\id 2CO - Sembeleke Samberigi PNG 2 CORINTH 01 22/3/91 Macnaughtan \h 2 KOTINDI \toc1 Poloma꞉ Kotindi Siosi pa꞉ta꞉ yaapo peao tapaeyeke wapee \toc2 2 Kotindi \toc3 2 Kotindi \mt1 Poloma꞉ Kotindi Siosi pa꞉ta꞉ yaapo peao tapaeyeke wapee \c 1 \p \v 1 Koda꞉na꞉ hone pa꞉la꞉ ekina꞉ I̱ta꞉ Yesu Ketisona꞉ aposolo hali hano la꞉la꞉ hali I̱ Poloma꞉ make nika꞉ kame Timodima꞉ make tapaasopa꞉ wape doe. Mo Kotindi da pa꞉ta꞉ Koda꞉na꞉ siosi pa꞉ta꞉ make mo Akaya kenke pa꞉ta꞉ hala꞉ Koda꞉na꞉ wanda꞉hali pa꞉ta꞉ alopa꞉me. \v 2 Nika꞉ Apa꞉ Koda꞉ma꞉ make Tekehali Yesu Ketisoma꞉ make iki pa꞉ta꞉ a꞉ta꞉ma꞉ homa tamba꞉ mina꞉la꞉eki make puki lopaniaasa꞉eki make kina꞉e. \s1 Poloma꞉ Koda꞉ pa꞉ta꞉ keiyae leekeeki \p \v 3 Niki paeyaoma꞉ mo Koda꞉ nika꞉ Tekehali Yesu Ketisona꞉ Apa꞉ pa꞉ta꞉ keiyae lomana꞉e. Ipikita꞉ pa hameke a꞉ta꞉ma꞉ homa꞉la꞉ Apa꞉ hata꞉ mo tamba꞉ mina꞉la꞉ ekita꞉ ipiki pa꞉ta꞉ yama꞉ ipu hala꞉me. \v 4 Ipikana꞉ma꞉ nika꞉ ka꞉nda꞉manu minoloma꞉ pa꞉ta꞉ tamba꞉ mu hala꞉me. Pa ekipeke ipikana꞉ma꞉ niki tamba꞉ mia꞉eki muma꞉ ekita꞉ mo mandane ka꞉nda꞉ma꞉ homa꞉la꞉ wanda꞉hali tamba꞉ miomono pa꞉la꞉me. \v 5 Nikita꞉ mo hande Ketisona꞉ tandamanu putu poloma꞉ tupa꞉ kone Ketiso pa꞉ta꞉ yama꞉ta꞉ Koda꞉na꞉ aneke tamba꞉ mina꞉la꞉eki putu poloma꞉me. \v 6 Tanda noma꞉ka꞉na꞉ta꞉ kota꞉ kotota꞉ ika꞉ tamba꞉ mina꞉la꞉eki make pa꞉ta꞉la꞉la꞉eki make minoloma꞉me. Nikita꞉ tamba꞉ mia꞉ka꞉na꞉ta꞉ kota꞉ iki make tamba꞉ mina꞉la꞉me. Do hau manuma꞉ta꞉ mo nikana꞉ma꞉ minoloma꞉ homeke haupiki tandamanu ikana꞉ma꞉ make minelemeeki pa꞉ta꞉ta꞉ mo homu pea hata꞉ kima꞉ na homa꞉la꞉eki anekema꞉ daena꞉ lelimikie. \v 7 Koto ekina꞉ iki pa꞉ta꞉ nika꞉ hone ti laaloma꞉ ekita꞉ ota꞉ hone yaapo yaapo na uluma꞉me. Ikana꞉ma꞉ nika꞉ ka꞉nda꞉manu telipa mineleme ekina꞉ta꞉ ikana꞉ma꞉ make nika꞉ tamba꞉ mina꞉la꞉eki minoloma꞉ ekita꞉ putupa minelememe laa hone witoloma꞉me. \p \v 8 Kame tonuo nikana꞉ma꞉ mo hande Eisia kenke pa꞉ta꞉ muma꞉ ka꞉nda꞉manu iki pa꞉ta꞉ pa hone u tiaaluekema꞉ hone pa꞉la꞉me. Mo niki manda wia꞉ ka꞉nda꞉ manuta꞉ tieke hombeleke make ka꞉nda꞉ tieke pia꞉ ekima꞉ nikita꞉ do kenkena꞉ hana̱la̱꞉ na pia꞉me hone uma꞉me. \v 9 Niki pa꞉ta꞉ homena꞉e ala꞉ pita꞉ amba꞉ la꞉ wiki nono pia꞉me. Pate doeki pia꞉ ekita꞉ nikana꞉ma꞉ nika꞉ homeke na ti lake pa mo homa꞉la꞉eki mea tiao hala꞉ Koda꞉ pa꞉ta꞉ homeke hone tulaamono pia꞉me. \v 10 Dupiki ota꞉ hoke paala꞉piki homa꞉la꞉ ekimanu pa꞉ta꞉ ipikana꞉ma꞉ niki tamba꞉ mia꞉ ekina꞉ta꞉ nikana꞉ma꞉ta꞉ niki paa tamba꞉ milieke laa nika꞉ honeta꞉ ipiki pa꞉ta꞉ tulaaloma꞉me. \v 11 Kutupa make niki tamba꞉ minolo yeni peaasome ekima꞉ta꞉ ipikana꞉ma꞉ niki pa tamba꞉ mina꞉ lelimikie. Koto ekina꞉ta꞉ nikina꞉ piteleme yeni paeyaota꞉ hombo pealieke. Kutupa Koda꞉ma꞉ niki epeaalieke. Koto ekina꞉ wopuma꞉ nikina꞉ Koda꞉ pa꞉ta꞉ keiyae lelimikie. \s1 Pulueke laa la꞉ wieke ekita꞉ paa topo piekeeki \p \v 12 Nika꞉ honema꞉ ota꞉ hau pelememe laa peneme yaasekena꞉ ta꞉na꞉ma꞉ homoloma꞉ ekita꞉ dupae. Nika꞉ pitoloma꞉ hau paeyao pa꞉ta꞉ta꞉ Koda꞉ma꞉ kita꞉la꞉ yakopiki hau make tikitiki piki hau make pitoloma꞉me. Dupiki hau manuta꞉ do kenkena꞉ hone u lenkena꞉ peaasa꞉eki pa꞉ta꞉ na a꞉pa꞉la꞉me. Pate mo Koda꞉na꞉ a꞉ta꞉ma꞉ homa tamba꞉ mina꞉la꞉ ekima꞉ homeke puma꞉me Dupiki haumanu puma꞉ ekita꞉ mo wanda꞉hali paeyao pa꞉ta꞉ puma꞉pate pa iki pa꞉ta꞉ homeke hone wopu witolo hata꞉ puma꞉me. \v 13-14 Nikana꞉ma꞉ta꞉ ikana꞉ma꞉ yata꞉polo hata꞉ hone ulu pelemeeki homeke laa tapaasoma꞉me. Ikana꞉ma꞉ nikita꞉ hosiki siki hone uluma꞉pate yaka hone pa꞉la꞉ ekima꞉ta꞉ ikana꞉ma꞉ nikita꞉ hone wopu wilimikie. Pa ekipeke mo nika꞉ Tekehali Yesuna꞉ Natena꞉ta꞉ nikana꞉ma꞉ ikina꞉ ta꞉na꞉ma꞉ homolo poloma꞉ tupa꞉ ikana꞉ma꞉ make nikina꞉ homeke hau kone pilimikie. \p \v 15 I̱ta꞉ doeki manuna꞉ hone lenkipa꞉ witolota꞉ iki yaapo peao epeaena꞉ honema꞉ iki handolo ipuluekema꞉ hone pambao ua꞉me. \v 16 I̱ mo Diudia nane pua꞉peke ekina꞉ tamba꞉ mina꞉la꞉ ekimanu ma꞉nda꞉ iki pa꞉ta꞉ muluekema꞉ yaka hone pambao witolota꞉ mo Ma꞉sedonia nane yopulu make pa la꞉ka꞉la ipulu make iki handa꞉ tia ipulueke hone ua꞉me. \v 17 Doeki hone pambao witolota꞉ iki pa꞉ta꞉ta꞉ I̱ta꞉ hone topo topo pu halo some hone wimipe. I̱ma꞉ yaka hone pambaasota꞉ mo kenke hauna꞉ I̱ I̱ alo hata꞉ aoma aoma make dia꞉ma꞉ma dia꞉ma꞉ma pita꞉ homeke dina꞉ lo halope. \v 18 Ota꞉ Koda꞉ma꞉ta꞉ ota꞉ pi homeke lo hala꞉ ekina꞉ta꞉ I̱ma꞉ iki pa꞉ta꞉ la꞉ ua꞉ ekita꞉ mo aowe make dia꞉me pi yaapo na la꞉ ua꞉me. \v 19 Pa ekipeke mo Yesu Ketiso Koda꞉na꞉ Eiyeke hande Sailasima꞉ make Timodima꞉ make I̱ma꞉ make iki pa꞉ta꞉ hande waloma꞉ hali ipikita꞉ aowe make dia꞉me hali dia꞉me. Ota꞉ dia꞉ya꞉la꞉pate ipikita꞉ ota꞉ Koda꞉na꞉ Aowe homekee. \v 20 Pa ekipeke Koda꞉na꞉ pi la꞉ ula꞉ ekimanu paeyaota꞉ ipiki pa꞉ta꞉ yama꞉ Aowe la꞉la꞉me. Koto ekina꞉ta꞉ Koda꞉na꞉ biki tieke wina꞉ loluekema꞉ta꞉ nika꞉ Kutu pina꞉e. Keiyae pita꞉ Yesu Ketiso pa꞉ta꞉ yama꞉ aloma꞉me. \v 21 Koda꞉ ipikana꞉ma꞉ homeke niki iki ame̱le̱ Ketiso pa꞉ta꞉ tunaaloma꞉ ekima꞉ta꞉ nika꞉ da꞉ta꞉la꞉ ekita꞉ ota꞉ wia haloma꞉me laa hone lenkipa wiomono ala꞉me. \v 22 Koda꞉ma꞉ kone niki ma̱leke lila꞉me. Ipikana꞉ma꞉ ombu nikita꞉ ipika꞉ ekie laata꞉ ipika꞉ tombo niki pa꞉ta꞉ ula꞉me. Koda꞉ma꞉ mo niki pa꞉ta꞉ ka꞉la꞉ Holi Sipitidita꞉ ipika꞉ wetepena꞉ kulu pa꞉la꞉ ale paeyaona꞉ titina꞉ tombo ka꞉la꞉mee. \p \v 23 Koda꞉ta꞉ yaka wekitisi hali lonoe. Ipikana꞉ma꞉ta꞉ yaka honeta꞉ hone ula꞉me. I̱ma꞉ta꞉ iki ka꞉nda꞉ kia꞉peke yeketa꞉ Kotindi nane pao na poa꞉me. \v 24 Nikana꞉ma꞉ta꞉ ika꞉ hone tulaalemeeki manuta꞉ dupi dupi alo dia꞉me. Ikana꞉ma꞉ hone tulaaseme ekita꞉ amba꞉ koto honkopu hao wia haleme handa꞉e. Koto ekina꞉ nikana꞉ma꞉ta꞉ iki ta꞉na꞉ma꞉ homelemeeki mea a꞉paaluekema꞉ iki ame̱le̱ apa꞉tao e pokoloma꞉me. \c 2 \p \v 1 Koto ekina꞉ta꞉ yaka hone witolota꞉ ika꞉ pukima꞉ ka꞉nda꞉ homaapa꞉na꞉ pao na ipulueke hone ua꞉me. \v 2 Pa ekipeke I̱ma꞉ ika꞉ pukima꞉ ka꞉nda꞉ homa꞉ tiawa꞉ka꞉na꞉ yoluta꞉ ma꞉nda꞉ epima꞉ I̱ ta꞉na꞉ma꞉ homa꞉ tiaalo pia꞉pe. Ota꞉ mo hande ika꞉ pukima꞉ ka꞉nda꞉ homawa꞉ tapake homeke yolo pia꞉me. \v 3 Koto ekina꞉ta꞉ I̱ma꞉ koto tameiya꞉ tapaowa꞉me. Pa ekipeke I̱ma꞉ta꞉ iki pa꞉ta꞉ a꞉pa yaka ta꞉na꞉ma꞉ homa꞉ tiaapeke ya꞉la꞉ tapakema꞉ kone I̱ puki ka꞉nda꞉ma꞉ homo tiaaseme laa laapa꞉na꞉ alo pua꞉me. I̱ma꞉ hone witolota꞉ I̱ ta꞉na꞉ma꞉ homolo dina꞉ta꞉ iki paeyao make ta꞉na꞉ma꞉ homelememe. \v 4 Iki pa꞉ta꞉ tameiya꞉ tapaowa꞉ta꞉ yaka puki ka꞉nda꞉ tieke pitolo hata꞉ tanda tieke pia꞉me. Kutupa e̱ wopu loa꞉me. Mo tameiya꞉ tapaowa꞉ ekina꞉ teketa꞉ ika꞉ puki ka꞉nda꞉ma꞉ homaaluekema꞉ na pua꞉pate ikana꞉ma꞉ I̱ma꞉ iki pa꞉ta꞉ pukima꞉ homoloeki hone uemena꞉yeke pua꞉me. \s1 Hoke hau pa꞉la꞉ halina꞉ hoke hau paeyaasa꞉eki \p \v 5 Ma꞉nda꞉ epima꞉ ma꞉nda꞉ pa꞉ta꞉ puki ka꞉nda꞉ma꞉ homa꞉ tiaeya꞉ ekita꞉ ipikana꞉ma꞉ I̱ pa꞉ta꞉ na pia꞉pate iki paeyao pa꞉ta꞉ ka꞉nda꞉ putupa kia꞉me alome. Koto ka꞉nda꞉ putupa kia꞉me pi alo ekita꞉ I̱ma꞉ mo some lombei piki tupa꞉ hando lapeke yeke alome. \v 6 Iki wopuma꞉ hande some dupiki tupa꞉ panisi peaeme ekita꞉ ana꞉e. \v 7 Ameta꞉ epeke ekita꞉ mo somema꞉ ka꞉nda꞉ma꞉ homolo hata꞉ Ketiso mina꞉pa꞉laapa꞉na꞉ iki paeyaoma꞉ ipika꞉ hoke hau pa paeyao epeke hau pina꞉ sutiaapa꞉peke ya꞉la꞉me. \v 8 Koto ekina꞉ta꞉ ikana꞉ma꞉ ipiki pa꞉ta꞉ ika꞉ pukima꞉ homelemeeki ota꞉ peneme yaapa꞉peke laa honke alome. \v 9 I̱ma꞉ iki pa꞉ta꞉ koto tameiya꞉ tapaowa꞉ ekita꞉ I̱ma꞉ mo hande la handa꞉la꞉eki kua꞉ ekita꞉ ikana꞉ma꞉ ekipa bepolaalimipe la handuluekema꞉ pua꞉me. Kutupa ikana꞉ma꞉ta꞉ hoto paeyao yaka alo ekimanu koto kone opua pilimio la handuluekema꞉ pua꞉me. \v 10 Ikana꞉ma꞉ hali ma꞉nda꞉ma꞉ pa꞉la꞉eki pa paeyawaemeka꞉na꞉ta꞉ kota꞉ I̱ma꞉ make pa paeyawalueke. Ma꞉nda꞉na꞉ pa paeyaapeke ekita꞉ I̱ma꞉ pa paeyaapeke ya꞉la꞉me hone ua꞉ka꞉na꞉ta꞉ kota꞉ iki hoeyaapa꞉na꞉yeke I̱ma꞉ Ketisona꞉ leke popelekena꞉ hata꞉ pu halome. \v 11 Kutu pu halo ekina꞉ teketa꞉ mo Sadanima꞉ niki bepolaama꞉na꞉ loa꞉me. Pa ekipeke nikana꞉ma꞉ta꞉ ipika꞉ hoke hone pambao ula꞉eki manuta꞉ amba꞉ hone uluma꞉me. \s1 Poloma꞉ Dotoa꞉si da pa꞉ta꞉ta꞉ hone ka꞉nda꞉ma꞉ homeekeeki \p \v 12 I̱ mo Dotoa꞉si da pa꞉ta꞉ Ketisona꞉ Pi Seliapo waluekema꞉ opolo puaata꞉ koto pa꞉ta꞉ pokolo pua꞉ eta꞉ mo Tekehalima꞉ amba꞉ pota꞉ wiayekeeki handa꞉ ua꞉me. \p \v 13 Pate I̱ta꞉ pomo tieke pia꞉me. Pa ekipeke nika꞉ kame Taitasita꞉ na handa꞉ u hao loa꞉me. Koto ekina꞉ta꞉ I̱ma꞉ta꞉ mo wanda꞉hali pa꞉ta꞉ A꞉taloe laa mo Ma꞉sedonia nane poa꞉me. \s1 Ketiso pa꞉ta꞉ yama꞉ bepolaapa꞉pekeeki \p \v 14 Kutu pua꞉pate Koda꞉ pa꞉ta꞉ keiyae lomana꞉e. Pa ekipeke Ketiso pa꞉ta꞉ apa꞉tao haloma꞉ ekima꞉ta꞉ Koda꞉ma꞉ nikita꞉ Ketisona꞉ bepolaala꞉ ekima꞉ta꞉ dipula wanda꞉hali leke sama꞉ titina꞉ hatuku pu hala꞉me. Mo Ketiso hone wita꞉la꞉ ekita꞉ Koda꞉ma꞉ niki pa꞉ta꞉ yama꞉ e pokolo hata꞉ mo hande totopopiki ale putu pa꞉la꞉ tupa꞉ kenke honiki paeyao pa꞉ta꞉ putu pa꞉la꞉me. \v 15 Nikita꞉ mo hande Ketisoma꞉ Koda꞉ pa꞉ta꞉ hala꞉la꞉ totopopiki alema꞉ handoloma꞉me. Koto aleta꞉ mo da꞉taasa꞉ wanda꞉hali make alu pa꞉la꞉ wanda꞉hali anka꞉lopuna꞉ putupu hala꞉ alema꞉ handoloma꞉me. \v 16 Mo alu pa꞉la꞉ wanda꞉hali pa꞉ta꞉ta꞉ wanda꞉hali lu homaasa꞉ tandepeke punkupiki alema꞉ handa꞉la꞉me. Pate mo detena꞉yeke pa꞉ta꞉la꞉la꞉ wanda꞉hali pa꞉ta꞉ta꞉ mo wanda꞉hali da꞉taapeke ya꞉la꞉ totopopiki ale ipula꞉ ekima꞉ handa꞉la꞉me. Koto ekina꞉ta꞉ dupiki ka꞉nda꞉piki e pokaaluekema꞉ta꞉ epita꞉ ana꞉ pa꞉la꞉pe. \v 17 Nikita꞉ mo hande mandane wanda꞉halima꞉ Koda꞉na꞉ pita꞉ mo bisinisi pea꞉peke alesiki leke pu haleme tupa꞉ na pu haloma꞉pate Koda꞉ma꞉ niki tapaala꞉ ekina꞉ta꞉ nikita꞉ Ketisona꞉ e pokaasa꞉ haliweki hata꞉ ipika꞉ pita꞉ Koda꞉na꞉ leke popelekena꞉ tikitiki yao poko haloma꞉me. \c 3 \s1 Panake pina꞉ e poka꞉la꞉ haliweki \p \v 1 Do alo ekita꞉ nikana꞉ma꞉ nika꞉ kone biki pa mina꞉liake nono pa꞉la꞉pe. O mandane wanda꞉halima꞉ piteleme tupa꞉ mo biki epeaasa꞉ tameiya꞉manu iki pa꞉ta꞉ kiomonope o iki pa꞉ta꞉ yama꞉ miomonope. \v 2 Dia꞉me iki kone nika꞉ wape pea ula꞉ tameiya꞉e. Paeyaoma꞉ yata꞉pa hone wina꞉yeke ikita꞉ nika꞉ pukina꞉ wape pea ula꞉me. \v 3 Ketiso ipika꞉ kone do tameiya꞉ lao niki pa꞉ta꞉ tapaala꞉ ekita꞉ penemena꞉ ula꞉me. Do tameiya꞉ta꞉ halina꞉ kikima꞉ na laala꞉pate mo deto hala꞉ Koda꞉na꞉ Sipitidima꞉ laala꞉me. Ipikana꞉ma꞉ta꞉ mo toopi sasakena꞉ na laala꞉pate wanda꞉halina꞉ puki manuna꞉ laala꞉me. \p \v 4 Nikana꞉ma꞉ doeki alome ekita꞉ Yesu pa꞉ta꞉ yama꞉ Koda꞉ pa꞉ta꞉ amba꞉ hone baaloma꞉me. \v 5 Nikana꞉ma꞉ ana꞉na꞉ kone do eta꞉ pokaalumeke pi lapeketa꞉ ota꞉ waleke ma꞉nda꞉ na ula꞉me. Nikana꞉ma꞉ pea꞉peke honkoputa꞉ Koda꞉ pa꞉ta꞉ yama꞉ ipula꞉me. \v 6 Ipikana꞉ma꞉ta꞉ nikana꞉ma꞉ do panake la꞉ ula꞉ pi pa꞉ta꞉ e pokomono niki wele peaasa꞉me. Do panake la꞉ ula꞉ pita꞉ mo wape pea ula꞉ Lo Pi dia꞉ya꞉la꞉pate pa mo Sipitidima꞉ peaasa꞉ekie. Mo wape pea ula꞉ Lo pima꞉ta꞉ homa꞉la꞉eki mea ipula꞉pate pa mo Sipitidima꞉ta꞉ da꞉ta꞉la꞉eki kita꞉la꞉me. \p \v 7 Mo Mosesina꞉ Lo Pita꞉ toopi sasakena꞉ wape pea lao halea꞉ dina꞉ta꞉ Koda꞉na꞉ pa̱a̱ opolo epeekeme. Kutupa koto Mosesina꞉ leke popelekena꞉ pia꞉ pa̱a̱ta꞉ paa alu putia pea꞉pate kone honkopu wopu pia꞉ ekima꞉ mo Isulai wanda꞉halima꞉ta꞉ ipiki na handaake wimikime. Mo homa꞉la꞉eki mea ipula꞉ Lo Pita꞉ ipika꞉ e poka꞉la꞉ dina꞉ dupiki pa̱a̱ pa꞉la꞉eki mea a꞉pa꞉peke ya꞉la꞉me hone uma꞉ka꞉na꞉ta꞉ \v 8 kota꞉ mo Sipitidina꞉ pita꞉la꞉ haumanu pa꞉ta꞉ ipula꞉ pa̱a̱ta꞉ ekipiki pa̱a̱ tieke pa꞉la꞉pe hone umana꞉e. \v 9 Mo hoke yenki mea ipula꞉ Lo Pina꞉ hauta꞉ ota꞉ yole pia꞉pate pa mo da꞉taapeke pa꞉ta꞉la꞉la꞉eki mea a꞉pa꞉la꞉ ekita꞉ ota꞉ lombei pikieki yole pa꞉la꞉me. \v 10 Nikana꞉ma꞉ dupa lapeke ya꞉la꞉me. Ame do ota꞉ lombei piki pa̱a̱ wopu pa꞉la꞉ ekima꞉ta꞉ mo amba꞉ hande pa̱a̱ wopu pieke ekita꞉ alu pa꞉la꞉me lapeke ya꞉la꞉me. \v 11 Kutupa mo amba꞉ hande nate leke hosiki hokuluna꞉ pa wieke ekina꞉ta꞉ pa̱a̱ piekeme loma꞉ka꞉na꞉ta꞉ kota꞉ mo ame do honiki na wiki ota꞉ hao hala꞉ ekina꞉ pa̱a̱ta꞉ ota꞉ lombei peaake pa̱a̱ pa꞉la꞉me laa hone umana꞉e. \p \v 12 Nikita꞉ do hone tulao handeteke haloma꞉eki wia haloma꞉ ekima꞉ta꞉ nikita꞉ honkopu wopu haloma꞉me. \v 13 Nikita꞉ mo hande Mosesi tupa꞉ dia꞉me. Ipikana꞉ma꞉ta꞉ mo Isulai wanda꞉halima꞉ ipika꞉ leke popelekena꞉ pa̱a̱ tieke pia꞉eki alu paeya꞉eki handaama꞉na꞉ yeke ipika꞉ leke popeleketa꞉ dau sinkipiki ma꞉nda꞉ma꞉ a꞉mbeeke tupa꞉ dia꞉me. \v 14 Ika꞉ hone manuta꞉ ota꞉ a꞉mbao pambeekeme. Kutupa a꞉pa ota꞉ ame do natena꞉ make mo hande amba꞉ Lo pi lao wieke bukamanu yata꞉pelemeketa꞉ ika꞉ hone manuta꞉ mo hande dau sinkipiki ma꞉nda꞉ma꞉ a꞉mbaala꞉me. Ma꞉nda꞉ epima꞉ Ketiso pa꞉ta꞉ tunaeya꞉ka꞉na꞉ homeketa꞉ kota꞉ mo leke popeleke a꞉mbaala꞉ dau sinkipiki ma꞉nda꞉ mea baapeke ya꞉la꞉me. \v 15 Ota꞉ ame do make mo Mosesina꞉ Lo Pi yata꞉pelemeketa꞉ mo dau sinkipikima꞉ta꞉ ika꞉ hone manuta꞉ paa a꞉mbao hala꞉me. \v 16 Pate ana꞉na꞉ mea baapeke ya꞉la꞉me. Pa ekipeke mo Baiboloma꞉ Mosesi hotiolo hata꞉ alota꞉ Ipika꞉ leke popeleke a꞉mbaala꞉ dau sinkipiki mea bake hauta꞉ ipiki Tekehali pa꞉ta꞉ la꞉ka꞉la pea꞉ dina꞉ pia꞉me la꞉la꞉ tupa꞉ loa꞉me. \v 17 Koto Tekehali pa꞉ta꞉e la꞉la꞉ ekita꞉ mo Sipitidi pa꞉ta꞉ konee la꞉la꞉me. Kutupa mo Tekehalina꞉ Sipitidi hala꞉ ale pa꞉ta꞉ta꞉ kota꞉ ka꞉la꞉pa꞉ tapaasa꞉ hau ula꞉me. \v 18 Kota꞉ niki paeyaota꞉ mo Tekehalina꞉ pa̱a̱ta꞉ na a꞉mbake nika꞉ leke popelekema꞉ta꞉ ipika꞉ pa̱a̱na꞉ su̱a̱ su̱a̱ waloma꞉me. Kutupa koto homeke pa̱a̱ma꞉ kone Tekehali hande Sipitidi pa꞉ta꞉ yama꞉ ipula꞉ ekima꞉ta꞉ nikita꞉ mo hoto paeyao pa daeya꞉tiki pu hala꞉ pa̱a̱ tieke pa꞉ta꞉ ipikima꞉ handomono topo peao hala꞉me. \c 4 \s1 Kanake pa꞉ta꞉ ti teke pambo ula꞉eki \p \v 1 Koda꞉ma꞉ a꞉ta꞉ma꞉ homa tamba꞉ mina꞉la꞉ hali hata꞉ niki do e pokomono ka꞉la꞉me. Koto ekina꞉ta꞉ do e pa꞉ta꞉ta꞉ ka꞉nda꞉manu ipula꞉pate niki ki hone na uluma꞉me. \v 2 Nikana꞉ma꞉ta꞉ mo a꞉mbaasa꞉ haumanu make yaala꞉piki haumanu make hoe nane wina꞉ loloma꞉me. Nikana꞉ma꞉ta꞉ makeaasa꞉ haumanu na pu haloma꞉me. Kutupa Koda꞉na꞉ pi walolo hata꞉ta꞉ ata꞉ka꞉ peake tupa꞉ na walo haloma꞉me. Nikana꞉ma꞉ta꞉ Koda꞉na꞉ leke popelekena꞉ hata꞉ mo ota꞉ pita꞉ wanda꞉halima꞉ opitolo hata꞉ta꞉ epeke tupa꞉ walelememe alo haena꞉ peneme yao walo haloma꞉me. \v 3 Nikana꞉ma꞉ peneme yao waloloma꞉ Pi Seliapota꞉ ma꞉nda꞉ pa꞉ta꞉ a꞉mbao wia꞉ka꞉na꞉ta꞉ kota꞉ mo alupa꞉la꞉ pota꞉na꞉ polo peleme wanda꞉hali pa꞉ta꞉ homeke a꞉mbao ula꞉me. \v 4 Ikana꞉ma꞉ hone na tulaasememe. Pa ekipeke do kenkena꞉ hoke koda꞉ma꞉ta꞉ ika꞉ hone manuta꞉ timba꞉ la꞉ pambaena꞉ hala꞉me. Ipikana꞉ma꞉ta꞉ mo ikina꞉ pa̱a̱ peaapeke pa̱a̱ta꞉ handaama꞉na꞉ yeke sa꞉sa꞉ pita꞉la꞉me. Mo Ketiso ota꞉ Koda꞉ma꞉ handeke halina꞉ pa̱a̱na꞉ mo Pi Seliapo pa꞉ta꞉ yama꞉ ipula꞉eki handaama꞉na꞉ yeke pita꞉la꞉me. \v 5 Nikana꞉ma꞉ta꞉ nikina꞉ na waloloma꞉pate pa Yesu Ketisota꞉ Tekehalie laa nikita꞉ waloloma꞉me. Kutupa Yesuna꞉ hone pa꞉la꞉ ekina꞉ ika꞉ pa hameke e pokaasoma꞉ haliwekie laa waloloma꞉me. \v 6 Mo amba꞉ hande Koda꞉ma꞉ alota꞉ Mo timba꞉ la꞉ pamba꞉la꞉ pa꞉ta꞉ta꞉ mo pa̱a̱ pa꞉la꞉ ekima꞉ pa̱a̱ pina꞉e leeke homeke Koda꞉ma꞉ kone mo pa̱a̱ta꞉ nika꞉ pukina꞉ pa̱a̱ peaya꞉me. Kota꞉ pa꞉la꞉ ekita꞉ Koda꞉ma꞉ ipika꞉ pa̱a̱ta꞉ Ketisona꞉ leke popelekena꞉ nikana꞉ma꞉ hone wiomonoyeke pa̱a̱ peaala꞉me. \p \v 7 Koto pa꞉la꞉pate kone do hande ota꞉ epeke ti teke wita꞉la꞉ ekita꞉ pa nikita꞉ mo hande pa baasa꞉ kanake pa꞉ta꞉ kone pamba ula꞉me. Kutu pieke hauna꞉ teketa꞉ mo honkopu tieketa꞉ nika꞉eki dia꞉ya꞉la꞉pate Koda꞉na꞉ ekie laa waluekema꞉ pia꞉me. \v 8 Nikita꞉ hoto ma꞉nda꞉ nina꞉ta꞉ ka꞉nda꞉ma꞉ homo haloma꞉pate ota꞉ lu tumbaaso dia꞉me. Hoto ma꞉nda꞉ nina꞉ta꞉ hone eleke eleke u haloma꞉pate nika꞉ hone pua doka꞉tiki yaala꞉ dina꞉ta꞉ pa pina꞉e hone na u haloma꞉me. \v 9 A꞉nda꞉ tunkuliki hali wopu halemepate nikita꞉ yankeke ame̱le̱ ombu haloma꞉me. Kutupa nate ma꞉nda꞉ nina꞉ta꞉ oni kenkena꞉ lu lopao halemepate nikita꞉ ota꞉ na hoyo haloma꞉me. \v 10 Hoto paeyaota꞉ nika꞉ kenke lokena꞉ta꞉ mo Yesuna꞉ homeekeeki meatia pomu haloma꞉me. Pa ekipeke nika꞉ loke pa꞉ta꞉ta꞉ ipiki da꞉ta hala꞉eki handena꞉yeke loa꞉me. \v 11 Yesuna꞉ ekina꞉ nika꞉ hatia puluma꞉ ale pa꞉ta꞉ manuta꞉ homa꞉la꞉eki teke pa꞉ta꞉ hao haloma꞉me. Pa ekipeke ipika꞉ deto hala꞉ ekita꞉ nika꞉ do kenke loke pa꞉ta꞉ handena꞉yeke pitoloma꞉me. \v 12 Koto ekina꞉ta꞉ homa꞉la꞉ ekita꞉ niki pa꞉ta꞉ e poka꞉la꞉pate pa da꞉ta꞉la꞉ ekita꞉ iki pa꞉ta꞉ e poka꞉la꞉me. \p \v 13 Mo Baiboloma꞉ alota꞉ I̱ma꞉ pi loa꞉ ekina꞉ teketa꞉ I̱ma꞉ hone tulaowa꞉ ekina꞉ pua꞉me la꞉la꞉me. Nikana꞉ma꞉ make homeke hone tulaasa꞉ hauma꞉ dupa aloma꞉me. Mo loma꞉eki manuna꞉ teketa꞉ nika꞉ hone tulaoma꞉ ekina꞉ puma꞉me. \v 14 Mo hande Tekehali Yesu mea da꞉taeya꞉ Koda꞉ma꞉ta꞉ niki make Yesu taapu mea da꞉taalieke hone uluma꞉me. Kutupa iki ame̱le̱ mandakena꞉ ipiki hala꞉ alena꞉ hatuku pelieke. \v 15 Doeki paeyaota꞉ ika꞉ ekina꞉ peaasa꞉me. Kutupa Koda꞉ ipika꞉ a꞉ta꞉ma꞉ homa tamba꞉ mina꞉la꞉ ekima꞉ wanda꞉hali paeyao pa꞉ta꞉ pulu hata꞉ta꞉ ikana꞉ma꞉ make Koda꞉ pata꞉ pa̱a̱ wopu mina꞉ keiyae ala꞉ yenimanu haka꞉ta꞉pao pu halimikie. \s1 Hone tulaasa꞉eki pa꞉ta꞉ hala꞉eki \p \v 16 Koto ekina꞉ta꞉ niki pa꞉ta꞉ ka꞉nda꞉manu epena꞉ kone ki hone na uluma꞉me. Nika꞉ manda loketa꞉ koke yomo yomo pita꞉la꞉pate nika꞉ temokota꞉ hoto paeyao wamo pea꞉tiki pu hala꞉me. \v 17 Kutupa do hosiki pa ta꞉ka꞉li minoloma꞉ ka꞉nda꞉ manuma꞉ta꞉ koto ka꞉nda꞉ ota꞉ lombeipiki pa u halopa꞉la꞉ seliapo piki pa̱a̱ mea ipilieke. \v 18 Nikana꞉ma꞉ta꞉ nika꞉ leke wia haloma꞉eki manuta꞉ mo lekema꞉ handa꞉peke ale manuna꞉ dia꞉ya꞉la꞉pate pa mo lekema꞉ na handa꞉peke ya꞉la꞉ ale manuna꞉ pu haloma꞉me. Mo lekema꞉ handa꞉peke ale manuta꞉ nate leke hosiki sikina꞉ ulu pa꞉la꞉pate pa mo lekema꞉ na handa꞉peke ya꞉la꞉ ale manuta꞉ hoto paeyao ota꞉ pa u halieke. \c 5 \p \v 1 Koto ekina꞉ta꞉ nikana꞉ma꞉ dupa hone uluma꞉me. Do nika꞉ haloma꞉ palai data꞉ nika꞉ kenke loke yalo hata꞉ leisiya꞉ka꞉na꞉ta꞉ kota꞉ Koda꞉ma꞉ niki hao hapeke da oli hepeni wialieke. Mo data꞉ ota꞉ ipika꞉ kone a꞉eyaata꞉ hoto paeyao pa hao halieke. \v 2 Kutupa ameta꞉ nika꞉ we pamba꞉la꞉ ekita꞉ oli hepeni nanema꞉ ipula꞉ data꞉ niki manda wina꞉e laa hone wotu witoloma꞉me. \v 3 Mo ekima꞉ dau leke yamoma꞉ka꞉na꞉ta꞉ nikita꞉ loke dia꞉ya꞉la꞉ wanda꞉hali na halumeke. \v 4 Niki do kenkena꞉ palai da pa꞉ta꞉ hata꞉ta꞉ ka꞉nda꞉ma꞉ homolo hata꞉ wese lo haloma꞉me. Do ekita꞉ mo nika꞉ kenke loke mea baaluekema꞉ dia꞉ya꞉la꞉pate nika꞉ hone pa꞉la꞉ ekita꞉ mo hepenina꞉eki nikina꞉ pambaena꞉yeke loma꞉me. Pa ekipeke mo homo hala꞉ ekita꞉ da꞉ta꞉la꞉ ekima꞉ da panda꞉ meaka꞉na꞉ bepolalieke. \v 5 Dupiki topo pulu pa꞉la꞉ ekina꞉ta꞉ Koda꞉ma꞉ niki tikitiki yaasa꞉me. Kutupa ipika꞉ Sipitidita꞉ mo wetepena꞉ niki kulu pa꞉la꞉ alena꞉ peneme yaasa꞉ tombo ula꞉eki ka꞉la꞉me. \p \v 6 Koto ekina꞉ta꞉ nikita꞉ hoto paeyao hali au la hata꞉ honkopu hao haloma꞉me. Nikita꞉ do nika꞉ lokena꞉ da pa꞉ta꞉ pa hata꞉ kone mo Koda꞉na꞉ da papate haloma꞉me laa hone uluma꞉me. \v 7 Pa ekipeke nika꞉ da꞉ta꞉la꞉ ekita꞉ lekema꞉ handa꞉la꞉ ekima꞉ dia꞉ya꞉la꞉pate hone tulaasa꞉ ekima꞉ homekee. \v 8 Nikita꞉ hali au la hata꞉ honkopu hao haloma꞉ ekima꞉ta꞉ nika꞉ honema꞉ do nika꞉ lokena꞉ data꞉ mina꞉pa꞉lao mo Tekehali ame̱le̱ oli da pua hao hawee hone uluma꞉me. \v 9 Pate nika꞉ hone pa꞉la꞉ hau paeyaona꞉ titina꞉ hau homeketa꞉ dupae. Ame do haloma꞉ da pa꞉ta꞉ make oli polo poloma꞉ da pa꞉ta꞉ make mo Tekehali ta꞉na꞉ma꞉ homaapeke hau homeke puluekema꞉ taapo haloma꞉me. \v 10 Pa ekipeke niki paeyaota꞉ ipikana꞉ma꞉ pi yokaalu pina꞉ Ketisona꞉ leke popelekena꞉ pua hapeke ya꞉lieke. Homeke homekema꞉ ipika꞉ mea꞉peke ya꞉la꞉ ekita꞉ ota꞉ milieke. Ipika꞉ kenke lokema꞉ epekeeki o hokeeki pa꞉la꞉eki paeyao sikina꞉ ana꞉na꞉ kone milieke. \s1 Ketiso pa꞉ta꞉ yama꞉ Koda꞉na꞉ yankeke hasa꞉eki \p \v 11 Koda꞉ paala꞉ma꞉ homa꞉peke ya꞉la꞉ ekita꞉ nikana꞉ma꞉ hone uluma꞉me. Koto ekina꞉ta꞉ nikana꞉ma꞉ta꞉ mandane wanda꞉hali hone la꞉ka꞉laluekema꞉ taapo haloma꞉me. Koda꞉ma꞉ta꞉ nika꞉ hau paeyaosiki hone wopu ula꞉eki yalo yaka honema꞉ta꞉ ikana꞉ma꞉ make ika꞉ temokoma꞉ I̱ make hone witolo pelememe. \v 12 Nikana꞉ma꞉ta꞉ ikana꞉ma꞉ nika꞉ biki paa mina꞉liamena꞉ loluekema꞉ na taapoloma꞉pate pa ikana꞉ma꞉ wanda꞉halina꞉ leke popelekena꞉ nikina꞉ ta꞉na꞉ma꞉ homolo hata꞉ epeke pimanu la haloemena꞉ yeke taapoloma꞉me. Dupiki hauta꞉ mo halina꞉ ota꞉ hau mina꞉pa꞉lao pa manda lokena꞉ epeke hau handolo biki mina꞉liaasa꞉ wanda꞉hali pa꞉ta꞉ ana꞉na꞉ hombo pealo peleme ekina꞉ loa꞉me. \v 13 Nikita꞉ kea tikitiki puma꞉ka꞉na꞉ta꞉ kota꞉ Koda꞉na꞉eki kone peaaso pitoloma꞉me. Make nika꞉ honema꞉ kesema꞉ puma꞉ka꞉na꞉ta꞉ kota꞉ ika꞉eki kone peaaso pitoloma꞉me. \v 14 Ketisona꞉ pukima꞉ homa꞉la꞉ ekima꞉ta꞉ niki handeteke hala꞉me. Pa ekipeke nikana꞉ma꞉ hone witolota꞉ hali homekema꞉ta꞉ paeyaona꞉ homaeyekeme. Koto hauma꞉ta꞉ paeyaoma꞉ ipika꞉ homa꞉la꞉eki putu pelememe. \v 15 Ipikita꞉ paeyaona꞉ homeeke ekita꞉ pa mo da꞉ta haleme wanda꞉halita꞉ ika꞉ kone na halo pelemepate pa ikina꞉ mo homa paa tiao da꞉ta꞉la꞉ hali pa꞉ta꞉ haena꞉yeke pa꞉la꞉me. \p \v 16 Koto ekina꞉ta꞉ ameta꞉ ma꞉nda꞉na꞉ manda hauna꞉ dupiki somee dupiki somee pi na aloma꞉me. Kenke hali tupa꞉ mo nate ma꞉nda꞉na꞉ Ketisota꞉ dupiki somee o mukutu piki somee loma꞉ ekita꞉ ameta꞉ kotoeki ota꞉ pa na aloma꞉me. \v 17 Ma꞉nda꞉ epita꞉ Ketiso pa꞉ta꞉ tunaeya꞉ka꞉na꞉ta꞉ kota꞉ ipikita꞉ panake some hala꞉me. Amba꞉ ekita꞉ pulu hata꞉ panakeeki a꞉pa꞉la꞉me. \p \v 18 Doeki paeyaota꞉ Koda꞉ma꞉ peala꞉me. Kotota꞉ ipikana꞉ma꞉ Ketiso pa꞉ta꞉ yama꞉ nikita꞉ ipika꞉ a꞉nda꞉ tunkuliki wanda꞉hali topo pea yankekemanu hamono la꞉la꞉me. Kutupa nikana꞉ma꞉ mandane wanda꞉hali ipika꞉ yankeke au laamono koto e tieke ka꞉la꞉me. \v 19 Nikana꞉ma꞉ waloloma꞉ ekita꞉ Koda꞉ma꞉ta꞉ wanda꞉hali paeyaota꞉ Ketiso pa꞉ta꞉ yama꞉ ipika꞉ yankeke au laala꞉ ekina꞉ aloma꞉me. Koda꞉ma꞉ta꞉ iki pi yokaalu puluekema꞉ ika꞉ hoke hau na yata꞉pea꞉me. Kutupa ipikana꞉ma꞉ta꞉ mo wanda꞉hali ipika꞉ yankekemanu au lao hala꞉ pita꞉ niki pa꞉ta꞉ la kia꞉me. \v 20 Koto ekina꞉ ameta꞉ niki do Ketisona꞉ pi lawaaso handa꞉e. Koda꞉ niki pa꞉ta꞉ yama꞉ ipika꞉ homu toluma꞉ wi la꞉la꞉eki kone peneme yaasa꞉me. Nikana꞉ma꞉ta꞉ Ketisona꞉ pi laaso hata꞉ wi aloma꞉ ekita꞉ dupae. Koda꞉ma꞉ iki a꞉nda꞉ tunkuliki wanda꞉hali halemeeki topo peao ipika꞉ yankeke au laena꞉ lapee lo haloma꞉me. \v 21 Ketiso pa꞉ta꞉ hoke hau ma꞉nda꞉ na wia꞉pate kone nika꞉ epeke hau peaaso hata꞉ Koda꞉ma꞉ ipikita꞉ nika꞉ hoke hau putupa꞉ mina꞉ leekeme. Pa ekipeke nikana꞉ma꞉ ipiki ame̱le̱ tunaasota꞉ mo Koda꞉na꞉ tikitiki pa꞉la꞉eki putu pomono yeke pa꞉la꞉me. \c 6 \p \v 1 Koto ekina꞉ nikana꞉ma꞉ Koda꞉ ame̱le̱ e pokaasoma꞉ tapake hata꞉ iki Koda꞉na꞉ a꞉ta꞉ma꞉ homa tamba꞉ mina꞉la꞉eki meleme wanda꞉hali pa꞉ta꞉ta꞉ do meleme hauta꞉ na hoeyaapa꞉peke laa honke aloma꞉me. \v 2 Do Koda꞉ma꞉ ala꞉eki opie. \q1 Mo iki pa꞉ta꞉ ta꞉na꞉ pa꞉la꞉eki walo pua꞉ nate epeeketa꞉ I̱ma꞉ iki opua꞉me. \q1 Mo iki petelolo pua꞉ nate opolo epeeketa꞉ I̱ma꞉ iki tamba꞉ mua꞉me laa la꞉la꞉me. \m Opie. Do nate leketa꞉ ota꞉ Koda꞉na꞉ ana꞉ pa꞉la꞉eki mulu peleme nate lekee. Ame do nateta꞉ iki petelo pa꞉la꞉ natee. \p \v 3 Nikana꞉ma꞉ta꞉ ma꞉nda꞉ma꞉ nika꞉ pokoloma꞉ ena꞉ ata꞉ka꞉ pa꞉la꞉eki ma꞉nda꞉ na handa꞉ wina꞉e hone uluma꞉me. Koto ekina꞉ nikana꞉ma꞉ta꞉ mandane wanda꞉halina꞉ pota꞉na꞉ ma꞉nda꞉ ha̱la̱꞉mba꞉ liaena꞉ ala꞉ta꞉ ma꞉nda꞉ uluekema꞉ na taapo haloma꞉me. \v 4 Kotoeki na pikita꞉ nika꞉ pitoloma꞉ hau paeyao pa꞉ta꞉ta꞉ nikita꞉ Koda꞉na꞉ e pokaasoma꞉ haliwekie laa dupa peneme yao haloma꞉me. Mo walolo hata꞉ ka꞉nda꞉ma꞉ homa꞉la꞉ ekimanu make tanda tieke pa꞉la꞉ ekimanu make mamatala꞉ ekimanu pa꞉ta꞉ make ki hone na wiki homu pea yu wia hao haloma꞉me. \v 5 Nikita꞉ yombua baeme ekimanu make dipula mea lopaeme ekimanu make nate ma꞉nda꞉ nina꞉ wanda꞉hali wopuma꞉ mineke pankolo hata꞉ niki hopiliaaso hata꞉ hoke tetopiki pimanu wopu lememe. Kutupa make haka꞉ta꞉pao e pokoma꞉ ekimanu make u na poluma꞉ ekimanu make ne na noma꞉eki make wopu pua꞉me. \v 6 Kutupa nika꞉ tikitiki piki hau puma꞉ ekima꞉ make nika꞉ hone manuma꞉ make nika꞉ homu pea yu wia haoma꞉ ekima꞉ make homu pitolo puki haloma꞉ ekima꞉ make paeyaoma꞉ta꞉ nikita꞉ Koda꞉na꞉ e pokaasoma꞉ haliwekie laa waloma꞉me. Kotota꞉ nika꞉ ota꞉ pukima꞉ homoma꞉ ekima꞉ make Holi Sipitidima꞉ make \v 7 mo ota꞉ pi waloma꞉ ekima꞉ make Koda꞉na꞉ honkopuma꞉ make paeyaoma꞉ puma꞉me. Nikana꞉ma꞉ta꞉ nika꞉ tikitiki piki hau pita꞉la꞉ ekita꞉ mo a꞉nda꞉ pita꞉la꞉ kolepe a꞉ndeli pita꞉ hanka꞉ yaapoma꞉ handa꞉la꞉me. \v 8 Nate ma꞉nda꞉ nina꞉ta꞉ niki pa꞉ta꞉ yeiya꞉ laasa꞉ hau pu haleme make yaala꞉ peaasa꞉ hau make pu halememe. Kutupa make kitata pu haleme make nika꞉ biki mea mina꞉liao halememe. Kutupa make nikita꞉ yayapiki pi lo haleme haliwekie lo halemepate nikana꞉ma꞉ta꞉ ota꞉ pi homeke lo haloma꞉me. \v 9 Nikita꞉ hone na wiki nono pelemepate nikita꞉ paeyaoma꞉ hone wilimime. Nikita꞉ homelememe lo halemepate pa haloma꞉ ekita꞉ ika꞉ hone wilimime. Nikita꞉ panisi peao halemepate kone niki homomono na lilimime. \v 10 Nikita꞉ puki hoeyao halemepate hoto paeyao ta꞉na꞉ma꞉ homoloma꞉me. Nikita꞉ nate hali hake nono poloma꞉pate nikana꞉ma꞉ta꞉ mandane wanda꞉hali wopu hamoko haena꞉ aloma꞉me. Nikita꞉ ala꞉ta꞉ ma꞉nda꞉ na wia hake nono poloma꞉pate nikita꞉ ala꞉ta꞉ ala꞉ta꞉ paeyao ana꞉na꞉ kone wia haloma꞉me. \p \v 11 Kotindi haleme yankeke tonuo. Nikana꞉ma꞉ nikina꞉ iki pa꞉ta꞉ pa ka꞉la꞉pa꞉ tapao ota꞉ la kuma꞉me. Nikana꞉ma꞉ta꞉ nika꞉ puki manuta꞉ iki pa꞉ta꞉ anekema꞉ ku haloma꞉me. \v 12 Nikana꞉ma꞉ta꞉ niki pukimanu iki pa꞉ta꞉ na a꞉mbo haloma꞉pate kone pa ikana꞉ma꞉ta꞉ ika꞉ pukimanu niki pa꞉ta꞉ a꞉mbo halememe. \v 13 Ameta꞉ I̱ma꞉ ikita꞉ yaka wekiwandiki tupa꞉ leke iki pa꞉ta꞉ pi alome. Nikana꞉ma꞉ iki pa꞉ta꞉ pukima꞉ homoloma꞉ tupa꞉ ikana꞉ma꞉ make ika꞉ pukima꞉ homelemeeki niki pa꞉ta꞉ wala꞉pee. Ika꞉ pukimanu anekema꞉ lomba꞉pa꞉peke. \s1 Pi na miki tapakena꞉ hauna꞉ kinki pita꞉la꞉eki \p \v 14 Mo hone na tulaleme wanda꞉hali ame̱le̱ apa꞉tao e pokuluekema꞉ na taapa꞉peke. Pa ekipeke iki ota꞉ ta꞉ma꞉ni pea꞉peke na ya꞉la꞉me. Tikitiki hau pita꞉la꞉eki pita꞉ ata꞉ka꞉ piki hau pita꞉la꞉eki yaapota꞉ ekipa yankeke hapeke ya꞉la꞉pe. Pa̱a̱ pa꞉la꞉eki pita꞉ timba꞉ la꞉la꞉eki yaapota꞉ ekipa apa꞉tao hapeke ya꞉la꞉pe. \v 15 Kutupa Ketiso pita꞉ Sadani yaapoma꞉ta꞉ ekipa homeke hone wia꞉peke ya꞉la꞉pe. Mo hone tulaala꞉ some pita꞉ mo hone na tulaala꞉ some yaapo ipilika꞉ta꞉ hando hau pitelepe ekita꞉ homeke hau pelepepe. \v 16 Mo Koda꞉na꞉ tembolota꞉ mo pi na miki wanda꞉halina꞉ toopi ti wepia ula꞉ alemanu yaapota꞉ ekipa hone homeke wia꞉peke ya꞉la꞉pe. Pa ekipeke. Nikita꞉ mo da꞉ta hao hala꞉ Koda꞉na꞉ tembolo da haloma꞉me. Koda꞉ ipikana꞉ma꞉ leeke tupa꞉ta꞉ dupae. \q1 Yaka data꞉ yaka wanda꞉hali ame̱le̱ wepulueke. Kutupa iki ame̱le̱ hao halueke. I̱ta꞉ ika꞉ Koda꞉ halueke. Kutupa ikita꞉ yaka wanda꞉hali halimikie leekeme. \q1 \v 17 Koto ekina꞉ mo Tekehalima꞉ alota꞉ Ikana꞉ma꞉ mo wanda꞉hali mina꞉pa꞉lao iki ame̱le̱ putupa꞉ alu pea hapa꞉peke. Mo ha̱i̱piki haumanu pa꞉ta꞉ nindi pea haluekema꞉ taapa꞉peke. Kutu pimika꞉na꞉ta꞉ I̱ma꞉ iki handa꞉ mulueke. \q1 \v 18 I̱ta꞉ ika꞉ Apa꞉ halueke. Kutupa ikita꞉ yaka wekiwandiki halimikie. Dota꞉ Aneke Tekehalima꞉ alome la꞉la꞉me. \c 7 \p \v 1 Yaka pukipiki yankeke tonuo do la꞉ ula꞉ pi manuta꞉ niki pa꞉ta꞉ la꞉la꞉me. Koto ekina꞉ta꞉ mo nika꞉ loke puki yaapo ha̱i̱ peaapeke ekimanu pa꞉ta꞉ta꞉ yako pea hamana꞉e. Kutupa nika꞉ Koda꞉ pa꞉ta꞉ paala꞉ma꞉ homa꞉la꞉ hauma꞉ ota꞉ niki yako pea hamana꞉e. \s1 Polona꞉ ta꞉na꞉ pa꞉la꞉eki \p \v 2 Ika꞉ puki pa꞉ta꞉manu nika꞉ da panda꞉ wepiapee. Nikana꞉ma꞉ta꞉ ma꞉nda꞉ pa꞉ta꞉ hoke hau na poloma꞉me. Nikana꞉ma꞉ta꞉ ma꞉nda꞉ tekipuleke na laoma꞉me. Kutupa ma꞉nda꞉ pa꞉ta꞉ imeke peaake pimanu laa ipika꞉ alemanu muluekema꞉ na taapoma꞉me. \v 3 I̱ma꞉ doeki alo ekita꞉ ikana꞉ma꞉ hoke hau pelememe laa ma̱leke litolo na loa꞉me. I̱ma꞉ amba꞉ titina꞉ loa꞉ tupa꞉ ikita꞉ niki pa꞉ta꞉ yole pelemeeki yalota꞉ nika꞉ temokota꞉ hoto paeyao iki ame̱le̱ mandakena꞉ haloma꞉me. Niki pa haloma꞉ dina꞉ make homoloma꞉ dina꞉ make loa꞉me. \v 4 I̱ma꞉ta꞉ ikita꞉ ana꞉ pa꞉la꞉me hone ulume. I̱ma꞉ta꞉ ika꞉ piteleme hauna꞉ ta꞉na꞉ma꞉ homa꞉la꞉eki minolome. Nika꞉ ka꞉nda꞉ma꞉ homoloma꞉ ekimanu pa꞉ta꞉ta꞉ I̱ta꞉ hali au la hata꞉ honkopu haasa꞉ ekima꞉ tumbu hala꞉me. I̱ta꞉ ta꞉na꞉ pa꞉la꞉ ekima꞉ tumbaa ankou ala꞉me. \v 5 Mo Ma꞉sedonia opolo poma꞉ dina꞉ maketa꞉ nikita꞉ hoto ota꞉ na pituma꞉me. Ka꞉nda꞉ paeyao manuta꞉ tumbulu baeyekeme. Ma꞉nda꞉ ame̱le̱ ape ala꞉eki make nika꞉ pukimanu pa꞉ta꞉ta꞉ paala꞉ pa꞉la꞉ ekimanu make pitia꞉me. \v 6 Pate mo puki hoela꞉ wanda꞉hali honkopu hawao hala꞉ Koda꞉ma꞉ta꞉ mo Taitasi epolo pia꞉ ekima꞉ niki honkopu hawaya꞉me. \v 7 Mo ipiki epolo pia꞉ ekima꞉ homeke niki ta꞉na꞉ma꞉ na homa꞉ tiaya꞉pate pa mo ikana꞉ma꞉ ipiki honkopu hawaemeeki a꞉pa la kia꞉ ekima꞉ make niki ta꞉na꞉ma꞉ homa꞉ tiaya꞉me. Ipikana꞉ma꞉ta꞉ ikana꞉ma꞉ I̱ handawee laa we pambelememe laata꞉ ikana꞉ma꞉ ota꞉ hokeeki puma꞉me laa kelepeleme ekina꞉ make mo I̱na꞉ ta̱luekema꞉ tikitiki yao halemeeki make paeyao a꞉pa la kia꞉me. Koto ekina꞉ ameta꞉ I̱ta꞉ ta꞉na꞉ tieke ota꞉ wopu pa꞉la꞉me. \p \v 8 Mo yaka tapaowa꞉ tameiya꞉ma꞉ iki ka꞉nda꞉ma꞉ homaeya꞉ka꞉na꞉ta꞉ I̱ma꞉ laawa꞉me laa a꞉ta꞉e pi na alome. Mo tameiya꞉ma꞉ iki nate ma꞉nda꞉ nina꞉ ka꞉nda꞉ma꞉ homawa꞉eki handoa꞉ dina꞉ta꞉ I̱ma꞉ a꞉ta꞉ma꞉ homolo pua꞉me. \v 9 Pate ameta꞉ I̱ta꞉ ta꞉na꞉ma꞉ homolome. Iki a꞉ta꞉ma꞉ homa꞉ tiawa꞉ ekina꞉ dia꞉ya꞉la꞉pate pa mo ika꞉ homeme ka꞉nda꞉ma꞉ta꞉ ika꞉ haumanu topo peaya꞉ ekina꞉ loa꞉me. Koto ka꞉nda꞉ma꞉ homa꞉la꞉ ekita꞉ Koda꞉ma꞉ peaya꞉eki yalo nikana꞉ma꞉ iki na hoeyaoma꞉me. \v 10 Pa ekipeke mo Koda꞉ma꞉ homo tiaasa꞉ ka꞉nda꞉ma꞉ta꞉ puki topo peaasa꞉eki mea ipulu hata꞉ da꞉ta꞉monoyeke pa꞉ta꞉la꞉la꞉eki pa꞉ta꞉ hatuku pula꞉mee. Koto ekina꞉ta꞉ ma꞉nda꞉ma꞉ koto pa꞉ta꞉ta꞉ I̱ hoeyaasa꞉ ekie pi ma꞉nda꞉ lapeke na ya꞉la꞉me. Pate do kenkena꞉ hau pa꞉ta꞉ ipula꞉ ka꞉nda꞉ma꞉ta꞉ homa꞉la꞉eki handa꞉ u hala꞉me. \v 11 Koda꞉ma꞉ do ika꞉ ka꞉nda꞉ma꞉ homemeeki pa꞉ta꞉ yama꞉ pa꞉la꞉eki handa꞉pe. Titina꞉ta꞉ ika꞉ bu alo hata꞉ a̱i̱ koto kone ika꞉ peleme hoke haumanu tikitiki yamena꞉ la꞉la꞉me. Kutaata꞉ ika꞉ pimi hoke hau manuta꞉ ameta꞉ ota꞉ mina꞉pa꞉laloma꞉me laa waluekema꞉ hone wopu witeleme ekina꞉ make iki epeaala꞉ma꞉ handa꞉pe. A꞉pa꞉e. Ameta꞉ topo wopu pea pimika꞉ta꞉me. Ikana꞉ma꞉ta꞉ mo ata꞉ka꞉ peaaseke mineke panka꞉la꞉ hau make puki yoka꞉ miniki hasa꞉ hau make pea pimika꞉ta꞉me. Ota꞉ aloma꞉ epeke honemanu witolo hata꞉ puki wopu wia pimika꞉ta꞉me. Kutupata꞉ hoke hau a̱i̱ koto kone panisi pealuekema꞉ tikitiki yao hata꞉ pimika꞉ta꞉me. Koto peleme ekita꞉ mo amba꞉ putia epoloma꞉ hau paeyao pa꞉ta꞉ta꞉ ikita꞉ ata꞉ka꞉ na piki wanda꞉halie laa wala꞉la꞉eki handolome. \p \v 12 Koto ekina꞉ta꞉ I̱ma꞉ mo tameiya꞉ laowa꞉ ekita꞉ mo hoke hau pia꞉ somena꞉ o hoke hau pa꞉la꞉ma꞉ lea꞉ somena꞉ na laawa꞉me. Kotoeki na pikita꞉ Koda꞉na꞉ leke popelekena꞉ mo ikana꞉ma꞉ niki pa꞉ta꞉ pukima꞉ homelemeeki iki pa꞉ta꞉ kone peneme yaaluekema꞉ pua꞉me. \v 13 Koto ekina꞉ yeketa꞉ nikita꞉ honkopu hawaememe. Kotoeki homeke dia꞉ya꞉la꞉pate pa ikana꞉ma꞉ Taitasi ta꞉na꞉ma꞉ homo tiaemeke handaa ipikana꞉ma꞉ iki pa꞉ta꞉ ta꞉na꞉ wopu homea꞉me. Nikana꞉ma꞉ kutu pia꞉eki handolo hata꞉ niki make ta꞉na꞉ tieke wopu pia꞉me. \v 14 I̱ma꞉ta꞉ ipiki pa꞉ta꞉ ika꞉ pi lawaowa꞉me. Kutupa ikana꞉ma꞉ta꞉ I̱ta꞉ na olopuniano lememe. Nikana꞉ma꞉ta꞉ iki pa꞉ta꞉ta꞉ ota꞉ pi homeke homeke laa kuma꞉me. Koto tupa꞉ koneta꞉ nikana꞉ma꞉ Taitasi pa꞉ta꞉ ika꞉ pi lawaoma꞉ ekita꞉ ota꞉ekie laa handa꞉ ula꞉me. \v 15 Koto ekina꞉ta꞉ ipikana꞉ma꞉ iki pa꞉ta꞉ pukima꞉ homa꞉la꞉ ekita꞉ honkopu hao daeyatia pula꞉me. Mo ikana꞉ma꞉ ipika꞉ walea꞉ ekimanu koto kone opua pimime. Kutupa make ikana꞉ma꞉ ipiki paala꞉ma꞉ make pututuma꞉ make homolo hata꞉ handa꞉ mimi ekina꞉ make loa꞉me. \v 16 I̱ta꞉ ika꞉na꞉ ti laapeke ya꞉ka꞉ta꞉me hone witolo hata꞉ ta꞉na꞉ tieke wopu pa꞉la꞉me. \c 8 \s1 Ketiso hau pea hala꞉la꞉eki \p \v 1 Nika꞉ kame tonuo nika꞉ honema꞉ta꞉ mo Koda꞉na꞉ a꞉ta꞉ma꞉ homa tamba꞉ mina꞉la꞉ ekita꞉ mo Ma꞉sedonia siosimanu pa꞉ta꞉ hala꞉la꞉eki ikana꞉ma꞉ hone uemena꞉ hone pa꞉la꞉me. \v 2 Mo wanda꞉halita꞉ ika꞉ mutia peme ka꞉nda꞉ manuma꞉ta꞉ ota꞉ hoke tupa꞉ la handea꞉pate ika꞉ ta꞉na꞉ma꞉ homeme ekita꞉ ota꞉ tieke aneke yaeyeke handaa ikita꞉ natehali wanda꞉hali hata꞉ kone ika꞉ alemanu pa haleme ekita꞉ ota꞉ ankulake hau pimime. \v 3 I̱ma꞉ iki pa꞉ta꞉ ota꞉ pi alo ekita꞉ ika꞉ haleme ekita꞉ ota꞉ hala꞉peke ya꞉la꞉ tupa꞉ make ota꞉ haka꞉ta꞉pake tupa꞉ make halememe. Ika꞉ hone lombei peake tupa꞉ta꞉ \v 4 mo Diudia da kenke pa꞉ta꞉ haleme Koda꞉na꞉ wanda꞉hali tamba꞉ mina꞉la꞉eki pa꞉ta꞉ ikana꞉ma꞉ make tamba꞉ mina꞉la꞉eki pa peomonope laa niki pa꞉ta꞉ honke tieke lememe. \v 5 Kutu pimi hauma꞉ta꞉ nikana꞉ma꞉ pina꞉ lawee laa hone uma꞉ ekita꞉ ota꞉ ankulao pimime. Titina꞉ta꞉ iki kone Koda꞉ pa꞉ta꞉ halememe. Kutupata꞉ Koda꞉na꞉ hone pa꞉la꞉eki pa꞉ta꞉ yama꞉ta꞉ ikita꞉ niki pa꞉ta꞉ make kimime. \p \v 6 Koto ekina꞉ nikana꞉ma꞉ do e kini pia꞉ some Taitasi pa꞉ta꞉ do ta꞉ta꞉ ma꞉nda꞉ piki pukima꞉ homa꞉la꞉ e ikana꞉ma꞉ paeyamena꞉yeke tamba꞉ mu hapeke laa honke loma꞉me. \v 7 Ikita꞉ ika꞉ wia halemeeki paeyao pa꞉ta꞉ta꞉ hamoko halememe. Ika꞉ hone tulaasemeeki pa꞉ta꞉ make pi aleme pa꞉ta꞉ make hone witelemeeki pa꞉ta꞉ make ika꞉ a̱i̱ koto kone tamba꞉ muluekema꞉ hone witeleme pa꞉ta꞉ make kutupa niki pa꞉ta꞉ pukima꞉ homeleme ekima꞉ make loa꞉me. Koto ekina꞉ta꞉ nika꞉ hone pa꞉la꞉ ekita꞉ ikana꞉ma꞉ do pukima꞉ homa꞉la꞉ ekina꞉ e poka꞉la꞉ pa꞉ta꞉ ta꞉na꞉ma꞉ homolo hata꞉ haka꞉ta꞉pao mandaneeki pa haloemena꞉yeke loa꞉me \p \v 8 I̱ma꞉ta꞉ mana꞉ pimanu ma꞉nda꞉ na lo witolome. Pate mo mandane wanda꞉halima꞉ a̱i̱ tamba꞉ muluekema꞉ hone witelemeeki waloloeki pa꞉ta꞉ yama꞉ I̱ma꞉ ika꞉ pukima꞉ homeleme ekita꞉ ekipape la handuluekema꞉ pitolome. \v 9 Ikana꞉ma꞉ta꞉ nika꞉ Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekita꞉ hone wilimime. Ipikita꞉ hamoko tieke hayekepate iki tamba꞉ muluekema꞉ yeke ipikita꞉ nate hali au leekeme. Kotota꞉ ipika꞉ natehali au leeke ekima꞉ iki hamoko hawaluekema꞉ pa꞉la꞉me. \p \v 10 Ya honema꞉ta꞉ mo hande paeya꞉ bapina꞉ kini pimi ekita꞉ ame do paeyaasota꞉ a꞉pa꞉la꞉me hone witolome. Tamba꞉ muluekema꞉ homeke dia꞉ya꞉la꞉pate pa puluekema꞉ hone witelemeeki make ikita꞉ titina꞉ amba꞉la꞉e. \v 11 Koto ekina꞉ta꞉ ame tiao ika꞉ kini pimieki a̱i̱ paeyaapee. Mo ta꞉na꞉ma꞉ homolo hata꞉ dupa pulumeke laa la꞉ wimi tupa꞉ kone paeyaaluekema꞉ make a̱i̱ paeyaalumeke laa hone wipee. Kutupa make ame do wia halemeeki pita꞉ pipee. \v 12 Ikita꞉ ta꞉na꞉ma꞉ homolo a̱i̱ haluekema꞉ hone wimika꞉na꞉ta꞉ kota꞉ Koda꞉ma꞉ta꞉ mo ika꞉ pa haluekema꞉ wia haleme aleta꞉ milieke. Pate mo na wia haleme alena꞉ dia꞉me. \p \v 13-14 Mandane wanda꞉hali ika꞉ ka꞉nda꞉manu yapa꞉ peaaso hata꞉ ikita꞉ ka꞉nda꞉ma꞉ homaasome laa na loa꞉pate pa ameta꞉ ikita꞉ ala꞉ta꞉ ala꞉ta꞉ wopu wia halemeke handaa mo dia꞉ya꞉la꞉ wanda꞉hali tamba꞉ mimika꞉na꞉ta꞉ ota꞉ ana꞉ pa꞉la꞉me. Kutupa nate ma꞉nda꞉ a꞉nda꞉ iki dia꞉ya꞉ka꞉na꞉ta꞉ mo wanda꞉halima꞉ta꞉ ika꞉ anekema꞉ wia haemeka꞉na꞉ta꞉ iki make tamba꞉ milieke. Dupita꞉la꞉ ekima꞉ta꞉ telipuna꞉ta꞉ ana꞉ sikina꞉ tamba꞉ mina꞉la꞉me. \v 15 Koto ekina꞉ mo Baiboloma꞉ alota꞉ Mo aneke hapu mombelea꞉ someta꞉ lombeipiki tupa꞉ na wia haya꞉me. Kutupa mo hosiki siki mombelea꞉ someta꞉ ota꞉ dia꞉ya꞉la꞉ tupa꞉ na wia haya꞉me la꞉la꞉me. \s1 Taitasi pita꞉ ipika꞉ yankeke tonu \p \v 16 Nikana꞉ma꞉ iki tamba꞉ muluekema꞉ hone wopu uluma꞉ tupa꞉ Koda꞉ma꞉ Taitasi mea hone wopu utiala꞉ ekina꞉ Koda꞉ pa꞉ta꞉ keiyae aloma꞉me. \v 17 Nikana꞉ma꞉ ipiki pa꞉ta꞉ nikana꞉ma꞉ polena꞉e loma꞉ ekita꞉ opua ta꞉na꞉ma꞉ homea꞉me. Koto loma꞉ ekima꞉ homeke dia꞉ya꞉la꞉pate ipika꞉ honema꞉ kone iki pa꞉ta꞉ tamba꞉ mulua꞉ ipulueke hone wia꞉ ekina꞉ loma꞉me. \v 18 Ipiki yaapota꞉ mo kame ma꞉nda꞉ ipikita꞉ siosi paeyao pa꞉ta꞉ ipika꞉ mo pi seliapo wala꞉la꞉ ekina꞉ ota꞉ epeke halie lo haleme kame tapaasoma꞉me. \v 19 Kutupa make ipikita꞉ nikana꞉ma꞉ do pukima꞉ homa꞉la꞉ ekina꞉ e pokotia pominoloma꞉ ale pa꞉ta꞉ mandakena꞉ pomiomono yeke mo siosi manuma꞉ ma̱leke lila꞉me. Do e pokoloma꞉ ekina꞉ teketa꞉ mo Tekehalina꞉ pa̱a̱na꞉ make mo nikita꞉ tamba꞉ muluekema꞉ hone wopu witoloma꞉me laa waluekema꞉ pitoloma꞉me. \p \v 20 Nikita꞉ do epeke pa kita꞉la꞉eki mea pominoloma꞉ pa꞉ta꞉ mandane wanda꞉halima꞉ hambilikima꞉ hambilikima꞉ pea la la peaama꞉na꞉yeke leke wia hata꞉ pitoloma꞉me. \v 21 Nika꞉ hone homeke homeketa꞉ ota꞉ tikitiki hau homeke puluekema꞉ hone witoloma꞉me. Ota꞉ Koda꞉na꞉ leke popelekena꞉ homeke dia꞉ya꞉la꞉pate pa kenke wanda꞉halina꞉ leke popelekena꞉ make loa꞉me. \p \v 22 Koto ekina꞉ta꞉ mo haliweki ame̱le̱ nika꞉ kame taa tapaasoma꞉ handa꞉e. Nikana꞉ma꞉ta꞉ hoto paeyao ipiki la handoma꞉me. Pate ipikita꞉ hoto paeyao tamba꞉ muluekema꞉ hone wopu ula꞉eki handa꞉ uluma꞉me. Ipikana꞉ma꞉ amba꞉ta꞉ iki tamba꞉ muluekema꞉ hone wia꞉pate pa ameta꞉ iki pa꞉ta꞉ hone tulaala꞉ ekima꞉ a̱i̱ tamba꞉ muluekema꞉ hone wopu wia hala꞉me. \v 23 Taitasita꞉ ipikita꞉ yaka ta꞉ma꞉ni hata꞉ iki tamba꞉ muluekema꞉ I̱ yaapo e poko hala꞉me. Kutupa mo ipiki ame̱le̱ pula꞉ mandane kame tonuta꞉ do siosi manuna꞉ bikina꞉ ipula꞉ hata꞉ta꞉ Ketisona꞉ biki daeyaena꞉ la꞉la꞉ tapakee. \v 24 Ika꞉ pukima꞉ homa꞉la꞉ ekita꞉ mo tapake pa꞉ta꞉ wala꞉pa꞉peke. Pa ekipeke mo siosi manuma꞉ hone witolota꞉ mo nikana꞉ma꞉ ika꞉ pi laoma꞉ ekita꞉ ota꞉ ya꞉ka꞉ta꞉me laa hone wina꞉ loa꞉me. \c 9 \s1 Ketiso yankeke tonu tamba꞉ mina꞉la꞉eki \p \v 1 Mo Diudia da kenke pa꞉ta꞉ haleme Koda꞉na꞉ wanda꞉hali pa꞉ta꞉ tapaala꞉ tamba꞉ mina꞉la꞉ ekita꞉ iki pa꞉ta꞉ do laaso tameiya꞉ tapapeketa꞉ ti na pa꞉la꞉me. \v 2 Pa ekipeke ikana꞉ma꞉ tamba꞉ muluekema꞉ hone wopu wilimi ekita꞉ I̱ma꞉ hone ulume. Kutupa ika꞉ piteleme ekita꞉ mo Ma꞉sedonia wanda꞉hali pa꞉ta꞉ I̱ma꞉ pi la waloa꞉me. Mo wanda꞉hali pa꞉ta꞉ alota꞉ Mo Akaya haleme kame tonuma꞉ta꞉ mo paeya꞉ bapina꞉ kini pea tamba꞉ muluekema꞉ tikitiki yao halememe laa loa꞉me. Ika꞉ puluekema꞉ a̱i̱ hone wilimi ekima꞉ta꞉ wopuna꞉ hone u tialememe. \v 3 Koto ekina꞉ ameta꞉ I̱ma꞉ do kamemanu tapaasome. Pa ekipeke mo nikana꞉ma꞉ do hauna꞉ ika꞉ pi laoma꞉ ekita꞉ pa hameke pi loma꞉me hone wiaama꞉na꞉ loa꞉me. Pate I̱ma꞉ amba꞉ loa꞉ tupa꞉ta꞉ ikita꞉ ika꞉ tamba꞉ mina꞉la꞉eki manuma꞉ tikitiki yao halememe loa꞉me. \v 4 Pate mo Ma꞉sedonia wanda꞉halita꞉ I̱ ame̱le̱ ipulu iki tikitiki yao na halemeeki handa꞉ wimika꞉na꞉ta꞉ kota꞉ nikita꞉ ota꞉ pulu pimime laa ekipiki yaala꞉ma꞉ homuluma꞉pe. Ika꞉ yaala꞉ pulu pa꞉la꞉eki make loa꞉me. \v 5 Koto ekina꞉ta꞉ yaka honema꞉ta꞉ do kame tonuma꞉ amba꞉la kinki pulu ipulu mo ikana꞉ma꞉ amba꞉ la꞉ wimi pa hameke hala꞉la꞉ ekina꞉ tikitiki yamena꞉ tapaowa꞉me. Kutupa I̱ opolo epoa꞉ka꞉na꞉ta꞉ tikitiki yao wiemena꞉ loa꞉me. Kutu pimika꞉na꞉ta꞉ ikana꞉ma꞉ haleleme ekita꞉ mo ika꞉ hone pa꞉la꞉ ekima꞉ kone halelememe laa walieke. Ma꞉nda꞉ma꞉ pia꞉pa꞉peke la꞉la꞉ ekina꞉ dia꞉me loa꞉me. \p \v 6 Hone wipee. Mo hande wae alemanu wopu na noka꞉pa꞉la꞉ halima꞉ta꞉ napeke hosiki siki mu hala꞉pate mo wae ale aneke hapu noka꞉pa꞉la꞉ halima꞉ta꞉ napeke tieke mu hala꞉me. \v 7 Koto ekina꞉ iki homeke homekema꞉ dupiki halueke laa leme tupa꞉ hala꞉peke ya꞉la꞉me. Haluekema꞉ hosiki ka꞉nda꞉ma꞉ homolo hata꞉ o do e poka꞉la꞉eki mina꞉pa꞉lapeke na ya꞉la꞉me laa alo hata꞉ dia꞉me Pa ekipeke Koda꞉ma꞉ta꞉ mo ta꞉na꞉ma꞉ homolo hata꞉ hala꞉la꞉ some pa꞉ta꞉ta꞉ pukima꞉ homa꞉la꞉me. \v 8 Kutupa Koda꞉ma꞉ta꞉ ika꞉ dia꞉ya꞉ tupa꞉ta꞉ ota꞉ haka꞉ta꞉pao wopu kuluekema꞉ aneke hali hala꞉me. Pa ekipeke iki dia꞉ya꞉la꞉ ale ana꞉na꞉ wia hamena꞉yeke make mo mandane epeke haumanu pa꞉ta꞉la꞉la꞉eki ota꞉ haka꞉ta꞉pao wia hamena꞉yeke make loa꞉me. \v 9 Kotota꞉ mo Baiboloma꞉ alota꞉ \q1 Ipikana꞉ma꞉ ipika꞉ pa hameke hala꞉la꞉ alemanu mo dia꞉ya꞉la꞉ wanda꞉hali mina꞉yeke sasape pea꞉tiki pu hala꞉me. \q1 Ipika꞉ tikitiki pita꞉la꞉ hauta꞉ na paeyeke pa u halieke laa la꞉la꞉me. \p \v 10 Kutupa mo noka꞉pa꞉la꞉ halina꞉ wae ale halo hala꞉ Koda꞉ma꞉ta꞉ mo napeke ne make halo hala꞉me. Koto Koda꞉ma꞉ta꞉ hoto paeyao mo ika꞉ dia꞉ya꞉la꞉ wae ale haka꞉ta꞉pao ku hata꞉ ika꞉ ma꞉nda꞉ pa꞉ta꞉ pa haleme hauna꞉ opena꞉ laa napeke tieke a꞉ena꞉ la꞉lieke. \p \v 11 Ipikana꞉ma꞉ta꞉ ikana꞉ma꞉ ta꞉na꞉ma꞉ homolo hata꞉ ika꞉ ale mandaneeki pa halo hamena꞉yeke iki hamoko hawalieke. Kutu pimika꞉na꞉ta꞉ mo ika꞉ pa halelemeeki niki pa꞉ta꞉ yama꞉ minolo hata꞉ wanda꞉hali wopuma꞉ Koda꞉ pa꞉ta꞉ keiyae la꞉limikie. \v 12 Do ikana꞉ma꞉ pokeleme ema꞉ta꞉ Koda꞉na꞉ wanda꞉halina꞉ dia꞉ya꞉la꞉eki homeke na epeaasa꞉pate pa Koda꞉ pa꞉ta꞉ keiyae tieke ala꞉ pi wopu lena꞉ la꞉la꞉me \v 13 Kutupa do ika꞉ pokeleme ema꞉ta꞉ ika꞉ epeke hau peneme yaaso hata꞉ paeyaoma꞉ta꞉ ikana꞉ma꞉ Ketisona꞉ Pi Seliapo oto pa꞉ta꞉ haleme ekina꞉ Koda꞉na꞉ biki yeiya꞉ lalimikie. Mo ikana꞉ma꞉ ika꞉ ta꞉na꞉ma꞉ homolo hata꞉ ale mandaneeki pa halo halemeeki iki ame̱le̱ telipa make paeyao ame̱le̱ putupeleme ekina꞉ loa꞉me. \v 14 Koto ekina꞉ta꞉ ikana꞉ma꞉ta꞉ pukima꞉ homa꞉la꞉eki tiekema꞉ ikina꞉ yeni peaalimikie. Pa ekipeke mo Koda꞉ma꞉ iki pa꞉ta꞉ ota꞉ anekema꞉ haka꞉ta꞉pake a꞉ta꞉ma꞉ homa꞉la꞉eki ka꞉la꞉ ekina꞉ loa꞉me. \v 15 Niki paeyaoma꞉ Koda꞉ ipika꞉ ota꞉ au lapeke na yeke pa kita꞉la꞉ ekina꞉ ipiki pa꞉ta꞉ keiyae lomana꞉e. \c 10 \s1 Poloma꞉ ipika꞉ ena꞉ mape liekeeki \p \v 1 I̱ta꞉ Poloma꞉ ya kone iki pa꞉ta꞉ honke alome. I̱ta꞉ hande iki ame̱le̱ halo dina꞉ta꞉ homu pea dete polopate iki mina꞉pa꞉lao papate halo dina꞉ta꞉ tanda pola꞉me lo hala꞉ma꞉ somema꞉ loa꞉me. Ketisona꞉ homu toloma꞉ lita꞉la꞉eki pita꞉ a꞉ta꞉ma꞉ homolo hata꞉ puki hala꞉la꞉ ekima꞉ta꞉ I̱ma꞉ iki honke alota꞉ \v 2 I̱ epoa꞉ka꞉na꞉ta꞉ tanda piono na sutiaamena꞉ yeke loa꞉me. I̱ma꞉ta꞉ mo nikana꞉ma꞉ kenkena꞉ hone pa꞉la꞉ hau pa꞉ta꞉ yama꞉ pitoloma꞉me laa aleme tapake pa꞉ta꞉ta꞉ I̱ma꞉ tanda pia꞉peke ya꞉la꞉me laa hone ulume. \v 3 Nikita꞉ do kenkena꞉ ota꞉ haloma꞉pate nikita꞉ kenkena꞉ hone pa꞉la꞉ hau pa꞉ta꞉ yama꞉ a꞉nda꞉ na pitoloma꞉me. \v 4 Mo nikana꞉ma꞉ a꞉nda꞉ pitolo hata꞉ wia haloma꞉ kolepe a꞉ndeli manuta꞉ do kenkena꞉ ekima꞉ dia꞉ya꞉la꞉me. Pate mo hande honkopu hake a꞉nda꞉ pape hoeyao haloma꞉ Koda꞉na꞉ wele wopupiki kolepe a꞉ndelima꞉ pu haloma꞉me. Nikana꞉ma꞉ta꞉ makeaaso ape ala꞉ ekimanu hoeyao haloma꞉me. \v 5 Mo Koda꞉ hone wiaapa꞉na꞉ sa꞉sa꞉ puluekema꞉ mea tiao pu halemeeki paeyao nikana꞉ma꞉ mea lopao haloma꞉me. Nikana꞉ma꞉ta꞉ honemanu paeyao minaata꞉ Ketisona꞉ pi opua homu pina꞉ lo haloma꞉me. \v 6 Kutupa ikana꞉ma꞉ pi opua oto pa꞉ta꞉ halimieki handa꞉ wia paeyaalimi dina꞉ta꞉ kota꞉ mo pi opua oto pa꞉ta꞉ na hao halimieki panisi pealuekema꞉ nikita꞉ tikitiki yao halumeke. \p \v 7 Ikana꞉ma꞉ta꞉ mo ala꞉ta꞉ ala꞉ta꞉na꞉ hama꞉ naneeki handelememe. Iki ame̱le̱ ma꞉nda꞉ma꞉ ipikita꞉ Ketiso pa꞉ta꞉ tunaalome ala꞉ some hala꞉pe. Kota꞉ ipikana꞉ma꞉ ipika꞉ hau pita꞉la꞉eki kone pa hone wina꞉e. Pa ekipeke ipikana꞉ma꞉ pita꞉la꞉ tupa꞉ kone niki make Ketiso pa꞉ta꞉ tunaaloma꞉me. \v 8 Kota꞉ mo Tekehalima꞉ niki ka꞉la꞉ handeteke hala꞉ ekina꞉ pi tieke lawa꞉pate I̱ta꞉ yaala꞉ na pa꞉la꞉me. Iki na hoeyake mea daeyamono ka꞉la꞉ handeteke hala꞉ ekina꞉ loa꞉me. \v 9 Mo yaka tameiya꞉ manuma꞉ta꞉ iki paala꞉ tiaasa꞉eki handoemena꞉ hone na ulume. \v 10 Ma꞉nda꞉ma꞉ta꞉ I̱na꞉ do la꞉lieke. Polona꞉ tameiya꞉ manuta꞉ tanda pea honkopu hala꞉pate pa mo ipika꞉ loke piti niki ame̱le̱ hala꞉ dina꞉ta꞉ ipikita꞉ dete pea ipika꞉ pi manuta꞉ teke na ula꞉me laa lelieke. \v 11 Koto ala꞉ somema꞉ta꞉ dupa hone wia꞉peke ya꞉la꞉me. Mo nikita꞉ papate hata꞉ tameiya꞉na꞉ laasoma꞉eki pita꞉ mo iki ame̱le̱ hata꞉ pulu poloma꞉eki yaapo pa꞉ta꞉ta꞉ eki ma꞉nda꞉ ta꞉ta꞉ na pa꞉la꞉me hone wia꞉peke ya꞉la꞉me. \p \v 12 Ota꞉ ya꞉la꞉pate nikana꞉ma꞉ta꞉ mo niki dupoloma꞉me o nika꞉ kone mo ikita꞉ manda haloma꞉me laa lo haleme tapake pa꞉ta꞉ na yola꞉ pamboloma꞉ta꞉ pa iki ota꞉ hoke ana꞉ na piki haliwekie. Ikana꞉ma꞉ta꞉ ika꞉ halemeeki tombo muluekema꞉ ika꞉ hone pa꞉la꞉ tombo mina꞉la꞉ ale wepia maka mea handolo hata꞉ dupiki somee laa lo halememe. Kutu pu halemepate \v 13 nikana꞉ma꞉ nika꞉ hakoko litoloma꞉ ekita꞉ tombo ula꞉eki na ankulalumeke. Mo Koda꞉ma꞉ nika꞉ e tikitiki yaala꞉ tombo taapu halieke. Do ekita꞉ mo iki ame̱le̱ nikana꞉ma꞉ pokoloma꞉ e make apa꞉taasa꞉me. \v 14 Kutupa ikita꞉ koto tombo taapu haleme ekina꞉ta꞉ nikita꞉ koto tombo mina꞉pa꞉lao mopate leke na poma꞉me. Mo iki pa꞉ta꞉ hande Ketisona꞉ Pi Seliapo mea epoma꞉ dina꞉ loa꞉me. \v 15 Koto ekina꞉ta꞉ nikana꞉ma꞉ta꞉ mo Koda꞉ma꞉ nika꞉ tombo wia yekeeki ankulao mopate leke pokeme tapakena꞉ ena꞉ hakoko na litoloma꞉me. Kotoeki na pikita꞉ nikana꞉ma꞉ hone witoloma꞉ ekita꞉ ika꞉ hone tulaaseme ekita꞉ daetolo hata꞉ iki ame̱le̱ e wopu pokuluekema꞉ hone wopu witoloma꞉me. Koto ekita꞉ mo Koda꞉ma꞉ la꞉ ula꞉ tombo pa꞉ta꞉ hoto paeyao hata꞉ pokomono loa꞉me. \v 16 Kutu paata꞉ nikana꞉ma꞉ mo Pi Seliapota꞉ mo papate hala꞉ tutu ma꞉nda꞉ pa꞉ta꞉ walolo hata꞉ mo hali ma꞉nda꞉na꞉ amba꞉ pokea꞉ ena꞉ kenke pa꞉ta꞉ hakoko na liomono yeke loa꞉me. \p \v 17 Pate mo Baiboloma꞉ alota꞉ Ma꞉nda꞉ epima꞉ pi latia pomulueke hone wia꞉ka꞉na꞉ta꞉ kota꞉ ota꞉ Koda꞉ma꞉ pa꞉la꞉ ekina꞉ pi latia pomua꞉peke ya꞉la꞉me la꞉la꞉me. \v 18 Ma꞉nda꞉ma꞉ I̱ta꞉ epeke halie hone wita꞉la꞉ ekima꞉ta꞉ kota꞉ ipikita꞉ epeke hali dia꞉ya꞉la꞉pate pa mo Koda꞉ma꞉ ipiki pa꞉ta꞉ epeke halie lea꞉ka꞉na꞉ta꞉ kota꞉ koto someta꞉ ota꞉ epeke hali hala꞉me. \c 11 \s1 Polo pita꞉ makeaaso aposolo haliweki \p \v 1 Ikana꞉ma꞉ I̱ta꞉ hosiki hone wopu na wiki hake nono pimanu lono a̱i̱ na kiake waleke siki kipe laa honke alome. \v 2 Koda꞉ma꞉ iki pa꞉ta꞉ hone wopu witolo leke wia hala꞉ tupa꞉ I̱ma꞉ make iki pa꞉ta꞉ homeke hone wopu witolo hata꞉ leke wia halome. Ikita꞉ mo hande ma꞉nda꞉ma꞉ hakopu na tunkuliki pa hala꞉ moputali wandikima꞉ handelememe. Kutupa I̱ma꞉ koto wandikita꞉ ota꞉ hali homeke Ketisoma꞉ kone mina꞉ laa amba꞉ la꞉ ua꞉me. \v 3 Ika꞉ hone manuta꞉ hoeyaasa꞉eki manuma꞉ mea bepolao ika꞉ ota꞉ Ketiso pa꞉ta꞉ homeke ala꞉ta꞉ ma꞉nda꞉ na ta̱leke pukima꞉ homelemeeki hoki walimikie laata꞉ I̱ta꞉ paala꞉ pa꞉la꞉me. Mo hande ketona꞉ hone wopu lenkene piki yayapiki pima꞉ hande Ipa꞉ makeaeyeke tupa꞉ kone pilieke laa loa꞉me. \v 4 Pa ekipeke ikana꞉ma꞉ta꞉ iki pa꞉ta꞉ ma꞉nda꞉ epima꞉ a꞉pa mo Yesu ma꞉nda꞉na꞉ wala꞉la꞉ pita꞉ pa ta꞉na꞉ma꞉ homaa opu halememe. Mo nikana꞉ma꞉ waloma꞉ Yesuna꞉ dia꞉me. Ikana꞉ma꞉ mimi sipitidi pita꞉ pi seliapo yaapota꞉ ota꞉ ta꞉ta꞉ pa꞉la꞉me. Mo hande nikana꞉ma꞉ mea epoma꞉ Sipitidi pita꞉ Pi Seliapo yaapo ota꞉ dia꞉me. \p \v 5 I̱ma꞉ta꞉ I̱ta꞉ koto ika꞉ mea a꞉meiyaaseme aposolo aleme haliweki ota꞉ hosiki siki make oto pa꞉ta꞉ halome hone na ulume. \v 6 I̱ta꞉ ma꞉nda꞉ta꞉ yaka pi alo pa꞉ta꞉ta꞉ me̱i̱me̱i̱ lialopate pa mo hone witoloeki pa꞉ta꞉ta꞉ ota꞉ dia꞉me hone witolome. Nikana꞉ma꞉ta꞉ hau paeyao pa꞉ta꞉ta꞉ koto ekita꞉ peneme yatiki pu haloma꞉me. \p \v 7 I̱ma꞉ta꞉ iki pa꞉ta꞉ mo hande Koda꞉na꞉ Pi Seliapo waloa꞉ dina꞉ta꞉ ikita꞉ ota꞉ ala꞉ta꞉ ma꞉nda꞉siki make yenki kipe pi na loa꞉me. Iki ota꞉ aneke wanda꞉hali au laluekema꞉ yeke I̱ma꞉ta꞉ ya kone homu pea lu mina꞉niaowa꞉me. Kotota꞉ ata꞉ka꞉ piki hau pua꞉pe. \v 8 I̱ma꞉ iki tukiki pa꞉ta꞉ e pokoa꞉ dina꞉ta꞉ mandane siosi manuma꞉ I̱ta꞉ yenki kimime. I̱ma꞉ta꞉ iki tamba꞉ muluekema꞉yeke mo wanda꞉halina꞉ mani pake neke nono pua꞉me. \v 9 Kutupa iki ame̱le̱ haowa꞉ natena꞉ta꞉ I̱ mani dia꞉yeketa꞉ I̱ tamba꞉ mipe laa iki pa꞉ta꞉ ka꞉nda꞉ peaapeke honke na loa꞉me. Pa ekipeke mo Ma꞉sedonia nanema꞉ epeme kame tonuma꞉ I̱ dia꞉ya꞉la꞉ ale paeyao aneke mea a꞉paememe. Amba꞉ pua꞉ tupa꞉ wetepe nina꞉ make I̱ta꞉ iki ka꞉nda꞉ homaaluekema꞉ na taapulueke. \v 10 Ketisona꞉ ota꞉ pi I̱ pa꞉ta꞉ pila꞉eki yalota꞉ I̱ma꞉ do yaka hakoko litolo pita꞉ ota꞉ koto Akaya kenke paeyao pa꞉ta꞉ta꞉ na palueke laa pi la꞉ witolome. \v 11 I̱ma꞉ do alo ekita꞉ iki pukima꞉ na homolome laa alope. Dia꞉me. I̱ma꞉ iki pa꞉ta꞉ pukima꞉ homolo ekita꞉ ota꞉ Koda꞉ma꞉ hone ula꞉me. \p \v 12 I̱ma꞉ta꞉ ame do pitolo ekita꞉ ota꞉ pa pitolo ombu halueke. Pa ekipeke mo koto mandane aposoloe lo haleme haliwekima꞉ hakoko litolo hata꞉ alota꞉ Nikana꞉ma꞉ta꞉ ikana꞉ma꞉ pokeme tupa꞉ kone pokoloma꞉me alemeeki sa꞉sa꞉ puluekema꞉ loa꞉me. \v 13 Koto haliwekita꞉ ota꞉ aposolo haliweki dia꞉me. Ikita꞉ makeaaso aposolo haliweki hata꞉ ika꞉ pokeleme ena꞉ yayapiki pi laata꞉ ikita꞉ Ketisona꞉ ota꞉ aposolo haliweki leke au lo halememe. \v 14 Kota꞉ a꞉pa꞉la꞉ma꞉ hone wopu wia꞉peke na ya꞉la꞉me. Pa ekipeke Sadanima꞉ kone ipikita꞉ mo pa̱a̱piki enisoloma꞉ handeke nono pu hapeke ya꞉la꞉me. \v 15 Koto ekina꞉ta꞉ ipika꞉ pa hameke e pokaasa꞉ haliwekima꞉ iki make ota꞉ tikitiki piki hauna꞉ e pokaasa꞉ haliweki hata꞉ au lemeka꞉na꞉ta꞉ kota꞉ kotoeki hau tieke dia꞉me. Paetolo nate nina꞉ta꞉ ika꞉ pimi hauma꞉ wala꞉la꞉ yenki kone milimikie. \s1 Polota꞉ aposolo hata꞉ mieke tandamanu \p \v 16 I̱ma꞉ pa yaapo peao dupa alome. Ma꞉nda꞉ma꞉ I̱ta꞉ hone na wiki halie hone wia꞉peke na ya꞉la꞉me. Pate ikana꞉ma꞉ koto hone wimika꞉na꞉ta꞉ kota꞉ a꞉pa꞉la꞉me. I̱ma꞉ta꞉ hosiki siki hauna꞉ hakoko liono I̱ta꞉ hone na wiki hali leke handa꞉ mipee. \v 17 Kota꞉ ame I̱ma꞉ do alo ekita꞉ Koda꞉ma꞉ I̱ma꞉ lono lolo pi dia꞉me. Dupiki hakoko litolo ekita꞉ ota꞉e mo hone na wiki somema꞉ ala꞉ tupa꞉ alome. \v 18 Kutu pa꞉la꞉pate kenke hauna꞉ hakoko liteleme wanda꞉hali wopu halemeeki yalota꞉ I̱ma꞉ make homeke hau pulueke. \v 19 Ikita꞉ lombei peao hone wopu wilimieki yalota꞉ mo hone na wiki haliwekita꞉ ta꞉na꞉ma꞉ homa handa꞉ mu halememe. \v 20 Ikana꞉ma꞉ta꞉ mo iki dupi dupi lo haleme haliweki make o iki teke puleke lao haleme haliweki make o iki hona꞉ma̱o̱ haleme o iki handa꞉niao haleme o iki kadapo ku haleme haliweki paeyao pa꞉ta꞉ ta꞉na꞉ma꞉ homolo hata꞉ ika꞉ pi opu halememe. \v 21 Nikana꞉ma꞉ta꞉ kutupiki haumanu puluekema꞉ doda꞉pikina꞉ na puma꞉ta꞉ laa loluekema꞉ I̱ma꞉ yaala꞉ pa꞉la꞉me. \p Pate ma꞉nda꞉ epima꞉ ala꞉ta꞉ ma꞉nda꞉na꞉ honkopu hao hakoko lulueke hone wia꞉ka꞉na꞉ta꞉ kota꞉ I̱ma꞉ make hone na wiki some leke mandake tupa꞉ loluekema꞉ ana꞉na꞉ honkopu hao pea꞉peke ya꞉lieke. \v 22 Ikita꞉ Hibulu ya꞉ka꞉ta꞉pe kota꞉ I̱ make lataa. Ikita꞉ Isulai ya꞉ka꞉ta꞉pe kota꞉ I̱ make lataa. Ikita꞉ Eipoloha꞉ma꞉na꞉ tapake ya꞉ka꞉ta꞉pe kota꞉ I̱ make lataa. \v 23 Ikita꞉ Ketisona꞉ e pokaaseme haliweki ya꞉ka꞉ta꞉pe kota꞉ I̱ta꞉ you hoke halima꞉ leke nono pitolopate I̱ta꞉ e pokaaso hali hata꞉ iki lombei peaalome. I̱ma꞉ta꞉ lombei peaaso hata꞉ oto honkopu hao e wopu pokolome. I̱ta꞉ dipula da pa꞉ta꞉manu ota꞉ lombei piki hoto eleke eleke mea pitaalememe. I̱ta꞉ ota꞉ lombei peake tupa꞉ dopitama꞉ yombelememe. Kutupa I̱ta꞉ homa꞉la꞉eki tombona꞉ teke pa꞉ta꞉ ota꞉ lombei piki natemanu mea꞉tiki polome. \v 24 Mo Diu tapakema꞉ I̱ta꞉ hoto yunki hata꞉na꞉ minaata꞉ puma꞉ hoto 39 peao I̱ yombimime. \v 25 Kutupa hoto tepota꞉ mo Loma꞉ haliwekima꞉ dopitama꞉ I̱ yombimime. Kutupa hoto homeketa꞉ toopima꞉ I̱ limime. I̱ta꞉ hoto tepota꞉ mo sisima kawasota꞉ toopina꞉ tulaaso yambolo hoeya꞉tiki pua꞉me. Kutupa hoto ma꞉nda꞉ta꞉ ota꞉ nate homekena꞉ ma꞉nda꞉ma꞉ I̱ petelena꞉ oni ikali manda pomua꞉me. \v 26 Yaka wopu pomua꞉tiki pu haowa꞉ pa꞉ta꞉ manuta꞉ I̱ lia homaaluekema꞉ mo ikali tieke tea꞉ ekima꞉ teke pa꞉ta꞉ epea꞉ make mo pake nala꞉ haliwekima꞉ make teke pa꞉ta꞉ haememe. Mo Diu yankeke tonu pita꞉ Diendaili tapake yaapoma꞉ta꞉ I̱ hoeyaaluekema꞉ hone wimime. Mo daonimanu pa꞉ta꞉ make hapu hayeke alemanu pa꞉ta꞉ make dawala tieke manuna꞉ make makeaaso yankeke tonu pa꞉ta꞉ make ota꞉ I̱ hoeyaapeke alemanu teke pa꞉ta꞉ hatiki pu haowa꞉me. \v 27 Kutupa nate mandaneeki manuna꞉ta꞉ honkopu paena꞉ kone e wopu pokoa꞉me. Hoto eleke eleke timba꞉ naneta꞉ e pokaaluekema꞉ u na polua꞉me. Nate ma꞉nda꞉ nina꞉ta꞉ I̱ta꞉ tea꞉ma꞉ make ikali na꞉na꞉ma꞉ make homoa꞉me. I̱ta꞉ nate ma꞉nda꞉ nina꞉ta꞉ ne da dau wopu dia꞉yalo hata꞉ pa haowa꞉me. \v 28 Kutupa mandane haumanu wina꞉ koneta꞉ I̱ta꞉ hoto paeyaota꞉ mo siosi paeyao pa꞉ta꞉ hone uluekema꞉ I̱ ota꞉ tumbaala꞉me. \v 29 Ma꞉nda꞉ a꞉nda꞉ damako pia꞉ka꞉na꞉ta꞉ I̱ make homeke tupa꞉ damako pu halome. Ma꞉nda꞉ a꞉nda꞉ hoke hau pa꞉ta꞉ mea lopaeya꞉ka꞉na꞉ta꞉ kota꞉ I̱ta꞉ ya puki pa꞉ta꞉ ka꞉nda꞉ma꞉ homolome. \p \v 30 I̱ma꞉ hakoko lia꞉peke ya꞉ka꞉na꞉ta꞉ kota꞉ I̱ma꞉ mo I̱ damako pitoloeki wala꞉la꞉ ale manuna꞉ hakoko lionoe. \v 31 Koda꞉ mo Tekehali Yesu Ketisona꞉ Atekema꞉ta꞉ I̱ma꞉ta꞉ yayapiki pi na alome laa hone wita꞉la꞉me. Ipika꞉ bikita꞉ hoto paeyao mea a꞉meiyamana꞉e. \v 32 I̱ta꞉ mo Damasikasi daoni pa꞉ta꞉ haowa꞉ dina꞉ta꞉ mo kini Aletasi oto pa꞉ta꞉ haya꞉ kapomani halima꞉ta꞉ I̱ minina꞉ alo hata꞉ mo daoni pota꞉ pa꞉ta꞉manu haliweki handeteke hao yapena꞉ lea꞉me. \v 33 Pate I̱ta꞉ mo daoni pape tea꞉na꞉ lombaemeke seto ka꞉ka꞉na꞉ windo pa꞉ta꞉ yama꞉ basekede nuna꞉ pita꞉paleke lopaniao ipika꞉ kiki pa꞉ta꞉ ka꞉la꞉pa꞉ta꞉ pao pindipa poa꞉me. \c 12 \s1 Polona꞉ upama꞉ leke walea꞉ ekimanu handeekeeki \p \v 1 I̱ma꞉ta꞉ do hauta꞉ ota꞉ teke ma꞉nda꞉ na ula꞉pate kone ota꞉ hakoko pa lia꞉peke ya꞉la꞉me. I̱ma꞉ mo Tekehalima꞉ kia꞉ pa upama꞉ leke handa꞉la꞉ ekimanu pita꞉ peneme yao walea꞉ ekimanu yaapona꞉ pimanu ame lolueke. \v 2 I̱ma꞉ hone uluta꞉ amba꞉ paeya꞉ bapi 14 haowa꞉ dina꞉ta꞉ Ketiso hali ma꞉nda꞉ta꞉ oli ota꞉ manda hala꞉ hepeni nane pa꞉ta꞉la꞉ mea pea꞉eki hone ulume. Do ekita꞉ ota꞉ pia꞉pe o pa upama꞉ leke handea꞉pe laa I̱ hone na ulupate Koda꞉ma꞉ homeke hone ula꞉me. \v 3-4 I̱ma꞉ yaapo peao paa alome. Koto halita꞉ oli Pa꞉ta꞉daisi nane pa꞉ta꞉la꞉ mea pea꞉me. Paa alome. Koto hauta꞉ ota꞉ pia꞉me laa make pa upama꞉ handeke nono pia꞉pe laa Koda꞉ma꞉ homeke hone ula꞉me. Kutupa koto pa꞉ta꞉ta꞉ pima꞉ lapeke na ya꞉la꞉ ekimanu opia꞉me. Mo kenke halina꞉ kake hambilikima꞉ na layeke ekimanu loa꞉me. \v 5 Koto ekina꞉ta꞉ I̱ma꞉ta꞉ mo halina꞉ pi lawalueke. Pate pa yaka kone yaka pi na lalueke. Kutu pulu pa꞉la꞉pate mo I̱ damako piki hali haloeki wala꞉la꞉eki homeke pi lalueke. \p \v 6 I̱ma꞉ pi lalueke hone ua꞉ka꞉na꞉ta꞉ kota꞉ I̱ta꞉ hone na wiki some na halueke. Pa ekipeke. Koto pita꞉ ota꞉ pi homeke lolueke. Pate pi na lalueke. Kutupa ma꞉nda꞉ma꞉ yaka pokoa꞉ emanu handolota꞉ yaka waloa꞉ pimanu opitolo hata꞉ I̱ta꞉ dupiki somee laa lea꞉ka꞉na꞉ta꞉ a꞉pa꞉la꞉pate pa ma꞉nda꞉ma꞉ I̱ pa꞉ta꞉ anemone hone wita꞉la꞉ ekita꞉ I̱ kipa꞉la꞉me. \s1 Polona꞉ lokena꞉ mieke tanda \p \v 7 Koda꞉ma꞉ I̱ pa꞉ta꞉ peneme yao ota꞉ ta꞉ta꞉ piki epeke haumanu walea꞉ ekita꞉ wopu handoa꞉me. Koto handoa꞉eki manuma꞉ I̱ manda meaama꞉na꞉ mo ya loke pa꞉ta꞉ ota꞉ tanda tieke pa꞉la꞉eki ma꞉nda꞉ kia꞉me. Mo ekima꞉ta꞉ I̱ma꞉ hakoko liaama꞉na꞉ yeke Sadanima꞉ I̱ yombina꞉ epena꞉ lea꞉me. \v 8 Doeki mea bae laa lota꞉ pitolo hata꞉ I̱ma꞉ta꞉ hoto tepona꞉ Tekehali pa꞉ta꞉ yeni pua꞉pate \v 9 ipika꞉ hombo peaya꞉ ekita꞉ dupa lea꞉me. Yaka a꞉ta꞉ma꞉ homa tamba꞉ mina꞉la꞉ ekita꞉ ana꞉ pa꞉la꞉me. Pa ekipeke neke damako pele dina꞉ta꞉ kota꞉ yaka welena꞉ ota꞉ lombei pea tieke ula꞉me lea꞉me. Koto ekina꞉ta꞉ mo yaka damako pa꞉la꞉ ekimanu pa꞉ta꞉ hakoko luluekema꞉ I̱ta꞉ ta꞉na꞉ wopu pa꞉la꞉me. Pa ekipeke mo Ketisona꞉ handeteke hala꞉ welema꞉ I̱ handeteke hala꞉eki handuluekema꞉ loa꞉me. \v 10 Koto ekina꞉ I̱ma꞉ta꞉ Ketisona꞉eki peaaso mo damako pa꞉la꞉ ekima꞉ make tetopiki pima꞉ make ka꞉nda꞉piki ekima꞉ make a꞉nda꞉ lita꞉la꞉ ekima꞉ make mamatala꞉ ekima꞉ make I̱ta꞉ pa ta꞉na꞉ pa꞉la꞉me. Pa ekipeke I̱ta꞉ damako polo dina꞉ta꞉ honkopu hao halome. \s1 Poloma꞉ Kotindi tapake hone wotu wiekeeki \p \v 11 I̱ta꞉ hone na wiki halima꞉ pita꞉la꞉eki leke pitolopate ikana꞉ma꞉ I̱ma꞉ kutu pono lelememe. Ikana꞉ma꞉ ta꞉na꞉ma꞉ homelemeeki I̱ pa꞉ta꞉ ota꞉ peneme yao wala꞉peke ya꞉la꞉me. I̱ta꞉ biki na wiki hali yana꞉ kone mo ika꞉ leleme ta꞉ta꞉piki aposolo haliweki pa꞉ta꞉ta꞉ ota꞉ hau homekesiki kone oto pa꞉ta꞉ na halome. \v 12 Mo hande na handeke haumanu make ta꞉ta꞉piki haumanu make iki tukikina꞉ peneme yaasota꞉ I̱ta꞉ ota꞉ aposolo hali wala꞉la꞉me. Kutupiki haumanu pua꞉ ekita꞉ homuma꞉ pua꞉ ekina꞉ loa꞉me. \v 13 Mo mandane siosi pa꞉ta꞉ tamba꞉ mua꞉ tupa꞉ta꞉ iki pa꞉ta꞉ ekipiki homeke hau a꞉nda꞉ na pua꞉pe. Hau homeketa꞉ pa ika꞉ manima꞉ I̱ tamba꞉ muemena꞉ laa ka꞉nda꞉ na peaowa꞉me. A꞉ta꞉e. Do I̱ma꞉ iki pa꞉ta꞉ mandake hau na pua꞉ ekita꞉ ota꞉ pa paeyawapee. \p \v 14 Ameta꞉ hoto tepo peao iki handolo ipuluekema꞉ tikitiki yaasopate iki pa꞉ta꞉ honke ala꞉ ekimanu ma꞉nda꞉ na pulueke. I̱ma꞉ta꞉ ika꞉ manimanu hone na pa꞉la꞉pate ota꞉ iki homeke yaka yankeke hamena꞉ hone pa꞉la꞉me. Pa ekipeke weki wandikima꞉ ika꞉ apa꞉ ama꞉na꞉ dia꞉ya꞉la꞉ alemanu na ana꞉ laalo pa꞉la꞉pate apa꞉ ama꞉ma꞉ta꞉ ika꞉ weki wandikina꞉ dia꞉ya꞉la꞉ ale ana꞉ lawaapeke ya꞉la꞉me. \v 15 Koto ekina꞉ yaka ta꞉na꞉ pa꞉la꞉ ekita꞉ iki tamba꞉ muluekema꞉ yeketa꞉ yaka wia halo ale paeyao make I̱ kone make pa baalueke laata꞉ I̱ hone wopu pa꞉la꞉me. I̱ma꞉ta꞉ iki pukima꞉ wopu homolo ekina꞉ yeke ikana꞉ma꞉ta꞉ I̱ta꞉ hosikima꞉ kone puki kilimikipe. \p \v 16 I̱ma꞉ta꞉ iki ka꞉nda꞉ na peaowa꞉me laata꞉ ikana꞉ma꞉ta꞉ ota꞉e lelimikie. Pate ma꞉nda꞉ma꞉ta꞉ I̱ta꞉ makeaaso hata꞉ ikita꞉ yayapiki pi manuma꞉ tamea꞉me laa lelieke. \v 17 Pate ekipa yaka꞉ta꞉ mo I̱ma꞉ pi mea epena꞉ tapaowa꞉ haliweki pa꞉ta꞉ yama꞉ iki teke puleke lawa꞉pe. \v 18 I̱ma꞉ta꞉ Taitasi pue laa honke laata꞉ ipiki ame̱le̱ mo hande Ketiso kame ma꞉nda꞉ make tapaowa꞉me. Ikana꞉ma꞉ta꞉ Taitasima꞉ iki teke puleke laeya꞉me lelimipe. Dikana꞉ma꞉ta꞉ homeke hau teke peaata꞉ ota꞉ homeke tupa꞉ popeke pa꞉la꞉ haumanu na pupa꞉pe. \p \v 19 Mata꞉la꞉me. Hoto paeyaota꞉ ika꞉ leke popelekena꞉ nikana꞉ma꞉ nika꞉ kone tamba꞉ muluekema꞉ pitoloma꞉me hone witolo pitelememe. Dia꞉me. Nikana꞉ma꞉ta꞉ Koda꞉na꞉ leke popelekena꞉ hata꞉ Ketisoma꞉ niki pi lomono lolo pa꞉la꞉ tupa꞉ aloma꞉me. Kutupa nika꞉ puki piki yankeke tonuo nikana꞉ma꞉ pitoloma꞉ hau paeyaota꞉ iki tamba꞉ muluekema꞉ pitoloma꞉me. \v 20 I̱ koto pa꞉ta꞉ opolo epoa꞉ka꞉na꞉ta꞉ ikita꞉ dupiki wanda꞉hali a꞉pa handulueke hone wia ipulua꞉pate pa ikita꞉ ta꞉ta꞉piki wanda꞉hali handulueke laa I̱ta꞉ paala꞉ pita꞉la꞉me. Kutupa make ikana꞉ma꞉ I̱ta꞉ dupiki some handulumeke hone wilimipate I̱ta꞉ pa ta꞉ta꞉ piki some handilimikie. I̱ paala꞉ pita꞉la꞉ ekita꞉ iki tukiki pa꞉ta꞉ta꞉ ape ala꞉ haumanu make ne tunkula꞉la꞉ haumanu make mineke tieke panka꞉la꞉ haumanu make pasa꞉tei pita꞉la꞉ haumanu make yaala꞉ peake haumanu make la la piki pimanu make manda꞉ meaasa꞉ haumanu make mamataasa꞉ haumanu make paeyao handa꞉ ulueke. \v 21 I̱ paala꞉ pita꞉la꞉ ekita꞉ I̱ pa ipulua꞉ dina꞉ta꞉ yaka Koda꞉ma꞉ta꞉ ika꞉ leke popelekena꞉ I̱ta꞉ wenoko mealieke. Kutupa I̱ma꞉ta꞉ mo amba꞉ hoke hau pimi wanda꞉halita꞉ ika꞉ kikana꞉ haumanu pimieki make ika꞉ hoke hone wimi ekimanu make ika꞉ loke apa꞉taasa꞉ hoke haumanu pimi ekimanu hoki na walemeke ekina꞉ I̱ma꞉ e̱ lolueke hone witolome. \c 13 \s1 Paeyaaso kinki pita꞉la꞉ pimanu \p \v 1 I̱ta꞉ hoto tepo peao iki handolo ipuluekema꞉ taapolome. Mo Baiboloma꞉ la꞉la꞉ tupa꞉ta꞉ Ma꞉nda꞉ma꞉ ketete pa꞉la꞉me lemeka꞉na꞉ta꞉ kota꞉ koto mo hali yaapo tepoma꞉ a꞉nda꞉ Ota꞉e Handoma꞉me pi alo wekitisi haemeka꞉na꞉ homeke ana꞉ pa꞉la꞉me la꞉la꞉me. \v 2 Amba꞉ hande hoto yaapo peao epoa꞉ dina꞉ la kua꞉ ekita꞉ ame papate halo dina꞉ta꞉ paa lolueke. Iki ame̱le̱ amba꞉ hoke hau pimi wanda꞉hali make pa iki paeyao pa꞉ta꞉ make I̱ma꞉ alo pi dupa. I̱ paa ipulua꞉ dina꞉ta꞉ ma꞉nda꞉ epi a꞉nda꞉ ipika꞉ panisi mea꞉peke ekita꞉ ota꞉ paka꞉lao pua꞉peke na yelieke alome. \v 3 Mo Ketisoma꞉ I̱ pa꞉ta꞉ yama꞉ lo hala꞉me ekina꞉ peneme yaasa꞉ ekita꞉ ikana꞉ma꞉ ota꞉ ana꞉na꞉ wia halimikie. Ipikana꞉ma꞉ iki pa꞉ta꞉ hau ma꞉nda꞉ pia꞉ka꞉na꞉ta꞉ ipikita꞉ damako na pa꞉la꞉me. Kotoeki na pikita꞉ ipikana꞉ma꞉ iki tukiki pa꞉ta꞉manu ipika꞉ honkopu walo hala꞉me. \v 4 Mo damako peaaso haena꞉ kone ipikita꞉ mo kotosina꞉ lu homaeya꞉pate Koda꞉na꞉ honkopuma꞉ta꞉ ipikita꞉ da꞉taa hao hala꞉me. Kutupa make ipiki ame̱le̱ tunaaso hata꞉ niki make damako poloma꞉pate pa iki ame̱le̱ tukikina꞉ hata꞉ nikana꞉ma꞉ta꞉ Koda꞉ma꞉ Ketiso wele peaasa꞉eki ma꞉nda꞉ putupa꞉ meaata꞉ ika꞉ yankeke halumeke. \p \v 5 Ika꞉ kone mo la handa꞉la꞉eki pa꞉ta꞉ u moneaaso hata꞉ ika꞉ kone pi yokaalu pea꞉pa꞉peke. Do hauta꞉ ika꞉ ota꞉ hone tulaasa꞉eki pa꞉ta꞉ halemeo laa handa꞉ uluekema꞉ pea꞉pa꞉peke. Iki amba꞉ a̱i̱ na lopemeketa꞉ kota꞉ Yesu Ketisota꞉ iki pa꞉ta꞉ hala꞉me hone u hapa꞉peke aleo. \v 6 Ikana꞉ma꞉ nikita꞉ na lopo haloma꞉me laa hone uemena꞉ yeke I̱ma꞉ hone ti lao halome. \v 7 Ikana꞉ma꞉ ata꞉ka꞉ pikieki ma꞉nda꞉ na puemena꞉ laa nikana꞉ma꞉ Koda꞉ pa꞉ta꞉ yeni pu haloma꞉me. Kota꞉ nikita꞉ mo la handa꞉la꞉eki lombei puma꞉me laa waluekema꞉ dia꞉ya꞉la꞉me. Pate nikita꞉ lopo hake nono piomono kone ikita꞉ mo ota꞉ tikitiki piki hau puemena꞉ yeke loma꞉me. \v 8 Nikana꞉ma꞉ta꞉ mo ota꞉eki pa꞉ta꞉ a꞉nda꞉piki hau ma꞉nda꞉ homeke pea꞉peke na ya꞉la꞉pate pa ipika꞉eki homeke pumana꞉ loa꞉me. \v 9 Niki damako poloma꞉ dina꞉ta꞉ iki honkopu hao haleme ekima꞉ nikita꞉ ta꞉na꞉ wopu pa꞉la꞉me. Koto ekina꞉ta꞉ iki ota꞉eki a꞉nda꞉ na piki wanda꞉hali hamena꞉ nikana꞉ma꞉ yeni pea꞉tiki pu haloma꞉me. \v 10 Koto ekina꞉ yeketa꞉ I̱ma꞉ papate hata꞉ doeki laasome. Pa ekipeke I̱ opolo epoa꞉ka꞉na꞉ta꞉ mo Koda꞉ma꞉ I̱ ka꞉la꞉ honkopu pita꞉ hata꞉ iki tandapiki tupa꞉ na a꞉pa lolo polo tupa꞉ loa꞉me. Do honkoputa꞉ iki mea londa꞉laalo polo tupa꞉ dia꞉ya꞉la꞉pate iki mea daeyaluekema꞉ yeke loa꞉me. \s1 Paeyaaso a꞉talo pimanu \p \v 11 Koto ekina꞉ ameta꞉ yaka kame tonuo iki pa꞉ta꞉ a꞉taloe alome. Eki a꞉nda꞉ ota꞉ na piki wanda꞉hali hamena꞉ iki ota꞉ honkopu hao hapa꞉peke. Yaka loa꞉ honke pimanu opu hapa꞉peke. Ma꞉nda꞉ ma꞉nda꞉ ame̱le̱ homeke hone u alualu pea꞉pa꞉peke. Puki lopaniaasa꞉eki pa꞉ta꞉ hapa꞉peke. Kutupa mo pukima꞉ homa꞉la꞉eki make puki lopaniaasa꞉ ekina꞉ Koda꞉ta꞉ iki ame̱le̱ halieke. \p \v 12 Yankeke tonu pa꞉ta꞉ ta꞉na꞉ma꞉ homolo hata꞉ kiki mina꞉ alualu pea꞉pa꞉peke. Do Koda꞉na꞉ wanda꞉hali paeyaoma꞉ iki pa꞉ta꞉ ika꞉ a꞉talo pimanu tapaasememe. \p \v 13 Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekima꞉ make Koda꞉na꞉ pukima꞉ homa꞉la꞉ ekima꞉ make Holi Sipitidina꞉ ta꞉ma꞉ni pita꞉la꞉eki paeyaoma꞉ta꞉ iki ame̱le̱ wina꞉e.