\id 1PE - Sembeleke Samberigi PNG 1 Peter 01 22/3/91 Macnaughtan \h 1 PIDA \toc1 Pidama꞉ tapaeyeke titina꞉ wapee \toc2 1 Pida \toc3 1 Pida \mt1 Pidama꞉ tapaeyeke titina꞉ wapee \c 1 \p \v 1 I̱ Pida Yesu Ketisona꞉ Aposoloma꞉ iki Koda꞉ma꞉ ma̱leke lia mea hala꞉ wanda꞉hali mo a꞉nda꞉ma꞉ ta꞉la꞉leke da yoka tankulupu mea pua iki ta Pondasi kenke o Ka꞉leisia kenke o Ka꞉padosia kenke o Eisia kenke kutupa make mo Bidinia do kenke paeyao pa꞉ta꞉ panka꞉ halo peleme wanda꞉hali iki pa꞉ta꞉ do wape pitolome. \v 2 Apa꞉ Koda꞉ma꞉ ipika꞉ hau ma꞉nda꞉ tekena꞉ hata꞉ iki ma̱leke lia mia꞉me. Kutu pieke ekita꞉ dupa Mo Holi Sipitidima꞉ iki yakopiki wanda꞉hali hamena꞉ lena꞉ make Yesu Ketisona꞉ pi opua puemena꞉ make kutupa ipika꞉ wema꞉ iki tandepena꞉ make iki mea haena꞉ la꞉la꞉me. A꞉ta꞉ma꞉ homa tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ ota꞉ tumbaena꞉e. \p \v 3 Nika꞉ Tekehali Yesu Ketisona꞉ Apa꞉ Koda꞉ pa꞉ta꞉ keiyae pi lomana꞉e. Ipikana꞉ma꞉ a꞉ta꞉ma꞉ homa tamba꞉ mieke handa Yesu Ketiso homa paa tiaeyeke ekima꞉ta꞉ niki pa꞉ta꞉ panake da꞉ta꞉la꞉eki kia꞉me. Koto pa꞉la꞉ ekima꞉ta꞉ nika꞉ hone pa꞉ta꞉ deto hala꞉ hone ti laasa꞉eki tumbao hala꞉me. \v 4 Koda꞉ma꞉ kita꞉la꞉ ota꞉ epeke ale manuta꞉ ipika꞉ wanda꞉halima꞉ mina꞉ momba꞉la wiala꞉ ekie. Koto ekina꞉ta꞉ do ale manuta꞉ nikana꞉ma꞉ mulumeke hone ti lao haloma꞉me. Ipikana꞉ma꞉ mo ota꞉ epeke ale manuta꞉ hepeni nane kukutu na pu o na hoyo make honipa pua꞉peke na yo pia꞉peke ale pa꞉ta꞉ wiala꞉me. Mo ale manuta꞉ ika꞉eki wiawala꞉me. \v 5 Koda꞉na꞉ pa꞉ta꞉la꞉la꞉ ekita꞉ mo paetolo natena꞉ peneme yao opolo epena꞉ ana꞉lao hala꞉me. Koto ekina꞉ ikana꞉ma꞉ do pa꞉ta꞉ la꞉la꞉ ekita꞉ muluekema꞉ yu wia haaso hata꞉ta꞉ ika꞉ Koda꞉ pa꞉ta꞉ hone tulaasemeke handa ipika꞉ wele pita꞉la꞉ ekima꞉ta꞉ iki handeteke hala꞉me. \p \v 6 Ameta꞉ tekipuleke laaseme haumanu make handolo hata꞉ hosikima꞉ ka꞉nda꞉ homo halemepate mo hande Koda꞉ma꞉ wiawala꞉ ale manuna꞉ ta꞉na꞉ma꞉ homo hapa꞉peke. \v 7 Mo tekipuleke laasa꞉ haumanu ipula꞉ ekina꞉ teketa꞉ mo ikana꞉ma꞉ Koda꞉ pa꞉ta꞉ hone tulaleme ekita꞉ ota꞉eki yaaluekema꞉ ipu hala꞉me. Kenke pa꞉ta꞉ awa mina꞉la꞉ kolota꞉ hoeyaapeke ya꞉la꞉pate kone haliwekima꞉ ota꞉ kolope o hoke ekipe laa pa handuluekema꞉ tima꞉ yanka hando halememe. Koto piteleme tupa꞉ kone ika꞉ hone tulaaseme ekina꞉ taka꞉lao hamena꞉ la handilieke. Mo kolota꞉ ota꞉ epeke ale ya꞉la꞉pate kone ikana꞉ma꞉ Koda꞉ pa꞉ta꞉ hone tulaleme ekima꞉ta꞉ mo kolo make ota꞉ lombei pa꞉la꞉me. Taka꞉lao haemeka꞉na꞉ta꞉ mo Yesu Ketisona꞉ opolo ipilie natena꞉ ikita꞉ yeiya꞉ laasa꞉eki mu pa̱a̱ peaasa꞉eki mu titina꞉ amba꞉la haasa꞉eki mu pilimikie. \v 8-9 Ipikita꞉ lekema꞉ na handemepate kone ipiki pa꞉ta꞉ ikana꞉ma꞉ pukima꞉ homelememe. Ameta꞉ ipiki lekema꞉ na handelemepate kone ikana꞉ma꞉ ipiki pa꞉ta꞉ hone tulao halememe. Ika꞉ temokona꞉ pa꞉ta꞉ la꞉la꞉ ekina꞉ muluekema꞉ hone tulaememe. Kutupa ameta꞉ minelemeke handa ikana꞉ma꞉ ta꞉na꞉ma꞉ homa꞉la꞉eki paeyao lombei pu pa pua ota꞉ pima꞉ make lapeke na yeke ta꞉na꞉ homo halememe. \p \v 10 Mo pa꞉ta꞉ la꞉la꞉ ekina꞉ hone uluekema꞉ amba꞉ Koda꞉na꞉ pi la꞉ mea halao hayeke potopede haliwekima꞉ ekipape alo hata꞉ weiyu haemekeme. Kutupa Koda꞉ma꞉ iki pa꞉ta꞉ do pa hameke kulu pieke ekina꞉ mo potopede haliwekima꞉ la꞉ wimikime. \v 11 Ketisona꞉ temokoma꞉ mo potopede haliweki tukiki pa꞉ta꞉ pita꞉ Ketiso ipika꞉ tanda mulu piekeeki make ipika꞉ pa̱a̱ma꞉ telimea epolo piekeeki make la꞉ wia waleeke pita꞉ma꞉ta꞉ ikana꞉ma꞉ koto hau manuta꞉ ekipa handima꞉ ipiliepe laa handuluekema꞉ weiyu taapo haemekeme. \v 12 Do hande opimi ota꞉ pita꞉ mo potopede haliwekima꞉ amba꞉ walaaso haena꞉ta꞉ Koda꞉ma꞉ iki pa꞉ta꞉ koto pita꞉ ika꞉eki dia꞉me. Mo wetepena꞉ haleme wanda꞉hali ika꞉eki peneme yao waleekeme. Mo Pi Seliapona꞉ kinki peaasa꞉ haliwekima꞉ hepeni nanema꞉ tapaeyeke Holi Sipitidina꞉ welema꞉ do ota꞉eki manuta꞉ iki pa꞉ta꞉ la kimime. Do ota꞉eki manuta꞉ mo enisolo haliwekima꞉ kone hone uluekema꞉ hone pu halememe. \p \v 13 Ika꞉ honema꞉ pea꞉peke hau hone hone u hapa꞉peke. Kutupa leke leke lo hapa꞉peke. Yesu Ketiso opolo epea꞉ka꞉na꞉ta꞉ iki pa꞉ta꞉ a꞉ta꞉ma꞉ homa tamba꞉ mina꞉la꞉eki kilieke. Kotoeki homekena꞉ ika꞉ hone ti lao hao hapa꞉peke. \v 14 Koda꞉na꞉ pi opua pu hapa꞉peke. Kutupa iki mateya꞉ di nina꞉ hone tiaemeeki manuma꞉ ameta꞉ ika꞉ halemeeki na handeteke haena꞉ lapa꞉peke. \v 15 Koto hau na pikita꞉ iki wi lea꞉ Koda꞉ yako piki hali hala꞉ tupa꞉ iki make ika꞉ hau paeyao tonka꞉na꞉ yako pea hapa꞉peke. \v 16 Mo Baiboloma꞉ alota꞉ I̱ta꞉ yako piki hali halo ekina꞉ iki make yako piki wanda꞉hali hapa꞉peketaa la꞉la꞉me. \s1 Koda꞉ma꞉ yenki tiekema꞉ niki hamba꞉ miekeeki \p \v 17 Ikana꞉ma꞉ yeni pitolo hata꞉ Apa꞉o lo haleme Koda꞉ma꞉ta꞉ wanda꞉hali paeyao homeke hone witolo hata꞉ta꞉ iki homeke homekema꞉ pu haeme hauna꞉ pi yoka꞉ alu pilieke. Koto ekina꞉ta꞉ ika꞉ ame do kenkena꞉ haleme natena꞉ta꞉ Koda꞉ pa꞉ta꞉ homu pea hao hapa꞉peke. \v 18 Ika꞉ atekena꞉ atekema꞉ kieke mimi napeke na pitu epe na piki hau manuna꞉ta꞉ Koda꞉ma꞉ iki ka꞉la꞉pa꞉ tapaala꞉ yenki haleeke ekita꞉ iki hone wilimime. Mo yenkita꞉ manimanu silipa o kolo hoeyaapeke ya꞉la꞉ mani ula꞉ tupa꞉ta꞉ dia꞉me. \v 19 Ketisona꞉ we ota꞉ seliapoma꞉ iki ka꞉la꞉pa꞉ tapaeyekeme. Ipikita꞉ hoyo ala꞉ta꞉ ma꞉nda꞉ na piki (Koda꞉ pa꞉ta꞉ lia halo haemeke) sipisipi ma꞉na꞉ ikiki leke hayekeme. \v 20 Koda꞉ma꞉ do kenke a̱i̱ na wepieke pita꞉ma꞉ kone Yesu amba꞉ mea hayekeme kutupa do wetepe naneta꞉ iki tamba꞉ muluekema꞉ ipiki peneme yaeyekeme. \v 21 Yesu pa꞉ta꞉ yama꞉ Koda꞉ pa꞉ta꞉ hone tulalememe. Koda꞉ma꞉ Yesu mea tiao pa̱a̱ peawayekeme. Koto ekina꞉ta꞉ ika꞉ hone tulalemeeki make ika꞉ hone ti lalemeeki make Koda꞉ pa꞉ta꞉ pu halememe. \s1 Nika꞉ Ketiso tapake pa꞉ta꞉ pukima꞉ homolo hata꞉ hamana꞉e \p \v 22 Koda꞉na꞉ ota꞉ pi opua pu haleme ekima꞉ta꞉ ika꞉ temoko yako pina꞉ lelememe. Ame ika꞉ Ketiso yankeke ota꞉ pukima꞉ homa halememe. Koto pelemepate ika꞉ puki paeyaoma꞉ pukima꞉ ota꞉ homa꞉ alualu pu hapa꞉peke. \v 23 Ikita꞉ homa꞉la꞉ apa꞉na꞉ wekiwandiki hamena꞉ dia꞉ya꞉la꞉pate da꞉ta hao hala꞉ apa꞉na꞉ wekiwandiki hamena꞉ Koda꞉na꞉ da꞉ta hao hala꞉ pima꞉ iki paa mendiaeyekeme. \v 24 Kota꞉ mo Baiboloma꞉ alota꞉ \q1 Wanda꞉hali paeyaota꞉ pa opa꞉la꞉ ambu tupa꞉ halememe. Kutupa ika꞉ au lo hala꞉ ekita꞉ ambuna꞉ moma opa꞉la꞉ tupa꞉ma꞉ handa꞉la꞉me. Mo ambu hapitolota꞉ ipika꞉ moma make alupilieke. \q1 \v 25 Kutu piliepate mo Tekehalina꞉ pita꞉ na paeke pa u halieke. \p Koto pita꞉ mo iki pa꞉ta꞉ walea꞉ Pi Seliapoe. \c 2 \s1 Tekehali ipikita꞉ da꞉ta ula꞉ toopi seliapo ula꞉me \p \v 1 Hoke hau paeyao baapa꞉peke. Yayapiki pi na lo makeaasa꞉ hau na pu ma꞉nda꞉na꞉ epeke hau pita꞉la꞉eki handa꞉peke yeke honditi pita꞉la꞉ hau na pu kutupa make kake neli pita꞉la꞉ pi na lapa꞉peke. \v 2 Panake mendia꞉la꞉ wekiwandikima꞉ andu na꞉na꞉ma꞉ homa꞉la꞉ tupa꞉ ikana꞉ma꞉ ika꞉ temoko tamba꞉ mulu pa꞉la꞉ yako piki andu na꞉na꞉ lo hapa꞉peke. Koto ekina꞉ mo andu no haemeka꞉na꞉ta꞉ epeke tupa꞉ daeya hata꞉ Koda꞉na꞉ pa꞉ta꞉ la꞉la꞉eki milimikie. \v 3 Kota꞉ mo Baiboloma꞉ la꞉la꞉ ekita꞉ Mo Tekehalina꞉ epeke hau pu hala꞉ ekita꞉ ikana꞉ma꞉ amba꞉ naa handememe. \p \v 4 Tekehalita꞉ mo da꞉ta ula꞉ toopi pa꞉ta꞉ ipu hapa꞉peke. Wanda꞉halima꞉ta꞉ koto toopita꞉ pa alee hone wia kiao haemekeme. Koto pimikipate Koda꞉ma꞉ mo toopita꞉ ota꞉ epekeekie la ma̱leke liekeme. \v 5 Iki make da꞉ta hala꞉ toopi ula꞉ tupa꞉ halememe. Kutupa ikana꞉ma꞉ Koda꞉ma꞉ ikita꞉ mea ipika꞉ yakopiki temokona꞉ da a꞉ena꞉ lapa꞉peke. Do da tukiki pa꞉ta꞉ ikana꞉ma꞉ yako piki yeni peao hala꞉ haliweki hata꞉ Koda꞉ ta꞉na꞉ma꞉ homolo hata꞉ mina꞉ ika꞉ temoko Yesu Ketiso pa꞉ta꞉ yama꞉ Koda꞉ pa꞉ta꞉ halo hapa꞉peke. \v 6 Kota꞉ mo Baiboloma꞉ la꞉la꞉ ekita꞉ \q1 I̱ma꞉ ota꞉ epeke toopi homeke ma̱leke lia ameta꞉ Saioni nane da kini pia꞉peke toopi wina꞉ ulume. Kutupa koto toopi pa꞉ta꞉ hone tulao halie hali epita꞉ yaala꞉ma꞉ na homilieke. \p \v 7 Iki hone tulaleme wanda꞉halima꞉ Ketisota꞉ ota꞉ a꞉pa꞉la꞉me hone u halemepate mo hone na tulaleme wanda꞉hali pa꞉ta꞉ta꞉ do la꞉la꞉me. \q1 Da a꞉eta꞉la꞉ haliwekima꞉ kiaemeke toopita꞉ wetepena꞉ tumiki toopi kone wiekeme. \p \v 8 Baibolo ma꞉nda꞉ pa꞉ta꞉ la꞉la꞉ ekita꞉ \q1 Do toopima꞉ta꞉ wanda꞉hali hala꞉mba꞉ liaena꞉ lelieke la꞉la꞉me. Kutupa koto toopi tiekema꞉ kone wanda꞉hali lopena꞉ lelieke la꞉la꞉me. \m Iki hala꞉mba꞉ liaemeke ekita꞉ ikana꞉ma꞉ Koda꞉na꞉ pina꞉ hone na tulaemeke ekina꞉ piekeme. Kotota꞉ Koda꞉na꞉ hone piekeekie. \s1 Nikita꞉ Koda꞉na꞉ tapake haloma꞉eki \p \v 9 Koto pa꞉la꞉pate ikita꞉ Koda꞉na꞉ ma̱leke lila꞉ tapake halememe. Ikita꞉ mo Kini halina꞉ yeni peao haleme wanda꞉halie. Ikita꞉ mo yakopiki tapakee. Koda꞉na꞉ wanda꞉hali homeke halememe. Ikita꞉ mo timba꞉la꞉ pambeke pa꞉ta꞉ haapa꞉na꞉ ipika꞉ pa̱a̱ pita꞉la꞉eki ota꞉ seliapo pa꞉ta꞉ epoemena꞉ wi lea꞉ Koda꞉ma꞉ ipika꞉ ota꞉ epeke pita꞉la꞉ ekimanu la halamena꞉ iki ma̱leke lila꞉me. \v 10 Amba꞉ta꞉ iki Koda꞉na꞉ wanda꞉hali na haemepate ameta꞉ ipika꞉eki halememe. Amba꞉ta꞉ iki Koda꞉na꞉ a꞉ta꞉ma꞉ homa꞉la꞉ hau hone na wimipate ameta꞉ ipika꞉ a꞉ta꞉ma꞉ homa꞉la꞉ hau a꞉pa꞉leke melememe. \s1 Nikita꞉ Koda꞉na꞉ e pokaasoma꞉ wanda꞉hali haloma꞉me \p \v 11 Ya yankeke tonuo. Iki do kenkena꞉ta꞉ ta꞉eileke epeleme na handeke wanda꞉hali leke hamena꞉ I̱ma꞉ honke alo ekita꞉ dupa Ika꞉ temoko a꞉nda꞉ lu tiaasa꞉ lokena꞉ hone pa꞉la꞉ ekimanu pa꞉ta꞉ waleke na wiao hapa꞉peke. \v 12 Ikana꞉ma꞉ pi na ma꞉la꞉ wanda꞉hali taapuna꞉ ota꞉ epeke hau pu hapa꞉peke. Kutu pimikina꞉ta꞉ hande pi na ma꞉la꞉ wanda꞉halima꞉ iki biki hoeyaaluekema꞉ taapilimipate ika꞉ epeke piteleme ekimanu pa꞉ta꞉ handilimikie. Koto ekina꞉ koto wanda꞉halima꞉ta꞉ hande la꞉ ula꞉ nate epea꞉ka꞉na꞉ta꞉ Koda꞉na꞉ biki a꞉meiyalimikie. \p \v 13 Ika꞉ Tekehali pa꞉ta꞉ hone witolo hata꞉ Kapomanina꞉ pi ula꞉eki paeyao opua homu pea hata꞉ mo Kini you hali haya꞉ka꞉na꞉ta꞉ ipiki pa꞉ta꞉ make \v 14 kutupa ipika꞉ e pokaasa꞉ haliweki pa꞉ta꞉ make homu pea hapa꞉peke. Mo you halima꞉ta꞉ ipika꞉ e pokaasa꞉ haliwekima꞉ mo hoke hau pu haleme wanda꞉hali panisi haluekema꞉ make mo epeke hau pu haleme wanda꞉halina꞉ biki a꞉meiyaluekema꞉ make tapaeyekeme. \v 15 Koda꞉na꞉ hone pa꞉la꞉ ekita꞉ dupa Mo hone na wiki wanda꞉hali ika꞉ napeke na wiki pi aleme ekita꞉ ikana꞉ma꞉ ika꞉ epeke hau piteleme ekima꞉ sa꞉sa꞉ puemena꞉ hone ula꞉me. \v 16 Ka꞉la꞉pa hala꞉ haliweki leke hapa꞉peke. Iki ka꞉la꞉pa haleme ekima꞉ta꞉ hoke haumanu a꞉mbaena꞉ dia꞉ya꞉la꞉pate ikita꞉ Koda꞉na꞉ pa hameke e pokaaseme wanda꞉hali hapa꞉peke. \v 17 Wanda꞉hali paeyao pa꞉ta꞉ epeke hone u ika꞉ Ketiso yankeke tonu pa꞉ta꞉ pukima꞉ homo kutupa Koda꞉ pa꞉ta꞉ paala꞉ma꞉ homo kutupa mo Kini you hali pa꞉ta꞉ make epeke hone u hapa꞉peke. \s1 Yesu teliolo hata꞉ ka꞉nda꞉ pa꞉la꞉eki mulumeke \p \v 18 Eki epima꞉ yenki e pokawaaseme wanda꞉hali haemeka꞉na꞉ta꞉ ika꞉ e teke tonu pa꞉ta꞉ homu pea hata꞉ ika꞉ pi opua꞉pa꞉peke ya꞉la꞉me. Hone wotu wia a꞉ta꞉ma꞉ homo hala꞉ teke hali tonu pa꞉ta꞉ homeke dia꞉ya꞉la꞉pate mo a̱i̱ mineke panko hala꞉ teke hali tonu pa꞉ta꞉ make kutu pia꞉pa꞉peke. \v 19 Ma꞉nda꞉ma꞉ ika꞉ hoke hau peleme ekina꞉ dia꞉ya꞉la꞉pate pa hameke iki pa꞉ta꞉ ka꞉nda꞉ kia꞉ka꞉na꞉ta꞉ ikana꞉ma꞉ Koda꞉na꞉ hone pa꞉la꞉eki hone witolo hata꞉ mo ka꞉nda꞉ mea tia haemeka꞉na꞉ta꞉ Koda꞉ma꞉ iki tamba꞉ mea epeaalieke. \v 20 Ota꞉ hoke hau pimi ekina꞉ panisi peaaso haena꞉ minolo halimipate kone kota꞉ hauna꞉ta꞉ ika꞉ biki ekipa mea a꞉meiyaliepe. Koto pa꞉la꞉pate ikana꞉ma꞉ ota꞉ epeke hau pu halimipate koto hauna꞉ kone ma꞉nda꞉ma꞉ ka꞉nda꞉ pita꞉la꞉eki kia꞉ka꞉na꞉ minolo hamena꞉ kota꞉ Koda꞉ma꞉ iki tamba꞉ mea epeaalieke. \v 21 Koto piki hau puemena꞉ Koda꞉ma꞉ iki wi leekeme. Kota꞉ Ketiso ipikana꞉ma꞉ kone iki tamba꞉ muluekema꞉ ka꞉nda꞉ miekeme. Kutupa mo handa piekeeki ikana꞉ma꞉ telia puemena꞉ yeke walolo piekeme. \v 22 Yesuma꞉ta꞉ hoke haumanu paeyao na piekeme. Kutupa ipika꞉ kake hambilikima꞉ yayapiki pi na leekeme. Wanda꞉hali paeyao ma꞉nda꞉ma꞉ a꞉nda꞉ ota꞉ na opimikime. \v 23 Kutupa haliwekima꞉ ipiki pa꞉ta꞉ hoke pi alo ipika꞉ loke manda꞉ meaemeketa꞉ ipikana꞉ma꞉ hoke pi la hombo na peayekeme. Kutupa ipikana꞉ma꞉ ika꞉ ka꞉nda꞉ mieke dina꞉ta꞉ dupiki hoke yenki milimikie la hombo na peayekepate Koda꞉ta꞉ tikitiki yao hala꞉ pi yoka꞉ alu pita꞉la꞉ hali pa꞉ta꞉ hone ti lao hayekeme. \v 24 Nikana꞉ma꞉ hoke hau pa꞉ta꞉ homomono kutupa tikitiki hau pa꞉ta꞉ da꞉ta hamono Ketisoma꞉ kone ipika꞉ lokema꞉ nika꞉ hoke hau mea tia a꞉ka꞉tei wape ti manda peekeme. Ipika꞉ loke lieke ekima꞉ta꞉ iki da꞉taala꞉me. \v 25 Amba꞉ ikita꞉ alu pimi sipisipi ma꞉na꞉ leke haemepate ameta꞉ mo sipisipi handeteke hala꞉ hali tomuemena꞉ hatuku mea epeleme. Ipikita꞉ mo ika꞉ temoko handeteke hala꞉ halie. \c 3 \s1 Tooli toolina꞉ mana꞉ pi \p \v 1 Koto tupa꞉ kone weteke tonu ikita꞉ ika꞉ haliki tonu pa꞉ta꞉ homu pea hao hapa꞉peke. Mandane haliki tonuma꞉ Koda꞉na꞉ pi na miki haemeka꞉na꞉ta꞉ kota꞉ ika꞉ epeke hau pilimi ekima꞉ta꞉ mo haliweki pi mina꞉ yola꞉ milimikie. \v 2 Ikana꞉ma꞉ mo ika꞉ pi na miki haliki tonu pa꞉ta꞉ pi homeke kone na lo haemeka꞉na꞉ta꞉ kota꞉ ika꞉ homu pea epeke yakopiki hau seliapo pilimieki handata꞉ mo haliwekima꞉ kutu pilimikie. \v 3 Loke yole epeke hake wanda꞉ haluekema꞉ manda lokena꞉ au anipu lapa꞉peke. Do hau manuna꞉ alome. Ika꞉ itiki ponka꞉ pilu o belekemanu wotu moko kutupa mo aka꞉ epeke epeke yamo halemeeki manuna꞉ alome. \v 4 Koto pa꞉la꞉pate ika꞉ loke tukiki pa꞉ta꞉ hala꞉ ota꞉ wanda꞉ do koto wanda꞉ta꞉ ota꞉ yole epeke haena꞉ lapa꞉peke. Koto yole pea haasa꞉ ekita꞉ hoto paeyao epeke tupa꞉ hao hapa꞉peke ya꞉la꞉me. Mo kimele piki hau make homu piki hau make koto hau yole yaapota꞉ Koda꞉ma꞉ handata꞉ ota꞉ epeke hau tieke hone u hala꞉me. \v 5 Mo amba꞉ Koda꞉ pa꞉ta꞉ hone ti lao haemeke yako piki wanda꞉ wekita꞉ koto tupa꞉ ikana꞉ma꞉ iki yole pina꞉ lemekeme. Kutupa ikana꞉ma꞉ mo ika꞉ haliki tonu oto pa꞉ta꞉ haemekeme. \v 6 Setata꞉ kutu piki wanda꞉ hata꞉ ipika꞉ haliki Eipoloha꞉ma꞉na꞉ pi opua hata꞉ta꞉ ipiki pa꞉ta꞉ ya teke halio la꞉tiki piekeme. Koto ekina꞉ ikana꞉ma꞉ aleta꞉ ma꞉nda꞉ pa꞉ta꞉ paala꞉ma꞉ na homeke epeke hau pu haemeka꞉na꞉ta꞉ ikita꞉ ipika꞉ waneke tonu halememe. \p \v 7 Haliki tonu iki make haliki hata꞉ta꞉ ika꞉ wanda꞉ta꞉ iki tupa꞉ honkopu na halememe hone wia꞉pa꞉peke. Koto ekina꞉ta꞉ ikana꞉ma꞉ iki pa꞉ta꞉ epeke tupa꞉ hone witolo hata꞉ handeteke hapa꞉peke. Kota꞉ kotota꞉ mo wanda꞉weki iki make iki ame̱le̱ mandakena꞉ Koda꞉na꞉ pa hameke kita꞉la꞉ da꞉ta꞉la꞉ ekita꞉ milimikie. Ala꞉ta꞉ ma꞉nda꞉ma꞉ ika꞉ yeni pu haleme ekimanu sa꞉sa꞉ na pina꞉ koto hau pu hapa꞉peke. \s1 Pukima꞉ homa꞉ alualu pea hamana꞉e \p \v 8 Ya paeyaaso pita꞉ dupa alome. Iki paeyaoma꞉ hau paeyao pa꞉ta꞉ homeke hone wia a꞉ta꞉ma꞉ homa꞉ alualu pu hapa꞉peke. Iki homeke homeke paeyaoma꞉ nikita꞉ yankeke homeke hone witolo hata꞉ta꞉ pukima꞉ homa꞉ alualu pea make epeke hau pu alualu pea make homu pu alualu pea hapa꞉peke. \v 9 Hoke hau iki pa꞉ta꞉ pimika꞉na꞉ta꞉ hoke hauma꞉ na hombo peapa꞉peke o keke pi lemeka꞉na꞉ta꞉ keke pima꞉ na hombo peapa꞉peke. Ikana꞉ma꞉ koto hau na pikita꞉ iki tamba꞉ mulu peleme ekima꞉ hombo peapa꞉peke. Kota꞉ kotota꞉ Koda꞉ma꞉ iki wi lea꞉ dina꞉ta꞉ iki tamba꞉ mulueke la la꞉ wiekeme. \p \v 10 Kota꞉ Baiboloma꞉ la꞉la꞉ ekita꞉ \q1 Epima꞉ ta꞉na꞉ma꞉ homa꞉la꞉eki make epeke tupa꞉ hao hala꞉eki make handuluekema꞉ hone pia꞉ka꞉na꞉ta꞉ kota꞉ ipikana꞉ma꞉ ipika꞉ lo hala꞉ hoke hoke pi make yayapiki pi make mina꞉pa꞉laena꞉e. \q1 \v 11 Kutupa ipikana꞉ma꞉ hoke hau hoki wala epeke hau pina꞉e. Kutupa make a꞉nda꞉ peliaasa꞉ hau handa puluekema꞉ tolu weiyu haena꞉e. \q1 \v 12 Pa ekipeke mo Tekehalima꞉ta꞉ mo epeke hau pu haleme wanda꞉hali handeteke hata꞉ ika꞉ yeni pu halemeeki hoto paeyao opu hala꞉me. Kutu pu hala꞉pate mo hoke hau pu haleme wanda꞉hali pa꞉ta꞉ta꞉ hoki wala a꞉nda꞉ lia hao hala꞉me. \s1 Epeke hau pita꞉la꞉ ekina꞉ ka꞉nda꞉ mina꞉la꞉eki \p \v 13 Ikana꞉ma꞉ epeke hau puluekema꞉ honema꞉ wotu homemeka꞉na꞉ta꞉ epima꞉ iki hoeyaaliepe. \v 14 Kutu pa꞉la꞉pate epeke hau pitolo hata꞉ kone ka꞉nda꞉ mimika꞉na꞉ta꞉ kota꞉ ta꞉na꞉ma꞉ wotu homa꞉pa꞉peke ya꞉la꞉me. Wanda꞉hali pa꞉ta꞉ paala꞉ma꞉ na homeke hone baapa꞉peke. \v 15 Koto pa꞉la꞉pate Ketiso pa꞉ta꞉ homu pea hata꞉ hone wopu witolo hata꞉ ipikita꞉ ika꞉ Tekehali haena꞉ lapa꞉peke. Kutupa ma꞉nda꞉ma꞉ ika꞉ hone ti lao haleme ekita꞉ ekipape la lota꞉ pia꞉ka꞉na꞉ta꞉ ikana꞉ma꞉ hombo pealuekema꞉ta꞉ tikitiki yao hapa꞉peke. \v 16 Koto pa꞉la꞉pate ikana꞉ma꞉ hombo peaemeka꞉na꞉ta꞉ epeke hone witolo hata꞉ homu pikima꞉ lapa꞉peke. Ika꞉ hone teke tikitiki yao hala꞉ tupa꞉ kone haena꞉ lo hapa꞉peke. Koto pimika꞉na꞉ta꞉ iki mo Ketisona꞉ hoki nane telia꞉la꞉ wanda꞉hali hata꞉ epeke hau pu halemeeki handata꞉ mo mandane wanda꞉halima꞉ do hauta꞉ hokeekie lemeka꞉na꞉ta꞉ wetepena꞉ koto leme ekina꞉ yaala꞉ma꞉ homena꞉ yeke ika꞉ hone teke tikitiki yao haena꞉ lapa꞉peke. \v 17 Nika꞉ epeke hau puluma꞉ ekina꞉ ka꞉nda꞉ muluma꞉ ekita꞉ Koda꞉ma꞉ hone pa꞉la꞉ ekina꞉ ka꞉nda꞉ muma꞉ka꞉na꞉ta꞉ kota꞉ ana꞉ pa꞉la꞉pate nika꞉ hoke hau puluma꞉ ekina꞉ ka꞉nda꞉ muluma꞉ ekita꞉ kotota꞉ ana꞉ na pa꞉la꞉me. \s1 Ketisoma꞉ nika꞉ hoke hau yoko luekema꞉ amba꞉ homeekeeki \p \v 18 Ketiso hone umana꞉e. Ipiki kone ikina꞉ homeekeme. Ipikana꞉ma꞉ hoke hau paeyao yoko luekema꞉ hoto homeke kone homeekeme. Niki Koda꞉ pa꞉ta꞉ hatuku poluekema꞉ mo epeke halima꞉ niki hoke wanda꞉halina꞉ anke teke mea homeekeme. Ipika꞉ loketa꞉ homena꞉ lemekepate ipika꞉ temokota꞉ (Koda꞉ma꞉) da꞉ta hao haena꞉ leekeme. \v 19 Kutupa temoko hata꞉ta꞉ ipikana꞉ma꞉ mo dipula pitimiki temokomanu pa꞉ta꞉ pua (Koda꞉na꞉) pi waleekeme. \v 20 Mo temoko manuta꞉ amba꞉ hande Noama꞉ mo kawaso eiyeke pita꞉ma꞉ haemeke wanda꞉halina꞉ temokomanue. Koto pita꞉ma꞉ta꞉ kota꞉ koto wanda꞉halima꞉ta꞉ ikana꞉ma꞉ pi mina꞉ yu wia handeteke hayeke Koda꞉na꞉ pi na opimikime. Kutu pieketa꞉ mo hande kawaso tukiki pa꞉ta꞉ta꞉ wanda꞉hali hombo a꞉nda꞉ iki paeyaota꞉ ketepo hata꞉ mo ikalima꞉ peteleekeme. \v 21 Koto ikalita꞉ mo hande wetepena꞉ bapitaisi hau epolo piekeeki manda mieke ikalie. Do ame pu haleme bapitaisi hauma꞉ta꞉ pa ika꞉ lokena꞉ ha̱i̱ tanda꞉ pelemeeki dia꞉ya꞉la꞉pate ika꞉ epeke hone tekema꞉ Koda꞉ pa꞉ta꞉ pi la꞉ witolo hamena꞉ mo ikalima꞉ iki petolo hala꞉me. Do bapitaisi hauta꞉ mo Yesu Ketisona꞉ paa tiaeyeke ekima꞉ iki petolo hala꞉me. \v 22 Koto Ketisota꞉ ame hepeni tukiki pa꞉ta꞉ pua Koda꞉na꞉ popeke nane hata꞉ mo enisolo haliweki make hepeni nane haleme you haliweki make mo wele pita꞉la꞉ ekimanu make iki paeyao ipikana꞉ma꞉ handeteke hala꞉me. \c 4 \s1 Amba꞉ hala꞉eki mina꞉pa꞉lao topo pumana꞉ \p \v 1 Ketiso ipika꞉ lokema꞉ tanda mieke handa ikana꞉ma꞉ make ipikana꞉ma꞉ mo tanda mulu piekeeki pa꞉ta꞉ hone wieke tupa꞉ koto mandake honema꞉ kone iki honkopu hao hapa꞉peke. Kota꞉ ma꞉nda꞉ epima꞉ ipika꞉ lokema꞉ tanda mu haya꞉ka꞉na꞉ta꞉ ipikana꞉ma꞉ hoke hau mina꞉pa꞉lao hala꞉me. \v 2 Koto ekina꞉ ame do aneta꞉ ikana꞉ma꞉ do kenkena꞉ hata꞉ ika꞉ hone tiaaseme ekima꞉ iki na handeteke haena꞉ leketa꞉ Koda꞉na꞉ hone pa꞉la꞉ ekima꞉ iki handeteke haena꞉ lo hapa꞉peke. \v 3 Amba꞉ta꞉ ikana꞉ma꞉ mo pi na miki wanda꞉halima꞉ ika꞉ hone pa꞉la꞉ hau pu haleme hau pimime. Koto hauna꞉ta꞉ nate ana꞉na꞉ paeyaememe. Mo yola꞉la꞉ hau pita꞉la꞉eki make leke pola꞉paasa꞉eki make hoke ikali naa keaasa꞉eki make (ne hoke ikali tieke pamba naa keao) siaka꞉ hake hau pita꞉la꞉eki make mo yeni hau pita꞉la꞉ alemanu pa꞉ta꞉ handa꞉peke na yo moka꞉laapeke na yo piki yeni hau pita꞉la꞉eki make koto hau manuna꞉ ika꞉ nate paeyaememe. \v 4 Kutupa mo pi na opiki pa haleme wanda꞉halima꞉ta꞉ ame do ikana꞉ma꞉ iki ame̱le̱ mandakena꞉ mo hande siaka꞉ haumanu apa꞉tao na pu haleme ekina꞉ta꞉ penkilipaata꞉ iki hoke tupa꞉ laalememe. \v 5 Kutu pu halemepate ikana꞉ma꞉ mo kenkena꞉ haleme wanda꞉hali make amba꞉ homeleme wanda꞉hali make pi yoka꞉ alu puluekema꞉ tikitiki yao hala꞉ Koda꞉ pa꞉ta꞉ ika꞉ pu tiki epeme (hoke) haumanu ota꞉ la halimikie. \v 6 Koto ekina꞉ yeketa꞉ mo amba꞉ homeleme wanda꞉hali pa꞉ta꞉ make mo Pi Seliapo waleekeme. Wanda꞉hali paeyao ika꞉ yenkita꞉ homa꞉la꞉eki mu haleme tupa꞉ iki make ika꞉ lokena꞉ homa꞉la꞉eki mimikime. Koto pa꞉la꞉pate Koda꞉ da꞉ta hao hala꞉ tupa꞉ ika꞉ temoko make da꞉ta hao haena꞉yeke mo hande Pi Seliapo iki pa꞉ta꞉ waleekeme. \s1 Koda꞉na꞉ kita꞉la꞉ ekimanu epeke tupa꞉ handeteke hata꞉ e pokomana꞉e \p \v 7 Ala꞉ta꞉ ala꞉ta꞉ paeyaona꞉ paeyolo pa꞉la꞉ nateta꞉ nuna꞉ ya꞉la꞉me. Koda꞉ pa꞉ta꞉ yeni (ana꞉na꞉) puluekema꞉ leke leke lo hata꞉ ika꞉ hone wopu wia hapa꞉peke. \v 8 Pukima꞉ homa꞉la꞉ ekima꞉ta꞉ hoke hau eleke eleke a꞉mbao haleke handa ika꞉ titina꞉ hauta꞉ pukima꞉ ota꞉ wopu homa꞉ alualu pu hapa꞉peke. \v 9 Tulu tulu na leke ika꞉ da pa꞉ta꞉manu ane pitulu endi mone pitulu endi pu hapa꞉peke. \v 10 Iki homeke homekema꞉ Koda꞉na꞉ ta ka꞉la꞉ ta꞉ta꞉ ta꞉ta꞉ pikieki manuta꞉ epeke tupa꞉ handeteke hata꞉ mo Koda꞉ma꞉ kieke ta꞉ta꞉ piki ekima꞉ta꞉ ika꞉ hameke epeaaluekema꞉ pu alualu hapa꞉peke. \v 11 Epima꞉ta꞉ pi walo haya꞉ka꞉na꞉ta꞉ ota꞉ Koda꞉na꞉ pi homeke wala꞉peke ya꞉la꞉taa. Epima꞉ta꞉ siosi wanda꞉hali tamba꞉ mia꞉ka꞉na꞉ta꞉ ota꞉ Koda꞉na꞉ hala꞉la꞉ wele taapuna꞉ hata꞉ tamba꞉ mia꞉peke ya꞉la꞉taa. Koto ekina꞉ do hau paeyao pilimi ekima꞉ta꞉ Yesu Ketiso pa꞉ta꞉ yama꞉ Koda꞉ yeiya꞉ lapeke yelieke. Mo pa̱a̱ pita꞉la꞉eki make mo kilu tombuao hala꞉eki make ipika꞉eki na paeke pa hao halieke. Kutu pina꞉e. \s1 Ketisona꞉ tapake hata꞉ ka꞉nda꞉ mulu pa꞉la꞉eki \p \v 12 Ya yankeke tonuo. Mo iki la handa꞉la꞉ ti tala꞉ ekima꞉ handeke tanda minelemeeki handata꞉ dota꞉ ta꞉ta꞉ piki ka꞉nda꞉ ya꞉ka꞉ta꞉me lata꞉ na penkili pea꞉pa꞉peke. \v 13 Kotoeki na pikita꞉ Ketisona꞉ ka꞉nda꞉ putu piliki minoloma꞉me laa ta꞉na꞉ma꞉ homa꞉pa꞉peke. Kota꞉ ipika꞉ pa̱a̱ pita꞉la꞉eki opolo ipilie pita꞉ma꞉ iki pa꞉ta꞉ ta꞉na꞉ma꞉ homa꞉la꞉ ekita꞉ tumbalieke. \v 14 Ikita꞉ Ketisona꞉ telia꞉la꞉ wanda꞉hali haleme ekina꞉ ma꞉nda꞉ma꞉ iki pa꞉ta꞉ hoke pi lemeka꞉na꞉ta꞉ ta꞉na꞉ma꞉ homa꞉pa꞉peke ya꞉la꞉me. Koto lemeka꞉na꞉ta꞉ kota꞉ mo pa̱a̱ piki temokota꞉ Koda꞉na꞉ temoko kone iki pa꞉ta꞉ pitia꞉ka꞉ta꞉me. \v 15 Mo ka꞉nda꞉ ku hala꞉eki manuta꞉ mo wanda꞉hali lita꞉la꞉ hali haleme ekina꞉ o pake nala꞉ wanda꞉hali haleme ekina꞉ o pi ula꞉eki yamba꞉la꞉la꞉ wanda꞉hali haleme ekina꞉ o mandane wanda꞉halina꞉ hau hoeyake pi alo dupi dupi pi lo hala꞉ wanda꞉hali haleme ekina꞉ kutu piki haumanu pu haleme ekina꞉ ka꞉nda꞉ ikana꞉ma꞉ta꞉ \v 16 koto ka꞉nda꞉ta꞉ mea꞉pa꞉peke na ya꞉la꞉pate mo Ketisona꞉ wanda꞉hali halemeke handa ka꞉nda꞉ mimika꞉na꞉ta꞉ koto ka꞉nda꞉ minelemeeki pa꞉ta꞉ yaala꞉ma꞉ na homeketa꞉ iki Ketisona꞉ biki miniki haleme ekina꞉ Koda꞉ pa꞉ta꞉ keiyae pi lo hapa꞉peke. \p \v 17 Koda꞉ma꞉ pi yokaalu pulu pa꞉la꞉ nateta꞉ ame amba꞉ a꞉pa hala꞉me. Kutupa Koda꞉ ipika꞉ wanda꞉hali kone pa꞉ta꞉ amba꞉la kini pu mea pi yokaalu pilieke. Koto ekina꞉ niki pa꞉ta꞉ amba꞉la kini pia꞉ka꞉na꞉ta꞉ kota꞉ mo Koda꞉na꞉ Pi Seliapo opua kone pa kiaaseme wanda꞉hali pa꞉ta꞉ta꞉ ekipa paeyaalia꞉pe \v 18 Kota꞉ mo Baiboloma꞉ alota꞉ \q1 Epeke hau pu haleme wanda꞉hali peteluekema꞉ ka꞉nda꞉ pia꞉ka꞉na꞉ta꞉ kota꞉ mo Koda꞉ hone na wiki hoke hau pu haleme wanda꞉hali pa꞉ta꞉ta꞉ eki hau pealia꞉pe. \m \v 19 Koto ekina꞉ mandane wanda꞉halima꞉ta꞉ Koda꞉ma꞉ hone pa꞉leke handaa ka꞉nda꞉ mimika꞉na꞉ta꞉ ika꞉ pu haleme epeke hau manuma꞉ ika꞉ hone tulaleme ekita꞉ mo ika꞉ Wepia Ula꞉ Hali ipika꞉ pi na yambolo hala꞉ hali pa꞉ta꞉ wala꞉pa꞉peke ya꞉la꞉me. \c 5 \s1 Koda꞉na꞉ sipisipi ma꞉na꞉manu handeteke hala꞉eki \p \v 1 Iki ame̱le̱ hala꞉ you hali weki pa꞉ta꞉ I̱ make you hali hata꞉ iki pa꞉ta꞉ tikitiki yaasa꞉ pi alome I̱ta꞉ Ketisona꞉ tanda miekeeki handoa꞉ halie. Kutupa mo epolo pa꞉la꞉ pa̱a̱ pita꞉la꞉ ekita꞉ I̱ma꞉ make mulueke. \v 2 Ikana꞉ma꞉ handeteke hamena꞉ Koda꞉ma꞉ ka꞉la꞉ sipisipi ma꞉na꞉ta꞉ ta꞉na꞉ma꞉ homolo hata꞉ handeteke hapa꞉peke. Kima꞉ na homeke Koda꞉ma꞉ hone pa꞉la꞉ tupa꞉ handeteke hapa꞉peke. Do e poka꞉la꞉ ekita꞉ yenki homekena꞉ hone na wiki ika꞉ honema꞉ kone hone pitolo haena꞉ poka꞉pa꞉peke. \v 3 Ikana꞉ma꞉ handeteke hamena꞉ ka꞉la꞉ wanda꞉halita꞉ tumbaaluekema꞉ na tapeke ikana꞉ma꞉ pu halimi epeke hau manuma꞉ mo sipisipi ma꞉na꞉manu wala tiaaso hata꞉ hapa꞉peke. \v 4 Kutupa mo sipisipi ma꞉na꞉ handeteke hala꞉ Titina꞉ Hali opolo epea꞉ka꞉na꞉ta꞉ ipikana꞉ma꞉ iki pa꞉ta꞉ mo pa̱a̱ na alu pulu pa꞉la꞉ namba ota꞉ seliapo pikieki kia꞉ka꞉na꞉ milimikie. \s1 Hone tikitiki yao homu pea hapa꞉pekeeki \p \v 5 Koto mandake tupa꞉ kone iki panake panake haliwekima꞉ make mo keileke haliweki pa꞉ta꞉ homu pea hao hapa꞉peke. Kutu pa꞉ta꞉ iki paeyaoma꞉ homu pea ha alualu pita꞉la꞉ hau manuta꞉ ika꞉ aka꞉ leke yama hao hapa꞉peke. Kota꞉ Baiboloma꞉ alota꞉ Koda꞉ma꞉ mo hakoko lita꞉la꞉ wanda꞉halita꞉ kiao hala꞉pate mo homu pea hala꞉ wanda꞉hali pa꞉ta꞉ ipika꞉ a꞉ta꞉ma꞉ homa tamba꞉ mina꞉la꞉eki halo hala꞉me. \p \v 6 Koto ekina꞉ta꞉ ikana꞉ma꞉ Koda꞉na꞉ wele wopu piki kiki oto pa꞉ta꞉ hata꞉ homu pea hao hapa꞉peke. Kota꞉ kotota꞉ ipika꞉ hone pilia꞉ di nina꞉ ipikana꞉ma꞉ iki mea a꞉meiyalieke. \v 7 Ipikana꞉ma꞉ iki pa꞉ta꞉ hone wopu u hala꞉ ekina꞉ ika꞉ witeleme hone eleke eleke paeyao ipiki pa꞉ta꞉ lopa monea꞉pa꞉peke. \p \v 8 Leke leke lo hata꞉ a꞉nda꞉ ipula꞉eki handoemena꞉ pota꞉ pua tunkulu hapa꞉peke. Ika꞉ a꞉nda꞉ tunkiliki hali Sadanima꞉ mo sayale hali ma꞉na꞉ tiekema꞉ handa wanda꞉hali lia noluekema꞉ wei mea pomu hala꞉me. \v 9 Mo kenke paeyaona꞉ ika꞉ Ketiso tapake wanda꞉halima꞉ mandake tupa꞉ tanda minelemeeki make hone wia hata꞉ta꞉ Koda꞉ pa꞉ta꞉ hone wotu tulao hata꞉ Sadani pendulu baapa꞉peke. \v 10 Koda꞉ma꞉ta꞉ pa a꞉ta꞉ma꞉ homa꞉la꞉ Tekehali hata꞉ iki Ketiso ame̱le̱ ta꞉ma꞉ni pea hamena꞉ ipika꞉ nate paeyao pa̱a̱ pu hala꞉eki muemena꞉yeke iki amba꞉ wi la꞉la꞉me. Kutupa iki pa꞉ta꞉ tanda peaasa꞉eki hosiki hao paeya꞉ka꞉na꞉ta꞉ Koda꞉ma꞉ kone wetepe iki epeaota꞉ ota꞉ honkopu hao da̱o̱la hamena꞉ lelieke. \v 11 Mo Kilu Tombuao Hala꞉ weleta꞉ hoto paeyao Koda꞉ pa꞉ta꞉ pu haena꞉e. Aowe ota꞉e. \s1 Ipika꞉ a꞉taloe pi \p \v 12 Do doka꞉tiki tameiya꞉ta꞉ Silipanisi ya kame teke pa꞉ta꞉ ekima꞉ wape peaena꞉ wape pea pua꞉me. I̱ma꞉ iki sa꞉sa꞉ pealuekema꞉yeke ya ota꞉ pi alo hata꞉ mo la꞉tiki epolo pi paeyaota꞉ Koda꞉na꞉ ota꞉ a꞉ta꞉ma꞉ homa꞉la꞉ekie alome. Koto ekina꞉ta꞉ do a꞉ta꞉ma꞉ homa꞉la꞉ ekina꞉ da̱o̱la hao hapa꞉peke. \p \v 13 Do Ba꞉biloni kenke pa꞉ta꞉ haleme siosi tapaketa꞉ iki tonka꞉na꞉ Koda꞉ma꞉ ma̱leke lila꞉me. Koto siosi tapakema꞉ make ya weki Makama꞉ make iki pa꞉ta꞉ a꞉taloe pi tapaala꞉me. \p \v 14 Ikana꞉ma꞉ Ketiso hata꞉ta꞉ mo pukima꞉ homa꞉la꞉ ekina꞉ kiki mina꞉ alualu pita꞉la꞉ hau pu hapa꞉peke. Iki paeyao Ketisona꞉ tapakema꞉ a꞉nda꞉ peliaasa꞉eki muemena꞉e.