\id EPH - Sembeleke Samberigi PNG Ephesians 01 14/2/91 Macnaughtan \h EPESESE \toc1 Poloma꞉ Epesese Siosi pa꞉ta꞉ tapaeyeke wapee \toc2 Epesese \toc3 Epesese \mt1 Poloma꞉ Epesese Siosi pa꞉ta꞉ tapaeyeke wapee \c 1 \p \v 1 I̱ Polota꞉ Koda꞉ ipika꞉ hone pa꞉la꞉ ekina꞉ Yesu Ketiso ipika꞉ aposolo hali halome. I̱ma꞉ do wape pitolo ekita꞉ ikita꞉ Koda꞉ ipika꞉ wanda꞉hali pa꞉ta꞉ pitolome. Ikita꞉ Yesu Ketiso pa꞉ta꞉ hone tulao hata꞉ Epesese da pa꞉ta꞉ halememe. \v 2 Koda꞉ nika꞉ Apa꞉ma꞉ make Yesu Ketiso nika꞉ Tekehalima꞉ make ipilikana꞉ma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niaepeka꞉na꞉ta꞉ epelieke. \s1 Koda꞉ma꞉ Ketiso pa꞉ta꞉ yama꞉ niki epeaala꞉eki \p \v 3 Tekehali Yesu Ketiso ipika꞉ Apa꞉ Koda꞉na꞉ pi nikana꞉ma꞉ laamana꞉e. Nikita꞉ Ketiso yaapo hamonota꞉ Koda꞉ma꞉ niki ota꞉ epeaala꞉ ekina꞉ loa꞉me. Hepeni nane hala꞉ ekimanu paeyaota꞉ nika꞉ temoko tamba꞉ mina꞉yeke amba꞉ ka꞉la꞉me. \v 4 Koda꞉ma꞉ do kenke na wepia wina꞉ leeke natena꞉ta꞉ nikita꞉ Ketiso yaapo hata꞉ ipika꞉eki hamono niki amba꞉ talopu ma꞉la꞉me. Nikita꞉ ipika꞉ leke popeleke nane hata꞉ta꞉ yako pea hata꞉ ekia꞉nda꞉ na piki wanda꞉hali hamonoyeke ma꞉la꞉me. \v 5 Koda꞉ma꞉ pukima꞉ homolo hata꞉ta꞉ Yesu Ketisoma꞉ nikita꞉ Koda꞉ ipika꞉ eiyekemanu hamono ipiki pa꞉ta꞉ hatuku epena꞉yeke hone amba꞉ wiekeme. Koto ekita꞉ Koda꞉ma꞉ hone pieke ekina꞉ hone wiekeme. \v 6 Koda꞉ma꞉ niki pa꞉ta꞉ pa hameke a꞉ta꞉ma꞉ wotu homa꞉la꞉ ekina꞉ make ipika꞉ hone pieke Eiyeke niki kitolo pa hameke kita꞉la꞉ ale tonka꞉na꞉ ka꞉la꞉ ekina꞉ make Koda꞉na꞉ pi laamana꞉e. \p \v 7 Ketiso homeeke ekima꞉ nikita꞉ ka꞉la꞉pa꞉ tapao hamono laata꞉ nika꞉ hoke hau poloma꞉ ekimanu ipika꞉ wema꞉ pa paeyaala꞉me. Koda꞉ ipika꞉ pa hameke a꞉ta꞉ma꞉ homa꞉la꞉ ekita꞉ ota꞉ wopue. \v 8 Ipikana꞉ma꞉ niki pa꞉ta꞉ aneke hapu wopu ka꞉la꞉me. Koda꞉ma꞉ta꞉ pita꞉la꞉ ekimanu handa ipikana꞉ma꞉ hone wopu wiata꞉ \v 9 amba꞉ ipikana꞉ma꞉ do hau pulueke hone wiekeeki pa꞉la꞉me. Kutupata꞉ hande amba꞉ ipika꞉ a꞉mbao wieke honeta꞉ Ketisoma꞉ yaena꞉yeke koto make ame niki pa꞉ta꞉ peneme yaala꞉me. \v 10 Koda꞉ma꞉ ipika꞉ hone u hala꞉ ekita꞉ dupae. Kenke ya yaapo nane ula꞉ ale hala꞉ ekimanu paeyaota꞉ hande Koda꞉ma꞉ wepia haena꞉ la꞉la꞉ ekimanu paeyao ipikana꞉ma꞉ mea momba꞉laota꞉ kutupa Ketisota꞉ you haena꞉ lelieke. Ipika꞉ di tunkulia꞉ka꞉na꞉ta꞉ Koda꞉ma꞉ koto hau pu paeyaalieke. \p \v 11 Hau paeyao pita꞉la꞉ ekita꞉ Koda꞉ ipika꞉ hone wia leeke ekina꞉ kone pita꞉la꞉me. Amba꞉ titi panake pa꞉ta꞉ kone Koda꞉ma꞉ hone wieke handata꞉ ipika꞉ hone wiekeeki pitolo hata꞉ niki talopu meata꞉ Ketiso yaapo ta꞉ma꞉ni pea hata꞉ ota꞉ ipika꞉ wanda꞉hali hamono la꞉la꞉me. \v 12 Koto pa꞉la꞉ ekina꞉ titina꞉ Ketiso pa꞉ta꞉ hone tulaaloma꞉ wanda꞉hali nikana꞉ma꞉ amba꞉la꞉ hande pa̱a̱ pa꞉la꞉ Koda꞉ ipika꞉ pi laamana꞉e. \p \v 13 Koto ekita꞉ iki pa꞉ta꞉ make pa꞉la꞉me. Ikana꞉ma꞉ta꞉ hande iki mea da꞉taalo pieke Pi Seliapo opuata꞉ Ketiso pa꞉ta꞉ hone tulaememe. Kutu pimiki handata꞉ Koda꞉ma꞉ ipika꞉ la꞉ wieke Holi Sipitidi iki kitolo hata꞉ta꞉ ikita꞉ ipika꞉ekie laa ti wia꞉me. \v 14 Holi Sipitidi ka꞉la꞉ ekita꞉ kota꞉ Koda꞉ma꞉ ipika꞉ wanda꞉hali pa꞉ta꞉ la꞉ wiekeeki ota꞉ yaalo pa꞉la꞉ ekina꞉ ti witolo pa꞉la꞉me. Dupa make Koda꞉ma꞉ ipika꞉ wanda꞉halita꞉ ota꞉ ka꞉la꞉pe tapao hao hamono la꞉la꞉eki wopu wala꞉la꞉me. Hande pa̱a̱ pa꞉la꞉ Koda꞉ ipika꞉ pi laamana꞉e. \s1 Poloma꞉ Epesese wanda꞉hali pa꞉ta꞉ yeni peaeyekeeki \p \v 15 Ikana꞉ma꞉ Tekehali Yesu pa꞉ta꞉ hone tulaalemeeki make Koda꞉na꞉ wanda꞉hali paeyao pa꞉ta꞉ pukima꞉ homelemeeki make I̱ma꞉ opu haota꞉ \v 16 iki pa꞉ta꞉ hone witolo hata꞉ Koda꞉ pa꞉ta꞉ keiyae pi alo ekita꞉ I̱ma꞉ na mina꞉pa꞉laake la꞉tiki pu halome. I̱ma꞉ iki pa꞉ta꞉ hone witolo hata꞉ yeni pu halo ekita꞉ dupa pu halome. \v 17 Hande nika꞉ Tekehali Yesu Ketiso ipika꞉ Koda꞉ta꞉ hande pa̱a̱ pa꞉la꞉ Atekema꞉ Sipitidi iki kina꞉yeke pu halome. Kutupa koto Sipitidima꞉ epeke hone wita꞉la꞉eki iki kiaata꞉ Koda꞉ hala꞉eki wopu handoemena꞉yeke Sipitidima꞉ la kina꞉yeke yeni pu halome. \v 18 I̱ma꞉ yeni pu halo ekita꞉ ika꞉ hone lumbu wia ipika꞉ pa̱a̱ pa꞉la꞉eki handoemena꞉yeke pu halome. Kotoeki handemeka꞉na꞉ta꞉ Koda꞉ma꞉ ipika꞉ pi la꞉ witolo hata꞉ ipika꞉ wanda꞉hali wotu epeaalo pa꞉la꞉ ekimanu ota꞉ seliapo pikieki hone wilimikie. \v 19 Kutupa make niki hone tulao haloma꞉ wanda꞉hali niki tukiki pa꞉ta꞉ pita꞉ ipika꞉ wele pita꞉la꞉eki daeyaatiki pua꞉pekeeki hone wilimikie. Do hande niki tukiki pa꞉ta꞉ pila꞉ wele pita꞉la꞉ ekita꞉ \v 20 hande Koda꞉ma꞉ wele wotu pitolo hata꞉ Ketisota꞉ homa wieke lapa꞉ pa꞉ta꞉ kone mea tiaota꞉ oli hepeni nane ipika꞉ popeke kiki nane mea pitaeyekeeki kotoeki kone niki tukiki pa꞉ta꞉ pila꞉me. \v 21 Ketisoma꞉ta꞉ oli hepeni kilu tumbuao hata꞉ koto nane haleme you haliweki make biki ula꞉ haliweki make wele pita꞉la꞉ ekimanu make teke haliweki make paeyao ipikana꞉ma꞉ lu tombuao pila꞉me. Do kenke ya yaapo pa꞉ta꞉ biki tieke ula꞉ haliweki paeyao mandata꞉ ame make wetepena꞉ make Ketiso homeke pila꞉me. \v 22 Koda꞉ma꞉ ala꞉ta꞉ ala꞉ta꞉ paeyao Ketisona꞉ anke oto pa꞉ta꞉ mea wiaata꞉ Ketisota꞉ ala꞉ta꞉ ala꞉ta꞉ paeyao manda Tumiki Tekehali haena꞉ laata꞉ ipikita꞉ siosi wanda꞉hali pa꞉ta꞉ ka꞉la꞉me. \v 23 Hande siosita꞉ Ketiso ipika꞉ loke haloma꞉me. Ketisoma꞉ta꞉ ala꞉ta꞉ ala꞉ta꞉ paeyao tukiki pa꞉ta꞉ pita꞉ tumba ula꞉me. Kutupa siosi wanda꞉hali tukiki pa꞉ta꞉ pita꞉ta꞉ tumba pila꞉me. \c 2 \s1 Homa꞉la꞉eki mina꞉pa꞉lao deto hala꞉eki mea꞉peke ya꞉la꞉eki \p \v 1 Amba꞉ ikita꞉ pi na opiki hoke hau pimiki ekima꞉ ika꞉ temokomanu homa wimikime. \v 2 Koto pita꞉ta꞉ ikana꞉ma꞉ do kenkena꞉ hoke hau pita꞉la꞉eki telia꞉ mea pu haota꞉ ya nane haleme wele pita꞉la꞉ temoko manuna꞉ teke halina꞉ pi opu haemekeme. Koto temokoma꞉ta꞉ Koda꞉na꞉ pi na opu haleme wanda꞉halita꞉ ipikana꞉ma꞉ handeteke hala꞉me. \v 3 Amba꞉ta꞉ niki make kutupiki wanda꞉hali hao hata꞉ta꞉ nika꞉ hone pieke ekimanu putia pulu hata꞉ nika꞉ lokema꞉ hone pieke make nika꞉ hone wia puma꞉eki make pu haoma꞉me. Koto hau pu haleme wanda꞉hali pa꞉ta꞉ Koda꞉ma꞉ hoke yenki hala꞉peke ya꞉la꞉ tupa꞉ niki pa꞉ta꞉ make kia꞉peke yolo pia꞉me. \p \v 4-5 Nikana꞉ma꞉ pi na opu haoma꞉ ekina꞉ nika꞉ temokomanu homa wimikipate kone Koda꞉ma꞉ a꞉ta꞉ma꞉ wopu homolo hata꞉ niki pa꞉ta꞉ pukima꞉ wotu homeeke ekina꞉ Ketiso ame̱le̱ niki mea da꞉taeyekeme. Koda꞉ ipika꞉ pa hameke a꞉ta꞉ma꞉ homeeke ekima꞉ iki mea da꞉taala꞉me. \v 6 Nikita꞉ Ketiso yaapo ta꞉ma꞉ni pea haloma꞉ ekina꞉ Koda꞉ma꞉ nikita꞉ Ketiso ame̱le̱ mea tiaota꞉ oli hepeni nane Ketiso ame̱le̱ lu tombuao pitomono la꞉la꞉me. \v 7 Koto hande Koda꞉ma꞉ pieke hauta꞉ ipikana꞉ma꞉ pukima꞉ homolo hata꞉ Yesu Ketiso niki pa꞉ta꞉ ka꞉la꞉ ekima꞉ wetepena꞉ halo peleme wanda꞉halima꞉ ipikana꞉ma꞉ ota꞉ pa hameke a꞉ta꞉ma꞉ wopu homo hala꞉eki nate paeyao handa꞉tiki pina꞉ piekeme. \v 8 Ikana꞉ma꞉ hone tulaaso hamina꞉ Koda꞉ta꞉ ipikana꞉ma꞉ pa hameke a꞉ta꞉ma꞉ homolo hata꞉ iki mea da꞉taala꞉me. Ikana꞉ma꞉ ika꞉ piteleme ekina꞉ dia꞉me. Koda꞉ma꞉ iki pa꞉ta꞉ pa kita꞉la꞉ ekina꞉ loa꞉me. \v 9 Ikana꞉ma꞉ ika꞉ kone ika꞉ pi laapeke na ya꞉la꞉me. Ikana꞉ma꞉ mineleme ekita꞉ ika꞉ piteleme ekina꞉ na minelemeke handa loa꞉me. \v 10 Koda꞉ta꞉ niki wepia hamono la꞉la꞉ Halie. Ipikana꞉ma꞉ta꞉ nikita꞉ Yesu Ketiso yaapo ta꞉ma꞉ni pea hata꞉ epeke haumanu pu hamonoyeke nikita꞉ panake wanda꞉hali wepia hamono la꞉la꞉me. Nikana꞉ma꞉ kutupiki hau peomonoyeke Koda꞉ma꞉ amba꞉ kone pota꞉ pilao pa꞉la꞉me. \s1 Ketisoma꞉ tapake yaapota꞉ homeke haena꞉ la꞉la꞉eki \p \v 11 Ikana꞉ma꞉ hone wilimime. Mo hande Diu haliwekima꞉ta꞉ ikana꞉ma꞉ ika꞉ kone alota꞉ nikita꞉ sekemesaisi hau pea haloma꞉ haliwekio la alemepate ikita꞉ Diendaili haliweki mondu wieke pa꞉ta꞉ kone iki pa꞉ta꞉ sekemesaisi hau na peleme haliwekio lo halememe. Hande sekemesaisi hau pita꞉la꞉ ekita꞉ haliwekina꞉ lokena꞉ pita꞉la꞉ hau pa꞉ta꞉ loa꞉me. Koto ekina꞉ Diendaili wanda꞉halio ikana꞉ma꞉ amba꞉ hata꞉ pimi ekita꞉ hone wia꞉pa꞉peke. \v 12 Koto pita꞉ta꞉ ikita꞉ Ketiso teke pa꞉ta꞉ na hake ika꞉ ta꞉ta꞉ papate haemekeme. Ikita꞉ Koda꞉ma꞉ talopu mea haena꞉ la꞉la꞉ wanda꞉hali apa꞉tao na hake tapake ta꞉ta꞉ wanda꞉hali haemekeme. Koda꞉ma꞉ ipika꞉ wanda꞉hali pa꞉ta꞉ pimanu la꞉ wiekeeki manuta꞉ iki pa꞉ta꞉ na leekeme. Ikita꞉ amba꞉ do kenkena꞉ haemeke dina꞉ta꞉ Koda꞉ ame̱le̱ na hake ipiki pa꞉ta꞉ epekeeki muluekema꞉ hone na wiki pa hao haemekeme. \v 13 Koto tupa꞉ pa haemekepate ameta꞉ Yesu Ketiso yaapo ta꞉ma꞉ni pea hata꞉ta꞉ ika꞉ ta꞉ta꞉ papate haemeke wanda꞉hali kone Ketiso ipika꞉ we lopeeke ekina꞉ iki mea a꞉pa Koda꞉ teke pa꞉ta꞉ hamina꞉ la꞉la꞉me. \v 14 Ketiso ipikana꞉ma꞉ kone Diu wanda꞉hali make Diendaili wanda꞉hali make mea apa꞉tao homeke tapake wanda꞉hali hamono la꞉la꞉ ekima꞉ nika꞉ a꞉nda꞉ ipikana꞉ma꞉ peliaowala꞉me. Mo hande a꞉nda꞉ tunkula꞉ alu alu pea ta꞉ta꞉ ta꞉ta꞉ pea haena꞉ tupele hayeke ekita꞉ Ketiso ipika꞉ lokena꞉ kone londa꞉la baeyekeme. \v 15 Ipikana꞉ma꞉ta꞉ hande Diu wanda꞉halina꞉ Lo Pimanu hande tombo tombo wimiki pimanu tonka꞉na꞉ paeyaeyekeme. Dupieke ekita꞉ mo tapake yaapo pa꞉ta꞉ tapake homeke hata꞉ panake wanda꞉hali ipiki yaapo ta꞉ma꞉ni pea hata꞉ta꞉ ipikana꞉ma꞉ wepia haena꞉ loluekema꞉ piekeme. Kutu pieke ekina꞉ a꞉nda꞉ peliaowaeyekeme. \v 16 Ketisota꞉ hande a꞉ka꞉tei wape piki tina꞉ homeeke ekima꞉ a꞉nda꞉ tunkula alu alu pitelemeeki leke tankema꞉ handa꞉la꞉eki ipikana꞉ma꞉ bepolao homaeyekeme. Kutu pieke ekima꞉ make ipikana꞉ma꞉ mo tapake yaapo pa꞉ta꞉ tapake homeke apa꞉tao haena꞉ laata꞉ Koda꞉ pa꞉ta꞉ paa hatuku epeekeme. \v 17 Koto ekina꞉ Ketisoma꞉ a꞉pata꞉ hande a꞉nda꞉ peliaasa꞉ Pi Seliapo paeyao pa꞉ta꞉ waleekeme. Diendaili wanda꞉halio Koda꞉ teke pa꞉ta꞉ na hake ta꞉ta꞉ papate hamina꞉ kone iki pa꞉ta꞉ waleekeme. Diu wanda꞉halio Koda꞉ teke pa꞉ta꞉ hamina꞉ kone iki pa꞉ta꞉ make waleekeme. \v 18 Ketisoma꞉ peaala꞉ ekima꞉ta꞉ Diu wanda꞉hali make Diendaili wanda꞉hali make niki paeyaoma꞉ta꞉ homeke Sipitidi meata꞉ Koda꞉ hala꞉ pa꞉ta꞉ pua꞉peke ya꞉la꞉me. \p \v 19 Koto ekina꞉ Diendaili wanda꞉halio ame ikita꞉ kenke ma꞉nda꞉ nanema꞉ hao epeleme wanda꞉hali leke make da ma꞉nda꞉ wanda꞉hali leke make na hake ikita꞉ Koda꞉na꞉ wanda꞉hali ame̱le̱ ota꞉ ipika꞉ da wanda꞉hali hata꞉ ipika꞉ tapake wanda꞉hali kone halememe. \v 20 Ikita꞉ Koda꞉ma꞉ a꞉eta꞉la꞉ da tupa꞉ halememe. Ipikana꞉ma꞉ koto da a꞉etolota꞉ niki aposolo haliweki make potopede haliweki make mea apa꞉tao pinkimanu tupa꞉ noka꞉pa꞉la꞉me. Kutu pa꞉la꞉pate Yesu Ketisota꞉ ota꞉ titina꞉ noka꞉pa꞉la꞉ pinki hala꞉me. \v 21 Yesu Ketisoma꞉ta꞉ koto hande da a꞉eta꞉la꞉ ti manuta꞉ ipikana꞉ma꞉ miniki hata꞉ta꞉ Tekehali ipika꞉ yakopiki da haena꞉yeke a꞉eya꞉ tia pula꞉me. \v 22 Ikita꞉ Yesu Ketiso yaapo ta꞉ma꞉ni pea hamina꞉ make mo mandane Ketiso wanda꞉hali paeyao make mea apa꞉tao Koda꞉ma꞉ ikita꞉ ipika꞉ da haena꞉ loluekema꞉ a꞉eta꞉la꞉me. Koto da tukiki pa꞉ta꞉ Koda꞉ ipika꞉ Sipitidi hao halieke. \c 3 \s1 Poloma꞉ Diendaili wanda꞉hali epeaaluekema꞉ piekeeki \p \v 1 Koto pa꞉la꞉ ekina꞉ I̱ Poloma꞉ta꞉ iki Diendaili wanda꞉hali ika꞉ e pokaowa꞉ ekina꞉ Yesu Ketiso ipika꞉ dipula hali hata꞉ta꞉ Koda꞉ pa꞉ta꞉ yeni pu halome. \v 2 Koda꞉ma꞉ pa hameke a꞉ta꞉ma꞉ homolo hata꞉ I̱ma꞉ iki epeaanoyeke koto e I̱ walea꞉eki ikana꞉ma꞉ amba꞉ opitolo pelememe. \v 3 Koda꞉ma꞉ amba꞉ ipika꞉ a꞉mbao u hayeke hone peneme yao walolo hata꞉ I̱ pa꞉ta꞉ la kia꞉me. Do alo ekita꞉ I̱ma꞉ amba꞉ wape hosiki pua꞉me. \v 4 Ikana꞉ma꞉ koto wapesiki handa yata꞉pemeka꞉na꞉ta꞉ Ketiso ipika꞉ a꞉mbao u hala꞉ hone I̱ma꞉ handoloeki kone ikana꞉ma꞉ make handilimikie. \v 5 Amba꞉ hata꞉ta꞉ koto hande a꞉mbao u hayeke honeta꞉ haliwekima꞉ na opimikipate ame Koda꞉ma꞉ta꞉ ipika꞉ yakopiki aposolo haliweki pa꞉ta꞉ make potopede haliweki pa꞉ta꞉ make Sipitidima꞉ peneme yao la kina꞉ la꞉la꞉me. \v 6 Koto hande a꞉mbao u hayeke honeta꞉ dupae. Hande Pi Seliapo opueleme ekina꞉ Diendaili wanda꞉hali ikana꞉ma꞉ta꞉ Koda꞉ma꞉ epeaasa꞉ ekimanu Diu wanda꞉hali ame̱le̱ mandakena꞉ apa꞉tao mea꞉peke ya꞉la꞉me. Ikana꞉ma꞉ta꞉ apa꞉tao homeke loke ta̱la̱ hata꞉ta꞉ hande Koda꞉ma꞉ Yesu Ketisoma꞉ peaena꞉ pi la꞉ wiekeeki ikana꞉ma꞉ make minelememe. \p \v 7 I̱ma꞉ta꞉ hande Pi Seliapo walolo e pokaaso ekita꞉ Koda꞉ma꞉ wele pitolo hata꞉ I̱ pa꞉ta꞉ kia꞉me. \v 8 Koda꞉na꞉ wanda꞉hali paeyao titina꞉ haena꞉ I̱ta꞉ ota꞉ wetepe nane halopate Koda꞉ma꞉ta꞉ mo Diendaili wanda꞉hali pa꞉ta꞉ hande Pi Seliapo I̱ma꞉ walo ponoyeke I̱ pa꞉ta꞉ kia꞉me. Hande Pi Seliapo pa꞉ta꞉ta꞉ Ketiso ipika꞉ paelo pua꞉peke na ya꞉la꞉ hamoko hala꞉eki pila꞉me. \v 9 Kutupa wanda꞉hali paeyaoma꞉ Koda꞉ma꞉ a꞉mbao u hayeke hone peneme yao yaalo pa꞉la꞉eki make handena꞉yeke I̱ma꞉ walo ponoyeke I̱ pa꞉ta꞉ kia꞉me. Hande ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ma꞉ta꞉ amba꞉ kiaake hatiki epemeke pa꞉ta꞉ kone ipika꞉ u hayeke hone a꞉mbao wia hao hayekeme. \v 10 Do ekina꞉yeke piekeme. Dupae. Oli hepeni nane haleme enisolo you haliwekima꞉ make wele pita꞉la꞉ haliwekima꞉ make mo hande siosi wanda꞉hali handolo hata꞉ Koda꞉ ipika꞉ ta꞉ta꞉ ta꞉ta꞉ piki epeke hone wita꞉la꞉eki ame do handa hone wina꞉yeke piekeme. \v 11 Koda꞉ma꞉ kutu pieke ekita꞉ ipika꞉ paeya꞉ paapeke na ya꞉la꞉ hone u hala꞉ ekita꞉ nika꞉ Tekehali Yesu Ketisoma꞉ pina꞉yeke leekeme. \v 12 Koto ekina꞉ nikita꞉ Yesu Ketiso yaapo ta꞉ma꞉ni pea ipiki pa꞉ta꞉ hone tulao hata꞉ta꞉ Koda꞉ hala꞉ pa꞉ta꞉ kina꞉pao honda꞉ pambolo pua꞉pa꞉peke ya꞉la꞉me. \v 13 Ika꞉ ekina꞉ I̱ma꞉ do tanda mea pilua꞉ ekita꞉ kota꞉ iki ka꞉nda꞉ma꞉ na homa꞉pa꞉peke laa I̱ma꞉ iki honke alome. Iki epeaalo pa꞉la꞉ ekina꞉ loa꞉me. \s1 Ketisoma꞉ pukima꞉ homa꞉la꞉eki \p \v 14 Koto pa꞉la꞉ ekina꞉ I̱ma꞉ Apa꞉ pa꞉ta꞉ tumiki yotuao panda꞉puniao pilume. \v 15 Oli hepeni do kenke yaapo pa꞉ta꞉ haloma꞉ tapake wanda꞉hali paeyaoma꞉ta꞉ nika꞉ ota꞉ bikimanu paeyaota꞉ ipiki pa꞉ta꞉ minoloma꞉me. \v 16 I̱ma꞉ Koda꞉ pa꞉ta꞉ honke alo ekita꞉ dupae. Ipikita꞉ manda hata꞉ tieke hala꞉ ekina꞉ ipikana꞉ma꞉ ikita꞉ puki hana꞉ noka꞉pa honkopu hao hamina꞉yeke Sipitidi wele tonka꞉na꞉ kina꞉yeke honke alome. \v 17 Kutupa make ikana꞉ma꞉ hone tulao hamina꞉ Ketisota꞉ ika꞉ puki pa꞉ta꞉ hao haena꞉yeke honke alome. Ti pikimanu kenkena꞉ lopa꞉niaaseme tupa꞉ ikana꞉ma꞉ make Koda꞉na꞉ pukima꞉ homa꞉la꞉eki pa꞉ta꞉ ika꞉ pikimanu lopa꞉niao haota꞉ \v 18 Koda꞉na꞉ wanda꞉hali paeyao ame̱le̱ ikana꞉ma꞉ Ketiso ipika꞉ pukima꞉ homa꞉la꞉eki tombomanu wala꞉la꞉ ekita꞉ petipeke make hokulu make manda make oto nane make handoemena꞉yeke I̱ma꞉ yeni pitolome. \v 19 Ketiso ipika꞉ pukima꞉ homa꞉la꞉ ekita꞉ hando paeyaapeke na ya꞉la꞉eki kone ikana꞉ma꞉ handemeka꞉na꞉ta꞉ epelieke. Kutupa mo hande epeke epeke ale paeyao Koda꞉ ipiki pa꞉ta꞉ tumbulu bao hala꞉eki kone iki pa꞉ta꞉ make tumbulu bao halieke. \p \v 20 Koda꞉ma꞉ nika꞉ puki pa꞉ta꞉ pita꞉ta꞉ wele pu tiaaso hata꞉ta꞉ nikana꞉ma꞉ honke lolo poloma꞉eki paeyao make nikana꞉ma꞉ hone ulu poloma꞉eki paeyao make ota꞉ paeyao ta꞉pao ipikana꞉ma꞉ lu ankulao hata꞉ peaapeke ya꞉la꞉me. \v 21 Kutupiki Koda꞉ta꞉ siosi wanda꞉hali paeyaoma꞉ Yesu Ketiso yaapo ta꞉ma꞉ni pea hata꞉ta꞉ ipika꞉ biki nate paeyao mea a꞉meiyatiki pa pulu pulu hamana꞉ pea꞉pa꞉peke aleo. Kutu pina꞉e. \c 4 \s1 Ketiso wanda꞉halita꞉ Ketisona꞉ loke kone \p \v 1 I̱ta꞉ Poloma꞉ Tekehalina꞉ e pokaaso ekita꞉ dipula pita꞉ kone iki pa꞉ta꞉ hone wotu witolo hata꞉ doeki alome. Koda꞉ma꞉ wi la꞉la꞉ ekina꞉ iki do tupa꞉ tikitiki yao hapa꞉peke. \v 2 Homu pea yopu hata꞉ta꞉ hoto paeyao handeteke hatiki pea꞉pa꞉peke. Ika꞉ kone tamba꞉ mu alu alu pilimi ekima꞉ta꞉ ika꞉ pukima꞉ homelemeeki peneme yao wala꞉pa꞉peke. \v 3 Mo hande Sipitidima꞉ homeke tupa꞉ halemeeki wala꞉la꞉ ekita꞉ hoeyaapa꞉na꞉ ika꞉ kone a꞉nda꞉ pelia hata꞉ handeteke hapa꞉peke. \v 4 Loke homeke kone halememe. Kutupa Sipitidi make homeke hala꞉me. Koda꞉ma꞉ iki wi la꞉la꞉ ekina꞉ homeke kone handeteke halememe. \v 5 Tekehali homeke make hone tulaasoma꞉eki homeke make bapitaisi pita꞉la꞉eki make homekee. \v 6 Kutupa Koda꞉ make homeke hata꞉ niki paeyaona꞉ Apa꞉ Tekehali hata꞉ ala꞉ta꞉ ala꞉ta꞉ paeyao tukiki pa꞉ta꞉ hata꞉ hau paeyao pa꞉ta꞉ ipikana꞉ma꞉ peao hala꞉me. \p \v 7 Ketisoma꞉ ula꞉ hone tupa꞉ niki paeyao pa꞉ta꞉ ta꞉ta꞉ ta꞉ta꞉ pikieki amba꞉ ka꞉la꞉me. \v 8 Mo Baibolo bukama꞉ ala꞉ tupa꞉ \q1 Ota꞉ oli manda a꞉meiya pulu hata꞉ ipiki ame̱le̱ dipula haliweki wopu hatuku puata꞉ wanda꞉hali pa꞉ta꞉ hala꞉la꞉ ekimanu haleekeme la꞉la꞉me. \m \v 9 Kutupa hande ipikita꞉ manda a꞉meiya peeke ekita꞉ eki puluekema꞉ piekepe. Doeki pa꞉ta꞉ ala꞉me. Titina꞉ amba꞉la ipiki hola꞉pa꞉niao do kenke tukiki nane oto pa꞉ta꞉ leke hola꞉pa꞉niaeyekeme. \v 10 Kutupa hande hola꞉pa꞉niaeyeke hali kone ota꞉ oli manda hepeni pa꞉ta꞉ a꞉meiya puata꞉ oli ya kenke yaapo ipika꞉ hala꞉ ekima꞉ tumbaaluekema꞉ peekeme. \v 11 Ipikana꞉ma꞉ kone wanda꞉hali pa꞉ta꞉ hala꞉la꞉ alemanu dupa haleekeme. Mandaneeki aposolo haliweki haena꞉ laata꞉ mandaneeki hande Pi Seliapo wala꞉la꞉ haliweki haena꞉ laata꞉ mandaneeki Koda꞉na꞉ pi la꞉ mea hala꞉la꞉ haliweki haena꞉ laata꞉ mandaneeki pasida haliweki make disa haliweki make haena꞉ la꞉la꞉me. \v 12 Kutupieke ekima꞉ Koda꞉na꞉ wanda꞉hali paeyao ana꞉na꞉ kone hata꞉ ipika꞉ e pokaena꞉yeke piekeme. Kutu pita꞉la꞉ ekima꞉ Ketiso tapake wanda꞉halita꞉ daeya꞉ tia pena꞉yeke pa꞉la꞉me. \v 13 Kutu pa꞉la꞉ ekima꞉ niki paeyao homeke tupa꞉ hata꞉ta꞉ hone tulaasoma꞉eki make homeke kone Koda꞉ ipika꞉ Eiyeke handoloma꞉eki make homekeeki kone handulumeke. Kutu puma꞉ka꞉na꞉ta꞉ nikita꞉ keileke haliweki hata꞉ Ketiso hala꞉ tupa꞉ kone halumeke. \v 14 Koto tupa꞉ haoma꞉ka꞉na꞉ta꞉ nikita꞉ weki wandikisunu leke na halumeke. Hande poma꞉ dawala mea pominolo pita꞉la꞉ tupa꞉ mandane yayapiki pi aleme haliwekima꞉ ika꞉ ta꞉ta꞉ piki pi make ika꞉ hone wia makeaaseme ekimanu make wanda꞉hali walolo hata꞉ hao hoeyaena꞉ alememe. \v 15 Koto ekita꞉ ana꞉ na pa꞉la꞉me. Nikana꞉ma꞉ta꞉ pukima꞉ homolo hata꞉ ota꞉ pimanu lomana꞉e. Kutu puma꞉ka꞉na꞉ta꞉ ota꞉ hau pitolo hata꞉ Yesu ame̱le̱ mandakena꞉ halumeke. Ipikita꞉ nika꞉ you hata꞉ tieke hala꞉me. \v 16 Kutupa nika꞉ lokena꞉ kiki anke paeyao ipiki pa꞉ta꞉ tunaaloma꞉me. Mo lokena꞉ hala꞉ alemanu paeyao tuna tuna pea ika꞉ kaukata pea꞉peke ekimanu pitolo hata꞉ hande loke paeyao daeya tia pulu hata꞉ ipika꞉ kone pukima꞉ homolo epeke tupa꞉ daeta꞉la꞉me. \s1 Ketiso pa꞉ta꞉ panakeeki mina꞉la꞉eki \p \v 17 Koto ekina꞉ Tekehalina꞉ bikina꞉ I̱ma꞉ iki pa꞉ta꞉ do pi tieke wotu alome. Hande pi na miki wanda꞉hali haleme tupa꞉ na hapa꞉peke. \v 18 Mo wanda꞉halima꞉ta꞉ ika꞉ hone witeleme ekita꞉ timba꞉ la꞉pa pulu hata꞉ epeke hone ma꞉nda꞉ na witelememe. Ikita꞉ hone na wiki kiaaso hata꞉ na mineleme ekima꞉ Koda꞉na꞉ da꞉taasa꞉ ekita꞉ na handelememe. \v 19 Kutu piteleme wanda꞉halima꞉ta꞉ yaala꞉ma꞉ na homeke hoke ekimanu puluekema꞉ taapolo hata꞉ pamba꞉ na piki haumanu pitolo hata꞉ paa putia pulimime. \p \v 20 Ikana꞉ma꞉ Ketiso hau sukulu pitolo hamina꞉ta꞉ koto hau manuta꞉ ma꞉nda꞉ma꞉ iki pa꞉ta꞉ na waleekeme. \v 21 Yaka honema꞉ta꞉ do hande Yesuna꞉ hau ota꞉ ekimanu waleeke ekita꞉ amba꞉ opitolo pelememe. \v 22 Do ota꞉eki manuta꞉ dupae. Ika꞉ amba꞉ hata꞉ pimi hau teketa꞉ ota꞉ baapa꞉peke. Koto ekima꞉ta꞉ iki hao hoeyaaso hata꞉ mo hande amba꞉ hau teketa꞉ ipika꞉ makeaasa꞉ hone pa꞉la꞉ haumanu pu tiaaso hata꞉ ipiki kone hao hoeyaaso make iki make hao hoeyaatiki piekeme. \v 23 Koto ekina꞉ panake hone witolo hata꞉ \v 24 hande panake hau teke mea꞉pa꞉peke. Koda꞉ma꞉ do hande panake hau teke wepa꞉leke handa do panake hau teketa꞉ Koda꞉na꞉ hau kone ana꞉ pa꞉la꞉me. Mo hande panake hau tekema꞉ hali ma꞉nda꞉ pa꞉ta꞉ pita꞉ mo halita꞉ tikitiki yao hata꞉ yakopiki hau piki hali haena꞉ lelieke. \p \v 25 Koto ekina꞉ yayapiki pi ala꞉eki paapa꞉peke. Nikita꞉ Ketiso ipika꞉ lokena꞉ tunao homekeeki yolo hata꞉ nika꞉ kame pa꞉ta꞉ ota꞉ pi la꞉tiki pulumeke. \v 26 Kutupa make mineke pankemeka꞉na꞉ta꞉ kota꞉ pa hoke hau pilimina꞉ yopu handeteke hapa꞉peke. Nate pambolo haena꞉ mineke panka꞉la꞉eki na pitina꞉ lapa꞉peke. \v 27 Sadanina꞉ pota꞉ ma꞉nda꞉ na pilaapa꞉peke. \v 28 Pake nala꞉ halima꞉ koto hau na piki pa e poka꞉peke ya꞉la꞉me. Ipika꞉ kikima꞉ e epeke tupa꞉ pokolo hata꞉ ala꞉ta꞉ ma꞉nda꞉ dia꞉ya꞉la꞉ wanda꞉hali pa꞉ta꞉ mandaneeki haluekema꞉ hone wina꞉yeke loa꞉me. \v 29 Hoke pi homeke a꞉nda꞉ ika꞉ kakema꞉ na leke wanda꞉hali epeaalo peleme pimanu lapa꞉peke. Kutupa ika꞉ pita꞉ wanda꞉halima꞉ opitolo hata꞉ Koda꞉ ipika꞉ pa a꞉ta꞉ma꞉ homa꞉la꞉eki mina꞉yeke loa꞉me. \v 30 Koda꞉ ipika꞉ Holi Sipitidi make ka꞉nda꞉ma꞉ na homaapa꞉peke. Do ekina꞉yeke loa꞉me. Koda꞉ma꞉ iki ota꞉ ka꞉la꞉pa꞉ tapaaluekema꞉ ipikana꞉ma꞉ mo Holi Sipitidi pitaala꞉ ekima꞉ tombo amba꞉ wiaala꞉me. \v 31 Ikana꞉ma꞉ honema꞉ yawa꞉la꞉eki make titipu pikieki kuta kone a꞉mina꞉la꞉eki make mineke panka꞉la꞉eki make tandapiki pi alemeeki make pi la la pitelemeeki make do hande hoke hone witeleme ekimanu paeyo baota꞉ \v 32 iki paeyao homu pea hata꞉ ika꞉ kone pukima꞉ homa꞉ alu alu peata꞉ Koda꞉ma꞉ta꞉ Ketisoma꞉ peaala꞉ ekina꞉ hone witolo hata꞉ ika꞉ hoke haumanu pa paeyaala꞉ ekina꞉ ikana꞉ma꞉ make ika꞉eki kone pa peaa alu alu pea꞉pa꞉peke. \c 5 \s1 Pa̱a̱ pu hala꞉ alena꞉ hala꞉eki \p \v 1 Koto ekina꞉ ikita꞉ Koda꞉ ipika꞉ hone pa꞉la꞉ weki wandiki kone hata꞉ Koda꞉na꞉ pita꞉la꞉ hau kone pea꞉pa꞉peke. \v 2 Hande Ketisoma꞉ niki pa꞉ta꞉ pukima꞉ homa꞉la꞉ tupa꞉ ikana꞉ma꞉ make pukima꞉ homa hapa꞉peke. Ipikana꞉ma꞉ Koda꞉ ta꞉na꞉ma꞉ homaaso hata꞉ ma꞉na꞉ lia halo haemeke tupa꞉ totopo piki ale leke ipika꞉ da꞉ta꞉la꞉eki kone nika꞉eki halawaeyekeme. \p \v 3 Kutupa make iki Koda꞉na꞉ wanda꞉hali hata꞉ loke hoeyaasa꞉ haumanu make na tiaake haumanu make pasa꞉tei pita꞉la꞉ haumanu make kutu pikieki manuna꞉ pi ma꞉nda꞉ a꞉nda꞉ na hotia꞉pa꞉peke. \v 4 Keke pi make popeke na piki pi make hone na wiki pa pi alemeeki make ota꞉ na leke Koda꞉ pa꞉ta꞉ keiyae pimanu la꞉tiki pea꞉pa꞉peke. \v 5 Do wape pa꞉la꞉ ekita꞉ Ota꞉ekie hone wia꞉pa꞉peke. Hali epima꞉ loke hoeyaasa꞉eki make na tiaake hau pita꞉la꞉eki make pasa꞉tei hau pita꞉la꞉eki make (mo pasa꞉tei hau pita꞉la꞉ ekita꞉ hande toopima꞉ wepia ula꞉ ale pa꞉ta꞉ yeni hau pita꞉la꞉ ekima꞉ kone handa꞉la꞉me) kutupiki hau pita꞉la꞉ halita꞉ Koda꞉ Ketiso yaapona꞉ Kilu Tombuao Hala꞉ ekina꞉ ota꞉ pua꞉peke na ya꞉la꞉me. \p \v 6 Ma꞉nda꞉ma꞉ hone na wiki pimanu alo hata꞉ iki makeaapa꞉na꞉ wotu handeteke hapa꞉peke. Koda꞉na꞉ pi na opitolo hata꞉ hande hoke haumanu pu haleme wanda꞉hali pa꞉ta꞉ Koda꞉ ipika꞉ mineke panka꞉la꞉eki mo wanda꞉hali pa꞉ta꞉ yapilieke. \v 7 Koto ekina꞉ kutupiki wanda꞉hali ame̱le̱ ta꞉ma꞉ni pea na hapa꞉peke. \v 8 Amba꞉ titina꞉ ikita꞉ timba꞉ la꞉pa peeke pa꞉ta꞉ haemepate ameta꞉ Tekehalina꞉ wanda꞉hali haleme ekina꞉ pa̱a̱ pita꞉la꞉eki tukiki pa꞉ta꞉ haleme wanda꞉hali ana꞉na꞉ hapa꞉peke. \v 9 Mo hande pa̱a̱ pita꞉la꞉ ekima꞉ peaasa꞉ hau manuta꞉ dupae. Epeke hau pita꞉la꞉ ekimanu make tikitiki hau pita꞉la꞉ ekimanu make ota꞉ hau pita꞉la꞉ ekimanu make peaasa꞉me. \v 10 Tekehali ta꞉na꞉ma꞉ homaalo pelemeeki puluekema꞉ weiya pea꞉pa꞉peke. \v 11 Mo timba꞉ lo pamba꞉la꞉ pa꞉ta꞉ hata꞉ napeke na wita꞉la꞉ alema꞉ handeke haumanu pu haleme wanda꞉hali ame̱le̱ na ta꞉ma꞉ni pea na hake kutupiki haumanu mo hande pa̱a̱ peaasa꞉ ekima꞉ kone peneme yaena꞉ lapa꞉peke. \v 12 Ika꞉ a꞉mbao pitelemeeki manuta꞉ wanda꞉hali yaala꞉ma꞉ homaapa꞉na꞉ pi hotia꞉pa꞉peke na ya꞉la꞉me. \v 13 Hau paeyao pita꞉la꞉ ekita꞉ mo hande pa̱a̱ pita꞉la꞉ ekima꞉ peneme yao walea꞉ka꞉na꞉ta꞉ pita꞉la꞉eki teke handa꞉peke ya꞉la꞉me. \v 14 Kutupa mo hande pa̱a̱ pita꞉la꞉ ekima꞉ peneme yaasa꞉eki manuta꞉ pa̱a̱ pita꞉la꞉eki kone yelieke. Koto ekina꞉ wape dupa pa꞉la꞉me. \q1 U peile halio. A̱i̱ tiae. Homa꞉la꞉eki mina꞉pa꞉lao tiaeka꞉na꞉ta꞉ Ketisoma꞉ neke pa̱a̱ pealieke wape pa꞉la꞉me. \p \v 15 Koto ekina꞉ epeke tupa꞉ haluekema꞉ wotu handeteke hata꞉ hone na wiki haliweki leke na hake hone wotu witolo hata꞉ hapa꞉peke. \v 16 Nate ma꞉nda꞉ pa na mina꞉pa꞉laake nate paeyao wotu weiya handa꞉tiki pia꞉pa꞉peke. Ame do nate manuna꞉ta꞉ hokeeki wotu pitelemeke handa loa꞉me. \v 17 Koto ekina꞉ hone na wiki haliweki leke na hake hone wia Tekehalina꞉ hone pa꞉la꞉eki handuluekema꞉ pea꞉pa꞉peke. \v 18 Kutupa hoke ikali naa keaasa꞉ ekima꞉ iki hoeyaapa꞉na꞉ kotoeki na piki Koda꞉na꞉ Holi Sipitidima꞉ iki tumbaatiki pita꞉la꞉eki muemena꞉ ota꞉ pea꞉pa꞉peke. \v 19 Kutupa ika꞉ yankeketiti ame̱le̱ epeke pimanu alo hata꞉ la꞉tiki pea꞉pa꞉peke. Kutupa make mo Baibolona꞉ emeli buka ula꞉ emelimanu make Tekehalina꞉ pi laaso hata꞉ ika꞉ pukima꞉ ta꞉na꞉ma꞉ homolo hata꞉ la꞉tiki pea꞉pa꞉peke. \v 20 Tekehali Yesu Ketisona꞉ bikina꞉ ala꞉ta꞉ ala꞉ta꞉ paeyao kita꞉la꞉ ekina꞉ hoto paeyao nika꞉ Apa꞉ Koda꞉ pa꞉ta꞉ keiyae pi la꞉tiki pea꞉pa꞉peke. \s1 Hali pa꞉la꞉ wanda꞉weki pita꞉ wanda꞉ ma꞉la꞉ haliweki yaapona꞉eki \p \v 21 Ikana꞉ma꞉ Ketiso pa꞉ta꞉ paala꞉ma꞉ homa haleme ekina꞉ ika꞉ kone homu pu alu alu pea hapa꞉peke. \v 22 Wanda꞉wekio hande ika꞉ Tekehali pa꞉ta꞉ homu pea haleme tupa꞉ ika꞉ haliki titi pa꞉ta꞉ make homu pea hapa꞉peke. \v 23 Ketisota꞉ hande siosi wanda꞉halina꞉ you hali pa꞉la꞉ tupa꞉ halima꞉ ipika꞉ weteke make koto tupa꞉ handeteke hala꞉me. Kutupa Ketisoma꞉ mo siosi wanda꞉halita꞉ ipika꞉ loke tupa꞉ haena꞉ laa niki mea Da꞉taasa꞉ Hali hala꞉me. \v 24 Koto ekina꞉ hande siosi wanda꞉halima꞉ Ketiso pa꞉ta꞉ homu pea haleme tupa꞉ wanda꞉wekima꞉ make ika꞉ haliki titi pa꞉ta꞉ homu pea hapa꞉peke ya꞉la꞉me. \p \v 25 Haliwekio Ketisoma꞉ ipika꞉ siosi wanda꞉hali pa꞉ta꞉ pukima꞉ homolo hata꞉ ipika꞉ da꞉ta꞉la꞉eki kone alupaeyeke tupa꞉ ikana꞉ma꞉ make ika꞉ wanda꞉weki pa꞉ta꞉ pukima꞉ homolo hata꞉ hapa꞉peke. \v 26 Dupieke ekima꞉ Ketisoma꞉ hande ipika꞉ siosi wanda꞉hali pima꞉ make ikalima꞉ make wamo peata꞉ Koda꞉na꞉eki kone tombo waleekeme. \v 27 Hande siosi wanda꞉halita꞉ ipika꞉eki mea haena꞉ loluekema꞉ta꞉ wamo pea epeao hakepiki wanda꞉hali haena꞉ laata꞉ hokeeki na ta̱la̱a̱ke eki a꞉nda꞉ na piki wanda꞉hali kone haena꞉ loluekema꞉ dupiekeme. \v 28 Haliwekima꞉ta꞉ ika꞉ loke pa꞉ta꞉ kone hone u haleme tupa꞉ ika꞉ wanda꞉weki pa꞉ta꞉ make hone u hapa꞉peke. Hali epima꞉ ipika꞉ wanda꞉ pa꞉ta꞉ hone wotu u haya꞉ka꞉na꞉ta꞉ ipiki kone hone wotu wita꞉la꞉me. \v 29-30 Hali ma꞉nda꞉ma꞉ ipika꞉ loke pa꞉ta꞉ kone kiaaso hata꞉ hone na wiki hau pea꞉peke na ya꞉la꞉me. Dia꞉me. Ipika꞉ loke ipika꞉ kone handeteke hata꞉ punilieke. Koto tupa꞉ kone Ketisoma꞉ make nikita꞉ ipika꞉ loke tupa꞉ hamonmono ipikana꞉ma꞉ ipika꞉ siosi wanda꞉hali puna꞉la꞉me. \v 31 Mo Baibolo bukama꞉ la꞉la꞉ tupa꞉ Koto ekina꞉ hali ma꞉nda꞉ma꞉ ateke inkiki mina꞉pa꞉lao ipika꞉ wanda꞉ yaapo apa꞉tao hata꞉ ipiliki yaapota꞉ homeke kone halipipikie la꞉la꞉me. \v 32 Do pi tieketa꞉ Baibolo bukama꞉ la kita꞉la꞉me. Kutupa yaka honema꞉ta꞉ Ketiso make ipika꞉ siosi wanda꞉hali ame̱le̱ hala꞉ ekina꞉ la꞉la꞉me hone witolopate pa \v 33 iki pa꞉ta꞉ make la꞉la꞉me laa hone witolome. Koto ekina꞉ haliwekio ikana꞉ma꞉ ika꞉ loke pa꞉ta꞉ kone hone witeleme tupa꞉ ika꞉ wanda꞉weki pa꞉ta꞉ make hone wia꞉pa꞉peke. Kutupa wanda꞉wekima꞉ make ika꞉ haliki titi pa꞉ta꞉ homu pea hapa꞉peke. \c 6 \s1 Weki wandiki make ateke inkikina꞉ pi la꞉la꞉eki \p \v 1 Weki wandikio. Tekehalima꞉ waleeke handa ika꞉ apa꞉ ama꞉ yaapona꞉ pi na tunkuliki opua꞉tiki pea꞉pa꞉peke. Kutu pimika꞉na꞉ta꞉ tikitiki hau pu halimikie. \v 2 Hande Naka꞉ ama꞉ apa꞉ yaapo pa꞉ta꞉ homu pea hapeke laa la꞉ wieke pita꞉ Koda꞉ma꞉ titina꞉ la꞉ wiekeeki make apa꞉tao dupa leekeme. \v 3 Kutu pika꞉na꞉ta꞉ neketa꞉ epeke tupa꞉ koto kenkena꞉ hao hata꞉ naka꞉ bapimanu wotu yopuao halipikie. \p \v 4 Ateke titima꞉ make ika꞉ weki wandikima꞉ mineke pankena꞉ su na tiaake Ketiso hau pitolo hata꞉ wala꞉la꞉eki make tikitiki yaasa꞉eki make pea꞉pa꞉peke. \s1 E pa hameke pokaasa꞉ haliweki make handeteke hala꞉ haliweki make \p \v 5 E pa hameke pokaaseme haliwekio ika꞉ handeteke haleme haliwekina꞉ pi paala꞉ma꞉ homolo hata꞉ opua꞉pa꞉peke. Makeaasa꞉ hau na piki Ketisona꞉ e pokaaseme tupa꞉ opua pea꞉pa꞉peke. \v 6 Handeteke hala꞉ haliweki ta꞉na꞉ma꞉ homaaluekema꞉ mo haliwekina꞉ leke popelekema꞉ hata꞉ homeke na piki Ketisona꞉ e pokaaseme haliweki hata꞉ Koda꞉ ipika꞉ hone pa꞉la꞉ hau puluekema꞉ honkopu hao pea꞉pa꞉peke. \v 7 Koto ekina꞉ ikana꞉ma꞉ta꞉ kenke haliwekina꞉ e pa hameke pokaasoma꞉me hone na wiki Tekehalina꞉ e kone pokaasoma꞉me hone wia ta꞉na꞉ma꞉ homolo hata꞉ pokaapa꞉peke. \v 8 Doeki make hone wia꞉pa꞉peke. Tekehalima꞉ epeke tupa꞉ e pokaaseme haliweki paeyao pa꞉ta꞉ yenki epekeeki halieke. Ma꞉nda꞉na꞉ e pa hameke pokaaseme haliweki pa꞉ta꞉ make ika꞉ e kone pokeleme haliweki pa꞉ta꞉ make epeke yenki milimikie. \p \v 9 Handeteke haleme haliwekio ikana꞉ma꞉ make ika꞉ e pokaaseme haliweki pa꞉ta꞉ paala꞉ tiaake pi na leke epeke tupa꞉ hapa꞉peke. Doeki hone wia꞉pa꞉peke. Iki make ika꞉ e pokaaseme haliweki make ika꞉ Tekehali tieke homeke kone hepeni nane hala꞉me. Kutupa ipikana꞉ma꞉ wanda꞉hali paeyao pa꞉ta꞉ homeke hone u hala꞉me. \s1 Koda꞉ma꞉ kita꞉la꞉ alemanu nika꞉ lokena꞉ pambaamana꞉e \p \v 10 Pi paetolo hata꞉ dupa alome. Ikana꞉ma꞉ Tekehali ta꞉ma꞉ni pea hata꞉ ipika꞉ wele pita꞉la꞉eki meata꞉ honkopu hao hapa꞉peke. \v 11 Sadanima꞉ iki makeaasa꞉ ekimanu ikana꞉ma꞉ da̱o̱la hata꞉ bepolaluekema꞉ta꞉ ika꞉ loke a꞉mbaamena꞉ mo Koda꞉ma꞉ kita꞉la꞉ alemanu paeyao mea pambaapa꞉peke. \v 12 Do ekina꞉yeke loa꞉me. Nikana꞉ma꞉ kenke haliweki pa꞉ta꞉ a꞉nda꞉ na litoloma꞉pate oli ya nanema꞉ haleme hoke temokomanu ame̱le̱ make do timba꞉ lo pamba꞉la꞉ ekina꞉ you hali ame̱le̱ make teke hali pa꞉ta꞉manu make mo wele pita꞉la꞉eki pa꞉ta꞉manu make a꞉nda꞉ litoloma꞉me. \v 13 Koto ekina꞉ Koda꞉ma꞉ ika꞉ loke a꞉mbaamena꞉ kita꞉la꞉ alemanu ame kone mea pambao hapa꞉peke. Kutupa hande hoke natemanu ipilie dina꞉ta꞉ ika꞉ a꞉nda꞉ tunkuliki haliwekima꞉ iki hoeyaaluekema꞉ limi ala꞉ta꞉ ikana꞉ma꞉ ana꞉na꞉ a꞉mbao hata꞉ tombona꞉ opolo puata꞉ ika꞉ halimi alena꞉ kone pa tiao hao halimikie. \p \v 14 Koto ekina꞉ tiao hata꞉ tikitiki yao hapa꞉peke. Ika꞉ hako yameleme ekita꞉ ota꞉ hau pita꞉la꞉eki yama꞉pa꞉peke. Ika꞉ hakoko a꞉mbaasa꞉ hanka꞉ta꞉ tikitiki hau pita꞉la꞉ ekima꞉ a꞉mbaapa꞉peke. \v 15 Kutupa ika꞉ anke dake pambaaseme ekita꞉ hande Koda꞉ma꞉ ika꞉ a꞉nda꞉ peliaasa꞉ Pi Seliapota꞉ a̱i̱ la haluekema꞉ tikitiki yaasa꞉eki pambaapa꞉peke. \v 16 Hanka꞉ta꞉ hoto paeyao mina pominolo hata꞉ hone tulaasa꞉eki mina pomua꞉pa꞉peke. Kotoeki mina꞉ hata꞉ta꞉ mo hoke Sadanima꞉ ipika꞉ ti tala꞉ a꞉ndelimanu pila꞉la꞉ ekita꞉ ana꞉na꞉ a꞉mbaalimikie. \v 17 Kutupa ika꞉ a꞉nda꞉ you aka꞉ta꞉ Koda꞉na꞉ da꞉taasa꞉eki kone pambaapa꞉peke. Kutupa make mo Sipitidi kita꞉la꞉ kepeteta꞉ pa mo Koda꞉na꞉ pimanu kone mea miniki hao hapa꞉peke. \v 18 Do haumanu paeyaota꞉ Koda꞉ma꞉ tamba꞉ mina꞉yeke pitolo hata꞉ yeni pea꞉tiki pu hapa꞉peke. Koto mo Sipitidima꞉ walolo haena꞉ hoto paeyao yeni pea꞉pa꞉peke. Koto ekina꞉ wotu handeteke hata꞉ soka꞉la꞉ma꞉ na homeke Koda꞉na꞉ wanda꞉hali paeyao pa꞉ta꞉ hone witolo hata꞉ hoto paeyao yeni pea꞉tiki pu hapa꞉peke. \v 19 Kutupa yaka biki make yeni pitolo hata꞉ Koda꞉ pa꞉ta꞉ hala꞉tiki pea꞉pa꞉peke. I̱ma꞉ta꞉ tikitiki yao hata꞉ mo hande Pi Seliapo a꞉mbao ula꞉ ekimanu handa꞉ wia honkopu hao wala꞉tiki pionoyeke Koda꞉ma꞉ kotoeki kina꞉ yeni pea꞉tiki pea꞉pa꞉peke. \v 20 I̱ta꞉ dipula pita꞉ kone mo hande Koda꞉na꞉ Pi Seliapo wala꞉tiki pitolo halie. Koto ekina꞉ do Pi Seliapo honkopu hao walonoyeke yeni pea꞉tiki pea꞉pa꞉peke. \s1 Paeyaasota꞉ mo pelia꞉pa꞉pekee la꞉la꞉eki \p \v 21 Nika꞉ kame hande Tekehalina꞉ e epeke tupa꞉ pokaasa꞉ hali Tikikasima꞉ta꞉ I̱ haloeki make I̱ma꞉ pitoloeki iki pa꞉ta꞉ la kilieke. \v 22 Ika꞉ puki hana꞉ noka꞉paaluekema꞉ nikana꞉ma꞉ pitoloma꞉ ekimanu paeyao ipikana꞉ma꞉ iki la kina꞉yeke Tikikasi iki pa꞉ta꞉ ta tapaaso handa꞉pe. \p \v 23 Nika꞉ Apa꞉ Koda꞉ma꞉ make Tekehali Yesu Ketisoma꞉ make iki pa꞉ta꞉ puki lopa꞉niaasa꞉eki make pukima꞉ homa꞉la꞉eki make hone tulaasa꞉eki tonka꞉na꞉ kia꞉ka꞉na꞉ta꞉ epelieke. \v 24 Kutupa Tekehali Yesu Ketiso pa꞉ta꞉ hoto paeyao pukima꞉ homo haleme wanda꞉hali pa꞉ta꞉ Koda꞉ma꞉ ipika꞉ pa a꞉ta꞉ma꞉ homa꞉la꞉eki kia꞉ka꞉na꞉ta꞉ epelieke.