\id ROM - Sembeleke Samberigi PNG Romans 01 10/7/91 Macnaughtan \h LOMA꞉ \toc1 Poloma꞉ Loma꞉ Ketiso tapake pa꞉ta꞉ tapaeyeke wapee \toc2 Loma꞉ \toc3 Loma꞉ \mt1 Poloma꞉ Loma꞉ Ketiso tapake pa꞉ta꞉ tapaeyeke wapee \c 1 \p \v 1 Do wapeta꞉ I̱ Poloma꞉ pua꞉me. Yesu Ketiso ipika꞉ e pokaaso hali halome. Koda꞉ ipika꞉ Pi Seliapo walonoyeke ipikana꞉ma꞉ I̱ wi la꞉ meaata꞉ aposolo hali hano la꞉la꞉me. \p \v 2 Do hande Pi Seliapota꞉ Koda꞉ma꞉ amba꞉ kiake pi la꞉ witolo hata꞉ ipika꞉ pi la꞉ mea halo haemeke potopede haliweki pa꞉ta꞉ la halaata꞉ yakopiki Baibolo bukana꞉ make wape pina꞉ leekeme. \v 3 Do Pi Seliapota꞉ ipika꞉ Eiyeke hande nika꞉ Tekehali Yesu Ketisoma꞉ pulu pieke ekina꞉ eki loa꞉me. Ipikita꞉ kenke hali leke hayeke ekita꞉ Deipidina꞉ tapake hali hayekeme. \v 4 Kutu piekepate ipikita꞉ Koda꞉ yaapo hao a꞉pa yakopiki hali hayeke ekita꞉ kota꞉ Koda꞉ma꞉ wele wotu pitolo hata꞉ ipikita꞉ Koda꞉na꞉ Eiyekee laa peneme yaluekema꞉ homeeke pa꞉ta꞉ kone paa mea tiaeyekeme. \v 5 Koda꞉ma꞉ Yesu Ketiso pa꞉ta꞉ hone witolo hata꞉ I̱ aposolo hali halo pua꞉eki kia꞉me. Kutupa Ketisona꞉ bikina꞉ kenke ta꞉ta꞉ ta꞉ta꞉ pa꞉ta꞉manu haeme wanda꞉hali paeyao hatuku pua ipika꞉ pi hone tulao opua pina꞉yeke kia꞉me. \v 6 Loma꞉ wanda꞉halio. Do alo ekita꞉ iki pa꞉ta꞉ make alome. Iki make Yesu Ketiso pa꞉ta꞉ hamina꞉yeke Koda꞉ma꞉ wi la꞉la꞉me. \p \v 7 Koto pa꞉la꞉ ekina꞉ Koda꞉ma꞉ pukima꞉ homaata꞉ ota꞉ ipika꞉ wanda꞉hali hamina꞉ wi la꞉la꞉ Loma꞉ wanda꞉halio. Iki paeyao pa꞉ta꞉ wape do pitolome. \p Nika꞉ Apa꞉ Koda꞉ma꞉ make pa Tekehali Yesu Ketisoma꞉ make iki pa꞉ta꞉ a꞉ta꞉ma꞉ homolo hata꞉ ika꞉ puki lopao hamina꞉ lepeka꞉na꞉ta꞉ epelieke. \s1 Poloma꞉ Koda꞉ pa꞉ta꞉ keiyae pi ala꞉eki \p \v 8 Do pi kini pitolo hata꞉ doeki alome. Ika꞉ Yesu Ketiso pa꞉ta꞉ hone tulaasemeeki kenke wanda꞉hali paeyaoma꞉ opiteleme ekina꞉ I̱ma꞉ iki paeyao pa꞉ta꞉ hone wia Yesu Ketisona꞉ bikina꞉ yaka Koda꞉ pa꞉ta꞉ keiyae pi alome. \v 9 Do alo ekita꞉ ota꞉ pi aloeki Koda꞉ma꞉ handa꞉la꞉me. Do Koda꞉ta꞉ ipika꞉ Eiyekena꞉ Pi Seliapo walolo hata꞉ yaka tieke pukima꞉ ipika꞉ e pokao halome. Hoto paeyao iki pa꞉ta꞉ hone witolo hata꞉ \v 10 I̱ma꞉ yeni pu haloeki Koda꞉ma꞉ handa꞉la꞉me. Koda꞉ma꞉ hone pia꞉ka꞉na꞉ta꞉ I̱ta꞉ ame iki pa꞉ta꞉ a꞉pa hosiki haluekema꞉ Koda꞉ma꞉ peaena꞉yeke honke alome. \v 11 Iki handuluekema꞉ I̱ma꞉ hone wotu pa꞉la꞉me. Mo hande Holi Sipitidina꞉ epeaasa꞉eki ma꞉nda꞉ iki pa꞉ta꞉ teli teli pealuekema꞉ ika꞉ puki taka꞉lao hamina꞉yeke loa꞉me. \v 12 Do alo ekita꞉ dupae. Yaka hone tulaalo ekima꞉ iki tamba꞉ mina꞉ make ika꞉ hone tulaaleme ekima꞉ I̱ tamba꞉ mina꞉ make niki paeyaoma꞉ tamba꞉ mu alualu pumana꞉yeke loa꞉me. \p \v 13 Yaka kame titio doeki hone wia꞉pa꞉peke. I̱ta꞉ iki ame̱le̱ hosiki halo ipuluekema꞉ hoto elekeeleke pua꞉pate ale ma꞉nda꞉ma꞉ yaka pota꞉ sa꞉sa꞉ pu hala꞉me. Iki ame̱le̱ haleme mandane wanda꞉halima꞉ pi mina꞉ puki la꞉ka꞉laluekema꞉ mo mandane Diendaili wanda꞉hali pa꞉ta꞉ pua꞉ tupa꞉ puluekema꞉ I̱ma꞉ hone pa꞉la꞉me. \v 14 Kapomanina꞉ pita꞉la꞉ hau handeleme wanda꞉hali pa꞉ta꞉ make na handeleme wanda꞉hali pa꞉ta꞉ make wape handeleme wanda꞉hali pa꞉ta꞉ make wape na handeleme wanda꞉hali pa꞉ta꞉ make paeyao pa꞉ta꞉ I̱ma꞉ pi wala꞉peke ya꞉la꞉me. \v 15 Koto ekina꞉ Loma꞉ wanda꞉hali iki pa꞉ta꞉ make mo Pi Seliapo waluekema꞉ tiki tiki hao halome. \s1 Mo Pi Seliapona꞉ wele pa꞉la꞉eki \p \v 16 Mo hande Pi Seliapoma꞉ Koda꞉ma꞉ta꞉ ipiki pa꞉ta꞉ hone tulaaseme wanda꞉halita꞉ Diu wanda꞉hali amba꞉la Diendaili wanda꞉hali wetepena꞉ paeyao ipikana꞉ma꞉ wele pitolo hata꞉ da꞉taapeke ya꞉la꞉me. Koto ekina꞉ mo Pi Seliapo pa꞉ta꞉ I̱ta꞉ ota꞉ ti lao halome. \v 17 Mo hande Pi Seliapoma꞉ doeki wala꞉leke handa loa꞉me. Koda꞉ma꞉ wanda꞉hali ipiki pa꞉ta꞉ tiki tiki haena꞉ ala꞉eki wala꞉la꞉me. Mo Koda꞉ma꞉ do pita꞉la꞉ ekita꞉ wanda꞉halima꞉ hone tulao hatiki puo pu hao paeyaalo pulu make pilieke. Mo Baibolo bukana꞉ wape pea ula꞉ tupa꞉ Hali epima꞉ Koda꞉ pa꞉ta꞉ hone tulao haya꞉ka꞉na꞉ta꞉ Koda꞉ma꞉ ipiki pa꞉ta꞉ mo hali tiki tiki haena꞉ lelieke. Kutupa mo halita꞉ da꞉ta halieke. \s1 Wanda꞉hali paeyao pa꞉ta꞉ hoke haumanu ula꞉eki \p \v 18 Kutupa Koda꞉ma꞉ta꞉ wanda꞉hali paeyaoma꞉ ipikita꞉ hoki nane yao ika꞉ hoke hau paeyao pimiki ekina꞉ ipikana꞉ma꞉ mineke pankolo hata꞉ iki ame̱le̱ pi yokaalu pulu pelemeeki make wala꞉la꞉me. Kutu piki wanda꞉halima꞉ ika꞉ hoke hau piteleme ekina꞉ mandane wanda꞉halima꞉ Koda꞉na꞉ ota꞉ hala꞉eki handaama꞉na꞉ sa꞉sa꞉ pu halememe. \v 19 Kutupiki wanda꞉halita꞉ Koda꞉ma꞉ panisi peaalieke. Do ekina꞉yeke loa꞉me. Koda꞉ hala꞉ ekita꞉ wanda꞉hali paeyao pa꞉ta꞉ na a꞉mbala꞉me. Ikana꞉ma꞉ handa꞉pa꞉peke ya꞉la꞉me. Pa ekipeke Koda꞉ma꞉ kone iki pa꞉ta꞉ peneme yaala꞉me. \v 20 Koda꞉ma꞉ kenke ala꞉ta꞉ ala꞉ta꞉ paeyao wepia wina꞉ la꞉la꞉ dina꞉ kini pu mea a꞉pa ame haloma꞉ pa꞉ta꞉ kone wanda꞉hali paeyaoma꞉ta꞉ Koda꞉ ota꞉ hala꞉eki make ipika꞉ wele pu hao halo pa꞉la꞉eki make hone epeke tupa꞉ wia꞉pa꞉peke ya꞉la꞉me. Koto Koda꞉na꞉ hau yaapota꞉ lekema꞉ peneme handa꞉pa꞉peke na ya꞉la꞉pate pa hone wia꞉pa꞉peke ya꞉la꞉me. Wanda꞉hali paeyaoma꞉ta꞉ Koda꞉ma꞉ wepia wina꞉ la꞉la꞉ ekimanu lekema꞉ handolo hata꞉ hone wia꞉pa꞉peke ya꞉la꞉me. Koto ekina꞉ wanda꞉hali paeyaoma꞉ pi ma꞉nda꞉ lapa꞉peke na ya꞉la꞉me. \v 21 Iki paeyaoma꞉ta꞉ Koda꞉ hala꞉eki hone witelemepate ipiki pa꞉ta꞉ Neketa꞉ ota꞉ Koda꞉ haleme pi na leke ipika꞉ pi laaluekema꞉ make kiao halememe. Kutupa ipiki pa꞉ta꞉ keiyae pi make na lo halememe. Kutu pu haleme ekina꞉ iki hone wopu na wiki hata꞉ ika꞉ hone teke pa꞉ta꞉ timba꞉ lo pamba꞉la꞉eki tumbulu baena꞉ halememe. \v 22 Ikana꞉ma꞉ alota꞉ Nikita꞉ hone wopu uluma꞉ wanda꞉hali haloma꞉me laa lo halemepate ikita꞉ hone na wiki wanda꞉hali hata꞉ta꞉ \v 23 hande na homeke pa hao hala꞉ Koda꞉ pa꞉ta꞉ panda꞉puniao yeni na piki pa mo wanda꞉halima꞉ wa꞉pa꞉la꞉ alemanu pa꞉ta꞉ kone panda꞉puniao yeni pu halememe. Koto ale manuta꞉ mo homa꞉la꞉eki pila꞉ halima꞉ make ba titima꞉ make kenkena꞉ pomineleme ale manuma꞉ make kutupiki ekima꞉ handeke ekimanu pa꞉ta꞉ panda꞉puniao yeni pu halememe. \s1 Hoke hau ta꞉ta꞉ ta꞉ta꞉ pita꞉la꞉eki \p \v 24 Hone na wiki kutupiki haliweki haleme ekina꞉ Koda꞉ma꞉ kiao ika꞉ hone pa꞉la꞉ suseke haasa꞉ haumanu pa putia pena꞉ ala꞉me. Kutupa ikana꞉ma꞉ yaala꞉ piki haumanu pu alualu pu halememe. \v 25 Kutu piki haliwekima꞉ta꞉ Koda꞉ ota꞉ hala꞉ ekita꞉ na miki pa topo pea yayapikieki melememe. Kutupa Koda꞉ma꞉ pa wepia wina꞉ la꞉la꞉ alemanu pa꞉ta꞉ panda꞉puniao yeni pu hata꞉ ika꞉ hau peao halemepateta꞉ hande ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ pa꞉ta꞉ta꞉ na pitelememe. Koto Koda꞉ta꞉ wanda꞉halima꞉ ipika꞉ pi laatiki pu hapa꞉peke ya꞉la꞉me. Ota꞉ loa꞉me. \p \v 26 Kutupu haemeke ekina꞉ Koda꞉ma꞉ta꞉ ika꞉ yaala꞉ piki haumanu pa putia pena꞉ la꞉la꞉me. Wanda꞉wekima꞉ kone haliweki pa꞉ta꞉ hone na wiki pa ika꞉ wanda꞉ yankeke pa꞉ta꞉ ana꞉ na piki haumanu pu halememe. \v 27 Koto tupa꞉ kone mo haliwekima꞉ make wanda꞉weki pa꞉ta꞉ hone na wiki ika꞉ hali yankeke pa꞉ta꞉ kone ana꞉ na piki haumanu pu alualu puluekema꞉ puki pa꞉ta꞉ ti leke talo hata꞉ pu halememe. Mo haliwekima꞉ta꞉ ika꞉ kone yaala꞉piki haumanu pu alualu pu haleme ekina꞉ Koda꞉ma꞉ ika꞉ ana꞉ na piki hauna꞉ yenkita꞉ hokeeki kone halo hala꞉me. \p \v 28 Mo haliwekima꞉ta꞉ Koda꞉ ota꞉ hala꞉eki hone ma꞉nda꞉ uluekema꞉ kiaasemeke ekina꞉ta꞉ Koda꞉ma꞉ ika꞉ kone hone u hoeyao pa haena꞉ la꞉la꞉me. Koto pa꞉la꞉ ekina꞉ mo haliwekima꞉ ana꞉ na piki haumanu pu halememe. \v 29 Koto wanda꞉halita꞉ hoke hau manuma꞉ make pasa꞉tei hau manuma꞉ make ma꞉nda꞉ pa꞉ta꞉ hokeeki puluekema꞉ hone witelemeeki manuma꞉ make ta꞉ta꞉ ta꞉ta꞉ pikieki manuma꞉ tumbulu bao halememe. Soka꞉la꞉ pita꞉la꞉ ekima꞉ make hali luekema꞉ pita꞉la꞉ ekima꞉ make a꞉nda꞉ lita꞉la꞉ ekima꞉ make yayapiki hau pita꞉la꞉ ekima꞉ make ma꞉nda꞉ pa꞉ta꞉ hoke hone wita꞉la꞉ ekima꞉ make tumbulu bao hata꞉ pa pimanu la꞉tiki pu halo hata꞉ \v 30 ika꞉ ika꞉ kone pi la la pu alualu pia꞉tiki pu halememe. Koda꞉ hoki wala leke pa꞉ta꞉ sa꞉take pu hambiliki hoepitolo make tanda pea hatiki pu halememe. Hakoko litolo hata꞉ Koda꞉na꞉ pi kone la꞉tiki pitolo hata꞉ hoke ekimanu puluekema꞉ panake pota꞉manu weiya꞉tiki pu halememe. Kutupa ateke inkiki yaapona꞉ pi tunkula꞉tiki pu halememe. \v 31 Ikana꞉ma꞉ ya꞉la꞉ma꞉ na homolo hata꞉ ika꞉ la꞉ wimiki pimanu pa tunkula꞉tiki pu pitolo hata꞉ make ma꞉nda꞉ pa꞉ta꞉ epeke hone na wiki pa a꞉ta꞉ma꞉ na homa꞉tiki pu halememe. \v 32 Koda꞉na꞉ pi ula꞉ ekima꞉ alota꞉ Mo kutu piki haumanu pu haleme wanda꞉halita꞉ homa꞉la꞉eki mea꞉pa꞉peke ya꞉la꞉me laa la꞉la꞉me. Koto la꞉la꞉ pi mo wanda꞉halima꞉ opitelemepate ika꞉ hande hoke ekimanu paa pia꞉tiki pu hao kutupa make mandane wanda꞉halima꞉ koto hande hoke ekimanu pimika꞉na꞉ta꞉ a꞉pa꞉la꞉ma꞉ pa pipe laa lo halememe. \c 2 \s1 Koda꞉ma꞉ wanda꞉hali paeyao pa꞉ta꞉ pi yokaalu pulu pa꞉la꞉eki \p \v 1 Nakana꞉ma꞉ hali ma꞉nda꞉ pa꞉ta꞉ kiki ma̱leke lika꞉na꞉ta꞉ kota꞉ neke pa꞉ta꞉ ketete wilieke. Do ekina꞉yeke loa꞉me. Ma꞉nda꞉ma꞉ pa꞉la꞉ ekina꞉ nakana꞉ma꞉ pu hata꞉ kone mo some pa꞉ta꞉ kiki ma̱leke lika꞉na꞉ta꞉ kota꞉ neke kone kiki ma̱leke liteleme. \v 2 Koda꞉ma꞉ta꞉ kutupiki haumanu pu haleme wanda꞉hali pa꞉ta꞉ pi yokaalu pia꞉ka꞉na꞉ta꞉ tikitikina꞉ pilieke hone witoloma꞉pate \v 3 pa nakana꞉ma꞉ta꞉ hali ma꞉nda꞉ma꞉ pa꞉la꞉ ekina꞉ kiki ma̱leke lika꞉na꞉ta꞉ neke make pu hata꞉ kone laaseme. Kota꞉ Koda꞉ma꞉ neke pa꞉ta꞉ pi yokaalu pulu pa꞉la꞉ ekita꞉ paka꞉lao ulueke hone witelepe. \v 4 Koda꞉ma꞉ neke pa꞉ta꞉ a꞉ta꞉ma꞉ wopu homaata꞉ naka꞉ hoke hauna꞉ yenki a̱i̱ na kiki yu wia hao hala꞉ ekita꞉ neketa꞉ hone na witele. Koda꞉ma꞉ a꞉ta꞉ma꞉ homa꞉la꞉ ekita꞉ nakana꞉ma꞉ ipiki pa꞉ta꞉ hone ma꞉nda꞉ la꞉ka꞉la꞉ mina haelena꞉yeke pita꞉la꞉me. Koto ekita꞉ iki paeyaoma꞉ hone witolo pelememe. \v 5 Koto pelemepate ikita꞉ pi na opiki puki taka꞉lao halememe. Koto ekina꞉ Koda꞉ma꞉ta꞉ hande Natena꞉ hoke hau peleme wanda꞉hali pa꞉ta꞉ mineke pankolo hata꞉ pi yokaalu tikitikina꞉ pia꞉ka꞉na꞉ta꞉ kota꞉ mo iki panisi tieke peaalia꞉ ekita꞉ ika꞉ kone ame pa haka꞉ta꞉paasememe. \v 6 Pa ekipeke wanda꞉hali paeyao homeke homekema꞉ piteleme ekimanu Koda꞉ma꞉ handaata꞉ yenki ana꞉na꞉ kilieke. \v 7 Mandane wanda꞉halima꞉ta꞉ epeke haumanu pu hatiki peaata꞉ ika꞉ biki epeke wina꞉ lolo pa꞉la꞉eki make Koda꞉ma꞉ ika꞉ pi lawalo pa꞉la꞉eki make homa꞉peke na yeke da꞉ta hao halo pa꞉la꞉eki make weiyu halememe. Kutu piki wanda꞉hali pa꞉ta꞉ Koda꞉ma꞉ da꞉ta hao halo pa꞉la꞉eki halieke. \v 8 Kutu piliepate mandane wanda꞉halima꞉ta꞉ ika꞉ hone pa꞉la꞉ ekimanu pu hao pa epeke hau pea꞉pa꞉pekeeki kiao hokeeki kone pu halememe. Kutu piki wanda꞉hali pa꞉ta꞉ Koda꞉ma꞉ mineke pankolo hata꞉ hoke yenki halieke. \v 9 Hoke hau pu haleme wanda꞉hali pa꞉ta꞉ Koda꞉ma꞉ ka꞉nda꞉ma꞉ homao tanda tanda pita꞉la꞉eki halieke. Diu wanda꞉hali pa꞉ta꞉ halaata꞉ Diendaili wanda꞉hali pa꞉ta꞉ make halieke. \v 10 Koda꞉ma꞉ kutu pulu pa꞉la꞉pate epeke hau pu haleme wanda꞉halita꞉ biki ula꞉ kapu halaata꞉ ika꞉ pi laota꞉ ika꞉ puki lopa꞉niaalieke. Diu wanda꞉hali pa꞉ta꞉ amba꞉la pea Diendaili wanda꞉hali pa꞉ta꞉ make kutu pilieke. \v 11 Koda꞉ma꞉ pi yokaalu pitolo hata꞉ ma꞉nda꞉ pa꞉ta꞉ honditi pea make pa ma꞉nda꞉ pa꞉ta꞉ a꞉ta꞉ma꞉ homa make Koda꞉ma꞉ kutupiki hau na piki paeyao pa꞉ta꞉ homeke hone wia pi yokaalu pilieke. \p \v 12 Diendaili wanda꞉halima꞉ta꞉ Mosesima꞉ wape peaala꞉ Lo Pimanu na handeke hoke hau pa pu hata꞉ alupu halememe. Mo hande Lo Pimanu iki pa꞉ta꞉ na ula꞉me. Diu wanda꞉halima꞉ta꞉ Mosesima꞉ wape peaala꞉ Lo Pimanu opuaata꞉ hoke hau pu haleme ekina꞉ Koda꞉ma꞉ mo hande Lo Pimanu hone witolo hata꞉ pi yokaalu pilieke. \v 13 Koda꞉ma꞉ta꞉ wanda꞉hali ipiki yaapo tikitiki yao haena꞉ ala꞉ ekita꞉ mo wanda꞉halima꞉ hande Lo Pimanu pa katakema꞉ homeke opiteleme ekina꞉ na pikita꞉ hande Lo Pimanu opua piteleme ekina꞉ haena꞉ lelieke. \v 14 Lo Pi manuta꞉ Diendaili wanda꞉halima꞉ na handeke hata꞉ kone ika꞉ hone wia mo hande Lo Pimanu pimika꞉na꞉ta꞉ kota꞉ mo pea꞉peke ekimanu make na pea꞉peke ekimanu make ika꞉ kone pitelememe. Mo hande Lo Pimanu na handeke hata꞉ kone pitelememe. \v 15 Mo hande Lo Pimanu ika꞉ puki pa꞉ta꞉ mendieleme ekita꞉ ika꞉ pu haleme ekima꞉ peneme yaasa꞉me. Kutupa make mo hande Lo Pimanu ota꞉ekie laa ika꞉ hone pa꞉ta꞉ kone leekeme. Hoto ma꞉nda꞉ma꞉ta꞉ ika꞉ honema꞉ alota꞉ Hokeeki pimime alemepate hoto ma꞉nda꞉ma꞉ta꞉ ika꞉ honema꞉ alota꞉ Epekeeki pimime la alememe. \v 16 Koto ekina꞉ Koda꞉ma꞉ta꞉ hande Natena꞉ pi yokaalu pia꞉ka꞉na꞉ta꞉ I̱ma꞉ hande Pi Seliapo loa꞉ tupa꞉ pilieke. Ipikana꞉ma꞉ta꞉ Yesu Ketisoma꞉ wanda꞉halima꞉ a꞉mbao u haeme hone manuna꞉ pi yokaalu pina꞉ lelieke. \s1 Diu wanda꞉halima꞉ mo hande Lo Pimanu opua pea꞉pa꞉pekeeki \p \v 17 Koto pa꞉la꞉pate neketa꞉ eki pelepe. Nakana꞉ma꞉ alota꞉ I̱ta꞉ Diu halie aleme. Nakana꞉ma꞉ta꞉ hande Lo Pimanu pa꞉ta꞉ ti lao hata꞉ naka꞉ kone naka꞉ hakoko litolo alota꞉ I̱ta꞉ Koda꞉na꞉ tapake hali halome aleme. \v 18 Nakana꞉ma꞉ta꞉ Koda꞉na꞉ hone pa꞉la꞉eki handaata꞉ mo hande Lo Pi manuna꞉ sukulu pea hata꞉ tikitiki hau handa꞉ uluekema꞉ handaata꞉ \v 19 naka꞉ hone dupa ula꞉me. Leke holupiki wanda꞉hali pa꞉ta꞉ I̱ma꞉ pota꞉ wala꞉peke ya꞉la꞉me laa I̱ta꞉ timba꞉ leke pa꞉ta꞉ haleme wanda꞉hali ika꞉ pa̱a̱ peaasoeki halome alo hata꞉ \v 20 I̱ta꞉ hone wopu na witeleme wanda꞉hali ika꞉ hone wiaaso hali make weki wandikima꞉ handeleme wanda꞉hali ika꞉ wala꞉la꞉ hali make halome hone witeleme. Naka꞉ honema꞉ta꞉ hande Lo Pimanu opua wia hala꞉ ekina꞉ pita꞉la꞉ ekimanu paeyao I̱ma꞉ handaata꞉ I̱ma꞉ lolo polo pimanu make ota꞉ekie lolueke hone witeleme. \v 21 Nakana꞉ma꞉ mandane wanda꞉hali walelepate neke naka꞉ kone ekipeke na walelepe. Nakana꞉ma꞉ pi walolo alota꞉ Pake na napeke alepate nakana꞉ma꞉ naka꞉ kone pake no halepe. \v 22 Nakana꞉ma꞉ alota꞉ Tooli ka꞉taasa꞉ hau na pea꞉peke alepate nakana꞉ma꞉ naka꞉ kone tooli ka꞉taasa꞉ hau na pu halepe. Toopi ti wepia ula꞉ ale pa꞉ta꞉ yeni pu haleme wanda꞉hali pa꞉ta꞉ nakana꞉ma꞉ pi wopu alepate koto alemanu ula꞉ tembolo da pa꞉ta꞉ ala꞉ta꞉ ala꞉ta꞉ pake no halepe. \v 23 Nakana꞉ma꞉ta꞉ hakoko litolo alota꞉ Hande Lo Pimanu Koda꞉ma꞉ niki pa꞉ta꞉ kiekeme alepate nakana꞉ma꞉ hande Lo Pimanu yambelele ekina꞉ wanda꞉halima꞉ Koda꞉na꞉ biki hoeyaena꞉ alepe. \v 24 Hande Baibolo bukana꞉ wape pa꞉la꞉ tupa꞉ Ika꞉ Diu wanda꞉halima꞉ pu haleme ekina꞉ mo Diendaili wanda꞉halima꞉ta꞉ Koda꞉na꞉ biki hoeyao halememe. \p \v 25 Nakana꞉ma꞉ta꞉ hande Lo Pimanu opua miniki hata꞉ pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ a꞉pa꞉la꞉pate pa nakana꞉ma꞉ hande Lo Pimanu opua na pu haeka꞉na꞉ta꞉ kota꞉ naka꞉ sekemesaisi hau peaala꞉ ekita꞉ pa ekie. \v 26 Diendaili hali ma꞉nda꞉ma꞉ sekemesaisi hau na piki pa hata꞉ kone hande Lo Pimanu opua miniki hata꞉ pu haya꞉ka꞉na꞉ta꞉ kota꞉ kutupiki halita꞉ sekemesaisi hau peaala꞉ hali leke hala꞉ ekita꞉ Koda꞉ma꞉ hone na wiliepe. \v 27 Koto ekina꞉ Diendaili haliwekima꞉ta꞉ sekemesaisi hau na piki hata꞉ kone hande Lo Pimanu opua miniki hata꞉ pu haleme ekina꞉ Diu wanda꞉hali kiki ma̱leke lilieke. Pa ekipeke ikana꞉ma꞉ta꞉ hande wape peaala꞉ Lo Pimanu miniki hata꞉ make sekemesaisi hau peaala꞉eki pea hata꞉ make pa yambolo haleme ekina꞉ kiki ma̱leke lilimikie. \v 28 Ota꞉ Diu halita꞉ epipe. Ota꞉ sekemesaisi hau peaala꞉ halita꞉ epipe. Diu hali ma꞉nda꞉ta꞉ pa manda hata꞉ pia꞉ka꞉na꞉ta꞉ kota꞉ kutupiki halita꞉ ota꞉ Diu hali na halieke. Kutupa make sekemesaisi hau pita꞉la꞉ ekita꞉ pa manda lokena꞉ pita꞉la꞉eki dia꞉me. \v 29 Ota꞉ Diu hali hala꞉ ekita꞉ puki pa꞉ta꞉ mea mendia hala꞉eki ota꞉ekie. Kutu piki halina꞉ puki pa꞉ta꞉ Koda꞉ma꞉ make amba꞉ hao hala꞉me. Kutu piki hauta꞉ Koda꞉na꞉ Sipitidima꞉ peaala꞉me. Hande wape peaala꞉ Lo Pimanu na peaala꞉me. Kutu piki halita꞉ wanda꞉halima꞉ ipika꞉ pi na laasemepate Koda꞉ma꞉ kone ipika꞉ pi laasa꞉me. \c 3 \p \v 1 Kota꞉ Diu wanda꞉halima꞉ta꞉ Diendaili wanda꞉hali ankulao halemepe. Sekemesaisi hau peaala꞉ ekima꞉ta꞉ epekeeki ma꞉nda꞉ handa꞉ wilimikipe. \v 2 A꞉pa꞉e. Iki pa꞉ta꞉ epekeeki wotu ula꞉me. Titina꞉ dupa Koda꞉ma꞉ta꞉ mo Diu wanda꞉halima꞉ ipika꞉ pimanu miniki hata꞉ handeteke haena꞉yeke iki pa꞉ta꞉ haleekeme. \v 3 Koto hau pina꞉ kone mandane wanda꞉halima꞉ pi na opiki kiao haemekepate mo wanda꞉halima꞉ pimiki ekina꞉ ika꞉ honema꞉ta꞉ Koda꞉ma꞉ make ipika꞉ pi tunkula halieke hone witelemepe. \v 4 Ota꞉ dia꞉me. Wanda꞉hali paeyaoma꞉ yayapiki pi alo hamina꞉ kone Koda꞉ma꞉ta꞉ ota꞉ pi homeke lo halieke. Hande Baibolo bukana꞉ wape pa꞉la꞉ tupa꞉ \q1 Nakana꞉ma꞉ ale pita꞉ paeyaoma꞉ opuaata꞉ ota꞉ tikitiki piki pi aleme laa hone wilimikie. \q1 Neke pa꞉ta꞉ pi yokaalu pitiki pimika꞉na꞉ta꞉ hoto paeyao wini pea꞉tiki pilipikie wape pa꞉la꞉me. \b \p \v 5 Koto pa꞉la꞉pate mandane haliwekima꞉ alota꞉ Hoke hau puma꞉ka꞉na꞉ta꞉ wanda꞉halima꞉ Koda꞉ma꞉ tikitiki hau pita꞉la꞉eki wotu handilimikie alemepate koto aleme pi hombo peaasota꞉ eki lomana꞉pe. Mo kenke haliwekima꞉ lo haleme tupa꞉ Koda꞉ma꞉ niki panisi kia꞉ka꞉na꞉ta꞉ hokeeki pitolo pita꞉la꞉me laa lomana꞉pe. \v 6 A꞉pa꞉e. Ota꞉ dia꞉me. Koda꞉ma꞉ta꞉ tikitiki hau na pu haya꞉ka꞉na꞉ta꞉ kota꞉ wanda꞉hali pa꞉ta꞉ ekipa pi yokaalu piliepe. \p \v 7 Koto pa꞉la꞉pate hali ma꞉nda꞉ma꞉ alota꞉ Yaka hoke hau pu halo ekima꞉ Koda꞉ma꞉ tikitiki hau pu hala꞉eki wopu walolo hata꞉ Koda꞉na꞉ biki make mea a꞉meiyaasa꞉ma꞉ ekina꞉ kota꞉ Koda꞉ma꞉ I̱ pa꞉ta꞉ alota꞉ Neketa꞉ hoke hau pu hale ekina꞉ hoke yenki kulueke pita꞉ ekipeke leliepe ala꞉me. \v 8 Koto ekina꞉ mandane wanda꞉halima꞉ alota꞉ Epekeeki epena꞉ma꞉ kota꞉ hokeeki pumana꞉e laa alememe. Mandane wanda꞉halima꞉ I̱ la la pitolo hata꞉ kone alota꞉ Poloma꞉ kutupiki pi ombu la꞉tiki pu hala꞉me laa lelememe. Koto pi leleme wanda꞉halita꞉ Koda꞉ma꞉ hoke yenki halea꞉ka꞉na꞉ta꞉ tikitiki hau pitolo hata꞉ kone pilieke. \s1 Hali homeke a꞉nda꞉ Koda꞉ pa꞉ta꞉ tikitikina꞉ na hala꞉eki \p \v 9 Kota꞉ niki Diu wanda꞉halima꞉ mo Diendaili wanda꞉hali ankulao haloma꞉pe. Dia꞉me. I̱ma꞉ta꞉ iki pa꞉ta꞉ amba꞉ ta waloa꞉ handa꞉e. Diu wanda꞉hali make Diendaili wanda꞉hali make hoke hau manuma꞉ wele pita꞉la꞉ ekima꞉ mandake tupa꞉ niki paeyao tombuao ula꞉me. \v 10 Mo Baibolo bukana꞉ wape pa꞉la꞉ tupa꞉ \q1 Ma꞉nda꞉ hali a꞉nda꞉ Koda꞉ pa꞉ta꞉ tikitikina꞉ na hala꞉me. \q1 \v 11 Ma꞉nda꞉ hali a꞉nda꞉ma꞉ tikitiki pikieki na handa꞉la꞉me. \q1 Ma꞉nda꞉ hali a꞉nda꞉ma꞉ Koda꞉ homeke na weiyu hala꞉me. \q1 \v 12 Haliweki paeyaoma꞉ta꞉ Koda꞉ hoki nane yao halememe. \q1 Paeya ta꞉pao hao hoeyaalememe. \q1 Ma꞉nda꞉ hali a꞉nda꞉ homekema꞉ kone epeke hau na pu hala꞉me. \q1 \v 13 Kutupa ika꞉ kake ka꞉ka꞉na꞉ manuta꞉ hali hoila꞉ naku ka꞉ka꞉na꞉ lumba꞉pa wiki nono pelememe. \q1 Ika꞉ kekekemanu pa꞉ta꞉ hoke hoke yayapiki pimanu ipu hala꞉me. \q1 Ika꞉ hambiliki manuma꞉ta꞉ hali lita꞉la꞉ keto kakema꞉ handeke pimanu lo halememe. \q1 \v 14 Ika꞉ kake manuta꞉ hali tetoma꞉ homaasa꞉ma꞉ pi manuma꞉ tumba halememe. \q1 \v 15 Wanda꞉hali tanda tanda peao luekema꞉ a̱i̱ a̱i̱ pu halememe. \q1 \v 16 Mandane mandane puaata꞉ ala꞉ta꞉ ala꞉ta꞉ hoeyaota꞉ wanda꞉hali make ka꞉nda꞉ma꞉ homao halememe. \q1 \v 17 A꞉nda꞉ peli alualu pea haluekema꞉ koto hauta꞉ hone na u halememe. \q1 \v 18 Koda꞉ pa꞉ta꞉ make pututuma꞉ homolo hata꞉ ika꞉ kone lu mina꞉niao homu pea halememe laa wape pa꞉la꞉me. \b \p \v 19 Mo hande Lo Pimanu opua oto pa꞉ta꞉ haleme wanda꞉halita꞉ mo Lo Pimanu iki pa꞉ta꞉ ula꞉ ekita꞉ handoloma꞉me. Koto Lo Pi manuma꞉ hambiliki honiolo aleme pimanu sa꞉sa꞉ peaata꞉ Koda꞉ma꞉ kenke wanda꞉hali paeyao pi yokaalu pulu pa꞉la꞉ ekita꞉ wala꞉la꞉me. \v 20 Do ekina꞉ yeke loa꞉me. Ma꞉nda꞉ hali a꞉nda꞉ma꞉ hande Lo Pimanu opua pa꞉la꞉ ekina꞉ Koda꞉ pa꞉ta꞉ tikitiki yao hapeke na ya꞉la꞉me. Mo hande Lo Pi manuma꞉ pita꞉la꞉ ekita꞉ wanda꞉halima꞉ ika꞉ hoke hau pelemeeki hone wina꞉ pita꞉la꞉me. \s1 Koda꞉ma꞉ wanda꞉hali ipiki pa꞉ta꞉ tikitiki yao haena꞉ la꞉la꞉eki \p \v 21 Kutu pita꞉la꞉pate Koda꞉ma꞉ta꞉ wanda꞉hali ipiki pa꞉ta꞉ tikitiki yao haena꞉ la꞉la꞉ ekita꞉ peneme yao ula꞉me. Hande Lo Pi manuma꞉ peaasa꞉eki dia꞉ ya꞉la꞉pate hande Lo Pi manuma꞉ make mo hande potopede haliwekima꞉ make amba꞉ la ka꞉la꞉me. \v 22 Wanda꞉halima꞉ Yesu Ketiso pa꞉ta꞉ hone tulaaseme ekima꞉ Koda꞉ma꞉ ikita꞉ ipiki pa꞉ta꞉ tikitiki yao hamina꞉ lo hala꞉me. Ketiso pa꞉ta꞉ hone tulaaseme wanda꞉hali paeya ta꞉pao pa꞉ta꞉ Koda꞉ma꞉ koto hau pu hala꞉me. Diu wanda꞉hali make Diendaili wanda꞉hali make ta꞉ta꞉ pea na haleme ekina꞉ loa꞉me. \v 23 Wanda꞉hali paeya ta꞉paoma꞉ hoke hau pea hata꞉ta꞉ hande da꞉tao hala꞉ Koda꞉ teke pa꞉ta꞉ na haloma꞉pate \v 24 ipikana꞉ma꞉ ipika꞉ pa a꞉ta꞉ma꞉ homolo hata꞉ kieke ekima꞉ nikita꞉ ipiki yaapo tikitiki yao hamono la꞉la꞉me. Koda꞉ma꞉ koto pa꞉la꞉ ekita꞉ Yesu Ketisoma꞉ niki ka꞉la꞉pa꞉ tapaala꞉ ekima꞉ pina꞉ la꞉la꞉me. \v 25 Koda꞉ma꞉ta꞉ Yesu Ketiso mea haena꞉ laata꞉ ipiki homolo hata꞉ ipika꞉ we lopolo piekeme. Lopeeke ekima꞉ ipiki pa꞉ta꞉ hone tulaalo peleme wanda꞉halina꞉ hoke hau pelemeeki manuta꞉ pa paeyaena꞉ leekeme. Koda꞉ma꞉ koto pa꞉la꞉ ekita꞉ ipika꞉ tikitiki hau pita꞉la꞉eki peneme yao waluekema꞉ piekeme. Amba꞉ta꞉ Koda꞉ma꞉ wanda꞉halina꞉ hoke hau peleme ekimanu leke honikima꞉ hando ankulao handeteke hao hayekepate \v 26 ameta꞉ ipika꞉ tikitiki hau pita꞉la꞉eki peneme yao waluekema꞉ wanda꞉halina꞉ hoke hau pelemeeki manuna꞉ hau ma꞉nda꞉ pu hala꞉me. Koda꞉ma꞉ kutu pita꞉la꞉ ekima꞉ ipikana꞉ma꞉ kone tikitiki hau pu hala꞉eki Yesu Ketiso pa꞉ta꞉ hone tulaaseme wanda꞉hali ipiki yaapo tikitiki yao hamena꞉ la꞉la꞉eki make wala꞉la꞉me. \p \v 27 Koto hali ma꞉nda꞉ epima꞉ eki hau pita꞉la꞉ ekina꞉ ipika꞉ hakoko lia꞉peke ya꞉la꞉pe. Dia꞉me. Hakoko lia꞉peke na ya꞉la꞉me. Ekipekepe. Ipikana꞉ma꞉ mo hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepe. Dia꞉me. Ota꞉ hakoko lia꞉peke na ya꞉la꞉me. Ipikana꞉ma꞉ hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepate mo halima꞉ hone tulaasa꞉ ekina꞉ haena꞉ lelieke. \v 28 Nika꞉ handa꞉ witoloma꞉ pita꞉ dupa. Hali ma꞉nda꞉ma꞉ ipika꞉ hone tulaasa꞉ ekima꞉ homeketa꞉ Koda꞉ma꞉ ipiki yaapo tikitiki yao haena꞉ lelieke. Koto halima꞉ hande Lo Pimanu opua pita꞉la꞉ ekima꞉ na haena꞉ lelieke. \v 29 Pate Koda꞉ta꞉ Diu wanda꞉halina꞉ Koda꞉ homeke hala꞉pe. O Diendaili wanda꞉halina꞉ Koda꞉ make hala꞉pe. Aowe ika꞉ Koda꞉ make hala꞉me. \v 30 Koda꞉ta꞉ homeke hata꞉ta꞉ mo Diu wanda꞉halima꞉ ika꞉ hone tulaaseme ekina꞉ make mo Diendaili wanda꞉halima꞉ ika꞉ hone tulaaseme ekina꞉ make ipiki yaapo tikitiki yao haena꞉ lelieke. \v 31 Koto pa꞉la꞉ ekina꞉ mo hande hone tulaasa꞉ ekima꞉ hande Lo Pimanu paeyaasoma꞉pe. Ota꞉ dia꞉me. Hande Lo Pimanu nikana꞉ma꞉ mea a꞉meiyaasoma꞉me. \c 4 \s1 Eipoloha꞉ma꞉ma꞉ Koda꞉ pa꞉ta꞉ hone tulao hayekeeki \p \v 1 Eipoloha꞉ma꞉ta꞉ Diu wanda꞉halina꞉ titina꞉ halie. Koto pa꞉la꞉ ekina꞉ nikana꞉ma꞉ eki pi lomana꞉pe. \v 2 Koda꞉ma꞉ta꞉ Eipoloha꞉ma꞉ma꞉ piekeeki manuma꞉ Koda꞉ pa꞉ta꞉ tikitiki yao haena꞉ lea꞉ka꞉na꞉ yoluta꞉ kota꞉ Eipoloha꞉ma꞉ma꞉ ipika꞉ hakoko lia꞉peke yolo pia꞉me. Kutu pulu pia꞉pate ipikana꞉ma꞉ Koda꞉ pa꞉ta꞉ hata꞉ hakoko lia꞉peke na ya꞉la꞉me. \v 3 Baibolo bukana꞉ wape pa꞉la꞉ ekita꞉ dupa Eipoloha꞉ma꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me. \v 4 Hali homeke a꞉nda꞉ma꞉ e pokaeya꞉ka꞉na꞉ta꞉ ipika꞉ yenki mulu pa꞉la꞉pate koto milia꞉ yenkita꞉ pa hameke na hala꞉la꞉ ekie. Dia꞉me pa ipika꞉ e pokaeyeke ekina꞉ halolo pita꞉la꞉me. \v 5 Koto pa꞉la꞉pate hali homeke a꞉nda꞉ma꞉ ipika꞉ pieke ekimanu hone na wiki pa Koda꞉ pa꞉ta꞉ hone tulao haya꞉ka꞉na꞉ta꞉ kota꞉ Koda꞉ma꞉ koto halima꞉ ipiki pa꞉ta꞉ hone tulaala꞉eki handaata꞉ pa hoke hau pa꞉la꞉ hali kone ameta꞉ eki a꞉nda꞉ na piki hali hala꞉me laa lelieke. Kutu pita꞉la꞉ ekima꞉ Koda꞉ma꞉ koto halita꞉ I̱ pa꞉ta꞉ tikitiki yao haena꞉ lolueke la꞉la꞉me. \v 6 Kutu pita꞉la꞉eki make Deipidima꞉ la꞉la꞉me. Hali homeke a꞉nda꞉ ipika꞉ pieke ekimanu hone na witolo hata꞉ Koda꞉ma꞉ pa mo someta꞉ tikitiki yao haena꞉ lea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa paleke hala꞉ ekina꞉ Deipidima꞉ leeke ekita꞉ dupa wape pa꞉la꞉me. \q1 \v 7 Hali ma꞉nda꞉ta꞉ Koda꞉na꞉ pi ula꞉ ekimanu yamba꞉la꞉la꞉ ekimanu Koda꞉ma꞉ pa paeyaowaala꞉ ekina꞉ta꞉ koto halima꞉ta꞉ ta꞉na꞉ma꞉ homa hao hapeke ya꞉la꞉me. \q1 \v 8 Hali ma꞉nda꞉ta꞉ ipika꞉ hoke hau pa꞉la꞉ ekimanu Koda꞉ma꞉ na yata꞉pea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa hapeke ya꞉la꞉me laa wape pa꞉la꞉me. \b \p \v 9 Do hande Deipidima꞉ la꞉la꞉ ta꞉na꞉ma꞉ homa hapeke ekita꞉ pa mo sekemesaisi hau pea haleme haliweki pa꞉ta꞉ homeke la꞉la꞉pe. Dia꞉me. Mo sekemesaisi hau na piki haleme haliweki pa꞉ta꞉ make la꞉la꞉me. Hande Baibolo bukana꞉ wape pa꞉la꞉eki loa꞉ tupa꞉ Eipoloha꞉ma꞉ Koda꞉ pa꞉ta꞉ hone tulao hayekeme. Koda꞉ma꞉ta꞉ Eipoloha꞉ma꞉ ipika꞉ hone tulao hayeke ekina꞉ ipikita꞉ tikitiki yao haena꞉ leekeme wape pa꞉la꞉me. \v 10 Koto hauta꞉ Eipoloha꞉ma꞉ pa꞉ta꞉ hando dina꞉ piekepe. Eipoloha꞉ma꞉ sekemesaisi hau pea haena꞉ piekepe o na piki haena꞉ piekepe. Na piki haena꞉ kone piekeme. \v 11 Mo sekemesaisi piki hauta꞉ wetepe nane piekeme. Kutupata꞉ ipika꞉ sekemesaisi hau pieke ekita꞉ ti witolo tombo dupa piekeme. Ipikita꞉ sekemesaisi hau na piki hata꞉ kone Koda꞉ pa꞉ta꞉ hone tulao hayeke ekina꞉ Koda꞉ma꞉ ipiki pa꞉ta꞉ tikitiki yao haena꞉ leeke ekita꞉ ti witolo tombo wiekeme. Kutu pa꞉la꞉ ekina꞉ haliweki paeyaoma꞉ sekemesaisi hau na piki hata꞉ kone Koda꞉ pa꞉ta꞉ hone tulao haleme ekina꞉ Koda꞉ma꞉ ipiki pa꞉ta꞉ tikitiki yao haena꞉ la꞉la꞉ haliwekina꞉ apa꞉ta꞉ Eipoloha꞉ma꞉ ika꞉ apa꞉ hala꞉me. \v 12 Kutu pa꞉la꞉pate Eipoloha꞉ma꞉ ipikita꞉ mo sekemesaisi hau pea haleme haliwekina꞉ apa꞉ make hala꞉me. Iki sekemesaisi hau pea haleme ekina꞉ dia꞉ya꞉la꞉pate hande nika꞉ apa꞉ Eipoloha꞉ma꞉ma꞉ta꞉ sekemesaisi hau na piki hata꞉ kone hone tulaeyeke tupa꞉ ikana꞉ma꞉ make hone tulaaseme ekina꞉ loa꞉me. \s1 Koda꞉na꞉ pi la꞉ ula꞉ ekita꞉ mo hone tulaasa꞉eki pa꞉ta꞉ yama꞉ mea꞉peke ya꞉la꞉eki \p \v 13 Koda꞉ma꞉ta꞉ Eipoloha꞉ma꞉ pa꞉ta꞉ alota꞉ Do kenke paeyaota꞉ neke pa꞉ta꞉ make naka꞉ hoki nane halo peleme wanda꞉hali pa꞉ta꞉ make kulueke laa la꞉ witolo leekeme. Koda꞉ma꞉ do pi la꞉ wieke ekita꞉ Eipoloha꞉ma꞉ma꞉ hande Lo Pimanu opua pu hayeke ekina꞉ na leekeme. Eipoloha꞉ma꞉ta꞉ hone tulao hata꞉ Koda꞉ pa꞉ta꞉ tikitiki yao hayeke ekina꞉ leekeme. \v 14 Hande Lo Pimanu opua pu haleme wanda꞉halima꞉ homeke Koda꞉na꞉ la꞉ ula꞉eki mimika꞉na꞉ta꞉ kota꞉ Koda꞉ pa꞉ta꞉ hone tulaasa꞉ wanda꞉halita꞉ pa hameke kone hone tulaasememe. Kutupa Koda꞉na꞉ pi la꞉ ula꞉eki make yaapeke na ya꞉la꞉me. \v 15 Hande Lo Pimanu opua oto pa꞉ta꞉ haleme wanda꞉hali pa꞉ta꞉ wetepena꞉ta꞉ Koda꞉ma꞉ mineke pankolo hata꞉ iki ame̱le̱ pi yokaalu pilieke. Kutu pulu pa꞉la꞉pate hali ma꞉nda꞉ma꞉ wanda꞉hali pa꞉ta꞉ pi wita꞉la꞉eki ma꞉nda꞉ na la halea꞉ka꞉na꞉ta꞉ kota꞉ wetepena꞉ iki pa꞉ta꞉ pi ula꞉eki yambelelememe pi lapeke na ya꞉la꞉me. \p \v 16 Eipoloha꞉ma꞉ Koda꞉ pa꞉ta꞉ hone tulaeyeke ekina꞉ Koda꞉ma꞉ hande pi la꞉ wiekeme. Koda꞉ma꞉ta꞉ Eipoloha꞉ma꞉ ipika꞉ hoki nane halo pimiki wanda꞉hali paeyao pa꞉ta꞉ hande la꞉ wieke pita꞉ iki pa꞉ta꞉ pa hameke halena꞉yeke loa꞉me. Hande Lo Pimanu oto pa꞉ta꞉ haleme wanda꞉hali pa꞉ta꞉ homeke dia꞉ya꞉la꞉pate hande Eipoloha꞉ma꞉ma꞉ pieke tupa꞉ Koda꞉ pa꞉ta꞉ hone tulao haleme wanda꞉hali pa꞉ta꞉ make hala꞉la꞉me. Eipoloha꞉ma꞉ta꞉ niki paeyaona꞉ apa꞉ hala꞉me. \v 17 Hande Baibolo bukana꞉ wape pa꞉la꞉ tupa꞉ Neketa꞉ tutu ta꞉ta꞉ ta꞉ta꞉ wanda꞉hali paeyaona꞉ apa꞉ halena꞉ lolome laa leeke ekina꞉ opua Eipoloha꞉ma꞉ Koda꞉ pa꞉ta꞉ hone tulao hayekeme. Koto ekina꞉ Koda꞉ma꞉ kone koto pi la꞉ wieke ekita꞉ ota꞉ yaeyekeme. Do hauta꞉ mo amba꞉ homemeke wanda꞉hali mea da꞉taapekeeki make mo amba꞉ na haemeke alemanu ipikana꞉ma꞉ pima꞉ alo hata꞉ kone mea haena꞉ leekeeki make koto Koda꞉ma꞉ta꞉ do hau make pu hala꞉me. \v 18 Eipoloha꞉ma꞉ma꞉ mo hande la꞉ wieke pina꞉ yaapeke pota꞉ ma꞉nda꞉ na handeekepate kone ipikana꞉ma꞉ hone tulao hayeke ekina꞉ta꞉ mo tutu ta꞉ta꞉ ta꞉ta꞉ wanda꞉halina꞉ apa꞉ hayekeme. Hande Baibolo bukana꞉ wape pa꞉la꞉ tupa꞉ Naka꞉ hoki nane halo peleme wanda꞉hali wopu halimikie wape pa꞉la꞉me. \v 19 Ipikana꞉ma꞉ta꞉ ipika꞉ bapimanu 100 tupa꞉ hata꞉ta꞉ Setama꞉ weki mendia꞉peke na yeekeeki make ipika꞉ loke ankolopa꞉ pamba꞉ pamba꞉ piekeeki make hone witolo hata꞉ kone ipika꞉ hone tulaeyeke ekita꞉ na kiti yokaeyekeme. \v 20 Koda꞉ma꞉ la꞉ wieke pita꞉ ipikana꞉ma꞉ hone ti na yokeke hone tulatiki pu hao hayekeme. Kutu pia꞉tiki pu hayeke ekima꞉ da̱o̱la hata꞉ Koda꞉na꞉ pi laatiki pu hayekeme. \v 21 Eipoloha꞉ma꞉ ipikana꞉ma꞉ hone lenkene pa witolota꞉ Koda꞉ma꞉ la꞉ ula꞉ pita꞉ ota꞉ yaapeke ya꞉la꞉me hone wiekeme. \v 22 Kutu pieke handaa Koda꞉ma꞉ Eipoloha꞉ma꞉ma꞉ hone tulaeyekeeki hando haota꞉ ipiki yaapo tikitiki yao haena꞉ leekeme. \v 23 Mo hande Ipiki yaapo tikitiki yao haena꞉ leekeme pita꞉ Eipoloha꞉ma꞉ pa꞉ta꞉ homeke wape na pa꞉la꞉me. \v 24 Niki pa꞉ta꞉ tonka꞉na꞉ wape pa꞉la꞉me. Nikana꞉ma꞉ta꞉ hande nika꞉ Tekehali Yesu homeekepate kone mea da꞉taeyeke Koda꞉ pa꞉ta꞉ hone tulao haloma꞉ ekina꞉ nikita꞉ ipiki yaapo tikitiki yao homono la꞉la꞉me. \v 25 Nika꞉ hoke hauna꞉ Koda꞉ma꞉ Yesu homolo epena꞉ tapaeyekeme. Kutupa nikita꞉ ipiki yaapo tikitiki yao hamonoyeke Yesu paa mea da꞉taeyekeme. \c 5 \s1 Koda꞉ma꞉ nikita꞉ ipiki yaapo tikitiki yao hamono la꞉la꞉eki \p \v 1 Nika꞉ hone tulaaloma꞉ ekima꞉ Koda꞉ma꞉ nikita꞉ ipiki yaapo tikitiki hamono la꞉la꞉me. Kutu pa꞉leke handa Koda꞉ma꞉ nika꞉ puki lopao ipiki ame̱le̱ hamono la꞉la꞉me. Nika꞉ Tekehali Yesu Ketisoma꞉ pa꞉la꞉ ekina꞉ pa꞉la꞉me. \v 2 Nikana꞉ma꞉ Yesu Ketiso pa꞉ta꞉ hone tulaaloma꞉ ekina꞉ ipikana꞉ma꞉ Koda꞉ma꞉ niki pa꞉ta꞉ pa hameke a꞉ta꞉ma꞉ homa꞉la꞉eki handomono la꞉la꞉me. Kutupa ameta꞉ koto tupa꞉ haloma꞉me. Koto ekina꞉ Koda꞉ma꞉ ipika꞉ pa̱a̱ pa꞉la꞉eki niki pa꞉ta꞉ teli teli peaalo pa꞉la꞉eki hone ti lao hata꞉ ta꞉na꞉ma꞉ homa haloma꞉me. \v 3 Koto ekina꞉ homeke dia꞉ya꞉la꞉pate niki pa꞉ta꞉ ka꞉nda꞉ma꞉ homa꞉la꞉eki ipula꞉ ekina꞉ make ta꞉na꞉ma꞉ homa hapeke ya꞉la꞉me. Niki pa꞉ta꞉ ka꞉nda꞉ma꞉ homa꞉la꞉ ekimanu epea꞉ka꞉na꞉ta꞉ kota꞉ nikita꞉ na꞉pa na wiki da̱o̱la halo poloma꞉eki ipulu pita꞉la꞉me. \v 4 Kutupa nikita꞉ la handa꞉la꞉eki epena꞉ kone da̱o̱la haoma꞉ka꞉na꞉ta꞉ Koda꞉ma꞉ ota꞉ halie laa lelieke. Kotoeki lolo pa꞉la꞉ ekina꞉ nikana꞉ma꞉ hone ti lao halumeke. \v 5 Nikana꞉ma꞉ koto tupa꞉ hone ti lao haoma꞉ka꞉na꞉ta꞉ nikita꞉ hoto ma꞉nda꞉ a꞉nda꞉ olopuniao na halumeke. Koda꞉ma꞉ niki pa꞉ta꞉ pukima꞉ wotu homa꞉leke handa loa꞉me. Ipikana꞉ma꞉ kita꞉la꞉ Holi Sipitidima꞉ kone nika꞉ puki pa꞉ta꞉ pita꞉ peaasa꞉me. \p \v 6 Nikita꞉ honkopu na hake hamono Koda꞉ma꞉ la꞉ wieke natena꞉ kone niki hoke hau pu haloma꞉ wanda꞉hali nika꞉eki peaaso hata꞉ Ketiso ipiki homeekeme. \v 7 Hali ma꞉nda꞉ma꞉ mo tikitiki hau piki halina꞉eki peaaso hata꞉ homa꞉peke ya꞉la꞉ ekita꞉ ka꞉nda꞉ pilieke. Pate hali ma꞉nda꞉ma꞉ mo epeke hau piki halina꞉eki peaaso hata꞉ homa꞉peke ya꞉lia꞉pe mata꞉la꞉me. \v 8 Kutu pulu pa꞉la꞉pate Koda꞉ma꞉ niki pa꞉ta꞉ ipika꞉ pukima꞉ wopu homa꞉la꞉ ekita꞉ peneme yao yaala꞉ ekita꞉ dupa. Nikita꞉ hoke hau pu haloma꞉ wanda꞉hali hamono kone Ketisota꞉ nika꞉eki peaaso hata꞉ homeekeme. \v 9 Ipika꞉ homeeke ekima꞉ Koda꞉ma꞉ nikita꞉ ipiki yaapo tikitiki yao hamono la꞉la꞉me. Koto pa꞉la꞉ ekina꞉ ipikana꞉ma꞉ niki wopu tamba꞉ mulu pa꞉la꞉ ekina꞉ Koda꞉ma꞉ mineke pankolo pa꞉la꞉ ekita꞉ hoke yenki halo pa꞉la꞉ ekita꞉ na handulumeke. \v 10 Amba꞉ nikita꞉ Koda꞉ ipika꞉ a꞉nda꞉ tunkuliki wanda꞉hali haoma꞉pate ipika꞉ Eiyekena꞉ homeeke ekima꞉ nikita꞉ ipika꞉ yankekesunu hamono la꞉la꞉me. Ame nikita꞉ Koda꞉ ipika꞉ yankekesunu haloma꞉ ekina꞉ Ketiso ipika꞉ da꞉ta hala꞉ ekima꞉ Koda꞉ma꞉ niki wotu tamba꞉ milieke. \v 11 Koto hau homeke dia꞉me. Nika꞉ Tekehali Yesu Ketisoma꞉ nikita꞉ Koda꞉ ipika꞉ yankekesunu hamono la꞉la꞉ ekina꞉ Koda꞉ pa꞉ta꞉ ta꞉na꞉ma꞉ homo haloma꞉me. \s1 A꞉da꞉ma꞉ pita꞉ Ketiso yaapo \p \v 12 Hali homekema꞉ pa꞉la꞉ ekima꞉ kone niki kenke wanda꞉hali paeyaoma꞉ hoke hau pu haloma꞉me. Ipika꞉ hoke hau pieke ekina꞉ homeekeme. Kutupa kenke wanda꞉hali paeyaoma꞉ make hoke hau pu haloma꞉ ekina꞉ homolo poloma꞉eki moloma꞉me. \v 13 Mosesima꞉ mo hande Lo Pimanu a̱i̱ na opieke dina꞉ta꞉ kenke wanda꞉halima꞉ hoke hau pu haemekepate pi ula꞉ ekimanu dia꞉ yolo hata꞉ kota꞉ wanda꞉halima꞉ hoke hau pu haleme ekimanu wotu handa yata꞉pa꞉ tapaapeke na yeekeme. \v 14 Koto pa꞉la꞉pate A꞉da꞉ma꞉ hao Mosesi halo ipu pea koto tukiki pa꞉ta꞉ haemeke wanda꞉halita꞉ paeyao homo paemekeme. Hande Koda꞉ma꞉ A꞉da꞉ma꞉ pa꞉ta꞉ leeke pi A꞉da꞉ma꞉ma꞉ na opieke tupa꞉ A꞉da꞉ma꞉ma꞉ piekeeki na pimiki wanda꞉hali kone paeyao homemekeme. A꞉da꞉ma꞉ta꞉ hali ma꞉nda꞉ wetepena꞉ epolo pieke hali tupa꞉ hayekeme. \p \v 15 Koto tupa꞉ hayekepate Koda꞉ma꞉ pa hameke kita꞉la꞉eki pita꞉ A꞉da꞉ma꞉ma꞉ hoke hau piekeeki yaapota꞉ ta꞉ta꞉ pu alu pa꞉la꞉ ekina꞉ mo hande hali yaapota꞉ mandake tupa꞉ na halo pelepeme. Mo hande hali homekema꞉ hoke hau pieke ekina꞉ wanda꞉hali paeyaota꞉ homemeke ekita꞉ nikana꞉ma꞉ hone uluma꞉me. Koto pa꞉la꞉pate Koda꞉ma꞉ pa a꞉ta꞉ma꞉ homo hala꞉eki wala꞉la꞉ hauta꞉ ota꞉ tiekee. Mo hande hali homeke Yesu Ketisoma꞉ pa a꞉ta꞉ma꞉ homeeke ekima꞉ Koda꞉ma꞉ta꞉ wanda꞉hali paeyao pa꞉ta꞉ ipika꞉ pa hameke kita꞉la꞉eki walo hala꞉me. \v 16 Kutupa make Koda꞉ma꞉ wanda꞉hali pa꞉ta꞉ ku hala꞉eki pita꞉ mo hande hali homekema꞉ hoke hau piekeeki yaapota꞉ ota꞉ ta꞉ta꞉ pu alu pelepeme. A꞉da꞉ma꞉ma꞉ hoke hau pieke handaata꞉ Koda꞉ma꞉ ipiki pa꞉ta꞉ alota꞉ Neketa꞉ ketete peleme la leekeme. Koto leekepate wanda꞉hali paeyaoma꞉ hoke hau pelemepate Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ Ikita꞉ ketete na peleme wanda꞉hali halememe la ala꞉me. \v 17 Mo hande hali homekema꞉ hoke hau pieke handa homa꞉la꞉ ekita꞉ honkopu hao wanda꞉hali paeyao lu tombuao ula꞉ ekita꞉ nikana꞉ma꞉ handoloma꞉me. Koto pa꞉la꞉pate mo hande hali homeke Yesu Ketisoma꞉ pieke ekita꞉ ota꞉ hone mateke some tieke pa꞉la꞉me. Koda꞉ma꞉ pa hameke a꞉ta꞉ma꞉ wopu homa꞉la꞉eki make ipiki yaapo tikitiki yao hamono la kita꞉la꞉eki make kotoeki yaapo moloma꞉ wanda꞉halima꞉ta꞉ Ketisoma꞉ peaala꞉ ekina꞉ da꞉ta hata꞉ honkopu hao halumeke. \p \v 18 Koto ekina꞉ mo hande hali homekema꞉ hoke hau pieke ekina꞉ wanda꞉hali niki paeyaoma꞉ hoke yenki mea꞉peke ya꞉la꞉me. Koto tupa꞉ kone mo hande hali homeke ma꞉nda꞉ma꞉ tikitiki hau pieke ekina꞉ Koda꞉ma꞉ wanda꞉hali niki paeyao ka꞉la꞉pa꞉ tapao da꞉ta hao hamono lo hala꞉me. \v 19 Kutupa make mo hande hali homekema꞉ Koda꞉na꞉ pi na opieke ekina꞉ wanda꞉hali woputa꞉ hoke hau poloma꞉ wanda꞉hali haloma꞉me. Koto tupa꞉ kone mo hande hali homeke ma꞉nda꞉ma꞉ Koda꞉na꞉ pi opua pieke ekina꞉ Koda꞉ma꞉ wanda꞉hali wopu ipiki yaapo tikitiki yao hamono lo hala꞉me. \p \v 20 Hande Lo Pi manuta꞉ wanda꞉halima꞉ hao hoeyaaseme ekimanu daeyaena꞉yeke Koda꞉ma꞉ wetepena꞉ Mosesi pa꞉ta꞉ la haleekeme. Kutu piekepate hoke haumanu daeya꞉tia peekepate Koda꞉ma꞉ pa hameke a꞉ta꞉ma꞉ homa꞉la꞉eki tiekema꞉ daeya꞉tia pulu hata꞉ lu ankulala꞉me. \v 21 Koto ekina꞉ wanda꞉hali paeyao homolo puma꞉ ekina꞉ hoke hau pita꞉la꞉eki titipu wotu piekeme. Koto tupa꞉ kone Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ nikita꞉ ipiki yaapo tikitiki yao hamono laata꞉ da꞉ta hao hamono la꞉la꞉me. Koto pa꞉la꞉ ekima꞉ Koda꞉ ipika꞉ pa hameke a꞉ta꞉ma꞉ homa꞉la꞉eki titipu wopu pa꞉la꞉eki peneme yao wala꞉la꞉me. Kutupa koto pa꞉la꞉ ekita꞉ Koda꞉ma꞉ nika꞉ Tekehali Yesu Ketisoma꞉ peaena꞉ leekeme. \c 6 \s1 Nikita꞉ Ketiso yaapo ta꞉ma꞉ni pea da꞉ta haloma꞉eki \p \v 1 Koto poloma꞉ ekina꞉ nikana꞉ma꞉ eki pi loluma꞉pe. Koda꞉ma꞉ pa hameke a꞉ta꞉ma꞉ homa꞉la꞉eki daeya꞉tia pena꞉yeke nikana꞉ma꞉ hoke haumanu pa pu tia pomana꞉pe. \v 2 A꞉pa꞉e. Dia꞉me. Hoke hau pita꞉la꞉eki pa꞉ta꞉ nikita꞉ amba꞉ homoma꞉me. Ekipeke paa putia pua꞉tiki pumana꞉pe. \v 3 Do pa꞉la꞉ ekita꞉ hone na witelemepe. Yesu Ketiso yaapo ta꞉ma꞉ni pea hata꞉ bapitaisi puma꞉ pita꞉ta꞉ ipika꞉ homeeke ekina꞉ make ta꞉ma꞉ni pea hata꞉ puma꞉me. \v 4 Koto bapitaisi puma꞉ ekita꞉ ipiki yaapo mandakena꞉ homa pa lapa꞉ pa꞉ta꞉ make mandake uma꞉me. Panake hau pu hata꞉ haluekema꞉ bapitaisi puma꞉me. Hande nika꞉ Apa꞉ma꞉ ipika꞉ honkopu hala꞉eki epekema꞉ Ketiso paa mea da꞉taeyeke tupa꞉ pitoloma꞉me. \p \v 5 Nikita꞉ ipika꞉ homeeke ekina꞉ ipiki ame̱le̱ mandakena꞉ homomeke handaata꞉ koto tupa꞉ kone Koda꞉ma꞉ ipiki mea da꞉taeyeke ekima꞉ niki make ipiki ame̱le̱ mandakena꞉ hamonoyeke mea da꞉taalieke. \v 6 Doeki make hone witoloma꞉me. Amba꞉ niki hao hoeyaoma꞉ ekita꞉ hande a꞉ka꞉tei wape piki tina꞉ Yesu ame̱le̱ mandakena꞉ lia homeekeme. Nikana꞉ma꞉ hoke hau puluekema꞉ hone wotu pa꞉la꞉ ekimanu Koda꞉ma꞉ hoeyaaluekema꞉ pa꞉la꞉me. Kutupa hoke hau pita꞉la꞉ ekima꞉ niki paa a꞉nda꞉ na lu tombuaena꞉yeke pa꞉la꞉me. \v 7 Hali ma꞉nda꞉ a꞉nda꞉ homea꞉ka꞉na꞉ta꞉ kota꞉ mo hoke hauma꞉ koto halita꞉ paa lu tumbaapeke na ya꞉la꞉me. \v 8 Nikita꞉ Ketiso homeeke ekita꞉ ipiki ame̱le̱ mandakena꞉ homomeke handa nika꞉ hone tulaasoma꞉ ekita꞉ dupa uluma꞉me. Ipiki ame̱le̱ hao halumeke hone witoloma꞉me. \v 9 Ketisota꞉ homeekepate Koda꞉ma꞉ ipiki paa mea da꞉taeyeketa꞉ paa na homa꞉peke yekeeki nikana꞉ma꞉ hone witoloma꞉me. Homaasa꞉ ekima꞉ honkopu hao Ketiso ipiki pa꞉ta꞉ pa eki a꞉nda꞉ paa pea꞉peke na ya꞉la꞉me. \v 10 Ketiso ipika꞉ homeeke ekita꞉ dupa. Hoto homeke pita꞉ kone ipiki homeekepate hoke hau pita꞉la꞉ ekina꞉ wele pita꞉la꞉ ekita꞉ paeyaeyekeme. Kutupa ame ipiki hake hauta꞉ Koda꞉ yaapo mandakena꞉ halepeme. \v 11 Koto pa꞉la꞉ tupa꞉ ikana꞉ma꞉ta꞉ ika꞉ kone hone dupa wipe. Niki make homoloma꞉me laa hone wipe. Hoke hau pita꞉la꞉ ekina꞉ wele pita꞉la꞉ ekima꞉ iki pa꞉ta꞉ eki a꞉nda꞉ pea꞉peke na ya꞉la꞉ ekina꞉ loa꞉me. Koto tupa꞉ halemepate Yesu Ketiso yaapo ta꞉ma꞉ni pea haleme ekina꞉ Koda꞉ yaapo mandakena꞉ da꞉ta halememe. \p \v 12 Ika꞉ loke tieke paeyaona꞉ hoke hone u tiaasa꞉ ekimanu pa putia pulu hamono hoke hau pita꞉la꞉ ekima꞉ ika꞉ homa꞉peke ya꞉la꞉ loke tieke paeyao lu tombuaasa꞉me. Kutu pa꞉la꞉pate koto hau manuma꞉ iki paa na lu tombuaena꞉ lapa꞉pekema. \v 13 Ika꞉ lokena꞉ haleme alemanu ma꞉nda꞉ta꞉ hoke hau pina꞉ na lapa꞉peke. Dia꞉me. Homa paa da꞉ta a꞉pa hala꞉ wanda꞉hali leke hata꞉ ika꞉ ika꞉ kone Koda꞉ pa꞉ta꞉ hala꞉pa꞉peke. Tikitiki haumanu pina꞉yeke ika꞉ loke tieke paeyao Koda꞉ pa꞉ta꞉ hala꞉pa꞉peke. \v 14 Hande Lo Pi manuna꞉ dupa꞉pe laa wala꞉la꞉eki ika꞉ wenoko tikitikina꞉ na mea wikita꞉ hande Koda꞉na꞉ pa a꞉ta꞉ma꞉ homa꞉la꞉eki homeke ika꞉ wenoko tikitikina꞉ mea wina꞉ aleme ekina꞉ kota꞉ hoke hau pita꞉la꞉ ekima꞉ iki paa a꞉nda꞉ na lu tombuaena꞉ lapa꞉pekema. \s1 Nikana꞉ma꞉ e pokaaso hata꞉ tikitiki hau ota꞉ pea꞉pekeeki \p \v 15 Koto ekina꞉ eki pumana꞉pe. Hande Lo Pi manuma꞉ dupa꞉pe laa wala꞉la꞉eki nika꞉ wenokona꞉ na wiki hande Koda꞉na꞉ pa a꞉ta꞉ma꞉ homa꞉la꞉eki homeke nika꞉ wenokona꞉ wina꞉ aloma꞉ ekina꞉ hoke hau pumana꞉pe. A꞉pa꞉e. Dia꞉me. \v 16 Do ekita꞉ ikana꞉ma꞉ hone na witelemepe. Koto a꞉nda꞉ ikana꞉ma꞉ ika꞉ kone hali ma꞉nda꞉ pa꞉ta꞉ ta̱la̱꞉ liao hata꞉ ipika꞉ e pa hameke pokaaseme wanda꞉hali hamena꞉ lemeka꞉na꞉ta꞉ kota꞉ ikita꞉ mo hande teke halina꞉ pi opitolo hata꞉ ipika꞉ pa hameke e pokaaseme wanda꞉hali halimikie. Hoke hau pita꞉la꞉eki ikana꞉ma꞉ opu haemeka꞉na꞉ta꞉ kota꞉ homa꞉la꞉eki milimikie. Koda꞉na꞉ pi opu haemeka꞉na꞉ta꞉ kota꞉ ikita꞉ ipiki yaapo tikitiki yao hamina꞉ lelieke. \v 17 Koda꞉ pa꞉ta꞉ keiyae pi lomana꞉e. Do ekina꞉yeke loa꞉me. Ikita꞉ amba꞉ hone pa꞉la꞉eki pitolo hata꞉ hoke hau pu haemeke ekina꞉ pa hameke e pokaaseme haliweki leke haemekepate ikana꞉ma꞉ hande waleekeeki opua handa꞉ wimiki ota꞉ pimanu wotu pimikime. \v 18 Hoke hauna꞉ wele pita꞉la꞉ ekina꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa iki ameta꞉ tikitiki haumanu puluekema꞉ Koda꞉ ipika꞉ pa hameke e pokaaseme wanda꞉hali halememe. \v 19 Ika꞉ hone a̱i̱ na tikitiki yao wimi ekina꞉ I̱ma꞉ da wanda꞉halima꞉ lo haleme tupa꞉ alome. Amba꞉ ikita꞉ hoke hoke haumanu paeyao puluekema꞉ pa hameke e pokaaseme wanda꞉hali leke hata꞉ suseke haasa꞉ haumanu make hoke haumanu make ika꞉ hone wia wenoko tikitikina꞉ mea wia hata꞉ pu haemekeme. Koto tupa꞉ kone ame ikita꞉ yakopiki haumanu puluekema꞉ yeke koto hauna꞉ e pa hameke pokaaseme wanda꞉hali leke hata꞉ tikitiki haumanu ika꞉ hone wia wenoko tikitikina꞉ mea wia hata꞉ pu hapa꞉peke ya꞉la꞉me. \p \v 20 Ikita꞉ e pa hameke pokaaseme wanda꞉hali leke hata꞉ hoke haumanu pu haemeke dina꞉ta꞉ Koda꞉na꞉ tikitiki haumanu puemena꞉yeke ma꞉nda꞉ma꞉ iki na su tiaeyekeme. \v 21 Kutupu haeme hau manuma꞉ ameta꞉ iki yaala꞉ma꞉ homelemepate iki epeaaso na pia꞉me. Kutu piki hau manuma꞉ta꞉ wanda꞉hali homao halememe. \v 22 Kutupa halemepate hoke hauna꞉ wele pita꞉la꞉ ekima꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa ikita꞉ ipika꞉ pa hameke e pokaaseme wanda꞉hali leke halememe. Koto peleme ekina꞉ ikana꞉ma꞉ ika꞉ loke tieke paeyao ipiki pa꞉ta꞉ halaata꞉ deto hala꞉eki make milimikie. \v 23 Hoke hau piteleme ekina꞉ mea꞉peke yenkita꞉ homa꞉la꞉ekie. Kutu pa꞉la꞉pate Koda꞉ma꞉ pa hameke kita꞉la꞉ ekita꞉ da꞉ta hao hala꞉ekie. Nika꞉ Tekehali Yesu Ketiso yaapo ta꞉ma꞉ni pea hamono kita꞉la꞉me. \c 7 \s1 Wanda꞉ mina꞉la꞉ hau \p \v 1 Kame tonuo. Ikana꞉ma꞉ mo hande Lo Pimanu opueleme ekina꞉ I̱ma꞉ ame do lolo polo pita꞉ hone wilimikie. Hali ma꞉nda꞉ma꞉ta꞉ pa hata꞉ta꞉ mo hande Lo Pimanu dupie ala꞉ ekita꞉ opua꞉peke ya꞉la꞉me. \v 2 Do tupa꞉ make hali pa꞉la꞉ wanda꞉ma꞉ta꞉ haliki pa haya꞉ka꞉na꞉ta꞉ kota꞉ mo hande Lo Pi manuma꞉ alota꞉ Naka꞉ haliki pa꞉ta꞉ hao hapeke la꞉la꞉me. Koto la꞉la꞉pate mo haliki homea꞉ka꞉na꞉ta꞉ mo hande Lo Pi manuma꞉ alota꞉ Naka꞉ honumake halipikie la꞉la꞉me. \v 3 Koto ekina꞉ haliki pa haena꞉ kone hali ma꞉nda꞉ pea꞉ka꞉na꞉ta꞉ kota꞉ siaka꞉ hali wanda꞉e lelimikie. Koto lolo pelemepate ipika꞉ haliki homea꞉ka꞉na꞉ta꞉ kota꞉ mo hande Lo Pi manuma꞉ la꞉la꞉ tupa꞉ ipika꞉ honumake halieke la꞉la꞉me. Koto tupa꞉ hata꞉ hali ma꞉nda꞉ pea꞉ka꞉na꞉ta꞉ kota꞉ siaka꞉ na haasa꞉me. \v 4 Ya kame tonuo. Koto tupa꞉ iki pa꞉ta꞉ make ula꞉me. Ikita꞉ Ketiso ipika꞉ loke kone haleme ekina꞉ hande Lo Pimanu pa꞉ta꞉ ikita꞉ homolo hata꞉ pa ameta꞉ mo Koda꞉ma꞉ paa mea tiaeyeke halina꞉eki halememe. Koto ekita꞉ nikana꞉ma꞉ Koda꞉na꞉ epeke haumanu pu hamonoyeke pa꞉la꞉me. \v 5 Amba꞉ nikita꞉ nika꞉ hone pa꞉la꞉ ekimanu homeke pu haoma꞉ dina꞉ hande Lo Pi manuma꞉ta꞉ nikana꞉ma꞉ hoke hau peomonoyeke nika꞉ lokena꞉ hone pa꞉la꞉ ekimanu pu tiaaso haena꞉ niki homaapeke yeekeme. \v 6 Kutu piekepate nikita꞉ mo Lo Pi manuma꞉ amba꞉ mea tonkao wiekeeki pa꞉ta꞉ homomeke handaata꞉ ameta꞉ Koda꞉ma꞉ niki ka꞉la꞉pa꞉ ta꞉pao pa hamono la꞉la꞉me. Ame do pokoloma꞉ eta꞉ hande amba꞉ wape pea wieke Lo Pi manuma꞉ waleeke tupa꞉ na pokoloma꞉pate hande Sipitidima꞉ panakeeki wala꞉la꞉ tupa꞉ pokoloma꞉me. \s1 Hande Lo Pi manuma꞉ wanda꞉halima꞉ hoke hau pina꞉ lo hala꞉eki \p \v 7 Koto pa꞉la꞉ ekina꞉ nikana꞉ma꞉ eki pi loluma꞉pe. Hande Lo Pi manuta꞉ hokeekie loluma꞉pe. A꞉pa꞉e. Dia꞉me. Koto pa꞉la꞉pate hande Lo Pi manuma꞉ta꞉ I̱ma꞉ hoke hau pitoloeki handonoyeke pa꞉la꞉me. Hande Lo Pi manuma꞉ alota꞉ Ta꞉ta꞉na꞉ ale muluekema꞉ we na pamba꞉peke la꞉la꞉pate pa kutupiki pi na lea꞉ka꞉na꞉ yoluta꞉ mo ta꞉ta꞉na꞉ ale muluekema꞉ we pamba꞉la꞉ ekita꞉ I̱ma꞉ hone wopu na ulu pua꞉me. \v 8 Hoke hauma꞉ I̱ pa꞉ta꞉ hoke hone pa꞉la꞉ ekimanu u tiaalo pieke pota꞉ handa꞉ wiekeme. Mo hande pi ula꞉eki homeke handeteke hata꞉ pia꞉me. Lo Pimanu dia꞉ka꞉na꞉ta꞉ hoke hauta꞉ wele na pilieke. \v 9 Hande Lo Pimanu na opiki hata꞉ I̱ta꞉ da꞉ta haowa꞉pate pa mo pi ula꞉eki opua꞉ dina꞉ta꞉ hoke hau tiaeyeke ekima꞉ \v 10 I̱ta꞉ homono lea꞉me. Kutupata꞉ mo I̱ mea da꞉taapeke ya꞉la꞉ pi ula꞉ ekima꞉ kone I̱ homono lea꞉me. \v 11 Hoke hauma꞉ hande pi ula꞉eki handeteke hata꞉ I̱ makealo pieke pota꞉ handa꞉ wiekeme. Hoke hauma꞉ hande pi ula꞉ ekima꞉ makeao I̱ lu homaeya꞉me. \p \v 12 Koto ekina꞉ mo hande Lo Pi manuta꞉ yakopiki hau pa꞉la꞉ pimanue. Kutupa hande pi ula꞉eki ta꞉ta꞉ ta꞉ta꞉ piki ekita꞉ kotoeki make yako pikieki make tikitiki pikieki make epekeeki make ula꞉me. \v 13 Koto pa꞉la꞉ ekina꞉ hande epeke ekima꞉ta꞉ I̱ lu homaeya꞉pe. A꞉pa꞉e. Dia꞉me. Hoke hauma꞉ homeke pia꞉me. Hoke hauma꞉ta꞉ epekeeki mea kone ipika꞉ hoke hau teke wanda꞉halima꞉ peneme yao handena꞉yeke I̱ lu homaeya꞉me. Koto ekina꞉ hande pi ula꞉ ekima꞉ kone hoke hau pita꞉la꞉ ekita꞉ ota꞉ hokeeki kone wala꞉ tiaasa꞉me. \s1 Loke tukiki pa꞉ta꞉ kone a꞉nda꞉ pu alu pita꞉la꞉eki \p \v 14 Mo hande Lo Pi manuta꞉ Koda꞉ pa꞉ta꞉ kone epeekepate I̱ta꞉ homa꞉peke ya꞉la꞉ halie. I̱ma꞉ta꞉ pa hameke e pokaatiki pomina꞉la꞉ hali leke hata꞉ hoke hau pu halome. \v 15 I̱ma꞉ta꞉ ya pu haloeki hone wopu na ulume. Hone pa꞉la꞉eki na pu halopateta꞉ hone na pa꞉la꞉ ekimanu kone pu halome. \v 16 Yaka hone na pa꞉la꞉ ekimanu pu halo ekima꞉ta꞉ hande Lo Pimanu epekeekie hone witolo ekita꞉ peneme yao wala꞉la꞉me. \v 17 Koto ekina꞉ do I̱ma꞉ hande pu halo hauta꞉ yaka kone na pitolopate I̱ tukiki pa꞉ta꞉ ula꞉ hoke hauma꞉ kone pita꞉la꞉me. \v 18 I̱ tukiki pa꞉ta꞉ epekeeki ma꞉nda꞉ na pila꞉eki I̱ma꞉ hone witolome. I̱ tukiki pa꞉ta꞉ loa꞉ ekita꞉ I̱ta꞉ kenke hali hata꞉ loa꞉me. I̱ma꞉ta꞉ epeke ekimanu puluekema꞉ hone pa꞉la꞉pate I̱ma꞉ pea꞉peke na ya꞉la꞉me. \v 19 Epekeeki puluekema꞉ I̱ma꞉ hone pa꞉la꞉pate na pu halome. Hokeeki puluekema꞉ I̱ma꞉ hone na pa꞉la꞉pate paa pu halome. \v 20 I̱ma꞉ hone na pa꞉la꞉eki kone pu halo ekina꞉ I̱ma꞉ ya kone na pitolopate I̱ tukiki pa꞉ta꞉ ula꞉ hoke hauma꞉ kone pita꞉la꞉me. \p \v 21 Koto ekina꞉ I̱ pa꞉ta꞉ ula꞉ hau handa꞉ witolo ekita꞉ dupae. I̱ma꞉ta꞉ epekeeki puluekema꞉ hone pa꞉la꞉pate kone hoke hau pionoyeke yaka honema꞉ putiao hala꞉me. \v 22 Koda꞉na꞉ Lo Pimanu pa꞉ta꞉ yaka pukima꞉ ta꞉na꞉ma꞉ homolopate \v 23 hau ma꞉nda꞉ta꞉ I̱ pa꞉ta꞉ ula꞉eki handolome. Koto ekima꞉ta꞉ yaka honema꞉ Koda꞉na꞉ Lo Pimanu epekeekie laa hone witoloeki yaapo a꞉nda꞉ lu alu pu halepeme. Do hande I̱ pa꞉ta꞉ ula꞉ hauma꞉ koto ekima꞉ta꞉ I̱ma꞉ hoke hau piono pu tiaasa꞉ hauta꞉ do hande I̱ pa꞉ta꞉ ula꞉ hauma꞉ kone I̱ dipula hali leke mea lopao halome. \v 24 A꞉ta꞉e. I̱ pa꞉ta꞉ ta꞉na꞉ma꞉ homa꞉la꞉eki na pila꞉me. Do hande I̱ homaasa꞉ loke taapuna꞉ halo ekita꞉ epima꞉ I̱ tamba꞉ miliepe. \p \v 25 Koda꞉ pa꞉ta꞉ I̱ma꞉ keiyae pi alome. Ipikana꞉ma꞉ nika꞉ Tekehali Yesu Ketisoma꞉ I̱ tamba꞉ mina꞉ lolo pa꞉la꞉ ekina꞉ loa꞉me. Kota꞉ yaka haloeki dupa. I̱ma꞉ yaka kone Koda꞉na꞉ Lo Pimanu yaka hone wia halopate yaka lokena꞉ hone pa꞉la꞉eki manuma꞉ I̱ma꞉ hoke hau piono pu tiaasa꞉ hauna꞉eki peao halome. \c 8 \s1 Holi Sipitidi ame̱le̱ mandakena꞉ pominoloma꞉eki \p \v 1 Koto ekina꞉ Yesu Ketiso ame̱le̱ ta꞉ma꞉ni pea haloma꞉ wanda꞉hali pa꞉ta꞉ta꞉ ma꞉nda꞉ma꞉ hoke yenki kia꞉peke na ya꞉la꞉me. \v 2 Do ekina꞉yeke loa꞉me. Nikita꞉ Yesu Ketiso ame̱le̱ ta꞉ma꞉ni pea ota꞉ hamono la꞉la꞉ Sipitidita꞉ ipikana꞉ma꞉ kone I̱ handeteke hata꞉ walo hala꞉ ekima꞉ta꞉ mo hoke hau pita꞉ homa꞉la꞉eki yaapo pu tiaasa꞉ hauma꞉ tonka pelia hala꞉eki ka꞉la꞉pa꞉ tapaala꞉me. \v 3 Hande Lo Pi manuma꞉ta꞉ kenke wanda꞉hali ika꞉ honkopu ana꞉ na pa꞉leke handaata꞉ pea꞉peke na ya꞉la꞉ ekita꞉ Koda꞉ma꞉ peaala꞉me. Kenke wanda꞉hali paeyaona꞉ loke tukiki pa꞉ta꞉ ula꞉ hoke hau teke hoeyaaluekema꞉ Koda꞉ma꞉ ipika꞉ Eiyeke kone tapaeyekeme. Hande ipika꞉ Eiyekema꞉ta꞉ hoke hau pu haleme wanda꞉halina꞉ loke manda꞉na꞉ hao kenkena꞉ a꞉paata꞉ hoke hau paeyaaluekema꞉ epeekeme. \v 4 Koda꞉ma꞉ do hau piki hauta꞉ mo hande Lo Pi manuma꞉ tikitiki hau pikieki wala꞉la꞉ ekimanu peomonoyeke pa꞉la꞉me. Nikana꞉ma꞉ta꞉ hande lokema꞉ wala꞉la꞉eki na opiki mo hande Sipitidima꞉ wala꞉la꞉eki opitolo hata꞉ pitoloma꞉me. \v 5 Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pimika꞉na꞉ta꞉ kota꞉ ika꞉ hone witeleme ekita꞉ mo ekima꞉ kone handeteke hatiki pilieke. Wanda꞉hali epi amedama꞉ hande Sipitidima꞉ walo hala꞉eki pea꞉tiki pimika꞉na꞉ta꞉ kota꞉ ika꞉ hone witeleme ekita꞉ ipikana꞉ma꞉ handeteke hatiki pilieke. \v 6 Ika꞉ hone witeleme ekita꞉ ika꞉ lokena꞉ hone pa꞉la꞉eki manuma꞉ handeteke hatiki pia꞉ka꞉na꞉ta꞉ kota꞉ homa꞉la꞉eki milimikie. Kutu pulu pelemepate ika꞉ hone witeleme ekita꞉ hande Sipitidima꞉ handeteke hatiki pia꞉ka꞉na꞉ta꞉ kota꞉ Koda꞉ma꞉ ika꞉ puki lopa꞉niawao iki da꞉taalieke. \v 7 Koto ekina꞉ hali epita꞉ ipika꞉ lokena꞉ hone pa꞉la꞉eki manuma꞉ ipika꞉ hone wita꞉la꞉eki handeteke hatiki pia꞉ka꞉na꞉ta꞉ kota꞉ ipikita꞉ Koda꞉na꞉ a꞉nda꞉ tunkuliki hali halieke. Ipikana꞉ma꞉ta꞉ Koda꞉na꞉ Lo Pimanu na opu hala꞉ ekima꞉ pita꞉la꞉pate ipikana꞉ma꞉ ota꞉ opua꞉peke na ya꞉la꞉me. \v 8 Wanda꞉hali epi amedama꞉ ika꞉ lokena꞉ hone pa꞉la꞉ ekimanu pea꞉tiki pu hata꞉ Koda꞉na꞉ hone pa꞉la꞉ haumanu pea꞉pa꞉peke na yelieke. \p \v 9 Kutupu halemepate ika꞉ lokena꞉ hone pa꞉la꞉eki manuma꞉ iki na handeteke hatiki pita꞉la꞉pateta꞉ Koda꞉ ipika꞉ Sipitidita꞉ iki tukiki pa꞉ta꞉ ota꞉ pitia꞉ka꞉na꞉ta꞉ kota꞉ hande Sipitidima꞉ walo hala꞉eki pea꞉tiki pu halememe. Hali ma꞉nda꞉ pa꞉ta꞉ Ketiso ipika꞉ Sipitidi na pitia꞉ka꞉na꞉ta꞉ kota꞉ ipikita꞉ Ketisona꞉eki dia꞉me. \v 10 Koto pa꞉la꞉pate Ketiso iki tukiki pa꞉ta꞉ pitia꞉ka꞉na꞉ta꞉ kota꞉ hande Sipitidima꞉ iki mea da꞉taalieke. Hoke hauma꞉ta꞉ ika꞉ loke lia homaalo pa꞉la꞉pate hande Sipitidima꞉ iki mea da꞉taalieke. Ketisoma꞉ iki pa꞉ta꞉ koto hau peaeya꞉ka꞉na꞉ta꞉ ikita꞉ Koda꞉ yaapo tikitiki yao hamina꞉ la꞉la꞉ ekina꞉ peaalieke. \v 11 Hande Yesu homeekepate kone paa mea tiaeyeke Koda꞉ ipika꞉ Sipitidi iki tukiki pa꞉ta꞉ pitia꞉ka꞉na꞉ta꞉ kota꞉ hande Ketiso homeekepate kone paa mea tiaeyeke Koda꞉ma꞉ta꞉ iki tukiki pa꞉ta꞉ pitaala꞉ ipika꞉ Sipitidima꞉ kone ika꞉ homolo peleme lokemanu mea da꞉taalieke. \p \v 12 Ya kame tonuo. Koto ekina꞉ nikana꞉ma꞉ yano ale hala꞉pa꞉peke ya꞉la꞉me. Nika꞉ hande lokena꞉ hone pa꞉la꞉ ekimanu pea꞉tiki pulu poloma꞉ ekina꞉ na loa꞉me. \v 13 Ikana꞉ma꞉ ika꞉ lokena꞉ hone pa꞉la꞉ ekimanu pea꞉tiki pu haemeka꞉na꞉ta꞉ ota꞉ homilimikie. Kutu pulu pelemepate Sipitidi ipika꞉ wele pita꞉la꞉ ekina꞉ ikana꞉ma꞉ ika꞉ lokema꞉ hoke hau piteleme ekimanu lu homaemeka꞉na꞉ta꞉ kota꞉ iki da꞉ta halimikie. \v 14 Koda꞉na꞉ Sipitidima꞉ hatuku pula꞉ wanda꞉halita꞉ Koda꞉na꞉ weki wandiki halememe. \v 15 Koda꞉ma꞉ iki ka꞉la꞉ Sipitidima꞉ta꞉ iki paala꞉ tiao pa hameke e pokaasa꞉ hali leke na hamina꞉ la꞉la꞉me. Dia꞉me. Koto hau na pita꞉la꞉me. Hande Sipitidima꞉ ikita꞉ Koda꞉ ipika꞉ wekiwandiki hamina꞉ la꞉la꞉me. Koto pa꞉la꞉ ekina꞉ Sipitidi ipika꞉ wele pita꞉la꞉ ekina꞉ nikana꞉ma꞉ Koda꞉ pa꞉ta꞉ wi alo alota꞉ Apa꞉o. Yaka Apa꞉o lo haloma꞉me. \v 16 Koda꞉ ipika꞉ Sipitidima꞉ nika꞉ temoko yaapo ta꞉ma꞉ni pea hata꞉ nikita꞉ Koda꞉ ipika꞉ wekiwandiki haloma꞉eki peneme yao waluekema꞉ pa꞉la꞉me. \v 17 Nikana꞉ma꞉ta꞉ ipika꞉ weki wandiki hata꞉ Koda꞉ma꞉ ipika꞉ wanda꞉hali epealuekema꞉ wina꞉ la꞉la꞉ ekimanu mulumeke. Kutupa Koda꞉ma꞉ Ketiso pa꞉ta꞉ haluekema꞉ wina꞉ la꞉la꞉ ekimanu make Ketiso ame̱le̱ mulumeke. Nikana꞉ma꞉ Ketiso ame̱le̱ tanda pa꞉la꞉ ekimanu muma꞉ka꞉na꞉ta꞉ kota꞉ ipika꞉ pa̱a̱ pa꞉la꞉eki make ipiki ame̱le̱ mandakena꞉ halumeke. \s1 Pa̱a̱ pita꞉la꞉eki handolo poloma꞉eki \p \v 18 I̱ma꞉ handolo ekita꞉ dupae. Wetepe mo hande kapu tieke handolo poloma꞉ ekima꞉ta꞉ ame do nikana꞉ma꞉ tanda tanda minoloma꞉ ekita꞉ ota꞉ ankulalieke. \v 19 Koda꞉ma꞉ wepia wina꞉ la꞉la꞉ alemanu paeyaoma꞉ta꞉ Koda꞉ma꞉ ipika꞉ eiyeketiti halemeeki peneme yao walena꞉yeke ta꞉na꞉ma꞉ homa hata꞉ leke wia handeteke hao halememe. \v 20 Do wa꞉pa꞉la꞉ ale manuta꞉ pa ekimanu wina꞉ leekepate ipika꞉ kone na leke Koda꞉ma꞉ kone paeki wina꞉e laa pa꞉la꞉me. Kutu piekepate Koda꞉ma꞉ honema꞉ tumao hata꞉ \v 21 hande wa꞉pa꞉la꞉ ekimanu paeyao wetepe tandepena꞉ tonkaake nono pea ula꞉pate ipikana꞉ma꞉ ka꞉la꞉pa꞉ tapaaluekema꞉ hone wiekeme. Koda꞉ma꞉ ipika꞉ weki wandiki honkopu hao ota꞉ epeke tupa꞉ ka꞉la꞉pa꞉ tapaalo pa꞉la꞉ ekita꞉ mo hande wa꞉pa꞉la꞉ ekimanu make kotoeki kone mina꞉e hone wiekeme. \v 22 Amba꞉ titina꞉ putiki a꞉pa pa ame make mo hande wa꞉pa꞉la꞉ ekimanu paeya꞉ tapaoma꞉ta꞉ tanda minolo hata꞉ta꞉ hande weki hoki nala꞉ wanda꞉ leke kimi yanda꞉ yanda꞉ pitolo hata꞉ e̱ wi lo halememe. \v 23 Koto wa꞉pa꞉la꞉eki manuma꞉ homeke na alemepate niki make hande Koda꞉ma꞉ titina꞉ amba꞉la ka꞉la꞉ Sipitidi mea hata꞉ta꞉ nikana꞉ma꞉ make niki tukiki pa꞉ta꞉ keme lo haloma꞉me. Koda꞉ma꞉ niki ipika꞉ wekitonu hamono laata꞉ nika꞉ loke tieke paeyao ka꞉la꞉pa꞉ tapaowaena꞉yeke handeteke hao hata꞉ lo haloma꞉me. \v 24 Nikana꞉ma꞉ honema꞉ tumao hamono Koda꞉ma꞉ niki da꞉taala꞉me. Koto pa꞉la꞉pate nikana꞉ma꞉ nika꞉ honema꞉ tumao witoloma꞉eki ota꞉ yao puma꞉ka꞉na꞉ta꞉ kota꞉ nika꞉ honema꞉ tumaasoma꞉eki ta paeyaasoma꞉me. Hali homekema꞉ ipika꞉ kone ipika꞉ handa꞉la꞉eki honema꞉ tumaapeke na ya꞉la꞉me. \v 25 Koto pa꞉la꞉pate nikana꞉ma꞉ na handoloma꞉eki kone honema꞉ tumao haoma꞉ka꞉na꞉ta꞉ kota꞉ ota꞉ yaalo pa꞉la꞉eki puluekema꞉ eiei na leke yopu handeteke hao halumeke. \p \v 26 Koto tupa꞉ kone nikita꞉ damakopiki wanda꞉hali haloma꞉ ekina꞉ mo hande Sipitidima꞉ niki tamba꞉ mulu ipu hala꞉me. Nikana꞉ma꞉ta꞉ yeni pea꞉peke ekimanu na handoloma꞉ ekina꞉ mo hande Sipitidima꞉ta꞉ peneme yao pi lapeke na yalo hata꞉ kemema꞉ kemema꞉ pitolo kone Koda꞉ pa꞉ta꞉ nika꞉ yeni peao hala꞉me. \v 27 Kutupa mo hande Sipitidima꞉ Koda꞉na꞉ hone pa꞉la꞉ ekimanu handeteke haena꞉ laata꞉ ipika꞉ wanda꞉halina꞉ yeni manuta꞉ Koda꞉ pa꞉ta꞉ peao hala꞉me. Koto ekina꞉ Koda꞉ma꞉ wanda꞉halina꞉ puki pa꞉ta꞉manu handolo hata꞉ mo hande Sipitidima꞉ hone wita꞉la꞉eki hando hala꞉me. \p \v 28 Koda꞉ma꞉ta꞉ ipiki pa꞉ta꞉ pukima꞉ homoloma꞉ wanda꞉hali niki ame̱le̱ hata꞉ wetepe pulu pa꞉la꞉ ekimanu epekeeki wina꞉yeke pu hala꞉me. Koto wanda꞉hali nikita꞉ Koda꞉ma꞉ ipika꞉ hone wita꞉la꞉eki peaaluekema꞉ niki wi la꞉la꞉me. Koto pa꞉la꞉ ekita꞉ nikana꞉ma꞉ handoloma꞉me. \v 29 Koda꞉ma꞉ amba꞉ talopu mea haena꞉ la꞉la꞉ wanda꞉halita꞉ ipika꞉ Eiyeke leke haena꞉yeke amba꞉ handa꞉ mea ta꞉ta꞉ haena꞉ la꞉la꞉me. Koto pa꞉la꞉ ekita꞉ ipika꞉ Eiyeketa꞉ ipika꞉ kamemanu paeyao ame̱le̱ hata꞉ta꞉ ipikita꞉ titina꞉ hali haena꞉yeke pa꞉la꞉me. \v 30 Koto pa꞉la꞉ ekina꞉ Koda꞉ma꞉ amba꞉ handa꞉ mea ta꞉ta꞉ haena꞉ la꞉la꞉ wanda꞉halita꞉ ipikana꞉ma꞉ wi la꞉la꞉ wanda꞉halie. Kutupa ipikana꞉ma꞉ta꞉ amba꞉ wi la꞉la꞉ wanda꞉halita꞉ ipiki yaapo tikitiki yao haena꞉ la꞉la꞉me. Kutupa ipikana꞉ma꞉ta꞉ ipiki yaapo tikitiki yao haena꞉ la꞉la꞉ wanda꞉halita꞉ ipika꞉ pa̱a̱ pa꞉la꞉eki koto wanda꞉hali pa꞉ta꞉ teli teli peaala꞉me. \s1 Koda꞉ma꞉ Yesu Ketiso pa꞉ta꞉ yama꞉ niki pukima꞉ homa꞉la꞉eki \p \v 31 Koto pa꞉la꞉ ekina꞉ nikana꞉ma꞉ eki pi loluma꞉pe. Do tupa꞉ lapeke ya꞉la꞉me. Koda꞉ma꞉ nika꞉eki peaeya꞉ka꞉na꞉ta꞉ hali epima꞉ niki pa꞉ta꞉ a꞉nda꞉ lia꞉peke ya꞉la꞉pe. Ma꞉nda꞉ma꞉ koto hau pea꞉peke na ya꞉la꞉me. \v 32 Koda꞉ma꞉ ota꞉ ipika꞉ Eiyeke sa꞉sa꞉ na piki kone niki paeyaona꞉eki peaaso homena꞉ kiekeme. Ipika꞉ Eiyeke niki ka꞉la꞉ ekina꞉ koto tupa꞉ ala꞉ta꞉ ala꞉ta꞉ paeyao make ipikana꞉ma꞉ kiki tindipao na kiliepe. Dia꞉me. Ota꞉ kilieke. \v 33 Koda꞉ma꞉ talopu mea haena꞉ la꞉la꞉ wanda꞉halita꞉ hali epima꞉ samani piliepe. Dia꞉me. Koda꞉ma꞉ kone iki pa꞉ta꞉ alota꞉ Eki a꞉nda꞉ na piki wanda꞉halie la ala꞉me. \v 34 Hali epima꞉ iki pa꞉ta꞉ alota꞉ Hoke yenki milimikie laa lapeke ya꞉la꞉pe. Dia꞉me. Ma꞉nda꞉ma꞉ koto pi lapeke na ya꞉la꞉me. Yesu Ketisota꞉ homeekepate Koda꞉ma꞉ ipiki paa mea tiao ipika꞉ popeke kikina꞉ pitina꞉ leekeme. Yesu Ketisoma꞉ta꞉ Koda꞉ pa꞉ta꞉ nika꞉ pi la꞉ mea halao hala꞉me. \v 35 Ketisoma꞉ niki pa꞉ta꞉ pukima꞉ homa꞉la꞉ ekita꞉ hali epima꞉ ka꞉taalu peaapeke ya꞉la꞉pe. Kota꞉ mo ka꞉nda꞉ pa꞉la꞉eki minolo hamono kone o tanda tanda minolo hamono kone o mandane wanda꞉halima꞉ a꞉nda꞉ litolo haena꞉ kone o tea꞉ma꞉ homolo hamono kone o yamolo poloma꞉ daumanu dia꞉yolo hamono kone o mandane wanda꞉halima꞉ niki paala꞉ tiaaso haena꞉ kone o niki litolo haena꞉ kone kutupa koto hau paeyao homeke a꞉nda꞉ma꞉ Ketiso ipika꞉ pukima꞉ homa꞉la꞉ ekita꞉ niki pa꞉ta꞉ na pina꞉ leliepe. Dia꞉ma꞉ \v 36 mo hande Baibolo bukana꞉ wape pa꞉la꞉ tupa꞉ \q1 Nikana꞉ma꞉ naka꞉eki peaasoma꞉ ekina꞉ wanda꞉halima꞉ nate paeyao niki luekema꞉ taapo halememe. \q1 Sipisipi ma꞉na꞉manu luekema꞉ piteleme tupa꞉ wanda꞉halima꞉ta꞉ niki pa꞉ta꞉ make hoke hau puluekema꞉ taapo halememe laa wape pa꞉la꞉me. \p \v 37 Kutu pulu pelemepate dia꞉me. Mandane mandane hau paeyao niki pa꞉ta꞉ ipulu haena꞉ kone hande niki pa꞉ta꞉ pukima꞉ homeeke halima꞉ta꞉ ota꞉ aela꞉ baala꞉ wanda꞉hali hamono la꞉la꞉me. \v 38 Ipikana꞉ma꞉ niki pa꞉ta꞉ pukima꞉ homa꞉la꞉ ekita꞉ hau ma꞉nda꞉ma꞉ ka꞉taalu peaapeke na ya꞉la꞉ ekita꞉ I̱ma꞉ ota꞉ handa ulume. Homoma꞉ka꞉na꞉ make pa hamono make oli hepeni nane haleme enisolo tonuma꞉ make mo you haliwekima꞉ make mo wele pita꞉la꞉eki manuma꞉ make ame do pita꞉la꞉eki manuma꞉ make wetepe pulu pa꞉la꞉eki manuma꞉ make koto ekimanu paeyaoma꞉ ipikana꞉ma꞉ niki pa꞉ta꞉ pukima꞉ homa꞉la꞉ ekita꞉ ota꞉ ka꞉taalu peaapeke na ya꞉la꞉me. \v 39 Do kenke manda hala꞉ eki ma꞉nda꞉ma꞉ make o do kenke oto pa꞉ta꞉ pila꞉eki ma꞉nda꞉ma꞉ make do wepia ula꞉ alemanu paeyao pa꞉ta꞉ kone ala꞉ta꞉ ma꞉nda꞉siki homeke a꞉nda꞉ma꞉ mo nika꞉ Tekehali Yesu Ketiso pa꞉ta꞉ yama꞉ Koda꞉ ipika꞉ pukima꞉ homa꞉la꞉eki niki pa꞉ta꞉ pa꞉la꞉ ekita꞉ ka꞉taalu peapeke na ya꞉la꞉me. \c 9 \s1 Koda꞉ make ipika꞉ ma̱leke lila꞉ wanda꞉hali make \p \v 1 I̱ma꞉ alo ekita꞉ ota꞉ pi alome. I̱ta꞉ Ketisona꞉eki ota꞉ hata꞉ yayapiki pi na alome. Holi Sipitidima꞉ yaka hone pa꞉ta꞉ handeteke haena꞉ I̱ma꞉ta꞉ yayapiki pi aleme laa ya hone pa꞉ta꞉ kone na ala꞉me. \v 2 I̱ma꞉ta꞉ yaka wanda꞉hali ota꞉ yaka Diu tapake wanda꞉hali pa꞉ta꞉ hone witolo hata꞉ a꞉ta꞉ tieke pu hala꞉ ekima꞉ ya puki pa꞉ta꞉ tanda pia꞉tiki pu hala꞉me. \v 3 I̱ma꞉ iki tamba꞉ mulueke alo hata꞉ pa Koda꞉ma꞉ I̱ hoeyaena꞉ laata꞉ Ketiso yaapo ta꞉ma꞉ni pea haloeki ka꞉taalu pea ta꞉ta꞉ halo polo pua꞉ka꞉na꞉ yoluta꞉ koto ana꞉ polu pia꞉me. \v 4 Ikita꞉ Koda꞉ma꞉ talopu mea haena꞉ la꞉la꞉ wanda꞉halie. Ipikana꞉ma꞉ ikita꞉ ipika꞉ wekiwandiki haena꞉ laata꞉ iki pa꞉ta꞉ ipika꞉ pa̱a̱ pa꞉la꞉eki waleekeme. Ipikana꞉ma꞉ iki pa꞉ta꞉ mandane pimanu la꞉ wia꞉tiki pea hande Lo Pimanu la kia꞉tiki pea ipiki pa꞉ta꞉ panda꞉puniao ota꞉ yeni pea꞉pekeeki walaata꞉ iki pa꞉ta꞉ kulu pieke ekimanu la꞉ wia꞉tiki piekeme. \v 5 Ikita꞉ amba꞉ haemeke apa꞉mei tieke tieke pa꞉ta꞉ kini pu mea a꞉pa halememe. Ketiso make kenke hali au la a꞉pa hata꞉ta꞉ iki tapake kone hayekeme. Koda꞉ma꞉ ala꞉ta꞉ ala꞉ta꞉ paeyao kilu tombuao hata꞉ tumiki hala꞉ ekina꞉ta꞉ ipika꞉ pi laatiki pu haoma꞉ka꞉na꞉ta꞉ epelieke. Kutu pina꞉e. \p \v 6 I̱ma꞉ta꞉ Koda꞉ma꞉ la꞉ wieke pita꞉ na yaala꞉me laa pi na alome. Koda꞉ma꞉ ipika꞉ la꞉ wieke pita꞉ ota꞉ yaala꞉me. Do ekina꞉ yeke loa꞉me. Ipikana꞉ma꞉ talopu mea haena꞉ la꞉la꞉ wanda꞉halita꞉ Isulai tapake wanda꞉hali homeke na mea haena꞉ leeke mo mandane wanda꞉hali make mea apa꞉tao haena꞉ la꞉la꞉ ekina꞉ loa꞉me. \v 7 Kutupa mo Eipoloha꞉ma꞉na꞉ tapake wanda꞉hali paeyaota꞉ Koda꞉ ipika꞉ weki wandikimanu na halememe. Koda꞉ma꞉ Eipoloha꞉ma꞉ pa꞉ta꞉ alota꞉ Aisa꞉kema꞉ monduma꞉ monduma꞉ pu tia epeleme wanda꞉hali homeketa꞉ naka꞉eki halimikie leekeme. \v 8 Koto leeke ekima꞉ta꞉ doeki wala꞉la꞉me. Pa Eipoloha꞉ma꞉ma꞉ monduma꞉ monduma꞉ pieke wanda꞉hali paeyaota꞉ Koda꞉na꞉ wekiwandikimanu paeyao na haemekeme. Dia꞉me. Koda꞉ma꞉ la꞉ wieke ekina꞉ monduma꞉ monduma꞉ pieke wanda꞉halita꞉ ota꞉ Koda꞉na꞉ wanda꞉hali haemekeme. \v 9 Koda꞉ma꞉ pi la꞉ witolota꞉ dupa la꞉ wiekeme. I̱ma꞉ ya hone pilie natena꞉ta꞉ paa la꞉ka꞉la ipulua꞉ dina꞉ta꞉ Setama꞉ haliweki mendilieke leekeme. \p \v 10 Kutu pulu pa꞉la꞉eki homeke dia꞉me. Lepekama꞉ weki yaapo mendiekepate mo weki yaapo ipilika꞉ ateketa꞉ Aisa꞉kee. Ipikita꞉ nika꞉ apa꞉mei hayekeme. \v 11-12 Koda꞉ma꞉ta꞉ mo weki yaapota꞉ ma꞉nda꞉ hondo muluekema꞉ ipika꞉ hone wia kone inkiki pa꞉ta꞉ alota꞉ Mupeke wekima꞉ta꞉ wetepe nane wekina꞉ e pokaalieke laa leekeme. Koto leeke pita꞉ mo weki yaapo a̱i̱ na mendiki haena꞉ make epeke hau o hoke hau ma꞉nda꞉ a̱i̱ na piki haena꞉ kone Koda꞉ma꞉ leekeme. Koto ekina꞉ Koda꞉ma꞉ talopu mea haena꞉ la꞉la꞉ ekita꞉ mo weki yaapoma꞉ pipiki ekina꞉ dia꞉ yekepate pa ipika꞉ hone wia kone wi leekeme. \v 13 Mo hande Baibolo bukana꞉ wape pa꞉la꞉ tupa꞉ I̱ma꞉ta꞉ Dieikope pa꞉ta꞉ pukina꞉ homoa꞉pate pa Iso pa꞉ta꞉ta꞉ leke tankema꞉ handoa꞉me la꞉la꞉me. \p \v 14 Koto pa꞉la꞉ ekina꞉ nikana꞉ma꞉ta꞉ Koda꞉ma꞉ tikitiki piki hau na pa꞉la꞉me laa loluma꞉pe. Ota꞉ dia꞉me. \v 15 Koda꞉ma꞉ Mosesi pa꞉ta꞉ alota꞉ \q1 I̱ma꞉ hali ma꞉nda꞉ epealueke hone ua꞉ka꞉na꞉ta꞉ kota꞉ yaka hone wia pulueke. \q1 Kutupa make I̱ma꞉ hali ma꞉nda꞉ pa꞉ta꞉ a꞉ta꞉ma꞉ homolueke hone ua꞉ka꞉na꞉ta꞉ kota꞉ yaka hone wia pulueke laa leekeme. \p \v 16 Koto pa꞉la꞉ ekina꞉ Koda꞉ma꞉ a꞉ta꞉ma꞉ homolo hata꞉ epekeeki puluekema꞉ta꞉ hali ma꞉nda꞉na꞉ hone pa꞉la꞉eki make pita꞉la꞉eki make Koda꞉ma꞉ hone na wiki ipika꞉ hone wia kone pilieke. \v 17 Mo Baibolo bukana꞉ wape pa꞉la꞉ ekita꞉ Koda꞉ma꞉ Petou pa꞉ta꞉ alota꞉ Nakana꞉ma꞉ dupiki hau yaapo puelena꞉yeke I̱ma꞉ neketa꞉ you hali mea halena꞉ laa pua꞉me. Nakana꞉ma꞉ yaka wele pitoloeki walaalena꞉yeke make kenke honiki paeyao pa꞉ta꞉ hao yapeleme wanda꞉hali paeyaoma꞉ yaka biki opuaalena꞉yeke make pua꞉me laa leekeme. \v 18 Koto pa꞉la꞉ ekina꞉ Koda꞉ma꞉ ipika꞉ hone pa꞉la꞉ hali pa꞉ta꞉ a꞉ta꞉ma꞉ homolueke hone wia꞉ka꞉na꞉ta꞉ kota꞉ a꞉ta꞉ma꞉ homilieke. Kutupa ipika꞉ hone pa꞉la꞉ hali ma꞉nda꞉ make honke pea haena꞉ lolueke hone wia꞉ka꞉na꞉ta꞉ kota꞉ honke pea haena꞉ lelieke. \s1 Koda꞉ma꞉ mineke panka꞉la꞉eki make pa a꞉ta꞉ma꞉ homa꞉la꞉eki make \p \v 19 Hali ma꞉nda꞉ma꞉ I̱ pa꞉ta꞉ dupa lelieke. Koda꞉ma꞉ koto hau yaapo pia꞉ka꞉na꞉ta꞉ kota꞉ Koda꞉ma꞉ta꞉ hali ma꞉nda꞉ma꞉ pieke ekina꞉ ketete pia꞉me laa ekipa handa꞉ wia꞉peke ya꞉la꞉pe. Hali epima꞉ Koda꞉na꞉ hone pa꞉la꞉eki kiaapeke ya꞉la꞉pe laa lelieke. \v 20 Kutupiki pi lelipi halita꞉ neketa꞉ epi ya꞉ka꞉ta꞉pe. Koda꞉na꞉ leke pa꞉ta꞉ lia halipikii. Kenkema꞉ wa꞉pa꞉la꞉ kanake holiki ma꞉nda꞉ma꞉ mo wa꞉pa꞉la꞉ hali pa꞉ta꞉ pi dupa na lelieke. I̱ta꞉ dupiki kanakena꞉ ekipa wepia hano la pipe laa na lelieke. \v 21 Kanake wepu hala꞉ halima꞉ta꞉ mo kenke meata꞉ ipika꞉ hone pa꞉la꞉ tupa꞉ wepilieke. Ipikana꞉ma꞉ homeke kenke penkema꞉ kone kanake homeketa꞉ hoto homeke homekema꞉ mea pa꞉tiki pea꞉pekeeki wepiata꞉ kanake ma꞉nda꞉ta꞉ nate paeyao mea pa꞉tiki pu hapekeeki wepia꞉ka꞉na꞉ta꞉ ana꞉ pilieke. \p \v 22 Kota꞉ Koda꞉ma꞉ koto tupa꞉ pea la꞉la꞉me. Ipika꞉ mineke panka꞉la꞉eki waluekema꞉ make ipika꞉ wele pita꞉la꞉eki wanda꞉halima꞉ handena꞉ loluekema꞉ make hone piekeme. Koto ekina꞉ Koda꞉ma꞉ mineke pankolo hata꞉ pi yokaalu pea꞉peke yeeke wanda꞉halita꞉ hande hoeyaapeke wanda꞉halita꞉ pota꞉ haena꞉ ipikana꞉ma꞉ koto wanda꞉halita꞉ yuwia hao hatiki piekeme. \v 23 Kutupa make ipika꞉ pa̱a̱ pa꞉la꞉eki tieke pu hala꞉eki waluekema꞉ hone piekeme. Koto ekita꞉ ipikana꞉ma꞉ a꞉ta꞉ma꞉ homa꞉la꞉ wanda꞉hali niki pa꞉ta꞉ teli teli peaala꞉me. Koto hande teli teli peaala꞉ pa̱a̱ pa꞉la꞉eki tieke pu hala꞉ ekita꞉ miomonoyeke niki amba꞉la tikitiki yao hamono la꞉la꞉me. \v 24 Nikita꞉ Koda꞉ma꞉ wi la꞉la꞉ wanda꞉hali hata꞉ta꞉ mo mandane Diu tapake wanda꞉hali homeke dia꞉ya꞉la꞉pate pa mo mandane Diendaili tapake wanda꞉hali make apa꞉tao haloma꞉me. \v 25 Hosiama꞉ wape pa꞉la꞉ ekina꞉ Koda꞉ma꞉ dupa leekeme. \q1 Amba꞉ mo yaka tapake na haemeke wanda꞉halita꞉ I̱ma꞉ iki pa꞉ta꞉ Yaka wanda꞉halio lolueke. \q1 Amba꞉ pukima꞉ na homoa꞉ wanda꞉halita꞉ I̱ma꞉ iki pa꞉ta꞉ alota꞉ Yaka pukima꞉ homolo wanda꞉halio lolueke laa leekeme. \p \v 26 Kutupa make \q1 Koda꞉ma꞉ Ikita꞉ yaka wanda꞉hali na halememe laa leeke alena꞉ koto alena꞉ kone \q1 Ikita꞉ hande da꞉ta hala꞉ Koda꞉na꞉ weki titi halememe laa lelieke leekeme. \p \v 27 Aisayama꞉ make Isulai wanda꞉hali pa꞉ta꞉ alota꞉ dupa leekeme. \q1 Ame mo Isulai wanda꞉halita꞉ hande dawala ikali tea꞉na꞉ ula꞉ hou kili kilipiki pa꞉la꞉ tupa꞉ wopu piseteke halemepate \q1 ika꞉ tapakesiki homeke homekema꞉ da꞉ta꞉la꞉eki milimikie. \q1 \v 28 Pa ekipeke mo Tekehalima꞉ta꞉ kenke wanda꞉hali paeyao pa꞉ta꞉ pi yokaalu pitolota꞉ hoto homeke kone pua꞉ tapaalo pa꞉la꞉ ekina꞉ loa꞉me leekeme. \p \v 29 Kutupa Aisayama꞉ amba꞉ leeke tupa꞉ta꞉ dupa \q1 Hande wele wotu pa꞉la꞉ Tekehalima꞉ nika꞉ tapake mandane wanda꞉hali na mea hamina꞉ lea꞉ka꞉na꞉ yoluta꞉ \q1 kota꞉ nikita꞉ mo hande Sodomo Komoto da yaapoma꞉ handa꞉la꞉ wanda꞉hali halo puma꞉me leekeme. \s1 Poloma꞉ Isulai wanda꞉halina꞉ Koda꞉ pa꞉ta꞉ yeni piekeeki \p \v 30 Koto ekina꞉ do aloma꞉ pita꞉ eki epina꞉ aloma꞉pe dupae. Diendaili wanda꞉halima꞉ta꞉ Koda꞉ yaapo tikitiki yao haluekema꞉ pota꞉ na weimikipate ikana꞉ma꞉ Koda꞉ pa꞉ta꞉ hone tulaaleme ekima꞉ Koda꞉ma꞉ ikita꞉ ipiki yaapo tikitiki hamina꞉ la꞉la꞉me. \v 31 Kutu pa꞉la꞉pate hande talopu mea haena꞉ la꞉la꞉ wanda꞉halima꞉ta꞉ ikita꞉ Koda꞉ yaapo tikitiki yao hamina꞉ lolo peleme pi ula꞉ ekimanu weimikipate na handa꞉ wimikime. \v 32 Hali ma꞉nda꞉ma꞉ alota꞉ dupa lelieke. Ekipeke na handa꞉ wimikipe laa lelieke. Kota꞉ mo hande pi ula꞉ ekimanu na handa꞉ wimiki ekina꞉ teke dupae. Koda꞉ pa꞉ta꞉ hone na tulaake ika꞉ kone hone wia pu haemeke ekina꞉ hone tulao haemeke ekina꞉ pimikime. Hande wanda꞉hali hala꞉mba꞉liao lopao hala꞉ toopima꞉ mo talopu mea haena꞉ la꞉la꞉ wanda꞉hali hala꞉mba꞉liao lopaeyekeme. \v 33 Kota꞉ mo Baibolo bukana꞉ wape pa꞉la꞉eki ma꞉nda꞉ dupa \q1 Opua꞉pe I̱ma꞉ta꞉ Saioni pa꞉ta꞉ wanda꞉hali hala꞉mba꞉liao lopaalo pa꞉la꞉ toopi mea witolo ekita꞉ wanda꞉hali mea lopaalo pa꞉la꞉ hana꞉ mea witolome. \q1 I̱ma꞉ mea ulu polopate hali epima꞉ ipiki pa꞉ta꞉ hone tulaeya꞉ka꞉na꞉ta꞉ hone ka꞉nda꞉ma꞉ homa na halieke laa wape pa꞉la꞉me. \c 10 \p \v 1 Yaka kame titio. Yaka puki pa꞉ta꞉ witolo hone tieketa꞉ yaka tapake hande Diu wanda꞉halima꞉ da꞉ta꞉la꞉eki muemena꞉yeke hone witolo ekina꞉ loa꞉me. I̱ma꞉ iki pa꞉ta꞉ hone witolo hata꞉ Koda꞉ pa꞉ta꞉ yeni pu halome. \v 2 Ikana꞉ma꞉ Koda꞉na꞉ hau puluekema꞉ hone wotu peleme ekita꞉ I̱ma꞉ handa alome. Kutu pitelemepateta꞉ ikana꞉ma꞉ Koda꞉na꞉ hau puluekema꞉ hone peleme ekita꞉ ota꞉eki hando hoeyaaso hata꞉ pitelememe. \v 3 Wanda꞉hali Koda꞉ma꞉ ipiki yaapo tikitiki yao haena꞉ la꞉la꞉ pota꞉ ikana꞉ma꞉ na handa꞉ wiki ikana꞉ma꞉ ika꞉ kone Koda꞉ yaapo tikitiki haluekema꞉ pimikime. Kutu pimiki ekina꞉ Koda꞉ma꞉ wanda꞉hali ipiki yaapo tikitiki yao haena꞉ la꞉la꞉ pota꞉ta꞉ kiao haemekeme. \v 4 Mo hande Lo Pimanu wieke dita꞉ Ketisoma꞉ paeyaala꞉ ekina꞉ ameta꞉ hone tulaaseme wanda꞉halita꞉ Koda꞉ma꞉ ipiki yaapo tikitiki yao haena꞉ ala꞉me. \s1 Wanda꞉hali paeyaoma꞉ da꞉ta꞉la꞉eki mea꞉pa꞉peke ya꞉la꞉eki \p \v 5 Mo hande wieke Lo Pimanu opieke halita꞉ Koda꞉ yaapo tikitiki yao haluekema꞉ pita꞉la꞉eki pa꞉ta꞉ Mosesima꞉ dupa wape pa꞉la꞉me. Hali epima꞉ mo hande Lo Pimanu opua pu haya꞉ka꞉na꞉ta꞉ kota꞉ da꞉ta꞉la꞉eki milieke. \v 6 Koto la꞉la꞉pate hande Koda꞉ pa꞉ta꞉ hone tulao hata꞉ ipiki yaapo tikitiki yao haluekema꞉ pita꞉la꞉eki pa꞉ta꞉ mo Baibolo bukana꞉ wape pa꞉la꞉ ekita꞉ dupae. Nakana꞉ma꞉ naka꞉ kone dupa lota꞉ na pea꞉peke. Oli hepeni naneta꞉ epi a꞉meiliepe laa lea꞉ka꞉na꞉ta꞉ kota꞉ mo Ketiso niki pa꞉ta꞉ hola꞉pa꞉niao epena꞉yeke honke lolo a꞉meilu pele ekina꞉ loa꞉me. \v 7 Dupa make na lota꞉ pea꞉peke. Oni homemeke wanda꞉hali pambo hao haleme alena꞉ epi hola꞉pa꞉niao peliepe. Kotota꞉ mo Ketisota꞉ niki pa꞉ta꞉ paa la꞉ka꞉la opa꞉liaena꞉yeke honke lolo hola꞉pa꞉niao lolo pele ekina꞉ loa꞉me. \v 8 Mo Baibolo bukana꞉ wape pa꞉la꞉ ekima꞉ta꞉ doeki ala꞉me. Koda꞉ma꞉ la꞉la꞉ pita꞉ papate na ulu pa꞉la꞉me. Ika꞉ puki pa꞉ta꞉ make mendiata꞉ ika꞉ kakema꞉ make lapa꞉peke ya꞉la꞉me laa wape pa꞉la꞉me. Hande pita꞉ nikana꞉ma꞉ walo haloma꞉ pi kone wanda꞉halima꞉ hone tulaena꞉ la꞉la꞉ ekita꞉ dupa. \v 9 Nakana꞉ma꞉ naka꞉ kakema꞉ Yesuta꞉ Tekehali hala꞉me laa peneme yao alo make naka꞉ puki pa꞉ta꞉ Koda꞉ma꞉ Yesu homa lapa꞉ pa꞉ta꞉ wieke alena꞉ paa mea tiaeyekeme laa hone tulaeka꞉na꞉ta꞉ kota꞉ da꞉ta halipikie. \v 10 Do ekina꞉yeke loa꞉me. Nika꞉ puki pa꞉ta꞉ hone tulaasoma꞉ ekina꞉ Koda꞉ma꞉ nikita꞉ ipiki yaapo tikitiki yao hamono ala꞉me. Nika꞉ kakema꞉ peneme yao aloma꞉ ekina꞉ nikita꞉ da꞉ta haloma꞉me. \v 11 Kota꞉ mo hande Baibolo bukana꞉ wape pa꞉la꞉ ekita꞉ dupa \q1 Hali epima꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ hone ka꞉nda꞉ma꞉ homa na halieke laa wape pa꞉la꞉me. \p \v 12 Koto wape pa꞉la꞉ ekita꞉ wanda꞉hali paeyao pa꞉ta꞉ la꞉la꞉me. Diu wanda꞉hali make Diendaili wanda꞉hali make paeyaota꞉ homeke tupa꞉ da꞉ta hapa꞉peke ekina꞉ loa꞉me. Wanda꞉hali paeya tapaona꞉ Tekehali homeke kone hala꞉me. Kutupa make epi ameda paeyaoma꞉ ipika꞉ biki laa honke lemeka꞉na꞉ta꞉ kota꞉ ipikana꞉ma꞉ iki wotu epeaalieke. \v 13 Mo hande Baibolo bukana꞉ wape pa꞉la꞉ ekita꞉ dupa \q1 Epi ameda paeyaoma꞉ Tekehalina꞉ biki laa honke lemeka꞉na꞉ta꞉ kota꞉ da꞉ta halimikie laa wape pa꞉la꞉me. \p \v 14 Kutu pulu pelemepate ikana꞉ma꞉ta꞉ hone na tulaake hata꞉ta꞉ ekipa ipika꞉ biki alo hata꞉ honke lelimikipe. Kutupa make hande la꞉la꞉ pita꞉ na opiki hata꞉ta꞉ ekipa hone tulaalimikipe. Kutupa hali ma꞉nda꞉ma꞉ hande pi na walea꞉ka꞉na꞉ta꞉ kota꞉ ekipa opilimikipe. \v 15 Kutupa hande pi mea pua walaaseme wanda꞉hali na tapaemeka꞉na꞉ta꞉ kota꞉ ekipa pi walaalimikipe. Mo hande Baibolo bukana꞉ wape pa꞉la꞉ ekita꞉ dupa. \q1 Mo ota꞉ epeke pi seliapo mea a꞉paaseme wanda꞉halina꞉ anke manuta꞉ ota꞉ yole pea ula꞉me laa la꞉la꞉me. \p \v 16 Kutu pa꞉la꞉pate hande Pi Seliapota꞉ pea꞉ paeyaoma꞉ opua puki pa꞉ta꞉ na mea mendielememe. Aisayama꞉ ipikana꞉ma꞉ kone alota꞉ \q1 Tekehalio. Do nikana꞉ma꞉ waloma꞉ pita꞉ epima꞉ opua hone tulaala꞉pe laa leekeme. \p \v 17 Koto ekina꞉ pi opita꞉la꞉ ekima꞉ wanda꞉halima꞉ hone tulaasememe. Kutupa hali ma꞉nda꞉ma꞉ Ketisoma꞉ pa꞉la꞉eki wala꞉la꞉ ekima꞉ wanda꞉halima꞉ pi opitelememe. \p \v 18 Kutu pitelemepate I̱ma꞉ lota꞉ pitoloeki dupae. Hande pita꞉ wanda꞉halima꞉ na opelememe ala꞉ ekita꞉ ota꞉ alemepe. Dia꞉me amba꞉ opimime. Hande Baibolo bukana꞉ wape pa꞉la꞉ ekita꞉ dupa \q1 Mo pi mea puaaseme haliwekina꞉ kakema꞉ lemeke pi manuta꞉ kenke paeyao pa꞉ta꞉ amba꞉ pa꞉la꞉me. \q1 Ikana꞉ma꞉ lemeke pi manuta꞉ kenke honiki pa꞉ta꞉ haleme wanda꞉halima꞉ amba꞉ opelememe laa wape pa꞉la꞉me. \p \v 19 I̱ma꞉ paa lota꞉ pitolo ekita꞉ dupa. Isulai wanda꞉halima꞉ta꞉ hande pita꞉ hone na wimikipe. Dia꞉me. Ikana꞉ma꞉ opua kone halememe. Mosesima꞉ta꞉ Koda꞉na꞉ pi lawaaso hata꞉ ipikana꞉ma꞉ amba꞉la pi alo alota꞉ \q1 I̱ma꞉ta꞉ pa ika꞉ ta꞉ta꞉ pea hao haleme wanda꞉hali ota꞉ tapake tieke na haleme wanda꞉hali kone mea haena꞉ loa꞉ka꞉na꞉ta꞉ ikana꞉ma꞉ hoke hone witolo hata꞉ I̱ma꞉ pitolo ekina꞉ sokulama꞉ homilimikie. \q1 Kutupa mo hone wopu na witeleme wanda꞉hali I̱ma꞉ mea haena꞉ loa꞉ka꞉na꞉ta꞉ ikana꞉ma꞉ kutu pitolo ekina꞉ mineke pankelimikie laa wape pa꞉la꞉me. \p \v 20 Kutupa Aisayama꞉ Koda꞉na꞉eki lawaaso hata꞉ doolema꞉ na homeke dupa leekeme. \q1 I̱ na weimi wanda꞉halima꞉ kone I̱ handa꞉ wimime laata꞉ I̱ haloeki lota꞉ na pimi wanda꞉hali pa꞉ta꞉ kone yaka kone peneme yao waloa꞉me laa leekeme. \p \v 21 Koto leekepate paa ipikana꞉ma꞉ mo Isulai wanda꞉hali pa꞉ta꞉ Koda꞉na꞉eki lawaaso hata꞉ alota꞉ \q1 Yaka pi na opiki I̱ kiaaseme wanda꞉hali pa꞉ta꞉ kone I̱ma꞉ta꞉ epoe la alo hano nate opa pa pambolo yapea꞉me laa leekeme. \c 11 \s1 Koda꞉ma꞉ Isulai wanda꞉hali pa꞉ta꞉ a꞉ta꞉ma꞉ homo hayekeeki \p \v 1 Koto pa꞉la꞉ ekina꞉ I̱ma꞉ lota꞉ pitolo ekita꞉ dupa. Koda꞉ma꞉ta꞉ ota꞉ ipika꞉ wanda꞉hali kiaeyekepe. Ota꞉ dia꞉me. I̱ kone Isulai hali hata꞉ Eipoloha꞉ma꞉ta꞉ yaka apa꞉mei hayekepate I̱ta꞉ Benisamini tapake hali halome. \v 2 Koda꞉ma꞉ta꞉ panake pa꞉ta꞉ talopu mea haena꞉ la꞉la꞉ ipika꞉ wanda꞉halita꞉ na kiaeyekeme. Hande Baibolo bukana꞉ wape pa꞉la꞉ ekita꞉ Ilaidiama꞉ Isulai wanda꞉hali pa꞉ta꞉ pi alo hata꞉ Koda꞉ pa꞉ta꞉ ota꞉ honke leeke ekita꞉ ikana꞉ma꞉ opimime. \v 3 Ipikana꞉ma꞉ alota꞉ \q1 Tekehalio. Naka꞉ potopede haliweki liaata꞉ naka꞉ olodamanu londolo baota꞉ I̱ta꞉ yasiki halopate I̱ make luekema꞉ taapelememe laa leekeme. \m \v 4 Koda꞉ma꞉ ipika꞉ pi hombo peaasota꞉ eki pi leekepe. Ipikana꞉ma꞉ leeke ekita꞉ dupa. \q1 Hande yayapiki koda꞉ Beiele pa꞉ta꞉ta꞉ na panda꞉puniao yeni na pimiki haliweki 7 daoseni haliweki kone I̱ma꞉ mea yakaeki haena꞉ lolome laa leekeme. \m \v 5 Koto pieke ekita꞉ ame make pitelememe. Koda꞉ma꞉ a꞉ta꞉ pieke handaata꞉ mandane wanda꞉hali hosiki ipikana꞉ma꞉ talopu mea haena꞉ la꞉la꞉me. \v 6 Koda꞉ma꞉ a꞉ta꞉ wotu pa꞉leke handaata꞉ talopu mea haena꞉ la꞉tiki pita꞉la꞉me. Koto ekina꞉ wanda꞉halima꞉ ika꞉ piteleme hauna꞉ na mea haena꞉ ala꞉me. Koda꞉ma꞉ta꞉ wanda꞉halima꞉ ika꞉ piteleme hauna꞉ mea haena꞉ lea꞉ka꞉na꞉ yoluta꞉ kota꞉ ipika꞉ a꞉ta꞉ pa꞉la꞉ ekita꞉ ota꞉eki dia꞉yolo pia꞉me. \p \v 7 Koto pa꞉la꞉ ekina꞉ nikana꞉ma꞉ eki pi loluma꞉pe. Isulai wanda꞉halima꞉ ika꞉ weimiki ekita꞉ na handa꞉ wimikime. Koda꞉ma꞉ hande talopu mea haena꞉ leeke wanda꞉hali tepo tepo homeke handa꞉ wimikipate mo mandane wanda꞉halima꞉ta꞉ Koda꞉ma꞉ wi leeke ekita꞉ na opimikime. \v 8 Hande Baibolo bukana꞉ wape pa꞉la꞉ ekita꞉ dupa \q1 Koda꞉ma꞉ ikita꞉ hone na wiki wanda꞉hali haena꞉ leekeme. \q1 Kutupa haena꞉ leeke ekima꞉ mo wanda꞉hali hatiki a꞉pa ame do make hata꞉ta꞉ ika꞉ lekema꞉ na handeke ika꞉ katakema꞉ make na opiki pa pambo halememe laa wape pa꞉la꞉me. \m \v 9 Deipidima꞉ make wape pa꞉la꞉eki dupa \q1 Mo wanda꞉halita꞉ ika꞉ ne pambolo peleme ekimanu pa꞉ta꞉ pua hata꞉ ma꞉nda꞉ma꞉ maala꞉ hona꞉na꞉ tea wimika꞉na꞉ta꞉ epilieke. \q1 Lopa hata꞉ panisi mimika꞉na꞉ta꞉ epelieke. \q1 \v 10 Ika꞉ leke handupa handa꞉peke na yolo hata꞉ ka꞉nda꞉ma꞉ homa houwolo puniao hatiki pimika꞉na꞉ta꞉ epelieke laa wape pa꞉la꞉me. \p \v 11 Koto pa꞉la꞉ ekina꞉ I̱ma꞉ lota꞉ pitoloeki dupae. Mo Diu wanda꞉halita꞉ hala꞉mba꞉liao lopaata꞉ paa na tiaake u pelia halimikipe. Ota꞉ dia꞉me. Mo Diu wanda꞉halima꞉ hoke hau pimiki handaata꞉ Diendaili wanda꞉halima꞉ta꞉ da꞉ta꞉la꞉eki minelememe. Kutu pitelemeke handaata꞉ Diu wanda꞉halima꞉ iki pa꞉ta꞉ honditi pitelememe. \v 12 Mo Diu wanda꞉halima꞉ hoke hau pimiki handaata꞉ mandane kenke wanda꞉halima꞉ta꞉ wamo wamo pea pita꞉la꞉ ekimanu minelememe. Koda꞉na꞉ hau pu hoeyaemeke handaata꞉ Diendaili wanda꞉halima꞉ta꞉ wamo wamo pea pita꞉la꞉ ekimanu minelememe. Mo Diu da꞉ta꞉la꞉eki meleme wanda꞉hali ame̱le̱ apa꞉tao Diu wanda꞉hali paeyaoma꞉ make mimika꞉na꞉ta꞉ kota꞉ mo hande wamo wamo pea pita꞉la꞉ ekimanu daeyalieke. \s1 Koda꞉ma꞉ mo Diendaili wanda꞉hali da꞉taala꞉eki \p \v 13 I̱ma꞉ Diendaili wanda꞉hali iki pa꞉ta꞉ do alo pita꞉ doeki loluekema꞉ loa꞉me. I̱ta꞉ Diendaili wanda꞉hali ika꞉ aposolo hali halo ekina꞉ Koda꞉ma꞉ I̱ pa꞉ta꞉ walea꞉ e pokaaluekema꞉ ta꞉na꞉ma꞉ homa honkopu hao hata꞉ pokaalueke. \v 14 Pa mata꞉la꞉me. Mandane ya tapake wanda꞉hali I̱ma꞉ honditi peaaso hata꞉ da꞉ta꞉la꞉eki mina꞉ lolua꞉pe mata꞉la꞉me. \v 15 Koda꞉ma꞉ Diu wanda꞉hali kiaeyeke pita꞉ ipikana꞉ma꞉ mo mandane kenke wanda꞉halita꞉ ipika꞉ yankeketiti haena꞉ leekeme. Kutu pieke handaata꞉ Koda꞉ma꞉ Diu wanda꞉hali paa handa꞉ mia꞉ka꞉na꞉ta꞉ kota꞉ kutu pulu pa꞉la꞉ ekita꞉ mo homa toko ula꞉ wanda꞉hali paa mea da꞉taalo pa꞉la꞉ ekina꞉ pa꞉la꞉me. \p \v 16 Hali ma꞉nda꞉ma꞉ palaowa kake naneeki tunkula꞉ mea Koda꞉ pa꞉ta꞉ halea꞉ka꞉na꞉ta꞉ kota꞉ mo honiki ulu pulueki make Koda꞉na꞉eki kone wilieke. Koto tupa꞉ make ti pikimanu Koda꞉ pa꞉ta꞉ halea꞉ka꞉na꞉ta꞉ kota꞉ oli palekemanu make ipika꞉eki kone halieke. \v 17 Ambu sa̱ lopao wata꞉lao hala꞉ olipi tina꞉ palekemanu mandaneeki tonda꞉pa꞉ mepi pea mea pa opa pa hala꞉ olipi ti ma꞉nda꞉na꞉ paleke tonda꞉pa꞉ mea mo hande wata꞉laala꞉ ekina꞉ palekena꞉ mea tunaala꞉me. Diendaili wanda꞉hali ikita꞉ mo hande pa opa hala꞉ olipi tima꞉ handelemepate mo Diu wanda꞉hali pa꞉ta꞉ a꞉pa꞉la꞉ epeke epeke haumanu ikana꞉ma꞉ minelememe. \v 18 Koto ekina꞉ mo hande palekemanu tonda꞉pa꞉ mepi pieke tupa꞉ Koda꞉ma꞉ kiaeyeke wanda꞉halita꞉ ikana꞉ma꞉ koto wanda꞉hali ankulalo peleme honemanu na wia꞉pa꞉peke. Eki epina꞉ ikana꞉ma꞉ handaena꞉ hau pilimikipe. Ikita꞉ pa paleke homeke halememe. Paleke manuma꞉ta꞉ piki pa꞉ta꞉ pankeke na pitaasa꞉me. Pikima꞉ kone paleke pa꞉ta꞉ pankeke pitaasa꞉me. \p \v 19 Koto pa꞉la꞉pate ikana꞉ma꞉ alota꞉ dupa lelimikie. Ota꞉ ya꞉la꞉pate mo hande palekemanu tonda꞉pa꞉ mepi pieke ekita꞉ mo palekemanu haemeke alena꞉ta꞉ pa niki mea tunao hamono loluekema꞉ piekeme laa lelimikie. \v 20 Koto make ota꞉eki ya꞉la꞉pate Diu wanda꞉hali ikana꞉ma꞉ hone na tulaemeke handaa ipikana꞉ma꞉ tonda꞉pa꞉ mepi pea pa꞉la꞉me. Diendaili wanda꞉hali ikana꞉ma꞉ hone tulaaseme ekina꞉ tunao halememe. Kutupa halemepate ikana꞉ma꞉ I̱ handaena꞉ haumanu hone na wiki ika꞉ loke tonkao paala꞉ma꞉ homa yopu hapa꞉peke. \v 21 Mo hande Diu wanda꞉halita꞉ ota꞉ ti palekemanu haemekepate Koda꞉ma꞉ pa haena꞉ pi na leeke ekina꞉ iki make pa hapa꞉peke laa lelieke hone witelemepe. \v 22 Kutu pieke ekina꞉ ikana꞉ma꞉ta꞉ Koda꞉ ipika꞉ a꞉ta꞉ma꞉ homa꞉la꞉ hau make ipika꞉ taka꞉lake hau pita꞉la꞉eki make hone wotu wia꞉pa꞉peke. Koda꞉ma꞉ta꞉ lopeleme wanda꞉hali pa꞉ta꞉ taka꞉lake hau peata꞉ ikita꞉ ipika꞉ a꞉ta꞉ma꞉ homa꞉la꞉eki taapuna꞉ hao hamina꞉ ipika꞉ a꞉ta꞉ma꞉ homa꞉la꞉ hau iki pa꞉ta꞉ ka꞉la꞉me. Koto a꞉nda꞉ iki make ipika꞉ a꞉ta꞉ma꞉ homa꞉la꞉eki taapuna꞉ na hao haemeka꞉na꞉ta꞉ ipikana꞉ma꞉ iki make tonda꞉pa꞉ mepi pilieke. \v 23 Diu wanda꞉halima꞉ make ika꞉ hone na tulao haemekeeki mina꞉pa꞉laemeka꞉na꞉ta꞉ Koda꞉ma꞉ ika꞉ amba꞉ haemeke alena꞉ paa mea tunao haena꞉ lelieke. Pa ekipeke. Koda꞉ma꞉ iki paa mea tunao hapeke ya꞉la꞉me. \v 24 Diendaili wanda꞉hali ikita꞉ pa opa hala꞉ olipi ti tonda꞉pa꞉ mepi pieke palekema꞉ handelememe. Kutupa ikita꞉ ambu sa̱ lopao wata꞉lao hala꞉ olipi ti pa꞉ta꞉ kone mea tunao hamina꞉ la꞉la꞉me. Diu wanda꞉halita꞉ mo hande ambu sa̱ lopao wata꞉lao hala꞉ olipi ti paleke manuma꞉ handelememe. Koda꞉ma꞉ koto tonda꞉pa꞉ mepi pieke palekemanu ika꞉ ota꞉ tina꞉ paa mea tunao haena꞉ lea꞉ka꞉na꞉ta꞉ yapa꞉ pilieke. \s1 Koda꞉ma꞉ wanda꞉hali paeyao pa꞉ta꞉ a꞉ta꞉ma꞉ homa꞉la꞉eki \p \v 25 Ya kame titio. Pi homeke a꞉nda꞉ta꞉ a꞉mbao ula꞉me. Ikana꞉ma꞉ handoemena꞉yeke I̱ta꞉ hone pa꞉la꞉me. Kotoeki handemeka꞉na꞉ta꞉ kota꞉ ikana꞉ma꞉ ame do kone alota꞉ Nikita꞉ pita꞉la꞉ ekimanu paeyao handoloma꞉me pi paa na lelimikie. Koto a꞉mbao ula꞉ ekita꞉ dupa. Mo mandane Isulai wanda꞉halima꞉ pi na opiteleme ekita꞉ hoto paeyao na opu haluekema꞉ na pitelememe. Pua꞉tiki pua Koda꞉ma꞉ Diendaili wanda꞉hali mina꞉la꞉ tombo ana꞉na꞉ mia꞉ka꞉na꞉ta꞉ pilimikie. \v 26 Kutupa Koda꞉ma꞉ Isulai wanda꞉hali paeyao koto tupa꞉ da꞉taalieke. Hande Baibolo bukana꞉ wape pa꞉la꞉ ekita꞉ dupa \q1 Hande Da꞉taala꞉ Halita꞉ Saioni nane hao a꞉pa mo Dieikope tapake wanda꞉halina꞉ hoke hau pimiki ekimanu yoka꞉ milieke. \q1 \v 27 Ipikana꞉ma꞉ alota꞉ I̱ma꞉ ika꞉ hoke haumanu pa paeyaowa꞉ka꞉na꞉ta꞉ I̱ma꞉ iki ame̱le̱ pi la꞉ ulueke laa wape pa꞉la꞉me. \p \v 28 Diu wanda꞉hali ikana꞉ma꞉ hande Pi Seliapo kiao haleme ekina꞉ ikita꞉ Koda꞉na꞉ a꞉nda꞉ tunkuliki wanda꞉hali halememe. Kutu peleme ekima꞉ Diendaili wanda꞉hali ikana꞉ma꞉ tamba꞉ mina꞉la꞉ hau minelememe. Kutu pitelemepate Koda꞉ma꞉ amba꞉ ika꞉ apa꞉mei ameda pa꞉ta꞉ pi la꞉ witolo alota꞉ Ikana꞉ma꞉ mendilimi wekiwandiki manuta꞉ yaka yankeketonu halimikie laa leeke handaata꞉ Diu wanda꞉hali ikita꞉ Koda꞉na꞉ yankeketonu halememe. \v 29 Wanda꞉hali epi amedata꞉ Koda꞉ma꞉ mea haena꞉ ala꞉eki make epeaasa꞉eki pia꞉ka꞉na꞉ta꞉ kota꞉ ipikana꞉ma꞉ hone ma꞉nda꞉ topo pea na wilieke. \v 30 Amba꞉ta꞉ Diendaili wanda꞉hali ikana꞉ma꞉ta꞉ Koda꞉na꞉ pi na opu haemekepate ameta꞉ Diu wanda꞉halima꞉ Koda꞉na꞉ pi na opueleme ekina꞉ Koda꞉na꞉ a꞉ta꞉ma꞉ homa꞉la꞉eki ikana꞉ma꞉ melememe. \v 31 Koto peleme tupa꞉ ikana꞉ma꞉ta꞉ hande a꞉ta꞉ma꞉ homa꞉la꞉eki melemeke handaata꞉ ameta꞉ Diu wanda꞉halima꞉ Koda꞉na꞉ pi na opu halememe. Koto peleme ekina꞉ta꞉ Koda꞉na꞉ a꞉ta꞉ma꞉ homa꞉la꞉eki mulu peleme ekina꞉ pitelememe. \v 32 Koda꞉ma꞉ta꞉ ipika꞉ pi na opiteleme wanda꞉hali paeyao ipikana꞉ma꞉ dipula pila꞉ wanda꞉hali leke hao haena꞉ laata꞉ paeyao pa꞉ta꞉ a꞉ta꞉ma꞉ homoluekema꞉ kone pa꞉la꞉me. \s1 Nikana꞉ma꞉ Koda꞉na꞉ pi laamana꞉e \p \v 33 Koda꞉na꞉ ipika꞉ hamoko hala꞉ ekita꞉ ota꞉ hone mateke some kiakee. Ipika꞉ epeke hone wita꞉la꞉eki make ipika꞉ handa꞉la꞉eki make kinuku dia꞉me. Ipikana꞉ma꞉ dupa꞉pe laa ala꞉eki manuna꞉ teke manuta꞉ hali epima꞉ handa꞉ wia la kiliepe. Ipikana꞉ma꞉ pita꞉la꞉ haumanu hali epima꞉ handa꞉ tapaapeke ya꞉la꞉pe. \v 34 Hande Baibolo bukana꞉ wape pa꞉la꞉ ekita꞉ dupa \q1 Tekehali ipika꞉ hone wita꞉la꞉eki hali epima꞉ handa꞉la꞉pe. \q1 Hali epima꞉ ipiki pa꞉ta꞉ dupie laa mana꞉ leekepe. \q1 \v 35 Hali epima꞉ Koda꞉ pa꞉ta꞉ ipika꞉ tondiki wina꞉ loluekema꞉ pa ipiki pa꞉ta꞉ ala꞉ta꞉ ma꞉nda꞉ pa hameke haleekepe laa wape pa꞉la꞉me. \p \v 36 Koda꞉ma꞉ta꞉ ala꞉ta꞉ ala꞉ta꞉ paeyao ipikana꞉ma꞉ wepia wina꞉ la꞉la꞉me. Kutupa ala꞉ta꞉ ala꞉ta꞉ paeyao ipikana꞉ma꞉ kone pa putia pulu pulu haena꞉ ala꞉me. Kutu pa꞉la꞉ ekita꞉ ala꞉ta꞉ ala꞉ta꞉ paeyao ipika꞉eki kone wina꞉ loluekema꞉ pa꞉la꞉me. Nikana꞉ma꞉ta꞉ Koda꞉na꞉ pita꞉ hoto paeyao laatiki pu hamana꞉e. Kutu pina꞉e. \c 12 \s1 Koda꞉na꞉ e pokalo hata꞉ haloma꞉eki \p \v 1 Koto pa꞉la꞉ ekina꞉ yaka kame titio. Koda꞉ma꞉ niki pa꞉ta꞉ a꞉ta꞉ma꞉ wotu homo haleke handaata꞉ I̱ma꞉ iki pa꞉ta꞉ honke aloeki ma꞉nda꞉ta꞉ dupa. Hande hotekemanu lia Koda꞉ pa꞉ta꞉ halemeke tupa꞉ ame ikana꞉ma꞉ta꞉ ika꞉ loke manuta꞉ pa da꞉ta hata꞉ kone Koda꞉ pa꞉ta꞉ hala꞉pa꞉peke. Ikana꞉ma꞉ kutu pimika꞉na꞉ta꞉ kota꞉ ikita꞉ ipika꞉eki hata꞉ta꞉ ipika꞉ e pokaaluekema꞉ make ipiki ta꞉na꞉ma꞉ homaaluekema꞉ make pilimikie. Kutu pita꞉la꞉ hauta꞉ Koda꞉ pa꞉ta꞉ panda꞉puniao ika꞉ temokoma꞉ ota꞉ yeni pita꞉la꞉eki pea꞉pa꞉peke aleo. \v 2 Ikana꞉ma꞉ta꞉ pa kenke wanda꞉halima꞉ pu haleme ekimanu tonka꞉na꞉ apa꞉tao puluekema꞉ hone na wia꞉pa꞉peke. Koto pa꞉la꞉pate Koda꞉ma꞉ ika꞉ hone topo pea wiaaso ika꞉ puki make la꞉ka꞉laena꞉ lapa꞉peke. Ipikana꞉ma꞉ kutu pia꞉ka꞉na꞉ta꞉ kota꞉ ikana꞉ma꞉ Koda꞉na꞉ hone pa꞉la꞉ ekita꞉ handilimikie. Kutu pita꞉la꞉ ekita꞉ epekeeki make Koda꞉ ta꞉na꞉ma꞉ homaasa꞉eki make eki a꞉nda꞉ na piki ota꞉ seliapo pea ula꞉eki make pita꞉la꞉me. \p \v 3 Koda꞉ma꞉ ipika꞉ pa hameke a꞉ta꞉ma꞉ homa꞉la꞉eki I̱ pa꞉ta꞉ kieke handaata꞉ kota꞉ I̱ma꞉ iki paeyao pa꞉ta꞉ pi dupa alome. Naka꞉ kone neke pa꞉ta꞉ hone witolota꞉ I̱ta꞉ ya handoloeki ya haloeki make wanda꞉halina꞉eki ankulao halome laa koto hone na wia꞉peke. Iki homeke homekema꞉ta꞉ ika꞉ ika꞉ kone hosiki yao hone wia hata꞉ Koda꞉ma꞉ ka꞉la꞉ hone tulaasa꞉eki ana꞉na꞉ handaata꞉ hone u hapa꞉peke. \v 4 Niki paeyaona꞉ loke pa꞉ta꞉ta꞉ tuna tuna pea hala꞉ alemanu hao hala꞉pate ika꞉ piteleme haumanu ta꞉ta꞉ ta꞉ta꞉ lo pu halememe. \v 5 Koto tupa꞉ niki make wanda꞉hali wopu haloma꞉pate Ketiso yaapo ta꞉ma꞉ni pea hata꞉ homeke loke tupa꞉ haloma꞉me. Kutupa hata꞉ta꞉ koto lokena꞉ tuna tuna pa꞉la꞉ ekimanu ya꞉leke handaata꞉ niki make tuna alualu pea haloma꞉me. \v 6 Koto pa꞉la꞉ ekina꞉ mo Koda꞉ma꞉ pa hameke a꞉ta꞉ma꞉ homolo hata꞉ niki homeke homeke pa꞉ta꞉ ka꞉la꞉ ekimanu handaa mea mo Ketiso tapake ame̱le̱ hata꞉ pia꞉tiki pumana꞉e. Koda꞉ma꞉ta꞉ mo ipika꞉ pi lawaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ ekipiki hone tulaasa꞉eki niki pa꞉ta꞉ pitia꞉ka꞉na꞉ta꞉ koto ekima꞉ lawamana꞉e. \v 7 Koda꞉ma꞉ta꞉ mo Ketiso wanda꞉hali tamba꞉ mea꞉peke ekita꞉ niki kia꞉ka꞉na꞉ta꞉ kota꞉ nikana꞉ma꞉ tamba꞉ mea꞉peke ya꞉la꞉me. Koda꞉ma꞉ta꞉ mo pi wala꞉la꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ nikana꞉ma꞉ ipika꞉ pi wala꞉peke ya꞉la꞉me. \v 8 Koda꞉ma꞉ta꞉ mo wanda꞉hali sutiaasa꞉ ekita꞉ niki pa꞉ta꞉ kia꞉ka꞉na꞉ta꞉ kota꞉ sutiatiki pumana꞉e. Hali ma꞉nda꞉ma꞉ ipika꞉ wia hala꞉ alemanu kone wanda꞉hali pa꞉ta꞉ teli teli peaeya꞉ka꞉na꞉ta꞉ kota꞉ epeke moke pitolo hata꞉ pea꞉peke ya꞉la꞉me. Hali ma꞉nda꞉ ipikita꞉ biki ula꞉ hali haya꞉ka꞉na꞉ta꞉ kota꞉ honkopu hao e poka꞉peke ya꞉la꞉me. Hali ma꞉nda꞉ma꞉ wanda꞉hali pa꞉ta꞉ a꞉ta꞉ma꞉ homolo hata꞉ pa꞉ta꞉lea꞉ka꞉na꞉ta꞉ kota꞉ ta꞉na꞉ma꞉ homolo hata꞉ pa꞉ta꞉la꞉peke ya꞉la꞉me. \p \v 9 Wanda꞉hali pa꞉ta꞉ pukima꞉ homemeka꞉na꞉ta꞉ kota꞉ ota꞉ pukima꞉ homa꞉pa꞉peke. Ikana꞉ma꞉ hokeeki handaata꞉ linka꞉ la꞉pa lopa hapa꞉peke. Epeke ekita꞉ mea mina hapa꞉peke. \v 10 Ikana꞉ma꞉ ika꞉ Ketiso kametiti ame̱le̱ ika꞉ kone pukima꞉ homa alualu pea hapa꞉peke. Kutupa ika꞉ ika꞉ kone lu mina꞉nia alualu puluekema꞉ taapo hapa꞉peke. \v 11 E pokolo hata꞉ta꞉ soka꞉la꞉ homa hata꞉ na pokeke honkopu hao hata꞉ poka꞉pa꞉peke. Tekehalina꞉ e pokaaso hata꞉ta꞉ puki loke paeyao ipiki pa꞉ta꞉ halolo hata꞉ pokaapa꞉peke. \v 12 Tekehalima꞉ pulu pa꞉la꞉ ekina꞉ handeteke hata꞉ ta꞉na꞉ma꞉ homa hapa꞉peke. Ka꞉nda꞉piki haumanu iki pa꞉ta꞉ epea꞉ka꞉na꞉ta꞉ kota꞉ honkopu hao hata꞉ handeteke hapa꞉peke. Hoto paeyao yeni pea꞉tiki pu hapa꞉peke. \v 13 Mandane Ketiso yankeke manuma꞉ ota꞉ mea꞉peke yelia꞉ alemanu mea꞉peke na ya꞉ka꞉na꞉ta꞉ kota꞉ ikana꞉ma꞉ ika꞉ wia haleme ekimanu kone telipa ma꞉nda꞉ hala꞉pa꞉peke. Da ma꞉nda꞉ nane haleme Ketiso wanda꞉hali kimisu a꞉pa pitimika꞉na꞉ta꞉ kota꞉ ika꞉ da pa꞉ta꞉ handa꞉ mea peliaapa꞉peke. \p \v 14 Iki pa꞉ta꞉ a꞉nda꞉ liteleme wanda꞉halita꞉ Koda꞉ma꞉ koto wanda꞉hali epeaena꞉ ikana꞉ma꞉ yeni pea꞉pa꞉peke. Koda꞉ma꞉ hoeyaena꞉ laa yeni na piki epeaena꞉ laa yeni pea꞉pa꞉peke. \v 15 Wanda꞉hali epi amedama꞉ ta꞉na꞉ma꞉ homemeka꞉na꞉ta꞉ kota꞉ ikana꞉ma꞉ make iki ame̱le̱ mandakena꞉ ta꞉na꞉ma꞉ homa꞉pa꞉peke. E̱ aleme wanda꞉hali make ikana꞉ma꞉ make iki ame̱le̱ mandakena꞉ e̱ lapa꞉peke. \v 16 Ikana꞉ma꞉ ika꞉ homeke homekema꞉ ika꞉ ika꞉ kone hone witolo piteleme tupa꞉ ma꞉nda꞉ ma꞉nda꞉ pa꞉ta꞉ make mandake tupa꞉ kone pa hone wia꞉pa꞉peke. Ikana꞉ma꞉ I̱ handaena꞉ hau na piki hosiki wanda꞉halima꞉ piteleme ekimanu make handa꞉ mea pea꞉pa꞉peke. Ikana꞉ma꞉ta꞉ I̱ homeke hone wotu ulu halie laa hone na wia꞉pa꞉peke. \p \v 17 Hali ma꞉nda꞉ma꞉ iki pa꞉ta꞉ hoke hau pia꞉ka꞉na꞉ta꞉ kota꞉ ikana꞉ma꞉ ipiki make hombo peaaso hata꞉ hoke hau na pea꞉pa꞉peke. Wanda꞉hali paeyaoma꞉ta꞉ Do hauta꞉ epeke ekie laa hone witelemeeki kone pea꞉pa꞉peke. \v 18 Wanda꞉hali paeyao ame̱le̱ a꞉nda꞉ pelia hao haluekema꞉ mo koto hauna꞉ pota꞉manu handa꞉ uluekema꞉ honkopu hao weiya꞉pa꞉peke. \v 19 Ya yankeke titio. Ma꞉nda꞉ma꞉ iki pa꞉ta꞉ hokeeki pia꞉ka꞉na꞉ta꞉ kota꞉ yenki mulu peleme hone na wia꞉pa꞉peke. Ika꞉ yenki meaake hauta꞉ Koda꞉ma꞉ mineke panka꞉la꞉ ekima꞉ peaowaena꞉ lapa꞉peke. Hande Baibolo bukana꞉ wape pa꞉la꞉ ekita꞉ dupa \q1 Tekehalima꞉ alota꞉ Yenki meaake hauta꞉ I̱ma꞉ pulueke laa wape pa꞉la꞉me. \m \v 20 Hande Baibolo bukana꞉ paa ma꞉nda꞉ wape pa꞉la꞉ ekita꞉ dupa \q1 Naka꞉ a꞉nda꞉ tunkuliki halita꞉ tea꞉ma꞉ homea꞉ka꞉na꞉ta꞉ kota꞉ ne hala꞉peke. \q1 Ikali na꞉na꞉ma꞉ make homea꞉ka꞉na꞉ta꞉ kota꞉ ikali naa hala꞉peke. \q1 Kutupiki hau pika꞉na꞉ta꞉ kota꞉ mo hali ipika꞉ you mandata꞉ ti lankake mea momba꞉lalipikie laa wape pa꞉la꞉me. \p \v 21 Hoke hauma꞉ iki mea lopaena꞉ handa꞉ pelia na hake epeke hau piteleme ekima꞉ta꞉ hoke hau bepolaena꞉ lapa꞉peke. \c 13 \s1 Kapomanina꞉ biki ula꞉ haliwekina꞉ pi opua꞉peke ya꞉la꞉eki \p \v 1 Iki paeyaoma꞉ta꞉ mo kapomanina꞉ biki ula꞉ haliwekina꞉ pi opua꞉peke ya꞉la꞉me. Do ekina꞉yeke loa꞉me. Koda꞉ma꞉ you hali ma꞉nda꞉ma꞉ta꞉ wanda꞉hali handeteke haena꞉ mea haena꞉ lea꞉ka꞉na꞉ta꞉ kota꞉ handeteke hapeke ya꞉la꞉me. Kutupa ame do handeteke haleme you haliwekita꞉ Koda꞉ma꞉ pina꞉e laa mea haleke handa halememe. \v 2 Hali epima꞉ ame do haleme you haliwekina꞉ pi yoka꞉ mea baeya꞉ka꞉na꞉ta꞉ kota꞉ Koda꞉ma꞉ pina꞉e laa la꞉la꞉ pi kone yoka꞉ mea baaso pita꞉la꞉me. Kutupiki hau pita꞉la꞉ halita꞉ ipiki pa꞉ta꞉ kone panisi pea꞉pekeeki milieke. \v 3 Epeke hau pu haleme wanda꞉halima꞉ta꞉ handeteke haleme you haliweki pa꞉ta꞉ paala꞉ma꞉ na homolo pelemepate hoke hau pu haleme wanda꞉halima꞉ta꞉ paala꞉ma꞉ homilimikie. Nakana꞉ma꞉ mo handeteke hala꞉ you hali pa꞉ta꞉ paala꞉ma꞉ na homolueke hone wika꞉na꞉ta꞉ kota꞉ epeke hau pu halipieki ipikana꞉ma꞉ handaata꞉ naka꞉ pi laalieke. \v 4 Pa ekipeke ipikita꞉ Koda꞉na꞉ e pokaasa꞉ hali hata꞉ neke epeaaso pita꞉la꞉me. Kota꞉ a꞉nda꞉ nakana꞉ma꞉ hoke hau pika꞉na꞉ta꞉ kota꞉ mo halita꞉ ota꞉ panisi peaalo pa꞉la꞉ hali hala꞉ ekina꞉ neketa꞉ ipiki pa꞉ta꞉ paala꞉ma꞉ homa halipikie. Mo hali ipikana꞉ma꞉ Koda꞉na꞉ e pokaasa꞉ hali hata꞉ta꞉ hoke hau pu haleme wanda꞉hali pa꞉ta꞉ Koda꞉ma꞉ ipika꞉ mineke panka꞉la꞉eki kone ipikana꞉ma꞉ peaasa꞉me. \v 5 Kutu pita꞉la꞉ ekina꞉ mo handeteke haleme you haliwekina꞉ pi ikana꞉ma꞉ ota꞉ opua꞉peke ya꞉la꞉me. Koda꞉na꞉ mineke panka꞉la꞉ ekina꞉ homeke dia꞉me. Ika꞉ puki tukiki pa꞉ta꞉ koto hau pulu peleme ekita꞉ ota꞉eki iki wala꞉leke handa loa꞉me. \p \v 6 Mo hande handeteke haleme you haliwekima꞉ta꞉ wanda꞉hali pa꞉ta꞉ eki haumanu pimika꞉na꞉ta꞉ kota꞉ Koda꞉na꞉ e kone pokaaso pitelememe. Kutu piteleme ekina꞉ ikana꞉ma꞉ dakisi mani halo halememe. \v 7 Koto ekina꞉ mo haliweki pa꞉ta꞉ halo peleme ekita꞉ ota꞉ hala꞉pa꞉peke. Dakisi mani ta꞉ta꞉ ta꞉ta꞉ piki ekimanu ma꞉nda꞉ ma꞉nda꞉ lo hala꞉pa꞉peke. Kutupa mo haliweki pa꞉ta꞉ homu pea hata꞉ ika꞉ pi make opua꞉pa꞉peke. \s1 Ika꞉ ame̱le̱ hata꞉ pu alualu pea꞉peke haumanu \p \v 8 Ikana꞉ma꞉ tondiki ma꞉nda꞉ ota꞉ na wina꞉ leke pa mo tondiki homeke homeke ula꞉ ekita꞉ dupa. Ika꞉ ika꞉ kone pukima꞉ homa꞉ alualu pea hapa꞉peke. Hali epima꞉ ma꞉nda꞉ pa꞉ta꞉ pukima꞉ homea꞉ka꞉na꞉ta꞉ kota꞉ mo hande Lo Pimanu opua꞉la꞉me. \v 9 Hande pi ula꞉eki manuta꞉ Hali ma꞉nda꞉na꞉ wanda꞉na꞉ hakopu na tunkuliki o ma꞉nda꞉ ota꞉ homena꞉ honema꞉ kone na liki o pake na neke o ma꞉nda꞉na꞉ alemanu muluekema꞉ leke na pola꞉paapa꞉peke laa la꞉ ula꞉ pimanu make mandane ekimanu tonka꞉na꞉ koto pimanu paeyaona꞉ titina꞉ pi homeketa꞉ dupa ula꞉me. Nakana꞉ma꞉ta꞉ neke pa꞉ta꞉ kone pukima꞉ homele tupa꞉ koto tupa꞉ ma꞉nda꞉ pa꞉ta꞉ make pukima꞉ homa꞉peke laa wape pa꞉la꞉me. \v 10 Hali epima꞉ ma꞉nda꞉ pa꞉ta꞉ pukima꞉ homea꞉ka꞉na꞉ta꞉ kota꞉ ipikana꞉ma꞉ eki a꞉nda꞉ na pilieke. Kutu pita꞉la꞉ ekina꞉ pukima꞉ homa꞉la꞉ halima꞉ta꞉ mo hande Lo Pimanu paeyao kone opua꞉la꞉me. \p \v 11 Do hau pulu peleme ekita꞉ do ekina꞉ yeke loa꞉me. Ame do haloma꞉ nateta꞉ ikana꞉ma꞉ hone wilimime. Ame ikita꞉ u̱ na peliki tiao hapeke nate amba꞉ epa꞉la꞉me. Amba꞉ nikita꞉ Ketiso pa꞉ta꞉ hone tulao haoma꞉ ekita꞉ hokulu pia꞉me. Kutu puma꞉pate ameta꞉ niki mea tiaalo pa꞉la꞉ nateta꞉ hosiki teke pa꞉ta꞉ ya꞉la꞉me. \v 12 Da kelepuluekema꞉ yeke timba꞉ la꞉la꞉ ekita꞉ paelieke. Timba hata꞉ pu haloma꞉ ekimanu mina꞉pa꞉laota꞉ pa̱a̱na꞉ hata꞉ a꞉nda꞉ pea꞉peke ya꞉la꞉ alemanu mea miniki hamana꞉e. \v 13 Nikita꞉ natena꞉ pominoloma꞉ wanda꞉hali leke hata꞉ta꞉ popeke pa꞉la꞉ haumanu pumana꞉e. Hoke ikali naa keaaso hata꞉ yaala꞉ma꞉ na homeke haumanu make suseke haasa꞉ hau pamba na piki haumanu make a꞉nda꞉ pita꞉la꞉eki honditi pita꞉la꞉eki make kutupiki haumanu ikana꞉ma꞉ pea꞉peke na ya꞉la꞉me. \v 14 Ikana꞉ma꞉ta꞉ ika꞉ lokena꞉ hoke hau tekema꞉ iki hoke hau puemena꞉yeke sutiaasa꞉ ekimanu na opiki Tekehali Yesu Ketiso ipika꞉ a꞉nda꞉ pea꞉peke alemanu mea miniki hapa꞉peke. \c 14 \s1 Damako piki Ketiso yankekemanu \p \v 1 Hali ma꞉nda꞉ta꞉ ipika꞉ hone tulao hala꞉eki damako pu pa wia꞉ka꞉na꞉ta꞉ kota꞉ iki ame̱le̱ apa꞉tao haena꞉ ikana꞉ma꞉ handa꞉ mea꞉pa꞉peke. Kutu pulu pelemepate ipikana꞉ma꞉ ipika꞉ hone wia pita꞉la꞉eki manuna꞉ ikana꞉ma꞉ ipiki ame̱le̱ ape na lapa꞉peke. \v 2 Hali ma꞉nda꞉ma꞉ta꞉ hone tulao hata꞉ nemanu paeyao napeke ya꞉la꞉pate hande damako piki hone tulaasa꞉ halima꞉ta꞉ ena꞉ noka꞉pa꞉la꞉ nemanu homeke mea nelieke. \v 3 Mo hande nemanu paeyao napeke ya꞉la꞉ halima꞉ta꞉ hande ena꞉ noka꞉pa꞉la꞉ nemanu homeke nala꞉ hali pa꞉ta꞉ laaso hata꞉ ninamu no hala꞉ halie lapeke na ya꞉la꞉me. Kutupa make mo hande ena꞉ noka꞉pa꞉la꞉ nemanu homeke nala꞉ halima꞉ta꞉ hande ne paeyao nala꞉ hali pa꞉ta꞉ hone u hoeyaaso hata꞉ neketa꞉ hoke halie laa lapeke na ya꞉la꞉me. Do alo ekita꞉ do ekina꞉ yeke loa꞉me. Hande ne paeyao nala꞉ halita꞉ Koda꞉ma꞉ ipiki amba꞉ handa꞉ ma꞉la꞉me. \v 4 Hali ma꞉nda꞉na꞉ e pokaasa꞉ hali pa꞉ta꞉ hone u hoeyaasa꞉ hali neketa꞉ epi ya꞉ka꞉ta꞉pe. Pu hoeyaaleme laa make epeke peleme laa make ipika꞉ Tekehalima꞉ homeke lelieke. Ipika꞉ Tekehalima꞉ epeke tupa꞉ pina꞉ lapeke ya꞉la꞉ ekima꞉ mo halima꞉ epeke tupa꞉ pilieke. \p \v 5 Hali ma꞉nda꞉ ipika꞉ honema꞉ta꞉ nate ma꞉nda꞉ta꞉ tiekee pa mandane nate manuta꞉ paekie hone wita꞉la꞉pate paa hali ma꞉nda꞉ ipika꞉ honema꞉ta꞉ natemanu paeyao homekeeki kone hone wita꞉la꞉me. Hali paeyao homeke homekema꞉ta꞉ Do pa꞉la꞉ ekita꞉ ota꞉ pea꞉peke ya꞉la꞉ekie laa hone wia lea꞉ka꞉na꞉ta꞉ epelieke. \v 6 Hali epima꞉ ipika꞉ hone wia nate ma꞉nda꞉ta꞉ tiekee laa hone wia꞉ka꞉na꞉ta꞉ kota꞉ Tekehalina꞉ pi laaso hata꞉ hone wita꞉la꞉me. Hali epima꞉ nemanu paeyao no haya꞉ka꞉na꞉ta꞉ kota꞉ Tekehalina꞉ pi laaso hata꞉ no hala꞉me. Mo nemanu meata꞉ Koda꞉ pa꞉ta꞉ keiyae pi laa nala꞉ ekina꞉ loa꞉me. Hali epima꞉ mandane nemanu napeke kiaeya꞉ka꞉na꞉ta꞉ kota꞉ Koda꞉ pa꞉ta꞉ keiyae pi laa Tekehalina꞉ pi laaso hata꞉ pita꞉la꞉me. \v 7 Niki do haloma꞉ haliweki ma꞉nda꞉ma꞉ hone witolota꞉ ya halo ekita꞉ yakaeki homekee pi na leke make I̱ homolo poloeki make ya homekee pi lapeke na ya꞉la꞉me. \v 8 Nikana꞉ma꞉ niki da꞉ta hata꞉ta꞉ Tekehalina꞉ pi lao haluekema꞉ haloma꞉me. Niki homolo poloma꞉eki make Tekehalina꞉ pi laaluekema꞉ homolumeke. Koto ekina꞉ nikita꞉ pa haoma꞉ka꞉na꞉ make homoma꞉ka꞉na꞉ make nikita꞉ Tekehalina꞉ ekie. \v 9 Ketiso homa paa tiao hala꞉ ekita꞉ ame do pa haloma꞉ wanda꞉hali make amba꞉ homemeke wanda꞉hali make niki paeyaona꞉ Tekehali haluekema꞉ pa꞉la꞉me. \v 10 Koto pa꞉la꞉pate pa nakana꞉ma꞉ naka꞉ Ketiso yankeke hala꞉eki handaata꞉ ekipeke hone u hoeyaasepe. Kutupa nakana꞉ma꞉ make naka꞉ Ketiso yankeke pa꞉ta꞉ ekipeke la la pitelepe. Koda꞉ma꞉ niki ame̱le̱ pi yokaalu pina꞉yeke ipika꞉ leke popelekena꞉ niki paeyao pua halumeke. \v 11 Hande Baibolo bukana꞉ wape pa꞉la꞉eki dupa \q1 Tekehalima꞉ alota꞉ I̱ta꞉ da꞉ta halo ekina꞉ wanda꞉hali paeyaoma꞉ta꞉ tumiki yotuao I̱ pa꞉ta꞉ panda꞉ punialimikie. \q1 Kutupa wanda꞉hali paeyaoma꞉ I̱ pa꞉ta꞉ alota꞉ Neke ota꞉ Koda꞉ haleme laa lelimikie laa wape pa꞉la꞉me. \p \v 12 Koto pa꞉la꞉ ekina꞉ niki paeyao niki homeke homekema꞉ nika꞉ poloma꞉ ekimanu Koda꞉ pa꞉ta꞉ ka꞉la꞉pa la halumeke. \s1 Ketiso yankekema꞉ hokeeki pina꞉ lapeke ekimanu na pumana꞉ \p \v 13 Koto ekina꞉ nika꞉ nika꞉ kone nika꞉ haloma꞉eki handaata꞉ hone na u hoeyaama꞉na꞉ pea꞉pa꞉peke aleo. Dia꞉me. Hone dupa wia꞉pa꞉peke aleo. Ika꞉ Ketiso yankeke hoke hauma꞉ hala꞉mba꞉liao mea lopaama꞉na꞉ hau ma꞉nda꞉ na pea꞉pa꞉peke. \v 14 I̱ta꞉ Tekehali Yesu yaapo ta꞉ma꞉ni poloeki yalo hata꞉ hone ota꞉ dupa witolome. Aleta꞉ ma꞉nda꞉ homeke a꞉nda꞉ta꞉ ipika꞉ kone hone wia pa na hoeta꞉la꞉me. Hali ma꞉nda꞉ ipika꞉ honema꞉ta꞉ aleta꞉ ma꞉nda꞉ma꞉ I̱ hoeyaalieke hone wia hata꞉ kone pa meisa meisa pea pia꞉ka꞉na꞉ta꞉ kota꞉ mo hali ipika꞉ kone hoeyaalieke. \v 15 Nakana꞉ma꞉ ne ma꞉nda꞉ nale ekima꞉ta꞉ naka꞉ Ketiso yankeke ma꞉nda꞉ hala꞉mba꞉liao mea lopaeka꞉na꞉ta꞉ kota꞉ nakana꞉ma꞉ ipiki pa꞉ta꞉ pukima꞉ homa꞉la꞉eki pitolo na piteleme. Ketisota꞉ mo hali pa꞉ta꞉ homeekepate kone nakana꞉ma꞉ ne ma꞉nda꞉ nale ekima꞉ mo hali na hoeyaena꞉ lapeke. \v 16 Ikana꞉ma꞉ do ekita꞉ epekeekie laa aleme ekita꞉ mandane wanda꞉halima꞉ dia꞉me. Do ekita꞉ hokeekie laa pi na lena꞉ lapa꞉peke. \v 17 Mo hande Koda꞉ ipika꞉ Kilu Tombuao Hala꞉ ekita꞉ kota꞉ ne ikali nala꞉ ekima꞉ na pa꞉la꞉me. Mo hande Holi Sipitidima꞉ kita꞉la꞉eki manuta꞉ tikitiki yao hala꞉eki puki lopa꞉niaasa꞉eki ta꞉na꞉ma꞉ homa꞉la꞉eki koto ekimanu kita꞉la꞉ ekima꞉ pa꞉la꞉me. \v 18 Kutupa hali epima꞉ Ketisona꞉ hau dupa peaeya꞉ka꞉na꞉ta꞉ kota꞉ Koda꞉ma꞉ ipiki pa꞉ta꞉ ta꞉na꞉ma꞉ homilieke. Kutupa wanda꞉halima꞉ make ipiki pa꞉ta꞉ epeke pita꞉la꞉me laa ipika꞉ pi laalimikie. \p \v 19 Koto pa꞉la꞉ ekina꞉ nikana꞉ma꞉ta꞉ a꞉nda꞉ pelia pata꞉ pea halo poloma꞉eki make nika꞉ nika꞉ kone honkopu hatia alualu pea halo poloma꞉eki koto hau manuta꞉ ota꞉ pumana꞉e. \v 20 Nakana꞉ma꞉ nemanu paeyao noluekema꞉ hone witele ekima꞉ Koda꞉ma꞉ pa꞉la꞉eki na hoeyaena꞉ lapeke. Nemanu paeyao pa napeke ya꞉la꞉pate nakana꞉ma꞉ ne ma꞉nda꞉ nale ekima꞉ hali ma꞉nda꞉ma꞉ hala꞉mba꞉liao lopa hoke hau pia꞉ka꞉na꞉ta꞉ kota꞉ nakana꞉ma꞉ pu hoeyaaseme. \v 21 Epeke hau pulu pa꞉la꞉ ekita꞉ dupae. Ne ikali nala꞉eki make hau ma꞉nda꞉ pea꞉pekeeki make naka꞉ Ketiso yankeke mea lopaapeke nono pia꞉ka꞉na꞉ta꞉ kota꞉ koto hauta꞉ paapa꞉peke. \v 22 Kutupiki haumanu pita꞉la꞉ ekina꞉ nakana꞉ma꞉ hone witele ekita꞉ Koda꞉ yaapo ipilika꞉ homeke wia꞉pa꞉peke. Hali ma꞉nda꞉ma꞉ Do hauta꞉ epekeeki laa pitolo hata꞉ kone pu hoeyaasome pi na lea꞉ka꞉na꞉ta꞉ kota꞉ koto hali ipikita꞉ ota꞉ ta꞉na꞉ma꞉ homa halieke. \v 23 Kutu pa꞉la꞉pate mo halima꞉ nalo nalo hata꞉ kone hone ti yokea꞉ka꞉na꞉ta꞉ kota꞉ hone tulao hata꞉ na nala꞉ ekina꞉ Koda꞉ma꞉ mo hali pa꞉ta꞉ alota꞉ Nakana꞉ma꞉ do hauta꞉ pu hoeyaaseme laa lelieke. Hau paeyao puluekema꞉ta꞉ hone tulao hata꞉ na puma꞉ka꞉na꞉ta꞉ kota꞉ hoke hau pulumeke. \c 15 \s1 Ika꞉ kone ta꞉na꞉ma꞉ na homaake \p \v 1 Nikana꞉ma꞉ta꞉ nika꞉ hone tulao haloma꞉eki honkopu hao hata꞉ta꞉ mo damako piki wanda꞉hali ika꞉ ka꞉nda꞉ pa꞉la꞉ ekimanu meatia pena꞉yeke tamba꞉ mumana꞉e. Nikana꞉ma꞉ niki kone ta꞉na꞉ma꞉ na homaamana꞉e. \v 2 Dia꞉me. Nika꞉ Ketiso yankeke ipika꞉ hone tulaasa꞉eki sutialuekema꞉ kota꞉ niki paeyao homeke homekema꞉ ipiki epeaaso ta꞉na꞉ma꞉ homa꞉tiamana꞉e. \v 3 Ketisoma꞉ta꞉ ipika꞉ hone pa꞉la꞉eki na pu hayeke ekina꞉yeke loa꞉me. Dia꞉me. Hande Baibolo bukana꞉ wape pa꞉la꞉ ekita꞉ dupae. Wanda꞉halima꞉ neke pa꞉ta꞉ pi la la pimikieki manuta꞉ I̱ pa꞉ta꞉ kone pi la la pitolo pimikime laa wape pa꞉la꞉me. \v 4 Mo hande Baibolo bukana꞉ wape pa꞉la꞉ ekimanu paeyaota꞉ niki waluekema꞉ wape pea pelememe. Mo hande Baibolo bukana꞉ wape pa꞉la꞉eki manuma꞉ta꞉ niki sutia tia pitolo haena꞉ niki tiao hata꞉ mo hande la꞉ ula꞉ ekimanu yaena꞉yeke handeteke hao hamono ula꞉me. \v 5 Kutupa hande niki sutia tia pea handeteke hamono ala꞉ Koda꞉ma꞉ta꞉ ikana꞉ma꞉ Yesu Ketisoma꞉ pu hayekeeki telia꞉ mea pulu hata꞉ ika꞉ ika꞉ kone hone homeke u hamina꞉ lea꞉ka꞉na꞉ta꞉ epelieke. \v 6 Iki paeyaoma꞉ta꞉ apa꞉tao hata꞉ kake mandakena꞉ wia hata꞉ Tekehali Yesu Ketiso ipika꞉ Apa꞉ Koda꞉na꞉ pi laamina꞉yeke loa꞉me. \s1 Diendaili wanda꞉halima꞉ make hande Pi Seliapo opitelemeeki \p \v 7 Ketisoma꞉ iki handa꞉ minolo pia꞉ tupa꞉ ikana꞉ma꞉ make iki ika꞉ kone handa꞉ mu alu alu pea꞉pa꞉peke. Wanda꞉halima꞉ Koda꞉na꞉ pi laena꞉yeke pea꞉pa꞉peke. \v 8 I̱ma꞉ iki pa꞉ta꞉ la kitolo ekita꞉ dupae. Ketisoma꞉ta꞉ Diu wanda꞉halina꞉ e pokalo a꞉pa꞉la꞉ ekita꞉ Koda꞉ma꞉ ipika꞉ la꞉ wieke pimanu ota꞉ yao hala꞉me laa la kuluekema꞉ pokalo epeekeme. Ketisoma꞉ta꞉ Koda꞉ma꞉ mo hande Diu wanda꞉halina꞉ apa꞉mei pa꞉ta꞉ la꞉ wieke pimanu yalo a꞉pata꞉ \v 9 mo Diendaili wanda꞉halima꞉ta꞉ Koda꞉ ipika꞉ a꞉ta꞉ma꞉ homa꞉la꞉eki minolo hata꞉ Koda꞉na꞉ pi laena꞉yeke epeekeme. Hande Baibolo bukana꞉ wape pa꞉la꞉eki dupa \q1 Koto ekina꞉ I̱ma꞉ta꞉ mo Diendaili wanda꞉hali ame̱le̱ hata꞉ta꞉ naka꞉ biki yeiya꞉ lalueke. \q1 I̱ma꞉ emelimanu alo hata꞉ta꞉ neke yeiya꞉ lalueke laa wape pa꞉la꞉me. \p \v 10 Kutupa doeki make wape pa꞉la꞉me. \q1 Diendaili wanda꞉halio. Koda꞉ma꞉ talopu mea haena꞉ la꞉la꞉ wanda꞉hali ame̱le̱ hata꞉ta꞉ ta꞉na꞉ma꞉ homa꞉pa꞉peke laa wape pa꞉la꞉me. \p \v 11 Kutupa make \q1 Diendaili wanda꞉hali paeyaoo. Ikana꞉ma꞉ Tekehalina꞉ pi laapa꞉peke. \q1 Kenke ta꞉ta꞉ ta꞉ta꞉ pa꞉ta꞉ haleme wanda꞉hali paeyao ikana꞉ma꞉ ipika꞉ pi wotu laapa꞉peke laa wape pa꞉la꞉me. \p \v 12 Kutupa Aisayama꞉ wape pa꞉la꞉eki make dupa \q1 Diesina꞉ tapake hali homeke ipilieke. \q1 Koda꞉ma꞉ta꞉ ipikita꞉ Diendaili wanda꞉halina꞉ you hali mea haena꞉ lelieke. \q1 Kutupa mo Diendaili wanda꞉halima꞉ ipikina꞉ ti lao hata꞉ ipikana꞉ma꞉ pita꞉la꞉eki homeke hando halimikie laa wape pa꞉la꞉me. \p \v 13 Mo hande ti lao haasa꞉ ekina꞉ teke hali Koda꞉ma꞉ta꞉ ikana꞉ma꞉ ipiki pa꞉ta꞉ hone tulaaseme ekina꞉ ta꞉na꞉ tiekema꞉ homelemeeki make puki lopa꞉niao halemeeki make iki pa꞉ta꞉ tumbao pitaeya꞉ka꞉na꞉ta꞉ epelieke. Kutupa ikana꞉ma꞉ ipikina꞉ ti lao hata꞉ hando haleme ekita꞉ mo Holi Sipitidina꞉ welema꞉ mea daeyatiki pina꞉ lea꞉ka꞉na꞉ta꞉ kota꞉ kotota꞉ epelieke. \s1 Do wape pieke ekina꞉ teke \p \v 14 Yaka kame titio. Ikana꞉ma꞉ epeke haumanu putia pulu hata꞉ mo piteleme ekimanu make wotu handelememe. Kutupa ika꞉ ika꞉ kone mana꞉ la alualu pea꞉pa꞉peke ekita꞉ I̱ma꞉ ota꞉ handa꞉ ulume. \v 15 Koto pa꞉la꞉pate I̱ma꞉ do wape poloeki pa꞉ta꞉ ika꞉ hone u tiaaso hata꞉ taka꞉lake pi mandane ekimanu laa wape polome. Koda꞉ma꞉ e tieke I̱ pa꞉ta꞉ ka꞉leke handaata꞉ I̱ma꞉ na kita꞉ yokake hata꞉ wape pea polome. \v 16 Hande I̱ pa꞉ta꞉ ka꞉la꞉ eta꞉ dupae. Yesu Ketiso ipika꞉ e pokaaso hali hata꞉ mo Diendaili wanda꞉halina꞉ e pokaanoyeke ka꞉la꞉me. I̱ma꞉ mo hande Koda꞉na꞉ Pi Seliapo walaaso hata꞉ta꞉ yeni peaasa꞉ hali leke hata꞉ pitolome. Mo hande Diendaili wanda꞉halita꞉ Koda꞉ma꞉ ta꞉na꞉ma꞉ homolo hata꞉ mina꞉yeke pa hala꞉la꞉ ale leke haluekema꞉ pitolome. Mo Holi Sipitidima꞉ make mo hala꞉la꞉ aleta꞉ yako pina꞉ ala꞉me. \v 17 Koto ekina꞉ I̱ma꞉ta꞉ Yesu Ketiso yaapo ta꞉ma꞉ni pea hata꞉ta꞉ Koda꞉na꞉ e pokao halo ekina꞉ epeke pua꞉me laa ta꞉na꞉ma꞉ homa꞉peke ya꞉la꞉me. \v 18 I̱ma꞉ na kita꞉ yokake hata꞉ dupa lolo polopate Ketisoma꞉ I̱ pa꞉ta꞉ peaala꞉eki homeke lolueke. Diendaili wanda꞉halima꞉ Koda꞉na꞉ pi opua pina꞉yeke pua꞉me. Do pimiki ekina꞉ teketa꞉ dupae. I̱ma꞉ loa꞉ pimanu make pua꞉ haumanu make \v 19 wele wotu pa꞉la꞉ ekimanu make na hando haeme ekimanu make ipika꞉ Sipitidima꞉ wele wotu pia꞉eki make koto ekimanu paeyao handaata꞉ pimikime. Koto ekina꞉ I̱ma꞉ta꞉ mo Diutuseleme da pa꞉ta꞉ kini pu mea wala꞉tiki pua mo Ilitikumi nane kone mo hande Ketiso pa꞉ta꞉ ipula꞉ Pi Seliapo paeyao pa꞉ta꞉ wala꞉niaowa꞉me. \v 20 Yaka hone witoloeki homeke dupae. Ketisona꞉ biki na opiki pa hao haleme wanda꞉hali pa꞉ta꞉ I̱ pua mo hande Pi Seliapo waluekema꞉ hone u halome. Ma꞉nda꞉ma꞉ pa꞉la꞉eki manda taapopao peaama꞉na꞉ loa꞉me. \v 21 Hande Baibolo bukana꞉ wape pa꞉la꞉ ekita꞉ dupa \q1 Hande ipiki pa꞉ta꞉ ipula꞉ pi na opiki wanda꞉halima꞉ handilimikie. \q1 Kutupa pi na opimiki wanda꞉halima꞉ hone wilimikie laa wape pa꞉la꞉me. \s1 Poloma꞉ Loma꞉ da ipuluekema꞉ hone wiekeeki \p \v 22 Koto pa꞉la꞉ ekina꞉ I̱ta꞉ iki pa꞉ta꞉ ipuluekema꞉ pitolopate hoto eleke eleke pota꞉ sa꞉sa꞉ pia꞉tiki pia꞉me. \v 23 Kutu pua꞉pate ameta꞉ hande hone ua꞉ kenke paeyaomanu pa꞉ta꞉ I̱ma꞉ e poko paeyaalome. Kutupa bapi wopu I̱ma꞉ iki handolo ipuluekema꞉ hone wia꞉tiki pua꞉ ekina꞉ \v 24 ame ipulueke laa hone pa꞉la꞉me. I̱ta꞉ Sipeini kenke nane yapuluekema꞉ yopuluta꞉ titina꞉ amba꞉la iki handuluekema꞉ hone pa꞉la꞉me. Iki ame̱le̱ hosiki a꞉pa haota꞉ pa mo Sipeini kenke nane poa꞉ka꞉na꞉ta꞉ kota꞉ ikana꞉ma꞉ I̱ tamba꞉ mimika꞉na꞉ta꞉ epelieke hone witolome. \v 25 Kutu pulu polopateto ame dota꞉ mo Diutuseleme da nane haleme Koda꞉na꞉ wanda꞉hali tamba꞉ mulu pulume. \v 26 Do I̱ polueke alo ekita꞉ mo hande Ma꞉sedonia Kitiki kenke yaapo nane haleme siosi wanda꞉halima꞉ta꞉ mo hande Diutuseleme da nane haleme Koda꞉na꞉ wanda꞉hali pa mandane natehali wanda꞉hali pa꞉ta꞉ mani haluekema꞉ hone wilimi ekina꞉ pulu loa꞉me. \v 27 Mo mani haleke hauta꞉ ikana꞉ma꞉ ika꞉ hone wia kone halo pelemepate koto hauta꞉ ikana꞉ma꞉ ota꞉ pea꞉pa꞉peke ale kone pitelememe. Mo hande Diu wanda꞉halima꞉ta꞉ Koda꞉ma꞉ ika꞉ temokomanu epeala꞉eki manuta꞉ Diendaili wanda꞉hali pa꞉ta꞉ teli teli peaalememe. Koto peleme ekina꞉ mo hande Diendaili wanda꞉halima꞉ta꞉ ika꞉ wia haleme alemanu Diu wanda꞉hali pa꞉ta꞉ teli teli peao halemeka꞉na꞉ta꞉ epelieke. \v 28 Ikana꞉ma꞉ amu pea wialeme mani paeyao mea pua haloa꞉ka꞉na꞉ta꞉ kota꞉ koto eta꞉ poko paeyaalueke. Kotoeki pu paeyaota꞉ I̱ta꞉ koto pa꞉ta꞉ mina꞉pa꞉lao mo Sipeini kenke nane yopulu hata꞉ iki amba꞉la a꞉pa handulueke. \v 29 I̱ epoa꞉ka꞉na꞉ta꞉ kota꞉ Ketisoma꞉ iki ota꞉ wotu epeaena꞉yeke ipuluekema꞉ loa꞉me. \p \v 30 Ya kame titio. Nikana꞉ma꞉ Tekehali Yesu Ketiso pa꞉ta꞉ hone tulao haloma꞉ ekina꞉ make mo Holi Sipitidima꞉ hande pukima꞉ homa꞉la꞉eki niki pa꞉ta꞉ ka꞉la꞉ ekina꞉ make ikana꞉ma꞉ make I̱ma꞉ make honkopu hao mandake dina꞉ Koda꞉ pa꞉ta꞉ ya yeni peaama꞉na꞉yeke I̱ma꞉ iki sutiaaso loa꞉me. \v 31 Doeki yaapona꞉ yeni peaapa꞉peke. Ma꞉nda꞉ta꞉ Diudia nane haleme pi na miki haliwekima꞉ I̱ hoeyaama꞉na꞉ loa꞉me. Ma꞉nda꞉ make dupa. Mo Diutuseleme da nane haleme Koda꞉na꞉ wanda꞉halima꞉ I̱ma꞉ iki tamba꞉ mulu poloeki mina꞉yeke loa꞉me. \v 32 Kutu pimika꞉na꞉ta꞉ Koda꞉na꞉ hone pa꞉la꞉ ekina꞉ I̱ma꞉ ta꞉na꞉ma꞉ homa꞉ paleke iki pa꞉ta꞉ ipulueke. Kutupate nika꞉ mandakena꞉ halo poloma꞉ ekima꞉ I̱ ta꞉na꞉ma꞉ homaalieke. \v 33 Mo hande puki lopa꞉niaasa꞉eki pu tiaasa꞉ teke hali Koda꞉ma꞉ iki paeyao ame̱le̱ mandakena꞉ haya꞉ka꞉na꞉ta꞉ kota꞉ epelieke. Kutu pina꞉e. \c 16 \s1 Poloma꞉ a꞉talo pimanu wape piekeeki \p \v 1 Mo hande Senkitia siosi wanda꞉halina꞉ e pokao hala꞉ wanda꞉ nika꞉ ana꞉ Pibita꞉ I̱ma꞉ iki pa꞉ta꞉ ipika꞉ pi laaso loa꞉me. \v 2 Koda꞉na꞉ wanda꞉halima꞉ta꞉ ika꞉ ika꞉ kone handa꞉ mu alualu pulu peleme tupa꞉ ikana꞉ma꞉ Tekehalina꞉ bikina꞉ ipiki handa꞉ meata꞉ kutupa ipikana꞉ma꞉ eki hau puluekema꞉ hone wia꞉ka꞉na꞉ta꞉ ikana꞉ma꞉ ipiki tamba꞉ mea꞉pa꞉peke. Ipikita꞉ wanda꞉hali wopu pa꞉ta꞉ make I̱ pa꞉ta꞉ make homu pea hata꞉ nika꞉ yankeke haya꞉ ekina꞉ loa꞉me. \p \v 3 Nika꞉ mandakena꞉ hata꞉ Yesu Ketiso ipika꞉ e pokao haloma꞉ tooli Pisila Akuila yaapo pa꞉ta꞉ a꞉taloe pi make la꞉niaasome. \v 4 Ipilikita꞉ yakaeki peaaso homolo pipieki kone paala꞉ma꞉ na homepeme. I̱ma꞉ homeke na loa꞉me. Diendaili siosi wanda꞉hali paeyaoma꞉ make nikana꞉ma꞉ ipiliki pa꞉ta꞉ keiyae pi aloma꞉me. \v 5 Ipilika꞉ da pa꞉ta꞉ mombolo haleme siosi wanda꞉hali pa꞉ta꞉ make a꞉taloe pi la꞉niaasome. Ota꞉ yaka yankeke Epenitasi pa꞉ta꞉ make a꞉taloe pi la꞉niaasome. Ipikita꞉ mo Eisia nane wanda꞉hali paeyao ame̱le̱ hata꞉ titina꞉ Ketiso biki ipikana꞉ma꞉ amba꞉la mia꞉me. \v 6 Mo hande ika꞉ e honkopu hao pokaeya꞉ wanda꞉ Meti pa꞉ta꞉ make a꞉taloe pi la꞉niaasome. \v 7 Hande nika꞉ mandakena꞉ dipula pituma꞉ Diu hali yaapo A꞉ndotonaikusi pita꞉ Diuniasi yaapo pa꞉ta꞉ make a꞉taloe pi la꞉niaasome. Mo hande aposolo haliwekima꞉ta꞉ koto hali yaapo wotu handa wilimime. I̱ta꞉ pi a̱i̱ na miki hano kone ipilikana꞉ma꞉ amba꞉la Ketiso haliweki haepekeme. \p \v 8 Mo hande Tekehali yaapo ta꞉ma꞉ni pea hala꞉ hali A꞉mbiliatusi make ota꞉ yaka yankeke pa꞉ta꞉ a꞉taloe pi la꞉niaasome. \v 9 Nika꞉ mandakena꞉ hata꞉ Ketisona꞉ e pokao haloma꞉ hali Ebanusi ipiki pa꞉ta꞉ make ota꞉ yaka yankeke Sitakusi ipiki pa꞉ta꞉ make a꞉taloe pi la꞉niaasome. \v 10 Hande ipika꞉ Ketiso pa꞉ta꞉ ti lao hala꞉eki peneme yala꞉ hali A꞉pelisi pa꞉ta꞉ make a꞉taloe pi la꞉niaasome. Hande Atisitobulusi tapake wanda꞉hali pa꞉ta꞉ make a꞉taloe pi la꞉niaasome. \v 11 Ya tapake Diu hali Hetodioni pa꞉ta꞉ make mo hande Nasisasi tapake Ketiso wanda꞉hali pa꞉ta꞉ make a꞉taloe pi la꞉niaasome. \p \v 12 Tekehalina꞉ e pokao halepe hali yaapo Totaipina pita꞉ Totaiposa yaapo pa꞉ta꞉ make Tekehalina꞉ e wotu pokaala꞉ hali Pesisi pa꞉ta꞉ make a꞉taloe pi la꞉niaasome. \v 13 Hande ponka꞉ ponka꞉ pilo hata꞉ Tekehalina꞉ e pokao hala꞉ hali Lupasi pa꞉ta꞉ make hande ipika꞉ eiyeke handeteke hala꞉ tupa꞉ kone I̱ make handeteke hao hala꞉ wanda꞉ Lupasina꞉ inkiki pa꞉ta꞉ make a꞉taloe pi la꞉niaasome. \v 14 Asinkitidasi Pilekoni Hemesi Pa꞉todobasi Hema꞉si kutupa iki ame̱le̱ hao haleme Ketiso wanda꞉hali paeyao pa꞉ta꞉ a꞉taloe pi la꞉niaasome. \v 15 Pilolokusi Diulia yaapo pa꞉ta꞉ make Netiasi ipika꞉ ana꞉ yaapo ipiliki pa꞉ta꞉ make Olimbasi pa꞉ta꞉ make kutupa iki ame̱le̱ hao haleme Koda꞉na꞉ wanda꞉hali paeyao pa꞉ta꞉ make a꞉taloe pi la꞉niaasome. \p \v 16 Iki paeyaoma꞉ hande Ketiso wanda꞉halima꞉ pu haloma꞉ tupa꞉ hopula alualu pea꞉pa꞉peke. Ketisona꞉ siosimanu paeyaoma꞉ iki pa꞉ta꞉ a꞉taloe pi la꞉niaasememe. \s1 Kinki pita꞉la꞉ pimanu \p \v 17 Yaka Ketiso kame titio. I̱ma꞉ iki sutiaaso hata꞉ dupiki pi alome. Mo wanda꞉halina꞉ hone tulaasemeeki hoeyaasa꞉eki make wanda꞉hali ka꞉ta꞉ alualu peaasa꞉eki make kutupiki hau piteleme wanda꞉halima꞉ iki hoeyaama꞉na꞉ma꞉ wotu handeteke hapa꞉peke. Amba꞉ titina꞉ iki pa꞉ta꞉ walemeke handa ikana꞉ma꞉ opimiki pi manuta꞉ ame mo wanda꞉halima꞉ tombualuekema꞉ taapelememe. Koto wanda꞉halita꞉ iki ame̱le̱ mandake pa꞉ta꞉ na momba꞉la꞉pa꞉peke. \v 18 Kutupiki haumanu pu haleme wanda꞉halima꞉ta꞉ Tekehali Yesu Ketisona꞉ e na pokaake ika꞉ loke manuna꞉ na꞉na꞉ pa꞉la꞉ ekimanu homeke hone u halememe. Ikana꞉ma꞉ mo tendepiki nonopiki pa imeke piki pimanu aleme ekima꞉ mo hokeeki wopu na handeleme wanda꞉hali makeao halememe. \v 19 Pate iki Loma꞉ wanda꞉hali ikana꞉ma꞉ mo hande Pi Seliapo opu haleme ekita꞉ mo wanda꞉hali paeyaoma꞉ amba꞉ opua wilimime. Kutu pa꞉la꞉ ekina꞉ I̱ma꞉ make iki pa꞉ta꞉ ta꞉na꞉ma꞉ homolome. Yaka hone pa꞉la꞉ ekita꞉ dupae. Ikana꞉ma꞉ta꞉ hokeeki puluekema꞉ hone na wiki wanda꞉hali hata꞉ epekeeki puluekema꞉ hone wopu wilimi wanda꞉hali hapa꞉peke hone witolome. \v 20 Kutu pimika꞉na꞉ta꞉ hande puki lopa꞉niaasa꞉ ekina꞉ teke hali Koda꞉ma꞉ mo Sadanita꞉ ika꞉ anke teke pa꞉ta꞉ lu tombualo pa꞉la꞉ ekita꞉ teke pa꞉ta꞉ ya꞉la꞉me. Tekehali Yesu ipika꞉ pa hameke a꞉ta꞉ma꞉ homa꞉la꞉eki iki ame̱le̱ pitina꞉ lena꞉e alome. \p \v 21 Dika꞉ mandakena꞉ e pokao halopa꞉ hali Timodima꞉ make iki pa꞉ta꞉ a꞉taloe pi la꞉niaasa꞉me. Lusiasima꞉ make Dieisonima꞉ make Sosipeidema꞉ make mo mandane Diu tapake haliweki ikana꞉ma꞉ make iki pa꞉ta꞉ a꞉taloe pi la꞉niaasememe. \p \v 22 Do wape peawaaso hali Tetiasi I̱ma꞉ make Ketiso hali hata꞉ iki pa꞉ta꞉ a꞉taloe pi la꞉niaasome. \p \v 23 Hande siosi wanda꞉hali mombolo haleme do da pa꞉ta꞉ I̱ handeteke hala꞉ da teke hali Kaiasima꞉ make iki pa꞉ta꞉ a꞉taloe pi la꞉niaasa꞉me. Do daonina꞉ kapomanina꞉ mani handeteke hala꞉ hali Eta꞉situsima꞉ make nika꞉ Ketiso kame Kuodasima꞉ make ipilikana꞉ma꞉ iki pa꞉ta꞉ a꞉taloe pi la꞉niaasepeme. \p \v 24 [Nika꞉ Tekehali Yesu Ketiso ipika꞉ a꞉ta꞉ma꞉ homa tamba꞉ mina꞉la꞉eki iki paeyao pa꞉ta꞉ wina꞉e.] \s1 Poloma꞉ wape pu paeyaaso hata꞉ Koda꞉na꞉ pi laasa꞉eki \p \v 25 Nikana꞉ma꞉ Koda꞉na꞉ pi laamana꞉e. Koda꞉ma꞉ mo amba꞉ kiake kone a꞉mbao wieke pa ame I̱ma꞉ walolo hande Yesu Ketisona꞉ Pi Seliapo pa꞉ta꞉ yama꞉ Koda꞉ma꞉ ika꞉ hone tulao haleme ekita꞉ ana꞉na꞉ taka꞉lao hamina꞉ lelieke. Koto walolo pita꞉ mo amba꞉ kiaake kone a꞉mbao wieke ota꞉ pie. \v 26 Koto pa꞉la꞉pate hande a꞉mbao wieke ota꞉ pi manuta꞉ ameta꞉ mo hande potopede haliwekina꞉ wape pelemeeki manuma꞉ peneme yaala꞉me. Kutupa hande na homeke pa hao hala꞉ Koda꞉ma꞉ dupa꞉pe laa leeke handaata꞉ wanda꞉hali paeyaoma꞉ opua pina꞉yeke koto hande pita꞉ kenke honiki honiki paeyao pa꞉ta꞉ mo tutu paeyao pa꞉ta꞉ wala꞉tia pominoloma꞉me. \p \v 27 Nikana꞉ma꞉ Yesu Ketiso pa꞉ta꞉ yama꞉ mo hande hau paeyao wotu handa ula꞉ Koda꞉ homeke homekena꞉ pi hoto paeyao laatiki pu hamana꞉e. Kutu pumana꞉e.