\id 1TH NT0004.1T - SUENA NT - Wilson DP Transfer 11-JUN-87 
\h 1 Tesalonika 
\toc1 PAS NAMBA WAN PAULO MENI TESALONIKA EMA DUBURE GAENUA 
\toc2 1 Tesalonika 
\mt1 PAS NAMBA WAN PAULO MENI TESALONIKA EMA DUBURE GAENUA  
\ip \it Paulo meni Korinti nate noise pas ei awa Tuara dubu Tesalonika nate noisowa amire gaenua. Nu gita Tesalonika nate noisonua. Ego emira gaenua: Yuda ema eni meni Tuara dubu iwo inoise waya numorekare inoisowa, are zewai wero doparise sero pas ei awa gaenua. Noko Yesu meni ewesemuro mamunoya, amira ge eni dai susumuro gaenua. \it*  
\c 1  
\s1 Paulo nu nukare emo wero isa toise Anuture kokopai asenua.  
\p
\v 1 Na Paulo ata Siluanoto Timotire ami nikare Tesalonika nata ge ninai dubu amire pas ei awa gainonakare awa. Nikare Anutu Mama ata Tua nasokai Yesu Kristora ema dubu wero nowewa. Dumi yagabare duba-ozaire nisokare nana itaise.   
\p
\v 2 Nakare be giti nikare emo inoise Anuture kokopai asinowenakare awa. Ago inoise isa saira bera ena nikare dapikarago ami emo isa towenakare awa.  
\v 3 Tuma diai nisokare meni wawi bua me inowewa. Ota dubara dumi pai amira bua inowewa. Ota Tua nasokai Yesu Kristo be giti tuma didinoise zewai inowewa. Are duba nasokare meni Anutu Mama nasokaira benaura tani awa eyaya kotumuro numore towenakare awa.  
\v 4 Otao mamai, nikare Anutura wama. Nakare ego gosinonakare: Anutu meni nimorekare dubara dumi pupinoise nikare sianiro pumunua awa.  
\v 5 Ago gosinonakare, nera kota, nakare Oziga Ewanana puro muro ge meni daba kota, putoure Ozanare duba peure senakare awa. Be nakare nisokare nana noisonakare amire nakare nikare emo wero tani eni wasanakare gosinoisowa awa.  
\v 6 Giro nikare nakare ama ganinoisowa. Nakare ama ganinoise Tua dai ama ganinoise noisowa nowewa. Ago inoise utura ge awa puro poti dube nasawa eni meni nikare iwo wasara duba nitinoise Ozanara yawa sara wai amire noisowa awa.  
\v 7 Nikare ago inoise Masedonia ata Akaya zebura ge ninai dubu amira gita wai wero susu gipewa awa.   
\s1 Tesalonika emara nana Tuana ge te wenua.  
\p
\v 8 Nisokare nana ena Tuara ge meni te wero susawise Masedonia ata Akaya zebura kei awenua. Awa gege kota, nikare Anutu tuma diwa amira oziga awa nata sero bamunu niniro tepo wewa, are nanekare oziga awa noko sai ine tepo.  
\v 9 Nukare nutopekare nisokare nana bua wenakare me wenua amira ge towera awa. Ago wero nikare tua opi poti gutipe niro Tua me nuaire amira nana baro nu sou inowewa, ago towera awa.  
\v 10 Ago toise nikare Anutura Mai utura ena osai gamu sia wero itewewa, ago towera awa. Nu betenu Anutu meni betaira ena awa-uzenu erinua. Na Yesure tona. Nune ami be Anutu meni nakai awina-dawina wero ina potamunoya be amire nakai Anutura tini kapaira ena soyamunoya.   
\c 2  
\s1 Paulo nu Tua meni gai ewanana waise amira daba senua.  
\p
\v 1 Otao mamai naso, nisokare nana kei awero bua wenakare me tepo oko wenua amira awa nikakare nitopekare gosinowa awa.  
\v 2 Gita nakare nisokare nana kaka kei awamure Filipai nate ena nakare dero isimuwa awa ninitinowewa. Ago wewa, ata saineba, oko betata wenakare. Tepo awa. Tua nasokai nana dowenakare namorekare kotumai tamunu peu wero nisokare nana muro yaya tapinoise Anutura Oziga Ewanana awa sero kereninakare awa.  
\v 3 Uzumaira ge senakare amira susu awa opi saira ena oko itia. Nikare pasina wawise oko senakare. Nikare etete namu oko wenakare.  
\v 4 Anutu meni nakare ginu te wenu giro Oziga Ewanana sero sero awanisekare senua te towenakare awa. Ema meni nakare gara ewanana wamu amira kota, Anutu nu duba gaira mama meni nakare gai ewanana wamu amira gege towenakare.  
\v 5 Nikare nakare gosinowewa. Nakare uzutai ge zo nimorekare oko senakare. Ota utura gera koiniro wau moni emo zo oko wenakare, awa Anutu ninitinoi amire tona.  
\v 6 Nikareta ema eni meni nakare bowi wawise oko senakare. Nakare Kristora aposolo nowenakare, are nakare nisokare nana ena ema babezinoma wero itise nikare pena-pana doinoise kora wanakare te wamia. Ata saineba, ago oko wenakare.  
\v 7 Tepo awa. Mia zo meni mai nuso zo kora inowia ago ine nakare nisokare nana saitiro noisonakare awa.  
\v 8 Dubara dumi nasokare meni nisokare nana itisonua, are Anutura Oziga Ewanana nimorekare tugata wai awa gege kota, nikare emo wero nuai nasokare sisai amira dai peu wenakare. Awa duba nasokare meni nikare emo wenua are ago wenakare awa.   
\s1 Paulo meni mama nusokare ine wero utura ge gipenua.  
\p
\v 9 Otao mamai, nakare be izanakare nikare biawa wai azu, pi waiko tamara bua dai niaore mena-mana inoise dopenakare awa. Ago inoisekare Anutura Oziga Ewanana nimorekare senakare, awa nikare kotupitinowewita?  
\v 10 Nakare damu-damuke saramai pasina amu noise ge ninai dubu nikare emo tani eni wenakare awa. Amira nikare ata Anutu ami susu nasokare ninitinowewa awa.  
\v 11 Ago wero ego ine gosinowewa awa. Mama zo meni mai awiso nusore inowia ago ine nanekare nikare emo da ago wenakare awa. Nakare nikare da da amire potai gere awita sai gere awa toisonakare. Ota ego toise nimorekare senakare awa:  
\v 12 Anutu meni nata nusore simai nusore amira mama wawise sero nikare zawa towia, are nuai nusora te noiwo.   
\s1 Utura ge ninitinoiwa iwo kei awenua.  
\p
\v 13 Nakare Anutura ge senakare niniwa emara ge ine oko wenua. Ge awa Anutura ge me asero puro poti dube niwa. Ge awa Anutura ge me awa. Ge awa ge ninai dubu nisokare nana bua inowia. Are nakare ami emo be giti Anuture kokopai asero nu bowi inowenakare awa.  
\v 14 Otao mamai naso, Anutura dubu Kristo Yesura zazo ninitinoise Yudaya zebura nowera ago ine nikare awa. Numorekare wewa da ago ine nimorekare wewa. Nukare Yuda ema meni dewa tama yaya tamuwa, da ago ine otao mamai nisokare eni meni nikare dewa tama yaya tamuwa awa.  
\v 15 Yuda ema nukare Tua Yesu ata porofete dewa betewa awa. Ago wero nakare dai dero tunero awewa. Nukare ema dubu giti awa iwo inoise nowera awa. Ago wawera Anutu meni nukare gawi waya inowia awa.  
\v 16 Ago wero ema Yudakore ge sanakare ninara Anutu meni korawai azu, ebata nasokare gazamu inowera awa. Nukare ago werota wero awinoise waya witai me witai inoe dowa pasina nusokare meni daininu giro Anutura tini kapai nusokare nana kei awenua awa.   
\s1 Paulo nu nukare emo yawa sara wenua.  
\p
\v 17 Otao mamai, nakare nikare donakare, ata duba meni oko donakare. Tama meni gege donakare awa. Be pei-kaka poiwo ine wero noe benau nisokare noko gamu yaba inoise noko tera nisokare nana bayamu inoisenakare.  
\v 18 Are muro nikare gamu sisenakare awa. Paulo na natope eyaya mamu wasana Satan meni na ebata gazinoisia.  
\v 19 Nikare gamu ara tapinowenakare awa ego emira. Tua nasokai Yesu kei awamunoya be amire nena nemi bua nasokarera me, o yawa sara nasokare, o simai nasokare wamunoi? Ninekare ami wamunowa.  
\v 20 Are nikare ami zazo bowire nasokare, noko yawa sara wai nasokare wamunowa.   
\c 3  
\s1 Paulo nu nukare emo kotumu-katumu wero Timoti iyetinu bamunua.  
\p
\v 1 Na nikare emo duba naso meni ara tapinoe giro saineba asero na imata Atens nate noise  
\v 2 Timoti potena nisokare nana bamisia. Nu otao nasokai. Nu Anutura bua mai noise Kristora Oziga Ewanana towia ami nisokare nana bamuro tuma diai nisokare emo nikare soremai zewai wawise iyetena bamisia.  
\v 3 Nikare dirina tame noise beyata wai azu, ago wisena. Nikare ninitinowa. Nakai awa dirina tame nuanisekai sai.  
\v 4 Are nakare gita nisokare nana soe noise ge ego senakare awa, “Nakai yaya tamanisekai sai itia.” Are ge awa me wenua, awa ninitinowa awa.  
\v 5 Are etetenaira mama meni nikare puro osesi bua nasora me tepo inoita asero duba naso meni kotumu-katumu bamu wero giro ema ami tuma diai nisokarera susu gaise sesena bamisia awa.   
\s1 Timoti meni ewesemuro ge uge wenua.  
\p
\v 6 Are Timoti ewesemuro tuma diaire dubara dumi pumai nisokare amira oziga kokopai sisia awa. Ago wero nikare nakare kotupitinowewa amire nakare nikare gamu sawenakare nikare da ago ine nakare gamu towewa, ge awa dapikarago namorekare sero tepo wisia awa.  
\v 7 Otao mamai, dirinare moka yayare meni nakare puro osero baitinu noe donakare tuma diai nisokarera ge awa puro muro sesi ge ami duba nasokare kora weti ewanana wero baitisia awa.  
\v 8 Nikare Tuara nana ereniro zewai inowewa awa gosinoise duba nasokare peu inoya awa.   
\s1 Utura ge nusokare nana kei awero baitiro itaise Paulo meni isa senua.  
\p
\v 9 Nakare nikare emo wero Anutu nasokaira nana benaura yawa sara bamu inowenakare, are nakare Anuture kokopai nogo nogo sanakare te wamunoi?  
\v 10 Nakare nisokare nana muro ina-ga wero ge eni itera awa susumanakare tuma diai nisokare zewai waise sero pi waiko nu zawa sero begomo towenakare awa.  
\v 11 Mama nasokai Anutu ata Tua nasokai Yesu nu nutope ebata wai amire nisokare nana mamunonakare.  
\v 12 Nisokare nana awa Tua meni dubara dumi nisokare awa-uzai eriro dopai ema enire o nitopekare dubara dumi ina-puma wewo. Nanekare nimorekare inowenakare da ago ine wewo.  
\v 13 Ago wawa Anutu meni duba nisokare ziai zewai wai Tua nasokai Yesu saramai dubu nusore kei awai amire nikare Mama nasokai Anutu amira benaura pasina tepo saramai dopamunowa awa.   
\c 4  
\s1 Duba inagayaire kota, duba saramaire nuai.  
\p
\v 1 Otao mamai naso, na Tua Yesu emo wero nikare ge potitinoise ge osino zo ego ine sana niniu. Utura gera nuaire waire nisokare meni Anutu otao waise susu sero gipero awenakare, da amira gege kokopai nowewa. Ata nuai awa zewai-zawai wero nuawise tonakare awa.  
\v 2 Tua Yesura bera potai ge sero gatero awenakare awa oko kau inowewa.  
\v 3 Anutu nu ego ine towia awa, “Duba saramaire noiwo.” Saramaire nuai awa ego ewa: Kuma wai duawise.  
\v 4 Nisokare nana mai seka zo duba saramaire gai ewanana waire ami bama ataise.  
\v 5 Duba-duba inoise atai awa ema diga Anutu kaka gamu inowera ami ago inowera awa.  
\v 6 Zo meni gazai ge awa zausemuro otao nusora bama bewana oko waise. Tua nu nena amira ina potiro tepo wamunoya. Nakare ge awa gita emoko nimorekare sero gipero awenakare awa.  
\v 7 Nakai duba inagayaire nuanisekai kota, duba saramaire nuanisekai Anutu meni zawa senua.  
\v 8 Are zo nu ge awa azu samunoya, awa nu eramara ge kota, Anutu Ozana nuso nimorekare potawi pupinowewa amira ge azu samunoya.   
\s1 Duba bayaore noise bua zewai-zawai wero wai.  
\p
\v 9 Nikare ge ninai meni dubara dumi ina-puma wawise nogoro pena-pana samunonikare? Anutu nu nutope dubara dumi ina-puma wawise susu sero gipero awenua awa.  
\v 10 Ago wenu nikare Masedonia zebura nata sero ge ninai nora nukare ami emo dubara dumi pupinoise nowewa. Ata saineba. Amira tame noko susumuro kei awaise tonakare.  
\v 11 Ago wero ge zo ego ine sero gatero awenakare awa. Potiro itai awa yaba inoise nena nisokare gege dia wewo. Wana meni wise nise awinoise noiwo.  
\v 12 Ago ine nuawise senakare, awa nera kota, nikare ago inoise diga nana benaura dora botiyo tepo neine nuawa gara ewanana waise.   
\s1 Yesu kei awaira be nuso amira ge.  
\p
\v 13 Otao mamai, nikare bebetenai nisokarera susu kaka gamu inoise diga ema tuma diai tepo ami duba gazawi di saire zo amaire nowera, ago ine ninekare wai azu, sanakare niniu.  
\v 14 Nakai Yesu betero erinua ge awa ziro tata-tata inowenakai. Are da ago ine ge ei awa ganakai me wae. Yesu tuma didinoma bebetenitinowera awa Anutu meni Yesure dai puro mamunoya.  
\v 15 Ota zo awa Tuara bera ge awa nimorekare sanekare. Nakai zebura seka nuanakai Tua meni kei awai amire nakai bebetenai nukare awa dainai ine tepo awa.  
\v 16 Nera kota, Tua nu nutope utura ena ge zawa sai nusore angelo giti kopira zawa gataire Anutura so awire osamunoya. Osai Kristo tuma diro noe bebeteniwa nunekare ami gita eramunora awa.  
\v 17 Erara seka nowenakai ami numorekare dara susumanakai bereze meni nakai eya tutamu puro witai soe ena Tua tamamunonakai. Ago wero Tuare dai itai gege itamunonakai awa.  
\v 18 Nikare ge awa otao mamaire sero niniro awero duba nisokare puro osewo.   
\c 5  
\s1 Tua be nuso apunu-kaka gege kei awamunoya.  
\p
\v 1 Be nazi o tani ne kei awai amire ge awa me wamunoi? Awa sanakare gawise sai awa oko itia.  
\v 2 Nikare nitopekare ego giro baititinowewa awa. Bewana wai ema meni pire kei awinowera, da ago ine be nuso mamunoya.  
\v 3 Are ema meni, “Bega bamu itia, are kokopai itenakai,” asinoise nuara sisaira nena ami nusokare nana eya kei awamunoya. Awa bama wasou wai meni mai pumamu inoise yaya tapinowera, da ago ine eramara nana kei awamunoya. Nena ago ine nusokare nana eya kei awai nogo nogo wero dainamunori? Dainai ine oko itia.  
\v 4 Ata ninekare meni awa mumera oko nowewa, are Tuara be meni bewana wai ema ine wero eya kei awai di oko tainamunowa.  
\v 5 Nikare zasimaira o waikora dubu wero nowewa. Nakai pira o mumera dubu oko aewa. Nakai zasimaira dubu awa.   
\s1 Be kaka gamu inowenakai, are duba seka noise uma wanekai.  
\p
\v 6 Are nakai erama eni meni gitawa inowera ago ine gitawa oko wanekai. Nakai uma inoise sienitinoise nuanekai.  
\v 7 Nakai gosinonakai. Gitawa wai nukare pire gitawa inowera, ota ou niro dau wai nukare awa pire ou niro dau inowera.  
\v 8 Zasimaira dubu nakai sienitinoise nuanekai. Ago inoise tuma diaire dubara dumire meni beri nasokai waise. Ota Anutu meni nakai wayara ena soyaise tuma didinowenakai ami gitira kana zewai nasokai waise.  
\v 9 Anutu nu be dumu nusora me pumanisekai kota, Tua nasokai Yesu Kristo meni nakai soyaise towia awa.  
\v 10 Nune ami nakai emo betenua. Awa nu mamunoya be amire nakai beterota seka noise numore dai eroma nuanisekai ago wenua awa.  
\v 11 Are nikare nitopekare kora wai ge ina-sa wero duba ina-zia wawewa zewai inowera, da ago ine inoise noiwo.   
\s1 Giti kopi sou inoise ema eni dai sou wai.  
\p
\v 12 Otao mamai, nikare ego wawise tonakare. Nisokare nana bua inoise tama doinowera, ota Tua emo wero nikare gita inowera, ota sero gipero awinowera, nukare awa sou wewo.  
\v 13 Ago inoise bua nusokare emo wero nukare emo dubara dumi pumuwo. Ago wero numorekare giwo witai wae. Ago wero bega ina-puma inoise noiwo.  
\v 14 Otao mamai, na nikare danara gaero sana niniu. Ema tebe-tabe nowera nukare awa ge potiwo. Ema kotumu-katumure ago awa kora wewo. Ema tuma diai beyatare awa soremuwo. Ago wero ema dapikarago amire dai duba-ozaire noiwo.  
\v 15 Wayara ina-wai ina-wai azu amira dia weu. Nitopekareta ema enire dai kora ina-wa inoise noiwo.   
\s1 Kora waira ge.  
\p
\v 16 Duba yawa sarare noiwo.  
\v 17 Isa zo oko duawe.  
\v 18 Nena neni neni amira kokopai asero Anutu bowi wewo. Kristo Yesu meni ago wawise Anutura bera towia awa.   
\p
\v 19 Ozanara niao oko dawa sikimae.  
\v 20 Anutura bera ge porofete meni sago wero kerenitinowera awa oko azu sero isimawe.  
\v 21 Ata ge bamubamu ninitinowewa awa siana-katana wero ewanana wai giro puro noiwo.  
\v 22 Ota waya-kawaya awa dowo.   
\s1 Gawa ge.  
\p
\v 23 Anutu nu duba-ozaira mama nutope nikare zere dago sewero baitaise. Ititi nisokare ata duba nisokare ata tama nisokare awa zere dago pasina amu itara Tua nasokai Yesu Kristora kei awai bera ena saramai dopawise isa tona.  
\v 24 Nikare zawa towia ami nikare oko duamunoya. Nu bua dago wero pesunamunoya.   
\p
\v 25 Ge kaka awa. Otao mamai, nikare nakare emo isa sewo.   
\p
\v 26 Otao mamai, nikare na emo Yesura gegenai ema bama amira wana ina-zia wewo.   
\p
\v 27 Na Tuara nana benaura sana zewai wae: Nikare pas ei awa ge ninai ema dapikarago amira benaura ena azimuwo gare.   
\p
\v 28 Tua nasokai Yesu Kristora dumi yagaba meni nisokare nana itaise.