\id PHP - Sembeleke Samberigi PNG Philippians 01 14/2/91 Macnaughtan \h PILIPAI \toc1 Poloma꞉ Pilipai Siosi pa꞉ta꞉ tapaeyeke wapee \toc2 Pilipai \toc3 Pilipai \mt1 Poloma꞉ Pilipai Siosi pa꞉ta꞉ tapaeyeke wapee \c 1 \p \v 1 I̱ Polo make Timodi dikana꞉ma꞉ Yesu Ketisona꞉ e pokaaso hata꞉ mo Pilipai nane haleme Koda꞉na꞉ wanda꞉hali ika꞉ siosi you haliweki pa꞉ta꞉ make ika꞉ dikoni haliweki pa꞉ta꞉ make iki Yesu Ketiso pa꞉ta꞉ haleme wanda꞉hali paeyao pa꞉ta꞉ do wape pea tapaasopa꞉me. \v 2 Nika꞉ Apa꞉ Koda꞉ pita꞉ nika꞉ Tekehali Yesu Ketiso yaapoma꞉ iki pa꞉ta꞉ mo a꞉ta꞉ma꞉ homa tamba꞉ mina꞉la꞉eki make mo puki lopa꞉niaasa꞉eki make kina꞉e. \s1 Poloma꞉ yeni peaeyekeeki \p \v 3 Iki hone u moneaaso pita꞉ma꞉ paeyaota꞉ I̱ma꞉ Koda꞉ pa꞉ta꞉ ikina꞉ keiyae pi la꞉tiki pu halome. \v 4 Kutupa ikina꞉ Koda꞉ pa꞉ta꞉ I̱ma꞉ yeni peaaso pita꞉ma꞉ta꞉ ta꞉na꞉ pita꞉ hata꞉ peatiki pu halome. \v 5 Pa ekipeke mo amba꞉ hande titi panake pa꞉ta꞉ kone kini pea a꞉pa ame do natena꞉ I̱ma꞉ mo Koda꞉na꞉ Pi Seliapo walono ikana꞉ma꞉ I̱ tamba꞉ mimi hau manuna꞉ hone witolo hata꞉ loa꞉me. \v 6 Koto ekina꞉ Koda꞉ma꞉ iki pa꞉ta꞉ kini pia꞉ eta꞉ Yesu Ketiso ipilie natena꞉ poko paeyaaluekema꞉ ota꞉ pa pokolo ombu halieke hone ulume. Koto pa꞉la꞉ ekina꞉ta꞉ ya pukima꞉ iki pa꞉ta꞉ ta꞉na꞉ma꞉ homolo hata꞉ iki hone u halome. \v 7 Koto ta꞉na꞉ma꞉ homolo ekita꞉ ota꞉ a꞉pa꞉la꞉me. Do Koda꞉ma꞉ ka꞉leke pokolo e seliapota꞉ iki ame̱le̱ mandakena꞉ apa꞉tao pokoloma꞉me. Ame do I̱ dipula pilu pita꞉ma꞉ make amba꞉ pa pomu haowa꞉ pita꞉ma꞉ make I̱ma꞉ mo Koda꞉na꞉ Pi Seliapota꞉ honkopu haena꞉ loluekema꞉ ya pima꞉ a꞉nda꞉ litolo hombo peao halo ekita꞉ iki ame̱le̱ apa꞉tao hata꞉ pu haloma꞉me. \v 8 Yesuma꞉ wanda꞉hali pa꞉ta꞉ pukima꞉ homa꞉la꞉ tupa꞉ kone iki pa꞉ta꞉ I̱ma꞉ make mandake tupa꞉ pukima꞉ homolo hata꞉ iki ame̱le̱ a꞉pa haowee hone u halome. I̱ma꞉ do alo pita꞉ ota꞉ pi aloeki Koda꞉ma꞉ handa꞉la꞉me. \p \v 9-10 I̱ma꞉ iki pa꞉ta꞉ dupiki yeni peao halome. Mo yeni peao halo ekita꞉ ikana꞉ma꞉ ota꞉ epeke titina꞉ hau ma̱leke lia꞉peke ya꞉la꞉ ika꞉ pukima꞉ homa꞉la꞉eki make ika꞉ ota꞉eki homeke hone wita꞉la꞉eki make ika꞉ honema꞉ teli pita꞉la꞉eki make mandakena꞉ daeyolo daeyolo ombu haena꞉ I̱ma꞉ do yeni peaasome. Koto haumanu iki tukiki pa꞉ta꞉ daeya꞉ka꞉na꞉ta꞉ mo Ketiso ipilie natena꞉ ikita꞉ haumanu na pu hoeyao aleta꞉ na piki wanda꞉hali halimikie. \v 11 Kutu pilie ekima꞉ta꞉ ika꞉ halemeeki tukiki pa꞉ta꞉ta꞉ mo Yesu Ketiso homekema꞉ puemena꞉ lapeke ya꞉la꞉ hau manuma꞉ iki tukiki pa꞉ta꞉ tumbaalieke. Iki tumbaeya꞉ka꞉na꞉ta꞉ kota꞉ koto hauma꞉ta꞉ Koda꞉na꞉ pi lao yeiya꞉ laalieke. \s1 Mo Polona꞉ dipula pitieke ekima꞉ta꞉ Koda꞉na꞉ Pi Seliapo kende tupa꞉ wina꞉ leekeeki \p \v 12 Ya Ketiso yankeke tonuo I̱ma꞉ ya hone pa꞉la꞉ ekita꞉ iki paeyaoma꞉ mo hande I̱ pa꞉ta꞉ a꞉pa pia꞉ ekimanu hone uemena꞉e. Koto hande hau manuma꞉ta꞉ mo Koda꞉na꞉ Pi Seliapo sa꞉sa꞉ na pita꞉la꞉pate ota꞉ kende tupa꞉ wina꞉ ala꞉me. \v 13 Koto ekima꞉ta꞉ mo hande Sisana꞉ da handeteke haleme a꞉ndeli miniki haliweki paeyaoma꞉ make pa do haleme wanda꞉halima꞉ make I̱ma꞉ Ketisona꞉ e pokaaso hali halo ekina꞉ dipula mea pitalemeke handelememe. \v 14 Koto mo Ketiso yankeke tonu anekema꞉ta꞉ mo Tekehali hone wotu tulaena꞉ ya dipula pilu ekima꞉ta꞉ iki wele peaala꞉me. Koto ekima꞉ta꞉ ikana꞉ma꞉ hoto paeyao paala꞉ma꞉ na homeke pipita꞉ pa pua hata꞉ pi wala꞉tiki pu halememe. \p \v 15 Koto pa꞉la꞉pate mo mandane ape ape lo haleme haliwekima꞉ta꞉ I̱ pa꞉ta꞉ honditi pitolo hata꞉ Ketisona꞉ pi walo halememe. Pateta꞉ pa mo mandane haliweki ma꞉nda꞉ma꞉ta꞉ epeke hone witolo hata꞉ walo halememe. \v 16 Ame do loa꞉ haliwekima꞉ta꞉ mo Pi Seliapota꞉ honkopu haena꞉ loluekema꞉ mo pima꞉ a꞉nda꞉ litolo hombo peao hala꞉ hauta꞉ Koda꞉ma꞉ I̱ pa꞉ta꞉ ka꞉la꞉me hone wilimime. Koto ekina꞉ I̱ pa꞉ta꞉ pukima꞉ homolo hata꞉ mo pi walo halememe. \v 17 Mo hande amba꞉ titina꞉ loa꞉ haliwekima꞉ta꞉ Ketisona꞉ bikina꞉ epeke hone na wiki pa ika꞉ biki homeke daeyaluekema꞉ yeke pi walo halememe. Ika꞉ honema꞉ta꞉ I̱ma꞉ do dipula pita꞉ ka꞉nda꞉ mandaneeki mina꞉e laa pi walo halememe. \v 18 Koto pa꞉la꞉pateta꞉ Ketisona꞉ pita꞉ pia꞉peke ya꞉la꞉ pota꞉ ula꞉ tupa꞉ waleme ekina꞉ta꞉ I̱ma꞉ ta꞉na꞉ma꞉ homolome. Epeke hone witolo pia꞉ka꞉na꞉ make o epeke hone na witolo pia꞉ka꞉na꞉ make a꞉pa꞉la꞉me. Pina꞉e. Kutupa I̱ma꞉ ta꞉na꞉ma꞉ homolo ombu halueke. \s1 Pa ekia꞉nda꞉ epea꞉ka꞉na꞉ta꞉ Ketisona꞉ e poka꞉peke ekina꞉ waleke wilieke \p \v 19 Pa ekipeke mo ikana꞉ma꞉ yeni peao halemeke mo Yesu Ketisona꞉ temokoma꞉ I̱ tamba꞉ mina꞉la꞉ ekina꞉ make I̱ta꞉ dipula da mina꞉pa꞉lao pomu halueke hone ulume. \v 20 Ya peawee laa hone tieke pa꞉la꞉ ekita꞉ mo I̱ma꞉ pokono Koda꞉ma꞉ ka꞉la꞉ eta꞉ ota꞉ na mina꞉pa꞉laake nate paeyao make ota꞉ ame do dipula pilu pita꞉ make ota꞉ pipita꞉ pa pua hapeke yelieke la alome. Kutaata꞉ I̱ homoa꞉ka꞉na꞉ make o pa hao haoa꞉ka꞉na꞉ make ya halo hau paeyaoma꞉ mo Ketiso yeiya꞉ lao halueke. \v 21 Pa hao haoa꞉ka꞉na꞉ta꞉ Ketisona꞉ e pokaapeke ekina꞉ waleke wiliepate homono lemeka꞉na꞉ta꞉ pa mo haka꞉ta꞉pao wiala꞉eki mulueke. \v 22 Koto pa꞉la꞉pate pa ya hao halue ekima꞉ta꞉ mo epeke e mandaneeki pia꞉peke ya꞉ka꞉na꞉ta꞉ kota꞉ I̱ma꞉ta꞉ handoeki ma̱leke lua꞉pe mone mata꞉la꞉me. \v 23 Ale yaapoma꞉ yola꞉ alu pita꞉la꞉me. Do kenkena꞉ haloeki mina꞉pa꞉lao Ketiso yaapo pua hapeketa꞉ hone wotu pa꞉la꞉me. Kutupa make do polueke alo ekita꞉ I̱ pa꞉ta꞉ta꞉ ota꞉ epekeeki ya꞉la꞉pate \v 24 I̱ma꞉ iki tamba꞉ muluekema꞉ pa hao halo ekita꞉ ota꞉ tumiki haue. \v 25 I̱ma꞉ ota꞉ koto hone witolo hata꞉ pa hao halueke hone witolome. Ika꞉ Koda꞉ pa꞉ta꞉ ta꞉na꞉ma꞉ homo hone tulaalemeeki daeyao honkopu hao hamena꞉ tamba꞉ muluekema꞉ I̱ta꞉ iki ame̱le̱ paa halueke. \v 26 Koto ekina꞉ I̱ mo iki ame̱le̱ a꞉pa haluma꞉ ekima꞉ta꞉ ikana꞉ma꞉ Ketisona꞉ biki yeiya꞉ laasemeeki daeyaena꞉ lelieke. \s1 A꞉nda꞉ tunkuliki wanda꞉hali pa꞉ta꞉ paala꞉ma꞉ na homa꞉pa꞉pekeeki \p \v 27 Ketisona꞉ Pi Seliapoma꞉ puemena꞉ wala꞉la꞉ tupa꞉ pu haleme hauta꞉ ota꞉ tumiki haue. Kutu pilimipate I̱ epoa꞉ka꞉na꞉ make o pa ika꞉ pilimi hauna꞉ pi lalimieki opua꞉ka꞉na꞉ make kota꞉ ikita꞉ taka꞉lao haemeka꞉ta꞉me hone ulueke. Kutupa mo wanda꞉halima꞉ Ketisona꞉ Pi Seliapo pa꞉ta꞉ hone tulaena꞉ ikana꞉ma꞉ ota꞉ homeke hone wia hata꞉ tamba꞉ mualualu pu haemeka꞉ta꞉me hone ulueke. \v 28 Ikana꞉ma꞉ ika꞉ a꞉nda꞉ tunkuliki wanda꞉halita꞉ paala꞉ma꞉ na homeke hoto paeyao aela꞉ bao hapa꞉peke. Ika꞉ aela꞉ baalo peleme ekita꞉ mo a꞉nda꞉ tunkuliki wanda꞉hali pa꞉ta꞉ pate hauma꞉ wala꞉la꞉eki yelieke. Koto pate hau handolota꞉ ikana꞉ma꞉ mo iki Ketiso wanda꞉halima꞉ iki ota꞉ bepolaalimikie hone wilimikie. Koda꞉ma꞉ ka꞉la꞉ wele homekema꞉ bepolao halimikie. \v 29 Ikana꞉ma꞉ Ketisona꞉ e pokawamena꞉ yeke Koda꞉ma꞉ iki pa꞉ta꞉ epeke waleke ka꞉la꞉me. Do e pokawaluekema꞉ pa ika꞉ hone tulaaso ombu halo peleme ekima꞉ dia꞉ ya꞉la꞉pate pa Ketiso ipika꞉ hauna꞉ ka꞉nda꞉ make meawaso ombu halimi ekima꞉ tonka꞉na꞉ ipika꞉ e pokalimikie. \v 30 Ameta꞉ ikana꞉ma꞉ I̱ ame̱le̱ mandakena꞉ ta꞉ma꞉ni pea mo a꞉nda꞉ lita꞉la꞉ ekina꞉ tunao hapa꞉peke ya꞉la꞉me. Mo amba꞉ hande pueke handeme a꞉nda꞉ kone alome. Kutupa ikana꞉ma꞉ ame mo opiteleme a꞉nda꞉ta꞉ koto mandake a꞉nda꞉ kone pa pu halome. \c 2 \s1 Homu pu alualu pia꞉pekeeki \p \v 1 Ika꞉ Ketiso pa꞉ta꞉ haleme ekita꞉ iki honkopu hamena꞉ la꞉la꞉pe o ipika꞉ pukima꞉ homa꞉la꞉ ekima꞉ta꞉ ika꞉ hone bamena꞉ la꞉la꞉pe o ikana꞉ma꞉ mo Holi Sipitidi ame̱le̱ ta꞉ma꞉ni pea halemepe o ika꞉ kone pukima꞉ homolo epeke hau pu alualu pelemepe. \v 2 Kutu pu haleme ekina꞉ta꞉ kota꞉ ika꞉ hone mandake wilimieki tekena꞉ make ika꞉ mandake pukima꞉ homa꞉ alualu peleme ekina꞉ make ika꞉ mandake hone peleme ekina꞉ make ika꞉ homeke hone wilimi ekina꞉ make kotoeki paeyaoma꞉ I̱ ta꞉na꞉ wopu homa꞉ tiaamena꞉ iki sutiaasome. \v 3 Kutupa make naka꞉ honumake homeke hone witolo o honumake hau o handaena꞉ hau ma꞉nda꞉ na pea꞉pa꞉peke. Kotoeki na pikita꞉ iki paeyao homu pu alualu pea hata꞉ ma꞉nda꞉ pa꞉ta꞉ ika꞉ hauma꞉ta꞉ nika꞉ hau lombei pa꞉la꞉me laa hone u hapa꞉peke. \v 4 Koto ekina꞉ta꞉ pa naka꞉eki homeke hone witolo ma꞉nda꞉na꞉ ekita꞉ naka꞉ leke tankema꞉ na handeke wopu hone wia handeteke ha alualu pea꞉pa꞉peke. \s1 Ketisoma꞉ homu pea hayeke ekima꞉ Koda꞉ma꞉ ipika꞉ yeiya꞉ laeyekeeki \p \v 5 Ika꞉ honema꞉ pu haleme hau manuta꞉ mo hande Yesu Ketiso ipika꞉ honema꞉ pu hayeke hau leke kone pia꞉pa꞉peke alee. \q1 \v 6 Yesuma꞉ta꞉ ipika꞉ ateke Koda꞉na꞉ hau leke kone pu hayekepate pa ipikana꞉ma꞉ Ya Apa꞉ tupa꞉ hapeke ekita꞉ ya welema꞉ pa꞉ta꞉la꞉ mulueke hone na wiekeme. \q1 \v 7 Koto hau na pikita꞉ ipika꞉ honema꞉ hone pieke ekina꞉ hata꞉ hande Apa꞉ tupa꞉ hapeke ekita꞉ pa wina꞉ kone do kenkena꞉ ma꞉nda꞉na꞉ e pokaaso halina꞉ hau leke miekeme. Kutupa ipikita꞉ kenke hali leke a꞉paata꞉ kenke hali tupa꞉ hayekeme. \q1 \v 8 Kutupa ipikana꞉ma꞉ ipiki kone homu pea hata꞉ mo homolo polo pieke ekina꞉ na kiake mea homeekeme. Hande ipikana꞉ma꞉ a꞉ka꞉tei wapepiki tina꞉ homeeke ekina꞉ loa꞉me. \q1 \v 9 Koto haumanu piekeeki tekena꞉ta꞉ Koda꞉ma꞉ Yesuta꞉ ota꞉ paeyaona꞉ titina꞉ hali haena꞉ mea a꞉meiyao ota꞉ biki paeyao lombeipiki biki kone haleekeme. \q1 \v 10 Koto ekina꞉ta꞉ Yesu yeiya꞉ laaluekema꞉ta꞉ hepeni nane haleme ale manuma꞉ make do kenke nane haleme ale manuma꞉ make o kenke oto nane haleme ale manuma꞉ make kotoeki paeyaoma꞉ta꞉ ipiki pa꞉ta꞉ tumiki yotu hao panda꞉ pilimikie. \q1 \v 11 Kutupa mo Ateke hala꞉ Koda꞉na꞉ biki yeiya꞉ laaluekema꞉ iki paeyaoma꞉ paeyao opina꞉ peneme yaaso hata꞉ Yesu Ketiso ipiki homeketa꞉ ota꞉ Tekehalie laa lelimikie. \s1 Do kenkena꞉ pa̱a̱ peaasa꞉ wanda꞉hali \p \v 12 Ya yankeke tonuo. Hande I̱ma꞉ iki ame̱le̱ mandake haoma꞉ pita꞉ma꞉ta꞉ ya kakena꞉ homo haeme ekita꞉ epea꞉pate ameta꞉ I̱ iki ame̱le̱ na halo dina꞉ ya kakena꞉ pa homo halimi ekita꞉ kota꞉ koto ekita꞉ ota꞉ titina꞉ haue. Ika꞉ Ketiso haleme ekita꞉ paala꞉ma꞉ make pututuma꞉ homolo hata꞉ pu paeyaaluekema꞉ hone wopu u hapa꞉peke. \v 13 Kota꞉ pa ekipeke Koda꞉ma꞉ta꞉ ikana꞉ma꞉ ipika꞉ hone pa꞉la꞉ hau pulu pa꞉la꞉eki peawaluekema꞉ ika꞉ hone pina꞉yeke ika꞉ tukiki pa꞉ta꞉ e pokolo ombu hala꞉me. \v 14-15 Do kenkena꞉ hoihoi piki hoke hau pu haleme wanda꞉hali tukiki pa꞉ta꞉ hata꞉ ikita꞉ hoke haumanu na talo yako pea Koda꞉na꞉ tikitiki piki wekiwandiki haluekema꞉ta꞉ ika꞉ hau paeyaona꞉ la la pu ape ape na leke hao hapa꞉peke. Mo hande hoihoi piki wanda꞉hali pa꞉ta꞉ mo hande deto hala꞉ pi la halolo hata꞉ta꞉ ikita꞉ oli hande hombulanka꞉ to hala꞉ tupa꞉ hapa꞉peke alee. \v 16 Koto hau a꞉nda꞉ pimikina꞉ta꞉ kota꞉ I̱ma꞉ ikina꞉ Ketisona꞉ paa epolo pa꞉la꞉ natena꞉ ya paleke na hake halo polo ekina꞉ teke wilieke. Kota꞉ pa ekipeke ikana꞉ma꞉ koto peleme ekima꞉ta꞉ ya pokoa꞉ eta꞉ pa hameke e na pokea꞉ ya꞉ka꞉ta꞉me lolo pelemeeki walieke. \p \v 17 Koda꞉ pa꞉ta꞉ lia halo haemeke tupa꞉ ikana꞉ma꞉ make ika꞉ Koda꞉ pa꞉ta꞉ hone tulaleme ekima꞉ta꞉ koto tupa꞉ kone pu halememe. Koto pu halemeeki mandaata꞉ eki a꞉nda꞉ pitolo ya we holaemeka꞉na꞉ta꞉ kota꞉ ta꞉na꞉ma꞉ homolome. Pina꞉e. Koto ekina꞉ta꞉ I̱ma꞉ iki ame̱le̱ mandakena꞉ ta꞉na꞉ma꞉ homoloma꞉me. \v 18 Ikana꞉ma꞉ make koto tupa꞉ ta꞉na꞉ma꞉ homolo hata꞉ I̱ ame̱le̱ mandakena꞉ ta꞉na꞉ma꞉ homa꞉pa꞉peke. \s1 Timodi tapaalo piekeeki \p \v 19 Ika꞉ pimanu a꞉pa moka꞉lalieeki opitolo hata꞉ I̱ sa꞉sa꞉ peaena꞉ mo Tekehali Yesu ipika꞉ hone pa꞉lekeya꞉ka꞉na꞉ta꞉ kota꞉ hosiki hao Timodi iki pa꞉ta꞉ tapaaluekema꞉ hone witolome. \v 20-21 Mandane wanda꞉hali paeyaoma꞉ta꞉ ika꞉ honumake honumake hone homeke u halemepate pa mo Yesu Ketisoma꞉ pulu pa꞉la꞉ ekita꞉ hone na u halememe. Kutu pu halemepate Timodima꞉ homeke homeketa꞉ I̱ma꞉ witolo hone mandake witolo hata꞉ iki pa꞉ta꞉ a꞉ta꞉ma꞉ homa hao hala꞉me. \v 22 Ikana꞉ma꞉ make Timodita꞉ handolota꞉ ota꞉ epeke halie la handelememe. Kutupa make a꞉tala꞉ leke hata꞉ Timodi dikana꞉ma꞉ Koda꞉na꞉ Pi Seliapo daeyaena꞉ poko hapa꞉ eta꞉ hone wilimime. \v 23 Kutaata꞉ pa titina꞉ amba꞉la I̱ pa꞉ta꞉ epolo pa꞉la꞉ hau manuta꞉ eki haumanu ipiliepe la handata꞉ kota꞉ ipikita꞉ iki pa꞉ta꞉ a̱i̱ epena꞉ tapaaluekema꞉ hone witolome. \v 24 Kutupa make Tekehalima꞉ I̱ pa꞉ta꞉ waleke kia꞉ka꞉na꞉ta꞉ iki handuluekema꞉ I̱ make hosiki hao ipulueke. \s1 Epa꞉pototaitisi tapaali pieke pi \p \v 25 Ya honema꞉ta꞉ nika꞉ Ketiso yankeke Epa꞉pototaitisi iki nane epena꞉ ota꞉ tapaapeke ya꞉la꞉me hone ulume. Ipikita꞉ I̱ yaapo mandakena꞉ Koda꞉na꞉ e pokaaso hata꞉ mo Pi Seliapo hoeyaama꞉na꞉ sa꞉sa꞉ pitolo hata꞉ haopa꞉me. Kutupa ipikita꞉ I̱ tamba꞉ muluekema꞉ ika꞉ pi lawaasa꞉ hali make haya꞉me. \v 26 Ipikana꞉ma꞉ iki a̱i̱ handuluekema꞉ hone wotu u hala꞉me. Kutupa ipiki yeni haasa꞉me pi opelemeeki opitolo hata꞉ ipikana꞉ma꞉ puki tandama꞉ homa꞉la꞉me. \v 27 Ota꞉e ipikita꞉ yeni tieke mea ota꞉ teke pa꞉ta꞉ homea꞉pate Koda꞉ma꞉ ipiki pa꞉ta꞉ a꞉ta꞉ma꞉ homea꞉me. Pa ipiki homeke dia꞉ya꞉pate Koda꞉ma꞉ I̱ma꞉ puki tanda ma꞉nda꞉ma꞉ na homonoyeke I̱ pa꞉ta꞉ make a꞉ta꞉ma꞉ homea꞉me. \v 28 Koto pia꞉ ekina꞉ta꞉ I̱ma꞉ ipikita꞉ iki pa꞉ta꞉ tapaaluekema꞉ hone tieke wotu pa꞉la꞉me. Kutaata꞉ ikana꞉ma꞉ ipiki paa ipilieki handolota꞉ ta꞉na꞉ma꞉ paa homilimikie kutupa ya ka꞉nda꞉ma꞉ homoloeki make pa paeyaalieke. \v 29 Koto ekina꞉ ikana꞉ma꞉ ipikita꞉ nika꞉ yankekeo laa ta꞉na꞉ma꞉ wopu homa mo Tekehalina꞉ bikina꞉ handa mea꞉pa꞉peke. Koto ekina꞉ta꞉ ipikana꞉ma꞉ pia꞉ hau tupa꞉ pu haleme wanda꞉hali paeyao pa꞉ta꞉ hone wopu u hapa꞉peke. \v 30 Ketisona꞉ e pokaaluekema꞉ hone witolo hata꞉ta꞉ ipiki homaapa꞉na꞉ hone na wieke ekima꞉ ipikita꞉ tekepa꞉ta꞉ homeekepate piekeme. Kutupiki hauta꞉ ikana꞉ma꞉ I̱ tamba꞉ mea꞉pa꞉peke na ya꞉la꞉ ekita꞉ ipikana꞉ma꞉ pealuekema꞉ piekeme. \c 3 \s1 Ota꞉ tikitiki hasa꞉ hau \p \v 1 Ya Ketiso yankeke tonuo. Ya pi lo paeyaaluekema꞉ta꞉ dupa alome. Ikana꞉ma꞉ mo Tekehali pa꞉ta꞉ tunao hata꞉ta꞉ ta꞉na꞉ma꞉ homo hapa꞉peke. Amba꞉ hande wape pua꞉eki paa wape puluekema꞉ soka꞉la꞉ na pa꞉la꞉pate iki lopaama꞉na꞉ sa꞉sa꞉ pina꞉e hone witolo ekina꞉ paa wape pitolome. \p \v 2 Koto ekina꞉ mo kikama꞉ leke hoke haumanu puluekema꞉ taapolo hata꞉ mo wanda꞉halina꞉ loke yonkeleke kialuekema꞉ hoto paeyao hone u haleme haliwekima꞉ta꞉ iki hoeyaama꞉na꞉ wopu handeteke hapa꞉peke. \v 3 Mo hau pu haleme haliweki dia꞉ya꞉la꞉ pateta꞉ nikita꞉ mo ota꞉ sekemesaisi hauta꞉ mea haloma꞉me. Pa ekipape. Nikita꞉ Koda꞉na꞉ yakopiki temokoma꞉ tamba꞉ minolo haena꞉ Koda꞉ pa꞉ta꞉ yeni pu haloma꞉me. Kutupata꞉ Yesu Ketiso pa꞉ta꞉ tunao hata꞉ paleke na hao haloma꞉me. Kutupa make mo nika꞉ manda loke nina꞉ peaaseme haumanu pa꞉ta꞉ hone ota꞉ homeke a꞉nda꞉ ti lao na haloma꞉me. \v 4 I̱ma꞉ta꞉ koto haumanu pa꞉ta꞉ ota꞉ hone ti lao hapeke ya꞉la꞉me. Pa ekipeke alo. Ma꞉nda꞉ epima꞉ mo manda loke nina꞉ peaasa꞉ hau pa꞉ta꞉ hone ti lao hapeke ya꞉la꞉me hone wia꞉ka꞉na꞉ta꞉ I̱ma꞉ta꞉ ipiki ota꞉ ankulapeke ya꞉la꞉me hone witolome. \v 5 Ya mendieke nate pula꞉ homeke yapeeke dina꞉ I̱ sekemesaisi hau peaemekeme. I̱ta꞉ ota꞉ Isulai hali hano Isulai nane mendiekeme. I̱ta꞉ Benisaminina꞉ tapakee. Kutupa ya apa꞉na꞉ atekena꞉ ateketa꞉ mo Hibulu haliweki homeke haemekeme. Hande Diu wanda꞉halina꞉ pi ula꞉ ekimanu miniki haasa꞉ ekina꞉ pi hotuma꞉ka꞉na꞉ta꞉ kota꞉ I̱ta꞉ Pa꞉tisi hali haowa꞉me. \v 6 Kutupa Koda꞉na꞉ hau puluekema꞉ hone wopu witolo hata꞉ I̱ma꞉ mo siosi wanda꞉hali pa꞉ta꞉ tanda hala꞉tiki pu haowa꞉me. Homekema꞉ mo hande pi ula꞉eki paeyao miniki haasa꞉ hauma꞉ tikitiki haasa꞉ hali hapeke ya꞉ka꞉na꞉ta꞉ kota꞉ I̱ma꞉ta꞉ hau ma꞉nda꞉ na pu hoeyaowa꞉me. \v 7 Koto pa꞉la꞉pate I̱ma꞉ Ketiso pa꞉ta꞉ hone tulaaluekema꞉ yeke mo hande ya biki wia꞉ alemanu paeyaota꞉ ameta꞉ pa alee hone ulume. \v 8 Koto alemanu homeke dia꞉ya꞉la꞉pate pa ya pu haowa꞉ hau paeyao tapaota꞉ ota꞉ pa alee hone witolome. Pa ekipeke. Mo ota꞉ titina꞉ hauta꞉ ya Tekehali Yesu Ketiso handuluekema꞉ yeke alome. I̱ta꞉ ipika꞉ e pokaasa꞉ hali homeke haluekema꞉ yeke ya pu haowa꞉ hau paeyao kiao baowa꞉me. Ketiso ya Tekehali haena꞉ ta꞉ma꞉ni pea haluekema꞉ yeke mo hande hau paeyaota꞉ pa mo pa tana baasa꞉ punku piki alemanue hone witolome. \v 9 Koto ekina꞉ mo tikitiki yao hala꞉ ekita꞉ ya kone na polome. Hande Mosesima꞉ mieke Lo Pimanu opua pu hao mea꞉peke ya꞉la꞉ ekima꞉ na polome laa loa꞉me. Mo Koda꞉ma꞉ Yesu Ketiso pa꞉ta꞉ hone tulaasome wanda꞉hali pa꞉ta꞉ ku hala tikitiki yao hala꞉ ekita꞉ ame molome. Do tikitiki yao haasa꞉ ekina꞉ teketa꞉ hone tulaasa꞉ekie. \v 10 Ya hone pa꞉la꞉eki homeketa꞉ ota꞉ Ketiso handuluekema꞉ hone pa꞉la꞉me. Koto hone pa꞉la꞉ ekita꞉ Ketiso ipika꞉ tiala꞉ wele pa꞉la꞉eki muluekema꞉ make ipikana꞉ma꞉ tanda mieke tupa꞉ muluekema꞉ make kutupa Ketiso homeeke tupa꞉ I̱ make mandake tupa꞉ homuluekema꞉ hone pa꞉la꞉me. \v 11 Dupitolo hata꞉ta꞉ ya homulue ekita꞉ Koda꞉ma꞉ bepolao I̱ paa mea tialieke hone witolo ya hone ti lao halome. \s1 Tombo muluekema꞉ a̱i̱ya pua꞉peke hau \p \v 12 I̱ma꞉ koto haumanu paeyaota꞉ ana꞉na꞉ ana꞉lao amba꞉ mea hata꞉ I̱ta꞉ ana꞉ pa꞉la꞉me pi na alome. I̱ma꞉ mo kita꞉la꞉ epeke ale miono Yesu Ketisoma꞉ I̱ mea hala꞉ ekina꞉ I̱ma꞉ koto ale muluekema꞉ honkopu pa haaso ombu halome. \v 13 Ya yankeke tonuo. I̱ma꞉ta꞉ ota꞉ alome ya honema꞉ mo hande hauta꞉ a̱i̱ na molome hone witolopate pa dupiki hau homeke pitolome ya putia epoa꞉ haumanu paeyao hone yonka꞉lao mina꞉pa꞉laapa꞉laa pua꞉tiki mo mulu polo ale muluekema꞉ honkopu hoke hao pulume. \v 14 Koto ekina꞉ta꞉ mo hotonelina꞉ yenki muluekema꞉ I̱ma꞉ mo tombo hala꞉ pa꞉ta꞉ tikitiki a̱i̱ya pulume. Do ekina꞉ alome. Oli hepeni nane hao hapekeeki miono Koda꞉ma꞉ Yesu Ketiso pa꞉ta꞉ yama꞉ I̱ wi la꞉la꞉ ekina꞉ alome. \p \v 15 Niki tukiki pa꞉ta꞉ taka꞉lake temoko pila꞉ wanda꞉hali nikana꞉ma꞉ta꞉ kutupiki haumanu pa꞉ta꞉ homeke hone u hamana꞉ pea꞉peke aleo. Koto pa꞉la꞉pate do wape tapaaso wanda꞉hali iki ma꞉nda꞉ epima꞉ koto piki haumanu pa꞉ta꞉ ta꞉ta꞉ ta꞉ta꞉ piki hone wimika꞉na꞉ta꞉ kota꞉ Koda꞉ma꞉ ika꞉ hone tikitiki yao u tialieke. \v 16 Eki hau puma꞉ka꞉na꞉ta꞉ mo amba꞉ mea putia epoma꞉ hau tupa꞉ kone ame do ane make koto hau tupa꞉ kone pua꞉tiki pomana꞉e. \p \v 17 Ya yankeke tonuo. Ikana꞉ma꞉ I̱ma꞉ pitolo hau hondo hapa꞉peke. Mo hande puemena꞉ waloma꞉ tikitiki haumanu pu haleme wanda꞉halina꞉ epeke haumanu ikana꞉ma꞉ handa honduluekema꞉ta꞉ hone wopu u hapa꞉peke. \v 18 Ame do lolo polo pita꞉ I̱ma꞉ amba꞉ iki pa꞉ta꞉ hoto eleke eleke wopu la ku haowa꞉pate ameta꞉ I̱ma꞉ e̱ alo alo hata꞉ paa ta la kitolo handa꞉e. Mandane wanda꞉hali ika꞉ pu haleme hauma꞉ kone mo a꞉ka꞉tei wapepiki ti manda Ketiso homa꞉la꞉eki pa꞉ta꞉ ikita꞉ a꞉nda꞉ tunkulao haena꞉ lo haleme. \v 19 Koto wanda꞉halima꞉ta꞉ ika꞉ lokena꞉ hone pa꞉la꞉ ekimanu teliolo hata꞉ panda꞉ puniao haleme ekina꞉ ikita꞉ ti to hala꞉ pa꞉ta꞉ pua hao halimikie. Mo ika꞉ yaaloma꞉ homa꞉pa꞉peke ya꞉la꞉ hau pu halemeeki pa꞉ta꞉ hakoko lu halememe. Kutupa ikana꞉ma꞉ pa do kenkena꞉ hau pu haleme wanda꞉halina꞉ hau leke pu halememe. \v 20 Koto pa꞉la꞉pateta꞉ nikita꞉ hepeni kenkena꞉ teke wanda꞉hali hata꞉ nika꞉ pa꞉ta꞉la꞉la꞉ Tekehali Yesu Ketiso oli hepeni nanema꞉ epena꞉ yeke ta꞉na꞉ lulu hata꞉ yu wia haloma꞉me. \v 21 Ipikana꞉ma꞉ta꞉ mo nika꞉ dete piki tande polo pa꞉la꞉ loke manuta꞉ mo ipika꞉ ota꞉ ta꞉ta꞉ piki pa̱a̱ pupapeke lokema꞉ handekeeki topo peao hawalieke. Koto hauta꞉ mo ipika꞉ ala꞉ta꞉ ala꞉ta꞉ paeyao lu tumbapeke ya꞉la꞉ welema꞉ peawalieke. \c 4 \s1 Pea꞉peke ya꞉la꞉ haumanu \p \v 1 Ya yankeke tonuo. Ikana꞉ma꞉ I̱ma꞉ hande loa꞉ pimanu paeyao hone witolo hata꞉ ika꞉ mo Tekehali pa꞉ta꞉ haleme ekita꞉ ota꞉ taka꞉lao hao hapa꞉peke. O ya yankeke tonuo. Ikita꞉ ya puki piki wanda꞉halie. I̱ma꞉ iki ame̱le̱ mandakena꞉ haluekema꞉ hone wopu pa꞉la꞉me. Ikana꞉ma꞉ I̱ ta꞉na꞉ma꞉ homa꞉ tiao halememe. I̱ma꞉ make iki pa꞉ta꞉ paleke na hao halome. \p \v 2 Yuodia neke make o Sindiki neke make I̱ma꞉ alo pi opua꞉pe. Ipilikana꞉ma꞉ Ketiso hakila꞉ hata꞉ta꞉ hone homeke u hapena꞉ I̱ma꞉ ipiliki hone u tiaasome. \v 3 Kutupa ya Ketiso ta꞉ma꞉ni epekeo. Neke pa꞉ta꞉ make mo wanda꞉ yaapoma꞉ hone homeke wina꞉ tamba꞉ mia꞉peke alome. Pa ekipeke mo wanda꞉ yaapo make Ka꞉lemiti make mo ya e mandake pokoloma꞉ wanda꞉hali paeyaoma꞉ tonka꞉na꞉ mo Ketisona꞉ Pi Seliapota꞉ peo lao daeyaena꞉yeke I̱ma꞉ iki ame̱le̱ weleke we wopu pea e tieke pokoma꞉me. Koto wanda꞉halina꞉ biki paeyaota꞉ mo Koda꞉na꞉ deto hala꞉ tapakena꞉ biki ula꞉ bukana꞉ wape pa ula꞉me. \p \v 4 Ika꞉ Tekehali pa꞉ta꞉ haleme ekina꞉ta꞉ hoto paeyao ta꞉na꞉ma꞉ homu hapa꞉peke. Paa make alome. Ta꞉na꞉ma꞉ homu hapa꞉peke. \p \v 5 Wanda꞉hali paeyao pa꞉ta꞉ ika꞉ pilimi hau manuma꞉ta꞉ ika꞉ homu piki hau walo hapa꞉peke. Mo Tekehalita꞉ niki teke pa꞉ta꞉ hala꞉me. \v 6 Ala꞉ta꞉ ala꞉ta꞉ paeyao pa꞉ta꞉ hone witeleme ekina꞉ ka꞉nda꞉ma꞉ homolo na yoko hapa꞉peke. Kotoeki na pikita꞉ hoto ma꞉nda꞉ a꞉nda꞉ Koda꞉ pa꞉ta꞉ yeni pimika꞉na꞉ta꞉ ika꞉ mia꞉peke ya꞉la꞉ alemanu kina꞉ keiyae alo hata꞉ honke lo hapa꞉peke. \v 7 Koto ekina꞉ ikana꞉ma꞉ Yesu Ketiso ame̱le̱ tunao haseme ekina꞉ta꞉ mo wanda꞉halina꞉ hone wilimieki ota꞉ lombeipiki Koda꞉na꞉ puki lopaasa꞉ ekima꞉ ika꞉ hone puki yaapo hoeyaama꞉na꞉ epeke tupa꞉ handeteke hao halieke. \p \v 8 Ya yankeke tonuo. Ya paeyaaso pita꞉ dupa alome. Ika꞉ honema꞉ mo epeke hau pita꞉la꞉ haumanu make mo yeiya꞉ lapeke ya꞉la꞉ haumanu make kota꞉ haumanu homeke hone u moneao hapa꞉peke. Dupiki hauna꞉ loa꞉me. Ota꞉ hau pita꞉la꞉eki leke tendepiki hau pita꞉la꞉eki tikitiki hau pita꞉la꞉eki aleta꞉ ma꞉nda꞉ na ta̱leke hau pita꞉la꞉eki hau seliapo seliapo pita꞉la꞉eki yole hau pita꞉la꞉ ekimanu make koto haumanu paeyao homeke hone u hamena꞉ alome. \v 9 Mo hande I̱ma꞉ la kueke opua mimi mana꞉ pi manuta꞉ ota꞉ pu hapa꞉peke. Ya pima꞉ loeke opimi tupa꞉ make ya hauma꞉ pueke handeme tupa꞉ make ota꞉ pu hapa꞉peke. Koto ekina꞉ mo nika꞉ puki lopao hamono lo hala꞉ Koda꞉ta꞉ iki ame̱le̱ hao halieke. \s1 Ika꞉ pa halemeke ale mea keiyae leeke pi \p \v 10 O I̱ma꞉ mo Tekehali pa꞉ta꞉ halo ekina꞉ta꞉ ta꞉na꞉ tiekema꞉ wopu homolome. Pa ekipeke. Mo nate eleke eleke wopu paeya꞉ hoki naneta꞉ ikana꞉ma꞉ I̱ pa꞉ta꞉ ika꞉ a꞉ta꞉ma꞉ homelemeeki paa waluekema꞉ pota꞉ handa꞉ wimika꞉ta꞉me. Ikana꞉ma꞉ I̱ hone yonka꞉laememe pi na alopate pa mo ika꞉ a꞉ta꞉ma꞉ homelemeeki wala꞉peke pota꞉ na handa꞉ witolo pia꞉ka꞉ta꞉me alome. \v 11 Kutupa I̱ma꞉ honumake hali halome hone witolo hata꞉ do pi na alome. Pa ekipeke. Mo ya halo ta꞉ta꞉ ta꞉ta꞉ piki tupa꞉ paeyaona꞉ ta꞉na꞉ma꞉ homuluekema꞉ hone ulume. \v 12 Mo miniki hapeke ya꞉la꞉ alemanu ota꞉ dia꞉ya꞉la꞉ hau pita꞉ mo aneke hapu haka꞉ta꞉pao miniki hapeke ya꞉la꞉ hau yaapota꞉ I̱ pa꞉ta꞉ epeeke pea handa hone ulume. I̱ma꞉ aneke hapu noluekema꞉ make tea꞉ma꞉ homuluekema꞉ make aneke hapu haka꞉ta꞉pao wia haluekema꞉ make hosikieki siki wia haluekema꞉ make nate ma꞉nda꞉ epina꞉ I̱ma꞉ hando pa꞉ta꞉ hata꞉ do hau paeyaota꞉ handa halo ekina꞉ ta꞉na꞉ma꞉ homuluekema꞉ hone witolome. \v 13 Do hau paeyaota꞉ Ketisoma꞉ ka꞉la꞉ welema꞉ bepolatia a꞉pa polome. \p \v 14 Koto polopateta꞉ mo ikana꞉ma꞉ ya ka꞉nda꞉ma꞉ homoa꞉ ekimanu tamba꞉ mimi ekita꞉ ota꞉ epeke hau pimime. \v 15 Iki Pilipai wanda꞉halima꞉ta꞉ I̱ma꞉ amba꞉ hande Ketisona꞉ Pi Seliapo waloa꞉ta꞉ mo hande Ma꞉sedonia mina꞉pa꞉lao poa꞉ dina꞉ koto pita꞉ma꞉ siosi tapake ma꞉nda꞉ma꞉ dia꞉ya꞉pate ikana꞉ma꞉ homeke I̱ tamba꞉ muma꞉me laa ota꞉ hone witolo pitememe. Siosi tapake ma꞉nda꞉ma꞉ ika꞉ manima꞉ I̱ ota꞉ na tamba꞉ mimipate ikana꞉ma꞉ homeke koto hau pimime. \v 16 I̱ mo Desalonaika hata꞉ hoto yaapo a꞉nda꞉ I̱ mani dia꞉ya꞉ dina꞉ta꞉ ikana꞉ma꞉ I̱ tamba꞉ muluekema꞉ tapaatiki pu haememe. \v 17 Ika꞉ pa hameke kiteleme alemanu muluekema꞉ pa na weitolo pateta꞉ pa mo oli hepeni nane ika꞉ epeke haumanu pitelemeeki dimina꞉la꞉eki haka꞉ta꞉pawao wiaena꞉yeke hone pa꞉leke handa iki pa꞉ta꞉ waleke kitolo alome. \v 18 Do wapena꞉ alo pita꞉ mo hande ikana꞉ma꞉ kimi alemanu molo ekina꞉ iki pa꞉ta꞉ keiyae pi alome I̱ma꞉ haka꞉ta꞉pao molo ekita꞉ ana꞉e alome. Ameta꞉ mo hande Epa꞉pototaitisima꞉ ika꞉ pa kiteleme alemanu paeyao mea a꞉paeyeke handa ya wia halo polo ale manuta꞉ ana꞉na꞉ molome. Koto pa keleme ale manuta꞉ Koda꞉ pa꞉ta꞉ totopo yolepiki hala꞉la꞉ alema꞉ handa꞉la꞉me. Kutupa Koda꞉ma꞉ kutupiki alemanu minolota꞉ ta꞉na꞉ma꞉ homa꞉la꞉me. \v 19 Ya Tekehali Koda꞉ma꞉ ipika꞉ ota꞉ aneke hapu haka꞉ta꞉pao ula꞉ ale manuma꞉ ika꞉ wia hapa꞉peke ya꞉la꞉ alemanu paeyaota꞉ Yesu Ketiso pa꞉ta꞉ yama꞉ ana꞉lao ku halieke. \v 20 Nate paeyao nika꞉ Apa꞉ Koda꞉ yeiya꞉ yeiya꞉ lao hamana꞉e. Kutu pina꞉e. \p \v 21 Ketiso pa꞉ta꞉ haleme Koda꞉na꞉ wanda꞉hali iki paeyao I̱ma꞉ iki hone witolo hata꞉ a꞉taloe la꞉neaasome. Do I̱ ame̱le̱ mandake haleme Ketiso yankeke tonuma꞉ make iki pa꞉ta꞉ a꞉taloe la꞉neaasememe. \v 22 Kutupa do haleme Koda꞉na꞉ wanda꞉hali paeyaoma꞉ make iki pa꞉ta꞉ a꞉taloe la꞉neaasemepate mo Sisana꞉ da pa꞉ta꞉ haleme Ketiso wanda꞉halima꞉ta꞉ a꞉taloe pi ota꞉ wopu la꞉neaasememe. \v 23 Koto ekina꞉ Tekehali Yesu Ketisona꞉ a꞉ta꞉ma꞉ homo tamba꞉ mina꞉la꞉eki iki homeke homeke ame̱le̱ nate paeyao u haena꞉e alome.