\id GAL - Sembeleke Samberigi PNG Galatians 13/2/91 Macnaughtan \h KA꞉LEISIA \toc1 Poloma꞉ Ka꞉leisia Siosi pa꞉ta꞉ tapaeyeke wapee \toc2 Ka꞉leisia \toc3 Ka꞉leisia \mt1 Poloma꞉ Ka꞉leisia Siosi pa꞉ta꞉ tapaeyeke wapee \c 1 \p \v 1 I̱ Polo I̱ma꞉ aposolo hano wi la꞉la꞉ ekita꞉ halima꞉ o hali pa꞉ta꞉ yama꞉ wi na lea꞉pate mo Yesu Ketisoma꞉ make mo naku pa꞉ta꞉ ipiki mea da꞉taeyeke Apa꞉ Koda꞉ma꞉ make ipiliki telipina꞉ma꞉ I̱ wi la꞉la꞉me. \v 2 Do mandake haloma꞉ kame tonuma꞉ I̱ ame̱le̱ apa꞉tao mo iki Ka꞉leisia kenke pa꞉ta꞉ haleme siosimanu pa꞉ta꞉ nika꞉ a꞉ta꞉pa꞉la꞉ pi la꞉neaasoma꞉me. \p \v 3 Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make iki pa꞉ta꞉ kina꞉e. \v 4 Ketisoma꞉ nika꞉ Apa꞉ Koda꞉na꞉ hone pa꞉la꞉ ekina꞉ ipika꞉ kakena꞉ homolo hata꞉ nika꞉ hoke hauna꞉ yenkita꞉ ipika꞉ lokema꞉ mina꞉ homeekeme. Kutu pieke ekita꞉ do hoke natena꞉ haloma꞉eki pa꞉ta꞉ niki peteluekema꞉ piekeme. \v 5 Koto ekina꞉ta꞉ Koda꞉ ipika꞉ biki tieke wina꞉ yeiya꞉ latiki latiki pu hamana꞉e. Kutu pina꞉e. \s1 Pi seliapota꞉ homeke homeke ula꞉eki \p \v 6 A꞉pei. Ikana꞉ma꞉ pitelememe ala꞉eki opitolo I̱ma꞉ tola꞉tia pominolome. Ikita꞉ nate aneke hapu a꞉nda꞉ dia꞉ya꞉pate mo hande Ketisona꞉ a꞉ta꞉ma꞉ homa꞉la꞉eki pa꞉ta꞉ yama꞉ iki wi lea꞉ Koda꞉ta꞉ koto kone mina꞉pa꞉laaso hata꞉ pi seliapo ma꞉nda꞉ taa miniki haemeka꞉ta꞉me. \v 7 Koto pimika꞉ta꞉ pateta꞉ I̱ma꞉ta꞉ pi seliapota꞉ ma꞉nda꞉ ota꞉ dia꞉me hone witolome. Koto alo ekita꞉ mandane wanda꞉halima꞉ mo Ketisona꞉ ota꞉ pi seliapo topo topo puluekema꞉ taapelememe. \v 8 Kota꞉ nikana꞉ma꞉ kone make o mo hepeni nane a꞉pa꞉la꞉ enisoloma꞉ make amba꞉ mo nikana꞉ma꞉ iki pa꞉ta꞉ waloma꞉ pi seliapoma꞉ na handeke ata꞉ka꞉piki pi seliapo ma꞉nda꞉ iki pa꞉ta꞉ walea꞉ka꞉na꞉ta꞉ kutu piki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee. \v 9 Amba꞉ hande loma꞉pate ame I̱ma꞉ paa alome. Ma꞉nda꞉ epima꞉ mo ikana꞉ma꞉ amba꞉ miniki haeme pi seliapoma꞉ na handeke ta꞉ta꞉ piki pi a꞉nda꞉ iki pa꞉ta꞉ walea꞉ka꞉na꞉ta꞉ kota꞉ kutupiki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee. \p \v 10 Do alo pima꞉ta꞉ mo wanda꞉hali ta꞉na꞉ma꞉ homa꞉ tiaaluekema꞉ alope. Dia꞉me. Ota꞉ dia꞉me. I̱ma꞉ta꞉ Koda꞉ma꞉ ta꞉na꞉ma꞉ homolo pa꞉la꞉eki weitolome. I̱ma꞉ta꞉ wanda꞉halima꞉ ya biki daeyaena꞉ taapolope. Dia꞉me. Koto hau puluekema꞉ taapoa꞉ka꞉na꞉ta꞉ kota꞉ I̱ta꞉ Ketisona꞉ e pokaaso hali na hapeke ya꞉la꞉me. \s1 Polo aposolo hali hayeke ekina꞉ pi \p \v 11 Ya kametonuo. I̱ma꞉ iki pa꞉ta꞉ lakionoe. Kota꞉ mo I̱ma꞉ walo halo Pi Seliapota꞉ kenke haliweki pa꞉ta꞉ pa꞉la꞉ pi dia꞉me. \v 12 Kuta make hali ma꞉nda꞉ma꞉ I̱ pa꞉ta꞉ na laku make na walo pia꞉me. Ota꞉ Yesu Ketisoma꞉ I̱ pa꞉ta꞉ peneme yao walea꞉me. \p \v 13 I̱ma꞉ mo hande Diu tapakena꞉ hau miniki haowa꞉ tomona꞉ pea꞉tiki pua꞉ hau manuna꞉ pita꞉ amba꞉ opu haememe. Kuta I̱ma꞉ mo hande Koda꞉na꞉ siosi wanda꞉hali pa꞉ta꞉ a꞉ta꞉ma꞉ na homeke tanda halolo hata꞉ ota꞉ hoeyaaluekema꞉ taapo haowa꞉me. \v 14 I̱ma꞉ mo hande Diu wanda꞉halina꞉ haumanu muluekema꞉ta꞉ ya mandake daeyoma꞉ Diu wekitonu bepolao lombei pitolo hata꞉ nika꞉ atekena꞉ atekena꞉ mana꞉ pimanu hone ota꞉ wopu ua꞉me. \p \v 15-16 Kutu pua꞉pate Koda꞉ma꞉ a꞉ta꞉ma꞉ homa tamba꞉ mina꞉la꞉ hali hata꞉ I̱ma꞉ ipika꞉ e pokaano ya ama꞉na꞉ weleke pa꞉ta꞉ pitono kone I̱ ma̱leke liekeme. Kutupa wetepena꞉ I̱ma꞉ Yesuna꞉ Pi Seliapota꞉ mo Diu tapake na hake ta꞉ta꞉piki tapakemanu pa꞉ta꞉ walalo ponoyeke Koda꞉ ipika꞉ eiyeke I̱ handono waluekema꞉ hone pieke di opolo epeeketa꞉ I̱ta꞉ ma꞉nda꞉ yaapo pi hotuluekema꞉ na pu make \v 17 mo Diutuseleme nane haemeke titina꞉ aposolo haliweki handolo make na peke pa tikitiki mo A꞉teibia kenke pa꞉ta꞉ pua wetepeta꞉ mo Damasikasi da nane paa la꞉ka꞉la epoa꞉me. \p \v 18 Mo Koda꞉na꞉ eiyeke I̱ pa꞉ta꞉ peneme yaeya꞉ hoki nane bapi tepo hao Diutuseleme da nane pua Pida yaapo pi pi loluekema꞉ pula yaapona꞉ ipika꞉ da pa꞉ta꞉ mandake haopa꞉me. \v 19 Koto hata꞉ta꞉ I̱ma꞉ aposolo hali ma꞉nda꞉ na handoa꞉pate pa mo Tekehalina꞉ hameke Dia꞉mesi homeke handoa꞉me. \v 20 Do wape pitolo pita꞉ ota꞉ pi alome. Ota꞉ diki honumakesiki I̱ma꞉ yapi alo na loa꞉me. Ota꞉ Koda꞉ma꞉ handa꞉la꞉me. \p \v 21 Wetepena꞉ta꞉ Sitia Silisia kenke yaapo pa꞉ta꞉ hayeke damanu pa꞉ta꞉ poa꞉me. \v 22 Koto pita꞉ma꞉ta꞉ mo Diudia kenke pa꞉ta꞉ haemeke siosi wanda꞉halima꞉ ya leke popeleketa꞉ na handemekepate \v 23 pa mandane wanda꞉halima꞉ mo hande niki pa꞉ta꞉ tanda ku haya꞉ somema꞉ta꞉ ipika꞉ hande hoeyaaluekema꞉ taapea꞉ hauna꞉ pi kone ameta꞉ pa wala꞉tiki pu hala꞉me lemeke pi opuata꞉ \v 24 kota꞉ koto ekina꞉ta꞉ ikana꞉ma꞉ Koda꞉na꞉ biki yeiya꞉ laemekeme. \c 2 \s1 Aposolo haliwekima꞉ Polo ame̱le̱ homeke hone wimikieki \p \v 1 Bapi 14 yapeeke hoki naneta꞉ Banabasi yaapo mo Diutuseleme nane Taitasi hatuku paa popa꞉me. \v 2 I̱ ponoyeke Koda꞉ma꞉ pue leeke handa poa꞉me. Kutupa mo siosi you haliweki niki honumake mombela pita꞉ I̱ma꞉ mo Diendaili wanda꞉hali pa꞉ta꞉ pi seliapo dupa walolome laa la haloa꞉me. Ya amba꞉ pokoa꞉ e make ame do pokolo e make pa pahameke pokaama꞉na꞉ laa iki pa꞉ta꞉ loa꞉me. \v 3 Ya hatuku poa꞉ some Taitasita꞉ Kitiki hali hayekepate mandane tapakema꞉ ipikita꞉ sekemesaisi hau pina꞉e lemekepate kone paeyaoma꞉ koto hau na peaemekeme. \v 4 Koto Taitasi sekemesaisi hau pina꞉e lemeke tapaketa꞉ yayapiki pi mimiki haliweki hata꞉ nika꞉ mombololoma꞉eki handoma꞉ tiaaluekema꞉ a꞉mbao epemekeme. Nikana꞉ma꞉ Yesu Ketiso ame̱le̱ hata꞉ mo Diu wanda꞉halina꞉ nindi peaasa꞉ pi wimiki ekimanu nindi na piki ka꞉la꞉pa꞉ tapaleke haloma꞉eki handuluekema꞉ kutu pimikime. Ikana꞉ma꞉ niki mo koto pi ula꞉ ekimanu paa nindi wopu peomono loluekema꞉yeke hone pimikime. \v 5 Dikana꞉ma꞉ iki Ketiso tapake pa꞉ta꞉ hone witolo hata꞉ koto tapakema꞉ mo ota꞉ pi seliapo pu hoeyaama꞉na꞉ da̱o̱la hata꞉ iki pa꞉ta꞉ waleke hosikisiki ma꞉nda꞉ na halopa꞉me. \p \v 6 Mandane haliwekita꞉ biki wiki you hali hake nono pea haemekeme. Ika꞉ biki ula꞉ ekita꞉ I̱ma꞉ta꞉ pa alee hone witolome. Koda꞉ma꞉ta꞉ manda yonkelekena꞉ hau handa na telipu hala꞉me. Koto you haliwekima꞉ I̱ pa꞉ta꞉ dupiki haumanu apa꞉tao pea꞉peke pi ma꞉nda꞉ na lememe. \v 7 Koto hau na pimipate Pidama꞉ Diu wanda꞉hali pa꞉ta꞉ mo pi seliapo walao haena꞉ mea hayeke tupa꞉ kone Koda꞉ma꞉ I̱ make Diu tapake na hake ta꞉ta꞉ piki tapakemanu pa꞉ta꞉ pi walano mea haena꞉ lea꞉ ekita꞉ ikana꞉ma꞉ handememe. \v 8 Pida mo hande Diu wanda꞉halina꞉ aposolo hali mea haena꞉ lea꞉ tupa꞉ kone I̱ make Koda꞉ ipika꞉ welema꞉ mo hande Diu na hake ta꞉ta꞉ piki wanda꞉halina꞉ aposolo hali hano mea haya꞉me. \v 9 Dia꞉mesi Pida make Dioni ikita꞉ you haliweki hake nono piki haliweki hata꞉ mo Koda꞉ma꞉ do I̱ pa꞉ta꞉ ka꞉la꞉ ta꞉ta꞉piki e handolota꞉ niki paeyao homeke tapake haloma꞉me laa handena꞉ walolo Banabasi yaapo kiki mina꞉ alualu puma꞉me. Kutupa nikana꞉ma꞉ homeke pi laata꞉ Banabasi make I̱ dikana꞉ma꞉ta꞉ Diendaili tapake ame̱le̱ hapono ikita꞉ Diu tapake ame̱le̱ hamena꞉e loma꞉me. \v 10 Kuta ikana꞉ma꞉ niki pa꞉ta꞉ honke lemeke pi homeke ma꞉nda꞉ta꞉ dupa. Mo niki ame̱le̱ haleme natehali wanda꞉hali hone na yonka꞉lapa꞉peke lemekeme. Koto honke lemeke hauta꞉ I̱ma꞉ honkopu hau pua꞉tiki pu halo hau homekena꞉ kone lemekeme. \s1 Poloma꞉ Pida tunkiliekeeki \p \v 11 Pida A꞉ndioko da nane epea꞉ pita꞉ma꞉ta꞉ ipika꞉ hauta꞉ peneme hoi pieke handa I̱ma꞉ ipika꞉ leke popelekena꞉ tikitiki pua sa꞉sa꞉ pua꞉me. \v 12 Dia꞉mesima꞉ tapaeyeke haliweki na opolo epeke haena꞉ta꞉ Pidama꞉ mo Diendaili Ketiso kametonu ame̱le̱ mandakena꞉ pita꞉ ne nemekepate pa mo haliweki opolo a꞉pa haemeketa꞉ Pidama꞉ mo Ketiso tapake paeyao sekemesaisi hau pumana꞉e lo haleme tapake haliweki pa꞉ta꞉ paala꞉ma꞉ homeke ekina꞉ ipikita꞉ mo Diendaili Ketiso tapake ame̱le̱ apa꞉tao pita꞉ ne na neke yola꞉ tapao pitiekeme. \v 13 Niki mandakena꞉ haloma꞉ Diu Ketiso kametonu make mo Pidana꞉ leke tieke hau honde mimikime. Do koto leke tita꞉la꞉ hauma꞉ta꞉ Banabasi make pa mea tiao peekeme. \v 14 Koto haliweki ikita꞉ mo panake pi seliapoma꞉ wala꞉la꞉ tupa꞉ tikitiki na pemekeeki handa I̱ma꞉ iki paeyaona꞉ leke popelekena꞉ Pida pa꞉ta꞉ alota꞉ Neketa꞉ Diu hali halepate kone nakana꞉ma꞉ Diu hali dia꞉ma꞉ pa mo Diendaili tapake haleme tupa꞉ kone haeme. Koto pele ekina꞉ta꞉ eki epi tekena꞉ nakana꞉ma꞉ mo Diendaili tapake Diu tapake leke haena꞉ tialo alepe. \s1 Epi amedama꞉ Yesu pa꞉ta꞉ hone tulaemeka꞉na꞉ta꞉ ata꞉ka꞉ na piki homeke tupa꞉ petelelieke \p \v 15 Mo hande Mosesina꞉ pi ula꞉eki na miniki hake pa haleme Diendaili tapake halememe lo haleme tupa꞉ dia꞉me. Nikita꞉ ota꞉ mo Diu tapakema꞉ ma꞉nda꞉la꞉ wanda꞉hali haloma꞉me. \v 16 Koto poloma꞉pate koneta꞉ ma꞉nda꞉ hali epima꞉ Koda꞉ pa꞉ta꞉ tikitiki yao haluekema꞉ta꞉ kota꞉ titina꞉ pea꞉peke hauta꞉ Yesu Ketiso pa꞉ta꞉ hone tulaalimi ekima꞉ homeke tikitiki yao halimikie. Pa mo Lo Pi ula꞉ ekimanu miniki haleme ekima꞉ ota꞉ dia꞉me. Koto pa꞉la꞉eki handolo hata꞉ niki make Yesu pa꞉ta꞉ hone tulaaloma꞉me. Pa Koda꞉ pa꞉ta꞉ tikitiki yao haluekema꞉yeke kutupiki hau ota꞉ poloma꞉me. Pate pa mo Mosesina꞉ pi ula꞉ ekimanu miniki haloma꞉ ekima꞉ dia꞉me. Koda꞉ pa꞉ta꞉ tikitiki yao haluekema꞉ta꞉ hali homeke ma꞉nda꞉ma꞉ mo Lo Pi ula꞉ ekimanu opua pu hala꞉ ekima꞉ ota꞉ pea꞉peke na ya꞉la꞉me. \v 17 Nikita꞉ nika꞉ Yesu pa꞉ta꞉ haloma꞉ ekima꞉ nika꞉ Koda꞉ pa꞉ta꞉ tikitiki yao haluekema꞉ taapolo hata꞉ kone pa mo Diendaili wanda꞉halima꞉ pu haleme hoke hau leke pulumeeki handa꞉ wimika꞉na꞉ta꞉ kota꞉ kotoeki ma꞉nda꞉ma꞉ handolo hata꞉ta꞉ koto hauma꞉ta꞉ Ketisoma꞉ hoke haumanu wala tiaaso pia꞉ka꞉ta꞉me lena꞉ lomana꞉pe. Dia꞉me. Ota꞉ dia꞉me. \v 18 Kota꞉ a꞉nda꞉ I̱ma꞉ mo Mosesina꞉ pi ula꞉ ekimanu pu haleme hau na pulueke laa paeyaowa꞉ ekimanu paa kini pea pua pua꞉ka꞉na꞉ta꞉ kota꞉ I̱ta꞉ mo pi ula꞉eki yambolo halo hali peneme halueke. \v 19 Mo hande pi ula꞉eki hotimika꞉na꞉ta꞉ kota꞉ mo koto pi ula꞉eki pa꞉ta꞉ I̱ amba꞉ homa halome. Koto pi ula꞉ ekima꞉ kone I̱ homono lia꞉me. Kutu pieke ekita꞉ I̱ma꞉ Koda꞉ yaapo da꞉ta hanoyeke pia꞉me. I̱ta꞉ mo Ketiso homea꞉ ti manda mandake homolopa꞉me. \v 20 Koto pa꞉la꞉ ekina꞉ta꞉ ame do ya da꞉ta halo ekita꞉ ya kone na da꞉ta halopate Ketiso I̱ tukiki pa꞉ta꞉ da꞉ta hala꞉me. I̱ma꞉ do koto da꞉ta halo ekita꞉ Koda꞉na꞉ Eiyeke pa꞉ta꞉ hone tulaalo ekima꞉ halome. Ipikana꞉ma꞉ I̱ pa꞉ta꞉ pukima꞉ homolo hata꞉ I̱ da꞉ta hanoyeke ipika꞉ da꞉ta꞉la꞉ ekita꞉ pa haleekeme. \v 21 Koda꞉na꞉ a꞉ta꞉ma꞉ homa꞉la꞉eki pa꞉ta꞉ I̱ma꞉ kiaaso hata꞉ mo tea꞉ hata꞉ pina꞉e pi na lolueke. Pate ma꞉nda꞉ma꞉ hone witolo hata꞉ta꞉ Koda꞉ yaapo tikitiki yao haluekema꞉ mo pi ula꞉eki manuma꞉ homeke pulueke hone wia꞉ka꞉na꞉ta꞉ kota꞉ Ketisota꞉ pa homeya꞉ka꞉ta꞉me. \c 3 \s1 Pi ula꞉ ekima꞉ o hone tulaaloma꞉ ekima꞉ \p \v 1 Ka꞉leisia wanda꞉halio ikita꞉ you hoeta꞉la꞉ pate ya꞉la꞉me. Epima꞉ hoeyao pa꞉la꞉pe. Mo hande Yesu Ketiso ti manda homeeketa꞉ ikana꞉ma꞉ ika꞉ lekema꞉ handa honema꞉ kone pikisa leke muemena꞉yeke ya pima꞉ ota꞉ tikitiki la kua꞉me. \v 2 Ameta꞉ ya lota꞉ pitoloeki homeke doma꞉ ikana꞉ma꞉ hombo peape. Ikana꞉ma꞉ Koda꞉na꞉ Sipitidita꞉ mo pi ula꞉eki manuma꞉ pea꞉peke ala꞉eki opua pimi ekima꞉ mimipe o mo pi seliapo opua koto pi pa꞉ta꞉ hone tulaeme ekima꞉ mimipe. \v 3 Ekipa do pamba꞉ na piki hau pea pelemepe. Ika꞉ Ketiso pa꞉ta꞉ da꞉ta haleme ekita꞉ Koda꞉na꞉ Sipitidina꞉ welema꞉ kini peaeyeke yekepate pa ameta꞉ ikana꞉ma꞉ ika꞉ lokena꞉ welema꞉ pu paeyaalimikipe. \v 4 Holi Sipitidina꞉ welema꞉ pua꞉tiki pu haeme hau manuta꞉ pa ekie hone witemepe. Dia꞉me. Ota꞉ hau teke wala꞉la꞉me hone witolome. \v 5 Ikana꞉ma꞉ mo pi ula꞉eki manuma꞉ pea꞉pa꞉peke ala꞉eki opua puemena꞉yeke handa Koda꞉ma꞉ ipika꞉ Sipitidi iki pa꞉ta꞉ kiaata꞉ mo na handeke haumanu iki pa꞉ta꞉ peao hala꞉pe o mo pi seliapo opua hone tulaamena꞉yeke handa kutu pu hala꞉pe. \p \v 6 Mo hande Eipoloha꞉ma꞉ pa꞉ta꞉ pieke hau hone umana꞉e. Mo Baiboloma꞉ alota꞉ \q1 Koda꞉na꞉ pi pa꞉ta꞉ hone tulaeyekeme. Koto ipika꞉ hone tulaeyekeeki handaata꞉ Koda꞉ma꞉ ipikita꞉ tikitiki piki halie laa handa꞉ miekeme ala꞉me. \m \v 7 Kotoeki hone wimika꞉na꞉ta꞉ mo hone tulaleme wanda꞉hali iki paeyaota꞉ ota꞉ Eipoloha꞉ma꞉na꞉ wekiwandiki hala꞉me hone wia꞉pa꞉peke. \v 8 Baiboloma꞉ dupa la꞉ wiekeme Koda꞉ma꞉ mo hande Diendaili wanda꞉hali ika꞉ hone tulaleme ekina꞉ Koda꞉ ipiki ame̱le̱ epea halimikie laa la꞉ wiekeme. Kota꞉ mo Baiboloma꞉ Eipoloha꞉ma꞉ pa꞉ta꞉ dupiki pi seliapo la halolo alota꞉ Neke pa꞉ta꞉ yama꞉ta꞉ Koda꞉ma꞉ wanda꞉hali paeyao wamo pilieke leekeme. Mo koto leeke ekita꞉ \v 9 Eipoloha꞉ma꞉ma꞉ opua hone tulao hayeke handaata꞉ Koda꞉na꞉ wamo piekeeki miekeme. Koto ekina꞉ta꞉ Koda꞉ pa꞉ta꞉ hone tulaleme wanda꞉hali paeyaota꞉ Eipoloha꞉ma꞉ma꞉ Koda꞉na꞉ wamo pita꞉la꞉eki mieke tupa꞉ iki make wamo pea halememe. \p \v 10 Epi amedama꞉ mo Lo Pi ula꞉eki pitolo ekima꞉ta꞉ I̱ ana꞉na꞉ epeaalieke laa hone ti laeya꞉ka꞉na꞉ta꞉ kota꞉ ipikita꞉ mo Koda꞉na꞉ esihou pi oto pa꞉ta꞉ hala꞉me. Kota꞉ mo Baiboloma꞉ alota꞉ Epima꞉ mo wape pea ula꞉ pi ula꞉eki paeyao ota꞉ tana꞉ paeyaona꞉ opua na pu haya꞉ka꞉na꞉ta꞉ kota꞉ koto some epita꞉ Koda꞉ ipika꞉ esihou pi yu wia hala꞉eki oto pa꞉ta꞉ hala꞉me ala꞉me. \v 11 Koto ekita꞉ mo Baiboloma꞉ dupa la꞉la꞉me. Hali epima꞉ ipika꞉ Koda꞉ pa꞉ta꞉ hone tulaleme ekina꞉ Koda꞉ma꞉ epeao ipiki yaapo haena꞉ lea꞉ka꞉na꞉ta꞉ koto ekima꞉ homeke da꞉ta halieke la꞉la꞉eki opuata꞉ do hone wita꞉la꞉ ekita꞉ niki pa꞉ta꞉ ota꞉ peneme ya꞉la꞉me. Ma꞉nda꞉ epita꞉ mo pi ula꞉eki pu haleme ekina꞉ Koda꞉ma꞉ epeao ipiki yaapo haena꞉ na lea꞉ka꞉ta꞉me. \v 12 Pi ula꞉ ekima꞉ pita꞉la꞉ hau pita꞉ Koda꞉ pa꞉ta꞉ hone tulaasa꞉ hau yaapota꞉ ota꞉ mandake na pelepeme. Koto pa꞉la꞉ ekima꞉ta꞉ mo Baiboloma꞉ alota꞉ Hali epima꞉ mo pi ula꞉eki paeyao homeke a꞉nda꞉ na mina꞉pa꞉lake pu haya꞉ka꞉na꞉ta꞉ koto someta꞉ da꞉ta halieke ala꞉me. \p \v 13 Hali epima꞉ ti manda endiaeya꞉ka꞉na꞉ta꞉ kota꞉ koto halita꞉ Koda꞉na꞉ esihou pi la꞉la꞉eki oto pa꞉ta꞉ hala꞉me mo Baibolona꞉ wape pea ula꞉ tupa꞉ Ketisoma꞉ mo pi ula꞉ ekina꞉ esihou pi niki pa꞉ta꞉ a꞉paama꞉na꞉yeke ipikana꞉ma꞉ nika꞉ anketeke mieke handaata꞉ mo esihou pita꞉ ipiki pa꞉ta꞉ yapeekeme. \v 14 Kutu pieke ekita꞉ mo hande Eipoloha꞉ma꞉ pa꞉ta꞉ Neke tamba꞉ mulueke laa la꞉ wieke pima꞉ta꞉ Yesu Ketiso pa꞉ta꞉ yama꞉ mo Diendaili wanda꞉hali make tamba꞉ meaata꞉ kota꞉ niki make Koda꞉ pa꞉ta꞉ hone tulaaso hata꞉ ipika꞉ pi la꞉ wia꞉ Sipitidi miomono piekeme. \s1 Pi ula꞉ ekima꞉ o pi la꞉ ula꞉ ekima꞉ \p \v 15 Kame tonuo. Ameta꞉ I̱ma꞉ mo hande nate paeyao pu haloma꞉ hau ma꞉nda꞉ minolome. Hali yaapoma꞉ hau ma꞉nda꞉ puluekema꞉ dupupana꞉e laa pi la꞉ witolo hata꞉ toopi mini pika꞉na꞉ta꞉ ipilika꞉ ipilika꞉ kone ma꞉nda꞉ma꞉ koto pi la꞉ witelepeeki tunkula make hau ma꞉nda꞉ na apa꞉taapeke yelieke. \v 16 Koda꞉ma꞉ make koto tupa꞉ kone Eipoloha꞉ma꞉ pa꞉ta꞉ make ipika꞉ hoki nane epolo pieke hali pa꞉ta꞉ make ipika꞉ pi la꞉ wita꞉la꞉eki manuma꞉ la꞉ wiekeme. Baiboloma꞉ hoki nane epolo pieke haliweki ala꞉ pina꞉ teketa꞉ haliweki eleke eleke laa na ala꞉pate pa hoki nane epolo pieke hali ala꞉ pina꞉ teketa꞉ hali homeke homeke la ala꞉me. Mo koto hali bikita꞉ Ketisoe. \v 17 I̱ma꞉ do alo pina꞉ teketa꞉ Koda꞉ma꞉ Eipoloha꞉ma꞉ yaapo homeke hone witolo hata꞉ ota꞉ handeteke halueke laa Eipoloha꞉ma꞉ pa꞉ta꞉ pi la꞉ wiekeme. Koto ekina꞉ mo hande 430 bapi wetepeta꞉ Koda꞉ma꞉ Mosesi pa꞉ta꞉ haleeke pi ula꞉eki manuma꞉ mo amba꞉ Eipoloha꞉ma꞉ pa꞉ta꞉ la꞉ wieke pita꞉ ota꞉ na yambolo na paeyao pea꞉peke yeekeme. \v 18 Mo hande Koda꞉ ipika꞉ kita꞉la꞉ ale mea꞉peke teketa꞉ mo hande Lo Pi ula꞉ ekimanu pea mea꞉peke ya꞉ka꞉na꞉ta꞉ kota꞉ kotota꞉ mo Koda꞉ma꞉ la꞉ witolo hata꞉ kulueke laa la꞉ wiekeeki tekena꞉ na pitememe. Pate Koda꞉ma꞉ Eipoloha꞉ma꞉ pa꞉ta꞉ta꞉ pi la꞉ wiekeeki pa꞉ta꞉ yama꞉ haleekeme. \p \v 19 Kutu pia꞉ka꞉na꞉ta꞉ kota꞉ mo hande Mosesina꞉ pi ula꞉ ekita꞉ eki pina꞉ la haleekepe. Koto pi ula꞉eki manuta꞉ mo amba꞉ Koda꞉na꞉ la꞉ wiekeeki taapuna꞉ apa꞉tao wiki hauta꞉ mo hoke hoke haumanu peneme yao waluekema꞉ wiekeme. Koto pi ula꞉eki manuta꞉ pa u pelia pua mo hande Eipoloha꞉ma꞉na꞉ hoki nane epolo pieke hali ipikita꞉ Koda꞉ma꞉ amba꞉ pi la꞉ wieke hali opolo ipuluta꞉ paeyaena꞉e. Mo Lo Pi ula꞉eki manuta꞉ homeke hali ka꞉pa pa꞉ta꞉ yama꞉ enisolo tonuma꞉ hala꞉niaeyekeme. \v 20 Pate homekena꞉ pi laluekema꞉ ka꞉pa hali hata꞉ e pokaapeke na ya꞉la꞉me. Kutupa Koda꞉ ipikita꞉ ota꞉ homeke hala꞉me. \s1 Pi ula꞉ ekina꞉ teketa꞉ \p \v 21 Koto alo ekina꞉ta꞉ mo pi ula꞉eki manuma꞉ta꞉ mo Koda꞉na꞉ pi la꞉ ula꞉eki hoeyaaluekema꞉ wia pa꞉la꞉pe. Dia꞉me. Ota꞉ dia꞉me. Mo pi ula꞉eki homekema꞉ wanda꞉hali da꞉taapeke ya꞉ka꞉na꞉ yoluta꞉ kota꞉ kotota꞉ paeyaoma꞉ koto pi ula꞉eki opua miniki hata꞉ Koda꞉ yaapo tikitiki halo pimipate \v 22 pa mo Baiboloma꞉ alota꞉ kenke paeyaota꞉ hoke hauna꞉ wele oto pa꞉ta꞉ ula꞉me ala꞉me. Koto ekina꞉ Koda꞉ma꞉ mo Yesu Ketiso pa꞉ta꞉ hone tulalemeeki tekena꞉ta꞉ I̱ma꞉ kulueke laa la꞉ ua꞉ ekita꞉ mo hone tulaaso haleme wanda꞉hali pa꞉ta꞉ halo hala꞉me. \p \v 23 Amba꞉ mo hande hone tulaasa꞉ ekina꞉ nate a̱i̱ na epea꞉ toma꞉na꞉ta꞉ mo Lo Pi ula꞉eki manuma꞉ niki paeyao dipula mea mo koto epolo pa꞉la꞉ hone tulaasa꞉eki peneme yaena꞉ ho̱linda꞉ pu pamba haya꞉me. \v 24 Koto ekina꞉ mo hone tulaasa꞉ hau pa꞉ta꞉ yama꞉ Koda꞉ yaapo tikitiki yao hamono mo Lo Pi ula꞉ ekima꞉ niki handeteke hatiki puaata꞉ Ketiso ipulu kinaeyekeme. \v 25 Kota꞉ ameta꞉ mo hone tulaasa꞉ ekina꞉ nate opolo a꞉pa꞉leke handaata꞉ mo Lo Pi ula꞉eki manuma꞉ niki pa na handeteke hala꞉me. \p \v 26 Iki paeyaota꞉ hone tulaasa꞉eki pa꞉ta꞉ yama꞉ Yesu Ketiso ame̱le̱ apa꞉tao Koda꞉na꞉ wekiwandiki halememe. \v 27 Ikana꞉ma꞉ Ketiso ame̱le̱ ta꞉ma꞉ni pea hamena꞉yeke bapitaisi peaya꞉me. Koto ekina꞉ta꞉ ameta꞉ ikana꞉ma꞉ Ketisona꞉ da꞉taasa꞉ ekita꞉ aka꞉ leke pambao halememe. \v 28 Koto pa꞉la꞉ ekima꞉ta꞉ kota꞉ mo Diu tapake pita꞉ Diendaili tapake yaapo make ata꞉ka꞉ na pu mo e handeteke hala꞉ haliweki pita꞉ e pokaasa꞉ haliweki yaapo make ata꞉ka꞉ na pu mo wanda꞉ pita꞉ hali yaapo make ata꞉ka꞉ na pu piki iki paeyaota꞉ Yesu Ketiso ame̱le̱ apa꞉tao ota꞉ homeke tapake halememe. \v 29 Ikita꞉ Ketiso ipika꞉eki haemeka꞉na꞉ta꞉ kota꞉ ikita꞉ mo Eipoloha꞉ma꞉na꞉ hoki nane wanda꞉hali hata꞉ Koda꞉na꞉ kulueke laa pi la꞉ wiekeeki milimikie. \c 4 \p \v 1 Mo koto pi honiki kone panake la꞉ moneaaso pita꞉ dupa. Mo atekena꞉ anketeke mulu polo pa꞉la꞉ weki homeketa꞉ panake daetolo hala꞉ dina꞉ ipikita꞉ mo pa hameke e pokaasa꞉ hali leke mea hasa꞉me. \v 2 Mo ipika꞉ apa꞉na꞉ mu hake alemanu paeyaota꞉ ota꞉ ipika꞉eki ya꞉la꞉pate kone ipika꞉ atekema꞉ la꞉ ula꞉ nate epena꞉ molu hala꞉ toma꞉na꞉ta꞉ mo ipika꞉ loke handeteke hala꞉ halima꞉ kone mo ipika꞉ alemanu make handeteke hao hawalieke. \v 3 Niki make koto tupa꞉ wekiwandiki leke hata꞉ do kenkena꞉ teke na wiki mana꞉ pimanu oto pa꞉ta꞉ haoma꞉pate \v 4 pa mo hande Koda꞉na꞉ la꞉ wieke nate ota꞉ opolo epeeke pita꞉ma꞉ta꞉ Koda꞉ma꞉ ipika꞉ weki kone tapaeyekeme. Koto wekita꞉ mo do kenke wanda꞉na꞉ weki tupa꞉ a꞉paata꞉ \v 5 mo Lo Pi wiekeeki oto pa꞉ta꞉ haemeke wanda꞉hali peteluekema꞉ koto Diu tapakena꞉ pi wiekeeki oto pa꞉ta꞉ hayekeme. Niki Koda꞉na꞉ wekiwandiki hamono kutu piekeme. \p \v 6 Ikita꞉ Koda꞉na꞉ wekiwandiki haleme ekina꞉ta꞉ Koda꞉ma꞉ ipika꞉ wekina꞉ Sipitidita꞉ nika꞉ puki pa꞉ta꞉ pitina꞉ tapaeya꞉me. Mo Apa꞉o. Ya Apa꞉o lo hala꞉ Sipitidita꞉ niki pa꞉ta꞉ tapaeya꞉me. \v 7 Koto ekina꞉ta꞉ ikita꞉ pa hameke e pokaaseme wanda꞉hali na halemepate ipika꞉ wekiwandiki halememe. Ikana꞉ma꞉ ipika꞉ wekiwandiki haleme ekina꞉ta꞉ kota꞉ Koda꞉ma꞉ ipika꞉ wekiwandikina꞉ wi ala꞉ alemanu iki kilieke. \s1 Poloma꞉ Ka꞉leisia siosi pa꞉ta꞉ hone tieke wiekeeki \p \v 8 Amba꞉ ikana꞉ma꞉ Koda꞉na꞉ haumanu na handemeke ekima꞉ta꞉ ikita꞉ pa mo hande ota꞉ Koda꞉ dia꞉yeke yayapiki ale manuna꞉ e pokao haemekeme. \v 9 Kutu pimipate ameta꞉ ikana꞉ma꞉ Koda꞉ handelememe o dia꞉me ameta꞉ Koda꞉ma꞉ iki handa꞉la꞉me lapeke ya꞉la꞉me. Koto pa꞉la꞉pate pa ekipa mo hoke honkopu na hake kenke tumbao haleme temokomanu pa꞉ta꞉ paa la꞉ka꞉la pua ika꞉ pa hameke e pokaaseme wanda꞉hali kone haluekema꞉ taapo halemepe. \v 10 Ikana꞉ma꞉ mo nate tiekemanu pa꞉ta꞉ make o wala꞉ panka꞉la꞉ sumba꞉manu pa꞉ta꞉ make o di mapemanu pa꞉ta꞉ make o panake bapi ipula꞉ ekimanu pa꞉ta꞉ make koto nate manuna꞉ di tunkula꞉la꞉ ekita꞉ hone wopu u halememe. \v 11 Ika꞉ piteme hauna꞉ I̱ paala꞉ma꞉ amba꞉ homolome. Pa ekipeke. I̱ma꞉ iki tukiki pa꞉ta꞉ pokoa꞉ eta꞉ pa pahameke pokonope hone witolo alome. \p \v 12 Kametonuo. Ikita꞉ I̱ tupa꞉ hamena꞉yeke I̱ma꞉ iki honke alome. I̱ make ikima꞉ handeke some kone halome. Ikana꞉ma꞉ I̱ pa꞉ta꞉ hoke hau ma꞉nda꞉ na pelememe. \v 13 I̱ma꞉ iki pa꞉ta꞉ pi kini pea waloa꞉ ekina꞉ teketa꞉ mo hande I̱ma꞉ yeni mua꞉ ekima꞉ iki pa꞉ta꞉ a꞉pa hata꞉ pi waloa꞉me. Kutu pua꞉ ekita꞉ hone wilimime. \v 14 Koto hande ya lokena꞉ hoke yeni haya꞉ ekima꞉ iki ka꞉nda꞉ tieke peaeya꞉pate kone ikana꞉ma꞉ I̱ na kiao make na tolu limime. Koto hau na pikita꞉ ikana꞉ma꞉ I̱ta꞉ mo hande Koda꞉na꞉ enisolo leke handa꞉ mimime o pa Yesu Ketiso kone leke I̱ handa꞉ mimime. \v 15 Koto pita꞉ma꞉ta꞉ iki pa꞉ta꞉ ta꞉na꞉ tieke wopu wia꞉me. Pate pa ameta꞉ ekipa pa꞉la꞉pe. I̱ma꞉ta꞉ dupiki pi kone lapeke ya꞉la꞉me. Ikana꞉ma꞉ I̱ tamba꞉ muluekema꞉ ika꞉ leke yoka꞉ mea kia꞉peke ya꞉ka꞉na꞉ yoluta꞉ amba꞉ yoka꞉ mea kulu pimime. \v 16 Pate ameta꞉ I̱ma꞉ iki pa꞉ta꞉ mo ota꞉ pi la kitolo ekima꞉ta꞉ ika꞉ a꞉nda꞉ tunkuliki hali halope. \p \v 17 Mo hande iki pa꞉ta꞉ homu pea hake nono peleme haliwekima꞉ta꞉ iki pa꞉ta꞉ hone wopu u halemepate ika꞉ wetepe pulueke hone u haleme ekita꞉ ota꞉ epekeeki dia꞉me. Ika꞉ hone pa꞉la꞉ ekita꞉ I̱ iki ame̱le̱ haloeki tekili peaaluekema꞉ taapelememe. Kota꞉ mo ikana꞉ma꞉ I̱ pa꞉ta꞉ hone witemeeki pao iki pa꞉ta꞉ homeke hone uemena꞉yeke pitememe. \v 18 Hali ma꞉nda꞉ma꞉ iki pa꞉ta꞉ hone witolo epeke haumanu puluekema꞉ hone wopu wia꞉ka꞉na꞉ta꞉ kota꞉ kotota꞉ a꞉pa꞉la꞉me. Nate ma꞉nda꞉ a꞉nda꞉ I̱ haowa꞉ka꞉na꞉ make na haowa꞉ka꞉na꞉ make kutupiki haumanu pimika꞉na꞉ta꞉ ota꞉ a꞉pa꞉la꞉me. \v 19 Ya wekiwandiki sunuo. Ikana꞉ma꞉ Ketisona꞉ hau muemena꞉yeke ama꞉ma꞉ weki taapolo pila꞉ tupa꞉ I̱ma꞉ iki paa taapolo hata꞉ tanda mua꞉tiki pulume. \v 20 Hone ma꞉nda꞉ uluekema꞉ I̱ta꞉ iki ame̱le̱ mandake hawee hone wotu ula꞉me. Koto ekima꞉ta꞉ I̱ma꞉ iki pa꞉ta꞉ hone eleke eleke wopu witolome. \s1 Seta Heika yaapona꞉ hau manda꞉ meaasa꞉eki \p \v 21 Iki ame̱le̱ mandane wanda꞉halima꞉ mo Mosesina꞉ pi ula꞉eki manuna꞉ oto pa꞉ta꞉ hao haluekema꞉ hone pa꞉la꞉ tapake iki pa꞉ta꞉ dupiki pi lota꞉ pionoe - mo hande pi ula꞉ ekima꞉ ala꞉ ekita꞉ opitemepe. \v 22 Eipoloha꞉ma꞉ma꞉ weki yaapo mendiekeme la꞉la꞉me. Weki ma꞉nda꞉ta꞉ pa hameke e pokaeyeke wanda꞉ma꞉ mendiekeme. Weki ma꞉nda꞉ta꞉ ka꞉la꞉pa꞉ tapao hata꞉ halina꞉ da peeke wanda꞉ma꞉ mendiekeme. \v 23 Mo hande pa hameke e pokaeyeke wanda꞉ma꞉ mendieke wekita꞉ paeyaoma꞉ mondu hala꞉ tupa꞉ mendiekeme. Pate mo hande ka꞉la꞉pa꞉ tapao hata꞉ hali peeke wanda꞉ma꞉ mendieke wekita꞉ koto wekita꞉ mo hande Koda꞉ma꞉ la꞉ wiekeeki yaena꞉ yeke handa mendiekeme. \v 24 Do hau yaapoma꞉ta꞉ mo manda꞉ meaasa꞉eki hone u tiaasa꞉me. Mo wanda꞉ yaapota꞉ mo la꞉ u alu pieke pi yaapo tupa꞉e. Mo pi la꞉ wiekeeki ma꞉nda꞉ta꞉ Sainai pote pa꞉ta꞉ kini pea haleekeme. Koto haleeke la꞉ wita꞉la꞉ pina꞉ wekiwandikita꞉ pa hameke e pokaasa꞉ wekiwandiki haemekeme. \v 25 Mo hande pa hameke e pokaasa꞉ wanda꞉ Heika ipikita꞉ mo hande Sainai pote tupa꞉e lapeke ya꞉la꞉me. Kutupa Sainaita꞉ mo A꞉teibia kenke pa꞉ta꞉ hala꞉ poteta꞉ mo hande pa ula꞉ Diutuseleme daoni tupa꞉e lapeke ya꞉la꞉me. Koto Diutuselemeta꞉ ipika꞉ wanda꞉hali tonka꞉na꞉ pa hameke e pokaasememe. \v 26 Koto pa꞉la꞉pate mo hepeni nane ula꞉ Diutuseleme ma꞉nda꞉ta꞉ ka꞉la꞉pa꞉ tapao hala꞉me. Kota꞉ ipikita꞉ nika꞉ ama꞉ hala꞉me. \v 27 Kotoeki mo Baiboloma꞉ alota꞉ \q1 Mo weki dia꞉ya꞉la꞉ wanda꞉o. Nakana꞉ma꞉ ta꞉na꞉ma꞉ homa꞉peke. \q1 Kutupa mo weki taapolo tanda pita꞉la꞉eki hone na wiki wanda꞉o. \q1 Nakana꞉ma꞉ ta꞉na꞉ma꞉ homolo hata꞉ e̱ wi lapeke. \q1 Mo halima꞉ kiaeyeke wanda꞉ma꞉ta꞉ ipika꞉ wekiwandiki wopu pa mo halikima꞉ epeke tupa꞉ handeteke hao haya꞉ wanda꞉ lombei peao mendilieke la꞉la꞉me. \p \v 28 Ya kametonuo. Ikita꞉ mo hande la꞉ wieke ekina꞉ mendieke weki Aisa꞉ke tupa꞉ kone iki make Koda꞉ma꞉ la꞉ wieke ekina꞉ ipika꞉ wekiwandiki halememe. \v 29 Koto hande pita꞉me mo hande wanda꞉ paeyaoma꞉ mondu hala꞉ tupa꞉ mendieke wekima꞉ta꞉ mo hande Koda꞉na꞉ Sipitidima꞉ peayeke mendieke weki ka꞉nda꞉ma꞉ homaeyeke tupa꞉ ame make koto homeke hau pu hala꞉me. \v 30 Pate pa mo Baiboloma꞉ta꞉ eki ala꞉pe. Dupa ala꞉me. Mo pahameke e pokaasa꞉ wanda꞉ make ipika꞉ weki tonka꞉na꞉ panane halo pa꞉na꞉ tapaapeke. Pa ekipeke. Mo kutupiki wekima꞉ta꞉ mo hande ka꞉la꞉pa꞉ tapao hala꞉ wanda꞉na꞉ weki tupa꞉ hata꞉ mo hande apa꞉na꞉ anketeke putupaalu pea꞉peke na yelieke la꞉la꞉me. \v 31 Koto ekina꞉ta꞉ kametonuo. Nikita꞉ mo pahameke e pokaasa꞉ wanda꞉na꞉ wekiwandiki dia꞉ya꞉la꞉pate nikita꞉ mo ka꞉la꞉pa꞉ tapaala꞉ wanda꞉na꞉ wekiwandiki haloma꞉me. \c 5 \s1 Ka꞉la꞉pa꞉ tapao hala꞉ hauna꞉ pi \p \v 1 Ota꞉ ka꞉la꞉pa꞉ tapao hamono Ketisoma꞉ niki ka꞉la꞉pa꞉ tapaala꞉me. Koto pa꞉la꞉ ekina꞉ta꞉ ka꞉la꞉pa꞉ tapaala꞉ wanda꞉hali tupa꞉ taka꞉lao hata꞉ mo pa hameke e pokaaseme wanda꞉hali tupa꞉ paa na hapa꞉peke. \p \v 2 Opua꞉pa꞉ I̱ta꞉ Poloma꞉ iki pa꞉ta꞉ do pi alome. Ikita꞉ ma꞉nda꞉ma꞉ sekemesaisi hau pina꞉ lemeka꞉na꞉ta꞉ kota꞉ ikana꞉ma꞉ Ketisota꞉ ota꞉ pa ale leke haena꞉ lelimikie. \v 3 Hoto yaapo peao paa kinki pitolo I̱ma꞉ alota꞉ Hali ma꞉nda꞉ epima꞉ ma꞉nda꞉ma꞉ ipiki sekemesaisi hau pina꞉ lea꞉ka꞉na꞉ta꞉ kota꞉ koto halita꞉ mo hande Lo Pi ula꞉eki paeyaona꞉ oto pa꞉ta꞉ homeke hao halieke. \v 4 Mo iki ame̱le̱ haleme mandane hali wekima꞉ta꞉ mo Lo Pi ula꞉eki paeyao pitolo ekima꞉ta꞉ Koda꞉ yaapo epea haluekema꞉ taapo haemeka꞉na꞉ta꞉ kutu piteme haliwekita꞉ ika꞉ Ketiso ame̱le̱ halo peleme ekita꞉ ika꞉ kone ti paleke leke la꞉ka꞉la꞉ mea baasememe. Kutu pimi ekima꞉ta꞉ ika꞉ kone Koda꞉na꞉ a꞉ta꞉ma꞉ homa tamba꞉ mina꞉la꞉eki tikene halememe. \v 5 Nikana꞉ma꞉ta꞉ Koda꞉ma꞉ niki tikitiki yaena꞉ yeke ipiki pa꞉ta꞉ ti lao haloma꞉me. Do hauta꞉ Koda꞉ ipika꞉ Holi Sipitidina꞉ welema꞉ nika꞉ hone tulaasoma꞉eki pa꞉ta꞉ yama꞉ peaalieke hone wia hone bao haloma꞉me. \v 6 Niki Yesu Ketiso pa꞉ta꞉ tunao haoma꞉ka꞉na꞉ta꞉ sekemesaisi hau pita꞉la꞉eki make sekemesaisi hau na pita꞉la꞉eki make koto hau telipina꞉ta꞉ pa pa alema꞉ handa꞉la꞉me. Pate hone tulaaso hata꞉ pukima꞉ homa꞉ alualu pu haemeka꞉na꞉ta꞉ kota꞉ koto hauta꞉ ota꞉ekie. \p \v 7 Ikita꞉ ota꞉ epeke tupa꞉ a̱i̱ya pu haemepate pa ikana꞉ma꞉ mo Koda꞉na꞉ ota꞉ pimanu opua peaama꞉na꞉ epima꞉ alekema꞉ iki ha̱la̱꞉mbe liaaso pia꞉pe. Ekipa ika꞉ hone la꞉ka꞉laeya꞉pe. \v 8 Kutu piki hauta꞉ mo hande iki wi la꞉la꞉ Koda꞉ma꞉ na peaya꞉me. \v 9 Mo hande palaowa pombei yaasa꞉ yisiti sikima꞉ta꞉ mo palaowa paeyao kone pombei yelieke alemepate \v 10 pa ya honema꞉ handolo ekita꞉ nikita꞉ mo Tekehali pa꞉ta꞉ tunao halomeke handa ikana꞉ma꞉ hone ma꞉nda꞉ na wiki pa I̱ma꞉ witolo hone kone ana꞉na꞉ wilimikie hone ulume. Kutupa mo ika꞉ hone la꞉ka꞉laasa꞉ halita꞉ epipe. Pa ipikita꞉ epi ya꞉ka꞉na꞉ make mo ipika꞉ kutu pita꞉la꞉ ekina꞉ta꞉ Koda꞉ma꞉ ipika꞉ hoke yenki ana꞉na꞉ halieke. \p \v 11 Ya kame tonuo. Mandane haliwekima꞉ I̱ pa꞉ta꞉ aleme pita꞉ I̱ma꞉ mo sekemesaisi hau pumana꞉ pipe laa pa wala꞉tia pu haowa꞉ka꞉na꞉ta꞉ kota꞉ pa ekipeke ikana꞉ma꞉ I̱ pa ka꞉nda꞉ peao halemepe. Koto aleme pita꞉ ota꞉ pi ya꞉ka꞉na꞉ yoluta꞉ kota꞉ mo ya Ketisona꞉ a꞉ka꞉tei wape piki tina꞉ pi walaaso ekima꞉ta꞉ iki hoke hone na u tialo pia꞉me. \v 12 Ya hone pa꞉la꞉ ekita꞉ mo ika꞉ hone la꞉ka꞉la tiaaseme haliweki ikana꞉ma꞉ ika꞉ kone sekemesaisi pimika꞉na꞉ta꞉ pa koto hau homeke na piki pa ika꞉ tukiliki tonka꞉na꞉ mina꞉e. \p \v 13 Ya kame tonuo. Ameta꞉ ikina꞉ do tupa꞉ alome. Ikita꞉ ka꞉la꞉pa꞉ tapao haleme haliweki hamena꞉ Koda꞉ma꞉ wi la꞉la꞉me. Koto pa꞉la꞉pate ika꞉ honema꞉ nikita꞉ ka꞉la꞉pa꞉ tapao haloma꞉me hone witolo pa mo hande lokena꞉ hone pa꞉la꞉ amba꞉ hau manuma꞉ neke na handeteke haena꞉ lapa꞉peke. Kotoeki na pikita꞉ pa ika꞉ kametonu ame̱le̱ pukima꞉ homeleme ekima꞉ ika꞉ ika꞉ kone tamba꞉ mu alualu puemena꞉ lena꞉ lapa꞉peke. \v 14 Mo hande Lo Pi ula꞉eki paeyao apa꞉tao hone wiomonota꞉ kota꞉ pa pa uluma꞉ pi homeke homeke ula꞉me. Dupa. Naka꞉ kone pukima꞉ homele tupa꞉ kota꞉ naka꞉ yankeketonu pa꞉ta꞉ make pukima꞉ homa꞉pa꞉peke laa la ula꞉me. \v 15 Koto la ula꞉pate ikana꞉ma꞉ ika꞉ ika꞉ kone ape a꞉nda꞉ leke yokaalu alu pu haemeka꞉na꞉ta꞉ ya some hombo koto pimika꞉na꞉ta꞉ kota꞉ ota꞉ wopu handeteke hapa꞉peke. Ika꞉ tapake ame̱le̱ kone epeke tupa꞉ pata꞉ pea na hake ota꞉ tekili tekili pu hoeyaalimikie. \s1 Holi Sipitidina꞉ hau lokena꞉ hau yaapo \p \v 16 I̱ma꞉ta꞉ dupiki pi alome. Mo Sipitidima꞉ ika꞉ pu haleme haumanu kilu tombuao handeteke hata꞉ tikitiki yawaena꞉ lapa꞉peke. Kutu pimika꞉na꞉ta꞉ kota꞉ ikana꞉ma꞉ mo ika꞉ lokema꞉ na꞉na꞉ pa꞉la꞉ hau manuta꞉ na telia pilimikie. \v 17 Pa ekipeke alo mo lokena꞉ hauma꞉ta꞉ mo Holi Sipitidi bepolaluekema꞉ taapo hala꞉me. Kutupa make mo Holi Sipitidima꞉ta꞉ mo lokena꞉ haumanu bepolaluekema꞉ taapo pu hala꞉me. Koto hau yaapoma꞉ta꞉ a꞉nda꞉ lu alu pu halepeme. Koto pitepe ekima꞉ta꞉ ikana꞉ma꞉ mo puluekema꞉ hone pa꞉la꞉ hau pia꞉peke ekita꞉ ota꞉ pea꞉peke na ya꞉la꞉me. \v 18 Koto pa꞉la꞉pate kota꞉ mo Sipitidima꞉ iki hatuku pu haya꞉ka꞉na꞉ta꞉ kota꞉ mo Lo Pi ula꞉ ekima꞉ta꞉ iki na tombuao hala꞉me. \p \v 19 Mo lokena꞉ hone pa꞉la꞉ hauna꞉ hone pa꞉la꞉ hauta꞉ ikana꞉ma꞉ handa hone wilimime. Koto hau manuta꞉ doe. Tooli ka꞉taasa꞉ hau o yola꞉la꞉ hau o suseke suseke haasa꞉ hau \v 20 o toopi ti wepia ula꞉ ale pa꞉ta꞉ yeni pita꞉la꞉ hau o peteke peteke hau o a꞉nda꞉ tunkula꞉la꞉ hau o mineke panka꞉la꞉ hau o ma꞉nda꞉ tombualuekema꞉ hoke hone wita꞉la꞉eki make o ma꞉nda꞉na꞉ ale pa꞉ta꞉ we pamba꞉la꞉eki make o ti teke yoka꞉la꞉ hau o ape ape lo tapake tekili pita꞉la꞉ hau \v 21 o ma꞉nda꞉na꞉ epeke hauna꞉ mineke panka꞉la꞉eki make o ikali naa keaasa꞉eki make o kima꞉ na homeke hoke ikali nala꞉ haumanu make kutupiki mandane hau ma꞉nda꞉manu make hone wilimime. Amba꞉ iki kinki pua꞉ tupa꞉ ame make paa kinki pitolome. Do alo haumanu pu haleme wanda꞉hali ikita꞉ Koda꞉na꞉ Kilu Tombuao Hala꞉eki pa꞉ta꞉ pua꞉peke na yelieke. \p \v 22 Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make \v 23 kimelema꞉ hala꞉ hau make naka꞉ kone naka꞉ loke hone yaapo lu tombuao hala꞉ hau make ipikana꞉ma꞉ta꞉ koto hau paeyao peawaasa꞉me. Dupiki haumanu sa꞉sa꞉ puluekema꞉ Lo Pi ma꞉nda꞉ ota꞉ na ula꞉me. \v 24 Mo Yesu Ketisona꞉ wanda꞉halima꞉ta꞉ ika꞉ lokena꞉ hau make koto loke ipika꞉ namonamo hata꞉ na꞉na꞉ na꞉na꞉ pitolo loke tiaasa꞉eki make koto hau paeyaota꞉ Ketiso yaapo apa꞉tao mo a꞉ka꞉tei wape piki tina꞉ lia endialememe. \p \v 25 Mo Holi Sipitidima꞉ta꞉ nika꞉ da꞉ta haloma꞉ ekina꞉ teke haleke handaata꞉ kota꞉ mo do haloma꞉eki make Holi Sipitidima꞉ kone tombuao haena꞉ lomana꞉ pea꞉peke alee. \v 26 Nikana꞉ma꞉ hakoko lita꞉la꞉ hau na pu make ma꞉nda꞉ soka꞉la꞉ homena꞉ loluekema꞉ toya꞉ toya꞉ piki haumanu na pu make I̱ mia꞉peke alee laa honema꞉ honditi pu alualu pila꞉ hau make paeyao na pumana꞉e. \c 6 \s1 Tamba꞉ mu alualu pita꞉la꞉ hau \p \v 1 Ya kametonuo. Ma꞉nda꞉ma꞉ hoke hau pitolo haena꞉ handemeka꞉na꞉ta꞉ kota꞉ iki epita꞉ mo Holi Sipitidima꞉ tumbiki some hombo ikana꞉ma꞉ mo some mea tiao haena꞉ alota꞉ ota꞉ yopu siki pia꞉pa꞉peke. Kuta make mo hande ipiki mea lopaeya꞉ hauma꞉ iki make yola꞉ mea lopaama꞉na꞉ wopu handeteke hata꞉ pia꞉pa꞉peke. \v 2 Ika꞉ ka꞉nda꞉ pa꞉la꞉ ekimanu ika꞉ ika꞉ kone tamba꞉ mu alualu pea꞉pa꞉peke. Kutu piki hau pilimi ekima꞉ta꞉ Ketisona꞉ pi la ula꞉ ekima꞉ la꞉la꞉eki telielememe. \v 3 Iki tukiki pa꞉ta꞉ ma꞉nda꞉ma꞉ ipikita꞉ biki na wilia꞉ some haliepate kone I̱ta꞉ biki ula꞉me hone wia꞉ka꞉na꞉ta꞉ koto somema꞉ ipika꞉ kone makeaasa꞉me. \v 4 Ika꞉ piteleme hau manuta꞉ ika꞉ ika꞉ kone ika꞉ honema꞉ telipa handa꞉pa꞉peke. Homeke halima꞉ ipika꞉ pita꞉la꞉ ekita꞉ ota꞉ hau pia꞉ka꞉na꞉ta꞉ kota꞉ ipika꞉ ota꞉ hauna꞉ ta꞉na꞉ma꞉ homa꞉peke ya꞉la꞉me. Ipikana꞉ma꞉ kutu pia꞉ka꞉na꞉ta꞉ kota꞉ ma꞉nda꞉ma꞉ pita꞉la꞉ hauna꞉ta꞉ hoela꞉ma꞉ a꞉pa꞉la꞉ma꞉ laa na hando telipu hapeke yelieke. \v 5 Hali homeke homekema꞉ ipika꞉ ka꞉nda꞉ pa꞉la꞉eki ipika꞉ kone mea tu hapeke yelieke. \p \v 6 Koda꞉na꞉ pi wala꞉la꞉eki opua mina꞉la꞉ somema꞉ ipika꞉ mina꞉la꞉ alemanu ipika꞉ wala꞉la꞉ hali yaapo putupa alu pia꞉pa꞉peke ya꞉la꞉me. \p \v 7 Ika꞉ ika꞉ kone na makeaapa꞉peke. Koda꞉ makeake hau pea꞉peke ya꞉la꞉ some ma꞉nda꞉ ota꞉ na hala꞉me. Wae noka꞉pa꞉la꞉ somema꞉ ota꞉ mo ipika꞉ noka꞉pa꞉la꞉ waena꞉ kiliki kone tala꞉peke yelieke. \v 8 Mo somema꞉ ipika꞉ lokena꞉ namonamo pa꞉la꞉ ekina꞉ waemanu ti lao noka꞉pea꞉ka꞉na꞉ta꞉ kota꞉ koto namo namona꞉ kilikita꞉ homa꞉la꞉eki milieke. Pate ipika꞉ waeta꞉ mo Holi Sipitidima꞉ kilu tombuao hala꞉ pa꞉ta꞉ wae noko pea꞉ka꞉na꞉ta꞉ kota꞉ mo ipika꞉ tala꞉la꞉ ekita꞉ mo hande Holi Sipitidima꞉ kita꞉la꞉ deto hala꞉eki milieke. \v 9 Kutu pea꞉peke ya꞉la꞉ ekina꞉ta꞉ mo epeke haumanu pu haluekema꞉ kima꞉ na homo hamana꞉e. Mo hau a꞉nda꞉ na mina꞉pa꞉laoma꞉ka꞉na꞉ta꞉ kota꞉ koto hauna꞉ kiliki tala꞉peke nateta꞉ opolo ipilieke. \v 10 Wanda꞉hali paeyao pa꞉ta꞉ epeke hau pia꞉peke ekina꞉ waleke a꞉nda꞉ opolo epea꞉ka꞉na꞉ta꞉ kota꞉ iki pa꞉ta꞉ epeke hau ota꞉ pia꞉peke ya꞉la꞉me. Kutu pia꞉peke yolo pa꞉la꞉pate mo nika꞉ Ketiso tapakena꞉ haleme wanda꞉hali pa꞉ta꞉ta꞉ hone ota꞉ wopu witolo hata꞉ tamba꞉ mea꞉tiki pea꞉peke ya꞉la꞉me. \s1 Poloma꞉ Yesu homeeke kolosuna꞉ hone wopu wiekeeki \p \v 11 Do ya kikima꞉ kone laaso wape tieke handa꞉pe. \v 12 Mo ikana꞉ma꞉ sekemesaisi hau puemena꞉ yeke ti aleme wanda꞉halima꞉ta꞉ ika꞉ biki mea a꞉meiyaaso hata꞉ kone pa mo yonkeleke manda pita꞉la꞉ hauna꞉ hakoko liki pimanu loluekema꞉ yeke alememe. Kutu pita꞉la꞉ ekita꞉ ikana꞉ma꞉ mo Yesu homeeke kolosuna꞉ pi walaemeka꞉na꞉ta꞉ mandane Diu tapakema꞉ iki pa꞉ta꞉ ka꞉nda꞉ halaama꞉na꞉ yeke pa yanaaso do manda yonkelekena꞉ pita꞉la꞉ hau pu halememe. \v 13 Mo koto sekemesaisi hau pu haleme wanda꞉hali ikana꞉ma꞉ kone pa mo Lo Pi ula꞉ ekimanu paeyaota꞉ na telia pu halememe. Mo haliwekima꞉ ika꞉ sekemesaisi hau puemena꞉ yeke hone peleme ekina꞉ ika꞉ biki daeyaena꞉ yeke pitememe. \v 14 Kutu pu halemepate I̱ma꞉ta꞉ mo nika꞉ Tekehali Yesu Ketiso mo kolosuna꞉ homeeke ekina꞉ homeke hakoko liki pi lolueke. Yesu Ketisoma꞉ kolosuna꞉ homeeke handa ya hone pa꞉ta꞉ta꞉ do kenke hau paeyaota꞉ homeke alema꞉ handa꞉la꞉me. Kutupa make I̱ta꞉ do kenke hauna꞉ta꞉ homa꞉ pa ulume hone witolome. \v 15 Sekemesaisi hau pita꞉ sekemesaisi na pita꞉la꞉ hau yaapota꞉ pa manda hau yaapoe. Ota꞉ hau tieketa꞉ Koda꞉ma꞉ niki panake wanda꞉hali mea haasa꞉eki homeke ota꞉ tumikiekie. \v 16 Do hau telieleme wanda꞉hali iki pa꞉ta꞉ Koda꞉na꞉ puki lopaasa꞉eki pita꞉ ipika꞉ a꞉ta꞉ma꞉ homa꞉la꞉eki yaapota꞉ iki ame̱le̱ hao haena꞉e. Iki ame̱le̱ make mo mandane Koda꞉na꞉ wanda꞉hali paeyao ame̱le̱ make hao haena꞉e. \p \v 17 Ya paeyaaso pita꞉ dupae. Ma꞉nda꞉ma꞉ I̱ pa꞉ta꞉ mandane ka꞉nda꞉manu na kina꞉e. Pa ekipeke. Mo ya lokena꞉ hondo ula꞉eki manuma꞉ walolota꞉ I̱ta꞉ Yesuna꞉ pa hameke e pokaalo hali haloeki wala꞉la꞉me. \p \v 18 Mo nika꞉ Tekehali Yesu Ketisona꞉ pa hameke a꞉ta꞉ma꞉ homa꞉la꞉ ekina꞉ iki ya kametonu paeyao ame̱le̱ hao haena꞉e. Kutu pina꞉e.