\id JAS - Sembeleke Samberigi PNG James 01 18/2/91 Macnaughtan \h DIA꞉MESI \toc1 Dia꞉mesima꞉ tapaeyeke wapee \toc2 Dia꞉mesi \toc3 Dia꞉mesi \mt1 Dia꞉mesima꞉ tapaeyeke wapee \c 1 \p \v 1 I̱ta꞉ Dia꞉mesi Koda꞉ make Tekehali Yesu Ketiso yaapona꞉ e pokaaso hali halome. Do wape pitolo ekita꞉ hande ika꞉ kenke nane mina꞉pa꞉lao pemeke Isulai 12 tapake ika꞉ wanda꞉hali pa꞉ta꞉ tapaasome. Iki pa꞉ta꞉ keiyae pi alome. \s1 Hone tulaasa꞉eki pita꞉ hone epeke u tiaasa꞉eki yaapo \p \v 2 Ya kametitio. Iki pa꞉ta꞉ la handa꞉la꞉eki ta꞉ta꞉ ta꞉ta꞉ pieke ekimanu epemeka꞉na꞉ta꞉ ta꞉na꞉ma꞉ homolo hata꞉ mea꞉pa꞉peke. \v 3 Do ekina꞉yeke loa꞉me. Ika꞉ Koda꞉ pa꞉ta꞉ hone tulaaleme ekina꞉ la handa꞉la꞉eki epea꞉ka꞉na꞉ta꞉ iki taka꞉lawaluekema꞉ pita꞉la꞉me. \v 4 Kutupa taka꞉lapa pua haemeka꞉na꞉ta꞉ hau ma꞉nda꞉siki na mina꞉pa꞉lake ota꞉ ana꞉na꞉ kone halimikie. \p \v 5 Iki pa꞉ta꞉ hali homekema꞉ epeke hone wita꞉la꞉eki yonka꞉laeya꞉ka꞉na꞉ta꞉ kota꞉ Koda꞉ pa꞉ta꞉ honke lea꞉ka꞉na꞉ta꞉ epelieke. Koda꞉ma꞉ta꞉ haliweki paeyao pa꞉ta꞉ ipika꞉ kiki tindipao hata꞉ haka꞉ta꞉pao halo hala꞉me. Kutupa mo hali pa꞉ta꞉ halieke. \v 6 Ipikana꞉ma꞉ haliepateta꞉ mo halima꞉ hone ti na yokeke hone tulao hata꞉ honke lea꞉ka꞉na꞉ta꞉ epelieke. Hali epima꞉ hone ti yokea꞉ka꞉na꞉ta꞉ ipikita꞉ mo poma꞉ dawala ikali ho a꞉meiyao lopatiki pita꞉la꞉ ekima꞉ handa꞉la꞉me. \v 7-8 Kutu piki halita꞉ hone ti yokolo hata꞉ da̱o̱la na hake Tekehali pa꞉ta꞉ honke lea꞉ka꞉na꞉ta꞉ aleta꞉ ma꞉nda꞉ mea꞉peke na yelieke. \s1 Natehali hasa꞉eki pita꞉ hamoko hasa꞉eki yaapo \p \v 9 Mo natehali kamema꞉ Koda꞉ma꞉ ipiki mea a꞉meiyaasa꞉ ekina꞉ ta꞉na꞉ma꞉ homa꞉peke ya꞉la꞉me. \v 10 Kutupa make mo hamoko kamema꞉ Koda꞉ma꞉ ipiki mininiaasa꞉ ekina꞉ ta꞉na꞉ma꞉ homa꞉peke ya꞉la꞉me. Mo hande ambu palapalamanu paeyo hala꞉ tupa꞉ mo halita꞉ paelieke laa loa꞉me. \v 11 Oli natema꞉ta꞉ titipu wopu pitolo hata꞉ opa꞉liao yopulu hata꞉ hande ambumanu hapuao hala꞉me. Kutupa mo palapala manuna꞉ kiliki lia ta wilie ekita꞉ dutu pa pa pu lopaata꞉ ipika꞉ au la꞉la꞉ ekita꞉ hoeyaalieke. Koto tupa꞉ mo hamoko halima꞉ ipika꞉ bisinisi pitolo hata꞉ homilieke. \s1 La handa꞉la꞉eki pita꞉ hone pula꞉eki yaapo \p \v 12 Hali epima꞉ mo la handa꞉la꞉ ekimanu epena꞉ kone da̱o̱la haya꞉ka꞉na꞉ta꞉ ta꞉na꞉ma꞉ homilieke. Do ekina꞉yeke loa꞉me. Mo halima꞉ta꞉ mo la handa꞉la꞉ ekimanu paeyao bepolaeya꞉ka꞉na꞉ta꞉ Koda꞉ma꞉ ipiki pa꞉ta꞉ yenki halolo hata꞉ta꞉ deto hala꞉eki kone halieke. Koto yenkita꞉ Koda꞉ma꞉ amba꞉ pi la꞉ witolo hata꞉ I̱ pa꞉ta꞉ pukima꞉ homa꞉la꞉ wanda꞉hali pa꞉ta꞉ deto hala꞉eki halueke laa pi la꞉ ula꞉me. \v 13 Hali epima꞉ mo la handa꞉la꞉ ekimanu ipulu haena꞉ hoke hone mea u tiaasa꞉eki taapuna꞉ epea꞉ka꞉na꞉ta꞉ ipikana꞉ma꞉ta꞉ do tupa꞉ lapeke na ya꞉la꞉me. Do hoke hone mea u tiaasa꞉ ekita꞉ Koda꞉ma꞉ epena꞉ la pia꞉ka꞉ta꞉ma꞉ pi lapeke na ya꞉la꞉me. Do ekina꞉yeke loa꞉me. Hoke ekima꞉ta꞉ Koda꞉ pa꞉ta꞉ hoke hone u tiaapeke na ya꞉la꞉me. Kutupa Koda꞉ma꞉ta꞉ homeke a꞉nda꞉ hoke hone u tiaapeke na ya꞉la꞉me. \v 14 Mo halita꞉ ipika꞉ hoke hone pa꞉la꞉ ekima꞉ kone hona꞉maasa꞉ tupa꞉ hoke hone u tiaasa꞉me. \v 15 Pa wanda꞉wekina꞉ weleke pa꞉ta꞉ weki pitao mendia꞉la꞉ tupa꞉ hande ipika꞉ hoke hone pa꞉la꞉eki pia꞉ka꞉na꞉ta꞉ kota꞉ hoke hau pita꞉la꞉me. Kutupa mo weki daeta꞉la꞉ tupa꞉ mo hoke hau pita꞉la꞉eki daeyatia puaata꞉ hande some ota꞉ homaalieke. \p \v 16 Ota꞉ ya kametitio. Yayapikieki na opua꞉pa꞉peke. \v 17 Mo epeke tupa꞉ kita꞉la꞉ ekimanu paeyao make mo epeke alemanu kita꞉la꞉eki paeyao make oli hepeni nanema꞉ ipulu hata꞉ pita꞉la꞉me. Hande ya nane haleme pa̱a̱ piki ale manuna꞉ Ateke pa꞉ta꞉ hola꞉pa꞉niao ipulu hata꞉ pita꞉la꞉me. Ipikana꞉ma꞉ hau ta꞉ta꞉ ta꞉ta꞉ pikieki topo na pealieke. Kutupa paa la꞉ka꞉lea꞉ka꞉na꞉ta꞉ tu na pilieke. \v 18 Ipika꞉ wa꞉pa꞉la꞉ ekimanu paeyao pa꞉ta꞉ nikita꞉ titina꞉ hamonoyeke ipika꞉ hande ota꞉ pi manuna꞉ ipika꞉ hone pa꞉la꞉eki pitolo hata꞉ niki mea hamono la꞉la꞉me. \s1 Opua pia꞉peke ya꞉la꞉eki \p \v 19 Ota꞉ ya kametitio. Do pimanu hone wipe. Iki paeyao pi opuluekema꞉ tikitiki yao hapeke ya꞉la꞉pate pa pi pi a̱i̱ na leke make mineke a̱i̱ na panka꞉pa꞉peke. Do alo pi manuta꞉ do ekina꞉yeke loa꞉me. \v 20 Wanda꞉halina꞉ mineke pankeleme ekima꞉ Koda꞉na꞉ tikitikipiki haumanu na peaasememe. \v 21 Koto ekina꞉ keke loluekema꞉ hoke hone wita꞉la꞉ haumanu paeyao make daeyatia pulu hata꞉ hoke hau pita꞉la꞉ ekimanu paeyao make ota꞉ mina꞉pa꞉laota꞉ kutupa Koda꞉ pa꞉ta꞉ homu pea hata꞉ neke mea da꞉taapeke ya꞉la꞉ pi alemanu ipikana꞉ma꞉ ika꞉ puki pa꞉ta꞉ noka꞉paeya꞉ka꞉na꞉ta꞉ ota꞉ mea mendia꞉pa꞉peke. \p \v 22 Hande pi ale manuta꞉ pa katakema꞉ homeke opitolo hata꞉ ika꞉ kone makeaasememe. Kotoeki na pikita꞉ pi opuata꞉ ota꞉ pea꞉pa꞉peke. \v 23 Do ekina꞉yeke loa꞉me. Hande pi alemanu pa opua kone na pita꞉la꞉ halita꞉ mo su̱a̱na꞉ leke popeleke handa꞉la꞉ halima꞉ handa꞉la꞉me. \v 24 Kutu pita꞉la꞉ halita꞉ ipika꞉ leke popeleke handa꞉la꞉pate la꞉ka꞉la pulu hata꞉ta꞉ ipika꞉ handea꞉ ekita꞉ kutaa kone hone yonka꞉laota꞉ hone paa nimina wia꞉peke na ya꞉la꞉me. \v 25 Kutu pita꞉la꞉pate hali epima꞉ mo hande seliapopiki pi ula꞉ ekimanu hande wanda꞉hali ka꞉la꞉pao hala꞉ pi ula꞉ ekimanu pa꞉ta꞉ loa꞉me. Hali epima꞉ kotoeki manuna꞉ hando haota꞉ pa katakema꞉ homeke na opiki opua ota꞉ pia꞉ka꞉na꞉ta꞉ koto halita꞉ pitolo haena꞉ kone Koda꞉ma꞉ epeaalieke. \p \v 26 Kutupa hali epima꞉ I̱ta꞉ ota꞉ Ketiso halie la ala꞉pate ipika꞉ kekeke na handeteke haya꞉ka꞉na꞉ta꞉ kota꞉ koto halita꞉ ipika꞉ kone makeao hao ipika꞉ Ketiso hala꞉ ekita꞉ ota꞉eki dia꞉me paekie. \v 27 Hoe ma꞉nda꞉ na piki ota꞉ Ketiso tikitiki hauta꞉ nika꞉ Apa꞉ Koda꞉ma꞉ta꞉ dupae ala꞉me. Pa haleme weki wandiki make kineke wanda꞉sunu make ika꞉ ka꞉nda꞉ma꞉ homelemeeki handaata꞉ tamba꞉ mina꞉la꞉eki mea꞉peke ya꞉la꞉me. Kutupa make mo kenke hauma꞉ na hoeyaena꞉ aloma꞉ ekina꞉ ala꞉me. \c 2 \s1 Paeyao pa꞉ta꞉ mandake a꞉ta꞉ma꞉ homa꞉la꞉ hau wala꞉la꞉eki \p \v 1 Ya kametitio. Hande pa̱a̱ pa꞉la꞉ Tekehalita꞉ nika꞉ Tekehali Yesu Ketiso pa꞉ta꞉ hone tulao hata꞉ wanda꞉hali pa꞉ta꞉ honditi na pea꞉pa꞉peke. \v 2 Hamoko hali ma꞉nda꞉ma꞉ ipika꞉ kikina꞉ kolo lini pitao dau epekeeki pambaaso hata꞉ ika꞉ pi hotieleme pa꞉ta꞉ epea꞉ka꞉na꞉ta꞉ kutupa hoke dau pambao natehali hali make epea꞉ka꞉na꞉ta꞉ \v 3 ikana꞉ma꞉ mo epeke dau pambaala꞉ hali pa꞉ta꞉ ta꞉na꞉ma꞉ homolo hata꞉ Neke do sea seliapona꞉ a꞉pa pitie laata꞉ Kutupa mo hande natehali hali pa꞉ta꞉ta꞉ Neketa꞉ pa tiao hae o I̱ pilu sea anke teke pa꞉ta꞉ pukuna꞉ pitie laa lemeka꞉na꞉ta꞉ \v 4 kota꞉ ikana꞉ma꞉ mo hali yaapota꞉ ta꞉ta꞉ ta꞉ta꞉ pea telipaaso hata꞉ honditi na pilimipe. Kutu pimika꞉na꞉ta꞉ ikana꞉ma꞉ ika꞉ kone pi yokaalu pita꞉la꞉ ekina꞉ tumiki haliweki mea haaso hata꞉ hoke hone wilimikie. \p \v 5 Ya kametitio. Opua꞉pe. Kenke wanda꞉halima꞉ta꞉ aleta꞉ ma꞉nda꞉ na wiki natehali wanda꞉halio laa alemepateta꞉ Koda꞉ma꞉ koto wanda꞉hali talopu meata꞉ ika꞉ hone tulaaleme ekina꞉ta꞉ iki hamoko mea yaasa꞉me. Kutupa make ipiki pa꞉ta꞉ pukima꞉ homeleme wanda꞉hali pa꞉ta꞉ pi la꞉ wieke tupa꞉ koto wanda꞉hali ipika꞉ Kilu Tombuao Hala꞉ ekina꞉ mea haena꞉ lelieke. \v 6 Kutu piliepate ikana꞉ma꞉ta꞉ hande natehali wanda꞉hali yaala꞉ma꞉ homaememe. Mandane haliweki epi amedama꞉ iki ka꞉nda꞉ma꞉ homao halemepe o pi yokaalu puluekema꞉ iki yola꞉ mea pu halemepe. Hande hamoko haliwekima꞉ koto hau pu haleme ekina꞉ loa꞉me. \v 7 Koto haliwekima꞉ hande Koda꞉ma꞉ iki pa꞉ta꞉ ka꞉la꞉ biki epeketa꞉ pa hoke biki laa hoeyao halememe. \p \v 8 Nika꞉ you halima꞉ta꞉ mo Baibolo buka pa꞉ta꞉ mo hande Lo Pimanu wape pa꞉la꞉ ekita꞉ Naka꞉ kone pukima꞉ homele tupa꞉ wanda꞉hali pa꞉ta꞉ make pukima꞉ homa꞉peke ala꞉ pi opua pimika꞉na꞉ta꞉ epeke hau pilimikie. \v 9 Kutu pilimipateta꞉ wanda꞉hali pa꞉ta꞉ honditi pimika꞉na꞉ta꞉ kotota꞉ hoke hau pilimikie. Kutu pimika꞉na꞉ta꞉ ikita꞉ mo hande Lo Pi manuna꞉ ula꞉eki yambilimikie. \v 10 Hali ma꞉nda꞉ma꞉ hande Lo Pi manuna꞉ homeke kone yambelea꞉ka꞉na꞉ta꞉ kotota꞉ mo hande Lo Pimanu paeyaona꞉ ka꞉ta꞉ta꞉ pilieke. \v 11 Do ekina꞉yeke loa꞉me. Koda꞉ma꞉ alota꞉ Hali ma꞉nda꞉na꞉ wanda꞉na꞉ hakopu na tunkula꞉peke la꞉la꞉pate doeki make Homena꞉ hali ma꞉nda꞉ na lia꞉peke la꞉la꞉me. Nakana꞉ma꞉ta꞉ hali ma꞉nda꞉na꞉ wanda꞉na꞉ hakopu make na tunkulua꞉ma꞉ alepate hali ma꞉nda꞉ naka꞉ honema꞉ lili ekina꞉ mo hande pi ula꞉eki paeyao yambeleme. \v 12 Wanda꞉hali ka꞉la꞉pa꞉ tapaasa꞉ pi ula꞉eki manuma꞉ koto pi ula꞉ ekina꞉ pi yokaalu pilimiki laa hone witolo hata꞉ pi pi la pea꞉tiki pea꞉pa꞉peke. \v 13 Hali ma꞉nda꞉ma꞉ wanda꞉hali pa꞉ta꞉ a꞉ta꞉ma꞉ homa꞉la꞉eki na pu haya꞉ka꞉na꞉ta꞉ wetepe mo hande pi yokaalu pulu pa꞉la꞉ teke halima꞉ mo hau pilie hali pa꞉ta꞉ make a꞉ta꞉ma꞉ na homilieke. Kutu piliepate mo a꞉ta꞉ma꞉ homa꞉la꞉ ekima꞉ta꞉ ipikana꞉ma꞉ panisi pealo pa꞉la꞉ ekita꞉ bepolalieke. \s1 Hone tulao hata꞉ pia꞉peke ya꞉la꞉eki \p \v 14 Ya kametitio. Hali ma꞉nda꞉ma꞉ alota꞉ I̱ta꞉ Ketiso pa꞉ta꞉ hone tulao halome ala꞉pate ipikana꞉ma꞉ ota꞉ hau na pia꞉ka꞉na꞉ta꞉ ota꞉ ekita꞉ ekipape. Koto tupa꞉ hone tulaasa꞉ ekima꞉ta꞉ da꞉ta꞉la꞉eki mea꞉peke ya꞉la꞉pe. \v 15 O naka꞉ ana꞉ kame dau ne dia꞉yalo hata꞉ pa pa haya꞉ka꞉na꞉ta꞉ \v 16 kutupa nakana꞉ma꞉ ipiki pa꞉ta꞉ pi alo hata꞉ Keiyae. A꞉pa꞉la꞉me. Naka꞉ loke titipu pina꞉ dau yama ne make naa da polena꞉e leka꞉na꞉ta꞉ ipika꞉ mea꞉peke ya꞉la꞉ ekimanu na haleke pa pi homeke leka꞉na꞉ta꞉ kota꞉ epeke ekita꞉ ekipa pilipikipe. \v 17 Hande Ketiso pa꞉ta꞉ hone tulao halome ala꞉ halita꞉ dupae. Pa pima꞉ homeke laa ota꞉ hau pitolo hata꞉ na lea꞉ka꞉na꞉ta꞉ kota꞉ ipika꞉ hone tulao hala꞉ ekita꞉ paeki pita꞉la꞉me. \p \v 18 Kutu piliepate hali ma꞉nda꞉ma꞉ dupa lelieke. Nakana꞉ma꞉ naka꞉ hone tulao hale ekina꞉ hone witelepate I̱ma꞉ta꞉ ya hau pitolo ekina꞉ hone witolome laa lelieke. I̱ma꞉ta꞉ hombo peaaso hata꞉ ipiki pa꞉ta꞉ dupa lolueke. Yaka hau pitolo ekima꞉ ya hone tulaalo ekita꞉ waluepate nakana꞉ma꞉ ota꞉ hau na piki naka꞉ hone tulao hale ekita꞉ ekipa walipikipe laa lolueke. \v 19 Naka꞉ hone tulale ekita꞉ dupae. Koda꞉ homeke hala꞉me ale ekita꞉ epeke alepate pa mo hande hoke temoko manuma꞉ make koto lo halemepateta꞉ pututuma꞉ homolo hata꞉ lo halememe. \v 20 Neketa꞉ hone na wiki halio. Hande ota꞉ hau na piki pa pima꞉ homeke Ketiso pa꞉ta꞉ hone tulao halome ala꞉ ekita꞉ paeki pita꞉la꞉me la walonope. \v 21 Koda꞉ma꞉ta꞉ nika꞉ amba꞉ titina꞉ hayeke teke hali Eipoloha꞉ma꞉ ekipa tikitiki yao haena꞉ leekepe. Hande ipika꞉ eiyeke Aisa꞉ke mo oloda manda wia Koda꞉ pa꞉ta꞉ lia haluekema꞉ pieke ekima꞉ piekeme. \v 22 Ipika꞉ hone tulaeyekeeki make ipika꞉ ota꞉ hau piekeeki make homeke hau pa꞉la꞉me laa hone na witelepe. Ipikana꞉ma꞉ ota꞉ hau pieke ekima꞉ta꞉ ipika꞉ hone tulaeyeke ekita꞉ peneme yaeyekeme. \v 23 Kutupa make mo Baibolo bukana꞉ leekeeki make ota꞉ yaeyekeme. Hande leekeeki dupa \q1 Eipoloha꞉ma꞉ma꞉ Koda꞉ pa꞉ta꞉ hone tulao hayeke ekina꞉ Koda꞉ma꞉ta꞉ ipikita꞉ tikitiki yao haena꞉ leekeme. \m Kutupa Koda꞉ma꞉ Eipoloha꞉ma꞉ pa꞉ta꞉ alota꞉ \q1 Neketa꞉ yaka yankekee laa leekeme. \m \v 24 Koto ekina꞉ Koda꞉ma꞉ta꞉ ipiki pa꞉ta꞉ hone tulao halemeeki homeke na handeke ika꞉ ota꞉ hau pitelemeeki tonka꞉na꞉ handata꞉ tikitiki yao haena꞉ ala꞉ ekita꞉ hone wilipikie. \p \v 25 Hande hali yolo hayeke wanda꞉ Leiha꞉pema꞉ make dupiekeme. Ipikana꞉ma꞉ hande Diosuama꞉ tapaeyeke iya ikiki haliweki handa꞉ mea pota꞉ ma꞉nda꞉ pa꞉ta꞉ pa tapaeyekeme. Ipikana꞉ma꞉ kutu pieke ekima꞉ Koda꞉ma꞉ mo wanda꞉ tikitiki yao haena꞉ leekeme. \p \v 26 Kutupa temoko na pila꞉ ekima꞉ta꞉ hali toko ula꞉ tupa꞉ hali epima꞉ ota꞉ hau na piki hone tulaala꞉ ekita꞉ homa꞉la꞉ hali tokoma꞉ handa꞉la꞉me. \c 3 \s1 Kekeke handeteke hapa꞉pekeeki \p \v 1 Ya kametitio. Iki pa꞉ta꞉ haliweki wopu wala꞉la꞉ hali haluekema꞉ hone na wia꞉pa꞉peke. Do ekina꞉yeke loa꞉me. Koda꞉ma꞉ta꞉ mo pa wanda꞉halina꞉eki pilie tupa꞉ na piki pa mo disa haliweki nikina꞉ hau wotu handilieke. \v 2 Niki paeyaoma꞉ hoto elekeeleke hao hoeya꞉tiki pitoloma꞉pate hali homeke a꞉nda꞉ma꞉ pi alo hata꞉ hokeeki ma꞉nda꞉ na lea꞉ka꞉na꞉ta꞉ koto halima꞉ta꞉ ipiki pa꞉ta꞉ ala꞉ta꞉ ma꞉nda꞉ na wiki hali hata꞉ ipika꞉ hone puki pa꞉ta꞉ make ipika꞉ loke make ana꞉na꞉ handeteke hatiki pilieke. \v 3 Nikana꞉ma꞉ mo hande hosi ma꞉na꞉na꞉ kake pa꞉ta꞉ mo ayeni ale hapulao niki pi opina꞉ aloma꞉me. Kutupa nika꞉ hone pa꞉la꞉ nane poluekema꞉ make hande ma꞉na꞉ la꞉ka꞉la꞉ mea puluma꞉me. \v 4 Mo hande sisima pa꞉ta꞉ make hone wia꞉pa꞉peke. Ale tieke kone po tiekema꞉ mea puaasa꞉pateta꞉ mo hande kapidini halima꞉ ipika꞉ hone pa꞉la꞉ nane poluekema꞉ mo hande mendeke nane hapulaala꞉ alesiki la꞉ka꞉lolo hata꞉ kone pota꞉ mea puaasa꞉me. \v 5 Koto tupa꞉ nika꞉ hande kekeke make hosiki alesikima꞉ kone pi tieke lomono lapeke ya꞉la꞉me. Kutupa hande ti ulekesiki pa꞉ta꞉ make hone wia꞉pa꞉peke. Ti polu tieke kone mo ti uleke sikima꞉ ana꞉na꞉ tapaalieke. \p \v 6 Kutupa kekeke make ti tala꞉ ekima꞉ handa꞉la꞉me. Nika꞉ loke pa꞉ta꞉ witolo hata꞉ hoke hau pita꞉la꞉ honemanu u tiaapeke ya꞉la꞉me. Kutupa loke paeyao hoeyao hala꞉me. Kutupa loke pa꞉ta꞉ ti tala꞉ ekima꞉ hando hala꞉me. Kutupa nika꞉ pota꞉ pominoloma꞉eki make yanko hala꞉me. Dupiki ti tala꞉ ekita꞉ ti to hala꞉ alena꞉ ipu hala꞉me. \p \v 7 Do kenkena꞉ hala꞉ ma꞉na꞉ yeti paeyao make keto delika꞉ make batiti paeyao make dawala ikali pa꞉ta꞉ pila꞉ alemanu paeyao make haliwekima꞉ homu peaapeke yolo hata꞉ amba꞉ homu pealemepate \v 8 kenke hali ma꞉nda꞉ma꞉ ipika꞉ kekeke homeketa꞉ homu peaapeke na ya꞉la꞉me. Mo hande kekeketa꞉ lu mininiapeke na ya꞉la꞉eki yolo hata꞉ hoke ale pita꞉ hali homaasa꞉ ekimanu tumba pila꞉eki yaalo hata꞉ wanda꞉hali homao hala꞉me. \v 9 Nikana꞉ma꞉ nika꞉ kekekema꞉ nika꞉ Apa꞉ Tekehali pa꞉ta꞉ keiyae pi lo haloma꞉pate hande Koda꞉ma꞉ ipiki tupa꞉ haena꞉yeke wepia haena꞉ la꞉la꞉ wanda꞉hali pa꞉ta꞉ kone hoke pimanu lo haloma꞉me. \v 10 Keiyae pi aloma꞉eki make hoke pi aloma꞉eki make homeke kake pa꞉ta꞉ kone ipu hala꞉me. Ya kametitio. Do ekita꞉ na pumana꞉ pea꞉pa꞉peke aleo. \v 11 Hande ikali opa꞉la꞉ pa꞉ta꞉ manuta꞉ tende pikieki make teto pikieki pita꞉ apa꞉tao na ipu hala꞉me. \v 12 Ya kametitio. Nose tima꞉ make olipi kiliki na a꞉ilieke. Kutupa puma꞉ make nose kiliki na a꞉ilieke. Koto tupa꞉ damena ikali pila꞉ ale pa꞉ta꞉ epeke ikali mea꞉peke na ya꞉la꞉me. \s1 Oli ya nanema꞉ ipula꞉ hone epeke u tiaasa꞉eki \p \v 13 Iki pa꞉ta꞉ hali epi amedama꞉ hone wopu wia pita꞉la꞉ ekimanu hando halemepe. Kutu piki halima꞉ta꞉ ipika꞉ epeke hala꞉eki peneme yaaluekema꞉ hone wopu wia homu pea hata꞉ ipikana꞉ma꞉ epeke hau pu halieke. \v 14 Kutu piliepate honditi wotu pita꞉la꞉eki make pasa꞉tei hau puluekema꞉ taapa꞉la꞉eki make ika꞉ puki pa꞉ta꞉ pitaemeka꞉na꞉ta꞉ kota꞉ ika꞉ pi ika꞉ kone na laake yayapiki hau na pea꞉pa꞉peke. \v 15 Dupiki hone wita꞉la꞉ ekita꞉ hepeni naneeki dia꞉me. Kenkena꞉ ula꞉ ekima꞉ kenke lokena꞉eki make hoke temokona꞉eki make kotoeki tepoma꞉ pita꞉la꞉me. \v 16 Do ekina꞉yeke loa꞉me. Honditi pita꞉la꞉eki pita꞉ pasa꞉tei pita꞉la꞉eki yaapo pa꞉ta꞉ epeke tupa꞉ hapeke na yaalo hata꞉ hoke hau pita꞉la꞉eki paeyao ipu hala꞉me. \v 17 Kutu pita꞉la꞉pateta꞉ oli ya nanema꞉ ipula꞉ hone epekeeki dupae. Titina꞉ amba꞉la kipabaake hone wita꞉la꞉ekie. Kutupa make puki lopa꞉niao pila꞉eki make yopu hala꞉eki make homu pea hala꞉eki make a꞉ta꞉ma꞉ wopu homolo hata꞉ epeke haumanu pita꞉la꞉eki make paeyao ya nanema꞉ ipula꞉pateta꞉ honditi pita꞉la꞉eki make yayapiki hau pita꞉la꞉eki make apa꞉tao na ipula꞉me. \v 18 Mo hande a꞉nda꞉ peliaaseme haliwekima꞉ noka꞉peleme wae alemanu pa꞉ta꞉ tikitiki hau pita꞉la꞉eki opilieke. \c 4 \s1 Do kenke hauna꞉ ta꞉ma꞉ni pita꞉la꞉eki \p \v 1 Iki pa꞉ta꞉ a꞉nda꞉ pita꞉la꞉eki ipula꞉eki make ape ala꞉eki ipula꞉eki make koto haumanu ipula꞉eki teketa꞉ hando pa꞉ta꞉ ka꞉ta꞉pe. Ika꞉ honema꞉ tiaasa꞉ ekimanu ika꞉ loke tukiki nane kone a꞉nda꞉ leke ale lia꞉tiki pitolo hata꞉ peaasa꞉me. \v 2 Ala꞉ta꞉ ala꞉ta꞉ muluekema꞉ ika꞉ hone pa꞉la꞉pateta꞉ mea꞉peke na yolo hata꞉ hali luekema꞉ taapeleme. Kutupa make ala꞉ta꞉ ala꞉ta꞉ meawee laa honema꞉ pitelemepateta꞉ mea꞉peke na yolo hata꞉ ape la a꞉nda꞉ pitelememe. Koto ekina꞉ ikana꞉ma꞉ Koda꞉ pa꞉ta꞉ honke na alemeke handa na minelememe. \v 3 Kutupa Koda꞉ pa꞉ta꞉ ika꞉ honke alemeeki make ana꞉ na pa꞉la꞉me. Ika꞉ hone pa꞉la꞉ hau puluekema꞉ hone u hoeyaaso hata꞉ honke aleme ekina꞉ na minelememe. \v 4 Ikita꞉ pi tunkuleleme wanda꞉halio. Do ekita꞉ ikana꞉ma꞉ hone na witelemepe. Hali epima꞉ do kenke hau puluekema꞉ hone pia꞉ka꞉na꞉ta꞉ koto halita꞉ Koda꞉ ipika꞉ a꞉nda꞉ tunkiliki hali hala꞉me. Koto tupa꞉ make hali epima꞉ do kenke hauna꞉ yankeke haluekema꞉ hone pia꞉ka꞉na꞉ta꞉ koto halita꞉ ipika꞉ kone Koda꞉na꞉ a꞉nda꞉ tunkiliki hali haluekema꞉ pita꞉la꞉me. \v 5 Hande Baibolo bukana꞉ wape pa꞉la꞉ ekita꞉ paekie hone witelemepe dupae. Hande Koda꞉ma꞉ niki loke tukiki pa꞉ta꞉ pitaala꞉ temokoma꞉ta꞉ ipika꞉ hone pa꞉la꞉eki puluekema꞉ wotu taapilieke wape pa꞉la꞉me. \v 6 Kutu piliepate Koda꞉ma꞉ ipika꞉ a꞉ta꞉ma꞉ homolo hata꞉ pa kita꞉la꞉ ekita꞉ wopue. Kutu pita꞉la꞉ ekima꞉ mo Baibolo bukana꞉ wape pa꞉la꞉eki doe. \q1 Hakoko liteleme haliweki pa꞉ta꞉ta꞉ Koda꞉ma꞉ a꞉nda꞉ lia hala꞉pate \q1 homupiki haliweki pa꞉ta꞉ ipika꞉ a꞉ta꞉ma꞉ homa꞉la꞉eki pa halo hala꞉me wape pa꞉la꞉me. \p \v 7 Koto ekina꞉ Koda꞉ pa꞉ta꞉ homu pea hata꞉ Sadani pa꞉ta꞉ a꞉nda꞉ lia hapa꞉peke. Kutu pimika꞉na꞉ta꞉ Sadanita꞉ iki mina꞉pa꞉lao pindipa pelieke. \v 8 Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke. \v 9 Ka꞉nda꞉ma꞉ homolo hata꞉ e̱ lapa꞉peke. Ika꞉ kitalemeeki topo pea e̱ lapa꞉peke. Ika꞉ ta꞉na꞉ma꞉ homelemeeki make topo pea ka꞉nda꞉ma꞉ homa꞉pa꞉peke. \v 10 Tekehali pa꞉ta꞉ homu pea haemeka꞉na꞉ta꞉ ipikana꞉ma꞉ iki mea a꞉meiyalieke. \s1 Yankeke pa꞉ta꞉ hoke hau peleme pi a̱i̱ na lapa꞉pekeeki \p \v 11 Ya kametitio. Ikana꞉ma꞉ ika꞉ kame ma꞉nda꞉ pa꞉ta꞉ hoke hone witolo hata꞉ la la pita꞉la꞉ pi na lapa꞉peke. Hali epima꞉ ipika꞉ kame pa꞉ta꞉ hoke hone witolo hata꞉ pi lao pi yokaalu pita꞉la꞉ halima꞉ handa haya꞉ka꞉na꞉ta꞉ mo hali homeke pa꞉ta꞉ na pita꞉la꞉pate mo hande Lo pimanu pa꞉ta꞉ kone pita꞉la꞉me. Nakana꞉ma꞉ kutu pika꞉na꞉ta꞉ mo hande Lo Pimanu hone na wiki neketa꞉ mo Lo Pi manuna꞉ pi yokaalu pitele hali halipikie. \v 12 Mo hande Lo pimanu ula꞉ Hali Koda꞉ homekema꞉ kone pi yokaalu pita꞉la꞉eki make pita꞉la꞉me. Kutupa ipikana꞉ma꞉ta꞉ da꞉taasa꞉eki make hoeyaasa꞉eki make ana꞉na꞉ pea꞉peke ya꞉la꞉me. Koto ekina꞉ nakana꞉ma꞉ hali ma꞉nda꞉ pa꞉ta꞉ laake hauta꞉ neketa꞉ aleke pa꞉ta꞉ hone wia hata꞉ alepe. Koto ekina꞉ nakana꞉ma꞉ hali ma꞉nda꞉na꞉ pita꞉la꞉ ekina꞉ pi yokaalu piki hauta꞉ neketa꞉ aleke pa꞉ta꞉ hone wia hata꞉ pitelepe. \s1 Hakoko liaama꞉na꞉ kinki pita꞉la꞉ pimanu \p \v 13 Iki pa꞉ta꞉ mandane haliwekima꞉ doeki lo halememe. Amepe o beliape daoni teke ma꞉nda꞉ pa꞉ta꞉ puaka꞉na꞉ta꞉ bapi homekemanu tupa꞉ koto pa꞉ta꞉ hata꞉ bisinisi pitolo hata꞉ yenki wotu mulumeke la alemepate I̱ma꞉ta꞉ iki pa꞉ta꞉ doeki alome. \v 14 Belia a꞉nda꞉ epolo pa꞉la꞉ hauta꞉ iki hone na wilimime. Ika꞉ da꞉ta꞉la꞉ ekita꞉ ekipape. Ika꞉ haleme ekita꞉ mo hande koa a꞉pa pamba hosiki hao kila꞉pa pula꞉ tupa꞉ halememe. \v 15-16 Dupa lapa꞉peke alee. Tekehalima꞉ hone pia꞉ka꞉na꞉ta꞉ niki da꞉ta hata꞉ nikana꞉ma꞉ doeki peata꞉ moeki pulumeke la lapa꞉peke alee alopate ameta꞉ ikana꞉ma꞉ hakoko litolo hata꞉ pi wotu hapa꞉leleme. Kutu piki pi hapa꞉leleme ekita꞉ hokeekie. \v 17 Koto ekina꞉ hali epima꞉ tikitiki hau pea꞉pekeeki hone wia hata꞉ kone ota꞉ na pia꞉ka꞉na꞉ta꞉ koto halima꞉ta꞉ hoke hau pita꞉la꞉me. \c 5 \s1 Hamoko wanda꞉hali kinki pita꞉la꞉eki \p \v 1 Hamoko wanda꞉halio. Do pi opua꞉pe. Iki pa꞉ta꞉ ka꞉nda꞉ piki ekimanu epolo pa꞉la꞉ ekina꞉ e̱ lo hapa꞉peke. \v 2 Ika꞉ alemanu amba꞉ kukutu pa꞉la꞉me kutupa make ika꞉ dau manuta꞉ hoke hoke alesunuma꞉ naaka꞉na꞉ta꞉ ka꞉ka꞉na꞉ ka꞉ka꞉na꞉ wiala꞉me. \v 3 Ika꞉ kolo silipa ale manuna꞉ maka꞉ta꞉ ikiki amba꞉ tala꞉me. Kutupa koto ekima꞉ta꞉ ika꞉ hokeeki peneme yaalieke. Kutupa ika꞉ loketa꞉ ti tala꞉ ekima꞉ handilieke. Kutupa mo paelo pa꞉la꞉ natena꞉ta꞉ ika꞉ hamoko alemanu amba꞉ amu pealememe. \v 4 Opua꞉pe. Ika꞉ e pokaaseme haliwekina꞉ yenkita꞉ makeaaso hata꞉ mandaneeki na haleke pa wia haleme ekima꞉ta꞉ pi ala꞉me. Kutupa make ika꞉ e pokaaseme haliwekina꞉ pi alemeeki make oli ya nane hala꞉ ami haliwekina꞉ Tekehalima꞉ amba꞉ opa꞉la꞉me. \v 5 Ikita꞉ nate paeyao kenkena꞉ hata꞉ epeke epeke alemanu minolo hata꞉ta꞉ ta꞉na꞉ma꞉ homa ne wopu no halememe. Kutupu halemepate ika꞉ imeke wopu pa꞉la꞉ ekima꞉ta꞉ iki lia꞉peke nate ipula꞉me. \v 6 Mo handeeki a꞉nda꞉ na pa꞉la꞉ halima꞉ta꞉ iki pa꞉ta꞉ a꞉nda꞉ na pita꞉la꞉pate ikana꞉ma꞉ amba꞉ pi yokaalu pea lilimime. \s1 Homu pea handeteke hata꞉ yeni pia꞉pekeeki \p \v 7 Ya kametitio. Tekehali epena꞉yeke handeteke hao hapa꞉peke. Mo e teke halima꞉ ipika꞉ ena꞉ hala꞉ alemanu napeke epeke tupa꞉ wina꞉yeke handeteke hala꞉eki handelememe. Lako panakeeki make wetepena꞉eki make handeteke hala꞉me. \v 8 Kutupa iki make handeteke hapa꞉peke. Tekehalina꞉ epolo pa꞉la꞉ nate koto kone ya꞉leke handa ika꞉ puki hana꞉ noka꞉pa hapa꞉peke. \p \v 9 Kametitio. Koda꞉ma꞉ iki pa꞉ta꞉ pi yokaalu peaapa꞉na꞉ ika꞉ kone pi la alualu na pea꞉pa꞉peke. Opua꞉pe. Hande pi yokaalu pulu pa꞉la꞉ hali Koda꞉ta꞉ pota꞉ kake pa꞉ta꞉ kone a꞉pa hala꞉me. \v 10 Kametitio. Hande Koda꞉na꞉ pi la꞉ mea halo haemeke haliwekima꞉ Tekehalina꞉ bikina꞉ pimiki ekita꞉ hone wia꞉pa꞉peke. Mo haliwekima꞉ tanda pikieki minolo hata꞉ kone puki hana꞉ noka꞉pa haemekeme. \v 11 Kutupa mo hande puki hana꞉ noka꞉pa haemeke haliweki pa꞉ta꞉ nikana꞉ma꞉ta꞉ Koda꞉ma꞉ mo haliweki amba꞉ epeaala꞉me lo haloma꞉eki hone wia꞉pa꞉peke. Hande Tekehalima꞉ honkopu hao handeteke hayekeeki make mo paelo pieke dina꞉ Koda꞉ma꞉ ipiki epeaeyekeeki make amba꞉ opuelememe. Tekehalima꞉ niki pa꞉ta꞉ a꞉ta꞉ma꞉ homa꞉la꞉eki make hone wopu wita꞉la꞉eki make amba꞉ handelememe. \s1 Dutu Ota꞉ Tekehali ala꞉ pina꞉ kinki pita꞉la꞉eki \p \v 12 Ya kametitio. Pi tieke doe. Ikana꞉ma꞉ pi la꞉ wimika꞉na꞉ta꞉ oli hepenina꞉ biki make do kenkena꞉ biki make ala꞉ta꞉ ma꞉nda꞉na꞉ biki make na la꞉ wia꞉pa꞉peke. Kutupa Aowe loluekema꞉ta꞉ pa Aowe pi homeke lapa꞉peke. Kutupa make Dia꞉me loluekema꞉ta꞉ pa Dia꞉me pi homeke lapa꞉peke. Tekehalima꞉ iki pa꞉ta꞉ pi yokaalu pilieke la loa꞉me. \s1 Tikitiki piki halina꞉ yeni pita꞉la꞉eki \p \v 13 Iki pa꞉ta꞉ hali ma꞉nda꞉ta꞉ ka꞉nda꞉ma꞉ homa꞉la꞉pe. Kutu piki halima꞉ta꞉ yeni pina꞉e. Hali ma꞉nda꞉ma꞉ta꞉ ta꞉na꞉ma꞉ homa꞉la꞉pe. Kutu piki halima꞉ta꞉ Koda꞉na꞉ pi laaso hata꞉ emelimanu lena꞉e. \v 14 Hali ma꞉nda꞉ta꞉ yeni haasa꞉pe. Kutu piki halima꞉ta꞉ hande siosi wanda꞉halina꞉ handeteke haleme tondiki haliweki wi la꞉ mepi peata꞉ Tekehalina꞉ biki laa oetama꞉ mo halina꞉ lokena꞉ yankaota꞉ ipiki tukiki pa꞉ta꞉ pitaota꞉ yeni pimika꞉na꞉ta꞉ epelieke. \v 15 Mo haliwekima꞉ Koda꞉ pa꞉ta꞉ hone tulao hata꞉ yeni pimika꞉na꞉ta꞉ Tekehalima꞉ mo hali wamo pitolo hata꞉ mea tialieke. Kutupa mo hali pa꞉ta꞉ hoke hau wia꞉ka꞉na꞉ make Koda꞉ma꞉ pa paeyaalieke. \v 16 Koto ekina꞉ yeni tandela haluekema꞉ ika꞉ hoke hau peleme ekimanu ka꞉la꞉pa alualu peata꞉ kutupa ika꞉ kone Koda꞉ pa꞉ta꞉ yeni pitolo hata꞉ tamba꞉ mu alualu pea꞉pa꞉peke. Tikitiki yao hala꞉ halima꞉ yeni pia꞉ka꞉na꞉ta꞉ kota꞉ wele wotu pilieke. \v 17 Hande Elaidiata꞉ nikima꞉ handeke hali kone hayekeme. Ipikana꞉ma꞉ lako na epena꞉yeke honkopu hao Koda꞉ pa꞉ta꞉ yeni piekepate bapi tepona꞉ sumba꞉ yunki mindiki hata꞉ tukiki pa꞉ta꞉ lako na epeekeme. \v 18 Kutupa koto hoki nane yeni pa piekepate ya nanema꞉ lako epeeketa꞉ kenkena꞉ ne pa ana꞉na꞉ wiekeme. \s1 Lopa꞉la꞉ wanda꞉hali tamba꞉ mina꞉la꞉eki \p \v 19 Ya kametitio. Iki pa꞉ta꞉ hali ma꞉nda꞉ma꞉ hande ota꞉ pimanu yonka꞉lao haya꞉ka꞉na꞉ta꞉ kutupa hali homekema꞉ mo hali la꞉ka꞉la pa hatuku epea꞉ka꞉na꞉ta꞉ kota꞉ do tupa꞉ hone wia꞉pa꞉peke. \v 20 Hali epima꞉ hoke hau pita꞉la꞉ some ma꞉nda꞉ ipika꞉ hokeeki yonka꞉lao epena꞉ lea꞉ka꞉na꞉ta꞉ mo halima꞉ta꞉ Koda꞉ma꞉ mo hoke hau pita꞉la꞉ some na homeke mea da꞉taena꞉ lata꞉ ipika꞉ hoke hau pa꞉la꞉ ekimanu paeyao make pa paeyaena꞉ lelieke.