\id GEN - Sembeleke Samberigi PNG Genesis 01 30/8/91 Macnaughtan 
\h KINI PIEKE 
\toc1 Ala꞉ta꞉ Ala꞉ta꞉ Paeyaona꞉ Kini Piekeekie 
\toc2 Kini Pieke 
\toc3 Kini Pieke 
\mt1 Ala꞉ta꞉ Ala꞉ta꞉ Paeyaona꞉ Kini Piekeekie  
\c 1  
\s1 Koda꞉ma꞉ ala꞉ta꞉ ala꞉ta꞉ paeyao wepiekeeki  
\p
\v 1-2 Titi panake pa꞉ta꞉ Koda꞉ma꞉ kenke ya yaapo wepieke dina꞉ do kenketa꞉ homeke hau honda꞉ lupa pua aleta꞉ ma꞉nda꞉ ota꞉ na wiekeme. Kutupa mo dawalata꞉ timba꞉ kiti la꞉pa peeke alena꞉ Koda꞉na꞉ Sipitidita꞉ manda hayekeme.  
\v 3 Kutupa Koda꞉ma꞉ alota꞉ Pa̱a̱ pa꞉la꞉eki wina꞉e leeke handaata꞉ pa̱a̱ piekeme.  
\v 4 Koda꞉ma꞉ kutu piekeeki handolo hata꞉ ta꞉na꞉ma꞉ homolo mo timba꞉ ala꞉eki pita꞉ pa̱a̱ pa꞉la꞉eki yaapo putupaalu pina꞉ leekeme.  
\v 5 Ipikana꞉ma꞉ mo pa̱a̱ pa꞉la꞉ ekina꞉ bikita꞉ Natee laata꞉ timba꞉ ala꞉ ekina꞉ bikita꞉ Timbae leekeme. Kota꞉ timba꞉ laa da kelepeeketa꞉ titina꞉ nate yeekeme.   
\p
\v 6-7 Kutupa Koda꞉ma꞉ alota꞉ Mo ikalita꞉ putupaalu pina꞉ yeke dopu miaasa꞉ ekima꞉ handeke ale wina꞉e leeke handaata꞉ kutu piekeme. Koda꞉ma꞉ do wieke alema꞉ta꞉ mo ikalita꞉ putupa꞉alu pea manda make oto nane make wina꞉ leekeme.  
\v 8 Koda꞉ma꞉ koto dopu miaasa꞉ ekima꞉ handeke alena꞉ bikita꞉ Yae leekeme. Kota꞉ timba꞉ laa da kelepeeketa꞉ yaapo peao nate yeekeme.   
\p
\v 9 Kutupa Koda꞉ma꞉ alota꞉ mo ya oto nane ula꞉ ikali pa꞉ta꞉ yu peneme yao opa꞉liao wina꞉ yeke mo ikalita꞉ homeke alena꞉ mombelena꞉e laa leeke handaata꞉ kutu piekeme.  
\v 10 Kutupa mo yuna꞉ bikita꞉ Kenkee laa mo homeke alena꞉ mombeleeke ikalina꞉ bikita꞉ Dawalae leekeme. Koto ekina꞉ moeki hando haota꞉ Koda꞉ma꞉ ta꞉na꞉ma꞉ homeekeme.   
\p
\v 11 Kutupa Koda꞉ma꞉ alota꞉ Do kenkema꞉ta꞉ mo kenkena꞉ opa꞉la꞉ ta꞉ta꞉ ta꞉ta꞉ piki ti potekemanu make kiliki a꞉eta꞉la꞉ alemanu make opaena꞉e laa leeke handaata꞉ kutu piekeme.  
\v 12 Kenkema꞉ kutu piekeeki hando haota꞉ Koda꞉ma꞉ ta꞉na꞉ma꞉ homeekeme.  
\v 13 Timba꞉ laa da kelepeeketa꞉ tepo peao nate yeekeme.   
\p
\v 14 Kutupa Koda꞉ma꞉ alota꞉ Mo nate pita꞉ timba꞉ ala꞉eki yaapo putupa꞉alu pina꞉ yeke oli ya nane pa̱a̱ pa꞉la꞉ ekimanu wina꞉e laata꞉ koto pa̱a̱ pa꞉la꞉eki manuma꞉ta꞉ mo natemanu make bapimanu make ne pamba꞉la꞉eki manuna꞉ dimanu kini peaena꞉ yeke wina꞉e laa leekeme.  
\v 15 Ikana꞉ma꞉ta꞉ mo kenke pa̱a̱ pealuekema꞉ oli ya nanema꞉ hata꞉ pa̱a̱ pilieke laa leeke handaa kutu piekeme.  
\v 16 Koto ekina꞉ Koda꞉ma꞉ta꞉ pa̱a̱ tieke yaapo wepiekeme. Mo natema꞉ta꞉ natepa handeteke haena꞉ make mo kaisepoma꞉ta꞉ timba handeteke haena꞉ piekeme. Kutupa hombulanka꞉manu make wepiekeme.  
\v 17 Ipikana꞉ma꞉ta꞉ mo pa̱a̱ pa꞉la꞉eki manuma꞉ta꞉ mo kenkena꞉ pa̱a̱ peaena꞉ yeke oli ya nane haena꞉ leekeme.  
\v 18 Ikana꞉ma꞉ta꞉ mo natepa pita꞉ timba yaapo handeteke haena꞉ make pa̱a̱ pa꞉la꞉eki pita꞉ timba꞉ ala꞉eki yaapo putupa꞉alu pina꞉ yeke piekeme. Kutupa Koda꞉ma꞉ kotoeki hando haota꞉ ta꞉na꞉ma꞉ homeekeme.  
\v 19 Timba꞉ laa da kelepeeketa꞉ tonko peao nate yeekeme.   
\p
\v 20 Kutupa Koda꞉ma꞉ alota꞉ Mo ikali pa꞉ta꞉ta꞉ ta꞉ta꞉ ta꞉ta꞉ pa pitiki ale manuma꞉ tumbina꞉e laata꞉ yana꞉ta꞉ ba titima꞉ tumbina꞉e laa leekeme.  
\v 21 Koto ekina꞉ Koda꞉ma꞉ta꞉ mo dawalana꞉ pila꞉ si tieke hombelekemanu make oni ikali pa꞉ta꞉ pila꞉ ta꞉ta꞉ ta꞉ta꞉ piki pa pitiki alemanu make ta꞉ta꞉ ta꞉ta꞉ piki bamanu make wepiekeme. Koto ekina꞉ Koda꞉ma꞉ mo alemanu hando haota꞉ ta꞉na꞉ma꞉ homeekeme.  
\v 22 Ipikana꞉ma꞉ta꞉ ta꞉na꞉ma꞉ homa꞉ tiaasa꞉ pima꞉ mo ikali pa꞉ta꞉ pilimi pa pitiki alemanu pa꞉ta꞉ alota꞉ Mo dawala pa꞉ta꞉ sembelomena꞉ pa mendiolo ombu hapa꞉peke laata꞉ mo bamanu pa꞉ta꞉ make alota꞉ Wopu yomena꞉ pa mendiolo ombu hapa꞉peke laa leekeme.  
\v 23 Timba꞉ laa da kelepeeketa꞉ yunki peao nate yeekeme.   
\p
\v 24 Kutupa Koda꞉ma꞉ alota꞉ Mo kenke pa꞉ta꞉ yama꞉ta꞉ ta꞉ta꞉ ta꞉ta꞉ piki pona꞉la꞉ hotekemanu make tikene hala꞉ hotekemanu make tieke make hosikale sunu make haena꞉e laa leeke handaa kutu piekeme.  
\v 25 Koto ekina꞉ta꞉ Koda꞉ma꞉ koto alemanu paeyao wepiaka꞉na꞉ mo alemanu hando haota꞉ ta꞉na꞉ma꞉ homeekeme.   
\p
\v 26 Kutupa Koda꞉ma꞉ alota꞉ Kota꞉ ameta꞉ wanda꞉halimanu wepumana꞉e laa leekeme. Ikita꞉ nikima꞉ handaa nika꞉ hau hondena꞉e laa leekeme. Ikana꞉ma꞉ta꞉ mo ta꞉pelimanu make bamanu make pona꞉la꞉ hotekemanu make tikene hala꞉ hotekemanu make tieke make hosikale sunu make paeya tapaota꞉ kilu tombuao haena꞉e laa leekeme.  
\v 27 Koto ekina꞉ta꞉ Koda꞉ma꞉ wanda꞉hali ipikima꞉ kone handena꞉ wepiekeme. Ipikana꞉ma꞉ta꞉ hali tapake pita꞉ wanda꞉ tapake yaapo wepiekeme.  
\v 28 Ipikana꞉ma꞉ ipiliki ta꞉na꞉ma꞉ homa꞉ tiaasa꞉ pima꞉ alota꞉ Ipilika꞉ monduma꞉ monduma꞉ pilipi wekiwandikina꞉ wekiwandikita꞉ do kenke honiki paeyao pa꞉ta꞉ hata꞉ ala꞉ta꞉ ala꞉ta꞉ paeyao kilu tombuao haena꞉ yeke wekiwandiki wopu mendia꞉pa꞉peke laa leekeme. I̱ma꞉ ipilikita꞉ mo ta꞉pelimanu make bamanu make tikene hala꞉ hotekemanu make handeteke hapena꞉ yeke alome leekeme.  
\v 29 Kutupa ipilikana꞉ma꞉ nopena꞉ yeketa꞉ mo ta꞉ta꞉ ta꞉ta꞉ piki konima꞉ handeke kilikimanu make ta꞉ta꞉ ta꞉ta꞉ piki ti potekemanu make amu pea wepia wina꞉ lolome leekeme.  
\v 30 Pate mo tikene hala꞉ hoteke manuma꞉ make ba manuma꞉ make nena꞉ta꞉ mo ambumanu make katake hake timanu wepia wina꞉ laalome leeke handaata꞉ kutu piekeme.  
\v 31 Kutupa Koda꞉ma꞉ mo ipika꞉ wepia wina꞉ leeke ala꞉ta꞉ ala꞉ta꞉ paeyao handolo hata꞉ta꞉ ta꞉na꞉ tiekema꞉ wopu homeekeme. Kota꞉ timba꞉ laa da kelepeeketa꞉ yunki mindiki peao nate yeekeme.   
\c 2  
\p
\v 1 Kutupa kota꞉ mo kenke nane ula꞉ alemanu make oli ya nane hala꞉ alemanu make paeyao wepu paeyaeyekeme.  
\v 2 Koda꞉ma꞉ mo ipika꞉ poka꞉tia epeeke eta꞉ poko paeyao mo wataake natena꞉ta꞉ e na pokeke hoto pitiekeme.  
\v 3 Koto ekina꞉ ipikana꞉ma꞉ mo wataake peao nateta꞉ ta꞉na꞉ma꞉ homa꞉ tiaasa꞉ pima꞉ Ta꞉ta꞉ ma꞉nda꞉ piki natee laa tombo wina꞉ leekeme. Pa ekipeke koto natena꞉ta꞉ mo ala꞉ta꞉ ala꞉ta꞉ paeyao weputia a꞉pa e poka꞉la꞉eki mina꞉pa꞉laeyeke natee.  
\v 4 Mo kenke ya yaapo make mo ala꞉ta꞉ ala꞉ta꞉ paeyao wepieke tupa꞉ta꞉ kotoe.   
\s1 Mo Ideni E  
\p
\v 5 Tekehali Koda꞉ma꞉ mo kenke ya yaapo wepia dina꞉ta꞉ do kenkena꞉ lako na tapaeyekeeki yalo make yu lu wia꞉peke wanda꞉hali ma꞉nda꞉ dia꞉yeke ekima꞉ do kenkema꞉ta꞉ wae alemanu ma꞉nda꞉ na hao make kilikimanu ma꞉nda꞉ na opeekeme.  
\v 6 Pate mo kenke oto nane wieke ikalima꞉ta꞉ opa꞉liao mo kenke tenke latiki piekeme.   
\p
\v 7 Kutupa mo Tekehali Koda꞉ma꞉ta꞉ kenkena꞉ dokolo mea hali au laa wepiata꞉ ipika꞉ mineke pa꞉ta꞉ta꞉ mo da꞉ta꞉la꞉eki hala꞉la꞉ pomo po lo pambeeke handaata꞉ mo halita꞉ tiao da꞉taa hayekeme.   
\p
\v 8 Kutupa mo Tekehali Koda꞉ma꞉ta꞉ mo nate opa꞉la꞉ nane wieke Ideni kenke pa꞉ta꞉ e pokaata꞉ mo hande wepieke hali koto e pa꞉ta꞉ haena꞉ leekeme.  
\v 9 Koda꞉ma꞉ koto e pa꞉ta꞉ta꞉ mo ta꞉ta꞉ ta꞉ta꞉ piki epeke au leke timanu opaota꞉ epeke ti potekemanu eiyaeyekeme. Koto e tukikina꞉ta꞉ mo da꞉ta꞉la꞉eki kita꞉la꞉ ti make mo epeke hau pita꞉la꞉eki pita꞉ hoke hau pita꞉la꞉eki yaapona꞉ hone u tiaasa꞉ ti make hayekeme.   
\p
\v 10 Mo Ideni e pa꞉ta꞉ta꞉ yopulu hala꞉ ikali ma꞉nda꞉ma꞉ mo e ikali halo hayekeme. Mo ikalita꞉ Ideni mo pate leketa꞉ ata꞉ka꞉ tonkopu piekeme.  
\v 11 Mo titina꞉ ikalita꞉ Pisoni ikalie. Ipikita꞉ mo Ha꞉pila kenke popei yao yapeekeme.  
\v 12 Mo ala꞉ta꞉ ma꞉nda꞉ na ta̱leke kolo make totopo piki weta꞉ make seliapo piki toopimanu make koto pa꞉ta꞉ handa꞉peke ya꞉la꞉me.  
\v 13 Mo yaapo peao ikalita꞉ Kioni ikalie. Ipikita꞉ mo Kusu kenke popei yao yapeekeme.  
\v 14 Mo tepo peao ikalita꞉ Taikitisi ikalie. Ipikita꞉ mo A꞉sitia kenkena꞉ nate opa꞉la꞉ nanema꞉ yapeekeme. Kutupa mo tonko peao ikalita꞉ Yupoteitisi ikalie.   
\p
\v 15 Kutupa Tekehali Koda꞉ma꞉ mo hande halita꞉ Ideni e pa꞉ta꞉ yu lia handeteke haena꞉yeke hawayekeme.  
\v 16 Koda꞉ma꞉ ipiki pa꞉ta꞉ alota꞉ Mo ena꞉ hala꞉ ti poteke paeyaota꞉ napeke ya꞉la꞉pateta꞉  
\v 17 mo epeke hau pita꞉ hoke hau pita꞉la꞉eki yaapona꞉ hone u tiaasa꞉ ti poteke homeke homeke dia꞉me. Mo koto tina꞉ poteketa꞉ ota꞉ na napeke laata꞉ Neka꞉na꞉ta꞉ kota꞉ mo nelipi natena꞉ kone homilipikie laa leekeme.   
\p
\v 18 Kutupa mo Tekehali Koda꞉ma꞉ alota꞉ Mo hali ipika꞉ siki hata꞉ta꞉ hoela꞉me. I̱ma꞉ta꞉ ipiki tamba꞉ mina꞉ ota꞉ epeke ta꞉ma꞉ni ma꞉nda꞉ wepulueke laa leekeme.  
\v 19 Koto ekina꞉ta꞉ Koda꞉ma꞉ mandane dokolomanu mea hoteke paeyao make ba paeyao make wepiekeme. Kutupa ipikana꞉ma꞉ mo alemanu mo halima꞉ handaa biki loma꞉ loma꞉ pina꞉ yeke hatuku epeekeme. Kotota꞉ ika꞉ hande biki mimiki tupa꞉e.  
\v 20 Koto ekina꞉ mo halima꞉ta꞉ mo bamanu paeyao make hotekemanu paeyao make biki hale hale piekeme. Pate koto ale manuta꞉ ota꞉ ma꞉nda꞉ hondo ipiki tamba꞉ mea꞉peke ta꞉ma꞉ni ma꞉nda꞉ na hayekeme.   
\p
\v 21 Koto ekina꞉ mo Tekehali Koda꞉ma꞉ta꞉ mo hali u̱ yoka꞉lupa pena꞉ leekeme. Kutupa u pelia haena꞉ta꞉ Koda꞉ma꞉ mo halina꞉ pa꞉ta꞉liki homeke ma꞉nda꞉ ipila꞉ mea mo loke a꞉mbaeyekeme.  
\v 22 Koda꞉ma꞉ta꞉ koto pa꞉ta꞉likima꞉ta꞉ wanda꞉ wepia mo hali pa꞉ta꞉ hatuku epeekeme.  
\v 23 Kutu pieke mo halima꞉ alota꞉ Ameta꞉ wetepe siki nane I̱ma꞉ handeke yankeke ma꞉nda꞉ doe. Ipika꞉ holikita꞉ yaka holiki pa꞉ta꞉ yama꞉ kone mea ipika꞉ loketa꞉ yaka loke pa꞉ta꞉ yama꞉ kone ma꞉la꞉me. Ipikita꞉ mo hali pa꞉ta꞉ yama꞉ kone miekeeki yalo hata꞉ta꞉ ipika꞉ bikita꞉ wanda꞉e leekeme.  
\v 24 Koto ekina꞉ta꞉ halima꞉ ipika꞉ apa꞉ ama꞉ mina꞉pa꞉lao ipika꞉ wanda꞉ yaapo ta꞉ma꞉ni peaata꞉ ipilikita꞉ homeke kone halepeme.   
\p
\v 25 Mo hali pita꞉ wanda꞉ yaapota꞉ pa tia haepekepate kone ipilikita꞉ yaala꞉ma꞉ na homepekeme.   
\c 3  
\s1 Koda꞉na꞉ pi tunkuliekeeki  
\p
\v 1 Mo Koda꞉ma꞉ wepieke hotekemanu paeyao tukiki pa꞉ta꞉ keto homeketa꞉ ota꞉ hone wopu u lenkene piki hoteke wepiekeme. Koto ketoma꞉ mo wanda꞉ lota꞉ pitolo alota꞉ Koda꞉ma꞉ ipiliki pa꞉ta꞉ta꞉ do e pa꞉ta꞉ hala꞉ ti ma꞉nda꞉na꞉ poteke na napa꞉peke laa ota꞉ lea꞉pe laa leekeme.   
\p
\v 2 Mo wanda꞉ma꞉ hombo peaaso alota꞉ Dikana꞉ma꞉ta꞉ do e pa꞉ta꞉ hala꞉ ti poteke paeyao nolo polopa꞉pateta꞉  
\v 3 mo e tukikina꞉ hala꞉eki homeke homeke dia꞉me laata꞉ Koda꞉ma꞉ diki pa꞉ta꞉ alota꞉ Koto ti poteke homeke ota꞉ na napa꞉peke make ota꞉ na wataapa꞉peke. Kutu pipika꞉na꞉ta꞉ homilipipikie laa lea꞉me leekeme.   
\p
\v 4 Mo ketoma꞉ pi lu moneaaso alota꞉ Kotota꞉ ota꞉ pi dia꞉me. Ipiliki na homilipipikie.  
\v 5 Koda꞉ma꞉ koto leke hauta꞉ ipilikana꞉ma꞉ koto ti poteke nepekena꞉ta꞉ ipikima꞉ kone handaa mo epeke hau pita꞉ hoke hau pita꞉la꞉ ekina꞉ hone u tiaasa꞉ ekita꞉ hone wilipipiki yeke handa lea꞉me leekeme.   
\p
\v 6 Mo wanda꞉ma꞉ mo ti handeeketa꞉ au epeke laa mo ti poteke nalota꞉ ota꞉ a꞉pa꞉la꞉me laa handeekeme. Kutupa ipika꞉ honema꞉ ipikita꞉ hone wopu u lenkene pitolota꞉ ota꞉ a꞉pa꞉la꞉me hone wiekeme. Koto ekina꞉ta꞉ ipikana꞉ma꞉ mo mandane ti potekemanu mea neekeme. Kutupa ipikana꞉ma꞉ mandane ekita꞉ ipika꞉ haliki haleeketa꞉ halikima꞉ make neekeme.  
\v 7 Ipilikana꞉ma꞉ mo ti poteke nepe ale pa꞉ta꞉ koneta꞉ hone u tiaasa꞉eki halaa ipilikita꞉ pa tia hata꞉ pupa꞉ka꞉ta꞉me hone wipikime. Koto ekina꞉ta꞉ ipilikana꞉ma꞉ nose katake tombula ipiliki loke a꞉mbaepekeme.   
\p
\v 8 Koto nate pambolo haena꞉ta꞉ mo Tekehali Koda꞉ta꞉ e pa꞉ta꞉ pomia꞉eki opitolo hata꞉ ipiki a꞉mbao oni ti polu pa꞉ta꞉manu panko pitipikime.  
\v 9 Pate Tekehali Koda꞉ma꞉ mo hali pa꞉ta꞉ wi la꞉moneaaso alota꞉ Neketa꞉ hando pa꞉ta꞉ halepe leekeme.   
\p
\v 10 Mo halima꞉ hombo peaaso alota꞉ I̱ma꞉ neke oni e pa꞉ta꞉ pomieki opu hao I̱ pa tia haowa꞉ ekima꞉ paala꞉ pieke neke a꞉mbao panko pilume leekeme.   
\p
\v 11  Koto leeke Koda꞉ma꞉ alota꞉ Neketa꞉ pa tia haleme laata꞉ Epima꞉ la kia꞉pe. Nakana꞉ma꞉ta꞉ mo I̱ma꞉ na napeke loa꞉ ti poteketa꞉ nepee leekeme.   
\p
\v 12 Mo halima꞉ hombo peaaso alota꞉ Do hande I̱ yaapo hapono lele wanda꞉ma꞉ mo ti poteke mea kieke handa noa꞉me leekeme.   
\p
\v 13 Mo Tekehali Koda꞉ma꞉ mo wanda꞉ pa꞉ta꞉ alota꞉ Do ekita꞉ ekipeke pea pelepe leekeme. Mo wanda꞉ma꞉ hombo peaaso alota꞉ I̱ma꞉ nono yeke handa mo ketoma꞉ I̱ makeaya꞉me leekeme.   
\s1 Hoke Yenki Haleekeeki  
\p
\v 14 Kutupa mo Tekehali Koda꞉ma꞉ mo keto pa꞉ta꞉ alota꞉ Do hau pele ekina꞉ hoke yenki kitolome. Mo hoteke manuma꞉ dia꞉ya꞉la꞉pate pa neke homeke homekema꞉ta꞉ dupiki esihou pi mie. Neketa꞉ ame do kini pea puluta꞉ naka꞉ weleketa꞉ yola꞉ tia pominolo hata꞉ neke pa ha pelia haeka꞉na꞉ta꞉ kota꞉ dokolo no halipikie.  
\v 15 Kutupa I̱ma꞉ neketa꞉ mo wanda꞉ yaapo a꞉nda꞉ tunkula꞉ alu peao ipika꞉ monduma꞉ monduma꞉ pilia꞉ wekiwandikima꞉ make naka꞉ ekima꞉ make a꞉nda꞉ tunkula꞉ alu alu pu haena꞉ lolueke. Ipikana꞉ma꞉ naka꞉ you da꞉ka꞉pa꞉ tombuaeya꞉ka꞉na꞉ta꞉ nakana꞉ma꞉ ipika꞉ anke kinuku handulu nelipikie leekeme.   
\p
\v 16 Kutupa Koda꞉ma꞉ mo wanda꞉ pa꞉ta꞉ alota꞉ I̱ma꞉ neketa꞉ naka꞉ weki loke lombilipi ale pa꞉ta꞉ta꞉ ka꞉nda꞉ pa꞉la꞉eki haka꞉ta꞉peao make weki milipi ale pa꞉ta꞉ta꞉ tanda pa꞉la꞉eki make haka꞉ta꞉palueke. Dupina꞉ kone nakana꞉ma꞉ta꞉ naka꞉ haliki hone wopu wia ipiki oto pa꞉ta꞉ halipikie.   
\p
\v 17 Kutupa Koda꞉ma꞉ A꞉da꞉ma꞉ pa꞉ta꞉ alota꞉ Nakana꞉ma꞉ta꞉ naka꞉ wanda꞉na꞉ pi opua mo I̱ma꞉ na napeke loa꞉ ti poteke neleme. Koto hau pele ekina꞉ do kenketa꞉ mo esihou pi oto pa꞉ta꞉ wilieke. Kutupa nakana꞉ma꞉ta꞉ do kenkena꞉ pa hapa꞉lia haeka꞉na꞉ta꞉ mo kenkema꞉ naka꞉ ne ana꞉na꞉ opaena꞉ e honkopu hao poko halipikie.  
\v 18 Mo kenkena꞉ta꞉ ambumanu make tekeke hake alemanu make opa꞉tiki pilieke. Kutupa nakana꞉ma꞉ta꞉ mo hapekena꞉ hala꞉ wae alemanu no halipikie.  
\v 19 Kutupa mo kenkema꞉ anemone ale opena꞉ yeketa꞉ a꞉ka꞉li mendia honkopu hao e poka꞉tiki pilipikie. Dupiki hau putia pua mo neke wa꞉pa꞉la꞉ kenke pa꞉ta꞉ pulu hata꞉ta꞉ mina꞉pa꞉lalipikie. Neketa꞉ dokoloma꞉ wepiekeeki yalo hata꞉ dokolo au kone lelipikie.   
\p
\v 20 A꞉da꞉ma꞉ma꞉ ipika꞉ wanda꞉na꞉ bikita꞉ Ipa꞉ leekeme. Pa ekipeke ipikita꞉ wanda꞉hali paeyaona꞉ inkikie.  
\v 21 Kutupa mo Tekehali Koda꞉ma꞉ hoteke manuna꞉ yonkeleke mea aka꞉ wepiaoka꞉na꞉ mo toolina꞉ yamaeyekeme.   
\s1 A꞉da꞉ma꞉ Ipa꞉ yaapo tolu liekeeki  
\p
\v 22 Kutupa mo Tekehali Koda꞉ma꞉ alota꞉ Ameta꞉ mo halita꞉ niki ma꞉nda꞉ hondoma꞉ handaata꞉ mo epeke hau pita꞉ hoke hau pita꞉la꞉eki yaapo hone ula꞉me. Koto ekina꞉ ipikana꞉ma꞉ta꞉ pa hatia puaama꞉na꞉ mo deto hala꞉ tina꞉ poteke naama꞉na꞉ waleke na halomana꞉e leekeme.  
\v 23 Koto ekina꞉ta꞉ mo Tekehali Koda꞉ma꞉ta꞉ mo halita꞉ Ideni e pa꞉ta꞉ tolu lia ipiki wepia꞉ kenke kone yu lina꞉ haena꞉ leekeme.  
\v 24 Kutupa Koda꞉ma꞉ mo ena꞉ nate opa꞉la꞉ naneta꞉ mandane honkopu hake enisolomanu haena꞉ laa make kutupa ti talo talo hake bainasi homeke mandane mandane lekeleke alo hakeeki haena꞉ leekeme. Do hau piki hauta꞉ mo deto hala꞉ ti teke pa꞉ta꞉ ma꞉nda꞉ a꞉paama꞉na꞉ piekeme.   
\c 4  
\s1 Keini pita꞉ Eipolo yaapo  
\p
\v 1 Kutupa A꞉da꞉ma꞉ma꞉ ipika꞉ weteke yaapo loke apa꞉tao mo wanda꞉ta꞉ weki loke lombeekeme. Ipikana꞉ma꞉ weki mendia alota꞉ Mo Tekehalima꞉ tamba꞉ mina꞉la꞉ ekima꞉ do weki mondoloma꞉ laa mo wekina꞉ bikita꞉ Keinie leekeme.  
\v 2 Pa hoki naneta꞉ weki ma꞉nda꞉ Eipolo mondu wiekeme. Eipolota꞉ sipisipi handeteke hayekepate Keinita꞉ e hali hayekeme.  
\v 3 Nate ma꞉nda꞉na꞉ta꞉ Keini ipika꞉ mandane ne napeke mea a꞉pa Tekehali pa꞉ta꞉ pa hameke haleekeme.  
\v 4 Kutupa Eipoloma꞉ ipika꞉ sipisipima꞉ titina꞉ mendieke ikikita꞉ lia mo epeke mindiki manuta꞉ Koda꞉ pa꞉ta꞉ pa hameke haleekeme. Mo Tekehalima꞉ta꞉ Eipoloma꞉ pa hameke haleeke ekina꞉ make ipiki yaapo ta꞉na꞉ma꞉ homeekeme.  
\v 5 Kutu piekepate Keinina꞉ pa hameke haleeke ekita꞉ kiayekeme. Koto ekina꞉ Keinita꞉ wenoko homa꞉niao mineke wopu pankeekeme.  
\v 6 Kutu pieke mo Tekehali Koda꞉ma꞉ Keini lota꞉ pitolo alota꞉ Neketa꞉ ekipeke mineke pankelepe laa Naka꞉ leke popeleketa꞉ ekipeke homa꞉nialepe.  
\v 7 Nakana꞉ma꞉ ota꞉ hau pika꞉na꞉ yoluta꞉ naka꞉ leke popeleke kipa baalo pia꞉pate nakana꞉ma꞉ hoke hau pele ekima꞉ta꞉ hoke ekima꞉ta꞉ naka꞉ pota꞉ kake pa꞉ta꞉ yu pamba hala꞉me. Ipikana꞉ma꞉ neke dipula muluekema꞉ pita꞉la꞉pate nakana꞉ma꞉ta꞉ ota꞉ bepolapeke ya꞉la꞉me leekeme.   
\p
\v 8 Kutupa Keinima꞉ ipika꞉ kame Eipolo pa꞉ta꞉ alota꞉ Oni e pa꞉ta꞉ pana꞉ epoe leekeme. Kutupa mo hama̱la̱꞉ oni ena꞉ pua haepe dina꞉ta꞉ Keinima꞉ la꞉ka꞉la꞉ moneao ipika꞉ hameke siki kone homena꞉ liekeme.   
\p
\v 9 Mo Tekehalima꞉ Keini lota꞉ pitolo alota꞉ Naka꞉ kame Eipolota꞉ hando pa꞉ta꞉ hala꞉pe leekeme. Koto leeke Keinima꞉ hombo peaaso alota꞉ I̱ mata꞉la꞉me. Yaka kameta꞉ I̱ma꞉ handeteke hapeke ya꞉la꞉pe leekeme.   
\p
\v 10 Koto leeke mo Tekehalima꞉ alota꞉ Ekipeke nakana꞉ma꞉ do hoke hau pea pelepe laata꞉ Mo hoke hauta꞉ Koda꞉ nakana꞉ma꞉ panisi peae laa naka꞉ kamena꞉ wema꞉ta꞉ pi ho̱la̱꞉makema꞉ leke oni kenkena꞉ hata꞉ I̱ wi ala꞉me leekeme.  
\v 11 Neketa꞉ mo esihou pi oto pa꞉ta꞉ haleeki yalota꞉ do kenkena꞉ e ota꞉ pa na pokilipikie laata꞉ Pa ekipeke nakana꞉ma꞉ mo naka꞉ kame lilipi natena꞉ kone mo kenkema꞉ta꞉ ipika꞉ we dodopo lo noluekema꞉ kake ala꞉pelia hake nono pia꞉me.  
\v 12 Kutupa nakana꞉ma꞉ e waemanu nokepeka꞉na꞉ta꞉ ne napeke ma꞉nda꞉ na halieke. Kutupa neketa꞉ do kenkena꞉ da teke dia꞉ yalo hata꞉ pomu lopa꞉la꞉ hali halipikie leekeme.   
\p
\v 13 Koto leeke Keinima꞉ mo Tekehali pa꞉ta꞉ alota꞉ Do ka꞉nda꞉ta꞉ I̱ma꞉ mea tia꞉peketa꞉ ana꞉ na pa꞉la꞉me laata꞉  
\v 14 kutupa nakana꞉ma꞉ta꞉ I̱ do kenke mina꞉pa꞉lao pono make naka꞉ leke tonona꞉ na hake hano leke tolu liteleme. Koto ekina꞉ I̱ta꞉ do kenkena꞉ da teke dia꞉yeke some hata꞉ ma꞉nda꞉ epima꞉ I̱ handa꞉ wia꞉ka꞉na꞉ta꞉ kota꞉ I̱ lilieke leekeme.   
\p
\v 15 Koto leekepate mo Tekehalima꞉ hombo peaaso alota꞉ Dia꞉me. Ma꞉nda꞉ epima꞉ neke lia꞉ka꞉na꞉ta꞉ kota꞉ koto somena꞉ hoke yenkita꞉ wataake hata꞉ peao haka꞉ta꞉pao homena꞉ lilieke leekeme. Koto leeke ekina꞉ ma꞉nda꞉ epima꞉ mo Keini manda꞉hande pia꞉ka꞉na꞉ta꞉ na lina꞉e alo hata꞉ Tekehalima꞉ mo somena꞉ lokena꞉ patehau ma꞉nda꞉ piekeme.  
\v 16 Kutu pieke handaa Keinita꞉ mo Tekehalina꞉ leke popelekena꞉ tonona꞉ na hake pao mo Ideni ena꞉ nate opa꞉la꞉ nane mo Pomina꞉la꞉eki leeke kenke ma꞉nda꞉ pa꞉ta꞉ pua hayekeme.   
\s1 Keinina꞉ tapake  
\p
\v 17 Keini pita꞉ ipika꞉ wanda꞉ yaapoma꞉ weki mondu wia bikita꞉ Inoko lepekeme. Kutupa Keinima꞉ daoni ma꞉nda꞉ a꞉eyaata꞉ eiyekena꞉ biki taapa꞉ tiao biki leekeme.  
\v 18 Wetepena꞉ Inokoma꞉ta꞉ biki Itado leke weki homeke mondu wiekeme. Itadota꞉ Mehudieilina꞉ ateke yekeme. Kutupa Mehudieilima꞉ta꞉ biki Meduseili leke weki mondu wiekeme. Meduseilita꞉ La꞉mekena꞉ ateke yekeme.  
\v 19 La꞉mekema꞉ta꞉ wanda꞉ yaapo Ada pita꞉ Sila yaapo miekeme.  
\v 20 Adama꞉ta꞉ Dieibolo mondu wiekeme. Ipikita꞉ mo palai da pa꞉ta꞉manu hata꞉ hotekemanu punieke ekina꞉ peayeke apa꞉meina꞉ kini pieke hali hayekeme.  
\v 21 Ipika꞉ hameketa꞉ Diubolo yekeme. Koto someta꞉ mo hande kidama꞉ handeke ale pita꞉ puo̱lo̱ yaapo limiki tapakena꞉ kini peayeke hali hayekeme.  
\v 22 Silama꞉ta꞉ weki Tubali Keini mondu wiekeme. Mo wekima꞉ta꞉ kopama꞉ handeke ale botonisi pita꞉ aeya꞉ni yaapoma꞉ mo ta꞉ta꞉ ta꞉ta꞉ piki kaiya sipeidimanu kini pea wepiekeme. Ipika꞉ belikita꞉ Nahama yekeme.   
\p
\v 23 La꞉mekema꞉ ipika꞉ weteke yaapo pa꞉ta꞉ alota꞉  
\q1 Ada pita꞉ Sila yaapoo. Yaka pi opua꞉pe.  
\q1 Mo panake hali ma꞉nda꞉ma꞉ta꞉ I̱ yombieke handaa I̱ma꞉ ipiki lua꞉me.  
\v 24 Koto ekina꞉ta꞉ mo hande Keini lita꞉la꞉ ekina꞉ yenkita꞉ watake hata꞉ haliweki homolo pia꞉ka꞉na꞉ta꞉ kota꞉ ma꞉nda꞉ epima꞉ I̱ lia꞉ka꞉na꞉ tombota꞉ mo 77 haliwekita꞉ I̱ lila꞉eki yenkina꞉ homilimikie leekeme.   
\s1 Sedi pita꞉ Inosi yaapo  
\p
\v 25 A꞉da꞉ma꞉ pita꞉ weteke yaapoma꞉ta꞉ weki ma꞉nda꞉ mondu wipikime. Kutupa mo wanda꞉ma꞉ alota꞉ Keinima꞉ lia꞉ weki Eipolona꞉ anketeke mina꞉ yeke Koda꞉ma꞉ weki ma꞉nda꞉ ka꞉la꞉me laata꞉ ipika꞉ bikita꞉ Sedie leekeme.  
\v 26 Kutupa Sedima꞉ta꞉ biki Inosi leeke weki mondu wiekeme. Koto natena꞉ kini peaata꞉ mo wanda꞉halima꞉ Tekehalina꞉ yakopiki biki alo hata꞉ yeiya꞉ lao haemekeme.   
\c 5  
\s1 A꞉da꞉ma꞉na꞉ tapake  
\p
\v 1 Dota꞉ mo hande A꞉da꞉ma꞉na꞉ tapakena꞉ biki ula꞉ ekie. Koda꞉ma꞉ hande wanda꞉hali wepieke dina꞉ta꞉ ipikima꞉ kone handeke wanda꞉hali wepitolota꞉  
\v 2 hali pita꞉ wanda꞉ yaapo wepiekeme. Ipikana꞉ma꞉ta꞉ mo tooli ta꞉na꞉ma꞉ homaasa꞉ pi laaka꞉na꞉ ipilika꞉ bikita꞉ Wanda꞉halie laa wiekeme.  
\v 3 A꞉da꞉ma꞉ ipika꞉ bapi 130 mieketa꞉ ipikima꞉ handeke weki ma꞉nda꞉ mondu wiaata꞉ ipika꞉ bikita꞉ Sedi leekeme.  
\v 4 Koto hoki naneta꞉ A꞉da꞉ma꞉ta꞉ bapi 800 hayekeme. Koto bapi tukiki pa꞉ta꞉ta꞉ mandane wekiwandiki make mendiekeme.  
\v 5 Kutupa ipikita꞉ 930 bapina꞉ta꞉ homeekeme.   
\p
\v 6 Mo Sedi ipika꞉ bapi 105 yeketa꞉ biki Inosi leeke weki mondu wiekeme.  
\v 7 Kutupa bapi 807 tukiki pa꞉ta꞉ta꞉ mandane wekiwandiki make mondu wiaata꞉  
\v 8 ipika꞉ 912 bapina꞉ta꞉ homeekeme.   
\p
\v 9 Mo Inosi ipika꞉ bapi 90 yeketa꞉ biki Kenana leeke weki mondu wiekeme.  
\v 10 Kutupa bapi 815 tukiki pa꞉ta꞉ta꞉ mandane wekiwandiki make mondu wiaata꞉  
\v 11 mo 905 bapina꞉ta꞉ homeekeme.   
\p
\v 12 Mo Kenana ipika꞉ bapi 70 yeketa꞉ Mahalale biki leeke weki mondu wiekeme.  
\v 13 Kutupa bapi 840 tukiki pa꞉ta꞉ta꞉ mandane wekiwandiki make wopu mondu wiaata꞉  
\v 14 mo 910 bapina꞉ta꞉ homeekeme.   
\p
\v 15 Mo Mahalale bapi 65 yeketa꞉ Dia꞉tedi biki leeke weki mondu wiekeme.  
\v 16 Kutupa bapi 830 tukiki pa꞉ta꞉ta꞉ mandane wekiwandiki make mondu wiaata꞉  
\v 17 mo 895 bapina꞉ta꞉ homeekeme.   
\p
\v 18 Mo Dia꞉tedi ipika꞉ bapi 162 yeketa꞉ biki Onoko leeke weki mondu wiekeme.  
\v 19 Kutupa bapi 800 tukiki pa꞉ta꞉ta꞉ mandane wekiwandiki make mondu wiaata꞉  
\v 20 mo 962 bapina꞉ta꞉ homeekeme.   
\p
\v 21 Mo Inoko ipika꞉ bapi 65 yeketa꞉ biki Medusela leeke weki mondu wiekeme.  
\v 22 Koto hoki naneta꞉ Inokota꞉ 300 bapi tukiki pa꞉ta꞉ta꞉ Koda꞉ yaapo ta꞉ma꞉ni pea hata꞉ mandane wekiwandiki mondu wiekeme.  
\v 23 Ipikita꞉ do kenkena꞉ 365 bapi hata꞉  
\v 24 Koda꞉ yaapo ta꞉ma꞉ni pipikime. Kutupa ipikita꞉ Koda꞉ma꞉ miekeeki yalo hata꞉ pa alu paeyekeme.   
\p
\v 25 Mo Medusela ipikita꞉ bapi 187 yeketa꞉ biki La꞉meke leeke weki mondu wiekeme.  
\v 26 Kutupa bapi 782 tukiki pa꞉ta꞉ta꞉ mandane wekiwandiki make mondu wiekeme.  
\v 27 Kutupa 965 bapina꞉ta꞉ homeekeme.   
\p
\v 28 Mo La꞉meke ipikita꞉ bapi 182 yeketa꞉ weki mondu wia hata꞉  
\v 29 alota꞉ Mo Tekehalima꞉ esihou pi wieke kenkena꞉ kone do wekima꞉ta꞉ do nika꞉ ka꞉nda꞉ paeyao mea baalo pa꞉la꞉ wekie alo hata꞉ ipika꞉ bikita꞉ Noa leekeme.  
\v 30 Kutupa bapi 595 pa꞉ta꞉ta꞉ mandane wekiwandiki make mondu wiekeme.  
\v 31 Kutupa 777 bapina꞉ta꞉ homeekeme.   
\p
\v 32 Kutupa Noa ipiki bapi 500 mieketa꞉ weki tepo mondu wiekeme. Ika꞉ bikita꞉ Seme make Ha꞉me make Dieipedi yekeme.   
\c 6  
\s1 Wanda꞉halina꞉ hoke hau  
\p
\v 1 Mo hande wanda꞉hali paeyao kenke honiki honiki paeyaona꞉ putupieke handaata꞉ wandiki titi make mendimikime.  
\v 2 Kutupa mo wandiki tonuta꞉ seliapo pimiki handaa mo Koda꞉na꞉ eiyeke tonuma꞉ ika꞉ hone pia꞉ tupa꞉ muma꞉ muma꞉ pimikime.  
\v 3 Kutupa Tekehalima꞉ alota꞉ I̱ma꞉ mo wanda꞉halita꞉ pa na hao haena꞉ lolueke laata꞉ Pa ekipeke ikita꞉ homa꞉peke ya꞉la꞉ loke halemeke handa loa꞉me. Koto ekina꞉ ame do siki kini pea puata꞉ ma꞉nda꞉ 120 bapi haka꞉ta꞉pao na haena꞉ lolueke leekeme.  
\v 4 Koto nate nina꞉ make wetepe nina꞉ make do kenkena꞉ta꞉ mo hande kenke wanda꞉ pita꞉ Koda꞉na꞉ eiyeke yaapona꞉ monduma꞉ monduma꞉ pieke weki titita꞉ ankolomeke haliweki titima꞉ handemekeme. Ikita꞉ you hali tieke tieke hata꞉ ikita꞉ mo amba꞉ kiake haemeke wanda꞉halina꞉ biki kende tupaa wieke haliweki yekeme.   
\p
\v 5 Mo Tekehalima꞉ do kenkena꞉ haemeke wanda꞉hali paeyaoma꞉ hoto paeyao ika꞉ putia peme hoke haumanu make ika꞉ temokona꞉ honemanu u tia peme ekimanu make hando haota꞉  
\v 6 ipikana꞉ma꞉ alota꞉ oni wanda꞉halita꞉ pa ekipeke do kenkena꞉ haena꞉ wepia polope hone wiekeme. Koto ekina꞉ koto hone wotu witolo hata꞉ alota꞉  
\v 7 I̱ma꞉ do wepolo wanda꞉hali make hotekemanu make bamanu make paeyaota꞉ I̱ma꞉ kone homena꞉ lia baalueke laa I̱ma꞉ta꞉ pa ekipeke wepia polope leekeme.  
\v 8 Pate mo Tekehalima꞉ta꞉ Noa yaapota꞉ ta꞉na꞉ma꞉ homeekeme.   
\s1 Noa  
\p
\v 9-10 Dota꞉ Noa tapakena꞉ pie. Ipikita꞉ weki tepo mondu wiekeme. Seme make Ha꞉me make Dieipedi make yekeme. Noa hayeke natena꞉ ipikita꞉ pu ata꞉ka꞉ peaya꞉eki ma꞉nda꞉ dia꞉yalo hata꞉ ipiki homeke homeke epeke some hayekeme. Ipikita꞉ Koda꞉ yaapo ta꞉ma꞉ni pea hayekeme.  
\v 11 Pate Koda꞉na꞉ leke popelekena꞉ wanda꞉hali paeyaota꞉ hoke hauma꞉ tumbulu bao make haku na piki hau pita꞉la꞉eki manuma꞉ta꞉ kenke honiki paeyao pa꞉ta꞉ putu piekeme.  
\v 12 Kutupa Koda꞉ma꞉ handeekepate do kenketa꞉ hoeya꞉pa wia wanda꞉hali paeyaota꞉ hokeeki pa꞉ta꞉ haemekeme.   
\p
\v 13 Koda꞉ma꞉ Noa pa꞉ta꞉ alota꞉ I̱ma꞉ wanda꞉hali paeyao ota꞉ hoeyaalueke hone witolome laata꞉ Do kenkena꞉ta꞉ ika꞉ haku na piki hau manuma꞉ tumba꞉la꞉ ekina꞉ iki paeyao siki hoeyaalueke.  
\v 14 Kutu pulu pa꞉la꞉ ekina꞉ nakana꞉ma꞉ epeke tima꞉ naka꞉ sisima a꞉eyaa tukiki naneta꞉ da panda꞉manu wepiaata꞉ oni tukiki nane make hama꞉ nane make ota꞉ paeyao koloda lia꞉peke.  
\v 15 Kutupa hokulu pulu pa꞉la꞉ ekina꞉ tombota꞉ 133 mida wepiaata꞉ mo petipeke ya꞉la꞉ ekina꞉ tombota꞉ 22 mida wepia haliao halo pa꞉la꞉ ekina꞉ tombota꞉ 13 mida wepia꞉peke.  
\v 16 Kutupa mo sisimana꞉ta꞉ holu wepia mo holu tukikina꞉ make pa꞉ta꞉liki yaapona꞉ make waleke 44 sendimida wina꞉ lapeke. Kutupa mo sisimana꞉ tukiki pa꞉ta꞉ta꞉ puku tepo wiaata꞉ tea꞉na꞉ta꞉ pota꞉ kake lombapeke.  
\v 17 Pa ekipeke I̱ma꞉ta꞉ do kenkena꞉ haleme pa pitiki ale paeyao siki hoeyaaluekema꞉ yeke ikali tieke a꞉meina꞉ tapaaluekema꞉ loa꞉me. Kutupa do kenkena꞉ haleme aleta꞉ ota꞉ paeyao homilimikie.  
\v 18 Pate I̱ma꞉ta꞉ neke pa꞉ta꞉ ya pi la꞉ ulueke. Koto ekina꞉ naka꞉ wanda꞉ ipiliki make naka꞉ weki tonu make ika꞉ wanda꞉weki make oni sisima pa꞉ta꞉ pupe.  
\v 19-20 Kutupa ta꞉ta꞉ ta꞉ta꞉ piki hotekemanu make bamanu make homaama꞉na꞉ wanda꞉eki mea꞉tiki halieki mea꞉tiki pea oni sisima pa꞉ta꞉ mea pupe.  
\v 21 Kutupa ika꞉ ne make mo hoteke ba manuna꞉ make nolo peleme nemanu make mea pua꞉pa꞉peke leekeme.  
\v 22 Koto leeke handaa Noama꞉ta꞉ Koda꞉ma꞉ pea꞉peke leeke hau sunu paeya꞉ tapao ana꞉na꞉ piekeme.   
\c 7  
\s1 Mo ikali tieke teekeeki  
\p
\v 1 Mo Tekehalima꞉ Noa pa꞉ta꞉ alota꞉ Do kenke honiki paeyao pa꞉ta꞉ta꞉ I̱ma꞉ta꞉ neke homeke homeketa꞉ mo tikitiki hau pu haleeki handa꞉ ulu ekina꞉ naka꞉ wekiwandiki iki paeyao oni sisima pa꞉ta꞉ pupe leekeme.  
\v 2 Kutupa neke ame̱le̱ta꞉ mo ota꞉ ha̱i̱ na ta̱leke ta꞉ta꞉ ta꞉ta꞉ piki hoteketa꞉ wataake hata꞉ tooli tooli lo mea polo pelepateta꞉ mo ha̱i̱ ta̱leke ta꞉ta꞉ ta꞉ta꞉ piki hoteke manuta꞉ tooli homeke lo mea꞉peke.  
\v 3 Kutupa mo ta꞉ta꞉ ta꞉ta꞉ piki bamanu make wataake hata꞉ tooli tooli lo mea꞉peke. Pa ekipeke kutupiki hau pika꞉na꞉ta꞉ kota꞉ mo ta꞉ta꞉ ta꞉ta꞉ piki hotekemanu make bamanu make na alupiki pa do kenkena꞉ mondu sembelaena꞉ lelipikie.  
\v 4 Kutupa ame do natena꞉ kini pea yata꞉polo mo wataake hata꞉ peao nate paeya꞉ka꞉na꞉ta꞉ mo I̱ma꞉ wepolo pa pitiki alemanu paeyao hoeyaena꞉ yeketa꞉ hali tieke yaapo natena꞉ta꞉ na to lena꞉ leke lako lopena꞉ lolueke leekeme.  
\v 5 Koto leeke Noama꞉ta꞉ mo Tekehalima꞉ ota꞉ pea꞉peke leeke ekimanu paeya꞉ tapao piekeme.   
\p
\v 6 Noata꞉ bapi 600 mieke dina꞉ta꞉ do kenkena꞉ mo ikali tieke a꞉meiyekeeki epeekeme.  
\v 7 Ipiliki tooli make ipilika꞉ weki tooli tooli make mo ikali tieke a꞉meiyolo piekeeki wendiao oni sisima pa꞉ta꞉ pemekeme.  
\v 8 Kutupa mo ta꞉ta꞉ ta꞉ta꞉ piki ha̱i̱ ta̱leke make ha̱i̱ na ta̱leke hotekemanu make bamanu make paeyao siki tooli tooli lo  
\v 9 mo Koda꞉ma꞉ pia꞉peke leeke tupa꞉ Noa ame̱le̱ oni sisima pa꞉ta꞉ honda꞉ pambemekeme.  
\v 10 Kutupa wataake hata꞉ nate paeyeketa꞉ mo ikali tieke kini pea teekeme.   
\p
\v 11 Noa ipika꞉ bapi 600 mieketa꞉ mo hande yaapo peao opeeke kaisepona꞉ pula yaapona꞉ pa nate tepo mieketa꞉ mo kenke tekilipulu bao oni kenke oto nane ula꞉ ikali paeyao opolu bao make oli ya nane wieke lakota꞉ pota꞉ lombieke pita꞉ta꞉ lombolu baeyekeme.  
\v 12 Kutupa mo lako pa ipulu ipulu haena꞉ta꞉ hali tieke yaapo nate pa mulu yapeekeme.  
\v 13 Koto kone Koda꞉ma꞉ pua꞉peke leeke natena꞉ta꞉ Noa tooli make ipilika꞉ eiyeke tonu Seme make Ha꞉me make Dieipedi make ika꞉ weteke tonu make paeyao oni sisima pa꞉ta꞉ honda꞉ pambemekeme.  
\v 14 Mo hosiki hosiki ale make aneke alemanu make pona꞉la꞉eki pita꞉ tikene hala꞉ ta꞉ta꞉ ta꞉ta꞉ piki hoteke make bamanu make mo Noa tapake ame̱le̱ mandakena꞉ pitulu pemekeme.  
\v 15-16 Mo ta꞉ta꞉ ta꞉ta꞉ piki pa pitiki alemanu tooli tooli lo mo Tekehalima꞉ leeke tupa꞉ Noa ame̱le̱ oni sisima tukiki pa꞉ta꞉ pemekeme. Kutupa mo Tekehalima꞉ Noana꞉ hoki teli teli pu kone pota꞉ poka꞉moneayekeme.   
\p
\v 17 Kutupa mo ikali tieketa꞉ hali tieke yaapo natena꞉ epeeketa꞉ mo sisima tia halo pieke tupa꞉ ikali kendo ana꞉na꞉ wiekeme.  
\v 18 Kutupa mo ikalita꞉ noka꞉ tieke wiekeeki yalo hata꞉ mo sisimata꞉ manda tia pomiekeme.  
\v 19 Mo ikalita꞉ ota꞉ noka꞉ tieke wiekeeki yalo hata꞉ mo hokulupeke pote tumiki manuta꞉ ota꞉ tote peao alu paeyekeme.  
\v 20 Kutupa mo ikali tieketa꞉ mi̱li mi̱li a꞉meiyolo hata꞉ mo ota꞉ lombeipiki hokulupeke pote tumiki manuta꞉ ikalima꞉ta꞉ pa 7 mida tupa꞉ anekema꞉ tote piekeme.  
\v 21 Kutu pieke handaa do kenkena꞉ pa pitiki alemanu paeyao homeekeme. Mo bamanu paeyao make hotekemanu paeyao make wanda꞉hali paeyao make ota꞉ homeekeme.  
\v 22 Do kenkena꞉ pomo mea pitimiki alemanu paeyao homemekeme.  
\v 23 Mo Tekehalima꞉ta꞉ do kenkena꞉ pa pitiki alemanu paeyao hoeyaeyekeme. Wanda꞉hali make hotekemanu make bamanu make paeya꞉ tapao hoeyaeyekeme. Pate Noa ame̱le̱ oni sisima pa꞉ta꞉ pitimikieki homeke pa pambo haemekeme.  
\v 24 Mo ikali tieketa꞉ 150 natena꞉ kone pa taa hayekeme.   
\c 8  
\s1 Mo hande ikali tieke lomeekeeki  
\p
\v 1 Koda꞉ma꞉ta꞉ Noa pita꞉ mo sisima pa꞉ta꞉ pitimiki tapake paeyaota꞉ hone na yonka꞉laeyekeme. Ipikana꞉ma꞉ po epena꞉ leeketa꞉ mo ikali kini pea o̱ loma꞉ loma꞉ piekeme.  
\v 2 Mo hande kenke oto nane a꞉liaeyeke ikali pita꞉ oli ya nane lombolu baeyeke ikali yaapo telipina꞉ a꞉mbeeketa꞉ mo lako paeyekeme.  
\v 3 Kutupa mo ikalita꞉ pa 150 nate ma꞉nda꞉na꞉ta꞉ o̱ loma꞉ loma꞉ piekeme.  
\v 4 Kutupa mo wataake peao kaisepona꞉ pula yaapona꞉ nate tepona꞉ mo sisimata꞉ mo A꞉ta꞉ta꞉de tokona꞉ a꞉pa wiekeme.  
\v 5 Kutupa mo ikalita꞉ o̱ la꞉niatia pua kiki yaapo peao kaisepo opeeke titina꞉ natena꞉ta꞉ mo pote tumikimanu peneme yao waleekeme.   
\p
\v 6 Kutupa nate hali tieke yaapo paeyeketa꞉ Noama꞉ da ka꞉ka꞉na꞉ ma꞉nda꞉ lomba  
\v 7 mo (da꞉e̱i̱nkima꞉ handeke) ba homeke ipika꞉ biki leibeni tapaeyekeme. Mo hande ba paa na la꞉ka꞉la epeeketa꞉ mo ikali o̱ la hala꞉pa꞉ wina꞉yeke pa a̱ya̱ pomu lopo hayekeme.  
\v 8 Kutu pieketa꞉ Noama꞉ mo ikali o̱ la꞉niala꞉pe la handena꞉ yeke paa ba ma꞉nda꞉ melipu tapaeyekepate  
\v 9 mo kenketa꞉ ikalima꞉ pa tote pea wiekeeki yalo mo melipu ipiki pita꞉peke alena꞉ dia꞉yeke handaa paa mo sisima wieke alena꞉ pa la꞉ka꞉la peekeme. Kutu pieke handaa Noama꞉ kiki hama꞉ nane pena꞉ laa mo ba handa꞉ miekeme.  
\v 10 Kutupa mo hoto wataake hata꞉ nate pa yu wia haota꞉ mo hande melipu paa pena꞉ tapaeyekeme.  
\v 11 Kutu pieketa꞉ mo melipuma꞉ta꞉ nate oni pambolo pulu haena꞉ ipika꞉ kake pa꞉ta꞉ mo panake olipi katake hapula Noa pa꞉ta꞉ paa epeekeme. Kutu piekeeki handaa Noama꞉ta꞉ mo ikalita꞉ o̱ la꞉niaya꞉ka꞉ta꞉me hone wiekeme.  
\v 12 Kutupa Noama꞉ wataake hata꞉ natena꞉ pa hao mo melipu paa tapaeyekepate koto natena꞉ta꞉ mo hande bata꞉ paa na la꞉ka꞉la epeekeme.   
\p
\v 13 Mo Noata꞉ 601 bapi mieketa꞉ mo titina꞉ kaisepona꞉ titina꞉ natena꞉ta꞉ mo ikalita꞉ ota꞉ o̱ la꞉niayekeme. Kutu pieke handaa Noama꞉ta꞉ mo sisima a꞉mbaeyeke ale mea bao lekema꞉ lekema꞉ piekepate mo kenketa꞉ hapuma꞉ hapuma꞉ pia꞉eki handeekeme.  
\v 14 Mo yaapo peao kaisepona꞉ pula tepo paeya yunki mindiki hata꞉ peao natena꞉ta꞉ mo kenketa꞉ ota꞉ hapupa peekeme.   
\p
\v 15 Koda꞉ma꞉ Noa pa꞉ta꞉ alota꞉  
\v 16 Naka꞉ wanda꞉ make naka꞉ weki tooli tooli make hama opolu bao yopupe laata꞉  
\v 17 Mo ba manuma꞉ make hoteke manuma꞉ make mendiolo mendiolo ombu haya꞉ka꞉na꞉ do kenke honiki paeyao pa꞉ta꞉ sembelena꞉ mea opolu bapee leekeme.  
\v 18 Koto leeke Noa tooli make ipilika꞉ weki tooli tooli make mo sisima mina꞉pa꞉lao hama opolu bao pemekeme.  
\v 19 Kutupa mo hotekemanu make bamanu make ika꞉ homeke tapake sunu lo mandakena꞉ opolu baemekeme.   
\s1 Noama꞉ hoteke lia haleekeeki  
\p
\v 20 Noama꞉ta꞉ Koda꞉ pa꞉ta꞉ oloda wepiata꞉ mo ha̱i̱ na ta̱leke hotekemanu make bamanu make tapake tapakena꞉ homeke homeke lo mea tieke tonka꞉na꞉ mo olodana꞉ lu yanka haleekeme.  
\v 21 Kutu pieke handaa mo lia haleeke hotekena꞉ totopo seliapoma꞉ta꞉ mo Tekehali ta꞉na꞉ homa꞉ tiayeke handaa ipika꞉ kone alota꞉ Do wanda꞉halima꞉ pu haleme ekina꞉ I̱ma꞉ do kenketa꞉ esihou pi oto pa꞉ta꞉ ota꞉ paa na wina꞉ lolueke. Pa ekipeke ika꞉ mo panake daeta꞉la꞉me ale pa꞉ta꞉ koneta꞉ hoke honemanu wilimi ekita꞉ I̱ma꞉ hone ulu ekina꞉ loa꞉me. Koto ekina꞉ I̱ma꞉ ame do pua꞉ tupa꞉ mo do kenkena꞉ pa pitiki alemanu paeyao ota꞉ paa a꞉nda꞉ na hoeyaalueke.  
\v 22 Kutupa do kenke pa wina꞉ta꞉ noka꞉pa꞉la꞉ nate make ne napeke mina꞉la꞉ nate make wilieke. Kutupa make hoto paeyao kosa꞉ make titipu make nate ki make lako ki make nate make timba꞉ make ota꞉ pa u̱ pelia halieke leekeme.   
\c 9  
\s1 Koda꞉ma꞉ Noa yaapo pi la꞉ wiekeeki  
\p
\v 1 Koda꞉ma꞉ Noa a꞉tala꞉ a꞉tala꞉ pa꞉ta꞉ epeaasa꞉ pima꞉ alota꞉ Ika꞉ monduma꞉ monduma꞉ pilimi wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke.  
\v 2 laata꞉ mo hotekemanu paeyao make bamanu paeyao make ta꞉peli paeyao make ika꞉ honkopu oto pa꞉ta꞉ haleme ekina꞉ iki paala꞉ halimikie.  
\v 3 Kutupa ameta꞉ mo tanimanu no haleme tupa꞉ do hotekemanu paeyao make lia nomena꞉ yeke kitolopate  
\v 4 pa mo we pa pitiki hoteke homeke na napa꞉peke. Pa ekipeke mo da꞉ta꞉la꞉ ekita꞉ koto we pa꞉ta꞉ pileke loa꞉me.  
\v 5 Kutupa ma꞉nda꞉ epima꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ kota꞉ ipikita꞉ hoke yenki halueke. Kutupa hoteke ma꞉nda꞉ma꞉ hali ma꞉nda꞉na꞉ da꞉ta꞉la꞉eki mia꞉ka꞉na꞉ta꞉ I̱ma꞉ta꞉ ipika꞉ hoke yenkita꞉ homa꞉la꞉eki halueke.  
\v 6 Halita꞉ Koda꞉ leke wepieke ekina꞉ta꞉ ma꞉nda꞉ma꞉ hali ma꞉nda꞉ homena꞉ lia꞉ka꞉na꞉ta꞉ kota꞉ koto someta꞉ hali tonuma꞉ kone lilimikie.   
\p
\v 7 Ika꞉ monduma꞉ monduma꞉ pilimi wekiwandikina꞉ wekiwandikita꞉ do kenke honiki paeyao pa꞉ta꞉ haena꞉ma꞉ wekiwandiki wopu mendia꞉pa꞉peke leekeme.  
\v 8 Koda꞉ma꞉ Noa a꞉tala꞉ a꞉tala꞉ pa꞉ta꞉ alota꞉  
\v 9 Iki make ika꞉ monduma꞉ monduma꞉ pilimi wekiwandikina꞉ wekiwandiki pa꞉ta꞉ tonka꞉na꞉ I̱ma꞉ dupiki pi la꞉ witolome.  
\v 10 Koto pita꞉ mo hande sisima pa꞉ta꞉ iki ame̱le̱ epemeke pa pitiki alemanu paeyaota꞉ mo bamanu make hotekemanu make iki paeyao pa꞉ta꞉ loa꞉me.  
\v 11 Dupiki pi manuma꞉ta꞉ iki ame̱le̱ pi la꞉ witolome. Mo kenkena꞉ pa pitiki alemanu paeyaota꞉ mo ikali tieke tiekema꞉ ota꞉ paa na hoeyaena꞉ laata꞉ mo ikali tieke tiekema꞉ do kenke paeyao paa na hoeyaena꞉e laa I̱ma꞉ la꞉ witolome.  
\v 12 Kutupa do iki ame̱le̱ make mo pa pitiki alemanu ame̱le̱ make do ota꞉ na paeyeke pa u halo pa꞉la꞉ la꞉ witolo patehau witolo ekita꞉  
\v 13 oli koana꞉ yaka ka꞉la꞉da꞉peiya witolo ekita꞉ I̱ma꞉ do kenke yaapo pi la꞉ ulu ekina꞉ patehau ulueki yelieke.  
\v 14 I̱ma꞉ oli yata꞉ koa manuma꞉ a꞉mbatiki pitolo hata꞉ mo ka꞉la꞉da꞉peiya a꞉pa꞉tiki pia꞉ka꞉na꞉ta꞉  
\v 15  kota꞉ I̱ma꞉ mo hande iki ame̱le̱ make mo hotekemanu ame̱le̱ make ikali tieke tiekema꞉ mo pa pitiki alemanu paeyao paa na hoeyaalueke laa pi la꞉ ua꞉eki niminaalueke.  
\v 16 Mo ka꞉la꞉da꞉peiya oli koa manuna꞉ peneme yatiki pia꞉ka꞉na꞉ta꞉ kota꞉ I̱ma꞉ do kenkena꞉ haleme pa pitiki alemanu nika꞉ mo na paeya꞉peke pi la꞉ uma꞉eki paa niminatiki pulueke.  
\v 17 Mo ka꞉la꞉da꞉peiyata꞉ I̱ma꞉ mo pa pitiki alemanu paeyao pa꞉ta꞉ pi la꞉ witolo ekina꞉ patehaue leekeme.   
\s1 Noa a꞉tala꞉ a꞉tala꞉  
\p
\v 18 Mo sisima pa꞉ta꞉ pita pemeke Noana꞉ eiyeke tonuta꞉ Seme make Ha꞉me make Dieipedi makee. Ha꞉meta꞉ Keinanina꞉ atekee  
\v 19 Mo Noana꞉ eiyeke tepota꞉ do kenke wanda꞉hali paeyaona꞉ apa꞉meie.  
\v 20 Noata꞉ e hali yalo ipikita꞉ titina꞉ waini pu noko peeke halie.  
\v 21 Ipikana꞉ma꞉ mo waini ikali naa keaaso hata꞉ta꞉ ipika꞉ aka꞉manu holo bao pa tu mea hata꞉ ipika꞉ palai da pa꞉ta꞉ pumbuniao wiekeme.   
\p
\v 22 Kutupa mo Keinanina꞉ ateke Ha꞉mema꞉ ipika꞉ ateke pa tia peliekeeki hando haota꞉ hameke yaapo lolo hama꞉ nane peekeme.  
\v 23 Kutu pieke handaa Seme pita꞉ Dieipedi yaapoma꞉ta꞉ ateke pa tia peliekeeki handa꞉peke yeketa꞉ dau homeke ipilika꞉ peiyokona꞉ pulumbao tia hoki la꞉ka꞉la oni palai da pa꞉ta꞉ pua pa ale handa hata꞉ atekena꞉ loke manda lopamoneao a꞉mbaepekeme.  
\v 24 Kutupa Noa ipika꞉ hone paa epeeketa꞉ mo ipika꞉ wetepe wekima꞉ ipiki pa꞉ta꞉ piekeeki handa꞉ u hao  
\v 25 Noama꞉ alota꞉  
\q1 Keinani pa꞉ta꞉ esihou pi witoloma꞉ ipikita꞉ ipika꞉ kame yaapona꞉ pa hameke e pokaasa꞉ hali halieke.   
\q1
\v 26 Mo Semena꞉ Tekehali Koda꞉na꞉ biki mina꞉liape. Keinanita꞉ Semena꞉ pa hameke e pokaasa꞉ hali halieke.   
\q1
\v 27 Mo Koda꞉ma꞉ta꞉ Dieipedina꞉ tapake daetolota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ mo Semena꞉ wanda꞉hali ame̱le̱ haena꞉e.  
\q1 Keinanita꞉ Dieipedina꞉ pa hameke e pokaasa꞉ hali halieke laa leekeme.   
\p
\v 28 Mo ikali tieke tieke a꞉pa hoki nane Noata꞉ 350 bapi pa ha pelia hayekeme.  
\v 29 Kutupa 950 bapi mieketa꞉ homeekeme.   
\c 10  
\s1 Noana꞉ eiyeke tonuna꞉ tapake  
\p
\v 1 Mo hande Noana꞉ eiyeke tonu Seme make Ha꞉me make Dieipedi make ika꞉ monduma꞉ monduma꞉ pimiki wekiwandikina꞉ wekiwandikina꞉ bikimanu doe. Mo hande ikali tieke tieke a꞉pa hoki naneta꞉ do weki tepoma꞉ta꞉ weki titi mondu wimikime.  
\v 2 Mo Dieipedina꞉ eiyeke tonuta꞉ Koma make Meikoko make Madai make Diapani make Diubolo make Meseke make Taitasi makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue.  
\v 3 Mo Komama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉sekena꞉se make Tipa꞉di make Tokama make koto damanu pa꞉ta꞉ haemeke wanda꞉halie.   
\p
\v 4 Mo Diapanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo A꞉lisia make Sepeini make Saipotasi make Loa꞉disi make koto da kenkemanu haemeke wanda꞉halie.  
\v 5 Ikita꞉ mo dawala tea꞉na꞉ make mo dawala u dupala꞉ kenke sunu pa꞉ta꞉ make pelia haemeke wanda꞉halina꞉ apa꞉meie. Do koto wanda꞉halita꞉ mo Dieipedima꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ ika꞉ kenke ma꞉nda꞉ ma꞉nda꞉ pa꞉ta꞉manu hao tutu ta꞉ta꞉ ta꞉ta꞉ hao tapake homeke homekema꞉ ika꞉ da pi ta꞉ta꞉ ta꞉ta꞉ lemekeme.   
\p
\v 6 Ha꞉mena꞉ eiyeke tonuta꞉ Kusu make Idiepi make Libia make Keinani makee. Ikita꞉ mo ika꞉ biki yano loma꞉ loma꞉ pimiki da wanda꞉halina꞉ apa꞉mei tonue.  
\v 7 Mo Kusuma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Siba make Ha꞉pila make Sabita make Lama make Sabeteka make koto da kenkemanu pa꞉ta꞉ haemeke wanda꞉halie. Mo Lamama꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Seba pita꞉ Dedani da wanda꞉halie.  
\v 8 Kusuma꞉ mo weki biki Nimolodo mondu wiekeme. Koto wekita꞉ do kenkena꞉ titina꞉ a꞉nda꞉ wotu bepolatiki pieke hali hayekeme.  
\v 9 Mo Tekehalima꞉ tamba꞉ mina꞉la꞉ ekima꞉ ipikita꞉ mo yapa꞉ eiya꞉ wotu no hayeke hali hayekeme. Koto ekina꞉ yeketa꞉ wanda꞉halima꞉ alota꞉ Tekehalima꞉ neketa꞉ Nimolodo pieke tupa꞉ yapa꞉ eiya꞉ wotu no pele hali hawaena꞉e lo halememe.  
\v 10 Nimolodo ipika꞉ titina꞉ kilu tombuao hayeke daoni manuta꞉ Ba꞉biloni make Eleke make Aka꞉de makee. Koto daoni tepota꞉ mo Ba꞉biloni kenke pa꞉ta꞉ haemekeme.  
\v 11 Koto kenkena꞉ haota꞉ ipikita꞉ mo A꞉sitia kenke pa꞉ta꞉ pua Ninipa daoni pita꞉ Lihobodi Ia daoni make Kala daoni make  
\v 12 kutupa mo Ninipa daoni pita꞉ Kala daoni aneke yaapo tukikina꞉ hala꞉ Leseni daoni make paeyao a꞉eyekeme.   
\p
\v 13 Mo Idiepima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Lidia make A꞉namo make Leha꞉be make Na꞉pidu make  
\v 14 Pa꞉dutusi make Ka꞉solu make mo Pilisidaini wanda꞉hali kini pa꞉la꞉ da Ka꞉podo make koto da wanda꞉hali yekeme.   
\p
\v 15 Mo hande Keinanina꞉ eiyeke tonuta꞉ mupeke weki Saidoni make Hedi makee. Ipilikita꞉ mo ipilika꞉ biki yano loma꞉ loma꞉ pimiki da wanda꞉halina꞉ apa꞉meie.  
\v 16 Keinani ombuta꞉ mo Diebasi wanda꞉hali make A꞉mo wanda꞉hali make Keakasi wanda꞉hali make  
\v 17 Hipai wanda꞉hali make Aki wanda꞉hali make Sini wanda꞉hali make  
\v 18 Apa꞉de wanda꞉hali make Sema wanda꞉hali make Ha꞉mode wanda꞉hali make koto wanda꞉hali paeya tapao sikina꞉ apa꞉mei hayekeme.  
\p Mo Keinani wanda꞉hali tutu ta꞉ta꞉ ta꞉ta꞉ putupulu bao puata꞉  
\v 19 ikana꞉ma꞉ yu tombo kini piki hauta꞉ mo Saidoni da nepoko nane kini pea pua mo Kasa da nanema꞉ tilao Kita da puata꞉ mo Laasa nanema꞉ tilao Sodomo make Komota make A꞉dema make Seboimi da manuna꞉ nate opa꞉la꞉ nanema꞉ tilao pua u naemekeme.  
\v 20 Mo Ha꞉mema꞉ kini pea monduma꞉ monduma꞉ pieke wekiwandikina꞉ wekiwandikita꞉ ika꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ make hata꞉ta꞉ tapake homeke homekena꞉ ika꞉ pita꞉ ta꞉ta꞉ ta꞉ta꞉ lemekeme.   
\p
\v 21 Mo hande Dieipedina꞉ hameke titina꞉ weki Semeta꞉ mo Hibulu wanda꞉hali paeyaona꞉ apa꞉mei yekeme.  
\v 22 Semena꞉ eiyeke titita꞉ Ila꞉me make A꞉sia make Apa꞉kesade make Ludu make Atamo makee. Ikita꞉ mo ika꞉ biki kone yano loma꞉ loma꞉ pimiki da wanda꞉halina꞉ apa꞉mei tonue.  
\v 23 Mo Atamoma꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Usu make Hulu make Keta make Meseke make koto damanu pa꞉ta꞉ haemeke wanda꞉halie.  
\v 24 Apa꞉kesadeta꞉ Silana꞉ ateke yekeme. Kutupa Silata꞉ Ebena꞉ ateke yekeme.   
\p
\v 25 Ebeta꞉ weki yaapo mondu wiekeme. Weki ma꞉nda꞉na꞉ bikita꞉ Peleke leeke ekita꞉ mo weki ipika꞉ hayeke natena꞉ta꞉ do kenkena꞉ haemeke wanda꞉halita꞉ putupa꞉ alualu pieke handa leekeme. Kutupa weki ma꞉nda꞉na꞉ bikita꞉ Diokotani leekeme.  
\v 26 Mo Diokotanima꞉ kini pea monduma꞉ monduma꞉ pieke wekiwandikina꞉ wekiwandikita꞉ mo Amoda꞉di make Selepe make Ha꞉samapede make Dieta make  
\v 27 Ha꞉dotamo make Usalo make Dikila make  
\v 28 Obalo make Abima꞉elo make Siba make  
\v 29 Opa make Ha꞉pila make Dioba꞉be make koto damanu pa꞉ta꞉ haemeke wanda꞉halie. Iki paeyaota꞉ Diokotanima꞉ kini pea monduma꞉ monduma꞉ pieke wekiwandikina꞉ wekiwandikie.  
\v 30 Mo tapake pelieke kenketa꞉ mo Mesa kenkena꞉ hao pua ota꞉ mo Sepa kenkena꞉ nate opa꞉la꞉ nane tumiki eli wieke kenke pa꞉ta꞉manu haemekeme.  
\v 31 Do alo tapaketa꞉ Semema꞉ kini pea monduma꞉ monduma꞉ pieke wekiwandikina꞉ wekiwandikie. Ikita꞉ tutu ta꞉ta꞉ ta꞉ta꞉ pa꞉ta꞉ make kenke ta꞉ta꞉ ta꞉ta꞉ pa꞉ta꞉ hata꞉ta꞉ tapake homeke homekema꞉ta꞉ ika꞉ pita꞉ ta꞉ta꞉ ta꞉ta꞉ lemekeme.   
\p
\v 32 Koto wanda꞉hali paeyao sikita꞉ Noama꞉ kini pea monduma꞉ monduma꞉ pieke wekiwandikina꞉ wekiwandikie. Kutupa ika꞉ kenke ma꞉nda꞉ ma꞉nda꞉na꞉ hatia epelemeeki maketa꞉ ika꞉ ta꞉ta꞉ ta꞉ta꞉ lo monduma꞉ monduma꞉ pieke tupa꞉ kone hatia epelememe. Mo ikali tieke tieke paeyeke hoki naneta꞉ do kenke ma꞉nda꞉ ma꞉nda꞉na꞉ hala꞉ wanda꞉halita꞉ mo Noana꞉ eiyeketonu pa꞉ta꞉ kini pea epemeke wanda꞉halie.   
\c 11  
\s1 Mo haliao a꞉emeke hokulupiki Beibolo da  
\p
\v 1 Amba꞉ titina꞉ do kenke honiki honiki paeyaona꞉ haemeke wanda꞉hali paeyaoma꞉ta꞉ da pi homeke la make homeke pi kone lemekeme.  
\v 2 Ikita꞉ mo nate opa꞉la꞉ nanema꞉ pomu lopaata꞉ oni homeke hau honda꞉ lia wieke Ba꞉biloni kenkena꞉ a꞉paata꞉ koto pate pitimikime.  
\v 3 Kutupa ika꞉ ika꞉ kone alota꞉ A꞉e. Ameta꞉ mo ma꞉na꞉ kenkema꞉ la꞉ka꞉la toopima꞉ handeke hankola꞉papeke alemanu wepumana꞉e lemekeme. Kutu pimikita꞉ mo wepimiki toopimanu make mo toopimanu tuna tuna pea miniki halo pieke koloda make wimikime.  
\v 4 Koto ekina꞉ ikana꞉ma꞉ alota꞉ Nika꞉ biki mina꞉liaena꞉ yeke make niki mo kenke honiki honiki pa꞉ta꞉ na putupa꞉ alualu pulu poloma꞉ tupa꞉ maketa꞉ daoni ma꞉nda꞉ a꞉etolo hata꞉ mo haliao hokulupeke da tieke ma꞉nda꞉ oli ya pa꞉ta꞉ lia a꞉emana꞉e lemekeme.   
\p
\v 5 Kutu pimiki handaa Tekehalita꞉ mo hande haliwekima꞉ a꞉emeke daoni make mo ya pa꞉ta꞉ peeke hokulupeke da tieke make handuluekema꞉ holopeekeme.  
\v 6 Kutupa a꞉pa ipikana꞉ma꞉ alota꞉ Ameta꞉ do wanda꞉halita꞉ homeke wanda꞉hali halemeke yalo homeke pi kone alememe laata꞉ Dota꞉ ika꞉ pua꞉tiki polo peleme ekina꞉ kini piteleme ekie. Kutupa ikana꞉ma꞉ta꞉ teke pa꞉ta꞉ ika꞉ hone pa꞉la꞉ anemone hau paeyao pa pilimikie.  
\v 7 Koto ekina꞉ niki pua ika꞉ ika꞉ kone hone na u alualu pulu peleme tupa꞉ ika꞉ pi topo topo pealo bape leekeme.  
\v 8 Koto ekina꞉ Tekehalima꞉ mo wanda꞉hali paeyao kenke honiki honiki paeyao pa꞉ta꞉ putupa putupa pieketa꞉ mo daonita꞉ pao na a꞉emekeme.  
\v 9 Mo Tekehalima꞉ mo wanda꞉hali paeyaona꞉ pi koto pate topo topo peao kenke honiki honiki paeyao pa꞉ta꞉ putupa yeke handaa mo daonina꞉ bikita꞉ Beibolo lemekeme.   
\s1 Semena꞉ tapake  
\p
\v 10 Semema꞉ monduma꞉ monduma꞉ pieke wekiwandikina꞉ wekiwandikina꞉ bikimanu doe. Mo hande ikali tieke tieke yopua bapi yaapo yapeeke hoki naneta꞉ Seme ipiki bapi 100 mieketa꞉ weki Apa꞉kesade mondu wiekeme.  
\v 11 Kotoeki hoki naneta꞉ bapi 500 pa haota꞉ mandane wekiwandiki mondu wiekeme.   
\p
\v 12 Mo Apa꞉kesadeta꞉ bapi 35 mieketa꞉ weki Sila mondu wiekeme.  
\v 13 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.   
\p
\v 14 Mo Silata꞉ bapi 30 mieketa꞉ weki Ebe mondu wiekeme.  
\v 15 Kotoeki hoki naneta꞉ bapi 403 pa haota꞉ mandane wekiwandiki mondu wiekeme.   
\p
\v 16 Mo Ebeta꞉ bapi 34 mieketa꞉ weki Peleke mondu wiekeme.  
\v 17 Kotoeki hoki naneta꞉ bapi 430 pa haota꞉ mandane wekiwandiki mondu wiekeme.   
\p
\v 18 Mo Peleketa꞉ bapi 30 mieketa꞉ weki Teu mondu wiekeme.  
\v 19 Kotoeki hoki naneta꞉ bapi 209 pa haota꞉ mandane wekiwandiki mondu wiekeme.   
\p
\v 20 Mo Teu bapi 32 mieketa꞉ weki Setuku mondu wiekeme.  
\v 21 Kotoeki hoki naneta꞉ bapi 207 pa haota꞉ mandane wekiwandiki mondu wiekeme.   
\p
\v 22 Mo Setuku bapi 30 mieketa꞉ weki Neiho mondu wiekeme.  
\v 23 Kotoeki hoki naneta꞉ bapi 200 pa haota꞉ mandane wekiwandiki mondu wiekeme.   
\p
\v 24 Mo Neihota꞉ bapi 29 mieketa꞉ weki Dita mondu wiekeme.  
\v 25 Kotoeki hoki naneta꞉ bapi 119 pa haota꞉ mandane wekiwandiki mondu wiekeme.   
\p
\v 26 Mo Ditata꞉ bapi 70 mieketa꞉ Eipola꞉ma꞉ make Neiho make Hatani ika꞉ ateke hayekeme.   
\s1 Ditana꞉ tapake  
\p
\v 27 Dota꞉ mo Eipola꞉ma꞉ make Neiho make Hatani ika꞉ ateke Ditama꞉ kini pea monduma꞉ monduma꞉ pieke wekiwandikina꞉ wekiwandikie. Hatanita꞉ Lodana꞉ ateke yeekeme.  
\v 28 Hatanita꞉ ipika꞉ apa꞉ pa haena꞉ kone ipikita꞉ mo Ba꞉biloni kenke pa꞉ta꞉ hala꞉ ipika꞉ daoni teke A꞉e pa꞉ta꞉ homeekeme.  
\v 29 Eipola꞉ma꞉ma꞉ta꞉ Sa꞉tai miekeme. Kutupa Neihota꞉ Hatanina꞉ waneke Milika miekeme. Hatani Isikana꞉ ateke yekeme.  
\v 30 Sa꞉taita꞉ wekiwandiki mendia꞉peke na yekeme.   
\p
\v 31 Ditama꞉ta꞉ mo Ba꞉biloni kenke pa꞉ta꞉ hayeke daoni A꞉e mina꞉pa꞉lao ipika꞉ weki Eipola꞉ma꞉ make Hatanina꞉ eiyeke Loda make Eipola꞉ma꞉na꞉ weteke Sa꞉tai make hatuku mo Keinani kenke pa꞉ta꞉ polueke alo pemekepate ikita꞉ pa mo Hatani kenke pa꞉ta꞉ pua pitimikime.  
\v 32 Kutupa koto pa꞉ta꞉ haena꞉ta꞉ Ditata꞉ 205 bapi mieketa꞉ homeekeme.   
\c 12  
\s1 Koda꞉ma꞉ Eipola꞉ma꞉ wi leekeeki  
\p
\v 1 Mo Tekehalima꞉ Eipola꞉ma꞉ pa꞉ta꞉ alota꞉ Naka꞉ da kenke make naka꞉ tapake make naka꞉ apa꞉na꞉ da kenke make mina꞉pa꞉lao mo I̱ma꞉ walo polo kenke pa꞉ta꞉ pua꞉peke.  
\v 2 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kiaata꞉ ikita꞉ tutu tieke halimikie. Neketa꞉ wamo peaasa꞉ hali halena꞉ yeke I̱ma꞉ neke epealueke laata꞉ naka꞉ biki kende tupa꞉ wina꞉ lolueke.   
\q1
\v 3 Mo neke epealimi wanda꞉halita꞉ I̱ma꞉ epealo polopate.  
\q1 Mo neke pa꞉ta꞉ esihou pi lelimi wanda꞉halita꞉ kota꞉ I̱ma꞉ iki pa꞉ta꞉ esihou pi laalueke.  
\q1 Kutupa neke pa꞉ta꞉ yama꞉ta꞉ mo tutu ta꞉ta꞉ ta꞉ta꞉ paeyao epealueke leekeme.   
\p
\v 4 Mo Eipola꞉ma꞉ ipiki bapi 75 mieketa꞉ mo hande Koda꞉ma꞉ leeke tupa꞉ Hatani da mina꞉pa꞉laeyekeme. Hande Loda make ipika꞉ yaapo peekeme.  
\v 5 Eipola꞉ma꞉ta꞉ weteke Sa꞉tai make hamekena꞉ eiyeke Loda꞉ make mo Hatani hata꞉ mimiki pa hameke e pokaasa꞉ wanda꞉hali make ala꞉ta꞉ ala꞉ta꞉ paeyao make mea mo Keinani kenke nane poluekema꞉ kini pea pemekeme. Kutupa mo Keinani kenke nane opolo pemeketa꞉  
\v 6 Eipola꞉ma꞉ta꞉ ipika꞉ tapake ame̱le̱ mo kenke pa꞉ta꞉ pomu lopa mo yakopiki daoni bikita꞉ Sekeme opolo pemekeme. Koto pateta꞉ mo Motena꞉ biki wiki ti tieke hayekeme. Koto nate nina꞉ta꞉ mo Keinani wanda꞉halita꞉ koto kenke pa꞉ta꞉ pa haemekeme.  
\v 7 Mo Tekehalima꞉ Eipola꞉ma꞉ pa꞉ta꞉ opolo a꞉pa alota꞉ Do kenke tieke paeyaota꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halo polo kenkee leekeme. Kutu piekena꞉ Eipola꞉ma꞉ma꞉ta꞉ mo ipiki pa꞉ta꞉ opolo peeke Tekehali Koda꞉ pa꞉ta꞉ koto pate oloda a꞉eyekeme.  
\v 8 Kotoeki pea hoki naneta꞉ mo ka꞉wa꞉ nane pote eli wieke kenke mo Bedele daonina꞉ nate opa꞉la꞉ nanema꞉ tilao peekeme. Kutupa ipika꞉ palai data꞉ mo Bedelena꞉ nate pamba꞉la꞉ nane tilao mo Ai dana꞉ nate opa꞉la꞉ nanema꞉ tilao koto tukikina꞉ a꞉eyekeme. Koto pateta꞉ oloda ombu a꞉eyaata꞉ Tekehali pa꞉ta꞉ panda꞉ puniao yeiya꞉ layekeme.  
\v 9 Kutupa ipikita꞉ mo Keinani kenkena꞉ ka꞉wa꞉ nanema꞉ tilao da ma꞉nda꞉ ma꞉nda꞉ pa꞉ta꞉ pomu lopeekeme.   
\s1 Eipola꞉ma꞉ Idiepi pua hayekeeki  
\p
\v 10 Pate koto Keinani kenke pa꞉ta꞉ta꞉ tea꞉ ki tieke epeeke handaa Eipola꞉ma꞉ma꞉ta꞉ ka꞉wa꞉ nanema꞉ papate leke puo pu hao mo Idiepi kenke pa꞉ta꞉ pa ta꞉ka꞉li halo peekeme.  
\v 11 Kutupa ipiki mo Idiepi poluekema꞉ yu tombona꞉ pua hata꞉ ipika꞉ weteke Sa꞉tai pa꞉ta꞉ alota꞉ Neketa꞉ wanda꞉ seliapoe.  
\v 12 Koto ekina꞉ mo Idiepi haliwekima꞉ neke handolota꞉ neketa꞉ yaka wanda꞉ ya꞉ka꞉ta꞉me laa I̱ litolo hata꞉ neketa꞉ pa halena꞉ lelimikie.  
\v 13 Kutu paama꞉na꞉ nakana꞉ma꞉ I̱ta꞉ yaka ana꞉e leka꞉na꞉ta꞉ kota꞉ I̱ta꞉ na liki pa epeke tupa꞉ hatuku halimikie leekeme.  
\v 14 Koto eki laa mo yu tombo mina꞉pa꞉lao oni Idiepi kenke pa꞉ta꞉ pepeketa꞉ ota꞉ leeke tupa꞉ kone mo Idiepi haliwekima꞉ mo wanda꞉ta꞉ wanda꞉ seliapoe laa handemekeme.  
\v 15 Kutupa mo kinina꞉ e pokaasa꞉ mandane kapomani haliwekima꞉ mo wanda꞉ handaata꞉ ipika꞉ seliapo piekeeki mo ika꞉ kini pa꞉ta꞉ pua lemekeme. Kutu pimiki mo wanda꞉ta꞉ ika꞉ kinina꞉ da pa꞉ta꞉ hatuku pemekeme.  
\v 16 Kutupa mo kinima꞉ta꞉ mo wanda꞉ mieke ekina꞉ Eipola꞉ma꞉ pa꞉ta꞉ta꞉ epeke hau pitolo hata꞉ sipisipi wopu make nanikosi wopu make kaomanu make donkimanu make pa hameke e pokaasa꞉ wanda꞉hali make kemelomanu make haleekeme.   
\p
\v 17 Pate mo kinima꞉ Sa꞉tai mieke ekina꞉ta꞉ Tekehalima꞉ mo ipiki pa꞉ta꞉ make ipika꞉ da pa꞉ta꞉ haemeke wanda꞉hali pa꞉ta꞉ make ota꞉ hoke yeni kimanu yapena꞉ leekeme.  
\v 18 Kutu pieke mo kinima꞉ Eipola꞉ma꞉ epoe laa lota꞉ pitolo alota꞉ I̱ pa꞉ta꞉ dota꞉ ekipiki hau pelepe laata꞉ Do wanda꞉ta꞉ naka꞉ wanda꞉e laa I̱ta꞉ ekipeke na lakipe.  
\v 19 Nakana꞉ma꞉ ekipeke ipikita꞉ naka꞉ ana꞉e le ekina꞉ I̱ma꞉ yaka wanda꞉ au lano laa pelepe. Naka꞉ wanda꞉ doma꞉ a̱i̱ hatuku pao pue leekeme.  
\v 20 Mo kinima꞉ ipika꞉ haliweki pa꞉ta꞉ Hatuku pupe leeke handaa mo haliwekima꞉ Eipola꞉ma꞉ make ipika꞉ wanda꞉ make ipika꞉ wia hayeke ala꞉ta꞉ ala꞉ta꞉ paeyao mea mo kenke mina꞉pa꞉lao pena꞉ hatuku pemekeme.   
\c 13  
\s1 Eipola꞉ma꞉ Loda yaapo ka꞉ta꞉alu pipikieki  
\p
\v 1 Eipola꞉ma꞉ma꞉ ipika꞉ wanda꞉ make ipika꞉ wia hayeke ala꞉ta꞉ ala꞉ta꞉ paeyao make mea Idiepi mina꞉pa꞉lao Keinani kenkena꞉ ka꞉wa꞉ nanema꞉ tilao peekeme. Loda make mandakena꞉ pemekeme.  
\v 2 Eipola꞉ma꞉ma꞉ta꞉ sipisipimanu make nanikosimanu make kaomanu make silipa make kolo make koto ale paeyaoma꞉ta꞉ hamoko hali tieke hayekeme.  
\v 3 Kutupa koto pate mina꞉pa꞉laota꞉ kenke ma꞉nda꞉ ma꞉nda꞉ pa꞉ta꞉ pua mo Bedele nanema꞉ peekeme. Ipikita꞉ mo amba꞉ hande ipika꞉ palai da a꞉eyeke alena꞉ mo Bedele pita꞉ Ai yaapo tukikina꞉  
\v 4 mo hande oloda a꞉eyeke alena꞉ opolo peekeme. Koto pateta꞉ mo Tekehali pa꞉ta꞉ panda꞉puniao yeiya꞉ layekeme.   
\p
\v 5 Lodata꞉ ipika꞉ wekiwanda꞉ make sipisipimanu make nanikosimanu make pa hameke e pokaasa꞉ wanda꞉hali make hayekeme.  
\v 6 Kutupa ipilikita꞉ ma꞉na꞉ hoteke wopu punupikieki yalo hata꞉ mo ipilika꞉ hoteke manuma꞉ napeke ambu opeeke kenketa꞉ wopu dia꞉ yekeme.  
\v 7 Kutu piekeeki yalo hata꞉ mo Eipola꞉ma꞉na꞉ ma꞉na꞉ hotekemanu handeteke haemeke haliweki pita꞉ mo Lodana꞉ ma꞉na꞉ hotekemanu handeteke haemeke haliweki ika꞉ ika꞉ kone ape ape la꞉tiki pimikime. Koto nate nina꞉ta꞉ mo Keinani wanda꞉hali make Petese wanda꞉hali make pa haemekeme.   
\p
\v 8 Kutu pieke handaata꞉ Eipola꞉ma꞉ma꞉ Loda pa꞉ta꞉ alota꞉ Dikita꞉ homeke tapake ya꞉la꞉ ekina꞉ naka꞉ haliweki pita꞉ yaka haliweki yaapoma꞉ta꞉ ape ape na lapeke alee.  
\v 9 Koto ekina꞉ta꞉ kota꞉ ka꞉ta꞉alu pupana꞉ma꞉ naka꞉ hone pa꞉la꞉ kenke ma̱leke lia neke mandanema꞉ pekena꞉ kota꞉ I̱ta꞉ mandanema꞉ poluekema꞉ loa꞉me leekeme.   
\p
\v 10 Koto leeke Lodama꞉ mo Diodani hawete handoma꞉ handoma꞉ putia pua mo Soa pua hando naeyekepate oni kenketa꞉ mo hande Tekehalina꞉ e o mo Idiepi kenkema꞉ handaa ikali wopu yapeekeeki handeekeme. Dota꞉ mo Tekehalima꞉ mo Sodomo pita꞉ Komoto daoni yaapo a̱i̱ na hoeyake haena꞉ piekeme.  
\v 11 Koto ekina꞉ Lodama꞉ta꞉ mo Diodani hawete tieke ipika꞉ekie laa ma̱leke liaata꞉ mo nate opa꞉la꞉ nanema꞉ tilao peekeme. Kotota꞉ mo hande hali yaapona꞉ ka꞉ta꞉alu pipiki tupa꞉e.  
\v 12 Eipola꞉ma꞉ta꞉ Keinani kenke pa꞉ta꞉ haena꞉ta꞉ Lodata꞉ mo hawetena꞉ hayeke daonimanu pa꞉ta꞉ pita꞉tia pominolota꞉ mo Sodomo nanema꞉ ipika꞉ palai da a꞉eya pitiekeme.  
\v 13 Koto pa꞉ta꞉ haemeke wanda꞉halita꞉ hoke wanda꞉hali hata꞉ make mo Tekehali pa꞉ta꞉ hoke hau pu haemekeme.   
\s1 Eipola꞉ma꞉ mo Hebotoni nane peekeeki  
\p
\v 14 Mo Loda pea꞉ hoki nane Tekehalima꞉ Eipola꞉ma꞉ pa꞉ta꞉ alota꞉ Koto neke hale alena꞉ hata꞉ta꞉ mo tea꞉ paeyao siki epeke tupa꞉ handa꞉e.  
\v 15 Koto handeleeki paeyaota꞉ neke pa꞉ta꞉ make naka꞉ monduma꞉ monduma꞉ pilipi wanda꞉wekina꞉ wanda꞉weki pa꞉ta꞉ make I̱ma꞉ kulu polo kenkee. Kutupa koto kenketa꞉ hoto paeyao naka꞉eki utia pu halieke.  
\v 16 I̱ma꞉ta꞉ ma꞉nda꞉ma꞉ na yata꞉pa꞉ ta꞉palo pa꞉la꞉ tupa꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke. Ma꞉nda꞉ma꞉ do kenkena꞉ ula꞉ dokolo yata꞉pa꞉ ta꞉paya꞉ka꞉na꞉ta꞉ kota꞉ naka꞉ monduma꞉ monduma꞉ pilipi wekiwandikina꞉ wekiwandiki make yata꞉pa꞉ ta꞉paena꞉e.  
\v 17 Koto pa꞉la꞉ma꞉ I̱ma꞉ do kenke neke kulu polo ekina꞉ mo kenke paeyao pua hando wie leekeme.  
\v 18 Koto leeke Eipola꞉ma꞉ma꞉ ipika꞉ palai da yoka꞉moneaota꞉ mo Hebotoni hali Ma꞉motena꞉ timanu tekepa꞉ta꞉ leke pua pita꞉ koto pateta꞉ Tekehali pa꞉ta꞉ oloda a꞉eyekeme.   
\c 14  
\s1 Eipola꞉ma꞉ma꞉ Loda pa꞉ta꞉leekeeki  
\p
\v 1 Kini haliweki tonkoputa꞉ mo Ba꞉bilonina꞉ kini A꞉motapele make A꞉lasana꞉ kini A꞉tioko make Ila꞉mena꞉ kini Siedolaoma make Koimina꞉ kini Taedolo make mo  
\v 2 mandane yunki hata꞉ kinita꞉ mo Sodomona꞉ kini Bita make mo Komotona꞉ kini Biesa make mo A꞉demana꞉ kini Sina꞉be make mo Seboimina꞉ kini Semebe make mo Bela biki ma꞉nda꞉ Soana꞉ kini ame̱le̱ a꞉nda꞉ pulu pemekeme.  
\v 3 Do yunki hata꞉ kini manuma꞉ta꞉ mo Sidimi hawetena꞉ ameta꞉ mo ikali leke ma꞉nda꞉ biki Homa꞉la꞉ dawala leleme alena꞉ ika꞉ ami haliweki momba꞉laemekeme.  
\v 4 Ikita꞉ 12 bapina꞉ta꞉ hande kini Siedolaoma oto pa꞉ta꞉ haemekepate pa mo bapi 13 pa꞉ta꞉ta꞉ ipiki oto pa꞉ta꞉ na halumeke lemekeme.   
\p
\v 5 Kutupa mo bapi 14 pa꞉ta꞉ta꞉ Siedolaoma ipika꞉ tamba꞉ mina꞉la꞉ kinimanu tonka꞉na꞉ ika꞉ ami haliweki ame̱le̱ mo A꞉sa꞉detodi Kanaimi kenke pa꞉ta꞉ haleme Tepa꞉imi wanda꞉hali make mo Ha꞉mi kenke pa꞉ta꞉ haleme Susimi tapake make mo homeke hau honda꞉ lupa peeke Kitia꞉tieimi kenke pa꞉ta꞉ haleme Emimi tapake make  
\v 6 mo Idomo pote pa꞉ta꞉manu haleme Ho tapake make ota꞉ lu yombitolo hata꞉ mo Elepa꞉tani kenkena꞉ mo hapu papeke ale honikina꞉ pua tolu naemekeme.  
\v 7 Kutupa paa mo Keidese kenke amba꞉ta꞉ Enemisipade leeke alena꞉ la꞉ka꞉la epemekeme. Ikana꞉ma꞉ta꞉ mo A꞉ma꞉leke wanda꞉hali bepolaota꞉ mo Hasasono Teima kenke pa꞉ta꞉ haemeke A꞉mo wanda꞉hali make bepolaemekeme.   
\p
\v 8 Kutu pieke mo Sodomo make Komoto make A꞉dema make Seboimi make Bela make koto da kini manuma꞉ta꞉ a꞉nda꞉ puluekema꞉ ika꞉ ami haliwekimanu mo Sidimi hawetena꞉ momba꞉laota꞉ mo  
\v 9 Ila꞉me make Koimi make Ba꞉biloni make Elasa make koto tonkopu dana꞉ kinimanu ame̱le̱ mo yunki hata꞉ dana꞉ kini manuma꞉ a꞉nda꞉ pimikime.  
\v 10 Koto hawetena꞉ta꞉ kolodama꞉ wepiki naku manuma꞉ tumbieke ekiyalo mo Sodomo Komoto da yaapona꞉ kini yaapota꞉ mo a꞉nda꞉na꞉ pindipa polueke alo pepekepate koto naku pa꞉ta꞉ pua lopepekeme. Pate mo pa haemeke kini tepota꞉ mo pote pa꞉ta꞉manu pindipa pemekeme.  
\v 11 Kota꞉ mo kini tonkopuma꞉ta꞉ mo Sodomo Komoto daoni yaapo pa꞉ta꞉ wieke ale paeyao make nemanu tonka꞉na꞉ mea pemekeme.  
\v 12 Kutupa make Eipola꞉ma꞉na꞉ hamekena꞉ eiyeke Lodata꞉ koto Sodomo daoni pa꞉ta꞉ hayeke ekiyalo ipiki make ipika꞉ ala꞉ta꞉ ala꞉ta꞉ tonka꞉na꞉ mea hatuku pemekeme.  
\v 13 Pate hali homeke ma꞉nda꞉ta꞉ pindipa pua mo A꞉mo tapake hali Ma꞉motena꞉ timanu hayeke ale nanema꞉ hayeke Hibulu hali Eipola꞉ma꞉ pa꞉ta꞉ a꞉pa mo koto haumanu la haleekeme. Ma꞉mote make ipika꞉ kame yaapo Esikolo pita꞉ A꞉na꞉ maketa꞉ Eipola꞉ma꞉na꞉ tamba꞉ mina꞉la꞉ haliweki haemekeme.   
\p
\v 14 Kutupa Eipola꞉ma꞉ ipika꞉ kamena꞉ eiyeke hatuku pemekeeki opu haota꞉ ipika꞉ a꞉nda꞉na꞉ moka꞉la hando haemeke 318 haliweki momba꞉lao mo hande kini tonkopu telia꞉ mea pua ota꞉ mo Da꞉ni kenke pa꞉ta꞉ tolu lopalo pemekeme.  
\v 15 Koto pateta꞉ ipika꞉ haliweki putupa꞉ putupa꞉ pea momba꞉lao haena꞉ loma loma peaata꞉ koto timba hata꞉ mo a꞉nda꞉ tunkuliki tapake lia bepolaemekeme. Ipikana꞉ma꞉ta꞉ mo haliwekita꞉ mo Damasikasina꞉ okane nanema꞉ tilao ota꞉ mo Hoba pua tolu lutia pemekeme.  
\v 16 Kutupa mo mea pemeke ala꞉ta꞉ ala꞉ta꞉ paeyao pa petolo mimikime. Kutupa make mo ipika꞉ kamena꞉ eiyeke Loda make ipika꞉ ala꞉ta꞉ ala꞉ta꞉ paeyao make wanda꞉weki make mo mandane dipula mea pemeke wanda꞉hali make paa hatuku epemekeme.   
\s1 Melekisedekema꞉ Eipola꞉ma꞉ epeayekeeki  
\p
\v 17 Eipola꞉ma꞉ta꞉ mo Siedolaoma make mo mandane kinimanu ame̱le̱ a꞉nda꞉ pea bepolao epeeketa꞉ mo Sodomona꞉ kinima꞉ta꞉ mo Sape hawetena꞉ biki ma꞉nda꞉ Kinina꞉ hawete la꞉la꞉ alena꞉ manda꞉hande pulu peekeme.  
\v 18 Kutupa mo Seilimina꞉ kini pita꞉ mo Manda Hala꞉ Koda꞉na꞉ yeni peao hala꞉ hali Melekisedekema꞉ta꞉ Eipola꞉ma꞉ pa꞉ta꞉ betedi make waini ikali make mea a꞉paeyekeme.  
\v 19 Kutupa epeaasa꞉ pi alo alota꞉ Mo kenke ya yaapo wa꞉pa꞉la꞉ Manda Hala꞉ Koda꞉ma꞉ Eipola꞉ma꞉ epeaena꞉e laata꞉  
\v 20 Mo naka꞉ a꞉nda꞉ tunkuliki haliweki bepolaena꞉ lea꞉ Manda Hala꞉ Koda꞉na꞉ biki mina꞉liamana꞉e leekeme. Kutupa Eipola꞉ma꞉ma꞉ta꞉ mo mia꞉ ala꞉ta꞉ ala꞉ta꞉ paeyao telipa kiki yaapo yeketa꞉ homeke ma꞉nda꞉ta꞉ Melekisedeke pa꞉ta꞉ haleekeme.   
\p
\v 21 Kutu pieke hoki nane mo hande Sodomo kinima꞉ Eipola꞉ma꞉ pa꞉ta꞉ alota꞉ Mo mi ala꞉ta꞉ ala꞉ta꞉ paeyaota꞉ wia halo pelepate yaka wanda꞉hali homeke kie leekeme.   
\p
\v 22 Eipola꞉ma꞉ma꞉ hombo peaaso alota꞉ Do kenke ya yaapo wa꞉pa꞉la꞉ Tekehali oli Manda Hala꞉ Koda꞉na꞉ biki aloma꞉  
\v 23 I̱ma꞉ta꞉ neke pepeleke ala꞉ta꞉ ma꞉nda꞉ siki make ota꞉ na wia halueke laata꞉ Ota꞉ mo kodoni pu kone o anke dake pu tunkuliki kone loa꞉me. Kota꞉ mo nakana꞉ma꞉ alota꞉ I̱ma꞉ Eipola꞉ma꞉ mea hamoko yawa꞉ma꞉ pi na loelena꞉ loa꞉me.  
\v 24 Koto ekina꞉ I̱ma꞉ta꞉ ala꞉ta꞉ ma꞉nda꞉ na mulu polopate mo yaka haliwekima꞉ amba꞉ nemeke alemanu homeke mulueke. Kutupa make do I̱ tamba꞉ ma꞉la꞉ hali tepo A꞉na꞉ make Esikolo make Ma꞉mote ika꞉ putupiliki homeke mina꞉e leekeme.   
\c 15  
\s1 Koda꞉ma꞉ Eipola꞉ma꞉ yaapo pi la꞉ wiekeeki  
\p
\v 1 Do haumanu hoki naneta꞉ Eipola꞉ma꞉ma꞉ upa piki nono pea Koda꞉ma꞉ ipiki pa꞉ta꞉ dupa leekeeki opiekeme. Eipola꞉ma꞉o. Paala꞉ma꞉ na homa꞉pee. I̱ma꞉ta꞉ mo ekia꞉nda꞉ pilia꞉ pa꞉ta꞉ta꞉ I̱ta꞉ ota꞉ naka꞉ hanka꞉ tupa꞉ hata꞉ neke pa꞉ta꞉ta꞉ yenki tieke kulueke leekeme.   
\p
\v 2 Pate Eipola꞉ma꞉ma꞉ alota꞉ Tekehali Koda꞉o. Mo I̱ta꞉ wekiwandiki make dia꞉me. Kota꞉ pa ekipa epeke yenki kilipikipe. Yaka anke teke mulu pa꞉la꞉ halita꞉ mo Damasikasi hali Eliesa homeke hala꞉me.  
\v 3 Nakana꞉ma꞉ I̱ta꞉ wekiwandiki ma꞉nda꞉ na kele ekina꞉ mo yaka pa hameke e pokaasa꞉ some ma꞉nda꞉ma꞉ yaka anke teke milieke leekeme.   
\p
\v 4 Kutupa Tekehalima꞉ ipiki pa꞉ta꞉ pi paa leekeeki dupa opiekeme. Do pa hameke e pokaasa꞉ some Eliesama꞉ naka꞉ anketeke na mulu pa꞉la꞉pate ota꞉ naka꞉ wekima꞉ milieke leekeme.  
\v 5 Kutupa mo Tekehalima꞉ ipiki hama hatuku pua alota꞉ Oli ya nane handa꞉liao oli hombulanka꞉manu yata꞉pa꞉ handa꞉e. Nakana꞉ma꞉ monduma꞉ monduma꞉ pilipi wekiwandikina꞉ wekiwandikita꞉ oli hombulanka꞉ manuma꞉ handilimikie leekeme.   
\p
\v 6 Koto ekina꞉ Eipola꞉ma꞉ma꞉ Tekehali pa꞉ta꞉ hone tulaeyeke ekiyalo mo Tekehalima꞉ta꞉ ipikita꞉ tikitiki piki halie leekeme.   
\p
\v 7 Kutu pa mo Tekehalima꞉ ipiki pa꞉ta꞉ alota꞉ I̱ma꞉ta꞉ do kenke neke muelena꞉yeke neke mo Ba꞉biloni kenke pa꞉ta꞉ hala꞉ daoni A꞉e mina꞉pa꞉lao hatuku epoa꞉ Tekehalie leekeme.   
\p
\v 8 Pate Eipola꞉ma꞉ma꞉ lota꞉ pitolo alota꞉ Tekehali Koda꞉o. I̱ma꞉ ota꞉ yaka kenke laata꞉ Ekipa hone wionope leekeme.   
\p
\v 9 Tekehalima꞉ hombo peaaso alota꞉ Mo bapi tepo paeke kao make nanikosi make sipisipi halieki make mea kutupa melipu make dokolo make mea epoe leekeme.  
\v 10 Koto leeke Eipola꞉ma꞉ma꞉ta꞉ mo hotekemanu Koda꞉ pa꞉ta꞉ mea a꞉pa tukikina꞉ hala꞉pa꞉la꞉tiki pea mandaneta꞉ tombo ma꞉nda꞉na꞉ wiatiki mandaneta꞉ tombo ma꞉nda꞉na꞉ wiatiki pea hoki tuna tuna pea wina꞉ leekepate mo ba yaapota꞉ na halepeleekeme.  
\v 11 Mo hoteke manuta꞉ mo Idama꞉ handeke ba manuma꞉ noluekema꞉ epemekepate Eipola꞉ma꞉ma꞉ tolu lia꞉tiki piekeme.   
\p
\v 12  Nate oni pambolo pulu haena꞉ta꞉ Eipola꞉ma꞉ta꞉ u̱ yoka꞉lupa puaata꞉ paala꞉ pita꞉la꞉eki pita꞉ pututu pita꞉la꞉eki yaapo ipiki pa꞉ta꞉ epeekeme.   
\p
\v 13 Kutupa mo Tekehalima꞉ ipiki pa꞉ta꞉ alota꞉ Naka꞉ monduma꞉ monduma꞉ pilipi wekiwandikina꞉ wekiwandikita꞉ mo ma꞉nda꞉na꞉ kenkena꞉ pua hata꞉ta꞉ leke popeleke na handeke tapake leke halimikie. Ikita꞉ koto pa꞉ta꞉ta꞉ pa pa hameke e pokaasa꞉ tapake hata꞉ 400 bapina꞉ta꞉ ota꞉ hoke tupa꞉ handeteke halimikie.   
\p
\v 14 Pate kutu pilia꞉ tapaketa꞉ I̱ma꞉ ka꞉nda꞉ halo polopate mo naka꞉ monduma꞉ monduma꞉ pilipi wekiwandikita꞉ koto kenke mina꞉pa꞉lao pemeka꞉na꞉ta꞉ ala꞉ta꞉ ala꞉ta꞉ tieke mea pelimikie.  
\v 15 Neketa꞉ koke yaa pita yopu homupea homeka꞉na꞉ta꞉ kota꞉ mea hoilimikie.  
\v 16 I̱ma꞉ta꞉ do kenkena꞉ haleme A꞉mo tapake wanda꞉hali a̱i̱ na tolu liki pa haota꞉ ika꞉ hoke hau tieke piteleme ekina꞉ ka꞉nda꞉ halua꞉ dina꞉ta꞉ mo naka꞉ monduma꞉ monduma꞉ pilipi wekiwandikina꞉ wekiwandikita꞉ mei tonkopu mia꞉ka꞉na꞉ta꞉ do pate paa la꞉ka꞉la ipilimikie leekeme.   
\p
\v 17 Mo nate oni pambolo pua timba꞉ leeketa꞉ mo lumu opolo hake itika꞉pei pita꞉ talo talo hake ola꞉pake yaapoma꞉ a꞉pa mo hotekemanu wieke ale tukiki pa꞉ta꞉ yama꞉ yapeekeme.  
\v 18 Kutupa koto pate koneta꞉ Tekehalima꞉ Eipola꞉ma꞉ yaapo pi la꞉ witolo alota꞉ I̱ma꞉ do yata꞉polo kenke paeyaota꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halueke laa pi la꞉ witolome. Oni Idiepi yu tombona꞉ kini pea pua mo Yupoteitisi ikali puata꞉  
\v 19 mo Keni wanda꞉halina꞉ kenke make Kenisi wanda꞉halina꞉ kenke make Kadomono wanda꞉halina꞉ kenke make mo  
\v 20 Hidi wanda꞉halina꞉ kenke make Petese wanda꞉halina꞉ kenke make mo Tepa꞉imi wanda꞉halina꞉ kenke make  
\v 21 mo A꞉mo wanda꞉halina꞉ kenke make Keinani wanda꞉halina꞉ kenke make Keakasi wanda꞉halina꞉ kenke make mo Diebusi wanda꞉halina꞉ kenke make paeyao halueke laa loa꞉me leekeme.   
\c 16  
\s1 Heika pita꞉ Isima꞉elo yaapo  
\p
\v 1 Eipola꞉ma꞉na꞉ weteke Sa꞉taima꞉ta꞉ weki ma꞉nda꞉ na mendiaeyekeme. Pate ipikana꞉ma꞉ta꞉ pa hameke e pokaasa꞉ Idiepi wandiki biki Heika hatuku hayekeme.  
\v 2 Koto ekina꞉ Sa꞉taima꞉ Eipola꞉ma꞉ pa꞉ta꞉ alota꞉ Mo Tekehalima꞉ I̱ weki na mendiono ala꞉ ekina꞉ mo yaka pa hameke e pokaasa꞉ wandiki yaapo pelia꞉peke na ya꞉la꞉pe. Kutu pika꞉na꞉ta꞉ ipikana꞉ma꞉ yaka weki mendiaena꞉ loa꞉me leekeme. Koto leeke Eipola꞉ma꞉ma꞉ta꞉ Sa꞉taima꞉ leeke pina꞉ta꞉ a꞉pa꞉la꞉me leekeme.  
\v 3 Koto ekina꞉ Heikata꞉ ipika꞉ yaapo peao wanda꞉ haena꞉ Sa꞉taima꞉ haliki haleekeme. Do hau piki hauta꞉ Eipola꞉ma꞉ta꞉ Keinani kenke pa꞉ta꞉ kiki yaapo bapi haena꞉ piekeme.  
\v 4 Kutupa Eipola꞉ma꞉ma꞉ Heika yaapo pelia mo wandikita꞉ weki pitiekeme. Mo wandikima꞉ ipiki weki weleke hayekeeki handolota꞉ hakoko yamo baaso hata꞉ Sa꞉tai lu pambaeyekeme.   
\p
\v 5 Kutu pieke Sa꞉taima꞉ Eipola꞉ma꞉ pa꞉ta꞉ alota꞉ Heikama꞉ I̱ lu pambaasa꞉ ekita꞉ naka꞉ ka꞉ta꞉ta꞉e. I̱ma꞉ kone ipiki neke pa꞉ta꞉ ku hao ipiki weki weleke haya꞉eki hando haota꞉ I̱ lu pambaasa꞉me. Koto ekina꞉ diki ma꞉nda꞉ hondo tikitiki polopa꞉me laata꞉ Koda꞉ ipika꞉ lena꞉e laa leekeme.   
\p
\v 6 Eipola꞉ma꞉ma꞉ hombo peaaso alota꞉ Kota꞉ a꞉pa꞉la꞉ma꞉ mo wandikita꞉ naka꞉ pa hameke e pokaasa꞉ wandiki yalo neke oto pa꞉ta꞉ hala꞉me. Naka꞉ hone pa꞉la꞉eki pie leekeme. Koto ekina꞉ Sa꞉taima꞉ta꞉ Heika hoke tupa꞉ handeteke hayeke handaa pao pindipa peekeme.   
\p
\v 7 Mo Tekehalina꞉ enisoloma꞉ta꞉ Heika oni Sia꞉e nane pula꞉ pota꞉na꞉ hapupapeke alena꞉ tunkulu pa pitieke ikali tea꞉na꞉ manda꞉hande piekeme.  
\v 8 Kutupa alota꞉ Sa꞉taina꞉ pa hameke e pokaaso wanda꞉ Heikao. Neketa꞉ hanema꞉ a꞉pa pelepe laata꞉ hane pulipe leekeme. Heikama꞉ hombo peaaso alota꞉ Ya handeteke hala꞉ wanda꞉ kiao pindipa pulume leekeme.   
\p
\v 9 Mo enisoloma꞉ alota꞉ Pao la꞉ka꞉la pua ipika꞉ pa hameke e pokaasa꞉ wanda꞉ hapeke leekeme.   
\p
\v 10 Kutupa paa alota꞉ I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ ma꞉nda꞉ma꞉ na yata꞉polo pa꞉la꞉ tupa꞉ wopu kulueke.  
\v 11 Neketa꞉ hali weki mendilipikima꞉ ipika꞉ bikita꞉ Isima꞉elo lapeke. Pa ekipeke mo Tekehalima꞉ta꞉ naka꞉ ka꞉nda꞉ma꞉ homolo e̱ leleeki opa꞉la꞉ ekina꞉ loa꞉me.  
\v 12 Pate naka꞉ wekita꞉ mo sayale au la꞉la꞉ donkima꞉ handaa ipikita꞉ paeyao pa꞉ta꞉ a꞉nda꞉ tunkulaa hata꞉ paeyaoma꞉ta꞉ ipiki pa꞉ta꞉ a꞉nda꞉ tunkulimikie. Kutupa ipikita꞉ yankeke paeyao ame̱le̱ na hao peliki ta꞉ta꞉ halieke leekeme.   
\p
\v 13 Heikama꞉ ipika꞉ kone lota꞉ pitolo alota꞉ I̱ma꞉ta꞉ Koda꞉ ota꞉ handolo hata꞉ doeki la haluekema꞉ pa hao polope laa leekeme. Koto ekina꞉ mo ipiki pa꞉ta꞉ pi la halea꞉ Tekehalita꞉ Hando Hala꞉ Koda꞉e laa ipika꞉ biki kini pea taapa꞉ wiayekeme.  
\v 14 Koto ekina꞉ wanda꞉halima꞉ mo Keidese hao mo Betede tukikina꞉ ula꞉ naku ikalita꞉ Mo I̱ Handa꞉la꞉ Pa Hao Hala꞉ Halina꞉ Naku Ikalie lelememe.   
\p
\v 15 Heikama꞉ta꞉ Eipola꞉ma꞉na꞉ weki mendiaeyeketa꞉ Isima꞉elo leekeme.  
\v 16 Koto dina꞉ta꞉ Eipola꞉ma꞉ta꞉ bapi 86 yekeme.   
\c 17  
\s1 Sekemesaisi hauta꞉ mo pi la꞉ wieke ekina꞉ patehau  
\p
\v 1 Eipola꞉ma꞉ 99 bapi mieketa꞉ mo Tekehali opolo pua alota꞉ I̱ta꞉ Aneke Wele wopupiki Koda꞉ halome. I̱ma꞉ alo pi opua hoto paeyao tikitiki hau homeke pea꞉peke.  
\v 2 I̱ma꞉ta꞉ neke yaapo yaka pi la꞉ wiaata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ wopu kulueke leekeme.  
\v 3 Koto leeke Eipola꞉ma꞉ta꞉ you panda꞉puniao ipika꞉ popeleketa꞉ oni yu wataeyeke handaa Koda꞉ma꞉ alota꞉  
\v 4 I̱ma꞉ neke yaapo do pi la꞉ witolome. I̱ma꞉ pi la꞉ witolota꞉ neketa꞉ tutu paeyao sikina꞉ apa꞉mei halipikie.  
\v 5 Naka꞉ bikita꞉ Eipola꞉ma꞉ dia꞉yalo ameta꞉ Eipoloha꞉ma꞉e. Pa ekipeke neketa꞉ tutu paeyaona꞉ apa꞉mei hawaasome.  
\v 6 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandiki tieke kua꞉ka꞉na꞉ta꞉ kota꞉ mandaneta꞉ kinimanu pitilimikie. Nakana꞉ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kua꞉ka꞉na꞉ta꞉ kota꞉ tutu ta꞉ta꞉ ta꞉ta꞉ halimikie.   
\p
\v 7 I̱ma꞉ta꞉ neke pa꞉ta꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ tapake pa꞉ta꞉ maketa꞉ do la꞉ witolo pita꞉ ota꞉ na paeke pa u halo pa꞉la꞉ pi la꞉ witolome. I̱ta꞉ naka꞉ Koda꞉ make naka꞉ monduma꞉ monduma꞉ pilipi wekiwandikina꞉ wekiwandikina꞉ Koda꞉ make halueke.  
\v 8 Ame do neketa꞉ da ma꞉nda꞉ hali leke hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Do Keinani kenke paeyaota꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ ota꞉ hoto paeyao ika꞉ ekie la halaata꞉ I̱ta꞉ ika꞉ Koda꞉ halueke.   
\p
\v 9 Koda꞉ma꞉ Eipoloha꞉ma꞉ pa꞉ta꞉ alota꞉ Nakana꞉ma꞉ make naka꞉ wetepe nina꞉ monduma꞉ monduma꞉ pilipi wekiwandikina꞉ wekiwandikima꞉ maketa꞉ I̱ ame̱le̱ do pi la꞉ witolo ekita꞉ ota꞉ wia halumeke laa lapa꞉peke.  
\v 10 Nakana꞉ma꞉ make naka꞉ monduma꞉ monduma꞉ pilipi wekiwandikina꞉ wekiwandikima꞉ make ika꞉ hali weki paeyaota꞉ sekemesaisi hau ota꞉ pulumeke laa lapa꞉peke.  
\v 11-12 Ame do kini pea puluta꞉ ika꞉ hali weki mondu wia pitina꞉ hoto ketepo hata꞉ paeya꞉ka꞉na꞉ta꞉ kota꞉ sekemesaisi hau peapa꞉peke. Kutupa mo iki haleme da pa꞉ta꞉ mendilimi pa hameke e pokaasa꞉ wanda꞉halina꞉ hali weki make mo kenke ma꞉nda꞉na꞉ hamba꞉la꞉ pa hameke e pokaasa꞉ haliweki make sekemesaisi hau peapa꞉peke. Do hauma꞉ta꞉ neke I̱ dika꞉ pi la꞉ witolopa꞉eki peneme yao walieke.  
\v 13 Hali paeyao sikita꞉ sekemesaisi hau peapeke ya꞉la꞉me. Kutupa do manda lokena꞉ pitoloma꞉ ekita꞉ mo na paeke pa u halo pa꞉la꞉ pi la꞉ witolo ekina꞉ patehau pitoloeki walieke.  
\v 14 Koto pa꞉la꞉pate iki ma꞉nda꞉ epi sekemesaisi hau na pia꞉ka꞉na꞉ta꞉ kota꞉ Ya tapakee pi na lolueke. Pa ekipeke ipikana꞉ma꞉ta꞉ yaka pi la꞉ ulueki na wia haleke loa꞉me leekeme.   
\p
\v 15 Koda꞉ma꞉ Eipoloha꞉ma꞉ pa꞉ta꞉ alota꞉ Naka꞉ wanda꞉ta꞉ Sa꞉tai pi paa na lapeke. Ame do kini peata꞉ Seta lapeke.  
\v 16 I̱ma꞉ta꞉ ipiki epeao make ipiki pa꞉ta꞉ yama꞉ naka꞉ weki kulueke. I̱ma꞉ta꞉ ipiki epeao make ipikita꞉ mandane tutuna꞉ inkiki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki tukiki pa꞉ta꞉ta꞉ kinimanu halimikie.   
\p
\v 17 Koto leeke Eipoloha꞉ma꞉ta꞉ you panda꞉puniao ipika꞉ leke popeleketa꞉ oni yu wataena꞉ leekepate ipika꞉ honema꞉ta꞉ halima꞉ ipikita꞉ 100 bapi ya꞉na꞉ kone weki mendia꞉peke ya꞉la꞉pe laa kutupa Setata꞉ 90 bapina꞉ weki mendia꞉peke ya꞉la꞉pe laa ipika꞉ honema꞉ kone ki teekeme.  
\v 18 Kutupa ipikana꞉ma꞉ Koda꞉ pa꞉ta꞉ lota꞉ pitolo alota꞉ Pa ekipeke Isima꞉eloma꞉ yaka anketeke na mina꞉ alepe leekeme.   
\p
\v 19 Pate Koda꞉ma꞉ alota꞉ Dia꞉me. Naka꞉ wanda꞉ Setama꞉ naka꞉ weki mendiaeya꞉ka꞉na꞉ta꞉ ipika꞉ bikita꞉ Aisa꞉ke lelipikie. I̱ma꞉ta꞉ ipiki make ipika꞉ monduma꞉ monduma꞉ pilia꞉ wekiwandikina꞉ wekiwandiki ame̱le̱ make hoto paeyao yaka pi la꞉ witoloeki pa wia halumeke. Koto pi la꞉ witolo ekita꞉ ota꞉ na paeke pa u halo pa꞉la꞉ekie.  
\v 20 I̱ma꞉ta꞉ mo nakana꞉ma꞉ Isima꞉elona꞉ honke leeki opua꞉me. Koto ekina꞉ I̱ma꞉ta꞉ ipiki epeaota꞉ wekiwandiki wopu halaa ipika꞉ monduma꞉ monduma꞉ pilia꞉ wekiwandikina꞉ wekiwandiki make wopu halueke. Ipikita꞉ 12 you haliweki tonuna꞉ ateke haota꞉ kutupa ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tieke hawalueke.  
\v 21 Pate I̱ma꞉ta꞉ naka꞉ weki Aisa꞉ke yaapo yaka pi la꞉ witoloeki miniki halueke. Ipikita꞉ do homeke natena꞉ kone mo bapina꞉ Setama꞉ mendilieke leekeme.  
\v 22 Kutupa Koda꞉ ipiki Eipoloha꞉ma꞉ yaapo pi lo paeyaota꞉ ipiki mina꞉pa꞉lao peekeme.   
\p
\v 23 Koto homeke natena꞉ kone Eipoloha꞉ma꞉ma꞉ Koda꞉na꞉ pi opuata꞉ ipika꞉ weki Isima꞉elo make mo ipika꞉ da pa꞉ta꞉ haemeke haliwekimanu make apa꞉tao mo ipika꞉ da kenke pa꞉ta꞉ haemeke pa hameke e pokaemeke wanda꞉halina꞉ eiyeke tonu make mo hambeeke haliweki paeyao siki make sekemesaisi hau peayekeme.  
\v 24 Eipoloha꞉ma꞉ ipikita꞉ 99 bapina꞉ sekemesaisi hau piekeme.  
\v 25 Kutupa ipika꞉ weki Isima꞉elota꞉ 13 bapina꞉ piekeme.  
\v 26 Ipilikita꞉ mo homeke natena꞉ sekemesaisi hau pipikime.  
\v 27 Kutupa ipika꞉ pa hameke e pokaemeke haliweki make mandakena꞉ pimikime.   
\c 18  
\s1 Eipoloha꞉ma꞉ pa꞉ta꞉ wekina꞉ pi la꞉ wiekeeki  
\p
\v 1 Tekehalita꞉ mo Ma꞉motena꞉ timanu tekena꞉ Eipoloha꞉ma꞉ pa꞉ta꞉ opolo peekeme. Eipoloha꞉ma꞉ta꞉ nate ota꞉ titipu tieke pieke dina꞉ ipika꞉ palai da pota꞉ kake pa꞉ta꞉ pita꞉  
\v 2 handa꞉ liaeyekepate tepo hali haemekeeki handeekeme. Mo handea꞉ dina꞉ kone pototo la pua mo haliweki manda꞉hande piekeme. Kutupa ipika꞉ leke popeleketa꞉ oni yu wataena꞉ alo hata꞉  
\v 3 alota꞉ Haliwekio. Yaka da pa꞉ta꞉ hoto na pitiki pa na lombei pea꞉pa꞉peke. I̱ta꞉ iki tamba꞉ muluekema꞉ halome.  
\v 4 Koto ekina꞉ ika꞉ ankemanu tanda꞉pa do ti teke pa꞉ta꞉ hoto pitomena꞉ ikali mealo ponoe.   
\p
\v 5 Kutupa make mo ika꞉ pota꞉ pelimi ale pa꞉ta꞉manu honkopu hamina꞉ ne siki make mea a꞉palueke. Ikana꞉ma꞉ta꞉ yaka da pa꞉ta꞉ epeleme ekita꞉ I̱ ta꞉na꞉ homa꞉tiaasa꞉ hau pelememe. Koto ekina꞉ta꞉ I̱ma꞉ iki tamba꞉ mionoe leekeme. Kutupa ikana꞉ma꞉ hombo peaaso alota꞉ Ota꞉ a꞉pa꞉la꞉me laa keiyae lemekeme.   
\p
\v 6 Koto ekina꞉ Eipoloha꞉ma꞉ta꞉ ipupula mo palai da pa꞉ta꞉ pua Seta pa꞉ta꞉ alota꞉ Naka꞉ ta꞉ta꞉ ma꞉nda꞉ wili palaowa tepo a꞉nda꞉ mea a̱i̱ betedi wepie leekeme.  
\v 7 Koto laa ipikita꞉ oni kao banisi pa꞉ta꞉ pua loke panka wiki panake kao ikiki mea ipika꞉ e pokaasa꞉ hali ma꞉nda꞉ pa꞉ta꞉ haleekeme. Kutupa mo halima꞉ta꞉ ipupula pua yankeekeme.  
\v 8 Kutupa yankeketa꞉ Eipoloha꞉ma꞉ mo kao andu pankeke manda wita꞉la꞉ epeke imekema꞉ handeke ale make ota꞉ kao andu pankeke make mo hande hoteke make mea pua mo haliweki pitieke alena꞉ pua wiekeme. Koto ti teke pa꞉ta꞉ta꞉ ipikana꞉ma꞉ mo haliweki ne pana꞉ peaota꞉ nena꞉ leekeme.   
\p
\v 9 Kutupa mo haliwekima꞉ lota꞉ pitolo alota꞉ Naka꞉ wanda꞉ Setata꞉ hande pa꞉la꞉pe lemekeme. Eipoloha꞉ma꞉ma꞉ hombo peaaso alota꞉ Oni palai da pa꞉ta꞉ pila꞉me leekeme.   
\p
\v 10 Hali homeke ma꞉nda꞉ma꞉ alota꞉ Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ kota꞉ naka꞉ wanda꞉ Setata꞉ weki mendilieke leekeme. Setata꞉ mo halikina꞉ hoki nane mo palai da pota꞉ kake pa꞉ta꞉ hata꞉ opiekeme.  
\v 11 Eipoloha꞉ma꞉ pita꞉ Seta yaapota꞉ ota꞉ koke yepekeme. Kutupa Setata꞉ ipika꞉ kaisepo da handeekeeki make paeyekeme.   
\p
\v 12  Koto ekina꞉ Setama꞉ta꞉ ipika꞉ onina꞉ toluma꞉ ki talo hata꞉ alota꞉ Ameta꞉ I̱ make yaka haliki make koke yalo hata꞉ honkopu paela꞉me. Ekipa ta꞉na꞉ma꞉ homolo hata꞉ loke paa apa꞉talupa꞉pe leekeme.   
\p
\v 13 Koto ekina꞉ mo Tekehalima꞉ Eipoloha꞉ma꞉ pa꞉ta꞉ lota꞉ pitolo alota꞉ Ekipeke Setama꞉ ki talo hata꞉ ipikita꞉ ota꞉ koke yolome ekipa weki mondulua꞉pe ala꞉pe.  
\v 14 Koto mo Tekehalima꞉ na pea꞉peke ya꞉la꞉ hau ma꞉nda꞉ ula꞉pe. Amba꞉ mo loa꞉ handa꞉e. Ame do kini pea kaisepo kiki homekena꞉ mandane ekina꞉ tonkopuna꞉ta꞉ I̱ paa epoa꞉ka꞉na꞉ta꞉ Setama꞉ weki mendilieke laa loa꞉me leekeme.   
\p
\v 15 Kotoeki leeke Seta ipikita꞉ paala꞉ pieke handa honiolo hata꞉ alota꞉ Ki na toa꞉me leekepate Tekehalima꞉ hombo peaaso alota꞉ Dia꞉me. Nakana꞉ma꞉ ki temee leekeme.   
\s1 Eipoloha꞉ma꞉ma꞉ Sodomo da hoeyaapa꞉na꞉ honke laeyekeeki  
\p
\v 16 Kutupa mo hali wekita꞉ mina꞉pa꞉lao mo Sodomo da handa꞉nialo pimiki alena꞉ pemeke handaa Eipoloha꞉ma꞉ta꞉ mo pota꞉na꞉ a꞉talo lo tapaaluekema꞉ mandakena꞉ pemekeme.   
\p
\v 17 Kutupa mo Tekehalima꞉ ipika꞉ onina꞉ toluma꞉ alota꞉ I̱ma꞉ pulu polo ekita꞉ Eipoloha꞉ma꞉ pa꞉ta꞉ na a꞉mbalueke.  
\v 18 Ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ honkopu wopu hake tutu tieke halieke. Kutupa make ipiki pa꞉ta꞉ yama꞉ta꞉ mo tutu paeyao epealueke.  
\v 19 I̱ma꞉ta꞉ ipikana꞉ma꞉ ipika꞉ weki titi make ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ make I̱ pa꞉ta꞉ homu pea tikitiki hau make ota꞉ hau make ota꞉ pia꞉pa꞉peke laa la halena꞉yeke ipiki ma̱leke lulume. Ikana꞉ma꞉ kutu pimika꞉na꞉ta꞉ kota꞉ I̱ma꞉ mo ipiki pa꞉ta꞉ pi la꞉ ua꞉ tupa꞉ hau paeyao peawalueke leekeme.   
\p
\v 20 Koto hone wia mo Tekehalima꞉ Eipoloha꞉ma꞉ pa꞉ta꞉ alota꞉ Mo Sodomo Komoto da yaapona꞉ pi laasa꞉eki manuta꞉ ota꞉ hokeeki laaloendi pita꞉la꞉me. Kutupa ipilika꞉ hoke hauta꞉ ota꞉ tiekee.  
\v 21 Koto ekina꞉ mo loloendi piteleme laasa꞉eki opolo ekita꞉ ota꞉pe laa handolo holopulueke leekeme.   
\p
\v 22 Kutupa mo hali yaapota꞉ Sodomo nane pepekepate mo Tekehalita꞉ Eipoloha꞉ma꞉ yaapo pa hayekeme.   
\p
\v 23 Kutupa Eipoloha꞉ma꞉ma꞉ Tekehali handolo hata꞉ alota꞉ Nakana꞉ma꞉ta꞉ mo hoke hau pa꞉la꞉ tapake hoeyaaso hata꞉ta꞉ mo tikitiki piki tapake make ota꞉ mandakena꞉ hoeyalo pele ekina꞉ alepe.  
\v 24  Oni daoni pa꞉ta꞉ hoke hau na pu haleme wanda꞉hali 50 haya꞉ka꞉na꞉ta꞉ kota꞉ pa hoeyalipikipe. Nakana꞉ma꞉ta꞉ koto 50 wanda꞉hali homaama꞉na꞉ ya honema꞉ta꞉ na hoeyalena꞉e hone witolome.  
\v 25 Ota꞉ mo tikitiki piki tapaketa꞉ mo hoke hau pa꞉la꞉ wanda꞉hali ame̱le̱ na lu homalipikipema. Kotota꞉ ota꞉ pea꞉peke na ya꞉la꞉ haue. Nakana꞉ma꞉ta꞉ kutupiki hau pea꞉peke na ya꞉la꞉me. Nakana꞉ma꞉ mo da hoeyaeka꞉na꞉ta꞉ kota꞉ mo tikitiki piki tapaketa꞉ mo hoke hau pa꞉la꞉ tapake ame̱le̱ ka꞉nda꞉ pealipikie. Koto ekina꞉ kotota꞉ ota꞉ ana꞉ na pa꞉la꞉ haue. Do kenke paeyaona꞉ pi yokaalu pitele halima꞉ta꞉ ota꞉ tikitiki yao kone pea꞉peke ya꞉la꞉me laa leekeme.   
\p
\v 26 Koto leeke mo Tekehalima꞉ hombo peaaso alota꞉ I̱ma꞉ mo Sodomo daoni pa꞉ta꞉ tikitiki pea hala꞉ tapake 50 handoa꞉ka꞉na꞉ta꞉ kota꞉ koto wanda꞉halina꞉ hauna꞉ kone mo daoni na hoeyalueke leekeme.   
\p
\v 27 Eipoloha꞉ma꞉ma꞉ pi paa alo alota꞉ Tekehalio. Pilisi I̱ma꞉ paala꞉ma꞉ na homeke pi paa alo ekina꞉ hone na wia꞉peke. I̱ta꞉ pa kenke hali yalo pi ma꞉nda꞉ lapeketa꞉ na ya꞉la꞉pate pa  
\v 28 mo daoni pa꞉ta꞉ 50 dia꞉ ya꞉lia꞉pate pa 45 tikitiki piki tapake homeke haya꞉ka꞉na꞉ta꞉ kota꞉ 5 ma꞉nda꞉ dia꞉ya꞉la꞉ ekina꞉ mo daoni paeyao hoeyalipikipe leekeme. Mo Tekehalima꞉ paa hombo peaaso alota꞉ I̱ma꞉ mo daoni pa꞉ta꞉ hoke hau na pu hala꞉ wanda꞉hali 45 handa꞉ ua꞉ka꞉na꞉ta꞉ na hoeyalueke leekeme.   
\p
\v 29 Eipoloha꞉ma꞉ma꞉ paa ombu alota꞉ Pa 40 tapake homeke haya꞉ka꞉na꞉ta꞉ eki pilipikipe leekeme. Ipikana꞉ma꞉ hombo peaaso alota꞉ Kota꞉ 40 tapake haya꞉ka꞉na꞉ make ota꞉ na hoeyalueke leekeme.   
\p
\v 30 Eipoloha꞉ma꞉ma꞉ alota꞉ Pilisi Tekehalio. I̱ma꞉ pi paa lapeke ya꞉la꞉ma꞉ mineke na panka꞉peke. Mo tapake 30 homeke haya꞉ka꞉na꞉ta꞉ eki pilipikipe leekeme. Tekehalima꞉ hombo peaaso alota꞉ 30 tapake handa꞉ ua꞉ka꞉na꞉ maketa꞉ na hoeyalueke leekeme.   
\p
\v 31 Eipoloha꞉ma꞉ma꞉ alota꞉ Tekehalio. Pilisi I̱ma꞉ paala꞉ma꞉ na homeke neke pa꞉ta꞉ pi pa la꞉tia pulu ekina꞉ hone na wia꞉peke. Mo pa꞉ta꞉ pa 20 homeke handa꞉ wika꞉na꞉ta꞉ eki pilipipe leekeme. Ipikana꞉ma꞉ alota꞉ 20 handa꞉ ua꞉ka꞉na꞉ make na hoeyalueke leekeme.   
\p
\v 32 Eipoloha꞉ma꞉ma꞉ alota꞉ Tekehalio. Pilisi ota꞉ hoto homeke lota꞉ puluekema꞉ mineke na panka꞉peke. Kiki yaapo homeke handa꞉ wika꞉na꞉ta꞉ eki pilipikipe leekeme. Ipikana꞉ma꞉ alota꞉ Kiki yaapo handa꞉ ua꞉ka꞉na꞉ make na hoeyalueke leekeme.   
\p
\v 33 Kutupa Eipoloha꞉ma꞉ yaapo pi lo paeyao mo Tekehali pu moneayeketa꞉ Eipoloha꞉ma꞉ta꞉ da la꞉ka꞉la peekeme.   
\c 19  
\s1 Sodomona꞉ hoke hau tieke  
\p
\v 1 Mo hande enisolo yaapo Sodomo opolo epepeketa꞉ Lodata꞉ mo daonina꞉ pota꞉ kake pa꞉ta꞉ pitiekeme. Lodama꞉ mo hali yaapo hando haota꞉ koto kone tiao handolo peekeme. Ipikana꞉ma꞉ mo hali yaapo haepeke alena꞉ pua panda꞉puniaaso  
\v 2 alota꞉ Hali yaapoo. I̱ta꞉ ipiliki tamba꞉ muluekema꞉ haloma꞉ pilisi ya da nane pomana꞉ ipupe. Ipilika꞉ anke tandepo peliaata꞉ da ka꞉la꞉paasota꞉ timba tiao ipilika꞉ polo pelepe nane poepena꞉ loa꞉me leekeme. Pate ipilikana꞉ma꞉ hombo peaaso alota꞉ Dia꞉me. Dikita꞉ ame do timbata꞉ do daoni wanda꞉halina꞉ mombolo haleme alena꞉ polupekee lepekeme.   
\p
\v 3 Pate Lodama꞉ta꞉ mo hali yaapo honke paa la꞉tiki pu haota꞉ wetepe nane ipika꞉ da pa꞉ta꞉ hatuku peekeme. Lodama꞉ta꞉ ipika꞉ e pokaasa꞉ haliweki pa꞉ta꞉ alota꞉ Do kimisu tapakena꞉ mandane betedimanu wepiao make epeke ne ma꞉nda꞉ wamo peape leekeme. Kutupa mo ne amu pea wieketa꞉ nemekeme.   
\p
\v 4 Mo kimisu hali yaapo polu poluekema꞉ haena꞉ta꞉ mo Sodomo haliwekima꞉ mo da a꞉pa popei yaemekeme. Mo daoni pa꞉ta꞉ haemeke koke haliweki paeyao make pa꞉pa꞉na꞉ weki paeyao make a꞉pa haemekeme.  
\v 5 Ikana꞉ma꞉ mo Loda pa꞉ta꞉ wi alo alota꞉ Mo neke ame̱le̱ ame timba polu epeme haliwekita꞉ hando ya꞉ka꞉ta꞉pe. Niki pa꞉ta꞉ hatuku epoe lemekeme. Mo Sodomo haliwekima꞉ta꞉ mo hali yaapo ame̱le̱ loke apa꞉taasa꞉ hau puluekema꞉ lemekeme.   
\p
\v 6 Koto lemeke Lodata꞉ hama opolu bao pota꞉ poka꞉neayekeme.  
\v 7 Kutupa ipikana꞉ma꞉ mo haliweki pa꞉ta꞉ alota꞉ Yankeke tonuo. Dupiki temokona꞉ hau na pia꞉pa꞉pee laa iki honke alome.  
\v 8 Handa꞉pe yaka moputali wandiki yaapo hala꞉ma꞉ ika꞉ hone pa꞉la꞉eki puemena꞉ hama hatuku eponoe. Pate do hali yaapo pa꞉ta꞉ta꞉ hau ma꞉nda꞉ na pia꞉pa꞉pee. Ipilikita꞉ yaka kimisu hali yaapo ya꞉la꞉ ekina꞉ I̱ma꞉ handeteke hapeke ya꞉la꞉ma꞉ leekeme.   
\p
\v 9 Koto leekepate mo tapakema꞉ alota꞉ Neketa꞉ kenke ma꞉nda꞉ hali ya꞉la꞉ma꞉ nika꞉ pota꞉na꞉ na hake wopu hae. Niki dupi dupi laa leeke hauta꞉ neketa꞉ epi ya꞉ka꞉ta꞉pe. Nikana꞉ma꞉ mo hali yaapo pa꞉ta꞉ pulu pololoma꞉ tupa꞉ neke pa꞉ta꞉ ota꞉ haka꞉ta꞉pake tupa꞉ puluma꞉ma꞉ wotu hae lemekeme. Mo haliwekima꞉ta꞉ Loda wato lopao oni pota꞉ kake yambuluekema꞉ pemekeme.  
\v 10 Pate mo da tukiki pa꞉ta꞉ pitipiki kimisu hali yaapoma꞉ta꞉ kiki hokulu peao Loda yola꞉ mea oni da tukiki pa꞉ta꞉ lopao pota꞉ poka꞉peekeme.  
\v 11 Kutupa mo hama꞉ nane haemeke haliwekima꞉ pota꞉ na lombolo pimiki tupa꞉ ipilikana꞉ma꞉ta꞉ ika꞉ leke holu peaepekeme.   
\s1 Lodama꞉ Sodomo mina꞉pa꞉laeyekeeki  
\p
\v 12 Mo hali yaapoma꞉ Loda pa꞉ta꞉ alota꞉ Ma꞉nda꞉ epi naka꞉ wekiwandiki tonu o naka꞉ mei tonu o naka꞉ yankeke do daoni pa꞉ta꞉ haemeka꞉na꞉ta꞉ kota꞉ do pa꞉ta꞉ na haena꞉ leke panane hatuku pue.  
\v 13 Pa ekipeke do daonita꞉ dikana꞉ma꞉ hoeyalo polopa꞉ ekina꞉ lopa꞉me. Mo Tekehalima꞉ta꞉ do Sodomo wanda꞉halina꞉ pi laasa꞉ ekita꞉ ota꞉ hoke tupa꞉ opua do Sodomo hoeya ponoyeke diki tapaala꞉me lepekeme.   
\p
\v 14 Koto lepeke Lodata꞉ ipika꞉ wandiki yaapo mulu pimiki haliweki pa꞉ta꞉ pua alota꞉ Mo Tekehalima꞉ do da hoeyaliekema꞉ mina꞉pa꞉lao ota꞉ a̱i̱ yopupe leekepate mo haliwekina꞉ honema꞉ta꞉ Lodama꞉ pa telepo alo ala꞉ma꞉ hone wimikime.   
\p
\v 15 Da kelepolo haena꞉ mo enisolo yaapoma꞉ Loda ipupulaaso alota꞉ A̱i̱ a̱i̱ pie. Naka꞉ wandiki ankula꞉ ankula꞉ ota꞉ a̱i̱ hatuku pue. Pa ekipeke mo daoni hoeyaeya꞉ka꞉na꞉ta꞉ iki na homolo peleme tupa꞉ lopa꞉me lepekeme.  
\v 16 Pate Lodama꞉ta꞉ kiao tapeke nono pieketa꞉ mo Tekehalima꞉ta꞉ Loda a꞉ta꞉ma꞉ homolo hata꞉ mo hali yaapoma꞉ Loda make ipika꞉ waneke ankula ankula paeyao kikima꞉ mea hatuku mo daoni mina꞉pa꞉lao pemekeme.  
\v 17 Kutupa mo enisolo ma꞉nda꞉ma꞉ alota꞉ Ota꞉ homa꞉la꞉eki weiya honkopu hao pototo laa pupe. Na handa꞉neake make mo hawetena꞉ na pua hando hapa꞉peke. Iki na lulu pa꞉la꞉ tupa꞉ oli pote pa꞉ta꞉manu pindipa pupe leekeme.   
\p
\v 18 Pate Lodama꞉ hombo peaaso alota꞉ Someo. Pilisi ota꞉ dia꞉me. Nikana꞉ma꞉ dupiki hau na piomono lapee.  
\v 19 I̱ a꞉ta꞉ma꞉ homolo hata꞉ ipilikana꞉ma꞉ I̱ homaama꞉na꞉ yeke ota꞉ tamba꞉ mipipate pa mo pote manuta꞉ papate yalo hata꞉ koto pate a̱i̱ na opolo peke hano mo hoeyalo pa꞉la꞉ ekima꞉ I̱ a꞉pa teliminia꞉ka꞉na꞉ta꞉ kota꞉ homulueke.  
\v 20 Koto ekina꞉ mo koto hosiki daoni sikita꞉ handelepe laa mo daonita꞉ pa hosiki da siki ya꞉la꞉ ekina꞉ I̱ na homolo polo tupa꞉ koto pa꞉ta꞉ pono lae leekeme.   
\p
\v 21 Mo enisoloma꞉ hombo peaaso alota꞉ A꞉pa꞉la꞉me. I̱ma꞉ aowe aloma꞉ koto daoni na hoeyalueke.  
\v 22 Ota꞉ a̱i̱ a̱i̱ la a̱i̱ya pupema. I̱ma꞉ta꞉ iki mopate a̱i̱ na opolo peke hamina꞉ta꞉ hau ma꞉nda꞉ a̱i̱ na pulueke leekeme. Lodama꞉ koto daonita꞉ hosiki alesiki leeke handaa mo daonina꞉ bikita꞉ Soa leekeme.   
\s1 Sodomo Komoto yaapo hoeyaeyekeeki  
\p
\v 23 Mo nate opolo haena꞉ta꞉ Loda mo Soa da opolo peekeme.  
\v 24 Kutupa koto kone Tekehalima꞉ talo talo hake lanka꞉ biki solopama꞉ mo Sodomo pita꞉ Komoto daoni yaapo pa꞉ta꞉ lako leke lopena꞉ alo hata꞉  
\v 25 hoeyao mo hawete tieke make wanda꞉hali paeyao make koto kenkena꞉ opeeke ala꞉ta꞉ ala꞉ta꞉ paeyao make hoeyaeyekeme.  
\v 26 Pate Lodana꞉ weteketa꞉ paa la꞉ka꞉la꞉ handa꞉moneao hao ipikita꞉ epi punka au laa hayekeme.   
\p
\v 27 Da ka꞉la꞉paaso sikita꞉ Eipoloha꞉ma꞉ta꞉ ipupula pua mo hande Tekehalina꞉ leke popelekena꞉ pua hayeke alena꞉ paa peekeme.  
\v 28 Kutupa mo Sodomo pita꞉ Komoto yaapo mo hawete tieke make handa꞉niayekepate mo kenke pa꞉ta꞉ta꞉ po moya̱la꞉ alena꞉ piki nono pea lumu tieke opeekeeki handeekeme.  
\v 29 Pate Koda꞉ma꞉ hande Loda hayeke daoni yaapo hoeyaeyeke dina꞉ta꞉ ipika꞉ hone pa꞉ta꞉ Eipoloha꞉ma꞉ hone pa wia hata꞉ Loda pindipa pena꞉ leekeme.   
\s1 Moa꞉be pita꞉ A꞉mono tapake yaapo kini piekeeki  
\p
\v 30 Loda ipikita꞉ Soa hapeke paala꞉ pieketa꞉ ipika꞉ wandiki yaapo ame̱le̱ pote eli pa꞉ta꞉manu pua tikene da pa꞉ta꞉ pelia haemekeme.  
\v 31 Kutupa mo mupeke wandikima꞉ hakepiki pa꞉ta꞉ alota꞉ Diki mea wekiwandiki mendialo pa꞉la꞉ hali ma꞉nda꞉ do kenke paeyao pa꞉ta꞉ na hala꞉me. Kutupa make dika꞉ apa꞉ta꞉ koke yala꞉me.  
\v 32 Koto ekina꞉ dika꞉ apa꞉ hoke ikali na keaena꞉ laa ipiki ame̱le̱ polupa꞉ka꞉na꞉ta꞉ kota꞉ ipiki pa꞉ta꞉ yama꞉ wekiwandiki mondupana꞉ loa꞉me leekeme.  
\v 33 Koto timbata꞉ ipiki waini ikali nena꞉ halaata꞉ mo mupeke wandiki ateke yaapo peliekepate mo ateketa꞉ ikali tieke neekeeki yalo ipikita꞉ hone na wiekeme.   
\p
\v 34 Mo da ma꞉nda꞉ kelepeeketa꞉ mo mupeke wandikima꞉ hakepiki pa꞉ta꞉ alota꞉ Ambaneke timbata꞉ ipiki yaapo I̱ polua꞉ma꞉ ame timbata꞉ neke poluepena꞉ ikali paa nena꞉ lopana꞉e. Kutu pupa꞉ka꞉na꞉ta꞉ kota꞉ diki telipuna꞉ma꞉ dika꞉ apa꞉ pa꞉ta꞉ yama꞉ weki mondupana꞉ loa꞉me leekeme.  
\v 35 Koto ekina꞉ koto timbata꞉ ipilika꞉ ateke ikali nena꞉ laa mo wetepe nane wandiki ateke yaapo pelipipikime. Kutupa ateketa꞉ ikali tieke ombu neekeeki yalo hone na wiekeme.  
\v 36 Koto hau pipiki ekima꞉ta꞉ Lodana꞉ waneke yaapota꞉ weki loke lomba꞉alu pipikime.  
\v 37 Mo titina꞉ wandikima꞉ weki mendieketa꞉ ipiki bikita꞉ Moa꞉be leekeme. Ipikita꞉ ame do Moa꞉be wanda꞉halina꞉ apa꞉meie.  
\v 38 Mo wetepena꞉ wandikima꞉ make weki ombu mendieketa꞉ ipiki bikita꞉ Benami leekeme. Ipikita꞉ ame do A꞉mono wanda꞉halina꞉ apa꞉meie.   
\c 20  
\s1 Eipoloha꞉ma꞉ pita꞉ Abimeleke yaapo  
\p
\v 1 Eipoloha꞉ma꞉ma꞉ta꞉ Ma꞉mote mina꞉pa꞉lao Keinanina꞉ ka꞉wa꞉ nanema꞉ tilao mo Keidese make Sia꞉e kenke yaapo tukikina꞉ pua pitiekeme.  
\v 2 Kutupa ipikana꞉ma꞉ Kita kenke pa꞉ta꞉ pua hata꞉ Setata꞉ ipika꞉ beliki leekeme. Koto leeke handa mo Kita kenkena꞉ kini Abimelekema꞉ Setata꞉ hatuku ipiki pa꞉ta꞉ epena꞉ leekeme.  
\v 3 Timba ma꞉nda꞉ta꞉ mo some pa꞉ta꞉ Koda꞉ma꞉ upama꞉ a꞉pa alota꞉ Nakana꞉ma꞉ do amba꞉ ma꞉nda꞉ma꞉ ma꞉la꞉ wanda꞉ mele ekina꞉ neke homilipikie leekeme.   
\p
\v 4 Pate Abimeleketa꞉ mo wanda꞉ teke pa꞉ta꞉ na epeeke ekina꞉ alota꞉ Tekehalio. I̱ta꞉ hokeeki ma꞉nda꞉ na poloma꞉ I̱ make yaka wanda꞉hali make hoeyalipikipe.  
\v 5 Eipoloha꞉ma꞉ma꞉ta꞉ ipika꞉ ana꞉e leeke handa mo wanda꞉ma꞉ make homeke pi kone lea꞉me. Koto ekina꞉ I̱ma꞉ do hauta꞉ yaka honema꞉ tikitiki pieke handa dupiki hau pua꞉me. Kutupa I̱ma꞉ta꞉ hoke hau ma꞉nda꞉ na polome leekeme.   
\p
\v 6 Koda꞉ma꞉ upama꞉ hombo peaaso alota꞉ Ota꞉e. Nakana꞉ma꞉ tikitiki pieke handaa pi ekina꞉ nakana꞉ma꞉ I̱ pa꞉ta꞉ hoke hau pilipiki yeke nakana꞉ma꞉ mo wanda꞉ na wataalena꞉ loa꞉me.  
\v 7 Koto ekina꞉ ameta꞉ mo wanda꞉ ipika꞉ haliki pa꞉ta꞉ paa hala꞉peke. Mo halita꞉ potopede hali halekena꞉ ipikana꞉ma꞉ nekena꞉ yeni peaya꞉ka꞉na꞉ta꞉ kota꞉ neke na homilipikie. Pate mo wanda꞉ pa na haleka꞉na꞉ta꞉ kota꞉ neke kinki pitoloma꞉ laa neke make naka꞉ wanda꞉hali make homilimikie leekeme.   
\p
\v 8 Da kelepeeketa꞉ Abimeleke ipika꞉ you haliweki wi la꞉ mepi pea mo piekeeki la haleeke handaa mo haliwekita꞉ paala꞉ma꞉ homemekeme.  
\v 9 Kutupa Abimelekema꞉ Eipoloha꞉ma꞉ wi la꞉ mea alota꞉ Nakana꞉ma꞉ niki pa꞉ta꞉ dota꞉ ekipiki hau pea pelepe. Nakana꞉ma꞉ I̱ pa꞉ta꞉ make yaka kilu tombuao halo pa꞉ta꞉ do hoeyaapekeeki epena꞉ leke hauta꞉ I̱ma꞉ neke pa꞉ta꞉ ekipiki ata꞉ka꞉ poleke pelepe. Nakana꞉ma꞉ do I̱ pa꞉ta꞉ pele ekita꞉ ota꞉ ma꞉nda꞉ma꞉ na pea꞉peke hau peleme.  
\v 10 Koto ekina꞉ ekipeke do hau pea pelepe leekeme.   
\p
\v 11 Eipoloha꞉ma꞉ma꞉ hombo peaaso alota꞉ Yaka honema꞉ta꞉ do pate Koda꞉ paala꞉piki some ma꞉nda꞉ na halieke hone wia yaka wanda꞉ muluekema꞉ I̱ limikie hone ua꞉me.  
\v 12 Pate mo wanda꞉ta꞉ ota꞉ yaka ana꞉e. Ipikita꞉ yaka apa꞉na꞉ waneke ya꞉la꞉pate ama꞉ homeke ta꞉ta꞉e. Kota꞉ I̱ma꞉ mea polome.  
\v 13 Koto ekina꞉ Koda꞉ma꞉ I̱ yaka apa꞉na꞉ da mina꞉pa꞉lao ma꞉nda꞉na꞉ kenke pa꞉ta꞉ pu leeke puluta꞉ I̱ma꞉ mo wanda꞉ pa꞉ta꞉ alota꞉ Nakana꞉ma꞉ I̱ oto pa꞉ta꞉ haleeki walolo hata꞉ paeyao pa꞉ta꞉ I̱ta꞉ naka꞉ ana꞉e lapeke laa loa꞉me leekeme.   
\p
\v 14 Kutupa Abimelekema꞉ Setata꞉ Eipoloha꞉ma꞉ paa halolo hata꞉ make homeke dina꞉ koneta꞉ sipisipimanu make kaomanu make pa hameke e pokaasa꞉ wanda꞉hali make apa꞉tao haleekeme.  
\v 15 Ipikana꞉ma꞉ Eipoloha꞉ma꞉ pa꞉ta꞉ alota꞉ Dota꞉ yaka kenkema꞉ naka꞉ hone pa꞉la꞉ alena꞉ hae leekeme.  
\v 16 Kutupa Seta pa꞉ta꞉ alota꞉ Mo neke ame̱le̱ haleme wanda꞉halima꞉ neketa꞉ hokeeki na ula꞉me laa waloelena꞉ make hokeeki ma꞉nda꞉ na peleme hone wina꞉ I̱ma꞉ naka꞉ ana꞉ pa꞉ta꞉ mo silipa manimanu 1 daoseni do halolo handa꞉e leekeme.   
\p
\v 17-18 Kutupa mo Eipoloha꞉ma꞉na꞉ weteke Seta pa꞉ta꞉ pieke ekina꞉ Tekehalima꞉ta꞉ mo Abimelekena꞉ kini da pa꞉ta꞉ haemeke wanda꞉manu paeyaota꞉ weki mendia꞉la꞉ hauta꞉ sa꞉sa꞉ piekeme. Koto ekina꞉ Eipoloha꞉ma꞉ma꞉ Koda꞉ pa꞉ta꞉ Abimelekena꞉ yeni peayeke handa epeayekeme. Kutupa make mo ipika꞉ wanda꞉ make mo ipika꞉ pa hameke e pokaemeke wandiki titi make weki mendina꞉ yeke epeayekeme.   
\c 21  
\s1 Aisa꞉kena꞉ mendiekeeki  
\p
\v 1 Mo Tekehalima꞉ ipika꞉ pi la꞉ wieke tupa꞉ kone Seta epeayeketa꞉  
\v 2 Eipoloha꞉ma꞉ta꞉ koke ya꞉na꞉ kone Setama꞉ weki loke lomba Eipoloha꞉ma꞉na꞉ hali weki mendiaeyekeme. Mo wekita꞉ hande Koda꞉ma꞉ mendiliekee laa la꞉ wieke natena꞉ kone mendiekeme.  
\v 3 Eipoloha꞉ma꞉ma꞉ta꞉ mo wekina꞉ bikita꞉ Aisa꞉ke leekeme.  
\v 4 Kutupa mo weki nate ketepo hata꞉ mieketa꞉ mo hande Koda꞉ma꞉ pia꞉peke laa leeke tupa꞉ sekemesaisi hau peayekeme.  
\v 5 Eipoloha꞉ma꞉ta꞉ 100 bapi mieketa꞉ Aisa꞉ke mendiekeme.  
\v 6 Setama꞉ alota꞉ Koda꞉ma꞉ I̱ pa꞉ta꞉ta꞉ ta꞉na꞉ pa꞉la꞉eki make ki tala꞉eki make mea a꞉pa꞉la꞉mee. Epi amedama꞉ doeki opia꞉ka꞉na꞉ta꞉ kota꞉ I̱ ame̱le̱ mandakena꞉ ki talimikie.  
\v 7 Kutupa pa pi ma꞉nda꞉ ombu alo alota꞉ Eipoloha꞉ma꞉ pa꞉ta꞉ta꞉ Setama꞉ wekiwandiki andu halia꞉pe pita꞉ epima꞉ lolo pia꞉pe. Kutu pina꞉ kone ipikita꞉ koke halina꞉ I̱ma꞉ weki mendiawalome leekeme.   
\p
\v 8 Kutupa mo weki daeyaata꞉ andu nala꞉eki mina꞉pa꞉laeyeke dina꞉ta꞉ Eipoloha꞉ma꞉ma꞉ta꞉ ne tieke pambaeyekeme.   
\s1 Heika pita꞉ Isima꞉elo yaapo tapaeyekeeki  
\p
\v 9 Nate ma꞉nda꞉na꞉ mo Idiepi wanda꞉ Heikama꞉ Eipoloha꞉ma꞉na꞉ mendiaeyeke weki Isima꞉elota꞉ Setana꞉ eiyeke Aisa꞉ke yaapo telepo lo pitipikime.  
\v 10 Kutu pieke Setama꞉ moeki hando hao Eipoloha꞉ma꞉ pa꞉ta꞉ alota꞉ Do pa hameke e pokaasa꞉ wanda꞉ ipika꞉ eiyeke yaapo tapae. Do wanda꞉na꞉ eiyekema꞉ta꞉ mo yaka weki Aisa꞉kema꞉ naka꞉ anketeke mulu pa꞉la꞉ ale ma꞉nda꞉ na mina꞉ lapeke leekeme.  
\v 11 Doeki leeke ekima꞉ta꞉ Eipoloha꞉ma꞉ma꞉ ka꞉nda꞉ma꞉ homeekeme. Pa ekipeke Isima꞉elo make ipika꞉ wekie hone wieke ekima꞉ piekeme.  
\v 12 Pate Koda꞉ma꞉ Eipoloha꞉ma꞉ pa꞉ta꞉ alota꞉ Mo naka꞉ pa hameke e pokaasa꞉ wanda꞉ Heika make mo weki Isima꞉elo yaapona꞉ pomoma꞉ na homa꞉peke. Mo Setama꞉ pia꞉ ala꞉ ekita꞉ ota꞉ pea꞉peke. Pa ekipeke mo I̱ma꞉ pi la꞉ ua꞉ tupa꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ Aisa꞉ke pa꞉ta꞉ yama꞉ ipilieke.  
\v 13 Kutupa make mo pa hameke e pokaasa꞉ wanda꞉na꞉ eiyeke pa꞉ta꞉ make wekiwandiki wopu halaa tutu tieke halieke. Pa ekipeke mo weki make naka꞉ weki ya꞉la꞉ ekina꞉ loa꞉me leekeme.   
\p
\v 14 Da ka꞉la꞉paaso sikita꞉ Eipoloha꞉ma꞉ma꞉ Heika pa꞉ta꞉ ne make mo kao yonkelekema꞉ wepiki ikali kanakena꞉ ikali no tumbao haleekeme. Kutupa mo wekita꞉ Heikana꞉ hokina꞉ tu lao pena꞉ tapaeyekeme. Kutu pieke mo wanda꞉ta꞉ pua mo Biasiba hapekena꞉ pomu lopeekeme.  
\v 15 Kutupa mo ikali paeyeketa꞉ mo wekita꞉ hosiki ti teke ma꞉nda꞉ pa꞉ta꞉ wina꞉ laa  
\v 16 Heikata꞉ mo pate leke pua pitiekeme. Kutupa mo wanda꞉ ipika꞉ kone alota꞉ Yaka weki homa꞉la꞉eki handa꞉peketa꞉ I̱ ana꞉ na pa꞉la꞉me leekeme. Kutupa koto pate pitina꞉ta꞉ ipikana꞉ma꞉ e̱ leekeme.   
\p
\v 17 Koda꞉ma꞉ mo wekina꞉ e̱ leekeeki opua hepeni nanema꞉ Koda꞉na꞉ enisoloma꞉ Heika pa꞉ta꞉ alota꞉ Heikao. Neketa꞉ alekena꞉ ka꞉nda꞉ma꞉ homelepe. Koda꞉ma꞉ mo wekina꞉ e̱ opia꞉ma꞉ paala꞉ma꞉ na homa꞉pee.  
\v 18 Tiao. Pua mo weki pua hopulu mea homupeae. I̱ma꞉ta꞉ do weki pa꞉ta꞉ yama꞉ta꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tieke hawalueke leekeme.  
\v 19 Kutupa Koda꞉ma꞉ mo wanda꞉na꞉ leke ki layeketa꞉ ipikana꞉ma꞉ naku ikali handeekeme. Kutupa mo wanda꞉ma꞉ mo kao yonkelekema꞉ wepiki ikali kanake pua mea ikali tumbao mandaneta꞉ mo weki haleekeme.  
\v 20 Kutupa mo weki daeya꞉liayeke ale pa꞉ta꞉ kone Koda꞉ma꞉ta꞉ mo weki handeteke hayekeme. Mo wekita꞉ mo Pa꞉tani hapekena꞉ hata꞉ eiya꞉nala꞉ ekina꞉ handa wiki some hayekeme.  
\v 21 Kutupa ipika꞉ inkikima꞉ mo wekina꞉ wanda꞉ta꞉ mo Idiepi wanda꞉ meayekeme.   
\s1 Abimeleke Eipoloha꞉ma꞉ yaapoma꞉ pi tonkaepekeeki  
\p
\v 22 Koto natena꞉ta꞉ Abimeleketa꞉ ipika꞉ amina꞉ you hali Pikolo yaapo pua Eipoloha꞉ma꞉ pa꞉ta꞉ alota꞉ Naka꞉ pitele hau paeyao pa꞉ta꞉ta꞉ Koda꞉ta꞉ neke yaapo hala꞉me.  
\v 23 Koto ekina꞉ mo Koda꞉na꞉ leke popelekena꞉ pi la꞉ witolota꞉ I̱ make yaka wekiwandiki make yaka monduma꞉ monduma꞉ pulua꞉ wekiwandikina꞉ wekiwandiki make na makealueke laa la꞉ wie. I̱ma꞉ta꞉ neke pa꞉ta꞉ hone tulapelia haloma꞉ nakana꞉ma꞉ I̱ pa꞉ta꞉ make hone tulapelia halueke laa la꞉ wie leekeme.   
\p
\v 24 Eipoloha꞉ma꞉ma꞉ alota꞉ I̱ma꞉ pi la꞉ witolome laa leekepate   
\p
\v 25 pa mo Abimelekena꞉ e pokaeyeke haliwekima꞉ pendilayeke naku ikalina꞉ Abimeleke pa꞉ta꞉ pi yokaalu piekeme.  
\v 26 Abimelekema꞉ hombo peaaso alota꞉ Do hau pa꞉la꞉ someta꞉ epipe. Nakana꞉ma꞉ I̱ na laa keleme. Kutupa ame do siki opitolome leekeme.  
\v 27 Kutupa Eipoloha꞉ma꞉ma꞉ mandane sipisipi make kaomanu make Abimeleke haleekeme. Kutupa hali yaapoma꞉ pi tonkao wipikime.  
\v 28 Eipoloha꞉ma꞉ma꞉ mo wataake hata꞉ sipisipi ikiki manuta꞉ mo ipika꞉ sipisipi ame̱le̱ na haena꞉ leke ta꞉ta꞉ putupa haena꞉ leekeme.  
\v 29 Kotoeki handaata꞉ Abimelekema꞉ lota꞉ pitolo alota꞉ Nakana꞉ma꞉ koto hauta꞉ ekipeke pipe leekeme.   
\p
\v 30 Koto leeke Eipoloha꞉ma꞉ma꞉ hombo peaaso alota꞉ Do wataake hata꞉ sipisipi ikikimanu mie. Do hau pitolopa꞉ ekima꞉ta꞉ nakana꞉ma꞉ do naku ikalita꞉ I̱ma꞉ awa polome loelena꞉ loa꞉me leekeme.  
\v 31 Koto pa꞉ta꞉ta꞉ mo hali yaapoma꞉ pi la꞉ wipiki pa꞉ta꞉ yalo bikita꞉ Biasiba lemekeme.   
\p
\v 32 Koto pi lo tonkao wiata꞉ Abimeleke pita꞉ Pikolo yaapota꞉ mo Pilisidia kenke nane paa pepekeme.  
\v 33 Kutupa Eipoloha꞉ma꞉ma꞉ta꞉ mo Biasiba pa꞉ta꞉ta꞉ mo napu ti homeke ma꞉nda꞉ noka꞉paata꞉ mo Pa Hao Hala꞉ Tekehali Koda꞉ pa꞉ta꞉ panda꞉puniao yeiya꞉ layekeme.  
\v 34 Kutupa Eipoloha꞉ma꞉ma꞉ta꞉ nate hokuluna꞉ Pilisidia kenke pa꞉ta꞉ hayekeme.   
\c 22  
\s1 Koda꞉ma꞉ Eipoloha꞉ma꞉ pa꞉ta꞉ Aisa꞉ke lia kie leekeeki  
\p
\v 1 Nate ma꞉nda꞉na꞉ Koda꞉ma꞉ Eipoloha꞉ma꞉ la handuluekema꞉ wi alota꞉ Eipoloha꞉ma꞉o leeke Eipoloha꞉ma꞉ma꞉ hombo peaasota꞉ Wae laa alota꞉ I̱ do handa꞉e leekeme.   
\p
\v 2 Koda꞉ma꞉ alota꞉ Mo ota꞉ naka꞉ pukima꞉ homele homeke weki Aisa꞉keta꞉ hatuku mo Motaeya kenke pa꞉ta꞉ pue. Kutupa koto pate I̱ma꞉ walua꞉ potena꞉ naka꞉ weki lia I̱ pa꞉ta꞉ kuelena꞉ loa꞉me leekeme.   
\p
\v 3 Da ka꞉la꞉paaso sikita꞉ Eipoloha꞉ma꞉ma꞉ta꞉ mo weki lia halopieke timanu poka ipika꞉ donkina꞉ hokina꞉ mendiao Aisa꞉ke make ipika꞉ e pokaepeke hali yaapo make hatuku peekeme. Ikita꞉ mo hande Koda꞉ma꞉ la haleeke alena꞉ poluekema꞉ pemekeme.  
\v 4 Nate tepo peaona꞉ta꞉ Eipoloha꞉ma꞉ma꞉ mo hande leeke alena꞉ handa꞉ moneayekeme.  
\v 5 Kutupa ipikana꞉ma꞉ mo e pokaepeke hali yaapo pa꞉ta꞉ alota꞉ Do donki ame̱le̱ do pate hape. Mo weki dikita꞉ mo pa pate leke pua panda꞉puniao yeiya꞉ lao ipiliki halipi alena꞉ paa ipulupekema꞉ loa꞉me leekeme.   
\p
\v 6 Eipoloha꞉ma꞉ma꞉ta꞉ mo hau pitolo yankolo pipiki tita꞉ Aisa꞉ke mea tiao ipikita꞉ kaiya make mo ti noya꞉ pia꞉peke ti epeleke make miniekeme. Ipiliki mandakena꞉ pulu hata꞉  
\v 7 Aisa꞉kema꞉ alota꞉ Apa꞉o leekeme. Ipikana꞉ma꞉ alota꞉ Alekeka꞉ta꞉pe leekeme. Aisa꞉kema꞉ lota꞉ pitolo alota꞉ I̱ma꞉ mo ti noya꞉ pulu pele ale ti epeleke pita꞉ ti yaapota꞉ handolopate mo lia halo polopa꞉ sipisipi ikikita꞉ handoka꞉ta꞉pe leekeme.   
\p
\v 8 Koto leeke Eipoloha꞉ma꞉ma꞉ hombo peaaso alota꞉ Koda꞉ma꞉ kone kilieke leekeme. Kutupa telipuna꞉ mandakena꞉ pepekeme.   
\p
\v 9 Kutupa mo hande Koda꞉ma꞉ la haleeke alena꞉ opolo a꞉pa Eipoloha꞉ma꞉ma꞉ oloda a꞉eyaata꞉ ti manda ana꞉ layekeme. Kutupa ipikana꞉ma꞉ ipika꞉ weki tonkao mo olodana꞉ ti manda wiekeme.  
\v 10 Kutupa mo weki luekema꞉ kaiya mea mina꞉ liaeyekepate  
\v 11 mo Tekehalina꞉ enisoloma꞉ ya pa꞉ta꞉ yama꞉ ipiki pa꞉ta꞉ wi alo alota꞉ Eipoloha꞉ma꞉o. Eipoloha꞉ma꞉o leekeme. Ipikana꞉ma꞉ hombo peaaso alota꞉ Wae. I̱ do handa꞉e leekeme.   
\p
\v 12 Koto leeke mo enisoloma꞉ alota꞉ Mo weki na liki ipiki pa꞉ta꞉ hau ma꞉nda꞉ na pia꞉pee. Nakana꞉ma꞉ naka꞉ homeke weki homeketa꞉ na sa꞉sa꞉ pele ekina꞉ ameta꞉ nakana꞉ma꞉ Koda꞉ paala꞉ma꞉ homeka꞉ta꞉me laa hone ulume leekeme.   
\p
\v 13 Kutupa Eipoloha꞉ma꞉ma꞉ lekema꞉ lekema꞉ piekepate sipisipi halieki mo ipika꞉ ekeketa꞉ ti ma꞉nda꞉na꞉ mea hopa꞉liayekeeki handeekeme. Ipikana꞉ma꞉ta꞉ ipika꞉ weki yanka halo pieke tupa꞉ta꞉ mo hande sipisipi ma꞉na꞉ pua mea yanka haleekeme.  
\v 14 Kutupa Eipoloha꞉ma꞉ma꞉ koto pate bikita꞉ Koda꞉ma꞉ Ana꞉ Lao Hala꞉me leekeme. Kutupa ame do make wanda꞉halima꞉ta꞉ Mo Koda꞉na꞉ potena꞉ ipikana꞉ma꞉ ana꞉ lao hala꞉me lo halememe.   
\p
\v 15 Kutupa mo Tekehalina꞉ enisoloma꞉ ya pa꞉ta꞉ yama꞉ Eipoloha꞉ma꞉ paa yaapo peao wi alo alota꞉  
\v 16 I̱ta꞉ Tekehalima꞉ ota꞉ yaka bikina꞉ pi la꞉ witolota꞉ I̱ma꞉ta꞉ neke wopu epealueke. Pa ekipeke. Nakana꞉ma꞉ta꞉ naka꞉ homeke weki kone na sa꞉sa꞉piki I̱ pa꞉ta꞉ kuluekema꞉ taape ekina꞉ loa꞉me.  
\v 17 I̱ma꞉ pi la꞉ witolota꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉ manuma꞉ o mo ikali tiekena꞉ tea꞉na꞉ ula꞉ hou manuma꞉ handena꞉ lolueke leekeme. Kutupa ikana꞉ma꞉ta꞉ ika꞉ a꞉nda꞉ tunkuliki wanda꞉halita꞉ lu bepolalimikie.  
\v 18 Mo nakana꞉ma꞉ yaka pi opele ekina꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke leekeme.  
\v 19 Kutupa Eipoloha꞉ma꞉ta꞉ mo ipika꞉ e pokaasa꞉ hali yaapo haepeke alena꞉ pua mandakena꞉ mo ipiki hayeke ale Biasiba nane pemekeme.   
\s1 Neihona꞉ tapake  
\p
\v 20 Hao hao nate ma꞉nda꞉ nina꞉ta꞉ Eipoloha꞉ma꞉ma꞉ mo hameke Neihona꞉ weteke Milikama꞉ wekiwandiki ketepo hata꞉ mendiaeyekeeki leeketa꞉ opiekeme.  
\v 21 Mupeke weki bikita꞉ Usu make hameke Busu kutupa mo A꞉tamona꞉ ateke Kemuele make  
\v 22 Diesede make Heiso make Pilida꞉se make Didila꞉pe make  
\v 23 kutupa Lepekana꞉ ateke Beduelo make koto weki tonu paeyaota꞉ Milikama꞉ Neihona꞉ mendiaeyekeme.  
\v 24 Kutupa Neihona꞉ yaapo peao mieke wanda꞉ Teumama꞉ta꞉ Diba make Kaha꞉me make Daha꞉se make Maaka make mendiekeme.   
\c 23  
\s1 Eipoloha꞉ma꞉ma꞉ hali lapa꞉ pulu pieke kenke hambeekeeki  
\p
\v 1 Setata꞉ bapi 127 miekeme.  
\v 2 Kutupa ipikita꞉ mo Keinani da kenke pa꞉ta꞉ hayeke kenke ma꞉nda꞉ Hebotoni pa꞉ta꞉ homeekeme. Kutu pieketa꞉ Eipoloha꞉ma꞉ma꞉ homa꞉ wia pitiekeme.   
\p
\v 3 Ipikana꞉ma꞉ta꞉ mo wetekena꞉ toko wieke alena꞉ mina꞉pa꞉lao mo Hidi wanda꞉hali pa꞉ta꞉ pua alota꞉  
\v 4 I̱ta꞉ da ma꞉nda꞉ hali kone iki ame̱le̱ mandakena꞉ do haloma꞉ma꞉ yaka wanda꞉ hoilu polo kenke ma꞉nda꞉ hambono tapapee leekeme.   
\p
\v 5 Mo tapakema꞉ hombo peaaso alota꞉  
\v 6 Someo. Niki pa꞉ta꞉ opie. Nikana꞉ma꞉ neketa꞉ nika꞉ aneke halie laa handa꞉ lialoma꞉me. Koto ekina꞉ naka꞉ wanda꞉ta꞉ do nika꞉ ota꞉ epeke lapa꞉ ma꞉nda꞉ handa hoie. Niki ma꞉nda꞉ hondoma꞉ naka꞉ wanda꞉ hoiyuelena꞉ lapa꞉ ma꞉nda꞉ pa kuluekema꞉ hone pa꞉la꞉me lemekeme.   
\p
\v 7 Kutupa Eipoloha꞉ma꞉ma꞉ mo tapake pa꞉ta꞉ panda꞉puniao hata꞉  
\v 8 alota꞉ Ikana꞉ma꞉ yaka wanda꞉ do pate hoiyonoe lemeka꞉na꞉ta꞉ kota꞉ pilisi mo Sohana꞉ eiyeke Epotonima꞉  
\v 9 mo Ma꞉ka꞉pilana꞉ tikene da mo ipika꞉ e nepoko nane ula꞉eki lota꞉ peapee. I̱ma꞉ yaka hali hoiyu halo polo hali lapa꞉ wialuekema꞉ do ika꞉ leke popelekena꞉ I̱ pa꞉ta꞉ ipika꞉ tapao yenki mulu pa꞉la꞉ tupa꞉ kone tapaena꞉ loa꞉me laa honke lapee leekeme.   
\p
\v 10 Epotonita꞉ mo daoni pota꞉ kake pa꞉ta꞉ pi hotu haemeke ale pa꞉ta꞉ mo mandane Hidi tapake pitieke ale paeyaoma꞉ opitolo haena꞉ hombo peaaso alota꞉  
\v 11 Someo. Opie. I̱ma꞉ta꞉ koto hama꞉ make koto pa꞉ta꞉ ula꞉ tikene da make paeyao neke kulueke. Do yaka da wanda꞉halina꞉ leke popelekena꞉ mo naka꞉ wanda꞉ hoiyuelena꞉ neke kulueke laa leekeme.   
\p
\v 12 Pate Eipoloha꞉ma꞉ma꞉ mo Hidi wanda꞉hali pa꞉ta꞉ panda꞉puniao paeyaoma꞉ opitolo haena꞉  
\v 13 mo Epotoni pa꞉ta꞉ alota꞉ Pilisi yaka pi opie. I̱ma꞉ta꞉ mo hama paeyao hamboloma꞉ mo kitolo yenkita꞉ na kiake mie. Kutupa yaka wanda꞉ koto pate hoilueke leekeme.   
\p
\v 14  Koto leeke Epotonima꞉ hombo peaaso alota꞉  
\v 15 Someo. Mo kenketa꞉ pa 400 silipa manima꞉ homeke hamba꞉peke ya꞉la꞉ma꞉ dikita꞉ ala꞉ta꞉ ma꞉nda꞉ dia꞉me. Pa pina꞉ma꞉ naka꞉ wanda꞉ koto pa꞉ta꞉ hoie leekeme.  
\v 16 Koto leekeeki Eipoloha꞉ma꞉ma꞉ A꞉pa꞉la꞉me laa mo manita꞉ mo bisinisi haliwekima꞉ tombo mu haemeke tupa꞉ tombo mea mo Epotonima꞉ mo ipika꞉ da wanda꞉hali opu haena꞉ leeke tupa꞉ 400 silipa mani haleekeme.   
\p
\v 17 Kotota꞉ mo hande Ma꞉motena꞉ nate ipula꞉ nanema꞉ Epotonina꞉ Ma꞉ka꞉pila kenke Eipoloha꞉ma꞉na꞉eki au leeke ekie. Kota꞉ mo hama꞉ make mo hama꞉ pa꞉ta꞉ wieke tikene da make mo hama꞉na꞉ pu hao naeyeke timanu make ala꞉ta꞉ ala꞉ta꞉ paeyao miekeme.  
\v 18 Koto pi hotimiki ale pa꞉ta꞉ a꞉pa pitimiki Hidi wanda꞉hali paeyaoma꞉ta꞉ ota꞉ Eipoloha꞉ma꞉na꞉ ekie laa hone wimikime.   
\p
\v 19 Kutupa Eipoloha꞉ma꞉ma꞉ta꞉ ipika꞉ weteke Seta mo Keinani da kenke pa꞉ta꞉ wieke tikene da pa꞉ta꞉ lapa꞉ piekeme.  
\v 20 Koto ekina꞉ koto Hidi wanda꞉halina꞉ hama꞉ kenke make tikene da make Eipoloha꞉ma꞉na꞉ hali hoita꞉la꞉ kenke au leekeme.   
\c 24  
\s1 Aisa꞉kena꞉ wanda꞉  
\p
\v 1 Eipoloha꞉ma꞉ta꞉ ameta꞉ ota꞉ koke yeekeme. Kutupa mo Tekehalima꞉ta꞉ ipika꞉ piekeeki paeyao epeayekeme.  
\v 2 Eipoloha꞉ma꞉ma꞉ mo ipika꞉ ala꞉ta꞉ ala꞉ta꞉ paeyao handeteke hayeke titina꞉ e pokaasa꞉ hali pa꞉ta꞉ alota꞉ Naka꞉ kiki yaka paleke yaapo pa꞉ta꞉ wia hata꞉ pi ma꞉nda꞉ la꞉ wie laa alota꞉.  
\v 3 Yaka hone pa꞉la꞉ ekima꞉ta꞉ nakana꞉ma꞉ mo Tekehali do kenke ya wa꞉pa꞉la꞉ Koda꞉na꞉ bikina꞉ pi la꞉ witolota꞉ yaka wekina꞉ wanda꞉ta꞉ do Keinani wanda꞉ na mealueke laa la꞉ wie.  
\v 4 Nakana꞉ma꞉ta꞉ mo I̱ mendia꞉ alena꞉ pua yaka tapake pa꞉ta꞉ kone mo yaka weki Aisa꞉kena꞉ wanda꞉ meapeke leekeme.   
\p
\v 5 Pate mo e pokaasa꞉ halima꞉ lota꞉ pitolo alota꞉ Mo wandikima꞉ ipika꞉ da mina꞉pa꞉lao I̱ yaapo do kenke nane a꞉pa꞉peke kiaya꞉ka꞉na꞉ta꞉ pa eki puluepe laata꞉ I̱ma꞉ naka꞉ wekita꞉ mo neke epele kenke nane pena꞉ tapaaluepe laa lota꞉ piekeme.   
\p
\v 6 Kutupa Eipoloha꞉ma꞉ hombo peaaso alota꞉ Nakana꞉ma꞉ yaka weki koto nane ota꞉ paa na pena꞉ lapeke.  
\v 7 Mo Tekehali oli hepenina꞉ Koda꞉ma꞉ mo yaka apa꞉na꞉ da kenke make mo yaka tapake manuna꞉ kenke make mina꞉pa꞉lao I̱ hatuku epea꞉me. Kutupa ipikana꞉ma꞉ I̱ pa꞉ta꞉ ota꞉ pi la꞉ witolo hata꞉ta꞉ Do kenketa꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ halueke laa lea꞉me. Koto ekina꞉ ipikana꞉ma꞉ta꞉ mo nakana꞉ma꞉ yaka wekina꞉ wanda꞉ mealena꞉ta꞉ ipika꞉ enisolo amba꞉la tapaalieke.  
\v 8 Pate mo wandiki neke yaapo a꞉pa꞉peke kiaya꞉ka꞉na꞉ta꞉ kota꞉ neketa꞉ do pi la꞉ witele ekita꞉ paka꞉lalipikie. Pate hau ma꞉nda꞉ pia꞉ka꞉na꞉ kone yaka wekita꞉ koto nane ota꞉ na hatuku pua꞉peke leekeme.  
\v 9 Koto ekina꞉ mo e pokaeyeke halima꞉ ipika꞉ you hali Eipoloha꞉ma꞉na꞉ paleke yaapo pa꞉ta꞉ kiki witolo hata꞉ Ota꞉ pulueke laa pi la꞉ wiekeme.   
\p
\v 10 Koto laata꞉ mo Eipoloha꞉ma꞉na꞉ ala꞉ta꞉ ala꞉ta꞉ paeyao handeteke hayeke halima꞉ ipika꞉ you somena꞉ kiki yaapo kemelomanu mea mo Neiho hayeke daoni mo Mesopoteimiana꞉ okane nanema꞉ tilao mea peekeme.  
\v 11 Kutupa ipiki mo daoni hama nane opolo puata꞉ mo kemelo manuta꞉ mo daonina꞉ naku ikali tea꞉na꞉ tumiki yotuao pitina꞉ leekeme. Kotota꞉ nate pambolo pulu haena꞉ta꞉ wanda꞉wekima꞉ ikali nolo a꞉pa꞉tiki pimiki nate yekeme.  
\v 12 Kutupa ipikana꞉ma꞉ yeni pitolo alota꞉ Tekehalio. Yaka you some Eipoloha꞉ma꞉na꞉ Koda꞉o. Yaka you some pa꞉ta꞉ la꞉ wili pi peneme yaaso hata꞉ ame I̱ma꞉ weitolo ale kie.  
\v 13 Ameta꞉ I̱ta꞉ mo hande daoni pa꞉ta꞉ haleme moputali wandiki tonuma꞉ ikali nolo epolo peleme naku ikali pa꞉ta꞉ do halo handa꞉e.  
\v 14 I̱ma꞉ mo wandiki homeke ma꞉nda꞉ pa꞉ta꞉ dupa lolueke. Pilisio. Naka꞉ ikali kanake mina꞉niao I̱ ikali nono lae lolueke. Ipikana꞉ma꞉ alo hata꞉ Ikali nae laa Naka꞉ kemelo manuna꞉ ikali make mea a꞉ponoe lea꞉ka꞉na꞉ta꞉ kota꞉ ipikita꞉ mo naka꞉ e pokaasa꞉ hali Aisa꞉kena꞉ ma̱leke lili wanda꞉ ya꞉na꞉e. Dupiki hau peaeka꞉na꞉ta꞉ kota꞉ nakana꞉ma꞉ mo yaka you some pa꞉ta꞉ la꞉ wili pita꞉ ota꞉ ya꞉ka꞉ta꞉me laa I̱ma꞉ hone ulueke laa yeni koto tupa꞉ piekeme.   
\p
\v 15 Mo hali yeni pu paeyaaso haena꞉ta꞉ Lepekata꞉ ipika꞉ peiyokona꞉ ikali kanake tia opolo epeekeme. Mo wandikita꞉ Beduelona꞉ waneke yekeme. Beduelota꞉ Eipoloha꞉ma꞉na꞉ hameke Neiho pita꞉ weteke Milika yaapona꞉ eiyeke yekeme.  
\v 16 Mo wandikita꞉ moputali pa pita꞉ ota꞉ seliapo piki wandiki yeekeme. Ipikita꞉ oni naku ikali pa꞉ta꞉ pua ipika꞉ ikali kanakena꞉ ikali no tumbao paa epeekeme.  
\v 17 Kutupa mo hande e pokaasa꞉ hali ankeao pua mo wandiki manda꞉hande pitolo hata꞉ alota꞉ Pilisi naka꞉ kanake pa꞉ta꞉ pila꞉ ikali ma꞉nda꞉ nono lae leekeme.   
\p
\v 18 Koto leeke mo wandikima꞉ alota꞉ Apa꞉o. Nae laa Koto kone mo ipika꞉ peiyokona꞉ tieke ikali kanake mina꞉niao ikali nena꞉ leekeme.  
\v 19 Mo halima꞉ ikali no paeyaeyeketa꞉ mo wandikima꞉ paa alota꞉ Mo naka꞉ kemelomanu make ika꞉ hone pa꞉la꞉ tupa꞉ nena꞉ ikali mea a꞉ponope leekeme.  
\v 20 Kutupa koto kone mo wandikima꞉ mo ma꞉na꞉na꞉ ikali no haleme kawaso pa꞉ta꞉ ikali paeyao hoelao pototo la oni ikali pa꞉ta꞉ ikali wopu nalo pua꞉tiki piekeme. Kutupa mo kemelo paeyao siki ikali ana꞉na꞉ nena꞉ lo paeyaeyekeme.  
\v 21 Kutu pieke handaa mo halima꞉ta꞉ Tekehalima꞉ ipiki epeala꞉pe laa handuluekema꞉ yeke yopu siki hata꞉ mo wandiki handaake wiekeme.   
\p
\v 22 Kutupa mo wandikima꞉ hande kemelo manuna꞉ ikali na halo paeyaeyeketa꞉ mo halima꞉ yenki tieke wiki koloma꞉ wepiki mineke kanake mea mo wandikina꞉ minekena꞉ pankao kutupa koloma꞉ ombu wepiki topa꞉ tieke aneke yaapo mea mo wandikina꞉ kiki yaapona꞉ pitaeyekeme.  
\v 23 Kutupa alota꞉ Pilisi naka꞉ apa꞉ta꞉ epika꞉ta꞉pe laata꞉ I̱ la kie. Kutupa ipika꞉ da pa꞉ta꞉ta꞉ I̱ make do yaka haliweki make polu polome da panda꞉ta꞉ ana꞉na꞉ ula꞉pe leekeme.   
\p
\v 24 Koto leeke mo wandikima꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe.  
\v 25 Kutupa nika꞉ da pa꞉ta꞉ta꞉ taa ma꞉na꞉ma꞉ napeke ambumanu make yama꞉peke ambu sa̱ make ula꞉me. Kutupa make iki pelia꞉peke da panda꞉ ula꞉me leekeme.   
\p
\v 26 Koto ekina꞉ mo halima꞉ta꞉ Tekehali pa꞉ta꞉ panda꞉ puniao yeni pitolo alota꞉  
\v 27 Mo yaka you some Eipoloha꞉ma꞉na꞉ Tekehali Koda꞉na꞉ biki mea mina꞉lianoe. Ipikana꞉ma꞉ta꞉ yaka you some pa꞉ta꞉ ipika꞉ pi la꞉ ula꞉ ekita꞉ ota꞉ peneme yala꞉me. Mo Tekehalima꞉ta꞉ yaka you somena꞉ tapake pa꞉ta꞉ kone mea hatuku mea a꞉pa꞉la꞉me laa leekeme.   
\p
\v 28 Mo wandikima꞉ta꞉ ipika꞉ ama꞉na꞉ da pa꞉ta꞉ pototo la puata꞉ mo hande pia꞉ haumanu paeyao pua leekeme.  
\v 29-30 Lepekana꞉ belikita꞉ Leibeni hayekeme. Mo somema꞉ belikina꞉ minekena꞉ pankeeke mineke kanake make kiki yaapona꞉ pitaeyeke topa꞉ make handolo hata꞉ mo leeke pi a꞉pa moka꞉laeyekeeki make opiekeme. Koto ekina꞉ ipikana꞉ma꞉ hande Eipoloha꞉ma꞉na꞉ e pokaeyeke halita꞉ mo naku ikali wieke alena꞉ hayeke handaa poluekema꞉ hama opolu bao pototo laa peekeme. Kutupa opolo poluta꞉ mo hande some ipika꞉ kemelo tonu ame̱le̱ mo naku ikali pitieke alena꞉ haemekeeki pua handolo hata꞉ alota꞉  
\v 31 Nika꞉ pomana꞉ a̱i̱ ipupee. Neketa꞉ mo Tekehalima꞉ epeala꞉ halie. Ekipeke do pa꞉ta꞉ hata꞉ pitelepe. I̱ma꞉ta꞉ yaka da pa꞉ta꞉ iki pelia꞉pa꞉peke da panda꞉ amba꞉ amu peala꞉me. Kutupa make ika꞉ kemelomanu hapeke da panda꞉ make ula꞉me leekeme.   
\p
\v 32 Koto leeke mo halita꞉ oni da pa꞉ta꞉ peekeme. Kutupa Leibenima꞉ta꞉ mo kemelona꞉ hokina꞉ wieke alemanu mu wia napeke ambumanu make halaa ambu sa̱manu make wiaeyekeme. Kutupa mo Eipoloha꞉ma꞉na꞉ e pokaasa꞉ hali make ipika꞉ haliweki make ika꞉ anke tandepena꞉yeke ikali honke pea haleekeme.  
\v 33 Kutupa mo ne mea a꞉paeyeke dina꞉ta꞉ mo halima꞉ alota꞉ I̱ma꞉ lolueke hone witolo pi amba꞉la laata꞉ ne wetepena꞉ nolueke leekeme. Koto leeke Leibenima꞉ alota꞉ A꞉pa꞉la꞉me. Naka꞉ pi lae leekeme.   
\p
\v 34 Koto leeke ipikana꞉ma꞉ pi kini pu mea alo alota꞉ I̱ta꞉ Eipoloha꞉ma꞉na꞉ e pokaaso halie.  
\v 35 Mo Tekehalima꞉ta꞉ yaka you some ota꞉ anekema꞉ epeao hamoko hali haena꞉ la꞉la꞉me. Kutupa make ipiki pa꞉ta꞉ mo sipisipi wopu make nanikosimanu make kaomanu make silipa make kolo make pa hameke e pokaasa꞉ wanda꞉weki make haliweki make kemelomanu make donkimanu make hala꞉me.  
\v 36 Yaka you somena꞉ weteke Setata꞉ koke ya pita꞉ kone hali weki mondu wialeke handaa yaka you somema꞉ta꞉ ipika꞉ ala꞉ta꞉ ala꞉ta꞉ paeyao mo weki hala꞉la꞉me.  
\v 37 Koto ekina꞉ yaka you somema꞉ta꞉ I̱ma꞉ Naka꞉ le pi ota꞉ pulueke laa la꞉ witolo hano loluekema꞉ ipika꞉ pi la꞉ witoloeki pia꞉peke laa dupa lea꞉me. Yaka wekina꞉ wanda꞉ta꞉ mo Keinani kenkena꞉ hala꞉ wandiki tonu na mea꞉peke.  
\v 38 Kotoeki na pikita꞉ mo yaka apa꞉na꞉ wanda꞉hali yaka tapake pa꞉ta꞉ pua mo wekina꞉ wanda꞉ meapeke lea꞉me.   
\p
\v 39 Koto leeke I̱ma꞉ yaka you some lota꞉ pitolo alota꞉ Mo wandikima꞉ I̱ yaapo a꞉pa꞉peke kiaya꞉ka꞉na꞉ta꞉ kota꞉ eki pulua꞉pe laa loa꞉me.  
\v 40 Koto loa꞉eki ipikana꞉ma꞉ hombo peaaso alota꞉ Mo I̱ma꞉ hoto paeyao siki ipika꞉ pi opua pu halo Tekehalima꞉ta꞉ ipika꞉ enisolo neke yaapo tapaaso hata꞉ nakana꞉ma꞉ pu epealena꞉ lelieke. Kutupa nakana꞉ma꞉ yaka wekina꞉ wanda꞉ta꞉ mo yaka tapake yaka apa꞉na꞉ wanda꞉hali pa꞉ta꞉ kone mealipikie laa lea꞉me.  
\v 41 Kutupa alota꞉ Do naka꞉ pi la꞉ wita꞉la꞉eki pa꞉ta꞉ ka꞉la꞉pa꞉ ta꞉pao halo peleeki homeketa꞉ neke mo yaka tapake pa꞉ta꞉ pelipipate neke kiaemeka꞉na꞉ta꞉ kota꞉ neketa꞉ ka꞉la꞉pa꞉ ta꞉pao halipikie laa lea꞉me.   
\p
\v 42 Koto ekina꞉ I̱ ame mo naku ikali pa꞉ta꞉ a꞉pa hata꞉ yeni dupa pua꞉me. Yaka you hali Eipoloha꞉ma꞉na꞉ Tekehali Koda꞉o. Pilisi I̱ma꞉ do pitolo ekita꞉ pu epeano lae.  
\v 43 Ameta꞉ I̱ta꞉ do naku ikali pa꞉ta꞉ do halo handa꞉e. Kutupa mo moputali wandiki ma꞉nda꞉ ikali noluekema꞉ epea꞉ka꞉na꞉ta꞉ I̱ma꞉ ipika꞉ ikali kanake pa꞉ta꞉ pila꞉ ikali ma꞉nda꞉ kie laa honke lolueke.  
\v 44 Kutupa mo wandikima꞉ a꞉pa꞉la꞉me laa make mo yaka kemelo manuna꞉ ikali mea a꞉paeya꞉ka꞉na꞉ta꞉ kota꞉ koto wandikita꞉ Koda꞉ nakana꞉ma꞉ mo yaka you halina꞉ eiyekena꞉ ma̱leke lili wanda꞉ ya꞉na꞉e laa yeni pua꞉me.  
\v 45 Koto yaka onina꞉ honema꞉ yeni pa pitolo hano kone Lepekata꞉ ikali kanake ipika꞉ peiyokona꞉ tia oni naku ikali pa꞉ta꞉ ikali nolo yapea꞉me. Kutu pieke I̱ma꞉ ipiki pa꞉ta꞉ alota꞉ Pilisio. I̱ ikali kie loa꞉me.  
\v 46 Kutupa ipikana꞉ma꞉ koto kone mo ikali kanake mina꞉niao hata꞉ alota꞉ Nae laata꞉ Naka꞉ kemelo manuna꞉ ikali make mea a꞉palueke lea꞉me. Koto leeke I̱ma꞉ta꞉ ikali noa꞉me. Kutupa yaka kemelomanu make ikali hale hale pia꞉me.  
\v 47 Kutupa I̱ma꞉ ipiki lota꞉ pitolo alota꞉ Naka꞉ apa꞉ta꞉ epipe loeke handaa ipikana꞉ma꞉ alota꞉ Yaka apa꞉ta꞉ Neiho pita꞉ weteke Milika yaapona꞉ eiyeke Bedueloe lea꞉me. Koto leeke kota꞉ I̱ma꞉ ipika꞉ minekena꞉ mo mineke kanake pankao make ipika꞉ kiki yaapona꞉ mo topa꞉ pitaowa꞉me.  
\v 48 Kutupa I̱ta꞉ tumiki yotuao Tekehali pa꞉ta꞉ panda꞉puniao yeiya꞉ lawa꞉me. Pa ekipeke mo Tekehali yaka you some Eipoloha꞉ma꞉na꞉ Koda꞉ ipikana꞉ma꞉ I̱ta꞉ mo yaka you somena꞉ tapake pa꞉ta꞉ kone hatuku epea꞉me. Kutupa ika꞉ wandiki yaka you somena꞉ eiyekena꞉ handa꞉ wiano la꞉la꞉ ekina꞉ ipika꞉ biki mina꞉liawa꞉me.  
\v 49 Koto ekina꞉ ameta꞉ ikana꞉ma꞉ yaka you some pa꞉ta꞉ pea꞉peke ya꞉la꞉ haumanu ana꞉na꞉ kone pulumeke hone wimika꞉na꞉ta꞉ kota꞉ pilisi I̱ la kipe. Dia꞉ya꞉ka꞉na꞉ make I̱ma꞉ pulu polo hau hone wiono a̱i̱ la kipe leekeme.   
\p
\v 50 Koto leeke Leibeni pita꞉ Beduelo yaapoma꞉ hombo peaaso alota꞉ Do hauta꞉ mo Tekehali pa꞉ta꞉ yama꞉ a꞉pa꞉la꞉ ekina꞉ta꞉ kota꞉ dikana꞉ma꞉ dupumana꞉e laa pi ma꞉nda꞉ lapeke na ya꞉la꞉me.  
\v 51 Koto ekina꞉ Lepeka do handa꞉e. Ipikita꞉ mo Tekehalima꞉ la꞉la꞉ tupa꞉ naka꞉ you somena꞉ eiyekena꞉ wanda꞉ haena꞉e lepekeme.  
\v 52 Koto lepekeeki mo Eipoloha꞉ma꞉na꞉ e pokaasa꞉ halima꞉ opu haota꞉ panda꞉puniao Koda꞉ yeiya꞉ layekeme.  
\v 53 Kutupa ipikana꞉ma꞉ daumanu make loke au laasa꞉ silipa make koloma꞉ wepiki alemanu make mea a꞉paata꞉ Lepeka haleekeme. Kutupa make mo yenki tieke peke pa hameke hala꞉la꞉ alemanu mo wandikina꞉ beliki inkiki yaapo haleekeme.   
\p
\v 54 Kutupa mo Eipoloha꞉ma꞉na꞉ e pokaasa꞉ hali make ipiki ame̱le̱ pemeke haliweki make ne ikali no pelimikime. Kutupa da ka꞉la꞉paaso tiao alota꞉ Yaka you some pa꞉ta꞉ paa la꞉ka꞉la pono lae leekeme.   
\p
\v 55 Pate Lepekana꞉ beliki pita꞉ inkiki yaapoma꞉ alota꞉ Mo wandikita꞉ niki ame̱le̱ pula homeke o nate kiki yaapomanu pa hao epena꞉ lolumeke lepekepate   
\p
\v 56 mo halima꞉ alota꞉ Niki pa꞉ta꞉ hosiki hao pomana꞉e pi na lapee. Mo Tekehalima꞉ta꞉ yaka pota꞉ kimisu epoa꞉ ekita꞉ epeaala꞉me. Koto ekina꞉ yaka you some pa꞉ta꞉ paa la꞉ka꞉la pono lae leekeme.   
\p
\v 57 Koto leeke hombo peaaso alota꞉ Kota꞉ mo wandikima꞉ lelia꞉eki opumana꞉ wi lomana꞉ pipee lepekeme.  
\v 58 Koto ekina꞉ Lepeka wi la꞉ mea lota꞉ pitolo alota꞉ Neketa꞉ do hali yaapo ame̱le̱ mandakena꞉ pelimikipe lepekeme. Mo wandikima꞉ hombo peaaso alota꞉ Aowe leekeme.   
\p
\v 59 Koto leeke kota꞉ Lepeka pita꞉ ipika꞉ apa꞉ ama꞉na꞉ amba꞉ kone e pokao hayeke wanda꞉ yaapo mo Eipoloha꞉ma꞉na꞉ e pokaasa꞉ hali make ipika꞉ haliweki ame̱le̱ pena꞉ leekeme.  
\v 60  Kutupa ikana꞉ma꞉ mo Lepeka epeaasa꞉ pi dupa la haleekeme.  
\q1 Ana꞉o. Neketa꞉ wanda꞉hali tapake tiekena꞉ ama꞉ hapekee. Kutupa naka꞉ monduma꞉ monduma꞉ pilipi wekiwandikina꞉ wekiwandikima꞉ta꞉ ika꞉ a꞉nda꞉ tunkiliki tapakena꞉ daonimanu bepolaena꞉e laa lemekeme.   
\p
\v 61 Kutupa Lepeka make ipika꞉ moputali wandiki titi tonka꞉na꞉ mo Eipoloha꞉ma꞉na꞉ e pokaasa꞉ hali ame̱le̱ poluekema꞉ yeke tikitiki yaaso hata꞉ mo kemelo manuna꞉ hokina꞉ pitulu puata꞉ kini pea pemekeme.   
\p
\v 62 Kutupa Aisa꞉keta꞉ hapu hala꞉ alena꞉ mo hande Handa꞉la꞉ Pa Hao Hala꞉ Halina꞉ Naku Ikali ula꞉ alena꞉ mo Keinani kenkena꞉ ka꞉wa꞉ nanema꞉ a꞉pa hayekeme.  
\v 63 Ipikita꞉ welealo nanema꞉ oni pate nina꞉ leke pota꞉ pomuluekema꞉ peekepate kemelomanu epemekeeki handeekeme.  
\v 64 Kutupa Lepekama꞉ Aisa꞉ke epeekeeki hando haota꞉ mo ipika꞉ kemelo mina꞉pa꞉lao hola꞉pa꞉niaeyekeme.  
\v 65 Kutupa mo Eipoloha꞉ma꞉na꞉ e pokaasa꞉ hali lota꞉ pitolo alota꞉ Mo niki handa꞉ paleke ipula꞉ halita꞉ epi yaka꞉ta꞉pe leekeme. Koto leeke mo e pokaasa꞉ halima꞉ hombo peaaso alota꞉ Ipikita꞉ yaka you somee leekeme. Koto ekina꞉ mo wandikima꞉ ipika꞉ you aka꞉ mea ipika꞉ leke popeleke a꞉mbaeyekeme.   
\p
\v 66 Kutupa mo e pokaasa꞉ halima꞉ ipika꞉ pieke hau paeyao Aisa꞉ke la haleekeme.  
\v 67 Kota꞉ Aisa꞉kema꞉ta꞉ ipika꞉ inkiki Seta hao hayeke palai da pa꞉ta꞉ Lepeka hatuku peekeme. Kutupa mo wandikita꞉ ipika꞉ wanda꞉ hayekeme. Aisa꞉kema꞉ta꞉ Lepeka pukima꞉ homeekeme. Koto ekina꞉ mo ipika꞉ ama꞉ homeeke ekina꞉ ka꞉nda꞉ mieke ekita꞉ Lepekama꞉ ipika꞉ puki ke̱i̱ layekeme.   
\c 25  
\s1 Eipoloha꞉ma꞉na꞉ mandane monduma꞉ monduma꞉ pieke tapake  
\p
\v 1 Eipoloha꞉ma꞉ma꞉ta꞉ wanda꞉ ma꞉nda꞉ biki Ketuta leeke wanda꞉ miekeme.  
\v 2 Mo wanda꞉ma꞉ta꞉ weki tonu biki Simitani make Diokosani make Medani make Midiani make Isibake make Sua make mondu wiayekeme.  
\v 3 Diokosanita꞉ Siba pita꞉ Didani yaapona꞉ ateke yekeme. Kutupa mo Didanima꞉ monduma꞉ monduma꞉ pieke tapaketa꞉ A꞉sutimu make Letusimi make Leumimi make yekeme.  
\v 4 Mo Midianina꞉ eiyeke tonuta꞉ Epa make Epe make Ha꞉noke make Abida make Eledaha make yekeme. Do tapake paeyaota꞉ Ketutana꞉ monduma꞉ monduma꞉ piki wekiwandikina꞉ wekiwandikie.   
\p
\v 5 Eipoloha꞉ma꞉ma꞉ ipika꞉ wia hayeke alemanu paeyaota꞉ Aisa꞉ke haleekeme.  
\v 6 Pate ipiki a̱i̱ na homeke pita꞉ta꞉ mo ipika꞉ mandane wanda꞉wekima꞉ mendiaeyeke weki tonu pa꞉ta꞉ta꞉ pa hameke hala꞉la꞉ alemanu haleekeme. Kutupa koto weki tonuta꞉ mo nate ipula꞉ nane Aisa꞉ke mina꞉pa꞉lao pena꞉ leekeme.   
\s1 Eipoloha꞉ma꞉ homeeke hoimikieki  
\p
\v 7-8 Eipoloha꞉ma꞉ta꞉ koke ya 175 bapina꞉ homeekeme.  
\v 9 Kutu pieke mo ipika꞉ weki yaapo Aisa꞉ke pita꞉ Isima꞉elo yaapoma꞉ mo hande Hidi hali Sohana꞉ eiyeke Epotonina꞉ Ma꞉motena꞉ nate opa꞉la꞉ nanema꞉ wieke Ma꞉ka꞉pila tikene da pa꞉ta꞉ lapa꞉ pipikime.  
\v 10 Koto hama꞉ta꞉ Eipoloha꞉ma꞉ma꞉ mo Hidi tapake pa꞉ta꞉ hambeeke hama꞉e. Eipoloha꞉ma꞉ pita꞉ ipika꞉ wanda꞉ Seta yaapota꞉ koto pa꞉ta꞉ lapa꞉ pipikime.  
\v 11 Kutupa Eipoloha꞉ma꞉ homeke hoki naneta꞉ ipika꞉ weki Aisa꞉keta꞉ Koda꞉ma꞉ epeayekeme. Aisa꞉keta꞉ mo Handa꞉la꞉ Pa Hao Hala꞉ Halina꞉ Naku Ikali teke pa꞉ta꞉ hayekeme.   
\s1 Isima꞉elona꞉ monduma꞉ monduma꞉ pieke tapake  
\p
\v 12 Mo Setana꞉ pa hameke e pokaeyeke Idiepi wanda꞉ Heikama꞉ Eipoloha꞉ma꞉na꞉ mendiaeyeke weki Isima꞉elona꞉  
\v 13 weki tonu dupa mondu wiekeme. Do ipika꞉ weki tonu ika꞉ ma꞉nda꞉la꞉ tupa꞉ biki laala꞉me. Nebeioto make Keda make A꞉debielo make Mibisa꞉mo make  
\v 14 Misima make Duma make Ma꞉sa make  
\v 15 Hada꞉de make Tema꞉ make Diede make Napisi make Kedema makee.  
\v 16 Ikita꞉ mo 12 tapakena꞉ apa꞉meie. Kutupa ika꞉ biki manuta꞉ mo ika꞉ hosiki da sunu make ika꞉ poluma꞉ poluma꞉ pimiki da pa꞉ta꞉manu make tapa꞉ wiama꞉ wiama꞉ pimikime.  
\v 17 Isima꞉elota꞉ 137 bapi hao homeekeme.  
\v 18 Isima꞉eloma꞉ monduma꞉ monduma꞉ pieke wekiwandikina꞉ wekiwandikita꞉ mo Ha꞉pila kenke pita꞉ Sia꞉e kenke yaapo tukikina꞉ pitiekeme. Koto kenketa꞉ Idiepi nate opa꞉la꞉ nanema꞉ mo A꞉sitia poluekema꞉ pota꞉na꞉ hayekeme. Ikita꞉ mo Eipoloha꞉ma꞉na꞉ mandane monduma꞉ monduma꞉ pieke wekiwandikina꞉ wekiwandiki ame̱le̱ na hake papate haemekeme.   
\s1 Iso pita꞉ Dieikope yaapona꞉ mendiekeeki  
\p
\v 19 Do tamenita꞉ Eipoloha꞉ma꞉na꞉ eiyeke Aisa꞉kena꞉ ekie.  
\v 20 Aisa꞉keta꞉ 40 bapina꞉ta꞉ Beduelona꞉ waneke Lepeka miekeme. Beduelota꞉ mo Mesopoteimia kenke nanema꞉ A꞉ta꞉mia hali hayekeme. Lepekata꞉ Leibenina꞉ beliki yekeme.  
\v 21 Kota꞉ Lepekata꞉ weki a̱i̱ na mendieke handaa Aisa꞉kema꞉ Tekehali pa꞉ta꞉ yeni peayekeme. Kutupa mo Tekehalima꞉ ipika꞉ yeni hombo peaasota꞉ Lepeka weki loke lombeekeme.  
\v 22 Mo wanda꞉ma꞉ta꞉ hone yaapo wiki weki monduluekema꞉ piekeme. Kutupa a̱i̱ na mendiki hata꞉ pa weleke pa꞉ta꞉ pita꞉ kone tonka꞉neli pipikime. Kutu pieke mo wanda꞉ma꞉ alota꞉ I̱ pa꞉ta꞉ta꞉ dupiki haumanu ekipeke pita꞉la꞉pe laa Tekehalima꞉ hombo peaena꞉ yeke lota꞉ piekeme.   
\p
\v 23 Koto leeke mo Tekehalima꞉ alota꞉  
\q1 Tutu yaapota꞉ neke pa꞉ta꞉ pila꞉me. Nakana꞉ma꞉ta꞉ ta꞉ta꞉ hone u alu pulu pa꞉la꞉ tapake yaapo mondu wilipikie. Ma꞉nda꞉ta꞉ honkopu wopu halieke. Mo mupeke halima꞉ta꞉ mo wetepe hali oto pa꞉ta꞉ halieke laa leekeme.   
\p
\v 24 Mo weki mulupieke nate opolo epeeketa꞉ hone yaapo wiki weki yaapo mondu wiekeme.  
\v 25 Mo titina꞉ wekita꞉ we pea make ipika꞉ yonkeleketa꞉ po̱ hapeleke dauma꞉ handeke itiki pelipa peekeme. Koto ekina꞉ ipika꞉ bikita꞉ Iso leekeme.  
\v 26 Mo wetepe wekita꞉ Isona꞉ anke kinuku mina꞉paleke mendieke ekiyalo ipika꞉ bikita꞉ Dieikope leekeme. Aisa꞉keta꞉ 60 bapina꞉ mo weki yaapo mendiekeme.   
\s1 Iso ipika꞉ mulupieke anketeke kone tapaeyekeeki  
\p
\v 27 Mo weki yaapo daeyaata꞉ Isota꞉ eiya꞉nala꞉ ekina꞉ handa wiki some hata꞉ mo hama꞉ nane pita꞉la꞉ ekina꞉ puki wieke some hayekeme. Pate Dieikopeta꞉ kesema꞉ hata꞉ da hao hayeke some yekeme.  
\v 28 Aisa꞉kema꞉ta꞉ Iso pa꞉ta꞉ta꞉ pukima꞉ homeekeme. Pa ekipeke ipikana꞉ma꞉ta꞉ mo Isoma꞉ lia꞉tiki pieke hotekemanu tendema꞉ homa na꞉tiki piekeme. Pate Lepekama꞉ta꞉ Dieikope pa꞉ta꞉ pukima꞉ homeekeme.   
\p
\v 29 Nate ma꞉nda꞉na꞉ Dieikopeta꞉ pota꞉ka꞉ supu yankolo pitina꞉ Isota꞉ eiya꞉na꞉ hao tea꞉ma꞉ homa opolo epeekeme.  
\v 30 Kutupa Isoma꞉ Dieikope pa꞉ta꞉ alota꞉ I̱ta꞉ tea꞉ma꞉ amba꞉ homoloma꞉ mo wepiki ale ma꞉nda꞉ kie leekeme. Koto ekina꞉ ipikita꞉ Idomo lemekeme.   
\p
\v 31 Dieikopema꞉ hombo peaaso alota꞉ Nakana꞉ma꞉ I̱ mupeke wekina꞉ anke teke mulu polo ekina꞉ a꞉pa꞉la꞉me leka꞉na꞉ta꞉ kota꞉ neke pa꞉ta꞉ kulueke leekeme.   
\p
\v 32 Koto leeke Isoma꞉ alota꞉ I̱ta꞉ tea꞉ma꞉ teke pa꞉ta꞉ homoloma꞉ koto mupeke wekina꞉ mulu polo anke tekema꞉ I̱ eki a꞉nda꞉ na piliekema꞉ pa a꞉pa꞉la꞉ma꞉ alome leekeme.   
\p
\v 33 Kutupa Dieikopema꞉ hombo peaaso alota꞉ Titina꞉ amba꞉la꞉ naka꞉ mupeke wekina꞉ mulu pele anke teketa꞉ I̱ kulueke laa pi amba꞉la la꞉ wie leekeme. Kota꞉ Isoma꞉ pi la꞉ witolo hata꞉ mo mupeke wekina꞉ mulu pieke anke teketa꞉ Dieikope pa꞉ta꞉ haleekeme.  
\v 34 Kutupa Dieikopema꞉ta꞉ hameke pa꞉ta꞉ betedi make mandane supu make haleekeme. Kutupa Isoma꞉ mo ne ikali naa mina꞉pa꞉lao tiao peekeme. Kotota꞉ Isoma꞉ ipika꞉ mupeke wekina꞉ anketeke mulu pieke ekina꞉ hone wieke ekita꞉ pa koto yekeme.   
\c 26  
\s1 Aisa꞉ke Kita daoni pa꞉ta꞉ hayekeeki  
\p
\v 1 Koto kenke pa꞉ta꞉ta꞉ mo hande amba꞉ titina꞉ Eipoloha꞉ma꞉ hayeke dina꞉ epeeke tea꞉ kima꞉ handekeeki paa epeekeme. Kota꞉ Aisa꞉keta꞉ mo Kita daoni nane mo Pilisidaini wanda꞉halina꞉ kini Abimeleke hayeke nane peekeme. A̱i̱ na peeke haena꞉ta꞉  
\v 2 mo Tekehalima꞉ Aisa꞉ke pa꞉ta꞉ peneme yao hata꞉ alota꞉ Idiepi kenke nane na peke do I̱ma꞉ hae alo kenkena꞉ kone hapeke.  
\v 3 I̱ma꞉ neke yaapo hata꞉ neke epealuekema꞉ do pate hapeke. I̱ma꞉ta꞉ do kenke paeyaota꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke. Kutupa I̱ma꞉ta꞉ naka꞉ apa꞉ Eipoloha꞉ma꞉ yaapo la꞉ upa꞉ pita꞉ paa wilieke.  
\v 4 I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉manu hala꞉ tupa꞉ haena꞉ kulueke. Kutupa iki pa꞉ta꞉ta꞉ do kenke paeyao halueke. I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke.  
\v 5 Kota꞉ Eipoloha꞉ma꞉ma꞉ta꞉ yaka pi make yaka lo pimanu make opua miniki haya꞉ ekina꞉ta꞉ I̱ma꞉ta꞉ neke epealueke laa leekeme.   
\p
\v 6 Koto ekina꞉ Aisa꞉keta꞉ Kita daoni pa꞉ta꞉ hao hayekeme.  
\v 7 Kutupa koto pa꞉ta꞉ haemeke haliwekima꞉ alota꞉ Mo wanda꞉ta꞉ epi yaka꞉ta꞉pe lemeke handaata꞉ ipika꞉ ana꞉e leekeme. Ipikana꞉ma꞉ ipika꞉ wanda꞉e pi na leeke ekita꞉ Lepekata꞉ wanda꞉ seliapo yalo hata꞉ koto pate haemeke haliwekima꞉ Lepeka muluekema꞉ ipiki liaama꞉na꞉ laa paala꞉ma꞉ homolo hata꞉ leekeme.  
\v 8 Kutupa Aisa꞉ke koto kenke pa꞉ta꞉ natemanu hosiki haena꞉ laa mo kini hali Abimeleketa꞉ ipika꞉ winido pa꞉ta꞉ handa꞉niayekepate Aisa꞉kema꞉ta꞉ Lepeka telepo la꞉tiaaso pitipekeeki handeekeme.  
\v 9 Kutupa Abimelekema꞉ Aisa꞉ke handa꞉ mulu pena꞉ la alota꞉ Kota꞉ naka꞉ wanda꞉ ya꞉ka꞉ta꞉me. Pa ekipeke naka꞉ ana꞉e la pelepe leekeme. Aisa꞉kema꞉ hombo peaaso alota꞉ Yaka honema꞉ta꞉ Yaka wanda꞉e loa꞉ka꞉na꞉ta꞉ kota꞉ I̱ limikie hone ua꞉me leekeme.   
\p
\v 10 Abimelekema꞉ alota꞉ Nakana꞉ma꞉ niki pa꞉ta꞉ eki hau pea pelepe. Mo yaka hali ma꞉nda꞉ma꞉ naka꞉ wanda꞉ yaapo ana꞉na꞉ polu pia꞉me. Nikana꞉ma꞉ koto hoke hau puma꞉ka꞉na꞉ yoluta꞉ kota꞉ teketa꞉ neke kone yolo pia꞉me leekeme.  
\v 11 Kutupa Abimelekema꞉ ipika꞉ wanda꞉hali paeyao pa꞉ta꞉ pi la꞉ witolo alota꞉ Ma꞉nda꞉ epima꞉ do hali o ipika꞉ wanda꞉ hoke tupa꞉ handeteke haya꞉ka꞉na꞉ta꞉ kota꞉ koto someta꞉ lu homaena꞉e leekeme.   
\p
\v 12 Kutupa Koda꞉ma꞉ Aisa꞉ke epeayeke ekiyalo hata꞉ ipikana꞉ma꞉ koto kenke pa꞉ta꞉ wae alemanu nokopeeketa꞉ mo nokopeeke bapina꞉ta꞉ ota꞉ anekema꞉ haka꞉ta꞉pake napeke tieke mia꞉tiki piekeme.  
\v 13 Kutupa ala꞉ta꞉ ala꞉ta꞉ wopu mutia pea꞉eki yalo hata꞉ ota꞉ hamoko hali hayekeme.  
\v 14 Aisa꞉keta꞉ sipisipi wopu make kaomanu wopu make e pokaasa꞉ haliweki wopu make yalo hata꞉ mo Pilisidaini tapakema꞉ta꞉ we pambemekeme.  
\v 15 Koto ekina꞉ Ikana꞉ma꞉ta꞉ mo hande ipika꞉ ateke Eipoloha꞉ma꞉ pa hata꞉ ipika꞉ e pokaemeke haliwekima꞉ awemeke naku ikalimanu pa kenke ao tumbaemekeme.   
\p
\v 16 Kutupa Abimelekema꞉ Aisa꞉ke pa꞉ta꞉ alota꞉ Neketa꞉ niki ankulake wele ula꞉ma꞉ nika꞉ kenke mina꞉pa꞉lae leekeme.  
\v 17 Koto ekina꞉ Aisa꞉kema꞉ta꞉ mina꞉pa꞉lao mo Kita hadipina꞉ palai da pua a꞉eyekeme. Koto pa꞉ta꞉ta꞉ nate mandane ekina꞉  
\v 18 Koto pateta꞉ mo hande Eipoloha꞉ma꞉ hayeke natena꞉ naku ikalimanu aweekepate Eipoloha꞉ma꞉ homeeke dina꞉ta꞉ mo Pilisidaini tapakema꞉ta꞉ ao tumbaemekeme. Koto naku ikali manuta꞉ Aisa꞉kema꞉ pa aweekeme. Ipikana꞉ma꞉ mo naku ikali biki manuta꞉ atekema꞉ leekeeki kone paa leekeme.   
\p
\v 19 Aisa꞉kena꞉ e pokaemeke haliwekima꞉ta꞉ mo hadipina꞉ panake naku ikali awa ikali handa꞉ wimikime.  
\v 20 Kutupa mo Kita kenke pa꞉ta꞉ sipisipi handeteke haemeke haliwekima꞉ mo Aisa꞉kena꞉ sipisipi handeteke haemeke haliweki ame̱le̱ hankiliki yololo hata꞉ alota꞉ Do ikalita꞉ nika꞉ ekie lemeke handaa Aisa꞉kema꞉ mo naku ikalina꞉ bikita꞉ Hankilikie leekeme.   
\p
\v 21 Kutupa Aisa꞉kena꞉ e pokaemeke haliwekima꞉ naku ikali ma꞉nda꞉ awemekepate koto ekina꞉ make ape hankiliki ombu yolemeke handaa mo naku ikalina꞉ bikita꞉ A꞉nda꞉ Pita꞉la꞉ekie leekeme.  
\v 22 Kutupa Aisa꞉kema꞉ta꞉ koto pate mina꞉pa꞉lao pua naku ikali ma꞉nda꞉ aweekeme. Koto ekina꞉ta꞉ hankiliki na yolemeke handaa ipika꞉ bikita꞉ Lihobodi (nika꞉ da pita꞉ Ka꞉la꞉pa꞉ Tapaala꞉me) leekeme. Kutupa ipikana꞉ma꞉ alota꞉ Niki do kenkena꞉ hamono Tekehalima꞉ niki ka꞉la꞉pa꞉ tapaala꞉me. Koto ekina꞉ ameta꞉ do pateta꞉ ala꞉ta꞉ ala꞉ta꞉manu ana꞉na꞉ kone wia halumeke leekeme.   
\p
\v 23 Kotoeki hoki naneta꞉ Aisa꞉keta꞉ pao mo Biasiba nane peekeme.  
\v 24 Koto timba Tekehalima꞉ ipiki pa꞉ta꞉ peneme yao alota꞉ I̱ta꞉ naka꞉ apa꞉ Eipoloha꞉ma꞉na꞉ Koda꞉e. Koto ekina꞉ paala꞉ma꞉ na homa꞉pee. I̱ta꞉ neke yaapo halome. Kutupa I̱ma꞉ mo yaka e pokaeya꞉ hali Eipoloha꞉ma꞉ pa꞉ta꞉ pi la꞉ ua꞉ ekina꞉ta꞉ neke epeaaso hata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ tieke kulueke leekeme.  
\v 25 Koto pateta꞉ Aisa꞉kema꞉ oloda wepia Tekehali pa꞉ta꞉ yeni hau piekeme. Kutupa ipikana꞉ma꞉ ipika꞉ palai da koto pate a꞉eyeketa꞉ ipika꞉ e pokaemeke haliwekima꞉ta꞉ koto pate naku ikali ma꞉nda꞉ awemekeme.   
\s1 Aisa꞉ke pita꞉ Abimeleke yaapoma꞉ pi tonkaepekeeki  
\p
\v 26 Abimeleketa꞉ ipika꞉ hone u tiao hayeke hali Ahusa꞉de make ipika꞉ amina꞉ you hali Pikolo ame̱le̱ Aisa꞉ke handulueke alo Kita nanema꞉ epemekeme.  
\v 27 Koto ekina꞉ Aisa꞉kema꞉ lota꞉ pitolo alota꞉ Amba꞉ta꞉ I̱ pa꞉ta꞉ a꞉nda꞉ lia naka꞉ kenke mina꞉pa꞉lao pue le ale pa ameta꞉ ekipeke I̱ handolo a꞉pa pelemepe leekeme.   
\p
\v 28 Ikana꞉ma꞉ hombo peaaso alota꞉ Ameta꞉ Tekehalita꞉ neke ame̱le̱ hala꞉eki handolo hata꞉ nika꞉ honema꞉ta꞉ neke niki ame̱le̱ pi tonkao umana꞉e. Nika꞉ honema꞉ta꞉ niki pa꞉ta꞉ pi dupa la꞉ uelena꞉e.  
\v 29 Mo nikana꞉ma꞉ neke na hoeyaoma꞉ tupa꞉ nakana꞉ma꞉ niki make na hoeyalena꞉ pi la꞉ uelena꞉ loa꞉me. Nikana꞉ma꞉ta꞉ neke pa꞉ta꞉ a꞉ta꞉ma꞉ homolo hata꞉ yopu kone mina꞉pa꞉lao poelena꞉ loma꞉me. Koto ekina꞉ ameta꞉ mo Koda꞉ma꞉ neke epeala꞉ ekita꞉ peneme yala꞉me lemekeme.  
\v 30 Kutupa Aisa꞉kema꞉ta꞉ ika꞉ ne pambaeyeke handaa ne ikali nemekeme.  
\v 31 Da kelepeeketa꞉ hali homeke homekema꞉ ika꞉ la wimiki pita꞉ keke pima꞉ tonkao wimikime. Kutupa Aisa꞉kema꞉ mo haliweki pa꞉ta꞉ a꞉taloe leeketa꞉ yankeke tonu au laa pemekeme.   
\p
\v 32 Koto natena꞉ kone Aisa꞉kena꞉ e pokaemeke haliwekima꞉ naku ikali ma꞉nda꞉ awemekeeki a꞉pa la halolo hata꞉ alota꞉ Ikali handa꞉ uluma꞉me lemekeme.  
\v 33 Ipikana꞉ma꞉ koto naku ikalina꞉ bikita꞉ Pi La꞉ Wita꞉la꞉ Ekie leekeme. Kotota꞉ mo hande Biasiba daoni ipika꞉ biki mieke tupa꞉e.   
\s1 Isoma꞉ kenke ma꞉nda꞉ wanda꞉ yaapo miekeeki  
\p
\v 34 Iso ipiki 40 bapi mieketa꞉ Hidi wanda꞉ yaapo miekeme. Ipilikita꞉ Bitina꞉ waneke Diudi make Elonina꞉ waneke Basema꞉de yekeme.  
\v 35 Mo wanda꞉ yaapoma꞉ta꞉ Aisa꞉ke pita꞉ Lepeka yaapo ka꞉nda꞉ma꞉ homaepekeme.   
\c 27  
\s1 Aisa꞉kema꞉ Dieikope epeayekeeki  
\p
\v 1 Aisa꞉keta꞉ ameta꞉ koke yaa leke holu piekeme. Ipikana꞉ma꞉ ipika꞉ mupeke weki Iso wi la꞉ mea alota꞉ Yaka wekio leekeme. Mo wekima꞉ hombo peaaso alota꞉ Wae leekeme.  
\v 2 Koto leeke Aisa꞉kema꞉ alota꞉ Ameta꞉ I̱ koke ya homolo poloeki teke pa꞉ta꞉ ya꞉la꞉ ekita꞉ do handele handa꞉e.  
\v 3 Koto ekina꞉ naka꞉ semoko a꞉ndeli mea oni hapekena꞉ pua hoteke ma꞉nda꞉ lia a꞉pa꞉peke.  
\v 4 Kutupa mo yaka hone pa꞉la꞉ tendepiki ne yankao I̱ pa꞉ta꞉ mea a꞉pa꞉peke. Kutupa naa pita꞉ta꞉ mo I̱ homuluekema꞉ pita꞉ yaka paeyaaso epeaasa꞉eki neke kuluekema꞉ loa꞉me leekeme.   
\p
\v 5 Kutupa Aisa꞉kema꞉ Iso pa꞉ta꞉ pi la haleeketa꞉ Lepekama꞉ opu hayekeme.  
\v 6 Kutupa ipikana꞉ma꞉ Dieikope pa꞉ta꞉ alota꞉ Naka꞉ apa꞉ma꞉ Iso pa꞉ta꞉ lea꞉eki I̱ma꞉ dupa opolome.  
\v 7 Hoteke ma꞉nda꞉ mea a꞉pa yaka hone pa꞉la꞉ tendepiki ne yankapeke. Kutupa naa pita꞉ta꞉ I̱ homuluekema꞉ pita꞉ Tekehalina꞉ leke popelekena꞉ neke pa꞉ta꞉ yaka epeaasa꞉eki kuluekema꞉ loa꞉me lea꞉me leekeme.  
\v 8 Kutupa Lepekama꞉ ombu alota꞉ Yaka wekio. Ameta꞉ I̱ma꞉ alo pi opua pie.  
\v 9 Oni ma꞉na꞉manu hala꞉ pa꞉ta꞉ pua panka wiki nanikosi ikiki yaapo mea epoe. Koto ekima꞉ta꞉ mo naka꞉ apa꞉na꞉ ta꞉na꞉ma꞉ homo hala꞉ ne yankaluekema꞉ loa꞉me.  
\v 10 Kutupa ipikana꞉ma꞉ nena꞉ nakana꞉ma꞉ mea pekena꞉ta꞉ kota꞉ ipiki homuluekema꞉ pita꞉ ipika꞉ epeaasa꞉ ekita꞉ neke kina꞉ loa꞉me leekeme.   
\p
\v 11 Pate Dieikopema꞉ ipika꞉ ama꞉ pa꞉ta꞉ alota꞉ Isota꞉ itiki pelipa pa꞉la꞉pate yaka loketa꞉ homu pa꞉la꞉me laa hone wilime.  
\v 12 Ma꞉nda꞉ta꞉ yaka apa꞉ma꞉ I̱ watao I̱ma꞉ ipiki makeaasoma꞉ laa I̱ handa꞉ wiaapa꞉na꞉e. Dupua꞉ka꞉na꞉ta꞉ kota꞉ mo epeaasa꞉eki mina꞉la꞉ tupa꞉ paa yaka kone I̱ pa꞉ta꞉ esihou pi mea epena꞉ lapeke yeke loa꞉me leekeme.   
\p
\v 13 Koto leeke ipika꞉ ama꞉ma꞉ hombo peaaso alota꞉ Yaka wekio. Koto ipilia꞉ esihou pi manuta꞉ I̱ pa꞉ta꞉ epena꞉ma꞉ pa mo I̱ma꞉ aloeki pua pie. Mo nanikosi yaapo pua meawae leekeme.  
\v 14 Koto leeke Dieikopema꞉ mo nanikosi yaapo mulu pua inkiki pa꞉ta꞉ mea epeekeme. Kutupa mo wanda꞉ma꞉ta꞉ mo wekina꞉ atekema꞉ ta꞉na꞉ma꞉ homeeke nema꞉ handekeeki yankaeyekeme.  
\v 15 Kutupa mo wanda꞉ma꞉ oni da pa꞉ta꞉ Isona꞉ amu pea wiayeke dau manuta꞉ mea Dieikopena꞉ pambawaeyekeme.  
\v 16 Mo nanikosi yaapona꞉ yonkeleke manuta꞉ mo wekina꞉ kiki yaapona꞉ pambawaeyeke make kutupa ipika꞉ itiki na pelieke alena꞉ tonka꞉na꞉ pambawaeyekeme.  
\v 17 Mo wanda꞉ma꞉ta꞉ mo weki pa꞉ta꞉ mo tendepiki ne make mo yankeeke betedi make haleekeme.   
\p
\v 18 Kutupa Dieikope ipika꞉ apa꞉ pa꞉ta꞉ pua alota꞉ Apa꞉o leekeme. Atekema꞉ hombo peaaso alota꞉ Wae. Neketa꞉ weki epi yaka꞉ta꞉pe leekeme.   
\p
\v 19 Dieikopema꞉ hombo peaaso alota꞉ I̱ta꞉ naka꞉ mupeke weki Isoe. I̱ma꞉ta꞉ naka꞉ hande pea꞉pekee le hau pealome. Koto ekina꞉ mo epeaasa꞉ ekimanu I̱ pa꞉ta꞉ kuelena꞉ma꞉ pilisi tiao pita꞉ mo I̱ma꞉ mea a꞉palo hoteke nae leekeme.   
\p
\v 20 Koto leeke Aisa꞉kema꞉ alota꞉ Yaka wekio. Ekipa a̱i̱ handa꞉ wia pelepe leekeme. Dieikopema꞉ hombo peaaso alota꞉ Mo Tekehali naka꞉ Koda꞉ma꞉ handa꞉ wiono I̱ tamba꞉ mia꞉me leekeme.   
\p
\v 21 Aisa꞉kema꞉ Dieikope pa꞉ta꞉ alota꞉ Pilisio. I̱ma꞉ neke wataalo polo tupa꞉ teke pa꞉ta꞉ epoe. Neketa꞉ ota꞉ Iso ka꞉ta꞉pe leekeme.  
\v 22 Dieikopeta꞉ ipika꞉ apa꞉ pitia꞉ alena꞉ paa teke pa꞉ta꞉ pua pitiekeme. Kutu pieke atekema꞉ watao alota꞉ Naka꞉ pi ho̱la̱꞉maketa꞉ Dieikopena꞉ ekima꞉ handa꞉la꞉pate pa naka꞉ kikita꞉ Isona꞉ kiki wataake nono pa꞉la꞉me leekeme.  
\v 23 Ipikana꞉ma꞉ Dieikopee laa na handa꞉ wieke ekita꞉ mo ipika꞉ kiki manuta꞉ Isona꞉ ekima꞉ handa itiki pelipa peeke ekima꞉ piekeme. Ipikana꞉ma꞉ ipika꞉ epeaasa꞉ ekimanu teke pa꞉ta꞉ haluekema꞉ pitiekepate kone  
\v 24 paa lota꞉ pitolo alota꞉ Neketa꞉ ota꞉ Iso ka꞉ta꞉pe leekeme. Mo wekima꞉ hombo peaaso alota꞉ Aowe I̱e leekeme.   
\p
\v 25 Kota꞉ Aisa꞉kema꞉ alota꞉ Mo mandane hoteke mea a꞉pae. Naa pita꞉ta꞉ yaka epeaasa꞉eki neke pa꞉ta꞉ kulueke leekeme. Koto leeke Dieikopema꞉ta꞉ ne mea a꞉pao make nolo pieke waini ikali make mea a꞉paeyekeme.  
\v 26 Kutupa mo weki pa꞉ta꞉ ipika꞉ apa꞉ma꞉ alota꞉ Yaka wekio. I̱ teke pa꞉ta꞉ a꞉pa I̱ nunu pie leekeme.  
\v 27 Ipikana꞉ma꞉ ateke nunu pulueke alo hata꞉ teke pa꞉ta꞉ epea꞉ dina꞉ta꞉ Aisa꞉kema꞉ mo yameeke aka꞉manu totopo mu hao ipika꞉ epeaasa꞉ ekimanu haleekeme. Ipikana꞉ma꞉ alota꞉  
\q1 Do yaka wekina꞉ totopo epeke pita꞉la꞉ ekita꞉ mo hande Tekehalima꞉ epeala꞉ hama꞉na꞉ totopoma꞉ handa꞉la꞉me.   
\q1
\v 28 Koda꞉ma꞉ oli ya nanema꞉ ekepipida꞉ kitolo naka꞉ hama꞉manu ne tieke wina꞉e. Kutupa widi make waini ikali make wopu kina꞉e.   
\q1
\v 29 Tutu manuta꞉ naka꞉ e pokaasa꞉ tapake haena꞉e. Kutupa wanda꞉hali neke pa꞉ta꞉ panda꞉puniaena꞉e. Naka꞉ tapake paeyao handeteke halena꞉e. Naka꞉ ama꞉na꞉ monduma꞉ monduma꞉ pa꞉la꞉ wekiwandikina꞉ wekiwandikima꞉ neke pa꞉ta꞉ panda꞉puniaena꞉e.  
\q1 Mo neke pa꞉ta꞉ esihou tunkilimi tapaketa꞉ esihou pa꞉ta꞉ haena꞉e. Kutupa neke epealimi wanda꞉halita꞉ iki make epeaasa꞉eki mina꞉e laa leekeme.   
\s1 Isoma꞉ Aisa꞉kena꞉ epeaasa꞉eki honke leekeeki  
\p
\v 30 Aisa꞉kema꞉ ipika꞉ epeaasa꞉eki halaa Dieikope pulu haena꞉ta꞉ ipika꞉ hameke eiya꞉na꞉ hao honda꞉ pambolo epeekeme.  
\v 31 Ipikana꞉ma꞉ make tendepiki ne yankao ateke pa꞉ta꞉ mea pua alota꞉ Pilisi apa꞉o. Mo naka꞉ epeaasa꞉eki I̱ pa꞉ta꞉ kuelena꞉yeke I̱ma꞉ do mea a꞉palo hoteke ma꞉nda꞉ noelena꞉ tiao pitie leekeme.   
\p
\v 32 Aisa꞉kema꞉ hombo peaaso alota꞉ Neketa꞉ epi ya꞉ka꞉ta꞉pe leekeme. Ipikana꞉ma꞉ hombo peaaso alota꞉ Naka꞉ mupeke weki Isoe leekeme.   
\p
\v 33 Aisa꞉keta꞉ tola꞉tia pominolo hata꞉ pututu liaaso alota꞉ Mo hoteke lia I̱ pa꞉ta꞉ mea epea꞉ta꞉ epi ya꞉ka꞉ta꞉pe. Neke amba꞉ do honda꞉ pambolo ipuluekema꞉ halena꞉ kone noa꞉me. Yaka paeyaaso epeaaso ekita꞉ ipiki pa꞉ta꞉ haloa꞉ma꞉ ameta꞉ ota꞉ ipika꞉eki homeke u halieke leekeme.   
\p
\v 34 Isoma꞉ doeki opu haota꞉ ka꞉pa꞉puki yoka anekema꞉ e̱ wi tieke alo hata꞉ alota꞉ Apa꞉o. I̱ make naka꞉ epeaasa꞉eki kie laa honke leekeme.   
\p
\v 35 Aisa꞉kema꞉ hombo peaaso alota꞉ Naka꞉ kamema꞉ I̱ a꞉pa makeaaso naka꞉ epeaasa꞉eki mea pu moneala꞉me leekeme.   
\p
\v 36 Isoma꞉ alota꞉ Dota꞉ ipika꞉ hoto yaapo peao I̱ makeala꞉me. Koto ekina꞉ ipika꞉ biki Dieikopeta꞉ ota꞉ ana꞉piki tupa꞉ laa pimika꞉ta꞉me. Ipikana꞉ma꞉ta꞉ yaka mupeke wekina꞉ anke teke mulu poloeki make mea ameta꞉ yaka epeaasa꞉eki make mea pua pika꞉ta꞉me. Koto ekina꞉ I̱ta꞉ epeaasa꞉eki ma꞉nda꞉ na panka꞉ wialepe leekeme.   
\p
\v 37  Aisa꞉kema꞉ hombo peaaso alota꞉ I̱ma꞉ta꞉ ipikana꞉ma꞉ neke ankulao you haena꞉ laa ipika꞉ tapakemanu maketa꞉ ipika꞉ pa hameke e pokaasa꞉ tapake haena꞉ loa꞉me. I̱ma꞉ta꞉ widi make waini ikali make haloa꞉me. Ota꞉ yaka wekio. Neke pa꞉ta꞉ pulu polo ekita꞉ ma꞉nda꞉ dia꞉me leekeme.   
\p
\v 38 Koto leekepate kone Isoma꞉ta꞉ ateke pa꞉ta꞉ honke ombu alo hata꞉ alota꞉ Apa꞉o. Mo epeaasa꞉eki homeke siki make ota꞉ ma꞉nda꞉ na wilipe. Apa꞉o. I̱ make epeae alo hata꞉ e̱ leekeme.   
\p
\v 39 Kota꞉ Aisa꞉kema꞉ ipiki pa꞉ta꞉ alota꞉  
\q1 Oli ya nanema꞉ ekepipida꞉ neke ma꞉nda꞉ na kina꞉e. Kenke epeke wiki hama꞉ ma꞉nda꞉ dia꞉me.  
\v 40 Neketa꞉ naka꞉ bainasi yaapo hao pelipikie. Pate neketa꞉ naka꞉ kamena꞉ pa hameke e pokaasa꞉ hali halipikie.  
\q1 Kutu pulu pa꞉la꞉pate wetepena꞉ a꞉nda꞉ liata꞉ mo ipika꞉ handeteke halia꞉eki pendulu bao pelipikie leekeme.   
\p
\v 41 Atekema꞉ mo hande epeaasa꞉eki hameke pa꞉ta꞉ haleeke handaa Isoma꞉ta꞉ Dieikope honditi piekeme. Ipika꞉ honema꞉ alota꞉ Yaka apa꞉ta꞉ teke pa꞉ta꞉ homolo pa꞉la꞉ ekina꞉ ipika꞉ homa꞉ da pitulu polo ekita꞉ teke pa꞉ta꞉ ya꞉la꞉ma꞉ Dieikope homena꞉ lulueke hone wiekeme.   
\p
\v 42 Pate Lepekama꞉ Isona꞉ pulueke leeke ekimanu amba꞉ opu hao Dieikope epoa꞉ la alota꞉ Opie. Naka꞉ kame Isoma꞉ta꞉ hombo peaaso hata꞉ neke lu homalueke ala꞉me.  
\v 43 Koto ala꞉ma꞉ yaka wekio. I̱ma꞉ pie aloeki pia꞉peke. Mo yaka ana꞉ Leibeni hala꞉ alena꞉ Hatani nane ame do kone pue.  
\v 44 Kutupa ipiki yaapo hosiki haota꞉ mo naka꞉ kamena꞉ mineke panka꞉la꞉eki uniao  
\v 45 ipiki pa꞉ta꞉ peleeki hone yonka꞉laena꞉ loa꞉me. Kutupa neke handa꞉ mulu epena꞉ta꞉ ma꞉nda꞉ tapaalueke. I̱ma꞉ta꞉ pa ekipeke yaka weki yaapo homeke natena꞉ alupalua꞉pe leekeme.   
\s1 Aisa꞉kema꞉ Dieikope Leibeni pa꞉ta꞉ tapaeyekeeki  
\p
\v 46 Lepekama꞉ Aisa꞉ke pa꞉ta꞉ alota꞉ Do Isona꞉ da ma꞉nda꞉ wanda꞉ yaapo handa꞉peketa꞉ I̱ta꞉ ota꞉ ki tieke pea soka꞉la꞉ pita꞉la꞉me. Dieikopema꞉ make do Hidi wandiki tonu ma꞉nda꞉ mia꞉ka꞉na꞉ta꞉ kota꞉ I̱ta꞉ homa꞉peke make ya꞉la꞉me leekeme.   
\c 28  
\p
\v 1 Aisa꞉kema꞉ Dieikope wi la ta꞉na꞉ma꞉ homa alota꞉ Keinani wanda꞉ ma꞉nda꞉ na mia꞉peke.  
\v 2 Kotoeki na pikita꞉ mo naka꞉ mei Beduelona꞉ da kenke Mesopoteimia nane pua mo naka꞉ awa꞉ Leibenina꞉ waneke tonu ma꞉nda꞉ hondo mea꞉peke.  
\v 3 Kutupa neketa꞉ tutu eleke elekena꞉ apa꞉ halena꞉ yeke mo Aneke Wele Wopupiki Koda꞉ma꞉ naka꞉ wanda꞉ milipi pa꞉ta꞉ neke epeaaso hata꞉ wekiwandiki wopu kina꞉e.  
\v 4 Kutupa ipikana꞉ma꞉ta꞉ Eipoloha꞉ma꞉ epeaaso pia꞉ tupa꞉ neke make naka꞉ monduma꞉ monduma꞉ pilipi wekiwandikina꞉ wekiwandiki paeyao epeaena꞉e. Kutupa make do neke hae kenketa꞉ mo Koda꞉ma꞉ mo Eipoloha꞉ma꞉ halea꞉ kenke ya꞉la꞉ ekina꞉ nakana꞉ma꞉ muelena꞉e.  
\v 5 Kutupa Aisa꞉kema꞉ Dieikopeta꞉ mo Iso pita꞉ Dieikope yaapona꞉ inkiki Lepekana꞉ beliki A꞉ta꞉mia hali Bedueloma꞉ mondu wieke hali Leibeni hayeke alena꞉ mo Mesopoteimia nane pena꞉ tapaeyekeme.   
\s1 Isoma꞉ wanda꞉ ma꞉nda꞉ miekeeki  
\p
\v 6 Aisa꞉kema꞉ta꞉ Dieikope epeao mo Mesopoteimia nane wanda꞉ weilu pena꞉ tapaeyekeeki Isoma꞉ opiekeme. Kutupa make Aisa꞉kema꞉ mo weki epeaaso hata꞉ Keinani wanda꞉ ma꞉nda꞉ ota꞉ na mea꞉peke leekeeki opiekeme.  
\v 7 Kutupa make Dieikopema꞉ta꞉ ipika꞉ apa꞉ ama꞉ yaapona꞉ pi opua Mesopoteimia nane amba꞉ peekeeki opiekeme.  
\v 8 Koto opiekeeki manuma꞉ta꞉ ipika꞉ atekema꞉ mo Keinani wanda꞉weki ota꞉ kiayekeeki hando hao  
\v 9 Isoma꞉ta꞉ mo Eipoloha꞉ma꞉na꞉ eiyeke Isima꞉elona꞉ waneke Mahala꞉di mulu peekeme. Mahala꞉dita꞉ Nebeiotona꞉ beliki yekeme.   
\s1 Dieikopema꞉ Bedele da upa piekeeki  
\p
\v 10 Dieikopeta꞉ Biasiba mina꞉pa꞉lao Hatani poluekema꞉ peekeme.  
\v 11 Nate pambolo pulu haena꞉ta꞉ ale ma꞉nda꞉na꞉ opolo a꞉paata꞉ koto pa꞉ta꞉ peliekeme. Ipikita꞉ mo toopina꞉ ka꞉nda꞉ lia polueke alo polu holepeekeme.  
\v 12 Kutupa upa pitolota꞉ pota꞉ lapa꞉ ma꞉nda꞉ kenkena꞉ wia a꞉pa yotuao oli ya nane pekeeki handeekeme. Mo pota꞉ lapa꞉na꞉ta꞉ enisolomanu olina꞉ pua꞉tiki onina꞉ hola꞉pa꞉tiki pimikieki handeekeme.  
\v 13 Kutupa mo Tekehalita꞉ ipiki teke pa꞉ta꞉ a꞉pa hata꞉ alota꞉ I̱ta꞉ mo Eipoloha꞉ma꞉ pita꞉ Aisa꞉ke yaapona꞉ Tekehali Koda꞉e. I̱ma꞉ta꞉ do neke pelipa꞉lia hale kenketa꞉ neke pa꞉ta꞉ make kia naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ make halueke.  
\v 14 Ikita꞉ do kenkena꞉ ula꞉ na yata꞉pea꞉peke ya꞉la꞉ dokolo paeyaoma꞉ handilimikie. Ikita꞉ ika꞉ da kenketa꞉ do kenke nepoko paeyao pa꞉ta꞉ putupolo baalieke. I̱ma꞉ta꞉ neke pa꞉ta꞉ yama꞉ make naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ make tutu paeyao epealueke.  
\v 15 Niminalo pele ekita꞉ dupae. I̱ta꞉ neke yaapo mandakena꞉ hata꞉ hane pekena꞉ make neke handeteke halueke. Kutupa neketa꞉ do kenke pa꞉ta꞉ paa hatuku ipulueke. I̱ma꞉ta꞉ mo pi la꞉ ulueki paeyaaluekema꞉ta꞉ neketa꞉ na mina꞉pa꞉lalueke leekeme.   
\p
\v 16 Dieikopema꞉ u tiao alota꞉ Mo Tekehalita꞉ do haya꞉ka꞉ta꞉me. Ipikita꞉ do pate haena꞉ kone hone na wia pua꞉ka꞉ta꞉me leekeme.  
\v 17 Kutupa ipikita꞉ pala꞉ haaso hata꞉ alota꞉ Dota꞉ ota꞉ paala꞉piki alena꞉e laata꞉ Koda꞉na꞉ da yalo pa꞉la꞉me. Oli hepeni nane pula꞉ pota꞉ kake lomba꞉la꞉ alena꞉ yalo pa꞉la꞉me leekeme.   
\p
\v 18 Kutupa ota꞉ da ka꞉la꞉paaso siki Dieikope tiao mo ipika꞉ hande ka꞉nda꞉ lia pelieke toopita꞉ hone u tialo piekeeki mea nokopeekeme. Kutupa mo toopi mandata꞉ olipi oeta holaa alota꞉ Dota꞉ Koda꞉na꞉ ekie leekeme.  
\v 19 Kutupa koto pateta꞉ Bedele leekeme. Koto pateta꞉ amba꞉ta꞉ Lusu lemeke alena꞉e.  
\v 20 Kutupa Dieikopema꞉ Tekehali pa꞉ta꞉ pi la꞉ witolo alota꞉ Kota꞉ neketa꞉ I̱ yaapo haeka꞉na꞉ta꞉ kota꞉ mo I̱ pulu pota꞉ kimisuta꞉ nakana꞉ma꞉ handeteke hao ne make aka꞉ make kika꞉na꞉ta꞉  
\v 21 kutupa I̱ paa yaka apa꞉na꞉ da nane epeke tupa꞉ la꞉ka꞉la yapono leka꞉na꞉ta꞉ kota꞉ neketa꞉ yaka Koda꞉ yelieke.  
\v 22 Kutupa do paa hone ua꞉tiki poluekema꞉ nokopolo toopita꞉ mo neke pa꞉ta꞉ panda꞉puniao yeiya꞉ lalo polo alena꞉e. Kutupa I̱ma꞉ta꞉ mo I̱ kilipi ale paeyaota꞉ putupa kiki homekena꞉ mandane tonkoputa꞉ yaka minolo homeketa꞉ neke kulueke leekeme.   
\c 29  
\s1 Dieikope Leibenina꞉ da opolo peekeeki  
\p
\v 1 Dieikope ipika꞉ pota꞉ kini pea pua mo nate opa꞉la꞉ nanema꞉ kenke nane pulu ombu hayekeme.  
\v 2 Kutupa paa peekepate nate ma꞉nda꞉na꞉ kenke ma꞉nda꞉ pa꞉ta꞉ pa mone wieke naku ikali ma꞉nda꞉ pua handa꞉ wiekeme. Kutupa sipisipi tapake tepo mo naku ikali hopa꞉liao pelia yapemekeeki handeekeme. Mo naku ikali kakena꞉ta꞉ toopi tiekema꞉ mea a꞉mbaemekeme. Mo koto ikalita꞉ mo sipisipi ma꞉na꞉manu ikali no halo haemekeekie.  
\v 3 Kutupa mo tapake tapake paeyaona꞉ sipisipimanu paeyao koto homeke alena꞉ a꞉pa꞉tiki pimikita꞉ kota꞉ mo sipisipi handeteke haemeke haliwekima꞉ta꞉ mo toopi aneke mea petepete yao ikali no hala꞉tiki pimikime. Kutupa paeyeketa꞉ mo hande toopi paa mea wia꞉tiki pimikime.  
\v 4 Dieikopema꞉ mo sipisipi handeteke haemeke haliweki lota꞉ pitolo alota꞉ Yaka yankeke tonuo. Ikita꞉ hane tapake ya꞉ka꞉ta꞉pe leekeme. Ikana꞉ma꞉ hombo peaaso alota꞉ Hatani nanee lemekeme.   
\p
\v 5 Ipikana꞉ma꞉ lota꞉ pitolo alota꞉ Neihona꞉ eiyeke Leibenita꞉ handelemepe leeke mo tapakema꞉ alota꞉ Aowe. Handoloma꞉me lemekeme.   
\p
\v 6 Koto leeke alota꞉ Ipikita꞉ epeke tupa꞉ hala꞉pe leekeme. Ikana꞉ma꞉ hombo peaaso alota꞉ Ipikita꞉ epeke tupa꞉ hala꞉me. Handa꞉taa. Ipika꞉ waneke Leisolota꞉ atekena꞉ sipisipimanu mea koto ipula꞉ handa꞉e lemekeme.   
\p
\v 7 Koto lemeke Dieikopema꞉ alota꞉ Nate pa hala꞉ ekina꞉ mo sipisipimanu mea a꞉pa꞉peke nate a̱i̱ dia꞉ma꞉ ikali hala ambumanu nena꞉ paa na hatuku pulimipe leekeme.   
\p
\v 8 Mo tapakema꞉ hombo peaaso alota꞉ Nikana꞉ma꞉ta꞉ kotoeki a̱i̱ na pikita꞉ mo sipisipi paeyao ana꞉na꞉ a꞉pa haena꞉ laa mo toopi petepete yaota꞉ kota꞉ ikali no halumeke lemekeme.   
\p
\v 9 Dieikopeta꞉ mo haliweki ame̱le̱ pi pa alo haena꞉ Leisolota꞉ mo sipisipimanu ame̱le̱ opolo epeekeme.  
\v 10 Kutu pieke Dieikopema꞉ta꞉ mo aweke Leibenina꞉ sipisipimanu pita꞉ Leisolo epea꞉eki hata꞉ta꞉ oni naku ikali pa꞉ta꞉ pua mo toopi mea petepete yao mo sipisipimanu ikali no hale hale piekeme.   
\p
\v 11 Kutupa ipikana꞉ma꞉ta꞉ mo wandiki nunu pitolo hata꞉ ta꞉na꞉ pitolo kone e̱ leekeme.  
\v 12 Kutupa mo wandiki pa꞉ta꞉ alota꞉ I̱ta꞉ Lepekana꞉ eiyeke naka꞉ apa꞉na꞉ tapakee leekeme. Koto leeke mo wandikita꞉ ipika꞉ apa꞉ lolueke alo a̱i̱ya peekeme.  
\v 13 Kutupa atekema꞉ mo belikina꞉ eiyeke Dieikope epeekeeki opu haota꞉ a̱i̱ya manda꞉hande pulu pua hopula nunu piekeme. Kutupa mo da pa꞉ta꞉ hatuku epeekeme. Kota꞉ Dieikopema꞉ Leibeni pa꞉ta꞉ mo piekeeki paeyao la haleeke handa  
\v 14 Leibenima꞉ alota꞉ Aowe. Ota꞉e. Neketa꞉ yaka loke homeke make we homekee leekeme. Kutupa Dieikopeta꞉ sumba꞉ homeke koto pa꞉ta꞉ hayekeme.   
\s1 Dieikopema꞉ Leibenina꞉ e pokaeyekeeki  
\p
\v 15 Leibenima꞉ Dieikope pa꞉ta꞉ alota꞉ Neketa꞉ ya wanda꞉ma꞉ mendiki ya꞉la꞉ ekina꞉ yaka e pahameke pokaalueke hone na wikita꞉ yenki dupa mulueke laa lakie leekeme.  
\v 16 Leibenina꞉ wandiki yaapo hayekeme. Mupeke wandikita꞉ Lia yekeme. Wetepe wandikita꞉ Leisolo yekeme.  
\v 17 Liana꞉ leketa꞉ u homeekepate Leisolota꞉ epeke tupa꞉ lombeke wandiki seliapo yekeme.   
\p
\v 18 Dieikopema꞉ta꞉ Leisolo hone wopu pieke handa alota꞉ Yaka hone pa꞉la꞉ yenkita꞉ nakana꞉ma꞉ I̱ Leisolo miono leka꞉na꞉ta꞉ kota꞉ I̱ma꞉ naka꞉ e bapi wataake hata꞉na꞉ pokaalueke leekeme.   
\p
\v 19 Leibenima꞉ hombo peaaso alota꞉ I̱ma꞉ta꞉ ma꞉nda꞉ pa꞉ta꞉ halo polo tupa꞉ta꞉ epeke ekita꞉ neke pa꞉ta꞉ homeke kuluekema꞉ I̱ yaapo do pate hapana꞉e leekeme.  
\v 20 Dieikopema꞉ta꞉ Leisolo mulueke alo hata꞉ta꞉ bapi wataake hata꞉na꞉ e pokeekeme. Ipikana꞉ma꞉ta꞉ Leisolo pukima꞉ homeekeeki yalo ipiki pa꞉ta꞉ta꞉ mo bapi manuta꞉ pa nate tepo a꞉nda꞉ hone wiekeme.   
\p
\v 21 Kutupa Dieikopema꞉ Leibeni pa꞉ta꞉ alota꞉ Hande nateta꞉ do ma꞉la꞉ma꞉ naka꞉ wandiki miono lae leekeme.  
\v 22 Koto ekina꞉ Leibenima꞉ta꞉ wanda꞉ mina꞉la꞉ natena꞉ ne pambolo hata꞉ paeyaosiki wi leekeme.  
\v 23 Pate koto timbata꞉ Dieikope pa꞉ta꞉ Leisolo na hatuku peketa꞉ Lia hatuku peekeme. Kutupa Dieikopema꞉ta꞉ mo wandiki yaapo loke apa꞉taeyekeme.  
\v 24 Kutupa Leibenima꞉ta꞉ ipika꞉ wandiki Liana꞉ tamba꞉ mina꞉la꞉ wandiki ipika꞉ pa hameke e pokaasa꞉ wandiki Silipata꞉ Lia pa꞉ta꞉ haleekeme.  
\v 25 Dieikopema꞉ta꞉ timba ipika꞉ wanda꞉ yaapo peliolome hone wiekepate da ka꞉la꞉paasota꞉ mo wanda꞉ta꞉ Lia ya꞉ka꞉ta꞉me laa hande wiekeme. Kutupa ipiki Leibeni pa꞉ta꞉ pua alota꞉ Nakana꞉ma꞉ I̱ pa꞉ta꞉ta꞉ do hauta꞉ ekipeke pea pipe. I̱ma꞉ta꞉ Leisolo muluekema꞉ e poka pua꞉ma꞉ nakana꞉ma꞉ I̱ta꞉ ekipeke makeao pipee leekeme.   
\p
\v 26 Leibenima꞉ hombo peaaso alota꞉ Mo mupeke wandiki pa haena꞉ wetepena꞉ wandiki amba꞉la halina꞉ da pena꞉ ala꞉ ekita꞉ do da hau dia꞉me.  
\v 27 Koto ekina꞉ nakana꞉ma꞉ paa bapi wataake hata꞉ ma꞉nda꞉na꞉ yaka e paa pokaalena꞉ kota꞉ do pula homeke mo ne pamba꞉la꞉eki paena꞉ laa Leisolo make neke kuluekema꞉ hando hae leekeme.   
\p
\v 28 Dieikopema꞉ a꞉pa꞉la꞉me laata꞉ mo ne pambeeke pula homeke paeyeketa꞉ Leibenima꞉ waneke Leisolo make Dieikopena꞉ wanda꞉ haena꞉ haleekeme.  
\v 29 Leibenima꞉ ipika꞉ pa hameke e pokaasa꞉ wandiki Bilihata꞉ ipika꞉ wandiki Leisolona꞉ tamba꞉ mina꞉la꞉ wandiki haena꞉ haleekeme.  
\v 30 Dieikopema꞉ta꞉ Leisolo yaapo make loke apa꞉taeyekeme. Kutupa telipuna꞉ pukima꞉ homeekepate Leisolota꞉ pukima꞉ wopu homeekeme. Kutupa ipikana꞉ma꞉ta꞉ paa bapi wataake hata꞉ Leibenina꞉ e paa pokaeyekeme.   
\s1 Dieikopena꞉ mendiaeyeke wekiwandiki  
\p
\v 31 Dieikopema꞉ Liata꞉ Leisolo pieke tupa꞉ pukima꞉ wopu na homeeke handaa mo Tekehalima꞉ta꞉ Liata꞉ wekiwandiki mendina꞉ leekepate Leisolota꞉ weki kenohali hayekeme.  
\v 32 Liata꞉ weki loke lomba hali weki mondu wiekeme. Ipikana꞉ma꞉ alota꞉ Mo Tekehalima꞉ta꞉ yaka ka꞉nda꞉ handa I̱ tamba꞉ ma꞉la꞉ ekina꞉ yaka halikima꞉ta꞉ ameta꞉ I̱ pukima꞉ homilieke leekeme. Koto ekina꞉ mo wekina꞉ bikita꞉ Lubeni leekeme.  
\v 33 Weki loke paa lomba hali weki ma꞉nda꞉ mondu wiekeme. Ipikana꞉ma꞉ alota꞉ Ya halikima꞉ I̱ta꞉ pukima꞉ na homa꞉la꞉eki Tekehalima꞉ opu hao do weki ka꞉la꞉ ekina꞉ ipika꞉ bikita꞉ Simiono leekeme.  
\v 34 Mo wanda꞉ta꞉ weki loke paa lomba hali weki ma꞉nda꞉ ombu mondu wiekeme. Kutupa mo wanda꞉ma꞉ alota꞉ I̱ma꞉ yaka halikina꞉ weki tepo mondu wialo ekina꞉ yaka halikima꞉ta꞉ I̱ pa꞉ta꞉ hone witolo I̱ yaapo ta꞉ma꞉ni pilieke laa mo wekina꞉ bikita꞉ Lipai leekeme.  
\v 35 Kutupa weki loke paa lomba hali weki ma꞉nda꞉ ombu mondu wiekeme. Ipikana꞉ma꞉ alota꞉ Ameta꞉ Tekehalina꞉ biki mea mina꞉lialueke laa mo wekina꞉ bikita꞉ Diuda leekeme. Kutupa weki mondu tunkuliekeme.   
\c 30  
\p
\v 1 Pate Leisoloma꞉ta꞉ Dieikope weki ma꞉nda꞉ na mendiaaso hata꞉ta꞉ hakepiki pa꞉ta꞉ a꞉nda꞉ tunkulolo hata꞉ Dieikope pa꞉ta꞉ alota꞉ I̱ homuluekema꞉ wekiwandiki kie leekeme.   
\p
\v 2 Koto leeke Dieikopeta꞉ Leisolo yaapo mineke pankolo hata꞉ alota꞉ I̱ma꞉ta꞉ Koda꞉ topo pea꞉peke na ya꞉la꞉pate pa neke weki mendiaapa꞉na꞉ yeke ipikana꞉ma꞉ sa꞉sa꞉ pitolo pia꞉ka꞉ta꞉me leekeme.   
\p
\v 3 Koto ekina꞉ mo wanda꞉ma꞉ alota꞉ Yaka weki mendialo pa꞉la꞉ tupa꞉ yaka pa hameke e pokaasa꞉ wandiki doma꞉ pelia꞉peke. Kutu pilia꞉ ekima꞉ta꞉ ipiki pa꞉ta꞉ yama꞉ ama꞉ au loluekema꞉ loa꞉me leekeme.  
\v 4 Koto ekina꞉ ipika꞉ haliki pa꞉ta꞉ Biliha haleeke handa loke apa꞉taepekeme.  
\v 5 Kutupa Bilihata꞉ weki loke lomba Dieikopena꞉ hali weki mendiaeyekeme.  
\v 6 Leisoloma꞉ alota꞉ Koda꞉ma꞉ telipolo hata꞉ta꞉ I̱ ma̱leke lila꞉me. Ipikana꞉ma꞉ta꞉ yaka pua꞉ yeni opua weki ka꞉la꞉me leekeme. Koto ekina꞉ta꞉ mo wekina꞉ bikita꞉ Da꞉ni leekeme.  
\v 7 Kutupa Bilihata꞉ weki loke paa lomba ipikana꞉ma꞉ Dieikopena꞉ yaapo peao weki mondu wiayekeme.  
\v 8 Kutu pieke handaa Leisoloma꞉ alota꞉ I̱ma꞉ yaka asi yaapo a꞉nda꞉ tieke pua꞉pate I̱ma꞉ bepolalo ekina꞉ta꞉ kota꞉ mo wekina꞉ bikita꞉ Na꞉petali leekeme.   
\p
\v 9 Kutupa Liama꞉ta꞉ ipiki weki mondulu piekeeki tunkuliekeeki hando haota꞉ ipika꞉ pa hameke e pokaasa꞉ wandiki Silipata꞉ Dieikopema꞉ weteke au laena꞉ haleekeme.  
\v 10 Kutupa Silipama꞉ta꞉ Dieikopena꞉ hali weki mendiaeyekeme.  
\v 11 Kota꞉ Liama꞉ alota꞉ Epekeeki ma꞉nda꞉ I̱ pa꞉ta꞉ a꞉pa꞉la꞉me laa mo wekina꞉ bikita꞉ Ka꞉de leekeme.  
\v 12 Kutupa Silipama꞉ Dieikopena꞉ hali weki ma꞉nda꞉ mendiaeyeke ekina꞉  
\v 13 Liama꞉ alota꞉ I̱ta꞉ ta꞉na꞉ tieke wopu pa꞉la꞉me. Ameta꞉ wanda꞉wekima꞉ I̱ta꞉ ta꞉na꞉ma꞉ homa꞉la꞉ wanda꞉e lelimikie laa ipika꞉ bikita꞉ A꞉sia leekeme.   
\p
\v 14 Mo hande widi kina꞉ta꞉ Lubenita꞉ oni e pa꞉ta꞉manu pua mo ma꞉nda꞉teiki leke ti kiliki handa꞉ wia ipika꞉ inkiki Lia pa꞉ta꞉ a꞉pa haleekeme. Kutu pieke Leisoloma꞉ Lia pa꞉ta꞉ alota꞉ Pilisi naka꞉ wekina꞉ ti kiliki I̱ ma꞉nda꞉ kie leekeme.   
\p
\v 15 Koto leeke Liama꞉ hombo peaaso alota꞉ Nakana꞉ma꞉ yaka haliki pake nele ekita꞉ ana꞉ na pa꞉la꞉pe. Ameta꞉ pa yaka wekina꞉ ti kiliki tonka꞉na꞉ muluekema꞉ alepe leekeme. Kota꞉ Leisoloma꞉ alota꞉ Naka꞉ wekina꞉ ti kiliki I̱ ma꞉nda꞉ kika꞉na꞉ta꞉ kota꞉ ame timbata꞉ Dieikope yaapo poluelena꞉e leekeme.   
\p
\v 16 Kutupa welealo nane Dieikopeta꞉ oni e pa꞉ta꞉manu hao epeeke handaa Lia hama opolu bao manda꞉hande pulu pua alota꞉ I̱ma꞉ yaka wekina꞉ ti kilikima꞉ nekena꞉ amba꞉ hamboa꞉ma꞉ ame timbata꞉ I̱ yaapo pelipikie leekeme. Koto ekina꞉ koto timbata꞉ Dieikopema꞉ mo wanda꞉ yaapo peliekeme.   
\p
\v 17 Koda꞉ma꞉ Liana꞉ pieke yeni hombo peaasota꞉ weki loke lomba ipikana꞉ma꞉ Dieikopena꞉ yunki pao weki mendiaeyekeme.  
\v 18 Liama꞉ alota꞉ Yaka pa hameke e pokaasa꞉ wanda꞉ yaka haliki pa꞉ta꞉ haloeke handaa Koda꞉ma꞉ yaka yenki ka꞉la꞉mee laa mo wekina꞉ bikita꞉ Isaka leekeme.  
\v 19 Kutupa Lia weki loke paa lomba ipikana꞉ma꞉ Dieikopena꞉ yunki mindiki hata꞉ peao weki mendiaeyekeme.  
\v 20 Kutupa Liama꞉ alota꞉ Koda꞉ma꞉ I̱ pa꞉ta꞉ ota꞉ epeke pa kita꞉la꞉ ale ka꞉la꞉me. Koto ekina꞉ ameta꞉ yaka halikina꞉ yunki mindiki hata꞉ weki mendiaaso ekina꞉ I̱ pukima꞉ homa handa꞉ milieke laa mo wekina꞉ bikita꞉ Sebuloni leekeme.  
\v 21 Wetepena꞉ta꞉ Liama꞉ wandiki mondu wia bikita꞉ Daena leekeme.   
\p
\v 22 Kutupa Koda꞉ma꞉ Leisolo hone u haota꞉ ipika꞉ pieke yeni opua weki mendina꞉ leekeme.  
\v 23 Mo wanda꞉ta꞉ weki loke lomba hali weki mondu wiekeme. Kutupa alota꞉ Koda꞉ma꞉ yaka yala꞉ pa꞉la꞉ ekita꞉ weki kitolo hata꞉ mea baala꞉me.   
\p
\v 24 Koto ekina꞉ mo Tekehalima꞉ I̱ weki ma꞉nda꞉ paa kina꞉e alo hata꞉ koto wekina꞉ bikita꞉ Diosepe leekeme.   
\s1 Dieikopema꞉ Leibeni yaapo pi lo tonkaepekeeki  
\p
\v 25 Mo Diosepe mendia hoki naneta꞉ Dieikopema꞉ Leibeni pa꞉ta꞉ alota꞉ I̱ yaka da ponoma꞉ I̱ tapae laa alota꞉  
\v 26 Mo I̱ma꞉ naka꞉ e pokao molo wekiwanda꞉ mea hatuku mina꞉pa꞉lao pono lae. Pa ekipeke I̱ma꞉ naka꞉ e epeke tupa꞉ pokalo ekita꞉ naka꞉ hone wilimee leekeme.   
\p
\v 27 Koto leeke Leibenima꞉ ipiki pa꞉ta꞉ alota꞉ I̱ma꞉ doeki lono lae. Mo ale paeyao molo ekita꞉ I̱ma꞉ handeau opao handa꞉ witolo Koda꞉ma꞉ I̱ epeala꞉ ekita꞉ neke pa꞉ta꞉ yama꞉ pa꞉la꞉me laa hone ulume.  
\v 28 Koto ekina꞉ I̱ma꞉ neke hambuluekema꞉ naka꞉ yenki dupae laa lae leekeme.   
\p
\v 29 Dieikopema꞉ hombo peaaso alota꞉ I̱ma꞉ naka꞉ e pokaaloeki make yaka kiki tukiki pa꞉ta꞉ naka꞉ sipisipi ma꞉na꞉manu sa꞉mba꞉lala꞉eki make naka꞉ handeleme.  
\v 30 Mo I̱ a̱i̱ na epeke hano hosiki siki wia hae ekita꞉ ameta꞉ tieke kiake sa꞉mba꞉la꞉pa ula꞉me. Kutupa mo Tekehalima꞉ta꞉ I̱na꞉ yeke neke epeaala꞉me. Koto ekina꞉ ameta꞉ I̱ma꞉ yaka ekimanu handeteke halo polo natee leekeme.   
\p
\v 31 Koto leeke Leibenima꞉ alota꞉ I̱ma꞉ta꞉ neketa꞉ ekipuma꞉ hambonope leekeme. Dieikopema꞉ hombo peaaso alota꞉ I̱ta꞉ yenki kipa꞉la꞉me. Nakana꞉ma꞉ I̱ma꞉ do alo ekina꞉ a꞉pa꞉la꞉me leka꞉na꞉ta꞉ kota꞉ naka꞉ sipisipi ma꞉na꞉manu paa handeteke hawalueke.  
\v 32 Koto ekina꞉ ameta꞉ naka꞉ sipisipi polu pa꞉ta꞉ puata꞉ mo punu pa꞉la꞉ sipisipi ikikimanu make wape wape piki o au au la꞉la꞉ nanikosi ikikimanu make yata꞉pa meono lae. Kotoeki homeketa꞉ mo yaka hone pa꞉la꞉ yenkie.  
\v 33 Koto ekina꞉ta꞉ wetepe nina꞉ta꞉ I̱ma꞉ neke na makealomee laa ana꞉na꞉ handilipikie. Pa ekipeke nakana꞉ma꞉ yaka molo yenki handulueke alo epeka꞉na꞉ta꞉ mo I̱ma꞉ au au na la꞉la꞉ o wape wape na piki nanikosi o punu na piki sipisipi ma꞉nda꞉ wia haowa꞉ka꞉na꞉ta꞉ kota꞉ pake na꞉la꞉me laa handa꞉ wilipikie leekeme.   
\p
\v 34 Leibenima꞉ hombo peaaso alota꞉ A꞉pa꞉la꞉me. Mo nakana꞉ma꞉ aleeki ota꞉ pupana꞉e leekeme.  
\v 35 Pate koto natena꞉ kone Leibenima꞉ta꞉ mo wape da꞉peda꞉pe piki o au au leke nanikosi hali ekimanu make mo au au leke wanda꞉ ma꞉na꞉ paeyao siki make kutupa mo punu piki sipisipi paeyao make yata꞉po miekeme. Kutupa ipika꞉ weki tonu paeyaoma꞉ handeteke haena꞉ laata꞉  
\v 36 Dieikope mina꞉pa꞉lao koto au au leke ma꞉na꞉manu mea nate tepona꞉ polo pieke tupa꞉ papate mea pemekeme. Kutupa Dieikopema꞉ta꞉ mo hande mina꞉pa꞉laeyeke au au na leke ma꞉na꞉manu handeteke hayekeme.   
\p
\v 37 Dieikopema꞉ta꞉ mo ta꞉ta꞉ ta꞉ta꞉ piki ti palekemanu mea hake pu lopa lopa pina꞉ta꞉ mandane yonkelekemanu loka꞉la꞉ mepi piekeme.  
\v 38 Kutupa ipikana꞉ma꞉ta꞉ do ti paleke manuta꞉ mo ma꞉na꞉ manuna꞉ ikali no haemeke kawaso wieke alena꞉ pua nokopeekeme. Ipikana꞉ma꞉ koto pate wieke ekita꞉ mo ma꞉na꞉ manuma꞉ta꞉ ikali nolo a꞉pa koto pate tia꞉tiki pieke piekeme.  
\v 39 Kutupa mo nanikosi manuma꞉ mo ti palekemanu nokopeeke alena꞉ tia꞉tiki pimikita꞉ kota꞉ mo panake mendia꞉tiki pimiki ikiki sunuta꞉ au au la make wape wape piki ekimanu mondu wia꞉tiki pimikime.   
\p
\v 40 Koto ekina꞉ Dieikopema꞉ta꞉ mo sipisipita꞉ nanikosi yaapo na apa꞉take ta꞉ta꞉ haena꞉ laata꞉ mo koto sipisipi paeyaota꞉ mo Leibenina꞉ au au leke make punu piki sipisipimanu haya꞉ nanema꞉ leke popeleke yao haena꞉ leekeme. Dupieke ekima꞉ta꞉ ipika꞉ ma꞉na꞉manu aneke hapu sa꞉mba꞉la꞉pa witolo hata꞉ mo Leibenina꞉ ma꞉na꞉manu ta꞉ta꞉ putupa haena꞉ leekeme.  
\v 41 Kutupa mo hande panka wiki wanda꞉ ma꞉na꞉ manuna꞉ puteke pambiekeeki handolota꞉ Dieikopema꞉ta꞉ mo ma꞉na꞉ manuma꞉ ikali no haemeke kawaso wieke alena꞉ tia꞉tiki pina꞉ yeketa꞉ mo ti paleke manuta꞉ koto pate noka꞉pa꞉tiki piekeme.  
\v 42 Pate mo honkopu na hake ma꞉na꞉manu haemeke alena꞉ta꞉ mo ti palekemanu na wia꞉tiki piekeme. Kutu pieketa꞉ Leibenita꞉ mo honkopu na hake ma꞉na꞉manu minolo hata꞉ Dieikopeta꞉ mo panka wiki ma꞉na꞉manu wia hayekeme.  
\v 43 Kutu pieke ekima꞉ta꞉ Dieikopeta꞉ hamoko tieke hayekeme. Ipikita꞉ sipisipi pita꞉ nanikosimanu make pa hameke e pokaasa꞉ tapake make kemelomanu make donkimanu make ota꞉ wopu wia hayekeme.   
\c 31  
\s1 Dieikope pindipa peekeeki  
\p
\v 1 Dieikopema꞉ta꞉ mo Leibenina꞉ eiyeke tonuma꞉ lemekeeki opieke ekita꞉ dupae. Dieikopema꞉ta꞉ mo nika꞉ apa꞉ma꞉ wia haya꞉ ale paeyao ma꞉la꞉me laa Ipika꞉ hamoko hala꞉ ekita꞉ mo nika꞉ apa꞉na꞉eki ma꞉la꞉ ekima꞉ pa꞉la꞉mee lemekeeki opiekeme.  
\v 2 Kutupa make ipikana꞉ma꞉ mo Leibenita꞉ amba꞉ta꞉ homu piekepate ameta꞉ leke tankema꞉ handeekeeki handeekeme.  
\v 3 Koto ekina꞉ mo Tekehalima꞉ ipiki pa꞉ta꞉ alota꞉ Mo naka꞉ apa꞉na꞉ kenke nane make naka꞉ tapake pa꞉ta꞉ make paa pue. Kutupa I̱ta꞉ neke yaapo halueke leekeme.   
\p
\v 4 Koto leeke Dieikopema꞉ta꞉ Leisolo pita꞉ Lia yaapo pa꞉ta꞉ mo ipika꞉ ma꞉na꞉manu hayeke alena꞉ ipiki a꞉pa manda꞉hande pia꞉pa꞉peke laa pi tapaeyekeme  
\v 5 Kutupa ipikana꞉ma꞉ mo wanda꞉ yaapo pa꞉ta꞉ alota꞉ Ipilika꞉ apa꞉ma꞉ta꞉ I̱ pa꞉ta꞉ amba꞉ pia꞉ tupa꞉ homu na piki pa leke tankema꞉ handa꞉la꞉eki I̱ma꞉ handolome. Kutu pa꞉la꞉pate yaka apa꞉na꞉ Koda꞉ma꞉ta꞉ I̱ yaapo hala꞉me.  
\v 6 Yaka welema꞉ ipilika꞉ apa꞉na꞉ e pokalo ekita꞉ hone wilipime.  
\v 7 Kutu pua꞉pate ipikana꞉ma꞉ta꞉ I̱ makeao make yaka yenki manuta꞉ hoto kiki yaapo natena꞉ honditi pa꞉la꞉mee. Koto pina꞉ kone Koda꞉ma꞉ta꞉ ipikana꞉ma꞉ I̱ na hoeyaena꞉ lea꞉me.  
\v 8 Pa mo ipilika꞉ apa꞉ma꞉ alota꞉ Mo au au lelie nanikosi manuta꞉ naka꞉ yenkie laa la꞉tiki pieketa꞉ kota꞉ mo ma꞉na꞉ paeyaoma꞉ta꞉ au au lekeeki mondu pamba꞉tiki piekeme. Kutupa paa alota꞉ mo wape wape pilia꞉ nanikosita꞉ naka꞉ yenkie pa la꞉tiki pia꞉ dina꞉ta꞉ kota꞉ mo ma꞉na꞉ paeyaoma꞉ta꞉ wape wape pikieki homeke mondu pamba꞉tiki pia꞉me.  
\v 9 Kota꞉ Koda꞉ma꞉ta꞉ mo naka꞉ apa꞉na꞉ ma꞉na꞉ manuta꞉ pao mea I̱ pa꞉ta꞉ ka꞉la꞉me.   
\p
\v 10 Mo ma꞉na꞉manu tita꞉la꞉ kina꞉ta꞉ I̱ma꞉ dupiki upa pua꞉me. Mo tia꞉tiki pimi nanikosi halieki manuta꞉ au au laa make wape wape pikieki homeke handoa꞉me.  
\v 11 Kutupa mo Koda꞉na꞉ enisoloma꞉ upama꞉ I̱ pa꞉ta꞉ alota꞉ Dieikopeo leeke I̱ma꞉ Wae loa꞉me.  
\v 12 Koto loeke alota꞉ Handa꞉e. Mo tita꞉la꞉ nanikosi halieki manuta꞉ mo au au leke make wape wape piki ekimanu homekee. Dupita꞉la꞉ ekita꞉ mo Leibenima꞉ neke pa꞉ta꞉ pita꞉la꞉eki handolo hata꞉ I̱ma꞉ dupiki hau pina꞉ alome.  
\v 13  I̱ta꞉ nakana꞉ma꞉ mo hande toopita꞉ hone u tiaasa꞉ ale wina꞉ la olipi oeta hola keke pi la꞉ wi ale Bedele hama pa꞉ta꞉ peneme yao epoa꞉ Koda꞉e. Koto ekina꞉ ameta꞉ mo neke mendia꞉ kenke nane polena꞉ tikitiki yae laa lea꞉me leekeme.   
\p
\v 14 Koto leeke Leisolo pita꞉ Lia yaapoma꞉ Dieikopena꞉ pi hombo peaaso alota꞉ Mo dikana꞉ma꞉ dika꞉ apa꞉ pa꞉ta꞉ mea꞉peke ale ma꞉nda꞉ dia꞉me.  
\v 15 Ipikana꞉ma꞉ dikita꞉ da ma꞉nda꞉ wanda꞉ma꞉ handaala꞉me. Ipikana꞉ma꞉ta꞉ diki tapao mia꞉ manita꞉ na꞉ta꞉ pa꞉la꞉me.  
\v 16 Mo Koda꞉ma꞉ dika꞉ apa꞉na꞉ alemanu paeyao ma꞉la꞉ ekita꞉ dika꞉eki make diki wekiwandikina꞉eki konee. Koto ekina꞉ mo Koda꞉ma꞉ neke la ka꞉la꞉eki kone pie lepekeme.   
\p
\v 17-18 Koto ekina꞉ Dieikopeta꞉ mo ateke hayeke alena꞉ Keinani nane poluekema꞉ tikitiki yaeyekeme. Ipika꞉ wekiwandiki make weteke tonu make mo kemelomanu manda pitaeyekeme. Kutupa ipika꞉ ma꞉na꞉manu paeyao make mo ipika꞉ Mesopoteimia hata꞉ mieke alemanu paeyao mea pulu haena꞉ leekeme.  
\v 19 Leibenita꞉ ipika꞉ sipisipi manuna꞉ itiki tunkulu pu moneayeke hoki nane haena꞉ Leisoloma꞉ta꞉ atekena꞉ da pa꞉ta꞉ pa wepia wieke koda꞉manu pake miekeme.  
\v 20 Dieikopema꞉ta꞉ ipiki mina꞉pa꞉laasome laa Leibeni na opuaeyeke ekima꞉ta꞉ Leibeni makeaeyekeme.  
\v 21 Ipikana꞉ma꞉ta꞉ ipika꞉ alemanu paeyao mea ipupulo mina꞉pa꞉laeyekeme. Kutupa mo Yupoteitisi ikali yuma pua mo yu elimanu wiki Kilia꞉de kenke nane polueke alo pemekeme.   
\s1 Leibenima꞉ Dieikope telimea peekeeki  
\p
\v 22 Nate tepo paeyeketa꞉ Dieikopeta꞉ pindipa pa꞉la꞉me laa ma꞉nda꞉ma꞉ Leibeni la haleekeme.  
\v 23 Kutu pieke handaa ipika꞉ haliweki hatuku hoto wataake hata꞉ natena꞉ Dieikope telia꞉ mea pua mo yu eli hapeleke Kilia꞉de kenke pa꞉ta꞉ pua teliminimikime.  
\v 24 Koto timbata꞉ Koda꞉ma꞉ Leibeni pa꞉ta꞉ upama꞉ alota꞉ Nakana꞉ma꞉ Dieikopena꞉ ala꞉ta꞉ ma꞉nda꞉ mulueke alo hata꞉ paala꞉ tiaapeke hau ma꞉nda꞉ ota꞉ na pea꞉peke laa leekeme.  
\v 25 Dieikopema꞉ta꞉ ipika꞉ palai da manuta꞉ mo pote pa꞉ta꞉ a꞉eyekeme. Kutupa make Leibeni ipika꞉ palai data꞉ ipika꞉ da haliweki ame̱le̱ mo pote eli wiki Kilia꞉de kenke pa꞉ta꞉ a꞉eyekeme.   
\p
\v 26 Leibenima꞉ Dieikope pa꞉ta꞉ alota꞉ Nakana꞉ma꞉ I̱ta꞉ ekipeke makeao mo yaka wandiki yaapota꞉ mo a꞉nda꞉ pa꞉ta꞉ dipula mina꞉la꞉ wanda꞉wekima꞉ handeke tupa꞉ hatuku mea a꞉pa pelepe.  
\v 27 I̱ta꞉ ekipeke makeao I̱ na opuake yopusiki doda꞉pikima꞉ a꞉pa pelepe. Nakana꞉ma꞉ I̱ lekena꞉ yoluta꞉ mo neke tapaaso hata꞉ pota꞉na꞉ ta꞉na꞉ma꞉ homolo kida make tapekema꞉ handeke ale make litolo hata꞉ emelimanu lo tapaalo pua꞉me.  
\v 28 Nakana꞉ma꞉ta꞉ yaka wandiki yaapona꞉ wekiwandiki make yaka wandiki yaapo make a꞉taloe pi alo hata꞉ nunu na piono lemee. Koto hauta꞉ ota꞉ ti na piki hau peleme.  
\v 29 I̱ma꞉ta꞉ neke hoeyalo polo honkoputa꞉ ula꞉pate naka꞉ apa꞉na꞉ Koda꞉ma꞉ta꞉ ambaneke timba I̱ kinki pitolo alota꞉ Neke paala꞉ tiaapeke hau ma꞉nda꞉ ota꞉ na pea꞉peke lea꞉me.  
\v 30 I̱ma꞉ hone witolota꞉ neketa꞉ da a̱i̱ a꞉pawema꞉ ta꞉na꞉ma꞉ homolo hata꞉ pelepate ekipeke ya da pa꞉ta꞉ ua꞉ koda꞉ alemanu pake naa a꞉pa pelepe leekeme.   
\p
\v 31 Koto leeke Dieikopema꞉ hombo peaaso alota꞉ Yaka honema꞉ta꞉ nakana꞉ma꞉ naka꞉ wandiki yaapo pao milipipatema꞉ I̱ma꞉ paala꞉ma꞉ homoa꞉me.  
\v 32 Pate ma꞉nda꞉ epima꞉ naka꞉ wepia wiki koda꞉manu wia haemeka꞉na꞉ta꞉ kota꞉ koto someta꞉ lu homaena꞉e. Do dika꞉ haliwekima꞉ wekitisi haaso haena꞉ta꞉ pa naka꞉ alemanu weiya naka꞉ ekita꞉ mia꞉peke laa leekeme. Koto leekeeki Dieikopema꞉ta꞉ mo Leisoloma꞉ Leibenina꞉ wepia wieke koda꞉manu pake neekeeki na handeekeme.   
\p
\v 33 Koto leeke Leibenima꞉ta꞉ Dieikopena꞉ palai da pa꞉ta꞉ pua weiya kutupa Liana꞉ palai da pa꞉ta꞉ make mo pa hameke e pokaasa꞉ wanda꞉ yaapona꞉ palai da pa꞉ta꞉ make pua weiyekepate ipika꞉ wepia wieke koda꞉manu na handa꞉ wiekeme. Kutupa Leisolona꞉ palai da pa꞉ta꞉ peekeme.  
\v 34 Leisoloma꞉ta꞉ mo hande da pa꞉ta꞉ wieke wepia wieke koda꞉ manuta꞉ mo kemelo ma꞉na꞉na꞉ hoki manda yama pita꞉la꞉ seama꞉ handeke alena꞉ u hayeke nu pa꞉ta꞉ mendia ipikita꞉ manda pua pitiekeme. Leibenima꞉ta꞉ mo palai da pa꞉ta꞉ weiyekepate na handa꞉ wiekeme.  
\v 35 Leisoloma꞉ ateke pa꞉ta꞉ alota꞉ Apa꞉o. I̱ yaapo mineke na panka꞉peke. Mo naka꞉ leke popelekena꞉ I̱ na tiao halo ekita꞉ I̱ta꞉ kaisepo da handolome laa leekeme. Kota꞉ Leibenima꞉ta꞉ weiyekepate ipika꞉ wepia wieke koda꞉manu ota꞉ na handa꞉ wiekeme.   
\p
\v 36 Kutu pieke handaa Dieikopeta꞉ mineke tunkulu mea nalo hata꞉ alota꞉ I̱ma꞉ta꞉ ekipiki ata꞉ka꞉ peaasa꞉eki polope laa mineke pankolo hata꞉ lota꞉ pitolo alota꞉ Mo I̱ telia꞉ mea epele ekita꞉ I̱ma꞉ hando tombo ula꞉ pi yambololo ekima꞉ pie leeke pelepe.  
\v 37 Ameta꞉ nakana꞉ma꞉ yaka ala꞉ta꞉ ala꞉ta꞉ paeyao koto talo pelema꞉ mo naka꞉ da pa꞉ta꞉ ula꞉ ale manuta꞉ hando ekimanu handa꞉ wilipe. Naka꞉ haliwekima꞉ make yaka haliwekima꞉ make handolota꞉ epima꞉ta꞉ ota꞉ hau pa꞉la꞉mee lena꞉ma꞉ do hamekena꞉ mea wie.  
\v 38 I̱ma꞉ta꞉ 20 bapina꞉ neke yaapo haowa꞉me. Naka꞉ sipisipi manuma꞉ make nanikosi manuma꞉ make ikiki pa epeke ombu mendiolo haememe. Kutupa make I̱ma꞉ta꞉ naka꞉ sipisipi hali ekimanu homeke ma꞉nda꞉ ota꞉ na lu noa꞉me.  
\v 39 Mo tikene ma꞉na꞉ yeti sayalema꞉ naka꞉ sipisipi ma꞉nda꞉ lu neeketa꞉ kota꞉ I̱ma꞉ta꞉ ota꞉ yaka kone epeatiki pua꞉me. I̱ma꞉ta꞉ yaka pu hoeyaasoeki dia꞉me laa loluekema꞉ta꞉ neke na a꞉pa wala꞉tiki pua꞉me. Kutupa nakana꞉ma꞉ta꞉ mo timba o natena꞉ pake na꞉tiki pia꞉ ekita꞉ I̱ pa꞉ta꞉ ota꞉ a̱i̱ koto kone epeae laa la꞉tiki pime.  
\v 40 Hoto anekema꞉ mo natena꞉ta꞉ nate titipuma꞉ homa꞉la꞉eki mea꞉tiki pea timbata꞉ kosa꞉ma꞉ homa꞉tiki pitolo u pelia꞉peke na ya꞉tiki pia꞉me.  
\v 41 Koto hauta꞉ mo hande neke yaapo hatia pu haowa꞉ 20 bapi tukiki pa꞉ta꞉ pia꞉ekie. I̱ma꞉ta꞉ 14 bapita꞉ naka꞉ wandiki yaapo muluekema꞉ naka꞉ e pokaoka꞉na꞉ mo yunki mindiki hata꞉ bapina꞉ta꞉ naka꞉ ma꞉na꞉manu ma꞉nda꞉ muluekema꞉ handeteke haowa꞉me. Kutu piono kone nakana꞉ma꞉ta꞉ yaka yenkita꞉ hoto kiki yaapona꞉ topo pime.  
\v 42 Mo yaka apa꞉tonu Eipoloha꞉ma꞉ Aisa꞉ke yaapona꞉ Koda꞉ I̱ yaapo na hata꞉ yoluta꞉ nakana꞉ma꞉ I̱ta꞉ amba꞉ kone kiki hameke pono tapaalo pime. Pate Koda꞉ma꞉ta꞉ yaka ka꞉nda꞉ make I̱ma꞉ pokoa꞉ e make hando haota꞉ ambaneke timbata꞉ ipiki paeyaaso hata꞉ I̱ ma̱leke lia pia꞉me leekeme   
\s1 Dieikope pita꞉ Leibeni yaapona꞉ pi lo tonkaepekeeki  
\p
\v 43 Leibenima꞉ Dieikope pa꞉ta꞉ hombo peaaso alota꞉ Do wandiki yaapota꞉ yaka wandiki yaapoe. Ipilika꞉ wekiwandikita꞉ yaka ekie. Kutupa do ma꞉na꞉manu paeyaota꞉ yaka ekie. Handa꞉taa. Do ale paeyaota꞉ yakaeki ya꞉la꞉me. Pate I̱ma꞉ta꞉ do yaka wandiki yaapo make ipilika꞉ wekiwandiki make pao muluekema꞉ta꞉ hau ma꞉nda꞉ pea꞉peke na ya꞉la꞉ ekina꞉ta꞉  
\v 44 kota꞉ neke yaapo a꞉pa꞉la꞉me laa pi tonkaluekema꞉ta꞉ I̱ta꞉ tikitiki yao halome. Ameta꞉ mo dika꞉ pi tonkao witolopa꞉eki niminao haluekema꞉ta꞉ toopimanu mu momba꞉la hombuta꞉ hapana꞉e leekeme.   
\p
\v 45 Koto leeke Dieikopema꞉ta꞉ niminao halo pieke toopi mea haena꞉ laata꞉  
\v 46 ipika꞉ haliweki pa꞉ta꞉ alota꞉ Mandane toopimanu mu hombuta꞉ hape leekeme. Kutupa koto toopimanu mea hombuta꞉ hayeke ale tea꞉ naneta꞉ iki paeyao pita꞉ ne nemekeme.  
\v 47 Koto pateta꞉ Leibenima꞉ta꞉ Dieka Sahaduda leekeme. Kutupa Dieikopema꞉ta꞉ Ka꞉lidi leekeme.  
\v 48 Leibenima꞉ Dieikope pa꞉ta꞉ alota꞉ Do mu mombololopa꞉ toopi manuma꞉ta꞉ diki telipuna꞉ hone u tialieke leekeme. Koto ekina꞉ yeke koto pateta꞉ Ka꞉lidi leekeme.  
\v 49 Leibenima꞉ ombu alota꞉ Diki ta꞉ta꞉ pualu pupa꞉ka꞉na꞉ maketa꞉ Tekehalima꞉ diki handeteke haena꞉e laa mo alena꞉ta꞉ biki ma꞉nda꞉ Misipa make leekeme.  
\v 50  Leibenima꞉ pi paa alo alota꞉ Nakana꞉ma꞉ yaka wandiki yaapo epeke tupa꞉ na handeteke hake o wanda꞉ ma꞉nda꞉ mu pika꞉na꞉ta꞉ I̱ma꞉ta꞉ na opulu polopate Koda꞉ma꞉ta꞉ diki handa꞉la꞉me laa hone wia꞉peke.  
\v 51 Dota꞉ neke diki tukikina꞉ I̱ma꞉ mu mombololo toopi manue. Kutupa do toopita꞉ niminapeke toopie.  
\v 52 Do mombololopa꞉ toopimanu make do niminapeke ekina꞉ toopi maketa꞉ diki hone u tialo pa꞉la꞉ekie. Koto ekina꞉ I̱ma꞉ta꞉ neke hoeyaluekema꞉ta꞉ do mombololopa꞉ toopimanu ankulao na ipulueke. Kutupa nakana꞉ma꞉ I̱ hoeyaluekema꞉ta꞉ do toopimanu o do niminapeke toopi ula꞉eki ankulao na a꞉pa꞉peke.  
\v 53 Mo Eipoloha꞉ma꞉ pita꞉ Neiho yaapona꞉ Koda꞉ma꞉ dika꞉ haumanu telipaena꞉e leekeme. Koto leeke ekina꞉ Dieikopema꞉ta꞉ mo ipika꞉ apa꞉ Aisa꞉kema꞉ yeiya꞉ lao yeni pu hayeke Koda꞉na꞉ bikina꞉ mo pi la꞉ wipikieki opulueke laa keke pi la꞉ wiekeme.  
\v 54 Kutupa ipikana꞉ma꞉ ma꞉na꞉ ma꞉nda꞉ liata꞉ mo potena꞉ Koda꞉ pa꞉ta꞉ yeni hau pea ipika꞉ haliweki wi la꞉ meata꞉ ne nemekeme. Ne no paeyaota꞉ koto timbata꞉ mo pote pa꞉ta꞉ pelimikime.  
\v 55 Da kelepeeketa꞉ Leibenima꞉ ipika꞉ wandiki yaapona꞉ wekiwandiki make waneke yaapo make nunu peata꞉ paa da poluekema꞉ la꞉ka꞉la peekeme.   
\c 32  
\s1 Dieikopema꞉ Iso manda꞉hande puluekema꞉ tikitiki yaeyeke ekie.  
\p
\v 1 Dieikope pota꞉na꞉ pulu haena꞉ta꞉ mandane enisolomanu manda꞉hande piekeme.  
\v 2 Kutaa ipikana꞉ma꞉ mo enisolomanu hando hao alota꞉ Dota꞉ Koda꞉na꞉ ta꞉ka꞉li dae laa Koto pateta꞉ Mahaneimi leekeme.   
\p
\v 3 Dieikopema꞉ta꞉ mo Idomo kenke nane hameke Iso pa꞉ta꞉ pi mea polo pieke haliweki amba꞉la pulu haena꞉ tapaeyekeme.  
\v 4 Ipikana꞉ma꞉ mo haliweki pa꞉ta꞉ dupa pua lapa꞉peke laa la halolo alota꞉ I̱ta꞉ naka꞉ pi opua e pokaasa꞉ some Dieikopema꞉ yaka you hali Iso neke pa꞉ta꞉ do pi lo tapaasome. I̱ta꞉ a̱i̱ na epoa꞉ ekita꞉ Leibeni yaapo hao ameta꞉ paa la꞉ka꞉la ipulume.  
\v 5 I̱ma꞉ta꞉ kaomanu make donkimanu make sipisipimanu make nanikosimanu make pa hameke e pokaasa꞉ wanda꞉hali make miniki ipulume. Ya tiekeo. I̱ta꞉ ta꞉na꞉ma꞉ homa handa꞉ mina꞉lepe laa do pi tapaasome laa lapa꞉peke leekeme.   
\p
\v 6 Kutupa mo pi mea pemeke haliweki Dieikope pa꞉ta꞉ paa la꞉ka꞉la ipulu alota꞉ Nikita꞉ naka꞉ kame Iso pa꞉ta꞉ pua lomeke handaa ipikita꞉ neke manda꞉hande pulueke alo hata꞉ amba꞉ pota꞉na꞉ ipula꞉me. Kutupa ipikita꞉ 400 haliweki ame̱le̱ ipula꞉me laa lemekeme.  
\v 7 Koto ekina꞉ Dieikopeta꞉ paala꞉ma꞉ homolo hata꞉ hone ti yokeekeme. Kutupa ipikana꞉ma꞉ta꞉ mo ipiki ame̱le̱ haemeke wanda꞉hali make ipika꞉ sipisipimanu make nanikosimanu make kaomanu make kemelomanu make tapake yaapo putupa꞉ alu piekeme.  
\v 8 Ipika꞉ honema꞉ta꞉ Isoma꞉ mo titina꞉ tapake a꞉pa hoeyaeya꞉ka꞉na꞉ta꞉ kota꞉ mo wetepena꞉ ekita꞉ pindipina꞉e hone wiekeme.   
\p
\v 9 Kutupa Dieikopema꞉ yeni pitolo alota꞉ Yaka mei Eipoloha꞉ma꞉ pita꞉ yaka apa꞉ Aisa꞉ke yaapona꞉ Koda꞉o. Yaka pi opie. Tekehalio. Nakana꞉ma꞉ I̱ pa꞉ta꞉ta꞉ mo yaka kenke pa꞉ta꞉ make yaka tapake pa꞉ta꞉ make paa la꞉ka꞉la pue laata꞉ Nakana꞉ma꞉ta꞉ ala꞉ta꞉ ala꞉ta꞉ paeyao epealueke laa I̱ la kimee.  
\v 10 I̱ta꞉ naka꞉ e pokaaso hali hata꞉ nakana꞉ma꞉ I̱ pa꞉ta꞉ a꞉ta꞉ma꞉ homa tamba꞉ mina꞉la꞉eki make kima꞉ na homa꞉la꞉eki make ki ekita꞉ I̱ta꞉ ana꞉ na pa꞉la꞉me. I̱ma꞉ta꞉ mone yopuluta꞉ mo hande Diodani ikalita꞉ ala꞉ta꞉ ma꞉nda꞉ na miniki pa tumapu piti homeke yumua꞉pate pa ame ipuluta꞉ do tapake yaapo ame̱le̱ ipulume.  
\v 11 Koto ekina꞉ ya Tekehalio I̱ta꞉ yaka kame Isoma꞉ pulu pa꞉la꞉ ekina꞉ I̱ pa꞉ta꞉la꞉e. Ipikita꞉ niki ame̱le̱ a꞉nda꞉ pea niki paeyao make mo wekiwanda꞉ make hoeyaaluekema꞉ ipula꞉ ekina꞉ I̱ paala꞉ pita꞉la꞉mee.  
\v 12 Nakana꞉ma꞉ta꞉ I̱ pa꞉ta꞉ pi la꞉ witolo mo ala꞉ta꞉ ala꞉ta꞉ paeyao epeao make kutupa I̱ma꞉ monduma꞉ monduma꞉ pulua꞉ wekiwandikina꞉ wekiwandikita꞉ ma꞉nda꞉ma꞉ na yata꞉polo pa꞉la꞉ tupa꞉ mo dawala tea꞉na꞉ ula꞉ ikali houma꞉ handekeeki kulueke laa la꞉ wi pita꞉ hone wie laa Koda꞉ pa꞉ta꞉ yeni piekeme.   
\p
\v 13-15 Koto timbata꞉ koto pate peliolo hata꞉ta꞉ Dieikopema꞉ta꞉ hameke Iso pa halo pieke ma꞉na꞉manu dupa yata꞉po miekeme. Nanikosita꞉ 200 wanda꞉eki pita꞉ 20 halieki make sipisipita꞉ 200 wanda꞉eki pita꞉ 20 halieki make kemelota꞉ 30 ikiki andu haleekeeki pita꞉ ika꞉ ikiki tonu make 40 kaomanu make kiki yaapo kao halieki make donkita꞉ 20 wanda꞉ ekimanu pita꞉ kiki yaapo donki halieki make paeyao yata꞉po miekeme  
\v 16 Kutupa ipikana꞉ma꞉ta꞉ ika꞉ homeke tapake tapake sununa꞉ haena꞉ loma꞉ loma꞉ peata꞉ homeke homekena꞉ta꞉ hali homekema꞉ handeteke haena꞉ loma꞉ loma꞉ pina꞉ leekeme. Kutupa mo haliweki pa꞉ta꞉ alota꞉ Iki amba꞉la pulu hata꞉ta꞉ mo homeke homeke ma꞉na꞉ tapakena꞉ tukikina꞉ta꞉ waleke uma꞉ uma꞉ pina꞉ lapa꞉peke laa mana꞉ leekeme.  
\v 17 Kutupa mo titina꞉ ma꞉na꞉ mea peeke some pa꞉ta꞉ alota꞉ Mo yaka kame Isoma꞉ neke manda꞉hande pea neke lota꞉ pitolo Naka꞉ you someta꞉ epi ya꞉ka꞉ta꞉pe o Hane pulipe o Do ipulimi ma꞉na꞉ manuta꞉ epina꞉ ekipe laa lota꞉ pia꞉ka꞉na꞉ta꞉  
\v 18 kota꞉ nakana꞉ma꞉ dupa hombo peaapeke. Ikita꞉ mo naka꞉ e pokaasa꞉ hali Dieikopena꞉ ekie. Ipikana꞉ma꞉ta꞉ mo ipika꞉ you some Iso pa꞉ta꞉ pa hameke hala꞉la꞉eki tapaala꞉me. Kutupa Dieikope ipikita꞉ nika꞉ hoki nane ipula꞉me laa lapeke leekeme.  
\v 19 Kutupa mo hoki pa꞉ta꞉ hali make tepo peao hali pa꞉ta꞉ make mo paeyao pa꞉ta꞉ make homeke pi kone loma꞉ loma꞉ pitolo hata꞉ alota꞉ Iso manda꞉hande pimika꞉na꞉ta꞉ dupa lapa꞉peke laa la halolota꞉  
\v 20 dupa make lapa꞉peke. Aowe. Naka꞉ e pokaasa꞉ hali Dieikopeta꞉ nika꞉ hoki nane kone ipula꞉me lapa꞉peke leekeme. Dieikopena꞉ honema꞉ta꞉ mo pa hameke hala꞉la꞉ ale manuma꞉ hamekena꞉ puki epeao kutupa ipiki pua manda꞉hande pua꞉ka꞉na꞉ta꞉ I̱ma꞉ pua꞉ hauta꞉ pa paeyawalieke laa honema꞉ piekeme.  
\v 21 Koto ekina꞉ mo pa hala꞉la꞉ ale manuta꞉ titina꞉ pulu haena꞉ta꞉ koto timba ipikita꞉ mo ipika꞉ palai da pa꞉ta꞉ peliekeme.   
\s1 Dieikopema꞉ Penielo kenke pa꞉ta꞉ tonka꞉neli piekeeki  
\p
\v 22 Koto homeke timba koneta꞉ Dieikope tiao ipika꞉ wanda꞉ yaapo make mo e pokaepeke wanda꞉ yaapo make ipika꞉ kiki yaapona꞉ ankena꞉ homeke wekiwandiki make mo Dia꞉boko ikali yuma꞉ pa pena꞉ tapaeyekeme.  
\v 23 Kutupa mo tapake tapaota꞉ ipika꞉ ala꞉ta꞉ ala꞉ta꞉ paeyao siki make tapaeyekeme.  
\v 24  Pate ipikita꞉ ipika꞉ siki pao hayekeme. Kutupa koto timbata꞉ hali ma꞉nda꞉ a꞉pa ipiki yaapo tonka꞉neli pitolo haena꞉ta꞉ da kelepeekeeki teke pa꞉ta꞉ mieke mina꞉pa꞉laluekema꞉  
\v 25 mo somema꞉ mo tonka꞉neli pita꞉la꞉ ekita꞉ ipikana꞉ma꞉ na bepolapeke ya꞉ka꞉ta꞉me laa handolo hata꞉ kota꞉ mo Dieikopena꞉ pelimokona꞉ lieke handaata꞉ pelimoko yoka꞉ endiaeyekeme.  
\v 26 Kutupa mo halima꞉ alota꞉ Da ka꞉la꞉pa꞉la꞉me. I̱ pono lae leeke handaa Dieikopema꞉ hombo peaaso alota꞉ Neke a̱i̱ na tapake. I̱ a꞉nda꞉ epeaeka꞉na꞉ta꞉ kota꞉ neke tapaalueke leekeme.   
\p
\v 27 Koto leeke mo halima꞉ lota꞉ pitolo alota꞉ Naka꞉ bikita꞉ epipe leekeme. I̱ta꞉ Dieikopee leekeme.   
\p
\v 28 Kota꞉ mo halima꞉ alota꞉ Ameta꞉ naka꞉ bikita꞉ Dieikope dia꞉ya꞉lieke. Pa ekipeke nakana꞉ma꞉ta꞉ Koda꞉ yaapo make hali yaapo make tonka꞉neli pea bepolae ekina꞉ naka꞉ bikita꞉ Isulaie leekeme.   
\p
\v 29 Koto leeke Dieikopema꞉ alota꞉ Ameta꞉ kota꞉ naka꞉ biki la kie leekepate ipikana꞉ma꞉ hombo peaaso alota꞉ Ekipeke nakana꞉ma꞉ yaka biki opuluekema꞉ alepe laa leekeme. Koto laata꞉ ipikana꞉ma꞉ Dieikope epeayekeme.   
\p
\v 30 Kota꞉ Dieikopema꞉ alota꞉ I̱ma꞉ta꞉ Koda꞉ta꞉ ota꞉ leke popeleke pa꞉ta꞉ handa꞉ alu pua꞉pate I̱ta꞉ na homeke pa halomee leekeme. Koto ekina꞉ koto alena꞉ta꞉ Penielo leekeme.  
\v 31 Dieikopeta꞉ Penielo mina꞉pa꞉laaso haena꞉ta꞉ nate opeekeme. Ipikita꞉ ipika꞉ pelimokoma꞉ yoka꞉ endiatiki peekeme.  
\v 32 Ame do maketa꞉ mo Isulaina꞉ monduma꞉ monduma꞉ pieke wekiwandikina꞉ wekiwandikima꞉ maketa꞉ mo pelimoko tunala꞉ pa꞉ta꞉ hala꞉ honkoputa꞉ na no halememe. Pa ekipeke Dieikopeta꞉ mo koto honkopuna꞉ lieke ekina꞉ pitelememe.   
\c 33  
\s1 Dieikopema꞉ Iso manda꞉hande piekeeki  
\p
\v 1 Dieikopema꞉ta꞉ Iso ipika꞉ 400 haliweki ame̱le̱ epemeeki hando haota꞉ ipika꞉ wekiwandikita꞉ mo Lia make Leisolo make mo e pokaepeke wanda꞉ yaapo make teli pea haoma꞉ haoma꞉ pina꞉ leekeme.  
\v 2 Ipikana꞉ma꞉ta꞉ mo e pokaeyeke wanda꞉ yaapo ipilika꞉ wekiwandiki ame̱le̱ titina꞉ haena꞉ laa koto hoki pa꞉ta꞉ta꞉ Lia ipika꞉ wekiwandiki ame̱le̱ haena꞉ laata꞉ mo Leisolo pita꞉ Diosepe yaapota꞉ sale nane haena꞉ leekeme.  
\v 3 Kutupa Dieikopema꞉ta꞉ ipiki amba꞉la titina꞉ pua mo ipika꞉ hameke handa꞉tia pulu hata꞉ hoto wataake hata꞉na꞉ oni kenkena꞉ panda꞉ puniaeyekeme.  
\v 4 Pate Isoma꞉ta꞉ a̱i̱ya ipiki manda꞉hande pulu pulu hata꞉ ipika꞉ kiki yaapo bao hameke hopulolo hata꞉ nunu piekeme. Ipiliki telipuna꞉ e̱ lepekeme.  
\v 5 Kutupa Isoma꞉ lekema꞉ lekema꞉ pitolo hata꞉ mo wanda꞉weki make wekiwandiki make handolo hata꞉ alota꞉ Do neke ame̱le̱ hala꞉ wanda꞉halita꞉ epi ameda ya꞉ka꞉ta꞉pe laa lota꞉ piekeme. Dieikopema꞉ hombo peaaso alota꞉ Kameo. Dota꞉ Koda꞉ma꞉ apetolo hata꞉ I̱ ka꞉la꞉ wekiwandikie leekeme.  
\v 6 Kutupa mo e pokaepeke wanda꞉ yaapo ipilika꞉ wekiwandiki ame̱le̱ a꞉pa panda꞉ puniaemekeme.  
\v 7 Kutupa Lia pita꞉ ipika꞉ wekiwandiki ame̱le̱ a꞉pa panda꞉ puniaemekeme. Kuta ota꞉ wetepe naneta꞉ Diosepe pita꞉ Leisolo yaapoma꞉ a꞉pa panda꞉ puniaepekeme.   
\p
\v 8 Isoma꞉ lota꞉ pitolo alota꞉ Pa mo titina꞉ manda꞉hande pua꞉ tapaketa꞉ kotota꞉ eki laa pipe leekeme. Dieikopema꞉ hombo peaaso alota꞉ Kotota꞉ nakana꞉ma꞉ I̱ pa꞉ta꞉ ta꞉na꞉ma꞉ homoelena꞉ yeke tapao pua꞉me leekeme.   
\p
\v 9 Pate Isoma꞉ alota꞉ Kameo. I̱ta꞉ ana꞉na꞉ wia haloma꞉ naka꞉ wia hale ekita꞉ naka꞉ kone wia hae laa leekeme.   
\p
\v 10 Dieikopema꞉ alota꞉ Pilisi ota꞉ dia꞉me. Nakana꞉ma꞉ I̱ pa꞉ta꞉ ta꞉na꞉ma꞉ homeka꞉na꞉ta꞉ kota꞉ yaka pa hameke kitolo alemanu mie. Ameta꞉ nakana꞉ma꞉ I̱ pa꞉ta꞉ homu wopu pitele ekita꞉ kota꞉ mo naka꞉ leke popeleke handolo ekita꞉ mo Koda꞉na꞉ leke popeleke handeke nono pita꞉la꞉me.  
\v 11 Koto ekina꞉ pilisio. Do I̱ma꞉ mea a꞉palo pa hameke kitolo ale manuta꞉ a꞉pa꞉la꞉me laa mie laata꞉ Koda꞉ma꞉ta꞉ I̱ pa꞉ta꞉ a꞉ta꞉ma꞉ homolo hata꞉ mo I̱ma꞉ weiyua꞉ alemanu paeyao ana꞉na꞉ kia꞉me leekeme. Dieikopema꞉ta꞉ hameke honke la꞉tia puoopu haota꞉ Isoma꞉ wetepena꞉ miekeme.   
\p
\v 12 Isoma꞉ alota꞉ Ameta꞉ kota꞉ pana꞉ tikitiki yae. I̱ amba꞉la polueke leekeme.   
\p
\v 13 Koto leeke Dieikopema꞉ hombo peaaso alota꞉ Yaka hosiki wekiwandikita꞉ soka꞉la꞉ma꞉ homa꞉la꞉ ekita꞉ naka꞉ handeleme. Kutupa mo sipisipi pita꞉ kao kemboko ankula꞉ ankula꞉ make hone wia꞉peke ya꞉la꞉me. Ikita꞉ pa mo nate homeke sikina꞉ kone mo ma꞉na꞉manu lu yombutia poma꞉ka꞉na꞉ta꞉ kota꞉ paeyao siki homilimikie.  
\v 14 Koto ekina꞉ pilisi neke amba꞉la pue. I̱ta꞉ neke telia꞉ mea yopusiki mo yaka ma꞉na꞉manu make mo wekiwandiki ame̱le̱ honkopu hao kone a꞉pa mo Idomo da a꞉pa tolu minuluekee leekeme.   
\p
\v 15 Koto leeke Isoma꞉ alota꞉ Kota꞉ a꞉pa꞉la꞉ma꞉ neke tamba꞉ mina꞉ mo yaka mandane haliweki mina꞉pa꞉lanoe leekepate Dieikopema꞉ hombo peaaso alota꞉ I̱ma꞉ta꞉ kotoeki hone pieke na loa꞉pate pa mo naka꞉ ta꞉na꞉ pa꞉la꞉eki homekena꞉ loa꞉me leekeme.  
\v 16 Koto ekina꞉ koto natena꞉ta꞉ Isota꞉ Idomo poluekema꞉ peekepate  
\v 17 Dieikopeta꞉ Sakodo nane peekeme. Koto pateta꞉ ipika꞉ da a꞉eya make ipika꞉ ma꞉na꞉ manuna꞉ kalale da sunu make a꞉eyaeyekeme. Koto ekina꞉ yeketa꞉ koto pateta꞉ Sakodo leekeme.   
\p
\v 18 Dieikope mo Mesopoteimia haota꞉ mo Keinani kenke pa꞉ta꞉ Sekeme daoni pa꞉ta꞉ epeke tupa꞉ opolo epeekeme. Kutupa ipika꞉ palai da manuta꞉ mo daonina꞉ hama꞉ ma꞉nda꞉ pa꞉ta꞉ a꞉eyekeme.  
\v 19 Kutupa ipikana꞉ma꞉ta꞉ koto hama꞉ta꞉ Sekemena꞉ ateke Hamona꞉ tapakena꞉eki 100 silipa manima꞉ hambeekeme.  
\v 20 Koto pateta꞉ oloda ma꞉nda꞉ a꞉eya bikita꞉ mo Isulaina꞉ Koda꞉na꞉ biki ma꞉nda꞉ Elo wina꞉ leekeme.   
\c 34  
\s1 Daena lumea peekeeki  
\p
\v 1 Nate ma꞉nda꞉na꞉ta꞉ mo Lia Dieikope yaapona꞉ waneke Daenata꞉ mo Keinani wanda꞉weki handolo peekeme.  
\v 2 Kutu piekepate mo da kenke pa꞉ta꞉ you hali hayeke Hipi hali Hamona꞉ eiyeke Sekemema꞉ hando haota꞉ Daena꞉ pake lumea peekeme.  
\v 3 Pate ipikana꞉ma꞉ mo wandikita꞉ ota꞉ wandiki seliapo yeke handaa mo wandiki pa꞉ta꞉ pukima꞉ homeekeme. Koto ekina꞉ ipikana꞉ma꞉ mo wandikina꞉ puki epealuekema꞉ taapeekeme.  
\v 4 Kutupa ipika꞉ ateke pa꞉ta꞉ alota꞉ Apa꞉o. Koto wandikita꞉ yaka wanda꞉ haena꞉ yeke mealena꞉ hone witolome leekeme.   
\p
\v 5 Dieikopema꞉ta꞉ waneke pa꞉ta꞉ yaala꞉piki hau piekeeki handeekepate ipika꞉ weki tonuta꞉ oni hama꞉manu pa꞉ta꞉ ipika꞉ ma꞉na꞉manu handeteke halo pemeke ekiyalo pa hando hayekeme.  
\v 6-7 Kutupa mo Dieikopena꞉ eiyeke tonuta꞉ oni hama꞉manu pa꞉ta꞉ hao honda꞉ pambolo ipulu haena꞉ kone mo Sekemena꞉ ateke Hamota꞉ Dieikope yaapo pi lolueke alo hata꞉ opolo peekeme. Kutu piekepate mo weki tonuma꞉ta꞉ Sekemema꞉ Dieikopena꞉ waneke lumea pa꞉la꞉ ekita꞉ ota꞉ dupiki hau pa꞉la꞉ ekita꞉ mo Isulai wanda꞉hali pa꞉ta꞉ yala꞉ peake hau pa꞉la꞉me laa tola꞉tia pominolo hata꞉ tetoma꞉ homemekeme.  
\v 8 Hamoma꞉ Dieikope pa꞉ta꞉ alota꞉ Yaka weki Sekemema꞉ta꞉ naka꞉ wandikina꞉ da ota꞉ homa꞉la꞉me.  
\v 9 Pilisio. Mina꞉ lae. Kutupa naka꞉ wanda꞉hali make yaka wanda꞉hali make mu alu alu pu hala꞉ pa꞉la꞉ tupa꞉ dikana꞉ma꞉ pi lo tonkao u pana꞉e.  
\v 10 Kutupa neketa꞉ do yaka kenke pa꞉ta꞉ hata꞉ka꞉na꞉ naka꞉ hone pa꞉la꞉ alena꞉ hata꞉ mo ala꞉ta꞉ ala꞉ta꞉ pa topo topo pea naka꞉ kenkemanu hamba wia halena꞉ loa꞉me leekeme.   
\p
\v 11 Kutupa Sekemema꞉ Daenana꞉ ateke make beliki tonu pa꞉ta꞉ alota꞉ I̱ pa꞉ta꞉ a꞉ta꞉ma꞉ homa yaka honke aloeki peaemeka꞉na꞉ta꞉ kota꞉ I̱ma꞉ta꞉ mo ika꞉ hone pa꞉la꞉ alemanu kulueke.  
\v 12 Ika꞉ ana꞉ta꞉ ota꞉ muluekema꞉ ika꞉ hone pa꞉la꞉ tupa꞉ pa kitolo alemanu muemena꞉ kota꞉ mo wandikina꞉ yenkita꞉ ika꞉ hone pa꞉la꞉ tupa꞉ make pa mina꞉liaemeka꞉na꞉ kota꞉ pa pina꞉ma꞉ mo wandiki homeke ota꞉ muluekema꞉ hone witolome leekeme.   
\p
\v 13 Pate Sekemema꞉ta꞉ ika꞉ ana꞉ Daena yala꞉ peake hau pieke handaa mo Dieikopena꞉ eiyeke tonuma꞉ mo Sekeme pita꞉ ipika꞉ ateke Hamo yaapo pa꞉ta꞉ yayapiki tupa꞉ hombo peaemekeme.  
\v 14 Ikana꞉ma꞉ ipiki pa꞉ta꞉ alota꞉ Nika꞉ ana꞉ta꞉ mo sekemesaisi hau na pa꞉la꞉ halima꞉ mia꞉peke na ya꞉la꞉me. Kotota꞉ niki yala꞉ tieke piki haue.  
\v 15 Nikana꞉ma꞉ta꞉ niki poloma꞉ tupa꞉ naka꞉ haliweki paeyao sekemesaisi hau pimika꞉na꞉ homeke a꞉pa꞉la꞉me lolumeke.  
\v 16 Kutu pimika꞉na꞉ta꞉ nikana꞉ma꞉ta꞉ wanda꞉ mu alu alu pita꞉la꞉ ekita꞉ a꞉pa꞉la꞉me lolumeke. Kutupa nikita꞉ iki ame̱le̱ homeke wanda꞉hali hao polumeke.  
\v 17 Pate do nikana꞉ma꞉ aloma꞉ tupa꞉ sekemesaisi hau na pimika꞉na꞉ta꞉ kota꞉ mo wandiki pao mea mina꞉pa꞉lao polumeke lemekeme.   
\p
\v 18 Dupiki pima꞉ta꞉ Hamo pita꞉ eiyeke Sekeme yaapoma꞉ta꞉ a꞉pa꞉la꞉me hone wipikime.  
\v 19 Koto ekina꞉ mo pa꞉pa꞉na꞉ wekima꞉ta꞉ Dieikopena꞉ waneke pukima꞉ homeekeeki yalo mo pia꞉peke lemeke ekita꞉ nateleke ma꞉nda꞉ na paeyaeyekeme. Ipikita꞉ mo ipika꞉ tapake tukiki pa꞉ta꞉ta꞉ you some hayekeme.   
\p
\v 20 Kota꞉ Hamo pita꞉ ipika꞉ eiyeke Sekeme yaapota꞉ mo ika꞉ pi hotu haemeke alena꞉ mo daoni pota꞉ kake pa꞉ta꞉ pua mo ipilika꞉ daoni haliweki pa꞉ta꞉ dupiki pimanu lepekeme.  
\v 21 Do haliwekita꞉ homu pelememe. Do niki haloma꞉ kenke pa꞉ta꞉ niki ame̱le̱ hata꞉ pa pomina꞉ lomana꞉e. Do nika꞉ kenketa꞉ iki make ana꞉na꞉ halimikie. Kutupa nikana꞉ma꞉ ika꞉ wandiki tonu hapua meata꞉ ikana꞉ma꞉ nika꞉ wandiki tonu make hapua mea꞉tiki pina꞉e.  
\v 22 Kutu pulu poloma꞉pate do haliwekima꞉ta꞉ niki ame̱le̱ hata꞉ homeke wanda꞉hali hamana꞉e alemepate ekia꞉nda꞉ homeketa꞉ iki peleme tupa꞉ nika꞉ haliweki paeyao make sekemesaisi hau puma꞉ka꞉na꞉ homeke a꞉pa꞉la꞉me alememe.  
\v 23 Kutu puma꞉ka꞉na꞉ta꞉ kota꞉ ika꞉ ma꞉na꞉manu paeyao make ika꞉ wia haleme alemanu paeyao make nika꞉eki dia꞉ya꞉liepe. Koto ekina꞉ niki ame̱le̱ haena꞉ lomana꞉e lepekeme.  
\v 24 Kutupa mo daoni pa꞉ta꞉ haemeke haliwekima꞉ta꞉ Hamo pita꞉ Sekeme yaapoma꞉ lepeke ekita꞉ a꞉pa꞉la꞉me laa iki paeyao siki sekemesaisi hau pimikime.   
\p
\v 25 Hoto tepo hao mo haliweki koto sekemesaisi hau pimiki ekima꞉ tanda pa pitolo haena꞉ta꞉ Dieikopena꞉ eiyeke yaapo mo Daenana꞉ beliki Simiono pita꞉ Lipai yaapoma꞉ ipilika꞉ bainasi yaapo mina oni daoni pa꞉ta꞉ pepekeme. Mo weki yaapoma꞉ta꞉ mo wanda꞉halima꞉ ata꞉ka꞉ piki hone ma꞉nda꞉ wiaama꞉na꞉ yeke pa ota꞉ hone wia peke nono pea pua mo haliweki paeyao lia  
\v 26 make mo Hamo pita꞉ Sekeme yaapo make lipikime. Kutupa Daena mo Sekemena꞉ da pa꞉ta꞉ pitieke alena꞉ pao hatuku pepekeme.  
\v 27  Mo haliweki lu paeyaepeke hoki naneta꞉ Dieikopena꞉ eiyeke titi mandane weki tonuma꞉ta꞉ ika꞉ ana꞉na꞉ yala꞉ mieke ekina꞉ hombo peaaso hata꞉ mo daoni teke puleke laemekeme.  
\v 28 Ikana꞉ma꞉ta꞉ mo ma꞉na꞉manu make kaomanu make donkimanu make oni daoni pa꞉ta꞉ wieke alemanu paeyao make oni hama꞉ nina꞉ hayeke alemanu paeyao mea pemekeme.  
\v 29 Ikana꞉ma꞉ta꞉ mo yenki tieke peke alemanu paeyao mea wanda꞉weki make mina kota꞉ ika꞉ da pa꞉ta꞉manu wieke alemanu paeyaosiki make mea pemekeme.   
\p
\v 30 Dieikopema꞉ Simiono pita꞉ Lipai yaapo pa꞉ta꞉ alota꞉ Ipilikana꞉ma꞉ta꞉ I̱ pa꞉ta꞉ ka꞉nda꞉ mea kelepeme. Ameta꞉ mo Keinani wanda꞉halima꞉ make Petese wanda꞉halima꞉ make do kenke pa꞉ta꞉ haleme wanda꞉hali paeyao sikima꞉ta꞉ I̱ pa꞉ta꞉ honditi pilimikie. Koto wanda꞉hali paeyaoma꞉ apa꞉tao I̱ ame̱le̱ a꞉nda꞉ puluekema꞉ pimika꞉na꞉ta꞉ kota꞉ I̱ta꞉ hali wopu dia꞉yalo hata꞉ do yaka tapake paeyaota꞉ hoeyaalimikie.  
\v 31 Pate mo hama̱la̱꞉ma꞉ hombo peaaso alota꞉ Dikana꞉ma꞉ta꞉ dika꞉ ana꞉ta꞉ pa koto hali yola꞉la꞉ wanda꞉ tupa꞉ haena꞉ lena꞉ lapeke na ya꞉la꞉me lepekeme.   
\c 35  
\s1 Bedele haena꞉ Koda꞉ma꞉ Dieikope epeayekeeki  
\p
\v 1 Koda꞉ma꞉ Dieikope pa꞉ta꞉ alota꞉ Koto kone Bedele nane pua hapeke. Koto pa꞉ta꞉ta꞉ neke mo hande naka꞉ kame Iso paala꞉ hao pindipa yapeke handa neke pa꞉ta꞉ peneme yaowa꞉ Koda꞉ I̱ pa꞉ta꞉ oloda a꞉eya꞉peke leekeme.   
\p
\v 2 Koto leeke Dieikopema꞉ ipika꞉ tapake make mo ipiki ame̱le̱ apa꞉tao haemeke tapake pa꞉ta꞉ make alota꞉ Mo ika꞉ wia haleme da ma꞉nda꞉ wanda꞉halina꞉ wepia ula꞉ koda꞉manu mea baapee. Kutupa make ikana꞉ma꞉ta꞉ iki tikitiki yao mo ha̱i̱ na ta̱leke aka꞉manu yama꞉pa꞉peke.  
\v 3 Nikita꞉ do pate mina꞉pa꞉lao mo Bedele nane puluma꞉me. Koto pateta꞉ mo I̱ma꞉ ka꞉nda꞉ tua꞉ natena꞉ I̱ tamba꞉ mea make mo I̱ pomua꞉ ale pa꞉ta꞉manu I̱ yaapo hao haya꞉ Koda꞉ pa꞉ta꞉ oloda a꞉eluekema꞉ loa꞉me leekeme.  
\v 4 Koto leeke mo wanda꞉halima꞉ta꞉ ika꞉ wia haemeke da ma꞉nda꞉ wanda꞉halina꞉ wepia ula꞉ koda꞉manu paeyao make mo ika꞉ pankemeke haleke halimanu make paeyao Dieikope pa꞉ta꞉ halemekeme. Kutupa ipikana꞉ma꞉ koto alemanu paeyao mo Sekeme hayeke pei teke pa꞉ta꞉ hoiyekeme.   
\p
\v 5 Mo Dieikope ipika꞉ weki tonu ame̱le̱ mina꞉pa꞉laaso haena꞉ta꞉ mo teke pa꞉ta꞉manu hao yapeeke daonimanu pa꞉ta꞉ haemeke wanda꞉halima꞉ta꞉ pa paala꞉ tieke pieke handaa mo tapake na telia꞉ mea pemekeme.  
\v 6 Kutupa Dieikopema꞉ta꞉ ipika꞉ wanda꞉hali paeyao ame̱le̱ Lusu opolo epemekeme. Ameta꞉ oni Keinani kenke pa꞉ta꞉ Bedele leleme alena꞉ loa꞉me.  
\v 7 Ipikana꞉ma꞉ta꞉ koto pate oloda a꞉eyaata꞉ mo koto pateta꞉ Bedelena꞉ Koda꞉na꞉ biki tapu wiao leekeme. Pa ekipeke koto pateta꞉ mo hande ipiki ipika꞉ hameke paala꞉ hao pindipa peeke handa Koda꞉ ipiki kone peneme yaeyeke alena꞉ leekeme.  
\v 8 Amba꞉ koto pateta꞉ mo hande hosiki ya꞉na꞉ kone mo Lepekana꞉ pa hameke e pokao hayeke wanda꞉ Debota homeeke handaa mo Bedele ka꞉wa꞉ nanema꞉ tilao mo pei teke ma꞉nda꞉ pa꞉ta꞉ hoimiki yeke handa bikita꞉ E̱ Ala꞉ Peie lemekeme.   
\p
\v 9 Kutupa Dieikope mo Mesopoteimia mina꞉pa꞉lao epeeketa꞉ Koda꞉ma꞉ ipiki pa꞉ta꞉ paa peneme yao pua ipiki epeayekeme.  
\v 10 Koda꞉ma꞉ ipiki pa꞉ta꞉ alota꞉ Naka꞉ bikita꞉ Dieikope ya꞉la꞉pate ame do kini peata꞉ Isulai lena꞉e leekeme. Koto ekina꞉ Koda꞉ma꞉ta꞉ ipika꞉ bikita꞉ Isulai leekeme.  
\v 11  Kutupa Koda꞉ma꞉ ipiki pa꞉ta꞉ alota꞉ I̱ta꞉ Aneke Wele Wopupiki Koda꞉e. Wekiwandiki wopu mendia꞉peke. Tutu manuta꞉ neke pa꞉ta꞉ yama꞉ monduma꞉ monduma꞉ pilieke. Kutupa neketa꞉ kini hali manuna꞉ apa꞉mei halipikie.  
\v 12 I̱ma꞉ta꞉ mo Eipoloha꞉ma꞉ pita꞉ Aisa꞉ke yaapo pa꞉ta꞉ haloa꞉ kenketa꞉ neke pa꞉ta꞉ kulueke. Kutupa make naka꞉ hoki nane monduma꞉ monduma꞉ pilimi wekiwandiki pa꞉ta꞉ make halueke leekeme.  
\v 13 Kutupa Koda꞉ma꞉ ipiki mina꞉pa꞉laeyekeme.  
\v 14 Koto pate mo hande Koda꞉ma꞉ ipiki pa꞉ta꞉ pi la haleeke alena꞉ta꞉ Dieikopema꞉ niminapeke toopi noka꞉pa olipi oeta make waini ikali make hola dota꞉ yakopiki alena꞉e laa pi wiekeme.  
\v 15 Koto pateta꞉ biki Bedele leekeme   
\s1 Leisolona꞉ homeekeeki  
\p
\v 16 Dieikope ipika꞉ tapake ame̱le̱ Bedele mina꞉pa꞉lao mo Epa꞉ta꞉ poluekema꞉ pa hosiki papate leke wina꞉ta꞉ Leisolo ipika꞉ weki mulu pieke nate minolo hata꞉ta꞉ weki hoki nalo hata꞉ make ka꞉nda꞉ tieke miekeme.  
\v 17 Mo weki hoki ota꞉ hoke tupa꞉ neeke dina꞉ mo weki meao hayeke wanda꞉ma꞉ alota꞉ Leisoloo. Hali weki ma꞉nda꞉ ya꞉ka꞉ta꞉ma꞉ paala꞉ma꞉ na homa꞉pee leekepate  
\v 18 mo Leisolota꞉ homolo pulu hata꞉ ipika꞉ paeyaaso pomo minolo hata꞉ta꞉ ipika꞉ wekina꞉ bikita꞉ Benomi leekeme. Pate pa atekema꞉ta꞉ biki Benisamini leekeme.   
\p
\v 19 Leisolo homea꞉ dina꞉ta꞉ mo Epa꞉ta꞉ nane pula꞉ pota꞉ tea꞉na꞉ hoimikime. Ameta꞉ Beteleha꞉ma꞉ la꞉leme alena꞉e.  
\v 20 Dieikopema꞉ta꞉ niminaasa꞉ toopi ma꞉nda꞉ koto alena꞉ nokopeekeme. Kutupa ame do make Leisolona꞉ lapa꞉ pa꞉la꞉ alena꞉e laa walo hala꞉me.  
\v 21 Kutupa Dieikopema꞉ta꞉ mo Edana꞉ oli ya pa꞉ta꞉ haliao peke hokulupeke da tea꞉ nane ipika꞉ palai damanu a꞉elo peekeme   
\s1 Dieikopena꞉ eiyeke tonu  
\p
\v 22 Dieikope koto kenke pa꞉ta꞉ haena꞉ Lubenima꞉ta꞉ ipika꞉ apa꞉na꞉ e pokaeyeke wanda꞉ Biliha yaapo loke apa꞉taeyekeme. Koto ekita꞉ Dieikopema꞉ opuata꞉ mineke tieke wopu pankeekeme.  
\p Dieikopeta꞉ weki kiki yaapona꞉ ankena꞉ yaapo pea mondu wiekeme.   
\q1
\v 23 Liana꞉ weki tonuta꞉ Lubeni hande Dieikopena꞉ mupeke weki make Simiono make Lipai make Diuda make Isaka make Sebuloni make yekeme.   
\q1
\v 24  Leisolona꞉ eiyeke yaapota꞉ Diosepe pita꞉ Benisamini yaapoe.   
\q1
\v 25 Mo Leisolona꞉ pa hameke e pokaeyeke wanda꞉ Bilihana꞉ eiyeke yaapota꞉ Da꞉ni pita꞉ Na꞉petali yaapoe.   
\q1
\v 26 Mo Liana꞉ pa hameke e pokaasa꞉ wanda꞉na꞉ eiyeke yaapota꞉ Ka꞉de pita꞉ A꞉sia yaapo yekeme.  
\p Do wekitonu paeyaota꞉ mo Mesopoteimia nane hata꞉ mendieke weki tonue.   
\s1 Aisa꞉kena꞉ homeekeeki  
\p
\v 27 Dieikopeta꞉ ateke Aisa꞉ke haya꞉ nane peekeme. Kotota꞉ mo Ma꞉mote da Hebotoni nanema꞉ ateke Aisa꞉ke pita꞉ Eipoloha꞉ma꞉ yaapo hao hayeke alena꞉e.  
\v 28 Aisa꞉keta꞉ 180 bapi hao  
\v 29 ota꞉ koke yaa homeekeme. Kutupa ipika꞉ weki Iso pita꞉ Dieikope yaapoma꞉ hoipikime.   
\c 36  
\s1 Isona꞉ monduma꞉ monduma꞉ pieke wekiwandiki  
\p
\v 1 Dota꞉ mo hande Iso o biki ma꞉nda꞉ Idomo la꞉la꞉ somena꞉ monduma꞉ monduma꞉ pieke wekiwandikina꞉ wekiwandikina꞉ bikie.  
\v 2 Isoma꞉ta꞉ Keinani wanda꞉weki miekeme. Ma꞉nda꞉ta꞉ Hidi hali Ilonona꞉ waneke Ada miekeme. Kutupa mo Hipi hali Sibionona꞉ eiyeke Anana꞉ waneke Oholibama make  
\v 3 Nebeiotona꞉ beliki Ba꞉sema꞉deta꞉ Isima꞉elona꞉ waneke make miekeme.  
\v 4 Titina꞉ wanda꞉ Adama꞉ta꞉ Elipa꞉se mendiaeyekeme. Ba꞉sema꞉dema꞉ta꞉ Leuelo mendiaeyekeme.  
\v 5 Kutupa Oholibamama꞉ta꞉ Dieusi make Dialamo make Kota make mendiaeyekeme. Do weki paeyaota꞉ mo Keinani kenke pa꞉ta꞉ hata꞉ Isona꞉ mendiaemeke weki tonue.   
\p
\v 6 Kutupa Isoma꞉ta꞉ ipika꞉ wanda꞉weki make eiyeke tonu make waneke tonu make ipika꞉ da pa꞉ta꞉ haemeke wanda꞉hali paeyao make ipika꞉ ma꞉na꞉manu make mo Keinani kenke pa꞉ta꞉ hata꞉ mieke alemanu paeyao tonka꞉na꞉ mea hameke Dieikope mina꞉pa꞉lao mo kenke ma꞉nda꞉ pa꞉ta꞉ peekeme.  
\v 7 Ipiki mina꞉pa꞉laeyeke ekita꞉ mo Dieikope ipiliki haepeke kenketa꞉ ne doka꞉tiki yeke piekeme. Ipilika꞉ ma꞉na꞉ manuta꞉ wotu ta̱la̱o̱ handolo hata꞉ homeke pa꞉ta꞉ hapeke na yekeme.  
\v 8 Koto ekina꞉ Isota꞉ mo Idomona꞉ pote eli pa꞉ta꞉ pu hayekeme.   
\p
\v 9 Dota꞉ mo hande Idomo wanda꞉halina꞉ apa꞉mei Isona꞉ monduma꞉ monduma꞉ pieke wekiwandikina꞉ wekiwandikie.   
\q1
\v 10 Isona꞉ weteke Adama꞉ta꞉ weki homeke Elipa꞉se mendiaeyekeme.  
\q1 Kutupa weteke ma꞉nda꞉ Ba꞉sema꞉dema꞉ta꞉ weki homeke Leuelo mendiaeyekeme.   
\b  
\q1
\v 11 Isona꞉ eiyeke Elipa꞉sema꞉ta꞉ weki yunki hata꞉ mendiekeme. Ika꞉ biki manuta꞉ Temani make Oma make Sepo make Ka꞉tamo make Kena꞉se makee.   
\q1
\v 12 Kutupa Elipa꞉sena꞉ pa hameke e pokaeyeke wanda꞉ ma꞉nda꞉ Timinama꞉ta꞉ ipiki pa꞉ta꞉ weki homeke A꞉ma꞉leke mendiaeyekeme.   
\b  
\q1
\v 13 Kutupa Isona꞉ eiyeke Leueloma꞉ta꞉ weki tonkopu mendiekeme. Ika꞉ biki manuta꞉ Nahati make Sita make Siama make Misa makee. Ikita꞉ mo Ba꞉sema꞉dena꞉ wekina꞉ eiyeke tonue.   
\b  
\q1
\v 14 Isona꞉ weteke ma꞉nda꞉ Oholibamama꞉ta꞉ weki tepo mendiaeyekeme.  
\q1 Ika꞉ biki manuta꞉ Dieusi make Dialamo make Kota makee.  
\q1 Oholibamama꞉ta꞉ mo hande Sibionona꞉ eiyeke Anana꞉ wanekee.   
\b  
\p
\v 15 Dota꞉ mo Iso pa꞉ta꞉ yama꞉ epemeke tapake you hali manue.  
\q1 Mo Isona꞉ mupeke weki Elipa꞉seta꞉ do tapake manuna꞉ apa꞉meie.  
\q1 Temani make Oma make Sepo make Kena꞉se make  
\v 16 Kota make Ka꞉tamo make A꞉ma꞉leke makee.  
\q1 Do tapake manuta꞉ mo Isona꞉ weteke Ada pa꞉ta꞉ yama꞉ epemeke tapake manue.   
\b  
\q1
\v 17 Isona꞉ eiyeke Leuelo pa꞉ta꞉ yama꞉ epeeke tapaketa꞉ Nahati make Sita make Siama make Misa makee. Do tapake manuta꞉ Isona꞉ weteke Ba꞉sema꞉de mendiaeyeke ekie.   
\b  
\q1
\v 18 Dota꞉ mo hande Anana꞉ waneke Oholibamama꞉ Isona꞉ mendiaeyeke weki tonuna꞉ tapakemanue. Dieusi make Dialamo make Kota make mendiaeyekeme   
\q1
\v 19 Koto tapake paeyaota꞉ Iso pa꞉ta꞉ yama꞉ epemeke tapakemanue   
\s1 Seiyana꞉ monduma꞉ monduma꞉ pieke tapakemanu  
\p
\v 20 Mo Idomo kenke kini pea haemeke tapakemanu ika꞉ apa꞉meita꞉ mo Ho hali Seiyana꞉ monduma꞉ monduma꞉ pieke wekiwandikina꞉ wekiwandikie. Koto tapake manuna꞉ apa꞉meina꞉ biki manuta꞉ doe.  
\q1 Loutani make Soubalo make Sibiono make Ana make  
\v 21 Disiono make Esa make Disiana꞉ makee.   
\b  
\q1
\v 22 Loutanita꞉ mo Hoti pita꞉ Hemane yaapona꞉ apa꞉meie. Kutupa Loutanina꞉ belikita꞉ Timinae.   
\b  
\q1
\v 23 Soubalota꞉ mo Elipani make Manahati make Ebalo make Siepo make Onamo make paeyaona꞉ apa꞉meie.   
\b  
\q1
\v 24 Sibionota꞉ weki yaapo Aiyali pita꞉ Ana yaapo mendiekeme. Anata꞉ mo hande atekena꞉ donkimanu mo hande hapu hayeke alema꞉ handeteke hata꞉ mo titipu piki ikali opeekeeki handa꞉ wieke somee.  
\v 25 Anata꞉ mo Disionona꞉ atekee. Anama꞉ta꞉ wandiki ma꞉nda꞉ Oholibama make mondu wiekeme.   
\b  
\q1
\v 26 Disionota꞉ do tapake manuna꞉ apa꞉meie. Hemedani make Esibani make Itidani make Dietani makee.   
\b  
\q1
\v 27 Esata꞉ mo Bilihane make Sapani make Akane make koto tapake manuna꞉ apa꞉meie.   
\b  
\q1
\v 28 Disiana꞉ta꞉ mo Usu pita꞉ Atani tapake yaapona꞉ apa꞉meie.   
\b  
\q1
\v 29-30 Koto mo hande Idomo kenke pa꞉ta꞉ haemeke Ho tapake manuna꞉ bikie. Loutani make Soubalo make Sibiono make Ana make Disiono make Esa make Disiana꞉ makee.   
\s1 Idomona꞉ Kinimanu  
\p
\v 31 Amba꞉ta꞉ mo Isulai wanda꞉halita꞉ kinimanu ma꞉nda꞉ma꞉ na handeteke haena꞉ta꞉ mo Idomo kenke pa꞉ta꞉ kini pieke kini manuna꞉ bikimanu doe.   
\q1
\v 32 Beona꞉ eiyeke Belata꞉ mo Idomona꞉ kini hali hayekeme. Ipika꞉ daonina꞉ bikita꞉ Dinihabae.   
\q1
\v 33 Bela homeeke dina꞉ta꞉ Sitana꞉ eiyeke Diobabema꞉ anketeke mea kini hali hayekeme. Ipika꞉ daonita꞉ Bositae.   
\q1
\v 34 Diobabe homeeke dina꞉ta꞉ Husamima꞉ ipika꞉ anketeke mea kini hali hayekeme. Ipikita꞉ mo Temani kenke pa꞉ta꞉ epeeke somee.   
\q1
\v 35 Husami homeeke dina꞉ta꞉ Bedadena꞉ eiyeke Hadadema꞉ ipika꞉ anketeke mea kini hali hayekeme. Ipika꞉ daonina꞉ bikita꞉ Apitie. Ipikana꞉ma꞉ta꞉ mo Moa꞉be kenke pa꞉ta꞉ mo Midiani tapake ame̱le̱ a꞉nda꞉ pea bepolayeke somee.   
\q1
\v 36 Hadade homeeke dina꞉ta꞉ mo Maseteka hali Samelama꞉ ipika꞉ anketeke mea kini hali hayekeme.   
\q1
\v 37 Kutupa Samela homeeke dina꞉ta꞉ mo ikali tea꞉na꞉ hayeke Teihobodi daoni pa꞉ta꞉ hayeke some Siauluma꞉ ipika꞉ anketeke mea kini hali hayekeme.   
\q1
\v 38 Siaulu homeeke dina꞉ta꞉ Akebona꞉ eiyeke Baele Hananema꞉ anketeke mea kini hali hayekeme.   
\q1
\v 39 Akebona꞉ eiyeke Baele Hanane homeeke dina꞉ta꞉ Hadadema꞉ anketeke miekeme. Ipika꞉ daonina꞉ bikita꞉ Paue. Ipika꞉ weteketa꞉ mo Mesahabena꞉ waneke Matededena꞉ waneke Mehetabelee.   
\p
\v 40 Dota꞉ mo hande Iso pa꞉ta꞉ yama꞉ epeeke tapake manuna꞉ you haliwekina꞉ biki manue.  
\q1 Timina make Alapa make Dietede make  
\v 41 Oholibama make Ela make Pinono make  
\v 42 Kena꞉se make Temani make Mibisa make  
\v 43 Makediele make Itame makee.  
\p Koto you haliwekimanu haemeke kenke manuta꞉ ika꞉ bikimanu yalao haemeke tapake manue.   
\c 37  
\s1 Diosepe pita꞉ ipika꞉ hameketonu  
\p
\v 1 Dieikopeta꞉ mo ipika꞉ ateke hayeke Keinani kenke pa꞉ta꞉ paa hayekeme.  
\v 2 Kutupa dota꞉ mo ipika꞉ tapakena꞉ tamenie.  
\p Diosepeta꞉ 17 bapina꞉ pa꞉pa꞉na꞉ weki hata꞉ mo ipika꞉ atekena꞉ e pokaeyeke wanda꞉ yaapo Biliha pita꞉ Silipa yaapona꞉ eiyeke tonu ame̱le̱ mo sipisipimanu make nanikosimanu make handeteke haemekeme. Ipikana꞉ma꞉ta꞉ ateke pa꞉ta꞉ mo ipika꞉ hameke tonuma꞉ hoke tupa꞉ pia꞉tiki pimiki ekina꞉ pi mea a꞉pa꞉tiki piekeme.   
\p
\v 3 Dieikopema꞉ta꞉ mo wekitonu anka꞉lopuna꞉ta꞉ Diosepe pa꞉ta꞉ homeke puki tieke wopuma꞉ homeekeme. Pa ekipe mo wekita꞉ ipiki koke nanema꞉ mendiaeyeke weki yeke handa piekeme. Ipikana꞉ma꞉ta꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke wepia haleekeme.  
\v 4 Kutupa mo ipika꞉ hameke tonuma꞉ ika꞉ atekema꞉ Diosepe pa꞉ta꞉ homeke puki tiekema꞉ wopu homeekeeki hando haota꞉ kota꞉ ika꞉ kame pa꞉ta꞉ta꞉ honditi pitolo hata꞉ homu piki pi manuma꞉ na la halemekeme.   
\p
\v 5 Timba ma꞉nda꞉ta꞉ Diosepema꞉ upa pea mo ipika꞉ hameke tonu laa haleeketa꞉ kota꞉ ikana꞉ma꞉ ota꞉ mineke leke ale panka a꞉nda꞉ lia haemekeme.  
\v 6 Ipikana꞉ma꞉ alota꞉ Mo I̱ma꞉ pua꞉ upa kelepono opua꞉pe.  
\v 7 Niki paeyaota꞉ oni e pa꞉ta꞉ hata꞉ widimanu tonkaaso haoma꞉me. Kutupa yaka widi tonkaaketa꞉ tikitikina꞉ tialiao haya꞉me. Kutupa ika꞉eki manuma꞉ta꞉ yakaeki popei yao hata꞉ yaka widi tonkaake pa꞉ta꞉ panda꞉ puniaememe laa leekeme.   
\p
\v 8 Koto leeke mo hameke tonuma꞉ lota꞉ pitolo alota꞉ Naka꞉ honema꞉ta꞉ neketa꞉ kini hali hata꞉ niki handeteke halipikie hone witelepe lemekeme. Koto ekina꞉ mo ipika꞉ upamanu tonka꞉na꞉ mo ipikana꞉ma꞉ a꞉pa la꞉tiki pieke pimanu tonka꞉na꞉ opia꞉tiki pitolo hata꞉ ikana꞉ma꞉ ota꞉ hoke mineke panka꞉tiki pimikime.   
\p
\v 9 Kutupa Diosepema꞉ upa ma꞉nda꞉ pea ipika꞉ hameke tonu pa꞉ta꞉ alota꞉ I̱ma꞉ upa ma꞉nda꞉ dupa pua꞉me. I̱ma꞉ta꞉ nate make kaisepo make kiki yaapona꞉ ankena꞉ homeke hombulanka꞉manu make handoa꞉me Kutupa moeki manuma꞉ta꞉ I̱ pa꞉ta꞉ panda꞉puniaememe leekeme.   
\p
\v 10 Ipikana꞉ma꞉ mo koto upata꞉ ipika꞉ ateke pa꞉ta꞉ make la haleeke handaata꞉ atekema꞉ ipiki hando alo hata꞉ alota꞉ Kotota꞉ ekipiki upa pea pelepe. Naka꞉ honema꞉ta꞉ naka꞉ ama꞉ma꞉ make naka꞉ kame tonuma꞉ make I̱ma꞉ make neke pa꞉ta꞉ a꞉pa panda꞉ punialumekee laa alepe leekeme.  
\v 11 Diosepena꞉ hameke tonuma꞉ta꞉ ipiki pa꞉ta꞉ wamili pimikipate atekema꞉ta꞉ mo ekina꞉ hone pa wia꞉tiki pu hayekeme.   
\s1 Diosepeta꞉ tapao Idiepi mea pemekeeki  
\p
\v 12 Nate ma꞉nda꞉na꞉ Diosepena꞉ hameke tonuta꞉ mo atekena꞉ ma꞉na꞉manu handeteke halo oni Sekeme nane pua haena꞉ta꞉  
\v 13 Dieikopema꞉ Diosepe pa꞉ta꞉ alota꞉ Yaka ta꞉na꞉ pa꞉la꞉ ekita꞉ neketa꞉ oni naka꞉ kame tonuma꞉ mo ma꞉na꞉manu handeteke haleme alena꞉ Sekeme nane poelena꞉e leekeme. Koto leeke Diosepema꞉ alota꞉ I̱ta꞉ poluekema꞉ tikitiki yalome leekeme.  
\v 14 Ipika꞉ atekema꞉ alota꞉ Mo naka꞉ kame tonuta꞉ epeke halemepe laa handolo puata꞉ mo ma꞉na꞉manu epeke tupa꞉ haemeka꞉na꞉ta꞉ kota꞉ paa la꞉ka꞉la I̱ lolo a꞉pa꞉peke leekeme. Koto ekina꞉ atekema꞉ mo wekita꞉ ika꞉ haemeke Hebotoni hadipi mina꞉pa꞉lao peneyeke tapaalo peekeme.  
\p Diosepeta꞉ mo Sekeme opolo pua  
\v 15 mo pate pomu lopolo haena꞉ hali ma꞉nda꞉ma꞉ handa꞉ u hao lota꞉ pitolo hata꞉ alota꞉ Neketa꞉ aleke weitolo pipe laa leekeme.   
\p
\v 16 Mo wekima꞉ hombo peaaso alota꞉ Mo yaka kame tonu ika꞉ ma꞉na꞉manu handeteke haleme pa꞉ta꞉ weitolome. Koto ekina꞉ mo iki haleme pa꞉ta꞉ handeka꞉na꞉ta꞉ I̱ la kie leekeme.   
\p
\v 17 Mo halima꞉ alota꞉ Ikita꞉ amba꞉ pelememe. Ikita꞉ mo Dodani nane puluma꞉me lemeeki opua꞉me leekeme. Koto leeke Diosepeta꞉ hameke tonu telimea pua Dodani pua handa꞉ wiekeme.   
\p
\v 18 Mo hama̱la̱꞉ hama̱la̱꞉ma꞉ta꞉ Diosepe papate leke epeekeeki hando haota꞉ a̱i̱ na opolo epeke haena꞉ kone pi lo tonkaasota꞉ lu homaamana꞉e laa lemekeme.  
\v 19 Ika꞉ ika꞉ kone la alu alu pitolo hata꞉ alota꞉ Hande upa pu hala꞉ some ipula꞉mee.  
\v 20 Ameta꞉ a̱i̱ lu homao ipika꞉ loketa꞉ oni naku ikali hapupapeke ekimanu ma꞉nda꞉ pa꞉ta꞉ lu baamana꞉e. Ipikita꞉ tikene ma꞉na꞉yeti sayale ma꞉nda꞉ma꞉ lia pa꞉la꞉me lomana꞉e. Kutupa ipika꞉ upama꞉ walea꞉eki manuta꞉ pilia꞉eki handomana꞉ loa꞉me lemekeme.   
\p
\v 21 Lubenima꞉ mo lemekeeki opu hao Diosepe tamba꞉ muluekema꞉ yeke alota꞉ Na lumana꞉ pipe.  
\v 22 Tanda ma꞉nda꞉ na haleketa꞉ pa do hapekena꞉ ula꞉ naku pa꞉ta꞉manu lopamana꞉ pipe leekeme. Lubenima꞉ koto leeke ekita꞉ mo weki pa꞉ta꞉la꞉ mea ateke hala꞉ nane paa tapaalueke hone witolo hata꞉ leekeme.  
\v 23 Diosepe mo hameke tonu haemeke alena꞉ opolo epeeketa꞉ mo wekina꞉ ta꞉ta꞉ ma꞉nda꞉ piki au leke kosa꞉ dau hokulupeke titipula꞉ mea baemekeme.  
\v 24 Kutupa mo weki meata꞉ mo ikali na pitieke naku pa꞉ta꞉ mea baemekeme.   
\p
\v 25 Koto hoki nane ikita꞉ ne nalo pitina꞉ta꞉ koto kone mo Isima꞉elo tapake haliweki Kilia꞉de hao Idiepi nane yapemeeki handemekeme. Ika꞉ kemelo manuta꞉ mo ne tende peaasa꞉ alemanu make totopo piki ti pankekemanu make mu wia yapemekeme.  
\v 26 Diudama꞉ ipika꞉ hameke tonu pa꞉ta꞉ alota꞉ Mo nika꞉ kame lia a꞉mbaoma꞉ka꞉na꞉ta꞉ aleke ota꞉ handa꞉ uluma꞉pe.  
\v 27 Pao. Do Isima꞉elo tapakema꞉ hambena꞉ tapaamana꞉e. Kutu puma꞉ka꞉na꞉ta꞉ kota꞉ ipiki na hoeyaalumeke. Pa ekipeke ipikita꞉ nika꞉ kame make homeke loke we konee leekeme. Koto leeke ipika꞉ hameke tonuma꞉ta꞉ a꞉pa꞉la꞉me lemekeme.  
\v 28 Kutupa mo Midianina꞉ ala꞉ta꞉ ala꞉ta꞉ tapao hala꞉ haliweki epemeketa꞉ mo hama̱la̱꞉ hama̱la̱꞉ma꞉ Diosepe oni naku pa꞉ta꞉ yola꞉ mea mo Isima꞉elo tapake pa꞉ta꞉ 20 silipa manima꞉ mea tapaemeke handaa mo haliwekima꞉ta꞉ hatuku Idiepi nane pemekeme.   
\p
\v 29 Kutupa Lubenita꞉ oni naku pa꞉ta꞉ a꞉pa handeeke pate Diosepe na pitiekeeki hando haota꞉ a꞉ta꞉ pitolo hata꞉ ipika꞉ aka꞉manu sinki piekeme.  
\v 30 Ipikita꞉ ipika꞉ hameke tonu pa꞉ta꞉ pua alota꞉ Mo wekita꞉ hande naku pa꞉ta꞉ na pila꞉ma꞉ I̱ma꞉ta꞉ eki pulua꞉pe leekeme.   
\p
\v 31 Koto ekina꞉ mo hameke tonuma꞉ nanikosi ma꞉nda꞉ lia Diosepena꞉ hokulupeke kosa꞉ dauta꞉ oni ma꞉na꞉ we kita kita pimikime.  
\v 32 Kutupa mo dauta꞉ ateke pa꞉ta꞉ mea pua alota꞉ Do dauta꞉ handa꞉ uma꞉mee. Naka꞉ wekina꞉ eki ya꞉ka꞉ta꞉pe laa lota꞉ pimikime.   
\p
\v 33 Mo atekema꞉ eiyekena꞉ eki ya꞉ka꞉ta꞉me laa handa꞉ u hao alota꞉ Aowe. Ipika꞉ ekie. Mandane tikene ma꞉na꞉yeti sayalema꞉ lia pia꞉ka꞉ta꞉me. Yaka weki Diosepeta꞉ sinki sinki pea wia pia꞉ka꞉ta꞉me leekeme.  
\v 34 Koto ekina꞉ Dieikopema꞉ta꞉ a꞉ta꞉ma꞉ homolo hata꞉ ipika꞉ aka꞉manu sinkipa busa꞉ pitikimanu yameekeme. Ipikana꞉ma꞉ta꞉ nate hokuluna꞉ eiyeke homa꞉ wia pitu hayekeme.  
\v 35 Kutu pieke ipika꞉ eiyeke tonuma꞉ make waneke tonuma꞉ make atekena꞉ puki epealo epemekepate pa mo ipiki epeaasa꞉ ekita꞉ kiaaso hata꞉ alota꞉ Oni homo hala꞉ kenke pa꞉ta꞉ pulu maketa꞉ yaka wekina꞉ homa꞉ pa upaleke polueke leekeme. Koto ekina꞉ eiyeke Diosepena꞉ homa꞉ pa utia peekeme.   
\p
\v 36 Kutu pitolo haena꞉ta꞉ mo Midiani tapakema꞉ta꞉ oni Idiepi pua Diosepeta꞉ mo kinina꞉ da handeteke haena꞉ leeke you some ma꞉nda꞉ Podipama꞉ hambena꞉ tapaemekeme.   
\c 38  
\s1 Diuda pita꞉ Teima yaapo  
\p
\v 1 Koto nate nina꞉ta꞉ Diudata꞉ hameke tonu mina꞉pa꞉lao mo Adalamo daoni hali Hita yaapo halo pu moneayekeme.  
\v 2 Koto pateta꞉ Diudama꞉ta꞉ Keinani hali ma꞉nda꞉ Suana꞉ waneke handeekeme. Kutupa mo wandiki meata꞉  
\v 3 hali weki mondu wiaota꞉ bikita꞉ Ea leekeme.  
\v 4 Weki loke paa lombaata꞉ hali weki ma꞉nda꞉ mondu wiata꞉ ipika꞉ bikita꞉ Onane leekeme.  
\v 5 Kutupa weki ma꞉nda꞉ mendiata꞉ bikita꞉ Sela leekeme. Diudata꞉ Kesibi haena꞉ do weki Sela mondu wiekeme.   
\p
\v 6 Diudama꞉ta꞉ ipika꞉ mupeke weki Eana꞉ta꞉ biki Teima leke wanda꞉ meayekeme.  
\v 7 Eana꞉ hau manuta꞉ ota꞉ hoeyeke ekina꞉ Koda꞉ma꞉ ta꞉na꞉ma꞉ na homolo hata꞉ lu homaeyekeme.  
\v 8 Koto ekina꞉ Diudama꞉ Eana꞉ hameke Onane pa꞉ta꞉ alota꞉ Naka꞉ kamena꞉ weteke kineke yaapo polu pue la alota꞉ Mo hande nika꞉ pi la꞉ uluma꞉ tupa꞉ ipika꞉ halikina꞉ hameke hata꞉ mo naka꞉ kamena꞉ monduma꞉ monduma꞉ pilia꞉ wekiwandikina꞉ wekiwandiki haena꞉ yeke loa꞉me leekeme.  
\v 9 Pate Onanema꞉ta꞉ mo wekiwandikita꞉ ipika꞉eki dia꞉ya꞉lieke hone witolo hata꞉ta꞉ mo hamekena꞉ wanda꞉ kineke yaapo polu puluta꞉ hamekena꞉ wekiwandiki ma꞉nda꞉ na mendiaena꞉ yeketa꞉ ipika꞉ hali hapeketa꞉ kenkena꞉ pao yapena꞉ la꞉tiki piekeme.  
\v 10 Ipikana꞉ma꞉ kutupiki hau pieke ekima꞉ta꞉ Koda꞉ ta꞉na꞉ma꞉ na homaeyeke handa Koda꞉ma꞉ta꞉ ipiki make lu homaeyekeme.  
\v 11 Koto ekina꞉ Diudama꞉ meiyeke wanda꞉ Teima pa꞉ta꞉ alota꞉ Mo yaka weki Sela daena꞉ hombota꞉ naka꞉ apa꞉na꞉ da pa꞉ta꞉ pa la꞉ka꞉la puata꞉ kineke wanda꞉ hapeke leekeme. Ipikana꞉ma꞉ doeki leeke ekita꞉ mo hande hameke yaapo pia꞉ tupa꞉ Sela make Koda꞉ma꞉ liliekee laa paala꞉ma꞉ homolo hata꞉ leekeme. Koto ekina꞉ Teimata꞉ ipika꞉ atekena꞉ da paa la꞉ka꞉la peekeme.   
\p
\v 12 Natemanu hosiki haota꞉ Diudana꞉ weteke homeekeme. Kutupa mo homa꞉ wia pita paeyeketa꞉ ipiki pita꞉ ipika꞉ yankeke some mo Adalamo hali Hita yaapo Timina nane mo ipika꞉ sipisipimanu itiki ponda꞉laeyeke nane pepekeme.  
\v 13 Kutupa ma꞉nda꞉ma꞉ Teima pa꞉ta꞉ alota꞉ Naka꞉ meita꞉ mo Timina nane ipika꞉ sipisipi manuna꞉ itiki pondololo yopula꞉me laa leekeeki opiekeme.  
\v 14 Koto ekina꞉ mo wanda꞉ma꞉ta꞉ mo ipika꞉ yamo hayeke kineke wanda꞉na꞉ aka꞉manu topo pea ipika꞉ leke popeleketa꞉ dau sinkipikima꞉ a꞉mbaota꞉ mo Timina pula꞉ pota꞉na꞉ hayeke daoni Eneimina꞉ pota꞉ kake pa꞉ta꞉ pua pitiekeme. Mo wanda꞉ma꞉ta꞉ Diudana꞉ wetepe weki Selata꞉ amba꞉ daela꞉pate kone I̱ na mina꞉ ala꞉me hone wiekeme.   
\p
\v 15 Kutupa Diudama꞉ mo wanda꞉ hando haota꞉ ipika꞉ leke popeleke a꞉mbaeyeke ekima꞉ta꞉ pa yola꞉la꞉ wanda꞉ ma꞉nda꞉ hone wiekeme.  
\v 16 Ipikana꞉ma꞉ mo pota꞉ tea꞉na꞉ pua mo wanda꞉ pa꞉ta꞉ alota꞉ A꞉pa꞉la꞉ma꞉ naka꞉ yenkita꞉ ekipa kulua꞉pe leekeme. Ipikana꞉ma꞉ta꞉ mo wanda꞉ ipika꞉ meiwanda꞉ ya꞉ka꞉ta꞉me hone na wiekeme.  
\p Mo wanda꞉ma꞉ hombo peaaso alota꞉ I̱ta꞉ aleke kilipikipe leekeme.   
\p
\v 17 Mo halima꞉ hombo peaaso alota꞉ I̱ma꞉ta꞉ mo yaka panake nanikosi ma꞉nda꞉ tapanealueke laa leekeme.  
\p Koto leeke mo wanda꞉ma꞉ alota꞉ A꞉pa꞉la꞉me. Kota꞉ mo ma꞉na꞉ a̱i̱ na kiki halena꞉ta꞉ aleta꞉ ma꞉nda꞉ amba꞉la꞉ ta꞉ka꞉li wia hawano kilipikipe leekeme.   
\p
\v 18 Mo halima꞉ alota꞉ Kota꞉ mo ta꞉ka꞉li wia hawalo pele aleta꞉ aleke kionope leekeme.  
\p Mo wanda꞉ma꞉ hombo peaaso alota꞉ Mo ta꞉ka꞉li wia hawalo polo aleta꞉ mo naka꞉ pi lo tonkaaso hata꞉ ta̱la̱o̱ hale tombota꞉ ipika꞉ endu lopala꞉ pu make mo naka꞉ miniki hale tumapu tonka꞉na꞉ make kie leekeme. Koto leeke mo ale manuta꞉ mo wanda꞉ pa꞉ta꞉ haleekeme. Kutupa loke apa꞉tao mo wanda꞉ta꞉ weki loke lombeekeme.  
\v 19 Kutupa Teimata꞉ da pua mo dau sinkipiki mea bao mo kineke wanda꞉na꞉ aka꞉manu paa pua mu pambaeyekeme.   
\p
\v 20 Diudama꞉ta꞉ mo ipika꞉ yankeke Hita pa꞉ta꞉ alota꞉ Mo hande I̱ma꞉ diminaowa꞉ nanikosi mea pua mo hande wanda꞉ pa꞉ta꞉ halolo hata꞉ ya amba꞉ hande ta꞉ka꞉li wia hawaloa꞉ alemanu mea a꞉papeke laa leekeme. Hitata꞉ koto leeke peekepate mo hande wanda꞉ na handa꞉ wiekeme.  
\v 21 Ipikana꞉ma꞉ta꞉ mo Eneimi haemeke haliweki pa꞉ta꞉ alota꞉ Do hande pota꞉na꞉ pitia꞉ yola꞉la꞉ wanda꞉ta꞉ handoka꞉ta꞉pe laa lota꞉ piekeme.  
\p Mo haliwekima꞉ hombo peaaso alota꞉ Do pateta꞉ yola꞉la꞉ wanda꞉ ma꞉nda꞉ ota꞉ na hala꞉me lemekeme.   
\p
\v 22 Mo hande halita꞉ Diuda pa꞉ta꞉ paa la꞉ka꞉la pua alota꞉ Mo wanda꞉ta꞉ handa꞉ wia꞉peke na ya꞉me. Kutupa make mo koto da haliwekima꞉ make alota꞉ Do pateta꞉ yola꞉la꞉ wanda꞉ ma꞉nda꞉ na hala꞉me laa lememe leekeme.   
\p
\v 23 Koto leeke Diudama꞉ alota꞉ Mo wanda꞉ma꞉ mo ale manuta꞉ pa wia haena꞉e. Wanda꞉halima꞉ diki kitaama꞉na꞉ loa꞉me. I̱ma꞉ta꞉ mo wanda꞉na꞉ yenki haluekema꞉ pua꞉pate mo wanda꞉ taa na handa꞉ wika꞉ta꞉me leekeme.   
\p
\v 24 Kutupa kaisepo tepomanu paena꞉ta꞉ Diuda pa꞉ta꞉ ma꞉nda꞉ma꞉ alota꞉ Naka꞉ mei wanda꞉ Teimama꞉ta꞉ hali yola꞉la꞉ wanda꞉ma꞉ handaaka꞉na꞉ ameta꞉ weki loke lomba꞉la꞉me leekeme.  
\p Koto leeke Diudama꞉ pi taka꞉lakema꞉ alota꞉ Koto wanda꞉ mea pua tima꞉ yankaa homena꞉ lapa꞉peke leekeme.   
\p
\v 25 Kota꞉ mo wanda꞉ta꞉ tima꞉ yanka homaluekema꞉ hama mea pulu haena꞉ta꞉ mo wanda꞉ma꞉ ipika꞉ meiyeke pa꞉ta꞉ pi tapaaso hata꞉ alota꞉ I̱ta꞉ do ale manuna꞉ teke somema꞉ weki mendiao pa꞉la꞉me. Koto ekina꞉ do pi lo tonkaaso hata꞉ ta̱la̱o̱ hala꞉ tombota꞉ ipika꞉ endu lopala꞉ pu make do tumapu tonka꞉na꞉ epina꞉ ekipe laa handa꞉e leekeme.   
\p
\v 26 Diudama꞉ mo hande alemanu handolo hata꞉ alota꞉ Mo wanda꞉ma꞉ta꞉ ota꞉ tikitikina꞉ pa꞉la꞉me. I̱ma꞉ta꞉ mo yaka weki Selama꞉ mina꞉ lapeke ale kone pa I̱ma꞉ pi la꞉ ua꞉eki ata꞉ka꞉ pealome leekeme. Koto ekina꞉ Diudama꞉ta꞉ mo wanda꞉ yaapo loke paa na apa꞉taeyekeme.   
\p
\v 27 Mo wanda꞉ ipika꞉ weki mulu pieke nate opolo epeeketa꞉ hone yaapo wiki weki mendilieke laa handa꞉ wimikime.  
\v 28 Kutupa mo wanda꞉ weki hoki nalo pitina꞉ta꞉ mo weki ma꞉nda꞉ma꞉ta꞉ kiki epena꞉ leeke handa mo weki meao hayeke wanda꞉ma꞉ kiki yola꞉ mea wepiki pu tunkilikima꞉ tonkao alota꞉ Doeki amba꞉la titina꞉ ma꞉nda꞉la꞉me leekepate  
\v 29 pa mo wekima꞉ta꞉ ipika꞉ kiki paa yola꞉ mea mo hameke ma꞉nda꞉ amba꞉la mendiekeme. Kota꞉ mo weki meao hayeke wanda꞉ma꞉ alota꞉ Dupiki hauma꞉ta꞉ naka꞉ pota꞉ ponda꞉pa ipulu pika꞉ta꞉me leekeme. Kota꞉ ekina꞉ mo wekina꞉ bikita꞉ Petese leekeme.  
\v 30 Kutupa mo ipika꞉ hameke mo wepiki pu kikina꞉ tonkaeyeke wekita꞉ wetepena꞉ mendia ipika꞉ bikita꞉ Sita lemekeme.   
\c 39  
\s1 Diosepe pita꞉ Podipana꞉ weteke yaapo  
\p
\v 1 Mo hande Isima꞉elo tapakema꞉ta꞉ Idiepi nane Diosepe hatuku pua mo kinina꞉ da handeteke haena꞉ leeke amina꞉ you some ma꞉nda꞉ Podipa pa꞉ta꞉ tapaemekeme.  
\v 2 Mo Tekehalita꞉ Diosepe yaapo hayeke ekima꞉ ipika꞉ pieke hau paeyao epeayekeme. Ipikita꞉ mo ipika꞉ pahameke e pokao hayeke Idiepi halina꞉ da pa꞉ta꞉ pelia hayekeme.  
\v 3 Kutupa koto somema꞉ta꞉ mo Tekehalita꞉ Diosepe yaapo hayekeeki yalo ipika꞉ pieke hau paeya tapaoma꞉ ota꞉ epeke tupa꞉ piekeeki handeekeme.  
\v 4 Koto ekina꞉ Podipama꞉ta꞉ mo wekima꞉ pieke hau manuna꞉ ta꞉na꞉ma꞉ homolo hata꞉ta꞉ ipika꞉ puki pi e pokaasa꞉ some haena꞉ alo hata꞉ta꞉ ipika꞉ da make ipika꞉ wia hayeke ala꞉ta꞉ ala꞉ta꞉ paeyaona꞉ handeteke hala꞉ you hali haena꞉ leekeme.  
\v 5 Koto natena꞉ kini peaata꞉ mo Diosepe hayeke ekina꞉ Tekehalima꞉ta꞉ mo Idiepi halina꞉ da pa꞉ta꞉ wieke alemanu paeyao make oni e nina꞉ haemeke alemanu make paeyao epeayekeme.  
\v 6 Podipama꞉ta꞉ mo ipika꞉ wia hayeke alemanu paeyao sikita꞉ Diosepena꞉ kiki pa꞉ta꞉ u moneaaso hata꞉ ipikita꞉ ala꞉ta꞉ ma꞉nda꞉na꞉ hone na wikita꞉ pa nolo pieke nena꞉ homeke hone wiekeme.  
\p Diosepeta꞉ loke panka hali seliapo hayekeme.  
\v 7 Kutupa hao hao peaata꞉ ipika꞉ you somena꞉ wetekema꞉ta꞉ mo wekina꞉ da tunkulolo hata꞉ da panda꞉ nane polupana꞉ pana꞉e laa honke leekeme.  
\v 8 Koto leeke mo wekima꞉ kiaaso hata꞉ mo wanda꞉ pa꞉ta꞉ alota꞉ Handa꞉e. Yaka you halima꞉ta꞉ do I̱ halo ekina꞉ ipika꞉ da pa꞉ta꞉ ula꞉ alemanu paeyaota꞉ hone bao hala꞉me. Ipikana꞉ma꞉ta꞉ ala꞉ta꞉ ala꞉ta꞉ paeyao I̱ma꞉ handeteke hano la꞉la꞉me.  
\v 9 Ipikana꞉ma꞉ta꞉ mo ipiki pa꞉ta꞉ ula꞉ honkopu kone I̱ pa꞉ta꞉ make ala꞉ta꞉ ala꞉ta꞉ paeyao handeteke hano la꞉la꞉pate neke homeke dia꞉me. Koto ekina꞉ pa I̱ma꞉ta꞉ Koda꞉ pa꞉ta꞉ hoke hau pitolo hata꞉ do nakana꞉ma꞉ ale hoke hauta꞉ ekipa peonope laa leekeme.  
\v 10 Mo wanda꞉ma꞉ta꞉ hoto paeyao Diosepe honke la꞉tia pulu hayekepate mo wanda꞉ yaapo ota꞉ na polu peekeme.  
\v 11 Kutu piekepate nate ma꞉nda꞉na꞉ta꞉ Diosepeta꞉ oni da pa꞉ta꞉ e pokulueke alo peekepate mo da pa꞉ta꞉ e pokao haemeke tapake ma꞉nda꞉ make ota꞉ na haemekeme.  
\v 12 Koto ekina꞉ mo wanda꞉ma꞉ mo wekina꞉ dau hokulupeke mineke hata꞉ alota꞉ Oni da panda꞉ pa꞉ta꞉ dika꞉ polupana꞉ pana꞉ epoma leekepate mo wekita꞉ ipika꞉ dauta꞉ mo wanda꞉na꞉ kiki pa꞉ta꞉ hola꞉mea wia haena꞉ hama pindipa opolu baeyekeme.  
\v 13 Mo wanda꞉ma꞉ta꞉ mo wekima꞉ ipika꞉ dau mina꞉pa꞉lao hama opolu baeya꞉ eki hando haota꞉  
\v 14 kota꞉ mo wanda꞉ma꞉ ipika꞉ da pa꞉ta꞉ e pokaemeke mandane wanda꞉hali pa꞉ta꞉ e̱ wi alo alota꞉ Do ale handa꞉pee. Do hande yaka halikima꞉ hatuku epea꞉ Hibulu wekima꞉ta꞉ niki yala꞉ peake hau pa꞉la꞉mee. Ipikana꞉ma꞉ta꞉ yaka da panda꞉ pa꞉ta꞉ a꞉pa I̱ minuluekema꞉ pia꞉pate I̱ma꞉ ota꞉ anekema꞉ e̱ wi tieke loa꞉me.  
\v 15 Mo ipikana꞉ma꞉ta꞉ I̱ma꞉ e̱ wi loa꞉eki opu haota꞉ kota꞉ ipika꞉ dau wina꞉ wina꞉ pea hama opolu bao pa꞉la꞉mee leekeme.  
\v 16 Mo wanda꞉ma꞉ta꞉ Diosepena꞉ dauta꞉ pa wia pita mo wekina꞉ you some epeeke handaa waleekeme.  
\v 17 Kutupa mo hande amba꞉ leekeeki kone paa laa halolo alota꞉ Mo nakana꞉ma꞉ hande hatuku epe pa hameke e pokaasa꞉ Hibulu wekima꞉ta꞉ yala꞉ peake hau puluekema꞉ yaka da panda꞉ pa꞉ta꞉ epea꞉me.  
\v 18 Kutu piekepate pa mo I̱ma꞉ e̱ wi loa꞉ dina꞉ta꞉ do ipika꞉ dau wina꞉ wina꞉ pu hama opolu baeya꞉me leekeme.   
\p
\v 19 Kota꞉ Diosepena꞉ you somema꞉ kotoeki opu haota꞉ tetoma꞉ homolo hata꞉  
\v 20 Diosepe minina꞉ laata꞉ mo kinina꞉ dipula haliweki pitaeyeke ale pa꞉ta꞉ dipula pitina꞉ leekeme. Kutupa Diosepeta꞉ koto pa꞉ta꞉ hao hayekeme.  
\v 21 Pate mo Tekehalita꞉ Diosepe yaapo hata꞉ ipiki epeayekeeki yalo mo dipula handeteke hayeke halima꞉ make Diosepe yaapo ta꞉na꞉ma꞉ homeekeme.  
\v 22 Koto ekina꞉ mo somema꞉ta꞉ Diosepeta꞉ mo mandane dipula haliweki paeyao handeteke haena꞉ laa make mo dipula da pa꞉ta꞉ pieke haumanu paeyaota꞉ ipikana꞉ma꞉ handeteke haena꞉ leekeme.  
\v 23 Mo Tekehalita꞉ Diosepe yaapo hata꞉ ipika꞉ pieke haumanu paeyaota꞉ pu epeayeke handaa mo dipula handeteke hayeke somema꞉ta꞉ Diosepema꞉ handeteke haena꞉ leeke ale manuta꞉ ipikana꞉ma꞉ pa na handeteke hayekeme.   
\c 40  
\s1 Diosepema꞉ dipula hali yaapona꞉ upana꞉ teke la haleekeeki  
\p
\v 1 Hao hao pea nate ma꞉nda꞉na꞉ta꞉ mo Idiepi kinina꞉ waini ikali handeteke hayeke some pita꞉ betedi yanko hayeke some yaapoma꞉ta꞉ mo Kini somena꞉ puki ka꞉nda꞉ peaepekeme.  
\v 2 Koto ekina꞉ mo kinita꞉ mo ipika꞉ e pokaepeke you hali yaapo ame̱le̱ mineke pankolo hata꞉  
\v 3 mo hande Diosepe pitieke ale pa꞉ta꞉ oni dipula handeteke hayeke somena꞉ da pa꞉ta꞉ dipula mea pitaeyekeme.  
\v 4 Hali yaapota꞉ nate wotuna꞉ dipula pita꞉ta꞉ mo dipula handeteke hayeke somema꞉ta꞉ Diosepeta꞉ mo hali yaapona꞉ handeteke hala꞉ hali haena꞉ leekeme.   
\p
\v 5 Timba ma꞉nda꞉na꞉ta꞉ mo dipula da pa꞉ta꞉ mo kinina꞉ waini ikali handeteke hayeke somema꞉ make mo betedi yanko hayeke somema꞉ make telipuna꞉ma꞉ upa teketa꞉ ta꞉ta꞉ pikieki pu alu pipikime.  
\v 6 Diosepeta꞉ da ka꞉la꞉paaso mo hali yaapo pa꞉ta꞉ epeekepate ipilikita꞉ wenoko homa꞉niao pitipipikieki handeekeme.  
\v 7 Ipikana꞉ma꞉ mo hali yaapo lota꞉ pitolo hata꞉ alota꞉ Ameta꞉ ipilikita꞉ ekipeke wenoko homa꞉niao pitipipipe leekeme.   
\p
\v 8 Koto leeke mo hali yaapoma꞉ hombo peaaso alota꞉ Diki telipuna꞉ma꞉ upa polopa꞉pate mo upa tekemanu la kulu pa꞉la꞉ some do pate ma꞉nda꞉ na hala꞉me lepekeme.  
\p Koto lepeke Diosepema꞉ alota꞉ Mo upa la꞉ka꞉la hala꞉peke ekina꞉ honkoputa꞉ Koda꞉ma꞉ kone kitolo pita꞉la꞉me. Ipilika꞉ upa yaapo la kipee leekeme.   
\p
\v 9-10 Koto ekina꞉ mo kinina꞉ waini ikali handeteke hayeke somema꞉ alota꞉ Ya upama꞉ta꞉ mo yaka puki nanema꞉ta꞉ hopiki tepo hake waini pu hayekeme. Mo katakemanu duta꞉pa lopa꞉ lopa꞉ pia꞉ dina꞉ koneta꞉ mo momamanu liaata꞉ mo waini kilikimanu make koto kone potea꞉me.  
\v 11 I̱ma꞉ta꞉ mo kinina꞉ kapo miniki hata꞉ pueke ale mo waini kilikimanu mea oni kapo pa꞉ta꞉ dekepo pamba mo kini pa꞉ta꞉ haloa꞉me laa la haleekeme.   
\p
\v 12 Diosepema꞉ alota꞉ Mo upana꞉ teketa꞉ do ekina꞉ peleme. Mo hopiki tepota꞉ nate tepoe.  
\v 13 Mo tepo natena꞉ta꞉ kinima꞉ neketa꞉ dipula mina꞉pa꞉lalena꞉ laa naka꞉ hande poko hae e paa pokoelena꞉ la꞉lieke. Kutupa nakana꞉ma꞉ta꞉ mo hande amba꞉ waini ikali handeteke hae tupa꞉ mo kinina꞉ kapo paa halo halipikie.  
\v 14 Koto pa꞉la꞉pate mo neke epeke tupa꞉ pua hao pelika꞉na꞉ta꞉ I̱ hone wia꞉peke. Kutupa make pilisi I̱ do dipula mina꞉pa꞉lano a꞉ta꞉ma꞉ homa tamba꞉ minolo hata꞉ta꞉ mo kini pa꞉ta꞉ pua opuapeke leekeme.  
\v 15 Pa ekipeke I̱ta꞉ mo Hibulu tapakena꞉ kenke pa꞉ta꞉ta꞉ pake mea a꞉pa ame do Idiepi kenke pa꞉ta꞉ maketa꞉ I̱ma꞉ dipula pula꞉ hau ma꞉nda꞉ na pua꞉pate kone pelememe laa leekeme.   
\p
\v 16 Kota꞉ mo hande betedi yanko hayeke you somema꞉ta꞉ mo kinina꞉ waini ikali handeteke hayeke you halina꞉ upa tekemanu la haleeke ekita꞉ epeke tupa꞉ la haleeke handa ipikana꞉ma꞉ make Diosepe pa꞉ta꞉ alota꞉ I̱ma꞉ make upa dupa pua꞉me. I̱ta꞉ betedi wiki kawaso paeyao tepo yaka youna꞉ tuekeme.  
\v 17 Kutupa mo ota꞉ manda tepo peao tueke ekina꞉ta꞉ mo kinina꞉ anemone ta꞉ta꞉ ta꞉ta꞉ piki palaowa kitikimanu yekeme. Kutupa mo ba manuma꞉ mu nememe.   
\p
\v 18 Diosepema꞉ hombo peaaso alota꞉ Teketa꞉ dupae. Mo kawaso tepota꞉ nate tepo la pa꞉la꞉me.  
\v 19 Nate tepona꞉ta꞉ kinima꞉ neketa꞉ dipula mina꞉pa꞉lalena꞉ laata꞉ naka꞉ make tunkilieke. Kutupa naka꞉ loketa꞉ ti hokuluna꞉ endialimi alena꞉ mo ba titima꞉ naka꞉ loke nelimikie leekeme.   
\p
\v 20 Kota꞉ nate tepo paeyeketa꞉ mo kinima꞉ ipika꞉ mendieke nate mieke handa ipika꞉ you haliweki manuna꞉ ne pambaaso hata꞉ mo hande ipika꞉ waini ikali handeteke hatiki pieke you some make mo betedi yanko hatiki pieke you some make telipuna꞉ dipula da mina꞉pa꞉lao mo ipika꞉ you haliweki pitimiki alena꞉ hatuku epeekeme.  
\v 21 Ipikana꞉ma꞉ta꞉ mo waini ikali handeteke hayeke you someta꞉ ipika꞉ amba꞉ hande ena꞉ paa haena꞉ alo hata꞉ta꞉  
\v 22 mo palaowa yanko hatiki pieke you someta꞉ lia endiayekeme. Do hau paeyaota꞉ mo hande Diosepema꞉ leeke tupa꞉ siki kone piekeme.  
\v 23 Pate mo kinina꞉ waini ikali handeteke hawayeke somema꞉ta꞉ Diosepe ota꞉ hone na wiki hone yonka꞉la kilipayekeme.   
\c 41  
\s1 Diosepema꞉ mo kini halina꞉ upa manuna꞉ teke la haleekeeki  
\p
\v 1 Koto hao pea bapi yaapo paeyeketa꞉ mo Idiepi kini ipika꞉ upama꞉ta꞉ ipikita꞉ mo Naili ikali tea꞉na꞉ hayekeeki handeekeme.  
\v 2 Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haemekeme.  
\v 3 Kutupata꞉ pa mandane wataake hata꞉ kaomanu make opa꞉liaememe. Koto kao manuta꞉ loke dia꞉ya make pa꞉ta꞉liki holiki yapeekeme. Ikita꞉ mo titina꞉ kaomanu haemeke alena꞉ mo ikali tea꞉na꞉ mandakena꞉ pua haemekeme.  
\v 4 Kutupa mo loke dia꞉yeke kao manuma꞉ta꞉ mo loke panka wiki kaomanu na꞉ta꞉ paemekeme. Kotoeki handolo hata꞉ mo kinita꞉ paa tiaeyekeme.  
\v 5 Kutupa ipiki paa polu hola꞉pa upa ma꞉nda꞉ dupa piekeme. Kunima꞉ handeke ale widi opeekeeki liki homekena꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme.  
\v 6 Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napeke pou taeyekeme.  
\v 7 Kutupa mo na pankeke widi napeke manuma꞉ta꞉ mo panka wiki napekemanu mea na꞉ta꞉ paemekeme. Kota꞉ mo kini tiaota꞉ upama꞉ pua꞉ka꞉ta꞉me laa handa꞉ wiekeme.  
\v 8 Da ka꞉la꞉paasota꞉ mo kinima꞉ta꞉ hone ka꞉nda꞉ma꞉ homolo hata꞉ mo Idiepi kenke pa꞉ta꞉ haemeke ti̱o̱ haliweki make mo hone u lenkene pimiki tapake make wi la꞉ mipi piekeme. Kutupa koto haliweki paeyao pa꞉ta꞉ta꞉ ipika꞉ upa yaapo kelepeekepate homeke a꞉nda꞉ma꞉ teke ota꞉ la hala꞉peke na yekeme.   
\p
\v 9 Koto ekina꞉ mo waini ikali handeteke hayeke you somema꞉ mo kini pa꞉ta꞉ alota꞉ I̱ma꞉ta꞉ hoke hau poloma꞉ ame neke pa꞉ta꞉ keleponoe.  
\v 10 Nakana꞉ma꞉ta꞉ mo amba꞉ palaowa yanko haya꞉ some diki pa꞉ta꞉ mineke pankolo hata꞉ mo dipula handeteke hala꞉ somena꞉ da pa꞉ta꞉ dipula mea lopaeme.  
\v 11 Kota꞉ timba ma꞉nda꞉na꞉ diki telipuna꞉ma꞉ teke ta꞉ta꞉ wiki upa pu alu pupa꞉me.  
\v 12 Koto pa꞉ta꞉ta꞉ diki ame̱le̱ mo Hibulu weki ma꞉nda꞉ haya꞉me. Ipikita꞉ mo naka꞉ da handeteke haena꞉ lele amina꞉ you somena꞉ pa hameke e pokaasa꞉ weki yekeme. Dikana꞉ma꞉ta꞉ ipiki pa꞉ta꞉ dika꞉ upa kelepopeke handaata꞉ mo upa yaapona꞉ teketa꞉ ipikana꞉ma꞉ diki la kia꞉me.  
\v 13 Koto mo somema꞉ lea꞉ tupa꞉ koneta꞉ nakana꞉ma꞉ I̱ta꞉ yaka e paa kipate mo betedi yanko haya꞉ you someta꞉ lu endiaeme laa la haleekeme.   
\p
\v 14 Koto leeke ekina꞉ mo kinima꞉ Diosepe handa꞉ mealo pupa꞉ leeke handaa koto kone mo dipula da pa꞉ta꞉ handa꞉ mea epeekeme. Mo weki ipika꞉ yankake itiki mea aka꞉ topo pea paeyeketa꞉ mo kinina꞉ leke popelekena꞉ epeekeme.  
\v 15 Kutupa mo kinima꞉ ipiki pa꞉ta꞉ alota꞉ I̱ma꞉ta꞉ upa pua꞉pate ma꞉nda꞉ma꞉ koto upana꞉ teke la kia꞉peke na ya꞉la꞉me. Ma꞉nda꞉ma꞉ I̱ pa꞉ta꞉ alota꞉ Nakana꞉ma꞉ta꞉ mo upa tekemanu lapeke ya꞉la꞉me laa lea꞉me leekeme.   
\p
\v 16 Koto leeke Diosepema꞉ hombo peaaso alota꞉ Aneke halio. I̱ma꞉ta꞉ pea꞉peke na ya꞉la꞉pate pa Koda꞉ma꞉ homeke epeke tupa꞉ teke la kilieke leekeme.   
\p
\v 17 Mo kinima꞉ alota꞉ Yaka upama꞉ta꞉ I̱ta꞉ mo Naili ikali tea꞉na꞉ hata꞉ puekeme.  
\v 18 Kutupa mo ikali pa꞉ta꞉ yama꞉ta꞉ loke panka wiki yonkeleke homu piki wataake hata꞉ kaomanu opa꞉liaota꞉ mo ambumanu nalo haememe.  
\v 19 Kutupata꞉ pa wataake hata꞉ kaomanu opa꞉liaememe. Mo koto kao manuta꞉ loke dia꞉ya pa꞉ta꞉liki holiki yapeekeme. Koto kao manuta꞉ do Idiepi kenke pa꞉ta꞉manu I̱ ota꞉ ma꞉nda꞉ na hando alo ota꞉ hoke kaomanu yekeme.  
\v 20 Mo loke na pankeke kao manuma꞉ta꞉ mo loke panka wiki kaomanu na꞉ta꞉ paememe.  
\v 21 Kutu pimipate mo kaomanu nemekeeki ma꞉nda꞉ma꞉ handa꞉ wia꞉peke na ya꞉me. Pa ekipeke mo kao manuta꞉ mo hande amba꞉ haeme tupa꞉ kone paa haemekeme. Kutupata꞉ I̱ tiaowa꞉me.  
\v 22 Koto timba kone pa upa ma꞉nda꞉ pua꞉ ekita꞉ mo kunima꞉ handeke ale widi opeekeeki homeke likina꞉ta꞉ napeke paeyao wataake hata꞉ wiekeme. Mo napeke manuta꞉ panka wia napea wiekeme.  
\v 23 Kutupa pa wataake hata꞉ widi napekemanu homeke ekina꞉ ombu opa꞉liaeyekepate mo napeketa꞉ na pankeekeme. Kota꞉ mo hapupa pa꞉la꞉ alena꞉ yama꞉ epeeke titipu piki poma꞉ta꞉ mo napekemanu pou taeyekeme.  
\v 24 Kutupa mo na pankeke widi napeke manuma꞉ta꞉ mo panka wiki napekemanu na꞉ta꞉ paememe. I̱ma꞉ta꞉ do upa yaapota꞉ mo ti̱o̱ haliweki pa꞉ta꞉ kelepoa꞉pate pa homeke a꞉nda꞉ma꞉ teke ota꞉ la kia꞉peke na ya꞉me laa leekeme.   
\p
\v 25 Diosepema꞉ mo kini pa꞉ta꞉ alota꞉ Mo upa yaapona꞉ teketa꞉ homeke konee. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ la ka꞉la꞉me.  
\v 26 Mo panka wiki wataake hata꞉ kao manuta꞉ wataake hata꞉ bapi manue. Kutupa mo panka ula꞉ wataake hata꞉ kunima꞉ handeke widi napeke make homeke tupa꞉ wataake hata꞉ bapi manue. Mo upa yaapona꞉ teketa꞉ homeke konee.  
\v 27 Kutupa mo wetepena꞉ opa꞉liaeyeke loke na pankeke wataake hata꞉ kaomanu pita꞉ mo na pankeke kunima꞉ handeke widi napeke mo hapupa pa꞉la꞉ alena꞉ yama꞉ epeeke titipu piki poma꞉ pou taeya꞉ ekina꞉ teketa꞉ bapi wataake hata꞉na꞉ tea꞉ ki tieke epolo pa꞉la꞉ekie.  
\v 28 Kotota꞉ mo amba꞉ hande la kua꞉ tupa꞉e. Koda꞉ma꞉ta꞉ mo ipikana꞉ma꞉ pulu pa꞉la꞉eki neke pa꞉ta꞉ wala꞉la꞉me.  
\v 29 Kota꞉ mo bapi wataake hata꞉na꞉ta꞉ do Idiepi kenke paeyao pa꞉ta꞉ta꞉ ne wotu tande pilieke.  
\v 30 Kotoeki hoki naneta꞉ bapi wataake hata꞉na꞉ tea꞉ ki ipilieke. Koto hoke tea꞉ ki ipulu do kenke hoeyaeya꞉ka꞉na꞉ta꞉ kota꞉ ikana꞉ma꞉ mo hande epeke bapi manuta꞉ hone yonka꞉lalimikie.  
\v 31 Mo ne tande pea꞉ bapi manuta꞉ ota꞉ hone yonka꞉lalimikie. Pa ekipeke mo ipilia꞉ tea꞉ kita꞉ ota꞉ teto pikieki ipilieke.  
\v 32 Mo hoto yaapo peao pele upana꞉ teketa꞉ mo Koda꞉ma꞉ ota꞉ pulueke laa wia kutupa teke pa꞉ta꞉ kone pina꞉ lelieke.   
\p
\v 33 Koto ekina꞉ nakana꞉ma꞉ mo hone u lenkene pa꞉la꞉ hali ma꞉nda꞉ma꞉ do kenke handeteke haena꞉ ma̱leke luelena꞉e.  
\v 34 Kutupa make mandane handeteke halo pimiki you halimanu meata꞉ mo ne wopu wita꞉la꞉ bapi wataake hata꞉na꞉ta꞉ koto haliwekima꞉ta꞉ mo wanda꞉hali paeyaona꞉ amu pimi ne manuta꞉ yunki hata꞉ lo wina꞉ laata꞉ homeke lo meata꞉ mu mombelena꞉ lapeke.  
\v 35 Mo tapakema꞉ta꞉ mo ipula꞉ epeke bapimanu pa꞉ta꞉ta꞉ koto ne paeyaomanu mu mombelena꞉ laata꞉ Kutupa oni daoni pa꞉ta꞉manu koto kunima꞉ handeke widi kilikimanu wia꞉peke damanu a꞉ena꞉ biki halaata꞉ handeteke haena꞉ lena꞉ lapekee.  
\v 36 Mo koto Idiepi kenke pa꞉ta꞉ epolo pa꞉la꞉ tea꞉ kita꞉ mo amu pea wilimi nema꞉ do Idiepi wanda꞉hali paeyao epealieke. Do hau pika꞉na꞉ta꞉ wanda꞉hali paeyao tea꞉ma꞉ na homilimikie leekeme.   
\s1 Diosepeta꞉ Idiepina꞉ you hali haena꞉ leekeeki  
\p
\v 37 Mo kini hali pita꞉ ipika꞉ you haliwekima꞉ make do Diosepema꞉ leeke pina꞉ a꞉pa꞉la꞉me laa  
\v 38 mo kini halima꞉ ipika꞉ haliweki pa꞉ta꞉ alota꞉ Nikana꞉ma꞉ta꞉ mo Diosepe ankulake Koda꞉na꞉ Sipitidi pila꞉ hali ma꞉nda꞉ ota꞉ na handa꞉ ulumeke leekeme.  
\v 39 Kutupa mo kinima꞉ Diosepe pa꞉ta꞉ alota꞉ Koda꞉ma꞉ do hau paeyao neke pa꞉ta꞉ wala꞉la꞉ma꞉ mo nakana꞉ma꞉ aneke tupa꞉ hone u lenkene pitele ekita꞉ paeyao ota꞉ ankulaleeki handoloma꞉me.  
\v 40  I̱ma꞉ neketa꞉ yaka kenke paeyao handeteke halena꞉ laata꞉ mo yaka wanda꞉hali paeyaoma꞉ta꞉ nakana꞉ma꞉ pipa꞉ lelipieki opua pina꞉ lolueke. Naka꞉ handeteke hale ekita꞉ ya handeteke halo ekina꞉ yaapo peao wina꞉e.  
\v 41 Koto ekina꞉ I̱ma꞉ neketa꞉ do Idiepi kenke paeyaona꞉ kapomanina꞉ handeteke hala꞉ you hali pituelena꞉ ame ma̱leke litolome leekeme.  
\v 42 Mo kinima꞉ta꞉ mo kapomanina꞉ handeteke pila꞉ ekina꞉ pi tonkao u hala꞉ linita꞉ ipika꞉ kikina꞉ hola꞉ mea Diosepena꞉ kikina꞉ pitaeyekeme. Kutupa ipika꞉ lokena꞉ mo epeke dau seliapo ma꞉nda꞉ pambawaota꞉ koloma꞉ wepiki senipu ipika꞉ make pa꞉ta꞉ mokaeyekeme.  
\v 43 Kutupa pomu lopena꞉ta꞉ mo kinima꞉ ipika꞉ yaapo peao hosima꞉ yola pula꞉ ale mo Diosepe pa꞉ta꞉ halaata꞉ mo ipika꞉ handeteke haemeke haliwekita꞉ Diosepe titina꞉ amba꞉la pulu hata꞉ e̱ wi la꞉ moneaaso alota꞉ Pota꞉ pilae. Pota꞉ pilae laa lena꞉ leekeme. Koto ekina꞉ta꞉ Diosepeta꞉ Idiepi kenke paeyao pa꞉ta꞉ kapomanina꞉ handeteke hala꞉ hali pitiekeme.  
\v 44 Mo kinima꞉ ipiki pa꞉ta꞉ alota꞉ I̱ta꞉ kini ya꞉la꞉ ekina꞉ do Idiepi kenke paeyao pa꞉ta꞉ hala꞉ some homeke ma꞉nda꞉ sikima꞉ nakana꞉ma꞉ a꞉pa꞉la꞉ma꞉ aleeki na miki hata꞉ta꞉ kiki anke kone na mea mina꞉liaena꞉e leekeme.  
\v 45-46 Kutupa Diosepeta꞉ mo Idiepi biki ma꞉nda꞉ Sa꞉pena꞉de Pania halaata꞉ mo Heliopolisi daoni pa꞉ta꞉ hayeke yeni peao hayeke hali Podipitana꞉ waneke A꞉sena꞉de mina꞉ haleekeme.  
\p Diosepeta꞉ 30 bapina꞉ mo Idiepina꞉ kinina꞉ e kini pea pokaeyekeme. Ipikita꞉ mo kinina꞉ da mina꞉pa꞉lao mo Idiepi kenke honiki paeyao pa꞉ta꞉ pomu lopeekeme.  
\v 47 Mo ne tandepeeke bapi wataake hata꞉ pa꞉ta꞉ta꞉ ota꞉ ne tieke opeeketa꞉  
\v 48 Diosepema꞉ meata꞉ mo daoni pa꞉ta꞉manu da a꞉eya mu mombeleekeme. Daoni homeke homeke pa꞉ta꞉ta꞉ koto daoni tea꞉na꞉ hao yapeeke e pa꞉ta꞉manu ne meata꞉ da a꞉eya mu momba꞉la wia꞉tiki piekeme.  
\v 49 Kunima꞉ handeke widita꞉ ota꞉ tieke wieke ekiyalo Diosepema꞉ta꞉ tombo mieke ekita꞉ mina꞉pa꞉laeyekeme. Mo widita꞉ dawalana꞉ houma꞉ handeekeme.   
\p
\v 50 Mo tea꞉ ki epolo pia꞉ bapimanu a̱i̱ na epeke haena꞉ta꞉ A꞉sena꞉dema꞉ Diosepena꞉ weki yaapo mendiaeyekeme.  
\v 51 Diosepema꞉ alota꞉ Mo Tekehalima꞉ta꞉ mo I̱ma꞉ mua꞉ ka꞉nda꞉manu make yaka tapake make hone yonka꞉lano la꞉la꞉me laata꞉ Mo mupeke wekina꞉ bikita꞉ Ma꞉na꞉sa꞉ leekeme.  
\v 52 Kutupa make alota꞉ Koda꞉ma꞉ta꞉ mo yaka ka꞉nda꞉ molo kenke pa꞉ta꞉ wekiwandiki ka꞉la꞉me laa mo yaapo peao mendieke wekina꞉ bikita꞉ Ipoteimi leekeme.   
\p
\v 53 Kutupa mo hande Idiepi tapakena꞉ ne tande peeke ta꞉na꞉ma꞉ homemeke wataake hata꞉ bapita꞉ paelo epeekeme.  
\v 54 Kutupa mo hande Diosepema꞉ leeke tupa꞉ kone mo tea꞉ kina꞉ wataake hata꞉ bapi kini piekeme. Kenke ma꞉nda꞉ ma꞉nda꞉ pa꞉ta꞉ta꞉ tea꞉ ki tieke epeekepate Idiepi kenke pa꞉ta꞉ homeketa꞉ ne pa wiekeme.  
\v 55 Mo Idiepi wanda꞉ hali tea꞉ma꞉ homolota꞉ mo kini pa꞉ta꞉ nena꞉ honke loloendi pimikime. Koto ekina꞉ mo kinima꞉ ikita꞉ Diosepe pa꞉ta꞉ pena꞉ laata꞉ mo ipikana꞉ma꞉ pipe lelia꞉eki pia꞉pa꞉peke laa leekeme.  
\v 56 Mo tea꞉ kita꞉ mo Idiepi kenke paeyao pa꞉ta꞉ putupolo hata꞉ ota꞉ hoeya꞉tia peeke handa Diosepema꞉ta꞉ mo ne damanu lumba mo Idiepi wanda꞉hali pa꞉ta꞉ widimanu tapatiki piekeme.  
\v 57 Mo tea꞉ kita꞉ kenke ta꞉ta꞉ ta꞉ta꞉ paeyao pa꞉ta꞉ ota꞉ hoke tupa꞉ putupieke handaa mo kenke ta꞉ta꞉ ta꞉ta꞉ pa꞉ta꞉ haemeke wanda꞉halita꞉ oni Idiepi da pa꞉ta꞉ widi hambuluekema꞉ Diosepe pa꞉ta꞉ epemekeme.   
\c 42  
\s1 Diosepena꞉ hameke tonu widi hambolo Idiepi pemekeeki  
\p
\v 1 Dieikopema꞉ta꞉ mo Idiepi nane widi ula꞉me leekeeki opu hao ipika꞉ eiyeke tonu pa꞉ta꞉ alota꞉ Ikana꞉ma꞉ta꞉ ekipeke hau ma꞉nda꞉ na pitelemepe.  
\v 2 Oni Idiepi kenke pa꞉ta꞉ widi ula꞉ma꞉ aleke opitolo loa꞉ma꞉ do niki tea꞉ma꞉ homaama꞉na꞉ma꞉ koto nane pua hamba꞉pee leekeme.  
\v 3 Koto ekina꞉ta꞉ Diosepena꞉ hameke tonu paeyao kiki yaapo weki tonuta꞉ Idiepi nane widi hambolo pemekeme.  
\v 4 Pate Dieikopema꞉ta꞉ mo Diosepena꞉ hameke wetepe nane weki Benisaminita꞉ mo hameke tonu ame̱le̱ na tapaeyekeme. Pa ekipeke ipika꞉ honema꞉ta꞉ mo weki pa꞉ta꞉ hau ma꞉nda꞉ peaama꞉na꞉e hone wiekeme.   
\p
\v 5 Mo Keinani kenke paeyao pa꞉ta꞉ta꞉ tea꞉ ki tieke pambeke handaata꞉ mo Dieikopena꞉ eiyeke tonu ame̱le̱ mandane wanda꞉hali make apa꞉tao widi hambolo pemekeme.  
\v 6 Mo Idiepi kenkena꞉ kapomani handeteke hayeke some Diosepema꞉ta꞉ mo kenke honiki wanda꞉hali paeyao pa꞉ta꞉ widi tapatiki piekeme. Koto ekina꞉ mo ipika꞉ hameke tonuma꞉ta꞉ Diosepe pa꞉ta꞉ leke popeleke oni kenkena꞉ wataaso haena꞉ a꞉pa panda꞉ puniaemekeme.  
\v 7 Diosepema꞉ mo ipika꞉ hameke tonuta꞉ handeekepate kone ipikana꞉ma꞉ pa na handeke nono pea hayekeme. Ipikana꞉ma꞉ mo tapake pa꞉ta꞉ pi taka꞉lakema꞉ lota꞉ pitolo alota꞉ Ikita꞉ hanema꞉ epelemepe leekeme. Koto leeke mo tapakema꞉ hombo peaaso alota꞉ Nikita꞉ mo Keinani hao ne hambuluekema꞉ a꞉pa puma꞉me lemekeme.   
\p
\v 8 Mo Diosepema꞉ta꞉ ipika꞉ hameke tonue laa handa꞉ wiekepate mo hama̱la̱꞉ hama̱la̱꞉ma꞉ta꞉ ika꞉ kamee laa na handa꞉ wimikime.  
\v 9 Ipikana꞉ma꞉ mo amba꞉ handa꞉ ikina꞉ pieke upamanu niminaaso hata꞉ alota꞉ Ikita꞉ kika ikiki haliwekie. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo a꞉pa pelememe leekeme.   
\p
\v 10 Koto leeke mo tapakema꞉ alota꞉ Tiekeo. Dia꞉me. Nikita꞉ naka꞉ e pa hameke e pokaasa꞉ tapake au laa ne hambolo epoma꞉me.  
\v 11 Tiekeo. Nikita꞉ hama̱la̱꞉ hama̱la̱꞉e. Nikita꞉ kika ikiki haliweki dia꞉me. Nikita꞉ ota꞉ hau pu haloma꞉ haliwekie lemekeme.   
\p
\v 12 Pate Diosepema꞉ mo tapake pa꞉ta꞉ alota꞉ Dia꞉me. Ikita꞉ mo nika꞉ kenke hando pa꞉ta꞉ damako pa꞉la꞉pe laa handolo epelememe leekeme.   
\p
\v 13  Mo tapakema꞉ alota꞉ Tiekeo. Nikita꞉ paeyao kiki yaapo paeya ankena꞉ yaapo hama̱la̱꞉ hama̱la̱꞉ ya꞉me. Mo Keinani kenke pa꞉ta꞉ hala꞉ some homekena꞉ wekitonue. Pate weki homeketa꞉ homea꞉me. Kutupa mo wetepe nane wekita꞉ nika꞉ apa꞉ yaapo hala꞉me lemekeme.   
\p
\v 14 Diosepema꞉ hombo peaaso alota꞉ Pa mo hande I̱ma꞉ loa꞉ handa꞉e. Ikita꞉ kika ikiki haliwekie.  
\v 15 Ameta꞉ dota꞉ iki yokaalo polo tupa꞉e. I̱ma꞉ta꞉ mo kinina꞉ bikina꞉ keke pi alo alota꞉ Ikita꞉ a̱i̱ na peke pa haota꞉ ika꞉ wetepe nane weki epea꞉ka꞉na꞉ta꞉ pelimikie.  
\v 16 Iki homeke ma꞉nda꞉ma꞉ mo weki handa꞉ mulu pua꞉pa꞉peke. Paeyaota꞉ dipula pitaota꞉ mo ika꞉ aleme ekita꞉ ota꞉pe laa amba꞉la꞉ yokaalumeke. Dia꞉ ya꞉ka꞉na꞉ta꞉ kota꞉ mo nika꞉ kini ota꞉ hala꞉ ekina꞉ta꞉ ikita꞉ kika ikiki haliwekie laa peneme ya꞉lieke leekeme.  
\v 17 Kutupata꞉ mo tapaketa꞉ hoto tepo dipula pitaeyekeme.   
\p
\v 18 Mo tepo natena꞉ Diosepema꞉ mo tapake pa꞉ta꞉ alota꞉ I̱ta꞉ Koda꞉ paala꞉ haso hali ya꞉la꞉ ekina꞉ hau homeke homeketa꞉ iki homaama꞉na꞉ I̱ma꞉ tamba꞉ mulueke.  
\v 19 Ikana꞉ma꞉ta꞉ ota꞉ pi lelemepe laa handa꞉ uluekema꞉ta꞉ iki homeke ma꞉nda꞉ta꞉ dipula pa pitina꞉e. Kutupa iki paeyaota꞉ pa la꞉ka꞉la pua mo hande hambeme widi manuta꞉ ika꞉ tea꞉ma꞉ homa꞉la꞉ tapake pa꞉ta꞉ mea poemena꞉e.  
\v 20 Kutupa ika꞉ kame wetepe wekita꞉ I̱ pa꞉ta꞉ hatuku a꞉pa꞉pa꞉peke. Koto hau pilimi ekima꞉ta꞉ ikana꞉ma꞉ ota꞉ pi lelememe laa iki na lu homalueke leekeme.  
\p Ikana꞉ma꞉ta꞉ do pina꞉ a꞉pa꞉la꞉me laa  
\v 21 ika꞉ ika꞉ kone alota꞉ Aowe. Ameta꞉ mo hande nika꞉ kame pa꞉ta꞉ puma꞉ hauna꞉ kiliki kone taloloma꞉me. Nikana꞉ma꞉ta꞉ mo ipiki ka꞉nda꞉ tieke minolo hata꞉ ipiki tamba꞉ mipee laa honke lea꞉ ekita꞉ handolo hata꞉ kone na opuma꞉me. Kutu puma꞉ ekina꞉ta꞉ ame nikita꞉ do ka꞉nda꞉ pa꞉ta꞉ haloma꞉me lemekeme.   
\p
\v 22 Lubenima꞉ alota꞉ Kota꞉ I̱ma꞉ iki pa꞉ta꞉ta꞉ mo weki na lia꞉pa꞉pee loa꞉pate ikana꞉ma꞉ta꞉ yaka pi na opimime. Koto ekina꞉ ameta꞉ ipika꞉ homa꞉la꞉ ekina꞉ yenkita꞉ niki pa꞉ta꞉ a꞉pa꞉la꞉me leekeme.  
\v 23 Diosepema꞉ta꞉ mo tapakema꞉ lemeke ekita꞉ opiekepate mo tapakema꞉ta꞉ kotoeki hone na wimikime. Pa ekipeke ikana꞉ma꞉ta꞉ mo pi la꞉ka꞉laeya꞉ some pa꞉ta꞉ laa ipikana꞉ma꞉ la꞉ mea hala꞉tiki pia꞉ ekima꞉ piekeme.  
\v 24 Diosepema꞉ta꞉ mo tapake mina꞉pa꞉lao pua e̱ leekeme. Kutupa ipikita꞉ pi ana꞉na꞉ lapeke yeketa꞉ paa la꞉ka꞉la a꞉pa mo ika꞉ leke popelekena꞉ Simiono ma̱leke lia mina mea tonkaena꞉ leekeme.   
\s1 Diosepena꞉ hameketonu Keinani la꞉ka꞉la pemekeeki  
\p
\v 25 Diosepema꞉ta꞉ mo e pokaemeke haliweki pa꞉ta꞉ta꞉ mo ipika꞉ hameke tonuna꞉ nu manuta꞉ mo widi napeke manuma꞉ tumbao mo homeke homekena꞉ widi hambemeke manita꞉ mo nu kakena꞉ paa mendiama꞉ mendiama꞉ peaata꞉ mo ika꞉ pota꞉na꞉ nolo pimiki ne make hala꞉pa꞉peke leeke handa ota꞉ kutu pimikime.  
\v 26 Kutupa mo hama̱la̱꞉ hama̱la̱꞉ma꞉ta꞉ mo widi nu manuta꞉ ika꞉ donki manuna꞉ hokina꞉ atula atula pea mea wia pemekeme.  
\v 27 Mo pota꞉na꞉ timba꞉ leeke pua pelimiki alena꞉ mo hameke ma꞉nda꞉ma꞉ ipika꞉ donkina꞉ ne halueke alo hata꞉ mo ipika꞉ nu ma꞉nda꞉ tokiekepate mo nu kakena꞉ta꞉ ipika꞉ mani paa mendipelia hayekeeki handolo hata꞉ alota꞉  
\v 28 A꞉pa꞉e. Yaka manita꞉ I̱ pa꞉ta꞉ paa la꞉ka꞉la a꞉pa pia꞉ka꞉ta꞉me laa penkilipa꞉tia pominolo hata꞉ ipika꞉ hameketonu pa꞉ta꞉ wi alo alota꞉ Do handa꞉pe. Yaka nu pa꞉ta꞉ menda꞉la꞉me leekeme. Kutupa mo hama̱la̱꞉ hama̱la̱꞉na꞉ puki keapa olina꞉ onina꞉ pitolo pututuma꞉ homolo hata꞉ ika꞉ ika꞉ kone lota꞉ pu alualu pitolo alota꞉ Koda꞉ma꞉ niki pa꞉ta꞉ eki hau pea pa꞉la꞉pe lemekeme.   
\p
\v 29 Iki mo Keinani nane paa opolo a꞉paata꞉ ika꞉ apa꞉ Dieikope pa꞉ta꞉ mo hande iki pa꞉ta꞉ piekeeki paeyaosiki a꞉pa la halolo hata꞉ alota꞉  
\v 30 Mo Idiepina꞉ kapomanina꞉ you somema꞉ta꞉ niki pa꞉ta꞉ pi taka꞉lake alo hata꞉ nikita꞉ ipika꞉ kenke handuluekema꞉ kika ikiki haliweki poma꞉me lea꞉me.  
\v 31 Koto leeke nikana꞉ma꞉ hombo peaaso alota꞉ Nikita꞉ kika ikiki haliweki dia꞉me. Nikita꞉ ota꞉ hau pitoloma꞉ tapakee laa  
\v 32 Nikita꞉ hali homekena꞉ wekitonu paeyao kiki yaapona꞉ ankena꞉ yaapo ya꞉mee. Weki homeketa꞉ homa꞉la꞉me. Kutupa wetepe nane wekita꞉ nika꞉ apa꞉ yaapo oni Keinani pa hala꞉me loma꞉me.  
\v 33 Kutupa mo you halima꞉ hombo peaaso alota꞉ Ikita꞉ ota꞉ pi lo haleme haliwekie laa handuluekema꞉ta꞉ dupulueke. Iki ma꞉nda꞉ hondota꞉ I̱ ame̱le̱ pa hapelia hata꞉ta꞉ mo iki paeyaota꞉ mo ika꞉ tea꞉ma꞉ homa꞉la꞉ tapakena꞉ widi napekemanu mea pupee laata꞉  
\v 34 Ika꞉ wetepe nane wekita꞉ I̱ pa꞉ta꞉ hatuku a꞉pa꞉pa꞉peke. Kutu pimika꞉na꞉ta꞉ kota꞉ ikita꞉ kika ikiki haliweki dia꞉ma꞉ ota꞉ pi aleme haliwekie hone ulueke. Kutupa do ika꞉ kame iki pa꞉ta꞉ paa kiaka꞉na꞉ ikita꞉ dopate hata꞉ ala꞉ta꞉ ala꞉ta꞉ pa tapamena꞉e laa lea꞉me lemekeme.   
\p
\v 35 Kutupa ikana꞉ma꞉ ika꞉ numanu tokimi dina꞉ta꞉ homeke homekema꞉ ika꞉ mani nu handa꞉ wimikime. Kutupa mo mani hando haota꞉ ikana꞉ma꞉ make ika꞉ apa꞉ Dieikopema꞉ make paala꞉ma꞉ homemekeme.  
\v 36 Ika꞉ apa꞉ma꞉ mo wekitonu pa꞉ta꞉ alota꞉ Ika꞉ honema꞉ta꞉ yaka wekiwandiki paeyao alu pano pitelemepe. Diosepe pa꞉la꞉me. Simiono make pa꞉la꞉me. Ameta꞉ Benisamini mea polukuma꞉ alemepe. I̱ta꞉ mo teto minolo somee leekeme.   
\p
\v 37 Koto leeke Lubenima꞉ ipika꞉ ateke pa꞉ta꞉ alota꞉ I̱ma꞉ Benisamini a꞉nda꞉ paa na hatuku epoa꞉ka꞉na꞉ta꞉ kota꞉ nakana꞉ma꞉ yaka weki yaapo luelena꞉e. Mo wekita꞉ yaka kiki pa꞉ta꞉ wie. Kutupa I̱ma꞉ paa hatuku ipulueke leekeme.   
\p
\v 38 Pate Dieikopema꞉ alota꞉ Yaka wekita꞉ neke yaapo na pena꞉ lolueke. Ipika꞉ hameketa꞉ homolo hata꞉ ipiki homeke hapelia hala꞉me. Mo pota꞉na꞉ hau ma꞉nda꞉ peaapa꞉na꞉ loa꞉me. I̱ta꞉ koke hali yaalo hata꞉ mo ikana꞉ma꞉ mea ipilimi puki tandama꞉ta꞉ I̱ lu homaliekee leekeme.   
\c 43  
\s1 Mo hama̱la̱꞉ hama̱la̱꞉ma꞉ Benisamini hatuku Idiepi pemekeeki  
\p
\v 1 Oni Keinani naneta꞉ mo tea꞉ kita꞉ ota꞉ hoeyekeme.  
\v 2 Kutupa mo Dieikopena꞉ tapakema꞉ mo hande Idiepi nane hambolo pua mea epemeke widita꞉ na꞉ta꞉ paota꞉ Dieikopema꞉ eiyeketonu pa꞉ta꞉ alota꞉ Paa pua nika꞉ ne tepo a꞉nda꞉ ma꞉nda꞉ pua hamba꞉pee leekeme.   
\p
\v 3 Diudama꞉ ateke pa꞉ta꞉ alota꞉ Mo hande you halima꞉ niki pa꞉ta꞉ pi taka꞉lakema꞉ alota꞉ Ikana꞉ma꞉ ika꞉ kame na hatuku epemeka꞉na꞉ta꞉ kota꞉ ika꞉ leke popeleke na handulueke laa lea꞉me.  
\v 4 Koto ekina꞉ nakana꞉ma꞉ nika꞉ kame niki ame̱le̱ tapaalueke hone wika꞉na꞉ta꞉ kota꞉ naka꞉ ne hambalo polumeke.  
\v 5 Pate nakana꞉ma꞉ na tapaalueke lekena꞉ta꞉ kota꞉ mo halima꞉ta꞉ mo nika꞉ kame niki ame̱le̱ ipika꞉ leke popelekena꞉ poma꞉ka꞉na꞉ homeketa꞉ ana꞉ pa꞉la꞉me lea꞉ ekina꞉ta꞉ na polumeke leekeme.   
\p
\v 6 Dieikopema꞉ alota꞉ I̱ pa꞉ta꞉ do ka꞉nda꞉ tieke epena꞉yeke ikana꞉ma꞉ta꞉ ekipeke ika꞉ kame ma꞉nda꞉ hala꞉me laa la halaa pelemepe leekeme.   
\p
\v 7 Ikana꞉ma꞉ hombo peaaso alota꞉ Mo halima꞉ta꞉ niki make nika꞉ tapake make lota꞉ lota꞉ ombu pia꞉me. Ika꞉ apa꞉ta꞉ pa hala꞉pe o Ika꞉ kame ma꞉nda꞉ hala꞉pe laa lota꞉ ombu pia꞉me. Koto ekina꞉ nikana꞉ma꞉ta꞉ ipika꞉ pi hombo peapeke yeke loma꞉me. Ipikana꞉ma꞉ nika꞉ kame hatuku a꞉pa꞉pa꞉peke laa lolo pia꞉ ekita꞉ pa ekipa hone wiomono alepe.   
\p
\v 8 Diudama꞉ ipika꞉ ateke pa꞉ta꞉ alota꞉ Niki koto kone polumekema꞉ mo weki I̱ yaapo tapae. Kutu puma꞉ka꞉na꞉ta꞉ kota꞉ niki ma꞉nda꞉ tea꞉ma꞉ ota꞉ na homulumeke.  
\v 9 Mo weki pa꞉ta꞉ hau ma꞉nda꞉ pia꞉ka꞉na꞉ maketa꞉ kota꞉ I̱ pa꞉ta꞉ wina꞉e. I̱ma꞉ mo weki hau ma꞉nda꞉ peao epeke tupa꞉ neke pa꞉ta꞉ na hatuku epoa꞉ka꞉na꞉ta꞉ kota꞉ koto pu hoeyalua꞉ hauna꞉ yenkita꞉ I̱ pa꞉ta꞉ wina꞉ loelena꞉e.  
\v 10 Nikana꞉ma꞉ nateleke hokuluna꞉ na yuwia haoma꞉ka꞉na꞉ yoluta꞉ ameta꞉ amba꞉ hoto yaapo pua epolo puma꞉me leekeme.   
\p
\v 11 Ika꞉ apa꞉ma꞉ iki pa꞉ta꞉ alota꞉ Kota꞉ kutu pulu pia꞉ka꞉na꞉ta꞉ kota꞉ do kenkena꞉ opa꞉la꞉ epeke nemanu ika꞉ nu pa꞉ta꞉manu mendiao mo kapomani handeteke hala꞉ you halina꞉ pa hameke hala꞉la꞉ ale mea puapee. Mo ale manuta꞉ pa totopo piki ti yonkeleke sikima꞉ make hosiki boi hapeke make mo ne totopo peaasa꞉ alemanu make mo (pei kilikima꞉ handeke) pisidasio kiliki make (mo sa꞉tikima꞉ handeke) amono kiliki make mea puapee.  
\v 12 Kutupa make mo hande ika꞉ nu kake nina꞉ mendiaeyeke manita꞉ ata꞉ka꞉ peaopate pimima꞉ pao mea puaaso hata꞉ta꞉ moeki haka꞉ta꞉pao yaapo peao mea pua꞉pa꞉peke.  
\v 13 Kutupa ika꞉ kame make hatuku puaata꞉ a̱i̱ koto kone paa la꞉ka꞉la a꞉pa꞉pa꞉peke.  
\v 14 Mo you halima꞉ta꞉ Benisamini make mo ika꞉ kame ma꞉nda꞉ make iki pa꞉ta꞉ a꞉ta꞉ma꞉ homolo kina꞉ yeketa꞉ mo Aneke Wele wopupiki Koda꞉ma꞉ mo some pa꞉ta꞉ a꞉ta꞉ma꞉ homa꞉la꞉eki halena꞉e. Kota꞉ I̱ta꞉ yaka wekiwandiki alupawa꞉ka꞉na꞉ta꞉ kota꞉ ota꞉ alupaapeke ya꞉la꞉me leekeme.   
\p
\v 15 Koto ekina꞉ mo hama̱la̱꞉ hama̱la̱꞉ma꞉ta꞉ mo hande pa hameke hala꞉la꞉ alemanu make mo mani haka꞉ta꞉pao yaapo peao mea Benisamini ame̱le̱ Idiepi nane pemekeme. Koto pate ikita꞉ Diosepe pa꞉ta꞉ pua walemekeme.  
\v 16 Kutupa Diosepema꞉ mo tapake ame̱le̱ Benisamini hayekeeki hando haota꞉ kota꞉ ipikana꞉ma꞉ mo ipika꞉ da handeteke hawayeke e pokaeyeke some pa꞉ta꞉ alota꞉ Do haliweki yaka da pa꞉ta꞉ hatuku pue. Ikita꞉ natepa nane I̱ ame̱le̱ ne nelimikima꞉ mo koa ma꞉na꞉ ma꞉nda꞉ lia amu peapeke leekeme.  
\v 17 Mo e pokaeyeke halima꞉ta꞉ mo pia꞉peke leeke tupa꞉ mo hama̱la̱꞉ hama̱la̱꞉ hatuku Diosepena꞉ da pa꞉ta꞉ peekeme.   
\p
\v 18 Mo hama̱la̱꞉ hama̱la̱꞉ mo da pa꞉ta꞉ hatuku epeeketa꞉ ikita꞉ paala꞉ma꞉ homolo hata꞉ dupiki hone wimikime. Niki do pa꞉ta꞉ hatuku ipula꞉ ekita꞉ mo hande titina꞉ hande nika꞉ nu pa꞉ta꞉manu mendieke manina꞉ pate pita꞉la꞉me. Ameta꞉ ikana꞉ma꞉ niki hoeyao make nika꞉ donkimanu make mea nikita꞉ ipika꞉ pa hameke e pokaasoma꞉ tapake hamono lelimikie laa hone wimikime.  
\v 19 Koto ekina꞉ mo da pota꞉ pa꞉ta꞉ pua hata꞉ mo e pokao haya꞉ handeteke hayeke some pa꞉ta꞉ alota꞉  
\v 20 Tiekeo. Pilisi nakana꞉ma꞉ opie. Nikita꞉ amba꞉ hoto homeke do pa꞉ta꞉ ne hambolo epoma꞉me.  
\v 21 Kutupa paa pua timba꞉ leeke palai da pua a꞉eyaata꞉ nika꞉ numanu pua tokua handoma꞉pate hali homeke homekema꞉ nika꞉ mani ota꞉ ana꞉ sikina꞉ mendieke handaa pao mea epoloma꞉me.  
\v 22 Kutupa make ne ma꞉nda꞉ hambulumekema꞉ yeke mandane mani make mea epoloma꞉me. Mo nika꞉ nu pa꞉ta꞉manu mo mani paa mendiaeyeke someta꞉ epima꞉ pa꞉la꞉ o niki mata꞉la꞉me lemekeme.   
\p
\v 23 Mo e pokaeyeke somema꞉ alota꞉ Hone ti yokolo hata꞉ paala꞉ma꞉ na homa꞉pa꞉peke. Ika꞉ Koda꞉ mo ika꞉ apa꞉na꞉ Koda꞉ma꞉ kone ika꞉ numanu pa꞉ta꞉ mo mani paa mendiao pa꞉la꞉mee. Ika꞉ yenki manuta꞉ ana꞉na꞉ mua꞉me leekeme. Kutupa ipikana꞉ma꞉ Simiono iki pa꞉ta꞉ hatuku epeekeme.   
\p
\v 24 Mo e pokaeyeke somema꞉ta꞉ mo hama̱la̱꞉ hama̱la̱꞉ da tukiki pa꞉ta꞉ hatuku mea epeekeme. Ipikana꞉ma꞉ta꞉ mo ika꞉ ankemanu tandepolo pimiki tupa꞉ ikali halaata꞉ ika꞉ donkimanu make ne haleekeme.  
\v 25 Mo tapakema꞉ta꞉ natepa nane Diosepe ame̱le̱ mandakena꞉ ne nelimikie laa la haleeke handa mo hande pa hameke hala꞉la꞉ alemanu tikitiki yao pitimikime.  
\v 26 Kutupa Diosepe da pa꞉ta꞉ opolo epeeketa꞉ ikana꞉ma꞉ mo pa hameke hala꞉la꞉ alemanu oni da pa꞉ta꞉ mea pua ipiki pa꞉ta꞉ pua panda꞉ puniaemekeme.  
\v 27 Ipikana꞉ma꞉ ikita꞉ epeke tupa꞉ halemepe laa alota꞉ Ikana꞉ma꞉ta꞉ mo ika꞉ apa꞉ kokena꞉ pi manuta꞉ I̱ la kimima꞉ ipikita꞉ eki pa꞉la꞉pe. Ipikita꞉ pa hala꞉pe o epeke hala꞉pe laa leekeme.   
\p
\v 28 Ikana꞉ma꞉ hombo peaaso alota꞉ Naka꞉ epeke homupiki e pokaasa꞉ hali mo nika꞉ apa꞉ta꞉ pa epeke tupa꞉ hala꞉mee lemekeme. Koto laata꞉ tumiki yotuao ipiki pa꞉ta꞉ panda꞉ puniaemekeme.   
\p
\v 29 Kutupa Diosepema꞉ ipika꞉ hameke Benisamini hando hao alota꞉ Dota꞉ hande I̱ pa꞉ta꞉ la kimi ika꞉ wetepe nane weki ya꞉ka꞉ta꞉me. Yaka wekio. Koda꞉ma꞉ neke epeaena꞉e leekeme.  
\v 30 Koto laata꞉ Diosepe ipika꞉ kamena꞉ ipika꞉ pukima꞉ tanda tieke pieke handaa koto kone iki mina꞉pa꞉lao peekeme. Ipikita꞉ teke pa꞉ta꞉ e̱ podela꞉ mia꞉peke nono pieke handa ipika꞉ da panda꞉ pa꞉ta꞉ pua e̱ leekeme.  
\v 31 Kutupa ipika꞉ leke popeleke tanda꞉pata꞉ hama opolu bao a꞉pa ipika꞉ kone lu mina꞉niao pita꞉ta꞉ mo ne pana꞉ pie leekeme.  
\v 32 Diosepeta꞉ teipolo ma꞉nda꞉na꞉ pana꞉ peao ipika꞉ hameke tonuta꞉ ma꞉nda꞉na꞉ pana꞉ peayekeme. Kutupa koto pa꞉ta꞉ ne nemeke Idiepi tapake manuma꞉ta꞉ mo Hibulu tapake ame̱le̱ mandake pa꞉ta꞉ pita ne napeke ana꞉ na pa꞉la꞉me laata꞉ teipolo ma꞉nda꞉na꞉ pita꞉ ne nemekeme.  
\v 33 Mo hama̱la̱꞉ hama̱la̱꞉ta꞉ Diosepe handa꞉ moneao pita꞉ ika꞉ mendieke tupa꞉ mupeke hali amba꞉la pita pua mo wetepe wekina꞉ pua pitu naena꞉ leekeme. Mo tapakema꞉ iki pitaeyeke tupa꞉ hando haota꞉ penkilipa꞉tia pominolo hata꞉ta꞉ ika꞉ ika꞉ kone handa꞉ alu alu pimikime.  
\v 34 Mo neta꞉ Diosepena꞉ teipolona꞉ pana꞉ piekeme. Kutupa Benisaminita꞉ mo hameke tonuna꞉eki make ankulao haka꞉ta꞉pao mo ipika꞉ ne yunki peao mulu pieke tupa꞉ haleekeme. Koto ekina꞉ mo tapaketa꞉ Diosepe ame̱le̱ ne ikali no opu hao keaemekeme.   
\c 44  
\s1 Diosepena꞉ kapo alupiekeeki  
\p
\v 1 Diosepema꞉ mo ipika꞉ da handeteke hayeke e pokaeyeke some pa꞉ta꞉ alota꞉ Mo haliwekina꞉ numanu pa꞉ta꞉ta꞉ mo ne ika꞉ mondulu peleme tupa꞉ kone mendiaota꞉ pa mo homeke homekena꞉ manita꞉ ika꞉ nu kakena꞉ mendia mendia pea꞉peke.  
\v 2 Kutupa mo yaka silipama꞉ wepieke kapota꞉ mo wetepe wekina꞉ nu pa꞉ta꞉ ipika꞉ widi hambea꞉ mani pita꞉ mandakena꞉ mendiapeke leekeme. Koto leeke mo halima꞉ta꞉ Diosepema꞉ leeke tupa꞉ siki kone piekeme.  
\v 3 Da ka꞉la꞉paaso sikita꞉ mo hama̱la̱꞉ hama̱la̱꞉ta꞉ ika꞉ donkimanu pita꞉ pena꞉ tapaeyekeme.  
\v 4 Mo tapaketa꞉ mo daoni mina꞉pa꞉lao pa hosiki siki papate leke pulu haena꞉ta꞉ Diosepema꞉ ipika꞉ da handeteke haya꞉ some pa꞉ta꞉ alota꞉ Mo haliweki telia꞉ mea a̱i̱ pue. Kuta teliminikina꞉ta꞉ dupa lota꞉ pia꞉peke. Ikana꞉ma꞉ta꞉ mo epeke hauna꞉ pa hoke ekima꞉ yenki kia pelemepe.  
\v 5 Pa ekipeke yaka you somena꞉ silipa kapo pake naa pelemepe. Koto ekita꞉ ota꞉ ipika꞉ ikali no hala꞉eki homeke make ipika꞉ handehau pulukuma꞉ mea꞉tiki pu hala꞉ kapoe. Ikana꞉ma꞉ta꞉ ota꞉ hoke hau pelememe laa lapeke leekeme.   
\p
\v 6 Mo e pokaeyeke somema꞉ mo tapake pua teliminata꞉ homeke pi kone pua leekeme.  
\v 7 Mo tapakema꞉ hombo peaaso alota꞉ Tiekeo. Dupiki pi ale ekita꞉ eki la alepe. Nikana꞉ma꞉ta꞉ kutupiki hau na poloma꞉me laa keke aloma꞉me.  
\v 8 Nikana꞉ma꞉ta꞉ mo Keinani kenke pa꞉ta꞉ hao ipulu hata꞉ta꞉ mo hande nika꞉ nu kakena꞉ mendia꞉ mani manuta꞉ paa mea epoma꞉ ekita꞉ naka꞉ hone wilime. Koto ekina꞉ nikana꞉ma꞉ta꞉ naka꞉ you halina꞉ da pa꞉ta꞉ mo silipa o kolota꞉ pa ekipeke pake noluma꞉pe.  
\v 9 Tiekeo. Niki ma꞉nda꞉ epima꞉ mo ale muluma꞉eki a꞉nda꞉ handa꞉ wika꞉na꞉ta꞉ kota꞉ koto someta꞉ lu homaena꞉ laata꞉ niki paeyaota꞉ naka꞉ pa hameke e pokaasoma꞉ tapake halumeke laa leekeme.   
\p
\v 10 Mo halima꞉ alota꞉ A꞉pa꞉la꞉pate pa mo kapo ma꞉la꞉ some homeketa꞉ yaka pa hameke e pokaasa꞉ hali haena꞉ iki paeyaota꞉ pao pomena꞉e leekeme.  
\v 11 Koto ekina꞉ paeyaoma꞉ koto kone ika꞉ numanu oni kenkena꞉ mea wia homeke homekema꞉ ipika꞉ nu toku wia pitimikime.  
\v 12 Kutupa Diosepena꞉ e pokaeyeke somema꞉ta꞉ sembepelasiki mo mupeke halina꞉ ekina꞉ kini pea weiya꞉tia pua mo wetepe halina꞉ ekina꞉ pua paeyaeyekepate mo kapota꞉ Benisaminina꞉ nu pa꞉ta꞉ mendieke handa꞉ wiekeme.  
\v 13 Koto ekina꞉ mo hama̱la̱꞉ hama̱la̱꞉ma꞉ta꞉ ota꞉ a꞉ta꞉ma꞉ homolo hata꞉ ika꞉ aka꞉manu sinkipa ika꞉ numanu mo donki hokina꞉ paa mu wia mo daoni nane paa la꞉ka꞉la pemekeme.   
\p
\v 14 Mo Diuda hama̱la̱꞉ hama̱la̱꞉ mo Diosepena꞉ da pa꞉ta꞉ epemeketa꞉ ipikita꞉ pa pitiekeme. Kutupa ikita꞉ ipiki pa꞉ta꞉ panda꞉ puniaemeke handaa  
\v 15 Diosepema꞉ alota꞉ Ikana꞉ma꞉ta꞉ ekipiki hau pea pelemepe. Ikana꞉ma꞉ta꞉ dupiki e pokolo hali I̱ma꞉ta꞉ ika꞉ peleme hauta꞉ mo handehau pea na handa꞉ ulueke hone wimipe leekeme.   
\p
\v 16 Koto leeke Diudama꞉ hombo peaaso alota꞉ Tiekeo. Nikana꞉ma꞉ neke pa꞉ta꞉ta꞉ eki lomonope. Ekipa pi yokaalu piomonope. Ekipa nikana꞉ma꞉ dia꞉me lomonope. Koda꞉ma꞉ta꞉ nika꞉ poloma꞉ hoke hau peneme yala꞉me. Mo hande kapo mia꞉ some homeke dia꞉ya꞉la꞉pate ameta꞉ niki paeyaota꞉ naka꞉ pa hameke e pokaasoma꞉ haliweki haloma꞉me leekeme.   
\p
\v 17 Diosepema꞉ alota꞉ O dia꞉me. I̱ma꞉ta꞉ kutupiki hau ota꞉ na pulueke. Mo yaka kapo ma꞉la꞉ some homeketa꞉ yaka pa hameke e pokaasa꞉ some halieke. Iki paeyaota꞉ epeke tupa꞉ siki hau ma꞉nda꞉ na piki ika꞉ apa꞉ pa꞉ta꞉ paa la꞉ka꞉la pelimikie leekeme.   
\s1 Diudama꞉ Benisaminina꞉ honke leekeeki.  
\p
\v 18 Diudama꞉ Diosepe pa꞉ta꞉ pua alota꞉ Pilisi Tiekeo. Neketa꞉ pa mo kinima꞉ handele ekina꞉ I̱ma꞉ neke pa꞉ta꞉ pi la kiono mineke na panka꞉pekee.  
\v 19 Tiekeo. Nakana꞉ma꞉ niki pa꞉ta꞉ lota꞉ pitolo hata꞉ alota꞉ Ika꞉ apa꞉ta꞉ hala꞉pe o ika꞉ kame ma꞉nda꞉ hala꞉pe laa lemee.  
\v 20 Koto leke nikana꞉ma꞉ hombo peaasota꞉ nika꞉ apa꞉ta꞉ koke halisiki hala꞉ make nika꞉ wetepe wekita꞉ mo koke nane ma꞉nda꞉la꞉ weki make hala꞉me. Mo wekina꞉ hameketa꞉ homa inkikina꞉ wekiwandikita꞉ ipiki homeke pa hala꞉me. Kutupa ipika꞉ apa꞉ma꞉ mo wekita꞉ pukima꞉ wopu homa꞉la꞉me loma꞉me.  
\v 21 Tiekeo. Nakana꞉ma꞉ta꞉ handuluekema꞉ hatuku a꞉pa꞉pekee leke handa  
\v 22 nikana꞉ma꞉ hombo peaasota꞉ mo wekima꞉ta꞉ ipika꞉ apa꞉ na mina꞉pa꞉lalieke loma꞉me. Mina꞉pa꞉laeya꞉ka꞉na꞉ta꞉ kota꞉ ipika꞉ ateketa꞉ homilieke laa loma꞉me.  
\v 23 Koto lomeke nakana꞉ma꞉ alota꞉ Ika꞉ wetepe weki iki ame̱le̱ epea꞉ka꞉na꞉ homeke naka꞉ leke popelekena꞉ niki handulumeke lemee.   
\p
\v 24 Kutupa niki nika꞉ apa꞉ pa꞉ta꞉ puata꞉ mo naka꞉ le pimanu paeyao pua la haloma꞉me.  
\v 25  Koto hoki naneta꞉ ipikana꞉ma꞉ niki pa꞉ta꞉ Paa la꞉ka꞉la pua ne hosikima꞉ pua hamba꞉pee lea꞉me.  
\v 26 Koto leeke nikana꞉ma꞉ hombo peaaso alota꞉ Nikita꞉ pua꞉peke na ya꞉la꞉me. Mo nika꞉ kame wetepe nane wekita꞉ nika꞉ ame̱le̱ poma꞉ka꞉na꞉ homeke mo halina꞉ leke popelekena꞉ pua hapeke ya꞉la꞉me. Mo nika꞉ kame Benisamini niki ame̱le̱ pea꞉ka꞉na꞉ homeke pua꞉peke ya꞉la꞉me loma꞉me.  
\v 27 Koto lomeke nika꞉ apa꞉ma꞉ niki pa꞉ta꞉ alota꞉ Mo yaka wanda꞉ Leisoloma꞉ta꞉ yaka weki yaapo homeke mendiaeya꞉me.  
\v 28 Homeketa꞉ I̱ amba꞉ mina꞉pa꞉lala꞉me. Ipikita꞉ hoki pea꞉ nane make ota꞉ na handolo ekima꞉ta꞉ mo tikene ma꞉na꞉yeti sayale manuma꞉ sinki sinki pea witolo pa꞉la꞉mee.  
\v 29 Ikana꞉ma꞉ ame do weki hatuku pua hau ma꞉nda꞉ peaemeka꞉na꞉ta꞉ kota꞉ I̱ta꞉ koke yalo hata꞉ ikana꞉ma꞉ mea ipilimi a꞉ta꞉ma꞉ta꞉ I̱ lu homaalieke laa lea꞉me laa la haleekeme.   
\p
\v 30-31 Diudama꞉ ombu pa alo hata꞉ alota꞉ Tiekeo. Pa ameta꞉ I̱ a꞉nda꞉ mo weki yaapo yaka apa꞉ pa꞉ta꞉ na poa꞉ka꞉na꞉ta꞉ kota꞉ mo weki I̱ yaapo na handolo kone ipiki homilieke. Ipika꞉ hone puki paeyaota꞉ koto weki pa꞉ta꞉ ula꞉me. Kutupa ipikita꞉ ota꞉ koke ya꞉la꞉ ekima꞉ta꞉ mo nikana꞉ma꞉ puluma꞉ hauma꞉ kone ipiki lu homaalumeke.  
\v 32 Hau ma꞉nda꞉ make dupae. I̱ma꞉ alota꞉ Mo weki pa꞉ta꞉ hau ma꞉nda꞉ pia꞉ka꞉na꞉ maketa꞉ kota꞉ I̱ pa꞉ta꞉ wina꞉e laa yaka apa꞉ pa꞉ta꞉ta꞉ I̱ma꞉ mo weki a꞉nda꞉ pa na hatuku epoa꞉ka꞉na꞉ta꞉ kota꞉ koto pu hoeyalua꞉ hauna꞉ yenkita꞉ I̱ pa꞉ta꞉ wina꞉ loelena꞉e loa꞉me.  
\v 33 Koto ekina꞉ tiekeo. Ameta꞉ mo wekina꞉ anketeke minolo hata꞉ I̱ta꞉ naka꞉ pa hameke e pokaaso hali haluekema꞉ ipikita꞉ ipika꞉ hameke tonu ame̱le̱ paa pena꞉ lae.  
\v 34 I̱ma꞉ta꞉ eki ekipa mo wekita꞉ I̱ yaapo na peke haena꞉ yaka apa꞉ pa꞉ta꞉ polua꞉pe. I̱ma꞉ta꞉ yaka apa꞉ pa꞉ta꞉ dupiki ke tieke ipula꞉eki handa꞉peketa꞉ I̱ ana꞉ na pa꞉la꞉me leekeme.   
\c 45  
\s1 Diosepema꞉ ipikie laa peneme yaeyekeeki  
\p
\v 1 Diosepema꞉ta꞉ ipika꞉ wieke hone manuna꞉ta꞉ mo ipika꞉ e pokaemeke tapakena꞉ leke popelekena꞉ lu mina꞉niapeke na yalo hata꞉ paeyaosiki mo da panda꞉ mina꞉pa꞉lao pupe laa leekeme. Kota꞉ Diosepema꞉ta꞉ ipiki ame̱le̱ ma꞉nda꞉ siki ota꞉ na haena꞉ mo hameke tonu pa꞉ta꞉ta꞉ I̱ lataa laa la haleekeme.  
\v 2 Ipikana꞉ma꞉ta꞉ e̱ alo hata꞉ anekema꞉ ka꞉pa꞉puki yokeke handa mo Idiepi tapakema꞉ make opuaata꞉ kota꞉ mo ekina꞉ pita꞉ mo kinina꞉ da pa꞉ta꞉ make mea pemekeme.  
\v 3 Diosepema꞉ ipika꞉ hameketonu pa꞉ta꞉ alota꞉ I̱ta꞉ Diosepee. Yaka apa꞉ta꞉ pa hala꞉pe leekeme. Koto leekepate mo hama̱la̱꞉ hama̱la̱꞉ma꞉ta꞉ doeki opu hao paala꞉ma꞉ hone mamatalo hata꞉ hombo peapeke na yekeme.  
\v 4 Kota꞉ Diosepema꞉ iki pa꞉ta꞉ alota꞉ Pilisi I̱ teke pa꞉ta꞉ ipupe leekeme. Kota꞉ mo tapake teke pa꞉ta꞉ epemeke handa alota꞉ I̱ta꞉ ikana꞉ma꞉ mo hande Idiepi nane mani mea tapaeme some ika꞉ kame Diosepee.  
\v 5 Koto ekina꞉ mo ikana꞉ma꞉ do pa꞉ta꞉ I̱ tapaaleme ekina꞉ ka꞉nda꞉ma꞉ na homa make nikana꞉ma꞉ pu hoeyaloma꞉me pi na lapa꞉peke. Ota꞉ Koda꞉ma꞉ kone mo wanda꞉hali homaapa꞉na꞉yeke. I̱ma꞉ pa꞉ta꞉lono I̱ amba꞉la tapao pa꞉la꞉me.  
\v 6 Do kenke pa꞉ta꞉ mo tea꞉ ki a꞉pa꞉la꞉ ekita꞉ bapi yaapo homeke do handa꞉e. Mo yu lita꞉la꞉eki kone o ne napeke mina꞉la꞉eki kone ota꞉ na pulu pa꞉la꞉ bapi yunki hata꞉ta꞉ pa ula꞉me.  
\v 7 Koda꞉ma꞉ I̱ amba꞉la tapaala꞉ ekita꞉ dupiki ta꞉ta꞉ ma꞉nda꞉ piki hauma꞉ iki pa꞉ta꞉lono laa kutupa mo ika꞉ monduma꞉ monduma꞉ pilimi wekiwandikina꞉ wekiwandiki ana꞉na꞉ hao pelina꞉yeke pa꞉la꞉me.  
\v 8 Koto ekina꞉ta꞉ ikana꞉ma꞉ I̱ do Idiepi kenke nane na tapaemepate pa Koda꞉ma꞉ kone pa꞉la꞉me. Ipikana꞉ma꞉ I̱ta꞉ mo kinina꞉ kapomani manda you hali pitono la꞉la꞉me. I̱ta꞉ do kenke paeyao handeteke halome. I̱ta꞉ do Idiepi wanda꞉halina꞉ you hali halome.   
\p
\v 9 Koto ekina꞉ yaka apa꞉ pa꞉ta꞉ a̱i̱ la꞉ka꞉la puata꞉ dota꞉ naka꞉ weki Diosepema꞉ ala꞉ pie laa pua lapa꞉peke. Koda꞉ma꞉ta꞉ I̱ta꞉ Idiepina꞉ handeteke hala꞉ hali hano la꞉la꞉me. Nate leke hokulu na peake I̱ pa꞉ta꞉ a̱i̱ epoe.  
\v 10 Neke make naka꞉ wekiwandiki make naka꞉ wekiwandikina꞉ wekiwandiki make naka꞉ sipisipimanu make naka꞉ nanikosimanu make naka꞉ kaomanu make mo naka꞉ wia hale alemanu paeyao make I̱ teke pa꞉ta꞉ wia halo pele tupa꞉ mo Kosene kenke pa꞉ta꞉ halena꞉e laata꞉  
\v 11 Neke mo Kosene kenke pa꞉ta꞉ haeka꞉na꞉ta꞉ kota꞉ I̱ma꞉ neke handeteke halo polo tupa꞉ loa꞉me. Mo tea꞉ kita꞉ bapi yunki hata꞉ pa ula꞉ ekina꞉ta꞉ neke make naka꞉ tapake make naka꞉ ma꞉na꞉manu make tea꞉ma꞉ homilimikiyeke loa꞉me leekeme.   
\p
\v 12 Diosepema꞉ ombu alota꞉ Ameta꞉ iki paeyaoma꞉ make Benisamini nakana꞉ma꞉ make I̱ta꞉ ota꞉ Diosepee laa handelememe.  
\v 13 Kutaa I̱ do Idiepi kenke pa꞉ta꞉ ota꞉ honkopu tieke ula꞉eki make mo ikana꞉ma꞉ handeleme alemanu paeyao make yaka apa꞉ pa꞉ta꞉ pua lapa꞉peke. Kutupa a̱i̱ a̱i̱ pu kone ipiki do pate hatuku a꞉pa꞉pa꞉peke leekeme.   
\p
\v 14 Koto laata꞉ ipikana꞉ma꞉ ipika꞉ hameke Benisaminita꞉ hopula꞉ mea e̱ leekeme. Benisaminima꞉ make e̱ alo hata꞉ hameke hopula꞉ miekeme.  
\v 15 E̱ pa alo alo hata꞉ta꞉ hameke titi homeke homeke lo hopulolo hata꞉ nunu piekeme. Kota꞉ kutu pieke hoki naneta꞉ ipika꞉ hameke tonuma꞉ ipiki ame̱le̱ pi kini pea lemekeme.   
\p
\v 16 Mo hande Diosepena꞉ hameke tonuta꞉ epelememe le ekita꞉ mo kinina꞉ da pa꞉ta꞉ haemeke tapakema꞉ opitolo hata꞉ mo kinima꞉ make mo ipika꞉ e pokaeyeke you haliwekima꞉ make ta꞉na꞉ma꞉ homemekeme.  
\v 17 Mo kinima꞉ Diosepe pa꞉ta꞉ alota꞉ Naka꞉ kametonu ika꞉ nemanu mo donki manuna꞉ hokina꞉ atula atula pea wia mo Keinani nane la꞉ka꞉la pupa꞉e lae laata꞉  
\v 18 Ika꞉ apa꞉ make ika꞉ tapake make hatuku do ane la꞉ka꞉la a꞉pa꞉pa꞉peke lae. I̱ma꞉ta꞉ iki pa꞉ta꞉ mo kenke paeyao ankulake ota꞉ epeke kenke halaata꞉ ota꞉ haka꞉ta꞉pake tupa꞉ ne no hao pelina꞉ loa꞉me lae.  
\v 19 Kutupa make mo ika꞉ weteke tonu make ika꞉ hosiki wekiwandiki sunu make ika꞉ ateke make hatuku epolo peleme mo Idiepina꞉ ma꞉na꞉ma꞉ yola꞉la꞉ pota꞉ alemanu mea pena꞉ lae.  
\v 20 Kuta ikana꞉ma꞉ta꞉ mo ika꞉ wia haleme alemanu mina꞉pa꞉laasoma꞉me laa hone ka꞉nda꞉ma꞉ na homa꞉pa꞉peke. Pa ekipeke do Idiepi kenke paeyao siki pa꞉ta꞉ ula꞉ epeke ale manuta꞉ ika꞉eki ya꞉lieke loa꞉me lae leekeme.   
\p
\v 21 Koto leeke mo Dieikopena꞉ eiyeke tonuma꞉ta꞉ mo leeke tupa꞉ siki kone pimikime. Kutupa Diosepema꞉ta꞉ mo kinima꞉ leeke tupa꞉ kone mo ma꞉na꞉ma꞉ yola꞉la꞉ pota꞉ alemanu halaata꞉ pota꞉na꞉ nolo pimiki ne make haleekeme.  
\v 22 Kutupa Diosepema꞉ hameke tonu pa꞉ta꞉ mo topo aka꞉manu make haleekepate pa Benisaminita꞉ 300 silipa mani make topo aka꞉ paeyao yunki hata꞉ haleekeme.  
\v 23 Kuta ipika꞉ atekena꞉ta꞉ mo Idiepina꞉ ota꞉ epeke nemanu mo kiki yaapo donkina꞉ mu wia kutupa pa kiki yaapo donkimanu ma꞉nda꞉na꞉ta꞉ mo pota꞉na꞉ nolo pieke widimanu make betedimanu make mandane nemanu make mu wiao tapaeyekeme.  
\v 24 Kutupa mo ipika꞉ hameketonu pena꞉ tapaaso hata꞉ alota꞉ Mo pota꞉na꞉ hankiliki na yola꞉pa꞉peke leekeme.   
\p
\v 25 Kota꞉ mo tapaketa꞉ Idiepi mina꞉pa꞉lao ika꞉ da nane ateke hayeke alena꞉ Keinani nane pemekeme.  
\v 26 Ikana꞉ma꞉ ateke pa꞉ta꞉ pua alota꞉ Diosepeta꞉ pa hala꞉mee. Ipikita꞉ mo Idiepi kenke paeyaona꞉ handeteke hala꞉ hali hala꞉me lemekeme. Koto lemeke handa Dieikopeta꞉ hone mata꞉pa pulu no la꞉mea pita꞉ mo weki tonuma꞉ lemeke ekina꞉ hone na tulaeyekeme.   
\p
\v 27 Pate mo eiyeke tonuma꞉ hande Diosepema꞉ iki pa꞉ta꞉ leekeeki paeyao ika꞉ apa꞉ pa꞉ta꞉ la halemekeme. Dieikopema꞉ koto lemekeeki opuolo pita꞉ pa mo Diosepema꞉ ipiki mulu epena꞉ tapaeyeke ma꞉na꞉ma꞉ yola꞉la꞉ pota꞉ alemanu hando haota꞉ kota꞉ ipikita꞉ paa epeke hone wia pitiekeme.  
\v 28 Kutu pitolo hata꞉ Dieikopema꞉ alota꞉ Keiyae. Doeki homeketa꞉ ota꞉ yaka hone pa꞉la꞉ ekina꞉ yaka weki Diosepeta꞉ paa haya꞉ka꞉ta꞉me. Kota꞉ I̱ a̱i̱ na homeke hata꞉ kone ipiki handolo polueke leekeme.   
\c 46  
\s1 Dieikope tapake Idiepi pemekeeki  
\p
\v 1 Dieikopema꞉ta꞉ ipika꞉ wia hayeke alemanu paeyao talo peaata꞉ Biasiba nane peekeme. Koto pateta꞉ ipika꞉ ateke Aisa꞉kena꞉ Koda꞉ pa꞉ta꞉ yeni hau piekeme.  
\v 2 Koto timbata꞉ upama꞉ leke ale Koda꞉ma꞉ ipiki pa꞉ta꞉ pi alo alota꞉ Dieikopeo Dieikopeo leeke ipikana꞉ma꞉ hombo peaaso alota꞉ Wao. I̱ do handa꞉e leekeme.   
\p
\v 3 Tekehalima꞉ alota꞉ I̱ta꞉ Koda꞉ naka꞉ apa꞉na꞉ Koda꞉e. Idiepi poluekema꞉ta꞉ paala꞉ma꞉ na homa꞉peke. I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ koto pate tapake tieke haena꞉ lolueke.  
\v 4 I̱ma꞉ta꞉ neke yaapo oni Idiepi nane mandakena꞉ puaata꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ do kenke nane paa hatuku ipulueke. Koto pateta꞉ mo Diosepe neke yaapo mandakena꞉ haena꞉ neke homilipikie laa leekeme.   
\p
\v 5 Kota꞉ Dieikopeta꞉ Biasiba mina꞉pa꞉laeyekeme. Ipika꞉ weki tonuma꞉ta꞉ mo hande Idiepi kinima꞉ tapaeyeke ma꞉na꞉ma꞉ yola꞉la꞉ pota꞉ ale manuna꞉ta꞉ ika꞉ ateke make ika꞉ hosiki wekiwandiki sunu make ika꞉ weteke tonu make pitaemekeme.  
\v 6 Ika꞉ mo Keinani hata꞉ mimiki alemanu paeyao make ma꞉na꞉manu make mea Idiepi nane pemekeme. Dieikopema꞉ta꞉ ipika꞉ monduma꞉ monduma꞉ pieke wekiwandikina꞉ wekiwandiki paeyao hatuku peekeme.  
\v 7 Ipika꞉ wekitonu make ipika꞉ weki tonuna꞉ wekitonu make ipika꞉ wandikitonu make ipika꞉ waneke tonuna꞉ wandikitonu make paeyao hatuku peekeme.   
\p
\v 8 Mo Dieikope ame̱le̱ oni Idiepi nane pemeke ipika꞉ tapaketa꞉ mupeke weki Lubeni  
\v 9 make Lubenina꞉ eiyeke tonu Ha꞉noko make Palu make Hesetoni make Kami makee.  
\v 10 Kutupa Simiono make ipika꞉ wekitonu Diemuelo make Diamini make Ohadi make Diakini make Soha make Siolo makee. Do weki Siolota꞉ mo Keinani wanda꞉na꞉ wekie.  
\v 11 Lipai make ipika꞉ weki tonuta꞉ Kiesoni make Koha꞉di make Metati makee.  
\v 12 Diuda make ipika꞉ weki tonuta꞉ Sela make Petese make Sita makee. Diudana꞉ eiyeke yaapo Ea pita꞉ Onane yaapota꞉ Keinani haemeke toma꞉na꞉ kone amba꞉ homepekeme.  
\v 13  Isaka make ipika꞉ weki tonuta꞉ Tola make Pua make Yope make Simitoni makee.  
\v 14 Sebuloni make ipika꞉ weki tonuta꞉ Setede make Elono make Dialieli makee.  
\v 15 Do weki tonuta꞉ oni Mesopoteimia hata꞉ Liama꞉ Dieikopena꞉ mendiaeyeke weki tonue. Liama꞉ wandiki Daena make mendiaeyekeme. Koto paeyao siki yata꞉polota꞉ Lia pa꞉ta꞉ yama꞉ Dieikope ipika꞉ monduma꞉ monduma꞉ pieke wekiwandiki paeyaota꞉ 33 yekeme.   
\p
\v 16 Ka꞉de make ipika꞉ wekitonu Sepedoni make Haki make Siuni make Eseboni make Eti make Atodi make Ateli makee.  
\v 17 A꞉sia make ipika꞉ weki tonuta꞉ Imina make Isipa make Isipi make Betia make ika꞉ ana꞉ Seta makee. Betiana꞉ eiyeke yaapota꞉ Heba pita꞉ Malakiele yaapoe.  
\v 18 Do 16 wekiwandikita꞉ mo hande Leibenima꞉ ipika꞉ waneke Lia pa꞉ta꞉ haleeke pa hameke e pokaasa꞉ wandiki Silipama꞉ Dieikopena꞉ mendiaeyeke wekiwandikie.   
\p
\v 19 Dieikopena꞉ weteke Leisoloma꞉ta꞉ Dieikope ipika꞉ weki Diosepe pita꞉ Benisamini yaapo mendiaeyekeme.  
\v 20 Oni Idiepi kenketa꞉ mo Heliopolisi da pa꞉ta꞉ yeni peao hayeke hali Podipitana꞉ waneke A꞉sena꞉dema꞉ta꞉ Diosepena꞉ weki Ma꞉na꞉sa꞉ pita꞉ Ipoteimi yaapo mondu wiayekeme.  
\v 21 Benisaminina꞉ eiyeke tonuta꞉ Bela make Bekea make A꞉sa꞉bele make Keta make Naamani make Ehi make Otosi make Mupimi make Hupimi make Ada makee.  
\v 22 Koto 14 weki tonuta꞉ mo Leisoloma꞉ pa꞉ta꞉ yama꞉ Dieikopena꞉ mendiaeyeke wekiwandikie.   
\p
\v 23 Da꞉ni make ipika꞉ weki Husimi makee.  
\v 24 Na꞉petali make ipika꞉ wekitonu Diasiele make Kuni make Diesa make Silemo makee.  
\v 25 Do watake hata꞉ tapaketa꞉ mo hande Leibenima꞉ waneke Leisolo haleeke pa hameke e pokaasa꞉ wandiki Bilihama꞉ pa꞉ta꞉ yama꞉ Dieikopena꞉ monduma꞉ monduma꞉ pieke wekiwandikie.  
\v 26 Kota꞉ mo Dieikopena꞉ eiyeke tonuna꞉ weteke tonu na yata꞉peke pa mo ota꞉ Dieikopena꞉ monduma꞉ monduma꞉ pieke wekitonu homeketa꞉ paeyao 66 oni Idiepi nane pemekeme.  
\v 27 Kutupa Diosepena꞉ oni Idiepi mendiaeyeke weki yaapo apa꞉taasota꞉ mo Dieikopena꞉ oni Idiepi nane pu haemeke tapake paeyaota꞉ 70 yekeme.   
\s1 Oni Idiepi nane Dieikope pita꞉ ipika꞉ tapake haemekeeki  
\p
\v 28  Dieikopema꞉ta꞉ Diosepema꞉ mo Kosene kenke pa꞉ta꞉ iki a꞉pa manda꞉hande pina꞉ honke lena꞉yeke Diuda amba꞉la tapaeyekeme. Kutupa mo tapake opolo pemeketa꞉  
\v 29 Diosepema꞉ ipika꞉ hosima꞉ yola꞉la꞉ pota꞉ ale pitulu pua Kosene kenke pa꞉ta꞉ ateke manda꞉hande pulu peekeme. Kutupa mo pate pua ateke manda꞉hande pitolo hata꞉ta꞉ Diosepema꞉ ipika꞉ kiki bao mo atekena꞉ make yola꞉ mea hopulolo hata꞉ e̱ tieke lo hokulu peayekeme.  
\v 30 Dieikopema꞉ Diosepe pa꞉ta꞉ alota꞉ I̱ma꞉ neke paa haeka꞉ta꞉ma꞉ laa handolo hata꞉ta꞉ kota꞉ ameta꞉ I̱ta꞉ homuluekema꞉ tikitiki yao halome leekeme.   
\p
\v 31 Kutupa Diosepema꞉ ipika꞉ hameke tonu pa꞉ta꞉ make mo atekena꞉ tapake paeyao pa꞉ta꞉ make alota꞉ I̱ma꞉ta꞉ mo kini pa꞉ta꞉ta꞉ oli Keinani haeme yaka kametonu make yaka apa꞉na꞉ tapake paeyao I̱ pa꞉ta꞉ epelememe laa amba꞉la lolo polueke.  
\v 32 Kutupa I̱ma꞉ ipiki pa꞉ta꞉ dupa lolueke. Ikita꞉ sipisipimanu handeteke hao haleme haliweki make ma꞉na꞉manu punu haleme haliweki make yalo hata꞉ ika꞉ ma꞉na꞉manu make e wae alemanu make ika꞉ wia haleme alemanu paeyao make mea epelememe laa pua lolueke.  
\v 33 Koto ekina꞉ mo kinima꞉ iki wi la꞉ mea ika꞉ pu haleme ekita꞉ aleke ka꞉ta꞉pa꞉ laa lota꞉ pia꞉ka꞉na꞉ta꞉ kota꞉  
\v 34 mo hande ika꞉ apa꞉meima꞉ pu haemeke tupa꞉ koto ika꞉ haleme andusa꞉ta꞉ ma꞉na꞉manu handeteke hao haloma꞉me laa lapa꞉peke. Dupa lemeka꞉na꞉ta꞉ kota꞉ mo Kosene kenke paeyao pa꞉ta꞉ hape laa la꞉lieke leekeme. Diosepema꞉ dupiki pi leeke ekita꞉ mo Idiepi tapake paeyaoma꞉ta꞉ mo sipisipi handeteke haleme wanda꞉hali iki ame̱le̱ hama꞉na꞉ ota꞉ kiaemeke ekina꞉ leekeme.   
\c 47  
\p
\v 1 Kutupa Diosepema꞉ta꞉ mo ipika꞉ hameketonu paeyao yunki hata꞉ hatuku mo kini pa꞉ta꞉ peekeme. Pua mo kini pa꞉ta꞉ alota꞉ Yaka apa꞉ make yaka kametonu make mo Keinani hao ika꞉ ma꞉na꞉manu make e wae alemanu make ika꞉ wia haleme alemanu paeyaosiki make mea epelememe. Ikita꞉ ameta꞉ mo Kosene kenke pa꞉ta꞉ a꞉pa halememe.  
\v 2 Kutupa Diosepe ipikana꞉ma꞉ ipika꞉ hatuku epeeke hameke tonuta꞉ mo kini hali pa꞉ta꞉ waleekeme.  
\v 3 Mo kinima꞉ iki lota꞉ pitolo hata꞉ alota꞉ Ikita꞉ eki e poko halemepe leekeme.  
\p Ikana꞉ma꞉ hombo peaaso alota꞉ Nikita꞉ mo nika꞉ apa꞉meima꞉ pia꞉ tupa꞉ kone sipisipi handeteke hao haloma꞉ haliwekie.  
\v 4 Kutupa mo Keinani kenke pa꞉ta꞉ta꞉ do tea꞉ kita꞉ ota꞉ hoela꞉ ekima꞉ nika꞉ sipisipi manuna꞉ ambu ma꞉nda꞉ dia꞉ya꞉la꞉ ekina꞉ nikita꞉ do kenke pa꞉ta꞉ haluekema꞉yeke epoloma꞉me. Koto ekina꞉ pilisio. Niki mo Kosene kenke pa꞉ta꞉ hamono waleke kie laa lemekeme.  
\v 5 Koto lemeke mo kinima꞉ Diosepe pa꞉ta꞉ alota꞉ Ameta꞉ naka꞉ apa꞉ make naka꞉ kametonu make opolo epeleme ekina꞉ta꞉ kota꞉  
\v 6 do Idiepi kenketa꞉ ika꞉ ekie. Ikita꞉ mo Kosene kenke pa꞉ta꞉ ota꞉ a꞉pa꞉la꞉ alena꞉ handa pitina꞉e. Kutupa mo iki tukiki pa꞉ta꞉ handa wiki haliweki ma꞉nda꞉ haemeka꞉na꞉ta꞉ kota꞉ yaka ma꞉na꞉manu make handeteke hawaena꞉ lapeke leekeme.   
\p
\v 7 Kutupa Diosepema꞉ta꞉ ipika꞉ apa꞉ Dieikope hatuku mo kini pa꞉ta꞉ pua waleeketa꞉ Dieikopema꞉ mo kinita꞉ Koda꞉na꞉ bikina꞉ epeayekeme.  
\v 8 Kutupa mo kinima꞉ lota꞉ pitolo alota꞉ Neketa꞉ bapi ekipa ka꞉ta꞉pe leekeme.   
\p
\v 9 Dieikopema꞉ hombo peaaso alota꞉ I̱ pa pomu lopolo hanota꞉ bapi paeyao 130 paela꞉me. Koto bapi manuta꞉ mo yaka apa꞉meima꞉ ika꞉ bapi eleke eleke pomu lopemeke tupa꞉ make na handeke pa ta꞉ta꞉ doka꞉tikipiki taka꞉lake bapimanu ya꞉mee leekeme.  
\v 10 Koto laa Dieikopema꞉ mo kini hali pa꞉ta꞉ paeyaaso epeaasa꞉eki halaa mina꞉pa꞉laeyekeme.  
\v 11 Kutupa Diosepema꞉ta꞉ mo kinima꞉ pia꞉peke leeke tupa꞉ kone ipika꞉ ateke make hameketonu make mo Idiepi kenke pa꞉ta꞉ pitina꞉ laa mo Lamesese daoni nepoko nanema꞉ mo Idiepi kenkemanu paeyao lombeipiki ota꞉ epeke kenkemanu haleekeme.  
\v 12 Diosepema꞉ta꞉ ipika꞉ apa꞉ make ipika꞉ hameke tonu make mo ipika꞉ apa꞉na꞉ tapake paeyaosiki mo hosiki wekiwandikisunu make apa꞉tao paeyaosiki ne ana꞉na꞉ haleekeme.   
\s1 Mo tea꞉ ki tieke  
\p
\v 13 Mo hande tea꞉ kita꞉ ota꞉ hoeya꞉pa wieke yalo hata꞉ da paeyao pa꞉ta꞉ ne dia꞉yekeme. Kutupa mo Idiepi wanda꞉hali make Keinani wanda꞉hali make paeyaosiki tea꞉ma꞉ honkopu dia꞉ yekeme.  
\v 14 Kuta mo wanda꞉halima꞉ widi hamba꞉tiki pimikita꞉ Diosepema꞉ mani paeyao meata꞉ mo kinina꞉ da pa꞉ta꞉ mea pua꞉tiki piekeme.  
\v 15 Kutupa mo Idiepi pita꞉ Keinani kenke yaapo pa꞉ta꞉ wieke mani paeyaosiki paeyeketa꞉ mo Idiepi haliwekima꞉ Diosepe pa꞉ta꞉ a꞉pa alota꞉ Niki ne kie. Niki na homaama꞉na꞉ma꞉ hau ma꞉nda꞉ ma꞉nda꞉ make a̱i̱ pie. Nika꞉ mani paeyaota꞉ ota꞉ paela꞉me laa lemekeme.   
\p
\v 16 Koto lemeke Diosepema꞉ hombo peaaso alota꞉ Ika꞉ ma꞉na꞉manu mea ipupee. Ika꞉ mani paeyao paeya꞉ka꞉na꞉ta꞉ kota꞉ koto ale topo pitolo hata꞉ta꞉ I̱ma꞉ iki ne kuluekema꞉ loa꞉me leekeme.  
\v 17 Koto leeke mo tapakema꞉ ika꞉ ma꞉na꞉manu mea Diosepe pa꞉ta꞉ epemekeme. Kutupa ipikana꞉ma꞉ mo wanda꞉halina꞉ hosi ma꞉na꞉manu make sipisipimanu make nanikosimanu make kaomanu make donkimanu make mea epemeke topo peata꞉ ne haleekeme. Koto bapina꞉ta꞉ mo ika꞉ ma꞉na꞉ manuna꞉ topo pea ne hala꞉tiki piekeme.   
\p
\v 18 Mo panake bapi ma꞉nda꞉na꞉ta꞉ mo wanda꞉halima꞉ ipiki pa꞉ta꞉ a꞉pa alota꞉ Tiekeo. Nikana꞉ma꞉ta꞉ mo ota꞉ ekita꞉ neke pa꞉ta꞉ na a꞉mbalumeke. Mo nika꞉ mani paeyaota꞉ paela꞉ make mo nika꞉ ma꞉na꞉ manuta꞉ amba꞉ naka꞉ mime. Koto ekina꞉ ameta꞉ mo neke kia꞉peke alemanu ma꞉nda꞉ta꞉ na ula꞉pate pa mo nika꞉ loke pita꞉ nika꞉ kenkemanu homeke neke pa꞉ta꞉ kia꞉peke ya꞉la꞉me.  
\v 19 Niki homaama꞉na꞉ma꞉ hau ma꞉nda꞉ ma꞉nda꞉ make a̱i̱ pie. Nika꞉ e manuta꞉ na mopu yamono lae. Niki make nika꞉ kenke make nema꞉ topo pitolo hata꞉ hamba꞉e. Nikita꞉ mo kinina꞉ pa hameke e pokaasa꞉ tapake homono nika꞉ kenke make ipiki milieke. Niki paa da꞉ta halo poloma꞉ tupa꞉ kone widimanu kie. Kutupa make nika꞉ e pa꞉ta꞉manu nokopomono wae alemanu ma꞉nda꞉ kie laa honke lemekeme.   
\p
\v 20 Kota꞉ Diosepema꞉ta꞉ mo Idiepi kenke paeyaota꞉ kinina꞉ eki wina꞉ hambaeyekeme. Mo tea꞉ kita꞉ ota꞉ hoeya꞉pa wieke handa mo Idiepi tapake paeyaona꞉ kenketa꞉ ota꞉ paeyaoma꞉ tapaena꞉ leeke ekima꞉ mo kenketa꞉ kinina꞉ eki homeke wiekeme.  
\v 21 Diosepema꞉ta꞉ mo Idiepi kenke mandane nepokona꞉ kini pea pua mandane nepokona꞉ puata꞉ wanda꞉hali paeyao pa hameke e pokaasa꞉ wanda꞉hali haena꞉ leekeme.  
\v 22 Kuta mo na hambeeke kenke homeketa꞉ mo hande yeni peao hayeke tapakena꞉ eki yekeme. Pa ekipeke ika꞉ eki na tapaemeke ekita꞉ kinima꞉ mo ika꞉ nolo pimiki nemanu ana꞉na꞉ hala꞉tiki pieke pimikime.  
\v 23 Diosepema꞉ mo wanda꞉hali pa꞉ta꞉ alota꞉ Ameta꞉ I̱ma꞉ iki make ika꞉ kenke make mo kinina꞉ hambalo ekita꞉ handelememe. Koto ekina꞉ ika꞉ e nina꞉ nokopolo peleme wae alemanu do handa꞉pe.  
\v 24 Kutu pulu pelemepate mo ne napeke mendiolota꞉ yunki hata꞉na꞉ homeke homeke lo hondo mo kini pa꞉ta꞉ halimikie. Mo paa wilia꞉ ekita꞉ wae wia make ika꞉ tapake ika꞉ nolo peleme eki mia꞉pa꞉peke.   
\p
\v 25 Koto leeke mo tapakema꞉ hombo peaaso hata꞉ alota꞉ Niki nakana꞉ma꞉ tea꞉ma꞉ amba꞉ homolo puma꞉pate niki tamba꞉ meleme. Tiekeo. Nakana꞉ma꞉ta꞉ niki pa꞉ta꞉ ota꞉ epeke hau pime. Koto ekina꞉ nikita꞉ mo kinina꞉ pa hameke e pokaasa꞉ tapakee.  
\v 26 Koto ekina꞉ Diosepema꞉ mo Idiepi kenkena꞉ lo pi witolota꞉ mo ne napeke mendiolo yunki hata꞉ ya꞉ka꞉na꞉ta꞉ homeke ma꞉nda꞉ hondo meata꞉ mo kinina꞉ eki ya꞉na꞉e laa lo pi wiekeme. Ame do make koto pi la꞉ ula꞉ ekita꞉ ota꞉ pa pa꞉la꞉me. Pate mo yeni peao haemeke haliwekina꞉ kenkemanu homeketa꞉ mo kinina꞉ eki na wiekeme.   
\s1 Dieikopena꞉ paeyaaso honke leekeeki  
\p
\v 27 Mo Isulai tapaketa꞉ oni Idiepi kenke pa꞉ta꞉ mo Kosene da yu pa꞉ta꞉ hata꞉ta꞉ hamoko haota꞉ wekiwandiki wopu mondu wimikime.  
\v 28 Dieikopeta꞉ mo Idiepi haena꞉ta꞉ bapi 17 paeyekeme. Kutupa ota꞉ ipika꞉ bapita꞉ 147 miekeme.  
\v 29 Mo ipika꞉ homolo pieke nate teke pa꞉ta꞉ opolo epeeketa꞉ ipika꞉ eiyeke Diosepe wi la꞉ mea alota꞉ Naka꞉ kiki yaka paleke ankolopuna꞉ wia hata꞉ I̱ do Idiepi kenke pa꞉ta꞉ na hoilueke laa keke pi la꞉ wie.  
\v 30 Pa ekipeke yaka hone pa꞉la꞉ ekita꞉ mo yaka apa꞉ ameda hoila꞉ alena꞉ hoilu poelena꞉ loa꞉me. Koto ekina꞉ I̱ do Idiepi mina꞉pa꞉lao mo tapake hoila꞉ alena꞉ tia pua hoiya꞉peke leekeme. Diosepema꞉ hombo peaaso alota꞉ I̱ma꞉ta꞉ nakana꞉ma꞉ ale tupa꞉ ota꞉ pulueke laa la꞉ wiekeme.   
\p
\v 31 Dieikopema꞉ alota꞉ Nakana꞉ma꞉ pulueke laa keke pi la꞉ wie leeketa꞉ Diosepema꞉ keke pi la꞉ wieke handa Dieikopema꞉ koto pate ipika꞉ da panda꞉ pa꞉ta꞉ yeni pitolo hata꞉ keiyae leekeme.   
\c 48  
\s1 Dieikopema꞉ Ipoteimi pita꞉ Ma꞉na꞉sa꞉ yaapo epeayekeeki  
\p
\v 1 Hao hao pa nate ma꞉nda꞉na꞉ta꞉ Diosepe pa꞉ta꞉ta꞉ ateke yeni hapa ula꞉me laa lemekeeki opu haota꞉ ipika꞉ weki yaapo Ma꞉na꞉sa꞉ pita꞉ Ipoteimi yaapo hatuku Dieikope handolo peekeme.  
\v 2 Kutupa Dieikope pa꞉ta꞉ naka꞉ weki Diosepeta꞉ neke handolo a꞉pa꞉la꞉me lemeke opu haota꞉ ipikita꞉ honkopu hao tia liao pitiekeme.  
\v 3 Dieikopema꞉ Diosepe pa꞉ta꞉ alota꞉ Mo Aneke Wele wopupiki Koda꞉ma꞉ta꞉ oli Keinani ula꞉ Lusu kenke pa꞉ta꞉ opolo a꞉pa I̱ epeaeya꞉me.  
\v 4 I̱ pa꞉ta꞉ dupa lea꞉me. Naka꞉ monduma꞉ monduma꞉ pilipi wekiwandikina꞉ wekiwandikita꞉ tutu paeyao siki haena꞉ yeke handa wekiwandiki wopu kulueke lea꞉me. Kutupa do kenketa꞉ ika꞉eki u tia pu haena꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki halueke lea꞉me leekeme.   
\p
\v 5 Dieikopema꞉ ombu alota꞉ Diosepeo. Mo I̱ a̱i̱ na epeke hano do Idiepi mendiala꞉ naka꞉ weki yaapota꞉ yaka ekie. Ipoteimi pita꞉ Ma꞉na꞉sa꞉ yaapota꞉ pa mo yaka weki Lubeni pita꞉ Simiono yaapo konema꞉ handa꞉la꞉me.  
\v 6 Pate mo naka꞉ wetepena꞉ mendilipi weki tonuta꞉ kota꞉ yaka weki dia꞉ ya꞉lieke. Koto weki tonuma꞉ta꞉ mo Ipoteimi pita꞉ Ma꞉na꞉sa꞉ yaapo pa꞉ta꞉ yama꞉ ipilia꞉ alemanu milimikie.  
\v 7 I̱ma꞉ dupitolo ekita꞉ mo naka꞉ ama꞉ Leisolona꞉ yeke pitolome. I̱ mo Mesopoteimia hao epoa꞉ dina꞉ta꞉ mo Keinani kenke pa꞉ta꞉ Epa꞉ta꞉ teke pa꞉ta꞉ I̱ a꞉ta꞉ tieke peao homea꞉me. I̱ma꞉ mo wanda꞉ta꞉ Epa꞉ta꞉ pula꞉ pota꞉ tea꞉na꞉ hoiyua꞉me leekeme. Koto Epa꞉ta꞉ta꞉ ameta꞉ Beteleha꞉ma꞉ lelememe.   
\p
\v 8 Dieikopema꞉ mo Diosepena꞉ weki yaapo hando hao alota꞉ Do weki yaapota꞉ epi yaapo ya꞉ka꞉ta꞉pe leekeme.   
\p
\v 9 Diosepema꞉ hombo peaaso alota꞉ Do weki yaapota꞉ mo hande Koda꞉ma꞉ do Idiepi kenke pa꞉ta꞉ hano ka꞉la꞉ weki yaapoe leekeme.  
\p Koto leeke Dieikopema꞉ alota꞉ I̱ma꞉ ipiliki epealuekema꞉ dopate hatuku epoe leekeme.  
\v 10 Dieikopeta꞉ bapi tieke lieke ekiyalo hata꞉ ipika꞉ leke anku pieke ekima꞉ wopu handa꞉peke na yekeme. Kutupa Diosepema꞉ mo weki yaapo ipiki pa꞉ta꞉ hatuku a꞉pa haena꞉ laa mo weki yaapo hopula nunu piekeme.  
\v 11 Dieikopema꞉ Diosepe pa꞉ta꞉ alota꞉ I̱ma꞉ta꞉ neke paa handulueke hone na ua꞉pate ameta꞉ Koda꞉ma꞉ naka꞉ weki yaapo kone pa handono la꞉la꞉me.  
\v 12 Kutupa Diosepema꞉ mo weki yaapo Dieikopena꞉ palekena꞉ pitipi alena꞉ mea Dieikope pitia꞉ alena꞉ panda꞉ puniaeyekeme.   
\p
\v 13 Diosepema꞉ta꞉ Ipoteimita꞉ Dieikopena꞉ hoeya꞉ nanema꞉ pitao Ma꞉na꞉sa꞉ta꞉ popeke nanema꞉ pitaeyekeme.  
\v 14 Pate Dieikopema꞉ta꞉ ipika꞉ kiki yaapo pala꞉sa꞉ pu alu pea mo Ipoteimita꞉ wetepe weki kone ipika꞉ popeke nane kikita꞉ mo wekina꞉ ambokena꞉ wia kutupa mo ipika꞉ hoeya꞉ nane kikita꞉ mo mupeke wekina꞉ youna꞉ wiekeme.  
\v 15 Kutupa Diosepe epeaaso dupa leekeme.  
\b  
\q1 Mo hande yaka apa꞉mei yaapo Eipoloha꞉ma꞉ pita꞉ Aisa꞉ke yaapoma꞉ yeni pu haepeke Koda꞉ma꞉ do weki yaapo epeaena꞉e.  
\q1 Ame do di sikina꞉ kone I̱ hatuku a꞉pa꞉la꞉ Koda꞉ma꞉ ipiliki epeaena꞉e.   
\q1
\v 16 Mo hande tanda eleke eleke epea꞉ ale pa꞉ta꞉ I̱ pa꞉ta꞉la꞉ mea꞉tiki pia enisoloma꞉ ipiliki epeaena꞉e.  
\q1 Yaka biki make mo yaka apa꞉mei yaapo Eipoloha꞉ma꞉ pita꞉ Aisa꞉ke yaapona꞉ biki make do weki yaapo pa꞉ta꞉ yama꞉ pa u tia pu haena꞉e.  
\q1 Ipilikana꞉ma꞉ wekiwandiki wopu make mendia ipilika꞉ wekiwandikina꞉ wekiwandiki wopu haena꞉e laa leekeme.   
\p
\v 17 Diosepema꞉ta꞉ atekema꞉ ipika꞉ popeke nane kikita꞉ mo Ipoteimina꞉ youna꞉ wia꞉eki hando haota꞉ puki tandama꞉ homolo hata꞉ pao mea mo Ma꞉na꞉sa꞉na꞉ youna꞉ wina꞉yeke atekena꞉ kiki pao miekeme.  
\v 18 Ipikana꞉ma꞉ ateke pa꞉ta꞉ alota꞉ Apa꞉o. Kutupa dia꞉me. Dota꞉ mupeke weki ya꞉la꞉ma꞉ mo naka꞉ popeke nane kikita꞉ ipika꞉ ambokena꞉ wie laa leekeme.   
\p
\v 19 Koto leekepate atekema꞉ ipika꞉ pi na opitolo hata꞉ alota꞉ Yaka wekio. I̱ma꞉ hone ulume. Ma꞉na꞉sa꞉na꞉ monduma꞉ monduma꞉ pilia꞉ wekiwandikina꞉ wekiwandiki make tapake tieke halo pa꞉la꞉pate pa ipika꞉ wetepe nane hamekema꞉ta꞉ ota꞉ ankulaota꞉ ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ tutu tiekemanu halieke.   
\p
\v 20 Koto ekina꞉ koto natena꞉ta꞉ Dieikopema꞉ mo weki yaapo epeaaso hata꞉ alota꞉ Mo Isulai tapakema꞉ta꞉ Ipilika꞉ biki alo hata꞉ta꞉ epeaasa꞉ pi dupa lelimikie. Koda꞉ma꞉ neketa꞉ Ipoteimi pita꞉ Ma꞉na꞉sa꞉ yaapoma꞉ handaena꞉e laa lelimikie leekeme. Kutu pieke ekima꞉ Dieikopema꞉ta꞉ Ipoteimita꞉ Ma꞉na꞉sa꞉na꞉ puki pa꞉ta꞉ haena꞉ leekeme.   
\p
\v 21 Kutupa Dieikopema꞉ Diosepe pa꞉ta꞉ alota꞉ I̱ homolo poloeki teke pa꞉ta꞉ ya꞉la꞉ ekita꞉ do handelepate Koda꞉ta꞉ neke yaapo hata꞉ neketa꞉ naka꞉ apa꞉meina꞉ kenke nane paa hatuku pelieke.  
\v 22 Mo I̱ma꞉ yaka bainasi pita꞉ a꞉ndeli yaapoma꞉ mua꞉ hande Amo tapakena꞉ Sekeme kenke epeketa꞉ naka꞉ kametonu pa꞉ta꞉ dia꞉ya꞉la꞉pate pa I̱ma꞉ neke kitolome leekeme.   
\c 49  
\s1 Dieikopena꞉ paeyaaso pimanu  
\p
\v 1 Dieikopema꞉ ipika꞉ wekitonu wi la꞉ mea alota꞉ I̱ hopa꞉lia pita꞉pe laa alota꞉ mo iki pa꞉ta꞉ wetepena꞉ pulu pa꞉la꞉ ekimanu I̱ma꞉ iki la kulukuma꞉ loa꞉me.   
\q1
\v 2 Dieikopena꞉ eiyeke tonuo. Homeke pa꞉ta꞉ a꞉pa taeyao pita꞉ opua꞉pe. Ika꞉ apa꞉ Isulaina꞉ pi opua꞉pe.   
\b  
\q1
\v 3 Lubeni neketa꞉ yaka mupeke weki make yaka honkopue. Kutupa I̱ wekihali hata꞉ mondolo mupeke wekie.  
\q1 Yaka weki paeyao ankulake neketa꞉ ta꞉na꞉ ta꞉na꞉ma꞉ homa honkopu wopu haleme.   
\q1
\v 4 Neketa꞉ mo hande ta꞉tiki ipula꞉ ikalima꞉ handeleme. Pate neketa꞉ mo titina꞉ halina꞉ biki na wilieke.  
\q1 Pa ekipeke neketa꞉ yaka wetepe wanda꞉ yaapo pelia naka꞉ apa꞉na꞉ da panda꞉ hoeyaeme.   
\b  
\q1
\v 5 Simiono pita꞉ Lipai yaapota꞉ hama̱la̱꞉e. Ipilikana꞉ma꞉ta꞉ ipilika꞉ a꞉nda꞉ pita꞉la꞉ ale manuma꞉ hali lu homaepeme.   
\q1
\v 6 Ipilika꞉ a꞉mbaaso hata꞉ pi pi lo halepeke I̱ma꞉ta꞉ na apa꞉taalueke. Kutupa ipilika꞉ pi hotilipi ale pa꞉ta꞉ make I̱ na apa꞉tiki pulueke.  
\q1 Pa ekipeke ipilikana꞉ma꞉ta꞉ mineke pankolo hata꞉ haliweki lipime. Kutupa telepo alo hata꞉ta꞉ mo hali kao manuta꞉ pa dola꞉pake peaepeme.   
\q1
\v 7 Ipilika꞉ mineke pankepe ekita꞉ ota꞉ paala꞉ pikieki ya꞉la꞉ ekina꞉ta꞉ kota꞉ esihou pi wina꞉e. Kutupa make ipilika꞉ lombeipiki mineke pankepe ekita꞉ ota꞉ a꞉ta꞉ma꞉ homa꞉peke na ya꞉la꞉ ekina꞉ loa꞉me.  
\q1 I̱ma꞉ ipilikita꞉ mo Isulai kenke paeyao pa꞉ta꞉ putupa꞉ alu pina꞉ lolueke. I̱ma꞉ta꞉ ipilika꞉ mo Isulai wanda꞉hali ame̱le̱ kone ta꞉ta꞉ ta꞉ta꞉ pea halu pilipikie.   
\b  
\q1
\v 8 Diuda neketa꞉ naka꞉ kame tonuma꞉ naka꞉ biki yeiya꞉ lalimikie. Nakana꞉ma꞉ta꞉ naka꞉ a꞉nda꞉ tunkiliki tapake manuta꞉ make yola꞉ mea wia haleme. Naka꞉ kame tonuma꞉ta꞉ neke pa꞉ta꞉ panda꞉punialimikie.   
\b  
\q1
\v 9 Diudata꞉ Laeonoma꞉ handa꞉la꞉me. Ipika꞉ napeke ale liata꞉ oni ipika꞉ da pa꞉ta꞉ la꞉ka꞉la pula꞉me.  
\q1 Kiki anke tindipa tindipa pea polu pila꞉me. Paeyaoma꞉ paala꞉ma꞉ homolo hata꞉ ipiki penkilipa꞉ tiatiki pea꞉peke na ya꞉la꞉me.   
\q1
\v 10 Diudama꞉ta꞉ mo kinina꞉ minu hala꞉ dolo miniki halieke. Kutupa ipika꞉ monduma꞉ monduma꞉ pilia꞉ wekiwandikina꞉ wekiwandiki pa꞉ta꞉ yama꞉ kini halimanu hoto paeyao handeteke hao hatiki pilimikie.  
\q1 Tutu manuma꞉ta꞉ ipika꞉ dakisi hambuluekema꞉ ala꞉ta꞉ ala꞉ta꞉ mea a꞉palimikie. Kutupa ipiki pa꞉ta꞉ homu pitolo hata꞉ panda꞉punialimikie.   
\q1
\v 11 Ipikana꞉ma꞉ ipika꞉ panake donkita꞉ mo waini puna꞉ endi baasa꞉me. Pa pina꞉ma꞉ mo ota꞉ epeke paeyao ankulake piki waini puna꞉ loa꞉me.  
\q1 Kutupa ipika꞉ aka꞉ manuta꞉ mo we au leke wepiki waini ikali pa꞉ta꞉ tandepo hala꞉me.  
\v 12 Mo waini ikali no haleke yalota꞉ ipika꞉ leke we pupa pa꞉la꞉mee. Ipika꞉ kaketa꞉ andu no haleke yalota꞉ hake pa꞉la꞉mee.   
\b  
\q1
\v 13 Sebulonita꞉ dawala tea꞉na꞉ pelia haliekee. Ipika꞉ dawala tea꞉na꞉ta꞉ mo kawasomanu epeke tupa꞉ a꞉pa pitina꞉ epeke alena꞉ yelieke. Ipika꞉ kilu tumbuao halo pa꞉la꞉ ekita꞉ ota꞉ mo Saidoni da kenkena꞉ pua tombo pilieke.   
\b  
\q1
\v 14 Isakata꞉ mo hone na wiki donkima꞉ handa꞉la꞉ halie. Mo donki ipikita꞉ oni ipika꞉ hokina꞉ mendiaasa꞉ numanu tukikina꞉ pala꞉mba꞉ pelia꞉la꞉ ma꞉na꞉ loa꞉me.  
\v 15 Pate ipika꞉ handolota꞉ do hoto pila꞉ alena꞉ta꞉ a꞉pa꞉la꞉me laata꞉ do kenketa꞉ ota꞉ yole pa꞉la꞉me ala꞉me. Koto ekina꞉ mo ala꞉ta꞉ ala꞉ta꞉ tuluekema꞉ yeke ipika꞉ hoki panda꞉puniaasa꞉me. Kutupa ipikita꞉ pa hameke e pokaasa꞉ some tupa꞉ e pokena꞉ la꞉la꞉me.   
\b  
\q1
\v 16 Da꞉nita꞉ ipika꞉ wanda꞉halina꞉ handeteke hala꞉ some halieke. Ikita꞉ mo hande mandane Isulai tapakema꞉ handilimikie.  
\v 17 Da꞉nita꞉ mo pota꞉ tea꞉na꞉ pila꞉ keto wilieke. Mo pota꞉ tea꞉na꞉ hali lita꞉la꞉ ketona꞉ loa꞉me. Mo hosi hokina꞉ pita pula꞉ some ya handa꞉liao lopena꞉yeke mo hosina꞉ kilolikina꞉ awa꞉la꞉ keto wilieke.   
\b  
\q1
\v 18 Tekehalio naka꞉ ka꞉la꞉pa꞉ tapaase eki yu wia halome.   
\b  
\q1
\v 19 Ka꞉da꞉ta꞉ mo pake no haleme tapake ma꞉nda꞉ma꞉ lulu pelia꞉pate paa ipikana꞉ma꞉ la꞉ka꞉la mo tapake telipilieke.   
\b  
\q1
\v 20 A꞉seana꞉ kenkena꞉ta꞉ epeke epeke nemanu opilieke. Ipikana꞉ma꞉ta꞉ mo kinima꞉ napeke ya꞉la꞉ epeke nemanu opalieke.   
\b  
\q1
\v 21 Na꞉petalita꞉ mo walekena꞉ pototo la pomina꞉la꞉ dia ma꞉na꞉ma꞉ handa꞉la꞉me. Ipikita꞉ ota꞉ epeke ikikimanu mondu hala꞉me.   
\b  
\q1
\v 22 Diosepeta꞉ mo tunkulupa ula꞉ ikali tea꞉na꞉ hala꞉ tikene donkima꞉ handa꞉la꞉me. Ipikita꞉ mo yueli pa꞉ta꞉ hala꞉ panake hosi hali ma꞉na꞉ma꞉ handa꞉la꞉me.  
\v 23 Ipika꞉ a꞉nda꞉ tunkiliki tapakema꞉ta꞉ ipikita꞉ paala꞉piki tupa꞉ a꞉pa a꞉nda꞉ pilimikie. Kutupa ika꞉ semoko a꞉ndeli manuma꞉ ipiki tolutia pomilimikie.  
\v 24 Pate ipika꞉ a꞉ndelita꞉ la꞉ma꞉ na pa꞉la꞉me. Kutupa ipika꞉ kiki yaapo honkopu haowala꞉me. Koto hauta꞉ mo Dieikopena꞉ Wele wopupiki Koda꞉na꞉ honkopuma꞉ pia꞉me. Mo hande Sipisipi Handeteke Hala꞉ some Isulaina꞉ handeteke hao hala꞉ Koda꞉ loa꞉me.   
\b  
\q1
\v 25 Mo neke tamba꞉ mina꞉la꞉ta꞉ naka꞉ apa꞉na꞉ Koda꞉ma꞉ pita꞉la꞉me. Mo Aneke Wele wopupiki Koda꞉ma꞉ neke epeaasa꞉me.  
\q1 Oli ya nane lakoma꞉ neke epeaasa꞉me. Kutupa oni kenke oto nane opa꞉laasa꞉ ikali manuma꞉ makee. Kaomanu wopu make wekiwandiki wopu make neke epeaasa꞉me.   
\q1
\v 26 Widina꞉ kiliki pita꞉ palawasi yaapoma꞉ make neke epeaasa꞉me. Mo amba꞉ hao haemeke pote manuma꞉ make neke epeaasa꞉me. Kutupa mo pa u tia pu hala꞉ elimanu pa꞉ta꞉ yama꞉ mo ta꞉ta꞉ ta꞉ta꞉ piki epeke alemanu make neke pa꞉ta꞉ ipula꞉me. Do epeaasa꞉ ekimanu paeyaota꞉ Diosepena꞉ ambokena꞉ wina꞉e. Mo ipika꞉ hamekema꞉ handa꞉la꞉ hali dia꞉me laa ma̱leke lila꞉ somena꞉ wenokona꞉ loa꞉me.   
\b  
\q1
\v 27 Benisaminita꞉ mo hoke paala꞉ wopupiki tikene kikama꞉ handa꞉la꞉me. Peliolo da kelepolota꞉ pa pitiki alemanu lia ombu na꞉tiki pu hala꞉me laa leekeme.   
\p
\v 28 Koto mo hande Isulaina꞉ 12 tapakee. Kutupa koto pi manuta꞉ mo hande ateke Dieikopema꞉ ipika꞉ paeyaaso pi alo hata꞉ ipika꞉ weki homeke homeke paeyao pa꞉ta꞉ manda꞉ meaaso hata꞉ leeke pie.   
\s1 Dieikope homeeke hoimikieki  
\p
\v 29-30 Kutupa Dieikopema꞉ eiyeketonu taka꞉lakema꞉ pi alo alota꞉ I̱ta꞉ ameta꞉ mo yaka wanda꞉hali ame̱le̱ apa꞉tao homolo pulume. Koto ekina꞉ dupa꞉peke. I̱ta꞉ yaka apa꞉ ame̱le̱ mandakena꞉ mo Keinani kenke pa꞉ta꞉ Ma꞉motena꞉ nate ipula꞉ nanema꞉ tilao Hidi hali Epotonina꞉ Ma꞉ka꞉pila e pa꞉ta꞉ ula꞉ tikene da pa꞉ta꞉ hoiya꞉peke. Eipoloha꞉ma꞉ma꞉ koto apa꞉nda꞉ta꞉ hali hoita꞉la꞉ lapa꞉ wina꞉ mo Epotoni pa꞉ta꞉ hambeeke ekima꞉ pa꞉la꞉me.  
\v 31 Koto pa꞉ta꞉ta꞉ Eipoloha꞉ma꞉ pita꞉ weteke Seta yaapo hoila꞉me. Kutupa koto pa꞉ta꞉ ombuta꞉ Aisa꞉ke pita꞉ weteke Lepeka yaapo make hoila꞉me. Kutupa I̱ma꞉ maketa꞉ koto pa꞉ta꞉ Lia hoiyua꞉me.  
\v 32 Mo e make mo tikene da make mo Hidi tapake pa꞉ta꞉ hambeeke ekie. Koto pa꞉la꞉ma꞉ I̱ koto pa꞉ta꞉ hoiya꞉pa꞉peke laa leekeme.  
\v 33 Dieikopema꞉ ipika꞉ eiyeketonu pa꞉ta꞉ mana꞉manu halo paeyaota꞉ paa polu hola꞉paka꞉na꞉ homeekeme.   
\c 50  
\p
\v 1 Diosepema꞉ta꞉ mo ateke toko manda lopa e̱ alo hata꞉ atekena꞉ leke popeleke nunu piekeme.  
\v 2 Kutupa ipikana꞉ma꞉ atekena꞉ loke tanda꞉ paama꞉na꞉ mulamula yankape laa leekeme.  
\v 3 Koto mulamula yankaota꞉ mo Idiepi tapakema꞉ pu haemeke tupa꞉ 40 natemanu pu paeyaemekeme. Kutupa mo Idiepi wanda꞉halima꞉ta꞉ 70 natena꞉ Dieikopena꞉ homa꞉ wia pitimikime.   
\p
\v 4 Mo homa꞉ wia pitimiki nate paeyeke handaata꞉ Diosepema꞉ mo kinina꞉ mandane e pokaemeke haliweki pa꞉ta꞉ alota꞉ Pilisio. Do pi mo kini pa꞉ta꞉ mea pupa꞉e.  
\v 5 Yaka apa꞉ homuluekema꞉ pita꞉ta꞉ mo Keinani kenke pa꞉ta꞉ ipika꞉ amu pea ula꞉ tikene da pa꞉ta꞉ pua hoiya꞉peke laata꞉ I̱ma꞉ pi la꞉ wiono lea꞉me. Koto ekina꞉ pilisio. Yaka apa꞉ hoilu pono lae. Kutupata꞉ I̱ paa la꞉ka꞉la ipulueke laa lapa꞉peke leekeme.   
\p
\v 6 Koto pi opua mo kinima꞉ hombo peaaso alota꞉ Mo naka꞉ pulueke laa la꞉ wi tupa꞉ naka꞉ apa꞉ pua hoiya꞉peke leekeme.   
\p
\v 7 Koto leeke Diosepeta꞉ ipika꞉ apa꞉ hoilu peekeme. Mo kinina꞉ handeteke haemeke haliweki paeyao make kinina꞉ handeteke pila꞉ pa꞉ta꞉ haleme tondiki haliweki make mo Idiepina꞉ biki ula꞉ haliweki paeyao make Diosepe ame̱le̱ pemekeme.  
\v 8 Kutupa ipika꞉ wekiwanda꞉ make ipika꞉ hameketonu make mo ipika꞉ apa꞉na꞉ tapake paeyaosiki make ipiki ame̱le̱ pemekeme. Pate ika꞉ hosiki wekiwandikisunu make ika꞉ sipisipimanu make nanikosimanu make kaomanu make homeke oni Kosene kenke pa꞉ta꞉ pa haemekeme.  
\v 9 Mo hosima꞉ yola꞉la꞉ pota꞉ alena꞉ pila꞉ haliweki make mo hosi hokina꞉ pila꞉ haliweki make Diosepe ame̱le̱ mandakena꞉ pemekeme. Mota꞉ tapaketa꞉ ota꞉ tieke kiake yekeme.   
\p
\v 10 Mo tapake hande hoilu pimiki ale teke pa꞉ta꞉ a꞉pa mo Diodanina꞉ nate ipula꞉ nanema꞉ tilao mo widi kilikina꞉ ambuku napeke yaapo putupa alu pa꞉la꞉ hama꞉ ma꞉nda꞉ biki Atade opolo a꞉paata꞉ nate hokuluna꞉ anekema꞉ homa꞉ wia e̱ lemekeme. Kutupa nate wataake hata꞉na꞉ Diosepema꞉ ika꞉ homa꞉ wia pita꞉ pu haemeke tupa꞉ piekeme.  
\v 11 Kutu pimikieki mo Keinani wanda꞉halima꞉ mo Atade da homa꞉ wimikieki handolo hata꞉ alota꞉ Mo Idiepi tapakema꞉ a꞉ta꞉ tiekema꞉ homa꞉ wia pita꞉la꞉ a꞉ta꞉piki hau tieke kiake pitelememe laa lemekeme. Koto ekina꞉ koto pateta꞉ bikita꞉ Abele Miseteimi lemekeme.   
\p
\v 12 Koto ekina꞉ mo Dieikopena꞉ eiyeke tonuma꞉ta꞉ atekema꞉ pia꞉pa꞉peke leekeeki kone pimikime.  
\v 13 Ipika꞉ toko tia puata꞉ mo hande Eipoloha꞉ma꞉ma꞉ hali lapa꞉ wina꞉yeke mo Keinani kenke pa꞉ta꞉ hande Hidi hali Epotonina꞉ e pa꞉ta꞉ wieke tikene da pa꞉ta꞉ mea pua lapa꞉ pimikime. Koto tikene data꞉ mo Ma꞉motena꞉ nate ipula꞉ nanema꞉ Ma꞉ka꞉pila da kenke pa꞉ta꞉ ula꞉ ekina꞉ loa꞉me.  
\v 14 Diosepema꞉ ateke lapa꞉ pea paeyeketa꞉ hameke tonu make mo ipiki ame̱le̱ homa꞉ da pemeke tapake paeyao Idiepi nane la꞉ka꞉la paa pemekeme.   
\s1 Diosepema꞉ hameke tonuna꞉ puki epeayekeeki  
\p
\v 15 Mo ika꞉ ateke homea꞉ hoki naneta꞉ Diosepena꞉ hameke tonuma꞉ alota꞉ Mo Diosepema꞉ hande nikana꞉ma꞉ ipiki pa꞉ta꞉ puma꞉ hoke hauna꞉ niki pa honditi pea mo nikana꞉ma꞉ puma꞉ ekina꞉ yenki mulueke laa pota꞉manu wepia꞉ka꞉na꞉ta꞉ kota꞉ eki pumana꞉pe lemekeme.  
\v 16 Koto ekina꞉ Diosepe pa꞉ta꞉ pi tapaaso alota꞉ Nika꞉ apa꞉ homuluekema꞉ pita꞉ta꞉ ipikana꞉ma꞉ta꞉ nikana꞉ma꞉  
\v 17 neke pa꞉ta꞉ dupa lota꞉ piomono lea꞉me. Pilisio. Naka꞉ kame tonuma꞉ neke luekema꞉ pimi ata꞉ka꞉ peake hauta꞉ pa paeyaapeke lea꞉me. Koto ekina꞉ta꞉ pilisio. Ameta꞉ mo nikana꞉ma꞉ ata꞉ka꞉ peake hau puma꞉eki pa paeyawapeke. Mo hande naka꞉ apa꞉na꞉ Koda꞉na꞉ e pokaasoma꞉ tapakema꞉ poloma꞉ ekina꞉ loa꞉me lemekeme. Diosepema꞉ koto pi mu haota꞉ e̱ leekeme.   
\p
\v 18 Kutupa ipika꞉ hameke tonu a꞉pa ipiki pa꞉ta꞉ panda꞉ puniaaso hata꞉ alota꞉ Nikita꞉ ameta꞉ naka꞉ leke popelekena꞉ naka꞉ pa hameke e pokaasoma꞉ tapake do handa꞉e laa lemekeme.   
\p
\v 19 Pate Diosepema꞉ mo hameke tonu pa꞉ta꞉ alota꞉ I̱ma꞉ta꞉ yaka kone mo Koda꞉ topo peaka꞉na꞉ I̱ hapeke na ya꞉la꞉me. Paala꞉ma꞉ na homa꞉pa꞉peke.  
\v 20 Ikana꞉ma꞉ta꞉ I̱ pa꞉ta꞉ hoke hau pimipate Koda꞉ma꞉ta꞉ koto paa topo pea epekeeki au lala꞉me. Kutupa mo koto hau pimi ekita꞉ mo ame pa do haleme wanda꞉hali paeyaona꞉ hao polu pelemeeki epeanoyeke pa꞉la꞉me.  
\v 21 Ikana꞉ma꞉ paala꞉ma꞉ homa꞉pekeeki ma꞉nda꞉ dia꞉me. I̱ma꞉ta꞉ iki make ika꞉ wekiwandiki make handeteke hao halueke leekeme. Koto ekina꞉ mo tapakema꞉ ta꞉na꞉ma꞉ homena꞉ loluekema꞉ ipikana꞉ma꞉ta꞉ mo tapakena꞉ puki liake koto homupiki pi manuma꞉ epeayekeme.   
\s1 Diosepena꞉ homeekeeki  
\p
\v 22 Diosepeta꞉ atekena꞉ tapake ame̱le̱ Idiepi kenke pa꞉ta꞉ hao hayekeme. Kutupa bapi 110 haota꞉ homeekeme.  
\v 23  Ipikana꞉ma꞉ta꞉ Ipoteimina꞉ wekiwandiki make ipika꞉ wekiwandikina꞉ wekiwandiki make handaa homeekeme. Kutupa make mo ipika꞉ weki ma꞉nda꞉ Ma꞉na꞉sa꞉na꞉ eiyeke Meikana꞉ wekiwandiki mo ipika꞉ tapake pa꞉ta꞉ honda꞉ pambemekeeki handeekeme.  
\v 24 Ipikana꞉ma꞉ ipika꞉ hameketonu pa꞉ta꞉ alota꞉ I̱ta꞉ homolo poloeki teke pa꞉ta꞉ do ya꞉la꞉me. Pate Koda꞉ma꞉ta꞉ iki ota꞉ epeke tupa꞉ handeteke hao halieke. Kutupata꞉ mo hande ipikana꞉ma꞉ Eipoloha꞉ma꞉ make Aisa꞉ke make Dieikope ameda pa꞉ta꞉ Do kenke kulueke laa la꞉ wieke kenke pa꞉ta꞉ta꞉ ota꞉ iki hatuku pelieke laa leekeme.  
\v 25 Kutupa Diosepema꞉ ipika꞉ wanda꞉hali pa꞉ta꞉ta꞉ keke pi dupa lape laata꞉ honke leekeme. Ipikana꞉ma꞉ alota꞉ I̱ pa꞉ta꞉ pi la꞉ wipe laata꞉ Koda꞉ma꞉ iki koto kenke pa꞉ta꞉ hatuku pea꞉ka꞉na꞉ta꞉ kota꞉ yaka toko iki ame̱le̱ mandakena꞉ mea polumekee laa la꞉ wipee leekeme.  
\v 26 Kota꞉ Diosepeta꞉ 110 bapina꞉ Idiepi kenke pa꞉ta꞉ homeekeme. Mo tapakema꞉ta꞉ ipika꞉ lokena꞉ na tanda꞉pa꞉la꞉ mulamula ana꞉na꞉ yankao hali toko pamba꞉la꞉ bokisi pa꞉ta꞉ wimikime.