\id COL NT0004.CO - SUENA NT - Wilson DP Transfer 11-JUN-87 
\h Kolosai 
\toc1 PAS PAULO MENI KOLOSAI EMARE GAENUA 
\toc2 Kolosai 
\mt1 PAS PAULO MENI KOLOSAI EMARE GAENUA  
\ip \it Paulo meni Roma nate ena benai sora itise pas ei awa Tuara dubu Kolosai nate noisowa amire gaenua. Gaenu Tikikasto Onesimore meni puro bamuwato. Ego emira gaenua: Epafara meni gita Roma nate kei awero Paulo tamuro opi sai ema eni Kolosai dubura nana soe noisowa amira senu Paulo meni opi nusokare puro osamu sero pas ei awa gaenua. Opi nusokare ego ewa: Anutu itia, erama itenakai amira soe ena nena putoure angelota tua eni itera, are nakai nukare bowi wanekai. Noko, Yesu, nu Anutura osai. Nu angelo zo ine gege. Noko nena nai eni sienitinoise tama aiso kapinoise nuanisekai sai itia, ago toisowa. Are Paulo meni opi nusokare awa puro osisinoise Kristo nu nena bamubamu amira giti kopi asenua awa. \it*  
\c 1  
\p
\v 1 Na Paulo. Anutu meni ara tamai nusora na Yesu Kristora aposolo potinu nowena. Nato otao nasokai Timoti  
\v 2 nato Kolosai nate ena Tuara dubu gera otao mamai nasoto Kristore dai susumuro nowewa nimorekare pas ei awa potitinonato. Anutu Mama nasokaira nana ena sogawaire duba ewananare meni semu nisokare nana niro itaise.   
\s1 Paulo meni nukare emo Anuture kokopai asenua.  
\p
\v 3-8 Oziga Ewanana awa ge me susure awa, are ge ami nisokare nana kei awenu nikare niniro Anutura sogawai amira susu giwa me wenua awa. Be amira ana zaawero Oziga Ewanana ami nisokare nana ena zamawi me kei awi-susawewia. Agoro nisokare nana ena daba kota, zebu sero ena ago inowia. Ge ami nena Anutu meni nimorekare potamu seroninu utura itewia amira susu kereninu giro nikare Kristo Yesu tuma didinoise gera otao mamai dapikarago emo dubara dumi pupinowewa. Oziga Ewanana awa otao soremai koko nasoto Epafara Kristora soumai ge dimaire nune ami gipenu giwa awa. Ago wero nu da ami Ozana meni nisokare nana dubara dumi tamunua amira ge uge namoreto wisia awa. Are nato ge nisokare ago ine niniro nikare emo isa toise Tua nasokai Yesu Kristora Mama Anutu amire kokopai towenato awa.   
\s1 Anutu meni putou numorekare potai zewai warise Paulo isa senua.  
\p
\v 9 Are nato ge uge nisokare niniro amire zaawero nikare dubare kotumaire meni Anutura ara tamai ninawise, o kotumaire ninaire Ozana meni tapinowia awa nisokare nana be maise isa si-tupewenato awa.  
\v 10 Tua meni nimorekare ago wai amire Tuara ebata nuanisekai sai amira te nuamunowa. Ago nuawa Tua meni gai ewanana wamunoya awa. Ota gera bua koko neire-neire itia, awa inoise amira me tamamunowa. Ago inoise Anutura susu niniro susawise nuamunowa awa.  
\v 11 Nato nikare emo isa toise Anutura putou bamubake ami nikare ziai dopero putou bamu pumuro nuawa nisokare nana tame nena mou-mau witai nikare beyata tepo zewai wawise isa towenato. Nikare zewai wero wama nisokare duawa orenai dimuro dopinoise yawa sara wawise isa towenato awa.  
\v 12 Mama nasokai nu ike zasimaira ena nena namorekai potamu sero potinu itewia, awa dubu nuso meni topetanisekai sero kora wenu te wenakai, are nu bowi wawise sero isa towenato.  
\v 13 Anutu nu nakai mumera mama amira putoura ena soero pumuro Mai bou nusora putoura potinua.  
\v 14 Mai nuso ami nakai pasinara putoura ena besenua awa. Awa pasina nasokai disenua awa.   
\s1 Kristora nuaire buare.  
\p
\v 15 Kristo awa Anutu bezai amira ititi awa. Nu nena bamubamu kaka kei awamure gita wero noisonua. Are nu nena bamubamu amira giti kopi wero nowia.  
\v 16 Wai nusora nena bamubamu utura ata zebura kei awero tepo wenua — nena gaire kaka gamure, angelo witaire osaire — awa dago putou nusora ata gegenai nuso ago kei awai awa.  
\v 17 Nena bamubamu awa kaka kei awamure nu noisonua nowia. Nena bamubamu awa putou nusora itise tupewia awa.  
\v 18 Nu dubu nuso amira giti kopi wero nowia awa. Dubu nuso awa te-wana tama ipu nuso awa. Nu dubu nusora susu awa. Nu betaira ena gita wero erinua. Ago inoise nena bamubamu amira giti kopi wenua.  
\v 19 Anutu nu nuaire putoure nuso awa Mai nuso nana bemuro itaise nininu te wenua.  
\v 20 Ago wero nena bamubamu utura ata zebura awa Mai nusora buara numore dai otao-gamao warise sero senu Mai nuso ni pasinaira orara nuso meni bega tamunua, are Anuture otao wewa awa.   
\p
\v 21 Nikare gita me gita Anutura nana asike noise tani waya-kawaya neire-neire inoise nu iwo wero noisowa awa.  
\v 22 Are Kristo tama aiso puro kei awero betai nuso meni nikare Anuture dai dara potinu otao wero nowewa. Nu nikare puro poti Anutura nana benaura nai duba saramai ata ge tepo o pasina tepo kei awawise ago wenua awa.  
\v 23 Are nikare Oziga Ewanana niniro tuma diwa, tuma diai awa besai azu, ziro tata-tata inoise zewai wero dopinoise beyata oko wawe. Oziga Ewanana awa ema sero ata zebu sero bamisia awa. Na Paulo, na amira bua mai nowena awa.   
\s1 Paulo nu Yesura dubu sorepitinoisonua.  
\p
\v 24 Na nikare emo yaya-buyaya tame noise yawa sara inona. Kristora dubu awa te-wana tama ipu nuso awa. Are nu dubu nuso emo wero yaya-buyaya tamunu, yaya amira agewa awa kaka tepo wamu dago itewia, are na tama aiso naso meni yaya agewa awa dimuro pesunitinona.  
\v 25 Anutu meni nikare emo na Yesura dubu amira bua mai potinu nowena. Na ge nuso sero gipero awinoise kereniro baitanise senua awa.  
\v 26 Ge sero gipero awinowena awa bui nuso awa. Gita ge amira susu awa bezai itasai kaka ninirota niniro awamu tepo noisowa awa. Are be zeme emire nu ema dubu nuso namorekai kereninua awa.  
\v 27 Bui nuso ami woi keero ema Yudakora nana zapinoise bamu kei awinoya, awa Anutu meni ge ema dubu nusore sero kerenitinoya. Buira susu ego ewa: Kristo duba nisokarera nowia, are nikare Anutura simai zasimaire topetamunowa.  
\v 28 Are nakare Kristora susu kereniro toise ema dapikarago tugata inowenakare. Ago inoise potai ge potitinoise ninai bamure inoise ema dapikarago sero gipero awinowenakare. Awa ema dapikarago Kristora nana susumuro ema me wawa amire nuso nana dubu damu sero ago inowenakare.  
\v 29 Putou nuso meni na soga wawi amire bua awa putou bamure zewai-zawai wero inowena awa.   
\c 2  
\s1 Kristo kotumuro dube potiro amire ge opi azu sarise.  
\p
\v 1 Na sana niniu. Nikare ata Leodisia natara ata ema eni benau naso kaka gamu inowera na nikare emo bua bamubake inowena.  
\v 2 Nikare dubara dumi ina-puma inoise duba da wero zewai wero nuawise bua bamubake inowena. Anutura bui niniro baitai awa wau me awa. Are nikare wau awa puro nuawise bua bamubake inowena. Anutura bui awa Kristo awa.  
\v 3 Nuso nana niniro baitaire kotumai bamubake awa dapikarago be muro bezai itia.   
\p
\v 4 Zo meni nikare uzutiro duba siso-siso wai azu, ge awa tona awa.  
\v 5 Na tama naso meni nisokare nana zora-zarako nowena, ota duba naso meni awa nimorekare noise nikare Kristo tuma didinoise toto gagatiro sima waira dopinowa giro duba naso ewanana inoya awa.   
\s1 Nuai me topetamu sero Kristore dai tairo nuanekai.  
\p
\v 6 Nikare Kristo Yesu meni Tua nisokare waise pumuwa, are nuso nana tairo noiwo.  
\v 7 Ago inoise nuso nana tatawi potiro amire kei awero baitamunowa awa. Ota tuma diaira eba nikare sero gipero awenakare da awa patitinoise zewai wewo. Ago inoise Anutu bowi wai awa nisokare nana bemuro zapinuai nuawe.   
\p
\v 8 Zo meni emara nana bera etetenai ge awa toise duba nisokare sisai azu, uma wero baitiu. Ge ago ine awa Kristora nana ena oko tupewia. Ge awa apipie ewowo-kawowora ge gege, o zebura biruta bi amira nana ena mawi towera awa.  
\v 9 Ge opi nusokare awa uma wero baitawise tona. Nikare Yesura ema me wero baitawise tona. Nera kota, Anutura susu bamubamu awa te Kristora nana bemuro itia.  
\v 10 Nune angelo giti kopire witaire bamubamu amira zawitimai awa. Are Anutu meni nikare nuso nana susumunu nikare nuai me topetiwa.  
\v 11 Nuso nana susumuro owe pumuwa, awa wana meni tamara owe wai awa kota, nuai nisokare matu awa Anutu meni dutuniro doro nuai seka wosuninu pumuro Kristora owere wewa awa.  
\v 12 Amire wawise ge ou gutewa betai nusore gowai nusore amira susumuwa.  
\v 13 Nikare ema Yudako meni gita tamara owe tepo noise pasina tebe-tabe inoisowa, ami nuai me tepo ema betai ine wero noisowa awa. Ago noe dowa Anutu nu pasina nasokai doro nikare Kristore dai awa-uzenu seka wewa awa.  
\v 14 Lo ge dai nasokai papiara gayai ami nakai gera potitinoise ge bua wanisekai toisonua awa Yesu ni pasinaira betinoinu Anutu meni papia awa keenu tepo wenua awa.  
\v 15 Ago inoise angelo wayare biruta bire amira putou nusokare awa ni pasinai meni puro osero baitiro susu nusokare poti damu ninua. Ago inoise iwora ge meni iwo eni mui wero isipitinowera ago ine nu nukare mui wero puro aita inoise ema bama benaura ena isimunua awa.   
\s1 Nakai Kristore dai betenakai ago ine inoya.  
\p
\v 16 Susu ago ine itia, are ema zo meni wore mare sienaita ota zepara purata inuara purata Sandera pura amira sienai ge kaka dimamu wawa nikare senai oko ninawe.  
\v 17 Nena ago ine awa etete wai gege awa. Nena me ama kei awamu inoinua amira etete wai nuso daba ami gita munua awa. Ota me meni awa Kristo nana ena kei awenua itia ewa.  
\v 18 Ema eni meni duba nusokare puro osero angelo bowi waira yaba inowera ami nikare puro osamu sero ego sara oko ninawe: “Nakare atua wero nena me susure gosinowenakare, are nakare nikare dainiro ema bamu wero nowenakare.” Ema ago ine ami nuai matura kotumai puro noise tama nusokare tepo puro wititinowera.  
\v 19 Nukare ami giti kopi nasokai Kristo awa oko ziro baititinowera. Nu awa giti kopi nasokai, ota nanekai meni awa te-wana tama ipu nuso. Are giti kopi ami te-wana tama ipu awa dia wawi amire te-wana tama ipu zewai inowia awa. Umure wuwurare meni te-wana tama ipu awa susumuro poti dara nawi amire Anutu nininua te baziro zewai waire putoure kei awinowia awa.   
\p
\v 20 Nikare Kristora betai amira susupitinoise numore dai betago wero zebura biruta bi amira mui kapewa tepo wenua. Awa nogoro amire zebura nata mera noise meni wago inowewi? Nikare nogoro potai ge ego ine dipinowewi?  
\v 21 “Oko ziase! Oko niro gase! Oko kimase!”  
\v 22 Potai ge ami zebura nena puro nuawenakai eya tepo inowia amire gege toya. Potai ge awa emara kotumai meni sero gipero awinowera awa.  
\v 23 Potai ge ago ine awa soga wai bamu asero ema bama meni gawera me ine inowia awa. Bowi waira awa-uzaita sienaira noise tama aiso puro osai amira ge soga inowia asinowera, ata tepo awa. Potai ge ago ine ami nuai matura duba-duba wai awa gazai ine tepo awa.   
\c 3  
\s1 Nena ike itia amira zewai wanekai.  
\p
\v 1 Nikare Anutu meni Kristore dai betaira ena awa-uzenu eriro nuai me pumuwa awa. Ami emo nuai mera nena utura itia awa pumamu zewai inoise noiwo. Utura ena Kristo meni Tua wero Anutura nana wana mera arumuro itewia.  
\v 2 Dubare kotumaire nisokare awa nena zebura itia amira kota, nena ike itia amira potiu itae.  
\v 3 Nikare betewa ago ine inoya. Ata nuai nisokare seka awa damu-damuke oko itia. Kristo nu nuai nuso seka awa Anutura nana ena pupinowia da ago ine nikare nuai nisokare seka awa Kristora nana ena pupinowewa awa.  
\v 4 Noma Kristo nu nuaira mama nasokai meni kei damu nai amire nikare da ago ine numore dai simai zasimaire nusora kei damu namunowa awa.   
\s1 Nuai matu doro nuai seka puro nuanekai.  
\p
\v 5 Are zebura nuai matu amira duba-duba wai eure-taure nisokare nana awa musuniu tepo-tapo ware. Pasina ego ine emire tona awa: Bama bewana wai, tani waya wai, tamara duba-duba waya wai, nena waya emo duba witai, wau emo duba-duba wai. Wau emo duba-duba wai awa pasina tua opi bowi wai ago ine awa.  
\v 6 Pasina bamubamu ami emo Anutura nana ena ge dai emara nana ina kei awamunoya.  
\v 7 Nikare da ago ine gita noise pasina inoise noisowa awa.  
\v 8 Ata zeme meni awa pasina ego ewa dapikarago doro baitiwo: Be dumu wai, tini kapai, ge busai, ema zora zazo puro osai, ge waya-kawaya sai. Pasina ago ine awa dago doro tepo wewo.  
\v 9-10 Nikare nuai matu nisokarere tani-butani mamatu awa tama woi aso ine dutuniro doro nuai seka nisokare tama woi seka ine wosuniro puro nowewa, are opi ina-sa wai awa oko wawe. Nuai seka awa Anutu meni tamunua awa. Ago wero nakai susu nuso giro baitiro nu ine wanisekai nuai seka awa kora inowia awa.  
\v 11 Nakai nuai seka puro nowenakai, are zaumuro nuai awa tepo wenua awa. Ema Yudako ata Yuda ema, o ema owere ata owe tepore, o ewa ema ata ware ema, o sou wai ema ata ema mui amu. Ema susu giti awa Kristo meni nakai bamu dago te wero giti kopi nasokai wero nasokai nana nowia awa.   
\s1 Utura gera nuai amira ge.  
\p
\v 12 Nikare awa Anutura gegenai dubu awa. Nu nutope nimorekare dubara dumi pupinoise dubu nuso wawise siana-katana wero pumunua awa. Are nikare tani ego ewa tama woi seka ine wosuniro noiwo: Awa-diaire, dumi yagaba pumaire, duba puro osaire, wama-ozaire, ina-da wai tepore.  
\v 13 Nimorekare waya wara ina ge oko sawe. Ota nisokare nana soe ena ge kei awai giro ge awa dowo tepo wae. Tua meni pasina nisokare donua da ago ine pasina ina-dua wewo.  
\v 14 Ago wero nena bamubamu amira tame dubara dumi puro nuawa ami tani ewa-gaewa awa poti dara nai ewanana wamunoya awa.  
\v 15 Nikare begare duba-ozaire Kristo meni puro munua awa puro nuawise Anutu meni nikare zawa sero poti dara ninu te-wana tama ipu da ine wero nowewa awa. Are begare duba-ozaire ami refri ine wero duba nisokare dia waise. Nikare kokopai Anuture toise noiwo.  
\v 16 Kristora ge meni nisokare nana soe ena zamaise. Nikare kotumai bamure noise ge ina-gipa wero ina-sorema wewo. Ago wero Anuture kokopai toise yere eure taure — Samta yereta koka Ozana meni nimorekare potitinowia — yere awa bere kotumaire meni gapinoise noiwo.  
\v 17 Nikare ge menita wana meni nena wamu wero giro awa Tua Yesura nana ereniro amire wewo. Ago inoise Anutu Mamere kokopai toise noiwo.   
\s1 Iu ara, ata mia mama, ata mai awiso amira ge.  
\p
\v 18 O bama mamai, nikare ibana nisokarera ge dipinoise noiwo. Tuara gegenai sai meni ago wawa te wamunoya.   
\p
\v 19 O ema mamai, nikare asini nisokare emo dubara dumi pumuwo. Tini gamai numorekare oko wawe.   
\p
\v 20 O mai bama dirire matere, nikare mia mama ge sara te dimuwo. Ago wawa Tua meni gai ewanana wamunoya.   
\p
\v 21 O mamana, mai awiso nisokare iwoka wai azu, nikare wama nusokare oko ziawe.   
\s1 Soumaire ema tuare amira ge.  
\p
\v 22 O soumai, nikare zebura ema tua nisokarera ge dimuro baitiwo. Nukare nikare ua inuara be amire gege bua oko wawe. Uzutai ema inowera ago ine oko wawe. Nikare Tua nasokai azu inoise duba opi sai tepo meni nukare sou wewo.  
\v 23 Bua nisokare bamubamu awa erama emo kota, Tua emo wero duba peure ziwo.  
\v 24 Sou bua nusokare inoise ego kotumuwo: Nikare Tua Kristo sou inowewa, are nu nena dubu nusore potamu sero sianiro potinu itewia, awa bua nisokarera ina waise nimorekare dai potamunoya awa.  
\v 25 Zo nu bua nuso wai waya wamunoya, awa ina da ago ine waya pumamunoya. Nera kota, nakai Anutu uzutai ninai ine tepo.   
\c 4  
\p
\v 1 Ema tua, nikare soumai nisokare te kora wero baitiro wewo. Nera kota, Tua nisokare utura noise nikare ua inowia, awa gosinowewa.   
\s1 Wini ge eni.  
\p
\v 2 Nikare zewai wero isa toise noiwo. Duba sekare isa toise kokopai Anuture toise noiwo.  
\v 3 Ago wero nakare emo dai isa sawa Anutu meni ebata nasokare tamai Kristora Oziga Ewanana kerenanekare. Ge amira mui waira itewena ewa.  
\v 4 Isa meni na soremawa na ge awa kere damu niro sana te wae.   
\p
\v 5 Digare dai ina-tama wero saitiro kotumaire noiwo. Ago inoise buara be oko dainawe.  
\v 6 Ge nisokare awa nena moka ine wai amire toise noiwo. Ago wero emara ge egota ago kapetenamu sero oko kau wamunowa.   
\s1 Paulo meni Tikikas ata Onesimo iyetinu bamuwato.  
\p
\v 7 Ge uge naso awa Tikikas meni nimorekare wamunoya. Nu mai bou gera otao soremai ge dimaire, ata Tuara bua mai awa.  
\v 8 Nu ami nuai nasokarera ge uge inoise nikare ziai dopawise nisokare nana potena susawia awa.  
\v 9 Onesimo meni numore dai susawia. Nu ge ninai otao nasokai ewanana ata nisokare nana natara zo. Nuto nena nasokare nana kei awisia amira ge uge sero tepo warato gamunowa awa.   
\s1 Paulo meni Kolosai ema areninua.  
\p
\v 10-11 Benai ema otao naso Aristako, ata Banabara iba mata Mak, ata Yesu zazo nuso zo Zastas, nukare nikare arenitinora. Mak awa nu amire ge gita ego sena giwa: “Baro nisokare nana kei awai giro otao wewo.” Yudara dubura ena kei awai amira nana nukare etorobara ami gege Anutura buara na sorepitinowera. Ago inoise duba ewanana namore potitinowera awa.   
\p
\v 12 Nisokare nana natara ema zo Epafara, Kristora bua mai, ami nikare arenitinoya. Nu nikare emo isa toise nikare zewai wero Anutura bera ge te dipinoise ara tamai nuso giro baitiro wawise be giti isa meni nikare sorepitinowia awa.  
\v 13 Na susu nuso gosinona. Nu nikare ata Leodisia natara ata Hirapolis natara nikare dapikarago ami emo bua pei oko inowia.  
\v 14 Luka dokta nasokare ewanana ata Dimas nuto ami nikare arenitinorato.   
\p
\v 15 Na gera otao naso Leodisia nate nowera ata bama Nimfa, ata Yesura dubu nuso nana ena aunitinowera nukare awa arenitinona, awa seu gare.  
\v 16 Pas ei awa azimawa ema bama niniro tepo wara amire potawa bamu Leodisia nate nai dubu omi azimamunora awa. Ota pas zo gaero numorekare potisena awa da ago nimorekare potarise azimawe.  
\v 17 Nikare Akipo nu ego tugata wewo ninae: “Tuara bua nimore potai awa kora-kara wero pesuniyo. Agewa zo oko duase.”   
\p
\v 18 Na natope zazo nasora owe ei awa wana naso meni gainona ewa: Na Paulo. Benai ema namore kotumuwo.  
\p Tuara sogawai meni nisokare nana itaise.