\id 2TI - Sembeleke Samberigi PNG 2Timothy 01 13/2/91 Macnaughtan \h 2 TIMODI \toc1 Poloma꞉ Timodi pa꞉ta꞉ yaapo peao wape pea tapaeyekeeki \toc2 2 Timodi \toc3 2 Timodi \mt1 Poloma꞉ Timodi pa꞉ta꞉ yaapo peao wape pea tapaeyekeeki \c 1 \p \v 1 Polo I̱ta꞉ mo Ketiso Yesuna꞉ aposolo hali halome. Koda꞉ma꞉ la꞉ wieke deto hala꞉eki Ketiso Yesu pa꞉ta꞉ yama꞉ nikana꞉ma꞉ moloma꞉ ekina꞉ pi walono yeke Koda꞉ma꞉ I̱ ma̱leke lia tapaala꞉me. \p \v 2 Do wapeta꞉ ya pukipiki weki Timodi neke pa꞉ta꞉ wape pitolome. Mo Apa꞉ Koda꞉ pita꞉ Ketiso Yesu nika꞉ Tekehali ipilikana꞉ma꞉ mo tamba꞉ mina꞉la꞉eki make a꞉ta꞉ma꞉ homa꞉la꞉eki make puki lopaasa꞉eki make neke pa꞉ta꞉ kina꞉e. \s1 Keiyae pi pita꞉ hone u tiaasa꞉ pi yaapo \p \v 3 Ya apa꞉na꞉ atekena꞉ atekema꞉ Koda꞉ pa꞉ta꞉ hone tulao hao haemeke tupa꞉ I̱ make ya hone tekema꞉ ala꞉ta꞉ ma꞉nda꞉ na ta̱le̱na꞉ leke koto tupa꞉ kone hone tulao halome. I̱ma꞉ timba make natena꞉ make neke hone na yonka꞉lake Koda꞉ pa꞉ta꞉ yeni pitolo keiyae pi lo halome. \v 4 Mo naka꞉ leke pa꞉ta꞉ e̱ pankeke lopo haya꞉eki handoa꞉eki niminaaso hata꞉ neke handuluekema꞉ I̱ma꞉ ta꞉na꞉ pa꞉la꞉me. Kutu pua꞉ka꞉na꞉ta꞉ I̱ma꞉ ta꞉na꞉ tiekema꞉ homulueke. \v 5 Mo naka꞉ ota꞉ hone tulale ekita꞉ I̱ma꞉ niminao halome. Naka꞉ aeya꞉ Loisi pita꞉ naka꞉ ama꞉ Yunisi yaapoma꞉ make do mandake hone tulaepe ekita꞉ ya honema꞉ta꞉ neke pa꞉ta꞉ make taa ula꞉me. \v 6 Koto hone ua꞉eki tekena꞉ta꞉ I̱ma꞉ naka꞉ youna꞉ ya kiki ua꞉ pa꞉ta꞉ yama꞉ Koda꞉ma꞉ neke pa꞉ta꞉ pa hameke ka꞉la꞉ hauta꞉ alupaama꞉na꞉ halima꞉ ti honiaama꞉na꞉ po lo hala꞉ tupa꞉ kone do hauta꞉ pa mea tiaaso tiaaso halena꞉ hone u tiaasome. \v 7 Pa ekipeke. Mo Koda꞉ma꞉ ka꞉la꞉ Sipitidima꞉ta꞉ niki yala꞉ yala꞉ na peaasa꞉me. Kotoeki na pikita꞉ ipika꞉ Sipitidima꞉ mo wele pita꞉la꞉eki make pukima꞉ homa꞉la꞉eki make hone lu tumbaasa꞉eki make niki ana꞉na꞉ ku hala꞉me. \p \v 8 Mo nika꞉ Tekehalina꞉ pi walawasa꞉ ekina꞉ta꞉ nakana꞉ma꞉ yaala꞉ma꞉ na homa꞉peke. Kutaa make I̱ mo Ketisona꞉ e pokawa꞉ ekina꞉ dipula mea pitaalemeke pilu ekina꞉ neke yaala꞉ma꞉ na homa꞉peke. Kotoeki na pikita꞉ mo Koda꞉ma꞉ ka꞉la꞉ wele tapu hata꞉ mo Pi Seliapo wala꞉la꞉ ekina꞉ ka꞉nda꞉ta꞉ I̱ yaapo mandake mea tia hapana꞉e. \v 9 Nikita꞉ ipika꞉ wanda꞉hali hamono yeke Koda꞉ma꞉ pa꞉ta꞉la꞉ mea wi la꞉la꞉me. Koto hau pieke ekina꞉ teketa꞉ nikana꞉ma꞉ epeke hau puma꞉ ekina꞉ dia꞉pate pa ipikana꞉ma꞉ a꞉ta꞉ma꞉ homolo hata꞉ ipika꞉ hone pieke ekima꞉ kone niki wi la꞉la꞉me. Koda꞉ma꞉ do kenke a̱i̱ na wepia wina꞉ leeke pita꞉ma꞉ta꞉ do a꞉ta꞉ma꞉ homa꞉la꞉ hauta꞉ niki miomono yeke Ketiso Yesu pa꞉ta꞉ yama꞉ wina꞉ leekeme. \v 10 Pate ameta꞉ mo nika꞉ da꞉taasa꞉ hali Ketiso Yesu ipika꞉ a꞉pa꞉la꞉eki pa꞉ta꞉ yama꞉ peneme yaala꞉me. Mo homa꞉la꞉ ekina꞉ wele ipikana꞉ma꞉ paeyaaso hata꞉ mo Koda꞉na꞉ Pi Seliapo pa꞉ta꞉ yama꞉ deto hala꞉eki peneme yaala꞉me. \p \v 11 Koto Pi Seliapona꞉ la hala꞉la꞉ hali make aposolo hali hata꞉ moka꞉la꞉ tiaaso hali hano yeke Koda꞉ma꞉ I̱ ma̱leke lia꞉me. \v 12 Kota꞉ I̱ma꞉ koto haumanu pua꞉ ekina꞉ ame do ka꞉nda꞉manu minolopate pa I̱ma꞉ yaala꞉ma꞉ na homolome. Pa ekipeke. Mo I̱ma꞉ ya hone ti lalo halita꞉ ota꞉ hone ulume. Ya honema꞉ta꞉ mo ipikana꞉ma꞉ I̱ ka꞉la꞉ haumanu ipikana꞉ma꞉ mo hande ipika꞉ Nate tieke epena꞉yeke ana꞉na꞉ handeteke hao hapeke ya꞉la꞉me. \p \v 13 Nakana꞉ma꞉ pi epeke tupa꞉ waluekema꞉ta꞉ I̱ma꞉ neke pa꞉ta꞉ waloa꞉ pi kone hone wia wala꞉tiki pu hapeke. Kutu pitolo hata꞉ta꞉ mo Ketiso Yesu pa꞉ta꞉ hone tulao pukima꞉ homolo hata꞉ pea꞉peke. \v 14 Mo neke pa꞉ta꞉ ka꞉la꞉ epeke epeke hau manuta꞉ ota꞉ wopu handeteke ke haluekema꞉ kota꞉ nakana꞉ma꞉ mo nika꞉ puki pa꞉ta꞉ pila꞉ Holi Sipitidina꞉ wele peaasa꞉ ekina꞉ welema꞉ wopu handeteke hapeke. \p \v 15 Mo Eisia potopinisi haleme wanda꞉hali paeyao make mo hande Paidia꞉lisi pita꞉ Hemodionisi koto hali yaapo tonka꞉na꞉ I̱ mina꞉pa꞉lao peleme ekita꞉ neke hone wotu witeleme. \v 16 Mo hande hali Onesipotasima꞉ hoto paeyao I̱ ta꞉na꞉ma꞉ homa꞉ tiao hayeke handaa I̱ma꞉ mo Tekehalima꞉ ipika꞉ wekiwanda꞉ pa꞉ta꞉ a꞉ta꞉ma꞉ homena꞉ honke alome. Pa ekipeke. I̱ do dipula pilu ekina꞉ ipikana꞉ma꞉ yaala꞉ma꞉ na homea꞉me. \v 17 Kotoeki na pia꞉pate ipikana꞉ma꞉ Loma꞉ da opolo a꞉paata꞉ koto kone I̱ weitia pomu haota꞉ handa꞉ wia꞉me. \v 18 Mo hande Nate tieke opolo epea꞉ka꞉na꞉ta꞉ Koda꞉ ipika꞉ a꞉ta꞉ma꞉ homa꞉la꞉eki koto some pa꞉ta꞉ halena꞉e. Mo hande Epesese nane haoma꞉ toma꞉na꞉ Onesipotasima꞉ tamba꞉ mu hata꞉ pia꞉ hau paeyaota꞉ nakana꞉ma꞉ ota꞉ handeleme. \c 2 \s1 Ketiso Yesuna꞉ kakena꞉ homa hala꞉ a꞉ndeli miniki hali \p \v 1 Ya weki neke pa꞉ta꞉ dupa alome. Mo Koda꞉na꞉ a꞉ta꞉ma꞉ homa꞉la꞉ ekita꞉ mo nika꞉ Ketiso Yesu ame̱le̱ ta꞉ma꞉ni pitolo hata꞉ minoloma꞉me. Koto a꞉ta꞉ma꞉ homa꞉la꞉eki nakana꞉ma꞉ minele ekina꞉ta꞉ honkopu hao hapeke. \v 2 I̱ma꞉ wanda꞉hali eleke elekena꞉ leke popelekena꞉ waloeke opi mana꞉ pi manuta꞉ kota꞉ nakana꞉ma꞉ meaata꞉ mo hone epeke tupa꞉ u paleke hata꞉ mandane da wanda꞉hali ana꞉na꞉ wala꞉peke ya꞉la꞉ wanda꞉halita꞉ nakana꞉ma꞉ moka꞉la hale hale pea꞉peke. \p \v 3 Ketiso Yesuna꞉ epeke a꞉nda꞉ peaasa꞉ hali hata꞉ mo ipika꞉ wanda꞉halina꞉ ka꞉nda꞉ma꞉ homa꞉la꞉ ekina꞉ ka꞉nda꞉ mandaneeki nakana꞉ma꞉ mea꞉peke. \v 4 Ami hali homekema꞉ ami hali hata꞉ta꞉ ipika꞉ you halina꞉ kakena꞉ homu haluekema꞉ pa mo da wanda꞉halina꞉ pu haleme haumanu tonka꞉na꞉ apa꞉tao na pilieke. \v 5 Kutupa make mo telepo tiekemanu lo hala꞉ halima꞉ta꞉ mo telepona꞉ pi ula꞉ ekimanu na tolu haya꞉ka꞉na꞉ta꞉ kota꞉ tombo watao yenki mia꞉peke na ya꞉la꞉me. \v 6 E handeteke hala꞉ halima꞉ ipika꞉ e tieke wopu poko hala꞉ ekina꞉ta꞉ mo ena꞉ ne tanu ekita꞉ ipika꞉ amba꞉la milieke. \v 7 I̱ma꞉ alo pita꞉ hone wopu wia꞉peke. Koto pi hone uelena꞉ta꞉ Tekehalima꞉ neke tamba꞉ milieke. \p \v 8 Nakana꞉ma꞉ mo hande homa paa tiaeyeke yeke Deipidina꞉ tapake hali Yesu Ketiso hone u hapeke. I̱ma꞉ mo Pi Seliapo waloa꞉ka꞉na꞉ta꞉ kota꞉ koto pi kone walo halome. \v 9 I̱ma꞉ do Pi Seliapo walo halo ekina꞉ ka꞉nda꞉ tieke mu halome. Kutaa make I̱ta꞉ pi yamba꞉la꞉la꞉ hoke hali leke seni puma꞉ tonkao uleke halome. I̱ta꞉ koto pa꞉leke halopate pa Koda꞉na꞉ pita꞉ kutupe seni puma꞉ na tonkao ula꞉me. \v 10 I̱ma꞉ mo Koda꞉ma꞉ ma̱leke lila꞉ wanda꞉hali tamba꞉ muluekema꞉ do ka꞉nda꞉ paeyaota꞉ na kiake mea tu halome. Mo wanda꞉halita꞉ Ketiso Yesu pa꞉ta꞉ yama꞉ a꞉pa꞉la꞉ na paelo pa꞉la꞉ pa̱a̱ tiekema꞉ wina꞉ la꞉la꞉ da꞉taasa꞉eki mina꞉yeke I̱ma꞉ do ka꞉nda꞉ tu moneao halome. \p \v 11 Dota꞉ ota꞉ pi alo pie. \q1 Nikana꞉ma꞉ ipiki ame̱le̱ mandake a꞉nda꞉ homoma꞉ka꞉na꞉ta꞉ kota꞉ ipiki ame̱le̱ mandake kone da꞉taa halumeke. \q1 \v 12 Kutupa nikana꞉ma꞉ mo ka꞉nda꞉manu epena꞉ kone aela꞉ bao haoma꞉ka꞉na꞉ta꞉ kota꞉ ipiki ame̱le̱ mandake piki you wanda꞉hali kone halumeke. \q1 Nikana꞉ma꞉ ipiki a꞉nda꞉ kiaoma꞉ka꞉na꞉ta꞉ kota꞉ ipikana꞉ma꞉ niki make kiaalieke. \q1 \v 13 Nikana꞉ma꞉ nika꞉ hone ti lao halumeke laa kone pa hone na ti lao haoma꞉ka꞉na꞉ kone kota꞉ kutu pumonopate pa ipikana꞉ma꞉ ipika꞉ pulueke laa la꞉ ula꞉ pita꞉ ota꞉ na tunkulieke. \q1 Pa ekipeke ipikana꞉ma꞉ ipika꞉ titina꞉ la꞉ ula꞉ pi kialuekema꞉ wetepe topo piki pi ma꞉nda꞉ lapeke na ya꞉la꞉me. \p \v 14 Do ekita꞉ naka꞉ wanda꞉hali hone u tiaaso hata꞉ la halo hapeke. Kutu pika꞉na꞉ta꞉ kota꞉ Koda꞉na꞉ leke popelekena꞉ iki kinki pitolo hata꞉ta꞉ dupa lapeke. Ikana꞉ma꞉ mo pi teke manuna꞉ tekena꞉ta꞉ pi yokaalu alu pu ape ape na lapa꞉peke lapeke. Kutu piki hauma꞉ta꞉ ma꞉nda꞉ na tamba꞉ mulu pa꞉la꞉pate mo opilimi wanda꞉hali pa꞉ta꞉ta꞉ paa hoeyaasa꞉eki homeke wilieke. \s1 Ipika꞉ ena꞉ pi lawaaso haena꞉ e poka꞉la꞉ hali \p \v 15 Nakana꞉ma꞉ ota꞉ epeke e poka꞉la꞉ hali haluekema꞉ta꞉ neke yala꞉ peaama꞉na꞉ naka꞉ titina꞉ honeta꞉ Koda꞉ma꞉ I̱ pa꞉ta꞉ ta꞉na꞉ma꞉ homena꞉e hone witolo hata꞉ e poko hapeke. Koda꞉na꞉ ota꞉ pi tikitiki wala꞉la꞉ hali hata꞉ta꞉ koto hau pu hapeke. \v 16 Mo wanda꞉hali Koda꞉ mina꞉pa꞉lao papate haena꞉ la꞉la꞉ epe na piki Koda꞉ mataake pimanu la kiteme pi manuta꞉ hoki wala kiao pua꞉peke. \v 17 Koto Koda꞉ mataake pi la kita꞉la꞉ pita꞉ mo mindiki na꞉paasa꞉ bolekema꞉ handa꞉la꞉me. Kutu piki pita꞉ yaapo hali Haimeniasi pita꞉ Pailita꞉si yaapoma꞉ walepeme. \v 18 Koto hali yaapoma꞉ta꞉ mo ota꞉ haumanu mina꞉pa꞉laepeme. Kutu polo hata꞉ mo nika꞉ homa paa tialo poloma꞉ ekina꞉ ipilikana꞉ma꞉ alota꞉ Nikita꞉ amba꞉ homa tiao haloma꞉me alepeme. Koto alepe ekima꞉ta꞉ mo mandane pi mina꞉la꞉ wanda꞉halina꞉ hone tulaaseme ekita꞉ hoeyaasepeme. \p \v 19 Koda꞉ma꞉ nokopeeke taka꞉lake pinkita꞉ da̱o̱la꞉pa pa꞉la꞉me. Koto pinkina꞉ pi yaapo wape pea ula꞉ ekita꞉ dupa. Tekehalima꞉ ipika꞉ wanda꞉halita꞉ ipika꞉ amba꞉ hando ulume laa wape pea ula꞉me. Kutupa pi ma꞉nda꞉ make dupa. Ma꞉nda꞉ hali epima꞉ I̱ta꞉ mo Tekehalina꞉eki halome lea꞉ka꞉na꞉ta꞉ kota꞉ mo hokeeki paeyao ota꞉ mina꞉pa꞉lao hoki walaa pua꞉peke ya꞉la꞉me pi yaapo wape pa꞉la꞉me. \p \v 20 Mo hamoko da tieke pa꞉ta꞉ta꞉ paata꞉ piki make noka꞉ wiki kawaso ta꞉ta꞉ ta꞉ta꞉ pikieki wopu ula꞉me. Mo kawaso manuta꞉ silipama꞉ make koloma꞉ make wa꞉peleme. Kutupa mandane ekita꞉ tima꞉ make kenkema꞉ make wa꞉peleme. Do kawaso mandaneeki manuta꞉ hau tieke pitolo mea꞉pekeeki wina꞉ laata꞉ mandane ekita꞉ pa nate paeyao pa mu hapekeeki wina꞉ la꞉la꞉me. \v 21 Hali ma꞉nda꞉ epima꞉ mo hoke hau paeyaona꞉ ha̱i̱ a꞉nda꞉ ipiki pa꞉ta꞉ na ta̱le̱na꞉ lea꞉ka꞉na꞉ta꞉ kota꞉ ipikita꞉ ipika꞉ Tekehalima꞉ ta꞉ta꞉ piki hau tieke ma꞉nda꞉ peaena꞉ mea haena꞉ lelieke. Pa ekipeke. Mo somema꞉ ipika꞉ Tekehalima꞉ hala꞉la꞉ epeke emanu pokaaluekema꞉ tikitiki yao ula꞉ ale manuma꞉ handa hala꞉me. \p \v 22 Nakana꞉ma꞉ mo wekihali hata꞉ mo wekiwandikima꞉ ika꞉ lokena꞉ hoke hone u alualu pita꞉la꞉ haumanu wendia꞉peke. Nakana꞉ma꞉ mo iki tamba꞉ mina꞉ ika꞉ yako piki pukima꞉ ika꞉ Tekehali o laa wi lo haleme wanda꞉hali ame̱le̱ hata꞉ mo tikitiki piki hau make hone tulaasa꞉eki make pukima꞉ homa꞉la꞉eki make a꞉nda꞉ peliaasa꞉eki make muluekema꞉ hone ha paleke pua꞉peke. \v 23 Mo teke na wiki o teke na handeke pi yokaalu alu pita꞉la꞉eki manuta꞉ hoki wala pua꞉peke. Pa ekipeke. Koto hau manuma꞉ta꞉ ape ape mea la꞉tialiekeyeke loa꞉me. \v 24 Mo Tekehalina꞉ e pokaasa꞉ halima꞉ta꞉ta꞉ ape ape na lelieke. Kotoeki na pikita꞉ ipikana꞉ma꞉ wanda꞉hali paeyao pa꞉ta꞉ a꞉ta꞉ma꞉ homolo epeke disa hali hata꞉ ika꞉ pu hoeyaaseme haumanu pa꞉ta꞉ ka꞉nda꞉ma꞉ a̱i̱ na homake yu wia hapeke ya꞉la꞉me. \v 25 Ipikana꞉ma꞉ mo pi tunkuleleme wanda꞉hali tikitiki yaasota꞉ kimelema꞉ hauma꞉ta꞉ yopu pu halieke. Koto hau a꞉nda꞉ pu haya꞉ka꞉na꞉ta꞉ kota꞉ ikita꞉ Koda꞉ma꞉ iki pa꞉ta꞉ waleke wiaya꞉ka꞉na꞉ta꞉ ika꞉ pukimanu topo pea mo ota꞉ pina꞉ hone ti laemeka꞉na꞉ta꞉ \v 26 kota꞉ ika꞉ honemanu paa epeke tupa꞉ mea lopao wilimikie. Kutu pimikina꞉ta꞉ kota꞉ ikana꞉ma꞉ Sadanina꞉ hone pa꞉la꞉eki peaena꞉ miniki hala꞉ bisale pa꞉ta꞉ pambelemeeki hola꞉pa yopua halimikie. \c 3 \s1 Nate paelia꞉ toma꞉na꞉ pea꞉peke yolo pa꞉la꞉ ekimanu \p \v 1 Mo nate paelia꞉ toma꞉na꞉ta꞉ ka꞉nda꞉ma꞉ homaasa꞉ haumanu wopu ipiliekema꞉ hone wopu wia hapeke. \v 2 Koto paelia꞉ dina꞉ta꞉ wanda꞉halima꞉ do haumanu pu halimikie. Ikita꞉ I̱ I̱ alo hata꞉ make pasa꞉tei hau wopu pita꞉la꞉eki make hakoko liki pimanu lo make handaena꞉ honemanu u make yala꞉ peaaso hata꞉ make kikama꞉ handeke some ala꞉ hoke pimanu make lo halimikie. Kutaa make ateke inkikina꞉ kakena꞉ na homo make keiyae loluekema꞉ hone na u make yeni hau pita꞉la꞉ haumanu hone na wiki wanda꞉hali make halimikie. \v 3 Ikana꞉ma꞉ a꞉ta꞉ma꞉ homa tamba꞉ na mu make pa paeyaaluekema꞉ hone na u make hoki nane laasa꞉ wanda꞉hali hata꞉ make hone mata꞉pa pua hata꞉ wanda꞉hali hoeyaasa꞉ hau pu make kika ma꞉na꞉na꞉ hau leke pita꞉la꞉ hau make pu halimikie. Mo wanda꞉halima꞉ epeke haumanu honditi pu halimikie. \v 4 Kutaa make ikana꞉ma꞉ yankeke kone lina꞉ ma꞉na꞉ yapa꞉ mu a꞉nda꞉ lombo make homa꞉la꞉ ale teke na hake haumanu pu make ika꞉ honema꞉ ikita꞉ tieke haloma꞉me hone witolo hata꞉ Koda꞉ pukima꞉ na homeketa꞉ pa ika꞉ loke ta꞉na꞉ peaasa꞉ alemanu pa꞉ta꞉ pukima꞉ homo halememe. \v 5 Ikana꞉ma꞉ mo Koda꞉ pa꞉ta꞉ yeni pita꞉la꞉ hauta꞉ pa pea꞉tiki pea꞉tiki pu halemepate mo yenina꞉ wele pita꞉la꞉ ekita꞉ hoki walaa kiaaso halememe. Kutu piki wanda꞉hali ame̱le̱ apa꞉tao na hapeke. \p \v 6 Kutu piki mandane haliwekima꞉ta꞉ mandane hone wopu na wiki wanda꞉weki homu pealuekema꞉ ika꞉ da pa꞉ta꞉ yopu siki honda꞉ pamba pu halememe. Kutu piki wanda꞉weki ika꞉ hoke hau manuma꞉ta꞉ ika꞉ honemanu ka꞉nda꞉ peaota꞉ ika꞉ lokena꞉ hoke hone pa꞉la꞉eki manuma꞉ iki yola꞉ mea aneya moneya pu hala꞉me. \v 7 Do koto wanda꞉wekima꞉ta꞉ mo pimanu opua hone uluekema꞉ taapemekepate pa mo ota꞉ pina꞉ teketa꞉ miniki hapa꞉peke na ya꞉la꞉me. \v 8 Mo hande Dia꞉nisi pita꞉ Dia꞉mbitisi yaapoma꞉ Mosesi pa꞉ta꞉ a꞉nda꞉ lipikime. Koto some yaapoma꞉ pipiki tupa꞉ kone mo hande haliwekima꞉ta꞉ mo hande ota꞉ pi pa꞉ta꞉ make a꞉nda꞉ lu halememe. Ikana꞉ma꞉ ika꞉ hone tikitiki na yaaso hata꞉ kone Koda꞉ pa꞉ta꞉ hone tulaapeke ekina꞉ta꞉ iki ana꞉ na paleke handaata꞉ Koda꞉ma꞉ iki kiao hala꞉me. \v 9 Koto haliweki ika꞉ hauta꞉ wopu na daeyalieke. Mo amba꞉ haemeke wanda꞉halima꞉ mo hande Dia꞉nisi Dia꞉mbitisi yaapona꞉ pamba꞉ na piki hau pipikieki handolo pimiki tupa꞉ ame make wanda꞉halima꞉ koto haliwekina꞉ pamba꞉ na piki haumanu handilimikie. \s1 Paeyaaso mana꞉ pi \p \v 10 Pate nakana꞉ma꞉ I̱ yaapo neke mandake pomi pita꞉ma꞉ta꞉ mo hande wanda꞉hali pa꞉ta꞉ waloa꞉ pi manuta꞉ nakana꞉ma꞉ amba꞉ opua hone wilime. Kutaa ya hau pita꞉ ya pua꞉eki yaapota꞉ nakana꞉ma꞉ hone wilime. Kutaa I̱ma꞉ ya hone tulaaloeki make wanda꞉halima꞉ pi mina꞉ soka꞉la꞉ma꞉ homa na kiake pa handeteke haloeki make ya a꞉ta꞉ma꞉ homa pukima꞉ homoloeki make ka꞉nda꞉manu epena꞉ kone I̱ma꞉ honkopu hao da̱o̱la haloeki make nakana꞉ma꞉ handeleme. \v 11 Mandane haliwekima꞉ I̱ lu yombu moneao halemeke make tanda wopuna꞉ moneao haloeki make handeme. Mo hande A꞉ndioko da pa꞉ta꞉ make Aikoniomo da pa꞉ta꞉ make kutaa Lisita da pa꞉ta꞉ make do da tepo haliwekima꞉ I̱ ota꞉ hoeya꞉ hau lu yombu haena꞉ kone pa taka꞉lao haowa꞉ ekita꞉ naka꞉ hone wilime. Kutu pimipate kone mo Tekehalima꞉ do koto hau paeyaona꞉ tukiki pa꞉ta꞉ kone I̱ wopu pa꞉ta꞉la꞉ moneao haya꞉me. \v 12 Aowe. Koto tupa꞉ kone mandane wanda꞉hali epima꞉ Ketiso Yesu pa꞉ta꞉ ta꞉ma꞉ni pea hata꞉ Koda꞉na꞉ pi tolu haemeka꞉na꞉ta꞉ kota꞉ iki pa꞉ta꞉ta꞉ mandane haliwekima꞉ mo hoeya꞉ hapu lu yombua꞉la꞉ haumanu pilimikie. \v 13 Hoke hau pu hala꞉ haliweki make yayapiki hau pita꞉la꞉ haliweki make ika꞉ ika꞉ kone makea alu alu pitolo hata꞉ ika꞉ hoke hau manuta꞉ ota꞉ mea daeyalimikie. \p \v 14 Kutu pu halimipate neketa꞉ hande waleeke opi ota꞉ pimanu wopu miniki hale ekita꞉ na mina꞉pa꞉lapeke. Hande neke walea꞉ tapaketa꞉ naka꞉ hone wilime. \v 15 Kutaa make mo hande Yakopiki Baibolona꞉ wape pea ula꞉ pi manuta꞉ neke wekisiki hata꞉ kone kini pea opua꞉tiki a꞉pa ame make paa opuolo haleme. Nakana꞉ma꞉ mo Ketiso Yesu pa꞉ta꞉ hone tulaaseeki pa꞉ta꞉ yama꞉ mea꞉peke da꞉taasa꞉eki muelena꞉ u tiaasa꞉ honeta꞉ do Baibolona꞉ wape pea ula꞉ pi manuma꞉ ka꞉la꞉me. \v 16 Mo Baibolona꞉ wape pea ula꞉ pi paeyao wape pina꞉ta꞉ haliwekina꞉ hone pa꞉ta꞉ Koda꞉ma꞉ wala꞉ tiaaso haena꞉ wape pimikime. Koto wape pa꞉la꞉ pima꞉ta꞉ wanda꞉hali pa꞉ta꞉ ota꞉ pimanu waluekema꞉ make hoke hau peaama꞉na꞉ sa꞉sa꞉ puluekema꞉ make hoi piki haumanu tondepealuekema꞉ make kutupa epeke hapeke ekina꞉ mana꞉manu loluekema꞉ wape pea ula꞉me. \v 17 Kutu peaapeke ya꞉la꞉ ekima꞉ta꞉ mo Koda꞉na꞉ e pokaasa꞉ somema꞉ epeke hau paeyao ana꞉na꞉ peaena꞉ tikitiki yao haena꞉ lelieke. \c 4 \s1 Koda꞉na꞉ ota꞉ pimanu homeke walo hapeke \p \v 1 Mo pa haleme wanda꞉hali pita꞉ amba꞉ homemeke wanda꞉hali pea telipulu pa꞉la꞉ Ketiso Yesu pita꞉ Koda꞉ yaapona꞉ leke popelekena꞉ telepo pi na alopate Ketisota꞉ mo wanda꞉halina꞉ handeteke hao halo pa꞉la꞉ Kini hali ipiliekeyeke ya pukima꞉ ka꞉nda꞉ma꞉ homolo haena꞉ I̱ma꞉ neke pa꞉ta꞉ dupa꞉pekee alome. \v 2 Koda꞉na꞉ pi walo hapeke. Kutu polo halena꞉ wanda꞉halima꞉ opuluekema꞉ ta꞉na꞉ma꞉ na homolo haena꞉ make o ta꞉na꞉ma꞉ homa opitolo haena꞉ make na kiaake pa walolo walolo ombu hapeke. Nakana꞉ma꞉ mo puki nala꞉ pima꞉ make mineke pima꞉ make kutupa mo hone u tiaasa꞉ pima꞉ make koto pi manuma꞉ ikana꞉ma꞉ epeke honemanu wina꞉ loluekema꞉ ta꞉na꞉ma꞉ homa꞉ tiaaso handeteke hao hapeke. \v 3 Wanda꞉halima꞉ mo epeke mana꞉ pi wopu na opulu pa꞉la꞉ nate make ipilieke. Kutaa make wanda꞉halima꞉ ika꞉ hone pa꞉la꞉ ekimanu pitolo hata꞉ ika꞉ opulueke hone peleme pimanu la hala꞉peke yolo pa꞉la꞉ haliwekima꞉ iki handeteke haena꞉ handa꞉ mea꞉tiki pilimikie. \v 4 Ikana꞉ma꞉ pa tindemanu homeke opuluekema꞉ mo ota꞉ pita꞉ na opiki hoki walaa kiaalimikie. \v 5 Kutu pina꞉ kone neke pa꞉ta꞉ ekipiki haumanu epena꞉ kone kota꞉ koto ekima꞉ neke hoeyaama꞉na꞉ naka꞉ hone lu tombua tombua pitolo hata꞉ hapeke. Ka꞉nda꞉manu epena꞉ kone da̱o̱la hata꞉ka꞉na꞉ mo Pi Seliapo wala꞉la꞉ hali hata꞉ e poko hapeke. Kutupa neketa꞉ Koda꞉na꞉ e pokaasa꞉ hali hata꞉ naka꞉ ka꞉la꞉ e poko hapeke. \p \v 6 I̱ pa꞉ta꞉ epolo pa꞉la꞉ hauta꞉ dupa. Mo hande hoteke lia hala꞉la꞉ tupa꞉ I̱ lu peleme nateta꞉ teke pa꞉ta꞉ ya꞉la꞉me. I̱ do kenkena꞉ haloeki paeyaalo polo nate teke pa꞉ta꞉ ya꞉la꞉me. \v 7 I̱ta꞉ mo hotoneli kita꞉la꞉ ekina꞉ta꞉ ya wele paeyaoma꞉ epeke tupa꞉ a̱i̱ya pua mo tombo epeke tupa꞉ watao halome. Kutupa make mo ya Koda꞉ pa꞉ta꞉ hone tulaalo ekita꞉ na mina꞉pa꞉lalome. \v 8 Koto ekina꞉ mo tikitiki pea haeme wanda꞉halima꞉ ika꞉ lombei pimiki ekina꞉ mea꞉peke yenki tieketa꞉ I̱ma꞉ putupiliki miono yeke pa ula꞉me. Do koto ya lombei polo ekina꞉ yenkita꞉ mo Tekehali nika꞉ tikitiki teli peaasa꞉ halima꞉ mo epolo pa꞉la꞉ nate tiekena꞉ I̱ pa꞉ta꞉ kilieke. Koto yenkita꞉ I̱ pa꞉ta꞉ homeke na kulu pa꞉la꞉pate pa mo mandane ipiki peneme yaena꞉ yeke pukima꞉ homolo handeteke hao haleme wanda꞉hali pa꞉ta꞉ tonka꞉na꞉ halieke. \s1 Polona꞉ ale manuna꞉ pimanu \p \v 9 Nakana꞉ma꞉ koto kone I̱ pa꞉ta꞉ a̱i̱ ipuluekema꞉ taapo hapeke. \v 10 Dimasita꞉ do kenkena꞉ hauna꞉ hone wopu pieke ekima꞉ I̱ na leeke mina꞉pa꞉lao mo Desalonaika da nane pua hala꞉me. Ketesinisita꞉ Ka꞉leisia kenke nane pua hala꞉me. Taitasita꞉ mo Da꞉lemeisia kenke nane pua hala꞉me. \v 11 Luku homeke homeke I̱ yaapo halopa꞉me. Neke ipulu hata꞉ta꞉ Maka handa꞉ mua꞉tiki a꞉pa꞉peke. Ipikana꞉ma꞉ I̱ tamba꞉ mina꞉ yeke loa꞉me. \v 12 Tikikasita꞉ Epesese nane tapaowa꞉me. \p \v 13 Ya kosa꞉ dauta꞉ mo Todoa꞉si da hala꞉ hali Kapusima꞉ wia hawaena꞉ epoa꞉ma꞉ neke ipulu hata꞉ta꞉ mea꞉tiki a꞉pa꞉peke. Ya bukamanu tonka꞉na꞉ mea a꞉paaso hata꞉ta꞉ mo hande hoteke yonkelekema꞉ wa꞉pa꞉la꞉ buka manuta꞉ ota꞉ hone na yonka꞉lapeke. \p \v 14 Mo kepete kawai wepu hala꞉ hali A꞉lekesa꞉ndama꞉ I̱ pa꞉ta꞉ hoke hau tieke piekeme. Koto ipika꞉ pieke hauna꞉ yenkita꞉ Tekehalima꞉ ana꞉na꞉ halieke. \v 15 Mo somema꞉ nika꞉ waloloma꞉ pina꞉ a꞉nda꞉ wopu lia꞉me. Kutu pieke handaa neke make hoeyaama꞉na꞉ma꞉ wopu handeteke hapeke. \p \v 16 Mo pi yokaalu puma꞉ natena꞉ta꞉ I̱ma꞉ ya pua꞉ haumanu waluekema꞉ titina꞉ hombo peaowa꞉ dina꞉ta꞉ mo I̱ tamba꞉ mina꞉la꞉ hali paeyao homeke a꞉nda꞉ na hake iki paeyaoma꞉ I̱ mina꞉pa꞉lao pememe. Koda꞉ma꞉ ika꞉ pimi hoke hauta꞉ hone yonka꞉laena꞉e. \v 17 Kutu pimipate mo Tekehalima꞉ I̱ teke pa꞉ta꞉ hata꞉ I̱ wele peaya꞉me. Kutu pia꞉ ekima꞉ta꞉ mo pi na miki wanda꞉hali paeyaoma꞉ opina꞉ I̱ma꞉ mo Pi Seliapo epeke tupa꞉ waloa꞉me. Kutaa make mo laionima꞉ I̱ lu nena꞉ taapolo pimikieki teke pa꞉ta꞉ ya꞉na꞉ mo Tekehalima꞉ I̱ petelea꞉me. \v 18 Mo Tekehalima꞉ mo hande hoke hau paeyao pa꞉ta꞉ I̱ yoka꞉ mea ipika꞉ hepeni nane Kilu Tombuao Hala꞉ ekina꞉ epeke tupa꞉ opolo a꞉pono lelieke. Mo biki yeiya꞉ laasa꞉eki paeyao ipiki pa꞉ta꞉ na paeyeke pa u haena꞉e. Kutu pina꞉e. \s1 Paeyaaso pimanu \p \v 19 Mo Pisila Akuila yaapo pa꞉ta꞉ make mo Onesipotasina꞉ tapake pa꞉ta꞉ tonka꞉na꞉ ya a꞉talo pi tapaasome. \v 20 Eta꞉situsi ipikita꞉ Kotindi da nane haya꞉me. Totobimasi yeni hayeke handaa Mailitasi da pa꞉ta꞉ haena꞉ epoa꞉me. \v 21 Mo kosa꞉ ki a̱i̱ na epeke haena꞉ kone I̱ pa꞉ta꞉ a̱i̱ ipuluekema꞉ taapo hapeke. Yubulisi Pudenisi Linusi Kolodia make mo mandane Ketiso tapake paeyaoma꞉ ika꞉ a꞉talo pi neke pa꞉ta꞉ tapaasememe. \p \v 22 Mo Tekehalita꞉ naka꞉ temoko yaapo hao haena꞉e. Koda꞉na꞉ a꞉ta꞉ma꞉ homa tamba꞉ mina꞉la꞉eki make iki paeyao ame̱le̱ hao haena꞉e.