\id LUK - Sembeleke Samberigi PNG Luke 01 22/2/91 Macnaughtan \h LUKU \toc1 Lukuma꞉ wape pieke Pi Seliapoe \toc2 Luku \toc3 Luku \mt1 Lukuma꞉ wape pieke Pi Seliapoe \c 1 \s1 Lukuma꞉ Diopilusi pa꞉ta꞉ tameiya꞉ tapaeyekeeki \p \v 1 Diopilusio. Mo niki tukiki pa꞉ta꞉ pa꞉la꞉eki manuta꞉ mandane wanda꞉hali wotuma꞉ ika꞉ ika꞉ kone honkopu wotu hao wape lao wilimime. \v 2 Mo amba꞉ hande pieke ekimanu paeyaota꞉ ota꞉ kini pea handaa walemeke haliwekima꞉ niki pa꞉ta꞉ la kimi tupa꞉ kone ikana꞉ma꞉ make ika꞉ wapemanu pa꞉ta꞉ laemekeme. \v 3 Koto ekina꞉ epeke some Diopilusio. I̱ma꞉ do hau manuna꞉ kini pa꞉la꞉ tupa꞉ sembepela hone na u pita꞉ handa꞉ wiaata꞉ naka꞉eki make tikitiki yao wape lao wiaasota꞉ epolo pia꞉me laa loa꞉me. \v 4 I̱ma꞉ dupiki hauta꞉ nakana꞉ma꞉ naka꞉ waleke pimanu paeyaona꞉ teke handoelena꞉ yeke loa꞉me. \s1 Dioni mondulu pieke ekina꞉ pi la haleekeeki \p \v 5 Mo Diudia nane hande kini hali Hetodi hayeke pita꞉ yeni peao hayeke hali homeke Sekataiya make hayekeme. Ipikita꞉ mo yeni peao haemeke Abaisia tapake halie. Ipika꞉ wanda꞉ Elisa꞉bedi make mo hande yeni peao haemeke Etoni tapake wanda꞉e. \v 6 Mo wanda꞉ hali yaapota꞉ Koda꞉na꞉ leke popelekena꞉ tikitiki yao hata꞉ ipika꞉ pi ula꞉ ekimanu paeyao opu haepekeme. \v 7 Kutu pu haepekepate weki ma꞉nda꞉ na hatuku haepekeme. Pa ekipeke mo Elisa꞉bedita꞉ kenohali hayekeme. Kutupa ipilikita꞉ koke tooli haepekeme. \p \v 8 Sekataiyata꞉ ipika꞉ tapake haliwekina꞉ Koda꞉ pa꞉ta꞉ hata꞉ hande yeni peao haemeke nate epeeke handaata꞉ \v 9 mo yeni peao haemeke haliwekima꞉ pu haemeke tupa꞉ Sekataiyama꞉ mo hande totopo piki ale mo olodana꞉ yankaena꞉yeke mimikime. \v 10 Koto ekina꞉ mo hande totopo piki ale yankeeke pita꞉ mo wanda꞉hali paeyaoma꞉ hama꞉ nane hata꞉ yeni pitolo haena꞉ Sekataiyata꞉ mo Tekehalina꞉ tembolo da pa꞉ta꞉ honda꞉ pamba peekepate \v 11 mo hande totopo piki ale oloda yanko hayeke popeke nanema꞉ kiki nane Tekehalina꞉ enisolo homeke a꞉pa hayekeeki handeekeme. \v 12 Kutupa Sekataiyama꞉ mo enisolo hando haota꞉ paala꞉ma꞉ homolo hata꞉ make ka꞉nda꞉ma꞉ homeekeme. \v 13 Kutu piekepate mo enisoloma꞉ ipiki pa꞉ta꞉ alota꞉ Sekataiyao. Paala꞉ma꞉ na homa꞉peke laata꞉ Koda꞉ma꞉ naka꞉ yeni pieki opu haota꞉ naka꞉ wanda꞉ Elisa꞉bedima꞉ naka꞉ weki mendiaena꞉ lelieke. Kutupa nakana꞉ma꞉ mo wekina꞉ bikita꞉ Dioni lapeke laata꞉ \v 14 Nakana꞉ma꞉ make ta꞉na꞉ma꞉ homolo pelepateta꞉ mo weki mendia꞉ka꞉na꞉ta꞉ mandane wanda꞉hali wopuma꞉ make ta꞉na꞉ma꞉ wotu homilimikie. Kutupa \v 15 mo weki daeya hata꞉ta꞉ Koda꞉na꞉ leke popelekena꞉ hata꞉ hali tieke halieke laata꞉ Ipikana꞉ma꞉ta꞉ mo waini ikali make mo hoke ikali make na nelieke. Kutupa ipikita꞉ inkikina꞉ weleke pa꞉ta꞉ pitina꞉ kone mo Holi Sipitidi tumbaalieke. \v 16 Kutupa ipikana꞉ma꞉ Isulai wanda꞉hali wopu pa hatuku ika꞉ Tekehali Koda꞉ pa꞉ta꞉ pelimikie. \v 17 Ipikita꞉ Tekehalina꞉ tapaalia꞉ hali pua hata꞉ta꞉ hande Elaidia tupa꞉ honkopu hao wele pitolo hata꞉ kutupa wekiwandiki ateke ameda titi make paa mea apa꞉taota꞉ mo hande pi na opueleme wanda꞉halima꞉ tikitiki piki hone wina꞉yeke mea la꞉ka꞉laota꞉ mo hande Tekehalina꞉ epolo pa꞉la꞉ dina꞉yeke ipika꞉ wanda꞉hali mea tikitiki yao haena꞉ lelieke leekeme. \p \v 18 Sekataiyama꞉ mo enisolo pa꞉ta꞉ alota꞉ Do pita꞉ ota꞉ekie laa ekipa hone wionope laata꞉ Ya wanda꞉ diki telipina꞉ koke ya halopa꞉me leekeme. \p \v 19 Mo hande enisoloma꞉ ipika꞉ pi hombo peaaso alota꞉ I̱ta꞉ Keipitelee laata꞉ Koda꞉na꞉ leke popelekena꞉ hao halome. Kutupa Koda꞉ma꞉ta꞉ do pi seliapo neke pa꞉ta꞉ lonoyeke I̱ tapaeya꞉me. \v 20 Do I̱ma꞉ mea epolo pita꞉ ipika꞉ nate epea꞉ka꞉na꞉ ota꞉ yaalo pa꞉la꞉pate nakana꞉ma꞉ na opueleme laata꞉ Kota꞉ do alo pi na opiki handaa neketa꞉ pi na leke kake a꞉mba halipikie. Kutupa I̱ma꞉ neke pa꞉ta꞉ do la꞉ witolo pi ota꞉ yaeya꞉ka꞉na꞉ta꞉ naka꞉ kake paa lombaa pi lelipikie leekeme. \p \v 21 Koto pi alo haepekepate mo wanda꞉halima꞉ hama꞉ nane hata꞉ Sekataiya epena꞉ handeteke haemekepate a̱i̱ na epeeke handaata꞉ ikana꞉ma꞉ hone ta꞉ta꞉ ta꞉ta꞉ wimikime. \v 22 Kutupa Sekataiya opolu bao hama꞉ nane epeekepate mo wanda꞉hali pa꞉ta꞉ pi ma꞉nda꞉ lapeke na yeekeme. Koto ekina꞉ wanda꞉halima꞉ hone witolota꞉ ipikana꞉ma꞉ mo tembolo da tukiki pa꞉ta꞉ hata꞉ aleta꞉ ma꞉nda꞉ handolo pia꞉me la hone wimikime. Kutupa Sekataiyama꞉ pi lapeke na yaalo hata꞉ wanda꞉hali pa꞉ta꞉ ipika꞉ kiki homeke wankeaaso hata꞉ kikima꞉ kone waleekeme. \p \v 23 Sekataiyama꞉ mo hande tembolo da pa꞉ta꞉ ipika꞉ e poko hayeke natemanu paeyeketa꞉ ipika꞉ da paa la꞉ka꞉la peekeme. \v 24 Kutupa koto hoki naneta꞉ ipika꞉ wanda꞉ Elisa꞉bedima꞉ weki loke lombeeketa꞉ sumba꞉ yunki hata꞉ ipika꞉ da na mina꞉pa꞉lake pa pitiekeme. \v 25 Elisa꞉bedima꞉ alota꞉ Tekehalima꞉ ame do tupa꞉ tamba꞉ ma꞉la꞉me laata꞉ Wanda꞉hali pa꞉ta꞉ yaala꞉ma꞉ homoa꞉ ekita꞉ ipikana꞉ma꞉ yoka꞉ mea baala꞉me leekeme. \s1 Yesu mondulu pieke ekina꞉ pi la haleekeeki \p \v 26 Kutupa Elisa꞉bedima꞉ weki loke lomba haena꞉ sumba꞉ yunki mindiki a꞉pa opeeke dina꞉ta꞉ Koda꞉ma꞉ hande enisolo Keipitele mo Ka꞉lili nane hayeke da Na꞉sa꞉tete da pa꞉ta꞉ tapaeyekeme. \v 27 Mo hande amba꞉ hayeke kini hali Deipidina꞉ tapake hali Diosepena꞉ da polo pieke wandiki pa꞉ta꞉ pi la꞉ ulu pena꞉ tapaeyekeme. Mo wandikina꞉ bikita꞉ Metie. \v 28 Mo hande enisoloma꞉ ipiki pa꞉ta꞉ pua alota꞉ Keiyae. Neketa꞉ Tekehalima꞉ ota꞉ amba꞉ epeaala꞉ wandikie. Neke yaapo hala꞉me leekeme. \p \v 29 Metima꞉ koto pi opiekepate Eki hau pulu polo ekina꞉ ala꞉pe laa ipika꞉ honema꞉ mo pi teke wotu weiyekeme. \p \v 30 Mo hande enisoloma꞉ ipiki pa꞉ta꞉ alota꞉ Metio. Koda꞉ma꞉ neke pa꞉ta꞉ hone wotu wita꞉la꞉ma꞉ paala꞉ma꞉ na homa꞉peke laata꞉ \v 31 Neketa꞉ weki loke lombaata꞉ wetepena꞉ hali weki mendilipikima꞉ ipika꞉ bikita꞉ Yesu lapeke. \v 32 Kutupa ipiki daeyaata꞉ hali tieke halieke. Kutupa ipikita꞉ Ota꞉ Manda Hala꞉ Koda꞉na꞉ Eiyeke lelimikie leekeme. Kutupa mo hande Tekehali Koda꞉ma꞉ ipika꞉ amba꞉ titina꞉ kini hali Deipidina꞉ kilu tombuao hayekeeki ipikana꞉ma꞉ mina꞉ lelieke. \v 33 Kutupa ipikita꞉ Dieikope tapake wanda꞉halina꞉ kini hali hao hata꞉ ipika꞉ kilu tombuao halo pa꞉la꞉ ekita꞉ na paelieke leekeme. \p \v 34 Koto leeketa꞉ Metima꞉ mo enisolo pa꞉ta꞉ alota꞉ Kotoeki pulu pa꞉la꞉ ekita꞉ ekipape. I̱ta꞉ halina꞉ da a̱i̱ na polome leekeme. \p \v 35 Mo hande enisoloma꞉ ipika꞉ pi hombo peaaso alota꞉ Mo Holi Sipitidi neke pa꞉ta꞉ ipilieke. Kutupa make Ota꞉ Manda Hala꞉ Koda꞉ ipika꞉ wele pita꞉la꞉eki neke pa꞉ta꞉ a꞉pa pitilieke. Kutu pita꞉la꞉ ekima꞉ta꞉ mo hande nakana꞉ma꞉ mondulu pele yako piki weki ipikita꞉ Koda꞉na꞉ Eiyekee lelimikie. \v 36 Naka꞉ tapake wanda꞉ Elisa꞉bedi pa꞉ta꞉ hone wia꞉peke. Ipiki pa꞉ta꞉ Weki kenohali wanda꞉e lo halemepateta꞉ ame ipikita꞉ koke wanda꞉sikima꞉ kone ipika꞉ weki loke lombeeke sumba꞉ yunki mindiki hata꞉ amba꞉ opa꞉la꞉me laata꞉ \v 37 Hau paeyao kone Koda꞉ma꞉ pea꞉peke ya꞉la꞉me leekeme. \p \v 38 Koto leeke handaa Metima꞉ alota꞉ I̱ta꞉ Tekehalina꞉ e pokao halo wandikie. Nakana꞉ma꞉ la꞉ witele tupa꞉ pina꞉e leekeme. Kutupa mo enisolota꞉ mo wandiki mina꞉pa꞉lao peekeme. \s1 Metima꞉ Elisa꞉bedina꞉ da kimisu peekeeki \p \v 39 Koto pita꞉ kone Metita꞉ tiao Diuda nane peiyene wieke pa꞉ta꞉ hayeke da ma꞉nda꞉ pa꞉ta꞉ a̱i̱ya peekeme. \v 40 Puaata꞉ Sekataiyana꞉ da pa꞉ta꞉ honda꞉ pamba pua Elisa꞉bedi pa꞉ta꞉ keiyae pi pua leekeme. \v 41 Metima꞉ leeke pi Elisa꞉bedima꞉ opitolo haena꞉ kone mo ipika꞉ weleke pa꞉ta꞉ pitieke weki la꞉ma꞉ la꞉ma꞉ piekeme. Kutupa Elisa꞉bedima꞉ mo Holi Sipitidima꞉ tumba pitina꞉ pi \v 42 anekema꞉ alota꞉ Wanda꞉weki poluna꞉ kone Koda꞉ma꞉ neke mea epeaala꞉me laata꞉ Nakana꞉ma꞉ mondulu pele weki make Koda꞉ma꞉ amba꞉ epeaala꞉me. \v 43 Yaka Tekehalina꞉ ama꞉ma꞉ I̱ handolo epele ekita꞉ do hau tiekena꞉ pa ekipeke epelepe leekeme. \v 44 Naka꞉ keiyae pi leeki opitolo hano kone ya weleke pa꞉ta꞉ pila꞉ wekima꞉ ta꞉na꞉ma꞉ homolo hata꞉ tia liaeya꞉me. \v 45 Nakana꞉ma꞉ta꞉ mo hande Tekehalima꞉ neke pa꞉ta꞉ pi la꞉ ula꞉ ekita꞉ opua ota꞉ pilieke hone tula ale ekima꞉ta꞉ ta꞉na꞉ma꞉ homilipikie leekeme. \s1 Metima꞉ ta꞉na꞉ homolo la꞉la꞉ emeli \p \v 46 Koto leeketa꞉ Metima꞉ alota꞉ \q1 Yaka pukima꞉ Tekehalina꞉ pi laasome. \q1 \v 47-48 I̱ Mea Da꞉taasa꞉ Hali Koda꞉ma꞉ta꞉ I̱ta꞉ ipika꞉ e pokaaso wanda꞉siki pa꞉ta꞉ kone hone ula꞉ ekina꞉ yaka temokoma꞉ta꞉ ta꞉na꞉ma꞉ homa꞉la꞉me. \q1 \v 49 Hande Wele Pita꞉la꞉ Koda꞉ma꞉ta꞉ I̱ pa꞉ta꞉ hau tiekemanu peala꞉ ekina꞉ta꞉ ame make wetepe make wanda꞉hali paeyaoma꞉ I̱ pa꞉ta꞉ta꞉ Koda꞉ma꞉ epeaala꞉ wanda꞉e lelimikie. \b \q1 Mo Koda꞉na꞉ bikita꞉ yakopiki bikie. \q1 \v 50 Ipiki pa꞉ta꞉ paala꞉ma꞉ homeleme wanda꞉hali pa꞉ta꞉ make koto wanda꞉halina꞉ weki wandiki pa꞉ta꞉ make ipikana꞉ma꞉ a꞉ta꞉ma꞉ homo hala꞉me. \q1 \v 51 Ipikana꞉ma꞉ ipika꞉ wele pita꞉la꞉ kiki tindipaota꞉ mo hakoko liteleme wanda꞉hali ika꞉ dupumana꞉e laa amu piteleme alemanu tonka꞉na꞉ ta꞉ta꞉ ta꞉ta꞉ pea wina꞉yeke la꞉la꞉me. \q1 \v 52 Wele piteleme kini haliwekimanu make manda pitimikipate ipikana꞉ma꞉ iki mea lopa꞉niao mo hande pa haleme haliweki mea a꞉meiyala꞉me. \q1 \v 53 Tea꞉ma꞉ homemeke wanda꞉hali pa꞉ta꞉ epeke napeke alemanu mea tumbaeyekepate pa mo hamoko wanda꞉halita꞉ kiki hameke tapaeyekeme. \b \q1 \v 54 Nika꞉ amba꞉ titina꞉ apa꞉mei pa꞉ta꞉ la꞉ wieke pi manuta꞉ ipikana꞉ma꞉ ota꞉ yao piekeme. \q1 Ipika꞉ e pokaeyeke hali Isulai pa꞉ta꞉ ipikana꞉ma꞉ tamba꞉ mulu epeekeme. \q1 \v 55 Kutupa Eipoloha꞉ma꞉ pa꞉ta꞉ make ipika꞉ hoki nane wanda꞉hali paeyao pa꞉ta꞉ make hoto paeyao ipikana꞉ma꞉ a꞉ta꞉ma꞉ homo halueke hone wiekeme laa leekeme. \p \v 56 Koto laa Metita꞉ Elisa꞉bedi ame̱le̱ sumba꞉ tepo haota꞉ paa la꞉ka꞉la ipika꞉ da peekeme. \s1 Bapitaisi peao halo pieke hali Dioni mendiekeeki \p \v 57 Kutupa Elisa꞉bedima꞉ ipika꞉ weki mondulu pieke nate epeeke handaata꞉ haliweki mendiekeme. \v 58 Kutu pieke handaa ipika꞉ tapake wanda꞉halima꞉ make ipiki ame̱le̱ haemeke wanda꞉halima꞉ make Tekehalima꞉ ipiki ota꞉ epeaeyekeeki handaata꞉ pea꞉ paeyaoma꞉ make Elisa꞉bedima꞉ make ta꞉na꞉ma꞉ homemekeme. \p \v 59 Pula homeke paeyeketa꞉ mo weki sekemesaisi hau pealuekema꞉ momba꞉la hata꞉ ipika꞉ atekena꞉ biki kone Sekataiya loluekema꞉ pimikipate \v 60 ipika꞉ inkikima꞉ alota꞉ Dia꞉me. Ipika꞉ bikita꞉ Dionie leekeme. \v 61 Kutupa mo wanda꞉halima꞉ ipiki pa꞉ta꞉ alota꞉ Koto biki lolo poloma꞉pateta꞉ naka꞉ tapake hali homeke a꞉nda꞉ koto biki leke hali ma꞉nda꞉ na haya꞉me lemekeme. \v 62 Koto laa mo wanda꞉halima꞉ kiki wankeaaso hata꞉ mo wekina꞉ ateke pa꞉ta꞉ alota꞉ Ta wekita꞉ eki biki lomana꞉pe lemekeme. \v 63 Koto ekina꞉ Sekataiyama꞉ wape puluekema꞉ tameiya꞉ honke laa dupa wape piekeme. Do wekina꞉ bikita꞉ Dioni alome laa wape piekeme. Kutu pieke handaa mo wanda꞉hali paeyaoma꞉ penkilipa꞉tia pomimikime. \v 64 Kutu pieketa꞉ kutaa kone Sekataiyana꞉ kake lumbieketa꞉ pi lapeke yalo hata꞉ ipikana꞉ma꞉ Koda꞉na꞉ pi laeyekeme. \v 65 Koto ekina꞉ta꞉ koto pa꞉ta꞉ haemeke wanda꞉halima꞉ paala꞉ma꞉ homemekeme. Kutupa mo pieke ekimanu mo Diudia nane peiyene pa꞉ta꞉ hayeke da sunu paeyao pa꞉ta꞉manu la꞉tia pomimikime. \v 66 Mo pi opimiki wanda꞉hali paeyaoma꞉ opua hone witolo alota꞉ Do wekita꞉ ekipiki hali halia꞉pe laa lota꞉ lota꞉ pimikime. Tekehalina꞉ wele pita꞉la꞉eki mo weki pa꞉ta꞉ peneme yao pitiekeeki handolo hata꞉ lemekeme. \s1 Sekataiyana꞉ la꞉ wieke ekimanu \p \v 67 Mo wekina꞉ ateke Sekataiyama꞉ mo Holi Sipitidi tumba pitina꞉ hata꞉ pi la꞉ witolo alota꞉ \q1 \v 68 Tekehalima꞉ ipika꞉ wanda꞉hali tamba꞉ mulu a꞉paata꞉ iki tonkaala꞉ alemanu ka꞉la꞉pa wala꞉ ekina꞉ Isulai wanda꞉halina꞉ Koda꞉ ipika꞉ pi laamana꞉e. \q1 \v 69 Ipika꞉ e pokaeyeke hali Deipidina꞉ tapake hali kone niki Mea Da꞉taalo Pa꞉la꞉ wele pita꞉la꞉ Hali ipikana꞉ma꞉ amba꞉ mea a꞉meiyawala꞉me. \q1 \v 70 Ame do yaaso hata꞉ pita꞉la꞉ ekita꞉ amba꞉ titina꞉ kone ipika꞉ pi la꞉mea halo haemeke yako piki haliwekima꞉ ipika꞉ pi la꞉ wiaena꞉yeke leekeme. \q1 \v 71 Niki ame̱le̱ a꞉nda꞉ liteleme haliwekima꞉ make leke tankema꞉ handeleme haliwekina꞉ wele pita꞉la꞉eki manuma꞉ make niki bepolaapa꞉na꞉ niki mea tamba꞉ muluekema꞉yeke ipikana꞉ma꞉ pi amba꞉ la꞉ wiekeme. \q1 \v 72 Kutupa nika꞉ amba꞉ titina꞉ haemeke haliweki pa꞉ta꞉ta꞉ Iki pa꞉ta꞉ a꞉ta꞉ma꞉ homolueke laa Yaka yako piki pi la꞉ ulueki make hone uluekee leekeme laata꞉ \q1 \v 73-74 Nika꞉ amba꞉ titina꞉ hayeke hali Eipoloha꞉ma꞉ pa꞉ta꞉ ipikana꞉ma꞉ pi tieke la꞉ witolo hata꞉ leeketa꞉ niki pa꞉ta꞉ make ipikana꞉ma꞉ pi dupa la꞉ ula꞉me. Ikana꞉ma꞉ paala꞉ma꞉ na homeke \q1 \v 75 yaka e pokao hata꞉ yako piki wanda꞉hali make tikitiki yao haleme wanda꞉hali make I̱ pa꞉ta꞉ bapi paeyao koto tupa꞉ hamena꞉yeke ika꞉ a꞉nda꞉ tunkuliki haliwekima꞉ iki bepolaapa꞉na꞉ I̱ma꞉ iki tamba꞉ mulueke laa pi la꞉ wiekeme leekeme. \b \q1 \v 76 Koto ekina꞉ ya wekio. Neketa꞉ Ota꞉ Manda Hala꞉ Koda꞉ ipika꞉ pi la꞉mea halo hala꞉ hali haleme laa lelimikie. \q1 Kutupa Tekehali wetepena꞉ epena꞉ nakana꞉ma꞉ ipika꞉ pota꞉ tikitiki yawaluekema꞉ amba꞉la pelipikie. \q1 \v 77 Nakana꞉ma꞉ ipika꞉ wanda꞉hali pa꞉ta꞉ dupa lelipikie. \q1 Koda꞉ma꞉ ika꞉ hoke hau peleme ekimanu paeyaaso hata꞉ta꞉ iki mea da꞉taalieke laa lelipikie. \q1 \v 78 Pa ekipeke. Nika꞉ Koda꞉ta꞉ yopu hao hata꞉ niki pa꞉ta꞉ a꞉ta꞉ma꞉ homo hala꞉me. Da panake ka꞉la꞉polo hata꞉ pa̱a̱ peaasa꞉ tupa꞉ta꞉ Koda꞉ma꞉ niki pa꞉ta꞉ da꞉ta꞉la꞉eki kilieke. \q1 \v 79 Kutupata꞉ mo homa꞉la꞉ ekina꞉ paala꞉ma꞉ homolo hata꞉ timba꞉ la꞉pa pa꞉la꞉ ekina꞉ tu̱ pa꞉ta꞉ haleme wanda꞉hali pa꞉ta꞉ make Koda꞉ma꞉ oli ya nane hata꞉ pa̱a̱ peanialieke. Nikita꞉ mo puki lopa꞉niao pula꞉ pota꞉na꞉ pomonoyeke ipikana꞉ma꞉ nika꞉ pota꞉ walolo hata꞉ do haumanu pilieke laa leekeme. \p \v 80 Kutupa mo wekita꞉ epeke tupa꞉ daeyaata꞉ ipika꞉ temoko make daeyatia pulu hata꞉ mo Isulai wanda꞉halina꞉ leke popelekena꞉ haluekema꞉ handeteke hata꞉ mo hapu hayeke alena꞉ hao hayekeme. \c 2 \s1 Yesu mendiekeeki \r (Ma꞉tiu 1꞉18-25) \p \v 1 Mo Sisa Okasitasima꞉ ipika꞉ kilu tombuao hayeke da wanda꞉hali paeyaona꞉ bikimanu wape pina꞉yeke momba꞉lapa꞉peke laa leekeme. \v 2 Koto titina꞉ biki mimiki pita꞉ta꞉ mo Sitia nane handeteke hayeke kapomani tieke halita꞉ Kuliniasi hayekeme. \v 3 Koto leeke handaa wanda꞉hali paeyao biki mina꞉yeke ika꞉ da teke pa꞉ta꞉manu pemekeme. \v 4 Hali ma꞉nda꞉ Diosepeta꞉ mo Ka꞉lili nane hayeke da Na꞉sa꞉tete da mina꞉pa꞉laota꞉ mo Diudia nane hayeke da Beteleha꞉ma꞉ da pa꞉ta꞉ peekeme. Koto data꞉ hande kini hali Deipidi mendieke dae. Diosepeta꞉ Deipidina꞉ tapake hali hayekeeki yaalo koto da pa꞉ta꞉ peekeme. \v 5 Kutupa ipika꞉ wanda꞉ Meti yaapo biki mina꞉yeke pepekeme. \v 6 Metita꞉ weki loke lomba pitina꞉ pepekepate mo Beteleha꞉ma꞉ da pa꞉ta꞉ pua hata꞉ Meti weki hoki neekeme. \v 7 Kutupa ipika꞉ mupeke weki mendiata꞉ hokulupeke dau manuma꞉ ambulata꞉ kimisu wanda꞉halima꞉ hambo haemeke da pa꞉ta꞉ pelia꞉peke da dia꞉yeke handa kao ma꞉na꞉na꞉ ne halo haemeke u̱lu̱ pa꞉ta꞉ mea pua wiekeme. \s1 Enisolotonu pita꞉ sipisipi handeteke haemeke haliweki yaapo \p \v 8 Kutupa mandane sipisipi handeteke haemeke haliwekima꞉ta꞉ koto data꞉ pa ambu hapeke nane ika꞉ sipisipi ma꞉na꞉ titi timba handeteke haemekepate \v 9 Tekehalina꞉ enisolo homeke iki pa꞉ta꞉ opolo epeekeme. Kutupa mo Tekehali ipika꞉ pa̱a̱ pa꞉la꞉ ekima꞉ iki dupaeyekeme. Koto ekina꞉ mo haliwekima꞉ paala꞉ma꞉ wopu homemekepate \v 10 mo enisoloma꞉ iki pa꞉ta꞉ alota꞉ Paala꞉ma꞉ na homa꞉pepee. Iki pa꞉ta꞉ epeke pi seliapo loluekema꞉ epolome. Koto ekima꞉ta꞉ wanda꞉hali paeyao ta꞉na꞉ma꞉ homaalieke. \v 11 Ame do timbata꞉ oni hande Deipidina꞉ da teke pa꞉ta꞉ta꞉ ika꞉ da꞉taalo pa꞉la꞉ Tekehali amba꞉ mendia꞉la꞉me. Ipikita꞉ Tekehali Ketisoe. \v 12 Iki pa꞉ta꞉ I̱ma꞉ alo ekita꞉ ota꞉ pi aloma꞉ handolo pupe. Mo wekita꞉ dauma꞉ ambula bao mo kao ma꞉na꞉ manuma꞉ ne no haleme u̱lu̱na꞉ ula꞉ma꞉ handolo pupe laa leekeme. \p \v 13 Koto kone oli hepeni nane haemeke enisolo titi wopuma꞉ mo hande enisolo homeke ame̱le̱ apa꞉tao a꞉pa pambo hata꞉ Koda꞉na꞉ pi laaso hata꞉ alota꞉ \q1 \v 14 Oli ya manda hala꞉ Koda꞉na꞉ pi lapa꞉peke. \q1 Ipikana꞉ma꞉ ta꞉na꞉ma꞉ homolo hata꞉ kenkena꞉ haleme haliwekina꞉ puki lopaala꞉me laa lemekeme. \s1 Sipisipi handeteke haemeke haliwekima꞉ Yesu handolo pemekeeki \p \v 15 Mo hande enisolo tapake pa la꞉ka꞉la ya nane pemeke hoki nane mo ma꞉na꞉ handeteke haemeke haliwekima꞉ pi hotiolo hata꞉ alota꞉ Mo Tekehalima꞉ niki pa꞉ta꞉ la kia꞉ ekita꞉ oni Beteleha꞉ma꞉ da nane pa꞉la꞉eki handomana꞉ bape lemekeme. \v 16 Kotoeki laa a̱i̱ya puata꞉ Meti Diosepe yaapo handa꞉ wiata꞉ u̱lu̱ pa꞉ta꞉ hande weki wiekeeki handemekeme. \v 17 Mo ma꞉na꞉ handeteke haemeke haliwekima꞉ mo weki handolo hata꞉ hande enisoloma꞉ mo wekima꞉ pulu piekeeki iki pa꞉ta꞉ la kiekeeki manuta꞉ mo wanda꞉ hali yaapo pa꞉ta꞉ la halemekeme. \v 18 Kota꞉ koto haliwekima꞉ la halemeke ekimanu opimiki wanda꞉hali paeyaoma꞉ta꞉ penkilipa꞉tia pomimikime. \v 19 Kutupa Metima꞉ta꞉ hande pi paeyao pa꞉ta꞉ hone witolo hone wopu u pitiekeme. \v 20 Kutupata꞉ mo hande ma꞉na꞉ handeteke haemeke haliwekima꞉ pa la꞉ka꞉la pulu hata꞉ta꞉ mo enisoloma꞉ leeke tupa꞉ kone hande hau paeyao handaata꞉ Koda꞉na꞉ biki mina꞉liaaso hata꞉ pi laatia pemekeme. \s1 Yesuna꞉ biki halemekeeki \p \v 21 Kutupa pula homeke paeyeketa꞉ mo weki pa꞉ta꞉ sekemesaisi hau peaota꞉ ipika꞉ biki Yesu lemekeme. Mo weki a̱i̱ na pitiki haena꞉ hande enisoloma꞉ lahaleeke biki kone lemekeme. \s1 Yesu tembolo da pa꞉ta꞉ hatuku pepekeeki \p \v 22 Hande Mosesina꞉ pi ula꞉eki manuna꞉ wape pa꞉la꞉ tupa꞉ mo ankula꞉ epeaalo pieke nate epeeke handa mo wekita꞉ Tekehali pa꞉ta꞉ haluekema꞉ Diosepe Meti yaapoma꞉ ipiki hatuku Diutuseleme da pemekeme. \v 23 Tekehalina꞉ pi ula꞉ ekimanu pa꞉ta꞉ dupa wape pea ula꞉me. Mupeke nanema꞉ mendilimi weki paeyao Tekehali pa꞉ta꞉ mea haena꞉ lapa꞉peke laa wape pa꞉la꞉me. \v 24 Ma꞉nda꞉ make dupa wape pa꞉la꞉me. Homupiki ba yaapo o melipu panake ba yaapo lia hala꞉peke laa wape pa꞉la꞉ tupa꞉ ipilikana꞉ma꞉ mo ba yaapo Koda꞉ pa꞉ta꞉ lia haluekema꞉ pepekeme. \s1 Simionima꞉ piekeeki \p \v 25 Kutupa mo Diutuseleme da pa꞉ta꞉ta꞉ koke hali ma꞉nda꞉ Simioni hayekeme. Koto halima꞉ta꞉ Koda꞉ pa꞉ta꞉ paala꞉ma꞉ homa hata꞉ epeke hau pitolo hata꞉ make mo Isulai wanda꞉halina꞉ da꞉taalo pieke nate epena꞉ handeteke hao hayekeme. Ipikita꞉ Holi Sipitidi yaapo hayekeeki yolo hata꞉ \v 26 mo Holi Sipitidima꞉ ipiki pa꞉ta꞉ pi la꞉ witolo alota꞉ Neketa꞉ a̱i̱ na homeke pa halena꞉ kone mo Tekehalima꞉ pi la꞉ ula꞉ hali ipilieke. Mo Ketiso kone handilipikie laa pi la꞉ wiekeme. \v 27 Kutupata꞉ mo Holi Sipitidima꞉ Simioni hatuku mo tembolo da pa꞉ta꞉ peekeme. Kutupa mo hande pi wiekeeki puluekema꞉ Diosepe Meti yaapoma꞉ mo tembolo da pa꞉ta꞉ mo hande weki Yesu hatuku pepekepate \v 28 Simionima꞉ mo weki meata꞉ Koda꞉ pa꞉ta꞉ keiyae pi alo hata꞉ alota꞉ \q1 \v 29 Tekehalio. Ameta꞉ naka꞉ hande pi la꞉ wili ekita꞉ ota꞉ yaaleme. Koto ekina꞉ naka꞉ e pokaaso halina꞉ puki lopao pono lae. \q1 \v 30 Do ekina꞉ yeke loa꞉me. Naka꞉ hande wanda꞉hali da꞉taalo pa꞉la꞉ hali ame yaka lekema꞉ handolome. \q1 \v 31 Do hauta꞉ wanda꞉hali paeyaoma꞉ handolo haena꞉ piteleme. \q1 \v 32 Kutu pitolo hata꞉ ipikana꞉ma꞉ mo Diendaili wanda꞉hali pa꞉ta꞉ pa̱a̱ pa꞉la꞉eki haluekema꞉ make Isulai wanda꞉halina꞉ biki tieke wina꞉ loluekema꞉ make pilieke laa leekeme. \p \v 33 Koto pita꞉ta꞉ mo Simionima꞉ mo weki pa꞉ta꞉ leeke pi opuaata꞉ mo ateke inkiki yaapoma꞉ penkilipa꞉tia pomipikime. \v 34 Simionima꞉ iki epeaota꞉ mo wekina꞉ inkiki Meti pa꞉ta꞉ alota꞉ \q1 Isulai wanda꞉hali wopu mea da꞉taaluekema꞉ make hoeyaaluekema꞉ make Koda꞉ma꞉ do weki mea haena꞉ laa pa꞉la꞉me. \q1 Ipikita꞉ Koda꞉ma꞉ tombo leke haya꞉ka꞉na꞉ta꞉ wanda꞉hali wopuma꞉ ipiki pa꞉ta꞉ pi la la pitolo hata꞉ make \q1 \v 35 ika꞉ hone a꞉mbao wita꞉la꞉ ekimanu peneme yao lelimikie. Kutupa ka꞉nda꞉ pikieki ma꞉nda꞉ make kepete ne haake ekima꞉ leke naka꞉ puki awilieke laa leekeme. \s1 A꞉na꞉ma꞉ piekeeki \p \v 36 Mo A꞉sea tapake hali Pa꞉nuele ipika꞉ waneke A꞉na꞉ma꞉ta꞉ Koda꞉na꞉ pi la꞉mea halo hayeke wanda꞉ hayekeme. Ipika꞉ haliki yaapota꞉ bapi watake hata꞉ hao haliki homeekeme. \v 37 Ipikita꞉ koke wanda꞉ hata꞉ ipika꞉ bapita꞉ 84 yeekeme. Kutupa ipikana꞉ma꞉ mo tembolo da na mina꞉pa꞉lake timba make natena꞉ make Koda꞉ pa꞉ta꞉ panda꞉puniao hata꞉ ne pi wia꞉tiki pea yeni pu hatiki pu hayekeme. \v 38 Mo wanda꞉ta꞉ koto pita꞉ kone ipikana꞉ma꞉ koto pa꞉ta꞉ opolo puata꞉ mo weki handaata꞉ Koda꞉ pa꞉ta꞉ keiyae pi laata꞉ Koda꞉ma꞉ mo Diutuseleme wanda꞉hali da꞉taena꞉yeke handeteke haemeke wanda꞉hali paeyaoma꞉ opina꞉ mo wekina꞉ pi wotu leekeme. \p \v 39 Mo Tekehalina꞉ pi ula꞉ ekima꞉ pea꞉pa꞉peke la꞉la꞉ hau paeyao pu paeyaepeketa꞉ mo Ka꞉lili nane ota꞉ ipilika꞉ haepeke da Na꞉sa꞉tete nane paa pepekeme. \v 40 Kutupa mo wekita꞉ daeya hata꞉ honkopu hao hata꞉ make hone wopu u hayeketa꞉ Koda꞉ma꞉ epeatiki piekeme. \s1 Yesuta꞉ weki hata꞉ tembolo da pa꞉ta꞉ piekeeki \p \v 41 Bapi paeyaota꞉ Yesuna꞉ apa꞉ ama꞉ yaapota꞉ Diutuseleme nane mo Lombei Pupa Yapeeke nate mia꞉tiki pieke handaa pua꞉tiki pipikime. \v 42 Yesuta꞉ bapi kiki yaapo paeya ankena꞉ yaapo mieke natena꞉ta꞉ mo ne pamba꞉la꞉ nane ika꞉ pu haemeke tupa꞉ kone pemekeme. \v 43 Mo hande ne pamba paeyeketa꞉ ika꞉ da poluekema꞉ yeke pemekepate Yesuta꞉ Diutuseleme da pa hapelia hayekeme. Ipika꞉ apa꞉ ama꞉ yaapoma꞉ta꞉ do ekita꞉ hone na wipikime. \v 44 Ipilika꞉ honema꞉ta꞉ Yesuta꞉ mo hande ika꞉ mandakena꞉ pemeke wanda꞉hali ame̱le̱ amba꞉ pa꞉la꞉me hone wipikime. Kutupa nate homekena꞉ pota꞉ ipu hao welealo nane ipilika꞉ tapake make ipilika꞉ yankekemanu pitimiki alena꞉ opolo a꞉pa Yesu weimea pominolo hata꞉ lota꞉ putia pomipikime. \v 45 Kutu pipikipate Yesuta꞉ ota꞉ na handa꞉ u haota꞉ Diutuseleme nane paa la꞉ka꞉la pulu hata꞉ weiya꞉tiki pepekeme. \v 46 Nate tepo peaota꞉ oli yeni pu haemeke da pa꞉ta꞉ Yesu pitiekeeki handa꞉ wipikime. Yesuta꞉ mo Diu wanda꞉halina꞉ pi walo hayeke haliweki ame̱le̱ pita꞉ ika꞉ pi opitolo hata꞉ make lota꞉ pita꞉la꞉ ekimanu pitolo pitimikime \v 47 Yesuma꞉ta꞉ tandapiki hombo peatiki pieke ekina꞉ mo ipika꞉ pi opimiki wanda꞉hali paeyaota꞉ penkilipa꞉tia pomimikime. \v 48 Ipika꞉ apa꞉ ama꞉ yaapoma꞉ta꞉ Yesu hando haota꞉ penkilipa꞉tia pomipikime. Kutupa Yesuna꞉ ama꞉ma꞉ alota꞉ Ya wekio. Ekipeke nakana꞉ma꞉ diki pa꞉ta꞉ dupiki hau pea pelepe. Neke weitolo hata꞉ naka꞉ apa꞉ dikana꞉ma꞉ pomoma꞉ wotu homopa꞉me leekeme. \v 49 Yesuma꞉ inkikina꞉ pi hombo peaaso alota꞉ Ekipeke ipilikana꞉ma꞉ I̱ weiya꞉ mea pomua pelepepe. I̱ta꞉ yaka Apa꞉na꞉ da pa꞉ta꞉ pitoloeki ipilikana꞉ma꞉ta꞉ hone na wipipa꞉ laa loa꞉me leekeme. \v 50 Koto leekepate ipilikana꞉ma꞉ta꞉ koto ipikana꞉ma꞉ hombo peayeke pina꞉ teketa꞉ hone na wipikime. \p \v 51 Kutupata꞉ Yesuta꞉ ipika꞉ apa꞉ ama꞉ yaapona꞉ pi opua Na꞉sa꞉tete nane mandakena꞉ pemekeme. Kutupa ipika꞉ apa꞉ ama꞉ yaapona꞉ pi nate paeyao opua homu pea hayekeme. Kutu piekepate ipika꞉ ama꞉ma꞉ta꞉ mo hande lemeke pimanu paeyaota꞉ hone na yonka꞉lake hone pa wia hayekeme. \v 52 Kutupa Yesuta꞉ epeke honema꞉ tumba꞉tia daetolo hata꞉ kenke wanda꞉halina꞉ make Koda꞉na꞉ hone pa꞉la꞉ ekina꞉ make daeyekeme. \c 3 \s1 Mo bapitaisi peao hayeke hali Dionima꞉ pi waleekeeki \r (Ma꞉tiu 3꞉1-12, Maka 1꞉1-8, Dioni 1꞉19-28) \p \v 1 Mo Loma꞉ Kapomani titina꞉ You hali Sisa Taibitiasi ipika꞉ bapi 15 peao handeteke hayeke da yu paeyaota꞉ pa handeteke hayekeme. Koto pita꞉ma꞉ta꞉ ipikana꞉ma꞉ mea haena꞉ leeke Kapomani you haliweki manuma꞉ ika꞉ handeteke hatia epena꞉ leeke kenke manuta꞉ dupa handeteke haemekeme. Pontiasi Pailedita꞉ Diudia kenke handeteke hayekeme. Hetodita꞉ Ka꞉lili kenke handeteke hayekeme. Kutupa Hetodina꞉ hameke Pilipita꞉ Idulia make Data꞉kenaidisi koto kenke yaapo handeteke hayekeme. Laisaniasita꞉ Abilini kenke handeteke hayekeme. \v 2 Koto pita꞉ma꞉ kone A꞉nasi Kaiya꞉pasi yaapota꞉ Koda꞉na꞉ yeni peao haepeke you hali haena꞉ta꞉ mo hapu hayeke alena꞉ hayeke hali Sekataiyana꞉ eiyeke Dioni pa꞉ta꞉ta꞉ Koda꞉na꞉ pi epeekeme. \v 3 Kutu pieke handaata꞉ Dionima꞉ mo Diodani ikali tea꞉na꞉ wieke yu paeyao pa꞉ta꞉ Koda꞉na꞉ pi latiki pomuolo hata꞉ alota꞉ Wanda꞉halio. Iki paeyaoma꞉ ika꞉ amba꞉ pimi haumanu make ika꞉ honemanu make la꞉ka꞉la꞉ minaata꞉ bapitaisi peano lapa꞉peke. Koto haumanu ota꞉ pimika꞉na꞉ta꞉ kota꞉ Koda꞉ma꞉ ika꞉ pimi haumanu paeyaosiki paeyaaso hata꞉ paa na niminaalieke leekeme. \p \v 4 Koto Dionima꞉ pieke ekita꞉ amba꞉ titina꞉ Koda꞉na꞉ pi la halo hayeke hali ma꞉nda꞉ bikita꞉ Aisaya ipikana꞉ma꞉ bukana꞉ wape pea ula꞉ ekita꞉ dupa la꞉la꞉me. \q1 Hali ma꞉nda꞉ma꞉ hapupapeke alena꞉ hata꞉ wi laa dupiki pi ala꞉me. \q1 Tekehalina꞉ pota꞉ tikitiki yao wia꞉pa꞉peke. \q1 Ipiki epeke tupa꞉ epena꞉ mo ipika꞉ pota꞉ wamo peao mea tikitiki yao epeapa꞉peke. \q1 \v 5 Kutupata꞉ mo hawete manuta꞉ mea tumbapa꞉peke. \q1 Mo yu elimanu make mo potemanu make paeyao ao tumbaota꞉ mandake pina꞉ lapa꞉peke. \q1 Kutu pitolo hata꞉ mo pota꞉ hoihoi pa꞉la꞉ ekimanu make ota꞉ epeke tupa꞉ tikitikina꞉ mea epeaaso hata꞉ \q1 mo hana꞉manu pota꞉na꞉ wekila꞉la꞉ ekimanu make ota꞉ epeke tupa꞉ tikitiki yao epeapa꞉peke. \q1 \v 6 Kutu pimikina꞉ta꞉ kota꞉ wanda꞉hali paeyaoma꞉ Koda꞉na꞉ kita꞉la꞉ da꞉ta꞉la꞉eki handilimikie laa la꞉la꞉me leekeme. \p \v 7 Koto dina꞉ta꞉ wanda꞉hali wotuma꞉ Dionima꞉ iki bapitaisi peaena꞉yeke paeyao epemekeme. Kutu pimiki handaa Dionima꞉ koto wanda꞉hali pa꞉ta꞉ alota꞉ Ikita꞉ ketomanue. Ikita꞉ Koda꞉ma꞉ teke pa꞉ta꞉ epena꞉ lolo pa꞉la꞉ mineke panka꞉la꞉ ekita꞉ wonduluekema꞉ hamena꞉ laa ma꞉nda꞉ epita꞉ pindipa pelimiki pita꞉ epima꞉ kinki pa꞉la꞉pe. \v 8 Ika꞉ pimi hoke haumanu paeyao amba꞉ hoki waleme ekina꞉ wanda꞉halima꞉ handena꞉ mo epeke kiliki a꞉ela꞉ tima꞉ pa꞉la꞉eki pina꞉ epeke haumanu pea꞉pa꞉peke. Koto ekina꞉ta꞉ ikana꞉ma꞉ Nika꞉ meita꞉ Eipoloha꞉ma꞉e laa kutupiki pimanu na lapa꞉peke laata꞉ Dionima꞉ iki pa꞉ta꞉ alota꞉ Opua꞉pe. Koda꞉ma꞉ do toopimanu meaata꞉ Eipoloha꞉ma꞉na꞉ mondu semba꞉lala꞉ wanda꞉hali ana꞉na꞉ wepia haena꞉ lapeke ya꞉la꞉me alome. \v 9 Hande hapula꞉ ti manuna꞉ teke pa꞉ta꞉ pokuluekema꞉ manda꞉ meaowa꞉me leekeme. Epeke kiliki na a꞉eya꞉la꞉ timanu paeyao siki poko lopaota꞉ ti talo hala꞉ pa꞉ta꞉ paeyao siki mu yankilieke leekeme. \p \v 10 Do pimanu opua mo wanda꞉halima꞉ Dioni pa꞉ta꞉ lota꞉ pitolo hata꞉ alota꞉ Kota꞉ nikana꞉ma꞉ta꞉ eki hau peomonope lemekeme. \v 11 Dionima꞉ ika꞉ pi hombo peaaso hata꞉ alota꞉ Hali ma꞉nda꞉ma꞉ ipika꞉ dau yaapo wia꞉ka꞉na꞉ta꞉ kota꞉ ma꞉nda꞉ta꞉ mo dau dia꞉ya꞉la꞉ natehali ma꞉nda꞉ pa꞉ta꞉ hala꞉peke. Kutupa make ne napekeeki wia꞉ka꞉na꞉ta꞉ kota꞉ ne dia꞉ya꞉la꞉ wanda꞉halimanu pa꞉ta꞉ telipea hala꞉pa꞉pekee leekeme. \v 12 Koto natena꞉ta꞉ mo mandane dakisi mani mu haemeke haliwekima꞉ Dionima꞉ iki bapitaisi peaena꞉ ipiki a꞉pa lota꞉ pitolo alota꞉ Wala꞉la꞉ halio. Nikana꞉ma꞉ta꞉ eki hau piomonope laa lota꞉ pimikime. \v 13 Koto lemeke Dionima꞉ hombo peaaso alota꞉ Ikana꞉ma꞉ mo wanda꞉halina꞉ dakisi mani mimika꞉na꞉ta꞉ kota꞉ haka꞉ta꞉pao na miki mo Kapomanina꞉ Lo pima꞉ tombo ula꞉ tupa꞉ mia꞉pa꞉peke leekeme. \v 14 Mandane ami haliwekima꞉ make a꞉pa lota꞉ pitolo hata꞉ alota꞉ Nikana꞉ma꞉ make ekipiki haumanu peomonope lemekeme. Koto lemeke Dionima꞉ iki pa꞉ta꞉ alota꞉ Ma꞉nda꞉na꞉ mani pake muluekema꞉ paala꞉ tiao o yayapiki ekina꞉ pa hameke la꞉ tiaasa꞉eki ota꞉ na pea꞉pa꞉peke. Kutupa ika꞉ e pokaasemeke kita꞉la꞉ yenkita꞉ ana꞉na꞉ kita꞉la꞉me hone wia꞉pa꞉peke leekeme. \p \v 15 Mo wanda꞉halima꞉ koto haumanu paeyao handaata꞉ ika꞉ puki pa꞉ta꞉ hayeke ale tialu baeyeke ekima꞉ta꞉ ikana꞉ma꞉ hone eleke eleke witolo hata꞉ta꞉ do Dionita꞉ hande Ketiso pateya꞉la꞉me laa hone wimikime. \v 16 Koto ekina꞉ Dionima꞉ iki pa꞉ta꞉ alota꞉ I̱ma꞉ ikita꞉ ikalima꞉ bapitaisi peao halopate hali ma꞉nda꞉ wetepena꞉ ipilia꞉ halita꞉ ota꞉ honkopu wotu hala꞉me. I̱ta꞉ ipiki yaapo ana꞉ pea꞉peke na ya꞉la꞉me. Ipika꞉ anke dake holaapeke make I̱ta꞉ ana꞉ na pa꞉la꞉me leekeme. Ipikana꞉ma꞉ ikita꞉ Holi Sipitidi pita꞉ ti uleke yaapoma꞉ bapitaisi pealieke leekeme. \v 17 Ipikana꞉ma꞉ mo hande widi kilikina꞉ ambuku napeke yaapo putupa alu puluekema꞉ pana꞉pulu pa꞉la꞉ sa꞉sata꞉ ipika꞉ kikina꞉ miniki hala꞉me. Ipika꞉ widi kiliki epekeeki paeyaota꞉ ipika꞉ widi napeke u hala꞉ da pa꞉ta꞉ momba꞉la wilieke. Pate mo ambuku paeyaota꞉ tina꞉ pana꞉pu yankilieke. Koto tita꞉ na paeyeke pa to halieke leekeme. \p \v 18 Mo wanda꞉hali ika꞉ hoke haumanu hoki wala puki hone lekelena꞉yeke Dionima꞉ Koda꞉na꞉ Pi Seliapomanu ota꞉ epeke tupa꞉ la hala꞉tiki pominolo hata꞉ wanda꞉hali sutiatia pua꞉tiki pomiekeme. \p \v 19 Koto pa꞉la꞉pate Dionima꞉ mo kapomani hali tieke Hetodi pa꞉ta꞉ la halolo hata꞉ alota꞉ Neketa꞉ hoke haumanu peleme laa la haleekeme. Ekipeke. Hetodi ipika꞉ hamekena꞉ weteke Hetodiasi pa ipika꞉ handa꞉mea make ipikana꞉ma꞉ ti teke wotu yoka꞉tiki pomieke handa leekeme. \v 20 Koto leeke ekina꞉ Hetodi ipikana꞉ma꞉ Dioni dipula mea lopaeyeke ekima꞉ta꞉ mo ipika꞉ amba꞉ pieke hoke haumanu paeyaota꞉ koto ekima꞉ lu ankula yeekeme. \s1 Dionima꞉ Yesu bapitaisi peayekeeki \r (Ma꞉tiu 3꞉13-17, Maka 1꞉9-11) \p \v 21 Kutupa Dionima꞉ wanda꞉hali paeyao siki bapitaisi hau peaota꞉ wetepe nane Yesu make bapitaisi hau peayekeme. Kutupa Yesuma꞉ yeni pitolo haena꞉ta꞉ oli hepeni lumba \v 22 mo Holi Sipitidita꞉ ba melipuma꞉ handekeeki hola꞉pa꞉niao Yesuna꞉ lokena꞉ a꞉pa holopeekeme. Kutaa oli ya nanema꞉ pi ho̱la̱꞉make homekema꞉ pi alo alota꞉ Neketa꞉ ota꞉ yaka puki piki wekie. Yaka pukima꞉ neke pa꞉ta꞉ ta꞉na꞉ma꞉ wotu homolome leekeme. \s1 Yesuna꞉ apa꞉meina꞉ bikimanu \r (Ma꞉tiu 1꞉1-17) \p \v 23 Yesu ipika꞉ bapita꞉ hali tieke homeke paeyao kiki yaapo bapimanu tupa꞉ yeketa꞉ ipika꞉ e kinipea pokeekeme. Mo wanda꞉halima꞉ hone witolota꞉ ipikita꞉ Diosepena꞉ eiyekee hone wimikime. \q1 Diosepe ipikita꞉ Helina꞉ eiyeke hayekeme. \q1 \v 24 Helita꞉ Madadina꞉ eiyeke hayekeme. \q1 Madadita꞉ Lipaena꞉ eiyeke hayekeme. \q1 Lipaeta꞉ Mela꞉kina꞉ eiyeke hayekeme. \q1 Mela꞉kita꞉ Dia꞉naina꞉ eiyeke hayekeme. \q1 Dia꞉naita꞉ Diosepena꞉ eiyeke hayekeme. \q1 \v 25 Diosepeta꞉ Mataatiasina꞉ eiyeke hayekeme. \q1 Mataatiasita꞉ Amosina꞉ eiyeke hayekeme. \q1 Amosita꞉ Nahumina꞉ eiyeke hayekeme. \q1 Nahumita꞉ Eselina꞉ eiyeke hayekeme. \q1 Eselita꞉ Nakaina꞉ eiyeke hayekeme. \q1 \v 26 Nakaita꞉ Maadina꞉ eiyeke hayekeme. \q1 Maadita꞉ Mataatiasina꞉ eiyeke hayekeme. \q1 Mataatiasita꞉ Semenina꞉ eiyeke hayekeme. \q1 Semenita꞉ Diosekina꞉ eiyeke hayekeme. \q1 Diosekita꞉ Diodana꞉ eiyeke hayekeme. \b \q1 \v 27 Diodata꞉ Dioananina꞉ eiyeke hayekeme. \q1 Dioananita꞉ Etesana꞉ eiyeke hayekeme. \q1 Etesata꞉ Setubabelena꞉ eiyeke hayekeme. \q1 Setubabeleta꞉ Sieletielina꞉ eiyeke hayekeme. \q1 Sieletielita꞉ Netina꞉ eiyeke hayekeme. \q1 \v 28 Netita꞉ Melekina꞉ eiyeke hayekeme. \q1 Melekita꞉ A꞉dina꞉ eiyeke hayekeme. \q1 Adita꞉ Kosamina꞉ eiyeke hayekeme. \q1 Kosamita꞉ Elemadamina꞉ eiyeke hayekeme. \q1 Elemadamita꞉ A꞉eta꞉na꞉ eiyeke hayekeme. \q1 \v 29 A꞉eta꞉ta꞉ Diosuana꞉ eiyeke hayekeme. \q1 Diosuata꞉ A꞉liesana꞉ eiyeke hayekeme. \q1 A꞉liesata꞉ Diotamana꞉ eiyeke hayekeme. \q1 Diotamata꞉ Madadina꞉ eiyeke hayekeme. \q1 Madadita꞉ Lipaena꞉ eiyeke hayekeme. \q1 \v 30 Lipaeta꞉ Simionina꞉ eiyeke hayekeme. \q1 Simionita꞉ Diudana꞉ eiyeke hayekeme. \q1 Diudata꞉ Diosepena꞉ eiyeke hayekeme. \q1 Diosepeta꞉ Dionamena꞉ eiyeke hayekeme. \q1 Dionameta꞉ Elaia꞉kimina꞉ eiyeke hayekeme. \b \q1 \v 31 Elaia꞉kimita꞉ Meleana꞉ eiyeke hayekeme. \q1 Meleata꞉ Menana꞉ eiyeke hayekeme. \q1 Menata꞉ Madadana꞉ eiyeke hayekeme. \q1 Madadata꞉ Neidanina꞉ eiyeke hayekeme. \q1 Neidanita꞉ Deipidina꞉ eiyeke hayekeme. \q1 Deipidita꞉ Diesina꞉ eiyeke hayekeme. \q1 \v 32 Diesita꞉ Obedina꞉ eiyeke hayekeme. \q1 Obedita꞉ Boa꞉sina꞉ eiyeke hayekeme. \q1 Boa꞉sita꞉ Sa꞉limonina꞉ eiyeke hayekeme. \q1 Sa꞉limonita꞉ Na꞉sionina꞉ eiyeke hayekeme. \q1 \v 33 Na꞉sionita꞉ Amina꞉da꞉bena꞉ eiyeke hayekeme. \q1 Amina꞉da꞉beta꞉ A꞉da꞉minina꞉ eiyeke hayekeme. \q1 A꞉da꞉minita꞉ Anina꞉ eiyeke hayekeme. \q1 Anita꞉ Hesotonona꞉ eiyeke hayekeme. \q1 Hesotonota꞉ Petesena꞉ eiyeke hayekeme. \q1 Peteseta꞉ Diudana꞉ eiyeke hayekeme. \b \q1 \v 34 Diudata꞉ Dieikopena꞉ eiyeke hayekeme. \q1 Dieikopeta꞉ Aisa꞉kena꞉ eiyeke hayekeme. \q1 Aisa꞉keta꞉ Eipoloha꞉ma꞉na꞉ eiyeke hayekeme. \q1 Eipoloha꞉ma꞉ta꞉ Titana꞉ eiyeke hayekeme. \q1 Titata꞉ Neihona꞉ eiyeke hayekeme. \q1 \v 35 Neihota꞉ Setakona꞉ eiyeke hayekeme. \q1 Setakota꞉ Eteyuna꞉ eiyeke hayekeme. \q1 Eteyuta꞉ Pelekena꞉ eiyeke hayekeme. \q1 Peleketa꞉ Ebena꞉ eiyeke hayekeme. \q1 Ebeta꞉ Silana꞉ eiyeke hayekeme. \q1 \v 36 Silata꞉ Keinanina꞉ eiyeke hayekeme. \q1 Keinanita꞉ Apa꞉ka꞉sa꞉dina꞉ eiyeke hayekeme. \q1 Apa꞉ka꞉sa꞉dita꞉ Siemena꞉ eiyeke hayekeme. \q1 Siemeta꞉ Noana꞉ eiyeke hayekeme. \q1 Noata꞉ Lamekena꞉ eiyeke hayekeme. \b \q1 \v 37 Lameketa꞉ Madiuselana꞉ eiyeke hayekeme. \q1 Madiuselata꞉ Inokana꞉ eiyeke hayekeme. \q1 Inokata꞉ Dia꞉tedina꞉ eiyeke hayekeme. \q1 Dia꞉tedita꞉ Mahalalielina꞉ eiyeke hayekeme. \q1 Mahalalielita꞉ Kenanina꞉ eiyeke hayekeme. \q1 \v 38 Kenanita꞉ Inosina꞉ eiyeke hayekeme. \q1 Inosita꞉ Sedena꞉ eiyeke hayekeme. \q1 Sedeta꞉ A꞉da꞉ma꞉na꞉ eiyeke hayekeme. \q1 A꞉da꞉ma꞉ta꞉ Koda꞉na꞉ eiyeke hayekeme. \c 4 \s1 Sadanima꞉ Yesu la handeeke ekimanu \r (Ma꞉tiu 4꞉1-11, Maka 1꞉12-13) \p \v 1 Yesuta꞉ mo Diodani ikali mina꞉pa꞉lao paa epeeke pita꞉ma꞉ta꞉ mo Holi Sipitidima꞉ ipiki pa꞉ta꞉ ota꞉ tumbiekeme. Koto dina꞉ta꞉ mo hande Holi Sipitidima꞉ Yesuta꞉ hapupapeke alena꞉ hatuku peekeme. \v 2 Koto pa꞉ta꞉ta꞉ nate hali tieke yaapo pa꞉ta꞉ Sadanima꞉ Yesu a꞉pa la handa꞉tiki piekeme. Koto hali tieke yaapo nate manuna꞉ta꞉ Yesuma꞉ ala꞉ta꞉ ma꞉nda꞉ siki make ota꞉ na neeke ekima꞉ tea꞉ma꞉ homeekeme. \p \v 3 Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ kota꞉ do toopi kone palaowa au lapeke leekeme. \v 4 Yesuma꞉ mo Sadanina꞉ pi litolo hata꞉ alota꞉ Mo Baiboloma꞉ alota꞉ Halima꞉ palaowa homeke naa na hapeke ya꞉la꞉me laa la꞉la꞉me leekeme. \p \v 5 Kutupa mo Sadanima꞉ Yesu oli manda hatuku pua mo kenkena꞉ kilu tombuao hala꞉ ekimanu paeyao siki ti tekele pea ipiki pa꞉ta꞉ waleekeme. \v 6 Kutu pitolo hata꞉ mo Sadanima꞉ Yesu pa꞉ta꞉ alota꞉ Mo alemanu paeyaota꞉ I̱ pa꞉ta꞉ ka꞉la꞉pate yaka honema꞉ta꞉ hali ma꞉nda꞉ pa꞉ta꞉ haloa꞉ka꞉na꞉ta꞉ ota꞉ ana꞉ pilieke. Koto ekina꞉ta꞉ mo kilu tombuao hala꞉ ekimanu paeyao pita꞉ ika꞉ hamoko alemanu paeyao telipina꞉ nakana꞉ma꞉ handeteke halena꞉ neke kuluekema꞉ \v 7 neketa꞉ ya biki laaluekema꞉ panda꞉ puniaeka꞉na꞉ta꞉ do alemanu paeyaota꞉ naka꞉eki yelieke leekeme. \v 8 Koto leeke Yesuma꞉ alota꞉ Mo Baiboloma꞉ dupa la꞉la꞉me. Tekehali naka꞉ Koda꞉ ipiki pa꞉ta꞉ homeke yeni pu hata꞉ e poko hapeke laa la꞉la꞉me leekeme. \v 9 Pa mo Sadanima꞉ Yesu mo Diutuseleme nane yeni pu haemeke da tiekena꞉ holu manda hatuku pua haena꞉ leekeme. Kutupa Sadanima꞉ Yesu pa꞉ta꞉ alota꞉ Neketa꞉ ota꞉ Koda꞉na꞉ Eiyeke ya꞉ka꞉na꞉ta꞉ do alena꞉ hao oni kenkena꞉ naka꞉ kone lopa꞉niae. \v 10 Kutu pikina꞉ta꞉ mo Baiboloma꞉ la꞉la꞉ tupa꞉ Koda꞉ma꞉ ipika꞉ enisolo tonuma꞉ neke epeke tupa꞉ handeteke haena꞉ laa pi lelieke la꞉la꞉me. \v 11 Kutupa mo Baiboloma꞉ paa la꞉la꞉ tupa꞉ Koto enisolo tonuma꞉ toopi ponekema꞉ naka꞉ anke awaama꞉na꞉yeke ika꞉ kiki manuma꞉ neke miniliao handeteke halimikie laa la꞉la꞉me leekeme. \v 12 Koto leekepate Yesuma꞉ ipika꞉ pi litolo hata꞉ alota꞉ Baibolo pima꞉ta꞉ do la꞉la꞉me. Tekehali naka꞉ Koda꞉ta꞉ na la handa꞉peke laa la꞉la꞉me leekeme. \v 13 Mo Sadanima꞉ Yesu pa꞉ta꞉ hoke la handa꞉la꞉ ekimanu ane mone eki paeyao siki peaata꞉ pa hosiki mina꞉pa꞉lao peekeme. \s1 Yesuma꞉ ipika꞉ emanu kini piekeeki \r (Ma꞉tiu 4꞉12-17, Maka 1꞉14-15) \p \v 14 Mo Holi Sipitidina꞉ honkopuma꞉ Yesu handeteke haena꞉ laa Yesu mo Ka꞉lili nane paa peekeme. Kutupa koto da yu paeyao pa꞉ta꞉ haemeke wanda꞉halima꞉ Yesuna꞉ biki kende tupa꞉ wina꞉ lemekeme. \v 15 Ipikana꞉ma꞉ Koda꞉na꞉ pi hotu haemeke damanu pa꞉ta꞉ pua꞉tiki pea wanda꞉hali pa꞉ta꞉ pi wala꞉tiki pomieke handaata꞉ mo wanda꞉hali paeyaoma꞉ ipika꞉ biki mea miniliatiki pimikime. \s1 Na꞉sa꞉tete da wanda꞉halima꞉ Yesu kiaemekeeki \r (Ma꞉tiu 13꞉53-58, Maka 6꞉1-6) \p \v 16 Kutupa Yesu ipika꞉ daeyeke da Na꞉sa꞉tete da pa꞉ta꞉ pua ipika꞉ pu hayeke tupa꞉ Diu wanda꞉halina꞉ hoto pitu haemeke natena꞉ Koda꞉na꞉ pi hotu haemeke da pa꞉ta꞉ peekeme. Kutupa ipikana꞉ma꞉ mo Baibolo buka yata꞉puluekema꞉ yeke tiao hayekeme. \v 17 Hali ma꞉nda꞉ma꞉ mo Koda꞉na꞉ potopede hali Aisayama꞉ wape pu wieke buka Yesu pa꞉ta꞉ haleekeme. Kota꞉ Yesuma꞉ mo buka lombaata꞉ handa꞉tiki pua pi ma꞉nda꞉ dupa laeyekeeki handa꞉ witolo hata꞉ yata꞉peekeme. \q1 \v 18 I̱ma꞉ natehali wanda꞉hali pa꞉ta꞉manu mo Pi Seliapomanu laanoyeke mo I̱ mea haena꞉ la꞉la꞉ Tekehalima꞉ ipika꞉ Sipitidi I̱ yaapo hala꞉me. \q1 Ipikana꞉ma꞉ I̱ tapaala꞉ ekita꞉ mo dipula pila꞉ wanda꞉hali ikita꞉ ka꞉la꞉pa꞉ tapao halememe lono make mo leke holupiki wanda꞉hali ikita꞉ ika꞉ leke manuma꞉ paa handilimikie laa lonoyeke tapaala꞉me. \q1 Kutupa make mo ika꞉ ka꞉nda꞉ manuma꞉ kone tekepa꞉ta꞉ hoeyaapeke ya꞉la꞉ wanda꞉hali ka꞉la꞉pa꞉ tapawano make \v 19 wanda꞉hali wotu pa꞉ta꞉ta꞉ Tekehalima꞉ ipika꞉ wanda꞉hali tamba꞉ mulu pa꞉la꞉ nate a꞉pa hala꞉me laa lono yeke I̱ tapaala꞉me laa leekeeki yata꞉peekeme. \p \v 20 Yesuma꞉ mo buka yata꞉paata꞉ amba꞉ bukamanu handeteke hayeke hali pa꞉ta꞉ paa hala꞉ moneao pitiniaeyekeme. Kota꞉ mo Koda꞉na꞉ pi hotu haemeke da pa꞉ta꞉ pitimiki wanda꞉hali paeyao sikima꞉ Yesu handolo hata꞉ yola꞉ pambemekeme. \v 21 Kota꞉ Yesuma꞉ iki pa꞉ta꞉ pi alo hata꞉ alota꞉ Do yata꞉pa kua꞉ hande Baibolo pita꞉ ikana꞉ma꞉ opitolo hamena꞉ kone ota꞉ ame do kone yaya꞉me leekeme. \v 22 Ipika꞉ leeke pi manuma꞉ tende pieke handaa iki paeyao siki leke opa penkiliputia pominolo hata꞉ make haleke lomba mo ikana꞉ma꞉ ipikina꞉ do pi lemekeme. Ipikita꞉ Diosepena꞉ eiyeke dia꞉yekea laa ika꞉ ika꞉ kone lota꞉ pu alu alu pimikime. \p \v 23 Koto lemeke handaa Yesuma꞉ mo wanda꞉hali pa꞉ta꞉ alota꞉ Ota꞉ loa꞉me laa Ikana꞉ma꞉ I̱ pa꞉ta꞉ make mo wanda꞉halima꞉ amba꞉ loma꞉ loma꞉ pa꞉la꞉me pi siki ma꞉nda꞉ dupa lelimikie. Dokeda halio. Naka꞉ yenita꞉ naka꞉ kone mea epeapeke lelimikie. Kutupa pi ma꞉nda꞉ make I̱ pa꞉ta꞉ dupa lelimikie. Hau ma꞉nda꞉ ma꞉nda꞉ mo Kapeneami teke da nane hata꞉ pi hande hau manuta꞉ nikana꞉ma꞉ amba꞉ opuma꞉me. Kota꞉ do naka꞉ ota꞉ teke da pa꞉ta꞉ make kutupiki homeke haumanu kone pie laa lelimikie laata꞉ \v 24 Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ alome. Koda꞉na꞉ pi wala꞉la꞉ potopede hali ipika꞉ teke wanda꞉halima꞉ ipiki hone wotu na wilimikie. \v 25 Opua꞉pe. I̱ma꞉ iki pa꞉ta꞉ ota꞉ pi alome. Mo Elaidia hayeke dina꞉ta꞉ kineke wanda꞉ sunuta꞉ wotu aneke hapu mo Isulai da yu pa꞉ta꞉ haemekeme. Koto natena꞉ bapi tepona꞉ sumba꞉ yunki mindiki hata꞉ lako ota꞉ na a꞉paata꞉ da yu paeyao pa꞉ta꞉ tea꞉ma꞉ homa꞉la꞉eki wotu aneke hapu epeekeme. \v 26 Kutu piekepate Koda꞉ma꞉ Elaidiata꞉ Isulai da yu pa꞉ta꞉ hayeke wanda꞉hali ma꞉nda꞉ pa꞉ta꞉ na tapaeyekepate ipikita꞉ mo Saidoni da yu tukiki pa꞉ta꞉ hayeke teke da Sa꞉tepa꞉di hayeke kineke wanda꞉ homeke pa꞉ta꞉ tapaeyekeme. \v 27 Kutupa make Koda꞉na꞉ pi la꞉ mea halo hayeke hali Elaisa hayeke dina꞉ta꞉ kindi yeni homo haemeke wanda꞉hali wotu anekema꞉ mo Isulai da yu pa꞉ta꞉ haemekepate Koda꞉ma꞉ koto wanda꞉halita꞉ ota꞉ ma꞉nda꞉ hondo na mea epeaeyekepate pa Sitia da yu pa꞉ta꞉ hayeke hali Neimana꞉ homeke mea epeaeyekeme leekeme. \p \v 28 Mo Koda꞉na꞉ pi hotu haemeke da pa꞉ta꞉ pitimiki wanda꞉halima꞉ koto pi leekeeki opua ikana꞉ma꞉ mineke tieke wotu pankemekeme. \v 29 Kutupa ikana꞉ma꞉ tiao Yesu minaa ika꞉ teke da mina꞉pa꞉lao hama nane yolaa pemekeme. Mo ika꞉ teke data꞉ pote elina꞉ hayekeeki yaalo Yesu mo pote elina꞉ hatuku pua oni paeleke alena꞉ poneke wato lopaaluekema꞉ hatuku pemekeme. \v 30 Kutu pimikipate Yesuta꞉ mo wanda꞉hali anka꞉lopuna꞉ pa꞉ta꞉ kone pa pa꞉nka꞉pa peekeme. \s1 Yesuma꞉ hoke temoko baena꞉ leekeeki \r (Maka 1꞉21-28) \p \v 31 Kutupa Yesuta꞉ mo Ka꞉lili da yu pa꞉ta꞉ hayeke teke da Kapeneami nane peekeme. Puaata꞉ mo hoto pitu haemeke natena꞉ wanda꞉hali pa꞉ta꞉ pi waleekeme. \v 32 Mo wanda꞉halima꞉ta꞉ Yesuma꞉ waleekeeki opuaata꞉ leke opo handake wimikime. Pa ekipeke. Ipikana꞉ma꞉ biki ula꞉ halima꞉ wala꞉la꞉ tupa꞉ waleeke handaa pimikime. \v 33 Mo pi hotu haemeke da pa꞉ta꞉ta꞉ hoke temoko pitieke hali ma꞉nda꞉ hayekeme. Koto halima꞉ Yesu handaata꞉ ipiki pa꞉ta꞉ wi aneke hapu la alota꞉ \v 34 Ae. Yesu Na꞉sa꞉tete da halio. Nakana꞉ma꞉ta꞉ niki ame̱le̱ eki puluekema꞉ a꞉pa pipa꞉ laata꞉ Neke epele ekita꞉ niki paeyao mea hoeyaaluekema꞉ a꞉pa pipe. Neketa꞉ I̱ma꞉ hone witolome. Neketa꞉ Koda꞉ma꞉ tapaeya꞉ yako piki hali ya꞉ka꞉ta꞉me leekeme. \v 35 Koto ekina꞉ Yesuma꞉ mo hoke temoko pa꞉ta꞉ tandapiki pi alo hata꞉ alota꞉ Neketa꞉ koto hali ota꞉ mina꞉pa꞉lao naka꞉ pi na leke a̱i̱ hosiki ya꞉la꞉na꞉ kone yopue leekeme. Koto pi leekeeki opua mo hoke temokoma꞉ mo wanda꞉halina꞉ leke taapuna꞉ mo hali mea wato lopao yopusiki hama nane opolu baeyekepate mo halina꞉ loke ma꞉nda꞉ na mea hoeyaeyekeme. \v 36 Koto eki handaata꞉ wanda꞉hali paeyao sikima꞉ penkilipa꞉tia pomua ika꞉ ika꞉ kone pi la alu alu pitolo hata꞉ alota꞉ Dota꞉ ekipiki pimanu ala꞉pe laata꞉ Do halita꞉ you hali ma꞉nda꞉ma꞉ leke nono pita꞉la꞉ tupa꞉ mo hoke temokomanu pa꞉ta꞉ dupi dupi aleke handaa hama ipulimime lemekeme. \v 37 Koto ekina꞉ta꞉ wanda꞉hali manuma꞉ Yesuma꞉ pieke ekimanu handaata꞉ da yu ma꞉nda꞉ ma꞉nda꞉ pa꞉ta꞉manu kendetia pomimikime. \s1 Wanda꞉hali wopu Yesuma꞉ epeaeyekeeki \r (Ma꞉tiu 8꞉14-17, Maka 1꞉29-34) \p \v 38 Yesu mo Koda꞉na꞉ pi hotu haemeke da mina꞉pa꞉laota꞉ Saimonona꞉ da pa꞉ta꞉ peekeme. Saimonona꞉ meiyeke wanda꞉ta꞉ titipu yeni tiekema꞉ homa꞉pa wieke handaa ikana꞉ma꞉ Yesu pa꞉ta꞉ mo wanda꞉na꞉ yeni hayeke tupa꞉ la halemekeme. \v 39 Kota꞉ ipiki pua mo wanda꞉ homa꞉pa wieke alena꞉ pa꞉ta꞉liki nane pua tiao hata꞉ mo hande titipu yeni hayeke ekima꞉ mo wanda꞉ mina꞉pa꞉laena꞉ tanda piki pi leekeme. Kutupiki pi leeke handaata꞉ mo yenima꞉ mo wanda꞉ mina꞉pa꞉lao tandela꞉pa yapeeke handaata꞉ koto kone mo wanda꞉ma꞉ tiao hata꞉ mo tapakena꞉ ne wamo peayekeme. \p \v 40 Nate amba꞉ pambeeke hoki naneta꞉ wanda꞉halima꞉ ika꞉ yankeke sunu ane mone yeni manuma꞉ homa꞉pa wia꞉tiki pimiki yeke handaa Yesu teke pa꞉ta꞉ mea epemeke handaa ipikana꞉ma꞉ ipika꞉ kiki iki manda wia꞉tiki pieke handaa paeyao mea epeatiki piekeme. \v 41 Kutupata꞉ mo hoke temoko manuma꞉ wanda꞉hali aneke tukiki pa꞉ta꞉ pita e̱ la꞉tiki yopulu hata꞉ alota꞉ Neketa꞉ Koda꞉na꞉ eiyekee lemekeme. Yesuma꞉ mo hoke temoko manuma꞉ pi ma꞉nda꞉ laama꞉na꞉ pi taka꞉lake leekeme. Pa ekipeke. Ika꞉ hone wimikipate ipikita꞉ hande Mesaya yeke handaa pimikime. \s1 Hotu haemeke damanu pa꞉ta꞉ pi waleekeeki \r (Maka 1꞉35-39) \p \v 42 Da panake kelepolo haena꞉ Yesu ipikita꞉ koto teke da mina꞉pa꞉lao wanda꞉hali na hala꞉ da yu ma꞉nda꞉ pa꞉ta꞉ ipika꞉ honumake siki peekeme. Kota꞉ mo wanda꞉halima꞉ Yesu ipiki pu moneaekeeki weitia pomu hao ipiki hayeke pa꞉ta꞉ pua handa꞉ witolota꞉ ika꞉ ta꞉na꞉ piki ekita꞉ Yesuma꞉ iki na kiao pena꞉ hone wia sa꞉sa꞉ puluekema꞉ taapemekeme. \v 43 Koto hau pimikipate Yesuma꞉ iki pa꞉ta꞉ alota꞉ Koda꞉ma꞉ I̱ tapaala꞉ ekita꞉ ipika꞉ Kilu Tombuao Hala꞉ ekina꞉ Pi Seliapo mandane teke da ma꞉nda꞉ ma꞉nda꞉ pa꞉ta꞉ haleme wanda꞉halimanu pa꞉ta꞉ make walono yeke I̱ tapaeya꞉me leekeme. \v 44 Koto ekina꞉ta꞉ mo da yu paeyao pa꞉ta꞉ ika꞉ pi hotu haemeke da pa꞉ta꞉manu pomu lopa꞉tia pominolo hata꞉ Koda꞉na꞉ pimanu walao hayekeme. \c 5 \s1 Yesuma꞉ ipika꞉ disaipolo haliweki miekeeki \r (Ma꞉tiu 4꞉18-22, Maka 1꞉16-20) \p \v 1 Nate ma꞉nda꞉na꞉ Yesuta꞉ mo Kenesatete ikali leke wieke ikali tea꞉ nane haena꞉ta꞉ wanda꞉hali aneke wopuma꞉ Koda꞉na꞉ pi opuluekema꞉ yeke ika꞉ ika꞉ kone pendilatia pulu hata꞉ titi ata꞉ta꞉ pimikime. \v 2 Yesuma꞉ mo ikali tea꞉na꞉ kawaso yaapo wiekeeki handeekeme. Mo kawaso teke haliwekita꞉ ika꞉ kawaso yaapo mina꞉pa꞉laota꞉ ika꞉ tenkinumanu tandepolo pitimikime. \v 3 Kutupa Yesuta꞉ Saimono ipika꞉ kawasona꞉ opa꞉liao ipikana꞉ma꞉ Saimono pa꞉ta꞉ alota꞉ Naka꞉ kawaso mo ikali houna꞉ hosiki siki mo pate leke mea pue laa mo kawasona꞉ pita꞉ wanda꞉hali pa꞉ta꞉ Koda꞉na꞉ pimanu waleekeme. \p \v 4 Koto hande pi walo paeyao wetepe naneta꞉ Yesuma꞉ Saimono pa꞉ta꞉ alota꞉ Nakana꞉ma꞉ naka꞉ kawaso mo ikali noka꞉ ula꞉ alena꞉ leke pendila moneae laata꞉ Neke make naka꞉ ta꞉ma꞉ni tonu ame̱le̱ ika꞉ tenkinu paeyao do ikali pa꞉ta꞉ ta꞉peli muemena꞉ lopape leekeme. \v 5 Koto leeke handaa Saimonoma꞉ ipika꞉ pi litolo hata꞉ alota꞉ Tekehalio. Do timba andusa꞉na꞉ niki paeyaoma꞉ e tieke pokoma꞉pate ta꞉peli ota꞉ homeke siki a꞉nda꞉ make na muma꞉pate nakana꞉ma꞉ aleke handaata꞉ mo tenkinu paeyao paa ikali pa꞉ta꞉ lopanoe leekeme. \v 6 Kotoeki pimiki dina꞉ta꞉ ikana꞉ma꞉ ta꞉peli ota꞉ wotu aneke hapu mimiki yeke handaata꞉ mo hande tenkinu paeyaota꞉ tumbulu baasota꞉ tunkuluekema꞉ taapeekeme. \v 7 Kutu pieke handaa mo kawaso ma꞉nda꞉na꞉ pitimiki haliwekima꞉ ika꞉ ta꞉ma꞉ni tonuma꞉ iki tamba꞉ mulu epena꞉ yeke kiki wanke pitolo hata꞉ ipupa꞉ laa lemekeme. Iki a꞉paata꞉ mo ta꞉pelimanu paeyao siki mo kawaso yaapona꞉ mea wimiki ekima꞉ mo hande kawaso yaapota꞉ ikali pa꞉ta꞉ honki loluekema꞉ taapepekeme. \v 8 Kutu piekeeki handaata꞉ Saimono Pidama꞉ Yesu teke pa꞉ta꞉ tumiki yotuao alota꞉ Tekehalio. I̱ta꞉ hoke hau polo somema꞉ I̱ kiao pue leekeme. \v 9 Saimono ipiki ame̱le̱ haemeke haliweki ika꞉ tenkinu paeyao siki pa꞉ta꞉ ta꞉peli wotu anekema꞉ mu wimikieki handaata꞉ penkilipa꞉tia pomimikime. \v 10 Saimono ipika꞉ ta꞉ma꞉ni pieke hama̱la̱꞉ Sepedina꞉ eiyeke yaapo Dia꞉mesi Dioni yaapoma꞉ make penkilipa꞉tia pomipikime. Yesuma꞉ Saimono pa꞉ta꞉ alota꞉ Nakana꞉ma꞉ paala꞉ma꞉ na homa꞉peke laata꞉ Ekipeke ame do kini peaata꞉ nakana꞉ma꞉ pa haliweki mealipikie leekeme. \v 11 Koto ekina꞉ta꞉ mo kawaso yola꞉ mea mo ikali tea꞉na꞉ mea wiata꞉ ika꞉ ala꞉ta꞉ ala꞉ta꞉ paeyao mina꞉pa꞉lao Yesuna꞉ hoki nane teli mea pemekeme. \s1 Yesuma꞉ hali ma꞉nda꞉ mea epeaeyekeeki \r (Ma꞉tiu 8꞉1-4, Maka 1꞉40-45) \p \v 12 Nate ma꞉nda꞉na꞉ Yesuta꞉ mo kindi yenima꞉ loke paeyao tumbieke hali ma꞉nda꞉ hayeke daoni ma꞉nda꞉ pa꞉ta꞉ hayekeme. Koto halima꞉ Yesu handaata꞉ ipiki teke pa꞉ta꞉ a꞉pa oni kenkena꞉ lopolo hata꞉ alota꞉ Tekehalio. Nakana꞉ma꞉ hone pia꞉ka꞉na꞉ta꞉ I̱ mea epeapeke ya꞉la꞉me leekeme. \v 13 Koto leeke pi opua Yesuma꞉ ipika꞉ kiki tindipao mo halina꞉ lokena꞉ wataaso hata꞉ alota꞉ I̱ma꞉ ya hone pa꞉la꞉me. Naka꞉ loke epena꞉e. Koto leeke handaata꞉ koto kone mo kindi yeni hayekeeki tandela꞉pa peekeme. \v 14 Yesuma꞉ pi honkopu hao ipiki pa꞉ta꞉ alota꞉ Do pitolo ekita꞉ ma꞉nda꞉ pa꞉ta꞉ a̱i̱ na leketa꞉ pa mo yeni peao hala꞉ halima꞉ titina꞉ amba꞉la naka꞉ yeni ota꞉ paela꞉pe laa handena꞉ a̱i̱ ipiki pa꞉ta꞉ pua꞉peke. Kutaata꞉ wanda꞉halima꞉ naka꞉ yenita꞉ ota꞉ paela꞉me hone wina꞉ mo hande Mosesima꞉ la꞉ wieke tupa꞉ Koda꞉ pa꞉ta꞉ lia hala꞉la꞉ ale lia hala꞉peke leekeme. \v 15 Koto pi leeke pateta꞉ wanda꞉hali paeyaoma꞉ Yesuma꞉ pieke ekimanu da yu paeyao pa꞉ta꞉ la꞉tiki pomimikime. Koto ekina꞉ta꞉ wanda꞉hali aneke hapuma꞉ Yesu ipika꞉ leeke pimanu opua make ipikana꞉ma꞉ ika꞉ yenimanu mea epeaena꞉ yeke epemekeme. \v 16 Kutu pimikipate Yesuma꞉ mo wanda꞉hali na hayeke alena꞉ pua Koda꞉ pa꞉ta꞉ yeni puluekema꞉ pua꞉tiki piekeme. \s1 Kiki anke lupa wiki hali ma꞉nda꞉ epeaeyekeeki \r (Ma꞉tiu 9꞉1-8, Maka 2꞉1-12) \p \v 17 Nate ma꞉nda꞉na꞉ Yesuma꞉ wanda꞉hali pa꞉ta꞉ Koda꞉na꞉ pi walolo haena꞉ta꞉ mandane Pa꞉tisi haliweki make mo Lo Pimanu wala꞉la꞉ haliweki make pitimikime. Koto haliwekita꞉ Ka꞉lili kenke pa꞉ta꞉ hala꞉ daonimanu make Diudia kenke pa꞉ta꞉ hala꞉ daonimanu make mo Diutuseleme teke da pa꞉ta꞉ make a꞉pa pitimikime. Koto natena꞉ta꞉ mo yeni homemeke wanda꞉hali paeyao Yesuma꞉ mea epeaena꞉ mo Tekehali Koda꞉na꞉ weleta꞉ ipiki pa꞉ta꞉ aneke hapu hayekeme. \p \v 18 Mandane haliwekima꞉ta꞉ mo kiki anke lupa wiki some ma꞉nda꞉ tilina꞉ mea tia a꞉paata꞉ ipiki mo da tukiki pa꞉ta꞉ tia pua Yesuna꞉ leke tonkona꞉ pua tu uluekema꞉ taapemekeme. \v 19 Kutu pimikipate polo pimiki pota꞉ta꞉ wanda꞉hali wotu aneke hapuma꞉ tumbieke handaata꞉ ikana꞉ma꞉ mo hali da tukiki pa꞉ta꞉ tia pua꞉peke pota꞉ ma꞉nda꞉ na wiekeme. Koto ekina꞉ta꞉ mo haliwekima꞉ hande da holuna꞉ mea opa꞉liao ka꞉ka꞉na꞉ mea wiao ipika꞉ loketa꞉ tilina꞉ wia mo wanda꞉hali anka꞉lopuna꞉ Yesu hayeke alena꞉ uniaemekeme. \v 20 Kutupa Yesuma꞉ mo haliwekina꞉ hone tulaemekeeki handaata꞉ ipikana꞉ma꞉ mo kiki anke lupa wiki hali pa꞉ta꞉ alota꞉ Kame. Naka꞉ hande pi hoke hau manuta꞉ pa paeyaasa꞉me leekeme. \v 21 Koto leekeeki opuaata꞉ mo Lo Pimanu wala꞉la꞉ haliweki make mo Pa꞉tisi haliweki paeyaoma꞉ ika꞉ ika꞉ kone pi pi alo alota꞉ Mo Koda꞉na꞉ biki hoeyaaso pimanu ala꞉ halita꞉ epi ya꞉ka꞉ta꞉pe. Ma꞉nda꞉na꞉ hoke hau manuta꞉ Koda꞉ma꞉ homeke ana꞉na꞉ paeyaapeke ya꞉la꞉taa lemekeme. \v 22 Kutupa mo haliwekima꞉ hone wimiki ekita꞉ Yesuma꞉ amba꞉ hone wia iki pa꞉ta꞉ alota꞉ Ekipeke ikana꞉ma꞉ ika꞉ hone pa꞉ta꞉ do honemanu witelemepe laa lota꞉ pitolo alota꞉ \v 23 Do pi yaapona꞉ yapa꞉ pa꞉la꞉ ekita꞉ handoeki ka꞉ta꞉pe. Naka꞉ hokeeki pa꞉la꞉eki manuta꞉ pa paeyaasa꞉me laa la꞉la꞉eki yapa꞉ pa꞉la꞉pe o Tiao pue aloeki yapa꞉ pa꞉la꞉pe laa \v 24 I̱ma꞉ iki pa꞉ta꞉ta꞉ Wanda꞉halina꞉ Eiyekema꞉ do kenkena꞉ hata꞉ hoke haumanu paeyaapeke wele wia halo ekita꞉ ame peneme yanoma꞉ handa꞉pa꞉peke leekeme. Koto ekina꞉ta꞉ Yesuma꞉ mo hande kiki anke lupa wiki hali pa꞉ta꞉ alota꞉ I̱ma꞉ neke pa꞉ta꞉ alome. Ame tiao. Naka꞉ tilita꞉ da pa mea tia pue leekeme. \v 25 Koto tomona꞉ kone mo wanda꞉halina꞉ leke tonka꞉na꞉ mo hande hali tiao mo ipiki pelieke tili mea tia ipika꞉ da nane pulu hata꞉ta꞉ Koda꞉na꞉ biki mea miniliatia peekeme. \v 26 Kutupa koto piekeeki handaata꞉ mo hande wanda꞉hali manuta꞉ penkilipa꞉tia pomua ikita꞉ pututuma꞉ homolo hata꞉ Koda꞉na꞉ biki mea miniliaaso alota꞉ Ameta꞉ nikana꞉ma꞉ na handeke epeke haumanu wotu handoma꞉me lemekeme. \s1 Yesuma꞉ Lipae miekeeki \r (Ma꞉tiu 9꞉9-13, Maka 2꞉13-17) \p \v 27 Wetepena꞉ Yesu hama opolu bao pulu hata꞉ dakisi mani mu hayeke hali ma꞉nda꞉ ipika꞉ biki Lipae handeekeme. Koto halita꞉ mo dakisi mani mu hayeke opisi pa꞉ta꞉ pitiekeme. Yesuma꞉ Lipae pa꞉ta꞉ alota꞉ I̱ telia꞉ mea epoe leekeme. \v 28 Koto ekina꞉ Lipae tiao ipika꞉ ala꞉ta꞉ ala꞉ta꞉ paeyao siki kiao Yesu telia꞉ mea peekeme. \p \v 29 Kutupa Lipaema꞉ta꞉ ipika꞉ da pa꞉ta꞉ Yesuna꞉ aneke ne ma꞉nda꞉ pambaeyekeme. Lipaema꞉ wi leeke epemeke haliweki ame̱le̱ mo dakisi mani mu haemeke haliweki aneke hapu make pa mandane haliweki make ipika꞉ da pa꞉ta꞉ pitimikime. \v 30 Kutupa mandane Pa꞉tisi haliweki manuma꞉ make iki ame̱le̱ apa꞉taemeke mandane Lo Pi wala꞉la꞉ haliwekima꞉ make Yesuna꞉ disaipolo haliweki pa꞉ta꞉ ka꞉nda꞉ piki pimanu lota꞉ pitolo hata꞉ alota꞉ Mo dakisi mani mu haleme haliweki make mo hoke hauma꞉ ha̱i̱ pieke handaa mina꞉pa꞉laemeke wanda꞉hali ame̱le̱ mandake pa꞉ta꞉ pita꞉ ne ikalimanu ekipeke nalemepe laa lota꞉ pimikime. \v 31 Koto ekina꞉ta꞉ Yesuma꞉ ika꞉ pi hombo peaaso hata꞉ alota꞉ Mo wanda꞉hali ma꞉nda꞉ epima꞉ yeni na homemeka꞉na꞉ta꞉ kota꞉ dokeda haliweki pa꞉ta꞉ na pu halemepate ota꞉ yeni homo haleme wanda꞉hali homeke dokeda hali pa꞉ta꞉ pu halememe. \v 32 I̱ma꞉ta꞉ epeke hau pu haleme wanda꞉hali hone ma꞉nda꞉ la꞉ka꞉la wina꞉yeke wi loluekema꞉ na epoa꞉pate pa hoke hau pu haleme wanda꞉hali wi loluekema꞉ epoa꞉me leekeme. \s1 Nee pi wia꞉peke ekina꞉ lota꞉ pimikieki \r (Ma꞉tiu 9꞉14-17, Maka 2꞉18-22) \p \v 33 Kota꞉ mandane wanda꞉halima꞉ Yesu pa꞉ta꞉ dupa lemekeme. Dionina꞉ disaipolo haliweki make mo Pa꞉tisi haliwekina꞉ disaipolo haliweki make nate paeyao nee pi u moneaaso hata꞉ Koda꞉ pa꞉ta꞉ yeni pea꞉tiki pu halemepate pa naka꞉ disaipolo haliwekima꞉ta꞉ ikali ne manuta꞉ pa no halememe lemekeme. \v 34 Koto ekina꞉ Yesuma꞉ ika꞉ pi hombo peaaso hata꞉ alota꞉ Ika꞉ honema꞉ta꞉ hali ma꞉nda꞉ma꞉ wanda꞉ panake mea pita꞉ ne pambolo hata꞉ mo wi leeke epemeke wanda꞉halima꞉ ipiki ame̱le̱ pa mandake pitu haya꞉ka꞉na꞉ta꞉ koto wanda꞉halita꞉ ne na neke pi wipe lea꞉ka꞉na꞉ta꞉ opilimikipe. Ota꞉ dia꞉me. \v 35 Koto pa꞉la꞉pate mo wanda꞉ panake mina꞉la꞉ halita꞉ ma꞉nda꞉ma꞉ hatuku pua꞉peke nate opolo epea꞉ka꞉na꞉ta꞉ kota꞉ koto natena꞉ta꞉ ikana꞉ma꞉ nee pi wia꞉tiki pu halimikie leekeme. \p \v 36 Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Hali ma꞉nda꞉ma꞉ ipika꞉ sinkipiki amba꞉ sedi ma꞉nda꞉ epeaaluekema꞉ta꞉ ipika꞉ panake sedi tunkulu mea mo amba꞉ ekina꞉ na tombilieke. Koto hau pia꞉ka꞉na꞉ta꞉ kota꞉ ipikana꞉ma꞉ ipika꞉ panake sedi tunkulieke make mo panake aka꞉ta꞉ tunkulu mieke mo ambisanake sedi mandakena꞉ apa꞉tao tombilia꞉ka꞉na꞉ta꞉ mandake na pilieke. \v 37 Koto tupa꞉ kone hali ma꞉nda꞉ma꞉ ambisanake ma꞉na꞉ yonkelekema꞉ wa꞉pa꞉la꞉ ipi kanake pa꞉ta꞉ panake waini ikali na holo pambilieke. Koto hau pia꞉ka꞉na꞉ta꞉ mo panake waini ikalima꞉ mo ma꞉na꞉ yonkelekema꞉ wa꞉pa꞉la꞉ amba꞉ ipi kanaketa꞉ sinkipa hoelo baalieke leekeme. Kutupa mo ma꞉na꞉ yonkeleke make hoeyaalieke leekeme. \v 38 Dia꞉me. Mo panake waini ikalita꞉ mo panake ma꞉na꞉ yonkelekema꞉ wa꞉pa꞉la꞉ ipi kanakena꞉ holo pambilieke. \v 39 Kutupa mo amba꞉ waini ikali amba꞉la꞉ nala꞉ halima꞉ta꞉ mo panake waini ikali napeketa꞉ kialieke. Ekipeke. Ipikana꞉ma꞉ amba꞉ waini ikalita꞉ ota꞉ a꞉pa꞉la꞉me lelieke leekeme. \c 6 \s1 Hoto pila꞉ natena꞉ pi ula꞉eki \r (Ma꞉tiu 12꞉1-8, Maka 2꞉23-28) \p \v 1 Yesuta꞉ ipika꞉ hoki nane telimiki haliweki ame̱le̱ Diu wanda꞉halina꞉ hoto pila꞉ nate homekena꞉ mo konima꞉ handeke ale widi emanu pa꞉ta꞉ pemekeme. Kutupa ipika꞉ disaipolo haliwekima꞉ mo widi kilikimanu honda꞉ mea ika꞉ kikima꞉ da꞉ka꞉pa꞉ mina꞉ bepia kilikimanu homeke nemekeme. \v 2 Kutupa mo mandane Pa꞉tisi haliwekima꞉ alota꞉ Pa ekipeke ikana꞉ma꞉ mo nika꞉ Lo Pi manuma꞉ la꞉la꞉ tupa꞉ mo Hoto Pila꞉ Natena꞉ na pea꞉pa꞉peke la꞉la꞉ ekita꞉ ekipeke pitolo pimipe lemekeme. \p \v 3 Koto lemeke Yesuma꞉ iki pa꞉ta꞉ alota꞉ Deipidi ipiki ame̱le̱ haemeke haliweki hoto ma꞉nda꞉na꞉ tea꞉ma꞉ homolo hata꞉ Deipidima꞉ pieke ekita꞉ na yata꞉pemepe. \v 4 Ipikana꞉ma꞉ mo Koda꞉na꞉ da tukiki pa꞉ta꞉ honda꞉ pamba puaata꞉ mo wanda꞉halima꞉ Koda꞉ pa꞉ta꞉ halemeke palaowa pua mea neekeme. Kutupa ipiki ame̱le̱ haemeke haliweki make mea haleekeme. Kutu piekepate mo wape pea ula꞉ Lo Pi manuma꞉ alota꞉ Do palaowata꞉ wanda꞉hali ma꞉nda꞉ma꞉ na napa꞉peke ya꞉la꞉pate ota꞉ mo yeni peao haemeke da handeteke haemeke haliwekima꞉ homeke napa꞉peke ya꞉la꞉me la꞉la꞉me laata꞉ \v 5 Yesuma꞉ ipika꞉ pi lo paeyaaso hata꞉ alota꞉ Hoto pila꞉ nateta꞉ Wanda꞉halina꞉ Eiyekema꞉ handeteke hala꞉me leekeme. \s1 Yesuma꞉ kiki hoke hali epeaeyekeeki \r (Ma꞉tiu 12꞉9-14, Maka 3꞉1-6) \p \v 6 Mo hoto pila꞉ nate ma꞉nda꞉na꞉ Yesuta꞉ mo Diu haliwekina꞉ pi hotu haemeke da ma꞉nda꞉ pa꞉ta꞉ honda꞉ pamba Koda꞉na꞉ pi waleekeme. Kutupa koto pa꞉ta꞉ mo popeke nane kiki hapueke endiki hali ma꞉nda꞉ hayekeme. \v 7 Mo wape pea ula꞉ Lo Pi walo haemeke haliweki make Pa꞉tisi haliwekima꞉ make Do nika꞉ Hoto Pila꞉ Natena꞉ Yesuma꞉ ma꞉nda꞉ mea epeaalia꞉pe laa handa꞉hake wimikime. Yesuma꞉ pi yamba꞉lea꞉me loluekema꞉ yeke pimikime. \v 8 Kutu pimikipate Yesuma꞉ta꞉ mo haliwekina꞉ hone wimikieki amba꞉ handa꞉ wiaata꞉ mo kiki hapueke endiki hali pa꞉ta꞉ alota꞉ Tiao. Do wanda꞉halina꞉ leke popeleke nane epoe leekeme. Mo halita꞉ tiao mo wanda꞉halina꞉ leke popeleke nane tiao halo yapeekeme. \v 9 Kutu pieketa꞉ Yesuma꞉ mo wanda꞉hali pa꞉ta꞉ alota꞉ I̱ma꞉ iki pa꞉ta꞉ lota꞉ pitolome. Mo Hoto Pila꞉ Natena꞉ nika꞉ Lo Pi ula꞉ ekima꞉ta꞉ eki pea꞉pa꞉peke la la꞉la꞉pe. Pa tamba꞉ muluekema꞉ o hoeyaaluekema꞉ la꞉la꞉pe. Mo wanda꞉halina꞉ hala꞉eki tamba꞉ muluekema꞉pe o hoeyaaluekema꞉pe laa lota꞉ piekeme. \v 10 Kotoeki laata꞉ Yesuma꞉ leke taka꞉lakema꞉ mo haliweki handa꞉ mone mone pitolo hata꞉ mo some pa꞉ta꞉ alota꞉ Naka꞉ kiki tindipae leekeme. Koto leeke mo halima꞉ ipika꞉ kiki tindipaeyeketa꞉ paa epeekeme. \v 11 Kutu pieke handaa mo Lo Pi walo haemeke haliwekima꞉ mo Pa꞉tisi haliwekima꞉ tonka꞉na꞉ mineke pankolo hata꞉ titipu tieke a꞉meiyeke handaa Yesu pa꞉ta꞉ta꞉ eki pumana꞉pe laa a꞉nda꞉ lombemekeme. \s1 Yesuma꞉ ipika꞉ 12 Aposolo haliweki miekeeki \r (Ma꞉tiu 10꞉1-4, Maka 3꞉13-19) \p \v 12 Koto dina꞉ta꞉ Yesuta꞉ Koda꞉ pa꞉ta꞉ yeni puluekema꞉yeke pote ma꞉nda꞉ a꞉meiya peekeme. Koto timba andusa꞉na꞉ Yesuma꞉ yeni paa pitolo ombu pitina꞉ta꞉ da paa kelepeekeme. \v 13 Kutupa nate teeketa꞉ Yesu ipika꞉ hoki nane tolu haemeke haliweki paeyao wi leekeme. Koto haliweki tukiki pa꞉ta꞉ kone 12 haliweki ma̱leke litolo hata꞉ alota꞉ Ikita꞉ yaka Aposolo haliweki hapa꞉peke leekeme. \v 14 Mo haliwekina꞉ biki manuta꞉ Saimono Yesuma꞉ leeke biki ma꞉nda꞉ta꞉ Pida ipika꞉ hameke A꞉ndutu make Dia꞉mesi Dioni Pilipi Badolomiu make \v 15 Ma꞉tiu make Tomasi make A꞉lopia꞉sina꞉ eiyeke Dia꞉mesi make Saimono ipika꞉ biki ma꞉nda꞉ta꞉ Seloti make \v 16 Dia꞉mesina꞉ eiyeke Diudasi make Isekatiotina꞉ eiyeke Diudasi ipikita꞉ hande Yesu ba꞉sa꞉ pulu yapolo pieke some hayekeme. \s1 Yesuma꞉ wanda꞉hali wamo piekeeki pita꞉ pi wala꞉la꞉eki yaapo \r (Ma꞉tiu 4꞉23-25) \p \v 17 Kutupa Yesuma꞉ mo Aposolo haliweki ame̱le̱ mo hande potena꞉ hao hola꞉pa꞉niao ikita꞉ epeke hawete epeekena꞉ Yesu ipika꞉ hoki nane tolu haemeke haliweki paeyao ame̱le̱ hata꞉ tiao hayekeme. \v 18 Koto dina꞉ta꞉ Diudia da yu paeyaona꞉ haemeke wanda꞉hali make Diutuseleme daoni wanda꞉hali make epemekeme. Kutupa mo dawala ikali tea꞉ pa꞉ta꞉ hayeke teke da yaapo Taiya pita꞉ Saidoni da yu pa꞉ta꞉ haemeke wanda꞉hali make epemekeme. Ikita꞉ Yesuma꞉ waleeke pi opuluekema꞉ make ika꞉ yeni ta꞉ta꞉ ta꞉ta꞉ hayekeeki mea epeaena꞉yeke make a꞉pa mombelemekeme. Koto dina꞉ta꞉ mo hoke temokoma꞉ ka꞉nda꞉ mea peatiki pimiki wanda꞉hali make ipiki pa꞉ta꞉ epemeke handaa Yesuma꞉ mea epeaeyekeme. \v 19 Mo wanda꞉halina꞉ yenimanu mea epeapeke honkopu tieke Yesu pa꞉ta꞉ hao yapeeke handaa mo wanda꞉hali paeyaoma꞉ ipiki wataluekema꞉ taapemekeme. \s1 Ta꞉na꞉ma꞉ homa꞉pekeeki make e̱ lapekeeki yaapo \r (Ma꞉tiu 5꞉1-12) \p \v 20 Yesuma꞉ ipika꞉ hoki nane tolu haemeke haliweki handolo hata꞉ alota꞉ Natehali wanda꞉halita꞉ ta꞉na꞉ma꞉ homo halememe. Koda꞉na꞉ Kilu Tombuao Hala꞉ ekita꞉ ika꞉ ekie. \v 21 Ame tea꞉ma꞉ homeleme wanda꞉hali iki ta꞉na꞉ma꞉ homo halememe. Ikita꞉ weleke tieke telieke. Ame e̱ aleme wanda꞉hali ikita꞉ ta꞉na꞉ma꞉ homo halememe. Ikita꞉ kitelimikie. \v 22 Ikita꞉ mo Wanda꞉halina꞉ Eiyeke tolu halemeke handaa mandane wanda꞉halima꞉ iki pa꞉ta꞉ yaala꞉ma꞉ homao make tanda ku make ika꞉ biki hoeyaaluekema꞉ hoke ba꞉sa꞉ pitolo yayapiki pimanu sa꞉mba꞉lao pitolo haena꞉ kone \v 23 pa pina꞉ma꞉ ikana꞉ma꞉ta꞉ pa epeke puki haaso hata꞉ ta꞉na꞉ma꞉ homolo make pita ponka꞉ lapa꞉peke. Pa ekipeke ika꞉ mulu peleme yenki tieketa꞉ oli hepeni nane wiawala꞉me. Amba꞉ hande haemeke potopede haliweki pa꞉ta꞉ make ika꞉ apa꞉meima꞉ pimieki kone pitolo pitelememe. \v 24 Koto pa꞉la꞉pate aiyo ame do hamoko haaseme wanda꞉halio. Iki pa꞉ta꞉ta꞉ ka꞉nda꞉ tieke ipula꞉me. Ika꞉ epeke tupa꞉ hao pa꞉limi ekita꞉ ame homeke minelememe. \v 25 A꞉pei. Ame do weleke tumbao hala꞉ wanda꞉halio. Ka꞉nda꞉ tieke ipula꞉me. Ikita꞉ tea꞉ma꞉ homilimikie. A꞉pei. Ame kitaleme wanda꞉halio. Ka꞉nda꞉ tieke ipula꞉me. Ikita꞉ ika꞉ pukima꞉ e̱ tieke alo hata꞉ e̱ pankeke lopena꞉ lelimikie. \p \v 26 A꞉pei. Wanda꞉hali paeyaoma꞉ ika꞉ hauna꞉ pi laemeka꞉na꞉ta꞉ ka꞉nda꞉ tieke ipula꞉me. Ekipeke amba꞉ kiake koto wanda꞉halina꞉ apa꞉meima꞉ mo makeaaso potopede haliweki tonu pa꞉ta꞉ lo haemeke tupa꞉ kone alo alememe leekeme. \s1 A꞉nda꞉ tunkuliki wanda꞉hali pa꞉ta꞉ pukima꞉ homa꞉la꞉eki \r (Ma꞉tiu 5꞉38-48, 7꞉12) \p \v 27 Pate ame ya pi opiteleme wanda꞉hali iki pa꞉ta꞉ta꞉ I̱ma꞉ dupa alome. Ika꞉ a꞉nda꞉ tunkuliki wanda꞉hali pa꞉ta꞉ta꞉ pukima꞉ homo hapa꞉peke. Kutupa iki pa꞉ta꞉ honditi pu haleme wanda꞉hali pa꞉ta꞉ tonka꞉na꞉ epeke hau homeke pu hapa꞉peke. \v 28 Iki pa꞉ta꞉ keke pi aleme tapake pa꞉ta꞉ta꞉ pukipiki pi homeke lapa꞉peke. Kutaa make iki hoeyaaseme tapake pa꞉ta꞉ta꞉ yeni peawapa꞉peke. \v 29 Hali ma꞉nda꞉ma꞉ naka꞉ pakena꞉ lia꞉ka꞉na꞉ta꞉ mandane pakena꞉ make lina꞉ lapeke. Hali ma꞉nda꞉ma꞉ naka꞉ kosa꞉ aka꞉ mia꞉ka꞉na꞉ta꞉ naka꞉ sedi make mina꞉ lapeke. \v 30 Hali ma꞉nda꞉ma꞉ neke pa꞉ta꞉ ale ma꞉nda꞉ kie laa honke lea꞉ka꞉na꞉ta꞉ hala꞉peke. Hali ma꞉nda꞉ma꞉ naka꞉ ala꞉ta꞉ ma꞉nda꞉ mia꞉ka꞉na꞉ta꞉ ipiki pa꞉ta꞉ Yaka ale paa kie laa paa na mia꞉peke. \v 31 Mandane wanda꞉halima꞉ iki pa꞉ta꞉ pina꞉e hone u haleme tupa꞉ ikana꞉ma꞉ ana꞉na꞉ iki pa꞉ta꞉ make mandake hau pu hapa꞉peke. \p \v 32 Iki pukima꞉ homeleme wanda꞉hali pa꞉ta꞉ homeke ikana꞉ma꞉ pukima꞉ homemeka꞉na꞉ta꞉ pa ekipeke ikita꞉ Koda꞉na꞉ epeaasa꞉ ekita꞉ milimipe. Hoke hau pu haleme wanda꞉halima꞉ kone iki pa꞉ta꞉ pukima꞉ homeleme wanda꞉hali pa꞉ta꞉ta꞉ pukima꞉ homo halememe. \v 33 Kutupa ikana꞉ma꞉ iki pa꞉ta꞉ epeke haumanu piteleme wanda꞉hali pa꞉ta꞉ homeke paa epeke haumanu pimika꞉na꞉ta꞉ kota꞉ Koda꞉na꞉ epeaasa꞉ ekita꞉ ekipeke kilieke ya꞉ka꞉ta꞉pe. Mo hoke hau pu haleme wanda꞉hali make koto hau koto tupa꞉ kone pu halememe. \v 34 Kutupa make ikana꞉ma꞉ ala꞉ta꞉ ma꞉nda꞉ I̱ pa꞉ta꞉ paa kilimikie hone witolo hata꞉ tondiki halemeka꞉na꞉ta꞉ kota꞉ Koda꞉na꞉ epeaasa꞉ ekita꞉ ekipa milimikipe. Mo hoke hau pu haleme wanda꞉halima꞉ta꞉ ika꞉ haleme tupa꞉ paa muluekema꞉ ika꞉ ala꞉ta꞉ ala꞉ta꞉ mo hoke hau pu haleme yankeke tonu pa꞉ta꞉ kone halo halememe. \v 35 Dia꞉me. Ika꞉ a꞉nda꞉ tunkuliki wanda꞉hali pa꞉ta꞉ pukima꞉ homa iki pa꞉ta꞉ epeke hau homeke pu hapa꞉peke. Ikana꞉ma꞉ wanda꞉hali ma꞉nda꞉ pa꞉ta꞉ ala꞉ta꞉ ma꞉nda꞉ tondiki halemeka꞉na꞉ta꞉ paa muluekema꞉ hone na u hapa꞉peke. Kutu pu haemeka꞉na꞉ta꞉ ika꞉ yenki aneke hapu meata꞉ oli Koda꞉ Manda Hala꞉ Tiekena꞉ eiyeke titi halimikie. Ekipeke Koda꞉ma꞉ta꞉ mo ipika꞉ epeke haumanu pita꞉la꞉ ekina꞉ ta꞉na꞉e pi na lo haleme wanda꞉hali make mo hoke haumanu wotu pu haleme wanda꞉hali pa꞉ta꞉ make epeke hau pu hala꞉me. \v 36 Koto ekina꞉ta꞉ ika꞉ Apa꞉ma꞉ iki pa꞉ta꞉ a꞉ta꞉ma꞉ homolo hata꞉ tamba꞉ mu hala꞉ tupa꞉ kone ikana꞉ma꞉ make mandane wanda꞉hali pa꞉ta꞉ a꞉ta꞉ma꞉ homolo hata꞉ tamba꞉ mu hapa꞉peke leekeme. \s1 Pi yokaalu pita꞉la꞉eki \r (Ma꞉tiu 7꞉1-5) \p \v 37 Koda꞉ma꞉ iki pa꞉ta꞉ pi yokaalu kiaapa꞉na꞉ ikana꞉ma꞉ make ma꞉nda꞉ pa꞉ta꞉ pi yokaalu na hala꞉pa꞉peke. Kutupa ma꞉nda꞉ na teli pimika꞉na꞉ta꞉ kota꞉ Koda꞉ma꞉ make iki na teli pilieke. Mandane wanda꞉halima꞉ iki pa꞉ta꞉ hoke hau pelemeeki ikana꞉ma꞉ pa paeyaemeka꞉na꞉ta꞉ kota꞉ Koda꞉ma꞉ make ika꞉ hoke hauta꞉ pa paeyaalieke. \v 38 Ma꞉nda꞉ pa꞉ta꞉ ala꞉ta꞉ ma꞉nda꞉ pa hameke kone halemeka꞉na꞉ta꞉ kota꞉ Koda꞉ma꞉ iki pa꞉ta꞉ ipiki epetolo hata꞉ ota꞉ anekehapu tumbao iki pa꞉ta꞉ wendiao kilieke. Ekipeke ikana꞉ma꞉ ma꞉nda꞉ pa꞉ta꞉ manda꞉ meao haleleme tupa꞉ kone Koda꞉ma꞉ iki pa꞉ta꞉ make koto tupa꞉ manda꞉ meao kone kilieke leekeme. \p \v 39 Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Leke holupiki hali ma꞉nda꞉ma꞉ leke holupiki hali ma꞉nda꞉ hatuku pua꞉peke na ya꞉la꞉pate pa pea꞉ka꞉na꞉ta꞉ ipiliki telipina꞉ ikali hanka꞉na꞉ pa꞉ta꞉ pua lopilipikie. \v 40 Sukulu pita꞉la꞉ weki o wandikita꞉ ipika꞉ wala꞉la꞉ disa some lombei peao na hala꞉me. Pate mo wekiwandikima꞉ ika꞉ sukulu pitelemeeki paeyaemeka꞉na꞉ta꞉ kota꞉ ikita꞉ mo disama꞉ handilimikie leekeme. \p \v 41 Ekipeke naka꞉ kamena꞉ leke pa꞉ta꞉ ula꞉ dokolo siki hone wopu witolo hata꞉ta꞉ mo naka꞉ lekena꞉ ula꞉ ti taka꞉la꞉pake tieketa꞉ hone na u halepe. \v 42 Mo ti taka꞉la꞉pake tieke naka꞉ leke pa꞉ta꞉ pa wina꞉ alo hata꞉ta꞉ ekipa naka꞉ kame pa꞉ta꞉ta꞉ Naka꞉ leke ula꞉ dokolo siki meanoe lelipikipe. Aa. Makeaasa꞉ hau pu hala꞉ someo. Titina꞉ mo naka꞉ leke pa꞉ta꞉ ula꞉ ti taka꞉la꞉pake kiake amba꞉la꞉ mea baeka꞉na꞉ta꞉ kota꞉ mo naka꞉ kamena꞉ leke pa꞉ta꞉ ula꞉ dokolo siki meawaluekema꞉ta꞉ epeke handilipikie leekeme. \s1 Tina꞉ hau pita꞉ ipika꞉ kilikina꞉ hau yaapo \r (Ma꞉tiu 7꞉16-20, 12꞉33-35) \p \v 43 Ipi saosao liki ti ma꞉nda꞉ma꞉ta꞉ hoke kiliki na a꞉ilieke. Kutupa make haka꞉teke ti ma꞉nda꞉ma꞉ta꞉ epeke kiliki na a꞉ilieke. \v 44 Ti paeyaota꞉ dupiki ti ya꞉ka꞉ta꞉me laata꞉ ipika꞉ kiliki a꞉eta꞉la꞉ ekima꞉ peneme yao la kilieke. Ikana꞉ma꞉ nose kiliki taluekema꞉ta꞉ sutekena꞉ na talimikie. Kutupa mo waini kiliki taluekema꞉ta꞉ mo taola꞉ puna꞉ na talipikie leekeme. \v 45 Epeke halima꞉ta꞉ ipika꞉ puki pa꞉ta꞉ a꞉mbao ula꞉ epeke hau manuta꞉ hama nane koto epeke haumanu homeke peneme yao walieke. Hoke halima꞉ta꞉ ipika꞉ puki pa꞉ta꞉ a꞉mbao ula꞉ hoke hau manuta꞉ hama nane koto hoke haumanu homeke peneme yao walieke. Ipika꞉ kake pa꞉ta꞉ ala꞉ pi manuna꞉ teke tieketa꞉ ipika꞉ puki pa꞉ta꞉ ula꞉me leekeme. \s1 Hali yaapoma꞉ da yaapo a꞉eyalu pipikieki \r (Ma꞉tiu 7꞉24-27) \p \v 46 Pa ekipeke ikana꞉ma꞉ I̱ pa꞉ta꞉ Tekehalio. Tekehalio alo hata꞉ pu halemepe. \v 47 Ma꞉nda꞉ epima꞉ I̱ teke pa꞉ta꞉ a꞉pa yaka pi opua pimika꞉na꞉ta꞉ I̱ma꞉ta꞉ ikita꞉ dupiki halie laa manda꞉ meanoe. \v 48 Ipikita꞉ hali ma꞉nda꞉ ipika꞉ da a꞉eluekema꞉ta꞉ yu amba꞉la aowa꞉tia pua toopi handa꞉ witolota꞉ pinkimanu koto toopi manda nokopo hala꞉ hali tupa꞉e. Ikali tieke ta ipulu hata꞉ hande da a꞉pa wataa hande hande piekepate hande data꞉ na lombeekeme. Pa ekipeke mo data꞉ ota꞉ epeke tupa꞉ a꞉eyeke handaa piekeme. \v 49 Koto pa꞉la꞉pate wanda꞉hali ma꞉nda꞉ epima꞉ yaka pi opuaata꞉ na pimika꞉na꞉ta꞉ ipikita꞉ mo kenke toopi na handa꞉ wiki hata꞉ kone pa hameke pinki nokopo hala꞉ hali tupa꞉e. Mo hande ikali tieke ta a꞉pa mo hande da wataa hande hande pieke pa꞉ta꞉ kone lombeekeme. Hande da lombolo hata꞉ta꞉ ota꞉ hoke tupa꞉ anekema꞉ lombeekeme leekeme. \c 7 \s1 Ami you halina꞉ e pokaasa꞉ some epeaeyekeeki \r (Ma꞉tiu 8꞉5-13) \p \v 1 Kutupa Yesuma꞉ mo wanda꞉hali pa꞉ta꞉ koto pimanu lo paeyaota꞉ mo Kapeneami daoni nane peekeme. \v 2 Koto pa꞉ta꞉ mo Loma꞉ ami haliwekina꞉ you hali ma꞉nda꞉ hayekeme. Koto halima꞉ ipika꞉ pukima꞉ ta꞉na꞉ tieke homeeke e pokao hayeke hali teke pa꞉ta꞉ homuluekema꞉ taapeekeme. \v 3 Kutu pieke handaa mo ami you halima꞉ Yesuma꞉ pieke ekimanu opuaata꞉ ipikana꞉ma꞉ mo mandane Diuna꞉ tondiki haliweki pa꞉ta꞉ Yesuma꞉ mo ipika꞉ e pokao hayeke some a꞉pa epeawaena꞉ yeke handaa mulu pupe laa tapaeyekeme. \v 4 Koto tondiki haliwekima꞉ Yesu pa꞉ta꞉ a꞉pa ota꞉ meme piki honke alo hata꞉ alota꞉ Do halita꞉ nakana꞉ma꞉ epeke tamba꞉ mia꞉peke ya꞉la꞉ halie. Pa ekipeke. \v 5 Ipikana꞉ma꞉ nika꞉ wanda꞉hali teke pa꞉ta꞉ pukima꞉ wotu homo hala꞉ make ipikana꞉ma꞉ ipika꞉ siki kone nika꞉ pi hotu haloma꞉ da ma꞉nda꞉ a꞉eyaeya꞉me leekeme. \p \v 6 Kotoeki opuaata꞉ Yesuta꞉ mo haliweki ame̱le̱ mandakena꞉ pua mo da teke pa꞉ta꞉ polueke alo pulu haena꞉ mo ami you halima꞉ ipika꞉ yankeke tonuma꞉ Yesu pa꞉ta꞉ dupiki pimanu lena꞉yeke tapaeyekeme. Tekehalio. Pina꞉ pae. \v 7 Neke ya da pa꞉ta꞉ epoelena꞉ loluekema꞉ta꞉ I̱ta꞉ epeke hali dia꞉ya꞉la꞉ ekina꞉ na ipilipikie laa Neke hale alena꞉ a꞉pa꞉peke make ota꞉ ana꞉ na pa꞉la꞉me. Nakana꞉ma꞉ta꞉ ipika꞉ yeni pa paena꞉e pi homeke leka꞉na꞉ta꞉ kota꞉ ya e pokaasa꞉ someta꞉ tialieke. \v 8 Pa ekipeke. I̱ta꞉ mandane ami you hali oto pa꞉ta꞉ halome. Kutaa I̱ oto pa꞉ta꞉ make mandane ami haliweki halememe. Kutupa I̱ma꞉ ma꞉nda꞉ pa꞉ta꞉ Pue loa꞉ka꞉na꞉ta꞉ pelieke. Ma꞉nda꞉ pa꞉ta꞉ make Epoe loa꞉ka꞉na꞉ta꞉ ipilieke. Kutupa yaka pa hameke e pokaasa꞉ some pa꞉ta꞉ Do e pokae loa꞉ka꞉na꞉ta꞉ kota꞉ ota꞉ pealieke leekeme. \p \v 9 Koto leekeeki Yesuma꞉ opuolota꞉ penkilipa꞉tia pominolo hata꞉ mo hande ipiki telimiki wanda꞉hali pa꞉ta꞉ la꞉ka꞉la꞉ moneao handolo hata꞉ alota꞉ I̱ma꞉ iki pa꞉ta꞉ ota꞉ pi alome. Dupiki hone tulaake some homeke ma꞉nda꞉ a꞉nda꞉ I̱ na handolome. Mo Isulai tapake tukiki pa꞉ta꞉ kone ota꞉ ma꞉nda꞉ a꞉nda꞉ na handa꞉ ulume. \v 10 Kutupa mo tapaeya꞉ haliweki paa la꞉ka꞉la mo ami you halina꞉ da pa꞉ta꞉ pua mo hande e pokao hayeke halita꞉ pa epeke tupa꞉ tiao pitiekeeki handemekeme. \s1 Yesuma꞉ wanda꞉ kinekena꞉ weki mea tiaeyekeeki \p \v 11 Hosiki siki haota꞉ wetepe nane Yesu ipika꞉ hoki nane telimiki haliweki make wanda꞉hali wotu anekehapu ame̱le̱ Neini daoni pa꞉ta꞉ pemekeme. \v 12 Ipiki pua mo teke da anekena꞉ wieke daoni pota꞉ kake pa꞉ta꞉ opolo polueke alo pulu haena꞉ mandane haliwekima꞉ mo homeeke hali toko mea hoilu poluekema꞉ yeke tia ipulu pitimikime. Mo homeeke halita꞉ kineke wanda꞉ siki ma꞉nda꞉na꞉ ota꞉ homeke weki siki yeekeme. Mo teke da aneke pa꞉ta꞉ haemeke wanda꞉hali woputa꞉ mo kineke wanda꞉ siki ame̱le̱ ipulu pitimikime. \v 13 Tekehalima꞉ mo hande kineke wanda꞉ handaata꞉ ipika꞉ pukima꞉ a꞉ta꞉ tiekema꞉ homolo hata꞉ ipikana꞉ma꞉ mo wanda꞉ pa꞉ta꞉ alota꞉ E na lapee leekeme. \v 14 Kutupa ipikana꞉ma꞉ mo toko tia epemeke bokosi teke pa꞉ta꞉ pua wataeyekeme. Kutu pieketa꞉ mo hande hali toko timiki haliwekima꞉ta꞉ pa tupaleke handeteke haemekeme. Yesuma꞉ alota꞉ Wekio. I̱ma꞉ neke pa꞉ta꞉ loma꞉ tiae leekeme. \v 15 Mo hande homeeke wekita꞉ paa tiao pita꞉ta꞉ pimanu lombo leekeme. Kutu pieke Yesuma꞉ mo hande wekita꞉ inkiki pa꞉ta꞉ hala꞉ moneayekeme. \p \v 16 Koto ekina꞉ta꞉ wanda꞉hali paeyaoma꞉ dupiki hau hando hao pututuma꞉ homolo hata꞉ Koda꞉na꞉ biki mea miniliaaso hata꞉ alota꞉ Ota꞉ aneke potopede ma꞉nda꞉ niki tukiki pa꞉ta꞉ a꞉pa꞉la꞉me. Koda꞉ma꞉ ipika꞉ wanda꞉hali tamba꞉ muluekema꞉ yeke a꞉pa꞉la꞉me lemekeme. \v 17 Do hande Yesuma꞉ pieke ekina꞉ pi manuta꞉ koto kenke paeyao pa꞉ta꞉ make mo kenke honiki honiki paeyao pa꞉ta꞉manu latia pomimikime. \s1 Dionima꞉ Yesu pa꞉ta꞉ tapaeyeke hali yaapo \r (Ma꞉tiu 11꞉2-19) \p \v 18 Koto dina꞉ta꞉ Dionina꞉ hoki nane tolu haemeke haliwekima꞉ Yesuma꞉ pieke ekimanu paeyao ipiki pa꞉ta꞉ la halemekeme. Koto leeke Dionima꞉ ipika꞉ disaipolo hali yaapo wi la꞉mea \v 19 alota꞉ Tekehali pa꞉ta꞉ pua dupa lota꞉ pea꞉pa꞉peke. Neketa꞉ hande Dionima꞉ Ipilieke leeke niki paeyaoma꞉ yu wia haloma꞉ hande hali ya꞉ka꞉ta꞉pe o hali ma꞉nda꞉ epena꞉ yu wia hamonope laa Yesu pa꞉ta꞉ lota꞉ pea꞉pa꞉peke leekeme. \v 20 Mo hande hali yaapota꞉ Yesu pa꞉ta꞉ opolo a꞉pa alota꞉ Mo bapitaisi peao hala꞉ hali Dionima꞉ neke pa꞉ta꞉ diki tapaeyeke handaa epopa꞉me. Neketa꞉ Dionima꞉ hande ipilieke leeke yu wia haloma꞉ hali ya꞉ka꞉ta꞉pe o paa hali ma꞉nda꞉ epena꞉ yu wia hamonope laa lota꞉ pitolopa꞉me lepekeme. \p \v 21 Koto tomona꞉ kone Yesuma꞉ yeni ta꞉ta꞉ ta꞉ta꞉ hake wanda꞉hali make hoke temoko pitieke wanda꞉hali wopu make leke holu piki wanda꞉hali make paeyao mea epeatiki piekeme. \v 22 Kutupa Yesuma꞉ mo Dionima꞉ tapaeyeke hali yaapona꞉ pi hombo peaaso hata꞉ alota꞉ Ipiliki paa la꞉ka꞉la puaata꞉ do handepe ekimanu make do opipieki paeyaota꞉ Dioni pa꞉ta꞉ pua la hala꞉pa꞉peke. Dupa lapa꞉peke. Mo leke holu piki wanda꞉halita꞉ ameta꞉ paa handelememe. Mo anke dola꞉pake piki wanda꞉hali make ameta꞉ pota꞉ pulimime. Kutupa mo kindi yeni hala꞉ wanda꞉hali make ameta꞉ epeke tupa꞉ halememe. Mo katake poka꞉la꞉ wanda꞉hali make ameta꞉ pi ana꞉na꞉ opitelememe. Ota꞉ homemeke wanda꞉hali make ameta꞉ paa mea tiao epeke tupa꞉ halememe. Kutupa maketa꞉ mo hande Pi Seliapota꞉ mo natehali wanda꞉hali sunu pa꞉ta꞉ wala꞉la꞉me laata꞉ \v 23 I̱ pa꞉ta꞉ hone yaapo yaapo lo na wimika꞉na꞉ta꞉ kota꞉ koto wanda꞉halita꞉ ta꞉na꞉ma꞉ homo halememe laa lapa꞉peke leekeme. \p \v 24 Mo hande hali yaapo Yesu mina꞉pa꞉lao pepeketa꞉ Yesuma꞉ koto pa꞉ta꞉ haemeke wanda꞉hali pa꞉ta꞉ Dionina꞉ pi dupa laeyekeme. Ikana꞉ma꞉ mo hapupapeke alena꞉ Dioni handuluekema꞉ pemeke hauta꞉ ota꞉ aleke handuluekema꞉ pemepe. Poma꞉ mo ambu mea anemone pea mekeaasa꞉eki handuluekema꞉ pemepe. \v 25 Ikana꞉ma꞉ koto alena꞉ ota꞉ aleke handuluekema꞉ pemepe. Ikana꞉ma꞉ hali ma꞉nda꞉ma꞉ epeke hamoko aka꞉manu pambao halia꞉eki handuluekema꞉ pemepe. Kutupiki aka꞉manu yama haleme wanda꞉halita꞉ hamoko hali leke hata꞉ kini haliwekina꞉ aneke da epeke pa꞉ta꞉ homeke halimikie. \v 26 Ikana꞉ma꞉ I̱ la kipa꞉e. Aleke handuluekema꞉ pemepe. Potopede hali handuluekema꞉ pemepe. Aowe. Ota꞉e. Kutu pimipate ipikita꞉ mo potopede haliweki paeyao ota꞉ ankulake hali handememe. \v 27 Koto ekita꞉ mo hande Baibolo bukama꞉ Dionina꞉ piekeeki dupa lao ula꞉me. Koda꞉ma꞉ alota꞉ Neketa꞉ a̱i̱ na epeke halena꞉ta꞉ amba꞉ titina꞉ I̱ma꞉ ya pimanu mea epena꞉yeke hali ma꞉nda꞉ tapalueke. Titina꞉ta꞉ ipikana꞉ma꞉ naka꞉ pota꞉ pilawalieke laa la꞉la꞉me laata꞉ \v 28 Yesuma꞉ iki pa꞉ta꞉ alota꞉ Opua꞉pe. Dioni ipikita꞉ amba꞉ haemeke haliweki paeyao lu ankulala꞉pate Koda꞉na꞉ Kilu Tombuao Hala꞉ alena꞉ oto pa꞉ta꞉ hala꞉ hali ipikita꞉ Dioni lu ankulao hala꞉me leekeme. \p \v 29 Wanda꞉halima꞉ koto pi opuaata꞉ iki make mo dakisi mani mu haemeke haliweki ame̱le̱ paeyaota꞉ Dionima꞉ amba꞉ iki bapitaisi peaena꞉ laata꞉ ame dota꞉ Yesuna꞉ pi opitolo hata꞉ta꞉ Koda꞉na꞉ hau manuta꞉ ota꞉ tikitiki ya꞉la꞉me lemekeme. \v 30 Pate mo Pa꞉tisi haliweki pita꞉ Lo Pi walo haemeke haliwekima꞉ta꞉ Koda꞉ma꞉ iki pa꞉ta꞉ hone pa꞉la꞉eki manuta꞉ kiaasota꞉ Dionima꞉ iki bapitaisi peaapa꞉na꞉yeke kiaemekeme. \p \v 31 Koto ekina꞉ Yesuma꞉ alota꞉ Ameta꞉ do kenkena꞉ haleme wanda꞉halita꞉ aleke tupa꞉ manda꞉ meanope o ikita꞉ alekema꞉ handelemepe. \v 32 Koto wanda꞉hali ikita꞉ mo makedi hama pa pitu haleme wekiwandikima꞉ handelememe. Mo tapake ma꞉nda꞉ma꞉ pa mo tapake ma꞉nda꞉ pa꞉ta꞉ wi la꞉moneaso hata꞉ alota꞉ Nikana꞉ma꞉ iki sama꞉ puemena꞉yeke tapeke luma꞉pate ikana꞉ma꞉ sama꞉ na piki kiaememe. Koto ekina꞉ nikana꞉ma꞉ pa homa꞉ emelimanu laoma꞉pate ikana꞉ma꞉ e̱ na leke kiaememe laa lemekeme. \v 33 Mo hande bapitaisi peao hayeke hali Dionima꞉ hoto paeyaota꞉ hoto ma꞉nda꞉na꞉ nee pi wia꞉tiki piekeeki make waini ikali na na꞉tiki pieke ekina꞉ ikana꞉ma꞉ alota꞉ Ipikita꞉ hoke temoko pila꞉ halie lememe. \v 34 Koto lemepate mo Wanda꞉halina꞉ Eiyeke ipiki a꞉paata꞉ ne make ikali a꞉pa na꞉tiki pieke handaata꞉ ikana꞉ma꞉ alota꞉ Do hali handa꞉pa꞉ ikali ne wopu no hake some ya꞉ka꞉ta꞉me. Kutupa ipikita꞉ mo dakisi mani mu haleme haliweki make mo wanda꞉halima꞉ ta꞉na꞉ma꞉ na homeleme tapekena꞉ yankeke hala꞉me laa lememe \v 35 laata꞉ Koda꞉na꞉ epeke hone wita꞉la꞉eki tolu haleme wanda꞉hali ika꞉ hauma꞉ kone mo hande hone wita꞉la꞉ ekita꞉ ota꞉ epekeekie laa peneme yao halimikie leekeme. \s1 Yesuma꞉ Pa꞉tisi hali ma꞉nda꞉ Saimonona꞉ da peekeeki \p \v 36 Kutupa nate ma꞉nda꞉na꞉ mo Pa꞉tisi hali ma꞉nda꞉ma꞉ ipika꞉ da pa꞉ta꞉ Yesu ne nolo epena꞉ yeke wi leeke handaa Yesuta꞉ ne nolueke alo pua pitiekeme. \v 37 Kutupa koto da teke pa꞉ta꞉ta꞉ hali yolo hayeke wanda꞉ ma꞉nda꞉ hayekeme. Koto wanda꞉ma꞉ Yesuta꞉ mo Pa꞉tisi halina꞉ da pa꞉ta꞉ a꞉pa ne no pila꞉me lemeeki opuaata꞉ ipikana꞉ma꞉ta꞉ a꞉la꞉ba꞉seta꞉ toopima꞉ wepiki kanakena꞉ mo totopo wotu piki oeta pambekeeki mea mina꞉ mo da pa꞉ta꞉ epeekeme. \v 38 Kutupa mo wanda꞉ma꞉ Yesuna꞉ hoki nane a꞉pa ipika꞉ anke teke pa꞉ta꞉ tiao hata꞉ ipika꞉ e̱ tonda꞉pa꞉ta꞉ Yesuna꞉ ankena꞉ lopena꞉ leekeme. Kutupa ipika꞉ itikima꞉ Yesuna꞉ ankena꞉ mo hande e̱ tonda꞉pa꞉ honia nunu peata꞉ mo totopo wotu piki oetata꞉ Yesuna꞉ ankena꞉ holayekeme. \p \v 39 Mo hande Pa꞉tisi halima꞉ kotoeki handaata꞉ ipika꞉ honema꞉ kone alota꞉ Do halita꞉ Koda꞉na꞉ potopede hali ya꞉ka꞉na꞉ yoluta꞉ ipikana꞉ma꞉ ipikita꞉ do wanda꞉ma꞉ wataasa꞉me laa peneme handolo pia꞉me. Ipikana꞉ma꞉ koto wanda꞉na꞉ pa꞉la꞉ hoke hauta꞉ hone ulu pia꞉me laa hone wiekeme. \p \v 40 Koto ekina꞉ Yesuma꞉ alota꞉ Saimonoo. Neke pa꞉ta꞉ I̱ma꞉ pi siki ma꞉nda꞉ lonoe leekeme. Mo halima꞉ Yesuna꞉ pi litolo hata꞉ alota꞉ Aowe disao. La kie leekeme. \v 41 Koto leeke Yesuma꞉ dupa leekeme. Nate ma꞉nda꞉na꞉ toopi tondiki halo hayeke hali ma꞉nda꞉ pa꞉ta꞉ta꞉ hali yaapoma꞉ toopi tondiki mipikime. Hali ma꞉nda꞉na꞉ pa wieke tondikita꞉ 100 kina. Kutupa hali ma꞉nda꞉na꞉ ekita꞉ 10 kina pa wiekeme. \v 42 Mo hande tondiki mipiki hali yaapoma꞉ ana꞉na꞉ ambula꞉peke na yeke handaa mo tondiki halo hayeke halima꞉ta꞉ ipilika꞉ tondikita꞉ pina꞉ pa paeyaeyekeme laata꞉ Yesuma꞉ Saimono pa꞉ta꞉ alota꞉ Koto hali yaapo epima꞉ hondo mo tondiki halo hayeke hali pa꞉ta꞉ puki anekehapu halia꞉pe leekeme. \p \v 43 Koto leeke Saimonoma꞉ alota꞉ Pa mata꞉la꞉me. Ya honema꞉ta꞉ mo ipika꞉ tondiki tieke kone pa paeyaeyeke hali yelieke leekeme. Koto leeke handaa Yesuma꞉ alota꞉ Nakana꞉ma꞉ ota꞉ aleme leekeme. \p \v 44 Kutaata꞉ Yesuma꞉ pa mo wanda꞉ handolo hata꞉ Saimono pa꞉ta꞉ alota꞉ Nakana꞉ma꞉ta꞉ do wanda꞉ta꞉ handelepe. I̱ta꞉ naka꞉ da pa꞉ta꞉ a꞉pa honda꞉ pamboa꞉pate nakana꞉ma꞉ ya anke tanda꞉pa꞉peke ikali ma꞉nda꞉ na kipate do wanda꞉ma꞉ta꞉ ipika꞉ e̱ tonda꞉pa꞉ma꞉ kone ya anke tanda꞉pao ipika꞉ itikima꞉ pa mea honiaeya꞉me leekeme. \v 45 Kutupa I̱ do da pa꞉ta꞉ honda꞉ pamboa꞉ dina꞉ta꞉ I̱ nunu na pipate do wanda꞉ma꞉ta꞉ ya anke nunu pia꞉ ekita꞉ hande I̱ epoa꞉ dina꞉ kini peaata꞉ ame do make paa pitolo pila꞉me leekeme. \v 46 Nakana꞉ma꞉ta꞉ mo olipi oetata꞉ ya youna꞉ na kitaepate do wanda꞉ma꞉ta꞉ ota꞉ epeke totopo piki oeta yaka ankena꞉ kitawaya꞉me. \v 47 I̱ma꞉ neke pa꞉ta꞉ alome. Ipika꞉ pukima꞉ homa꞉la꞉eki tieke I̱ pa꞉ta꞉ peneme yaala꞉ ekima꞉ta꞉ ipika꞉ wopu pa꞉la꞉ hoke hauta꞉ do paeta꞉la꞉ handa꞉e laa wala꞉la꞉me. Koto pa꞉la꞉pate ma꞉nda꞉ma꞉ ipika꞉ hoke hau hosikale siki kone Koda꞉ma꞉ paeyaowaya꞉ka꞉na꞉ta꞉ kota꞉ ipikana꞉ma꞉ Koda꞉ pa꞉ta꞉ta꞉ puki hosikale siki halieke leekeme. \p \v 48 Koto laa Yesuma꞉ mo wanda꞉ pa꞉ta꞉ alota꞉ Naka꞉ pele hoke hau paeyaota꞉ paela꞉me leekeme. \v 49 Pate mo teipolona꞉ tilao pitimiki wanda꞉halima꞉ ika꞉ ika꞉ kone pi la alualu pitolo hata꞉ alota꞉ Do hoke hau kone tanda꞉paasa꞉ halita꞉ epi ya꞉ka꞉ta꞉pe lemekeme. \v 50 Koto leekepate Yesuma꞉ mo wanda꞉ pa꞉ta꞉ alota꞉ Naka꞉ hone tulale ekima꞉ta꞉ neke pa꞉ta꞉la꞉la꞉me. Puki lopao pue leekeme. \c 8 \s1 Yesu ame̱le̱ pomimiki wanda꞉weki \p \v 1 Hosiki siki hao wetepe naneta꞉ Yesuta꞉ mo daoni paeyao pa꞉ta꞉ make mo hosiki da sunu pa꞉ta꞉ make pominolo hata꞉ Koda꞉na꞉ Kilu Tombuao Hala꞉ ekina꞉ Pi Seliapo wanda꞉hali paeyao pa꞉ta꞉ la hala꞉tiki pomiekeme. Kutupa make ipika꞉ 12 disaipolo haliweki make ipiki ame̱le̱ pemekeme. \v 2 Kutupa amba꞉ titina꞉ mo hande hoke temokomanu tolu lia make yenimanu pea mea epeaeyeke wanda꞉weki make Yesu telia꞉ mea pomimikime. Metita꞉ mo ipika꞉ puki pa꞉ta꞉ta꞉ temoko watake hata꞉ pitiekeeki tolu lieke wanda꞉e. Ipika꞉ biki ma꞉nda꞉ta꞉ Ma꞉kadalawanda꞉e. \v 3 Kutupa mo Hetodina꞉ da handeteke hayeke ami you hali Tiusana꞉ weteke bikita꞉ Dioa꞉na make Susa꞉na make mandane wanda꞉wekima꞉ make yeekeme. Mo wanda꞉wekima꞉ ika꞉ mani manuta꞉ Yesu make ipika꞉ disaipolo haliweki tonka꞉na꞉ tamba꞉ mutia pomu hatiki pimikime. \s1 Wae ale manuna꞉ onkoluma꞉ pi \r (Ma꞉tiu 13꞉1-9, Maka 4꞉1-9) \p \v 4 Wanda꞉hali aneke hapuma꞉ daoni ma꞉nda꞉ ma꞉nda꞉ pa꞉ta꞉ pa ipulu ipulu ombu hata꞉ wanda꞉hali tieke mombelemeke handaa Yesuma꞉ onkoluma꞉ pi ma꞉nda꞉ dupa la haleekeme. \v 5 Hali ma꞉nda꞉ma꞉ ipika꞉ e pa꞉ta꞉ wae alemanu a꞉pa tandeleekeme. Tandela꞉tia pulu haena꞉ mandane wae ale manuta꞉ pota꞉na꞉ lopa꞉ lopa꞉ piekeme. Kutu pieke mo wanda꞉halina꞉ ankema꞉ tumba tumba piki hau make ba titima꞉ make a꞉pa yata꞉po nemekeme. \v 6 Mandane wae ale manuta꞉ toopimanu manda ta̱leeke kenke sikina꞉ lopeekeme. Koto wae aleta꞉ opeekepate koto toopi manda wieke kenketa꞉ tenke tenke na leekeeki yaalo opuluekema꞉ piki nono peata꞉ pa hapiekeme. \v 7 Mandane wae ale manuta꞉ tekeke hake alemanu pa꞉ta꞉manu lopeekeme. Kutupa mo tekeke hake alemanu opa꞉liaaso hata꞉ hande wae alemanu opolo pieke ekita꞉ tombuaeyekeme. \v 8 Kutu piekepate mandane wae ale manuta꞉ epeke kenkena꞉ lopaata꞉ opa꞉liao napeketa꞉ 100manu wiekeme. Kutupa Yesuma꞉ ipika꞉ pi lo a꞉mbolo hata꞉ alota꞉ Katake lomba꞉la꞉ halima꞉ta꞉ wotu opina꞉e leekeme. \s1 Onkoluma꞉ pina꞉ teke \r (Ma꞉tiu 13꞉10-17, Maka 4꞉10-12) \p \v 9 Yesuna꞉ disaipolo haliwekima꞉ ipiki pa꞉ta꞉ lota꞉ pitolo alota꞉ Do onkoluma꞉na꞉ teke pi la kie lemekeme. \v 10 Ipikana꞉ma꞉ ika꞉ pi hombo peaaso hata꞉ alota꞉ Koda꞉na꞉ Kilu Tombuao Hala꞉ ekina꞉ a꞉mbaala꞉eki manuta꞉ iki pa꞉ta꞉ amba꞉ wala꞉la꞉me. Pate mo mandane wanda꞉hali pa꞉ta꞉ta꞉ onkoluma꞉ pi homekema꞉ la halolome. Pa ekipeke. Ikana꞉ma꞉ handolo pelemepate na handena꞉ opulu pelemepate hone na wina꞉e leekeme. \s1 Wae alena꞉ onkoluma꞉ pi teke waleekeeki \r (Ma꞉tiu 13꞉18-23, Maka 4꞉13-20) \p \v 11 Kutupa Yesuma꞉ alota꞉ Do onkoluma꞉ alo ekina꞉ teketa꞉ dupae. Mo hande wae aleta꞉ Koda꞉na꞉ pie. \v 12 Mo pota꞉na꞉ lopea꞉ wae ale manuta꞉ pi opiteleme wanda꞉hali ana꞉na꞉ halememe. Mo hoke Sadanima꞉ hande pi ika꞉ puki pa꞉ta꞉ yoka꞉ mea ikana꞉ma꞉ koto pi pa꞉ta꞉ hone na tulao tamba꞉ mina꞉la꞉eki na mina꞉yeke do hau pu hala꞉me. \v 13 Mo toopi panka꞉ panka꞉ pa꞉la꞉ kenkena꞉ lopa꞉la꞉ wae ale manuta꞉ wanda꞉hali ma꞉nda꞉ma꞉ Koda꞉na꞉ pi opua ta꞉na꞉ma꞉ homolo hata꞉ mina꞉lemepate ota꞉ wopu na mendiki hosiki haota꞉ mo la handa꞉la꞉ ekimanu ipula꞉ dina꞉ta꞉ paa lopo halememe. \v 14 Kutupa mo hande tekeke hake ale polu pa꞉ta꞉ lopeeke wae ale manuta꞉ pi opu haleme wanda꞉hali tupa꞉ ya꞉la꞉pate do kenkena꞉ haumanu pa꞉ta꞉ hone eleke eleke wopu wita꞉la꞉meeki make hamoko hau make do kenke lokena꞉ hone pa꞉la꞉ ekimanu make paeyaoma꞉ ika꞉ honemanu tumbatiki pita꞉leke handaa da꞉ka꞉polo hata꞉ ika꞉ kiliki na pota꞉lieke. \v 15 Kutupa mo epeke kenkena꞉ lopa꞉la꞉ wae ale manuta꞉ pi opua homu pu haleme wanda꞉hali ikana꞉ma꞉ honkopu hao epeke tupa꞉ minaata꞉ ika꞉ kiliki aneke a꞉eluekema꞉ pa putia pelimikie leekeme. \s1 Pa̱a̱ a꞉mbaasa꞉ pi \r (Maka 4꞉21-25) \p \v 16 Yesuma꞉ alota꞉ Hali ma꞉nda꞉ma꞉ lamepa ka꞉waata꞉ sini tiekema꞉ na mea dopuaniao o bedi tokele pa꞉ta꞉ na u hala꞉me. Koto hau na pikita꞉ wanda꞉hali a꞉pa honda꞉ pambetiki pitolo handena꞉ yeketa꞉ mo lamepa u hala꞉ alena꞉ u hala꞉me. \v 17 Ala꞉ta꞉ ma꞉nda꞉ a꞉mbao panka꞉ ula꞉ aleta꞉ hama nane peneme yao mea a꞉pa wilieke. Kutupa make ala꞉ta꞉ ma꞉nda꞉ tote pealimi ekita꞉ pa̱a̱na꞉ peneme yao mea ipilimikie leekeme. \p \v 18 Koto ekina꞉ta꞉ ikana꞉ma꞉ pi opu haleme ekita꞉ wotu handeteke hao hapa꞉peke. Ekipeke ma꞉nda꞉ma꞉ ala꞉ta꞉ ma꞉nda꞉ wia꞉ka꞉na꞉ta꞉ kota꞉ ipikita꞉ haka꞉ta꞉pao ota꞉ wotu milieke. Pate hali ma꞉nda꞉ma꞉ ala꞉ta꞉ ma꞉nda꞉ na wia꞉ka꞉na꞉ta꞉ kota꞉ mo hosikieki make ipika꞉ honema꞉ Ulume laa wia꞉eki kone yoka꞉ mealieke leekeme. \s1 Yesuna꞉ inkiki hameketonu \r (Ma꞉tiu 12꞉46-50, Maka 3꞉31-35) \p \v 19 Yesuna꞉ ama꞉ make hameke tonuma꞉ ipiki handolo epemekepate Yesu teke pa꞉ta꞉ pua꞉peke na yeekeme. Ekipeke wanda꞉hali anekehapuma꞉ Yesu mea hopa꞉liao haemekeme. \v 20 Ma꞉nda꞉ma꞉ Yesu pa꞉ta꞉ a꞉pa alota꞉ Naka꞉ ama꞉ kame tonuta꞉ neke handuluekema꞉ da hama do a꞉pa halememe leekeme. \v 21 Koto leeke Yesuma꞉ mo wanda꞉hali paeyao pa꞉ta꞉ alota꞉ Koda꞉na꞉ pi opua pu haleme wanda꞉halita꞉ yaka ama꞉ kametonu halememe leekeme. \s1 Yesuna꞉ pima꞉ po tilipu tunkulaeyekeeki \r (Ma꞉tiu 8꞉23-27, Maka 4꞉35-41) \p \v 22 Nate ma꞉nda꞉na꞉ Yesu ipika꞉ disaipolo haliweki ame̱le̱ pua kawaso ma꞉nda꞉na꞉ pitulu pemekeme. Yesuma꞉ iki pa꞉ta꞉ alota꞉ Nikita꞉ do ikali tunkula mone tea꞉na꞉ bape leekeme. Kutupata꞉ iki kini pea puluta꞉ \v 23 mo kawaso pulu haena꞉ta꞉ Yesuta꞉ u peliekeme. Kutupa koto kone po tilipu tieke epeeketa꞉ mo ikalita꞉ kawaso tukiki pa꞉ta꞉ tumbieke ekima꞉ta꞉ homa꞉la꞉ ekita꞉ teke pa꞉ta꞉ yeekeme. Koto ekina꞉ mo haliwekita꞉ paala꞉ tiekema꞉ homemekeme. \v 24 Kutupa ikana꞉ma꞉ Yesu a꞉pa tiao alota꞉ Aneke halio. Aneke halio. Nikita꞉ teke pa꞉ta꞉ do homoloma꞉ handa꞉e lemekeme. Koto lemeke Yesu tiaota꞉ mo hande honkopu wopu hake po tilipu pa꞉ta꞉ make mo la꞉ma꞉ la꞉ma꞉ piki honkopu hake ikali yaapo pa꞉ta꞉ta꞉ Paae leeke handaa ipilika꞉ honkopu paeyao upa lopaata꞉ la꞉ma꞉ na piki e̱ pondo na lepekeme. \v 25 Kutupa Yesuma꞉ ipika꞉ disaipolo haliweki pa꞉ta꞉ alota꞉ Ika꞉ hone tulaleme ekita꞉ hando ka꞉ta꞉pe laa lota꞉ piekeme. Koto leekepate iki paeyaoma꞉ penkilipa꞉tia pominolo make paala꞉ma꞉ wotu homolo hata꞉ ika꞉ ika꞉ kone alota꞉ Do halita꞉ epi ya꞉ka꞉ta꞉pe. Mo ikali pita꞉ po tilipu yaapoma꞉ ipika꞉ pi ota꞉ opitelepeme lemekeme. \s1 Kedasa halina꞉ hoke temokomanu tolu liekeeki \r (Ma꞉tiu 8꞉28-34, Maka 5꞉1-20) \p \v 26 Koto hau pea paeyeketa꞉ Yesu ipika꞉ disaipolo haliweki ame̱le̱ mo Kedasa kenke pa꞉ta꞉ kawasona꞉ pua opa꞉liaemekeme. Koto Kedasa kenketa꞉ mo Ka꞉lili kenke nanema꞉ hao mo ikali leke tunkula pua mone tea꞉na꞉ ula꞉me. \v 27 Yesuma꞉ mo kawaso mina꞉pa꞉lao mo ikali tea꞉na꞉ pulu haena꞉ta꞉ mo hoke temokomanu pitiki hali ma꞉nda꞉ mo daoni ma꞉nda꞉ pa꞉ta꞉ hao ipiki manda꞉hande pipikime. Ota꞉ amba꞉ hande hatiki a꞉paata꞉ ame make mo someta꞉ aka꞉ na yameke make da pa꞉ta꞉ na hao polu make ipikita꞉ mo homo hayeke haliweki u haemeke tikene da pa꞉ta꞉manu hao hayekeme. \v 28 Ipikana꞉ma꞉ Yesu handaata꞉ wi tieke alo hata꞉ Yesuna꞉ anke pa꞉ta꞉ handa꞉niao kenkena꞉ tu lopaata꞉ wi anekema꞉ pa alo alota꞉ Yesuo. Neketa꞉ Koda꞉ Manda Hala꞉ Tiekena꞉ Eiyekee. Nakana꞉ma꞉ I̱ yaapo eki hau puluekema꞉ pitelepe. Nakana꞉ma꞉ I̱ pa꞉ta꞉ tanda na kia꞉pee laa honke leekeme. \p \v 29 Koto leeke ekita꞉ Yesuma꞉ mo hoke temoko pa꞉ta꞉ Pue leeke ekina꞉ leekeme. Nate paeyao mo hoke temokoma꞉ mo hali wotu lu keatiki pomu hayekeme. Nate ma꞉nda꞉ nina꞉ta꞉ mo halita꞉ dipula pitao senipu manuma꞉ ipika꞉ kiki anke mea tonkao u hatiki pimikipate kone ipikana꞉ma꞉ mo senipumanu tunkula꞉ lubepi pia꞉tiki peaata꞉ mo hoke temokoma꞉ koto halita꞉ hapu hayeke alena꞉ lu mea pua꞉tiki piekeme. \p \v 30 Yesuma꞉ mo hali pa꞉ta꞉ alota꞉ Naka꞉ bikita꞉ epi ya꞉ka꞉ta꞉pe laa lota꞉ pieke handaa ipikana꞉ma꞉ alota꞉ Yaka bikita꞉ Eleke elekee leekeme. Koto leeke ekita꞉ temoko eleke eleke wotu ipiki pa꞉ta꞉ pitieke ekina꞉ leekeme. \v 31 Mo hoke temoko tonuma꞉ta꞉ Yesu pa꞉ta꞉ honke honke wotu alo hata꞉ alota꞉ Niki mo tanda mu halo poloma꞉ naku ka꞉ka꞉na꞉ tieke pa꞉ta꞉ dipula pitulu pomono na tapaapeke lemekeme. \p \v 32 Koto alena꞉ ma꞉na꞉ titi monema꞉ hayeke peiyene tea꞉na꞉ ne nalo haena꞉ mo hoke temoko tonuma꞉ Yesu pa꞉ta꞉ honke alota꞉ Mo ma꞉na꞉ titina꞉ weleke pa꞉ta꞉ pitulu pomono lae lemeke handaa Yesuma꞉ ika꞉ honke lemeke tupa꞉ pa pina꞉ la kiaeyekeme. \v 33 Koto ekina꞉ ikana꞉ma꞉ mo hali mina꞉pa꞉lao ma꞉na꞉ titina꞉ weleke pa꞉ta꞉ pitulu pemekeme. Kutu pimikita꞉ mo ma꞉na꞉ paeyaota꞉ mo peiyene paeleeke alena꞉ a̱i̱ya pua hola꞉pa꞉niao ikali pa꞉ta꞉ puaata꞉ ikali naa honki lemekeme. \p \v 34 Mo ma꞉na꞉ titi handeteke haemeke haliwekima꞉ mo pieke ekimanu handaata꞉ pindipa puata꞉ daoni nane haemeke wanda꞉hali make koto daoni tekepa꞉ta꞉ haemeke wanda꞉hali make la꞉tiki pomimikime. \v 35 Koto ekina꞉ mo wanda꞉halima꞉ hande pieke ekimanu handuluekema꞉ pua Yesu pa꞉ta꞉ a꞉paata꞉ amba꞉ hande weleke pa꞉ta꞉ hoke temokomanu pitieke halita꞉ Yesuna꞉ anke teke pa꞉ta꞉ dau yama epeke hone wia pitiekeeki handolo hata꞉ta꞉ iki paeyaoma꞉ paala꞉ma꞉ homemekeme. \v 36 Mo hali mea epeaaso piekeeki handemeke wanda꞉halima꞉ mo piekeeki manuta꞉ mo epemeke wanda꞉hali pa꞉ta꞉ la halemekeme. \v 37 Kutupa mo Kedasa kenke wanda꞉hali paeyaoma꞉ paala꞉ma꞉ homolo hata꞉ Yesu pa꞉ta꞉ alota꞉ Nakana꞉ma꞉ niki mina꞉pa꞉lao pue lemekeme. Koto lemeke Yesuma꞉ mo kawasona꞉ pitulu pua peekeme. \v 38 Kutu pitolo haena꞉ mo hoke temokomanu tolu lieke halima꞉ Yesu pa꞉ta꞉ honke alo alota꞉ I̱ta꞉ neke yaapo pana꞉e leekeme. Koto leeke Yesuma꞉ mo hali paa tapaaso hata꞉ alota꞉ \v 39 Neke naka꞉ da nane paa la꞉ka꞉la pua Koda꞉ma꞉ neke pa꞉ta꞉ pia꞉ hande ekimanu paeyao wanda꞉hali paeyao pa꞉ta꞉ pua la hala꞉tiki pu hapeke leekeme. Koto ekina꞉ta꞉ mo halima꞉ ipika꞉ teke da nane puaata꞉ Yesuma꞉ ipiki tamba꞉ miekeeki paeyaosiki wanda꞉hali pa꞉ta꞉ pua la hale hale piekeme. \s1 Diaitusina꞉ wandiki pita꞉ yeni hao hayeke wanda꞉ yaapo \r (Ma꞉tiu 9꞉18-26, Maka 5꞉21-43) \p \v 40 Yesu mo kawasona꞉ pita ikali leke mone tea꞉na꞉ paa la꞉ka꞉la peeke pita꞉ma꞉ta꞉ wanda꞉halima꞉ ipika꞉ opolo polo pieke ekina꞉ yu wia handeteke haemeke ekina꞉ ta꞉na꞉ma꞉ wopu homemekeme. \v 41 Koto tomona꞉ta꞉ hali ma꞉nda꞉ ipikita꞉ mo pi hotu haemeke dana꞉ you hali bikita꞉ Diaitusima꞉ a꞉pa Yesuna꞉ anke teke pa꞉ta꞉ panda꞉ puniao ipika꞉ da pa꞉ta꞉ epena꞉ honke leekeme. \v 42 Pa ekipeke ipika꞉ ota꞉ homeke hayeke bapita꞉ 12 yeeke wandikita꞉ tekesiki pa꞉ta꞉ homuluekema꞉ taapolo pitieke handaa leekeme. Koto leeke Yesu pulu haena꞉ mo wanda꞉hali anekehapu mandane mandane yama꞉ a꞉pa momba꞉laaso hata꞉ Yesu mea daka꞉pa daka꞉pa puluekema꞉ taapemekeme. \v 43 Kutupa mo wanda꞉hali anka꞉lopuna꞉ mo bapi 12 andusa꞉na꞉ we yopu hayeke wanda꞉ ma꞉nda꞉ hayekeme. Ipika꞉ yeni tamba꞉ mina꞉yeke dokeda haliweki pa꞉ta꞉ ipika꞉ mani paeyao hala꞉tiki piekepate ipika꞉ yenita꞉ ota꞉ na epeaeyekeme. \v 44 Kutupa mo wanda꞉ma꞉ mo wanda꞉hali anka꞉lopuna꞉ puata꞉ Yesuna꞉ hoki nanema꞉ a꞉pa ipika꞉ dopieke dau honiki wataeyekeme. Koto tomona꞉ kone hande we yapeeke ekita꞉ paeyekeme. \v 45 Yesuma꞉ mo wanda꞉hali pa꞉ta꞉ lota꞉ pitolo alota꞉ I̱ta꞉ epima꞉ wataeya꞉pe leekeme. Mo wanda꞉halima꞉ alota꞉ Niki ma꞉nda꞉ma꞉ na wataoma꞉me lemeketa꞉ Pidama꞉ Yesuna꞉ pi hombo peaaso alota꞉ Tekehalio. Do wanda꞉halima꞉ neke mea hopa꞉liao daka꞉paasa꞉ handa꞉e leekeme. \v 46 Koto leekepate Yesuma꞉ alota꞉ Ekipeke I̱ tukiki pa꞉ta꞉ ula꞉ honkoputa꞉ ma꞉nda꞉ teke pa꞉ta꞉ puleke handaa ma꞉nda꞉ma꞉ I̱ ota꞉ wataeya꞉me laa loa꞉me leekeme. \v 47 Mo wanda꞉ma꞉ Yesuma꞉ I̱ma꞉ pua꞉ ekita꞉ handa꞉ ya꞉ka꞉ta꞉me laa pututuma꞉ homa꞉tia a꞉pa Yesuna꞉ anke teke pa꞉ta꞉ a꞉pa panda꞉ puniaeyekeme. Wanda꞉hali paeyaona꞉ leke tonka꞉na꞉ hata꞉ mo wanda꞉ma꞉ Yesu pa꞉ta꞉ ipika꞉ dau honiki wataeyeke ekina꞉ teke make mo ipika꞉ yeni koto kone paeyekeeki make laa haleekeme. \p \v 48 Koto ekina꞉ta꞉ Yesuma꞉ mo wanda꞉ pa꞉ta꞉ alota꞉ Ya wandikio. Naka꞉ hone tulale ekima꞉ naka꞉ yeni ame do kone mea epeaasa꞉me. Puki lopao pue leekeme. \p \v 49 Yesuma꞉ do pi alo haena꞉ta꞉ hali ma꞉nda꞉ma꞉ mo you halina꞉ da nane hao a꞉pa Diaitusi pa꞉ta꞉ alota꞉ Naka꞉ wandikita꞉ ota꞉ homea꞉me. Mo Disa pa꞉ta꞉ pina꞉ pa paena꞉ lae leekeme. \v 50 Koto leekeeki opua Yesuma꞉ Diaitusi pa꞉ta꞉ alota꞉ Paala꞉ma꞉ na homa꞉pee. Hone tulaase hau homeke pika꞉na꞉ta꞉ naka꞉ wandiki sikita꞉ ota꞉ paa tialieke leekeme. \v 51 Yesu mo da pa꞉ta꞉ opolo pulu haena꞉ mo da tukiki pa꞉ta꞉ta꞉ ma꞉nda꞉ ota꞉ na pena꞉ leekepate pa Pida Dioni Dia꞉mesi make mo wandikina꞉ ateke inkiki yaapo pea Yesu ame̱le̱ da pa꞉ta꞉ honda꞉ pambemekeme. \v 52 Koto da pa꞉ta꞉ pitimiki wanda꞉hali paeyaoma꞉ta꞉ mo wandikina꞉ e̱ alo hata꞉ homa꞉ wia pitimikime. Yesuma꞉ mo wanda꞉hali pa꞉ta꞉ alota꞉ E̱ na lapepe. Do wandiki sikita꞉ ota꞉ na homa꞉la꞉pate pa u peliolo hata꞉ pa꞉la꞉me leekeme. \v 53 Koto leekeeki opuaata꞉ mo wanda꞉halima꞉ta꞉ mo wandiki siki ota꞉ homea꞉eki handemeke ekina꞉ Yesu pa꞉ta꞉ kitaemekeme. \v 54 Koto lemekepate Yesuma꞉ mo wandiki sikina꞉ kiki mea wi alo hata꞉ alota꞉ Wandiki sikio. Tiae leekeme. \v 55 Koto alema꞉ kone mo wandiki pa꞉ta꞉ deto hala꞉eki paa a꞉pa ipiki paa tiaeyekeme. Kutupa Yesuma꞉ mo ateke inkiki pa꞉ta꞉ Mo wandiki ne ma꞉nda꞉ hala꞉pe leekeme. \v 56 Kotoeki handaata꞉ mo wandikina꞉ ateke inkiki yaapoma꞉ta꞉ dota꞉ ota꞉ pita꞉la꞉pe honema꞉ lapeke pi pea꞉ mamata꞉pa pekepate Yesuma꞉ mo tooli pa꞉ta꞉ pi tanda pikima꞉ alota꞉ Wanda꞉hali ma꞉nda꞉ pa꞉ta꞉ do pitoloeki na la hala꞉pa꞉peke leekeme. \c 9 \s1 Yesuma꞉ mo 12 disaipolo haliweki tapaeyekeeki \r (Ma꞉tiu 10꞉5-15, Maka 6꞉7-13) \p \v 1 Yesuma꞉ mo 12 disaipolo haliweki pa꞉ta꞉ Ipupa꞉e laa homeke pa꞉ta꞉ mea momba꞉laota꞉ ikana꞉ma꞉ yenimanu mea epeaena꞉ make hoke temokomanu paeyaosiki tolu lina꞉yeke Yesuma꞉ iki pa꞉ta꞉ wele pita꞉la꞉ biki pita꞉ honkopu yaapo hale hale piekeme. \v 2 Kutupa mo haliwekima꞉ Koda꞉na꞉ Kilu Tombuao Hala꞉ ekina꞉ pi walolo hata꞉ yeni haleme wanda꞉hali mea epeawaena꞉ Yesuma꞉ iki tapaeyekeme. \v 3 Tapaaso hata꞉ta꞉ dupa leekeme. Iki paeyao pota꞉ poluekema꞉ta꞉ ala꞉ta꞉ ma꞉nda꞉ na mea mina꞉pa꞉peke. Koto alo ale manuta꞉ tumapu o nu o ne o mani o topo pea꞉peke sedi homeke kone na mea mina꞉pa꞉peke. \v 4 Kutupa ma꞉nda꞉ epima꞉ ta꞉na꞉ma꞉ homolo hata꞉ ipika꞉ da pa꞉ta꞉ iki hatuku pea꞉ka꞉na꞉ta꞉ mo daoni mina꞉pa꞉lalueke hone wimika꞉na꞉ta꞉ kota꞉ koto pua hale da pa꞉ta꞉ homeke hao pua꞉pa꞉peke. \v 5 Daoni ma꞉nda꞉ pa꞉ta꞉ mandali epima꞉ iki na handa꞉ mimika꞉na꞉ta꞉ kota꞉ koto daoni mina꞉pa꞉laaso hata꞉ mo wanda꞉hali kinki pitolota꞉ ika꞉ ankena꞉ ta̱la̱꞉la̱꞉ dokolo tande lapa꞉peke leekeme. \v 6 Koto ekimanu lo paeyaeyeketa꞉ hande 12 disaipolo haliwekita꞉ Yesu mina꞉pa꞉lao da hala꞉ hala꞉ pomu lopolo hata꞉ hande Pi Seliapo wala꞉tiki pominolo hata꞉ iki pomimiki ale pa꞉ta꞉manu wanda꞉hali mea epeatia pomimikime. \s1 Hetodima꞉ pomoma꞉ homeekeeki \r (Ma꞉tiu 14꞉1-12, Maka 6꞉14-29) \p \v 7 Mo Ka꞉lili da kenke pa꞉ta꞉ you hali Hetodima꞉ koto pieke ekina꞉ pi paeyao opieke ekima꞉ pomoma꞉ homeekeme. Pa ekipeke mandane haliwekima꞉ dupiki pi la alualu pimikime. Mo bapitaisi peao hayeke hali Dionita꞉ paa tiao a꞉pa hala꞉me lemekeme. \v 8 Kutupa mandane wanda꞉halima꞉ta꞉ Elaidia peneme yao opolo a꞉pa꞉la꞉me lemekeme. Mandane wanda꞉halima꞉ alota꞉ Amba꞉ hande hayeke potopede hali ma꞉nda꞉ paa tiaeya꞉ka꞉ta꞉me lemekeme. \v 9 Koto ekina꞉ta꞉ Hetodima꞉ alota꞉ I̱ma꞉ta꞉ Dionina꞉ make mea tunkulua꞉pate pa do pi ma꞉nda꞉ ma꞉nda꞉ opitolo halita꞉ ota꞉ epi ya꞉ka꞉ta꞉pe. Koto ekina꞉ ipikana꞉ma꞉ Yesu ota꞉ handuluekema꞉ taapa꞉tiki pu hayekeme. \s1 Yesuma꞉ 5 daoseni wanda꞉hali ne haleekeeki \r (Ma꞉tiu 14꞉13-21, Maka 6꞉30-44, Dioni 6꞉1-14) \p \v 10 Mo aposolo haliwekima꞉ paa a꞉pa ika꞉ pimiki ekimanu paeyaosiki Yesu pa꞉ta꞉ la halemekeme. Koto ekina꞉ta꞉ Yesuma꞉ mo haliweki ame̱le̱ ika꞉ siki mo Betesaida teke da pa꞉ta꞉ pemekeme. \v 11 Kutu pimikieki opitolo hata꞉ wanda꞉hali wopuma꞉ momba꞉latia pulu hata꞉ Yesu teli mea pemekeme. Yesuma꞉ mo epemeke wanda꞉hali handaata꞉ ta꞉na꞉ma꞉ homolo hata꞉ Koda꞉na꞉ Kilu Tombuao Hala꞉ ekina꞉ pi walolota꞉ yeni homemeke wanda꞉halita꞉ mea epeaeyekeme. \p \v 12 Welealo nane nate pambolo haena꞉ta꞉ mo 12 disaipolo haliwekima꞉ Yesu pa꞉ta꞉ a꞉pa alota꞉ Do niki haloma꞉ alena꞉ta꞉ wanda꞉hali na hake alena꞉ma꞉ do wanda꞉halita꞉ mo da sunu make mo napeke ne make pelia꞉peke damanu weina꞉ma꞉ pena꞉ tapae lemekeme. \v 13 Koto lemekepate Yesuma꞉ alota꞉ Ikana꞉ma꞉ kone mo wanda꞉hali ne hala꞉pa꞉peke leekeme. Koto leeke ikana꞉ma꞉ alota꞉ Niki pa꞉ta꞉ta꞉ palaowa wala꞉ kiki homekena꞉ ta꞉peli yaapo pea homeke wia haloma꞉me. Naka꞉ honema꞉ta꞉ nikana꞉ma꞉ do wanda꞉hali paeyaona꞉ ne paeyao hambalo pomonope laa lota꞉ pimikime. \v 14 Ekipeke 5 daoseni haliweki koto pa꞉ta꞉ haemekeme. Yesuma꞉ mo disaipolo haliweki pa꞉ta꞉ alota꞉ Mo wanda꞉halita꞉ hali tieke yaapona꞉ kiki yaapomanu tupa꞉ momba꞉lao kenkena꞉ mea pitama꞉ pitama꞉ pipee leekeme. \p \v 15 Mo disaipolo haliwekima꞉ koto hau pimikita꞉ \v 16 Yesuma꞉ mo hande kiki homeke palaowa wala꞉ sunu make mo ta꞉peli yaapo pea meata꞉ oli ya nane handa꞉liao hata꞉ Koda꞉ pa꞉ta꞉ keiyae pi leekeme. Koto laata꞉ mo ne pindi pindi peaata꞉ ipika꞉ disaipolo haliweki pa꞉ta꞉ta꞉ mo wanda꞉hali paeyao pa꞉ta꞉ telipape laa haleekeme. \v 17 Mo wanda꞉hali paeyaoma꞉ ne ana꞉na꞉ no tumba tumba peaata꞉ mo disaipolo haliwekima꞉ mo putupiliki wiekeeki manuta꞉ kiki yaapo paeya ankena꞉ yaapo wieke nuna꞉ mondu tumba tumba pea wimikime. \s1 Pidama꞉ Yesuta꞉ Ketisoe leekeeki \r (Ma꞉tiu 16꞉13-19, Maka 8꞉27-29) \p \v 18 Nate ma꞉nda꞉na꞉ Yesuma꞉ ipika꞉ honumake hata꞉ yeni pitolo haena꞉ta꞉ ipika꞉ disaipolo haliweki opolo epemekeme. Yesuma꞉ mo haliweki pa꞉ta꞉ lota꞉ pitolo alota꞉ Wanda꞉halima꞉ I̱ta꞉ Epina꞉ biki lo halemepe leekeme. \v 19 Ipika꞉ disaipolo haliwekima꞉ ipika꞉ pi hombo peaaso alota꞉ Mandane wanda꞉halima꞉ta꞉ neketa꞉ mo bapitaisi peao haya꞉ hali Dioni lo halememe. Mandane wanda꞉halima꞉ta꞉ Elaidia lo halememe. Mandane wanda꞉halima꞉ta꞉ potopede hali ma꞉nda꞉ amba꞉ hande homea꞉pate ame dosiki paa tiao hala꞉ halie lo halememe lemekeme. \v 20 Koto lemeke Yesuma꞉ mo haliweki pa꞉ta꞉ alota꞉ Pa ikana꞉ma꞉ I̱ta꞉ epi lo halemepe leeke handaa Pidama꞉ alota꞉ Neketa꞉ Koda꞉na꞉ Ketisoe leekeme. \v 21 Koto leeke Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ ota꞉ loa꞉ma꞉ do pita꞉ wanda꞉hali ma꞉nda꞉ pa꞉ta꞉ na lapa꞉peke leekeme. \s1 Tanda meaata꞉ homolueke leekeeki \r (Ma꞉tiu 16꞉20-28, Maka 8꞉30—9꞉1) \p \v 22 Yesuma꞉ paa pi ma꞉nda꞉ alo alota꞉ Wanda꞉halina꞉ Eiyeketa꞉ tanda tieke ota꞉ wotu meaata꞉ mo Diu tondiki haliwekima꞉ make yeni peao haleme you haliwekima꞉ make wape pea ula꞉ Lo Pimanu wala꞉tiki pu haleme haliwekima꞉ make ipiki kialimikie. Ipikita꞉ homena꞉ lulu pelemepate hoto tepo wiaata꞉ paa tialieke leekeme. \p \v 23 Koto laata꞉ Yesuma꞉ iki paeyao pa꞉ta꞉ alota꞉ Hali ma꞉nda꞉ epima꞉ I̱ telia꞉ mea ipulueke hone wia꞉ka꞉na꞉ta꞉ ipika꞉ kone hone yonka꞉lao nate paeyao ipika꞉ a꞉ka꞉tei wapepiki ti mea tia pominolo hata꞉ I̱ telia꞉ mea pomu haena꞉e. \v 24 Pa ekipeke. Hali ma꞉nda꞉ epima꞉ ipika꞉ deto hala꞉eki alupaama꞉na꞉ yeke hone wotu wia꞉ka꞉na꞉ta꞉ kota꞉ ipika꞉ deto hala꞉ ekita꞉ alupalieke. Kutu pulu pa꞉la꞉pate I̱ pa꞉ta꞉ hone witolo hata꞉ ipika꞉ deto hala꞉eki alu pina꞉ lea꞉ka꞉na꞉ta꞉ kota꞉ koto halita꞉ ipika꞉ deto hala꞉ ekita꞉ paa miniki halieke. \v 25 Hali ma꞉nda꞉ma꞉ honkopu hao do kenkena꞉ anemone ale paeyao mina꞉la꞉pate ipika꞉ halo pa꞉la꞉eki kone alu pao o tondiki halea꞉ka꞉na꞉ta꞉ kota꞉ koto ale manuma꞉ta꞉ ipikita꞉ ekipa tamba꞉ milia꞉pe. \v 26 Hali ma꞉nda꞉ epima꞉ I̱ pa꞉ta꞉ make yaka waloa꞉ pimanu pa꞉ta꞉ make yaala꞉ma꞉ homea꞉ka꞉na꞉ta꞉ kota꞉ mo Wanda꞉halina꞉ Eiyeke make Ateke make yako piki enisolo tonu make iki paeyaona꞉ pa̱a̱ pa꞉la꞉eki ame̱le̱ a꞉paata꞉ mo Wanda꞉halina꞉ Eiyekema꞉ mo hande hali pa꞉ta꞉ make yaala꞉ma꞉ homaalieke. \v 27 I̱ma꞉ iki pa꞉ta꞉ ota꞉ pi alome. Do haleme mandane wanda꞉halita꞉ ambi na homeke hamena꞉ Koda꞉na꞉ Kilu Tombuao Hala꞉eki ota꞉ handilimikie leekeme. \s1 Yesuna꞉ wonu piliekeeki \r (Ma꞉tiu 17꞉1-8, Maka 9꞉2-8) \p \v 28 Yesuma꞉ dupiki pi laa pula homekemanu paeyeketa꞉ yeni puluekema꞉ pote ma꞉nda꞉ pa꞉ta꞉ peekeme. Ipikana꞉ma꞉ta꞉ Pida Dioni Dia꞉mesi hatuku opa꞉liaemekeme. \v 29 Yesuma꞉ yeni pitolo pitina꞉ta꞉ ipika꞉ leke popeleketa꞉ ta꞉ta꞉ ma꞉nda꞉ pikieki hao make ipika꞉ pambaeyeke aka꞉ta꞉ ota꞉ hake wotu pea baeyeke ekima꞉ leke yale yale piki nono piekeme. \v 30 Kutupa koto kone hali yaapota꞉ Yesu ame̱le̱ hata꞉ pi lemekeme. Mo hali yaapota꞉ Mosesi pita꞉ Elaidia yaapo yeekeme. \v 31 Ipilikita꞉ Koda꞉na꞉ pa̱a̱na꞉ a꞉pa hata꞉ Yesu ame̱le̱ ipiki teke pa꞉ta꞉ Koda꞉ma꞉ pina꞉e hone ula꞉ tupa꞉ Diutuseleme da pa꞉ta꞉ homolo pieke ekina꞉ pi hotiolo haemekeme. \v 32 Pida pita꞉ mo hali yaapo peata꞉ u yoka꞉lupa pemekepate tiaota꞉ Yesuna꞉ pa̱a̱ pikieki make mo Yesu ame̱le̱ haepeke hali yaapo handemekeme. \v 33 Koto ekina꞉ta꞉ hali yaapota꞉ Yesu mina꞉pa꞉lao poluekema꞉ pulu haena꞉ laata꞉ Pidama꞉ Yesu pa꞉ta꞉ alota꞉ Tekehalio. Niki do pa꞉ta꞉ haloma꞉ ekita꞉ ota꞉ epeke epomekeme. Topu da tepo a꞉eyamono lae. Ma꞉nda꞉ naka꞉eki. Ma꞉nda꞉ Mosesina꞉eki. Ma꞉nda꞉ Elaidiana꞉eki pea a꞉eyamono lae leekeme. Pidama꞉ leeke pi manuta꞉ hone wotu na wiki hata꞉ leekeme. \p \v 34 Pidama꞉ dupiki pi alo haena꞉ta꞉ koa a꞉pa ipika꞉ su̱a̱ma꞉ta꞉ iki mea tumbaeyekeme. Tumbaeyeke handaata꞉ mo disaipolo haliweki tepoma꞉ paala꞉ma꞉ homemekeme. \v 35 Mo koa tukiki pa꞉ta꞉ pi ho̱la̱꞉makema꞉ la꞉niaaso hata꞉ alota꞉ Do ya wekita꞉ I̱ma꞉ kiki ma̱leke lulu wekima꞉ pa꞉la꞉me. Ipika꞉ pi opua꞉pe laa la꞉niaeyekeme. \v 36 Koto pi ho̱la̱꞉make laa paeyeke naneta꞉ Yesu homeke hapelia hayekeeki handemekeme. Mo hali tepoma꞉ mo handemeke ekimanu wanda꞉hali ma꞉nda꞉ pa꞉ta꞉ na la haleke ika꞉ homeke hone wimikime. \s1 Hoke temokoma꞉ hoeyaeyeke weki epeaeyekeeki \r (Ma꞉tiu 17꞉14-18, Maka 9꞉14-27) \p \v 37 Da ma꞉nda꞉ kelepeeketa꞉ Yesuta꞉ mo hali tepo ame̱le̱ mo pote mina꞉pa꞉lao hola꞉pa꞉niaemekepate wanda꞉hali aneke hapuma꞉ Yesu a꞉pa manda꞉hande pimikime. \v 38 Mo wanda꞉hali anka꞉lopuna꞉ a꞉pa hayeke hali ma꞉nda꞉ma꞉ Yesu pa꞉ta꞉ wi anekema꞉ alo alota꞉ Disao. I̱ma꞉ neke pa꞉ta꞉ honke aloma꞉ yaka weki a꞉pa handa꞉e. Ipikita꞉ yaka ota꞉ homeke wekie. \v 39 Kutupa ipikita꞉ mo hoke temokoma꞉ mina꞉tiki pita꞉la꞉ natena꞉ta꞉ e̱ wi tieke la꞉tiki pu hala꞉me. Kutupa mo hoke temokoma꞉ mo weki mea lu keao kake pa꞉ta꞉ dako hankoloma꞉ lu hala꞉me. Kutupa mo hoke temokoma꞉ yombu moneatiki pu hata꞉ a̱i̱ na mina꞉pa꞉lalieke. \v 40 Koto ekina꞉ta꞉ I̱ma꞉ naka꞉ disaipolo haliwekima꞉ tolu lina꞉yeke honke loa꞉pate mo haliwekima꞉ ana꞉ na pia꞉me leekeme. \v 41 Koto ekina꞉ta꞉ Yesuma꞉ ipika꞉ pi hombo peaaso alota꞉ Ikita꞉ hone wopu na tulaake ata꞉ka꞉ peao haleme wanda꞉halie. Nate ekipuna꞉ iki ame̱le̱ ombu hao hanope. Nate ekipuna꞉ ika꞉ ka꞉nda꞉ kiteleme ekimanu meanope laata꞉ mo hali pa꞉ta꞉ alota꞉ Naka꞉ weki I̱ pa꞉ta꞉ hatuku epoe leekeme. \v 42 Mo weki ipulu haena꞉ta꞉ mo hande hoke temokoma꞉ mo weki kenkena꞉ mea lopao lu keayekeme. Yesuma꞉ mo hoke temoko hando laata꞉ mo weki mea epeao ipika꞉ ateke pa꞉ta꞉ paa hala꞉ moneayekeme. \v 43 Koto hau handemeke wanda꞉hali paeyaoma꞉ Koda꞉na꞉ honkopu wotu hala꞉eki handolo hata꞉ penkilipa꞉tia pomimikime. \s1 Ipika꞉ homa tiaalo piekeeki paa la haleekeeki \r (Ma꞉tiu 17꞉22-23, Maka 9꞉30-32) \p Wanda꞉hali paeyaoma꞉ Yesuma꞉ putia pomiekeeki handaata꞉ pututu pieke pi pa alo alo haena꞉ Yesuma꞉ ipika꞉ disaipolo haliweki pa꞉ta꞉ alota꞉ \v 44 Ikana꞉ma꞉ I̱ma꞉ la kulu polo pi opua hone na yonka꞉lapa꞉peke. Wanda꞉halina꞉ Eiyeketa꞉ mo mandane haliwekina꞉ kiki pa꞉ta꞉ hala꞉ monealieke leekeme. \v 45 Koto leeke ekina꞉ teketa꞉ mo disaipolo haliwekima꞉ hone na wimikime. Mo pi teketa꞉ iki a꞉mbaeyeke handaa ika꞉ honema꞉ hone wia꞉peke na yeekeme. Koto ekina꞉ta꞉ ikana꞉ma꞉ mo pi tekena꞉ lota꞉ pia꞉peke ekita꞉ paala꞉ma꞉ homolo hata꞉ na lota꞉ pimikime. \s1 Tumiki halita꞉ epipe \r (Ma꞉tiu 18꞉1-5, Maka 9꞉33-37) \p \v 46 Kutupa mo disaipolo haliwekima꞉ ika꞉ ika꞉ kone tumiki halita꞉ epipe laa pi la alualu pimikime. \v 47 Yesuma꞉ ika꞉ hone pa꞉ta꞉ wimiki ekimanu handaata꞉ hosiki weki siki ma꞉nda꞉ hatuku a꞉pa tiao hata꞉ \v 48 iki pa꞉ta꞉ alota꞉ Ma꞉nda꞉ epima꞉ yaka bikina꞉ dupiki weki siki handa꞉ mia꞉ka꞉na꞉ta꞉ kota꞉ I̱ kone handa꞉ mina꞉la꞉me. Kutupa hali epima꞉ I̱ handa꞉ mia꞉ka꞉na꞉ta꞉ kota꞉ I̱ tapaeya꞉ hali make handa꞉ mina꞉la꞉me leekeme. Iki tukiki pa꞉ta꞉ta꞉ biki na wiki hali ma꞉nda꞉ haya꞉ka꞉na꞉ta꞉ kota꞉ ipikana꞉ma꞉ iki paeyaosiki lu ankulala꞉me leekeme. \s1 Ma꞉nda꞉ epima꞉ iki ame̱le̱ a꞉nda꞉ na lia꞉ka꞉na꞉ta꞉ ipikita꞉ ika꞉ekie \r (Maka 9꞉38-40) \p \v 49 Dionima꞉ alota꞉ Tekehalio. Hali ma꞉nda꞉ma꞉ naka꞉ bikina꞉ hoke temokomanu tolu baeya꞉pate mo halita꞉ niki ame̱le̱ na tunaleke handaa nikana꞉ma꞉ koto hau na pia꞉pe laa sa꞉sa꞉ puma꞉me leekeme. \v 50 Koto leeke Yesuma꞉ Dioni pa꞉ta꞉ make ipika꞉ disaipolo haliweki paeyao pa꞉ta꞉ make alota꞉ Ikana꞉ma꞉ ipiki sa꞉sa꞉ puluekema꞉ na taapa꞉peke. Ekipeke iki ame̱le̱ a꞉nda꞉ na lita꞉la꞉ halita꞉ kota꞉ ika꞉ ta꞉ma꞉nie leekeme. \s1 Sametia da ma꞉nda꞉ma꞉ Yesu mea꞉peke kiaemekeeki \p \v 51 Yesu oli hepeni nane mea polo pieke nate teke pa꞉ta꞉ yolo epeeketa꞉ ipikita꞉ mo Diutuseleme teke da nane ota꞉ polueke hone u paleke peekeme. \v 52 Ipikana꞉ma꞉ mo Sametia da ma꞉nda꞉ nane ipika꞉ da ne ala꞉ta꞉ ala꞉ta꞉ wamo peaena꞉ yeke kinki haliweki tapaeyekeme. \v 53 Kutu pimikipate koto pa꞉ta꞉ haemeke wanda꞉halima꞉ hone witolota꞉ Yesuta꞉ mo Diutuseleme da nane yopula꞉me laata꞉ ipiki na handa꞉ mimikime. \v 54 Kutu pimikieki mo disaipolo hali Dia꞉mesi pita꞉ Dioni yaapoma꞉ dupiki hau handaata꞉ Yesu pa꞉ta꞉ alota꞉ Tekehalio. Naka꞉ honema꞉ta꞉ dikana꞉ma꞉ oli ya nanema꞉ ti uleke a꞉pa do wanda꞉hali mea hoeyaena꞉ wi loponope lepekeme. \v 55 Yesuma꞉ ipiliki pa꞉ta꞉ la꞉ka꞉la꞉ moneaaso hata꞉ alota꞉ Kutupiki pi na lapepee leekeme. \v 56 Kutupa Yesu ipika꞉ disaipolo haliweki ame̱le̱ da siki ma꞉nda꞉ pa꞉ta꞉ pemekeme. \s1 Yesu ame̱le̱ ponope laa taapa꞉la꞉ haliweki \r (Ma꞉tiu 8꞉19-22) \p \v 57 Ikita꞉ mo pota꞉na꞉ pulu haena꞉ hali ma꞉nda꞉ma꞉ Yesu pa꞉ta꞉ alota꞉ I̱ta꞉ neke pomilipi ale pa꞉ta꞉manu ta꞉lia꞉ mea ipulueke leekeme. \v 58 Yesuma꞉ mo hali pa꞉ta꞉ alota꞉ Tikene kika manuma꞉ta꞉ ika꞉ kenke ka꞉ka꞉na꞉ wiaata꞉ ba manuma꞉ make ika꞉ dakemanu hala꞉pate pa mo Wanda꞉halina꞉ Eiyeketa꞉ ipika꞉ hoto minolo pelia꞉peke da ota꞉ ma꞉nda꞉ siki make dia꞉me leekeme. \v 59 Kutupa Yesuma꞉ hali ma꞉nda꞉ pa꞉ta꞉ alota꞉ I̱ telia꞉ mea epoe leekepate mo halima꞉ alota꞉ Tekehalio. Titina꞉ amba꞉la yaka apa꞉ mea hoilu pono lae leekeme. \v 60 Yesuma꞉ alota꞉ Homeeke wanda꞉halima꞉ kone ika꞉ homa꞉la꞉ wanda꞉hali toko mea hoina꞉ma꞉ neketa꞉ Koda꞉na꞉ Kilu Tombuao Hala꞉ ekina꞉ pi pua wala꞉tiki pu hae leekeme. \p \v 61 Hali ma꞉nda꞉ma꞉ alota꞉ Tekehalio. I̱ta꞉ neke telia꞉ mea ipuluekema꞉ titina꞉ amba꞉la yaka tapake pa꞉ta꞉ A꞉taloe lolo ponoe leekeme. \v 62 Yesuma꞉ alota꞉ Hali epima꞉ ipika꞉ kenke aowa꞉ mea lopaasa꞉ ale miniki hata꞉ kenke aowa꞉tia puluta꞉ hoki nane handa꞉tiki pu haya꞉ka꞉na꞉ta꞉ kota꞉ koto halita꞉ Koda꞉na꞉ Kilu Tombuao Hala꞉eki tukiki pa꞉ta꞉ta꞉ e pokaapeke ana꞉ na pa꞉la꞉me leekeme. \c 10 \s1 Yesuma꞉ 72 haliweki tapaeyekeeki \p \v 1 Do hande haumanu peaata꞉ Tekehalima꞉ 72 haliweki mea yaapo yaapo pu mo ipiki polo pieke da pa꞉ta꞉manu tapa tapa piekeme. \v 2 Kutupa ipikana꞉ma꞉ iki pa꞉ta꞉ alota꞉ Ne napeke wotu mo ena꞉ta꞉ pota꞉la꞉pate mo ne momba꞉laapeke wanda꞉halita꞉ aneke hapu dia꞉me. Koto ekina꞉ta꞉ mo e teke halima꞉ ipika꞉ ena꞉ ne mea momba꞉laalo peleme wanda꞉hali ana꞉na꞉ tapaena꞉ ikana꞉ma꞉ yeni pu hapa꞉peke. \v 3 Pupa꞉e I̱ma꞉ ikita꞉ sipisipi ma꞉na꞉na꞉ ikikisunu mandane tikene kikamanu haleme ale pa꞉ta꞉manu taa tapaaso handa꞉e. \v 4 Ikana꞉ma꞉ mani pausa o nu sunu o anke dake ma꞉nda꞉ na mea pua꞉pa꞉peke. Ma꞉nda꞉ ame̱le̱ pota꞉na꞉ manda꞉hande pitolo hata꞉ pi na lapa꞉peke. \v 5 Ikana꞉ma꞉ da ma꞉nda꞉ pa꞉ta꞉ honda꞉ pambemeka꞉na꞉ta꞉ titina꞉ amba꞉la koto da pa꞉ta꞉ta꞉ A꞉nda꞉ peliaasa꞉eki epena꞉e lapa꞉peke. \v 6 Kutupa koto da pa꞉ta꞉ a꞉nda꞉ peliaasa꞉ ekina꞉ hone wopu u hala꞉ hali ma꞉nda꞉ haya꞉ka꞉na꞉ta꞉ kota꞉ a꞉nda꞉ peliaasa꞉ pi le ekita꞉ ipiki pa꞉ta꞉ pa wina꞉ lapa꞉peke. Dia꞉ya꞉ka꞉na꞉ta꞉ kota꞉ naka꞉ hande a꞉nda꞉ peliaaso pita꞉ pao mia꞉peke. \p \v 7 E pokao hala꞉ hali ipika꞉ yenkita꞉ ota꞉ mea꞉peke ya꞉la꞉ ekina꞉ da lumbu na likita꞉ homeke da pa꞉ta꞉ pa hao hata꞉ ne ikali alekemanu kimika꞉na꞉ta꞉ pa napa꞉peke. \v 8 Kutupa ikita꞉ da yu ma꞉nda꞉ pa꞉ta꞉ pemeka꞉na꞉ta꞉ koto pa꞉ta꞉ haleme wanda꞉halima꞉ iki pa꞉ta꞉ ta꞉na꞉ma꞉ homolo hata꞉ hatuku mea nemanu kimika꞉na꞉ta꞉ kota꞉ pa napa꞉peke. \v 9 Koto da yu pa꞉ta꞉ yeni haleme wanda꞉hali wopu mea epeapa꞉peke. Kutupa koto pa꞉ta꞉ haleme wanda꞉hali pa꞉ta꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ opolo a꞉pa꞉la꞉me lapa꞉peke. \v 10 Koto pa꞉la꞉pate da yu ma꞉nda꞉ pa꞉ta꞉ pemeka꞉na꞉ta꞉ mo wanda꞉halima꞉ iki ika꞉ da pa꞉ta꞉ na hatuku pemeka꞉na꞉ta꞉ kota꞉ ikana꞉ma꞉ mo pota꞉ nina꞉ pua hata꞉ alota꞉ \v 11 Ika꞉ daoni tukiki pa꞉ta꞉ ula꞉ dokolota꞉ nika꞉ ankena꞉ ta̱la̱꞉la̱꞉ ekita꞉ iki pa꞉ta꞉ kone koto tandela꞉neasoma꞉pate doeki homeke hone wipee laata꞉ Koda꞉na꞉ Kilu Tombuao Hala꞉ ekita꞉ iki teke siki pa꞉ta꞉ koto epea꞉me hone wotu wia꞉pa꞉peke lapa꞉peke. \v 12 I̱ma꞉ iki pa꞉ta꞉ ota꞉ alome. Hande pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ Koda꞉ma꞉ mo Sodomo halo pa꞉la꞉ a꞉ta꞉ma꞉ homa꞉la꞉ ekita꞉ mo hande daoni pa꞉ta꞉ halo pa꞉la꞉ ekita꞉ ota꞉ haka꞉ta꞉pao ankulao halieke alome leekeme. \s1 Hone na tulaemeke daonimanu \r (Ma꞉tiu 11꞉20-24) \p \v 13 A꞉ta꞉ tieke Kotaasini daonio. A꞉ta꞉ tieke Betesaida daonio. I̱ma꞉ mo ipiliki pa꞉ta꞉ na handeke haumanu paeyao a꞉nda꞉ mo hande daoni yaapo Taiya Saidoni pa꞉ta꞉ pua꞉ka꞉na꞉ yoluta꞉ kota꞉ koto da yaapo pa꞉ta꞉ haleme wanda꞉hali ika꞉ puki lekelemeka꞉ta꞉me laa Koda꞉ma꞉ handena꞉ta꞉ busa꞉ pitikimanu wepia yamaata꞉ lanka꞉ apolo kitulu pimime. I̱ma꞉ ipiliki pa꞉ta꞉ta꞉ ota꞉ pi alome. Mo pi yokaalu pulu pa꞉la꞉ nate opolo epea꞉ka꞉na꞉ta꞉ kota꞉ \v 14 Koda꞉ma꞉ mo Taiya Saidoni yaapo pa꞉ta꞉ halo pa꞉la꞉ a꞉ta꞉ma꞉ homa꞉la꞉ ekita꞉ mo ipiliki Kotaasini Betesaida yaapo pa꞉ta꞉ kulu pa꞉la꞉eki ota꞉ haka꞉ta꞉pao ankulao halieke. \v 15 Kutupa Kapeneamio. Neketa꞉ naka꞉ homeke oli ya nane mea a꞉meiyalueke hone wipe. Neketa꞉ oni ti to hala꞉ pa꞉ta꞉ mea lopaalieke leekeme. \p \v 16 Yesuma꞉ ipika꞉ disaipolo haliweki pa꞉ta꞉ alota꞉ Ma꞉nda꞉ epima꞉ ika꞉ pi opia꞉ka꞉na꞉ta꞉ kota꞉ yaka pi kone opita꞉la꞉me. Ma꞉nda꞉ epima꞉ iki kiaeya꞉ka꞉na꞉ta꞉ ota꞉ I̱ kone kiaasa꞉me. Kutupa make hali epima꞉ I̱ kiaeya꞉ka꞉na꞉ta꞉ mo I̱ tapaeya꞉ hali kone kiaasa꞉me leekeme. \s1 Mo 72 haliweki paa la꞉ka꞉la epemekeeki \p \v 17 Mo hande 72 haliwekita꞉ ta꞉na꞉ tiekema꞉ homolo hata꞉ paa opolo epemekeme. Tekehalio. Nikana꞉ma꞉ naka꞉ biki laaso hata꞉ teliolo hamono kone mo hoke temoko manuma꞉ nika꞉ pi ota꞉ opimime lemekeme. \v 18 Yesuma꞉ ika꞉ pi hombo peaaso alota꞉ I̱ma꞉ Sadani oli ya nane yama꞉ ti tekele manda꞉na꞉ do kenkena꞉ lopea꞉ ekita꞉ handoa꞉me. \v 19 Opua꞉pe. Ikana꞉ma꞉ mo ketomanu make tei halimanu make da꞉ka꞉pa꞉ tombuamena꞉ make mo a꞉nda꞉ tunkuliki hoke temokona꞉ honkopu paeyao lu tombuao bepolamina꞉ta꞉ ya bikina꞉ welema꞉ iki handeteke halieke. Koto ekina꞉ta꞉ ikita꞉ ala꞉ta꞉ ma꞉nda꞉ma꞉ na hoeyaalieke. \v 20 Koto pa꞉la꞉ma꞉ mo hoke temoko manuma꞉ ika꞉ pi opua pilia꞉eki pa꞉ta꞉ ta꞉na꞉ma꞉ na homa꞉pa꞉peke. Pate ika꞉ bikita꞉ amba꞉ hepeni nane wape pea ula꞉ma꞉ ta꞉na꞉ma꞉ homa꞉pa꞉peke leekeme. \s1 Koda꞉ pa꞉ta꞉ keiyae leekeeki \r (Ma꞉tiu 11꞉25-27, 13꞉16-17) \p \v 21 Koto natena꞉ta꞉ mo Holi Sipitidima꞉ Yesu pa꞉ta꞉ epeke ta꞉na꞉ pita꞉la꞉ ekima꞉ tumbieketa꞉ Yesuma꞉ alota꞉ Apa꞉o. Oli ya do kenke yaapona꞉ Tekehalio. I̱ma꞉ neke pa꞉ta꞉ Ta꞉na꞉e alome. Ekipeke nakana꞉ma꞉ mo hande hone wotu u tekele peleme wanda꞉hali make mo sukulu wotu peleme wanda꞉hali ameda pa꞉ta꞉ a꞉mbao wina꞉ le hau manuta꞉ pa mo panake wekiwandiki sunu pa꞉ta꞉ wala꞉leke handa alome. Aowe Apa꞉o. Koto ekita꞉ naka꞉ hone pieke yekeeki yaena꞉yeke pina꞉ aleme leekeme. \v 22 Yaka Apa꞉ma꞉ta꞉ ala꞉ta꞉ ala꞉ta꞉ paeyao sikita꞉ I̱ pa꞉ta꞉ ka꞉la꞉me. Mo Eiyeketa꞉ ma꞉nda꞉ma꞉ hone na ula꞉pate ipika꞉ Atekema꞉ homeke hone ula꞉me. Kutupa Ateketa꞉ ma꞉nda꞉ma꞉ hone na ula꞉pate ipika꞉ Eiyekema꞉ homeke hone ula꞉me. Kutupa make mo Eiyekema꞉ ipika꞉ hone pilia꞉ wanda꞉hali pa꞉ta꞉ta꞉ ipika꞉ Ateke walea꞉ka꞉na꞉ta꞉ kota꞉ ikana꞉ma꞉ homeke Ateke hone wilimikie leekeme. \v 23 Kutupa Yesuma꞉ ika꞉ honumake siki hata꞉ ipika꞉ disaipolo haliweki pa꞉ta꞉ la꞉ka꞉la꞉ moneaaso alota꞉ Ikita꞉ ta꞉na꞉ma꞉ homa꞉pa꞉peke. Ikana꞉ma꞉ handeleme ale handolo peleme ekina꞉ loa꞉me. \v 24 I̱ma꞉ iki pa꞉ta꞉ loa꞉ma꞉ mo amba꞉ potopede haliweki wopu make kini haliweki make ikana꞉ma꞉ handeleme alemanu handuluekema꞉ taapemekepate handa꞉peke na yaalo make ikana꞉ma꞉ opitelemeeki opuluekema꞉ pimikipate opua꞉peke ana꞉ na piekeme leekeme. \s1 Epeke Sametia halina꞉ onkoluma꞉ leekeeki \p \v 25 Mo Lo Pi walo hayeke hali homekema꞉ Yesu tamuluekema꞉ la handolo alota꞉ Disao. Deto hala꞉eki muluekema꞉ eki pionope laa lota꞉ piekeme. \v 26 Koto leeke Yesuma꞉ ipika꞉ pi hombo peaaso alota꞉ Mo hande Baibolo pi manuma꞉ta꞉ eki ala꞉pe. Nakana꞉ma꞉ta꞉ ekipa hone wilipe leekeme. \v 27 Kutupa mo halima꞉ Yesuna꞉ pi hombo peaaso alota꞉ Baiboloma꞉ dupa la꞉la꞉me. Naka꞉ Tekehali Koda꞉ pa꞉ta꞉ pukima꞉ homolo hata꞉ naka꞉ puki paeyaoma꞉ make naka꞉ temoko paeyaoma꞉ make naka꞉ honkopu paeyaoma꞉ make naka꞉ hone paeyaoma꞉ make ipiki pa꞉ta꞉ pukima꞉ homo hapeke la꞉la꞉me laa make Nakana꞉ma꞉ naka꞉ kone pukima꞉ homele tupa꞉ ma꞉nda꞉ pa꞉ta꞉ make koto tupa꞉ kone pukima꞉ homo hapeke la꞉la꞉me leekeme. \v 28 Koto leeke Yesuma꞉ ipiki pa꞉ta꞉ alota꞉ Naka꞉ ale pita꞉ epeke aleme. Koto ale ekita꞉ ota꞉ pika꞉na꞉ta꞉ deto hala꞉eki milipikie laa leekeme. \v 29 Koto leekepate hande Lo Pi walo hayeke halima꞉ ipika꞉ biki kone epeaaluekema꞉ Yesu paa lota꞉ pitolo alota꞉ Koto hali ma꞉nda꞉e la꞉la꞉ ekita꞉ epipe laa lota꞉ piekeme. \v 30 Yesuma꞉ ipika꞉ pi hombo peaaso alota꞉ Hali ma꞉nda꞉ta꞉ Diutuseleme da mina꞉pa꞉lao oni Dietiko da nane pulu haena꞉ mo pota꞉na꞉ mandane pake naleme haliwekima꞉ mina ipika꞉ dau titipila꞉ mina꞉ bepie yombua bao homuluekema꞉ taapolo pitina꞉ pemekeme. \v 31 Kutupa koto natena꞉ kone mo yeni peao hayeke hali homeke ma꞉nda꞉ koto pota꞉na꞉ peekepate hande yombua bao wina꞉ lemeke some handeekepate pa wina꞉ kone paka꞉lao pota꞉ tea꞉ nane peekeme. \v 32 Koto hoki naneta꞉ Lipae tapake hali ma꞉nda꞉ make koto tupa꞉ peekepate mo hande yombua bao wina꞉ lemeke hali pua handa kone pao paka꞉lao pota꞉ tea꞉na꞉ peekeme. \v 33 Pate Sametia hali ma꞉nda꞉ koto pota꞉na꞉ a꞉paata꞉ mo hali hando haota꞉ ipika꞉ pukima꞉ a꞉ta꞉ma꞉ homeekeme. \v 34 Kutupa mo hali wieke alena꞉ puaata꞉ mo limiki ale nina꞉ ipikana꞉ma꞉ honku make waini ikali make holaota꞉ banisima꞉ tonkawayekeme. Kutupa mo halima꞉ hande someta꞉ ipika꞉ donki ma꞉na꞉na꞉ hoki manda mea wiaata꞉ hatuku pua hande kimisu haliwekima꞉ hamba polu haemeke da ma꞉nda꞉ pa꞉ta꞉ opolo puaata꞉ koto da pa꞉ta꞉ mo hali handeteke hayekeme. \v 35 Kutupa da kelepeeketa꞉ mo Sametia halima꞉ hande da teke hali pa꞉ta꞉ 2 kina halaa alota꞉ Do hali wotu handeteke hapeke. I̱ doane la꞉ka꞉la ipulua꞉ dina꞉ta꞉ mo hali handeteke halena꞉ kitolo 2 kina ana꞉ na pia꞉ka꞉na꞉ta꞉ kota꞉ yenkita꞉ haka꞉ta꞉pao a꞉pa kulueke leekeme. \v 36 Koto laa Yesuma꞉ mo hali pa꞉ta꞉ pi paeyaaso hata꞉ alota꞉ Do tepo hali aloma꞉pate mo pake nala꞉ haliwekima꞉ limiki some teke pa꞉ta꞉ta꞉ epima꞉ puki halea꞉pe laa lota꞉ piekeme. \v 37 Hande Lo Pi walo hayeke halima꞉ Yesuna꞉ pi hombo peaaso alota꞉ Hande a꞉ta꞉ma꞉ homeeke halie laa leekeme. Koto leeke Yesuma꞉ ipiki pa꞉ta꞉ alota꞉ Kota꞉ nakana꞉ma꞉ make kutu piki hau pu hapeke laa leekeme. \s1 Yesuma꞉ Mada Meti yaapo handolo peekeeki \p \v 38 Yesuta꞉ ipika꞉ disaipolo haliweki ame̱le̱ pota꞉na꞉ pulu hata꞉ da yu siki ma꞉nda꞉ pa꞉ta꞉ opolo pemekeme. Koto da yu pa꞉ta꞉ta꞉ wanda꞉ ma꞉nda꞉ hayekeme. Ipika꞉ bikita꞉ Mada. Koto wanda꞉ma꞉ Yesu ipika꞉ da pa꞉ta꞉ epena꞉ta꞉ ta꞉na꞉ma꞉ homeekeme. \v 39 Mada ipika꞉ hakepiki homeke Meti hayekeme. Metima꞉ta꞉ mo Tekehalina꞉ anke lopao pitieke alena꞉ a꞉pa pita꞉ ipika꞉ pi waleekeeki opu pitiekeme. \v 40 Kutu piekepate Madata꞉ ne aneke hapu wamo pieke ekima꞉ ipika꞉ hone ka꞉nda꞉ wotu pieke a꞉pa alota꞉ Tekehalio. Yaka asima꞉ I̱ma꞉ mo emanu paeyao yaka honumake piono ala꞉ ekita꞉ nakana꞉ma꞉ta꞉ hone na witelepe. Ipikana꞉ma꞉ I̱ tamba꞉ mulu epena꞉ lae leekeme. \v 41 Koto leeke Tekehalima꞉ Madana꞉ pi hombo peaaso alota꞉ Madao. Madao. Nakana꞉ma꞉ ala꞉ta꞉ ala꞉ta꞉ wotu pa꞉ta꞉ hone u taapo make hone ka꞉nda꞉ma꞉ homelepate \v 42 pa ota꞉ pea꞉peke hau homeke homeke na peleme. Metima꞉ta꞉ hone wia ota꞉ hau ma꞉la꞉ ekita꞉ ma꞉nda꞉ma꞉ pendilao mea꞉peke na ya꞉lieke leekeme. \c 11 \s1 Yesuma꞉ yeni pita꞉la꞉ hauna꞉ waleekeeki \r (Ma꞉tiu 6꞉9-13, 7꞉7-11) \p \v 1 Nate ma꞉nda꞉na꞉ Yesuta꞉ ala꞉ta꞉ ma꞉nda꞉ pa꞉ta꞉ pua yeni pu pitiekeme. Yeni pu paeyaeyeketa꞉ ipika꞉ disaipolo hali ma꞉nda꞉ma꞉ ipiki pa꞉ta꞉ alota꞉ Tekehalio amba꞉ hande Dionima꞉ ipika꞉ disaipolo haliweki yeni pina꞉yeke waleeke tupa꞉ niki pa꞉ta꞉ make koto tupa꞉ wala꞉e leekeme. \v 2 Koto leeke Yesuma꞉ iki pa꞉ta꞉ walolo hata꞉ alota꞉ Ikana꞉ma꞉ yeni pimika꞉na꞉ta꞉ dupa pia꞉pa꞉peke. \q1 Apa꞉o. Naka꞉ yako piki bikita꞉ ota꞉ manda wia haena꞉e. \q1 Naka꞉ Kilu Tombuao Haleeki do ane opolo epena꞉e. \q1 \v 3 Nika꞉ ame nolo poloma꞉ neta꞉ ana꞉na꞉ kia꞉peke. \q1 \v 4 Mandane wanda꞉halima꞉ niki pa꞉ta꞉ hoke hau pimieki nikana꞉ma꞉ pa paeyaasoma꞉ ekina꞉ \q1 nika꞉ hoke hau puma꞉eki make nakana꞉ma꞉ koto tupa꞉ pa paeyawapeke. \q1 Ka꞉nda꞉ piki la handa꞉la꞉eki pa꞉ta꞉ niki na hatuku a꞉pa꞉peke laa lapa꞉peke leekeme. \p \v 5 Kutupa Yesuma꞉ ipika꞉ disaipolo haliweki pa꞉ta꞉ alota꞉ Iki pa꞉ta꞉ hala꞉ hali homeke ma꞉nda꞉ma꞉ buta꞉ hokina꞉ naka꞉ yankekena꞉ da pa꞉ta꞉ pua alota꞉ Kameo. Palaowa punka tepo ta꞉ka꞉li kie. \v 6 Ya yankeke ma꞉nda꞉ pota꞉ pomulu yapuluekema꞉ ame do timba ya da pa꞉ta꞉ opolo a꞉pa pila꞉pate I̱ma꞉ hala꞉peke ne dia꞉ya꞉leke handa loa꞉ma꞉ ma꞉nda꞉ kie laa leka꞉na꞉ta꞉ \v 7 kota꞉ naka꞉ yankekema꞉ ipika꞉ da tukiki pa꞉ta꞉ hata꞉ naka꞉ pi hombo peaaso alota꞉ I̱ ka꞉nda꞉ma꞉ na homake. Yaka pota꞉ta꞉ amba꞉ loka꞉ hao yaka weki wandiki ame̱le̱ amba꞉ u pa꞉eloma꞉me. Naka꞉ honke ale ala꞉ta꞉ ekipa tiao mea kionope laa lea꞉ka꞉na꞉ta꞉ \v 8 kota꞉ eki pilipikipe. Iki pa꞉ta꞉ I̱ma꞉ do pi alome. Mo da teke halima꞉ neketa꞉ ipika꞉ yankeke halena꞉ kone mo hande palaowa kuluekema꞉ na tialo pa꞉la꞉pateta꞉ nakana꞉ma꞉ yaala꞉ma꞉ na homeke honke wotu leka꞉na꞉ta꞉ kota꞉ ota꞉ opua tiao naka꞉ mea꞉peke ya꞉la꞉ ekimanu ana꞉na꞉ mea kilieke alome. \v 9 Koto ekina꞉ iki pa꞉ta꞉ do pi alome. Honke leka꞉na꞉ta꞉ ota꞉ kilieke. Weika꞉na꞉ta꞉ handa꞉ wilipikie. Kilikili laeka꞉na꞉ta꞉ pota꞉ lombawalieke. \v 10 Do ekina꞉ yeke loa꞉me. Honke la꞉tiki pu haya꞉ka꞉na꞉ta꞉ kota꞉ koto somema꞉ milieke. Kutaa make ma꞉nda꞉ epima꞉ weiya꞉tiki pu haya꞉ka꞉na꞉ta꞉ ipikana꞉ma꞉ handa꞉ wilieke. Epima꞉ pota꞉ lia꞉tiki pu haya꞉ka꞉na꞉ta꞉ kota꞉ mo pota꞉ta꞉ koto some pa꞉ta꞉ lombawalieke. \v 11 Do pita꞉ weki wandiki hala꞉ haliweki pa꞉ta꞉ alome. Ika꞉ wekima꞉ iki pa꞉ta꞉ ta꞉peli teekeeki honke lea꞉ka꞉na꞉ta꞉ hoke keto mea halimikipe. \v 12 O ba hapeke honke lea꞉ka꞉na꞉ta꞉ tei hali mea halimikipe. \v 13 Ikita꞉ hoke haliweki halemepate kone ika꞉ weki wandiki pa꞉ta꞉ta꞉ epeke epeke alemanu halo halememe. Koto hau ota꞉ lombei peaaso hata꞉ta꞉ oli ya nane hala꞉ Apa꞉ma꞉ta꞉ mo Holi Sipitidi honke aleme wanda꞉hali pa꞉ta꞉ta꞉ ota꞉ halieke laa leekeme. \s1 Yesu pita꞉ Bielisibulu yaapo \r (Ma꞉tiu 12꞉22-30, Maka 3꞉20-27) \p \v 14 Hali ma꞉nda꞉ta꞉ pi na leke hoke temoko pitiki hali hayeke Yesuma꞉ mo hoke temoko tolu lieke handa mo halima꞉ pi lombo leekeme. Kutu pieke handa wanda꞉hali paeyaoma꞉ tola꞉tia pomimikipate \v 15 mandane wanda꞉halima꞉ alota꞉ Ipikana꞉ma꞉ mo hande hoke temoko manuna꞉ you hali Bielisibuluna꞉ wele pita꞉la꞉eki mea hoke temokomanu tolu lita꞉la꞉me lemekeme. \v 16 Mandane wanda꞉halima꞉ Yesu tamuluekema꞉ alota꞉ Nakana꞉ma꞉ hepeni nanema꞉ ipula꞉ patehau ma꞉nda꞉ nikana꞉ma꞉ handomono pie lemekeme. \v 17 Koto lemekepate Yesuma꞉ mo wanda꞉halina꞉ hone teke amba꞉ handa꞉ wiata꞉ dupa leekeme. Kapomani homekena꞉ handeteke hala꞉ wanda꞉halima꞉ ika꞉ ika꞉ kone tekilipa꞉ alu alu pea a꞉nda꞉ pimika꞉na꞉ta꞉ ika꞉ hande tapake au leleme ekita꞉ koto kone paelieke. Kutupa tapakesiki ma꞉nda꞉ma꞉ ika꞉ ika꞉ kone tekilipa꞉ alu alu pimika꞉na꞉ta꞉ kota꞉ koto tapake sikina꞉ hao pelia꞉peke ekita꞉ hoelieke. \v 18 Koto ekina꞉ta꞉ Sadanina꞉ kilu tombuao hala꞉eki pa꞉ta꞉ haleme tapakema꞉ ta꞉ta꞉ ta꞉ta꞉ lo tekilipa꞉ alu alu pea ika꞉ ika꞉ kone a꞉nda꞉ pimika꞉na꞉ta꞉ ekipa hao pelia꞉tiki pu halimikipe. Ikana꞉ma꞉ I̱ pa꞉ta꞉ta꞉ Bielisibuluma꞉ I̱ honkopu kita꞉leke handa hoke temokomanu tolu lita꞉la꞉me laa alemeeki \v 19 ota꞉ ya꞉ka꞉na꞉ta꞉ kota꞉ ika꞉ disaipolo haliwekima꞉ta꞉ ekipa hoke temoko tolu lu halemepe. Koto haliwekina꞉ piteleme hauma꞉ kone ika꞉ hau telipilimikie. \v 20 Dia꞉me. Koda꞉na꞉ honkopu homekema꞉ mo hoke temoko tolu lu halome. Kutu pu halo ekima꞉ta꞉ Koda꞉na꞉ Kilu Tombuao Hala꞉ ekita꞉ iki teke pa꞉ta꞉ amba꞉ a꞉pa꞉la꞉ ekita꞉ peneme yao wala꞉la꞉me. \p \v 21 Honkopu hake hali ma꞉nda꞉ma꞉ ipika꞉ a꞉nda꞉ pita꞉la꞉ alemanu tiki tiki yao wia hata꞉ mo ipika꞉ da handeteke haya꞉ka꞉na꞉ta꞉ ipika꞉ da tukiki pa꞉ta꞉ ula꞉ alemanu paeyaota꞉ epeke tupa꞉ pa wilieke. \v 22 Koto pa꞉la꞉pate ota꞉ honkopu wopu hake hali ma꞉nda꞉ma꞉ koto da teke hali yaapo a꞉nda꞉ pea mo da teke hali lu bepolaota꞉ ipika꞉ a꞉nda꞉ alemanu paeyao mea pelieke. Kutupa mo pake mia꞉ ale manuta꞉ telipilieke. \p \v 23 Ma꞉nda꞉ epita꞉ yaka yankeke na haeka꞉na꞉ta꞉ kota꞉ I̱ yaapo a꞉nda꞉ lita꞉la꞉me. Kutupa make hali ma꞉nda꞉ epima꞉ yaka sipisipi momba꞉laaso hano I̱ na tamba꞉ mia꞉ka꞉na꞉ta꞉ kota꞉ ipikana꞉ma꞉ta꞉ panane tolu lita꞉la꞉me leekeme. \s1 Hoke temoko paa la꞉ka꞉la a꞉pa꞉la꞉eki \r (Ma꞉tiu 12꞉43-45) \p \v 24 Yesuma꞉ alota꞉ Hali ma꞉nda꞉na꞉ weleke pa꞉ta꞉ pila꞉ hoke temoko ma꞉nda꞉ hama opolu bao yapea꞉ka꞉na꞉ta꞉ mo hapula꞉ alena꞉ pomu lopolo hata꞉ hoto pita꞉peke da panda꞉ ma꞉nda꞉ weita꞉la꞉me. Hoto pita꞉peke ale ma꞉nda꞉ na handa꞉ wia꞉ka꞉na꞉ta꞉ kota꞉ mo hoke temokoma꞉ ipika꞉ kone alota꞉ Yaka hande mina꞉pa꞉lao epoa꞉ da nane paa la꞉ka꞉la polueke laa \v 25 ipikana꞉ma꞉ la꞉ka꞉la pua mo da a꞉pa handilia꞉pate ma꞉nda꞉ na hake wamo pea bao epeke tupa꞉ halia꞉eki handilieke. \v 26 Koto pa꞉leketa꞉ mo hoke temoko pua pa mandane watake hata꞉ hoke temokomanu paeyao hatuku milieke. Koto hoke temoko manuna꞉ hoke hau pita꞉la꞉ ekita꞉ mo ipiki make lu ankulalimikie. Iki paeyao mandake pa꞉ta꞉ a꞉pa halimikie. Kutu pimika꞉na꞉ta꞉ mo halita꞉ amba꞉ta꞉ hoke tupa꞉ hao pelia꞉pate ameta꞉ ota꞉ hoke tupa꞉ hao pelieke laa leekeme. \s1 Ota꞉ epeke ta꞉na꞉ma꞉ homa꞉la꞉eki \p \v 27 Yesuma꞉ koto pi lo paeyeketa꞉ mo wanda꞉hali anka꞉lopuna꞉ pitieke wanda꞉ ma꞉nda꞉ma꞉ anekema꞉ alota꞉ Neke ma꞉nda꞉la꞉ make andu ka꞉la꞉ wanda꞉ta꞉ ta꞉na꞉ma꞉ homolo pa꞉la꞉me leekeme. \v 28 Koto leeke Yesuma꞉ alota꞉ Dia꞉me. Koda꞉na꞉ pi opua pu haleme wanda꞉hali ikana꞉ma꞉ta꞉ ta꞉na꞉ma꞉ wotu homa꞉peke ya꞉la꞉me leekeme. \s1 Wele pita꞉la꞉eki handuluekema꞉ honke lemekeeki \r (Ma꞉tiu 12꞉38-42) \p \v 29 Wanda꞉hali wopuma꞉ Yesu a꞉pa momba꞉la hopa꞉liao haena꞉ Yesuma꞉ alota꞉ Ame do natena꞉ haleme wanda꞉halita꞉ hoke wanda꞉hali halememe. Ikana꞉ma꞉ta꞉ mo na handeke patehau ma꞉nda꞉ handuluekema꞉ I̱ pa꞉ta꞉ honke aleme pateta꞉ I̱ma꞉ta꞉ iki pa꞉ta꞉ ota꞉ ma꞉nda꞉siki make na walo polopate mo hande Dionama꞉ patehau piekeeki homeke handilimikie. \v 30 Mo hande potopede hali Dionama꞉ Ninipa wanda꞉hali pa꞉ta꞉ patehau pieke tupa꞉ kone mo Wanda꞉halina꞉ Eiyekema꞉ make ame wanda꞉hali pa꞉ta꞉ patehau pilieke. \v 31 Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ mo hande Siba da yu handeteke hala꞉ kuini wanda꞉ma꞉ tiao hata꞉ ame do natena꞉ haleme wanda꞉halina꞉ hoke hau manuna꞉ ma̱leke lilieke. Ekipeke mo wanda꞉ma꞉ta꞉ mo kini hali Solomonona꞉ epeke hone wotu u tekelepea wala꞉la꞉ pimanu opuluekema꞉ yeke mo kenke honiki ma꞉nda꞉ nane hao epeekeme. Kutu piekepate I̱ma꞉ iki pa꞉ta꞉ alome. Ameta꞉ Solomono ankulala꞉ ale ma꞉nda꞉ a꞉pa꞉la꞉me. \v 32 Mo hande pi yokaalu pulu pa꞉la꞉ nate opolo epea꞉ka꞉na꞉ta꞉ Ninipa wanda꞉halima꞉ tiao hata꞉ ika꞉ hoke hauna꞉ ma̱leke lilimikie. Ekipeke. Dionama꞉ pi waleeke dina꞉ta꞉ koto wanda꞉halima꞉ ika꞉ hoke hoke haumanu hoki walemekeme. Koto pa꞉la꞉ ekina꞉ I̱ma꞉ iki pa꞉ta꞉ alome. Ameta꞉ Diona ankulala꞉ ale ma꞉nda꞉ a꞉pa꞉la꞉me leekeme. \s1 Lokena꞉ pa̱a̱ pa꞉la꞉eki \r (Ma꞉tiu 5꞉15, 6꞉22-23) \p \v 33 Ma꞉nda꞉ma꞉ ipika꞉ ola꞉pake ka꞉waata꞉ na a꞉mbao u hala꞉ o mo disi kawaso tieke oto pa꞉ta꞉ na wilieke. Koto hau na pikita꞉ mo da pa꞉ta꞉ wanda꞉hali a꞉pa honda꞉ pamba꞉tiki pitolo handena꞉ mo lamepa u hala꞉ alena꞉ u hala꞉me. \v 34 Naka꞉ leketa꞉ naka꞉ lokena꞉ ola꞉pakee. Naka꞉ leke a꞉nda꞉ ota꞉ epea꞉ka꞉na꞉ta꞉ kota꞉ naka꞉ loke paeyaota꞉ pa̱a̱ma꞉ tumbilieke. Koto pa꞉la꞉pate naka꞉ leke a꞉nda꞉ hoeya꞉ka꞉na꞉ta꞉ naka꞉ loke paeyaota꞉ timba꞉la꞉ pambilieke. \v 35 Koto ekina꞉ta꞉ mo naka꞉ lokena꞉ pa̱a̱ pa꞉la꞉ ekita꞉ timba꞉ na la꞉na꞉ leketa꞉ ota꞉ wopu handeteke hapeke \v 36 Kutupa naka꞉ loke paeyao a꞉nda꞉ pa̱a̱ma꞉ tumba hata꞉ pa timba꞉ timba꞉ homeke a꞉nda꞉ na lea꞉ka꞉na꞉ta꞉ kota꞉ ola꞉pake pa̱a̱ pita꞉la꞉ ma꞉nda꞉na꞉ naka꞉ loke paeyao pa̱a̱ pu kimalieke leekeme. \s1 Yesuma꞉ tapake yaapona꞉ haumanu lo kelaeyekeeki \r (Ma꞉tiu 23꞉1-36, Maka 12꞉38-40) \p \v 37 Yesuma꞉ pimanu lo paeyeketa꞉ Pa꞉tisi hali ma꞉nda꞉ma꞉ ne nolo pana꞉e leeke handa ipika꞉ da pa꞉ta꞉ honda꞉ pamba pua ne nolueke alo pitiekeme. \v 38 Mo hande Pa꞉tisi halima꞉ta꞉ Yesuma꞉ ne noluekema꞉ ipika꞉ kiki amba꞉la na tandepeekeeki hando haota꞉ pututuma꞉ homa tola꞉tia pomiekeme. \v 39 Kutu piekeeki handaata꞉ mo Teke Halima꞉ ipiki pa꞉ta꞉ alota꞉ Ameta꞉ kota꞉ iki Pa꞉tisi haliwekima꞉ta꞉ ika꞉ kapo make kawaso manuta꞉ manda homeke tandepo halemepate tukiki pa꞉ta꞉ta꞉ pasa꞉tei pita꞉la꞉ hau make hoke hoke hau paeyaoma꞉ iki tumba halememe. \v 40 Ikita꞉ hone na wiki haliwekio. Koda꞉ma꞉ hama nane wa꞉pa꞉la꞉ tupa꞉ tukiki nane make na wa꞉pa꞉la꞉pe. \v 41 Koto ekina꞉ ika꞉ kapo make kawasomanu pa꞉ta꞉ ula꞉ ale manuta꞉ mo nate hali wanda꞉hali pa꞉ta꞉ pa hala꞉pa꞉peke. Kutu piki hau a꞉nda꞉ pimika꞉na꞉ta꞉ kota꞉ ika꞉eki paeyao ota꞉ hake wotu pilieke leekeme. \p \v 42 Pa꞉tisi haliwekio. Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ ika꞉ hande ena꞉ hala꞉ ale tekia꞉ o totopo piki tanima꞉ handeke ale sunuta꞉ kiki yaapo telipata꞉ putupa homeke sikita꞉ Koda꞉ pa꞉ta꞉ halo halemepate mo Koda꞉ teke pa꞉ta꞉ta꞉ puki hala꞉pekeeki make epeke tikitiki piki hau manuta꞉ hone yonka꞉lalememe. Dupiki hau manuta꞉ ota꞉ pea꞉tiki pitolo hata꞉ mo mandaneeki make na mina꞉pa꞉lapeke. \p \v 43 Pa꞉tisi haliwekio ika꞉ hoke yenki tiekena꞉ I̱ paala꞉e. Ikana꞉ma꞉ta꞉ oni yeni pu hala꞉ da pa꞉ta꞉ mo you haliwekina꞉ wiala꞉ sea manuna꞉ pituluekema꞉ hone wotu u haleme make oni makedi hama haleme wanda꞉halima꞉ ika꞉ biki miniliaaso Epeke daka꞉la꞉paaso꞉e la꞉tiki pina꞉ hone wopu u halememe. \p \v 44 Ika꞉ hoke yenki tiekena꞉ I̱ paala꞉e. Ikita꞉ wanda꞉halima꞉ mo patehau na pa꞉la꞉ hali lapa꞉ma꞉ handeke nono pelemeke handa tumbao pomu haleme haliwekima꞉ lapa꞉ma꞉ handelememe leekeme. \p \v 45 Koto leeke mo Lo Pi walo haemeke hali ma꞉nda꞉ma꞉ Yesu pa꞉ta꞉ alota꞉ Disao. Nakana꞉ma꞉ kutupiki pi ale ekima꞉ta꞉ niki manda꞉ meake nono piteleme leekeme. \v 46 Yesuma꞉ alota꞉ Lo Pi walo haleme haliwekio iki make ika꞉ hoke yenki tiekena꞉ I̱ paala꞉e. Ikana꞉ma꞉ wanda꞉halina꞉ hoki mandata꞉ ma꞉nda꞉ma꞉ tia꞉peke na yeke ka꞉nda꞉ piki alemanu mea tiao halemepate ikana꞉ma꞉ta꞉ ika꞉ kiki ma̱leke kone tindipao na tamba꞉ mea tialimikie. \p \v 47 Ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande potopede haliwekina꞉ toko ula꞉ apa꞉nda꞉ta꞉ epeke tupa꞉ wamo pea wiao halememe. Pate koto potopede haliwekita꞉ hande ika꞉ apa꞉mei tonuma꞉ kone lia꞉tiki pimiki haliwekie. \v 48 Ikana꞉ma꞉ ika꞉ apa꞉meima꞉ pimiki ekina꞉ ta꞉na꞉ma꞉ homo haloma꞉me alememe. Pa ekipeke ika꞉ apa꞉meima꞉ta꞉ mo potopede haliweki pa lu pitaemeke handa ikana꞉ma꞉ta꞉ ika꞉ apa꞉nda꞉ manuta꞉ wamo peao halememe. \p \v 49 Doeki tekena꞉ta꞉ Koda꞉na꞉ epeke hone wotu wita꞉la꞉ ekima꞉ta꞉ do la꞉la꞉me. I̱ma꞉ta꞉ yaka potopede haliweki make pi mea pomuao haleme haliweki tapaalo polopate mandaneta꞉ lu baalimiki make mandaneta꞉ tanda tanda wopu halimikie laa la꞉la꞉me. \v 50 Koto ekina꞉ta꞉ mo hande do ya yu kini pea a꞉pa ame do limiki potopede haliweki paeyao limiki ekina꞉ hoke yenkita꞉ ame do haleme wanda꞉halima꞉ milimikie. \v 51 Mo hande Eipolo limikieki kini pea a꞉pa mo hande oloda pita꞉ yako piki da yaapo tukiki pa꞉ta꞉ a꞉mbolo hata꞉ limiki hali Sekataiya alome. Aowe. I̱ma꞉ iki pa꞉ta꞉ ota꞉ loa꞉ma꞉ ame do wanda꞉halita꞉ koto limikieki paeyaona꞉ hoke yenki milimikie. \v 52 Mo Lo Pi walo haleme haliweki ika꞉ hoke yenki tiekena꞉ I̱ paala꞉e. Ikana꞉ma꞉ta꞉ mo hande hone wotu mia꞉peke da pota꞉na꞉ kita꞉ ika꞉ wia halemepate koneta꞉ ika꞉ kone na honda꞉ pambeketa꞉ mo honda꞉ pambuluekema꞉ taapeleme wanda꞉halita꞉ sa꞉sa꞉ pu halememe leekeme. \p \v 53 Yesuma꞉ koto da mina꞉pa꞉lao peeke naneta꞉ mo Lo Pi walo haemeke haliwekima꞉ make Pa꞉tisi haliwekima꞉ make Yesuta꞉ ota꞉ hoke tetopiki tupa꞉ kitaaso hata꞉ ane mone alena꞉ ipiki pa꞉ta꞉ lota꞉ pita꞉la꞉eki wotu halemekeme. \v 54 Kutu pimiki hauta꞉ Yesu hona꞉ma̱o̱ tamuluekema꞉ make ipikana꞉ma꞉ ata꞉ka꞉ piki pi ma꞉nda꞉ lea꞉ka꞉na꞉ minulua꞉ patema꞉ lemekeme. \c 12 \s1 Makeaaso hauna꞉ kinki pita꞉la꞉eki \r (Ma꞉tiu 10꞉26-27) \p \v 1 Wanda꞉hali pisetekema꞉ ika꞉ ika꞉ kone lu tumbapeke nono pea mombololo haena꞉ Yesuma꞉ ipika꞉ disaipolo haliweki pa꞉ta꞉ amba꞉la alota꞉ Ikana꞉ma꞉ mo Pa꞉tisi haliwekina꞉ palaowa pombeiyaasa꞉ ale yisiti wotu handeteke hapa꞉peke. Doeki alo ekita꞉ ika꞉ yayapiki makeaaso hauna꞉ loa꞉me. \v 2 Panka꞉ wilimi ekimanu paeyaota꞉ wetepena꞉ta꞉ pa peneme yaalieke. Kutupa mo a꞉mbao aleme pimanu paeyaota꞉ wetepena꞉ peneme yaalieke. \v 3 Koto ekina꞉ ikana꞉ma꞉ mo timba a꞉mbao leleme pi manuta꞉ paa natena꞉ opina꞉ lelimikie. Kutupa pota꞉ poka꞉la꞉ da panda꞉ pa꞉ta꞉ pita꞉ ma꞉nda꞉na꞉ haleke pa꞉ta꞉ tome pambele pita꞉ paeyaoma꞉ opina꞉ yeke da holu manda nina꞉ tiao hata꞉ pi anekema꞉ lelimikie. \s1 Epi paala꞉ma꞉ homa꞉peke ya꞉la꞉pe \r (Ma꞉tiu 10꞉28-31) \p \v 4 Ya yankeke tonuo. I̱ma꞉ iki pa꞉ta꞉ aloma꞉ Mo ika꞉ manda loke lu homaemeka꞉na꞉ta꞉ wetepe nane hau ma꞉nda꞉ pea꞉peke na ya꞉la꞉ wanda꞉hali pa꞉ta꞉ta꞉ paala꞉ma꞉ na homa꞉pa꞉peke. \v 5 Ikana꞉ma꞉ mo hali homeke ma꞉nda꞉ liaata꞉ ipika꞉ temokota꞉ oni ti to hala꞉ ale pa꞉ta꞉ baapeke ya꞉la꞉ wele pa꞉la꞉ Koda꞉ pa꞉ta꞉ paala꞉ma꞉ homa꞉pa꞉peke. Iki pa꞉ta꞉ ota꞉ loa꞉ma꞉ Ipiki pa꞉ta꞉ homeke paala꞉ma꞉ homa꞉pa꞉peke aleo. \p \v 6 Mo hande wesoma꞉ handeke basunu yunki hata꞉ 20 toeama꞉ hambo halemeke yekea. Koto pa꞉la꞉pate Koda꞉ma꞉ta꞉ koto wesoma꞉ handeke ba sikita꞉ homeke kone hone na yonka꞉lala꞉me. \v 7 Koto tupa꞉ kone ika꞉ you itiki paeyao make amba꞉ yata꞉pa꞉ ta꞉pao ana꞉ lao ula꞉me. Koto ekina꞉ta꞉ ikana꞉ma꞉ paala꞉ma꞉ na homo hapa꞉peke. Pa ekipeke. Ika꞉ tombota꞉ koto hosiki ba sunu wopuna꞉ yenki ota꞉ lombei pa꞉la꞉me. \s1 Ketisona꞉ biki peneme yaasa꞉eki make hoki wala꞉la꞉eki yaapo \r (Ma꞉tiu 10꞉32-33, 12꞉32, 10꞉19-20) \p \v 8 Yesuma꞉ alota꞉ I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ wanda꞉halina꞉ leke popelekena꞉ peneme yaaso hata꞉ I̱ta꞉ Ketisona꞉ halie lea꞉ka꞉na꞉ta꞉ kota꞉ mo Wanda꞉halina꞉ Eiyekema꞉ make mo Koda꞉na꞉ enisolo manuna꞉ leke popelekena꞉ make homeke hau kone pilieke. \v 9 Pate ma꞉nda꞉ hali epima꞉ wanda꞉halina꞉ leke pototona꞉ hata꞉ yaka biki na leke kiaeya꞉ka꞉na꞉ta꞉ kota꞉ mo Wanda꞉halina꞉ Eiyekema꞉ta꞉ Koda꞉na꞉ enisolo manuna꞉ leke pototona꞉ hata꞉ ipika꞉ biki make na leke kiaalieke. \p \v 10 Ma꞉nda꞉ epima꞉ Wanda꞉halina꞉ Eiyeke pa꞉ta꞉ hoke pimanu lea꞉ka꞉na꞉ta꞉ kota꞉ koto ekita꞉ pa paeyaapeke ya꞉la꞉pate pa ma꞉nda꞉ epima꞉ Holi Sipitidi kitake hoke pimanu lea꞉ka꞉na꞉ta꞉ kota꞉ koto ekita꞉ ota꞉ na paeyawalieke. \p \v 11 Ma꞉nda꞉ epima꞉ iki pi yokaalu puluekema꞉ ika꞉ pi hotu haleme da pa꞉ta꞉manu make o mo kapomani haliweki pa꞉ta꞉ make o handeteke haleme haliweki pa꞉ta꞉ hatuku pemeka꞉na꞉ta꞉ kota꞉ ikana꞉ma꞉ta꞉ eki pi lolua꞉pe o ekipa ya kone tamba꞉ miki pi lolua꞉pe laa ka꞉nda꞉ma꞉ na homo taapa꞉peke \v 12 Pa ekipeke. Mo Holi Sipitidima꞉ta꞉ koto nate leke sikina꞉ kone ika꞉ lolo peleme pi manuta꞉ walekena꞉ walieke. \s1 Hone na wiki hamoko halina꞉ onkoluma꞉ la꞉la꞉eki \p \v 13 Wanda꞉hali momba꞉la haemeke tukiki pa꞉ta꞉ hayeke hali homekema꞉ Yesu pa꞉ta꞉ alota꞉ Disao. Yaka kamema꞉ dika꞉ apa꞉na꞉ anke teketa꞉ yakaeki telipa kina꞉ lawae leekeme. \v 14 Yesuma꞉ ipika꞉ pi hombo peaaso alota꞉ Someo. Ipilika꞉ alemanu telipaano make ipilika꞉ pi tikitiki yawaanota꞉ I̱ta꞉ epima꞉ mea haena꞉ la꞉la꞉pe leekeme. \v 15 Koto laa Yesuma꞉ paeyao pa꞉ta꞉ alota꞉ Handeteke hapa꞉peke. Hande pasa꞉tei hau ta꞉ta꞉ ta꞉ta꞉ pikieki a꞉paapa꞉na꞉ ika꞉ kone wopu handeteke hata꞉ leke leke lo hapa꞉peke. Wanda꞉hali paeyaoma꞉ hamoko tieke ekipa haena꞉ kone ika꞉ da꞉ta꞉la꞉ ekina꞉ teketa꞉ ika꞉ wia haleme alemanu pa꞉ta꞉ na ula꞉me leekeme. \p \v 16 Koto laa Yesuma꞉ iki pa꞉ta꞉ onkoluma꞉ pi dupa leekeme. Amba꞉ a꞉nda꞉ta꞉ mo hamoko hali ma꞉nda꞉na꞉ e pa꞉ta꞉ ne napekemanu wotu wiekeme. \v 17 Kutupa mo halima꞉ ipika꞉ honema꞉ kone alota꞉ Mo hande ne napekemanu poka꞉ mepi pea wia꞉peke alena꞉ ana꞉ na pa꞉la꞉ma꞉ eki puluepe laa hone wiekeme. \v 18 Kutupa ipika꞉ honema꞉ kone alota꞉ Dupulueke. Yaka ne napekemanu u hala꞉ damanu londa꞉la kutupa da tieke tiekemanu a꞉eyaata꞉ mo ne napekemanu make yaka mandane alemanu paeyao make koto da pa꞉ta꞉manu mu ulueke laata꞉ \v 19 kota꞉ ya kone dupa lolueke. Naka꞉ta꞉ yolee. Naka꞉ wia hale ale manuta꞉ bapi wotu kone ana꞉na꞉ wilieke laa Ameta꞉ pa pitu hata꞉ ne ikali nalo hata꞉ ta꞉na꞉ma꞉ homo hapeke lolueke leekepate \v 20 Koda꞉ma꞉ ipiki pa꞉ta꞉ alota꞉ Neketa꞉ hone na wiki halio. Ame do timba kone naka꞉ da꞉ta꞉la꞉eki pao yokulueke. Kutu pua꞉ka꞉na꞉ta꞉ kota꞉ nakana꞉ma꞉ naka꞉eki laa wia hale ale manuta꞉ epima꞉ milia꞉pe laa leekeme. \v 21 Kutupa Yesuma꞉ pi paeyaaso alota꞉ Hali epima꞉ Dota꞉ yakaeki homekee laa alemanu wopu mu momba꞉la꞉tiki pita꞉la꞉ dina꞉ta꞉ Koda꞉na꞉ leke popelekena꞉ta꞉ pa natehali hala꞉me. Kota꞉ dupiki some a꞉nda꞉ta꞉ mo hande titina꞉ loa꞉ haumanu pa꞉ta꞉ opolo ipilieke leekeme. \s1 Koda꞉ pa꞉ta꞉ hone ti lao haasa꞉eki \r (Ma꞉tiu 6꞉25-34) \p \v 22 Koto hoki naneta꞉ Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ do alo ekita꞉ ikana꞉ma꞉ iki pa hapeke ekina꞉ nemanu make lokena꞉ yama꞉peke alemanu koto alemanu pa꞉ta꞉ta꞉ ka꞉nda꞉ma꞉ na homo hapa꞉peke. \v 23 Pa ekipeke. Da꞉ta꞉la꞉ ekima꞉ta꞉ ne ota꞉ lombei pa꞉la꞉ make mo lokema꞉ta꞉ dau make ota꞉ lombei pu pa꞉la꞉me. \v 24 Ba manuna꞉ hau handa꞉pa꞉peke. Ikana꞉ma꞉ta꞉ e wae alemanu na nokopata꞉ na mondu no halememe. Ika꞉ sidowa o ne amu pu u haleme da ma꞉nda꞉ na hala꞉me. Koda꞉ma꞉ taa halo hala꞉ handa꞉e. Koto ekina꞉ta꞉ ikana꞉ma꞉ mo ba manuta꞉ taa lu ankulalemetaa. \v 25 Iki ma꞉nda꞉ epima꞉ ipika꞉ hone wopu wita꞉la꞉ ekima꞉ ipika꞉ do kenkena꞉ halo pa꞉la꞉ nate leke manuta꞉ mu moneao ulu pua꞉peke ya꞉la꞉pe. \v 26 Kota꞉ koto hosiki ale siki kone na pea꞉peke ya꞉ka꞉na꞉ta꞉ pa ekipeke mo mandane ale pa꞉ta꞉ manuta꞉ ka꞉nda꞉ma꞉ homo halemepe. \p \v 27 Mo hapeke pa꞉ta꞉manu pa opa꞉la꞉ moma sununa꞉ opa꞉la꞉ ekita꞉ handa꞉pa꞉peke. Ikana꞉ma꞉ta꞉ e na poko make aka꞉manu na tombulu yamo halememe. Koto pa꞉la꞉pate I̱ma꞉ iki pa꞉ta꞉ alome. Kini Solomonoma꞉ta꞉ hamoko alemanu wotu wiekepate kone do moma manuna꞉ loke hake dau epeke epeke ekimanu ma꞉nda꞉ ota꞉ na wia hayekeme. \v 28 Mo ame homeke opa haena꞉ laa beliata꞉ tunkula hapuao tina꞉ yanka꞉peke yeke ambu manuna꞉ au kone Koda꞉ma꞉ lawao haya꞉ka꞉na꞉ta꞉ a꞉pei kota꞉ ika꞉ hone tulaaseme ekita꞉ ota꞉ hodiki ale siki ya꞉ka꞉ta꞉me. Koto alemanu pa꞉ta꞉ kone Koda꞉ma꞉ kutu pu haya꞉ka꞉na꞉ta꞉ kota꞉ ipikana꞉ma꞉ iki make dau ota꞉ ana꞉na꞉ kone yamatiki pilieke. \v 29 Kutu piliekema꞉ ikana꞉ma꞉ta꞉ Ya nolo polo ne ikali hanema꞉ epea꞉ka꞉na꞉ mulua꞉pe laa ka꞉nda꞉ma꞉ na homo hapa꞉peke. \v 30 Mo Koda꞉na꞉ biki na opeleme wanda꞉halima꞉ta꞉ hoto paeyao koto alemanu hone wopu u halememe. Pate ika꞉ Apa꞉ma꞉ta꞉ koto alemanu nate paeyao ikana꞉ma꞉ mu halo peleme ekita꞉ hone ula꞉me. \v 31 Koto pa꞉la꞉ ekina꞉ta꞉ ikana꞉ma꞉ta꞉ Koda꞉na꞉ Kilu Tombuao Hala꞉eki amba꞉la weiyu haemeka꞉na꞉ta꞉ kota꞉ ipikana꞉ma꞉ mo koto ale manuta꞉ haka꞉ta꞉pao ku halieke. \s1 Hepeni nane hamoko hapekeeki \r (Ma꞉tiu 6꞉19-21) \p \v 32 Yaka sipisipi ma꞉na꞉ tapake sikio. Paala꞉ma꞉ na homa꞉pa꞉peke. Pa ekipeke ika꞉ Apa꞉ma꞉ta꞉ oli hande Kilu Tombuao Hala꞉ ekita꞉ iki pa꞉ta꞉ kuluekema꞉ta꞉ ta꞉na꞉ma꞉ homo hala꞉me. \v 33 Ika꞉ ala꞉ta꞉ ala꞉ta꞉ta꞉ tapao mani meaata꞉ mo natehali wanda꞉hali pa꞉ta꞉ hala꞉pa꞉peke. Kutupa na kukutu pulu pa꞉la꞉ mani pausa meaata꞉ ika꞉ hamoko ale manuta꞉ oli ya nane na paeya꞉niake pa wia halo pelemeeki homeke amu pu hapa꞉peke. Ekipeke koto naneta꞉ mo pake no haleme haliwekima꞉ make bisapu inkikima꞉ make na hoeyaalimikie. \v 34 Ika꞉ hone manuta꞉ mo ika꞉ epeke epeke alemanu u haleme ale pa꞉ta꞉ mandakena꞉ u pelia halimikie. \s1 Lekema꞉ lekema꞉ pea e poka꞉la꞉eki \p \v 35-36 Ikana꞉ma꞉ta꞉ mo e pokaasa꞉ haliweki tupa꞉ hata꞉ta꞉ ika꞉ you halita꞉ hali ma꞉nda꞉ma꞉ wanda꞉ panake mea ne pamba꞉la꞉ ekina꞉ pa꞉leke handaa paa epena꞉ yu wia haleme tupa꞉ ikana꞉ma꞉ta꞉ ika꞉ aka꞉manu wotu soto la꞉tia haena꞉ yama ika꞉ ola꞉pakemanu ka꞉watia hata꞉ta꞉ anemone ipilia꞉ ekimanu lekema꞉ lekema꞉ pitolo hata꞉ hao hapa꞉peke. Koto ekina꞉ta꞉ mo you halima꞉ a꞉pa pota꞉ lia꞉ka꞉na꞉ta꞉ kota꞉ koto kone lombilimikie. \v 37 Kutupa mo you hali paa la꞉ka꞉la a꞉pa mo ipika꞉ e pokaaseme hali wekita꞉ u̱ na polu pitiki a꞉nda꞉ pa ipiki yu wia pilimieki a꞉pa handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. I̱ma꞉ iki pa꞉ta꞉ ota꞉ pi aloma꞉ Mo haliwekima꞉ koto hau pimiki yeke handaa ika꞉ you halima꞉ta꞉ ipika꞉ manda aka꞉ hola wiaata꞉ iki pa꞉ta꞉ Ne no hala꞉ alena꞉ a꞉pa pita꞉pe laa ne pana꞉ pu kilieke. \v 38 Kutupa make mo you halita꞉ buta꞉ hokina꞉ o hoki nane kone epea꞉ka꞉na꞉ ikana꞉ma꞉ tiki tiki yao ipiki yu wia pilimieki handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. \v 39 Kutupa make doeki hone wotu wia꞉pa꞉peke. Mo da teke hali ma꞉nda꞉ma꞉ mo pake nala꞉ hali ma꞉nda꞉ epolo pa꞉la꞉eki amba꞉ handa꞉ wia꞉ka꞉na꞉ta꞉ kota꞉ koto someta꞉ oni ipika꞉ da yamba꞉la na yapena꞉ lelieke. \v 40 Iki make ota꞉ tikitiki yao hapa꞉peke. Pa ekipeke. Mo hande Wanda꞉halina꞉ Eiyeketa꞉ ipilieke hone na witolo halimi di nina꞉ ipilieke laa loa꞉me leekeme. \s1 Mo epeke e pokaasa꞉ hali pita꞉ hoke e pokaasa꞉ hali yaapo \r (Ma꞉tiu 24꞉45-51) \p \v 41 Pidama꞉ alota꞉ Tekehalio. Nakana꞉ma꞉ do ale onkoluma꞉ pita꞉ niki pa꞉ta꞉ homeke alepe o mo wanda꞉hali paeyao pa꞉ta꞉ alepe laa lota꞉ piekeme. \v 42 Koto leeke mo Tekehalima꞉ Pidana꞉ pi hombo peaaso alota꞉ Kima꞉ na homeke make ota꞉ epeke hone wotu u lenkene pu wia e poko halia꞉ halita꞉ epi ya꞉ka꞉ta꞉pe. Koto halita꞉ mo da teke halima꞉ta꞉ ipika꞉ da handeteke haena꞉yeke make mo ipika꞉ mandane e pokao haleme wanda꞉hali pa꞉ta꞉ ika꞉ ne no haleme di mia꞉ka꞉na꞉ta꞉ ika꞉ ne nena꞉ teli teli peao halieke leekeme. \v 43 Ipika꞉ you hali paa la꞉ka꞉la a꞉pa ipika꞉ e pokao hala꞉ halima꞉ mo hande emanu ota꞉ epeke tupa꞉ pitolo pitilia꞉eki a꞉pa handa꞉ ya꞉ka꞉na꞉ta꞉ kota꞉ koto e pokao hala꞉ halita꞉ ta꞉na꞉ma꞉ homo halieke. \v 44 Ota꞉ alome. Mo you halima꞉ta꞉ koto someta꞉ ipika꞉ ala꞉ta꞉ ala꞉ta꞉ paeyao handeteke haena꞉ la꞉lieke. \v 45 Kutu pulu pa꞉la꞉pate mo e pokaasa꞉ halima꞉ta꞉ ipika꞉ kone alota꞉ Yaka you someta꞉ di hokulu hokulu pitolo hata꞉ a̱i̱ na ipula꞉me laa mo mandane e pokaasa꞉ wanda꞉ pita꞉ hali yaapo kini pea hali lu yombitolo hata꞉ ikali ne nalo keaaso hata꞉ \v 46 ipika꞉ you halita꞉ Do natena꞉ ipilieke hone na witolo halia꞉ natena꞉ta꞉ koto kone opolo ipilieke. A꞉paata꞉ mo e pokaasa꞉ halita꞉ homena꞉ liaata꞉ pa pi na opiki wanda꞉hali ame̱le̱ haena꞉ la꞉lieke leekeme. \p \v 47 Mo e pokaasa꞉ hali ma꞉nda꞉ epima꞉ ipika꞉ you halima꞉ pea꞉peke la꞉la꞉ haumanu hone wia ipikana꞉ma꞉ ipika꞉ kone ana꞉ lao na piki ipika꞉ you halima꞉ pea꞉peke la꞉la꞉ haumanu na pia꞉ka꞉na꞉ta꞉ kota꞉ koto halita꞉ mo you halima꞉ dopitama꞉ podela꞉ mia꞉ka꞉na꞉ta꞉ tanda tieke nelieke. \v 48 Pate e pokaasa꞉ hali ma꞉nda꞉ma꞉ta꞉ ipika꞉ you halima꞉ hone pa꞉la꞉eki hone na witolo kone tanda napekeeki pia꞉ka꞉na꞉ta꞉ kota꞉ ipikita꞉ ae̱ya̱piki dopitama꞉ hosiki podela꞉ milieke. Hali ma꞉nda꞉ta꞉ mandane alemanu handeteke haena꞉ yeke anekema꞉ halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ anekema꞉ muluekema꞉ hone wilieke. Koto tupa꞉ kone hali ma꞉nda꞉ pa꞉ta꞉ ala꞉ta꞉ ma꞉nda꞉ wopu handeteke haena꞉ yeke halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ ota꞉ ankulao anekema꞉ muluekema꞉ hone wilieke leekeme. \s1 Yesuta꞉ tapake tekili pa꞉la꞉ ekina꞉ teke \r (Ma꞉tiu 10꞉34-36) \p \v 49 Yesuma꞉ alota꞉ I̱ epolo ekita꞉ ti ulekema꞉ do kenkena꞉ mo yaaluekema꞉ epoa꞉pate ya honema꞉ta꞉ amba꞉ kone talo hapeke alee. \v 50 I̱ta꞉ bapitaisi pea꞉peke hau homeke mulueke hone ulupate pa a̱i̱ na pu paeyaaso ekina꞉ kota꞉ yaka weleke pukima꞉ ka꞉nda꞉ tieke minolome. \v 51 Ika꞉ honema꞉ta꞉ I̱ma꞉ta꞉ ika꞉ a꞉nda꞉ piteleme ekimanu homu pealo epoa꞉me hone wi witelemepe. Ota꞉ dia꞉me. I̱ta꞉ wanda꞉hali tapake tekili pawaluekema꞉ epoa꞉me. \v 52 Ame do hao kini peaata꞉ wetepena꞉ make tapakesiki yunki hata꞉ma꞉ ika꞉ kone tekilipa tepoma꞉ta꞉ yaapo pa꞉ta꞉ a꞉nda꞉ litolo hata꞉ yaapo sikima꞉ta꞉ pa tepo pa꞉ta꞉ a꞉nda꞉ lia꞉tiki pu halimikie leekeme. \v 53 Ateke tonuma꞉ta꞉ pa eiyeke ame̱le̱ a꞉nda꞉ lualu peaata꞉ eiyeke tonuma꞉ta꞉ ateke tonu ame̱le̱ a꞉nda꞉ lualu pilimikie. Inkiki tonuma꞉ta꞉ waneke tonu ame̱le̱ a꞉nda꞉ lualu peaata꞉ waneke tonuma꞉ta꞉ inkiki tonu ame̱le̱ a꞉nda꞉ lualu pilimikie. Halikina꞉ inkiki tonuma꞉ta꞉ ika꞉ aeya꞉ tonu ame̱le̱ a꞉nda꞉ lualu peaata꞉ mo aeyeke tonuma꞉ta꞉ ika꞉ halikina꞉ inkiki tonu ame̱le̱ a꞉nda꞉ lualu pilimikie leekeme. \s1 Wetepena꞉ epolo pa꞉la꞉ ekina꞉ handa꞉la꞉eki \r (Ma꞉tiu 16꞉2-3) \p \v 54 Yesuma꞉ mo wanda꞉hali pa꞉ta꞉ alota꞉ Ikana꞉ma꞉ oni nate pamba꞉la꞉ nane yama꞉ ipula꞉ koa handolota꞉ kota꞉ koto kone ikana꞉ma꞉ alota꞉ Lako ipilieke lo halemeketa꞉ kota꞉ ota꞉ ipu hala꞉me. \v 55 Kutupa oni ka꞉wa꞉na꞉ yu nanema꞉ tilao po ipula꞉eki handolota꞉ kota꞉ ikana꞉ma꞉ koto kone alota꞉ Nate tieke talo hata꞉ titipu tieke pilieke lo halemeketa꞉ ota꞉ titipu tieke pu hala꞉me. \v 56 Makeaasa꞉ hau pu haleme haliwekio. Ikana꞉ma꞉ta꞉ do ya yu nane pita꞉la꞉ ekimanu handolo hata꞉ dupilieke aleme ekita꞉ ota꞉ yao hala꞉pate pa ekipeke ame do natena꞉ ipula꞉ hau manuna꞉ teketa꞉ na handa꞉ witolo pimipe leekeme. \s1 Pi yokaalu peaama꞉na꞉ a̱i̱ tiki tiki yaasa꞉eki \r (Ma꞉tiu 5꞉25-26) \p \v 57 Ekipeke handaa ika꞉ kone mo epeke hau pia꞉peke ekita꞉ na teli pitolo pimipe. \v 58 Hali ma꞉nda꞉ma꞉ neketa꞉ pi yokaaluna꞉ hatuku poluekema꞉ pia꞉ka꞉na꞉ta꞉ kota꞉ a̱i̱ na peke hata꞉ kone nakana꞉ma꞉ tiki tiki yaaluekema꞉ taapa꞉peke. Nakana꞉ma꞉ koto hau na pika꞉na꞉ta꞉ kota꞉ ipikana꞉ma꞉ neketa꞉ oli pi yokaalu pu hala꞉ hali teke pa꞉ta꞉ yola꞉ mea puaata꞉ pa koto halima꞉ta꞉ mo polisi haliwekina꞉ kikina꞉ mea halaata꞉ neketa꞉ dipula da pa꞉ta꞉ mea pitalieke. \v 59 Kutupa neke pa꞉ta꞉ Mo opisi hamba꞉e lelia꞉ tupa꞉ a̱i̱ na hambo paeyaeka꞉na꞉ta꞉ kota꞉ neketa꞉ koto pa꞉ta꞉ pa pita꞉ pelia halipikie leekeme. \c 13 \s1 Iki homilimina꞉ ika꞉ hoke hau hoki wala kiaape \p \v 1 Koto natena꞉ta꞉ koto pa꞉ta꞉ haemeke mandane haliwekima꞉ Yesu pa꞉ta꞉ a꞉pa mo Pailedima꞉ Ka꞉lili mandane haliwekita꞉ ika꞉ hotekemanu lia Koda꞉ pa꞉ta꞉ halolo haena꞉ kone lieke ekina꞉ pi la halemekeme. \v 2 Koto ekina꞉ Yesuma꞉ ika꞉ pi hombo peaaso alota꞉ Mo Ka꞉lili haliweki paeyaota꞉ hoke hau pu halemepate ika꞉ honema꞉ta꞉ mo hande limiki haliwekima꞉ hoke hau ota꞉ haka꞉ta꞉pao pimiki yeke handa liekeme hone witelemepe. \v 3 Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ iki make mo hande Ka꞉lili haliweki homemeke tupa꞉ kone homilimikie. \v 4 Kutupa make mo hande Sailoa꞉me da pa꞉ta꞉ haliao a꞉emeke da hokulu tieke lombolo hata꞉ lu sesape pieke 18 wanda꞉hali pa꞉ta꞉ta꞉ eki hone witelemepe. Mo hande dama꞉ lieke ekina꞉ta꞉ ika꞉ hoke hauta꞉ mo Diutuseleme haleme wanda꞉hali paeyaona꞉ pimiki hoke hau ota꞉ lombei peake tupa꞉ pimikieki peneme yaasa꞉pe. \v 5 Ota꞉ dia꞉me. I̱ma꞉ iki pa꞉ta꞉ ota꞉ loa꞉me. Iki make ika꞉ piteleme hoke haumanu na kiaemeka꞉na꞉ta꞉ kota꞉ koto tapake homemeke tupa꞉ kone homilimikie leekeme. \s1 Nose tima꞉ kiliki na a꞉eyeke ekina꞉ onkoluma꞉ pi \p \v 6 Kutupa Yesuma꞉ iki pa꞉ta꞉ onkoluma꞉ pi ma꞉nda꞉ dupa leekeme. Amba꞉ hali ma꞉nda꞉ma꞉ ipika꞉ e tukikina꞉ta꞉ nose ti ma꞉nda꞉ nokopeekeeki hayekeme. Mo halima꞉ta꞉ mo nose kiliki a꞉ela꞉ patema꞉ handolo endi pu hayekepate homeke a꞉nda꞉ na a꞉eyekeme. \v 7 Koto ekina꞉ta꞉ mo halima꞉ ipika꞉ e pokao hayeke hali pa꞉ta꞉ alota꞉ Handa꞉e. Bapi tepo tukiki pa꞉ta꞉ta꞉ do nose tina꞉ kiliki a꞉ela꞉pe laa handolo endi pu halopate homeke a꞉nda꞉ ota꞉ na a꞉ela꞉me. Koto pa꞉la꞉ ekina꞉ta꞉ do hoke tima꞉ mo epeke kenke pa hameke naata꞉ paama꞉na꞉ poko bae leekeme. \v 8 Koto leekepate mo e pokaeyeke halima꞉ alota꞉ Yaka tiekeo. Bapi homekena꞉ pa haena꞉ lae. I̱ma꞉ do ti teke hopa꞉liao yu lia kao imanu lekeluekema꞉ loa꞉me. \v 9 Yaka honema꞉ta꞉ mone mo bapina꞉ kiliki a꞉eya꞉ka꞉na꞉ta꞉ ota꞉ epolo pa꞉la꞉pate na a꞉eya꞉ka꞉na꞉ta꞉ kota꞉ pao poko baena꞉ lolena꞉e laa leekeme. \s1 Hoto Pila꞉ Natena꞉ kone wanda꞉ ma꞉nda꞉ epeaeyekeeki \p \v 10 Mo hoto pila꞉ nate ma꞉nda꞉na꞉ Yesuta꞉ mo pi hotu haemeke da ma꞉nda꞉ pa꞉ta꞉ pi walo hayekeme. \v 11 Koto pa꞉ta꞉ta꞉ hoke temoko pitieke wanda꞉ ma꞉nda꞉ pitiekeme. Kutu pieke ekima꞉ kone mo wanda꞉ta꞉ 18 bapina꞉ yeni mea hao hayeke ekima꞉ mo wanda꞉na꞉ hoki hoi peaota꞉ tindipapeke na yeekeme. \v 12 Yesuma꞉ mo wanda꞉ hando hao wi la꞉moneaso alota꞉ Wanda꞉o. Neketa꞉ naka꞉ yeni ta paetolo hata꞉ neketa꞉ walekena꞉ ta hale handa꞉e. \v 13 Koto laa Yesuma꞉ ipika꞉ kiki mo wanda꞉na꞉ loke manda wieke dina꞉ koto kone ipikana꞉ma꞉ ipika꞉ hoki tindi paeyekeme. Koto ekina꞉ta꞉ Koda꞉na꞉ biki mea miniliaeyekeme. \v 14 Kutu pieke handaa mo pi hotu haemeke da handeteke hayeke halima꞉ta꞉ Yesuma꞉ mo wanda꞉ta꞉ mo Hoto Pila꞉ Natena꞉ kone epeaeyeke handa Yesu yaapo mineke pankeekeme. Koto ekina꞉ ipikana꞉ma꞉ mo wanda꞉hali pa꞉ta꞉ alota꞉ E poka꞉peke nate manuta꞉ yunki mindiki hata꞉ taama꞉ ika꞉ yenimanu epeaena꞉ hone wimika꞉na꞉ta꞉ kota꞉ koto nate nina꞉ a꞉pa꞉peke ya꞉la꞉pate pa do Hoto Pila꞉ Natena꞉ta꞉ ota꞉ dia꞉me leekeme. \v 15 Mo Tekehalima꞉ ipika꞉ pi hombo peaaso alota꞉ Makeaasa꞉ hau pu haleme haliwekio. Iki ma꞉nda꞉ hondoma꞉ mo Hoto Pila꞉ Natena꞉ ika꞉ kao o donki ma꞉na꞉ make mo ho̱linda꞉ pa꞉ta꞉ mea hama lomba꞉ ta꞉pao ikali na꞉na꞉yeke mea pelimikie. \v 16 Koto tupa꞉ kone do Eipoloha꞉ma꞉na꞉ tapake wanda꞉ta꞉ hoke temokoma꞉ 18 bapina꞉ tonkao ula꞉ puta꞉ mo Hoto Pila꞉ Natena꞉ta꞉ na ka꞉la꞉pa꞉ tapaena꞉pe laa lota꞉ piekeme. \v 17 Koto hombo peayeke ekima꞉ta꞉ Yesu ipika꞉ a꞉nda꞉ tunkuliki haliwekima꞉ yaala꞉ma꞉ homolo haena꞉ta꞉ mo wanda꞉halima꞉ta꞉ mo epeke haumanu piekeeki handolo hata꞉ ta꞉na꞉ma꞉ wotu homemekeme. \s1 Masidadi waena꞉ onkoluma꞉ pi \r (Ma꞉tiu 13꞉31-32, Maka 4꞉30-32) \p \v 18 Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handa꞉la꞉pe laa manda꞉ meanope. \v 19 Mo Kilu Tombuao Hala꞉ ekita꞉ mo (ki̱mi̱le̱ma꞉ handeke) masidadi wae ale sikita꞉ hali ma꞉nda꞉ma꞉ mea ipika꞉ ena꞉ tande leekeeki opaata꞉ ota꞉ aneke ti hombeleke hao paleke palekena꞉ ba titima꞉ dake hapeke ya꞉la꞉me leekeme. \s1 Palaowa pombei yaasa꞉ yisitina꞉ onkoluma꞉ pi \r (Ma꞉tiu 13꞉33) \p \v 20 Kutupa Yesuma꞉ paa make lota꞉ pitolo alota꞉ Koda꞉na꞉ Kilu Tombuao Hala꞉ ekita꞉ alekema꞉ manda꞉ mealua꞉pe. \v 21 Dupa manda꞉ meanoe. Wanda꞉ ma꞉nda꞉ma꞉ mo palaowa pombei yaasa꞉ yisitisiki mea palaowa nu homeke mea apa꞉tao kawasona꞉ dakole dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme. \s1 Dekepeke pota꞉siki \r (Ma꞉tiu 7꞉13-14,21-23) \p \v 22 Yesuma꞉ mo Diutuseleme da nane opolo poluekema꞉ yeke handaa hosiki da sunu make daoni pa꞉ta꞉manu amba꞉la pominolo hata꞉ pi wala꞉tiki pomiekeme. \v 23 Kutupieke ma꞉nda꞉ma꞉ Yesu pa꞉ta꞉ lota꞉ pitolo hata꞉ alota꞉ Tekehalio. Koda꞉ma꞉ta꞉ pa tepo tepo wanda꞉hali homeke detena꞉ yeke petelia꞉pe laa leekeme. Yesuma꞉ mo pi hombo peaaso alota꞉ \v 24 Ikana꞉ma꞉ mo dekepeke pota꞉ kake pa꞉ta꞉ honda꞉ pambuluekema꞉ honkopu hapa꞉peke. Pa ekipeke. Wanda꞉hali wotuma꞉ honda꞉ pambuluekema꞉ taapolo pelemepate honda꞉ pambolo pua꞉pa꞉peke na ya꞉lieke. \v 25 Mo da teke halima꞉ta꞉ tiao pota꞉ pokilieke. Kutu pia꞉ka꞉na꞉ta꞉ iki hama hata꞉ta꞉ pota꞉ kake kilikili laaso alota꞉ Tiekeo. Niki epomono pota꞉ lomba꞉e lelimipate ipikana꞉ma꞉ hombo peaaso alota꞉ Ikita꞉ I̱ na handoloma꞉ Ikita꞉ hanema꞉ epelemepe laa lelieke. \v 26 Koto leliepate ikana꞉ma꞉ ipika꞉ pi hombo peaaso dupa lelimikie. Nikita꞉ neke ame̱le̱ mandakena꞉ pita꞉ ne ikali noma꞉ hande make nakana꞉ma꞉ta꞉ mo nika꞉ da sunu pa꞉ta꞉ pimanu wala꞉tiki pomime laa lelimikie. \v 27 Koto lemekena꞉ ipikana꞉ma꞉ pa do tupa꞉ lelieke. Ikita꞉ hane wanda꞉halipa꞉ I̱ mina꞉pa꞉lao pupa꞉e. Ikita꞉ hoke hau pu haleme wanda꞉halie lelieke. \v 28 Kutupa ikana꞉ma꞉ta꞉ mo Eipoloha꞉ma꞉ Aisa꞉ke Dieikope make mo potopede haliweki paeyao make mo Koda꞉na꞉ Kilu Tombuao Hala꞉ eki pa꞉ta꞉ halimieki handolo hata꞉ ikita꞉ hama tolu lia꞉ka꞉na꞉ta꞉ kota꞉ ikita꞉ e̱ tieke alo hata꞉ kake lenkene lo halimikie. \v 29 Wanda꞉halita꞉ mo nate pamba꞉la꞉ nane make nate opa꞉la꞉ nane make mo nepoko yaapo nane make opolo endi peaata꞉ Koda꞉na꞉ Kilu Tombuao Hala꞉ alena꞉ ne pamba꞉la꞉ ekina꞉ a꞉pa pitilimikie. \v 30 Koto ekina꞉ta꞉ ame do wetepena꞉ haleme wanda꞉hali mandaneta꞉ titina꞉ halimikie. Kutupa titina꞉ haleme wanda꞉halita꞉ wetepena꞉ halimikie leekeme. \s1 Yesuma꞉ mo Diutuseleme dana꞉ a꞉ta꞉ma꞉ homeekeeki \r (Ma꞉tiu 23꞉37-39) \p \v 31 Koto dina꞉ kone mandane Pa꞉tisi haliwekima꞉ Yesu pa꞉ta꞉ a꞉pa alota꞉ Kini Hetodima꞉ neke luekema꞉ taapa꞉la꞉me. Neketa꞉ do da yu mina꞉pa꞉lao ota꞉ ame do kone pua꞉peke lemekeme. \p \v 32 Yesuma꞉ ika꞉ pi hombo peaaso alota꞉ Iki puata꞉ koto hande tikene kika pa꞉ta꞉ dupa lapa꞉peke. I̱ma꞉ta꞉ ameta꞉ mo hoke temokomanu tolu lia make yenimanu epeaasoma꞉ laata꞉ belia make kutupata꞉ tuneketa꞉ ya e paeyaalueke laa lapa꞉peke. \v 33 Koto pa꞉la꞉pate ame belia tuneketa꞉ ya pota꞉na꞉ pa yopu pitulueke. Pa ekipeke. Mo Koda꞉na꞉ potopede halita꞉ da ma꞉nda꞉ pa꞉ta꞉manu lita꞉la꞉ta꞉ ana꞉ na pa꞉la꞉pate pa Diutuseleme da tukiki pa꞉ta꞉ homeke ana꞉ pa꞉la꞉me leekeme. \p \v 34 Diutuseleme Diutuselemeo. A꞉ta꞉ tiekee. Nakana꞉ma꞉ta꞉ mo potopede haliwekita꞉ liki hau ombu peaata꞉ toopima꞉ lu homao haleme. I̱ma꞉ta꞉ ikita꞉ mo hande wanda꞉ koka꞉la꞉ma꞉ ipika꞉ ikiki sunu ipika꞉ popake itiki oto pa꞉ta꞉ mea momba꞉lao hala꞉ tupa꞉ I̱ma꞉ make koto tupa꞉ kone naka꞉ wekiwandiki ya kikima꞉ hapisa꞉ pu halopate nakana꞉ma꞉ kiao haleme. \v 35 Koto ekina꞉ta꞉ naka꞉ yeni pu haleme data꞉ mina꞉pa꞉laemeka꞉na꞉ta꞉ pa taake halieke. I̱ma꞉ neke pa꞉ta꞉ ota꞉ pi do la kitolo handa꞉e. Ame do ane kini pea pua nakana꞉ma꞉ I̱ pa꞉ta꞉ta꞉ Tekehalina꞉ biki mea ipula꞉ hali pa꞉ta꞉ Ta꞉na꞉e pi loluekema꞉ tiki tiki yao a̱i̱ na haeka꞉na꞉ta꞉ kota꞉ I̱ a̱i̱ na handilimikie alome leekeme. \c 14 \s1 Yesuma꞉ yeni homeeke hali ma꞉nda꞉ mea epeaeyekeeki \p \v 1 Mo hande hoto pila꞉ nate ma꞉nda꞉na꞉ Yesuta꞉ Pa꞉tisi haliwekina꞉ you hali ma꞉nda꞉na꞉ da pa꞉ta꞉ ne noluekema꞉ peekeme. Kutupa koto pa꞉ta꞉ haemeke wanda꞉halima꞉ta꞉ Yesuta꞉ wopu handaake wimikime. \v 2 Pa koto pa꞉ta꞉ta꞉ kiki anke pambeke hali ma꞉nda꞉ta꞉ Yesu pa꞉ta꞉ epeekeme. \p \v 3 Kutu pieke Yesuma꞉ mo hande Lo Pi walo haemeke haliweki make mo mandane Pa꞉tisi haliweki pa꞉ta꞉ make lota꞉ pitolo hata꞉ alota꞉ Nika꞉ hande Lo Pi ula꞉eki manuma꞉ta꞉ hoto pila꞉ nate nina꞉ wanda꞉hali mea epeamonota꞉ waleke ku hala꞉pe o dia꞉ ya꞉la꞉pe leekeme. \v 4 Koto leekepate mo haliwekima꞉ta꞉ pi siki ma꞉nda꞉ make ota꞉ na hondomu lemekeme. Kota꞉ Yesuma꞉ta꞉ mo hande yeni hayeke hali mea epeao tapaeyekeme. \v 5 Kutupa Yesuma꞉ iki pa꞉ta꞉ alota꞉ Iki ma꞉nda꞉ hondo ika꞉ weki o ma꞉na꞉ ma꞉nda꞉ oni naku pa꞉ta꞉ mo hoto pila꞉ natena꞉ kone lopa wia꞉ka꞉na꞉ta꞉ kota꞉ ikana꞉ma꞉ta꞉ Mo hoto pila꞉ natena꞉e laa a̱i̱ na kiki yola꞉ milimikipe leekeme. \v 6 Koto leekepate mo haliwekima꞉ta꞉ Yesuna꞉ pi hombo peapeketa꞉ ana꞉ na piekeme. \s1 Ika꞉ kone homu pea hasa꞉eki \p \v 7 Mo hande wi leeke epemeke haliwekima꞉ a꞉pa꞉la꞉ da panda꞉ handaa mu tia pomimikieki hando hao Yesuma꞉ dupiki onkoluma꞉ pi la haleekeme. \v 8 Ma꞉nda꞉ epima꞉ wanda꞉ panake mea ne pambolo hata꞉ neke pa꞉ta꞉ epoe pi a꞉nda꞉ lea꞉ka꞉na꞉ta꞉ kota꞉ pua mo hande hamoko haliweki pitu hala꞉ epeke alena꞉ amba꞉la na pua pita꞉peke. Ma꞉nda꞉ta꞉ neke lu ankulao hala꞉ hamoko hali ma꞉nda꞉ make Epoe alo pa꞉la꞉me laa loa꞉me. \v 9 Kutupa mo hande iki ipupa꞉ lea꞉ halima꞉ mo hali tieke epea꞉ka꞉na꞉ta꞉ Do hali pitina꞉ koto da panda꞉ mina꞉pa꞉lao pue laa neke pa꞉ta꞉ a꞉pa lelieke. Koto lea꞉ka꞉na꞉ta꞉ neketa꞉ yaala꞉ tieke minolo hata꞉ hoki nane pitulu pelipiki yeke loa꞉me. \v 10 Koto hau na pikita꞉ ma꞉nda꞉ma꞉ neke pa꞉ta꞉ Ne nolo epoe pi a꞉nda꞉ lea꞉ka꞉na꞉ta꞉ kota꞉ hoki nanema꞉ a꞉pa pita꞉peke. Kutu pika꞉na꞉ta꞉ mo hande neke wi lea꞉ somema꞉ neke pa꞉ta꞉ a꞉pa alota꞉ Yaka yankekeo. Do epeke alena꞉ a꞉pa pitie lelieke. Kutu piki hau pilia꞉ ekima꞉ta꞉ wanda꞉hali paeyaona꞉ leke popelekena꞉ta꞉ neketa꞉ mina꞉lialieke leekeme. \v 11 Ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mininialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme. \p \v 12 Kutupa Yesuma꞉ ipiki wi lea꞉ hali pa꞉ta꞉ alota꞉ Nakana꞉ma꞉ natena꞉ o timba ne nolo epena꞉ yeke wi leka꞉na꞉ta꞉ naka꞉ yankeke sunu o naka꞉ kame tonu o naka꞉ tapake make naka꞉ hamoko yankeke tonu wi na lapeke. Ekipeke. Wetepe nina꞉ make koto tupa꞉ kone neke wi lelimi ekima꞉ta꞉ naka꞉ yenkita꞉ paa koto ana꞉na꞉ kone milipikie. \v 13 Kutu pulu pelepate nakana꞉ma꞉ ne ma꞉nda꞉ pambeka꞉na꞉ta꞉ natehali wanda꞉hali sunu pa꞉ta꞉ make dola꞉pake piki kiki anke hoela꞉ wanda꞉hali make leke holu piki wanda꞉hali sunu paeyao pa꞉ta꞉ ipupe lapeke. \v 14 Kutu pika꞉na꞉ta꞉ Koda꞉ma꞉ kone neke yenki kilieke. Ekipeke. Kutupiki wanda꞉halima꞉ta꞉ naka꞉ yenki kia꞉peke na ya꞉la꞉ ekina꞉ Koda꞉ma꞉ta꞉ mo ipika꞉ pi opua pea꞉tiki pimi wanda꞉hali homa tialimi natena꞉ta꞉ naka꞉ yenki kilieke leekeme. \s1 Ne tieke pambeeke ekina꞉ onkoluma꞉ laa leekeeki \r (Ma꞉tiu 22꞉1-10) \p \v 15 Mo ne no pitimiki haliweki ame̱le̱ pitieke hali homekema꞉ta꞉ koto pi opua Yesu pa꞉ta꞉ alota꞉ Koda꞉na꞉ Kilu Tombuao Hala꞉ ekina꞉ ne pambilia꞉ pa꞉ta꞉ pua pitulu pa꞉la꞉ halima꞉ta꞉ ta꞉na꞉ma꞉ homilieke laa leekepate \v 16 Yesuma꞉ ipiki pa꞉ta꞉ alota꞉ Hali ma꞉nda꞉ma꞉ ne tieke pambolo hata꞉ wanda꞉hali wopu epena꞉ wi la꞉ mepi piekeme. \v 17 Kutupa mo ne nolo pimiki nate teke pa꞉ta꞉ yeeke handaata꞉ mo hande wi la꞉ mepi pieke wanda꞉hali pa꞉ta꞉ e pokaeyeke hali homekema꞉ lolo pena꞉ tapaaso hata꞉ alota꞉ Ala꞉ta꞉ ala꞉ta꞉ paeyao amba꞉ ana꞉ lao uluma꞉ma꞉ ipupe laa lolo pue leekeme. \v 18 Mo halima꞉ lolo peekepate haliweki paeyaoma꞉ homeke homeke lo kiaemeke ekina꞉ tekemanu weitolo hata꞉ta꞉ dupa lemekeme. Titina꞉ halima꞉ hande e pokaeyeke hali pa꞉ta꞉ alota꞉ I̱ta꞉ yaka hambolo kenke handolo polueke. Koto ekina꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme. \v 19 Hali ma꞉nda꞉ma꞉ hande e pokaeyeke hali pa꞉ta꞉ alota꞉ I̱ta꞉ e poka꞉la꞉ kao kiki yaapo hambolo ekima꞉ ika꞉ hau handuluekema꞉ yeke puluekema꞉ pilisi I̱ta꞉ a꞉pa꞉peke na ya꞉la꞉me laa lawaapeke leekeme. \v 20 Kutupa hali ma꞉nda꞉ma꞉ make alota꞉ I̱ta꞉ ame do siki wanda꞉ panake molo ekima꞉ a꞉pa꞉peke na ya꞉la꞉me laa lawaapeke leekeme. \p \v 21 Koto ekina꞉ mo hande e pokaeyeke halima꞉ paa la꞉ka꞉la pua hande haliwekima꞉ lemeke pi paeyao ipika꞉ teke hali pa꞉ta꞉ la haleekeme. Koto leeke opuaata꞉ mo teke halima꞉ mineke tieke pankolo hata꞉ ipika꞉ e pokaeyeke hali pa꞉ta꞉ alota꞉ A̱i̱ya puaata꞉ mo daonina꞉ pota꞉ tieke pa꞉ta꞉manu make hosiki pota꞉ pa꞉ta꞉manu make mo natehali wanda꞉hali make kiki anke hoeke dola꞉pake wanda꞉hali make leke holu piki wanda꞉hali make ankema꞉ pomua꞉peke na yeke wanda꞉hali make koto wanda꞉hali paeyaosiki hatuku mea a꞉pa꞉peke leekeme. \v 22 Kutupa mo e pokao hayeke halima꞉ kotoeki pea a꞉pa alota꞉ Tekehalio. Naka꞉ hande le ekita꞉ pua꞉pate naka꞉ da tukiki pa꞉ta꞉ta꞉ waleke pa ula꞉me leekeme. \p \v 23 Koto ekina꞉ mo teke halima꞉ hande e pokao hayeke hali pa꞉ta꞉ alota꞉ Papate pa꞉la꞉ pota꞉ pa꞉ta꞉manu puaata꞉ yaka da tumbina꞉ yeke loa꞉ma꞉ wanda꞉hali paeyao handa꞉ mea a꞉pawapeke. \v 24 Pa ekipeke. Amba꞉ hande titina꞉ wi loa꞉ haliweki homeke a꞉nda꞉ma꞉ yaka ne a꞉pa napena꞉ yeke handa loa꞉me leekeme laa leekeme. \s1 Yesuna꞉ disaipolo hali haluekema꞉ pita꞉la꞉ ekita꞉ yopu hau dia꞉me \r (Ma꞉tiu 10꞉37-38) \p \v 25 Nate ma꞉nda꞉na꞉ wanda꞉hali wopuma꞉ Yesu ame̱le̱ pulu haena꞉ Yesuma꞉ la꞉ka꞉la꞉ moneaso hata꞉ iki pa꞉ta꞉ dupa leekeme. \v 26 I̱ telia꞉ mea ipuluekema꞉ ipilimi wanda꞉hali ma꞉nda꞉ hondoma꞉ I̱ ame̱le̱ pominolota꞉ ana꞉ na pa꞉la꞉me. Pate ipikana꞉ma꞉ I̱ pa꞉ta꞉ puki kuluekema꞉ta꞉ ipika꞉ apa꞉ ama꞉ make ipika꞉ wanda꞉ make wekiwandiki make ipika꞉ kame ana꞉ tonu make ipiki tonka꞉na꞉ kiaota꞉ I̱ pa꞉ta꞉ puki tiekema꞉ homea꞉ka꞉na꞉ta꞉ kota꞉ kutu pilia꞉ someta꞉ ana꞉ pa꞉la꞉me leekeme. \v 27 Ma꞉nda꞉ epima꞉ ipika꞉ a꞉ka꞉tei wape piki ti ipika꞉ kone na mea tia yaka hoki nane na telia꞉ mea ipu haya꞉ka꞉na꞉ta꞉ kota꞉ ipikita꞉ yaka disaipolo hali hapeke na ya꞉la꞉me. \p \v 28 Ma꞉nda꞉ epima꞉ oli ya nane a꞉eyo a꞉meiyake hokulu pa꞉la꞉ da tieke a꞉eyo paeyaaluekema꞉ ipikana꞉ma꞉ta꞉ titina꞉ honema꞉ amba꞉lata꞉ tumao toopi dupa baalueke o toopi ana꞉ na pa꞉la꞉pe laa yata꞉pilieke. \v 29 Ipikana꞉ma꞉ kotoeki na piki pa amba꞉la a꞉eya꞉ka꞉na꞉ta꞉ kota꞉ mo data꞉ a̱i̱ na paeyaake pa ka꞉ta꞉manu homeke nokopa꞉ wia pa kapa꞉lalieke. Kutu pia꞉ka꞉na꞉ta꞉ wanda꞉halima꞉ moeki handolota꞉ mo some kitaaso hata꞉ alota꞉ \v 30 Do halita꞉ ipika꞉ da a꞉eya꞉pate paeyaapeke ana꞉ na pea pia꞉ka꞉ta꞉me lelimikie. \p \v 31 Kini hali ma꞉nda꞉ma꞉ ipika꞉ 10 daoseni haliweki a꞉nda꞉ mea kini hali ma꞉nda꞉ ame̱le̱ a꞉nda꞉ puluekema꞉ polo pa꞉la꞉pate pa mo kini hali ma꞉nda꞉na꞉ haliwekita꞉ 20 daoseni haliweki ya꞉ka꞉na꞉ta꞉ kota꞉ mo titina꞉ kinima꞉ta꞉ titina꞉ amba꞉la pita꞉ ipika꞉ honema꞉ tumaaso hata꞉ta꞉ Mo kini yaapota꞉ a꞉nda꞉ puluekema꞉ta꞉ I̱ta꞉ ana꞉ polopema꞉ hone wilieke. \v 32 Ipika꞉ honema꞉ ipikita꞉ ana꞉ na polome hone wia꞉ka꞉na꞉ta꞉ kota꞉ mo hande kini halita꞉ papate haena꞉ kone ipika꞉ kinki haliweki tapaaso hata꞉ alota꞉ A꞉nda꞉ pao polupana꞉ pi minalu pupana꞉e laa pi tapaalieke. \p \v 33 Yesuma꞉ a꞉mbolo hata꞉ alota꞉ Koto tupa꞉ kone iki ma꞉nda꞉ epima꞉ yaka hoki nane telia꞉ mea ipulueke hone wia꞉ka꞉na꞉ta꞉ kota꞉ ipika꞉ hone pa꞉la꞉ ale paeyao mina꞉pa꞉lao I̱ telia꞉ mea ipilieke leekeme. \s1 Hoela꞉ epi \r (Ma꞉tiu 5꞉13, Maka 9꞉50) \p \v 34 Epita꞉ epeke tendepiki ale ya꞉la꞉pate ipika꞉ tende pa꞉la꞉eki a꞉nda꞉ alu pia꞉ka꞉na꞉ta꞉ kota꞉ ikana꞉ma꞉ mo epina꞉ tende paa mea peapeke pota꞉ta꞉ ma꞉nda꞉ na wilieke. \v 35 Kutupa koto hoela꞉ epima꞉ta꞉ mo e nina꞉ o mini ambuku bao haleme alena꞉ make na epeaalieke. Koto ekina꞉ta꞉ pa bao bao pu halememe. Katake lomba꞉la꞉ somema꞉ta꞉ do pimanu opina꞉e leekeme. \c 15 \s1 Alu pieke sipisipi ma꞉na꞉na꞉ onkoluma꞉ pi \r (Ma꞉tiu 18꞉12-14) \p \v 1 Nate ma꞉nda꞉na꞉ mo hande dakisi mani mu haemeke haliweki make mo hoke haliweki make paeyaoma꞉ Yesuma꞉ leeke pimanu opuluekema꞉ ipiki pa꞉ta꞉ a꞉pa mombelemekepate \v 2 hande Pa꞉tisi haliwekima꞉ make mo hande Lo Pi walo haemeke haliwekima꞉ make kotoeki handaata꞉ pi la la pitolo hata꞉ ika꞉ kone alota꞉ Do halima꞉ta꞉ mo hoke haliweki handa꞉ mea꞉tiki pea ne kone homeke pa꞉ta꞉ netiki pitelememe laa lemeke handa \v 3 Yesuma꞉ ika꞉ pi hombo peaaso onkoluma꞉ dupa leekeme. \v 4 Iki pa꞉ta꞉ hala꞉ hali homekema꞉ ipika꞉ sipisipi ma꞉na꞉ titi 100 halia꞉pate homeke alu pia꞉ka꞉na꞉ta꞉ pa eki pilia꞉pe. Mo pa hala꞉ 99 sipisipi ma꞉na꞉ manuta꞉ ambu nalo haena꞉ mo hande alupia꞉ ekita꞉ ota꞉ handa꞉ uluekema꞉ weilu pelieke leekeme. \v 5 Kutupa handa꞉ wiata꞉ ta꞉na꞉ma꞉ homolo hata꞉ hande sipisipi ma꞉na꞉ hopula꞉ mea \v 6 peiyokona꞉ tia da pelieke. Kutupa ipika꞉ yankeke titi make ipika꞉ da wanda꞉hali make paeyao ipupe laa wi alota꞉ Hande alupia꞉ ma꞉na꞉ homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉e laa lelieke. \v 7 I̱ma꞉ iki pa꞉ta꞉ ota꞉ pi alome. Koto tupa꞉ kone oli hepeni naneta꞉ pa mandane 99 hone ma꞉nda꞉ na la꞉ka꞉lapeke epeke tupa꞉ haleme wanda꞉hali pa꞉ta꞉ ta꞉na꞉ma꞉ make homelemepate pa mo hoke hali homekema꞉ hone la꞉ka꞉lea꞉ka꞉na꞉ta꞉ kota꞉ oli hepeni naneta꞉ ota꞉ ta꞉na꞉ tiekema꞉ homilimikie laa leekeme. \s1 Alu pieke mani toopi kiliki homeke \p \v 8 Kutupa make wanda꞉ homeke ma꞉nda꞉ma꞉ ipika꞉ silipa mani kiki yaapo wia halia꞉pate homeke ma꞉nda꞉ alu paeya꞉ka꞉na꞉ta꞉ eki piliepe laa leekeme. Ipikana꞉ma꞉ta꞉ handa꞉ ulueke alo ola꞉pake ka꞉wata꞉ sisimei mea da panda꞉ kila bao weilieke. \v 9 Kutupa hande mani siki handa꞉ wiata꞉ ipika꞉ yankeke make ipika꞉ da wanda꞉hali make paeyao ipupe laa wi alota꞉ Hande alupia꞉ mani homeketa꞉ handa꞉ ua꞉ma꞉ niki paeyaoma꞉ ta꞉na꞉ma꞉ homomana꞉ pipe laa lelieke. Koto ekina꞉ I̱ma꞉ iki pa꞉ta꞉ ota꞉ pi dupa alome. \v 10 Koto tupa꞉ kone hoke hali homekema꞉ Koda꞉ pa꞉ta꞉ hone ma꞉nda꞉ la꞉ka꞉lea꞉ka꞉na꞉ta꞉ kota꞉ oli Koda꞉na꞉ enisolo manuma꞉ koto ekina꞉ta꞉ ta꞉na꞉ tiekema꞉ homilimikie laa leekeme. \s1 Alu pieke weki \p \v 11 Kutupa Yesuma꞉ pi ma꞉nda꞉ alo hata꞉ alota꞉ Hali homeke ma꞉nda꞉ ipika꞉ eiyeke yaapo ame̱le̱ haemekepate \v 12 mo wetepe wekima꞉ ateke pa꞉ta꞉ alota꞉ Apa꞉o I̱ma꞉ wetepena꞉ naka꞉ anke teke mulu polo ala꞉ta꞉ ala꞉ta꞉ ame do kone telipa kuelena꞉e laa honke leekeme. Koto ekina꞉ hande atekema꞉ ipika꞉ ala꞉ta꞉ ala꞉ta꞉ mo weki yaapo pa꞉ta꞉ teli paeyekeme. \v 13 Kutupa mo wetepe wekima꞉ta꞉ nate tepomanu haota꞉ ipika꞉ mieke ekita꞉ ma꞉nda꞉ma꞉ hambena꞉ laata꞉ koto mani mea da mina꞉pa꞉lao da yu ma꞉nda꞉ papate hayeke da nane peekeme. Koto nane puata꞉ na tiaake haumanu pitolo hata꞉ \v 14 ipika꞉ mani paeyao batiki pu hayekeme. Kotoeki pu paeyao haena꞉ta꞉ koto kenke pa꞉ta꞉ tea꞉ ki tieke epeeketa꞉ mo wekita꞉ ala꞉ta꞉ ma꞉nda꞉ na miniki pa hayekeme. \v 15 Koto ekina꞉ mo da nane hayeke hamoko hali ma꞉nda꞉ pa꞉ta꞉ ti lao haluekema꞉ peekepate mo hali tiekema꞉ ipika꞉ e poko hayeke yu nane ipika꞉ ma꞉na꞉manu handeteke halo pena꞉ tapaeyekeme. \v 16 Kutupa mo wekita꞉ mo ma꞉na꞉ manuma꞉ nemeke pato ambuku manuta꞉ ipika꞉ weleke haena꞉yeke noluekema꞉ taapeekepate hali ma꞉nda꞉ma꞉ ipiki pa꞉ta꞉ ne ma꞉nda꞉ a꞉nda꞉ na haleekeme. \p \v 17 Kotoeki puoopu hao wetepena꞉ ipika꞉ hone lumba witolo hata꞉ ipika꞉ honema꞉ alota꞉ Ya apa꞉na꞉ e pokaaseme haliwekima꞉ ne ana꞉na꞉ nalo hata꞉ mandaneeki pa wina꞉ lo halemepate I̱ta꞉ do pa꞉ta꞉ hata꞉ta꞉ tea꞉ma꞉ homoluekema꞉ taapolome hone wiekeme. \v 18 I̱ tiao puaata꞉ yaka apa꞉ pa꞉ta꞉ pua dupa lolueke. Apa꞉o. Koda꞉ pa꞉ta꞉ make neke pa꞉ta꞉ make hoke hau polome. \v 19 Koto polo ekima꞉ I̱ta꞉ naka꞉ weki au lapeke na ya꞉la꞉me. Koto ekina꞉ naka꞉ e pokalo polo hali hano lolena꞉e laa lolueke hone wiekeme. \v 20 Koto ekina꞉ta꞉ mo wekita꞉ koto da yu mina꞉pa꞉lao atekena꞉ da poluekema꞉ peekeme. Da a̱i̱ na opolo peeke pota꞉na꞉ pulu haena꞉ kone atekema꞉ eiyeke epeekeeki handaata꞉ ipika꞉ pukima꞉ a꞉ta꞉ma꞉ homolo hata꞉ a̱i̱ya puaata꞉ ipika꞉ weki hopula꞉ mea nunu piekeme. \v 21 Hande eiyekema꞉ ateke pa꞉ta꞉ alota꞉ Apa꞉o. Neke pa꞉ta꞉ make Koda꞉ pa꞉ta꞉ make hoke hau polome. Koto polo ekima꞉ I̱ta꞉ naka꞉ weki au lapeke na ya꞉la꞉me leekepate \v 22 pa atekema꞉ ipika꞉ e pokao haemeke haliweki pa꞉ta꞉ wi la alota꞉ A̱i̱ pua hande ota꞉ epeke dau mea a꞉pa yamaota꞉ ipika꞉ kikina꞉ lini pitao ankedake make pambawapa꞉peke. \v 23 Kutupa hande imeke wotu piki kao ikiki mulu pua liata꞉ ta꞉na꞉ma꞉ homolo hata꞉ ne pambomana꞉ loa꞉me laata꞉ \v 24 Pa ekipeke. Do yaka wekita꞉ amba꞉ homea꞉pate kone ameta꞉ paa tiala꞉me. Alu pia꞉pate kone ameta꞉ handa꞉ ula꞉me leekeme. Kutupa koto kone ikana꞉ma꞉ ta꞉na꞉ma꞉ homolo hata꞉ mo ne pamba꞉la꞉eki kini pimikime. \p \v 25 Koto hau paeyao pitolo haena꞉ta꞉ hande mupeke wekita꞉ e ma꞉nda꞉ pa꞉ta꞉ pua paa da la꞉ka꞉la teke pa꞉ta꞉ ipulu haena꞉ hande ta꞉na꞉ma꞉ homolo hata꞉ dupale emelimanu lemekeeki opiekeme. \v 26 Kutupa mo e pokao hayeke hali homeke wi la꞉ mea alota꞉ Mota꞉ eki pitolo hata꞉ alemepe laa lota꞉ piekeme. \v 27 Mo e pokao hayeke halima꞉ ipiki pa꞉ta꞉ alota꞉ Ameta꞉ naka꞉ hande kame da la꞉ka꞉la epeeke handa naka꞉ apa꞉ma꞉ ipika꞉ weki epeke tupa꞉ la꞉ka꞉la da a꞉pa꞉la꞉me laata꞉ mo hande imeke wopu piki kao ikiki lia ne pambolo ala꞉me leekeme. \v 28 Hande mupeke wekima꞉ koto leekeeki opuata꞉ mineke wopu pankolo hata꞉ da pua꞉peketa꞉ kiaeyekeme. Koto ekina꞉ ipika꞉ atekema꞉ hama opolu bao pua mo hande mupeke weki da tukiki nane epena꞉ yeke honke leekeme. \v 29 Kutu piekepate mo hande wekima꞉ ipika꞉ atekena꞉ pi hombo peaaso alota꞉ Opima. Bapi paeyao I̱ma꞉ta꞉ naka꞉ e pokao hala꞉ hali leke hata꞉ e poka꞉tiki pu hata꞉ naka꞉ pi hoto homeke a꞉nda꞉ na tunkulua꞉pate pa nanikosi homeke a꞉nda꞉ kone yaka yankeke titi ame̱le̱ nomono yeke ma꞉nda꞉ na lia kime. \v 30 Pate koto hande naka꞉ wekima꞉ naka꞉ mani mea puata꞉ mo hambo haleme wandiki titi pa꞉ta꞉ ba tapao pua paa da a꞉pa꞉leke kone nakana꞉ma꞉ hande imeke wotu piki kao ikiki liaaleme leekeme. \p \v 31-32 Koto leeke handa atekema꞉ ipika꞉ pi hombo peaaso hata꞉ alota꞉ Yaka wekio. Neketa꞉ do pa꞉ta꞉ diki mandake hata꞉ I̱ma꞉ wia halo alemanu paeyaota꞉ naka꞉ ekie. Koto pa꞉la꞉pate naka꞉ kameta꞉ amba꞉ homea꞉pate kone ameta꞉ paa tiaala꞉me. Alupia꞉pate kone ameta꞉ paa handa꞉ ulume. Koto ekina꞉ta꞉ ne pambolo hata꞉ ta꞉na꞉ma꞉ homoloma꞉ ekita꞉ ota꞉ pea꞉peke ekina꞉ puma꞉me laa leekeme leekeme. \c 16 \s1 Ana꞉ lao hone wotu wiki hali \p \v 1 Yesuma꞉ ipika꞉ hoki nane telimiki haliweki pa꞉ta꞉ dupa leekeme. Amba꞉ a꞉nda꞉ hamoko hali ma꞉nda꞉ ipika꞉ ala꞉ta꞉ ala꞉ta꞉ handeteke haena꞉ta꞉ hali ma꞉nda꞉ mea haena꞉ leekeme. Kutupa koto mieke halima꞉ mo ipika꞉ teke halina꞉ mani mea bepolaasa꞉me laa hali ma꞉nda꞉ma꞉ mo teke hali pa꞉ta꞉ la haleekeme. \v 2 Koto leeke mo teke halima꞉ mo ipika꞉ e pokao hayeke hali wi la꞉mea alota꞉ Do nakana꞉ma꞉ pitelema꞉ aleme ekita꞉ ota꞉ alemepe laata꞉ Nakana꞉ma꞉ naka꞉ handeteke hawale alemanu paeyao sikita꞉ wapena꞉ mu wia yaka kikina꞉ u neae. Pa ekipeke. Ameta꞉ nakana꞉ma꞉ yaka ala꞉ta꞉ ala꞉ta꞉ handeteke hawapeke na ya꞉leke loa꞉me leekeme. \p \v 3 Koto leeke ekina꞉ mo halima꞉ hone witolota꞉ Yaka tiekema꞉ta꞉ I̱ta꞉ do paeyaaluekema꞉ pita꞉la꞉ma꞉ I̱ta꞉ eki pulua꞉pe laata꞉ I̱ta꞉ mo hombomanu awapeke make honkopu na halome. Kutupa make honke lapeketa꞉ yaala꞉ pa꞉la꞉me. \v 4 Koto ekina꞉ta꞉ ameta꞉ I̱ma꞉ pulu polo ekita꞉ hone witolome. Kutu pulu pua꞉ka꞉na꞉ta꞉ kota꞉ yaka e paelia꞉ dina꞉ta꞉ ika꞉ da pa꞉ta꞉manu ipupe lena꞉yeke yaka yankeke tonu halueke leekeme. \v 5 Koto ekina꞉ta꞉ ipikana꞉ma꞉ mo ipika꞉ teke hali teke pa꞉ta꞉ tondiki wimiki wanda꞉hali paeyaota꞉ wi la꞉ mepi piekeme. Kutupa mo titina꞉ hali pa꞉ta꞉ alota꞉ Nakana꞉ma꞉ yaka teke hali pa꞉ta꞉ta꞉ tondiki ekipu melepe laa lota꞉ piekeme. \v 6 I̱ma꞉ tondiki molo tupa꞉ta꞉ honku kanake 100 molome laa leekeme. Koto leeketa꞉ mo e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 50 homeke wape lao wie leekeme. \v 7 Kutupa hali ma꞉nda꞉ pa꞉ta꞉ alota꞉ Naka꞉ tondikita꞉ ekipu melepe leeke handa mo halima꞉ alota꞉ Palaowa nu 100 molome laa leekeme. Koto leeke handa mo hande e handeteke hayeke halima꞉ alota꞉ Naka꞉ tondiki meleke wape pea ula꞉ tameiya꞉ta꞉ doma꞉ pao honia pa 80 homeke wape lao wie leekeme. \p \v 8 Kutu pieke handa wetepena꞉ mo hande you hali tiekema꞉ mo hande e handeteke hayeke halima꞉ta꞉ hone wotu wiki halina꞉ hau tupa꞉ pieke ekina꞉ta꞉ ipika꞉ biki anekema꞉ mina꞉liaeyekeme. Pa ekipeke. Do kenkena꞉ hau pu haleme wanda꞉halita꞉ ika꞉ e pokuluekema꞉ta꞉ hone wotu wia pokolo hata꞉ta꞉ mo pa̱a̱ piki hau pu haleme wanda꞉halita꞉ lu ankulao halememe leekeme. \p \v 9 Kutupa Yesuma꞉ la꞉tia pulu hata꞉ alota꞉ I̱ma꞉ iki pa꞉ta꞉ alome. Do kenkena꞉ hamoko ale manuma꞉ta꞉ mandane wanda꞉hali naka꞉ yankeke halena꞉ lena꞉ lapeke. Kutu pika꞉na꞉ta꞉ mo hande hamoko alemanu paelia꞉ dina꞉ta꞉ neketa꞉ pa hao hala꞉ da nane handa꞉ milieke. \p \v 10 Kutupa hali epima꞉ hosiki e sunu epeke tupa꞉ tikitikina꞉ handeteke haya꞉ka꞉na꞉ta꞉ kota꞉ aneke emanu make epeke tupa꞉ tikitikina꞉ handeteke halieke. Kutupa make hali epima꞉ hosiki e sunu a꞉mba a꞉mba pea poko pu hoeyaeya꞉ka꞉na꞉ta꞉ kota꞉ aneke e make a꞉mba a꞉mba pea poko pu hoeyaalieke. \v 11 Koto ekina꞉ta꞉ nakana꞉ma꞉ do kenkena꞉ ula꞉ hamoko alemanu a꞉nda꞉ tikitikina꞉ na handeteke haeka꞉na꞉ta꞉ kota꞉ epima꞉ Neketa꞉ mo deto hala꞉ ekina꞉ hamoko alemanu epeke tupa꞉ handeteke hapeke laa hone tulao kilia꞉pe. \v 12 Kutupa nakana꞉ma꞉ ma꞉nda꞉na꞉ alemanu a꞉nda꞉ epeke tupa꞉ tikitikina꞉ na handeteke hawaeka꞉na꞉ta꞉ kota꞉ Naka꞉ ekie la꞉la꞉ ale manuta꞉ epima꞉ kilia꞉pe. \p \v 13 E pokaasa꞉ halima꞉ta꞉ you hali yaapona꞉ e pokaasa꞉ hali hapeke na ya꞉la꞉me. Puluekema꞉ taapo haya꞉ka꞉na꞉ta꞉ hali ma꞉nda꞉ta꞉ puki halolo hata꞉ta꞉ hali ma꞉nda꞉ta꞉ honditi pilieke o hali ma꞉nda꞉ pa꞉ta꞉ homu wopu pitolo hata꞉ta꞉ hali ma꞉nda꞉ta꞉ kiaalieke. Kutupa make ikana꞉ma꞉ Koda꞉ pita꞉ mani yaapo ika꞉ you hali yaapo haena꞉ laa ipilika꞉ e yaapota꞉ homeke dina꞉ pokaapeke ana꞉ na pelememe leekeme. \s1 Yesuna꞉ mandane pimanu leekeeki \r (Ma꞉tiu 11꞉12-13, 5꞉31-32, Maka 10꞉11-12) \p \v 14 Mo hande Pa꞉tisi haliwekima꞉ Yesuma꞉ leekeeki opuaata꞉ ipiki kitaemekeme. Pa ekipeke ikita꞉ mani pa꞉ta꞉ta꞉ puki wotu wimikima꞉ pimikime. \v 15 Koto ekina꞉ Yesuma꞉ iki pa꞉ta꞉ alo hata꞉ alota꞉ Ikita꞉ kenke wanda꞉halina꞉ leke popelekena꞉ ota꞉ epeke tupa꞉ haleme tapakema꞉ handolo pelemepate Koda꞉ma꞉ta꞉ ika꞉ puki hone paeyaota꞉ hone ula꞉me. Do kenke wanda꞉halima꞉ Ota꞉ hau tieke ale manue laa hone witeleme ale manuta꞉ Koda꞉na꞉ leke popelekena꞉ta꞉ pa pa alee hone ula꞉me leekeme. \p \v 16 Mo Lo Pi wieke ekimanu make mo hande potopede haliwekima꞉ wape pimiki ekimanu make la꞉tia a꞉pa hande bapitaisi peao hayeke hali Dionima꞉ walo paeyaeyekeme. Koto natena꞉ kini pu mea a꞉pa ame do natena꞉ kone Koda꞉na꞉ Kilu Tombuao Hala꞉ ekina꞉ Pi Seliapota꞉ wala꞉tia pu haleketa꞉ kota꞉ mo wanda꞉hali aneke hapuma꞉ koto pa꞉ta꞉ ipuluekema꞉ honkopu wotu halememe leekeme. \p \v 17 Kutupa oli ya do kenke yaapo alupea꞉peke ekita꞉ tanda tieke ya꞉la꞉pate pa mo Lo Pi ula꞉ ekina꞉ wape pa꞉la꞉ tombo hosiki siki kone alupea꞉peke ekita꞉ ota꞉ tanda tieke pa꞉la꞉me. \p \v 18 Hali ma꞉nda꞉ epima꞉ ipika꞉ wanda꞉ kiao wanda꞉ ma꞉nda꞉ mia꞉ka꞉na꞉ta꞉ kota꞉ koto halima꞉ta꞉ tooli ka꞉taasa꞉ hau pita꞉la꞉me. Kutupa mo kiala꞉ wanda꞉ mina꞉la꞉ halima꞉ make hali ma꞉nda꞉na꞉ wanda꞉na꞉ hakopu tunku la꞉la꞉me leekeme. \s1 Hamoko hali pita꞉ La꞉satesi yaapo \p \v 19 Amba꞉ hamoko hali ma꞉nda꞉ma꞉ yenki tiekema꞉ hambeeke dau seliapo pikieki pambatiki peata꞉ nate paeyao epeke epeke nemanu na꞉tiki pu hayekeme. \v 20 Kutupa mo hamoko halina꞉ pota꞉ kake pa꞉ta꞉ mandane haliwekima꞉ta꞉ mo natehali hayeke hali homeke La꞉satesi mea pua wia꞉tiki pu haemekeme. Mo halita꞉ tete tete pambeekeme. \v 21 Ipikita꞉ hande hamoko halina꞉ ne u hayeke teipolo tokele pa꞉ta꞉ lopa꞉tiki pia꞉ka꞉na꞉ batiki pilimi ne popusunu nolueke hone u hayekeme. Kutu piekepate ipika꞉ tete manuta꞉ kika titima꞉ a꞉pa pende pende na꞉tiki pu haemekeme. \p \v 22 Kutu pea꞉tiki pu hao mo hande natehalita꞉ homeekeme. Kutupa mo hande enisolo manuma꞉ ipikita꞉ Eipoloha꞉ma꞉ yaapo lopulao pitina꞉ mea pemekeme. Kutupa mo hande hamoko hali make homeeketa꞉ ipika꞉ toko mea hoimikime. \v 23 Hande hamoko halita꞉ oni ti to hala꞉ ale pa꞉ta꞉ puaata꞉ tanda tieke minolo hata꞉ handa꞉liaeyekepate Eipoloha꞉ma꞉ La꞉satesi yaapo lopula alu pea pitipikieki papate haepekeeki handeekeme. \v 24 Koto ekina꞉ ipikana꞉ma꞉ anekema꞉ wi alo hata꞉ alota꞉ Apa꞉ Eipoloha꞉ma꞉o. I̱ pa꞉ta꞉ a꞉ta꞉ma꞉ homa꞉e. Do ti to hala꞉ ekima꞉ I̱ tanda tieke peaasa꞉ ekina꞉ La꞉satesima꞉ ipika꞉ kiki ma̱lekema꞉ ikali pa꞉ta꞉ tenke lao yaka kekeke kosa꞉ pina꞉yeke wataena꞉ tapae laa leekeme. \p \v 25 Koto leekepate Eipoloha꞉ma꞉ma꞉ alota꞉ Ya wekio. Hone niminae. Neketa꞉ hande kenkena꞉ hae natena꞉ta꞉ kota꞉ epeke alemanu wotu wia haepate La꞉satesita꞉ ota꞉ hoke alemanu homeke mia꞉me. Kutu piekepate ameta꞉ ipikita꞉ ta꞉na꞉ma꞉ homo haena꞉ta꞉ neketa꞉ tanda naleme. \v 26 Kotoeki manuta꞉ koto ya꞉la꞉pate ma꞉nda꞉ta꞉ nika꞉ haloma꞉eki tukiki pa꞉ta꞉ hombo tieke ula꞉ ekima꞉ do diki halopa꞉ nane haloma꞉ wanda꞉hali ma꞉nda꞉ta꞉ ta neke hale nane ipuluekema꞉ taapelemepate a꞉pa꞉peke na ya꞉lieke. Kutupa neke hale nane haleme wanda꞉hali ma꞉nda꞉ta꞉ doane ipuluekema꞉ taapea꞉ka꞉na꞉ta꞉ a꞉pa꞉peke na ya꞉lieke leekeme. \v 27 Koto leeke mo hamoko halima꞉ alota꞉ Apa꞉o. Kota꞉ I̱ma꞉ neke honke aloma꞉ yaka apa꞉na꞉ da nane La꞉satesi pena꞉ tapae. \v 28 Koto pa꞉ta꞉ta꞉ yaka kame tonu yunki hata꞉ halemema꞉ iki make do tanda pu hala꞉ alena꞉ a꞉paama꞉na꞉yeke La꞉satesima꞉ kinki pulu pena꞉yeke loa꞉me leekeme. \p \v 29 Koto leeke handa Eipoloha꞉ma꞉ma꞉ alota꞉ Naka꞉ kame tonuna꞉ kinki pita꞉la꞉ pi manuta꞉ Mosesima꞉ make potopede haliwekima꞉ amba꞉ lao ula꞉me. Naka꞉ kame tonuma꞉ mo haliwekina꞉ pi opina꞉e laa leekeme. \v 30 Hande hamoko halima꞉ ipika꞉ pi hombo peaaso alota꞉ A꞉pa Eipoloha꞉ma꞉o. Kotota꞉ ana꞉ dia꞉me. Pate amba꞉ homeeke hali ma꞉nda꞉ma꞉ paa tiao lolo pea꞉ka꞉na꞉ta꞉ kota꞉ mo haliwekima꞉ ika꞉ hoke hau peleme ekimanu hoki walimikie laa leekeme. \v 31 Koto leekepate Eipoloha꞉ma꞉ma꞉ alota꞉ Hande Mosesima꞉ make potopede haliwekima꞉ amba꞉ lao ula꞉ ekimanu na opimika꞉na꞉ta꞉ kota꞉ mo homa꞉la꞉ hali ma꞉nda꞉ paa tiao epea꞉ka꞉na꞉ make hone ma꞉nda꞉ la꞉ka꞉la na wilimikie leekeme. \c 17 \s1 Hoke hau pina꞉ pu tiaasa꞉ hau \r (Ma꞉tiu 18꞉6-7,21-22, Maka 9꞉42) \p \v 1 Yesuma꞉ ipika꞉ disaipolo haliweki pa꞉ta꞉ alota꞉ Wanda꞉hali hoke hau pa꞉ta꞉ pena꞉ yeke pu tiaasa꞉ haumanu opolo epolo pa꞉la꞉pate kutu piki haumanu pina꞉ pu tiaasa꞉ someta꞉ paala꞉e. Hoke yenki milieke. \v 2 Kutu pita꞉la꞉ someta꞉ ipika꞉ make pa꞉ta꞉ toopi tieke aneke mea endiao oni dawala ikali pa꞉ta꞉ lopaaso yoluta꞉ epolo pia꞉me. Ekipeke. Ipiki pa hata꞉ta꞉ do hosiki wekiwandiki sunu ma꞉nda꞉ hondo hoke hau pina꞉ pu tialieke. \v 3 Koto ekina꞉ta꞉ ika꞉ piteleme haumanu wotu handeteke hapa꞉peke leekeme. \p Naka꞉ kamema꞉ neke pa꞉ta꞉ hoke hau pia꞉ka꞉na꞉ta꞉ kota꞉ nakana꞉ma꞉ta꞉ honkopu hake mana꞉ pimanu la hala꞉peke. Kutupa ipikana꞉ma꞉ paa hande ipika꞉ pia꞉ hoke hau manuna꞉ hone la꞉ka꞉la mina꞉pa꞉laeya꞉ka꞉na꞉ta꞉ kota꞉ nakana꞉ma꞉ hone ma꞉nda꞉ na wiki paa paeyaapeke. \v 4 Ipikana꞉ma꞉ neke pa꞉ta꞉ nate homekena꞉ kone hoto watake hata꞉ hoke hau pea paa hoto watake hata꞉ kone neke pa꞉ta꞉ a꞉ta꞉e lolo epea꞉ka꞉na꞉ta꞉ kota꞉ nakana꞉ma꞉ta꞉ hone ma꞉nda꞉ na wiki ipika꞉ hoke hau paa paeyaapeke leekeme. \s1 Hone tulaasa꞉eki \p \v 5 Aposolo haliwekima꞉ mo Tekehali pa꞉ta꞉ alota꞉ Nika꞉ hone tulaaloma꞉ ekita꞉ nakana꞉ma꞉ mea daeyawae lemekeme. \v 6 Tekehalima꞉ ika꞉ pi hombo peaaso alota꞉ Ika꞉ hone tulaalemeeki a꞉nda꞉ mo (ki̱mi̱le̱ma꞉ handeke ale) masidadi kiliki sikima꞉ handena꞉ yeke ikana꞉ma꞉ daena꞉ lemeka꞉na꞉ta꞉ kota꞉ do kiliki nala꞉ ti hombeleke biki molobeti pa꞉ta꞉ alota꞉ Naka꞉ kone naka꞉ piki yokaata꞉ oni dawalana꞉ pua noka꞉pee lemeka꞉na꞉ta꞉ ika꞉ pi ota꞉ opua pilieke leekeme. \s1 E pokaasa꞉ halina꞉ pea꞉pekeeki \p \v 7 Iki ma꞉nda꞉ hondoma꞉ naka꞉ e pokaasa꞉ halima꞉ naka꞉ ena꞉ kenke lu wiaena꞉ o naka꞉ sipisipi ma꞉na꞉ handeteke haena꞉ leka꞉na꞉ta꞉ kota꞉ koto some paa la꞉ka꞉la naka꞉ da a꞉pa꞉tiki pia꞉ka꞉na꞉ta꞉ a̱i̱ ne a꞉pa nae pita꞉ lo halepe. \v 8 Dia꞉me. Kotoeki na leketa꞉ nakana꞉ma꞉ta꞉ dupa lo haleme. Yaka ne ambi wamo peaota꞉ ne pana꞉ puluekema꞉ yamo hala꞉ aka꞉ mea pambaota꞉ yaka ne ikali nono yu wia pitaata꞉ wetepena꞉ta꞉ naka꞉ ne nelipikie lo haleme leekeme. \v 9 Mo e pokaasa꞉ halima꞉ ipika꞉ aneke halima꞉ pea꞉peke la꞉la꞉eki opua paeyao pia꞉ka꞉na꞉ta꞉ kota꞉ ipika꞉ aneke halima꞉ ta꞉na꞉ma꞉ homolo keiyae lena꞉ yu wia hapeke ya꞉la꞉pe. Dia꞉me. \v 10 Koto ekina꞉ta꞉ iki make koto tupa꞉ konee. Iki pa꞉ta꞉ pea꞉pa꞉peke lelimi ekimanu a꞉nda꞉ pu paeyaemeka꞉na꞉ta꞉ kota꞉ ikana꞉ma꞉ do tupa꞉ lapa꞉peke. Nikita꞉ epeke e pokaasoma꞉ wanda꞉hali dia꞉me. Nikita꞉ nika꞉ pea꞉pa꞉peke la꞉la꞉ haumanu homeke pu paeyaaloma꞉me lapeke ya꞉la꞉me leekeme. \s1 Yesuma꞉ kiki yaapo halina꞉ kindi yeni mea epeaeyekeeki \p \v 11 Yesuta꞉ Diutuseleme da nane poluekema꞉ yeke Ka꞉lili make Sametia kenke yaapo tombona꞉ peekeme. \v 12 Ipikita꞉ da ma꞉nda꞉ pa꞉ta꞉ polueke alo pulu haena꞉ kiki yaapo haliwekita꞉ ika꞉ lokena꞉ kindi yeni hayeke haliwekima꞉ Yesu a꞉pa manda꞉hande pimikime. Ikita꞉ hosiki siki papate hata꞉ \v 13 Yesu wi la do lemekeme. Yesu Aneke Halio. Nakana꞉ma꞉ niki a꞉ta꞉ma꞉ homa꞉e lemekeme. \p \v 14 Yesuma꞉ iki handa alota꞉ mo yeni peao hala꞉ haliwekima꞉ iki handena꞉ pupe leekeme. Kutupa mo haliwekita꞉ mo pota꞉na꞉ pulu haena꞉ kone mea epeaeyekeme. \v 15 Koto haliweki tukiki pa꞉ta꞉ hali homeke ma꞉nda꞉ma꞉ta꞉ ipiki mea epeaeyekeeki hando haota꞉ paa la꞉ka꞉la ipulu hata꞉ Koda꞉na꞉ bikita꞉ anekema꞉ mea a꞉meiyatia \v 16 a꞉pa Yesuna꞉ leke popelekena꞉ puki yama peliolo hata꞉ ta꞉na꞉e pi leekeme. Kutu pieke halita꞉ Sametia hali yeekeme. \p \v 17 Kotoeki handaata꞉ Yesuma꞉ dupa leekeme. I̱ma꞉ mea epeaowa꞉ haliwekita꞉ kiki yaapo mea epeaowa꞉me. Mo mandane kiki paeya mandane kikina꞉ tonkopu haliwekita꞉ ekipeke na la꞉ka꞉la a꞉pa pelemepe. \v 18 Pa ekipeke do da yu ma꞉nda꞉ hali ipiki homeke la꞉ka꞉la a꞉pa Koda꞉ pa꞉ta꞉ ta꞉na꞉e lolo epeekepe \v 19 laata꞉ Yesuma꞉ mo hali pa꞉ta꞉ alota꞉ Naka꞉ hone tulale ekima꞉ neke mea epeaala꞉me. Tiao pue leekeme. \s1 Koda꞉na꞉ Kilu Tombuao Hala꞉eki epolo pa꞉la꞉eki \r (Ma꞉tiu 24꞉23-28,37-41) \p \v 20 Mandane Pa꞉tisi haliwekima꞉ Yesu pa꞉ta꞉ lota꞉ pitolo alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ handima꞉pe lemekeme. Yesuma꞉ alota꞉ Koda꞉na꞉ Kilu Tombuao Hala꞉eki epolo pa꞉la꞉ ekita꞉ wanda꞉halima꞉ handolo pa꞉la꞉ tupa꞉ na ipilieke leekeme. \v 21 Ma꞉nda꞉ma꞉ alota꞉ Do pa꞉ta꞉ do handa꞉e o Mokoto pa꞉ta꞉ mokoto handa꞉e pi na lelieke. Pa ekipeke. Koda꞉na꞉ Kilu Tombuao Hala꞉ ekita꞉ iki ame̱le̱ haleke loa꞉me leekeme. \p \v 22 Kutupa Yesuma꞉ ipika꞉ disaipolo haliweki pa꞉ta꞉ alota꞉ Ikana꞉ma꞉ mo Wanda꞉halina꞉ Eiyekena꞉ nate homeke a꞉nda꞉ handuluekema꞉ hone wopu ulu pelemepate ota꞉ na handilimikie. \v 23 Mandane tapakema꞉ iki pa꞉ta꞉ dupa lelimikie. Mo nane handa꞉pe o Doane handa꞉pe laa lolo pelemepate na weiya꞉ mea pua꞉pa꞉peke. Pa ekipeke. \v 24 Wanda꞉halina꞉ Eiyekena꞉ epolo pa꞉la꞉ ekita꞉ mo ti tekele pitolo hata꞉ mo ya honiki honiki paeyaona꞉ pa̱a̱ peao hala꞉ tupa꞉ kone pilieke. \v 25 Kutu pulu pa꞉la꞉pate titina꞉ta꞉ ipikana꞉ma꞉ tanda aneke hapu milieke. Kutupa ame do haleme wanda꞉halima꞉ make ipiki kialimikie. \p \v 26 Hande Noa hayeke natena꞉ pu haemeke tupa꞉ mo Wanda꞉halina꞉ Eiyeke ipika꞉ nate manuna꞉ make mandake haumanu pilimikie. \v 27 Wanda꞉halima꞉ ika꞉ ne ikali na꞉tiki wanda꞉ mea꞉tiki halina꞉ da pua꞉tiki putia a꞉pa Noa kawaso pa꞉ta꞉ honda꞉ pambeeke nate opolo epeekeme. Kutu piki haumanu pu haemekepate koto tomona꞉ kone ikali talo hata꞉ iki paeyao lu homaeyekeme. \v 28 Koto mandake tupa꞉ kone hande Loda ipika꞉ hayeke natena꞉ pieke tupa꞉ kone pilimikie. Koto dina꞉ta꞉ wanda꞉hali paeyaoma꞉ta꞉ ne ikali nalo anemone ale hambolo tapaaso pitolo wae alemanu pokolo hata꞉ damanu a꞉eya꞉tiki pu haemekeme. \v 29 Kutu pimikipate Lodama꞉ mo Sodomo da mina꞉pa꞉layeke natena꞉ta꞉ ti uleke make talo talo hake lanka꞉ ma꞉nda꞉ biki solopa oli ya pa꞉ta꞉ yama꞉ lopa꞉niaeyeke ekima꞉ wanda꞉hali paeyaosiki lu homaeyekeme. \v 30 Mo Wanda꞉halina꞉ Eiyeke peneme yao walia꞉ natena꞉ta꞉ homeke tupa꞉ kone ipilieke. \p \v 31 Koto natena꞉ta꞉ da holuna꞉ pitilia꞉ halima꞉ta꞉ ipika꞉ da pa꞉ta꞉ ula꞉ ala꞉ta꞉ ala꞉ta꞉ muluekema꞉ pua꞉peke na yelieke. Mandake tupa꞉ kone hali ma꞉nda꞉ epi ena꞉ haya꞉ka꞉na꞉ta꞉ ipiki pa la꞉ka꞉la da pua꞉peke na yelieke. \v 32 Lodana꞉ weteke niminaapa꞉peke. \v 33 Hali ma꞉nda꞉ epima꞉ ipika꞉ da꞉ta꞉la꞉eki miniki hao haluekema꞉ hone wia꞉ka꞉na꞉ta꞉ kota꞉ ipika꞉ da꞉ta꞉la꞉eki kone alu palieke. Kutu pilia꞉pate ma꞉nda꞉ epima꞉ ipika꞉ da꞉ta꞉la꞉eki alu paena꞉ lea꞉ka꞉na꞉ta꞉ ipika꞉ deto hala꞉ ekita꞉ paa wia halieke. \p \v 34 I̱ma꞉ iki pa꞉ta꞉ la kitolome. Koto timbaata꞉ hali yaapo pelipipate homeke hali minolota꞉ ma꞉nda꞉ta꞉ pa peli pelia halieke. \v 35-36 Wanda꞉ yaapota꞉ palaowa yumbuolo pitina꞉ homeke wanda꞉ hondo minolota꞉ ma꞉nda꞉ta꞉ mina꞉pa꞉lalieke leekeme. \v 37 Mo disaipolo haliwekima꞉ Yesu lota꞉ pitolo hata꞉ alota꞉ Tekehalio. Koto ale ekita꞉ hando pa꞉ta꞉ pilia꞉pe lemekeme. Yesuma꞉ ika꞉ pi hombo peaaso alota꞉ Ma꞉nda꞉ hando pa꞉ta꞉ ma꞉na꞉ hoteke lupa ula꞉ ale nina꞉ta꞉ kota꞉ wapukini mombolo hala꞉me leekeme. \c 18 \s1 Kosa꞉piki wanda꞉ma꞉ honke la꞉tiki piekeeki \p \v 1 Kutupa Yesuma꞉ta꞉ ipika꞉ disaipolo haliwekima꞉ kima꞉ na homeke hoto paeyao yeni pea꞉tiki pina꞉yeke onkoluma꞉ laa dupa leekeme. \v 2 Da ma꞉nda꞉ pa꞉ta꞉ta꞉ pi yokaalu pita꞉la꞉ ekina꞉ handeteke hala꞉ hali ma꞉nda꞉ hayekeme. Ipikita꞉ Koda꞉ pa꞉ta꞉ paala꞉ma꞉ na homeke make wanda꞉hali pa꞉ta꞉ make hone wotu na wiekeme. \v 3 Kutupa koto da pa꞉ta꞉ hayeke kineke wanda꞉ homekema꞉ mo hande hali pa꞉ta꞉ pua꞉tiki pitolo hata꞉ alota꞉ Ma꞉nda꞉ma꞉ I̱ ka꞉nda꞉ma꞉ homaasa꞉ma꞉ I̱ tamba꞉ mie la꞉tiki piekeme. \v 4 Koto ekina꞉ mo pi yokaalu peao hayeke halima꞉ titina꞉ amba꞉la mo wanda꞉na꞉ pota꞉ epeaapeketa꞉ kiatiki piekepate pa hosiki hao hao pea ipika꞉ honema꞉ kone alota꞉ Koda꞉ pa꞉ta꞉ make paala꞉ma꞉ na homolopate wanda꞉hali pa꞉ta꞉ make hone na witolopate \v 5 pa do hande kineke wanda꞉ma꞉ I̱ ka꞉nda꞉ma꞉ homaasa꞉ ekina꞉ ipika꞉ pota꞉ epeaalueke. Kotoeki na pua꞉ka꞉na꞉ta꞉ ipikita꞉ hoto paeyao a꞉pa꞉tiki pitolo hata꞉ I̱ soka꞉la꞉ma꞉ homaapa꞉na꞉ hone wiekeme leekeme. \p \v 6 Kutupa Tekehalima꞉ paa pi alo alota꞉ Hande hoke pi yokaalu peayeke halima꞉ leeke ekita꞉ hone wia꞉pa꞉peke. \v 7 Kota꞉ Koda꞉na꞉ wanda꞉halima꞉ iki tamba꞉ mina꞉ alo timba natena꞉ wi alo honke la꞉tiki pu haleme wanda꞉halina꞉ pota꞉ta꞉ Koda꞉ma꞉ tikitiki na yaalia꞉pe. Tamba꞉ muluekema꞉ kese kese pilia꞉pe. Dia꞉me. \v 8 I̱ma꞉ iki pa꞉ta꞉ ota꞉ pi alome. Ipikana꞉ma꞉ koto kone ika꞉ pota꞉ epeaalieke. Kutu pilia꞉pate Wanda꞉halina꞉ Eiyeketa꞉ paa la꞉ka꞉la ipilia꞉ dina꞉ta꞉ do kenke wanda꞉hali paeyao pa꞉ta꞉ta꞉ paa hone tulaleme tapaketa꞉ handilia꞉pe o na handilia꞉pe laa leekeme. \s1 Koda꞉ pa꞉ta꞉ yeni pipiki hali yaapona꞉ onkoluma꞉ pi \p \v 9 I̱ta꞉ epeke hali seliapo ya꞉la꞉pate iki paeyaota꞉ hoke wanda꞉halie hone u haleme tapake pa꞉ta꞉ta꞉ Yesuma꞉ onkoluma꞉ pi ma꞉nda꞉ dupa leekeme. \v 10 Amba꞉ a꞉nda꞉ hali yaapo oli tembolo da pa꞉ta꞉ yeni pulupeke alo pepekeme. Mo hali ma꞉nda꞉ta꞉ Pa꞉tisi halie. Ma꞉nda꞉ta꞉ dakisi mu hayeke hali yeekeme. \v 11 Mo Pa꞉tisi halita꞉ wanda꞉hali na hayeke pa꞉ta꞉ leke yola꞉ moneao hata꞉ yeni dupa piekeme. Koda꞉ neke pa꞉ta꞉ I̱ma꞉ keiyae alome. I̱ta꞉ mandane wanda꞉halima꞉ piteleme tupa꞉ pasa꞉tei na pu o yayapiki pi na lo o suseke na hao halome. I̱ta꞉ mo koto dakisi mu hala꞉ hali tupa꞉ dia꞉me. \v 12 I̱ta꞉ pula homeke homeke tukiki pa꞉ta꞉ hoto yaapoma꞉ nee pi wiaata꞉ kutupa I̱ma꞉ yaka mu halo ala꞉ta꞉manu paeyao putupa kiki yaapona꞉ homeketa꞉ neke ku halome. \p \v 13 Koto leekepate mo dakisi mu hayeke halima꞉ta꞉ ipika꞉ siki mo pate leke hata꞉ta꞉ oli ya nane kone na handa꞉liake panda꞉ puniao hata꞉ ipika꞉ hakokona꞉ litolo hata꞉ alota꞉ Koda꞉o. I̱ta꞉ hoke hau polo somema꞉ I̱ a꞉ta꞉ma꞉ homa꞉e leekeme. \v 14 Yesuma꞉ alota꞉ I̱ma꞉ iki pa꞉ta꞉ dupa la kitolome. Mo hande Pa꞉tisi halita꞉ da la꞉ka꞉la peeketa꞉ Koda꞉ yaapo halepe ekita꞉ tikitiki na pa꞉la꞉pate pa mo dakisi mu hala꞉ halita꞉ tikitiki pa꞉la꞉me. Pa ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mina꞉nialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme. \s1 Wekiwandiki sunu wamo puma꞉ puma꞉ piekeeki \r (Ma꞉tiu 19꞉13-15, Maka 10꞉13-16) \p \v 15 Mandane wanda꞉halima꞉ ika꞉ hosiki wekiwandiki sunu Yesuna꞉ kikima꞉ wataena꞉ yeke hatuku epemekeme. Kutu pimikieki handolo hata꞉ ipika꞉ disaipolo haliwekima꞉ mo wanda꞉hali hando lemekeme. \v 16 Koto lemekepate Yesuma꞉ mo wekiwandiki wi la꞉ mea alota꞉ Mo wekiwandiki sunuma꞉ I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke. Do wekiwandikima꞉ handeke wanda꞉halita꞉ mo Koda꞉na꞉ Kilu Tombuao Hala꞉ ekita꞉ ika꞉ ekie. \v 17 Doeki hone wopu u hapa꞉peke. Wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme. \s1 Hamoko hali \r (Ma꞉tiu 19꞉16-30, Maka 10꞉17-31) \p \v 18 Mo Diu wanda꞉halina꞉ you hali homekema꞉ Yesu pa꞉ta꞉ lota꞉ pitolo hata꞉ alota꞉ Epeke Disao. I̱ma꞉ deto hala꞉eki muluekema꞉ta꞉ eki hau peonope laa lota꞉ piekeme. \v 19 Yesuma꞉ ipika꞉ pi hombo peaaso alota꞉ I̱ta꞉ epeke halie pita꞉ ekipeke alo alepe. Ma꞉nda꞉ hali a꞉nda꞉ epeke tupa꞉ na hala꞉pate Koda꞉ homeke epeke tupa꞉ hala꞉me. \v 20 Hande Lo Pi Ula꞉eki paeyao hone wilime. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke. Naka꞉ ama꞉ apa꞉ yaapona꞉ pi opua꞉peke la꞉la꞉eki hone wilime leekeme. \p \v 21 Mo halima꞉ Yesuna꞉ pi hombo peaaso alota꞉ I̱ hosiki weki siki hatia a꞉paata꞉ koto ale pi ula꞉eki paeyaota꞉ homeke a꞉nda꞉ na tunkuliki opua telia pu halome leekeme. \v 22 Yesuma꞉ do pi opuaata꞉ mo hali pa꞉ta꞉ alota꞉ Nakana꞉ma꞉ pulu pele hau ma꞉nda꞉ pa ula꞉me. Naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laa mo milipi manita꞉ mandane natehali wanda꞉hali pa꞉ta꞉ hale hale pea꞉peke. Kutu pikina꞉ta꞉ nakana꞉ma꞉ oli hepeni da tukiki pa꞉ta꞉ta꞉ mo epeke epeke ale wopu mu halipikie. Koto ekina꞉ta꞉ yaka hoki nane telia꞉peke leekeme. \v 23 Hande halima꞉ koto leekeeki opitolota꞉ ipika꞉ pukima꞉ ka꞉nda꞉ma꞉ homeekeme. Pa ekipeke ipikita꞉ hamoko tieke hayeke ekima꞉ piekeme. \p \v 24 Yesuma꞉ mo halina꞉ puki ka꞉nda꞉ma꞉ homeekeeki handa alota꞉ Mo hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ honda꞉ pamba꞉peketa꞉ tanda wopu pa꞉la꞉me. \v 25 Mo kemolo ma꞉na꞉ma꞉ mo no̱i̱ ka꞉ka꞉na꞉ pa꞉ta꞉ ana꞉na꞉ honda꞉ pamba yopua꞉peke ekina꞉ ka꞉nda꞉ta꞉ pa mo hamoko halima꞉ Koda꞉na꞉ Kilu Tombuao Hala꞉eki tukiki pa꞉ta꞉ pua꞉peke ekina꞉ mia꞉peke ka꞉nda꞉ tupa꞉ na milieke alome leekeme. \v 26 Mo wanda꞉halima꞉ Yesuma꞉ do leekeeki opuaata꞉ ipiki pa꞉ta꞉ lota꞉ pitolo alota꞉ Koto pa꞉la꞉ ekina꞉ta꞉ kota꞉ epima꞉ ota꞉ Koda꞉na꞉ pa꞉ta꞉la꞉la꞉eki handa꞉peke ya꞉la꞉pe lemekeme. \v 27 Yesuma꞉ hombo peaaso alota꞉ Wanda꞉halima꞉ pea꞉peke na ya꞉la꞉ ekita꞉ Koda꞉ma꞉ ana꞉ pa꞉la꞉me leekeme. \p \v 28 Kutupa Pidama꞉ta꞉ dupa leekeme. Handa꞉e. Nikana꞉ma꞉ta꞉ nika꞉ damanu make kiao neke telia꞉ mea epoma꞉me leekeme. \v 29 Yesuma꞉ iki pa꞉ta꞉ alota꞉ Ota꞉e. I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ Koda꞉na꞉ Kilu Tombuao Hala꞉ ekina꞉ hone witolo ipika꞉ wanda꞉ o da o hameke titi o apa꞉ ama꞉ o wekiwandiki ma꞉nda꞉ hondo mina꞉pa꞉lao epea꞉ka꞉na꞉ta꞉ \v 30 kota꞉ ame do kenkena꞉ haena꞉ kone ala꞉ta꞉ ala꞉ta꞉ paeyao haka꞉ta꞉pao meaata꞉ wetepena꞉ ipilia꞉ natena꞉ta꞉ deto hala꞉ ekita꞉ milieke leekeme. \s1 Yesuma꞉ ipika꞉ homa paa tiaapeke ekina꞉ tana꞉ tepo la haleekeeki \r (Ma꞉tiu 20꞉17-19, Maka 10꞉32-34) \p \v 31 Yesuma꞉ ipika꞉ disaipolo haliweki talo pu mea mo pateleke pulu hata꞉ alota꞉ Opua꞉pe. Nikita꞉ Diutuseleme da teke pa꞉ta꞉ puluma꞉me. Koto pa꞉ta꞉ta꞉ hande potopede haliwekima꞉ Wanda꞉halina꞉ Eiyeke pa꞉ta꞉ pulu pa꞉la꞉ ekimanu lao wilimi ekita꞉ peneme yaalimikie. \v 32 Ipikita꞉ Diendaili haliweki pa꞉ta꞉ mea halimikie. Koto haliwekima꞉ta꞉ ipiki kitao laa manda꞉ manda꞉ meaota꞉ ipika꞉ lokena꞉ dopi taalimikie. \v 33 Ipiki yombua baota꞉ homena꞉ lilimikie. Kutu pilimipate ipikita꞉ wiaata꞉ nate tepona꞉ paa tiao da꞉ta halieke leekeme. \p \v 34 Koto leekepate mo disaipolo haliwekima꞉ta꞉ mo pina꞉ teketa꞉ ota꞉ homeke siki make na handa꞉ wimikime. Ekipeke koto leeke pi manuna꞉ teke paeyaota꞉ a꞉mbao wiekeeki yaalo ota꞉ na handa꞉ wimikime. \s1 Leke holu pea honke lo hayeke hali \r (Ma꞉tiu 20꞉29-34, Maka 10꞉46-52) \p \v 35 Yesuta꞉ mo Dietiko da pa꞉ta꞉ poluekema꞉ yeke pulu haena꞉ta꞉ pota꞉na꞉ pitieke leke holu piki halima꞉ ala꞉ta꞉ ala꞉ta꞉ honke alo pitiekeme. \v 36 Ipikita꞉ pitu hata꞉ mo wanda꞉hali tieke yopulu leekeeki opuaata꞉ lota꞉ pitolo alota꞉ Dota꞉ aleke ya꞉ka꞉ta꞉pe leekeme. \v 37 Mo wanda꞉halima꞉ alota꞉ Na꞉sa꞉tete hali Yesu yopu ala꞉me lemekeme. \v 38 Koto lemeke mo halima꞉ anekema꞉ e̱ wi alo hata꞉ alota꞉ Yesuo. Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme. \v 39 Mo titina꞉ yapemeke wanda꞉halima꞉ta꞉ Pi na lapema laa sa꞉sa꞉ pimikipate mo halima꞉ ota꞉ wi aneke hapu paa alo alota꞉ Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme. \p \v 40 Koto leeke Yesuma꞉ pua yola꞉ mea hata꞉ mo hali ipiki teke pa꞉ta꞉ hatuku mea ipupee leekeme. Mo hande hali teke pa꞉ta꞉ epeeke handa Yesuma꞉ lota꞉ pitolo alota꞉ \v 41 I̱ma꞉ neke pa꞉ta꞉ eki peaano hone pa꞉la꞉pe leeke handaa mo halima꞉ alota꞉ Tekehalio. Yaka hone pa꞉la꞉ ekita꞉ ota꞉ paa handuluekema꞉ loa꞉me leekeme. \v 42 Yesuma꞉ mo hali pa꞉ta꞉ alota꞉ A꞉pa꞉la꞉me. Handa꞉e. Naka꞉ hone tulale ekima꞉ neke epeaala꞉me. \v 43 Koto kone mo halima꞉ ana꞉na꞉ handa꞉peke yeekeme. Koto ekina꞉ta꞉ ipikana꞉ma꞉ Yesu telia꞉ mea pulu hata꞉ Koda꞉ pa꞉ta꞉ keiyae la꞉tia peekeme. Mo hande wanda꞉halima꞉ doeki hando haota꞉ paeyaoma꞉ Koda꞉na꞉ biki tieke laemekeme. \c 19 \s1 Yesu pita꞉ Sa꞉kiasi yaapo \p \v 1 Yesuta꞉ mo Dietiko daoni monema꞉ tilao polueke alo oni daoni pa꞉ta꞉ honda꞉ pambeekeme. \v 2 Koto pa꞉ta꞉ta꞉ dakisi mu hayeke hamoko hali ma꞉nda꞉ Sa꞉kiasi hayekeme. \v 3 Ipikita꞉ mo Yesu lo haemeke hali handulueke alo epeekepate doka꞉tiki yeke ekima꞉ wanda꞉hali tieke momba꞉la haemekeeki yaalo hata꞉ Yesu handa꞉peke ana꞉ na piekeme. \v 4 Koto ekina꞉ ipiki amba꞉la pototo laa pua nose ti ma꞉nda꞉ a꞉meiya pita꞉ Yesu kotoeki mea wendiao yapilia꞉ alena꞉ handulueke hone wiekeme. \v 5 Yesu koto alena꞉ opolo a꞉pa oli ti nane handa꞉liaaso Sa꞉kiasi pa꞉ta꞉ alota꞉ Neke ota꞉ a̱i̱ hola꞉pa꞉e. Pa ekipeke. I̱ta꞉ ameta꞉ naka꞉ da pa꞉ta꞉ a꞉pa꞉peke ya꞉leke loa꞉me. \p \v 6 Sa꞉kiasi koto kone hola꞉pa꞉niaota꞉ Yesu pa꞉ta꞉ ta꞉na꞉ma꞉ homolo hata꞉ handa꞉ miekeme. \v 7 Wanda꞉hali paeyaoma꞉ Kutu piekeeki hando haota꞉ hambilikima꞉ hambilikima꞉ pitolo alota꞉ Do halita꞉ mo hande hoke hau pa꞉la꞉ halina꞉ da pa꞉ta꞉ kimisu pula꞉me lemekeme. \v 8 Kutu pimikipate Sa꞉kiasi tiao hata꞉ Tekehali pa꞉ta꞉ alota꞉ Tekehalio. Opie. I̱ma꞉ yaka ala꞉ta꞉ ala꞉ta꞉ tukikina꞉ telipa mandane ekita꞉ mo natehali wanda꞉hali pa꞉ta꞉ halueke. Kutupa I̱ma꞉ wanda꞉hali a꞉nda꞉ makeao pake a꞉nda꞉ noa꞉ka꞉na꞉ta꞉ kota꞉ I̱ma꞉ta꞉ hoto tonkopuna꞉ paka꞉lao paa hala꞉tiki pulueke leekeme. \p \v 9 Yesuma꞉ mo hali pa꞉ta꞉ alota꞉ Da꞉ta꞉la꞉ ekita꞉ ame do da pa꞉ta꞉ a꞉pa꞉la꞉me. Pa ekipeke do halita꞉ Eipoloha꞉ma꞉na꞉ mondu tanka꞉la꞉ peala꞉ tapake hali yeke loa꞉me. \v 10 Wanda꞉halina꞉ Eiyeketa꞉ mo alu pa꞉la꞉ wanda꞉hali handa꞉ wia peteluekema꞉ yeke a꞉pa꞉la꞉me leekeme. \s1 Manima꞉ e pokolo hata꞉ haka꞉ta꞉pao mina꞉la꞉eki \r (Ma꞉tiu 25꞉14-30) \p \v 11 Wanda꞉halima꞉ pi opitolo haena꞉ Yesuma꞉ iki pa꞉ta꞉ onkoluma꞉ pi ma꞉nda꞉ la haleekeme. Koto wanda꞉halima꞉ Yesuta꞉ Diutuseleme nane teke pa꞉ta꞉ polukuma꞉ peeke handaa ikana꞉ma꞉ ekima꞉ Koda꞉na꞉ Kilu Tombuao Hala꞉ ekita꞉ koto kone ipula꞉me hone wimikime. \v 12 Koto ekina꞉ Yesuma꞉ alota꞉ Hali tieke ma꞉nda꞉ta꞉ kenke ma꞉nda꞉ nane pua ipikita꞉ ika꞉ kini hali pituluekema꞉ peekepate kone paa la꞉ka꞉la ipuluekema꞉ peekeme. \v 13 Poluekema꞉ hata꞉ ipikana꞉ma꞉ ipika꞉ e pokao haemeke kiki yaapo haliweki wi la꞉ meaata꞉ iki paeyao pa꞉ta꞉ 20 kina hale hale pea iki pa꞉ta꞉ alota꞉ I̱ polua꞉ hoki nane do kitolo manima꞉ bisinisi pea ikana꞉ma꞉ ekipa haka꞉ta꞉pao milimio laa e poka꞉pa꞉peke leekeme. \p \v 14 Koto laa peekepate mo hande halina꞉ da haliwekima꞉ ipiki honditi pitolo hata꞉ ipika꞉ peeke hoki nane mandane haliwekima꞉ pua lena꞉ tapaaso alota꞉ Do halita꞉ nika꞉ kini hali pitaapeketa꞉ nikita꞉ ki pa꞉la꞉me laa lolo pena꞉ tapaemekeme. \p \v 15 Kutu pimikipate hande halita꞉ kini hali ana꞉na꞉ pitata꞉ paa ipika꞉ da nane la꞉ka꞉la epeekeme. Koto kone ipika꞉ e pokao haena꞉ mani halaa peeke haliweki wi la꞉ mipi peaata꞉ ika꞉ haka꞉ta꞉pao mimiki ekita꞉ ekipupe laa handuluekema꞉ piekeme. \p \v 16 Titina꞉ halima꞉ a꞉pa alota꞉ Tekehalio. Hande 20 kina ki manima꞉ta꞉ pa mandane 200 kinamanu make haka꞉ta꞉pao mealome laa leekeme. \v 17 Hande kinima꞉ alota꞉ Epeke tupa꞉ peleme. Neketa꞉ e epeke tupa꞉ pokale halie. Nakana꞉ma꞉ hosiki e kone epeke tupa꞉ handeteke haeke handa loa꞉ma꞉ ameta꞉ teke damanu kiki yaapo handeteke halena꞉yeke kitolome leekeme. \p \v 18 Kutupa ipika꞉ hoki nane epeeke halima꞉ a꞉pa alota꞉ Tekehalio. Hande 20 kina ki manima꞉ pa mandane 100 kinamanu make haka꞉ta꞉pao mealome laa leekeme. \v 19 Hande kinima꞉ koto some pa꞉ta꞉ alota꞉ Nakana꞉ma꞉ teke damanu kiki homeke handeteke halena꞉yeke kitolome leekeme. \p \v 20 Kutupa koto hoki nane e pokao hayeke hali ma꞉nda꞉ a꞉pa alota꞉ Tekehalio. Hande naka꞉ 20 kina doe. I̱ma꞉ta꞉ dau siki pa꞉ta꞉ panka꞉ ua꞉me. \v 21 Neketa꞉ taka꞉lake hali hale ekina꞉ I̱ma꞉ paala꞉ma꞉ homoa꞉me. Pa ekipeke. Nakana꞉ma꞉ na nokopekeeki kone mondu no hale make na tandelekeeki kone tulu no haleme leekeme. \p \v 22 Hande kinima꞉ mo halina꞉ pi hombo peaaso alota꞉ Neketa꞉ hoke e pokao hale halie. Naka꞉ ale pima꞉ kone naka꞉ hoke hau peleeki peneme yaalueke. Naka꞉ honema꞉ta꞉ I̱ta꞉ taka꞉lake hali haloma꞉ hone ta wika꞉ta꞉me. I̱ma꞉ na nokopekeeki no halo make na tandelekeeki tulu no halome hone witele yekea. \v 23 Kota꞉ a꞉pa꞉la꞉me. Yaka manita꞉ ba꞉nka꞉ pa꞉ta꞉ wia wetepena꞉ haka꞉ta꞉pao muluekema꞉ ekipeke na wiaepe. Kutu pika꞉na꞉ yoluta꞉ wetepena꞉ I̱ ipulua꞉ dina꞉ta꞉ I̱ma꞉ta꞉ handeeki make haka꞉ta꞉pao wilieeki apa꞉tao mulu pua꞉me leekeme. \v 24 Kotoeki laa ipikana꞉ma꞉ koto pa꞉ta꞉ haemeke haliweki pa꞉ta꞉ alota꞉ Do halina꞉ 20 kina meaata꞉ hande 200 kina wia hala꞉ e pokaasa꞉ hali pa꞉ta꞉ hala꞉pe laa leekeme. \p \v 25 Mo haliwekima꞉ ipiki pa꞉ta꞉ alota꞉ Tekehalio. Pa ekipeke. Mo halita꞉ 200 kina amba꞉ wia hala꞉me lemekeme. \v 26 Mo kini halima꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Amba꞉ wia hala꞉ halima꞉ta꞉ mandaneeki make haka꞉ta꞉pao milieke. Koto pa꞉la꞉pate na wia hala꞉ halima꞉ta꞉ ipika꞉ wia hala꞉eki siki kone yoka꞉ milieke. \v 27 Kutupa ameta꞉ hande I̱ta꞉ ika꞉ kini hamena꞉ kiaemeke a꞉nda꞉ tunkuliki haliweki ikita꞉ hatuku a꞉pa yaka leke popelekena꞉ hata꞉ lia꞉pa꞉peke laa leekeme leekeme. \s1 Kini hali tupa꞉ Diutuseleme daoni pa꞉ta꞉ opolo peekeeki \r (Ma꞉tiu 21꞉1-11, Maka 11꞉1-11, Dioni 12꞉12-19) \p \v 28 Yesuma꞉ koto pimanu laata꞉ ipiki amba꞉la titina꞉ mo wanda꞉hali mea wetepe yao mo Diutuseleme da teke pa꞉ta꞉ peekeme. \v 29-30 Kutupa ipikita꞉ oli Olipi peiyene tea꞉na꞉ hayeke Betepeisi make Bedani da yaapo pa꞉ta꞉ opolo a꞉paata꞉ ipika꞉ disaipolo hali yaapo amba꞉la tapaaluekema꞉ hata꞉ta꞉ dupa leekeme. Oni hala꞉ da nane opolo pua꞉pa꞉peke. Koto pa꞉ta꞉ opolo pepeka꞉na꞉ta꞉ donki ikiki hali ma꞉na꞉ endi bala꞉eki handilipipikie. Mo donkita꞉ ota꞉ homeke a꞉nda꞉ na pita pomu halemeekie. Hola꞉ tapao mea a꞉pa꞉peke. \v 31 Kutu pipikina꞉ ma꞉nda꞉ma꞉ ipiliki lota꞉ pia꞉ka꞉na꞉ta꞉ kota꞉ ipilikana꞉ma꞉ alota꞉ Tekehalima꞉ muluekema꞉ hone pa꞉la꞉me lapa꞉peke leekeme. \p \v 32 Kutupa mo hande hali yaapo pua Yesuma꞉ leeke tupa꞉ kone ota꞉ pua handepepekeme. \v 33 Mo hande donki ikiki hali ma꞉na꞉siki hololo haena꞉ta꞉ mo teke haliwekima꞉ alota꞉ Ekipeke hola꞉ mina꞉lepepe lemeke handaa mo hali yaapoma꞉ hombo peaaso alota꞉ \v 34 Tekehalima꞉ muluekema꞉ hone pa꞉la꞉me lepekeme. \v 35 Kutupa mo hande hali yaapoma꞉ mo donki ikiki hali ma꞉na꞉ta꞉ Yesu pa꞉ta꞉ mea pepekeme. Kutupa mo disaipolo haliwekima꞉ ika꞉ daumanu mo donkina꞉ hoki manda wiata꞉ Yesu pitulu a꞉meina꞉ tamba꞉ mimikime. \p \v 36 Yesuma꞉ mo ma꞉na꞉ hokina꞉ pita ipulu haena꞉ta꞉ wanda꞉halima꞉ ika꞉ daumanu lepolona꞉ peolao yamoma꞉ yamoma꞉ pimikime. \v 37 Kutupa ipiki mo Diutuseleme teke pa꞉ta꞉ opolo poluekema꞉ yeke mo Olipi pote tea꞉ nane u niayeke pota꞉na꞉ hola꞉pa pulu haena꞉ mo ipika꞉ hoki nane telimea pemeke wanda꞉hali aneke hapuma꞉ kini pea Koda꞉ pa꞉ta꞉ Keiyae laata꞉ ipika꞉ biki anekema꞉ mea mina꞉liaemekeme. Pa ekipeke Yesuma꞉ hau tieke tieke ma꞉nda꞉ ma꞉nda꞉ pieke ekimanu ota꞉ aneke hapu handemekeme. \p \v 38 Mo wanda꞉halima꞉ la꞉tia pulu alota꞉ Mo Tekehalina꞉ bikina꞉ ipula꞉ kini halita꞉ Koda꞉ma꞉ epeaena꞉e. Hepeni nane haleme tapakema꞉ a꞉nda꞉ peliaaso hata꞉ Koda꞉na꞉ biki tieke miniliaena꞉e la꞉tia pemekeme. \v 39 Koto lemeke handaa koto wanda꞉hali anka꞉lopuna꞉ haemeke Pa꞉tisi haliwekima꞉ Yesu pa꞉ta꞉ alota꞉ Disao. Naka꞉ disaipolo haliweki pa꞉ta꞉ Kutupiki pi na lapepe laa lae lemekeme. \v 40 Yesuma꞉ ika꞉ pi hombo peaaso hata꞉ alota꞉ I̱ma꞉ iki pa꞉ta꞉ Pi na lapa꞉pee loa꞉ka꞉na꞉ta꞉ kota꞉ do toopimanu ika꞉ kone e̱ alo hata꞉ poya꞉ tieke lelimikie leekeme. \s1 Yesuma꞉ Diutuseleme daonina꞉ e̱ leekeeki \p \v 41 Yesu mo Diutuseleme da teke pa꞉ta꞉ opolo a꞉pa mo da handolo hata꞉ta꞉ e̱ alo alota꞉ \v 42 Nakana꞉ma꞉ ame a꞉nda꞉ peliaasa꞉eki muluekema꞉ pea꞉pekeeki hone witolo yoluta꞉ epolo pia꞉me. Koto pa꞉la꞉pate ameta꞉ nakana꞉ma꞉ ana꞉na꞉ handa꞉peke na ya꞉la꞉me. \v 43 Nate ma꞉nda꞉ a꞉nda꞉na꞉ta꞉ naka꞉ a꞉nda꞉ tunkuliki haliweki a꞉pa a꞉nda꞉ pape tieke tieke hopa꞉liao pokaata꞉ naka꞉ pota꞉ poka꞉niao pitilimikie. A꞉nda꞉ puluekema꞉ta꞉ mandane mandane a꞉pa dupalimikie. \v 44 Ikana꞉ma꞉ neke make naka꞉ pape tukiki pa꞉ta꞉ haleme wanda꞉hali paeyaota꞉ ota꞉ lia paeyaalimikie. Kutupa naka꞉ toopi ma꞉nda꞉ ipika꞉ ula꞉ alena꞉ ota꞉ na wina꞉ lelimikie. Pa ekipeketa꞉ nakana꞉ma꞉ Koda꞉ma꞉ neke peteluekema꞉ peneme yao epena꞉ lea꞉ nate leketa꞉ na handa꞉ wima꞉e leekeme. \s1 Yesu tembolo da peekeeki \r (Ma꞉tiu 21꞉12-17, Maka 11꞉15-19, Dioni 2꞉13-22) \p \v 45 Kutupa Yesuma꞉ mo tembolo da pa꞉ta꞉ honda꞉ pamba pua ne anemone alemanu tapaaso pitimiki haliweki tolu litolo alota꞉ \v 46 Mo Baibolona꞉ wape pea ula꞉ pita꞉ Koda꞉ma꞉ alota꞉ Yaka data꞉ wanda꞉halima꞉ yeni pea꞉tiki pulu pa꞉la꞉ dae lolo pa꞉la꞉pate ikana꞉ma꞉ta꞉ mo pake no hala꞉ haliwekina꞉ a꞉mbalo peleme da haena꞉ alememe leekeme. \p \v 47 Kutupa hoto paeyao Yesuma꞉ mo tembolo da pa꞉ta꞉ pi wala꞉tiki pu hayekeme. Pate mo hande yeni peao haemeke haliwekina꞉ you haliwekima꞉ make pi ula꞉eki walo haemeke haliwekima꞉ make mo wanda꞉halina꞉ you haliwekima꞉ make Yesu luekema꞉ hone wimikime. \v 48 Kutu pimikipate ikana꞉ma꞉ pota꞉ ma꞉nda꞉ na handa꞉ wimikime. Pa ekipeke. Wanda꞉hali paeyaoma꞉ ipika꞉ pi pa oputia pulu hata꞉ ipika꞉ pi ma꞉nda꞉ hosiki siki make mina꞉pa꞉laluekema꞉ na taapemekeme. \c 20 \s1 Yesu pa꞉ta꞉ lota꞉ pimikieki \r (Ma꞉tiu 21꞉23-27, Maka 11꞉27-33) \p \v 1 Nate ma꞉nda꞉na꞉ Yesuta꞉ tembolo da pa꞉ta꞉ pita꞉ wanda꞉hali Koda꞉na꞉ mana꞉ pi alo make mo Pi Seliapo walo hayekeme. Kutupa mo yeni peao haemeke haliwekina꞉ you haliweki make mo Lo Pi walo haemeke haliwekima꞉ make mandane da handeteke haemeke you haliweki paeyao a꞉pa \v 2 Yesu pa꞉ta꞉ alota꞉ Do pu haleeki manuta꞉ epina꞉ welema꞉ pie ala꞉eki pu halepe. Kutupa make neketa꞉ epima꞉ honkopu ku haleke pipe laa niki opuomono a̱i̱ la kie lemekeme. \p \v 3 Yesuma꞉ ika꞉ pi hombo peaaso alota꞉ I̱ma꞉ iki ma꞉nda꞉ lota꞉ pionoe. \v 4 Dionima꞉ wanda꞉hali bapitaisi peayeke ekina꞉ honkoputa꞉ wanda꞉halima꞉ haleekepe o Koda꞉ma꞉ haleekepe laa leekeme. \v 5 Koto pi opuata꞉ mo haliwekima꞉ ika꞉ ika꞉ kone alo alota꞉ Nikana꞉ma꞉ta꞉ ekipa hombo peamana꞉pe. Hepeni nane ekie loma꞉ka꞉na꞉ta꞉ kota꞉ niki pa꞉ta꞉ta꞉ Dionima꞉ lo hayeke pi manuta꞉ ekipeke na miniki haemepe laa lelieke. \v 6 Pate nikana꞉ma꞉ kenke wanda꞉halina꞉ ekie loma꞉ka꞉na꞉ta꞉ do wanda꞉hali wopuma꞉ niki toopima꞉ lilimikie. Pa ekipeke iki paeyaoma꞉ Dionita꞉ Koda꞉na꞉ pi la꞉ mea halo hayeke halie lo halememe. \v 7 Koto ekina꞉ ikana꞉ma꞉ Yesu pa꞉ta꞉ alota꞉ Niki na handoloma꞉me lemekeme. \v 8 Koto lemeke Yesuma꞉ hombo peaaso alota꞉ I̱ma꞉ make yaka pu halo hau manuna꞉ wele peao hala꞉ halina꞉ bikita꞉ iki pa꞉ta꞉ na la kulueke leekeme. \s1 Hoke haliwekima꞉ e handeteke haemekeeki \r (Ma꞉tiu 21꞉33-46, Maka 12꞉1-12) \p \v 9 Kutupa Yesuma꞉ mo wanda꞉hali pa꞉ta꞉ onkoluma꞉ pi ma꞉nda꞉ la halolo alota꞉ Hali homeke ma꞉nda꞉ ipikita꞉ waini pu e pokaata꞉ mo eta꞉ mandane haliwekima꞉ handeteke haena꞉ta꞉ yenki mulu pimiki ekita꞉ hosikima꞉ putupa ipiki pa꞉ta꞉ hala꞉tiki pina꞉yeke halaata꞉ nate hokuluna꞉ papate peekeme. \v 10 Wetepena꞉ mo waini kiliki talemeke nate opolo epeeketa꞉ mo hande haliwekima꞉ ipika꞉ putu piliki wiaemekeeki meaena꞉yeke ipika꞉ e pokaeyeke hali ma꞉nda꞉ tapaeyekeme. Kutu piekepate hande halita꞉ mo haliwekima꞉ yombua bao ala꞉ta꞉ ma꞉nda꞉ siki make na haleke pa tapaemekeme. \v 11 Kutu pimiki handaata꞉ paa ipika꞉ e pokaeyeke hali ma꞉nda꞉ tapaeyekeme. Kutu piekepate mo haliwekima꞉ta꞉ mo halita꞉ yaala꞉ meao yombua bao ombu ala꞉ta꞉ ma꞉nda꞉ make na haleke pa tapaemekeme. \v 12 Kutu pimiki ombu paa tepo peao ipika꞉ e pokaeyeke hali ma꞉nda꞉ tapaeyekepate mo hande haliwekima꞉ta꞉ koto some make lia yombua bao tete tete mea pitao mo e pa꞉ta꞉ yama꞉ mea baemekeme. \v 13 Kotoeki ombu pimiki mo hande waini ena꞉ teke somema꞉ alota꞉ I̱ma꞉ eki pulua꞉pe hone wiaata꞉ Yaka pukima꞉ na kepeleke weki kone tapalueke hone wiekeme. Ipika꞉ honema꞉ alota꞉ Yaka wekina꞉ pita꞉ ota꞉ opua pilimikie laa leekeme. \v 14 Kutu piekepate mo hande e handeteke haemeke haliwekima꞉ta꞉ mo weki epeekeeki handaata꞉ kota꞉ ika꞉ honema꞉ lombolo alota꞉ Hande e teke halina꞉ anke teke mulu pa꞉la꞉ wekita꞉ koto ipula꞉ handa꞉e. Ota꞉ lumana꞉e la alota꞉ Luma꞉ka꞉na꞉ta꞉ kota꞉ mo eta꞉ ota꞉ nika꞉ eki wilieke lemekeme. \v 15 Koto laata꞉ ikana꞉ma꞉ mo someta꞉ e tikene nane yola꞉ mea puaata꞉ lia homaemekeme leekeme. \p Koto pimanu la paeyeketa꞉ Yesuma꞉ mo wanda꞉hali lota꞉ pitolo alota꞉ Do ena꞉ tekehali opolo epea꞉ka꞉na꞉ta꞉ kota꞉ mo e handeteke haleme haliweki pa꞉ta꞉ta꞉ eki haumanu pilia꞉pe. \v 16 Ipikana꞉ma꞉ a꞉pa mo haliweki liaata꞉ ipika꞉ eta꞉ mo mandane e handeteke halo pa꞉la꞉ haliweki pa꞉ta꞉ hala꞉ monealieke leekeme. \p Mo wanda꞉halima꞉ doeki opu hao alota꞉ Ota꞉ kutupa dia꞉me lemekepate \v 17 Yesuma꞉ iki handake witolo hata꞉ lota꞉ pitolo alota꞉ Dia꞉me alemepate mo Baibolo bukana꞉ wape pea ula꞉ pima꞉ta꞉ Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ dana꞉ teke toopi ula꞉me la꞉la꞉ ekina꞉ teketa꞉ alekepe la loa꞉me. \v 18 Mo koto toopi manda lopilia꞉ hali ma꞉nda꞉ a꞉nda꞉ta꞉ ota꞉ pindi pindi pilieke. Kutupa make mo toopima꞉ hali ma꞉nda꞉ a꞉nda꞉ manda lopea꞉ka꞉na꞉ta꞉ kota꞉ mo someta꞉ yombua bao dokolo au lalieke leekeme. \s1 Sisana꞉ dakisi mani \r (Ma꞉tiu 22꞉15-22, Maka 12꞉13-17) \p \v 19 Koto leeke ekina꞉ mo yeni peao haemeke haliwekina꞉ you haliweki make hande pi ula꞉eki walo haemeke haliwekima꞉ make Yesu koto kone minuluekema꞉ yeke taapemekeme. Ekipeke ika꞉ hone witolota꞉ Ipikana꞉ma꞉ lea꞉ onkoluma꞉ pita꞉ iki pa꞉ta꞉ kone lea꞉me hone witolo hata꞉ pimikime. Kutu puluekema꞉ pimikipate mo wanda꞉halima꞉ paala꞉ pieke handa paemekeme. \p \v 20 Koto ekina꞉ yeketa꞉ ikana꞉ma꞉ pota꞉ ma꞉nda꞉ weitolo hata꞉ mandane haliwekima꞉ lota꞉ pita꞉la꞉eki manuma꞉ Yesu tamena꞉yeke ma꞉na꞉ yapa꞉ pimikime. Mo haliweki pa꞉ta꞉ alota꞉ Makeaaso hata꞉ kone ikana꞉ma꞉ homu piki pimanu alememe hone wina꞉ lota꞉ pulu pupe lemekeme. Ika꞉ hone tukiki pa꞉ta꞉ta꞉ Koto lota꞉ pilimi ekima꞉ pa makeaaso hata꞉ Yesuna꞉ kiki tondoliki honda꞉ lia mo Loma꞉na꞉ Kapomani You halina꞉ kiki nane hala꞉ monealumeke laa honema꞉ pimikime. \v 21 Koto hambemeke ma꞉na꞉ ikiki haliwekima꞉ pua lota꞉ pitolo alota꞉ Wala꞉la꞉ Halio. Nikana꞉ma꞉ta꞉ nakana꞉ma꞉ lo hale pi make walo hale pi make ota꞉ pi lo haleme hone witoloma꞉me. Kutupa nakana꞉ma꞉ mo biki ula꞉ wanda꞉hali pa꞉ta꞉ hone ma꞉nda꞉ na u hake iki paeyao pa꞉ta꞉ mandake hau piki wanda꞉halie laata꞉ Koda꞉na꞉ ota꞉ hau pita꞉la꞉ pi homeke walo haleme laa alota꞉ \v 22 Niki la kie. Mo Kapomani tieke Sisa pa꞉ta꞉ dakisi mani hala꞉la꞉ ekita꞉ a꞉pa꞉la꞉pe o hoela꞉pe. Halomonope o na halomonope lemekeme. \p \v 23 Koto lemekepate Yesuma꞉ ika꞉ makeaaso pimikieki amba꞉ handaata꞉ mo haliweki pa꞉ta꞉ alota꞉ \v 24 Mo toopi kiliki homeke ma꞉nda꞉ i̱ pa꞉ta꞉ wala꞉pe. Do a̱o̱a̱o̱ pita꞉ biki yaapota꞉ epina꞉eki ya꞉ka꞉ta꞉pe laa lota꞉ piekeme. Ikana꞉ma꞉ alota꞉ Mo Sisana꞉ ekie lemekeme. \v 25 Koto lemeke Yesuma꞉ alota꞉ Sisana꞉ alemanu meatiki pitolota꞉ kota꞉ Sisa pa꞉ta꞉ kone mea hala꞉tiki pu hapa꞉peke. Kutupa Koda꞉na꞉ alemanu ya꞉ka꞉na꞉ta꞉ kota꞉ Koda꞉ pa꞉ta꞉ kone pa hala꞉tiki pu hapa꞉peke leekeme. \v 26 Mo wanda꞉halina꞉ leke popelekena꞉ Yesu mea lopapeke tupa꞉ mateeke handaa mo hande haliwekima꞉ pi ma꞉nda꞉ na leke ipika꞉ hombo peayeke ekina꞉ pututuma꞉ homa pitatia yapemekeme. \s1 Homa paa tiaasa꞉ ekina꞉ lota꞉ piekeeki \r (Ma꞉tiu 22꞉23-33, Maka 12꞉18-27) \p \v 27 Kutupa mandane Sa꞉dusi haliwekita꞉ homemeke wanda꞉hali paa na tialieke lo haemeke haliwekima꞉ Yesu ombu lota꞉ pulu a꞉pa alota꞉ \v 28 Wala꞉la꞉ halio. Mosesima꞉ nika꞉ Lo Pi dupa lao wiala꞉me. Hali ma꞉nda꞉ta꞉ wekiwandiki ma꞉nda꞉ na mondu wiki weteke homeke mina꞉pa꞉lao homea꞉ka꞉na꞉ta꞉ kota꞉ mo kosa꞉ piki wanda꞉ta꞉ ipika꞉ hamekema꞉ meaata꞉ mo mendilipi wekiwandikita꞉ mo homea꞉ somena꞉eki mendiaena꞉ laa la꞉la꞉me leekeme. \v 29 Kota꞉ amba꞉ a꞉nda꞉ hama̱la̱꞉ hama̱la̱꞉ watake hata꞉ haemekeme. Kutupa mupeke halita꞉ wanda꞉ mea hao kone wekiwandiki ma꞉nda꞉ na mondu wiki pa homeekeme. \v 30 Kutu pieke handaa mo hoki pa꞉ta꞉ halima꞉ mo kosa꞉piki wanda꞉ miekepate homeke tupa꞉ kone homeekeme. \v 31 Kutu pieketa꞉ kota꞉ tepo peao halima꞉ mea ipikana꞉ma꞉ make homeke hau piekeme. Kutupa mo hama̱la̱꞉ hama̱la̱꞉ paeyao pa꞉ta꞉ homeke hau ombu piekeme. \v 32 Kutu pua꞉tiki pua paelo pulu hata꞉ta꞉ mo hande wanda꞉ make homeekeme. \v 33 Kutu pimikipate mo wanda꞉hali paa tialimi natena꞉ta꞉ mo hande wanda꞉ta꞉ ota꞉ epina꞉ wanda꞉ haliepe. Pa ekipeke mo hande watake hata꞉ hali paeyaoma꞉ mo homeke wanda꞉ kone mimiki ekina꞉ loma꞉me lemekeme. \p \v 34 Yesuma꞉ ika꞉ pi hombo peaaso alota꞉ Ame do kenkena꞉ hatia ipula꞉ wanda꞉halita꞉ mu alualu pea tooli hao halemepate \v 35 pa mo homa paa tiao mo wetepe nane ipilia꞉ natena꞉ta꞉ paa hao haena꞉ ana꞉pa꞉la꞉ wanda꞉hali ikita꞉ tooli au na lelimikie. \v 36 Ikita꞉ enisoloma꞉ handaa paa na homeke hao halimikie. Ikita꞉ Koda꞉na꞉ wekiwandiki halimikie. Pa ekipeke ikita꞉ homa paa tialememe. \v 37 Kutupa Mosesima꞉ta꞉ homeleme wanda꞉halina꞉ paa tiaasa꞉ ekita꞉ ana꞉na꞉ peneme yao wala꞉la꞉me. Mo Baibolo bukana꞉ tunkula ula꞉eki ma꞉nda꞉ pa꞉ta꞉ta꞉ Mosesima꞉ mo ti talo hala꞉ pa꞉ta꞉ pua Tekehali pa꞉ta꞉ alota꞉ Koda꞉ neketa꞉ Eipoloha꞉ma꞉na꞉ Koda꞉ make Aisa꞉kena꞉ Koda꞉ make Dieikopena꞉ Koda꞉ haleme laa leekeme. \v 38 Kota꞉ koto Koda꞉ta꞉ paa hao hala꞉ wanda꞉halina꞉ Koda꞉ hala꞉me. Homeleme wanda꞉halina꞉eki dia꞉me. Ekipeke. Ipiki pa꞉ta꞉ta꞉ wanda꞉hali paeyao paa hao halememe leekeme. \p \v 39 Mandane Lo Pi walo haemeke haliwekima꞉ alota꞉ Wala꞉la꞉ Halio. Nakana꞉ma꞉ta꞉ epeke tupa꞉ la꞉ka꞉la la꞉neaseme lemekeme. \v 40 Koto lemeke ekita꞉ ikana꞉ma꞉ lota꞉ pita꞉la꞉eki ma꞉nda꞉ lapeke ana꞉ na poloma꞉me hone witolo hata꞉ lemekeme. \s1 Ketisona꞉ tapake apa꞉ta꞉ epipe \r (Ma꞉tiu 22꞉41-46, Maka 12꞉35-37) \p \v 41 Yesuma꞉ iki pa꞉ta꞉ alota꞉ Ekipa wanda꞉halima꞉ Ketisota꞉ hande Deipidina꞉ tapake weki yelieke lapeke ya꞉la꞉pe. \v 42 Pa ekipeke Deipidima꞉ ipika꞉ kone mo Emeli manuna꞉ buka pa꞉ta꞉ alota꞉ \q1 Mo Tekehalima꞉ yaka Tekehali pa꞉ta꞉ dupa leekeme. \q1 \v 43 Naka꞉ a꞉nda꞉ tunkiliki haliwekita꞉ naka꞉ anke oto pa꞉ta꞉ mea pitaluekema꞉ neketa꞉ yaka popeke nane kikina꞉ pita꞉pekee la꞉la꞉me leekeme. \p \v 44 Koto ekina꞉ta꞉ Deipidima꞉ ipika꞉ kone Ketiso pa꞉ta꞉ta꞉ Yaka Tekehalie la꞉la꞉ ekina꞉ kota꞉ Ketisota꞉ ekipa ipika꞉ tapake weki halia꞉pe laa leekeme. \s1 Yesuma꞉ mo Lo Pi walo haemeke haliweki pa꞉ta꞉ kinki piekeeki \r (Ma꞉tiu 23꞉1-36, Maka 12꞉38-40) \p \v 45 Mo wanda꞉hali paeyaoma꞉ Yesuma꞉ alo pitieke pi opitolo haena꞉ ipika꞉ disaipolo haliweki pa꞉ta꞉ alota꞉ \v 46 Mo Lo Pi walo haemeke haliwekina꞉ hau wotu handeteke hapa꞉peke. Ikana꞉ma꞉ta꞉ hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ homu pitolo pi la halena꞉ hone wotu u halememe. Mo yeni damanu tukiki pa꞉ta꞉ pituluekema꞉ta꞉ wanda꞉halima꞉ iki handena꞉ hone wia mo you haliweki pitina꞉ wepia wiala꞉ epeke seamanu yata꞉pa pitu halememe. Ne pambaasa꞉ ekina꞉ make epeke haupiki seana꞉ pituluekema꞉ hone u halememe. \v 47 Kutupa kosa꞉piki wanda꞉wekina꞉ damanu makea makea pea minolota꞉ handaena꞉ hau pea yeni pu hokulu peao halememe. Koto ekina꞉ta꞉ mo haliwekima꞉ ika꞉ mulu peleme hoke yenkita꞉ ota꞉ haka꞉ta꞉pao tieke milimikie leekeme. \c 21 \s1 Kosa꞉piki wanda꞉na꞉ haleekeeki \r (Maka 12꞉41-44) \p \v 1 Yesuma꞉ handa꞉ moneayekepate mo tembolo da pa꞉ta꞉ mani pambo haemeke bokosina꞉ hamoko haliwekima꞉ ika꞉ pa hameke halemeke manimanu pamboloendi pimikieki handeekeme. \v 2 Kutupa make natehali kosa꞉piki wanda꞉ sikima꞉ ipika꞉ manisiki toea yaapoma꞉ handekeeki a꞉pa lopaeyekeeki handeekeme. \v 3 Kotoeki handolo Yesuma꞉ alota꞉ I̱ma꞉ iki pa꞉ta꞉ ota꞉ pi alome. Do natehali kosa꞉piki wanda꞉ sikima꞉ lopaasa꞉eki sikita꞉ ota꞉ tieke alo hata꞉ mo mandane wanda꞉halina꞉ wieke ekita꞉ lu ankulala꞉me. \v 4 Pa ekipeke ikana꞉ma꞉ ika꞉ mani tieke putupu mea putupiliki wimiki ekimanu kone mea lopaemepate do wanda꞉ta꞉ natehali hata꞉ ipika꞉ wia hayekeeki paeyao mea lopaeya꞉me. Ipika꞉ ne hamba꞉pekeeki kone mea lopaeya꞉me leekeme. \s1 Yesuma꞉ mo tembolo dana꞉ pulu pieke ekimanu la haleekeeki \r (Ma꞉tiu 24꞉1-2, Maka 13꞉1-2) \p \v 5 Mandane disaipolo haliwekima꞉ta꞉ mo tembolo data꞉ Epekee laa ipika꞉ epeke toopimanu pita꞉ make Koda꞉ pa꞉ta꞉ pa hameke halemeke alemanu tonka꞉na꞉ Handa꞉e laa pi alo pitimikime. Koto ekina꞉ Yesuma꞉ alota꞉ \v 6 Do handeleme alemanu paeyaota꞉ ika꞉ nate opolo epea꞉ka꞉na꞉ta꞉ toopi manda ma꞉nda꞉ na tapa꞉ pelia hata꞉ paeyao mea lopaalieke leekeme. \s1 Ka꞉nda꞉manu epolo pa꞉la꞉eki \r (Ma꞉tiu 24꞉3-14, Maka 13꞉3-13) \p \v 7 Koto leekeeki ikana꞉ma꞉ opua alota꞉ Disao. Do aleeki manuta꞉ handima꞉ ipiliepe. Kutupa ipuluekema꞉ haena꞉ta꞉ eki hau pulu pa꞉la꞉eki handuluma꞉pe laa lota꞉ pimikime. \v 8 Yesuma꞉ alota꞉ Ma꞉nda꞉ma꞉ iki makeaama꞉na꞉ wotu handeteke hapa꞉peke. Hali wopuma꞉ ya biki la꞉paleke ipulu alota꞉ I̱ta꞉ ipikie alo hata꞉ hande nate a꞉pa꞉la꞉mee lolo pelemepate ikana꞉ma꞉ iki na ta꞉lia꞉pa꞉peke. \v 9 Ikana꞉ma꞉ Tapake ma꞉nda꞉ma꞉ tapake ma꞉nda꞉ yaapo a꞉nda꞉ pita꞉la꞉me o Homeke tapakema꞉ kone a꞉nda꞉ pu alu alu pita꞉la꞉me pi opimika꞉na꞉ta꞉ kota꞉ ikana꞉ma꞉ paala꞉ma꞉ na homu hapa꞉peke. Dupiki haumanu amba꞉la a꞉pa꞉peke ya꞉la꞉pate pa mo hande paetolo nateta꞉ teke pa꞉ta꞉ laa na pita꞉la꞉me. \p \v 10 Yesuma꞉ pi ma꞉nda꞉ ombu alo hata꞉ alota꞉ Kenke homekena꞉ amitonu tiao pua kenke ma꞉nda꞉na꞉ ami tapu a꞉nda꞉ pilimikie. Kini hali homekena꞉ amitonu tiao kini hali ma꞉nda꞉na꞉ ami tapu a꞉nda꞉ pilimikie. \v 11 Kutu pilia꞉ tomona꞉ta꞉ kenke yu paeyao pa꞉ta꞉ paala꞉ piki yu momeni tiekemanu pea make tea꞉ ki pambo pea make yeni ki tieke make ipilieke. Kutupata꞉ oli ya nane na handeke haumanu make peaata꞉ ta꞉ta꞉ ta꞉ta꞉ pea paala꞉ wopupiki aneke haumanu wotu handilimikie. \p \v 12 Dupiki haumanu puluekema꞉ haena꞉ta꞉ niki amba꞉la mina꞉ yombuata꞉ oni pi hotu haleme da pa꞉ta꞉ niki pi yokaalu puemena꞉ hala꞉ moneaota꞉ dipula mea pitalimikie. Kutupa ikita꞉ yaka bikina꞉ kone mo kini haliwekimanu make handeteke pilimi haliwekina꞉ leke popelekena꞉ hatuku ipilimikie. \v 13 Koto nateta꞉ ikana꞉ma꞉ mo hande Pi Seliapo la halo peleme ekina꞉ waleke wita꞉la꞉me. \v 14 Mo nate a̱i̱ na miki haena꞉ kone titina꞉ amba꞉la ika꞉ lolo polome pina꞉ hone ti na yokulueke laa a̱i̱ telipea꞉peke. \v 15 Pa ekipeke I̱ma꞉ iki pa꞉ta꞉ kutupiki pimanu make epeke hone make kua꞉ka꞉na꞉ta꞉ ika꞉ a꞉nda꞉ tunkuliki haliweki homeke a꞉nda꞉ma꞉ make na tumbalimikie. Kutupa ika꞉ pi na yoko baalimikie. \v 16 Ika꞉ apa꞉ ama꞉ma꞉ make ika꞉ kame tonuma꞉ make ika꞉ tapake tonuma꞉ make ika꞉ yankeke tonuma꞉ make iki hala꞉ moneaya꞉ka꞉na꞉ta꞉ mandaneta꞉ ota꞉ homomena꞉ limikie. \v 17 Yaka biki melemeke handaa wanda꞉hali paeyaoma꞉ iki ota꞉ kiaalimikie. \v 18 Kutu pulu pelemepate ika꞉ amboke itiki homeke kone na alupilieke. \v 19 Honkopu hao hapa꞉peke. Pa ekipeke dupiteleme hau manuma꞉ta꞉ ika꞉ kone petelimikie leekeme. \s1 Mo Diutuseleme hoeyaaso pulu piekeeki \r (Ma꞉tiu 24꞉15-21, Maka 13꞉14-19) \p \v 20 Ikana꞉ma꞉ mo Diutuseleme da a꞉nda꞉ ami titima꞉ dupasa꞉eki handemeka꞉na꞉ta꞉ kota꞉ ikana꞉ma꞉ta꞉ teke pa꞉ta꞉ ipiki hoeyaalieke hone wilipikie. \v 21 Koto dina꞉ta꞉ mo Diudia nane halo peleme wanda꞉halita꞉ mo potemanu pa꞉ta꞉ pindipa pena꞉e. Ma꞉nda꞉ epi mo daonimanu pa꞉ta꞉ haya꞉ka꞉na꞉ta꞉ mina꞉pa꞉laena꞉e. Kutupa ma꞉nda꞉ epi mo da kenke tea꞉na꞉ haya꞉ka꞉na꞉ta꞉ pa mo daoni pa꞉ta꞉ ota꞉ na pena꞉e. \v 22 Pa ekipeke do hau paeyaota꞉ hande Baiboloma꞉ la꞉la꞉ tupa꞉ Mo tanda mia꞉peke natemanu la꞉la꞉ nate peneme yaaluekema꞉ pilieke. \v 23 Koto nate nina꞉ta꞉ mo weki weleke haleme wanda꞉weki o weki panake hopulu wia haleme wanda꞉weki ika꞉ mulu peleme tandana꞉ paala꞉e. Ota꞉ hoke paala꞉ piki haumanu make do kenkena꞉ ipilieke. Kutupa Koda꞉na꞉ tanda peaasa꞉ ekita꞉ do wanda꞉hali pa꞉ta꞉ ipilieke. \v 24 Mandane wanda꞉halita꞉ kepete dolo manuma꞉ lu homao mandaneta꞉ mandane kenke yu ma꞉nda꞉ nane dipula leke mea pua kutupa mo Diendaili wanda꞉halima꞉ta꞉ Diutuseleme tumbuatia pua ika꞉ nate mulu epea꞉ka꞉na꞉ mina꞉pa꞉lalimikie. \s1 Wanda꞉halina꞉ Eiyeke epolo pa꞉la꞉eki \r (Ma꞉tiu 24꞉29-31, Maka 13꞉24-27) \p \v 25 Oli ya naneta꞉ oli natena꞉ kaisepona꞉ hombulanka꞉ paeyaona꞉ pate haumanu pilieke. Do kenke naneta꞉ mandane da kenke paeyaoma꞉ta꞉ Eki pumana꞉pe laa hone mataaso hata꞉ mo dawalana꞉ ho tiekema꞉ e̱ lelieke make dawala telia꞉ ekina꞉ make paala꞉ma꞉ homo halimikie. \v 26 Wanda꞉hali paala꞉ma꞉ homolo hata꞉ mo kenke paeyao pa꞉ta꞉ eki hau opolo ipula꞉pe laa la꞉ma꞉ lulu pitolo hata꞉ homilimikie. Mo ya nane hala꞉ ale manuta꞉ ika꞉ hao haleme tupa꞉ na hake pa nane wato baalieke. \v 27 Koto tomona꞉ kone Wanda꞉halina꞉ Eiyeketa꞉ oli koa pa꞉ta꞉ honkopu tieke make pa̱a̱ peaasa꞉eki ame̱le̱ opolo ipilieke. \v 28 Kutupiki haumanu a꞉nda꞉ kini pea pia꞉ka꞉na꞉ta꞉ kota꞉ ikana꞉ma꞉ tiao hata꞉ ika꞉ ambokemanu mina꞉liapa꞉peke. Pa ekipeke ika꞉ deto hao hamena꞉ pa꞉ta꞉la꞉la꞉ ekita꞉ teke pa꞉ta꞉ ya꞉leke loa꞉me leekeme. \s1 Nose manda꞉ mu onkoluma꞉ pi ala꞉eki \r (Ma꞉tiu 24꞉32-35, Maka 13꞉28-31) \p \v 29 Kutupa Yesuma꞉ dupiki onkoluma꞉ pi ma꞉nda꞉ leekeme. Mo hande nose ti pita꞉ mandane timanu make hone wotu wia꞉pa꞉peke. \v 30 Mo hande ika꞉ katakemanu kini pea tindiki lia꞉ka꞉na꞉ta꞉ kota꞉ hatuhama ti tala꞉ nate ipuluekema꞉ pita꞉la꞉me hone u halememe. \v 31 Kota꞉ koto tupa꞉ kone hande loa꞉ alemanu ipula꞉eki kini pea handemeka꞉na꞉ta꞉ teke pa꞉ta꞉ Koda꞉na꞉ Kilu Tombuao Hala꞉ Ekita꞉ ipuluekema꞉ hala꞉me hone wilimikie. \p \v 32 Iki pa꞉ta꞉ ota꞉ pi alome. Do haleme tapake paeyao a̱i̱ na homeke halimi pita꞉ta꞉ I̱ma꞉ loa꞉ alemanu paeyao amba꞉ ipilieke. \v 33 Oli ya do kenke yaapota꞉ paelo pa꞉la꞉pate yaka pi lo haloeki manuta꞉ na paelieke leekeme. \s1 Wopu handeteke hapa꞉peke leekeeki \p \v 34 Ika꞉ kone wopu handeteke hapa꞉peke. Ne tieke pamba make honkopu hake hoke ikali wopu na make do kenkena꞉ hone pa꞉la꞉ ekina꞉ we pamba꞉la꞉ ekima꞉ iki ota꞉ na tumbaena꞉ lapa꞉peke. Pa ekipeke mo Tekehalina꞉ Natema꞉ ikita꞉ wisakema꞉ pita꞉la꞉ tupa꞉ koto kone \v 35 tamilieke la loa꞉me. Koto Nateta꞉ do kenke honiki paeyao pa꞉ta꞉ haleme wanda꞉hali pa꞉ta꞉ ipilieke. \v 36 Koto ekina꞉ leke leke lo hata꞉ hoto paeyao yeni pu hapa꞉peke. Pa ekipeke ikana꞉ma꞉ dupiki haumanu tukiki pa꞉ta꞉ kone honkopu hau epeke tupa꞉ opolo pua mo Wanda꞉halina꞉ Eiyekena꞉ leke popelekena꞉ hamena꞉yeke loa꞉me leekeme. \p \v 37 Yesuma꞉ koto nate manuta꞉ mo tembolo da pa꞉ta꞉ pi walaata꞉ welealo nane nina꞉ta꞉ mo Olipi Potena꞉ pua pitu timba꞉ latiki pu hayekeme. \v 38 Kutupa wanda꞉hali paeyaota꞉ ipika꞉ pi opulueke alo timba tiao da ka꞉la꞉paaso mo tembolo da pa꞉ta꞉ pua꞉tiki pimikime. \c 22 \s1 Yesu luluekema꞉ hone amba꞉ pambao wimikieki \r (Ma꞉tiu 26꞉1-5, Maka 14꞉1-2, Dioni 11꞉45-53) \p \v 1 Mo hande Na Pombeiyaake Palaowa Nala꞉ Di ipika꞉ bikita꞉ Lombei Pupa Yapeeke Nateta꞉ teke pa꞉ta꞉ yolo epeekeme. \v 2 Mo yeni peao haemeke teke haliwekima꞉ make mo Lo Pi wala꞉tiki pu haemeke haliwekima꞉ make Yesu a꞉mbao luekema꞉ yeke mandane pota꞉manu wopu weimikime. Pa ekipeke. Ikita꞉ mo wanda꞉hali paala꞉ma꞉ homolo hata꞉ pimikime. \s1 Diudasima꞉ Yesu lina꞉ yeke a꞉nda꞉ lomba wiekeeki \r (Ma꞉tiu 26꞉14-16, Maka 14꞉10-11) \p \v 3 Isekatioti hali Diudasima꞉ mo hande 12 disaipolo hali ma꞉nda꞉ hayekepate kone Sadani honda꞉ pambeekeme. \v 4 Koto ekina꞉ Diudasima꞉ mo yeni peao haemeke teke haliweki make mo tembolo da handeteke haemeke you haliweki ame̱le̱ ipikana꞉ma꞉ Yesuta꞉ ekipa iki pa꞉ta꞉ mea hala꞉ monealua꞉pe laa hotulu peekeme. \v 5 Mo haliwekita꞉ ta꞉na꞉ tiekema꞉ homolo hata꞉ ipiki pa꞉ta꞉ mani haluekema꞉ pi la꞉ wimikime. \v 6 Koto ekina꞉ Diudasima꞉ mo ekina꞉ a꞉pa꞉la꞉me laa ikana꞉ma꞉ mo wanda꞉halima꞉ na handolo pa꞉la꞉ tupa꞉ Yesu lina꞉ yeke ipikana꞉ma꞉ epeke pota꞉manu kini pea weiyekeme. \s1 Yesuma꞉ mo Lombei Pupa Yapeeke ne noluekema꞉ tikitiki yaeyekeeki \r (Ma꞉tiu 26꞉17-25, Maka 14꞉12-21, Dioni 13꞉21-30) \p \v 7 Mo hande Na Pombeiyaake Palaowa Nala꞉ natena꞉ mo Lombei Pupa Yapeeke yawena꞉ sipisipi ma꞉na꞉ ikiki sunu lulu pimiki nate opolo epeekeme. \v 8 Yesuma꞉ Pida pita꞉ Dioni yaapo pa꞉ta꞉ dupiki pi mea pena꞉ lo tapaaso alota꞉ Pua nika꞉ Lombei Pupa Yapeeke Natena꞉ ne nolo polome alena꞉ tikitiki yaalo pupa꞉e leekeme. \v 9 Ipilikana꞉ma꞉ Yesu pa꞉ta꞉ lota꞉ pitolo hata꞉ alota꞉ Hando pa꞉ta꞉ pua wamo peoponope lepekeme. \v 10 Yesuma꞉ alota꞉ Opua꞉pe. Ipiliki mo daoni nane pulu hapena꞉ta꞉ hali ma꞉nda꞉ma꞉ ikali kanake homeke tia ipuluta꞉ ipiliki manda꞉hande pilieke. Kutupa mo hali teli mea pua ipiki honda꞉ pambilia꞉ da pa꞉ta꞉ pua꞉pa꞉peke. \v 11 Kutupa mo da teke hali pa꞉ta꞉ dupa lapa꞉peke. Mo Disama꞉ neke pa꞉ta꞉ alota꞉ Yaka disaipolo haliweki I̱ ame̱le̱ Lombei Pupa Yapeeke Natena꞉ ne nolo poloma꞉ da panda꞉ hando pa꞉ta꞉pe laa lapa꞉peke. \v 12 Kutupa ipikana꞉ma꞉ manda nane ula꞉ ala꞉ta꞉ ala꞉ta꞉ ana꞉lao wiki da panda꞉ tieke walieke. Koto pa꞉ta꞉ ipilikana꞉ma꞉ ala꞉ta꞉ ala꞉ta꞉ tikitiki yaalipipikie leekeme. \v 13 Mo hali yaapo puaata꞉ hande Yesuma꞉ leeke pita꞉ ota꞉ yaeyekeme. Kutupa mo hande Lombei Pupa Yapeeke Natena꞉ ne wamo pipikime. \s1 Teke Halina꞉ ne ikali telipeayekeeki \r (Ma꞉tiu 26꞉26-30, Maka 14꞉22-26, 1 Kotindi 11꞉23-25) \p \v 14 Mo hande nate opolo epeeketa꞉ Yesu ipika꞉ pita꞉peke da panda꞉ mea mo ipika꞉ disaipolo haliweki ame̱le̱ teipolona꞉ pitimikime. \v 15 Kutupa ipikana꞉ma꞉ iki pa꞉ta꞉ alota꞉ I̱ yaka hone tiekema꞉ta꞉ I̱ tanda noluekema꞉ hata꞉ta꞉ do Lombei Pupa Yapeeke Natena꞉ neta꞉ iki ame̱le̱ noluekema꞉ hone wotu pa꞉la꞉me leekeme. \v 16 I̱ma꞉ iki pa꞉ta꞉ ota꞉ pi alome. Ame doeki pea hoki naneta꞉ mo Koda꞉na꞉ Kilu Tombuao hala꞉eki pa꞉ta꞉ homeke do hauna꞉ teke peneme yaena꞉ yeke paa na nolueke laa leekeme. \p \v 17 Kutupa Yesuma꞉ mo kapo mea Koda꞉ pa꞉ta꞉ keiyae alo hata꞉ iki pa꞉ta꞉ alota꞉ Ika꞉ ika꞉ kone telipa nape laata꞉ \v 18 I̱ma꞉ do waini ikalita꞉ ame do kini pea pua na neke hao mo Koda꞉na꞉ Kilu Tombuao hala꞉eki ipilia꞉ dina꞉ paa nolueke leekeme. \v 19 Kutupa ipikana꞉ma꞉ mo betedi mea Koda꞉ pa꞉ta꞉ keiyae laa pindi pindi pea iki pa꞉ta꞉ halolo hata꞉ alota꞉ Dota꞉ yaka lokee laata꞉ iki pa꞉ta꞉ ka꞉la꞉ ekie. Dupiki hauta꞉ I̱ hone niminaaso hata꞉ pea꞉tiki pu hapa꞉peke leekeme. \v 20 Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Ikina꞉ holao pa꞉la꞉me leekeme. \p \v 21 Koto pa꞉la꞉pate handa꞉e. Mo hande I̱ minina꞉yeke a꞉nda꞉ lombolo pa꞉la꞉ halina꞉ kikita꞉ yakaeki ame̱le̱ mandakena꞉ do teipolona꞉ wia piluma꞉ handa꞉e. \v 22 Wanda꞉halina꞉ Eiyeketa꞉ mo hande Koda꞉ma꞉ la꞉ ula꞉ tupa꞉ kone homena꞉yeke pa꞉la꞉pate pa mo a꞉nda꞉ lomba꞉la꞉ halita꞉ ota꞉ paala꞉e leekeme. \v 23 Koto leekeeki opitolo hata꞉ ika꞉ ika꞉ kone lota꞉ pu alualu pitolo alota꞉ Niki ma꞉nda꞉ hondo epima꞉ dupiki hau pulu polome ekina꞉ ala꞉pe lemekeme. \s1 Tieke haasa꞉ ekina꞉ ape ape lemekeeki \p \v 24 Yesuna꞉ disaipolo haliwekima꞉ iki ma꞉nda꞉ epita꞉ ota꞉ tiekee hone wina꞉ta꞉ epi ka꞉ta꞉pe laa ape lemekeme. \v 25 Yesuma꞉ iki pa꞉ta꞉ alota꞉ Mo Diendaili wanda꞉halina꞉ kini manuma꞉ ika꞉ wanda꞉halita꞉ ika꞉ honkopu oto pa꞉ta꞉ haena꞉ lo halememe. Kutupa mo you haliwekima꞉ta꞉ ika꞉ kone wanda꞉halina꞉ ta꞉ma꞉nie lo halememe. \v 26 Koto pa꞉la꞉pate iki ame̱le̱ta꞉ koto tupa꞉ dia꞉me. Koto ekina꞉ iki tukiki pa꞉ta꞉ta꞉ tumiki hali ma꞉nda꞉ haya꞉ka꞉na꞉ta꞉ kota꞉ koto someta꞉ pao wetepena꞉ weki au lena꞉ lapa꞉peke. Kutupa mo you halita꞉ pao e pokaasa꞉ hali au lena꞉ lapa꞉peke. \v 27 Epita꞉ tiekepe. Mo ne noluekema꞉ a꞉pa pila꞉ halipe o mo ne pana꞉ peaasa꞉ halipe. Ota꞉ mo pila꞉ hali lataa. Koto pa꞉la꞉pate I̱ta꞉ iki ame̱le̱ta꞉ ne pana꞉ peaaso somema꞉ handolome. \p \v 28 Ikita꞉ yaka ka꞉nda꞉ pikieki tapu ame̱le̱ mandakena꞉ hatia epememe. \v 29 Kutupa yaka Apa꞉ma꞉ I̱ pa꞉ta꞉ I̱ma꞉ handeteke hano ma̱leke lila꞉ tupa꞉ kone I̱ma꞉ make iki ame̱le̱ homeke hau kone pulueke. \v 30 Ikita꞉ yaka Kilu Tombuao Hala꞉ alena꞉ yaka teipolona꞉ pita꞉ ne ikali nolumeke. Kutupa make ikita꞉ oli you halina꞉ sea manuna꞉ pita꞉ mo Isulaina꞉ 12 tapake teli pilimikie leekeme. \s1 Pidama꞉ Yesu na handolome lolo piekeeki \r (Ma꞉tiu 26꞉31-35, Maka 14꞉27-31, Dioni 13꞉36-38) \p \v 31 Saimono Saimonoo. Opie. Sadanima꞉ iki la handena꞉ yeke waleke hala꞉la꞉me. Kutupa mo hande e poko hala꞉ halima꞉ widi napeke yata꞉pa ambuku wina꞉ ala꞉ tupa꞉ ika꞉ pilimi hau manuma꞉ kone hokeeki o epekeeki make teli pealieke. \v 32 Koto pa꞉la꞉pate I̱ma꞉ Saimono neke pa꞉ta꞉ yeni pealo ekita꞉ naka꞉ hone tulale ekita꞉ na lopena꞉yeke polome. Kutupa nakana꞉ma꞉ I̱ pa꞉ta꞉ paa la꞉ka꞉la epeka꞉na꞉ta꞉ kota꞉ naka꞉ kametonu wele pu tiaapeke leekeme. \p \v 33 Pidama꞉ Yesuna꞉ pi hombo peaaso alota꞉ Tekehalio. I̱ta꞉ neke yaapo mandakena꞉ dipula pulueke make homeka꞉na꞉ homuluekema꞉ make tikitiki yao halome leekeme. \v 34 Yesuma꞉ alota꞉ Pidao. I̱ma꞉ neke pa꞉ta꞉ ota꞉ pi alome. Ame timba kone koka꞉la꞉ e̱ a̱i̱ na leke haena꞉ nakana꞉ma꞉ hoto tepo yaka biki amba꞉la hoeyaaso hata꞉ I̱ na handolome lelipikie leekeme. \s1 Pausa nu kepete dolo mina꞉la꞉eki \p \v 35 Kutupa Yesuma꞉ ipika꞉ disaipolo haliweki pa꞉ta꞉ alota꞉ Hande I̱ma꞉ iki tapawa꞉ dina꞉ta꞉ pausa o nu o anke dake na kiki pa tapawa꞉ma꞉ ikita꞉ ala꞉ta꞉ ma꞉nda꞉ weimipe laa lota꞉ piekeme. Ikana꞉ma꞉ hombo peaaso alota꞉ Ota꞉ ala꞉ta꞉ homekesiki ma꞉nda꞉ kone dia꞉me lemekeme. \v 36 Kota꞉ Yesuma꞉ alota꞉ Kutu pimipate ameta꞉ ma꞉nda꞉ epima꞉ pausa o nu wia haemeka꞉na꞉ta꞉ ota꞉ mea pua꞉pa꞉peke. Kutupa ma꞉nda꞉ epi a꞉nda꞉ kepete dolo dia꞉ ya꞉ka꞉na꞉ta꞉ kota꞉ ika꞉ sedi tapao mani mea kepete dolo ma꞉nda꞉ a̱i̱ hamba꞉pa꞉peke. \v 37 Pa ekipeke. I̱ma꞉ iki pa꞉ta꞉ ota꞉ alome. Mo hande Baiboloma꞉ lao witolota꞉ Ikana꞉ma꞉ ipikita꞉ mo pi ula꞉eki yambeleme haliweki ame̱le̱ mandakena꞉ apa꞉tao yata꞉pilimikie la꞉la꞉ ekita꞉ I̱na꞉ ota꞉ peneme yaena꞉e. Pa ekipeke. Mo hande I̱na꞉ lao wiekeeki paeyaota꞉ ameta꞉ ota꞉ peneme yao ipula꞉me leekeme. \v 38 Mo disaipolo haliwekima꞉ alota꞉ Tekehalio. Handa꞉e. Kepete dolo yaapo do handa꞉e lemekeme. Yesuma꞉ alota꞉ Kotota꞉ ana꞉e leekeme. \s1 Yesuma꞉ Olipi Potena꞉ pita꞉ yeni piekeeki \r (Ma꞉tiu 26꞉36-46, Maka 14꞉32-42) \p \v 39 Yesuta꞉ ipika꞉ pea꞉tiki pu hayeke tupa꞉ mo da teke mina꞉pa꞉lao mo Olipi Potena꞉ ipika꞉ disaipolo haliweki ame̱le̱ peekeme. \v 40 Koto alena꞉ opolo a꞉pa ipikana꞉ma꞉ mo disaipolo haliweki pa꞉ta꞉ alota꞉ La handa꞉la꞉ ekima꞉ iki mea lopaama꞉na꞉ yeni wopu pia꞉pa꞉peke. \v 41 Koto laa Yesuta꞉ iki mina꞉pa꞉lao mo toopi baasa꞉ tupa꞉ leke mopate pua tumiki yotuao pita꞉ yeni piekeme. \v 42 Ipikana꞉ma꞉ alota꞉ Apa꞉o. Ana꞉ pia꞉ka꞉na꞉ta꞉ do I̱ pa꞉ta꞉ ipula꞉ kapo I̱ pa꞉ta꞉ na epena꞉ lapeke. Kutu pea꞉peke ya꞉la꞉pate yaka hone pa꞉la꞉eki dia꞉me. Naka꞉ hone pa꞉la꞉ ekina꞉ homeke pina꞉e leekeme. \p \v 43 Oli ya nanema꞉ hayeke enisolo homeke opolo a꞉pa Yesu honkopu haleekeme. \v 44 Kutupa pukima꞉ ka꞉nda꞉ tieke pieketa꞉ Yesuma꞉ ota꞉ anekema꞉ yeni piekeme. Kutu pieke ekima꞉ a꞉ka꞉li tieketa꞉ wema꞉ handekeeki oni kenkena꞉ lopeekeme. \p \v 45 Oni yeni pu pitieke alena꞉ tialiaota꞉ mo ipika꞉ disaipolo haliweki puki tandama꞉ kone soka꞉la꞉ pitolo hata꞉ u pa꞉liake wimikieki pua handa꞉ wiekeme. \v 46 Kutupa mo haliweki pa꞉ta꞉ alota꞉ Ekipeke u pa꞉liake wilimipe. Tiao. La handa꞉la꞉ ekima꞉ iki mea lopaama꞉na꞉ yeni wopu pu hapa꞉peke leekeme. \s1 Yesu minimikieki \r (Ma꞉tiu 26꞉47-56, Maka 14꞉43-50, Dioni 18꞉3-11) \p \v 47 Koto kone Yesuma꞉ koto pi alo haena꞉ hande disaipolo hali ma꞉nda꞉ Diudasima꞉ mo haliweki wopu hatuku Yesu hayeke alena꞉ opolo epemekeme. Diudasima꞉ta꞉ Yesu nunu puluekema꞉ teke pa꞉ta꞉ leke peekeme. \v 48 Kutu piekepate Yesuma꞉ alota꞉ Diudasio. Mo Wanda꞉halina꞉ Eiyeke lina꞉ hala꞉ monealuekema꞉ta꞉ nunu pitele ekima꞉ walelepe leekeme. \p \v 49 Yesu ame̱le̱ haemeke disaipolo haliwekima꞉ mo pulu piekeeki hando hao alota꞉ Tekehalio. Nika꞉ kepete doloma꞉ liomonope lemekeme. \v 50 Koto kone mo hande disaipolo hali ma꞉nda꞉ma꞉ mo kepete doloma꞉ mo yeni peao hayeke teke halina꞉ e pokao hayeke halina꞉ popeke nane katake tunkulu poka lopaeyekeme. \v 51 Kutu piekepate Yesuma꞉ alota꞉ Do hauta꞉ ana꞉ma laata꞉ mo halina꞉ katake watao paa epeaeyekeme. \p \v 52 Kutupa Yesuma꞉ mo yeni peao hayeke teke haliweki make mo tembolo handeteke haemeke you haliweki make tondiki haliweki ipiki minuluekema꞉ epemeke haliweki pa꞉ta꞉ alota꞉ Ika꞉ honema꞉ta꞉ I̱ta꞉ a꞉nda꞉ kini pitolo hali patema꞉ a꞉nda꞉ pita꞉la꞉ kepete make ba̱i̱ make miniki a꞉pa pimipe. \v 53 I̱ta꞉ nate wopu oni tembolo da tukiki pa꞉ta꞉ iki ame̱le̱ haowa꞉pate ikana꞉ma꞉ I̱ da꞉ka꞉pa꞉ minuluekema꞉ na taapememe. Koto pa꞉la꞉pate do timbata꞉ naka꞉ natee. Mo hande timba꞉ leke ekina꞉ honkopuma꞉ handeteke halo pa꞉la꞉ natee leekeme. \s1 Pidama꞉ Yesuta꞉ I̱ na handolome leekeeki \r (Ma꞉tiu 26꞉57-58,69-75, Maka 14꞉53-54,66-72, Dioni 18꞉12-18,25-27) \p \v 54 Mo haliwekima꞉ Yesu mina mo yeni peao hayeke teke halina꞉ da nane hatuku mea pemekeme. Kutupa Pidata꞉ mopate leke hata꞉ telia꞉ mea peekeme. \v 55 Mo da hama tukikina꞉ta꞉ ti yankemekeme. Kutupa Pidata꞉ mo tina꞉ pitu dupaemeke wanda꞉hali ame̱le̱ apa꞉taeyekeme. \v 56 Koto pitina꞉ta꞉ mo e pokao hayeke wandiki ma꞉nda꞉ma꞉ Pida mo tina꞉ pitiekeeki handaata꞉ Pida handake witolo hata꞉ alota꞉ Do hali make Yesu yaapo haya꞉me leekeme. \p \v 57 Koto leekepate Pidama꞉ Dia꞉me laa honi mea baaso alota꞉ Wanda꞉o. Ipikita꞉ I̱ na handolome leekeme. \v 58 Pa hosiki siki hao hao pea hali ma꞉nda꞉ma꞉ Pida handa꞉ u haota꞉. Neke make ipika꞉ tapake lataa leekeme. Koto leekepate Pidama꞉ hombo peaaso alota꞉ Someo I̱ dia꞉me leekeme. \v 59 Kutupa nate leke homeke a꞉nda꞉ paeyeketa꞉ hali ma꞉nda꞉ma꞉ ombu honkopu hao ma̱leke litolo alota꞉ Ala꞉ta꞉ ma꞉nda꞉ma꞉ na a꞉mbala꞉me. Do halita꞉ Yesu ame̱le̱ haya꞉me. Pa ekipeke ipiki make Ka꞉lili hali yekeme. \v 60 Koto leeke handaa Pidama꞉ hombo peaaso alota꞉ Someo. Nakana꞉ma꞉ koto ale ekita꞉ I̱ mata꞉la꞉me leekeme. Kutupa koto tomona꞉ kone pi pa alo haena꞉ mo koka꞉la꞉ma꞉ tiao e̱ leekeme. \v 61 Koto kone mo Tekehalima꞉ la꞉ka꞉la꞉ moneao Pida handake wiekeme. Kutu pieke Pidama꞉ta꞉ hande Tekehalina꞉ pimanu dupa lea꞉me laa niminaeyekeme. Mo koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ titina꞉ amba꞉la hoto tepo ya biki a꞉mbao lo hoeyaasota꞉ I̱ na handolome laa lelipikie leekeeki hone wiekeme. \v 62 Koto ekina꞉ Pida hama opolu bao ota꞉ puki teto tiekema꞉ homolo hata꞉ ka꞉pa꞉puki yoka e̱ tieke leekeme. \s1 Yesuta꞉ kitata pea yombua baemekeeki \r (Ma꞉tiu 26꞉67-68, Maka 14꞉65) \p \v 63 Mo hande Yesu handeteke haemeke haliwekima꞉ta꞉ Yesu kitata pea yombua baemekeme. \v 64 Kutupa make mo haliwekima꞉ Yesuna꞉ leke popeleke a꞉mbao lota꞉ pitolo alota꞉ Neke lia꞉ halina꞉ biki lakie lemekeme. \v 65 Kutupa make Yesu yaala꞉meake pimanu wotu lemekeme. \s1 Yesuta꞉ mo Ka̱le̱sete pa꞉ta꞉ hatuku pemekeeki \r (Ma꞉tiu 26꞉59-66, Maka 14꞉55-64, Dioni 18꞉19-24) \p \v 66 Da kelepeeketa꞉ mo Diu haliwekina꞉ ka̱le̱sete mombuluekema꞉ mo tondiki haliweki make yeni peao haemeke teke haliweki make Lo Pi walo haemeke haliweki paeyao mombololo hata꞉ Yesu hatuku epemekeme. \v 67 Ikana꞉ma꞉ alota꞉ Niki lakie. Neketa꞉ hande Ketiso ya꞉ka꞉ta꞉pe lemekeme. Kutupa Yesuma꞉ hombo peaaso alota꞉ I̱ma꞉ iki pa꞉ta꞉ la kua꞉ka꞉na꞉ta꞉ ikana꞉ma꞉ I̱ hone na tulalimikie. \v 68 Kutupa I̱ma꞉ iki lota꞉ pita꞉la꞉eki ma꞉nda꞉ pua꞉ka꞉na꞉ta꞉ ikana꞉ma꞉ na yoka la kilimikie. \v 69 Koto pa꞉la꞉pate ame do kini pea puaata꞉ hande Wanda꞉halina꞉ Eiyeketa꞉ oli wele wotu piki Koda꞉na꞉ popeke nane kikina꞉ pua pitu halieke leekeme. \p \v 70 Mo hali paeyaoma꞉ alota꞉ Kota꞉ neketa꞉ Koda꞉na꞉ Eiyeke ya꞉ka꞉ta꞉pe laa lota꞉ pimikime. Yesuma꞉ hombo peaaso alota꞉ Ika꞉ kone I̱e laata꞉ koto alemetaa leekeme. \p \v 71 Kutupa ikana꞉ma꞉ alota꞉ Wekitisimanu weiya꞉peke na ya꞉la꞉me. Nika꞉ kone ipika꞉ pi koto opuma꞉taa lemekeme. \c 23 \s1 Yesuta꞉ Pailedi pa꞉ta꞉ hatuku pemekeeki \r (Ma꞉tiu 27꞉1-2,11-14, Maka 15꞉1-5, Dioni 18꞉28-38) \p \v 1 Mo hande tapake paeyao tiao Yesuta꞉ mo Pailedi pa꞉ta꞉ hatuku puaata꞉ \v 2 ipiki ma̱leke litolo alota꞉ Nikana꞉ma꞉ta꞉ do halita꞉ nika꞉ wanda꞉hali hatuku pu hoeyaaso hata꞉ mo wanda꞉hali pa꞉ta꞉ mo Sisana꞉ dakisi mani na hala꞉pa꞉pe laata꞉ ipikita꞉ ipika꞉ kone Ketiso laa Kini hali halome la ala꞉me lemekeme. \v 3 Mo Pailedima꞉ Yesu pa꞉ta꞉ alota꞉ Neketa꞉ Diu wanda꞉halina꞉ kini hali halepe leekeme. Yesuma꞉ Pailedina꞉ pi hombo peaaso alota꞉ Koto aletaa leekeme. \p \v 4 Kutupa Pailedima꞉ mo yeni peao haemeke teke haliweki pa꞉ta꞉ make mo mombelemeke wanda꞉hali pa꞉ta꞉ make alota꞉ I̱ma꞉ta꞉ do hali hoeyaapeke pota꞉ ma꞉nda꞉ na handa꞉ witolome leekeme. \v 5 Koto leekepate mo wanda꞉halima꞉ta꞉ ota꞉ honkopu hao hata꞉ alota꞉ Ta hali ipika꞉ wala꞉la꞉ pima꞉ta꞉ mo Diudia da yu paeyao pa꞉ta꞉ hala꞉ wanda꞉hali hoke hone mea wiatia pomina꞉la꞉me. Ipikana꞉ma꞉ta꞉ mo Ka꞉lili nane kini pea a꞉paata꞉ ameta꞉ do opolo a꞉pa꞉la꞉ handa꞉e lemekeme. \s1 Yesuta꞉ Hetodi pa꞉ta꞉ tapaeyekeeki \p \v 6 Pailedima꞉ koto lemekeeki opua mo wanda꞉hali pa꞉ta꞉ lota꞉ pitolo alota꞉ Do halita꞉ Ka꞉lili hali ya꞉ka꞉ta꞉pe leekeme. \v 7 Koto laata꞉ Pailedima꞉ Yesuta꞉ Hetodima꞉ handeteke hayeke da yu nane yama꞉ a꞉pa pia꞉ka꞉ta꞉me laa handa꞉ wiaata꞉ Yesuta꞉ Hetodi pa꞉ta꞉ tapaeyekeme. Ekipeke koto natena꞉ta꞉ Hetodita꞉ Diutuseleme da nane a꞉pa hayeke handa piekeme. \v 8 Hetodima꞉ta꞉ Yesu hando haota꞉ ta꞉na꞉ tiekema꞉ homeekeme. Pa ekipeke. Hetodima꞉ta꞉ mo Yesuma꞉ pieke ekimanu opu haota꞉ Yesu handulueke laa nate hokuluna꞉ yu wia hatia peekeme. Ipikana꞉ma꞉ta꞉ Yesuma꞉ na handeke hau ma꞉nda꞉ pina꞉e hone wia hayekeme. \p \v 9 Koto ekina꞉ Hetodima꞉ Yesu pa꞉ta꞉ anemone lota꞉ pita꞉la꞉ ekimanu wotu lota꞉ piekepate Yesuma꞉ hombo peaasa꞉eki ma꞉nda꞉ ota꞉ na piekeme. \v 10 Kutupa mo yeni peao haemeke you haliweki make mo Lo Pi walo haemeke haliweki paeyao teke pa꞉ta꞉ leke a꞉pa honkopu tieke haaso hata꞉ Yesu pa꞉ta꞉ ma̱leke limikime. \v 11 Kutupa Hetodi make ipika꞉ a꞉ndeli minimiki haliweki ame̱le̱ Yesu eto eto lao pa ale au laemekeme. Kutupa ota꞉ epeke au leke dau hokulu mea yamao paa Pailedi pa꞉ta꞉ tapaa moneayekeme. \v 12 Amba꞉ta꞉ Hetodi pita꞉ Pailedi yaapota꞉ a꞉nda꞉ tunkula alu pea haepekepate koto natena꞉ta꞉ ta꞉ma꞉ni pipikime. \s1 Pailedima꞉ Yesu lina꞉ leekeeki \r (Ma꞉tiu 27꞉15-26, Maka 15꞉6-15, Dioni 18꞉39—19꞉16) \p \v 13 Pailedima꞉ mo yeni peao haemeke you haliwekima꞉ make tondiki haliwekima꞉ make mo wanda꞉hali \v 14 paeyao pa꞉ta꞉ alota꞉ Ikana꞉ma꞉ I̱ pa꞉ta꞉ do hali hatuku ipuluta꞉ ipikana꞉ma꞉ wanda꞉hali hatuku pu hoeyaasa꞉me lemepate ameta꞉ I̱ma꞉ ipikita꞉ ika꞉ leke popelekena꞉ teke weitolopate ipikana꞉ma꞉ mo mandane pimanu yamba꞉la꞉me laa ma̱leke limipate homeke a꞉nda꞉ yamba꞉la꞉la꞉eki na handolome. \v 15 Kutupa Hetodima꞉ make do halima꞉ pu hoeyaala꞉ hau homeke a꞉nda꞉ na handolo hata꞉ niki teke pa꞉ta꞉ pa do tapaala꞉ handa꞉e. Ipiki lia homamonota꞉ hoke hau ma꞉nda꞉ na pa꞉la꞉me. \v 16 Koto ekina꞉ta꞉ I̱ma꞉ ipikita꞉ dopitama꞉ yombina꞉ laa pao pena꞉ lolueke leekeme. \v 17 [] \p \v 18 Mo mombelemeke wanda꞉halima꞉ e̱ wi tieke alo hata꞉ alota꞉ Yesuta꞉ homena꞉ liae. Mo Batabasita꞉ pena꞉ tapawae lemekeme. \v 19 Koto Batabasita꞉ dipula pitieke ekita꞉ ipikana꞉ma꞉ mo daoni pa꞉ta꞉ kapomani ame̱le̱ a꞉nda꞉ lia make mandane wanda꞉hali lieke ekina꞉ piekeme. \v 20 Pailedina꞉ honema꞉ta꞉ Yesu tapaaluekema꞉ yeke mo wanda꞉hali pa꞉ta꞉ paa opolo peekeme. \v 21 Kutu piekepate mo wanda꞉halima꞉ paa pi tanda pu alualu pitolo alota꞉ A꞉ka꞉tei wape piki tina꞉ homena꞉e. A꞉ka꞉tei wape piki tina꞉ homena꞉e lemekeme. \p \v 22 Pailedima꞉ paa hoto tepo peao alo alota꞉ Koto pa꞉la꞉pate ipikana꞉ma꞉ ekipiki pi ata꞉ka꞉ peala꞉pe. I̱ma꞉ta꞉ ipikana꞉ma꞉ homa꞉peke hau ma꞉nda꞉ na pa꞉la꞉ ekina꞉ ipikita꞉ pa dopitama꞉ yombina꞉ laa paa tapalueke leekeme. \v 23 Koto leekepate mo wanda꞉halima꞉ta꞉ poya꞉ tieke wotu alo hata꞉ Yesuta꞉ ota꞉ a꞉ka꞉tei wape piki tina꞉ endina꞉ laa lemeke e̱ wi ota꞉ yaeyekeme. \v 24 Koto ekina꞉ Pailedima꞉ Yesu homena꞉e lemekeeki telia piekeme. \p \v 25 Ipikana꞉ma꞉ mo wanda꞉halima꞉ pena꞉e lemeke halita꞉ pena꞉ tapaeyekeme. Mo hande kapomani pa꞉ta꞉ a꞉nda꞉ lia make mandane wanda꞉hali lieke some kone pena꞉ tapaeyekeme. Kutupa Yesuta꞉ mo wanda꞉halima꞉ ika꞉ hone pa꞉la꞉eki pina꞉yeke hala꞉ moneayekeme. \s1 Yesuta꞉ a꞉ka꞉tei wape piki tina꞉ ta mea endiao limikieki \r (Ma꞉tiu 27꞉32-44, Maka 15꞉21-32, Dioni 19꞉17-27) \p \v 26 Mo hande dolo miniki haemeke haliwekima꞉ta꞉ Yesu hatuku pulu haena꞉ta꞉ Saitini da hali ma꞉nda꞉ Saimono manda꞉hande pimikime. Ipikita꞉ mo kenke honiki nane hao oni daoni tieke aneke pa꞉ta꞉ opolo ipulu haena꞉ pimikime. Mo dolo miniki haemeke haliwekima꞉ta꞉ Saimono yola꞉ meata꞉ mo Yesuna꞉ a꞉ka꞉tei wape piki ti mea tiawao Yesuna꞉ hoki nane telia꞉ mea epena꞉ lemekeme. \p \v 27 Wanda꞉hali tiekema꞉ Yesu telia꞉ mea pemekeme. Koto wanda꞉hali ame̱le̱ta꞉ mandane wanda꞉ sunuta꞉ puki yoka hata꞉ Yesuna꞉ e̱ wopu lemekeme. \v 28 Koto ekina꞉ Yesuma꞉ la꞉ka꞉la꞉ moneaaso hata꞉ alota꞉ Diutuseleme da wanda꞉sunuo. I̱na꞉ e̱ na leketa꞉ ika꞉ kone make ika꞉ wekiwandikina꞉ e̱ lapa꞉peke. \v 29 Pa ekipeke mo wetepena꞉ ipula꞉ nate ma꞉nda꞉ nina꞉ta꞉ ikana꞉ma꞉ dupiki pi lelimikie. Mo kenohali wanda꞉weki make hololuku hake piki wanda꞉weki make andu liki na sinkipa꞉la꞉ wanda꞉weki pa꞉ta꞉ta꞉ ta꞉na꞉ma꞉ homelememe lelimikie. \v 30 Koto natena꞉ta꞉ wanda꞉halima꞉ oli potemanu pa꞉ta꞉ta꞉ Niki manda lopa꞉e laata꞉ mo yu elimanu pa꞉ta꞉ta꞉ Niki mea a꞉mbae lelimikie. \v 31 Pa ekipeke dupiki haumanu a꞉nda꞉ pilia꞉ta꞉ mo hande ti a꞉nda꞉ taniso̱ kiki pina꞉ pia꞉ka꞉na꞉ta꞉ kota꞉ hapina꞉ta꞉ eki pilia꞉pe leekeme. \p \v 32 Hali yaapo ma꞉nda꞉ ipilikita꞉ hoke hau pipiki some yaapo make Yesu ame̱le̱ mandakena꞉ lu endialuekema꞉ yeke hatuku pemekeme. \v 33 Kutupa mo hande haliwekita꞉ mo yueli ma꞉nda꞉ wiekeeki ipika꞉ bikita꞉ Hali You Holiki lemeke alena꞉ a꞉pa ikana꞉ma꞉ Yesu a꞉ka꞉tei wape piki tina꞉ lu endiaemekeme. Kutupa mo hande hoke hau pipiki some yaapo make homeke tupa꞉ lu endiaemekeme. Ma꞉nda꞉ta꞉ Yesuna꞉ popeke nane kikina꞉ endiao ma꞉nda꞉ta꞉ hoe nane kikina꞉ endiaemekeme. \v 34 Yesuma꞉ alota꞉ Apa꞉o. Do wanda꞉halima꞉ piteleme hauta꞉ iki hone na witolo pitelemema꞉ nakana꞉ma꞉ pa paeyawapeke leekeme. \p Kutupa mo dolo miniki haliwekima꞉ta꞉ Yesuna꞉ daumanu telipaaluekema꞉ kase tupa꞉ telepo laemekeme. \v 35 Mo wanda꞉halima꞉ handolo haena꞉ mo Diu wanda꞉halina꞉ you haliwekima꞉ Yesu kitaaso hata꞉ dupa lemekeme. Mandane wanda꞉halita꞉ pa꞉ta꞉la꞉tiki piekepate ipikita꞉ hande Koda꞉ma꞉ ma̱leke lila꞉ Ketiso haya꞉ka꞉na꞉ta꞉ kota꞉ ipika꞉ kone petelena꞉e lemekeme. \v 36 Mo a꞉ndeli dolo miniki haemeke haliwekima꞉ make Yesu makeaaso hata꞉ ipiki pa꞉ta꞉ a꞉pa hoke waini ikali halolo hata꞉ \v 37 alota꞉ Neketa꞉ hande Diu wanda꞉halina꞉ Kini hali ya꞉ka꞉na꞉ta꞉ kota꞉ naka꞉ kone pa꞉ta꞉la꞉e lemekeme. \v 38 Kutupa Yesuna꞉ amboke mandata꞉ dupa laemekeme. Dota꞉ Diu Wanda꞉halina꞉ Kinie Halie laa wape pea endiaemekeme. \p \v 39 Mo hande pi yambeleeke some ma꞉nda꞉ma꞉ tetopiki pimanu la꞉ moneaso alota꞉ Neketa꞉ hande Ketiso dia꞉ya꞉ka꞉ta꞉pe. Neke make diki make pa꞉ta꞉la꞉taa leekeme. \v 40 Koto leekepate mo hande pi yambeleeke some ma꞉nda꞉ma꞉ mo some kake nalo hata꞉ alota꞉ Kutupiki pi na lapee laata꞉ Neketa꞉ Koda꞉ paala꞉ na pa꞉la꞉pe. Neke make ipikana꞉ma꞉ mina꞉la꞉ tanda kone mineleme. \v 41 Dikita꞉ dika꞉ pupa꞉ ekina꞉ yenki ana꞉na꞉ minolopa꞉pate ipiki homeke hau ma꞉nda꞉ na pa꞉la꞉me laa \v 42 mo halima꞉ Yesu pa꞉ta꞉ alota꞉ Yesuo. Neke Kini hali ipilipi dina꞉ta꞉ I̱ hone wia꞉peke leekeme. \v 43 Kutupa Yesuma꞉ ipiki pa꞉ta꞉ alota꞉ I̱ma꞉ neke pa꞉ta꞉ ota꞉ pi la꞉ witolome. Ame do natena꞉ kone I̱ yaapo oli Pa꞉ta꞉daisi nane mandakena꞉ halupeke leekeme. \s1 Yesu ota꞉ homeekeeki \r (Ma꞉tiu 27꞉45-56, Maka 15꞉33-41, Dioni 19꞉28-30) \p \v 44 Nate you tikeke nate nina꞉ta꞉ hande nate tala꞉eki a꞉mbaota꞉ timba꞉ tiekema꞉ da yu honiki paeyao tumbaota꞉ nate leke tepo nina꞉ta꞉ mo pa̱a̱ paa piekeme. \v 45 Kutupa mo hande tembolo da pa꞉ta꞉ endiaemeke dauta꞉ tekilipualu pea yaapo wiekeme. \p \v 46 Yesuma꞉ anekema꞉ e̱ wi alo alota꞉ Apa꞉o. Yaka temokota꞉ naka꞉ kikina꞉ koto witolo handa꞉e laata꞉ ota꞉ homeekeme. \v 47 Mo hande ami haliwekina꞉ you halima꞉ mo piekeeki hando haota꞉ Koda꞉na꞉ biki mea miniliaaso hata꞉ alota꞉ Ipikita꞉ ota꞉ epeke hali yekeme leekeme. \p \v 48 Kutupa mo hande hau handuluekema꞉ mombelemeke wanda꞉hali paeyaoma꞉ta꞉ mo piekeeki hando haota꞉ a꞉ta꞉ma꞉ homolo hata꞉ ika꞉ hakoko lutia pulu hata꞉ pao da la꞉ka꞉la pemekeme. \p \v 49 Yesu ota꞉ handaa hone wimiki wanda꞉hali make ipiki Ka꞉lili nane kini pea telia꞉ mea epemeke wanda꞉ sunuma꞉ make mo pate leke hata꞉ do hau paeyao handemekeme. \s1 Yesu toko mea hoimikieki \r (Ma꞉tiu 27꞉57-61, Maka 15꞉42-47, Dioni 19꞉38-42) \p \v 50-51 Mo Diudia nane wieke daoni ma꞉nda꞉ A꞉ta꞉matia da hali Diosepe hayekeme. Ipikita꞉ ota꞉ epeke tiki tiki hau pu hake hali hao hata꞉ Koda꞉na꞉ Kilu Tombuao Hala꞉eki ipula꞉eki yu wia hao hayekeme. Ipikita꞉ mo Ka̱le̱sete haliweki ma꞉nda꞉ hondo hayekepate kone ipikana꞉ma꞉ mo haliweki ame̱le̱ apa꞉tao pimanu make hau ma꞉nda꞉ make na piekeme. \v 52 Ipikana꞉ma꞉ mo Pailedina꞉ leke popelekena꞉ pua Yesuna꞉ toko honke leekeme. \v 53 Kutupa ipikana꞉ma꞉ Yesuna꞉ toko hondaata꞉ hakepiki dauma꞉ tonkao mea tia puaata꞉ toopi anekema꞉ peiyekeeki awa wimiki tikene dama꞉ handeke ale pa꞉ta꞉ lapa꞉ piekeme. Mo koto lapa꞉ pa꞉ta꞉ta꞉ ota꞉ ma꞉nda꞉ make na hoimikieki yekeme. \v 54 Mo nateta꞉ Palaide yaalo mo hande Hoto Pila꞉ Nate amba꞉ kini puluekema꞉ pitiekeme. \p \v 55 Kutupa mo hande Ka꞉lili kini pea Yesu telia꞉ mea epemeke wanda꞉ sunuma꞉ta꞉ Diosepe ame̱le̱ pua mo Yesu lapa꞉ piekeeki handemekeme. \v 56 Kutupa paa la꞉ka꞉la da puaata꞉ mo Yesuna꞉ lokena꞉ holo pimiki totopo piki honkumanu amu pimikime. Kutupata꞉ mo Lo Pima꞉ leeke tupa꞉ hande hoto pila꞉ natena꞉ yaalo hoto pitimikime. \c 24 \s1 Yesu paa tiaeyekeeki \r (Ma꞉tiu 28꞉1-10, Maka 16꞉1-8, Dioni 20꞉1-10) \p \v 1 Sande da panake ka꞉la꞉ polo nate epolo haena꞉ta꞉ mo wanda꞉ sunuma꞉ Yesuna꞉ lapa꞉ nane mo hande tiki tiki yaemeke totopo wopu piki honkumanu miniki pemekeme. \v 2 Mo alena꞉ opolo pemekepate mo hande pota꞉ pokeeke toopi tieketa꞉ pete pete yao wiekeeki handaata꞉ \v 3 honda꞉ pambemekepate mo Tekehali Yesuna꞉ loketa꞉ na wiekeme. \v 4 Mo wanda꞉ sunuta꞉ koto pa꞉ta꞉ hata꞉ hone ti yokolo haena꞉ koto kone hake pupapeke leke yala꞉ yala꞉ piki aka꞉ yama꞉ mea hali yaapo a꞉pa haepekeme. \v 5 Koto ekina꞉ ota꞉ paala꞉ tiekema꞉ homolo hata꞉ mo wanda꞉ sunuta꞉ kenke nane you mina꞉niao haena꞉ mo hali yaapoma꞉ alota꞉ Ekipeke mo amba꞉ da꞉ta hala꞉ halita꞉ mo hali toko u hala꞉ alena꞉ weitelemepe. \v 6 Ipikita꞉ do pa꞉ta꞉ na ula꞉me. Ipikita꞉ amba꞉ tiao pa꞉la꞉me. Mo hande ipiki Ka꞉lili hata꞉ lea꞉eki manuta꞉ niminaasemepe. \v 7 Dupa lea꞉me. Mo Wanda꞉halina꞉ Eiyeketa꞉ mo hoke hau pu haleme haliwekina꞉ kikina꞉ hala꞉ moneaota꞉ a꞉ka꞉tei wape piki tina꞉ tame mea endiao liaata꞉ kutupa hoto tepo peao natena꞉ta꞉ paa tialieke laa lea꞉me lepekeme. \p \v 8 Kutupa mo wanda꞉wekima꞉ Yesuna꞉ pi leekeeki niminaota꞉ \v 9 mo lapa꞉ mina꞉pa꞉lao puaata꞉ hande handemekeeki paeyao mo 11 disaipolo haliweki make mandane disaipolo wanda꞉hali paeyao pa꞉ta꞉ lemekeme. \v 10 Koto wanda꞉ sunuta꞉ Meti Ma꞉kadala make Dioa꞉na make Dia꞉mesina꞉ inkiki Meti make iki ame̱le̱ haemeke mandane wanda꞉ sunuma꞉ mo pieke haumanu mo aposolo haliweki pa꞉ta꞉ la halemekeme. \v 11 Kutu lemekepate mo aposolo haliwekima꞉ta꞉ mo wanda꞉ sunuma꞉ lemeke pita꞉ apa꞉ta apa꞉ta piki pi alememe laa hone na wimikime. \v 12 Kutu piekepate Pidama꞉ta꞉ mo lapa꞉ handulueke alo pototo laa mo toopi ka꞉ka꞉na꞉ pa꞉ta꞉ pua panda꞉ puniao ala꞉ta꞉ ma꞉nda꞉ na handeekepate mo tonkaeyeke aka꞉ hake piki homeke handeekeme. Kutupa moeki handolo hata꞉ penkilipa꞉tia pominolo hata꞉ paa la꞉ka꞉la da peekeme. \s1 Yesuta꞉ mo Emeiase pota꞉na꞉ handepekeeki \r (Maka 16꞉12-13) \p \v 13 Koto homeke natena꞉ kone Yesu telia꞉ mea pomu haepeke hali yaapo ma꞉nda꞉ta꞉ oni Emeiase leeke da siki ma꞉nda꞉ pa꞉ta꞉ polueke alo pepekeme. Mo da sikita꞉ mo Diutuseleme daoni mina꞉pa꞉lao 3 aowa tupa꞉ opolo pula꞉ da yekeme. \v 14 Kutupa mo hali yaapoma꞉ta꞉ hande piekeeki manuna꞉ ipilika꞉ ipilika꞉ kone pi hotipipikime. \v 15 Ipilikana꞉ma꞉ pi laa hotitia pulu haena꞉ta꞉ Yesuta꞉ ipiliki teke pa꞉ta꞉ leke pua mandakena꞉ pemekeme. \v 16 Ipilikana꞉ma꞉ ipikita꞉ handepepekepate Yesue laa na handa꞉ wipikime. \p \v 17 Yesuma꞉ mo hali yaapo pa꞉ta꞉ alota꞉ Koto pulu hata꞉ta꞉ ipilikana꞉ma꞉ta꞉ aleke pi hotia꞉lepepe leekeme. Mo hali yaapota꞉ a꞉ta꞉ piki leke popeleke hata꞉ poneke ale haepekeme. \v 18 Ma꞉nda꞉ hondo Keliopasi leeke halima꞉ ipiki pa꞉ta꞉ lota꞉ pitolo alota꞉ Mo Diutuseleme daoni pa꞉ta꞉ a꞉pa haleme kimisu wanda꞉hali ame̱le̱ta꞉ hande ambaneke numaneke pia꞉ hau manuta꞉ neke homeke na opelepe leekeme. \v 19 Yesuma꞉ alota꞉ Eki hau manupe leekeme. \p Kutupa mo hali yaapoma꞉ alota꞉ Mo hande Na꞉sa꞉tete hali Yesu pa꞉ta꞉ pia꞉ hau manuna꞉ lopa꞉me. Do halita꞉ potopede yaalo hata꞉ Koda꞉ma꞉ make wanda꞉hali paeyaoma꞉ make ipika꞉ pia꞉ hau manuma꞉ make leeke pimanu make honkopu wele pa꞉la꞉ halie lememe. \v 20 Kutupa nika꞉ yeni peao haleme you haliwekima꞉ make handeteke haleme haliwekima꞉ make ipikita꞉ a꞉ka꞉tei wape piki tina꞉ tame mea endiao lu homaena꞉ yeke hala꞉ moneaemekeme. \v 21 Kutupa nika꞉ honema꞉ta꞉ ipikana꞉ma꞉ta꞉ mo Isulai wanda꞉hali lombo tapaalo pa꞉la꞉ halie hone uma꞉me. Koto haumanu pa꞉la꞉ ekita꞉ ameta꞉ tepo peao natee. \v 22 Kutupata꞉ mandane nika꞉ tapake wanda꞉ sunuma꞉ niki penkilipaememe. Ikita꞉ da ka꞉la꞉paaso siki mo lapa꞉na꞉ pemekepate \v 23 ipika꞉ loke na handa꞉ wimikime. Mo wanda꞉weki paa la꞉ka꞉la a꞉pa alota꞉ U̱ leme leme leke enisolo manuma꞉ Yesuta꞉ tiao da꞉ta hala꞉me laa lemekeeki niki a꞉pa la kimime. \v 24 Koto lemeke nika꞉ mandane tapake pua mo lapa꞉ pemekepate pa mo hande wanda꞉wekima꞉ lemeke tupa꞉ kone pua handa alota꞉ Yesuta꞉ na handoma꞉me lememe lepekeme. \p \v 25 Kutupa Yesuma꞉ mo hali yaapo pa꞉ta꞉ alota꞉ Meimei liake some yaapoo. Mo hande potopede halima꞉ leeke pimanu homeke a꞉nda꞉ hone a̱i̱ na tulao pipika꞉ta꞉me. \v 26 Mo Ketisoma꞉ta꞉ titina꞉ amba꞉la tanda meaata꞉ wetepena꞉ oli ipika꞉ pa̱a̱ peaasa꞉eki pa꞉ta꞉ honda꞉ pambolota꞉ ana꞉ na pa꞉la꞉pe laa leekeme. \v 27 Kutupa Yesuma꞉ iki pa꞉ta꞉ mo Baibolo paeyaona꞉ ipika꞉ pi lao ula꞉eki paeyao la haleekeme. Ipikana꞉ma꞉ mo Mosesina꞉ buka manuna꞉ kini pea a꞉pa mo potopede manuma꞉ lao wieke ekimanu lo paeyaeyekeme. \p \v 28 Kutupata꞉ iki paeyao mo polo pimiki da siki teke pa꞉ta꞉ yeketa꞉ Yesuta꞉ mo pateleke peke nono piekeme. \v 29 Pate mo hali yaapoma꞉ sa꞉sa꞉ pitolo hata꞉ alota꞉ Timba꞉ amba꞉ ala꞉me. Diki ame̱le̱ hae lepekeme. Koto lepeke Yesuta꞉ mo hali yaapo ame̱le̱ haluekema꞉ da peekeme. \v 30 Kutupa mo hali yaapo ame̱le̱ ne nolueke alo pitiniaota꞉ Yesuma꞉ mo betedi mea keiyae laata꞉ pindipa mo hali yaapo haleekeme. \v 31 Kutu pitolo pitina꞉ mo hali yaapoma꞉ ipilika꞉ hone lombolo Yesu ya꞉ka꞉ta꞉me laa handa꞉ wipiki dina꞉ kone Yesuta꞉ koto pa꞉ta꞉ pitiki nono pea alu paeyekeme. \v 32 Mo hali yaapoma꞉ ipilika꞉ kone alota꞉ Mo hande pota꞉na꞉ hande Baibolona꞉ la꞉la꞉ ekimanu laa kieketa꞉ dika꞉ tukiki naneta꞉ ti uleke leke na teekea lepekeme. \p \v 33 Kutupa koto kone mo hali yaapota꞉ tiao paa Diutuseleme nane pua mo 11 disaipolo haliweki make mandane disaipolo haliweki ame̱le̱ momba꞉la pita꞉ \v 34 hande Tekehalita꞉ ota꞉ da꞉ta hata꞉ Saimono pa꞉ta꞉ ipiki peneme yaala꞉me laa hotiolo pitimiki ale pa꞉ta꞉ opolo pepekeme. \v 35 Kutupa ipilikana꞉ma꞉ mo hande pota꞉na꞉ pieke ekimanu make Yesuma꞉ betedi pindipina꞉ handa꞉peke ekimanu make mo wanda꞉hali pa꞉ta꞉ la halepekeme. \s1 Disaipolo haliweki paeyaoma꞉ Yesu handemekeeki \r (Ma꞉tiu 28꞉16-20, Maka 16꞉14-18, Dioni 20꞉19-23, Aposolo 1꞉6-8) \p \v 36 Mo hande hali yaapoma꞉ moeki alo haena꞉ta꞉ koto kone mo Tekehali ipika꞉ kone iki ame̱le̱ mandakena꞉ peneme yao hata꞉ alota꞉ Puki lopaasa꞉eki iki pa꞉ta꞉ wina꞉e leekeme. \v 37 Mo wanda꞉hali paeyao pututu tiekema꞉ homolo hata꞉ ika꞉ honema꞉ta꞉ temoko handoloma꞉me hone wimikime. \v 38 Pate Yesuma꞉ iki pa꞉ta꞉ alota꞉ Ekipeke paala꞉ma꞉ homelemepe. Ika꞉ hone pa꞉ta꞉ta꞉ hone yaapo yaapo ekipeke witelemepe. \v 39 Yaka kiki anke handolota꞉ ota꞉ I̱ ya꞉ka꞉ta꞉me lapa꞉peke. I̱ wataemeka꞉na꞉ta꞉ ota꞉ I̱e hone wilimikie. Watae. I̱ta꞉ temoko yoluta꞉ loke make holiki make na halo pua꞉pate ikana꞉ma꞉ta꞉ I̱ta꞉ holiki hao loke haloeki handa꞉pe laa leekeme. \v 40 Yesuma꞉ doeki laata꞉ ipika꞉ kiki anke waleekeme. \v 41 Kutu piekepate ikana꞉ma꞉ ta꞉na꞉ tiekema꞉ tumbitolo hata꞉ hone ti yokolo hata꞉ hone na tulaemeke handaa Yesuma꞉ iki pa꞉ta꞉ alota꞉ Napeke ale ma꞉nda꞉ wia pilimipe leekeme. \v 42 Koto leeke ikana꞉ma꞉ ta꞉peli teekeeki siki halemeke handaa \v 43 mea ika꞉ leke popelekena꞉ neekeme. \p \v 44 Kutupa Yesuma꞉ iki pa꞉ta꞉ alota꞉ Do hau manuta꞉ hande I̱ ame̱le̱ haeme dina꞉ la kua꞉ ekimanue. Mo hande Mosesina꞉ Lo Pi wape pea ula꞉ ekina꞉ make hande potopede haliwekima꞉ wape pea ula꞉ ekina꞉ make hande Emeli bukana꞉ wape pea ula꞉ ekina꞉ make I̱na꞉ lao ula꞉eki manuta꞉ ota꞉ yaapeke ya꞉la꞉me leekeme. \v 45 Kutupa Yesuma꞉ mo wanda꞉halina꞉ honemanu lumbao mo Baiboloma꞉ leeke ekimanu opina꞉ laa \v 46 iki pa꞉ta꞉ alota꞉ Dupa wape pea ula꞉me. Hande Ketisota꞉ tanda amba꞉la ota꞉ mea homaata꞉ hoto tepo peaasota꞉ ota꞉ paa tialieke laa wape pa꞉la꞉me. Kutupa make \v 47 ipika꞉ bikina꞉ mo hoke hauna꞉ hone la꞉ka꞉la꞉la꞉eki make pa paeyaasa꞉eki make mo Diutuseleme da pa꞉ta꞉ kini pea pua mo kenke honiki paeyao pa꞉ta꞉ haleme wanda꞉hali pa꞉ta꞉ ota꞉ walotia pua꞉pa꞉peke ya꞉la꞉me. \v 48 Ikita꞉ do hau manuna꞉ wekitisie. \v 49 Kutupa I̱ma꞉ta꞉ yaka Apa꞉ma꞉ amba꞉ kone la꞉ ula꞉ ale iki pa꞉ta꞉ tapalueke. Pate ikana꞉ma꞉ta꞉ do daoni tieke pa꞉ta꞉ mo hande wele pa꞉la꞉eki tieke oli ya nane iki pa꞉ta꞉ epena꞉ yu wia pita꞉pa꞉peke ya꞉la꞉me leekeme. \s1 Yesu oli ya nane mea peekeeki \r (Maka 16꞉19-20, Aposolo 1꞉9-11) \p \v 50 Kutupa Yesuma꞉ mo wanda꞉hali hatuku mo daoni tieke mina꞉pa꞉lao mo Bedani puaata꞉ ipika꞉ kiki mina꞉liao mo wanda꞉hali epeaeyekeme. \v 51 Kutu pitolo haena꞉ta꞉ Yesuta꞉ iki mina꞉pa꞉lao oli hepeni nane hatuku peekeme. \v 52 Mo wanda꞉halima꞉ Yesuna꞉ biki miniliaaso hata꞉ ta꞉na꞉ tiekema꞉ tumbitolo hata꞉ mo Diutuseleme da nane la꞉ka꞉la paa pemekeme. \v 53 Kutupa ikana꞉ma꞉ mo tembolo da pa꞉ta꞉ Koda꞉ pa꞉ta꞉ keiyae alo hata꞉ ika꞉ nate lekemanu paeyaemekeme.