\id REV - Sembeleke Samberigi PNG REVELATION 1 13/2/91 Macnaughtan \h PENEME YAEYEKEEKI \toc1 Dota꞉ Yesu Ketisoma꞉ Dioni pa꞉ta꞉ peneme yaeyekeeki \toc2 Peneme Yaeyekeeki \toc3 Peneme Yaeyekeeki \mt1 Dota꞉ Yesu Ketisoma꞉ Dioni pa꞉ta꞉ peneme yaeyekeeki \c 1 \p \v 1 Do bukata꞉ mo Yesu Ketisona꞉ peneme yaeyeke haumanu lao ula꞉ bukae. Koda꞉ma꞉ do peneme yaasa꞉ haumanu haleeke ekita꞉ ipika꞉ e pokaasa꞉ wanda꞉hali pa꞉ta꞉ koto kone pulu piekeeki waluekema꞉ piekeme. Ketisoma꞉ta꞉ ipika꞉ e pokaasa꞉ hali Dioni pa꞉ta꞉ ipika꞉ enisolo tapao dupiki haumanu walena꞉ leekeme. \v 2 Kutupa Dionima꞉ta꞉ ipikana꞉ma꞉ handeeke haumanu paeyao la꞉la꞉me. Do lao ula꞉ pita꞉ mo Koda꞉ma꞉ la꞉la꞉ pi make Yesu Ketisoma꞉ ota꞉ tupa꞉ peneme yaala꞉ pie. \p \v 3 Ma꞉nda꞉ epima꞉ do buka pa꞉ta꞉ la꞉ ula꞉ ekimanu ipula꞉ ekita꞉ Koda꞉ma꞉ ota꞉ epeaasa꞉me. Kutupa make epi amedama꞉ do la꞉ ula꞉ pimanu opitolo hata꞉ ika꞉ puki tukiki nane mendimika꞉na꞉ta꞉ ikita꞉ Koda꞉ma꞉ ota꞉ epeaasa꞉me. Pa ekipeke do haumanu pulu pa꞉la꞉ nateta꞉ teke pa꞉ta꞉ ya꞉leke loa꞉me. \s1 Watake hata꞉ siosi pa꞉ta꞉ wape tapaeyekeeki \p \v 4 I̱ta꞉ Dionima꞉ mo Eisia kenke nane hala꞉ watake hata꞉ a꞉ta꞉ alome. Ame do make hala꞉ amba꞉ make hayeke wetepena꞉ make epolo pa꞉la꞉ Koda꞉ma꞉ a꞉ta꞉ma꞉ homolo tamba꞉ mina꞉la꞉eki pita꞉ puki lopa꞉niaasa꞉eki yaapota꞉ iki pa꞉ta꞉ kina꞉e. Koto tupa꞉ mo Koda꞉na꞉ handeteke pila꞉ sea tikitikina꞉ haleme watake hata꞉ sipitidi manuma꞉ make kina꞉e. \v 5 Kutupa make mo Koda꞉na꞉ pi ota꞉ tupa꞉ laasa꞉ hali mo hande homa꞉la꞉eki bepolao tiaeyeke titina꞉ hali make do kenke honiki paeyaona꞉ kini haliwekina꞉ handeteke hala꞉ hali Yesu Ketisoma꞉ make homeke hau kone pina꞉e. \p Ipikana꞉ma꞉ta꞉ niki pukima꞉ homo hala꞉me. Ipika꞉ a꞉ka꞉tei wape piki tina꞉ lopeeke wema꞉ta꞉ nika꞉ hoke hau pa꞉ta꞉ niki ka꞉la꞉pa꞉ tapaala꞉me. \v 6 Kutupa ipika꞉ Apa꞉ Koda꞉na꞉ e pokomono nikita꞉ ipika꞉ kilu tombuao hala꞉ ekina꞉ yeni peao haleme wanda꞉hali hamono la꞉la꞉me. Yesu Ketiso pa꞉ta꞉ta꞉ pa̱a̱ pita꞉la꞉eki make wele pita꞉la꞉eki make hoto paeyao pa utia pu haena꞉e. Kutu pina꞉e. \p \v 7 Ipikita꞉ ya hapi manda oli ipula꞉ handa꞉e. Paeyaoma꞉ handilimikie. Mo ipiki ikoko lia doloma꞉ awemeke haliwekina꞉ make loa꞉me. Kutupa do kenkena꞉ hala꞉ wanda꞉hali paeyaoma꞉ta꞉ ipiki handolo hata꞉ e̱ tieke lelimikie. Koto ekina꞉ta꞉ kutu pilieke. \p \v 8 Mo Aneke Tekehali Koda꞉ma꞉ alota꞉ I̱ta꞉ ota꞉ titina꞉ ota꞉ wetepe sale nane makee laa I̱ta꞉ ame do halo make amba꞉ haowa꞉ make wetepena꞉ make epolo polo halie ala꞉me lea꞉me. \s1 Dionima꞉ Ketiso handeekeeki \p \v 9 I̱ta꞉ ika꞉ kame Dioni Yesuna꞉ hoki nane teliolo halie. Ipika꞉ Kilu Tombuao Hala꞉eki pa꞉ta꞉ haleme ekina꞉ ki hone na wiki Pina꞉e laa tanda mineleme ekina꞉ putupoloma꞉ yankekema꞉ loa꞉me. I̱ta꞉ Koda꞉na꞉ pi walaawa꞉ ekina꞉ make Yesuma꞉ ota꞉eki peneme yaeyekeeki walaawa꞉ ekina꞉ I̱ta꞉ mo dawalama꞉ dupake Pa꞉timosi kenke siki pa꞉ta꞉ hano lelememe. \v 10 Mo Tekehalina꞉ natena꞉ta꞉ hande Sipitidima꞉ I̱ handeteke hata꞉ e pokea꞉me. Kutupa bu kanakena꞉ e̱ma꞉ handeke pi ho̱la̱꞉make tiekema꞉ yaka hoki nane pi lea꞉eki opua꞉me. \v 11 Dupa lea꞉me. Nakana꞉ma꞉ do handolo peleeki manuta꞉ wape laaniao kutupa mo bukata꞉ mo watake hata꞉ daoni manuna꞉ siosi pa꞉ta꞉ tapaapeke. Epesese Semena Pekamamo Daetaeda Sadisi Pila꞉delepia make Leiodisiamanu pa꞉ta꞉ loa꞉me lea꞉me. \p \v 12 I̱ pa꞉ta꞉ pi ala꞉ta꞉ epima꞉ ala꞉pe laa la꞉ka꞉la꞉ moneawa꞉pate handeta꞉ watake hata꞉ koloma꞉ wepiki ola꞉pake keo panka꞉la꞉ alemanu handoa꞉me. \v 13 Kutupa koto alemanu anka꞉lopuna꞉ta꞉ halima꞉ handeke nono piki alema꞉ hake piki dau hokulu oni ipika꞉ anke ana꞉na꞉ wataapekeeki yameekeme. Kutupa make koloma꞉ wepiki beleke ipika꞉ hakokona꞉ adoto pia꞉me. \v 14 Ipika꞉ you pita꞉ itiki yaapota꞉ mo hake pupapeke sipisipi itikima꞉ handa o hake pupapeke yahapima꞉ handeke alema꞉ handa make ipika꞉ leketa꞉ ti to hala꞉ ti haaleke ekima꞉ handea꞉me. \v 15 Ipika꞉ anketa꞉ mo epeke tupa꞉ wamo pea mulamula kitao wiki koloma꞉ handeke nono piki ale batasima꞉ handa leke yale yale peata꞉ ipika꞉ pi ho̱la̱꞉maketa꞉ mo u tieke laa lopa꞉la꞉ ikali do̱u̱ma꞉ handea꞉me. \v 16 Ipika꞉ popeke nane kikina꞉ta꞉ watake hata꞉ hombulanka꞉manu miniki hata꞉ ipika꞉ kake pa꞉ta꞉ta꞉ mo ne hake kake yaapo hake bainasi opolu baeya꞉me. Ipika꞉ leke popeleketa꞉ mo you tikekena꞉ tala꞉ natema꞉ handeke pa̱a̱ tieke pia꞉me. \p \v 17 I̱ma꞉ ipiki handoa꞉ dina꞉ta꞉ amba꞉ homeke halima꞉ handaa ipika꞉ anke teke pa꞉ta꞉ lopoa꞉me. Kutu pueketa꞉ ipikana꞉ma꞉ ipika꞉ popeke nane kiki I̱ manda witolo hata꞉ alota꞉ Paala꞉ma꞉ na homa꞉pee. I̱ta꞉ ota꞉ titina꞉ make ota꞉ wetepe sale nane makee. \v 18 I̱ta꞉ deto hala꞉ halie. I̱ta꞉ homoa꞉pate ameta꞉ tiao hoto paeyao pa hatia pu hala꞉ hali halome. I̱ma꞉ta꞉ homa꞉la꞉ ekina꞉ make mo homo hala꞉ kenkena꞉ pota꞉ ki handeteke halo halie. \v 19 Koto ekina꞉ta꞉ do handele alemanu paeyao make wetepe nane pulu pa꞉la꞉ ekimanu make paeyao laaniae. \v 20 Do yaka popeke nane miniki halo watake hata꞉ hombulanka꞉ manuna꞉ make do watake hata꞉ koloma꞉ wepiki ola꞉pake keo panka꞉la꞉ alemanu yaapona꞉ a꞉mbao ula꞉ teketa꞉ dupae. Do watake hata꞉ hombulanka꞉ manuta꞉ mo hande watake hata꞉ siosi manuna꞉ enisolomanue. Kutupa do watake hata꞉ ola꞉pake keo panka꞉la꞉ ale manuta꞉ mo hande watake hata꞉ siosimanue lea꞉me. \c 2 \s1 Epesese siosi pa꞉ta꞉ pi tapaeyekeeki \p \v 1 Mo Epesese siosina꞉ enisolo pa꞉ta꞉ dupa lae. Do pita꞉ mo hande watake hata꞉ hombulanka꞉manu ipika꞉ popeke nane kikina꞉ miniki hata꞉ mo watake hata꞉ koloma꞉ wepiki ola꞉pake keo panka꞉la꞉ ale anka꞉lopuna꞉ pomina꞉la꞉ somema꞉ tapaasa꞉me. \p \v 2 Ika꞉ peleme hau manuta꞉ I̱ma꞉ hone ulume. Ika꞉ honkopu hao e pokelemeeki make ika꞉ homu pea yu wia halemeeki make loa꞉me. Ikana꞉ma꞉ mo hoke haliweki na handoma꞉ tiake make mandane haliwekima꞉ ikita꞉ aposolo haliwekie aleme tapaketa꞉ hande hande pea dia꞉yaota꞉ yayapiki pi alo lemeka꞉ta꞉me laa handa꞉ wilimime. \v 3 Ikita꞉ homu pea yu wia halememe. Kutupa ikita꞉ yaka ekina꞉ kone tanda nalo hata꞉ na kiaalememe. \v 4 Koto pelemepate ameta꞉ iki pa꞉ta꞉ alo pita꞉ dupa. Ikana꞉ma꞉ amba꞉ titina꞉ I̱ puki kitolo pimi tupa꞉ ameta꞉ puki na kelememe. \v 5 Iki pua lopeleme tupa꞉ hone wipee. Ika꞉ hoke hau hoki walaa amba꞉ titina꞉ pimieki paa pipee. Ikana꞉ma꞉ ika꞉ hoke hau hoki na walemeka꞉na꞉ta꞉ I̱ma꞉ iki pa꞉ta꞉ a꞉pa mo ika꞉ ola꞉pake keo panka꞉la꞉ ale ipika꞉ u hala꞉ ale mina꞉pa꞉laena꞉ lolueke. \v 6 Pate I̱ ta꞉na꞉ putiaaseme hauta꞉ doe. I̱ma꞉ mo Nikoleitani tapakema꞉ pu haleme haumanu kiaaso pitolo tupa꞉ kone ikana꞉ma꞉ make kiaasememe. \p \v 7 Haleke haemeka꞉na꞉ta꞉ kota꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ mo Koda꞉na꞉ e pa꞉ta꞉ opa꞉la꞉ da꞉ta꞉la꞉ tina꞉ kiliki nena꞉ waleke halueke. \s1 Semena siosi pa꞉ta꞉ pi tapaeyekeeki \p \v 8 Mo Semena siosina꞉ enisolo pa꞉ta꞉ dupa lae. Do pita꞉ mo hande titina꞉ make wetepena꞉ make hala꞉ halima꞉ ala꞉me. I̱ta꞉ homaaka꞉na꞉ paa da꞉taa halo somee ala꞉me. \p \v 9 Ika꞉ ka꞉nda꞉ manuta꞉ I̱ma꞉ hone ulume. Ikita꞉ nate hali halemepate ikita꞉ ota꞉ hamoko halememe hone ulume. Diu wanda꞉hali dia꞉ya꞉la꞉pate kone ikita꞉ Diu wanda꞉halie lo haleme wanda꞉halima꞉ iki pa꞉ta꞉ hoke pimanu lo haleme ekita꞉ I̱ma꞉ hone ulume. Koto wanda꞉halita꞉ Sadanina꞉ tapakee. \v 10 Mo mulu peleme tanda manuna꞉ paala꞉ma꞉ na homa꞉pa꞉peke. Opia꞉pe. Mo Sadanima꞉ta꞉ iki la handolo hata꞉ iki ma꞉nda꞉ hondo dipula mea lopaalieke. Kutupa ika꞉ ka꞉nda꞉ma꞉ homelemeeki manuta꞉ kiki yaapo natena꞉ pua paelieke. Homa꞉la꞉eki epena꞉ kone I̱ pa꞉ta꞉ hone tulaa pelia hapa꞉peke. Kutu pimika꞉na꞉ta꞉ ika꞉ a꞉nda꞉ pea bepolaaseme ekina꞉ ta꞉na꞉ma꞉ homolo peleme yenkita꞉ da꞉ta꞉la꞉eki kulueke. \p \v 11 Haleke haemeka꞉na꞉ta꞉ mo Sipitidima꞉ siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaasa꞉ halita꞉ hande hoto yaapo peao homa꞉la꞉ ekima꞉ta꞉ hoeyaapeke na yelieke. \s1 Pekamamo siosi pa꞉ta꞉ pi tapaeyekeeki \p \v 12 Mo Pekamamo siosina꞉ enisolo pa꞉ta꞉ dupa lae. Do pita꞉ mo hande yaapo hao ne wopu hake bainasi wia hala꞉ halima꞉ ala꞉me. \p \v 13 Ika꞉ haleme pa꞉ta꞉ta꞉ I̱ma꞉ hone ulume. Mo Sadanima꞉ ipika꞉ kilu tombuao hala꞉eki ula꞉ alena꞉e. Ikita꞉ I̱ pa꞉ta꞉ ota꞉ hau pu halememe. Kutupa mo Sadani hala꞉ alena꞉ yaka hande hone tulao hao hata꞉ e pokawao haya꞉ hali A꞉ntipa꞉si lu homaeya꞉ nate nina꞉ kone I̱ pa꞉ta꞉ hone tulao halemeeki hoki na walememe. \v 14 Koto pelemepate I̱ma꞉ta꞉ iki pa꞉ta꞉ alo pimanu dupa. Iki tukiki pa꞉ta꞉ta꞉ mo Beilame wala꞉la꞉ pi tolu haleme wanda꞉hali taa haleme handa꞉e. Koto Beilame Beileke walolota꞉ Isulai wanda꞉hali mo toopi ti wepia ula꞉ ale pa꞉ta꞉ halo haleme nemanu nena꞉ alo make loke hoeyaasa꞉ hau pina꞉yeke ipikana꞉ma꞉ sutiaeyeke hauma꞉ iki hoke hau pa꞉ta꞉ hatuku pena꞉yeke waleekeme. \v 15 Homeke tupa꞉ kone mo hande Nikoleitani tapakena꞉ wala꞉la꞉ ekimanu tolu haleme wanda꞉hali iki tukiki pa꞉ta꞉ taa haleme handa꞉e. \v 16 Koto pa꞉la꞉me ameta꞉ ika꞉ hoke hau hoki wala꞉pe. Kotoeki na pimika꞉na꞉ta꞉ I̱ta꞉ iki pa꞉ta꞉ koto kone a꞉pa koto wanda꞉hali ame̱le̱ yaka kake pa꞉ta꞉ ipu hala꞉ bainasima꞉ a꞉nda꞉ pulueke. \p \v 17 Haleke haemeka꞉na꞉ta꞉ kota꞉ mo Sipitidima꞉ siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ I̱ma꞉ ipiki pa꞉ta꞉ mo a꞉mbao ula꞉ mandane ma꞉na halueke. Kutupa mo hake piki toopina꞉ panake biki laala꞉eki make halueke. Mo bikita꞉ ma꞉nda꞉ma꞉ make hone na ula꞉pate mo milia꞉ somema꞉ homeke hone wilieke. \s1 Daetaeda siosi pa꞉ta꞉ pi tapaeyekeeki \p \v 18 Mo Daetaeda siosina꞉ enisolo pa꞉ta꞉ dupa lae. Do pita꞉ mo Koda꞉na꞉ Eiyeke ipika꞉ leketa꞉ mo hande we pupapeke ti haaleke ekima꞉ handaa ipika꞉ anketa꞉ mo mulamula lialeke pa leke yale yale piki koloma꞉ handeke ale batasima꞉ handeke somema꞉ ala꞉me. \p \v 19 Ika꞉ pu haleme hau manuta꞉ I̱ma꞉ hone ulume. Ika꞉ pukima꞉ homelemeeki make kima꞉ na homeke hone tulao halemeeki make ika꞉ e pokelemeeki make ika꞉ homu pea yu wia halemeeki make I̱ma꞉ hone ulume. Ikana꞉ma꞉ ameta꞉ wopu pitelememe. Amba꞉ hande pimi tupa꞉ dia꞉me laa I̱ma꞉ hone ulume. \v 20 Koto pelemepate I̱ma꞉ iki pa꞉ta꞉ alo pita꞉ dupa. Ikana꞉ma꞉ta꞉ mo wanda꞉ Diesibeleta꞉ iki ame̱le̱ pa haena꞉ kiaalememe. Koto wanda꞉ma꞉ta꞉ ipikita꞉ Koda꞉na꞉ pi mea ipulu wanda꞉e lo hala꞉pate ipika꞉ wala꞉la꞉ ekima꞉ta꞉ yaka e pa hameke pokaaseme tapakema꞉ ika꞉ loke hoeyaasa꞉ hau pina꞉ make mo hoke temoko pa꞉ta꞉ hala꞉la꞉ nemanu nena꞉ hatuku pu hoeyao hala꞉me. \v 21 I̱ma꞉ta꞉ ipika꞉ hoke hau hoki walena꞉ waleke haloa꞉pate ipika꞉ loke hoeyaasa꞉ hau pa꞉ta꞉ hoki wala꞉peke ya꞉leke kiaasa꞉me. \v 22 Koto ekina꞉ta꞉ I̱ma꞉ta꞉ mo wanda꞉ make mo wanda꞉ ame̱le̱ loke hoeyaasa꞉ hau pimi tapake ame̱le̱ ota꞉ hoke tupa꞉ tanda mulu peleme da panda꞉ pa꞉ta꞉ lopaa monealueke. Ikana꞉ma꞉ mo wanda꞉ ame̱le̱ loke hoeyaasa꞉ haumanu pimikieki na kelepemeka꞉na꞉ta꞉ kota꞉ ameta꞉ I̱ma꞉ iki pa꞉ta꞉ do aloeki pulueke. \v 23 Kutupa ipika꞉ hoki nane tolu haleme tapake make lu homaalueke. Kutu pua꞉ka꞉na꞉ta꞉ mo siosi paeyaoma꞉ I̱ta꞉ wanda꞉hali paeyaona꞉ honemanu make hone u halemeeki manuna꞉ hone ulu somee hone wilimikie. I̱ma꞉ta꞉ iki paeyao ika꞉ peleme ekina꞉ homeke homeke lo ana꞉na꞉ kone yenki kulueke. \p \v 24 Koto pa꞉la꞉pate Daetaeda haleme mandane wanda꞉halima꞉ta꞉ mo hokeeki wala꞉la꞉eki na telia꞉ mea pelememe. Koto wanda꞉ ame̱le̱ haleme tapakema꞉ alota꞉ Sadanina꞉ ota꞉ onina꞉ toluma꞉ a꞉mbao ula꞉ pi tekemanue lo haleme ekita꞉ na moka꞉la handelememe. Iki pa꞉ta꞉ mo ka꞉nda꞉ pa꞉la꞉eki ma꞉nda꞉ na atulao ulueke alome. \v 25 Koto ekina꞉ ika꞉ wia halemeeki manuta꞉ I̱ epono honkopu hao miniki hapa꞉peke. \v 26 Ma꞉nda꞉ epi amedama꞉ a꞉nda꞉ pea bepolaaso hata꞉ yaka hone pa꞉la꞉eki pa putia pua mo honikina꞉ paeyaeya꞉ka꞉na꞉ta꞉ kota꞉ yaka Apa꞉ma꞉ I̱ma꞉ handeteke hanoyeke ka꞉la꞉ ekita꞉ iki pa꞉ta꞉ kulueke. I̱ma꞉ta꞉ iki pa꞉ta꞉ mo kenke honiki paeyao pa꞉ta꞉ haleme tapake paeyao handeteke hamena꞉ lolueke. \v 27 Mo ayenima꞉ wepieke dopitama꞉ handeteke hamena꞉ laata꞉ mo kenkema꞉ wa꞉pa꞉la꞉ kanakema꞉ handaa yambolo sasape puemena꞉ lolueke. \v 28 Kutupa mo da ka꞉la꞉paaso opa꞉la꞉ hombulanka꞉ make iki pa꞉ta꞉ halueke. \p \v 29 Haleke haemeka꞉na꞉ta꞉ kota꞉ mo Sipitidima꞉ siosimanu pa꞉ta꞉ lo hala꞉ pi manuta꞉ ota꞉ opua꞉pa꞉peke ya꞉la꞉me. \c 3 \s1 Sadisi siosi pa꞉ta꞉ pi tapaeyekeeki \p \v 1 Mo Sadisi siosina꞉ enisolo pa꞉ta꞉ dupa lae. Do pita꞉ mo Koda꞉na꞉ watake hata꞉ sipitidimanu make mo watake hata꞉ hombulanka꞉manu wia hala꞉ halima꞉ ala꞉me. \p Ika꞉ piteleme hau manuta꞉ I̱ma꞉ hone ulume. Wanda꞉halima꞉ ikita꞉ tanda piki Ketiso wanda꞉hali halememe lo halemeke opulupate handeta꞉ ikita꞉ homaa pimika꞉ta꞉me. \v 2 Koto ekina꞉ tiao mo wia haleme ale ota꞉ homaama꞉na꞉ a̱i̱ tindipapee. Pa ekipeke ika꞉ peleme hau manuta꞉ Koda꞉na꞉ leke popelekena꞉ a̱i̱ tikitiki na pa꞉la꞉eki handolo hata꞉ loa꞉me. \v 3 Hande iki walea꞉eki opimi ekimanu niminaaso hata꞉ opua ika꞉ hoke haumanu pa꞉ta꞉ a̱i̱ hoki walaapee. Iki a̱i̱ na tiaemeka꞉na꞉ta꞉ kota꞉ I̱ta꞉ iki pa꞉ta꞉ pake nala꞉ hali leke opolo ipulueke. Kutupa ikana꞉ma꞉ta꞉ I̱ epolo polo nateta꞉ hone na wilimikie. \v 4 Pate koto Sadisi haleme wanda꞉hali tepo tepo a꞉nda꞉ma꞉ta꞉ ika꞉ aka꞉manu ha̱i̱ peaama꞉na꞉yeke epeke tupa꞉ handeteke hao pimika꞉ta꞉me. Koto peleme ekima꞉ta꞉ ikita꞉ hakepiki dau yama I̱ yaapo pota꞉ pomu halumeke. Pa ekipeke ikana꞉ma꞉ do epeke hau peleme ekina꞉ loa꞉me. \v 5 Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ kota꞉ dupiki hake piki dau yamilieke. Kutupa ika꞉ bikita꞉ mo deto haleme wanda꞉halina꞉ bukana꞉ ula꞉ ekita꞉ I̱ma꞉ na honulueke. Yaka Apa꞉ make ipika꞉ enisolo manuna꞉ leke popelekena꞉ peneme yao hata꞉ Ikita꞉ yaka tapakee lolueke lea꞉me. \p \v 6 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. \s1 Pila꞉delepia siosi pa꞉ta꞉ pi tapaeyekeeki \p \v 7 Mo Pila꞉delepia siosina꞉ enisolo pa꞉ta꞉ dupa lae. Do pita꞉ mo yako pea ota꞉ hauna꞉ teke halima꞉ ala꞉me. Ipikita꞉ mo hande Deipidina꞉ pota꞉ ki wia hala꞉ halie. Kutupa ipikana꞉ma꞉ pota꞉ ma꞉nda꞉ lombea꞉ka꞉na꞉ta꞉ ma꞉nda꞉ma꞉ hamba꞉peke na ya꞉la꞉me make pokea꞉ka꞉na꞉ta꞉ ma꞉nda꞉ma꞉ lomba꞉peke na ya꞉la꞉me. \p \v 8 I̱ma꞉ta꞉ ika꞉ pu haleme hau manuta꞉ hone ulume. Ikita꞉ honkopu hosikale siki halememe laa I̱ma꞉ hone ulume. Ikana꞉ma꞉ yaka waloloeki manuta꞉ opua kima꞉ na homeke I̱ pa꞉ta꞉ hone tulaalememe. Ma꞉nda꞉ma꞉ na poka꞉peke yolo pa꞉la꞉ tupa꞉ I̱ma꞉ta꞉ ika꞉ puki nanema꞉ pota꞉ lomba wialome. \v 9 Opie. Mo Sadanina꞉ tapake yayapiki pi alo hata꞉ Diu wanda꞉hali dia꞉ya꞉la꞉pate kone ikita꞉ Diu wanda꞉halie lo haleme wanda꞉halita꞉ I̱ma꞉ ika꞉ anke teke pa꞉ta꞉ a꞉pa panda꞉puniaena꞉ lolueke. Mo wanda꞉halima꞉ta꞉ I̱ma꞉ iki pukima꞉ homolome laa hone wilimikie. \v 10 Mo kenkena꞉ haleme wanda꞉hali paeyao la handuluekema꞉ ipula꞉ ka꞉nda꞉manu pa꞉ta꞉ta꞉ I̱ma꞉ iki handeteke halueke. Pa ekipeke ikana꞉ma꞉ta꞉ mo ka꞉nda꞉ pa꞉la꞉eki pa꞉ta꞉ hata꞉ kone kima꞉ na homeke honkopu hao hapa꞉peke laa la꞉ ua꞉ ekita꞉ na mina꞉pa꞉lake pa pea꞉tiki peleme ekina꞉ loa꞉me. \v 11 I̱ta꞉ teke pa꞉ta꞉ ipuluma꞉ ika꞉ wia haleme ekita꞉ amuma꞉ wia hapa꞉peke. Pa ekipeke ma꞉nda꞉ma꞉ ika꞉ hande a꞉nda꞉ pea bepolaaso hata꞉ mimi ekina꞉ yenkita꞉ pake naama꞉na꞉yeke loa꞉me. \v 12 I̱ma꞉ta꞉ mo bepolao hala꞉ halita꞉ yaka Koda꞉na꞉ tembolo da pinki haena꞉ laata꞉ koto aleta꞉ na mina꞉pa꞉lalieke. I̱ma꞉ ipiki pa꞉ta꞉ yaka Koda꞉na꞉ biki lao make mo yaka Koda꞉ma꞉ oli ya pa꞉ta꞉ yama꞉ hola꞉pa꞉nialia꞉ hande panake daoni tieke Diutuselemena꞉ biki make laalueke. Kutupa make yaka panake biki laalueke lea꞉me. \p \v 13 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. \s1 Leiodisia siosi pa꞉ta꞉ pi tapaeyekeeki \p \v 14 Mo Leiodisia siosina꞉ enisolo pa꞉ta꞉ dupa lae. Do pita꞉ mo hande ipika꞉ biki ma꞉nda꞉ taapo wiaaso hata꞉ Kutu pina꞉taa leleme somema꞉ ala꞉me. Ipikita꞉ kima꞉ na homeke ota꞉ hauna꞉ walo hala꞉ halie. Kutupa make ipikita꞉ mo hande Koda꞉ma꞉ wa꞉pa꞉la꞉ alemanu paeyaona꞉ teke somee. \p \v 15 I̱ma꞉ ika꞉ peleme hau manuta꞉ hone ulume. Iki titipu make kosa꞉ make na pa꞉la꞉me laa hone ulume. Ikita꞉ titipu make kosa꞉ make ma꞉nda꞉ hondo pina꞉e hone witolopate \v 16 ikita꞉ kosa꞉ dia꞉ titipu dia꞉ pa tukikina꞉ haleme ekina꞉ yaka kake pa꞉ta꞉ yama꞉ dopita baalueke. \v 17 Ikana꞉ma꞉ alota꞉ I̱ta꞉ hamoko hata꞉ ala꞉ta꞉ ala꞉ta꞉ paeyao ana꞉ pa꞉la꞉me. I̱ dia꞉ya꞉la꞉ ale manuta꞉ ma꞉nda꞉ dia꞉yalo hata꞉ I̱ ana꞉ pa꞉la꞉me alememe. Pate ikita꞉ ta꞉na꞉ na pea ota꞉ a꞉ta꞉ pambeleme ekita꞉ hone na wilimime. Ikita꞉ natehali hao aka꞉ na yameke pa tia hata꞉ leke holu peleme. \v 18 Koto ekina꞉ I̱ma꞉ iki mana꞉ alo ekita꞉ mo ota꞉ ala꞉ta꞉ ma꞉nda꞉ na taleke kolo I̱ pa꞉ta꞉ hambemeka꞉na꞉ta꞉ kota꞉ hamoko halo peleme tupa꞉ loa꞉me. Kutupa make mo hakepiki aka꞉ ika꞉ yaala꞉ piki pa tia haleeki a꞉mbao yamoemena꞉ hamba꞉pee. Kutupa handolo peleme tupa꞉ mandane mulamula ika꞉ lekena꞉ liamena꞉ hamba꞉pee. \v 19 I̱ma꞉ta꞉ yaka pukima꞉ homolo wanda꞉hali paeyaota꞉ pima꞉ hando laa panisi peao halome. Koto ekina꞉ ika꞉ hoke hau manuta꞉ ota꞉ hone witolo hata꞉ hoki wala꞉pe. \v 20 Opua꞉pe. I̱ta꞉ pota꞉ kake pa꞉ta꞉ hata꞉ kili kili lao halome. Ma꞉nda꞉ epima꞉ yaka pi ho̱la̱꞉make opua pota꞉ lombea꞉ka꞉na꞉ta꞉ I̱ta꞉ ipika꞉ da pa꞉ta꞉ a꞉pa ipiki yaapo ne nolueke. Kutupa ipikana꞉ma꞉ make I̱ yaapo ne nelieke. \v 21 Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ I̱ ame̱le̱ mo yaka kini seana꞉ lopulao pitulupeke. I̱ma꞉ta꞉ bepolaota꞉ ameta꞉ yaka Apa꞉na꞉ kini seana꞉ lopulao pilupa꞉ tupa꞉ loa꞉me lea꞉me. \p \v 22 Haleke haemeka꞉na꞉ta꞉ mo Sipitidima꞉ mo siosimanu pa꞉ta꞉ lo hala꞉eki manuta꞉ ota꞉ opua꞉pa꞉peke ya꞉la꞉me. \c 4 \s1 Hepeni nane biki mina꞉liaaso yeiya꞉ laasemeeki \p \v 1 Koto natena꞉ kone ya nane oli hepeni pota꞉ lomba꞉pa wia꞉eki handoa꞉me. Kutupa mo hande amba꞉ I̱ pa꞉ta꞉ pi la kia꞉ bu kanakema꞉ handeke pi ho̱la̱꞉makema꞉ alota꞉ Do pate epoe laa Kutupa doeki hoki nane pulu pa꞉la꞉eki waluekema꞉ loa꞉me lea꞉me. \v 2 Koto kone mo Sipitidima꞉ I̱ pa꞉ta꞉ e pokea꞉me. Oli hepeni naneta꞉ mo kilu tumbao pila꞉ kini seana꞉ ma꞉nda꞉ manda pitia꞉me. \v 3 Ipika꞉ leke popeleketa꞉ yenki tieke yeke toopimanu dia꞉sepa make kanilianima꞉ make leke yale yale pita꞉la꞉ ekima꞉ handea꞉me. Kutupa mo emulolidi toopina꞉ au leke ka꞉la꞉da꞉peiya mo kilu tumbao pila꞉eki popei yao wiekeeki handoa꞉me. \v 4 Mo hande kini sea popei yaota꞉ mandane hali tieke homekena꞉ tonkopu kini seamanu wia꞉me. Moeki manuna꞉ta꞉ mo hali tieke homekena꞉ tonkopu you haliweki hake piki dau yamaata꞉ koloma꞉ wepiki handeteke hala꞉ haliwekina꞉ you aka꞉manu pambaememe. \v 5 Mo kini sea pa꞉ta꞉ yama꞉ta꞉ ti tekelemanu make a꞉ta꞉ a꞉ta꞉ piki tutu make mo tutu tieke lita꞉la꞉eki make yapea꞉me. Mo kini seana꞉ puki tikitikita꞉ watake hata꞉ ola꞉pakemanu talo haya꞉me. Kotota꞉ mo Koda꞉na꞉ watake hata꞉ sipitidimanu ya꞉me. \v 6 Kutupa mo kini seana꞉ puki nane ombuta꞉ kalasima꞉ handeke ala꞉ta꞉ ma꞉nda꞉ na taleke hama꞉ tieke wia꞉eki handoa꞉me. \p Mo kini seana꞉ nepoko nina꞉ta꞉ pa deto hao hala꞉ tonkopu alemanu ika꞉ puki nane make hoki nane paeyao lekema꞉ tumbiki ale manuma꞉ popei yao wia꞉me. \v 7 Titina꞉ ekita꞉ mo bosikasi tieke biki laeonoma꞉ handea꞉me. Yaapo peao ekita꞉ mo kao hali ekima꞉ handea꞉me. Tepo peao ekita꞉ halina꞉ leke popeleke haya꞉me. Tonko peao ekita꞉ bitutu laa pomina꞉la꞉ uda tiekema꞉ handea꞉me. \v 8 Mo deto hala꞉ alemanu homeke homekema꞉ta꞉ watake hata꞉ popake haememe. Kutupa ika꞉ loketa꞉ oto nane make hama꞉ nane make lekema꞉ tumbulu bao wia꞉me. Ikana꞉ma꞉ peliolo da ka꞉la꞉polo tombo na wiki lo haleme emelita꞉ dupa \q1 Tekehali Aneke Koda꞉ta꞉ yako piki yako piki yako piki Koda꞉o. \q1 Amba꞉ make haya꞉ ame make hala꞉ wetepena꞉ make halo pa꞉la꞉ halie laa lo halememe. \p \v 9 Mo deto haleme tonkopu ale manuma꞉ta꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ pa̱a̱ peaasa꞉eki yeiya꞉ laasa꞉eki keiyae ala꞉eki pa꞉ta꞉ emelimanu lo halememe. Kutupu haleme dina꞉ta꞉ \v 10 mo hali tieke homekena꞉ tonkopu you haliwekita꞉ mo kini seana꞉ pila꞉ hoto paeyao pa hao halo pa꞉la꞉ hali pa꞉ta꞉ panda꞉puniao lopaata꞉ yeiya꞉ lo halememe. Ika꞉ you aka꞉manu mo kini seana꞉ puki tikitiki lopaaso dupa lo halememe. \q1 \v 11 Nika꞉ Tekehali Koda꞉o. Neke pa꞉ta꞉ta꞉ pa̱a̱ pa꞉la꞉eki make yeiya꞉ laasa꞉eki make honkopu make ana꞉na꞉ mea꞉peke ya꞉la꞉me. \q1 Pa ekipeke nakana꞉ma꞉ ala꞉ta꞉ ala꞉ta꞉ paeyao wa꞉peleme. Kutupa naka꞉ hone pi ekima꞉ta꞉ ika꞉ hapekeeki make da꞉ta꞉la꞉eki make hala꞉me laa lo halememe. \c 5 \s1 Pi ula꞉ buka pita꞉ Sipisipi Ma꞉na꞉ Ikiki yaapo \p \v 1 Mo kini seana꞉ pila꞉ halina꞉ popeke nane kikina꞉ta꞉ mo pi ula꞉ buka miniki pitia꞉eki handoa꞉me. Mo pi ula꞉ bukana꞉ nepoko yaapo telipuna꞉ta꞉ wapema꞉ tumbulu bao wia꞉me. Kutupa watake hata꞉ tonkaake alema꞉ tonkaeyekeme. \v 2 Kutupa wele wopu piki enisolo handoa꞉me. Mo enisoloma꞉ pi ho̱la̱꞉make tiekema꞉ alota꞉ Mo tonkaake alemanu yamba꞉la mo pi ula꞉ buka lumbuluekema꞉ epita꞉ ipika꞉ pa꞉la꞉ hauma꞉ ana꞉na꞉ pea꞉peke ya꞉la꞉pe lea꞉me. \v 3 Pate oli hepeni nane make do kenke nane make kenke oto nane make mo pi ula꞉ buka lumba tukiki nane handa꞉peke some ma꞉nda꞉ dia꞉me. \v 4 I̱ma꞉ ka꞉pa꞉puki yoka e̱ tieke loa꞉me. Pa ekipeke mo pi ula꞉ bukata꞉ lumba tukiki pa꞉ta꞉ handuluekema꞉ ma꞉nda꞉ ipika꞉ pa꞉la꞉ hauma꞉ ana꞉na꞉ pea꞉peke hali ma꞉nda꞉ dia꞉yeke loa꞉me. \v 5 Mo hande you hali homeke ma꞉nda꞉ma꞉ I̱ pa꞉ta꞉ alota꞉ E̱ na lapee. Handa꞉e. Hande Diudana꞉ tapake laeonota꞉ hande Deipidina꞉ eiyekema꞉ monduma꞉ monduma꞉ pea a꞉pa ota꞉ biki wiki hali mendieke somema꞉ homeke bepolao hala꞉me. Ipikana꞉ma꞉ ana꞉na꞉ mo watake hata꞉ tonkaakemanu ula꞉eki yamba꞉la mo pi ula꞉ buka lumba꞉peke ya꞉la꞉me. \p \v 6 Kutupa mo Sipisipi Ma꞉na꞉ Ikiki homeketa꞉ mo kini sea tukikina꞉ haya꞉eki handoa꞉me. Ipikita꞉ mo deto hala꞉ ale tonkopu make mo you haliwekima꞉ make dupaememe. Mo Sipisipi Ma꞉na꞉ Ikikita꞉ limiki nono piekeme. Ipikita꞉ watake hata꞉ ekekemanu hao make watake hata꞉ lekemanu haya꞉me. Ipika꞉ leke manuta꞉ hande Koda꞉na꞉ watake hata꞉ sipitidimanu do kenke honiki paeyao pa꞉ta꞉ tapaala꞉eki yekeme. \v 7 Mo Sipisipi Ma꞉na꞉ Ikikima꞉ mo kini seana꞉ pila꞉ halina꞉ popeke nane kikina꞉ wia pitia꞉ pi ula꞉ buka pua mia꞉me. \v 8 Dupitolo haena꞉ta꞉ mo deto hala꞉ tonkopu ale manuma꞉ make mo hali tieke homekena꞉ tonkopu you haliweki paeyaoma꞉ mo Sipisipi Ma꞉na꞉ Ikikina꞉ puki tikitikina꞉ panda꞉puniao lopememe. Homeke homekema꞉ta꞉ mo kidama꞉ handeke ale make mo koloma꞉ wepiki ulu pa꞉ta꞉ta꞉ totopo piki alema꞉ tumbikieki wimime. Kotota꞉ mo hande Koda꞉na꞉ wanda꞉halina꞉ yeni pita꞉la꞉eki yekeme. \v 9 Ikana꞉ma꞉ panake emeli homeke alota꞉ \q1 Neketa꞉ mo pi ula꞉ buka mea tonkaake ale yamba꞉lapeketa꞉ ota꞉ ana꞉ pa꞉la꞉me. \q1 Pa ekipeke neketa꞉ limikime. Kutupa nakana꞉ma꞉ naka꞉ wema꞉ mo wanda꞉halita꞉ Koda꞉na꞉ wanda꞉hali haena꞉yeke hambeleme. \q1 Ikita꞉ tapake ta꞉ta꞉ ta꞉ta꞉ make pi ta꞉ta꞉ ta꞉ta꞉ make kapomani manuma꞉ handeteke hala꞉ da ta꞉ta꞉ ta꞉ta꞉ make tutu ta꞉ta꞉ ta꞉ta꞉ paeyao pa꞉ta꞉ hambeleme. \q1 \v 10 Kutupa nakana꞉ma꞉ ikita꞉ mo yeni peao hala꞉ kilu tombuao hala꞉eki haena꞉yeke Koda꞉ oto pa꞉ta꞉ hata꞉ e pokaena꞉ leleme. \q1 Ikita꞉ do kenkena꞉ handeteke haena꞉ lelipikie laa lemekeme. \p \v 11 Pa handoeketa꞉ mo yata꞉pea꞉peke na yeke tupa꞉ haemeke enisolo titita꞉ daoseni eleke eleke opua꞉me. Ikita꞉ mo kini sea make mo deto hala꞉ tonkopu alemanu make mo you haliweki popei yao haememe. \v 12 Kutupa pi ho̱la̱꞉make anekema꞉ emeli alo alota꞉ \q1 Mo hande lia꞉ Sipisipi Ma꞉na꞉ Ikikima꞉ta꞉ wele make \q1 hamoko make hone u tiaasa꞉eki make honkopu make \q1 biki miniliaasa꞉eki make pa̱a̱ pikieki make \q1 yeiya꞉ laasa꞉eki make paeyao mea꞉peketa꞉ ana꞉ pa꞉la꞉me lemekeme. \p \v 13 Kutupa oli ya nane make kenkena꞉ make kenke oto nane make dawala pa꞉ta꞉ da꞉ta hala꞉ ala꞉ta꞉ ala꞉ta꞉ paeyaoma꞉ emeli lemeeki opua꞉me. Dupa lememe. \q1 Mo kini seana꞉ pila꞉ hali make mo Sipisipi Ma꞉na꞉ Ikiki make \q1 yeiya꞉ lao make biki miniliao make pa̱a̱ make wele make \q1 hoto paeyao pa u haena꞉e lememe. \p \v 14 Koto lemeke mo deto hala꞉ tonkopu ale manuma꞉ alota꞉ Kutu pina꞉e lemeke mo you haliwekita꞉ panda꞉puniao lopa ipiki pa꞉ta꞉ yeiya꞉ laaso yeni pimime. \c 6 \s1 Tonkaake alemanu \p \v 1 Kutupa mo Sipisipi Ma꞉na꞉ Ikikima꞉ mo titina꞉ watake hata꞉ tonkaake ale homeke ma꞉nda꞉ ka꞉la꞉peeke handoa꞉me. Kutupa mo deto hala꞉ tonkopu ale homeke ma꞉nda꞉na꞉ pi ho̱la̱꞉makema꞉ tutu liki nono pea alota꞉ Epoe leeki opua꞉me. \v 2 I̱ma꞉ handoeketa꞉ handeta꞉ hakepiki hosi ma꞉na꞉ yekeme. Mo ma꞉na꞉ hokina꞉ pitieke halima꞉ta꞉ a꞉ndeli miniki pitia꞉me. Ipikita꞉ you aka꞉ halea꞉me. Kutu pieke ipikita꞉ a꞉nda꞉ bepolalo poluekema꞉ pula꞉ hali tupa꞉ mo ma꞉na꞉ hokina꞉ pita pea꞉me. \p \v 3 Kutupa mo Sipisipi Ma꞉na꞉ Ikikima꞉ hande yaapo peao tonkaake ale ka꞉la꞉peaaso haena꞉ta꞉ mo deto hala꞉ ale yaapo peao ekima꞉ alota꞉ Epoe lea꞉me. \v 4 Koto pa꞉ta꞉ wepiki hosi ma꞉na꞉ ma꞉nda꞉ opolo epea꞉me. Mo hosi ma꞉na꞉ hokina꞉ pitieke halita꞉ do kenkena꞉ hali yankeke ika꞉ ika꞉ kone lu alu alu pina꞉yeke a꞉nda꞉ pita꞉la꞉eki mea epena꞉yeke honkopu halea꞉me. Kutupa make bainasi tieke tonka꞉na꞉ halea꞉me. \p \v 5 Kutupa mo Sipisipi Ma꞉na꞉ Ikikima꞉ mo tepo peao tonkaake ale ka꞉la꞉pea꞉ ale pa꞉ta꞉ta꞉ mo deto hala꞉ ale tepo peao ekima꞉ alota꞉ Epoe lea꞉me. I̱ma꞉ handoeketa꞉ handeta꞉ punupiki hosi ma꞉na꞉ yekeme. Koto hosi ma꞉na꞉na꞉ hoki manda pitieke halima꞉ta꞉ mo ka꞉nda꞉ tombo mu hala꞉ ale minia꞉me. \v 6 Hande deto hala꞉ tonkopu alemanu haeme ale tukiki pa꞉ta꞉ pi ho̱la̱꞉makema꞉ leke nono pea alota꞉ Nate homekena꞉ e pokaa mina꞉la꞉ yenkima꞉ta꞉ widi putu piliki siki homeke hambena꞉ laa mo widima꞉ handeke ale balita꞉ tukikina꞉ putupaa homeke yenkima꞉ kone hambena꞉e. Koto pa꞉la꞉pate mo olipi timanu make waini emanu make na hoeyaapa꞉peke lea꞉me. \p \v 7 Kutupa mo Sipisipi Ma꞉na꞉ Ikikima꞉ tonko peao tonkaake ale ka꞉la꞉pea꞉ ale pa꞉ta꞉ta꞉ mo tonko peao deto hala꞉ alema꞉ alota꞉ Epoe lea꞉me. \v 8 Handoeketa꞉ handeta꞉ hamipiki hosi ma꞉na꞉ yekeme. Mo hosi ma꞉na꞉ manda pitieke halina꞉ bikita꞉ Homa꞉la꞉eki lea꞉me. Kutupa ipika꞉ hoki naneta꞉ mo homa꞉la꞉ wanda꞉halina꞉ temoko hala꞉ kenketa꞉ telia꞉ mea teke pa꞉ta꞉ ipulu haya꞉me. Ipilikita꞉ do kenke tonkopu tekilipa homeke homeke pa꞉ta꞉ta꞉ a꞉nda꞉ pita꞉la꞉eki make tea꞉ ki make yeni ki make hapekena꞉ hala꞉ yeti sayale manuma꞉ make paeyao lina꞉yeke honkopu halea꞉me. \p \v 9 Kutupa mo Sipisipi Ma꞉na꞉ Ikikima꞉ yunki peao tonkaake ale ka꞉la꞉pea꞉ ale pa꞉ta꞉ta꞉ mo hande amba꞉ Koda꞉na꞉ pi walaaso hata꞉ kima꞉ na homeke walaemeke handa limiki haliwekina꞉ temokomanu mo oloda oto pa꞉ta꞉ wieke handoa꞉me. \v 10 Koto temoko manuma꞉ anekema꞉ e̱ wi alota꞉ Yako pea ota꞉ hau pu hale wele wopu piki Tekehalio. Mo niki limi tapake panisi pealuekema꞉ do kenke wanda꞉hali pi yokaalu pulu pele nateta꞉ handima꞉pe lememe. \v 11 Mo haliweki homeke homeketa꞉ hake piki dau hale hale pea alota꞉ Mo iki litolo pia꞉ tupa꞉ ika꞉ e pokeleme yankeke titi paeyao ana꞉na꞉ lu paeyaena꞉ hosiki siki hoto pita꞉pee lea꞉me. \p \v 12 Kutupa mo Sipisipi Ma꞉na꞉ Ikikima꞉ mo yunki mindiki hata꞉ tonkaake ale ka꞉la꞉peeke handoa꞉me. Koto dina꞉ta꞉ paala꞉ piki yu momeni tieke pea mo nateta꞉ da hokolo pupapeke aka꞉ hankolakema꞉ handaata꞉ mo kaisepota꞉ we au lolo yapea꞉me. \v 13 Mo hombulanka꞉ manuta꞉ mo hande kankake nose kiliki po tilipu tiekema꞉ tandela꞉ lita꞉leke lopa꞉la꞉ tupa꞉ oni kenkena꞉ honda꞉pa lopea꞉me. \v 14 Oli yata꞉ mo hande keda tako pu minolo pita꞉la꞉ tupa꞉ alupaeya꞉me. Kutupa pote paeyao make dawalama꞉ popei yaala꞉ kenkemanu paeyaota꞉ ika꞉ hao hala꞉ tupa꞉ na hake ane mone pimime. \v 15 Kutupa do kenkena꞉ kinimanu make handeteke hala꞉ haliweki make amina꞉ you haliweki make hamoko haliweki make wele wopu piki haliweki make pa hameke e pokaaseme haliweki make pa haleme haliweki make paeyao siki oni apa꞉nda꞉ make pote pa꞉ta꞉manu ula꞉ toopi tieke tieke pa꞉ta꞉manu a꞉mbao pitulu endi pimime. \v 16 Mo wanda꞉halima꞉ mo potemanu make toopimanu pa꞉ta꞉ wi la꞉ moneaaso alota꞉ Mo kini seana꞉ pila꞉ halina꞉ leke popelekena꞉ make mo Sipisipi Ma꞉na꞉ Ikikina꞉ mineke panka꞉la꞉eki a꞉mbao niki manda a꞉pa lopa꞉pee. \v 17 Ipilika꞉ mineke panka꞉la꞉ ota꞉ hoke nateta꞉ doma꞉ ma꞉nda꞉ epima꞉ doeki mea baapeke ya꞉la꞉pe lememe. \c 7 \s1 144 daoseni Isulai wanda꞉hali \p \v 1 Doeki hoki naneta꞉ enisolo tonkopuma꞉ mo kenke honiki tonkopu telipa haemeeki handoa꞉me. Ikana꞉ma꞉ta꞉ mo tonkopu poma꞉ta꞉ mo kenke make dawala make ti ma꞉nda꞉ hondo poma꞉ tiaama꞉na꞉ miniki haememe. \v 2 Kutupa enisolo ma꞉nda꞉ma꞉ta꞉ mo deto hala꞉ Koda꞉na꞉ tonkaake ale miniki hata꞉ oli nate opa꞉la꞉ nanema꞉ opolo epea꞉me. Ipikana꞉ma꞉ mo hande Koda꞉ma꞉ mo kenke pita꞉ ikali yaapo hoeyaena꞉yeke honkopu hala꞉la꞉ tonkopu enisolomanu pa꞉ta꞉ anekema꞉ wi la꞉ moneaya꞉me. \v 3 Mo enisoloma꞉ alota꞉ Nika꞉ Koda꞉na꞉ pa hameke e pokaasa꞉ haliweki ika꞉ wenoko manuna꞉ mo Koda꞉ ipika꞉ tomboma꞉ maka u paeyaoma꞉ka꞉na mo kenke make dawala make mo timanu make hoeyaama꞉na꞉ma꞉ ame dota꞉ a̱i̱ na hoeyaapee lea꞉me. \p \v 4 Kutupa I̱ pa꞉ta꞉ la kieketa꞉ Mo Koda꞉ ipika꞉ tomboma꞉ maka ula꞉ tapaketa꞉ 144 daoseni halememe lea꞉me. Koto wanda꞉halita꞉ mo hande Isulaina꞉ 12 tapakee lea꞉me. \v 5-8 Ikita꞉ 12 daoseni lo mo tapake homeke homeke pa꞉ta꞉ yata꞉po ma꞉la꞉me. Mo tapake biki manuta꞉ Diuda Lubeni Ka꞉da꞉ A꞉sea Na꞉petali Ma꞉na꞉sa꞉ Simioni Lipae Isaka Sebuloni Diosepe make Benisamini koto tapake manue. \s1 Hone pa mata꞉papeke tapake tieke \p \v 9 Doeki hoki naneta꞉ hone pa mata꞉papeke tapake tieke handoa꞉me. Do wanda꞉halita꞉ ma꞉nda꞉ma꞉ yata꞉pea꞉peke tapake tupa꞉ dia꞉me. Mo wanda꞉halita꞉ tutu paeyao make tapake paeyao make kapomani ta꞉ta꞉ ta꞉ta꞉ma꞉ handeteke hala꞉ kenke ta꞉ta꞉ ta꞉ta꞉ make pi ta꞉ta꞉ leke tapake paeyao siki haememe. Ikana꞉ma꞉ta꞉ mo kini seana꞉ make mo Sipisipi Ma꞉na꞉ Ikikina꞉ puki tikitikina꞉ hakepiki dau yama hau palo miniki haememe. \v 10 Ikana꞉ma꞉ anekema꞉ alo hata꞉ alota꞉ Da꞉ta꞉mono yeke pa꞉ta꞉la꞉la꞉ ekita꞉ mo kini seana꞉ pila꞉ nika꞉ Koda꞉ make mo Sipisipi Ma꞉na꞉ Ikiki yaapo pa꞉ta꞉ yama꞉ ipula꞉me lememe. \p \v 11 Enisolo paeyaota꞉ mo kini seana꞉ make mo you haliweki make mo deto hala꞉ ale tonkopu paeyao popei yao hao yapememe. Kutupa ikita꞉ mo kini seana꞉ puki tikitikina꞉ panda꞉puniao lopolo hata꞉ Koda꞉ pa꞉ta꞉ yeiya꞉ laaso hata꞉ yeni pitolo alota꞉ \v 12 Kutu pina꞉e. Yeiya꞉ laasa꞉eki make pa̱a̱ make hone u lenkene peaasa꞉eki make ta꞉na꞉e ala꞉eki make biki miniliaasa꞉eki make wele honkopu make paeyaota꞉ hoto paeyao nika꞉ Koda꞉na꞉eki ula꞉me. Kutu pina꞉e lememe. \s1 Ka꞉nda꞉manu paeta꞉la꞉eki \p \v 13 Mo hala꞉ you hali ma꞉nda꞉ma꞉ I̱ lota꞉ pitolo alota꞉ Mo hake piki dau yameleme wanda꞉halita꞉ epi ameda ka꞉ta꞉pe laata꞉ hanema꞉ a꞉pa pelemepe lea꞉me. \p \v 14 I̱ma꞉ alota꞉ Someo. I̱ hone na ulupate nakana꞉ma꞉ta꞉ hone wilime loa꞉me. Ipikana꞉ma꞉ I̱ pa꞉ta꞉ alota꞉ Ikita꞉ mo hande ota꞉ hoke tanda pa꞉ta꞉ yama꞉ kone epeke tupa꞉ epeleme wanda꞉halie lea꞉me. Ikana꞉ma꞉ta꞉ ika꞉ aka꞉ manuta꞉ mo Sipisipi Ma꞉na꞉ Ikikina꞉ wema꞉ tanda꞉pa hake peao pelememe. \v 15 Koto peleme ekina꞉ta꞉ ikita꞉ Koda꞉na꞉ kini seana꞉ puki tikitikina꞉ hata꞉ peliolo da ka꞉la꞉polo ipika꞉ tembolo pa꞉ta꞉ ipika꞉ e pokao halememe. Mo kini seana꞉ pila꞉ halima꞉ ipika꞉ hala꞉ ekima꞉ta꞉ iki handeteke pitilieke. \v 16 Ikita꞉ tea꞉ma꞉ make ikali na꞉na꞉ma꞉ make ota꞉ paa na homilimikie. Kutupa make nate o ti ulekema꞉ potaasa꞉ ale tupa꞉ make na yankilieke. \v 17 Pa ekipeke mo kini sea tukikina꞉ hala꞉ Sipisipi Ma꞉na꞉ Ikikita꞉ ika꞉ handeteke hala꞉ hali halieke. Kutupa ikita꞉ mo da꞉ta꞉la꞉eki kita꞉la꞉ tunkulu pa pitumu pitumu pa꞉la꞉ ikalimanu pa꞉ta꞉ hatuku pelieke. Kutupa Koda꞉ma꞉ ika꞉ leke pa꞉ta꞉ e̱ pankekemanu paeyao honu baalieke. \c 8 \s1 Watake peao tonkaake ale \p \v 1 Mo hande Sipisipi Ma꞉na꞉ Ikikima꞉ mo watake peao ale kelepea꞉ dina꞉ta꞉ oli hepeni nane nate leke awa homeke tukikina꞉ no la꞉pa pea꞉me. \v 2 Kutupa mo Koda꞉na꞉ leke popelekena꞉ hala꞉ watake hata꞉ enisolomanu pa꞉ta꞉ watake hata꞉ bu kanake halea꞉me. \v 3 Enisolo ma꞉nda꞉ta꞉ koloma꞉ wepiki totopo piki ale yanko hala꞉ kanake miniki mo oloda wia꞉ alena꞉ a꞉pa haya꞉me. Ipiki pa꞉ta꞉ta꞉ mo Koda꞉na꞉ wanda꞉halina꞉ yenimanu ame̱le̱ totopo piki alemanu wopu apa꞉taena꞉yeke halea꞉me. Koto ale manuta꞉ mo kini seana꞉ puki tikitiki ula꞉ koloma꞉ wepiki olodana꞉ yankena꞉yeke pia꞉me. \v 4 Mo totopopiki ale yankea꞉ ekina꞉ lumuta꞉ Koda꞉na꞉ wanda꞉halina꞉ yeni taapu mo Koda꞉na꞉ puki tikitiki hala꞉ enisolona꞉ kiki pa꞉ta꞉ yama꞉ a꞉meiya pea꞉me. \v 5 Kutupa mo enisoloma꞉ mo totopo piki ale pamba꞉la꞉ kanake mea mo olodana꞉ talo haya꞉ ti mea apa꞉tao do kenkena꞉ wekila꞉ holaeya꞉me. Kutu pia꞉ tomona꞉ta꞉ a꞉ta꞉ a꞉ta꞉piki tutu make tutu tieke make ti tekele make yu momeni make pia꞉me. \s1 Bu kanake lita꞉la꞉ ekimanu \p \v 6 Koto kone mo watake hata꞉ bu kanake miniki haeme watake hata꞉ enisolo manuma꞉ mo bu kanakemanu luekema꞉ tikitiki yao hao yapememe. \p \v 7 Titina꞉ enisoloma꞉ ipika꞉ bu kanake lia꞉ dina꞉ta꞉ ya hapeke pita꞉ ti uleke apa꞉taake we ikali anekema꞉ do̱u̱ hao oni kenkena꞉ lopea꞉me. Kutu pieketa꞉ mo kenketa꞉ tepo tekilipa homeke ma꞉nda꞉ta꞉ tima꞉ to paeya꞉me. Kutupa mo timanu tonka꞉na꞉ tepo tekilipa homeke ma꞉nda꞉ta꞉ tima꞉ to paeya꞉me. Koto tupa꞉ mo ambu paeyao siki ta꞉ta꞉ paeya꞉me. \p \v 8 Kutupa mo yaapo peao enisoloma꞉ ipika꞉ bu kanake lia꞉me. Pote tieke hombeleke ti talo talo hake nono piki ala꞉ta꞉ ma꞉nda꞉ oni dawala pa꞉ta꞉ holaeya꞉me. Mo dawala tepo tekilipa homeke ma꞉nda꞉ta꞉ we au lolo yapea꞉me. \v 9 Mo dawala pa꞉ta꞉ pila꞉ alemanu tepo tekilipa homeke ma꞉nda꞉ta꞉ homea꞉me. Kutupa kawaso make homeke hau kone pea hoeyaeya꞉me. \p \v 10 Kutupa mo tepo peao enisoloma꞉ ipika꞉ bu kanake lia꞉me. Kutu pieketa꞉ mo talo talo hake dosima꞉ handeke hombulanka꞉ tieke ya nanema꞉ lopa꞉niao mo ikali yopula꞉ ekimanu make opa꞉la꞉ ekimanu make tepo tekilipa homeke ma꞉nda꞉ manda lopea꞉me. \v 11 Mo hombulanka꞉na꞉ bikita꞉ Teto pa꞉la꞉ekie. Kutupa mo ikali manuta꞉ tepo tekilipa homeke ma꞉nda꞉ta꞉ teto pia꞉me. Mandane wanda꞉halita꞉ koto ikali no hao homememe. Pa ekipeke mo ikalita꞉ teto pitolo hata꞉ pia꞉me. \p \v 12 Kutupa mo tonkopu enisoloma꞉ ipika꞉ bu kanake lia꞉me. Kutu pieketa꞉ nate make kaisepo make hombulanka꞉manu make tepo tekilipa homeke ma꞉nda꞉ manuta꞉ lu tondo peaya꞉eki yaalo ika꞉ pa̱a̱ peaasa꞉ ekita꞉ tepo tekilipa homeke ma꞉nda꞉ta꞉ alupaememe. Kutupa mo natepata꞉ tepo tekilipa homeke ma꞉nda꞉ pa꞉ta꞉ta꞉ pa̱a̱ na pia꞉me. Timba꞉ ala꞉eki make homeke hau kone pia꞉me. \p \v 13 Kutupa handoa꞉pate oli ya pa꞉ta꞉ a̱e̱ya̱ ida tieke anekema꞉ alota꞉ A꞉pee. A꞉pee. Mo mandane enisolo tepoma꞉ ika꞉ bu kanake lia꞉ka꞉na꞉ta꞉ do kenkena꞉ haleme wanda꞉halita꞉ ekipiki tanda tieke piki ka꞉nda꞉manu milimikipe. \c 9 \s1 Yunki peao enisolona꞉ bu kanake \p \v 1 Kutupa mo yunki peao enisoloma꞉ ipika꞉ bu kanake lia꞉me. Hombulanka꞉ homeke oni kenkena꞉ honda꞉pa lopeekeeki pa꞉ta꞉ mo honiki na wiki naku tieke kiakena꞉ pota꞉ ki halea꞉eki handoa꞉me. \v 2 Mo hombulanka꞉ma꞉ mo naku tieke kiakena꞉ pota꞉ lombea꞉ dina꞉ta꞉ ti tieke yanka꞉leke opa꞉la꞉ lumuma꞉ handeke lumu hola꞉lu baeya꞉me. Mo lumuma꞉ta꞉ nate make ya make timba꞉la꞉ pamba haya꞉me. \v 3 Hombuta꞉ta꞉ mo lumu pa꞉ta꞉ yama꞉ a꞉pa oni kenkena꞉ lopememe. Kutupa ikita꞉ teihali manuma꞉ haleme honkopuma꞉ handeke honkopu halea꞉me. \v 4 Iki pa꞉ta꞉ta꞉ mo e alemanu pa꞉ta꞉ ambu make timanu make mandane ambumanu paeyao na hoeyaapa꞉peke laata꞉ hoeyaapeke ale homeketa꞉ mo Koda꞉na꞉ tomboma꞉ maka ika꞉ wenokona꞉ na ula꞉ wanda꞉hali homeke hoeyaapa꞉peke lea꞉me. \v 5 Mo hombuta꞉ma꞉ handeke ale manuma꞉ta꞉ mo wanda꞉hali homena꞉yeke lina꞉ dia꞉ya꞉la꞉pate pa kaisepo yunki hata꞉ natena꞉ homeke tanda tieke halolo ombu haena꞉ lea꞉me. Mo tanda tieketa꞉ mo teihalima꞉ poka꞉leke mina꞉la꞉ tanda tupa꞉e. \v 6 Koto yunki hata꞉ kaisepo tukiki pa꞉ta꞉ta꞉ mo wanda꞉halima꞉ homa꞉la꞉eki weilimipate na handa꞉ wilimikie. Homawee hone wilimipate homa꞉la꞉ ekita꞉ iki mina꞉pa꞉lao pindipa pelieke. \p \v 7 Mo hombuta꞉ titita꞉ mo a꞉nda꞉na꞉ poluekema꞉ tikitiki yao hala꞉ hosi ma꞉na꞉ manuma꞉ handememe. Ika꞉ ambokena꞉ta꞉ koloma꞉ wepiki you aka꞉ma꞉ handeke ale pambao ika꞉ leke popeleketa꞉ halina꞉ leke popelekema꞉ handea꞉me. \v 8 Ika꞉ itikita꞉ wanda꞉wekina꞉ hokulupiki itikima꞉ handaa ika꞉ kaketa꞉ laeonona꞉ kakema꞉ handea꞉me. \v 9 Ika꞉ hakokota꞉ ayenima꞉ wepiki hakokona꞉ yama꞉la꞉ alema꞉ handeke ekima꞉ tote pea kutupa ika꞉ popakema꞉ laeme e̱ma꞉ta꞉ mo a꞉nda꞉na꞉ polukuma꞉ ipupula yopula꞉ hosi ma꞉na꞉na꞉ aiela꞉ da꞉ta꞉ka mendekemanu yopulu leke nono pia꞉me. \v 10 Ikita꞉ mendeke hao teihalina꞉ pa꞉la꞉ tupa꞉ tekeke haememe. Kutupa mo wanda꞉halita꞉ kaisepo yunki hata꞉na꞉ ika꞉ mendekema꞉ tanda halo pa꞉la꞉ honkopu haememe. \v 11 Kini homeke ma꞉nda꞉ma꞉ iki handeteke hala꞉me. Ipikita꞉ mo honiki na wiki naku tieke kiakena꞉ handeteke hala꞉ enisoloe. Hibulu pima꞉ ipika꞉ bikita꞉ A꞉ba꞉dono. Kitiki pima꞉ta꞉ A꞉poliyono Koto bikita꞉ Hoeyaasa꞉ halie laa ala꞉me. \p \v 12 Titina꞉ paala꞉piki ka꞉nda꞉ tieketa꞉ koto paela꞉ handa꞉e. Doeki hoki naneta꞉ paala꞉piki ka꞉nda꞉ tieke yaapo epolo pa꞉la꞉eki pa ula꞉me. \s1 Yunki mindiki peao enisolona꞉ bu kanake \p \v 13 Kutupa mo yunki mindiki peao enisoloma꞉ ipika꞉ bu kanake lia꞉me. Mo Koda꞉na꞉ puki tikitiki haya꞉ koloma꞉ wepiki olodana꞉ nepoko tonkopu nanema꞉ pi ho̱la̱꞉make epea꞉eki opua꞉me. \v 14 Mo pi ho̱la̱꞉makema꞉ mo yunki mindiki peao enisolo pa꞉ta꞉ alota꞉ Mo Yupoteitisi ikali tieke pa꞉ta꞉ tonkaala꞉ enisolo tonkopu ka꞉la꞉pa꞉ tapae lea꞉me. \v 15 Mo enisolomanu ka꞉la꞉pa꞉ tapaeya꞉me. Ikana꞉ma꞉ta꞉ mo kenke wanda꞉hali paeyao tepo tekilipa homeke ma꞉nda꞉ta꞉ ota꞉ do awa siki make ota꞉ do nate siki make ota꞉ do kaisepo siki make ota꞉ do bapi siki make epena꞉yeke wiala꞉ natena꞉ lina꞉yeke tikitiki yao haena꞉ lea꞉me. \v 16 Mo wanda꞉hali lulu polo pieke hosi hokina꞉ pitieke ami tapakena꞉ nambata꞉ I̱ pa꞉ta꞉ alota꞉ 200 milioni haliweki lea꞉me. \v 17 Kutupa yaka upama꞉ leke handoa꞉ ekina꞉ta꞉ mo hosi ma꞉na꞉ make ika꞉ hokina꞉ pitimi haliweki handoa꞉me. Kutupa mo haliwekina꞉ hakokona꞉ yameleme alena꞉ au la꞉la꞉eki manuta꞉ mo ti lankakema꞉ handa we pupa pua make oli ya punupa꞉la꞉ ekima꞉ handeke toopi sa꞉paeyana꞉ au lekeeki make mo hami pupapeke toopi solopana꞉ au lekeeki make au lea꞉me. Mo hosi ma꞉na꞉ manuna꞉ amboketa꞉ laeonona꞉ ambokema꞉ handaa ika꞉ kake pa꞉ta꞉ta꞉ ti uleke make lumu make ti na honi papeke lankake biki solopa opolu baeya꞉me. \v 18 Do ki yeni leke lita꞉la꞉ hau tepoma꞉ta꞉ mo wanda꞉hali tepo tekilipa homeke ma꞉nda꞉ta꞉ homo paeya꞉me. Mo hosina꞉ kake pa꞉ta꞉ opolu baeya꞉ ekima꞉ loa꞉me. \v 19 Mo hosi ma꞉na꞉ manuna꞉ honkoputa꞉ ika꞉ kake pa꞉ta꞉ make mendeke pa꞉ta꞉manu ula꞉me. Ika꞉ mendeke manuta꞉ amboke hake ketoma꞉ handea꞉me. Koto ekima꞉ta꞉ wanda꞉hali tanda peao haememe. \p \v 20 Do hau tepoma꞉ na lia꞉ wanda꞉halita꞉ ika꞉ wepia wia yeni pu haeme ale pa꞉ta꞉manu hoki na walememe. Ikita꞉ mo hoke temoko titi pa꞉ta꞉ make mo koloma꞉ make silipama꞉ make toopima꞉ make tima꞉ make toopi ti wepia wimiki alemanu pa꞉ta꞉ yeni pita꞉la꞉eki hoki na walememe. Mo handa꞉peke na yeke make pi na opua꞉peke make pi na lapeke ale manuna꞉ loa꞉me. \v 21 Kutupa make ika꞉ hali homena꞉ lilimieki make ika꞉ ti̱o̱ haumanu make ika꞉ loke hoeyaasa꞉ haumanu make pake nala꞉ ekimanu kone ota꞉ na kiaememe. \c 10 \s1 Enisolo pita꞉ pi ula꞉ buka hosikale siki \p \v 1 Kutupa wele wopu piki enisolo ma꞉nda꞉ oli hepeni nanema꞉ hola꞉pa꞉nialo epeeke handoa꞉me. Ipikita꞉ koama꞉ ambula bao ipika꞉ ambokena꞉ta꞉ ka꞉la꞉da꞉peiyama꞉ ambula wiekeme. Ipika꞉ leke popeleketa꞉ natema꞉ handaa ipika꞉ anketa꞉ ti talo talo hake da pinki manuma꞉ handeekeme. \v 2 Ipika꞉ kikina꞉ta꞉ pi ula꞉ buka hosiki ale siki lumbu wia haya꞉me. Ipika꞉ popeke nane anketa꞉ dawala manda wia ipika꞉ hoe nane anketa꞉ kenkena꞉ wia haya꞉me. \v 3 Kutupa laeono manuna꞉ aneke e̱ wi ala꞉ tupa꞉ mo halima꞉ anekema꞉ wi lea꞉me. Mo wi lea꞉ hoki naneta꞉ mo watake hata꞉ tutu manuma꞉ anekema꞉ e̱ wi laa hombo peaememe. \v 4 Mo pi lea꞉ ale pa꞉ta꞉ kone I̱ta꞉ wape laanialuekema꞉ pitono oli hepeni nane pi ho̱la̱꞉makema꞉ alota꞉ Do watake hata꞉ tutu manuma꞉ lemeke ekita꞉ na laaniake a꞉mbaapeke lea꞉me. \p \v 5-6 Mo hande dawala pita꞉ kenke yaapo manda hayeke handoa꞉ enisoloma꞉ do kenke ya make dawala make koto pa꞉ta꞉manu hala꞉ ala꞉ta꞉ ala꞉ta꞉ make koto ale paeyaona꞉ wepia wina꞉ la꞉la꞉ hoto paeyao pa hao hala꞉ Koda꞉na꞉ bikina꞉ pi la꞉ witolo alota꞉ Nate yola꞉ moneapeke dia꞉ya꞉la꞉pate \v 7 pa mo watake hata꞉ peao enisoloma꞉ ipika꞉ bu kanake lia꞉ka꞉na꞉ta꞉ Koda꞉ma꞉ mo hande ipika꞉ pa hameke e pokaasa꞉ potopede haliweki pa꞉ta꞉ la haleeke tupa꞉ ipikana꞉ma꞉ ipika꞉ pulueke laa a꞉mbao ula꞉ ekita꞉ ota꞉ pu paeyaalieke lea꞉me. \p \v 8 Kutupa oli hepeni nanema꞉ hande I̱ pa꞉ta꞉ pi laa kia꞉ pi ho̱la̱꞉make ombuma꞉ alota꞉ Mo dawala make kenke yaapo manda hala꞉ enisolona꞉ kiki pa꞉ta꞉ lumba wia hala꞉ pi ula꞉ buka pua mie lea꞉me. \v 9 Koto ekina꞉ I̱ pua mo enisolo lota꞉ pitolota꞉ mo pi ula꞉ hosiki buka siki kie loa꞉me. Ipikana꞉ma꞉ I̱ pa꞉ta꞉ alota꞉ Mea nae. Neliaeka꞉na꞉ta꞉ weleke nolo pa꞉la꞉pate naka꞉ kake pa꞉ta꞉ta꞉ boi hapekema꞉ handaa tende yole pilieke lea꞉me. \v 10 Koto leeke I̱ma꞉ mo pi ula꞉ hosiki buka siki mea noa꞉pate boi hapekema꞉ handaa tende yole pia꞉me. Pate neliawa꞉ dina꞉ta꞉ yaka weleke nea꞉me. \p \v 11 Kutupa I̱ pa꞉ta꞉ alota꞉ Mo kapomanimanu handeteke pila꞉ kenke ta꞉ta꞉ ta꞉ta꞉ make tutu ta꞉ta꞉ ta꞉ta꞉ make pi ta꞉ta꞉ ta꞉ta꞉ make kini ta꞉ta꞉ paeyao pa꞉ta꞉ Koda꞉ ipikana꞉ma꞉ lolo pa꞉la꞉ ekina꞉ pi tapaasa꞉eki paa lawaapekee lea꞉me. \c 11 \s1 Mo wekitisi yaapo \p \v 1 Kutupa I̱ pa꞉ta꞉ tombo mina꞉la꞉ alema꞉ handeke tolo kitolo alota꞉ Mo Koda꞉na꞉ tembolo da make mo oloda yaapo pua tombo mie laata꞉ mo tembolo da pa꞉ta꞉ yeni piteleme wanda꞉hali yata꞉pea꞉peke lea꞉me. \v 2 Pate mo hama꞉ nane momba꞉la꞉la꞉ hama꞉ manuta꞉ tombo na mia꞉pe lea꞉me. Pa ekipeke koto ekita꞉ mo pi na miniki haleme tapake pa꞉ta꞉ hala꞉la꞉ hama꞉e lea꞉me. Koto tapakema꞉ta꞉ kaisepo halitieke yaapona꞉ paa yaapona꞉ mo yakopiki daoni lu tumbalimikie. \v 3 Kutupa I̱ma꞉ yaka wekitisi hali yaapo mo palaowamanu mondu hala꞉ ekima꞉ dau yamao 1 daoseni kutupa 260 natemanu Koda꞉na꞉ pi walawaena꞉ tapaalueke lea꞉me. \p \v 4 Mo wekitisi hali yaapota꞉ mo olipi ti yaapo pita꞉ ola꞉pake keo panka꞉la꞉ ale yaapoe. Ipilikita꞉ mo kenke Tekehalina꞉ puki tikitiki halepeme. \v 5 Ma꞉nda꞉ epima꞉ koto hali yaapo hoeyaaluekema꞉ pimika꞉na꞉ta꞉ ti uleke ipilika꞉ kake pa꞉ta꞉ opolu bao mo ipilika꞉ a꞉nda꞉ tunkiliki haliweki hoeyaalieke. Kutupa dupilipi ekima꞉ta꞉ mo hali yaapo hoeyaaluekema꞉ taapilimi wanda꞉halita꞉ lilieke. \v 6 Ipilikana꞉ma꞉ta꞉ mo Koda꞉na꞉ pi laaso halipi natena꞉ lako na epena꞉ laa oli ya a꞉mbolota꞉ honkopu ula꞉me. Kutupa make mo opolo hala꞉ ikali manuta꞉ we au lena꞉ loluekema꞉ make ane mone yeni ki ipilika꞉ hone pa꞉la꞉ tupa꞉ do kenke a꞉pa hoeyaena꞉ laa make honkopu ula꞉me. \p \v 7 Ipilikana꞉ma꞉ ipilika꞉ pi walo paeyaalipi natena꞉ta꞉ mo honiki na wiki naku tieke kiake pa꞉ta꞉ hao opulu baalia꞉ sayalema꞉ handeke ale tieke hombelekema꞉ mo hali yaapo ame̱le̱ a꞉nda꞉ pilieke. Mo alema꞉ta꞉ mo hali yaapo bepolao lu homaota꞉ \v 8 ipilika꞉ tokota꞉ ipilika꞉ Tekehali lu endiaemeke daoni tiekena꞉ pota꞉na꞉ pa wina꞉ lelieke. Koto daonita꞉ onkoluma꞉ ala꞉ biki yaapota꞉ Sodomo pita꞉ Idiepi yaapo ula꞉me. \v 9 Kapomani ta꞉ta꞉ ta꞉ta꞉ma꞉ handeteke hala꞉ kenkemanu make tapake ta꞉ta꞉ ta꞉ta꞉ma꞉ make pi ta꞉ta꞉ ta꞉ta꞉ma꞉ make tutu ta꞉ta꞉ ta꞉ta꞉ma꞉ make paeyaoma꞉ mo hali yaapona꞉ tokota꞉ nate tepona꞉ nate ma꞉nda꞉na꞉ tukikina꞉ta꞉ handolo make na hoina꞉ lelimikie. \v 10 Pa ekipeke do kenkena꞉ haleme wanda꞉halima꞉ta꞉ mo hali yaapo homelepe ekina꞉ ta꞉na꞉ma꞉ homilimikie. Kutupa ne pambolo hata꞉ pa hala꞉la꞉ alemanu ika꞉ ika꞉ kone anemone tapa alu alu pilimikie. Pa ekipeke mo potopede hali yaapoma꞉ta꞉ wanda꞉hali pa꞉ta꞉ tanda tieke mea epepeme laa lelimikie. \p \v 11 Koto nate tepo paeya nate ma꞉nda꞉na꞉ tukikina꞉ta꞉ da꞉ta꞉la꞉eki hala꞉la꞉ pomo Koda꞉ pa꞉ta꞉ yama꞉ a꞉pa mo hali yaapo pa꞉ta꞉ honda꞉ pambeeketa꞉ mo hali yaapo tialu pipime. Kutupa mo hali yaapo handeme wanda꞉hali paeyaota꞉ pututuma꞉ homememe. \v 12 Mo potopede hali yaapo pa꞉ta꞉ta꞉ oli ya nane pi ho̱la̱꞉make tiekema꞉ alota꞉ Do pate ipupe lea꞉me. Kutupa ipilika꞉ a꞉nda꞉ tunkiliki wanda꞉halima꞉ handa꞉pa꞉lia haena꞉ mo hali yaapota꞉ koa piti oli ya pa꞉ta꞉ pepeme. \v 13 Koto koneta꞉ yumomeni tieke pea mo daonita꞉ kiki yaapo tekili pea homeke ma꞉nda꞉ta꞉ hoeyao mo daoseni watake hata꞉ wanda꞉hali homememe. Kutupa mo pa haleme wanda꞉halima꞉ta꞉ moeki handolo hata꞉ pututuma꞉ homolo oli hepeni hala꞉ Koda꞉na꞉ aneke ekina꞉ biki mina꞉liaememe. \p \v 14 Yaapo peao hoeyaasa꞉ hau koto paeya꞉pate mo tepo peao hoeyaasa꞉ ekita꞉ teke pa꞉ta꞉ ipilieke. \s1 Watake hata꞉ peao bu kanake \p \v 15 Kutupa mo watake hata꞉ enisoloma꞉ ipika꞉ bu kanake lia꞉ dina꞉ta꞉ oli hepeni nane pi ho̱la̱꞉make tieke tieke manuma꞉ alota꞉ Mo kenke handeteke halo pa꞉la꞉ honkoputa꞉ ameta꞉ nika꞉ Tekehali pita꞉ ipika꞉ ma̱leke lila꞉ hali Ketiso pa꞉ta꞉ ula꞉me. Kutupa hoto paeyao handeteke hao halieke lememe. \v 16 Kutupa mo Koda꞉na꞉ puki tikitikina꞉ ika꞉ kini seana꞉ pitimi hande halitieke homekena꞉ tonkopu you haliwekita꞉ panda꞉puniao yeiya꞉ laaso hata꞉ Koda꞉ pa꞉ta꞉ yeni pitolo alota꞉ \q1 \v 17 Amba꞉ pa hao hae make ame make hale Aneke Tekehali Koda꞉o. \q1 Nakana꞉ma꞉ naka꞉ wele tieke mea ameta꞉ kini pea handeteke hale ekina꞉ keiyae aloma꞉me laa alota꞉ \q1 \v 18 Mo pi na miniki haleme wanda꞉halita꞉ mineke pankelememe. Pa ekipeke Koda꞉ naka꞉ mineke pankele nateta꞉ opolo a꞉pa꞉la꞉me. Homa꞉la꞉ wanda꞉halina꞉ pi yokaalu pulu peleme nate a꞉pa꞉leke loa꞉me. \q1 Kutupa make naka꞉ e pokaeya꞉ potopede haliweki pa꞉ta꞉ ika꞉ yenki seliapo halo pele aneke nate a꞉pa꞉la꞉me. Mo neke pa꞉ta꞉ yeiya꞉ laaso hata꞉ homu pea haleme wanda꞉hali ota꞉ paeyaona꞉ nate make loa꞉me. \q1 Do kenke hoeyaaseme wanda꞉hali hoeyaalo pa꞉la꞉ nate opolo a꞉pa꞉la꞉me laa lememe. \p \v 19 Oli hepeni nane hala꞉ Koda꞉na꞉ tembolota꞉ lumbia꞉me. Kutupa mo hande pi la꞉ wiekeeki wieke bokosi handoa꞉me. Kutupa ti tekele make a꞉ta꞉ a꞉ta꞉ piki tutu make tutu tiekemanu make yumomeni make ya hapeke wopu make epea꞉me. \c 12 \s1 Mo wanda꞉ pita꞉ popake itiki hake si handeke ale tieke yaapo \p \v 1 Kutupa ta꞉ta꞉ ma꞉nda꞉ pea hone mateke hau tieke oli yana꞉ opolo epea꞉me. Wanda꞉ homeke koto pa꞉ta꞉ pitia꞉me. Ipika꞉ dauta꞉ mo nate yamea꞉me. Kutupa mo kaisepota꞉ ipika꞉ anke oto pa꞉ta꞉ wia kutupa ipika꞉ you aka꞉ta꞉ kiki yaapona꞉ ankena꞉ yaapo hombulanka꞉ pambaeya꞉me. \v 2 Ipikita꞉ teke pa꞉ta꞉ weki mulu pua꞉peke yata꞉ mo weki hoki nea꞉ ekima꞉ tanda tieke pitolo hata꞉ e̱ wi lea꞉me. \v 3 Kutupa ma꞉nda꞉ ta꞉ta꞉piki ale ma꞉nda꞉ oli ya manda opolo epea꞉me. Handeta꞉ we pupapeke popake itiki hake sima꞉ handeke ale tieke hombeleke ipika꞉ amboketa꞉ paeyao watake hata꞉ hao kutupa kiki yaapo ekeke haya꞉me. Kutupa mo ambokemanu yalaota꞉ kinina꞉ you aka꞉ pamba pamba pia꞉me. \v 4 Ipika꞉ mendekema꞉ta꞉ mo hombulanka꞉manu tepo tekilipa homeke ma꞉nda꞉ta꞉ mo ya mina꞉pa꞉lao yola yopua do kenkena꞉ wekila꞉ lopaeya꞉me. Mo aleta꞉ mo wanda꞉ma꞉ weki mondu lopaeya꞉ka꞉na꞉ mea nolueke alo puki tikitiki pua haya꞉me. \v 5 Kutupa mo wanda꞉ma꞉ta꞉ hali weki mondu wia꞉me. Ipiki daeyaata꞉ do kenke paeyao ayeni dopitama꞉ handeteke halo pa꞉la꞉ wekie. Pate mo wekita꞉ pa꞉ta꞉la꞉ mea Koda꞉ pa꞉ta꞉ ipika꞉ kini seana꞉ hala꞉ alena꞉ mea pea꞉me. \v 6 Mo wanda꞉ta꞉ Koda꞉ma꞉ ipika꞉ amu pea wia꞉yeke hapupapeke alena꞉ pindipa pea꞉me. Koto alena꞉ta꞉ mo wanda꞉ daoseni homeke kutupa 260 natena꞉ handeteke halo pia꞉ alena꞉e. \p \v 7 Kutupa oli hepeni nane a꞉nda꞉ kini pia꞉me. Maikolo ipika꞉ enisolo ame̱le̱ mo popake itiki hake si ipika꞉ enisolo ame̱le̱ a꞉nda꞉ pimime. \v 8 Pate Maikolo tapakema꞉ mo popake itiki hake sita꞉ bepolao ipika꞉ enisolomanu tonka꞉na꞉ hepeni na haena꞉ lememe. \v 9 Mo popake itiki hake si tieke hombeleketa꞉ tolu lopaeya꞉me. Ipikita꞉ mo hande amba꞉ kiake hayeke keto biki Sadani la꞉la꞉ alee. Ipikana꞉ma꞉ta꞉ mo kenke wanda꞉hali paeyao makeaeyeke halie. Ipikita꞉ ipika꞉ enisolo titi ame̱le̱ oni kenkena꞉ tolu lopaeya꞉me. \p \v 10 Kutupa oli hepeni nane pi ho̱la̱꞉make tiekema꞉ alota꞉ Ameta꞉ niki da꞉ta꞉monoyeke Koda꞉na꞉ pa꞉ta꞉la꞉la꞉eki ta a꞉pa꞉la꞉ handa꞉e. Ameta꞉ Koda꞉ ipiki kini hata꞉ ipika꞉ weleta꞉ peneme yaasa꞉ handa꞉e. Ameta꞉ ipika꞉ ma̱leke lila꞉ Ketisoma꞉ ipika꞉ handeteke hala꞉eki peneme yao wala꞉la꞉ handa꞉e. Pa ekipeke nika꞉ Koda꞉na꞉ puki tikitikina꞉ hata꞉ peliolo da kelepolo nika꞉ kamemanu ma̱leke lia hokeeki pa꞉la꞉me lo haya꞉ halita꞉ oli hepeni mina꞉pa꞉lao tolu lopaala꞉me. \v 11 Ipikita꞉ nika꞉ kame tonuma꞉ mo Sipisipi Ma꞉na꞉ Ikikina꞉ wema꞉ make mo ota꞉ ekie laa waleme ekima꞉ make bepolaya꞉me. Kutupa make ikana꞉ma꞉ ika꞉ da꞉ta꞉la꞉ ekita꞉ pina꞉ pa hoeyao homa꞉la꞉ ekita꞉ pa pulumeke laa lememe. \v 12 Koto ekina꞉ta꞉ oli hepeni make koto pa꞉ta꞉ haleme wanda꞉halio paeyao ta꞉na꞉ma꞉ homa꞉pee. Pate oni dawala pita꞉ kenke yaapota꞉ paala꞉e. Pa ekipeke hande Sadanita꞉ iki pa꞉ta꞉ a꞉pa꞉la꞉me. Kutupa ipikita꞉ hosiki nate lekesiki homeke ula꞉me hone witolo hata꞉ ota꞉ hoke mineke panka꞉la꞉me. \p \v 13 Mo popake itiki hake si tieke hombelekema꞉ ipikita꞉ mo kenke nane tolu lopaala꞉me hone wiaata꞉ mo hande weki mondu wia꞉ wanda꞉ minuluekema꞉yeke teliolo ombu haya꞉me. \v 14 Mo wanda꞉ta꞉ ipika꞉ da mo hapupapeke alena꞉ pena꞉yeketa꞉ ida tiekena꞉ popake yaapo halea꞉me. Koto pa꞉ta꞉ta꞉ mo popake itiki hake sima꞉ hoeyaapa꞉na꞉ bapi tepona꞉ yunki mindiki hata꞉ kaisepona꞉ handeteke halo pia꞉ pa꞉ta꞉e. \v 15 Kutupa mo popake itiki hake sima꞉ta꞉ ipika꞉ kake pa꞉ta꞉ yama꞉ epea꞉ ikali wopuma꞉ mo wanda꞉ telia꞉ mea pena꞉ lea꞉me. Handeta꞉ mo wanda꞉ ikali naa homena꞉yeke pia꞉me. \v 16 Kutu pia꞉pate kenkema꞉ mo wanda꞉ tamba꞉ minolo hata꞉ ipika꞉ kake a̱a̱ laa mo popake itiki hake sina꞉ kake pa꞉ta꞉ epea꞉ ikali mea neliaya꞉me. \v 17 Kutu pia꞉ ekina꞉ mo popake itiki hake si tieke hombelekema꞉ta꞉ mo wanda꞉ pa꞉ta꞉ mineke tieke pankolo hata꞉ ipika꞉ wekiwandiki ame̱le̱ a꞉nda꞉ pulu pea꞉me. Koto tapaketa꞉ mo Koda꞉na꞉ pi ula꞉ ekimanu opua Yesuma꞉ peneme yaasa꞉ ota꞉eki pa꞉ta꞉ kima꞉ na homeke hone tu laeme wanda꞉halie. \v 18 Kutupa mo popake itiki hake sita꞉ dawala houna꞉ tiao haya꞉me. \c 13 \s1 Sayale yaapo \p \v 1 Kutupa mo sayale hombeleketa꞉ mo dawala pa꞉ta꞉ pita opolo epea꞉eki handoa꞉me. Mo aleta꞉ ekeke kiki yaapo hao amboke watake hata꞉ haya꞉me. Mo ekekemanu yalaota꞉ kini you aka꞉ pambama꞉ pambama꞉ pia꞉me. Kutupa mo amboke manuna꞉ta꞉ Koda꞉ kitaake biki laememe. \v 2 Mo sayale hombeleketa꞉ bosikasi tieke ma꞉nda꞉ ipika꞉ biki lepadima꞉ handaa ipika꞉ anketa꞉ peioloma꞉ handeke ale tieke hombelekena꞉ ankema꞉ handaa ipika꞉ kaketa꞉ laeonona꞉ kakema꞉ handea꞉me. Mo hande popake itiki hake si tiekema꞉ta꞉ ipika꞉ honkopu make ipika꞉ kini sea make ipika꞉ handeteke hala꞉eki tieke paeyao mo sayale hombeleke pa꞉ta꞉ halea꞉me. \v 3 Mo sayalena꞉ amboke ma꞉nda꞉ta꞉ homena꞉ tupa꞉ apa꞉la꞉ pokeekepate pa mea epeayeke handaa mo wanda꞉hali paeyaota꞉ penkili putia pominolo hata꞉ mo sayale hombeleke telia꞉ mea pememe. \v 4 Kutupa wanda꞉hali paeyaoma꞉ mo popake itiki hake si pa꞉ta꞉ panda꞉puniao yeiya꞉ laaso hata꞉ yeni pimime. Pa ekipeke mo sima꞉ta꞉ ipika꞉ honkopu tieketa꞉ mo sayale pa꞉ta꞉ haleeke handa loa꞉me. Ikana꞉ma꞉ sayale pa꞉ta꞉ make panda꞉puniao yeiya꞉ laaso hata꞉ yeni pitolo alota꞉ Epita꞉ mo sayalema꞉ handelemepe. Epima꞉ ipiki ame̱le̱ a꞉nda꞉ puluekema꞉ honkopu aneke hala꞉pe lememe. \p \v 5 Mo sayalema꞉ta꞉ kaisepo hali tieke yaapona꞉ pa hali ma꞉nda꞉na꞉ yaapona꞉ handeteke haena꞉ laata꞉ hakoko lita꞉la꞉eki manuma꞉ Koda꞉ kitaena꞉yeke waleke halea꞉me. \v 6 Mo sayalema꞉ta꞉ Koda꞉ make ipika꞉ biki make ipiki hala꞉ da make oli hepeni haleme wanda꞉hali paeyao make yaala꞉ma꞉ homao hoeyaasa꞉ pi kini pea lea꞉me. \v 7 Kutupa ipikana꞉ma꞉ Koda꞉na꞉ wanda꞉hali ame̱le̱ a꞉nda꞉ pea bepolaena꞉ make tapake ta꞉ta꞉ ta꞉ta꞉ make kapomani ta꞉ta꞉ ta꞉ta꞉ma꞉ handeteke hala꞉ wanda꞉hali make pi ta꞉ta꞉ ta꞉ta꞉ make tutu ta꞉ta꞉ ta꞉ta꞉ make paeyao handeteke haena꞉ waleke halea꞉me. \v 8 Do kenkena꞉ hala꞉ wanda꞉hali paeyaoma꞉ta꞉ mo sayale pa꞉ta꞉ panda꞉puniao yeiya꞉ laaso hata꞉ yeni pilimikie. Pate do kenke a̱i̱ na wepiki haena꞉ kone ika꞉ biki manuta꞉ mo deto hala꞉ wanda꞉halina꞉ biki ula꞉ bukana꞉ laala꞉ wanda꞉hali homeke homekema꞉ kotoeki na pilimikie. Koto biki ula꞉ bukata꞉ hande limiki Sipisipi Ma꞉na꞉ Ikikina꞉ bukae. \p \v 9 Haleke haemeka꞉na꞉ta꞉ kota꞉ opua꞉pa꞉peke ya꞉la꞉me. \v 10 Ma꞉nda꞉ epita꞉ tapake ma꞉nda꞉ma꞉ minina꞉e laa wia꞉ka꞉na꞉ta꞉ kota꞉ ota꞉ minina꞉ lelieke. Epita꞉ bainasima꞉ lia homaena꞉e laa wia꞉ka꞉na꞉ta꞉ kota꞉ ota꞉ mo bainasima꞉ lia homaena꞉ lelieke. Dupiki haumanu pa꞉ta꞉ta꞉ Koda꞉na꞉ wanda꞉hali lopaama꞉na꞉yeke homu pea pa pina꞉e laa yu wia hata꞉ make kima꞉ na homeke hone tu lao haya꞉ka꞉na꞉ta꞉ ana꞉ pilieke. \p \v 11 Koto hoki naneta꞉ mo sayale hombeleke ma꞉nda꞉ mo kenke pa꞉ta꞉ yama꞉ opa꞉liaeyeke handoa꞉me. Do sayaleta꞉ sipisipi ma꞉na꞉ ekekema꞉ handeke ekeke yaapo haya꞉me. Kutupa ipika꞉ pita꞉ mo popake itiki hake sima꞉ ala꞉ tupa꞉ lea꞉me. \v 12 Mo alema꞉ta꞉ mo titina꞉ sayalena꞉ handeteke hala꞉eki tieke meata꞉ ipika꞉ leke popelekena꞉ hata꞉ e wopu pokea꞉me. Ipikana꞉ma꞉ta꞉ do kenke make do kenkena꞉ haleme wanda꞉hali paeyao make mo amba꞉ hande titina꞉ amboke hoeyaeya꞉pate paa epea꞉ sayale pa꞉ta꞉ panda꞉puniao yeiya꞉ laaso hata꞉ yeni pipee laa honkopu wopu hao sutiaeya꞉me. \v 13 Mo yaapo peao sayalema꞉ta꞉ na handeke haumanu wopu pitolo hata꞉ wanda꞉halina꞉ leke popelekena꞉ oli ya nanema꞉ ti uleke do kenkena꞉ lopena꞉ lea꞉me. \v 14 Kutupa ipikana꞉ma꞉ mo titina꞉ sayalena꞉ hau peaaso hata꞉ ipika꞉ leke popelekena꞉ hata꞉ mokoto na handeke haumanu pia꞉eki manuma꞉ta꞉ do kenke wanda꞉hali paeyao makeaaso hata꞉ yola꞉ mea pea꞉me. Ipikana꞉ma꞉ wanda꞉halima꞉ mo hande bainasima꞉ hoeyaeya꞉pate pa tiao hala꞉ titina꞉ sayale yeiya꞉ laaluekema꞉ koto ekima꞉ handekeeki ma꞉nda꞉ wepia꞉pe lea꞉me. \v 15 Kutupa mo yaapo peao sayalema꞉ta꞉ mo hande titina꞉ sayale manda꞉ meao wepimi ale pa꞉ta꞉ da꞉taasa꞉ pomo halena꞉yeke waleke halea꞉me. Kutupiki hauta꞉ mo alema꞉ pi lena꞉ la make mo ipiki pa꞉ta꞉ panda꞉puniao yeiya꞉ lapeke kiaalimi wanda꞉hali paeyao lu homaena꞉yeke pia꞉me. \p \v 16 Mo yaapo peao sayalema꞉ta꞉ mo hosiki wanda꞉hali make aneke wanda꞉hali make hamoko wanda꞉hali make natehali wanda꞉hali make pa hameke e poka꞉la꞉ wanda꞉hali make pa haleme wanda꞉hali make paeyaoma꞉ ika꞉ popeke nane kikina꞉ o ika꞉ wenokona꞉ta꞉ maka ma꞉nda꞉ ta̱laena꞉yeke honkopu hao sutiaeya꞉me. \v 17 Kutupa ma꞉nda꞉ epima꞉ do maka na ta̱laeyeketa꞉ kota꞉ koto someta꞉ aleta꞉ ma꞉nda꞉manu ota꞉ na hambo make tapao pina꞉e lea꞉me. Koto makata꞉ mo sayalena꞉ biki tapa꞉ wiao o ipika꞉ bikina꞉ namba haleke ekie. \v 18 Do ekimanu opolo epea꞉ka꞉na꞉ta꞉ kota꞉ epeke hone u lenkene pita꞉la꞉ somema꞉ ana꞉ pilieke. Ma꞉nda꞉ epita꞉ epeke honema꞉ tumba wia꞉ka꞉na꞉ta꞉ kota꞉ ipikana꞉ma꞉ koto sayalena꞉ namba lo yokena꞉e. Pa ekipeke mo nambata꞉ halina꞉ bikina꞉ anketeke minolo kone la꞉la꞉me. Koto nambata꞉ 666 la꞉la꞉me. \c 14 \s1 Sipisipi Ma꞉na꞉ Ikiki pita꞉ ipika꞉ wanda꞉hali \p \v 1 Kutupaka꞉na꞉ handoa꞉pate mo hande Sipisipi Ma꞉na꞉ Ikikita꞉ mo ipika꞉ biki make ipika꞉ Apa꞉na꞉ biki ika꞉ wenokona꞉ laemeke 144 daoseni wanda꞉hali ame̱le̱ mo Saioni potena꞉ haememe. \v 2 Kutupa oli ya nanema꞉ ikali do̱u̱ tiekema꞉ handa make tutu tieke liki nonopiki pi ho̱la̱꞉make opua꞉me. Mo pi ho̱la̱꞉maketa꞉ kidama꞉ handeke ale lita꞉la꞉ haliwekima꞉ liki nonopiki ala꞉ ekima꞉ handeke nono pia꞉me. \v 3 Mo 144 daoseni wanda꞉halita꞉ mo hande Koda꞉na꞉ kini seana꞉ make mo deto hala꞉ tonkopu ale manuna꞉ make mo you haliwekina꞉ puki tikitiki pua haememe. Ikita꞉ panake emeli ikana꞉ma꞉ homeke moka꞉la hande hande pea lapeke emeli homeke lememe. Kenke wanda꞉hali paeyao pa꞉ta꞉ta꞉ koto tapake homeke pa꞉ta꞉la꞉ mea epeaalo pia꞉ tapakee. \v 4 Ikita꞉ wanda꞉weki hakopu na tunkulimieki yaalo yakopiki haliweki haememe. Ikana꞉ma꞉ta꞉ mo Sipisipi Ma꞉na꞉ Ikiki pea꞉ pa꞉ta꞉ta꞉ telipaleke ombu haememe. Ikita꞉ kenke wanda꞉hali paeyao anka꞉lopuna꞉ epeaala꞉ tapakee. Ikita꞉ Koda꞉ pa꞉ta꞉ make mo Sipisipi Ma꞉na꞉ Ikiki pa꞉ta꞉ make titina꞉ halo pa꞉la꞉ tapakee. \v 5 Ma꞉nda꞉ma꞉ ikita꞉ yayapiki pi lelemeeki na opua make ala꞉ta꞉ ma꞉nda꞉ ata꞉ka꞉ na pealeme haliwekie. \s1 Enisolo tepo \p \v 6 Kutupa enisolo ma꞉nda꞉ oli ya manda a̱e̱nolo hata꞉ do kenke wanda꞉hali paeyao pa꞉ta꞉ mo pa u hala꞉ Pi Seliapo laluekema꞉ pia꞉me. Mo wanda꞉halita꞉ tutu ta꞉ta꞉ ta꞉ta꞉ make tapake ta꞉ta꞉ ta꞉ta꞉ make kapomani eleke elekema꞉ handeteke hala꞉ kenke make paeyao pa꞉ta꞉ loluekema꞉ pieke handoa꞉me. \v 7 Ipikana꞉ma꞉ anekema꞉ alota꞉ Koda꞉ paala꞉ma꞉ homaaso hata꞉ ipika꞉ tieke hala꞉ ekina꞉ biki mina꞉liape. Pa ekipeke ipikana꞉ma꞉ mo hande wanda꞉hali pi yokaalu pulu pa꞉la꞉ nate a꞉pa꞉leke loa꞉me. Do kenke make oli ya make dawala make opa꞉la꞉ ikalimanu make koto ale paeyao wa꞉pa꞉la꞉ Koda꞉ pa꞉ta꞉ panda꞉puniao yeiya꞉ laaso hata꞉ yeni pea꞉pa꞉peke lea꞉me. \p \v 8 Kotoeki hoki naneta꞉ enisolo ma꞉nda꞉ma꞉ teliolo alota꞉ Mo wanda꞉ta꞉ lopa꞉la꞉me. Aneke Ba꞉bilonita꞉ lopa꞉la꞉me. Mo wanda꞉ma꞉ wanda꞉hali paeyao ipika꞉ waini ikali nena꞉ lea꞉me. Mo honkopu hake waini ikalita꞉ ipika꞉ lokena꞉ hoke hone pa꞉la꞉eki manue lea꞉me. \p \v 9 Pa tepo peao enisoloma꞉ mo titina꞉eki yaapo teliolo hata꞉ anekema꞉ alota꞉ Ma꞉nda꞉ epima꞉ mo sayale hombeleke make koto ale manda꞉ meao wa꞉pa꞉la꞉ ale pa꞉ta꞉ make panda꞉puniao yeni pitolo o ipika꞉ maka wenoko o popeke nane kikina꞉ ta̱lena꞉ lemeka꞉na꞉ta꞉ kota꞉ \v 10 koto someta꞉ ipika꞉ kone Koda꞉na꞉ waini ikali nelieke. Kota꞉ mo Koda꞉ma꞉ta꞉ ipika꞉ paala꞉piki mineke panka꞉la꞉ wele pa ula꞉ waini ikalita꞉ mo ipika꞉ mineke panka꞉la꞉ kapo pa꞉ta꞉ holo pambeekeeki loa꞉me. Dupilia꞉ wanda꞉hali paeyaota꞉ mo yakopiki enisolo titi make mo Sipisipi Ma꞉na꞉ Ikikina꞉ leke tomona꞉ mo ti uleke make mo titipu tiekepiki lanka꞉ma꞉ handeke ale pa꞉ta꞉ tanda no halimikie. \v 11 Mo tanda halo hala꞉ tina꞉ lumuta꞉ na paeyeke hoto paeyao pa u halieke. Koto sayale hombeleke pita꞉ ipika꞉ manda꞉ meao wa꞉pa꞉la꞉ ale yaapo pa꞉ta꞉ panda꞉puniao yeni pitolo make o koto alena꞉ bikina꞉ maka wina꞉ lea꞉ka꞉na꞉ta꞉ kota꞉ koto wanda꞉hali ika꞉ tanda no halo pa꞉la꞉ ekita꞉ nate o timba꞉ ota꞉ hosiki siki na paeyaalieke lea꞉me. \p \v 12 Koto ya꞉leke handaa mo Koda꞉na꞉ pi ula꞉ ekimanu opua Yesu pa꞉ta꞉ kima꞉ na homeke hone tulao hala꞉ wanda꞉hali lopaama꞉na꞉yeke ika꞉ pa pina꞉e laa yu wia hala꞉ ekita꞉ ana꞉na꞉ pilieke. \p \v 13 Kutupa oli hepeni nanema꞉ pi ho̱la̱꞉makema꞉ alota꞉ Doeki laaniae. Ame do kini pea mo Tekehalina꞉ e pokolo hata꞉ homeleme wanda꞉halita꞉ ta꞉na꞉ma꞉ homa꞉pa꞉peke ya꞉la꞉me lea꞉me. Koto leeke mo Sipitidima꞉ hombo peaaso hata꞉ alota꞉ Ota꞉e. Ikita꞉ ika꞉ ki hone na wiki honkopu hao pokelemeeki paeyaemeke handaa ta꞉na꞉ma꞉ homilimikie. Pa ekipeke ika꞉ e pokeleme ekina꞉ yenkita꞉ iki ame̱le̱ pa hala꞉me lea꞉me. \s1 Kenkena꞉ ne napeke mina꞉la꞉eki \p \v 14 Kutupa handoa꞉pate ya hapi handoa꞉me. Kutupa mo ya hapi mandaata꞉ halima꞉ handeke ale pitia꞉me. Ipika꞉ ambokena꞉ta꞉ koloma꞉ wepiki kinina꞉ you aka꞉ pambao kutupa widi tunkula꞉la꞉ ne wopu hake kaiya minia꞉me. \v 15 Kutupa mo enisolo ma꞉nda꞉ta꞉ mo tembolo pa꞉ta꞉ yama꞉ a꞉pa mo ya hapi manda pitia꞉ some pa꞉ta꞉ e̱ wi tieke la꞉moneaaso alota꞉ Naka꞉ widi tunkulu hale kaiyama꞉ ne napeke mie. Pa ekipeke mo nateta꞉ a꞉pa꞉la꞉me. Kutupa kenkena꞉ ne napeke mina꞉ pota꞉leke loa꞉me lea꞉me. \v 16 Koto leeke mo ya hapi manda pitia꞉ somema꞉ ipika꞉ widi tunkulu hala꞉ kaiya wankeaaso hata꞉ kenkena꞉ ne napeke mu paeyaeya꞉me. \p \v 17 Kutupa enisolo ma꞉nda꞉ mo tembolo pa꞉ta꞉ pita opolu bao ipulu ne wopu hake kaiya ombu miniki epea꞉me. \v 18 Kutupa mo tina꞉ handeteke haya꞉ enisolo ma꞉nda꞉ta꞉ mo oloda pa꞉ta꞉ hao epea꞉me. Ipikana꞉ma꞉ mo ne wopu hake kaiya miniki haya꞉ enisolo pa꞉ta꞉ anekema꞉ alota꞉ Naka꞉ kaiyama꞉ mo waini puna꞉ kilikimanu honda꞉ poka꞉e. Pa ekipeke mo kiliki manuta꞉ pota꞉leke loa꞉me lea꞉me. \v 19 Kota꞉ mo enisoloma꞉ ipika꞉ kaiya do kenkena꞉ wankeaaso hata꞉ mo waini kiliki manuta꞉ talo pamba oni Koda꞉na꞉ paala꞉ piki mineke panka꞉la꞉ waini kiliki dekepo hala꞉ pa꞉ta꞉ lopaeya꞉me. \v 20 Mo waini kilikita꞉ mo daoni tieke hama꞉ nane mo waini kiliki dekepo hala꞉ pa꞉ta꞉ dekepea꞉me. Kutupa mo dekepea꞉ ale pa꞉ta꞉ta꞉ we ikali tieke 300 kilomida hokulu taa hata꞉ ota꞉ kendo tieke make mo hosina꞉ kake ana꞉na꞉ lombei pea꞉peke kendo wia꞉me. \c 15 \s1 Ane mone ke handaasa꞉ watake hata꞉ haumanu ipula꞉eki \p \v 1 Kutupa oli yana꞉ ta꞉ta꞉ ma꞉nda꞉ piki hone mateke pututu au tieke handoa꞉me. Watake hata꞉ enisolo manuma꞉ paeyaaso ane mone ke handaasa꞉ ipula꞉ watake hata꞉ haumanu miniki haememe. Kotota꞉ Koda꞉ ipika꞉ paeyaaso mineke panka꞉la꞉eki walo paeyaasa꞉eki yekeme. \p \v 2 Kutupa mo kalasima꞉ handeke hama꞉ ma꞉nda꞉ ti uleke apa꞉taakeeki handoa꞉me. Koto pa꞉ta꞉ make mo hande sayale hombeleke make koto ale manda꞉ meao wepimiki sayale make mo alena꞉ bikina꞉ taapa꞉ wiao la꞉la꞉ namba make bepolao haleme wanda꞉hali handoa꞉me. Ikita꞉ mo kalasi hama꞉ tea꞉na꞉ tilao hata꞉ Koda꞉ma꞉ hala꞉la꞉ kidama꞉ handeke alemanu miniki hata꞉ \v 3 mo Koda꞉na꞉ e pokeeke hali Mosesina꞉ emeli make mo Sipisipi Ma꞉na꞉ Ikikina꞉ emeli make lememe. Ikana꞉ma꞉ alota꞉ \q1 Aneke Tekehali Koda꞉o. \q1 Naka꞉ pita꞉la꞉eki manuta꞉ ta꞉ta꞉ ma꞉nda꞉ peao make yole make pa꞉la꞉me. \q1 Tapake paeyaona꞉ kinio. \q1 Naka꞉ pitele haumanu paeyaota꞉ tikitiki pea ota꞉ hau manue. \q1 \v 4 Tekehali neketa꞉ epima꞉ paala꞉ma꞉ na homilia꞉pe. \q1 Naka꞉ hau tieke laaluekema꞉ta꞉ epima꞉ kiaalia꞉pe. \q1 Neke homeke homeke yako peleme. \q1 Wanda꞉hali paeyaota꞉ neke pa꞉ta꞉ a꞉pa panda꞉ puniao yeiya꞉ laaso hata꞉ yeni pilimikie. \q1 Pa ekipeke naka꞉ yakopiki hau manuta꞉ paeyaoma꞉ amba꞉ handelememe lememe. \p \v 5 Koto hoki naneta꞉ oli hepeni nane mo tembolo da pota꞉ lumba wiekeeki handoa꞉me. Kutupa mo da tukikina꞉ta꞉ amba꞉ hande Koda꞉ ipika꞉ wanda꞉hali ame̱le̱ pi lo hayeke palai da handoa꞉me. \v 6 Mo watake hata꞉ enisolo manuta꞉ mo watake hata꞉ ke handa꞉peke ekimanu miniki hata꞉ tembolo pa꞉ta꞉ hao epememe. Ikita꞉ hake piki leke yale yale piki dau yama koloma꞉ wepiki beleke ika꞉ hakokona꞉ yamemekeme. \v 7 Kutupa mo hande deto hala꞉ tonkopu ale homekema꞉ mo watake hata꞉ enisolomanu pa꞉ta꞉ mo hoto paeyao pa hao halo pa꞉la꞉ Koda꞉na꞉ mineke panka꞉la꞉ ekima꞉ tumbiki watake hata꞉ kawasomanu halea꞉me. \v 8 Mo Koda꞉na꞉ wele pita꞉ pa̱a̱ yaapo pa꞉ta꞉ yama꞉ epea꞉ lumuma꞉ta꞉ mo tembolo tumbulu baeya꞉me. Kutupa mo tembolo pa꞉ta꞉ta꞉ ma꞉nda꞉ pua꞉peke na ya꞉pate pa mo watake hata꞉ enisolo manuma꞉ mo watake hata꞉ ke handaasa꞉eki mea ipu paeya꞉ka꞉na꞉ta꞉ wetepena꞉ pua꞉peke ya꞉me. \c 16 \s1 Koda꞉na꞉ mineke panka꞉la꞉eki ula꞉ kawasomanu \p \v 1 Kutupa mo tembolo pa꞉ta꞉ yama꞉ pi ho̱la̱꞉make wopuma꞉ mo watake hata꞉ enisolo pa꞉ta꞉ alota꞉ Kenkena꞉ pua mo Koda꞉na꞉ mineke panka꞉la꞉eki pamba꞉la꞉ watake hata꞉ kawasomanu hola꞉pe lea꞉me. \p \v 2 Koto ekina꞉ titina꞉ enisoloma꞉ ipika꞉ kawaso kenkena꞉ pua holaeya꞉me. Kutu pieke handaa ota꞉ hoke tanda tieke piki boleke manuta꞉ mo hande hoke sayalena꞉ maka talaeme tapake make mo ale manda꞉ meao wepimiki ale pa꞉ta꞉ panda꞉puniao yeni pu haeme wanda꞉hali pa꞉ta꞉ pua pitia꞉me. \p \v 3 Kutupa yaapo peao enisoloma꞉ ipika꞉ kawaso mo dawala manda pua holaeya꞉me. Mo ikalita꞉ homeke halina꞉ wema꞉ handaata꞉ koto dawala pa꞉ta꞉ pitimi ale paeyao homememe. \p \v 4 Kutupa tepo peao enisoloma꞉ ipika꞉ kawaso mea pua mo ikalimanu make opa꞉la꞉ ikali pa꞉ta꞉manu holaeya꞉ dina꞉ta꞉ we au lolo yapea꞉me. \v 5 Kutupa mo ikalimanu handeteke haya꞉ enisoloma꞉ alota꞉ Naka꞉ panisi pealuekema꞉ ma̱leke liaasa꞉eki manuta꞉ ota꞉ ana꞉na꞉ kone wa꞉peleme. O ota꞉ yako piki someo. Neke ame hale make amba꞉ hae makee. \v 6 Pa ekipeke ikana꞉ma꞉ta꞉ mo Koda꞉na꞉ wanda꞉halina꞉ we make mo potopede haliwekina꞉ we make holememe. Koto ekina꞉ ame nakana꞉ma꞉ta꞉ iki make we ikali nena꞉ haleleme. Ikana꞉ma꞉ta꞉ ika꞉ ekina꞉ yenki kone mina꞉lememe laa lea꞉me. \v 7 Kutupa mo oloda pa꞉ta꞉ yama꞉ pi ho̱la̱꞉makema꞉ alota꞉ Wele wopupiki Tekehali Koda꞉o. Naka꞉ panisi pealuekema꞉ ma̱leke liaasa꞉eki manuta꞉ tikitiki pea make ota꞉ ana꞉na꞉ wepeleme lea꞉me. \p \v 8 Koto hoki naneta꞉ mo tonko peao enisoloma꞉ ipika꞉ kawasota꞉ natena꞉ holaeya꞉me. Kutupa mo nate ipika꞉ wele wopu piki titipuma꞉ wanda꞉hali tena꞉ waleke halea꞉me. \v 9 Mo wanda꞉halita꞉ do wele wopupiki titipuma꞉ to tokilieke handaata꞉ mo ke manuna꞉ handeteke haya꞉ Koda꞉na꞉ biki hoeyaememe. Kutu pimipate ika꞉ hoke hau manuta꞉ hoki na walaa ipika꞉ wele tiekena꞉ biki na mea mina꞉liaememe. \p \v 10 Kutupa mo yunki peao enisoloma꞉ ipika꞉ kawasota꞉ mo hoke sayalena꞉ kini seana꞉ pua holaeya꞉me. Kutu pieke handaa timba꞉ ala꞉ ekima꞉ mo hande sayalena꞉ kilu tombuao hala꞉ alena꞉ tumbaeya꞉me. Kutupa wanda꞉halima꞉ tanda tieke nalo hata꞉ ika꞉ kekeke tankolo nememe. \v 11 Kutu pitolo hata꞉ ika꞉ tanda make tete manuna꞉ oli hepeni hala꞉ Koda꞉na꞉ biki hoeyaemepate ika꞉ hoke hau manuta꞉ hoki na walememe. \p \v 12 Kutupa mo yunki mindiki peao enisoloma꞉ ipika꞉ kawasota꞉ mo ikali tieke biki Yupoteitisina꞉ holaeya꞉me. Kutupa mo nate opa꞉la꞉ nane haleme kini manuna꞉ pota꞉ wiaaso mo hande ikalita꞉ hapupa pea꞉me. \v 13 Kutupa ki̱ma꞉ handeke ha̱i̱ pambeke temoko tepo handoa꞉me. Ikita꞉ mo popake itiki hake sina꞉ handeke alena꞉ kake pa꞉ta꞉ make mo hoke sayale hombelekena꞉ kake pa꞉ta꞉ make mo yayapiki potopedena꞉ kake pa꞉ta꞉ make pita꞉ opolu bao epememe. \v 14 Ikita꞉ mo na handeke haumanu pu haleme hoke temokomanue. Mo hoke temoko tepoma꞉ta꞉ do kenke honiki paeyao pa꞉ta꞉ hala꞉ kinimanu pua hatuku mea a꞉pa mo Wele Wopupiki Koda꞉na꞉ Aneke natena꞉ a꞉nda꞉ pina꞉ yeke pimikime. \p \v 15 Opie. I̱ta꞉ pake nala꞉ hali leke ipulueke. U̱ na peliki hata꞉ ipika꞉ aka꞉manu wopu handeteke hao hale someta꞉ ta꞉na꞉ma꞉ homilieke. Ipikita꞉ paa tia pominolo hata꞉ wanda꞉hali leke popelekena꞉ yaala꞉ meaapa꞉na꞉yeke pita꞉la꞉me. \p \v 16 Kutupa mo hande temoko tepoma꞉ mo kinimanu hatuku a꞉pa mo Hibulu pima꞉ta꞉ Amakedoni la꞉la꞉ alena꞉ a꞉pa momba꞉laeya꞉me. \p \v 17 Kutupa mo watake peao enisoloma꞉ ipika꞉ kawasota꞉ oli ya pa꞉ta꞉ holaeya꞉me. Oni mo tembolo pa꞉ta꞉ yama꞉ aneke pi ho̱la̱꞉make alota꞉ Ameta꞉ koto paela꞉ handa꞉e lea꞉me. \v 18 Kutupa ti tekelemanu make a꞉ta꞉ a꞉ta꞉ piki tutumanu make tutu tiekemanu make ota꞉ hoke yu momeni make pia꞉me. Amba꞉ hali wepia kini pea a꞉pa ame do make kutupiki yu momeni na pa꞉la꞉pate do yu momeni homeketa꞉ paeyao ankulake ota꞉ hoke ta꞉ta꞉ ma꞉nda꞉ pikieki ya꞉mee. \v 19 Mo aneke daonita꞉ tepo tekilipa mo kenke paeyaona꞉ daoni paeyaota꞉ ota꞉ hoeyaeya꞉me. Koda꞉ma꞉ta꞉ mo hande Ba꞉biloni tieketa꞉ pa niminaaso hata꞉ ipika꞉ wopu mineke panka꞉la꞉ waini ikali ipika꞉ kapona꞉ nena꞉ lea꞉me. \v 20 Mo dawalama꞉ dupala꞉ kenkemanu paeyaota꞉ alu pao mo potemanu paeyaota꞉ alupaeya꞉me. \v 21 Leke opeke ya hapeke tieke tiekemanu ka꞉nda꞉ ota꞉ tieke hombeleke piki ekimanu oli ya nanema꞉ yama꞉ a꞉pa wanda꞉hali manda lopea꞉me. Koto wanda꞉halima꞉ta꞉ mo ke handaeya꞉ ya hapekena꞉ Koda꞉na꞉ biki hoeyaememe. Pa ekipeke do keta꞉ ota꞉ hokeeki ya꞉mee. \c 17 \s1 Hali yolo hala꞉ biki wiki wanda꞉ \p \v 1 Kutupa mo hande watake hata꞉ kawaso miniki haeme watake hata꞉ enisolo homeke ma꞉nda꞉ma꞉ I̱ pa꞉ta꞉ a꞉pa alota꞉ Epoe. I̱ma꞉ mo hali yolo hala꞉ biki wiki wanda꞉ pa꞉ta꞉ halo pa꞉la꞉ panisi walueke. Mo ikalimanu tea꞉na꞉ a꞉ela꞉ aneke daoni hombelekema꞉ loa꞉me. \v 2 Do kenkena꞉ hala꞉ kini manuma꞉ta꞉ mo wanda꞉ ame̱le̱ hoke loke hoeyaasa꞉ hau pu ombu haememe. Kutupa mo kenke wanda꞉halima꞉ta꞉ ipika꞉ loke hoeyaasa꞉ hau manuna꞉ waini ikali naa keaememe lea꞉me. \p \v 3 Mo Sipitidima꞉ I̱ pa꞉ta꞉ e pokolo hata꞉ mo enisoloma꞉ I̱ta꞉ hapu hala꞉ alena꞉ mea tia pea꞉me. Koto pa꞉ta꞉ta꞉ wanda꞉ ma꞉nda꞉ma꞉ mo wepiki sayale ma꞉nda꞉na꞉ hoki manda pitia꞉eki handoa꞉me. Mo sayalena꞉ loke paeyao pa꞉ta꞉ta꞉ Koda꞉ kitaasa꞉ bikimanu lao kutupa ipikita꞉ watake hata꞉ amboke hao make kiki yaapo ekekemanu haya꞉me. \v 4 Mo wanda꞉ ipika꞉ aka꞉ta꞉ we ta꞉ta꞉ ma꞉nda꞉ yaapo piki au lekeeki yamea꞉me. Kutupa mo aka꞉ta꞉ koloma꞉ wepiki beleke manuma꞉ make seliapo piki toopi manuma꞉ make sekete inkiki manuma꞉ make tumbulu baeya꞉me. Ipika꞉ kiki pa꞉ta꞉ta꞉ ipika꞉ loke hoeyaasa꞉ ekina꞉ yenkita꞉ ota꞉ yaala꞉piki ekimanu make ha̱i̱ pambeke alemanu make tumbulu baeyeke koloma꞉ wepiki kapo miniki haya꞉me. \v 5 Mo ipika꞉ wenokona꞉ta꞉ hande a꞉mbaala꞉ ekina꞉ biki dupa wiekeme. Hali yola꞉la꞉ wanda꞉hali make kikana꞉ haumanu pu haleme wanda꞉hali make iki paeyaona꞉ inkiki Ba꞉biloni tieke laa wia꞉me. \v 6 Kutupa mo wanda꞉ta꞉ Koda꞉na꞉ wanda꞉halina꞉ make Yesu pa꞉ta꞉ hone tulaa pelia haemeke handa limiki wanda꞉halina꞉ we na̱a̱ keaya꞉eki handoa꞉me. I̱ma꞉ moeki hando haota꞉ ota꞉ hoke tupa꞉ penkilipa꞉tia pomua꞉me. \p \v 7 Mo enisoloma꞉ I̱ lota꞉ pitolo alota꞉ Neketa꞉ ekipeke penkilipa꞉tia pominelepe. I̱ma꞉ neke pa꞉ta꞉ mo wanda꞉na꞉ make mo wanda꞉ mea tia pomu hala꞉ sayalena꞉ a꞉mbao ula꞉ ekina꞉ teke la kionoe. Mo hande watake hata꞉ amboke hao make kiki yaapo ekeke hala꞉ sayalena꞉ loa꞉me. \v 8 Koto sayaleta꞉ amba꞉ta꞉ da꞉ta haya꞉pate ameta꞉ na da꞉taa hala꞉me. Ipikita꞉ ame do siki mo honiki na wiki naku kiake pa꞉ta꞉ hama opolu bao ipiki hoeyaena꞉ pelieke. Do kenkena꞉ haleme wanda꞉hali ika꞉ biki manuta꞉ do kenke a̱i̱ na wepiki haena꞉ kone mo deto hala꞉ wanda꞉halina꞉ biki ula꞉ bukana꞉ ika꞉ biki na lake wanda꞉halita꞉ mo hande sayale handolo hata꞉ penkilipa꞉tia pomilimikie. Amba꞉ a꞉nda꞉ta꞉ da꞉ta haya꞉pate ameta꞉ na deteke hala꞉me. Pate paa opolo ipilieke. \p \v 9 Doeki manuta꞉ hone u lenkene pita꞉la꞉eki pita꞉ hone wita꞉la꞉eki yaapoma꞉ handa꞉peke ya꞉la꞉ haue. Mo watake hata꞉ amboketa꞉ watake hata꞉ yueli manue. Kotota꞉ mo hande wanda꞉ pila꞉ alena꞉e. Kutupa make ikita꞉ watake hata꞉ kini manue. \v 10 Yunki hata꞉ta꞉ lopelemepate homekema꞉ta꞉ ipika꞉ kilu tombuao hala꞉ ekina꞉ pa handeteke hala꞉me. Kutupa ma꞉nda꞉ta꞉ a̱i̱ na a꞉pa꞉la꞉me. Ipiki epea꞉ka꞉na꞉ta꞉ nate hosiki sikima꞉ homeke handeteke halieke. \v 11 Kutupa mo hande amba꞉ta꞉ da꞉ta haya꞉pate ame na da꞉ta hala꞉ sayaleta꞉ ipika꞉ kone ketepo peao kinie. Mo hande watake hata꞉ tapake konee. Ipikita꞉ hoeyaena꞉ pula꞉me. \p \v 12 Mo hande kiki yaapo ekeke manuta꞉ kiki yaapo kini manue. Ikita꞉ a̱i̱ na kini pea handeteke halemepate pa aowa homeke homekena꞉ mo hoke sayale ame̱le̱ handeteke haena꞉ waleke halieke. \v 13 Do kiki yaapo ale ikita꞉ teke homeke homeke wia halememe. Ika꞉ honkopu make ika꞉ handeteke haleme wele manuta꞉ mo sayale pa꞉ta꞉ halelememe. \v 14 Ikana꞉ma꞉ta꞉ mo Sipisipi Ma꞉na꞉ Ikiki ame̱le̱ a꞉nda꞉ pilimikie. Pate mo Sipisipi Ma꞉na꞉ Ikikita꞉ ipika꞉ wi laa yata꞉pa꞉ ma꞉la꞉ hone tulao haleme hoki nane tolu haleme tapake ame̱le̱ hata꞉ mo tapake bepolalimikie. Pa ekipeke ipikita꞉ tekehali paeyaona꞉ Tekehali make kini paeyaona꞉ Kinie lea꞉me. \p \v 15 Mo enisoloma꞉ I̱ pa꞉ta꞉ ombu alota꞉ Mo hande hande hali yolo hala꞉ wanda꞉ pitia꞉ ikali manuta꞉ kapomani ta꞉ta꞉ ta꞉ta꞉ma꞉ handeteke hala꞉ kenkemanu make mo ta꞉ta꞉ ta꞉ta꞉ piki wanda꞉hali paeyao make mo tutu ta꞉ta꞉manu make pi ta꞉ta꞉ ta꞉ta꞉ leke tapake manue. \v 16 Mo hande hande kiki yaapo ekeke manuma꞉ make mo hande sayalema꞉ make ikana꞉ma꞉ mo wanda꞉ ota꞉ honditi pilimikie. Ikana꞉ma꞉ta꞉ mo wanda꞉ma꞉ pambala꞉ ala꞉ta꞉ ala꞉ta꞉ paeyao hola꞉ mea pa tia haena꞉ lelimikie. Mo wanda꞉na꞉ loke mindiki naa kutupa ti ulekema꞉ hoeyaalimikie. \v 17 Pa ekipeke Koda꞉ma꞉ta꞉ ipika꞉ hone pa꞉la꞉eki peaena꞉ yeke ika꞉ puki pa꞉ta꞉manu ipika꞉ hone pa꞉la꞉eki wina꞉ leeke handaa ikana꞉ma꞉ ta꞉ma꞉ni pea homeke tupa꞉ hau pilimikie. Ika꞉ honkoputa꞉ mo sayale pa꞉ta꞉ halaata꞉ Koda꞉na꞉ pimanu ota꞉ peneme yaalo epena꞉ lelimikie. \v 18 Mo hande wanda꞉ta꞉ mo aneke daoni hombelekee. Mo kenke honiki paeyaona꞉ kinimanu handeteke hala꞉ daonie laa lea꞉me. \c 18 \s1 Ba꞉bilonina꞉ lopa꞉la꞉eki \p \v 1 Doeki hoki naneta꞉ enisolo ma꞉nda꞉ oli hepeni nane hao hola꞉pa꞉nialo epea꞉eki handoa꞉me. Ipikita꞉ wele tieke pa꞉ta꞉ ipulu ipika꞉ yameeke leke yale yale piki pa̱a̱ma꞉ta꞉ do kenke paeyao pa̱a̱ peaya꞉me. \v 2 Ipikana꞉ma꞉ pi ho̱la̱꞉make tiekema꞉ e̱ wi alo alota꞉ \q1 Mo wanda꞉ta꞉ lopa꞉la꞉me. Ba꞉biloni tieketa꞉ lopa꞉la꞉me. \q1 Ipikita꞉ hoke temoko tonuma꞉ make ha̱i̱ pambeke temokomanu haleme teke dae. \q1 Ota꞉ ha̱i̱ pamba꞉papeke make handa꞉ nala꞉ na piki anemone ba manuta꞉ koto pa꞉ta꞉ pila꞉me. \q1 \v 3 Pa ekipeke mo kapomani ta꞉ta꞉ ta꞉ta꞉ma꞉ handeteke hala꞉ tapake paeyaoma꞉ta꞉ ipika꞉ waini ikali nememe. \q1 Mo honkopu wopu hake waini ikali ipika꞉ loke hoeyaasa꞉ na꞉na꞉ pa꞉la꞉ hauna꞉ loa꞉me. \q1 Do kenkena꞉ kini manuma꞉ta꞉ mo wanda꞉ ame̱le̱ loke hoeyaasa꞉ hau pu ombu haememe. \q1 Kutupa do kenkena꞉ bisinisi haliwekita꞉ mo wanda꞉na꞉ kikana꞉ hau leke pia꞉ hoke hau pa꞉ta꞉ yama꞉ hamoko haememe lea꞉me. \p \v 4 Kutupa I̱ma꞉ opua꞉pate oli hepeni nanema꞉ pi ho̱la̱꞉make ma꞉nda꞉ma꞉ alota꞉ \q1 Ya wanda꞉halio. Opolu bao ipupee. Koto wanda꞉ mina꞉pa꞉lao ipupee. \q1 Ikana꞉ma꞉ta꞉ ipika꞉ hoke haumanu pa꞉ta꞉ na apa꞉taapa꞉pee. Ipika꞉ hoke yenki mina꞉la꞉eki na telipa mia꞉pa꞉pee. \q1 \v 5 Pa ekipeke ipika꞉ hoke hau manuta꞉ oli hepeni wataalo a꞉ma꞉ela꞉me. \q1 Kutupa Koda꞉ma꞉ta꞉ ipika꞉ hoke hau pa꞉la꞉ ekimanu hone niminaasa꞉me. \q1 \v 6 Iki pa꞉ta꞉ pia꞉ tupa꞉ ipiki pa꞉ta꞉ make homeke tupa꞉ pipee. Ipika꞉ pia꞉ ekina꞉ hoke yenkita꞉ pa atulao hala꞉pe. \q1 Ikana꞉ma꞉ hokeeki nomena꞉yeke ipikana꞉ma꞉ amu peawaya꞉ tupa꞉ ikana꞉ma꞉ make ipika꞉ kapo pa꞉ta꞉ mo yaapo peao honkopu wopu hake ikali tumbape. \q1 \v 7 Ipika꞉ kone mo pa̱a̱ pa꞉la꞉eki make ta꞉na꞉ tieke pa꞉la꞉eki make halolo pia꞉ tupa꞉ kone paa mo tanda tiekemanu make homena꞉ tupa꞉ tanda mina꞉la꞉eki make hala꞉pe. \q1 Pa ekipeke ipika꞉ kone alota꞉ Kini wanda꞉ do pilu handa꞉e. I̱ta꞉ kineke wanda꞉ dia꞉me. I̱ma꞉ta꞉ hamono tupa꞉ tanda mina꞉la꞉ ekita꞉ ota꞉ na handulueke laa ala꞉me. \q1 \v 8 Do ekina꞉ yeketa꞉ nate ma꞉nda꞉na꞉ ipikita꞉ ke eleke elekema꞉ minilieke. Do ke manuta꞉ yeni ki make homena꞉ tupa꞉ tanda mina꞉la꞉eki make tea꞉ ki makee. Kutupa ipikita꞉ ti ulekema꞉ yankilieke. \q1 Pa ekipeke mo wanda꞉ panisi peaasa꞉ Tekehali Koda꞉ta꞉ ota꞉ wele wopu pa꞉la꞉me. \p \v 9 Do kenkena꞉ haleme kinimanu mo wanda꞉ ame̱le̱ loke apa꞉tao hoke na꞉na꞉ pa꞉la꞉ haumanu mandakena꞉ pimi tapakema꞉ta꞉ mo daoni tiekena꞉ e̱ lelimikie. Mo yanko paeyaasa꞉ ti ulekena꞉ lumu handolo hata꞉ loa꞉me. \v 10 Ikita꞉ mo wanda꞉na꞉ mina꞉la꞉ tandata꞉ ma꞉nda꞉ putupa mea꞉peke yeke paala꞉ma꞉ homolo hata꞉ ota꞉ papate leke halememe. Ikana꞉ma꞉ alota꞉ A꞉pa꞉e. Ota꞉ paala꞉e. Do aneke make honkopu hake daoni Ba꞉bilonio. Nate leke homeke sikina꞉ kone neketa꞉ panisi ka꞉la꞉me laa lelimikie. \p \v 11 Do kenkena꞉ bisinisi haliwekima꞉ make mo wanda꞉na꞉ e̱ alo make a꞉ta꞉ma꞉ make homelememe. Pa ekipeke ma꞉nda꞉ma꞉ ika꞉ ala꞉ta꞉ ala꞉ta꞉ ota꞉ na hambelememe. \v 12 Ika꞉ kolo make silipa make seliapo piki toopimanu make sekete inkikimanu make dau panka꞉manu make ta꞉ta꞉ ta꞉ta꞉ piki wepiki daumanu make silika daumanu make mandane ta꞉ta꞉ ta꞉ta꞉ piki wopu na hala꞉ timanu make elepa꞉ntina꞉ ekekema꞉ wa꞉pele ta꞉ta꞉ ta꞉ta꞉ piki alemanu make yenki tieke wiki timanu make kopama꞉ handeke ale botonosi make ayenima꞉ wepiki alemanu make kalasima꞉ handeke hakesapo biki mambolo \v 13 make mandane ti manuna꞉ yonkeleke make teika꞉ma꞉ handeke ale make totopo yole piki ale make hosiki tima꞉ handeke maetamo leke ti make totopo wopu piki oeta make waini ikali make pa oeta make palaowa make widi make kao make sipisipi make hosi make hosi ma꞉na꞉ma꞉ yolaa pula꞉ da꞉ta꞉ka mendeke make e pa hameke pokaaseme haliweki make halina꞉ da꞉ta꞉la꞉eki kone ota꞉ ma꞉nda꞉ma꞉ ame do hamba꞉peke na ya꞉me. \v 14 Mo bisinisi haliwekima꞉ mo wanda꞉ pa꞉ta꞉ alota꞉ Naka꞉ ekie laa Naka꞉ hande wia hae epeke ale manuta꞉ alu pa꞉la꞉me. Kutupa naka꞉ hande hamoko hale alemanu make neke au le yole pa꞉la꞉ ale manuta꞉ paeyaota꞉ alu pa꞉la꞉me. Nakana꞉ma꞉ ota꞉ paa na handa꞉ wilipikie laa lelimikie. \p \v 15 Koto daoni pa꞉ta꞉ bisinisi pitolo hata꞉ hamoko haeme bisinisi haliwekita꞉ ota꞉ papate pua halimikie. Pa ekipeke mo wanda꞉na꞉ mina꞉la꞉ tanda putupa mea pekeyeke loa꞉me. Ikana꞉ma꞉ta꞉ e̱ alo make a꞉ta꞉ma꞉ homolota꞉ do lelimikie. \v 16 Mo aneke daoni hombeleketa꞉ a꞉pa꞉e ota꞉ paala꞉e. Ipikita꞉ hakepiki aka꞉ panka꞉ma꞉ make ta꞉ta꞉ ta꞉ta꞉ piki wepiki dauma꞉ make yama kutupa koloma꞉ wepiki beleke manuma꞉ make seliapo piki toopi manuma꞉ make sekete inkikima꞉ make dupao yama꞉tiki pu haya꞉me. \v 17 Pate nateleke homeke sikina꞉ kone do hamoko alemanu paeyao alu paeya꞉me. \p Mo dawalana꞉ sipi you haliweki make mo sipina꞉ pua꞉tiki pimi wanda꞉hali make mo sipina꞉ e poka꞉la꞉ haliweki make mo dawalana꞉ ane mone e pokeme wanda꞉hali paeyao make papate haememe. \v 18 Ikana꞉ma꞉ta꞉ mo wanda꞉ mea neliaya꞉ ti ulekena꞉ lumu handolo hata꞉ e̱ wi tieke alo hata꞉ alota꞉ Dupiki aneke daoni hombeleke ma꞉nda꞉ na haya꞉me lea꞉me. \v 19 Ika꞉ ambokenina꞉ dokolo mea lopaaso hata꞉ e̱ alo make a꞉ta꞉ma꞉ homolo hata꞉ alota꞉ A꞉pa꞉e. Ota꞉ paala꞉e. Mo koto aneke daoni ota꞉ paala꞉e. Ipikita꞉ ipika꞉ hamoko hala꞉ ekima꞉ mo dawalana꞉ pomina꞉la꞉ sipi teke haliwekita꞉ hamoko haememe. Kutupa nateleke homekena꞉ kone ipika꞉ ala꞉ta꞉ ala꞉ta꞉ paeyao alu paeya꞉me lememe. \p \v 20 Hepenio ta꞉na꞉ma꞉ homa꞉e. Pa ekipeke ipikita꞉ hoeyaala꞉ ekina꞉ loa꞉me. Koda꞉na꞉ wanda꞉hali make mo aposolo haliweki make potopede haliweki make ta꞉na꞉ma꞉ homa꞉pee. Pa ekipeke mo wanda꞉ma꞉ iki pa꞉ta꞉ pia꞉ ekina꞉ Koda꞉ma꞉ ipiki hoeyaala꞉me. \p \v 21 Kutupa wele wopu piki enisoloma꞉ mo ka꞉nda꞉ ota꞉ tieke piki toopi tieke mea oni dawala pa꞉ta꞉ yombu lopaaso hata꞉ alota꞉ Do hande aneke daoni Ba꞉bilonita꞉ dupa anekema꞉ mea lopa꞉niao ota꞉ pa na handolo pa꞉la꞉ tupa꞉e. \v 22 Mo kidama꞉ handeke alena꞉ e̱ make wanda꞉halina꞉ pi ho̱la̱꞉makemanu make mo soke lu haleme wanda꞉hali make mo bu kanake make neke tukiki pa꞉ta꞉ ota꞉ na opilimikie. Kutupa mo ane mone e pokeleme haliwekita꞉ neke pa꞉ta꞉ ota꞉ na halimikie. Kutupa mo palaowa yombita꞉la꞉ ka꞉nda꞉piki toopina꞉ e̱ make ota꞉ na opilimikie. \v 23 Lamepana꞉ pa̱a̱ta꞉ neke pa꞉ta꞉ ota꞉ na handilimikie. Kutupa mo halina꞉ da panake pula꞉ wanda꞉na꞉ make wanda꞉ panake mina꞉la꞉ halina꞉ pi ho̱la̱꞉make make ota꞉ na opilimikie. Naka꞉ bisinisi haliwekita꞉ kenke honiki paeyao lu tumbao honkopu wopu haeme make naka꞉ yayapiki ha̱i̱piki ti̱o̱ haumanu pi ekima꞉ta꞉ do kenke wanda꞉hali paeyao makeaememe laa lea꞉me. \p \v 24 Ba꞉biloni panisi peake hauta꞉ mo potopede haliweki make Koda꞉na꞉ wanda꞉halina꞉ weta꞉ mo daoni pa꞉ta꞉ wieke pia꞉me. Ota꞉e. Mo kenkena꞉ lia꞉ wanda꞉hali paeyaona꞉ we paeyao wia꞉me. \c 19 \p \v 1 Doeki hoki naneta꞉ oli hepeni nane wanda꞉hali tiekema꞉ leke nono pea alota꞉ Haleluya. (Nika꞉ pima꞉ta꞉ Koda꞉na꞉ biki miniliamana꞉e) Da꞉ta꞉mono yeke pa꞉ta꞉la꞉la꞉eki make pa̱a̱ peaasa꞉eki make wele tieke make nika꞉ Koda꞉ pa꞉ta꞉ ula꞉me. \v 2 Ipika꞉ pi yokaalu pita꞉la꞉eki manuta꞉ ota꞉eki make tikitiki pikieki makee. Ipikana꞉ma꞉ta꞉ mo hande hali yolo haya꞉ wanda꞉ ipika꞉ loke hoeyaasa꞉ hauma꞉ kenke paeyao hoeyaeyeke handaa ketete peleme laa ma̱leke liaata꞉ ipikita꞉ panisi peala꞉me. Pa ekipeke mo wanda꞉ma꞉ Koda꞉na꞉ e pokaeya꞉ wanda꞉hali lu homaeyeke handaa loa꞉me laa lememe. \p \v 3 Paa e̱ wi alo alota꞉ Haleluya. Mo hande aneke daoni mea neliaya꞉ lumuta꞉ honiki na wiki hoto paeyao pa a꞉meiyu hala꞉me lememe. \v 4 Mo hali tieke homekena꞉ tonkopu you haliweki make mo deto haleme tonkopu ale manuma꞉ make panda꞉puniao lopa mo kini seana꞉ pitia꞉ Koda꞉ pa꞉ta꞉ yeiya꞉ laaso hata꞉ yeni pimime. Ikana꞉ma꞉ alota꞉ Kutu pina꞉e. Haleluya lememe. \v 5 Kutupa mo kini sea pa꞉ta꞉ yama꞉ pi ho̱la̱꞉makema꞉ alota꞉ Koda꞉na꞉ e pokaaseme tapake make ipiki yeiya꞉ laaseme wanda꞉hali make iki paeyaoma꞉ nika꞉ Koda꞉na꞉ biki miniliapee. Mo aneke wanda꞉hali pa꞉ta꞉ make natehali wanda꞉halisunu pa꞉ta꞉ make loa꞉me lea꞉me. \s1 Mo Sipisipi Ma꞉na꞉ Ikikina꞉ ne pamba꞉la꞉eki \p \v 6 Kutupa e̱ ala꞉eki ma꞉nda꞉ta꞉ mo wanda꞉hali hombuta꞉ hombeleke hata꞉ make ikali dou lopolo make tutu tieke litolo make leke nono pia꞉eki dupa opua꞉me. Haleluya. Mo Tekehali nika꞉ Aneke Koda꞉ta꞉ kini hala꞉me. \v 7 Koto ekina꞉ niki paeyao ta꞉na꞉ma꞉ homomana꞉e. Ipika꞉ tieke hala꞉ ekina꞉ biki mea miniliamana꞉e. Pa ekipeke mo hande Sipisipi Ma꞉na꞉ Ikikina꞉ wanda꞉ mulu pa꞉la꞉ nateta꞉ opolo a꞉pa꞉la꞉me. Ipika꞉ panake wanda꞉ta꞉ mo ekina꞉ amba꞉ tikitiki yao hala꞉me. \v 8 Mo wanda꞉ta꞉ hake pea leke yale yale piki dau yamena꞉ hala꞉la꞉me laa lememe. Koto dauta꞉ Koda꞉na꞉ wanda꞉halina꞉ epeke hau piteleme ekie. \p \v 9 Kutupa mo enisoloma꞉ I̱ pa꞉ta꞉ alota꞉ Doeki laaniae. Mo Sipisipi Ma꞉na꞉ Ikikina꞉ wanda꞉ mina꞉la꞉ ekina꞉ ne pamba꞉la꞉ pa꞉ta꞉ epoa꞉ la꞉la꞉ wanda꞉halita꞉ ta꞉na꞉ma꞉ homa꞉pee. Kutupa mo enisoloma꞉ apa꞉taaso alota꞉ Dota꞉ Koda꞉na꞉ ota꞉ pimanue lea꞉me. \v 10 I̱ta꞉ ipiki yeiya꞉ lao yeni puluku alo ipika꞉ anke teke pa꞉ta꞉ panda꞉puniao lopoa꞉ pa꞉ta꞉ ipikana꞉ma꞉ I̱ pa꞉ta꞉ alota꞉ Ei I̱ pa꞉ta꞉ kotoeki na pia꞉pema. I̱ta꞉ e pokaaso naka꞉ yankekee. Kutupa make naka꞉ kamemanu mo Yesuma꞉ peneme yaeya꞉ ota꞉ pimanu miniki haleme wanda꞉halina꞉ yankeke halome. Koda꞉ pa꞉ta꞉ homeke yeiya꞉ laaso hata꞉ yeni pu hapeke laa lea꞉me. Pa ekipeke mo Yesuma꞉ peneme yaeya꞉ ota꞉ ekita꞉ mo potopede haliwekima꞉ alemeeki hone u tiaasa꞉ekie. \s1 Mo hakepiki hosi ma꞉na꞉na꞉ hokina꞉ pila꞉ hali \p \v 11 Kutupa oli hepeni lumba꞉pa wia mo hakepiki hosi ma꞉na꞉ handoa꞉me. Mo hosi hokina꞉ pitia꞉ halina꞉ bikita꞉ Kima꞉ na homeke hone tu laala꞉eki pita꞉ Ota꞉eki yaapoe lea꞉me. Ipikana꞉ma꞉ tikitiki piki hauma꞉ pi yokaalu pea make ipika꞉ a꞉nda꞉ ipula꞉eki a꞉nda꞉ pu hala꞉me. \v 12 Ipika꞉ leketa꞉ titipu pupapeke ti haleke ekima꞉ handaa ipika꞉ ambokena꞉ta꞉ kini you aka꞉ eleke eleke pambaeya꞉me. Biki ma꞉nda꞉ta꞉ mo somena꞉ laeya꞉pate koto bikita꞉ ma꞉nda꞉ma꞉ hone na ula꞉pate ipika꞉ homeke hone ula꞉me. \v 13 Ipika꞉ pambaeyeke aka꞉ hokuluta꞉ wema꞉ tote pia꞉me. Ipika꞉ bikita꞉ Koda꞉na꞉ Pie. \v 14 Mo hepenina꞉ ami manuma꞉ta꞉ ipiki telia꞉ mea pememe. Ikana꞉ma꞉ hakepiki hosi manda pita꞉ hakepiki aka꞉ yamememe. \v 15 Ipika꞉ kake pa꞉ta꞉ta꞉ do kenkena꞉ kapomani paeyaoma꞉ handeteke hala꞉ tapake lu bepolaena꞉ ne wopu hake bainasi opolu baeya꞉me. Ipikana꞉ma꞉ta꞉ mo ayeni dopitama꞉ iki handeteke hata꞉ mo Aneke Koda꞉ paala꞉ piki mineke panka꞉la꞉ waini dekepo hala꞉ pa꞉ta꞉ pa ula꞉ waini da꞉ka꞉pa꞉ tumba bepilieke. \v 16 Ipika꞉ aka꞉ hokuluna꞉ make ipika꞉ palekena꞉ maketa꞉ biki dupa laeya꞉me. Kini paeyaona꞉ kinie laa Tekehali paeyaona꞉ Tekehalie. \p \v 17 Kutupa mo natena꞉ tiao haya꞉ enisolo ma꞉nda꞉ handoa꞉me. Ipikana꞉ma꞉ mo ya tukikina꞉ a̱e̱ya̱ pomimi bamanu pa꞉ta꞉ anekema꞉ wi la꞉moneaaso alota꞉ Koda꞉na꞉ aneke yawe lita꞉la꞉eki pa꞉ta꞉ a꞉pa momba꞉la꞉pee laata꞉ \v 18 A꞉pa mo kini manuna꞉ make ami you haliwekina꞉ make ami titina꞉ loke make paeyao a꞉pa napee. Kutupa hosi ma꞉na꞉ manuna꞉ loke make hosi mea pomu haleme haliwekina꞉ loke make wanda꞉hali paeyao pa hameke e poka꞉la꞉ wanda꞉halina꞉ loke make pa haleme wanda꞉halina꞉ loke make natehali wanda꞉halina꞉ loke make aneke wanda꞉halina꞉ loke paeyao a꞉pa napee lea꞉me. \p \v 19 Kutupa mo hande sayale tieke hombeleke make do kenkena꞉ kinimanu make ika꞉ ami paeyaoma꞉ mo hande hosi hokina꞉ pitia꞉ hali pita꞉ ipika꞉ ami ame̱le̱ a꞉nda꞉ puluekema꞉ mombelememe. \v 20 Mo sayale make mo sayalena꞉ leke popelekena꞉ na handeke haumanu pia꞉ makeaaso potopede hali make dipula minimime. Koto pia꞉ na handeke hau manuma꞉ta꞉ ipikana꞉ma꞉ mo sayalena꞉ tombo ika꞉ wenokona꞉ wimi wanda꞉hali make mo manda꞉ meao wepimi sayale pa꞉ta꞉ yeiya꞉ laaso hata꞉ yeni pimi wanda꞉hali make makeaeya꞉me. Mo sayale tieke hombeleke pita꞉ mo makeaaso potopede hali yaapo pa pitiki oni titipupiki lanka꞉ ma꞉nda꞉ solopa tala꞉ ti uleke kiake pa꞉ta꞉ lopaememe. \v 21 Ika꞉ ami titita꞉ mo hosi ma꞉na꞉ hokina꞉ pitia꞉ halina꞉ kake pa꞉ta꞉ yama꞉ epea꞉ bainasima꞉ lu petepete pia꞉me. Kutupa mo ba manuma꞉ mo tokomanu naaka꞉na꞉ ika꞉ weleke ana꞉ pia꞉ka꞉na꞉ta꞉ mina꞉pa꞉lalimikie. \c 20 \s1 Bapimanu 1 daoseni \p \v 1 Kutupa enisolo ma꞉nda꞉ oli hepeni nanema꞉ hao holopolo ipulu ipika꞉ kiki pa꞉ta꞉ta꞉ mo honiki na wiki naku tieke kiakena꞉ pota꞉na꞉ ki make ka꞉nda꞉ tieke piki seni miniki epea꞉eki handoa꞉me. \v 2 Ipikana꞉ma꞉ta꞉ mo hande popake itiki hake sita꞉ hande ambisanake hao haya꞉ keto kotota꞉ hande Depolo o Sadani la꞉la꞉ aleta꞉ mina 1 daoseni bapi manuna꞉ senima꞉ tonkaeya꞉me. \v 3 Mo enisoloma꞉ta꞉ mo sita꞉ oni naku tieke kiake pa꞉ta꞉ yola꞉ mea loka꞉ hao a꞉mbo pambea꞉me. Pa ekipeke mo sima꞉ta꞉ do kenke paeyao haleme tapake ta꞉ta꞉ ta꞉ta꞉ makeaama꞉na꞉ mo 1 daoseni bapimanu paeya꞉ka꞉na꞉ opolu baena꞉yeke pia꞉me. Koto hoki naneta꞉ nateleke hosiki siki ka꞉la꞉pa꞉ tapaalieke. \p \v 4 Kutupa kini seamanu handoa꞉me. Koto seana꞉ pitimi haliwekita꞉ pi yokaalu pulu pimi wele halea꞉me. Kutupa make mo hande Yesuma꞉ peneme yaeya꞉ ota꞉eki waleme ekina꞉ make Koda꞉na꞉ pi waleme ekina꞉ limiki wanda꞉halina꞉ temokomanu handoa꞉me. Ikana꞉ma꞉ta꞉ mo hande sayale tieke hombeleke make ipiki manda꞉ meao wepimiki ale yaapo pa꞉ta꞉ panda꞉puniao yeiya꞉ laaso hata꞉ yeni na pimi make ika꞉ wenoko o popeke nane kikina꞉ mo sayalena꞉ maka na mimikime. Ikita꞉ paa da꞉ta hata꞉ 1 daoseni bapi manuna꞉ Ketiso ame̱le̱ kini pita꞉ handeteke haememe. \v 5 Do ekita꞉ ota꞉ titina꞉ homa꞉la꞉eki mea tiaasa꞉ekie. Mo mandane wopu homemeke wanda꞉hali paeyaota꞉ a̱i̱ na da꞉ta tiao haemepate mo 1 daoseni bapimanu hoki nane detena꞉ pia꞉me. \v 6 Mo mandane homeme wanda꞉halimanu do titina꞉ mea tiaasa꞉eki pa꞉ta꞉ apa꞉taemeka꞉na꞉ta꞉ ika꞉ta꞉ ta꞉na꞉ma꞉ homena꞉ laa yako pina꞉ lelieke. Mo yaapo peao homa꞉la꞉ ekima꞉ta꞉ iki wataapeketa꞉ honkopu na ula꞉me. Ikita꞉ Koda꞉ pita꞉ Ketiso yaapona꞉ yeni peaasa꞉ haliweki hata꞉ 1 daoseni bapimanu ipiki ame̱le̱ handeteke halimikie. \s1 Sadani bepolaasa꞉eki \p \v 7 Mo 1 daoseni bapimanu paeya꞉ka꞉na꞉ta꞉ mo Sadanita꞉ ipika꞉ dipula pila꞉eki ka꞉la꞉pa꞉ tapaalieke. \v 8 Ipikana꞉ma꞉ta꞉ mo kenke honiki honiki paeyao pa꞉ta꞉ hala꞉ tapake paeyao makealieke. Kotota꞉ Koko pita꞉ Meikoko leke tapakee. Sadanima꞉ta꞉ paeyao a꞉nda꞉na꞉ hatuku ipilieke. Mo tapaketa꞉ mo dawala hou manuma꞉ handilimikie. \v 9 Ikana꞉ma꞉ta꞉ kenke tieke tumbaaso hata꞉ Koda꞉na꞉ wanda꞉halina꞉ mombeleme alena꞉ make Koda꞉na꞉ pukima꞉ homa꞉la꞉ daoni make pua popei yaememe. Pate ti uleke oli hepeni nanema꞉ a꞉pa lopaa paeyao hoeyaeya꞉me. \v 10 Kutupa mo wanda꞉hali makeaeya꞉ Sadanita꞉ oni ti uleke kiake make titipupiki lanka꞉ ma꞉nda꞉ biki solopa pa꞉ta꞉ yola꞉ mea lopaeya꞉me. Kotota꞉ amba꞉ hande sayale tieke hombeleke make mo makeaaso potopede hali make lopala꞉ pa꞉ta꞉e. Kutupa ikita꞉ timba꞉ ala꞉eki make natepa yolao hoto paeyao puki tandama꞉ homo halimikie. \s1 Paeyaaso pi yokaalu pita꞉la꞉eki \p \v 11 Kutupa mo hakepiki kini sea tieke pita꞉ mo seana꞉ pila꞉ hali yaapo handoa꞉me. Kutupa mo kenke ya yaapota꞉ ipika꞉ leke popelekena꞉ na haena꞉ loluekema꞉ pa pindipa pualu pitolo hata꞉ alupaepeme. \v 12 Kutupa mo homemeke wanda꞉hali aneke make natehali make paeyao mandakena꞉ mo kini seana꞉ puki tikitiki haemeeki handoa꞉me. Buka manuta꞉ lumbia꞉me. Kutupa buka ma꞉nda꞉ta꞉ mo da꞉ta꞉la꞉ wanda꞉halina꞉ buka lumbia꞉me. Mo homemeke wanda꞉hali paeyaota꞉ mo buka manuna꞉ lao wieke tupa꞉ ika꞉ pimiki tupa꞉ siki kone ma̱leke lia telipia꞉me. \v 13 Kutupa mo dawalama꞉ ipiki pa꞉ta꞉ homemeke wanda꞉hali halea꞉me. Kutupa homa꞉la꞉ ekima꞉ make mo homo hala꞉ kenkema꞉ make ipilika꞉ wia haepe toko halepeme. Kutupa paeyaota꞉ ika꞉ pimiki tupa꞉ siki kone ana꞉na꞉ ma̱leke lia telipia꞉me. \v 14 Kutupa homa꞉la꞉eki pita꞉ homo hala꞉ kenke yaapota꞉ oni ti uleke pa꞉ta꞉ yola꞉ mea lopaeya꞉me. Do ti uleke kiaketa꞉ yaapo peao homa꞉la꞉ekie. \v 15 Kutupa make ma꞉nda꞉ epi ipika꞉ bikita꞉ mo da꞉ta꞉la꞉ wanda꞉halina꞉ bukana꞉ na laeya꞉ someta꞉ oni ti uleke kiake pa꞉ta꞉ yola꞉ mea lopaeya꞉me. \c 21 \s1 Panake hepeni pita꞉ panake kenke yaapo \p \v 1 Koto hoki naneta꞉ I̱ma꞉ panake hepeni pita꞉ panake kenke yaapo handoa꞉me. Titina꞉ hepeni pita꞉ kenke yaapota꞉ alupaeya꞉me. Kutupa mo dawala make loa꞉me. \v 2 Mo hande Yakopiki Daoni hande panake Diutuselemeta꞉ wanda꞉ma꞉ ipika꞉ haliki ma̱landi puluekema꞉ amu pea tikitiki yao ipulu pita꞉la꞉ tupa꞉ oli hepeni nanema꞉ Koda꞉ pa꞉ta꞉ yama꞉ opolo epea꞉eki handoa꞉me. \v 3 Oli kini sea nanema꞉ pi ho̱la̱꞉make tiekema꞉ dupa lea꞉eki opua꞉me. Ameta꞉ Koda꞉na꞉ data꞉ wanda꞉hali ame̱le̱ hala꞉me. Ipikita꞉ iki ame̱le̱ hata꞉ mo wanda꞉halita꞉ ipika꞉ wanda꞉hali au lalieke. Koda꞉ ipikita꞉ mo wanda꞉hali ame̱le̱ halieke. Ipikita꞉ ika꞉ Koda꞉ halieke. \v 4 Ipikana꞉ma꞉ta꞉ ika꞉ e̱ pankekemanu honialieke. Koto pa꞉ta꞉ta꞉ homa꞉la꞉eki pa na handilimikie. Kutupa puki tanda pitolo a꞉ta꞉ma꞉ homa꞉la꞉eki make e̱ ala꞉eki make tanda mina꞉la꞉eki make ota꞉ dia꞉ya꞉lieke. Mo amba꞉ haumanu paeyaota꞉ alu paeya꞉me laa lea꞉me. \p \v 5 Kutupa mo kini seana꞉ pitia꞉ halima꞉ alota꞉ Ameta꞉ I̱ma꞉ ala꞉ta꞉ ala꞉ta꞉ paeyao panakeeki wepitolome lea꞉me. Ipikana꞉ma꞉ I̱ pa꞉ta꞉ dupa alota꞉ Do ekita꞉ laaniae. Pa ekipeke do pi manuta꞉ ota꞉eki ya꞉la꞉ ekina꞉ make ota꞉ hone tu lapeke ya꞉la꞉ pie lea꞉me. \v 6 Kutupa ombu alota꞉ Ameta꞉ pu paela꞉me. I̱ta꞉ titina꞉ make sale nane makee. Kini pitolo make paeyaaso makee. Ma꞉nda꞉ epita꞉ ikali na꞉na꞉ma꞉ homea꞉ka꞉na꞉ta꞉ I̱ma꞉ mo opa꞉la꞉ da꞉taasa꞉ ikalita꞉ na hambeke pa nena꞉ waleke halueke. \v 7 Ma꞉nda꞉ epima꞉ a꞉nda꞉ peaa bepolaasa꞉ hali haya꞉ka꞉na꞉ta꞉ I̱ pa꞉ta꞉ doeki mina꞉e. I̱ta꞉ ipika꞉ Koda꞉ halueke. Kutupa ipikita꞉ yaka weki au lalueke. \v 8 Pate hone pamboneke tapake make ba꞉sa꞉ piteleme tapake make ata꞉ka꞉ peaaseme tapake make honema꞉ kone hali lu homaaseme tapake make pake nalo loke apa꞉taaseme tapake make ti̱o̱ hau pu haleme tapake make toopi ti wepia ula꞉ ale pa꞉ta꞉ yeni pu haleme tapake make mo yayapiki pi lo haleme tapake make paeyaota꞉ ika꞉ hala꞉peke ya꞉la꞉ ekita꞉ oni ti uleke kiake make titipupiki lanka꞉ ma꞉nda꞉ biki solopa bu lo hala꞉ pa꞉ta꞉e. Koto hau pita꞉la꞉ ekita꞉ mo yaapo peao homa꞉la꞉ekie. \s1 Panake Diutuseleme \p \v 9 Mo hande paeyaaso watake hata꞉ ke handa꞉la꞉eki manuma꞉ tumbulu baake kawaso miniki haeme hande watake hata꞉ enisolo homekema꞉ I̱ pa꞉ta꞉ a꞉pa alota꞉ I̱ma꞉ mo hande Sipisipi Ma꞉na꞉ Ikikina꞉ ma꞉la꞉ wanda꞉ walono epoe lea꞉me. \v 10 Mo Sipitidima꞉ I̱ tukiki pa꞉ta꞉ e pokolo hata꞉ mo enisoloma꞉ I̱ta꞉ ota꞉ oli pote tieke tumikina꞉ mea tia pea꞉me. Ipikana꞉ma꞉ mo panake Diutuseleme hande yakopiki daoni oli hepeni nane Koda꞉ pa꞉ta꞉ yama꞉ hao holopolo epea꞉eki I̱ pa꞉ta꞉ walea꞉me. \v 11 Mo daonita꞉ Koda꞉na꞉ pa̱a̱ piti pa̱a̱ putia ipulu hata꞉ dia꞉sepa leke toopi seliapoma꞉ handa ala꞉ta꞉ ma꞉nda꞉ na ta̱leke kalasima꞉ handeekeme. \v 12 Mo daonita꞉ hokulupiki pape tiekema꞉ popei yao pota꞉ kaketa꞉ paeyao kiki yaapona꞉ ankena꞉ yaapo lombaya꞉me. Mo pota꞉ kake yalaota꞉ kiki yaapona꞉ ankena꞉ yaapo enisoloma꞉ handeteke haememe. Mo pota꞉ kake manuna꞉ yalaota꞉ mo Isulai wanda꞉halina꞉ kiki yaapona꞉ ankena꞉ yaapo tapakena꞉ biki laeya꞉me. \v 13 Mo nepokomanu yalaota꞉ pota꞉kake tepo lo lombaya꞉me. Nate opa꞉la꞉ naneta꞉ pota꞉ kake tepo lombaya꞉me. Nepoko yaapo nane make pota꞉ kake tepo tepo lo lombaya꞉me. Oni nate pamba꞉la꞉ nane make pota꞉ kake tepo lombaya꞉me. \v 14 Mo daonina꞉ papeta꞉ kiki yaapona꞉ ankena꞉ yaapo pinki nonopiki toopi oto tiekena꞉ noko peekeme. Koto toopi manuna꞉ta꞉ mo Sipisipi Ma꞉na꞉ Ikikina꞉ aposolo hali kiki yaapona꞉ ankena꞉ yaapona꞉ biki laeya꞉me. \p \v 15 Mo I̱ pa꞉ta꞉ pi la kia꞉ enisolota꞉ mo daoni make ipika꞉ pota꞉ kakemanu make ipika꞉ pape pa꞉la꞉eki make paeyao tombo muluekema꞉ mo koloma꞉ wepiki tombo mina꞉la꞉ tolo miniki haya꞉me. \v 16 Mo daonina꞉ petipeke maka make mo hokulu maka make ota꞉ homeke make pa꞉la꞉me. Mo enisoloma꞉ ipika꞉ tombo mina꞉la꞉ doloma꞉ mo daonina꞉ tombo mia꞉me. Mo daonita꞉ 2 daosenina꞉ 400 kilomida ota꞉ hokulu pea make petipeke ya꞉la꞉eki make olina꞉ hokulu pa꞉la꞉eki make homeke hau kone piekeme. \v 17 Kutupa mo enisoloma꞉ ombu mo daonina꞉ pape polopala꞉eki tombo mia꞉pate ota꞉ 60 mida mia꞉me. Mo tombo mina꞉la꞉ alena꞉ hokulu piki ekita꞉ ota꞉ ana꞉na꞉ kone tombo mia꞉me. \p \v 18 Mo papeta꞉ dia꞉sepa leke toopima꞉ wepiekeme. Kutupa mo daonita꞉ koloma꞉ handa ala꞉ta꞉ ma꞉nda꞉ na ta̱leke kalasima꞉ handea꞉me. \v 19 Mo daonina꞉ papena꞉ pinki toopi manuna꞉ta꞉ ane mone seliapopiki toopi manuma꞉ popei yao ota꞉ lu liaeyekeme. Titina꞉ toopi pinkita꞉ biki dia꞉sepa yekeme. Yaapo peao toopi pinkina꞉ bikita꞉ sa꞉paeya yekeme. Tepo peao ekina꞉ bikita꞉ a꞉keidi yekeme. Tonko peao ekita꞉ ambuma꞉ handeke au leke toopi biki emulolidi yekeme. \v 20 Yunki peao ekina꞉ bikita꞉ onkisi yekeme. Yunki mindiki hata꞉ peao ekina꞉ bikita꞉ kaniliani yekeme. Watake hata꞉ peao ekita꞉ hamipiki toopi biki kotisalaedi yekeme. Ketepo peao ekina꞉ bikita꞉ betili yekeme. No̱i̱ peao ekina꞉ bikita꞉ topa꞉si yekeme. Kiki yaapo peao ekina꞉ bikita꞉ kotisapoteisi yekeme. Kiki yaapona꞉ ankena꞉ homeke peao ekina꞉ bikita꞉ dieisini yekeme. Kiki yaapona꞉ ankena꞉ yaapo peao ekina꞉ bikita꞉ a꞉metisi yekeme. \v 21 Mo kiki yaapona꞉ ankena꞉ yaapo pota꞉ kake manuta꞉ kiki yaapona꞉ ankena꞉ yaapo sekete hapekemanu yekeme. Mo pota꞉ kake manuna꞉ yalaota꞉ mo sekete hapekema꞉ wepuma꞉ wepuma꞉ piekeme. Mo daonina꞉ pota꞉ta꞉ aleta꞉ ma꞉nda꞉ na taleke kalasima꞉ handeke koloma꞉ pilaeyekeme. \p \v 22 I̱ma꞉ta꞉ mo daoni pa꞉ta꞉ta꞉ tembolo da na handoa꞉me. Pa ekipeke mo Aneke Tekehali Koda꞉ pita꞉ mo hande Sipisipi Ma꞉na꞉ Ikiki yaapota꞉ mo tembolo da yekeme. \v 23 Mo daonina꞉ta꞉ nate o kaisepo ma꞉nda꞉ pa̱a̱ pealuekema꞉ opa꞉peke na ya꞉me. Pa ekipeke mo Koda꞉na꞉ au la꞉la꞉ pa̱a̱ta꞉ koto pa꞉ta꞉ pa̱a̱ pu hala꞉me. Kutupa mo daonina꞉ ola꞉paketa꞉ mo Sipisipi Ma꞉na꞉ Ikiki ya꞉me. \v 24 Koto kenke wanda꞉halita꞉ mo daonina꞉ pa̱a̱na꞉ pomilimikie. Kutupa mo kenkena꞉ kini manuma꞉ta꞉ ika꞉ hamoko ale manuta꞉ ipiki pa꞉ta꞉ mea ipilimikie. \v 25 Mo daonina꞉ pota꞉ kake manuta꞉ nate paeyao pa lomba꞉pa wilieke. Ota꞉ na pokilieke. Pa ekipeke koto pa꞉ta꞉ta꞉ timba꞉ ala꞉eki ota꞉ dia꞉ya꞉lieke. \v 26 Mo kenkena꞉ aneke make hamoko ale paeyaota꞉ mo daoni pa꞉ta꞉ mea ipilimikie. \v 27 Pate mo ha̱i̱ piki ala꞉ta꞉ ma꞉nda꞉ koto daoni pa꞉ta꞉ na honda꞉ pambilieke. Koto tupa꞉ kone ma꞉nda꞉ epima꞉ yaala꞉piki haumanu pu o yayapiki pi lo hala꞉ some make na honda꞉ pambilieke. Mo Sipisipi Ma꞉na꞉ Ikiki ipika꞉ da꞉ta꞉la꞉ tapakena꞉ biki ula꞉ bukana꞉ biki laala꞉ wanda꞉hali homeke koto daoni pa꞉ta꞉ honda꞉ pambilimikie. \c 22 \s1 Da꞉ta꞉la꞉eki kita꞉la꞉ ikali pita꞉ ti yaapo \p \v 1 Mo enisoloma꞉ta꞉ ala꞉ta꞉ ma꞉nda꞉ na ta̱leke kalasima꞉ handeke da꞉ta꞉la꞉eki kita꞉la꞉ ikali yopulu hala꞉ I̱ pa꞉ta꞉ walea꞉me. Mo ikalita꞉ oli Koda꞉ pita꞉ Sipisipi Ma꞉na꞉ Ikiki yaapona꞉ kini sea pa꞉ta꞉ yama꞉ epea꞉me. \v 2 Kutupa mo ikalita꞉ mo daonina꞉ pota꞉ tukikina꞉ yapea꞉me. Mo ikali tea꞉ yaapona꞉ta꞉ hande da꞉ta꞉la꞉eki kita꞉la꞉ ti opo hala꞉me. Mo tima꞉ta꞉ bapi homekena꞉ta꞉ sumba꞉ homeke homeke yalao kiliki a꞉eya꞉tiki pu hala꞉me. Kutupa ipika꞉ katake manuta꞉ mo tapake ta꞉ta꞉ ta꞉ta꞉ paeyaona꞉ epeaasa꞉ekie. \v 3 Mo Koda꞉ma꞉ta꞉ hoeyaena꞉ laa ma̱leke lia ula꞉ ale ma꞉nda꞉ta꞉ koto daoni pa꞉ta꞉ ota꞉ na wilieke. \p Mo Koda꞉ pita꞉ mo Sipisipi Ma꞉na꞉ Ikiki yaapona꞉ kini seata꞉ koto daoni pa꞉ta꞉ wilieke. Kutupa ipika꞉ e pokaaseme wanda꞉halita꞉ ipiki pa꞉ta꞉ panda꞉puniao yeiya꞉ laaso hata꞉ yeni pu halimikie. \v 4 Ikana꞉ma꞉ta꞉ ipika꞉ leke popeleke handaa make ipika꞉ bikita꞉ ika꞉ wenokonina꞉ laalimikie. \v 5 Koto pa꞉ta꞉ta꞉ timba꞉ ala꞉eki ota꞉ dia꞉yalo hata꞉ ola꞉pake make natena꞉ pa̱a̱ make na weilimikie. Pa ekipeke mo Tekehali Koda꞉ta꞉ ika꞉ pa̱a̱ halieke. Kutupa ikana꞉ma꞉ta꞉ kinimanu pita꞉ hoto paeyao handeteke hao halimikie. \s1 Yesuna꞉ epolo pa꞉la꞉eki \p \v 6 Kutupa mo enisoloma꞉ I̱ pa꞉ta꞉ alota꞉ Do pi manuta꞉ ota꞉eki ya꞉la꞉ ekina꞉ hone tu lapeke ya꞉la꞉me. Kutupa hande potopede haliweki pa꞉ta꞉ Sipitidi halo pa꞉la꞉ Tekehali Koda꞉ma꞉ mo ipika꞉ e pokaaseme haliweki pa꞉ta꞉ ame do koto kone pulu pa꞉la꞉ ekimanu walena꞉yeke ipika꞉ enisolo tapaala꞉me lea꞉me. \v 7 Yesuma꞉ alota꞉ Opie. I̱ta꞉ teke pa꞉ta꞉ ipulume. Do buka pa꞉ta꞉ ula꞉ wetepena꞉ pulu pa꞉la꞉ pimanu pa꞉ta꞉ opua pu haleme wanda꞉halita꞉ ta꞉na꞉ma꞉ homilimikie. \p \v 8 I̱ Dionima꞉ do hau paeyao handaa make opua꞉me. Kutupa do haumanu handa make opu paeyaota꞉ I̱ta꞉ do haumanu walea꞉ enisolona꞉ anketeke pa꞉ta꞉ lopa ipiki pa꞉ta꞉ panda꞉puniao yeiya꞉ laaluekema꞉ pitua꞉pate \v 9 ipikana꞉ma꞉ I̱ pa꞉ta꞉ alota꞉ Kotoeki na pia꞉pema laata꞉ I̱ta꞉ e pokaaso naka꞉ yankekee. Kutupa make mo hande naka꞉ potopede kame manuna꞉ make do bukana꞉ ula꞉ wapena꞉ opua pita꞉la꞉ wanda꞉hali paeyaona꞉ yankeke kone halome. Koda꞉ pa꞉ta꞉ homeke yeiya꞉ laaso hata꞉ yeni pu hapeke laa lea꞉me. \v 10 Kutupa I̱ pa꞉ta꞉ ombu alota꞉ Do bukana꞉ la꞉ ula꞉ wetepena꞉ pulu pa꞉la꞉ pi manuta꞉ na a꞉mbao wia꞉peke. Pa ekipeke do haumanu paeyaona꞉ pulu pa꞉la꞉ nateta꞉ teke pa꞉ta꞉ ya꞉la꞉me. \v 11 Epi a꞉nda꞉ hoke temoko haeka꞉na꞉ta꞉ kota꞉ ota꞉ hoke hau homeke pa pu hapeke. Epi a꞉nda꞉ ha̱i̱piki some pu haeka꞉na꞉ta꞉ kota꞉ ota꞉ ha̱i̱piki hau homeke pa pu hapeke. Epi a꞉nda꞉ epeke some haeka꞉na꞉ta꞉ kota꞉ ota꞉ epeke hau homeke pa pu hapeke. Kutupa epi a꞉nda꞉ yakopiki some haeka꞉na꞉ta꞉ kota꞉ ota꞉ yako piki hau homeke pa pu hapeke. \p \v 12 Yesuma꞉ alota꞉ Opie. I̱ta꞉ teke pa꞉ta꞉ ipulu hata꞉ ika꞉ yenkita꞉ ika꞉ homeke homeke peleme tupa꞉ kone ana꞉na꞉ haluekema꞉ I̱ma꞉ mo halo polo alemanu mea ipulume. \v 13 I̱ta꞉ titina꞉ make sale nane makee. Kini pitolo make paeyaaso makee laa lea꞉me. \p \v 14 Epi amedama꞉ ika꞉ aka꞉manu tanda꞉pa hake peaemeka꞉na꞉ta꞉ ta꞉na꞉ma꞉ homena꞉e. Ikita꞉ mo hande da꞉ta꞉la꞉eki hala꞉la꞉ tina꞉ kiliki nena꞉ make mo daonina꞉ pota꞉ kake pa꞉ta꞉ yama꞉ pena꞉ make waleke halieke. \v 15 Pate mo ata꞉ka꞉ peaaseme tapake make ti̱o̱ hau pu haleme tapake make pake nalo loke apa꞉taaseme tapake make honema꞉ kone hali lu homaaseme tapake make toopi ti wepia꞉ ula꞉ ale pa꞉ta꞉ yeni hau pu haleme tapake make yayapiki ekina꞉ ta꞉na꞉ma꞉ homa pu haleme tapake make paeyao sikita꞉ mo daoni tea꞉na꞉ hama꞉ nane halememe. \v 16 I̱ta꞉ Yesuma꞉ do hau manuta꞉ iki siosimanu haleme wanda꞉hali pa꞉ta꞉ lawaena꞉ yaka enisolo tapaalome. Deipidita꞉ yaka apa꞉mei halie. I̱ta꞉ mo hande da ka꞉la꞉paaso opa꞉la꞉ pa̱a̱ tieke piki hombulanka꞉e laa lea꞉me. \p \v 17 Mo Sipitidi pita꞉ mo hali panake pula꞉ wanda꞉ yaapoma꞉ alota꞉ Epoe ala꞉me. Do pi opilimi tapake paeyaoma꞉ make Epoe lapa꞉peke ya꞉lieke. Ikali na꞉na꞉ma꞉ homele some epita꞉ do da꞉taapeke ya꞉la꞉ ikalita꞉ pa hameke kita꞉la꞉ekie laa mea꞉peke ya꞉la꞉me. Dota꞉ ma꞉nda꞉ epi hone pa꞉la꞉ somena꞉ loa꞉me lea꞉me. \p \v 18 I̱ta꞉ Dionima꞉ do la꞉ ula꞉ wetepena꞉ pulu pa꞉la꞉ pimanu opiteleme wanda꞉hali pa꞉ta꞉ kinki pita꞉la꞉ pi dupa alome. Ma꞉nda꞉ epima꞉ do pimanu pa꞉ta꞉ pi ma꞉nda꞉ apa꞉taeya꞉ka꞉na꞉ta꞉ kota꞉ Koda꞉ma꞉ koto some ipika꞉ panisi pa꞉ta꞉ta꞉ do bukana꞉ la꞉la꞉ kemanu handa꞉pekeeki apa꞉taalieke. \v 19 Kutupa ma꞉nda꞉ epima꞉ do bukana꞉ ula꞉ wetepena꞉ pulu pa꞉la꞉ pimanu ma꞉nda꞉ mea baeya꞉ka꞉na꞉ta꞉ kota꞉ koto some ipika꞉ mo da꞉ta꞉la꞉eki hala꞉peke ya꞉la꞉ tina꞉ kiliki mulupa꞉la꞉ yenkina꞉ putupilikita꞉ pao mea make mo hande yakopiki daoni pua hapeke ya꞉la꞉eki make Koda꞉ma꞉ pao milieke. Do bukana꞉ la꞉la꞉ ekina꞉ loa꞉me. \p \v 20 Do wape pa꞉la꞉ pi manuta꞉ ota꞉ pie laa la꞉ wita꞉la꞉ somema꞉ alota꞉ Aowe. Ota꞉ a꞉pa꞉la꞉me. I̱ta꞉ teke pa꞉ta꞉ ipulume lea꞉me. Koto ekina꞉ta꞉ kutu pia꞉peke. Tekehali Yesuo. Epoe. \p \v 21 Tekehali Yesuna꞉ a꞉ta꞉ma꞉ homolo tamba꞉ mina꞉la꞉ ekita꞉ iki paeyao pa꞉ta꞉ wina꞉e.