\id ACT - Sembeleke Samberigi PNG Acts 01 22/3/91 Macnaughtan 
\h APOSOLO 
\toc1 Aposolo haliwekima꞉ pimiki ekimanue 
\toc2 Aposolo 
\toc3 Aposolo 
\mt1 Aposolo haliwekima꞉ pimiki ekimanue  
\c 1  
\p
\v 1 Diopilusio. I̱ma꞉ta꞉ titina꞉ buka wape pua꞉ ekina꞉ Yesuma꞉ ipika꞉ e kini pea mea pokeeke natena꞉ kini pea pua kutupa pa ipiki oli hepeni nane peeke natena꞉ ipikana꞉ma꞉ piekeeki make wala꞉tiki piekeeki make paeyao wape pua꞉me.  
\v 2 Kutupa Holi Sipitidima꞉ walolo haena꞉ Yesuma꞉ ipika꞉ talopu mea haena꞉ leeke aposolo haliweki pa꞉ta꞉ pi lo paeyaota꞉ oli ya nane a꞉meiyeketa꞉ wape pu naowa꞉me.  
\v 3 Yesuma꞉ ipiki homa hoki nane mo aposolo haliwekima꞉ ipiki ota꞉ wotu handena꞉yeke peneme yao hali tieke yaapo natena꞉ hata꞉ ipika꞉ kone tiaeyekeeki walaata꞉ Koda꞉na꞉ Kilu Tombuao Hala꞉eki iki pa꞉ta꞉ walo hayekeme.  
\v 4 Mo haliweki ame̱le̱ pa hayeke dina꞉ Yesuma꞉ iki pa꞉ta꞉ alota꞉ Diutuseleme na mina꞉pa꞉laake pa hapa꞉peke. Ya Apa꞉ma꞉ kulueke laa la꞉ ula꞉ ale handeteke hapa꞉peke. Hande I̱ma꞉ iki pa꞉ta꞉ loa꞉ alena꞉ loa꞉me.  
\v 5 Kutupa Dionima꞉ta꞉ pa ikalima꞉ bapitaisi peao haya꞉pate hosikisiki hao hao peaata꞉ Holi Sipitidima꞉ bapitaisi peaalieke loa꞉ pita꞉ amba꞉ opimime leekeme.   
\s1 Yesu oli ya nane mea pa꞉la꞉eki  
\p
\v 6 Yesu make mo haliweki ame̱le̱ mandake pa꞉ta꞉ momba꞉la haemeke dina꞉ ikana꞉ma꞉ Yesu pa꞉ta꞉ alota꞉ Tekehalio. Ame do natena꞉ta꞉ nakana꞉ma꞉ Isulai paa kilu tombuao haluekema꞉ alepe lemekeme.  
\v 7 Yesuma꞉ mo haliweki pa꞉ta꞉ alota꞉ Ikana꞉ma꞉ta꞉ Do natena꞉ doeki piliekee o Do ekina꞉ dupiliekee laa opuemena꞉ ika꞉eki dia꞉me. Mo Apa꞉ Koda꞉ma꞉ ipika꞉ honumake pulu pa꞉la꞉ekie leekeme.  
\v 8 Koto pa꞉la꞉pate ikita꞉ wele pita꞉la꞉eki milimikie leekeme. Mo Holi Sipitidi epea꞉ka꞉na꞉ta꞉ ikita꞉ yaka wekitisi haliweki Diutuseleme pa꞉ta꞉ make Sametia pa꞉ta꞉ make Diudia paeyao pa꞉ta꞉ make hama hama pea kenke honiki honiki paeyao pa꞉ta꞉manu make la halimikie leekeme.  
\v 9 Kotoeki lo paeyaota꞉ mo haliwekima꞉ handa꞉ poto poto la haena꞉ kone opa꞉liao peekeme. Kutupa ya hapi homekema꞉ a꞉pa ipiki a꞉mbaeyekeme.  
\v 10 Yesu peeke handa mo haliwekima꞉ oli pula꞉me laa wopu handa꞉hake witolo haena꞉ta꞉ koto kone hali yaapo hake pupa peke dau yama꞉ mea a꞉pa halu pitolo alota꞉  
\v 11 Ka꞉lili haliwekio. Do pa꞉ta꞉ hata꞉ ya pa꞉ta꞉ ombu ekipeke handa꞉liao halemepe lepekeme. Do iki mina꞉pa꞉lao ya nane pula꞉ Yesuta꞉ paa ipulu make do ya nane puleke handa handeleme tupa꞉ kone paa ipilia꞉eki make koto tupa꞉ kone ipiliekee lepekeme.   
\s1 Diudasina꞉ anke teke mieke hali  
\p
\v 12 Kutupa Diutuseleme nepoko pa꞉ta꞉ kilomida homeke tupa꞉ pote ma꞉nda꞉ biki Olipeti pa꞉ta꞉ hao Diutuseleme nane la꞉ka꞉la pemekeme.  
\v 13 Mo teke da tieke pa꞉ta꞉ puaata꞉ ika꞉ pelia hao haemeke manda da panda꞉ pa꞉ta꞉ opa꞉liaemekeme. Pida Dioni yaapo Dia꞉mesi A꞉ndutu yaapo Pilipi Tomasi yaapo Badolomiu Ma꞉tiu yaapo A꞉lopia꞉sina꞉ eiyeke Dia꞉mesi pita꞉ Saimono Seloti yaapo kutupa Dia꞉mesina꞉ eiyeke Diudasi makee.  
\v 14 Koto haliweki paeyao mo wanda꞉weki tonka꞉na꞉ Yesuna꞉ ama꞉ Meti make ipika꞉ hameketiti make mandake pa꞉ta꞉ momba꞉la pita꞉ yeni pu pitimikime.   
\p
\v 15 Yeni pu pitaata꞉ pa hosiki hao hao peaata꞉ mo Ketisona꞉ pi mina꞉la꞉ wanda꞉halima꞉ pi hotuluekema꞉ mombelemekeme. Iki paeyaota꞉ 120 wanda꞉hali tupa꞉ momba꞉la pitina꞉ Pidama꞉ pi loluekema꞉ tiaeyekeme.  
\v 16 Kutupa ipikana꞉ma꞉ alota꞉ Yaka ana꞉ kame titio. Hande Baibolo bukana꞉ wape pa꞉la꞉ pita꞉ ota꞉ yaapeke ya꞉la꞉me. Hande Holi Sipitidima꞉ Deipidina꞉ hone u tiaaso haena꞉ta꞉ Yesu da꞉ka꞉pa꞉ minina꞉ haliweki hatuku polo pia꞉ hali Diudasima꞉ pulu piekeeki dupilieke laa Deipidima꞉ wape piekeme.  
\v 17 Yesuma꞉ Diudasi make niki ame̱le̱ mandakena꞉ e pokomonoyeke talopu mea haena꞉ leeke handaata꞉ niki ame̱le̱ pomu haya꞉me leekeme.   
\p
\v 18 Hande Diudasima꞉ta꞉ hokeeki puluekema꞉ ma꞉na꞉ yapa꞉ pea mieke manima꞉ta꞉ kenkesiki ma꞉nda꞉ hamba꞉ miekeme. Koto kenke pa꞉ta꞉ta꞉ ipika꞉ kone lopa꞉niaota꞉ ota꞉ homeekeme. Ipika꞉ weleke tekelipe lia weleke yoka꞉ petepete pea wiekeme.  
\v 19 Kutupa mo Diutuseleme da pa꞉ta꞉ haemeke wanda꞉hali paeyaoma꞉ koto piekeeki opuaata꞉ koto kenke sikina꞉ biki ika꞉ da pi la alota꞉ Akeledama lo haemekeme. Koto la꞉la꞉ ekita꞉ We Kenkee laa lo haemekeme.   
\p
\v 20 Pidama꞉ alota꞉ Mo Emeli buka pa꞉ta꞉ wape pa꞉la꞉ ekita꞉ dupa  
\q1 Ipika꞉ data꞉ hankoko pa haya꞉ka꞉na꞉ta꞉ epelieke. Hali ma꞉nda꞉ na pua haena꞉e laa wape pa꞉la꞉me.  
\p Kutupa wape pa꞉la꞉eki ma꞉nda꞉ make dupa  
\q1 Ipika꞉ pokeeke eta꞉ hali ma꞉nda꞉ma꞉ mea꞉peke ya꞉la꞉me laa wape pa꞉la꞉me.   
\p
\v 21-22 Koto ekina꞉ta꞉ hali ma꞉nda꞉ta꞉ niki ame̱le̱ ta꞉ma꞉ni pea haluekema꞉ mo Tekehali Yesu paa mea tiaeya꞉eki handea꞉ hali kone ana꞉ pa꞉la꞉me. Koto halita꞉ niki ame̱le̱ hata꞉ hoto paeyao Tekehali Yesu ame̱le̱ mandakena꞉ pomu haoma꞉ halie. Hande Dionima꞉ bapitaisi hau walea꞉ dina꞉ kini pu mea a꞉pa Yesu niki ame̱le̱ mandakena꞉ hamono kone ipiki hatuku mea hepeni nane a꞉meiyeke handoma꞉ pita꞉ pomu haoma꞉ hali koto hali homeke ma꞉nda꞉ta꞉ ana꞉ pa꞉la꞉me leekeme.   
\p
\v 23 Koto leeke handaa mo Ketiso wanda꞉halima꞉ hali yaapona꞉ biki lemekeme. Hali homeketa꞉ Diosepee. Ipika꞉ biki ma꞉nda꞉ta꞉ Basabasie. Koto hali kone pa tepo peao leeke bikita꞉ Diasedasi. Hali ma꞉nda꞉ta꞉ Madaiyasie.  
\v 24-25 Kotoeki peaata꞉ yeni dupa pimikime. Tekehalio. Wanda꞉hali paeyaona꞉ puki pa꞉ta꞉ ula꞉ haumanu paeyao nakana꞉ma꞉ handeleme. Kutu pele ekina꞉ Tekehalio. Do hali yaapo pa꞉ta꞉ta꞉ Diudasima꞉ta꞉ aposolo hali hata꞉ pokea꞉ e mina꞉pa꞉lao ipika꞉ halo pia꞉ alena꞉ peeke handaata꞉ koto eta꞉ hali epima꞉ mina꞉pe. Niki pa꞉ta꞉ nakana꞉ma꞉ walae.  
\v 26 Koto yeni peaata꞉ mo hali yaapona꞉ biki toopisiki yaapona꞉ wape peaata꞉ titina꞉ wape pea lopaeyeke halina꞉ biki Madaiyasi yeketa꞉ koto hali mimikime. Kutupa mo halita꞉ hande kiki yaapona꞉ ankena꞉ homeke pu aposolo haliweki ame̱le̱ ta꞉ma꞉ni pea haemekeme.   
\c 2  
\s1 Hande Holi Sipitidi epeekeeki  
\p
\v 1 Mo hande Pendikosi nate epeeke dina꞉ta꞉ mo pi mimiki wanda꞉hali paeyao homeke alena꞉ momba꞉la haemekeme.  
\v 2 Kuta kone oli ya nanema꞉ po tilipu tieke ipula꞉ tupa꞉ u̱ tieke laa a꞉paata꞉ mo wanda꞉hali momba꞉la pitimiki da pa꞉ta꞉ pua ota꞉ tumbaeyekeme.  
\v 3 Mo wanda꞉halima꞉ta꞉ mo ti ulekema꞉ handeke ekimanu handemekeme. Kutupa mo ti ulekema꞉ handekeeki manuma꞉ta꞉ telipeaaso hata꞉ iki paeyao pa꞉ta꞉ wataeyekeme.  
\v 4 Kutupa mo Holi Sipitidima꞉ iki paeyao tumba pitina꞉ mo wanda꞉hali paeyaoma꞉ pi ta꞉ta꞉ ta꞉ta꞉ lena꞉ leekeme.   
\p
\v 5 Yeni puluekema꞉ hone wimiki Diu haliwekita꞉ mo kenke paeyao nane hao pua mo Diutuseleme da pa꞉ta꞉ pua haemekeme.  
\v 6 Mo hande u tieke leekeeki opuaata꞉ wanda꞉hali wopu pua handemekeme. Hande kenke paeyao nane hao epemeke Diu haliwekima꞉ do pi mimiki haliwekima꞉ ika꞉ da pi ta꞉ta꞉ ta꞉ta꞉ kone laa lemekeeki opitolo hata꞉ta꞉ ikana꞉ma꞉  
\v 7 wotu penkilipa꞉tia pominolo hata꞉ta꞉ ika꞉ kone alota꞉ Do pi aleme haliweki paeyaota꞉ Ka꞉lili haliwekie.  
\v 8 Ikana꞉ma꞉ta꞉ nika꞉ da pimanu aleme ekita꞉ ekipa pa꞉la꞉pe laa alo hata꞉ alota꞉  
\v 9 Nikita꞉ Padia nane make Midia nane make Ilame nane make Mesopoteimia nane make Diudia nane make Ka꞉padosia nane make Pondasi nane make Eisia nane make  
\v 10 Pitikia nane make Pa꞉mbilia nane make Idiepi nane make mo Saitini teke pa꞉ta꞉ Libia nane make mandane haliweki Loma꞉ da hao epoloma꞉me laata꞉ nikita꞉ Diu haliweki make mo Diu haliwekina꞉ hau puluekema꞉ la꞉ka꞉la haloma꞉ Diendaili haliwekima꞉ make mandane ekita꞉  
\v 11 mo Kotiti A꞉teibia yaapo nane hao epoloma꞉ haliweki haloma꞉pateta꞉ Koda꞉ma꞉ hau tieke pa꞉la꞉ ekimanu mo haliwekima꞉ aleme ekita꞉ niki paeyaoma꞉ nika꞉ da pi ta꞉ta꞉ ta꞉ta꞉ piki pimanu kone opitoloma꞉me lemekeme.  
\v 12 Ikana꞉ma꞉ hone elekeeleke witolo hata꞉ penkilipa꞉tia pomua ika꞉ ika꞉ kone lota꞉ pea꞉tiki pitolo alota꞉ Do hau tieketa꞉ ekipa pa꞉la꞉pe laa lemekepate  
\v 13 mandane haliwekima꞉ mo pi mimiki haliweki pa꞉ta꞉ kitaaso hata꞉ alota꞉ Do haliwekima꞉ta꞉ hoke ikali naa keaaso pitelememe laa lemekeme.   
\s1 Pidama꞉ pi waleekeeki  
\p
\v 14 Kutupa Pidama꞉ mo hande 11 haliweki ame̱le̱ tiao hata꞉ wanda꞉hali pa꞉ta꞉ pi anekema꞉ alota꞉ Mo ya tapake Diu haliweki make do Diutuseleme teke da pa꞉ta꞉ hao haleme wanda꞉hali pa꞉ta꞉ make iki paeyao I̱ma꞉ lolua꞉ pita꞉ wotu opua꞉pa꞉pekee laata꞉  
\v 15 Mandane haliweki ika꞉ honema꞉ta꞉ do haliwekita꞉ hoke ikali naa keaaso pitelememe alemepate dia꞉me. Ameta꞉ pa 9 okoloko nate minolo haena꞉ kone haloma꞉me.  
\v 16 Dia꞉me. Do hauta꞉ amba꞉ mo potopede hali Diolema꞉ leekeeki dupa   
\q1
\v 17 Koda꞉ma꞉ alota꞉ Natemanu paeluekema꞉ haena꞉ta꞉ dupulueke laa  
\q1 Wanda꞉hali paeyao pa꞉ta꞉ yaka Holi Sipitidi hale hale pulueke.  
\q1 Kutupa ika꞉ weki manuma꞉ make wandiki manuma꞉ make yaka pi la꞉ mea hala꞉tiki pilimikie.  
\q1 Ika꞉ weki haliwekima꞉ mandane hau pita꞉la꞉ ekimanu handena꞉ lolueke.  
\q1 Kutupa ika꞉ koke haliwekima꞉ make upamanu pilimikie.   
\q1
\v 18 Aowe. Koto nate manuna꞉ I̱ma꞉ yaka Holi Sipitidi hale hale pua꞉ka꞉na꞉ta꞉  
\q1 yaka e pokao haleme wanda꞉halima꞉ kone yaka pi la꞉ mea hala꞉tiki pilimikie.   
\q1
\v 19 Oli ya nane make oni kenke nane make mo na hando haleme wele pita꞉la꞉ ekimanu pulueke.  
\q1 Kutupa we make ti uleke make lumu tieke make handilimikie.   
\q1
\v 20 Oli nateta꞉ na teke timba꞉ lelieke. Oli sumba꞉ make we pupa pelieke.  
\q1 Kutupa koto hoki naneta꞉ mo hande Tekehalina꞉ pa̱a̱ pita꞉la꞉ Nate Tieke ipilieke.   
\q1
\v 21 Koto di ipula꞉ naneta꞉ hali epima꞉ Tekehalina꞉ biki alo hata꞉ wi lea꞉ka꞉na꞉ta꞉  
\q1 kota꞉ koto someta꞉ Tekehalima꞉ da꞉taena꞉ loluekema꞉ petelelieke laa leekeme.   
\p
\v 22 Isulai haliwekio. I̱ma꞉ do alo pi opua꞉pa꞉peke. Hande Na꞉sa꞉tete hali Yesuta꞉ iki ame̱le̱ a꞉pa hata꞉ta꞉ Koda꞉ma꞉ wele peaaso haena꞉ Yesuma꞉ na hando haloma꞉ ekimanu make wele pita꞉la꞉ ekimanu make ipikana꞉ma꞉ pitolo haena꞉ Koda꞉ma꞉ ipikita꞉ I̱ma꞉ tapaalo halie laa peneme yatiki pia꞉me. Kutupa do haumanu paeyao ika꞉ hone wilimime leekeme.  
\v 23 Amba꞉ kone Koda꞉ma꞉ hone wiaata꞉ Yesuta꞉ ikana꞉ma꞉ milimikie laa pi la꞉ wiekeme. Kutupa ikana꞉ma꞉ta꞉ mo hoke hau pu haleme haliwekima꞉ Yesuta꞉ hande a꞉ka꞉tei wapepiki tina꞉ ikokoma꞉ tamendiaena꞉ lemeke ekima꞉ ikana꞉ma꞉ kone Yesu limikime.  
\v 24 Kutu pimipate Koda꞉ma꞉ mo hande toopi ka꞉ka꞉na꞉ pa꞉ta꞉ Yesu paa mea tiaeyekeme. Mo hande lapa꞉ pimiki toopima꞉ta꞉ Yesu miniki pita꞉peke ana꞉ na pitolo hata꞉ mo hande homaasa꞉ ekima꞉ Yesu tonkaeyeke ekita꞉ Koda꞉ma꞉ ka꞉la꞉pa꞉ tapawaeyekeme.  
\v 25 Deipidima꞉ ipiki pa꞉ta꞉ doeki la꞉leke handa loa꞉me.  
\q1 Tekehali hoto paeyao I̱ yaapo hala꞉eki handolome. Ma꞉nda꞉ma꞉ I̱ la꞉ma꞉ la꞉ma꞉ peaapa꞉na꞉yeke yaka popeke kiki nane hala꞉me.   
\q1
\v 26 Koto ekina꞉ yaka pukima꞉ ta꞉na꞉ma꞉ homolo hata꞉ ya kakema꞉ make ta꞉na꞉piki pimanu lo halome.  
\q1 Kutupa make I̱ta꞉ pa kenke hali halopate kone mo epekeeki muluekema꞉ handeteke halueke.   
\q1
\v 27 Pa ekipeke nakana꞉ma꞉ yaka temokota꞉ mo homemeke wanda꞉hali haleme alena꞉ na haena꞉ lelipikie.  
\q1 Kutupa naka꞉ yakopiki halita꞉ oni kenke pa꞉ta꞉ na tandepena꞉ lelipikiyeke loa꞉me.   
\q1
\v 28 Mo hande da꞉ta꞉ lolo pa꞉la꞉ pota꞉ta꞉ I̱ pa꞉ta꞉ amba꞉ waleme. Kutupa nakana꞉ma꞉ I̱ yaapo hale ekina꞉ta꞉ ta꞉na꞉ma꞉ homa꞉la꞉ ekima꞉ I̱ pa꞉ta꞉ tumbaala꞉me laa la꞉la꞉me leekeme.   
\p
\v 29 Kametitio. Iki pa꞉ta꞉ mo nika꞉ apa꞉ Deipidina꞉ do ota꞉ pimanu alome. Ipikita꞉ amba꞉ kone homeeke handa mea hoimikipate pa ame make hande hoimiki alena꞉ hando haloma꞉me.  
\v 30 Deipidima꞉ta꞉ potopede hali hata꞉ta꞉ hande Koda꞉ma꞉ ipiki pa꞉ta꞉ pi la꞉ wiekeeki piekeme. Koda꞉ma꞉ ipiki pa꞉ta꞉ pi la꞉ witolo alota꞉ Naka꞉ hoki nane halo pa꞉la꞉ hali homeketa꞉ neke kini hali hale tupa꞉ mea haena꞉ lolueke laa la꞉la꞉me.  
\v 31 Kutupa Deipidima꞉ Koda꞉ma꞉ pulu piekeeki hone witolo hata꞉ hande Ketiso paa tiaalo piekeeki pa꞉ta꞉ dupa leekeme.  
\q1 Nakana꞉ma꞉ mo homemeke wanda꞉hali haleme alena꞉ yaka temoko na haena꞉ lelipikie.  
\q1 Kutupa naka꞉ yakopiki halita꞉ oni kenke pa꞉ta꞉ na tandepo lo pa꞉la꞉ ekina꞉ loa꞉me la꞉la꞉me leekeme.   
\p
\v 32 Do hande Yesuta꞉ Koda꞉ma꞉ paa mea tiaala꞉ ekita꞉ niki paeyaoma꞉ handoma꞉eki iki pa꞉ta꞉ la kitoloma꞉me.  
\v 33 Ipika꞉ Apa꞉ Koda꞉ma꞉ la꞉ wieke tupa꞉ Yesuta꞉ mea tiao ipika꞉ popeke kiki nane mea pitaota꞉ ipiki pa꞉ta꞉ Holi Sipitidi haleekeme. Kutupa nikana꞉ma꞉ ame do handoloma꞉ ekimanu make do opitoloma꞉ ekimanu tonka꞉na꞉ ipiki pa꞉ta꞉ ipula꞉me.  
\v 34 Deipidima꞉ta꞉ oli ya nane na a꞉meiyekepate pa ipikana꞉ma꞉ alota꞉  
\q1 Mo Tekehalima꞉ yaka Tekehali pa꞉ta꞉ alota꞉   
\q1
\v 35 I̱ma꞉ mo naka꞉ a꞉nda꞉ tunkuliki wanda꞉halita꞉ naka꞉ anke tapa꞉pao pituelena꞉ loluekema꞉ nakana꞉ma꞉ ame do yaka popeke nane kikina꞉ pitie laa la꞉la꞉me leekeme.   
\p
\v 36 Koto ekina꞉ Isulai wanda꞉hali paeyao do hande ikana꞉ma꞉ a꞉ka꞉tei wapepiki tina꞉ tamendiao limiki hali Yesuta꞉ Koda꞉ma꞉ ipikita꞉ Tekehali make Ketiso make mea haena꞉ la꞉la꞉ ekita꞉ ikana꞉ma꞉ hone ota꞉ wopu wia꞉pa꞉peke laa leekeme.   
\p
\v 37 Mo wanda꞉halima꞉ koto pi opuaata꞉ ika꞉ puki pa꞉ta꞉ aweeke handaa Pida pa꞉ta꞉ make mandane aposolo haliweki pa꞉ta꞉ make alota꞉ Kametitio. Nikana꞉ma꞉ eki peomonope laa lemekeme.  
\v 38 Koto lemeke handaa Pidama꞉ iki pa꞉ta꞉ alota꞉ Koda꞉ma꞉ ika꞉ hoke hau peleme ekimanu pa paeyaena꞉yeke hone ma꞉nda꞉ la꞉ka꞉la꞉ mina wiaata꞉ Yesu Ketisona꞉ bikina꞉ bapitaisi hau pea꞉pa꞉peke. Kutu pimika꞉na꞉ta꞉ Koda꞉ma꞉ kilie aleta꞉ mo Holi Sipitidi kilieke.  
\v 39 Pa ekipeke mo hande Koda꞉ma꞉ pi la꞉ wieke ekita꞉ iki pa꞉ta꞉ make ika꞉ weki wandiki pa꞉ta꞉ make mo papate haleme wanda꞉hali pa꞉ta꞉ make pa mo Tekehalima꞉ ipiki pa꞉ta꞉ kone epena꞉ wi ala꞉ wanda꞉hali paeyao pa꞉ta꞉ta꞉ make ipikana꞉ma꞉ pi la꞉ wiekeme laa leekeme.   
\p
\v 40 Pidama꞉ koto tupa꞉ pi walaata꞉ pa mandane pimanu make mea a꞉meiyao alota꞉ Do hoke wanda꞉hali hoeyaaluekema꞉ ipilie panisima꞉ iki tonka꞉na꞉ hoeyaapa꞉na꞉ ota꞉ paapa꞉peke.  
\v 41 Koto leeke handa wanda꞉hali wopuma꞉ Pidama꞉ waleeke pi opuaata꞉ bapitaisi hau pimikime. Paeyaota꞉ 3 daoseni wanda꞉hali tupa꞉ koto natena꞉ mo hande pi minolo hata꞉ mo Ketiso wanda꞉hali ame̱le̱ apa꞉tao hao haemekeme.  
\v 42 Mo wanda꞉halima꞉ta꞉ hande aposolo haliwekima꞉ waleme pimanu opua꞉tiki peaata꞉ Ketiso wanda꞉hali ame̱le̱ momba꞉la꞉tiki peaata꞉ yeni pea ne na꞉tiki pimikime.   
\s1 Ketiso wanda꞉halina꞉ haemeke hau  
\p
\v 43 Kutupa Koda꞉ma꞉ wele peaaso haena꞉ mo aposolo haliwekima꞉ na hando haemeke ekimanu wotu pimiki handaa wanda꞉hali paeyaoma꞉ paala꞉ma꞉ homemekeme.  
\v 44 Mo hande pi mimiki wanda꞉hali paeyaoma꞉ wotu ta꞉ma꞉ni pea hata꞉ ika꞉ wia haemeke alemanu paeyao telipea pimikime.  
\v 45 Ika꞉ kenkemanu o damanu make ika꞉ ala꞉ta꞉ ala꞉ta꞉ make ma꞉nda꞉ma꞉ hambena꞉ laata꞉ mani meata꞉ mo iki ame̱le̱ mani dia꞉yeke wanda꞉halimanu pa꞉ta꞉ telipaemekeme.  
\v 46 Nate paeyao mo tembolo da tukiki pa꞉ta꞉ homeke alena꞉ momba꞉la꞉tiki peaata꞉ ika꞉ da pa꞉ta꞉manu make mandake pa꞉ta꞉ pita꞉ ne na꞉tiki pimikime. Homu pea hata꞉  
\v 47 Koda꞉na꞉ pi laaso hata꞉ kutu pimikime. Kutupa wanda꞉hali paeyaoma꞉ make iki pa꞉ta꞉ ta꞉na꞉ma꞉ homa꞉tiki pimikime. Koto ekina꞉ nate paeyao Tekehalima꞉ mo da꞉taena꞉yeke pi mimiki wanda꞉hali iki ame̱le̱ haena꞉yeke mea ta꞉ma꞉ni peao haena꞉ la꞉tiki piekeme.   
\c 3  
\s1 Mo hande anke hoke hali mea epeaeyekeeki  
\p
\v 1 Kutupa Pida Dioni yaapota꞉ ipilika꞉ yeni pu haepeke nate lekena꞉ 3 okoloko nate oni pambolo pulu haena꞉ oli tembolo da pa꞉ta꞉ yeni puluekema꞉ pepekeme.  
\v 2 Kutupa hali homeke mendieke pa꞉ta꞉ kone pota꞉ ota꞉ pomua꞉peke na yeke hali nate paeyao mea tia pua꞉tiki pea mo tembolo da pota꞉ kake bikita꞉ Seliapopiki Pota꞉ Kake koto pa꞉ta꞉ mo tembolo da tukiki pa꞉ta꞉ yopua꞉tiki pimiki wanda꞉hali pa꞉ta꞉ mani ma꞉nda꞉ kipee laa honke la꞉tiki pina꞉ yeke pua tu wia꞉tiki pimikime.   
\p
\v 3 Mo hande pota꞉ pua꞉peke na yeke halima꞉ta꞉ Pida Dioni yaapo mo tembolo da pa꞉ta꞉ honda꞉ pambuluekema꞉ haena꞉ alota꞉ Mani ma꞉nda꞉ kipee laa honke leekeme.  
\v 4 Koto leeke Pida Dioni yaapoma꞉ mo hande hali handa꞉moneaaso hata꞉ Pidama꞉ alota꞉ Diki handa꞉e leekeme.  
\v 5 Mo hande pota꞉ pomua꞉peke na yeke halima꞉ hone witolota꞉ do hali yaapoma꞉ ala꞉ta꞉ ma꞉nda꞉ ota꞉ kilieke hone witolo hata꞉ mo hali yaapo ota꞉ wopu handa꞉hake wiekepate  
\v 6 Pidama꞉ alota꞉ I̱ta꞉ kolo o silipamanu make ma꞉nda꞉ dia꞉ya꞉la꞉pate I̱ma꞉ wia halo aleta꞉ kionoe. Mo Na꞉sa꞉tete hali Yesu Ketisona꞉ bikina꞉ loa꞉ma꞉ pota꞉ pue leekeme.  
\v 7 Kutupa Pidama꞉ popeke nane kiki mina mea a꞉meiyaeyekeme. Kutupa koto kone mo halina꞉ anke ma̱lekemanu honkopu honkopu hao hayekeme.  
\v 8 Kutupa mo hande hali tialu bao anke hao peekeme.  
\p Kutupa mo hali yaapo ame̱le̱ mo tembolo da pa꞉ta꞉ puaata꞉ mo hande pota꞉ pua꞉peke na yeke halita꞉ pua꞉tiki ponka꞉da꞉da꞉ pua꞉tiki pitolo hata꞉ Koda꞉na꞉ biki make mea a꞉meiyatiki peekeme.  
\v 9 Kutupa da pa꞉ta꞉ pitimiki wanda꞉halima꞉ mo hande hali yopulu hata꞉ Koda꞉na꞉ biki mea a꞉meiyatiki yapeekeeki handemekeme.  
\v 10 Kutupa mo wanda꞉halima꞉ hone wimikime. Do halita꞉ mo hande tembolona꞉ Seliapopiki Pota꞉ Kake pa꞉ta꞉ pita꞉ mani honke lo hala꞉ halie hone wimikime. Kutupa puki keapa anemone pitolo haena꞉ alota꞉ Do halita꞉ ekipa pa꞉la꞉pe lemekeme.   
\s1 Pidama꞉ tembolo da pa꞉ta꞉ pi waleekeeki  
\p
\v 11 Mo hande halima꞉ Pida Dioni yaapona꞉ kiki pa wia haena꞉ iki tepota꞉ mo tembolona꞉ kalale ma꞉nda꞉ biki Solomonona꞉ Kaputa꞉ haemekeme. Kutupa mo wanda꞉hali paeyao leke opo handa꞉hake witolo hata꞉ koto pa꞉ta꞉ anke hao pua mombelemekeme.  
\v 12 Pidama꞉ doeki handa mo haliweki pa꞉ta꞉ alota꞉ Isulai haliwekio. Do ekina꞉ ekipeke leke opo handa꞉hake wia yopilimipe o diki make ekipeke handa꞉hake witemepe. Dikana꞉ma꞉ dika꞉ wele pita꞉la꞉ ekina꞉ o nika꞉ yakopiki hauma꞉ do hali mea pota꞉ pena꞉ lolopa꞉pe leekeme.  
\v 13 Eipoloha꞉ma꞉ Aisa꞉ke Dieikope ika꞉ Koda꞉ta꞉ nika꞉ apa꞉ titina꞉ Koda꞉ma꞉ kone mo wele pita꞉la꞉eki ipika꞉ e pokaeyeke hali Yesuna꞉ biki mea a꞉meiyaaso hata꞉ haleekeme. Kutu pa꞉la꞉pate ikana꞉ma꞉ Pailedi pa꞉ta꞉ luekema꞉ hatuku pua Pailedima꞉ta꞉ paa pena꞉ loluekema꞉ taapolo haena꞉ kone ikana꞉ma꞉ luekema꞉ taapeme hali ipikina꞉ loa꞉me.  
\v 14 Kutu pa꞉la꞉pate ikana꞉ma꞉ Epeke Yakopiki Hali kiao pa Pailedi pa꞉ta꞉ lota꞉ pitolo alota꞉ Ika꞉ hone pa꞉la꞉ ekita꞉ mo hande hali lita꞉la꞉ hali kone pa pena꞉ lae lememe leekeme.  
\v 15 Ikana꞉ma꞉ mo da꞉taasa꞉ hali limipate Koda꞉ma꞉ mea tiaeyekeme. Kutupa nikana꞉ma꞉ wekitisi do halualu pitoloma꞉ handa꞉e leekeme.  
\v 16 Mo hande ipika꞉ bikina꞉ wele pita꞉la꞉ ekima꞉ mo pota꞉ pomua꞉peke na yeke hali honkopu haena꞉ lopa꞉me. Ame do handeleme ekita꞉ mo hande ipika꞉ hone tulaasa꞉ ekima꞉ pita꞉la꞉me. Ame do handeleme ekita꞉ Yesu pa꞉ta꞉ hone tulaasa꞉ ekima꞉ ipiki epeaala꞉me leekeme.   
\p
\v 17 Ya kametitio. Ikana꞉ma꞉ make ika꞉ you haliwekima꞉ tonka꞉na꞉ Yesu pa꞉ta꞉ pimiki ekita꞉ teke na handa꞉ wiki hata꞉ pimi ekita꞉ I̱ma꞉ hone witolome.  
\v 18 Amba꞉ kiaake Koda꞉ma꞉ta꞉ ipika꞉ Ketisona꞉ tanda mulu pa꞉la꞉eki mo potopede haliweki paeyaoma꞉ la hale hale pina꞉ leekeme. Kutupa hande Koda꞉ma꞉ la꞉ wiekeeki kone ota꞉ yao ikana꞉ma꞉ do pimime.  
\v 19 Koto pa꞉la꞉ ekina꞉ ika꞉ hoke hau peleme ekimanu Koda꞉ma꞉ honi mea baena꞉yeke ikana꞉ma꞉ hone ma꞉nda꞉ la꞉ka꞉la꞉ mina wiaata꞉ Koda꞉ pa꞉ta꞉ la꞉ka꞉la꞉ mina pua꞉pa꞉peke.  
\v 20 Dupimika꞉na꞉ta꞉ ika꞉ temoko manuna꞉ honkopu ha tiaasa꞉eki Koda꞉ma꞉ kiaata꞉ kutupa Yesuta꞉ Koda꞉ma꞉ amba꞉ mea ika꞉ Ketiso hali haena꞉ leeke hali iki pa꞉ta꞉ tapaalieke.  
\v 21 Yesuta꞉ hepeni nane pua hao hala꞉pate Koda꞉ma꞉ ala꞉ta꞉ ala꞉ta꞉ paeyao panake ekimanu wopulu pa꞉la꞉ nate handeteke hala꞉me. Amba꞉ kiaake Koda꞉ma꞉ ipika꞉ yakopiki potopede haliwekima꞉ la hale hale pieke tupa꞉ loa꞉me.  
\v 22 Mosesima꞉ dupa leekeme. Ika꞉ Koda꞉ hande Tekehalima꞉ I̱ tapaeya꞉ tupa꞉ iki pa꞉ta꞉ make potopede hali ma꞉nda꞉ tapaalieke. Koto halita꞉ ika꞉ tapake hali kone tapaalieke. Ipikana꞉ma꞉ eki pimanu iki pa꞉ta꞉ lea꞉ka꞉na꞉ta꞉ ota꞉ opua꞉pa꞉peke.  
\v 23 Hali epima꞉ mo hande potopede halima꞉ lelie pi na opia꞉ka꞉na꞉ta꞉ koto halita꞉ Koda꞉na꞉ wanda꞉hali ame̱le̱ ta꞉ma꞉ni pea na hake Koda꞉ma꞉ hoeyaalieke leekeme.   
\p
\v 24 Kutupa make mo potopede haliwekima꞉ta꞉ Samuele make ipika꞉ hoki nane haemeke potopede haliweki make pi la꞉ mea hala꞉pa꞉peke yeeke haliweki paeyaoma꞉ta꞉ ame do pitoloma꞉ haumanu kone amba꞉ la hale hale pimikime.  
\v 25 Mo potopede haliwekima꞉ Koda꞉ma꞉ la꞉ wieke pimanu la hale hale pimiki ekita꞉ ika꞉eki kone ula꞉me. Kutupa make Koda꞉ma꞉ ika꞉ apa꞉mei ameda ame̱le̱ pi la꞉ wieke ekita꞉ iki pa꞉ta꞉ make la꞉ ula꞉me. Koda꞉ma꞉ Eipoloha꞉ma꞉ pa꞉ta꞉ leeke tupa꞉ dupae. Naka꞉ hoki nane monduma꞉ monduma꞉ pilimi wanda꞉halima꞉ kenke wanda꞉hali paeyao I̱ma꞉ epeaalueke laa leekeme.  
\v 26 Koto ekina꞉ Koda꞉ma꞉ ipika꞉ e pokaasa꞉ hali mea haena꞉ laata꞉ iki pa꞉ta꞉ amba꞉la tapaeyekeme. Koto tapake hauta꞉ iki epeaaluekema꞉ piekeme. Ikana꞉ma꞉ ika꞉ hoke haumanu mina꞉pa꞉lao ika꞉ puki ipikana꞉ma꞉ la꞉ka꞉laasa꞉ ekima꞉ iki epeaaluekema꞉ piekeme laa leekeme.   
\c 4  
\s1 Pida Dioni yaapo ka̱le̱sete haliwekina꞉ leke popelekena꞉ haepekeeki  
\p
\v 1 Pida Dioni yaapoma꞉ mo wanda꞉hali pa꞉ta꞉ pi alo haena꞉ yeni peao haemeke haliweki make mo tembolo da handeteke hayeke you hali make Sa꞉dusi haliweki make mo hali tepo pa꞉ta꞉ epemekeme.  
\v 2 Pida Dioni yaapoma꞉ Yesuna꞉ bikina꞉ hande homa paa tiaalo poloma꞉eki wanda꞉hali pa꞉ta꞉ walepeke handa mo haliwekima꞉ mineke pankolo hata꞉  
\v 3 iki tepo ta꞉nka꞉pa꞉ mina timba꞉ amba꞉ leeke handa da ka꞉la꞉paaso pi yokaalu puluekema꞉ dipula pitaemekeme.  
\v 4 Kutu piekepate mo pi opimiki wanda꞉halita꞉ pi mimikime. Kutupa mo haliwekita꞉ 5000manu yekeme.   
\p
\v 5 Da ma꞉nda꞉ kelepeeke ika꞉ you haliwekita꞉ kutupa tondiki haliweki make wape pea wala꞉tiki pu haemeke haliweki make Diutuseleme pa꞉ta꞉ manda꞉hande manda꞉hande pu alu alu pimikime.  
\v 6 Wanda꞉halina꞉ yeni peao haemeke you haliwekina꞉ you hali A꞉nasi kutupa Kaiya꞉pasi Dioni make A꞉lekesa꞉nda kutupa yeni peao haemeke you haliwekina꞉ you halina꞉ tapake haliweki make mombelemekeme.  
\v 7 Mo haliwekima꞉ mo aposolo haliweki pa꞉ta꞉ alota꞉ Eki wele pita꞉la꞉ ekima꞉ o eki bikina꞉ doeki pitelepepe lemekeme.   
\p
\v 8 Kutupa Pidata꞉ Holi Sipitidima꞉ tumba hake halima꞉ alota꞉ Wanda꞉halina꞉ you haliweki pita꞉ tondiki haliweki yaapoo.  
\v 9 Do dikana꞉ma꞉ koto anke hoke hali mea epeaalopa꞉eki pa꞉ta꞉ loa꞉me. Ikana꞉ma꞉ diki pa꞉ta꞉ lota꞉ pitolo alota꞉ Do halita꞉ ekipa mea epeao pipipe alemepe.  
\v 10 Iki paeyao mo Isulai wanda꞉hali make doeki opua꞉pe. Na꞉sa꞉tete hali Yesu Ketisota꞉ ikana꞉ma꞉ limipate Koda꞉ma꞉ paa mea tiaeyeke hali ipika꞉ bikina꞉ do hali epeke tupa꞉ tiao honkopu hao do hala꞉ handa꞉e leekeme.  
\v 11 Pa ekipeke Yesu pa꞉ta꞉ta꞉ mo Baiboloma꞉ alota꞉  
\q1 Koto toopita꞉ iki mo da a꞉eteleme haliwekima꞉ kipa꞉la꞉me lemepate pa ameta꞉ koto toopi kone mo keneme toopi pa ula꞉me laa la꞉la꞉me.   
\p
\v 12 Kutupa niki mea detemono pa꞉ta꞉la꞉la꞉ hali ma꞉nda꞉ na hala꞉me. Oli ya oto pa꞉ta꞉ta꞉ mo wanda꞉hali mea da꞉taasa꞉ halina꞉ biki ma꞉nda꞉ dia꞉ya꞉leke loa꞉me leekeme.   
\p
\v 13 Mo haliwekima꞉ Pida Dioni yaapoma꞉ paala꞉ na homepekeeki handolo hata꞉ koto hali yaapoma꞉ sukuluna꞉ make na pepeke ota꞉ pa da haepeke hali yaapoe laata꞉ kota꞉ ikana꞉ma꞉ leke opa꞉ alu alu pea kutupa hone witolota꞉ Yesu ame̱le̱ pomu hata꞉ pa꞉la꞉ma꞉ hone wimikime.  
\v 14 Kutupa mo hande mea tiao hayeke halita꞉ koto hali yaapo ame̱le̱ hayeke eki handolo hata꞉ pi ma꞉nda꞉ laapeke na yeekeme.  
\v 15 Koto ekina꞉ mo hali tepo pa꞉ta꞉ alota꞉ Do ka̱le̱sete da mina꞉pa꞉lao pupe laata꞉ mo haliwekima꞉ ika꞉ ika꞉ kone alota꞉  
\v 16 Do hali yaapo pa꞉ta꞉ta꞉ eki pumana꞉pe lemekeme. Oni Diutuseleme pa꞉ta꞉ haleme wanda꞉halima꞉ mo ota꞉ na hando haloma꞉eki ma꞉nda꞉ tieke pipikieki amba꞉ opua wilimime. Nikana꞉ma꞉ yapi alo alepeme pi lapeke na ya꞉la꞉pate  
\v 17 pa do hau pita꞉la꞉ ekita꞉ mo wanda꞉hali pa꞉ta꞉ sa꞉mba꞉la꞉pa wiaapa꞉na꞉ do hali yaapo pa꞉ta꞉ Mo hande bikina꞉ wanda꞉hali pa꞉ta꞉ ota꞉ paa na wala꞉pa꞉peke laa pi taka꞉lakema꞉ lomana꞉e lemekeme.   
\p
\v 18 Koto ekina꞉ Pida Dioni yaapo wi la alota꞉ Do wanda꞉hali pa꞉ta꞉ Yesuna꞉ biki laa ala꞉ta꞉ ma꞉nda꞉ o pi ma꞉nda꞉ na wala꞉pa꞉pekee lemekeme.  
\v 19 Koto leeke Pidama꞉ alota꞉ Koda꞉na꞉ leke popelekena꞉ hata꞉ ikana꞉ma꞉ aleme pi opua pita꞉la꞉ ekita꞉ a꞉pa꞉la꞉pe o Koda꞉na꞉ pi opua pita꞉la꞉ ekita꞉ a꞉pa꞉la꞉pe. Ika꞉ hone wia pi hotia꞉pa꞉peke lepekeme.  
\v 20 Dikana꞉ma꞉ handopa꞉eki make opupa꞉eki make pa wala꞉peke ya꞉la꞉me leekeme.  
\v 21 Kutupa wanda꞉hali paeyaoma꞉ kutu piekeeki hando hao Koda꞉na꞉ pi laemeke handa hali yaapo panisi peaapeke na yeke pi taka꞉lakema꞉ paa laata꞉ da pena꞉ tapaemekeme.  
\v 22 Mo hande mea tiaeyeke halita꞉ ipika꞉ anke hoeya u pitina꞉ yapeeke bapita꞉ 40 tupa꞉ amba꞉ paeyekeme.   
\s1 Ketiso wanda꞉halima꞉ Koda꞉ma꞉ ika꞉ puki hana꞉ nokepena꞉yeke yeni pimikieki  
\p
\v 23 Pida Dioni yaapota꞉ lomba꞉ tapaeyeke pita꞉ta꞉ kuta kone ipilikana꞉ma꞉ ipilika꞉ wanda꞉hali pa꞉ta꞉ la꞉ka꞉la puaka꞉na꞉ mo hande yeni peao haemeke teke haliwekima꞉ make mo tondiki haliwekima꞉ make lemekeeki mo wanda꞉hali pa꞉ta꞉ la halepekeme.  
\v 24 Koto lepeke pi opuaata꞉ mo wanda꞉halima꞉ homeke hone wia Koda꞉ pa꞉ta꞉ yeni pitolo alota꞉ Tekehalio. Neketa꞉ ya kenke dawala tepo make kutupa koto pa꞉ta꞉ ula꞉ alemanu paeyao make nakana꞉ma꞉ wepia wina꞉ lele halie laata꞉  
\v 25 Nika꞉ apa꞉mei hali Deipidita꞉ naka꞉ e pokaeyeke hali haena꞉ma꞉ nakana꞉ma꞉ Holi Sipitidima꞉ pu tiaaso haena꞉ kone ipikana꞉ma꞉ alota꞉  
\q1 Diendaili wanda꞉halima꞉ ekipeke mineke soka꞉la꞉ma꞉ homemekepe.  
\q1 Wanda꞉halima꞉ ekipeke pa hameke kone a꞉nda꞉ lombemekepe.   
\q1
\v 26 Do kenkena꞉ kini haliwekima꞉ tikitiki yao hata꞉ mo you haliweki ame̱le̱ momba꞉laata꞉  
\q1 mo Tekehali pa꞉ta꞉ make ipika꞉ Ketiso pa꞉ta꞉ make mea lopaaluekema꞉ tiao haemekeme leekeme.   
\p
\v 27 Ota꞉ leekeme laata꞉ Do daoni tieke pa꞉ta꞉ Hetodi pita꞉ Pontiasi Pailedi yaapoma꞉ make mo Diendaili haliweki pita꞉ Isulai wanda꞉hali ame̱le̱ make paeyaoma꞉ momba꞉laata꞉ naka꞉ yakopiki E Pokaeya꞉ Halita꞉ hande Ketiso haena꞉ lele hali Yesu mea lopaaluekema꞉ tiao haememe.  
\v 28 Ikana꞉ma꞉ momba꞉la hata꞉ kotoeki puluekema꞉ pimikipate nakana꞉ma꞉ naka꞉ hone wia naka꞉ wele pa꞉la꞉ ekima꞉ amba꞉ kone dupilimikie laa pina꞉ leleme.  
\v 29 Kutupa Tekehalio. Ameta꞉ niki paala꞉ma꞉ homomono alemeeki nakana꞉ma꞉ opuaata꞉ niki naka꞉ e pokaasoma꞉ haliwekima꞉ naka꞉ pita꞉ puki taka꞉lao hata꞉ lamono lapeke laata꞉  
\v 30 Wanda꞉halina꞉ yenimanu tande laluekema꞉ naka꞉ kiki tindipao hata꞉ka꞉na꞉ wele pita꞉la꞉ ekimanu make na hando haloma꞉ ekimanu make naka꞉ yakopiki E Pokaasa꞉ Hali Yesu ipika꞉ bikina꞉ pina꞉ lapeke laa lemekeme.   
\p
\v 31 Yeni pu paeyeketa꞉ ika꞉ mo hande mombelemeke da kone la꞉ma꞉ la꞉ma꞉ piekeme. Koto pa꞉ta꞉ pitimiki wanda꞉hali paeyaota꞉ Holi Sipitidi tumba pituma꞉ pituma꞉ piekeme. Kutupa Koda꞉na꞉ pita꞉ ikana꞉ma꞉ puki taka꞉lao hata꞉ lemekeme.   
\s1 Ala꞉ta꞉ ala꞉ta꞉ paeyao mandakena꞉eki  
\p
\v 32 Kutupa mo hande pi mimiki wanda꞉hali paeyaoma꞉ hone homeke hau homeke wia haemekeme. Kutupa hali ma꞉nda꞉ma꞉ ipika꞉ wieke ala꞉ta꞉ ala꞉ta꞉ ota꞉ yakaeki homekee lapeke na yekeme. Homekema꞉ wieke ala꞉ta꞉ pea꞉na꞉eki yekeme.  
\v 33 Kutupa wele pita꞉la꞉eki tiekema꞉ta꞉ mo aposolo haliwekima꞉ Yesu Ketisona꞉ tiaeya꞉ ekina꞉ wekitisi halu alu pea kutupa Koda꞉na꞉ a꞉ta꞉ma꞉ homa꞉la꞉ ekita꞉ mo wanda꞉hali paeyao pa꞉ta꞉ pitiekeme.  
\v 34-35 Kutu piekepate iki paeyaota꞉ ala꞉ta꞉ ala꞉ta꞉ paeyao ana꞉na꞉ wimikime. Mo hande tapake wanda꞉hali paeyaoma꞉ta꞉ ika꞉ da make ika꞉ kenke make hali ma꞉nda꞉ma꞉ hambena꞉ laata꞉ koto mani ki la꞉ meaata꞉ mo aposolo haliwekina꞉ anke teke pa꞉ta꞉ a꞉pa wia꞉tiki pimikime. Kutupa mo manita꞉ aposolo haliwekima꞉ meaata꞉ Ketiso wanda꞉hali pa꞉ta꞉ ana꞉na꞉ telipatiki pimikime.   
\p
\v 36 Kutupu haemekepate hali ma꞉nda꞉ta꞉ Diosepe hayekeme. Koto halita꞉ Lipae tapake hali hayekepate ipiki mendiki hauta꞉ Saipotasi nane mendieke halie. Aposolo haliwekima꞉ mo halina꞉ biki ma꞉nda꞉ Banabasi lemekeme. Mo biki lemeke ekina꞉ pi napeketa꞉ dupae. Honkopu haena꞉ Sutiaasa꞉ Halie la kone lemekeme.  
\v 37 Koto hali ipikana꞉ma꞉ta꞉ ipika꞉ kenkesiki ma꞉nda꞉ hali ma꞉nda꞉ma꞉ hambena꞉ laata꞉ koto mieke mani mea a꞉paata꞉ aposolo haliweki pa꞉ta꞉ haleekeme.   
\c 5  
\s1 A꞉na꞉naisi Sapaita yaapo  
\p
\v 1 Kutu piekepate A꞉na꞉naisi ipika꞉ wanda꞉ Sapaita yaapo ipilika꞉ kenketa꞉ ma꞉nda꞉ma꞉ hambena꞉ lepekeme.  
\v 2 Kutupa mo hande mipiki manita꞉ mandaneeki ipilika꞉ hone wia mea panka꞉ wiaata꞉ mandaneeki ipikana꞉ma꞉ mo hande aposolo haliweki pa꞉ta꞉ mea epeekeme.  
\v 3 Kutu piekepate Pidama꞉ alota꞉ A꞉na꞉naisio. Ekipeke Holi Sipitidi pa꞉ta꞉ yayapiki pi alepe leekeme. Sadani naka꞉ you pa꞉ta꞉ a꞉pa pita꞉ka꞉na꞉ mo naka꞉ kenkena꞉ mele manita꞉ pa ekipeke mandaneeki panka꞉ wina꞉ laa pipe leekeme.  
\v 4 Amba꞉ nakana꞉ma꞉ wia hae dina꞉ta꞉ naka꞉eki na yekepe leekeme. Kutupa mo hambena꞉ le dina꞉ make mo manita꞉ naka꞉ honkopuna꞉ kone na pelepe leekeme. Nakana꞉ma꞉ hali pa꞉ta꞉ yayapiki hau na pelepate Koda꞉ pa꞉ta꞉ kone peleme. Do hauta꞉ ekipa handa꞉ wia pelepe leekeme.  
\v 5 Do leeke ekimanu opuaata꞉ A꞉na꞉naisi kenkena꞉ honda꞉pa lopa homeekeme. Kutupa koto hao yapeeke haliwekima꞉ doeki opimiki haliwekima꞉ make paala꞉ma꞉ homolo hata꞉ leke opo handa꞉hake wimikime.  
\v 6 Kutupa pa꞉pa꞉na꞉ wekitonu a꞉pa ipika꞉ toko mea dauma꞉ tonkao hoilu pemekeme.   
\p
\v 7 Hosiki pitu pitu pea mo awa tepomanu paeyeke ipika꞉ wanda꞉ mo hande pieke ekimanu hone make na wiki honda꞉ pambolo epeekeme.  
\v 8 Pidama꞉ mo wanda꞉ pa꞉ta꞉ alota꞉ Mo ipilika꞉ kenke hambena꞉ lepe mani manuta꞉ ota꞉ dupiki wopu mipipe leeke mo wanda꞉ma꞉ alota꞉ Aowe. Koto tupa꞉ mupa꞉me leekeme.  
\v 9 Pidama꞉ mo wanda꞉ pa꞉ta꞉ alota꞉ Ipiliki yaapoma꞉ ipilika꞉ honema꞉ mo Tekehalina꞉ Holi Sipitidi pa꞉ta꞉ hoke hone mea wialuekema꞉ ekipeke pipipe leekeme. Handa꞉e. Naka꞉ haliki mea hoilu pa꞉la꞉ haliwekita꞉ neke mea hoilu puluekema꞉ amba꞉ do pota꞉ kake pa꞉ta꞉ do a꞉pa haleme handa꞉e leekeme.  
\v 10 Kutupa koto kone mo wanda꞉ Pidana꞉ anke teke pa꞉ta꞉ honda꞉pa lopa꞉niao homeekeme. Kutupa mo hande wekihali tonu a꞉pa handemekepate homeeke handa ipika꞉ toko mea tia pua haliki hoiyeke ale pa꞉ta꞉ pua hoimikime.  
\v 11 Kutupa koto siosi wanda꞉hali paeyaota꞉ pa mo opimiki wanda꞉hali make paala꞉ma꞉ homolo hata꞉ kone leke opa꞉ mina꞉ bepi pu alu alu pimikime.   
\s1 Na hando haemeke haumanu  
\p
\v 12 Mo aposolo haliwekima꞉ wanda꞉hali pa꞉ta꞉ na hando haemeke ekimanu wotu pimikime. Kutupa paeyaoma꞉ mo tembolona꞉ kalale ma꞉nda꞉ biki Solomonona꞉ Kapu pa꞉ta꞉ mombela꞉tiki pimikime.  
\v 13 Kutupa ikina꞉ mo pa haemeke wanda꞉halima꞉ pi laemekepate paala꞉ma꞉ homolo hata꞉ iki ame̱le̱ haluekema꞉ hone na wimikime.  
\v 14 Kutu pimikipate amba꞉ na pu haemeke tupa꞉ ma꞉nda꞉ ma꞉nda꞉ lo wanda꞉weki make haliweki make Yesu pa꞉ta꞉ ta꞉ma꞉ni puluendi pimikime.  
\v 15 Mo aposolo haliwekima꞉ koto haumanu pu haemeke ekina꞉ da wanda꞉halima꞉ yeni hapa papu wimiki wanda꞉halita꞉ tu mea pua pota꞉na꞉ yapa꞉ta꞉ yamaoma꞉ yamaoma꞉ peaata꞉ mandaneeki bedina꞉ uma꞉ uma꞉ pea paeyao pota꞉na꞉ wimikime. Koto hau pimiki ekita꞉ Pida pota꞉na꞉ yopulu hata꞉ ipika꞉ suasuama꞉ kone mo wimiki mandane wanda꞉hali ankulatiki yapena꞉ pimikime.  
\v 16 Mo Diutuseleme da teke pa꞉ta꞉ haemeke daonimanu pa꞉ta꞉ haemeke wanda꞉hali paeya tapaoma꞉ ika꞉ yeni haemeke wanda꞉hali make hoke temoko pitieke wanda꞉hali make hatuku mea epemekeme. Kutu pieketa꞉ paeyao ika꞉ yeni tandeleekeme.   
\s1 Aposolo haliwekima꞉ tanda pa꞉la꞉eki mimikieki  
\p
\v 17 Kutu pieke handaata꞉ mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ mo Sa꞉dusi tapake mandane haliweki kone ikana꞉ma꞉ta꞉ mo aposolo haliweki pa꞉ta꞉ hoke hone witolo hata꞉ soka꞉la꞉ma꞉ homemekeme. Hau ma꞉nda꞉ pulumeke hone wimikime.  
\v 18 Kutupa mo aposolo haliweki da꞉ka꞉pa꞉ minina꞉ laata꞉ dipula mea lopaemekeme.  
\v 19 Kutu pimikipate koto timbata꞉ Tekehali ipika꞉ enisolo ma꞉nda꞉ma꞉ mo dipula da pota꞉ lomba꞉ mea hande aposolo haliweki hama꞉ nane hatuku pua iki pa꞉ta꞉ alota꞉  
\v 20 Mo tembolo da tukiki pa꞉ta꞉ honda꞉ pamba pua hata꞉ do panake da꞉ta꞉la꞉ pi wanda꞉halima꞉ opina꞉ wala꞉pa꞉peke leekeme.  
\v 21 Mo hande aposolo haliwekima꞉ koto leeke pi opuaata꞉ da panake ka꞉la꞉polo haena꞉ mo tembolo da tukiki pa꞉ta꞉ honda꞉ pamba pua pi walemekeme.  
\p Mo yeni peao haemeke you haliwekina꞉ you halima꞉ ipiki ame̱le̱ mandakena꞉ haemeke haliweki tonka꞉na꞉ ikana꞉ma꞉ Diu ka̱le̱sete haliweki paeyaoma꞉ pi tieke hotuluekema꞉ mombelena꞉ lemekeme. Kutupa mo dipula da nane make pi tapaaso alota꞉ Koto hande haliwekita꞉ niki pa꞉ta꞉ hatuku mea ipupe laa lemekeme.  
\v 22 Mo tembolo da handeteke haemeke haliwekima꞉ dipula da pa꞉ta꞉ opolo pua handemekepate pa mo aposolo haliweki na pitimikieki handaata꞉ paa la꞉ka꞉la pua mo ka̱le̱sete haliweki pa꞉ta꞉ la halolo alota꞉  
\v 23 Nikita꞉ mo dipula da pa꞉ta꞉ opolo poma꞉ pita꞉ta꞉ pota꞉ setepe pu pamba pota꞉ kake pa꞉ta꞉ handeteke haena꞉ leeke haliweki haema꞉eki handoma꞉me. Kutu puma꞉pate pota꞉ lomba tukiki nane handolo poma꞉pate hali ma꞉nda꞉ na pitia꞉eki handoma꞉me laa lemekeme.  
\v 24 Mo tembolo da handeteke hayeke you halima꞉ make mo yeni peao haemeke you haliwekima꞉ make koto lemeke pi opuaata꞉ koto hau pa꞉la꞉ ekita꞉ ekipa pa꞉la꞉pe laa hone elekeeleke wimikime.  
\v 25 Kutu pimikipate hali ma꞉nda꞉ honda꞉ pamba a꞉pa iki pa꞉ta꞉ alota꞉ Opua꞉pe. Hande ikana꞉ma꞉ dipula mea lopaeme haliwekima꞉ta꞉ mo tembolo da tukiki pa꞉ta꞉ hata꞉ wanda꞉hali pa꞉ta꞉ pi walolo pitelememe laa leekeme.  
\v 26 Koto ekina꞉ mo hande tembolo da handeteke hayeke you halima꞉ ipika꞉ haliweki ame̱le̱ puaata꞉ mo aposolo haliweki hatuku mulu pua epemekeme. Wanda꞉halima꞉ toopima꞉ iki liaama꞉na꞉yeke mo haliweki yopu hatuku mea epemekeme.   
\p
\v 27 Mo aposolo haliweki hatuku mea a꞉pa mo ka̱le̱sete haliwekina꞉ leke minekena꞉ haena꞉ leekeme. Kutupa mo yeni peao haemeke you haliwekina꞉ you halima꞉ iki lota꞉ pitolo alota꞉  
\v 28 Mo hande halina꞉ bikina꞉ wanda꞉hali pa꞉ta꞉ pi ma꞉nda꞉ na wala꞉pa꞉peke laa iki pa꞉ta꞉ na lapa꞉peke laa ta꞉e leke pi loma꞉pate ikana꞉ma꞉ pimieki hone wia꞉pa꞉peke. Do Diutuseleme da paeyao pa꞉ta꞉ ika꞉ pi yama꞉ tumbulu bao ula꞉me. Kutupa make mo hande hali homea꞉ ekita꞉ ikana꞉ma꞉ niki tulaasememe laa leekeme.   
\p
\v 29 Pidama꞉ mo aposolo haliweki ame̱le̱ hata꞉ ipika꞉ pi hombo peaaso alota꞉ Nikana꞉ma꞉ta꞉ haliwekina꞉ pi amba꞉la na opiki Koda꞉na꞉ pi opua꞉pa꞉peke ya꞉la꞉me.  
\v 30 Ikana꞉ma꞉ Yesu a꞉ka꞉tei wapepiki tina꞉ ikoko lia homaemepate nika꞉ apa꞉ amedana꞉ Koda꞉ma꞉ Yesu lapa꞉ pa꞉ta꞉ kone paa mea tiaeyekeme.  
\v 31 Koda꞉ma꞉ Yesu paa mea tiaota꞉ ipikita꞉ Titina꞉ Pula꞉ Hali make Da꞉taasa꞉ Hali make ipika꞉ popeke kiki nane haena꞉ laata꞉ Isulai wanda꞉halima꞉ hone ma꞉nda꞉ la꞉ka꞉la mina wiaata꞉ ika꞉ hoke hau peleme ekimanu pa tumbaena꞉yeke piekeme.  
\v 32 Nikana꞉ma꞉ do hande piteleme haumanu handaata꞉ la haloloma꞉ haliweki haloma꞉me. Nikana꞉ma꞉ homeke dia꞉me. Holi Sipitidima꞉ make nikana꞉ma꞉ make la haloloma꞉me. Koda꞉ma꞉ ipika꞉ pi opu hala꞉ wanda꞉hali pa꞉ta꞉ Holi Sipitidi halo hala꞉me.   
\p
\v 33 Koto lemekeeki ka̱le̱sete haliwekima꞉ opuaata꞉ mineke wotu pankolo hata꞉ mo aposolo haliweki lia homaalumeke hone wimikipate  
\v 34 ka̱le̱sete hali homeke ma꞉nda꞉ta꞉ Pa꞉tisi hali ipika꞉ bikita꞉ Kamaliele pitiekeme. Ipikana꞉ma꞉ mo hande Lo Pimanu wala꞉la꞉ hali hata꞉ wanda꞉hali paeyaoma꞉ Ipikita꞉ epeke halie laa ipika꞉ pi lao haemekeme. Koto hali ipikana꞉ma꞉ta꞉ mo ka̱le̱sete haliweki momba꞉la pitina꞉ ipiki tiao hata꞉ alota꞉ Mo aposolo haliweki hama꞉ nane hatuku pupe laa  
\v 35 mo ka̱le̱sete haliweki pa꞉ta꞉ dupa leekeme. Isulai haliwekio. Koto haliweki pa꞉ta꞉ hau ma꞉nda꞉ puluekema꞉ta꞉ titina꞉ amba꞉la hone wopu wia꞉pa꞉peke.  
\v 36 Amba꞉ta꞉ Teudasi tiaota꞉ ipika꞉ honema꞉ I̱ta꞉ hali tiekee hone wiekeme. Koto ekina꞉ 400 haliweki ipiki ame̱le̱ ta̱lemekeme. Kutupa haemekepate mo hande hali lieke handaata꞉ ipiki ame̱le̱ ta̱la̱ haemeke haliwekita꞉ ta꞉ta꞉ ta꞉ta꞉ pea tankulupu alu alu pea pulu hata꞉ ika꞉ tumiki haemekeeki alu piekeme.  
\v 37 Kotoeki pieke hoki naneta꞉ mo Ka꞉lili nane hao epeeke hali Diudasita꞉ kapomanima꞉ wanda꞉halina꞉ biki minolo haena꞉ Diudasi ipiki tiaeyekeme. Ipikana꞉ma꞉ make haliweki wopu yola꞉ mea hatuku peekepate pa koto hali make lieke handa ipiki ame̱le̱ ta̱lemeke haliweki make ta꞉ta꞉ ta꞉ta꞉ pea tankulupu alu alu pimikime.  
\v 38 Koto ekina꞉ ame make do pita꞉la꞉ ekima꞉ I̱ma꞉ iki pa꞉ta꞉ do alome. Do haliweki pa꞉ta꞉ ikana꞉ma꞉ hau ma꞉nda꞉ na pea꞉pa꞉peke. Pa haena꞉ paape. Do ekina꞉yeke loa꞉me. Do haliweki ika꞉ piteleme hau manuta꞉ kenke halima꞉ hone wia ika꞉ e walea꞉ka꞉na꞉ta꞉ kota꞉ pa alema꞉ handilieke.  
\v 39 Kutu pulu pia꞉pate Koda꞉ma꞉ pina꞉ lea꞉ka꞉na꞉ta꞉ kota꞉ ikana꞉ma꞉ mo haliweki bepolaapeke na ya꞉la꞉me. Kutu pimika꞉na꞉ta꞉ Koda꞉ ame̱le̱ a꞉nda꞉ lita꞉la꞉eki handilimikie leekeme.  
\p Kamalielema꞉ mana꞉ leeke pita꞉ mo ka̱le̱sete haliwekima꞉ opimikime.  
\v 40 Mo aposolo haliweki epena꞉ wi la꞉ mepi peaata꞉ yombua bao alota꞉ Pa hoto ma꞉nda꞉ a꞉nda꞉ Yesuna꞉ bikina꞉ pi ma꞉nda꞉ na lapa꞉peke laa ta꞉e ta꞉e lo laata꞉ pao da tapaemekeme.  
\v 41 Mo aposolo haliwekita꞉ ka̱le̱sete haliweki mina꞉pa꞉lao pulu hata꞉ Koda꞉ma꞉ ikita꞉ Yesuna꞉ bikina꞉ tanda pa꞉la꞉eki ana꞉na꞉ mea꞉pa꞉peke ya꞉la꞉me laa iki pa꞉ta꞉ hone wieke ekina꞉ ta꞉na꞉ma꞉ wopu homolo hata꞉ pemekeme.  
\v 42 Kutupa tembolo da pa꞉ta꞉ make wanda꞉halina꞉ da pa꞉ta꞉manu make mo haliwekima꞉ hande Yesuta꞉ ota꞉ Ketiso hala꞉me laa mo Pi Seliapo nate paeyao wala꞉tiki pu haemekeme.   
\c 6  
\s1 Mo tamba꞉ mina꞉la꞉ wataake hata꞉ haliweki  
\p
\v 1 Koto natena꞉ta꞉ mo Yesuna꞉ disaipolo haliweki daeyaeyekeme. Mo Kitiki pi lo haemeke Diu wanda꞉halima꞉ mo teke da pa꞉ta꞉ haemeke Diu wanda꞉halima꞉ ika꞉ kosa꞉piki wanda꞉sunu ne ana꞉na꞉ na telipitolo hata꞉ honditi pitelememe laa pi lemekeme.  
\v 2 Mo 12 haliwekima꞉ mo Ketiso haliweki paeyao wi la alota꞉ Nikana꞉ma꞉ Koda꞉na꞉ pi waloloma꞉eki mina꞉pa꞉lao ne telipaoma꞉ka꞉na꞉ta꞉ ana꞉ na pa꞉la꞉me lemekeme.  
\v 3 Koto ekina꞉ kame titio. Hali paeyao watake hata꞉ hali Holi Sipitidima꞉ tumbula꞉ hali hone wopu u hala꞉ hali kutupa koto hali manuma꞉ do ne telipatiki pina꞉ mimika꞉na꞉ta꞉ nikana꞉ma꞉ mea haena꞉ lolumeke lemekeme.  
\v 4 Kutupa nikana꞉ma꞉ta꞉ Koda꞉na꞉ pi paa walolo ombu halumeke lemekeme.   
\p
\v 5 Koto lemeke ekina꞉ mo Ketiso hali paeyao ta꞉na꞉ma꞉ wopu homa mimiki haliwekita꞉ Sidipeni Koda꞉na꞉ pi wopu miniki hata꞉ make Holi Sipitidima꞉ tumba hayeke halie. Kutupa Pilipi Polokotasi Nikano Timono Pamenasi Nikolasi make A꞉ndioko hali kone Diu haliwekina꞉ hau mieke halie.  
\v 6 Do haliwekita꞉ hatuku pua mo aposolo haliwekina꞉ leke popelekena꞉ a꞉pa yeni pitolo hata꞉ ika꞉ kiki mo haliwekina꞉ youna꞉ wimikime.   
\p
\v 7 Koto ekina꞉ mo Koda꞉na꞉ pi paa mea a꞉meiyao kutupa Diutuseleme da nane mo disaipolo wanda꞉hali make aneke hapu daeyao kutupa mandane yeni peao haemeke haliweki wopu make mo Koda꞉na꞉ pi opua Ketiso pa꞉ta꞉ hone tulao haemekeme.   
\s1 Sidipeni da꞉ka꞉pa꞉ minimikieki  
\p
\v 8 Koda꞉ma꞉ ipika꞉ a꞉ta꞉ma꞉ homa꞉la꞉ ekima꞉ make wele pa꞉la꞉ ekima꞉ make Sidipenita꞉ tumbiekeme. Kutupa ipikana꞉ma꞉ mo wanda꞉hali pa꞉ta꞉ wele pa꞉la꞉ ekimanu make na hando haemeke ekimanu make pu tia pomiekeme.  
\v 9 Kutu piekepate mo ka꞉nda꞉ pikieki mina꞉pa꞉lao pi hotu haemeke da pa꞉ta꞉ haemeke haliweki mandaneeki make kutupa Saitini haliweki make A꞉lekesa꞉ndia haliweki make kutupa mandane Silisia haliweki make Eisia haliweki make mandake pa꞉ta꞉ momba꞉la hata꞉ Sidipeni ame̱le̱ pi yoka꞉ alu pimikime.  
\v 10 Kutu pimikipate Holi Sipitidima꞉ wele peaaso haena꞉ ipika꞉ hone epekeeki wia hata꞉ pi la꞉tiki pieke ekita꞉ ma꞉nda꞉ma꞉ bepolaapeke na yekeme.  
\v 11 Kutupa mo haliwekima꞉ ika꞉ kone lomba mandane haliweki mea Ikana꞉ma꞉ta꞉ dupa lapa꞉peke. Do halima꞉ta꞉ Mosesi pa꞉ta꞉ make Koda꞉ pa꞉ta꞉ make hoke pi lea꞉ halie laa a꞉pa lapa꞉peke lemekeme.  
\v 12 Kutupa mo haliwekima꞉ wanda꞉hali make tondiki haliweki make wape pea wala꞉tiki pu haemeke haliweki make sutiaemeke handaata꞉ Sidipeni pua minata꞉ ka̱le̱sete haliweki pa꞉ta꞉ yola꞉ mea pemekeme.  
\v 13 Kutupa hande la꞉ wimiki tupa꞉ mo yayapiki wekitisi haliwekima꞉ tiao alota꞉ Do halita꞉ do yakopiki tembolo da pa꞉ta꞉ make hande Lo Pimanu pa꞉ta꞉ make hoke pi lo hala꞉ halie lemekeme.  
\v 14 Ipikana꞉ma꞉ dupa leeke opuma꞉me. Mo Na꞉sa꞉tete hali Yesuma꞉ do da teke hoeyao Mosesima꞉ waleeke ekimanu make topo pea panakeeki walieke lea꞉ ekita꞉ pea꞉ma꞉ opuma꞉me lemekeme.  
\v 15 Kutupa mo ka̱le̱sete haliweki paeyaoma꞉ ipiki handa hake wimikipate ipika꞉ leke popeleketa꞉ enisolona꞉ ekima꞉ handemekeme.   
\c 7  
\s1 Sidipenima꞉ pi leekeeki  
\p
\v 1 Mo yeni peao haemeke you haliwekina꞉ you halima꞉ Sidipeni pa꞉ta꞉ lota꞉ pitolo alota꞉ Koto aleme pita꞉ ota꞉ pi alemepe laa leekeme.   
\p
\v 2 Sidipenima꞉ ipika꞉ pi hombo peaaso alota꞉ Ya kame apa꞉manuo. I̱ma꞉ alo pi opua꞉pe. Nika꞉ tapake kini pa꞉la꞉ hali Eipoloha꞉ma꞉ta꞉ Hatani nane a̱i̱ na halo peeke pita꞉ mo Mesopoteimia nane pa haena꞉ta꞉ mo hande manda hata꞉ pa̱a̱ peao hala꞉ Koda꞉ta꞉ ipiki pa꞉ta꞉ peneme yao a꞉pa hayekeme.  
\v 3 Kutupa Koda꞉ma꞉ ipiki pa꞉ta꞉ alota꞉ Naka꞉ tapake naka꞉ wanda꞉hali make naka꞉ kenke make mina꞉pa꞉laota꞉ I̱ma꞉ walo polo kenke pa꞉ta꞉ pua꞉peke leekeme.  
\v 4 Koto leeke pi opuaata꞉ Eipoloha꞉ma꞉ mo Koledia wanda꞉halina꞉ kenke mina꞉pa꞉laota꞉ hande Hatani nane halo peekeme. Eipoloha꞉ma꞉ ipika꞉ ateke homao haena꞉ta꞉ Koda꞉ma꞉ ipiki pa꞉ta꞉ ame do iki haleme kenke pa꞉ta꞉ da yoka epena꞉ leekeme.   
\p
\v 5 Koto pita꞉ta꞉ Koda꞉ma꞉ Eipoloha꞉ma꞉ ota꞉ ipika꞉ kenke wina꞉yeke kenke hosiki alesiki kone ma꞉nda꞉ na haleekepate Koda꞉ma꞉ pi la꞉ witolo Eipoloha꞉ma꞉ pa꞉ta꞉ make ipika꞉ hoki nane hatiki polo peleme wanda꞉hali pa꞉ta꞉ make ota꞉ kulueke laa leekeme. Koda꞉ma꞉ do pi la꞉ wieke natena꞉ta꞉ Eipoloha꞉ma꞉ma꞉ta꞉ weki ma꞉nda꞉ make na mendiki hayeke dina꞉ leekeme.  
\v 6 Koda꞉ma꞉ ipiki pa꞉ta꞉ pi dupa leekeme. Naka꞉ hoki nane halo peleme wanda꞉halita꞉ kenke ma꞉nda꞉ nane halo pelimikie. Koto kenke nane pua hata꞉ta꞉ pa hameke e pokaaso tanda mua꞉tiki pulu hata꞉ta꞉ bapi 400 bapimanu hao halimikie.   
\p
\v 7 Kutu pulu pelemepateta꞉ mo e pa hameke pokaape lolo peleme wanda꞉hali pa꞉ta꞉ I̱ma꞉ panisi peaalueke laa kutupa wetepena꞉ naka꞉ tapake wanda꞉halima꞉ta꞉ koto kenke nane mina꞉pa꞉lao do hale pa꞉ta꞉ a꞉pa I̱ pa꞉ta꞉ panda꞉puniao yeni pilimikie laa leekeme.  
\v 8 Koto hoki naneta꞉ Koda꞉ma꞉ Eipoloha꞉ma꞉ pa꞉ta꞉ pi la꞉ wiekeeki tombo witolo hata꞉ ipiki pa꞉ta꞉ sekemesaisi hau waleekeme. Kutupa haena꞉ta꞉ Eipoloha꞉ma꞉ma꞉ta꞉ Aisa꞉ke mendia haena꞉ pula꞉ homeke paeyeketa꞉ Aisa꞉ke pa꞉ta꞉ sekemesaisi hau peayekeme. Kutupa Aisa꞉kema꞉ta꞉ Dieikope pa꞉ta꞉ sekemesaisi hau piekeme. Kutupa Dieikopema꞉ta꞉ mo hande tapake tapake kini pieke 12 haliweki pa꞉ta꞉ sekemesaisi hau peayekeme.   
\p
\v 9 Mo hande tapake tapake kini pieke haliwekima꞉ta꞉ Diosepe pa꞉ta꞉ honditi pitolo hata꞉ ipikita꞉ Idiepi nane hata꞉ pa hameke e pokaasa꞉ hali halo pena꞉yeke mani muluekema꞉ ma꞉nda꞉ma꞉ hambena꞉ lemekeme. Kutu pimikipate Koda꞉ ipiki yaapo hata꞉ta꞉  
\v 10 ipika꞉ ka꞉nda꞉ pa꞉la꞉ ekimanu paeyao minolo haena꞉ kone Koda꞉ma꞉ ana꞉na꞉ handeteke hayekeme. Diosepeta꞉ mo Idiepi you hali Petou pa꞉ta꞉ pua hayeke dina꞉ta꞉ Koda꞉ma꞉ ipikita꞉ kipa baake hone wiki hali make hone lenkena꞉ pea wiki hali make haena꞉ leekeme. Kutu pieke ekima꞉ Petouma꞉ Diosepeta꞉ Idiepi nane kapomani you hali pitina꞉ laata꞉ ipika꞉ da kenkemanu paeyao make handeteke haena꞉ leekeme.  
\v 11 Koto hoki naneta꞉ mo Idiepi Keinani kenke yaapo paeyao pa꞉ta꞉ tea꞉ ki tieke epeeke handaata꞉ wanda꞉hali wopuma꞉ ka꞉nda꞉ma꞉ homa yapemekeme. Nika꞉ apa꞉mei amedama꞉ta꞉ nemanu ma꞉nda꞉ na handa꞉ wimikime.  
\v 12 Koto ekina꞉ Dieikopema꞉ta꞉ Idiepi nane nemanu ula꞉me lemekeeki opuaata꞉ ipika꞉ eiyeketiti hande nika꞉ apa꞉mei ameda kone titi panake pa꞉ta꞉ koto pa꞉ta꞉ tapaeyekeme.   
\p
\v 13 Pa hoto yaapo peao paa tapaeyeke pita꞉ta꞉ Diosepema꞉ta꞉ ipika꞉ hameketiti pa꞉ta꞉ ipiki peneme yao la haleekeme. Kutu pieketa꞉ Petouma꞉ Diosepe ipika꞉ tapake wanda꞉halie lemeke ekita꞉ opua hone wiekeme.  
\v 14 Koto ekina꞉ Diosepema꞉ta꞉ ipika꞉ ateke Dieikope pa꞉ta꞉ pi la꞉ moneaaso alota꞉ Neke make neke ame̱le̱ tapake wanda꞉hali paeyao make Idiepi nane ipupe laa leekeme. Mo wanda꞉hali paeyaota꞉ 75 wanda꞉hali haemekeme.  
\v 15 Kutupa Dieikope Idiepi nane pua haota꞉ ipiki make nika꞉ apa꞉mei ameda make koto pa꞉ta꞉ hao homemekeme.  
\v 16 Ika꞉ toko manuta꞉ Sekeme kenke pa꞉ta꞉ mea pua hoimikime. Koto hali lapa꞉ pu haemeke kenketa꞉ amba꞉ Eipoloha꞉ma꞉ma꞉ Heimona꞉ tapake pa꞉ta꞉ manima꞉ hambeeke kenkee.   
\p
\v 17 Hande Eipoloha꞉ma꞉ pa꞉ta꞉ Koda꞉ma꞉ pi la꞉ wiekeeki ota꞉ yao peaalo pieke nate mo Idiepi nane nika꞉ tapake wanda꞉halita꞉ tapake tieke kone haemekeme.  
\v 18 Koto pita꞉ma꞉ta꞉ you hali ma꞉nda꞉ tiao Idiepi wanda꞉hali handeteke hayekepate Diosepe hayekeeki ipikana꞉ma꞉ na handeekeme.  
\v 19 Nika꞉ tapake wanda꞉hali pa꞉ta꞉ ipikana꞉ma꞉ makeatiki pea puki tandama꞉ homaatiki piekeme. Panake hamba꞉ mea mendimiki wekisunu da pa꞉ta꞉ na mondu wia pitina꞉ leke pa hama꞉ nane homena꞉yeke mondu batiki pina꞉ leekeme.  
\v 20 Koto pita꞉ta꞉ Mosesita꞉ epeke weki seliaposikita꞉ inkikima꞉ mendiekepate pa da tukiki nane mea mondu wia pitina꞉ sumba꞉ tepo yapeekeme.  
\v 21 Kutupa wetepena꞉ hama꞉ nane mea pua nuna꞉ pala꞉mba꞉ hao wieke alena꞉ Petouna꞉ wanekema꞉ mea puna daeyaota꞉ ipika꞉ weki kone haena꞉ leekeme.  
\v 22 Mosesima꞉ta꞉ mo Idiepi haliwekima꞉ epeke honemanu wia pu haemekeeki paeyao sukulu peata꞉ pi pi lo haemeke ekimanu make pea꞉peke ekimanu make ipikana꞉ma꞉ handa꞉ wia pitolo hata꞉ hali tieke hayekeme.   
\p
\v 23 Mosesita꞉ ipika꞉ bapi 40 paeyeketa꞉ ipika꞉ Isulai tapake wanda꞉hali handolo peekeme.  
\v 24 Idiepi hali homekema꞉ Isulai hali ma꞉nda꞉ liekeeki Mosesima꞉ handaata꞉ mo hali tamba꞉ minolo hata꞉ mo Idiepi hali ota꞉ liekeme.  
\v 25 Mosesi ipika꞉ honema꞉ta꞉ Koda꞉ma꞉ I̱ ma꞉la꞉ ekita꞉ iki mea tapaano pa꞉la꞉me laata꞉ wanda꞉halima꞉ koto hone witelememe hone wiekepate mo Isulai wanda꞉halima꞉ koto hone na wimikime.  
\v 26 Da ma꞉nda꞉ kelepeeketa꞉ Isulai hali yaapo a꞉nda꞉ pitolo haepekeeki Mosesima꞉ handaata꞉ pua sa꞉sa꞉ pitolo alota꞉ Hali yaapo opua꞉pe laa Ipilikita꞉ hama̱la̱꞉e. Ekipeke ipilika꞉ kone a꞉nda꞉ pitelepepe laa leekeme.  
\v 27 Koto leekepate mo hali ma꞉nda꞉ yumbieke halima꞉ Mosesi pendulu baaso alota꞉ Neketa꞉ nika꞉ you hali hata꞉ pi yokaalu peaalo pa꞉la꞉ halita꞉ epima꞉ neke mea haena꞉ lea꞉pe.  
\v 28 Hande nakana꞉ma꞉ ambaneke mo Idiepi hali litolo pi tupa꞉ I̱ make luekema꞉ alepe laa leekeme.  
\v 29 Mosesima꞉ koto leeke pi opuaata꞉ Idiepi nane mina꞉pa꞉lao pindipa pua mo Midiani nane halo peekeme. Koto pa꞉ta꞉ hata꞉ta꞉ weki yaapo mondu wiekeme.   
\p
\v 30 Bapi 40 yapeeketa꞉ Mosesita꞉ mo Sainai pote teke pa꞉ta꞉ hapu hayeke alena꞉ haena꞉ta꞉ ti to hayeke alena꞉ mo ti uleke pa꞉ta꞉ hata꞉ enisolo ma꞉nda꞉ta꞉ Mosesi pa꞉ta꞉ peneme yao waleekeme.  
\v 31 Mosesima꞉ leke opo handake witolo hata꞉ mo ti teke pa꞉ta꞉ wotu handuluekema꞉ peekepate Tekehalima꞉ leeke pi make opiekeme dupa.  
\v 32 I̱ta꞉ naka꞉ apa꞉mei amedana꞉ Koda꞉ halome laata꞉ Eipoloha꞉ma꞉ Aisa꞉ke Dieikope amedana꞉ Koda꞉ halome la leekeme. Mosesima꞉ pututuma꞉ homolo hata꞉ na handa꞉liaeyekeme.  
\v 33 Mo hande Tekehalima꞉ ipiki pa꞉ta꞉ alota꞉ Neke hale kenketa꞉ yakopiki kenkee. Naka꞉ anke dake holo wie.  
\v 34 Ya Idiepi nane haleme wanda꞉halita꞉ tanda tieke mu haleme ekita꞉ I̱ma꞉ handolome. Ika꞉ e̱ alo hata꞉ kememe kememe pu halemeeki manuta꞉ I̱ma꞉ opuaata꞉ iki tamba꞉ muluekema꞉ hola꞉pa꞉niaalo a꞉pa pua꞉me. Neke do pa꞉ta꞉ leke epoe la alota꞉ Neketa꞉ mo Idiepi nane tapaalueke laa leekeme.   
\p
\v 35 Hande Isulai wanda꞉halima꞉ta꞉ Mosesi kiaemekeme. Neketa꞉ nika꞉ you hali hata꞉ pi yokaalu peaalo pa꞉la꞉ hali halena꞉ neketa꞉ epima꞉ mea haena꞉ lea꞉pe laa lota꞉ pimikime. Koto hali koneta꞉ you hali hata꞉ tamba꞉ mina꞉la꞉ hali haena꞉ Koda꞉ma꞉ mea tapaeyekeme. Mo enisoloma꞉ handeteke haena꞉ Koda꞉ma꞉ tapaeyekeme. Hande ti to hayeke ale pa꞉ta꞉ hata꞉ Mosesi pa꞉ta꞉ peneme yao waleeke ekima꞉ tapaaso piekeme.  
\v 36 Mosesima꞉ mo wanda꞉hali Idiepi nane mina꞉pa꞉lao hatuku puaata꞉ mo Idiepi nane make mo Wepiki Dawala Ikali pa꞉ta꞉ make mo hapu hayeke ale pa꞉ta꞉manu make ipikana꞉ma꞉ bapi 40manu mo wanda꞉hali hatuku pominolo hata꞉ na hando haemeke hau tieke tieke pia꞉tiki piekeme.  
\v 37 Ipikana꞉ma꞉ mo Isulai wanda꞉hali pa꞉ta꞉ hali ma꞉nda꞉na꞉ dupa leekeme. Koda꞉ma꞉ I̱ tapaeya꞉ tupa꞉ iki pa꞉ta꞉ potopede hali ma꞉nda꞉ make tapaalieke. Koto someta꞉ ika꞉ tapake hali kone tapaalieke laa leekeme.  
\v 38 Ipiki make mo Isulai wanda꞉hali ame̱le̱ mo hapu hayeke alena꞉ momba꞉la haemekeme. Ipikita꞉ nika꞉ apa꞉mei ameda ame̱le̱ koto pa꞉ta꞉ hayeke halie. Mo Sainai Pote pa꞉ta꞉ hande ipiki pa꞉ta꞉ pi leeke enisolo yaapo hayeke halie. Koda꞉ma꞉ ipika꞉ da꞉ta꞉la꞉ pi niki pa꞉ta꞉ la kina꞉yeke Koda꞉ma꞉ ipiki pa꞉ta꞉ la haleekeme.   
\p
\v 39 Kutu piekepate nika꞉ apa꞉mei amedama꞉ Mosesima꞉ leeke pi opua꞉peke ekita꞉ kiaemekeme. Idiepi nane paa la꞉ka꞉la polumeke hone witolo hata꞉ Mosesi pa nane pendilaemekeme.  
\v 40 Ikana꞉ma꞉ Etoni pa꞉ta꞉ alota꞉ Nakana꞉ma꞉ niki hatuku polo peleme koda꞉manu wepiae. Mo hande Idiepi nane hamono niki hatuku epea꞉ hali Mosesita꞉ hane pa꞉la꞉pe niki na handoloma꞉me lemekeme.  
\v 41 Koto lemeke pita꞉ta꞉ mo wanda꞉halima꞉ kao sikima꞉ handeke ale wepia wiaata꞉ koto ale pa꞉ta꞉ ma꞉na꞉ lia halaata꞉ ikana꞉ma꞉ kone ika꞉ kikima꞉ wepieke ale ta꞉na꞉ma꞉ homolo hata꞉ ne pambaemekeme.  
\v 42 Kutu pimikipate Koda꞉ma꞉ta꞉ iki hoki la꞉ka꞉laata꞉ oli ya nane hala꞉ hombulanka꞉manu pa꞉ta꞉ mo wanda꞉halima꞉ panda꞉puniao pa yeni pina꞉ leekeme. Hande buka pa꞉ta꞉ potopede haliwekima꞉ wape pa꞉la꞉eki dupa  
\q1 Isulai wanda꞉halio. Ikana꞉ma꞉ta꞉ mo hapu hala꞉ alena꞉ bapi 40manu hata꞉ta꞉ kaomanu make sipisipi make lia halo haemeeki manuta꞉ I̱ pa꞉ta꞉ na kimime.   
\q1
\v 43 Kutupa ika꞉ palai data꞉ mo Moleke koda꞉ ipika꞉ palai da kone mea tia puaata꞉ ika꞉ wepia wina꞉ la꞉la꞉ hombulanka꞉ma꞉ handeke ale manuta꞉ mo Lepani koda꞉ ipika꞉eki kone mea tia pememe.  
\q1 Koto ale manuta꞉ ikana꞉ma꞉ kone ika꞉ panda꞉puniao yeni puluekema꞉ wepia wina꞉ lemeke alemanue.  
\q1 Koto peleme ekina꞉ I̱ma꞉ ikita꞉ mo Ba꞉biloni nane ankulao poemena꞉ mea tapaalueke laa leekeme.   
\p
\v 44 Nika꞉ apa꞉mei amedama꞉ta꞉ mo hapu hayeke alena꞉ haemeke pita꞉ta꞉ mo hande tukiki pa꞉ta꞉ Koda꞉ hayeke palai data꞉ iki pa꞉ta꞉ hayekeme. Koto data꞉ Koda꞉ma꞉ Mosesi pa꞉ta꞉ pi la halolo hata꞉ pikisa make waleeke tupa꞉ Mosesima꞉ a꞉eyaena꞉ leekeme.  
\v 45 Kutupa hao hao pea wetepena꞉ta꞉ nika꞉ apa꞉mei amedama꞉ta꞉ mo hande palai data꞉ ika꞉ apa꞉ ameda pa꞉ta꞉ meata꞉ ika꞉ kone mea tia pua꞉tiki pimikime. Diosua make mandakena꞉ puaata꞉ hande Koda꞉ma꞉ tolu lieke tapake wanda꞉halimanu ika꞉ kenke pa꞉ta꞉la minolo hata꞉ mea tia pemekeme. Kutupa koto kenke pa꞉ta꞉ mo palai da a꞉eya pa ha pelia haena꞉ kone Deipidi make opolo a꞉pa hayekeme.  
\v 46 Koda꞉ma꞉ mo Deipidina꞉ hayeke haumanu handaata꞉ ipiki pa꞉ta꞉ ta꞉na꞉ma꞉ homeekeme. Koto ekina꞉ Deipidima꞉ ipika꞉ apa꞉mei hali Dieikopena꞉ tapake ika꞉ Koda꞉na꞉ da a꞉eyaluekema꞉ Koda꞉ pa꞉ta꞉ I̱ma꞉ a꞉eyaano lae laa honke leekeme.  
\v 47 Koto leekepate Solomonoma꞉ Koda꞉na꞉ da a꞉eyaeyekeme.   
\p
\v 48 Kutu piekepate ota꞉ oli manda hala꞉ Koda꞉ta꞉ haliwekima꞉ kikima꞉ a꞉eyaaseme da pa꞉ta꞉manu na hao hala꞉me. Koto mo hande potopede halima꞉ la꞉la꞉ tupa꞉   
\q1
\v 49 I̱ta꞉ hepeni nane hata꞉ kilu tombuao hao halome laata꞉  
\q1 kenketa꞉ yaka anke tapa꞉pao hao halo alee laa Tekehalima꞉ alo hata꞉ alota꞉  
\q1 Yaka data꞉ ekipiki da a꞉eyaluekema꞉ alemepe.  
\q1 I̱ hoto pitulu polo data꞉ hando pa꞉ta꞉ ya꞉ka꞉ta꞉pe.   
\q1
\v 50 Koto alemanu paeyaota꞉ I̱ma꞉ ya kone na wopua wina꞉ lolope laa leekeme.   
\p
\v 51 Iki make hoi pea hao haleme haliwekio. Ika꞉ puki manuta꞉ pi na opita꞉la꞉ wanda꞉halina꞉ pukima꞉ handelememe. Koda꞉na꞉ pi ale opua꞉peke ekita꞉ katake pokeeke hali leke hao halememe. Hande ika꞉ apa꞉mei amedama꞉ mo Holi Sipitidi kiayeke tupa꞉ ikana꞉ma꞉ make kiatiki pitelememe.  
\v 52 Ika꞉ apa꞉mei amedama꞉ta꞉ potopede hali homeke pa꞉ta꞉ kone tanda na halemekepe. Hande Koda꞉ ipika꞉ tikitiki yao hala꞉ e pokaasa꞉ Hali epolo piekeeki la haleeke haliwekita꞉ Koda꞉ma꞉ tapaeyeke haliweki kone ika꞉ apa꞉mei amedama꞉ limikime. Ame make ikana꞉ma꞉ koto Hali a꞉nda꞉ lomba limime.  
\v 53 Koda꞉na꞉ Lo Pi manuta꞉ enisolo manuma꞉ lopa꞉niao kiekepate ikita꞉ kieke meleme haliweki halemepate ikana꞉ma꞉ koto pi manuta꞉ na opiki pa halememe laa leekeme.   
\s1 Sidipeni toopima꞉ limikieki  
\p
\v 54 Koto leekeeki opua mo haliwekima꞉ ipiki pa꞉ta꞉ soka꞉la꞉ma꞉ wotu homolo hata꞉ kake noka꞉pa haemekepate  
\v 55 Sidipeni Holi Sipitidima꞉ tumba hake halima꞉ oli ya pa꞉ta꞉ handa꞉liao Koda꞉na꞉ pa̱a̱ pita꞉la꞉eki make Yesuta꞉ Koda꞉na꞉ popeke nane kikina꞉ tiao haya꞉eki make handolo hata꞉ alota꞉  
\v 56 Handa꞉pe. I̱ma꞉ta꞉ oli ya akolopa꞉ lumba꞉lu bao kutupa Wanda꞉halina꞉ Eiyeke Koda꞉na꞉ popeke nane kikina꞉ oli hala꞉eki handolome leekeme.  
\v 57 Koto leekepate mo haliwekima꞉ ta꞉e ta꞉e lo laa ika꞉ katake a꞉mba kutupa mandake dina꞉ a̱i̱ya pua mo hali yola꞉ mea pua  
\v 58 da mina꞉pa꞉lao pua toopima꞉ limikime. Kutupa mo wekitisi haliwekina꞉ dau manuta꞉ wekihali ma꞉nda꞉ bikita꞉ Solo koto halina꞉ anke teke pa꞉ta꞉ holo pambaata꞉  
\v 59 kutupa toopima꞉ litolo haena꞉ Sidipenima꞉ yeni pitolo alota꞉ Tekehali Yesuo. Yaka temoko nakana꞉ma꞉ handa꞉ mie leekeme.  
\v 60 Kutupa pa tumiki yotuao pita꞉ anekema꞉ e̱ alo hata꞉ alota꞉ Tekehalio. Do haliwekima꞉ hoke hau piteleme ekita꞉ pa na wina꞉ leke nakana꞉ma꞉ paeyaapeke leekeme. Kotoeki lo paeyaota꞉ homeekeme.   
\c 8  
\s1 Soloma꞉ siosi wanda꞉hali tanda haleekeeki  
\p
\v 1 Sidipeni limiki ekita꞉ Soloma꞉ lina꞉e hone wiekeme. Koto limiki pita꞉ kone mo Diutuseleme nane haemeke siosi wanda꞉halita꞉ tanda wotu mulu pimikieki kini pea mimikime. Kutu pieke handa Ketiso wanda꞉hali paeyaota꞉ mo Diudia Sametia koto potopinisi yaapo pa꞉ta꞉manu haloendi pimikipate mo aposolo haliwekita꞉ Diutuseleme nane pa ha pelia haemekeme.  
\v 2 Koda꞉ pa꞉ta꞉ panda꞉puniao yeni pu haemeke mandane haliwekima꞉ Sidipeni toko mea pua hoitolo hata꞉ e̱ tieke lemekeme.   
\p
\v 3 Kutu pimikipate Soloma꞉ siosi wanda꞉hali hoeyaaluekema꞉ taapeekeme. Ipikana꞉ma꞉ta꞉ da ma꞉nda꞉ ma꞉nda꞉ pa꞉ta꞉ pominolo hata꞉ siosi wanda꞉hali kiki yola꞉ mea hama꞉ nane mea batiki pea dipula mea lopatiki piekeme.   
\s1 Mo hande Pi Seliapo Sametia nane waleekeeki  
\p
\v 4 Koto ekina꞉ mo hande pindipa ta꞉ta꞉ ta꞉ta꞉ pea pemeke wanda꞉halima꞉ mo hande Koda꞉na꞉ Pi Seliapo latia tia pomimikime.  
\v 5 Pilipima꞉ mo Sametia daoni nane pua Ketisona꞉ pi mo wanda꞉hali pa꞉ta꞉ waleekeme.  
\v 6 Kutupa mo wanda꞉halima꞉ ipikana꞉ma꞉ leeke pi opuaata꞉ ipika꞉ wele pieke ekimanu hando pitolo hata꞉ta꞉ pea꞉ma꞉ homeke hone witolo hata꞉ Pilipima꞉ leeke pi opimikime.  
\v 7 Wanda꞉hali wopuna꞉ weleke pa꞉ta꞉ pitimiki hoke temokomanu e̱ wi la꞉ paleke paleke pea opolu bepi pea yapemekeeki make kiki anke homa pa wieke wanda꞉hali wopu make ankena꞉ pua꞉peke na yeke wanda꞉hali wopu make tiaemekeeki handolota꞉ ipika꞉ pi opimikime.  
\v 8 Kutupa koto daoni pa꞉ta꞉ ta꞉na꞉ tieke homo haemekeme.   
\p
\v 9 Kutu piekepate hali ma꞉nda꞉na꞉ bikita꞉ Saimonota꞉ oni da amba꞉ yopua hata꞉ ti̱o̱ haumanu moka꞉la꞉ hande hande pitolo hata꞉ mo Sametia wanda꞉halina꞉ leke mea opaaso hata꞉ta꞉ ipika꞉ kutu pita꞉la꞉ ekima꞉ Tieke halueke hone wiekeme.  
\v 10 Mo wanda꞉hali tieke tiekema꞉ make hosiki wanda꞉halima꞉ make mo leeke ekimanu opitolo hata꞉ alota꞉ Do halina꞉ bikita꞉ Koda꞉na꞉ wele pita꞉la꞉eki kone ya꞉ka꞉ta꞉me lemekeme.  
\v 11 Mo haliwekima꞉ta꞉ mo ti̱o̱ halima꞉ nate paeyao pia꞉tiki pieke ekima꞉ ika꞉ leke opo handake wia꞉tiki pitolo hata꞉ make ipika꞉ pi opua꞉tiki pimikime.  
\v 12 Kutu piekepate wanda꞉halima꞉ Pilipima꞉ mo Koda꞉na꞉ epeke Kilu Tombuao Hala꞉ ekina꞉ pi seliapo Yesu Ketisona꞉ biki tonka꞉na꞉ pua waleekeeki pa꞉ta꞉ hone tulaemeke handaata꞉ kota꞉ haliweki make wanda꞉weki make paeyao bapitaisi pimikime.  
\v 13 Kutupa Saimono make Koda꞉na꞉ pi minolo haena꞉ ipiki bapitaisi peaeyekeme. Kutupa Saimonota꞉ Pilipi yaapo hata꞉ mo wele pita꞉la꞉ ekimanu make na hando haemeke ekimanu make hando haota꞉ leke opa꞉ mina꞉ bepi piekeme.   
\p
\v 14 Kutupa mo Diutuseleme da haemeke aposolo haliwekima꞉ Sametia wanda꞉halima꞉ Koda꞉na꞉ pi mineleme pi opu haota꞉ Pida Dioni yaapo pupa꞉ laa tapaemekeme.  
\v 15 Kutupa mo hande Pida Dioni yaapo Sametia da opolo puata꞉ mo wanda꞉halima꞉ Holi Sipitidi mina꞉yeke yeni pua pipikime.  
\v 16 Pa ekipeke mo Holi Sipitidita꞉ mo wanda꞉halina꞉ weleke pa꞉ta꞉ a̱i̱ na a꞉pa pitiekeme. Mo ika꞉ bapitaisi pimiki hau make Tekehali Yesuna꞉ bikina꞉ homeke bapitaisi pimikime.  
\v 17 Pida Dioni yaapoma꞉ ipilika꞉ kiki mo wanda꞉halina꞉ youna꞉ wia hata꞉ yeni pipiki handa Holi Sipitidita꞉ mo wanda꞉halina꞉ weleke pa꞉ta꞉ a꞉pa pitiekeme.   
\p
\v 18 Kutupa Saimonoma꞉ mo aposolo hali yaapoma꞉ kiki wieke ekina꞉ hande Holi Sipitidi epeekeeki handolo hata꞉ kota꞉ ipikana꞉ma꞉ manimanu mutia a꞉pa wia hata꞉ alota꞉  
\v 19 I̱ma꞉ make yaka kiki hali ma꞉nda꞉na꞉ youna꞉ ua꞉ka꞉na꞉ Holi Sipitidi mina꞉ loa꞉me do wele pita꞉la꞉eki ma꞉nda꞉ kipe leekeme.   
\p
\v 20 Koto leekepate Pidama꞉ alota꞉ Koda꞉ma꞉ pa kita꞉la꞉ ale naka꞉ honema꞉ hambuluekema꞉ hone witele ekina꞉ neke tonka꞉na꞉ naka꞉ mani tonka꞉na꞉ ma꞉nda꞉ma꞉ hoeyaena꞉e.  
\v 21 Du pitele ekina꞉ neketa꞉ niki ame̱le̱ na hake. Pa ekipeke naka꞉ pukita꞉ Koda꞉na꞉ leke popelekena꞉ tikitiki na pa꞉la꞉me.  
\v 22 Do hoke hau pi ekina꞉ hone ma꞉nda꞉ la꞉ka꞉la wiaata꞉ yeni pea꞉peke. Tekehalima꞉ naka꞉ hoke hone witele ekimanu paa mea tombualiepe mata꞉la꞉me leekeme.  
\v 23 I̱ma꞉ta꞉ neketa꞉ teto pita꞉la꞉ alema꞉ handeleke handolome. Kutupa naka꞉ hoke hau pitele ekima꞉ neke tonkao ula꞉me leekeme.  
\v 24 Saimonoma꞉ alota꞉ Nakana꞉ma꞉ koto ale pimanu I̱ pa꞉ta꞉ a꞉paapa꞉na꞉ Tekehali pa꞉ta꞉ yeni peae leekeme.   
\p
\v 25 Kutupa Pida Dioni yaapoma꞉ mo Tekehalina꞉ pi walolo hata꞉ la hala꞉tiki peaata꞉ mo Diutuseleme da nane paa la꞉ka꞉la pulu hata꞉ mandane Sametia da pa꞉ta꞉manu mo Pi Seliapo wala꞉tia tia pepekeme.   
\s1 Pilipi mo Idiopia kapomani hali yaapo  
\p
\v 26 Tekehalina꞉ enisoloma꞉ Pilipi pa꞉ta꞉ alota꞉ Tiao. Oni Diutuseleme kini pea Kasa nane pula꞉ pota꞉ teli mea pue leekeme. Koto pota꞉ta꞉ ota꞉ hapu hayeke ale tukiki pa꞉ta꞉ peeke pota꞉e.  
\v 27 Kutupa Pilipi tiaota꞉ peekeme. Pulu haena꞉ta꞉ mo pota꞉na꞉ Idiopia yuniki hali ma꞉nda꞉ ipikita꞉ mo Idiopia Kuini wanda꞉na꞉ mani paeyao handeteke hae leeke hali tieke manda꞉hande piekeme.  
\v 28 Mo halita꞉ Diutuseleme da nane Koda꞉ pa꞉ta꞉ yeni pulu yopua ipika꞉ da la꞉ka꞉la yopulu piekeme. Ipikita꞉ mo hosima꞉ yola꞉la꞉ bokisi pita pota꞉na꞉ pulu hata꞉ potopede hali Aisayama꞉ wape piekeeki yata꞉po pitiekeme.  
\v 29 Kutupa mo Holi Sipitidima꞉ Pilipi pa꞉ta꞉ alota꞉ Mo hosima꞉ yola yopula꞉ ale teke pa꞉ta꞉ leke pua pita꞉peke leekeme.  
\v 30 Koto ekina꞉ Pilipi a̱i̱ya pua mo hali pa꞉ta꞉ peekepate mo halima꞉ mo Aisayama꞉ wape pa꞉la꞉ buka yata꞉polo pitiekeeki opua alota꞉ Naka꞉ koto yata꞉pele ekita꞉ hone witelepe leekeme.   
\p
\v 31 Mo halima꞉ alota꞉ Ma꞉nda꞉ma꞉ na waleke haena꞉ ekipa hone wiono alepe leekeme. Kutupa mo halima꞉ Pilipi pa꞉ta꞉ alota꞉ Do I̱ pilu pa꞉ta꞉ lopulao pitupana꞉ epoe leekeme.  
\v 32 Mo hande halima꞉ mo Baibolo bukana꞉ yata꞉polo pitieke ekita꞉ doeki yeekeme.  
\q1 Ipikita꞉ sipisipi pita꞉la꞉ tupa꞉ kia kia pi na leekeme.  
\q1 Kutupa mo sipisipima꞉ mo itiki tunkulu hala꞉ halina꞉ leke popeleke nane a꞉pa haena꞉ kake a꞉mbaaso hata꞉ pi na la꞉lie tupa꞉ kota꞉ ipikana꞉ma꞉ ipika꞉ kake na a̱a̱ leekeme.   
\q1
\v 33 Ipika꞉ hande tieke hayekeeki mea lopao pita꞉ta꞉ pi yokaalu epeke tupa꞉ na pimikime.  
\q1 Kutupa ipika꞉ kini pu mieke tapake epima꞉ lapeke ya꞉la꞉pe.  
\q1 Ipika꞉ da꞉ta꞉la꞉ ekita꞉ ma꞉nda꞉ma꞉ hoeyaasa꞉me  
\m la꞉la꞉eki yata꞉polo pitiekeme.   
\p
\v 34 Kutupa mo hande kapomani halima꞉ Pilipi pa꞉ta꞉ alota꞉ Do potopede halima꞉ta꞉ pilisi epi pa꞉ta꞉ ala꞉pe leekeme. Ipika꞉ kone ala꞉pe o ma꞉nda꞉ pa꞉ta꞉ ala꞉pe leekeme.  
\v 35 Koto leeke Pilipima꞉ pi alo hata꞉ta꞉ mo Baibolo buka a̱i̱ koto kone yata꞉pea꞉ ekimanu pa꞉ta꞉ kini pea mo some pa꞉ta꞉ Yesu Ketisona꞉ epeke Pi Seliapo la haleekeme.  
\v 36 Ameta꞉ mo pota꞉ hokuluna꞉ pu hao ikali pa꞉ta꞉ opolo pua kutupa mo yuniki halima꞉ alota꞉ Handa꞉e. Ikali doe leekeme. Epima꞉ ya bapitaisi pulu poloeki sa꞉sa꞉ piliepe leekeme.  
\v 37 [Kutupa Pilipima꞉ alota꞉ Nakana꞉ma꞉ naka꞉ puki paeyaoma꞉ hone wikina꞉ta꞉ kota꞉ naka꞉e leekeme. Kutupa mo halima꞉ alota꞉ I̱ma꞉ta꞉ Yesu Ketisota꞉ Koda꞉na꞉ Eiyeke hala꞉me hone witolome leekeme.]   
\p
\v 38 Kutupa mo hande hosima꞉ yola yopula꞉ ale dataiwa hali pa꞉ta꞉ alota꞉ Koto pate hae laa Pilipi mo hali yaapo telipina꞉ ikali pa꞉ta꞉ pua kutupa Pilipima꞉ hande hali bapitaisi peaeyekeme.  
\v 39 Kutu piekepate ipilikana꞉ma꞉ mo ikali mina꞉pa꞉lao yopulu haena꞉ Tekehalina꞉ Sipitidima꞉ Pilipita꞉ pa a꞉pa a̱i̱ tamba꞉ mea peekeme. Kutupa mo bapitaisi pieke halima꞉ Pilipi ota꞉ paa na handeekepate ipikana꞉ma꞉ ta꞉na꞉ma꞉ homa꞉paleke ipika꞉ da peekeme  
\v 40 Kutu piekepate Pilipita꞉ A꞉sidoti da pa꞉ta꞉ hao pulu hata꞉ mandane damanu pa꞉ta꞉ mo Pi Seliapo waloma꞉ waloma꞉ putialo hata꞉ Sesatia nane peekeme.   
\c 9  
\s1 Solona꞉ hone la꞉ka꞉la miniekeeki  
\p
\v 1 Soloma꞉ wese wese alo hata꞉ mo Tekehalina꞉ disaipolo wanda꞉hali tolu lutia pomiekeme.  
\v 2 Kutu putia mo yeni peao haemeke you haliwekina꞉ you hali pa꞉ta꞉ pua alota꞉ Mo Damasikasi nane pi hotu haleme damanu pa꞉ta꞉ do hande panake hau piteleme wanda꞉hali dipula mea Diutuseleme nane mea ipuluekema꞉ loa꞉ma꞉ pase kie laa pua honke leekeme.  
\v 3 Solota꞉ Damasikasi nane polueke laa pota꞉na꞉ pulu haena꞉ oli ya nanema꞉ pa̱a̱ tieke a꞉pa mo some dupao a꞉pa to hopa꞉liaeyekeme.  
\v 4 Kutupa mo some kenkena꞉ honda꞉pa topopi lopolo hata꞉ ho̱la̱꞉make opiekepate alota꞉ Soloo. Soloo. Ekipeke I̱ yaapo a꞉nda꞉ litelepe leekeme.  
\v 5 Kutupa Soloma꞉ alota꞉ Tekehalio. Neketa꞉ epiya꞉ka꞉ta꞉pe leekeme. Mo hande pi ho̱la̱꞉makema꞉ alota꞉ I̱ta꞉ Yesue. Nakana꞉ma꞉ I̱ yaapo a꞉nda꞉ liteleke handa loa꞉me leekeme.  
\v 6 Tiao oni da nane naka꞉ pulu peleeki loluekema꞉ pue leekeme.   
\p
\v 7 Kutupa mo Solo ame̱le̱ epemeke haliweki ota꞉ nunu nunu pisiki make ota꞉ na leke hata꞉ mo leeke pi homeke opiekepate ma꞉nda꞉ a꞉nda꞉ na handemekeme.  
\v 8 Solo oni kenke mina꞉pa꞉lao tiao ipika꞉ leketa꞉ ki leekepate ota꞉ ala꞉ta꞉ ma꞉nda꞉ na handeeke handa hali mandane hatiki mandane hatiki pea hatuku oni Damasikasi da pa꞉ta꞉ pemekeme.  
\v 9 Kutupa Solota꞉ ikali ne make na neke ala꞉ta꞉ ala꞉ta꞉ make na handeke hoto tepo oni Damasikasi da pa꞉ta꞉ wiekeme.   
\p
\v 10 Kutupa oni Damasikasi Ketiso hali ma꞉nda꞉ bikita꞉ A꞉na꞉naisi hayekeme. Tekehalima꞉ upama꞉ alota꞉ A꞉na꞉naisio. Kutupa A꞉na꞉naisima꞉ alota꞉ Tekehalio. I̱ta꞉ do pilume leekeme.  
\v 11 Kutupa Tekehalima꞉ alota꞉ Tiao. Oni pota꞉ bikita꞉ Tikitikipiki pota꞉ yola꞉ mea pua Diudasina꞉ da pa꞉ta꞉ pua Tasa꞉si hali Solota꞉ hando pa꞉ta꞉ pila꞉pe laa lota꞉ pia꞉pekee. Ipikita꞉ yeni koto pitolo pila꞉ handa꞉e leekeme.  
\v 12 Kutupa ipikana꞉ma꞉ hali ma꞉nda꞉ biki A꞉na꞉naisi a꞉pa ipika꞉ kiki yaka youna꞉ a꞉pa wia꞉ka꞉na꞉ ya leke ki leliekee laa amba꞉ handea꞉me leekeme.  
\v 13 A꞉na꞉naisima꞉ alota꞉ Tekehalio. Do halita꞉ naka꞉ Diutuseleme wanda꞉hali pa꞉ta꞉ tanda tanda hala꞉la꞉eki ma꞉nda꞉ ma꞉nda꞉ma꞉ a꞉pa la꞉tiki pu haleke opu halome leekeme.  
\v 14 Kutupa ipikana꞉ma꞉ mo yeni peao haleme teke haliweki pa꞉ta꞉ pase mea wia hata꞉ do naka꞉ bikina꞉ pi milie Damasikasi wanda꞉hali pa꞉ta꞉ tanda tanda halolo pita꞉la꞉me leekeme.   
\p
\v 15 Koto leekepate Tekehalima꞉ alota꞉ Pue. Do halita꞉ yaka amba꞉ molo halima꞉ pa꞉la꞉me leekeme. Yaka bikita꞉ Diendaili wanda꞉halima꞉ make kini haliwekima꞉ make Isulai wanda꞉halima꞉ make opina꞉ pua꞉ma꞉ pue leekeme.  
\v 16 I̱ma꞉ yaka hauna꞉ tanda pa꞉la꞉eki mina꞉ la waluekema꞉ pue leekeme.   
\p
\v 17 Koto ekina꞉ A꞉na꞉naisi pua da pa꞉ta꞉ opolo peekeme. Kutupa ipika꞉ kiki Solona꞉ youna꞉ pua witolo hata꞉ alota꞉ Solo ya kameo. Tekehali Yesu mo pota꞉na꞉ ipulu halena꞉ epeeke hande Yesuma꞉ naka꞉ leke paa kilao Holi Sipitidima꞉ tumba halena꞉ yeke I̱ tapaeya꞉me leekeme.  
\v 18 Kutupa koto kone mo ta꞉peli o̱ma꞉ handeke ale manuma꞉ leke tombuao hao londa꞉la꞉pa lopeke nono piekeme. Kutupa ipika꞉ leke paa ki leekeme. Kutupa koto kone tiao pua bapitaisi piekeme.  
\v 19 Kutupa ne tamba꞉ mea nolo yapeeke dina꞉ta꞉ ipika꞉ honkopu paa hao epeekeme.  
\s1 Soloma꞉ Damasikasi hata꞉ pi waleekeeki  
\p Solota꞉ Damasikasi da hao hala꞉ Ketiso haliweki ame̱le̱ hosiki hayekeme.  
\v 20 Ipikana꞉ma꞉ koto kone Yesu Ketisona꞉ pi mo pi hotu haemeke da pa꞉ta꞉ walolo hata꞉ alota꞉ Yesuta꞉ Koda꞉na꞉ Eiyekee leekeme.  
\v 21 Mo opimiki haliwekita꞉ leke wopu opa꞉ alu alu pimikime. Kutupa alota꞉ Do hali dia꞉ya꞉ka꞉ta꞉pe. Mo hande Diutuseleme da pa꞉ta꞉ hande some Yesuna꞉ biki laa yeni pimi wanda꞉hali tanda tanda halea꞉ hali dia꞉ya꞉ka꞉ta꞉pe. Aowe. Ipikita꞉ do epa꞉la꞉ ekita꞉ mo kutupiki wanda꞉hali mea tonkao hatuku mo yeni peao haleme teke haliweki pa꞉ta꞉ mea poluekema꞉ a꞉pa pa꞉la꞉me lemekeme.  
\v 22 Kutu piekepate Soloma꞉ta꞉ pi waluekema꞉ wele wopu piekeme. Ipikana꞉ma꞉ Yesuta꞉ ota꞉ Koda꞉na꞉ Ketisoe laa ota꞉ ana꞉na꞉ peneme yao waleeke mandane pi manuta꞉ mo Damasikasi da haleme Diu haliwekima꞉ pi homeke ma꞉nda꞉ma꞉ hombo pealuekema꞉ ana꞉ na pimikime.   
\p
\v 23 Hosiki hao hao pea wetepena꞉ mo haliwekima꞉ Solo luekema꞉ tome tome pambemekepate mo hande lemeke ekita꞉ Soloma꞉ amba꞉ opiekeme.  
\v 24 Mo haliwekima꞉ mo pota꞉ kake pa꞉ta꞉ timba andusa꞉ andusa꞉ make pa̱a̱na꞉ make haemekeme.  
\v 25 Kutu pimikipate disaipolo haliwekima꞉ mo peiyekeeki mea ankulao Solota꞉ basekedena꞉ pitina꞉ laata꞉ mea lopa꞉niaemekeme.   
\s1 Solo Diutuseleme hayekeeki  
\p
\v 26 Mo Diutuseleme da nane opolo a꞉pa mo disaipolo wanda꞉hali ame̱le̱ apa꞉tao haluekema꞉ piekepate mo Ketiso haliwekima꞉ta꞉ Ipikita꞉ disaipolo hali dia꞉me hone witolo hata꞉ paala꞉ma꞉ homemekeme.  
\v 27 Kutupa Banabasima꞉ Solota꞉ mo aposolo haliweki pa꞉ta꞉ hatuku pua mo Tekehalima꞉ pota꞉na꞉ Solo pa꞉ta꞉ peneme yaeya꞉eki make pi leekeeki make la haleekeme. Kutupa oli Damasikasi da hata꞉ Soloma꞉ Yesuna꞉ biki a꞉mbao na leke pi waleekeeki make mo haliweki pa꞉ta꞉ la haleekeme.  
\v 28 Koto ekina꞉ mo haliweki ame̱le̱ hata꞉ da pa꞉ta꞉ honda꞉ pamba꞉tiki opolu batiki piekeme.  
\v 29 Solota꞉ mo wanda꞉hali paala꞉ma꞉ na homeke mo Tekehalina꞉ biki laa pi wala꞉tiki piekeme. Kutupa pi pi la꞉tiki pitolo hata꞉ mo Kitiki pi lo haemeke Diu wanda꞉hali ame̱le̱ make pi la alu alu pua꞉tiki pomiekepate mo wanda꞉halima꞉ta꞉ Solo lu pie hone wimikime.  
\v 30 Mo hameke titima꞉ kotoeki opu haota꞉ Solota꞉ Sesatia nane hatuku pua Tasa꞉si nane pena꞉ tapaemekeme.   
\p
\v 31 Kutu pieketa꞉ mo Diudia nane make Ka꞉lili nane make Sametia nane make koto kenke paeyao pa꞉ta꞉ haemeke siosi wanda꞉halita꞉ a꞉nda꞉ pelia haemekeme. Koto siosi wanda꞉halita꞉ Holi Sipitidima꞉ tamba꞉ minolo haena꞉ honkopu hao hata꞉ daeyatiki pimikime. Tekehali pa꞉ta꞉ panda꞉puniao hata꞉ pimikime.   
\s1 Pidata꞉ Lida Diopa da yaapo pa꞉ta꞉ hayekeeki  
\p
\v 32 Pidata꞉ kenke paeyao pa꞉ta꞉ pomu lopaata꞉ hoto ma꞉nda꞉ta꞉ mo Lida da nane haemeke Koda꞉na꞉ wanda꞉hali handolo peekeme.  
\v 33 Koto da pa꞉ta꞉ta꞉ hali homeke Iniasi handeekeme. Koto halita꞉ kiki anke homa pa wieke hali pita꞉ bapi ketepo hata꞉ ipika꞉ da panda꞉ pa꞉ta꞉ u pita꞉tiki pu hayekeme.  
\v 34 Pidama꞉ ipiki pa꞉ta꞉ alota꞉ Iniasio. Yesu Ketisoma꞉ neke epeaasa꞉me. Naka꞉ yapa꞉ta꞉ oko pea mina tiae laa leekeme. Koto leeke pita꞉ kone Iniasita꞉ tiaeyekeme.  
\v 35 Mo Lida Sietoni da yaapo pa꞉ta꞉ haemeke wanda꞉hali paeyaoma꞉ mo hali handaata꞉ Tekehali pa꞉ta꞉ la꞉ka꞉la hone tulaemekeme.   
\p
\v 36 Mo Diopa da pa꞉ta꞉ta꞉ disaipolo wanda꞉ homeke Ta꞉bida hayekeme. Koto bikita꞉ pa mo Kitiki pi laata꞉ Dokasi laa la꞉la꞉me. Koto wanda꞉ma꞉ta꞉ hoto paeyao epeke hau pu hata꞉ mo ala꞉ta꞉ ma꞉nda꞉ dia꞉yeke mesiolo hali wanda꞉hali tamba꞉ mu hayekeme.  
\v 37 Kutu pu hayekepate nate ma꞉nda꞉na꞉ koto wanda꞉ta꞉ yeni tondope mea ota꞉ homeekeme. Ipika꞉ toko tanda꞉paata꞉ oli manda da panda꞉ pa꞉ta꞉ wina꞉ lemekeme.  
\v 38 Koto Diopa data꞉ mo Lida da teke pa꞉ta꞉ hayeke handaa mo Diopa da haemeke disaipolo wanda꞉halima꞉ta꞉ Pidata꞉ Lida da pa꞉ta꞉ a꞉pa hala꞉me pi opuaata꞉ hali yaapo pa꞉ta꞉ pi tapaaso alota꞉ Niki pa꞉ta꞉ pilisi a̱i̱ epo lapa꞉peke lena꞉ tapaemekeme.   
\p
\v 39 Koto ekina꞉ Pida tiaota꞉ mo hali yaapo ame̱le̱ mandakena꞉ pemekeme. Da opolo peeketa꞉ oli manda da panda꞉ pa꞉ta꞉ ipiki hatuku a꞉meimikime. Koto pa꞉ta꞉ta꞉ mo kosa꞉piki wanda꞉sunu paeyaoma꞉ta꞉ mombololo hata꞉ e̱ a꞉pa lemekeme. Hande Dokasima꞉ na homeke pa hayeke pita꞉na꞉ tumbulieke sedisunu make kosa꞉ aka꞉manu make Pida pa꞉ta꞉ walemekeme.  
\v 40 Pidama꞉ mo wanda꞉sunu paeyao hama꞉ nane pupe laata꞉ tumiki yotuao yeni peaata꞉ mo wanda꞉ toko handa꞉moneaaso alota꞉ Ta꞉bida. Tiae laa leekeme. Mo wanda꞉ma꞉ leke kila Pida handaata꞉ tiao pitiekeme.  
\v 41 Pidama꞉ panda꞉puniao ipika꞉ kiki yola꞉ mea tiaeyekeme. Kutu pieketa꞉ Pidama꞉ mo Ketiso wanda꞉hali make mo kosa꞉piki wanda꞉sunu make ipupe laata꞉ hande wanda꞉ta꞉ do tiao hala꞉ handa꞉pe laa leekeme.  
\v 42 Koto hande pieke ekita꞉ mo Diopa da paeyao pa꞉ta꞉ la꞉tia tia pimikime. Kutupa wanda꞉hali wopuma꞉ Tekehali pa꞉ta꞉ hone tulaemekeme.  
\v 43 Pidata꞉ Diopa da pa꞉ta꞉ hoto elekeeleke hatiki peaata꞉ mo ma꞉na꞉ yonkelekema꞉ ala꞉ta꞉ ala꞉ta꞉ wepu hayeke hali Saimonona꞉ da pa꞉ta꞉ pelia haepekeme.   
\c 10  
\s1 Pida Koniliesi yaapo  
\p
\v 1 Mo Sesatia da nane ami opisa hali homeke hayekeme. Ipika꞉ bikita꞉ Koniliesie. Ipikana꞉ma꞉ta꞉ mo ami haliweki 100 handeteke hayekeme. Koto somema꞉ handeteke hayeke ami tapakena꞉ bikita꞉ Ideli tapakee.  
\v 2 Hande halita꞉ Koda꞉ pa꞉ta꞉ hone wotu u hao ipika꞉ weteke weki wandikima꞉ Koda꞉ pa꞉ta꞉ paala꞉ma꞉ wotu homa꞉tiki pu haemekeme. Kutupa ipika꞉ kiki tindipao mani dia꞉yeke wanda꞉hali pa꞉ta꞉ halo haota꞉ Koda꞉ pa꞉ta꞉ yeni pia꞉tiki pu hayekeme.  
\v 3 Nate ma꞉nda꞉na꞉ nate toke nane haena꞉ Koda꞉na꞉ enisolo homeke epeekeeki upama꞉ ota꞉ peneme yao handeke nono piekeme. Mo enisoloma꞉ ipiki pa꞉ta꞉ alota꞉ Koniliesio leekeme.  
\v 4 Koniliesima꞉ mo enisolo pa꞉ta꞉ paala꞉ tieke homa handake witolo hata꞉ alota꞉ Tekehalio. Aleke ka꞉ta꞉pe leekeme. Kutupa ipiki pa꞉ta꞉ alota꞉ Naka꞉ yeni pu haleeki make naka꞉ mani halo haleeki make oli hepeni da nane pua Koda꞉ pa꞉ta꞉ naka꞉ pi laasa꞉me leekeme.  
\v 5 Kutupa ame do mo Diopa da pa꞉ta꞉ hala꞉ hali ma꞉nda꞉ ipika꞉ biki Saimono biki ma꞉nda꞉ Pida epena꞉ handa꞉ mulu pena꞉ hali ma꞉nda꞉ tapae leekeme.  
\v 6 Koto someta꞉ hali ma꞉nda꞉na꞉ da pa꞉ta꞉ ta꞉ka꞉li pua pila꞉me. Mo da teke hali Saimonota꞉ ma꞉na꞉ yonkeleke hako ala꞉ta꞉ ala꞉ta꞉ wepu hala꞉ halie. Kutupa ipika꞉ data꞉ dawala ikali tea꞉na꞉ hala꞉me leekeme.  
\v 7 Kutupa mo hande ipiki pa꞉ta꞉ pi leeke enisolo peeke nane ipika꞉ e pokao hayeke hali yaapo make ipiki teke pa꞉ta꞉ hayeke ami hali homeke make wi leekeme. Mo ipiki teke pa꞉ta꞉ hayeke ami halita꞉ Koda꞉ pa꞉ta꞉ paala꞉ma꞉ homo hayekeme.  
\v 8 Kutupa mo hande leeke pita꞉ iki pa꞉ta꞉ la halaaka꞉na꞉ Diopa da nane tapaeyekeme.   
\p
\v 9 Kutupa da kelepeeketa꞉ mo pota꞉na꞉ pu opu hao pa Diopa da teke pa꞉ta꞉ ipulu haena꞉ kone Pidata꞉ nate you tikekena꞉ haena꞉ mo da holuna꞉ a꞉meiya yeni pua piekeme.  
\v 10 Kotoeki pitolo haena꞉ tea꞉ tieke wopu pieke handa ya nee hone witolo haena꞉ oni haliwekima꞉ ne amu peaaso haena꞉ Pidata꞉ u̱ yoka꞉ lupa peekeme.  
\v 11 Peliolo hata꞉ upama꞉ handeekepate oli ya akolopa꞉olu bao dapolo tiekema꞉ handeke ale honiki nane tonkopu mina꞉ alu alu pea mea lopa꞉niaeyekeme.  
\v 12 Koto ale pa꞉ta꞉ta꞉ ma꞉na꞉ yeti ala꞉ta꞉ ala꞉ta꞉ make basunu paeyao kenkena꞉ ula꞉ keto ala꞉ta꞉ ala꞉ta꞉ sunu make mu pamba a꞉pa mea lopa꞉niaeyekeme.  
\v 13 Kutupa pi ho̱la̱꞉makema꞉ alota꞉ Pidao. Tiao. Koto alemanu lia nae leekeme.  
\v 14 Koto leekepate Pidama꞉ alota꞉ Tekehalio. Ota꞉ dia꞉me leekeme. I̱ta꞉ hoke ale manuta꞉ na no halome leekeme.  
\v 15 Hande pi hoto yaapo peao paa alota꞉ Koda꞉ma꞉ wamo pea ula꞉ aleta꞉ hoepeao ula꞉ alee pi na lapeke leekeme.  
\v 16 Kotoeki hoto tepo peao peata꞉ mo hande aleta꞉ oli ya nane pa mea a꞉meiyekeme.   
\p
\v 17 Pidata꞉ mo hande upata꞉ eki pulu piena꞉ pia꞉pe laa hone witolo haena꞉ Koniliesima꞉ tapaeyeke haliweki Saimonona꞉ data꞉ hando pa꞉ta꞉pe lolo pieke haliweki pota꞉ kake pa꞉ta꞉ a꞉pa hando haemekeme.  
\v 18 Kutupa wi leekeme. Saimono Pidata꞉ koto pa꞉ta꞉ hala꞉pe la lota꞉ piekeme.  
\v 19 Koto ekina꞉ Pidama꞉ mo hande upa piekeeki hone witolo pitina꞉ mo Holi Sipitidima꞉ alota꞉ Handa꞉e. Hali tepoma꞉ neke oni a꞉pa lota꞉ pita꞉la꞉ handa꞉e leekeme.  
\v 20 Tiao. Oni haliweki ame̱le̱ hone ma꞉nda꞉ na wiki pa pulu ombu hapekee leekeme. Koto haliwekita꞉ I̱ma꞉ tapao pua꞉me leekeme.  
\v 21 Kutupa Pida hola꞉pa꞉niao alota꞉ I̱ta꞉ ikana꞉ma꞉ koto weiteleme halie leekeme. Ekipeke epemepe leekeme.  
\v 22 Mo haliwekima꞉ alota꞉ Koniliesita꞉ ami opisa epeke halima꞉ tapaeya꞉me laa ipikana꞉ma꞉ Koda꞉ pa꞉ta꞉ paala꞉ma꞉ homa꞉la꞉ halie laata꞉ Diu wanda꞉hali paeyaoma꞉ epeke pi lo hala꞉ halie. Kutupa Koda꞉na꞉ yako piki enisolo homekema꞉ leeke handa naka꞉ pimanu tonka꞉na꞉ opuluekema꞉ neke handa꞉ mulu pupe leeke handa ipuluma꞉me lemekeme.  
\v 23 Kutupa Pidama꞉ da pa꞉ta꞉ epena꞉ wi laa ne polu pieke da make waleekeme.  
\p Kutupa da kelepeeketa꞉ Pida make mo hali tepo make mandane Diopa Ketiso haliweki make mandakena꞉ pemekeme.  
\v 24 Kutupa da ma꞉nda꞉ kelepeeketa꞉ Sesatia da nane opolo pemekeme. Mo haliweki Koniliesima꞉ handeteke hata꞉ ipika꞉ tapake wanda꞉hali make ipika꞉ yankeketiti make wi lemipi pieke handa paeyao momba꞉la haemekeme.  
\v 25 Pida da pa꞉ta꞉ honda꞉ pambeeketa꞉ Koniliesima꞉ a꞉pa manda꞉hande pea ipika꞉ anke pa꞉ta꞉ lopa꞉niao Pida pa꞉ta꞉ panda꞉puniaeyekeme.  
\v 26 Kutu piekepate Pidama꞉ mo hali mina꞉liao alota꞉ Tiae. I̱ make kenke halie leekeme.  
\v 27 Kutupa Pidama꞉ mo hali yaapo pi alo hata꞉ da tukiki nane puaata꞉ mo hande mombelemeke wanda꞉hali handa alota꞉  
\v 28 Diu halima꞉ kenke ma꞉nda꞉ hali yaapo ta꞉ma꞉ni pea꞉peke na yeke ipika꞉ da pa꞉ta꞉ pua꞉peke na ya꞉la꞉me ekita꞉ ika꞉ kone handelemepate Koda꞉ma꞉ Hali ma꞉nda꞉ta꞉ hoke hali o hoe peao hala꞉ halie pi na lapeke laa I̱ pa꞉ta꞉ walea꞉me leekeme.  
\v 29 Koto ekina꞉ mo haliwekima꞉ I̱ handa꞉ mulu epeeke handa I̱ta꞉ hone ma꞉nda꞉ na wiki epoa꞉me. Kota꞉ ekipeke I̱ handa꞉ mulu epena꞉ la pipe leekeme.   
\p
\v 30 Kutupa Koniliesima꞉ alota꞉ Hoto tonkopu amba꞉ yopua nate dupitolo haena꞉ I̱ma꞉ta꞉ do da pa꞉ta꞉ hata꞉ welealo nane yeni pitolo hano hakepiki dau pambaake hali kuta kone a꞉pa I̱ teke pa꞉ta꞉ haya꞉me leekeme.  
\v 31 Mo halima꞉ alota꞉ Koniliesio. Naka꞉ yeni pu haleeki make naka꞉ mani halo haleeki make Koda꞉ma꞉ hone wita꞉la꞉me.  
\v 32 Koto ekina꞉ mo Diopa da pa꞉ta꞉ mo hali Saimono biki ma꞉nda꞉ Pida hali ma꞉nda꞉ma꞉ handa꞉ mulu pena꞉ tapae la alota꞉ Mo halita꞉ ma꞉na꞉ yonkelekema꞉ hako wopu hala꞉ hali Saimonona꞉ da pa꞉ta꞉ hala꞉me lea꞉me. Mo data꞉ dawala ikali tea꞉na꞉ hala꞉me laa lea꞉me.  
\v 33 Koto ekina꞉ koto kone neke handa꞉ mulu pimi haliweki tapaowa꞉me leekeme. Kutupa epeke epeme leekeme. Ameta꞉ Tekehalima꞉ neke pa꞉ta꞉ dupa lapeke lea꞉ pimanu paeyao opoluekema꞉ do a꞉pa Koda꞉ pa꞉ta꞉ momba꞉la haloma꞉me leekeme.   
\s1 Pidana꞉ pi leekeeki  
\p
\v 34 Kutupa Pidama꞉ alota꞉ Ameta꞉ ota꞉ handolome. Koda꞉ma꞉ wanda꞉hali paeyao pa꞉ta꞉ hone ta꞉ta꞉ ta꞉ta꞉ na wiki homeke hone wita꞉la꞉eki handolome leekeme.  
\v 35 Kenke paeyaona꞉ hala꞉ hali epima꞉ Koda꞉ pa꞉ta꞉ paala꞉ma꞉ homolo hata꞉ ipika꞉ epeke hau pu haya꞉ka꞉na꞉ta꞉ Koda꞉ma꞉ koto hali milieke leekeme.  
\v 36 Ikana꞉ma꞉ do ekita꞉ amba꞉ ta handeleme handa꞉e. Koda꞉ma꞉ mo Isulai wanda꞉hali pa꞉ta꞉ pi tapaeyekeeki loa꞉me. Ipikana꞉ma꞉ mo a꞉nda꞉ peliaasa꞉ Pi Seliapota꞉ Yesu Ketiso pa꞉ta꞉ yama꞉ walena꞉ leekeme. Yesuta꞉ wanda꞉hali make ala꞉ta꞉ ala꞉ta꞉ make paeyaona꞉ Tekehalie.  
\v 37 Kutupa mo hande Diudia nane paeyao pa꞉ta꞉ ame do numaneke pimiki ekita꞉ I̱ma꞉ iki pa꞉ta꞉ na lolueke. Ikana꞉ma꞉ amba꞉ opimika꞉ta꞉me. Dionima꞉ bapitaisi hau peaeyeke nane wetepena꞉ mo Ka꞉lili nane kini pu miekeme.  
\v 38 Hande Na꞉sa꞉tete da halita꞉ Yesue. Ipikita꞉ Koda꞉ma꞉ wele peaaso hata꞉ mo Holi Sipitidima꞉ make suta꞉pe wiaeyekeeki opimika꞉ta꞉me. Kutupa ipikana꞉ma꞉ Koda꞉ ame̱le̱ hata꞉ epeke hau pea꞉tiki pu hao Sadanima꞉ hoeyaeyeke wanda꞉hali mea tiatiki pu hao pomu hayekeme.  
\v 39 Kutupa mo Diu wanda꞉halina꞉ kenke nane make mo Diutuseleme da pa꞉ta꞉ make ipikana꞉ma꞉ pia꞉ ekimanu paeyaota꞉ nikana꞉ma꞉ wekitisi haloma꞉me. Kutupa koto hoki naneta꞉ mo haliwekima꞉ ipiki meata꞉ tina꞉ tamendiao homena꞉ lememe.  
\v 40 Kutu pimipate hoto tepona꞉ wina꞉ laata꞉ Koda꞉ma꞉ paa mea tiaota꞉ peneme yao walea꞉me.  
\v 41 Wanda꞉hali paeyaoma꞉ handena꞉ na leke pa Koda꞉ma꞉ amba꞉la talopu mieke wanda꞉halima꞉ homeke handena꞉ lea꞉me. Nikita꞉ ipika꞉ la haloloma꞉ haliweki haloma꞉me. Ipika꞉ homa paa tiao a꞉paata꞉ nikana꞉ma꞉ ipiki ame̱le̱ ne noma꞉me.  
\v 42 Kutupa ipikana꞉ma꞉ niki pa꞉ta꞉ mana꞉ alo hata꞉ alota꞉ dupae. Wanda꞉hali pa꞉ta꞉ pi walemeka꞉na꞉ta꞉ Koda꞉ma꞉ I̱ta꞉ homa꞉la꞉ wanda꞉hali make pa haleme wanda꞉hali make ika꞉ pi yokaalu peaalo polo hali mea hano lea꞉me lapa꞉peke lea꞉me.  
\v 43 Mo hande potopede haliweki paeyaoma꞉ ipiki pa꞉ta꞉ lemeke ekita꞉ dupae. Hali epima꞉ ipika꞉ pi miniki haya꞉ka꞉na꞉ta꞉ kota꞉ ipika꞉ bikina꞉ mo hoke hau piekeeki pa tombuaasa꞉eki milieke lemekeme leekeme.   
\s1 Diendaili wanda꞉halima꞉ Holi Sipitidi mimikieki  
\p
\v 44 Pidama꞉ koto pimanu alo haena꞉ kone mo Holi Sipitidima꞉ koto opimiki wanda꞉hali paeyao pa꞉ta꞉ hola꞉pa꞉niaeyekeme.  
\v 45 Hande Pida ame̱le̱ a꞉pa haemeke Ketiso haliwekima꞉ Diu haliweki kone leke opa wotu handaake wimikime. Koda꞉ma꞉ mo Diendaili wanda꞉hali pa꞉ta꞉ kone mo Holi Sipitidi haleeke handa pimikime.  
\v 46 Mo wanda꞉halima꞉ da ma꞉nda꞉ ma꞉nda꞉na꞉ pi kone pa laaka꞉na꞉ Koda꞉na꞉ pi laemekeme. Kutupa Pidama꞉ alota꞉  
\v 47 Hali epima꞉ do wanda꞉hali pa꞉ta꞉ ikalima꞉ bapitaisi hau na pina꞉ lapeke ya꞉la꞉pe. Nika꞉ kone Holi Sipitidi muma꞉ tupa꞉ ta mimi handa꞉pe leekeme.  
\v 48 Kutupa Pidama꞉ koto wanda꞉hali Yesu Ketisona꞉ bikina꞉ bapitaisi peaapa꞉pekee leekeme. Kutupa ikana꞉ma꞉ Pida pa꞉ta꞉ nate mandaneeki do pa꞉ta꞉ hamana꞉e laa honke lemekeme.   
\c 11  
\s1 Pidama꞉ Diutuseleme haemeke Ketiso wanda꞉hali la haleekeeki  
\p
\v 1 Mo Diudia nane haemeke aposolo haliweki paeyao pa꞉ta꞉ make Ketiso wanda꞉hali make iki paeyaoma꞉ta꞉ mo Diendaili wanda꞉halima꞉ make Koda꞉na꞉ pi mimiki ekita꞉ opimikime.  
\v 2 Pidata꞉ oli Diutuseleme da nane peeke pita꞉ta꞉ hande Diendaili haliweki pa꞉ta꞉ sekemesaisi hau peaaluekema꞉ hone wimiki haliwekima꞉ Pidama꞉ pieke hauna꞉ lota꞉ pitolo dupa lemekeme.  
\v 3 Nakana꞉ma꞉ta꞉ mo sekemesaisi hau na piki Diendaili haliwekina꞉ da pa꞉ta꞉ pelia hao ne mandakena꞉ nemekeme la lemekeme.  
\v 4 Koto lemeke handaata꞉ Pidama꞉ta꞉ amba꞉ pieke haumanu kini pu mea kutupa mo pieke haumanu paeyao mo haliweki pa꞉ta꞉ la haleeke ekita꞉ dupae.   
\p
\v 5 I̱ta꞉ mo Diopa daoni pa꞉ta꞉ hata꞉ yeni pitolo pitono upama꞉ piki nono pea handoa꞉ ekita꞉ dupae. Dapolo dau tiekema꞉ handeke ale lopa꞉niaeya꞉eki handoa꞉me. Oli ya nane honiki tonkopu yola꞉ mea wia hata꞉ hande dau I̱ haowa꞉ ale teke pa꞉ta꞉ lopa꞉niao wia꞉me.  
\v 6 Kutu pia꞉ ekita꞉ I̱ma꞉ mo dau tukiki nane weni weni naa wotu handoa꞉me. Da ma꞉na꞉sunu make sayale ma꞉na꞉ yeti ala꞉ta꞉ ala꞉ta꞉sunu make ti katakena꞉ ula꞉ keto ala꞉ta꞉ ala꞉ta꞉manu make ya pa꞉ta꞉ pomina꞉la꞉ basunu make paeyao handoa꞉me.  
\v 7 Kotoeki handaata꞉ pi ho̱la̱꞉makema꞉ kone I̱ pa꞉ta꞉ dupa lea꞉eki opua꞉me. Pidao. Tiao. Koto alemanu lia nae lea꞉me.  
\v 8 Koto lea꞉pate I̱ma꞉ alota꞉ Tekehalio. Ota꞉ dia꞉me. Nindi peala꞉ ale ya꞉leke hoeya꞉ pea hata꞉ kutupiki ne hoto homeke a꞉nda꞉ na nolome laa loa꞉me.  
\v 9 Hande pi ho̱la̱꞉makema꞉ kone oli ya nane hata꞉ paa la꞉niaaso alota꞉ Aleta꞉ ma꞉nda꞉ Koda꞉ma꞉ ana꞉na꞉ napeke ya꞉la꞉me lea꞉ka꞉na꞉ta꞉ nakana꞉ma꞉ napeke na ya꞉la꞉ alee pi na lapeke lea꞉me.  
\v 10 Koto pia꞉ hauta꞉ hoto tepo pia꞉me. Koto hande alemanu paeyao oli ya nane pa yola꞉ mia꞉me.  
\v 11 Kotoeki peata꞉ I̱ pelia haowa꞉ da pa꞉ta꞉ hali tepo kuta kone opolo epememe. Koto hali tepota꞉ mo Sesatia nane hayeke hali homekema꞉ I̱ pa꞉ta꞉ tapaeyekeme.  
\v 12 Hande Holi Sipitidima꞉ I̱ pa꞉ta꞉ alota꞉ Hone ma꞉nda꞉ na wiki koto haliweki ame̱le̱ mandakena꞉ pupe lea꞉me. Koto hande Diopa nane haleme kametiti yunki mindiki hata꞉ haliweki I̱ ame̱le̱ mandakena꞉ Sesatia da nane opolo puaata꞉ Koniliesina꞉ da pa꞉ta꞉ honda꞉ pambolo poma꞉me.  
\v 13 Kutupa ipikana꞉ma꞉ta꞉ niki pa꞉ta꞉ enisolo ma꞉nda꞉ma꞉ ipika꞉ da pa꞉ta꞉ a꞉pa hata꞉ ipiki pa꞉ta꞉ leekeeki dupa lea꞉me laa niki pa꞉ta꞉ la kia꞉me. Diopa da nane hali ma꞉nda꞉ tapae laa hali ma꞉nda꞉ ipika꞉ ota꞉ bikita꞉ Saimono Pida koto hali wi lolo pena꞉ tapae laa lea꞉me.  
\v 14 Koto halima꞉ neke pa꞉ta꞉ lolo pa꞉la꞉ pima꞉ta꞉ neke make naka꞉ da pa꞉ta꞉ haleme wanda꞉hali paeyao tonka꞉na꞉ da꞉taalieke laa lea꞉me.  
\v 15 Koto laata꞉ pi kini pu mea walolo hano hande Holi Sipitidita꞉ amba꞉ hande titi panake pa꞉ta꞉ niki pa꞉ta꞉ holopea꞉ tupa꞉ koto tupa꞉ kone iki pa꞉ta꞉ make holopea꞉me.  
\v 16 Kutu pia꞉ta꞉ hande Tekehalima꞉ lea꞉ alee hone ua꞉me dupae. Dionima꞉ta꞉ ikalima꞉ iki bapitaisi peao hayekepate Koda꞉ma꞉ Holi Sipitidima꞉ iki bapitaisi peaalieke laa lea꞉me.  
\v 17 Nikana꞉ma꞉ta꞉ hande Tekehali Yesu Ketiso pa꞉ta꞉ amba꞉ hone tulaome pita꞉ta꞉ Koda꞉ma꞉ niki kia꞉ ekita꞉ kotoeki kone mo Diendaili wanda꞉hali pa꞉ta꞉ make halea꞉me. Koda꞉ma꞉ pita꞉la꞉ ekita꞉ sa꞉sa꞉ pua꞉ka꞉na꞉ta꞉ kota꞉ I̱ta꞉ epipe. Dia꞉me. Sa꞉sa꞉ pea꞉peke na ya꞉la꞉me laa leekeme.   
\p
\v 18 Mo haliwekima꞉ Pidama꞉ leekeeki opuaata꞉ ika꞉ lota꞉ lota꞉ pimiki pimanu tunkulata꞉ Koda꞉na꞉ pi laaso hata꞉ alota꞉ Koda꞉ma꞉ta꞉ mo Diendaili wanda꞉halima꞉ make hone ma꞉nda꞉ la꞉ka꞉la꞉ mina wia da꞉ta꞉la꞉eki mea꞉pa꞉peke pota꞉ lombolo piekeme lemekeme.   
\s1 Mo A꞉ndioko Siosi  
\p
\v 19 Hande Sidipeni lia Ketiso wanda꞉hali luekema꞉ pimiki pita꞉ da mina꞉pa꞉lao pemeke wanda꞉halita꞉ mo Pinisia nane make Saipotasi nane make A꞉ndioko nane make pulu hata꞉ Diu wanda꞉hali pa꞉ta꞉ homeke pi wala꞉tiki pimikime.  
\v 20 Kutu pimikipate mandane haliwekima꞉ Saipotasi Saitini yaapo nane haemeke haliwekima꞉ A꞉ndioko da pa꞉ta꞉ opolo a꞉paata꞉ mo Tekehali Yesuna꞉ pi Kitiki wanda꞉hali pa꞉ta꞉ make wala꞉tiki pimikime.  
\v 21 Kutupa Koda꞉ma꞉ mo haliweki tamba꞉ minolo haena꞉ wanda꞉hali wopuma꞉ pi meaata꞉ Tekehali pa꞉ta꞉ la꞉ka꞉la pemekeme.   
\p
\v 22 Mo Diutuseleme siosi tapakema꞉ handeeki pi opuaata꞉ kutupa oli A꞉ndioko da pa꞉ta꞉ Banabasi tapaemekeme.  
\v 23 Banabasita꞉ oli da opolo puaata꞉ Koda꞉ma꞉ epeaeyekeeki handaata꞉ ta꞉na꞉ma꞉ wopu homeekeme. Kutupa paeyao pa꞉ta꞉ Tekehalina꞉ pi da̱o̱la hata꞉ wopu miniki hao hapa꞉peke laa pi waleekeme.  
\v 24 Banabasita꞉ ipikita꞉ epeke hali hata꞉ Koda꞉na꞉ pi wopu miniki hayeketa꞉ Holi Sipitidima꞉ ipiki tumbaeyekeme. Kutupa wanda꞉hali wopu Tekehali pa꞉ta꞉ apa꞉tao ta꞉ma꞉ni pea haemekeme.  
\v 25 Koto ekina꞉ Banabasima꞉ mo Tasa꞉si da nane Solo weilu peekeme.  
\v 26 Kutupa handa꞉ wiata꞉ mo A꞉ndioko da pa꞉ta꞉ hatuku epeekeme. Bapi homeke koto pa꞉ta꞉ hata꞉ mo siosi tapake ame̱le̱ pi hotu haota꞉ wanda꞉hali wopu pi walo haepekeme. Koto da pa꞉ta꞉ pi mimiki wanda꞉hali ikita꞉ mo Ketiso wanda꞉halie laa mo koto bikita꞉ koto da pa꞉ta꞉ kini pu mimikime.   
\p
\v 27 Koto dina꞉ta꞉ mandane potopede haliwekita꞉ Diutuseleme da hao oni A꞉ndioko da opolo epemekeme.  
\v 28 Kutupa homeke halita꞉ Akipasima꞉ mo Holi Sipitidima꞉ la halolo haena꞉ tiao alota꞉ Tea꞉ ki tieke kenke paeyao nane ipilieke laa waleekeme. Kutupa mo Kolodiusima꞉ Sisa hayeke natena꞉ kutu piekeme.  
\v 29 Kutupa mo disaipolo wanda꞉halima꞉ hone wia alota꞉ Nika꞉ Diudia nane haleme kametiti tamba꞉ mumana꞉ paeyaoma꞉ ana꞉na꞉ halomana꞉e lemekeme.  
\v 30 Koto ekina꞉ kotoeki peata꞉ oli siosi tondiki haliweki pa꞉ta꞉ Banabasi Solo yaapoma꞉ mea puaena꞉ laa tapaemekeme.   
\c 12  
\s1 Tanda wopu minelemeeki  
\p
\v 1 Koto pita꞉ta꞉ hande kini hali Hetodima꞉ mandane siosi tapake haliweki da꞉ka꞉pa꞉ miniekeme.  
\v 2 Ipikana꞉ma꞉ Dionina꞉ hameke Dia꞉mesita꞉ kepete hokuluma꞉ liekeme.  
\v 3 Kutupa Diu wanda꞉halima꞉ ta꞉na꞉ma꞉ homemeke handa Pida make da꞉ka꞉pa꞉ miniekeme. Mo hande Na Pombei Yaake Palaowa Nemeke pita꞉ piekeme.  
\v 4 Kutupa da꞉ka꞉pa꞉ minata꞉ dipula mea lopao ami haliweki mandane tonkopu mandane tonkopu mandane tonkopu mandane tonkopu haliwekita꞉ kade hatiki pina꞉ leekeme. Ipika꞉ honema꞉ta꞉ mo hande Lombei Pupa Yapeeke pita꞉ paeya꞉ka꞉na꞉ta꞉ wanda꞉hali pa꞉ta꞉ mea a꞉pa walueke hone wiekeme.  
\v 5 Koto ekina꞉ Pidata꞉ dipula da pa꞉ta꞉ pa pitina꞉ leekepate mo siosi tapake wanda꞉halima꞉ Koda꞉ pa꞉ta꞉ Pida yeni wopu pea꞉tiki pimikime.   
\s1 Pida dipula pao tapaeyekeeki  
\p
\v 6 Hetodima꞉ Pida mea a꞉pa waluekema꞉ haena꞉ timba kone Pidata꞉ mo ami hali yaapo ame̱le̱ seni pu yaapoma꞉ endialu pea tukiki pa꞉ta꞉ peliekeme. Kutupa pota꞉ hama꞉ nane hata꞉ kade haliwekima꞉ mo dipula da handeteke hatiki ombu pimikime.  
\v 7 Kuta kone Tekehalina꞉ enisolo homeke epeeketa꞉ mo da panda꞉ pa꞉ta꞉ pa̱a̱ tieke piekeme. Kutupa ipikana꞉ma꞉ Pida a꞉pa lu tiaaso alota꞉ A̱i̱ tiae leekeme. Kutupa hande seni pumanu ipika꞉ kiki pa꞉ta꞉ kone tunkulupa lopa꞉ lopa꞉ piekeme.  
\v 8 Kutupa mo enisoloma꞉ ipiki pa꞉ta꞉ alota꞉ Naka꞉ hako yama anke dake pambae leekeme. Kutu piekeme. Kutupa ipikana꞉ma꞉ Pida pa꞉ta꞉ alota꞉ Naka꞉ dau mea dopua I̱ teli mea epoe leekeme.  
\v 9 Kutupa teli mea hama peekeme. Pidama꞉ mo enisoloma꞉ pieke ekita꞉ hone na wiki upama꞉ piki nono piekeme.  
\v 10 Kutupa titina꞉ kade hayeke alena꞉ lombei pupa pua koto hoki pa꞉ta꞉eki make lombei pupa puaata꞉ mo hande daoni nane peeke ayenima꞉ wepieke pota꞉ kake tieke pa꞉ta꞉ opolo pepekeme. Kutupa mo hande pota꞉ta꞉ ipika꞉ kone lombeekeme. Kutupa ipilikita꞉ tunkulupa puaata꞉ pota꞉ homeke yola꞉ mea pepekepate mo enisolota꞉ koto kone Pida mina꞉pa꞉lao peekeme.   
\p
\v 11 Koto pita꞉ta꞉ Pidama꞉ hone wiekeme. Ameta꞉ ota꞉ hone wia handolome leekeme. Tekehalima꞉ ipika꞉ enisolo tapao mo Hetodima꞉ I̱ mia꞉ ekita꞉ mo Diu wanda꞉halima꞉ I̱ pa꞉ta꞉ pulu pelemeeki make I̱ tamba꞉ mia꞉me leekeme.   
\p
\v 12 Koto hone wiata꞉ Dionita꞉ ipika꞉ biki ma꞉nda꞉ Maka ipika꞉ inkiki Metina꞉ da pa꞉ta꞉ peekeme. Koto da pa꞉ta꞉ wanda꞉hali wopuma꞉ momba꞉la pita꞉ yeni pu pitimikime.  
\v 13 Kutupa mo pota꞉ kake pa꞉ta꞉ pua hoto laa kilikili laeyekeme. Kutupa wandiki ma꞉nda꞉ Loudama꞉ lombolo peekepate  
\v 14 Pidana꞉ pi make meata꞉ ta꞉na꞉ma꞉ wopu homolo hata꞉ pota꞉ na lombeke da tukiki pa꞉ta꞉ anke hao pua Pidata꞉ pota꞉ kake pa꞉ta꞉ a꞉pa hala꞉me leekeme.  
\v 15 Ikana꞉ma꞉ ipiki pa꞉ta꞉ alota꞉ Neketa꞉ keaaso alee lemekepate ipikana꞉ma꞉ alota꞉ Ota꞉ loa꞉me leekeme. Ikana꞉ma꞉ alota꞉ Ipika꞉ enisolo hata꞉ pa꞉la꞉me lemekepate  
\v 16 Pidama꞉ kilikili laaso haena꞉ pua pota꞉ lomba Pida handolo hata꞉ penkilipa꞉tia pomua wotu handake wimikime.   
\p
\v 17 Kutu pimikipate Pidama꞉ kikima꞉ kone pi na lapee leekeme. Kutupa Tekehalima꞉ mo dipula da pa꞉ta꞉ hatuku epeeke pi la haleekeme. Kutupa Pidama꞉ alota꞉ Dia꞉mesi pa꞉ta꞉ make Ketiso kametiti pa꞉ta꞉ make do pi la hala꞉pa꞉peke leekeme. Kutupa mina꞉pa꞉lao pua da ma꞉nda꞉ pa꞉ta꞉ peekeme.   
\p
\v 18 Da kelepeeketa꞉ mo hande ami haliwekima꞉ Pida na pitieke handa hone ti yokemekeme.  
\v 19 Kutupa Hetodima꞉ Pida weiyekepate na handa꞉ wiekeme. Koto ekina꞉ mo kade haemeke haliweki pa꞉ta꞉ Ekipa pa꞉la꞉pe laa lota꞉ lota꞉ peata꞉ mo haliweki homena꞉ lina꞉ leekeme. Doeki paeyeketa꞉ Hetodi Diudia mina꞉pa꞉lao nate mandaneeki Sesatia nane hayekeme.   
\s1 Hetodi homeekeeki  
\p
\v 20 Hetodima꞉ Taiya Saidoni da yaapo pa꞉ta꞉ haemeke wanda꞉hali pa꞉ta꞉ mineke tieke wopu pankeekeme. Koto ekina꞉ mo da yaapo pa꞉ta꞉ haemeke mandane haliwekima꞉ apa꞉tao Hetodi handolo pemekeme. Titina꞉ amba꞉la mo kini halina꞉ da handeteke hayeke hali Ba꞉lasitusita꞉ ika꞉ a꞉nda꞉ liaena꞉yeke ipiki ame̱le̱ pi lolo pemekeme. Mo halima꞉ ika꞉ pi opiekeme. Kotoeki pea꞉ta꞉ a꞉nda꞉ polumana꞉e laa Hetodi pa꞉ta꞉ honke lolo pemekeme. Ika꞉ wanda꞉halina꞉ neta꞉ Hetodima꞉ handeteke hayeke kenke pa꞉ta꞉ mu haemeke ekina꞉yeke lemekeme.   
\p
\v 21 Hetodima꞉ la꞉ wieke nate ma꞉nda꞉na꞉ kini halima꞉ ipika꞉ yamo haya꞉ aka꞉manu yamaata꞉ ipika꞉ yama pitu hayeke seana꞉ pita꞉ wanda꞉hali pa꞉ta꞉ pi leekeme.  
\v 22 Wanda꞉halima꞉ opuaata꞉ anekema꞉ wi la alu alu pitolo alota꞉ Dota꞉ ota꞉ halima꞉ na ala꞉me laa koda꞉ ma꞉nda꞉ma꞉ ala꞉pate ya꞉la꞉me lemekeme.  
\v 23 Hetodima꞉ta꞉ wanda꞉halima꞉ Koda꞉na꞉ pi na laena꞉ leke pa ipika꞉ pi kone laena꞉ leeke handaata꞉ kuta kone Tekehalina꞉ enisoloma꞉ Hetodi yeni tonda꞉pa꞉ mina꞉ leekeme. Kutupa pipi manuma꞉ weleke tunkula꞉ mepi naata꞉ homeekeme.   
\p
\v 24 Kutu pitolo haena꞉ kone Koda꞉na꞉ pi mandane mandane wanda꞉hali paeyao pa꞉ta꞉ daeyatia peekeme.   
\p
\v 25 Banabasi Solo yaapoma꞉ mo Diutuseleme da pa꞉ta꞉ pea꞉peke ekimanu pu paeyaota꞉ pa la꞉ka꞉la Dioni Maka make hatuku mandakena꞉ pemekeme.   
\c 13  
\s1 Banabasi Solo yaapo meata꞉ tapaemekeeki  
\p
\v 1 Mo A꞉ndioko siosi tapake pa꞉ta꞉ mandane potopede haliweki make pi walo haemeke haliweki make haemekeme. Koda꞉na꞉ pi lao hayeke Banabasi make Simioni biki ma꞉nda꞉ Naidia make Saitini hali Lusiasi make hande you hali Hetodina꞉ yankeke hali homeke Maneini make Solo make haemekeme.  
\v 2 Kutupa Tekehali pa꞉ta꞉ ne na neke panda꞉puniaaso haena꞉ mo Holi Sipitidima꞉ alota꞉ Banabasi Solo yaapo yaka walo polo e pokaena꞉yeketa꞉ pa nane haena꞉ lape leekeme.  
\v 3 Kutupa pa ne na neke yeni peaata꞉ mo hali yaapona꞉ youna꞉ kiki wiata꞉ hande leeke e pokaena꞉ pena꞉ tapaemekeme.   
\s1 Saipotasi haepekeeki  
\p
\v 4 Koto ekina꞉ hande hali yaapota꞉ mo Holi Sipitidima꞉ tapaaso haena꞉ oni Selusia nane pepekeme. Koto pa꞉ta꞉ opolo pua Saipotasi nane palai kawaso tiekena꞉ pita pepekeme.  
\v 5 Kutupa Salamisa da nane opolo puaata꞉ Diu haliwekina꞉ pi hotu haemeke damanu pa꞉ta꞉ Koda꞉na꞉ pi ale waloendi pu haepekeme. Dioni Makama꞉ make ipiliki petoloendi pu hayekeme.   
\p
\v 6 Mo hoki paeyao pa꞉ta꞉ waloendi pu haota꞉ mo Peiposi da nane puaata꞉ ti̱o̱ hali homeke bikita꞉ Ba Yesu handepekeme. Ipikita꞉ Diu hali hata꞉ pa yayapiki potopede hayekeme.  
\v 7 Koto halita꞉ mo hokina꞉ kapomani you hali Sesiasi Polasi yaapo ame̱le̱ hao hayeke halie. Mo Sesiasi Polasi ipikita꞉ hone wopu lenkena꞉ pea u hayeke halie. Mo kapomani you halima꞉ Koda꞉na꞉ pi opuluekema꞉ Banabasi Solo yaapo ipiki pa꞉ta꞉ epena꞉ wi leekeme.  
\v 8 Hali yaapo pepekepate mo ti̱o̱ hali Elimasima꞉ mo Kitiki pi laa koto ti̱o̱ halina꞉ bikita꞉ Elimasie ipikana꞉ma꞉ta꞉ Banabasi Solo yaapo sa꞉sa꞉ puluekema꞉ taapeekeme. Mo kapomanina꞉ you halima꞉ Tekehali pa꞉ta꞉ hone tulaasa꞉eki pao la꞉ka꞉la mina haena꞉ loluekema꞉ taapeekeme.  
\v 9 Kutu pieke handa Solo ipika꞉ biki ma꞉nda꞉ Polo ipikana꞉ma꞉ta꞉ Holi Sipitidima꞉ ipiki tumba pitina꞉ mo ti̱o̱ hali handaake wia alota꞉  
\v 10 Neketa꞉ Sadanina꞉ halie. Epeke alemanu paeyao pa꞉ta꞉ a꞉nda꞉ lu halemee. Mo hoke hoke yayapiki haumanu pita꞉la꞉eki neke pa꞉ta꞉ tumba pila꞉me laata꞉ Tekehalina꞉ ota꞉ pimanu kone nakana꞉ma꞉ta꞉ yayapiki pimanu laa la꞉ka꞉laluekema꞉ taapo haleme.  
\v 11 Koto ekina꞉ ameta꞉ Tekehalima꞉ neke liekee. Kutupa neketa꞉ leke holupiki hali hao hata꞉ta꞉ nate pa̱a̱ a̱i̱ na handilipikie laa leekeme.  
\p Poloma꞉ koto alo haena꞉ kone timba꞉la꞉ pambeke koama꞉ handeke alema꞉ Elimasina꞉ leke telipina꞉ holu peaeyekeme. Ma꞉nda꞉ma꞉ ipika꞉ kiki yola꞉ mea mina pena꞉yeke kikima꞉ hali weiya꞉tiki pomiekeme.  
\v 12 Mo kapomanina꞉ you halima꞉ta꞉ kutu piekeeki hando haota꞉ hone tulaeyekeme. Tekehalina꞉ pi waleekeeki opitolo hata꞉ penkilipa꞉tia pomiekeme.   
\s1 Pisidia nane hayeke da A꞉ndioko da pa꞉ta꞉ pepekeeki  
\p
\v 13 Polo ame̱le̱ mandakena꞉ pemeke haliwekita꞉ palai kawaso tiekena꞉ pitata꞉ mo Peiposi da mina꞉pa꞉lao mo Pa꞉mbilia nane hayeke da Peka pa꞉ta꞉ opolo pemekeme. Koto pa꞉ta꞉ opolo pemekepate Dioni Makata꞉ iki mina꞉pa꞉lao Diutuseleme nane pa la꞉ka꞉la peekeme.  
\v 14 Peka da mina꞉pa꞉lao puaata꞉ mo Pisidia da nane hayeke da A꞉ndioko da pa꞉ta꞉ opolo puaata꞉ mo Hoto Pila꞉ Natena꞉ mo haliwekita꞉ mo Diu haliwekina꞉ pi hotu haemeke da pa꞉ta꞉ honda꞉ pamba pua pitimikime.  
\v 15 Hali ma꞉nda꞉ma꞉ mo Mosesima꞉ wape pea ula꞉ Lo Pimanu make mo potopede haliwekima꞉ wape pea ula꞉ pimanu make yata꞉pa haena꞉ta꞉ mo pi hotu haemeke da you haliwekima꞉ Polo ameda pa꞉ta꞉ pi la꞉moneaaso alota꞉ Kame titio. Wanda꞉hali honkopu hao halo pa꞉la꞉ pi lapa꞉peke yea꞉ka꞉na꞉ta꞉ kota꞉ loa꞉mina꞉e hone witoloma꞉me lemekeme.  
\v 16 Koto lemeke Poloma꞉ tiao hata꞉ kiki mea a꞉meiyao pi dupa waleekeme.  
\p Ya tapake Isulai wanda꞉hali iki make Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make I̱ma꞉ alo pi opua꞉pe laata꞉  
\v 17 Koto Isulai tapake wanda꞉halina꞉ Koda꞉ma꞉ nika꞉ apa꞉mei ameda mea haena꞉ laata꞉ mo Idiepi kenke nane da ma꞉nda꞉ wanda꞉hali hata꞉ kone tapake tieke wanda꞉hali hamina꞉ leekeme. Koda꞉ma꞉ ipika꞉ wele wotu pita꞉la꞉ ekima꞉ koto wanda꞉hali Idiepi nane mina꞉pa꞉lao hatuku puaata꞉  
\v 18 mo hapu hayeke alena꞉ bapi 40 mo wanda꞉hali koto pa꞉ta꞉ hata꞉ ikita꞉ ka꞉nda꞉ma꞉ homo hatiki pimikipate Koda꞉ma꞉ handeteke hatiki pu hayekeme.  
\v 19 Mo Keinani kenke pa꞉ta꞉ haemeke tapake watake hata꞉ wanda꞉hali ipikana꞉ma꞉ hoeyaota꞉ ipika꞉ wanda꞉halita꞉ koto kenke teke wanda꞉hali haena꞉ leekeme.  
\v 20 Kutu pu paeyaasa꞉ ekina꞉ bapi manuta꞉ pa 450manu yapeekeme.  
\p Kutupa wetepe naneta꞉ ipikana꞉ma꞉ iki pa꞉ta꞉ pi yokaalu peao haemeke teke haliweki haena꞉ loma꞉ loma꞉ pua꞉tiki a꞉pa mo potopede hali Samuele ipiki a꞉pa hayekeme.  
\v 21 Mo wanda꞉halima꞉ Nika꞉ kini hali ma꞉nda꞉ haena꞉e laa honke lemeke handa Koda꞉ma꞉ iki pa꞉ta꞉ Solo mea haena꞉ leekeme. Ipikita꞉ Benisamini tapake hali Kisina꞉ eiyeke hata꞉ ika꞉ kini hali haena꞉ yapeeke bapi manuta꞉ 40e.  
\v 22 Kutu piekepate Koda꞉ma꞉ Solo yoka pa nane haena꞉ laa Deipidi meata꞉ kini hali haena꞉ leekeme. Koda꞉ma꞉ Deipidi hayekeeki handaata꞉ pi dupa leekeme. I̱ma꞉ handolo alota꞉ dupae. Diesina꞉ eiyeke Deipidita꞉ ipika꞉ hala꞉eki handolo hata꞉ I̱ma꞉ hone pa꞉la꞉me laata꞉ koto halima꞉ta꞉ I̱ma꞉ hone pa꞉la꞉eki paeyao ipikana꞉ma꞉ pilieke la leekeme.  
\v 23 Hande Deipidina꞉ tapake hali Yesuta꞉ Koda꞉ma꞉ la꞉ wieke tupa꞉ Isulai wanda꞉halina꞉ Da꞉taala꞉ Hali haena꞉ la꞉la꞉me.  
\v 24 Yesuma꞉ e a̱i̱ na kini pu mea pokeeke haena꞉ta꞉ Dionima꞉ Isulai wanda꞉hali paeyao pa꞉ta꞉ pi waleekeme. Ika꞉ hoke hau pimiki ekimanu mina꞉pa꞉laota꞉ bapitaisi pina꞉yeke pi waleekeme.  
\v 25 Kutupa Dionima꞉ ipika꞉ e poko paeyaaluekema꞉ hata꞉ wanda꞉hali pa꞉ta꞉ alota꞉ Ika꞉ honema꞉ I̱ halo ekita꞉ epi hone witelemepe. Ikana꞉ma꞉ yu wia haleme halita꞉ I̱ dia꞉ya꞉la꞉pate handa꞉pe. Yaka hoki nane ipula꞉me. Koto ipula꞉ halina꞉ anke daketa꞉ I̱ma꞉ holawaapeketa꞉ ana꞉ na pa꞉la꞉me laa leekeme.   
\p
\v 26 Eipoloha꞉ma꞉ tapake haliweki ya kametitio. Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make Koda꞉ma꞉ do hande niki da꞉taapeke ya꞉la꞉ pi niki pa꞉ta꞉ epena꞉ la꞉la꞉me.  
\v 27 Mo Diutuseleme da pa꞉ta꞉ haleme wanda꞉halima꞉ make ika꞉ you haliwekima꞉ make Yesuta꞉ wanda꞉hali Da꞉taasa꞉ Hali hala꞉ ekita꞉ hone na wimikime. Mo Hoto Pila꞉ Natemanu paeyaona꞉ mo hande potopede haliwekima꞉ wape pea ula꞉ ekimanu yata꞉po halemeeki make hone wopu na wilimime. Kutu pimikipate ikana꞉ma꞉ta꞉ Yesuta꞉ lia homaemeke ekima꞉ mo hande potopede haliwekima꞉ wape pea ula꞉eki kone yaemekeme.  
\v 28 Kutupa ikana꞉ma꞉ Yesu lia homaaluekema꞉ta꞉ pa꞉la꞉eki teke ma꞉nda꞉ na handa꞉ wiki kone Pailedi pa꞉ta꞉ pua honke alo alota꞉ Yesu homae laa honke lemekeme.   
\p
\v 29 Kutupa hande Baibolo bukana꞉ Yesu pa꞉ta꞉ pulu piekeeki wape pea ula꞉eki kone ikana꞉ma꞉ pu paeyaemekeme. Mandane haliwekima꞉ta꞉ Yesu toko mo a꞉ka꞉tei wapepiki tina꞉ endiaemekeme alena꞉ pua honda꞉ mea pua lapa꞉ pimikime.  
\v 30 Kutu pimikipate Koda꞉ma꞉ mo lapa꞉ wieke alena꞉ Yesu pa mea tiaeyekeme.  
\v 31 Kutupa ipikita꞉ ipiki ame̱le̱ mandakena꞉ Ka꞉lili nane hao Diutuseleme da pa꞉ta꞉ pemeke wanda꞉hali pa꞉ta꞉ ipiki handena꞉ hoto elekeeleke peneme yao ipika꞉ leke mineke wala꞉tiki piekeme. Ameta꞉ koto wanda꞉halita꞉ ika꞉ Yesu handemeeki Isulai wanda꞉hali pa꞉ta꞉ la halele wanda꞉hali halememe.  
\v 32-33 Kutupa dikana꞉ma꞉ make koto hande Pi Seliapo iki pa꞉ta꞉ la kuluekema꞉ a꞉pa halopa꞉me. Koda꞉ma꞉ make nika꞉ apa꞉mei ameda pa꞉ta꞉ pi la꞉ wiekeeki ameta꞉ ika꞉ wekiwandiki titi niki pa꞉ta꞉ peaowala꞉me. Yesu da꞉taala꞉ ekima꞉ta꞉ nika꞉eki peaowala꞉me. Hande hoto yaapo peao wape pieke Emeli pa꞉ta꞉ wape pa꞉la꞉ tupa꞉ dupae.  
\q1 Neketa꞉ yaka Wekie. Ame do natena꞉ I̱ta꞉ naka꞉ Apa꞉ halome  
\m laa wape pa꞉la꞉me.  
\v 34 Kutupa Koda꞉ma꞉ Yesu lapa꞉ wieke alena꞉ mea tiao pa hoto ma꞉nda꞉ a꞉nda꞉ paa na homolo pieke ekina꞉ Koda꞉ma꞉ pi dupa leekeme.  
\q1 Hande Deipidi pa꞉ta꞉ I̱ma꞉ pi la꞉ ulueki kone I̱ma꞉ epeke yakopiki hauma꞉ neke ota꞉ epeaalueke  
\m laa wape pa꞉la꞉me.  
\v 35 Kutupa make mo Baibolo bukana꞉ pa ma꞉nda꞉ma꞉ Koda꞉ pa꞉ta꞉ pi alo hata꞉ dupa wape pa꞉la꞉me.  
\q1 Naka꞉ Yakopiki Halina꞉ loke na tandepena꞉ lelipikie  
\m laa wape pa꞉la꞉me.  
\v 36 Deipidi ipika꞉ hayeke pita꞉ta꞉ Koda꞉na꞉ hone pa꞉la꞉ ekimanu pia꞉tiki pu hao wetepena꞉ homeekeme. Ipika꞉ apa꞉mei ameda lapa꞉ pimiki alena꞉ ipiki make koto pa꞉ta꞉ lapa꞉ pimikipate ipika꞉ loke make tandepeekeme.  
\v 37 Kutu piekepate Koda꞉ma꞉ lapa꞉ wieke alena꞉ paa mea tiaeyeke halita꞉ ipika꞉ loke na tandepeekeme.  
\v 38-39 Ya kametitio. Iki paeyaoma꞉ doeki ota꞉ hone wia꞉pa꞉peke. Yesu ipikana꞉ma꞉ pa꞉la꞉ ekima꞉ kone ika꞉ hoke hau pimiki ekimanu pa hameke paeyaapeke pi iki pa꞉ta꞉ waloloma꞉me. Wanda꞉hali epi amedama꞉ ipiki pa꞉ta꞉ hone tulaeya꞉ka꞉na꞉ta꞉ kota꞉ ipika꞉ hoke hau piekeeki manuta꞉ Mosesima꞉ wape pea ula꞉ Lo Pi manuma꞉ ka꞉la꞉pa꞉ tapaapeke na ya꞉la꞉pate Yesuma꞉ ka꞉la꞉pa꞉ tapawalieke.  
\v 40 Koto pa꞉la꞉ ekina꞉ wotu handeteke hapa꞉peke. Mo hande potopede haliwekima꞉ leeke ekimanu iki pa꞉ta꞉ a꞉paama꞉na꞉ loa꞉me. Dupa   
\q1
\v 41 Koda꞉ma꞉ la꞉la꞉ pimanu pa꞉ta꞉ pi la la pu haleme wanda꞉halio. Handa꞉pe.  
\q1 Kutupa handolo hata꞉ penkilipa꞉tia pomua ota꞉ homa꞉pa꞉pekee.  
\q1 Iki haleme dina꞉ta꞉ I̱ma꞉ pokolo polo eta꞉ ikana꞉ma꞉ hone na wilimikie.  
\q1 Ma꞉nda꞉ma꞉ iki pa꞉ta꞉ la kina꞉ kone opua hone na tulaalimikie laa wape pa꞉la꞉me.   
\p
\v 42 Solo Banabasi yaapota꞉ hama꞉ nane pulu haena꞉ wanda꞉halima꞉ ipiliki pa꞉ta꞉ alota꞉ Hande lepe pi mo Hoto Pila꞉ Nate ma꞉nda꞉na꞉ make pa lopena꞉e laa honke lemekeme.  
\v 43 Kutupa mo pi hotu haemeke da pa꞉ta꞉ pi hotia paeyeketa꞉ Diu haliweki wopu make Koda꞉ pa꞉ta꞉ hone wopu u haemeke Diendaili haliweki wopu make Polo Banabasi yaapo teli mea pemekeme. Kutupa ipilikana꞉ma꞉ mo haliweki pa꞉ta꞉ pi laata꞉ Koda꞉na꞉ pa a꞉ta꞉ma꞉ homa꞉la꞉eki honkopu hao wotu miniki hao haena꞉ pi walepekeme.   
\p
\v 44 Kutupa mo hande Hoto Pila꞉ Nate ma꞉nda꞉na꞉ mo daoni nane wanda꞉hali paeyao Koda꞉na꞉ pi opuluekema꞉ mombelemekeme.  
\v 45 Kutu pimikipate mo Diu haliwekima꞉ mo wanda꞉hali paeyao handaata꞉ honditi pitolo hata꞉ Poloma꞉ leeke pita꞉ Ya pi ala꞉me laa ipiki pa꞉ta꞉ pi la la pimikime.  
\v 46 Kutupa Solo pita꞉ Banabasi yaapoma꞉ paala꞉ma꞉ na homeke hata꞉ pi alo alota꞉ Iki pa꞉ta꞉ amba꞉la Koda꞉na꞉ pi ale wala꞉peke ya꞉la꞉pateo. Ikana꞉ma꞉ kiaaso hata꞉ Nikita꞉ deto hala꞉eki mea꞉peke na ya꞉la꞉me alemeke handaata꞉ kota꞉ handa꞉pe. Mo Diendaili wanda꞉hali pa꞉ta꞉ walo pulupa꞉me lepekeme.  
\v 47 Pa ekipeke Koda꞉ma꞉ dupape laa niki pa꞉ta꞉ leeke ekita꞉ dupae.  
\q1 Ikita꞉ mo Diendaili wanda꞉halina꞉ pa̱a̱ pita꞉la꞉eki hamina꞉ la꞉la꞉me leekeme.  
\q1 Ikana꞉ma꞉ mo kenke honiki nane pa꞉ta꞉manu da꞉taasa꞉eki mea pomina꞉ la꞉la꞉me leekeme.   
\p
\v 48 Kutupa mo Diendaili wanda꞉halima꞉ koto pi opuaata꞉ ta꞉na꞉ma꞉ homolo hata꞉ mo Koda꞉na꞉ pi laemekeme. Kutupa deto hala꞉eki mulu pimiki wanda꞉halima꞉ pi mimikime.   
\p
\v 49 Kutupa Tekehalina꞉ pi aleta꞉ da paeyao pa꞉ta꞉ kende tia wiekeme.  
\v 50 Kutu piekepate hande Diu haliwekima꞉ mo Koda꞉ pa꞉ta꞉ hone wopu u haemeke wanda꞉ tieke tieke mandaneeki manuma꞉ make mo daonina꞉ you haliwekima꞉ make Polo Banabasi yaapo ame̱le̱ a꞉nda꞉ lina꞉yeke sutiaemekeme. Kutupa koto da nane mina꞉pa꞉lao pena꞉yeke tolu limikime.  
\v 51 Kutu pimikipate mo hali yaapoma꞉ ipilika꞉ ankena꞉ taleeke dokolota꞉ koto A꞉ndioko wanda꞉hali pa꞉ta꞉ tandelaata꞉ Aikoniomo da nane pepekeme.  
\v 52 Kutupa mo disaipolo wanda꞉halima꞉ Holi Sipitidima꞉ tumba pita꞉ ta꞉na꞉ma꞉ homa꞉ tiaaso haena꞉ haemekeme.   
\c 14  
\s1 Aikoniomo da pa꞉ta꞉ haepekeeki  
\p
\v 1 Kutupa mo Aikoniomo da pa꞉ta꞉ mo Diu haliwekina꞉ pi hotu haemeke da pa꞉ta꞉ telipina꞉ honda꞉ pambepekeme. Kutupa pi epeke tupa꞉ walepeke handa Diu wanda꞉hali wopu make Kitiki wanda꞉hali wopu make Koda꞉na꞉ pi mimikime.  
\v 2 Kutu pimiki handa pi na miki Diu haliwekima꞉ mo Diendaili haliweki sutiaaso hata꞉ ika꞉ hone dunki peao Ketiso wanda꞉hali pa꞉ta꞉ hoke hone wina꞉yeke lemekeme.  
\v 3 Kutupa Polo Banabasi yaapoma꞉ koto pa꞉ta꞉ hao hata꞉ paala꞉ma꞉ na homeke Tekehali Koda꞉na꞉ pi wala꞉tiki pipikime. Kutupa Tekehalima꞉ ipika꞉ pa a꞉ta꞉ma꞉ homa꞉la꞉ pi wanda꞉hali pa꞉ta꞉ peneme yaaluekema꞉ mo hali yaapoma꞉ wele peaaso hata꞉ na hando haemeke ekimanu pina꞉ leekeme.  
\v 4 Kutu piekepate mo daoni wanda꞉halita꞉ mandane aposolo hali yaapo pa꞉ta꞉ tala꞉tiki mandane wanda꞉halita꞉ Diu wanda꞉hali ame̱le̱ tala꞉tiki pimikime.  
\v 5 Kutupa mandane Diu haliweki pita꞉ Diendaili haliweki yaapoma꞉ ika꞉ you haliwekima꞉ A꞉pa꞉la꞉me alo haena꞉ mo Solo Banabasi yaapo hoeyao toopima꞉ luekema꞉ tome tome pambemekepate  
\v 6 mo hali yaapoma꞉ opuaata꞉ mo Laikonia nane haepeke Lisita Debi da yaapo pa꞉ta꞉ make mo topu damanu pa꞉ta꞉ make pindipa puaata꞉  
\v 7 mo hande Pi Seliapo wala꞉tiki pipikime.   
\s1 Lisita Debi da yaapo pa꞉ta꞉ haepekeeki  
\p
\v 8 Kutupa mo Lisita da pa꞉ta꞉ ankena꞉ pua꞉peke na yeeke hali pitiekeme. Ipikita꞉ hoto ma꞉nda꞉ a꞉nda꞉ ankena꞉ na peekeme. Mendieke natena꞉ kone ota꞉ hoeya꞉ paleke mendiekeme.  
\v 9 Ipikana꞉ma꞉ Poloma꞉ pi alo haena꞉ pi opiekeme. Kutupa Poloma꞉ ipiki pa꞉ta꞉ wotu handaata꞉ Do halita꞉ Koda꞉ma꞉ epeaena꞉yeke hone tulaapeke ya꞉la꞉me hone witolo hata꞉  
\v 10 pi anekema꞉ alota꞉ Tiao naka꞉ anke tindipao hae leekeme. Kutupa mo hande halita꞉ koto kone tindipulu bao tiao peekeme.  
\v 11 Wanda꞉hali wopuma꞉ Poloma꞉ piekeeki handaata꞉ Laikonia da pi la wi alo hata꞉ alota꞉ Koda꞉manu ota꞉ hali leke niki pa꞉ta꞉ a꞉pa pia꞉ka꞉ta꞉me lemekeme.  
\v 12 Banabasina꞉ biki ma꞉nda꞉ Siusi lemekeme. Kutupa Polo ipikita꞉ titina꞉ pi waleeke hali yeeke handaata꞉ ipika꞉ bikita꞉ Hemesi lemekeme.  
\v 13 Kutupa mo po̱lo̱ko nane temoko da ma꞉nda꞉ hayekeme. Koto dana꞉ koda꞉ Siusi pa꞉ta꞉ yeni peao hayeke halima꞉ hali kaomanu make palapalama꞉ au laemeke ekimanu make pota꞉ kake tieke pa꞉ta꞉ mea a꞉pa kutupa Polo Banabasi yaapo pa꞉ta꞉ mo wanda꞉hali ame̱le̱ mo kaomanu yeni pitolo lia haluekema꞉ hone wimikime.   
\p
\v 14 Kutu pimikipate Polo Banabasi yaapoma꞉ opuaata꞉ ipilika꞉ dau sinkipa꞉ minalu pea mo wanda꞉hali tukiki pa꞉ta꞉ anke hao pua wi alo alota꞉  
\v 15 Haliwekio. Ekipeke koto hau pitelemepe lepekeme. Diki make ikima꞉ handeke kenke hali yaapoe lepekeme. Do pitelemeeki manuta꞉ paekie lepekeme. Ikana꞉ma꞉ do hau mina꞉pa꞉lamina꞉yeke dikita꞉ Pi Seliapo mea a꞉pa pupa꞉me lepekeme. Do hau pao do ya kenke dawala ikali make tukiki pa꞉ta꞉ ula꞉ alemanu paeyao make wepia haena꞉ la꞉la꞉ deto hala꞉ Koda꞉ pa꞉ta꞉ la꞉ka꞉la epoemena꞉yeke a꞉pa pupa꞉me lepekeme.  
\v 16 Amba꞉ haemeke haliwekita꞉ ika꞉ hone pa꞉la꞉ hau tukiki pa꞉ta꞉ haena꞉yeke pina꞉ leekepate  
\v 17 pa ipika꞉ hala꞉eki waluekema꞉ peneme yaeyekeme dupa. Epeke hau pia꞉tiki pitolo hata꞉ ipikana꞉ma꞉ oli ya nanema꞉ lako epena꞉ alo hata꞉ bapina꞉ ika꞉ e ala꞉ta꞉ ala꞉ta꞉ opaatiki pea kutupa nema꞉ make ta꞉na꞉ma꞉ homa꞉la꞉ hauma꞉ make iki ta꞉na꞉ma꞉ homatiki pita꞉la꞉me lepekeme.  
\v 18 Koto pi lepekepate mo wanda꞉halima꞉ hande kaomanu lia haluekema꞉ taapemekepate paemekeme.   
\p
\v 19 Kutupa A꞉ndioko Aikoniomo Diu haliweki a꞉paata꞉ mo wanda꞉hali sutiaota꞉ Polo toopima꞉ liata꞉ ota꞉ homa꞉la꞉me laa lu yola daoni hama꞉ nane pemekeme.  
\v 20 Kutu pimikipate mo pi mimiki haliweki ipiki wieke alena꞉ momba꞉la haena꞉ Polota꞉ tiao mo daoni tukiki pa꞉ta꞉ paa peekeme. Kutupa da kelepeeketa꞉ Banabasi yaapo mo Debi da nane pepekeme.   
\s1 Hande Sitia nane hayeke da A꞉ndioko nane paa pepekeeki  
\p
\v 21 Kutupa Polo Banabasi yaapoma꞉ koto da pa꞉ta꞉ mo hande Pi Seliapo walaka꞉na꞉ disaipolo wanda꞉hali wopu haena꞉ laata꞉ oli hande Lisita Aikoniomo A꞉ndioko damanu paeyao nane la꞉ka꞉la puaata꞉  
\v 22 Ketiso wanda꞉hali honkopu haena꞉ alo hata꞉ pi walolo alota꞉ Pi wotu miniki hao hapa꞉pekealeo laata꞉ Nikita꞉ ka꞉nda꞉ma꞉ homa꞉la꞉eki wotu meata꞉ Koda꞉ ipika꞉ Kilu Tombuao Hala꞉ ekina꞉ honda꞉ pambulumeke lepekeme.  
\v 23 Polo Banabasi yaapoma꞉ mo siosi tapake handeteke haena꞉ tondiki haliweki tamba꞉ mipi peaata꞉ kutupa ne na neke yeni pitolo hata꞉ mo hande Koda꞉ pa꞉ta꞉ hone tulaasa꞉ wanda꞉hali Koda꞉ma꞉ handeteke haena꞉ lepekeme.   
\p
\v 24 Kutupa Pisidia nane pua lombei pupa Pa꞉mbilia nane opolo pepekeme.  
\v 25 Kutupa Peka da pa꞉ta꞉ pi walaka꞉na꞉ A꞉talia da nane puniaepekeme.  
\v 26 Kutupa koto hao palai kawasona꞉ pita hande A꞉ndioko da pa꞉ta꞉ pepekeme. Koto data꞉ amba꞉ kone mo Koda꞉na꞉ a꞉ta꞉ma꞉ homa꞉la꞉eki minolo hata꞉ ipika꞉ pi walena꞉yeke tapaemeke haliweki pa꞉ta꞉ta꞉ pi wala paeyeke handa paa opolo epepekeme.   
\p
\v 27 Kutupa opolo a꞉paata꞉ siosi tapake wanda꞉hali mombelena꞉ laata꞉ Koda꞉ma꞉ Diendaili wanda꞉halima꞉ pi mina꞉yeke pota꞉ lombeekeeki make walepekeme.  
\v 28 Kutupa mo Ketiso wanda꞉hali ame̱le̱ hao hatiki pimikime.   
\c 15  
\s1 Diutuseleme da pa꞉ta꞉ pi hotimikieki  
\p
\v 1 Kutupa mandane Diudia nane haemeke haliwekima꞉ koto pa꞉ta꞉ hao hola꞉pa꞉nini pea a꞉pa Ketiso wanda꞉hali pa꞉ta꞉ pi walolo alota꞉ Mo hande Mosesima꞉ waleeke sekemesaisi hau na pimika꞉na꞉ta꞉ ikita꞉ deto hala꞉ ekita꞉ na milimikie laa lemekeme.  
\v 2 Koto lemeke ekina꞉ Polo Banabasi yaapoma꞉ mo haliweki ame̱le̱ ka꞉nda꞉piki pi tieke lepeketa꞉ hande A꞉ndioko Ketiso tapake haliwekima꞉ Polo Banabasi yaapo make mandane haliwekima꞉ mo Diutuseleme haemeke aposolo haliweki pa꞉ta꞉ make mo handeteke haemeke tondiki haliweki pa꞉ta꞉ make hande walemeke pi hotulu pena꞉yeke mimikime.   
\p
\v 3 Koto ekina꞉ mo siosi tapakema꞉ tapaemeketa꞉ pua mo Pinisia nane make Sametia nane make pomu lopa mo Diendaili wanda꞉halima꞉ Koda꞉ pa꞉ta꞉ puki la꞉ka꞉laemekeeki walolo hata꞉ koto pima꞉ mo Ketiso wanda꞉hali paeyaota꞉ ta꞉na꞉ma꞉ homaemekeme.  
\v 4 Kutupa Diutuseleme da pa꞉ta꞉ opolo pemeketa꞉ mo aposolo haliweki make tondiki haliwekima꞉ make mo siosi wanda꞉halima꞉ make ta꞉na꞉ma꞉ homolo hata꞉ iki handa꞉ mimikime. Kutupa Koda꞉ma꞉ ipiliki pa꞉ta꞉ pieke ekimanu paeyao walepekepate  
\v 5 mandane Pa꞉tisi tapake Ketiso haliwekima꞉ tiao alota꞉ Mo wanda꞉halita꞉ sekemesaisi hau pina꞉ laata꞉ Mosesima꞉ waleeke Lo Pimanu make opina꞉ laata꞉ ana꞉ pa꞉la꞉me lemekeme.   
\p
\v 6 Mo hande aposolo haliweki make tondiki haliweki ame̱le̱ mo hande lota꞉ pieke ekina꞉ mombelemekeme.  
\v 7 Pi wotu hotu haota꞉ Pidama꞉ tiao alota꞉ Ya kametitio. Amba꞉ kone iki ame̱le̱ hano Koda꞉ma꞉ I̱ mea haena꞉ laata꞉ Diendaili wanda꞉hali pa꞉ta꞉ mo hande Pi Seliapo walonoyeke pa꞉la꞉me. Mo wanda꞉halima꞉ pi opuaka꞉na꞉ hone tulaena꞉yeke pa꞉la꞉me.  
\v 8 Kutupa wanda꞉halina꞉ puki tukiki nane hando hala꞉ Koda꞉ma꞉ta꞉ Diendaili wanda꞉halima꞉ hone tulaasemeeki a꞉pa꞉la꞉me la walolo hata꞉ niki pa꞉ta꞉ ka꞉la꞉ tupa꞉ iki pa꞉ta꞉ make Holi Sipitidi haleekeme.  
\v 9 Kutu pieke ekima꞉ ipikana꞉ma꞉ta꞉ niki Diu wanda꞉hali make iki Diendaili wanda꞉hali make ta꞉ta꞉ ta꞉ta꞉ pea na haloma꞉eki waleekeme. Ika꞉ hone tulaemeke ekina꞉ ipikana꞉ma꞉ ika꞉ hoke haumanu pa paeyaeyekeme.  
\v 10 Koto ekina꞉ Koda꞉ma꞉ pa꞉la꞉eki handa kone ameta꞉ pa ekipeke Koda꞉ la handuluekema꞉ hone witelemepe. Nika꞉ apa꞉meima꞉ make nikana꞉ma꞉ kone make mea꞉peke na yeke ka꞉nda꞉ pa꞉la꞉eki kone pa ekipeke mo hande hone tulaaseme wanda꞉hali pa꞉ta꞉ ka꞉nda꞉ma꞉ homena꞉ alemepe.  
\v 11 Dia꞉me laata꞉ Nikana꞉ma꞉ hone tulaasoma꞉ ekita꞉ Koda꞉ma꞉ Tekehali Yesu ipika꞉ pa a꞉ta꞉ma꞉ homa꞉la꞉ ekima꞉ niki da꞉taasa꞉me. Diendaili wanda꞉hali da꞉taaso pita꞉la꞉ tupa꞉ pita꞉la꞉me.   
\p
\v 12 Banabasi Polo yaapoma꞉ta꞉ Koda꞉ma꞉ ipiliki pa꞉ta꞉ wele pita꞉la꞉eki halaata꞉ mo na hando haemeke ekimanu make wele pieke ekimanu make mo Diendaili wanda꞉hali pa꞉ta꞉ pieke ekimanu walolo haena꞉ta꞉ mo mombelemeke haliwekima꞉ opitolo hata꞉ pi na leke yopu pitimikime.  
\v 13 Pi lo paeyaepeketa꞉ Dia꞉mesima꞉ ipilika꞉ pi hombo peaaso alota꞉ Ya kametitio. I̱ma꞉ alo pi opua꞉pe.  
\v 14 Koda꞉ma꞉ mo Diendaili wanda꞉hali pa꞉ta꞉ mandane ekimanu ota꞉ ipika꞉ wanda꞉hali talopu mea haena꞉ la꞉la꞉ ekima꞉ iki pa꞉ta꞉ ipika꞉ epeke hone wita꞉la꞉eki niki wala꞉la꞉me. Saimonoma꞉ koto la ka꞉la꞉me.  
\v 15 Mo hande potopede haliwekima꞉ lemeke pi manuta꞉ ota꞉ mandake pimanu la꞉la꞉me. Hande Baibolo bukama꞉ la꞉la꞉ tupa꞉   
\q1
\v 16 Tekehalima꞉ alota꞉ Doeki paeya꞉ka꞉na꞉ta꞉ kota꞉ I̱ paa a꞉pata꞉ Deipidina꞉ howa ula꞉ da I̱ma꞉ paa mea a꞉pa a꞉meiyalueke.  
\q1 Koto da taake pa꞉ta꞉ kone I̱ma꞉ paa epeao mea haena꞉ lolueke.   
\q1
\v 17 Kutupa mo mandane mandane wanda꞉hali paeyaoma꞉ta꞉ Tekehali weilimikie.  
\q1 Hande I̱ma꞉ wi lolo Diendaili wanda꞉halita꞉ ota꞉ yakaeki haena꞉ lolome leekeme.   
\q1
\v 18 Tekehalima꞉ amba꞉ kone dupiki pi la halaata꞉ koto ala꞉ handa꞉e leekeme.   
\p
\v 19 Dia꞉mesima꞉ pa alo alota꞉ Yaka honema꞉ta꞉ Koda꞉ pa꞉ta꞉ la꞉ka꞉la꞉ mina haleme Diendaili wanda꞉halita꞉ nikana꞉ma꞉ ka꞉nda꞉ma꞉ homa꞉la꞉eki na halomana꞉ pea꞉pa꞉peke alee.  
\v 20 Dia꞉me. Wape ma꞉nda꞉ pea dupiki pi la halomana꞉ pea꞉pa꞉peke alee. Mo toopi tima꞉ wepia ula꞉ koda꞉manu pa꞉ta꞉ lia haleeke ma꞉na꞉ mindiki napeke na yeke suseke hau na piki make wa꞉ka꞉ta꞉pa lita꞉la꞉ ma꞉na꞉ yeti na neke we make na napa꞉peke laa lomana꞉ pea꞉pa꞉peke alee.  
\v 21 Mosesima꞉ Lo Pi manuta꞉ mo pi hotu haleme da pa꞉ta꞉manu hata꞉ta꞉ Hoto Pila꞉ Nate paeyaona꞉ kone yata꞉pa꞉tiki pu haemekeme. Kutupa make daoni paeyao pa꞉ta꞉manu ipika꞉ pimanu wala꞉tiki pu halememe laa leekeme.   
\s1 Mo Diendaili Ketiso wanda꞉hali pa꞉ta꞉ wape tapaemekeeki  
\p
\v 22 Koto pa꞉la꞉ ekina꞉ mo aposolo haliweki make mo tondiki haliweki make siosi wanda꞉hali paeyao ame̱le̱ ikana꞉ma꞉ iki pa꞉ta꞉ mandane haliweki talopu mea haena꞉ laata꞉ Polo Banabasi yaapo ame̱le̱ hata꞉ta꞉ mo A꞉ndioko da pa꞉ta꞉ tapaaluekema꞉ hone wimikime. Diudasi biki ma꞉nda꞉ Basabasi meata꞉ Sailasi make talopu mea haena꞉ lemekeme. Mo Ketiso wanda꞉halima꞉ koto hali yaapo pa꞉ta꞉ epeke hone u haemekeme.  
\v 23 Kutupa do wapeta꞉ mo haliwekima꞉ mea pena꞉ lemekeme. Koto pase tukiki pa꞉ta꞉ do pi wiekeme.  
\q1 Nikita꞉ aposolo haliwekima꞉ mo siosina꞉ handeteke haloma꞉ tondiki haliwekima꞉ tonka꞉na꞉ ika꞉ kametonu hata꞉ do wapema꞉ nika꞉ oli A꞉ndioko Sitia Silisia nane haleme Diendaili kametiti pa꞉ta꞉ keiyae aloma꞉me.   
\b  
\p
\v 24 Nika꞉ da nane haliweki mandaneeki manuma꞉ pi walolo hata꞉ iki ka꞉nda꞉ peaemeke ekita꞉ opuma꞉me. Nikana꞉ma꞉ dupa lapa꞉peke pi na loma꞉pate pa ika꞉ konema꞉ iki ka꞉nda꞉ma꞉ homaemekeme.  
\v 25 Koto ekina꞉ nikana꞉ma꞉ momba꞉la hata꞉ Mandane haliweki mumana꞉e laa koto haliweki nika꞉ epeke kame yaapo Banabasi Polo ame̱le̱ iki pa꞉ta꞉ tapaoma꞉ka꞉na꞉ta꞉ epelieke loma꞉me.   
\b  
\p
\v 26 Hande hali yaapoma꞉ta꞉ Tekehali Yesu Ketiso pa꞉ta꞉ hone wopu witolo hata꞉ ipilika꞉ lokena꞉ hau hone wopu na wiki homeke nono pea haepekeme.  
\v 27 Koto ekina꞉ Diudasi Sailasi yaapo iki pa꞉ta꞉ tapaasoma꞉me. Kutupa ipilikana꞉ma꞉ kakema꞉ hande pi kone lelipipikie lemekeme.   
\b  
\p
\v 28 Mo Holi Sipitidima꞉ make nika꞉ honema꞉ make iki pa꞉ta꞉ ka꞉nda꞉ma꞉ na homaake pa do pimanu siki homeke a꞉pa꞉la꞉ma꞉ opua꞉pe aloma꞉me.   
\b  
\p
\v 29 Toopi tima꞉ wepia ula꞉ ale pa꞉ta꞉ lia halemeke hoteke ne ala꞉ta꞉ ala꞉ta꞉ na neke we make na neke mo da꞉ka꞉pe miniki hata꞉ homaasa꞉eki na neke loke hoeyaasa꞉ hau na piki kutupa koto haumanu na pimika꞉na꞉ta꞉ epeke tupa꞉ halimikie aloma꞉me. A꞉taloe laa wape pu paeya꞉me.   
\p
\v 30 Kutupa mo tapaemeke haliweki oni A꞉ndioko da nane puaata꞉ Ketiso wanda꞉hali a꞉pa mombelena꞉ laaka꞉na꞉ hande pase halemekeme.  
\v 31 Kutupa yata꞉paka꞉na꞉ta꞉ hande mana꞉ lemekeeki opuaata꞉ ta꞉na꞉ma꞉ homemekeme.  
\v 32 Kutupa Diudasi Sailasi yaapo potopede hali yaapo hata꞉ kone pi wopu walolo hata꞉ta꞉ honkopu haena꞉ lepekeme.  
\v 33 Kutupa koto pa꞉ta꞉ hosiki hao hatiki pipikita꞉ mo Ketiso haliwekima꞉ hande titina꞉ amba꞉ kone tapaemeke haliweki pa꞉ta꞉ epeke tupa꞉ hata꞉ paa tapaemekeme.  
\v 34 [Pate Sailasina꞉ honema꞉ta꞉ do pa꞉ta꞉ pa halueke hone wiekeme.]   
\p
\v 35 Kutu pimikipate Polo Banabasi yaapo A꞉ndioko da nane hao haota꞉ haliweki paeyao ame̱le̱ hata꞉ Tekehalina꞉ pi latiki peata꞉ wala꞉tiki pu haemekeme.   
\s1 Polo Banabasi yaapo ka꞉ta꞉alu pea ta꞉ta꞉ ta꞉ta꞉ pipikieki  
\p
\v 36 Kutupa nate mandaneeki hao Poloma꞉ Banabasi pa꞉ta꞉ alota꞉ Pana꞉e amba꞉ hande Tekehalina꞉ pi walopa꞉ da nina꞉ wanda꞉halita꞉ eki pa꞉la꞉pe laa handopana꞉ pana꞉e leekeme.  
\v 37 Kutupa Banabasima꞉ Dioni Maka hatuku poluekema꞉ hone wiekepate  
\v 38 Poloma꞉ta꞉ hone na wiekeme. Hande Pa꞉mbilia da nane hata꞉ pi walo poluekema꞉ hone na wiki ipiliki mina꞉pa꞉laeyeke handa ana꞉ na pa꞉la꞉me leekeme.  
\v 39 Kutupa ipilika꞉ pi ta꞉ta꞉ ta꞉ta꞉ pea ka꞉nda꞉ma꞉ homepeke handa pota꞉ ma꞉nda꞉na꞉ ma꞉nda꞉ pea pota꞉ ma꞉nda꞉na꞉ ma꞉nda꞉ pea pepekeme. Banabasima꞉ Maka ame̱le̱ pita palai kawasona꞉ Saipotasi nane pepekepate  
\v 40 Poloma꞉ Sailasi meaata꞉ Ketiso haliwekima꞉ Koda꞉na꞉ a꞉ta꞉ma꞉ homa꞉la꞉eki mina꞉yeke tapaemekeme.  
\v 41 Kutupa puata꞉ Sitia Silisia yaapo nane siosi wanda꞉hali honkopu haena꞉ alo hata꞉ pomu haepekeme.   
\c 16  
\s1 Timodita꞉ Polo Sailasi ame̱le̱ pemekeeki  
\p
\v 1 Kutupa mo Debi Lisita da yaapo nane opolo epepekeme. Ketiso hali homeke Timodi koto pa꞉ta꞉ hayekeme. Ipika꞉ inkikita꞉ Diu wanda꞉ma꞉ kone pi miniki hayeke wanda꞉na꞉ eiyeke hayekepate ipika꞉ ateketa꞉ Kitiki hali hayekeme.  
\v 2 Mo Lisita Aikoniomo da yaapona꞉ Ketiso wanda꞉halima꞉ Timodi ipika꞉ pi lao haemekeme.  
\v 3 Poloma꞉ ipika꞉ honema꞉ta꞉ Timodi yaapo poluekema꞉ mo some meaata꞉ sekemesaisi hau peaeyekeme. Mo da nina꞉ haemeke Diu haliwekima꞉ Timodina꞉ ateketa꞉ Kitiki halie laa handemeke handa peaeyekeme.  
\v 4 Mo daoni pa꞉ta꞉manu pomu lopolo hata꞉ hande Diutuseleme aposolo haliwekima꞉ make handeteke haemeke tondiki haliwekima꞉ make lemeke pi manuta꞉ mo Ketiso wanda꞉halima꞉ hone wina꞉yeke la hala꞉tiki pimikime.  
\v 5 Koto ekina꞉ mo hande siosi tapake manuma꞉ hande pi mina꞉la꞉ ekina꞉ honkopu honkopu hao nate paeyao daeyaemekeme.   
\s1 Poloma꞉ upama꞉ piki nono piekeeki  
\p
\v 6 Kutupa mo Pitikia Ka꞉leisia nane yaapo lombei pupa pemekepate mo Holi Sipitidima꞉ mo Eisia nane pi na walena꞉ leekeme.  
\v 7 Kutupa Maisia nane teke pa꞉ta꞉ opolo epemekepate Bidinia nane poluekema꞉ pu handemekepate Yesu ipika꞉ Sipitidima꞉ sa꞉sa꞉ piekeme.  
\v 8 Kutupa Maisia da nane nepoko nanema꞉ paka꞉lao puaata꞉ lombei pupa puata꞉ Dotoa꞉si da nane hola꞉pa꞉niaemekeme.  
\v 9 Timba upama꞉ piki nono pea Poloma꞉ hali ma꞉nda꞉ handeekeme. Ma꞉sedonia hali homekema꞉ ipiki pa꞉ta꞉ honke alo hata꞉ alota꞉ Ma꞉sedonia nane niki tamba꞉ mulu a꞉pa꞉peke laa leeke some homeke handeekeme.  
\v 10 Kutupa hande upama꞉ piki nono pikieki handaata꞉ Koda꞉ma꞉ hande Pi Seliapo koto wanda꞉hali pa꞉ta꞉ walomono lea꞉me hone witolo hata꞉ mo Ma꞉sedonia nane poluekema꞉ kuta kone pota꞉ weimikime.   
\s1 Pilipai wanda꞉ Lidiama꞉ hone la꞉ka꞉la꞉ mina wiekeeki  
\p
\v 11 Dotoa꞉si da mina꞉pa꞉laota꞉ palai kawasona꞉ pita꞉ mo Sa꞉moteisi da nane tikitikina꞉ opolo puaata꞉ nate ma꞉nda꞉na꞉ Nia꞉polisi da nane opolo poma꞉me.  
\v 12 Koto pa꞉ta꞉ hao mina꞉pa꞉laota꞉ mo Ma꞉sedonia nane teke da Pilipai da nane opolo poma꞉me. Koto da pa꞉ta꞉ make Loma꞉ haliweki wopu haemekeme. Koto daoni pa꞉ta꞉ nate mandaneeki haota꞉  
\v 13 kutupa Hoto Pila꞉ Nate nina꞉ mo daonina꞉ pota꞉ kake tieke pa꞉ta꞉ tunkulupa pua ikali tea꞉ nane poma꞉me. Nika꞉ honema꞉ta꞉ koto alena꞉ta꞉ yeni pu hala꞉ alena꞉ hone wiaata꞉ kutupa pitiniao koto pa꞉ta꞉ a꞉pa mombelemeke wanda꞉weki pa꞉ta꞉ pi pi loma꞉me.  
\v 14 Wanda꞉ homeketa꞉ Lidiama꞉ mo Daetaeda daoni nane wanda꞉ a꞉pa wepiki alemanu hambo hatiki pina꞉ laata꞉ Koda꞉ pa꞉ta꞉ panda꞉puniao yeni pu haota꞉ nika꞉ pi opia꞉me. Poloma꞉ waleeke pi opina꞉yeke Tekehalima꞉ mo wanda꞉na꞉ puki la꞉ka꞉laeyekeme.  
\v 15 Kutupa ipika꞉ tapake ame̱le̱ bapitaisi pea hata꞉ niki pa꞉ta꞉ honke alo hata꞉ alota꞉ Ikana꞉ma꞉ta꞉ I̱ta꞉ pi na tunkuliki Tekehali pa꞉ta꞉ epeke halome hone wimika꞉na꞉ta꞉ kota꞉ ya da pa꞉ta꞉ a꞉pa hao hapa꞉peke lea꞉me. Kutupa honke wopu leeke handa poma꞉me.   
\s1 Pilipai da dipula pitipikieki  
\p
\v 16 Hoto ma꞉nda꞉na꞉ hande yeni pu haeme alena꞉ poma꞉pate pota꞉na꞉ ti̱o̱ wandiki ma꞉nda꞉ manda꞉hande puma꞉me. Mo wandikima꞉ta꞉ wetepena꞉ pulu pa꞉la꞉ ekimanu la halolo haena꞉ ipika꞉ teke haliwekima꞉ mani wopu mu haemekeme.  
\v 17 Kutupa Polo nika꞉ hoke nanema꞉ teli mea ipulu hata꞉ wi la꞉tiki pea alota꞉ Do haliwekita꞉ ota꞉ oli manda hala꞉ Koda꞉ tieke ipika꞉ e pokaaseme haliweki hata꞉ mo hande deto hala꞉ pota꞉ iki walelememe lea꞉me.  
\v 18 Kutupa nate paeyao kutu pia꞉tiki pu haya꞉pate Poloma꞉ ipika꞉ pukima꞉ ka꞉nda꞉ma꞉ homolo hata꞉ la꞉ka꞉la mo temoko pa꞉ta꞉ alota꞉ Yesu Ketisona꞉ bikina꞉ neke pa꞉ta꞉ aloma꞉ mo wandiki mina꞉pa꞉lao opolu bao yopuma lea꞉me. Kutupa koto kone opolu baeya꞉me.   
\p
\v 19 Kutu pia꞉pate mo wandiki ipika꞉ teke haliwekima꞉ta꞉ Nika꞉ hone pia꞉ ekina꞉ mani mia꞉tiki puma꞉ ekita꞉ ameta꞉ paeya꞉me laa hone wiaata꞉ Polo Sailasi yaapo da꞉ka꞉pa꞉ minaata꞉ makedi pa꞉ta꞉ yola꞉ mea pua you haliweki pa꞉ta꞉ pitaemekeme.  
\v 20 Kutupa mo pi yokaalu peao haemeke haliweki pa꞉ta꞉ hatuku pua alota꞉ Do Diu haliwekima꞉ta꞉ nika꞉ da teke hoeyaasepeme lemekeme.  
\v 21 Nikita꞉ Loma꞉ haliwekita꞉ ipilika꞉ walelepe hau manuta꞉ opua pea꞉peke na ya꞉la꞉me lemekeme.  
\v 22 Kutupa mo hande momba꞉la pitimiki wanda꞉halima꞉ tonka꞉na꞉ ipiliki pa꞉ta꞉ mineke pankemekeme. Kutupa mo pi yokaalu peao haemeke haliwekima꞉ ika꞉ dau leisi mea bao dopita manuma꞉ yombua baena꞉yeke pi lemekeme.  
\v 23 Kutupa mo hali yaapota꞉ wopu yombua baota꞉ dipula da pa꞉ta꞉ mea lopao mo dipula handeteke hayeke hali pa꞉ta꞉ alota꞉ Wopu handeteke hapeke laa pi la halemekeme.  
\v 24 Koto pi opuaata꞉ mo hali ipikana꞉ma꞉ oni dipula da ota꞉ tukiki pa꞉ta꞉ mea lopao ipilika꞉ anke meata꞉ tina꞉ talao katolao pitaeyekeme.   
\p
\v 25 Kutu piekepate buta꞉hokina꞉ Polo Sailasi yaapoma꞉ Koda꞉ pa꞉ta꞉ yeni pea꞉tiki pea emeli la꞉tiki pipikime. Kutupa mo dipula da pa꞉ta꞉ pitimiki haliwekima꞉ opitolo haena꞉  
\v 26 koto kone yu momeni tieke wotu piekeme. Koto ekina꞉ mo dipula da pinkimanu la꞉ma꞉ la꞉ma꞉ pieketa꞉ koto kone mo hande da pota꞉manu paeyao lomba wieketa꞉ hali paeyaona꞉ seni pumanu pa kone ka꞉la꞉pe pa lopeekeme.  
\v 27 Mo dipula handeteke hayeke halima꞉ tiaota꞉ mo dipula da pota꞉manu lomba pa pa pu wiekeeki handolota꞉ dipula haliweki amba꞉ pindipa yopua pimika꞉ta꞉ma꞉ hone witolo hata꞉ ipika꞉ kepete hokulu yola꞉ mea ipika꞉ kone aoluekema꞉ handaeyekepate  
\v 28 Poloma꞉ anekehapu wi alo hata꞉ alota꞉ Naka꞉ kone na lia꞉pe. Niki paeyaota꞉ do pambo piluma꞉taa leekeme.   
\p
\v 29 Kutupa lamepa mea epo laa mo halima꞉ dipula da tukiki pa꞉ta꞉ ipikana꞉ma꞉ anke hao honda꞉ pambaata꞉ pututuma꞉ homolo hata꞉ paala꞉ pieke handaata꞉ Polo Sailasi yaapo pa꞉ta꞉ lopa꞉niao hali yaapo hama꞉ nane hatuku pua alota꞉  
\v 30 Hali yaapoo. Deto hala꞉eki muluekema꞉ta꞉ eki peonope leekeme.  
\v 31 Ipilikana꞉ma꞉ alota꞉ Tekehali Yesu pa꞉ta꞉ hone tulaapeke. Kutu pika꞉na꞉ta꞉ deto hala꞉eki milipikie. Neke make naka꞉ weki wanda꞉ma꞉ make milimikie lepekeme.  
\v 32 Kutupa ipiki pa꞉ta꞉ make ipika꞉ da pa꞉ta꞉ pitimiki wanda꞉hali pa꞉ta꞉ make mo hande Tekehalina꞉ pi alemanu walepekeme.  
\v 33 Kutupa koto pita꞉ kone ipikana꞉ma꞉ ipilika꞉ hatuku mea pua ipilika꞉ yumbieke alena꞉ ikalima꞉ tandepeekeme. Kutupa koto kone ipika꞉ weki wanda꞉ ame̱le̱ apa꞉tao bapitaisi pimikime.  
\v 34 Kutupa ipika꞉ da pa꞉ta꞉ mo hali yaapo hatuku a꞉pa ipilika꞉ ne haleekeme. Kutupa ipika꞉ weki wanda꞉ ame̱le̱ hata꞉ Koda꞉na꞉ pi mimiki ekina꞉ ta꞉na꞉ma꞉ wotu homemekeme.   
\p
\v 35 Da kelepeeketa꞉ mo hande pi yokaalu peao haemeke haliwekima꞉ ika꞉ polisi haliweki pa꞉ta꞉ alota꞉ Dipula handeteke hayeke hali pa꞉ta꞉ do pi lolo pupe laata꞉ Mo hali yaapota꞉ pa pena꞉ tapae laa lolo pupe lemekeme.   
\p
\v 36 Koto leeke ekina꞉ mo dipula handeteke hayeke halima꞉ koto pita꞉ Polo pa꞉ta꞉ alota꞉ Mo pi yokaalu peao haleme haliwekima꞉ I̱ pa꞉ta꞉ pi dupa la꞉neala꞉me. Koto hali yaapota꞉ pa pena꞉ tapae la꞉neala꞉me leekeme. Koto la꞉la꞉ ekina꞉ ipilikita꞉ do dipula da pao yopu pupe laa leekeme.  
\v 37 Koto leekepate Poloma꞉ mo polisi haliweki pa꞉ta꞉ alota꞉ Dikana꞉ma꞉ta꞉ hau ma꞉nda꞉ na pupa꞉pate wanda꞉hali handa꞉ potopoto la haena꞉ kone diki yumbua baememe. Dikita꞉ Loma꞉ Kapomanina꞉ pamodi wia halopa꞉ hali yaapo pa꞉ta꞉ kone pimikime. Kotoeki peata꞉ dikita꞉ dipula da pa꞉ta꞉ pa mea lopaememe. Kutupa ameta꞉ a꞉mbaaso hata꞉ diki pa tapaaluekema꞉ lemepe. Ota꞉ dia꞉me. Mo hande pi yokaalu peao haleme haliweki ikana꞉ma꞉ kone do pa꞉ta꞉ a꞉paata꞉ diki mea a꞉pa tapaena꞉ loa꞉me leekeme.   
\p
\v 38 Mo polisi haliwekima꞉ Poloma꞉ leeke pita꞉ mo pi yokaalu peao haemeke haliweki pa꞉ta꞉ lolo pemekeme. Kutupa mo haliwekima꞉ta꞉ Polo Sailasi yaapoma꞉ Loma꞉ Kapomanina꞉ pamodi wia halepe hali yaapo halepeme leekeeki opuaata꞉ paala꞉ma꞉ homemekeme.  
\v 39 Koto ekina꞉ Polo Sailasi yaapo pa꞉ta꞉ pua alota꞉ Ipiliki pa꞉ta꞉ puma꞉eki a꞉ta꞉e laa lemekeme. Koto laata꞉ ikana꞉ma꞉ mo hali yaapo dipula da mina꞉pa꞉lao hatuku mea pua ipiliki pa꞉ta꞉ alota꞉ Do daoni mina꞉pa꞉lao pupe laa honke lemekeme.  
\v 40 Polo Sailasi yaapoma꞉ mo dipula da mina꞉pa꞉laota꞉ Lidiana꞉ da pa꞉ta꞉ pepekeme. Ipilikana꞉ma꞉ta꞉ Ketiso wanda꞉hali ame̱le̱ koto pa꞉ta꞉ momba꞉la hata꞉ta꞉ iki pa꞉ta꞉ sa꞉tiaasa꞉ pimanu laata꞉ mo da mina꞉pa꞉lao pepekeme.   
\c 17  
\s1 Desalonaika da pa꞉ta꞉ haemekeeki  
\p
\v 1 Kutupa A꞉mbipolisi A꞉polonia da yaapo nane lombei pupa mo Diu haliwekina꞉ pi hotu haemeke da homeke hayeke pa꞉ta꞉ Desalonaika da nane opolo pemekeme.  
\v 2 Kutupa Poloma꞉ honda꞉ pambaata꞉ hande pu hayekeeki pitolo hata꞉ kutupa Hoto Pila꞉ Nate tepona꞉ mo Baibolo buka pina꞉ pi yokaalu alu pitolo hata꞉  
\v 3 Ketiso tanda pita꞉la꞉eki amba꞉la meaata꞉ wetepena꞉ homa tiaalieke laa wotu waleekeme.  
\v 4 Kutupa ipikana꞉ma꞉ alota꞉ Do hande I̱ma꞉ iki pa꞉ta꞉ waloa꞉ Yesuta꞉ ota꞉ Ketisoe leekeme. Kutupa mandaneeki manuma꞉ hone la꞉ka꞉lao hata꞉ Polo Sailasi yaapo ame̱le̱ ta꞉ma꞉ni pea haemekeme. Kutupa Koda꞉ pa꞉ta꞉ hone wopu u haemeke Kitiki wanda꞉halima꞉ make mandane keileke wanda꞉wekima꞉ make kutu pimikime.   
\p
\v 5 Kutu pimikipate mo Diu haliwekima꞉ honditi pitolo hata꞉ hoke wanda꞉hali pa꞉ta꞉ ti teke yoko haemeke haliweki mandaneeki meaata꞉ haliweki momba꞉lena꞉ laata꞉ mo daoni wanda꞉hali paeyao la꞉tia tia peaata꞉ Dieisonina꞉ da bepolaluekema꞉ pimikipate mo hali yaapota꞉ wanda꞉hali pa꞉ta꞉ hatuku poluekema꞉ pimikime.  
\v 6 Kutupa na handa꞉ wieke handaata꞉ Dieisoni make mandane Ketiso haliweki make yola pua mo daonina꞉ ka̱le̱sete haliweki pa꞉ta꞉ wala wi la alota꞉ Hande kenke paeyao la꞉ka꞉la꞉ mina꞉la꞉ haliwekima꞉ do pa꞉ta꞉ make ipulimime.  
\v 7 Kutupa do Dieisonima꞉ iki handa꞉ mia꞉me lemekeme. Kutupa ikana꞉ma꞉ Sisama꞉ pi ula꞉ ekimanu yambolo hata꞉ alota꞉ Kini hali ma꞉nda꞉ hala꞉me. Ipikita꞉ Yesue lo halememe laa lemekeme.  
\v 8 Koto pi opuaata꞉ wanda꞉halima꞉ make mo daonina꞉ ka̱le̱sete haliwekima꞉ make pitiniao na pitiki Eki a꞉nda꞉ hau a꞉paapa꞉na꞉ wotu handeteke hamana꞉e laa haemekeme.  
\v 9 Kutupa Dieisoni amedama꞉ mo kapomanima꞉ lo wieke tupa꞉ mo kode hamboemena꞉ laa mani aneke halemeke handa da tapaemekeme.   
\s1 Betia da pa꞉ta꞉ haemekeeki  
\p
\v 10 Koto kone mo Ketiso haliwekima꞉ Polo Sailasi yaapo Betia da pa꞉ta꞉ timba kone tapaemekeme. Kutupa mo da pa꞉ta꞉ opolo puata꞉ Diu haliwekina꞉ pi hotu haemeke da pa꞉ta꞉ pemekeme.  
\v 11 Mo da Diu haliwekima꞉ Desalonaika Diu haliwekima꞉ pimiki hau na piki pa epeke tupa꞉ hata꞉ homu pea mo hande pi opuaata꞉ Ota꞉ekipe la handuluekema꞉ mo Baibolo buka pa꞉ta꞉ yata꞉pa nate paeyao weiya꞉tiki pimikime.  
\v 12 Koto ekina꞉ paeyaoma꞉ pi mimikime. Kutupa mandane Kitiki wanda꞉weki tiekemanu make mandane Kitiki haliweki wopu make pi mimikime.  
\v 13 Kutu pimikipate mo Desalonaika Diu haliwekima꞉ Poloma꞉ mo Betia da pa꞉ta꞉ make Koda꞉na꞉ pi ale wala꞉la꞉me pi opuata꞉ koto pa꞉ta꞉ make a꞉paata꞉ pa wanda꞉hali sutiaaso hata꞉ mineke panka꞉ tiaemekeme.  
\v 14 Kutupa mo Ketiso haliwekima꞉ Polota꞉ oni dawala ikali nane tapaemekepate Sailasi Timodi yaapota꞉ koto pa꞉ta꞉ haepekeme.  
\v 15 Hande Polo hatuku pemeke haliwekita꞉ mo A꞉ta꞉ni da nane ipiki hatuku puaata꞉ Poloma꞉ Sailasi Timodi yaapo do pa꞉ta꞉ a̱i̱ epena꞉ lolo pupe leeke pi opuaata꞉ pa la꞉ka꞉la pemekeme.   
\s1 A꞉ta꞉ni da pa꞉ta꞉ haemekeeki  
\p
\v 16 Kutupa Polota꞉ A꞉ta꞉ni da pa꞉ta꞉ mo hali yaapo epena꞉ handeteke hata꞉ mo daoni teke da toopi tima꞉ wepia wimiki ale manuma꞉ tumba꞉pa peekeeki handolo hata꞉ ipika꞉ pukima꞉ ka꞉nda꞉ma꞉ wotu homeekeme.  
\v 17 Koto ekina꞉ mo pi hotu haemeke da pa꞉ta꞉ mo Diu haliweki Koda꞉ pa꞉ta꞉ hone wopu wimiki haliweki ame̱le̱ mo makedi pa꞉ta꞉ haemeke haliweki ame̱le̱ make nate paeyao pi yokaalu pea꞉tiki pimikime.  
\v 18 Kutupa mandane Epikutiani Sitoiki sukulu tapake yaapona꞉ haliwekima꞉ Polo manda꞉hande pea alota꞉ Do hande pi wopu ala꞉ halima꞉ eki leliepe lemekeme. Mandaneeki manuma꞉ alota꞉ Da ma꞉nda꞉ nane koda꞉ manuna꞉ hau wala꞉la꞉ hali ya꞉ka꞉ta꞉me lemekeme. Poloma꞉ Yesu pa꞉ta꞉ make mo hande wanda꞉hali homa pa tiaalo piekeeki waleeke handa lemekeme.  
\v 19 Kutupa Polo handa꞉ mea mo hande A꞉tiopeikusi da pa꞉ta꞉ hatuku pua alota꞉ Nakana꞉ma꞉ koto hande wale panake pi niki pa꞉ta꞉ pa la kie lemekeme.  
\v 20 Nakana꞉ma꞉ amba꞉ na wale pimanu waleleme. Kutupa koto pi teke opuluekema꞉ hone pa꞉la꞉me lemekeme.  
\v 21 Mo A꞉ta꞉ni da haliwekima꞉ make kimisu a꞉pa pitimiki haliwekima꞉ make koto pa꞉ta꞉ hata꞉ nate paeyao aleta꞉ ma꞉nda꞉ hone na wiki panake waleeke pi ombu opuluekema꞉ hotu haemekeme.   
\p
\v 22 Koto ekina꞉ Poloma꞉ mo A꞉tiopeikusi da tukiki pa꞉ta꞉ tiao hata꞉ alota꞉ A꞉ta꞉ni haliwekio. Ika꞉ temoko pa꞉ta꞉ hone wopu u haleme ekita꞉ handolome leekeme.  
\v 23 Ika꞉ panda꞉puniao hata꞉ yeni pu haleme ale manuta꞉ pulu hata꞉ handoa꞉pate pa ika꞉ oloda homekena꞉ mo wape pa꞉la꞉ pi ma꞉nda꞉ dupa handa꞉ ua꞉me. Na hando hala꞉ Tekehalina꞉ ekie handoa꞉me. Kutupa koto ikana꞉ma꞉ panda꞉puniao hata꞉ na hando haleme Tekehalina꞉ pi kone ame iki pa꞉ta꞉ walolome leekeme.  
\v 24 Do kenke ya yaapo tukikina꞉ hala꞉ ekimanu paeyao make wepia haena꞉ la꞉la꞉ Koda꞉ta꞉ hepeni kenke yaapo Tekehali hata꞉ haliwekima꞉ a꞉eteleme damanu pa꞉ta꞉ na hao hala꞉me leekeme.  
\v 25 Kutupa kenke haliwekima꞉ ipika꞉ e pokaena꞉ na la꞉la꞉me. Ipika꞉ kone ana꞉na꞉ hala꞉me. Ipikana꞉ma꞉ kone haliweki paeyao pa꞉ta꞉ la꞉ma꞉ peao pomu haena꞉ ala꞉eki make pomo mina꞉la꞉eki make ala꞉ta꞉ ala꞉ta꞉ paeyao make ku hala꞉me leekeme.  
\v 26 Hali homeke pa꞉ta꞉ kone ipikana꞉ma꞉ wanda꞉hali paeyaona꞉ tapakemanu kenke paeyaona꞉ mea haena꞉ la꞉la꞉me leekeme. Kutupa ika꞉ natemanu wiaota꞉ ika꞉ kenke tombomanu wiaota꞉  
\v 27 Koda꞉ pa꞉ta꞉ hone witolo hata꞉ ipiki weimika꞉na꞉ta꞉ handa꞉ wina꞉yeke piekeme leekeme. Kutu piekepate niki paeyaota꞉ ipiki tekepa꞉ta꞉ haloma꞉me leekeme.  
\v 28 Ika꞉ mandane emeli lemeke haliwekima꞉ lemeke tupa꞉  
\q1 Ipiki pa꞉ta꞉ la꞉ma꞉ pea pomu hata꞉ hao haloma꞉me. Ipika꞉ weki wandiki ota꞉ hata꞉ pitoloma꞉me lemekeme leekeme.   
\p
\v 29 Kutupa nikita꞉ ipika꞉ weki wandiki hata꞉ Koda꞉ta꞉ haliwekima꞉ hone niminao kolo silipa toopima꞉ wepita꞉la꞉ alema꞉ handa꞉la꞉me hone na umana꞉ pea꞉pa꞉pekealeo.  
\v 30 Hone wopu na wimiki pita꞉ta꞉ Koda꞉ma꞉ pa pina꞉ leekepate ameta꞉ kenke wanda꞉hali paeyao pa꞉ta꞉ta꞉ Ika꞉ hoke hau mina꞉pa꞉lao hone ma꞉nda꞉ la꞉ka꞉la wina꞉ lapa꞉peke ala꞉me.  
\v 31 Pa ekipeke ipikana꞉ma꞉ nate amba꞉ wiaeyeke handa ala꞉me. Koto natena꞉ ipika꞉ haena꞉ la꞉la꞉ hali homekema꞉ kenke wanda꞉hali paeyao pa꞉ta꞉ pi yokaalu tikitikina꞉ pina꞉ lelieke leekeme. Kutu pulu pa꞉la꞉ ekita꞉ wanda꞉hali paeyaoma꞉ opua Ota꞉ekie hone wina꞉yeke mo hande halita꞉ homa peneme yao paa mea tiaeyekeme laa leekeme.   
\p
\v 32 Kutupa mo hande homa pa mea tiaeyekeeki opuaata꞉ mandane haliwekima꞉ ki taemekepate mandane haliwekima꞉ alota꞉ Do alo ekina꞉ta꞉ hoto ma꞉nda꞉ naka꞉ pi opulumekee laa lemekeme.  
\v 33 Koto ekina꞉ Polo opulu bao peekepate  
\v 34 mandane haliwekima꞉ ipiki pa꞉ta꞉ ta̱la̱a̱ta꞉ pi mimikime. Mo A꞉tiopeikusi hali homeke Dionisiusi make wanda꞉ ma꞉nda꞉ Damatisi make mandane haliweki ame̱le̱ pi mimikime.   
\c 18  
\s1 Kotindi da pa꞉ta꞉ haemekeeki  
\p
\v 1 Kutupa A꞉ta꞉ni da mina꞉pa꞉lao mo Kotindi da nane puaata꞉  
\v 2 Diu hali homeke Akuila mo Pondasi da nane hali kone pua handeekeme. Koto halita꞉ ipika꞉ weteke Pisila yaapo mo Ideli nane mina꞉pa꞉lao panake a꞉pa haepekeme. Mo Sisa Kolodiusima꞉ Diu wanda꞉hali paeyaota꞉ Loma꞉ da mina꞉pa꞉lao pupe leeke handa epepekeme. Poloma꞉ta꞉ ipiliki handuluekema꞉ ipilika꞉ da pa꞉ta꞉ peekepate  
\v 3 mo tooli make Polo make homeke e poko haemeke handa Polota꞉ ipiliki ame̱le̱ pelia hao hatiki peaata꞉ palai damanu epeaaso tumbulu haemekeme.  
\v 4 Kutupa Hoto Pila꞉ Nate paeyaona꞉ mo pi hotu haemeke da pa꞉ta꞉ Diu haliweki make Kitiki haliweki make ika꞉ hone la꞉ka꞉laluekema꞉ pi yokaalu pia꞉tiki pu hayekeme.   
\p
\v 5 Kutupa Sailasi Timodi yaapo Ma꞉sedonia nane hao opolo epepeke pita꞉ta꞉ Poloma꞉ mo Diu haliweki pa꞉ta꞉ Yesuta꞉ Ketisoe la waluekema꞉ hone wotu wia wala꞉tiki pu hayekeme.  
\v 6 Kutu piekepate ipiki tolu luekema꞉ pi la la pimiki pita꞉ Poloma꞉ ipika꞉ dau tandela iki pa꞉ta꞉ alota꞉ I̱ dia꞉me. Ika꞉ youna꞉ ika꞉ we mendia꞉pa꞉peke leekeme. Ya ketete dia꞉me leekeme. Ameta꞉ Diendaili wanda꞉hali pa꞉ta꞉ pulume leekeme.  
\v 7 Kutupa Diu haliweki mina꞉pa꞉lao Koda꞉ pa꞉ta꞉ panda꞉puniao yeni pu hayeke hali homeke Taitasi Diasedasina꞉ da pa꞉ta꞉ peekeme. Mo halina꞉ data꞉ mo hande pi hotu haemeke da nepoko nane kone hayekeme.  
\v 8 Mo pi hotu haemeke da you hali Kitisipusima꞉ ipika꞉ weki wanda꞉ ame̱le̱ pi mimikime. Kutupa Kotindi wanda꞉hali wopuma꞉ make Poloma꞉ waleeke pi opua meaata꞉ bapitaisi pimikime.   
\p
\v 9 Kutupa Tekehalima꞉ timba upama꞉ tupa꞉ Polo pa꞉ta꞉ leekeme. Dupa. Paala꞉ma꞉ homolo hata꞉ neke pa na pitiki ya pi wala꞉tiki pu hapeke leekeme.  
\v 10 Pa ekipeke I̱ta꞉ neke yaapo halome. Kutupa neke luekema꞉ hali ma꞉nda꞉ na tiaalieke leekeme. Do da pa꞉ta꞉ ya wanda꞉hali wotu halememe laa leekeme.  
\v 11 Koto ekina꞉ Poloma꞉ ba pi homekena꞉ sumba꞉ yunki mindiki hata꞉ haota꞉ koto pa꞉ta꞉ Koda꞉na꞉ pi alemanu iki pa꞉ta꞉ wala꞉tiki pu hayekeme.   
\p
\v 12 Kutu piekepate Ka꞉liota꞉ mo Akaya nane kapomani tieke haena꞉ leeke pita꞉ta꞉ mo Diu haliwekima꞉ Polo luekema꞉ apa꞉tao pi yokaalu puluekema꞉ mea pua alota꞉  
\v 13 Do halima꞉ta꞉ haliwekima꞉ Lo Pimanu yambolo hata꞉ Koda꞉ pa꞉ta꞉ panda꞉puniaena꞉yeke ika꞉ hone la꞉ka꞉lao hala꞉me lemekeme.   
\p
\v 14 Koto lemekepate Poloma꞉ pi loluekema꞉ haena꞉ Ka꞉lioma꞉ mo Diu haliweki pa꞉ta꞉ alota꞉ Diu haliwekio. Hoke hau ketete tieke piekena꞉ yoluta꞉ I̱ma꞉ ika꞉ pi opulu pua꞉pate  
\v 15 ika꞉ Lo Pi manuna꞉ lota꞉ pita꞉la꞉ ekita꞉ kota꞉ ika꞉ kone epeaapa꞉peke. Koto pi manuna꞉ta꞉ I̱ma꞉ na lalueke. Ki pa꞉la꞉me leekeme.  
\v 16 Kutupa hama tolu liekeme.  
\v 17 Kutupa paeyaoma꞉ mo hande pi hotu haemeke da handeteke hayeke hali Sosenisi da꞉ka꞉pe minaata꞉ mo pi yokaalu pu haemeke da hama꞉ nane hata꞉ yombua baemekepate Ka꞉lioma꞉ pi ma꞉nda꞉ na leekeme.   
\s1 A꞉ndioko da nane paa pemekeeki  
\p
\v 18 Polota꞉ nate mandane ekimanu koto pa꞉ta꞉ haota꞉ mo Ketiso wanda꞉hali mina꞉pa꞉lao hande Pisila Akuila tooli ame̱le̱ palai kawasona꞉ pita Sitia nane pemekeme. Senkitia da nane hata꞉ pi la꞉ wiekeeki loluekema꞉ ipika꞉ itiki tunkuliekeme.  
\v 19 Kutupa Epesese opolo a꞉paata꞉ ipiliki koto pa꞉ta꞉ haena꞉ laata꞉ ipika꞉ kone mo pi hotu haemeke da pa꞉ta꞉ honda꞉ pamba pua Diu haliweki ame̱le̱ pi yokaalu pimikime.  
\v 20 Mo haliwekima꞉ Hosiki hapeke aleo lemekepate Poloma꞉ Dia꞉me laaka꞉na꞉  
\v 21 mo haliweki mina꞉pa꞉lao pulu hata꞉ alota꞉ Koda꞉ma꞉ hone pia꞉ka꞉na꞉ta꞉ iki pa꞉ta꞉ pa ipulueke leekeme. Kutupa palai kawasona꞉ pita Epesese da mina꞉pa꞉lao peekeme.   
\p
\v 22 Sesatia da opolo a꞉paata꞉ mo siosi tapake handuluekema꞉ a꞉meiya puata꞉ oni A꞉ndioko da nane hola꞉pa꞉niao peekeme.  
\v 23 Koto pa꞉ta꞉ hosiki hao hao peaata꞉ mina꞉pa꞉lao mo Ka꞉leisia Pitikia yaapo nane hone tulaasa꞉ wanda꞉halima꞉ honkopu haena꞉ titipu peaaso hata꞉ pomu lopo hayekeme.   
\s1 Apolosita꞉ Epesese Kotindi da yaapo pa꞉ta꞉ hayekeeki  
\p
\v 24 Diu hali ma꞉nda꞉ Apolosita꞉ A꞉lekesa꞉ndia da hali mo Epesese da pa꞉ta꞉ epeekeme. Ipikita꞉ Baibolo buka pi hone wotu wia pi wotu yoka la꞉tiki pieke halie.  
\v 25 Hali ma꞉nda꞉ma꞉ ipiki pa꞉ta꞉ Tekehalina꞉ hau amba꞉ waleeke handa ipikana꞉ma꞉ wele pieke hali hata꞉ Yesuma꞉ pieke ekimanu tikitiki yao walo hayekepate Dionima꞉ bapitaisi peaeyekeeki pa꞉ta꞉ homeke hone wiekeme.  
\v 26 Mo pi hotu haemeke da pa꞉ta꞉ ipikana꞉ma꞉ taka꞉lao hata꞉ pi honda꞉ mea waleekepate Pisila Akuila toolima꞉ ipika꞉ pi opuaata꞉ ipiki hatuku mea pua Koda꞉na꞉ hau wopu walepekeme.  
\v 27 Ipikita꞉ Akaya da nane poluekema꞉ hone pieke pita꞉ mo Ketiso haliwekima꞉ A꞉pa꞉la꞉ma꞉ polena꞉e laa oli da nane haemeke Ketiso haliweki pa꞉ta꞉ pase wape pea alota꞉ Do hali handa꞉ mea꞉pa꞉peke lemekeme. Kutupa opolo puaata꞉ Koda꞉ma꞉ a꞉ta꞉ma꞉ homa꞉la꞉ ekina꞉ pi mimiki wanda꞉halita꞉ ipikana꞉ma꞉ wotu petelo hayekeme.  
\v 28 Hande Baibolo buka pi walolo hata꞉ Yesuta꞉ ota꞉ Ketisoe laa mo Diu haliwekita꞉ penemena꞉ hata꞉ pima꞉ bepolao hayeke handaa piekeme.   
\c 19  
\s1 Polo Epesese da pa꞉ta꞉ hayekeeki  
\p
\v 1 Apolosi mo Kotindi da pa꞉ta꞉ haena꞉ Polota꞉ mo hande potopinisi tukikina꞉ yopu yopu pea Epesese da opolo epeekeme. Koto da pa꞉ta꞉ mandane disaipolo haliweki handeekeme.  
\v 2 Ipikana꞉ma꞉ iki pa꞉ta꞉ alota꞉ Amba꞉ta꞉ pi minolo hata꞉ Holi Sipitidi mimipe leekeme. Kutupa mo haliwekima꞉ alota꞉ Dia꞉me. Mo Holi Sipitidi ala꞉ ekita꞉ hoto homeke a꞉nda꞉ na opuma꞉me lemekeme.  
\v 3 Kutupa ipikana꞉ma꞉ alota꞉ Epina꞉ bapitaisi hau pimipe leekeme. Ikana꞉ma꞉ alota꞉ Dionima꞉ bapitaisi peaeyeke hauna꞉ puma꞉me lemekeme.  
\v 4 Kutupa Poloma꞉ alota꞉ Dionima꞉ wanda꞉halima꞉ hone ma꞉nda꞉ la꞉ka꞉la mina witolo haena꞉ bapitaisi peao hayekepate wanda꞉hali pa꞉ta꞉ alota꞉ Ya hoki nane ipilie halina꞉ pi mea꞉pa꞉peke laa la꞉la꞉me leekeme. Koto ekita꞉ Yesu pa꞉ta꞉ la꞉la꞉me leekeme.  
\v 5 Koto pi opuata꞉ Tekehali Yesuna꞉ bikina꞉ bapitaisi pimikime.  
\v 6 Kutupa Poloma꞉ ipika꞉ kiki yaapo ika꞉ youna꞉ wieketa꞉ mo Holi Sipitidi iki pa꞉ta꞉ epeekeme. Kutupa pi ta꞉ta꞉ ta꞉ta꞉ kone laaka꞉na꞉ta꞉ Koda꞉na꞉ pimanu lemekeme.  
\v 7 Mo haliweki paeyaota꞉ 12manu haemekeme.   
\p
\v 8 Kutupa mo pi hotu haemeke da pa꞉ta꞉ puata꞉ sumba꞉ tepona꞉ hata꞉ Koda꞉na꞉ Kilu Tombuao Hala꞉ ekina꞉ paala꞉ma꞉ na homeke pi yokaalu pea꞉tiki pea honke alo hata꞉ pi la꞉tiki piekeme.  
\v 9 Kutu piekepate mandane haliwekima꞉ pi na miki ki hone witolo hata꞉ mo hande Hauna꞉ wanda꞉hali pa pitina꞉ hoke pi lemeke pita꞉ Polota꞉ mo Ketiso haliweki ame̱le̱ koto haliweki mina꞉pa꞉lao puata꞉ Taita꞉nusina꞉ mombolo haemeke da pa꞉ta꞉ nate paeyao pi yokaalu pea꞉tiki piekeme.  
\v 10 Koto hau pitolo haena꞉ bapi yaapo yaapeekeme. Koto ekina꞉ mo Eisia wanda꞉hali paeyaoma꞉ Kitiki wanda꞉hali make Diu wanda꞉hali make Tekehalina꞉ pi alemanu opimikime.   
\s1 Sikipana꞉ eiyeketiti  
\p
\v 11 Koda꞉ma꞉ Polo pa꞉ta꞉ wele peaaso hata꞉ na hando haemeke wele pita꞉la꞉ ekimanu peaena꞉ la꞉tiki piekeme.  
\v 12 Koto ekina꞉ wanda꞉halima꞉ Polona꞉ yonkeleke pa꞉ta꞉ ta̱leeke dau munku tupa꞉ tumbulieke ekimanu make hako leke howao yameeke daumanu make yeni haemeke wanda꞉hali pa꞉ta꞉ mea pemekepate yeni tandelatiki pea hoke temokomanu opulu batiki pimikime.  
\v 13 Kutupa mandane pomuolo hata꞉ mo wanda꞉halina꞉ weleke pa꞉ta꞉ pitieke hoke temoko tolu haemeke Diu haliwekima꞉ta꞉ Yesuna꞉ bikima꞉ koto hau puluekema꞉ taapemekeme. Ikana꞉ma꞉ mandane hoke temokomanu pa꞉ta꞉ alota꞉ Poloma꞉ wala꞉la꞉ hali Yesuna꞉ bikina꞉ neke aloma꞉ma꞉ yopuma lemekeme.  
\v 14 Koto hauta꞉ mo yeni peao hayeke you haliwekina꞉ you hali ma꞉nda꞉ Siba ipika꞉ eiyeke watake hata꞉ma꞉ pimikipate  
\v 15 pa mo hoke temokoma꞉ iki pa꞉ta꞉ alota꞉ Yesu handolome. Kutupa Polo make handolopate ikita꞉ epi ameda ka꞉ta꞉pe leekeme.  
\v 16 Kutupa mo hoke temoko pitieke halima꞉ mo haliweki pa꞉ta꞉ pua ponkaalo hata꞉ lu tumbua tumbua pea bepolayekeme. Koto ekina꞉ mo haliwekita꞉ ota꞉ hoeyao pa loke hameke hata꞉ mo da mina꞉pa꞉lao pindipa pemekeme.  
\v 17 Koto piekeeki mo Epesese da Kitiki pita꞉ Diu wanda꞉hali paeyaoma꞉ opuaka꞉na꞉ paala꞉ma꞉ homemekeme. Kutupa Tekehali Yesuna꞉ bikita꞉ kende tia wiekeme.  
\v 18 Kutupa pi mimiki wanda꞉hali wopuma꞉ a꞉paata꞉ ika꞉ pu haemeke ekimanu na a꞉mbaake kelepemekeme.  
\v 19 Kutupa make temoko pa꞉ta꞉ yeni pu haemeke wanda꞉hali mandaneeki manuma꞉ ika꞉ bukamanu homeke alena꞉ mea a꞉pa wanda꞉hali paeyaoma꞉ handolo haena꞉ tima꞉ kitimikime. Kutupa mo buka paeyaona꞉ mani make yata꞉pa handemekepate pa mo kinamanu 50 daoseni ana꞉ piekeme.  
\v 20 Koto ekina꞉ Tekehalina꞉ pi alemanu daeyao kende tia pomu haemekeme.   
\s1 Epesese da pa꞉ta꞉ pi tieke laa wi lemekeeki  
\p
\v 21 Kutupa hande pimiki ekimanu paeyeketa꞉ Poloma꞉ Diutuseleme da nane poluekema꞉ Ma꞉sedonia Akaya yaapo nanema꞉ lopa꞉la꞉ poluekema꞉ hone wia alota꞉ Kutupa pua Loma꞉ da nane make handolo pua꞉peke ya꞉la꞉me leekeme.  
\v 22 Kutupa ipiki tamba꞉ mu haepeke hali yaapo Timodi Eta꞉situsi yaapo mo Ma꞉sedonia nane tapaota꞉ ipikita꞉ mo Eisia nane pa hayekeme.   
\p
\v 23 Kutupa koto dina꞉ta꞉ hande Ketiso hauna꞉ a꞉nda꞉ liekeeki tiaeyekeme.  
\v 24 Hali homeke Dimiditiasima꞉ta꞉ silipa alemanu wepu hayeke halima꞉ Atemisina꞉ silipa wepia wieke alemanu wepitolo hata꞉ kutu pu haemeke mandane haliwekima꞉ make bisinisi wotu pu haena꞉ leekeme.  
\v 25 Koto ekina꞉ Dimiditiasima꞉ mo hande haliweki make mo hande mandake e poko haemeke mandane haliweki make momba꞉lao iki pa꞉ta꞉ alota꞉ Haliwekio. Do pitoloma꞉ bisinisi e pa꞉ta꞉ nika꞉ mani ipula꞉eki mu haloma꞉ ekita꞉ handelememe leekeme.  
\v 26 Ikana꞉ma꞉ do Poloma꞉ pita꞉la꞉eki opua hando halememe leekeme. Do Epesese da homeke dia꞉la꞉pate mo Eisia nane paeyao pa꞉ta꞉ make wanda꞉hali wopuna꞉ puki la꞉ka꞉lao alota꞉ Kikima꞉ wepia ula꞉ koda꞉ sunuta꞉ ota꞉eki dia꞉me lo halememe leekeme.  
\v 27 Kutupa nika꞉ bisinisina꞉ hoke biki wiaapa꞉na꞉ homeke dia꞉ya꞉la꞉pate mo hande koda꞉wanda꞉ Atemisina꞉ toopima꞉ a꞉eya꞉la꞉ yeni hau pita꞉la꞉ da make pa aleta꞉ ma꞉nda꞉ma꞉ handilieke laata꞉ kutupa ipika꞉ pu hala꞉eki make hoeyaalieke. Mo hande Eisia wanda꞉hali make do kenke honiki honiki pa꞉ta꞉ haleme wanda꞉halima꞉ make do koda꞉wanda꞉ pa꞉ta꞉ yeni pu halemepate dia꞉me dupiki hau pilieke leekeme.   
\p
\v 28 Koto pi opuaata꞉ mineke tieke pankolo hata꞉ wi la alota꞉ Epesese wanda꞉halina꞉ Atemisita꞉ tiekee laa wi la꞉tiki pimikime.  
\v 29 Koto ekina꞉ mo daoni wanda꞉halima꞉ hone ti yokolo hata꞉ Polona꞉ ta꞉ma꞉ni pea pomu haemeke Ma꞉sedonia yankeketiti Kaiasi A꞉tisakusi yaapo yola꞉ mea anke hao mo mombolo haemeke alena꞉ pemekeme.  
\v 30 Poloma꞉ ipika꞉ honema꞉ta꞉ mo wanda꞉hali pa꞉ta꞉ polueke hone wiekepate mo disaipolo haliwekima꞉ sa꞉sa꞉ pimikime.  
\v 31 Kutupa Polona꞉ yankeketiti mandaneeki manuma꞉ta꞉ ka̱le̱sete haliweki hata꞉ kone ipiki pa꞉ta꞉ pi tapao alota꞉ Mo mombolo haleme alena꞉ na pua꞉pe laa honke lemekeme.  
\v 32 Kutupa mo mombelemeke wanda꞉halima꞉ hone ti yokolo hata꞉ mandane haliwekima꞉ wi ma꞉nda꞉ la꞉tiki mandane haliwekima꞉ wi ma꞉nda꞉ la꞉tiki pimikime. Kutupa mandane wanda꞉hali woputa꞉ hone wotu na wiki pa mombelemekeme.  
\v 33 Mandane haliwekima꞉ta꞉ mo Diu haliwekima꞉ mea haena꞉ lemeke hali A꞉lekesa꞉nda pa꞉ta꞉ ha la lemeke handa ipikana꞉ma꞉ mo wanda꞉hali pa꞉ta꞉ pi loluekema꞉ ipika꞉ kiki tindipao wanke yaeyekepate  
\v 34 ipikita꞉ Diu halie laa handolo hata꞉ paeyaoma꞉ aowa꞉ yaapo tupa꞉ homeke pi ombu wi alo alota꞉ Epesese wanda꞉halina꞉ Atemisita꞉ tiekee laa wi lo haemekeme.   
\p
\v 35 Kutupa mo daoni kusikusi halima꞉ mo wanda꞉hali paeyao homu peaoka꞉na꞉ alota꞉ Epesese haliwekio. Hande ya nanema꞉ lopa꞉niaeyeke toopi ta꞉ta꞉ mo hande Atemisi tiekena꞉ yeni hau pita꞉la꞉ da Epesese daoni pa꞉ta꞉ hala꞉ ekita꞉ hali epima꞉ na opa꞉la꞉pe leekeme.  
\v 36 Koto ekimanu tunkula paapeke na ya꞉leke handaata꞉ ikita꞉ pa hau na piki yopu hapa꞉peke aleo leekeme.  
\v 37 Do hatuku epeme haliwekima꞉ta꞉ nika꞉ koda꞉wanda꞉na꞉ hau na hoeyaake ipiki pa꞉ta꞉ hoke pi na lememe leekeme.  
\v 38 Koto ekina꞉ Dimiditiasi ipika꞉ e mandake pokeleme haliwekita꞉ ma꞉nda꞉ pa꞉ta꞉ ketete ula꞉me hone wimika꞉na꞉ta꞉ kota꞉ pi yokaalu pu haleme damanu hala꞉me. Kutupa mo pi yokaalu pita꞉la꞉eki handeteke haleme haliweki make hao halememe. Ma꞉nda꞉ pa꞉ta꞉ pua lena꞉e leekeme.  
\v 39 Kutupa pi ma꞉nda꞉ make loluekema꞉ hone wimika꞉na꞉ta꞉ mo hande mombolo haloma꞉ ekina꞉ a꞉pa lapa꞉peke leekeme.  
\v 40 Nikana꞉ma꞉ ame pa hameke hone mateke pi laa wi lomeke handaata꞉ niki pa꞉ta꞉ samani pea꞉peke ya꞉la꞉me leekeme.  
\v 41 Kotoeki laaka꞉na꞉ wanda꞉hali tapaa tapaa piekeme.   
\c 20  
\s1 Mo Ma꞉sedonia Kitiki yaapo pa꞉ta꞉ pemekeeki  
\p
\v 1 Mo hande poiya꞉ poiya꞉ la꞉ alualu pimikieki upa lopa haena꞉ta꞉ Poloma꞉ hone tulaemeke wanda꞉hali wi la꞉ mepi pea iki pa꞉ta꞉ sa꞉tiaasa꞉ pimanu laata꞉ a꞉taloe laa koto pa꞉ta꞉ mina꞉pa꞉lao mo Ma꞉sedonia nane peekeme.  
\v 2 Koto da pa꞉ta꞉manu pi waloendi pitolo hata꞉ wanda꞉hali honkopu ha tiatiki piekeme. Kutupa hao Kitiki kenke nane opolo puata꞉  
\v 3 sumba꞉ tepo koto pa꞉ta꞉ hayekeme. Sitia nane poluekema꞉ tikitiki yaaso haena꞉ Diu haliwekima꞉ ipiki luekema꞉ a꞉nda꞉ lombo haemekeeki opuaata꞉ paa la꞉ka꞉la mo Ma꞉sedonia nanema꞉ lopa꞉la꞉ yapulueke hone wiekeme.  
\v 4 Mandane haliweki ipiki ame̱le̱ mandakena꞉ pemekeme. Paitusina꞉ eiyeke mo Betia da hali Sopade make A꞉tisakusi Sekundusi yaapota꞉ Desalonaika da hali yaapo make mo Debi da hali Kaiasi make mo Eisia potopinisi hali tepota꞉ Timodi Tikikasi Totobimasi koto hali tepo make Polo ame̱le̱ mandakena꞉ pemekeme.  
\v 5 Iki amba꞉la titina꞉ pua mo Todoa꞉si da pa꞉ta꞉ niki pomono hando haemekeme.  
\v 6 Nikana꞉ma꞉ta꞉ mo hande Na Pombei Yaake Palaowa Ne pamba paeyeketa꞉ Pilipai da pa꞉ta꞉ hata꞉ palai kawasona꞉ pita pulu hamono nate yunki hata꞉ paeyeketa꞉ mo Todoa꞉si da pa꞉ta꞉ opolo puata꞉ mo haliweki ame̱le̱ mandake pa꞉ta꞉ hamono pula homeke yapea꞉me.   
\s1 Poloma꞉ paeyaaso hata꞉ Todoa꞉si da handolo peekeeki  
\p
\v 7 Mo Sande natena꞉ nikita꞉ palaowa pindi pindi puluekema꞉ momba꞉la hamono Poloma꞉ mo wanda꞉hali pa꞉ta꞉ pi walea꞉me. Ipikana꞉ma꞉ da ka꞉la꞉paaso polueke hone wiaata꞉ timba buta꞉hokina꞉ make pi ombu walea꞉me.  
\v 8 Kutupa nikana꞉ma꞉ momboloma꞉ da mandata꞉ lamepa wopu tea꞉me.  
\v 9 Kutupa wekihali homeke Yuta꞉kusita꞉ windo lombaeya꞉ pa꞉ta꞉ pitia꞉me. Kutupa Poloma꞉ pi ombu alo pitina꞉ mo wekihali u̱ tonda꞉pao pita u̱ pelia꞉me. Kutupa u̱ ota꞉ pelia꞉pate da yaapo ankulao oni kenkena꞉ lopeeke handa pua mea a꞉meiyaemepate ota꞉ homea꞉me.  
\v 10 Kutu pimipate Poloma꞉ hola꞉pa꞉niao kenkena꞉ hata꞉ panda꞉puniao mo wekihali hopula꞉ mea alota꞉ Paala꞉ na hake hone na wia꞉pe. Ipikita꞉ pa do da꞉ta pila꞉me lea꞉me.  
\v 11 Kutupa Polota꞉ paa a꞉meiya puata꞉ palaowa pindi pindi pea naaka꞉na꞉ta꞉ iki ame̱le̱ pi ombu alo alo pita da kelepeeke handa mina꞉pa꞉lao peekeme.  
\v 12 Kutupa hande wekihali da꞉ta tiao hayeke handa hone wopu bao hatuku pemekeme.   
\s1 Todoa꞉si da mina꞉pa꞉lao Mailitasi da pa꞉ta꞉ pemekeeki  
\p
\v 13 Kutu pia꞉pate niki amba꞉la puata꞉ mo palai kawaso tiekena꞉ pitata꞉ Todoa꞉si da mina꞉pa꞉lao Polota꞉ Asosi da pa꞉ta꞉ manda꞉hande puluekema꞉ poma꞉me. Poloma꞉ niki pa꞉ta꞉ta꞉ Pota꞉na꞉ pua mo Asosi da pa꞉ta꞉ opolo a꞉pono pupe leeke handa poma꞉me.  
\v 14 Mo Asosi da pa꞉ta꞉ manda꞉hande pea Polo make kawasona꞉ a꞉pa pitata꞉ Mitilini da pa꞉ta꞉ puata꞉  
\v 15 da ma꞉nda꞉ kelepeeketa꞉ Seose hoki teke pa꞉ta꞉ opolo poma꞉me. Da ma꞉nda꞉ kelepeeketa꞉ Sa꞉mosi pa꞉ta꞉ puata꞉ kutupa da ma꞉nda꞉ kelepeeketa꞉ Mailitasi opolo poma꞉me.  
\v 16 Poloma꞉ ipika꞉ honema꞉ta꞉ mo Eisia nane haena꞉ nate paeyaama꞉na꞉ Epesese da lombei pupa puata꞉ mo hande Diutuseleme da pa꞉ta꞉ opolo polo pa꞉la꞉ nateta꞉ Pendikosi nate a̱i̱ na paeyeke haena꞉ opolo puluekema꞉ hone wia꞉me.   
\s1 Tondiki haliweki mina꞉pa꞉lao poluekema꞉ hata꞉ leeke pimanu  
\p
\v 17 Kutupa Mailitasi da hao mo Epesese da nane pi tapaasota꞉ mo siosi wanda꞉hali handeteke haemeke tondiki haliwekita꞉ ipiki pa꞉ta꞉ epena꞉yeke pi tapaeya꞉me.  
\v 18 Kutupa mo haliwekita꞉ ipiki pa꞉ta꞉ opolo epeme pita꞉ta꞉ ipikana꞉ma꞉ iki pa꞉ta꞉ alota꞉ I̱ta꞉ Eisia nane panake a꞉pa iki pa꞉ta꞉ haowa꞉ ekita꞉ ikana꞉ma꞉ handememe lea꞉me.  
\v 19 I̱ma꞉ta꞉ e̱ alo hata꞉ homu peaata꞉ Tekehalina꞉ hau peaaso hano hande Diu haliwekima꞉ I̱ luekema꞉ taapolo hata꞉ ka꞉nda꞉ma꞉ homaemeeki manuta꞉ handememe lea꞉me.  
\v 20 Iki epeaalo pia꞉eki iki na a꞉mbaake walo haowa꞉ ekita꞉ handememe lea꞉me. Kutupa da ma꞉nda꞉ pa꞉ta꞉ make momba꞉la pitimi tukiki pa꞉ta꞉ make walo haowa꞉ ekita꞉ handememe lea꞉me.  
\v 21 Kutupa Diu wanda꞉hali pa꞉ta꞉ make Kitiki wanda꞉hali pa꞉ta꞉ make ika꞉ Koda꞉ pa꞉ta꞉ hone ma꞉nda꞉ la꞉ka꞉la꞉ mina꞉ wiaata꞉ nika꞉ Tekehali Yesu Ketisona꞉ pi miniki haena꞉yeke walo haowa꞉ ekita꞉ handememe lea꞉me.  
\v 22 Kutupa ameta꞉ I̱ do handa꞉pe lea꞉me. Holi Sipitidima꞉ I̱ hone yapa꞉ peaaso haena꞉ Diutuseleme da nane pulume. Kutupa koto alena꞉ I̱ pa꞉ta꞉ pulu pa꞉la꞉ hau I̱ mata꞉la꞉pate  
\v 23 mo Holi Sipitidima꞉ daoni paeyao pa꞉ta꞉ mo dipula pita꞉ tanda pulu pa꞉la꞉eki I̱ la ku hala꞉me lea꞉me.  
\v 24 Kutu pa꞉la꞉pate ya lokena꞉ hau hone na witolome laa tombona꞉ opolo puaata꞉ ya Tekehali Yesuma꞉ walea꞉ hau amba꞉la paeyaalueke lea꞉me. Hande Koda꞉na꞉ pa hameke a꞉ta꞉ma꞉ homo hala꞉ Pi Seliapo la kitoloeki loa꞉me lea꞉me.   
\p
\v 25 Kutupa ameta꞉ opua꞉pe. Iki paeyao pa꞉ta꞉ pominolo hata꞉ Koda꞉na꞉ Kilu Tombuao Hala꞉eki waloendi pu haowa꞉pate I̱ma꞉ handolome. Ya leke mineke paa na handilimikie lea꞉me.  
\v 26 Koto ekina꞉ iki pa꞉ta꞉ pi do alo handa꞉pe lea꞉me. I̱ta꞉ hau ma꞉nda꞉ dia꞉me yako pilume. Iki paeyaona꞉ we I̱ pa꞉ta꞉ dia꞉me lea꞉me.  
\v 27 I̱ma꞉ta꞉ pi ma꞉nda꞉ na a꞉mbaake Koda꞉na꞉ hau paeyao iki pa꞉ta꞉ waloa꞉me lea꞉me.  
\v 28 Holi Sipitidima꞉ ikita꞉ handeteke halo peleme haliweki mea hamina꞉ leeke handa ika꞉ kone handeteke hao mo ma꞉na꞉titi paeyao make handeteke hapa꞉peke lea꞉me. Tekehalima꞉ ipika꞉ Eiyekena꞉ wema꞉ kone mieke tapake wanda꞉halita꞉ ikana꞉ma꞉ handeteke hapa꞉peke lea꞉me.  
\v 29 I̱ma꞉ mina꞉pa꞉lao polua꞉ natena꞉ ka̱꞉la̱꞉ta꞉ pu hala꞉ tikene kika titima꞉ iki pa꞉ta꞉ a꞉paata꞉ do ma꞉na꞉ titina꞉ a꞉ta꞉ma꞉ ota꞉ na homilimikie lea꞉me.  
\v 30 Kutupa iki pa꞉ta꞉ kone mandane haliwekima꞉ tiaota꞉ mo Ketiso wanda꞉hali yola꞉ muluekema꞉ hoke pi alemanu lelimikie hone ulume lea꞉me.  
\v 31 Koto ekina꞉ ikita꞉ handeteke hao hapa꞉peke. Kutupa I̱ma꞉ta꞉ bapi tepona꞉ u pelia꞉la꞉eki yolao da ka꞉la꞉pa꞉la꞉eki yolao iki paeyao pa꞉ta꞉ e̱ alo hata꞉ pi walo haowa꞉ ekita꞉ hone wia꞉pa꞉peke lea꞉me.   
\p
\v 32 Kutupa ameta꞉ Koda꞉ pa꞉ta꞉ make ipika꞉ pa a꞉ta꞉ma꞉ homa꞉la꞉ pi ale pa꞉ta꞉ make iki halolome. Ipikana꞉ma꞉ta꞉ iki daeyaapeke yao ipika꞉ talopu mea haena꞉ la꞉la꞉ wanda꞉hali ame̱le̱ ika꞉ anke teke mulu pelemeeki ana꞉na꞉ kia꞉peke ya꞉la꞉me lea꞉me.  
\v 33 I̱ma꞉ta꞉ hali ma꞉nda꞉na꞉ silipa kolo dau leke na polopaota꞉  
\v 34 ya do kiki yaapoma꞉ e pokaa I̱ ame̱le̱ haeme haliweki nika꞉ mea꞉peke yeke ekimanu mu haowa꞉ ekita꞉ iki handememe lea꞉me.  
\v 35 Koto pua꞉ ekima꞉ nikana꞉ma꞉ e wopu pokolo hata꞉ honkopu na hake hali tamba꞉ mumana꞉yeke waloa꞉me lea꞉me. Tekehali Yesuma꞉ la꞉la꞉ pi hone wia꞉pa꞉peke dupae. Aleta꞉ aleta꞉ halolo hata꞉ ota꞉ ta꞉na꞉ma꞉ homaasa꞉ekie. Minolo hata꞉ta꞉ ota꞉ wopu dia꞉me la꞉la꞉me lea꞉me.   
\p
\v 36 Koto pi laaka꞉na꞉ tumiki yotuao iki paeyao ame̱le̱ homeke pa꞉ta꞉ pita꞉ yeni pia꞉me.  
\v 37 Kutupa paeyaoma꞉ e̱ alo hata꞉ Polo hopulu mea nunu pimime.  
\v 38 Ipikana꞉ma꞉ta꞉ ya leke mineke paa na handilimikie leeke handaa a꞉ta꞉ma꞉ wotu homememe. Kutupa mo palai kawaso pa꞉ta꞉ ipiki hatuku pememe.   
\c 21  
\s1 Polota꞉ Diutuseleme da nane peekeeki  
\p
\v 1 Nikana꞉ma꞉ koto wanda꞉hali pa꞉ta꞉ a꞉taloe la iki mina꞉pa꞉lao poma꞉me. Palai kawasona꞉ pitata꞉ tikitikina꞉ tunkula pua Kosi da pa꞉ta꞉ poma꞉me. Kutupa da ma꞉nda꞉ kelepeeketa꞉ Lodesi da pa꞉ta꞉ opolo puata꞉ pa mo Padata da pa꞉ta꞉ poma꞉me.  
\v 2 Koto da pa꞉ta꞉ hata꞉ Pinisia nane polu pia꞉ palai kawaso ma꞉nda꞉ handa꞉ wiaata꞉ koto kawasona꞉ pita poma꞉me.  
\v 3 Koto pulu hata꞉ta꞉ Saipotasi hoki handoma꞉pate koto hoki nepoko nane pua mo Sitia nane poma꞉me. Taiya da pa꞉ta꞉ opolo puata꞉ kenkena꞉ hola꞉pa poma꞉me. Koto Taiya da pa꞉ta꞉ mo kawasona꞉ mea wia pemeke alemanu londolo wimime.  
\v 4 Koto pa꞉ta꞉ pua mandane disaipolo wanda꞉hali handa꞉ wiaata꞉ pula homeke iki ame̱le̱ pelia haoma꞉me. Holi Sipitidima꞉ ika꞉ hone u tiaaso haena꞉ ikana꞉ma꞉ Polo pa꞉ta꞉ alota꞉ Diutuseleme da nane na pua꞉peke aleo laa lememe.  
\v 5 Koto lemepate nikita꞉ koto da pa꞉ta꞉ iki ame̱le̱ haoma꞉ di paeyeketa꞉ iki mina꞉pa꞉lao poma꞉me. Koto haliweki paeyaoma꞉ ika꞉ weki wanda꞉ paeyao ame̱le̱ make daoni nane niki hatuku tapaalo epememe. Kutupa niki paeyaoma꞉ koto dawala ikali tea꞉na꞉ tumiki yotuao pita꞉ yeni puma꞉me.  
\v 6 Niki paeyaoma꞉ta꞉ a꞉taloe la alu alu peaata꞉ nikita꞉ mo palai kawasona꞉ pitulu pomono ikita꞉ da la꞉ka꞉la pememe.   
\p
\v 7 Nikita꞉ Taiya da mina꞉pa꞉lao kawasona꞉ pita mo Tolemese da pa꞉ta꞉ opolo poma꞉me. Koto pa꞉ta꞉ haeme Ketiso wanda꞉hali kiki mina꞉ alu alu pea hoto homeke iki ame̱le̱ poluma꞉me.  
\v 8 Da ka꞉la꞉paota꞉ mina꞉pa꞉lao mo Sesatia da nane opolo puata꞉ kutupa hande pi walo haya꞉ hali Pilipina꞉ da pa꞉ta꞉ honda꞉ pamboma꞉me. Mo Diutuseleme da nane amba꞉ hande ma̱leke limi 7 dikoni haliweki kone homeketa꞉ ipikie.  
\v 9 Kutupa ipika꞉ wandiki tonkoputa꞉ Koda꞉na꞉ pi la꞉ u haemeke potopede wandikitonu haemekeme.  
\v 10 Nate mandaneeki koto pa꞉ta꞉ hamono potopede hali homeke Akipasi Diudia nane hao epea꞉me.  
\v 11 Kutupa niki pa꞉ta꞉ a꞉pata꞉ Polona꞉ ba꞉ta꞉ido hako meaata꞉ anke kiki ipika꞉ kone tonkao alota꞉ Holi Sipitidima꞉ do ala꞉me lea꞉me. Mo Diutuseleme da nane Diu haliwekima꞉ do ba꞉ta꞉ido hako teke hali mea tonkao mo Diendaili haliweki pa꞉ta꞉ ipiki mea hatuku pelimikie ala꞉me lea꞉me.   
\p
\v 12 Kotoeki opuaata꞉ koto pa꞉ta꞉ haeme wanda꞉hali ame̱le̱ nikana꞉ma꞉ Polo pa꞉ta꞉ Diutuseleme da nane na polena꞉e laa honke loma꞉me.  
\v 13 Kutupa Poloma꞉ alota꞉ Ikita꞉ do e̱ e̱ aleme ekima꞉ ya puki hoeyaaluekema꞉ alemepe lea꞉me. I̱ma꞉ta꞉ Tekehali Yesuna꞉ bikina꞉ mo Diutuseleme da nane dipula pituluekema꞉ homeke na loa꞉me. Ota꞉ homuluekema꞉ kone tikitiki yao halome lea꞉me.  
\v 14 Kutupa ipika꞉ hone la꞉ka꞉laapeke na yeke handa nikana꞉ma꞉ kiao alota꞉ Tekehalina꞉ hone pa꞉la꞉eki pina꞉e loma꞉me.   
\p
\v 15 Kutupata꞉ nika꞉ ala꞉ta꞉ ala꞉ta꞉ hombo pea wia oli Diutuseleme da nane poma꞉me.  
\v 16 Kutupa mandane Sesatia Ketiso wanda꞉halima꞉ niki ame̱le̱ puata꞉ mo Saipotasi hali Menasonita꞉ titina꞉ pi mieke hali ipika꞉ da pa꞉ta꞉ hamonoyeke niki hatuku pememe.   
\s1 Poloma꞉ Dia꞉mesi handolo peekeeki  
\p
\v 17 Diutuseleme da nane poma꞉ dina꞉ta꞉ Ketiso wanda꞉halima꞉ ta꞉na꞉ma꞉ homolo hata꞉ niki handa꞉ mimime.  
\v 18 Kutupa da ka꞉la꞉paota꞉ mo handeteke haemeke tondiki haliweki paeyao pitina꞉ Polo ame̱le̱ nikita꞉ Dia꞉mesi handolo poma꞉me.  
\v 19 Kutupa Poloma꞉ keiyae pi laa ipikana꞉ma꞉ amba꞉ pi wala꞉ tia pomieke pita꞉ Koda꞉ma꞉ mo Diendaili wanda꞉hali pa꞉ta꞉ pieke ekimanu homeke homeke lo la hala꞉tiki pia꞉me.  
\v 20 Kutupa mo haliwekima꞉ kotoeki opuaata꞉ Koda꞉na꞉ pi laememe. Kutupa ipiki pa꞉ta꞉ alota꞉ Kameo. Hande Diu haliweki paeyaoma꞉ pi mimiki ekita꞉ handeleme. Paeyaoma꞉ hande Lo Pimanu opuluekema꞉ hone wotu witelemepate  
\v 21 mandane haliwekima꞉ iki pa꞉ta꞉ lemekeeki dupa. Hande hali Poloma꞉ mo Diendaili wanda꞉hali ame̱le̱ haleme Diu haliweki pa꞉ta꞉ta꞉ Mosesima꞉ waleekeeki mina꞉pa꞉lao ika꞉ wekisunu sekemesaisi hau na piki Diu haliwekima꞉ pita꞉la꞉eki na pea꞉pa꞉peke laa walo hala꞉mee alememe lememe.  
\v 22 Koto ekina꞉ eki pumana꞉pe. Mo haliwekima꞉ neke epeleeki ota꞉ opilimikie lememe.  
\v 23 Koto ekina꞉ nikana꞉ma꞉ neke pa꞉ta꞉ lolo poloma꞉eki pea꞉peke lememe.  
\v 24 Tonkopu haliwekima꞉ nindi pea do halememe. Do haliweki ame̱le̱ hata꞉ta꞉ naka꞉ loke epeao kutupa ika꞉ you itiki makole mina꞉yeke ika꞉ yenki halawapeke lememe. Koto ekina꞉ paeyaoma꞉ naka꞉ hande Lo Pimanu opiteleeki handolo hata꞉ neke pa꞉ta꞉ leme pimanu na opilimikie lememe.  
\v 25 Kutu pa꞉la꞉pate hande pi mimiki Diendaili wanda꞉hali pa꞉ta꞉ wape tapaaso dupiki pi loma꞉me. Ikana꞉ma꞉ toopi tima꞉ wepia ula꞉ alemanu pa꞉ta꞉ lia hala꞉eki na neke we make na neke da꞉ka꞉pa꞉ mina homaasa꞉eki make na neke kutupa loke hoeyaasa꞉eki make na pina꞉e loma꞉me lememe.  
\v 26 Kutupa Poloma꞉ mo hande haliweki hatuku puata꞉ da ka꞉la꞉paota꞉ iki ame̱le̱ ipika꞉ loke epeao mo tembolo da tukiki pa꞉ta꞉ honda꞉ pambaata꞉ pua hande loke epeaasa꞉ ekina꞉ natemanu la ulu ekima꞉ make mo haliweki paeyaona꞉ yenki halawaaluekema꞉ pemekeme.   
\s1 Tembolo da pa꞉ta꞉ Polo da꞉ka꞉pa꞉ minimikieki  
\p
\v 27 Hande nate watake hata꞉ paeluekema꞉ haena꞉ mo Eisia nane hao epemeke Diu haliwekima꞉ Polo mo hande tembolo da tukiki pa꞉ta꞉ hayekeeki handaata꞉ wanda꞉hali paeyao sutiao Polo da꞉ka꞉pa꞉ mina hata꞉ alota꞉  
\v 28 Isulai haliwekio. A꞉pa niki pa꞉ta꞉la꞉pe lemekeme. Nika꞉ wanda꞉hali pa꞉ta꞉ make mo hande Lo Pimanu pa꞉ta꞉ make do da pa꞉ta꞉ make wanda꞉hali paeyaoma꞉ hoke hone wina꞉yeke la꞉tia pomina꞉la꞉ hali doe lemekeme. Kutupa make do tembolo da tukiki pa꞉ta꞉ Kitiki haliweki hatuku a꞉paata꞉ do pi ula꞉ da amba꞉ hoeyaeya꞉ka꞉ta꞉me laa lemekeme.  
\v 29 Amba꞉ta꞉ Polo mo hande Epesese da hali Totobimasi yaapo daoni nane pomipikieki hando hao ika꞉ honema꞉ta꞉ Poloma꞉ koto hali tembolo da tukiki pa꞉ta꞉ hatuku mea pulu pia꞉me hone wimikime.   
\p
\v 30 Kutupa mo daoni wanda꞉hali paeyao tiao anke hao pua homeke pa꞉ta꞉ momba꞉la hata꞉ Polo da꞉ka꞉pa꞉ mina mo tembolo da hama꞉ nane yola꞉ mea pua kutupa kuta kone mo pota꞉manu hambemekeme.  
\v 31 Kutupa Polo ota꞉ lia homaaluekema꞉ taapolo haena꞉ hali ma꞉nda꞉ma꞉ mo hande Loma꞉ ami haliwekina꞉ tumiki hali pa꞉ta꞉ pua alota꞉ Diutuseleme da wanda꞉hali paeyaoma꞉ momba꞉la hata꞉ wi laa pa pi taka꞉lake la alu alu pitelememe pua leekeme.  
\v 32 Koto pi opuata꞉ mo tumiki halima꞉ a̱i̱ koto kone ipika꞉ ami mandane haliweki ika꞉ opisa haliweki tonka꞉na꞉ oni wanda꞉hali pa꞉ta꞉ anke hao hatuku peekeme. Kutupa wanda꞉halima꞉ mo ami tumiki hali ipika꞉ ami haliweki ame̱le̱ epemekeeki handaata꞉ Polo litolo haemeke ekita꞉ mina꞉pa꞉laemekeme.  
\v 33 Kutupa mo hande a꞉nda꞉ tumiki halima꞉ a꞉pa Polo minata꞉ seni pu yaapoma꞉ hotape leekeme. Kutupa Polota꞉ hane halipe eki hau pia꞉pe laa lota꞉ piekeme.  
\v 34 Mo mombelemeke haliweki mandane ekima꞉ pi ma꞉nda꞉ wi la꞉tiki pa mandaneeki manuma꞉ pi ta꞉ta꞉ wi la꞉tiki kutupa wi la꞉tiki pimiki ekima꞉ a꞉nda꞉ tumiki halima꞉ opua꞉peke na yeke handaata꞉ Polota꞉ mo ami haliwekina꞉ hala꞉ da pa꞉ta꞉ hatuku pupe leekeme.  
\v 35 Kutupa mo wata꞉pe lieke alena꞉ opolo peekepate pa mo mombela mineke pambemeke haliwekima꞉ pasa꞉tei pua꞉tiki pemeke handaata꞉ mo ami haliwekima꞉ Polo kikima꞉ mina꞉liao opa꞉liaemekeme.  
\v 36 Pate mo haliwekima꞉ telia꞉ mea pulu hata꞉ wi alo alota꞉ Homena꞉ lie laa la꞉tiki pimikime.   
\s1 Poloma꞉ ipikana꞉ma꞉ kone ipika꞉ pi leekeeki  
\p
\v 37 Poloma꞉ta꞉ mo ami haliwekima꞉ ika꞉ hala꞉ da tukiki pa꞉ta꞉ ipiki hatuku opolo puluekema꞉ haena꞉ mo a꞉nda꞉ tumiki hali pa꞉ta꞉ alota꞉ Neke pa꞉ta꞉ pi siki lonope leekeme.  
\v 38 Kutupa mo somema꞉ alota꞉ Kitiki pita꞉ neketa꞉ opelepe leekeme. Neketa꞉ mo hande Idiepi hali dia꞉ya꞉ka꞉ta꞉pe laata꞉ Neketa꞉ kapomani mea lopaaluekema꞉ mo 4 daoseni pi uleke yambolo haemeke haliweki sutiao mo hapu hayeke alena꞉ hatuku peeke hali dia꞉ya꞉ka꞉ta꞉pe leekeme.  
\v 39 Poloma꞉ alota꞉ I̱ta꞉ Diu halie. Mo Silisia nane Tasa꞉si teke da tiekena꞉ da hali hao epoa꞉me leekeme. Wanda꞉hali pa꞉ta꞉ pi loluekema꞉ neke pa꞉ta꞉ honke alome leekeme.  
\v 40 Kutupa mo halima꞉ A꞉pa꞉la꞉me lolena꞉e leeke handa Poloma꞉ta꞉ mo wata꞉pe manda hata꞉ ipika꞉ kikima꞉ wanda꞉hali pa꞉ta꞉ pi paape laaka꞉na꞉ ikana꞉ma꞉ pi pi na leke haena꞉ Poloma꞉ mo Hibulu pi laa iki pa꞉ta꞉ alota꞉   
\c 22  
\p
\v 1 Kame apa꞉titio. Iki pa꞉ta꞉ I̱ma꞉ ame do alo pi opua꞉pe leekeme.  
\v 2 Kutupa iki pa꞉ta꞉ ipikana꞉ma꞉ Hibulu pi laa leekeeki opuaka꞉na꞉ pi pi na leke pa haemekeme. Kutupa ipikana꞉ma꞉ iki pa꞉ta꞉ alota꞉   
\p
\v 3 I̱ta꞉ Diu hali mo hande Silisia nane hala꞉ da Tasa꞉si da pa꞉ta꞉ I̱ mendiekepate do daoni tukiki pa꞉ta꞉ daeya polome. Kutupa Kamalielena꞉ sukulu da pita nika꞉ apa꞉ amedana꞉ Lo haumanu sukulu wotu peaka꞉na꞉ ikana꞉ma꞉ Koda꞉ pa꞉ta꞉ ame hone wotu witeleme tupa꞉ I̱ma꞉ make hone u halome.  
\v 4 Kutupa do hande Hau pita꞉la꞉ ekita꞉ amba꞉ta꞉ I̱ma꞉ a꞉nda꞉ wotu litolo hata꞉ wanda꞉hali da꞉ka꞉pa꞉ minata꞉ dipula da pa꞉ta꞉ mea lopao haowa꞉me leekeme.  
\v 5 Mo yeni peao haleme you haliwekina꞉ you halima꞉ make mo ka̱le̱sete haliwekima꞉ make handememe leekeme. Mo haliweki pa꞉ta꞉ ika꞉ Damasikasi hameke titina꞉ pasemanu meaka꞉na꞉ oli da nane Ketiso wanda꞉hali muluekema꞉ poa꞉me leekeme. Mo wanda꞉hali mea tonkao Diutuseleme da nane hatuku a꞉pa panisi peaaluekema꞉ pua꞉me leekeme.   
\s1 Poloma꞉ ipika꞉ hone la꞉ka꞉la꞉ miniekeeki  
\p
\v 6 Pota꞉na꞉ puaka꞉na꞉ mo Damasikasi da nane opolo poluekema꞉ pulu hano nate you tikekena꞉ haena꞉ oli ya nanema꞉ epea꞉ pa̱a̱ tiekema꞉ I̱ hapisa꞉ pea to hopa꞉liaeya꞉me leekeme.  
\v 7 I̱ta꞉ kenkena꞉ honda꞉pa lopa wiono pi ho̱la̱꞉makema꞉ I̱ pa꞉ta꞉ dupa la꞉niaeya꞉me. Solo. Solo. Ekipeke I̱ pa꞉ta꞉ a꞉nda꞉ litelepe laa la꞉niaeya꞉me.  
\v 8 Kutupa I̱ma꞉ alota꞉ Tekehalio. Neketa꞉ epika꞉ta꞉pe laa la꞉liaowa꞉pate ipikana꞉ma꞉ alota꞉ I̱ta꞉ Na꞉sa꞉tete hali Yesue. Nakana꞉ma꞉ I̱ pa꞉ta꞉ a꞉nda꞉ liteleke pua꞉me laa la꞉niaeya꞉me.  
\v 9 Kutupa I̱ ame̱le̱ haeme haliwekima꞉ hande pa̱a̱ pia꞉eki handemepate oli ya nane pi la꞉niaeya꞉ halina꞉ pi ho̱la̱꞉maketa꞉ na opimime leekeme.  
\v 10 Kutupa I̱ma꞉ alota꞉ Tekehalio. Eki peonope loa꞉me. Kutupa ipikana꞉ma꞉ I̱ pa꞉ta꞉ alota꞉ Tiao. Mo Damasikasi da pa꞉ta꞉ pua pitika꞉na꞉ ma꞉nda꞉ma꞉ a꞉pa naka꞉ pulu peleeki la kilieke laa la꞉niaeya꞉me.  
\v 11 Mo hande pa̱a̱ wotu pieke handa I̱ma꞉ta꞉ handa꞉peke na yeke hano mo I̱ ame̱le̱ haeme haliwekima꞉ yaka kiki mina mo Damasikasi da pa꞉ta꞉ I̱ hatuku pememe.  
\v 12 Kutupa hali ma꞉nda꞉ A꞉na꞉naisita꞉ hande Lo Pimanu wotu opu hayeke hali make koto pa꞉ta꞉ haemeke Diu haliweki paeyaoma꞉ ipika꞉ pi lao hatiki pimiki hali I̱ pa꞉ta꞉ epoa꞉me.  
\v 13 Kutupa teke pa꞉ta꞉ hata꞉ I̱ pa꞉ta꞉ alota꞉ Ya kame Soloo. Ameta꞉ naka꞉ leke ki laa handa꞉peke laa lea꞉me. Kutupa koto kone yaka leke ki leeke handa ipiki handoa꞉me.  
\v 14 Kutupa ipikana꞉ma꞉ alota꞉ Nika꞉ apa꞉meina꞉ Koda꞉ma꞉ta꞉ neketa꞉ ipika꞉ hone pa꞉la꞉eki handoelena꞉ make ipika꞉ Tikitikina꞉ hala꞉ hali handolo hata꞉ ipika꞉ kakema꞉ la꞉niaeya꞉ pi ho̱la̱꞉make opuelena꞉yeke neke ma̱leke lila꞉me.  
\v 15 Koto ekina꞉ nakana꞉ma꞉ mo naka꞉ handeeki make opieki make wanda꞉hali paeyao pa꞉ta꞉ la hala꞉tiki pilipikie.  
\v 16 Kutupa ameta꞉ ekipeke hando halepe. Tiao pua bapitaisi hau pea ipika꞉ bikina꞉ wi alo hata꞉ naka꞉ hoke hau pi ekimanu tanda꞉pena꞉ lapeke lea꞉me leekeme.   
\s1 Poloma꞉ Diendaili wanda꞉hali pa꞉ta꞉ pi laena꞉ wi leekeeki  
\p
\v 17 Kutupa I̱ma꞉ Diutuseleme da nane paa a꞉pa hata꞉ mo tembolo da tukiki pa꞉ta꞉ yeni pitolo hata꞉ upama꞉ leke  
\v 18 Tekehali handoa꞉me. Ipikana꞉ma꞉ I̱ pa꞉ta꞉ alota꞉ Ya la halawaasa꞉eki do wanda꞉halima꞉ na opilimikie. Koto ekina꞉ a̱i̱ tiao do Diutuseleme da mina꞉pa꞉lao pua꞉peke laa lea꞉me.  
\v 19 Kutupa I̱ma꞉ hombo peaaso alota꞉ Tekehalio. Mo pi hotu haleme damanu paeyao pa꞉ta꞉ I̱ma꞉ta꞉ naka꞉ pi mimi wanda꞉hali mea yombua꞉tiki pea dipula mea lopatiki pua꞉eki mo haliwekima꞉ handememe.  
\v 20 Kutupa naka꞉ la halawaeya꞉ hali Sidipenina꞉ we lopaeme pita꞉ I̱ make koto pa꞉ta꞉ hata꞉ I̱ma꞉ make a꞉pa꞉la꞉me lipe laa ipiki limi haliwekina꞉ daumanu miniki haowa꞉me loa꞉me.  
\v 21 Koto loa꞉pate ipikana꞉ma꞉ I̱ pa꞉ta꞉ alota꞉ Pue. I̱ma꞉ta꞉ papate kone pa mo Diendaili wanda꞉hali pa꞉ta꞉ neke tapaalueke lea꞉me leekeme.   
\p
\v 22 Hande wanda꞉halima꞉ Polona꞉ pi amba꞉ opimikipate mo koto leekeeki opuaata꞉ taka꞉lake pi la alu alu pea alota꞉ Do hali lumana꞉e. Apa꞉e. Ipikita꞉ ota꞉ homaena꞉ lapeke aleo leekeme.  
\v 23 Kutupa pi taka꞉lake pi la alu alu pitolo haena꞉ ika꞉ daumanu wankea wankea pitolo haena꞉ dokolo apolo lopaliaaso haena꞉  
\v 24 mo a꞉nda꞉ tumiki halima꞉ Polota꞉ mo baliki da pa꞉ta꞉ hatuku mea epena꞉ laaka꞉na꞉ mo haliwekima꞉ ipiki pa꞉ta꞉ koto taka꞉lake pi la alu alu pimiki ekina꞉ teke weiluekema꞉ Polo yombina꞉ leekeme.  
\v 25 Kutu piekepate puma꞉ Polo tonkaemeke pita꞉ Poloma꞉ ipiki teke pa꞉ta꞉ hayeke ami opisa hali ma꞉nda꞉ pa꞉ta꞉ alota꞉ Loma꞉ da pamodi mea wia hala꞉ halita꞉ pi yokaalu na piki yumbolo hauta꞉ ana꞉ pa꞉la꞉pe laa leekeme.   
\p
\v 26 Koto pi opuaata꞉ mo opisa halima꞉ hande a꞉nda꞉ tumiki hali pa꞉ta꞉ pua alota꞉ Eki puluekema꞉ pitelee laa do halita꞉ Loma꞉ pamodi wia hala꞉ halie leekeme.  
\v 27 Koto ekina꞉ mo a꞉nda꞉ tumiki halima꞉ Polo pa꞉ta꞉ a꞉pa alota꞉ I̱ pa꞉ta꞉ la kie. Neketa꞉ Loma꞉ pamodi wia hala꞉ma꞉ lea꞉ halipe leekeme. Kutupa Poloma꞉ alota꞉ Aowe leekeme.  
\v 28 Mo a꞉nda꞉ tumiki halima꞉ alota꞉ Yaka pamodi wia halo ekita꞉ mani tiekema꞉ hamboa꞉me laa leekepate Poloma꞉ hombo peaaso alota꞉ Kutu pa꞉la꞉pate I̱ mendia꞉ alena꞉ kone pamodi mea pua꞉me leekeme.   
\p
\v 29 Hande Polona꞉ pu hayeke ekina꞉ teke weilu pimiki haliwekima꞉ koto leekeeki opuaata꞉ kuta kone yola꞉ pamba tikitiki pua꞉tiki pua haemekeme. Kutupa mo a꞉nda꞉ tumiki hali make Polota꞉ hande Loma꞉ pamodi wia hala꞉ hali mea tonkao pua꞉ka꞉ta꞉me laa paala꞉ma꞉ homeekeme.   
\s1 Polota꞉ ka̱le̱sete haliwekina꞉ leke popelekena꞉ hayekeeki  
\p
\v 30 Kutupa da kelepeeketa꞉ mo Diu haliwekima꞉ Polo ba꞉sa꞉ pimiki ekina꞉ ota꞉ teke lota꞉ pu handuluekema꞉ mo a꞉nda꞉ tumiki halima꞉ Polona꞉ tonkaemekeeki ka꞉la꞉paka꞉na꞉ta꞉ mo Diuna꞉ yeni peao haemeke you haliweki make ika꞉ ka̱le̱sete haliweki paeyao make mombelena꞉ laata꞉ Polota꞉ mo haliweki pa꞉ta꞉ hatuku mea a꞉pa haena꞉ leekeme.   
\c 23  
\p
\v 1 Kutupa Poloma꞉ mo ka̱le̱sete haliweki wotu handake witolo hata꞉ alota꞉ Kametitio. Hokeeki na piki Koda꞉ pa꞉ta꞉ epeke tupa꞉ hatiki pea ame make hata꞉ pua꞉me leekeme.  
\v 2 Kutupa mo yeni peao haemeke you haliwekina꞉ you hali A꞉na꞉naisima꞉ Polo teke pa꞉ta꞉ haemeke haliwekima꞉ Polona꞉ kake da꞉ka꞉pa꞉ lina꞉e leekeme.  
\v 3 Kutupa Poloma꞉ ipiki pa꞉ta꞉ alota꞉ Koda꞉ma꞉ neke lieke. Neketa꞉ yayapiki hau pu hala꞉ halie leekeme. Mo hande Lo Pimanu mana꞉ leeke ekina꞉ pi yokaalu puluekema꞉ koto handeteke pilipateto hande Lo Pimanu na opiki nakana꞉ma꞉ I̱ pa lina꞉ leme leekeme.   
\p
\v 4 Hande ipiki teke pa꞉ta꞉ haemeke haliwekima꞉ alota꞉ Koda꞉ ipika꞉ yeni peao haleme you haliwekina꞉ you hali pa꞉ta꞉ hoke pi pa lelipikipe lemekeme.  
\v 5 Kutupa Poloma꞉ alota꞉ Kametitio. Ipikita꞉ yeni peao haleme you haliwekina꞉ you halie hone na ua꞉me leekeme. Hande wape pea ula꞉eki doe. Naka꞉ wanda꞉halina꞉ you hali pa꞉ta꞉ hoke pi na lapeke la꞉la꞉me leekeme.   
\p
\v 6 Kutu piekepate Poloma꞉ mo hande ka̱le̱sete haliweki handaata꞉ mo Sa꞉dusi Pa꞉tisi yaapo tapake haliweki a꞉pa pita꞉ pelememe hone wia iki pa꞉ta꞉ pi anekema꞉ alota꞉ Kametitio. I̱ta꞉ Pa꞉tisi hali hata꞉ Pa꞉tisi tapake weki mendia꞉me laata꞉ Do I̱ pa꞉ta꞉ pi yokaalu piteleme ekita꞉ hande I̱ polo tupa꞉ wanda꞉hali mea tiaalo pa꞉la꞉ ekina꞉ pitelememe laa leekeme.  
\v 7 Koto pita꞉ Poloma꞉ leeke handa mo Sa꞉dusi Pa꞉tisi yaapo tapake haliwekima꞉ ape ape laa ka꞉ta꞉ alu alu pea ta꞉ta꞉ ta꞉ta꞉ pea haemekeme.  
\v 8 Mo hande Sa꞉dusi tapake haliwekima꞉ lo haemeke ekimanu dupa Homemeke wanda꞉hali paa na mea tialieke laa mo enisolo tapaketa꞉ na hao hata꞉ pelememe laa make mo temokomanu make na pita꞉ pelememe laa lo haemekepate mo Pa꞉tisi tapake haliwekima꞉ koto pi paeyao opu haemekeme.  
\v 9 Kutupa ape ape alo hata꞉ mandane Pa꞉tisi tapake Wape pea wala꞉tiki pu haemeke haliwekima꞉ tiao alota꞉ Do halita꞉ eki a꞉nda꞉ ketete make na handa꞉ witoloma꞉me. Enisoloma꞉ o temokoma꞉ ipiki pa꞉ta꞉ la pia꞉pe niki mata꞉la꞉me lemekeme.  
\v 10 Kutupa mo hande ape ape daeyao lemeke handa mo a꞉nda꞉ tumiki halima꞉ mo haliwekima꞉ Polo mea pa lusinki paama꞉na꞉ ipika꞉ a꞉ndeli miniki haemeke haliwekima꞉ Polo pendilao mea mo ami haliwekina꞉ hala꞉ da pa꞉ta꞉ hatuku pena꞉yeke pi laa tapaeyekeme.   
\p
\v 11 Kutupa nate ma꞉nda꞉na꞉ timba Tekehalima꞉ Polo teke pa꞉ta꞉ a꞉pa hata꞉ alota꞉ Honkopu hapeke. Do Diutuseleme da pa꞉ta꞉ yaka pi la halawaeye tupa꞉ mo Loma꞉ da pa꞉ta꞉ make pi la halawaalena꞉e leekeme.   
\s1 Polo luekema꞉ a꞉nda꞉ lombemekeeki  
\p
\v 12 Kutupa da kelepeeketa꞉ Diu haliwekima꞉ tome tome pamba nindi pea alota꞉ Ne ikali a̱i̱ na neke hata꞉ Polo amba꞉la lumana꞉e lemekeme.  
\v 13 Kutupa mo 45 tupa꞉ haliwekima꞉ nindi pea koto lemekeme.  
\v 14 Kutupa mo yeni peao haemeke teke haliweki pa꞉ta꞉ make mo tondiki haliweki pa꞉ta꞉ make pua alota꞉ Nika꞉ kone ota꞉ nindi tieke pea Ne ikali a̱i̱ na neke hata꞉ Polo amba꞉la lumana꞉e loma꞉me lemekeme.  
\v 15 Koto ekina꞉ ikana꞉ma꞉ mo ka̱le̱sete haliweki ame̱le̱ hata꞉ mo a꞉nda꞉ tumiki hali pa꞉ta꞉ pi tapaapa꞉peke dupa. Hande Polota꞉ ipika꞉ pi yokaalu ota꞉ tikitikina꞉ pumana꞉yeke hatuku a꞉pa꞉peke laa tapaapa꞉peke lemekeme. Kutupa Polota꞉ a̱i̱ na opolo pa ipulu haena꞉ kone amba꞉ lulumeke lemekeme.   
\p
\v 16 Polo ipika꞉ belikina꞉ eiyekema꞉ hande haliwekima꞉ yuwia pituluekema꞉ lemekeeki opua puata꞉ mo ami haliwekina꞉ hala꞉ da tukiki pa꞉ta꞉ honda꞉ pamba Polo pa꞉ta꞉ pua la haleekeme.  
\v 17 Kutupa Poloma꞉ opisa hali homeke epena꞉ wi la꞉ mea alota꞉ Do wekihalita꞉ mo a꞉nda꞉ tumiki hali pa꞉ta꞉ la halena꞉yeke hatuku pua꞉peke leekeme.  
\v 18 Koto ekina꞉ hatuku mea pua mo a꞉nda꞉ tumiki hali pa꞉ta꞉ alota꞉ Hande dipula pila꞉ hali Poloma꞉ I̱ wi la alota꞉ Do wekihalima꞉ mo a꞉nda꞉ tumiki hali pa꞉ta꞉ pua la halena꞉yeke hatuku pua꞉peke lea꞉me leekeme.  
\v 19 Mo a꞉nda꞉ tumiki halima꞉ hande wekihalina꞉ kiki mina hosiki mo pate leke hatuku pua tome tome la lota꞉ pea alota꞉ Eki pi la kuluekema꞉ lepe leekeme.  
\v 20 Kutupa ipikana꞉ma꞉ alota꞉ Mo Diu haliwekima꞉ tome tome pamba mo Polona꞉ pi yokaalu tikitikina꞉ puluekema꞉ belia neke pa꞉ta꞉ laa mo ka̱le̱sete haliweki pa꞉ta꞉ hatuku epoelena꞉ honke lelimikie lememe leekeme.  
\v 21 Koto lelemepate nakana꞉ma꞉ na opua꞉peke. Pa ekipeke mo 45 tupa꞉ haleme haliwekima꞉ nindi pea ne ikali a̱i̱ na neke koto Polota꞉ titina꞉ amba꞉la lumeke laa pota꞉na꞉ yuwia pita꞉ tikitiki yao naka꞉ lolo peleeki opuluekema꞉ handeteke pita꞉ pelememe laa leekeme.  
\v 22 Koto ekina꞉ mo a꞉nda꞉ tumiki halima꞉ hande wekihali Pu la alota꞉ Nakana꞉ma꞉ ma꞉nda꞉ pa꞉ta꞉ pua I̱ma꞉ la hala pua꞉me pi na lapeke leekeme.   
\s1 Polota꞉ mo kapomani teke hali Pilikisi pa꞉ta꞉ tapaeyekeeki  
\p
\v 23 Koto laaka꞉na꞉ a꞉nda꞉ tumiki halima꞉ opisa hali yaapo epena꞉ wi la꞉ mea alota꞉ Ame timba 9 okoloko tupa꞉ mo ami haliweki 200 make hosi ma꞉na꞉ hokina꞉ pitu haleme ami haliweki 70 make dolo miniki haliweki 200 make Sesatia da nane pena꞉yeke ipilikana꞉ma꞉ tikitiki yao haena꞉ lapa꞉peke.  
\v 24 Kutupa Polo pitulu pa꞉la꞉ ma꞉na꞉manu mea haena꞉ laata꞉ mo kapomani you hali Pilikisi pa꞉ta꞉ yopu handeteke hatia hatuku pua꞉peke leekeme.  
\v 25 Koto laata꞉ mo ami you halima꞉ tameiya꞉ homeke dupa wape piekeme.   
\q1
\v 26 Kolodiusi Laisiasima꞉ nika꞉ kapomani you hali Pilikisi neke pa꞉ta꞉ keiyae alome.  
\v 27 Do halita꞉ Diu haliwekima꞉ da꞉ka꞉pa꞉ mina hata꞉ ota꞉ luekema꞉ taapolo haena꞉ yaka ami haliweki ame̱le̱ I̱ma꞉ opolo pua peteloa꞉me. Ipikita꞉ Loma꞉ pamodi mea wia hala꞉ hali yeke handa pua꞉me.   
\b  
\p
\v 28 Ika꞉ ba꞉sa꞉ pimi pi teke weiluekema꞉ ika꞉ ka̱le̱sete haliweki pa꞉ta꞉ hatuku poa꞉pate  
\v 29 mo ba꞉sa꞉ pimi pita꞉ pa ika꞉ Lo Pi manuna꞉ pimime. Koto ekina꞉ ipikita꞉ dipula mea pitapeke o homena꞉ lapeke ekita꞉ ana꞉ na pa꞉la꞉me handa꞉ ua꞉me.  
\v 30 Kutupa haliwekima꞉ Polo luekema꞉ tome tome pambemekeeki ma꞉nda꞉ma꞉ I̱ pa꞉ta꞉ la kieke handaa neke pa꞉ta꞉ koto kone tapaasome. Kutupa ipiki pa꞉ta꞉ ba꞉sa꞉ piteleme haliwekima꞉ neke pa꞉ta꞉ hata꞉ ba꞉sa꞉ pina꞉ loa꞉me loa꞉me laa wape piekeme.   
\p
\v 31 Koto ekina꞉ mo ami haliwekima꞉ koto ika꞉ you halina꞉ mana꞉ pi opuata꞉ Polo meaata꞉ timba kone mo A꞉ndipatisi da pa꞉ta꞉ hatuku pemekeme.  
\v 32 Kutupa da kelepeeketa꞉ mo hosi ma꞉na꞉ hokina꞉ pitu haemeke haliwekima꞉ Polo hatuku mea tapaalo mo ami haliwekita꞉ ika꞉ hala꞉ da pa꞉ta꞉ paa la꞉ka꞉la epemekeme.  
\v 33 Kutupa Sesatia da nane opolo puata꞉ mo kapomani you hali pa꞉ta꞉ mo pase halaaka꞉na꞉ Polo make hatuku pua haena꞉ lemekeme.  
\v 34 Kutupa mo kapomani you halima꞉ hande pase yata꞉paka꞉na꞉ Polo pa꞉ta꞉ lota꞉ pea alota꞉ Neketa꞉ hando potopinisi halipe leekeme. Kutupa Polota꞉ Silisia nane halie leekeeki opua  
\v 35 ipikana꞉ma꞉ alota꞉ Neke pa꞉ta꞉ ba꞉sa꞉ pimiki haliweki opolo epemeka꞉na꞉ta꞉ kota꞉ naka꞉ pi opulueke leekeme. Kutupa mo Hetodina꞉ da tieke pa꞉ta꞉ mea pita kade haliwekima꞉ handeteke haena꞉yeke leekeme.   
\c 24  
\s1 Diu haliwekima꞉ Polo samani pimikieki  
\p
\v 1 Kutupa nate yunki hata꞉ paeyeketa꞉ mo yeni peao haemeke you haliwekina꞉ you hali A꞉na꞉naisi make mandane handeteke haemeke tondiki haliweki make pi lalo pieke hali homeke Tetalusi make opolo epemekeme. Kutupa ika꞉ samani pimiki pi Polo pa꞉ta꞉ mo kapomani you hali pa꞉ta꞉ laaka꞉na꞉  
\v 2 kutupa Polo a꞉pa haena꞉ mo Tetalusima꞉ ipiki pa꞉ta꞉ ba꞉sa꞉ pitolo alota꞉  
\p Epeke you hali Pilikisio. Neketa꞉ niki handeteke hata꞉ hone wopu wiki hali hale ekina꞉ nikita꞉ amba꞉ kone a꞉nda꞉ pelia hao haloma꞉me. Kutupa haloma꞉pate nakana꞉ma꞉ make nika꞉ kenke pa꞉ta꞉ haloma꞉ wanda꞉hali epeaaluekema꞉ tikitiki hau peaasa꞉ ekimanu amba꞉ peaaleme.  
\v 3 Koto pele ekina꞉ nikana꞉ma꞉ do kenke paeyao pa꞉ta꞉ hata꞉ hoto paeyao neke pa꞉ta꞉ ta꞉na꞉ma꞉ homolo hata꞉ keiyae pi lo haloma꞉me.  
\v 4 Koto pele ekina꞉ naka꞉ nate paeyaapa꞉na꞉ I̱ma꞉ neke pa꞉ta꞉ pi hokulu na leke nika꞉ lolo poloma꞉ pi sikita꞉ nakana꞉ma꞉ niki pa꞉ta꞉ epeke hone witolo hata꞉ opuelena꞉yeke neke honke alo loa꞉me.  
\v 5 Do hande halima꞉ta꞉ wanda꞉hali hao hoeyaena꞉ dupi dupi laa sutiao hala꞉ hali hala꞉ ekita꞉ handoma꞉me. Ipikana꞉ma꞉ do kenke paeyao pa꞉ta꞉ Diu haliweki ame̱le̱ a꞉nda꞉ semba꞉lalo pa꞉la꞉ pi la꞉tiki pomu hala꞉me. Ipikita꞉ mo Na꞉sa꞉tini tapake wanda꞉halina꞉ you hali ma꞉nda꞉ hala꞉me.  
\v 6 Ipikana꞉ma꞉ hande tembolo da hoeyaaluekema꞉ taapeekepate da꞉ka꞉pa꞉ minuma꞉me.  
\p [Nika꞉ Lo Pi manuma꞉ ala꞉ tupa꞉ nikana꞉ma꞉ mo hali pa꞉ta꞉ puluekema꞉ puma꞉pate  
\v 7 mo a꞉nda꞉ tumiki hali Laisiasima꞉ honda꞉ pambolo a꞉paata꞉ nika꞉ kiki yola꞉ mepi bao honkopu hao do hali pa꞉ta꞉la꞉ mea hatuku pea꞉me.  
\v 8 Koto hau pea Laisiasima꞉ta꞉ do hali pa꞉ta꞉ samani pimi haliwekita꞉ neke pa꞉ta꞉ a꞉pa haena꞉ dupea꞉peke laa lea꞉me.]  
\p Nakana꞉ma꞉ do hali pa꞉ta꞉ lota꞉ pika꞉na꞉ta꞉ nikana꞉ma꞉ do hali pa꞉ta꞉ samani puma꞉ pita꞉ ipika꞉ kake pa꞉ta꞉ lelie pi nakana꞉ma꞉ kone opilipikie laa leekeme.  
\v 9 Mo Diu haliwekima꞉ make Polo samani pitolo hata꞉ alota꞉ Koto hande lea꞉ ekimanu paeyaota꞉ ota꞉ lea꞉eki nikana꞉ma꞉ make handoloma꞉me laa lemekeme.   
\s1 Poloma꞉ Pilikisi pa꞉ta꞉ ipika꞉ pi leekeeki  
\p
\v 10 Poloma꞉ pi lena꞉yeke mo kapomani you halima꞉ ipika꞉ you mea a꞉meiyaeyekeme. Kutu pieketa꞉ Poloma꞉ handata꞉ pi alo alota꞉ Nakana꞉ma꞉ bapi elekeeleke do kenke pa꞉ta꞉ haleme wanda꞉halina꞉ pi yokaalu peao hala꞉ ekita꞉ I̱ma꞉ hone ulume. Koto ekina꞉ I̱ma꞉ make ya pu halo ekimanu neke pa꞉ta꞉ loluekema꞉ ta꞉na꞉ma꞉ homolome.  
\v 11 Amba꞉ta꞉ da ka꞉la꞉pa꞉la꞉eki 12 tupa꞉ koto natena꞉ kone oli Diutuseleme da pa꞉ta꞉ I̱ma꞉ Koda꞉ pa꞉ta꞉ panda꞉puniao yeni puluekema꞉ poa꞉ ekita꞉ naka꞉ kone weiya handa꞉ wia꞉peke ya꞉la꞉me.  
\v 12 Mo Diu haliwekima꞉ta꞉ mo tembolo da tukiki pa꞉ta꞉ I̱ma꞉ hali ma꞉nda꞉ ame̱le̱ ape alo hano ma꞉nda꞉ma꞉ I̱ na a꞉pa handea꞉me. Mo pi hotu haleme da pa꞉ta꞉manu make mo daoni tukiki pa꞉ta꞉ make aleta꞉ ma꞉nda꞉ pa꞉ta꞉ make I̱ma꞉ wanda꞉hali sutia tia pitolo hano hali ma꞉nda꞉ma꞉ I̱ na a꞉pa handea꞉me.  
\v 13 Koto pa꞉la꞉pate do I̱ a꞉pa samani peleme pimanu make I̱ma꞉ ota꞉ polo ekimanu do haliwekima꞉ neke pa꞉ta꞉ la kia꞉pa꞉peke na ya꞉la꞉me.  
\v 14 Koto pa꞉la꞉pate I̱ma꞉ neke pa꞉ta꞉ do lolo polo pita꞉ ota꞉ pi lolueke. Mo haliwekima꞉ ika꞉ honema꞉ta꞉ yayapiki hau aleme Hau kone I̱ma꞉ telia꞉ mea pulume. Kutu puluekema꞉ yaka apa꞉mei amedana꞉ Koda꞉ pa꞉ta꞉ panda꞉puniao yeni pu halome. Kutupa make mo Mosesima꞉ wape pea ula꞉ Lo Pimanu paeyao make mo potopede haliwekima꞉ wape pea ula꞉ buka manuna꞉ pi paeyao make I̱ma꞉ opu halome.  
\v 15 Koda꞉ma꞉ pulu pa꞉la꞉ ekina꞉ I̱ma꞉ ipiki pa꞉ta꞉ hone tulao hata꞉ handeteke hao halo tupa꞉ do haliwekima꞉ make Koda꞉ pa꞉ta꞉ koto tupa꞉ halememe. Dupae. Koda꞉ma꞉ta꞉ wanda꞉hali paeyaota꞉ epeke wanda꞉hali make hoke wanda꞉hali make homa lapa꞉ pa꞉ta꞉ ula꞉ wanda꞉hali paeyao ipikana꞉ma꞉ mea tiaalieke.  
\v 16 Kutu pulu pa꞉la꞉ ekina꞉ I̱ma꞉ta꞉ nate paeyao Koda꞉na꞉ leke minekena꞉ hata꞉ make wanda꞉halina꞉ leke minekena꞉ hata꞉ make yaka pu halo hau pa꞉ta꞉ hokeeki ma꞉nda꞉ taapa꞉paapa꞉na꞉ hone wotu wia hao halome.   
\p
\v 17 Diutuseleme da nane mandane bapi manuna꞉ I̱ na poa꞉ ekina꞉ numaneke a꞉nda꞉ poa꞉pita꞉ta꞉ yaka wanda꞉hali pa꞉ta꞉ mani mea pua halaota꞉ Koda꞉ pa꞉ta꞉ haluekema꞉ ma꞉na꞉ make lia haloa꞉me.  
\v 18 Mo tembolo da tukiki pa꞉ta꞉ koto hau pitolo hata꞉ta꞉ mo hali wamo pitolo pu hala꞉ hau pu paeyao hano kone mo haliwekima꞉ I̱ a꞉pa handememe. Koto pa꞉ta꞉ta꞉ haliweki wopu I̱ ame̱le̱ mandake pa꞉ta꞉ na a꞉pa haememe. Haliwekima꞉ poiya꞉ poiya꞉ na a꞉pa lememe.  
\v 19 Koto pa꞉la꞉pate mo Eisia potopinisi nane hao epeleme Diu haliweki mandane ekimanu koto pa꞉ta꞉ haememe. Koto haliweki ikana꞉ma꞉ kone I̱ pa꞉ta꞉ pi ma꞉nda꞉ loluekema꞉ hone wimika꞉na꞉ta꞉ kota꞉ neke pa꞉ta꞉ a꞉pa ika꞉ samani piteleme pi lemeka꞉na꞉ta꞉ epelieke.  
\v 20 Do haleme haliwekima꞉ make I̱ma꞉ta꞉ ika꞉ ka̱le̱sete haliweki pa꞉ta꞉ hata꞉ yaka pi loa꞉ pita꞉ta꞉ I̱ma꞉ pu hoeyao hau ma꞉nda꞉ handa꞉ wimi ekita꞉ lemeka꞉na꞉ta꞉ epelieke.  
\v 21 Koto haliweki pa꞉ta꞉ tiao hata꞉ta꞉ pi homeke homeke wi laa dupa loa꞉me. Koda꞉ma꞉ta꞉ lapa꞉ pa꞉ta꞉ ula꞉ wanda꞉hali mea tiaalo pa꞉la꞉ ekita꞉ I̱ma꞉ kutu pulu pa꞉la꞉ ekina꞉ hone tulao halo ekina꞉ta꞉ ame ikana꞉ma꞉ I̱ pi yokaaluna꞉ mea hasememe laa leekeme.   
\p
\v 22 Koto leeketa꞉ Pilikisima꞉ta꞉ mo Hau pita꞉la꞉eki dupae laa ma꞉nda꞉ma꞉ ipiki pa꞉ta꞉ la haleeke handaata꞉ ipikana꞉ma꞉ alota꞉ Pi ana꞉ma. Paape laa leekeme. Mo haliweki pa꞉ta꞉ alota꞉ Mo a꞉nda꞉ tumiki hali Laisiasi opolo epea꞉ka꞉na꞉ta꞉ I̱ma꞉ ika꞉ pi tikitiki yao lalueke leekeme.  
\v 23 Koto laata꞉ mo Polo handeteke hayeke ami opisa pa꞉ta꞉ alota꞉ Polo handeteke hata꞉ta꞉ ota꞉ dipula pila꞉ hali tupa꞉ na handeteke hake ipika꞉ yankeke titima꞉ ota꞉ mea꞉peke alemanu mea epemeka꞉na꞉ta꞉ sa꞉sa꞉ na pea꞉peke laa leekeme.   
\s1 Poloma꞉ Pilikisi Datusila yaapo pa꞉ta꞉ pi leekeeki  
\p
\v 24 Hoto mandane ekimanu haota꞉ Pilikisi ipika꞉ wanda꞉ Datusila yaapo epepekeme. Datusilata꞉ Diu tapake wanda꞉e. Pilikisima꞉ta꞉ Polo a꞉pa ipiki pa꞉ta꞉ pi lena꞉yeke epoe laa la꞉moneaeyekeme. Poloma꞉ta꞉ Yesu Ketiso pa꞉ta꞉ hone tulaasa꞉ pi teke la halolo hata꞉ta꞉  
\v 25 tikitiki hau pita꞉la꞉eki hone tulaasa꞉ pi teke la halolo kone ana꞉na꞉ handeteke hala꞉eki pa꞉ta꞉ make Koda꞉ma꞉ wanda꞉hali paeyao pa꞉ta꞉ pi yokaalu pulu pa꞉la꞉eki pa꞉ta꞉ make kutupiki pi leekepate Pilikisima꞉ paala꞉ma꞉ homolo hata꞉ alota꞉ Ameta꞉ pue laa Nate ma꞉nda꞉na꞉ waleke wia꞉ka꞉na꞉ta꞉ epoelena꞉ paa wi loluekema꞉ ameta꞉ pue leekeme.  
\v 26 Pilikisima꞉ hone ma꞉nda꞉ make dupa wiekeme. Poloma꞉ mani ma꞉nda꞉ kina꞉e hone wiekeme. Koto pa꞉la꞉ ekina꞉ Polo epena꞉ wi la꞉tiki pea Polo yaapo pi la꞉tiki pipikime.   
\p
\v 27 Kutupa hao bapi yaapo yapeeketa꞉ Pilikisima꞉ kapomani you hali haya꞉ ekita꞉ pa Posiasi Pesitasima꞉ miekeme. Kutu pieketa꞉ Pilikisima꞉ta꞉ mo Diu haliweki ta꞉na꞉ma꞉ homaaluekema꞉ Polota꞉ dipula pa pita꞉ pelia haena꞉ laa peekeme.   
\c 25  
\s1 Poloma꞉ta꞉ Sisama꞉ ipika꞉ pi yokaalu peaena꞉ honke leekeeki  
\p
\v 1 Pesitasi mo potopinisi nane opolo a꞉paata꞉ hoto tepo hao mo Sesatia da mina꞉pa꞉lao oli Diutuseleme da nane peekeme.  
\v 2 Koto da pa꞉ta꞉ haemeke yeni peao haemeke you haliwekima꞉ make mo Diu you haliwekima꞉ make ikana꞉ma꞉ Polo samani pimiki pita꞉ Pesitasi pa꞉ta꞉ la halemekeme. Ikana꞉ma꞉ Pesitasi pa꞉ta꞉ honke alo alota꞉  
\v 3 Nikana꞉ma꞉ epeke hone wiomono Polota꞉ do Diutuseleme nane epena꞉ lae lemekeme. Koto lemeke pita꞉ Polota꞉ pota꞉na꞉ ipulu haena꞉ luekema꞉ a꞉nda꞉ lomba꞉ wia lemekeme.  
\v 4 Pesitasima꞉ ika꞉ pi hombo peaaso alota꞉ Polota꞉ Sesatia nane dipula pa pila꞉me. Koto pa꞉la꞉ ekina꞉ I̱ta꞉ hosiki hao koto da nane paa la꞉ka꞉la polueke. Mo halima꞉ hau ma꞉nda꞉ pu hoeyaala꞉eki wia꞉ka꞉na꞉ta꞉  
\v 5 kota꞉ ika꞉ you haliwekima꞉ I̱ ame̱le̱ mandakena꞉ Sesatia da pa꞉ta꞉ pua mo hali pa꞉ta꞉ samani piki pi loa꞉mina꞉e laa leekeme.   
\p
\v 6 Koto pi laata꞉ Pesitasi ipikita꞉ hoto ketepo hata꞉ o no̱i̱ hata꞉ iki ame̱le̱ pelia hao Sesatia da pa꞉ta꞉ peekeme. Pua da kelepeeketa꞉ mo pi yokaalu pu haemeke da tukiki pa꞉ta꞉ pua pitata꞉ Polo hatuku ipupe laa leekeme.  
\v 7 Kutupa Polo opolo a꞉pa haena꞉ta꞉ mo Diutuseleme da hao epemeke Diu haliwekima꞉ Polo dupao hata꞉ mo haliwekima꞉ alota꞉ Do halima꞉ta꞉ hoke hoke ane mone haumanu wopu pu hala꞉ halima꞉ pa꞉la꞉me lemekepate mo ota꞉ pa꞉la꞉eki tekemanu na la꞉ yokemekeme.  
\v 8 Koto lemekepate Poloma꞉ ipika꞉ kone alota꞉ I̱ma꞉ta꞉ Diu wanda꞉halina꞉ Lo Pimanu pa꞉ta꞉ make mo tembolo da pa꞉ta꞉ pi wilimi ekimanu pa꞉ta꞉ make mo Loma꞉ kapomani hali Sisa pa꞉ta꞉ make hau ma꞉nda꞉ na polome laa leekeme.   
\p
\v 9 Pesitasima꞉ mo Diu haliweki ta꞉na꞉ma꞉ homa꞉ tiaaluekema꞉ Polo pa꞉ta꞉ lota꞉ pitolo hata꞉ alota꞉ Do hande samani piteleme pita꞉ I̱ma꞉ naka꞉ pi yokaaluta꞉ oli Diutuseleme da nane peaano poluekema꞉ hone witelepe laa lota꞉ piekeme.  
\v 10 Koto leeke Poloma꞉ alota꞉ Sisama꞉ pi yokaalu peao hala꞉ da pa꞉ta꞉ta꞉ do halota꞉ laata꞉ do da pa꞉ta꞉ kone pea꞉peke ya꞉la꞉me. Do Diu haliweki pa꞉ta꞉ I̱ma꞉ hau ma꞉nda꞉ na poloeki make naka꞉ kone handeleme.  
\v 11 I̱ma꞉ pi ula꞉eki ota꞉ yamba꞉la꞉ mea꞉peke yenkita꞉ homolo poloeki mea꞉peke yea꞉ka꞉na꞉ta꞉ kota꞉ I̱ na pindipa polueke. Koto pa꞉la꞉pate pa yayapikieki laa I̱ samani pitolo lemeka꞉na꞉ta꞉ kota꞉ hali ma꞉nda꞉ma꞉ mo haliweki pa꞉ta꞉ I̱ mea hala꞉peke na ya꞉la꞉me. Sisama꞉ kone yaka pi yokaalu peaena꞉ honke alome laa leekeme.   
\p
\v 12 Koto leeketa꞉ Pesitasima꞉ ipika꞉ pota꞉ epeaaseme haliweki ame̱le̱ pi pi amba꞉la laa Poloma꞉ pi hombo peaaso alota꞉ Nakana꞉ma꞉ta꞉ Sisama꞉ naka꞉ pi yokaalu peaena꞉ honke le ekina꞉ kota꞉ Sisa pa꞉ta꞉ pelipikie laa leekeme.   
\s1 Akatipa pa꞉ta꞉ Poloma꞉ pa꞉la꞉ ekimanu la haleekeeki  
\p
\v 13 Mandane pulamanu hao mo kini hali ma꞉nda꞉ Akatipata꞉ Benisi yaapo Pesitasi pa꞉ta꞉ kiki haluekema꞉ mo Sesatia da pa꞉ta꞉ epepekeme.  
\v 14 Koto pa꞉ta꞉ hoto mandane ekimanu a꞉pa haena꞉ta꞉ Pesitasima꞉ Poloma꞉ pa꞉la꞉ ekimanu kini hali pa꞉ta꞉ la halolo alota꞉ Do pa꞉ta꞉ hala꞉ hali homeketa꞉ Pilikisima꞉ dipula mea pitao peekeme.  
\v 15 I̱ta꞉ Diutuseleme da nane poa꞉ pita꞉ta꞉ mo yeni peao haleme teke haliweki make tondiki haliweki make paeyao Diu haliwekima꞉ ipiki pa꞉ta꞉ samani peaata꞉ I̱ pa꞉ta꞉ honke alo alota꞉ Do halita꞉ hoke hau pa꞉la꞉ halie lae la honke lememe.  
\v 16 Koto lemepate I̱ma꞉ iki pa꞉ta꞉ alota꞉ Loma꞉ haliweki nika꞉ hauta꞉ hali ma꞉nda꞉ pa hameke kone ka꞉nda꞉ma꞉ homaapeke na ya꞉la꞉me. Haliwekima꞉ hali ma꞉nda꞉ pa꞉ta꞉ hokeeki pia꞉me laa samani pimika꞉na꞉ta꞉ kota꞉ mo halima꞉ta꞉ mo ipiki samani pilimi haliwekina꞉ leke minekena꞉ hata꞉ ipika꞉ pa꞉la꞉eki alo hata꞉ mo haliwekina꞉eki hombo peaapeke ya꞉la꞉me.  
\v 17 Mo haliwekita꞉ do pa꞉ta꞉ epemeketa꞉ kota꞉ I̱ma꞉ handa꞉ pelia na hake da kelepea꞉eke kone mo pi yokaalu pu haloma꞉ da tukiki pa꞉ta꞉ pua pita꞉ mo hali hatuku epena꞉ loa꞉me.  
\v 18 Mo ipiki samani pimi haliwekima꞉ tiao hata꞉ ipiki pa꞉ta꞉ samani piteleme pimanu lemepate pa I̱ma꞉ hone ua꞉ tupa꞉ ota꞉ hoke hau pa꞉la꞉eki ma꞉nda꞉ ipiki pa꞉ta꞉ na lememe.  
\v 19 Ikana꞉ma꞉ ipiki samani pitolo leme ekita꞉ ika꞉ yeni pu haleme hauna꞉ make pa amba꞉ homeeke hali Yesu pa꞉ta꞉ make samani pitolo lememe. Koto hali Yesuta꞉ Poloma꞉ alota꞉ koto hali ame paa tiao hala꞉me lea꞉me.  
\v 20 Kutu piki haumanu handa꞉ wia꞉peke pota꞉ weiluekema꞉ I̱ma꞉ pomoma꞉ homolo hata꞉ Polo pa꞉ta꞉ lota꞉ pitolo alota꞉ koto hande neke samani pitolo leme pina꞉ pi yokaalu peaano mo Diutuseleme da pa꞉ta꞉ poluekema꞉ hone witelepe la lota꞉ pua꞉pate  
\v 21 Poloma꞉ Sisama꞉ ipika꞉ pi yokaalu peaena꞉ honke laata꞉ ipikita꞉ dipula da pa꞉ta꞉ handeteke haena꞉ Sisama꞉ ipika꞉ pi tikitiki yao laowaena꞉ honke lea꞉me. Koto leeke handa I̱ma꞉ta꞉ dipula pa pitina꞉ laa Sisa pa꞉ta꞉ tapaalueke laa loa꞉me leekeme.   
\p
\v 22 Akatipama꞉ Pesitasi pa꞉ta꞉ alota꞉ Do halina꞉ pi I̱ma꞉ kone opuluekema꞉ hone witolome leekeme. Pesitasima꞉ alota꞉ Belia opuelena꞉e leekeme.   
\p
\v 23 Koto laa da ka꞉la꞉paasota꞉ Akatipa Benisi yaapo au au wotu laa a꞉pata꞉ mo mombolo haeme da pa꞉ta꞉ta꞉ mo ami a꞉nda꞉ tumiki haliweki ame̱le̱ make mo daoni pa꞉ta꞉ haeme you haliweki ame̱le̱ make paeyaota꞉ honda꞉ pamba epememe. Pesitasima꞉ pi leeke handa Polo hatuku epena꞉ lememe.  
\v 24 Kutupa a꞉pa haena꞉ Pesitasima꞉ alota꞉ Kini hali Akatipao. Do hao yapeleme wanda꞉hali iki paeyao make do hala꞉ hali ika꞉ handelememe. Do pa꞉ta꞉ haleme wanda꞉halima꞉ make Diutuseleme da pa꞉ta꞉ haleme wanda꞉halima꞉ make koto Diu wanda꞉hali paeyaoma꞉ I̱ pa꞉ta꞉ koto hali samani pimime. Mo haliwekima꞉ pi tanda pu alu alu pea alota꞉ Do halita꞉ homena꞉e alememe.  
\v 25 Koto alemepate do halima꞉ta꞉ ipika꞉ homolo pa꞉la꞉ hau ma꞉nda꞉ pa꞉la꞉ ekita꞉ I̱ma꞉ na handa꞉ witolome. Ipikana꞉ma꞉ kone Sisama꞉ ipika꞉ pi yokaalu peaena꞉ honke lea꞉ ekina꞉ Sisa pa꞉ta꞉ tapaalueke hone ua꞉me.  
\v 26 Kutu pua꞉pate pa do halima꞉ pa꞉la꞉ ekina꞉ Sisa pa꞉ta꞉ I̱ma꞉ teke pi ma꞉nda꞉ wape pea tapaaluekema꞉ I̱ hone na witolome. Koto ekina꞉ Kini hali Akatipao. Neke pa꞉ta꞉ make do haliweki pa꞉ta꞉ make iki paeyao pa꞉ta꞉ do hali koto epena꞉ alo handa꞉e. Ipikana꞉ma꞉ lelie pi opuata꞉ wetepena꞉ I̱ma꞉ wape pulu polo pi hone ulueke.  
\v 27 I̱ma꞉ dipula pila꞉ hali ma꞉nda꞉ tapaaso hata꞉ ipiki pa꞉ta꞉ samani pimi pi teke tonka꞉na꞉ wape ana꞉na꞉ pea na tapaowa꞉ka꞉na꞉ta꞉ kota꞉ ana꞉ na pa꞉la꞉me hone witolome laa leekeme.   
\c 26  
\s1 Poloma꞉ Akatipana꞉ leke popelekena꞉ hata꞉ pi leekeeki  
\p
\v 1 Akatipama꞉ Polo pa꞉ta꞉ alota꞉ Naka꞉ kone pi lapeke ya꞉la꞉me. Lae lea꞉me. Kutupa Poloma꞉ ipika꞉ kiki tindipao pi alo alota꞉   
\p
\v 2 Kini Akatipao. I̱ma꞉ta꞉ neke pa꞉ta꞉ hata꞉ kone mo hande Diu haliwekima꞉ I̱ ba꞉sa꞉ pimi ekimanu yaka pi alo ekina꞉ a꞉pa꞉la꞉me.  
\v 3 Nakana꞉ma꞉ mo hande Diu haliwekina꞉ peleme ekimanu make ika꞉ pi yokaalu pu haleme hauna꞉ ekimanu handolo hata꞉ yaka pi yopu opu pita꞉peke lea꞉me.   
\p
\v 4 Yaka wanda꞉hali pa꞉ta꞉ weki hata꞉ pua꞉eki make Diutuseleme da pa꞉ta꞉ haowa꞉eki make Diu wanda꞉hali paeyaoma꞉ handememe lea꞉me.  
\v 5 I̱ta꞉ hande Pa꞉tisi tapake haowa꞉ ekita꞉ mo haliwekima꞉ amba꞉ kone handata꞉ neke pa꞉ta꞉ lapeke ya꞉la꞉me lea꞉me.  
\v 6 Kutupa Koda꞉ma꞉ nika꞉ apa꞉ ameda pa꞉ta꞉ la꞉ wiekeeki pa꞉ta꞉ hone uluma꞉ ekina꞉ ame I̱ ba꞉sa꞉ pitelememe lea꞉me.  
\v 7 Koto pi la꞉ wiekeeki muluekema꞉ nika꞉ tapake 12 wanda꞉halima꞉ Koda꞉ pa꞉ta꞉ panda꞉puniao yeni pu halememe lea꞉me. Kini halio. Koto pi la꞉ wieke ekina꞉ hone ulu ekina꞉ mo Diu haliwekima꞉ I̱ ba꞉sa꞉ pitelememe.  
\v 8 Koda꞉ma꞉ ota꞉ homa꞉la꞉ wanda꞉hali paa mea tiaapeke ya꞉la꞉me laa ikana꞉ma꞉ta꞉ ekipeke koto hone na witelemepe lea꞉me.   
\p
\v 9 Mo hande Na꞉sa꞉tete hali Yesuna꞉ bikina꞉ pita꞉la꞉ ekimanu sa꞉sa꞉ puluekema꞉ I̱ma꞉ta꞉ hau ma꞉nda꞉ wotu puluekema꞉ hone wopu wiaata꞉  
\v 10 Diutuseleme da pa꞉ta꞉ kutu pua꞉me. Mo yeni peao haleme you haliwekima꞉ pea꞉peke lemeke handaata꞉ I̱ma꞉ mo Koda꞉na꞉ yakopiki wanda꞉hali woputa꞉ dipula homeke na pitaake ota꞉ litolo haena꞉ make I̱ma꞉ make kiki mea a꞉meiyaowa꞉me lea꞉me.  
\v 11 Kutupa mo wanda꞉halita꞉ pi hotu haleme da paeyao pa꞉ta꞉ panisi wotu peatiki peaata꞉ Yesu pa꞉ta꞉ hoke pi lena꞉yeke la handetiki pua꞉me. Kutupa mo wanda꞉hali pa꞉ta꞉ mineke wotu pankolo hata꞉ mandane damanu pa꞉ta꞉ kone tolu lia꞉tiki pua꞉me.   
\s1 Poloma꞉ ipika꞉ hone la꞉ka꞉la꞉ miniekeeki la꞉la꞉eki  
\p
\v 12 Koto ekina꞉ mo yeni peao haleme teke haliwekima꞉ I̱ tapaemeke handa I̱ta꞉ Damasikasi da nane poa꞉pate  
\v 13 Ya tiekeo. Nate you tikekena꞉ haena꞉ pota꞉na꞉ pulu hamono oli ya nanema꞉ pa̱a̱ tieke nate tupa꞉ dia꞉me mo I̱ ame̱le̱ mandakena꞉ poma꞉ haliweki hande pa̱a̱ tiekema꞉ niki dopuaeya꞉eki handoa꞉me lea꞉me.  
\v 14 Kutupa niki paeyao kenkena꞉ honda꞉pa lopa wiomono I̱ma꞉ta꞉ Hibulu pima꞉ kone pi ho̱la̱꞉make I̱ pa꞉ta꞉ lea꞉eki opua꞉me dupae. Solo. Solo. Ekipeke I̱ pa꞉ta꞉ a꞉nda꞉ litelepe lea꞉me. Kanake etima꞉ awa꞉la꞉eki kiaase ekina꞉ tanda koto minele handa꞉e lea꞉me.  
\v 15 Kutupa I̱ma꞉ alota꞉ Tekehalio. Neketa꞉ epika꞉ta꞉pe loa꞉me. Kutupa Tekehalima꞉ alota꞉ I̱ta꞉ Yesue. Nakana꞉ma꞉ I̱ pa꞉ta꞉ a꞉nda꞉ liteleme.  
\v 16 Kutu pitelepate neke tiao hapeke laata꞉ Nakana꞉ma꞉ ya e pokaalena꞉ I̱ma꞉ ya kone neke pa꞉ta꞉ peneme yaowa꞉me lea꞉me. I̱ma꞉ pua꞉ hau nakana꞉ma꞉ handa la haloelena꞉ make I̱ma꞉ neke pa꞉ta꞉ peneme yaalo polo ekina꞉ la haloelena꞉ make neke halena꞉ alome lea꞉me lea꞉me.  
\v 17 Kutupa mo Diu Diendaili yaapo tapake haliwekima꞉ neke na mina꞉ laata꞉ mo Diendaili wanda꞉hali pa꞉ta꞉ neke tapaasome lea꞉me lea꞉me.  
\v 18 Ika꞉ leke kilaowalena꞉ yeke neke tapaasome lea꞉me. Ikana꞉ma꞉ timba꞉ lo pamba꞉la꞉eki la꞉ka꞉la mina꞉pa꞉lao pa̱a̱na꞉ epoemena꞉yeke pua꞉me. Hande Sadanina꞉ wele pa꞉la꞉eki la꞉ka꞉la mina꞉pa꞉lao Koda꞉na꞉eki hamina꞉yeke pua꞉me. Koto ekina꞉ ika꞉ hoke hau pita꞉la꞉ ekimanu Koda꞉ma꞉ pa tombuao hala꞉eki muemena꞉yeke pua꞉me. Kutupa ikana꞉ma꞉ yaka pi mina꞉leke handa talopu mea haena꞉ lolo wanda꞉hali ame̱le̱ tukiki pa꞉ta꞉ a꞉pa hamina꞉yeke pua꞉me lea꞉me.   
\s1 Poloma꞉ ipika꞉ e pokeekeeki la꞉la꞉eki  
\p
\v 19 Koto ekina꞉ Kini Akatipao. I̱ma꞉ oli ya nanema꞉ peneme yao la꞉niaeya꞉eki opuata꞉ pi na tunkuliki ota꞉ pua꞉me.  
\v 20 Mo Damasikasi da wanda꞉hali pa꞉ta꞉ amba꞉la wala kutupa Diutuseleme da pa꞉ta꞉ make mo Diudia nane paeyao make kutupa Diendaili wanda꞉hali pa꞉ta꞉ make iki paeyaoma꞉ Koda꞉ pa꞉ta꞉ la꞉ka꞉lolo hata꞉ hone ma꞉nda꞉ la꞉ka꞉la witolo epeke haumanu pina꞉yeke pi waloendi pu haowa꞉me.  
\v 21 Koto ekina꞉ta꞉ mo Diu haliwekima꞉ mo tembolo da pa꞉ta꞉ I̱ da꞉ka꞉pa꞉ mina luekema꞉ taapemepate  
\v 22 Koda꞉ma꞉ I̱ pa tamba꞉ mina꞉la꞉eki mu hata꞉ ame make do pa꞉ta꞉ hata꞉ hali tieke pa꞉ta꞉manu make hosiki halisunu pa꞉ta꞉ make la hala꞉tiki pitolome. Hande Mosesima꞉ make mo potopede haliwekima꞉ make pulu pa꞉la꞉ ekimanu lemeke tupa꞉ I̱ma꞉ make do la halo halome.  
\v 23 Dupa. Ketisota꞉ titina꞉ amba꞉la tanda pa꞉la꞉eki meaata꞉ kutupa titina꞉ homa paa tiaalo pa꞉la꞉ hali hata꞉ mo Diu wanda꞉hali pa꞉ta꞉ make mo Diendaili wanda꞉hali pa꞉ta꞉ make pa̱a̱ pita꞉la꞉eki wala꞉tiki pilieke leleme pi kone I̱ma꞉ make alome leekeme.   
\p
\v 24 Kutupa Poloma꞉ koto pi alo haena꞉ Pesitasima꞉ pi anekema꞉ alota꞉ Polo neketa꞉ keaase lea꞉me. Nakana꞉ma꞉ hau paeyao pitele ekima꞉ neke koto mea keaasa꞉ handa꞉e lea꞉pate  
\v 25 Poloma꞉ alota꞉ Hali keilekeo. I̱ta꞉ siaka꞉hali dia꞉me. I̱ma꞉ta꞉ ota꞉ pi alome.  
\v 26 Kini hali Akatipama꞉ do haumanu handeleke handa ipiki pa꞉ta꞉ pa pi alo hata꞉ yaka honema꞉ta꞉ koto hau paeyao handa꞉la꞉me. Pa ekipeke mo hau manuta꞉ a꞉mbao na piki peneme yao pia꞉ ekina꞉ loa꞉me.  
\v 27 Kini hali Akatipao. Hande potopede haliwekima꞉ wape pelemeeki manuta꞉ opitele laa naka꞉ opua pitele hauta꞉ handolome laa leekeme.  
\v 28 Kutupa Akatipama꞉ Polo pa꞉ta꞉ alota꞉ Naka꞉ honema꞉ta꞉ I̱ta꞉ paa koto kone Ketiso hali hanoyeke alepe laa leekeme.  
\v 29 Koto leeke Poloma꞉ alota꞉ Ame dope o wetepena꞉pe o Koda꞉ pa꞉ta꞉ ya hone pa꞉la꞉ ekita꞉ neke make do pita yapa꞉la꞉ wanda꞉hali paeyao make do I̱ma꞉ walolo pi opuata꞉ I̱ tupa꞉ hamina꞉yeke loa꞉pate pa do seni pu manuma꞉ I̱ tonkao halo tupa꞉ na loa꞉me lea꞉me.   
\p
\v 30 Kutupa mo hande kini hali tiaota꞉ mo kapomani you hali make Benisi make mo iki ame̱le̱ pitimiki wanda꞉hali make tiao mina꞉pa꞉lao puaata꞉  
\v 31 ika꞉ kone pi la alu alu pitolo alota꞉ Do halita꞉ dipula pitina꞉ homaapeketa꞉ ana꞉ na pa꞉la꞉me. Eki a꞉nda꞉ na pia꞉me laa lemekeme.  
\v 32 Kutupa Akatipama꞉ Pesitasi pa꞉ta꞉ alota꞉ Do halima꞉ta꞉ Sisa pa꞉ta꞉ wi na lea꞉ka꞉na꞉ yoluta꞉ da nane pa pua꞉peke yolo pia꞉me laa leekeme.   
\c 27  
\s1 Polota꞉ palai kawasona꞉ pita Loma꞉ nane peekeeki  
\p
\v 1 Kutupa Ideli nane palai kawaso tiekena꞉ pomana꞉e laa hone wimiki pita꞉ Polo mandane dipula haliweki ame̱le̱ ami opisa hali homeke Diuliusi pa꞉ta꞉ halaaka꞉na꞉ ipikana꞉ma꞉ta꞉ Okasitani tapake hali hata꞉ handeteke haena꞉yeke pimime.  
\v 2 Kutupa A꞉datamitiomo da nane hao epeeke palai kawaso Eisia damanu pa꞉ta꞉ poluekema꞉ haena꞉ mo hande Ma꞉sedonia nane Desalonaika hali A꞉tisakusi ame̱le̱ mo kawasona꞉ pua pita poma꞉me.  
\v 3 Da kelepeeke handa mo Saidoni da opolo poma꞉me. Kutupa Diuliusima꞉ Polo pa꞉ta꞉ a꞉ta꞉ma꞉ homolo hata꞉ ipika꞉ yankeke titima꞉ handeteke haena꞉yeke handolo pena꞉ lea꞉me.  
\v 4 Kutupa koto pa꞉ta꞉ mina꞉pa꞉lao dawala tukiki pa꞉ta꞉ pua po tilipumanu wenoko nanema꞉ epeeke handa mo Saipotasi nanema꞉ oto pa꞉ta꞉ yapoma꞉me.  
\v 5 Kutupa mo Silisia Pa꞉mbilia kenke yaapo nane dawalana꞉ tunkula puata꞉ mo Laisia nanema꞉ hala꞉ da Maita da pa꞉ta꞉ opolo poma꞉me.  
\v 6 Koto da pa꞉ta꞉ mo opisa halima꞉ palai kawaso homeke A꞉lekesa꞉ndia da nane hao Ideli nane poluekema꞉ haena꞉ handa꞉ wiaata꞉ niki koto palai kawasona꞉ pitaeya꞉me.   
\p
\v 7 Nate mandaneeki manuna꞉ta꞉ yopusiki pua꞉tiki pea ka꞉nda꞉ taapuna꞉ mo Sinaidasi da pa꞉ta꞉ opolo poma꞉me. Kutupa mo po tilipu nika꞉ wenoko nanema꞉ ipulu hata꞉ sa꞉sa꞉ pieke handa mo Kotiti hoki oto pa꞉ta꞉ mo Sa꞉lomono da teke pa꞉ta꞉ poma꞉me.  
\v 8 Kutupa mo dawala tea꞉ nane ka꞉nda꞉ taapuna꞉ pulu hata꞉ mo hande Lasea teke pa꞉ta꞉ hala꞉ da Pe Heipeni da pa꞉ta꞉ opolo poma꞉me.   
\p
\v 9 Natelekemanu amba꞉ paeyeke handa mo hande Diu wanda꞉halima꞉ nemanu na neke pa hao haemeke nate make paeyeke handa niki ekia꞉nda꞉ peaama꞉na꞉ laa da pua꞉peke na yea꞉me. Poloma꞉ pi alo alota꞉  
\v 10 Haliwekio. Ya hone witolo ekita꞉ doe lea꞉me. Ame do dina꞉ poma꞉ka꞉na꞉ta꞉ hoeyapeke ya꞉la꞉me lea꞉me. Do palai kawaso ala꞉ta꞉ ala꞉ta꞉ homeke na loa꞉me. Haliweki make alupea꞉peke ya꞉la꞉me lea꞉me.  
\v 11 Koto leekepate mo opisa halima꞉ Poloma꞉ lea꞉ pi na opiki mo palai kawaso teke halina꞉ pi pita꞉ mo teke handeteke hayeke hali yaapona꞉ pi homeke opia꞉me.  
\v 12 Kutupa koto pa꞉ta꞉ kosa꞉ ki epea꞉ka꞉na꞉ hapeke na ya꞉la꞉me laa haliweki paeyaoma꞉ alota꞉ Dawala tukiki pa꞉ta꞉ pua mo Kotiti nane sisima u hayeke alena꞉ Pinikisi da pa꞉ta꞉ opolo poluma꞉pe mata꞉la꞉me laa lememe. Koto pa꞉ta꞉ hamono kosa꞉ ki epea꞉ka꞉na꞉ta꞉ ana꞉ pilieke laa lememe.   
\s1 Mo dawalana꞉ po tilipu epeekeeki  
\p
\v 13 Kutupa po hosiki ipulu haena꞉ Ameta꞉ pua꞉peke ya꞉la꞉me hone wia mo a꞉nka yola꞉ mea a꞉meiyao mo Kotiti nepoko nanema꞉ poma꞉me.  
\v 14 Poma꞉pate po tieke kenke nanema꞉ epeeketa꞉  
\v 15 ota꞉ ambulaeyeke handa mo hande kawasota꞉ wenoko nanema꞉ pua꞉peke na yalo hata꞉ la꞉ka꞉la niki tu mea baeya꞉me.  
\v 16 Kutupa puoopu hao mo Kouda hosiki nepoko nanema꞉ puata꞉ ka꞉nda꞉ma꞉ homolo hata꞉ kone mo kawasosiki mea kawaso tieke manda  
\v 17 mea a꞉meiyao mo palai kawaso tieke setepe pea mea tonkaluekema꞉ pimime. Kutupa mo Setisi kenke nane puaama꞉na꞉ palaimanu leisi mea wiaata꞉ pa poma꞉ tina꞉ lememe.  
\v 18 Kutupa mo kawaso tieketa꞉ lekeleke wotu leeke handa da kelepeeketa꞉ kako ala꞉ta꞉ ala꞉ta꞉ ikali pa꞉ta꞉ mu ba ba pimime.  
\v 19 Da ma꞉nda꞉ kelepeeketa꞉ ika꞉ kikima꞉ kone mo hande palaimanu make mo palai endu haya꞉ pumanu make mea baememe.  
\v 20 Kutupa mo hande nate hombulanka꞉manu hoto elekeeleke na teeke handa po tieke paa ipulu haena꞉ nikana꞉ma꞉ta꞉ nikita꞉ da꞉ta꞉peke na ya꞉la꞉me laa hone uma꞉me.   
\p
\v 21 Kutupa nate paeyao ne na nemeke handa Poloma꞉ta꞉ tiao iki pa꞉ta꞉ pua alota꞉ Haliwekio. I̱ma꞉ hande loa꞉ pi opua꞉pa꞉peke aleo. Kotiti nane na mina꞉pa꞉laemeka꞉na꞉ yoluta꞉ do ala꞉ta꞉ ala꞉ta꞉ la꞉tieke na hao weleke we puma꞉ ekita꞉ na pulu puma꞉me lea꞉me.  
\v 22 I̱ma꞉ta꞉ iki pa꞉ta꞉ do alome. Honkopu hape lea꞉me. Hali ma꞉nda꞉ ota꞉ homeke hauta꞉ na pilieke. Do kawaso homeke hoelieke lea꞉me.  
\v 23 Ame do timba kone ya panda꞉puniao hata꞉ ta꞉ma꞉ni pea halo Koda꞉na꞉ enisolo homeke I̱ teke pa꞉ta꞉ a꞉pa hata꞉ alota꞉  
\v 24 Poloo ota꞉ paala꞉ma꞉ na homa꞉peke. Neketa꞉ Sisa teke pa꞉ta꞉ pua halipikie lea꞉me lea꞉me. Kutupa opie. Koda꞉ma꞉ neke ame̱le̱ pulimi haliweki paeyao pa kilieke lea꞉me.  
\v 25 Koto ekina꞉ haliwekio. Honkopu hape. I̱ma꞉ta꞉ Koda꞉na꞉ pi miniki hata꞉ hande I̱ pa꞉ta꞉ lea꞉ haumanu ota꞉ pilieke hone ulume lea꞉me.  
\v 26 Kutu piliepate nikita꞉ hoki ma꞉nda꞉ nane pua talumeke lea꞉me.   
\p
\v 27 Natemanu 14 paeyeketa꞉ mo po tilipu ipulu haena꞉ timbata꞉ mo Meditoteiniani dawala ikali tukiki pa꞉ta꞉ pulu hamono buta꞉hokina꞉ mo palai kawaso handeteke haeme haliwekima꞉ Ameta꞉ kenke teke pa꞉ta꞉ puluma꞉me hone wimikime.  
\v 28 Koto ekina꞉ pu mea lopa꞉niao 20 pa꞉domi yata꞉pa handaata꞉ hosiki mo pateleke pua paa mea lopa꞉niao 15 pa꞉domi yata꞉pa handemekeme.  
\v 29 Kutupa mo toopi pa꞉ta꞉ puaama꞉na꞉ mo palai kawaso hoki nane a꞉nka tonkopu mea lopaota꞉ da kelepena꞉yeke yeni pimikime.  
\v 30 Mo palai kawaso handeteke haeme haliwekita꞉ mo palai kawaso mina꞉pa꞉lao pindipa poluekema꞉ mo hande kawasosiki mea ikali manda lopanialuekema꞉ pimime. Mo palai kawaso mineke nane pa꞉ta꞉ a꞉nka mandane ekimanu mea lopaaluekema꞉ makeaaso hata꞉ pimipate  
\v 31 Poloma꞉ mo opisa hali ipika꞉ ami haliweki tonka꞉na꞉ iki pa꞉ta꞉ alota꞉ Do palai kawaso handeteke haleme haliweki do pa꞉ta꞉ na pitimika꞉na꞉ta꞉ da꞉ta꞉peke na ya꞉la꞉me lea꞉me.  
\v 32 Koto lea꞉ ekina꞉ mo ami haliwekima꞉ hande konau pumanu tunkula hande kawasosiki paa lopena꞉ lememe.   
\p
\v 33 Da ka꞉la꞉puluekema꞉ haena꞉ Poloma꞉ paeyaoma꞉ nesiki nena꞉yeke honke wotu alo alota꞉ Ikana꞉ma꞉ nesiki na neke hone elekeeleke witolo hamina꞉ nate 14 paeya꞉me lea꞉me.  
\v 34 Koto ekina꞉ I̱ma꞉ do honke alo pita꞉ Ne nape pi ta alo handa꞉pe lea꞉me. Honkopu hamena꞉ nape lea꞉me. Hali ma꞉nda꞉ta꞉ ipika꞉ itiki homeke kone na alupilieke lea꞉me.  
\v 35 Koto laaka꞉na꞉ Poloma꞉ palaowa mea haliweki paeyao ame̱le̱ hata꞉ Koda꞉ pa꞉ta꞉ keiyae pi laata꞉ mo palaowa pindipa nea꞉me.  
\v 36 Kutupa paeyaoma꞉ ta꞉na꞉ma꞉ homa ika꞉ kone ne nememe.  
\v 37 Mo hande kawaso tiekena꞉ 276 haliweki pituma꞉me.  
\v 38 Kutupa ne ana꞉na꞉ naaka꞉na꞉ mo kawaso yapa꞉ pu liaena꞉yeke mo widi palaowana꞉ kiliki pusemanu dawala tukiki pa꞉ta꞉ mea lopaememe.   
\s1 Mo hande palai kawaso yamba꞉la꞉ alu alu piekeeki  
\p
\v 39 Kutupa da kelepea꞉ pita꞉ta꞉ kenke handaata꞉ Hando pa꞉ta꞉pe lemepate ankolo pu wiekeeki homeke handaata꞉ Do kawasota꞉ koto pa꞉ta꞉ talamana꞉e lememe.  
\v 40 Koto ekina꞉ mo hande a꞉nka pumanu ka꞉la꞉pa lopa꞉niao oni dawala tukiki pa꞉ta꞉ ulu pena꞉ laata꞉ mo kawaso la꞉ka꞉lao haya꞉ alemanu tonkaeya꞉ pumanu make ka꞉la꞉paata꞉ mo kawaso mineke nane palai homeke mea endiao poma꞉ titolo haena꞉ mo kenke pa꞉ta꞉ a̱i̱ pena꞉yeke pimime.  
\v 41 Kutu pimipate mo kawasota꞉ ikali hou pa꞉ta꞉ ta̱la̱ haena꞉ mo kawaso mineke nane ota꞉ panka꞉ pelia hata꞉ taka꞉la꞉pa pulu haena꞉ hande mendeke naneta꞉ mo dawala ikali homa꞉ a꞉pa mea lonke lonke laaso hata꞉ hande kawaso mendeke nane yamba꞉latiki pia꞉me.  
\v 42 Kutupa mo ami haliwekima꞉ mo dipula haliweki paeyao ikali pa꞉ta꞉ kiki moka꞉la pindipa puaama꞉na꞉ lumana꞉e hone wimikipate  
\v 43 pa ika꞉ opisa halima꞉ Polo tamba꞉ muluekema꞉ mo haliweki hone wimieki tunkula sa꞉sa꞉ pia꞉me. Ipikana꞉ma꞉ pi la alota꞉ Kiki moka꞉lapeke ya꞉la꞉ haliweki amba꞉la dawala pa꞉ta꞉ ponkaniao kenke nane pua꞉pa꞉peke lea꞉me.  
\v 44 Kutupa mandane haliwekita꞉ tisunu make kawaso yamba꞉la꞉la꞉eki sasakesunu make mea mina pua꞉pa꞉peke lea꞉me. Koto ekina꞉ niki paeyaota꞉ mo kenke nane pua ana꞉na꞉ opolo poma꞉me.   
\c 28  
\s1 Molota pa꞉ta꞉ hayekeeki  
\p
\v 1 Kutupa kenke nane epeke opolo pua hata꞉ koto hokina꞉ bikita꞉ Molota lemeeki opuma꞉me.  
\v 2 Koto pa꞉ta꞉ haeme haliwekima꞉ niki petololo hata꞉ ti kita kiki kimime. Lako ipulu hata꞉ kosa꞉ pieke handa pimime.  
\v 3 Poloma꞉ tisunu mu tonko pea tina꞉ wia꞉pate titipu pieke handa hoke ketoma꞉ a꞉pa ipika꞉ kikina꞉ hapulia꞉me.  
\v 4 Mo da haliwekima꞉ hande keto ipika꞉ kikina꞉ hapulia꞉eki handaata꞉ ika꞉ kone ane mone pitolo hata꞉ alota꞉ Do halima꞉ta꞉ ketete pea hali ma꞉nda꞉ litolo pa꞉la꞉me lememe. Dawala pa꞉ta꞉ na homea꞉pate pa ipika꞉ ketetena꞉ homilieke lememe.  
\v 5 Koto lemepate Poloma꞉ ipika꞉ kiki tande tande laa mo keto ti pa꞉ta꞉ lopaeya꞉me. Kutupa ipika꞉ lokena꞉ ekia꞉nda꞉ na pia꞉me.  
\v 6 Mo haliwekima꞉ Polo pombei yao tako pea lopena꞉ patema꞉ handoma꞉ handoma꞉ pimipate ekia꞉nda꞉ na pieke handa ika꞉ hone la꞉ka꞉la alota꞉ Do halita꞉ koda꞉ ma꞉nda꞉ ya꞉ka꞉ta꞉me lememe.   
\p
\v 7 Koto alena꞉ tekepa꞉ta꞉ mo hokina꞉ haeme wanda꞉halina꞉ hamoko tumiki hali Pubiliusita꞉ ipika꞉ emanu pokea꞉me. Ipikana꞉ma꞉ niki handa꞉ mea nate tepona꞉ ipika꞉ da pa꞉ta꞉ niki handeteke haya꞉me.  
\v 8 Ipika꞉ ateketa꞉ ki yeni tiputu hatu yamaasa꞉ yeni make hao homa꞉pa wia꞉me. Kutupa Poloma꞉ ipika꞉ da panda꞉ pa꞉ta꞉ pua Koda꞉ pa꞉ta꞉ yeni pea ipika꞉ kiki yaapo mo halina꞉ lokena꞉ wia yeni tandelaeya꞉me.  
\v 9 Kutu pieke handa mo hokina꞉ yeni haeme wanda꞉hali paeyao epemepate ika꞉ yeni make tandelena꞉ lea꞉me.  
\v 10 Niki pa꞉ta꞉ ala꞉ta꞉ ala꞉ta꞉ wopu kiaata꞉ kutupa palai kawaso ma꞉nda꞉na꞉ paa poluekema꞉ hamono nika꞉ mea pua꞉peke yea꞉ alemanu kimime.   
\s1 Mo Molota hao Loma꞉ nane pemekeeki  
\p
\v 11 Sumba꞉ tepo yapeeke handa mo A꞉lekesa꞉ndia da hao epea꞉ palai kawaso homekena꞉ poma꞉me. Mo kawaso bikita꞉ Temoko Manda꞉e. Mo kosa꞉ dina꞉ta꞉ hande hoki pa꞉ta꞉ hando haya꞉me.  
\v 12 Kutupa pua mo Sitakusi daoni pa꞉ta꞉ opolo pua nate tepo koto pa꞉ta꞉ haowa꞉me.  
\v 13 Koto pa꞉ta꞉ mina꞉pa꞉lao puoopu hao mo Lidiumi daoni pa꞉ta꞉ opolo poma꞉me. Da kelepea꞉ pita꞉ta꞉ mo dawala nane po ipulu haena꞉yeke nate yaapo puata꞉ mo Puteoli daoni pa꞉ta꞉ opolo poma꞉me.  
\v 14 Koto pa꞉ta꞉ mandane Ketiso tapake wanda꞉hali handa꞉ uma꞉pate pula homekena꞉ niki ame̱le̱ hamana꞉e laa honke lememe. Koto ekina꞉ puata꞉ Loma꞉ da pa꞉ta꞉ opolo poma꞉me.  
\v 15 Kutupa mo Loma꞉ Ketiso kame titima꞉ niki ipuluma꞉me pi opuata꞉ mo Apiusina꞉ makedi pa꞉ta꞉ make mo Kimisu Hali Polu Hala꞉ Da Tepo pa꞉ta꞉ make niki manda꞉hande pulu epememe. Kutupa Poloma꞉ iki handaata꞉ Koda꞉ pa꞉ta꞉ keiyae pi laata꞉ honkopu haya꞉me.   
\s1 Loma꞉ pa꞉ta꞉ hayekeeki  
\p
\v 16 Kutupa mo Loma꞉ daoni pa꞉ta꞉ opolo poma꞉pate pa Polota꞉ ipika꞉ kone honumake haena꞉ mo ami hali homekema꞉ ipiki handeteke haena꞉ lememe.  
\v 17 Kutupa nate tepo paeyeketa꞉ Poloma꞉ koto pa꞉ta꞉ haeme tondiki Diu haliweki wi la꞉ mepi peaata꞉ kutupa momba꞉la haena꞉ ipikana꞉ma꞉ alota꞉ Kametitio. I̱ma꞉ta꞉ nika꞉ wanda꞉hali pa꞉ta꞉ make nika꞉ apa꞉mei manuna꞉ peleme ekimanu pa꞉ta꞉ make ekia꞉nda꞉ na pua꞉pate mo Diutuseleme haliwekima꞉ I̱ meaata꞉ Loma꞉ haliweki pa꞉ta꞉ halememe.  
\v 18 Kutupa ya hau weiya lota꞉ pimipate I̱ homaalo pia꞉ hau ma꞉nda꞉ na handa꞉ u haota꞉ I̱ta꞉ da tapaaluekema꞉ hone wimime.  
\v 19 Kutu pimipate mo Diu haliwekima꞉ Na tapaapeke lemeke handa yaka wanda꞉hali pa꞉ta꞉ samani puluekema꞉ hone na ua꞉pate Sisa pa꞉ta꞉ kone wi loluekema꞉ pua꞉me.  
\v 20 Koto ekina꞉ I̱ma꞉ iki wi la handolo pi loluekema꞉ loa꞉me. Isulai wanda꞉halima꞉ hone wilimi ekina꞉ do seni puma꞉ I̱ tonkaeya꞉me lea꞉me.  
\v 21 Kutupa ikana꞉ma꞉ ipiki pa꞉ta꞉ alota꞉ Diudia nanema꞉ neke pa꞉ta꞉ wape pea ipula꞉ pasemanu na muma꞉me. Kutupa do ane epea꞉ kame homekema꞉ pi ma꞉nda꞉ hoke pi make neke pa꞉ta꞉ na la꞉la꞉me lememe.  
\v 22 Kutu pa꞉la꞉pate mo kenke paeyao nane do hande tapake pa꞉ta꞉ la la pu halemeeki opoloma꞉me. Koto ekina꞉ naka꞉ hone witele ekimanu opuluekema꞉ hone pa꞉la꞉me lememe.   
\p
\v 23 Kutupa nate wiata꞉ ipika꞉ haya꞉ da pa꞉ta꞉ haliweki wopu pua mombelememe. Kutupa Poloma꞉ mo haliweki pa꞉ta꞉ mo hande Koda꞉na꞉ Kilu Tombuao Hala꞉ pimanu walo haya꞉eki da ka꞉la꞉paaso la pua timba꞉ laeya꞉me. Yesuna꞉ pi opua mina꞉yeke ipikana꞉ma꞉ hande Mosesina꞉ wape pa꞉la꞉ Lo Pimanu make mo potopede haliwekina꞉ wape pelemeeki pa꞉ta꞉ make laa walea꞉me.  
\v 24 Mandane haliwekima꞉ ipikana꞉ma꞉ lea꞉ pi opimipate mandaneeki manuma꞉ na opimime.  
\v 25 Koto ekina꞉ ika꞉ kone hone ta꞉ta꞉ ta꞉ta꞉ wia pi ta꞉ta꞉ ta꞉ta꞉ alo hata꞉ poluekema꞉ haena꞉ Poloma꞉ pi homeke ma꞉nda꞉ dupa lea꞉me. Mo Holi Sipitidima꞉ hande potopede hali Aisaya pa꞉ta꞉ la halolo hata꞉ ika꞉ atekemanu pa꞉ta꞉ do leeke pita꞉ ota꞉ alo pia꞉me.  
\v 26 Ipikana꞉ma꞉ leeke ekita꞉ dupa  
\q1 Ikana꞉ma꞉ opitolo opitolo halo pelemepate ika꞉ hone pa꞉ta꞉ na wilimikie.  
\q1 Kutaa make handolo handolo halo pelemepate ika꞉ honema꞉ta꞉ na handilimikie.   
\q1
\v 27 Pa ekipeke. Do wanda꞉halina꞉ hone manuta꞉ timba꞉ lo make ika꞉ katakemanu poko make ika꞉ lekemanu handupu pa꞉la꞉me.  
\q1 Koda꞉ma꞉ alota꞉  
\q1 Kutu piki haumanu na pia꞉ka꞉na꞉ yoluta꞉ ika꞉ lekema꞉ epeke hando make ika꞉ katakema꞉ epeke opu make ika꞉ honema꞉ epeke hone wia hata꞉ ikana꞉ma꞉ I̱ pa꞉ta꞉ la꞉ka꞉la epolo pimika꞉na꞉ yoluta꞉ kota꞉ I̱ma꞉ iki wamo pulu pua꞉me laa la꞉la꞉me leekeme lea꞉me.   
\b  
\p
\v 28 Kutupa Poloma꞉ lo paeyaaso hata꞉ alota꞉ Hone wia꞉pa꞉peke. Koda꞉ma꞉ ipika꞉ da꞉taasa꞉ pita꞉ mo Diendaili wanda꞉hali pa꞉ta꞉ tapaasa꞉ma꞉ opilimikie laa lea꞉me.  
\v 29 [Koto pi lea꞉ ekita꞉ mo Diu haliwekima꞉ mina꞉pa꞉lao pulu hata꞉ pi la alu alu pulu pimime.]   
\p
\v 30 Kutupa koto pa꞉ta꞉ bapi yaapo Poloma꞉ ipika꞉ hambo haya꞉ da pa꞉ta꞉ta꞉ hao hata꞉ ipiki handolo epemeke wanda꞉hali paeyao handa꞉ meaata꞉  
\v 31 ma꞉nda꞉ma꞉ sa꞉sa꞉ na pitolo haena꞉ ipikana꞉ma꞉ honkopu haaso hata꞉ Koda꞉na꞉ Kilu Tombuao Hala꞉ ekina꞉ make mo Tekehali Yesu Ketisona꞉eki make pi wala꞉tiki pu hayekeme.