\id 2TH NT0004.2T - SUENA NT - Wilson DP Transfer 11-JUN-87 
\h 2 Tesalonika 
\toc1 PAS NAMBA TU PAULO MENI TESALONIKA EMARE GAENUA 
\toc2 2 Tesalonika 
\mt1 PAS NAMBA TU PAULO MENI TESALONIKA EMARE GAENUA  
\ip \it Paulo meni Korinti nate noise pas ei awa Tuara dubu Tesalonika nate noisowa amire gaenua. Nu ego emira gaenua: Nukare Be Bamu amira ge waya-waya niniro be awa emoko kei awisia asinoisowa awa. Are Paulo meni opi nusokare awa tepo waise sero Tuara Be Bamu amira ge noko gaenua awa. \it*  
\c 1  
\p
\v 1 Paulo, Siluano, ata Timoti, nakare nikare Tesalonika natera ena Mama nasokai Anutu ata Tua Yesu Kristora ema dubu wero nowewa, nimorekare pas ei awa potitinonakare.   
\p
\v 2 Anutu Mama ata Tua Yesu Kristo nusoto nana ena sogawaire duba-ozaire semu nisokare nana niro itaise.   
\s1 Paulo nu nukare emo kokopai Anuture toisonua.  
\p
\v 3 Otao mamai, duba nasokare meni wawi nikare emo be giti Anuture kokopai asanisekare inowia. Noko nuture kokopai sawenakare te inowia. Nera kota, tuma diai nisokare meni awa zewai-zawai kei awinowia, ota dumi ina-pa wai meni awa nisokare nana zapinowia awa.  
\v 4 Ami emo nakare natopekare Anutura dubu sero amira nana noise zazo nisokare de ike nitinowenakare. Erama nimorekare iwo wawera yaya tamaire duba naire noise saineba asero zewai wero noise tuma diai nisokare oko besinowewa, amira ge uge nata sero Anutura dubura nana inowenakare.   
\s1 Tua nu iwo nisokarera ina te potamunoya.  
\p
\v 5 Tani nisokare nana kei awinowia ami namorekai susu ego ine gipinowia: Anutu nu ina ewanana nimorekare potamu wero opi oko wamunoya. Nu ina ewanana potai me gege wamunoya. Nikare Anutu imata Tua wero nuaise amira yaya tapinowewa, are yaya ami nuai nisokare korawai amire nata nuso awa topetawa te wamunoya awa.  
\v 6 Anutu nu opi kota me gege inoise noma nimorekare yaya mena- manare inowera awa da ago ine numorekare yaya mena-manare ina tamamunoya.  
\v 7 Ota yaya mena-manare tapinowewa ninekare meni awa namorekare dai dara potiro amire zanatiai nakai emo tamamunoya. Awa noma Tua Yesu nu angelo dubu nuso putou bamure niao bamu amire utura ena osero kei damu nai amire namorekai ago wamunoya.  
\v 8 Osero ema Anutura susu kau inowera ata ema Tua nasokai Yesura Oziga Ewanana niniro kaka dimamu inowera amira ina numorekare potamunoya awa.  
\v 9 Ema awa nukare Tua meni ina nusokare gera wai itai gege itai awa potitinoise benau nusora ena ata noko putou nuso simai zasimaire amira ena musunai nuai gege nuamunora awa.  
\v 10 Kristora be bamu amire ema dubu awa gera wamunora. Be nuso bamu amira ana dubu nuso saramai amira nana ena simai zasimaire nuso kei awamunoya awa. Ota ge nuso niniro nu tuma didinowenakai ami dapikarago nu giro di tainiro yaba wamunonakai awa. Nikare dai ago wamunowa, nera kota, nikare awa ge nasokare tugata wenakare awa niniwa me wenua awa.   
\s1 Nukare ewanana wero baitarise Paulo meni isa toisonua.  
\p
\v 11 Ami emo nikare emo be giti isa toise ego towenakare. Anutu nasokai nu nakai zawa sero pumunua ami zawa sai nusora te nuawise moka nisokare kora-makora waise. Ago wero putou nuso meni nikare sorepitinuai bua ewa-gaewa wamu towewa amira me tamawise, o tuma diaira bua me tamuro tepo wawise isa towenakare.  
\v 12 Nikare ago inoise Tua nasokai Yesura zazo bowire awa de ike namunowa awa. Noko nune da ago ine zazo nisokare de ike namunoya. Awa Anutu nasokai ata Tua Yesu Kristo nuto dumi yagaba nusotora nimorekare ago wamunorato.   
\c 2  
\s1 Utura ge gera-gaira wai bamu ami kei awai amire Yesura  
\s1 be zora awamunoya.  
\p
\v 1 Otao mamai, Tua nasokai Yesu Kristo ewesemai be nusore ata nakai numore dai poti dara nai amira ge zo sanakare niniu.  
\v 2 Ema eni nukare “Tuara be bamu kei awitaya” asinoise Ozana meni ema zore sisita, ota ema zo meni kotumai nusora sisita, ota nukare nanekare pas numorekare ago potisenikareta?, ago samunora awa. Are etetenai ge ago ine awa kei awai nikare eya oko titibi awero kotumai sisero itazaita wawe. Nikare ago wai azu tonakare.  
\v 3 Etetenai ge zota zo sara oko niniu. Nera kota, Tua be nuso zora awamu inuai gita ge dai bamu kei awamunoya. Ago kei awai ge dai ema, nu dega niaore amira gegenai, ami kei damu namunoya awa.  
\v 4 Nu ami tama nuso puro wititinoise nena ema meni bowi inowera, o nena ema meni “Tua” asinowera awa dapikarago iwo inoise puro osero tepo wamunoya awa. Ago wero witiro Anutura ibu bamu amira arumuro itise amire nu nutope samunoya awa, “Nama Anutu awa.”   
\p
\v 5 Na gita nisokare nana noise ema amira ge nikare tugata wena. Awa nikare kotupitinowewita?  
\v 6 Be zeme emire ge dai bamu amira gazai itia, awa ninitinowa, awa daitai amire ge dai ema meni be nusora kei damu namunoya awa.  
\v 7 Be zeme emire ge dai meni bua nuso tura-tura inowia awa. Ota eba gazinowia nu daitai amire  
\v 8 ge dai ema awa kei damu namunoya awa. Nu kei damu nai amire Tua Yesura be so amira ozana meni pisai ema awa dai betamunoya awa. Tua Yesu nu kei damu nitinoise zasimai nuso bamu meni ge dai ema amira putou awa puro osero tepo-tapo wamunoya awa.   
\s1 Etetenai witai kei awamunoya.  
\p
\v 9 Ge dai ema amira ge eni susumuro sane. Ema awa nu Satan meni mama wai putou neire-neire amire dai kei awero tani putoure opi, o tani benau sekare opi awa inoise  
\v 10 ema sisaira gegenai awa etetenai waya meni etetenamunoya. Nukare sisamunora, nera kota, nukare Anutu meni nukare soero paise ge me nuso ninamu yaba kaka wamu inowera awa.  
\v 11 Ago inowera, are nukare ge opi awa ninara me waise sero Anutu meni etetenaira putou potai kei awai ge opi awa ninamunora.  
\v 12 Awa nukare ge me giwa me kaka wamu wenu giro doro nena waya-kawaya amira ara tapinowera ema awa ina nusokare kei awaise sero Anutu meni ago ine wamunoya awa.   
\s1 Nikare meni awa zewai wewo. Nera kota, Anutu meni nikare soero pumamu ginu itewia.  
\p
\v 13 Otao mamai, Tua meni nikare awa ara tapinowia. Ozana meni nikare wayara ena uzupitinuai nikare Yesu nana susumuro ge me ninawa me wai ewanana wawise sero Anutu meni emokore zaawaira ena nikare siana-katana wero pumunua awa. Ami emo be giti numore kokopai asanisekare duba nasokare meni wititinowia awa.  
\v 14 Anutu nu Oziga Ewanana nimorekare sanakare niniro Tua nasokai Yesu Kristora simai zasimaire awa topetiro mama wawise sero nikare zawa sero kora wenua awa.  
\v 15 Are otao mamai, nikare zewai wero ge be nasokare meni ata pas meni sero gipero awenakare awa ziro tata-tata inoise noiwo.   
\p
\v 16 Tua nasokai Yesu Kristo nu nutope ata Anutu Mama nasokai, nu nakai emo zo bamubake amuro nakai soga inoise uzutai itai gege itai, o tuma diai kokopai awa namorekai potinua, nu ami  
\v 17 duba nisokare ziai zewai wai de ike nitinuai amire ge ewanana sise bua ewanana wise awinoise noiwo.   
\c 3  
\s1 Ema nukare Paulo isa meni soremarise senua.  
\p
\v 1 Otao mamai, ge zo itia ewa sana niniu. Nakare emo wero isa sawa Tuara ge meni eya semu-ketemu wero zapinoise nisokare nana ena bamubake kei awenua ago ine kei awero bayaise.  
\v 2 Ge awa ema meni te dago oko niniro dube potitinowera. Are Anutu meni nakare ema wayata pasina emara wanera ena soero pumaise isa meni nakare soremuwo.   
\p
\v 3 Ata Tua meni ge nuso sero dipinowia. Nu ami duba nisokare ziai zewai wawa nikare doena-doeti wai Satan meni nikare pumamu kaputamunoya.  
\v 4 Nikare ge sawenakare dimurota dimuro awinoise nowewa, da ago inoise nuamunowa. Awa Tua meni duba nasokarera sawi giro nimorekare duba eto oko inowenakare.  
\v 5 Tua meni kotumai ei awa duba nisokarera potaise: Anutu meni nikare zo apinowia, noko Kristo meni nikare ziawi zewai inowewa.   
\s1 Tamara bua doro timara noise utura ge puro nuai ine oko itia.  
\p
\v 6 Otao mamai, nakare Tua nasokai Yesu Kristora bera potai ge ei awa sanakare niniu. Ge gipenakare awa gera otao eni meni kaka dimamu timara inoise tepo-tapo nowera, ema amire dai oko nuawe.  
\v 7 Nakare ebata zaawero patinakare da awa patamu sero oko kau inowewa. Nakare nisokare nana timara zo oko noisonakare.  
\v 8 Ago wero nisokare nana nena zuma tepo zo oko ninakare. Tepo awa. Nakare tamara nena emo yaya nimorekare potai azu, pi waiko wana meni tamara bua mena-manare inoise yaya tamunakare.  
\v 9 Nikare ego oko sawe, “Paulo otao mamaire ego noise nukare korawanisekai saira putou awa nusokare nana tepo, are nutopekare tamara bua ago wewa.” Ago oko sawe. Tepo awa. Nakare korawawise saira putou nasokare nana itia, ata saineba, nakare nikare susu gipanakare awiso nasokare ata dubu nasokare wero nuawise ago ine awa wenakare awa.  
\v 10 Nisokare nana noise ego toisonakare awa, “Timara nuamunoya numore nena oko potawa nae.”   
\p
\v 11 Ago tonakare, nera kota, nisokare nana ena ge ego ine mi ninisenakare awa, “Ema eni meni bua nusokare doro timara noise ge busaira bua gege inoise nowera sia.”  
\v 12 Ema ago ine awa Tua Yesu Kristora bera potai ge ego sanakare niniro baitarise: Duba oreniro bua nusokare wara me kei awai nusokare nana ena puro narise.   
\p
\v 13 Otao mamai, nikare awa bua ewanana waira biawa oko wawe.  
\v 14 Zeme ge gainonakare, awa ema zo meni ninai azu sai giro susu nuso kereniro sero poti damu niro duawa nu imata noise me naise.  
\v 15 Numore iwo wawise oko tona. “Nu gera otao nasokai” asero nu senero wini ge sawise tona awa.   
\s1 Pesunaira ge.  
\p
\v 16 Tua nu duba-ozaira mama meni duba-ozai tamai nisokare nana be giti te wero baitiro itaise. Tua nu nimorekare dai nuaise.   
\p
\v 17 Na Paulo, na natope nikare arenitinoise wana naso meni zazo naso gainona. Pas gainowena te owe naso ami kei awinowia awa. Ago gayawena owe naso saore gawewa be nasora ge inowia.   
\p
\v 18 Tua nasokai Yesu Kristora dumi yagaba meni nisokare nana itaise.