\id 2PE - NT1076 Sulka - Doug Tharp 21/3/97 
\h 2Pita 
\toc1 E Pita Ka Hor To Alomin Orom To Tittiegom 
\toc2 2Pita 
\mt1 E Pita Ka Hor To Alomin Orom To Tittiegom  
\is1 O Rhek Ruk Ktar Kam Keknen Mang E Pita Ka Hor To Alomin Orom To Tittiegom  
\ip E Pita tittiegom ka hor to alomin orom ta ngang e Yesus ka ngaomevek lsir to ta ktar ittiegom ka hor to aktarang ngang ngar. Vanangko mnam a venloot to e Pita tittiegom ka hor to alomin orom to enda, e Yesus ka ngaomevek ta re kam mrua ksir petgim e Yesus hak, ko o pattermia ruk la ppiagar ngat kerpatter mar kmegom kam vraik orom ngaro papat ruk kmor mnam mar mang e Yesus he kmokpom kar petgim mar.  
\ip E Pita ta mnor tok, to le kaittiegom ka hor to alomin orom ta ngang ngar kmel pat kim mar mang a papat to kam sir lserppak malngaeng o pattermia ruk la ppiagar. E Pita tkaenkrovgem mar kam lol o papat mang E Yesus he klaut kngae orom mar ko ngak kaeharom mar ngang o mia mekam mekam. Ii, tkaenkrovgem mar kam vle ngang E Nut orom ngaro keknen ruk o totur, endruk ngam kolkol ekam E Nut ktakor. Tkaenkrovgem mar tok, ekam ko thavaeng ngar te, ketasuo he e Yesus kam mi kaottam ka tnangal to kam kat kaeknik ngte mmie.  
\ip Va e Pita tkaengorang o pattermia ruk la ppiagar kat te, E Nut ner mia rum kim mar hak ko ngam kaegom kam kering karo mia mruo.  
\c 1  
\s1 E Pita Tkaen Ka Mamrung Ngang O Mia  
\p
\v 1 Dok e Saimon Pita, a aposel to mkor e Yesus Kristus, ekam ko tmeng dok kam kol ka gu kam havae mang en. Ii, dok kalkayie to kom kaeha ngang en tok.  
\p Ko kaittiegom kua hor ta ngang nguk ruk mut kor mnam muk mang e Yesus Kristus he kmokpom kar, endo tsusulgim mor he kmon mor la mmok ko pum E Nut kalo keik. Muk mut her lol o papat ruk kmor mnam muk mang e Yesus he kmokpom kar kmenang ngor kat ko mor ngot kor mnam mor mang en he kmokpom kar gi enang tok kat. Va nguaro papat ruk kmor mnam mor mang e Yesus he kmokpom kar, ngta vle ngang ngor te, ngua gol ka pun. Va her e Yesus kat arhe ta vle kat te, en E mi Nut msim hak.   
\p
\v 2 Ii, he ekam ko muta mnor mang E Nut to Ngoldaip e Yesus, va kua ngarkie ngang en mang nguk te, En kam ho ksovet hak kam ring ya mang nguk kmeharom mularo vurkul kmongeik kat.   
\s1 E Nut Ten Karo Tnangal Ngang Karo Mia Mruo, Mar Kam Kolkol Ekam En Vgum Mar  
\p
\v 3 Mare, e Yesus ka serppak tho mi kut kaenang E Nut ka serppak msim hak. Va ten ka serppak ngang ngor ruk ngot kor mnam mor mang en he kmokpom kar. Va ka serppak to endo ther enserpagam mor kmeharom nguaro ngorsang tgus orom o keknen ruk ngat ottek ekam E Nut mruo vgum ko ngota mnor mang en. Va her e Yesus to ther mi kut vaeng ngor kmikkiem ka keknen to kam ya mang o mia, ko karo keknen tgus ngat vua mmok hak.  
\v 4 Ii, va her ekam ko E Yesus nma vle ngang ngor orom karo keknen ruk endruk, ther le mur el karo tnangal ngang ngor. Va karo tnangal ruk endruk ngat ho mi kut laut hak, va ngaro serppak ngat kais kam hortgem mor kam pis enang en mruo, kmikkiem gi enang ko en tho mi kut vle te, en E mi Nut msim. Ii, ngot kais kam kolkol ekam en mruo tok, ko karo tnangal ngat kais kam kser o kerkeknen ruk ngma kering ngor mo mmie ko nguaro pkor ngaro svil ruk ngat kernonho ngam kaenen mor kmeharom mar tok. He ekam tok, E Nut karo tnangal ruk endruk, ngta vle ngang ngor kat te, ngua gol ka pun kat.   
\p
\v 5 Ii, mut kor mnam muk mang e Yesus he kmokpom kar, he en ten ka serppak ngang nguk kam hortgem muk kam vle enang en mruo tok arhe. He her gi ekam tok, mguak kle klol o keknen akuruk he kaelik kuon malpgem endo kmor mnam muk mang e Yesus he kmokpom kar kngae kngae tok. Ii, mguak kael a keknen to kam ya ngang o mia kuon malpgem endo kmor mnam muk mang e Yesus. Va mguak kael a keknen to kam smia mnor mang o ni keknen ruk lyar va endruk nong lyar kuon malpgem endo kam ya ngang o mia.  
\v 6 Va mguak le kngae kael a keknen to kam mrua nho mang mularo pkor kuon malpgem endo kam mnor mang o keknen ruk lyar va o keknen ruk nong lyar. Va a keknen to kam matnge vgum o vnek, mguak kael kuon malpgem endo kam mrua nho mang mularo pkor kat. Va a keknen to kam totu pum E Nut, mguak kael kuon malpgem endo kam matnge vgum o vnek.  
\v 7 Va mguak le kael a keknen to kam vle te, a sim re pum muornopeik kuon malpgem endo kam totu pum E Nut kat. Va a keknen to kmelongtok mang o mia, mguak kle kael kuon malpgem endo kam vle te, a sim re pum muornopeik tok kat.  
\v 8 Ii! Mguak kael o keknen ruk endri mo malpek kun mnam muk kngae kngae tok. He enangthe mup kaeharom tok, va mularo papat ruk endri mut lol mang Ngoldaip to e Yesus Kristus, ngar le mi kael mit orom mularo keknen ruk mguak kaeharom mar kmikkiem o keknen ruk endri tok arhe.  
\v 9 Vanangko ani mhel to tlol o papat ruk mang e Yesus, nang lua khenam o keknen ruk endri orom karo keknen mruo ma mmok tok, va a mhel to endo ta kle ktua vle enang a mhel to kalo keik ngint ho mi kut srongrong hak he kle ka vle te, en a vivisker. Ko en nam lo kta pat mang Ngoldaip kat e, nang kle kikiangae mang tgus te, tesgun her Ngoldaip arhe endo ther parrum kakro kerkeknen ruk nam eharom mar tesgun he.   
\p
\v 10 To koornopeik, ekam ko o papat ruk endri ngata mien, va mguak kle ka svil hak kmegom mularo serppak tgus kam khenam o keknen ruk endri lyar orom muk mruo, he nang kmenserpagam E Nut ka ngaeha to kam vaeng nguk kam vle enang En mruo va endo ko ta ktar re pum muk tennik kam vle ngang En mruo tok. Ii, he enangthe mupa khenam o keknen ri orom muk enang tok, va mularo papat ruk kmor mnam muk mang e Yesus he kmokpom kar nga ho lo is kam ksir hak.  
\v 11 Mare, va enangthe mupa khenam o keknen ruk endri orom muk tok kat, va Ngoldaip to e Yesus Kristus, endo tsusulgim mor, ner kle ho mi ktua sovet hak kam kunngir kim muk ge, mnam a kolkha to o mia tgus ngak vaik ku meorom ka tavgo to nera vle kuo mang o mia tgus ngnik ngnik.   
\s1 E Pita Tkael Pat Kim O Mia Mang O Papat Ruk O Minar Mang E Yesus  
\p
\v 12 He ekam tok, mut si lol o rhek ruk endri o minar mang e Yesus tesgun, he mularo papat ruk mang ngar ngat sir lvu serppak hak, vanangko ko kle kta svil kam kta kael pat kmuk ormar kngae kngae ge.  
\v 13-14 Ii! Va ta sir ngang dok kmel pat kmuk tok he kta hover mularo papat mang ngar. Ko kua mnor te, kua vok tgia vle enang a rambel e, he ketasuo dok kam yor he. Vanangko, ekam ko kua ktal he ka vle vop, va kua svil kmel pat kmuk ormar, kais ko kua serppak nak ngae knop. Kua mien te, ketasuo dok kam yor kmikkiem enang ko Ngoldaip e Yesus Kristus tel dok ma hor mang tok orom karo rhek mruo.  
\v 15 He ekam tok, tete, ktar mang dok kam yor, kua svil kmegom kua serppak tgus hak kmeharom a ngaelaut tang kam turang nguk kam pat mang o papat ri mekam mekam kopekam ko nguak yor he.   
\s1 E Yesus Ner Kat Kaeknik Orom Ka Serppak  
\p
\v 16-18 Tesgun ngot havaeng nguk orom nguaro rhek te, Ngoldaip to e Yesus Kristus tpis mo mmie orom kla serppak, he ner kat kaeknik ngte mmie orom kla serppak to endo gi. Ngot havaeng nguk tok, vanangko nguaro rhek ngam lo kaikkiem o gi vrong mohoi e, enang ko o mia akuruk ngma havae orom ngaro rhek kmikkiem o mohoi ormar. Nop, nop hak! Vanangko ngot kle va horo mi vokong e Yesus kla serppak to tmi kut laut hak orom nguaro kerok mruo. Ko ngot vokom en te, en a ho vu ngaurar hak tok arhe. Ii! Ko her mor mruo ri arhe ngot horo mi vle ko kim e Yesus kuo kia vul to a totur mnam a kolkha to msim Ngorteit to E Nut tmur khenam e Yesus kla serppak to tmi kut laut hak ma mmok ngang ngor. Ii, ngota vle ko kim ko E Nut ta rere he kteiver en va khover e Yesus ka munik. Va her mor mruo ri kat arhe ngot horo mi mur kut ngan E Nut karo rhek ko ngat ottek kuon ma volkha ekam En mruo to La Vu Ngaurar Hak, Endo A Ho Momgor Hak ko thavae te, “Ko hal ta arhe, kom vu kaelongtok mang va ko sei kam higiang.”   
\p
\v 19 Va kam ngam a papat langto kuon malpgem kat, E Nut Khal to endo tenserpagam o rhek ruk o propet ngata ktar kpavap ormar tennik mang Endo E Nut Thim Orom Ka Msasaen, ko ngat her mi el mit tete he orom en mruo tok arhe. He enang tok, mor ruk ngot kor mnam mor mang e Yesus he kmokpom kar, nguaro papat ruk mang o propet ngaro rhek ruk endruk ngat kle ho mi kut serppak hak te, ngat pis lmien orom en tok arhe. Ii, he ekam tok, mguak ngarngar mang o propet ngaro rhek ruk endri kam toot mang a kolkha to e Yesus na kat kaeknik mnam ormar, gi enang a mhel to ta sngam a ngnung ka pun he ktoot orom kun ma slommok kam paneng kam mamarar tok kat. Ii, mguak toot mang nguk mruo orom o rhek ruk endruk mang en kam ngae kais mang a kolkha to endo, ko en nera vle enang a kolkha, ko nera valler muk he kho kpet a slommok kun mnam muk. Ii, va e Yesus ta vle enang a ketor to a lesa kat ko ner kaen a mmok ngang o mia mang E Nut kat mnam a kolkha to endo gi.  
\v 20 Ii, va kam ngam kuon mang a papat to endo kat te, ngot lo kaikkiem o vrong mohoi kam havaeng nguk mang e Yesus, ko a papat to a ngaenpaeir ta vle ti te, enangthe a propet naka ktar kpavap orom E Nut karo rhek va nop ke mhe tang hak kun mnam karo rhek tgus ngat pis kmikkiem a propet karo mur papat mruo e. Nop hak!  
\v 21 Ko E Nut karo rhek ngat lo ottek ekam a mhel tang ka svil mruo e. Nop hak! Vanangko o propet ngaro rhek ngat kle ottek ekam E Nunu A Totur ko ten o rhek mnam mar, mar kam ktar kpavap ormar enang tok.   
\c 2  
\s1 E Pita Ta Keknen Mang O Ker Pattermia Ngaro Kerkeknen  
\p
\v 1 Ii, pu lmien te, o Israel ngaro propet ruk tennik ngaro rhek ngat si ottek ekam E Nunu A Totur tok, vanangko lmien kat te, o propet ruk la ppiagar akuruk ngat pis kun pgegom lIsrael kat ge, he ka ppiak kam ktar kpavap orom ngaro rhek mruo ngang ngar kat. Va tok kat, o pattermia ruk la ppiagar akuruk ngata pis tete kun pgegom muk kat, gi enang ngar tok kat. Endri ngat her aol ma mmek mnam muk orom ngartaro papat ruk la ppiagar. He ngara hos kim o mia akuruk ngaro papat ruk kmor mnam mar mang e Yesus ormar kat. Ii, si a papat to mang Ngoldaip to La Vu Ngaurar hak ka yor to tel a ngaekam ekmar orom, va ngam kle ho mia klai mang endo kat. He ekam ko ngma vle tok, ngar mur kait a kapnes kuon mang ngar mruo, he E Nut ner lua hus hak kmen nga kapnes to endo ngang ngar kat e.  
\v 2 Ii, ngara vle tok, he le kait o mia kavurgem kat kmikkiem ngaro kerkeknen ruk ngma ngam o leep kuon mang ngaro pkor ormar. He ekam tok, o mia ruk endruk ngara kolkol ekam mar tok, he kaenpgam o mia akuruk kam kerrereng a re to a minar mang e Yesus.  
\v 3 Va ekam ko o ker pattermia ri ngam vua gorgor pum lraip va lurokol kam mrua ngam mar mruo ekam ngaro pkor ngaro sing mang ngar kam tmar kmar, va ngar mia mas orom muk he ker patter muk orom ngaro mohoi ruk mar mruo ngat elelik mo malpek, he nang muk kam kle kaikkiem mar pum mar tok. Ngam sia vle tok, vanangko E Nut thera ktar el nga kapnes ngang ngar tennik he, he nga kapnes to endo ta vle kuo mang ngar vop kam paneng ngar tete ge, ko E Nut ner ho lo konit orom nga kapnes to endo hak.   
\p
\v 4 Ii, E Nut ner lo konit orom nga kapnes hak, ko mu vokom na, o ker engyel ruk ngat eharom o kerkeknen tennik, E Nut tlo mnang tang mnam mar hak kam lo kaen a kapnes ngang kat e. Nove! Ther kle va kaenpasiker mar tgus ko mnam a hengor to ogu mLol ku kia paei to a vleir. A mhe to endo, a mhe to a slommok alautar nma vle mnam, he ngar le ka vle ko tok kais mnam a kolkha to E Nut nera momngan kar mar kmen nga kapnes ngang ngar.  
\v 5 Ii, va E Nut tlo konit orom a kapnes to ngang endruk tennik mnam a venloot to e Noa nma vle kat e. Ko E Nut tlo mnang o mia ruk ko mnam a venloot to endo kat kam lo kaen a kapnes ngang ngar kat e. Nove! Ko E Nut tmeng a kus ngang ngar ruk ngam lua totu pum En orom ngaro keknen. Va a kus alautar ta pis, va a ye tsovet kmottek he kaem a mmie tgus ka vvuom o mia tgus kngam mar o yoror. Vanang ta nho mang e Noa kar endruk aktiek hori orom alomin kam pet mar petgim a ye. Ko e Noa en a mhel to nma havaeng o mia kmeharom E Nut karo keknen ruk ngta sir ko pum E Nut kalo keik.  
\v 6 Va o kernonhor ruk yok tennik, endruk kun mnam alo rengmat ruk e Sodom va e Gomora kat, va E Nut tlo mnang ngar kam lo kaen a kapnes ngang ngar kat e. Nove! Tmi kut ngampaei pum endruk tgus ngam lua totu pum En orom ngaro keknen kam mi kut khenam ngang ngor ruk tete te, En ner mi kaen a kapnes ngang endruk tgus ngam lua totu pum En orom ngaro keknen enang tok.  
\v 7-8 Vanang e Lot, en tuk en a mhel to nma vle mekam mekam orom karo keknen ruk ngat vua sir ko pum E Nut kalo keik kun pgegom endruk ngama kpoot mang E Nut karo pos orom ngaro kerkeknen. E Lot nma vokom mar orom ngaro kerkeknen he ka ngnek mang ngaro kerkeknen ruk kat, he ngaro kerkeknen ruk endruk ngam ho mi ktua vanker ka vrek mnam o kolkhek tgus. Mare, ko ka ngaung nam ho lo kaisis hak ekam o mia ngaro kerkeknen ruk endruk ko en a mhel to karo keknen ngam vua sir hak ko pum E Nut kalo keik. He enang tok, E Nut ta nho mang e Lot kat he kturang kam pet petgim a paei to E Nut tngampaei pmar orom.  
\v 9 Mu vokom na, ekam ko o rhek ri mang o mia ruk endruk ngta mien tok, va ta khenam ngang ngor te, Ngoldaip nam smia mnor kam turang o mia ruk ngam sim kut kaikkiem karo keknen kam pet mar petgim ngaro vnek. Va ta khenam kat te, E Nut nam smia mnor kat kam lua tutut mang a kolkha to kam momngan kar endruk ngam lo kaeharom o keknen ruk ngta sir ko pum kalo keik ko tpaneng a kolkha to endo kam pis. Vanang ta kle lo korim mar lhok kam lua marer kmen ngaro kapnes ngang ngar enang tok kat ge.  
\v 10 Ii, va o ker pattermia ruk mnam muk, E Nut nera rum nga kapnes ngang ngar ko ngam mrua ngam mar mruo ekam ngaro pkor ngaro svil ruk ngat kernonho hak ko ngam kaenen mar kmeharom o kerkeknen.  
\p Ii, ko ngam vua kpiem o vrong serppak to kle khover mar mruo kam khenam ngartaro serppak mruo. Va si o kool ruk kuo kia gan kat va o mia ruk endruk ngam lua gor hak kam rere pum mar kam kering ngaro mnok kat e.  
\v 11 Ii, ngam sia vle tok, vanangko si o engyel ruk ngaro serppak ngat ho mi kut laut hak mang o ker pattermia ruk endruk, va mar ngam lo ktua rere pum o kool ruk o serpgar ruk endruk ko kim E Nut kalo keik kam kering ngaro mnok enang ngar tok e.  
\v 12 Lmien te, o engyel ngam lua rere pum o kool tok, vanangko o ker pattermia ruk endruk, ngam her gia kolaspa kam rere pum o vrong serppak ruk ngat lua mmok mang ngar. Ii, he enang tok, ngama vle enang o kangsop ruk nong ngaro papat ngang ngar. Ko ngam gi vrong ngam mar mruo ekam ngaro pkor ngaro vrong svil ruk ngat kernonho. Mare, o kangsop ruk ngam lua non, mar ngat mi ktua vle ngang o mia te, o mia kam gia krus ekmar gi krong ngar kngam mar o yoror. Va o ker pattermia ri kat, ngat gia vle ngang E Nut gi enang o kangsop ruk tok kat, he nang En kam ngam mar o yoror enang tok kat ekam ko ngma rere pum o vrong serppak ruk ngat lua mmok mang ngar.   
\p
\v 13 Enang tok, o ker pattermia ri E Nut nera kering ngar kmikkiem enang ko ngata ktar kering o mia ruk tesgun. Ko mar ngam kael ngaro papat te, kam ker sirei orom ngaro kerkeknen ko ma mmok. Ii, mnam o kolkhek ruk muk ruk mut kor mnam muk mang e Yesus he kmokpom kar mum kael mularo ngorsang kmemik mo kmuk kam khenam te, mum kaelongtok mo nguk, va endri ngam kaum kaemik ko kmuk he ker sirei kmeharom o kerkeknen orom ngaro pkor ko ma mmok ko kim muk tok. He enang tok, ngma ngam a leep alautar kuon mang nguk orom ngaro kerkeknen ruk endruk tok.  
\v 14 Ii, ko ngam lua tu kmeharom a kerkeknen to kam vua nonhong lraip lurokol kam vret mar. Ko ngam kaeharom tok ngang endruk ngaro papat ngam lo vua serppak mang kmor mnam mar mang e Yesus he kmokpom kar kmit mar kam vret mar. Ko a keknen to a mhel kam gorgor pum lraip va lurokol kam mrua ngam en mruo ekam ngaro pkor ngaro sing mang ngar kam tmar kim mar tok tottep kun mnam ngaro vurkul hak. Enang tok, ngma vle enang a murgun to orom o vimol ruk E Nut ner ho mi ktua rum kim mar hak. Ii, E Nut nera rum kim mar hak ko  
\v 15 ngat her parem karo rhek ruk ngata sir he ka vle enang a mhel to tparem a ngaelaut he kle kaol ksosop he. Ii, ngma sosop to kle kaeharom o kerkeknen, kam sim kut kolkol ekam e Balam to e Baor khal, ko tennik e Balam nma svil mang o mia kmenkim mang ka kerkeknen to na re kaeharom ngang lIsrael.  
\v 16 Tpua vle tok, vanangko, e Balam ka dongki mruo, endo a gi ngaemslang to tlo kais kam rere, ther mi ktua rere orom a mi mhel ka ktui he ka psom mang ka kerkeknen to endo. Enang tok, a her gi dongki to endo arhe thera tokim a propet to endo, en kam lo kta kaeha kmikkiem ka mrang to endo kat e.   
\p
\v 17-18 Va o ker pattermia ruk endri kat ngata vle enang a ye ka ton ko a ye ta kauyang ngor ko tlo kta sap ekam e. Va ngta vle enang o varhek ruk ngma kauyang ngor tok kat ko a ngausgi tkovvorik, nang a kus tlo kaerik e. Ii! O ker pattermia ruk endruk ngama vle enang tok, ekam ko ngam vua gu piris kam mrua hover mar mruo orom o tnangal ruk nong ngaro kleim ngang ngar. Enang tok, her mar ruk arhe, E Nut thera ktar kael nga ngaekam to kun mnam a hengor to tho mi kut slok hak ngang ngar, mar kam vle mnam ngnik ngnik. Ii, ngam kaeharom tok kmit o mia ruk ngat re gun kael ngaro yaik ngang o mia ruk ngam kaikkiem o keknen ruk la ppiagar petgim mar, nang lo vua serppak mang e Yesus vop. Ii, ko ngam kait mar orom a kerkeknen to kam gorgor pum lraip lurokol, mar kmikkiem ngaro pkor ngaro svil ruk ngam kaenen mar kmeharom o kerkeknen.  
\v 19 Enang tok, o pattermia ruk la ppiagar ruk endruk ngam papanglou kam re kmel a tnangal ngang ngar ruk ngat lo vua serppak vop kam havaeng ngar te, ngat kais kam mrua kser mar pum o pos ruk ngma kurogos mang ngar he ktokim mar kam tmar kim ngaro pkor ngaro svil mruo. O ker pattermia ruk endri ngam si papanglou kam re tok, vanangko her ngaro kerkeknen mruo ruk arhe ngam kle ho mi ktua kurogos mang ngar kserpagam mar ge. He enang tok, ngama tokim mar mruo kam lo kaeharom a keknen tang ko a vu yar tok. Ngma vle tok, ko a ni vrong keknen to napa ngae mi kut sovet kun mnam a mhel tang, va a mhel to enda ta vle ku meorom a keknen to enda ka serppak, ko ta kurogos mang kserpagam.   
\p
\v 20-21 Tesgun o ker pattermia ruk endri ngat hera lol o papat mang Ngoldaip to e Yesus Kristus he, endo tsusulgim mor. He ekam tok, ngaro kerkeknen ruk tesgun ngma kering ngar mo mmie ko ngaro pkor ngaro svil ruk ngat kernonho ngam kaenen mar kmeharom mar tok, o ker pattermia ri ngat her kle ksir pum ngaro kerkeknen ruk endruk he, her vgum ko ngat kor mnam mar mang Ngoldaip to arhe he kmokpom kar. Vanangko tete, ngat her kle kat kaeknik mang o kerkeknen ruk endruk he kta kpom mar kat kam vle ku meorom ngaro serppak ko ngaro kerkeknen ngata kta kurogos mang ngar kir kim mar kat he. He ekam tok, enangthe ngap lo ktar lol o papat ruk mang e Yesus, va E Nut ner lua vanker a kapnes ngang ngar. Vanangko ekam ko ngat her lol o papat ruk o totur mang e Yesus, ko o mia ngat smia papsim mar ormar tesgun, nang koknaik kle kat kael ngaro yaik ngang ngar kam kta vraik petgim E Nut karo rhek ruk ngta sir, va E Nut ner ho mi ktua vanker a kapnes ngang ngar hak. He ekam tok, te vrua ya ngang ngar enangthe nga lua ktar klol o papat ruk mang e Yesus hak. Vanang ther mi kut kernonho hak ngang ngar tete ko ngat lol to kle kael ngaro yaik ngang ngar.  
\v 22 Enang tok, alo koka ri ngint pis lmien orom o ker pattermia ri te,  
\q2 “A vela nam kat kaeknik kmem karo rengtek mruo”  
\m va  
\q2 “A morek to nam korop ko mye, nam kat kaeknik kam kta muom kat.”   
\c 3  
\s1 Ketasuo E Yesus Kmeknik Mo Mmie  
\p
\v 1 Kolenar ruk kom kaelongtok mang nguk, kua hor to enda ta vle te, kua hor to alomin orom ko kaittiegom ngang nguk. Va orom kuaro rhek ruk kun mnam kualo hor ri tgus, ko kael pat kmuk ormar mang E Nut karo papat, he nang dok kmegom kam hover o papat ruk lvu yar hak kun mnam muk ormar.  
\v 2 Ko kua svil muk kam pat mang E Nut karo rhek ruk o propet ruk o totur ngata ktar kpavap ormar tennik, endruk mang a kolkha to a kser kim. Kua svil muk kam pat mang a pos to Ngoldaip To Tsusulgim mor, ten ngang ngor kat ko vgum o aposel ruk muma ngan vgum mar.   
\p
\v 3 Ko a papat to tvua laut, endo mang a kolkha to a kser kim, ko mgua smia mmok mang ta vle ti te, kun mnam a venloot to nak konner a kolkha to a kser kim, o kermia akuruk ngara ktar kpagis he kerrereng o mia kam hallam mar he kaikkiem ngaro pkor ngaro svil mruo ruk ngat kernonho hak.  
\v 4 Ii, ngara pagis he ka klel orom muk ruk mut kor mnam muk mang e Yesus he kmokpom kar kam mngan pum muk te, “Endo muma paneng kpaneng ngnam e? Nok ka tnangal to tel mang en mruo te, en kmeknik tgi ppiak orom vor e! Ii, ngorores ngat yor he, he o tgoluk ngat gia vle enang tennik ko E Nut tkueng o tgoluk kat e, ko a volkha kar a mmie ngint pal kmis mang tete gi, nang en ngnam e?”  
\v 5 Ii, o kermia ngara mngan pum muk tok, ko ngar ho mi kut kaennegiang E Nut ka ngaeha to kam kueng a volkha kar a mmie. Mare! Ko E Nut tgia re, he gia kueng a mmie kar a volkha. Tkueng a mmie he thurpis mnam o itok ko E Nut tkueng a mmie orom mar tok.  
\v 6 Kam ngae, to E Nut ta kle gi kta re kat, he kvuvuem a mmie kam kering tgus hak orom o itok ruk endruk gi.  
\v 7 Ii! Va her gi vgum E Nut karo rhek nga serppak to endo kat gi, E Nut ther el a mmie to tete va a volkha to tete ngina kolkha langto kam vle koknaik, he nang En kam toot mang kam ngae kais ko En kam knim a paei to alautar mnam he kngampaei pmin tgus, yek En nak momngan kar o mia ruk ngam lua totu pum En orom ngaro keknen kun mnam a kolkha to endo gi. Ko mnam a kolkha to endo, o mia ngara lol ngaro mumgu he kyor kat ko E Nut tmi kut el a mmie va a volkha to tete min kam vle kpaneng a kolkha to endo enang tok.   
\p
\v 8-9 Ii, a kolkha to endo na sia pis koknaik yek, vanangko kolenar ruk kom kaelongtok mang nguk, tete mu or kam mi kaennegiang a papat ti te: E Nut ner lua hus hak kmaottam ka tnangal e, ko o pnes ngarlavurgem ngarlavurgem ngat gia vle ngang E Nut enangthe, mar a kolkha agitgiang e. Va a kolkha to agitgiang tgia vle ngang En kat enangthe, o pnes ngarlavurgem ngarlavurgem. Ko nam lo vua tutut mang a kolkha to endo kam pis e. Nove, nma paneng o mia tete kmitgung ngaro kerkeknen, ko her muk ruk arhe En nam lua svil muk kam yor he kpolok petgim En mruo hak. Vanangko o mia akuruk ngma pat te, E Nut nma hus kmeknik.   
\p
\v 10 Pu lmien tok, vanangko a kolkha to a kser kim ko Ngoldaip nera pis mnam, ner gia pis pangnaom o mia he kaelsenkrip ngang ngar, gi enang a ngauruvik ko nma pis pangnaom a rek kteit he kaelsenkrip ngang en tok kat. Ko mnam a kolkha to endo, a volkha nera khir he kbor klik kam loloong ka ngmeang hak va a paei ner kaem o vrong tgoluk tgus kuo ma volkha he krum mar tgus kat. Va o tgoluk tgus mo mmie kat a paei ner kaemik he ngara loloong tgus kat.   
\p
\v 11 Mare! He ekam ko o tgoluk tgus ngara loloong enang tok, va muta pat nngia, mularo keknen ngaka vle nngia tete? Ekam tok, mguak kaegom mularo serppak tgus hak kam mur kaen muk mruo ngang E Nut, kam vle ngang En mruo orom mularo keknen ruk o totur he sim ktua kolkol ekam En mruo.  
\v 12 Ii, mguak kaeharom tok tete he ka vle tok kngae kngae kat, kam tutut mnam a kolkha to E Nut nera momngan kar o mia tgus. Ii, mularo keknen ngaka vle tok, kam marer pum a kolkha to endo kam pis. Mare, a kolkha to endo, E Nut nera ngampaei pum a volkha tgus va a paei ka mman ner kael o tgoluk tgus kuo ma volkha kat he ngara guggus to le kloloong hak.  
\v 13 Ii, o tgoluk tgus ngar sia loloong enang tok mnam a kolkha to endo, vanangko mor ruk ngot kor mnam mor mang e Yesus he kmokpom kar ngom kle va kserppak ge mang E Nut ka tnangal to tel ngang o mia, endo E Nut kam kta kueng a mmie to a gunngar kar a volkha to a gunngar. Ii, he her ka tnangal to ngota nho mkor E Nut kmaottam arhe. Ko ko tok mnam a mmie to a gunngar tok, o mia ngar kaeharom o keknen ruk ngta sir ko pum E Nut kalo keik ko a mmie to a gunngar to endo o mia ruk endruk ngara kol te, nga rengmat ka pun to a gunngar msim.   
\p
\v 14 Kolenar ruk kom kaelongtok mang nguk, gi ekam ko muta nho mkor E Nut kam kta kueng a mmie to a gunngar va a volkha to a gunngar kun mnam a kolkha to endo tok, va mguak kaegom mularo serppak tgus hak kam vle orom mularo keknen ruk ngat vua mmok hak ko pum E Nut kalo keik, he nang E Nut kam lo kais hak kam mon muk orom a kerkeknen tang hak mnam a kolkha to endo gi. He enang tok, mguer kais kam vle orom a vrek longeik ko kim E Nut kun mnam a kolkha to endo.  
\v 15 He ekam tok, mgua smia papat kmikkiem a papat ti te, Ngoldaip nam gia huhus kmeknik her gi ekam ko nam gia paneng nguk kmitgung mularo kerkeknen, he nang E Nut kam susulgim muk kam hong nguk pum mar. Ii, mguak smia papat tok kmikkiem ngornopia to e Pol, endo ngom kaelongtok mang, ko en kat tittiek ngang o mia orom karo papat ruk lvu laol, endruk E Nut tennik ngang.  
\v 16 Ko e Pol nam kaittiek kun mnam karo hor tgus kam rere gi enang ti arhe mang o papat ruk endri kat, vanang karo papat akuruk kun mnam karo hor ngat vua kellet kam lol ngaro pneik. He enang tok, o mia ruk ngam lua svil kam ngae ka pngat mang karo rhek ngaro pneik, endruk ko ngaro papat ngat lo vua serppak mang E Nut, mar ngma ker hortgem mar, gi enang ko ngma ker hortgem E Nut karo rhek akuruk yok kat ruk kun mnam ka meer. He ekam ko ngma ker hortgem E Nut karo rhek tok, ngam mur kaen a ho kapnes a ho laut hak ngang ngar mruo, he nang E Nut kam rum kim mar vgum tok.   
\p
\v 17 Vanangko kolenar ruk kom kaelongtok mang nguk, ekam ko mut hera mnor mang o mia ruk enang tok, va mgua smia toot mang nguk mruo kim o ker pattermia ruk ngama kpoot mang E Nut karo pos, matok ngar mia pagis orom ngaro papat ruk ngat ho lo vua sir hak kmegom kam krong mularo vorngap he kait muk orom ngaro kerkeknen. He enang tok, mguer lo kat kais kam sir lserppak orom o papat ruk kmor mnam muk mang e Yesus he kmokpom kar. He enang tok, mguer kle kvuut orom o kerkeknen ruk endruk tok.  
\v 18 Ii, mguak or kmorim mar kam krong mularo vorngap, nang mguak kle sim kut kael mularo papat ruk mang Ngoldaip ka keknen to kam ring ya mang nguk kar mularo papat ruk kmor mnam muk mang en he kmokpom kar, mar kam kaum klaut kngae kun mnam muk. Ko her Ngoldaip to e Yesus Kristus, endo tsusulgim mor arhe, ngruak hover en tete kngae ngnik ngnik ge. Lmien.