\id 1TH - Sembeleke (SGI1TH.01) Samberigi PNG 1Thess. 01 13/2/91 Macnaughtan 
\h 1 DESALONAIKA 
\toc1 Poloma꞉ Desalonaika Siosi pa꞉ta꞉ tapaeyeke titina꞉ wapee 
\toc2 1 Desalonaika 
\toc3 1 Desalonaika 
\mt1 Poloma꞉ Desalonaika Siosi pa꞉ta꞉ tapaeyeke titina꞉ wapee  
\c 1  
\p
\v 1 Polo Sailasi Timodi niki tepoma꞉ta꞉ mo Desalonaika siosi wanda꞉halita꞉ nika꞉ Apa꞉ Koda꞉na꞉eki make Tekehali Yesu Ketisona꞉eki make haleme ekina꞉ iki pa꞉ta꞉ tapaasoma꞉me. Koda꞉ma꞉ta꞉ ipika꞉ pa a꞉ta꞉ma꞉ homa꞉la꞉eki make puki lopa꞉niaasa꞉eki make iki pa꞉ta꞉ pitaeya꞉ka꞉na꞉ta꞉ epelieke.   
\s1 Desalonaika wanda꞉halina꞉ hone tulaemekeeki  
\p
\v 2 Hoto paeyao nikana꞉ma꞉ta꞉ iki pa꞉ta꞉ hone witolo hata꞉ Koda꞉ pa꞉ta꞉ keiyae pi la꞉tiki pea yeni peao haloma꞉me.  
\v 3 Ikana꞉ma꞉ hone tulao hata꞉ epeke hau pimieki make ika꞉ pukima꞉ homa hata꞉ e wotu pokemeeki make nika꞉ Tekehali Yesu Ketiso handeteke hata꞉ puki hana꞉ noka꞉pa haemeeki make nikana꞉ma꞉ hone u haloma꞉ ekina꞉ loa꞉me.  
\v 4 Kametitio. Koda꞉ma꞉ iki pa꞉ta꞉ pukima꞉ homo hao ikita꞉ ipika꞉eki hamina꞉yeke amba꞉ talopu mea hamina꞉ la꞉la꞉eki nikana꞉ma꞉ hone witoloma꞉me.   
\p
\v 5 Hande Pi Seliapota꞉ nikana꞉ma꞉ iki pa꞉ta꞉ mea epoma꞉pate pa pahameke ala꞉ pimanu na mea epeketa꞉ ota꞉ wele tonka꞉na꞉ Holi Sipitidi tonka꞉na꞉ do pita꞉ ota꞉eki laa hone wotu wia mea epoma꞉me. Iki ame̱le̱ hata꞉ pia꞉tiki puma꞉ haumanu make ikana꞉ma꞉ handememe. Iki epeaalo pieki pitolo puma꞉me.  
\v 6 Nikana꞉ma꞉ puma꞉ hau make Tekehalina꞉ hau make ikana꞉ma꞉ telia꞉ mea ipulu hata꞉ pimime. Kutupa tanda tieke minolo hata꞉ kone hande Holi Sipitidima꞉ iki ta꞉na꞉ma꞉ homa tiaaso haena꞉ ikana꞉ma꞉ pi mimime.  
\v 7 Kutu pimiki ekina꞉ mo Ma꞉sedonia Akaya potopinisi yaapo nane pi mea haleme wanda꞉hali paeyaoma꞉ handena꞉ pu tiaememe.  
\v 8 Hande Tekehalina꞉ pita꞉ iki pa꞉ta꞉ kini pea mo Ma꞉sedonia Akaya yaapo nane homeke pena꞉ na piekeme. Ikana꞉ma꞉ Koda꞉ pa꞉ta꞉ hone tulaasememe la꞉la꞉ ekita꞉ da paeyao pa꞉ta꞉manu pa꞉la꞉me. Koto pa꞉la꞉ ekina꞉ nikana꞉ma꞉ mo wanda꞉hali pa꞉ta꞉ pi ma꞉nda꞉ na lolumeke.  
\v 9 Pa nikana꞉ma꞉ iki Desalonaika wanda꞉hali handolo epoma꞉ dina꞉ ikana꞉ma꞉ niki handa꞉ mimi ekita꞉ koto wanda꞉hali paeyaoma꞉ta꞉ lo halememe. Kutupa ikana꞉ma꞉ hande yayapiki koda꞉ wa꞉pele alemanu mina꞉pa꞉lao Koda꞉ pa꞉ta꞉ ipulu hata꞉ hoki lekelemeeki make ikana꞉ma꞉ lo halememe. Kutu pimi ekita꞉ hande ota꞉ da꞉ta꞉la꞉ Koda꞉na꞉ e pokaaluekema꞉ make  
\v 10 ipika꞉ Eiyeke hepeni nane hao epena꞉yeke handeteke haluekema꞉ pimime. Koda꞉ma꞉ta꞉ ipika꞉ Eiyeke Yesuta꞉ ipikana꞉ma꞉ homa wieke lapa꞉ pa꞉ta꞉ mea tiaeyekeme. Kutupa Yesuma꞉ta꞉ Koda꞉ ipikana꞉ma꞉ wetepe mineke panka꞉la꞉eki niki pa꞉ta꞉ a꞉paapa꞉na꞉ niki pa꞉ta꞉la꞉ minolo pa꞉la꞉me.   
\c 2  
\s1 Desalonaika da pa꞉ta꞉ Poloma꞉ e pokeekeeki  
\p
\v 1 Kametitio. Nikana꞉ma꞉ iki ame̱le̱ titina꞉ a꞉pa haoma꞉ pita꞉ta꞉ nika꞉ e pokoma꞉ ekita꞉ pa pe ekina꞉ na pokoma꞉me. Koto ekita꞉ ika꞉ kone hone wilimime.  
\v 2 Desalonaika nane ipuluekema꞉ hamonota꞉ mo Pilipai da nane hata꞉ niki yaala꞉ma꞉ homaaso hata꞉ niki tanda kimieki make ikita꞉ opimime. Kutu pimipate nika꞉ Koda꞉ma꞉ nika꞉ puki hana꞉ noka꞉paeyeke handaata꞉ niki ame̱le̱ a꞉nda꞉ litolo haena꞉ kone iki pa꞉ta꞉ Koda꞉na꞉ Pi Seliapo a꞉pa waloma꞉me.  
\v 3 Nikana꞉ma꞉ a꞉pa aloma꞉ pita꞉ wanda꞉hali hoeyao pamba꞉ na piki hau ma꞉nda꞉ puluekema꞉ kutu pitolo hata꞉ wanda꞉hali makealuekema꞉ na epoma꞉me.  
\v 4 Dia꞉me. Koda꞉ma꞉ niki amba꞉la꞉ la handea꞉me. Kutupa ipikana꞉ma꞉ ipika꞉ hone piekena꞉ kone nikana꞉ma꞉ mo Pi Seliapo walomono mea haena꞉ la꞉la꞉me. Koto ekina꞉ wanda꞉halima꞉ nika꞉ e pokoloma꞉ ekina꞉ ta꞉na꞉ma꞉ homena꞉ laa na pokoma꞉me. Dia꞉me. Nika꞉ hone pa꞉la꞉ ekita꞉ pa Koda꞉ma꞉ homeke nika꞉ puki telipitolo ta꞉na꞉ma꞉ homolo hata꞉ ana꞉ pa꞉la꞉me laa lena꞉e.  
\v 5 Nikana꞉ma꞉ iki pa꞉ta꞉ imeke pulueke alo hata꞉ iki pa꞉ta꞉ imeke piki pi na leke kutupa make nikana꞉ma꞉ pasa꞉tei hau puluekema꞉ a꞉mba a꞉mba piki pi make na loma꞉me. Koda꞉ma꞉ make handolo haena꞉ ikana꞉ma꞉ make handememe.  
\v 6 Kota꞉ ikana꞉ma꞉ make mo mandane wanda꞉halima꞉ make nika꞉ biki a꞉meiyamena꞉yeke weiya na puma꞉pate  
\v 7 nikana꞉ma꞉ Ketiso ipika꞉ aposolo haliweki hata꞉ ikana꞉ma꞉ niki tamba꞉ muemena꞉ honke lapeke yea꞉pate na puma꞉me. Dia꞉me. Inkikima꞉ ipika꞉ weki wandiki yopu handeteke hala꞉ tupa꞉ kone iki ame̱le̱ hata꞉ yopu haoma꞉me.  
\v 8 Nikana꞉ma꞉ iki pa꞉ta꞉ pukima꞉ homoma꞉ ekina꞉ Koda꞉na꞉ Pi Seliapo homeke homeke iki pa꞉ta꞉ waluekema꞉ hone na uma꞉pate pa nika꞉ hau puma꞉eki make kuluekema꞉ hone uma꞉me. Pa ekipeke iki pa꞉ta꞉ nika꞉ pukima꞉ homoma꞉eki tiekeyeke puma꞉me.  
\v 9 Kametitio. Nikana꞉ma꞉ e tieke poka weleke we puma꞉eki ikana꞉ma꞉ hone ta wili handa꞉e. Nikana꞉ma꞉ iki pa꞉ta꞉ Koda꞉na꞉ Pi Seliapo walaaso hata꞉ta꞉ nikana꞉ma꞉ iki ka꞉nda꞉ma꞉ homaapa꞉na꞉yeke timba make natena꞉ make u̱ na peliki nika꞉ nemanu hambuluekema꞉ e poko haoma꞉me.   
\p
\v 10 Nikita꞉ iki hone tulaaseme wanda꞉hali ame̱le̱ haeme dina꞉ta꞉ nikana꞉ma꞉ iki pa꞉ta꞉ puma꞉ hau manuta꞉ yakopiki hau make tonda꞉pa꞉piki hau make hau ma꞉nda꞉ na piki hau make puma꞉ ekita꞉ Koda꞉ma꞉ handolo haena꞉ ikana꞉ma꞉ make handolo hamina꞉ puma꞉me.  
\v 11 Atekema꞉ ipika꞉ weki wandiki pa꞉ta꞉ pu hala꞉ tupa꞉ niki make iki ame̱le̱ hata꞉ koto tupa꞉ puma꞉eki ikana꞉ma꞉ handememe.  
\v 12 Nikana꞉ma꞉ iki sa꞉sa꞉ pea tiaaso make epeke hone u tiaaso make iki sutiaaso puma꞉me. Ikana꞉ma꞉ epeke tupa꞉ hata꞉ Koda꞉ ta꞉na꞉ma꞉ homaamina꞉ iki sutiatiki puma꞉me. Pa ekipeke Koda꞉ma꞉ta꞉ ikana꞉ma꞉ ipika꞉ Kilu Tombuao Hala꞉eki pa꞉ta꞉ hata꞉ ipika꞉ hau puemena꞉ make muemena꞉ make iki wi la꞉la꞉me.   
\p
\v 13 Ikana꞉ma꞉ pimi hau ma꞉nda꞉ make nikana꞉ma꞉ Koda꞉ pa꞉ta꞉ keiyae pi la꞉tiki pu haloma꞉me. Kota꞉ hande nikana꞉ma꞉ iki pa꞉ta꞉ Koda꞉na꞉ pi mea epoma꞉ pita꞉ta꞉ ikana꞉ma꞉ kenke halina꞉ pi leke na opimikipate ota꞉ Koda꞉na꞉ pi kone opua mimime. Kotota꞉ ota꞉ koto lataa. Pa ekipeke Koda꞉ma꞉ iki hone tulaaleme wanda꞉hali pa꞉ta꞉ ipika꞉ e wopu poka꞉la꞉ ekina꞉ loa꞉me.  
\v 14 Kametitio. Hande Diudia nane haleme Koda꞉na꞉ siosi tapake Yesu Ketisona꞉ wanda꞉hali pa꞉ta꞉ pieke tupa꞉ kone iki pa꞉ta꞉ make pelememe. Mo hande Diu haliwekima꞉ koto tapake kone tanda halemeke tupa꞉ ika꞉ tapake haliwekima꞉ make iki pa꞉ta꞉ homeke hau kone pimime.  
\v 15 Hande Diu haliwekima꞉ta꞉ nika꞉ Tekehali Yesu make mo hande potopede haliweki make limikime. Koto homeke tapakema꞉ kone niki make a꞉nda꞉ lu moneasememe. Ikana꞉ma꞉ Koda꞉na꞉ hone pa꞉la꞉eki kiaaso hata꞉ wanda꞉hali paeyao pa꞉ta꞉ make a꞉nda꞉ lia halememe.  
\v 16 Nikana꞉ma꞉ mo Diendaili wanda꞉hali pa꞉ta꞉ hande da꞉taapeke yeeke pi waluekema꞉ puma꞉ dina꞉ mo haliwekima꞉ sa꞉sa꞉ puluekema꞉ taapememe. Kutu pu haleme ekima꞉ ika꞉ hoke hau piteleme ekimanu daeyatia pua ota꞉ tieke ya꞉la꞉me. Kutupa ameta꞉ koto peleme ekima꞉ta꞉ Koda꞉na꞉ mineke pankolo pa꞉la꞉eki ika꞉ kone netepo neleme ekina꞉ iki pa꞉ta꞉ kone a꞉pa ula꞉me.   
\s1 Poloma꞉ iki ame̱le̱ paa haluekema꞉ hone wiekeeki  
\p
\v 17 Kametitio. Nikana꞉ma꞉ iki ame̱le̱ hosiki ma꞉nda꞉ a꞉nda꞉ na haoma꞉pate iki pa꞉ta꞉ nika꞉ hone pu haya꞉me. Nikana꞉ma꞉ iki ame̱le̱ haluekema꞉ hone wopu witolo hata꞉ a꞉pa꞉peke pota꞉ wopu weima꞉me.  
\v 18 Nika꞉ honema꞉ta꞉ iki pa꞉ta꞉ paa la꞉ka꞉la ipuluekema꞉ hone uma꞉me. Polo I̱ta꞉ hoto mandaneeki manuna꞉ paa la꞉ka꞉la ipuluekema꞉ pua꞉pate Sadanima꞉ pate a꞉mbea꞉me.  
\v 19 Wetepena꞉ nika꞉ Tekehali Yesu paa la꞉ka꞉la epea꞉ka꞉na꞉ta꞉ kota꞉ ipika꞉ leke popelekena꞉ mombela hata꞉ta꞉ nikana꞉ma꞉ aleke muluma꞉pe. Nika꞉ hone pualo poloma꞉ ekita꞉ alekepe. Eki yenki epeke muluekema꞉ ta꞉na꞉ma꞉ homuluma꞉pe. Koto yenkita꞉ iki homekee. Ikita꞉ nika꞉ ta꞉na꞉ma꞉ homaasa꞉eki make nika꞉ mulu poloma꞉eki make nika꞉ hone pualo poloma꞉eki makee.  
\v 20 Aowe. Nikana꞉ma꞉ iki pa꞉ta꞉ ta꞉na꞉ma꞉ homolo hata꞉ ika꞉ pi lawao haloma꞉me.   
\c 3  
\p
\v 1 Koto ekina꞉ handeteke hapeke yea꞉pate yuwia hapeke soka꞉la꞉ pieke handaata꞉ dikita꞉ A꞉ta꞉ni da nane  
\v 2-3 hata꞉ta꞉ hande Ketisona꞉ Pi Seliapo walolo hali nika꞉ mandakena꞉ Koda꞉na꞉ e pokaasoma꞉ hali dika꞉ kame Timodi tapaopa꞉me. Timodi tapaopa꞉ ekita꞉ mo iki pa꞉ta꞉ a꞉nda꞉ limiki ekina꞉ hali ma꞉nda꞉ paa la꞉ka꞉la peliekeyeke ipikana꞉ma꞉ iki taka꞉lao hata꞉ ika꞉ hone tulaalemeeki daeyamena꞉ petelo epeekeme. Kutupiki a꞉nda꞉ lita꞉la꞉eki manuta꞉ niki pa꞉ta꞉ a꞉pa꞉tiki pilieke laa Koda꞉ma꞉ la꞉ wiekeeki ikana꞉ma꞉ hone wilimime.  
\v 4 Nikana꞉ma꞉ iki ame̱le̱ haoma꞉ pita꞉ wetepe niki pa꞉ta꞉ a꞉nda꞉ lulu pa꞉la꞉ ekimanu ipu halieke laa lo haoma꞉ ekita꞉ ota꞉ yaasa꞉eki handelememe.  
\v 5 Kutu pa꞉la꞉ ekina꞉ I̱ma꞉ Timodi tapaowa꞉me. Yuwia hapeke soka꞉la꞉ pieke handa ika꞉ hone tulaaleme ekimanu handoma꞉ tiaena꞉ Timodi tapaowa꞉me. Sadanima꞉ iki makeala꞉ ekina꞉ nika꞉ e pokoloma꞉ ekita꞉ pa alepe laa opuluekema꞉ loa꞉me.   
\p
\v 6 Kutu puma꞉pate ameta꞉ Timodi iki mina꞉pa꞉lao paa la꞉ka꞉la a꞉pa ika꞉ epeke pukima꞉ homa hata꞉ make ika꞉ epeke hone tulaalemeeki make niki pa꞉ta꞉ la kia꞉me. Ipikana꞉ma꞉ la kitolo alota꞉ Hoto paeyao ikana꞉ma꞉ niki pa꞉ta꞉ hone wopu witolo hata꞉ nikana꞉ma꞉ iki handuluekema꞉ hone pia꞉ tupa꞉ ikana꞉ma꞉ make niki handuluekema꞉ make homeke hone kone wilimime ala꞉me.  
\v 7 Kametitio. Koto ekina꞉ta꞉ nikana꞉ma꞉ tanda tanda o ka꞉nda꞉ tonka꞉na꞉ mu haoma꞉pate nikana꞉ma꞉ iki pa꞉ta꞉ yenkimeke homo haoma꞉ ekita꞉ ameta꞉ a꞉pa꞉la꞉me. Ika꞉ hone tulaaleme ekima꞉ niki sa꞉tiaala꞉me.  
\v 8 Ikana꞉ma꞉ a꞉nda꞉ ika꞉ Tekehali pa꞉ta꞉ halemeeki taka꞉lao haemeka꞉na꞉ta꞉ kota꞉ niki make da꞉ta hata꞉ epeke tupa꞉ halumeke.  
\v 9 Ameta꞉ nikana꞉ma꞉ iki pa꞉ta꞉ hone witolo hata꞉ Koda꞉ pa꞉ta꞉ keiyae pi lapeke ya꞉la꞉me. Ika꞉ epeke haleme ekina꞉ nika꞉ Tekehali pa꞉ta꞉ hata꞉ ta꞉na꞉ma꞉ homa haloma꞉me. Koto pa꞉la꞉ ekina꞉ta꞉ ipiki pa꞉ta꞉ keiyae pi lo haloma꞉me.  
\v 10 Timba natena꞉ nikana꞉ma꞉ nika꞉ Tekehali pa꞉ta꞉ nika꞉ pukima꞉ ota꞉ yeni wopu pu haloma꞉me. Ika꞉ leke popeleke paa handuluekema꞉ make ika꞉ hone tulaalemeeki taka꞉lawalo pa꞉la꞉ ekina꞉ make loa꞉me.   
\p
\v 11 Nika꞉ Apa꞉ Koda꞉ ipikana꞉ma꞉ make nika꞉ Tekehali Yesuma꞉ make niki iki pa꞉ta꞉ a꞉pomono pota꞉ ana꞉na꞉ pilaepeka꞉na꞉ta꞉ kota꞉ epelieke.  
\v 12 Koto ekina꞉ ika꞉ ika꞉ kone pukima꞉ homelemeeki make paeyao pa꞉ta꞉ pukima꞉ homelemeeki make mo Tekehalima꞉ta꞉ nikana꞉ma꞉ iki pa꞉ta꞉ pitoloma꞉ tupa꞉ kone ipikana꞉ma꞉ ika꞉eki mea daeyawao pia꞉ka꞉na꞉ta꞉ epelieke.  
\v 13 Ipikana꞉ma꞉ kutu pilimi ekima꞉ ika꞉ puki taka꞉lawalieke. Kutu pia꞉ka꞉na꞉ta꞉ nika꞉ Tekehali Yesu ipika꞉ wanda꞉hali ame̱le̱ epolo peleme natena꞉ta꞉ ikita꞉ nika꞉ Apa꞉ Koda꞉ ipika꞉ leke popelekena꞉ mombela hata꞉ta꞉ ala꞉ta꞉ na piki epeke yakopiki wanda꞉hali halimikie.   
\c 4  
\s1 Nika꞉ haloma꞉ ekima꞉ Koda꞉ ta꞉na꞉ma꞉ homaasoma꞉eki  
\p
\v 1 Kametitio. Ameta꞉ paeyaaso hata꞉ ikana꞉ma꞉ Koda꞉ ta꞉na꞉ma꞉ homa꞉ tiaaso hata꞉ halo peleme tupa꞉ta꞉ nikana꞉ma꞉ amba꞉ waloma꞉me. Koto waloma꞉ tupa꞉ kone hata꞉ pelememe. Kutupa ameta꞉ iki honke alo hata꞉ ikana꞉ma꞉ Tekehali Yesu ipika꞉ bikina꞉ ikana꞉ma꞉ mo hande hau mandaneeki wopu pu hamina꞉ iki sutiaasoma꞉me.  
\v 2 Hande Tekehali Yesu ipika꞉ biki ula꞉ ekina꞉ nikana꞉ma꞉ iki pa꞉ta꞉ mana꞉ loma꞉ ekimanu hone wilimime.  
\v 3 Koda꞉ma꞉ iki pa꞉ta꞉ hone pa꞉la꞉ hauta꞉ dupae. Ikana꞉ma꞉ yakopiki wanda꞉hali hata꞉ta꞉ suseke haasa꞉ hau ma꞉nda꞉ na piki hamina꞉yeke hone pa꞉la꞉me.  
\v 4 Iki pa꞉ta꞉ hali homeke homekema꞉ wanda꞉ minolo hata꞉ ota꞉ tupa꞉ yako pea hata꞉ mea꞉pa꞉peke aleo.  
\v 5 Hande pi na miki hata꞉ Koda꞉na꞉ hau na handeke haliwekima꞉ ika꞉ hoke hone pa꞉la꞉eki tumbaaluekema꞉ wanda꞉ mineleme tupa꞉ koto hau na pea꞉pa꞉peke aleo.  
\v 6 Do ekina꞉ta꞉ hali ma꞉nda꞉ma꞉ ipika꞉ Ketiso yankeke tekipuleke lao hoke hau ma꞉nda꞉ na pea꞉pa꞉peke aleo. Koto pita꞉ iki pa꞉ta꞉ kinki wopu pitolo hata꞉ loma꞉ ekita꞉ dupa. Kutupiki hau pu haleme wanda꞉halita꞉ Tekehalima꞉ wape walieke laa loma꞉me.  
\v 7 Nikita꞉ suseke haasa꞉ hau peomono Koda꞉ma꞉ wi na lea꞉pate yakopiki hauna꞉ hamono wi lea꞉me.  
\v 8 Koto ekina꞉ta꞉ hali epima꞉ do walolo pi kiaeya꞉ka꞉na꞉ta꞉ kota꞉ koto somema꞉ mo kenke hali na kiaasa꞉pate hande Holi Sipitidi ku hala꞉ Koda꞉ kone kiaaso pila꞉me.   
\p
\v 9 Ika꞉ Ketiso yankeketiti pa꞉ta꞉ pukima꞉ homolo peleme ekina꞉ I̱ma꞉ wape ma꞉nda꞉ na pitolome. Pa ekipeke. Do hau pulu pimi ekita꞉ Koda꞉ma꞉ iki pa꞉ta꞉ amba꞉ walea꞉me.  
\v 10 Koto pukima꞉ homeleme ekita꞉ ikana꞉ma꞉ mo Ma꞉sedonia kenke pa꞉ta꞉manu haleme ika꞉ Ketiso yankeketiti paeyao pa꞉ta꞉ amba꞉ pelememe. Koto ekina꞉ kametitio. Do hauta꞉ ota꞉ wopu pu hapa꞉peke laa iki honke alo loma꞉me.  
\v 11 Nikana꞉ma꞉ iki pa꞉ta꞉ amba꞉ loma꞉ tupa꞉ ikana꞉ma꞉ ika꞉ titina꞉ hone witeleme ekita꞉ iki epeke tupa꞉ sembepela haluekema꞉ hone wopu u hapa꞉peke. Kutupa koto tupa꞉ kone ma꞉nda꞉na꞉eki na handeketa꞉ pa ika꞉eki homeke ika꞉ kone puluekema꞉ pota꞉ weiya꞉pa꞉peke. Kutaa make ika꞉ pitu pelia꞉pa꞉pekeeki ika꞉ kikima꞉ ika꞉ kone puluekema꞉ hone wopu u hapa꞉peke.  
\v 12 Kutu pu haemeka꞉na꞉ta꞉ mo pi na miki wanda꞉halima꞉ handolo hata꞉ iki pa꞉ta꞉ epeke hone wilimikie. Kutupa make ma꞉nda꞉ma꞉ peaena꞉e hone na wiki ika꞉ honumake kone handeteke hapeke yelieke.   
\s1 Tekehalina꞉ epolo pa꞉la꞉eki  
\p
\v 13 Kametitio. Mo hande homemeke wanda꞉halima꞉ piteme ekimanu ikana꞉ma꞉ hone wopu uemena꞉yeke niki hone pa꞉la꞉me. Hande paa tiaalo pa꞉la꞉ ekina꞉ hone na puaake homa꞉ ke handeleeleme wanda꞉hali leke halimikiyeke loma꞉me.  
\v 14 Nika꞉ hone tulaasoma꞉ ekita꞉ dupa. Yesu ipikita꞉ homa kone paa tiaeyekeme. Koto ekina꞉ta꞉ hone dupa uluma꞉me. Yesu pa꞉ta꞉ hone tulao hata꞉ homemeke wanda꞉halita꞉ Koda꞉ma꞉ Yesu ame̱le̱ hatuku ipilieke.   
\p
\v 15 Dota꞉ Tekehalima꞉ wala꞉la꞉eki iki pa꞉ta꞉ la kitoloma꞉me. Tekehali pa la꞉ka꞉la epolo pa꞉la꞉ natena꞉ta꞉ niki pa haluma꞉ wanda꞉halita꞉ mo hande amba꞉ titina꞉ homemeke wanda꞉hali wetepeyao na polumeke.  
\v 16 Kutu pilie natena꞉ta꞉ mana꞉ pi aneke hapu alo haena꞉ mo titina꞉ enisolona꞉ pi ho̱la̱꞉make tonka꞉na꞉ alo haena꞉ Koda꞉na꞉ bu kanake make litolo haena꞉ kutupiki haumanu pitolo haena꞉ta꞉ Tekehali ipiki oli hepeni nanema꞉ hao hola꞉pa꞉nialo ipilieke. Hande Ketiso pa꞉ta꞉ hone tulao hata꞉ homemeke wanda꞉hali amba꞉la paa mea tialieke.  
\v 17 Kutu pilie pita꞉ta꞉ niki pa haluma꞉ wanda꞉hali make mo hande wanda꞉hali ame̱le̱ Koda꞉ma꞉ mea apa꞉tao hamono laa oli koa manda niki hatuku pua Tekehali manda꞉hande pea handulumeke. Kutupata꞉ nikita꞉ Tekehali ipiki ame̱le̱ hoto paeyao hao halumeke.  
\v 18 Koto ekina꞉ta꞉ do pima꞉ ika꞉ yankeketiti ame̱le̱ ta꞉na꞉ma꞉ homa꞉ alualu pea hao hapa꞉peke.   
\c 5  
\s1 Tekehalina꞉ epolo pa꞉la꞉ ekina꞉ tikitiki yao hamana꞉  
\p
\v 1 Kametitio. Mo hande haumanu pulu pa꞉la꞉ hau manuna꞉ di o natemanu iki hone wilimi ekina꞉ I̱ma꞉ iki pa꞉ta꞉ wape pea la kia꞉peke na ya꞉la꞉me.  
\v 2 Hande Tekehali ipika꞉ epolo pa꞉la꞉ Nateta꞉ pake nala꞉ hali timba ipu hala꞉ tupa꞉ opolo epolo pa꞉la꞉ ekita꞉ ika꞉ kone opua hone wopu witelememe.  
\v 3 Wanda꞉halima꞉ alota꞉ Ameta꞉ ekia꞉nda꞉ pea꞉pekeeki niki dia꞉yalo hata꞉ homu pea haloma꞉me lemeka꞉na꞉ta꞉ kota꞉ mo hoeyaalo pa꞉la꞉ alemanu iki pa꞉ta꞉ ota꞉ koto kone ipilieke. Weki hoki nala꞉ wanda꞉ pa꞉ta꞉ ipula꞉ tanda leke iki pa꞉ta꞉ make epea꞉ka꞉na꞉ta꞉ wendia pua꞉peke na yelieke.  
\v 4 Kametitio. Kutu piliepate ikita꞉ timba ala꞉eki pa꞉ta꞉ na haleme ekina꞉ mo hande Nate epolo pa꞉la꞉ ekita꞉ hande pake nala꞉ halima꞉ a꞉pa penkilipaasa꞉ tupa꞉ iki pa꞉ta꞉ na ipilieke.  
\v 5 Iki paeyaota꞉ nate pa̱a̱ pa꞉la꞉ ekina꞉ wanda꞉hali halememe. Nikita꞉ timba꞉ pa꞉ta꞉ na haloma꞉me.  
\v 6 Koto ekina꞉ta꞉ u̱ pelieleme wanda꞉hali leke na hake tialiao epeke hone wia hamana꞉ pea꞉pa꞉peke aleo.  
\v 7 Timbata꞉ wanda꞉halina꞉ u̱ pelieleme die. Kutupa timba kone wanda꞉halima꞉ hoke ikali naa keaaseme die.  
\v 8 Kutu pu halemepate nikita꞉ pa̱a̱ pita꞉la꞉ ekina꞉ wanda꞉hali haloma꞉me. Koto ekina꞉ta꞉ epeke hone wia hamana꞉ pea꞉pa꞉peke aleo. Nika꞉ hone tulaasoma꞉eki pita꞉ pukima꞉ homoloma꞉ ekita꞉ hakoko a꞉mbaasa꞉ hanka꞉ leke pambaota꞉ Koda꞉ma꞉ niki mea da꞉taalo pa꞉la꞉ ekina꞉ hone puaasoma꞉ ekita꞉ nika꞉ a꞉nda꞉ pita꞉la꞉ you aka꞉ leke pambamana꞉e.  
\v 9 Koda꞉ma꞉ ipika꞉ mineke panka꞉la꞉eki niki pa꞉ta꞉ epena꞉yeke niki na talopu mea hamono lea꞉pate pa Tekehali Yesuma꞉ niki mea da꞉taowaena꞉ leekeme.  
\v 10 Yesuma꞉ta꞉ ipiki ame̱le̱ hao hamonoyeke nika꞉eki peaaso homeekeme. Koto ekina꞉ Yesu paa epea꞉ka꞉na꞉ta꞉ amba꞉ homeme wanda꞉hali pita꞉ pa haloma꞉ wanda꞉hali make ala꞉ta꞉ ma꞉nda꞉ dia꞉ma꞉ pa ipiki ame̱le̱ da꞉taa halumeke.  
\v 11 Koto ekina꞉ta꞉ ame do piteleme tupa꞉ ika꞉ ika꞉ kone sa꞉tia alualu pea tamba꞉ mu alualu pitolo hapa꞉peke.   
\s1 Paeyaaso mana꞉ pi make pelia꞉pa꞉peke la꞉la꞉eki make  
\p
\v 12 Kametitio. Ika꞉ pota꞉manu tondepeao iki waleleme haliwekita꞉ Tekehalima꞉ mea haena꞉ leekeme. Iki ame̱le̱ hata꞉ pokeleme ekina꞉ ikana꞉ma꞉ iki pa꞉ta꞉ panda꞉pea hamina꞉yeke honke aloma꞉me.  
\v 13 Koto e poko haleme ekina꞉ iki pa꞉ta꞉ pukima꞉ homa hata꞉ hone wopu u hapa꞉peke. Ika꞉ ika꞉ kone homu pea puki homeke wia hapa꞉peke.  
\v 14 Kametitio. Iki sutiaasoma꞉me dupa. Pa pitu haleme wanda꞉halita꞉ mana꞉ laka꞉na꞉ mo pututuma꞉ homeleme wanda꞉hali sa꞉tiaaso hata꞉ mo damakopiki wanda꞉hali pa꞉ta꞉la꞉ mea꞉tiki pea iki paeyao wotu handeteke hatiki pea꞉pa꞉peke.  
\v 15 Mandane wanda꞉halima꞉ iki pa꞉ta꞉ hoke hau pimika꞉na꞉ta꞉ ikana꞉ma꞉ paa na hombo peaapa꞉peke. Hoto paeyaota꞉ ika꞉ ika꞉ kone epea alualu pea hata꞉ wanda꞉hali paeyao make epeaaluekema꞉ hone wopu wia꞉pa꞉peke.   
\p
\v 16 Nate paeyao ta꞉na꞉ma꞉ homo hapa꞉peke.  
\v 17 Hoto paeyao make yeni pu hapa꞉peke.  
\v 18 Kutupa eki a꞉nda꞉ paeyaona꞉ make Koda꞉ pa꞉ta꞉ keiyae pi lo hapa꞉peke. Do haumanu ikana꞉ma꞉ Yesu Ketiso ame̱le̱ ta꞉ma꞉ni pea hata꞉ puemena꞉yeke Koda꞉ma꞉ hone pa꞉la꞉me.   
\p
\v 19 Hande Holi Sipitidina꞉ ti uleke na honiapa꞉peke.  
\v 20 Koda꞉na꞉ pi la꞉ mea hala꞉ halina꞉ wala꞉la꞉ pita꞉ ikana꞉ma꞉ hoki walo honditi na pea꞉pa꞉peke.  
\v 21 Hau paeyao pea handaata꞉ mo a꞉pa꞉la꞉ haumanu miniki hata꞉  
\v 22 kutupa hokeeki paeyao handa paka꞉laapa꞉peke.   
\p
\v 23 Nika꞉ puki lopawao hala꞉ Koda꞉ma꞉ ikita꞉ ika꞉ haumanu paeyao pa꞉ta꞉ yako pina꞉ lawaena꞉e alome. Kota꞉ nika꞉ Tekehali Yesu Ketisona꞉ epolo pa꞉la꞉ nateta꞉ ipula꞉me. Koto nate opolo epea꞉ka꞉na꞉ta꞉ ikita꞉ ata꞉ka꞉ na piki wanda꞉hali hamina꞉ Koda꞉ma꞉ ika꞉ temoko make a̱o̱a̱o̱ make loke make paeyaota꞉ ana꞉na꞉ handeteke hao haena꞉e alome.  
\v 24 Do ekina꞉ loa꞉me. Iki wi la꞉la꞉ halima꞉ ipika꞉ pulueke laa la꞉ ula꞉ ekita꞉ ota꞉ pealieke.   
\p
\v 25 Kametitio. Niki pa꞉ta꞉ tonka꞉na꞉ yeni peao hapa꞉peke.   
\p
\v 26 Hande Ketiso wanda꞉halima꞉ pu haloma꞉ tupa꞉ ika꞉ yankeketiti paeyao ame̱le̱ hopula alualu pea꞉pa꞉peke.   
\p
\v 27 I̱ma꞉ mo Tekehalina꞉ bikina꞉ iki sutiaaso hata꞉ dupa alome. Ika꞉ yankeketiti paeyao pa꞉ta꞉ do wape yata꞉pa꞉peke.   
\p
\v 28 Nika꞉ Tekehali Yesu Ketiso ipika꞉ pa hameke a꞉ta꞉ma꞉ homa꞉la꞉eki iki ame̱le̱ haena꞉e.