\id 1PE - NT1076 Sulka - Doug Tharp 21/3/97 
\h 1Pita 
\toc1 E Pita Ka Hor To Aktarang To Tittiegom 
\toc2 1Pita 
\mt1 E Pita Ka Hor To Aktarang To Tittiegom  
\is1 O Rhek Ruk Ktar Kam Keknen Mang E Pita Ka Hor To Aktarang To Tittiegom  
\ip A hor ta, e Pita tittiegom. E Pita en e Yesus ka aposel langto mnam endruk loktiek hori orom alomin. Tittiegom ka hor ta ngang o mia ruk ngat kor mnam mar mang e Yesus he kmokpom kar, endruk ngta vle ko mnam o rengmat ruk ngoguon kun mnam a mmie ka mhe to ngma mon te, e Esia To Kesie. O mia ri e Pita tkaittiek ngang ngar, o mia ngta koskalil ormar kmel o vokngnes ngang ngar ekam ko ngat kor mnam mar mang e Yesus he kmokpom kar.  
\ip He ekam tok, e Pita tittiegom ka hor ta ngang ngar kmenkrovgem mar orom karo rhek kam havaeng ngar kam mur kael pat kim mar mang e Yesus ko en kat ta kerkolkol vgum o vokngnes mang ngar tok kat.  
\c 1  
\s1 E Pita Ta Ngarkie Mang O Mia  
\p
\v 1 Dok e Pita, a aposel to mkor e Yesus To E Nut Thim Orom Ka Msasaen, ko tmeng dok kam kol ka gu kam havaeng o mia mang en.  
\p Ko kaittiegom kua hor ta ngang nguk ruk E Nut tmi kut re pmuk kmor mnam muk mang e Yesus he kmokpom kar. Her muk ruk arhe, muta vle enang o hirtek kun mnam a mmie karo mhetor ruk muta senkir kmovavaik mnam o vrong rhek mnam mar, endruk ko mPontus, ko mGalesia, ko mKapadosia, ko mEsia va ko mBitinia he ka vle ko kmar.  
\v 2 Ii, Ngor Teit E Nut ta ktar mi kut el karo papat mang nguk kam mi ktua re pmuk kmikkiem enang ko ta ktar ka mnor mang nguk tennik he te, mguer kor mnam muk mang e Yesus he kmokpom kar. Ta ktar mi kut re pmuk tok, vgum E Nunu A Totur ka ngaeha to mang muk, endo kam kser mularo kerkeknen tgus petgim muk, nang kle kael muk kam vle ngang E Nut mruo. Ii, E Nut tre pmuk, he nang muk kam kle mi ktua ngan vgum e Yesus Kristus he kor mnam muk mang en he kmokpom kar, yek E Nut kam kle kmomgol muk vgum e Yesus ka gidiel to ta ksuk mang o mia.  
\p Her muk ruk kat arhe kua ngarkie ngang E Nut mang nguk te, En kam ho ksovet hak kam ring ya mang nguk va kmeharom mularo vurkul kmongeik kat.   
\s1 Ngruak Kanprim E Nut Mang A Ktalhok To Ngoma Nho Mkor En Kmen Ngang Ngor  
\p
\v 3 Mor ruk ngot kor mnam mor mang e Yesus he kmokpom kar ngruak kanprim E Nut to Ngoldaip e Yesus Kristus Kteit, Endo e Yesus nma totu pum. Ngruak kanprim En mang ko tho mi kut mrung ngor hak he kaeharom nguaro vurkul kam vle te, mar o gunngae, he nang mor kam kol a ktalhok to kam plong vle ko kim En ngnik ngnik. Ko her a ktalhok to endo arhe ngoma nho mkor En mang kam mi kaen ngang ngor koknaik. Ii, teharom tok ngang ngor her vgum ko e Yesus Kristus tkat hop petgim ka nnak.  
\v 4 Ii, Ngorteit E Nut teharom mor kam pis lgunngae tok kat, he nang mor kam kol a ktalhok to endo ko mkor En. Vanang a ktalhok to endo, tlua vle enang o mi tgoluk ruk a mhel nma lol ko mkor kteit mo mmie e. Ko tlo is hak kam lpus, kam ngti, i o kam loloong kat e. Nove, E Nut ther el a ktalhok to endo ka mi mit msim kuon ma volkha kam vle ko tok he kpaneng ngor kam kol koknaik.  
\v 5 Va muk ruk mguera kol a ktalhok to endo, her muk ruk arhe E Nut nma toot mang nguk orom ka serppak mruo ekam ko mut kor mnam muk mang e Yesus he kmokpom kar. Va nera toot mang nguk tok, kam ngae kais mang a kolkha to nera khenam e Yesus ma mmok orom ka ngaeha to kam susulgim muk. Ko E Nut thera ktar mi kut el ka ngaeha to endo kam mi ktua vle kpaneng a venloot to orom a kolkha to a kser kim, he nang En kam mrua khenam ma mmok mnam a kolkha to endo gi.  
\v 6 Va tete, nok pathe mgua sia ker kolkol vgum o vnek ngo mamten gi vur nong ke laut na, he mrua mrung nguk vgum mar, vanangko muma sirei mang E Nut ge, ekam ko ner kle mia susulgim muk koknaik.  
\v 7 Vanang o vnek ruk endruk nga mia pis kim muk gi enang tok, kam khikher mularo gi vrong papat tgus, he nang kam yor a gi papat tang tuk, endo kmor mnam muk mang e Yesus kun mnam muk. Ii, he ekam tok, E Nut ner kais kam kanprim muk va kteiver muk kmen ka yammok ngang nguk mnam a kolkha to na mrua khenam e Yesus Kristus ma mmok tok. Ii, E Nut nma khikher mularo gi vrong papat tgus tok, gi enang ko o mia ngma mat a kre to ta movavaik kar a gol, he kyor o mi gol tuk tok kat. Ii, ko a gol to endo nam si loloong vgum a paei kla manakain ko o mia ngma mamat tok, vanangko o mia ngam kle ktua vokom te, ka keik tvua grap ge. Vanang E Nut ta kle kvokom mularo papat ruk kmor mnam muk mang e Yesus te, mar ngat laut ho mi kut kir kim a gol to endo ka keik ko mar ngat lo is kam loloong hak.   
\p
\v 8 Muk mut lo si vokom e Yesus vop, vanangko mum her kaelongtok mang ge. Va mum lo sia vokom tete kat gi, vanangko mum mi kut kor mnam muk mang en he kmokpom kar kat ge, he ksirei orom a sirei to a ho lautar hak ko mula sirei tho mi ktua kerngorom muk hak he kaenpgam muk kam hover E Nut ka munik.  
\v 9 Ii, muma sirei alaut tok tete, ekam ko mut her kor mnam muk mang e Yesus he kmokpom kar he, he kngae rkieng mularo papat ruk endruk nga treil to te, E Nut kam susulgim muk he.   
\p
\v 10-11 Va mang kam keknen mang ko E Nut nera susulgim muk tok, kua svil kam havaeng nguk te, mnam a venloot to E Nunu A Totur tviging o propet he kpavap vgum mar, ta ktar kpavap vgum mar mang E Nut te, E Nut nak ring ya mang nguk he ksusulgim muk koknaik mang a venloot to ngta ktar kpavap mnam tok. Ii, ko ta ktar kpavap vgum mar mang o vnek ruk Endo E Nut Thim Orom Ka Msasaen nak lol, he nang E Nut kam ring ya mang o mia koknaik mang tok orom karo keknen ruk ngta mmok. Ii, he her gi vgum ko o propet ngata ktar kpavap mang E Nut te, nak susulgim o mia orom en tok, o propet ruk endruk ngat her sim kut khanang ngar kam sim kut non ekam E Nunu A Totur karo rhek ruk ta ktar kpavap mang Endo E Nut Thim Orom Ka Msasaen vgum mar ormar. He ngat sim kut nantom mar kam sim ktua lol o papat ruk mang en, kam mnor mang en te, E Nunu A Totur ta kier mang en te, nak pis mnam ani venloot to msim va oni tgoluk ruk msim ngaka ktar kpis ktar mang en kam pis kat.  
\v 12 Ii, ngat sia khanang ngar tok, to E Nut ta khenam ngang ngar te, ngma ktar kpavap mang o tgoluk ruk endruk, va ngam lua ktar kpavap mang ngar ngang ngar mruo, he nang mar mruo tuk kam lol o papat mang en kun mnam a gi venloot to mar mruo ngma vle mnam tuk e. Parem ko, E Nut ta kle ka khenam ngang o propet te, ngta ktar kpavap mang o tgoluk ruk endruk, yek o tgoluk ruk endruk kam kle kpis koknaik her ngang nguk ruk arhe vgum o mia ruk tete ngaro papat ko ngat her havaeng nguk orom mar he, ko ngat her havaeng nguk orom a re to mang e Yesus he. Ii, ngat havaeng nguk mang a knovvur tok vgum E Nunu A Totur to E Nut tmeng ngang nguk ko tottek kun kuon ma volkha. Ii, va o rhek ruk o propet ngta ktar kpavap ormar mang Endo E Nut Thim Orom Ka Msasaen, va si o engyel kat, va ngat ho mi ktua svil hak kam her sim ktua non ekam mar he sim kut nantom mar kam sim ktua lol o papat ruk mang en kam mnor mang en tok kat.   
\s1 O Mia Ngaka Ksir Pum Ngaro Kerkeknen Tgus  
\p
\v 13 He ekam ko E Nut nera susulgim muk tok, va mguak mrua toot mang mularo pkor mruo he sim kaelel mo kim mularo papat kam toot, kmus kar mularo pkor ngaro svil ruk ngat kernonho. Va mgua ho mi ktua nho mkor E Nut lserppak kat, En kam ring ya mang nguk mnam a kolkha to ner mrua khenam e Yesus Kristus ma mmok kmen a ktalhok ngang nguk.  
\v 14 Ii, mguaka vle enang E Nut kles ruk ngam smia ngan vgum, nang lo kat kael ekam mularo pkor ngaro svil ruk ngat kernonho, endruk ko tesgun mum mrua ngam muk mruo ekmar ko mut lua mnor mang E Nut vop, he nang mar kam lo kta kaenpgam muk kmeharom mar kat e.  
\v 15 Nove, mguak kle va ka ksir pum mularo kerkeknen ruk endruk, he nang muk kam kle ka vle ngang E Nut mruo orom mularo keknen tgus ruk o totur, endruk mguak kaeharom mar. Ii, mguaka vle tok, ekam ko E Nut to tvaeng nguk kmor mnam muk mang En he kmokpom kar, En nma vle orom o keknen ruk o totur hak tok kat.  
\v 16 Ii, mguaka vle tok, kmikkiem E Nut karo rhek ruk ngat ittiegom mar te, “Mguaka ksir pum o kerkeknen tgus, he ka vle ngang dok mruo orom o keknen ruk o totur, gi enang ko dok koma vle orom o keknen ruk o totur tok kat.”   
\p
\v 17 He ekam ko muma kap kim Ngor Teit to nera kaum o mia tgus kmomngan kar mar pum ngaro reha he lua khen o mia akuruk kmen a momgu ngang ngar, nang ka mnang akuruk, va mguak gorang E Nut kam totu pum he kaeharom mularo keknen ruk lyar ngang o vrong rhek ruk muma vle kun pgegom mar enangthe, muk o hirtek ruk mo mmie.  
\v 18-19 Mguaka vle tok, ekam ko mut hera mnor mang E Nut he te, ther en Endo Thim Orom Ka Msasaen ngang nguk, he nang ka gidiel kam ksuk mang nguk kmel ekam muk orom ka gidiel to endo arhe. Ii, E Nut ther en endo ngang nguk tok, ko ta vle enang a sipsip to a sital, endo la gi ngaenser ko nong karo vellik va karo turok ngang. Va ther el ekam muk orom ka gidiel to ta vle ngang ngor enangthe ngua gol ka pun to arhe, nang tlo el ekam mor orom o vrong tgoluk ruk ngat kais kam loloong, enang alo kre ruk a gol i o, a silva e. Parem ko, tel ekam muk orom ka gidiel to nma plong vle ngnik ngnik kam hong nguk kun mnam mula ngorsang to tesgun to tho lo eveep hak kam susulgim muk, endo mut kol ko mkor mulmialaol ruk tennik ko ngata maen ngang nguk orom ngaro keknen.  
\v 20 Ii, va Endo E Nut Thim Orom Ka Msasaen, E Nut ta ktar mur re pum ktar mang ko tlo kueng a mmie vop en kam her mi kut kael ekam muk orom ka gidiel tok arhe. Ii, tmur mi kut el tennik tok, nang kle ka khenam en ma mmok kun mnam o kolkhek ruk endri tete ko rkieng a kolkha to a kser kim, her mi kut mang kam susulgim muk ruk arhe orom ka gidiel to endo.  
\v 21 Ii, va her vgum en kat mut kor mnam muk mang E Nut to thover en petgim ka nnak he kteiver en ko thover en ngoguon ma volkha. He ekam tok, muma nho mkor E Nut mang en kam susulgim muk ekam ko mut kor mnam muk mang E Nut he kmokpom kar vgum en tok kat.   
\p
\v 22 He tete, ekam ko mut her momgol muk mruo ko mut her ngan vgum E Nut karo rhek ruk o minar, kam mien orom mularo keknen ruk kmelongtok mang muornopeik ruk ngat kor mnam mar mang e Yesus he kmokpom kar, va muk ge, mgua ho mi ktua papuntom lmien hak kmelongtok mang ngar kngae gi.  
\v 23 Ii, mguaka vle tok, ekam ko E Nut teharom mularo vurkul kam vle te, mar o gunngae. Ii, E Nut teharom muk o gunngae tok, ko tel karo rhek mruo ruk ngat lo is hak kam loloong kun mnam muk, nang lo kael a tomhel to tis kam loloong kun mnam muk e. Ko E Nut karo rhek ruk kun mnam muk, o mia ngma ktal kim mar va ngam lo kais kam loloong e. Nove, ngma plong vle ngnik ngnik.  
\v 24 Ii, E Nut karo rhek ngama plong vle ngnik ngnik tok kmikkiem enang ko ngat ittiek mang ngar te,  
\q2 “O mia tgus ruk orom nglaro vu kraen ngat gi kaenang a guip ko ma lootpgeik orom karo vu rehi ruk nglaro vu kraen ko a guip karo kenkiip ngma vui va karo vu kraen ngma rpuo.  
\v 25 O mia tgus ngma vle tok, vanangko Ngoldaip karo rhek, ngara sir lserppak ngnik ngnik.”  
\m Ii, va her E Nut karo rhek ruk endri o mia ngat her havaeng nguk ormar arhe.   
\c 2  
\p
\v 1 He ekam ko E Nut teharom mularo vurkul kam vle te, mar o gunngae enang tok, va mguak ksir pum o kerkeknen tgus ruk endri te, kam kering o mia orom mularo rhek, kam mas orom o mia orom o vrong keknen tgus ruk kam kauyang ngar ormar, kam kerruru, kmesik pum o mia ngaro tgoluk va kam rere pum o mia kam kering ngaro mnok.  
\v 2-3 Ii, tete, ekam ko mut ngan mgaem Ngoldaip karo rhek ruk endruk, va mguak kle kaenang o gunsvel ruk ngam kael riring mnam mar mang a mem. Ii, mguak sovet kmel riring mnam muk mang Ngoldaip karo rhek ruk endruk o minar, endruk ngata vle ngang nguk ruk mut kor mnam muk mang Ngoldaip he kmokpom kar enangthe mar mularo ol tok. Ii, mguak vang mang ngar tok, he nang mularo papat ruk mang Ngoldaip kam laut kngae ormar ko her karo rhek ruk endruk Ngoldaip ther susulgim muk ormar arhe.   
\s1 E Nut Nam Mur Kaeharom Karo Mia Mruo, Mar Kam Vle Enangthe, Mar Ka Rek To A Totur  
\p
\v 4 Ii, E Nut tmur re pum e Yesus Kristus kam teiver en, ko ta vle enang a ho to a hokidek to a rek tgus nma serppak kim. Va en nama plong vle ngnik ngnik kat. Ii, va a hokidek to endo ta vle te, o mia ngat si kais kam ktal kim en kat, vanangko ngat kle va keyang he kngam. Vanangko muk, her vgum ko mum kaol rkieng en tok  
\v 5 muma ktal kim endo a hokidek tok kat, he ka vle enang o hi ruk E Nunu A Totur nam kaeha orom mar kam ngam ka rek to orom muk, he nang muk kam serppak kim a hokidek to endo. Ii, E Nunu A Totur nam kaeha orom muk kngae tok tete, he nang muk kam ktua vle te, E Nut kta valngan mruo ruk karo pris ruk muk, muk kam mi ktua vle ngang En mruo orom o keknen ruk o totur. Ii, nam kaeha orom muk tok, he nang muk kmeha ngang En kam nngiar ngang En orom muk mruo, ko E Nunu A Totur nam kaenpgam muk kam mur kaen muk mruo ngang enang tok. Ii, mularo nngiar ruk endruk orom muk mruo E Nut nma sirei kam lol ko mkor muk, her vgum ko mut kor mnam muk mang e Yesus Kristus te, tmi hop petgim ka nnak he le kmokpom kar.  
\v 6 E Yesus ta vle enang a hokidek tok, kmikkiem gi enang ko ngat ittiegom E Nut karo rhek ruk kun mnam ka meer ko ngat havae mang te,  
\q2 “Mu vokom na, her dok to arhe ko her el a ho to a hokidek ko mSaion to e Yerusalem, endo ko her mur re pum kam teiver he. Va ani mhel to tkor mnam en mang a hokidek to endo he kmokpom kar, E Nut ner lua ngam a leep kuon mang hak.”   
\m
\v 7 Ii, he muk ruk mut kor mnam muk mang a ho to a hokidek to endo he kmokpom kar, mut her teiver en tok kat arhe. Vanangko endruk ngat lo kor mnam mar mang a hokidek to endo he lua mokpom kar ngat kle va ka vle enang endruk E Nut karo rhek ngat havae mang ngar ko ngat ittiegom mar kat te,  
\q2 “Endruk ngma ngamrektor, mar ngata keyang a ho langto he kngam. Vanangko a ho to endo tmia vle te, a ho to mang a hokidek to arhe kam sir orom a rek.”   
\m
\v 8 Ii, va ngat ittiek mang ngar kat te,  
\q2 “Ke ho to endo o mia ngat lua vokom kam mnor mang tkaeharom mar kam tunvie pum he kvuut.”  
\m Ii, o mia ngma tunvie pum a hokidek to endo, her vgum ko ngma kerngnek vgum E Nut ko ngat lo kaikkiem karo rhek ruk o mia ngat her havaeng nguk ormar he. Mare, vanangko E Nut ther ktar mi kut el karo papat mang ngar tok arhe te, mar kam kle mi ktua tunvie pum a hokidek to endo gi enang tok.   
\p
\v 9 Mar ngam ktua vle tok, vanangko muk, E Nut ther kle mi kut re pum muk he, kam ktua hover a ngausie ka pun langto orom muk, muk kam ktua vle te, kta valngan mruo orom karo pris ruk muk, he nang muk kmeha ngang mula Taven to En. Ii, tmur re pmuk kam ktua hover a ngausie ka pun to orom muk ruk karo mia mruo, muk kam mi ktua vle ngang En mruo orom o keknen ruk o totur kat. Teharom tok, he nang muk kam havaeng o mia mang karo reha ruk ngak kanprim En mang ngar ko teharom mar ngang nguk kam vaeng nguk kmottek ko mnam a slommok, nang kle kael muk kam vle ngang En mruo orom ka mmok, endo nma reimsor mnam o mia.  
\v 10 Ii, ko tesgun mut lo kol E Nut ka mamrung vop kam vle te, karo mia mruo. Vanangko tete, mut her kol E Nut ka mamrung he, he mia vle te, E Nut karo mia mruo orom muk he.   
\p
\v 11 Kolenar ruk kom vu kaelongtok mang nguk, mut gia vle enang o hirtek va o vrong rhek kun pgegom o mia ruk mo mmie. He ekam tok, ko kaurur kim muk te, mgua mrua kser muk pum mularo pkor ngaro svil ruk ngam kaenen muk kmeharom o kerkeknen ko ngam kaus kar o keknen ruk lyar kun mnam mularo vurkul.  
\v 12 Va o tamatan ngam sia mon muk orom o kerkeknen, vanangko mguak kle va sim kut kaeharom o keknen ruk lyar mekam mekam ge, muk kam ho mi kut kais orom mar, he nang o tamatan ruk endruk kam vokom mar to kle kanprim E Nut mang ngar koknaik kun mnam a kolkha to E Nut nak pis ka ptang ngor.   
\s1 O Mia Ngaka Krus Orom Mar Mruo Kmeha Ngang O Mia  
\r Ngang Ngalmialaol Ruk Mkor A Gavaman  
\p
\v 13 Mguak mrua krus orom muk mruo he kngan vgum o mia tgus ruk ngat kol a serppak ko mkor a gavman kam nho mang nguk. Ii, mguak kaeharom tok, gi enang Ngoldaip ko tesgun en nam mrua krus orom en mruo he kngan vgum mar tok kat. Ii, va si mula taven to a gavman kalaip, endo ta ktar va tomten kam nho mang nguk,  
\v 14 i o kalngunes ruk ku meorom en kat, va mguak ngan vgum ngaro pos tgus ge. Ko a taven to endo nma meng kalngunes kmenpasiker endruk ngam kaeharom o kerkeknen va kam kle kanprim endruk ngam kaeharom o keknen ruk lyar kat.  
\v 15 Ii, mguak ngan vgum mar tok, ekam ko E Nut nama svil muk kmeharom o keknen ruk lyar tok he ka kser kim o rhek ruk mkor o mia ruk ngat lo kor mnam mar mang En he lua mokpom kar. Ko ngaro rhek ruk endruk ngat kottek ko vgum ngaro papat ruk ngta tu kim mar.  
\v 16 Lmien te, mgua smia vle gi enang ko nong a pos tang ka serppak hak ta kpom muk. Vanangko mguak or kam pe gia vle tok, enangthe muk kmel ekam muk kam mi kut kaeharom o kerkeknen vgum tok. Parem ko, mguak kle va ka vle orom mularo keknen ruk ngata khenam muk ma mmok te, muk E Nut kalngunes ruk mum kaeha ngang.  
\v 17 Ii, mguaka vle tok, va mgua smia totu pum o mia tgus va kaelongtok mang muornopeik tgus ruk kun mnam E Nut ka valngan, endruk ngat kor mnam mar mang e Yesus he kmokpom kar. Va mguak gorang E Nut kat. Va mguak teiver a gavman kalaip to ta ktar oguo va tomten kam nho mang nguk.   
\s2 Ngang Ngalmialaol Ruk Ngam Kaenen Mar Kmeha Ngang Ngar  
\p
\v 18 Va muk ruk mut kaeha ngang mulmialaol ko ngam kaenen muk kmeha ngang ngar, muk kat mguak totu pum mulmialaol ruk endruk he ka krus orom muk mruo kmeha ngang ngar kat. Ii, va mguak or kam gi mrua krus orom muk mruo ngang gi endruk ngama ya pum muk ko ngam smia pat mang nguk e. Nove, si endruk ngam lua non mang nguk kam kol a regesal mang nguk kat, va mgua mrua krus orom muk mruo he ktotu pum mar tok kat.  
\v 19 Ko E Nut nma kanprim a mhel to ka papat nma vle mang En he kmatnge vgum o vokngnes ruk o mia ngam lua non kam kol a regesal mang en ormar, nang en tlo eharom a kerkeknen tang hak.  
\v 20 Vanangko E Nut tlo is hak kam kanprim muk enangthe mupa matnge vgum o vokngnes ko o mia ngap kirmekon a khap mnam muk pum mularo kerkeknen msim e. Vanangko enangthe mup kle va kmatnge vgum o vnek ruk vgum mularo keknen ruk lyar, va E Nut ner mia kanprim muk ekam tok arhe.  
\v 21 Ii, ko her gi mang a papat to muk kam lol o vnek msim arhe E Nut tvaeng nguk kmor mnam muk mang e Kristus he kmokpom kar, ekam ko e Kristus kat, va en tmatnge vgum o vnek ruk tlol mang nguk tok kat. Ii, tmatnge vgum mar tok, he nang muk kam kolkol ekam en kam kar ekam karo leik tok kat. Ii, ko en   
\q2
\v 22 “Tngae ho lo mi kut eharom a kerkeknen tang hak, va o mia ngat lo kais hak kam mon a re tang hak kat ko ta rere ka ppiak orom kat e.”   
\m
\v 23 Mare, ko tie ko o mia ngat si petpet o rhek ngang kam kerrereng, vanangko en tlo kerrereng ngar kmoripang ngar kat e. Va tie ko tsi lol o vnek vgum mar, vanangko tlua kaengorang ngar orom karo rhek kat e. Parem ko, ta kle va mur kaen en mruo ko maktiegom E Nut to nera kaum o mia tgus kam momngan kar mar orom karo papat ruk ngta sir hak. Ko En nam lua khen akuruk, nang ka mnang akuruk e.  
\v 24 Ii, her e Yesus mruo to tmatnge vgum o vnek ruk tok, kam her mi ktua lol nguaro kerkeknen kuon mang ka vok mruo ko ngata krong orom o ot kvat engnang a ho. Tyor tok, he nang mor kam ksir pum nguaro kerkeknen ruk ngam kaenen mor kam mrua ngam mor mruo ekmar, mar kam yor kun mnam mor tok kat, nang mor kam kle kaeharom o keknen ruk ngta sir hak ko pum E Nut kalo keik. Ii, her e Yesus arhe endo ta momgol mor her vgum karo turok ruk tlol mang ngor vgum ko tyor mang ngor tok arhe.  
\v 25 Ii, ther momgol mor ko tesgun ngoma vle enang o sipsip ruk ngma sop ko ngta vraik petgim endo nma toot mang ngar he ka nho mang ngar. Vanangko tete, ngot her kaeknik he, ngok kim endo ngma mon te, A Toot Kmo Sipsip va Endo Nma Nho Mang Nguaro Nunu.   
\c 3  
\s2 Ngang Mulmialurokol  
\p
\v 1 Muk lraip, mgua mrua krus orom muk mruo tok kat he kngan vgum mulmialurokol, he nang endruk mnam mar ngat lo kor mnam mar mang E Nut karo rhek he lua mokpom kar vop, mar kam kle kvokom mularo keknen ruk lyar he mularo keknen ruk endruk kam ngae kun mnam akuruk mnam mar, kmeharom mar kmeknik ngok kim E Nut ekam tok kat. Nang mut lo gi kais kmit mar ngok kim E Nut orom mularo gi rhek tuk e. Nove. Mularo keknen ruk tok ngar her gi kais tok.  
\v 2 Ii, ko nga vokom mularo keknen ruk ngat vua mmok va nga le vokom muk ko muma gorang E Nut, to endo yek, ngar kais kmeknik ngok kim E Nut ekam tok arhe.  
\v 3 Ii, mguak or kam mrua pat kmuk mruo te, mute ksei kam kheng vgum mularo pkor ruk o gi ngaenser ko mum kaegenkar o it ruk ngaro vu kraen, va ka sreng orom o prongran ruk ngat eharom mar orom a kre to a gol, va ko muma kirmaskor orom mulakro ngairis kam vuum mar kat.  
\v 4 Parem ko, mguak kle mrua pat kmuk mruo te, mute sei kam kheng vgum mularo keknen ruk ngam kottek kun mnam mularo vurkul ruk o mia ngam lua vokom mar e. Ko a keknen to a sim re pum o mia, nang lo mrua hover muk mruo ta vle te, a keknen to E Nut nma vokom te, en enang a kre to ka keik tvua grap, ko E Nut nma vokom a keknen to endo te, tlo is kam loloong hak.  
\v 5 Mguaka vle tok, ko a her keknen to tok arhe lraip ruk tennik, endruk ngta vle ngang E Nut mruo he gia nho mkor En kam susulgim mar, ngata mrua pat kmar mruo tok te, ngate ksei kam kheng vgum tok kat. Ko mar ngam mrua krus orom mar mruo he kngan vgum ngalmialurokol.  
\v 6 Ii, her enang a vlom to e Sara arhe ko en te mrua krus orom en mruo he kngan vgum katngokol to e Ebrehem kam mon en te, kalaip to en. Va her muk ruk kat arhe, e Sara kaorpeik ruk lraip orom muk enangthe mup kaikkiem a keknen to endo ko ta sir ko pum E Nut kalo keik, nang lo vur kaursie vgum o mia ko muta gorang ngar.   
\s2 Ngang Mulmialraip  
\p
\v 7 Yu! Vanang muk ruk lurokol, mgua smia pat mang mulmialraip tok kat, ko muma vle ko kmar. Va mguak totu pum mar ko her mar ruk arhe endruk ngat lo vua serppak kun mnam o mevek tgus. Ii, mguak totu pum mar tok, her ekam ko muk kar mar, muk tgus mut kaum ka vle te, endruk ngar mia tuur mnam a ktalhok to kam plong vle ko kim Ngor Teit ngnik ngnik ko tring ya mang nguk kam nngiar ngang nguk tgus orom. Ii, mguak totu pum mar tok, he nang muk ruk o mevek kam lo mrua tokim muk mruo pum mularo ngarkie.   
\s1 E Nut Ta Ngamyammok Mang Endruk Ngam Lo Si Kaeharom O Kerkeknen Vanang O Mia Ngma Kol A Regesal Mang Ngar Ge  
\p
\v 8 He tete ktar mang dok kam rum kua hor ta, kua svil kam havaeng nguk mang o papat akuruk na, endruk endri te, muk tgus mguaka vle orom a vrek longeik mo nguk tgus. Va mguak mo vokom muk orom o vnek. Mguak kaelongtok mo nguk enangthe muk o moornopeik msim ruk muk. Va mgua mrua mrung nguk mruo kat. Va mgua mrua krus orom muk mruo,  
\v 9 va mguak or kmekon ngang a mhel enangthe nap kaeharom a kerkeknen ngang nguk kam kat kaeharom a kerkeknen ngang. Va mguak or kmekon ngang a mhel kat enangthe napa kerrereng nguk kam kta kerrereng en kat. Nove, mguak kle va kaekon ngang en kam ngamyammok mang en ha, ekam ko her gi mang a keknen to kam ngamyammok mang o mia arhe, yek E Nut tvaeng nguk kam vle orom, he nang muk kam kaum kol a ktalhok to kam plong vle ko kim Ngor Teit ngnik ngnik ko mkor En ko nak ngamyammok mang nguk orom.  
\v 10 Ii, mguaka vle tok, kmikkiem enang ko ngat ittiegom E Nut karo rhek ruk endri te,  
\q2 “Endo nak kael a ktalhok to kam plong vle ko kim E Nut ngnik ngnik te, ka treil va kle ka svil kat te, en kam smia vle lya ngnik ngnik, va nak kle khagam ka gu kam lua kerrere orom o rhek ruk nong lyar he lua mas orom o mia e.  
\v 11 Va a mhel to endo nak kaitgung karo kerkeknen, nang kle va kaeharom o keknen ruk lyar. Ii, va a mhel to endo na kael a keknen to kam vle orom a vrek longeik kun pgegom o mia ngoguo ktar ko pum kalo keik mekam mekam kat enangthe a keknen to endo ta vle te, ka treil kat.  
\v 12 Ii, mguaka vle tok, ekam ko Ngoldaip kalo keik nginm gia vle kuon mang endruk ngam kaeharom o keknen ruk En mruo nma vokom mar te, ngta sir ko pum kalo keik. Va kalo ngaela nginm gia prik gi kam ngan o mia ruk endruk tuk ngaro ngarkie. Vanang nam kle va kpet kalo keik petgim endruk ngam kaeharom o kerkeknen.”   
\p
\v 13 He ekam tok, enangthe mup kael riring o keknen ruk lyar kmeharom mar tok, to erieto he, tis kam kering nguk?  
\v 14 Vanangko si enangthe mupa kerkolkol vgum o vnek ruk o mia ngap kol a regesal mang nguk ormar ekam ko mum kaeharom o keknen ruk endruk ko ngta sir tok tevanie, ko E Nut tvokom muk te, muta lgekol ekam tok ge. He ekam tok, mguak or kam gorang ngaro rhek, i o kam rute krute orom muk mruo kim mar kat e.  
\v 15 Vanangko muk, kun mnam mularo vurkul mguak pet o vrong tgoluk tgus petgim muk, nang kle kaendavloum e Kristus kun mnam muk, he nang en kam vle ko tok en tuk ko mut kael a totu mang En kam vle te, Muldaip to En. Va mguak kaelel kuon mang nguk mekam mekam kam sim koripang o mia tgus ruk ngma mamnganang nguk mang te, kman ko muma nho mkor E Nut kmen a ktalhok to endo ngang nguk. Ii, mguak koripang ngar, va mguak koripang ngar orom a keknen to a sim re pum mar ko mguak totu pum mar tok kat.  
\v 16 Va mum si kaeharom mularo keknen ruk lyar, endruk mum kaeharom mar ko mut kor mnam muk mang e Kristus he kmokpom kar, vanangko o mia ngam kle kerrereng nguk ge. Vanang mguak totu pum mar kmoripang ngar orom mularo vurkul ruk ngat gia mrer mekam mekam ko pum E Nut kalo keik, he nang mar kam mrua leep pum ngaro rhek mruo ruk ngma rere pum muk ormar kmegom kam kering mularo mnok ormar tok.  
\v 17 Mguak kaeha ngang o mia tok, ekam ko enangthe E Nut npa svil muk kam kerkolkol vgum o vnek mkor o mia, va tgia ya kam kerkolkol vgum mar ko mum kaeharom o keknen ruk lyar. Vanang tlo vua ya hak muk kam kerkolkol vgum o vnek mkor o mia ko mum kaeharom o kerkeknen msim e.  
\v 18 Ii, mguak matnge vgum o vnek ruk muma kerkolkol vgum mar ko mum kaeharom o keknen ruk lyar ekam ko her e Kristus arhe, endo karo keknen ngat ho mi kut sir hak ko pum E Nut kalo keik, va En tkerkolkol vgum o vnek ko tyor ngaltgiang ngatngae he, mang ngor ruk nguaro kerkeknen ngat lo vua sir hak ko pum E Nut kalo keik, he nang E Nut kam lol patgiang ngaiting he kikiangae mang ngar hak. Tyor tok, kmit muk ngok kim E Nut tok arhe, ko o mia ngat si im kuon mang ka vok kngam a yoror, vanangko E Nunu A Totur ta kle va kta hover petgim ka nnak he.  
\v 19 He her gi vgum E Nunu A Totur to kat arhe, yek e Yesus ta grung ngogu mLol ngok kim o yoror ngaro nunu ruk E Nut tel mar kun ma hengor ko tok, en kam havaeng ngar mang E Nut.  
\v 20 Endruk ku mLol, her endruk arhe ngat kerngnek vgum E Nut tennik kun mnam o kolkhek ruk e Noa ta hivuo kmeharom ka langail, tie ko E Nut tlo kaeloong kam marer kam vvuom a mmie orom a kus vop, ko E Nut tgia vle kpaneng e Noa kam rum ka langail na. Ii, he kun mnam a langail to endo E Nut tsulgim o mia ruk lgititge kun mnam a ye, gi endruk aktiek hori orom korlotge.  
\v 21 Va her a ye to endo kat arhe ta kaelmir mang a parrur to E Nut nama susulgim muk orom tete arhe. Ii, E Nut nam lua susulgim mor tete orom a parrur to endo ko ngom gia momgol nguaro gi pkor kuon mail orom e. Nove, nma susulgim mor ekam ko ngom kael a tnangal ngang E Nut orom te, nguaro vurkul ngat gia mrer ko pum kalo keik. Te tok, a parrur to endo, tkais kam susulgim muk vgum ko e Yesus Kristus arhe thop petgim ka nnak he,  
\v 22 he ka grap ngoguon ma volkha kmorsang ko vanam E Nut ka miktiek. He ekam tok, o engyel, o vrong serppak, va o kool, ngam mrua krus orom mar mruo ku penharom en kam vle ku meorom ka tavgo ko tok.   
\c 4  
\s1 O Mia Nga Kael E Gi Nut Tuk Ktar Ko Pum Ngaro Kerok  
\p
\v 1 He ekam ko e Yesus ta laut enang tok, va mgua mi kut kael mularo papat mang kam kerkolkol vgum o vnek kam vle tok, gi enang ko e Kristus mruo tkerkolkol vgum o vnek ruk endruk kuon mang ka vok tok kat. Va muk kat mguak sir kserppak orom a papat to endo tok kat kam toot. Ko ani mhel to nma kerkolkol vgum o vnek kuon mang ka vok tok, ta khenam te, ther mi kut ksir pum karo kerkeknen tgus, nang kle ka vle ngang E Nut he.  
\v 2 He ekam ko a mhel ther mi kut ksir pum karo kerkeknen ruk tok, va a mhel to endo nam lo kta ngam en mruo ekam ka vok karo svil kat e, endruk ngam kaenen en kam tmar kim mar ko nma vle mo mmie vop. Nove, ta kle ka khenam te, nam kle va kngam en mruo ekam E Nut kmeharom E Nut ka svil ha.  
\v 3 Mgua mi ktua khenam ma mmok te, muta ksir pum mularo kerkeknen tok, ekam ko tesgun, ko mut lo kor mnam muk mang E Nut he lua mokpom kar vop, mut her tagur pum a ngaeha to kam rum mularo svil ruk mang o kerkeknen ruk o tamatan ngam mi kut kael ngaro papat mang ngar kam mi kut kaeharom mar. Ii, ko o tamatan ngam ngae ho mi ktua sovet hak kam mrua ngam mar mruo ekam a kerkeknen to kmem pnes he kaivie kveve va enangthe kam totu pum E Nut tok. Ko ngam kaeharom tok, kam ho ksovet hak kam mo gorgor pum lraip lurokol he mrua ngam mar mruo ma mmok mang ngar ko pa pnes. Ii, ngma mo kaum tok kmivie he kveve kam ho ksovet kam mur kaen mar mruo ngang o mia kam gi vrong mo vret mar ko ngam kaeharom tok kam totu pum ngartaro tarmki enangthe mar E Nut msim. Ii, a keknen to endo tho mi kut kernonho hak ko pum E Nut kalo keik.  
\v 4 Ii, o tamatan ruk endri ngam kaeharom o kerkeknen ruk endruk, nang kle ksenkrip kim muk ekam ko mum lua gun ngok kmar kam klang nguk mruo kun mnam mar orom ngaro kerkeknen ruk ngat ho mi kut kernonho hak gi, ko mar ngam ngae sei kam mrua ngam mar mruo ekmar. Ii, ngma senkrip kim muk tok, he kpetpet o rhek ngang nguk kam kerrereng nguk vgum tok.  
\v 5 Ngam si petpet o rhek ngang nguk tete, vanangko koknaik her mar ruk arhe ngar kle mia sir ko pum E Nut kalo keik, yek kam mrua havae mang ngar mruo. Ii, ko E Nut tkaelel mang En mruo he re kam momngan kar o mia tgus, endruk ngat yor va endruk ngat lo yor vop.  
\v 6 He her gi mang a papat to ketasuo E Nut kam momngan kar o mia tgus arhe, yek e Kristus ther grung ngok mLol si ko kim endruk ngat her yor he, kam mi ktua havaeng ngar kat mang a knovvur. Ii, thavaeng ngar tok, he nang E Nut kam momngan kar mar kmikkiem ngaro keknen ruk ngaro pkor ngam kaenen mar kmeharom mar ko ngat lo yor vop, nang kmel a ngaekam ekam mar, he nang nok mar kam kle mi kut kais kam kol a ktalhok to kam plong vle ko kim En ngnik ngnik kat her vgum E Nunu A Totur. Ii, ngar kais kam kol a ktalhok to endo tok, kmikkiem gi enang ko E Nut nama vle ngnik ngnik tok kat.   
\p
\v 7 Vanangko ketasuo o vrong tgoluk tgus kam loloong he. He ekam tok, mgua smia papat he mrua toot mang mularo pkor, he nang muk kam mi kut kais kam smia ngarkie.  
\v 8 Va a keknen to a ngaenpaeir ta vle ti te, muk kam sovet kmelongtok mo nguk mruo hak, ko a keknen to kmelongtok mang o mia tok, tkais kam kir mang o kerkeknen tgus ruk o mia ngam kaeharom mar ngang nguk.  
\v 9 Va mguak mo vaeng nguk mruo ngok mnam mularo rektor, nang mguak or kam rere porom muk mo kmuk ko mguak kaeharom tok e.  
\v 10 Va langto langto mnam muk, nak kaeha orom kta nngiar mruo to tmi ktua kol vgum E Nunu A Totur kam sim kut kaeha ngang o mia kam turang ngar orom. He enangthe langto langto mnam muk na kaeha orom kta nngiar mruo to endo mekam mekam ngang o mia, gi enang ko E Nut ta svil muk kmeharom tok, yek muk tgus mguer mi ktua khenam E Nut ka keknen to kam ring ya mang o mia orom mularo vrong nngiar ngo mamten tgus ruk tok.  
\v 11 Ii, ko enangthe tang mnam muk na kol a nngiar to kam rere malpgem o mia, va o mia ngak vokom a mhel to endo te, en nma rere orom E Nut karo rhek msim. Va enangthe langto mnam muk na kol a nngiar to kmeha ngang o mia kam turang ngar, va a mhel to endo na kaeha orom ka nngiar to endo ngang ngar orom E Nut ka serppak to E Nut nam kaenserpgam en orom. Va enangthe akuruk ngap kaeha orom o nngiar ruk endruk tgus enang tok, to endo yek, o mia ngar kais kam kanprim E Nut mang ngar her gi vgum ko ngata ktar kor mnam mar mang e Yesus Kristus he kmokpom kar. Ko her En arhe o mia tgus ngak teiver En orom kla serppak hak kngorom kngorom. Lmien hak.   
\s1 Endruk Ngat Kor Mnam Mar Mang E Yesus He Kmokpom Kar Ngar Mia Kerkolkol Vgum O Vnek  
\p
\v 12 Kolenar ruk kom kaelongtok mang nguk, tete mut her vaik kun mnam o vnek ruk o koppeter he. Ii, mum sia kerkolkol vgum mar tok, vanangko mguak or kam senkrip kim mar enangthe, mar o vnek ruk o gunngae he ngat gnua pagis kim muk.  
\v 13 Parem ko, mguak kle va ksirei tete mang ngar, ko muma tuur mnam o vnek ruk e Kristus tkerkolkol vgum mar her tok kat arhe. Ii, mguak sirei tete tok, he nang koknaik a sirei to endo kam pis alaut he kerngorom muk koknaik kat ko E Nut nak khenam e Kristus kla mmok ma mmok mnam a kolkha to nak kta pis mnam.  
\v 14 Ii, va enangko muma lol o vnek vgum o mia ko ngma kerrereng nguk mang ko mum kor mnam muk mang e Kristus ka munik he kmokpom kar, va muta lgekol he, ekam ko E Nunu A Totur ther viging nguk he, he nam kaenkrovgem muk. Va her E Nunu A Totur to kat arhe endo E Nut tmeng ngang nguk orom kla mmok.  
\v 15 Enangthe mupa kerkolkol vgum o vnek tok, mguak or kam kerkolkol vgum o vnek ekam ko muk o ngairivik msim, va o ngauruvik, i o ekam o gi vrong kerkeknen akuruk kat. Va a keknen to kam toop kim o mia ngartaro tgoluk kat, va mguak or kam kerkolkol vgum o vnek ekam a kerkeknen to endo tok kat.  
\v 16 Vanang, ani mhel to na kerkolkol vgum o vnek ekam ko tkor mnam en mang Endo E Nut Thim Orom Ka Msasaen he kmokpom kar, va en nak or kam leep. Parem ko, en nak kle kanprim E Nut ha, ko a mhel to endo ta sir orom Endo E Nut Thim Orom Ka Msasaen ka munik tok arhe.  
\v 17 Ii, mguak kanprim E Nut enang tok, ekam ko a her venloot ta tete arhe to E Nut kmelha kam momngan kar o mia, va ner kaelha orom ka valngan mruo na. Va enangthe E Nut ner lua mnang ngor ruk ngot mi kut kor mnam mor mang a knovvur kam mon a kapnes ngang ngor pum nguaro kerkeknen, to ner le ho mi ktua kernonho hak ngang o mia ruk ngat si kol a re to mang e Yesus, nang kle kael ngaro yaik ngang he lo kor mnam mar mang.  
\v 18 Va  
\q2 “Enangthe ta koppet ngang endruk E Nut tmur mon mar la mmok ko pum kalo keik, he E Nut kam susulgim mar, va ner kle ho mi ktua kernonho hak ngang endruk ngat lo kor mnam mar mang E Nut, nang kle gia plong kaeharom o kerkeknen.”   
\p
\v 19 He ekam tok, endruk E Nut tmi kut svil mar kam kerkolkol vgum o vnek ekam o mia, mar ngak kael mar mruo ko maktiegom Endo tkueng ngar, Endo nam lo vur korim mar hak. Ii, ngak kael mar ko maktiegom En to le kaeharom o keknen ruk lyar mekam mekam.   
\c 5  
\s1 E Pita Tkaenkrovgem O Hipun Ruk Ngma Toot Mang E Nut Ka Ngaomevek  
\p
\v 1 Dok a mhel to ko her mi vokom e Kristus orom kualo keik mruo ko tkerkolkol vgum o vnek ruk tok. Ii, va ngora tuur mnam e Kristus kla mmok kat kun mnam a kolkha to E Nut na khenam en ma mmok mnam. Va dok a hipun to koma kaum kar mularo hipun akuruk mnam a ngaeha to kam toot mang E Nut ka ngaomevek langto, he ko kaurur kim mularo hipun ruk ngma toot mang E Nut ka ngaomevek to orom muk ruk ko tok te:  
\v 2 Mgua smia toot mang E Nut karo mia ruk ngta vle enang o sipsip, gi enang a toot kmo sipsip, ko E Nut tel o mia ruk endruk ko maktiegom muk, muk kam sim kaeha ngang ngar kam smia nho mang ngar kam turang ngar tok. Ii, va mguak or kam gi kaeha tok, enangthe E Nut ta sopong nguk kmeha tok, ko tel a ngaeha to endo ko maktiegom muk. Parem ko, mguak kle va kaeha ngang ngar orom mularo svil mruo ha, gi enang ko E Nut ta svil muk kam svil kmeha ngang ngar enang tok. Ii, mguak kaeha ngang ngar tok, nang or kam kaumluo mang o krek. Vanangko mguak kle va kael riring mula ngaeha to kam turang ngar kam ho mi ktua svil hak kmeharom mar.  
\v 3 Va mguak or kam sopong E Nut karo mia ruk karo sipsip, endruk E Nut tel mar ko maktiegom muk. Vanang mguak kle va ka krus orom muk mruo kam khenam muk ma mmok ngang ngar kam ktar mang o keknen ruk lyar ngang ngar, he nang mar kam vokom mar tok, to le kolkol ekmuk ormar.  
\v 4 He enangthe mupa vle tok, va koknaik mnam a venloot to E Nut na khenam Ngua Taven to ta vle te, A Toot Kmo Sipsip, yek mguera kol a keik to a ktalhok, endo ta vle enang a msasaen to orom kla mmok, ko E Nut nera him muk orom. Va a ktalhok to endo tho lo is hak kam loloong kam nop.   
\p
\v 5 Vanang muk lurokol ruk lgi serpgue, mgua mrua krus orom muk mruo kam ngan vgum o hipun ruk endruk tok kat. Ii, si muk o mia tgus va mgua gia pi orom a keknen to kam mrua krus orom muk mruo mo nguk tok, ko E Nut karo rhek ngat havae te,  
\q2 “E Nut nma sir kim endruk ngam mrua hover mar mruo, vanang nam kle kring ya mang endruk ngam mrua krus orom mar mruo.”   
\m
\v 6-7 He ekam ko o rhek ruk endruk ngat havae tok, va mgua mrua krus orom muk mruo ku meorom E Nut ka tavgo to a serpgar, he kaen mularo papat ruk ngma kerngorom muk ngang En. To endo yek, E Nut ner le khover muk koknaik mnam a venloot to En mruo tmur kut el ngang nguk kam hover muk tok. Mguak kaen mularo papat ruk ngma kerngorom muk ngang E Nut enang tok, ko En nam kaelongtok mang nguk.   
\p
\v 8 Mguak toot mang mularo pkor mruo he gia nho ktoot ko mula imuo to e Seten nma turpetik he kpunpa kaolol enang a ngaemslang to a laion to nam kaeti klik orom ka kram he kriring a mhel kam gia memget hak.  
\v 9 Ii, nam si riring a mhel kam memget, vanangko mguak sir malngaeng kam sir kim orom mularo papat ruk kmor mnam muk mang e Yesus he kmokpom kar, ekam ko muta mnor mang muornopeik akuruk kat te, mar ruk mnam a mmie karo mhetor akuruk malhagenmok tok kat, va ngama kerkolkol vgum o vnek ngo mten ruk endruk gi, muma kerkolkol vgum mar tete tok kat.   
\p
\v 10 Mguak matnge vgum o vnek kam kerkolkol vgum mar tok, gi vur nong ke laut mo mmie na, yek E Nut to nma vle kia vul orom ka keknen to kam ring ya mang o mia, ner kle sim ktua kaeharom muk, muk kam vle te, muk o gunngae. Ii, ner kaeharom muk o gunngae tok, muk kam vle lserppak hak orom mularo papat ruk kmor mnam muk mang En he kmokpom kar ko ngat ngae gi ringring hak kun mnam muk. Ii, ner kaeharom tok, ko her En arhe, Endo tvaeng nguk kam kol a ktalhok to kam plong vle ko kim En ngnik ngnik kam tuur mnam kla mmok tok. Ner kaeharom muk tok kat, her gi ko mut kor mnam muk mang e Kristus he kmokpom kar he.  
\v 11 Her E Nut arhe, Endo o mia ngak kanprim En pum kla serppak kngae kngae gi. Lmien.   
\s1 E Pita Tkaen Ka Mamrung Ngang O Mia Kam Rum Karo Rhek  
\p
\v 12 E Silas to koma vokom te, konopia ko tkor mnam en mang e Yesus he kmokpom kar, en nam lo korim karo reha ruk ngang E Nut. Va en kat, ta turang dok orom ko ket hor ta. Ko dok ko gi vur ittiek ngang nguk tete orom he. Va kun mnam ko ke hor to enda ko her kaenkrovgem muk kam havaeng nguk lmien te, her a ktalhok to a mi minar to arhe, endo E Nut nma ring ya mang o mia orom. He mguaka kpom mekam mekam kserpgam.   
\p
\v 13 Va e Yesus ka ngaomevek to ko mBabilon, endo tkaum ka vle kar muk ko E Nut tmi kut re pum muk tgus, o mia tgus kun mnam ka ngaomevek to endo ngat kaen nga mamrung ngang nguk. Va e Mak to ko pavloum orom o papat ruk kmor mnam en mang e Yesus he kmokpom kar, endo ta vle enangthe ko hal msim, en kat tkaen ka mamrung ngang nguk kat.  
\v 14 Va mguak mo kaen mularo mamrung mo nguk kam khenam ma mmok te, muk tgus mum mo kaelongtok mo nguk mruo.  
\p Yu! Va kua ngarkie ngang E Nut, en kmen a vrek longeik ngang nguk tgus ruk mut kor mnam muk mang e Kristus he kmokpom kar.