\id HEB - Sembeleke SAMBERIGI PNG HEBREWS 01 22/3/91 Macnaughtan \h HIBULU \toc1 Hibulu Ketiso tapake pa꞉ta꞉ tapaeyeke wapee \toc2 Hibulu \toc3 Hibulu \mt1 Hibulu Ketiso tapake pa꞉ta꞉ tapaeyeke wapee \c 1 \s1 Koda꞉na꞉ pita꞉ ipika꞉ Eiyeke pa꞉ta꞉ yama꞉ la ka꞉la꞉eki \p \v 1 Mo hande ambi sanake sanake aneketa꞉ Koda꞉ma꞉ hoto eleke elekema꞉ make mandane hau manuma꞉ make ipika꞉ pita꞉ mo potopede haliweki pa꞉ta꞉ yama꞉ nika꞉ apa꞉na꞉ atekena꞉ ateketonu pa꞉ta꞉ la hala꞉tiki pu hayekeme. \v 2 Kutu pieke pateta꞉ pa ame do wetepe naneta꞉ Koda꞉ma꞉ ipika꞉ Eiyeke pa꞉ta꞉ yama꞉ ipika꞉ pi niki pa꞉ta꞉ la kina꞉ la꞉la꞉me. Kutaata꞉ Koda꞉ma꞉ koto Eiyekena꞉ kikima꞉ta꞉ do kenke ya yaapona꞉ ula꞉ alemanu paeyao wepia wina꞉ laa ipikana꞉ma꞉ mo paelo pa꞉la꞉ naneta꞉ ala꞉ta꞉ ala꞉ta꞉ paeyao kilu tombuao haena꞉ Koda꞉ma꞉ ipiki mea hayekeme. \v 3 Ipikita꞉ Koda꞉na꞉ pa̱a̱ tieke nikina꞉ pa̱a̱ peaasa꞉ hali hata꞉ make Koda꞉ma꞉ handeke kone make hata꞉ ipika꞉ wele wotu piki pima꞉ do kenke ya paeyao miniliao hala꞉me. \s1 Koda꞉na꞉ Eiyekena꞉ hau tieke \p \v 4 Koda꞉na꞉ Eiyeke ipika꞉ bikita꞉ mo enisolo tonuna꞉ biki lombei piki biki mieke tupa꞉ ipiki make mo enisolo tonu lombei pao hayekeme. \v 5 Amba꞉ Koda꞉ma꞉ leeke pita꞉ dupae \q1 Neketa꞉ ya wekie. I̱ ameta꞉ naka꞉ Apa꞉ halome leekeme. \p Kutupa pa yaapo pao pima꞉ make alota꞉ \q1 I̱ma꞉ ipika꞉ Apa꞉ hano ipikita꞉ ya weki halieke \m leeke pita꞉ mo enisolomanu ma꞉nda꞉ pa꞉ta꞉ leeke yeke yekea. Dia꞉me. \v 6 Kotoeki na piekepate ipika꞉ mupeke weki do kenkena꞉ tapaalo pieke ekina꞉ta꞉ pi dupa leekeme. \q1 Mo Koda꞉na꞉ enisolo tonu paeyaoma꞉ta꞉ mo Weki pa꞉ta꞉ panda꞉ puniaaso ipika꞉ biki yeiya꞉ lalimikie \m leeke pateta꞉ \v 7 mo enisolo tapake ikina꞉ta꞉ pi dupa leekeme. \q1 Koda꞉ma꞉ ipika꞉ enisolo tonuta꞉ mo po tupa꞉ wepiaata꞉ ipika꞉ e pokaasa꞉ tapake tonu ti uleke tupa꞉ mea haena꞉ la꞉la꞉me leekeme. \p \v 8 Kutupa Koda꞉ma꞉ ipika꞉ Eiyekena꞉ta꞉ dupa leekeme. \q1 O Koda꞉ naka꞉ kilu tombuao halo pele ekita꞉ na paeke pa u halieke. \q1 Naka꞉ tikitiki piki hauma꞉ta꞉ naka꞉ wanda꞉hali epeke tupa꞉ handeteke hao haleme. \q1 \v 9 Nakana꞉ma꞉ta꞉ epeke hau pa꞉ta꞉ta꞉ puki wopu pelepate hoke hau pa꞉ta꞉ta꞉ honditi wopu peleme. \q1 Koto ekima꞉ta꞉ Koda꞉ naka꞉ Koda꞉ hata꞉ neke mea mo naka꞉ yankeke tonu lombei piki some halena꞉ tombo kitolo hata꞉ ta꞉na꞉ peaasa꞉ honku naka꞉ kitawaya꞉me leekeme. \p \v 10 Kutaa Koda꞉ma꞉ paa pi ma꞉nda꞉ma꞉ make alota꞉ \q1 Tekehalio. Mo hande panake kini pu miki ale pa꞉ta꞉ta꞉ nakana꞉ma꞉ mo hande yu paeyao wepitolo hata꞉ naka꞉ kikima꞉ mo ya nane ula꞉ alemanu paeyao make wepeme. \q1 \v 11 Koto alemanu paeyaota꞉ pa alu pulu pa꞉la꞉pate neketa꞉ pa hao halipikie. \q1 Kutu pulu pelepate mo ale manuta꞉ dau sinkipa꞉ pa pa pu pula꞉ tupa꞉ sinkipa꞉ pa pa pu pelieke. \q1 \v 12 Nakana꞉ma꞉ ikita꞉ mo hande daumanu panka꞉ pita꞉la꞉ tupa꞉ panka꞉ pilipikie. \q1 Kutupa nakana꞉ma꞉ mo ale manuta꞉ wanda꞉halima꞉ ika꞉ dau topo piteleme tupa꞉ ma꞉nda꞉na꞉ topo pilipikie. \q1 Koto ale manuta꞉ kutu pulu pa꞉la꞉pate neketa꞉ topu ma꞉nda꞉ na pu make naka꞉ da꞉ta꞉la꞉eki na paeyo piki pa hao halipikie leekeme. \p \v 13 Koda꞉ma꞉ leeke pi ma꞉nda꞉ta꞉ dupa \q1 Naka꞉ a꞉nda꞉ tunkiliki tapaketa꞉ naka꞉ anke oto pa꞉ta꞉ haena꞉ laano neketa꞉ ya popeke kiki nanema꞉ hando pitie leekeme. \m Koto pita꞉ mo hande enisolomanu ma꞉nda꞉ pa꞉ta꞉ leeke yeke yekea. Dia꞉me. \p \v 14 Mo enisolo paeyaota꞉ Koda꞉na꞉ deto hala꞉eki mulu peleme wanda꞉halina꞉ pa꞉ta꞉la꞉la꞉ temokomanu na halemeke yekea. \c 2 \s1 Koda꞉ma꞉ niki pa꞉ta꞉la꞉ mea deto hala꞉eki ka꞉la꞉ ekita꞉ ota꞉ hau tieke \p \v 1 Koto ekina꞉ta꞉ niki ipilipa lopa mo opuma꞉ ota꞉ pimanu mina꞉pa꞉lao puaama꞉na꞉ma꞉ koto pita꞉ hone ota꞉ wopu wia miniki hamana꞉ pea꞉peke alee. \v 2 Mo enisolo haliwekima꞉ nika꞉ apa꞉na꞉ atekena꞉ ateketonu pa꞉ta꞉ la halemeke pi manuta꞉ ota꞉ pi yeekeme. Kutupa ma꞉nda꞉ epima꞉ koto pi opua na hao o homu pea na hao pieke some hayeke handaata꞉ kota꞉ ipika꞉ mieke yenkita꞉ ipika꞉ pu hayeke hau ana꞉ piki yenki mea꞉tiki pimikime. \v 3 Kutu pimiki ekina꞉ta꞉ pa niki make mo Koda꞉ma꞉ niki pa꞉ta꞉ lolo ka꞉la꞉ da꞉ta꞉la꞉eki tiekena꞉ hone wopu na uma꞉ka꞉na꞉ta꞉ kota꞉ ekipa mo niki pa꞉ta꞉ kulu pa꞉la꞉ hoke yenki wenduluma꞉pe. Tekehalima꞉ kone do ka꞉la꞉ da꞉ta꞉la꞉eki peneme yaeyekeme. Koto ekita꞉ mo amba꞉ ipikana꞉ma꞉ leeke pi opimiki wanda꞉halima꞉ do pita꞉ ota꞉ la꞉la꞉ pie laa niki pa꞉ta꞉ wopu la kimime. \v 4 Kutaa make koto ikana꞉ma꞉ la kimi pi manuta꞉ ota꞉ pie hone wiomono yeketa꞉ Koda꞉ma꞉ na handeke haumanu make ta꞉ta꞉ piki haumanu make piekeme. Kutupa make ipika꞉ hone pieke ekina꞉ mo Holi Sipitidina꞉ peaasa꞉ haumanu pa hameke haka꞉ta꞉pao telipatiki pu hayekeme. \s1 Nikana꞉ma꞉ da꞉ta꞉la꞉eki miomono yeke nika꞉ you hala꞉ halita꞉ hala꞉me \p \v 5 Do ipilieke lo haloma꞉ kenke panakeeki handeteke haena꞉ta꞉ Koda꞉ma꞉ enisolomanu na mea haena꞉ la꞉la꞉me. \v 6 Koto hau na piekepateta꞉ mo hande Baibolo tukiki pa꞉ta꞉ wape pa꞉la꞉ wape ma꞉nda꞉na꞉ la꞉la꞉ pita꞉ dupae \q1 Koda꞉o. Nakana꞉ma꞉ hone witolota꞉ halita꞉ aleke ya꞉ka꞉ta꞉pe. \q1 Ipiki pa꞉ta꞉ a꞉ta꞉ma꞉ homa handeteke halena꞉ta꞉ ipikita꞉ eki pa꞉la꞉pe. \q1 \v 7 Nakana꞉ma꞉ hali wepitolo hata꞉ mo hande enisolo oto pa꞉ta꞉ hosiki haena꞉ wepia haena꞉ leke yekepate \q1 paa wetepena꞉ta꞉ yeiya꞉ laasa꞉eki tieke pita꞉ pa̱a̱ peaasa꞉eki tieke yaapo ipiki pa꞉ta꞉ dopuaeyekeme. \q1 \v 8 Kutupa ipikana꞉ma꞉ ala꞉ta꞉ ala꞉ta꞉ paeyao handeteke haena꞉ leme la꞉la꞉me. \m Koda꞉ma꞉ halima꞉ta꞉ paeyao handeteke haena꞉ wepiekeme mo Baiboloma꞉ la꞉la꞉ ekita꞉ ota꞉ ala꞉ta꞉ ala꞉ta꞉ paeyao tapao pa꞉ta꞉ ala꞉me. Koto ekita꞉ ota꞉ peneme ya꞉la꞉me. Koto ala꞉pate pa ameta꞉ halima꞉ mo ala꞉ta꞉ ala꞉ta꞉ paeyao handeteke hala꞉me ekita꞉ na handoloma꞉me. \v 9 Pate pa Yesu handoloma꞉me. Ipikana꞉ma꞉ Koda꞉na꞉ a꞉ta꞉ma꞉ homa tamba꞉ mina꞉la꞉eki pa꞉ta꞉ yama꞉ wanda꞉halina꞉ anketeke mea homaena꞉ Koda꞉ma꞉ ipiki enisolo manuna꞉ oto nane hosiki haena꞉ leekeme. Pate ameta꞉ nika꞉na꞉ tanda tieke mea homeeke yekema꞉ koto ekima꞉ta꞉ Koda꞉ma꞉ mo yeiya꞉ laasa꞉eki tieke pita꞉ pa̱a̱ peaasa꞉eki tieke yaapo ipiki pa꞉ta꞉ dopuaeyeke ekita꞉ handoloma꞉me. \p \v 10 Mo ala꞉ta꞉ ala꞉ta꞉ paeyao wepia wina꞉ laa epeke handeteke hala꞉ Koda꞉ma꞉ wekiwandiki eleke eleke ipika꞉ hepeni kenke seliapo nane haena꞉ yeke ika꞉ deto hala꞉eki me̱a̱ya꞉ hali Yesu pa꞉ta꞉ tanda tieke haleeke ekima꞉ Koda꞉ma꞉ ipikita꞉ ota꞉ ika꞉ titina꞉ hali haena꞉ leeke ekita꞉ ota꞉ epeke hau epeke piekeme. \v 11 Mo wanda꞉hali yako pea haena꞉ epeaasa꞉ hali make mo epeaaleke yako pea haleme wanda꞉hali iki paeyaona꞉ Apa꞉ta꞉ homeke homeke hala꞉me. Yesuma꞉ koto ekina꞉ta꞉ koto wanda꞉hali pa꞉ta꞉ kame tonue loluekema꞉ yaala꞉ na homeke lo hala꞉me. \v 12 Ipikana꞉ma꞉ Koda꞉ pa꞉ta꞉ alo alota꞉ \q1 Mo nakana꞉ma꞉ pieki paeyaota꞉ ya kame tonu pa꞉ta꞉ la halueke. \q1 Naka꞉ bikita꞉ ika꞉ mombilimi alena꞉ta꞉ I̱ma꞉ yeiya꞉ lawaalueke leekeme. \p \v 13 Paa pi ma꞉nda꞉ make alota꞉ \q1 I̱ta꞉ Koda꞉ pa꞉ta꞉ ti lao halueke laa \m paa make alota꞉ \q1 I̱ta꞉ mo hande Koda꞉ma꞉ kia꞉ weki wandiki tonu ame̱le̱ do a꞉pa halo handa꞉e leekeme. \s1 Yesu ota꞉ hali hayekeeki \p \v 14 Ipikana꞉ma꞉ Mo wekiwandikie lea꞉ wanda꞉halita꞉ kenke loke hake wanda꞉hali haemeke yeke handaata꞉ ipiki make ika꞉ loke mea kenke hali leke hayekeme. Koto loke mea ipika꞉ homeeke ekima꞉ta꞉ mo hande homa꞉la꞉ ekina꞉ wele handeteke hala꞉ hali Sadani bepolaluekema꞉ yeke piekeme. \v 15 Koto pa꞉la꞉ ekima꞉ta꞉ mo homa꞉la꞉eki pa꞉ta꞉ paala꞉ma꞉ homoloma꞉ ekima꞉ nate paeyao niki tonkao hala꞉ hauta꞉ Yesu ipika꞉ homa꞉la꞉ ekima꞉ ka꞉la꞉pa꞉ tapaala꞉me. \v 16 Kutu pieke ekita꞉ enisolo tonu tamba꞉ muluekema꞉ yeke na piekepate mo Baiboloma꞉ alota꞉ \q1 Ipikana꞉ma꞉ Eipoloha꞉ma꞉na꞉ tapake wekiwandiki tamba꞉ muluekema꞉ piekeme la꞉la꞉me. \m \v 17 Koto hau puluekema꞉ta꞉ ipikana꞉ma꞉ mo ipika꞉ hau paeyaoma꞉ta꞉ ota꞉ ipika꞉ hameke tonu leke hayekeme. Iki pa꞉ta꞉ a꞉ta꞉ma꞉ homolo hata꞉ pea꞉peke hau ma꞉nda꞉ na mina꞉pa꞉lake Koda꞉ pa꞉ta꞉ ika꞉ yeni peao hala꞉ hali haluekema꞉ kutu piekeme. Wanda꞉hali ika꞉ hoke haumanu paeyawaena꞉ Yesuma꞉ hambaasota꞉ kutu piekeme. \v 18 Koto ekina꞉ ipiki make mo la handa꞉la꞉eki manuna꞉ ka꞉nda꞉manu mu hayeke handaata꞉ ame make mo la handa꞉la꞉eki manuma꞉ ma꞉nda꞉ epi pa꞉ta꞉ opolo epea꞉ka꞉na꞉ta꞉ ipikana꞉ma꞉ iki a̱i̱ tamba꞉ mea꞉peke ya꞉la꞉me. \c 3 \s1 Yesuta꞉ Mosesi lombei piki hali hala꞉eki \p \v 1 Koda꞉ma꞉ wi la꞉ mea haena꞉ la꞉la꞉ ya Ketiso kame tonuo nika꞉ hone tu lao haloma꞉ ekina꞉ yeni peao hala꞉ You hali pita꞉ Koda꞉ma꞉ tapaeyeke hali Yesu peneme yaaso hata꞉ta꞉ ipiki pa꞉ta꞉ hone wopu u hapa꞉peke. \v 2 Hande Mosesima꞉ Koda꞉na꞉ wanda꞉hali tukiki pa꞉ta꞉ e paeyao ma꞉nda꞉ na mina꞉pa꞉lake hata꞉ pa ota꞉ epeke e pokaeyeke tupa꞉ Yesu ipikana꞉ma꞉ make ipika꞉ ma̱leke lila꞉ Koda꞉na꞉ e pokaaluekema꞉ pea꞉peke yeke ekita꞉ ma꞉nda꞉ ota꞉ na mina꞉pa꞉lake paeyao ota꞉ epeke tupa꞉ kone pokaeyekeme. \v 3 Da seliapo homeke ma꞉nda꞉ a꞉elia꞉eki handolo hata꞉ wanda꞉halima꞉ da seliapoe laa hotu halo pelemepate pa mo da a꞉elia꞉ halina꞉ biki homeke epeke da a꞉ela꞉ halie laa ipika꞉ biki homeke kende wilieke. Mo da a꞉eta꞉la꞉ halina꞉ biki kende wilie tupa꞉ta꞉ Yesuna꞉ bikima꞉ Mosesina꞉ biki ota꞉ lombei piki biki tieke wina꞉ la꞉la꞉me. \v 4 Da paeyaota꞉ halima꞉ kone a꞉eta꞉la꞉pate pa mo ala꞉ta꞉ ala꞉ta꞉ paeya tapaona꞉ wepia wina꞉ la꞉la꞉ someta꞉ Koda꞉ homeke hala꞉me. \v 5 Mosesima꞉ e pokaasa꞉ hali hata꞉ Koda꞉na꞉ wanda꞉hali tukiki pa꞉ta꞉ e epeke tupa꞉ pokaeyekeme. Kutu pitolo hata꞉ta꞉ ipikana꞉ma꞉ mo Koda꞉ma꞉ wetepe lapeke yeke pi manuta꞉ iki pa꞉ta꞉ la haleekeme. \v 6 Mosesita꞉ pa e pokaasa꞉ hali homeke hayekepate Ketisota꞉ Koda꞉na꞉ eiyeke yaalo hata꞉ Koda꞉na꞉ wanda꞉hali ota꞉ epeke tupa꞉ handeteke hala꞉me. Koto handeteke hala꞉ wanda꞉halita꞉ nikie. Nikana꞉ma꞉ a꞉nda꞉ nika꞉ Tekehalima꞉ ota꞉ pealieke hone wita꞉la꞉eki pita꞉ aela꞉ baasa꞉ hau yaapo a꞉nda꞉ ota꞉ wopu miniki haoma꞉ka꞉na꞉ alome. \s1 Koda꞉ma꞉ta꞉ wanda꞉halina꞉ hoto pitulu pa꞉la꞉ nate wina꞉ la꞉la꞉eki \p \v 7 Koto pa꞉la꞉ ekina꞉ mo Holi Sipitidima꞉ kinki pitolo hata꞉ alota꞉ \q1 Ame do natena꞉ Koda꞉na꞉ pi ho̱la̱꞉make opimika꞉na꞉ta꞉ \q1 \v 8 kota꞉ mo hande ika꞉ apa꞉na꞉ atekena꞉ atekena꞉ puki taka꞉laaso hata꞉ Koda꞉na꞉ pi na opiki nono pimiki tupa꞉ ikana꞉ma꞉ make pi na opiki nono na pea꞉pa꞉peke. \q1 Mo wanda꞉halima꞉ hande hapu hayeke alena꞉ haemeke dina꞉ta꞉ koto alo hau manuma꞉ Koda꞉ma꞉ pilia꞉ hau handuluekema꞉ makea handemekeme. \q1 \v 9 Koda꞉ma꞉ alota꞉ I̱ma꞉ bapi paeyao hali tieke yaapona꞉ iki pa꞉ta꞉ pua꞉ hau tieke tieketa꞉ pa mo handolo hata꞉ kone ikana꞉ma꞉ I̱ paa makea handemekeme leekeme. \q1 \v 10 Kutu pimi ekina꞉ mo wanda꞉hali pa꞉ta꞉ I̱ma꞉ mineke pankolo hata꞉ alota꞉ \q1 Do wanda꞉halima꞉ hoto paeyao I̱ kiaaso ya pi ulu ekimanu kiao na opu halememe. \v 11 Koto pimi ekina꞉ I̱ma꞉ iki pa꞉ta꞉ mineke tieke pankolo ota꞉ topo pia꞉peke na yeke pi tieke la꞉ witolo alota꞉ \q1 Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me leekeme. \p \v 12 Aiyo. Kame tonuo. Iki ma꞉nda꞉ mo deto hala꞉ Koda꞉ mina꞉pa꞉laluekema꞉ hoke hone na tulaasa꞉ hoke hone wiaama꞉na꞉ ota꞉ wopu handeteke hapa꞉peke. \v 13 Koto hau na pikita꞉ mo hoke hauma꞉ iki makeao haama꞉na꞉ laa ika꞉ puki taka꞉lawaama꞉na꞉ nate paeyao ika꞉ ika꞉ kone epeke pi manuma꞉ tikitiki ya alualu pu hapa꞉peke. Mo Baiboloma꞉ Ame do natee la꞉la꞉ pita꞉ niki pa꞉ta꞉ waleke kitolo aleketa꞉ kota꞉ koto ala꞉ hau pu hamana꞉e. \v 14 Mo hande nika꞉ titina꞉ hone ti laoma꞉ ekita꞉ na mina꞉pa꞉lake homolo kia꞉naluekema꞉ honkopu hao hata꞉ miniki hao hamana꞉e. Koto hau a꞉nda꞉ puma꞉ka꞉na꞉ta꞉ kota꞉ nikita꞉ ota꞉ Ketiso ame̱le̱ apa꞉tao tunaa haloma꞉me. \p \v 15 Hande kinki pitolo ala꞉ pita꞉ niki pa꞉ta꞉ ipulu ipulu hata꞉ alota꞉ dupae \q1 Ame Koda꞉na꞉ pi ho̱la̱꞉make opimika꞉na꞉ta꞉ kota꞉ mo hande ika꞉ apa꞉na꞉ atekena꞉ atekema꞉ puki taka꞉laaso hata꞉ Koda꞉na꞉ pi na opiki nono pimiki tupa꞉ ikana꞉ma꞉ make pi na opiki nono na pea꞉pa꞉peke la꞉la꞉me. \p \v 16 Mo Koda꞉na꞉ pi ho̱la̱꞉make opitolo hata꞉ kone kiaemeke wanda꞉halita꞉ epi ameda yekea. Ikita꞉ mo hande Mosesima꞉ Idiepi kenke mina꞉pa꞉lao hatuku peeke wanda꞉hali paeyao dia꞉yeke yekea. \v 17 Bapi hali tieke yaapo tukiki pa꞉ta꞉ta꞉ Koda꞉ma꞉ epi ameda pa꞉ta꞉ mineke panka꞉tiki pu hayekea. Mo hande hapu hayeke alena꞉ hoke hau pea homo tandepemeke wanda꞉hali dia꞉yeke yekea. \v 18 Koda꞉ma꞉ pi tieke la꞉ witolo alota꞉ Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ ulume leeke ekita꞉ epina꞉ leeke yekea. Mo hande ipika꞉ pi kiaemeke wanda꞉hali pa꞉ta꞉ leekeme. \v 19 Ika꞉ hone na tulaemekeme. Ika꞉ kutu pimiki ekima꞉ kone mo hande hoto pitina꞉ Koda꞉ma꞉ halueke laa pi la꞉ wieke kenke pa꞉ta꞉ ota꞉ pua꞉peke na yekeme. Koto ekita꞉ do la kita꞉leke opitoloma꞉me. \c 4 \p \v 1 Mo hande Koda꞉ma꞉ kulueke laa pi la꞉ wieke hoto pita꞉peke ekita꞉ ame make nikina꞉ pa u pelia hala꞉me. Koto ekina꞉ iki ma꞉nda꞉ma꞉ koto pi la꞉ wiekeeki wendiaama꞉na꞉ kimelema꞉ hao hapa꞉peke. \v 2 Mo Pi Seliapota꞉ ikana꞉ma꞉ opimiki tupa꞉ nikana꞉ma꞉ make opu haoma꞉me. Ikana꞉ma꞉ epeke opimikipate kone hone tulao na miniki haemeke ekima꞉ mo pima꞉ta꞉ iki tamba꞉ mea꞉peke na yekeme. \p \v 3 Kutu piekepate ame nikita꞉ hone tulao haloma꞉ wanda꞉halima꞉ mo hande Koda꞉ma꞉ la꞉ wiekeeki talo hata꞉ hoto pita꞉peke laa leeke ekina꞉ mu haloma꞉me. Amba꞉ hande Koda꞉na꞉ pima꞉ la꞉ wieke tupa꞉ kone alota꞉ \q1 I̱ma꞉ iki pa꞉ta꞉ mineke tieke pankolo ota꞉ topo pia꞉peke na yeke pi tieke la꞉ witolo alota꞉ \q1 Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me leekeme. \m Koto leekepate Koda꞉ma꞉ mo kenke wepia paeyao paeyeke hoki naneta꞉ ipika꞉ e ota꞉ paeyekeme. \v 4 Mo Baibolo tukiki ma꞉nda꞉ pa꞉ta꞉ta꞉ mo watake hata꞉ natena꞉ pita꞉ dupa la꞉la꞉me. \q1 Mo watake hata꞉ nateta꞉ Koda꞉ma꞉ ipika꞉ e poko tunkula hoto pitiekeme la꞉la꞉me. \m \v 5 Do hande hoto pitina꞉e laa wapena꞉ la꞉la꞉ pi kone paa yaapo peao dupa la꞉la꞉me. \q1 Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me la꞉la꞉me. \p \v 6 Mo Pi Seliapo titina꞉ opimiki wanda꞉halima꞉ ika꞉ hone na tulaemeke ekima꞉ta꞉ mo hande hoto pita꞉pekeeki na mimikime. Kutu pimikita꞉ ameta꞉ pa mandane wanda꞉halima꞉ mo koto hoto pila꞉eki mia꞉peke ya꞉la꞉me. \v 7 Koto mia꞉pekeeki ota꞉ peneme yaasa꞉ ekita꞉ Koda꞉ma꞉ pa nate ma꞉nda꞉ witolo alota꞉ Ame koto natee leekeme. Do wapena꞉ amba꞉ loa꞉ Baibolo pita꞉ bapi wopu paeyeke hoki nane Deipidima꞉ la꞉na꞉ ipiki pa꞉ta꞉ yama꞉ leeke ekita꞉ dupae \q1 Ame do natena꞉ Koda꞉na꞉ pi ho̱la̱꞉make opimika꞉na꞉ta꞉ puki taka꞉laaso hata꞉ ipika꞉ pi na opiki nono na pea꞉peke leekeme. \p \v 8 Diosuama꞉ a꞉nda꞉ amba꞉ kone iki pa꞉ta꞉ Koda꞉ma꞉ la꞉ wieke hoto pila꞉ nate halea꞉ka꞉na꞉ yoluta꞉ kota꞉ Koda꞉ma꞉ paa nate ma꞉nda꞉ ulumee pi na lolo pia꞉me. \v 9 Koto pa꞉la꞉ ekina꞉ta꞉ Koda꞉ma꞉ watake hata꞉ natena꞉ hoto pilieke tupa꞉ pa niki Koda꞉na꞉ wanda꞉halina꞉ hoto pita꞉peke nateta꞉ pa wia꞉ka꞉ta꞉me hone witoloma꞉me. \v 10 Epi amedama꞉ Koda꞉ma꞉ halueke laa la꞉ wieke hoto pita꞉pekeeki a꞉nda꞉ mia꞉ka꞉na꞉ta꞉ kota꞉ Koda꞉ma꞉ ipika꞉ e poko tunkula hoto pitieke tupa꞉ koto halima꞉ make ipika꞉ e poko tunkula hoto pitilieke. \v 11 Mo hande amba꞉ haemeke wanda꞉halima꞉ hone wopu na tulaemeke ekima꞉ pu hoeyaemeke tupa꞉ niki make kutu paama꞉na꞉ma꞉ mo hoto pita꞉peke nate muluekema꞉ta꞉ hone wopu wia pumana꞉e. \p \v 12 Koda꞉na꞉ pita꞉ da꞉taa hata꞉ e wopu poko hala꞉me. Mo pima꞉ta꞉ hande kake yaapo hake bainasi kone lombei pea ne ne wopu hala꞉me. Kutupa mo pima꞉ta꞉ wanda꞉hali ponda꞉pa꞉ awa ika꞉ temoko pita꞉ hone teke yaapo tukikina꞉ opolo pua tekili peao make ika꞉ lokena꞉ holiki kilikalu yaapo pa꞉nka꞉pa꞉ lia tekili pea alu make pea꞉peke ya꞉la꞉me. Wanda꞉halina꞉ honena꞉ hone pa꞉la꞉ ekimanu tikitiki yawao hala꞉me. \v 13 Koda꞉ma꞉ na handena꞉ yeke ala꞉ta꞉ ma꞉nda꞉ a꞉mbao panka꞉ wia꞉peke na ya꞉la꞉me. Dia꞉me. Koda꞉ma꞉ handa꞉leketa꞉ ipika꞉ leke popelekena꞉ta꞉ mo wepia ula꞉ ala꞉ta꞉ ala꞉ta꞉ paeyao ota꞉ peneme yao lumbupa ula꞉me. Kutupa niki paeyaoma꞉ nika꞉ puma꞉ hau manuta꞉ ipiki pa꞉ta꞉ ota꞉ peneme yaalumeke. \s1 Yesuta꞉ nika꞉ yeni peao hala꞉ you hali tieke \p \v 14 Koto pa꞉leke handaata꞉ mo nika꞉ Yeni peao hala꞉ You hali tieketa꞉ Koda꞉na꞉ eiyeke Yesuta꞉ mo hepeni da tukiki pa꞉ta꞉ ota꞉ honda꞉ pambeeke yeke handaata꞉ kota꞉ nikana꞉ma꞉ make mo nika꞉ hone tulaaloma꞉eki wopu handeteke hao hamana꞉e. \v 15 Nika꞉ Yeni peao hala꞉ You halima꞉ta꞉ nika꞉ honkopu na hake dete piki haumanu handaa a꞉ta꞉ma꞉ na homolo pa꞉la꞉ hali dia꞉me. Kotoeki na pikita꞉ nika꞉ Yeni peao hala꞉ You halita꞉ mo niki la handa꞉peke ya꞉la꞉ ekimanu paeyaoma꞉ ipiki make la handetiki piekepate hoke hau homeke siki ma꞉nda꞉ a꞉nda꞉ ota꞉ na piekeme. \v 16 Nika꞉ ka꞉nda꞉ma꞉ homa꞉la꞉ natemanu epea꞉ka꞉na꞉ ipika꞉ a꞉ta꞉ma꞉ homa tamba꞉ mina꞉la꞉eki kia꞉ka꞉na꞉ muluekema꞉ aela꞉ bao hata꞉ mo pa hameke a꞉ta꞉ma꞉ homo hala꞉ Koda꞉ teke pa꞉ta꞉ pomana꞉e. \c 5 \p \v 1 Hali homeke mo wanda꞉halina꞉ yeni peaasa꞉ you hali haena꞉ make Koda꞉na꞉ e pokaasa꞉ hali hao pina꞉ ipika꞉ tapake ma꞉nda꞉ hondo ma̱leke lu mia꞉tiki pu hala꞉me. Mo yeni peaasa꞉ you halima꞉ta꞉ wanda꞉halina꞉ hoke hau a꞉mbawaluekema꞉ ma꞉na꞉ lia hala꞉la꞉eki make totopo yolepiki ale hala꞉la꞉eki make Koda꞉ pa꞉ta꞉ hala꞉tiki pu hala꞉me. \v 2 Mo someta꞉ ipika꞉ hau manuma꞉ make detepiki hali hata꞉ kone mo pi ula꞉eki manuna꞉ pi ula꞉ ekimanu mataalo hata꞉ pu hoeyao haleme wanda꞉halita꞉ yopu kimelema꞉ tamba꞉ mu hapeke ya꞉la꞉me. \v 3 Ipiki make detepiki hali hata꞉ kone mo wanda꞉halina꞉ hoke hauma꞉ homeke dia꞉ yekepate ipika꞉ hoke hau make a꞉mbawaena꞉ Koda꞉ pa꞉ta꞉ ma꞉na꞉ lia hala꞉tiki pia꞉peke yekeme. \p \v 4 Mo yeni peaasa꞉ hali hasa꞉ ekina꞉ biki tieke mina꞉la꞉ ekita꞉ hali ma꞉nda꞉ma꞉ ipika꞉ kone ipiki ma̱leke lia hapeke na yeliepate Koda꞉ma꞉ wi lelie ekina꞉ homeke ipika꞉ yeni peaasa꞉ hali hapeke yelieke. Pa mo hande Etoni wi leeke tupa꞉ kone wi lelieke. \p \v 5 Mandake tupa꞉ Yesuma꞉ mo yeni peao hala꞉ halina꞉ biki tieketa꞉ ipika꞉ kone na miekepate pa Koda꞉ma꞉ ipiki pa꞉ta꞉ alota꞉ \q1 Neketa꞉ ya wekie. Ameta꞉ I̱ta꞉ naka꞉ Apa꞉ halome leekeme. \p \v 6 Kutupa make Koda꞉ma꞉ Baibolo ma꞉nda꞉na꞉ alota꞉ \q1 Neketa꞉ mo hande Melekisedeke hata꞉ pieke tupa꞉ bapi paeyaona꞉ yeni peaasa꞉ hali hao halipikie leekeme. \p \v 7 Yesuma꞉ do kenkena꞉ hata꞉ta꞉ mo hande homa꞉la꞉ ekima꞉ ipiki meaama꞉na꞉ mo ipika꞉ pa꞉ta꞉la꞉peke yeke Koda꞉ pa꞉ta꞉ ipika꞉ yeni pieke ekima꞉ make honke leeke ekima꞉ make e̱ wi tieke laa e̱ pankeke lopolo haena꞉ yeni piekeme. Koto yenita꞉ homu pikima꞉ pieke handaa Koda꞉ma꞉ ota꞉ opiekeme. \v 8 Kutupa ipikita꞉ Koda꞉na꞉ Eiyeke hayekepate ipika꞉ homu pieke ekita꞉ mo hande tandama꞉ homa꞉la꞉eki mieke yeke ekima꞉ hone wiekeme. \v 9 Ipikita꞉ koto hau paeyaona꞉ ota꞉ ana꞉ pieketa꞉ mo ipika꞉ kakena꞉ homaa pi opu haleme wanda꞉halina꞉ da꞉ta꞉la꞉ ekina꞉ tekehali hayekeme. \v 10 Kutu pieke handaata꞉ Koda꞉ma꞉ ipiki pa꞉ta꞉ alota꞉ \q1 Neketa꞉ mo hande Melekisedeke hata꞉ pieke tupa꞉ yeni peaasa꞉ you hali hao halipikie laa peneme yao leekeme. \s1 Andu nala꞉ wekiwandiki tupa꞉ na hao hamana꞉ leekeeki \p \v 11 Do hauna꞉ta꞉ nikana꞉ma꞉ pi eleke eleke ota꞉ wopu lapeke ya꞉la꞉pate ikita꞉ hone a̱i̱ na mia꞉peke ya꞉leke handaa mo pimanu wala꞉la꞉ ekita꞉ ka꞉nda꞉ pa꞉leke paasoma꞉me. \v 12 Ikana꞉ma꞉ Koda꞉na꞉ pi wala꞉la꞉ wanda꞉hali hamena꞉ yeke nate tieke ana꞉na꞉ wia꞉pate kone pa mo hande wekiwandiki sunu pa꞉ta꞉ wala꞉la꞉ Koda꞉na꞉ hosiki pi sunu ma꞉nda꞉ma꞉ paa walena꞉ lapeke ya꞉ka꞉ta꞉me. Epeke taka꞉lake nemanu no hapa꞉peke yolo pa꞉la꞉pate pa andu homeke no halememe. \v 13 Wanda꞉hali epima꞉ andu homeke napeke ya꞉la꞉ some haya꞉ka꞉na꞉ta꞉ kota꞉ mo someta꞉ mo hande hoke hau epeke hau yaapo telipea haluekema꞉ hone na wiki pa pu haleme wekiwandiki leke halememe. \v 14 Koto pa꞉la꞉pate mo hoke hau pita꞉ epeke hau yaapo talo talo pea epeke tupa꞉ telipea haleme keileke wanda꞉halima꞉ta꞉ mo epeke taka꞉lake ne tupa꞉ no halimikie. \c 6 \p \v 1 Mo hande titi panake pa꞉ta꞉ opuma꞉ Ketisona꞉ pi manuna꞉ homeke na ambula u hake pa wina꞉ ipika꞉ pi mandane ekimanu make handa꞉tia pomana꞉e. Da a꞉eyoma꞉ka꞉na꞉ta꞉ oni hande amba꞉ nokopoma꞉ da ka꞉ta꞉ta꞉ pa yoka noka꞉pa꞉tiki noka꞉pa꞉tiki pea꞉peke na ya꞉la꞉me. Koto tupa꞉ kone nikana꞉ma꞉ make mo Koda꞉ pa꞉ta꞉ hone tulaasa꞉ titina꞉ pimanu make mo teke na wiki hau pita꞉la꞉ ekimanu mina꞉pa꞉lao hone la꞉ka꞉la꞉la꞉ ekina꞉ pimanu make \v 2 bapitaisi pita꞉la꞉ hau manuna꞉ pi wala꞉la꞉eki make youna꞉ kiki wia yeni pita꞉la꞉ haumanu make homa paa tiaasa꞉ hau make Koda꞉na꞉ pi yokaalu pea mo honiki na paeke homo hala꞉ alena꞉ tapaalo pa꞉la꞉ ekina꞉ wala꞉la꞉ pimanu make koto amba꞉ hande titina꞉ waloma꞉ pimanu na ambula u hake \v 3 pa mandane ekimanu make handa꞉tia pomana꞉e. Kutu piomono Koda꞉ma꞉ niki pa꞉ta꞉ waleke kia꞉ka꞉na꞉ta꞉ kota꞉ ota꞉ putia polumeke. \p \v 4 Mandane wanda꞉halima꞉ta꞉ mo hande amba꞉ ika꞉ hone tulaemekeeki mina꞉pa꞉laemeka꞉na꞉ta꞉ pa ekipa ika꞉ puki la꞉ka꞉la hone ma꞉nda꞉ tulaena꞉ handa꞉ mea epomana꞉pe. Ikita꞉ Koda꞉na꞉ pa̱a̱ pa꞉la꞉eki tukiki pa꞉ta꞉ amba꞉ haemeke handa make mo hepeni nanema꞉ pa hameke hala꞉la꞉ hau ikana꞉ma꞉ amba꞉ pea handemeke handa make mo Holi Sipitidima꞉ telipea yekeeki make mimiki handaata꞉ \v 5 Koda꞉na꞉ pi mea pea handa epekeeki yeke handaata꞉ a꞉pa꞉la꞉me hone make wimiki handaata꞉ Koda꞉na꞉ wetepe epolo pa꞉la꞉ natena꞉ wele tiekena꞉ wele wataa handemeke handaata꞉ \v 6 kota꞉ koto hau paeyao pea hoki naneta꞉ ika꞉ hone tulaemekeeki mina꞉pa꞉lao lopea꞉ka꞉na꞉ta꞉ kota꞉ iki paa la꞉ka꞉la a꞉pa hone tulaena꞉ ma꞉nda꞉ma꞉ ota꞉ paa hatuku a꞉pa꞉pa꞉peke na ya꞉la꞉me. Dia꞉me. Ika꞉ koto peleme ekima꞉ta꞉ mo Koda꞉na꞉ Eiyeketa꞉ mo wanda꞉halina꞉ leke popelekena꞉ yaala꞉ma꞉ homena꞉ mo a꞉ka꞉tei wape piki tina꞉ ipiki paa liki nono pitelememe. \p \v 7 Kenke ma꞉nda꞉ma꞉ lako nalo hata꞉ mo e handeteke hala꞉ halina꞉ ne anekema꞉ opaeya꞉ka꞉na꞉ta꞉ kota꞉ koto kenketa꞉ Koda꞉ma꞉ wamo pita꞉la꞉ kenkee. \v 8 Pate mo ka̱꞉la̱꞉ta꞉ o hoke ambu homeke opa꞉la꞉ kenketa꞉ ipika꞉ hoeyaalo pa꞉la꞉eki make teke pa꞉ta꞉ ulume. Koto hoke ambu opita꞉la꞉ kenketa꞉ tima꞉ yankilieke. \p \v 9 Nika꞉ puki piki yankeke titio. Iki pa꞉ta꞉ dupiki pi tieke aloma꞉pate pa mo da꞉ta꞉la꞉ ekima꞉ mea a꞉pa꞉la꞉ wamo pita꞉la꞉ haumanu pu haleme ekina꞉ nikana꞉ma꞉ koto piteme wanda꞉hali iki pa꞉ta꞉ hone ma꞉nda꞉ na witoloma꞉me. \v 10 Koda꞉ta꞉ homeke pa꞉ta꞉ homeke hone ula꞉ Koda꞉ dia꞉me. Ipikana꞉ma꞉ mo ika꞉ epeke e poka꞉lemekeeki make ika꞉ Ketiso kame tonu tamba꞉ mimieki make ame do pa tamba꞉ mu haleme ekima꞉ make koto hau pa꞉ta꞉ yama꞉ta꞉ ika꞉ Koda꞉ pa꞉ta꞉ pukima꞉ homelemeeki peneme yaasa꞉me. Koto piteme ekita꞉ Koda꞉ma꞉ hone na yonka꞉lapeke ya꞉la꞉me. \v 11 Koda꞉ma꞉ ota꞉ pina꞉e hone wilimieki iki pa꞉ta꞉ ota꞉ pina꞉ kima꞉ na homeke honkopu hao hata꞉ mo hande epeke haumanu pa pea꞉tiki pu hamena꞉ niki hone wopu pa꞉la꞉me. \v 12 Ikana꞉ma꞉ soka꞉la꞉ homeleme wanda꞉hali hamena꞉ niki hone na pa꞉la꞉me. Kotoeki na pikita꞉ mo hande mandane wanda꞉hali ika꞉ hone tulaemeke hauma꞉ make ika꞉ epeke tupa꞉ yu wia haemeke hauma꞉ make koto hau yaapo pa꞉ta꞉ yama꞉ mo hande Koda꞉ma꞉ la꞉ ula꞉ ekimanu mu haemekeme. Koto wanda꞉halina꞉ hauta꞉ ikana꞉ma꞉ handa꞉ muemena꞉ hone witoloma꞉me. \s1 Koda꞉ma꞉ ota꞉ yaalo pieke pi la꞉ wiekeeki \p \v 13 Mo hande Eipoloha꞉ma꞉ pa꞉ta꞉ pi la꞉ wieke dina꞉ hali ma꞉nda꞉ta꞉ ota꞉ manda hala꞉ hali ma꞉nda꞉ ota꞉ dia꞉ yeke handaata꞉ Koda꞉ma꞉ ipika꞉ biki kone laa ota꞉ pi alo loa꞉me laa pi la꞉ wiekeme. \v 14 Ipikana꞉ma꞉ alota꞉ I̱ma꞉ neke epeaota꞉ naka꞉ hoki nane halo peleme tapaketa꞉ ota꞉ wopu haena꞉ lolueke pita꞉ I̱ma꞉ ota꞉ neke pa꞉ta꞉ la꞉ witolome leekeme. \v 15 Eipoloha꞉ma꞉ mo pi la꞉ wieke ale muluekema꞉ yu wia hayeke handaata꞉ koto pi la꞉ wieke ekita꞉ ota꞉ miekeme. \p \v 16 Hali homeke ma꞉nda꞉ma꞉ ota꞉ pi loluekema꞉ta꞉ kota꞉ ota꞉ mo paeyaona꞉ bikimanu tombuao ota꞉ manda hala꞉ biki ula꞉ halina꞉ biki laa la꞉ wita꞉la꞉ pi lea꞉ka꞉na꞉ta꞉ kota꞉ koto pima꞉ta꞉ mo pi yoka꞉ alualu piki pi aleme ekimanu pa tunkulalieke. \v 17 Koda꞉ make mo hande pi la꞉ wiekeeki mulu peleme wanda꞉hali pa꞉ta꞉ ipika꞉ puluekee laa la꞉ wiekeeki ota꞉ topo na pea꞉peke ya꞉la꞉eki peneme yaaluekema꞉ ipikana꞉ma꞉ hali keke wita꞉la꞉ pima꞉ apa꞉tao la꞉ wiekeme. \v 18 Koda꞉ma꞉ koto topo pea꞉peke na yo yayapiki pi na lo pea꞉peke yekeeki yaapo wina꞉ leekeme. Ipika꞉ oto nane tinki pa haloma꞉ wanda꞉hali nikita꞉ nika꞉ hone ti laloma꞉eki ota꞉ miniki hamono yeke do koto pi yaapoma꞉ta꞉ nika꞉ puki tieke wopu mea tiala꞉me. \v 19 Do hone ti laloma꞉ ekina꞉ta꞉ nika꞉ temoko epeke tupa꞉ halo pa꞉la꞉ ekina꞉ da̱o̱la hasa꞉ ekina꞉ teke ula꞉me. Koto teketa꞉ mo hepeni nane yeni pu hala꞉ dana꞉ tupele dau tieke hoki nane ula꞉ yako piki da panda꞉ tukiki nane yopua ula꞉me. \v 20 Niki tamba꞉ muluekema꞉ta꞉ koto yako piki da panda꞉na꞉ pota꞉ pilaluekema꞉ Yesu amba꞉la amba꞉ yapeekeme. Ipikana꞉ma꞉ mo hande amba꞉ hayeke some Melekisedeke hayeke tupa꞉ ipika꞉ anke teke mea mo Yeni Peaasa꞉ You Hali na paeke hao hala꞉me. \c 7 \s1 Yeni peao hayeke hali Melekisedeke \p \v 1 Do Melekisedeketa꞉ Seileme dana꞉ kini hali hayekeme. Kutaa make mo hande manda hala꞉ Koda꞉ pa꞉ta꞉ wanda꞉halina꞉ pi lawaasa꞉ hali hayekeme. Mo hande Eipoloha꞉ma꞉ma꞉ mo hande kini hali tonkopu ame̱le̱ a꞉nda꞉ pea bepolao da la꞉ka꞉la pulu haena꞉ do Melekisedekema꞉ manda꞉ hande peaata꞉ ipika꞉ epeaasa꞉ pima꞉ Eipoloha꞉ma꞉ wamo piekeme. \v 2 Kutu pieketa꞉ Eipoloha꞉ma꞉ma꞉ Melekisedeke pa꞉ta꞉ mo hande da pambolo hata꞉ mieke alemanu paeyaota꞉ kiki yaapo yeketa꞉ homeke hondota꞉ Melekisedeke hala꞉tiki piekeme. Do Melekisedeke la꞉la꞉ biki teke titina꞉ ekita꞉ Tikitiki piki hauna꞉ kini halie laa la꞉la꞉me. Kutaa make mo ipika꞉ biki Seileme dana꞉ kini halie la꞉la꞉ bikina꞉ teketa꞉ A꞉nda꞉ peliaasa꞉ ekina꞉ kini halie laa la꞉la꞉me. \v 3 Koto hali ipika꞉ inkiki atekena꞉ biki make o atekena꞉ atekena꞉ biki make o ipikita꞉ do natena꞉ mendiekeme laa make o ipikita꞉ do natena꞉ homeekeme laa make ota꞉ na wape pea ula꞉me. Koto ekima꞉ta꞉ ipikita꞉ Koda꞉na꞉ Eiyeke tupa꞉ wanda꞉halina꞉ pa u halo pa꞉la꞉ yeni peaasa꞉ hali hao hala꞉me. \p \v 4 Nika꞉ tapakena꞉ kini peala꞉ biki tieke ula꞉ hali Eipoloha꞉ma꞉ma꞉ mo hande a꞉nda꞉na꞉ bepolao mieke alemanu paeyao kiki yaapo yeketa꞉ homeke Melekisedeke hondo hala꞉tiki hala꞉tiki piekeme. Eipoloha꞉ma꞉ma꞉ koto pieke ekima꞉ta꞉ Melekisedekena꞉ lombei piki biki tieke wieke yekeeki taa peneme yao ula꞉ handa꞉e. \v 5 Mo hande amba꞉ hayeke hali Lipae ipika꞉ eiyekena꞉ eiyeke tonuta꞉ yeni peaasa꞉ haliweki ombu hatiki pulu pulu haemekeme. Koto yeni peaasa꞉ hau pia꞉tiki pimiki ekita꞉ mo Lo Pi la꞉ wieke tupa꞉ opitolo hata꞉ Isulai wanda꞉halina꞉ kiki yaapo alena꞉ homeke hondo mea꞉tiki pimikime. Mo wanda꞉halita꞉ Eipoloha꞉ma꞉na꞉ eiyeke tonu ikita꞉ homeke hama̱la̱꞉ hama̱la̱꞉ yekepate kone mo Lipae tapakema꞉ ika꞉ kiki yaapo ale manuna꞉ homeke hondo mea꞉tiki pimikime. \v 6 Melekisedeketa꞉ Lipaena꞉ tapake hali na hayekepate mo hande Koda꞉na꞉ la꞉ wiekeeki mieke hali Eipoloha꞉ma꞉na꞉ kiki yaapo ale manuna꞉ homeke homeke lo hondo haleeke ekimanu meata꞉ ipikana꞉ma꞉ Eipoloha꞉ma꞉ wamo pita꞉la꞉ pimanu leekeme. \v 7 Wamo pita꞉la꞉ pi ala꞉ halita꞉ manda hala꞉pate pa mo wamo pita꞉la꞉ pi ala꞉eki opita꞉la꞉ halita꞉ oto nane hala꞉me. Koto hauta꞉ niki paeyaoma꞉ hone uluma꞉me. \v 8 Hande Lipaena꞉ tapaketa꞉ homa꞉peke yeke haliweki hata꞉ kone mo hande wanda꞉halina꞉ kiki yaapo wikieki manuna꞉ homeke hondo mia꞉tiki pimikipate pa mo Baiboloma꞉ na homeke pa hao hala꞉ halie la꞉la꞉ Melekisedekema꞉ta꞉ mo hande kiki yaapo alena꞉ homeke homeke lo hondo taiti miekeme. \v 9 Koto ekina꞉ta꞉ nikana꞉ma꞉ dupiki pi lapeke ya꞉la꞉me. Eipoloha꞉ma꞉ Melekisedeke pa꞉ta꞉ mo hande taiti haleeke yeke ekita꞉ Lipaema꞉ make haleekeme. \v 10 Ekipa pieke yekea. Hande Melekisedekema꞉ Eipoloha꞉ma꞉ manda꞉ hande pieke pita꞉ma꞉ta꞉ Lipaeta꞉ a̱i̱ na mendieke yekepate ipika꞉ atekena꞉ atekena꞉ ateke Eipoloha꞉ma꞉na꞉ loke tukiki pa꞉ta꞉ pitiekeme. \p \v 11 Koda꞉ma꞉ Isulai wanda꞉hali pa꞉ta꞉ ipika꞉ Lo Pimanu wieke ekina꞉ teketa꞉ mo Lipae tapakema꞉ ika꞉ yeni peaasa꞉ tapake haena꞉ yeke wiekeme. Do Yeni peaasa꞉ tapakema꞉ ika꞉ yeni peaasa꞉ e pokemeke ekimanu a꞉nda꞉ ata꞉ka꞉ na piki ota꞉ tikitiki pimika꞉na꞉ yoluta꞉ kota꞉ mo ta꞉ta꞉ piki yeni peaasa꞉ hali na opolo epolo piekeme. Do epolo pieke ta꞉ta꞉ piki yeni peaasa꞉ halita꞉ Etonina꞉ anketeke mieke some dia꞉yekepate mo hande Melekisedekena꞉ anketeke mieke some epeekeme. \v 12 Kota꞉ mo yeni peaasa꞉ tapake homeke yokaa tapake ma꞉nda꞉ haena꞉ lea꞉ka꞉na꞉ta꞉ kota꞉ mo Lo Pi ula꞉ ekimanu make topo pea꞉peke ya꞉lieke. \v 13 Do aloma꞉ halita꞉ mo Lipae tapake hali na hayekeme. Kutupa make ipika꞉ tapake hali homeke a꞉nda꞉ ma꞉nda꞉ hondoma꞉ oloda pa꞉ta꞉ yeni pita꞉la꞉ hau na piekeme. \v 14 Koto ekita꞉ koto hande nika꞉ Tekehalita꞉ Diuda tapake pa꞉ta꞉ yama꞉ epeeke ekita꞉ niki paeyaoma꞉ hone uluma꞉me. Mo hande yeni peaasa꞉ ekina꞉ Mosesima꞉ pi pi leeke pita꞉ma꞉ta꞉ do Diuda tapakena꞉ biki na leekeme. \s1 Yesuma꞉ta꞉ Melekisedekena꞉ anketeke miekeeki \p \v 15 Mo opolo epeeke ta꞉ta꞉ piki yeni peaasa꞉ some ipika꞉ hauta꞉ mo hande Melekisedekena꞉ hau leke piki some yeekeme. Koto pa꞉la꞉ ekita꞉ peneme do ya꞉la꞉ handa꞉e. \v 16 Koto ipiki yeni peaasa꞉ hali haena꞉ leeke ekita꞉ pa wekima꞉ atekena꞉ anketeke mina꞉la꞉ tupa꞉ o mana꞉ pimanu wiekeeki mieke ekima꞉ na miekeme. Dia꞉me mo da꞉ta hao hala꞉ ekina꞉ wele pita꞉la꞉eki homekema꞉ ipiki yeni peaasa꞉ hali mea haena꞉ leekeme. \v 17 Do ekina꞉ mo Baiboloma꞉ alota꞉ \q1 Nakana꞉ma꞉ Melekisedekena꞉ anketeke mea mo na paelo pa꞉la꞉ yeni peaasa꞉ hali hao halipikie la꞉la꞉me. \p \v 18 Kota꞉ mo hande amba꞉ pi la꞉ ula꞉ ekita꞉ honkopu na hake pa alema꞉ handa꞉leke handaa pa nane wina꞉ la꞉la꞉me. \v 19 Koto pieke ekita꞉ kota꞉ mo Mosesina꞉ Lo Pi wiekeeki manuma꞉ta꞉ hau ma꞉nda꞉ tikitiki na yaeyekeme. Kutu pieke yeketa꞉ niki ipiki teke pa꞉ta꞉ epomono Koda꞉ma꞉ mo Lo Pi wiekeeki ota꞉ lombei piki panake pota꞉ ma꞉nda꞉ wiawayekeme. \p \v 20 Koto pota꞉ homeke dia꞉ya꞉pate mo hande Koda꞉na꞉ hali keke ula꞉ pi make ula꞉me. Mo hande amba꞉ haemeke haliwekita꞉ yeni peaasa꞉ haliweki haena꞉ leeke pita꞉ma꞉ta꞉ dupiki hali keke pi wieke ekima꞉ handeteke haena꞉ na leekeme. \v 21 Pate Koda꞉ma꞉ Yesu yeni peaasa꞉ hali haena꞉ loluekema꞉ta꞉ ipiki pa꞉ta꞉ hali keke pi dupa la꞉ wiekeme. \q1 Tekehalima꞉ topo na pilieke laa la꞉ wieke hali keke pima꞉ alota꞉ \q1 Neketa꞉ bapi paeyaona꞉ yeni peaasa꞉ hali hao halipikie laa la꞉ ulume leekeme. \p \v 22 Yesuta꞉ mo niki epeaaluekema꞉ la꞉ wieke ula꞉ pina꞉ teke hali haena꞉yeke Koda꞉ma꞉ ipiki pa꞉ta꞉ koto hali keke pi la꞉ wiekeme. Koto ekina꞉ do panake la꞉ ula꞉eki niki pa꞉ta꞉ta꞉ mo amba꞉ la꞉ wiekeeki ota꞉ lombei pa꞉la꞉me. \p \v 23 Ipikana꞉ma꞉ ta꞉ta꞉piki hau ma꞉nda꞉ make pa꞉la꞉me. Koto pa꞉la꞉ hauta꞉ dupa pa꞉la꞉me. Amba꞉ hande yeni peao haemeke haliweki ika꞉ e mina꞉pa꞉lao homa꞉tiki pea꞉peke yeke handaa ikita꞉ eleke eleke haena꞉ leekepate \v 24 Yesuta꞉ pa hao haleke handaa ipika꞉ yeni peaasa꞉ ekita꞉ ma꞉nda꞉ pa꞉ta꞉ hala꞉peke na ya꞉la꞉me. \v 25 Koto pa꞉la꞉ ekima꞉ta꞉ wetepe make ame do make mo ipiki pa꞉ta꞉ yama꞉ Koda꞉ pa꞉ta꞉ ipilimi wanda꞉halita꞉ ota꞉ da꞉taapeke ya꞉la꞉me. Pa ekipeke ipikana꞉ma꞉ ikina꞉ Koda꞉ pa꞉ta꞉ honke latiki puluekema꞉ hao hala꞉me. \p \v 26 Koto ekina꞉ Yesuta꞉ Yeni Peao Hala꞉ You Hali hata꞉ nika꞉ ka꞉nda꞉manu ana꞉na꞉ tamba꞉ mea꞉peke ya꞉la꞉me. Ipikita꞉ yako piki hali hala꞉me. Kutupata꞉ ipiki pa꞉ta꞉ eki a꞉nda꞉ ma꞉nda꞉ o hoke hau ma꞉nda꞉ ota꞉ na ula꞉me. Ipika꞉ hauta꞉ hoke hau pu haleme wanda꞉halina꞉ hau leke na pieke handaa Koda꞉ma꞉ Neketa꞉ ota꞉ ta꞉ta꞉ pa꞉la꞉ halie laa ota꞉ oli hepeni manda nane mini liao haena꞉ la꞉la꞉me. \v 27 Koto ekima꞉ ipikita꞉ mandane yeni peao haleme haliweki tupa꞉ na hala꞉me. Pa ekipeke koto yeni peaasa꞉ haliweki ikana꞉ma꞉ta꞉ wanda꞉halina꞉ hoke hau a꞉mbaena꞉ ma꞉na꞉ lialuekema꞉ta꞉ nate ma꞉nda꞉ ma꞉nda꞉ lo titina꞉ ika꞉ hoke hau amba꞉la a꞉mbaena꞉ ma꞉na꞉ lia hala꞉tiki pu halemepate Yesuma꞉ta꞉ koto tupa꞉ na piekeme. Ipikana꞉ma꞉ wanda꞉halina꞉ hoke hau paeyaaluekema꞉ ma꞉na꞉ lia hala꞉tiki pu halemepate Yesuma꞉ta꞉ koto tupa꞉ na pita꞉la꞉me. Ipikana꞉ma꞉ wanda꞉halina꞉ hoke hau paeyaaluekema꞉ ma꞉na꞉ lia halemeke tupa꞉ ipiki kone Koda꞉ pa꞉ta꞉ haleekeme. Koto ekita꞉ ota꞉ paeyaaso hata꞉ hoto homeke homeke peao paeyaeyekeme. \v 28 Hande Lo Pi manuma꞉ mo yeni peaasa꞉ you haliweki haena꞉ loluekema꞉ta꞉ pa epe na piki haliweki mea hao hala꞉pate Koda꞉ma꞉ mo Lo Pi hoki nane hali keke witolo ipika꞉ la꞉ wieke pima꞉ta꞉ ipika꞉ Eiyeketa꞉ Yeni Peao Hala꞉ You Hali haena꞉ la꞉la꞉me. Kutaata꞉ kota꞉ Koda꞉ma꞉ ipika꞉ Eiyeke hoto paeyao ota꞉ ala꞉ta꞉ na ta̱leke epea haena꞉ yeke ma̱leke lila꞉me. \c 8 \s1 Yesuta꞉ nika꞉ Yeni Peaasa꞉ You Hali \p \v 1 Ameta꞉ kota꞉ do nikana꞉ma꞉ aloma꞉ pina꞉ teketa꞉ dupae. Yeni Peaasa꞉ You Halita꞉ oli hepeni nane hala꞉ Kini Hali Tiekena꞉ pita꞉la꞉ ale tieke popeke nanema꞉ pila꞉me. \v 2 Kutupa ipikita꞉ Koda꞉na꞉ yako piki dana꞉ Yeni Peao Hala꞉ You Hali hala꞉me. Koto yeni data꞉ halima꞉ a꞉ela꞉ da dia꞉ ya꞉la꞉pate pa ota꞉ Koda꞉ma꞉ haena꞉ la꞉la꞉ dae. \p \v 3 Yeni Peao Hala꞉ You Haliweki paeyaota꞉ pa hala꞉la꞉ alemanu make lia hala꞉la꞉ ekimanu make Koda꞉ pa꞉ta꞉ halaena꞉ mea haena꞉ lo hala꞉me. Koto tupa꞉ kone nika꞉ Yeni Peao Hala꞉ You Hali make Koda꞉ pa꞉ta꞉ pa hala꞉la꞉ ale ma꞉nda꞉ haluekema꞉ miniki hapeke ya꞉la꞉me. \v 4 Kota꞉ a꞉nda꞉ ipikana꞉ma꞉ do kenkena꞉ pa haya꞉ka꞉na꞉ yoluta꞉ kota꞉ ipikita꞉ yeni peaasa꞉ hali na halo pia꞉me. Pa ekipeke. Do kenkena꞉ta꞉ mo Diu wanda꞉halina꞉ Lo Pima꞉ mea haena꞉ la꞉la꞉ yeni peao hala꞉ haliwekima꞉ mo pa hala꞉la꞉ alemanu halolo ombu halememe. \v 5 Ikana꞉ma꞉ oli hepeni nane hala꞉ ota꞉ yeni dana꞉ manda꞉ mea pitemepate pa do kenkena꞉ alu pulu pa꞉la꞉ yeni da pa꞉ta꞉ e pokaasememe. Koto yeni data꞉ mo hepeni hala꞉ ota꞉ dana꞉ su̱a̱ su̱a̱ma꞉ handa꞉la꞉eki homeke hala꞉me. Mo hande Mosesi haena꞉ pieke tupa꞉ kone pa pa꞉la꞉me. Mosesima꞉ mo hande palai da a꞉eluekema꞉ haena꞉ Koda꞉ma꞉ ipiki pa꞉ta꞉ alota꞉ Mo dana꞉ pulu pa꞉la꞉ hau paeyaota꞉ mo hande pote pa꞉ta꞉ waloa꞉ tupa꞉ kone ota꞉ hone wopu wia pea꞉peke. \v 6 Koto haumanu pimikipate ameta꞉ Yesu pa꞉ta꞉ haleeke yeni peaasa꞉ eta꞉ mo amba꞉ yeni peaasa꞉ haliwekina꞉eki ota꞉ lombei pikieki haleekeme. Pa ekipeke. Ipikita꞉ Koda꞉ma꞉ mo wanda꞉hali ame̱le̱ ika꞉ pi la꞉ witeleme ekina꞉ ka꞉pa hali hala꞉me. Do Koda꞉ma꞉ ipika꞉ wanda꞉hali ame̱le̱ la꞉ u alualu pa꞉la꞉ pima꞉ta꞉ mo hande amba꞉ la꞉ wimiki ekita꞉ ota꞉ lombei pa꞉la꞉me. Kota꞉ koto pa꞉la꞉ ekima꞉ta꞉ do la ula꞉eki pea꞉peke ekina꞉ la꞉ ula꞉ pima꞉ta꞉ mo hande amba꞉ pi la꞉ wiekeeki ota꞉ lombei pa꞉la꞉me. \s1 Panake pi la꞉ wiekeeki \p \v 7 Mo amba꞉ titina꞉ la꞉ wieke pima꞉ eki a꞉nda꞉ na pia꞉ka꞉na꞉ yoluta꞉ kota꞉ Koda꞉ma꞉ pa mo panake la꞉ wita꞉la꞉ pi make na la꞉ ulu pia꞉me. \v 8 Pate Koda꞉ma꞉ ipika꞉ wanda꞉halina꞉ pu hoeyaemeke ekimanu handolo hata꞉ do pimanu leekeme. \q1 Koda꞉ma꞉ alota꞉ Opua꞉pe. Mo Isulai tapake pita꞉ Diuda tapake yaapo iki pa꞉ta꞉ ya panake pi la꞉ wia꞉peke nate epolo pa꞉la꞉ nate manuta꞉ ipula꞉me. \q1 \v 9 Do panake la꞉ wia꞉peke pita꞉ mo hande amba꞉ ika꞉ meiyeke tonu pa꞉ta꞉ la wita꞉la꞉ pi la꞉ ua꞉ tupa꞉ dia꞉me. Koto ika꞉ meiyeke tonu mo hande Idiepi kenketa꞉ ya kikima꞉ yoka꞉ mea tapaaso hata꞉ iki pa꞉ta꞉ ya la witolo pi la꞉ ua꞉pate koto hande la꞉ ua꞉ pi ikana꞉ma꞉ wopu miniki na hake baemekeme. Kutu pimiki handaata꞉ I̱ma꞉ iki hoki walaa kiaowa꞉me laa Koda꞉ma꞉ la꞉la꞉me. \p \v 10 Pate pa ame mo Tekehalima꞉ alota꞉ \q1 Mo ipulua꞉ nate nina꞉ta꞉ mo Isulai wanda꞉hali ame̱le̱ la꞉ ulu polo panake pita꞉ dupa la꞉ ulueke laata꞉ Mo ya pi ulu pi manuta꞉ ika꞉ hone teke pa꞉ta꞉manu wina꞉ laota꞉ ika꞉ puki manuna꞉ make wape pealueke. Kutaa I̱ta꞉ ika꞉ Koda꞉ halueke. Kutu pua꞉ka꞉na꞉ta꞉ ikita꞉ ya wanda꞉hali halimikie. \q1 \v 11 Koto nate nina꞉ta꞉ hali ma꞉nda꞉ma꞉ ipika꞉ da haliweki pa꞉ta꞉ make o ipika꞉ ateke hameke tonu pa꞉ta꞉ make pi walolo hata꞉ alo alota꞉ Tekehali hone wipee pi na lelieke. \q1 Pa ekipeke. I̱ta꞉ ota꞉ mo natehali wanda꞉halina꞉ kini pea pua ota꞉ hamoko tieke hala꞉ wanda꞉hali paeyao sikima꞉ta꞉ I̱ ana꞉na꞉ hone wilimikie. \q1 \v 12 Kutaata꞉ ika꞉ pu hoeyaasa꞉ haumanu paeyaota꞉ I̱ma꞉ pa paeyaalueke. Kutupa make ika꞉ hoke hau paeyao I̱ma꞉ hone ma꞉nda꞉ na wiki hoto paeyao hone yonka꞉latiki pulueke laa leekeme. \p \v 13 Koda꞉ma꞉ mo panake pi la꞉ wita꞉la꞉ pi la꞉ wieke pita꞉ma꞉ta꞉ mo hande titina꞉ wieke pita꞉ amba꞉eki ya꞉na꞉ leekeme. Ala꞉ta꞉ ma꞉nda꞉ a꞉nda꞉ pitiki yaalo kukutu pia꞉ka꞉na꞉ta꞉ kota꞉ hosiki wetepena꞉ta꞉ ota꞉ alupilieke. \c 9 \s1 Ala꞉ta꞉ na taleke hotekena꞉ we mea hala꞉tiki pimikieki \p \v 1 Mo titina꞉ pi la꞉ wita꞉la꞉eki wieke pita꞉ma꞉ta꞉ Koda꞉ma꞉ ipika꞉ wanda꞉halina꞉ yeni pitolo pea꞉peke hau paeyaona꞉ mana꞉ pimanu make la haleekeme. Kutupa do kenkena꞉ mo wanda꞉halima꞉ta꞉ ika꞉ yako piki yeni da make haena꞉ a꞉eyo haemekeme. \v 2 Ikana꞉ma꞉ palai da homeke a꞉eyaa haena꞉ lemekeme. Mo data꞉ tupele pu alu pimikime. Mineke da panda꞉na꞉ bikita꞉ Yako Piki Da Panda꞉e. Koto pa꞉ta꞉ta꞉ ola꞉pake keo panka꞉la꞉ ale make teipolo make kutupa mo teipolo mandata꞉ mo Koda꞉ pa꞉ta꞉ hala꞉la꞉ palaowa kitiki make wiekeme. \v 3 Da panda꞉ ma꞉nda꞉ta꞉ aka꞉ tiekema꞉ tupele hao pambeekeme. Koto da panda꞉na꞉ bikita꞉ Ota꞉ Yako Piki Da Panda꞉e. \v 4 Mo Ota꞉ Yako Piki Da Panda꞉ pa꞉ta꞉ta꞉ mo totopo piki ale yankaasa꞉ oloda make mo hande pi la꞉ u alu pa꞉la꞉ pi la꞉ wieke bokosi make wiekeme. Mo bokosi pita꞉ oloda yaapota꞉ tima꞉ wepia manda naneta꞉ kolo kitao a꞉mbaemekeme. Mo bokosi pa꞉ta꞉ wieke ale manuta꞉ kolo kanakena꞉ ma꞉na pamba꞉ paleke u make Etonina꞉ tumaputa꞉ pa ipika꞉ kone katake haluekema꞉ tindiki lu paleke u make mo hande pi ula꞉eki wape pieke toopi sopo yaapo make koto ale paeyao panka wiekeme. \v 5 Koto bokosi manda naneta꞉ Koda꞉ma꞉ niki ame̱le̱ hala꞉meeki walolo enisolo leke wepieke ale yaapota꞉ wepia handa꞉ alu pea haena꞉ lemekeme. Ipilika꞉ popakema꞉ta꞉ mo hoke hau a꞉mbaluekema꞉ we holo hayeke ale tikitiki peolaniao wipikime. Pa ameta꞉ do hau paeyaona꞉ tekemanu wopu wala꞉peke na ya꞉la꞉me. \p \v 6 Mo ale paeyaota꞉ koto tupa꞉ tikitiki yao wimiki alena꞉ mo yeni peao hala꞉ haliwekima꞉ mo hande mineke da panda꞉ pa꞉ta꞉ ika꞉ e pokuluekema꞉ hoto paeyao pua꞉tiki a꞉pa꞉tiki pu haemekeme. \v 7 Kutu pu haemekepate mo aka꞉ma꞉ tupele tukiki naneta꞉ ota꞉ mo Yeni Peaasa꞉ You Hali homeke peekeme. Ipikana꞉ma꞉ kutu piki hauta꞉ bapi homeke homekena꞉ hoto homeke homeke pua꞉tiki piekeme. Koto pa꞉ta꞉ta꞉ pa hameke pa na peekepate ota꞉ we mina꞉ paleke peekeme. Koto wema꞉ta꞉ mo somema꞉ ipika꞉ hoke hau make mo wanda꞉halima꞉ ika꞉ na handolo hata꞉ pimiki hoke haumanu make a꞉mbaena꞉ Koda꞉ pa꞉ta꞉ haleekeme. \v 8 Koto hau manuna꞉ta꞉ mo Holi Sipitidima꞉ niki pa꞉ta꞉ wala꞉la꞉ ekita꞉ dupae. Mo mineke da panda꞉ pa꞉ta꞉ pokemeke emanu a꞉nda꞉ pa pokolo haemeke pita꞉ma꞉ta꞉ mo hande Ota꞉ Yako Piki Da Panda꞉ tukiki nane polo puma꞉ pota꞉ta꞉ na lumbu pa wiki pa poka꞉ pelia hayekeme. \v 9 Koto ekima꞉ta꞉ do ame haloma꞉ wanda꞉halina꞉ pitoloma꞉ hau peneme yawaluekema꞉ la꞉la꞉me. Koto ekita꞉ do ekina꞉ la꞉la꞉me. Mo wanda꞉halima꞉ ika꞉ Koda꞉ pa꞉ta꞉ hala꞉la꞉ alemanu make ma꞉na꞉ hoteke lia haleleme ekimanu make koto ale manuma꞉ta꞉ mo Koda꞉ yeiya꞉ lao haleme wanda꞉halina꞉ pukimanu ota꞉ ala꞉ta꞉ na talena꞉ yeke wamo peawapeke na ya꞉la꞉me. Ota꞉ dia꞉me. \v 10 Koto ale manuta꞉ pa ne ikali napeke ale o manda loke homeke tanda꞉pa꞉peke alemanue. Dota꞉ pa manda lokena꞉ mana꞉ pimanue. Hau paeyaota꞉ wetepe tikitiki yaaluekema꞉ yeke Koda꞉ma꞉ do mana꞉ pi pa ta꞉ka꞉li la꞉ wiekeme. \s1 Ketisona꞉ we \p \v 11 Ketisota꞉ amba꞉ a꞉pa꞉la꞉me. Kutaa ipikita꞉ mo hande Pi Seliapoma꞉ mea epeeke epeke hau paeyaona꞉ Yeni Peaasa꞉ You Hali hala꞉me. Kutaa make ame do ipikana꞉ma꞉ e poka꞉la꞉ yeni data꞉ mo hande amba꞉ hayeke yeni da ota꞉ lombei piki ala꞉ta꞉ ma꞉nda꞉ na taleke yeni da hala꞉me. Mo data꞉ halima꞉ a꞉eya haena꞉ la꞉la꞉ da dia꞉ma꞉ o do wepia ulu kenkena꞉ da dia꞉me. \v 12 Ketisoma꞉ mo da tukiki pa꞉ta꞉ pua mo Ota꞉ Yako Piki Da Panda꞉ pa꞉ta꞉ honda꞉ pamba puluta꞉ hande kao o sipisipina꞉ we Koda꞉ pa꞉ta꞉ haluekema꞉ na mea peekepate ota꞉ ipika꞉ we kone mea peekeme. Koto wema꞉ nika꞉ deto halo poloma꞉eki meala꞉me. \v 13 Mo nanikosi o hali kaona꞉ we make mo kao ikiki yankilie ekina꞉ yomuneke make koto ale yaapoma꞉ mo mana꞉ pi wieke ekina꞉ hoeya꞉ hapu haleme wanda꞉halina꞉ lokena꞉ tande la꞉ kitawaasa꞉ ekima꞉ ika꞉ manda lokena꞉ hoeya꞉ hapu haleme hau paeyaapeke ya꞉ka꞉na꞉ta꞉ \v 14 kota꞉ mo Ketisona꞉ wema꞉ta꞉ koto titina꞉ hau ota꞉ lombei peao hau tieke peaapeke ya꞉la꞉me laa hone wipee. Ipikana꞉ma꞉ta꞉ mo na paelo pa꞉la꞉ Sipitidi pa꞉ta꞉ yama꞉ ala꞉ta꞉ ma꞉nda꞉ na ta̱lekeeki ipiki kone Koda꞉ pa꞉ta꞉ haleekeme. Nikana꞉ma꞉ mo da꞉ta hao hala꞉ Koda꞉na꞉ e ana꞉na꞉ pokomono ipika꞉ wema꞉ nika꞉ hone teke pa꞉ta꞉ ula꞉ popeke na piki haumanu tandepo halieke. \s1 Mo panake la꞉ ula꞉ pina꞉ teketa꞉ Ketisona꞉ we \p \v 15 Koto ekina꞉ta꞉ Ketisoma꞉ mo hande panake la꞉ ula꞉ pina꞉ honkopu hawaasa꞉ ka꞉pa hali hata꞉ta꞉ wanda꞉halima꞉ mo hande amba꞉ pi wiekeeki oto pa꞉ta꞉ hata꞉ pimiki hoke haumanu bepolao ka꞉la꞉pa꞉ tapaaluekema꞉ yeke ikina꞉ homeekeme. Kutu pieke ekita꞉ ipikana꞉ma꞉ mo hande Koda꞉ma꞉ wi la꞉la꞉ wanda꞉halima꞉ Koda꞉ ipika꞉ pi la꞉ wieke na paeta꞉la꞉ epeaasa꞉ ekimanu mina꞉yeke piekeme. \p \v 16 Hali ma꞉nda꞉ma꞉ ipika꞉ homa꞉pekeeki teke pa꞉ta꞉ ya꞉la꞉ma꞉ hone witolo ipika꞉ wekiwandikima꞉ ipika꞉ wina꞉ laa homolo pa꞉la꞉ ale manuta꞉ ipika꞉ hone pa꞉la꞉ tupa꞉ telipina꞉ta꞉ ipika꞉ pi la꞉ wita꞉la꞉ ekimanu tameiya꞉na꞉ wape pea wilieke. Kutu pilia꞉ hoki nane mo weki wandikima꞉ ika꞉ apa꞉na꞉ anke teketa꞉ mo tameiya꞉na꞉ la꞉la꞉ tupa꞉ muluekema꞉ hone wimika꞉na꞉ta꞉ kota꞉ mo handeteke hala꞉ haliwekima꞉ mo someta꞉ ota꞉ homea꞉pe laa titina꞉ amba꞉la weilimikie. \v 17 Kutu piliepate mo hande tameiya꞉ wape pa꞉la꞉ some pa haya꞉ka꞉na꞉ta꞉ kota꞉ mo wapena꞉ la꞉ ula꞉ pita꞉ a̱i̱ na yaalieke. Pate mo some ota꞉ homea꞉ka꞉na꞉ta꞉ kota꞉ mo ipika꞉ wapena꞉ laa la꞉ ula꞉ pita꞉ ota꞉ yaalieke. \v 18 Koto hau tupa꞉ta꞉ mo Koda꞉na꞉ amba꞉ hande titina꞉ pi la꞉ wiekeeki wanda꞉hali pa꞉ta꞉ ota꞉ yaaluekema꞉ mo hotekena꞉ wema꞉ wele peayekeme. \v 19 Kutu piekepate titina꞉ amba꞉lata꞉ Mosesima꞉ mo hande Koda꞉na꞉ pi ula꞉eki paeyao homeke la la pu mo wanda꞉hali pa꞉ta꞉ la hale hale piekeme. Kutaata꞉ ipikana꞉ma꞉ hali kaona꞉ we pita꞉ nanikosi we yaapo mea ikali taapuna꞉ apa꞉taota꞉ mo hisopi tina꞉ paleke katake hake pita꞉ wepiki wulu tonka꞉na꞉ apa꞉tao mo we pa꞉ta꞉ peiyaota꞉ Koda꞉na꞉ pi wieke buka pa꞉ta꞉ tonka꞉na꞉ tande laata꞉ wanda꞉halina꞉ lokena꞉ make tande lo kitaeyekeme. \v 20 Kutu pitolo hata꞉ Mosesima꞉ mo wanda꞉hali pa꞉ta꞉ alota꞉ Ikana꞉ma꞉ mo Koda꞉na꞉ pi ula꞉eki miniki hata꞉ tolu hamena꞉ yeke do wema꞉ta꞉ Koda꞉ma꞉ mo iki pa꞉ta꞉ la꞉ wita꞉la꞉ pi tombo wala꞉la꞉me leekeme. \v 21 Koto tupa꞉ kone Mosesima꞉ mo palai da manda make tukiki pa꞉ta꞉ ula꞉ Koda꞉ pa꞉ta꞉ yeni puluekema꞉ mu hala꞉ alemanu paeyao make mo hande we tande laa kita kita piekeme. \v 22 Ota꞉ alome. Mo pi ula꞉ bukama꞉ la꞉la꞉ tupa꞉ta꞉ mo we homekema꞉ ala꞉ta꞉ ala꞉ta꞉ paeyao yako peaasa꞉me. Kutaa make we na lombea꞉ka꞉na꞉ta꞉ hoke hau paeyaapeke na yelieke. \s1 Ketisona꞉ we lombeke ekima꞉ hoke hau yokawala꞉eki \p \v 23 Mo hande palai da make mo yeni puluekema꞉ mu haleme alemanu paeyao make oli hepeni nane ula꞉ alemanu manda꞉na꞉ uleke handaa mo hande hoteke lia we kitaasa꞉ hauma꞉ta꞉ yako peaasa꞉pate pa mo hepeni nane ula꞉ ale manuta꞉ mo lia hala꞉la꞉ hau ota꞉ lombei piki ekima꞉ homeke peaapeke ya꞉la꞉me. \v 24 Kota꞉ mo ota꞉eki manda꞉ meaaso hata꞉ haliwekima꞉ a꞉emeke Yako Piki Da pa꞉ta꞉ Ketiso na peekeme. Pate ipikita꞉ ota꞉ hepeni nane peekeme. Kutupa ameta꞉ Koda꞉na꞉ leke popelekena꞉ nikina꞉ hao hala꞉me. \p \v 25 Mo Diu wanda꞉halina꞉ Yeni Peao Hala꞉ You Halima꞉ta꞉ mo hoteke wemanu mea mo Ota꞉ Yako Piki Da Panda꞉ pa꞉ta꞉ bapi homekena꞉ tana꞉ homeke homeke pua꞉tiki pu hala꞉pate pa Ketisota꞉ hepeni nane pua ipika꞉ da꞉ta꞉la꞉eki kone Koda꞉ pa꞉ta꞉ tana꞉ eleke eleke hala꞉tiki na piekeme. \v 26 Kota꞉ a꞉nda꞉ tana꞉ eleke eleke pua꞉tiki pia꞉ka꞉na꞉ yoluta꞉ kota꞉ Koda꞉ma꞉ mo kenke kini pea wepia꞉ dina꞉ kone kini pea pua ame do make Ketisoma꞉ tanda tieke wopu mia꞉tiki mia꞉tiki pu halo pia꞉me. Kutu na pikita꞉ ame do paetolo naneta꞉ Ketisoma꞉ ipika꞉ homeeke ekima꞉ kone mo hoke hau yokawaluekema꞉ tana꞉ homeke homeke opolo epeekeme. \v 27 Wanda꞉hali paeyao tana꞉ homeke homaa hoki naneta꞉ Koda꞉ma꞉ pi yokaalu pina꞉ handeteke halieke. \v 28 Koto tupa꞉ kone Ketisoma꞉ wanda꞉hali wopuna꞉ hoke hau yokawaluekema꞉ lia we hala꞉la꞉ hoteke tupa꞉ hoto homeke homekema꞉ homeekeme. Ipikana꞉ma꞉ hoto ma꞉nda꞉ opolo epolo pa꞉la꞉ ekita꞉ wanda꞉halina꞉ hoke hau yokawaluekema꞉ dia꞉ ya꞉la꞉pate pa mo ipiki epena꞉ yuwia haleme wanda꞉hali peteluekema꞉ homeke ipilieke. \c 10 \s1 Hoteke wema꞉ta꞉ hoke hau na yokeekeeki \p \v 1 Mo Diu wanda꞉halina꞉ pi ula꞉eki manuta꞉ mo wetepe epolo pa꞉la꞉ ota꞉ hau seliapo tupa꞉ dia꞉me. Pa mo koto hauna꞉ su̱a̱ su̱a̱ tupa꞉ homeke ula꞉me. Wanda꞉halima꞉ mo pi ula꞉eki miniki hata꞉ bapi paeyao hotekena꞉ we hala꞉tiki hala꞉tiki pimikime. Kutu pimikipate mo hande pi ula꞉ ekima꞉ta꞉ hotekena꞉ wema꞉ mo Koda꞉ pa꞉ta꞉ yeni pulu polo peleme wanda꞉hali epeaapeke na yeekeme. \v 2 Mo hande hoteke wema꞉ta꞉ mo Koda꞉ pa꞉ta꞉ yeni pita꞉la꞉ wanda꞉hali ota꞉ yako pea ya꞉ka꞉na꞉ yoluta꞉ ika꞉ hoke hauma꞉ iki yaala꞉ peatiki na pulu pia꞉me. Kutu pia꞉ka꞉na꞉ yoluta꞉ mo hoteke we hala꞉la꞉ hau amba꞉ kone paelo pia꞉me. \v 3-4 Pate mo hali kao o nanikosi wema꞉ta꞉ hoke hau ota꞉ yokawapeke na yeke handaata꞉ mo bapi paeyao we hala꞉tiki pimiki ekima꞉ta꞉ ika꞉ pimiki hoke haumanu paa niminaa tiatiki pu halememe. \p \v 5 Kutu piki hau wieke ekina꞉ Ketisoma꞉ do kenkena꞉ ipuluekema꞉ hata꞉ Koda꞉ pa꞉ta꞉ alota꞉ \q1 Nakana꞉ma꞉ mo hoteke we hala꞉la꞉ hau pita꞉ pa hameke hala꞉la꞉ hau yaapota꞉ hone na ulu pelepate I̱ta꞉ ota꞉ loke hano tikitiki yawaleme. \q1 \v 6 Mo hoteke tieke tonka꞉na꞉ yanka hala꞉la꞉eki o hoke hau a꞉mbaena꞉ we hala꞉la꞉eki make nakana꞉ma꞉ ta꞉na꞉ma꞉ na homeleme laa \q1 \v 7 I̱ma꞉ alota꞉ Koda꞉o. Mo naka꞉ pi ula꞉ bukana꞉ wape pa꞉la꞉ tupa꞉ naka꞉ ekihau hone pa꞉la꞉eki pealuekema꞉ do halome alome leekeme. \p \v 8 Ipikana꞉ma꞉ titina꞉ amba꞉la leeke ekita꞉ dupa Hoteke lia hala꞉la꞉eki o pa hameke hala꞉la꞉eki o yanka hala꞉la꞉eki make o hoke hau a꞉mbaena꞉ we hala꞉la꞉eki kutu piki hau paeyao mo pi ula꞉ bukama꞉ pea꞉peke la꞉la꞉pate kone nakana꞉ma꞉ kota꞉ haumanu pa꞉ta꞉ ta꞉na꞉ma꞉ na homo make hone na pime leekeme. \v 9 Kutaa yaapo peao alota꞉ Koda꞉o. Naka꞉ ekihau hone pa꞉la꞉eki pealuekema꞉ do halome leekeme. Koto leeke ekima꞉ta꞉ ipikana꞉ma꞉ mo amba꞉ hau yoka pa mo wetepe epolo pieke panake taka꞉lake hau mea tiaeyekeme. \v 10 Yesu Ketisoma꞉ ipika꞉ Atekena꞉ pi teliolo hata꞉ Atekena꞉ hone piekeeki paeyao pitolo ipika꞉ loketa꞉ paa pa hameke hala꞉la꞉ hoteke we leke pa hoto homeke homeke halaa paeyaeyekeme. Koto pa꞉la꞉ ekima꞉ta꞉ nika꞉ hoke haumanu pa paeyao yokaa yako pea hamono la꞉la꞉me. \s1 Ketisona꞉ homa꞉la꞉ ekima꞉ta꞉ hoke hau ota꞉ paeyaala꞉me \p \v 11 Mo Diu yeni peao hala꞉ haliwekima꞉ ika꞉ eta꞉ nate paeyao pokolo ombu hao halememe. Kutupa mo hoteke we make ikana꞉ma꞉ hoto eleke eleke hala꞉tiki hala꞉tiki pu halememe. Kutu pu halemepate koto hoteke we hala꞉la꞉ ekima꞉ta꞉ hoke hau ota꞉ paeyaapeke na ya꞉la꞉me. \v 12 Pate Ketisoma꞉ hoke hau paeyaaluekema꞉ta꞉ hoto homeke homeke ipika꞉ da꞉ta꞉la꞉eki halaeyekeme. Koto homa꞉la꞉ ekima꞉ epe ala꞉ ekita꞉ topo na piki pa u pelia halieke. Kutu pu paeyeketa꞉ ipikana꞉ma꞉ Koda꞉na꞉ kiki popeke nanema꞉ pitiekeme. \v 13 Koto pa꞉ta꞉ta꞉ Ketiso ipika꞉ a꞉nda꞉ tunkuliki haliweki ipika꞉ anke oto nane Koda꞉ma꞉ mea haena꞉ lena꞉ yeke yu wia handeteke hala꞉me. \v 14 Ipikana꞉ma꞉ mo hoke haumanu paeyawaena꞉ la haleme wanda꞉halita꞉ ipika꞉ hoto homeke homeke homeeke ekima꞉ ikita꞉ ota꞉ wamo peayekeme. Koto ekita꞉ ota꞉ na paelieke. \p \v 15 Kotoeki kone mo Holi Sipitidima꞉ peneme yao la kitolo alota꞉ \q1 \v 16 Mo Tekehalima꞉ mandane natemanu ipilie dina꞉ta꞉ ya pi la꞉ wita꞉la꞉ pi ma꞉nda꞉ iki pa꞉ta꞉ la꞉ ulueke laa mo pi la꞉ witolo pita꞉ dupae. \q1 Yaka pi ula꞉eki paeyao ika꞉ puki pa꞉ta꞉ wiaota꞉ ika꞉ hone tekena꞉ wape pealueke la꞉la꞉me leekeme. \m \v 17 Pate pa pi ma꞉nda꞉ apa꞉taaso alota꞉ \q1 I̱ma꞉ ika꞉ hoke haumanu o ota꞉ pea꞉peke na yeke hoke hau pimiki ekimanu pa ame aneta꞉ hone ma꞉nda꞉ na ulueke la꞉la꞉me leekeme. \p \v 18 Koda꞉ma꞉ do koto hoke haumanu pa paeyaala꞉ hoki naneta꞉ mo hoteke lia hala꞉la꞉ hau manuta꞉ paa pea꞉peke na ya꞉la꞉me. \s1 Koda꞉ teke pa꞉ta꞉ hamana꞉e \p \v 19 Kame tonuo. Koto pa꞉la꞉ ekima꞉ta꞉ Yesuna꞉ wema꞉ nika꞉ pota꞉ wiawaleke handaa nikana꞉ma꞉ mo Ota꞉ Yako Piki Da Panda꞉ tukiki pa꞉ta꞉ ale ma꞉nda꞉ hone na wiki pa pua꞉peke ya꞉la꞉me. \v 20 Nikana꞉ma꞉ mo Ota꞉ Yako Piki Da Panda꞉ pa꞉ta꞉ honda꞉ pambomonota꞉ Ketisoma꞉ mo deto hala꞉ panake pota꞉ homeketa꞉ mo tupele dau ponda꞉pa꞉ lia wiaeyekeme. Koto tupele dauta꞉ ipika꞉ lokee. \v 21 Nika꞉ yeni peao hala꞉ hali tiekema꞉ Koda꞉na꞉ wanda꞉hali handeteke hala꞉me. \v 22 Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e. \v 23 Koda꞉ma꞉ ipika꞉ pi la꞉ ula꞉eki manuta꞉ ota꞉ na tunkulieke hone witoloma꞉ ekina꞉ta꞉ kota꞉ nika꞉ hone tulaasome aloma꞉ ekita꞉ ota꞉ wopu miniki hamana꞉ pia꞉pa꞉peke. \v 24 Niki paeyaoma꞉ nika꞉ nika꞉ kone pukima꞉ homa꞉ alualu pita꞉la꞉eki puluekema꞉ make epeke tamba꞉ mina꞉la꞉ hau pu alualu puluekema꞉ make ekipa sa꞉tia alualu pea hata꞉ pea꞉peke ya꞉la꞉pe hone umana꞉e. \v 25 Mo nika꞉ Ketiso kametonu ame̱le̱ mombolo haloma꞉eki manuta꞉ mandane wanda꞉halima꞉ mina꞉pa꞉lao haleme tupa꞉ nikana꞉ma꞉ na mina꞉pa꞉lamana꞉e. Kotoeki na pikita꞉ mo Tekehalina꞉ epolo pa꞉la꞉ nate teke pa꞉ta꞉ yoma꞉ a꞉pa꞉la꞉ ekina꞉ta꞉ nikana꞉ma꞉ nika꞉ nika꞉ kone hone utia alualu pumana꞉e. \s1 Koda꞉na꞉ Eiyeke hoki na walamana꞉e \p \v 26 Nikana꞉ma꞉ mo Koda꞉na꞉ ota꞉ pi opua hone witolo hata꞉ kone hoke hau pa pua꞉tiki pu haoma꞉ka꞉na꞉ta꞉ kota꞉ koto hoke hau paeyawaena꞉ hala꞉peke we ma꞉nda꞉ dia꞉ ya꞉la꞉pate \v 27 pa paala꞉ma꞉ homolo handeteke hapeke hau yaapo homeketa꞉ ula꞉me. Hau ma꞉nda꞉ta꞉ Koda꞉na꞉ pi yokaalu pulu pa꞉la꞉eki epolo pa꞉la꞉ekie. Ma꞉nda꞉ta꞉ mo Koda꞉ pa꞉ta꞉ a꞉nda꞉ liteme wanda꞉hali tolo pa꞉la꞉ wele wopu piki ti tala꞉eki epolo pa꞉la꞉ekie. \v 28 Mo Diu hali homeke ma꞉nda꞉ma꞉ Mosesina꞉ pi ula꞉eki yambieke handaa mo handa꞉la꞉ hali yaapo tepo manuna꞉ pima꞉ ota꞉ pie lemeketa꞉ kota꞉ koto hali pa꞉ta꞉ a꞉ta꞉ma꞉ na homeke homena꞉ lia꞉tiki pimikime. \v 29 Kutu piekeeki hone witolo hata꞉ nikana꞉ma꞉ mo hali homeke ma꞉nda꞉ma꞉ mo a꞉ta꞉ma꞉ homa tamba꞉ mina꞉la꞉ Sipitidi laasa꞉ pi alo make mo ipika꞉ hoke hau paeyaeyeke pi la꞉ ula꞉ weta꞉ pa ekie hone witolo hata꞉ make mo Koda꞉na꞉ Eiyeke hoki walaa paa pa alema꞉ handa ya꞉ka꞉na꞉ta꞉ kota꞉ koto hali pa꞉ta꞉ta꞉ eki hau opolo ipiliekee hone witemepe. Kutu pilie someta꞉ kota꞉ mo lita꞉la꞉eki ota꞉ lombei piki hoke yenki milieke hone wia꞉pa꞉peke. \v 30 Mo yenki meake hauta꞉ I̱ma꞉ pealueke. Hoke yenkita꞉ I̱ma꞉ kone pa halueke laa pi leeke halita꞉ niki hone witoloma꞉me. Ipika꞉ leekeeki ma꞉nda꞉ dupae. Tekehalima꞉ ipika꞉ wanda꞉hali pa꞉ta꞉ pi yokaalu pilieke leekeme. \v 31 Mo deto hala꞉ Koda꞉na꞉ hoke yenki tukiki pa꞉ta꞉ taapolo talo pea꞉ka꞉na꞉ta꞉ ota꞉ paala꞉ piki haue. \s1 Wopu taka꞉lao hone tulao hapa꞉peke ya꞉la꞉eki \p \v 32 Mo hande iki amba꞉ haeme ekimanu niminaapa꞉peke. Koto pita꞉ma꞉ta꞉ mo Koda꞉na꞉ pa̱a̱ma꞉ ika꞉ puki pa꞉ta꞉ pa̱a̱ peaya꞉ hoki naneta꞉ ka꞉nda꞉manu wopu mimipate pa koto hau manuma꞉ iki bepolaena꞉ na leke ota꞉ honkopu hao haememe. \v 33 Ma꞉nda꞉ pita꞉ma꞉ ikita꞉ wanda꞉halina꞉ leke popelekena꞉ mea hao hata꞉ hoke keke pimanu alo hata꞉ iki yombua baememe. Kutaa make mo mandane Ketiso yankeke tonu koto tupa꞉ lia꞉tiki pimikieki handaata꞉ iki tamba꞉ muluekema꞉ niki make mandake lina꞉ pomana꞉e laa pememe. \v 34 Ikana꞉ma꞉ mo dipula pitimi wanda꞉hali pa꞉ta꞉ make a꞉ta꞉ma꞉ homememe. Kutupa make mandane haliwekima꞉ ika꞉ wia haeme ala꞉ta꞉ ala꞉ta꞉ paeyao pake muluekema꞉ pa꞉ta꞉la꞉ pemekeeki handemeketa꞉ kota꞉ ta꞉na꞉ma꞉ homolo hata꞉ ika꞉ honema꞉ta꞉ pa ota꞉ paeyaapeke na yeke epeke alemanu pa wia haloma꞉me hone witolo hata꞉ pa epeke tupa꞉ hao haememe. \p \v 35 Ika꞉ aela꞉ baasa꞉ hau na mina꞉pa꞉lapa꞉peke. Pa ekipeke. Ika꞉ koto epeke hauna꞉ epeke yenki tieke milimikie. \v 36 Koto ekina꞉ta꞉ mo Koda꞉na꞉ hone pa꞉la꞉eki amba꞉la pealuekema꞉ make mo ipika꞉ la꞉ ula꞉ alemanu muluekema꞉ make ikana꞉ma꞉ yopu yu wia hapa꞉peke ya꞉la꞉me. \v 37 Kutu pea꞉peke ekina꞉ta꞉ mo Baiboloma꞉ alota꞉ \q1 Pa hosiki siki yu wia hao wetepena꞉ta꞉ mo epolo pa꞉la꞉ hali opolo ipuluekema꞉ta꞉ hoi hoi na piki opolo ipilieke. \q1 \v 38 Koto yu wia halo pita꞉ma꞉ta꞉ ma꞉nda꞉ epi ota꞉ tikitiki yao hala꞉ halita꞉ ipika꞉ hone tulaala꞉ ekima꞉ pa hao haena꞉ lelieke. \q1 Kutu pilia꞉pate pa hali homeke ma꞉nda꞉ma꞉ yola꞉ pambea꞉ka꞉na꞉ta꞉ kota꞉ ipiki pa꞉ta꞉ ta꞉na꞉ma꞉ na homolueke la꞉la꞉me. \p \v 39 Nikita꞉ mo nika꞉ da꞉ta꞉pekeeki alu pina꞉ yola꞉ pamba hapeke wanda꞉hali na haloma꞉me. Kotoeki na pikita꞉ nikita꞉ hone ti laaso hata꞉ da꞉ta꞉la꞉eki mea haloma꞉me. \c 11 \s1 Hone tulaasa꞉ hauna꞉ teke pi \p \v 1 Mo hone tulaaluekema꞉ pita꞉la꞉eki manuta꞉ dupae. Hali homekema꞉ mo mulueke hone wita꞉la꞉ ekita꞉ ipika꞉ hone tukiki pa꞉ta꞉ ota꞉ mea miniki hata꞉ make ipika꞉ lekema꞉ handa꞉peke na ya꞉la꞉ ale manuta꞉ honema꞉ hone witolota꞉ ota꞉ ula꞉me alo hata꞉ ipika꞉ hone tulao handeteke hala꞉me. \v 2 Amba꞉ kiake haemeke wanda꞉hali ika꞉ hone tulao hao haemeke ekina꞉ta꞉ Koda꞉ma꞉ iki pa꞉ta꞉ ta꞉na꞉ma꞉ homo hayekeme. \v 3 Nika꞉ hone tulaasome ekima꞉ta꞉ do ya yu paeyaona꞉ ula꞉ ala꞉ta꞉ ala꞉ta꞉ paeyaota꞉ Koda꞉ ipika꞉ pima꞉ kone wepiekeme. Kutupa do nika꞉ lekema꞉ handa꞉peke ya꞉la꞉ alemanu paeyaota꞉ mo handa꞉peke na yeke yeke alemanu mea wepia wina꞉ leekeme hone witoloma꞉me. \s1 Eipolo Inoko Noa ameda \p \v 4 Mo hande Eipoloma꞉ Koda꞉ pa꞉ta꞉ hone tulaota꞉ ipiki pa꞉ta꞉ pa hala꞉la꞉ alemanu haleekeme. Koto hone tulaaso hata꞉ haleeke ekima꞉ta꞉ mo hande Keinina꞉ pa hala꞉la꞉ ale ota꞉ lombei peakeeki haleekeme. Eipoloma꞉ Koda꞉ pa꞉ta꞉ ipika꞉ hone tulaaso hata꞉ haleeke ale epeke tupa꞉ haleeke handaa Koda꞉ma꞉ ta꞉na꞉ma꞉ homolo hata꞉ Eipolota꞉ tikitiki piki halie leekeme. Eipolota꞉ amba꞉ kiaake homeeke yekepate ipika꞉ hone tulaeyeke ekima꞉ta꞉ wanda꞉halina꞉ hone pa mea u tiao hala꞉me. \p \v 5 Hone tulaasa꞉eki homeke homekema꞉ mo hande Inokota꞉ na homeke pa haena꞉ kone Koda꞉ma꞉ hepeni nane mea peekeme. Kutu pieke ekima꞉ta꞉ do kenkena꞉ ma꞉nda꞉ma꞉ pa handa꞉peke na yeekeme. Mo Baiboloma꞉ alota꞉ Koda꞉ma꞉ Inoko oli hepeni nane a̱i̱ na mea peeke do kenkena꞉ pa hata꞉ta꞉ Koda꞉ ta꞉na꞉ma꞉ homao hayekeme. \v 6 Ma꞉nda꞉ hali epima꞉ hone na tulake hata꞉ Koda꞉ ta꞉na꞉ma꞉ homaapeke na ya꞉la꞉me. Ekipeke. Hali homeke ma꞉nda꞉ma꞉ a꞉nda꞉ Koda꞉ teke pa꞉ta꞉ puluekema꞉ pia꞉ka꞉na꞉ta꞉ kota꞉ titina꞉ amba꞉la ipika꞉ honema꞉ta꞉ Koda꞉ ota꞉ hala꞉me laa ipikana꞉ma꞉ mo ipiki ota꞉ wei moneao haleme wanda꞉hali iki epeaasa꞉ ota꞉ epeke yenki mola꞉me hone tulaapeke ya꞉la꞉me. \p \v 7 Koda꞉ma꞉ wetepe epolo pieke hau manuta꞉ Noa pa꞉ta꞉ kinki piekeme. Koto hau manuta꞉ Noama꞉ handa꞉peke na yekepate kone ipika꞉ hone tulaaso hata꞉ Koda꞉na꞉ pi opiekeme. Koto leeke Koda꞉na꞉ kakena꞉ homolo mo wepie leeke kawaso tieke wepiekeme. Koto kawasoma꞉ta꞉ ipiki make ipika꞉ wekiwanda꞉ make peteleekeme. Noama꞉ mo hande Koda꞉ma꞉ leeke pi telia pieke handaa Koda꞉ma꞉ mo hone tulaasemeke hala꞉la꞉ tikitiki piki hauta꞉ Noa pa꞉ta꞉ haleekepate paa pa haemeke mandane wanda꞉hali paeyaota꞉ ota꞉ hoeyaeyekeme. \s1 Eipoloha꞉ma꞉ \p \v 8 Eipoloha꞉ma꞉ ipika꞉ hone tulaeyeke ekima꞉ Koda꞉na꞉ kakena꞉ homa mo hande kuluekee laa pi la꞉ wieke kenke pa꞉ta꞉ peekeme. Ipika꞉ teke da mina꞉pa꞉lao mo ipiki mateke kenke pa꞉ta꞉ peekeme. \v 9 Koto la꞉ wieke kenkena꞉ da ma꞉nda꞉ hali leke hata꞉ kone Koda꞉ pa꞉ta꞉ hone tulao hao hayekeme. Ipikita꞉ palai da pa꞉ta꞉ hayekeme. Koda꞉ma꞉ Eipoloha꞉ma꞉ pa꞉ta꞉ la꞉ wieke tupa꞉ kone mo Aisa꞉ke Dieikope yaapo pa꞉ta꞉ make leeke opua miniki hata꞉ pa palai da pa꞉ta꞉ kone hao haepekeme. \p \v 10 Pa ekipeke. Eipoloha꞉ma꞉ mo Koda꞉ma꞉ hone pambao wia a꞉ela꞉ daonita꞉ handeteke hayekeme. Koto daonita꞉ mo kukutu pea꞉peke na yeke pa hao halo pa꞉la꞉ ka꞉ta꞉ manda a꞉ela꞉me. \p \v 11 Eipoloha꞉ma꞉ta꞉ koke yaalo weki mendia꞉peke nate paeyeke yekepate kone ipika꞉ hone tulao hayeke ekima꞉ weki mendia꞉peke yekeme. Seta make weki kenohali wanda꞉ hayekeme. Eipoloha꞉ma꞉na꞉ honema꞉ta꞉ mo hande Koda꞉ma꞉ la꞉ wieke pita꞉ ota꞉ na tunkulieke laa hone bao hayekeme. \v 12 Ipikita꞉ ota꞉ teke siki pa꞉ta꞉ homa꞉peke yekepate koto homa꞉peke somesiki pa꞉ta꞉ yama꞉ kone opeeke wanda꞉halita꞉ pa oli yana꞉ hombulanka꞉ hala꞉ tupa꞉ o ikali houna꞉ ka꞉ka꞉la꞉ ula꞉ tupa꞉ haemekeme. \p \v 13 Do aloma꞉ titina꞉ haeme haliwekina꞉ Seta peaata꞉ iki paeyao hone tulaa paleke homemekeme. Ikana꞉ma꞉ mo hande Koda꞉na꞉ la꞉ wieke ekimanu na mimikipate pa papate yolo peeke handaa pa ika꞉ lekema꞉ homeke handaata꞉ mokoto ya꞉la꞉pate pila꞉mee laa ta꞉na꞉ma꞉ homeke homemekeme. Do kenkena꞉ koto tapakema꞉ alota꞉ Nika꞉ da teke do dia꞉ ya꞉la꞉pate nikita꞉ pa ta꞉ka꞉li haloma꞉me laa peneme yao lemekeme. \v 14 Wanda꞉hali manuma꞉ kutupiki pi lemeka꞉na꞉ta꞉ kota꞉ nikana꞉ma꞉ hone witolota꞉ Ikana꞉ma꞉ ika꞉ hao hapeke yu weitelememe hone ulumekee. \v 15 Ikana꞉ma꞉ mo hande mina꞉pa꞉laeme kenke pa꞉ta꞉ hone pa na umoneao haemekeme. Hone pa umoneao haemeka꞉na꞉ yoluta꞉ kota꞉ ikita꞉ pa ana꞉na꞉ la꞉ka꞉la polo pimime. \v 16 Kotoeki na pikita꞉ do kenke ota꞉ lombei piki kenke ma꞉nda꞉ hepeni nane ula꞉eki pa꞉ta꞉ puawee hone wimikime. Koto ekima꞉ta꞉ ikana꞉ma꞉ Koda꞉ pa꞉ta꞉ Nika꞉ Koda꞉o laa la꞉na꞉yeketa꞉ ipikana꞉ma꞉ yaala꞉ma꞉ na homeekeme. Pa ekipeke. Koda꞉ ipikana꞉ma꞉ ika꞉ pua hapa꞉peke daoni ma꞉nda꞉ tikitiki yao wiaeyekeme. \p \v 17 Koda꞉ma꞉ Eipoloha꞉ma꞉ makea handeeke dina꞉ta꞉ Eipoloha꞉ma꞉ma꞉ hone tulaaso hata꞉ ipika꞉ eiyeke Aisa꞉ke lia haluekema꞉ peekeme. Koda꞉ma꞉ ipiki pa꞉ta꞉ weki wandiki wopu kuluekee laa pi la꞉ wieke pi miniki hayekepate kone Eipoloha꞉ma꞉ ipika꞉ weki siki homeke kone Koda꞉ pa꞉ta꞉ lia haluekema꞉ tikitiki yaeyekeme. \v 18 Koda꞉ma꞉ amba꞉ Eipoloha꞉ma꞉ pa꞉ta꞉ pi la꞉ witolo alota꞉ Naka꞉ weki Aisa꞉ke pa꞉ta꞉ yama꞉ta꞉ wekiwandiki wopu sa꞉mba꞉lawalueke leekeme. \v 19 Kutupa Eipoloha꞉ma꞉ ipika꞉ honema꞉ta꞉ Aisa꞉ke lua꞉ka꞉na꞉ta꞉ kota꞉ Koda꞉ma꞉ paa mea tiaapeke ya꞉la꞉me hone wiekeme. Kutu pieke ekima꞉ta꞉ ipika꞉ amba꞉ homeeke weki paa handa꞉ miki nono piekeme. \s1 Aisa꞉ke Dieikope make Diosepe \p \v 20 Aisa꞉kema꞉ ipika꞉ hone tulao hayeke ekima꞉ta꞉ ipika꞉ weki Dieikope Iso yaapo ipiliki pa꞉ta꞉ wetepe epolo pia꞉ la꞉ wita꞉la꞉ epeaasa꞉ pimanu la haleekeme. \v 21 Dieikopema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ haena꞉ mo Diosepena꞉ weki yaapo homeke homeke lo wamo pita꞉la꞉ hau piekeme. Kutu puluekema꞉ta꞉ ipikana꞉ma꞉ tumapu pita꞉ tiao hata꞉ Koda꞉na꞉ biki mea a꞉meiyaaso yeni piekeme. \v 22 Diosepema꞉ ipika꞉ hone tulao hayeke ekima꞉ta꞉ ipika꞉ homa꞉peke nate teke pa꞉ta꞉ yeke mo Isulai tapakema꞉ Idiepi kenke mina꞉pa꞉lao polo pimiki ekina꞉ pi la꞉ witolo hata꞉ alota꞉ ipika꞉ wonku piki loke pa꞉ta꞉ pea꞉peke hauna꞉ pimanu make la haleekeme. \s1 Mosesi \p \v 23 Mosesina꞉ inkiki ateke yaapoma꞉ make ipilika꞉ hone tulao haepeke ekima꞉ta꞉ ipilika꞉ weki Mosesi mendipiki hoki naneta꞉ sumba꞉ tepo tukiki pa꞉ta꞉ mondu panka꞉ wipikime. Ipikita꞉ ota꞉ epeke weki seliapo yeke handaata꞉ mo kini halina꞉ pi wieke ekina꞉ paala꞉ma꞉ na homepekeme. \p \v 24 Mosesima꞉ make hone tulao hayeke ekima꞉ ipiki weki hali hata꞉ alota꞉ I̱ta꞉ mo kini halina꞉ wanekena꞉ weki dia꞉me leekeme. \v 25 Ipikana꞉ma꞉ mo hoke haumanu puluekema꞉ hosikima꞉ ta꞉na꞉ma꞉ homa pea꞉peke yeekeme. Pate kutu piteme tupa꞉ta꞉ mo Koda꞉na꞉ wanda꞉hali ame̱le̱ hata꞉ ka꞉nda꞉ muluekema꞉ ma̱leke liekeme. \v 26 Ipika꞉ honema꞉ta꞉ I̱ma꞉ mo Ketiso bikina꞉ yaala꞉ma꞉ homoa꞉ka꞉na꞉ta꞉ kota꞉ koto hauma꞉ta꞉ mo Idiepi nane ula꞉ mani make koloma꞉ wepiki alemanu paeya tapao ota꞉ lombei pa꞉la꞉me hone wiekeme. Kutu pieke ekita꞉ ipikana꞉ma꞉ mo wetepe mulu pieke epeke yenkina꞉ hone u hayekeme. \p \v 27 Mosesima꞉ ipika꞉ hone tulao hayeke ekima꞉ta꞉ mo kini halina꞉ mineke pankekeeki pa꞉ta꞉ paala꞉ma꞉ na homeke Idiepi kenke mina꞉pa꞉layekeme. Ipikana꞉ma꞉ mo handa꞉peke na yeke Koda꞉ handeke nono pea pa hone ma꞉nda꞉ na wiki da̱o̱la hayekeme. \v 28 Ipika꞉ hone tulao hayeke ekima꞉ mo hande Lombei Pu Pa Yapena꞉ sipisipi ma꞉na꞉ lita꞉la꞉ hau kini piekeme. Kutupa mo homaasa꞉ enisoloma꞉ mo Isulai wanda꞉halina꞉ mupeke wekitonu liaama꞉na꞉ lombei pina꞉yeke mo sipisipina꞉ wema꞉ ika꞉ da pota꞉ kake ti nina꞉ kitaape laa leekeme. \s1 Isulai wanda꞉halimanu \p \v 29 Mo Isulai wanda꞉hali ika꞉ hone tulaemeke ekima꞉ta꞉ mo hande Wepiki Dawala Ikali ana꞉na꞉ yuma pemekeme. Pate mo Idiepi haliwekima꞉ta꞉ make ikana꞉ma꞉ yumimiki tupa꞉ yumulua꞉ patema꞉ pu hao mo hande ikalima꞉ iki paeyao kili miekeme. \p \v 30 Mo hande Isulai wanda꞉halima꞉ nate watake hata꞉ mo hande Dietiko daoni hopa꞉liao sama꞉ pimikime. Kutu pitolo hata꞉ ika꞉ hone tulaemeke ekima꞉ mo hande hopa꞉liao pieke daonina꞉ toopi pape tieke londa꞉laeyekeme. \v 31 Mo Isulai wanda꞉halima꞉ tapaeyeke kika ikiki hali yaapo tamba꞉ mieke hali yolo hayeke wanda꞉ Leiha꞉pema꞉ mo hande Koda꞉ pa꞉ta꞉ homu na piki wanda꞉hali ame̱le̱ na homeke ipika꞉ hone tulaeyeke ekima꞉ deteekeme. \p \v 32 Mo mandane ekimanu ma꞉nda꞉manu la kionope. Dia꞉me. Mandane haliweki Kidioni Ba꞉teke Sa꞉misoni Diepita Deipidi Samuele amedama꞉ pimikieki make mandane potopede haliwekima꞉ pimikieki make wopu moka꞉lalo polopate nate leke dia꞉ya꞉leke wopu na moka꞉lalueke. \v 33 Ikana꞉ma꞉ hone tulaaso hata꞉ a꞉nda꞉ pea mandane kenkemanu bepolayekeme. Ikana꞉ma꞉ tiki tiki hau pitolo hata꞉ Koda꞉ma꞉ kulueke laa la꞉ wieke ekimanu miekeme. Kutupa mo laeono manuna꞉ kake a꞉mbaemekeme. \v 34 Mo uleke tieke hake ti tiekemanu honiaemekeme. Mo bainasima꞉ lia꞉pekeeki make wendimikime. Ikita꞉ detepiki some hombo yekepate honkopu haemekeme. Kutupa mo a꞉nda꞉na꞉ta꞉ ikana꞉ma꞉ honkopu tieke wopu hao mo hande kenke ma꞉nda꞉ tapakena꞉ ame tonu bepolaemekeme. \v 35 Mandane wanda꞉wekima꞉ make hone tulaemeke handaa ika꞉ tapake homemeke wanda꞉hali Koda꞉ma꞉ mea tiao ika꞉ ame̱le̱ haena꞉ leekeme. Mo a꞉nda꞉ tunkiliki haliwekima꞉ mea tanda halaa homaena꞉ leeke haliwekima꞉ta꞉ mo ika꞉ ka꞉la꞉pa꞉ tapao haena꞉ leeke ekita꞉ kiaemekeme. Kutu pimiki ekina꞉ teketa꞉ Koda꞉ma꞉ iki epeke da꞉taa haena꞉ lena꞉ yeke pimikime. \p \v 36 Iki mandane tapaketa꞉ mandane wanda꞉halima꞉ hoke tupa꞉ kitata pu make dopitama꞉ yombu pimikime. Mandane wanda꞉halita꞉ kiki anke tonkao dipula mea pua꞉tiki pimikime. \v 37 Kutupa mandane tapaketa꞉ toopima꞉ lia꞉tiki pu make mandane tapaketa꞉ soma꞉ tukikina꞉ tunkula꞉ alu pea꞉tiki pu make mandane tapaketa꞉ bainasima꞉ lia꞉tiki pu pimikime. Ikita꞉ nate hali haemeke ekima꞉ sipisipi o nanikosi yonkeleke daumanu yama pominolo haena꞉ ma꞉nda꞉ma꞉ ka꞉nda꞉ma꞉ homa tiatiki pieke handaa pindipa pomua꞉tiki pimikime. \v 38 Do kenkena꞉ hoke wanda꞉halima꞉ mo koto epeke wanda꞉halita꞉ iki taapuna꞉ hapeketa꞉ ota꞉ ana꞉ na pieke yekeme. Ikita꞉ a꞉nda꞉ma꞉ tulu limiki wanda꞉hali hata꞉ hapiki kenke pa꞉ta꞉ make pote tea꞉ pa꞉ta꞉manu make puaata꞉ ika꞉ da manuta꞉ toopi ka꞉ka꞉na꞉ pa꞉ta꞉ hao haemekeme. \p \v 39 Mo wanda꞉halima꞉ta꞉ ika꞉ Koda꞉ pa꞉ta꞉ hone tulaaso hata꞉ pimikieki manuma꞉ta꞉ ota꞉ kende wiki biki melememe. Koto pelemepate Koda꞉ma꞉ kuluekee laa la꞉ wieke ekita꞉ ikana꞉ma꞉ a̱i̱ na mimikime. \v 40 Koda꞉ma꞉ niki pa꞉ta꞉ make epeke hau ma꞉nda꞉ pealuekema꞉ hone pambao wiekeme. Koto pambao wieke honeta꞉ Koda꞉ma꞉ iki homeke dia꞉ yekepate pa niki tonka꞉na꞉ mandake epeaalueke laa hone piekeme. \c 12 \s1 Yesu handa paleke pomana꞉e \p \v 1 Mo hande amba꞉ haeme wanda꞉halita꞉ ameta꞉ niki hopa꞉liao koa leke haleme ekima꞉ta꞉ ika꞉ hone tulaemekeeki niminaa tiaasememe. Kutu peleke handaata꞉ do ame haloma꞉ wanda꞉hali nikita꞉ pa eki pumana꞉pe. Do haumanu pumana꞉e. Mo niki miniki hata꞉ me̱i̱me̱i̱ liaasa꞉ alemanu paeyao make pa mo ta̱la꞉ pelia hasa꞉ hoke haumanu paeyao londa꞉la꞉ mipi bao pomana꞉e. Kutaata꞉ mo Koda꞉ma꞉ peomono yeke telipala꞉ a̱i̱ya꞉ pula꞉ hauna꞉ta꞉ nika꞉ puki hana꞉ noka꞉pa hao hamana꞉e. \v 2 Kutu puluekema꞉ta꞉ kota꞉ Yesuta꞉ nika꞉ hone tulaasa꞉ ekina꞉ kini pu mea pua ana꞉ lawalo pa꞉la꞉ teke hali hala꞉ ekina꞉ ipiki homeke handa꞉ paleke pomana꞉e. Ipikana꞉ma꞉ mo hande a꞉ka꞉tei wape piki ti yeke handaata꞉ pa pina꞉ na kiaeyekeme. Dia꞉me. Ipika꞉ pua mulu pieke ta꞉na꞉ma꞉ homa꞉la꞉ hau tieke handeeke ekima꞉ mo hande a꞉ka꞉tei wape piki tina꞉ homa꞉peke ekina꞉ yaala꞉ mea꞉peke ekina꞉ta꞉ hone ma꞉nda꞉ na wiekeme. Kutaa ameta꞉ ipikana꞉ma꞉ Koda꞉na꞉ pila꞉ ale tieke popeke nanema꞉ tilao pila꞉me. \p \v 3 Ipikana꞉ma꞉ a꞉pa mieke ka꞉nda꞉ tiekemanu hone umana꞉e. Mo hoke hau pu haemeke wanda꞉halima꞉ ipiki pa꞉ta꞉ honditi pimikieki manuta꞉ pa hone yonka꞉latiki piekeme. Koto piekeeki hone witolo hata꞉ soka꞉la꞉ma꞉ homo pututuma꞉ na homo hapa꞉peke. Pa ekipeke. \v 4 Mo hoke hau ame̱le̱ a꞉nda꞉ta꞉ pelemepate mo a꞉nda꞉ pelemeeki peneme yaena꞉ta꞉ ika꞉ lokena꞉ we a꞉nda꞉ na yapa꞉la꞉me. \v 5 Ikita꞉ Koda꞉ma꞉ ipika꞉ wekiwandiki hamena꞉ laata꞉ do hone u tiaasa꞉ pimanu la ku hala꞉ ekita꞉ na niminake yonka꞉lalemepe. Ipikana꞉ma꞉ dupa la꞉la꞉me. \q1 Ya wekio. Mo Tekehalima꞉ neke tikitiki yaena꞉ pita꞉la꞉ ekita꞉ hone wopu wia꞉peke. Kutupa ipikana꞉ma꞉ neke hando lea꞉ka꞉na꞉ta꞉ kota꞉ kima꞉ na homa꞉peke. \q1 \v 6 Pa ekipeke. Mo Tekehalima꞉ ipika꞉ pukima꞉ homa꞉la꞉ wanda꞉hali paeyao tikitiki yao haena꞉ la꞉la꞉me. Kutupa mandane wanda꞉hali ipika꞉ wekiwandiki haena꞉ laata꞉ ka꞉nda꞉ homa꞉ tiatiki pu hala꞉me ala꞉me. \p \v 7 Ka꞉nda꞉ma꞉ homa꞉la꞉ ekimanu iki pa꞉ta꞉ epea꞉ka꞉na꞉ta꞉ do ka꞉nda꞉ta꞉ mo atekema꞉ ipika꞉ weki epeaasa꞉ ka꞉nda꞉e laa puki hana꞉ noka꞉pa꞉pa꞉peke. Mo ika꞉ mineleme ka꞉nda꞉ma꞉ta꞉ Koda꞉ma꞉ iki ipika꞉ wekiwandiki hamena꞉ la꞉la꞉eki peneme yaasa꞉me. Amba꞉ta꞉ apa꞉ amedama꞉ yombu tikitiki na yaeyeke wekita꞉ ma꞉nda꞉ hayeke yekea. \v 8 Ikita꞉ ika꞉ Apa꞉ Koda꞉ma꞉ mana꞉ laa tikitiki yao hamena꞉ la꞉la꞉ wekiwandiki na haemeka꞉na꞉ta꞉ kota꞉ ikita꞉ ota꞉ halina꞉ wekiwandiki dia꞉me. Ikita꞉ pake wekiwandiki haleme ekita꞉ peneme ya꞉la꞉me. \v 9 Nika꞉ kenke apa꞉ amedama꞉ niki epeaaluekema꞉ yombua꞉tiki pimikita꞉ tanda naa kone ika꞉ kakena꞉ homa꞉tiki pu haoma꞉me. Mo nika꞉ kenke apa꞉ pa꞉ta꞉manu kutu pumeke handaata꞉ kota꞉ mo nika꞉ temoko handeteke hala꞉ Apa꞉ pa꞉ta꞉ta꞉ homu pea hata꞉ ipika꞉ da꞉ta꞉la꞉eki miniki hamana꞉ pea꞉peke alee. \v 10 Nika꞉ kenke apa꞉ amedama꞉ bapi wopuna꞉ niki panisi na peatiki pimipate pa ika꞉ hone pieke tupa꞉ peatiki pimikime. Kutu pimikipate Koda꞉ma꞉ta꞉ niki epeomono yeke niki homeke hone witolo hata꞉ panisi peatiki pu hala꞉me. Koto ekina꞉ teketa꞉ nikana꞉ma꞉ ipika꞉ yako piki hau tieke putupa mea halumeke. \v 11 Yombita꞉la꞉ hauma꞉ta꞉ niki ta꞉na꞉ na pealo pa꞉la꞉pate kota꞉ koto pita꞉la꞉ hauma꞉ tikitiki yaeya꞉ wanda꞉hali ikita꞉ wetepena꞉ mo tikitiki piki hauna꞉ homu pea puki lopao hasa꞉ kilikimanu milimikie. \s1 Mana꞉ pi pita꞉ kinki pita꞉la꞉ pi yaapo \p \v 12 Ika꞉ lupa wiki kikimanu mea a꞉meiyao tindipa liao make ika꞉ putuputu liki anke yaapo make tindipao da̱o̱la hapa꞉peke. \v 13 Kutu pimika꞉na꞉ta꞉ kota꞉ mo ika꞉ dola꞉pake peleme anketa꞉ ota꞉ hoena꞉ dia꞉ ya꞉la꞉pate epena꞉ta꞉ mo tikitiki piki pota꞉ manuna꞉ pu hapa꞉peke. \p \v 14 Wanda꞉hali paeyao ame̱le̱ a꞉nda꞉ pelia haluekema꞉ taapo hapa꞉peke. Kutaata꞉ ika꞉ halo pelemeeki tonka꞉na꞉ yako peao haluekema꞉ taapo hapa꞉peke. Pa ekipeke. Koto hau na piki wanda꞉hali homeke a꞉nda꞉ma꞉ta꞉ mo Tekehali ota꞉ na handilimikie. \v 15 Koda꞉na꞉ a꞉ta꞉ma꞉ homa tamba꞉ mina꞉la꞉ hau pa꞉ta꞉ hoki walaapa꞉na꞉ma꞉ wopu handeteke hapa꞉peke. Iki homeke ma꞉nda꞉ma꞉ ipika꞉ puki pa꞉ta꞉ ka꞉ta꞉pa wilie titi peaasa꞉ ale ma꞉nda꞉ pa opa daeyaena꞉ alo hata꞉ iki paeyao hoeyaapa꞉na꞉ma꞉ wopu handa꞉ paleke hapa꞉peke. \v 16 Iki homeke ma꞉nda꞉ma꞉ yola꞉la꞉ hau pilimina꞉ma꞉ wopu handeteke hapa꞉peke. Amba꞉ Isoma꞉ mo hande hoto homeke napeke ne hambolo hata꞉ ipika꞉ mupeke wekima꞉ mia꞉peke anke teketa꞉ Koda꞉na꞉ hau pa꞉ta꞉ hone na witolo hata꞉ ma꞉nda꞉ pa꞉ta꞉ pa haleeke hau leke na pia꞉pa꞉peke. \v 17 Isoma꞉ pieke ekita꞉ hone wilimime. Ipika꞉ apa꞉na꞉ epeaasa꞉ la꞉ wita꞉la꞉ ekita꞉ wetepena꞉ muluekema꞉ peekepate na miekeme. Mo epeaasa꞉ hau kina꞉e hone witolo ipika꞉ apa꞉ pa꞉ta꞉ pua e̱ alo alo hata꞉ honke leekepate atekena꞉ hone topo pina꞉ pia꞉peke hau ma꞉nda꞉ na handa꞉ wiekeme. \p \v 18 Ikita꞉ mo hande Isulai wanda꞉halima꞉ ota꞉ wataapeke yeke Sainai pote pa꞉ta꞉ opolo epemeke tupa꞉ na opolo epelememe. Koto Sainai pote pa꞉ta꞉ ti uleke tieke make timba꞉ make timba꞉ ki tieke make po tilipu tieke make \v 19 bu kanake lita꞉la꞉eki make pi ho̱la̱꞉make tieke make koto hau paeyao pa꞉la꞉ pote pa꞉ta꞉ta꞉ iki na opolo epelememe. \v 20 Isulai wanda꞉halima꞉ mo hande pi ho̱la̱꞉make leekeeki opuata꞉ yaapo peao paa na opuomonoe laa honke lemekeme. Koto paa na opuomonoe laa honke leeke hauna꞉ teketa꞉ mo hande pi ho̱la̱꞉makema꞉ alo hata꞉ alota꞉ Iki make ika꞉ puneleme alemanu ma꞉nda꞉ma꞉ make mo pote wataemeka꞉na꞉ta꞉ toopima꞉ lu homaena꞉e laa la꞉ wieke ekina꞉ paala꞉ma꞉ homolo hata꞉ lemekeme. \v 21 Mo potena꞉ ta꞉ta꞉ piki paala꞉ tieke piki haumanu piekeeki Mosesima꞉ handolo hata꞉ alota꞉ I̱ paala꞉ pitolo hata꞉ pututu tieke pa꞉la꞉me leekeme. \p \v 22 Ikita꞉ koto paala꞉ piki pote pa꞉ta꞉ na opolo epemekepate pa mo Saioni pote pa꞉ta꞉ mo deto hala꞉ Koda꞉na꞉ da teke nane opolo epelememe. Koto data꞉ hepeni hala꞉ Diutuseleme dae. Koto pa꞉ta꞉ta꞉ mo enisolo daoseni eleke eleke tonu ame̱le̱ ta꞉na꞉ma꞉ homa mombolo halememe. \v 23 Ikita꞉ Koda꞉na꞉ mo hepeni nane biki wape pa ula꞉ titina꞉ haemeke wanda꞉halina꞉ momba꞉la꞉la꞉ eki pa꞉ta꞉ make mo wanda꞉hali paeyaona꞉ pi yokaalu pulu pa꞉la꞉ Koda꞉ pa꞉ta꞉ make mo amba꞉ titina꞉ haemeke tikitiki piki wanda꞉hali epeaeyeke temokomanu pa꞉ta꞉ make opolo epelememe. \v 24 Kutaa make ikita꞉ mo panake pi la꞉ ula꞉ ekina꞉ ka꞉pa hali Yesu pa꞉ta꞉ make ipika꞉ tunkula꞉ pa pa pu lopeeke wema꞉ta꞉ mo hande Eipolona꞉ we ota꞉ lombei piki la꞉ wita꞉la꞉ we pa꞉ta꞉ make opolo epelememe. \p \v 25 Mo iki pa꞉ta꞉ pi ala꞉ somena꞉ pita꞉ na kiaake yopusiki hata꞉ opua꞉pa꞉peke. Mo hande Koda꞉ma꞉ la꞉niaeyeke pimanu la꞉mea halao haemekeeki na opimiki wanda꞉halita꞉ Koda꞉na꞉ hoeyaasa꞉eki na wendimikime. Ikana꞉ma꞉ na wendimiki yeke handaata꞉ nikana꞉ma꞉ oli hepeni nanema꞉ pi la kita꞉la꞉ hali hoki walaa kiaoma꞉ka꞉na꞉ta꞉ kota꞉ niki make ota꞉ na wondulumeke. \v 26 Amba꞉ koto hande toma꞉na꞉ta꞉ ipika꞉ pi ho̱la̱꞉makema꞉ do kenke la꞉ma꞉ la꞉ma꞉ peayekepate paa ameta꞉ ipikana꞉ma꞉ pi la꞉ witolo alota꞉ I̱ma꞉ hoto homeke ma꞉nda꞉ make do kenke paa la꞉wa꞉ peaoa꞉ka꞉na꞉ta꞉ kota꞉ oli hepeni make la꞉wa꞉ pealueke la꞉la꞉me. \v 27 Koto hoto homeke ma꞉nda꞉ make laa la꞉ ula꞉eki pitolota꞉ kota꞉ mo la꞉wa꞉ pea꞉peke na ya꞉la꞉ alemanu homeketa꞉ pa u pelia haena꞉ta꞉ pa mo wepia wina꞉ la꞉la꞉ alemanu paeyaota꞉ la꞉wa꞉ la꞉wa꞉ peao hoelo baalo pa꞉la꞉ ekina꞉ peneme yaasa꞉ pi la꞉la꞉me. \p \v 28 Koto pa꞉la꞉pate nikana꞉ma꞉ mo la꞉wa꞉ la꞉wa꞉ peaapeke na yolo pa꞉la꞉ kilu tombuao hala꞉eki moloma꞉me. Koto poloma꞉ ekina꞉ta꞉ Koda꞉ma꞉ ta꞉na꞉ma꞉ homena꞉ nikana꞉ma꞉ ipika꞉ biki mea a꞉meiyaaso hata꞉ keiyae pi lomana꞉e. \v 29 Nika꞉ Koda꞉ta꞉ ota꞉ hoeyaasa꞉ ti tala꞉eki ya꞉leke handaa ipiki pa꞉ta꞉ paala꞉ma꞉ homa panda꞉ pea hata꞉ ipika꞉ biki mea a꞉meiyao hamana꞉e. \c 13 \s1 Koda꞉ma꞉ ta꞉na꞉ma꞉ homena꞉ pea꞉peke ya꞉la꞉eki \p \v 1 Ketiso tapakema꞉ ika꞉ Ketiso yankeke tonu ame̱le̱ pukima꞉ homa꞉ alualu pu hapa꞉peke. \v 2 Hande leke mineke na handeke wanda꞉hali kone ika꞉ da pa꞉ta꞉ epena꞉ ala꞉ hauta꞉ hone na yonka꞉lapa꞉peke. Kutu pitolo haena꞉ta꞉ pa mandane wanda꞉halima꞉ enisolo halie hone na wiki handa꞉ mea pitao tapaeyekeme. \p \v 3 Mo dipula haena꞉ la꞉la꞉ wanda꞉halina꞉ ka꞉nda꞉ta꞉ nika꞉eki kone hone witolo hata꞉ iki hone na yonka꞉lapa꞉peke. Koto tupa꞉ kone mo mandane tanda no haleme wanda꞉hali make hone na yonka꞉lapa꞉peke. \p \v 4 Wanda꞉ hapua mina꞉la꞉ hauta꞉ ota꞉ a꞉pa꞉la꞉ hauma꞉ pa꞉la꞉ma꞉ hone wopu wia handeteke hapa꞉peke. Tooli haepeka꞉na꞉ta꞉ kota꞉ ipilika꞉ loke homeke hone ualu pea hapa꞉peke. Mo suseke haasa꞉ hau pu make tooli hoeyaaso pake nala꞉ hau pu haleme wanda꞉halita꞉ Koda꞉ma꞉ pi yokaalu pilieke. \p \v 5 Mani pa꞉ta꞉ pukima꞉ homa꞉la꞉ hauma꞉ ika꞉ puki na handeteke haena꞉ lapa꞉peke. Koto hau na pikita꞉ pa mo ika꞉ wia halemeeki manuta꞉ ana꞉ pa꞉la꞉me hone wia꞉pa꞉peke. Kutu pulu poloma꞉ ekina꞉ Koda꞉ma꞉ alota꞉ \q1 I̱ma꞉ iki hoki na walo make ota꞉ na mina꞉pa꞉lalueke la꞉la꞉me. \m \v 6 Koto ekina꞉ nikana꞉ma꞉ aela꞉ baaso hata꞉ dupa lomana꞉e \q1 Mo Tekehalita꞉ I̱ tamba꞉ mina꞉la꞉ hali haleke handaa I̱ma꞉ta꞉ paala꞉ma꞉ na homulueke. Hali ma꞉nda꞉ma꞉ I̱ta꞉ ekipa hoeyaapeke yelia꞉pe aloma꞉me. \p \v 7 Amba꞉ mo iki pa꞉ta꞉ Koda꞉na꞉ pi walao haeme siosi you haliweki hone na yonka꞉lapa꞉peke. Ika꞉ pu haeme haumanu make hone na yonka꞉lake niminatiki pitolo hata꞉ ika꞉ hone tulaeme hau honda꞉ mea pu hapa꞉peke. \p \v 8 Yesu Ketisota꞉ amba꞉ make ame make belia make hoto paeyao tapao topo na piki pa homeke hau kone pa꞉la꞉me. \v 9 Amba꞉ na opimi pa ta꞉ta꞉ ta꞉ta꞉ piki pi walimieki manuma꞉ mo ika꞉ epeke pota꞉na꞉ pulimieki na yola꞉ mea pa꞉na꞉ lapa꞉peke. Koda꞉na꞉ a꞉ta꞉ma꞉ homa tamba꞉ mina꞉la꞉eki homekema꞉ ika꞉ puki hana꞉ noka꞉paena꞉ lemeka꞉na꞉ta꞉ a꞉pa꞉la꞉pate paa mo ne na nape laa pi ula꞉ hau manuma꞉ dia꞉me. Koto hau tolu haleme wanda꞉halita꞉ mo hauma꞉ iki na tamba꞉ mu hala꞉me. \p \v 10 Mo Diu wanda꞉halina꞉ palai da pa꞉ta꞉ e poko haleme haliwekita꞉ nika꞉ oloda pa꞉ta꞉ ula꞉ ne manuta꞉ napeke na ya꞉la꞉me. \v 11 Ika꞉ Yeni Peao Hala꞉ You Halima꞉ wanda꞉halina꞉ hoke hau a꞉mbaena꞉ mo hoteke we mea mo Ota꞉ Yako Piki Da Panda꞉ pa꞉ta꞉ mea pua halo haemekeme. Pate mo hoteke mindiki manuta꞉ mo ika꞉ da hama꞉ nane tokulu haena꞉ yanka꞉ baemekeme. \v 12 Koto tupa꞉ kone Yesu make ipika꞉ wema꞉ mo wanda꞉halina꞉ hoke haumanu paeyaaluekema꞉ mo pape tikene homeekeme. \v 13 Niki make mandake tupa꞉ kone mo tikene pua mo ipikana꞉ma꞉ mieke yaala꞉ apa꞉tao mumana꞉e. \v 14 Pa ekipeke do kenkena꞉ta꞉ nika꞉ ota꞉ pa hao hapeke ya꞉la꞉ daoni ma꞉nda꞉ dia꞉ ya꞉leke handaa mo wetepe opolo epolo pa꞉la꞉ daoni weitoloma꞉me. \v 15 Nikana꞉ma꞉ Koda꞉na꞉ biki yeiya꞉ laasoma꞉ ekita꞉ nika꞉ ipiki pa꞉ta꞉ pa hameke hala꞉la꞉ ale tupa꞉ Yesu pa꞉ta꞉ yama꞉ halo hamana꞉e. Mo Tekehalina꞉ biki peneme yao laasa꞉ ekita꞉ kota꞉ nika꞉ kakena꞉ kiliki ipiki pa꞉ta꞉ pa hameke haloloma꞉me. \v 16 Epeke hau pualu pu make tamba꞉ mualu pu pita꞉la꞉ hau yaapota꞉ hone na yonka꞉lapa꞉peke. Pa ekipeke. Do hau yaapoma꞉ta꞉ Koda꞉ ta꞉na꞉ma꞉ homaena꞉ pa hameke hala꞉la꞉ haue. \p \v 17 Mo ika꞉ siosi you haliweki pa꞉ta꞉ homu pea hata꞉ ika꞉ kakena꞉ homo hapa꞉peke. Ikana꞉ma꞉ ika꞉ siosi wanda꞉hali tukiki pa꞉ta꞉ e poka꞉la꞉eki paeyao Koda꞉ma꞉ handena꞉ ipiki pa꞉ta꞉ peneme yao waluekema꞉ta꞉ timba꞉ nate yaapona꞉ u na peliki hata꞉ mo siosi wanda꞉hali ika꞉ temokomanu wopu handeteke hao halememe. Ika꞉ kakena꞉ homa telia pu haemeka꞉na꞉ta꞉ kota꞉ ta꞉na꞉ lulu hata꞉ ika꞉ e epeke tupa꞉ pokolo pelemepate pa ikana꞉ma꞉ ika꞉ kakena꞉ na homemeka꞉na꞉ta꞉ kota꞉ ika꞉ e poka꞉la꞉eki ka꞉nda꞉ pealieke. Ikana꞉ma꞉ ka꞉nda꞉ma꞉ homemeka꞉na꞉ta꞉ kota꞉ koto ka꞉nda꞉ peaasa꞉ ekima꞉ mo siosi wanda꞉hali iki na tamba꞉ milieke. \v 18 Koda꞉ma꞉ niki tamba꞉ mina꞉ yeni na mina꞉pa꞉lake wopu peao hapa꞉peke. Nikana꞉ma꞉ hoto paeyao ota꞉ tikitiki piki hau puluekema꞉ taapo haloma꞉me. Koto ekina꞉ nika꞉ hone teketa꞉ Koda꞉na꞉ leke popelekena꞉ ota꞉ tikitiki pa꞉la꞉me hone witoloma꞉me. \v 19 Koda꞉ma꞉ iki pa꞉ta꞉ I̱ pa a̱i̱ tapaena꞉ ikana꞉ma꞉ yeni peamena꞉ yeke I̱ma꞉ meme pitolo hata꞉ iki honke alome. \p \v 20-21 Mo sipisipi ma꞉na꞉ handeteke hala꞉ hali tieke Yesu mo lapa꞉ pa꞉ta꞉ mea tiaeya꞉ Koda꞉ma꞉ kone mo na paelo pa꞉la꞉ la꞉ wieke we pa꞉ta꞉ yama꞉ ikana꞉ma꞉ ipika꞉ hone pa꞉la꞉ e epeke tupa꞉ pokawamena꞉ yeke epeao wina꞉e alome. Kutupa make mo puki lopawaasa꞉ Koda꞉ma꞉ Yesu Ketiso pa꞉ta꞉ yama꞉ niki tukiki pa꞉ta꞉ ipiki ta꞉na꞉ma꞉ homa꞉ tialo poloma꞉eki pina꞉ lomana꞉e alome. Ketisona꞉ bikima꞉ na paelo pa꞉la꞉ yeiya꞉ laasa꞉eki tieke mina꞉e. Kutu pina꞉e. \p \v 22 Ya kame tonuo. I̱ma꞉ ika꞉ hone u tialuekema꞉ wape polo pimanu yopu opua꞉pa꞉peke laa honke alome. Pa ekipeke. Do I̱ma꞉ wape polo ekita꞉ ota꞉ hokulu na wape polome. \v 23 Hande nika꞉ kame Timodi mo dipula pita opulu bao hala꞉eki ikana꞉ma꞉ opuemena꞉ do la kitolo handa꞉pe. Do I̱ halo pa꞉ta꞉ a̱i̱ opolo epea꞉ka꞉na꞉ta꞉ kota꞉ iki handolo ipulu mandake ipulupekee. \p \v 24 Nika꞉ a꞉taloe pi manuta꞉ ika꞉ you haliweki paeyao pa꞉ta꞉ make mo Koda꞉na꞉ wanda꞉hali paeyao pa꞉ta꞉ make la halawapa꞉peke. Do Ideli haleme Ketiso yankeke tonuma꞉ ika꞉ a꞉talo pi iki pa꞉ta꞉ tapaasememe. \p \v 25 Koda꞉na꞉ a꞉ta꞉ma꞉ homa tamba꞉ mina꞉la꞉eki iki ame̱le̱ hao haena꞉e.