\id 2PE - Sembeleke Samberigi PNG 2 Peter 01 18/2/91 Macnaughtan \h 2 PIDA \toc1 Pidama꞉ yaapo peao tapaeyeke wapee \toc2 2 Pida \toc3 2 Pida \mt1 Pidama꞉ yaapo peao tapaeyeke wapee \c 1 \p \v 1 I̱ta꞉ Saimono Pida mo hande Yesu Ketisona꞉ e pokaasa꞉ make aposolo halima꞉ loa꞉me. Mo hande niki da꞉taasa꞉ Koda꞉ Yesu Ketisona꞉ tikitiki hau pita꞉la꞉eki pa꞉ta꞉ yama꞉ hone tulaala꞉eki hala꞉la꞉ ekita꞉ nika꞉ hande ota꞉ seliapo piki ekima꞉ handekeeki meleme wanda꞉hali pa꞉ta꞉ do tameiya꞉ tapaasome. \v 2 A꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make ota꞉ tumbulu baasa꞉ ekita꞉ Koda꞉ make nika꞉ Tekehali Yesu ipilika꞉ honemanu yama꞉ ika꞉ eki wina꞉e. \s1 Koda꞉na꞉ wi ala꞉eki pita꞉ ma̱leke lita꞉la꞉eki yaapo \p \v 3 Koda꞉na꞉ welepiki ota꞉ ekima꞉ta꞉ da꞉ta꞉la꞉eki pita꞉ tikitiki piki hau yaapo mulu poloma꞉ hau paeyao ana꞉na꞉ ka꞉la꞉me. Do hau manuta꞉ mo ipika꞉ pa̱a̱ make epeke hau yaapoma꞉ niki wi la꞉la꞉ Koda꞉ hone uma꞉eki pa꞉ta꞉ yama꞉ ana꞉na꞉ moloma꞉me. \v 4 Dupita꞉la꞉ hauma꞉ta꞉ ipikana꞉ma꞉ mo la꞉ ula꞉ ota꞉ aneke make seliapo piki pa hameke hala꞉la꞉ alemanu ka꞉la꞉me. Pa ekipeke. Dupiki pa hameke hala꞉la꞉ ale manuma꞉ta꞉ mo hande do kenkena꞉ ula꞉ hoeyaasa꞉ puki tiaasa꞉ hau mea paka꞉lao mo Koda꞉na꞉ ota꞉ hau pa꞉ta꞉ a꞉pa apa꞉taalimikie. \v 5 Doeki tekena꞉ta꞉ ika꞉ hone tulaasemeeki pa꞉ta꞉ mo ota꞉ epeke hau apa꞉taaluekema꞉ honkopu hapa꞉peke. Kutupa ika꞉ ota꞉ epeke hau pa꞉ta꞉ta꞉ hone wilimieki apa꞉taapa꞉peke. \v 6 Koto ika꞉ hone wilimieki pa꞉ta꞉ta꞉ mo ika꞉ kone loke hone yaapo lu tumbao haleme hau apa꞉taapa꞉peke. Kutupa koto loke hone yaapo lu tumbao halemeeki pa꞉ta꞉ta꞉ puki hana꞉ noka꞉pelemeeki apa꞉taapa꞉peke. Koto ika꞉ puki hana꞉ noka꞉pelemeeki pa꞉ta꞉ta꞉ Koda꞉na꞉ hau leke pitelemeeki apa꞉taapa꞉peke. \v 7 Kutupa ika꞉ Koda꞉na꞉ hau leke piteleme hau pa꞉ta꞉ta꞉ kame pa꞉ta꞉ ta꞉na꞉ma꞉ homelemeeki apa꞉taapa꞉peke. Kutupa kame pa꞉ta꞉ ta꞉na꞉ma꞉ homeleme hau pa꞉ta꞉ta꞉ ma꞉nda꞉ pa꞉ta꞉ pukima꞉ homelemeeki apa꞉taapa꞉peke. \p \v 8 Do seliapo piki hau manuta꞉ ota꞉ ikana꞉ma꞉ wia hapa꞉peke ya꞉la꞉ haumanue. Kutupa ikana꞉ma꞉ do haumanu mea tumbulu bao wia haemeka꞉na꞉ta꞉ kota꞉ koto ale manuma꞉ta꞉ ika꞉ mo nika꞉ Tekehali Yesu Ketiso pa꞉ta꞉ hone witeleme ekita꞉ wele putiaasa꞉ honkopu kilieke. \v 9 Koto pa꞉la꞉pate ma꞉nda꞉ epima꞉ do ekimanu na wia haya꞉ka꞉na꞉ta꞉ kota꞉ koto someta꞉ leke ota꞉ doka꞉tiki yaalo hata꞉ handa꞉peke na ya꞉la꞉me. Koto pa꞉la꞉ ekima꞉ta꞉ ipika꞉ amba꞉ pa꞉la꞉ hoke haumanu tanda꞉pa paeyawala꞉ ekita꞉ hone yonka꞉lala꞉me. \p \v 10 Koto ekina꞉ yaka kame titio. Mo Koda꞉ma꞉ iki wi laa ma̱leke lita꞉la꞉ ekita꞉ ota꞉ pa u haena꞉ ikana꞉ma꞉ honkopu wopu hao pea꞉pa꞉peke. Kutu pimika꞉na꞉ta꞉ ika꞉ hone tulaleme ekita꞉ ota꞉ na mina꞉pa꞉lalimikie. \v 11 Dupimika꞉na꞉ta꞉ ikita꞉ mo nika꞉ Pa꞉ta꞉la꞉la꞉ Tekehali Yesu Ketisona꞉ na paelo pa꞉la꞉ Kilu Tombuao hala꞉eki pa꞉ta꞉ honda꞉ pamboemena꞉ waleke tieke kilieke. \p \v 12 Kutupa ikana꞉ma꞉ta꞉ amba꞉ meleme ota꞉eki pa꞉ta꞉ honkopu hao hapa꞉lia hata꞉ do alo pimanu amba꞉ hone wilimipate I̱ma꞉ do hau manuta꞉ iki pa꞉ta꞉ paa opuaaso ombu halueke. \v 13 Yaka honema꞉ta꞉ I̱ pa halo aneta꞉ I̱ma꞉ pea꞉pekeeki homeketa꞉ do hau manuna꞉ ika꞉ amba꞉ wilimi honemanu paa hone u tiatiki pulueke. \v 14 Nika꞉ hande Tekehali Yesu Ketisoma꞉ I̱ pa꞉ta꞉ peneme yao la kia꞉ tupa꞉ I̱ma꞉ do homa꞉peke loketa꞉ teke pa꞉ta꞉ baalueke hone witolome. \v 15 Koto ekina꞉ta꞉ I̱ homulua꞉ hoki nane make ikana꞉ma꞉ do haumanu hoto paeyao hone u hamena꞉yeke I̱ma꞉ honkopu hao pota꞉manu wepu wialueke. \s1 Ketisona꞉ pa̱a̱na꞉ lekema꞉ handa꞉ wilimieki \p \v 16 Mo hande nika꞉ Tekehali Yesu Ketisona꞉ wele pa꞉ta꞉ ipula꞉ ekita꞉ nikana꞉ma꞉ta꞉ pa ma꞉nda꞉ma꞉ ipika꞉ hone pa꞉ta꞉ wa꞉pa꞉la꞉ tameni manuna꞉ tilao hata꞉ iki pa꞉ta꞉ walolo na loma꞉me. Ota꞉ nika꞉ lekema꞉ ipika꞉ honkopu tieke handoma꞉me. \v 17 Mo hande Koda꞉ Apa꞉ma꞉ Yesu pa꞉ta꞉ pa̱a̱ pa꞉la꞉eki pita꞉ yeiya꞉ laasa꞉eki yaapo halea꞉ natena꞉ta꞉ nikita꞉ koto pa꞉ta꞉ hamono pia꞉me. Koto dina꞉ta꞉ mo pa̱a̱ wopupiki Koda꞉na꞉ pi ho̱la̱꞉makema꞉ alo hata꞉ alota꞉ Dota꞉ ya pukipiki wekie. I̱ma꞉ ipiki pa꞉ta꞉ ta꞉na꞉ma꞉ wopu homolome laa pi la꞉niaeya꞉me. \v 18 Ota꞉ nikana꞉ma꞉ kone mo pi ho̱la̱꞉make oli hepeni nanema꞉ epea꞉eki opuma꞉me. Nikita꞉ ipiki ame̱le̱ mo hande yako piki potena꞉ haoma꞉ dina꞉ loa꞉me. \p \v 19 Koto ekina꞉ nikita꞉ mo hande potopede haliwekima꞉ walo haemeke pina꞉ hone wopu tulaloma꞉me. Ikana꞉ma꞉ make koto pi wopu opimika꞉na꞉ta꞉ ota꞉ epeke tupa꞉ pilimikie. Pa ekipeke koto pita꞉ hande lamepama꞉ timba꞉ leke ale pa꞉ta꞉ pa̱a̱ peatia pua mo da ka꞉la꞉polo hata꞉ da ka꞉la꞉paaso hombulanka꞉ma꞉ ika꞉ puki pa꞉ta꞉ pa̱a̱ peaasa꞉ nate opolo haena꞉ mina꞉pa꞉laasa꞉ tupa꞉e. \v 20 Titina꞉ pita꞉ dupama꞉ hone u hapa꞉peke Ma꞉nda꞉ma꞉ ipika꞉ honema꞉ kone mo Baibolo pa꞉ta꞉ la꞉ ula꞉ pi ma꞉nda꞉na꞉ teketa꞉ pa na wala꞉peke ya꞉la꞉me. \v 21 Pa ekipeke mo la꞉ wieke pi ma꞉nda꞉ta꞉ halina꞉ hone pa꞉ta꞉ na epeekepate mo haliwekita꞉ Holi Sipitidima꞉ handeteke hayekeeki oto pa꞉ta꞉ hata꞉ Koda꞉ma꞉ haleeke tupa꞉ walao haemekeme. \c 2 \s1 Yayapiki pi wala꞉la꞉ haliweki \p \v 1 Makeaaso potopede haliwekita꞉ amba꞉ hande haemeke wanda꞉hali tukiki pa꞉ta꞉ opa꞉liaemeke tupa꞉ kone yayapiki pi wala꞉la꞉ haliwekita꞉ iki tukiki pa꞉ta꞉ make opa꞉lialieke. Koto haliwekima꞉ta꞉ iki hoeyaapeke yayapiki mana꞉ pimanu mea a꞉pa make mo hande iki ka꞉la꞉pa꞉ tapaala꞉ Tekehali hoki walolo hata꞉ ika꞉ kone iki hoeyaasa꞉ haumanu mea ipilimikie. \v 2 Kutu pitolo kone wanda꞉hali wopuma꞉ta꞉ ika꞉ yaala꞉piki hoke haumanu tolu halimikie. Kutu piteleme ekima꞉ta꞉ mandane wanda꞉halima꞉ta꞉ mo ota꞉ tikitiki piki pota꞉na꞉ta꞉ pa hoke ha̱i̱ piki pimanu lalimikie. \v 3 Do yayapiki pi wala꞉la꞉ haliwekima꞉ta꞉ pasa꞉tei pitolo hata꞉ ika꞉ alemanu muluekema꞉ makeaaso la꞉la꞉ tamenimanu la kilieke. Ameta꞉ amba꞉ kiake kone iki pi yokaalu pulu pa꞉la꞉ halita꞉ tikitiki yao hata꞉ iki hoeyaalo pa꞉la꞉ halita꞉ u̱ na pa꞉ela꞉me. \p \v 4 Koda꞉ma꞉ta꞉ mo hoke hau pieke enisolo manuna꞉ yenkita꞉ pa na mina꞉pa꞉lae yekepate ikita꞉ oni ti uleke pa꞉ta꞉ hoto paeyao seni puma꞉ tonkao timba꞉ la꞉papeke pa꞉ta꞉ haena꞉ la꞉la꞉me. Koto pa꞉ta꞉ta꞉ iki pi yokaalu pulu peleme nate yu wia haena꞉ la꞉la꞉me. \v 5 Koda꞉ma꞉ta꞉ mo hande amba꞉ kenkena꞉ hoke yenkita꞉ na mina꞉pa꞉lae yekepate ipiki hoki walemeke wanda꞉halita꞉ ikali tala꞉ ekima꞉ mina꞉ leekeme. Ipikana꞉ma꞉ tamba꞉ mieke wanda꞉halita꞉ mo ota꞉ ekina꞉ pi walo hayeke hali Noa pita꞉ mandane watake hata꞉ wanda꞉hali pea tamba꞉ miekeme. \p \v 6 Koda꞉ma꞉ta꞉ mo Sodomo Komoto daoni yaapo ma̱leke lia ti ulekema꞉ hoeyaeyeke ekita꞉ ipiki hoki walo peleme wanda꞉hali pa꞉ta꞉ pulu pa꞉la꞉ tupa꞉ waleekeme. \v 7 Ipikana꞉ma꞉ta꞉ Loda peteleekeme. Lodata꞉ epeke hali hata꞉ ipikita꞉ mo pi yambelemeke wanda꞉halima꞉ walemeke loke hoeyaasa꞉ haumanu handolo hata꞉ ipika꞉ weleke pukima꞉ ka꞉nda꞉ma꞉ homeekeme. \v 8 Koto epeke halita꞉ kutupiki wanda꞉hali anka꞉lopuna꞉ hata꞉ peliolo da kelepolo dupiki temokona꞉ hau pimikieki handolo make opitolo hata꞉ puki tandama꞉ homolo tanda tieke mutia peekeme. \v 9 Koto ekina꞉ Koda꞉ma꞉ta꞉ mo ipika꞉ hau leke piteleme wanda꞉hali ika꞉ ka꞉nda꞉ma꞉ homelemeke pa꞉ta꞉la꞉la꞉ ekita꞉ hone ula꞉me. Kutupa make mo hoke wanda꞉halita꞉ hoke yenki oto pa꞉ta꞉ haena꞉ laata꞉ mo pi yokaalu pulu pa꞉la꞉ nate yu wia haena꞉ ala꞉ ekita꞉ hone ula꞉me. \v 10 Ota꞉ mo ika꞉ ha̱i̱ piki lokena꞉ na꞉na꞉ma꞉ homa꞉la꞉eki pita꞉ Koda꞉na꞉ handeteke hala꞉ ekita꞉ pa pina꞉ma꞉ hone u haleme wanda꞉hali pa꞉ta꞉ loa꞉me. \p Do yayapikieki wala꞉la꞉ haliwekima꞉ta꞉ ma꞉nda꞉ pa꞉ta꞉ homu na piki ika꞉ homeke hone u hata꞉ oli manda hala꞉ seliapo piki enisolo titita꞉ na handomo tiao halememe. Kotoeki na pikita꞉ pa iki kitao halememe. \v 11 Mo yayapiki pi waleleme haliweki bepolaake wele wopu piki enisolo haliwekima꞉ koneta꞉ Tekehalina꞉ leke popelekena꞉ Ikita꞉ ka꞉ta꞉ta꞉ pelememe laa la la na pu halememe. \v 12 Koto pa꞉la꞉pate do haliwekima꞉ta꞉ ika꞉ lokema꞉ kone iki handeteke haena꞉ laa mo hona꞉ma̱o̱ lina꞉yeke mondu ula꞉ tikene hala꞉ yeti sayalema꞉ handelememe. Ikana꞉ma꞉ta꞉ iki hone wopu na wilimi pimanu kone la la pea hoeyao halememe. Ikita꞉ mo tikene hala꞉ yeti sayale pita꞉la꞉ tupa꞉ hoeyaalieke. \v 13 Kutupa ikana꞉ma꞉ ma꞉nda꞉ pa꞉ta꞉ tanda piki haumanu peleme ekina꞉ iki make koto tupa꞉ kone tanda piki yenki kilieke. \p Ika꞉ ta꞉na꞉ma꞉ homa꞉la꞉ ekita꞉ ika꞉ lokena꞉ na꞉na꞉ pa꞉la꞉eki tumbaaluekema꞉ mo pa̱a̱na꞉ hata꞉ yaala꞉ma꞉ na homeke anemone hau pu halememe. Ika꞉ yayapiki pota꞉ manuna꞉ ta꞉na꞉ma꞉ homo hata꞉ iki ame̱le̱ ne mandakena꞉ apa꞉tao nalemeketa꞉ iki tukiki pa꞉ta꞉ ha̱i̱ peao hondo pilake nono pelememe. \v 14 Ikita꞉ wanda꞉na꞉ leke titolo hata꞉ hoke hauta꞉ ota꞉ na pao halememe. Ikana꞉ma꞉ mo damako piki wanda꞉halita꞉ hona꞉ pa꞉ta꞉ mea teao halememe. Ika꞉ta꞉ pasa꞉tei pita꞉la꞉ hau puluekema꞉ amba꞉ moka꞉la handa wilimime. Ikita꞉ Koda꞉na꞉ mineke panka꞉la꞉eki oto pa꞉ta꞉ hala꞉ tapake au laa halememe. \v 15 Ikita꞉ mo hande tikitiki piki pota꞉ mina꞉pa꞉lao pota꞉ pomu keaaso hata꞉ mo hande Biona꞉ eiyeke Beilamema꞉ ipika꞉ pieke hoke hauna꞉ mieke mani pa꞉ta꞉ pukima꞉ homeeke tupa꞉ koto awili teilememe. \v 16 Koto someta꞉ ipika꞉ hoke hau pa꞉ta꞉ lu panda꞉ puniaena꞉ mo donkima꞉ pi leekeme. Ipika꞉ donkima꞉ta꞉ wanda꞉halina꞉ pi ho̱la̱꞉makema꞉ leke leekema꞉ mo potopedena꞉ you hoke haumanu piekeeki sa꞉sa꞉ piekeme. \p \v 17 Do haliwekita꞉ mo hande opa꞉la꞉ ikali o ala꞉ ekima꞉ handelememe. Ikita꞉ po tilipuma꞉ kili mea baala꞉ koama꞉ handelememe. Koda꞉ma꞉ta꞉ oni timba꞉ la꞉papeke naku tieke pa꞉ta꞉ta꞉ ika꞉ da panda꞉ amba꞉ mea wiala꞉me. \v 18 Ikana꞉ma꞉ta꞉ hakoko lia teke na wiki pimanu wepu halememe. Kutupa make mo hokeeki pa꞉ta꞉ haleme wanda꞉hali paka꞉lao poluekema꞉ kini piteleme wanda꞉hali tamuluekema꞉ta꞉ ika꞉ lokena꞉ na꞉na꞉ma꞉ homa꞉la꞉ ekima꞉ pu halememe. \v 19 Ikita꞉ ika꞉ lu wiala꞉ hoke hoeyaasa꞉ hauna꞉ pa hameke e pokaasa꞉ haliweki hata꞉ kone mo wanda꞉hali pa꞉ta꞉ta꞉ iki ka꞉la꞉paalumeke laa pi la꞉ u halememe. Ma꞉nda꞉ epi a꞉nda꞉ ipika꞉ pu hala꞉ hauma꞉ da panda꞉ mina꞉ lea꞉ka꞉na꞉ta꞉ kota꞉ koto someta꞉ pa hameke e pokaasa꞉ hali hala꞉me. \p \v 20 Wanda꞉hali epi a꞉nda꞉ma꞉ niki pa꞉ta꞉la꞉la꞉ Tekehali Yesu Ketiso hone wita꞉la꞉eki pa꞉ta꞉ yama꞉ do kenkena꞉ honkopu hake hoke ekimanu paka꞉lao kone handeeki manuma꞉ da panda꞉ paa mina꞉ lemeka꞉na꞉ta꞉ dupiki wanda꞉halita꞉ amba꞉ hande kini pea haeme tupa꞉ dia꞉ya꞉la꞉pate ota꞉ ankulake hokeeki pa꞉ta꞉ halememe. \v 21 Mo hande yakopiki pi ula꞉eki iki pa꞉ta꞉ haleekeeki hone wia kone paa mina꞉pa꞉lao peleme ekima꞉ mo ota꞉ tikitiki piki ekina꞉ pota꞉ hone na wimika꞉na꞉ yoluta꞉ ota꞉ epolo pia꞉me. \v 22 Ikina꞉ pa mo wanda꞉halima꞉ amba꞉ hande lo haemeke pi ma꞉nda꞉ta꞉ ota꞉ekie laa dupa wala꞉la꞉me. \q1 Kikama꞉ta꞉ ipika꞉ amba꞉ hande tolu wieke moku pa꞉ta꞉ta꞉ paa la꞉ka꞉la pu hala꞉me \m laa make paa pi ma꞉nda꞉ta꞉ \q1 Mo ikali peiyao ula꞉ ma꞉na꞉ma꞉ta꞉ mo kenke pa꞉ta꞉ paa peke lulu pu hala꞉me laa lo halememe. \c 3 \s1 Tekehalina꞉ ipula꞉ ekina꞉ pi la꞉ ula꞉eki \p \v 1 Yaka yankeke tonuo. Dota꞉ iki pa꞉ta꞉ yaka yaapo peao tameiya꞉ tapaasome. Do tameiya꞉ yaapo telipuna꞉ pa꞉ta꞉ta꞉ ika꞉ hone pa꞉ta꞉ hakepiki honemanu mea tialuekema꞉yeke do haumanu paa hone u tiaasome. \v 2 Yaka hone pa꞉la꞉ ekita꞉ mo yakopiki potopede haliwekima꞉ amba꞉ hande la kimi pimanu make hande Pa꞉ta꞉la꞉la꞉ Tekehalina꞉ pi wiekeeki ika꞉ aposolo haliweki pa꞉ta꞉ yama꞉ iki kia꞉eki tonka꞉na꞉ niminatiki piomena꞉ loa꞉me. \p \v 3 Titina꞉ amba꞉la do hone wopu wia꞉peke. Mo hande paetolo nate manuna꞉ta꞉ mandane kitao hala꞉ wanda꞉hali ipilimikie. Koto wanda꞉hali ika꞉ hau manuta꞉ ika꞉ hone pa꞉la꞉ ekima꞉ handeteke haena꞉ lelimikie. Ikana꞉ma꞉ta꞉ iki kitaaso hata꞉ lota꞉ pitolo alota꞉ \v 4 Ipikita꞉ ipulueke pita꞉ na la꞉ wiekea. Ameta꞉ ipikita꞉ handoka꞉ta꞉pe. Nika꞉ apa꞉ amedata꞉ amba꞉ koto homelemepate pa mo ala꞉ta꞉ ala꞉ta꞉ paeyaota꞉ amba꞉ mo hande kenke ya wepitolo wieke tupa꞉ kone hande mande laa pa do ula꞉taa laa lelimikie. \v 5 Ikana꞉ma꞉ta꞉ Koda꞉ma꞉ amba꞉ kiake pi la꞉ witolota꞉ kenke ya yaapo wepiekeme la꞉la꞉ ota꞉ ekita꞉ hoki walo halememe. Kenketa꞉ ikali pa꞉ta꞉ opa꞉liao ikalima꞉ta꞉ kenke au laeyekeme. \v 6 Kutupa make mo hande ikali tea꞉ ekima꞉ta꞉ hande amba꞉ kenke hoeyaeyekeme. \v 7 Koto tupa꞉ Koda꞉ma꞉ mo hande la꞉ wieke homeke pima꞉ kone ame do ula꞉ kenke ya yaapota꞉ ti ulekema꞉ hoeyaena꞉yeke amu pea ula꞉me. Koda꞉ matao haleme wanda꞉hali pi yokaalu pea hoeyaalo pa꞉la꞉ nate yu wia haena꞉ la꞉la꞉me. \p \v 8 Koto pa꞉la꞉pate yaka yankeke tonuo. Do alo pi homeke hone na yonka꞉lapa꞉peke. Koda꞉na꞉ leke popelekena꞉ta꞉ nate homeke pita꞉ bapi hali tieke eleke eleke manuta꞉ ata꞉ka꞉ na pa꞉la꞉me. Ipiki pa꞉ta꞉ta꞉ telipuna꞉ mandake hau kone pa꞉la꞉me. \v 9 Mandane wanda꞉halima꞉ hone witolota꞉ Tekehalita꞉ ipika꞉ pi la꞉ ula꞉eki puluekema꞉ta꞉ kesema꞉ pu hala꞉me lo halememe. Kotoeki na piki ipikana꞉ma꞉ta꞉ ikina꞉ a꞉ta꞉ma꞉ homolo yu wia hala꞉me. Pa ekipeke ipikana꞉ma꞉ta꞉ homeke a꞉nda꞉ hoeyaapa꞉na꞉e laata꞉ wanda꞉hali paeyao ika꞉ hoke hau mina꞉pa꞉laena꞉e hone u̱ hala꞉me. \p \v 10 Koto pa꞉la꞉pate Tekehalina꞉ Nateta꞉ mo hande pake nala꞉ hali ipula꞉ tupa꞉ ipilieke. Koto Natena꞉ta꞉ oli yata꞉ pututu piki e̱ wi laa alupilieke. Oli yana꞉ hala꞉ ale manuta꞉ tima꞉ taa hoeyaota꞉ do kenke make kenke pa꞉ta꞉ ula꞉ ale paeyao make taa alupaalieke. \v 11-12 Do ala꞉ta꞉ ala꞉ta꞉ paeyao dupa hoeyaalo pa꞉la꞉eki ya꞉leke loa꞉ma꞉ ikita꞉ ekipiki wanda꞉hali hapa꞉peke ya꞉la꞉pe. Ikana꞉ma꞉ta꞉ Koda꞉na꞉ Nate epolo pa꞉la꞉ dita꞉ honema꞉ kimaaso hata꞉ a̱i̱ epena꞉e laa honkopu hao hapa꞉peke. Kutu pitolota꞉ ika꞉ haleme ekita꞉ yako pina꞉ laa Koda꞉na꞉ hau leke pu hapa꞉peke ya꞉la꞉me. Koto dina꞉ta꞉ mo yata꞉ ta꞉ta꞉ pao hoeyao mo yana꞉ hala꞉ ale manuta꞉ mo titipuma꞉ taa o̱ la꞉ palieke. \v 13 Pate Koda꞉ma꞉ la꞉ ula꞉ tupa꞉ mo hande tikitiki hau homeke ulu pa꞉la꞉ panake kenke ya yaapo epena꞉ yu wia haloma꞉me. \p \v 14 Koto ekina꞉ yaka yankeke tonuo. Koto nate yu wia hata꞉ta꞉ Koda꞉na꞉ leke popelekena꞉ hake pea eki a꞉nda꞉ na piki wanda꞉halima꞉ handaa Koda꞉ yaapo puki lopa꞉niao haluekema꞉ taapo hapa꞉peke. \v 15 Nika꞉ kame seliapo Poloma꞉ Koda꞉ma꞉ haleeke epeke hone wita꞉la꞉eki miniki hata꞉ iki pa꞉ta꞉ tameiya꞉ tapaaso leekeme. Koto tupa꞉ mo nika꞉ Tekehalina꞉ a꞉ta꞉ma꞉ homolo yu wia hala꞉ ekita꞉ iki da꞉ta꞉la꞉eki miomena꞉ waleke wiaaso pita꞉la꞉me hone wopu u hapa꞉peke. \v 16 Polo ipika꞉ tameiya꞉ paeyaona꞉ta꞉ homeke pi ombu lo hala꞉me. Kutu pa꞉la꞉pate pi ula꞉eki matao hone eleke eleke u haleme wanda꞉halima꞉ta꞉ ipika꞉ tameiya꞉manu pa꞉ta꞉ koto kone hone wia꞉peke na ya꞉la꞉ mandane pi manuta꞉ ata꞉ka꞉ peao walo halememe. Mo mandane Baibolo pimanu pa꞉ta꞉ pu haleme tupa꞉ loa꞉me. Koto ekina꞉ta꞉ ika꞉ kone iki pa꞉ta꞉ mo hoeyaasa꞉eki mea ipu halememe. \p \v 17 Pate iki yaka yankeke tonuo. Ikana꞉ma꞉ta꞉ koto ekita꞉ amba꞉ hone wilimime. Koto ekina꞉ta꞉ wopu handeteke hapa꞉peke. Pa ekipeke mo lo pi yambolo haleme wanda꞉halina꞉ yayapikieki manuma꞉ iki hatuku pua ika꞉ epeke haleme alena꞉ mea lopaama꞉na꞉ loa꞉me. \v 18 Kotoeki na pikita꞉ nika꞉ Pa꞉ta꞉la꞉la꞉ Tekehali Yesu Ketisona꞉ hone ula꞉eki make a꞉ta꞉ma꞉ homolo tamba꞉ mina꞉la꞉eki pa꞉ta꞉ daeyatia pu hapa꞉peke. Ipiki pa꞉ta꞉ pa̱a̱ pa꞉la꞉eki ame make wetepe nina꞉ make wina꞉e. Kutu pina꞉e.