\id JHN - Sembeleke 2 Samberigi PNG John 01 23/2/91 Macnaughtan 
\h DIONI 
\toc1 Dionima꞉ wape pieke Pi Seliapoe 
\toc2 Dioni 
\toc3 Dioni 
\mt1 Dionima꞉ wape pieke Pi Seliapoe  
\c 1  
\s1 Deto hala꞉ Pi  
\p
\v 1 Amba꞉ titina꞉ do kenke ya yaapo a̱i̱ na wepia wina꞉ leeke pita꞉ta꞉ mo hande Pita꞉ hao hayekeme. Ipikita꞉ Koda꞉ yaapo hao hayekepate Koda꞉ hayeke tupa꞉ kone ipiki make hayekeme.  
\v 2 Ipikita꞉ mo kini pieke pa꞉ta꞉ kone Koda꞉ yaapo mandakena꞉ hao hayekeme.  
\v 3 Koda꞉ma꞉ leeke handaata꞉ mo hande Pima꞉ta꞉ ala꞉ta꞉ ala꞉ta꞉ paeyao wepia wina꞉ leekepate aleta꞉ ma꞉nda꞉siki kone Koda꞉ma꞉ ipika꞉ honumake hata꞉ na wepia wina꞉ leekeme.  
\v 4 Mo hande Pi pa꞉ta꞉ta꞉ da꞉ta꞉la꞉eki pitiekeme. Kutupa mo da꞉ta꞉la꞉ ekita꞉ kenke wanda꞉halina꞉ pa̱a̱ peaasa꞉eki pitiekeme.  
\v 5 Mo hande pa̱a̱ peaasa꞉ ekima꞉ta꞉ mo timba꞉ la꞉pa pula꞉ pa꞉ta꞉ pa̱a̱ peaasa꞉pate kone mo hande timba꞉ la꞉la꞉ ekima꞉ta꞉ pa̱a̱ pa꞉la꞉eki na honiao hala꞉me.   
\p
\v 6 Koda꞉ma꞉ ipika꞉ pi mea epena꞉ tapaeyeke halita꞉ Dioni tapaeyekeme.  
\v 7 Kutupa Dionima꞉ta꞉ mo hande pa̱a̱ pa꞉la꞉ ekita꞉ wanda꞉hali waluekema꞉ epeekeme. Kutupa wanda꞉hali paeyaoma꞉ ipikana꞉ma꞉ mea epeeke pi opua pi mina꞉yeke handa loluekema꞉ epeekeme.  
\v 8 Dionima꞉ta꞉ mo hande pa̱a̱ na peaeyekepate ipikana꞉ma꞉ta꞉ mo hande pa̱a̱ pa꞉la꞉ ekita꞉ wanda꞉hali pa꞉ta꞉ waluekema꞉ epeekeme.  
\v 9 Mo hande pa̱a̱ pa꞉la꞉ ekita꞉ ota꞉eki yaalo hata꞉ kenke paeyao pa꞉ta꞉ a꞉paata꞉ wanda꞉hali paeyaona꞉ pa̱a̱ peao hala꞉me.   
\p
\v 10 Kutupa mo hande Pita꞉ kenkena꞉ a꞉pa hayekeme. Koda꞉ma꞉ leeke handa ala꞉ta꞉ ala꞉ta꞉ paeyao ipikana꞉ma꞉ wepia wina꞉ leekepate kenke wanda꞉halima꞉ta꞉ ipiki hone na wimikime.  
\v 11 Ipikita꞉ ipika꞉ kenke teke nane epeekepate kone ipika꞉ wanda꞉halima꞉ ipiki na handa꞉ mimikime.  
\v 12 Kutu pimikipate mandane wanda꞉halima꞉ta꞉ ipiki handa꞉ meata꞉ ipiki pa꞉ta꞉ hone tulao hatiki pimikime. Kutu pimiki handaata꞉ koto wanda꞉halita꞉ Koda꞉na꞉ weki wandiki haena꞉ leekeme.  
\v 13 Koto ekina꞉ Koda꞉ma꞉ mo wanda꞉halita꞉ ipika꞉ weki wandiki haena꞉ leekepate kenke halima꞉ mendiaasa꞉ tupa꞉ na mendiaeyekeme. Koda꞉ kone ika꞉ apa꞉ hayekeme.   
\p
\v 14 Mo hande Pita꞉ hali au la a꞉pa niki ame̱le̱ haya꞉me. Ipika꞉ pa̱a̱ pu hala꞉eki pa a꞉ta꞉ma꞉ homa꞉la꞉eki make ota꞉ hau pita꞉la꞉eki make tumba pitia꞉eki nikana꞉ma꞉ handoma꞉me. Koto hande pa̱a̱ pu hala꞉ ekita꞉ ipikita꞉ Atekena꞉ Eiyeke homeke kone hata꞉ miekeme.   
\p
\v 15 Dionima꞉ Yesu hala꞉eki niki pa꞉ta꞉ la kuluekema꞉ wi la alota꞉ I̱ma꞉ amba꞉ hande lo haowa꞉ ekita꞉ dupae. Ya hoki nane ipilie halita꞉ I̱ na mendiki haena꞉ kone ipiki amba꞉la hao hayeke ekima꞉ I̱ ankulala꞉me. Kutupa hande lo haowa꞉ ekita꞉ ameta꞉ do hali pa꞉ta꞉ loa꞉me.   
\p
\v 16 Ipika꞉ pa a꞉ta꞉ma꞉ homa꞉la꞉eki tumba hala꞉eki mea niki kia꞉tiki kia꞉tiki peaata꞉ niki paeyao amba꞉ epeaala꞉me.  
\v 17 Koda꞉ma꞉ta꞉ mo hande Lo Pimanu niki pa꞉ta꞉ la kina꞉yeke Mosesi pa꞉ta꞉ la haleekeme. Kutu piekepate pa a꞉ta꞉ma꞉ homa꞉la꞉eki make ota꞉ hau pita꞉la꞉eki make Yesu Ketisoma꞉ mea a꞉paeyekeme.  
\v 18 Hali homeke ma꞉nda꞉ma꞉ Koda꞉ ota꞉ na handeekeme. Kutu piekepate Eiyeke homekema꞉ homeke Koda꞉ tupa꞉ hata꞉ Atekena꞉ popeke nane kikina꞉ pila꞉ halima꞉ kone ipikana꞉ma꞉ niki la ka꞉la꞉me.   
\s1 Bapitaisi peao hayeke hali Dionina꞉ pi  
\r (Ma꞉tiu 3꞉1-12, Maka 1꞉1-18, Luku 3꞉1-18)  
\p
\v 19 Dionima꞉ koto leeke ekina꞉ mo Diutuseleme nane haemeke Diu haliwekima꞉ta꞉ yeni peao haemeke haliwekima꞉ make Lipae tapake haliwekima꞉ make Dioni pa꞉ta꞉ Neketa꞉ epika꞉ta꞉pe laa lota꞉ pulu pena꞉ tapaemekeme.  
\v 20 Dionima꞉ta꞉ Ika꞉ pi I̱ma꞉ na hombo peaalueke pi na leke ipikana꞉ma꞉ ota꞉ ka꞉la꞉pa꞉ bao alota꞉ I̱ta꞉ Ketiso dia꞉me la leekeme.  
\v 21 Koto leeke mo haliwekima꞉ ipiki lota꞉ pitolo alota꞉ Kota꞉ neketa꞉ epi ya꞉ka꞉ta꞉pe. Neketa꞉ Elaidiape lemekeme. Dionima꞉ ika꞉ pi hombo peaaso alota꞉ I̱ta꞉ koto hali dia꞉me leekeme. Mo haliwekima꞉ paa lota꞉ pitolo alota꞉ Neketa꞉ mo hande Potopede halipe lemekeme. Dionima꞉ ika꞉ pi hombo peaaso alota꞉ Dia꞉me. I̱ta꞉ koto hali dia꞉me leekeme.  
\v 22 Mo haliwekima꞉ alota꞉ Neke haleeki niki pa꞉ta꞉ la kie laata꞉ Nikana꞉ma꞉ opua niki tapaeme haliweki pa꞉ta꞉ lolo pomonoyeke neke haleeki kone nakana꞉ma꞉ eki pi lelipikipe lemekeme.  
\v 23 Dionima꞉ ika꞉ pi hombo peaaso alota꞉ I̱ halo ekita꞉ dupae. Hali homekema꞉ mo hapu hala꞉ alena꞉ hata꞉ wi ala꞉ ekita꞉ dupae. Tekehali epena꞉yeke pota꞉ tikitikina꞉ pilaapa꞉peke. Koto leeke pita꞉ mo potopede hali Aisayama꞉ wape pieke pi kone leekeme.   
\p
\v 24 Mo lota꞉ pulu pena꞉ tapaemeke haliwekita꞉ mo Pa꞉tisi haliwekima꞉ tapaemekeme.  
\v 25 Mo haliwekima꞉ Dioni lota꞉ pitolo alota꞉ Neketa꞉ Ketiso make Elaidia make mo hande Potopede hali make na hata꞉ kone ekipeke wanda꞉hali bapitaisi peao halepe lemekeme.  
\v 26 Dionima꞉ ika꞉ pi hombo peaaso alota꞉ I̱ma꞉ta꞉ wanda꞉hali ikalima꞉ bapitaisi peaaso halopate iki tukiki pa꞉ta꞉ hala꞉ hali ma꞉nda꞉ ikana꞉ma꞉ na handelememe.  
\v 27 Koto halita꞉ ya hoki nane ipula꞉pate ipika꞉ anke dake limbiti pa꞉la꞉ pu I̱ma꞉ ka꞉la꞉papeke ana꞉ na pa꞉la꞉me leekeme.   
\p
\v 28 Koto hau pimiki ekita꞉ mo Bedani da pa꞉ta꞉ mo Diodani ikali mone tea꞉na꞉ Dionima꞉ bapitaisi peaeyeke alena꞉ hata꞉ pimikime.   
\s1 Koda꞉na꞉ Sipisipi Ma꞉na꞉na꞉ Ikiki  
\p
\v 29 Da kelepeeketa꞉ Dionima꞉ ipiki pa꞉ta꞉ Yesu epeekeeki handolo hata꞉ alota꞉ Koda꞉ ipika꞉ Sipisipi Ma꞉na꞉siki koto ipula꞉ma꞉ handa꞉pe laa ipikana꞉ma꞉ kenke wanda꞉hali paeyaona꞉ hoke hau peleme ekimanu mea pula꞉me.  
\v 30 Hande loa꞉ ale hali ma꞉nda꞉ yaka hoki nane ipiliepate I̱ na mendiki haena꞉ kone ipikita꞉ amba꞉ hao hayeke ekima꞉ I̱ ankulala꞉me loa꞉me laata꞉  
\v 31 Hande halita꞉ epipe laa hone na ua꞉pate I̱ma꞉ Isulai wanda꞉hali paeyao pa꞉ta꞉ waluekema꞉ ikalima꞉ wanda꞉hali bapitaisi peaalo epoa꞉me leekeme.   
\p
\v 32 Dionima꞉ta꞉ pi la halolo hata꞉ dupiki pi leekeme. Hande melipuma꞉ handeke ba a̱i̱ya hola꞉pa꞉niaasa꞉ tupa꞉ mo Sipitidita꞉ hepeni nane hao hola꞉pa꞉niao a꞉pa ipiki pa꞉ta꞉ pitia꞉eki I̱ma꞉ handoa꞉me laa  
\v 33 Koto pita꞉ kone I̱ma꞉ mo hali epipe hone na ua꞉pate hande ikalima꞉ wanda꞉hali bapitaisi peaalo pono I̱ tapaeya꞉ Koda꞉ma꞉ I̱ pa꞉ta꞉ alota꞉ Mo hande Holi Sipitidita꞉ hola꞉pa꞉niao a꞉pa hali ma꞉nda꞉ pa꞉ta꞉ pila꞉eki handilipikie laa koto halima꞉ta꞉ Holi Sipitidima꞉ wanda꞉hali bapitaisi peao hala꞉me lea꞉me laa leekeme.  
\v 34 Dionima꞉ alota꞉ Koto ekita꞉ I̱ma꞉ handoa꞉me. Koto ekina꞉ ipikita꞉ Koda꞉na꞉ Eiyeke hala꞉eki iki pa꞉ta꞉ la kitolome leekeme.   
\s1 Amba꞉ titina꞉ Yesuna꞉ hoki nane telimiki haliweki  
\p
\v 35 Da kelepeeketa꞉ Dioni make ipika꞉ disaipolo hali yaapo make koto pa꞉ta꞉ paa a꞉pa hata꞉ta꞉  
\v 36 Yesu yapeekeeki handaata꞉ ipikana꞉ma꞉ alota꞉ Dota꞉ Koda꞉ ipika꞉ Sipisipi Ma꞉na꞉sikie leekeme.  
\v 37 Mo hande disaipolo hali yaapoma꞉ koto leeke pi opuaata꞉ Yesu ame̱le̱ mandakena꞉ pemekeme.  
\v 38 Yesuma꞉ la꞉ka꞉la꞉ mina ipiki telia꞉ mea epepekeeki handaa ipiliki lota꞉ pitolo alota꞉ Aleke weitelepepe leekeme. Ipilikana꞉ma꞉ ipika꞉ pi hombo peaaso alota꞉ La꞉baio. Neketa꞉ hando pa꞉ta꞉ hao halepe lepekeme. Do La꞉bai ala꞉ ekita꞉ Disa la kone ala꞉ekie.  
\v 39 Yesuma꞉ ipilika꞉ pi hombo peaaso alota꞉ A꞉pa handa꞉pe la leeke handaa ipika꞉ hayeke alena꞉ handolo puaata꞉ koto pita꞉ ipilikita꞉ ipiki ame̱le̱ hao haemekeme. Koto hau pimiki hauta꞉ welealo nane 4 okoloko pimikime.   
\p
\v 40 Mo hande hali yaapota꞉ Dionima꞉ leeke pi opua Yesu ame̱le̱ halo pepeke hali yaapo ma꞉nda꞉ta꞉ A꞉ndutue. Saimono Pida ipika꞉ hamekee.  
\v 41 Koto kone A꞉ndutuma꞉ ipika꞉ hameke Saimono handa꞉ wia ipiki pa꞉ta꞉ alota꞉ Hande Mesayata꞉ dikana꞉ma꞉ handa꞉ ulupa꞉me leekeme. Do Mesaya ala꞉ ekita꞉ Ketisoe laa ala꞉ekie.  
\v 42 Koto pi laata꞉ ipikana꞉ma꞉ Yesu pa꞉ta꞉ Saimono hatuku peekeme. Yesuma꞉ Saimono handolo alota꞉ Neketa꞉ Dionina꞉ eiyeke Saimonoe. Wetepena꞉ta꞉ naka꞉ biki Sipasi lelimikie. Koto bikita꞉ Pida kone homeke niki Toopi la kone leekeme.   
\s1 Yesuma꞉ Pilipi Nada꞉niele yaapo wi leekeeki  
\p
\v 43 Da kelepeeketa꞉ Yesuta꞉ Ka꞉lili nane polueke hone wiekeme. Ipikana꞉ma꞉ Pilipi handa꞉ wia ipiki pa꞉ta꞉ alota꞉ Dika꞉ pana꞉ epoe leekeme.  
\v 44 Pilipita꞉ Betesaida halie. Hande A꞉ndutu Pida yaapo haepeke da konee.  
\v 45 Koto ekina꞉ Pilipima꞉ Nada꞉niele handa꞉ wia ipiki pa꞉ta꞉ alota꞉ Hande Mosesima꞉ Lo Pimanu wape pitolo hata꞉ wape pa꞉la꞉ halita꞉ mo Koda꞉na꞉ potopede haliwekima꞉ wape pa꞉la꞉ hali kone handa꞉ uluma꞉me. Ipikita꞉ Na꞉sa꞉tete hali Diosepena꞉ eiyeke Yesue laa leekeme.  
\v 46 Na꞉sa꞉tete nanema꞉ epekeeki ma꞉nda꞉ ipula꞉eki handa꞉peke ya꞉la꞉pe laa lota꞉ pitolo haena꞉ta꞉ Pilipima꞉ ipiki pa꞉ta꞉ alota꞉ A꞉pa handa꞉taa leekeme.   
\p
\v 47 Nada꞉niele Yesu pa꞉ta꞉ ipulu haena꞉ kone Yesuma꞉ handa Nada꞉nielena꞉ pita꞉la꞉ ekita꞉ dupae laa ma꞉nda꞉ pa꞉ta꞉ la halolo alota꞉ Do halita꞉ ota꞉ Isulai halie laa ipiki pa꞉ta꞉ yayapiki hau ma꞉nda꞉ na ula꞉me leekeme.  
\v 48 Nada꞉nielema꞉ Yesu pa꞉ta꞉ opolo a꞉pa lota꞉ pitolo alota꞉ Nakana꞉ma꞉ I̱ta꞉ ekipa handa alepe leekeme. Yesuma꞉ ipika꞉ pi hombo peaaso alota꞉ Pilipima꞉ neke wi a̱i̱ na leeke dina꞉ kone neketa꞉ mo hande nose ti teke pa꞉ta꞉ pitieki I̱ma꞉ amba꞉ handoa꞉me leekeme.  
\v 49 Nada꞉nielema꞉ ipika꞉ pi hombo peaaso alota꞉ Disao. Neketa꞉ Koda꞉na꞉ Eiyekee. Neketa꞉ Isulai wanda꞉halina꞉ Kini halie leekeme.  
\v 50 Yesuma꞉ alota꞉ I̱ma꞉ neketa꞉ nose ti teke pa꞉ta꞉ pitieki handoa꞉me loa꞉ ekina꞉ hone tulaaso alepe laa kutupiki hausunu ankulalo peleme hau tieke tiekemanu pulu pa꞉la꞉eki handilipikie leekeme.  
\v 51 Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ ota꞉ pi alome. Ikita꞉ hepeni nane lomba꞉pa ula꞉ alena꞉ Koda꞉ ipika꞉ enisolo haliweki mo Wanda꞉halina꞉ Eiyeke pa꞉ta꞉ a꞉pa hata꞉ hola꞉pa꞉niatiki a꞉meiyatiki pilimieki handilimikie leekeme.   
\c 2  
\s1 Keina da pa꞉ta꞉ wanda꞉ miekeeki  
\p
\v 1 Nate yaapo paeyeketa꞉ mo Ka꞉lili nane hayeke da Keina da pa꞉ta꞉ta꞉ hali homekema꞉ wanda꞉ miekeme. Kutupa Yesuna꞉ inkiki make koto pa꞉ta꞉ hayekeme.  
\v 2 Yesu ipika꞉ disaipolo haliweki ame̱le̱ tonka꞉na꞉ mo wanda꞉ hapieke alena꞉ ipupe laa wi leekeme.  
\v 3 Mo hande waini ikali no paeyao ma꞉nda꞉ na pitieketa꞉ Yesuna꞉ inkikima꞉ ipika꞉ weki Yesu pa꞉ta꞉ alota꞉ Hande waini ikali no paeyao ma꞉nda꞉ na pila꞉me leekeme.  
\v 4 Kutupa Yesuma꞉ ipika꞉ ama꞉ pa꞉ta꞉ alota꞉ Wanda꞉o. Ya pulu poloeki nakana꞉ma꞉ dupi dupi laa I̱ pa꞉ta꞉ na lelipikie laata꞉ Ya nateta꞉ a̱i̱ na ipula꞉me leekeme.  
\v 5 Pate ipika꞉ ama꞉ma꞉ta꞉ mo e pokaemeke haliweki pa꞉ta꞉ alota꞉ Ipikana꞉ma꞉ la꞉lie pi opua pea꞉pa꞉peke leekeme.   
\p
\v 6 Mo Diu wanda꞉halima꞉ ika꞉ hande ikalima꞉ tandepa꞉la꞉ hau pu haemeke ekina꞉ toopima꞉ wepia ikali kanake yunki mindiki hata꞉ mo pa꞉ta꞉ wiekeme. Kanake homeke pa꞉ta꞉ ikalita꞉ 80 lida o 90 lida tupa꞉ pitaapeke yeekeme.  
\v 7 Yesuma꞉ mo e pokaemeke haliweki pa꞉ta꞉ alota꞉ Mo toopi ikali kanake manuna꞉ ikalima꞉ tumba tumba pipe leekeme. Koto leeke mo haliwekima꞉ mo ipi kanakemanu tumba tumba pimikime.  
\v 8 Kutu pu paeyeke Yesuma꞉ alota꞉ Mandane ekita꞉ kanake mandane ekina꞉ yupu tia mo ne handeteke hala꞉ hali pa꞉ta꞉ mea pua hala꞉pe leekeme. Koto leeke mo ikali mandaneeki yupa mea pua halemekeme.  
\v 9 Kutupa mo halima꞉ mea naa handeekepate ota꞉ waini ikalima꞉ kone handeekeme. Mo halima꞉ta꞉ koto waini ikali yupimikieki pa꞉ta꞉ hone na wiekepate hande ikali yupimiki e pokaemeke haliwekima꞉ hone wimikime. Koto ekina꞉ ipikana꞉ma꞉ mo wanda꞉ tekehali wi la꞉ mea  
\v 10 ipiki pa꞉ta꞉ alota꞉ Haliweki paeyaoma꞉ waini ikali ota꞉ epekeeki amba꞉la hale hale pea kutupa mo ne nolo epo laa epemeke wanda꞉halima꞉ waini ikali wopu nemeke hoki naneta꞉ mo hosiki metoko piki waini ikali hale hale pilieke. Pate nakana꞉ma꞉ mo ota꞉ epeke waini ikalita꞉ hosiki sa꞉sa꞉ pea wia hao ame kone hale hale pina꞉ aleme leekeme.   
\p
\v 11 Yesuma꞉ta꞉ mo Ka꞉lili nane hayeke da Keina da pa꞉ta꞉ hata꞉ ipika꞉ wele piekeeki koto pa꞉ta꞉ amba꞉la piekeme. Koto pa꞉ta꞉ hata꞉ ipikana꞉ma꞉ ipika꞉ kapu tieke hala꞉eki peneme yao waleeke handaa ipika꞉ disaipolo haliwekima꞉ ipiki pa꞉ta꞉ hone tulaemekeme.   
\p
\v 12 Kutu pieke hoki naneta꞉ Yesu make ipika꞉ inkiki make ipika꞉ hameketiti make ipika꞉ disaipolo haliweki tonka꞉na꞉ paeyao Kapeneami da pa꞉ta꞉ pua hoto mandane ekimanu koto pa꞉ta꞉ haemekeme.   
\s1 Yesu mo tembolo da nane peekeeki  
\r (Ma꞉tiu 21꞉12-13, Maka 11꞉15-17, Luku 19꞉45-46)  
\p
\v 13 Mo Diu wanda꞉halima꞉ ika꞉ Lombei Pupa Yapeeke natena꞉ ne pambuluekema꞉ haemeke handaata꞉ Yesuta꞉ mo Diutuseleme da nane peekeme.  
\v 14 Yesuma꞉ mo tembolo da tukiki pa꞉ta꞉ pua handeekepate mandane haliwekima꞉ kao make sipisipi ma꞉na꞉manu make melipuma꞉ handeke bamanu make mandane haliwekima꞉ hambena꞉yeke wia pitimikieki make mandane haliwekima꞉ ika꞉ teipolo pa꞉ta꞉ pita꞉ mani topo pimikieki make handeekeme.  
\v 15 Ipikana꞉ma꞉ pu tunkulikimanu meaata꞉ ponka꞉ pilimepi pea depita wepiaata꞉ paeyao hama pena꞉ mo kao sipisipi ma꞉na꞉manu tonka꞉na꞉ tolu liekeme. Mo mani topo pu pitimiki haliwekina꞉ teipolomanu londolo ba ba pea ika꞉ manimanu tonka꞉na꞉ hoelo ba ba piekeme.  
\v 16 Kutupa mo melipuma꞉ handeke bamanu wia pitimiki haliweki pa꞉ta꞉ alota꞉ Do alemanu mu tia hama pupe. Yaka Apa꞉na꞉ data꞉ makedi da au na lapa꞉peke leekeme.  
\v 17 Ipika꞉ disaipolo haliwekima꞉ mo Baibolo bukana꞉ wape pa꞉la꞉eki hone wimikime dupae. Koda꞉o. Naka꞉ da epeaalo polo hone witolo ekita꞉ I̱ta꞉ titipu wopu polome wape pa꞉la꞉me.   
\p
\v 18 Mo Diu haliwekima꞉ ipika꞉ pi hombo peaaluekema꞉ lota꞉ pitolo alota꞉ Do pitele hauta꞉ naka꞉ biki ula꞉eki niki pa꞉ta꞉ta꞉ waluekema꞉ eki wele piteleeki pilipiki lemekeme.  
\v 19 Yesuma꞉ ika꞉ pi hombo peaaso alota꞉ Do hande Koda꞉na꞉ da leisimika꞉na꞉ta꞉ I̱ma꞉ hoto tepona꞉ pa mea a꞉meiyao haena꞉ lolueke leekeme.  
\v 20 Mo haliwekima꞉ alota꞉ Do hande tembolo da a꞉etolo haena꞉ 46 bapimanu amba꞉ paeya꞉pate nakana꞉ma꞉ta꞉ hoto tepona꞉ kone paa mea a꞉meiyao haena꞉ loluekema꞉ alepe lemekeme.  
\v 21 Koto lemekepate Yesuma꞉ mo hande tembolo da leeke ekita꞉ ipika꞉ loke pa꞉ta꞉ kone leekeme.  
\v 22 Koto ekina꞉ Yesu homeeke Koda꞉ma꞉ pa mea tiaeyeke natena꞉ ipika꞉ disaipolo haliwekima꞉ do leeke pi hone wimikime. Kutupa mo Baibolo bukana꞉ wape pa꞉la꞉eki make Yesuma꞉ leeke pimanu make hone tulaemekeme.   
\s1 Yesuma꞉ haliweki paeyaona꞉ honeta꞉ handeekeeki  
\p
\v 23 Mo hande Lombei Pupa Yapeeke ne pambemeke dina꞉ta꞉ Yesuma꞉ mo Diutuseleme da pa꞉ta꞉ hata꞉ ipikana꞉ma꞉ wele wotu pieke ekimanu wanda꞉hali wopuma꞉ handaata꞉ ipiki pa꞉ta꞉ hone tulaemekepate  
\v 24 Yesuma꞉ta꞉ wanda꞉hali paeyao ika꞉ piteleme ekimanu wotu handa꞉ wiaata꞉ mo wanda꞉hali pa꞉ta꞉ hone na tulaaso hata꞉ na taleekeme.  
\v 25 Wanda꞉halina꞉ puki pa꞉ta꞉ ula꞉ ekimanu Yesuma꞉ wotu handeeke ekina꞉ hali ma꞉nda꞉ma꞉ ipiki pa꞉ta꞉ la hala꞉peke na yeekeme.   
\c 3  
\s1 Yesu Nikodimasi yaapo  
\p
\v 1 Handa Pa꞉tisi tapake hali homeke Nikodimasita꞉ ipikita꞉ mo Diu wanda꞉halina꞉ Ka̱le̱sete hali hata꞉ta꞉  
\v 2 nate ma꞉nda꞉na꞉ timba Yesu pa꞉ta꞉ pua alota꞉ Disao. Neketa꞉ Koda꞉ma꞉ tapaaleke walele hali hale ekita꞉ handoloma꞉me. Kutupa nakana꞉ma꞉ wele pitele tupa꞉ Koda꞉ yaapo na hake halima꞉ wele pea꞉peke na ya꞉la꞉me la leekeme.  
\v 3 Koto pi leeke handa Yesuma꞉ ipika꞉ pi hombo peaaso alota꞉ I̱ma꞉ neke pa꞉ta꞉ ota꞉ pi alome. Hali epima꞉ pa panake weki leke na mendia꞉ka꞉na꞉ta꞉ kota꞉ Koda꞉ ipika꞉ Kilu Tombuao Hala꞉eki na handilieke leekeme.  
\v 4 Nikodimasima꞉ alota꞉ Keileke halima꞉ta꞉ ekipa panake weki leke paa mendiliekepe laa Ipika꞉ inkikima꞉ hoto yaapo peao paa mendina꞉ alepe leekeme.  
\v 5 Yesuma꞉ ipika꞉ pi hombo peaaso alota꞉ I̱ma꞉ neke pa꞉ta꞉ ota꞉ pi alome. Hali homeke a꞉nda꞉ ikalima꞉ make Sipitidima꞉ make ipikita꞉ panake weki leke paa na mendia꞉ka꞉na꞉ta꞉ Koda꞉ ipika꞉ Kilu Tombuao Hala꞉eki pa꞉ta꞉ na honda꞉ pamba pelieke laa  
\v 6 weki mondu hala꞉ ale manuma꞉ta꞉ ipika꞉ loke hala꞉eki kone mondu hala꞉pate mo Sipitidima꞉ta꞉ ipikima꞉ handekeeki kone pitaalieke laa leekeme.  
\v 7 I̱ma꞉ iki paeyao pa panake weki wandiki leke mendia hamina꞉ alo ekina꞉ta꞉ hone ta꞉ta꞉ na wia꞉peke.  
\v 8 Po ipula꞉ ekita꞉ ipika꞉ honema꞉ kone ipula꞉me. Ipika꞉ u la ipula꞉ ekita꞉ nakana꞉ma꞉ opitelepate hao ipula꞉eki make mandane pula꞉eki make nakana꞉ma꞉ na handilipikie. Kutupa mo poma꞉ pita꞉la꞉ tupa꞉ mo Sipitidima꞉ wanda꞉hali make panake weki leke mendilieke leekeme.   
\p
\v 9 Kotoeki opua Nikodimasima꞉ lota꞉ pitolo alota꞉ Nakana꞉ma꞉ koto ale ekita꞉ ekipa peaaliepe leekeme.  
\v 10 Yesuma꞉ ipika꞉ pi hombo peaaso alota꞉ Neketa꞉ do Isulai wanda꞉halina꞉ wala꞉la꞉ hali tieke ma꞉nda꞉ halepate do aloeki manuta꞉ hone na wiaalepe.  
\v 11 I̱ma꞉ neke pa꞉ta꞉ ota꞉ pi alome laa Nikana꞉ma꞉ honema꞉ handoloma꞉ ekimanu make lekema꞉ handoloma꞉ ekimanu make la kitoloma꞉pate iki pa꞉ta꞉ hala꞉ hali homeke a꞉nda꞉ma꞉ make do pi opuluekema꞉ hone na wita꞉la꞉me.  
\v 12 Do kenkena꞉eki I̱ma꞉ walolo ekimanu na opimika꞉na꞉ta꞉ kota꞉ oli hepeni nane pita꞉la꞉ ekimanu waloa꞉ka꞉na꞉ make ekipa opilimikipe.  
\v 13 Kutupa hali homeke a꞉nda꞉ oli hepeni nane na pa꞉la꞉pate hande Wanda꞉halina꞉ Eiyeke hepeni nane hao a꞉pa꞉la꞉ hali homekee laa leekeme.   
\p
\v 14 Hande Mosesima꞉ mo hapu hayeke alena꞉ hata꞉ mo keto mea a꞉meiyaeyeke tupa꞉ta꞉ kota꞉ koto tupa꞉ kone hande Wanda꞉halina꞉ Eiyeketa꞉  
\v 15 ipiki pa꞉ta꞉ hone tulao haleme wanda꞉halima꞉ deto hala꞉eki mina꞉yeke haliwekima꞉ ipiki mea a꞉meiyalieke.  
\v 16 Do ekina꞉yeke loa꞉me. Koda꞉ma꞉ kenke wanda꞉hali pa꞉ta꞉ pukima꞉ wotu homolo hata꞉ ipika꞉ Weki homeke kone kiekeme. Kutupa hali epima꞉ ipika꞉ Weki pa꞉ta꞉ hone tulao haya꞉ka꞉na꞉ta꞉ kota꞉ koto hali na homeke deto hala꞉eki mina꞉yeke kiekeme.  
\v 17 Koda꞉ma꞉ta꞉ ipika꞉ Weki kenke wanda꞉halina꞉ pi yokaalu peaalo pa꞉la꞉ hali haena꞉yeke na tapake ika꞉ mea da꞉taalo pa꞉la꞉ hali haena꞉yeke tapaeyekeme.   
\p
\v 18 Kutupa hali epima꞉ mo hande Weki pa꞉ta꞉ hone tulao haya꞉ka꞉na꞉ta꞉ pi yokaalu pilieeki pa꞉ta꞉ na pelieke. Pate hali epima꞉ hone na tulao haya꞉ka꞉na꞉ta꞉ hande pi yokaalu pilie natena꞉ Koda꞉na꞉ Weki homeke pa꞉ta꞉ hone na tulao hayeke ekina꞉ ipikana꞉ma꞉ wini pea꞉peke na ya꞉la꞉me.  
\v 19 Mo pi yokaalu pulu pa꞉la꞉ ekita꞉ dupae. Do kenkena꞉ pa̱a̱ pa꞉la꞉eki amba꞉ epa꞉la꞉pate haliwekima꞉ta꞉ ika꞉ hoke haumanu pu haleme ekina꞉ hande pa̱a̱ pa꞉la꞉ ekita꞉ kiao mo timba꞉la꞉ pamba꞉la꞉eki pa꞉ta꞉ haluekema꞉ hone witelememe.  
\v 20 Hoke hau pu haleme haliwekima꞉ta꞉ mo pa̱a̱ pa꞉la꞉ ekina꞉ ika꞉ hoke haumanu peneme yao walaapa꞉na꞉ ota꞉ kiaaso hata꞉ mo pa̱a̱ pa꞉la꞉eki pa꞉ta꞉ na ipilimikie.  
\v 21 Kutu pa꞉la꞉pate hali epima꞉ ota꞉ hau pu hala꞉ halima꞉ mo pa̱a̱ pa꞉la꞉eki pa꞉ta꞉ ipilieke. Kutupa mo pa̱a̱ pa꞉la꞉ ekima꞉ ipika꞉ piekeeki manuta꞉ Koda꞉ yaapo hata꞉ pieke ekimanu peneme yao walena꞉yeke ipilieke.   
\s1 Yesu Dioni yaapo  
\p
\v 22 Koto hoki naneta꞉ Yesu ipika꞉ disaipolo haliweki ame̱le̱ mo Diudia nane pua koto pa꞉ta꞉ hata꞉ wanda꞉hali bapitaisi peatiki pimikime.  
\v 23 Dionima꞉ make mo Seilimi da teke pa꞉ta꞉ Inoni da hata꞉ta꞉ ikali wotu pitieke handaa ipiki pa꞉ta꞉ a꞉pa꞉tiki pimiki wanda꞉halita꞉ ipikana꞉ma꞉ bapitaisi peatiki piekeme.  
\v 24 Koto pita꞉ta꞉ Hetodima꞉ Dioni dipula a̱i̱ na pitaake haena꞉ piekeme.   
\p
\v 25 Kutupa Dionina꞉ disaipolo mandane haliwekima꞉ mo Diu hali homeke ame̱le̱ mo pi ula꞉ ekina꞉ ikalima꞉ peiya꞉tiki pia꞉peke ekina꞉ pi yokaalu pimikime.  
\v 26 Koto ekina꞉ Dioni pa꞉ta꞉ pua alota꞉ Disao. Mo Diodani ikali mone tena꞉ neke yaapo mandakena꞉ haya꞉ halita꞉ hande nakana꞉ma꞉ niki pa꞉ta꞉ walea꞉ halima꞉ta꞉ kota꞉ ameta꞉ ipikana꞉ma꞉ bapitaisi peaaseke handaa wanda꞉hali wopu ipiki pa꞉ta꞉ pua꞉tiki pitelememe lemekeme.   
\p
\v 27 Koto ekina꞉ Dionima꞉ ika꞉ pi hombo peaaso alota꞉ Koda꞉ma꞉ niki pa꞉ta꞉ aleta꞉ ma꞉nda꞉ na kia꞉ka꞉na꞉ta꞉ kota꞉ mea꞉peke na ya꞉la꞉me laa  
\v 28 I̱ta꞉ Ketiso dia꞉me. Koda꞉ma꞉ titina꞉ I̱ amba꞉la tapaala꞉me laa iki pa꞉ta꞉ la kua꞉ ekita꞉ amba꞉ opimime leekeme. Hande wanda꞉ mina꞉la꞉ ekita꞉ mo wanda꞉ta꞉ halikina꞉eki halieke laa  
\v 29 mo wanda꞉ teke halina꞉ hameketa꞉ mandakena꞉ hata꞉ kone wanda꞉ teke halima꞉ lelie pi opitolo hata꞉ta꞉ ta꞉na꞉ma꞉ homilieke. Koto ekina꞉ yaka ta꞉na꞉ma꞉ homa꞉la꞉ ekita꞉ tumba ula꞉me laa  
\v 30 Ipikita꞉ tieke daeyatiki pitolo haena꞉ta꞉ I̱ta꞉ hosiki uniatiki pea꞉peke ya꞉la꞉me.   
\s1 Oli manda hao a꞉pa꞉la꞉ hali  
\p
\v 31 Oli manda hao a꞉pa꞉la꞉ halita꞉ paeyao pa꞉ta꞉ manda halieke. Kenkena꞉ hao a꞉pa꞉la꞉ halima꞉ta꞉ kenkena꞉ hali hata꞉ kenke pimanu lelieke. Oli manda hepeni nane hao a꞉pa꞉la꞉ halima꞉ta꞉ paeyao manda hata꞉ta꞉  
\v 32 ipikana꞉ma꞉ handa꞉la꞉eki make opita꞉la꞉eki make la kita꞉la꞉pate wanda꞉halima꞉ ipika꞉ pi opua na miniki halememe.  
\v 33 Hali epima꞉ ipika꞉ pi opua miniki haya꞉ka꞉na꞉ta꞉ Koda꞉ma꞉ ota꞉eki ala꞉me laa lelieke.  
\v 34 Koda꞉ma꞉ tapaala꞉ halima꞉ta꞉ Koda꞉na꞉ pimanu lalieke. Koda꞉ma꞉ ipiki pa꞉ta꞉ Holi Sipitidi hala꞉la꞉ ekita꞉ tombo wia na hala꞉la꞉ ekina꞉ loa꞉me.  
\v 35 Atekema꞉ ipika꞉ Eiyeke pa꞉ta꞉ pukima꞉ homolo hata꞉ ala꞉ta꞉ ala꞉ta꞉ paeyao Eiyekena꞉ kiki pa꞉ta꞉ wina꞉ la꞉la꞉me.  
\v 36 Hali epima꞉ hande Eiyeke pa꞉ta꞉ hone tulao haya꞉ka꞉na꞉ta꞉ kota꞉ koto halima꞉ da꞉ta꞉ hao halo pa꞉la꞉pate hali epima꞉ hande Eiyekena꞉ kakena꞉ na homea꞉ka꞉na꞉ta꞉ deto hala꞉eki na miki haena꞉ Koda꞉ ipika꞉ mineke panka꞉la꞉eki koto hali pa꞉ta꞉ ula꞉me.   
\c 4  
\s1 Yesu mo hande Sametia wanda꞉ yaapo  
\p
\v 1 Koto natena꞉ta꞉ mo hande Pa꞉tisi haliweki pa꞉ta꞉ pi dupa la꞉niaeyekeme. Yesuma꞉ disaipolo wanda꞉hali wopu meaata꞉ bapitaisi peao pita꞉la꞉ ekima꞉ Dionima꞉ pita꞉la꞉ ekita꞉ wetepe yaasa꞉me laa la꞉niaeyekeme.  
\v 2 Koto la꞉niaeyekepate Yesu ipikana꞉ma꞉ bapitaisi na peaake ipika꞉ disaipolo haliwekima꞉ homeke bapitaisi peatiki pimikime.  
\v 3 Koto la꞉niaeyeke pita꞉ Yesuma꞉ make opuaata꞉ mo hande Diudia nane mina꞉pa꞉lao mo Ka꞉lili nane peekeme.   
\p
\v 4 Koto nane pulu hata꞉ Sametia nanema꞉ lopa꞉la꞉ peekeme.  
\v 5 Kutupa Sametia lopa꞉la꞉ puaata꞉ daoni homeke pa꞉ta꞉ opolo peekeme. Koto daoni bikita꞉ Saika lemekeme. Mo da teketa꞉ hande Dieikopema꞉ ipika꞉ eiyeke Diosepe pa꞉ta꞉ haleeke kenke teke pa꞉ta꞉ hayeke dae.  
\v 6 Koto kenke pa꞉ta꞉ Dieikopema꞉ aweeke naku pa꞉ta꞉ ikali pitiekeme. Kutupa Yesuta꞉ pota꞉na꞉ ipu hao anke litu pieke mo naku ikali teke pa꞉ta꞉ pitiekeme. Nate you tikekena꞉ haena꞉ pitiekeme.   
\p
\v 7 Kutupa pitina꞉ Sametia wanda꞉ homekema꞉ ikali nolo epeekeme. Yesuma꞉ ipiki pa꞉ta꞉ alota꞉ Ikali ma꞉nda꞉ nono kie leekeme.  
\v 8 Ipika꞉ disaipolo haliwekima꞉ mo daoni pa꞉ta꞉ ne hambolo pena꞉ pita꞉ leekeme.  
\v 9 Mo Sametia wanda꞉ma꞉ Yesuna꞉ pi hombo peaaso alota꞉ I̱ta꞉ Sametia wanda꞉ halopate neketa꞉ Diu hali hata꞉ kone ekipeke I̱ pa꞉ta꞉ Ikali ma꞉nda꞉ nono kie laa honke alepe leekeme. Koto Sametia wanda꞉halima꞉ ika꞉ ne ikali no haemeke kawaso manuta꞉ mo Diu wanda꞉halima꞉ yola꞉ alu pea napeke na yeeke handa loa꞉me.  
\v 10 Yesuma꞉ ipika꞉ pi hombo peaaso alota꞉ Nakana꞉ma꞉ta꞉ Koda꞉ma꞉ kita꞉la꞉ ale make neke pa꞉ta꞉ Ikali ma꞉nda꞉ nono kie laa honke ala꞉ halina꞉ biki make hone wika꞉na꞉ yoluta꞉ kota꞉ naka꞉ honke aleeki ipikana꞉ma꞉ opua da꞉ta꞉la꞉ ikali kulu pia꞉me leekeme.   
\p
\v 11 Mo wanda꞉ma꞉ ipiki pa꞉ta꞉ alota꞉ Aneke halio. Do nakuta꞉ ota꞉ oni pa꞉ta꞉ leke awa꞉niaala꞉me. Koto pa꞉la꞉ ekina꞉ neketa꞉ ipi kanake na wia halepate da꞉ta꞉la꞉ ikali ekipa naa kuluekema꞉ alepe laata꞉  
\v 12 Nika꞉ apa꞉mei Dieikopema꞉ta꞉ do naku ikali niki pa꞉ta꞉ ka꞉la꞉me. Do ikalita꞉ ipikana꞉ma꞉ make ipika꞉ eiyeke titima꞉ make ipika꞉ ma꞉na꞉ manuma꞉ make na꞉tiki pu haemekeme. Neketa꞉ Dieikope ankulaluekema꞉ alepe leekeme.  
\v 13 Yesuma꞉ mo wanda꞉ pa꞉ta꞉ alota꞉ Hali epima꞉ do naku ikali naa haota꞉ wetepena꞉ make ikali nena꞉ pa pea꞉tiki pilieke.  
\v 14 Kutu piliepate hali epima꞉ I̱ma꞉ halolo ikali naa haya꞉ka꞉na꞉ta꞉ koto halita꞉ ikali nena꞉ paa na pilieke. I̱ma꞉ do alo ekita꞉ do ekina꞉ yeke loa꞉me. I̱ma꞉ halolo ikalita꞉ mo hali tukiki pa꞉ta꞉ pita꞉ opa꞉la꞉ ikali kone pitilieke. Kutupa hande ikalima꞉ta꞉ opolo hata꞉ mo halita꞉ da꞉tao haena꞉ lelieke leekeme.   
\p
\v 15 Mo wanda꞉ma꞉ ipiki pa꞉ta꞉ alota꞉ Aneke halio. Nakana꞉ma꞉ koto ale ikalita꞉ I̱ ma꞉nda꞉ kie leekeme. Kutupa wetepena꞉ ikali nena꞉ paa na pitolo hata꞉ do naku ikali nolo paa na ipulueke leekeme.  
\v 16 Yesuma꞉ ipiki pa꞉ta꞉ alota꞉ Naka꞉ haliki amba꞉la wi lolo puaata꞉ do pa꞉ta꞉ paa a꞉pa꞉peke leekeme.  
\v 17 Mo wanda꞉ma꞉ alota꞉ I̱ta꞉ hali dia꞉me leekeme.  
\p Koto leeke handaa Yesuma꞉ ipiki pa꞉ta꞉ alota꞉ Nakana꞉ma꞉ I̱ta꞉ hali dia꞉me ale ekita꞉ ota꞉ pi aleme.  
\v 18 Neketa꞉ yunki hata꞉ haliwekina꞉ da amba꞉ pekepate ame do halepe hali make ota꞉ naka꞉ haliki dia꞉me laata꞉ Nakana꞉ma꞉ ale ekita꞉ ota꞉ekie leekeme.  
\v 19 Mo wanda꞉ma꞉ ipiki pa꞉ta꞉ alota꞉ Aneke halio. Ameta꞉ neke handolome laa Koda꞉na꞉ pi la꞉ mea halo hale hali ya꞉ka꞉ta꞉me leekeme.  
\v 20 Nika꞉ apa꞉mei amedama꞉ niki Sametia wanda꞉hali pa꞉ta꞉ Do pote pa꞉ta꞉ pua mombela Koda꞉ pa꞉ta꞉ yeni pea꞉pa꞉peke laa lemekepate Diu haliweki ikana꞉ma꞉ alota꞉ Diutuseleme da pa꞉ta꞉ pua mombela Koda꞉ pa꞉ta꞉ yeni pea꞉pa꞉peke alememe leekeme.   
\p
\v 21 Yesuma꞉ ipiki pa꞉ta꞉ alota꞉ Wanda꞉o. I̱ma꞉ do aloeki opua꞉peke. Nate ma꞉nda꞉ ipilieke laa koto nate epea꞉ka꞉na꞉ta꞉ kota꞉ do pote pa꞉ta꞉ hata꞉ make oli Diutuseleme da pa꞉ta꞉ hata꞉ make wanda꞉halima꞉ta꞉ hande Apa꞉ pa꞉ta꞉ yeni na pilimikie laata꞉  
\v 22 Iki Sametia wanda꞉hali ikana꞉ma꞉ yeni piteleme ekita꞉ epi pa꞉ta꞉ pitelemepe. Ikana꞉ma꞉ wopu na handelememe. Kutu pitelemepate niki Diu wanda꞉hali nikana꞉ma꞉ yeni pitoloma꞉ ekita꞉ epi pa꞉ta꞉ pitoloma꞉pe kota꞉ ota꞉ handoloma꞉me. Pa ekipeke mo wanda꞉hali da꞉taasa꞉ ekita꞉ Diu wanda꞉hali pa꞉ta꞉ kini pea ipula꞉eke handa loa꞉me leekeme.   
\p
\v 23 Koto pa꞉la꞉pate wetepe hande epolo pa꞉la꞉ nateta꞉ ame amba꞉ a꞉pa꞉la꞉me. Kutu pa꞉la꞉ ekina꞉ ota꞉ yeni piteleme wanda꞉halima꞉ta꞉ Apa꞉ pa꞉ta꞉ yeni pimika꞉na꞉ta꞉ ika꞉ temokoma꞉ make ota꞉ hau pitolo hata꞉ make yeni pilimikie leekeme. Koto tupa꞉ ipiki pa꞉ta꞉ yeni piteleme wanda꞉halita꞉ Apa꞉ma꞉ hone pa꞉la꞉me.  
\v 24 Koda꞉ta꞉ temoko tekee. Koto pa꞉la꞉ ekina꞉ ipiki pa꞉ta꞉ yeni piteleme wanda꞉halima꞉ta꞉ ika꞉ temokoma꞉ make ota꞉ hau pitolo hata꞉ make ipiki pa꞉ta꞉ yeni pea꞉peke ya꞉la꞉me leekeme.   
\p
\v 25 Mo wanda꞉ma꞉ ipiki pa꞉ta꞉ alota꞉ Mo hande Mesaya ipika꞉ biki ma꞉nda꞉ta꞉ Ketiso epolo pa꞉la꞉eki hone witolome. Ipiki a꞉paata꞉ hau paeyao pita꞉la꞉eki la kilieke leekeme.  
\v 26 Yesuma꞉ ipiki pa꞉ta꞉ alota꞉ Nakana꞉ma꞉ koto ale halita꞉ I̱ konee laata꞉ Neke yaapo do pi alopa꞉ halie leekeme.   
\p
\v 27 Koto pi alo haena꞉ta꞉ ipika꞉ disaipolo haliweki paa opolo epemekepate Yesu mo wanda꞉ yaapo pi alo haepekeeki handaata꞉ hone ta꞉ta꞉ ta꞉ta꞉ wimikipate hali homeke ma꞉nda꞉ma꞉ Aleke muluekema꞉ alepe o Ipiki yaapo ekipeke pi alepe laa pa na lota꞉ piekeme.   
\p
\v 28 Kutupa mo wanda꞉ma꞉ ipi kanake mina꞉pa꞉lao mo daoni nane puaata꞉ koto pa꞉ta꞉ haemeke wanda꞉hali pa꞉ta꞉ alota꞉  
\v 29 Hali ma꞉nda꞉ handoemena꞉ ipupe laata꞉ I̱ma꞉ amba꞉ pua꞉ ekimanu paeyaota꞉ ipikana꞉ma꞉ la kia꞉me laata꞉ Ipikita꞉ hande Ketisope leekeme.  
\v 30 Koto leeke ekina꞉ mo wanda꞉halita꞉ daoni mina꞉pa꞉lao Yesu handolo pemekeme.   
\p
\v 31 Koto hau pitolo haena꞉ta꞉ hande disaipolo haliwekima꞉ Yesu honke alo alota꞉ Disao. Ne ma꞉nda꞉ nae lemekepate  
\v 32 Yesuma꞉ ika꞉ pi hombo peaaso alota꞉ Ya neta꞉ ma꞉nda꞉ ula꞉pate ikana꞉ma꞉ na handeleme leekeme.  
\v 33 Koto leekeeki opuaata꞉ mo disaipolo haliwekima꞉ ika꞉ kone ane la꞉ mone la꞉ pitolo alota꞉ Ma꞉nda꞉ma꞉ ipika꞉ ne mea a꞉pao halea꞉pe lemekeme.  
\v 34 Yesuma꞉ iki pa꞉ta꞉ alota꞉ Yaka neta꞉ dupae. I̱ tapaala꞉ halina꞉ hone pa꞉la꞉eki puluekema꞉ make ipikana꞉ma꞉ I̱ pa꞉ta꞉ walea꞉ e make pokao paeyawaaluekema꞉ loa꞉me leekeme.  
\v 35 Kota꞉ ika꞉ aleme pita꞉ dupae. Sumba꞉ tonkopu yapea꞉ka꞉na꞉ta꞉ ne napeke naa pilie natena꞉ poka꞉ mepi pilimikie lo halemepate I̱ma꞉ iki pa꞉ta꞉ alota꞉ Emanu lekema꞉ lekema꞉ pea꞉pa꞉peke. Ame kone ne napeketa꞉ naa pa꞉leke handaa poka꞉ mepi pia꞉pa꞉peke ya꞉la꞉me leekeme.  
\v 36 Ne napeke poka꞉ mepi pita꞉la꞉ halima꞉ta꞉ ipika꞉ yenki minolo hata꞉ mo hande ne napekemanu mea pua momba꞉la wia꞉ka꞉na꞉ta꞉ da꞉ta hao hala꞉eki kone yelieke. Kutu pia꞉ka꞉na꞉ta꞉ ne wae noka꞉pa꞉la꞉ hali make napeke poka꞉ mepi pita꞉la꞉ hali make ipiliki telipina꞉ma꞉ ta꞉na꞉ma꞉ homilipipikie leekeme.  
\v 37 Kutu pita꞉la꞉ ekima꞉ mo hande lo haloma꞉ pi ma꞉nda꞉ dupa yaasa꞉me. Hali ma꞉nda꞉ma꞉ta꞉ ne wae noka꞉pa꞉la꞉pate pa hali ma꞉nda꞉ma꞉ta꞉ mo ne napeke poka꞉ mepi pita꞉la꞉me aloma꞉me laata꞉  
\v 38 Ikana꞉ma꞉ na pokeme e pa꞉ta꞉ kone ne napekemanu poka꞉ mepi puemena꞉yeke iki tapaalome. Kutupa mandane haliwekima꞉ pokeme e pa꞉ta꞉ kone ikana꞉ma꞉ ne napeke poka꞉ mepi pulu pelemepateta꞉ mo amba꞉ haliwekima꞉ honkopu hao pu wilimi hauna꞉ pitelememe leekeme.   
\p
\v 39 Mo hande wanda꞉ma꞉ I̱ma꞉ pua꞉ ekimanu paeyao ipikana꞉ma꞉ la kia꞉me leeke ekina꞉ mo daoni pa꞉ta꞉ haemeke Sametia wanda꞉hali wopuma꞉ Yesu pa꞉ta꞉ hone tulaemekeme.  
\v 40 Koto ekina꞉ mo hande Sametia wanda꞉halima꞉ta꞉ Yesu pa꞉ta꞉ puaata꞉ Niki ame̱le̱ hosiki hao polena꞉e laa honke lemekeme. Koto lemeke handa hoto yaapo Yesu koto pa꞉ta꞉ haemekeme.   
\p
\v 41 Kutupa mandane wanda꞉hali wopuma꞉ ipikana꞉ma꞉ waleeke pi opitolo hata꞉ ipiki pa꞉ta꞉ hone tulaaso hata꞉ mo wanda꞉ pa꞉ta꞉ alota꞉  
\v 42 Ameta꞉ ipiki pa꞉ta꞉ hone tulaasoma꞉ ekita꞉ nakana꞉ma꞉ lele ekina꞉ hone na tulaake nikana꞉ma꞉ kone ipika꞉ pi opuaata꞉ ipikita꞉ kenke wanda꞉hali hande mea Da꞉taasa꞉ Hali ota꞉ hala꞉me hone witoloma꞉me lemekeme.   
\s1 Yesuma꞉ mo kapomani halina꞉ eiyeke mea tiaeyekeeki  
\p
\v 43 Yesuta꞉ hoto yaapo koto pa꞉ta꞉ hao pa Ka꞉lili nane peekeme.  
\v 44 Yesuma꞉ ipika꞉ kone leekeme dupae. Potopede halita꞉ ipika꞉ ota꞉ da teke pa꞉ta꞉ haya꞉ka꞉na꞉ta꞉ ipika꞉ biki na wilieke leekeme.  
\v 45 Ipikana꞉ma꞉ mo Ka꞉lili nane opolo peeke dina꞉ta꞉ wanda꞉hali paeyaoma꞉ ipiki handa꞉ mimikime. Do ekina꞉ yeke loa꞉me. Mo wanda꞉hali ika꞉ kone Diutuseleme nane puaata꞉ hande Lombei Pupa Yapeeke pita꞉ta꞉ ne nalo hata꞉ Yesuma꞉ pieke haumanu paeyao amba꞉ handemekeme.   
\p
\v 46 Kutupa Yesuta꞉ mo Ka꞉lili nane hayeke da Keina pa꞉ta꞉ opolo peekeme. Amba꞉ta꞉ koto da pa꞉ta꞉ hata꞉ Yesuma꞉ ota꞉ ikali kone waini ikali pitina꞉ leekeme. Koto da pa꞉ta꞉ta꞉ kapomani hali homeke hayekepate ipika꞉ wekita꞉ Kapeneami da pa꞉ta꞉ yeni hayekeme.  
\v 47 Koto halima꞉ta꞉ Yesuta꞉ Diudia nane mina꞉pa꞉lao Ka꞉lili nane a꞉pa hala꞉me leekeeki opuaata꞉ Yesu pa꞉ta꞉ peekeme. Yesuma꞉ mo Kapeneami nane pua ipika꞉ homoluekema꞉ taapo pitieke weki mea tiaena꞉yeke honke leekeme.  
\v 48 Yesuma꞉ mo hali pa꞉ta꞉ alota꞉ Ikana꞉ma꞉ hau tieke ipula꞉eki handolo homeke pa hone tulaasememe leekeme.   
\p
\v 49 Mo hande kapomani halima꞉ alota꞉ Aneke halio. Yaka weki homaapa꞉na꞉ dika꞉ mandakena꞉ pana꞉e laa leekeme.  
\v 50 Yesuma꞉ ipiki pa꞉ta꞉ alota꞉ Naka꞉ weki tiaaliekema꞉ pue leekeme. Hande halima꞉ Yesuma꞉ leeke pi opua hone tulao hao peekeme.  
\v 51 Mo ipika꞉ da nane paa poluekema꞉ pulu haena꞉ ipika꞉ e pokaemeke haliwekima꞉ pota꞉na꞉ manda꞉hande pea alota꞉ Naka꞉ weki tiao pila꞉me lemekeme.   
\p
\v 52 Ipikana꞉ma꞉ mo haliweki pa꞉ta꞉ lota꞉ pitolo alota꞉ Ya weki hosiki tiaeyeke hauta꞉ nate hando pa꞉ta꞉ haena꞉ piekepe laa lota꞉ pieke handaa mo haliwekima꞉ ipika꞉ pi hombo peaaso alota꞉ Ambaneke nate lekelo yopulu haena꞉ta꞉ ipika꞉ hoputiti yenita꞉ tandelea꞉me lemekeme.  
\v 53 Atekema꞉ hone witolota꞉ Ambaneke koto natena꞉ kone Yesuma꞉ I̱ pa꞉ta꞉ alota꞉ Naka꞉ weki tiaalieke laa lea꞉me hone wiekeme. Koto ekina꞉ mo halima꞉ make ipika꞉ weki wanda꞉ma꞉ make hone tulaemekeme.   
\p
\v 54 Yesuta꞉ Diudia nane mina꞉pa꞉lao Ka꞉lili nane pua hayeke pita꞉ta꞉ do wele wopu pieke ekita꞉ hoto yaapo peaoeki piekeme.   
\c 5  
\s1 Yesuma꞉ Bedeseda ikali pa꞉ta꞉ hali mea tiaeyekeeki  
\p
\v 1 Koto hau piekeeki hoki naneta꞉ mo Diu wanda꞉halima꞉ yeni puluekema꞉ ne mieke nate ma꞉nda꞉ epeeke dina꞉ta꞉ Yesu make Diutuseleme nane peekeme.  
\v 2 Mo Diutuseleme da pa꞉ta꞉ta꞉ hande Sipisipi Pota꞉ Kake nepoko pa꞉ta꞉ tunkula꞉pa pila꞉ ikali kendo ula꞉me. Hibulu pi laa mo ikali bikita꞉ Bedeseda lo halememe. Koto ikali nepoko pa꞉ta꞉ta꞉ tu peaasa꞉ da yunki hata꞉ hala꞉me.  
\v 3 Koto dasunu pa꞉ta꞉ta꞉ yeni haemeke wanda꞉hali wopu haemekeme. Leke holupiki wanda꞉hali make anke hoke wanda꞉hali make kiki anke tindipa tindipa pea꞉peke na yeke wanda꞉hali make koto pa꞉ta꞉ haemekeme. Koto wanda꞉hali paeyaoma꞉ta꞉ mo hande ikalita꞉ la꞉ma꞉ la꞉ma꞉ pina꞉yeke handeteke hatiki pimikime.  
\v 4 Do ekina꞉yeke pimikime. Hoto ma꞉nda꞉ta꞉ Tekehalina꞉ enisolo halima꞉ hola꞉pa꞉niao a꞉pa mo hande ikali tapa꞉tiaeyekeme. Koto hoki naneta꞉ mo ikali pa꞉ta꞉ titina꞉ amba꞉la honda꞉ pambilia꞉ halina꞉ yenita꞉ tandelelieke.  
\v 5 Koto pa꞉ta꞉ hayeke hali ma꞉nda꞉ta꞉ ipika꞉ yeni hayeke bapita꞉ 38 bapimanu amba꞉ yapeekeme.  
\v 6 Yesuma꞉ koto pa꞉ta꞉ mo hali pelia hake wiekeeki handaata꞉ ipika꞉ yeni hapa wina꞉ bapi wopu yapeekeeki make hone wiekeme. Koto ekina꞉ ipikana꞉ma꞉ mo hali pa꞉ta꞉ alota꞉ Naka꞉ honema꞉ta꞉ naka꞉ yeni tandelena꞉ hone witelepe leekeme.   
\p
\v 7 Mo yeni hapa wieke halima꞉ Yesuna꞉ pi hombo peaaso alota꞉ Aneke halio. Mo ikali tapa꞉tiatia pita꞉la꞉ natena꞉ I̱ mea miniliao ikali pa꞉ta꞉ hatuku pua꞉peke hali dia꞉me. Koto ekina꞉ ya kone pu pitua꞉ka꞉na꞉ta꞉ ma꞉nda꞉ma꞉ I̱ wetepeao yapilieke leekeme.   
\p
\v 8 Yesuma꞉ ipiki pa꞉ta꞉ alota꞉ Tiao naka꞉ yapa꞉ta꞉ mea mina anke lopao pue leekeme.  
\v 9 Kota꞉ koto kone mo hande halita꞉ epeke loke haota꞉ ipika꞉ yapa꞉ta꞉ mea mina anke lopao peekeme.  
\p Koto hau pieke ekita꞉ Hoto Pila꞉ Natena꞉ pieke handaa  
\v 10 mo Diu haliwekima꞉ koto yeni tandelaeyeke hali pa꞉ta꞉ alota꞉ Do Hoto Pila꞉ Natena꞉ naka꞉ yapa꞉ta꞉ mea mina puli ekita꞉ pi ula꞉eki yambololo piteleme lemekeme.  
\v 11 Kota꞉ mo halima꞉ ika꞉ pi hombo peaaso alota꞉ Ya yeni tandelaeya꞉ halima꞉ I̱ pa꞉ta꞉ alota꞉ Naka꞉ yapa꞉ta꞉ mea mina anke lopao pua꞉peke lea꞉me leekeme.  
\v 12 Mo haliwekima꞉ ipiki pa꞉ta꞉ lota꞉ pitolo alota꞉ Neke pa꞉ta꞉ naka꞉ yapa꞉ta꞉ mea mina pua꞉peke lea꞉ halita꞉ epipe lemekepate  
\v 13 mo yeni tandelaeyeke halima꞉ make Yesu na handeekeme. Pa ekipeke wanda꞉hali wopu koto pa꞉ta꞉ mombelemeke handa Yesu amba꞉ peekeme.   
\p
\v 14 Wetepena꞉ mo tembolo da tukiki pa꞉ta꞉ Yesuma꞉ hande hali handa꞉ wia alota꞉ Handa꞉e. Ame neketa꞉ epeke loke haleme. Hoke hau paa na pea꞉peke. Neke pa꞉ta꞉ ka꞉nda꞉ma꞉ homa꞉la꞉ hau tieke a꞉paama꞉na꞉ loa꞉me leekeme.  
\v 15 Koto leekeeki opua hande hali mina꞉pa꞉lao pua mo Diu haliweki pa꞉ta꞉ alota꞉ Ya yeni tandelaeya꞉ halita꞉ Yesue leekeme.  
\v 16 Kota꞉ Yesuma꞉ Hoto Pila꞉ Natena꞉ mo halina꞉ yeni tandelaeyeke ekina꞉ mo Diu haliwekima꞉ Yesu tanda haluekema꞉ kini pu mimikime.  
\v 17 Koto ekina꞉ Yesuma꞉ ika꞉ pi hombo peaaso alota꞉ Yaka Apa꞉ma꞉ hoto paeyao e poko hala꞉me. Kutupu hala꞉ ekina꞉ I̱ma꞉ make e pokolome leekeme.  
\v 18 Koto leekeeki opuaata꞉ mo Diu haliwekima꞉ Yesu luekema꞉ mineke pankemekeeki daeyaemekeme. Do ekina꞉yeke pimikime. Yesuma꞉ hande Hoto Pila꞉ Natena꞉ pi ula꞉eki yamba꞉laata꞉ ipikana꞉ma꞉ Koda꞉ta꞉ ota꞉ ipika꞉ Apa꞉ hala꞉me leeke ekima꞉ make Koda꞉ ana꞉na꞉ kone halome laa leekeme.   
\s1 Koda꞉na꞉ Eiyekena꞉ biki ula꞉eki  
\p
\v 19 Koto ekina꞉ Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Hande Eiyekema꞉ ipika꞉ kone hone wia hau ma꞉nda꞉ pea꞉peke na ya꞉la꞉me. Ipika꞉ Apa꞉ma꞉ pita꞉la꞉eki handa꞉ pu hala꞉me. Hande Apa꞉ma꞉ pu hala꞉eki kone hande Eiyekema꞉ make pu hala꞉me.  
\v 20 Hande Apa꞉ma꞉ ipika꞉ Eiyeke pa꞉ta꞉ pukima꞉ homolo hata꞉ ipikana꞉ma꞉ pu hala꞉ ekimanu paeyao hande Eiyeke pa꞉ta꞉ walo hala꞉me. Iki penkilipa꞉tia pomuemena꞉yeke ipikana꞉ma꞉ wetepena꞉ta꞉ ota꞉ hau tiekemanu dupikieki wetepeao ipikana꞉ma꞉ Eiyeke pa꞉ta꞉ walieke.  
\v 21 Hande Apa꞉ma꞉ homemeke wanda꞉hali mea da꞉taasa꞉ tupa꞉ koto tupa꞉ kone hande Eiyekema꞉ ipika꞉ hone wia wanda꞉hali mea da꞉taasa꞉me.  
\v 22 Kutupa make Apa꞉ma꞉ ma꞉nda꞉ pa꞉ta꞉ pi yokaalu na piki ipika꞉ Eiyekema꞉ homeke pi yokaalu peaena꞉ la꞉la꞉me.  
\v 23 Koto ekina꞉yeke wanda꞉hali paeyaoma꞉ Apa꞉na꞉ pi laaseme tupa꞉ Eiyekena꞉ pi make koto tupa꞉ kone laena꞉yeke la꞉la꞉me. Hali epima꞉ Eiyekena꞉ pi na laeya꞉ka꞉na꞉ta꞉ kota꞉ ipiki tapaala꞉ Apa꞉na꞉ pi kone na laasa꞉me leekeme.   
\p
\v 24 Iki pa꞉ta꞉ ota꞉ pi alome. Hali epima꞉ I̱ma꞉ alo pimanu opuaata꞉ I̱ tapaala꞉ hali pa꞉ta꞉ make hone tulaeya꞉ka꞉na꞉ta꞉ kota꞉ koto halita꞉ deto hala꞉eki miniki hala꞉me. Kutu pita꞉la꞉ halita꞉ homa꞉la꞉eki mina꞉pa꞉lao da꞉ta꞉la꞉eki amba꞉ miniki hala꞉eki yolo hata꞉ pi yokaalu pulu pa꞉la꞉ pa꞉ta꞉ na pelieke.  
\v 25 Iki pa꞉ta꞉ ota꞉ pi alome. Amba꞉ homemeke wanda꞉halima꞉ta꞉ Koda꞉ ipika꞉ Eiyekena꞉ pi ho̱la̱꞉make mia꞉peke ya꞉la꞉ nate epolo pa꞉la꞉pate amba꞉ a꞉pa hala꞉me. Kutupa ipika꞉ pi ho̱la̱꞉make opiteleme wanda꞉halita꞉ da꞉tilimikie.  
\v 26 Hande Apa꞉ma꞉ ipiki kone da꞉ta꞉la꞉ teke hali hala꞉ tupa꞉ ipika꞉ Eiyeke make ipiki kone da꞉ta꞉la꞉ teke hali haena꞉ la꞉la꞉me.  
\v 27 Kutupa ipikita꞉ Wanda꞉halina꞉ Eiyeke haleke handaata꞉ Eiyekema꞉ pi yokaalu peaalo pa꞉la꞉ hali ipika꞉ Atekema꞉ haena꞉ la꞉la꞉me.  
\v 28 Do ekina꞉ta꞉ ikana꞉ma꞉ hone eleke eleke na wia꞉pa꞉peke. Amba꞉ homa lapa꞉ peleme wanda꞉hali paeyaoma꞉ta꞉ ipika꞉ pi ho̱la̱꞉make opulu peleme nate epolo pa꞉la꞉ ekina꞉ loa꞉me.  
\v 29 Kutupa mo wanda꞉halima꞉ opuaata꞉ ika꞉ lapa꞉ mina꞉pa꞉lao hama꞉ nane ipilimikie. Epeke hau pu hao homemeke wanda꞉halita꞉ tiao da꞉ta halimikie. Kutupa hoke hau pu hao homemeke wanda꞉halita꞉ tiao pi yokaalu pulu pa꞉la꞉ nane pelimikie.   
\s1 Yesu pa꞉ta꞉ wekitisi haemekeeki  
\p
\v 30 I̱ma꞉ ya kone hone wia hau ma꞉nda꞉ pea꞉peke na ya꞉la꞉me. Koda꞉ma꞉ I̱ pa꞉ta꞉ la kita꞉la꞉eki I̱ma꞉ opuaata꞉ pi yokaalu pitolome. Yaka hone pa꞉la꞉eki puluekema꞉ hone na wiki I̱ tapaala꞉ halina꞉ hone pa꞉la꞉eki puluekema꞉ hone witolo ekina꞉ I̱ma꞉ pi yokaalu pitolo ekita꞉ tikitikina꞉ pea꞉peke ya꞉la꞉me.   
\p
\v 31 Ya pitolo ekina꞉ I̱ma꞉ kone wekitisi hao loa꞉ka꞉na꞉ta꞉ kota꞉ I̱ma꞉ alo ekita꞉ teke na wilieke.  
\v 32 Kutu pulu pa꞉la꞉pate I̱ma꞉ pitolo ekina꞉ hali ma꞉nda꞉ wekitisi hao lapeke ya꞉la꞉me. Kutupa mo halima꞉ I̱ pa꞉ta꞉ lolo pa꞉la꞉ pita꞉ ota꞉eki ala꞉me hone witolome.  
\v 33 Ikana꞉ma꞉ Dioni pa꞉ta꞉ mandane haliweki tapaemekepate ipikana꞉ma꞉ iki pa꞉ta꞉ mo ota꞉ hau piteleme ekina꞉ta꞉ la haleekeme.  
\v 34 I̱ma꞉ pitolo ekimanu wekitisi hali muluekema꞉ hone na pa꞉la꞉pate ikana꞉ma꞉ da꞉ta꞉la꞉eki muemena꞉yeke do pi alo loa꞉me.  
\v 35 Dionita꞉ hande ola꞉pake tupa꞉ ka꞉wa endialeke handaa pa̱a̱ wopu pu haya꞉me. Koto ekina꞉ ipika꞉ pa̱a̱ pa꞉la꞉eki pa꞉ta꞉ hosiki haluekema꞉ ikana꞉ma꞉ hone pia꞉me.  
\v 36 Kutu pia꞉pate yaka wekitisi hali ma꞉nda꞉ta꞉ Dionima꞉ I̱ pa꞉ta꞉ wekitisi hata꞉ la kia꞉ ekimanu wetepeaalo pa꞉la꞉eki kone hala꞉me. Yaka Apa꞉ma꞉ I̱ma꞉ pionoyeke walea꞉ e manuta꞉ pokolo hata꞉ pitoloeki manuma꞉ kone yaka Apa꞉ma꞉ I̱ tapaala꞉eki wanda꞉hali pa꞉ta꞉ peneme yao wala꞉la꞉me.  
\v 37 Kutupa I̱ tapaala꞉ hali yaka Apa꞉ma꞉ make yaka pi lawaasa꞉me. Ipika꞉ pi ho̱la̱꞉maketa꞉ hoto homeke a꞉nda꞉ na opiki ipika꞉ leke popeleke make hoto homeke a꞉nda꞉ na handelememe.  
\v 38 Koto ekina꞉ ipikana꞉ma꞉ tapaala꞉ hali pa꞉ta꞉ ikana꞉ma꞉ hone na tulaaseme ekina꞉ ipika꞉ pi manuta꞉ iki tukiki pa꞉ta꞉ na ula꞉me.  
\v 39 Deto hala꞉eki handa꞉ uluekema꞉ ikana꞉ma꞉ mo hande Baibolo buka pimanu pa꞉ta꞉ teke weitelemepateta꞉ mo hande Baibolo buka pi manuma꞉ kone yaka pi lawaasa꞉me.  
\v 40 Kutu pa꞉la꞉pate ikana꞉ma꞉ deto hala꞉eki muluekema꞉ I̱ pa꞉ta꞉ a꞉pa꞉peke kiaasememe.   
\p
\v 41 Wanda꞉halima꞉ yaka pi laena꞉yeke na weitolopate  
\v 42 ikita꞉ I̱ma꞉ amba꞉ handoa꞉me. Koda꞉ pa꞉ta꞉ pukima꞉ homeleme ekita꞉ ika꞉ puki pa꞉ta꞉ na ula꞉me.  
\v 43 I̱ta꞉ yaka Apa꞉na꞉ bikina꞉ epolopate ikana꞉ma꞉ I̱ na handa꞉ minelememe. Hali ma꞉nda꞉ ipika꞉ kone epea꞉ka꞉na꞉ta꞉ ikana꞉ma꞉ kutupiki hali handa꞉ milimikie.  
\v 44 Ikana꞉ma꞉ ika꞉ ika꞉ kone ika꞉ pi lao alualu piteleme ekita꞉ hone pa꞉la꞉pate hande homeke hala꞉ Koda꞉ma꞉ ika꞉ pi laasa꞉ ekita꞉ hone na witelememe. Kutu piteleme ekina꞉ ika꞉ honeta꞉ I̱ pa꞉ta꞉ ekipa tulaalimikipe.  
\v 45 I̱ma꞉ iki yaka Apa꞉ pa꞉ta꞉ samani pulueke hone na wia꞉pa꞉peke. Hande ika꞉ hone tulaaleme hali Mosesita꞉ ipikana꞉ma꞉ kone iki samani pilieke.  
\v 46 Mosesima꞉ leeke pimanu ota꞉ekie laa hone tulaemekena꞉ yoluta꞉ kota꞉ yaka pimanu make opulu pimime. Mosesima꞉ wape pieke ekita꞉ I̱ pa꞉ta꞉ kone pieke ekina꞉ loa꞉me.  
\v 47 Kutu pulu pimipate ipikana꞉ma꞉ wape pieke ekimanu ikana꞉ma꞉ hone na tulaaleme ekina꞉ I̱ma꞉ alo pi manuta꞉ ekipa hone tulaalimikipe.   
\c 6  
\s1 Yesuma꞉ 5 daoseni wanda꞉hali ne haleekeeki  
\r (Ma꞉tiu 14꞉13-21, Maka 6꞉30-44, Luku 9꞉10-17)  
\p
\v 1 Koto pimanu laata꞉ mo hande tunkula꞉pa pitieke Ka꞉lili ikali mone tea꞉na꞉ pa la꞉ka꞉la peekeme. Koto ikali biki ma꞉nda꞉ta꞉ Taibitiasi lo hala꞉me.  
\v 2 Wanda꞉hali paeyaoma꞉ta꞉ Yesuma꞉ mo yeni haemeke wanda꞉halina꞉ yeni tandeleaaso hata꞉ wele wopu pieke ekimanu handemeke ekina꞉ Yesu telia꞉ mea pemekeme.  
\v 3 Yesuta꞉ eli ma꞉nda꞉ a꞉meiya pua ipika꞉ disaipolo haliweki ame̱le̱ pitimikime.  
\v 4 Hande Diu wanda꞉halina꞉ Lombei Pupa Yapeeke nate ipuluekema꞉ haena꞉ peekeme.  
\v 5 Yesuma꞉ lekema꞉ lekema꞉ pea handaata꞉ mo wanda꞉hali paeyao epemekeeki handata꞉ Pilipi pa꞉ta꞉ alota꞉ Do wanda꞉hali paeyaota꞉ ne ana꞉na꞉ halomana꞉yeke neta꞉ hando pa꞉ta꞉ hambomana꞉pe leekeme.  
\v 6 Pilipima꞉ pulu pa꞉la꞉eki handuluekema꞉ leekeme. Yesuma꞉ ipika꞉ pulu piekeeki amba꞉ hone wiekeme.   
\p
\v 7 Pilipima꞉ ipika꞉ pi hombo peaaso alota꞉ Do wanda꞉hali paeyaoma꞉ ne hosikisiki kone nena꞉yeke palaowa hambaasota꞉ 200 kina kone ana꞉ na pilieke.  
\v 8 Ipika꞉ disaipolo hali ma꞉nda꞉ta꞉ Saimono Pidana꞉ hameke A꞉ndutuma꞉ alota꞉  
\v 9 Do hala꞉ weki ma꞉nda꞉ma꞉ bali palaowa punka yunki hata꞉ make ta꞉peli yaapo make wia hala꞉pate do wanda꞉hali paeyao yolo hata꞉ ana꞉na꞉ napeke na yelieke.  
\v 10 Yesuma꞉ iki pa꞉ta꞉ alota꞉ Wanda꞉hali pitiniao pitinina꞉ lape leekeme. Noma꞉ wopu opa꞉la꞉ alena꞉ pitimikime. Koto ekina꞉ wanda꞉hali paeyao pitimikipate haliweki paeyao diminiekepate 5 daoseni tupa꞉ pitimikime.  
\v 11 Yesuma꞉ hande palaowa meata꞉ Koda꞉ pa꞉ta꞉ keiyae pi laata꞉ mo pitimiki wanda꞉hali pa꞉ta꞉ teli teli peaeyekeme. Mo hande ta꞉peli yaapo make koto tupa꞉ teli teli peaeyekeme. Kutupa mo wanda꞉hali paeyao ika꞉ hone pieke tupa꞉ kone mea nemekeme.  
\v 12 Wanda꞉hali paeyao ne naa weleke hao pitina꞉ Yesuma꞉ ipika꞉ disaipolo haliweki pa꞉ta꞉ alota꞉ Mo hande ne putupilikimanu minolota꞉ popusunu kone na wina꞉ lapa꞉peke leekeme.  
\v 13 Koto leeke handa mo haliwekima꞉ta꞉ hande bali palaowa yunki hata꞉ nemeke wanda꞉hali paeyaoma꞉ naa wina꞉ lemeke putupilikimanu paeyao mea basekede nuna꞉ mendimikipate 12 basekede numanu tumbaemekeme.   
\p
\v 14 Mo wanda꞉halima꞉ta꞉ Yesuma꞉ koto pa꞉ta꞉ wele wopu piekeeki hando hao alota꞉ Do halita꞉ hande kenkena꞉ epolo pa꞉la꞉ ota꞉ Potopede hali ya꞉ka꞉ta꞉me lemekeme.  
\v 15 Mo wanda꞉halima꞉ta꞉ koto pa꞉ta꞉ kone Yesu ta꞉nka꞉pa꞉ mina ika꞉ kini hali haena꞉ loluekema꞉ hone wimikieki Yesuma꞉ handaata꞉ ipika꞉siki paa la꞉ka꞉la mo yu eli pa꞉ta꞉manu peekeme.   
\s1 Yesuma꞉ ikali manda peekeeki  
\r (Ma꞉tiu 14꞉22-33, Maka 6꞉45-52)  
\p
\v 16 Welealo naneta꞉ Yesu ipika꞉ disaipolo haliwekita꞉ oni tunkula꞉pa pitieke ikali kendo pa꞉ta꞉ hola꞉pa꞉niaota꞉  
\v 17 kawaso pa꞉ta꞉ pua pita Kapeneami nane poluekema꞉ mo ikali tunkula pemekeme. Kutupa timba꞉ leekepate Yesuta꞉ mo haliweki pa꞉ta꞉ a̱i̱ na opolo peekeme.  
\v 18 Kutupa pulu haena꞉ta꞉ po tilipu tieke ipulu hata꞉ ikali ho a꞉meiyekeme.  
\v 19 Mo disaipolo haliwekima꞉ deli awa tia 5 kilomida o 6 kilomida tupa꞉ pemekepate Yesuta꞉ kawaso pa꞉ta꞉ ipuluekema꞉ ikali manda anke hao epeekeeki handaata꞉ paala꞉ma꞉ wopu homemekeme.  
\v 20 Yesuma꞉ iki pa꞉ta꞉ alota꞉ Paala꞉ma꞉ na homa꞉pa꞉peke dota꞉ I̱e leekeme.  
\v 21 Mo haliwekima꞉ Yesuta꞉ mo kawaso tukiki pa꞉ta꞉ pitulu epena꞉e hone wimikime. Kutupa mo hande kawasota꞉ ika꞉ opolo polo pimiki alena꞉ kuta kone opolo pemekeme.   
\s1 Wanda꞉halima꞉ Yesu weimikieki  
\p
\v 22 Kutupa da kelepeeketa꞉ hande tunkula꞉pa pitieke ikali mone tea꞉na꞉ mina꞉pa꞉lao pemeke wanda꞉halima꞉ta꞉ mo kawaso homeke wiekeeki amba꞉ hone wimikime. Mo disaipolo haliwekita꞉ Yesu iki ame̱le̱ mandakena꞉ na pitiki pa ika꞉ kone pemekeeki make hone wimikime.  
\v 23 Mandane kawaso manuta꞉ Taibitiasi nane hao a꞉paata꞉ hande Tekehalima꞉ keiyae pi laa mo wanda꞉hali paeyao pa꞉ta꞉ palaowa teli teli peaeyeke ikali tea꞉na꞉ kone opolo epemekeme.  
\v 24 Wanda꞉hali paeyaoma꞉ Yesu na hayekeeki make ipika꞉ disaipolo haliweki na haemekeeki make handaata꞉ kawaso manuna꞉ pita Kapeneami da nane Yesu weilu pemekeme.   
\s1 Yesuta꞉ da꞉ta꞉la꞉ palaowa konee  
\p
\v 25 Mo wanda꞉halima꞉ta꞉ Yesuta꞉ mo hande tunkula꞉pa pitieke ikali mone tea꞉na꞉ hayekeeki handaata꞉ ipiki pa꞉ta꞉ alota꞉ Disao. Do pa꞉ta꞉ handima꞉ a꞉pa pipe lemekeme.  
\v 26 Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Hande wele pita꞉la꞉eki pua꞉eki handeme ekina꞉ I̱ weiya mea na epeke hande palaowa naa weleke haemeke ekina꞉ hone witolo hata꞉ I̱ weiya mea ipulimime.  
\v 27 Paeya꞉peke ne muluekema꞉ hone anepu na wiki pa u hapekeeki muluekema꞉ hone wotu wia꞉peke. Koto ekita꞉ da꞉ta꞉la꞉eki kone hoto paeyao pa u halieke. Apa꞉ Koda꞉ma꞉ Wanda꞉halina꞉ Eiyeke mea haena꞉ la꞉la꞉ ekina꞉ Eiyekema꞉ koto neta꞉ iki pa꞉ta꞉ mea kilieke.   
\p
\v 28 Koto leeke handa mo wanda꞉halima꞉ Yesu pa꞉ta꞉ lota꞉ pitolo alota꞉ Koda꞉na꞉ pita꞉la꞉ ekimanu puluekema꞉ta꞉ nikana꞉ma꞉ eki puluma꞉pe.  
\v 29 Yesuma꞉ ika꞉ pi hombo peaaso alota꞉ Koda꞉ma꞉ta꞉ ikana꞉ma꞉ dupa puemena꞉yeke hone pa꞉la꞉me la Koda꞉ ipikana꞉ma꞉ tapaala꞉ hali pa꞉ta꞉ hone tulaamina꞉ hone pa꞉la꞉me leekeme.  
\v 30 Mo wanda꞉halima꞉ ipika꞉ pi hombo peaaso alota꞉ Nikana꞉ma꞉ neke pa꞉ta꞉ hone tulamonoyeke eki wele pita꞉la꞉eki ma꞉nda꞉ nikana꞉ma꞉ handomono pilipikipe lemekeme.  
\v 31 Nika꞉ apa꞉mei amedama꞉ mo hande hapu hayeke alena꞉ hata꞉ta꞉ hande ma꞉na netiki pu haemekeme. Hande Baibolo bukana꞉ wape pa꞉la꞉ tupa꞉ Palaowa nena꞉yeke hepeni nane hata꞉ hala꞉niaeyekeme.  
\v 32 Yesuma꞉ mo wanda꞉hali pa꞉ta꞉ alota꞉ Iki pa꞉ta꞉ ota꞉ pi alome. Mosesima꞉ta꞉ hepeni nane palaowa iki na kitolo pia꞉me. Yaka Apa꞉ma꞉ hepeni nane ota꞉ palaowata꞉ iki kia꞉peke ya꞉la꞉me.  
\v 33 Do hande Koda꞉ma꞉ kita꞉la꞉ palaowata꞉ ipikana꞉ma꞉ hepeni mina꞉pa꞉lao hola꞉pa꞉niao a꞉paata꞉ kenke wanda꞉hali pa꞉ta꞉ da꞉ta꞉la꞉eki hala꞉la꞉me leekeme.  
\v 34 Mo wanda꞉halima꞉ ipiki pa꞉ta꞉ alota꞉ Aneke halio kutupiki palaowata꞉ niki pa꞉ta꞉ hoto paeyao ku hapeke.  
\v 35 Yesuma꞉ mo wanda꞉hali pa꞉ta꞉ alota꞉ Da꞉ta꞉la꞉ palaowata꞉ I̱ konee laata꞉ Hali epima꞉ I̱ pa꞉ta꞉ epea꞉ka꞉na꞉ta꞉ tea꞉ma꞉ paa na homilieke. Kutupa hali epima꞉ I̱ pa꞉ta꞉ hone tulaeya꞉ka꞉na꞉ta꞉ ikali na꞉na꞉ paa na pilieke leekeme.   
\p
\v 36 I̱ma꞉ iki pa꞉ta꞉ loa꞉pate ikana꞉ma꞉ I̱ta꞉ handaa kone hone na tulaasememe.  
\v 37 Yaka Apa꞉ma꞉ I̱ pa꞉ta꞉ kita꞉la꞉ wanda꞉hali paeyao I̱ pa꞉ta꞉ ipilieke. Koto ekina꞉ hali epima꞉ I̱ pa꞉ta꞉ epea꞉ka꞉na꞉ta꞉ I̱ma꞉ ota꞉ na tolu lueke.  
\v 38 I̱ma꞉ta꞉ oli hepeni nane hao hola꞉pa꞉niao a꞉pa yaka hone pa꞉la꞉eki puluekema꞉ na epeke I̱ tapaala꞉ halina꞉ hone pa꞉la꞉eki puluekema꞉ epolo ekina꞉ loa꞉me.  
\v 39 I̱ tapaala꞉ halina꞉ hone pa꞉la꞉ ekita꞉ do hau pionoyeke tapaala꞉me dupae. Ipikana꞉ma꞉ I̱ pa꞉ta꞉ ka꞉la꞉ wanda꞉halita꞉ homeke a꞉nda꞉ I̱ma꞉ na alupaake hande paelie dina꞉ta꞉ paeyao I̱ma꞉ pa mea tiawaanoyeke tapaala꞉me.  
\v 40 Yaka Apa꞉na꞉ hone pa꞉la꞉eki dupae. Eiyeke handaa ipiki pa꞉ta꞉ hone tulaaseme wanda꞉hali paeyaota꞉ deto hala꞉eki mina꞉yeke hone pa꞉la꞉me. Kutupa mo hande paelie dina꞉ make I̱ma꞉ mo wanda꞉hali pa mea tiawaalueke leekeme.   
\p
\v 41 Yesuma꞉ mo hepeni nane hao hola꞉pa꞉niao epoa꞉ da꞉ta꞉la꞉ palaowata꞉ I̱ konee leeke ekina꞉ mo wanda꞉halima꞉ ipiki pa꞉ta꞉ tulu tulu leekeme.  
\v 42 Koto ekina꞉ mo wanda꞉halima꞉ alota꞉ Do halita꞉ Yesue la Diosepena꞉ eiyeke na hala꞉pe laata꞉ inkiki ateke yaapo amba꞉ handoloma꞉me. Ekipeke I̱ta꞉ oli hepeni nane hao hola꞉pa꞉niao epoa꞉me ala꞉pe lemekeme.  
\v 43 Yesuma꞉ ika꞉ pi hombo peaaso alota꞉ Ikana꞉ma꞉ I̱ pa꞉ta꞉ tulu tulu aleme pi paapa꞉peke leekeme.  
\v 44 Hali ma꞉nda꞉ta꞉ I̱ pa꞉ta꞉ ipuluekema꞉ta꞉ pa hameke a꞉pa꞉peke na ya꞉la꞉me. I̱ tapaala꞉ hali yaka Apa꞉ma꞉ hali ma꞉nda꞉ I̱ pa꞉ta꞉ epena꞉ yola꞉ mea epea꞉ka꞉na꞉ta꞉ I̱ pa꞉ta꞉ ipilieke. Kutupa koto halita꞉ mo hande paelie dina꞉ I̱ma꞉ pa mea tiawaalueke.  
\v 45 Mo hande potopede haliwekima꞉ wape pa꞉la꞉eki dupae. Koda꞉ma꞉ wanda꞉hali paeyao wala꞉ tiaalieke wape pa꞉la꞉me. Hali epima꞉ hande Apa꞉na꞉ pi opua pia꞉ka꞉na꞉ta꞉ I̱ pa꞉ta꞉ ipilieke leekeme.  
\v 46 I̱ma꞉ do alo ekina꞉ aloma꞉ hali homeke ma꞉nda꞉ma꞉ hande Apa꞉ ota꞉ na handa꞉la꞉me. Koda꞉ yaapo hao do a꞉pa hala꞉ halima꞉ homeke handa꞉la꞉me.  
\v 47 Iki pa꞉ta꞉ ota꞉ pi alome laata꞉ I̱ pa꞉ta꞉ hone tulaasa꞉ halita꞉ da꞉ta hao hala꞉me.  
\v 48 Da꞉ta꞉la꞉ palaowata꞉ I̱e laata꞉  
\v 49 Ika꞉ apa꞉mei amedama꞉ta꞉ mo hande hapu hayeke alena꞉ hata꞉ ma꞉na palaowa nemekepate homemekeme.  
\v 50 Kutu pimikipate oli hepeni nane hao hola꞉pa꞉niao epeeke palaowata꞉ hali epima꞉ koto palaowa nea꞉ka꞉na꞉ta꞉ na homilieke.  
\v 51 Oli hepeni nane hao hola꞉pa꞉niao a꞉pa꞉la꞉ da꞉ta꞉la꞉ palaowata꞉ I̱e leekeme. Hali epima꞉ do palaowa nea꞉ka꞉na꞉ta꞉ da꞉ta hao halieke. Kutupa mo hali pa꞉ta꞉ I̱ma꞉ halo polo palaowata꞉ yaka loke mindiki kone halueke. Kenke wanda꞉hali paeyaoma꞉ da꞉ta꞉la꞉eki mina꞉yeke yaka loke mindiki halueke leekeme.   
\p
\v 52 Koto leekeeki opuata꞉ mo Diu haliwekima꞉ ika꞉ ika꞉ kone ape la alu alu pitolo alota꞉ Do halima꞉ta꞉ ipika꞉ loke mindiki nikana꞉ma꞉ nomonoyeke ekipa kiliepe laa lota꞉ pimikime.  
\v 53 Yesuma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Wanda꞉halina꞉ Eiyeke ipika꞉ loke mindiki make ipika꞉ we make na nemeka꞉na꞉ta꞉ ika꞉ kone da꞉ta꞉la꞉eki na milimikie.  
\v 54 Hali epima꞉ yaka loke mindiki make yaka we make nea꞉ka꞉na꞉ta꞉ da꞉ta hao hala꞉me. Kutupa mo hande paelie dina꞉ koto halita꞉ I̱ma꞉ pa mea tiawaalueke.  
\v 55 I̱ma꞉ do alo ekita꞉ do ekina꞉yeke loa꞉me. Yaka loke mindikita꞉ ota꞉ nee kutupa yaka we make ota꞉ ikalie leekeme.  
\v 56 Hali epima꞉ yaka loke mindiki make yaka we make nea꞉ka꞉na꞉ta꞉ ipikita꞉ I̱ pa꞉ta꞉ halieke. Kutu pia꞉ka꞉na꞉ta꞉ I̱ make ipiki pa꞉ta꞉ halueke.  
\v 57 Da꞉ta hala꞉ Apa꞉ma꞉ I̱ tapaeya꞉me. Kutupa ipiki hala꞉ ekima꞉ I̱ make halome. Koto pa꞉la꞉ ekina꞉ hali epima꞉ I̱ nea꞉ka꞉na꞉ta꞉ kota꞉ koto halita꞉ I̱ haloa꞉ ekima꞉ da꞉ta halieke.  
\v 58 Koto ekina꞉ do ekita꞉ hande hepeni nane hao hola꞉pa꞉niao a꞉pa꞉la꞉ palaowae laata꞉ hande ika꞉ apa꞉mei amedama꞉ naa homemeke palaowa tupa꞉ dia꞉me. Hali epima꞉ do palaowa nea꞉ka꞉na꞉ta꞉ da꞉ta hao halieke leekeme.  
\v 59 Do la꞉la꞉ pi manuta꞉ Yesuma꞉ mo Kapeneami nane hayeke pi hotu haemeke da pa꞉ta꞉ hata꞉ waleeke pimanue.   
\s1 Mo da꞉tao hala꞉ pi  
\p
\v 60 Ipika꞉ disaipolo haliweki wopuma꞉ koto leekeeki opua alota꞉ Do pita꞉ ka꞉nda꞉ wopu piki pie. Epi amedama꞉ opua꞉peke ya꞉la꞉pe lemekeme.  
\v 61 Koto haliwekima꞉ ipika꞉ leeke ekina꞉ tulu tulu lemekeeki Yesuma꞉ hone wia kone mo haliweki pa꞉ta꞉ alota꞉ Do alo pina꞉ ki hone witelemepe.  
\v 62 Wanda꞉halina꞉ Eiyeketa꞉ amba꞉ hao epea꞉ nane paa la꞉ka꞉la polo pa꞉la꞉eki handemeka꞉na꞉ta꞉ eki piliepe.  
\v 63 Loke mindikima꞉ta꞉ niki tamba꞉ mea꞉peke na yelieke. Mo hande Sipitidima꞉ kone da꞉taapeke ya꞉la꞉me. I̱ma꞉ iki pa꞉ta꞉ loa꞉ pi manuta꞉ Sipitidina꞉eki make da꞉taapekeeki make loa꞉me.  
\v 64 Koto pa꞉la꞉pate iki ame̱le̱ haleme mandane haliwekima꞉ I̱ pa꞉ta꞉ hone na tulaasememe leekeme. Ipiki pa꞉ta꞉ hone na tulaalo peleme haliwekita꞉ Yesuma꞉ amba꞉ kone hone wiekeme. Ipiki lina꞉ a꞉nda꞉ lombolo polo pieke hali make amba꞉ kone hone wiekeme.  
\v 65 Ipikana꞉ma꞉ alota꞉ Hande iki pa꞉ta꞉ amba꞉ loa꞉ ekita꞉ do ekina꞉yeke loa꞉me. Hali ma꞉nda꞉ta꞉ hande Apa꞉ma꞉ na peaeya꞉ka꞉na꞉ta꞉ koto hali I̱ pa꞉ta꞉ a꞉pa꞉peke na ya꞉la꞉me leekeme.   
\p
\v 66 Koto leeke handaa Yesu ipika꞉ hoki nane telimiki haliweki wopuma꞉ Yesu kiao mina꞉pa꞉lao ipiki ame̱le̱ paa na pomu haemekeme.  
\v 67 Koto ekina꞉ Yesuma꞉ hande 12 disaipolo haliweki pa꞉ta꞉ alota꞉ Ikana꞉ma꞉ make I̱ kiao pelimikipe.  
\v 68 Saimono Pidama꞉ ipika꞉ pi hombo peaaso alota꞉ Tekehalio. Epi pa꞉ta꞉ pomonope. Naka꞉ pi manuta꞉ da꞉tao hala꞉ pimanue.  
\v 69 Neketa꞉ Koda꞉ ipika꞉ Yakopiki Hali hale ekita꞉ nikana꞉ma꞉ hone tulao hao amba꞉ handoloma꞉me leekeme.  
\v 70 Yesuma꞉ ika꞉ pi hombo peaaso alota꞉ Iki 12 haliwekita꞉ I̱ma꞉ na talopu mea hamina꞉ loeke yekea. Kutu pua꞉pate iki ame̱le̱ hala꞉ hali homeketa꞉ hoke temoko hala꞉me leekeme.  
\v 71 Koto leeke ekita꞉ ipikana꞉ma꞉ mo Isekatioti hali Saimonona꞉ eiyeke Diudasi pa꞉ta꞉ leekeme. Ipikita꞉ hande 12 haliweki ame̱le̱ haemeke hali kone wetepeta꞉ Yesu lina꞉yeke a꞉nda꞉ lombeekeme.   
\c 7  
\s1 Yesu make ipika꞉ hameke titi ame̱le̱ haemekeeki  
\p
\v 1 Kutu pieke hoki naneta꞉ Diu haliwekima꞉ ipiki lu pimiki hone wimiki handaa Yesuta꞉ Diudia nane pomuluekema꞉ hone na wiki mo Ka꞉lili nane pomiekeme.  
\v 2 Hande Sale damanu pa꞉ta꞉ haemeke ekina꞉ ne pambolo pimiki di tekepa꞉ta꞉ yeekeme.  
\v 3 Koto ekina꞉ Yesuna꞉ hameke titima꞉ ipiki pa꞉ta꞉ alota꞉ Naka꞉ disaipolo haliwekima꞉ naka꞉ pitele ekimanu handena꞉yeke do pa꞉ta꞉ mina꞉pa꞉lao Diudia nane pua꞉peke.  
\v 4 Hali ma꞉nda꞉ma꞉ ipika꞉ honema꞉ wanda꞉hali paeyaoma꞉ yaka pitoloeki handena꞉e hone wia꞉ka꞉na꞉ta꞉ kota꞉ a꞉mbao hata꞉ pea꞉peke na ya꞉la꞉me. Do haumanu pitele ekita꞉ wanda꞉hali paeyaona꞉ leke popelekena꞉ hata꞉ pea꞉peke lemekeme.  
\v 5 Kota꞉ ipika꞉ hameke titima꞉ kone Yesu pa꞉ta꞉ hone na tulaemekeme.  
\v 6 Yesuma꞉ mo haliweki pa꞉ta꞉ alota꞉ Yaka nate a̱i̱ na a꞉pa꞉la꞉me laata꞉ ika꞉ ekita꞉ amba꞉ a꞉pa꞉la꞉me.  
\v 7 Kenke wanda꞉hali paeyaoma꞉ iki pa꞉ta꞉ ota꞉ ki hone wia꞉peke na ya꞉la꞉pate I̱ma꞉ ika꞉ piteleme haumanu hoke ekie laa lo halo ekina꞉ I̱ pa꞉ta꞉ ki hone witelememe.  
\v 8 Ikita꞉ hande ne pambolo pa꞉la꞉ ekina꞉ pua꞉pa꞉peke. I̱ta꞉ yaka nate a̱i̱ na a꞉pa꞉la꞉ ekina꞉ na polueke leekeme.  
\v 9 Koto pi laata꞉ Yesuta꞉ Ka꞉lili nane pa hayekeme.   
\s1 Yesuta꞉ hande Sale da manuna꞉ ne pambaemeke pa꞉ta꞉ hayekeeki  
\p
\v 10 Ipika꞉ hameke titi hande ne pambolo pimikieki pa꞉ta꞉ pemeke hoki naneta꞉ Yesu make peneme yao na peke a꞉mbao peekeme.  
\v 11 Mo Diu haliwekima꞉ta꞉ hande ne pambeeke alena꞉ hata꞉ Yesu weitolo hata꞉ lota꞉ pitolo alota꞉ Yesuta꞉ hando pa꞉ta꞉ hala꞉pe lemekeme.  
\v 12 Mo wanda꞉hali paeyaoma꞉ Yesu pa꞉ta꞉ pi alo hata꞉ hambiliki hambilikima꞉ pimikime. Mandane wanda꞉halima꞉ta꞉ Ipikita꞉ epeke halie lemekepate mandane wanda꞉halima꞉ta꞉ Dia꞉me laa Wanda꞉hali pa꞉ta꞉ ya pi lo hala꞉ halie lemekeme.  
\v 13 Koto lemekepate wanda꞉hali paeyaoma꞉ Diu haliweki pa꞉ta꞉ paala꞉ma꞉ homolo hata꞉ pa hali homeke ma꞉nda꞉ma꞉ Yesu pa꞉ta꞉ pi loluekema꞉ peneme yao na leekeme.   
\p
\v 14 Hande ne pambemekeeki tukiki pa꞉ta꞉ Yesuma꞉ mo tembolo da pa꞉ta꞉ pua hata꞉ pi waleekeme.  
\v 15 Mo Diu haliwekima꞉ penkilipitolo hata꞉ alota꞉ Do halita꞉ sukulu na piki halima꞉ kone wopu handa ula꞉ ekita꞉ ekipa pa꞉la꞉pe lemekeme.  
\v 16 Yesuma꞉ ika꞉ pi hombo peaaso alota꞉ Do walolo ekita꞉ I̱ma꞉ hone wia yakaeki na walolome. I̱ tapaala꞉ hali Koda꞉ ipika꞉eki kone walolome.  
\v 17 Hali epima꞉ Koda꞉na꞉ hone pa꞉la꞉ hau puluekema꞉ hone pia꞉ka꞉na꞉ta꞉ kutu pita꞉la꞉ halima꞉ta꞉ I̱ma꞉ do waloloeki Koda꞉na꞉eki kone walaasoeki make o yaka hone wia waloloeki make handa꞉ wilieke.  
\v 18 Hali epima꞉ ipika꞉ hone wia pi lea꞉ka꞉na꞉ta꞉ kota꞉ ipika꞉ biki kone a꞉meiyaasa꞉me. Koto pa꞉la꞉pate hali epima꞉ ipika꞉ biki kone na a꞉meiyaake ipiki tapaala꞉ halina꞉ biki a꞉meiyaluekema꞉ pia꞉ka꞉na꞉ta꞉ kota꞉ koto halita꞉ yayapiki hau pita꞉la꞉ hali dia꞉me. Ota꞉ hau pita꞉la꞉ halie.  
\v 19 Hande Lo Pi manuta꞉ Mosesima꞉ iki pa꞉ta꞉ na ka꞉la꞉pe. Koto pa꞉la꞉pate iki pa꞉ta꞉ hali homeke a꞉nda꞉ma꞉ hande Lo Pimanu na opitolo pita꞉la꞉me. I̱ lia homaaluekema꞉ ekipeke pitelemepe.   
\p
\v 20 Mo wanda꞉hali paeyaoma꞉ ipika꞉ pi hombo peaaso alota꞉ Neke tukiki pa꞉ta꞉ hoke temoko pila꞉me. Neketa꞉ epima꞉ luekema꞉ taapa꞉la꞉pe lemekeme.  
\v 21 Yesuma꞉ ika꞉ pi hombo peaaso alota꞉ I̱ma꞉ta꞉ wele pita꞉la꞉ hau homeke pua꞉ ekina꞉ iki paeyaoma꞉ penkilipimime.  
\v 22 Mosesima꞉ ika꞉ wekisunu pa꞉ta꞉ sekemesaisi hau pea꞉pa꞉peke laa leeke ekina꞉ mo Hoto Pila꞉ Natena꞉ make weki ma꞉nda꞉ pa꞉ta꞉ sekemesaisi hau pilimikie. Mosesima꞉ leeke ekina꞉ loa꞉pate pa Mosesima꞉ do hau na kini pu miekeme. Ika꞉ amba꞉ atekemeima꞉ kini pu mimikime.  
\v 23 Mosesima꞉ waleeke Lo Pimanu yamba꞉laama꞉na꞉ Hoto Pila꞉ Natena꞉ kone weki ma꞉nda꞉ pa꞉ta꞉ sekemesaisi hau pimika꞉na꞉ta꞉ kota꞉ I̱ma꞉ make Hoto Pila꞉ Natena꞉ hali homeke epeaowa꞉ ekina꞉ ekipeke I̱ pa꞉ta꞉ mineke pankelemepe.  
\v 24 Pa lekema꞉ handolo hata꞉ hone na wiki tiki tiki hau pa꞉la꞉ ekina꞉ hone wia꞉pa꞉peke aleo.   
\s1 Ipikita꞉ ota꞉ hande Ketisope  
\p
\v 25 Mandane Diutuseleme wanda꞉halima꞉ alota꞉ Hande luekema꞉ taapeleme halita꞉ do hali ya꞉ka꞉ta꞉pe.  
\v 26 Handa꞉pe. Ipikana꞉ma꞉ wanda꞉halina꞉ leke popelekena꞉ hata꞉ pi ala꞉pate ipiki pa꞉ta꞉ hali ma꞉nda꞉ma꞉ pi na ala꞉me. Nika꞉ you haliwekima꞉ta꞉ do halita꞉ ota꞉ Ketiso hone witelemepe.  
\v 27 Pate do hali hao epa꞉la꞉ alena꞉ nikana꞉ma꞉ handoloma꞉pate hande Ketiso epea꞉ka꞉na꞉ta꞉ ipika꞉ hao epa꞉la꞉ alena꞉ hali ma꞉nda꞉ma꞉ handa꞉peke na yelieke laa lemekeme.   
\p
\v 28 Yesuma꞉ mo tembolo da tukiki pa꞉ta꞉ hata꞉ pi walolo wi la alota꞉ I̱ta꞉ ota꞉ handelemepe. I̱ hao epolo alena꞉ make handelemepe. Yaka kone hone wia na epoa꞉me. Koto pa꞉la꞉pate I̱ tapaeya꞉ halima꞉ta꞉ ota꞉ pi lo hala꞉me.  
\v 29 Koto halita꞉ ikana꞉ma꞉ na handelemepate ipiki yaapo hao epoa꞉ ekina꞉ make ipikana꞉ma꞉ I̱ tapaeya꞉ ekina꞉ make I̱ma꞉ ota꞉ handolome leekeme.  
\v 30 Koto leeketa꞉ ipiki da꞉ka꞉pa꞉ minuluekema꞉ pimikipate ipika꞉ nate a̱i̱ dia꞉yeke handaa hali ma꞉nda꞉ma꞉ ipiki na miniekeme. Wanda꞉hali wopuma꞉ ipiki pa꞉ta꞉ hone tulaaso hata꞉ alota꞉  
\v 31 Hande Ketiso epea꞉ka꞉na꞉ta꞉ do halina꞉ wele pita꞉la꞉ ekimanu ankulaliepe lemekeme.   
\s1 Haliwekima꞉ Yesu da꞉ka꞉pa꞉ minulu pa꞉na꞉ tapaeyekeeki  
\p
\v 32 Mo wanda꞉halima꞉ Yesu pa꞉ta꞉ koto pi lemeke ekimanu mo Pa꞉tisi haliwekima꞉ opuata꞉ mo yeni peao haemeke you haliweki ame̱le̱ apa꞉tao Yesu da꞉ka꞉pa꞉ minulu pena꞉ mo tembolo da handeteke haemeke haliweki tapaemekeme.  
\v 33 Yesuma꞉ alota꞉ Iki ame̱le̱ hosiki haota꞉ wetepena꞉ta꞉ I̱ tapaeya꞉ hali pa꞉ta꞉ polueke.  
\v 34 I̱ weilu pelemepate I̱ halo polo alena꞉ iki epa꞉peke na ya꞉la꞉ ekina꞉ I̱ na handa꞉ wilimiki leekeme.  
\v 35 Mo Diu haliwekima꞉ ika꞉ ika꞉ kone pi la꞉ alu alu pitolo hata꞉ alota꞉ Ipikita꞉ mo nikana꞉ma꞉ na handolo poloma꞉ tupa꞉ hane poluekema꞉ ala꞉pe. Ipikita꞉ mo nika꞉ wanda꞉hali haleme Kitiki daoni pa꞉ta꞉manu mo Kitiki wanda꞉hali walo peliekepe.  
\v 36 Ipikana꞉ma꞉ alota꞉ I̱ handa꞉ uluekema꞉ weilu pelemepate I̱ na handa꞉ wilimikie laa kutupa I̱ halo polo alena꞉ ikita꞉ a꞉pa꞉peke na ya꞉la꞉me la lea꞉me lemekeme. Eki epina꞉ lea꞉pe lemekeme.   
\s1 Deto hala꞉ ikalina꞉ pi  
\p
\v 37 Mo hande ne pambemekeeki paeyeke natena꞉ nate tieke yeekeme. Koto natena꞉ Yesuma꞉ tia liao hata꞉ pi anekema꞉ alota꞉ Hali epima꞉ ikali nena꞉ pia꞉ka꞉na꞉ta꞉ I̱ pa꞉ta꞉ a꞉pa nea꞉ka꞉na꞉ta꞉ epelieke.  
\v 38 Mo Baibolo bukama꞉ la꞉la꞉ ekita꞉ dupae. Hali epima꞉ I̱ pa꞉ta꞉ hone tulaeya꞉ka꞉na꞉ta꞉ ipika꞉ puki pa꞉ta꞉ da꞉ta꞉la꞉ ikali opa wotu yapilieke la꞉la꞉me leekeme.  
\v 39 Yesuma꞉ koto leeke ekita꞉ Holi Sipitidi pa꞉ta꞉ kone leekeme. Ipiki pa꞉ta꞉ hone tulao haemeke wanda꞉halima꞉ mo Holi Sipitidi muluekema꞉ haena꞉ leekeme. Koto natena꞉ta꞉ Yesuma꞉ ipika꞉ halo pieke kapu tieke a̱i̱ dia꞉yeke handaa mo Holi Sipitidi a̱i̱ na epena꞉ leekeme.   
\s1 Wanda꞉hali putupa alu alu pea ta꞉ta꞉ haemekeeki  
\p
\v 40 Mo momba꞉la haemeke wanda꞉hali pa꞉ta꞉ mandane wanda꞉halima꞉ koto leekeeki opua alota꞉ Do halita꞉ hande Koda꞉na꞉ Potopede hali ota꞉ ya꞉ka꞉ta꞉me lemekeme.  
\v 41 Mandane wanda꞉halima꞉ alota꞉ Ipikita꞉ hande Ketisoe lemekepate mandane wanda꞉halima꞉ alota꞉ Ketiso epea꞉ka꞉na꞉ta꞉ mo Ka꞉lili nane hao na ipilieke lemekeme.  
\v 42 Pa ekipeke mo Baibolo bukana꞉ la꞉la꞉ ekita꞉ Ketisota꞉ Deipidi tapake hali hata꞉ta꞉ hande Deipiti hao hayeke daoni pa꞉ta꞉ Beteleha꞉ma꞉ daoni pa꞉ta꞉ mendilieke la la꞉la꞉me lemekeme.  
\v 43 Koto leeke ekina꞉ wanda꞉halima꞉ Yesu pa꞉ta꞉ hone ta꞉ta꞉ ta꞉ta꞉ witolo hata꞉ putupa alualu pea ta꞉ta꞉ haemekeme.  
\v 44 Mandane haliwekima꞉ta꞉ Yesu da꞉ka꞉pa꞉ minuluekema꞉ hone wimikipate hali ma꞉nda꞉ma꞉ ipiki na miniekeme.   
\s1 You haliwekima꞉ Yesu pa꞉ta꞉ hone na tulaemekeeki  
\p
\v 45 Kutu pieketa꞉ mo tembolo da handeteke haemeke haliwekita꞉ mo yeni peao haemeke you haliweki make mo Pa꞉tisi haliweki ame̱le̱ haemeke alena꞉ paa la꞉ka꞉la pemekepate mo haliwekima꞉ hande tembolo da handeteke haemeke haliweki pa꞉ta꞉ alota꞉ Mo hande halita꞉ ekipeke da꞉ka꞉pa꞉ mina na hatuku ipulimipe lemekeme.   
\p
\v 46 Mo tembolo da handeteke haemeke haliwekima꞉ ika꞉ pi hombo peaaso alota꞉ Amba꞉ hata꞉ make do halima꞉ ala꞉ tupa꞉ ma꞉nda꞉ma꞉ dupiki pi na leekeme.  
\v 47 Mo Pa꞉tisi haliwekima꞉ ika꞉ pi hombo peaaso alota꞉ Iki pa꞉ta꞉ make makeao pia.  
\v 48 Nika꞉ you hali ma꞉nda꞉ma꞉ make Pa꞉tisi hali ma꞉nda꞉ma꞉ make ipiki pa꞉ta꞉ hone tulao pia. Dia꞉me.  
\v 49 Do da wanda꞉halita꞉ Koda꞉na꞉ Lo Pimanu na handeleme ekina꞉ Koda꞉ma꞉ hoeyaaluekema꞉ hone amba꞉ wiekeme.   
\p
\v 50 Hande amba꞉ kone Yesu handolo peeke hali Nikodimasima꞉ta꞉ mo haliweki ame̱le̱ hata꞉ta꞉ iki pa꞉ta꞉ alota꞉  
\v 51 Nika꞉ Lo Pi manuma꞉ta꞉ hali ma꞉nda꞉ pa hameke pi yokaalu pea꞉peke na ya꞉la꞉me. Ipika꞉ pi opuata꞉ ipika꞉ pieke hau handa꞉ wia pitolota꞉ ana꞉ pa꞉la꞉me leekeme.  
\v 52 Mo haliwekima꞉ ipiki lu pambaaso alota꞉ Neke make mo hande Ka꞉lili hali yekea. Mo Baibolo buka yata꞉pata꞉ mo Koda꞉na꞉ potopede hali ma꞉nda꞉ta꞉ oli Ka꞉lili nane hao epolo pa꞉la꞉eki na handilipikie lemekeme.  
\v 53 [Kutupa wanda꞉hali paeyao da pemekeme.]   
\c 8  
\s1 Tooli ka꞉taalu pitolo pitina꞉ handeeke wanda꞉ hatuku epeekeeki  
\p
\v 1 Wanda꞉hali paeyaota꞉ da pemekepate Yesuta꞉ mo Olipi pote pa꞉ta꞉ peekeme.  
\v 2 Da ka꞉la꞉paaso siki ipikita꞉ paa la꞉ka꞉la mo tembolo da pa꞉ta꞉ peekeme. Kutupa wanda꞉hali wopu ipiki pa꞉ta꞉ mombelemeke handaa ipikana꞉ma꞉ pitiniao pita꞉ mo wanda꞉hali pa꞉ta꞉ pi waleekeme.  
\v 3 Mo hande Lo Pimanu walo haemeke haliwekima꞉ mandane Pa꞉tisi haliweki ame̱le̱ apa꞉tao wanda꞉ homeke hatuku mea a꞉pa haliweki anka꞉lopuna꞉ haena꞉ lemekeme. Mo wanda꞉ma꞉ tooli ka꞉taalu pitolo haena꞉ handeeke ekina꞉ hatuku epemekeme.  
\v 4 Mo haliwekima꞉ Yesu pa꞉ta꞉ alota꞉ Disao. Do wanda꞉ma꞉ tooli ka꞉taalu pita꞉la꞉ hau pitolo haena꞉ kone handemekeme.  
\v 5 Mosesima꞉ mo hande Lo Pimanu walolo alota꞉ Dupiki wanda꞉ta꞉ toopima꞉ lia homaapa꞉peke la꞉la꞉pate nakana꞉ma꞉ eki pi lelipikipe lemekeme.  
\v 6 Yesu pa꞉ta꞉ pi loluekema꞉ weitolo hata꞉ ipikana꞉ma꞉ ala꞉eki opuluekema꞉ yokaemekeme. Koto lemekepate Yesuma꞉ panda꞉puniao pita꞉ kiki ma̱lekema꞉ kenkena꞉ wape wape piekeme.  
\v 7 Mo haliwekima꞉ lota꞉ lota꞉ pitolo haena꞉ta꞉ Yesuma꞉ tialiao hata꞉ mo haliweki pa꞉ta꞉ alota꞉ Iki pa꞉ta꞉ hala꞉ hali ma꞉nda꞉ hoke hau na pa꞉la꞉ hali haya꞉ka꞉na꞉ta꞉ ipikana꞉ma꞉ amba꞉la toopima꞉ do wanda꞉ lina꞉e leekeme.  
\v 8 Koto laa paa panda꞉puniao pita꞉ kenkena꞉ wape piekeme.  
\v 9 Mo haliwekima꞉ koto pi opuata꞉ homeke la la pu taka꞉laake haliweki amba꞉la homeke la la pu paeyao pemekeme. Yesu homeke pa pitina꞉ mo wanda꞉ta꞉ pa tiao hayekeme.  
\v 10 Ipikana꞉ma꞉ tialiao hata꞉ mo wanda꞉ pa꞉ta꞉ alota꞉ Wanda꞉o. Mo hande haliwekita꞉ handopa꞉ta꞉ halemepe. Hali homekema꞉ neke pa꞉ta꞉ pi yokaalu na pita꞉la꞉pe leekeme.  
\v 11 Mo wanda꞉ma꞉ Yesuna꞉ pi hombo peaaso alota꞉ Tekehalio. Hali ma꞉nda꞉ dia꞉me leekeme. Yesuma꞉ alota꞉ Kota꞉ I̱ma꞉ make neke yaapo pi yokaalu na pulueke. Puaata꞉ wetepena꞉ hoke hau ma꞉nda꞉ na pea꞉peke leekeme.   
\s1 Yesuta꞉ do kenkena꞉ pa̱a̱  
\p
\v 12 Yesuma꞉ iki pa꞉ta꞉ paa alota꞉ I̱ta꞉ do kenkena꞉ pa̱a̱e. Hali epima꞉ ya hoki nane telia꞉ mea epea꞉ka꞉na꞉ta꞉ timba꞉ lo pamba꞉la꞉eki pa꞉ta꞉ na pomiki pa̱a̱ pa꞉la꞉eki pa꞉ta꞉ hata꞉ da꞉ta halieke. Mo da꞉ta꞉la꞉ ekina꞉ pa̱a̱ pa꞉la꞉eki pa꞉ta꞉ halieke.  
\v 13 Mo Pa꞉tisi haliwekima꞉ ipiki pa꞉ta꞉ alota꞉ Naka꞉ piteleeki naka꞉ kone la kitele ekita꞉ ota꞉ pi na aleme lemekeme.  
\v 14 Yesuma꞉ ika꞉ pi hombo peaaso alota꞉ Dia꞉me. I̱ma꞉ pitoloeki I̱ma꞉ kone la kua꞉ka꞉na꞉ta꞉ ota꞉ pi alome. Do ekina꞉yeke loa꞉me. I̱ hao epoa꞉eki make wetepena꞉ polo polo alena꞉ make I̱ma꞉ta꞉ handolopate I̱ hao epoa꞉eki make wetepena꞉ polo polo alena꞉ make iki na handelememe.  
\v 15 Ikana꞉ma꞉ pi yokaalu piteleme ekita꞉ kenke haliwekima꞉ yaalo alememe. I̱ma꞉ta꞉ hali ma꞉nda꞉ pa꞉ta꞉ pi yokaalu na pitolopate  
\v 16 pi yokaalu pulueke laa pua꞉ka꞉na꞉ta꞉ ota꞉eki pitolo hata꞉ pulueke. Ekipeke na loa꞉me. Ya siki na hake I̱ tapaeya꞉ hali yaka Apa꞉ yaapo halopa꞉ ekima꞉ loa꞉me.  
\v 17 Ika꞉ Lo Pimanu pa꞉ta꞉ wape peleme ekita꞉ dupae. La hala꞉la꞉ hali yaapoma꞉ homeke pi lepeka꞉na꞉ta꞉ ipilika꞉ pita꞉ ota꞉eki alepeme.  
\v 18 I̱ma꞉ pitoloeki ya kone la kitolome. Kutupa I̱ tapaeya꞉ hali yaka Apa꞉ma꞉ make yaka pi lawaasa꞉me.   
\p
\v 19 Mo haliwekima꞉ Yesu lota꞉ pitolo alota꞉ Naka꞉ apa꞉ta꞉ hando pa꞉ta꞉ hala꞉pe lemekeme. Yesuma꞉ ika꞉ pi hombo peaaso alota꞉ I̱ make yaka Apa꞉ make iki na handelememe. Ikana꞉ma꞉ I̱ handemeka꞉na꞉ yoluta꞉ yaka Apa꞉ make handolo pimime leekeme.   
\p
\v 20 Koto leeke pi manuta꞉ Yesuma꞉ta꞉ pi walolo mo mani wimiki tembolo da panda꞉ pa꞉ta꞉ hata꞉ leekeme. Kutupa ipika꞉ nate a̱i̱ dia꞉yeke handaa hali ma꞉nda꞉ma꞉ ipiki na da꞉ka꞉pa꞉ miniekeme.   
\s1 I̱ pulu alena꞉ta꞉ ikita꞉ a꞉pa꞉peke na ya꞉la꞉me leekeeki  
\p
\v 21 Yesuma꞉ iki pa꞉ta꞉ pa alota꞉ I̱ta꞉ polueke. Kutupa ikana꞉ma꞉ I̱ weilu pelemepate ika꞉ hoke hau taapuna꞉ hao homilimikie. I̱ pulu alena꞉ ikita꞉ a꞉pa꞉peke na ya꞉la꞉me leekeme.  
\v 22 Koto leeke handaa mo Diu haliwekima꞉ alota꞉ Ipikana꞉ma꞉ alota꞉ I̱ pulu alena꞉ ikita꞉ a꞉pa꞉peke na ya꞉la꞉me lea꞉ ekita꞉ ipikana꞉ma꞉ ipiki kone luekema꞉ lea꞉pe lemekeme.  
\v 23 Yesuma꞉ ika꞉ pi hombo peaaso alota꞉ Ikita꞉ do oto pa꞉ta꞉ haleme haliweki halemepate I̱ta꞉ manda hao epoa꞉me. Ikita꞉ do kenkena꞉ hao haleme haliweki halemepate I̱ta꞉ koto tupa꞉ dia꞉me.  
\v 24 Koto peleme ekina꞉ iki pa꞉ta꞉ ika꞉ hoke hau taapuna꞉ hao homilimikie laa loa꞉me. I̱ do halima꞉ alo pi na opimika꞉na꞉ta꞉ ikita꞉ hoke hau taapuna꞉ hao homilimikie leekeme.  
\v 25 Mo haliwekima꞉ Yesu pa꞉ta꞉ lota꞉ pitolo alota꞉ Neketa꞉ epipe lemekeme. Yesuma꞉ ika꞉ pi hombo peaaso alota꞉ Hande titi panake pa꞉ta꞉ hata꞉ loa꞉eki kone alo loa꞉me.  
\v 26 Ika꞉ pu haleme hauna꞉ I̱ma꞉ pi wopu lapeke ya꞉la꞉me. Kutupa iki pa꞉ta꞉ pi yokaalu pea꞉peke ya꞉la꞉me. Kutu pa꞉la꞉pate I̱ tapaeya꞉ halina꞉ hauta꞉ ota꞉ekie. Kutupa ipika꞉ kake pa꞉ta꞉ opua꞉eki kone kenke wanda꞉hali pa꞉ta꞉ la halolome leekeme.   
\p
\v 27 Mo haliwekima꞉ta꞉ Yesuma꞉ mo Ateke leeke ekita꞉ hone na wimikime.  
\v 28 Koto ekina꞉ Yesuma꞉ iki pa꞉ta꞉ alota꞉ Ikana꞉ma꞉ wetepena꞉ Wanda꞉halina꞉ Eiyeke mea a꞉meiyaemeka꞉na꞉ta꞉ I̱ do halima꞉ la꞉tiki pua꞉ ekita꞉ ota꞉ ya꞉ka꞉ta꞉me laa koto natena꞉ hone wilimikie. Kutupa make I̱ma꞉ ya kone hau ma꞉nda꞉ na piki hande Apa꞉ma꞉ walea꞉eki homeke pu haowa꞉ ekita꞉ hone wilimikie.  
\v 29 Kutupa I̱ tapaeya꞉ halita꞉ dika꞉ mandakena꞉ halopa꞉me. I̱ma꞉ ipiki ta꞉na꞉ma꞉ homaaso hau hoto paeyao pu halo ekina꞉ I̱ honumake hano I̱ na mina꞉pa꞉lala꞉me leekeme.  
\v 30 Ipikana꞉ma꞉ do leeke pi opuaata꞉ wanda꞉hali wopuma꞉ ipiki pa꞉ta꞉ hone tulaemekeme.   
\s1 Mo hande ota꞉ pimanu opiteleme ekima꞉ iki ka꞉la꞉pa꞉ hamina꞉ leliekeeki  
\p
\v 31 Koto ekina꞉ mo Diu haliwekima꞉ ipiki pa꞉ta꞉ hone tulaemeke haliweki pa꞉ta꞉ Yesuma꞉ alota꞉ Ikana꞉ma꞉ I̱ma꞉ waloloeki opua pea꞉tiki pimika꞉na꞉ta꞉ kota꞉ ota꞉ ya disaipolo haliweki hata꞉ta꞉  
\v 32 ota꞉ hau pita꞉la꞉eki handilimikie. Kutupa mo ota꞉ hau pita꞉la꞉ ekima꞉ iki ka꞉la꞉pa꞉ tapao hamina꞉ lelieke.  
\v 33 Mo haliwekima꞉ ipika꞉ pi hombo peaaso alota꞉ Nikita꞉ Eipoloha꞉ma꞉na꞉ tapake haliweki haloma꞉pate hoto homeke a꞉nda꞉ nikana꞉ma꞉ hali ma꞉nda꞉ pa꞉ta꞉ tala꞉liao hata꞉ ipika꞉ e pa hameke na pokao haoma꞉me laa Nakana꞉ma꞉ alota꞉ Ikita꞉ ka꞉la꞉pa꞉ tapao halimikie ale ekita꞉ eki epina꞉ alepe lemekeme.  
\v 34 Yesuma꞉ iki pa꞉ta꞉ alota꞉ Iki pa꞉ta꞉ ota꞉ pi alome. Hali epima꞉ hoke hau pu haya꞉ka꞉na꞉ta꞉ koto halima꞉ta꞉ hoke hau pu hala꞉ ekina꞉ e pa hameke pokaasa꞉ hali leke hala꞉me leekeme.  
\v 35 Kutu piki halita꞉ ipika꞉ teke halina꞉ tapake ame̱le̱ hoto paeyao na hao hatiki piliepate teke halina꞉ eiyeketa꞉ hoto paeyao hao halieke.  
\v 36 Hande Eiyekema꞉ iki ka꞉la꞉pa꞉ tapaeya꞉ka꞉na꞉ta꞉ kota꞉ ota꞉ ka꞉la꞉pa꞉ tapao halimikie.  
\v 37 Ikita꞉ Eipoloha꞉ma꞉ tapake haleme ekita꞉ I̱ma꞉ handolopate I̱ma꞉ walolo pimanu na mendieleme ekina꞉ I̱ luekema꞉ pitelememe.  
\v 38 Yaka Apa꞉ma꞉ I̱ pa꞉ta꞉ walea꞉eki kone I̱ma꞉ walolopate ikana꞉ma꞉ ika꞉ apa꞉ma꞉ walea꞉eki pitelememe leekeme.   
\p
\v 39 Mo haliwekima꞉ ipika꞉ pi hombo peaaso alota꞉ Nika꞉ apa꞉ta꞉ Eipoloha꞉ma꞉e lemekeme. Yesuma꞉ ika꞉ pi hombo peaaso alota꞉ Ikita꞉ Eipoloha꞉ma꞉na꞉ wekitonu haemekena꞉ yoluta꞉ Eipoloha꞉ma꞉na꞉ pieke ekimanu kone pulu pimime.  
\v 40 I̱ma꞉ta꞉ Koda꞉ pa꞉ta꞉ opua꞉eki homeke ota꞉ hau pita꞉la꞉eki iki pa꞉ta꞉ waloa꞉pate ikana꞉ma꞉ I̱ luekema꞉ pitelememe. Eipoloha꞉ma꞉ma꞉ kutupiki hau na piekeme.  
\v 41 Ika꞉ apa꞉ma꞉ piekeeki kone pitelememe. Mo haliwekima꞉ hombo peaaso alota꞉ Nikita꞉ pake wekitonu dia꞉me. Nika꞉ Apa꞉ homeke Koda꞉ hala꞉me lemekeme.  
\v 42 Yesuma꞉ iki pa꞉ta꞉ alota꞉ Koda꞉ta꞉ ika꞉ Apa꞉ haya꞉ka꞉na꞉ yoluta꞉ I̱ pa꞉ta꞉ pukima꞉ homolo pimime. I̱ta꞉ Koda꞉ pa꞉ta꞉ hao a꞉pa ame do halo ekina꞉ loa꞉me. Ya hone wia na epeke ipikana꞉ma꞉ I̱ tapaeyeke a꞉pa halo ekina꞉ loa꞉me.  
\v 43 Ikana꞉ma꞉ I̱ma꞉ alo pita꞉ ekipeke hone na witelemepe. I̱ma꞉ aloeki na opulumeke hone witeleme ekina꞉ loa꞉me.  
\v 44 Ikita꞉ ika꞉ apa꞉ Sadanina꞉ eiyeke titi halememe. Koto peleme ekina꞉ ika꞉ apa꞉na꞉ hone pa꞉la꞉ ekimanu puluekema꞉ pitelememe. Titi panake pa꞉ta꞉ kone ipikita꞉ hali lita꞉la꞉ hali hayekeme. Ipiki pa꞉ta꞉ ota꞉ hau pita꞉la꞉eki ma꞉nda꞉ na ula꞉ ekina꞉ ipikana꞉ma꞉ ota꞉ hau pea꞉peke na ya꞉la꞉me. Yayapiki pi lea꞉ka꞉na꞉ta꞉ ipika꞉ pita꞉la꞉eki kone ala꞉me. Ipikana꞉ma꞉ yayapiki pi lo hala꞉ ekina꞉ make ipikita꞉ yayapiki pi ala꞉ teke hali hala꞉ ekina꞉ make loa꞉me.  
\v 45 I̱ma꞉ ota꞉ pi alo ekita꞉ ikana꞉ma꞉ na opitelememe.  
\v 46 Iki pa꞉ta꞉ hala꞉ hali epima꞉ I̱ma꞉ hoke hau pua꞉eki ma꞉nda꞉ peneme yaaliepe. I̱ma꞉ ota꞉ pi loa꞉ka꞉na꞉ta꞉ pa ekipeke na opitelemepe.  
\v 47 Koda꞉na꞉ wekiwandiki tonuma꞉ Koda꞉na꞉ pimanu opu halemepate ikita꞉ Koda꞉na꞉eki na haleme ekina꞉ta꞉ na opitelememe.   
\s1 Yesu Eipoloha꞉ma꞉ yaapo  
\p
\v 48 Mo Diu haliwekima꞉ Yesuna꞉ pi hombo peaaso alota꞉ Nikana꞉ma꞉ neketa꞉ Sametia hali neke pa꞉ta꞉ hoke temoko pita꞉ pa꞉la꞉me loma꞉ ekita꞉ paeki loma꞉ekea.  
\v 49 Yesuma꞉ ika꞉ pi hombo peaaso alota꞉ I̱ pa꞉ta꞉ta꞉ hoke temoko dia꞉me. Yaka Apa꞉na꞉ pi laasopate ikana꞉ma꞉ yaka pi tombaaluekema꞉ pitelememe.  
\v 50 I̱ma꞉ta꞉ yaka pi kone na laasopate hali ma꞉nda꞉ma꞉ yaka pi laluekema꞉ pita꞉la꞉pate ipikita꞉ pi yokaalu pulu pa꞉la꞉ halie.  
\v 51 Iki pa꞉ta꞉ ota꞉ pi alome. Hali epima꞉ yaka waloloeki opua pia꞉ka꞉na꞉ta꞉ koto halita꞉ hoto ma꞉nda꞉ a꞉nda꞉ homa꞉la꞉eki na handilieke.  
\v 52 Mo Diu haliwekima꞉ Yesu pa꞉ta꞉ alota꞉ Ameta꞉ ota꞉ hone witoloma꞉me. Neke pa꞉ta꞉ hoke temoko pila꞉me. Eipoloha꞉ma꞉ make mo potopede haliweki make amba꞉ homemekepate nakana꞉ma꞉ alota꞉ Hali epima꞉ yaka waloloeki opua pita꞉la꞉ halita꞉ hoto ma꞉nda꞉ a꞉nda꞉ta꞉ homa꞉la꞉eki na handilieke lepate  
\v 53 nika꞉ apa꞉ Eipoloha꞉ma꞉ta꞉ amba꞉ homeekeme laa nakana꞉ma꞉ ipiki ankulaluekema꞉ alepe. Kutupa mo hande potopede haliweki make amba꞉ homemekeme laa neketa꞉ ekipiki hali haluekema꞉ hone witolo alepe lemekeme.   
\p
\v 54 Yesuma꞉ ika꞉ pi hombo peaaso alota꞉ I̱ma꞉ kone yaka pi laa laowa꞉ka꞉na꞉ yoluta꞉ I̱ta꞉ pa hali kone halo pua꞉me. Yaka pi laasa꞉ halita꞉ yaka Apa꞉ma꞉ kone laasa꞉me. Ipikita꞉ ikana꞉ma꞉ nika꞉ Koda꞉ hala꞉me leme halie.  
\v 55 Ipikita꞉ ikana꞉ma꞉ na handelemepate I̱ma꞉ta꞉ ipiki hala꞉eki handolome. Ipikita꞉ I̱ma꞉ na handolome loa꞉ka꞉na꞉ yoluta꞉ kota꞉ iki tupa꞉ yayapiki hali halo pua꞉me. Kutu pulu pua꞉pate I̱ma꞉ ipiki handaata꞉ ipika꞉ pi make opu halome.  
\v 56 Ika꞉ apa꞉ Eipoloha꞉ma꞉ma꞉ yaka di handuluekema꞉ ta꞉na꞉ma꞉ homa hata꞉ handaata꞉ ta꞉na꞉ma꞉ homeekeme.  
\v 57 Mo Diu haliwekima꞉ ipiki pa꞉ta꞉ alota꞉ Naka꞉ bapi manuta꞉ pa 50manu a̱i̱ na paela꞉pate Eipoloha꞉ma꞉ nakana꞉ma꞉ amba꞉ handekea.  
\v 58 Yesuma꞉ ika꞉ pi hombo peaaso alota꞉ Iki pa꞉ta꞉ ota꞉ pi alome. Eipoloha꞉ma꞉ a̱i̱ na mendieke natena꞉ kone I̱ta꞉ pa halome leekeme.  
\v 59 Mo haliwekima꞉ Yesu luekema꞉ toopimanu mimikipate Yesuta꞉ mo tembolo da mina꞉pa꞉lao a꞉mbao hama꞉ nane peekeme.   
\c 9  
\s1 Inkikima꞉ mendieke pa꞉ta꞉ kone handa꞉peke na yeke halina꞉ leke ki laeyekeeki  
\p
\v 1 Yesuma꞉ pota꞉na꞉ pulu hata꞉ handeekepate inkikima꞉ mendieke pa꞉ta꞉ kone leke holupiki hali handeekeme.  
\v 2 Kutupa ipika꞉ disaipolo haliwekima꞉ Yesu lota꞉ pitolo alota꞉ Disao. Do mendieke pa꞉ta꞉ kone do halina꞉ leke holupiki hauta꞉ epima꞉ pa꞉la꞉ hoke hauna꞉ pa꞉la꞉pe laa ateke inkikina꞉ ekina꞉ pa꞉la꞉pe o ipika꞉ ekima꞉ kone pa꞉la꞉pe laa lota꞉ pimikime.  
\v 3 Kutupa Yesuma꞉ ika꞉ pi hombo peaaso alota꞉ Do halima꞉ make ateke inkikima꞉ make ika꞉ hoke hau peleme ekina꞉ na pa꞉la꞉me. Pa Koda꞉na꞉ wele pita꞉la꞉ ekima꞉ do hali epeaasa꞉eki handena꞉yeke leke holupiki hali mendia pa꞉la꞉me leekeme.  
\v 4 Hande I̱ tapaala꞉ halina꞉ eta꞉ nate a꞉pa talo haena꞉ pokatiki pumana꞉e. Timba꞉ lolo yapea꞉ka꞉na꞉ta꞉ ipika꞉ e pokaapeke na yelieke.  
\v 5 I̱ kenkena꞉ a꞉pa halo dina꞉ta꞉ kenkena꞉ pa̱a̱ peaasoeki halome leekeme.  
\v 6 Kotoeki laata꞉ Yesuma꞉ dopi kenkena꞉ taata꞉ kenke taapu dakole peao handeeki meaata꞉ mo halina꞉ leke pa꞉ta꞉ kitaaso hata꞉  
\v 7 ipiki pa꞉ta꞉ alota꞉ Mo hande tunkula꞉ pa ula꞉ Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke laa leekeme. Koto ikali bikita꞉ Tapaala꞉me laa lo haemekeme. Koto ekina꞉ mo hali puata꞉ ipika꞉ leke popeleke tanda꞉pa ala꞉ta꞉ handolo hata꞉ la꞉ka꞉la paa epeekeme.   
\p
\v 8 Kutupa ipika꞉ da wanda꞉halima꞉ make mo pitu hata꞉ honke lea꞉tiki piekeeki opimiki wanda꞉halima꞉ make alota꞉ Do halita꞉ hande pitu hata꞉ honke lo pita꞉tiki pia꞉ hali dia꞉ya꞉ka꞉ta꞉pe laa lemekeme.  
\v 9 Mandane wanda꞉halima꞉ alota꞉ Aowe. Koto hali lataa lemekepate mandane wanda꞉halima꞉ alota꞉ Dia꞉me. Do halima꞉ handeke hali kone ma꞉nda꞉ hata꞉ pa꞉la꞉me lemekeme. Koto lemekepate mo halima꞉ ipika꞉ kone alota꞉ I̱ lataa leekeme.  
\v 10 Wanda꞉halima꞉ ipiki pa꞉ta꞉ lota꞉ pitolo alota꞉ Ekipa naka꞉ leke epeao pa꞉la꞉pe la lemekepate  
\v 11 ika꞉ pi hombo peaaso ipikana꞉ma꞉ alota꞉ Mo hande Yesu biki leleme halima꞉ kenke dakole peao yaka lekena꞉ kitao I̱ pa꞉ta꞉ alota꞉ Mo Sailoa꞉me ikali pa꞉ta꞉ pua naka꞉ leke popeleke tanda꞉pa꞉peke lea꞉me laa koto leeke handaa I̱ pua tandepoa꞉pate ala꞉ta꞉ ala꞉ta꞉ koto kone handoa꞉me leekeme.  
\v 12 Koto leeke handaa mo wanda꞉halima꞉ lota꞉ pitolo alota꞉ Koto halita꞉ hando pa꞉ta꞉ hala꞉pe la lemekepate ipikana꞉ma꞉ alota꞉ I̱ na handolome leekeme.   
\s1 Mo Pa꞉tisi haliwekima꞉ hande epeaeyekeeki handemekeeki  
\p
\v 13 Kutupa mo haliwekima꞉ hande amba꞉ leke holupiki hali hatuku mo Pa꞉tisi haliweki pa꞉ta꞉ waluekema꞉ mea pemekeme.  
\v 14 Yesuma꞉ kenke dakole peao mo halina꞉ leke kilaake hauta꞉ Hoto Pila꞉ Natena꞉ piekeme.  
\v 15 Kutupa mo Pa꞉tisi haliwekima꞉ mo hali paa lota꞉ pitolo alota꞉ Naka꞉ leketa꞉ ekipa epeao pa꞉la꞉pe la lota꞉ pimiki handaa mo halima꞉ alota꞉ Ipikana꞉ma꞉ kenke dakole piki ekima꞉ yaka lekena꞉ kitaeyeketa꞉ ikali pa꞉ta꞉ pua tandepoa꞉ ekita꞉ ameta꞉ handolome leekeme.  
\v 16 Mandane Pa꞉tisi haliwekima꞉ alota꞉ Do hau pa꞉la꞉ halita꞉ mo Hoto Pila꞉ Natena꞉ pi ula꞉eki yamba꞉la꞉la꞉ ekina꞉ ipikita꞉ Koda꞉ma꞉ na tapaala꞉me lemekepate mandane haliwekima꞉ alota꞉ Dupiki wele pita꞉la꞉ ekita꞉ hoke hau pa꞉la꞉ halima꞉ ekipa piliepe la lemekeme. Koto ekina꞉ ika꞉ kone putupaalu pea pi ta꞉ta꞉ ta꞉ta꞉ lemekeme.   
\p
\v 17 Kutupa mo Pa꞉tisi haliwekima꞉ hande hali pa꞉ta꞉ hoto ma꞉nda꞉ paa lota꞉ pitolo alota꞉ Nakana꞉ma꞉ alota꞉ Yaka leke kilaeya꞉me alepateta꞉ ipiki pa꞉ta꞉ eki hone witelepe lemekeme. Mo halima꞉ hombo peaaso alota꞉ Ipikita꞉ Koda꞉na꞉ potopede halie la leekepate  
\v 18 mo Diu haliwekima꞉ ipika꞉ leke holu pea hayekeeki make mo leke epeaeyekeeki make koto pi opua꞉peke kiaaso hata꞉ mo halina꞉ ateke inkiki yaapo wi la꞉ mea  
\v 19 ipiliki pa꞉ta꞉ lota꞉ pitolo alota꞉ Do halita꞉ ipilika꞉ wekipe. Kutupa ipikita꞉ panake mendi pa꞉ta꞉ kone leke holupiki weki mendipe laata꞉ Kutu pia꞉ka꞉na꞉ yoluta꞉ kota꞉ ameta꞉ ekipa handolo pia꞉pe laa lota꞉ pimikime.  
\v 20 Mo halina꞉ ateke inkiki yaapoma꞉ ika꞉ pi hombo peaaso alota꞉ Koto halita꞉ dika꞉ weki ya꞉la꞉pate mendia꞉ pa꞉ta꞉ kone leke holupiki weki mendia꞉ ekita꞉ hone ulupa꞉pateta꞉  
\v 21 ame ipika꞉ leke kila handa꞉la꞉eki make ipika꞉ leke kilaake hauta꞉ epima꞉ pa꞉la꞉pe. Kota꞉ dikita꞉ mata꞉la꞉me laa lepekeme. Ipiki pa꞉ta꞉ pua opua꞉pa꞉peke. Ipika꞉ bapi manuta꞉ ana꞉na꞉ hala꞉ ekima꞉ ipika꞉ kone la kilieke laa lepekeme.  
\v 22 Ateke inkiki yaapoma꞉ mo Diu haliweki pa꞉ta꞉ paala꞉ma꞉ homolo hata꞉ dupa lepekeme. Mo Diu haliwekima꞉ta꞉ hali epima꞉ Yesuta꞉ hande Ketiso hala꞉me lelimi wanda꞉halita꞉ mo pi hotu haemeke da pa꞉ta꞉ na epena꞉yeke pa yokomana꞉ la pi la꞉ wieke ekina꞉ paala꞉ma꞉ homepekeme.  
\v 23 Koto ekina꞉ mo toolima꞉ alota꞉ Ipika꞉ bapimanu ana꞉na꞉ hala꞉ ekima꞉ ipiki pa꞉ta꞉ pua opua꞉pe laa lepekeme.   
\p
\v 24 Kutupa hoto yaapo peao hande mendieke pa꞉ta꞉ kone leke holupiki halita꞉ mo haliwekima꞉ wi la ipiki pa꞉ta꞉ alota꞉ Koda꞉ pa꞉ta꞉ pi la꞉ witolo hata꞉ ota꞉eki lapeke laa nikana꞉ma꞉ hone uluma꞉me. Koto hande halita꞉ hoke hau pita꞉la꞉ halie la lemekeme.  
\v 25 Kutupa mo halima꞉ ika꞉ pi hombo peaaso alota꞉ Ipikita꞉ hoke hau pa꞉la꞉ halipe. I̱ mata꞉la꞉me. Pa hau homeketa꞉ handolome. Amba꞉ta꞉ yaka leke holu pea haowa꞉pate ameta꞉ yaka leke kila handolome leekeme.  
\v 26 Mo haliwekima꞉ ipiki pa꞉ta꞉ lota꞉ pitolo alota꞉ Neke pa꞉ta꞉ eki hau pia꞉pe. Naka꞉ leketa꞉ ekipa kilaeya꞉pe laa lota꞉ pimiki handaa  
\v 27 mo halima꞉ alota꞉ Amba꞉ la kua꞉pate na opuelememe. Ekipeke pa opuluekema꞉ alemepe laa iki make mo hande halina꞉ disaipolo haliweki haluekema꞉ hone witelemepe la leekeme.  
\v 28 Koto leeke handaa mo haliwekima꞉ ipiki kitaaso hata꞉ alota꞉ Neketa꞉ mo hande halina꞉ disaipolo hali halepate nikita꞉ Mosesina꞉ disaipolo haliweki haloma꞉me.  
\v 29 Koda꞉ma꞉ Mosesi pa꞉ta꞉ la꞉la꞉ ekita꞉ nikana꞉ma꞉ hone uluma꞉pate koto hande halita꞉ hando pa꞉ta꞉ hao a꞉pa pa꞉la꞉pe. Niki na handoloma꞉me laa lemekeme.   
\p
\v 30 Koto ekina꞉ mo halima꞉ ika꞉ pi hombo peaaso alota꞉ Ikana꞉ma꞉ koto halita꞉ hando pa꞉ta꞉ hao a꞉pa pa꞉la꞉pe alemepateta꞉ yaka leke ipikana꞉ma꞉ kilaeya꞉me.  
\v 31 Nikana꞉ma꞉ Koda꞉ma꞉ hoke wanda꞉halina꞉ pi na opita꞉la꞉ ekita꞉ handoloma꞉pate pa Koda꞉ma꞉ta꞉ ipiki pa꞉ta꞉ homu pea hata꞉ ipika꞉ hone pa꞉la꞉ hau peaaseme wanda꞉halina꞉ pita꞉ opu hala꞉me.  
\v 32 Kota꞉ panake pa꞉ta꞉ ala꞉ta꞉ ala꞉ta꞉ wepieke pa꞉ta꞉ kone mo mendieke dina꞉ kone leke holupiki halina꞉ leke kilaasa꞉ ekita꞉ ma꞉nda꞉ma꞉ dupaeya꞉me pita꞉ na opoloma꞉me.  
\v 33 Koto hande halima꞉ta꞉ Koda꞉ ame̱le̱ hao na epea꞉ka꞉na꞉ yoluta꞉ hau homeke a꞉nda꞉ pea꞉peke na yolo pia꞉me leekeme.   
\p
\v 34 Koto ekina꞉ mo haliwekima꞉ ipika꞉ pi hombo peaaso alota꞉ Naka꞉ ama꞉ma꞉ hokeeki tukiki pa꞉ta꞉ hata꞉ ma꞉nda꞉leke daele halima꞉ kone niki waluekema꞉ alepe lemekeme. Koto laa mo halita꞉ mo pi hotu haemeke da pa꞉ta꞉ na epena꞉yeke pao yoka ta꞉ta꞉ haena꞉ lemekeme.   
\s1 Hoke ekima꞉ leke holu peaasa꞉eki  
\p
\v 35 Yesuma꞉ mo hali yoka ta꞉ta꞉ haena꞉ lelememe lemekeeki opuaata꞉ mo hali weiya handa꞉ wia ipiki pa꞉ta꞉ alota꞉ Wanda꞉halina꞉ Eiyeke pa꞉ta꞉ hone tulao halepe laa leeke handaa  
\v 36 mo halima꞉ Yesuna꞉ pi hombo peaaso alota꞉ Tekehalio. Wanda꞉halina꞉ Eiyeke pa꞉ta꞉ hone tulao haluekema꞉ loa꞉me. Ipika꞉ biki la kie leekepate  
\v 37 Yesuma꞉ ipiki pa꞉ta꞉ alota꞉ Ipikita꞉ amba꞉ handeme. Neke yaapo do pi pi alepe halie laa leekeme.  
\v 38 Mo halima꞉ Yesu pa꞉ta꞉ alota꞉ Tekehalio. Hone tulaasome laata꞉ Yesu pa꞉ta꞉ tumiki yotuao pitiekeme.   
\p
\v 39 Kutupa Yesuma꞉ alota꞉ Do kenkena꞉ wanda꞉halina꞉ pi yokaalu puluekema꞉ epoa꞉me la leke holupiki wanda꞉halima꞉ handena꞉ make handeleme wanda꞉hali make leke holu pea haena꞉yeke epoa꞉me la leekeme.  
\v 40 Mandane Pa꞉tisi haliwekima꞉ koto leekeeki opua Yesu pa꞉ta꞉ lota꞉ pitolo alota꞉ Nikita꞉ leke holupiki haliweki halemema꞉ alepe lemekepate  
\v 41 Yesuma꞉ iki pa꞉ta꞉ alota꞉ Leke holupiki haliweki haemekena꞉ yoluta꞉ iki pa꞉ta꞉ hokeeki ma꞉nda꞉ na ulu pia꞉me laa kutupulu pia꞉pate ikana꞉ma꞉ alota꞉ Nikita꞉ handoloma꞉me aleme ekina꞉ iki pa꞉ta꞉ hokeeki pa ula꞉me leekeme.   
\c 10  
\s1 Mo Sipisipi ma꞉na꞉na꞉ ho̱linda꞉na꞉ onkoluma꞉ pi  
\p
\v 1 Yesuma꞉ alota꞉ I̱ma꞉ iki pa꞉ta꞉ ota꞉ pi alome. Hali epima꞉ mo sipisipi ma꞉na꞉manu ho̱linda꞉ pa꞉la꞉ pota꞉ kake pa꞉ta꞉ na peke pa pa꞉ta꞉ ponda꞉pa pea꞉ka꞉na꞉ta꞉ koto halita꞉ ta꞉ta꞉na꞉ alemanu muluekema꞉ pake nala꞉ halie.  
\v 2 Pate mo pota꞉ kake pa꞉ta꞉ pula꞉ halita꞉ mo hande sipisipi ma꞉na꞉manu handeteke hala꞉ halie leekeme.  
\v 3 Mo pota꞉ kake handeteke hala꞉ halima꞉ta꞉ koto hali pena꞉ta꞉ pota꞉ lombalieke. Kutupa mo halima꞉ ipika꞉ ma꞉na꞉ manuna꞉ biki laa wi la꞉ mepi peaata꞉ mo ma꞉na꞉ manuma꞉ ipika꞉ pi ho̱la̱꞉make opimika꞉na꞉ta꞉ hama꞉ nane hatuku pelieke.  
\v 4 Hama꞉ nane hatuku puaata꞉ ipiki amba꞉la titina꞉ pelieke. Kutupa mo sipisipi ma꞉na꞉ manuma꞉ ipika꞉ pi ho̱la̱꞉make opitolo hata꞉ ipiki telia꞉ mea pelimikie.  
\v 5 Pa hali ma꞉nda꞉ telia꞉ meata꞉ na pelimikie. Dia꞉me. Ipika꞉ pi ho̱la̱꞉make na opitolo hata꞉ mo ma꞉na꞉manu pindipa pelimikie.   
\p
\v 6 Yesuma꞉ onkoluma꞉ laa do pi leekepate mo haliwekima꞉ do pi teketa꞉ hone na wimikime.   
\s1 Yesuta꞉ epeke tupa꞉ ma꞉na꞉ handeteke hala꞉ hali  
\p
\v 7 Koto ekina꞉ Yesuma꞉ paa dupa leekeme. I̱ma꞉ iki pa꞉ta꞉ ota꞉ pi alome. I̱ta꞉ sipisipi ma꞉na꞉ manuna꞉ pota꞉ kake halome.  
\v 8 I̱ na epeke hano titina꞉ epemeke haliweki paeyaota꞉ pake nolo pimiki haliweki epemeke handaa hande sipisipi ma꞉na꞉ manuma꞉ta꞉ ika꞉ pi na opimikime.  
\v 9 I̱ta꞉ pota꞉ kake halome. Hali epima꞉ I̱ pa꞉ta꞉ honda꞉ pamba epea꞉ka꞉na꞉ta꞉ koto halima꞉ da꞉ta꞉la꞉eki milieke. Kutupa mo halita꞉ tukiki nane pua꞉tiki hama꞉ nane a꞉pa꞉tiki pitolo hata꞉ epeke nemanu netiki pilieke.  
\v 10 Pake nala꞉ halima꞉ta꞉ mo sipisipi ma꞉na꞉manu pake meata꞉ lia hoeyaaluekema꞉ ipilimipateta꞉ I̱ epolo ekita꞉ ikana꞉ma꞉ da꞉ta꞉la꞉eki muemena꞉yeke epolome. Tumba ula꞉ da꞉ta꞉la꞉eki kone muemena꞉yeke epolome.   
\p
\v 11 I̱ta꞉ handa꞉ ma꞉na꞉ epeke tupa꞉ handeteke halo halie. Mo sipisipi ma꞉na꞉manu tamba꞉ muluekema꞉ yaka da꞉ta꞉la꞉eki hone na ulueke.  
\v 12 Mo yenki e poka꞉la꞉ somema꞉ pa ma꞉nda꞉na꞉ sipisipi ma꞉na꞉manu handeteke hawaaso hata꞉ mo tikene kika epea꞉ka꞉na꞉ta꞉ ipikita꞉ teke some dia꞉yalo hata꞉ mo ma꞉na꞉manu mina꞉pa꞉lao pindipa pelieke. Koto ekina꞉ mo tikene kikama꞉ hande ma꞉na꞉manu lu nea꞉ka꞉na꞉ta꞉ ta꞉ta꞉ ta꞉ta꞉ pea pindipa pelimikie.  
\v 13 Hande yenki muluekema꞉ e pokeeke halima꞉ta꞉ mo ma꞉na꞉manu pa꞉ta꞉ hone wopu na witolo hata꞉ ipikita꞉ pa e pokaasa꞉ hali yaalo hata꞉ta꞉ pindipa pelieke.  
\v 14-15 I̱ta꞉ hande ma꞉na꞉ epeke tupa꞉ handeteke halo halie. Yaka Apa꞉ma꞉ I̱ handa꞉la꞉eki make I̱ma꞉ make yaka Apa꞉ handolo tupa꞉ I̱ma꞉ make yaka sipisipi ma꞉na꞉manu handolome. Kutupa yaka sipisipi ma꞉na꞉ manuma꞉ make I̱ handilimikie. Kutupa hande sipisipi ma꞉na꞉manu pa꞉ta꞉ hone witolo hata꞉ta꞉ yaka da꞉ta꞉la꞉eki alupaowa꞉ka꞉na꞉ta꞉ ana꞉ pilieke.  
\v 16 Yaka mandane ma꞉na꞉manu make halememe. Do haleme ekimanu homeke na loa꞉me. Iki make yaka pi ho̱la̱꞉make opitolo haena꞉ I̱ma꞉ mina꞉neaalueke. Kutupa mo ma꞉na꞉manu tapake homeke halo pelemepateta꞉ handeteke hala꞉ hali make homeke kone halieke.   
\p
\v 17 Yaka da꞉ta꞉la꞉eki kone pa muluekema꞉ alupaalo poloeki yaka Apa꞉ma꞉ kotoeki handolo hata꞉ I̱ pa꞉ta꞉ pukima꞉ wotu homa꞉la꞉me.  
\v 18 Hali ma꞉nda꞉ma꞉ yaka da꞉ta꞉la꞉eki hoeyaapeke na ya꞉la꞉pate yaka hone wia kone yaka hone pa꞉la꞉ ekina꞉ loa꞉me. I̱ma꞉ homeke ana꞉na꞉ kia pa I̱ma꞉ homeke ana꞉na꞉ paa mea꞉peke ya꞉la꞉me. Do ekita꞉ yaka Apa꞉ma꞉ pea꞉pekee la꞉la꞉ ekina꞉ loa꞉me.   
\p
\v 19 Kutupa Yesuma꞉ do pimanu leeke ekina꞉ mo Diu haliwekima꞉ putupa ta꞉ta꞉ ta꞉ta꞉ haemekeme.  
\v 20 Mandane haliweki wopuma꞉ alota꞉ Ipiki pa꞉ta꞉ hoke temoko pita꞉ pa꞉la꞉me laa ipikita꞉ keaaso pita꞉la꞉me. Ipika꞉ pita꞉ ekipeke opitelemepe laa lea꞉tiki pimikipate  
\v 21 mandane haliwekima꞉ alota꞉ Hoke temoko pila꞉ halima꞉ dupiki pi lapeke na ya꞉la꞉me laa hoke temokoma꞉ta꞉ leke holupiki haliwekina꞉ leke ekipa kilaaliepe laa lea꞉tiki pimikime.   
\s1 Wanda꞉halima꞉ Yesu kiaemekeeki  
\p
\v 22 Koto pita꞉ Diutuseleme nane haena꞉ ta꞉ta꞉ piki nate epeekeme. Koto nateta꞉ di wia hao amba꞉ kone mo hande tembolo da pota꞉ pa lombemekeeki hone witolo hata꞉ pimikime. Kosa꞉ kina꞉ hata꞉ pimikime.  
\v 23 Koto dina꞉ta꞉ Yesuta꞉ mo tembolo da pa꞉ta꞉ hata꞉ mo Solomonona꞉ da mineke pa꞉ta꞉ pomiekeme.  
\v 24 Kutu pitolo haena꞉ mo Diu haliwekima꞉ ipiki dupao hata꞉ ipiki pa꞉ta꞉ lota꞉ pitolo alota꞉ Nikita꞉ hoto ekipuna꞉ hone eleke eleke wia hamono lelipiki laata꞉ Neketa꞉ hande Ketisope. Niki pa꞉ta꞉ ota꞉ pi la kia꞉peke lemekeme.  
\v 25 Yesuma꞉ iki pi hombo peaaso alota꞉ I̱ma꞉ iki pa꞉ta꞉ amba꞉ la kua꞉pateta꞉ ikana꞉ma꞉ I̱ pa꞉ta꞉ hone na tulaalememe. Yaka Apa꞉na꞉ bikina꞉ pitolo haumanu paeyaoma꞉ta꞉ yaka biki mea a꞉meiyaasemepateta꞉  
\v 26 ikita꞉ yaka sipisipi ma꞉na꞉manu na haleme ekina꞉ I̱ pa꞉ta꞉ hone na tulaasememe.  
\v 27 Yaka sipisipi ma꞉na꞉ manuma꞉ yaka pi ho̱la̱꞉make minelememe. I̱ma꞉ make iki handolome. Kutupa yaka hoki nane telia꞉ mea ipulimime.  
\v 28 Iki pa꞉ta꞉ da꞉ta hao hala꞉eki halono ikita꞉ ota꞉ na homilimikie. Kutupa ikita꞉ ya kiki pa꞉ta꞉ haena꞉ hali ma꞉nda꞉ma꞉ pa꞉ta꞉la꞉ mea꞉peke na ya꞉la꞉me.  
\v 29 Yaka Apa꞉ma꞉ iki I̱ pa꞉ta꞉ kia꞉me. Kutupa yaka Apa꞉ make manda hata꞉ paeyao ankulala꞉me. Yaka Apa꞉ma꞉ miniki hala꞉ ekimanu hali ma꞉nda꞉ma꞉ pa꞉ta꞉la꞉ mea꞉peke na ya꞉la꞉me.  
\v 30 Yaka Apa꞉ dikita꞉ homeke kone halopa꞉me leekeme.   
\p
\v 31 Koto leeke ekina꞉ Mo Diu haliwekima꞉ Yesu luekema꞉ toopimanu paa mimikime.  
\v 32 Yesuma꞉ mo haliweki pa꞉ta꞉ alota꞉ Yaka Apa꞉ma꞉ peaala꞉ epeke pita꞉la꞉ ekimanu wotu I̱ma꞉ iki pa꞉ta꞉ waloa꞉pate eki pua꞉ ekina꞉ toopima꞉ I̱ luekema꞉ pitelemepe.  
\v 33 Mo Diu haliwekima꞉ ipika꞉ pi hombo peaaso alota꞉ Nakana꞉ma꞉ epeke peleeki ma꞉nda꞉na꞉ hone witolo hata꞉ toopima꞉ neke luekema꞉ na pitoloma꞉pate pa Koda꞉ laasa꞉ ekina꞉ pitoloma꞉me. Neketa꞉ pa hali ya꞉la꞉pate nakana꞉ma꞉ Koda꞉ tupa꞉ hata꞉ kone alome le ekina꞉ pitoloma꞉me.  
\v 34 Yesuma꞉ ika꞉ pi hombo peaaso alota꞉ Ika꞉ Lo Pimanu pa꞉ta꞉ dupa wape pea ula꞉me. I̱ma꞉ alota꞉ Ikita꞉ koda꞉sunue loa꞉me laa wape pa꞉la꞉me.  
\v 35 Kota꞉ Koda꞉ma꞉ ipika꞉ pi la꞉niaemeke haliweki pa꞉ta꞉ ika꞉ bikita꞉ koda꞉manue laa leekeme. Kutupa Baibolo bukana꞉ pita꞉ ota꞉eki kone pa u halieke.  
\v 36 Kutu pa꞉la꞉pate I̱ta꞉ hande yaka Apa꞉ma꞉ I̱ meata꞉ do kenke pa꞉ta꞉ epono I̱ tapaeya꞉me. Koto ekina꞉ I̱ma꞉ta꞉ Koda꞉na꞉ Eiyeke halome loa꞉ ekita꞉ Koda꞉ laasopatema꞉ ekipeke alemepe.  
\v 37 Yaka Apa꞉na꞉ pita꞉la꞉ ekimanu na pua꞉ka꞉na꞉ta꞉ kota꞉ I̱ pa꞉ta꞉ hone na tulaapa꞉pe.  
\v 38 Kutu pua꞉peke ya꞉la꞉pate yaka Apa꞉na꞉ pita꞉la꞉ ekimanu pua꞉ka꞉na꞉ta꞉ I̱ pa꞉ta꞉ hone na tulaake hata꞉ kone yaka pitolo ekimanu pa꞉ta꞉ kone hone tulaapeke aleo. Kutu pimika꞉na꞉ta꞉ hande Apa꞉ta꞉ I̱ tukiki pa꞉ta꞉ hala꞉eki make I̱ta꞉ ipiki tukiki pa꞉ta꞉ haloeki make handa꞉ hone wilimikie leekeme.  
\v 39 Yesu pa da꞉ka꞉pa꞉ minuluekema꞉ pimikipate ipikita꞉ opa꞉ pa lopa peekeme.   
\p
\v 40 Yesuta꞉ pa la꞉ka꞉la pua mo Diodani ikali tunkula mone tea꞉na꞉ Dionima꞉ amba꞉ bapitaisi peaatiki pu hayeke alena꞉ opolo puata꞉ koto pa꞉ta꞉ hayekeme.  
\v 41 Wanda꞉hali wopuma꞉ ipiki pa꞉ta꞉ pua mombolo hata꞉ alota꞉ Dionima꞉ wele wotu pita꞉la꞉eki wopu na piekepate ipikana꞉ma꞉ do hali pa꞉ta꞉ leeke pi paeyao amba꞉ yaala꞉me lemekeme.  
\v 42 Kutupa wanda꞉hali wopu koto pa꞉ta꞉ hata꞉ Yesu pa꞉ta꞉ hone tulaemekeme.   
\c 11  
\s1 La꞉satesi homeekeeki  
\p
\v 1 Bedani da pa꞉ta꞉ hayeke hali La꞉satesi yeni hayekeme. Mo Bedani data꞉ Mada hakepiki Meti yaapona꞉ dae.  
\v 2 Mo Metima꞉ta꞉ hande Tekehalina꞉ ankena꞉ totopo wotupiki senisi holaota꞉ ipika꞉ itikima꞉ kone honiaeyekeme. Koto wanda꞉na꞉ beliki La꞉satesi yeni hayekeme.  
\v 3 Koto ekina꞉ mo hakila꞉ma꞉ Yesu pa꞉ta꞉ pi tapaaso alota꞉ Tekehalio. Naka꞉ yankeketa꞉ yeni hao ula꞉me laa tapaepekeme.  
\v 4 Yesuma꞉ koto pi opua alota꞉ Koto yenima꞉ta꞉ hali na homaalieke laa koto yeni a꞉pa hake hauta꞉ Koda꞉na꞉ biki make Koda꞉na꞉ Eiyekena꞉ biki make mea a꞉meiyaena꞉yeke a꞉pa hao pa꞉la꞉me leekeme.   
\p
\v 5 Yesuma꞉ mo beliala꞉ tepo pa꞉ta꞉ta꞉ hone wotu wiekeme.  
\v 6 Kutupa hande La꞉satesi yeni hao ula꞉me leekeeki opuata꞉ pa hoto yaapo koto pa꞉ta꞉ hao  
\v 7 ipika꞉ disaipolo haliweki pa꞉ta꞉ alota꞉ Diudia nane paa la꞉ka꞉la pomana꞉e leekepate  
\v 8 ipika꞉ disaipolo haliwekima꞉ ipiki pa꞉ta꞉ alota꞉ Disao. Amba꞉ numaneke a꞉nda꞉ mo Diu haliwekima꞉ toopima꞉ neke luekema꞉ taapemepate koto pa꞉ta꞉ paa pomana꞉ alepe lemekeme.  
\v 9 Yesuma꞉ alota꞉ Nate homekena꞉ pa yata꞉pea꞉peke nate leke manuta꞉ 12 awamanu dia꞉ya꞉ka꞉ta꞉pe. Hali ma꞉nda꞉ta꞉ oli nate talo haena꞉ pomia꞉ka꞉na꞉ta꞉ do kenkena꞉ pa̱a̱ pa꞉la꞉eki handa꞉la꞉ ekima꞉ ipikita꞉ lopuluekema꞉ taapa꞉tia na pelieke laa  
\v 10 Kutu pulu pa꞉la꞉pateta꞉ timba꞉ alo haena꞉ pomia꞉ka꞉na꞉ta꞉ ipiki pa꞉ta꞉ pa̱a̱ na peaasa꞉ ekima꞉ ipikita꞉ lopuluekema꞉ taapa꞉tia pelieke leekeme.  
\v 11 Yesuma꞉ kotoeki laa pi ma꞉nda꞉ alo alota꞉ Nika꞉ yankeke La꞉satesita꞉ amba꞉ u peila꞉pateta꞉ ipiki mea tiaalo pulume leekeme.  
\v 12 Koto leeke handaa mo disaipolo haliwekima꞉ alota꞉ Tekehalio. U pelia꞉ka꞉na꞉ta꞉ kota꞉ tiaalieke lemekeme.  
\v 13 Yesuma꞉ta꞉ mo La꞉satesi ota꞉ homeeke ekina꞉ leekepate mo haliwekima꞉ta꞉ pa u peileke ala꞉me hone wimikime.  
\v 14 Koto ekina꞉ Yesuma꞉ iki pa꞉ta꞉ peneme yao alota꞉ La꞉satesi ota꞉ homeekeme.  
\v 15 Koto pa꞉la꞉pate ikana꞉ma꞉ hone tulao hamina꞉yeke iki pa꞉ta꞉ hone witolo hata꞉ ipiki yaapo na haowa꞉ ekima꞉ ta꞉na꞉ma꞉ homolome laa ipiki pa꞉ta꞉ pomana꞉e leekeme.  
\v 16 Koto ekina꞉ Tomasita꞉ hande Manda꞉e halima꞉ ipika꞉ disaipolo yankeketiti pa꞉ta꞉ alota꞉ Nika꞉ Disa ame̱le̱ paeyao mandakena꞉ bape laa ipiki ame̱le̱ homomana꞉e leekeme.   
\s1 Yesuta꞉ paa mea tiaasa꞉eki make da꞉taasa꞉eki make hala꞉me  
\p
\v 17 Yesu opolo puaata꞉ La꞉satesi lapa꞉ pea haena꞉ta꞉ hoto tonkopu wiekeeki opiekeme.  
\v 18 Mo Bedani data꞉ Diutuseleme da teke pa꞉ta꞉ kone hayekeme.  
\v 19 Kutupa Diu wanda꞉hali wopuma꞉ Mada Meti yaapo ipilika꞉ ana꞉ homeeke ekina꞉ tamba꞉ minolo hata꞉ pi pi loluekema꞉ pemekeme.   
\p
\v 20 Madama꞉ Yesu ipula꞉me lemekeeki opuaata꞉ manda꞉hande peekepate Metita꞉ da pa꞉ta꞉ pitina꞉ peekeme.  
\v 21 Madama꞉ Yesu manda꞉hande pea ipiki pa꞉ta꞉ alota꞉ Tekehalio. Neketa꞉ do pa꞉ta꞉ haeka꞉na꞉ yoluta꞉ ya ana꞉ na homolo pia꞉me.  
\v 22 Kutu pulu pia꞉pate pa ame do kone nakana꞉ma꞉ Koda꞉ pa꞉ta꞉ ala꞉ta꞉ ma꞉nda꞉ honke lelipi ale Koda꞉ma꞉ ota꞉ kilieke hone witolome leekeme.  
\v 23 Yesuma꞉ ipiki pa꞉ta꞉ alota꞉ Naka꞉ ana꞉ta꞉ paa tiaalieke leekeme.  
\v 24 Madama꞉ hombo peaaso alota꞉ Mo hande paelia꞉ natena꞉ Koda꞉ma꞉ ipiki paa mea tiaalo pa꞉la꞉ ekita꞉ hone witolome leekeme.  
\v 25 Koto leekepate Yesuma꞉ ipiki pa꞉ta꞉ alota꞉ I̱ta꞉ pa mea tiaasa꞉eki make da꞉taasa꞉eki make halome. Hali epima꞉ I̱ pa꞉ta꞉ hone tulao haya꞉ka꞉na꞉ta꞉ kota꞉ koto hali homea꞉ka꞉na꞉ kone da꞉ta halieke.  
\v 26 Kutupa hali epima꞉ da꞉ta꞉ hata꞉ I̱ pa꞉ta꞉ hone tulao haya꞉ka꞉na꞉ta꞉ koto halita꞉ ota꞉ na homilieke. I̱ma꞉ do alo pina꞉ homelepe laa leekeme.  
\v 27 Madama꞉ ipika꞉ pi hombo peaaso alota꞉ Tekehalio. Aowe. Naka꞉ kakema꞉ homolo hata꞉ neketa꞉ hande Ketiso make Koda꞉na꞉ Eiyeke do kenkena꞉ ipilieke leeke halita꞉ hone witolome leekeme.   
\s1 Yesuma꞉ e̱ leekeeki  
\p
\v 28 Madama꞉ kotoeki laa pa pua hakepiki Meti pa꞉ta꞉ yopu pua alota꞉ Tekehalima꞉ do a꞉pa hata꞉ neke wi ala꞉me.  
\v 29 Meti koto pi opua tiao Yesu manda꞉hande puluekema꞉ a̱i̱ya peekeme.  
\v 30 Yesuta꞉ mo hande da pa꞉ta꞉ a̱i̱ na opolo peke Madata꞉ ipiki manda꞉hande pieke alena꞉ pa hayekeme.  
\v 31 Mo mandane Diu wanda꞉halima꞉ta꞉ Meti pa꞉ta꞉ a꞉ta꞉ma꞉ homolo hata꞉ ipiki ame̱le̱ pita꞉ta꞉ Meti a̱i̱ tiao hama peekeeki handaata꞉ ipiki telia꞉ mea pemekeme. Ika꞉ honema꞉ta꞉ Metima꞉ mo lapa꞉ pieke ale pa꞉ta꞉ e̱ lolo pula꞉me hone wimikime.  
\v 32 Metima꞉ Yesu hayeke alena꞉ opolo pua Yesu handolo ipika꞉ anke pa꞉ta꞉ lopa꞉niao alota꞉ Tekehalio. Neke do pa꞉ta꞉ haeka꞉na꞉ yoluta꞉ ya ana꞉ na homolo pia꞉me leekeme.   
\p
\v 33 Metima꞉ e̱ leekeeki make mo ipiki ame̱le̱ pemeke Diu wanda꞉halina꞉ e̱ lemekeeki make handaata꞉ ipikana꞉ma꞉ ka꞉nda꞉ma꞉ homolo hata꞉ ipika꞉ puki tetoma꞉ homeekeme.  
\v 34 Yesuma꞉ alota꞉ Ipikita꞉ hando pa꞉ta꞉ wilimipe leeke handaa ikana꞉ma꞉ alota꞉ Tekehalio. Handolo epoe lemekeme.  
\v 35 Kutupa Yesuma꞉ e̱ leekeme.  
\v 36 Koto ekina꞉ mo Diu wanda꞉halima꞉ pi hotiolo alota꞉ Handa꞉pe. Do halima꞉ La꞉satesi pa꞉ta꞉ pukima꞉ wotu homolo pita꞉la꞉me lemekepate  
\v 37 mandane wanda꞉halima꞉ alota꞉ Do halima꞉ta꞉ hande leke holupiki halina꞉ leketa꞉ kilaeya꞉ tupa꞉ mo halina꞉ homa꞉la꞉eki make sa꞉sa꞉ pia꞉peke yolo pia꞉me hone witoloma꞉me lemekeme.   
\s1 La꞉satesi paa mea tiaeyekeeki  
\p
\v 38 Yesuma꞉ pa puki tetoma꞉ homolo hata꞉ mo lapa꞉ pimiki alena꞉ peekeme. Mo lapa꞉ pimiki ekita꞉ tikene da pa꞉ta꞉ toopima꞉ a꞉mba wimikime.  
\v 39 Yesuma꞉ alota꞉ Mo toopi pa nane mea wipe leekepate hande hoieke halina꞉ beliki Madama꞉ alota꞉ Tekehalio. Punku wotu pilieke. Mo lapa꞉ pea hamonota꞉ hoto tonkopu paeya꞉me leekeme.  
\v 40 Yesuma꞉ ipiki pa꞉ta꞉ alota꞉ Nakana꞉ma꞉ hone tulao haeka꞉na꞉ta꞉ Koda꞉na꞉ pa̱a̱ pa꞉la꞉eki handilipikie pita꞉ na loa꞉pe leekeme.  
\v 41 Kutupa hande toopi pa nane mea wimikime. Yesuma꞉ handa꞉liao hata꞉ alota꞉ Apa꞉o. Nakana꞉ma꞉ yaka pi opu hale ekina꞉ neke pa꞉ta꞉ keiyae pi alome.  
\v 42 Nakana꞉ma꞉ I̱ma꞉ aloeki opu hale ekita꞉ handolopate pa do haleme wanda꞉halima꞉ nakana꞉ma꞉ I̱ tapaaleeki handa꞉ hone tulaena꞉yeke neke pa꞉ta꞉ do pi alome leekeme.  
\v 43 Yesuma꞉ koto laa anekema꞉ wi alo hata꞉ alota꞉ La꞉satesio. Hama epoe leekeme.  
\v 44 Hande homeeke halita꞉ kiki anke leke popeleke ipika꞉ dauma꞉ ambula wimiki tupa꞉ tiao hama epeekeme. Kutupa Yesuma꞉ iki pa꞉ta꞉ alota꞉ Dau leisi mea bao epena꞉ tapaape leekeme.   
\s1 Yesu lulu pimiki ekina꞉ pota꞉ weimikieki  
\r (Ma꞉tiu 26꞉1-5, Maka 14꞉1-2, Luku 22꞉1-2)  
\p
\v 45 Meti handolo pemeke Diu wanda꞉hali wopuma꞉ta꞉ Yesuma꞉ piekeeki handaata꞉ ipiki pa꞉ta꞉ hone tulaemekeme.  
\v 46 Kutu pimikipate mandane haliwekima꞉ta꞉ Yesuma꞉ pieke ekita꞉ mo Pa꞉tisi haliweki lolo pemekeme.  
\v 47 Koto ekina꞉ mo Pa꞉tisi haliweki make mo yeni peao haemeke you haliweki make mo Ka̱le̱sete tapake ame̱le̱ momba꞉lalo hata꞉ alota꞉ Nikana꞉ma꞉ta꞉ eki pumana꞉pe. Do hande halima꞉ wele wotu pa꞉la꞉ ekimanu pita꞉la꞉me.  
\v 48 Pa pina꞉ paoma꞉ka꞉na꞉ta꞉ wanda꞉hali paeyaoma꞉ ipiki pa꞉ta꞉ hone tulaalimikie. Kutupa make mo Loma꞉ haliwekima꞉ a꞉paata꞉ nika꞉ tembolo da make nika꞉ tapake make telipina꞉ hoeyaalimikie lemekeme.   
\p
\v 49 Iki pa꞉ta꞉ hayeke hali Kaiya꞉pasita꞉ koto bapina꞉ yeni peao haemeke you haliwekina꞉ you hali hata꞉ kone ipikana꞉ma꞉ alota꞉ Ikita꞉ ala꞉ta꞉ ma꞉nda꞉ na handelememe.  
\v 50 Wanda꞉hali paeyao pa꞉ta꞉ hali homeke homea꞉ka꞉na꞉ta꞉ iki pa꞉ta꞉ epekeeki ipilieke. Kutupa nika꞉ tapake paeyao hoeyaapeke na yelieke. Kutu pulu pa꞉la꞉ ekita꞉ hone na witelemepe leekeme.  
\v 51 Do leeke ekita꞉ Kaiya꞉pasima꞉ kone pa na leke koto bapina꞉ yeni peao haemeke you haliwekina꞉ you hali hata꞉ Yesuta꞉ mo Diu wanda꞉hali pa꞉ta꞉ homolo piekeeki la halolo hata꞉ leekeme.  
\v 52 Kutupa make mo Diu wanda꞉hali pa꞉ta꞉ homeke na homeke mo Koda꞉na꞉ weki wandikita꞉ pa hata꞉ pepi pea haena꞉ kone paeyao handa꞉ mea homeke tapake kone apa꞉tao haena꞉yeke Yesu homolo pa꞉la꞉eki la halolo hata꞉ leekeme.  
\v 53 Koto leeke ekina꞉ mo Diu wanda꞉halina꞉ you haliwekima꞉ koto natena꞉ kini pea Yesu lulu peleme pota꞉ weimikime.  
\v 54 Koto ekina꞉ Yesuta꞉ koto pa꞉ta꞉ pominolo hata꞉ peneme yao na pomiekepate Diudia nane mina꞉pa꞉lao mo hapu hayeke alena꞉ teke pa꞉ta꞉ hayeke da Ipoteimi da pa꞉ta꞉ puaata꞉ ipika꞉ disaipolo haliweki ame̱le̱ koto pa꞉ta꞉ haemekeme.   
\p
\v 55 Mo Diu wanda꞉halina꞉ Lombei Pupa Yapeeke nate tunkulieke handaa papate da ta꞉ta꞉ ta꞉ta꞉ wanda꞉halima꞉ ne a̱i̱ na pambeke haena꞉ ika꞉ loke wamo puluekema꞉ oli Diutuseleme da nane pemekeme.  
\v 56 Mo wanda꞉halima꞉ Yesu weitolo hata꞉ mo tembolo da pa꞉ta꞉ momba꞉la ika꞉ ika꞉ kone lota꞉ lota꞉ pu alualu pitolo alota꞉ Eki hone witelemepe. Do hande ne pamba꞉la꞉ ekita꞉ na ipilieke hone witoloma꞉pate eki hone witelemepe la leekeme.   
\p
\v 57 Kota꞉ mo yeni peao haemeke you haliweki make mo Pa꞉tisi haliweki tonka꞉na꞉ ikana꞉ma꞉ pi alo alota꞉ Hali epima꞉ Yesu hala꞉eki handea꞉ka꞉na꞉ta꞉ Yesu da꞉ka꞉pa꞉ minomonoyeke niki a꞉pa la kia꞉pa꞉peke lemekeme.   
\c 12  
\s1 Bedani da pa꞉ta꞉ Yesuna꞉ mo nada senisi holaeyekeeki  
\r (Ma꞉tiu 26꞉6-13, Maka 14꞉3-9)  
\p
\v 1 Mo hande Lombei Pupa Yapeeke natena꞉ ne pambuluekema꞉ haena꞉ nate yunki mindiki hata꞉ pa wina꞉ kone Yesuta꞉ mo Bedani da pa꞉ta꞉ peekeme. Hande Yesuma꞉ paa mea tiaeyeke hali La꞉satesi ipika꞉ dae.  
\v 2 Koto pa꞉ta꞉ Yesuna꞉ ne pambaemekeme. La꞉satesita꞉ teipolona꞉ Yesu yaapo mandake pa꞉ta꞉ pitina꞉ Madama꞉ hande ne pane pea hale hale piekeme.  
\v 3 Kutupa Metima꞉ mo nada senisi seliapota꞉ yenki tieke ale kone mo ka꞉nda꞉ makata꞉ kilo pa hapo siki tupa꞉ meata꞉ Yesuna꞉ anke pa꞉ta꞉ holaota꞉ ipika꞉ itikima꞉ honiaeyekeme. Kutu pieke ekima꞉ mo senisi totopoma꞉ta꞉ mo da paeyao pa꞉ta꞉ totopo yuyu wia wiekeme.  
\v 4 Mo disaipolo hali homeke Isekatioti hali Diudasita꞉ hande Yesu a꞉nda꞉ lombolo pieke hali ipikana꞉ma꞉ alota꞉  
\v 5 Do senisita꞉ ma꞉nda꞉ma꞉ hambena꞉ laata꞉ 60 kina meaata꞉ nate hali wanda꞉hali pa꞉ta꞉ na teli teli peaemeke ekita꞉ ekipeke pimipe leekeme.  
\v 6 Do leeke pita꞉ nate hali wanda꞉hali pa꞉ta꞉ a꞉ta꞉ma꞉ homolo na leke pake hali hata꞉ leekeme. Mani pausata꞉ ipikana꞉ma꞉ miniki hata꞉ mea pomiekepate ipika꞉ hone wia yoka꞉ mea꞉tiki piekeme.  
\v 7 Koto leekepate Yesuma꞉ alota꞉ Koto wanda꞉ pa꞉ta꞉ pi na lapeke. Ipika꞉ wia hala꞉eki pa miniki haena꞉ I̱ toko hoiyulu peleme natena꞉ loa꞉me.  
\v 8 Natehali wanda꞉halita꞉ iki ame̱le̱ hao halo pelemepate I̱ta꞉ iki ame̱le̱ na hao halumeke leekeme.   
\s1 La꞉satesi lulu pimiki pota꞉ weimikieki  
\p
\v 9 Diu wanda꞉hali wopuma꞉ Yesuta꞉ Bedani da pa꞉ta꞉ a꞉pa hala꞉me lemekeeki opuaata꞉ koto pa꞉ta꞉ pemekeme. Yesu homeke handuluekema꞉ na pekepate hande Yesuma꞉ lapa꞉ pa꞉ta꞉ pa mea tiaeyeke hali La꞉satesi make handuluekema꞉ pemekeme.  
\v 10 Koto ekina꞉ mo yeni peao haemeke you haliwekima꞉ta꞉ La꞉satesi make lulu pimiki pota꞉ weimikime.  
\v 11 Diu haliweki wopuma꞉ La꞉satesi pa꞉ta꞉ hone witolo hata꞉ ika꞉ you haliweki mina꞉pa꞉lao Yesu pa꞉ta꞉ hone tulaemeke ekina꞉ pimikime.   
\s1 Ta꞉na꞉ma꞉ homolo hata꞉ Diutuseleme nane pemekeeki  
\r (Ma꞉tiu 21꞉1-11, Maka 11꞉1-11, Luku 19꞉28-40)  
\p
\v 12 Da ka꞉la꞉peeketa꞉ hande Lombei Pupa Yapeeke dina꞉ ne pambuluekema꞉ momba꞉la haemeke wanda꞉hali paeyaoma꞉ta꞉ Yesuta꞉ Diutuseleme da nane ipula꞉me lemekeeki opimikime.  
\v 13 Koto ekina꞉ dopema꞉ handeke ti palekemanu tonda꞉pa꞉ mepi pea mina Yesu manda꞉hande puluekema꞉ wi la꞉tiki pulu hata꞉ alota꞉  
\q1 Koda꞉na꞉ pi laapa꞉pe.  
\q1 Tekehalina꞉ bikina꞉ ipula꞉ halita꞉ Koda꞉ma꞉ epeaeya꞉ka꞉na꞉ta꞉ epelieke.  
\q1 Ipikita꞉ Isulai wanda꞉halina꞉ Kini halie la lemekeme.   
\p
\v 14 Yesuma꞉ donki ma꞉na꞉ handa꞉ wiata꞉ mo ma꞉na꞉ hoki manda pitiekeme. Kutu pieke ekita꞉ mo Baibolo buka pa꞉ta꞉ wape pa꞉la꞉ ekita꞉ dupa   
\q1
\v 15 Saioni data꞉ paala꞉ma꞉ na homa꞉peke. Handa꞉e. Naka꞉ kini hali koto ipula꞉ handa꞉e. Donki ma꞉na꞉ siki ipika꞉ hoki manda pita꞉ koto ipula꞉ handa꞉e laa wape pa꞉la꞉me.   
\p
\v 16 Yesuma꞉ koto hau pieke pita꞉ta꞉ ipika꞉ disaipolo haliwekima꞉ hone na wimikipate pa wetepena꞉ta꞉ Yesu paa tiao oli ipika꞉ pa̱a̱ piki kapu tieke mulu pieke haena꞉ ikana꞉ma꞉ mo Baibolo bukana꞉ dupiki pi wape pa꞉la꞉ ekita꞉ ota꞉ Yesu pa꞉ta꞉ kone yaeyekeeki hone wimikime.   
\p
\v 17 La꞉satesi lapa꞉ pa꞉ta꞉ wina꞉ Yesuma꞉ wi la paa mea tiaeyeke pita꞉ma꞉ Yesu ame̱le̱ haemeke wanda꞉halima꞉ koto pieke ekita꞉ hande wanda꞉hali pa꞉ta꞉ amba꞉ la halemekeme.  
\v 18 Koto wele wopu pieke ekina꞉ wanda꞉hali paeyaoma꞉ opuata꞉ Yesu manda꞉hande pulu pemekeme.  
\v 19 Koto ekina꞉ mo Pa꞉tisi haliwekima꞉ ika꞉ kone ane la꞉ mone la꞉ pu alualu pitolo alota꞉ Handelemepe. Nikana꞉ma꞉ hau ma꞉nda꞉ pea꞉peke na ya꞉la꞉me. Handa꞉pe. Wanda꞉hali paeya꞉ tapao ipiki telia꞉ mea pulimime lemekeme.   
\s1 Mandane Kitiki wanda꞉halima꞉ Yesu weimikieki  
\p
\v 20 Mo hande ne pambemeke pita꞉ Diutuseleme da pa꞉ta꞉ yeni pulu pemeke wanda꞉hali ame̱le̱ta꞉ mandane Kitiki wanda꞉hali make pemekeme.  
\v 21 Mo wanda꞉halima꞉ hande Ka꞉lili nane hayeke da Betesaida da hao epeeke hali Pilipi pa꞉ta꞉ pua alota꞉ Aneke halio. Nika꞉ honema꞉ta꞉ Yesu handulumeke hone witoloma꞉me lemekeme.   
\p
\v 22 Pilipima꞉ A꞉ndutu pa꞉ta꞉ pua laata꞉ Ipilikana꞉ma꞉ Yesu lolo pepekeme.  
\v 23 Yesuma꞉ ipilika꞉ pi hombo peaaso alota꞉ Wanda꞉halina꞉ Eiyekema꞉ mo pa̱a̱ piki kapu tieke mulu pa꞉la꞉ di ame ipula꞉me.  
\v 24 Ipiliki pa꞉ta꞉ ota꞉ pi alome. Kuni wae alesiki homeketa꞉ kenkena꞉ na opa꞉ pa lopa na homea꞉ka꞉na꞉ta꞉ ipika꞉ pa u pelia halieke. Kutu pulu pa꞉la꞉pate homea꞉ka꞉na꞉ta꞉ opa kiliki wotu a꞉elieke.  
\v 25 Hali epima꞉ ipika꞉ da꞉ta꞉la꞉eki kone hone wotu wia꞉ka꞉na꞉ta꞉ ipika꞉ da꞉ta꞉la꞉ ekita꞉ alupilieke. Hali epima꞉ do kenkena꞉ hata꞉ ipika꞉ da꞉ta꞉la꞉eki kone hone wopu na wia꞉ka꞉na꞉ta꞉ ipika꞉ da꞉ta꞉la꞉eki mea miniki hata꞉ da꞉ta hao halo pa꞉la꞉eki kone yelieke.  
\v 26 Hali epima꞉ yaka e pokaaluekema꞉ hone pia꞉ka꞉na꞉ta꞉ ipikana꞉ma꞉ ya hoki nane telia꞉ mea epena꞉e. Yaka e pokaasa꞉ halita꞉ I̱ halo alena꞉ kone diki mandakena꞉ halupekema꞉ loa꞉me. Yaka e pokaasa꞉ halita꞉ yaka Apa꞉ma꞉ koto halina꞉ biki tieke wina꞉ lelieke leekeme.   
\s1 Yesuma꞉ ipika꞉ homolo pieke ekina꞉ pi leekeeki  
\p
\v 27 Ameta꞉ ya puki tandama꞉ homolome hata꞉ eki pi lonope. Doeki lapeke ya꞉la꞉pe. Apa꞉o. Hande I̱ pa꞉ta꞉ epolo pa꞉la꞉ di na epena꞉ lapeke lonope. Dia꞉me. Koto tanda tandama꞉ homolo polo di muluekema꞉ epoa꞉me.  
\v 28 Apa꞉o. Naka꞉ biki tieke wina꞉ lapeke leekeme. Koto la haena꞉ oli ya nanema꞉ la꞉niaeyeke pi ho̱la̱꞉makema꞉ alota꞉ Yaka bikita꞉ amba꞉ titina꞉ tieke wina꞉ lolopate paa ma꞉nda꞉ alo peao tieke wina꞉ lolueke leekeme.   
\p
\v 29 Koto pa꞉ta꞉ pambulu bao haemeke wanda꞉halima꞉ hande pi ho̱la̱꞉make opua alota꞉ Tutu lia꞉me lemekeme. Mandane wanda꞉halima꞉ alota꞉ Enisolo halima꞉ ipiki pa꞉ta꞉ pi alopate lea꞉me lemekepate  
\v 30 Yesuma꞉ iki pa꞉ta꞉ alota꞉ Oli la꞉niaeya꞉ pita꞉ I̱ pa꞉ta꞉ dia꞉me. Iki pa꞉ta꞉ hone witolo hata꞉ la꞉niaaso lea꞉me.  
\v 31 Ameta꞉ do kenke wanda꞉halina꞉ pi yokaalu pulu pa꞉la꞉ di ipula꞉me. Ameta꞉ do kenkena꞉ tumiki hala꞉ halita꞉ yoka mea lopaalieke.  
\v 32 Kutupa I̱ta꞉ kenkena꞉ hano I̱ mea a꞉meiyaemeka꞉na꞉ta꞉ wanda꞉hali paeyao I̱ pa꞉ta꞉ epena꞉ yola꞉ mulueke leekeme.  
\v 33 Koto leeke ekita꞉ ipika꞉ homolo piekeeki la halolo leekeme.  
\v 34 Koto leeketa꞉ mo wanda꞉hali paeyaoma꞉ ipika꞉ pi hombo peaaso alota꞉ Mo Lo Pi manuma꞉ ala꞉ ekita꞉ doeki opuma꞉me. Ketisota꞉ hao halieke ala꞉me. Nakana꞉ma꞉ alota꞉ Wanda꞉halina꞉ Eiyeke mea a꞉meiyalieke ale ekita꞉ ekipape. Mo hande Wanda꞉halina꞉ Eiyeketa꞉ epiya꞉ka꞉ta꞉pe lemekeme.   
\p
\v 35 Yesuma꞉ iki pa꞉ta꞉ alota꞉ Mo hande pa̱a̱ pa꞉la꞉ ekita꞉ iki ame̱le̱ hosiki halimikie. Timba꞉ la꞉la꞉ ekima꞉ iki mea tombuaama꞉na꞉ pa̱a̱ pa꞉la꞉ pita꞉ kone pua꞉pa꞉peke. Timba꞉ la꞉pa pa꞉la꞉ pa꞉ta꞉ pula꞉ halima꞉ta꞉ Dota꞉ hando pa꞉ta꞉ pulupe lelieke.  
\v 36 Kutu pa꞉la꞉ ekina꞉ ikita꞉ pa̱a̱ pa꞉la꞉ dina꞉ hata꞉ pa̱a̱ pa꞉la꞉ ekina꞉ wekiwandiki leke hamina꞉yeke pa̱a̱ pa꞉la꞉eki pa꞉ta꞉ kone hone tulaapa꞉peke leekeme.  
\s1 Mo Diu wanda꞉halima꞉ Yesu pa꞉ta꞉ hone na tulaemekeeki  
\p Yesuma꞉ koto pi laata꞉ mo wanda꞉hali mina꞉pa꞉lao puata꞉ panka halo peekeme.  
\v 37 Ipikana꞉ma꞉ta꞉ wanda꞉halina꞉ leke popelekena꞉ hata꞉ kone wele wotu pieke ekimanu mo wanda꞉halima꞉ handaa kone ipiki pa꞉ta꞉ hone na tulaemekeme.  
\v 38 Mo hande potopede hali Aisayama꞉ leeke ekimanu yaena꞉yeke piekeme. Dupa  
\q1 Tekehalio. Nikana꞉ma꞉ la haloma꞉ ekita꞉ epima꞉ opimipe.  
\q1 Kutupa Tekehalima꞉ ipika꞉ wele pieke ekita꞉ epi pa꞉ta꞉ walea꞉pe laa leekeme.   
\p
\v 39 Koto ekina꞉ mo wanda꞉halima꞉ hone tulaapeke na yeeke ekina꞉ Aisayama꞉ leekeeki ma꞉nda꞉ dupa   
\q1
\v 40 Koda꞉ma꞉ ika꞉ leke holu peaota꞉ ika꞉ pukita꞉ taka꞉la꞉pa pua hata꞉ta꞉ toopi leke wina꞉ leekeme.  
\q1 Wanda꞉halima꞉ ika꞉ lekema꞉ handaama꞉na꞉ make ika꞉ puki tooluma꞉ hone wiaama꞉na꞉ pua꞉me.  
\q1 I̱ma꞉ iki wamo peaanoyeke I̱ pa꞉ta꞉ na la꞉ka꞉la haena꞉yeke pua꞉me laa leekeme.   
\p
\v 41 Koto leeke pita꞉ Aisayama꞉ta꞉ Yesuma꞉ ipika꞉ pa̱a̱ tieke mea hayekeeki handeeke ekina꞉ Yesu pa꞉ta꞉ mulu pa꞉la꞉eki hone witolo hata꞉ leekeme.   
\p
\v 42 Kutu pimikipate mo Diu you haliweki wopuma꞉ Yesu pa꞉ta꞉ hone tulaemekepate mo Pa꞉tisi haliweki pa꞉ta꞉ pieke handaata꞉ ika꞉ pi hotu haemeke da pa꞉ta꞉ ika꞉ ula꞉eki yokaama꞉na꞉ ika꞉ hone tulaemekeeki peneme yao na lemekeme.  
\v 43 Koda꞉ma꞉ ika꞉ pi laena꞉ hone na wiki kenke haliwekima꞉ laena꞉ hone wopu wimikime.   
\s1 Yesuna꞉ leeke pi manuma꞉ pi yokaalu pea꞉peke ya꞉la꞉eki  
\p
\v 44 Yesuma꞉ pi anekema꞉ alo alota꞉ Hali epima꞉ I̱ pa꞉ta꞉ hone tulaeya꞉ka꞉na꞉ta꞉ I̱ pa꞉ta꞉ homeke hone na tulaake I̱ tapaeya꞉ hali pa꞉ta꞉ make pita꞉la꞉me.  
\v 45 Hali epima꞉ I̱ handea꞉ka꞉na꞉ta꞉ kota꞉ I̱ tapaeya꞉ hali make handa꞉la꞉me.  
\v 46 I̱ta꞉ do kenkena꞉ pa̱a̱ pa꞉la꞉eki tupa꞉ a꞉pa halome. I̱ pa꞉ta꞉ hone tulaaseme wanda꞉halita꞉ timba꞉ la꞉ pamba꞉la꞉ pa꞉ta꞉ na haena꞉yeke epoa꞉me.  
\v 47 Hali epima꞉ I̱ma꞉ alo pi opua na pia꞉ka꞉na꞉ta꞉ koto hali yaapo I̱ma꞉ pi yokaalu na pulueke. Kenke wanda꞉halita꞉ iki pa꞉ta꞉ pi yokaalu puluekema꞉ na epeke iki mea da꞉taaluekema꞉ epoa꞉me.  
\v 48 Hali epima꞉ I̱ kiaaso hata꞉ I̱ma꞉ alo pi na opia꞉ka꞉na꞉ta꞉ kota꞉ ma꞉nda꞉ma꞉ ipiki yaapo pi yokaalu pilieke. Do I̱ma꞉ aloeki manuma꞉ kone paelie natena꞉ ipiki yaapo pi yokaalu pilieke.  
\v 49 I̱ma꞉ ya hone wia na loa꞉me. I̱ tapaeya꞉ hali yaka Apa꞉ma꞉ I̱ma꞉ lolo pua꞉ ekimanu paeyao ipikana꞉ma꞉ lapeke leeke handaa pua꞉me.  
\v 50 Kutupa yaka Apa꞉ma꞉ du pea꞉peke la ala꞉ pi manuta꞉ da꞉ta hao hala꞉eki kone peaasa꞉ekie hone witolome. Koto ekina꞉ I̱ma꞉ alo pita꞉ yaka Apa꞉ma꞉ I̱ pa꞉ta꞉ lapeke lea꞉ pi kone alome leekeme.   
\c 13  
\s1 Yesuma꞉ ipika꞉ disaipolo haliwekina꞉ anke tanda꞉paeyekeeki  
\p
\v 1 Mo hande Lombei Pupa Yapeeke natena꞉ ne pambuluekema꞉ hata꞉ta꞉ Yesuma꞉ do kenke mina꞉pa꞉lao Ateke pa꞉ta꞉ polo pieke di amba꞉ tunkula꞉la꞉me hone wiekeme. Ipikana꞉ma꞉ do kenkena꞉ haemeke ipika꞉ wanda꞉hali pa꞉ta꞉ pukima꞉ homo hao paeyaalo pulu hata꞉ make iki pa꞉ta꞉ pukima꞉ homeekeme.   
\p
\v 2 Welealo nane Yesu ipika꞉ disaipolo haliweki ame̱le̱ ne no pitimikime. Isekatioti hali Saimonona꞉ eiyeke Diudasima꞉ta꞉ Yesu mina꞉yeke a꞉nda꞉ lombolo pieke honeta꞉ ipiki pa꞉ta꞉ Sadanima꞉ amba꞉ mea wiaeyekeme.  
\v 3 Yesuma꞉ta꞉ hande ipika꞉ Atekema꞉ ala꞉ta꞉ ala꞉ta꞉ paeyao ipiki pa꞉ta꞉ haleekeeki make ipikita꞉ Koda꞉ yaapo hao a꞉pa Koda꞉ pa꞉ta꞉ polo piekeeki make hone wiekeme.  
\v 4 Koto ekina꞉ Yesuma꞉ mo teipolo mina꞉pa꞉lao tiaota꞉ manda pambaeyeke dau hola꞉ mea wiaata꞉ dawelo mea tonkaeyekeme.  
\v 5 Kutupata꞉ ma꞉tiki pa꞉ta꞉ ikali hola꞉ pambaata꞉ mo disaipolo haliweki ika꞉ ankemanu homeke pa꞉ta꞉ pua꞉tiki pea tanda꞉pa꞉tiki pea hande tonkaeyeke daweloma꞉ honia꞉tiki piekeme.  
\v 6 Kutupata꞉ Saimono Pida pitieke pa꞉ta꞉ peekepate ipikana꞉ma꞉ Yesu pa꞉ta꞉ alota꞉ Tekehali nakana꞉ma꞉ ya anke tanda꞉puluekema꞉ pi leekeme.  
\v 7 Yesuma꞉ ipika꞉ pi hombo peaaso alota꞉ Ame do pitolo ekita꞉ nakana꞉ma꞉ hone na witelepate wetepena꞉ta꞉ hone wilipikie leekeme.  
\v 8 Pidama꞉ ipiki pa꞉ta꞉ alota꞉ Yaka anke nakana꞉ma꞉ hoto homeke a꞉nda꞉ tanda꞉pa꞉peke na ya꞉la꞉me leekeme. Yesuma꞉ ipika꞉ pi hombo peaaso alota꞉ I̱ma꞉ naka꞉ anke na tanda꞉poa꞉ka꞉na꞉ta꞉ kota꞉ neketa꞉ yaka disaipolo hali hapeke na yelieke leekeme.  
\v 9 Saimono Pidama꞉ ipika꞉ pi hombo peaaso alota꞉ Tekehalio. Kota꞉ yaka anke homeke dia꞉me laata꞉ Yaka kiki you tonka꞉na꞉ tanda꞉pae leekeme.  
\v 10 Yesuma꞉ ipiki pa꞉ta꞉ alota꞉ Hali epima꞉ ipika꞉ loke paeyao tenke lao ikali peiya hata꞉ta꞉ ipika꞉ loke paeyao wamo pea haluekema꞉ ikali pa na peiyiki ipika꞉ anke homeke pa tanda꞉pa꞉peke ya꞉la꞉me. Iki paeyao amba꞉ wamo pea halemepate hali homeketa꞉ dia꞉me leekeme.  
\v 11 Yesuma꞉ ipiki a꞉nda꞉ lombolo pieke hali amba꞉ hone witolo hata꞉ koto pi leekeme. Koto ekina꞉ Iki paeyao amba꞉ wamo pea halemepate hali homeke dia꞉me leekeme.   
\p
\v 12 Yesuma꞉ ika꞉ anke tanda꞉pa paeyeketa꞉ ipika꞉ dau paa mea pambao ipika꞉ amba꞉ pitieke teipolo pa꞉ta꞉ paa pua tepiao pitiekeme. Mo haliweki paeyao pa꞉ta꞉ ipikana꞉ma꞉ lota꞉ pitolo  
\v 13 Ikana꞉ma꞉ I̱ biki yaapo alo hata꞉ Disa make Tekehali make aleme ekita꞉ ana꞉piki pi alememe. I̱ta꞉ koto polome.  
\v 14 Koto ekina꞉ I̱ma꞉ta꞉ ika꞉ Tekehali make Disa make hata꞉ ika꞉ anke tandepoa꞉ ekina꞉ ikana꞉ma꞉ make ika꞉ ika꞉ kone ika꞉ ankemanu tanda꞉pa꞉ alualu pea꞉pa꞉peke aleo.  
\v 15 I̱ma꞉ iki pa꞉ta꞉ peaowa꞉ ekita꞉ ikana꞉ma꞉ make puemena꞉yeke wala꞉ tiaaso pua꞉me.  
\v 16 Iki pa꞉ta꞉ ota꞉ pi alome. Pa hameke e pokaasa꞉ halima꞉ta꞉ ipika꞉ e teke hali ankulapeke na ya꞉la꞉me. Kutupa pi lolo pena꞉ tapaasa꞉ halima꞉ make ipiki tapaasa꞉ hali kone ankulaapeke na ya꞉la꞉me.  
\v 17 Do walo ekita꞉ hone wimika꞉na꞉ta꞉ kota꞉ pitolo hata꞉ kone ta꞉na꞉ma꞉ homilimikie.   
\p
\v 18 I̱ma꞉ iki paeyao pa꞉ta꞉ na alome. Ya talopu molo haliweki amba꞉ handoa꞉me. Kutu pa꞉la꞉pate mo Baibolo bukana꞉ wape pa꞉la꞉ ekita꞉ yaapeke ya꞉la꞉me dupae. Dika꞉ mandakena꞉ pita꞉ ne nopa꞉ halima꞉ kone I̱ yaapo a꞉nda꞉ tunkula hala꞉me.  
\v 19 Dupiki hau a̱i̱ na piki haena꞉ kone iki pa꞉ta꞉ ame do kone la kitolome. Koto ekina꞉ wetepena꞉ koto hau pia꞉ka꞉na꞉ta꞉ yaka halo ekita꞉ ota꞉ halome. I̱ pa꞉ta꞉ hone wilimikie.  
\v 20 Iki pa꞉ta꞉ ota꞉ pi alome. Hali epima꞉ I̱ma꞉ tapaaso hali handa꞉ mia꞉ka꞉na꞉ta꞉ I̱ make handa꞉ minolo pita꞉la꞉me. Kutupata꞉ I̱ handa꞉ mina꞉la꞉ halima꞉ I̱ tapaeya꞉ hali kone handa꞉ mina꞉la꞉me leekeme.   
\s1 Yesuma꞉ ipiki pa꞉ta꞉ a꞉nda꞉ lombolo pulu piekeeki la꞉ wiekeeki  
\r (Ma꞉tiu 26꞉20-25, Maka 14꞉17-21, Luku 22꞉21-23)  
\p
\v 21 Kotoeki laa Yesuma꞉ ka꞉nda꞉ma꞉ wopu homolo hata꞉ mo haliweki pa꞉ta꞉ la halolo alota꞉ Iki pa꞉ta꞉ ota꞉ pi alome. Iki ame̱le̱ hala꞉ hali homekema꞉ I̱ mina꞉yeke a꞉nda꞉ lombelieke leekeme.   
\p
\v 22 Mo disaipolo haliweki pa penkili pitolo hata꞉ ika꞉ kone ane handa꞉ mone handa꞉ pitolo epi pa꞉ta꞉ ala꞉pe hone wimikime.  
\v 23 Disaipolo hali homeketa꞉ Yesuma꞉ puki pieke halita꞉ Yesu yaapo lopu la꞉ alu pea pitiekeme.  
\v 24 Saimono Pidama꞉ mo hali pa꞉ta꞉ so la꞉ mea alota꞉ Epi pa꞉ta꞉ alepe. Lota꞉ pie leekeme.  
\v 25 Koto leeke handaa mo disaipolo halima꞉ teke pa꞉ta꞉ panda꞉pea pita꞉ Yesu pa꞉ta꞉ lota꞉ pitolo alota꞉ Tekehalio. Epi pa꞉ta꞉ alepe leekeme.  
\v 26 Yesuma꞉ ipika꞉ pi hombo peaaso alota꞉ Do palaowata꞉ kawaso pa꞉ta꞉ tenke lao halue halita꞉ koto halie leekeme. Kotoeki la ipikana꞉ma꞉ palaowa meata꞉ tenke lao mo Isekatioti hali Saimono ipika꞉ eiyeke Diudasi pa꞉ta꞉ haleekeme.  
\v 27 Diudasima꞉ hande palaowa mieke pita꞉ kone Sadanita꞉ ipiki tukiki pa꞉ta꞉ pitulu epeekeme. Yesuma꞉ ipiki pa꞉ta꞉ alota꞉ Naka꞉ pulu peleeki a̱i̱ pua pea꞉peke leekeme.  
\v 28 Yesuma꞉ Diudasi pa꞉ta꞉ leeke ekita꞉ mo teipolo pa꞉ta꞉ pitimiki haliweki homeke a꞉nda꞉ma꞉ hone na wimikime.  
\v 29 Mandane disaipolo haliwekima꞉ ika꞉ honema꞉ta꞉ Diudasima꞉ mo mani pausa handeteke hayeke ekina꞉ ika꞉ ne pambuluekema꞉ ala꞉ta꞉ ma꞉nda꞉ hambolo pena꞉ tapaeya꞉pe o natehali wanda꞉hali pa꞉ta꞉ ala꞉ta꞉ ma꞉nda꞉ halo pu la tapaeya꞉pe hone wimikime.  
\v 30 Diudasima꞉ mo palaowa meata꞉ kuta kone hama opolu bao peekeme. Koto dina꞉ta꞉ timba꞉ la꞉ pambeekeme.   
\s1 Mo panake pi ula꞉eki  
\p
\v 31 Diudasi peeke hoki nane Yesuma꞉ alota꞉ Ameta꞉ Wanda꞉halina꞉ Eiyekema꞉ta꞉ ipika꞉ pa̱a̱ pa꞉la꞉eki milieke. Kutupa Koda꞉na꞉ pa̱a̱ pa꞉la꞉ ekita꞉ Wanda꞉halina꞉ Eiyeke pa꞉ta꞉ handulumeke.  
\v 32 Kutupa Koda꞉na꞉ pa̱a̱ pa꞉la꞉eki Wanda꞉halina꞉ Eiyeke pa꞉ta꞉ peaeya꞉ka꞉na꞉ta꞉ kota꞉ Koda꞉ma꞉ ipikana꞉ma꞉ kone Wanda꞉halina꞉ Eiyekena꞉ pa̱a̱ pa꞉la꞉eki peaalieke. Kutupa kuta kone peaalieke.  
\v 33 Yaka weki wandikio. Iki ame̱le̱ halo poloma꞉pateta꞉ hosiki halueke. Kutupa ikana꞉ma꞉ I̱ weilimikipate pa amba꞉ mo Diu wanda꞉hali pa꞉ta꞉ loa꞉ ekita꞉ ameta꞉ iki pa꞉ta꞉ make alome. I̱ polue da naneta꞉ iki a꞉pa꞉peke na ya꞉la꞉me la leekeme.  
\v 34 Ameta꞉ I̱ma꞉ iki pa꞉ta꞉ panake pi ula꞉eki la꞉ wiaasome dupa. Ika꞉ kone pukima꞉ homaalu alu pea hapa꞉peke. I̱ma꞉ iki pa꞉ta꞉ pukima꞉ homao tupa꞉ ikana꞉ma꞉ make pukima꞉ homaalu alu pea꞉pa꞉peke laa  
\v 35 ikana꞉ma꞉ pukima꞉ homaalu alu pimika꞉na꞉ta꞉ ikita꞉ yaka disaipolo haliweki haleme ekita꞉ paeyaoma꞉ handilimikie la leekeme.   
\s1 Pidama꞉ Yesuna꞉ biki hoeyaaso pulu pieke ekita꞉ Yesuma꞉ pi la꞉ wiekeeki  
\r (Ma꞉tiu 26꞉31-35, Maka 14꞉27-31, Luku 22꞉31-34)  
\p
\v 36 Saimono Pidama꞉ Yesu pa꞉ta꞉ lota꞉ pitolo alota꞉ Tekehalio. Neketa꞉ hane poluekema꞉ alepe leeke handaa Yesuma꞉ alota꞉ I̱ polue naneta꞉ ame I̱ telia꞉ mea a꞉pa꞉peke na yolo pa꞉la꞉pate wetepena꞉ta꞉ telia꞉ mea ipilipikie leekeme.  
\v 37 Koto ekina꞉ Pidama꞉ paa lota꞉ pitolo alota꞉ Tekehalio. Ekipeke neke na telia꞉ mea ipilipiki la alepe laata꞉ I̱ma꞉ neke tamba꞉ muluekema꞉ yaka da꞉ta꞉la꞉eki homaoa꞉ka꞉na꞉ make ana꞉ pilieke laa leekepate  
\v 38 Yesuma꞉ ipika꞉ pi hombo peaaso alota꞉ Nakana꞉ma꞉ I̱ pa꞉ta꞉ homoluekema꞉ ota꞉ pi alepe laa neke pa꞉ta꞉ ota꞉ pi do alome. Mo hali koka꞉la꞉ma꞉ e̱ a̱i̱ na leke haena꞉ta꞉ nakana꞉ma꞉ hoto tepona꞉ I̱ Yesu na handolome laa lelipikie leekeme.   
\c 14  
\s1 Yesuta꞉ Apa꞉ pa꞉ta꞉ pula꞉ pota꞉e  
\p
\v 1 Yesuma꞉ iki pa꞉ta꞉ alota꞉ Ikana꞉ma꞉ pomoma꞉ na homeke hone eleke eleke na wiki hata꞉ Koda꞉ pa꞉ta꞉ hone tulao hata꞉ make I̱ pa꞉ta꞉ tonka꞉na꞉ hone tulao hapa꞉peke.  
\v 2 Yaka Apa꞉na꞉ da pa꞉ta꞉ta꞉ da panda꞉ eleke eleke wotu ula꞉me. Kutupa I̱ puata꞉ ika꞉ a꞉pa halo peleme alena꞉ wamo peaalo pula꞉me. Do aloeki na wia꞉ka꞉na꞉ yoluta꞉ I̱ma꞉ iki pa꞉ta꞉ amba꞉ la kulu pua꞉me laa leekeme.  
\v 3 Kutupa I̱ pua ika꞉ halo peleme alena꞉ wamo peaota꞉ I̱ halo alena꞉ mandake pa꞉ta꞉ a꞉pa hamina꞉yeke I̱ paa a꞉pa iki a꞉pa handa꞉ mulueke.  
\v 4 Kutupa I̱ pulueeki make pota꞉ make ikana꞉ma꞉ handelememe laa leekeme.  
\v 5 Tomasima꞉ ipiki pa꞉ta꞉ alota꞉ Tekehalio. Neke polo pele ekita꞉ nikana꞉ma꞉ na handoloma꞉me. Koto ekina꞉ pota꞉ta꞉ ekipa handomonope laa leeke handaa  
\v 6 Yesuma꞉ ipika꞉ pi hombo peaaso alota꞉ I̱ta꞉ hande pota꞉e. I̱ ota꞉ekie laa I̱ta꞉ da꞉ta꞉la꞉ekie. Hali epima꞉ yaka Apa꞉ pa꞉ta꞉ polueke hone wia꞉ka꞉na꞉ta꞉ pota꞉ ma꞉nda꞉ dia꞉me. I̱ pa꞉ta꞉ homeke epena꞉e leekeme.  
\v 7 Ikana꞉ma꞉ I̱ handemeka꞉na꞉ta꞉ yaka Apa꞉ make handilimikie. Ameta꞉ ipiki handolo pelemeeki ameta꞉ kini pitelememe laa ipikita꞉ amba꞉ handelememe la leekeme.   
\p
\v 8 Pilipima꞉ ipiki pa꞉ta꞉ alota꞉ Tekehalio. Naka꞉ Apa꞉ta꞉ niki pa꞉ta꞉ wala꞉e. Kutu pika꞉na꞉ta꞉ ana꞉ pilieke leekeme.  
\v 9 Yesuma꞉ ipika꞉ pi hombo peaaso alota꞉ Pilipio. Iki paeyao ame̱le̱ nate wopu haowa꞉pate nakana꞉ma꞉ I̱ta꞉ hone na wia alepe. I̱ handilia꞉ halima꞉ta꞉ yaka Apa꞉ make handilieke laa ekipeke handa naka꞉ Apa꞉ wala꞉e alepe.  
\v 10 Yaka Apa꞉ma꞉ I̱ yaapo hala꞉eki make I̱ma꞉ make yaka Apa꞉ yaapo haloeki make hone na witelepe leekeme. Koto laa Yesuma꞉ mo disaipolo haliweki pa꞉ta꞉ alota꞉ Iki pa꞉ta꞉ loa꞉ pi manuta꞉ ya hone wia na loa꞉me laa hande I̱ yaapo hala꞉ Apa꞉ma꞉ ipikana꞉ma꞉ kone ipika꞉eki pita꞉la꞉me.  
\v 11 Yaka Apa꞉ma꞉ I̱ yaapo hala꞉ ekina꞉ make I̱ma꞉ta꞉ yaka Apa꞉ yaapo halo ekina꞉ make I̱ma꞉ do alo pita꞉ ikana꞉ma꞉ ota꞉ opua꞉pa꞉peke ya꞉la꞉pate pa do aloeki na opimika꞉na꞉ta꞉ kota꞉ I̱ma꞉ hande pua꞉ ekimanu hone witolo hata꞉ I̱ pa꞉ta꞉ hone tulao hapa꞉peke laa leekeme.  
\v 12 I̱ma꞉ta꞉ iki pa꞉ta꞉ ota꞉ pi alome laa I̱ pa꞉ta꞉ hone tulao hala꞉ halima꞉ta꞉ I̱ma꞉ pitoloeki manuta꞉ ipikana꞉ma꞉ make pilieke. Kutupa yaka Apa꞉ pa꞉ta꞉ I̱ polue ekina꞉ta꞉ I̱ma꞉ pitolo ekimanu kone mo halima꞉ ankulao hau tiekemanu pilieke leekeme.  
\v 13 Kutupa ala꞉ta꞉ ma꞉nda꞉ yaka bikima꞉ honke alo hata꞉ lemeka꞉na꞉ta꞉ hande Atekema꞉ hande Eiyeke pa꞉ta꞉ yama꞉ pa̱a̱ peaena꞉yeke I̱ma꞉ peaalueke leekeme.  
\v 14 Ala꞉ta꞉ ma꞉nda꞉ yaka biki alo hata꞉ I̱ pa꞉ta꞉ honke lemeka꞉na꞉ta꞉ I̱ma꞉ peaalueke leekeme.   
\s1 Mo hande la꞉ wieke Holi Sipitidi  
\p
\v 15 I̱ pa꞉ta꞉ pukima꞉ homekena꞉ta꞉ yaka pi ula꞉ ekimanu opua pilimikie.  
\v 16-17 Kutupa I̱ma꞉ yaka Apa꞉ pa꞉ta꞉ honke loa꞉ka꞉na꞉ta꞉ ipikana꞉ma꞉ mo iki ame̱le̱ hao haena꞉ lelia꞉ mo Tamba꞉ Mu Halo Pa꞉la꞉ Hali kilieke. Ipikita꞉ mo ota꞉eki pu hala꞉ Epeke Temoko konee. Kenke wanda꞉halima꞉ta꞉ ipiki na handolo hata꞉ make hone na witolo hata꞉ make ipiki handa꞉ mea꞉peke na yolo pa꞉la꞉pate iki ame̱le̱ mandake hata꞉ iki tukiki pa꞉ta꞉ hala꞉ ekina꞉ta꞉ ipiki handelememe.   
\p
\v 18 I̱ma꞉ ikita꞉ pa honumake hamina꞉ na lolueke. Iki pa꞉ta꞉ paa la꞉ka꞉la ipulueke laa  
\v 19 hosiki hao kenke wanda꞉halima꞉ I̱ pa na handolo pelemepate ikana꞉ma꞉ wetepe I̱ handilimikie. Koto ekina꞉ I̱ da꞉ta꞉ halo ekima꞉ta꞉ iki make da꞉ta꞉ halimikie.  
\v 20 Kutupa koto dina꞉ta꞉ I̱ta꞉ yaka Apa꞉ tukiki pa꞉ta꞉ haloeki make ikita꞉ I̱ tukiki pa꞉ta꞉ halemeeki make iki tukiki pa꞉ta꞉ I̱ haloeki make handilimikie laa leekeme.   
\p
\v 21 Hali epima꞉ yaka pi ulu ekimanu opua pia꞉ka꞉na꞉ta꞉ kota꞉ koto halima꞉ I̱ pa꞉ta꞉ pukima꞉ homa꞉la꞉me. Kutupa I̱ pa꞉ta꞉ pukima꞉ homilie halita꞉ yaka Apa꞉ma꞉ ipiki pa꞉ta꞉ pukima꞉ homilieke. Kutupa make I̱ma꞉ ipiki pa꞉ta꞉ pukima꞉ homolo hata꞉ I̱ halo ekita꞉ peneme yaalueke laa leekeme.  
\v 22 Yesuma꞉ koto leeke handaata꞉ Diudasi hande Isekatioti hali Diudasi pa꞉ta꞉ na loa꞉ma꞉ ipikana꞉ma꞉ Yesu pa꞉ta꞉ alota꞉ Tekehalio. Ekipa kenke wanda꞉halima꞉ na handena꞉ leke niki pa꞉ta꞉ homeke peneme yao walipikipe leekeme.  
\v 23 Kutupa Yesuma꞉ ipika꞉ pi hombo peaaso alota꞉ Hali epima꞉ I̱ pa꞉ta꞉ pukima꞉ homea꞉ka꞉na꞉ta꞉ I̱ma꞉ alo pi opua pilieke. Kutupa yaka Apa꞉ma꞉ koto hali pa꞉ta꞉ pukima꞉ homilieke. Kutupa yaka Apa꞉ dikita꞉ mo hali pa꞉ta꞉ a꞉pa ipiki ame̱le̱ hao halumeke.  
\v 24 Pate hali epima꞉ I̱ pa꞉ta꞉ pukima꞉ na homea꞉ka꞉na꞉ta꞉ I̱ma꞉ alo pi manuta꞉ na opilieke. Ikana꞉ma꞉ do opueleme pita꞉ yakaeki dia꞉me pa I̱ tapaala꞉ hali yaka Apa꞉ pa꞉ta꞉ ipula꞉me leekeme.   
\p
\v 25 Iki ame̱le̱ halo dina꞉ta꞉ do pimanu la kitolome.  
\v 26 Kutu pitolopate hande iki Tamba꞉ Mulu pa꞉la꞉ Hali yaka Apa꞉ma꞉ yaka bikina꞉ tapaalo pa꞉la꞉ halita꞉ Holi Sipitidi kone ala꞉ta꞉ paeyao ipikana꞉ma꞉ walieke. Kutupa make I̱ma꞉ hande iki pa꞉ta꞉ walo ekimanu paeyaota꞉ ikana꞉ma꞉ hone uemena꞉yeke ipikana꞉ma꞉ ika꞉ hone u tiaalieke.   
\p
\v 27 I̱ma꞉ iki mina꞉pa꞉lao pulupate puki lopa꞉niaasa꞉ ekita꞉ iki pa꞉ta꞉ pa wina꞉ laa pulume. Yaka puki lopa꞉niaasa꞉eki kone iki pa꞉ta꞉ kitolome. Kutupa mo kenke wanda꞉halima꞉ iki pa꞉ta꞉ kita꞉la꞉ tupa꞉ pa na kitolome. Koto ekina꞉ hone eleke eleke na wiki paala꞉ma꞉ na homa꞉pa꞉peke laa leekeme.  
\v 28 I̱ma꞉ iki mina꞉pa꞉lao polueke laa loa꞉pateta꞉ paa la꞉ka꞉la ipulueke laa loa꞉ pita꞉ amba꞉ opimime. Ikana꞉ma꞉ I̱ pa꞉ta꞉ pukima꞉ homemeka꞉na꞉ yoluta꞉ mo yaka Apa꞉ pa꞉ta꞉ I̱ pulume loa꞉ ekina꞉ ta꞉na꞉ma꞉ homolo pimime. Pa ekipeke yaka Apa꞉ta꞉ I̱ ankulao hala꞉ ekina꞉ loa꞉me leekeme.  
\v 29 Do alo ekimanu a̱i̱ na epeke haena꞉ kone iki pa꞉ta꞉ la kitolome. Pa ekipeke ota꞉ yaeya꞉ka꞉na꞉ta꞉ ikana꞉ma꞉ hone tulaalimikie leekeme.  
\v 30 Do kenkena꞉ you hali epolo pa꞉la꞉ ekina꞉ I̱ma꞉ta꞉ iki pa꞉ta꞉ pi wotu na lolueke. Ipikana꞉ma꞉ta꞉ I̱ pa꞉ta꞉ hau ma꞉nda꞉ pea꞉peke na ya꞉la꞉pate  
\v 31 Pa I̱ma꞉ yaka Apa꞉ pa꞉ta꞉ pukima꞉ homolo ekita꞉ do kenke wanda꞉halima꞉ handena꞉ loluekema꞉yeke ipikana꞉ma꞉ I̱ pa꞉ta꞉ doeki pea꞉peke lea꞉ haumanu paeyao pu halome laata꞉ Tiao do pa꞉ta꞉ mina꞉pa꞉lao pomana꞉e laa leekeme.   
\c 15  
\s1 Yesuta꞉ ota꞉ waini pu tekee  
\p
\v 1 Yesuma꞉ alota꞉ I̱ta꞉ ota꞉ waini pu tekee. Kutupa yaka Apa꞉ta꞉ mo waini pu ena꞉ teke halie.  
\v 2 Yaka paleke mandane ekima꞉ kiliki na a꞉eya꞉ka꞉na꞉ta꞉ kota꞉ koto paleketa꞉ yaka Apa꞉ma꞉ poka mea baalieke. Kutupa mo mandane kiliki a꞉eta꞉la꞉ paleke manuta꞉ wamo peaaso hata꞉ kiliki wopu a꞉ena꞉yeke yaka Apa꞉ma꞉ poka꞉ mepi pilieke.  
\v 3 I̱ma꞉ iki pa꞉ta꞉ amba꞉ loa꞉ ekima꞉ta꞉ ikita꞉ amba꞉ wamo pa꞉la꞉me.  
\v 4 Ikita꞉ I̱ pa꞉ta꞉ hapa꞉peke. Kutupa I̱ma꞉ta꞉ iki pa꞉ta꞉ halueke. Mo hande paleke ma꞉nda꞉ teke pa꞉ta꞉ na tunaeya꞉ka꞉na꞉ta꞉ kota꞉ ipika꞉ kone kiliki a꞉eya꞉peke na ya꞉la꞉me. Iki make I̱ pa꞉ta꞉ na haemeka꞉na꞉ta꞉ ika꞉ kone kiliki na a꞉elieke.   
\p
\v 5 I̱ta꞉ waini pu tekee. Ikita꞉ palekemanue. Hali epima꞉ I̱ pa꞉ta꞉ haya꞉ka꞉na꞉ta꞉ I̱ta꞉ ipiki yaapo hata꞉ kiliki wotu a꞉elieke. Pate ikana꞉ma꞉ I̱ ame̱le̱ na hake hata꞉ta꞉ ikana꞉ma꞉ epeke hau homeke a꞉nda꞉ na pilimikie.  
\v 6 Hali epima꞉ I̱ pa꞉ta꞉ na haya꞉ka꞉na꞉ta꞉ ipikita꞉ mo hande hapua꞉la꞉ palekema꞉ handilieke. Kutupa mo hapua꞉la꞉ paleke manuta꞉ amu pea ti uleke pa꞉ta꞉ lopaeya꞉ka꞉na꞉ta꞉ tima꞉ telieke.  
\v 7 Ikita꞉ I̱ pa꞉ta꞉ hata꞉ta꞉ yaka pi lolo ekimanu miniki hata꞉ta꞉ ika꞉ hone pa꞉la꞉ tupa꞉ honke lemeka꞉na꞉ta꞉ ota꞉ milimikie.  
\v 8 Ikana꞉ma꞉ kiliki wotu a꞉eteleme ekima꞉ta꞉ yaka Apa꞉na꞉ biki tieke wiaasememe. Kutu piteleme ekima꞉ta꞉ ikita꞉ yaka disaipolo haliweki halimikie leekeme.  
\v 9 Yaka Apa꞉ma꞉ I̱ pa꞉ta꞉ pukima꞉ homa꞉la꞉ tupa꞉ta꞉ I̱ma꞉ make iki pa꞉ta꞉ pukima꞉ homolome. Koto ekina꞉ yaka pukima꞉ homoloeki pa꞉ta꞉ hao hapa꞉peke.  
\v 10 I̱ma꞉ta꞉ yaka Apa꞉na꞉ pi ula꞉ ekimanu opua peata꞉ ipika꞉ pukima꞉ homa꞉la꞉eki pa꞉ta꞉ halo tupa꞉ ikana꞉ma꞉ make yaka pi ula꞉ ekimanu opua pimika꞉na꞉ta꞉ yaka pukima꞉ homoloeki pa꞉ta꞉ halimikie laa leekeme.   
\p
\v 11 Do aloma꞉ pi manuta꞉ yaka ta꞉na꞉ma꞉ homoloeki iki pa꞉ta꞉ witolo hata꞉ ika꞉ ta꞉na꞉ma꞉ homelemeeki tumba pitina꞉yeke iki pa꞉ta꞉ alome.  
\v 12 Yaka pi witolo ekita꞉ dupae. I̱ma꞉ iki pa꞉ta꞉ pukima꞉ homolo tupa꞉ ikana꞉ma꞉ make pukima꞉ homaalualu pea꞉pa꞉peke.  
\v 13 Hali ma꞉nda꞉ma꞉ ipika꞉ yankeke tamba꞉ minolo hata꞉ ipika꞉ da꞉ta꞉la꞉eki kone alu paeya꞉ka꞉na꞉ta꞉ kota꞉ kutupiki pukima꞉ homa꞉la꞉ hauta꞉ ma꞉nda꞉ma꞉ ankulapeke na ya꞉la꞉me.  
\v 14 Kutupa I̱ma꞉ dupa꞉pa꞉ aloeki opua pimika꞉na꞉ta꞉ ikita꞉ yaka yankeke titi halimikie.  
\v 15 Pa e pokaasa꞉ halima꞉ta꞉ ipika꞉ teke halima꞉ hone wita꞉la꞉ ekita꞉ handa꞉peke na ya꞉la꞉ ekina꞉ ameta꞉ iki pa꞉ta꞉ pa e pokaaseme haliwekio pi na lolueke. Pa ekipeke yaka Apa꞉ma꞉ I̱ pa꞉ta꞉ la kita꞉la꞉ pi paeyao iki pa꞉ta꞉ la kitolo ekina꞉ iki pa꞉ta꞉ yaka yankeke titio alome laa leekeme.  
\v 16 I̱ta꞉ ikana꞉ma꞉ na mea haena꞉ lelemepate pa ikita꞉ I̱ma꞉ talopu meaata꞉ ikita꞉ pua hande u halo pa꞉la꞉ napeke a꞉eyamina꞉yeke mea haena꞉ lolome. Koto ekina꞉ ikana꞉ma꞉ yaka Apa꞉ pa꞉ta꞉ ala꞉ta꞉ ma꞉nda꞉ yaka biki alo hata꞉ honke lemeka꞉na꞉ta꞉ ipikana꞉ma꞉ iki pa꞉ta꞉ ota꞉ kilieke.  
\v 17 Koto ekina꞉ iki pa꞉ta꞉ I̱ma꞉ pi witoloeki dupae. Ika꞉ kone pukima꞉ homaalu alu pea hapa꞉peke laa leekeme.   
\s1 Kenke wanda꞉halina꞉ a꞉nda꞉ lila꞉eki  
\p
\v 18 Kenke wanda꞉halima꞉ iki pa꞉ta꞉ a꞉nda꞉ lia꞉ka꞉na꞉ta꞉ I̱ pa꞉ta꞉ amba꞉ a꞉nda꞉ lilimieki hone wia꞉pa꞉peke.  
\v 19 Ikita꞉ do kenke hau pu haleme wanda꞉hali ame̱le̱ ta꞉ma꞉ni pea haemeka꞉na꞉ yoluta꞉ mo wanda꞉halima꞉ Nika꞉ tapakee laa iki pa꞉ta꞉ ta꞉na꞉ma꞉ homolo pimime. Kutu pulu pimipate I̱ma꞉ iki talopu mea hamina꞉ lolo ekima꞉ta꞉ ikita꞉ mo kenkena꞉ hau pu haleme wanda꞉hali ame̱le̱ na halememe. Koto peleme ekina꞉ iki pa꞉ta꞉ a꞉nda꞉ litelememe.  
\v 20 I̱ma꞉ alo pina꞉ hone wia꞉pa꞉peke. E pokaasa꞉ halima꞉ta꞉ ipika꞉ teke hali na ankulalieke laa loa꞉me. I̱ pa꞉ta꞉ a꞉nda꞉ lilimi ekima꞉ta꞉ iki pa꞉ta꞉ make a꞉nda꞉ lilimikie. I̱ma꞉ walolo pi opueleme ekima꞉ta꞉ ikana꞉ma꞉ walo pelemeeki make opilimikie.  
\v 21 Ikita꞉ yakaeki halemeke handaa do haumanu paeyao iki pa꞉ta꞉ pilimikie. Kutupa make I̱ tapaala꞉ hali na handolo hata꞉ pilimikie.  
\v 22 I̱ma꞉ mo wanda꞉hali pa꞉ta꞉ na a꞉pa loa꞉ka꞉na꞉ yoluta꞉ ika꞉ hoke hau peneme na yaalo pimime. Kutu pulu pia꞉pateta꞉ ameta꞉ ika꞉ hoke hau peleme ekina꞉ hombo pealuekema꞉ pi ma꞉nda꞉ lapeke na ya꞉la꞉me.  
\v 23 Hali epima꞉ I̱ pa꞉ta꞉ a꞉nda꞉ lia꞉ka꞉na꞉ta꞉ kota꞉ yaka Apa꞉ pa꞉ta꞉ make a꞉nda꞉ lita꞉la꞉me.  
\v 24 Amba꞉ titina꞉ ma꞉nda꞉ma꞉ na pieke ekimanu I̱ma꞉ iki ame̱le̱ na pua꞉ka꞉na꞉ yoluta꞉ ika꞉ hoke hauta꞉ peneme na yaalo pia꞉me. Koto pa꞉la꞉pate I̱ma꞉ pua꞉eki handaa kone yaka Apa꞉ diki pa꞉ta꞉ honditi pu halememe.  
\v 25 Kutu pitelemepate ika꞉ Lo Pi manuna꞉ wape pa꞉la꞉eki ota꞉ yaaluekema꞉ pita꞉la꞉me. Dupae. Pa hameke kone I̱ pa꞉ta꞉ honditi pimime.   
\p
\v 26 Kutu pitelemepate mo Tamba꞉ Mu Hala꞉ Hali ipilieke. Ipikita꞉ Ateke yaapo hala꞉ hali kone I̱ma꞉ tapaalueke. Ipikita꞉ ota꞉ hau pu hala꞉ Temokoe. Ipikita꞉ Ateke pa꞉ta꞉ hao ipilieke. Kutupa yaka pi la꞉ mea halawaasa꞉ wekitisi hali halieke.  
\v 27 Kutupa iki make amba꞉ kone I̱ ame̱le̱ haleme ekina꞉ yaka pi lawaaseme wekitisi haliweki halimikie.   
\c 16  
\p
\v 1 Ika꞉ hone tulao halemeeki wetepena꞉ na mina꞉pa꞉lalo peleme tupa꞉ do pimanu paeyao iki pa꞉ta꞉ la kitolome.  
\v 2 Mo hande pi hotu haleme da pa꞉ta꞉manu iki poemena꞉yeke iki yokilimikie. Kutupa wetepena꞉ mandane haliwekima꞉ta꞉ iki litolo hata꞉ta꞉ Koda꞉na꞉ e pokaasoma꞉me laa hone wilimikie.  
\v 3 Yaka Apa꞉ diki na handeleme ekina꞉ koto haumanu pilimikie.  
\v 4 Kutu pulu pelemepate koto haumanu pulu peleme nate epea꞉ka꞉na꞉ta꞉ hande I̱ma꞉ loa꞉ ekimanu ikana꞉ma꞉ hone uemena꞉yeke do pimanu iki pa꞉ta꞉ la kitolome.  
\s1 Mo Holi Sipitidina꞉ e poka꞉la꞉eki  
\p I̱ta꞉ panake pa꞉ta꞉ kone iki ame̱le̱ haowa꞉ ekima꞉ta꞉ do pimanu iki pa꞉ta꞉ na la kua꞉pate  
\v 5 Pa ameta꞉ I̱ tapaala꞉ hali pa꞉ta꞉ paa pulume laa alo ekita꞉ hali homekema꞉ Neketa꞉ hane pulipe la make na lota꞉ pita꞉la꞉me.  
\v 6 Kutupa ameta꞉ do hande pimanu la kua꞉ ekina꞉ ikita꞉ puki tetoma꞉ homelememe.  
\v 7 Koto pa꞉la꞉pate I̱ma꞉ iki pa꞉ta꞉ do ota꞉ pi alome. I̱ma꞉ iki mina꞉pa꞉lao polue ekita꞉ ota꞉ epekeekie laa do ekina꞉yeke loa꞉me. I̱ na poa꞉ka꞉na꞉ta꞉ hande Tamba꞉ Mulu Pa꞉la꞉ Halita꞉ na ipilieke. Kutupa I̱ poa꞉ka꞉na꞉ta꞉ hande hali iki pa꞉ta꞉ I̱ma꞉ mea tapaalueke.  
\v 8 Kutupa a꞉paata꞉ ipikana꞉ma꞉ta꞉ kenke wanda꞉halima꞉ mo hoke hau pita꞉la꞉eki pa꞉ta꞉ make tikitiki hau pita꞉la꞉eki pa꞉ta꞉ make pi yokaalu pulu pa꞉la꞉eki pa꞉ta꞉ make ika꞉ hone u hoeyaasekeeki peneme yao walieke.  
\v 9 Mo hoke hau pita꞉la꞉eki pa꞉ta꞉ hone u hoeyaasa꞉ ekita꞉ I̱ pa꞉ta꞉ hone na tulaaseme ekina꞉ pitelememe.  
\v 10 Mo tiki tiki hau pita꞉la꞉eki pa꞉ta꞉ hone u hoeyaasa꞉ ekita꞉ I̱ta꞉ yaka Apa꞉ pa꞉ta꞉ polo polopate I̱ paa na handolo peleme ekina꞉ loa꞉me.  
\v 11 Mo pi yokaalu pita꞉la꞉eki pa꞉ta꞉ hone u hoeyaasa꞉ ekita꞉ do kenkena꞉ hala꞉ you halita꞉ pi yokaalu peata꞉ oto pa꞉ta꞉ yaala꞉ ekina꞉ loa꞉me.   
\p
\v 12 Mandane pi eleke eleke iki pa꞉ta꞉ lolo polopate pomoma꞉ weleke taapa꞉na꞉ ame do na la kulueke.  
\v 13 Kutu polopate wetepe hande ota꞉ pi la wala꞉la꞉ Temoko epea꞉ka꞉na꞉ta꞉ ota꞉ pimanu paeyao opuemena꞉ iki tikitiki yao hatuku pelieke. Ipika꞉ hone wia na leke eki pi opia꞉ka꞉na꞉ta꞉ ipikana꞉ma꞉ koto pi kone la kilieke. Kutupa wetepena꞉ pulu peleme ekimanu make la kilieke.  
\v 14 Yaka pi kone opua iki pa꞉ta꞉ la kia꞉ka꞉na꞉ta꞉ ipikana꞉ma꞉ yaka biki mea a꞉meiyalieke.  
\v 15 Ala꞉ta꞉ ala꞉ta꞉ paeyao yaka Apa꞉ma꞉ wia hala꞉ ekita꞉ ya ekie. Koto polo ekina꞉ I̱ma꞉ mo Temoko pa꞉ta꞉ halolo ekita꞉ ipikana꞉ma꞉ meaata꞉ iki pa꞉ta꞉ la kilieke loa꞉me.   
\s1 Ka꞉nda꞉ma꞉ homa꞉la꞉ ekita꞉ paa ta꞉na꞉ma꞉ homa꞉la꞉eki yelieke  
\p
\v 16 Hosiki hao ikana꞉ma꞉ I̱ paa na handaata꞉ pa hosiki hao hao pea I̱ paa handilimikie.  
\v 17 Mandane disaipolo haliwekima꞉ ika꞉ kone pi la alualu pitolo alota꞉ Do ala꞉ pita꞉ eki epina꞉ ala꞉pe. Ipikana꞉ma꞉ niki pa꞉ta꞉ alota꞉ Hosiki hao ikana꞉ma꞉ I̱ paa na handaata꞉ kutupa pa hosiki hao hao pea I̱ paa handilimikie lea꞉me. Kutupa make yaka Apa꞉na꞉ da pa꞉ta꞉ polo polo ekina꞉ loa꞉me lea꞉me lemekeme.  
\v 18 Kutupa ika꞉ kone lota꞉ lota꞉ pu alu alu pitolo alota꞉ Hande hosiki hao lea꞉ ekita꞉ eki epina꞉ lea꞉pe laata꞉ ipikana꞉ma꞉ lea꞉ pi teketa꞉ niki hone na witoloma꞉me lemekeme.  
\v 19 Yesuma꞉ mo haliwekima꞉ ipiki pa꞉ta꞉ lota꞉ pulu pimikieki hone wia iki pa꞉ta꞉ alota꞉ Hosiki hao ikana꞉ma꞉ I̱ paa na handaata꞉ pa hosiki hao hao pea I̱ paa handilimikie loa꞉ ekina꞉ta꞉ Ika꞉ kone ane la꞉ mone la꞉ pitelemepe.  
\v 20 Iki pa꞉ta꞉ ota꞉ pi alome. Ikana꞉ma꞉ puki tandama꞉ homolo hata꞉ e̱ lolo pelemepate kenke wanda꞉halima꞉ta꞉ ta꞉na꞉ma꞉ homilimikie. Ikita꞉ puki tandama꞉ homolo pelemepate kutupulu pelemeeki mina꞉pa꞉lao ta꞉na꞉ma꞉ homa halimikie.  
\v 21 Wanda꞉wekima꞉ta꞉ weki loke lomba hao hoki nea꞉ka꞉na꞉ta꞉ kota꞉ ipika꞉ weki mulu pa꞉la꞉ di ipula꞉ ekina꞉ tandama꞉ homiliepate pa mo hande weki mia꞉ka꞉na꞉ta꞉ mo wekita꞉ do kenkena꞉ mendia꞉ ekina꞉ ta꞉na꞉ma꞉ homolo hata꞉ ipika꞉ tanda mia꞉ ekita꞉ hone yonka꞉laalieke.  
\v 22 Iki make koto tupa꞉e. Ikita꞉ ame ka꞉nda꞉ma꞉ homelemepate I̱ma꞉ iki paa handulueke. Kutu pua꞉ka꞉na꞉ta꞉ ika꞉ pukima꞉ ta꞉na꞉ma꞉ homilimikie. Kutupa koto ika꞉ ta꞉na꞉ma꞉ homolo peleme ekita꞉ hali ma꞉nda꞉ma꞉ yokuluekema꞉ na bepolalieke.   
\p
\v 23 Koto di epea꞉ka꞉na꞉ta꞉ ikana꞉ma꞉ I̱ pa꞉ta꞉ ala꞉ta꞉ ma꞉nda꞉ a꞉nda꞉ honke na lelimikie. I̱ma꞉ta꞉ iki pa꞉ta꞉ ota꞉ pi alome. Hande yaka Apa꞉ma꞉ta꞉ yaka bikina꞉ honke lolo peleme ekita꞉ iki pa꞉ta꞉ kilieke.  
\v 24 Amba꞉ make ame do make yaka bikina꞉ ala꞉ta꞉ ma꞉nda꞉ a꞉nda꞉ honke na lememe. Honke lemeka꞉na꞉ta꞉ milimikie. Kutupa make ika꞉ ta꞉na꞉ma꞉ homolo peleme ekita꞉ tumbulu bao halieke.   
\s1 Yesuma꞉ta꞉ kenkena꞉ pita꞉la꞉ haumanu amba꞉ bepolala꞉eki  
\p
\v 25 Do pita꞉ onkoluma꞉ laa iki pa꞉ta꞉ loa꞉pate wetepena꞉ta꞉ onkoluma꞉ pi ma꞉nda꞉ na leke pa yaka Apa꞉ pa꞉ta꞉ pi alo hata꞉ peneme yao iki pa꞉ta꞉ lolueke.  
\v 26 Koto di epea꞉ka꞉na꞉ta꞉ yaka biki laa ipiki pa꞉ta꞉ honke lelimikie. I̱ma꞉ iki pa꞉ta꞉ dupa na lolueke. I̱ma꞉ ipiki pa꞉ta꞉ ika꞉eki honke lalueke pi na lolueke.  
\v 27 Pa ekipeke yaka Apa꞉ma꞉ kone iki pa꞉ta꞉ pukima꞉ homa꞉la꞉ ekina꞉ loa꞉me. Ikana꞉ma꞉ I̱ pa꞉ta꞉ pukima꞉ homa I̱ta꞉ Koda꞉ yaapo hao epoloeki opimiki handaa pita꞉la꞉me.  
\v 28 I̱ta꞉ hande yaka Apa꞉ yaapo hao do kenkena꞉ a꞉pa hao ameta꞉ do kenke mina꞉pa꞉lao yaka Apa꞉ pa꞉ta꞉ polueke leekeme.   
\p
\v 29 Koto leekeeki opuaata꞉ ipika꞉ disaipolo haliwekima꞉ ipiki pa꞉ta꞉ alota꞉ Ameta꞉ onkoluma꞉ laa na leke peneme yao aleme ekina꞉  
\v 30 ameta꞉ nikana꞉ma꞉ handoloma꞉me laa hali ma꞉nda꞉ma꞉ neke pa꞉ta꞉ amba꞉la lota꞉ pina꞉yeke na handeteke haleme. Nakana꞉ma꞉ hau paeyao handeleme. Koto pa꞉la꞉ ekina꞉ neketa꞉ Koda꞉ yaapo hao epele ekita꞉ opoloma꞉me.  
\v 31 Yesuma꞉ ika꞉ pi hombo peaaso alota꞉ Ameta꞉ hone tulaasemepe.  
\v 32 Opua꞉pe. Nate ma꞉nda꞉ta꞉ epolo pa꞉la꞉pate amba꞉ a꞉pa꞉la꞉me. Koto pa꞉la꞉ ekina꞉ iki paeyao tankulu paalu pea ta꞉ta꞉ ta꞉ta꞉ lo ika꞉ da nina꞉ kone polo pelemepate I̱ ya honumake siki pa halueke. Kutu pulu pelemepate I̱ta꞉ honumake na hake yaka Apa꞉ yaapo mandakena꞉ halupeke.  
\v 33 Do la kitolo pita꞉ ikana꞉ma꞉ I̱ yaapo ta꞉ma꞉ni pea hata꞉ puki lopa꞉niao hamina꞉yeke la loa꞉me. Kenke wanda꞉halima꞉ iki pa꞉ta꞉ tanda kulu pelemepate honkopu hao hapa꞉peke. Do kenkena꞉ pita꞉la꞉ hau manuta꞉ I̱ma꞉ amba꞉ bepolao ulume leekeme.   
\c 17  
\s1 Yesuma꞉ ipika꞉ disaipolo haliweki pa꞉ta꞉ yeni peaeyekeeki  
\p
\v 1 Yesuma꞉ koto pimanu laata꞉ oli ya nane handa꞉liao hata꞉ alota꞉ Apa꞉o. Hande di amba꞉ epa꞉la꞉me. Naka꞉ wekima꞉ naka꞉ bikita꞉ mea a꞉meiyaena꞉yeke naka꞉ wekina꞉ biki nakana꞉ma꞉ mea a꞉meiyapeke.  
\v 2 Nakana꞉ma꞉ ipikita꞉ wanda꞉hali paeyaona꞉ you haena꞉ laata꞉ Nakana꞉ma꞉ ipiki pa꞉ta꞉ halo pele wanda꞉hali paeyaota꞉ ipikana꞉ma꞉ da꞉tao hao haena꞉yeke lele ekina꞉ loa꞉me.  
\v 3 Deto hala꞉ ekita꞉ dupae. Neke homeke ota꞉ Koda꞉ haleeki make nakana꞉ma꞉ tapaale hali Yesu Ketiso hala꞉eki make telipina꞉ handa꞉la꞉ekie.  
\v 4 Neke tieke haleeki do kenkena꞉ hata꞉ walaata꞉ kutupa nakana꞉ma꞉ wale e make poko paeyaowa꞉me.  
\v 5 Apa꞉o. Amba꞉ do kenke a̱i̱ na wepiki hata꞉ neke yaapo hata꞉ mua꞉ pa̱a̱ piki kapu tieketa꞉ kotoeki kone ameta꞉ naka꞉ leke popelekena꞉ hano kie.   
\p
\v 6 Nakana꞉ma꞉ do kenke pa꞉ta꞉ mea ki haliweki pa꞉ta꞉ neke haleeki peneme yaowa꞉me. Koto haliwekita꞉ naka꞉ eki haena꞉ I̱ pa꞉ta꞉ mea kime. Kutupa naka꞉ pi make opimime.  
\v 7 Nakana꞉ma꞉ I̱ pa꞉ta꞉ ki alemanu paeyaota꞉ neke pa꞉ta꞉ kone mua꞉ ekita꞉ ame handelememe.  
\v 8 Nakana꞉ma꞉ I̱ pa꞉ta꞉ la ki pimanu paeya꞉ tapao iki pa꞉ta꞉ waloa꞉me. Kutu pua꞉peke handaa ikana꞉ma꞉ opua mimime. I̱ta꞉ neke yaapo epoloeki make ota꞉ekie laa nakana꞉ma꞉ I̱ tapaeeki make opitelememe.   
\p
\v 9 Do haliweki pa꞉ta꞉ hone witolo hata꞉ yeni pitolome. Kenke wanda꞉hali pa꞉ta꞉ hone witolo hata꞉ yeni na piki nakana꞉ma꞉ I̱ pa꞉ta꞉ ki haliwekita꞉ naka꞉eki kone koto haliweki pa꞉ta꞉ hone witolo hata꞉ yeni pitolome.  
\v 10 Yaka wia halo alemanu paeyaota꞉ naka꞉ ekie. Kutupa naka꞉ wia hale alemanu paeyao make yaka ekie. Koto pa꞉la꞉ ekina꞉ koto haliwekima꞉ yaka biki mea a꞉meiyalememe.  
\v 11 Ameta꞉ I̱ta꞉ do kenkena꞉ pa na hake neke pa꞉ta꞉ epolo polopate do haliwekita꞉ do kenkena꞉ pa ha pelia halimikie. Yako piki Apa꞉o. Nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ iki handeteke haena꞉ lapeke. Dikita꞉ homeke kone halopa꞉ tupa꞉ iki make homeke tupa꞉ haena꞉yeke loa꞉me.  
\v 12 I̱ta꞉ do haliweki ame̱le̱ hata꞉ta꞉ nakana꞉ma꞉ I̱ pa꞉ta꞉ ki bikita꞉ koto bikina꞉ welema꞉ kone iki wotu handeteke haowa꞉me. I̱ma꞉ iki handeteke haowa꞉ pita꞉ta꞉ hali ma꞉nda꞉ na alu pia꞉pate pa mo Baibolo buka pa꞉ta꞉ wape pa꞉la꞉eki yaena꞉yeke hande alu pulu pa꞉la꞉ hali homekee.  
\v 13 Ameta꞉ neke pa꞉ta꞉ epolo polopate do kenkena꞉ hata꞉ta꞉ I̱ma꞉ do haliwekima꞉ yaka ta꞉na꞉ pa꞉la꞉eki mea tumbao haena꞉yeke do pimanu alome.  
\v 14 Naka꞉ pita꞉ I̱ma꞉ iki pa꞉ta꞉ amba꞉ la haloa꞉me. Koto polo ekina꞉ do kenke wanda꞉halima꞉ta꞉ iki pa꞉ta꞉ honditi pu halememe. I̱ta꞉ do kenkena꞉eki na halo tupa꞉ koto haliweki make do kenkena꞉eki na haleme ekina꞉ pitelememe.  
\v 15 I̱ma꞉ do honke alo ekita꞉ do haliweki kenke pa꞉ta꞉ na haena꞉ yoka꞉ muelena꞉ laa na loa꞉pateta꞉ hande Hoke Halima꞉ iki hoeyaama꞉na꞉ nakana꞉ma꞉ handeteke halena꞉yeke honke alome.  
\v 16 I̱ta꞉ do kenkena꞉eki na halo tupa꞉ iki make do kenkena꞉eki na halememe.  
\v 17 Nakana꞉ma꞉ naka꞉ ota꞉ pi lele ekima꞉ do haliwekita꞉ yakopiki haliweki haena꞉ lapeke. Naka꞉ pita꞉ ota꞉ ekie.  
\v 18 Nakana꞉ma꞉ I̱ do kenkena꞉ tapae tupa꞉ta꞉ I̱ma꞉ do haliweki kenke ta꞉ta꞉ ta꞉ta꞉ pa꞉ta꞉ tapaowa꞉me.  
\v 19 I̱ma꞉ do haliweki pa꞉ta꞉ hone witolo hata꞉ I̱ ya kone neke pa꞉ta꞉ kitolome. Kutupa do haliweki make ota꞉ naka꞉eki haena꞉yeke pitolome.   
\p
\v 20 I̱ma꞉ do haliweki homeke pa꞉ta꞉ hone witolo hata꞉ yeni na piki ika꞉ pua walo pelemeeki opua I̱ pa꞉ta꞉ hone tulao halo peleme wanda꞉hali pa꞉ta꞉ make hone witolo hata꞉ yeni pitolome.  
\v 21 Paeyaota꞉ homekeeki haena꞉yeke yeni pitolome. Apa꞉o. Neketa꞉ I̱ yaapo haleeki make I̱ neke yaapo haloeki make iki make koto tupa꞉ diki ame̱le̱ haemeka꞉na꞉ta꞉ epelieke. Kenke wanda꞉halima꞉ nakana꞉ma꞉ I̱ tapaaleeki hone wina꞉yeke ikita꞉ homekeeki haemeka꞉na꞉ta꞉ epelieke.  
\v 22 Nakana꞉ma꞉ I̱ pa꞉ta꞉ hande ki biki tieketa꞉ I̱ma꞉ iki pa꞉ta꞉ haloa꞉me. Diki homeke kone halopa꞉ tupa꞉ iki make homekeeki haena꞉yeke pua꞉me.  
\v 23 I̱ta꞉ iki pa꞉ta꞉ haloeki make neketa꞉ I̱ pa꞉ta꞉ haleeki make ikita꞉ ota꞉ homekeeki haena꞉yeke loa꞉me. Kenke wanda꞉halima꞉ta꞉ nakana꞉ma꞉ I̱ tapaaleeki make I̱ pa꞉ta꞉ pukima꞉ homele tupa꞉ do haliweki pa꞉ta꞉ koto homeke pukima꞉ homeleeki make hone wina꞉yeke loa꞉me.   
\p
\v 24 Apa꞉o. Do haliwekita꞉ nakana꞉ma꞉ I̱ pa꞉ta꞉ keleme. Koto pele ekina꞉ I̱ halo alena꞉ iki make koto pa꞉ta꞉ haena꞉ yaka pa̱a̱ piki biki tieke moloeki handena꞉yeke I̱ma꞉ hone pa꞉la꞉me. Koto biki tieketa꞉ nakana꞉ma꞉ keleekie. Do kenke a̱i̱ na wepieke dina꞉ kone I̱ pa꞉ta꞉ pukima꞉ homele ekina꞉ keleme.  
\v 25 Tiki tiki piki Apa꞉o. Kenke wanda꞉halima꞉ neke na handelemepate I̱ma꞉ta꞉ neke handolome. Kutupa do haliwekima꞉ta꞉ nakana꞉ma꞉ I̱ tapaale ekita꞉ handelememe.  
\v 26 Naka꞉ hale ekita꞉ I̱ma꞉ iki pa꞉ta꞉ waloa꞉pate pa wala꞉tiki pulueke. Nakana꞉ma꞉ I̱ pa꞉ta꞉ pukima꞉ homele ekita꞉ iki pa꞉ta꞉ make pitina꞉yeke kutupa I̱ make iki pa꞉ta꞉ hanoyeke pulueke.   
\c 18  
\s1 Yesu da꞉ka꞉pa꞉ minimikieki  
\r (Ma꞉tiu 26꞉47-56, Maka 14꞉43-50, Luku 22꞉47-53)  
\p
\v 1 Yesuma꞉ koto pi lo paeyaota꞉ ipika꞉ disaipolo haliweki ame̱le̱ pua mo Kidotoni mukiki lombei pupa pemekeme. Koto pa꞉ta꞉ta꞉ Yesu ipika꞉ disaipolo haliweki ame̱le̱ e ma꞉nda꞉ pa꞉ta꞉ honda꞉ pambolo pemekeme.  
\v 2 Amba꞉ta꞉ Yesuma꞉ koto pa꞉ta꞉ ipika꞉ disaipolo haliweki manda꞉hande pu hayeke handaata꞉ kutu pu hayeke ekita꞉ hande Yesu a꞉nda꞉ lombeeke hali Diudasima꞉ koto alena꞉ handeekeme.  
\v 3 Koto ekina꞉ Diudasima꞉ta꞉ mandane ami haliweki make mo yeni peao haemeke you haliweki mo Pa꞉tisi haliweki yaapoma꞉ tapaemeke tembolo da handeteke haemeke haliweki make hande e pa꞉ta꞉ hatuku peekeme. Mo haliwekima꞉ ola꞉pake make a꞉ndelimanu make mutia pemekeme.  
\v 4 Yesuma꞉ta꞉ ipiki pa꞉ta꞉ epolo pieke hau paeyao hone wia mo haliweki pa꞉ta꞉ pua lota꞉ pitolo alota꞉ Epi weitelemepe leekeme.   
\p
\v 5 Koto leeke handa mo haliwekima꞉ ipika꞉ pi hombo peaaso alota꞉ Mo hande Na꞉sa꞉tete hali Yesu wei mea epoma꞉me lemekeme. Ipikana꞉ma꞉ alota꞉ Koto halita꞉ I̱ dota꞉ leekeme. Hande Yesu a꞉nda꞉ lombeeke hali Diudasita꞉ mo haliweki ame̱le̱ apa꞉tao hayekeme.  
\v 6 Yesuma꞉ta꞉ Koto halita꞉ I̱ dota꞉ leeke pita꞉ta꞉ mo haliwekita꞉ yola꞉ pamba kenkena꞉ lopemekeme.  
\v 7 Yesuma꞉ paa lota꞉ pitolo alota꞉ Epi weitelemepe leekeme. Mo haliwekima꞉ alota꞉ Mo hande Na꞉sa꞉tete hali Yesu weitoloma꞉me lemekeme.  
\v 8 Yesuma꞉ alota꞉ I̱e laa iki pa꞉ta꞉ amba꞉ la kua꞉me. I̱ weitolo lemeka꞉na꞉ta꞉ kota꞉ do haliweki pao pena꞉ lape leekeme.  
\v 9 Ipikana꞉ma꞉ dupiki pi leeke ekita꞉ amba꞉ la꞉ ula꞉eki yaena꞉yeke leekeme. Dupae. Apa꞉o. Nakana꞉ma꞉ I̱ pa꞉ta꞉ ki haliweki paeyao pa꞉ta꞉ hali homeke kone na alupia꞉me leekeme.   
\p
\v 10 Saimono Pidama꞉ta꞉ kepete hokulu panka꞉niao hayekeeki yolo tia mo yeni peao haemeke you haliwekina꞉ you halina꞉ e pokaeyeke hali pokeekepate ipika꞉ popeke nane katake tunkula꞉ pokeekeme. Mo pokaeyeke halina꞉ bikita꞉ Ma꞉likusie.  
\v 11 Kutu pieketa꞉ Yesuma꞉ Pida pa꞉ta꞉ alota꞉ Naka꞉ kepete hokulu pao mea dake pa꞉ta꞉ panka꞉niae. Yaka Apa꞉ma꞉ I̱ ka꞉la꞉ kapo ikalita꞉ na noluepe leekeme.   
\s1 Yesuma꞉ A꞉nasina꞉ leke popelekena꞉ hayekeeki  
\p
\v 12 Mo ami haliweki ika꞉ you hali tonka꞉na꞉ mo Diu wanda꞉halina꞉ tembolo da handeteke haemeke haliweki make ikana꞉ma꞉ Yesu da꞉ka꞉pa꞉ minaata꞉ puma꞉ tonkao  
\v 13 A꞉nasi pa꞉ta꞉ amba꞉la꞉ hatuku pemekeme. Ipikita꞉ koto bapina꞉ yeni peao haemeke you haliwekina꞉ you hali Kaiya꞉pasi ipika꞉ meiyeke hayekeme.  
\v 14 Kaiya꞉pasita꞉ ipikana꞉ma꞉ hande Diu wanda꞉hali pa꞉ta꞉ dupa leeke halie. Wanda꞉hali paeyao homaama꞉na꞉ hali homeke kone homea꞉ka꞉na꞉ epelieke laa leekeme.   
\s1 Pidama꞉ Yesuna꞉ biki hoeyaeyekeeki  
\r (Ma꞉tiu 26꞉69-70, Maka 14꞉66-68, Luku 22꞉55-57)  
\p
\v 15 Saimono Pida make disaipolo hali ma꞉nda꞉ make Yesu telia꞉ mea pepekeme. Mo hande disaipolo hali ma꞉nda꞉ta꞉ mo yeni peao haemeke you haliwekina꞉ you halima꞉ hando hatiki pieke handaa ipikita꞉ mo yeni peao haemeke you haliwekina꞉ you halina꞉ da hama pa꞉ta꞉ Yesu ame̱le̱ peekeme.  
\v 16 Pidata꞉ mo pota꞉ kake hama꞉ nane pa hayekeme. Mo disaipolo hali ma꞉nda꞉ta꞉ hande yeni peao haemeke you haliwekina꞉ you halima꞉ hando hatiki pieke halima꞉ paa la꞉ka꞉la puaata꞉ mo pota꞉ kake pa꞉ta꞉ hayeke wandiki pa꞉ta꞉ pi laata꞉ Pida tukiki pa꞉ta꞉ hatuku epeekeme.  
\v 17 Mo pota꞉ kake pa꞉ta꞉ hayeke wandikima꞉ Pida pa꞉ta꞉ alota꞉ Neketa꞉ do hande halina꞉ disaipolo hali ma꞉nda꞉ pate ya꞉la꞉me laa leekepate Pidama꞉ alota꞉ I̱ta꞉ dia꞉me leekeme.   
\p
\v 18 Kosa꞉ pieke handa mo e pokaemeke haliweki make mo tembolo da handeteke haemeke haliweki make paeyaoma꞉ punu lankake momba꞉lao ta꞉na꞉ laata꞉ titipuna꞉ pambo haemekeme. Pida make ipika꞉ loke titipu pina꞉ alo mo haliweki haemeke alena꞉ pua hayekeme.   
\s1 Mo yeni peao hayeke you halima꞉ Yesu lota꞉ piekeeki  
\r (Ma꞉tiu 26꞉59-66, Maka 14꞉55-64, Luku 22꞉66-71)  
\p
\v 19 Mo yeni peao haemeke you haliwekina꞉ you halima꞉ta꞉ Yesu ipika꞉ disaipolo haliweki haemekeeki make ipika꞉ wala꞉tiki piekeeki make Yesu pa꞉ta꞉ lota꞉ piekeme.  
\v 20 Yesuma꞉ ipika꞉ pi hombo peaaso alota꞉ Wanda꞉halina꞉ leke popelekena꞉ hata꞉ wanda꞉hali paeyao pa꞉ta꞉ walo haowa꞉me. Kutupa Diu wanda꞉hali mombolo haleme alena꞉ make mo pi hotu haleme da pa꞉ta꞉manu make mo tembolo da pa꞉ta꞉ make I̱ma꞉ koto pa꞉ta꞉ hata꞉ pi wala꞉tiki pua꞉me. Pi ma꞉nda꞉ na a꞉mbao loa꞉me.  
\v 21 Kutu pua꞉ ekina꞉ I̱ ekipeke lota꞉ pitolo alepe laa I̱ma꞉ waloeki opimi wanda꞉hali pa꞉ta꞉ lota꞉ pie. I̱ma꞉ iki pa꞉ta꞉ loa꞉eki manuta꞉ hone wia halememe. Koto ekina꞉ I̱ma꞉ waloeki opuelena꞉ iki pa꞉ta꞉ lota꞉ pie leekeme.  
\v 22 Yesuma꞉ koto pi leeke handaa mo tembolo da handeteke hayeke hali homekema꞉ ipika꞉ kadapoma꞉ lia alota꞉ Do yeni peao haleme you haliwekina꞉ you halina꞉ pi hombo peaaso hata꞉ ekipeke kutupiki pi alepe leekeme.  
\v 23 Yesuma꞉ ipika꞉ pi hombo peaaso alota꞉ I̱ma꞉ pi lo hoeyaowa꞉eki opika꞉na꞉ta꞉ kota꞉ do haliweki paeyao opina꞉ la hala꞉e laata꞉ kutupulu pelepate ota꞉ pi loa꞉ ekina꞉ kone pika꞉na꞉ kota꞉ I̱ta꞉ ekipeke lipe leekeme.   
\p
\v 24 Koto ekina꞉ A꞉nasima꞉ta꞉ Yesuta꞉ tonkao pelia haena꞉ kone mo yeni peao haemeke you haliwekina꞉ you hali Kaiya꞉pasi pa꞉ta꞉ tapaeyekeme.   
\s1 Pidama꞉ Yesuna꞉ biki paa hoeyaeyekeeki  
\r (Ma꞉tiu 26꞉71-75, Maka 14꞉69-72, Luku 22꞉58-62)  
\p
\v 25 Pidama꞉ ipika꞉ loke titipu pina꞉ alo koto pa꞉ta꞉ pa ha pelia hayekeme. Kutupu haena꞉ mo mandane haliwekima꞉ ipiki pa꞉ta꞉ alota꞉ Neketa꞉ mo hande halina꞉ disaipolo hali ma꞉nda꞉ na halepe lemekepate Pidama꞉ a꞉mbaaso alota꞉ I̱ta꞉ dia꞉me leekeme.  
\v 26 Mo yeni peao haemeke you haliwekina꞉ you halina꞉ e pokao hayeke hali ma꞉nda꞉ta꞉ Pidama꞉ katake tunkula꞉ pokeeke halina꞉ tapake hayeke halima꞉ pi alota꞉ Neketa꞉ mo hande hali ame̱le̱ mo e pa꞉ta꞉ haemekeeki I̱ma꞉ na handoa꞉pe laa lota꞉ piekeme.  
\v 27 Pidama꞉ Dia꞉me pi paa alo haena꞉ kone mo hali koka꞉la꞉ma꞉ e̱ leekeme.   
\s1 Yesuta꞉ Pailedina꞉ leke popelekena꞉ hayekeeki  
\r (Ma꞉tiu 27꞉1-2, Maka 15꞉1-5, Luku 23꞉1-5)  
\p
\v 28 Kaiya꞉pasi hayeke alena꞉ mina꞉pa꞉lao mo Kapomani You halina꞉ da pa꞉ta꞉ Yesu hatuku mea pemekeme. Da panake ka꞉la꞉polo haena꞉ mea pemekeme. Diu haliwekima꞉ta꞉ mo Lombei Pupa Yapeeke ekina꞉ ne pambemekeeki noluekema꞉ iki hoeyaama꞉na꞉ ika꞉ nindi pelemeeki hone witolo hata꞉ mo da tukiki pa꞉ta꞉ na peke hama꞉ nane pa haemekeme.  
\v 29 Koto ekina꞉ Pailedima꞉ hama꞉ nane pua iki pa꞉ta꞉ alota꞉ Do halima꞉ eki hau pa꞉la꞉ ekina꞉ samani pulu epemepe leekeme.  
\v 30 Mo haliwekima꞉ ipika꞉ pi hombo peaaso alota꞉ Do halima꞉ ketete na pia꞉ka꞉na꞉ yoluta꞉ neke pa꞉ta꞉ na hatuku epolo puma꞉me lemekeme.  
\v 31 Pailedima꞉ iki pa꞉ta꞉ alota꞉ Ikana꞉ma꞉ ika꞉ kone hatuku pua ika꞉ pi wilimi alena꞉ hata꞉ pi yokaalu pea꞉pa꞉peke leekeme. Mo Diu haliwekima꞉ ipika꞉ pi hombo peaaso alota꞉ Nikana꞉ma꞉ kone nika꞉ hone wia hali ma꞉nda꞉ lia homaapeke na ya꞉la꞉me lemekeme.  
\v 32 Koto lemeke ekima꞉ta꞉ Yesu ipikana꞉ma꞉ amba꞉ pi la꞉ witolo hata꞉ ipika꞉ homolo pa꞉la꞉ tupa꞉ kone yaaluekema꞉ lemekeme.  
\v 33 Pailedima꞉ da tukiki pa꞉ta꞉ la꞉ka꞉la pua hata꞉ Yesu epena꞉ wi laa ipiki pa꞉ta꞉ lota꞉ pitolo alota꞉ Neketa꞉ Diu wanda꞉halina꞉ kini hali halepe leekeme.  
\v 34 Yesuma꞉ ipika꞉ pi hombo peaaso alota꞉ Nakana꞉ma꞉ naka꞉ hone wia I̱ lota꞉ pitolo alepe o mandane haliwekima꞉ I̱ma꞉ poloeki neke pa꞉ta꞉ la kia꞉pe leekeme.  
\v 35 Pailedima꞉ ipika꞉ pi hombo peaaso alota꞉ Naka꞉ honema꞉ta꞉ I̱ta꞉ Diu hali patema꞉ alepe. Naka꞉ wanda꞉halima꞉ make ika꞉ yeni peao haleme you haliwekima꞉ make I̱ pa꞉ta꞉ neke hatuku mea epememe. Nakana꞉ma꞉ eki hau pelepe leekeme.  
\v 36 Yesuma꞉ ipika꞉ pi hombo peaaso alota꞉ Yaka Kilu Tombuao Halo ekita꞉ do kenkena꞉eki dia꞉me. Yaka Kilu Tombuao Halo ekita꞉ do kenkena꞉eki yoluta꞉ I̱ telia꞉ mea pomineleme haliwekima꞉ta꞉ mo Diu haliwekima꞉ I̱ minaama꞉na꞉ yaka a꞉nda꞉ liaalo pimime. Dia꞉me. Yaka Kilu Tombuao Halo ekita꞉ do pa꞉ta꞉eki dia꞉me leekeme.  
\v 37 Koto leeke ekina꞉ Pailedima꞉ ipiki lota꞉ pitolo alota꞉ Kota꞉ neketa꞉ kini hali ya꞉ka꞉ta꞉pe leekeme. Yesuma꞉ ipika꞉ pi hombo peaaso alota꞉ I̱ pa꞉ta꞉ kini halie ale ekita꞉ naka꞉ alee. I̱ta꞉ hau homeke puluekema꞉ epoa꞉me. Mo ota꞉ pi waluekema꞉ loa꞉me. Kutu pionoyeke yaka ama꞉ma꞉ I̱ mendieke do kenkena꞉ epoa꞉me. Kutupa mo ota꞉ pi opuluekema꞉ katake na a꞉mba haleme wanda꞉halima꞉ I̱ma꞉ pi alo ekita꞉ opu halememe.   
\p
\v 38 Pailedima꞉ alota꞉ Ota꞉ pi ala꞉ ekita꞉ handoekipe leekeme.  
\s1 Yesuta꞉ homena꞉yeke pi leekeeki  
\r (Ma꞉tiu 27꞉15-31, Maka 15꞉6-20, Luku 23꞉13-25)  
\p Koto pi laa Pailedima꞉ hama꞉ nane pua mo Diu haliweki pa꞉ta꞉ alota꞉ Do halima꞉ ketete ma꞉nda꞉ pa꞉la꞉ ekita꞉ I̱ma꞉ na handa꞉ ua꞉me laa  
\v 39 kutu pua꞉pate hande Lombei Pupa Yapeeke pita꞉ pa꞉ta꞉ pu haleme tupa꞉ I̱ma꞉ dipula hali homeke pa tapao halome. Koto ekina꞉ do Diu wanda꞉halina꞉ kini hali pa tapawanope leekeme.  
\v 40 Mo haliwekima꞉ ipika꞉ pi hombo peaaso wi la alualu pea alota꞉ Dia꞉me. Ipikita꞉ dia꞉me. Nika꞉ hone pa꞉la꞉ ekita꞉ Batabasie lemekeme. Mokoto Batabasita꞉ hali lu ta꞉ta꞉na꞉ ala꞉ta꞉ ala꞉ta꞉ pa yola꞉tiki pomu hayeke halie.   
\c 19  
\p
\v 1 Kutupa Pailedima꞉ Yesu meata꞉ yumbina꞉ leekeme.  
\v 2 Mo ami haliwekima꞉ta꞉ tekeke hake pumanu mea panka pea you aka꞉ wepia ipika꞉ youna꞉ pambaemekeme. Kutupata꞉ wepiki dau mea dopuao  
\v 3 ota꞉ ipiki pa꞉ta꞉ pua꞉tiki pea alota꞉ Handa꞉e. Diu wanda꞉halina꞉ kini halie laata꞉ kadapoma꞉ lia꞉tiki pimikime.   
\p
\v 4 Kutu pieketa꞉ Pailedima꞉ hama꞉ nane paa la꞉ka꞉la pua mo wanda꞉hali pa꞉ta꞉ alota꞉ Handa꞉pe. I̱ma꞉ ipiki pa꞉ta꞉ ketete ma꞉nda꞉ pa꞉la꞉ ekita꞉ na handa꞉ ua꞉eki ikana꞉ma꞉ handoemena꞉ do iki pa꞉ta꞉ hatuku ipulueke leekeme.  
\v 5 Koto ekina꞉ Yesuta꞉ mo tekeke hake pu manuma꞉ wepieke you aka꞉ pambao mo wepiki dau dopua hama꞉ nane peekeme. Pailedima꞉ iki pa꞉ta꞉ alota꞉ Hande hali doma꞉ handa꞉pe leekeme.   
\p
\v 6 Mo yeni peao haemeke you haliwekima꞉ make mo tembolo da handeteke haemeke haliwekima꞉ make Yesu handaata꞉ anekema꞉ wi la alualu pitolo alota꞉ A꞉ka꞉tei wape piki tina꞉ tamendiao homena꞉ lie. A꞉ka꞉tei wapepiki tina꞉ tamendiao homena꞉ lie lemekeme. Pailedima꞉ iki pa꞉ta꞉ alota꞉ Kota꞉ ika꞉ kone ipiki mea pua a꞉ka꞉tei wapepiki tina꞉ tamendiao lipe laa I̱ma꞉ta꞉ ipika꞉ ketete ma꞉nda꞉ pa꞉la꞉ ekita꞉ na handa꞉ ua꞉me leekeme.  
\v 7 Mo Diu haliwekima꞉ ipika꞉ pi hombo peaaso alota꞉ Nika꞉ pi uluma꞉eki ma꞉nda꞉ ula꞉me. Koto poloma꞉ ekina꞉ dupiki hali homaapeke ya꞉la꞉me. Ipikana꞉ma꞉ Koda꞉na꞉ Eiyeke halome leeke handa loma꞉me lemekeme.   
\p
\v 8 Pailedima꞉ koto lemeke pi opuaata꞉ paala꞉ma꞉ wotu homaata꞉  
\v 9 mo da tieke pa꞉ta꞉ paa honda꞉ pamba pua Yesu pa꞉ta꞉ alota꞉ Neketa꞉ hanema꞉ a꞉pa pipe leekepate pa ipika꞉ pi Yesuma꞉ na yoka꞉ mea haleekeme.  
\v 10 Koto ekina꞉ Pailedima꞉ ipiki pa꞉ta꞉ alota꞉ I̱ pa꞉ta꞉ pi ma꞉nda꞉ na lelipiki laa neke da paa tapaowa꞉ka꞉na꞉ make a꞉ka꞉tei wapepiki tina꞉ neke tamendiao lina꞉ loa꞉ka꞉na꞉ make I̱ma꞉ ana꞉na꞉ pea꞉peke ya꞉la꞉pate nakana꞉ma꞉ koto ekita꞉ hone na witele leekeme.  
\v 11 Yesuma꞉ ipika꞉ pi hombo peaaso alota꞉ Nakana꞉ma꞉ I̱ pa꞉ta꞉ pea꞉peke ekita꞉ oli manda hala꞉ Koda꞉ma꞉ neke pa꞉ta꞉ na kia꞉ka꞉na꞉ yoluta꞉ I̱ pa꞉ta꞉ hau ma꞉nda꞉ pea꞉peke na yolo pime. Koto ekina꞉ neke pa꞉ta꞉ I̱ hatuku mea epea꞉ hali ipikita꞉ ketete tieke pa꞉la꞉me.  
\v 12 Pailedima꞉ koto pi opuaata꞉ Yesu paa tapaalo pieke pota꞉ weiyu taapeekepate mo Diu wanda꞉halima꞉ anekema꞉ wi la alualu pea alota꞉ Nakana꞉ma꞉ do hali paa tapaeka꞉na꞉ta꞉ neketa꞉ Sisana꞉ yankeke na halipikie laata꞉ Hali epima꞉ ipika꞉ kone kini hali haluekema꞉ taapea꞉ka꞉na꞉ta꞉ kota꞉ koto halita꞉ Sisana꞉ a꞉nda꞉ tunkiliki hali halieke lemekeme.   
\p
\v 13 Pailedima꞉ koto lemekeeki opuaata꞉ Yesu hatuku hama peekeme. Kutupa pi yokaalu puluekema꞉ pitu hayeke seana꞉ pitiekeme. Koto sea wieke alena꞉ bikita꞉ Toopi Yameekeekie. Koto bikita꞉ mo Hibulu pima꞉ Ka꞉ba꞉ta lemekeme.   
\p
\v 14 Kutu pimiki ekita꞉ hande Lombei Pupa Yapeeke ekina꞉ ne pambuluekema꞉ nate you tikekena꞉ haena꞉ pimikime. Pailedima꞉ mo Diu wanda꞉hali pa꞉ta꞉ alota꞉ Ika꞉ kini hali kotoma꞉ handa꞉pe leekeme.  
\v 15 Mo wanda꞉halima꞉ anekema꞉ wi la alu alu pitolo alota꞉ Li li laa a꞉ka꞉tei wapepiki tina꞉ tamendiao lima lemekeme. Pailedima꞉ iki pa꞉ta꞉ alota꞉ Ika꞉ kini halita꞉ a꞉ka꞉tei wapepiki tina꞉ tamendiao I̱ma꞉ lionope leekeme. Mo yeni peao haemeke you haliwekima꞉ ipika꞉ pi hombo peaaso alota꞉ Nika꞉ kini halita꞉ ma꞉nda꞉ dia꞉me. Sisa homekee lemekeme.  
\v 16 Koto lemeke handaa Pailedima꞉ a꞉ka꞉tei wape piki tina꞉ Yesu tamendiao lina꞉yeke mo haliweki pa꞉ta꞉ Yesu haleekeme.  
\s1 Yesuta꞉ a꞉ka꞉tei wapepiki tina꞉ ta mea endiao homeekeeki  
\r (Ma꞉tiu 27꞉32-44, Maka 15꞉21-32, Luku 23꞉26-43)  
\p Koto ekina꞉ Yesu minimikime.  
\v 17 Kutupa Yesuma꞉ ipika꞉ a꞉ka꞉tei wapepiki ti mea tia pua mo daoni hama꞉ nane hayeke alena꞉ opolo peekeme. Mo kenke bikita꞉ Hali you holikima꞉ handeke alena꞉ lo haemekeme. Hibulu pi laata꞉ Kolokoda lemekeme.  
\v 18 Koto alena꞉ mo a꞉ka꞉tei wapepiki tina꞉ Yesu tamendiao lia a꞉meiyao nokepemekeme. Hali yaapo make nepoko nane yaapona꞉ ma꞉nda꞉ mandane endiao ma꞉nda꞉ mandane endiao Yesu tukiki pa꞉ta꞉ endiaota꞉ limikime.   
\p
\v 19 Pailedima꞉ pi siki wape pea mo a꞉ka꞉tei wapepiki tina꞉ talaena꞉ leekeme. Koto wape pieke ekita꞉ dupae. Na꞉sa꞉tete Hali Yesuta꞉ Diu wanda꞉halina꞉ Kini halie laa wape piekeme.  
\v 20 Mo a꞉ka꞉tei wapepiki tina꞉ Yesu tamendiaemeke alena꞉ daoni teke pa꞉ta꞉ yolo hata꞉ Diu wanda꞉hali wopuma꞉ mo wape pieke ekita꞉ handemekeme. Mo wape pieke pita꞉ Hibulu pi make Loma꞉ pi make Kitiki pi make wape piekeme.  
\v 21 Mo yeni peao haemeke Diu you haliwekima꞉ Pailedi pa꞉ta꞉ alota꞉ Diu wanda꞉halina꞉ Kini halie wape na piki Do halima꞉ alota꞉ I̱ta꞉ Diu wanda꞉halina꞉ Kini halie leekeme laa wape pea꞉peke aleo lemekeme.  
\v 22 Pailedima꞉ ika꞉ pi hombo peaaso alota꞉ I̱ma꞉ wape polo ekita꞉ amba꞉ wape pua꞉me leekeme.   
\p
\v 23 Mo ami haliwekima꞉ mo a꞉ka꞉tei wapepiki tina꞉ Yesu lu endiaota꞉ ipika꞉ dau manuta꞉ mea iki tonkopu hali hata꞉ telipea mimikime. Ipika꞉ dau hokulupeke lopaniaeyekeeki make mimikipate koto dauta꞉ na tunaakeeki kone homeke kone tumbula lopaniaeyekeeki yeeke handaa  
\v 24 mo haliwekima꞉ ika꞉ ika꞉ kone alota꞉ Na sinkipiki pa mo mina꞉la꞉ hali handomana꞉ laki pumana꞉e lemekeme. Hande Baibolo bukana꞉ wape pa꞉la꞉eki yaaluekema꞉ pimikime. Wape pa꞉la꞉ ekita꞉ dupa  
\q1 Yaka dau manuta꞉ ika꞉ telipa meaata꞉ yaka hokulupeke dau muluekema꞉ laki pimikime laa wape pa꞉la꞉me.  
\p Kota꞉ mo a꞉ndeli miniki haliwekima꞉ kutu pimikime.   
\p
\v 25 Mo Yesu ipika꞉ a꞉ka꞉tei wapepiki ti teke pa꞉ta꞉ta꞉ ipika꞉ inkiki make inkikina꞉ hakepiki make Keliopasina꞉ wanda꞉ Meti kutupa mo Ma꞉kadala wanda꞉ Meti make paeyao koto pambo haemekeme.  
\v 26 Yesuma꞉ta꞉ ipika꞉ inkiki make ipika꞉ hande pukima꞉ homeeke disaipolo hali make ipiki teke pa꞉ta꞉ haepekeeki handaata꞉ ipika꞉ inkiki pa꞉ta꞉ alota꞉ Wanda꞉o. Naka꞉ weki koto handa꞉e laata꞉  
\v 27 mo disaipolo hali pa꞉ta꞉ make alota꞉ Naka꞉ ama꞉ koto handa꞉e laa leekeme. Koto dina꞉ta꞉ mo disaipolo halima꞉ Meti ipika꞉ da pa꞉ta꞉ hatuku pua handeteke hao hayekeme.   
\s1 Yesu ota꞉ homeekeeki  
\r (Ma꞉tiu 27꞉45-56, Maka 15꞉33-41, Luku 23꞉44-49)  
\p
\v 28 Yesuma꞉ta꞉ I̱ma꞉ pea꞉peke ekita꞉ amba꞉ pu paeyaalome hone wiaata꞉ mo Baibolo bukana꞉ wape pa꞉la꞉eki yaaluekema꞉ ipikana꞉ma꞉ alota꞉ I̱ ikali na꞉na꞉ pa꞉la꞉me leekeme.  
\v 29 Koto pa꞉ta꞉ta꞉ mo pinika ikali tumba pitieke ikali kanake homeke wiekeme. Koto ekina꞉ ikana꞉ma꞉ wa꞉la꞉mbima꞉ handeke ale ma꞉nda꞉ mea mo pinika ikali pa꞉ta꞉ tenke lao ti hotina꞉ hapu lao mea a꞉meiyao Yesuna꞉ hambiliki pa꞉ta꞉ hapulaemekeme.  
\v 30 Yesuma꞉ mo pinika ikali naa alota꞉ Ameta꞉ paela꞉me leekeme. Koto laa ipikita꞉ you toka꞉la꞉niao homeekeme.   
\s1 Yesuna꞉ pa꞉ta꞉likina꞉ awo liekeeki  
\p
\v 31 Koto pimiki ekita꞉ hande Lombei Pupa Yapeeke nate teke pa꞉ta꞉ yeeke handaata꞉ mo Diu haliwekima꞉ta꞉ Beliata꞉ hande Hoto Pila꞉ Nate ota꞉ tieke konee hone witolo hata꞉ mo hali tokomanu a꞉ka꞉tei wapepiki tina꞉ na endi pelia haena꞉ hone wimikime. Koto ekina꞉ ikana꞉ma꞉ Pailedi pa꞉ta꞉ pua mo hali tepona꞉ ankemanu tonda꞉pa꞉ lia ika꞉ tokomanu honda꞉ mina꞉yeke honke lemekeme.  
\v 32 Koto ekina꞉ mo ami haliwekima꞉ pua mo Yesu ame̱le̱ mandakena꞉ limiki hali yaapona꞉ ankemanu tonda꞉pa꞉ limikime.  
\v 33 Kutupa Yesu pa꞉ta꞉ pemekepate ipikita꞉ amba꞉ homa toko wiekeeki handaata꞉ ipika꞉ anke yaapo na tonda꞉pa꞉ limikime.  
\v 34 Kutu pimikipate mo ami hali homekema꞉ ipika꞉ doloma꞉ Yesuna꞉ pa꞉ta꞉liki pa꞉ta꞉ awa꞉liaeyekeme. Kutu pieke handaa kutaa kone we tonka꞉na꞉ ikali tonka꞉na꞉ a꞉pa lopeekeme.  
\v 35 Kutu pia꞉eki handea꞉ halima꞉ta꞉ ikana꞉ma꞉ pi opua miniki hamina꞉yeke kone koto amba꞉ lea꞉me. Kutupa ipikana꞉ma꞉ lea꞉ pita꞉ ota꞉eki alome laa ipika꞉ kone hone wita꞉la꞉me.  
\v 36 Koto hau pieke ekima꞉ mo Baibolo bukana꞉ wape pa꞉la꞉eki yaeyekeme. Mo wape pa꞉la꞉ ekita꞉ dupae. Ipika꞉ hoka꞉ta꞉ma꞉ homeke ma꞉nda꞉ na tonda꞉pa꞉ limikie wape pa꞉la꞉me.  
\v 37 Kutupa mo Baibolo bukana꞉ wape pa꞉la꞉eki ma꞉nda꞉ dupae. Wanda꞉halima꞉ mo awemeke hali handilimikie wape pa꞉la꞉me.   
\s1 Yesu toko toopi ka꞉ka꞉na꞉ pa꞉ta꞉ wiekeeki  
\r (Ma꞉tiu 27꞉57-61, Maka 15꞉42-47, Luku 23꞉50-56)  
\p
\v 38 Koto hau pimikieki hoki nane mo A꞉ta꞉matia da hao epeeke hali Diosepema꞉ta꞉ Yesu toko mea poluekema꞉ Pailedi pa꞉ta꞉ pua honke leekeme. Diosepema꞉ta꞉ Yesuna꞉ pi opu hayekepate mo Diu haliweki pa꞉ta꞉ paala꞉ hata꞉ puki tooluma꞉ piekeme. Pailedima꞉ a꞉pa꞉la꞉me leeke handaa Diosepema꞉ pua mea peekeme.  
\v 39 Amba꞉ titina꞉ hande timba Yesu handolo peeke hali Nikodimasi make Diosepe yaapo puaata꞉ totopo piki ale yaapo mua make a꞉lo make mea dakole dakole peaeyekeeki ma꞉nda꞉ mendia pepekeme. Mo senisi alena꞉ ka꞉nda꞉ pieke ekita꞉ 34 kiloe.  
\v 40 Mo hali yaapoma꞉ Yesu toko honda꞉ meaata꞉ hande totopo piki senisi alemanu mea yankaota꞉ dauma꞉ ambula꞉niaepeke ekita꞉ mo Diu wanda꞉halima꞉ hali hoiluekema꞉ toko wamo pu haemeke tupa꞉ pipikime.  
\v 41 Mo Yesu a꞉ka꞉tei wapepiki tina꞉ limiki alena꞉ koto pa꞉ta꞉ e pokemekeme. Koto e tukiki pa꞉ta꞉ta꞉ hali hoiya꞉peke ale panake wepia wiekeeki wiekeme. Amba꞉ta꞉ hali toko ma꞉nda꞉ koto pa꞉ta꞉ na wimikime.  
\v 42 Koto pa꞉ta꞉ Yesu toko mea pua wipiki ekita꞉ pa mo hali hoiya꞉peke lapa꞉ teke pa꞉ta꞉ yeke make mo Hoto Pila꞉ Nate belia epolo pa꞉la꞉ ekina꞉ pea꞉peke ekimanu wamo puluekema꞉ nate yeke make pipikime.   
\c 20  
\s1 Yesu paa tiaeyekeeki  
\r (Ma꞉tiu 28꞉1-8, Maka 16꞉1-8, Luku 24꞉1-12)  
\p
\v 1 Da kelepuluekema꞉ yu pa̱a̱ pitolo haena꞉ Sande kone Ma꞉kadala wanda꞉ Metita꞉ hande hali hoimiki pa꞉ta꞉ puaata꞉ hande naku kake a꞉mbaniao wimiki toopita꞉ paa londolo wiekeeki handeekeme.  
\v 2 Kutupa handa anke hao pua Saimono Pida pa꞉ta꞉ make hande Yesuma꞉ pukima꞉ homeeke disaipolo hali ma꞉nda꞉ pa꞉ta꞉ make ipiliki yaapo pa꞉ta꞉ ipikana꞉ma꞉ pua alota꞉ Mo hande naku pa꞉ta꞉ Tekehali toko yoka wilimieki make na handoloma꞉ma꞉ hando pa꞉ta꞉ wia pelemepe leekeme.   
\p
\v 3 Koto ekina꞉ Pidata꞉ hande disaipolo hali yaapota꞉ mina꞉pa꞉lao mo hali hoimiki pa꞉ta꞉ pepekeme.  
\v 4 Anke homeke halupa pepekepate hande disaipolo halita꞉ Pida wetepeao ipiki amba꞉la mo hali hoimiki pa꞉ta꞉ opolo peekeme.  
\v 5 Kutupa ipikita꞉ pua panda꞉puniao hande hali tonkao hoimiki daumanu wiekeeki handeekepate na honda꞉ pambolo peekeme.  
\v 6 Saimono Pidata꞉ wetepena꞉ opolo a꞉pa kutaa kone lombei pua mo naku pa꞉ta꞉ honda꞉ pamba peekeme. Ipikana꞉ma꞉ta꞉ hande hali tonkao hoimiki daumanu make  
\v 7 Yesuna꞉ you tonkaemeke dau make handeekeme. Koto dauta꞉ hande hali tonkao hoimiki daumanu apa꞉tao na wiki pa tonkaake tonka꞉na꞉ pa ipika꞉ ta꞉ta꞉ ma꞉nda꞉ pa꞉ta꞉ wiekeme.  
\v 8 Pidama꞉ kutu pitolo haena꞉ta꞉ hande hali hoimiki pa꞉ta꞉ titina꞉ amba꞉la peeke disaipolo hali make wetepena꞉ honda꞉ pamba pua mo piekeeki handaata꞉ ota꞉ hone tulaeyekeme.  
\v 9 Koto pita꞉ta꞉ mo hali yaapoma꞉ta꞉ mo Baibolo buka pa꞉ta꞉ Yesuta꞉ homaa paa tiaalo pa꞉la꞉eki wape pieke ekita꞉ hone a̱i̱ na wipikime.  
\v 10 Kutupata꞉ mo disaipolo hali yaapota꞉ paa la꞉ka꞉la da nane pepekeme.   
\s1 Yesuma꞉ Meti Ma꞉kadala pa꞉ta꞉ pua hayekeeki  
\r (Ma꞉tiu 28꞉9-10, Maka 16꞉9-11)  
\p
\v 11 Metima꞉ta꞉ hande hali hoimiki pa꞉ta꞉ hama꞉ nane e̱ lo hayekeme. E̱ alo alo hata꞉ ipikana꞉ma꞉ panda꞉puniao mo hali hoimiki pa꞉ta꞉ wako puniaeyekepate  
\v 12 koto pa꞉ta꞉ enisolo yaapo handeekeme. Mo hali yaapota꞉ hakepiki dau pamba alu pea Yesu toko amba꞉ wimiki alena꞉ ma꞉nda꞉ta꞉ you nane pitu ma꞉nda꞉ta꞉ anke nane pitu pea pitipikime.  
\v 13 Ipilikana꞉ma꞉ Meti pa꞉ta꞉ alota꞉ Wanda꞉o. Ekipeke e̱ alepe lepekeme. Ipikana꞉ma꞉ ipiliki pa꞉ta꞉ alota꞉ Ikana꞉ma꞉ yaka Tekehali mea pua wilimi pa꞉ta꞉ make I̱ na handolome leekeme.  
\v 14 Kotoeki laa la꞉ka꞉la koto pa꞉ta꞉ Yesu hayekeeki handeekepate kone Yesue hone na wiekeme.  
\v 15 Yesuma꞉ ipiki pa꞉ta꞉ alota꞉ Wanda꞉o. Ekipeke e̱ alepe. Epi weitolo alepe leekeme. Mo wanda꞉na꞉ hone wieke ekita꞉ mo e handeteke hayeke hali patema꞉ ipiki pa꞉ta꞉ alota꞉ Aneke halio. Nakana꞉ma꞉ ipiki mea pua wika꞉na꞉ta꞉ kota꞉ koto wili alena꞉ I̱ pa꞉ta꞉ la kie. Kutu pika꞉na꞉ta꞉ I̱ma꞉ mulu polueke leekeme.   
\p
\v 16 Yesuma꞉ ipiki pa꞉ta꞉ alota꞉ Metio leekeme. Mo wanda꞉ma꞉ ipiki pa꞉ta꞉ la꞉ka꞉la mina hata꞉ Hibulu pi la alota꞉ Labonaie leekeme. Koto leeke ekita꞉ Wala꞉la꞉ Halio laa leekeme.  
\v 17 Yesuma꞉ ipiki pa꞉ta꞉ alota꞉ I̱ na mina꞉pe. Yaka Apa꞉ pa꞉ta꞉ a̱i̱ na la꞉ka꞉la a꞉meilo ekina꞉ loa꞉me. Yaka kametiti pa꞉ta꞉ yaka pi lawaalo pua꞉peke. Yaka Apa꞉ ika꞉ Apa꞉ make yaka Koda꞉ ika꞉ Koda꞉ make ipiki pa꞉ta꞉ paa la꞉ka꞉la a꞉meinolome lapeke leekeme.  
\v 18 Koto ekina꞉ Meti Ma꞉kadala wanda꞉ mo disaipolo haliweki pa꞉ta꞉ opolo pua Tekehali handeekeeki make Tekehalima꞉ ipiki pa꞉ta꞉ leeke pimanu make la haleekeme.   
\s1 Yesuta꞉ ipika꞉ disaipolo haliweki pa꞉ta꞉ pua hayekeeki  
\r (Ma꞉tiu 28꞉16-20, Maka 16꞉14-18, Luku 24꞉36-49)  
\p
\v 19 Koto Sande timbaata꞉ mo hande disaipolo ame̱le̱ pomu haemeke haliwekima꞉ mo Diu haliweki pa꞉ta꞉ paala꞉ma꞉ homolo hata꞉ da pota꞉manu poka loka꞉ hao da tukiki pa꞉ta꞉ momba꞉la pitimikipate Yesuma꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopa꞉niaape leekeme.  
\v 20 Koto laata꞉ ipika꞉ kiki yaapo make ipika꞉ pa꞉ta꞉liki iki pa꞉ta꞉ waleekeme. Koto ekina꞉ mo disaipolo haliwekima꞉ Yesu handa꞉ta꞉ ta꞉na꞉ tieke homemekeme.  
\v 21 Kutupa Yesuma꞉ iki pa꞉ta꞉ paa alota꞉ Ika꞉ puki lopa꞉niao hape laa Hande Apa꞉ma꞉ I̱ epono tapaala꞉ tupa꞉ iki make pomina꞉ koto tupa꞉ tapaasome leekeme.  
\v 22 Kotoeki laata꞉ iki pa꞉ta꞉ pomo puaaso alota꞉ Mo hande Holi Sipitidi iki pa꞉ta꞉ kitoloma꞉ mipe leekeme.  
\v 23 Ikana꞉ma꞉ mandane wanda꞉halina꞉ hoke hau peleme ekimanu Koda꞉ma꞉ pa paeyaala꞉me lemeka꞉na꞉ta꞉ kota꞉ ota꞉ pa paeyaalieke. Kutupa make mandane wanda꞉halina꞉ hoke hau peleme ekimanu Koda꞉ma꞉ pa na paeyaala꞉me laa lemeka꞉na꞉ta꞉ kota꞉ na paeyaake paa wilieke la leekeme.   
\s1 Yesu Tomasi yaapo  
\p
\v 24 Mo Yesu epeeke natena꞉ hande disaipolo hali homeke iki ame̱le̱ na pitiekeme. Ipikita꞉ Tomasi kone ipika꞉ biki ma꞉nda꞉ Manda꞉e.  
\v 25 Koto ekina꞉ mo hande disaipolo haliwekima꞉ ipiki pa꞉ta꞉ alota꞉ Nikana꞉ma꞉ mo Tekehali handoma꞉me lemekepate ipikana꞉ma꞉ alota꞉ I̱ma꞉ make ipika꞉ kikina꞉ ikokoma꞉ aweekeeki handaa yaka kiki ma̱leke puaota꞉ kutupa ipika꞉ pa꞉ta꞉likina꞉ aweekeeki pa꞉ta꞉ make yaka kiki puaota꞉ ota꞉e lolo polopate I̱ma꞉ na handeke hata꞉ta꞉ ika꞉ aleme pita꞉ na opulueke leekeme.   
\p
\v 26 Kutupa pula homeke paeyeketa꞉ hande disaipolo haliweki Tomasi ame̱le̱ mo da tukiki pa꞉ta꞉ pa momba꞉la haemekeme. Mo pota꞉manu loka꞉ hao haemekepate Yesu a꞉paata꞉ iki tukiki pa꞉ta꞉ a꞉pa hata꞉ alota꞉ Ika꞉ puki lopao pita꞉pe laata꞉  
\v 27 Mo Tomasi pa꞉ta꞉ alota꞉ Naka꞉ kiki ma̱lekema꞉ yaka kiki yaapo pa꞉ta꞉ a꞉pa puae. Kutupa naka꞉ kikima꞉ ya pa꞉ta꞉liki pa꞉ta꞉ make a꞉pa puae. Koto ekina꞉ naka꞉ pi na opitele hau paa na piki ota꞉ opua꞉peke leekeme.  
\v 28 Tomasima꞉ alota꞉ Neketa꞉ yaka Tekehali make yaka Koda꞉ make haleme leekeme.  
\v 29 Yesuma꞉ ipiki pa꞉ta꞉ alota꞉ I̱ handele ekima꞉ pi opitele laa I̱ na handeke hata꞉ kone pi mineleme wanda꞉halima꞉ ta꞉na꞉ma꞉ homa halimikie leekeme.   
\s1 Do buka wape pa꞉la꞉ ekina꞉ pi teke  
\p
\v 30 Yesuma꞉ ipika꞉ disaipolo haliweki ame̱le̱ hata꞉ mandane wele pita꞉la꞉ ekimanu wotu piekepate do bukana꞉ wape na pa꞉la꞉me.  
\v 31 Kutu pa꞉la꞉pate ikana꞉ma꞉ Yesuta꞉ mo Ketiso make Koda꞉ ipika꞉ Eiyeke make hala꞉me laa ipiki pa꞉ta꞉ hone tulao hata꞉ ipika꞉ bikina꞉ da꞉ta꞉la꞉eki muemena꞉yeke do ekimanu do bukana꞉ wape pea ula꞉me.   
\c 21  
\s1 Yesuta꞉ ipika꞉ disaipolo hali watake hata꞉ pa꞉ta꞉ pua hayekeeki  
\p
\v 1 Wetepena꞉ta꞉ Yesuma꞉ ipika꞉ disaipolo haliweki pa꞉ta꞉ ipiki peneme yao paa waleekeme. Mo tunkula꞉ pa pitieke ikali Taibitiasi pa꞉ta꞉ pua hata꞉ dupa piekeme.  
\v 2 Saimono Pida make hande Manda꞉e lemeke hali Tomasi make hande Ka꞉lili nane Keina da hao epeeke hali Nada꞉niele make Sepedi ipika꞉ eiyeke yaapo make Yesuna꞉ disaipolo hali yaapo ma꞉nda꞉ make paeyao mandake pa꞉ta꞉ momba꞉la haemekeme.  
\v 3 Saimono Pidama꞉ mo hande mandane haliweki pa꞉ta꞉ alota꞉ Ta꞉peli mulu pulume leeke handaa mo haliwekima꞉ ipiki pa꞉ta꞉ alota꞉ Niki make neke ame̱le̱ mandakena꞉ pomana꞉e lemekeme. Koto la pua kawasona꞉ pita pemekepate koto timbaata꞉ ta꞉peli homeke a꞉nda꞉ na mimikime.   
\p
\v 4 Nate panake opolo haena꞉ Yesuta꞉ mo ikali tea꞉na꞉ a꞉pa hayekepate mo disaipolo haliwekima꞉ta꞉ Yesue hone na wimikime.  
\v 5 Ipikana꞉ma꞉ iki pa꞉ta꞉ alota꞉ Weki tonuo. Ta꞉peli ma꞉nda꞉ mimipe leekeme. Ikana꞉ma꞉ ipika꞉ pi hombo peaaso alota꞉ Dia꞉me lemekeme.  
\v 6 Ipikana꞉ma꞉ iki pa꞉ta꞉ alota꞉ Kawasona꞉ popeke nane tenkinu mea lopaemeka꞉na꞉ta꞉ ta꞉pelimanu milimikie leekeme. Koto leeke handaa mo haliwekima꞉ tenkinu mea lopaemekepate ta꞉pelimanu wotu mendieke handaa mo tenkinu paa yola꞉ mia꞉peke na yeekeme.   
\p
\v 7 Hande Yesuma꞉ pukima꞉ homeeke disaipolo hali homekema꞉ Pida pa꞉ta꞉ alota꞉ Dota꞉ Tekehalie leekeme. Saimono Pidama꞉ Dota꞉ Tekehalie leekeeki opuata꞉ amba꞉ ipika꞉ dau hola wieke handaa ipika꞉ manda tonkaeyekeeki paa mea tonkao ikali pa꞉ta꞉ ponkaeyekeme.  
\v 8 Mo hande mandane disaipolo haliwekima꞉ta꞉ kawasona꞉ ipulu hata꞉ mo tenkinu ta꞉peli manuma꞉ tumba wina꞉ yolo tia ikali tea꞉ nane opolo epemekeme. Mo haliwekita꞉ ikali tea꞉ nane opolo ipuluekema꞉ makata꞉ 100 midamanu kone epemekeme.  
\v 9 Kenkena꞉ opolo a꞉pata꞉ ti to hayeke alena꞉ ta꞉peli palaowa yaapo to hayekeeki handemekeme.  
\v 10 Yesuma꞉ iki pa꞉ta꞉ alota꞉ Ika꞉ ame do mimi ta꞉peli mandaneeki mea ipupe leekeme.   
\p
\v 11 Saimono Pidama꞉ kawasona꞉ pua mo tenkinu kenkena꞉ yola꞉ mea epeekeme. Mo nu mendia tumbulu baeyeke ta꞉peli manuta꞉ paeyao 153 mendiekeme. Ta꞉peli wopu mendiekepate kone mo tenkinuta꞉ na titipila꞉niaeyekeme.  
\v 12 Yesuma꞉ iki pa꞉ta꞉ alota꞉ Ne nolo ipupe leekepate mo disaipolo haliweki paeyaoma꞉ ipikita꞉ Tekehalie hone wimiki handaa hali ma꞉nda꞉ma꞉ Neketa꞉ epika꞉ta꞉pe laa lota꞉ na piekeme.  
\v 13 Koto ekina꞉ Yesuma꞉ palaowa mulu pua iki pa꞉ta꞉ hale hale pea ta꞉peli make koto tupa꞉ kone haleekeme.   
\p
\v 14 Do hau pieke ekita꞉ Yesuma꞉ homa paa tiao hata꞉ ipika꞉ disaipolo haliweki pa꞉ta꞉ hoto tepo peao ipiki peneme yao waleekeekie.   
\s1 Yesu Pida yaapo  
\p
\v 15 Ne no paeyeketa꞉ Yesuma꞉ Saimono Pida pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homolo hata꞉ do haliweki ankulalipikipe leekeme. Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke hone pa꞉la꞉ ekita꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉ ikikisunu nakana꞉ma꞉ punao hapeke leekeme.  
\v 16 Hoto yaapo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. I̱ pa꞉ta꞉ pukima꞉ homelepe leeke handaa Pidama꞉ ipika꞉ pi hombo peaaso alota꞉ Aowe Tekehalio. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Kota꞉ ya sipisipi ma꞉na꞉manu nakana꞉ma꞉ punao hapeke leekeme.  
\v 17 Hoto tepo peao Yesuma꞉ ipiki pa꞉ta꞉ alota꞉ Dionina꞉ eiyeke Saimonoo. Nakana꞉ma꞉ I̱ pa꞉ta꞉ hone pa꞉la꞉pe leekeme.  
\p Pidama꞉ta꞉ Yesuma꞉ Nakana꞉ma꞉ I̱ pa꞉ta꞉ hone pa꞉la꞉pe pi ipiki pa꞉ta꞉ hoto tepo peao lota꞉ pieke ekina꞉ta꞉ ka꞉nda꞉ma꞉ homolo hata꞉ ipiki pa꞉ta꞉ alota꞉ Tekehalio. Ala꞉ta꞉ ala꞉ta꞉ paeyao nakana꞉ma꞉ handeleme. I̱ma꞉ neke pa꞉ta꞉ hone pa꞉la꞉ ekita꞉ nakana꞉ma꞉ handeleme leekeme. Yesuma꞉ ipiki pa꞉ta꞉ alota꞉ Ya sipisipi ma꞉na꞉ manuta꞉ nakana꞉ma꞉ punao hapeke.  
\v 18 I̱ma꞉ neke pa꞉ta꞉ ota꞉ pi alome. Neke wekihali hae dina꞉ta꞉ nakana꞉ma꞉ ba꞉ta꞉ido hako yama naka꞉ hone pia꞉ nane pomu hayekeme. Kutupu hayekepate wetepena꞉ta꞉ neke koke yolo pa꞉la꞉ dina꞉ naka꞉ kiki yaapo tindipa moneaalo pelepate hali ma꞉nda꞉ma꞉ naka꞉ kiki mea tonkao naka꞉ hone na pa꞉la꞉ nane kone neke hatuku pelieke leekeme.  
\v 19 Yesuma꞉ do leeke ekima꞉ Pidama꞉ Koda꞉na꞉ biki mea a꞉meiyaluekema꞉ ipika꞉ homolo pieke ekina꞉ la hololo leekeme. Yesuma꞉ kotoeki laa Pida pa꞉ta꞉ alota꞉ I̱ telia꞉ mea epoe leekeme.   
\s1 Yesu make mo hande disaipolo hali ma꞉nda꞉ make  
\p
\v 20 Pidama꞉ la꞉ka꞉la꞉moneao Yesuma꞉ pukima꞉ homeeke halita꞉ ipika꞉ hoki nane epeekeeki handeekeme. Mo halita꞉ hande ne nalo pita꞉ Yesu teke pa꞉ta꞉ panda꞉puniao lota꞉ pitolo alota꞉ Tekehalio. Neke a꞉nda꞉ lombolo pa꞉la꞉ hali epipe leeke halie.  
\v 21 Pidama꞉ koto hali handaa Yesu pa꞉ta꞉ alota꞉ Tekehalio. Do hali pa꞉ta꞉ta꞉ eki hau ipiliepe leekeme.  
\v 22 Yesuma꞉ ipika꞉ pi hombo peaaso alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me. Neketa꞉ I̱ telia꞉ mea epoe leekeme.  
\v 23 Koto leeke ekina꞉ Yesuna꞉ hoki nane telimiki haliwekima꞉ dupiki pi lo haemekeme. Mo hande disaipolo halita꞉ na homilieke laa lo haemekepate Yesuma꞉ mo hande hali na homilieke pi na leke ipikana꞉ma꞉ alota꞉ Do halita꞉ pa hatiki puoopu hao I̱ paa eponoyeke ya hone wia loa꞉ka꞉na꞉ta꞉ kota꞉ naka꞉eki dia꞉me leekeme.   
\p
\v 24 Mo hande disaipolo hali doe. Kutupa koto pieke ekimanu pa꞉ta꞉ laa kutupa make wape pia꞉me. Ipikana꞉ma꞉ lea꞉ alemanu paeyaota꞉ nikana꞉ma꞉ ota꞉ ekie hone witoloma꞉me.   
\s1 Paeyaasoeki  
\p
\v 25 Yesuma꞉ hau mandane ekimanu wopu piekeme. Hali ma꞉nda꞉ma꞉ hande Yesuma꞉ pieke ekimanu paeyao homeke homeke lo wape pia꞉ka꞉na꞉ta꞉ kota꞉ yaka honema꞉ta꞉ mo wape pia꞉peke buka manuma꞉ta꞉ do kenke tumbulu baaso ana꞉ na pilieke hone witolome.