\id TIT  
\h TIITO 
\toc1 GU UAꞌNAꞌN GU PAABLO NAT TU UAꞌÑXI GU TIITO 
\toc2 TIITO 
\toc3 Tit. 
\mt2 GU UAꞌNAꞌN GU PAABLO NAT TU UAꞌÑXI GU 
\mt1 TIITO 
\c 1  
\s1 Gu Paablo na ba ñioꞌkdhaꞌ gu Tiito 
\p  
\v 1 Aañ Paablo nañ jir nobiiꞌñ guch Xoiꞌkam nat pu chuꞌm kɨꞌn jiñ dhai gu Dios nañ tu juañxidhaꞌ. Jiñ joot nañ ja aaꞌñdharaꞌ gu jaꞌtkam nam jax jaꞌk dai buiñor bax biiñak kaꞌ guiꞌ nat jɨꞌk dɨɨlh ja aꞌm ba tɨ tɨɨ, baꞌ bhaiꞌ ji machiaꞌ am na puiꞌ jaꞌk jir sɨlhkam nach jax jaꞌk tu jim.  
\v 2 Jum aaꞌ na puꞌñi jaꞌk tu jimiaꞌ gu jaroiꞌ na baꞌx bhaaiꞌn kaꞌ na buiñor jimiaꞌ gu Dios na baꞌ gammɨjɨ buiñor bap tuiꞌkaꞌ. Gu Dios dɨɨlh pu puiꞌ tɨi bɨɨpɨꞌ dɨr nat baꞌ moo bap duu dhi oiꞌñgaꞌn na puꞌñi ja baidhikaꞌ gu jaꞌtkam guiꞌ nam jɨꞌk soiꞌm ɨlhdhai buiñor jum biiñkadai tɨ jɨɨꞌñdhaꞌ. Baꞌ dhiꞌ puiꞌ ji chu buusniaꞌ, na guꞌ gu Dios cham jɨꞌxkat iataꞌ.  
\v 3 Yammɨ pu duuk jix bhaiꞌ kach aagiꞌñ na tuꞌ pɨk aagɨt jup kaiꞌch bhaan gux bhaiꞌm kaiꞌchdham ñioꞌkiꞌñ, nat guꞌ dɨɨlh yammɨ pu dhuuk tu dai. Bhaan maat jachich jaiꞌ dhɨt nam jich aagiꞌñ nam pu chuꞌm kɨꞌn bhaan tu juan, dhiꞌ nat tuꞌ aañ jiñ aꞌm ji bii ɨp nañ pu tu duñiaꞌ. Nat guꞌ gu Dios pu chuꞌm kɨꞌn jiñ dhaasak jiñ chia, dhiꞌ nat bach boosolh nach mu jaꞌk ba bhɨichgɨt nach paiꞌ gammɨjɨ gɨt miꞌ pup jich chulhiiñdhaꞌ.  
\v 4 Baꞌ aañ tum uaꞌñxidhaꞌ bhaan dhiꞌñi uꞌuan aap Tiito, nañ jaꞌp jum ɨlhiiꞌñ nap jir jiñ mar, nap guꞌ jaꞌxbuiꞌ puiꞌp jix biiñak buiñor guch Xoiꞌkam na jax aañ. Baꞌ moo gu Dios jich Gɨꞌkoraꞌ gio guch Xoiꞌkam Jesuus pɨx gɨt jum aꞌm tɨ nɨidhidhaꞌ am nap baꞌ gammɨjɨx bhaiꞌm taat kaꞌ. 
\s1 Gu Paablo na ba aagiꞌñdhaꞌ gu Tiito na jax jaꞌk tu duñiaꞌ mi Kreeta 
\p  
\v 5 Janoꞌ na ñich jax bhammɨ dɨr xim doꞌñchok Kreeta, jup xim tɨɨdak jañich nap aap baꞌr diꞌ kaꞌ nap tɨ tɨɨmoꞌ nat jɨꞌk tuꞌ tu bii nach jax ka tu buaꞌt. Gio baꞌ nam paiꞌ jax jum jumpaꞌn guch Xoiꞌkam jɨɨgiꞌñdham, saak jap jɨꞌmaꞌn naiꞌ ja darsaꞌ guiꞌ nam tu ja aꞌgiꞌñdhaꞌ nam jax jaꞌk miꞌ puiꞌ jiimdaꞌ gammɨjɨ. Gio nar miꞌ kam kaꞌ ja bui guiꞌ am gu jaroiꞌ nap daasaꞌ, gam na muiꞌ tanoolh ba tɨ jɨɨgiꞌñdhaꞌ buiñor guch Xoiꞌkam.  
\v 6 Gu jaroiꞌ nap daasaꞌ, jum aaꞌ na joidham jir jix bhaiꞌkam kaꞌ, nam cham jɨꞌx bhaamkiꞌñdhaꞌ gu jaꞌtkam. Gio baꞌ na maaꞌn pɨx tɨ bɨɨnaꞌ kaꞌ, pu daipuꞌ gu jax chuꞌm na bɨɨmaꞌn jum tɨɨmoꞌ gu ubii. Gio gu maamraꞌn nam bɨɨx tɨ jɨɨgiꞌñdhaꞌ buiñor guch Xoiꞌkam, cham tuꞌ nam jax ja aꞌgadaꞌ gu jaꞌtkam nam jix buam tu jim gio nam cham tuꞌ kaꞌm tɨ nɨiꞌñ.  
\v 7 Na guꞌ gu jaroiꞌ na tu ja aꞌgiꞌñdhaꞌ guch Xoiꞌkam jɨɨgiꞌñdham, dhiꞌ gu Dios na bhaankam miꞌ puiꞌ tu buadaꞌ. Puiꞌ ku baꞌm aaꞌ na tuꞌ kaꞌm tɨ nɨidhat miꞌ puiꞌ jimdaꞌ na jax jix aaꞌ, na cham tuꞌ dɨɨlh pɨx xim joiꞌgɨꞌndaꞌ, ni ku cham bhammukdaꞌ, ni ku cham maimmukdaꞌ, ni ku cham joojoiꞌñdhaꞌ na ja gɨɨbdaꞌ gu jaiꞌ, ni ku cham jix maiꞌchim kaꞌ gu tuumiñ na kɨꞌn jix chu sabaꞌdam kaꞌ gu tuꞌ na pu cham tuꞌ mim nɨnɨiꞌñ buiñor gu Dios.  
\v 8 Gu jaꞌpji jaꞌkbuiꞌ kat nax bhaiꞌ ja buadaꞌ bɨɨx pɨx gu jaꞌtkam, jum aaꞌ na joidham jix bhaiꞌ tɨɨdai tɨbiaptudaꞌ gu jaroiꞌ na paxiaraidhaꞌ. Dai gux kɨɨꞌp jum duukam na bhaan jum tukgiꞌñkaꞌ nap tu buadaꞌ, dɨɨlh xim guguuxdhatgɨdaꞌ na miꞌ puiꞌ jimdaꞌ xim gaꞌngidhat na jax jaꞌk jix aaꞌ gu Dios.  
\v 9 Gam na gammɨjɨ maaꞌn na jax miꞌ puiꞌ tu daaꞌñchuꞌndaꞌ nat jax jaꞌk ba maat gux bhaiꞌm kaiꞌchdham ñioꞌkiꞌñ guch Xoiꞌkam na sɨlhkam tu aꞌga, na baꞌ guꞌ miꞌ dhɨr gammɨjɨ jaꞌk pu chuꞌm ja aaꞌñdhat bhaan ja guguuxiꞌñdhaꞌ gu jaiꞌ, gam na baꞌx bhaiꞌ ja aagiꞌñdhaꞌ guiꞌ nam maakam ɨlhdhat kɇɇ gux bhaiꞌm kaiꞌchdham ñioꞌkiꞌñ guch Xoiꞌkam nam baꞌ miꞌ puiꞌ jimiaꞌ. 
\p  
\v 10 Nam guꞌ muiꞌx jaiꞌch guiꞌ nam maakam ɨlhdhat kɇɇ gu ñioꞌkiꞌñ guch Xoiꞌkam, jaꞌp jum aaꞌ am nam pui miꞌ puiꞌ tu daaꞌñchuꞌndaꞌ na jax gu bɨjɨk dɨr kam Israel kam, nam ja matgilhdhat gu aꞌaalh chichioꞌñ nam kiaꞌpɨx maaxilhidhaꞌ na baꞌ bhaan jix maatɨꞌ kaꞌ nam jir Israel kam kaꞌ. Gam bɨɨx aixim tuꞌm nam tu aꞌga na ni jaroiꞌ kux maatɨt kɇɇ na jax jir jum duukam, jaiꞌ dhɨt gu jaꞌtkam ja jɨɨgiꞌñ am nam jax kaiꞌch.  
\v 11 Ja sooꞌmchulhdhaꞌ ap dhiꞌ pu chuꞌm gu jaꞌtkam nam cham pu chuꞌm tu aꞌgadaꞌ. Bɨɨx mu jaꞌk ji ja kaajidhaꞌm guꞌ nam jɨꞌk maap jir jum oiꞌdhagɨm kaꞌ noꞌt maadɨt ba iatgi miꞌ paiꞌ jax chuꞌm kiicham. Miꞌ dhɨr baꞌ bɨɨx maap aixim ba ja tɨtdadaꞌ am na jax jaꞌk pu cham jir sɨlhkam kaꞌ, nam jax dhui bhaan maiꞌchɨkdaꞌ pɨx baꞌ gu tuumiñ. 
\p  
\v 12 Maadɨt gu miꞌ kam kat Kreeta nax chu matdagich, bɨɨx aixim tuꞌm tu uaꞌna. Baꞌ maaꞌn jix jaiꞌch gu uꞌuan nap jum kaiꞌch: “Gammɨjɨ pɨx iatdaꞌ am gu jaꞌtkam yaꞌ oiꞌñkam Kreeta, gam nam jix chu oꞌjoꞌn. Nam gɇꞌgɇr tu kuaꞌdaꞌ dho gi guꞌ giilhim ji, daman jaꞌp tu jim am na jax gu jɨꞌngiarum nam mu jaꞌp jix jaiꞌch gampɨx.” Gu miꞌ kam pɨx na ja aagɨt jup kaiꞌch gu jaꞌtkam.  
\v 13 Maaxik jir puiꞌ dho nat jax tu uaꞌnak, sia xib pui puiꞌ jaꞌk tu jim am. Jix gɨꞌm jix ooꞌ kɨꞌn jap xi ja aagiꞌñdhaꞌ nam dai dhiꞌ bhaan tɨ jɨɨꞌñdhat miꞌ puiꞌ tu duñiidhaꞌ nach jax jaꞌk tu jim aach, na guꞌ dai dhiꞌr jix kɨɨꞌp jum duukam.  
\v 14 Ni kum cham mi ja jɨɨgiꞌñdhaꞌ guiꞌ nam bɨjɨk dɨr kam bhaan tu daaꞌñchugɨt tu aꞌga, na guꞌ dɨɨlh pɨx nam jax ɨlhiiꞌñ nam puiꞌ tu jim. Jaꞌp xi dhuukat am guiꞌ na pɨk tuꞌr sɨlhkam, sɨlh pɨx nam ja chiandaꞌ gu jaꞌtkam nam pu duñiaꞌ sia ku tɨi cham jir sɨlhkam. 
\p  
\v 15 Na guꞌ gu jaroiꞌ na daix kɨɨꞌp tum duuꞌnkam bhaan jurtɨkaꞌ, bɨɨx jir jix kɨɨꞌp tum duuꞌnkam kaꞌ ɨp na jɨꞌk tuꞌ naiꞌx chu jaiꞌch. Guꞌ ji noꞌ guꞌ pu cham jɨꞌx tɨ jɨɨgiꞌñ nax jaiꞌch gu tuꞌ nar jix kɨɨꞌ, dho pu cham jɨꞌxdhaꞌ jaiꞌchdhɨlhiaꞌ, na guꞌ dai puiꞌ pɨx jaꞌk jum aaꞌndaꞌ. Puiꞌ na jax guiꞌ nam cham tɨ jɨɨgiꞌñ buiñor guch Xoiꞌkam nam daix buam tum duuꞌnkam bhaan jujurtɨk.  
\v 16 Puiꞌ xi kaiꞌchɨt am nam miꞌ puiꞌ jiim na jax jix aaꞌ gu Dios, guꞌ pɨx ji na guꞌ nam jax jaꞌk tu jim, pu dhiꞌ bhaan jix bhaiꞌx maatɨꞌ nam jaꞌp xi dhuukat na jax pɨk jaꞌk jum aaꞌ nam tuiꞌñgɨdaꞌ. Jix ja bhaamkiꞌñdhaꞌ am gu jaꞌtkam, gio nam cham tɨ jɨɨgiꞌñ na tuꞌ pɨk jir sɨlhkam, ni kum cham jɨꞌx iam xim guꞌnguxiꞌñ nam xip tu duñiaꞌ gu tuꞌ nar jix kɨɨꞌp jum duukam. 
\c 2  
\s1 Gu Paablo na ba aagiꞌñdhaꞌ gu Tiito na jax jaꞌk ja aagiꞌñdhaꞌ guch Xoiꞌkam jɨɨgiꞌñdham 
\p  
\v 1 Baꞌ aap nap paiꞌ dhuuk tu ja aꞌgiꞌñdhaꞌ nap ja guguuxdhaꞌ guch Xoiꞌkam jɨɨgiꞌñdham, dai gu tuꞌ nar sɨlhkam jap bhaan tɨtɨɨꞌñchokat tu ja aꞌgiꞌñdhaꞌ.  
\v 2 Gio gu chichioꞌñ nap saak ja darsaꞌ nam tu ja aꞌgiꞌñdhaꞌ guch Xoiꞌkam jɨɨgiꞌñdham, jum aaꞌ nam jix gɨꞌm tu aꞌgadaꞌ gio sɨlhkam, gam nam tuꞌ kaꞌm ja nɨiꞌñdhaꞌ gu jaiꞌ. Xim gaꞌngidhat am dɨɨlh nam jax jaꞌk miꞌ puiꞌ jiimdaꞌ na jax jix aaꞌ gu Dios, gio nam gammɨjɨ bhaan tu daaꞌñchugɨt miꞌ puiꞌ jiimdaꞌ dhiꞌ nach tuꞌ bhaan jix biiñak kat tɨ jɨɨgiꞌñ. Gam nam jix chu joiꞌgɨꞌndaꞌ, gio nam jix ñakooꞌndaꞌ gu tulhiiñaraꞌ nam baꞌ nakgaꞌ na paiꞌ dhuuk ja daam ji jimiaꞌ.  
\v 3 Gio gu uꞌuub nap saak puiꞌp ja darsaꞌ nam tu ja aꞌgiꞌñdhaꞌ ɨp gu jaiꞌ uꞌuub, jum aaꞌ sia nam puiꞌ jaꞌk jup tu jimdaꞌ na jax jix kɨɨꞌ kaꞌm nɨiꞌñ gu Dios. Cham jir am nam naiꞌ bɨɨx aixim tuꞌm tu aꞌgidhaꞌ na tuꞌ cham jir sɨlhkam, ni kum cham jix buam ja aꞌgadaꞌ gu jaꞌtkam, ni kum cham jix maik kaꞌ. Guꞌ jaꞌpji nam jix bhaiꞌ tu jimdaꞌ nam baꞌ puiꞌp ji ja nɨidhat miꞌ puiꞌp tu daaꞌñchuꞌndaꞌ gu jaiꞌ.  
\v 4 Xi ja aagiꞌñdhaꞌ ap nam xix ja daꞌdat gammɨjɨ gu ja bɨpnaꞌ gio gu ja maamar.  
\v 5 Dɨɨlh jam puiꞌp xim gaꞌngidhat nam jax jaꞌk miꞌ puiꞌ jiimdaꞌ na jax jix kɨɨꞌ kaꞌm nɨiꞌñ gu Dios, nax uꞌuañ jup tuiꞌñgɨdaꞌ gammɨjɨ gu ja iꞌiiꞌmdaꞌ. Gio nam jix bhaiꞌ tu buaꞌt mu jaꞌp ja kiikiaꞌ am, gio nam jix chu joiꞌgɨꞌndaꞌ, gam nam jix ja kɇɇkɇt gu ja bɨpnaꞌ. Puꞌñi jaꞌk jum aaꞌ nach tu duiñchuꞌndaꞌ na baꞌ cham jaroiꞌ buam aꞌgaꞌ gux bhaiꞌm kaiꞌchdham ñioꞌkiꞌñ gu Dios. 
\p  
\v 6 Baꞌ aap dɨɨlh jup xi ja guguuxdhatuꞌndaꞌ gu biipibop nam gammɨjɨ dɨɨlh xim gaꞌngidhat nam jax jaꞌk miꞌ puiꞌ jiimdaꞌ na jax jix aaꞌ gu Dios.  
\v 7 Na guꞌ aap jaꞌp ji buusandaꞌ nap jir ja booiꞌ kaꞌ, nam guꞌm nɨidhat nap jax jaꞌk tuiꞌñgɨdaꞌ miꞌ puiꞌp tu daaꞌñchuꞌndaꞌ. Baꞌ nap paiꞌ dhuuk tu ja aꞌgiꞌñdhaꞌ nam jax jaꞌk tuiꞌñgɨdaꞌ, jix gɨꞌm nap pu ja tɨtdadaꞌ, cham tuꞌ jaaxmadaꞌ bhaan.  
\v 8 Noꞌch bɨɨx puiꞌ tu duiñchuꞌ dhiꞌ nañ jɨꞌk jax kaiꞌch, cham jaroiꞌ buam jich aꞌgadaꞌ, nam guꞌch nɨiꞌñdhaꞌ nach jix bhaiꞌ tu jimdaꞌ, jix xiꞌɨraam jum aagat jich ñɨiꞌñdhaꞌ am pɨx. 
\p  
\v 9 Baꞌ gu tujuandam nam puiꞌp tɨ jɨɨgiꞌñ buiñor guch Xoiꞌkam, xi ja aagiꞌñdhaꞌ ap nam cham jax ji kaiꞌchɨt miꞌ puiꞌp xi dhuñiidhat gu tuꞌ na ja chiandaꞌ gu jaroiꞌ nam tu juañxiꞌñdhaꞌ. Na guꞌ cham jir am noꞌm jix bhaakut pɨx tuꞌ kaiꞌch tuꞌ na ja chiandaꞌ, jir jix bhabhaiꞌkam kaꞌm pɨx buiñor.  
\v 10 Gio nam cham tɨ ɨɨxiꞌñdhaꞌ, baꞌ dhiꞌ bhaan bhaiꞌ ji machiaꞌ am gu jaꞌtkam na gu Dios jix bhaaiꞌ na pataasaꞌ gu iiꞌmdagaꞌn gu jaroiꞌ noꞌt soiꞌm ɨlhdhak buiñor miꞌ puiꞌ ba jii na jax jum kaiꞌch gu ñioꞌkiꞌñ, jaꞌp na jax aach nat bach boosolh nach mu jaꞌk ba bhɨichgɨt nach paiꞌ gammɨjɨ gɨt miꞌ pup jich chulhiiñdhaꞌ. 
\p  
\v 11 Nat guꞌ gu Dios maaxik xich joiꞌmdak jich chɨɨ, puiꞌ kuch baꞌ tɨ jɨɨgiꞌñ na gu Dios puiꞌx joiꞌmdaip tɨɨgɨi baabuꞌ gu jaroiꞌ bhaan dɨr gu boi na mu jaꞌk bhɨix na paiꞌ gammɨjɨ miꞌ pup jum tulhiiñdhaꞌ, dai pɨx noꞌt soiꞌ bam ɨlh buiñor.  
\v 12 Baꞌ puiꞌ nat jax xich joiꞌmdak jich chɨɨ, puꞌñip jum aaꞌ nach miꞌ puiꞌ jimiaꞌ na jax jix aaꞌ, nach cham tuꞌ kap tu buadaꞌ gux buam jum duukam na tuꞌ dhi oiꞌñgaꞌn jich aagiꞌñ, dai gux kɨɨꞌp jum duukam pɨx nach bhaan bach chukgiꞌñkaꞌ. Dɨɨlh jach xich gaꞌngidhat na jax jir joidham, gio baꞌ nach soiꞌch ɨlhdhat dai guiꞌ tɨꞌñchokaꞌ.  
\v 13 Puꞌñi jaꞌk jach tu duiñchugɨt jix bhaiꞌch chaatɨt nɨɨradaꞌ gu Dios jich Xoiꞌkam na gio bhaiꞌp jim jix ioꞌm gɇꞌkam kɨꞌn giox abhaar bhaan. Na guꞌ dhiꞌr diꞌ nat jich boosolh miꞌ dhɨr bhaan gu boi na mu jaꞌk bhɨix nach paiꞌ gammɨjɨ gɨt miꞌ pup jich chulhiiñdhaꞌ, na guꞌx ioꞌm jir gɇꞌkam.  
\v 14 Guch Xoiꞌkam dɨɨlh jum doꞌñcho na mɨt mua nat baꞌ pu duuk bɨɨx jich uañchuda guch uaꞌtulhdharaꞌ nach aꞌm jup tuꞌt janoꞌ nach chakui tɨ jɨɨꞌñdhat buiñor, jaꞌp ji buus nat jich boosgak jaꞌp jaꞌk jich chuttu miꞌ dhɨr na paiꞌx chu uaꞌtulhdhix. Baꞌ aach dɨɨlh xich guguuxdhai miꞌ puiꞌ ba jimiaꞌ na jax jix aaꞌ, dai guiꞌ buiñor pɨx jaꞌk jach bap tuiꞌñgɨdaꞌ. 
\p  
\v 15 Baꞌ aap miꞌ dhɨr puꞌñip ja aagiꞌñdhaꞌ guch Xoiꞌkam jɨɨgiꞌñdham, bɨɨx aixim jap bhaan xi ja guguuxiꞌñdhaꞌ nam jax jaꞌk miꞌ puiꞌ jiimdaꞌ. Ja ñiokiꞌñdhaꞌ ap noꞌm jaiꞌ cham miꞌ pu bua, nap guꞌ jaꞌp ji buusandaꞌ nap aap jir gɇꞌkam kaꞌ ja bui. Chaꞌp gan ja doꞌñchokaꞌ nam tuꞌ pɨx jum ɨlhiiꞌñdhaꞌ. 
\c 3  
\s1 Gu Paablo na ba aagiꞌñdhaꞌ gu Tiito na jax jaꞌk jum aaꞌ nam tuiꞌñgɨdaꞌ guiꞌ nam tɨ jɨɨgiꞌñ buiñor guch Xoiꞌkam 
\p  
\v 1 Gammɨjɨp ja tɨꞌñchoxiꞌñkaꞌ guch Xoiꞌkam jɨɨgiꞌñdham nam tuꞌ kaꞌm ja nɨidhat gu gɇꞌgɇrkam jix kakaiꞌ ganaiꞌ bɨɨx aixim nam tuꞌ kɨꞌn tu daraa, xix ja kɇɇkɇt am jax ñam kaiꞌchdhaꞌ. Bɨɨpɨꞌm jup xim gaꞌngadaꞌ noꞌ moor jix kɨɨꞌp jum duukam gu tuꞌ nam ja chiandaꞌ gu gɇꞌgɇrkam.  
\v 2 Cham jir am nam buam ja aꞌgadaꞌ gu jaꞌtkam, ni kum cham bhaaꞌmnaꞌ kaꞌ, jix chu joiꞌgɨꞌndaꞌm pɨx. Puiꞌm jaꞌk tu jimdaꞌ nam jax jaꞌk jix maatɨt ja nɨiꞌñdhaꞌ gu jaꞌtkam nam soiꞌm ɨlhiiꞌñ ja jujur am bhaan. 
\p  
\v 3 Puiꞌ dhor tuꞌm kat ich ji bɨɨpɨꞌ dɨr nach chakui tɨ jɨɨꞌñdhat buiñor guch Xoiꞌkam, bɨɨx aixim tu buadaꞌ ich na tuꞌ cham jir kɨɨꞌ, nach guꞌ pu cham tuꞌ kaꞌm nɨiꞌñdhaꞌ gu Dios, jaꞌp ji buusandaꞌ pɨx nach jir tujuandam tugiꞌñ kaꞌ gux buam jum duukam. Maiꞌ suulhgix kat ich tuꞌ sɨlhkam kɨꞌn, dai nach xich jɨjɨɨgak kaꞌ tuꞌ na pɨx bhaan nach jax dhuix bhaak kaꞌ.  
\v 4 Baꞌ aach na chich jɨꞌk buiñor soiꞌch ɨlh, gu Dios xich joiꞌmdak jich chɨɨgɨk jich boosolh miꞌ dhɨr bhaan gu boi nach paiꞌ bhaan mu jaꞌk ka jiimɨt nach paiꞌ gammɨjɨ gɨt miꞌ pup jich chulhiiñdhaꞌ.  
\v 5 Baꞌ cham tuꞌ na chich moo tuꞌ gɇꞌkam kɨꞌn jix bhaiꞌ duiñ gu Dios kut baꞌ xich joiꞌmdak jich boosolh miꞌ dhɨr nach paiꞌ jaꞌk jich chulhiiñaꞌ gɨt, gu jaꞌpji dɨɨlh pɨx nat xich joiꞌgɨlh. Uana bɨɨx guch uaꞌtulhdharaꞌ, jaꞌp ji buus nat jich bopko suudaiꞌ kɨꞌn nach jix iꞌkoraꞌ kat, gio na chich panaas kiaꞌpɨx ba maaxir. Baꞌ gux Dhuuduꞌ kam jix Uañ Iiꞌmdaꞌ nat jich aꞌm jum tajaa, dhiꞌ puiꞌch jurtuꞌnkaꞌ nach jix mat kaꞌ na tuꞌr jix kɨɨꞌp jum duukam nach baꞌ miꞌ puiꞌ jiimdaꞌ.  
\v 6 Baꞌ dɨɨlh pɨx gu Dios jich palhbuiꞌñ bhaankam guch Xoiꞌkam nat baꞌx ioꞌm gɇꞌch aꞌm tajaa gux Dhuuduꞌ kam jix Uañ Iiꞌmdaꞌ.  
\v 7 Baꞌ miꞌ dhɨr dai nach ba jimiaꞌ nach gammɨjɨ buiñor bap tuiꞌkaꞌ nach jax baꞌ tuꞌm tɨi nɨɨra xib, nat guꞌ bach uañ guch uaꞌtulhdharaꞌ nat xich joiꞌmdak jich chɨɨ. 
\p  
\v 8 Baꞌ aañ jix aaꞌ nap gammɨjɨ dai dhiꞌ bhaan tu aꞌgadaꞌ ja bui guch Xoiꞌkam jɨɨgiꞌñdham nam baꞌx kɨɨꞌp jum duukam bhaan jum tukgidhidhaꞌ nam jup tu duñiidhaꞌ. Na guꞌ dhiꞌr jix kɨɨꞌp jum duukam, jaroiꞌ na pɨx palhbuiꞌñchuꞌndaꞌ na jax jaꞌk miꞌ puiꞌ jimdaꞌ.  
\v 9 Chaꞌp tuꞌp jum buixiꞌñdhaꞌ noꞌm jaiꞌ dhɨt bhaan ñiokbo gu tuꞌ na pu cham tuꞌ mim nɨnɨiꞌñ, puiꞌ na jax noꞌm bhaan tu aꞌga gu bɨjɨk dɨr kam sapookiꞌñ nam jax tu jimdat guch bopxi kat, na guꞌ dhiꞌ bhaan pɨx jix bhaak kaꞌ am bhaan ji chu aꞌgat na jax tu aagix nat tu uaꞌnak gu Moisees. Guꞌ dhiꞌ cham tuꞌ kam aaꞌ xib, pu cham jañ maat nam jax kaiꞌñkam puiꞌ jaꞌk tu daaꞌñchuꞌ. 
\p  
\v 10 Noꞌ jaroiꞌ maadɨt miꞌ paiꞌ maakam ja aagiꞌñ guch Xoiꞌkam jɨɨgiꞌñdham, dɨlhkob jap xi baidhai xi chu aꞌgidhaꞌ na cham jir am na jax jaꞌk tu jim. Baꞌ noꞌ cham jum jɨɨgiꞌñ, jaꞌp jap tɨɨdaꞌ na buusniaꞌ miꞌ dhɨr ja bui guch Xoiꞌkam jɨɨgiꞌñdham, cham tuꞌ na miꞌ oirɨt maakam ja aagiꞌñdhaꞌ.  
\v 11 Na guꞌ noꞌ cham jɨꞌx jum kɇkɇɇ nap jax tɨi tɨtdadaꞌ, dhiꞌ bhaan jix mat kaꞌ ap na cham jɨꞌxkat miꞌ puiꞌ ka jimiaꞌ na jax jir sɨlhkam, dɨɨlh baꞌ gu uaꞌtulhdhargaꞌn tulhiiñchudaꞌ. 
\s1 Gu Paablo na ba aagiꞌñdhaꞌ gu Tiito na jɨꞌk tuꞌ jax dhuñiaꞌ 
\p  
\v 12 Aañ mum joochxidhaꞌ gu Arteemas piam gu Tiikiko nam aꞌmkam miꞌ ka oirɨdaꞌ nap aap yammɨ ka jimiaꞌ Nikoopolis nap bhañ chɨɨꞌmɨraꞌ. Xim gaagaꞌ ap nap jax dhui miꞌp tuiꞌkaꞌ, nañ guꞌ aañ miꞌx buusaidham gux jɨɨp na ba miamlhim.  
\v 13 Aap baꞌ xi palhbuidhaꞌ gu abogaaꞌn Seenas gu tuꞌ na aꞌmiram jum aaꞌndaꞌ, gio gu Apoolos. Sia tuꞌ nap bhaan puiꞌ pup jum duukaꞌp kɨꞌn xi ja palhbuidhaꞌ, na guꞌx ioꞌm jum aaꞌ na jaroiꞌ ja palhbuidhaꞌ na baꞌ cham tuꞌ ja aꞌm jum aaꞌndaꞌ nam naiꞌ ja palhbuidhim guch Xoiꞌkam jɨɨgiꞌñdham.  
\v 14 Xi ja aagiꞌñdhaꞌ ap guch Xoiꞌkam jɨɨgiꞌñdham na puiꞌp jum aaꞌ nam ja palhbuidhaꞌ tuꞌ na pɨx kɨꞌn nam baꞌ puiꞌ maachidhaꞌ. Na guꞌ puꞌñi jaroiꞌ na pɨx bam aaꞌndaꞌ nam palhbuidhaꞌ guch Xoiꞌkam jɨɨgiꞌñdham. 
\s1 Gu Paablo na puiꞌ ba tɨɨdaꞌ gu Tiito na bhaankam xi ja ñioꞌkdhaꞌ guch Xoiꞌkam jɨɨgiꞌñdham 
\p  
\v 15 Bɨɨx yaꞌ dɨr mu tum guguuxiꞌñ am guch Xoiꞌkam jɨɨgiꞌñdham nam jɨꞌk yaꞌñ bɨɨm jup tuꞌiiꞌ. Aap baꞌ miꞌ dhɨr gammɨjɨ jaꞌk puiꞌp xi ja tɨɨdaꞌ guiꞌ nach maap jix biiñak guch Xoiꞌkam nach aach yaꞌ dɨr mu tu ja guguuxiꞌñ. Jaꞌpni ku baꞌ gu Dios jich Gɨꞌkoraꞌ pɨx gɨt jam aꞌm tɨ nɨidhidhaꞌ gammɨjɨ bɨɨx jɨꞌmaꞌn aapiꞌm.