena witai itiwa, ata zazo nuso zo nuso nana gayai amira susu awa nu nutope imata gosinowia.  
\v 13 Tama woi nuso iboi-tatana awa orara gutai. Ata zazo nuso meni awa, “Anutura ge” awa.  
\v 14 Bamunu utura ena goroba ema dubu giti nukare wo osi kapawai amira tame arumuro nu ama ganewa. Tama woi nusokare ewa-awanana sara-kisaramai.  
\v 15 Be so nusora ena bogi waira kasiwa dire-dare zo kei awenua ami ema dubu giti damunoya. Ago wero bogi aen puro noise nukare dia wamunoya. Ago inoise Anutu putoura mama amira tini kapai bamu awa kerenitinoise ina potaira bua wamunoya. Awa ema meni wain me tenkra potiro patawera ou nuso osisinowia ago ine iwo nuso patamunoya.  
\v 16 Tama woi nusora soe ena ata atima demabera zazo nuso ego gayai itia awa, “Ema tuara Ema Tua, ota ema babezinomara Ema Bamu.”   
\s1 Yesura be sora ena bogi waira kasiwa meni osero iwo dubu nuso  
\s1 dero tepo wamunoya.  
\p
\v 17 Na iri niro angelo zo waikora dopenu gina. Nu ago dopero ni mamai ike umuro muro baro awewa nu nukare dago zawa sero ego senua awa, “Anutu meni nena nai bamu tapinoya, are nikare dago muu, aunawe!  
\v 18 Ago inoise ema tua babezinomara tama aisore pisire soldiara dia amira tama aisore pisire ata ema zezewenaira tama aisore pisi nusokarere amire wo osire iwo dubu nusokarere amira tama aisore pisire amire ema dapikarago — ema tua ata soumai, witaita osai — amira tama aisore pisire dago niro tepo-tapo wawe.”   
\p
\v 19 Are na wo goroba ata zebu serora ema tua goroba ema dubu nusokarere dago auniwa gina. Nukare wo osi kapawai amira tame itinua nu ata iwo wai dubu nuso numorekare iwo wamu sero kei awewa.  
\v 20 Iwo wamu sero kei awewa wo goroba ata porofete opi saire nuto awa saniro puro beniwa. Porofete opi sai nu gita tani putoure neire-neire wo goroba amira nana benaura inoise ema wo goroba amira zazo dimuro puro noisowa, o noko ititi nuso bawa diro bowi inoisowa, ema dubu awa etetenitinoisonua. Are wo goroba ata porofete opi sai ema nuto seka dago pumuro ape niao awinoise itewia amira niwa osewato awa.  
\v 21 Eni bamu awa dago wo osi kapawaira itinua amira be sora ena kasiwa meni osero dero tepo-tapo wenua awa. Ago wenu ni mamai meni kei awero tama aisore pisire nusokare niwa oti wenua awa.   
\c 20  
\s1 Noma Satan benara zepa 1,000 itamunoya.  
\p
\v 1 Utura ena angelo zo osenu gina. Nu degara kire sen bamure puro noinua.  
\v 2 Nu ugama awa zazo nuso “Zi matu” ata “Erama gera potai ema” ata “Satan”, nu awa ziro pumuro sen meni beniro zepa 1,000 muire itaise sero  
\v 3 musuninu degara osenua awa. Osenu so be awa ki meni denu gamunu amire ema zo meni muro besai, besaira esa gamu sao mu dai zozenu gamunua awa. Awa Satan meni zebu serora ema dubu awa etetenai ine tepo itai zepa 1,000 tepo waise sero ago wenua awa. Tepo wai besara kei awero be apunu-kaka gege nuamunoya.   
\s1 Ema gita eramunora amira ge.  
\p
\v 4 Na arumai simaire eni itiwa gina. Ema amira tame itiwa nukare ge kora wai ema awa. Ata Yesura bowi toise Anutura ge azu tepo puro noiwa duba nusokare kapewa amira ititi nusokare awa gina. Nukare gita wo goroba ata wo amira ititi awa bowi kaka wamu. Noko wo amira tagi owere awa nusokare nana meweneta wanera oko puro noisowa. Are ema dubu amira tama aiso bi ditira ena eriwa gina. Nukare eriro Kristore dai ema tua bua inoise noe dowa zepa 1,000 tepo wenua.  
\v 5 Betai eni bamu dago nukare kaka eramu zepa 1,000 tepo wai gamu dia itiwa. Eria gina awa erai namba wan awa.  
\v 6 Erai namba wan amira eramunora nukare yawa sara inoise duba saramaire nuamunora. Ema dubu ago ine awa betai namba tu meni puro osai ine tepo. Nukare Anutu ata Kristo amira pris dubu nusoto wero nuamunora awa. Ago wero numore dai ema tua bua inoise nuara zepa 1,000 tepo wamunoya awa.   
\s1 Satan benai sora ena kei awero sisamunoya.  
\p
\v 7 Zepa 1,000 tepo wai amire Satan benai sora ena besara noko kei awero mamunoya.  
\v 8 Kei awero ema dubu sero nukare zebu agewarata agewara iketa bage nora amira duba siso-siso wero Gogo dubu ata Magogo dubu amira ema tina-mapina gayai nukare iwo dubu pumuro mamunora. Nukare namba nusokare awa oze ine, azimai ine tepo.  
\v 9 Kei awero zebu garawi bamu amira bamuro witiro saramai ema meni nata potiro itiwa awa zimuwa awa. Nata awa Anutu meni yaba inowia. Ago inoiwa amire utura ena niao osero Satanra dubu awenu bebeteniro tepo wewa awa.  
\v 10 Are Satan duba nusokare siso-siso inoise noinua awa nu niao awinoise itewia amira apewa osenua awa. Wo goroba ata porofete opi sai nuto masi da amira itiwato awa. Are nukare etorobara pi waiko yaya mena-mana zewai-zawai tamuro susawise itamunora awa.   
\s1 Ama koto bamu kei awamunoya.  
\p
\v 11 Arumai kapawai bamu zo gina. Arumai amira ema zo arumuro itinua, nuso nana benaura ena uture zebure azu bamuwato itai nusoto tepo wenua.  
\v 12 Ago wewato amire ema bebetenai witaire osaire ami nuso nana arumai simaire amira susura dopewa gina. Dopinoiwa amire buku eni kanenua awa. Kanero susaumite zo kanenua ami meni awa nuai mera buku. Are nu bebetenaira nuai amira ge bukura gayai itinua awa gosinoise ge nusokare senu tepo wenua awa.  
\v 13 Are be amira ana ewa meni bebetenai nuso nana mokara itisowa awa donu kei awewa awa. Ota bi diti meni da ago ine ema bebetenai awa donu ewesemuwa awa. Ota dega nu da ago ine erama bebetenai donu ewesemuwa awa. Ago wewa arumaira itinua ami bebetenaira nuai amira susu awa gosinoise ina nusokarera ge kora wenu tepo wenua awa.  
\v 14 Ago wero amire Betai ata Dega nuto awa pumuro ape niao awinoise itewia amira ninu osewato awa. Niao ami betai namba tu inoya awa.  
\v 15 Are ema zo dai zazo nuso nuai mera bukura ena kau wero giro apewa niaora osenua.   
\c 21  
\s1 Utu sekare zebu sekare kei awamunorato.  
\p
\v 1 Na utu sekare zebu sekare gina. Nera kota, utu mature zebu mature emoko tepo wewato. Ewa da ago ine emoko tepo wenua.  
\v 2 Are saramai nata Yerusalem Anutura nana utura ena osisinoinu gina. Nata amira simai amai awa gina bama seronai zo emare potamu sero sipinowenakai ago ine wenua awa.  
\v 3 Are arumai simaire amira ana ge bamu ego ine kei awenu ninina awa, “Ei giu! Anutura itai nata emara nana kei awinoya. Nune nusokare nana soe itai-matai wai nukare ema dubu nuso wero nuamunora awa. Anutu nu nutope nusokare nana noise  
\v 4 diriu nusokare gaero tepo wamunoya. Betaita duba naita di zawa gatero saita yaya tamai ami ana zo oko kei awamunoya. Nera kota, nuai matu awa dago tepo wenua awa.”   
\p
\v 5 Are arumai simaire amira itinua ami ego senua awa, “Ei giu! Na nena bamubamu awa seka-sakama tapinona.” Ago sero namore ego senua awa, “Ge awa me memeka me, are gaeyo.”  
\v 6 Ago sero namore ego senua awa, “Wetena kei awetia. Na zaawaire tepo waire amira mama. Na nena bamubamu tamuro tepo wena. Are zo nu ou uza sai giro na nuaira ou surura ena dumuro zuma tepo potana namunoya.  
\v 7 Zo nu bogira pugeu wero susauma pesunamunoya ami nena amira mama wamunoya awa. Ago wai nane Anutu nuso wero nuana nu da ago mai naso wero nuamunoya awa.  
\v 8 Ata ema ego ine ami niaora baro itamunora: bogira burau wai ema, sero duai ema, ema moka waya, mai dai betai ema, bama bewana wai ema, kayo wai ema, tua opi bowi wai ema, amire opi sai ema awa. Nukare dago niao awinoise itewia amira bayarise sai awa. Niao awa betai namba tu awa.   
\s1 Yeruslem nata seka utura ena osamunoya.  
\p
\v 9 Angelo 7 nukare ami gita erama dainiro sisaira nena 7 akoura puro dopewa amira nana zo meni naso nana muro ego senua awa, “Ni mu, Lamara bama seronai awa gipana gase.”  
\v 10 Ago senu Ozana meni duba naso pumunu dirumu bamu zo amira na uzumuro pumunu witiro bamuroto saramai nata Yerusalem awa Anutura nana utura ena osisinoinu na gipenu ego ine gina awa:  
\v 11 Anutura simai zasimaire meni nata awa zasimuro duai. Zasimai nuso awa zo, omata zuma bamure meni pipiri-papiri awago inoinua.  
\v 12 Goma omata meni ike damu zimuro wai. Goma amira toyai be 12, ata angelo toyai be sero dia inora awa da ago 12. Ata toyai be sero Isreli ema dubu 12 amira zazo nusokare tere-tare gayai itiwa awa.  
\v 13 Waiko witaira kenara toyai be etorobara itiwa, ose bage kenara nai amira etorobara itiwa, witi ike naira da ago etorobara itiwa, waiko osaira da ago etorobara itiwa awa.  
\v 14 Nata gomara siwako awa omata 12 zasiwi potago wewa. Are omata 12 amira demabera Lamara aposolo 12 zazo nusokare 12 da ago gayai itinua awa.   
\s1 Yerusalem nata seka amira ititi.  
\p
\v 15 Angelo namore ge senua ami tega waira bogi zo gol meni wai awa puro dopenua ami natare toyai be nusore goma nusore amira tega wenua.  
\v 16 Nata awa iboi nusore gaya nusore ata ike witai nusore amira tega da ago ine awa. Are angelo meni nata awa zimuro tega waira bogi nuso ami tega wenu 2,400 kilomita ago wenua awa. Iboi nuso enibare enibare da ago ine awa. Amira noko agewa nuso awa da ago ine awa. Bagera iboi nuso itia da ago ikera da ago ine awa.  
\v 17 Goma amira dopai nuso amira tega wenu 70 mita ago awa wenua awa. Ema meni bogi puro noise sora tega inowenakai ago ine awa angelo meni bogi puro noise natara tega wenua awa.  
\v 18 Nata goma awa omata saramai meni wai awa. Ota nata meni awa gol meni wai. Nata awa glas ine, gasa ziwamunoya.  
\v 19 Natara goma amira omata zasiwira demabera omata zuma bamure neire-kaire* ami zasimuro itiwa. Zasiwi namba wan awa omata saramai glas ine ami wai awa. Zasiwi namba 2 awa omata uwiwai meni wai. Zasiwi namba 3 awa omata kapawai meni wai. Zasiwi namba 4 awa omata gesawai meni wai.  
\v 20 Zasiwi namba 5 awa omata kapawaire izaire meni wai. Zasiwi namba 6 awa omata izai meni wai. Zasiwi namba 7 awa omata nozawai meni wai. Zasiwi namba 8 awa omata uwiwai buge ine ami wai. Zasiwi namba 9 awa omata nozawai meni wai. Zasiwi namba 10 awa omata nozawai zo meni wai. Zasiwi namba 11 awa omata uwiwai zo meni wai. Zasiwi namba 12 awa omata izai zo meni wai awa.  
\v 21 Gomara toyai be 12 awa biuze zuma bamure ami wai awa. Toyai be zo awa biuze zo meni wai awa; toyai be zo da ago biuze zo meni wai; ago gege wero bayai. Natara ebata awa gol saramai meni wai, glas ine.   
\p
\v 22 Tuara ibu bamu meni awa nata mokara zo oko itinu gina. Nera kota, Tua Anutu putoura mama nu nutope ibu bamu nusokare inoya. Lama meni dai ibu bamu nusokare awa.  
\v 23 Ata nata awa inuare waikore meni oko zasipitinowia, ata saineba zasimai oko kau inowera. Nera kota, Anutura simai zasimaire meni zasipitinowia. Ota Lama meni dai bana ine wero zasipitinowia.  
\v 24 Zebu serora ema nukare nata amira zasimaira nuamunora. Ata zebu serora ema tua nukare da ago wau simai nena nusokare puro nata amira bayamunora.  
\v 25 Nata awa pi zo oko ziamunoya. Are gomara toyai be meni awa gazai tepo waiko bamu ago dago itai gege itamunoya awa.  
\v 26 Ema dubu sero amira nena ewa-gaewa zuma bamure awa puro nata amira baro tepo wamunora awa.  
\v 27 Ata nena bemitire zo puro nata amira bayai ine tepo awa. Ota ema zo meni nena wayata opi zo puro noma nata amira bayai ine tepo awa. Zazo nusokare Lamara nana nuai mera buku amira gayai itia ami gege nata amira mokara bayamunora awa.   
\c 22  
\s1 Nuaira ou amire nuaira ni amira ge.  
\p
\v 1 Angelo zo meni nuaira ou gipenu gina. Ou awa koakoa wero itia. Awa Anutu ata Lamara nana arumai simaire amira susura ena osisinoya.  
\v 2 Osero natara ebata soe sieniro susawia. Ou pao enibare enibare amira nuaira ni dopinora. Ni ami inua sero me eure-taure zizinowera. Ni amira gi meni awa zebu serora ema bama meni puro ewanana wamunora.  
\v 3 Nena warure zo nata amira oko itamunoya. Anutu ata Lamara arumai simaire nata amira itai ema dubu nuso nukare sou bua nuso inoise nu bowi inoise nuamunora.  
\v 4 Nukare benau nuso gosinoise nuamunora. Ota zazo nuso awa nusokare nana mewene gayai itamunoya.  
\v 5 Nata awa pi oko ziamunoya. Ata damanata waikora zasimai emo oko samunora. Nera kota, Tua Anutu nu nutope zasimai nusokare wamunoya awa. Ago wai nata amira erama nukare dia bua wai gege wero susawise nuamunora awa.   
\s1 Yesu eya ewesemuro mamunoya.  
\p
\v 6 Angelo meni namore ego senua awa, “Ge awa me memeka awa. Tua Anutu meni Ozana nuso porofete nana iyetitinowia ami angelo nuso iyeti mai sou nuso nikare nena be iboi tepo eya kei awaise sai awa sero gipero awetia awa.”   
\p
\v 7 Yesu meni ego toya, “Ei giu! Na apunu-kaka gege mamunona awa. Are zo nu buku emira ge gayai awa puro nuamunoya ami yawa sara wamunoya awa.”   
\p
\v 8 Na Yohane, na natope nena awa giro tepo wena awa. Giro tepo wero angelo namore tani gipenua amira nana bawa diro nu bowi wamu wena  
\v 9 nu azu sero ego senua awa, “Ago oko wase! Na soumai otao niso, ata porofete otao mamai nisora otao, ata buku emira ge dia wero baitiro puro nuamunora amira otao dai. Ni Anutu gege bowi weyo.”  
\v 10 Ago sero namore ego senua awa, “Ni buku emira nena ama kei awamunoya amira ge itia awa oko gazero bezase. Ge awa me waise sero be nuso zorage awinoya awa.  
\v 11 Are ema zo nu tani waya inowia ami tani waya wamu wero giro ago waise. Ota duba inagayaire meni duba inagayaire nuamu wero giro ago nuaise. Ota Tuara gera nowia ami Tuara gera dago nuaise. Ota duba saramaire nowia ami duba saramaire dago nuaise.”   
\p
\v 12 Tua Yesu meni ego toya ewa, “Ei giu! Nama apunu-kaka gege mamunona awa. Emara wai amira ina puro mamunona. Puro muro nuai nisokarera te potamunona awa.  
\v 13 Na gitare amare; na susure gomire; na nena zaawaire tepo waire amira mama.”   
\p
\v 14 Tama woi nusokare sewawera sara-kisarapitinowia nukare yawa sara wamunora. Nera kota, nukare awa sana nuaira ni amira me namunora awa. Ota nata amira mokara toiro itamunora.  
\v 15 Nata atura erama ego ine nuamunora: Ema waya-kawaya suna ine, ata ema kayore nowera, ata ema kuma inowera, ata ema mai dawera betinowera, ata ema tua opi bowi inoise puro nowera, ata ema opi puro noise gawera me gege inowia awa. Nukare ago ine ami nata atura nuamunora.   
\s1 Yesu meni ewesemuro mamu towia, are nakai ina nu maise sanekai.  
\p
\v 16 “Na Yesu, na natope angelo naso iyetina nune ami kerenai ge awa dubu naso nimorekare kereninua awa. Na awa na Dawidira diai susu ata osi nuso ine. Na moroa bamu zasimaire.”   
\p
\v 17 Ozana ata Yesura gegenai dubu nukare Yesure ego towera awa, “Ni muyo.” Ota zo nu ge ei awa niniro da ago saiseyo, “Ni muyo.” Zo nu ou uza betero giro ego maiseyo. Ota zo nu nuaira ou emo towia ami muro ou awa zuma tepo naise.   
\s1 Yohane meni potai ge potinua.  
\p
\v 18 Buku emira kerenai ge gayai itia awa azimuro niniro awamunowa nimorekare potai ge potana niniu. Zo nu duba nusora ge zo buku emira susumamunoya, ema awa nu Anutu meni yaya-buyayare nena gorobare buku emira gayai itia awa nuso nana susumamunoya.  
\v 19 Zo nu ge emira agewa azu sero disamunoya, awa Anutu meni nuaira ni ata saramai nata awa buku emira gayai itia da ago ine nuso nana ena soyamunoya. Nena amira uge awa buku emira gayai itia.   
\p
\v 20 Kerenai ge ei awa soga inowia ami ego toya ewa, “Me memeka, na eya mamunona awa.”  
\p Me memeka, Tua Yesu, ni muyo!   
\p
\v 21 Tua Yesura dumi yagaba meni nisokare nana itaiseyo.