\id 1JN  
\h 1 JUAN 
\toc1 GU BƗƗPƗꞌ KAM UAꞌNAꞌN GU JUAN NAR NOBIIꞌÑ GUCH XOIꞌKAM 
\toc2 1 JUAN 
\toc3 1 Jn. 
\mt2 GU BƗƗPƗꞌ KAM UAꞌNAꞌN GU 
\mt1 JUAN 
\mt2 NAR NOBIIꞌÑ GUCH XOIꞌKAM 
\c 1  
\s1 Gu Juan nap kaiꞌchdhaꞌ na guch Xoiꞌkam jir diꞌ pɨx guiꞌ na tu maak gu iiꞌmdaꞌ 
\p  
\v 1 Mɨjɨ jaꞌp tu jam uaꞌñxiꞌñ iñ jiñ jaaduñ na pim paiꞌ jax tu daraa nañ bhaan tu jam aꞌgiꞌñ na jax jir tuꞌm kam guch Xoiꞌkam guiꞌ na bɨjɨk dɨr pux jaiꞌch. Aach jaiꞌ dhɨt jix bhaiꞌ maatɨk na jax jir tuꞌm kam, na chich guꞌ maaxik tɨɨgɨk jich buupui kɨꞌn, ñioꞌkdhak jachich, kɇɇjimɨk ich ɨp na jax tu aꞌgimɨk. Dhiꞌ pɨx jir diꞌ guiꞌ na bɨjɨk dɨr bhaan ba tum aꞌga, jir diꞌ pɨx ɨp guiꞌ na tu maak gu iiꞌmdaꞌ.  
\v 2 Baꞌ dhiꞌ jɨꞌ na jaroiꞌ tu maak gu iiꞌmdaꞌ, maaxik yaꞌ xi oilhimɨk maaꞌnkam jup jum duuk. Aach jix bhaiꞌ tɨɨgɨk jaiꞌ dhɨt, jix maatɨt jach baꞌ yaꞌ dɨr pu chuꞌm jup ba tu jam aꞌgiꞌñ jiñ jaaduñ na pim baꞌ moo muiꞌ xim guguuxdhaꞌ na pim jix ioꞌm muiꞌ xix biiñak kaꞌ buiñor na baꞌ jam makiaꞌ gu iiꞌmdaꞌ na pim kɨꞌn gammɨjɨ pu ba duduakaꞌ bhammɨ jaꞌk jix dhaam. Na guꞌ dhiꞌ nañ jaroiꞌ bhaan tu jam aꞌgiꞌñ jiñ jaaduñ, cham tuꞌr yaꞌ paiꞌ kam dhi oiꞌñgaꞌn, matgɨm guꞌ dhiꞌ bhammɨ dɨr ji nat bha jii jix dhaam na paiꞌp tuꞌiiꞌ gu Dios, nat paiꞌ jaꞌk giop bhɨi na jax yaꞌ xi oilhimɨk.  
\v 3 Baꞌ aach xib bhaankamuꞌn guiꞌ jam guguuxiꞌñ jiñ jaaduñ na pim bɨɨx jam jujur kɨꞌn ba tɨ jɨɨꞌñdhaꞌ buiñor. Na guꞌ dhiꞌ cham tuꞌr iatdaꞌ nach jax tu jam aꞌgiꞌñ, guꞌ aach maaxik tɨɨgɨk ji jich buupui kɨꞌn nañ jax ba jam tɨtda, jix bhaiꞌ kɇɇjimɨk ich na jax tu aꞌgimɨk. Baꞌ jam guguuxiꞌñ ich na pim bɨɨx jam jujur kɨꞌn tɨ jɨɨꞌñdhai miꞌ puiꞌ ba jimiaꞌ na jax jix aaꞌ nach baꞌ maap maaꞌn ñiꞌook bap duukaꞌ jam bɨɨm, jaꞌp na jax aach nach maap maaꞌn ñiꞌook bap duuk gu Dios gio gu Maraaꞌn jich Xoiꞌkam, nach guꞌ bɨɨx jich jujur kɨꞌn ba tɨ jɨɨgiꞌñ buiñor.  
\v 4 Bɨɨx dhiꞌ puꞌñi jaꞌk jañ mu tu jam uaꞌñxiꞌñ jiñ jaaduñ, nañ guꞌ gɇꞌkam kɨꞌn jix bhaiꞌ bañ chaat buiñor guch Xoiꞌkam, na pim baꞌ aapiꞌm puꞌñi dhuuji puiꞌx bhaiꞌp jum taat kaꞌ buiñor. 
\s1 Gu Juan nap kaiꞌchdhaꞌ na gu Dios joidham gɇꞌ tanoor 
\p  
\v 5 Janoꞌ nach maap oipimɨk guch Xoiꞌkam, puiꞌ tuch aꞌgidhimɨk na gu Dios joidham gɇꞌ tanoor bhammɨ na paiꞌp tuꞌiiꞌ, cham paiꞌ dhuuk jix chukgam kɨr jup tuꞌiiꞌ. Baꞌ aach yaꞌ dɨr pu chuꞌm jup ba tu jam aꞌgiꞌñ jiñ jaaduñ na jax jir tuꞌm kam gu Dios nat jich aaꞌñdhak guch Xoiꞌkam.  
\v 6 Baꞌ noꞌch aach jax kaiꞌch nach sɨlhkam tɨ jɨɨꞌñdhat miꞌ puiꞌ ba jiim na jax jix aaꞌ, guꞌ ji noꞌch guꞌx chu tukgam tɨr jup tuꞌiiꞌ puiꞌ xi kaiꞌchɨt, ba iatdaꞌ ich pɨx, cham tuꞌ paiꞌ sɨlhkam tɨ jɨɨgiꞌñdhaꞌ ich buiñor.  
\v 7 Guꞌ noꞌch sɨlhkam bɨɨx jich jujur kɨꞌn tɨ jɨɨꞌñdhat miꞌ puiꞌ ba jiim na jax jix aaꞌ, dho gi guꞌ puiꞌ bam kaiꞌch ji nach tuꞌ sɨlhkam jix chu maax kɨr jup tuꞌiiꞌ, na guꞌ tɨich bɨꞌñxiꞌñkaꞌ gu Dios noꞌch tuꞌ kaꞌm nɨiꞌñ. Gio guꞌ joidham jix bhaiꞌ kaiꞌchɨt maaꞌn ñiꞌook bap duukaꞌ ich nach jɨꞌk ba tɨ jɨɨgiꞌñ buiñor gu Dios, baꞌ gammɨjɨ ba tuch uañiꞌñkaꞌ noꞌch jich uaꞌtulhiꞌñ kɨꞌn gu ɨꞌraꞌn gu Maraaꞌn jich Xoiꞌkam nat jaax bhammɨ kuruus taꞌm. 
\p  
\v 8 Baꞌ cham jir am noꞌch aach jax kaiꞌch nach cham ka uꞌuaꞌtulhdhix, na guꞌ cham jɨꞌxdhaꞌ jaroiꞌx uañ kɨꞌn pu ba kɨɨkaꞌ yaꞌ dɨr jaꞌp jaꞌk, na guꞌ yaꞌx chu uaꞌtulhdhix. Puiꞌ kuñ baꞌp kaiꞌch na cham jir am noꞌ jaroiꞌ puiꞌm aaꞌ na cham ka uaꞌtulhdhix, na guꞌ cham tuꞌr miꞌ puiꞌ kaꞌ na jax jir sɨlhkam, dɨɨlh pɨx na puiꞌ ɨlhiiꞌñdhaꞌ.  
\v 9 Jɇɇꞌ ji noꞌch maaxik jax kaiꞌch nach gammɨjɨ pɨx jich uaꞌtulhiꞌñ na baꞌr puiꞌ kaꞌ na jax jir sɨlhkam. Tuch uañiꞌñkaꞌ ɨp gu Dios noꞌch soiꞌch ɨlhdhat jax chɨtda na tuch uañdhaꞌ noꞌ chich tuꞌ bhaan mach uaꞌtulh.  
\v 10 Sia cham jir am noꞌch jax kaiꞌch nach cham paiꞌ dhuuk tuꞌ bhaan jich uaꞌtulhiꞌñ, na guꞌ puiꞌ pɨx ba ji buusniaꞌ baꞌ gu Dios nar jix iatkum, na puiꞌ kaiꞌch nach bɨɨx pɨx jix uꞌuaꞌtulhdhix nach jɨꞌk jaꞌtkam, maaxik jup jir puiꞌ guꞌ nach bɨɨx pɨx jix uꞌuaꞌtulhdhix. Baꞌ noꞌch puiꞌ kaiꞌch nach cham paiꞌ dhuuk tuꞌ bhaan jich uaꞌtulhiꞌñ, dhiꞌ bhaan bax maatɨꞌ kaꞌ nach cham tuꞌ bɨɨx jich jujur kɨꞌn tɨ jɨɨgiꞌñ buiñor gu Dios. 
\c 2  
\s1 Guch Xoiꞌkam jich aꞌmkam ñiok buiñor gu Dios 
\p  
\v 1 Baꞌ aañ dhiꞌ puꞌñi jaꞌk pɨx miꞌ tu jam uaꞌñxiꞌñ jiñ jaaduñ jich Xoiꞌkam bhaan nañ bhaan jam guguuxiꞌñ na pim miꞌ puiꞌ xi jiimdaꞌ na jax jix aaꞌ gu Dios, na pim baꞌ moo cham kam uaꞌtulhiꞌñdhaꞌ. Piam kut guꞌ moo jax dhuuk jaroiꞌ maadɨt mam uaꞌtulh cham jum ɨlhdham, maadɨt biaꞌ ich ji guꞌ matgɨm guiꞌ na jaroiꞌx bhaaiꞌ nach aꞌmkam nokiaꞌ buiñor gu Dios jich Gɨꞌkoraꞌ, na baꞌ tuch uañiꞌñkaꞌ nach jich uaꞌtulhiꞌñ. Guiꞌ dho Jesuus jich Xoiꞌkam jañ aagɨt jup kaiꞌch na jaroiꞌx uañ kɨꞌn kɨɨk,  
\v 2 nat jaroiꞌ jich aꞌmkam jum makgɨrta bo janoꞌ bhaan gu kuruus na baꞌ puꞌñi dhuuji tu namkix kaꞌ bɨɨx nach jɨꞌx jix uaꞌtulhdhix. Ku guꞌ cham tuꞌ ji na dai nach jɨꞌk jir yaꞌ kam dhi Israel nat tuch ñamkix, jaꞌpji dappaam ji na jɨꞌx oiꞌñgaꞌn kam gu jaꞌtkam. 
\p  
\v 3 Baꞌ noꞌch miꞌ puiꞌ xi jiim na jax jix aaꞌ gu Dios, dhiꞌ bhaan bax maatɨꞌ kaꞌ nach tuꞌ sɨlhkam bɨɨx jich jujur kɨꞌn tɨ jɨɨꞌñdhat tuꞌ kaꞌm ba nɨiꞌñ, baꞌ puiꞌ bam kaiꞌchdhaꞌ nach jix bhaiꞌ bax maat na jax jir tuꞌm kam.  
\v 4 Guꞌ ji noꞌch guꞌ pu cham tuꞌ miꞌ puiꞌ jiim na jax jix aaꞌ, sia kuch guꞌ puiꞌ tɨi xi kaiꞌch nach bɨɨx jich jujur kɨꞌn ba tɨ jɨɨgiꞌñ buiñor, pɨx jap kaiꞌchdhaꞌ ich, cham tuꞌr puiꞌ kaꞌ.  
\v 5 Guꞌ matgɨm gu jaroiꞌ noꞌt moo tuꞌ sɨlhkam ba maat na jax jir tuꞌm kam gu Dios, joidham ji na tuꞌ kaꞌm nɨidhat miꞌ puiꞌ jimdaꞌ na jax jix aaꞌ. Dhiꞌ baꞌ bhaan bax maatɨꞌ kaꞌ na bɨɨx juraaꞌn kɨꞌn ba tɨ jɨɨgiꞌñ buiñor, baꞌ maap bam kɇkɇɇ am gu Dios.  
\v 6 Baꞌ noꞌ jaroiꞌ jax kaiꞌch nam maap maaꞌn ñiꞌook bap duuk gu Dios, jum aaꞌ na puiꞌ jaꞌk jup xi chu jimdaꞌ nat jax tu jii guch Xoiꞌkam janoꞌ na yaꞌ xi oilhimɨk na baꞌ bhaan jix maatɨꞌ kaꞌ nar sɨlhkam. 
\s1 Na jax jaꞌk tu aagix kaꞌ yaꞌ dɨr jaꞌp jaꞌk 
\p  
\v 7 Baꞌ dhiꞌ nañ jɨꞌk tuꞌ mu tu jam uaꞌñxiꞌñ jiñ jaaduñ, jir diꞌ pɨx gu ñioꞌkiꞌñ gu Dios na pim bɨjɨk dɨr pu ba kɇɇ na pu chuꞌm tum aꞌga, nat pu bɨjɨk dɨr puiꞌ jaꞌk tu dai gu Dios. Cham tuꞌ na pim jax jum aaꞌndaꞌ na dhiꞌ baꞌ bar xibkam nañ aañ muiꞌ ba tu jam uaꞌñxiꞌñ.  
\v 8 Ku baꞌ guꞌ dhiꞌ nañ jɨꞌk tuꞌ mu tu jam uaꞌñxiꞌñ jiñ jaaduñ, jaꞌp ji buus ji nar xibkam ñioꞌkiꞌñ gu Dios, sia ku guꞌ bɨjɨk dɨr pu chuꞌm bhaan ba tum aꞌga, nat guꞌ kiaꞌpɨx puiꞌ tum kuugalh na jax yaꞌ xi oilhimɨk guch Xoiꞌkam. Dhiꞌ baꞌr diꞌ baꞌ xib guiꞌ na joidham gɇꞌ tanoor yaꞌ dhi oiꞌñgaꞌn. 
\p  
\v 9 Baꞌ noꞌ guꞌ maadɨt jax kaiꞌch nax chu maax kɨr bap tuꞌiiꞌ na puiꞌ jim aagɨt na ba tɨ jɨɨgiꞌñ buiñor guch Xoiꞌkam, guꞌ ji noꞌ guꞌx bhaamkiꞌñ gu jumai na puiꞌp tɨ jɨɨgiꞌñ buiñor guch Xoiꞌkam, cham tuꞌx chu maax kɨr jup tuiꞌkaꞌ, puix chukgam kɨr kap tuiꞌkaꞌ.  
\v 10 Jɨɨꞌ ji noꞌ guꞌ joidham jix joiꞌndat pɨx jix bhaiꞌ tɨtda gu jumai na puiꞌp tɨ jɨɨgiꞌñ buiñor guch Xoiꞌkam, dhiꞌ jɨꞌ ji na baꞌ puiꞌ bam kaiꞌch na joidham jix chu maax kɨr bap tuiꞌdhiꞌ, baꞌ cham jɨꞌxdhaꞌ tuꞌ bhaan jutbui ɨlhiaꞌ. Jaꞌp jañ kaiꞌñkam jup kaiꞌch na cham jɨꞌxdhaꞌ maiꞌchiaꞌ gux buam jum duukam.  
\v 11 Guꞌ ji noꞌ guꞌ daix bhaamkiꞌñ gu jumaich Xoiꞌkam jɨɨgiꞌñdham, dhiꞌ dho gi guꞌ puix chu tukgam kɨr jup tuiꞌkaꞌ ji, baꞌ pu cham mat kaꞌ na paiꞌ jaꞌk bhɨichgɨdaꞌ, puiꞌ pɨx ba ji buusniaꞌ na jax maaꞌn gu cham ñiakam. 
\p  
\v 12 Jaꞌpniñ baꞌ moo yaꞌp tu jam uaꞌñxiꞌñ jiñ jaaduñ jich Xoiꞌkam bhaan na pim jix bhaiꞌ pɨx jum taat kaꞌ, nat guꞌ ba tu jam uañ gu Dios bɨɨx gu jam uaꞌtulhdharaꞌ nat jix bhaiꞌ duu guch Xoiꞌkam nat tuch ñamkix.  
\v 13 Baꞌ aapiꞌm na pim jɨꞌk bar gɇꞌgɇr jaꞌtkam, mu tu jam uaꞌñxiꞌñ iñ ɨp nañ jix bhaiꞌñ chaat na pimɨt puiꞌp ba maat guch Xoiꞌkam guiꞌ na bɨjɨk dɨr pux jaiꞌch, na gammɨjɨ pur gɇꞌkam. Gio aapiꞌm na pim jɨꞌk jir tu biipibop, puiꞌñ muiꞌp tu jam uaꞌñxiꞌñ nañ jix bhaiꞌñ chaat na pim cham ka kaichuꞌ gux buam jum duukam, na pim guꞌ ba tɨ jɨɨgiꞌñ buiñor guch Xoiꞌkam. 
\p  
\v 14 Puꞌñi jaꞌk jañ dho baꞌ pɨx tu jam uaꞌñxiꞌñ jiñ jaaduñ nañ bhaan jam guguuxiꞌñ na pim jix bhaiꞌ pɨx bam taat kaꞌ, na pim guꞌ bax maat baꞌ xib na jax jir tuꞌm kam gu Dios jich Gɨꞌkoraꞌ. Gio aapiꞌm na pim jɨꞌk jir gɇꞌgɇr jaꞌtkam, puꞌñi jaꞌk pɨx jañ muiꞌp tu jam uaꞌñxiꞌñ na pim baꞌ moox bhaiꞌ pɨx jup bam taat kaꞌ na pimɨt puiꞌp ba maat guch Xoiꞌkam guiꞌ na bɨjɨk dɨr pux jaiꞌch. Bɨɨx sia aapiꞌm na pim jir tu biipibop jañ puꞌñi pɨx jaꞌk muiꞌp tu jam uaꞌñxiꞌñ, nañ guꞌx bhaiꞌñ chaat na pim bhaan bax oꞌjoꞌ baꞌ xib buiñor guch Xoiꞌkam, na pim guꞌ ba tɨ jɨɨgiꞌñ buiñor, baꞌ cham jɨꞌxdhaꞌ jax ka jam doodaꞌ gu jaꞌook. 
\p  
\v 15 Jam guguuxiꞌñ iñ ɨp jiñ jaaduñ na pim siamri mɨk ba buaꞌ gu tuꞌ nar yaꞌ kam dhi oiꞌñgaꞌn. Chaꞌpim bhaan kam tutkagiꞌñkaꞌ, ni ku pim puiꞌ jaꞌk jup ka tu jimdaꞌ nam jax tu jim guiꞌ nam chakui tɨ jɨɨgiꞌñ buiñor guch Xoiꞌkam. Na guꞌ gu jaroiꞌ noꞌ dai mu jaꞌk bhaan tɨtɨɨꞌñcho gu tuꞌ nar yaꞌ kam dhi oiꞌñgaꞌn, dhiꞌ bhaan jix maatɨꞌ kaꞌ na cham tuꞌ bɨɨx juraaꞌn kɨꞌn tɨ jɨɨꞌñdhat tuꞌ kaꞌm nɨiꞌñdhaꞌ gu Dios.  
\v 16 Na guꞌ cham tuꞌ gu Dios na puiꞌ jaꞌk jurtuꞌnkaꞌ noꞌx buam bax chu duñiim na jax cham kɨɨꞌ kaꞌm nɨiꞌñ, yaꞌ dɨr pɨx ji bhaan dhi oiꞌñgaꞌn na pu chuꞌm busaak. Bɨɨx nam jɨꞌk tuꞌ jax bua gu jaꞌtkam nar jix buam jum duukam, jir yaꞌ kam pɨx dhi oiꞌñgaꞌn bhaan, puiꞌ na jax nam gɇꞌgɇrkam bam taat kaꞌ noꞌm bar jix chutumñigam, piam nam bɨxchuꞌ bhax chu joiꞌñdhaꞌ jix dhaꞌram namkɨm, gam nam jaiꞌ bhax ja joiꞌñdhaꞌ gu uꞌuub.  
\v 17 Ku guꞌ dhiꞌ alhio pɨx ji nam yaꞌ puiꞌ xi chu buimɨi dai yaꞌ dhi oiꞌñgaꞌn bhaan, iam guꞌ gammɨjɨ kɨꞌn yaꞌ pux bhaiꞌm taat kaꞌ am gɨt. Na guꞌ na paiꞌ dhuuk jum tɨɨmoꞌ dhi oiꞌñgaꞌn, bɨɨx pu cham paiꞌ matgilhiaꞌ gu tuꞌ na yaꞌx chu jaiꞌch. Guꞌ matgɨm gu jaroiꞌ noꞌt ba tɨ jɨɨꞌñ buiñor guch Xoiꞌkam, gammɨjɨ ji na pux jɨkgɨm bap tuiꞌkaꞌ, na guꞌ pu baidhikaꞌ bhammɨ jaꞌk jix dhaam na buiñor bap tuiꞌkaꞌ. 
\s1 Nam jax jaꞌk tu jimdaꞌ guiꞌ nam jix bhaamut aꞌgadaꞌ guch Xoiꞌkam 
\p  
\v 18 Jiñ jaaduñ jich Xoiꞌkam bhaan, yaꞌ moo ba miamlhim na paiꞌ dhuuk tum kuugalhdhaꞌ yaꞌ dhi oiꞌñgaꞌn bhaan. Baꞌ na pim jax bax maat jiñ jaaduñ na puiꞌ tum kaiꞌch bo na saak maaꞌn jaiꞌchdhɨlhiaꞌ guiꞌ nax bhaamut aꞌgidhaꞌ guch Xoiꞌkam na paiꞌ dhuuk puꞌñi bar miaꞌn kaꞌ na tum kuugalhdhaꞌ. Dho guꞌ xib muiꞌ ji nam pu chuꞌm ba oipo gu jaꞌtkam nam jix bhaamut aꞌga guch Xoiꞌkam. Dhiꞌñ baꞌ bhaan puiꞌ ba kaiꞌch na bar miaꞌn ji na paiꞌ dhuuk tum kuugalhdhaꞌ yaꞌ dhi oiꞌñgaꞌn.  
\v 19 Dhiꞌ dhi jaꞌtkam nam xib naiꞌ jiimɨt jix bhaamut aꞌgim guch Xoiꞌkam, yaꞌ maap jich jumpadat ich nach chu daandat buiñor guch Xoiꞌkam, nam guꞌ panaas ka tɨ jɨɨgiꞌñdhaꞌ buiñor. Guꞌ ji na mɨt guꞌ mɨkkat yaꞌ dɨr ji jii jich bui, mummu jaꞌp jam pɨx jix bhaamut ba aꞌgim guch Xoiꞌkam. Dhiꞌ baꞌ bhaan ba matgir nam bak guꞌ pu cham kɨɨgalhiꞌñ ji sia pu bɨjɨk dɨr, nam guꞌ chi pu cham tɨ jɨɨgiꞌñdhaꞌ buiñor bɨɨx ja jujur kɨꞌn. Na guꞌ noꞌm pux kɨɨgalhiꞌñdhaꞌ gɨt pu bɨjɨk dɨr, puich bɨɨm jup tuiꞌñgɨdaꞌm gɨt sia gu xib. 
\p  
\v 20 Aapiꞌm na pim guꞌ bɨɨx jam jujur kɨꞌn ba tɨ jɨɨgiꞌñ buiñor guch Xoiꞌkam, baꞌ bɨɨx jɨꞌmaꞌn jam aꞌm ba tajaañix gux Dhuuduꞌ kam jix Uañ Iiꞌmdagaꞌn. Dhiꞌ bax bhaiꞌ jam mattuꞌn na jax jir tuꞌm kam guch Xoiꞌkam, gio na jax jaꞌk jix aaꞌ na pim tuiꞌñgɨdaꞌ.  
\v 21 Puiꞌ kuñ baꞌ mɨjɨ tu jam uaꞌñxiꞌñ jiñ jaaduñ, nañ guꞌx bhaiꞌñ chaat na pim jix bhaiꞌx maatɨt tuꞌ kaꞌm ba nɨiꞌñ guch Xoiꞌkam, gam na pim bɨɨx jam jujur kɨꞌn ba tɨ jɨɨgiꞌñ buiñor. Baꞌ guiꞌ nam jɨꞌk puꞌñix bhaiꞌ bax mat kaꞌ na jax jir tuꞌm kam guch Xoiꞌkam, cham tuꞌx bhaamut aaꞌndaꞌ am. 
\p  
\v 22 Guiꞌ nam jɨꞌk puiꞌ kaiꞌchdhaꞌ na gu Jesuus cham tuꞌr diꞌ guch Xoiꞌkam nat Dios bha joot jix dhaam dɨr na baꞌ yaꞌch aꞌmkam mukiaꞌ, dhiꞌr diꞌ kaꞌ am guiꞌ nam jix bhaamkiꞌñdhaꞌ guch Xoiꞌkam. Baꞌ puiꞌ bam kaiꞌchdhaꞌ nam tuꞌ sɨlhkam jir jix iatkum kaꞌ, nam guꞌ naiꞌ jiimɨt tu iatgidhidhaꞌ nam jix bhaamut aꞌgidhaꞌ guch Xoiꞌkam, jaꞌp jum aaꞌndaꞌ am na guꞌ ja aꞌm tɨ nɨidhidhaꞌ gu Dios nam chi sap pɨk baꞌ panaas tɨi tɨ jɨɨgiꞌñ guiꞌ buiñor. Jax gi dhui ɨp nam guꞌ maap jup tuiꞌdhiꞌ gu Dios gio gu Maraaꞌn jich Xoiꞌkam. Baꞌ gu jaroiꞌ noꞌ tuꞌ pɨx ɨlhdhat jaꞌp xi dhuukat gu Jesuus jich Xoiꞌkam, cham tuꞌ bhaan tɨ nɨidhidhaꞌ gu Dios, na guꞌ puiꞌ ji buusandaꞌ na bɨɨx jix bhaamkiꞌñdhaꞌ noꞌ tuꞌ pɨx ɨlhiiꞌñ gu Maraaꞌn jich Xoiꞌkam.  
\v 23 Na guꞌ kaiꞌñkam nañ jax ba kaiꞌch, na gu jaroiꞌ noꞌ tuꞌ pɨx ɨlhdhat jaꞌp xi dhuukat gu Jesuus jich Xoiꞌkam, cham tuꞌ bhaan tɨ nɨidhidhaꞌ gu Dios, sia ku guꞌ kaiꞌñkam tɨi tɨ jɨɨgiꞌñ dai gu Dios buiñor. Jɨɨꞌ ji gu jaroiꞌ noꞌ tɨ jɨɨgiꞌñ bɨɨx juraaꞌn kɨꞌn buiñor gu Maraaꞌn jich Xoiꞌkam na baꞌ bhaan tɨ nɨidhidhaꞌ gu Dios jich Gɨꞌkoraꞌ, nam guꞌ kaiꞌñkam maap jum kɇkɇɇ gu Dios gio guch Xoiꞌkam. 
\p  
\v 24 Baꞌ aañ jam guguuxiꞌñ na pim cham tuꞌ mɨk buppadaꞌ dhix bhaiꞌm kaiꞌchdham ñiꞌook na pimɨt janoꞌ dɨr pu maat na pimɨt paiꞌ dhuuk tɨ jɨɨꞌñ buiñor guch Xoiꞌkam. Jam jujur am japim xi baapsai na pim baꞌ gammɨjɨ tɨꞌñchokat miꞌ puiꞌ tu daaꞌñchuꞌndaꞌ na pim jax ba jiim, na baꞌ bhaan jix maatɨꞌ kaꞌ na jam aꞌm tɨ nɨidhidhaꞌ gu Dios jich Gɨꞌkoraꞌ gio gu Maraaꞌn jich Xoiꞌkam.  
\v 25 Na baꞌ noꞌch puꞌñi miꞌ puiꞌ xi dhuiñchuꞌ na jɨꞌk jax jix aaꞌ guch Xoiꞌkam, dai na bach baidhikaꞌ bhammɨ jaꞌk jix dhaam nat paiꞌ tuch iimchuda na saak jich aichdhaꞌ. Dɨɨlh puiꞌ xich chɨɨdak guꞌ guch Xoiꞌkam janoꞌ na yaꞌ xi oilhimɨk. 
\p  
\v 26 Puiꞌ kuñ baꞌ tɨiñ dhakooꞌñdhatuꞌ nañ mu tu jam uaꞌñxiꞌñ jiñ jaaduñ nañ bhaan pɨx jam aagiꞌñ nam jax jir tuutuꞌm guiꞌ nam puꞌñi naiꞌ jiimɨt jix bhaamut aꞌgidhaꞌ guch Xoiꞌkam, gam nam maakam tu iatgidhidhaꞌ, na pim baꞌ moo cham ja kɇkɇɇdaꞌ aapiꞌm jiñ jaaduñ noꞌm pu chuꞌm mi jaꞌp paiꞌ ba guꞌnguk, jir maaꞌn na pim jax tɨ nɨidhidhaꞌ na pim paiꞌ jax ba jiim.  
\v 27 Na guꞌ aapiꞌm jam aꞌm ba tajaañix gux Dhuuduꞌ kam jix Uañ Iiꞌmdaꞌ, dai dhiꞌ ji na pim pɨx kaichgɨdaꞌ na jax jaꞌk jam jurtudidhaꞌ. Cham kam aaꞌ na jaroiꞌ paiꞌ dhɨr jimdat jam aagiꞌñdhaꞌ na pim jax jaꞌk tuiꞌñgɨdaꞌ. Gux Dhuuduꞌ kam jix Uañ Iiꞌmdaꞌ na jam aꞌm ba tajaañix bɨɨx jɨꞌmaꞌn, jir diꞌ na puiꞌ jaꞌk jam jurtudidhaꞌ na pim jax jaꞌk tuiꞌñgɨdaꞌ, gam na jam mattudidhaꞌ na jax pɨk jaꞌk jix aaꞌ gu Dios. Guꞌ baꞌ noꞌ pim miꞌ puiꞌ xi bhɨichuꞌ, dhiꞌ bhaan jix maatɨꞌ kaꞌ na pim sɨlhkam bɨɨx jam jujur kɨꞌn tɨ jɨɨꞌñdhat tuꞌ kaꞌm nɨiꞌñ guch Xoiꞌkam. 
\p  
\v 28 Baꞌ aañ jam guguuxiꞌñ jiñ jaaduñ na pim muiꞌ xix biiñak kaꞌ buiñor guch Xoiꞌkam cham tuꞌp jum buixdhat sia ku mi jaꞌp jax tum aꞌga. Na guꞌ noꞌ chich jax dhuuk cham miꞌ puiꞌ jii na jax jix aaꞌ, jix xiꞌɨꞌrai naiꞌ gampaiꞌ jich dhuñiaꞌ ich janoꞌ na paiꞌ dhuuk gio bhaiꞌp jimdaꞌ. Guꞌ dai ji nach jix bhaiꞌch chaatɨt baasɨꞌn ba namkiaꞌ noꞌ chich miꞌ puiꞌ jii,  
\v 29 nach guꞌ tuꞌ sɨlhkam bar maamraꞌn kaꞌ. Na guꞌ na pim jax bax maat jiñ jaaduñ nap kaiꞌch bo gu Dios na gu jaroiꞌ noꞌt tuꞌ kaꞌm tɨɨgɨk miꞌ puiꞌ jii na jax jix aaꞌ, dhiꞌ baꞌ puiꞌ bam kaiꞌchdhaꞌ na sɨlhkam jir maraaꞌn kaꞌ, jaꞌp na jax guch Xoiꞌkam janoꞌ na yaꞌ xi oilhimɨk nat guꞌ tuꞌ kaꞌm tɨɨgɨk gu Dios. 
\c 3  
\s1 Gu Juan nap kaiꞌchdhaꞌ nach aach bar maamraꞌn gu Dios nach jɨꞌk ba tɨ jɨɨgiꞌñ buiñor guch Xoiꞌkam 
\p  
\v 1 Dho jaiñ na jax pɨk jir jix bhaiꞌkam gu Dios, bɨɨx puiꞌch biaꞌ nach sap bar maamraꞌn, na guꞌ joidham xich joiꞌgɨꞌn. Maaxik dho sɨlhkam bar maamraꞌn ich, nach guꞌ ba tɨ jɨɨgiꞌñ buiñor gu Maraaꞌn jich Xoiꞌkam. Guꞌ baꞌ guiꞌ nam jɨꞌk cham tɨ jɨɨgiꞌñ buiñor, pu cham maat am nach jir tuꞌp tuꞌm daꞌ, nach jax kaiꞌñkam baꞌ puiꞌ bach chɨɨtɨꞌ nach bar maamraꞌn gu Dios, nam guꞌ cham tɨ jɨɨꞌñdhat buiñor xim gaꞌnga bɨɨx ja jujur kɨꞌn nam iam ba machiaꞌ gɨt na jax jir tuꞌm kam gu Dios nach jaroiꞌ buiñor bap tuꞌiiꞌ.  
\v 2 Aach dho gi nach guꞌ bax maat nach tuꞌ sɨlhkam bar maamraꞌn gu Dios nañ jax ba jam tɨtdañ jaaduñ, sia kuch guꞌ chakui pɨk moo maat gu xib nach jax moo tuꞌm jup jich dhuñiaꞌ janoꞌ nach paiꞌ dhuuk buiñor bap tuiꞌkaꞌ guch Xoiꞌkam noꞌt bach baidhak yaꞌ dɨr dhi oiꞌñgaꞌn. Daipuꞌ nach jix maat nach saak puiꞌ tuutuꞌm jup jich dhuñiaꞌ na jax jir tuꞌm guiꞌ, nach guꞌ maap bap tuiꞌkaꞌ.  
\v 3 Guꞌ baꞌ gu jaroiꞌ noꞌx aaꞌ na bhammɨ aayaꞌ na paiꞌp tuiꞌkaꞌ guch Xoiꞌkam, jum aaꞌ nax bhaiꞌ xi chu jimdaꞌ, na cham tuꞌx buam ka tu buadaꞌ na tuꞌr uaꞌtulhdharaꞌ. Na guꞌ cham jɨꞌxdhaꞌ jaroiꞌ bhammɨ aayaꞌ noꞌx uaꞌtulhdhix, na guꞌ guiꞌx uañ kɨꞌn kɨɨk na paiꞌp tuꞌiiꞌ. 
\p  
\v 4 Na guꞌ gu jaroiꞌ noꞌ bɨɨx aixim tu bua na jax cham jir am, jum uaꞌtulhiꞌñdhaꞌ buiñor gu Dios, na guꞌ guiꞌ cham kɨɨꞌ kaꞌm nɨiꞌñ gu puiꞌ jaꞌk.  
\v 5 Pu kaiꞌñkam dho bha jii guch Xoiꞌkam yaꞌ dhi oiꞌñgaꞌn na baꞌ tɨ bhɨikaꞌ gu uaꞌtulhdharaꞌ yaꞌ dɨr dhi oiꞌñgaꞌn. Nat guꞌ guiꞌ cham paiꞌ dhuuk jum uaꞌtulhdhak, puiꞌ kut baꞌch aꞌmkam jum makgɨrtak tɨ bhɨɨk.  
\v 6 Baꞌ noꞌch tuꞌ sɨlhkam puiꞌ jaꞌk ba tɨ jɨɨgiꞌñ bɨɨx jich jur kɨꞌn buiñor guch Xoiꞌkam, jum aaꞌ nach cham tuꞌ bhaan kach uaꞌtulhiꞌñdhaꞌ. Guꞌ noꞌñ guꞌ puiñ uaꞌtulhiꞌñ puiꞌ xi kaiꞌchɨt nañ ba tɨ jɨɨgiꞌñ buiñor, cham tuꞌ tɨ jɨɨgiꞌñdhaꞌ iñ, pɨx jap kaiꞌchdhaꞌ iñ.  
\v 7 Jaꞌpniñ baꞌ moop jam guguuxiꞌñ jiñ jaaduñ jich Xoiꞌkam bhaan na pim siamri xi chɨ nɨidhat na cham jaroiꞌ paiꞌ dhɨr jimdat maakam jup ba jam iatgidhaꞌ na jax cham jir puiꞌ na jax jix aaꞌ gu Dios. Aapiꞌm cham tuꞌ ji kɇkɇɇdat jir maaꞌn na pim jax miꞌ puiꞌ xi jiimdaꞌ na jax jix aaꞌ gu Dios na baꞌ bhaan jix maatɨꞌ kaꞌ na pim dai guiꞌ tuꞌ kaꞌm nɨiꞌñ.  
\v 8 Guꞌ noꞌ pim guꞌ dai bɨɨx aixim tu bua na tuꞌr uaꞌtulhdharaꞌ, dhiꞌ bhaan jup bax maatɨꞌ kaꞌ na pim dai mu jaꞌk kaichgɨt gu jaꞌook miꞌ puiꞌ tu kuugalhdhim na jɨꞌk jax jam tɨɨdaim. Na guꞌ gu jaꞌook gammɨjɨ dhiꞌ bhaan tu juan, bɨjɨk dɨr pum uaꞌtulhiꞌñ nat dɨr jup duu gu Dios. Pu kaiꞌñkam baꞌ pɨx bha joot gu Dios gu Maraaꞌn jich Xoiꞌkam na baꞌ yaꞌch palhbuidhaꞌ na puꞌñi tuch uañdhaꞌ guch uaꞌtulhdharaꞌ, na baꞌ miꞌ dhɨr cham jɨꞌxdhaꞌ jax kach dhoodaꞌ gu jaꞌook na jax tɨi ka ɨlhdhat. 
\p  
\v 9 Na guꞌ gu jaroiꞌ noꞌ sɨlhkam bar maraaꞌn gu Dios, cham tuꞌ kam uaꞌtulhiꞌñdhaꞌ. Jix bhaiꞌ pɨx ba tu jimdaꞌ, na guꞌ bhaan jup tuiꞌñgɨdaꞌ gu Dios.  
\v 10 Pux bhaiꞌx maatɨꞌ kaꞌ jia nam jax jaꞌk tu jimdaꞌ guiꞌ nam sɨlhkam jir maamraꞌn kaꞌ gu Dios gio guiꞌ nam jup jir maamraꞌn gu jaꞌook. Puiꞌ na jax guiꞌ nam bɨɨx aixim tu buadaꞌ na jax cham jir am, na jax cham kɨɨꞌ kaꞌm nɨiꞌñ gu Dios, gio nam jix ja bhaamkiꞌñdhaꞌ gu jaiꞌch Xoiꞌkam jɨɨgiꞌñdham, dhiꞌ cham tuꞌ Dios jir maamraꞌn kaꞌ am, guiꞌ ji jaꞌook. 
\s1 Gu Juan nap kaiꞌchdhaꞌ nach xich jajoiꞌgɨꞌndaꞌ bɨɨx jɨꞌmaꞌn 
\p  
\v 11 Jaꞌpni jaꞌk jup xi chɨꞌɨɨk guch Xoiꞌkam janoꞌ na yaꞌ xi oilhimɨk, sap nach xich jajoiꞌgɨꞌndaꞌ bɨɨx jɨꞌmaꞌn na pim jax ba tɇ kɇɇñ jaaduñ janoꞌ dɨr na pimɨt jax tɨ jɨɨꞌñ buiñor.  
\v 12 Cham tuꞌch miꞌ puiꞌp ka tu daaꞌñchuꞌn nat jax tu jii bɨjɨk gu Kayiin nat cham tuꞌ kɨɨꞌ maaꞌnkam buus. Tɨɨꞌ nat bhaamkidhak mua gu sɨpdhiꞌñ Abeel nat jax jaꞌk jurtuda gu jaꞌook na bhaan jup tuiꞌñgɨt. ¿Jax japim ɨlhiiꞌñ nat kaiꞌñkam jup doodaꞌ? Dho nax jɨɨgam dho, na guꞌx maat na gu sɨpdhiꞌñ tuꞌ kaꞌm nɨidhat miꞌ puiꞌ jimdaꞌ na jax jix aaꞌ gu Dios, baꞌ joidham jix kɨɨgalhiꞌñdhaꞌ. Dɨɨlh guꞌ gu Kayiin pu cham tuꞌ miꞌ puiꞌ jimdaꞌ na jax jaꞌk jix kɨɨꞌ kaꞌm nɨiꞌñ gu Dios, baꞌ pu cham kɨɨgalhiꞌñdhaꞌ, na guꞌ buam pɨx tu buadaꞌ. 
\p  
\v 13 Jam guguuxiꞌñ iñ ɨp jiñ jaaduñ na pim cham tuꞌ bhaan jax jum aaꞌndaꞌ sia kum xi jam bhaamkiꞌñ gu jaꞌtkam na pim bar jich Xoiꞌkam jɨɨgiꞌñdham.  
\v 14 Na guꞌ aach nach jɨꞌk ba tɨ jɨɨgiꞌñ buiñor guch Xoiꞌkam, cham tuꞌ mu jaꞌk ka bhɨichuꞌ ich nach paiꞌ gammɨjɨ miꞌ pup jich chulhiiñdhaꞌ gɨt. Xib guꞌ dai ji nach sɨlh ba bhɨichuꞌ nach paiꞌ gammɨjɨx jɨjɨkgɨm bap tuiꞌkaꞌ, jaꞌp ji buus nach koꞌiix kat gio duduadɨk jup ba baapam. Puiꞌ kuch baꞌ xib joidham bax ja joiꞌgɨꞌn guch Xoiꞌkam jɨɨgiꞌñdham, na guꞌ puꞌñi jaꞌk jia noꞌch sɨlhkam ba dua guch iiꞌmdaꞌ bhaan, guꞌ noꞌch pui ka koꞌiix guch iꞌiiꞌmdaꞌ bhaan, dai ji nach jix chu bhaamkiꞌñdhaꞌ.  
\v 15 Baꞌ gu jaroiꞌ noꞌx bhaamkiꞌñ gu jumai na puiꞌp tɨ jɨɨgiꞌñ buiñor guch Xoiꞌkam, jaꞌp ji buusniaꞌ na ba muꞌaaꞌ, na guꞌ gu jaroiꞌ na puꞌñix chu bhaamkiꞌñdhaꞌ, jaꞌp ji buusandaꞌ nar tu muaꞌkam kaꞌ, baꞌ cham jɨꞌxdhaꞌ ja baidhikaꞌ guch Xoiꞌkam jix dhaam nam paiꞌ gammɨjɨx jɨkgɨm bap tuiꞌkaꞌ.  
\v 16 Aach dho gi guꞌ nach jɨꞌk bɨɨx jich jujur kɨꞌn ba tɨ jɨɨgiꞌñ buiñor guch Xoiꞌkam jix bhaiꞌ bax maat ji nach jax jaꞌk tu buadaꞌ noꞌch sɨlhkam jix chu joiꞌgɨꞌn, nach guꞌ miꞌ puiꞌ tu daaꞌñchuꞌ nat jax tu duu guch Xoiꞌkam janoꞌ nat joidham xich joiꞌndak jich aꞌmkam muu nach baꞌ puꞌñi duuji cham kach chulhiiñaꞌ. Aach baꞌ puꞌñi ɨp jiñ jaaduñ, puiꞌch jup xix chu joiꞌgɨꞌndaꞌ nat jax xich joiꞌgɨlh guch Xoiꞌkam, cham jax bua sia mɨt chi mach koi ja aꞌmkam gu jaiꞌ, nach guꞌx ja joiꞌgɨꞌndaꞌ.  
\v 17 Dhiꞌ jɨꞌ puꞌñi jaꞌk noꞌch xi dhuiñchuꞌ na baꞌ puiꞌ bam kaiꞌch nach bax maat na jax kaiꞌñkam puiꞌm kaiꞌch nach jix chu joiꞌgɨꞌndaꞌ. Guꞌ ji noꞌ guꞌ puiꞌ na jax gu jaroiꞌ noꞌ tɨir jix chumñigam, baꞌ noꞌ guꞌ tɨi nɨiꞌñ na tuꞌ aꞌmiram jum aaꞌ gu jax chuꞌm jich Xoiꞌkam jɨɨgiꞌñdham, ji noꞌt guꞌ pu cham paiꞌ iam jix joiꞌndak xi maa, dhiꞌ pu cham tuꞌx mat kaꞌ na jax kaiꞌñkam puiꞌm kaiꞌchdhaꞌ nañ jix chu joiꞌgɨꞌn, na guꞌ bak pu cham mat kaꞌ na jax jir tuꞌm kam gu Dios.  
\v 18 Baꞌ aapiꞌm cham pu chuꞌt jiñ jaaduñ jich Xoiꞌkam bhaan, jaꞌpji nach xi ja palhbuidhat guch jaaduñ kɨꞌn gu tuꞌ na ja aꞌm jum aagaidhaꞌ na baꞌ bhaan jix maatɨꞌ kaꞌ nach sɨlhkam bax chu joiꞌgɨꞌn, cham tuꞌ nach puiꞌ pɨx kaiꞌchdhaꞌ. 
\s1 Nach jax jaꞌk tuiꞌñgɨdaꞌ na baꞌch aꞌm tɨ nɨidhidhaꞌ gu Dios 
\p  
\v 19 Dhiꞌ pɨx noꞌch puꞌñi jaꞌk xi dhuiñchuꞌ bhaan bax maatɨꞌ kaꞌ nach tuꞌ sɨlhkam bax maat na jax jaꞌk jum aaꞌ nach tuiꞌñgɨdaꞌ noꞌch puiꞌ ba tɨ jɨɨgiꞌñ buiñor guch Xoiꞌkam, baꞌ puiꞌ ba ɨlhiiꞌñdhaꞌ ich nach aꞌm tɨ nɨidhidhaꞌ gu Dios.  
\v 20 Nach guꞌ cham jɨꞌxkat tuꞌ ɨxchuidhaꞌ gu Dios, sia kuch guꞌ jax jich aaꞌ na chi cham maat noꞌch miꞌ paiꞌ maaꞌn kap cham miꞌ puiꞌ jiim na jax jix aaꞌ. Jax gi dhui na guꞌ guiꞌ bɨɨx jix chu maat sia nar tuꞌ, pux bhaiꞌx mat kaꞌ noꞌch jich uaꞌtulhiꞌñ. Tɨi pɨk aa nach guꞌ aach sia dɨɨlh jix mat kaꞌ noꞌch miꞌ paiꞌ cham pu duiñchuꞌ na jax jix aaꞌ, guꞌ gi baꞌ guiꞌ nar gɇꞌkam.  
\v 21 Baꞌ aapiꞌm jiñ jaaduñ jich Xoiꞌkam bhaan, xim gaꞌngadaꞌ pim jam jujur am bhaan noꞌ pim moo miꞌ puiꞌp duiñchuꞌ na jax pɨk jaꞌk moox aaꞌ gu Dios, piam ku guꞌ cham. Baꞌ noꞌ pim guꞌ moo panaas miꞌ puiꞌ bhɨichuꞌ na jax jix aaꞌ na pim muiꞌ xim gaꞌnga, dho guꞌ dai dho baꞌ na pim joidham pɨx jix bhaiꞌm taat kaꞌ buiñor, na pim guꞌ bhaan bax mat kaꞌ na jam aꞌm tɨ nɨidhim guiꞌ.  
\v 22 Baꞌ guiꞌ xi jam joiꞌndat tu jam maakidhaꞌ bɨɨx na pim jɨꞌk tuꞌ mu taandaꞌ bhammɨ jaꞌk na paiꞌp tuꞌiiꞌ, na guꞌx mat kaꞌ na pim tuꞌ kaꞌm nɨidhat miꞌ puiꞌ bhɨichgɨdaꞌ na jax chu daaxix gux bhaiꞌm kaiꞌchdham ñioꞌkiꞌñ gam na jax pɨk jaꞌk jix aaꞌ.  
\v 23 Gux bhaiꞌm kaiꞌchdham ñioꞌkiꞌñ na tu daaxix, jir diꞌ pɨx guiꞌ na bhaan tu aꞌga gu Maraaꞌn jich Xoiꞌkam na puiꞌm kaiꞌch nach sap tɨ jɨɨꞌñdhaꞌ buiñor na baꞌ puꞌñi duuji uañchudhix kaꞌ guch uaꞌtulhdharaꞌ. Miꞌ dhɨr sap baꞌ dai nach ba xich jajoiꞌgɨꞌndaꞌ bɨɨx jɨꞌmaꞌn jaꞌp na jax guch Xoiꞌkam nat xich joiꞌgɨlh, dɨɨlh sia puiꞌp xich chɨɨdak na yaꞌ xi oilhimɨk.  
\v 24 Dhiꞌ jɨꞌ baꞌ noꞌch bɨɨx miꞌ puiꞌ xi dhuiñchuꞌ puiꞌ bam kaiꞌchdhaꞌ nach miꞌ puiꞌ tu kuugalhdhim na jɨꞌk jax chu daaxix gu ñioꞌkiꞌñ gu Dios. Baꞌ guiꞌch aꞌm ba tɨ nɨidhidhaꞌ, gio aach yaꞌ dɨr mu jaꞌk buiñor jup tuiꞌñgɨdaꞌ ɨp, nach guꞌ maap bach kɇkɇɇkɇꞌ. Baꞌ pux bhaiꞌx mat kaꞌ ich noꞌch aꞌm tɨ nɨidhim gu Dios, na guꞌch mattuꞌnkaꞌ gux Dhuuduꞌ kam jix Uañ Iiꞌmdagaꞌn nat jich aꞌm tajaa. 
\c 4  
\s1 Nach jax jaꞌk duujix mat kaꞌ nam jax chuꞌm sɨlhkam Dios bhaankamuꞌn tu aꞌgadaꞌ 
\p  
\v 1 Jiñ jaaduñ jich Xoiꞌkam bhaan, moo pim siamri xi chɨ nɨidhat na cham jaroiꞌ paiꞌ dhɨr jimdat maakam jam iatgidhaꞌ puiꞌ xi kaiꞌchidhat na Dios bhaankamuꞌn tu aꞌgadaꞌ. Bɨɨpɨꞌ pim xi mamtɨdaꞌ noꞌ moo sɨlhkam Dios jir tujuandam tugiꞌñ piam ku guꞌ cham, nam guꞌ xib muiꞌ naiꞌ oipichuꞌ guiꞌ nam maakam tu iatgiꞌñ puiꞌ xi kaiꞌchidhat nam sap pɨk baꞌ Dios bhaankamuꞌn tu aꞌgim. Baꞌ aapiꞌm cham tuꞌ maaꞌn jimdam ja kɇɇji mu jaꞌk jup ji ja kaayaꞌ, ka xi mamtɨdaꞌ pim.  
\v 2 Jix maatɨꞌ kaꞌ am jia guiꞌ nam sɨlhkam Dios jir tujuandam tugiꞌñ gio guiꞌ na cham. Guiꞌ nam sɨlhkam Dios bhaankamuꞌn tu aꞌga, puiꞌ jaꞌk kaiꞌchidhaꞌ am nat guch Xoiꞌkam maaꞌnkam jup jum duuk yaꞌ ai dhi oiꞌñgaꞌn bhaan.  
\v 3 Baꞌ noꞌ guꞌ cham tuꞌ puiꞌ jaꞌk kaiꞌchim, dhiꞌ cham tuꞌr diꞌ kaꞌ guiꞌ na sɨlhkam Dios bhaankamuꞌn tu aꞌga, guiꞌ ji jaꞌook na bhaankamuꞌn tu aꞌgidhaꞌ, guiꞌ pɨx na puiꞌ jaꞌk kaiꞌchidhaꞌ, na guꞌx bhaamkiꞌñ guch Xoiꞌkam. Nam guꞌ saak pu chuꞌm jaiꞌchdhɨlhiaꞌ gu jaꞌtkam nam puꞌñix bhaamut aꞌgidhaꞌ guch Xoiꞌkam na pim jax ba tɇ kɇɇ. Dho guꞌ dhiꞌ pu xib ji nam pu chuꞌm ba oipichuꞌ, cham tuꞌ na paiꞌ dhuuk. 
\p  
\v 4 Ku guꞌ aapiꞌm jiñ jaaduñ, cham jɨꞌxdhaꞌ jam iatgidhaꞌm ji dhiꞌ pu chuꞌm gu jaꞌtkam sia kum tɨi ɨlhiiꞌñdhaꞌ gɨt, na guꞌ aapiꞌm jam aꞌm tɨ nɨidhidhat jam nuukdaim gu Dios, na pim guꞌ bɨɨx jam jujur kɨꞌn ba tɨ jɨɨgiꞌñ buiñor. Gio na guꞌx ioꞌm jir gɇꞌkam guiꞌ na jam buip tuiꞌdhiꞌ aapiꞌm, cham tuꞌ puiꞌ na jax guiꞌ na ja buip tuiꞌdhiꞌ guiꞌ nam puꞌñix bhaamut aꞌgidhaꞌ guch Xoiꞌkam.  
\v 5 Na guꞌ dai gu tuꞌ nar yaꞌ kam dhi oiꞌñgaꞌn nam bhaan tu aꞌgidhaꞌ na jax jaꞌk ja jurtuꞌnkaꞌ gux buam jum duukam, cham tuꞌ gu ñioꞌkiꞌñ gu Dios. Baꞌ joidham ja kɇɇkɇꞌ am guiꞌ nam cham tuꞌ kaꞌm nɨiꞌñdhaꞌ gu Dios, na guꞌ bɨɨx ja koꞌraardaꞌ nam jax jaꞌk tu ja aꞌgiꞌñdhaꞌ, na guꞌr yaꞌ kam kaꞌ pɨx dhi oiꞌñgaꞌn bhaan.  
\v 6 Ku guꞌ aach nach jɨꞌk ba tɨ jɨɨgiꞌñ buiñor guch Xoiꞌkam, cham tuꞌ kach bɨpnat ji siam jax tɨich iatgiꞌñ gu dhiꞌ pu chuꞌm gu jaꞌtkam, nach guꞌ aach jix bhaiꞌ bax maat na jax pɨk jaꞌk jir sɨlhkam, dai ji guiꞌ nam cham tuꞌ kaꞌm nɨiꞌñ gu Dios nam baꞌ joidham ja kɇɇkɇꞌ. Aach baꞌ noꞌch tɨip xi chu ja aꞌgiꞌñ guiꞌ nar sɨlhkam ñioꞌkiꞌñ gu Dios, pu cham kaim kaꞌ am, na guꞌ cham ja koꞌraardaꞌ, dai baꞌ guiꞌ nam tuꞌ kaꞌm nɨiꞌñ gu Dios nam baꞌ joidham jup jix kaik kaꞌ. Puꞌñi jaꞌk japim baꞌ duujix mat kaꞌ jiñ jaaduñ nam jax chuꞌm sɨlhkam Dios bhaankamuꞌn tu aꞌgidhaꞌ gio baꞌ na jax chuꞌm cham. 
\s1 Gu Juan nap kaiꞌchdhaꞌ na gu Dios jir jix chu joiꞌgɨꞌn 
\p  
\v 7 Jam guguuxiꞌñ iñ ɨp jiñ jaaduñ na pim siamri xim jajoiꞌgɨꞌndaꞌ bɨɨx jɨꞌmaꞌn na baꞌ bhaan jix maatɨꞌ kaꞌ na Dios jam aꞌm tɨ nɨidhim, na guꞌ guiꞌ joidham jix chu joiꞌgɨꞌn. Baꞌ gu jaroiꞌ noꞌ puꞌñi joidham jix ja joiꞌgɨꞌn gu jaiꞌ, dhiꞌ bhaan jix maatɨꞌ kaꞌ na bax maat na jax jir tuꞌm kam gu Dios, baꞌ puiꞌ bam kaiꞌchdhaꞌ na Dios bar Maraaꞌn.  
\v 8 Guꞌ noꞌ ampɨx jix ja bhaamkiꞌñ gu jaiꞌ, dho gi guꞌ bhaan jup bax maatɨꞌ kaꞌ ji na pu chakui maat na jax jir tuꞌm kam gu Dios, na guꞌ bak pu cham tɨ jɨɨgiꞌñdhaꞌ buiñor. Na guꞌ noꞌ tɨ jɨɨgiꞌñdhaꞌ gɨt, puiꞌp jix chu joiꞌgɨꞌndaꞌ gɨt jia na jax gu Dios na joidham jix chu joiꞌgɨꞌn.  
\v 9 Na guꞌx bhaiꞌx maatɨꞌ jia na joidham jix chu joiꞌgɨꞌn gu Dios. Tɨɨꞌ nat moo bha joot gu dai maaꞌn Maraaꞌn yaꞌ aach jich bui, nat xich joiꞌgɨlh na sap baꞌ noꞌ chich tɨ jɨɨꞌñ buiñor, jich baidhikaꞌx dhaam nach paiꞌ joidham jix jɨjɨkgɨm bap tuiꞌkaꞌ.  
\v 10 Dɨɨlh pɨx nat xich joiꞌgɨlh gu Dios, sia kuch chakui miꞌ puiꞌ jiimdaꞌ na jax jix aaꞌ, dai pɨx nax mat kaꞌ nach mu jaꞌk bhɨichuꞌn nach paiꞌ gammɨjɨ miꞌ pup jich chulhiiñdhaꞌ. Puiꞌ kut baꞌ bhaiꞌ ma joot gu Maraaꞌn jich Xoiꞌkam na yaꞌch aꞌmkam jum makgɨrtaꞌ na baꞌ puꞌñi duuji tu namkix kaꞌ nach jɨꞌx jix uꞌuaꞌtulhdhix. 
\p  
\v 11 Dho jaiñ na jax pɨk jir jix bhaiꞌkam gu Dios, gɇꞌkam kɨꞌn xich joiꞌgɨlh nach maiꞌ ba suulhgix kat. Aach baꞌ miꞌ puiꞌp xi chu daaꞌñchuꞌndaꞌñ jaaduñ na jax guiꞌ, joidham jach xich jajoiꞌgɨꞌndaꞌ bɨɨx jɨꞌmaꞌn.  
\v 12 Na baꞌ noꞌch puꞌñi xich jajoiꞌgɨꞌn bɨɨx jɨꞌmaꞌn, gammɨjɨch aꞌm ba kiokaꞌ guch Gɨꞌkoraꞌ, gam nax ioꞌm ba xich joiꞌgɨꞌndaꞌ. Sia kuch guꞌ cham nɨiꞌñ gu maaxik bhaan na jax chuꞌm, ku guꞌ yaꞌp tuiꞌkaꞌ ji jich bui noꞌch puꞌñi jaꞌk xi dhuiñchuꞌ.  
\v 13 Jix bhaiꞌx maatɨꞌ nach aꞌm tɨ nɨidhim gu Dios, gio aach yaꞌ dɨr mu jaꞌk nach buiñor jup tuiꞌdhiꞌ, na guꞌ puiꞌ jaꞌk jich mattuꞌn gux Dhuuduꞌ kam jix Uañ Iiꞌmdaꞌ nat jich aꞌm tajaa bɨɨx jɨꞌmaꞌn.  
\v 14 Bax maat ich ɨp nat guch Gɨꞌkoraꞌ bha joot gu dai maaꞌn Maraaꞌn yaꞌ dhi oiꞌñgaꞌn na baꞌ yaꞌch palhbuidhaꞌ bɨɨx nach jɨꞌk jaꞌtkam nach baꞌ cham kach chulhiiñaꞌ gatuuk. Dhiꞌ bɨɨx puꞌñi jaꞌk jich mattuꞌn gux Dhuuduꞌ kam jix Uañ Iiꞌmdaꞌ.  
\v 15 Gu jaroiꞌ noꞌ tɨ jɨɨgiꞌñ nat gu Dios bha joot gu Maraaꞌn jich Xoiꞌkam, dhiꞌ bhaan tɨ nɨidhidhaꞌ, na guꞌ bɨɨx juraaꞌn kɨꞌn ba tɨ jɨɨgiꞌñdhaꞌ nar sɨlhkam, gio guiꞌ yaꞌ dɨr mu jaꞌk buiñor jup tuiꞌñgɨdaꞌ ɨp. 
\p  
\v 16 Baꞌ aach nach jɨꞌk ba tɨ jɨɨgiꞌñ bɨɨx jich jujur kɨꞌn buiñor guch Xoiꞌkam, jix bhaiꞌ bax maat ich na gu Dios joidham xich joiꞌgɨꞌn, na guꞌr diꞌ pɨx gux chu joiꞌgɨꞌn. Baꞌ gu jaroiꞌ noꞌ puiꞌp jix chu joiꞌgɨꞌn na guiꞌ, dhiꞌ bhaan bax maatɨꞌ kaꞌ na sɨlhkam bax maat gu Dios, baꞌ puiꞌ bam kaiꞌchdhaꞌ na bhaan ba tɨ nɨidhim.  
\v 17 Baꞌ noꞌch aach puiꞌp jix chu joiꞌgɨꞌn na gu Dios, cham paiꞌ totdon kaꞌ ich janoꞌ na paiꞌ dhuuk jum aayaꞌ na ja aagiꞌñdhaꞌ guch Xoiꞌkam bɨɨx gu jaꞌtkam nam tuꞌ jax buimɨi nam duduakat ja tutkuꞌ bhaan, nach guꞌ puiꞌ xich aaꞌndaꞌ nach puiꞌ jaꞌk jup tu jimdat nat jax tu jii dɨɨlh janoꞌ na yaꞌ xi oilhimɨk.  
\v 18 Na guꞌ noꞌñ moo joidham xix chu joiꞌgɨꞌn na jax gu Dios, cham tuꞌ bhaan toodon kaꞌ iñ, dai nañ joidham jix bhaiꞌ pɨx jiñ chaat kaꞌ, pu paiꞌ na jaꞌk jax jum duñiaꞌ gu tooꞌnniꞌ. Guꞌ dai ji noꞌñ cham puiꞌp jix chu joiꞌgɨꞌn na gu Dios nañ baꞌ tɨix choodon kaꞌ, nañ guꞌx mat kaꞌ nañ bañ chulhiiñaꞌ pɨx baꞌ, nañ guꞌ dhiꞌ bhaan cham am buatuꞌndaꞌ. 
\p  
\v 19 Aach tuꞌ kaꞌm nɨidhat miꞌ puiꞌ ba jiim ji baꞌ xib na jax jix aaꞌ gu Dios, nat guꞌ guiꞌ bɨɨpɨꞌ dɨr xich joiꞌgɨlh ampɨk nach baꞌ aach tuꞌ kaꞌm jup ba nɨiꞌñdhaꞌ, cham tuꞌ nat gatuuk xich joiꞌgɨlh nach aach pu tuꞌ kaꞌm ba nɨiꞌñ.  
\v 20 Baꞌ noꞌ guꞌ jaroiꞌ maadɨt jax kaiꞌch: “Aañ dho gi tuꞌ kaꞌm nɨidhat miꞌ puiꞌ jim ji na jax jix aaꞌ gu Dios”, guꞌ ji noꞌ guꞌx bhaamkiꞌñ gu jumai na puiꞌp tɨ jɨɨgiꞌñ buiñor guch Xoiꞌkam, pɨx jap kaiꞌchdhaꞌ, cham tuꞌ sɨlhkam tuꞌ kaꞌm nɨiꞌñdhaꞌ gu Dios. Na guꞌ noꞌ puꞌñi cham tuꞌ kaꞌm nɨidhat jix joiꞌgɨꞌn gu jumaich Xoiꞌkam jɨɨgiꞌñdham na yaꞌ nɨiꞌñ maaxik, ¿jax dhui tuꞌ kaꞌm jup tɨgiaꞌ gu Dios na cham maax?  
\v 21 Guꞌ dhiꞌm aaꞌ ji na puiꞌp xix jajoiꞌgɨꞌndaꞌ gu jaiꞌch Xoiꞌkam jɨɨgiꞌñdham noꞌ baabuiꞌ tuꞌ kaꞌm nɨidhat miꞌ puiꞌ ba jim na jax jix aaꞌ gu Dios, puiꞌ nat jax jaꞌk xi chu daasak guch Xoiꞌkam janoꞌ na yaꞌ xi oilhimɨk nap kaiꞌch bo: “Gu jaroiꞌ noꞌ tuꞌ kaꞌm nɨidhat miꞌ puiꞌ ba jim na jax jix aaꞌ gu Dios, jum aaꞌ na tuꞌ kaꞌm nɨidhat jix joiꞌgɨꞌndaꞌ ɨp gu jumai na puiꞌp tɨ jɨɨgiꞌñ aañ jiñ bui.” 
\c 5  
\s1 Na cham jɨꞌxkat jax jiñ dhoodaꞌ gux buam jum duukam noꞌñ bɨɨx jiñ jur kɨꞌn tɨ jɨɨgiꞌñ buiñor guch Xoiꞌkam 
\p  
\v 1 Gu jaroiꞌ noꞌ bɨɨx juraaꞌn kɨꞌn tɨ jɨɨgiꞌñ na gu Jesuus jir diꞌ guch Xoiꞌkam nat Dios bha joot, dhiꞌ jɨꞌ puiꞌ bam kaiꞌchdhaꞌ na Dios jir Maraaꞌn. Baꞌ noꞌ puiꞌ bam tɨɨtɨꞌ na Dios bar Maraaꞌn, jum aaꞌ nax ja joiꞌndat jix bhaiꞌ ja tɨtdadaꞌ gu jaiꞌ nam puiꞌp jir maamraꞌn gu Dios.  
\v 2 Baꞌ aach noꞌch tuꞌ sɨlhkam tuꞌ kaꞌm nɨidhat miꞌ puiꞌ ba jiim na jax jix aaꞌ guch Gɨꞌkoraꞌ, jich aꞌm jum aaꞌ nach jix ja joiꞌndat tuꞌ kaꞌm ja nɨiꞌñdhaꞌ gu jaiꞌ nam puiꞌp tɨ jɨɨgiꞌñ buiñor guch Xoiꞌkam, nam guꞌr maamraꞌn guch Gɨꞌkoraꞌ.  
\v 3 Nañ miꞌ puiꞌ xi jimdaꞌ na jɨꞌk moo jax jix aaꞌ gu Dios na baꞌ puiꞌ bam kaiꞌch nañ tuꞌ kaꞌm nɨiꞌñ. Cham xijai ɨp nañ miꞌ puiꞌ tu kuugalhdhidhaꞌ nat jax tu dai, ni ku paiꞌx magooñiꞌ.  
\v 4 Gio na guꞌ noꞌñ sɨlhkam bar maraaꞌn gu Dios, cham tuꞌ bhaan ka tɨtɨɨꞌñchokaꞌ iñ jia gu tuꞌ nar yaꞌ kam dhi oiꞌñgaꞌn, ni kuñ tuꞌ bhaan ka xiñ uaꞌtulhdham kaꞌ, nañ guꞌ bɨɨx jiñ jur kɨꞌn ba tɨ jɨɨgiꞌñdhaꞌ buiñor guch Xoiꞌkam, baꞌ cham jɨꞌxdhaꞌ jax jiñ dhoodaꞌ gux buam jum duukam.  
\v 5 Noꞌñ tɨ jɨɨgiꞌñ dho siamri bɨɨx jiñ jur kɨꞌn na gu Jesuus jich Xoiꞌkam Dios jir Maraaꞌn nat bha joot na baꞌ cham jax jiñ dhoodaꞌ gux buam jum duukam, na guꞌ bañ palhbuiꞌñchuꞌndaꞌ gu Dios nañ baꞌ cham ka xiñ uaꞌtulhdham kaꞌ. 
\s1 Nach jax jaꞌk duix mat kaꞌ nat sɨlhkam Dios bha joot guch Xoiꞌkam 
\p  
\v 6 Janoꞌ na yaꞌ xi oilhimɨk guch Xoiꞌkam dhi oiꞌñgaꞌn bhaan, suudaiꞌ kɨꞌn jum bakuanak, gio mɨkkat na mɨt paiꞌ dhuuk mua na mɨt sissapa kuruus taꞌm, gɇꞌ jaax gu ɨꞌraꞌn. Dhiꞌch baꞌ bhaan jix mat kaꞌ na sɨlhkam yaꞌ oilhimɨk. Bɨɨx gux Dhuuduꞌ kam jix Uañ Iiꞌmdaꞌ puiꞌx chu maat nat puꞌñim duu guch Xoiꞌkam, baꞌm aaꞌ nach jɨɨgiꞌñdhaꞌ na paiꞌ dhuuk puꞌñi jaꞌk jich jurtuꞌnkaꞌ.  
\v 7-8 Baꞌ puiꞌ ji buusan nam baik puiꞌx chu maat nat sɨlhkam yaꞌ ɇɇk guch Xoiꞌkam, puiꞌ na jax gux Dhuuduꞌ kam jix Uañ Iiꞌmdaꞌ, gio baꞌ gu suudaiꞌ, gio baꞌ gu ɨꞌraꞌn ɨp. Baꞌ dhiꞌ dhi bɨɨx baik xi chuut am nam puiꞌ kaiꞌch nat sɨlhkam yaꞌ ɇɇk ji guch Xoiꞌkam, baꞌm aaꞌ nach tɨ jɨɨgiꞌñdhaꞌ noꞌm puiꞌ ba tuch aꞌgiꞌñ.  
\v 9 Na guꞌ jaꞌpni jia na jax baꞌ gu jaroiꞌ noꞌ yaꞌni jaꞌp paiꞌ kɨɨkat jax tuñ aꞌgiꞌñ, nañ guꞌ joidham pɨx jix dhappaam jɨɨgiꞌñdhaꞌ noꞌ jax kaiꞌch. Guꞌ dhiꞌ gi baꞌ na Dios jir ñioꞌkiꞌñ, pu moo janoꞌ ji nach joidham kɇɇji ba tɨ jɨɨꞌñdhaꞌ noꞌm puiꞌ ba tuch aꞌgiꞌñ, nam guꞌ puiꞌch chɨtdaidhaꞌ na guch Xoiꞌkam Dios jir Maraaꞌn nat bha joot bhammɨ dɨr jix dhaam. Dhi ñioꞌkiꞌñ gu Dios gɇꞌp jum duukam bhaan tu aꞌga, cham tuꞌ tuꞌ palhɨɨp jup jum duukam.  
\v 10 Baꞌ gu jaroiꞌ noꞌ bɨɨx juraaꞌn kɨꞌn tɨ jɨɨgiꞌñ na guch Xoiꞌkam sɨlhkam Dios jir Maraaꞌn nat bha joot, cham tuꞌ iatdaꞌ ɨlhiiꞌñdhaꞌ noꞌ jaroiꞌ puiꞌ ba tu aꞌgiꞌñ. Guꞌ noꞌ guꞌ cham tɨ jɨɨgiꞌñ na Dios jir Maraaꞌn guch Xoiꞌkam, iatdaꞌ dho pɨx ɨlhiiꞌñdhaꞌ gux bhaiꞌm kaiꞌchdham ñioꞌkiꞌñ gu Dios na bhaan tu aꞌga na guch Xoiꞌkam jir Maraaꞌn nat bha joot bhammɨ dɨr jix dhaam, puiꞌ baꞌ pɨx ba ji buusniaꞌ nax iatbiꞌ gu Dios.  
\v 11 Guꞌ gu Dios puiꞌ tɨi ba tɨi ji na sap jich baidhikaꞌx dhaam nach paiꞌ gammɨjɨx jɨjɨkgɨm bap tuiꞌkaꞌ, ku guꞌ sap noꞌch tɨ jɨɨꞌñdhaꞌ ji buiñor gu Maraaꞌn jich Xoiꞌkam. Noꞌch guꞌ sap cham tɨ jɨɨꞌñdhaꞌ, cham tuꞌ dhoch baidhikaꞌ.  
\v 12 Na guꞌ dai gu jaroiꞌ noꞌ tɨ jɨɨgiꞌñ buiñor gu Maraaꞌn gu Dios na baꞌ jimiaꞌx dhaam na paiꞌp tuꞌiiꞌ. Noꞌ guꞌ puꞌñi cham tɨ jɨɨgiꞌñ buiñor, dho gi guꞌ cham tuꞌ jimiaꞌ ji, yaꞌ pup biꞌyaꞌ na paiꞌr tu tulhiiñaraꞌ. 
\s1 Na ba ja tabuimgidhaꞌ gu Juan guch Xoiꞌkam jɨɨgiꞌñdham 
\p  
\v 13 Baꞌ aapiꞌm jix bhaiꞌ pɨx jum taat kaꞌñ jaaduñ, na pim guꞌ aapiꞌm jimiaꞌx dhaam na pim paiꞌ gammɨjɨx jɨjɨkgɨm bap tuiꞌkaꞌ, na pim guꞌ aapiꞌm bɨɨx jam jujur kɨꞌn ba tɨ jɨɨgiꞌñ buiñor guch Xoiꞌkam nar Maraaꞌn gu Dios. 
\p  
\v 14 Na guꞌ aach nach jɨꞌk ba tɨ jɨɨgiꞌñ buiñor guch Xoiꞌkam, dai gu Dios jach pɨx buiñor bax biiñak, nach guꞌx maat nach kɇɇkɇꞌ nach paiꞌ dhuuk soiꞌch ɨlhdhat mu taandaꞌ gu tuꞌ nach aꞌm jum aaꞌndaꞌ, noꞌx maat na sɨlhkam jich aꞌm jum aaꞌ.  
\v 15 Baꞌ dai nach pɨx tɨ nɨɨrdaꞌ na guiꞌch makiaꞌ maaꞌn jimdam gu tuꞌ nach mu tañiaꞌ nach aꞌm jum aaꞌ, noꞌch dho ji baabuiꞌ tɨ jɨɨgiꞌñ na guiꞌch kɇɇkɇꞌ nach jɨꞌk tuꞌ mu taandaꞌ soiꞌch ɨlhdhat. 
\p  
\v 16 Gioñ baꞌ moo jaꞌpnip xi jam tɨɨdam jiñ jaaduñ, noꞌ pim maadɨt nɨiꞌñ gu jax chuꞌm jich jaduuñ jich Xoiꞌkam bhaan na cham pɨk miꞌ puiꞌ jim na jax jix aaꞌ guch Gɨꞌkoraꞌ, noꞌ guꞌ pui tɨ jɨɨgiꞌñ buiñor guch Xoiꞌkam, tu daañxiꞌñdhaꞌ pim buiñor gu Dios na tu uañdhaꞌ gu uaꞌtulhdhargaꞌn na baꞌ cham ka tulhiiñchudaꞌ gatuuk. Noꞌ guꞌ pu cham ka tɨ jɨɨgiꞌñ buiñor guch Xoiꞌkam, dho gi guꞌ cham jɨꞌxdhaꞌ tu uañdhaꞌ ji gu Dios, sia ku pim aapiꞌm tɨi tu daañxiꞌñ buiñor na tu uañdhaꞌ gu uaꞌtulhdhargaꞌn, na guꞌ pu cham paiꞌ soiꞌm ɨlhiiꞌñdhaꞌ, baꞌ dai na ba tulhiiñchudaꞌ gatuuk.  
\v 17 Na guꞌ yaꞌ dhi oiꞌñgaꞌn bhaan, tuꞌ nach pɨx bhaan bach uaꞌtulhdhaꞌ ji bo, ku baꞌ guꞌ noꞌñ moo tɨ jɨɨꞌñdhat buiñor guch Xoiꞌkam soiꞌñ ɨlhiiꞌñ, tuñ uañdhaꞌ ji gu Dios guñ uaꞌtulhdharaꞌ, baꞌ cham tuꞌ kañ chulhiiñchudaꞌ gatuuk. 
\p  
\v 18 Guꞌ baꞌ gu jaroiꞌ noꞌ Gɨꞌkorgaꞌn ba iim gu Dios, cham ka joojoiꞌñdhaꞌ nam uaꞌtulhiꞌñdhaꞌ, na guꞌ palhbuiꞌñchuꞌndaꞌ guch Xoiꞌkam na baꞌ cham maiꞌchiaꞌ gux buam jum duukam. 
\p  
\v 19 Aach nach jɨꞌk moo ba tɨ jɨɨgiꞌñ buiñor guch Xoiꞌkam, Dios buiñor jup tuiꞌdhiꞌ ich, na guꞌch aꞌm tɨ nɨidhim. Guꞌ baꞌ guiꞌ nam jɨꞌk tuꞌ pɨx ɨlhiiꞌñ guch Xoiꞌkam nam cham tɨ jɨɨgiꞌñ buiñor, dhiꞌ dai bɨɨx ja daam kɨɨk gu jaꞌook. 
\p  
\v 20 Aach nach guꞌ bax maat gu sɨlhkam Dios na jaroiꞌx ioꞌm jir gɇꞌkam, nat guꞌ bach mattuda gu Maraaꞌn jich Xoiꞌkam nat bhammɨ dɨr bha joot jix dhaam na puꞌñi yaꞌch aagiꞌñdhaꞌ na jax jir tuꞌm kam guch Gɨꞌkoraꞌ. Puiꞌ kuch baꞌ aach xib dai guch Xoiꞌkam buiñor tɨ jɨɨꞌñdhat miꞌ puiꞌ bhɨichuꞌ na jax jix aaꞌ, nach guꞌ bax maat nar diꞌ gu sɨlhkam Dios nax ioꞌm jir gɇꞌkam, gio nax bhaaiꞌ nach baidhikaꞌ gatuuk jix dhaam jaꞌk nach paiꞌ gammɨjɨx jɨjɨkgɨm bap tuiꞌkaꞌ.  
\v 21 Dai gu Dios japim baꞌ tuꞌ kaꞌm nɨidhat miꞌ puiꞌ jiimdaꞌ na jax jix aaꞌ jiñ jaaduñ. Chaꞌpim mu jaꞌk ja daandaꞌ gup duñiixim didios. Jaꞌpniñ baꞌ pɨx jam guguuxiꞌñ.