\id 1TI - Sembeleke (SGI1TI.01) Samberigi PNG 1Timothy 01 13/2/91 Macnaughtan \h 1 TIMODI \toc1 Poloma꞉ Timodi pa꞉ta꞉ tapaeyeke titina꞉ wapee \toc2 1 Timodi \toc3 1 Timodi \mt1 Poloma꞉ Timodi pa꞉ta꞉ tapaeyeke titina꞉ wapee \c 1 \p \v 1 Polo I̱ta꞉ mo Ketiso Yesuna꞉ aposolo hali halome. Nika꞉ da꞉taasa꞉ Koda꞉ma꞉ make mo epena꞉ yu wia haloma꞉ Ketiso Yesu yaapoma꞉ do e pokono lelepeme. \p \v 2 Do wape Timodi neke pa꞉ta꞉ wape pitolome. Mo Koda꞉ pa꞉ta꞉ hone tulaaseme ekina꞉ta꞉ neketa꞉ ota꞉ ya weki haleme. Mo Apa꞉ Koda꞉ pita꞉ Ketiso Yesu nika꞉ Tekehali ipilikana꞉ma꞉ mo tamba꞉ mina꞉la꞉eki make a꞉ta꞉ma꞉ homa꞉la꞉eki make puki lopaasa꞉eki make neke pa꞉ta꞉ kina꞉e. \s1 Makeaasa꞉ hau wala꞉la꞉ ekina꞉ kinki pita꞉la꞉ pimanu \p \v 3 I̱ma꞉ mo hande Ma꞉sedonia nane pulu hata꞉ loa꞉ tupa꞉ ame make neketa꞉ mo Epesese nane pa hao hapeke alome. Koto pa꞉ta꞉ haleme mandane haliwekima꞉ iki makeaasa꞉ haumanu walo halemeeki na walepepee loelena꞉yeke loa꞉me. \v 4 Mo haliweki ika꞉ napeke na pitiki pimanu make ika꞉ apa꞉meina꞉ atekena꞉ atekena꞉ bikimanu yata꞉po hata꞉ alemeeki make paeyao mina꞉pa꞉laena꞉ lapeke. Kutu piki pi lo haleme ekima꞉ ikana꞉ma꞉ Koda꞉na꞉ epeaalo pa꞉la꞉ ekimanu mina꞉ na tamba꞉ mikita꞉ ape ape la꞉ tiaalieke. Mo epeaalo pa꞉la꞉eki manuta꞉ nika꞉ hone tulaaloma꞉ ekima꞉ homeke mia꞉peke ya꞉la꞉me. \v 5 Mo iki pa꞉ta꞉ na lapepee lapeke alo ekina꞉ teketa꞉ kota꞉ mo wanda꞉hali ika꞉ hone teke yako pea make ika꞉ puki lopao make ika꞉ Yesu pa꞉ta꞉ ota꞉ hone tulao halimi ekima꞉ make koto haumanu pilimi ekima꞉ ika꞉ ika꞉ kone pukima꞉ homa꞉ alualu pea haena꞉yeke loa꞉me. \v 6 Mandane wanda꞉halima꞉ do haumanu mina꞉pa꞉lao mo hande popeke na piki pimanu hotu haleme ekima꞉ epeke hau pea꞉peke ya꞉la꞉ pota꞉manu handa꞉pa꞉peke na ya꞉la꞉me. \v 7 Ikana꞉ma꞉ Koda꞉na꞉ pi ula꞉eki manuna꞉ wala꞉la꞉ hali haluekee hone wia hata꞉ dupa꞉pa꞉peke dupa꞉pa꞉peke pimanu wopu alemepate pa mo ika꞉ aleme pi kone hone wopu na u make koto pina꞉ teke make hone wopu na witelememe. \v 8 Mo Koda꞉na꞉ Lo Pi manuma꞉ la꞉ ula꞉ tupa꞉ homeke pu haya꞉ka꞉na꞉ta꞉ epelieke hone witoloma꞉pate \v 9 pa dupiki hone make witoloma꞉me. Mo lo pi manuta꞉ mo epeke wanda꞉hali tikitiki yaaluekema꞉ na ula꞉pate pa mo ika꞉ you hali pa꞉ta꞉ homu na piki pa pi yambolo haleme wanda꞉hali pa꞉ta꞉ ula꞉me. Dupae. Koda꞉ hoki walaa hoke hau pu haleme wanda꞉hali pa꞉ta꞉ make Koda꞉ hone ma꞉nda꞉ na wiki kenke alemanu pa꞉ta꞉ homeke hone u haleme wanda꞉hali pa꞉ta꞉ make inkiki ateke kone lu make mandane wanda꞉hali lu homao haleme wanda꞉hali pa꞉ta꞉ make kutupa mo \v 10 yola꞉la꞉ hau pu haleme wanda꞉hali pa꞉ta꞉ make mo wanda꞉ pa꞉ta꞉ pita꞉la꞉ hauta꞉ pa hali yankeke pa꞉ta꞉ kone pita꞉la꞉ wanda꞉hali pa꞉ta꞉ make mandane wanda꞉hali pake mina꞉la꞉ wanda꞉hali pa꞉ta꞉ make yayapiki pi lo haleme wanda꞉hali pa꞉ta꞉ make ya pi alo kone Tekehalina꞉ biki lo haleme wanda꞉hali pa꞉ta꞉ make kutu piki hau piteleme wanda꞉hali paeyao pa꞉ta꞉ hone witolo hata꞉ koto lo pimanu wia pa꞉la꞉me. Do lo pimanu ula꞉ ekita꞉ mo epeke tikitiki piki mana꞉ pimanu a꞉mbaasa꞉ hoke haumanu sa꞉sa꞉ puluekema꞉ ula꞉me. \v 11 Koto wala꞉peke mana꞉ pi epeketa꞉ mo pa̱a̱ pita꞉la꞉ ta꞉na꞉ piki Koda꞉ma꞉ I̱ma꞉ la halonoyeke ka꞉la꞉ Pi Seliapo pa꞉ta꞉ ula꞉me. \s1 Poloma꞉ Koda꞉na꞉ a꞉ta꞉ma꞉ homeeke ekina꞉ keiyae leekeeki \p \v 12 Ya e pokono wele peaasa꞉ Ketiso Yesu nika꞉ Tekehali pa꞉ta꞉ keiyae pi alome. Ipika꞉ e I̱ma꞉ ana꞉na꞉ pokaalieke hone wia I̱ ma̱leke lieke ekina꞉ keiyae alome. \v 13 Amba꞉ta꞉ I̱ma꞉ ota꞉ Ketisona꞉ biki hoke pi pi alo hata꞉ make ipika꞉ wanda꞉hali ka꞉nda꞉ma꞉ homa꞉ tiao make iki tekipuleke laasa꞉ hali haowa꞉me. Kutu pua꞉ ekita꞉ I̱ma꞉ Ketiso pa꞉ta꞉ hone na tulao make mo pua꞉ ekina꞉ teketa꞉ hone wopu na wiki hata꞉ pueke handaa Koda꞉ma꞉ I̱ pa꞉ta꞉ a꞉ta꞉ma꞉ homeekeme. \v 14 Nika꞉ Tekehalima꞉ ipika꞉ a꞉ta꞉ma꞉ homa tamba꞉ mina꞉la꞉eki I̱ pa꞉ta꞉ wopu kua꞉niaeyekeme. Kutupa make mo nika꞉ Ketiso Yesu ame̱le̱ molome hone tulaasa꞉eki pita꞉ pukima꞉ homa꞉la꞉eki yaapo I̱ pa꞉ta꞉ make kia꞉me. \p \v 15 Ota꞉ opua hone tulaapeke ya꞉la꞉ ota꞉ pi ma꞉nda꞉ta꞉ dupa. Ketiso Yesuma꞉ hoke hau pu haloma꞉ wanda꞉hali da꞉taaluekema꞉ yeke do kenkena꞉ epeekeme. Koto ekina꞉ mo hoke hau wopu pita꞉la꞉ halita꞉ I̱ ya꞉pate \v 16 Koda꞉ma꞉ I̱ pa꞉ta꞉ a꞉ta꞉ma꞉ homeekeme. Ipikana꞉ma꞉ koto I̱ pa꞉ta꞉ a꞉ta꞉ma꞉ homeeke ekina꞉ teketa꞉ Ketiso Yesuma꞉ mo wetepe hone tulao da꞉ta꞉la꞉eki mulu peleme wanda꞉halima꞉ ipika꞉ a꞉ta꞉ma꞉ homa꞉la꞉eki I̱ pa꞉ta꞉ pieketa꞉ iki pa꞉ta꞉ make pina꞉ I̱ pa꞉ta꞉ amba꞉la wala꞉la꞉me. \v 17 Mo lekema꞉ handa꞉peke na yo make homa꞉peke na yo piki da꞉ta hao hala꞉ Kini hali ipiki homeke kone Koda꞉ hala꞉me. Ipika꞉ biki tieke ota꞉ kende wina꞉ mea a꞉meiyaena꞉ la꞉na꞉e. Kutu pina꞉e. \p \v 18 Ya weki Timodio. I̱ma꞉ amba꞉ neke hone witolo hata꞉ la꞉ wia꞉ pita꞉ koto la꞉ wia꞉ tupa꞉ kone ame nakana꞉ma꞉ pea꞉peke alome. Koto la꞉ wia꞉ pi manuta꞉ naka꞉ a꞉nda꞉ pita꞉la꞉ ale leke miniki hata꞉ a꞉nda꞉ epeke tupa꞉ pea꞉peke. \v 19 Kutupa naka꞉ hone tulaleeki wopu miniki hata꞉ naka꞉ hone tekemanu ha̱i̱ peaapa꞉na꞉ wopu handeteke hapeke. Mandane haliwekima꞉ta꞉ ika꞉ hone tekemanu pendulu baemeke handaata꞉ ika꞉ hone tulaaseme ekita꞉ mo hande sisima kawasota꞉ toopina꞉ tulaaso yambolo hoeta꞉la꞉ tupa꞉ ika꞉ hone tulaasemeeki make koto tupa꞉ kone ota꞉ hoeyaasememe. \v 20 Mo haliweki ame̱le̱ haepeke hali yaapo ipilika꞉ biki Haimeniasi pita꞉ A꞉lekesa꞉nda yaapota꞉ koto hau pipikime. Ipiliki tanda mina꞉ mo Sadanina꞉ kiki pa꞉ta꞉ pa꞉na꞉ tapaowa꞉me. Kutu pu ekima꞉ta꞉ ipilikana꞉ma꞉ mo hande Koda꞉na꞉ biki laasepeeki mina꞉pa꞉laena꞉ tamba꞉ milieke. \c 2 \s1 Siosi tapakena꞉ mombela yeni pita꞉la꞉eki \p \v 1-2 Ya sutiaaso titina꞉ pita꞉ dupa. Ikana꞉ma꞉ Koda꞉ pa꞉ta꞉ yeni pimika꞉na꞉ta꞉ wanda꞉hali paeyao make ika꞉ kini haliweki make kapomani e poka꞉la꞉ haliweki make Koda꞉ma꞉ tamba꞉ mina꞉ honke lo hapa꞉peke. Kutaa make ikina꞉ keiyae lo hapa꞉peke. Koto yeni pulu peleme ekina꞉ teketa꞉ do ekina꞉ alome. Iki niki paeyao yopu hao polumana꞉ make Koda꞉na꞉ tikitiki piki hau mumana꞉ alome. \v 3 Kutu piki yeni pita꞉la꞉eki manuma꞉ta꞉ mo niki pa꞉ta꞉la꞉la꞉ Koda꞉ ta꞉na꞉ma꞉ homaasa꞉me. \v 4 Ipika꞉ hone pa꞉la꞉ ekita꞉ wanda꞉hali paeyaoma꞉ ipika꞉ da꞉ta꞉la꞉eki mea hata꞉ mo ota꞉ pina꞉ teke handa꞉ wina꞉e. \v 5 Ipikita꞉ ota꞉ Koda꞉ homeke hala꞉me. Kutupa Koda꞉ pita꞉ wanda꞉hali nika꞉ ka꞉pa hali homeketa꞉ Ketiso Yesu hala꞉me. \v 6 Ipikana꞉ma꞉ Koda꞉na꞉ la꞉ wieke nate opolo epeeketa꞉ wanda꞉hali paeyao paa hambuluekema꞉ ipiki kone haleekeme. Kutu pieke ekima꞉ walolota꞉ Koda꞉ma꞉ wanda꞉hali paeyao da꞉ta꞉la꞉eki mina꞉e laa hone pa꞉la꞉eki peneme yaala꞉me. \v 7 Koto pi walono yeke Koda꞉ma꞉ I̱ aposolo hano la꞉la꞉me. I̱ma꞉ yaa pi na alome. Ota꞉ pi alo loa꞉me. Ipikana꞉ma꞉ I̱ta꞉ mo Diendaili wanda꞉halina꞉ moka꞉la꞉ tiaasa꞉ hali hata꞉ta꞉ ipika꞉ ota꞉ pi make mo hone tulaasa꞉eki make walaano yeke hano la꞉la꞉me. \p \v 8 I̱ma꞉ Siosi paeyao pa꞉ta꞉ halima꞉ yeni pina꞉ hone pa꞉la꞉me. Hali epima꞉ ma꞉nda꞉ pa꞉ta꞉ mineke pankolo o kake neli pita꞉la꞉ hau na piki ota꞉ yako piki hone u paleke hala꞉ hali manuma꞉ mo siosina꞉ mombilimi pa꞉ta꞉ kiki a꞉meiyao yeni pina꞉e. \s1 Wanda꞉wekima꞉ pea꞉peke haumanu \p \v 9 Wanda꞉weki pa꞉ta꞉ make dupiki pi alome. Ika꞉ dau manuta꞉ epekeeki ika꞉ ana꞉ piki tupa꞉ kone yama꞉pa꞉peke ya꞉la꞉me. Ikana꞉ma꞉ kimelema꞉ hata꞉ ika꞉ itiki loke yaapona꞉ koloma꞉ wepia ula꞉ ale manuma꞉ make o beleke manuma꞉ make o yenki tieke yeke aka꞉manu au na lapa꞉peke. \v 10 Koto hau na pikita꞉ ikana꞉ma꞉ Koda꞉na꞉ wandiki haluekema꞉ hone wimika꞉na꞉ta꞉ kota꞉ ikana꞉ma꞉ ota꞉ epeke haumanu pu hapa꞉peke. Kutu piteleme hauta꞉ ota꞉ ika꞉ au seliapoe. \v 11 Wanda꞉wekima꞉ ika꞉ kone mina꞉niao yopu siki pita꞉ mo pimanu opua꞉pa꞉peke ya꞉la꞉me. \v 12 I̱ma꞉ta꞉ wanda꞉ homeke ma꞉nda꞉ma꞉ mo haliweki pa꞉ta꞉ pi wala꞉la꞉ you wanda꞉ haena꞉e hone na witolome. Dia꞉me. Ikita꞉ pi na leke pita꞉ opita꞉la꞉eki homeke pia꞉pa꞉peke ya꞉la꞉me laa la꞉ witolome. \v 13 Do ekina꞉ yeke loa꞉me. Koda꞉ma꞉ A꞉da꞉ma꞉ amba꞉la wepiaata꞉ Ipa꞉ta꞉ wetepe wepiekeme. \v 14 Kutupa A꞉da꞉ma꞉ma꞉ mo Sadanima꞉ makeaeyeke pi na opiekepate ipika꞉ wanda꞉ Ipima꞉ opuaata꞉ Koda꞉na꞉ pi yambeleekeme. \v 15 Kutu piekepate wanda꞉wekima꞉ weki taapolo hata꞉ a꞉nda꞉ kimelema꞉ hone tulao pukima꞉ homaa tikitiki piki hone taapuna꞉ hata꞉ pu haemeka꞉na꞉ta꞉ kota꞉ mo ika꞉ weki mendilimi ekima꞉ta꞉ iki pa꞉ta꞉ eki a꞉nda꞉ epolo pa꞉la꞉eki sa꞉sa꞉ pilieke. \c 3 \s1 Siosi tapake handeteke hala꞉ haliwekina꞉ pea꞉pekeeki \p \v 1 Ota꞉ pi ala꞉eki ma꞉nda꞉ doe. Hali ma꞉nda꞉ma꞉ ipika꞉ honema꞉ta꞉ Ketiso wanda꞉hali hatuku polueke hone wia꞉ka꞉na꞉ta꞉ kota꞉ epeke e hone koto wita꞉la꞉ handa꞉e. \v 2 Ketiso wanda꞉hali hatuku pula꞉ halita꞉ eki a꞉nda꞉ na piki hali yelieke. Ipikita꞉ wanda꞉ homeke ma꞉la꞉ halie. Ipikita꞉ hone wotu lenkene pea ula꞉ halie. Ipika꞉ lokena꞉ handeteke hata꞉ e na kapa꞉lake epeke tupa꞉ pita꞉la꞉ halie. Mo na handeke wanda꞉hali make ipika꞉ da pa꞉ta꞉ mea peliaasa꞉ hali yelieke. Ipikita꞉ pi epeke tupa꞉ wala꞉la꞉ halie. \v 3 Hoke ikali naa lu keaasa꞉ hali o tekipuleke laasa꞉ hali dia꞉ya꞉la꞉pate ipikita꞉ yopu hata꞉ a꞉nda꞉ a̱i̱ puluekema꞉ na taapa꞉la꞉ halie. Kutupa ipikita꞉ mani pa꞉ta꞉ we na pambeke hala꞉ halie. \v 4 Ipikana꞉ma꞉ ipika꞉ wekiwanda꞉ wopu handeteke hata꞉ make ipika꞉ wekiwandikima꞉ ipiki pa꞉ta꞉ epeke hone wia ipika꞉ pi opina꞉ lelieke. \v 5 Mo halima꞉ ipika꞉ wekiwanda꞉ kone handeteke hapeke na ya꞉ka꞉na꞉ta꞉ kota꞉ Koda꞉na꞉ siosi wanda꞉halita꞉ ekipa handeteke hapeke ya꞉la꞉pe. \v 6 Handaena꞉ hau pea lopaama꞉na꞉ ipikita꞉ Tekehalina꞉ pi panake mina꞉la꞉ hali na halieke. Mo hande Sadani lopeeke tupa꞉ lopaama꞉na꞉ loa꞉me. \v 7 Ipikita꞉ mo Ketiso na haleme wanda꞉halima꞉ kone ipika꞉ pi laalimikie. Kutu pilie ekima꞉ta꞉ ipika꞉ biki na hoeyaaso haena꞉ mo hande Sadanima꞉ hona꞉maasa꞉ ale pa꞉ta꞉ na lopilieke. \s1 Siosi tapake tamba꞉ mina꞉la꞉ haliweki \p \v 8 Kutupa dikoni haliweki make kekeke yaapo na haasa꞉ hali make epeke hau pu haleme haliweki hapeke ya꞉la꞉me. Kutaa make ikita꞉ mo hande waini ikali wotu na no haleme haliweki make yenki haka꞉ta꞉pao muluekema꞉ hone wopu peleme haliweki hapeke na ya꞉la꞉me. \v 9 Kutupa hokeeki ika꞉ hone teke pa꞉ta꞉ na u pelia haena꞉ alo hata꞉ta꞉ mo wala꞉ tiaeyeke ota꞉ pimanu wotu miniki hao halimikie. \v 10 Koto haliwekita꞉ ika꞉ pu haleme haumanu handoma꞉ tiatiki peaata꞉ ana꞉ pia꞉ka꞉na꞉ta꞉ kota꞉ mo e pokaena꞉ lapeke ya꞉la꞉me. \v 11 Koto haliwekina꞉ wanda꞉wekima꞉ make ika꞉ta꞉ epeke hone manuma꞉ tekele tekele pea hata꞉ pi la la na piki wanda꞉weki halimikie. Epeke hone wia hoto paeyao ika꞉ hau pita꞉ pi yaapoma꞉ ota꞉ hau homeke pu hapeke yeke wanda꞉weki halimikie. \v 12 Dikoni halita꞉ wanda꞉ homeke ma꞉la꞉ hali hata꞉ ipika꞉ wekiwanda꞉ wopu handeteke hapeke ya꞉la꞉ halie. \v 13 Mo e epeke tupa꞉ pokaaseme dikoni haliwekita꞉ ika꞉ epeke halimi ekima꞉ ika꞉ta꞉ epeke biki wilie haliweki halimikie. Kutaa make ika꞉ Ketiso Yesu pa꞉ta꞉ hone tulaleme ekina꞉ta꞉ paala꞉ma꞉ na homeke pi lapeke ya꞉la꞉me. \s1 Koda꞉na꞉ pita꞉la꞉ hauna꞉ teke pi \p \v 14 Neke pa꞉ta꞉ I̱ma꞉ do wape pitolo hata꞉ta꞉ neke a̱i̱ koto kone handolo ipulueke hone wia halopate \v 15 ale ma꞉nda꞉ma꞉ I̱ sa꞉sa꞉ pia꞉ka꞉na꞉ta꞉ kota꞉ nika꞉ Koda꞉na꞉ tapakema꞉ hata꞉ pulu poloma꞉eki manuta꞉ do wapema꞉ walieke. Koto tapaketa꞉ mo da꞉taa hao hala꞉ Koda꞉na꞉ siosi tapake loa꞉me. Koto siosita꞉ mo hande Koda꞉na꞉ ota꞉ pita꞉ tia haena꞉ la꞉la꞉ pinki tieke leke hala꞉me. \v 16 Mo nika꞉ Ketiso hauna꞉ teketa꞉ ota꞉ hau tieke dia꞉me pita꞉ ma꞉nda꞉ma꞉ lapeke na ya꞉la꞉me. Do ekina꞉ alome. \q1 Ipikita꞉ ota꞉ halina꞉ loke kone mea opolo epeekeme. \q1 Mo hande Sipitidima꞉ ipika꞉ yako pa꞉la꞉ ekita꞉ ota꞉ ekie laa peneme waleekeme. \q1 Kutupa ipikita꞉ enisoloma꞉ make handeekeme. \q1 Ipika꞉ bikita꞉ mo tutu ma꞉nda꞉ ma꞉nda꞉ paeyao pa꞉ta꞉manu make walemekeme. \q1 Kutu pieketa꞉ mo kenke paeyao pa꞉ta꞉ haemeke wanda꞉halima꞉ ipiki pa꞉ta꞉ hone tulaemekeme. \q1 Kutaa ipikita꞉ Koda꞉ma꞉ oli ya nane hatuku mea peekeme. \c 4 \s1 Mandane makeaasa꞉ pimanu wala꞉la꞉ wanda꞉hali \p \v 1 Mo Sipitidima꞉ peneme yao dupa ala꞉me. Wetepe nina꞉ta꞉ mandane wanda꞉halima꞉ mo hone tulaasa꞉ hauta꞉ mina꞉pa꞉lalimikie la꞉la꞉me. Ikana꞉ma꞉ mo yayapiki pi aleme sipitidi manuna꞉ kakena꞉ homa hata꞉ mo hoke temoko manuna꞉ wala꞉la꞉eki telimikie. \v 2 Koto wala꞉la꞉eki manuta꞉ mo makeaaso yayapiki pi lo haleme wanda꞉halima꞉ peo lalememe. Mo talo talo hake toopi wepikima꞉ ala꞉ta꞉ ma꞉nda꞉ to tokula꞉la꞉ tupa꞉ koto wanda꞉halina꞉ ika꞉ hone teketa꞉ to tokula꞉la꞉me. \v 3 Kutu pu haleme haliwekima꞉ pi walolo hata꞉ alota꞉ Wanda꞉ mina꞉la꞉eki make mandane nemanu hala꞉eki make hoke haue laa wahapa꞉ peao halememe. Pate do ne manuta꞉ nikana꞉ma꞉ nomono yeke Koda꞉ma꞉ wepiayekeme laa ipika꞉ pi mina꞉la꞉ wanda꞉halima꞉ mo ota꞉ hau homeke hone witolo hata꞉ koto ne manuna꞉ Koda꞉ pa꞉ta꞉ keiyae pi alo hata꞉ napeke ya꞉la꞉me. \v 4 Koda꞉ma꞉ wepieke alemanu paeyaota꞉ epeke ale manue. Ala꞉ta꞉ ma꞉nda꞉ wahapa꞉ pu kiaapeke na ya꞉la꞉pate paeyaota꞉ pa Koda꞉ pa꞉ta꞉ keiyae pi alo hata꞉ mea꞉peke ya꞉la꞉me. \v 5 Pa ekipeke. Koda꞉na꞉ pi pita꞉ ipiki pa꞉ta꞉ keiyae laa yeni pita꞉la꞉eki yaapoma꞉ mo ne pa꞉ta꞉ ala꞉ta꞉ na ta̱le̱na꞉ lelieke. \s1 Ketiso Yesuna꞉ epeke e pokaasa꞉ hali \p \v 6 Nakana꞉ma꞉ do mana꞉ pimanu a꞉nda꞉ epeke tupa꞉ mo Ketiso kametonu pa꞉ta꞉ la halo haeka꞉na꞉ta꞉ kota꞉ neketa꞉ Ketiso Yesuna꞉ epeke e pokaasa꞉ hali halipikie. Kota꞉ koto nakana꞉ma꞉ teliele hone tulaasa꞉ pi pita꞉ mo walea꞉ ota꞉ pi yaapo a꞉nda꞉ ota꞉ wopu miniki hao haeka꞉na꞉ta꞉ kota꞉ kutu pilipi ekima꞉ta꞉ neke wele pealieke. \v 7 Kutu pea꞉peke ya꞉la꞉pate pa mo epe na piki Koda꞉ mataake tindemanu moka꞉laa kitemeeki kiaapeke. Nakana꞉ma꞉ Koda꞉na꞉ hau puluekema꞉ moka꞉la꞉ hande hande pu hapeke. \v 8 Lokena꞉ moka꞉la꞉ hande hande pita꞉la꞉eki manuma꞉ta꞉ niki pa hosikima꞉ epeaaliepate pa Koda꞉na꞉ hau puluekema꞉ moka꞉la꞉ hande hande pita꞉la꞉eki manuma꞉ta꞉ niki ota꞉ epeaalieke. Pa ekipeke. Koto hauma꞉ta꞉ ame do nika꞉ kenkena꞉ haloma꞉eki make wetepe da꞉taa halo poloma꞉eki make ana꞉lawalieke. \v 9 Ota꞉ opua hone tulaapeke ya꞉la꞉ ota꞉ pi ma꞉nda꞉ta꞉ dupae. \v 10 Koda꞉ta꞉ wanda꞉hali paeyaona꞉ pa꞉ta꞉la꞉la꞉ hali hala꞉me. Koto pa꞉la꞉pate ipikita꞉ ota꞉ mo ipiki pa꞉ta꞉ hone tulaasoma꞉ wanda꞉halina꞉ da꞉taasa꞉ hali hala꞉me. Koto ekina꞉ta꞉ nikana꞉ma꞉ koto da꞉taa hao hala꞉ Koda꞉ pa꞉ta꞉ hone ti laloma꞉ ekina꞉ta꞉ bepolaluekema꞉ honkopu hao e wopu poko haloma꞉me. \p \v 11 Do mana꞉manu make do wala꞉la꞉ ekimanu make ikana꞉ma꞉ opua ota꞉ pea꞉tiki pu haena꞉ nakana꞉ma꞉ iki pa꞉ta꞉ wopu walo hapeke. \v 12 Wanda꞉halima꞉ neke wekihali hale ekina꞉ handolo hata꞉ ipikita꞉ pa wekie laama꞉na꞉ nakana꞉ma꞉ ota꞉ Ketiso hau moka꞉la꞉ tiaapeke. Koto puluekema꞉ta꞉ naka꞉ pilipi hauma꞉ make naka꞉ lelipi pima꞉ make naka꞉ pukima꞉ homilipi ekima꞉ make naka꞉ hone tulalipi ekima꞉ make naka꞉ tikitiki piki hauma꞉ make koto hau paeyaota꞉ mo pi mineleme wanda꞉halima꞉ ota꞉ handena꞉ lapeke. \v 13 I̱ a꞉pono mo̱lu̱ hata꞉ta꞉ naka꞉ natemanu wiaata꞉ paeyaoma꞉ opina꞉ mo Baibolo pimanu yata꞉pa꞉la꞉eki make mo pi wala꞉la꞉eki make wala꞉ tiaaso la hala꞉la꞉eki make koto hau manuta꞉ ota꞉ honkopu hao putia pua꞉peke. \v 14 Mo siosi you haliwekima꞉ pi la꞉ witolo hata꞉ naka꞉ youna꞉ ika꞉ kiki wimi dina꞉ Koda꞉ma꞉ ipika꞉ pa hameke kita꞉la꞉ epeke ale homeke naka꞉ puki pa꞉ta꞉ wiaya꞉ ekita꞉ nakana꞉ma꞉ ota꞉ na mina꞉pa꞉lapeke. \v 15 Paeyaoma꞉ naka꞉ Ketiso hau daeyaaso piteleeki handena꞉ do I̱ma꞉ la kitolo ekimanu nakana꞉ma꞉ hone wopu wia moka꞉la꞉ hande hande pu hapeke. \v 16 Naka꞉ walele ekimanu make naka꞉ pu hale hau make wopu handeteke hapeke. Do haumanu paeyao epeke tupa꞉ putia peka꞉na꞉ta꞉ kota꞉ koto pilipi ekima꞉ta꞉ neke make mo nakana꞉ma꞉ walele pi opua ipu haleme wanda꞉hali make detelimikie. \c 5 \s1 Siosi wanda꞉hali handeteke hata꞉ pea꞉pekeeki \p \v 1 Mo koke haliweki na tolu lu pelepateta꞉ naka꞉ apa꞉ pa꞉ta꞉ ale tupa꞉ homu piki pimanu lapeke. Panake haliweki make naka꞉ kame tupa꞉ kone epeaapeke. \v 2 Koke wanda꞉weki make naka꞉ ama꞉ tupa꞉ kone handeteke hata꞉ta꞉ panake wanda꞉weki make naka꞉ ana꞉ leke tikitiki piki hauma꞉ homeke handeteke hapeke. \p \v 3 Kosa꞉piki wanda꞉ ma꞉nda꞉ ota꞉ ipika꞉ honumake siki hala꞉eki handeka꞉na꞉ta꞉ kota꞉ ipiki tamba꞉ muluekema꞉ hone epeke u hapeke. \v 4 Pate ipika꞉ wekiwandiki o eiyeke wanekena꞉ wekiwandiki haya꞉ka꞉na꞉ta꞉ kota꞉ ikana꞉ma꞉ amba꞉la ika꞉ koke wanda꞉ handeteke hasa꞉ hau pea꞉pa꞉peke ya꞉la꞉me. Kutu piki hau pimika꞉na꞉ta꞉ kota꞉ mo hande ateke inkiki make aeyeke meiyekema꞉ iki pa꞉ta꞉ pimi ekimanu hombo peaasememe. Koto hauma꞉ta꞉ Koda꞉ ta꞉na꞉ma꞉ homaasa꞉me. \v 5 Kosa꞉piki wanda꞉ ma꞉nda꞉ta꞉ ipiki tamba꞉ mina꞉yeke ipika꞉ tapake wanda꞉hali ma꞉nda꞉ dia꞉yalo ipika꞉ honumake siki haya꞉ka꞉na꞉ta꞉ kota꞉ Koda꞉ma꞉ ipiki handeteke haena꞉ ipiki pa꞉ta꞉ hone ti lao hala꞉me. Kutu pitolo hata꞉ta꞉ Koda꞉ma꞉ ipiki tamba꞉ mina꞉yeke ipikana꞉ma꞉ timba꞉ nate yaapona꞉ honke pa alo alo hata꞉ yeni pu hala꞉me. \v 6 Pate kosa꞉piki wanda꞉ ma꞉nda꞉ma꞉ ipika꞉ lokena꞉ namonamo pita꞉la꞉ ekimanu homekena꞉ hone u haya꞉ka꞉na꞉ta꞉ kota꞉ koto wanda꞉ ipikita꞉ pa hala꞉pate kone ipika꞉ temokota꞉ homa ula꞉me. \v 7 Wanda꞉halima꞉ iki pa꞉ta꞉ hoela꞉me laama꞉na꞉ do mana꞉ pimanu wanda꞉weki pa꞉ta꞉la hala꞉tiki pu hapa꞉peke. \v 8 Kutu pilipipate ma꞉nda꞉ hali epima꞉ ipika꞉ tapakemanu o ota꞉ ipika꞉ wekiwanda꞉ epeke tupa꞉ na handeteke haya꞉ka꞉na꞉ta꞉ kota꞉ koto someta꞉ mo Ketiso hau kiaaso toopi mea baasa꞉me. Kutu piki somena꞉ hoke hauma꞉ta꞉ mo pi na miki wanda꞉halina꞉ hoke hau lombei pea ota꞉ hoela꞉me. \p \v 9 Mo kosa꞉piki wanda꞉wekina꞉ biki ula꞉ wapena꞉ta꞉ dupiki wanda꞉na꞉ biki homeke wia꞉peke. Wanda꞉ ma꞉nda꞉ ipika꞉ bapi hali tieke tepo paeya꞉ka꞉na꞉ make ipikita꞉ hali homekena꞉ da peeke wanda꞉ make \v 10 wanda꞉halima꞉ epeke hau pia꞉ wanda꞉e aleme wanda꞉ make ipika꞉ wekiwandiki epeke tupa꞉ handeteke haya꞉ wanda꞉ make na handeke da ma꞉nda꞉ wanda꞉hali epemeke handa꞉mea wamo pia꞉tiki pieke wanda꞉ make Ketiso yankeketonu oto nane hata꞉ tamba꞉ mieke wanda꞉ make ka꞉nda꞉ mina꞉la꞉ wanda꞉hali petelea꞉ wanda꞉ make epeke haumanu puluekema꞉ hone wopu u hayeke wanda꞉ make kosa꞉piki wanda꞉ homekema꞉ koto hau paeyao tonka꞉na꞉ apa꞉tao pea꞉tiki pieki handemeka꞉na꞉ta꞉ kota꞉ ipika꞉ biki wape pea꞉peke. \p \v 11 Kutu pulu pa꞉la꞉pate mandane moputali kosa꞉piki wanda꞉manu ika꞉ bikimanu wape pea na apa꞉taapeke. Pa ekipeke. Ikana꞉ma꞉ ika꞉ lokena꞉ hone pelemeeki hone witolo hata꞉ hali ma꞉nda꞉na꞉ da puluekema꞉ Ketiso hoki walaa pelimikie. \v 12 Kutu pimikina꞉ta꞉ ika꞉ Ketiso pa꞉ta꞉ amba꞉la la꞉ wimiki pimanu yambilimikie. \v 13 Kutaa make kutupiki kosa꞉piki wanda꞉wekima꞉ da yalayala pu pominolo hata꞉ ika꞉ e poka꞉peke natemanu hoeyaalememe. Koto hau homeke dia꞉pate ikana꞉ma꞉ kotoeki ota꞉ lombeipiki hoke hau ma꞉nda꞉ta꞉ dupa. Mandane wanda꞉halina꞉ hau hotiata꞉ la꞉ mundula mundula pitolo hata꞉ mo ota꞉ lapeke na ya꞉la꞉ ekimanu la꞉ tiatia pu halememe. \v 14 Mo a꞉nda꞉ piteleme wanda꞉halima꞉ niki pa꞉ta꞉ hoke pi loluekema꞉ waleke wiaama꞉na꞉ mo Ketiso hala꞉ moputali kosa꞉piki wanda꞉wekita꞉ pa hali ma꞉nda꞉na꞉ da pua wekiwandiki mendia ika꞉ da handeteke haena꞉e hone witolome. \v 15 Pate mandane kosa꞉piki wanda꞉ manuta꞉ paa la꞉ka꞉la Sadani teli mea pelememe. \v 16 Kutu pu halemepate Ketiso wanda꞉ ma꞉nda꞉ ipika꞉ tapake kosa꞉piki wanda꞉manu ma꞉nda꞉ haya꞉ka꞉na꞉ta꞉ kota꞉ mo Siosi tapake pa꞉ta꞉ ka꞉nda꞉ wiaama꞉na꞉ ikita꞉ ipikana꞉ma꞉ handeteke hapeke ya꞉la꞉me. Kutu pia꞉ka꞉na꞉ta꞉ mo siosi tapakema꞉ ota꞉ mo honumake siki haleme kosa꞉piki wanda꞉weki ota꞉ epeke tupa꞉ handeteke haena꞉ waleke wilieke. \p \v 17 Ika꞉ you haliwekima꞉ wanda꞉hali handeteke hata꞉ e epeke tupa꞉ pokemeka꞉na꞉ta꞉ ika꞉ biki a꞉meiyaaso yenki ana꞉na꞉ haka꞉ta꞉pao mina꞉e hone wia꞉peke ya꞉la꞉me. Mo pi wala꞉pekeeki o mana꞉ moka꞉la꞉ tiaaso hata꞉ ota꞉ honkopu hao wopu pokemeka꞉na꞉ta꞉ kota꞉ kutu piki you haliweki pa꞉ta꞉ amba꞉la hone wia pea꞉peke. \v 18 Do alo ekina꞉ mo Baiboloma꞉ alota꞉ Kaoma꞉ palaowa kilikimanu ambuku mea baaluekema꞉ ankema꞉ e pokolo haena꞉ta꞉ ipika꞉ kake anka꞉ta꞉pu na pea꞉peke lo make mo e poka꞉la꞉ halima꞉ta꞉ ipika꞉ e poka꞉la꞉ yenki mia꞉peke ya꞉la꞉me laa wape pea ula꞉me. \v 19 Wanda꞉hali homekema꞉ alota꞉ Mo you halima꞉ ata꞉ka꞉piki hau pia꞉me lea꞉ka꞉na꞉ta꞉ na opua꞉peke. Koto pilipipate hali yaapo tepoma꞉ a꞉nda꞉ a꞉pa lea꞉ka꞉na꞉ta꞉ kota꞉ opua꞉peke ya꞉la꞉me. \v 20 You halima꞉ a꞉nda꞉ hoke hau pia꞉ka꞉na꞉ta꞉ kota꞉ mandane you haliwekima꞉ handolo hata꞉ hone wina꞉ ika꞉ leke potopoto kone ipika꞉ hoke hau pa꞉la꞉eki laa la halaata꞉ sa꞉sa꞉ pea꞉peke. \p \v 21 Mo Koda꞉ make Ketiso Yesu make mo ma̱leke lila꞉ enisolomanu make iki paeyaona꞉ leke potopoto hata꞉ I̱ma꞉ neke pa꞉ta꞉ la꞉ witolo pita꞉ dupa alome. Nakana꞉ma꞉ homeke pa꞉ta꞉ homeke puki wita꞉la꞉ hau na pu make mandane tapake homeke na petolo pikita꞉ do ya pea꞉peke alo ekita꞉ ota꞉ paeyao pa꞉ta꞉ hone witolo hata꞉ pea꞉peke. \v 22 Hali ma꞉nda꞉ma꞉ siosi pa꞉ta꞉ Koda꞉na꞉ e pokaena꞉ta꞉ na hondoma꞉ tiake hata꞉ kiki wita꞉la꞉ hau a̱i̱ na pea꞉peke. Mandane wanda꞉halina꞉ hoke hau neke pa꞉ta꞉ na mundilina꞉ leke naka꞉ hauta꞉ yako pea hapeke. \p \v 23 Neketa꞉ yeni mea꞉tiki pu haeka꞉na꞉ta꞉ naka꞉ welekema꞉ epeke e pokena꞉ ikali homeke na neke waini siki make apa꞉tao napeke. \p \v 24 Mandane wanda꞉halina꞉ hoke hauta꞉ peneme peneme yao ula꞉me. Koto ekima꞉ta꞉ pi yokaalu pia꞉peke nate opolo epea꞉ka꞉na꞉ta꞉ ika꞉ hoke hauma꞉ta꞉ iki hatuku ipilieke. Pate mandane wanda꞉halina꞉ hoke hauta꞉ wetepe nane peneme yaeya꞉ka꞉na꞉ta꞉ handa꞉ wilimikie. \v 25 Mandane epeke haumanu make koto tupa꞉ kone peneme peneme yao ula꞉me. Kutaata꞉ mo ota꞉ peneme na ula꞉ epeke hau mandane ekimanu maketa꞉ a꞉mbao wia꞉peke na ya꞉la꞉me. \c 6 \s1 Wanda꞉halina꞉ e pokaasa꞉ tapakena꞉ mana꞉ pi \p \v 1 Mandane pa hameke e pokaaseme tapake ikana꞉ma꞉ ika꞉ you haliweki pa꞉ta꞉ hone witolo hata꞉ homu pea hapa꞉peke. Kutu pimika꞉na꞉ta꞉ kota꞉ mo pa haleme wanda꞉halima꞉ Koda꞉na꞉ biki pa꞉ta꞉ make nika꞉ aloma꞉ mana꞉ pimanu pa꞉ta꞉ make ikana꞉ma꞉ hoke pimanu na lelimikie. \p \v 2 Mandane pa hameke e pokaaseme tapakema꞉ ika꞉ you halita꞉ Ketiso hali haya꞉ka꞉na꞉ta꞉ ipikita꞉ nika꞉ Ketiso yankeke hone witolo hata꞉ paa pa alema꞉ na handaapa꞉peke. Kotoeki na pikita꞉ ikana꞉ma꞉ dupiki hone witolo Ipikita꞉ ya Ketiso kame haleka꞉na꞉ta꞉ I̱ma꞉ ipiki hone pa꞉la꞉me. I̱ma꞉ ipika꞉ e pokawa꞉ka꞉na꞉ta꞉ ipikana꞉ma꞉ do e pa꞉ta꞉ yama꞉ epeke ale mina꞉e hone wiaata꞉ ikana꞉ma꞉ amba꞉ pokeme e tupa꞉ na pokeketa꞉ kotoeki lombei peao pokaapeke. \s1 Makeaasa꞉ hau wala꞉la꞉ ekina꞉ kinki pita꞉la꞉ pimanu \p Do alo pi manuta꞉ nate paeyao wopu sa̱꞉tiaaso hata꞉ wala꞉tiki pu hapeke. \v 3 Ma꞉nda꞉ epima꞉ mo hande nika꞉ Tekehali Yesu Ketisona꞉ ota꞉ pi make mo nika꞉ hone tulao yeni pita꞉la꞉ hauna꞉ mana꞉ pimanu make kota꞉ waloma꞉ pi yaapo mandake na piki pa ta꞉ta꞉ piki mana꞉ pimanu a꞉pa walea꞉ka꞉na꞉ta꞉ \v 4 kota꞉ koto someta꞉ hone na wiki hakoko lita꞉la꞉ hali hala꞉me. Ipiki pa꞉ta꞉ta꞉ hoke hone teke pila꞉me. Koto ekina꞉ ipikana꞉ma꞉ mo mana꞉ pi teke manuna꞉ta꞉ ape ape lo make pi yokaalu alu puluekema꞉ hone wopu u hala꞉me. Ipika꞉ kutu pita꞉la꞉ ekima꞉ta꞉ mo hone wopu epeke tupa꞉ na handeteke haleme wanda꞉hali tukiki pa꞉ta꞉ta꞉ I̱ I̱ ala꞉ hau make ape ape la alualu pitolo hata꞉ yaala꞉ peake pi la alualu pu make na handoma꞉ tiake hoke hone u alualu pita꞉la꞉eki make \v 5 kima꞉ na homeke pi yokaalu alu pita꞉la꞉ ekimanu make kota꞉ hao paeyao mo wanda꞉hali tukiki pa꞉ta꞉ wala꞉ tiao hala꞉me. Kutu piki wanda꞉halima꞉ta꞉ mo hande ota꞉ pimanu mina꞉pa꞉laaso hata꞉ta꞉ pa mo Koda꞉na꞉ hau pita꞉la꞉ ekita꞉ hamoko hapeke pota꞉e hone u halememe. \p \v 6 Ota꞉ ala꞉me. Hali ma꞉nda꞉ epita꞉ Koda꞉ pa꞉ta꞉ hone tulao hata꞉ ipika꞉ miniki hala꞉ kenke ala꞉ta꞉ ala꞉ta꞉ ana꞉e hone wia꞉ka꞉na꞉ta꞉ kota꞉ koto someta꞉ hamoko some hala꞉me. \v 7 Nikita꞉ do kenkena꞉ ipulu hata꞉ta꞉ aleke miniki epoloma꞉pe. Ala꞉ta꞉ ma꞉nda꞉ na miniki epoloma꞉me. Pa do kenke mina꞉pa꞉laoma꞉ka꞉na꞉ta꞉ aleke mea poluma꞉pe. Dia꞉me. Ala꞉ta꞉ ma꞉nda꞉ na mea polumeke. \v 8 Koto ekina꞉ta꞉ nika꞉ ne aka꞉manu ana꞉na꞉ wia haoma꞉ka꞉na꞉ta꞉ kota꞉ kotota꞉ ana꞉e. \v 9 Mo hamoko haluekema꞉ hone pa꞉la꞉ wanda꞉halita꞉ ne wiaasa꞉eki muluekema꞉ pea꞉ka꞉na꞉ta꞉ ka꞉pei leke hondalieke. Ika꞉ hone wopu na wiki hoeyaapeke ya꞉la꞉ hoke hone manuma꞉ iki yola꞉ mea lopao ota꞉ hoeyaalieke. \v 10 Mo mani we pamba꞉la꞉ ekima꞉ta꞉ ta꞉ta꞉ ta꞉ta꞉ piki hoke haumanu pu tialo pa꞉la꞉ ekina꞉ teke ula꞉me. Mandane wanda꞉halima꞉ mani muluekema꞉ hone wopu witolo hata꞉ ika꞉ hone tulao halemeeki mina꞉pa꞉lao hoke ka꞉nda꞉ manuma꞉ ika꞉ puki tandama꞉ homo haememe. \s1 Timodi pa꞉ta꞉ leeke mana꞉ pimanu \p \v 11 Nakana꞉ma꞉ Koda꞉na꞉ hali hata꞉ta꞉ koto hau manuta꞉ mone hata꞉ pina꞉ kiao papate leke hapeke. Kutu puluekema꞉ta꞉ kota꞉ nakana꞉ma꞉ mo tikitiki piki hau make Koda꞉na꞉ hau leke pita꞉la꞉ hau make hone tulaasa꞉ hau make pukima꞉ homa꞉la꞉ hau make ki hone na wiki pita꞉la꞉ hau make kimele piki hau pita꞉la꞉ hau make koto hau paeyao ota꞉ muluekee hone u paleke pu hapeke. \v 12 Wanda꞉halima꞉ hoto neli kita꞉la꞉ nate nina꞉ mo hande tombo muluekema꞉ honkopu hao a̱i̱ya pu halememe. Koto tupa꞉ nakana꞉ma꞉ make Koda꞉ pa꞉ta꞉ hone tulaaso hata꞉ naka꞉ deto hala꞉ ekita꞉ mo tombo wataasa꞉ tupa꞉ muluekema꞉ ota꞉ honkopu hao a̱i̱ya pu hapeke. Koto deto hala꞉ ekita꞉ nakana꞉ma꞉ wanda꞉hali wopuna꞉ leke popelekena꞉ Koda꞉ pa꞉ta꞉ hone tulaasome alo hata꞉ peneme yaeketa꞉ kota꞉ Koda꞉ma꞉ muelena꞉yeke neke wi lea꞉me. \v 13 Mo ala꞉ta꞉ ala꞉ta꞉ paeyao da꞉taa wina꞉ la꞉la꞉ Koda꞉na꞉ leke popelekena꞉ hata꞉ make mo hande Pontiasi Pailedi pa꞉ta꞉ ota꞉ pi leeke Ketiso Yesu ipika꞉ leke popelekena꞉ hata꞉ make I̱ma꞉ neke pa꞉ta꞉ dupa alome. \v 14 Mo pea꞉pekee laa neke pa꞉ta꞉ la꞉ ula꞉ pi manuna꞉ kakena꞉ homa mo Tekehali Yesu Ketiso paa epolo pa꞉la꞉ nate epena꞉ handeteke hata꞉ ota꞉ hoeya hoeya na piki yopu miniki hao hapeke. \v 15 Mo Ketisona꞉ paa la꞉ka꞉la epolo pa꞉la꞉ nateta꞉ Koda꞉ma꞉ homeke handeteke hala꞉ ekina꞉ mo ponka꞉ di pilu ula꞉ nate opolo epea꞉ka꞉na꞉ta꞉ kota꞉ Koda꞉ma꞉ Ketiso peneme yao mea halieke. Koda꞉ta꞉ ta꞉na꞉ma꞉ homa꞉la꞉ ekina꞉ teke hata꞉ ipiki homeketa꞉ wanda꞉hali paeyaona꞉ handeteke hala꞉ hali hala꞉me. Ipikita꞉ mo kini haliweki paeyaona꞉ Tumiki Kini hali make mo teke haliweki paeyaona꞉ Tekehali make hala꞉me. \v 16 Ipiki homeketa꞉ ipika꞉ kone pa da꞉taa hao hala꞉ Koda꞉ hala꞉me. Wanda꞉halima꞉ ipiki hala꞉ teke pa꞉ta꞉ pua꞉peke na yeke pa̱a̱ tieke pa꞉ta꞉ hala꞉me. Ipikita꞉ hali ma꞉nda꞉ma꞉ ota꞉ na handemeke yeke Koda꞉ yeke handaata꞉ ame make ota꞉ ma꞉nda꞉ma꞉ handa꞉peke na ya꞉la꞉me. Ipika꞉ biki tieke ota꞉ kende wina꞉ make mo na paeyeke pa hao hala꞉ Kilu Tombuao hala꞉ ekina꞉ wele make ipika꞉eki wina꞉e. Kutu pina꞉e. \s1 Hamoko wanda꞉halina꞉ mana꞉ pi \p \v 17 Mo kenke ala꞉ta꞉ ala꞉ta꞉na꞉ hamoko haseme wanda꞉hali pa꞉ta꞉ta꞉ dupiki pi la wia꞉peke. Ika꞉ hakoko na lu make mo a̱i̱ paelo pa꞉la꞉ kenke ale manuna꞉ hone na ti lao hao hapa꞉peke. Kotoeki na pikita꞉ niki ta꞉na꞉ma꞉ homomono epeke alemanu ku hala꞉ Koda꞉ pa꞉ta꞉ hone ti lao hapa꞉peke lapeke. \v 18 Koto wanda꞉hali ikana꞉ma꞉ mandane wanda꞉hali pa꞉ta꞉ epeke hau pipe laata꞉ mo ika꞉ tamba꞉ mina꞉la꞉ hau piteme ekima꞉ hamoko hapa꞉peke laa lapeke. Ikana꞉ma꞉ epeke moke pita꞉la꞉ wanda꞉hali hata꞉ ika꞉ hamoko ale manuta꞉ mandane wanda꞉hali pa꞉ta꞉ pa teli pealuekema꞉ tikitiki yao hapa꞉peke lapeke. \v 19 Koto hau a꞉nda꞉ pu haemeka꞉na꞉ta꞉ kota꞉ ika꞉ wetepe hapeke yolo pa꞉la꞉ ekina꞉ epeke teke u haena꞉ lelimikie. Kutu pimika꞉na꞉ta꞉ kota꞉ mo ota꞉ deto hala꞉eki miniki hao halimikie. \p \v 20 Timodio. Do Koda꞉ma꞉ neke pa꞉ta꞉ ka꞉la꞉ eta꞉ ota꞉ wopu handeteke hapeke. Mo epe na piki Koda꞉ mataake pimanu la kiteme pi manuta꞉ kiaapeke. Mandane wanda꞉halima꞉ makeaaso hata꞉ Do aloma꞉ pi manuta꞉ ota꞉ tumiki pie lo halememe. \v 21 Kutupa mandane wanda꞉halima꞉ Koto aleme tumiki pita꞉ nikana꞉ma꞉ ota꞉ hone uluma꞉me laa lemeke handaata꞉ ikana꞉ma꞉ mo hande ota꞉ hone tulaasa꞉ hauna꞉ pota꞉ta꞉ mina꞉pa꞉laememe. \p Koda꞉na꞉ a꞉ta꞉ma꞉ homa tamba꞉ mina꞉la꞉ ekita꞉ Timodi iki pa꞉ta꞉ hao haena꞉e.