\id TIT - Sembeleke Samberigi PNG Titus 01 22/3/91 Macnaughtan \h TAITASI \toc1 Poloma꞉ Taitasi pa꞉ta꞉ tapaeyeke wapee \toc2 Taitasi \toc3 Taitasi \mt1 Poloma꞉ Taitasi pa꞉ta꞉ tapaeyeke wapee \c 1 \p \v 1 I̱ta꞉ Poloma꞉ Koda꞉na꞉ e pokaasa꞉ hali hata꞉ make Yesu Ketisona꞉ aposolo hali hata꞉ make do wape wapitolome. I̱ta꞉ mo Koda꞉ma꞉ ma̱leke lila꞉ wanda꞉halina꞉ hone tulalemeeki daeyaena꞉ lono ipikana꞉ma꞉ I̱ mea tapaeya꞉me. Kuta make ika꞉ pi miniki haasa꞉ hauna꞉ ota꞉ pita꞉ miniki haena꞉ walonoyeke I̱ tapaeya꞉me. \v 2 Ika꞉ mo koto hone tulalemeeki make mo ota꞉ pi miniki halemeeki make do hau yaapota꞉ mo deto hala꞉ hauna꞉ ti laasa꞉eki pa꞉ta꞉ ti lalememe. Mo yayapiki pi na lo hala꞉ Koda꞉ma꞉ amba꞉ mo ala꞉ta꞉ ala꞉ta꞉ paeyao na wepia wina꞉ leke do deto hala꞉ ekita꞉ niki pa꞉ta꞉ hone witolo hata꞉ pi la꞉ wiekeme. \v 3 Koto hoki naneta꞉ mo yapekeyeke nate opolo epeke pita꞉ma꞉ta꞉ mo koto deto hala꞉ ekita꞉ ipika꞉ pi walaasa꞉ haliwekima꞉ walemeke pima꞉ peneme yaeyekeme. Koto ka꞉la꞉ pita꞉ I̱ma꞉ walawano mo nika꞉ da꞉taasa꞉ Koda꞉ma꞉ peae la꞉leke walaasome. \p \v 4 Koto ekina꞉ do wapeta꞉ mo Taitasi pa꞉ta꞉ wape tapaasome. Mo dika꞉ hone tulaalope ekina꞉ ipikita꞉ ota꞉ ya weki hala꞉me. Mo Apa꞉ hala꞉ Koda꞉ma꞉ make mo nika꞉ da꞉taasa꞉ Ketiso Yesuma꞉ make neke pa꞉ta꞉ a꞉ta꞉ma꞉ homa tamba꞉ mina꞉la꞉eki pita꞉ puki lopao haasa꞉eki yaapo kina꞉e la alome. \s1 Siosi you haliwekina꞉ mana꞉ pi \p \v 5 Nakana꞉ma꞉ niki na puma꞉ ekimanu tikitiki yao epeaota꞉ mo siosi tapake handeteke halo peleme haliweki make mo daoni paeyao pa꞉ta꞉ haena꞉ lolena꞉yeke neke hae laa poma꞉me. Neke mo Kotiti ikali hoki tukikina꞉ mina꞉pa꞉lao poa꞉ ekita꞉ do ekina꞉ pua꞉me. I̱ma꞉ hande dupa pia꞉peke loa꞉ ekita꞉ hone wia꞉peke. \v 6 Mo handeteke halo pa꞉la꞉ halita꞉ moeki a꞉nda꞉ na pa꞉la꞉ hali make wanda꞉ homeke ma꞉la꞉ halima꞉ hapeke yelieke. Kutupa make ipika꞉ wekiwandikita꞉ mo pi miniki hata꞉ ikita꞉ ti teke yoka꞉la꞉ wekiwandikie o ateke inkikina꞉ pi yoka꞉la꞉ wekiwandikie laa ika꞉ biki na wia꞉ka꞉na꞉ta꞉ hapa꞉peke yelimikie. \v 7 Ipikana꞉ma꞉ta꞉ Koda꞉na꞉ hau handeteke hapeke ekina꞉ ipikita꞉ ota꞉eki a꞉nda꞉ na piki hali hapeke yelieke. Ipikita꞉ wanda꞉hali lu pambaake pi lo o mineke a̱i̱ koto kone panka꞉la꞉ o hoke ikali naa keao o wanda꞉hali make ala꞉ta꞉ ala꞉ta꞉ hoeyao tekipuleke lao o I̱ I̱ laa pasa꞉tei pu o dupiki haumanu pu halia꞉ halita꞉ hapeke na yelieke. \v 8 Ipika꞉ da pa꞉ta꞉ta꞉ kimisu wanda꞉hali pambolo opolo pina꞉ ala꞉ hali make epeke hau pita꞉la꞉ ekita꞉ ta꞉na꞉ma꞉ homa hone wotu wita꞉la꞉ hali make ipika꞉ hone pa꞉ta꞉ kone ana꞉e ala꞉ hali make tikitikina꞉ hala꞉ hali make yakopiki hali make ipika꞉ loke handeteke hala꞉ hali make hapeke yelieke. \v 9 Kuta make ipikita꞉ mo hande ti lao hapeke ya꞉la꞉ ota꞉ pi wala꞉la꞉eki da̱o̱la miniki hapeke yelieke. Kutu pilie ekima꞉ta꞉ mandane wanda꞉hali pa꞉ta꞉ ota꞉ tupa꞉ walolo hata꞉ tamba꞉ mea꞉peke yelieke. Kutupa make mo hande ota꞉ tupa꞉ wala꞉la꞉ pimanu pa tupa꞉ alo hata꞉ kiaaseme wanda꞉hali tikitiki yaasa꞉ hali hapeke yelieke. \s1 Makeaasa꞉ haliweki haemekeeki \p \v 10 Haliweki wopuma꞉ ota꞉ pi kiaaso hata꞉ mo ika꞉ pa hameke pi manuma꞉ mandane wanda꞉hali makeao halememe. Kutupiki pi lo haleme mandane haliwekita꞉ mo pa sekemesaisi pu haleme Diu tapake haemeke tapakema꞉ kone lo halememe. \v 11 Kutupiki yala꞉ mea꞉peke haumanu piteleme hauta꞉ pa yanaaso hata꞉ wanda꞉halina꞉ manimanu muluekema꞉ pitelememe. Mo wala꞉peke na yeke pimanu walemeke ekima꞉ta꞉ mandane haliwekina꞉ hone make ika꞉ wekiwanda꞉na꞉ hone make u hoeyaena꞉ lo halememe. Kutu paama꞉na꞉ ika꞉ lo haleme pimanu sa꞉sa꞉ pea꞉peke. \v 12 Ika꞉ Kotiti tapake hali homeke ma꞉nda꞉ma꞉ ipikita꞉ hone wopu wiki some hata꞉ mo ipika꞉ Kotiti tapake pa꞉ta꞉ ota꞉ pimanu dupa leekeme. Kotiti haliweki ikita꞉ hoto paeyao ya pi ombu lo halememe. Kutupa ikita꞉ hoke sayalema꞉ handa꞉ hata꞉ weleke pamba pita꞉ ne tieke naa soka꞉la꞉ pambeke some hombo hao halememe leekeme. \v 13 Koto pita꞉ ota꞉ pi yeke handaata꞉ mo Ketiso wanda꞉halina꞉ hone tulalemeeki taka꞉laena꞉ nakana꞉ma꞉ pima꞉ hando lolena꞉e. \v 14 Koto ekina꞉ta꞉ ikana꞉ma꞉ mo hande Diu wanda꞉halina꞉ pa pimanu make o ota꞉ pi na opiki haliwekina꞉ pi ula꞉ ekimanu make ipua teliaama꞉na꞉ kutu puelena꞉e. \p \v 15 Yako piki hau pu hala꞉ somema꞉ paeyaota꞉ pa yako pikieki homeke hone u hala꞉pate pa mo pi na miki ha̱i̱piki hone u hala꞉ somema꞉ paeyaota꞉ yako pikieki dia꞉me hone u hala꞉me. Pa ekipeke ipika꞉ hone wita꞉la꞉ ekimanu make ipika꞉ puki make ha̱i̱ pitolo pita꞉la꞉me. \v 16 Ika꞉ pima꞉ Koda꞉ta꞉ handoloma꞉me laa lo halemepate pa ika꞉ piteleme hau manuma꞉ta꞉ Koda꞉ na handelemeeki peneme yao hala꞉me. Kota꞉ wanda꞉halima꞉ta꞉ honditi honditi wopu pu make pi na opu epeke haumanu pea꞉pa꞉peketa꞉ iki ana꞉ na pa꞉la꞉me. \c 2 \s1 Keileke wanda꞉halina꞉ mana꞉ pimanu \p \v 1 Koto pa꞉la꞉pate nakana꞉ma꞉ ota꞉ mo mana꞉ pi ula꞉ tupa꞉ tolu walo hapeke. \v 2 Keileke haliweki pa꞉ta꞉ Mo hoke ikali naa keaapeke na ya꞉la꞉me laata꞉ ikana꞉ma꞉ epeke hau pa꞉ta꞉ tikitiki piki hone witolo make mo ika꞉ hone wopu handeteke hata꞉ ika꞉ hone tulalemeeki make pukima꞉ homelemeeki make kutupa mo ika꞉ puki taka꞉laasa꞉ hau pitolo pitolo haleme hau make kota꞉ hau paeyaona꞉ ala꞉ta꞉ na ta̱lena꞉ leke epeke tupa꞉ hapa꞉peke laa wala꞉peke. \p \v 3 Mo keileke wanda꞉weki pa꞉ta꞉ make koto tupa꞉ kone alota꞉ Iki make yako piki wanda꞉weki hapeke ya꞉la꞉ tupa꞉ hapa꞉peke la alota꞉ mo hande keileke wanda꞉weki pa꞉ta꞉ ikana꞉ma꞉ laasa꞉ hau na pu make mo waini ikalima꞉ ika꞉ hone hoeyaama꞉na꞉ wopu na neke hata꞉ make ikana꞉ma꞉ mo panake wanda꞉weki pa꞉ta꞉ epeke hau pita꞉la꞉ ekimanu wala꞉ tiaapa꞉peke la wala꞉peke. \v 4 Kutu pimika꞉na꞉ta꞉ ikana꞉ma꞉ mo panake wanda꞉weki pa꞉ta꞉ ika꞉ haliki wekiwandiki pa꞉ta꞉ pukima꞉ homolo hata꞉ make \v 5 ika꞉ hone handeteke hata꞉ make ika꞉ halemeeki ala꞉ta꞉ na ta̱lena꞉ leke hata꞉ make epeke da handeteke hala꞉ wanda꞉weki hata꞉ ika꞉ haliki tonu oto pa꞉ta꞉ hao hapa꞉peke laa walena꞉ walo hapeke. Koto panake wanda꞉wekima꞉ kutupiki haumanu pimika꞉na꞉ta꞉ kota꞉ mo pa wanda꞉halima꞉ Koda꞉na꞉ pimanu pa꞉ta꞉ hoke pi lapeke waleke na wilieke. \p \v 6 Kota꞉ tupa꞉ kone mo panake haliweki ika꞉ honemanu wopu handeteke haena꞉ma꞉ nakana꞉ma꞉ ika꞉ hone u tiaapeke. \v 7 Naka꞉ kone naka꞉ pilipi hau paeyaota꞉ wanda꞉halima꞉ handaa honda꞉mea pu haena꞉ epeke hau seliapomanu pu hapeke. Naka꞉ pi wala꞉la꞉ hauna꞉ hone wopu wia mo hapeke pitiki pimanu homeke walo hapeke. \v 8 Naka꞉ lolo pele pi manuta꞉ mandane wanda꞉halima꞉ la la pu hoeyaama꞉na꞉ma꞉ ala꞉ta꞉ na ta̱leke pi manuma꞉ walo hapeke. Mo naka꞉ a꞉nda꞉ tunkuliki wanda꞉halima꞉ koto hau handaata꞉ ikana꞉ma꞉ nika꞉ pitoloma꞉ ekina꞉ hokeeki ma꞉nda꞉ na handemeka꞉na꞉ta꞉ pi ma꞉nda꞉ lapeke na ya꞉la꞉me hone witolo yaala꞉ma꞉ homilimikie. \s1 E pokaasa꞉ halina꞉ mana꞉ pi \p \v 9 Mo pa hameke e pokaasa꞉ haliweki pa꞉ta꞉ta꞉ dupiki pi lapeke. Ika꞉ e pokemeeki paeyaoma꞉ mo ika꞉ handeteke hala꞉ haliwekina꞉ pi oto pa꞉ta꞉ hata꞉ ika꞉ epeke e pokeme ekima꞉ iki ta꞉na꞉ma꞉ homaapa꞉peke. Kutu pimika꞉na꞉ta꞉ mo iki handeteke hala꞉ haliwekina꞉ pi eto eto na lao make \v 10 mo ika꞉ ala꞉ta꞉ ala꞉ta꞉ make pake na napa꞉peke. Kotoeki na pikita꞉ ki na hake epeke e poka꞉la꞉ hali hala꞉me hone wina꞉ ika꞉ e pokeleme ekima꞉ lena꞉ lapa꞉peke. Dupiki haumanu pimika꞉na꞉ta꞉ koto ika꞉ hau paeyaoma꞉ta꞉ nika꞉ Da꞉taasa꞉ Koda꞉na꞉ mana꞉ pimanu yeiya꞉ la walieke. \s1 Ketisona꞉ epolo pa꞉la꞉ nate \p \v 11 Koda꞉na꞉ a꞉ta꞉ma꞉ homo tamba꞉ mina꞉la꞉ ekita꞉ kenke wanda꞉hali paeyao mea da꞉taaluekema꞉ peneme ya꞉la꞉eki handoloma꞉me. \v 12 Koto a꞉ta꞉ma꞉ homo tamba꞉ mina꞉la꞉ ekima꞉ walota꞉ pa nikana꞉ma꞉ Koda꞉ hoki nane yao nika꞉ hoke hone pa꞉la꞉ haumanu pitoloma꞉eki make do kenkena꞉ hoke hone pa꞉la꞉ haumanu pitoloma꞉eki make kiaamono pa꞉la꞉me. Koto pa꞉la꞉ ekina꞉ta꞉ ame do kenkena꞉ hata꞉ta꞉ nika꞉ hone handeteke hata꞉ make tondepe pea hata꞉ make Koda꞉na꞉ hau hone witolo hata꞉ make kutu pitolo hata꞉ \v 13 mo hande ota꞉ ipilie nate opolo epena꞉e laa hone tulaasa꞉ hata꞉ yu wia haloma꞉me. Koto epolo pa꞉la꞉ nateta꞉ mo nika꞉ Koda꞉ tieke make da꞉taala꞉ hali Yesu Ketiso make ipilika꞉ pa̱a̱ tieke peneme yaasa꞉eki opolo ipilieke. \v 14 Ketiso ipikita꞉ nikina꞉ homeekeme. Kutu pieke ekima꞉ta꞉ nikita꞉ mo hoke hau pa꞉ta꞉ haomeke yoka꞉ muluekema꞉ make ipika꞉ epeke hauna꞉ puawee hone pa꞉la꞉ yako piki wanda꞉hali homeke hamono yeke piekeme. \p \v 15 Do mana꞉ pimanu walo hapeke. Kutu puluekema꞉ta꞉ naka꞉ pi opita꞉la꞉ wanda꞉halina꞉ hone u tia tia puluekema꞉ make hoke haumanu peaama꞉na꞉ sa꞉sa꞉ pulu pika꞉na꞉ make naka꞉ biki ula꞉ ekina꞉ hata꞉ pea꞉peke. \c 3 \s1 Ketiso wanda꞉halima꞉ pea꞉pa꞉peke haumanu \p \v 1 Nakana꞉ma꞉ mo naka꞉ wanda꞉halina꞉ hone u tiatiki pika꞉na꞉ta꞉ ikana꞉ma꞉ mo ika꞉ kapomani haliweki oto nane make ikana꞉ma꞉ telipaala꞉ e handeteke haleme haliweki oto nane make hao hapa꞉peke lapeke. Mo haliwekina꞉ kakema꞉ homo hata꞉ hau paeyao epeke tupa꞉ puluekema꞉ tikitiki yao hapa꞉peke lapeke. \v 2 Ikana꞉ma꞉ ma꞉nda꞉ pa꞉ta꞉ hoke pimanu na leketa꞉ a꞉nda꞉ pelia ta꞉ma꞉ni pea hata꞉ hoto paeyaota꞉ paeyao pa꞉ta꞉ yopu a꞉ta꞉ma꞉ homolo hata꞉ hapa꞉peke lapeke. \p \v 3 Amba꞉ niki make hone wopu na wiki pi tunkulu make pu ata꞉ka꞉ peaoma꞉me. Nika꞉ lokena꞉ hone pa꞉la꞉ hau manuma꞉ make nika꞉ lokena꞉ ta꞉na꞉ma꞉ homaasa꞉ haumanu make koto hau paeyaoma꞉ nika꞉ hone handeteke haena꞉ loma꞉me. Kutupa nate paeyao mineke panka꞉ tiake pimanu lo make ma꞉nda꞉ma꞉ epeke ale pa꞉ta꞉ make leke polopao haoma꞉me. Mandane wanda꞉halima꞉ niki honditi pimikita꞉ iki make honditi pu haoma꞉me. \p \v 4 Kutu puma꞉pate mo hande nika꞉ da꞉taasa꞉ Koda꞉na꞉ a꞉ta꞉ma꞉ homa꞉la꞉eki make pukima꞉ homa꞉la꞉eki make peneme yaalo epeke pita꞉ma꞉ta꞉ \v 5 ipikana꞉ma꞉ niki pa꞉ta꞉la tamba꞉ miekeme. Pa nikana꞉ma꞉ nika꞉ epeke hau pumeke handa na pieke yekepate pa mo ipika꞉ a꞉ta꞉ma꞉ homeeke ekina꞉ niki tamba꞉ miekeme. Kutu piekeeki manuta꞉ niki panake weki tupa꞉ da꞉ta hamono Koda꞉ma꞉ ipika꞉ Holi Sipitidi pa꞉ta꞉ yama꞉ tanda pa꞉la꞉me. \v 6 Koda꞉ma꞉ nika꞉ Da꞉taasa꞉ Hali Yesu Ketiso pa꞉ta꞉ yama꞉ ipika꞉ Holi Sipitidi niki pa꞉ta꞉ anekema꞉ wopu tapaeyekeme. \v 7 Kutu pieke ekima꞉ta꞉ mo Ketiso ipika꞉ a꞉ta꞉ma꞉ homeeke ekina꞉ niki Koda꞉na꞉ leke popelekena꞉ tikitiki pea make nika꞉ hone puaasoma꞉ deto hala꞉eki make miomono piekeme. Do ala꞉ pita꞉ ota꞉ pie. \p \v 8 Koda꞉ pa꞉ta꞉ hone tulaaseme wanda꞉halima꞉ta꞉ mo ika꞉ epeke piteme hau manuma꞉ mo mandane wanda꞉hali tamba꞉ muluekema꞉ hone witolo hata꞉ waleke hala꞉tiki pina꞉ma꞉ nakana꞉ma꞉ do wapena꞉ alo pimanu iki pa꞉ta꞉ ota꞉ wopu la꞉ moneao hapeke. \p \v 9 Kutu pulu pa꞉la꞉pate mo epe na piki ape apemanu make mo atekena꞉ ateke hatiki epeeke ekina꞉ biki eleke eleke moka꞉lao haleme ekimanu make mo pi yokaalu alu pita꞉la꞉ ekimanu make mo hande Diu wanda꞉halina꞉ lo pimanu wiekeeki dupa ula꞉me laa ape ape lo halemeeki make kota꞉ hau paeyao paka꞉lao pu hapeke. Kota꞉ hau manuma꞉ta꞉ niki epeaapeke ana꞉ na pa꞉la꞉me. \p \v 10 Mo Ketiso tapake tekili paaluekema꞉ taapa꞉la꞉ somema꞉ hoto homeke o yaapo tekili peaapeke lea꞉ka꞉na꞉ta꞉ hoto yaapo sa꞉sa꞉ pilipipate pi na opiki pa tepo peao paa pia꞉ka꞉na꞉ta꞉ kota꞉ koto someta꞉ nika꞉ tapake some dia꞉me laa hoki wala꞉peke. \v 11 Naka꞉ handeleme. Kutu piki hau pita꞉la꞉ someta꞉ ipika꞉ hoke hau manuma꞉ kone mea hoeyao keaasa꞉me. \p \v 12 I̱ma꞉ Atemasi o Tikikasi yaapo homeke a꞉nda꞉ neke pa꞉ta꞉ epena꞉ tapaowa꞉ka꞉na꞉ta꞉ kota꞉ neketa꞉ mo I̱ yopua halua꞉ Nikopolisi da nane pota꞉manu weiya a꞉pa꞉peke. I̱ma꞉ mo hande koa ki dina꞉ta꞉ koto Nikopolisi da pa꞉ta꞉ halueke loa꞉ ekita꞉ nakana꞉ma꞉ hone wilime. \v 13 Mo Kapomanina꞉ pi ula꞉eki tikitiki yao hala꞉ hali Senasi make mo hande Apolosi kota꞉ hali yaapo ipilika꞉ pi walo polo pelepeeki kini pina꞉ nakana꞉ma꞉ epeke tamba꞉ muluekema꞉ taapa꞉peke. Ipilika꞉ mea polo pelepe ale manuta꞉ ana꞉na꞉ mea wilipipe laa handa꞉ handa꞉peke. \p \v 14 Nika꞉ Ketiso tapakema꞉ a꞉pa꞉la꞉ haumanu puluekema꞉ ikana꞉ma꞉ mo ika꞉ nate leke epeke tupa꞉ handeteke hata꞉ pina꞉ moka꞉la꞉ tiatiki pea꞉pa꞉peke alee. Kutupa make mo wanda꞉halina꞉ ka꞉nda꞉ma꞉ homa꞉la꞉eki handa꞉ peteluekema꞉ ikana꞉ma꞉ mo napeke na pitiki epe na piki haumanu leke na pea꞉peke ya꞉la꞉me. \p \v 15 Do I̱ ame̱le̱ mandake haloma꞉ tapakema꞉ neke pa꞉ta꞉ a꞉taloe pi la꞉neaasememe. Kutupa mo neke ame̱le̱ haleme Ketiso yankeketonu pa꞉ta꞉ tonka꞉na꞉ a꞉taloe pi aloma꞉me laa la hala꞉peke. Koda꞉na꞉ a꞉ta꞉ma꞉ homo tamba꞉ mina꞉la꞉ ekita꞉ iki taapuna꞉ hao haena꞉e.