\id 1JN - Sembeleke SAMBERIGI PNG 1 JOHN 01 12/02/91 MACNAUGHTAN \h 1 DIONI \toc1 Dionima꞉ titina꞉ tapaeyeke wapee \toc2 1 Dioni \toc3 1 Dioni \mt1 Dionima꞉ titina꞉ tapaeyeke wapee \c 1 \s1 Panake Pi \p \v 1 Nikana꞉ma꞉ta꞉ mo hande amba꞉ kini pitolo hata꞉ pa hao hao hala꞉ da꞉ta꞉la꞉ pina꞉ pi kone iki pa꞉ta꞉ laasoma꞉me. Nikana꞉ma꞉ opoloma꞉ make ota꞉ nika꞉ lekema꞉ handoloma꞉me. Ota꞉e. Nika꞉ lekema꞉ handoloma꞉ make nika꞉ kikima꞉ ota꞉ wataaloma꞉me. \v 2 Hande Da꞉ta꞉la꞉ ekita꞉ do kenkema꞉ handolo poloma꞉ tupa꞉ peneme yamo epeeke handa nikana꞉ma꞉ handoma꞉me. Kutupa koto mo Ateke yaapo hao hayeke niki pa꞉ta꞉ peneme yaeya꞉ Deto hala꞉ ekina꞉ pi iki pa꞉ta꞉ la kitolome. \v 3 Nikana꞉ma꞉ handaa opoloma꞉ ekita꞉ iki paeyao pa꞉ta꞉ make opuaasoma꞉me. Pa ekipeke nikana꞉ma꞉ mo Ateke make ipika꞉ Eiyeke Yesu Ketiso ame̱le̱ hone homeke uluma꞉ ekita꞉ iki ame̱le̱ mandakena꞉ apa꞉tamena꞉yeke loma꞉me. \v 4 Nikana꞉ma꞉ doeki laasoma꞉ ekita꞉ mo nika꞉ ta꞉na꞉ pa꞉la꞉eki ota꞉ anekema꞉ tumbulu baena꞉yeke pitoloma꞉me. \s1 Koda꞉ta꞉ pa̱a̱e \p \v 5 Ameta꞉ nikana꞉ma꞉ mo Koda꞉na꞉ Eiyeke pa꞉ta꞉ yama꞉ opoloma꞉ ekimanu iki paeyao pa꞉ta꞉ opuaaseme ekita꞉ doe. Koda꞉ta꞉ pa̱a̱ kone yaalo hata꞉ ipiki pa꞉ta꞉ta꞉ timba꞉ la꞉la꞉eki ota꞉ ma꞉nda꞉ dia꞉me. \v 6 Kota꞉ koto ya꞉ka꞉na꞉ta꞉ nikana꞉ma꞉ alota꞉ Ipiki ame̱le̱ homeke hone uluma꞉me la alo hata꞉ pa homeke dina꞉ kone timba꞉ ala꞉eki pa꞉ta꞉ haoma꞉ka꞉na꞉ta꞉ nikana꞉ma꞉ta꞉ mo nika꞉ pi aloma꞉ ekita꞉ makeaasa꞉ hau pitoloma꞉ make yayapikieki pitoloma꞉me. \v 7 Pate mo ipikita꞉ pa̱a̱ pa꞉la꞉eki pa꞉ta꞉ hala꞉ tupa꞉ niki make mo pa̱a̱ pa꞉la꞉eki pa꞉ta꞉ hao poluma꞉ka꞉na꞉ta꞉ kota꞉ nikita꞉ mandakena꞉ hone homeke u alualu poloma꞉me. Kutupa ipika꞉ Eiyeke Yesuna꞉ wema꞉ta꞉ nika꞉ hokeeki paeyao wamo peaasa꞉me. \p \v 8 Nikana꞉ma꞉ alo hata꞉ Nikita꞉ hokeeki na ula꞉me loma꞉ka꞉na꞉ta꞉ kota꞉ nikana꞉ma꞉ta꞉ nika꞉ kone makeaasoma꞉me. Kutupa niki pa꞉ta꞉ta꞉ ota꞉eki na ula꞉me. \v 9 Pate nikana꞉ma꞉ nika꞉ hoke haumanu Koda꞉ pa꞉ta꞉ kelepoma꞉ka꞉na꞉ta꞉ kota꞉ ipikana꞉ma꞉ ipika꞉ pulueke laa la꞉ ula꞉eki pilieke. Kutupa ota꞉ tikitiki pita꞉la꞉ hau pitolo hata꞉ nika꞉ hoke haumanu paeyao paeyaasota꞉ nika꞉ hokeeki poloma꞉eki paeyao wamo pealieke. \v 10 Kota꞉ a꞉nda꞉ nikana꞉ma꞉ alo hata꞉ Nikita꞉ hoke hau na poloma꞉me la loma꞉ka꞉na꞉ta꞉ nikana꞉ma꞉ Koda꞉ta꞉ yayapiki pi lo hala꞉ hali au laasoma꞉me. Kutupa ipika꞉ pita꞉ niki pa꞉ta꞉ na ula꞉me. \c 2 \s1 Ketisota꞉ nika꞉ tamba꞉ mina꞉la꞉ hali \p \v 1 Yaka wekiwandiki ikana꞉ma꞉ hokeeki na pulu peleme tupa꞉ I̱ma꞉ doeki iki pa꞉ta꞉ laasome. Pate ma꞉nda꞉ epima꞉ hokeeki pia꞉ka꞉na꞉ta꞉ kota꞉ nika꞉ hau peaaso hata꞉ Apa꞉ pa꞉ta꞉ honke lawaasa꞉ some ma꞉nda꞉ hala꞉me. Ipikita꞉ tikitiki piki some Yesu Ketiso hala꞉me. \v 2 Kutupa Ketisota꞉ nika꞉ hoke hau paeyawala꞉ ekina꞉ tekee. Nika꞉ hoke hau homeke dia꞉ya꞉la꞉pate pa paeyao sikina꞉ hoke hau make loa꞉me. \p \v 3 Kutupa nikana꞉ma꞉ Koda꞉na꞉ pi ula꞉ ekimanu opua puma꞉ka꞉na꞉ta꞉ kota꞉ ipiki handoloma꞉me laa nika꞉ hone uluma꞉me. \v 4 Pate ma꞉nda꞉ma꞉ alo hata꞉ alota꞉ I̱ma꞉ta꞉ ipiki handolota alo kone ipika꞉ pi ula꞉ ekimanu na opua pia꞉ka꞉na꞉ta꞉ kota꞉ kutu pita꞉la꞉ someta꞉ yayapiki pi ala꞉ some make mo ota꞉ pi ala꞉ ekita꞉ ipiki pa꞉ta꞉ na ula꞉me. \v 5 Pate ma꞉nda꞉ epima꞉ Koda꞉na꞉ pi opua pua꞉tiki pita꞉la꞉ someta꞉ kota꞉ ipiki Koda꞉ pa꞉ta꞉ puki hala꞉la꞉ ekita꞉ ota꞉ anekema꞉ handaa ula꞉me. Nikita꞉ Koda꞉ ame̱le̱ ta꞉ma꞉ni poloma꞉me laa hone uluekema꞉ pea꞉pekeeki dupa. \v 6 Ma꞉nda꞉ epima꞉ Koda꞉ yaapo ta꞉ma꞉ni pea halome lea꞉ka꞉na꞉ta꞉ kota꞉ ipikita꞉ mo Yesu Ketisoma꞉ pieke tupa꞉ kone hao pelia꞉peke ya꞉la꞉me. \s1 Panake pi ula꞉eki \p \v 7 Yaka pukipiki yankeke tonuo. Iki pa꞉ta꞉ I̱ma꞉ do laaso pi ula꞉ ekita꞉ panakeeki dia꞉me. Mo kini pitolo hata꞉ hande amba꞉ wia haeme pi ula꞉eki konee. Koto amba꞉ pi ula꞉ ekita꞉ ika꞉ amba꞉ hande opeleme ekimanue. \v 8 Koto pa꞉la꞉pate I̱ma꞉ ame do laaso pi ula꞉ ekita꞉ panakeekie. Pa ekipeke ipika꞉ ota꞉ ekita꞉ Ketiso pa꞉ta꞉ make iki pa꞉ta꞉ make handoloma꞉me. Kota꞉ mo timba꞉ ala꞉ ekita꞉ amba꞉ lombei pita꞉la꞉me. Kutupa mo ota꞉ pa̱a̱ pa꞉la꞉ ekita꞉ amba꞉ pa̱a̱ pita꞉la꞉me. \p \v 9 Ma꞉nda꞉ epima꞉ ipikita꞉ mo pa̱a̱ pa꞉la꞉eki pa꞉ta꞉ halome alo kone ipika꞉ kame honditi pia꞉ka꞉na꞉ta꞉ kota꞉ ipikita꞉ ame do make timba꞉ leke pa꞉ta꞉ ha pelia hala꞉me. \v 10 Pate manda꞉ epima꞉ ipika꞉ kame pa꞉ta꞉ pukima꞉ homea꞉ka꞉na꞉ta꞉ kota꞉ ipikita꞉ mo pa̱a̱ pa꞉la꞉eki pa꞉ta꞉ hala꞉me. Koto ekina꞉ ipiki pa꞉ta꞉ta꞉ hoke hau pu tialo pa꞉la꞉ ekita꞉ ota꞉ ma꞉nda꞉ na ula꞉me. \v 11 Pate ma꞉nda꞉ epima꞉ ipika꞉ yankeke honditi pia꞉ka꞉na꞉ta꞉ ipikita꞉ timba꞉ leke pa꞉ta꞉ hala꞉me. Ipikita꞉ koto pa꞉ta꞉ pominolo hata꞉ timba꞉ la꞉la꞉ ekima꞉ leke holu peala꞉ ekiyalo hata꞉ta꞉ ipika꞉ pula꞉ pota꞉ta꞉ hone na ula꞉me. \p \v 12 Yaka wekiwandikio. Mo Ketisona꞉ bikina꞉ ika꞉ hoke hauta꞉ amba꞉ paeyawala꞉ ekina꞉ I̱ma꞉ iki pa꞉ta꞉ do pi laasome. \v 13 Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa pa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laasome. Paa ekipeke ikana꞉ma꞉ta꞉ mo Hoke Temoko bepolaleme ekina꞉ loa꞉me. \p \v 14 Yaka wekiwandikio. Iki pa꞉ta꞉ do pi laaso ekita꞉ ikana꞉ma꞉ Apa꞉ Koda꞉ handa hone wilimi ekina꞉ loa꞉me. Yaka apa꞉titio. Iki pa꞉ta꞉ do pi laaso ekita꞉ pa mo ota꞉ titina꞉ kini pea a꞉pa paa hao hala꞉ someta꞉ ikana꞉ma꞉ hone wilimi ekina꞉ loa꞉me. Panake haliweki iki pa꞉ta꞉ do pi laaso ekita꞉ pa mo Koda꞉na꞉ pi iki pa꞉ta꞉ e pokolo haena꞉ iki honkopu hasememe. Kutupa ikana꞉ma꞉ta꞉ mo Hoke Temoko bepolaleme ekina꞉ loa꞉me. \p \v 15 Do kenkena꞉ hau o do kenkena꞉ ula꞉ alemanu pa꞉ta꞉ pukima꞉ na homa꞉peke. Ikana꞉ma꞉ do kenkena꞉ ula꞉ alemanu pa꞉ta꞉ pukima꞉ homemeka꞉na꞉ta꞉ kota꞉ Koda꞉ pa꞉ta꞉ pukima꞉ na homelememe. \v 16 Do kenkena꞉ ula꞉ ala꞉ta꞉ ala꞉ta꞉ paeyaota꞉ pa mo lopa hala꞉ lokena꞉ hone pa꞉la꞉ ekimanu make wanda꞉halina꞉ lekema꞉ handolo pukima꞉ homa꞉la꞉ hau make wanda꞉halima꞉ ta꞉na꞉ma꞉ homaa biki tieke wiaasa꞉ alemanu make koto ale paeyao siki homeke a꞉nda꞉ Apa꞉ pa꞉ta꞉ na a꞉pa꞉la꞉me. Koto hau paeyaona꞉ teketa꞉ do kenkena꞉ ekie. \v 17 Kutupa do kenke make do kenkena꞉ ula꞉ wanda꞉halina꞉ hone pa꞉la꞉ alemanu paeyao make koto alemanu paeyao sikita꞉ paeta꞉la꞉me. Pate ma꞉nda꞉ epima꞉ Koda꞉na꞉ hone pa꞉la꞉eki peaasa꞉ someta꞉ hoto paeyao da꞉ta hao halieke. \s1 Ketisona꞉ a꞉nda꞉ tunkiliki hali \p \v 18 Yaka wekiwandikio. Paetolo nateta꞉ teke pa꞉ta꞉e. Mo Ketisona꞉ a꞉nda꞉ tunkiliki hali ipilieke laata꞉ iki pa꞉ta꞉ amba꞉ ta opuaeya꞉ handa꞉e. Koto ekina꞉ ameta꞉ mo Ketisona꞉ a꞉nda꞉ tunkiliki tapake wopu amba꞉ opolo epelememe. Koto ekina꞉ ameta꞉ paetolo nateta꞉ teke pa꞉ta꞉ ya꞉ka꞉ta꞉me laa nika꞉ hone uluma꞉me. \v 19 Koto wanda꞉halita꞉ ota꞉ nika꞉ homhomeke hone wia mombololoma꞉eki tukiki pa꞉ta꞉ epea꞉pate pa na apa꞉taememe. Koto ekina꞉ ikana꞉ma꞉ niki mina꞉pa꞉lalememe. Iki a꞉nda꞉ nika꞉ mombololoma꞉eki pa꞉ta꞉ apa꞉taemekena꞉ yoluta꞉ kota꞉ niki ame̱le̱ mandakena꞉ halo pimime. Pate ika꞉ pa mina꞉pa꞉laemeketa꞉ ota꞉ ma꞉nda꞉ hondo niki ame̱le̱ na apa꞉talemeeki peneme yaasememe. \p \v 20 Kutu pimipate pa ya wekiwandikio. Ikita꞉ mo hande Ketisoma꞉ kua꞉neala꞉ Holi Sipitidi amba꞉ koto miniki halememe. Koto ekina꞉ iki paeyaoma꞉ta꞉ mo ota꞉ ekita꞉ hone wilimime. \v 21 I̱ma꞉ iki pa꞉ta꞉ tameiya꞉ laaso ekita꞉ pa ikana꞉ma꞉ mo ota꞉eki hone na wilimiki yeke dia꞉ya꞉la꞉pate pa mo hone wilimiki handa pueme. Kutupa make mo yayapikieki ma꞉nda꞉ta꞉ mo ota꞉eki pa꞉ta꞉ na ipula꞉me laata꞉ hone ika꞉ wilimiki pua꞉me. \p \v 22 Koto ekina꞉ mo yayapiki pi ala꞉ someta꞉ epi ya꞉ka꞉ta꞉pe. Pa ma꞉nda꞉ epima꞉ Yesuta꞉ mo Ketiso dia꞉me ala꞉ some lataa. Dupiki someta꞉ Ketisona꞉ a꞉nda꞉ tunkiliki somee. Ipikana꞉ma꞉ta꞉ Ateke make Eiyeke make hoki wala꞉la꞉me. \v 23 Ma꞉nda꞉ epima꞉ a꞉nda꞉ mo Eiyeke hoki walea꞉ka꞉na꞉ta꞉ kota꞉ Ateke make hoki wala꞉la꞉me. Ma꞉nda꞉ epima꞉ Eiyeke a꞉nda꞉ pukima꞉ homea꞉ka꞉na꞉ta꞉ kota꞉ Ateke make pukima꞉ homa꞉la꞉me. \p \v 24 Koto ekina꞉ hone wopu witolo hata꞉ mo hande titina꞉ kini pitolo hata꞉ opimi pi ika꞉ puki pa꞉ta꞉ mondu hapa꞉peke. Ikana꞉ma꞉ a꞉nda꞉ koto opimi pi pa u haemeka꞉na꞉ta꞉ kota꞉ ikita꞉ mo Eiyeke pita꞉ ipika꞉ Ateke yaapo ame̱le̱ hoto paeyao ta꞉ma꞉ni pea halimikie. \v 25 Kotota꞉ mo hande Ketisoma꞉ niki pa꞉ta꞉ kulueke laa pi la꞉ wia꞉ ekita꞉ Da꞉ta꞉la꞉eki lataa. \p \v 26 I̱ma꞉ta꞉ do laaso ekita꞉ mo iki makealuekema꞉ taapeleme wanda꞉halina꞉eki iki pa꞉ta꞉ do laaso handa꞉e. \v 27 Koto pa꞉la꞉pate iki pa꞉ta꞉ta꞉ Ketisoma꞉ ipika꞉ Sipitidi amba꞉ ka꞉la꞉me. Koto ekina꞉ ipika꞉ Sipitidi iki pa꞉ta꞉ a꞉nda꞉ pita꞉ pelia haena꞉ta꞉ iki wala꞉peke some ma꞉nda꞉ta꞉ weiya꞉peke na ya꞉la꞉me. Pa ekipeke mo Sipitidima꞉ta꞉ iki pa꞉ta꞉ hau paeyao walieke. Kutupa ipikana꞉ma꞉ wala꞉la꞉ ekita꞉ yayapikieki dia꞉ya꞉la꞉pate ota꞉ekie. Koto ekina꞉ kota꞉ mo Sipitidima꞉ wala꞉la꞉eki opua pitolo hata꞉ make Ketiso pa꞉ta꞉ ta꞉ma꞉ni pu pelia hapeke ya꞉la꞉me. \p \v 28 Ota꞉e. Yaka wekiwandikio. Ipiki yaapo ta꞉ma꞉ni pea hapee. Pa ekipeke ipiki opolo epea꞉ka꞉na꞉ta꞉ nikita꞉ honkopu haasa꞉ ekima꞉ tumbulu pa꞉la꞉ tupa꞉ loa꞉me. Kutupa koto mo ipilia꞉ natena꞉ta꞉ ipiki handolo hata꞉ yaala꞉ma꞉ na homolo polome tupa꞉ loa꞉me. \v 29 Ketisota꞉ tikitiki pa꞉la꞉me laata꞉ ika꞉ hone wilimime. Kota꞉ ma꞉nda꞉ epi ameda tikitiki piki hau pu haya꞉ka꞉na꞉ta꞉ Koda꞉na꞉ wekiwandikie laata꞉ ika꞉ hone witolo pelememe. \c 3 \s1 Koda꞉na꞉ wekiwandiki \p \v 1 Mo Apa꞉ma꞉ niki pa꞉ta꞉ pukima꞉ homa꞉la꞉eki tieke handa꞉pe. Ipika꞉ pukima꞉ homa꞉la꞉ ekita꞉ ota꞉ tieke aneke yalo hata꞉ta꞉ nikita꞉ Koda꞉na꞉ wekiwandiki lelememe. Kota꞉ koto ekina꞉ nikita꞉ ota꞉ ipika꞉ wekiwandikie. Doeki tekena꞉ta꞉ do kenke wanda꞉halima꞉ta꞉ Koda꞉ na handelemeeki yalo niki make na handelememe. \v 2 Ota꞉ yaka ta꞉ma꞉ni sunuo. Nikita꞉ ameta꞉ Koda꞉na꞉ wekiwandiki ya꞉la꞉pate pa mo wetepena꞉ halo polome ekita꞉ a̱i̱ na peneme yaala꞉me. Koto pa꞉la꞉pate mo Ketiso opolo ipilia꞉ dina꞉ta꞉ nikita꞉ ipikima꞉ kone handulumeke. Pa ekipeke ipikita꞉ ota꞉ ipika꞉ hala꞉eki nika꞉ lekema꞉ handolo polome ekina꞉ loa꞉me. \v 3 Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me. \p \v 4 Ma꞉nda꞉ epita꞉ hoke hau pia꞉ka꞉na꞉ta꞉ Koda꞉na꞉ pi ula꞉eki yamba꞉la꞉la꞉me. Pa ekipeke hoke hauta꞉ Koda꞉na꞉ pi ula꞉eki yamba꞉la꞉la꞉ ekie. \v 5 Ketiso opolo epeeke ekita꞉ nika꞉ hoke hau mea bawaluekema꞉ a꞉pa꞉la꞉me. Kutupa ipiki pa꞉ta꞉ta꞉ hokeeki ma꞉nda꞉ na ula꞉me laa hone wilimime. \v 6 Koto ekina꞉ ma꞉nda꞉ epi Ketiso yaapo hone homeke wia ta꞉ma꞉ni pu haya꞉ka꞉na꞉ta꞉ kota꞉ koto someta꞉ hoke hau pa na pu hala꞉me. Pate ma꞉nda꞉ epita꞉ hoke hau pa putia pea꞉ka꞉na꞉ta꞉ kota꞉ koto someta꞉ Ketiso ota꞉ na handa꞉la꞉ make hone na ula꞉me. \p \v 7 Yaka wekiwandikio. Ma꞉nda꞉ma꞉ iki na makeaena꞉ lapa꞉peke. Ma꞉nda꞉ epima꞉ ota꞉ hau pia꞉ka꞉na꞉ta꞉ kota꞉ koto someta꞉ mo Ketiso pa꞉la꞉ tupa꞉ tikitiki piki some hala꞉me. \v 8 Pate ma꞉nda꞉ epima꞉ hoke hau pa putia pea꞉ka꞉na꞉ta꞉ koto someta꞉ mo Hoke Temokona꞉eki hala꞉me. Pa ekipeke mo Hoke Temokoma꞉ta꞉ kini pitolo kone hoke hau pa꞉leke loa꞉me. Mo Koda꞉na꞉ Eiyeke opolo a꞉pa꞉la꞉ ekita꞉ ota꞉ doeki tekena꞉ pa꞉la꞉me. Mo Hoke Temokoma꞉ pa꞉la꞉eki hoeyaaluekema꞉ pa꞉la꞉me. \p \v 9 Ma꞉nda꞉ epita꞉ Koda꞉na꞉ eiyeke haya꞉ka꞉na꞉ta꞉ kota꞉ hoke hau pa na putia pu hala꞉me. Pa ekipeke Koda꞉na꞉ da꞉ta꞉la꞉eki kone ipiki pa꞉ta꞉ pila꞉me. Kutupa Koda꞉ta꞉ ipika꞉ Apa꞉ yaalo ipikana꞉ma꞉ hoke hau pa putia pua꞉peke na ya꞉la꞉me. \v 10 Mo Koda꞉na꞉ wekiwandiki pita꞉ mo Hoke Temokona꞉ wekiwandiki yaapo ata꞉ka꞉ tieke pa꞉la꞉ ekita꞉ dupae. Ma꞉nda꞉ epima꞉ mo ota꞉ hau na pu o ipika꞉ yankeke pukima꞉ na homo pia꞉ka꞉na꞉ta꞉ ipikita꞉ Koda꞉na꞉ weki na hala꞉me. \s1 Pukima꞉ homa꞉ alualu pita꞉la꞉eki \p \v 11 Ikana꞉ma꞉ mo hande kini pitolo hata꞉ titina꞉ opimi pita꞉ doe. Nikana꞉ma꞉ta꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hapa꞉peke ya꞉la꞉me. \v 12 Nikita꞉ mo hande Keinima꞉ na hando hapa꞉peke ya꞉la꞉me. Ipikita꞉ mo Hoke Temokona꞉eki hata꞉ ipika꞉ hameke Eipolo kone lu homaeyekeme. Pa ekipeke lu homaeyekepe. Do ekina꞉yeke loa꞉me. Mo ipika꞉ pieke hau manuta꞉ tikitiki na pitolo haena꞉ ipika꞉ hamekena꞉ hau manuta꞉ tikitiki pikieki yaalo piekeme. \p \v 13 Koto ekina꞉ yaka kame tonuo. Do kenke wanda꞉halima꞉ iki honditi pia꞉ka꞉na꞉ta꞉ na penkilipa꞉tia pomia꞉pa꞉peke. \v 14 Mo homa꞉la꞉eki mina꞉pa꞉lao da꞉ta꞉la꞉eki pa꞉ta꞉ epoloma꞉ ekita꞉ nika꞉ hone uluma꞉me. Koto mo nikana꞉ma꞉ nika꞉ kametonu pa꞉ta꞉ pukima꞉ homo haloma꞉ ekita꞉ hone ulume laa loa꞉me. Ma꞉nda꞉ epima꞉ pukima꞉ na homea꞉ka꞉na꞉ta꞉ ipikita꞉ mo homa꞉la꞉ ekina꞉ honkopu oto pa꞉ta꞉ paa hala꞉me. \v 15 Ma꞉nda꞉ epima꞉ ipika꞉ hameke honditi pia꞉ka꞉na꞉ta꞉ kota꞉ koto someta꞉ hali lu homaasa꞉ somee. Kutupa ika꞉ hone wilimima꞉ mo hali lu homaasa꞉ someta꞉ da꞉ta꞉la꞉eki ipiki pa꞉ta꞉ na ula꞉me. \p \v 16 Nikana꞉ma꞉ mo pukima꞉ homa꞉la꞉ ekita꞉ dupa ya꞉ka꞉ta꞉me laa hone witoloma꞉ ekina꞉ teketa꞉ Ketisoma꞉ta꞉ nika꞉ anketeke mea ipika꞉ da꞉ta꞉la꞉ ekita꞉ halea꞉me. Koto ekina꞉ta꞉ nikana꞉ma꞉ make nika꞉ da꞉ta꞉la꞉ ekima꞉ta꞉ nika꞉ kametonu tamba꞉ muluekema꞉ pa hala꞉peke ya꞉la꞉me. \v 17 Mo hamoko halima꞉ ipika꞉ hameke ala꞉ta꞉ ma꞉nda꞉ dia꞉ ya꞉la꞉eki handolo hata꞉ kone hameke pa꞉ta꞉ ipika꞉ puki na halea꞉ka꞉na꞉ta꞉ pa ekieki pea ipikana꞉ma꞉ Koda꞉ pa꞉ta꞉ pukima꞉ homolome laa leliepe. \v 18 Yaka wekiwandikio. Nika꞉ pukima꞉ homoloma꞉ ekita꞉ kakema꞉ homeke o pima꞉ homeke lapeke na ya꞉la꞉me. Dia꞉me. Koto pukima꞉ homa꞉la꞉ ekima꞉ta꞉ pa mo ota꞉eki peneme yaena꞉ nika꞉ kikima꞉ pitolo hata꞉ homekee. \v 19 Kota꞉ kutu pita꞉la꞉ ekima꞉ta꞉ mo ota꞉eki pa꞉ta꞉ tunaaloma꞉me laa hone ulumeke. Kutupa dupita꞉la꞉ ekima꞉ta꞉ nikana꞉ma꞉ Koda꞉na꞉ leke popelekena꞉ puki hana꞉ nokopoloma꞉ ekie. \v 20 Pate nika꞉ hone tekema꞉ alo hata꞉ nikita꞉ hoke hau poloma꞉me lea꞉ka꞉na꞉ta꞉ kota꞉ nika꞉ hone uluma꞉ ekita꞉ dupa. Koda꞉ta꞉ nika꞉ hone paeyaona꞉ aneke hali yaalo ipikana꞉ma꞉ ala꞉ta꞉ ala꞉ta꞉ paeyao hone ula꞉me. \p \v 21 Koto ekina꞉ yaka pukipiki ta꞉ma꞉ni sunuo. Nika꞉ honema꞉ a꞉nda꞉ niki hoke hau na poloma꞉me lea꞉ka꞉na꞉ta꞉ kota꞉ nikita꞉ Koda꞉na꞉ leke popelekena꞉ puki hana꞉ nokopoloma꞉me. \v 22 Nikana꞉ma꞉ta꞉ ipika꞉ pi ula꞉ ekimanu opua pitolo make ipiki ta꞉na꞉ homa꞉ tiaasa꞉ haumanu pua halomeketa꞉ kota꞉ nikana꞉ma꞉ ipiki pa꞉ta꞉ honke la꞉la꞉ alemanu mu haloma꞉me. \v 23 Kutupa ipikana꞉ma꞉ mo niki pa꞉ta꞉ pipee ala꞉ ekita꞉ dupa. Nikana꞉ma꞉ ipika꞉ Eiyeke Yesu Ketiso pa꞉ta꞉ hone tulao hata꞉ make pa mo hande Yesuma꞉ leeke tupa꞉ kone niki ame̱le̱ pukima꞉ homa꞉ alualu pu hapa꞉peke. \v 24 Ma꞉nda꞉ epima꞉ Koda꞉na꞉ pi ula꞉ ekimanu opua pia꞉ka꞉na꞉ta꞉ ipikita꞉ Koda꞉ yaapo tunao hala꞉ make Koda꞉ta꞉ ipiki yaapo tunao hala꞉me. Kutupa mo Koda꞉ma꞉ niki pa꞉ta꞉ Sipitidi ka꞉leketa꞉ kota꞉ Koda꞉ta꞉ niki ame̱le̱ tunao hala꞉me hone uluma꞉me. \c 4 \s1 Mo ota꞉ Sipitidi pita꞉ yayapiki sipitidimanu \p \v 1 Yaka pukipiki ta꞉ma꞉ni sunuo. Mo Koda꞉na꞉ Sipitidi moloma꞉me aleme wanda꞉hali paeyao pa꞉ta꞉ hone na tulaake pa ika꞉ ekita꞉ Koda꞉ pa꞉ta꞉ yama꞉ a꞉pa꞉la꞉pe laa amba꞉la handaa handa꞉pa꞉peke. Pa ekipeke mo makeaaso potopede hali paeyaota꞉ mo kenke honiki paeyao pa꞉ta꞉ pelemeke loa꞉me. \v 2 Dota꞉ ota꞉ Koda꞉na꞉ Sipitidi ya꞉ka꞉ta꞉me laa handa꞉ ulu peleme tupa꞉ta꞉ dupae. Ma꞉nda꞉ epima꞉ a꞉nda꞉ Yesu Ketisota꞉ do kenke pa꞉ta꞉ ota꞉ hali a꞉pa hayekeme laa lea꞉ka꞉na꞉ta꞉ kota꞉ ipikita꞉ mo Koda꞉ pa꞉ta꞉ yama꞉ ipula꞉ Sipitidi pila꞉mee. \v 3 Pate ma꞉nda꞉ epima꞉ Yesuta꞉ kotoeki na pa꞉la꞉me lea꞉ka꞉na꞉ta꞉ kota꞉ koto someta꞉ mo Koda꞉ pa꞉ta꞉ yama꞉ ipula꞉ Sipitidi na pila꞉me. Koto some pa꞉ta꞉ pila꞉ sipitidita꞉ mo Ketisona꞉ a꞉nda꞉ tunkiliki some pa꞉ta꞉ yama꞉ a꞉pa꞉la꞉me. Koto ekita꞉ ipiliekee laata꞉ ika꞉ amba꞉ koto opimitaa. Kutupa ameta꞉ do kenkena꞉ amba꞉ koto a꞉pa꞉la꞉taa. \p \v 4 Pate yaka wekiwandikio. Ikita꞉ Koda꞉na꞉ ekie. Kutupa mo makeaaso potopede manuta꞉ amba꞉ bepolalememe. Pa ekipeke mo iki pa꞉ta꞉ pila꞉ Sipitidita꞉ do kenkena꞉ wanda꞉hali tukiki pa꞉ta꞉ pila꞉ sipitidi tupa꞉ dia꞉me. Iki pa꞉ta꞉ pila꞉ Sipitidita꞉ wele wopu pikieki pileke loa꞉me. \v 5 Hande makeaasa꞉ potopede manuma꞉ta꞉ do kenkena꞉ hau manuna꞉ pi hotu halememe. Koto ekina꞉ mo kenke hauna꞉ tapakema꞉ta꞉ do kenke hauna꞉ tapake haleme ekiyalo koto pi opu halememe. \v 6 Koto pa꞉la꞉pate nikita꞉ Koda꞉na꞉eki haloma꞉me. Kutupa Koda꞉ pa꞉ta꞉ hone ula꞉ tapakema꞉ta꞉ nika꞉ pi opu halememe. Pate Koda꞉ pa꞉ta꞉ hone na ula꞉ tapakema꞉ta꞉ nika꞉ pi na opilimikie. Kota꞉ koto hau manuma꞉ta꞉ mo ota꞉ ekina꞉ Sipitidi ya꞉ka꞉ta꞉me laa make mo yayapiki ekina꞉ sipitidi ya꞉ka꞉ta꞉me laa make nikana꞉ma꞉ ana꞉na꞉ tekili pea handa꞉ u hapa꞉peke ya꞉la꞉me. \s1 Koda꞉ta꞉ pukima꞉ homa꞉la꞉eki \p \v 7 Yaka ta꞉ma꞉ni tonuo. Nikana꞉ma꞉ta꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hamana꞉e. Pa ekipeke mo pukima꞉ homa꞉la꞉ hauna꞉ teketa꞉ Koda꞉e. Ma꞉nda꞉ epima꞉ pukima꞉ homea꞉ka꞉na꞉ta꞉ ipikita꞉ Koda꞉na꞉ eiyeke hala꞉ make Koda꞉ handa꞉la꞉me. \v 8 Ma꞉nda꞉ epima꞉ pukima꞉ na homo haya꞉ka꞉na꞉ta꞉ ipikita꞉ Koda꞉ na handa꞉la꞉me. Pa ekipeke Koda꞉ta꞉ pukima꞉ homa꞉la꞉ekie. \v 9 Kutupa Koda꞉ma꞉ ipika꞉ Weki homeke do kenkena꞉ tapaala꞉ ekima꞉ta꞉ ipika꞉ pukima꞉ homa꞉la꞉eki peneme yaala꞉me. Nikana꞉ma꞉ mo weki pa꞉ta꞉ yama꞉ da꞉ta꞉la꞉eki miomono yeke pa꞉la꞉mee. \v 10 Pukima꞉ homa꞉la꞉ ekita꞉ dupae. Nikana꞉ma꞉ Koda꞉ pa꞉ta꞉ pukima꞉ homomeke handa dia꞉ya꞉la꞉pate pa ipikana꞉ma꞉ niki pa꞉ta꞉ pukima꞉ homolo hata꞉ ipika꞉ weki tapaala꞉ ekima꞉ta꞉ nika꞉ hoke hau paeyao paeyawala꞉me. \p \v 11 Yaka ta꞉ma꞉ni tonuo. Koda꞉ma꞉ nikita꞉ koto tupa꞉ pukima꞉ homo haya꞉ka꞉na꞉ta꞉ kota꞉ nikana꞉ma꞉ make ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu hapa꞉peke aleo. \v 12 Homekesiki ma꞉nda꞉ma꞉ Koda꞉ na handa꞉la꞉pate pa nikana꞉ma꞉ a꞉nda꞉ ma꞉nda꞉ ma꞉nda꞉ pa꞉ta꞉ pukima꞉ homa꞉ alualu pu homoma꞉ka꞉na꞉ta꞉ kota꞉ Koda꞉ta꞉ niki ame̱le̱ ta꞉ma꞉ni pea hata꞉ ipika꞉ pukima꞉ homa꞉la꞉ ekita꞉ niki pa꞉ta꞉ tikitiki yao pitaala꞉me. \p \v 13 Nikita꞉ Koda꞉ ame̱le̱ ta꞉ma꞉ni pea haloma꞉ make ipikita꞉ niki ame̱le̱ ta꞉ma꞉ni pea hala꞉ ekita꞉ nikana꞉ma꞉ hone uluma꞉me. Pa ekipeke ipikana꞉ma꞉ta꞉ niki pa꞉ta꞉ ipika꞉ Sipitidi ka꞉la꞉mee. \v 14 Kutupa nikana꞉ma꞉ handoloma꞉ ekita꞉ pa mo Atekema꞉ ipika꞉ Eiyeketa꞉ do kenke wanda꞉halina꞉ pa꞉ta꞉la꞉la꞉ some tapaala꞉me laa ma꞉nda꞉ ma꞉nda꞉ pa꞉ta꞉ la hala꞉tiki pu haloma꞉me. \v 15 Ma꞉nda꞉ epima꞉ Yesuta꞉ Koda꞉na꞉ Eiyekee lea꞉ka꞉na꞉ta꞉ kota꞉ koto someta꞉ Koda꞉ yaapo ta꞉ma꞉ni pea hala꞉ make Koda꞉ta꞉ ipiki yaapo ta꞉ma꞉ni pea hala꞉me. \v 16 Kutupa mo Koda꞉ma꞉ niki pa꞉ta꞉ pukima꞉ homa꞉la꞉ ekita꞉ nikana꞉ma꞉ hone witolo hata꞉ hone tulaaloma꞉me. \p Koda꞉ta꞉ pukima꞉ homa꞉la꞉ekie. Koto ekina꞉ ma꞉nda꞉ epita꞉ pukima꞉ homa꞉la꞉eki pa꞉ta꞉ haya꞉ka꞉na꞉ta꞉ kota꞉ ipikita꞉ Koda꞉ yaapo ta꞉ma꞉ni pea hala꞉me. Kutupa Koda꞉ta꞉ ipiki yaapo ta꞉ma꞉ni pea hala꞉me. \v 17 Nikana꞉ma꞉ mo Pi Yokaalu Pilie Natena꞉ta꞉ pa honkopu hao halo poluekema꞉ yeketa꞉ mo pukima꞉ homa꞉la꞉ ekita꞉ niki pa꞉ta꞉ ankulao pitaala꞉me. Kutupa nikana꞉ma꞉ miniki halumekee. Pa ekipeke nika꞉ do kenkena꞉ hao peoloma꞉ ekita꞉ mo Ketisona꞉ ekima꞉ kone handa꞉leke loa꞉me. \v 18 Pukima꞉ homa꞉la꞉eki pa꞉ta꞉ta꞉ paala꞉ pa꞉la꞉eki na ula꞉me. Ota꞉ tikitiki piki pukima꞉ homa꞉la꞉ ekima꞉ta꞉ mo paala꞉ pa꞉la꞉eki pendulu baasa꞉me. Koto ekina꞉ ma꞉nda꞉ epi paala꞉ma꞉ homea꞉ka꞉na꞉ta꞉ mo pukima꞉ homa꞉la꞉ ekita꞉ ipiki pa꞉ta꞉ tikitiki yao na pitaala꞉me. Pa ekipeke paala꞉ pa꞉la꞉ ekita꞉ mo hoke yenki pa꞉ta꞉ apa꞉taleke loa꞉me. \v 19 Koda꞉ma꞉ta꞉ niki amba꞉la pukima꞉ homeeke handaa nikana꞉ma꞉ make pukima꞉ homo haloma꞉me. \v 20 Kota꞉ ma꞉nda꞉ epima꞉ Koda꞉ pa꞉ta꞉ pukima꞉ homolome alo hata꞉ kone ipika꞉ kame honditi pia꞉ka꞉na꞉ta꞉ kota꞉ ipikita꞉ yayapiki pi ala꞉ somee. Pa ekipeke mo ipika꞉ lekema꞉ handa꞉la꞉ kameta꞉ pukima꞉ na homolo haya꞉ka꞉na꞉ta꞉ kota꞉ mo ipika꞉ lekema꞉ na handa꞉la꞉ Koda꞉ pa꞉ta꞉ make pukima꞉ homa꞉peke na ya꞉la꞉me. \v 21 Mo hande Ketisoma꞉ niki pa꞉ta꞉ ka꞉la꞉ pi ula꞉ ekita꞉ dupae. Ma꞉nda꞉ epima꞉ Koda꞉ pa꞉ta꞉ pukima꞉ homea꞉ka꞉na꞉ta꞉ kota꞉ ipikita꞉ mo ipika꞉ kame pa꞉ta꞉ make pukima꞉ homa꞉peke ya꞉la꞉me la la꞉la꞉me. \c 5 \s1 Kenke hau bepolaloma꞉eki \p \v 1 Ma꞉nda꞉ epima꞉ Yesuta꞉ Ketisoe laa hone tulaeya꞉ka꞉na꞉ta꞉ ipikita꞉ Koda꞉na꞉ eiyeke hala꞉me. Kutupa ma꞉nda꞉ epima꞉ ateke pa꞉ta꞉ pukima꞉ homea꞉ka꞉na꞉ta꞉ kota꞉ ipika꞉ eiyeke make pukima꞉ homa꞉la꞉me. \v 2 Nikana꞉ma꞉ Koda꞉ pa꞉ta꞉ pukima꞉ homolo make ipika꞉ pi ula꞉ ekimanu opua pu haloma꞉ ekita꞉ kota꞉ kotota꞉ ipika꞉ wekiwandiki make pukima꞉ homoloma꞉me laa pa handoloma꞉me. \v 3 Nika꞉ Koda꞉ pa꞉ta꞉ pukima꞉ homoloma꞉ ekima꞉ta꞉ kota꞉ ipika꞉ pi ula꞉eki opua pitoloma꞉eki konee. Kutupa ipika꞉ mana꞉ pi manuma꞉ta꞉ niki ka꞉nda꞉ na peaasa꞉me. \v 4 Paa ekipeke Koda꞉na꞉ wekiwandiki paeyaoma꞉ta꞉ do kenke hauta꞉ ota꞉ ana꞉na꞉ bepolapeke ya꞉la꞉me. Kutupa nika꞉ hone tulaaloma꞉ ekima꞉ta꞉ do kenkena꞉ hau bepolatia pu haloma꞉me. \v 5 Kota꞉ epima꞉ do kenkena꞉ hau bepolaapeke ya꞉la꞉pe. Mo Yesuta꞉ Koda꞉na꞉ Eiyekee laa hone tulaasa꞉ somema꞉ homekee. \s1 Yesu Ketisona꞉ wekitisimanu \p \v 6 Yesu Ketisota꞉ mo ikalima꞉ bapitaisi pita꞉la꞉ hauna꞉ make ipika꞉ we holo pieke hauna꞉ make epeekeme. Ipikita꞉ mo ikalina꞉ hau homekena꞉ na epeekepate pa mo ikali pita꞉ we yaapo telipuna꞉na꞉ epeekeme. Kutupa mo Sipitidima꞉ kone peneme yaasota꞉ do hauta꞉ ota꞉ekie laa ala꞉me. Pa ekipeke mo Sipitidita꞉ ota꞉ ekie. \v 7 Do ekina꞉ wekitisi haasa꞉eki manuta꞉ tepoe. \v 8 Mo Sipitidi make mo ikali make mo we make koto hau tepoma꞉ta꞉ homeke peneme yaasa꞉ pi kone alememe. \v 9 Nikana꞉ma꞉ta꞉ do kenke halina꞉ peneme yao ala꞉ pi hone tulao haloma꞉pate pa Koda꞉na꞉ peneme yaasa꞉ pita꞉ ota꞉ honkopu wotu hala꞉me. Kutupa ipika꞉ peneme yaasa꞉ pita꞉ ipika꞉ Eiyekena꞉ alo hata꞉ la꞉la꞉me. \v 10 Koto ekina꞉ ma꞉nda꞉ epima꞉ mo Koda꞉na꞉ Eiyeke pa꞉ta꞉ hone tulaeya꞉ka꞉na꞉ta꞉ kota꞉ koto mo Eiyekena꞉ alo hata꞉ peneme yaasa꞉ pita꞉ ipika꞉ puki pa꞉ta꞉ ula꞉me. Pate ma꞉nda꞉ epima꞉ a꞉nda꞉ Koda꞉ma꞉ leeke ekimanu pa꞉ta꞉ hone na tulaeya꞉ka꞉na꞉ta꞉ kota꞉ ipikana꞉ma꞉ Koda꞉ta꞉ yayapiki pi ala꞉ somee ala꞉me. Pa ekipeke koto somema꞉ta꞉ mo Koda꞉ma꞉ ipika꞉ Eiyekena꞉ alo hata꞉ la꞉la꞉eki hone na tulaala꞉me loa꞉me. \v 11 Mo peneme yao ala꞉ pita꞉ doe. Koda꞉ma꞉ta꞉ niki pa꞉ta꞉ da꞉taa hao hala꞉eki ka꞉la꞉me. Kutupa do da꞉ta꞉la꞉ ekina꞉ teketa꞉ ipika꞉ Eiyekee. \v 12 Ma꞉nda꞉ epima꞉ mo Eiyeke ma̱꞉na꞉la꞉ someta꞉ kota꞉ mo da꞉ta꞉la꞉eki u hala꞉pate pa mo Koda꞉na꞉ Eiyeke na ma̱꞉na꞉la꞉ some ipikita꞉ da꞉ta꞉la꞉eki na wia hala꞉me. \s1 Da꞉taa hao hala꞉eki \p \v 13 I̱ma꞉ iki pa꞉ta꞉ do laaso ekita꞉ mo da꞉ta꞉la꞉eki ikana꞉ma꞉ amba꞉ melememe laa hone uemena꞉yeke pitolome. Koto mo Koda꞉na꞉ Eiyeke pa꞉ta꞉ hone tulaaseme wanda꞉hali iki pa꞉ta꞉ loa꞉me \v 14 Nikita꞉ Koda꞉na꞉ leke popelekena꞉ honkopu mo̱loma꞉me. Pa ekipeke mo nikana꞉ma꞉ ipika꞉ hone pa꞉la꞉ ekina꞉ ala꞉ta꞉ ma꞉nda꞉ honke loma꞉ka꞉na꞉ta꞉ ota꞉ opita꞉la꞉me laa nika꞉ hone uluma꞉me. \v 15 Nikana꞉ma꞉ ipiki pa꞉ta꞉ honke la꞉tiki pu haloma꞉eki manuta꞉ ota꞉ opu hala꞉me hone ula꞉me. Kutupa koto ekita꞉ ota꞉ ekie laa hone uma꞉ka꞉na꞉ta꞉ kota꞉ ipiki pa꞉ta꞉ alemanu honke la꞉tiki pitolo hata꞉ ku hala꞉me hone uluma꞉me. \p \v 16 Iki ame̱le̱ homekema꞉ ipika꞉ hamekema꞉ mo homena꞉ na la꞉la꞉ hoke hau ma꞉nda꞉ pita꞉la꞉eki handea꞉ka꞉na꞉ta꞉ kota꞉ mo somena꞉eki Koda꞉ pa꞉ta꞉ yeni peaapeke ya꞉la꞉me. Kutupa Koda꞉ma꞉ ipiki da꞉taena꞉ lelieke. Koto hauta꞉ pa mo homena꞉ lapeke na ya꞉la꞉ hoke hau pu haleme wanda꞉hali pa꞉ta꞉ loa꞉me. Pate mo homa꞉la꞉eki pa꞉ta꞉ hatuku polo pa꞉la꞉ hoke hauta꞉ ta꞉ta꞉ ma꞉nda꞉e. Koto hauna꞉ I̱ma꞉ta꞉ Koda꞉ pa꞉ta꞉ yeni pea꞉peke laa na loa꞉me. \v 17 Tikitiki na piki hau pita꞉la꞉eki paeyaota꞉ hoke haue. Pate mo homa꞉la꞉eki pa꞉ta꞉ na hatuku pula꞉ hoke hau make ula꞉me. \p \v 18 Nikana꞉ma꞉ mo Koda꞉na꞉ weki wandikima꞉ta꞉ hoke hau pa na pitolo ombu hala꞉me laa hone uluma꞉me. Pa ekipeke mo Koda꞉na꞉ Eiyekema꞉ iki handeteke hala꞉me ekita꞉ mo Hoke Temokoma꞉ iki hoeyaapeke na ya꞉la꞉me. \v 19 Do kenketa꞉ mo Hoke Temokoma꞉ kilu tombuao hala꞉pate pa nikita꞉ Koda꞉na꞉eki haloma꞉me laa hone uluma꞉me. \p \v 20 Nika꞉ hone uluma꞉ ekita꞉ mo Koda꞉na꞉ Eiyeketa꞉ niki hone lenkipa wita꞉la꞉eki kulu a꞉pa꞉la꞉me. Pa ekipeke nikana꞉ma꞉ mo ota꞉ Koda꞉ hone ulu poloma꞉ tupa꞉ pa꞉la꞉me. Ipiki ame̱le̱ hone homeke witolo hata꞉ pa ipika꞉ Eiyeke Yesu Ketiso kone hone homeke wia haloma꞉me. Ipikita꞉ mo ota꞉ Koda꞉e. Kutupa ipikita꞉ deto hala꞉ ekina꞉ tekee. \v 21 Yaka wekiwandikio. Mo yayapiki koda꞉manu teke pa꞉ta꞉ na hapa꞉peke.