\id 2TH - Sembeleke Samberigi PNG 2Thess. 01 14/2/91 Macnaughtan \h 2 DESALONAIKA \toc1 Poloma꞉ Desalonaika Siosi pa꞉ta꞉ tapaeyeke wetepena꞉ wapee \toc2 2 Desalonaika \toc3 2 Desalonaika \mt1 Poloma꞉ Desalonaika Siosi pa꞉ta꞉ tapaeyeke wetepena꞉ wapee \c 1 \p \v 1 Polo Sailasi Timodi niki tepoma꞉ iki Desalonaika siosi pa꞉ta꞉ dupiki tameiya꞉ wape pea tapaasoma꞉me. Ikita꞉ Koda꞉ nika꞉ Apa꞉ make Yesu Ketiso nika꞉ Tekehali tieke ame̱le̱ halememe. \v 2 Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ kina꞉e. \s1 Poloma꞉ Koda꞉ pa꞉ta꞉ keiyae leekeeki \p \v 3 Nika꞉ kametonuo. Iki pa꞉ta꞉ hone witolo hata꞉ Koda꞉ pa꞉ta꞉ keiyae pi lo hamonoe. Ota꞉ dupiki pi lo haloma꞉ ekina꞉ teketa꞉ ika꞉ hone tulaleme ekita꞉ ota꞉ anekema꞉ daela꞉me. Kutupa mo ika꞉ pukima꞉ homa꞉ alualu pelemeeki make daeya tieke ya꞉la꞉me. \v 4 Koto peleme ekina꞉ nikita꞉ mo siosi paeyao pa꞉ta꞉manu ta꞉na꞉ma꞉ puki na hake hata꞉ ika꞉ pi lawao haloma꞉me. Ika꞉ pi lawaasome ekita꞉ ika꞉ a꞉nda꞉ tunkuliki halima꞉ iki tekipuleke laaseme ekimanu make mandane ka꞉nda꞉ peaasa꞉ haumanu tukiki pa꞉ta꞉ tonka꞉na꞉ ikana꞉ma꞉ taka꞉lao hata꞉ hone tu alo haleme ekina꞉ lawaasoma꞉me. \s1 Koda꞉ta꞉ tikitiki piki hali hata꞉ niki telipulu pa꞉la꞉eki \p \v 5 Koto pu haleme hau manuta꞉ Koda꞉ma꞉ niki tikitiki yao telipealo pa꞉la꞉eki peneme yaasa꞉eki doe. Ikana꞉ma꞉ mo Koda꞉na꞉ Kilu Tombuao Hala꞉eki mea tialuekema꞉ do ka꞉nda꞉ pa꞉la꞉ ekimanu mea tu haleme ekina꞉ yenkita꞉ kota꞉ pa Koda꞉ma꞉ iki ipika꞉ Kilu Tombuao Hala꞉ alena꞉ tukiki pa꞉ta꞉ hamena꞉ ipikana꞉ma꞉ iki ana꞉na꞉ ana꞉ lalieke. \v 6 Koda꞉ma꞉ pulu pa꞉la꞉ hauta꞉ ota꞉ tikitiki hau pilieke. Kutupa mo iki pa꞉ta꞉ ka꞉nda꞉ma꞉ homaasa꞉ hau pimi wanda꞉hali pa꞉ta꞉ ipikana꞉ma꞉ iki make ka꞉nda꞉ma꞉ homawalieke. \v 7 Kutupa iki niki paeyaona꞉ ka꞉nda꞉ pa꞉la꞉eki ipikana꞉ma꞉ yoka꞉ mea baalieke. Koda꞉ma꞉ kutu piki hauta꞉ Tekehali Yesu ipika꞉ honkopu tieke haasa꞉ enisolomanu tonka꞉na꞉ hepeni mina꞉pa꞉lao opolo epemeka꞉na꞉ kutu pilieke. \v 8 Kota꞉ ikana꞉ma꞉ta꞉ Koda꞉ hone na pa꞉la꞉ wanda꞉hali make Tekehali Yesuna꞉ Pi Seliapo na opiki wanda꞉hali make ika꞉ hoke yenki haluekema꞉ ti uleke talo talo haena꞉ ipilimikie. \v 9 Koto wanda꞉hali ika꞉ tanda pa꞉la꞉ yenkita꞉ dupa. Hoetolo hoetolo haena꞉ hao halimikie. Koto ekina꞉ Tekehali ame̱le̱ make ipika꞉ honkopu seliapo haasa꞉eki taapuna꞉ na hake tekilipa hao halimikie. \v 10 Mo ponka꞉di pilu wieke nate opolo epea꞉ka꞉na꞉ta꞉ Tekehalina꞉ wanda꞉hali paeyaoma꞉ ipiki biki yeiya꞉ laena꞉ make ipiki pa꞉ta꞉ hone tulaaseme wanda꞉halima꞉ ipiki pa꞉ta꞉ ta꞉na꞉ma꞉ homena꞉yeke Tekehali ipilieke. Nikana꞉ma꞉ iki pa꞉ta꞉ waloma꞉ opua꞉ hone tulao haeme ekina꞉ iki make mo hande wanda꞉hali ame̱le̱ mandakena꞉ mombilimikie. \s1 Koda꞉ma꞉ Desalonaika wanda꞉hali honkopu hawaena꞉ Poloma꞉ yeni peaeyekeeki \p \v 11 Nikana꞉ma꞉ koto ekina꞉ hone witolo hata꞉ Koda꞉ pa꞉ta꞉ ikina꞉ yeni peawao haloma꞉me. Koda꞉ma꞉ ipika꞉ hau ikana꞉ma꞉ puemena꞉ wi lea꞉ ekina꞉ ikana꞉ma꞉ koto tupa꞉ ota꞉ ana꞉na꞉ hamena꞉ lena꞉ Koda꞉ pa꞉ta꞉ meme pea yeni peawao haloma꞉me. Koda꞉ma꞉ ikana꞉ma꞉ epeke haumanu puluekema꞉ witeleme hone paeyao ipika꞉ welema꞉ puemena꞉ lena꞉ kutupa make ika꞉ hone tulaaso pitelemeeki pu paeyawaena꞉ yeni peawao haloma꞉me. \v 12 Koda꞉ma꞉ kutu pia꞉ka꞉na꞉ta꞉ ikana꞉ma꞉ nika꞉ Tekehali Yesuna꞉ biki yeiya꞉ lalimikie. Kutupa ipikana꞉ma꞉ iki make kutu pilieke. Kutupa nika꞉ Koda꞉ make Tekehali Yesu Ketiso ipilika꞉ a꞉ta꞉ma꞉ homolo tamba꞉ minelepe ekima꞉ta꞉ koto tupa꞉ pilipipikie. \c 2 \s1 Wanda꞉hali ota꞉ hoeyaalo pa꞉la꞉ hoke halina꞉ pi \p \v 1 Nika꞉ kametonuo. Mo hande nika꞉ Tekehali Yesu Ketisoma꞉ paa epolo pa꞉la꞉ ekina꞉ make ipiki pa꞉ta꞉ niki momba꞉laasa꞉ ekina꞉ make hone witolo hata꞉ iki honke alo dupiki pi aloma꞉me. \v 2 Ma꞉nda꞉ma꞉ Tekehalina꞉ ponka꞉ di pilu wia꞉ nate a꞉pa꞉la꞉me lea꞉ka꞉na꞉ta꞉ opua hone ti yoko pomoma꞉ a̱i̱ na homa꞉pa꞉peke. Ma꞉nda꞉ma꞉ Koda꞉ma꞉ aleke handa loa꞉me ala꞉ pi o ma꞉nda꞉ma꞉ pi walolo walea꞉ pi o ma꞉nda꞉ma꞉ alota꞉ Polo amedama꞉ do wapena꞉ leleme pi tupa꞉ leliepate \v 3 ma꞉nda꞉ma꞉ do aloeki manuma꞉ iki na yola꞉ mina꞉ lapa꞉peke. Mo hande ponka꞉ di pilu ula꞉ nateta꞉ pa hameke na opolo ipilieke. Mo nate epolo pa꞉la꞉ di teke pa꞉ta꞉ ya꞉ka꞉na꞉ta꞉ Koda꞉na꞉ pi na opiki a꞉nda꞉ lita꞉la꞉eki amba꞉la opolo ipilieke. Kutupa make mo wanda꞉hali hoeyaalo pa꞉la꞉ hoke halita꞉ wetepe ti to hala꞉ alena꞉ pena꞉ titina꞉ amba꞉la peneme yaalo ipilieke. \v 4 Epea꞉ka꞉na꞉ta꞉ wanda꞉halina꞉ yeni hau pu haleme alemanu paeyao make Koda꞉na꞉ alemanu hone u haleme ekimanu sa꞉sa꞉ puluekema꞉ taapilieke. Ipikita꞉ do alo alemanu paeyaota꞉ oto nane yao manda halieke. Kutupa make Koda꞉na꞉ tembolo da pa꞉ta꞉ kone pua pita꞉ I̱ta꞉ Koda꞉ halome lo halieke. \p \v 5 Na niminaasemepe. Do alo pi paeyaota꞉ I̱ iki ame̱le̱ hande mandake hama꞉ pita꞉ma꞉ la kua꞉me. \p \v 6 Ameta꞉ do haumanu peaapa꞉na꞉ ma꞉nda꞉ma꞉ sa꞉sa꞉ pita꞉la꞉me. Ikita꞉ do sa꞉sa꞉ pita꞉la꞉ ekita꞉ hone witelememe. Koda꞉ma꞉ la꞉ ula꞉ nate opolo ipilie dina꞉ta꞉ kota꞉ do wanda꞉hali hoeyaalo pa꞉la꞉ hoke halita꞉ peneme yao ipilieke. \v 7 Ti teke yokaasa꞉ hauma꞉ ameta꞉ a꞉mbao hata꞉ e poka꞉la꞉pate wetepe pulu pa꞉la꞉ ekita꞉ pa a̱i̱ na pulu pa꞉la꞉pate amba꞉la mo hande sa꞉sa꞉ pita꞉la꞉ halita꞉ hatuku mea pelieke. \v 8 Kutu pilie dina꞉ta꞉ mo hande wanda꞉hali hoeyaalo pa꞉la꞉ hali opolo ipilieke. Kutupa Tekehali Yesu opolo a꞉pata꞉ ipika꞉ kake pa꞉ta꞉ pomo tapaasa꞉ ekima꞉ make ipika꞉ pa̱a̱ seliapo taapuna꞉ opolo ipilie ekima꞉ make mo hali homaalieke. \v 9 Mo hande wanda꞉hali hoeyaalo pa꞉la꞉ hoke halita꞉ Sadanina꞉ wele taapuna꞉ ipilieke. Kutupa ipikana꞉ma꞉ pea꞉peke na yeke haumanu make yayapiki pate haumanu make na handeke haumanu make a꞉pa pilieke. \v 10 Kutupa ipikana꞉ma꞉ mo alu pulu peleme wanda꞉hali pa꞉ta꞉ hoke makeaasa꞉ hau ta꞉ta꞉ ta꞉ta꞉ wopu pilieke. Mo hande alu pulu peleme wanda꞉hali ika꞉ pa꞉ta꞉la꞉la꞉eki na miki alu pulu peleme ekina꞉ teketa꞉ ikana꞉ma꞉ Koda꞉na꞉ ota꞉ hau handa꞉ mea pukima꞉ na homemekeme. \v 11 Koto ekina꞉ta꞉ mo hande wanda꞉halima꞉ makeaasa꞉ hauta꞉ ota꞉ekie hone wina꞉ Koda꞉ma꞉ ata꞉ka꞉ peaasa꞉ wele iki pa꞉ta꞉ e pokena꞉ tapaalieke. \v 12 Kota꞉ koto ekina꞉ yenkita꞉ ikana꞉ma꞉ mo ota꞉ pina꞉ hone na tulake hoke haumanu pa꞉ta꞉ ta꞉na꞉ma꞉ homa pu haleme ekina꞉ iki paeyaota꞉ Koda꞉ma꞉ pi yokaalu pea hoke yenki halieke. \s1 Koda꞉ma꞉ iki pa꞉ta꞉la꞉la꞉eki muemena꞉ mea hala꞉eki \p \v 13 Tekehalima꞉ pukima꞉ homo hala꞉ kametonuo. Hoto paeyao ikina꞉ Koda꞉ pa꞉ta꞉ keiyae lo hamonoe. Koda꞉ma꞉ iki peteluekema꞉ titina꞉ amba꞉ ma̱leke lia mea haya꞉me. Mo Holi Sipitidima꞉ iki Koda꞉na꞉eki hamena꞉ sa̱ pa꞉la꞉ ekima꞉ make ika꞉ mo ota꞉ pi pa꞉ta꞉ hone tulaleme ekima꞉ make koto ekima꞉ta꞉ Koda꞉ma꞉ iki petelea꞉me. \v 14 Koda꞉ma꞉ koto tupa꞉ hamena꞉ mo Pi Seliapo waloma꞉ ekima꞉ta꞉ iki wi lea꞉me. Nika꞉ Tekehali Yesu Ketisona꞉ pa̱a̱ pita꞉la꞉eki putu piliki ikana꞉ma꞉ muemena꞉ wi lea꞉me. \v 15 Kametonuo. Koto ekina꞉ta꞉ mo ota꞉ pimanu nikana꞉ma꞉ wapena꞉ loma꞉eki make kakema꞉ waloma꞉eki make koto pi paeyao miniki hata꞉ taka꞉lao hao hapa꞉peke. \v 16 Koda꞉ nika꞉ Apa꞉ma꞉ niki pukima꞉ homolo hata꞉ ipika꞉ a꞉ta꞉ma꞉ homa tamba꞉ mina꞉la꞉ ekina꞉yeke mo na paelo pa꞉la꞉ aela꞉ baasa꞉ hau make epeke hone tulaasa꞉ hau make niki kia꞉me. \v 17 Kutupa ipikana꞉ma꞉ make nika꞉ Tekehali Yesu Ketisoma꞉ make ipilikana꞉ma꞉ aela꞉ baasa꞉ hauma꞉ ika꞉ puki tumbaena꞉ lapa꞉peke aloma꞉me. Kutupa ika꞉ epeke hau paeyao pulu peleme ekina꞉ make ika꞉ epeke pi paeyao lolo peleme ekina꞉ make ipilikana꞉ma꞉ iki wele peawapa꞉peke aloma꞉me. \c 3 \s1 Nika꞉na꞉ yeni peapa꞉peke laa leekeeki \p \v 1 Kametonuo. Paeyaaso pita꞉ dupa. Tekehalina꞉ pita꞉ hande iki pa꞉ta꞉ peo la꞉pa wia꞉ tupa꞉ mo mandane wanda꞉hali pa꞉ta꞉ make a̱i̱ peo lena꞉e. Kutupa ikana꞉ma꞉ do pita꞉ seliapoe la kende tupa꞉ wina꞉ lena꞉ nika꞉na꞉ yeni peao hapa꞉peke. \v 2 Kutupa make wanda꞉hali paeyaoma꞉ mo hande pina꞉ hone na tulaasemeke handa mo hoke haliwekima꞉ niki pa꞉ta꞉ hoke hau peaama꞉na꞉ Koda꞉ma꞉ niki petelena꞉ yeni peao hapa꞉peke. \v 3 Mo Tekehalima꞉ hone homeke u haleke handa ikita꞉ wele pealieke. Kutupa make Sadanima꞉ iki hoeyaapa꞉na꞉ handeteke halieke. \v 4 Kutupa ikana꞉ma꞉ta꞉ epeke tupa꞉ pilimikie hone witoloma꞉ ekita꞉ Koda꞉ma꞉ niki pa꞉ta꞉ ku hala꞉me. Koto ekina꞉ ota꞉ nika꞉ honema꞉ta꞉ nikana꞉ma꞉ iki pa꞉ta꞉ la ku haloma꞉eki manuta꞉ ame do piteleme tupa꞉ pa pu halimikie hone witoloma꞉me. \v 5 Ikana꞉ma꞉ Koda꞉na꞉ pukima꞉ homa꞉la꞉eki make Ketisoma꞉ ka꞉nda꞉ pa꞉la꞉eki na mina꞉pa꞉lake taka꞉lao hayekeeki make hone uemena꞉ Tekehalima꞉ ika꞉ hone witeleme ekita꞉ tikitiki yao hatuku pena꞉e. \s1 Wanda꞉hali paeyaoma꞉ e poka꞉pa꞉peke aleo \p \v 6 Kametonuo. Tekehali Yesu Ketisona꞉ bikina꞉ dupa꞉pe aloma꞉me. Mo nikana꞉ma꞉ loma꞉ mana꞉ pimanu opua na piki soka꞉la꞉ pambeke kametiti pa꞉ta꞉ apa꞉tao na hake ta꞉ta꞉ hapa꞉peke. \v 7 Nikana꞉ma꞉ puma꞉ tupa꞉ ikana꞉ma꞉ make koto tupa꞉ kone pea꞉pa꞉peke aleo. Koto ekita꞉ ikana꞉ma꞉ hone wotu wilimime. Nikana꞉ma꞉ iki ame̱le̱ mandake hata꞉ta꞉ soka꞉la꞉ na hake haoma꞉me. \v 8 Ika꞉ kimi neta꞉ pa hameke na noma꞉pate hamboma꞉me. Nikana꞉ma꞉ pa na pitu haoma꞉pate iki homeke homekena꞉ mani paeyaama꞉na꞉ yeke timba natena꞉ e pokolo hata꞉ e tieke pokoma꞉me. \v 9 Nikana꞉ma꞉ ne kipa꞉ lapeke na yeke dia꞉me. Kipa꞉ lapeke yea꞉pate kone ikana꞉ma꞉ nika꞉ hau handa puemena꞉ yeke kipa꞉ pi na loma꞉me. \v 10 Nikana꞉ma꞉ iki ame̱le̱ mandake hata꞉ta꞉ dupa la kuma꞉me. Hali epima꞉ e poka꞉la꞉eki kiaeya꞉ka꞉na꞉ta꞉ kota꞉ koto somema꞉ ne napeke na ya꞉la꞉me. \p \v 11 Nikana꞉ma꞉ doeki aloma꞉ ekina꞉ teketa꞉ taa iki tukiki pa꞉ta꞉ mandakena꞉ haleme wanda꞉halita꞉ soka꞉la꞉ pamba pa pitu hata꞉ mandane wanda꞉halina꞉ pita꞉la꞉eki manuna꞉ wakopu tia pomu dupi dupi la꞉tiki pu haleme ekita꞉ opu haloma꞉me. \v 12 Tekehali Yesu Ketisona꞉ bikina꞉ koto wanda꞉hali pa꞉ta꞉ iki handeteke hapa꞉peke laa pi dupa witoloma꞉me. Ikana꞉ma꞉ pa na pomu lopo hake tikitiki yao hata꞉ ika꞉ halo peleme ekina꞉ e pokolo hata꞉ haena꞉e. \p \v 13 Kametonuo. Koto pa꞉la꞉pate ikana꞉ma꞉ epeke hau pitolo hata꞉ta꞉ soka꞉la꞉ma꞉ na homa꞉pa꞉peke. \v 14 Mata꞉la꞉ do tameiya꞉na꞉ wape poloma꞉ pita꞉ iki homeke ma꞉nda꞉ma꞉ na opilieke. Kutu pia꞉ka꞉na꞉ta꞉ koto ipika꞉ hau handolo hata꞉ta꞉ ipikana꞉ma꞉ yaaloma꞉ homaena꞉ mandakena꞉ na apa꞉tao hapa꞉peke. \v 15 Kutupa ikana꞉ma꞉ ipikita꞉ a꞉nda꞉ tunkuliki hali leke na haena꞉ lo pelemepate pa Kameo. Yopu handeteke hae lo hapa꞉peke. \s1 Wape paeyaaso pi \p \v 16 Mo Tekehali ipikana꞉ma꞉ kone nika꞉ a꞉nda꞉ peliaasa꞉ ekina꞉ teke hata꞉ ika꞉ pota꞉ paeyao pa꞉ta꞉ hoto paeyao a꞉nda꞉ peliaasa꞉eki ku haena꞉e. Tekehali iki paeyao ame̱le̱ mandakena꞉ haena꞉e. \p \v 17 I̱ta꞉ Polo ya kikima꞉ kone wape pitolo hata꞉ iki pa꞉ta꞉ A꞉taloe alome. Tameiya꞉ paeyaona꞉ dupiki wapema꞉ ya biki wape pu halome. \p \v 18 Nika꞉ Tekehali Yesu Ketisona꞉ a꞉ta꞉ma꞉ homolo tamba꞉ mina꞉la꞉eki iki paeyao pa꞉ta꞉ haena꞉e.