\id 1CO - Sembeleke (SGI1CO.01) Samberigi PNG 1 Corinth 01 5/2/91 Macnaughtan 
\h 1 KOTINDI 
\toc1 Poloma꞉ Kotindi Siosi pa꞉ta꞉ titina꞉ tapaeyeke wapee 
\toc2 1 Kotindi 
\toc3 1 Kotindi 
\mt1 Poloma꞉ Kotindi Siosi pa꞉ta꞉ titina꞉ tapaeyeke wapee  
\c 1  
\p
\v 1 Koda꞉ma꞉ ipika꞉ hone pa꞉la꞉eki pitolo hata꞉ I̱ta꞉ Yesu Ketisona꞉ aposolo hali hano la꞉la꞉me. I̱ Poloma꞉ make nika꞉ kame Sosenisima꞉ make dikana꞉ma꞉ tapaasopa꞉ wape doe.   
\p
\v 2 Iki Kotindi daoni pa꞉ta꞉ haleme Koda꞉na꞉ siosi wanda꞉hali pa꞉ta꞉ wape polo pi doe. Koda꞉ma꞉ ikita꞉ ipika꞉ yakopiki wanda꞉hali hamina꞉ wi la꞉la꞉me. Iki mo Yesu Ketiso yaapo ta꞉ma꞉ni pea hata꞉ Koda꞉na꞉eki haleme wanda꞉hali pa꞉ta꞉ loa꞉me. Kutupa mo kenke paeyao pa꞉ta꞉ hata꞉ nika꞉ Tekehali make ika꞉ Tekehali Yesu Ketisona꞉ biki wi aleme wanda꞉hali make iki paeyao pa꞉ta꞉ wape polo pi doe.   
\p
\v 3 Nika꞉ Apa꞉ Koda꞉ma꞉ pita꞉ Tekehali Yesu Ketiso yaapoma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niawaena꞉e laa alopa꞉me.   
\s1 Ketiso yaapo ta꞉ma꞉ni pea hamono Koda꞉ma꞉ niki epeala꞉ ekimanu  
\p
\v 4 Koda꞉ma꞉ iki pa꞉ta꞉ mo Yesu Ketiso pa꞉ta꞉ yama꞉ pa a꞉ta꞉ma꞉ homa tamba꞉ mina꞉la꞉eki handolo hata꞉ I̱ma꞉ ipiki pa꞉ta꞉ keiyae pi lo halome.  
\v 5 Ikana꞉ma꞉ Ketiso yaapo ta꞉ma꞉ni pea hata꞉ ala꞉ta꞉ ala꞉ta꞉ paeyaoma꞉ hamoko halememe. Pi alemeeki paeyao make hone witelemeeki paeyao make apa꞉taaso hata꞉ paeyaona꞉ hamoko halememe.  
\v 6-7 Hande Ketisona꞉ pita꞉ ikana꞉ma꞉ wopu da̱o̱la miniki halememe. Kutupa ikana꞉ma꞉ mo nika꞉ Tekehali Yesu Ketiso peneme yaena꞉yeke handeteke hata꞉ mo Koda꞉na꞉ epeaasa꞉eki ma꞉nda꞉ na mina꞉pa꞉lalememe.  
\v 8 Kutupa ame kini pua pea pa mo paelo pa꞉la꞉ Natena꞉ epena꞉ kone Koda꞉ma꞉ iki wopu da̱o̱la haatiki puemena꞉ la꞉tiki pu halieke. Koto mo nika꞉ Tekehali Yesu Ketisona꞉ Natena꞉ iki pa꞉ta꞉ eki hau ma꞉nda꞉ na handa꞉ wilieke loa꞉me.  
\v 9 Mo Yesu Ketiso nika꞉ Tekehali yaapo ta꞉ma꞉ni puemena꞉ yeke wi la꞉la꞉ Koda꞉ma꞉ta꞉ ipika꞉ la꞉ ula꞉ pimanu na tunkuliki ota꞉ pilieke. Ipiki pa꞉ta꞉ hone tulaapa꞉peke ya꞉la꞉me.   
\s1 Siosi wanda꞉hali ka꞉taalualu pea haemekeeki  
\p
\v 10 Kametonuo. Nika꞉ Tekehali Yesu Ketisona꞉ bikina꞉ ikana꞉ma꞉ do haumanu puemena꞉ do honke alome. Ka꞉ta꞉ alualu pea na hake pi homekena꞉ kake mandakena꞉ wia hapa꞉peke. Kutupa make homeke hone wiata꞉ homeke hau puluekema꞉ iki paeyao ota꞉ tunao hapa꞉peke.  
\v 11 Kametitio. Iki pa꞉ta꞉ Kolauna꞉ tapakema꞉ la kimieki loa꞉me. Paeyaoma꞉ ape ape lo halememe leme ekina꞉ loa꞉me.  
\v 12 I̱ma꞉ta꞉ do ekina꞉ alome. Iki paeyao homeke homekema꞉ la la pu alota꞉ I̱ta꞉ Polona꞉ halie o I̱ta꞉ Apolosina꞉ halie o I̱ta꞉ Pidana꞉ halie o I̱ta꞉ Ketisona꞉ halie laa la alualu pitelememe.  
\v 13 Ketisota꞉ tunkula꞉ alualu pea halemekea. Mo hande a꞉ka꞉tei wape piki tina꞉ iki pa꞉ta꞉ Polo mea pua endiaemekepe. Polona꞉ bikina꞉ bapitaisi pimipe.   
\p
\v 14 Iki paeyao bapitaisi na puake pa Kitisipusi pita꞉ Kaiasi yaapo homeke peaowa꞉ ekina꞉ Koda꞉ pa꞉ta꞉ keiyae pi alome.  
\v 15 Kutu pua꞉ ekita꞉ ma꞉nda꞉ma꞉ Polona꞉ bikina꞉ I̱ bapitaisi peaeya꞉me laama꞉na꞉yeke loa꞉me.  
\v 16 Kutupa make mo hande Sitepanisi ipika꞉ weki wanda꞉ ame̱le̱ iki bapitaisi peaowa꞉pate pa mandane wanda꞉hali bapitaisi peaowa꞉ ekita꞉ I̱ma꞉ hone na witolome.  
\v 17 Ketisoma꞉ I̱ma꞉ wanda꞉hali bapitaisi pealuekema꞉ na tapaeya꞉pate hande Pi Seliapo walonoyeke tapaeya꞉me. Kutupa mo hande a꞉ka꞉tei wape piki tina꞉ Ketiso endiaemeke ekina꞉ pi manu ula꞉ wele pita꞉la꞉ ekita꞉ pa tunkulaama꞉na꞉ I̱ma꞉ta꞉ hande Pi Seliapota꞉ mo kenke haliwekima꞉ hone witeleme tupa꞉ walonoyeke I̱ na tapaeya꞉me.   
\s1 Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo  
\p
\v 18 Hoke hauna꞉ alupulu pa꞉la꞉ wanda꞉halima꞉ta꞉ hande a꞉ka꞉tei wape piki tina꞉ endiaemeke pi pa꞉ta꞉ta꞉ Pa ekie alemepate pa Koda꞉ma꞉ mea da꞉taasa꞉ wanda꞉halima꞉ta꞉ do pi pa꞉ta꞉ta꞉ Koda꞉na꞉ wele pita꞉la꞉ ekie aloma꞉me.  
\v 19 Pa ekipeke mo Baibolo buka pa꞉ta꞉ do wape pa꞉la꞉eki ula꞉me.  
\q1 Mo hone wotu witeme haliwekina꞉ hone wotu witeme ekita꞉ hoeyaalueke.  
\q1 Kutupa mo wape pa꞉la꞉eki wotu handeleme haliwekina꞉ handeleme ekimanu make tea꞉ nane mea wina꞉ lolueke laa wape pa꞉la꞉me.   
\p
\v 20 Koto ekina꞉ mo hande hone wotu witeme haliwekita꞉ ekipape o mo hande wape pa꞉la꞉eki wopu handeleme haliwekita꞉ ekipape o do kenkena꞉ mo pi hotia꞉la꞉meeki wotu handeleme haliwekita꞉ ekipape. Koda꞉ma꞉ walolota꞉ Do kenkena꞉ hone wotu wita꞉la꞉ ekita꞉ Pa alee laa wala꞉leke handa loa꞉me.   
\p
\v 21 Koda꞉ma꞉ ipika꞉ hone wotu wita꞉la꞉ ekima꞉ta꞉ do kenkena꞉ hone wotu witeleme wanda꞉halima꞉ ipiki handaapa꞉na꞉ yeke sa꞉sa꞉ piekeme. Kutupa mo wanda꞉halima꞉ do nikana꞉ma꞉ walo haloma꞉ pi pa꞉ta꞉ Pa ekie alemepate pa mo opiteleme wanda꞉halita꞉ Koda꞉ma꞉ mea da꞉taasa꞉me.  
\v 22 Mo Diu wanda꞉halima꞉ Na hando haloma꞉eki handoma꞉ka꞉na꞉ta꞉ kota꞉ opulumeke laa alememe. Kutupa hande Kitiki wanda꞉halima꞉ta꞉ hone wotu witemeeki weitelememe.  
\v 23 Kutu pelemepateta꞉ nikana꞉ma꞉ hande a꞉ka꞉tei wape piki tina꞉ Ketiso endiaemekeme laa pi walo haloma꞉me. Do waloma꞉ pina꞉ta꞉ mo Diu wanda꞉halima꞉ta꞉ ya handa꞉olu bepi pu halememe. Kutupa mo Kitiki wanda꞉halima꞉ta꞉ Pa ekie lo halememe.  
\v 24 Koto lo halemepate pa mo hande Koda꞉ma꞉ wi la ma꞉la꞉ Diu wanda꞉hali make Diendaili wanda꞉hali make koto wanda꞉halima꞉ do pina꞉ Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo hala꞉me lo haloma꞉me.  
\v 25 Koto ekina꞉ kenke haliwekima꞉ta꞉ Koda꞉na꞉ hone wotu wita꞉la꞉eki manuta꞉ Pa ekie alemepate pa Koda꞉ma꞉ ipika꞉ hone wita꞉la꞉ ekima꞉ta꞉ mo kenke haliwekina꞉eki lu ankulala꞉me. Kutupa make mo kenke haliwekima꞉ta꞉ Koda꞉na꞉ wele pita꞉la꞉ ekita꞉ damako pupa ula꞉ ekie alemepate pa mo Koda꞉na꞉ wele pita꞉la꞉ ekima꞉ta꞉ mo kenke haliwekina꞉eki lu ankulala꞉me.   
\p
\v 26 Kametitio. Koda꞉ma꞉ iki wi lea꞉ dina꞉ta꞉ ika꞉ haeme ekita꞉ hone wia꞉pa꞉peke. Mo kenke haliwekima꞉ handeleme ekina꞉ta꞉ ikita꞉ pa peao paeyao hone wopu wiki haliweki na haememe.  
\v 27 Koda꞉ma꞉ mo hone wotu wiki haliweki yaala꞉ mea peaaluekema꞉ ika꞉ pa pi aleme ekimanu ipikana꞉ma꞉ ka꞉na꞉ hone wia miekeme. Kutupa make mo hamoko haliweki yaala꞉ mea peaaluekema꞉ mo ikana꞉ma꞉ damakopiki ekie alemeeki kone ipikana꞉ma꞉ ka꞉na꞉ hone wia miekeme.  
\v 28 Koda꞉ma꞉ta꞉ mo kenke wanda꞉halina꞉ tumiki haumanu hoeyaaluekema꞉ ikana꞉ma꞉ handa꞉niaasemeeki make pa alemanue laa hone witelemeeki make ipikana꞉ma꞉ ka꞉na꞉ hone wia miekeme.  
\v 29 Koto mo hali homeke a꞉nda꞉ma꞉ Koda꞉na꞉ leke popelekena꞉ hata꞉ ipika꞉ hakoko na lina꞉yeke Koda꞉ma꞉ kutu piekeme.  
\v 30 Koda꞉ma꞉ iki mea Yesu Ketiso yaapo ta꞉ma꞉ni peala꞉me. Kutupa ipikana꞉ma꞉ Ketisota꞉ nika꞉ hone wopu wita꞉la꞉eki haena꞉ la꞉la꞉me. Kutupa make Ketisoma꞉ nikita꞉ Koda꞉ yaapo tikitiki yao hamono laata꞉ nikita꞉ yakopiki wanda꞉hali hamono la꞉la꞉me. Kutupa ipikana꞉ma꞉ make niki pa ka꞉la꞉pa꞉ tapaala꞉me.  
\v 31 Kutu pieke handaa mo Baibolo bukana꞉ wape pa꞉la꞉ pea꞉pekeeki ma꞉nda꞉ dupa Hali epima꞉ hakoko luekema꞉ hone wia꞉ka꞉na꞉ta꞉ Tekehalima꞉ peaala꞉ ekimanu hone witolo hata꞉ ipika꞉ hakoko lia꞉peke yelieke wape pa꞉la꞉me.   
\c 2  
\s1 Ketisota꞉ a꞉ka꞉tei wape piki tina꞉ tamendiao hayeke pi  
\p
\v 1 Ya kametitio. Iki pa꞉ta꞉ mo Koda꞉na꞉ a꞉mbao ula꞉ ota꞉ pi waluekema꞉ epoa꞉ dina꞉ta꞉ mo yaka waloa꞉ pi make yaka hone witoloeki make mo wanda꞉halima꞉ pa ana꞉na꞉ opua꞉peke ya꞉la꞉ pi kone waloa꞉me.  
\v 2 Kutupa iki ame̱le̱ hata꞉ hone dupa ua꞉me. Mo ala꞉ta꞉ ala꞉ta꞉ paeyao hone yonka꞉laaso hata꞉ pa mo Yesu Ketiso pita꞉ mo hande ipiki a꞉ka꞉tei wape piki tina꞉ endiaemekeeki yaapo homeke waluekema꞉ hone witolo hata꞉ haowa꞉me.  
\v 3 Kutupa make iki pa꞉ta꞉ epoa꞉ dina꞉ta꞉ damako pupa wia paala꞉ma꞉ homolo hata꞉ puki la꞉ma꞉ la꞉ma꞉ tonka꞉na꞉ pia꞉me.  
\v 4 Kutupa I̱ma꞉ta꞉ pi walolo hata꞉ mo hone wopu witeme kenke haliwekima꞉ aleme tupa꞉ pi hokulu hokulu na loa꞉pate pa mo Koda꞉na꞉ Sipitidima꞉ mo ipika꞉ wele wopupiki honkopu peneme yaena꞉yeke waloa꞉me.  
\v 5 Koto ekina꞉ ika꞉ hone tulaaleme ekita꞉ pa mo kenke halina꞉ hone wotu witemeeki opitolo hata꞉ na tulaalemepate pa mo Koda꞉na꞉ wele pita꞉la꞉ ekina꞉ kone hone tulaalememe.   
\s1 Koda꞉na꞉ hone wotu wita꞉la꞉eki  
\p
\v 6 Koto pa꞉la꞉pate pa mo Koda꞉na꞉ pina꞉ keileke haleme wanda꞉hali pa꞉ta꞉ I̱ma꞉ta꞉ hone wotu witolo hata꞉ pi walo halopate pa do kenkena꞉ hone wotu wita꞉la꞉ ekimanu na lo halome. Do kenkena꞉ kilu tombuao haleme haliwekina꞉eki pa꞉ta꞉ make loa꞉me. Koto haliwekina꞉ kilu tombuaasa꞉ ekina꞉ natemanu paelieke.  
\v 7 Kutu pilia꞉pate I̱ma꞉ hande hone wotu witolo hata꞉ lo halo ekita꞉ mo Koda꞉na꞉ hone wotu wita꞉la꞉eki kone alopate pa do kenkena꞉ wanda꞉hali pa꞉ta꞉ta꞉ pa panka꞉ ala꞉ ekie. Amba꞉ do kenke ala꞉ta꞉ ala꞉ta꞉ paeyao a̱i̱ na wepiki hata꞉ kone Koda꞉ma꞉ mo ipika꞉ pa̱a̱ pa꞉la꞉ ekita꞉ niki handa꞉ mea poluekema꞉ do hande hone wotu wita꞉la꞉ ekita꞉ ipikana꞉ma꞉ amba꞉ hone wiekeme.  
\v 8 Do kenke kilu tombuao haleme haliwekima꞉ta꞉ do hone wotu wita꞉la꞉ ekita꞉ na handemekeme. Handemeka꞉na꞉ yoluta꞉ hande pa̱a̱ piki Tekehalita꞉ mo a꞉ka꞉tei wape piki tina꞉ na endiaalo pimime.  
\v 9 Koto pa꞉la꞉pate hande Baibolo bukana꞉ wape pa꞉la꞉ tupa꞉ta꞉  
\q1 Wanda꞉hali homeke a꞉nda꞉ma꞉ na handeekeeki make na opiekeeki make honema꞉ na niminaeyekeeki make kotoeki kone Koda꞉ma꞉ mo ipiki pa꞉ta꞉ pukima꞉ homa꞉la꞉ wanda꞉hali pa꞉ta꞉ peaeyekeme laa wape pa꞉la꞉me.   
\p
\v 10 Koto ekina꞉ koto ekimanu kone Koda꞉ma꞉ta꞉ niki pa꞉ta꞉ ipika꞉ Sipitidima꞉ peneme yaena꞉ la꞉la꞉me. Mo Sipitidima꞉ ala꞉ta꞉ ala꞉ta꞉ paeyao akolopa mu tia pominolo hata꞉ Koda꞉na꞉ ka꞉na꞉ honema꞉ a꞉mbao ula꞉ ekimanu kone handa꞉ wita꞉la꞉me.  
\v 11 Hali homekema꞉ hali ma꞉nda꞉na꞉ wita꞉la꞉ hone na handa꞉la꞉pate pa mo somena꞉ hone teke pa꞉ta꞉ wita꞉la꞉ hone manuta꞉ ipika꞉ temoko homekema꞉ kone hando hala꞉me. Koto tupa꞉ kone Koda꞉na꞉ Sipitidima꞉ta꞉ mo Koda꞉na꞉ pita꞉la꞉eki paeyao hando hala꞉me.  
\v 12 Koda꞉ma꞉ta꞉ do kenkena꞉ hau pita꞉la꞉eki handomono na la꞉la꞉pate ipikana꞉ma꞉ amba꞉ ka꞉la꞉ alemanu paeyao handomonoyeke ipika꞉ Sipitidi kone amba꞉ ka꞉la꞉me.  
\v 13 Koto ekina꞉ hande Sipitidi meleme wanda꞉hali pa꞉ta꞉ Koda꞉na꞉ ota꞉ pimanu walolo hata꞉ nikana꞉ma꞉ do kenkena꞉ hone wotu wiki haliwekima꞉ wala꞉la꞉eki na waloma꞉pate pa mo Sipitidima꞉ wala꞉la꞉eki wala꞉tiki pu haloma꞉me.   
\p
\v 14 Koto poloma꞉pate hande Sipitidi na ma꞉la꞉ some epita꞉ mo hande Koda꞉na꞉ Sipitidima꞉ pa kita꞉la꞉ alemanu na mia꞉peke ya꞉la꞉me. Kutupiki someta꞉ hande Koda꞉na꞉ Sipitidima꞉ pa kita꞉la꞉ alemanu na minolo hata꞉ yalo Pa ekie laa hone na u hala꞉me.  
\v 15 Mo Koda꞉na꞉ Sipitidi ma꞉la꞉ someta꞉ mo piteme hau paeyao hando ka꞉pa꞉la꞉peke ya꞉la꞉pate pa ma꞉nda꞉ma꞉ ipika꞉ pita꞉la꞉ ekita꞉ hando ka꞉pa꞉la꞉peke na ya꞉la꞉me.  
\v 16 Hande Baibolo bukana꞉ wape pa꞉la꞉ ekita꞉ dupa  
\q1 Tekehalina꞉ hone wita꞉la꞉eki hali epima꞉ handa꞉la꞉pe. Hali epima꞉ ipiki pa꞉ta꞉ Doeki pie laa lapeke ya꞉la꞉pe laa wape pa꞉la꞉me.  
\m Koto pa꞉la꞉pate nikana꞉ma꞉ witoloma꞉ honeta꞉ Ketisoma꞉ wita꞉la꞉ tupa꞉ kone witoloma꞉me.   
\c 3  
\s1 Koda꞉na꞉ e pokaasa꞉ haliweki  
\p
\v 1 Koto pa꞉la꞉pate ya kametitio. I̱ma꞉ ikita꞉ mo Holi Sipitidi meleme wanda꞉hali pa꞉ta꞉ lo haloma꞉ tupa꞉ ana꞉ na pa꞉leke handaa pa mo kenke wanda꞉hali haememe o mo Ketisona꞉ panake weki wandikisunu haememe laa hone witolo hata꞉ I̱ma꞉ iki pa꞉ta꞉ pi waloa꞉me.  
\v 2 Koto ekina꞉ ikana꞉ma꞉ taka꞉lake nemanu napeke na ya꞉la꞉ ekina꞉ andu kone kua꞉me. Kutupa ame do make ikita꞉ pa kenke wanda꞉hali leke haleme ekina꞉ taka꞉lake ne manuta꞉ pa napeke na ya꞉la꞉me.  
\v 3 Ikana꞉ma꞉ ne tunkula꞉la꞉ haumanu make ape ala꞉ ekimanu make kutupiki haumanu piteleme ekita꞉ mo kenke wanda꞉halima꞉ pu haleme tupa꞉ kone pitelememe.  
\v 4 Hali homeke ma꞉nda꞉ma꞉ alota꞉ I̱ta꞉ Polona꞉ hali halome la ala꞉pate hali ma꞉nda꞉ma꞉ I̱ta꞉ Apolosina꞉ hali halome la lea꞉ka꞉na꞉ta꞉ kota꞉ koto lo haleme ekima꞉ta꞉ ikana꞉ma꞉ kenke hau na pitelemepe.   
\p
\v 5 Kota꞉ Apolosita꞉ epi ya꞉ka꞉ta꞉pe. I̱ Polo make epi ya꞉ka꞉ta꞉pe. Diki telipina꞉ Koda꞉na꞉ e pokaasopa꞉ hali yaapo hata꞉ mo pitolopa꞉ ekina꞉ta꞉ ikana꞉ma꞉ Koda꞉ pa꞉ta꞉ hone tulaalememe. Tekehalima꞉ diki pa꞉ta꞉ ta꞉ta꞉ ta꞉ta꞉piki e telipaleke handaa pokaasopa꞉me.  
\v 6 I̱ta꞉ wae noka꞉polo hali haowa꞉me. Kutupa Apolosima꞉ta꞉ mo ikali naa hala꞉la꞉ hali haya꞉me. Dikita꞉ kutu pupa꞉pate opaake hauta꞉ Koda꞉ma꞉ piekeme.  
\v 7 Wae noka꞉pa꞉la꞉ hali make ikali naa hala꞉la꞉ hali make ipilikita꞉ biki dia꞉ya꞉la꞉pate hande wae ale opaake hauta꞉ Koda꞉ma꞉ peaasa꞉ ekina꞉ ipika꞉ biki tieke ula꞉me.  
\v 8 Kutupa wae noka꞉pa꞉la꞉ hali make ikali naa hala꞉la꞉ hali make ta꞉ta꞉ na pa꞉la꞉pate ipilikana꞉ma꞉ Koda꞉na꞉ e pokaasepe ekita꞉ yenki make ana꞉na꞉ kone milipipikie.  
\v 9 Dikita꞉ mandake pa꞉ta꞉ hata꞉ Koda꞉na꞉ e pokaasoma꞉ haliweki halopa꞉me. Kutupa ikita꞉ Koda꞉na꞉ e kone halememe.  
\p Kutupa ikita꞉ Koda꞉na꞉ da make halememe.  
\v 10 Koda꞉na꞉ pa a꞉ta꞉ma꞉ homa kita꞉la꞉eki meata꞉ I̱ma꞉ta꞉ mo da a꞉eta꞉la꞉ ekina꞉ hone wotu wiki kapenda you hali hata꞉ pinki amba꞉ nokopolome. Kutupa hali ma꞉nda꞉ma꞉ da a꞉eluekema꞉ mo pinkimanu manda a꞉eta꞉la꞉me. Koto pa꞉la꞉pate mo da a꞉eta꞉la꞉ hali ma꞉nda꞉ epima꞉ta꞉ wotu handeteke hata꞉ a꞉eya꞉ka꞉na꞉ta꞉ kota꞉ pa ana꞉ pilieke.  
\v 11 Do alo pita꞉ do ekina꞉yeke loa꞉me. Mo hande da pinkimanu nokopa꞉la꞉ ekita꞉ Koda꞉ma꞉ Yesu Ketiso homeke amba꞉ mea haena꞉ la꞉la꞉me. Kutupa mandane pinki manuta꞉ noka꞉pea꞉peke na ya꞉la꞉me.  
\v 12 Kutupa mo hande pinkimanu manda da a꞉eluekema꞉ mandane haliwekima꞉ta꞉ koloma꞉ make silipama꞉ make yenki tieke toopima꞉ make a꞉elimikie. Kutupa mandane haliwekima꞉ta꞉ tima꞉ make yenki katakema꞉ make liki manuma꞉ make da a꞉elimikie.  
\v 13 Kutu pilimipate pa mo hande pi yokaalu pulu pa꞉la꞉ Nate epea꞉ka꞉na꞉ta꞉ kota꞉ mo da a꞉eleme haliweki paeyaona꞉ a꞉eleme hau manuta꞉ peneme yaalieke. Koto Natena꞉ta꞉ mo ti tala꞉ ekima꞉ kone ipilieke. Kutupa haliweki paeyaoma꞉ a꞉elemeeki manuta꞉ mo hande ti tolo pa꞉la꞉ ekima꞉ kone ta handilieke.  
\v 14 Hali ma꞉nda꞉ma꞉ mo hande pinki manda a꞉ela꞉eki na teke paa hao haya꞉ka꞉na꞉ta꞉ kota꞉ koto da a꞉eta꞉la꞉ someta꞉ epeke yenki milieke.  
\v 15 Kutu piliepate pa mo hali ma꞉nda꞉na꞉ a꞉ela꞉ ekita꞉ to paeya꞉ka꞉na꞉ta꞉ kota꞉ ipika꞉ a꞉ela꞉eki paeyao alupalieke. Hande a꞉eyeke someta꞉ na alupiki da꞉taa haliepate pa ti tala꞉eki pa꞉ta꞉ kone pindi pita꞉la꞉ hali leke da꞉taa halieke.   
\p
\v 16 Ikita꞉ Koda꞉na꞉ yakopiki da hamina꞉ta꞉ kutupa Koda꞉na꞉ Sipitidi iki tukiki pa꞉ta꞉ amba꞉ pitaala꞉eki make ikana꞉ma꞉ hone na witelemepe.  
\v 17 Hali ma꞉nda꞉ a꞉nda꞉ma꞉ Koda꞉na꞉ yakopiki da hoeyaeya꞉ka꞉na꞉ta꞉ kota꞉ Koda꞉ma꞉ koto hali hoeyaalieke. Koda꞉na꞉ data꞉ yakopiki da ya꞉leke handa loa꞉me. Kutupa iki kone ipika꞉ yakopiki da halememe.   
\p
\v 18 Ikana꞉ma꞉ iki kone na makeaapa꞉peke. Iki ame̱le̱ hali homeke a꞉nda꞉ma꞉ tiaota꞉ kenke haliwekima꞉ hone witeleme tupa꞉ alota꞉ I̱ta꞉ hone wotu ulu hali halome laa lea꞉ka꞉na꞉ta꞉ kota꞉ koto halima꞉ta꞉ mo ota꞉ hone wotu wita꞉la꞉eki handa꞉ uluekema꞉ I̱ta꞉ hone na wiki hali halome laa amba꞉la lapeke aleo.  
\v 19 I̱ma꞉ do alo pita꞉ do ekina꞉yeke loa꞉me. Kenke haliwekina꞉ hone wopu witelemeeki manuta꞉ Koda꞉ma꞉ handaata꞉ hone na wiki pa ekie laa lelieke. Mo Baibolona꞉ wape pa꞉la꞉eki dupa.  
\q1 Koda꞉ma꞉ mo kenkena꞉ hone wotu witeleme haliwekita꞉ ika꞉ hone wotu witelemeeki manuma꞉ta꞉ iki kone hona꞉ meao tamina꞉ lelieke laa la꞉la꞉me.   
\m
\v 20 Kutupa mo Baibolona꞉ wape pa꞉la꞉eki ma꞉nda꞉ dupa.  
\q1 Kenke haliwekina꞉ hone wopu witelemeeki manuta꞉ Tekehalima꞉ handa alota꞉ Pa alemanu witelememe laa la꞉la꞉me wape pa꞉la꞉me.   
\m
\v 21 Koto ekina꞉ ma꞉nda꞉ma꞉ mo kenke haliwekima꞉ hone wia piteleme ekimanu handolo hata꞉ ika꞉ pi laapeke na ya꞉la꞉me. Pa ekipeke mo ala꞉ta꞉ ala꞉ta꞉ paeyaota꞉ mo Ketiso tapake ika꞉eki ya꞉leke handa loa꞉me.  
\v 22 Polo make Apolosi make Pida make do kenke paeyao make mo da꞉ta꞉la꞉eki pita꞉ homa꞉la꞉eki yaapo make ame do pita꞉la꞉eki make wetepe pulu pa꞉la꞉eki make do ekimanu paeyao ika꞉eki ya꞉la꞉pate  
\v 23 ikita꞉ Ketisona꞉ekie. Kutupa Ketisota꞉ Koda꞉na꞉eki hala꞉me.   
\c 4  
\s1 Ketisona꞉ aposolo haliweki  
\p
\v 1 Ikana꞉ma꞉ niki pa꞉ta꞉ hone witolo hata꞉ hone dupa wia꞉pa꞉peke. Ikita꞉ Ketisona꞉ e pokaasoma꞉ haliweki hata꞉ta꞉ mo hande Koda꞉na꞉ a꞉mbao ula꞉ haumanu handeteke haleme haliwekie laa hone wia꞉pa꞉peke.  
\v 2 Mo e poka꞉la꞉ haliweki paeyao pa꞉ta꞉ta꞉ hau pitelemeeki homeke homeke weiyu haleme ekita꞉ dupa. Ika꞉ teke halina꞉ pita꞉ na tunkuliki ipikana꞉ma꞉ ala꞉eki paeyao opua piteleme ekina꞉ weiyu halememe.  
\v 3 Kutu pita꞉la꞉ ekina꞉ ikana꞉ma꞉ make mandane haliwekima꞉ make I̱ma꞉ polo ekina꞉ pi yokaalu pimika꞉na꞉ta꞉ kota꞉ I̱ma꞉ hone witolo koto ekita꞉ aleta꞉ ma꞉nda꞉ dia꞉me hone witolome. Pa I̱ pa꞉ta꞉ make yaka ekina꞉ make I̱ma꞉ ya kone pi yokaalu puluekema꞉ hone na witolome.  
\v 4 I̱ pa꞉ta꞉ eki a꞉nda꞉ na handolopate pa koto ekima꞉ta꞉ I̱ma꞉ta꞉ Epeke halie pi lapeke ana꞉ na pa꞉la꞉me. Pa ekipeke yaka hauna꞉ pi yokaalu pea꞉peke halita꞉ mo Tekehali homekee.  
\v 5 Koto ekina꞉ mo Tekehalina꞉ pi yokaalu pulu pa꞉la꞉ Nate epena꞉yeke handeteke hata꞉ta꞉ ikana꞉ma꞉ ma꞉nda꞉na꞉eki amba꞉la pi yokaalu na peke pa handeteke hapa꞉peke. Tekehalima꞉ epena꞉ yu wia hapa꞉peke. Ipikana꞉ma꞉ mo timba꞉ lekeeki pa꞉ta꞉ a꞉mbao ula꞉eki paeyaota꞉ pa̱a̱na꞉ mea wilieke. Kutupa wanda꞉halima꞉ puki nane panka꞉ ula꞉ honemanu ipikana꞉ma꞉ peneme yaalieke. Koto dina꞉ta꞉ Koda꞉ma꞉ wanda꞉hali paeyaoma꞉ pimi ekina꞉ yenkita꞉ ana꞉na꞉ mea꞉peke ekimanu handolo hata꞉ ikina꞉ pi la wilieke.   
\p
\v 6 Kametitio. Do wape pitolo pi paeyaota꞉ mo Apolosi diki pa꞉ta꞉ hone witolo hata꞉ pua꞉me. Dikana꞉ma꞉ pitolopa꞉ hau manuna꞉ wape polo ekita꞉ ikana꞉ma꞉ hone witolo hata꞉ mo Baibolo bukana꞉ wala꞉la꞉ tupa꞉ lombei peaama꞉na꞉yeke pua꞉me. Koto ekina꞉ ikana꞉ma꞉ ma꞉nda꞉na꞉ biki mea a꞉meiyaaso hata꞉ ma꞉nda꞉na꞉ biki lu mininiaasemeeki na pea꞉pa꞉peke.  
\v 7 Neketa꞉ wanda꞉hali ankulao tieke halena꞉ epima꞉ mea haena꞉ la꞉la꞉pe. Naka꞉ wia haleeki paeyaota꞉ Koda꞉ma꞉ na kia꞉pe. Koto pa꞉la꞉eki ya꞉ka꞉na꞉ta꞉ kota꞉ nakana꞉ma꞉ta꞉ ya kone poloma꞉ ala꞉ halima꞉ laata꞉ naka꞉ biki kone ekipeke mea a꞉meiyaasepe.   
\p
\v 8 Ikana꞉ma꞉ mea꞉peke ya꞉la꞉ ale manuta꞉ amba꞉ melememe. Ikita꞉ hamoko haliweki amba꞉ halememe. Ikita꞉ mo kini haliweki leke hata꞉ ika꞉ kilu tombuao hala꞉eki pa꞉ta꞉ halemepate pa nikita꞉ yonka꞉lao pelememe. A꞉ta꞉e. Yaka hone pa꞉la꞉ ekita꞉ iki ota꞉ kini haliweki hamina꞉ alome. Kutu pu haemeka꞉na꞉ta꞉ kota꞉ niki make iki ame̱le̱ kini haliweki halumeke.  
\v 9 Pate ya honema꞉ta꞉ Koda꞉ma꞉ ipika꞉ aposolo haliweki nikita꞉ ota꞉ hoki nane hamono la꞉la꞉me. Nikita꞉ mo homaapeke ya꞉la꞉ haliwekima꞉ handele tupa꞉ mo kenke wanda꞉hali paeyaona꞉ leke popeleke nane make mo enisolo tapakena꞉ leke popelekena꞉ make ota꞉ mo telepo la꞉tiaasa꞉ hama tukikina꞉ homaapeke ya꞉la꞉ haliweki tupa꞉ haloma꞉eki handelememe.  
\v 10 Ketisona꞉ biki daeyaena꞉ loluekema꞉ nikita꞉ hone na wiki haliweki haloma꞉pate ikita꞉ Ketisona꞉ hauna꞉ hone wotu wilimi haliweki halememe. Nikita꞉ honkopu na haloma꞉pate ikita꞉ honkopu wotu halememe. Ika꞉ biki laasemepate pa niki pa꞉ta꞉ biki na ula꞉ haliwekie la alememe.  
\v 11 Amba꞉ make ame make nikita꞉ ne ikali tea꞉ma꞉ homa꞉tiki pu hata꞉ mo dau make wotu dia꞉ya꞉la꞉ haliweki haloma꞉me. Haliwekima꞉ niki pa litolo ombu haena꞉ make kutupa ota꞉ nika꞉ da pa꞉ta꞉ na hake pa pominolo hata꞉ta꞉  
\v 12 nika꞉ kikima꞉ kone mo ka꞉nda꞉piki e wotu poka꞉tiki pu haloma꞉me. Kutupa niki kitaaseme wanda꞉hali pa꞉ta꞉ epeke wamopiki pima꞉ kone epeaasoma꞉me. Tanda pita꞉la꞉ haumanu ku halemeeki make pa meatiao pu haloma꞉me.  
\v 13 Niki laaseme wanda꞉hali pa꞉ta꞉ make epeke pimanu lo hombo peaasoma꞉me. Nikita꞉ do kenkena꞉ ne sambe baasa꞉ ale manuma꞉ handoloma꞉me. Kutupa amba꞉ make ame make nikita꞉ do kenke wanda꞉halina꞉ ha̱i̱ ta̱la̱꞉la̱꞉ ekima꞉ handoloma꞉me.   
\p
\v 14 Iki pa꞉ta꞉ I̱ma꞉ do wape polo ekita꞉ iki yaala꞉ma꞉ homaaluekema꞉ na pua꞉me. Pate ikita꞉ yaka weki wandiki leke haleme ekina꞉ ika꞉ hone tikitiki yaluekema꞉ pua꞉me.  
\v 15 Ika꞉ Ketiso haleme ekina꞉ pi wala꞉la꞉ haliwekita꞉ mo 10 daosenimanu mea haena꞉ lemeka꞉na꞉ta꞉ epolo pa꞉la꞉pate pa ika꞉ apa꞉ta꞉ homekee. Ika꞉ Yesu Ketiso pa꞉ta꞉ haleme ekina꞉ I̱ta꞉ ika꞉ apa꞉ halome. Koto mo Pi Seliapo iki pa꞉ta꞉ mea epolo ekina꞉ loa꞉me.  
\v 16 Koto ekina꞉ iki pa꞉ta꞉ dupa꞉pe laa I̱ma꞉ honke tieke alome. I̱ma꞉ pitoloeki moka꞉la hata꞉ kone pipe la alome.  
\v 17 Koto ekina꞉yeke hande Timodita꞉ iki pa꞉ta꞉ tapaasome. Ipikita꞉ yaka pukima꞉ homolo weki hata꞉ta꞉ ipika꞉ Ketiso hala꞉eki make ota꞉eki hala꞉me. I̱ma꞉ Ketiso hata꞉ hau pu haloeki make mo siosi paeyaona꞉ wanda꞉hali paeyao pa꞉ta꞉ walo haloeki make Timodima꞉ ika꞉ hone paa u tiaalieke.   
\p
\v 18 Iki ame̱le̱ mandane haliwekima꞉ta꞉ Polota꞉ paa na ipilieke laa hone witolo hata꞉ Nika꞉ kone ana꞉ pa꞉la꞉me laa hone wia halememe.  
\v 19 Pate Tekehalima꞉ hone pia꞉ka꞉na꞉ta꞉ I̱ma꞉ iki pa꞉ta꞉ koto kone paa ipulueke. Paa epoa꞉ka꞉na꞉ta꞉ mo hande Niki kone ana꞉ pa꞉la꞉me aleme haliwekina꞉ pa alemeeki manuta꞉ hone na wiki ika꞉ ota꞉ ana꞉na꞉ pea꞉pekeeki manuta꞉ pa a꞉pa handa weilueke.  
\v 20 Do ekina꞉yeke loa꞉me. Koda꞉na꞉ Kilu Tombuao Hala꞉ ekita꞉ pa pima꞉ ala꞉eki dia꞉pate ota꞉ wele pita꞉la꞉eki homekee.  
\v 21 Do hone pa꞉la꞉eki yaapota꞉ handoeki hone pelemepe. Iki tikitiki yaluekema꞉ tolo mea mina eponope o yopu hata꞉ta꞉ pukima꞉ homolo hata꞉ eponope.   
\c 5  
\s1 Loke hoeyaeyeke hauta꞉ Siosi wanda꞉hali pa꞉ta꞉ wiekeeki  
\p
\v 1 Hali ma꞉nda꞉na꞉ wanda꞉ hoeyaasa꞉ hau iki ame̱le̱ ula꞉ ekita꞉ amba꞉ opolome. Kutupa mo kutu piki hauta꞉ mo pi na miki wanda꞉halima꞉ make na pu haleme hau kone pa꞉la꞉me. Hande hauta꞉ dupa. Hali ma꞉nda꞉ma꞉ ipika꞉ atekena꞉ wanda꞉ kone ma꞉la꞉ ekina꞉ loa꞉me.  
\v 2 Kutu pa꞉la꞉pate ikana꞉ma꞉ alota꞉ Niki kone ana꞉ pa꞉la꞉me la aleme ekita꞉ ekipa alemepe. Epeke ekita꞉ ikana꞉ma꞉ kutupiki hauna꞉ yaala꞉ma꞉ homolo hata꞉ e̱ lapa꞉peke aleo. Kutupa mo hande hau pieke halita꞉ ika꞉ mombelemeeki mina꞉pa꞉lao yoka꞉pa꞉peke aleo.   
\p
\v 3 I̱ta꞉ yaka loke haota꞉ da ma꞉nda꞉ nane papate halopate yaka temokoma꞉ta꞉ iki ame̱le̱ hala꞉me. Koto ekina꞉ iki ame̱le̱ mandake hata꞉ lolo pua꞉ tupa꞉ I̱ma꞉ta꞉ Tekehali Yesu ipika꞉ bikina꞉ mo hande pamba꞉ na piki hau pieke hali pa꞉ta꞉ pi amba꞉ loa꞉me.  
\v 4 Iki mombela hamina꞉ I̱ make ya temoko kone iki ame̱le̱ hamina꞉ laata꞉ mo Tekehali Yesuna꞉ wele pita꞉la꞉eki niki paeyao pa꞉ta꞉ ta̱lolo haena꞉ta꞉ nikana꞉ma꞉  
\v 5 hande Tekehalina꞉ epolo pa꞉la꞉ Natena꞉ mo halina꞉ temoko da꞉taena꞉yeke ameta꞉ ipika꞉ loke hoeyaena꞉yeke Sadani pa꞉ta꞉ halomana꞉ alome.   
\p
\v 6 Ikana꞉ma꞉ Niki kone ana꞉ pa꞉la꞉me la aleme ekita꞉ popeke na piki pi alememe. Hande opeleme lo halemeeki ma꞉nda꞉ dupa. Mo pombei yaasa꞉ yisitita꞉ hosiki alesikima꞉ kone palaowa paeyao pombei yao hala꞉me laa lo halememe.  
\v 7 Koto ekina꞉ ikana꞉ma꞉ iki kone ota꞉ wamo pea haluekema꞉ do amba꞉ wieke hoke hauna꞉ pombei yaasa꞉ yisitita꞉ ota꞉ yoka꞉ mea baapa꞉peke. Kutu pimika꞉na꞉ta꞉ ikita꞉ pombei na yaake panake palaowama꞉ handilimikie. Kutu pikieki ame do pelememe. Pa ekipeke Ketisota꞉ nika꞉ Lombei Pupa Yapeekeeki ma꞉na꞉siki leke amba꞉ lia haleeke ekina꞉ nika꞉ Lombei Pupa Yapeeke ekina꞉ ne pambaalo poloma꞉eki ame do ana꞉na꞉ ula꞉me.  
\v 8 Koto ekina꞉ nikana꞉ma꞉ hande nika꞉ Lombei Pupa Yapeeke ekina꞉ ne pambuluekema꞉ hande amba꞉ pombei yaala꞉ hoke hau pita꞉la꞉ ekimanu pita꞉ hoeyaapeke ekimanu yaapona꞉ yisiti ula꞉ palaowa na mumana꞉ pea꞉pa꞉peke. Pate mo hande na pombei yaake palaowa mumana꞉ pea꞉pa꞉peke aleo. Koto palaowata꞉ ota꞉eki yalo hokeeki taapuna꞉ dia꞉me.   
\p
\v 9 Amba꞉ iki pa꞉ta꞉ tapaowa꞉ wape pa꞉ta꞉ta꞉ mo tooli ka꞉taaseme wanda꞉hali ame̱le̱ na hapa꞉peke laa loa꞉me.  
\v 10 Koto loa꞉ ekita꞉ hande pi na miki hata꞉ tooli ka꞉taaseme wanda꞉hali make o mo pi ula꞉ ekimanu yambeleme wanda꞉hali make o toopi tima꞉ wepia ula꞉ ale pa꞉ta꞉ panda꞉ puniaaseme wanda꞉hali make hande pita꞉ koto wanda꞉hali pa꞉ta꞉ na loa꞉me. Koto wanda꞉hali ame̱le̱ na haluekema꞉ yeke ikana꞉ma꞉ do kenke a̱i̱ mina꞉pa꞉lapeke ya꞉la꞉me.  
\v 11 I̱ma꞉ loa꞉ ekita꞉ do ekina꞉ yeke loa꞉me. Hali ma꞉nda꞉ma꞉ iki pa꞉ta꞉ alota꞉ I̱ta꞉ ika꞉ Ketiso kamee la ala꞉pate ipikana꞉ma꞉ tooli ka꞉taasa꞉ hau o honumake hau o toopi tima꞉ wepia ula꞉ ale pa꞉ta꞉ panda꞉ puniaasa꞉ hau o pi la la pita꞉la꞉ hau o hoke ikali naa keaasa꞉ hau o pi ula꞉ ekimanu yamba꞉la꞉la꞉ hau pa pulu ombu haya꞉ka꞉na꞉ta꞉ kota꞉ kutupiki hali ame̱le̱ na hapa꞉peke loa꞉me. Kutu piki hali ame̱le̱ mandake pa꞉ta꞉ pua pita꞉ kone ne na napa꞉peke.   
\p
\v 12 Pate pi na miki hama꞉ nane haleme wanda꞉halima꞉ pi yokaalu pea꞉peke ekita꞉ yaka e dia꞉me. Koda꞉ homekema꞉ koto wanda꞉halina꞉ pi yokaalu peaalieke. Kutu pulu pa꞉la꞉pate pa ikana꞉ma꞉ ota꞉ pea꞉peke ekita꞉ mo siosi wanda꞉halina꞉ pi yokaalu peaapeke ya꞉la꞉me.  
\v 13 Hande Baibolo bukana꞉ wape pa꞉la꞉ pi ma꞉nda꞉ta꞉ dupa. Hande hoke halita꞉ ika꞉ mombeleme pa꞉ta꞉ na pitina꞉ leke pa yokaa ta꞉ta꞉ haena꞉ lapa꞉peke laa wape pa꞉la꞉me.   
\c 6  
\s1 Ketiso kame titima꞉ ika꞉ kone pi yokaaluna꞉ hatuku pemekeeki  
\p
\v 1 Iki ame̱le̱ hali homeke ma꞉nda꞉ma꞉ta꞉ ipika꞉ Ketiso yankeke pa꞉ta꞉ eki a꞉nda꞉ pa꞉la꞉eki handaata꞉ kota꞉ Koda꞉na꞉ wanda꞉hali ame̱le̱ hata꞉ na epeaake pa mo pi na miki pi yokaalu handeteke haleme haliweki pa꞉ta꞉ pua lea꞉ka꞉na꞉ta꞉ kota꞉ yaala꞉ma꞉ na homiliepe.  
\v 2 Koda꞉na꞉ wanda꞉hali nikana꞉ma꞉ta꞉ mo kenke wanda꞉hali paeyaona꞉ pi yokaalu pulu poloma꞉ ekita꞉ hone na witelemepe. Mo kenke wanda꞉hali paeyaona꞉eki pea꞉pa꞉peke yea꞉ka꞉na꞉ta꞉ kota꞉ mo iki ame̱le̱ opolo pa hosikieki manuta꞉ ikana꞉ma꞉ pi yokaalu pea꞉peke na ya꞉la꞉pe.  
\v 3 Nikana꞉ma꞉ta꞉ mo enisolo titina꞉ pi yokaalu pulu poloma꞉eki make hone na witelemepe. Kutu pulu poloma꞉ ekina꞉ nikana꞉ma꞉ do kenkena꞉ haloma꞉eki manuna꞉ kone ana꞉na꞉ pi yokaalu pea꞉peke ya꞉la꞉me laa loa꞉me.  
\v 4 Koto ekina꞉ mo hande haumanu iki tukikina꞉ opolo epea꞉ka꞉na꞉ta꞉ kota꞉ ikana꞉ma꞉ mo pi na miki wanda꞉hali pa꞉ta꞉ mea pelimikipe.  
\v 5 Do alo pita꞉ iki yaala꞉ma꞉ homaaluekema꞉ loa꞉me. Iki pa꞉ta꞉ta꞉ epeke hone wita꞉la꞉ hali homeke ma꞉nda꞉ na hala꞉pe. Kutu piki halima꞉ta꞉ mo Ketiso hameke yaapona꞉ pi yokaalu pitelepeeki epeaapeke na ya꞉la꞉pe.  
\v 6 Koto hau na piki pa Ketiso hali ma꞉nda꞉ma꞉ ipika꞉ Ketiso yankeke kone pi yokaaluna꞉ mea puata꞉ pa mo pi na miki haliwekima꞉ kone ipilika꞉ pi yokaalu peaena꞉ la꞉la꞉me.   
\p
\v 7 Ikana꞉ma꞉ pa iki kone pi yokaalu puluekema꞉ mea pulimieki manuta꞉ kota꞉ iki ota꞉ lopa halememe laa peneme yaasa꞉me. Mo iki hoeya꞉ pa꞉la꞉eki manuta꞉ pa wina꞉ paapa꞉peke alee. Kutupa mo pake nala꞉ ekimanu make pa wina꞉ paapa꞉peke alee.  
\v 8 Kutu pea꞉peke ya꞉la꞉pate pa ikana꞉ma꞉ na piki ika꞉ kone hoeya alualu pea pake naa alualu pea ika꞉ yankeketiti pa꞉ta꞉ kone pitelememe.  
\v 9 Hande hoke hau pu haleme wanda꞉halima꞉ Koda꞉na꞉ Kilu Tombuao Hala꞉ ekina꞉ pua꞉peke na ya꞉la꞉ ekita꞉ hone na witelemepe. Ika꞉ kone na makeaapa꞉peke. Mo wanda꞉halina꞉ loke hoeyao haleme wanda꞉hali make toopi tima꞉ wepia ula꞉ ale pa꞉ta꞉ panda꞉ puniao haleme wanda꞉hali make tooli ka꞉tao haleme wanda꞉hali make mo wanda꞉ pa꞉ta꞉ pita꞉la꞉eki hali ma꞉nda꞉ pa꞉ta꞉ kone pu haleme haliweki make kutupu haleme wanda꞉weki make  
\v 10 mo pake no haleme wanda꞉hali make pasa꞉tei hau pu haleme wanda꞉hali make kutupa hoke ikali naa keao haleme wanda꞉hali make pi la la pu haleme wanda꞉hali make dupiki hau pu haleme wanda꞉hali homeke a꞉nda꞉ ota꞉ Koda꞉na꞉ Kilu Tombuao Hala꞉eki pa꞉ta꞉ na pelieke.  
\v 11 Iki pa꞉ta꞉ mandane wanda꞉halita꞉ kutupiki wanda꞉hali haemepate pa Koda꞉ma꞉ ika꞉ hoke haumanu tanda꞉ pea haena꞉ yeke handa ameta꞉ wamo pea halememe. Ameta꞉ Koda꞉ma꞉ iki talopu mea hamina꞉ la꞉la꞉me. Kutupa ame ikita꞉ Koda꞉ pa꞉ta꞉ tikitiki yao hamina꞉ la꞉la꞉me. Kutupiki hauta꞉ mo Tekehali Yesu Ketiso pita꞉ nika꞉ Koda꞉na꞉ Sipitidi yaapoma꞉ peaala꞉me.   
\s1 Ika꞉ loke manuma꞉ta꞉ Koda꞉na꞉ biki mea a꞉meiyaapekeeki  
\p
\v 12 Hali homeke a꞉nda꞉ma꞉ alota꞉ I̱ma꞉ta꞉ ya hone pa꞉la꞉ hau paeyao pea꞉peke ya꞉la꞉me laa leliepate pa mo hau paeyao pitoloma꞉eki manuma꞉ta꞉ niki epeaapeke na ya꞉la꞉me. I̱ma꞉ta꞉ hau paeyao pea꞉peke ya꞉la꞉me laa lapeke ya꞉la꞉pate pa mo hau homeke a꞉nda꞉ pitolo ekima꞉ I̱ta꞉ pa hameke e pokaasa꞉ hali leke hano lena꞉ ota꞉ na lolueke laa loa꞉me.  
\v 13 Hali ma꞉nda꞉ma꞉ alota꞉ Ne nala꞉ ekita꞉ welekena꞉ ekie laata꞉ Pa mo weleke make ne muluekema꞉ hala꞉me laa lelie ekita꞉ ota꞉ ya꞉la꞉pate koto ale yaapo telipina꞉ homeke dina꞉ Koda꞉ma꞉ paeyaalieke. Kutu pulu pa꞉la꞉ ekina꞉ yeke homekema꞉ ipika꞉ lokema꞉ta꞉ ta꞉ta꞉na꞉ loke hoeyaaluekema꞉ na hake pa mo Tekehalina꞉ e pokaaluekema꞉ pa꞉la꞉me. Kutupa make mo Tekehalima꞉ta꞉ nika꞉ lokemanu handeteke haluekema꞉ hala꞉me.  
\v 14 Koda꞉ma꞉ mo Tekehalita꞉ ota꞉ homa꞉la꞉eki pa꞉ta꞉ kone mea tiaeyeke ekina꞉ kota꞉ niki make ipika꞉ wele pita꞉la꞉ ekima꞉ koto tupa꞉ kone mea tiaalieke.   
\p
\v 15 Ika꞉ loke manuta꞉ Ketiso pa꞉ta꞉ tunao hata꞉ ipika꞉eki kone halemeeki hone na witelemepe. Kota꞉ I̱ma꞉ mo Ketisona꞉ loke pa꞉ta꞉ tunao hala꞉ hali hata꞉ yaka loke yoka꞉ meata꞉ mo mani muluekema꞉ hone wita꞉la꞉ wandiki ma꞉nda꞉na꞉ loke yaapo apa꞉taena꞉ loa꞉ka꞉na꞉ta꞉ ana꞉ piliepe. Ota꞉ dia꞉me.  
\v 16 Hali epima꞉ta꞉ mo mani muluekema꞉ hone wita꞉la꞉ wandiki yaapo apa꞉tao hala꞉ ekita꞉ kota꞉ ipilikita꞉ homeke loke kone hala꞉ ekita꞉ hone na witelemepe. Koto mo Baibolo bukana꞉ wape pa꞉la꞉ ekita꞉ dupa. Hande yaapota꞉ homeke loke kone halipipikie laa wape pa꞉la꞉me.  
\v 17 Kutu pita꞉la꞉pate hali epima꞉ Tekehali pa꞉ta꞉ ta꞉ma꞉ni pea haya꞉ka꞉na꞉ta꞉ kota꞉ ipilika꞉ temokota꞉ homeke kone halipipikie.   
\p
\v 18 Ta꞉ta꞉na꞉ loke hoeyaasa꞉ hau manuta꞉ ota꞉ na wataake nindi pea hapa꞉peke. Mandane hoke hau pita꞉la꞉ ekimanu paeyaota꞉ loke hama꞉ nane pita꞉la꞉pate hali epima꞉ ta꞉ta꞉na꞉ loke hoeyaasa꞉ haumanu pia꞉ka꞉na꞉ta꞉ kota꞉ ipika꞉ loke pa꞉ta꞉ kone hoke hau peaasa꞉me  
\v 19 Ika꞉ lokemanu tukiki pa꞉ta꞉ta꞉ mo Holi Sipitidi pitina꞉ ipika꞉ yakopiki da haleme ekita꞉ hone na witelemepe. Kutupa mo Holi Sipitidi pila꞉ ekita꞉ Koda꞉ma꞉ iki pa꞉ta꞉ kita꞉la꞉ ekita꞉ hone na witelemepe. Ikita꞉ ika꞉eki dia꞉me. Koda꞉na꞉eki halememe.  
\v 20 Ipika꞉eki kone hamina꞉yeke ipikana꞉ma꞉ ikita꞉ yenki tiekema꞉ amba꞉ hamba꞉la꞉me. Koto pa꞉la꞉ ekina꞉ ika꞉ loke manuma꞉ Koda꞉na꞉ biki mea a꞉meiyaena꞉ alo hata꞉ handeteke hapa꞉peke.   
\c 7  
\s1 Wanda꞉ mina꞉la꞉ ekina꞉ lota꞉ pita꞉la꞉eki  
\p
\v 1 Ikana꞉ma꞉ hande tapaeme wapena꞉ lota꞉ pimi ekina꞉ hombo peaaso pita꞉ dupa. Hali ma꞉nda꞉ma꞉ wanda꞉ na miki pa haya꞉ka꞉na꞉ta꞉ epeke pita꞉la꞉pate  
\v 2 hande wanda꞉halina꞉ loke hoeyaasa꞉ haumanu wotu ya꞉leke handaata꞉ halima꞉ ipika꞉ wanda꞉ mina꞉la꞉eki make wanda꞉ma꞉ halina꞉ da pula꞉eki make kutu pita꞉la꞉ hauta꞉ epelieke.  
\v 3 Halima꞉ ipika꞉ weteke pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me. Kutupa wanda꞉ma꞉ make haliki pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me.  
\v 4 Koto pa꞉la꞉ ekima꞉ wanda꞉ma꞉ta꞉ ipika꞉ loke ipika꞉ kone na handeteke hala꞉pate halikima꞉ handeteke hala꞉me. Halima꞉ make ipika꞉ loke ipika꞉ kone na handeteke hala꞉pate ipika꞉ wetekema꞉ handeteke hala꞉me.  
\v 5 Kutupa tooli ta꞉ma꞉ni pea hata꞉ta꞉ homekema꞉ ma꞉nda꞉ pa꞉ta꞉ ki pa꞉la꞉me lapeke na ya꞉la꞉me. Hoto ma꞉nda꞉ta꞉ ipilikana꞉ma꞉ pi la꞉ wia Koda꞉ pa꞉ta꞉ yeni puluekema꞉ pao hosiki hapa꞉na꞉e laa lepeka꞉na꞉ta꞉ kota꞉ a꞉pa꞉la꞉pate pa ipilika꞉ loke handeteke halepeeki ana꞉ na pitolo hapina꞉ Sadanima꞉ ipiliki pa꞉ta꞉ hoke hone mea wiaapa꞉na꞉ paa ta꞉ma꞉ni pea hapa꞉peke ya꞉la꞉me.  
\v 6 Do alo pita꞉ la witolo hata꞉ dupa꞉pe laa na alopate pa iki puemena꞉yeke ika꞉ hone pa tikitiki yaowaasome.  
\v 7 Pate iki paeyao I̱ halo tupa꞉ hamina꞉yeke hone pa꞉la꞉pate pa Koda꞉ma꞉ ipika꞉ telipaasa꞉eki manuta꞉ ta꞉ta꞉ ta꞉ta꞉ pikieki telipao hala꞉me.   
\p
\v 8 Mo wanda꞉ na miki o hali na peke pa haleme wanda꞉hali pa꞉ta꞉ make kineke wanda꞉weki pa꞉ta꞉ make do pi alome. I̱ halo tupa꞉ haemeka꞉na꞉ta꞉ epelieke.  
\v 9 Kutu piliepate pa ika꞉ hone pa꞉la꞉ ekita꞉ homu peaapeke na ya꞉ka꞉na꞉ta꞉ kota꞉ wanda꞉ mea꞉pekeeki make halina꞉ da pua꞉pekeeki make ana꞉ pa꞉la꞉me. Hone pa꞉la꞉eki puluekema꞉ ti tala꞉ ekima꞉ handolo haena꞉ hata꞉ta꞉ hoelieke. Koto ekina꞉ mo wanda꞉ mea hali pua pita꞉la꞉ ekita꞉ epelieke.   
\p
\v 10 Kutupa mo tooli tooli peleme wanda꞉halita꞉ iki pa꞉ta꞉ yakaeki na laake mo Tekehalima꞉ dupa꞉pe ala꞉eki kone la kitolome. Halina꞉ da pa꞉la꞉ wanda꞉ma꞉ta꞉ hali mina꞉pa꞉lao pua꞉peke na ya꞉la꞉me.  
\v 11 Pate kutu pia꞉ka꞉na꞉ta꞉ kota꞉ pa pua hao hao o hali pa꞉ta꞉ la꞉ka꞉la paa pea꞉ka꞉na꞉ make epelieke. Halima꞉ make ipika꞉ wanda꞉ yoka꞉peke na ya꞉la꞉me.   
\p
\v 12 Mandane wanda꞉hali pa꞉ta꞉ mo Tekehalina꞉ pi dia꞉ya꞉la꞉pate pa I̱ma꞉ kone dupa alome. Ketiso hali homekema꞉ ipika꞉ wanda꞉ pi na miki wanda꞉ haya꞉ka꞉na꞉ta꞉ kutupa mo wanda꞉ta꞉ haliki yaapo haluekema꞉ hone wia haya꞉ka꞉na꞉ta꞉ kota꞉ mo halima꞉ koto wanda꞉ta꞉ yoka꞉peke na ya꞉la꞉me.  
\v 13 Kutupa make mo Ketiso wanda꞉ homekema꞉ pi na miki hali yaapo haya꞉ka꞉na꞉ta꞉ kutupa mo halima꞉ ipika꞉ wanda꞉ yaapo haluekema꞉ hone wia haya꞉ka꞉na꞉ta꞉ kota꞉ mo wanda꞉ma꞉ta꞉ ipika꞉ haliki mina꞉pa꞉lao pua꞉peke na ya꞉la꞉me.  
\v 14 Do alo pita꞉ do ekina꞉yeke loa꞉me. Hande pi na miki halita꞉ ipika꞉ wanda꞉ yaapo ta꞉ma꞉ni pea hala꞉ ekina꞉ Koda꞉ma꞉ ana꞉e ala꞉me. Kutupa hande pi na miki wanda꞉ta꞉ ipika꞉ Ketiso hali yaapo ta꞉ma꞉ni pea hala꞉ ekina꞉ make kota꞉ Koda꞉ma꞉ ana꞉e ala꞉me. Do aloeki na pia꞉ka꞉na꞉ yoluta꞉ ika꞉ wekiwandiki titita꞉ pa mo Koda꞉ mataake weki wandiki halo pimime. Kutu pulu pelemepate ameta꞉ ika꞉ weki wandikimanu haleme ekita꞉ Koda꞉ma꞉ ana꞉e ala꞉me.  
\v 15 Kutu pu hapeke ya꞉la꞉pate hande pi na miki halima꞉ ipika꞉ Ketiso wanda꞉ mina꞉pa꞉lao pena꞉ yeke hone pia꞉ka꞉na꞉ta꞉ kota꞉ kutu pina꞉e. Mandake tupa꞉ kone mo pi na miki wanda꞉ma꞉ ipika꞉ Ketiso hali pa mina꞉pa꞉laeya꞉ka꞉na꞉ta꞉ kota꞉ kutu pina꞉e. Koto hau tukiki pa꞉ta꞉ta꞉ hande Ketiso hali pa꞉ta꞉ make Ketiso wanda꞉ pa꞉ta꞉ make pota꞉ a꞉mbaapekeeki dia꞉me. Koda꞉ma꞉ wi ala꞉ ekita꞉ iki a꞉nda꞉ peliaaso hata꞉ hamina꞉yeke wi ala꞉me.  
\v 16 Ketiso wanda꞉o. Naka꞉ haliki tamba꞉ minolo halena꞉ ipikita꞉ Ketiso hali haliepe o na haliepe nakana꞉ma꞉ na handeleme. Kutupa Ketiso hali neke make naka꞉ wanda꞉ tamba꞉ minolo halena꞉ ipikita꞉ Ketiso wanda꞉ haliepe o na haliepe nakana꞉ma꞉ na handeleme.   
\s1 Iki wi leeke natena꞉ haemeke tupa꞉ kone pa hao hapa꞉pekeeki  
\p
\v 17 Koda꞉ma꞉ telipea pa kita꞉la꞉ alemanu mea wia hata꞉ make ipikana꞉ma꞉ iki wi leeke a꞉pa haeme tupa꞉ kone pa hao hapa꞉peke. Do hande pi ula꞉ ekita꞉ mo siosi wanda꞉hali paeyao pa꞉ta꞉ wala꞉tiki pu halome.  
\v 18 Hali homeke ma꞉nda꞉ta꞉ Koda꞉ma꞉ wi leeke natena꞉ ipikita꞉ sekemesaisi hau pea hata꞉ opuata꞉ kota꞉ ipikana꞉ma꞉ hande sekemesaisi hau pa꞉la꞉ ekita꞉ honialuekema꞉ taapa꞉peke na ya꞉la꞉me. Kutupa hali homeke ma꞉nda꞉ta꞉ Koda꞉ma꞉ wi leeke natena꞉ ipikita꞉ sekemesaisi hau na piki hata꞉ opuata꞉ kota꞉ ipikana꞉ma꞉ sekemesaisi hau puluekema꞉ taapa꞉peke na ya꞉la꞉me.  
\v 19 Mo hande sekemesaisi hau pita꞉la꞉eki make na pita꞉la꞉eki make telipina꞉ aleta꞉ ma꞉nda꞉ dia꞉ya꞉la꞉pate pa mo Koda꞉na꞉ pi ula꞉ ekimanu opua pita꞉la꞉ ekita꞉ kotota꞉ hau tiekee.  
\v 20 Iki paeyaoma꞉ Koda꞉ma꞉ wi leeke natena꞉ haemeke tupa꞉ kone paa hapa꞉peke ya꞉la꞉me.  
\v 21 Neketa꞉ pa hameke e pokaase hali hata꞉ Koda꞉na꞉ wi leekeeki opipe. Kota꞉ nakana꞉ma꞉ kotoeki pa꞉ta꞉ ka꞉nda꞉ma꞉ na homa꞉peke. Pate naka꞉ hande pa hameke e pokaaseeki mina꞉pa꞉laalena꞉ pota꞉ lombea꞉ka꞉na꞉ta꞉ kota꞉ pua꞉peke ya꞉la꞉me.  
\v 22 Do ekina꞉yeke loa꞉me. Mo pa hameke e pokaasa꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Tekehalima꞉ ka꞉la꞉pa꞉ tapao haena꞉ la꞉la꞉ halie. Koto tupa꞉ kone mo pa hala꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Ketisona꞉ e pa hameke pokaasa꞉ halie.  
\v 23 Koda꞉ma꞉ yenki tiekema꞉ iki hamba꞉la꞉me. Koto ekina꞉ mo haliwekina꞉ pa hameke e pokaaseme haliweki na hapa꞉peke.  
\v 24 Kametitio. Iki paeyaota꞉ Koda꞉ma꞉ iki wi leeke natena꞉ haeme tupa꞉ kone pa ame make Koda꞉ ame̱le̱ hao hapa꞉peke.   
\s1 Wanda꞉ na miki o hali na peke kutupa kineke wanda꞉halina꞉ ekina꞉ lota꞉ pita꞉la꞉ ekimanu  
\p
\v 25 Hande wanda꞉ na miki o hali na peke weki wandiki pa꞉ta꞉ honke leme ekita꞉ mo Tekehalima꞉ dupa꞉pe ala꞉ pi dia꞉ya꞉la꞉pate pa mo I̱ma꞉ hone witoloeki kone alome. Kutupa Koda꞉ma꞉ I̱ pa꞉ta꞉ a꞉ta꞉ma꞉ homa꞉la꞉ ekina꞉ yeke ikana꞉ma꞉ I̱ma꞉ alo ekina꞉ hone tulaapeke ya꞉la꞉me loa꞉me.  
\v 26 I̱ma꞉ dupa alome. Do hande ka꞉nda꞉ pa꞉la꞉ nate hala꞉ ekina꞉ yaka honema꞉ta꞉ mo epeke ekita꞉ dupa. Homekema꞉ ipika꞉ ame do haleme tupa꞉ paa haena꞉ lapeke ya꞉la꞉me laa hone witolome.  
\v 27 Neketa꞉ wanda꞉ melepe. Kota꞉ wanda꞉ yokuluekema꞉ hone na wia꞉peke. Neketa꞉ wanda꞉ na miki haeka꞉na꞉ta꞉ kota꞉ wanda꞉ muluekema꞉ hone na wia꞉peke.  
\v 28 Koto alopate pa wanda꞉ mika꞉na꞉ta꞉ hoke hau na piteleme. Kutupa wandiki make halina꞉ da pea꞉ka꞉na꞉ta꞉ hoke hau na pita꞉la꞉me. Koto hau pea꞉peke ya꞉la꞉ ekita꞉ mo wanda꞉halina꞉ tooli tooli haasa꞉ ekina꞉ epolo pa꞉la꞉ ka꞉nda꞉ manuta꞉ iki pa꞉ta꞉ make a꞉paapa꞉na꞉yeke loa꞉me.   
\p
\v 29 Kametitio. Koto aloeki manuta꞉ do ekina꞉yeke loa꞉me. Nate wopu dia꞉yalo haena꞉ta꞉ ameta꞉ wanda꞉ miki haliwekita꞉ wanda꞉ na miki haleme haliweki tupa꞉ hapa꞉peke.  
\v 30 Kutupa e̱ aleme wanda꞉halima꞉ e̱ na leke haleme wanda꞉hali tupa꞉ hapa꞉peke. Kutupa ki taleme wanda꞉halima꞉ ki na teke haleme wanda꞉hali tupa꞉ hapa꞉peke. Kutaa make mo hamba꞉tiki pu haleme wanda꞉halima꞉ta꞉ ala꞉ta꞉ ala꞉ta꞉ na hambeke wanda꞉hali leke hapa꞉peke.  
\v 31 Kutupa kenkena꞉ ale manuma꞉ e pokeleme wanda꞉halima꞉ta꞉ mo kenkena꞉ alemanu pa꞉ta꞉ hone wopu na wiki wanda꞉hali leke hapa꞉peke. Do ekina꞉yeke loa꞉me. Do hande kenketa꞉ ame ula꞉ tupa꞉ pa na u halieke.   
\p
\v 32 Ikana꞉ma꞉ hone eleke eleke u halemeeki manuta꞉ I̱ta꞉ hone na pa꞉la꞉me. Wanda꞉ na miki halima꞉ta꞉ mo Tekehalina꞉ hone pa꞉la꞉ ekimanu epeke tupa꞉ puluekema꞉ hone witolo hata꞉ Tekehalina꞉ e pokaasa꞉ ekina꞉ hone u hala꞉me.  
\v 33 Kutu pu hala꞉pate mo wanda꞉ miki halima꞉ta꞉ ipika꞉ wanda꞉ ta꞉na꞉ma꞉ homaaluekema꞉yeke do kenkena꞉ ula꞉ alemanu pa꞉ta꞉ hone u hala꞉me.  
\v 34 Koto ekina꞉ ipika꞉ hone ula꞉ ekita꞉ putupa yaapo ualu pa꞉la꞉me. Kutupa mo halina꞉ da na peke wanda꞉ma꞉ make moputali wandikima꞉ make Tekehalina꞉ e pokaasa꞉ ekina꞉ hone u hala꞉me. Ipika꞉ hone pa꞉la꞉ ekita꞉ ipika꞉ loke temoko make Tekehali pa꞉ta꞉ hata꞉ yako peaena꞉yeke hone wilieke. Kutu piliepate pa mo halina꞉ da pa꞉la꞉ wanda꞉ma꞉ta꞉ ipika꞉ haliki ta꞉na꞉ma꞉ homaaluekema꞉yeke do kenkena꞉ ula꞉ alemanu pa꞉ta꞉ hone u hala꞉me.  
\v 35 I̱ma꞉ do alo pi manuta꞉ iki tamba꞉ muluekema꞉yeke alome. I̱ma꞉ ika꞉ pota꞉manu sa꞉sa꞉ puluekema꞉ na alopate ikana꞉ma꞉ tikitiki yao hata꞉ hone eleke eleke na wiki Tekehalina꞉ e ota꞉ epeke tupa꞉ pokaama꞉na꞉yeke loa꞉me.   
\p
\v 36 Koto ekina꞉ta꞉ hali homeke a꞉nda꞉ma꞉ ipika꞉ mulu pa꞉la꞉ wandiki hapulu pa꞉la꞉ wale alemanu wia hata꞉ kone paa na mulueke laa kutupa wetepena꞉ mo halina꞉ honema꞉ o ipika꞉ pita꞉la꞉ haumanu mo wandiki pa꞉ta꞉ epeke tupa꞉ na pia꞉ka꞉na꞉ make o ipika꞉ hone pa꞉la꞉eki manuta꞉ ota꞉ honkopu wotu haaso hata꞉ hapuluekee hone wia꞉ka꞉na꞉ta꞉ kota꞉ mina꞉ lapeke ya꞉la꞉me. Ipika꞉ hone pa꞉la꞉eki pia꞉ka꞉na꞉ta꞉ kota꞉ kutu pita꞉la꞉ ekima꞉ta꞉ hoke hau ma꞉nda꞉ na pita꞉la꞉me.  
\v 37 Pate hali ma꞉nda꞉ma꞉ aleta꞉ ma꞉nda꞉ dia꞉ya꞉la꞉ ekina꞉ pa ipika꞉ honema꞉ kone honkopu haaso hata꞉ ipika꞉ lokena꞉ hone pa꞉la꞉eki manuta꞉ ana꞉na꞉ handeteke hapeke ya꞉leke handaata꞉ mo ipika꞉ mulu pa꞉la꞉ wandikita꞉ na mulueke alo hata꞉ dikita꞉ na mualu piki pa hao hapana꞉e laa hone ota꞉ na la꞉ka꞉lea꞉ka꞉na꞉ta꞉ kota꞉ koto pita꞉la꞉ ekima꞉ make epeke hau kone pita꞉la꞉me.  
\v 38 Kutupa mo hali ma꞉nda꞉ epima꞉ ipika꞉ yenki ula꞉ wandiki hapia꞉ka꞉na꞉ta꞉ kota꞉ epekeeki pita꞉la꞉pate pa mo ipika꞉ yenki wilie wandiki na hapilie hali ipikita꞉ mo lombeipiki epeke hau tieke pita꞉la꞉me.   
\p
\v 39 Kutupa mo halina꞉ da pa꞉la꞉ wanda꞉ma꞉ta꞉ ipika꞉ haliki paa haya꞉ka꞉na꞉ta꞉ kota꞉ ipika꞉ haliki pa꞉ta꞉ hapeke ya꞉la꞉me. Koto pa꞉la꞉pate ipika꞉ haliki homea꞉ka꞉na꞉ta꞉ kota꞉ ipika꞉ hone pa꞉la꞉ halina꞉ da pa꞉ta꞉ pua꞉peke ya꞉la꞉pate pa ota꞉ Ketiso halina꞉ da pea꞉ka꞉na꞉ta꞉ ana꞉ pilieke.  
\v 40 Koto hau pea꞉peke ya꞉la꞉pate I̱ma꞉ hone witolo ekita꞉ dupa. Hande kosa꞉piki wanda꞉ta꞉ pa kosa꞉ piki haeka꞉na꞉ make ota꞉ epelieke hone witolome. I̱ma꞉ta꞉ koto tupa꞉ hone witolopate pa ya honema꞉ta꞉ mo Koda꞉na꞉ Sipitidita꞉ I̱ pa꞉ta꞉ make pila꞉me hone witolo hata꞉ do pi alome.   
\c 8  
\s1 Toopi tima꞉ wepia ula꞉ ale pa꞉ta꞉ ne hala꞉la꞉eki  
\p
\v 1 Kutupa hande toopi tima꞉ wepia ula꞉ ale pa꞉ta꞉ ne hala꞉la꞉ hauna꞉ wape pea lota꞉ pimi ekita꞉ dupa alome. Niki paeyaoma꞉ta꞉ mo handa꞉la꞉ hauta꞉ hone uluma꞉me. Pate mo handa꞉la꞉ hauma꞉ta꞉ mo hakoko lita꞉la꞉ hau pu tiaasa꞉pate pa mo pukima꞉ homa꞉la꞉ hauma꞉ta꞉ wanda꞉halina꞉ hone tulaasa꞉ ekita꞉ daeya haena꞉ ala꞉me.  
\v 2 Hali ma꞉nda꞉ epima꞉ I̱ma꞉ ota꞉ handa ulume laa hone wia꞉ka꞉na꞉ta꞉ kota꞉ koto halina꞉ handa꞉la꞉ ekita꞉ ana꞉ na pa꞉la꞉me.  
\v 3 Koto pa꞉la꞉pate hali epima꞉ Koda꞉ pa꞉ta꞉ pukima꞉ homea꞉ka꞉na꞉ta꞉ kota꞉ Koda꞉ma꞉ koto hali ota꞉ handa꞉la꞉me.   
\p
\v 4 Kutupa mo toopi tima꞉ wepia ula꞉ ale pa꞉ta꞉ halea꞉ nemanu pa naleme ekita꞉ nikana꞉ma꞉ handoloma꞉ ekita꞉ dupa. Mo homeke Koda꞉ homeke hala꞉ ekina꞉ hande toopi tima꞉ wepia ula꞉ aleta꞉ ota꞉eki dia꞉me hone witoloma꞉me.  
\v 5 Mo wanda꞉hali manuma꞉ lo haleme koda꞉manu make teke halimanu make oli ya nane haya꞉ka꞉na꞉ make do kenke nane haya꞉ka꞉na꞉ make pa pina꞉ma꞉  
\v 6 nikana꞉ma꞉ nika꞉ Koda꞉ homeke kone nika꞉ Apa꞉ hata꞉ ipikita꞉ ala꞉ta꞉ ala꞉ta꞉ paeyao wepia wina꞉ la꞉la꞉ Koda꞉ hala꞉me laata꞉ Nikita꞉ ipiki pa꞉ta꞉ ti lao haloma꞉me. Kutupa make mo Tekehali homeke homeketa꞉ Yesu Ketiso hala꞉me. Ipikana꞉ma꞉ ala꞉ta꞉ ala꞉ta꞉ paeyao wepia wina꞉ laata꞉ niki make amba꞉ da꞉taala꞉me.   
\p
\v 7 Koto do nikana꞉ma꞉ handoloma꞉ ekita꞉ mandane wanda꞉halima꞉ta꞉ na handelememe. Mo wanda꞉halima꞉ta꞉ toopi tima꞉ wepia ula꞉ alena꞉ haumanu pia꞉tiki pu haemeke ekina꞉ ame make kutupiki nemanu nalo hata꞉ta꞉ mo hande toopi tima꞉ wepia ula꞉ alena꞉ ekie hone witelememe. Kutu piki wanda꞉halina꞉ hone na lumba witolo hata꞉ kone mo hande ne naloma꞉ ekima꞉ta꞉ niki hoeyaasa꞉me laa hone witelememe.  
\v 8 Koto tupa꞉ hone witelemepate pa mo ne naloma꞉ ekima꞉ta꞉ niki hatuku Koda꞉ teke pa꞉ta꞉ pu hamono lapeke na ya꞉la꞉me. Kutupa mo ne na neke haoma꞉ka꞉na꞉ta꞉ kota꞉ koto ekima꞉ nika꞉ hau ma꞉nda꞉ yonka꞉lamono alu na pealieke. Kutupa ne nolo poloma꞉ ekima꞉ make mandane haumanu apa꞉tao na mulumeke.   
\p
\v 9 Koto pa꞉la꞉pate ikana꞉ma꞉ mo ika꞉ ana꞉na꞉ handaa pitelemeeki manuma꞉ta꞉ pa mo hone wopu na tulaaleme wanda꞉hali hoke hau pea lopaapa꞉na꞉yeke wotu handeteke hapa꞉peke.  
\v 10 Do ekina꞉yeke loa꞉me. Neketa꞉ handele hali hata꞉ pa toopi tima꞉ wepia ula꞉ alena꞉ yeni hau pita꞉la꞉ da pa꞉ta꞉ pua pita꞉ ne naleme ekita꞉ mo dupiki hauna꞉ hone na lumba ula꞉ halima꞉ neke handea꞉ka꞉na꞉ta꞉ kota꞉ naka꞉ pitele ekima꞉ta꞉ mo toopi ti wepia ula꞉ ale pa꞉ta꞉ yeni hau pita꞉la꞉ nemanu nena꞉ loluekema꞉ na sutiaalipikipe.  
\v 11 Kutupa do naka꞉ handele ekima꞉ta꞉ mo hande honkopu na hake halita꞉ hoeyaalipikie. Koto halita꞉ Ketiso ipiki pa꞉ta꞉ homa꞉la꞉ hali naka꞉ kame kone hoeyaalipikie.  
\v 12 Kutu pitele hauma꞉ta꞉ mo ika꞉ hone wotu na lumba wilimi yankekemanu hoeyaeka꞉na꞉ta꞉ kota꞉ neketa꞉ Ketiso pa꞉ta꞉ make hoke hau pilipikie.  
\v 13 Koto ekina꞉ yaka kamena꞉ ne nala꞉ ekima꞉ta꞉ ipiki hoke hau pina꞉ mea lopaapeke yea꞉ka꞉na꞉ta꞉ kota꞉ I̱ma꞉ mo mindiki ma꞉nda꞉siki hoto homeke a꞉nda꞉ ota꞉ na nolueke. Yaka kame lopaapa꞉na꞉yeke loa꞉me.   
\c 9  
\s1 Mo Aposolo halina꞉ pea꞉pekeeki pita꞉ mea꞉pekeeki yaapo  
\p
\v 1 I̱ta꞉ ka꞉la꞉pa꞉ ta꞉pao halo hali na halope. I̱ta꞉ aposolo hali na halope. Nika꞉ Tekehali Yesu na handoa꞉pe. Ikita꞉ mo I̱ma꞉ Tekehalina꞉ e pokaaso ekina꞉ na halemepe.  
\v 2 Mandane haliwekima꞉ta꞉ I̱ta꞉ aposolo hali na halome hone wimika꞉na꞉ta꞉ kota꞉ pa pina꞉ma꞉ ikana꞉ma꞉ kutupiki hone ota꞉ wia꞉peke na ya꞉la꞉me. Iki Ketiso pa꞉ta꞉ haleme ekima꞉ta꞉ kota꞉ pa I̱ta꞉ Tekehalina꞉ aposolo hali haloeki peneme yaasa꞉me.   
\p
\v 3 Mo I̱ laaseme haliwekina꞉ pimanu hombo peaasoeki dupa alome.  
\v 4 I̱ta꞉ yaka ena꞉ yenkita꞉ mo ne ikali napekeeki ana꞉ na pa꞉la꞉pe.  
\v 5 Mo mandane aposolo haliwekima꞉ make mo Tekehalina꞉ hameke titima꞉ make Pidama꞉ make koto haliwekima꞉ piteleme tupa꞉ I̱ make Ketiso wanda꞉ mea hatuku pomua꞉peke ana꞉ na pa꞉la꞉pe.  
\v 6 Dia꞉me mo Banabasi diki yaapo homekema꞉ mo yenki mulu pa꞉la꞉ e poka꞉peke ekima꞉ kone dika꞉ ne alemanu hamba꞉peke ya꞉la꞉pe.  
\v 7 Hali epima꞉ mo ami hali hata꞉ ipika꞉ manima꞉ kone ipika꞉ ne dau hamba꞉peke ya꞉la꞉pe. Dia꞉me. Kutupa mo e teke halima꞉ ipika꞉ noka꞉pa꞉la꞉ ne kone napeke na ya꞉la꞉pe. Kutupa make mo sipisipi ma꞉na꞉manu handeteke hala꞉ hali epima꞉ ipika꞉ ma꞉na꞉ andu yupa napeke na ya꞉la꞉pe.   
\p
\v 8 Do alo ekita꞉ mo kenke wanda꞉halina꞉ hau pitelemeeki homeke dia꞉me pa mo Lo Pimanu make homeke pi kone ala꞉me.  
\v 9 Mosesima꞉ hande Lo Pimanu wape pa꞉la꞉ ekina꞉ do tupa꞉ ala꞉me. Mo kao ma꞉na꞉ma꞉ mo palaowa kilikimanu ambuku mea baaluekema꞉ ankema꞉ pitolo haena꞉ta꞉ ipika꞉ kake na tonkaapeke laa la꞉la꞉me. Koto la꞉la꞉ ekina꞉ta꞉ Koda꞉ma꞉ mo ma꞉na꞉manu pa꞉ta꞉ homeke hone wita꞉la꞉pe.  
\v 10 Koto la꞉la꞉ ekita꞉ Koda꞉ma꞉ niki pa꞉ta꞉ make hone wita꞉la꞉pe. Aowe. Niki pa꞉ta꞉ make hone wita꞉la꞉me. Kenke awa꞉la꞉ halima꞉ make kiliki tala꞉la꞉ halima꞉ make e pokolo hata꞉ mo ena꞉ ipilika꞉ nemanu ana꞉na꞉ muluekema꞉ hone wia e poka꞉peke ya꞉la꞉me.  
\v 11 Kutupa nikana꞉ma꞉ta꞉ iki pa꞉ta꞉ mo Koda꞉na꞉ Sipitidina꞉ wae alemanu nokopoma꞉me. Kutupa ame mo kiliki mina꞉la꞉ tupa꞉ ikana꞉ma꞉ mandane alemanu niki pa꞉ta꞉ kimika꞉na꞉ta꞉ ana꞉ na pa꞉la꞉pe.  
\v 12 Mandane haliwekima꞉ta꞉ iki pa꞉ta꞉ ula꞉ alemanu muluekema꞉ hone wia꞉peke yaeya꞉ka꞉na꞉ta꞉ kota꞉ nikana꞉ma꞉ iki lombei pitolo hata꞉ ota꞉ muluekema꞉ ana꞉ na pa꞉la꞉pe. Dia꞉me ota꞉ mea꞉peke ya꞉la꞉pate pa na minoloma꞉me. Do ekina꞉yeke loa꞉me. Mo Ketisona꞉ Pi Seliapo pula꞉eki sa꞉sa꞉ peaapa꞉na꞉yeke hande ka꞉nda꞉manu paeyao niki honumake sikima꞉ wotu mu haloma꞉me.   
\p
\v 13 Mo Tembolo da pa꞉ta꞉ e pokeleme haliwekima꞉ta꞉ koto pa꞉ta꞉ kone ika꞉ nemanu mu haleme ekita꞉ handelememe. Kutupa hande ma꞉na꞉ lia olodana꞉ wia halo haleme haliweki ikana꞉ma꞉ make mo limi hotekemanu pa꞉ta꞉ mandaneeki mu haleme ekita꞉ handelememe.  
\v 14 Koto tupa꞉ kone mo Tekehalina꞉ pi ula꞉eki dupae. Koda꞉ ipika꞉ Pi Seliapo walaaseme haliwekima꞉ta꞉ koto e pokolo hata꞉ kone ika꞉ ana꞉na꞉ hapeke ekimanu mea꞉peke ya꞉la꞉me la꞉la꞉me.   
\p
\v 15 Koto la꞉la꞉pate I̱ma꞉ta꞉ koto tupa꞉ aleta꞉ ma꞉nda꞉ na molome. Kutupa ame make aleta꞉ ma꞉nda꞉ muluekema꞉ iki pa꞉ta꞉ do wape ota꞉ na tapaasome. Kie laapa꞉na꞉ I̱ amba꞉la homa꞉peke aleo. I̱ma꞉ iki ame̱le̱ ota꞉ pa hameke e pokolo ekina꞉ pi laaso ekita꞉ hali homeke a꞉nda꞉ma꞉ Paeki ala꞉me laa pi laapa꞉na꞉yeke loa꞉me.  
\v 16 I̱ma꞉ hande Pi Seliapo walaaso ekina꞉ta꞉ yaka pi I̱ma꞉ kone laapeke na ya꞉la꞉me. Pa ekipeke mo Tekehalima꞉ dupie la꞉la꞉ ekina꞉ kone pitolome. Koto ekina꞉ I̱ma꞉ mo Pi Seliapo na walaoka꞉na꞉ta꞉ a꞉pei I̱ta꞉ ota꞉ hoke tupa꞉ hapeke ya꞉la꞉me.  
\v 17 Yaka e pokolo ekita꞉ yaka honema꞉ kone wia pokoa꞉ka꞉na꞉ yoluta꞉ kota꞉ mo ena꞉ yenki muluekema꞉ hone ulu pua꞉pate pa yaka hone wia na piki pa mo Koda꞉ma꞉ walea꞉ e kone pokaaso ekina꞉ta꞉  
\v 18 kota꞉ eki yenki mea꞉peke ya꞉la꞉pe. Yaka yenkita꞉ dupae. I̱ma꞉ta꞉ yenki ki pi na leke handaa mo mea꞉peke alemanu na minolo hata꞉ hande Pi Seliapo walaasoeki kone kotota꞉ yaka yenki ana꞉ pa꞉la꞉me.   
\p
\v 19 I̱ta꞉ hali ma꞉nda꞉na꞉ pa hameke e pokaaso hali na hake ya kone halome. Kutupu halopate mandane wanda꞉hali wopu muluekema꞉ yaka hone wia kone wanda꞉hali paeyaona꞉ pa hameke e pokaaso hali halome.  
\v 20 Mo Diu wanda꞉hali muluekema꞉ I̱ta꞉ Diu wanda꞉hali haleme tupa꞉ kone halome. I̱ta꞉ hande Lo Pi manuma꞉ kilu tombuaasa꞉ wanda꞉hali leke na halopate pa koto tupa꞉ haleme wanda꞉hali muluekema꞉ I̱ make iki haleme tupa꞉ kone haowa꞉me.  
\v 21 Koto tupa꞉ kone mo Diendaili wanda꞉hali ame̱le̱ hata꞉ koto wanda꞉hali muluekema꞉ ikana꞉ma꞉ mo Diu wanda꞉halina꞉ Lo Pimanu pa꞉ta꞉ na haleme tupa꞉ I̱ make koto tupa꞉ halome. Do alo ekima꞉ta꞉ I̱ta꞉ Koda꞉na꞉ pi ula꞉eki yamba꞉la꞉ hali leke halome pi na leke I̱ta꞉ Ketisona꞉ pi ula꞉eki pa꞉ta꞉ teliolo hali halo ekina꞉ loa꞉me.  
\v 22 Mandane detepiki hone tulaaseme wanda꞉hali ame̱le̱ hata꞉ I̱ma꞉ta꞉ iki muluekema꞉ pa detepiki hali leke halome. Koto ekina꞉ wanda꞉hali paeyao pa꞉ta꞉ hau paeyaoma꞉ iki muluekema꞉ iki haleme tupa꞉ kone I̱ make hatiki pu halome.  
\v 23 Do pitolo ekita꞉ hande Pi Seliapo daeyaena꞉yeke pitolome. Kutupa koto ekima꞉ta꞉ mo Koda꞉ma꞉ wanda꞉hali epeaasa꞉eki manuna꞉ putupiliki ma꞉nda꞉ I̱ma꞉ muluekema꞉yeke pitolome.   
\p
\v 24 Hande anke teline̱li pita꞉la꞉eki nina꞉ta꞉ haliweki wopuma꞉ anke hao pelimipate titina꞉ pelie hali homekema꞉ epeke yenki pua milieke. Koto hauta꞉ paeyaoma꞉ amba꞉ hone wilimime. Koto ekina꞉ iki make titina꞉ pua epeke yenki muluekema꞉ honkopu haaso hata꞉ anke hao pua꞉pa꞉peke.  
\v 25 Anke taline̱li pulu pa꞉la꞉ halima꞉ta꞉ titina꞉ amba꞉la moka꞉la hande hande pitolo hata꞉ ipika꞉ lokena꞉ hone pa꞉la꞉ ekimanu homao taka꞉lao haena꞉yeke pita꞉la꞉me. Kutu piki halima꞉ta꞉ mo kukutu pea꞉peke yenki ale muluekema꞉ do haumanu pita꞉la꞉pate nikana꞉ma꞉ta꞉ ota꞉ kukutu na pea꞉peke yenki ale muluekema꞉ pitoloma꞉me.  
\v 26 Koto pa꞉la꞉ ekina꞉ I̱ta꞉ anke taline̱li pitolo hata꞉ta꞉ lekema꞉ lekema꞉ pea na piki hande opolo polo polo pa꞉ta꞉ handa꞉ paleke pulume. I̱ta꞉ hande epeke hone wiki kiki a꞉nda꞉ pita꞉la꞉ hali leke hata꞉ yaka kikima꞉ pa manda꞉ meaaso na piki ota꞉eki kone pitolome.  
\v 27 Yaka loketa꞉ homu peaaluekema꞉ yaka kone yumbitolo hata꞉ pitolome. Do ekina꞉yeke loa꞉me. I̱ma꞉ta꞉ wanda꞉hali wi la꞉la꞉ pi walaaso hali halopate pa wetepena꞉ I̱ kone halu peaapa꞉na꞉ pitolome.   
\c 10  
\s1 Toopi tima꞉ wepia ula꞉ ale pa꞉ta꞉ kinki pita꞉la꞉ pi  
\p
\v 1 Kametitio. Nika꞉ apa꞉na꞉ ateke amedama꞉ Mosesi telia꞉ mea pulu haena꞉ iki pa꞉ta꞉ piekeeki manuta꞉ hone wia꞉pa꞉peke. Koto tapake paeyaota꞉ hande ya hapi oto pa꞉ta꞉ hao puaata꞉ hande dawala Wepiki Ikali tukikina꞉ tunkula pua epeke tupa꞉ mone tea꞉na꞉ opolo pemekeme.  
\v 2 Kutupa mo wanda꞉halita꞉ hande ya hapi pa꞉ta꞉ make mo dawala ikali pa꞉ta꞉ make Mosesina꞉ anke telia꞉ mea pominolo haena꞉ iki paeyaota꞉ bapitaisi hau pimikime.  
\v 3 Kutupa paeyaoma꞉ hande Koda꞉na꞉ Sipitidima꞉ haleeke ne naata꞉  
\v 4 mo Sipitidima꞉ haleeke ikali make nemekeme. Hande Koda꞉na꞉ Sipitidima꞉ waleeke toopi pa꞉ta꞉ yama꞉ epeeke ikali nemekeme. Kutupa mo wanda꞉hali ame̱le̱ pomieke toopita꞉ Ketiso kone hayekeme.  
\v 5 Kutu pimikipate koto wanda꞉hali wopuna꞉ hauna꞉ta꞉ Koda꞉ma꞉ ta꞉na꞉ma꞉ na homeekeme. Kutupa mo hapu hayeke alena꞉ ika꞉ tokomanu koto pa꞉ta꞉ wia꞉tiki pimikime.   
\p
\v 6 Koto ekina꞉ mo tapakema꞉ pimikieki manuma꞉ta꞉ niki manda꞉ meaasa꞉me. Ikana꞉ma꞉ hoke haumanu puluekema꞉ taapemeke tupa꞉ nikana꞉ma꞉ kutupiki haumanu peaapa꞉na꞉ yeke kinki pita꞉la꞉me.  
\v 7 Kutupa iki ame̱le̱ mandane wanda꞉halima꞉ toopi tima꞉ wepia ula꞉ ale pa꞉ta꞉ yeni hau pimiki tupa꞉ nikana꞉ma꞉ peaapa꞉na꞉ yeke wala꞉la꞉me. Mo Baiboloma꞉ alota꞉ Wanda꞉halima꞉ta꞉ ne ikali naa kealuekema꞉ pitimikipate pa hoki naneta꞉ mo haliwekima꞉ wanda꞉weki tonka꞉na꞉ hoke telepo la alualu pimikime laa la꞉la꞉me.  
\v 8 Mandane kutupiki haumanu pimiki wanda꞉halita꞉ homeke natena꞉ kone 23 daoseni homemekeme. Koto ekina꞉ nikana꞉ma꞉ kutu piki haumanu na piki pa yankeke ma꞉nda꞉na꞉ loke hoeyaasa꞉ haumanu na pumana꞉ pea꞉pa꞉peke.  
\v 9 Ikana꞉ma꞉ ika꞉ hoke hau manuma꞉ Koda꞉ma꞉ pia꞉ handeeke tupa꞉ nikana꞉ma꞉ mo Tekehali pa꞉ta꞉ hoke hone u tiaaluekema꞉ hone na umana꞉ pea꞉pa꞉peke. Mo hande mandane kutupiki hau pimiki wanda꞉halita꞉ mo hoke ketoma꞉ aweeke ekima꞉ homemekeme.  
\v 10 Kutupa nikana꞉ma꞉ Koda꞉ pa꞉ta꞉ pi la la na pumana꞉ pea꞉pa꞉peke. Mo hande mandane wanda꞉halima꞉ kutupiki hau pimiki handaata꞉ mo lu homaasa꞉ enisoloma꞉ iki liekeme.   
\p
\v 11 Mo hande wanda꞉hali pa꞉ta꞉ pimiki ekimanu paeyaoma꞉ta꞉ mo mandane wanda꞉hali paeyao manda꞉ mealuekema꞉ pa꞉la꞉me. Kutupa niki pa꞉ta꞉ kinki pina꞉yeke amba꞉ wape pea ula꞉me. Niki haloma꞉ ekita꞉ paeyaalo pa꞉la꞉ natena꞉ teke pa꞉ta꞉ ya꞉leke handa loa꞉me.  
\v 12 Koto ekina꞉ mo some epima꞉ I̱ta꞉ da̱o̱la hata꞉ epeke tiao halome laa hone wia꞉ka꞉na꞉ta꞉ kota꞉ koto someta꞉ lopaapa꞉na꞉ wotu hapeke aleo.  
\v 13 Mo iki pa꞉ta꞉ la handa꞉la꞉eki manuta꞉ mo wanda꞉hali paeyao pa꞉ta꞉ pa ipu hala꞉eki kone ipula꞉pate pa Koda꞉ma꞉ ipika꞉ pi la꞉ wita꞉la꞉ ekita꞉ ota꞉ yao hala꞉me. Kutupa ipikana꞉ma꞉ta꞉ mo iki mea ota꞉ lombeipiki lopaapeke ya꞉la꞉ la handa꞉la꞉eki ma꞉nda꞉ na epena꞉ lelieke. La handa꞉la꞉ ekimanu ipulu haena꞉ kone Koda꞉ma꞉ ika꞉ pota꞉ pilao iki tamba꞉ milieke. Mo tamba꞉ mina꞉la꞉ ekina꞉ iki honkopu hao ana꞉na꞉ hamina꞉ lelieke.   
\p
\v 14 Ota꞉ ya kametitio. Koto pa꞉la꞉ ekina꞉ mo toopi tima꞉ wepia ula꞉ ale pa꞉ta꞉ yeni hau peaasa꞉ ekita꞉ la꞉ka꞉la꞉ mina na peaapa꞉peke.  
\v 15 Ikana꞉ma꞉ hone wotu wilimi ekina꞉ do pimanu iki pa꞉ta꞉ alome. Koto ekina꞉ I̱ma꞉ aloeki opuaata꞉ teke weiya handa꞉pa꞉peke.  
\v 16 Hande Koda꞉ma꞉ niki epeaala꞉ kapona꞉ noluekema꞉ hata꞉ Koda꞉ pa꞉ta꞉ keiyae pi laa nalo hata꞉ta꞉ Ketiso ipika꞉ we pa꞉ta꞉ na telipaasoma꞉pe. Kutupa hande pindipindi pea ula꞉ palaowa make nalo hata꞉ta꞉ Ketiso ipika꞉ loke mindiki pa꞉ta꞉ na telipaasoma꞉pe.  
\v 17 Palaowa punka homeke ya꞉leke handaata꞉ niki paeyao wotu kone homeke loke mindiki haloma꞉me. Hande homeke palaowa punka telipaasoma꞉ ekina꞉ loa꞉me.   
\p
\v 18 Mo Isulai wanda꞉halima꞉ pimikieki make hone wia꞉pa꞉peke. Hande lia haleeke hoteke ne alemanu nemeke haliwekita꞉ mo oloda pa꞉ta꞉ wiekeeki kone na telipaasemepe.  
\v 19 Do alo ekina꞉ teketa꞉ eki epina꞉ alope. Hande toopi tima꞉ wepia ula꞉ ale pa꞉ta꞉ hala꞉la꞉ nemanu pita꞉ toopi tima꞉ wepia ula꞉ ale yaapona꞉ta꞉ ota꞉ekie alope.  
\v 20 Dia꞉me. Do ekina꞉ alome. Mo pi na miki haliwekima꞉ ma꞉na꞉ lia haleme ekita꞉ koto Koda꞉ pa꞉ta꞉ na haleke pa mo hoke temokomanu pa꞉ta꞉ kone halememe. Kutupa ikita꞉ mo hoke temokomanu ame̱le̱ ta꞉ma꞉ni pea hamina꞉ I̱ta꞉ hone na pa꞉la꞉me.  
\v 21 Ikana꞉ma꞉ Tekehalina꞉ kapo pa꞉ta꞉ make hoke temokona꞉eki apa꞉tao napeke na ya꞉la꞉me. Ikana꞉ma꞉ Tekehalina꞉ teipolona꞉ make mo temokona꞉eki make apa꞉tao napeke na ya꞉la꞉me.  
\v 22 Pate mo Tekehalima꞉ niki pa꞉ta꞉ soka꞉la꞉ma꞉ homena꞉ loluekema꞉ hone witoloma꞉pe. O nika꞉ honkopuma꞉ta꞉ ipika꞉eki lombei pa꞉la꞉me laa hone witoloma꞉pe.   
\p
\v 23 Mandane wanda꞉halima꞉ alota꞉ Nikana꞉ma꞉ nika꞉ hone pa꞉la꞉ hau paeyao pa pea꞉peke ya꞉la꞉me la alemepate pa ika꞉ hau paeyao piteleme ekima꞉ta꞉ iki epeaasa꞉pe. Ikana꞉ma꞉ alota꞉ Nikana꞉ma꞉ nika꞉ hone pa꞉la꞉ hau paeyao pa pea꞉peke ya꞉la꞉me la alemepate hande hau paeyao pitelemeeki manuma꞉ta꞉ niki honkopu haasa꞉ Ketiso wanda꞉hali hamono na ala꞉me.  
\v 24 Hali homekema꞉ ya siki epeke tupa꞉ haluekema꞉ hone wopu na wiki pa iki paeyaoma꞉ ma꞉nda꞉ ma꞉nda꞉ pa꞉ta꞉ kone epeke tupa꞉ haena꞉yeke hone wia꞉pa꞉peke ya꞉la꞉me.   
\p
\v 25 Mo makedi pa꞉ta꞉ ula꞉ hoteke mindikimanu ikana꞉ma꞉ pa hamba napeke ya꞉la꞉me. Kutu puluekema꞉ yeke hone eleke eleke witolo hata꞉ lota꞉ lota꞉ pea꞉peke na ya꞉la꞉me.  
\v 26 Pa ekipeke mo Baiboloma꞉ alota꞉ Kenke make kenkena꞉ ula꞉ alemanu paeyao make Tekehalina꞉ ekie laa wape pa꞉la꞉me.   
\p
\v 27 Pi na miki halima꞉ Ne nomana꞉e laa neke wi lea꞉ka꞉na꞉ta꞉ kutupa naka꞉ honema꞉ polueke hone wika꞉na꞉ta꞉ kota꞉ pua pita mo kita꞉la꞉ napeke alemanu pa꞉ta꞉ta꞉ hone elekeeleke witolo hata꞉ lota꞉ lota꞉ na piki pa napeke.  
\v 28 Kutu pea꞉peke ya꞉la꞉pate hali homeke ma꞉nda꞉ma꞉ neke pa꞉ta꞉ alota꞉ Do neta꞉ toopi tima꞉ wepia ula꞉ ale pa꞉ta꞉ halea꞉ ekie laa lea꞉ka꞉na꞉ta꞉ kota꞉ mo neke pa꞉ta꞉ lea꞉ hali pa꞉ta꞉ make mo hone na lomba꞉la꞉ ekina꞉ make hone witolo hata꞉ koto ne na napeke.  
\v 29 Naka꞉ hone lomba꞉la꞉ ekina꞉ na alopate mo somena꞉ hone na lomba꞉la꞉ ekina꞉ loa꞉me.  
\p Kutupa ma꞉nda꞉ma꞉ dupa lelieke. Kota꞉ mo hali ma꞉nda꞉na꞉ hone na lomba꞉la꞉ ekima꞉ta꞉ do I̱ta꞉ hone lombao hata꞉ pa hone wia pea꞉peke ekita꞉ pa ekipeke handeteke haena꞉ lapeke ya꞉la꞉pe laata꞉  
\v 30 Kutupa make mo yaka ne ula꞉ ekina꞉ Koda꞉ pa꞉ta꞉ keiyae pi loa꞉ka꞉na꞉ta꞉ kota꞉ mo I̱ma꞉ keiyae pi loa꞉ ne nalo ekina꞉ta꞉ ma꞉nda꞉ma꞉ ekipeke I̱ laasa꞉pe laa lelieke.   
\p
\v 31 Pate ikana꞉ma꞉ ika꞉ hau paeyao piteleme ekima꞉ make mo ne ikali naleme ekima꞉ make mo Koda꞉na꞉ biki daeyaena꞉ loluekema꞉ hau paeyao pea꞉pa꞉peke.  
\v 32 Kutupa mo Diu wanda꞉hali pa꞉ta꞉ make Diendaili wanda꞉hali pa꞉ta꞉ make mo Koda꞉na꞉ siosi wanda꞉hali pa꞉ta꞉ make homeke a꞉nda꞉ mea lopaaluekema꞉ hau ma꞉nda꞉ a꞉nda꞉ na pea꞉pa꞉peke.  
\v 33 I̱ma꞉ pu haloeki kone pea꞉pa꞉peke. I̱ma꞉ yaka hau paeyao pitolo ekima꞉ta꞉ mo wanda꞉hali paeyao ta꞉na꞉ma꞉ homaaluekema꞉ pitolome. I̱ kone epeaaluekema꞉ hone na piki pa wanda꞉hali paeyao Koda꞉ma꞉ da꞉tao haena꞉yeke epeaaluekema꞉ hone u halome.   
\c 11  
\p
\v 1 Koto ekina꞉ I̱ma꞉ Ketisona꞉ hau moka꞉la hando halo tupa꞉ ikana꞉ma꞉ make I̱ma꞉ pitoloeki kone moka꞉la hando hapa꞉peke.   
\s1 You a꞉mbao pita꞉ yeni pita꞉la꞉eki  
\p
\v 2 Ikana꞉ma꞉ hoto paeyao I̱ pa꞉ta꞉ hone wiata꞉ I̱ma꞉ iki pa꞉ta꞉ walolo ekimanu pu haleme ekina꞉ta꞉ I̱ma꞉ iki pi laasome.  
\v 3 Koto pa꞉la꞉pate do alo pita꞉ wotu opua꞉pa꞉peke. Haliweki paeyao pa꞉ta꞉ Ketisota꞉ you hala꞉me. Kutupa ipika꞉ wanda꞉na꞉ youta꞉ haliki hala꞉me. Kutupa Ketisona꞉ youta꞉ Koda꞉ hala꞉me.  
\v 4 Koto ekina꞉ hali homeke a꞉nda꞉ma꞉ta꞉ wanda꞉hali ame̱le̱ hata꞉ ipika꞉ you aka꞉ pambao pi wala o yeni pia꞉ka꞉na꞉ta꞉ kota꞉ Ketiso pa꞉ta꞉ yaala꞉ma꞉ homaasa꞉me.  
\v 5 Kutupa make wanda꞉ homeke a꞉nda꞉ma꞉ wanda꞉hali ame̱le̱ hata꞉ ipika꞉ you aka꞉ na dopuaake pi wala o yeni pia꞉ka꞉na꞉ta꞉ kota꞉ ipika꞉ haliki pa꞉ta꞉ yaala꞉ma꞉ homaasa꞉me. Kutu piki wanda꞉ta꞉ mo you itiki makole mea bao hala꞉ wanda꞉ma꞉ handa꞉la꞉me.  
\v 6 Dupiki wanda꞉ma꞉ta꞉ ipika꞉ you aka꞉ na dopua꞉ka꞉na꞉ta꞉ kota꞉ ipika꞉ itiki paeyao makole mea baapeke alee. Kutupa wanda꞉ma꞉ta꞉ you itiki makole mea baasa꞉ ekima꞉ make itiki tunkula꞉la꞉ ekima꞉ make yaala꞉ma꞉ homa꞉la꞉ hau ya꞉leka꞉na꞉ta꞉ kota꞉ aka꞉ dopua hapeke alee.  
\v 7 Halima꞉ta꞉ you aka꞉ na pambao halieke. Pa ekipeke ipikita꞉ Koda꞉na꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me. Koto pa꞉la꞉pate wanda꞉ma꞉ta꞉ ipika꞉ halina꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me.  
\v 8 Do ekina꞉yeke loa꞉me. Koda꞉ma꞉ hali wepitolota꞉ wanda꞉na꞉ loke pa꞉ta꞉ mea na wepia haena꞉ leekepate pa wanda꞉ta꞉ halina꞉ loke pa꞉ta꞉ mea wepia haena꞉ leekeme.  
\v 9 Kutupa make Koda꞉ma꞉ta꞉ wanda꞉ hone witolo hata꞉ halima꞉ tamba꞉ mina꞉yeke na wepia haena꞉ leekepate pa mo hali hone witolo hata꞉ wanda꞉ma꞉ tamba꞉ mina꞉yeke wepia haena꞉ leekeme.  
\v 10 Koto ekina꞉ta꞉ mo enisolo tonuma꞉ hala꞉ ekina꞉ wanda꞉ma꞉ta꞉ ipika꞉ haliki pa꞉ta꞉ homu pea hala꞉ ekina꞉ tombo walolo ipika꞉ you aka꞉ dopua꞉peke ya꞉la꞉me.  
\v 11 Do pimanu alopate pa ameta꞉ niki paeyao Tekehali ame̱le̱ ta꞉ma꞉ni pea hata꞉ta꞉ wanda꞉ hali yaapoma꞉ tamba꞉ mu alualu pitolo hata꞉ hapeke ya꞉la꞉me.  
\v 12 Pa ekipeke wanda꞉ta꞉ halina꞉ loke pa꞉ta꞉ mea wepia haena꞉ leekepate ameta꞉ halita꞉ wanda꞉na꞉ loke pa꞉ta꞉ kini pea ipula꞉me. Kutupa ala꞉ta꞉ ala꞉ta꞉ paeyaona꞉ hala꞉ ekina꞉ teketa꞉ Koda꞉ hala꞉me.   
\p
\v 13 Ikana꞉ma꞉ kone hone wia꞉pa꞉peke. Wanda꞉ homeke a꞉nda꞉ma꞉ pa wanda꞉hali paeyao ame̱le̱ hata꞉ you aka꞉ na dopiki pa yeni pia꞉ka꞉na꞉ta꞉ kota꞉ koto hauta꞉ ti pa꞉la꞉pe.  
\v 14 Mo nika꞉ kenkena꞉ haloma꞉ hauma꞉ kone niki manda꞉ meaasa꞉eki dupa. Haliwekima꞉ta꞉ hokulupeke itiki haena꞉ lea꞉ka꞉na꞉ta꞉ kota꞉ kotota꞉ yaala꞉piki haue.  
\v 15 Pate mo wanda꞉na꞉ hokulupeke itikita꞉ ipika꞉ au la꞉la꞉ ekie. Ipika꞉ itiki hokulupeke ekima꞉ta꞉ ipika꞉ you a꞉mbaasa꞉ ekina꞉yeke loa꞉me.  
\v 16 Koto pa꞉la꞉pate pa hali ma꞉nda꞉ma꞉ do aloeki manuna꞉ ape loluekema꞉ hone wia꞉ka꞉na꞉ta꞉ kota꞉ I̱ma꞉ta꞉ dupiki pi homeke lolueke. Nikana꞉ma꞉ make mo Koda꞉na꞉ siosi tapake paeyao make hau ma꞉nda꞉ na handeke pa I̱ma꞉ do aloeki homeke pu haloma꞉me.   
\s1 Mo hande Tekehalina꞉ ne nala꞉eki  
\p
\v 17 Mo mana꞉ pimanu ame do lolo polo ekina꞉ta꞉ ika꞉ pu haleme ekina꞉ ika꞉ pi na laalueke. Ikana꞉ma꞉ yeni puluekema꞉ mo ika꞉ momba꞉la꞉eki manuma꞉ta꞉ iki na epeaasa꞉pate pa hokeeki kone ipula꞉ ekina꞉ loa꞉me.  
\v 18 I̱ma꞉ mandane opitoloeki dupa. Ikana꞉ma꞉ yeni puluekema꞉ momba꞉la hata꞉ kone tekilipa ta꞉ta꞉ ta꞉ta꞉ pea halememe laa alemeeki opitolo hata꞉ mandaneeki ota꞉ ekie hone witolome.  
\v 19 Kutupa make mo mandane tekilipa ta꞉ta꞉ ta꞉ta꞉ pea halemeeki manuta꞉ ota꞉ hau piteleme wanda꞉hali peneme yaluekema꞉ pea꞉peke ya꞉la꞉ haue laa loa꞉me.  
\v 20 Kutu piteleme hauma꞉ta꞉ ikana꞉ma꞉ homeke pa꞉ta꞉ momba꞉la hata꞉ mo Tekehalina꞉ ne nala꞉ ekita꞉ ota꞉ na nalememe.  
\v 21 Do ekina꞉yeke loa꞉me. Iki homeke homeke loma꞉ ika꞉ ne kone a̱i̱ nolueke laa pitolo hamina꞉ kone mo some homeke ma꞉nda꞉ tea꞉ma꞉ homa haena꞉ laata꞉ ma꞉nda꞉ma꞉ta꞉ hoke ikali naa keaasa꞉me.  
\v 22 Ika꞉ da pa꞉ta꞉manu pita꞉ kone ika꞉ ne ikali napeke na ya꞉la꞉pe. Kutupa Koda꞉na꞉ siosita꞉ Pa ekie laata꞉ mo natehali wanda꞉hali make yaala꞉ma꞉ homaaluekema꞉ pitelemepe. Iki pa꞉ta꞉ eki pi lonope. Kutu piteleme ekina꞉ta꞉ ika꞉ pi laanope. Dia꞉me ika꞉ pi laapeke na ya꞉la꞉me.   
\p
\v 23 I̱ma꞉ hande waloa꞉ ekita꞉ mo Tekehalima꞉ I̱ pa꞉ta꞉ la kia꞉me dupa. Tekehali Yesuma꞉ta꞉ hande timba ipiki pa꞉ta꞉ a꞉nda꞉ lombeeke natena꞉ta꞉ hande palaowa mea mina hata꞉  
\v 24 Koda꞉ pa꞉ta꞉ keiyae pi laata꞉ pindi pindi pea alota꞉ Dota꞉ I̱ma꞉ iki pa꞉ta꞉ kitolo ya loke mindikie laata꞉ I̱ pa꞉ta꞉ hone witolo hata꞉ do hau pea꞉tiki pu hapa꞉peke leekeme.  
\v 25 Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Nemeka꞉na꞉ta꞉ I̱ pa꞉ta꞉ hone witolo hata꞉ pu hapa꞉peke laa leekeme.  
\v 26 Do palaowa make do kapona꞉ make nalo hata꞉ Tekehali epena꞉yeke ipika꞉ homeekeeki walo halimikie.   
\p
\v 27 Koto ekina꞉ hali o wanda꞉ epima꞉ Tekehalina꞉ palaowa make ipika꞉ kapona꞉ make hoke tupa꞉ hata꞉ nea꞉ka꞉na꞉ta꞉ Tekehalina꞉ we loke mindiki pa꞉ta꞉ ketete pita꞉la꞉me.  
\v 28 Koto ekina꞉ wanda꞉hali paeyaoma꞉ ika꞉ piteleme hau amba꞉la wotu handaata꞉ hande palaowa kapona꞉ make napa꞉peke alee.  
\v 29 Hali epima꞉ hande palaowa kapona꞉ make nalo hata꞉ Tekehalina꞉ loke mindiki pa꞉ta꞉ hone na wiki nea꞉ka꞉na꞉ta꞉ kota꞉ koto nalo hata꞉ta꞉ ipiki pa꞉ta꞉ kone hoke hau wina꞉ ala꞉me.  
\v 30 Koto piteleme ekina꞉ iki pa꞉ta꞉ haleme wanda꞉hali woputa꞉ yeni haa pitao loke damako pu pitao kutupa mandane wanda꞉halita꞉ amba꞉ homelememe.  
\v 31 Nika꞉ pitoloma꞉ haumanu amba꞉la talo pea bao handoma꞉ka꞉na꞉ yoluta꞉ Koda꞉ma꞉ ka꞉nda꞉ peaasa꞉eki niki pa꞉ta꞉ na epena꞉ lolo pia꞉me.  
\v 32 Koto pa꞉la꞉pate Koda꞉ma꞉ nika꞉ hao hoeyaasoma꞉eki handaata꞉ ka꞉nda꞉ miomono lea꞉ka꞉na꞉ta꞉ kota꞉ mo kenke wanda꞉hali ame̱le̱ apa꞉tao hoke yenki meaama꞉na꞉yeke pita꞉la꞉me.   
\p
\v 33 Kutupa ya kametitio. Iki momba꞉la pita꞉ Tekehalina꞉ ne noluekema꞉ paeyao epena꞉ laa yuwia pita꞉pa꞉peke.  
\v 34 Kutupa ika꞉ momba꞉la pita꞉ pu hoeyaasemeeki Koda꞉ma꞉ handaa iki pa꞉ta꞉ eki a꞉nda꞉ peaama꞉na꞉ mo tea꞉ma꞉ homa꞉la꞉ halima꞉ta꞉ ipika꞉ da pa꞉ta꞉ pita꞉ kone ne napeke alee. Kutupa mo hande mandane pea꞉pekeeki manuta꞉ I̱ a꞉pa hata꞉ tikitiki yalueke.   
\c 12  
\s1 Hande Holi Sipitidima꞉ kita꞉la꞉ alemanu  
\p
\v 1 Ya kametitio. Ya hone pa꞉la꞉ ekita꞉ ikana꞉ma꞉ mo hande Holi Sipitidima꞉ ota꞉ kita꞉la꞉eki manuna꞉ hone eleke eleke na uemena꞉ hone witolome.  
\v 2 Ikita꞉ pi na miki haemeke dina꞉ta꞉ hande pi lapeke na yeke toopi tima꞉ wepia ula꞉ ale manuma꞉ iki handeteke hata꞉ hatuku ombu pu hoeyaemeke ekita꞉ ikana꞉ma꞉ hone amba꞉ wilimime. Ikana꞉ma꞉ hande pi lapeke na ya꞉la꞉ ale manuna꞉ biki yeiya꞉ loluekema꞉ pemekeeki loa꞉me.  
\v 3 Koto ekina꞉ ikana꞉ma꞉ hone uemena꞉yeke do alome. Hali homeke ma꞉nda꞉ a꞉nda꞉ma꞉ta꞉ Koda꞉na꞉ Holi Sipitidima꞉ handeteke haena꞉ alo hata꞉ alota꞉ Yesuta꞉ hoeyaena꞉e laa pi lapeke na ya꞉la꞉me. Kutupa ma꞉nda꞉ma꞉ make Yesuta꞉ ota꞉ Tekehalie laa loluekema꞉ mo Holi Sipitidima꞉ na handeteke haena꞉ kone kutupiki pi lapeke na ya꞉la꞉me.   
\p
\v 4 Hande Sipitidina꞉ kita꞉la꞉ ale manuta꞉ ta꞉ta꞉ ta꞉ta꞉ ya꞉la꞉pate pa mo kita꞉la꞉ Sipitidita꞉ homeke kone hala꞉me.  
\v 5 Mo Tekehalina꞉ e pokaasoma꞉ ekimanu make ta꞉ta꞉ ta꞉ta꞉ ya꞉la꞉pate pa mo ena꞉ Tekehalita꞉ homeke kone hala꞉me.  
\v 6 Kutupa ipika꞉ e pokaena꞉ loluekema꞉ta꞉ mo e pokaapeke handa꞉la꞉ haumanu ta꞉ta꞉ ta꞉ta꞉ pa꞉la꞉pate pa homeke Koda꞉ma꞉ kone koto e pokaasa꞉ haumanu paeyaota꞉ ipika꞉ wanda꞉hali paeyao pa꞉ta꞉ teli peaasa꞉me.  
\v 7 Wanda꞉hali paeyao epeaaluekema꞉ mo Sipitidima꞉ niki paeyao homeke homeke pa꞉ta꞉ ipika꞉ pitaasa꞉eki wala꞉la꞉me.  
\v 8 Hande Sipitidima꞉ hali homeke pa꞉ta꞉ epeke hone wiki pi ala꞉eki halolo hata꞉ mo homeke Sipitidima꞉ kone hali ma꞉nda꞉ pa꞉ta꞉ make epeke handaasa꞉eki hala꞉la꞉me.  
\v 9 Do homeke Sipitidima꞉ hali ma꞉nda꞉ pa꞉ta꞉ ota꞉ hone tulaasa꞉eki hala꞉la꞉pate pa mo homeke Sipitidima꞉ kone hali ma꞉nda꞉ pa꞉ta꞉ mo yeni haaseme wanda꞉halina꞉ yeni tandelaasa꞉eki hala꞉la꞉me.   
\p
\v 10 Mo Sipitidima꞉ hali homeke pa꞉ta꞉ mo na handeke hau manuna꞉ pea꞉peke wele halaata꞉ hali ma꞉nda꞉ pa꞉ta꞉ make mo Koda꞉na꞉ pi walaasa꞉eki hala꞉la꞉me. Kutupa ma꞉nda꞉ pa꞉ta꞉ta꞉ mo kita꞉la꞉eki manuta꞉ Sipitidima꞉ hala꞉la꞉eki o hoke temokoma꞉ hala꞉la꞉eki tekili pea pa handena꞉yeke peaasa꞉eki hala꞉la꞉me. Hali ma꞉nda꞉ pa꞉ta꞉ mo ta꞉ta꞉ ta꞉ta꞉piki pimanu ala꞉eki halaata꞉ ma꞉nda꞉ pa꞉ta꞉ kutupiki pimanu opua pa la꞉ka꞉la꞉la꞉ ekina꞉ wele hala꞉la꞉me.  
\v 11 Kutu pita꞉la꞉ ekimanu paeyaota꞉ hande homeke Sipitidima꞉ kone wanda꞉hali homeke homeke pa꞉ta꞉ ipikana꞉ma꞉ ipiki hone pa꞉la꞉ tupa꞉ kone telipaaso hata꞉ peaasa꞉me.   
\s1 Loke homekema꞉ kone ala꞉ta꞉ ala꞉ta꞉ paeyao haasa꞉eki  
\p
\v 12 Ketisota꞉ loke homeke tupa꞉ kiki ankemanu tuna tuna pea hala꞉me. Hande kiki anke lokena꞉ tunaala꞉ alemanu ta꞉ta꞉ ta꞉ta꞉ ya꞉la꞉pate loketa꞉ homeke kone hala꞉me.  
\v 13 Koto tupa꞉ kone niki paeyaota꞉ Diu wanda꞉hali pita꞉ Diendaili wanda꞉hali yaapo make ma꞉nda꞉na꞉ e pa hameke pokaaseme wanda꞉hali pita꞉ ka꞉la꞉pa꞉ ta꞉pao haleme wanda꞉hali yaapo make niki paeyao mo homeke Sipitidima꞉ kone bapitaisi pea homeke loke tunao haloma꞉me. Kutupa nikana꞉ma꞉ ikali no haloma꞉ tupa꞉ mo homeke Sipitidi kone na꞉tiki pu haloma꞉me.   
\p
\v 14 Loketa꞉ homeke ale dia꞉me. Mandane alemanu paeyao tuna tuna pea hala꞉me.  
\v 15 Kutupa ankema꞉ alota꞉ I̱ta꞉ kiki dia꞉ya꞉leke handaa lokena꞉ ale dia꞉me laa lea꞉ka꞉na꞉ta꞉ kota꞉ pa pina꞉ma꞉ ipikita꞉ lokena꞉ ota꞉ tunao haasa꞉ ale kone pa ula꞉me.  
\v 16 Kutupa make mo katakema꞉ alota꞉ I̱ta꞉ leke dia꞉ya꞉leke handaa mo lokena꞉ ale dia꞉me laa lea꞉ka꞉na꞉ta꞉ kota꞉ pa pina꞉ma꞉ ipikita꞉ lokena꞉ ota꞉ pa tunao hala꞉me.  
\v 17 Mo loke homeketa꞉ pa leke homeke kone haya꞉ka꞉na꞉ta꞉ kota꞉ mo pimanu ekipa opiliepe. Kutupa mo loketa꞉ katake homeke kone haya꞉ka꞉na꞉ta꞉ kota꞉ mo ala꞉ta꞉ ala꞉ta꞉na꞉ totopo pa꞉la꞉ ekimanu ekipa milia꞉pe.  
\v 18 Loketa꞉ koto tupa꞉ dia꞉me. Pa ekipeke Koda꞉ma꞉ ipika꞉ hone witolo tupa꞉ kone mo ta꞉ta꞉ ta꞉ta꞉ piki ale manuta꞉ mo loke pa꞉ta꞉ ota꞉ tuna tuna peayekeme.  
\v 19 Loketa꞉ pa homeke ale kone haya꞉ka꞉na꞉ta꞉ kota꞉ mo ka꞉la꞉ alemanu dia꞉yeke handaata꞉ ota꞉ loke hapeke na ya꞉la꞉me.  
\v 20 Koto tupa꞉ dia꞉pate pa mo tuna tuna peaala꞉ alemanu paeyao kone apa꞉taota꞉ kota꞉ homeke loke kone hala꞉me.   
\p
\v 21 Koto ekina꞉ lekema꞉ mo kiki pa꞉ta꞉ta꞉ I̱ta꞉ neke yaapo haluekema꞉ hone na wiki ya kone halo ekita꞉ a꞉pa꞉la꞉me la꞉la꞉ pita꞉ ota꞉ lapeke na ya꞉la꞉me. Koto tupa꞉ kone youma꞉ mo anke pa꞉ta꞉ta꞉ I̱ta꞉ neke yaapo haluekema꞉ hone na wiki ya kone halo ekita꞉ a꞉pa꞉la꞉me la꞉la꞉ pita꞉ ota꞉ lapeke na ya꞉la꞉me.  
\v 22 Dia꞉me. Kutupiki hau pea꞉peke na ya꞉la꞉pate pa mo lokena꞉ tunaala꞉ honkopu na hake ale manuta꞉ dia꞉ya꞉ka꞉na꞉ta꞉ kota꞉ nika꞉ loke manuta꞉ epeke tupa꞉ na haloma꞉me.  
\v 23 Kutupa lokena꞉ tunaala꞉ mandane ale manuta꞉ pa ale manue aloma꞉pate pa koto alemanu kone pa epeke tupa꞉ handeteke haloma꞉me. Kutupa lokena꞉ tunaala꞉ mandane au na la꞉la꞉ alemanu pa꞉ta꞉ta꞉ hone wopu wia kesema꞉ handeteke haloma꞉me.  
\v 24 Pate mandane au la꞉la꞉ ale manuta꞉ handeteke haluekema꞉ hone wopu na u haloma꞉me. Koda꞉ma꞉ta꞉ mo lokena꞉ mandane alemanu tunaaso hata꞉ta꞉ mo pa ale manuta꞉ ipikana꞉ma꞉ ota꞉ ana꞉na꞉ haena꞉ laa pa꞉la꞉me.  
\v 25 Koto pa꞉la꞉ ekina꞉ mo hande loketa꞉ pa yoka yoka pea na hake mo hande tunaala꞉ alemanu paeyaoma꞉ta꞉ ika꞉ kone handeteke ha alualu puemena꞉yeke pa꞉la꞉me.  
\v 26 Koto ekina꞉ mo lokena꞉ tunaala꞉ ale homekema꞉ tanda mia꞉ka꞉na꞉ta꞉ kota꞉ mo tunaala꞉ mandane alemanu paeyaoma꞉ make mandakena꞉ tandama꞉ homilimikie. Kutupa ma꞉nda꞉ma꞉ mo lokena꞉ tunaala꞉ ale homeke a꞉nda꞉na꞉ biki yeiya꞉ lea꞉ka꞉na꞉ta꞉ kota꞉ mo lokena꞉ tunaala꞉ mandane alemanu paeyaoma꞉ta꞉ mandakena꞉ ta꞉na꞉ma꞉ homilimikie.   
\p
\v 27 Koto ekina꞉ iki paeyaota꞉ Ketisona꞉ loke kone hata꞉ hande tunaala꞉ alemanu homeke homeke lo halememe.  
\v 28 Kutupa Koda꞉ma꞉ta꞉ mo siosina꞉ mea haena꞉ la꞉la꞉ wanda꞉hali dupa. Titina꞉ amba꞉lata꞉ aposolo haliwekie. Koto hoki naneta꞉ Koda꞉na꞉ pi la꞉ mea halo haleme tapakee. Koto hoki naneta꞉ mo Koda꞉na꞉ pimanu epeke walo haleme tapake mea haena꞉ la꞉la꞉me. Koto hoki naneta꞉ mo na handeke haumanu puluekema꞉ wele peaaseme haliweki make pa ika꞉ hoki naneta꞉ yeni tandelaaseme haliweki make mo tamba꞉ mineleme haliweki make mandane mandane e pokaena꞉ handeteke haleme haliweki make pi ta꞉ta꞉ ta꞉ta꞉ aleme haliweki make Koda꞉ma꞉ paeyao mea haena꞉ la꞉la꞉me.  
\v 29 Paeyaota꞉ aposolo haliweki haloma꞉pe. O paeyaota꞉ pi la꞉ mea halo haloma꞉ haliweki haloma꞉pe. Paeyaota꞉ pi wala꞉la꞉ haliweki haloma꞉pe. Paeyaoma꞉ta꞉ na handeke wele peaasoma꞉ haliweki haloma꞉pe. Koto tupa꞉ dia꞉me.  
\v 30 Paeyaoma꞉ta꞉ yeni tandelaasoma꞉ haliweki haloma꞉pe. Paeyaoma꞉ta꞉ mo ta꞉ta꞉ ta꞉ta꞉piki pi aloma꞉pe. O paeyaoma꞉ta꞉ mo pimanu la꞉ka꞉loloma꞉ haliweki haloma꞉pe.  
\v 31 Koto ekina꞉ta꞉ ikana꞉ma꞉ mo Koda꞉na꞉ ota꞉ tumiki pa kita꞉la꞉ ekimanu muluekema꞉ hone wotu u hapa꞉peke.  
\p Kotoeki pea꞉pa꞉peke laa loa꞉pate pa hau ma꞉nda꞉ta꞉ ota꞉ titina꞉ epekeeki kone iki pa꞉ta꞉ walo pulu pa꞉la꞉me.   
\c 13  
\s1 Pukima꞉ homa꞉la꞉eki  
\p
\v 1 Da ta꞉ta꞉ ta꞉ta꞉ pimanu make mo enisolo titina꞉ pi make alo hali hata꞉ta꞉ pukima꞉ homa꞉la꞉ hau na pitolo hata꞉ la꞉tiki pu haowa꞉ka꞉na꞉ta꞉ kota꞉ yaka pi aloeki manuta꞉ mo beto pa lita꞉la꞉ ekima꞉ handekeeki o pa ti ka꞉ka꞉pa꞉ ka꞉ka꞉pa꞉ laasa꞉ ekima꞉ handekeeki kone alome.  
\v 2 I̱ma꞉ta꞉ mo Koda꞉na꞉ pi la꞉ mea hala꞉la꞉ hauta꞉ wotu handolo hata꞉ pa mo Koda꞉ma꞉ a꞉mbao ula꞉ ekimanu make handa꞉ witolo hata꞉ mo hau paeyaona꞉ pea꞉peke ekimanu make handaata꞉ kutupa ya Koda꞉ pa꞉ta꞉ hone tulaaso ekima꞉ta꞉ mo potemanu kone pendilaapeke ya꞉la꞉ hali hata꞉ kone pa pukima꞉ homa꞉la꞉ hau na piki haowa꞉ka꞉na꞉ta꞉ kota꞉ I̱ta꞉ pa alema꞉ handeke hali halueke.  
\v 3 Yaka wia halo alemanu paeyao ma꞉nda꞉ ma꞉nda꞉ pa꞉ta꞉ hale hale pea make kutupa ya loke kone mo ti ulekema꞉ yankena꞉ haloa꞉ka꞉na꞉ta꞉ kota꞉ pukima꞉ homa꞉la꞉ hau na piki pua꞉ka꞉na꞉ta꞉ kota꞉ koto haumanu pitolo ekima꞉ I̱ na epeaasa꞉me.   
\p
\v 4 Pukima꞉ homa꞉la꞉ hau pu hala꞉ somema꞉ta꞉ kima꞉ na homeke pa wotu handeteke hata꞉ make paeyao pa꞉ta꞉ a꞉ta꞉ma꞉ homolo hata꞉ pa tamba꞉ mu halieke. Pukima꞉ homa꞉la꞉ hau pu hala꞉ somema꞉ta꞉ wamili na piki ipika꞉ hakoko na liki handaena꞉ hau na pilieke.  
\v 5 Pukima꞉ homa꞉la꞉ hau pu hala꞉ somema꞉ta꞉ mo wanda꞉hali ka꞉nda꞉ peaasa꞉ popeke na piki haumanu na pu make I̱ homekee laa hone na wiki pa mo ka꞉la꞉ta꞉ pita꞉la꞉ hau make na pilieke. Pukima꞉ homa꞉la꞉ hau pu hala꞉ somema꞉ta꞉ mo wanda꞉hali manuma꞉ ipiki pa꞉ta꞉ hoke hau peleme ekimanu yata꞉ puluekema꞉ hone na u halieke.  
\v 6 Ipikita꞉ hoke haumanu pita꞉la꞉ ekina꞉ ta꞉na꞉ma꞉ na homiliepate pa mo ota꞉ haumanu pita꞉la꞉ ekina꞉ ta꞉na꞉ma꞉ homilieke.  
\v 7 Pukima꞉ homa꞉la꞉ hau pu hala꞉ somema꞉ta꞉ soka꞉la꞉ma꞉ na homilieke. Dia꞉me. Ipika꞉ hone tulao hao haasa꞉eki make hone ti lao haasa꞉eki make kutupa ipika꞉ kima꞉ na homeke Koda꞉ pa꞉ta꞉ yu wia haasa꞉eki make kutupiki haumanu pea꞉tiki pu haluekema꞉ta꞉ ana꞉na꞉ honkopu hao halieke.   
\p
\v 8 Pukima꞉ homa꞉la꞉ hauta꞉ ota꞉ na paelieke. Mo wanda꞉hali pa꞉ta꞉ Koda꞉na꞉ pi la꞉ mea hala꞉la꞉ hauta꞉ wetepena꞉ paelieke. Kutupa da ta꞉ta꞉ ta꞉ta꞉ pi ala꞉eki make wetepena꞉ta꞉ paelieke. Kutupa mo pita꞉la꞉eki manuna꞉ handa꞉la꞉ hau make wetepena꞉ paelieke.  
\v 9 Do ekina꞉ yeke loa꞉me. Mo pita꞉la꞉eki manuna꞉ handoloma꞉eki make Koda꞉na꞉ pi la꞉ mea haloloma꞉eki make ameta꞉ hosikima꞉ pitoloma꞉pate  
\v 10 pa wetepe hande ana꞉ pulu pa꞉la꞉ ota꞉ hau tieke epea꞉ka꞉na꞉ta꞉ kota꞉ ame do hosikima꞉ pitoloma꞉ ekita꞉ paelieke.   
\p
\v 11 I̱ta꞉ wekisiki haowa꞉ dina꞉ta꞉ yaka pi loa꞉ ekimanu make puki yoka mea pomua꞉ ekimanu make yaka hone ua꞉ ekimanu make wekima꞉ pita꞉la꞉eki kone pua꞉pate ameta꞉ hali hata꞉ hande wekima꞉ pita꞉la꞉ hau manuta꞉ amba꞉ mina꞉pa꞉laowa꞉me.  
\v 12 Nikana꞉ma꞉ ame do hata꞉ handoloma꞉eki manuta꞉ pa mo ankupiki su̱a̱ta꞉na꞉ pa꞉ta꞉ handeke nono pitoloma꞉me. Kutu pitoloma꞉pate wetepe nina꞉ta꞉ ota꞉ leke popeleke wopu handa꞉ alualu pulumeke. Ameta꞉ hosikima꞉ handolopate wetepe nina꞉ta꞉ Koda꞉ma꞉ I̱ wopu handa꞉la꞉ tupa꞉ kone I̱ma꞉ make hau paeyao ota꞉ handulueke.  
\v 13 Kutu pulu pa꞉la꞉ natemanu epena꞉ yu wia hata꞉ ame do hande hau tepota꞉ pa pu hapeke ya꞉la꞉me. Dupa. Hone tulaasa꞉eki make ta꞉na꞉ma꞉ homa Koda꞉ pa꞉ta꞉ handeteke hala꞉eki make pukima꞉ homa꞉la꞉eki make do hau tepota꞉ pa pu hapeke ya꞉la꞉pate ota꞉ titina꞉ tumiki hau homeketa꞉ pukima꞉ homa꞉la꞉ekie.   
\c 14  
\s1 Mo Holi Sipitidima꞉ kita꞉la꞉ ale manuna꞉ mandane pimanu  
\p
\v 1 Koto ekina꞉ pukima꞉ homa꞉la꞉ hau puluekema꞉ honkopu hao hapa꞉peke. Kutupa mo Holi Sipitidima꞉ kita꞉la꞉ ekimanu muluekema꞉ hone wotu wia꞉peke ya꞉la꞉pate hande pa mo kita꞉la꞉eki homeke ma꞉nda꞉ta꞉ Koda꞉na꞉ pi la꞉ mea haloemena꞉ muluekema꞉ hone amba꞉la wia꞉pa꞉peke.  
\v 2 Mo da ta꞉ta꞉na꞉ pi ala꞉ halima꞉ta꞉ haliweki pa꞉ta꞉ na ala꞉pate pa Koda꞉ pa꞉ta꞉ kone ala꞉me. Ma꞉nda꞉ma꞉ ipika꞉ pi na opita꞉la꞉ ekina꞉ yeke loa꞉me. Hande Sipitidina꞉ welema꞉ peaaso haena꞉ ala꞉pate mo a꞉mbao ula꞉ pimanu ala꞉me.  
\v 3 Kutu pa꞉la꞉pate Koda꞉na꞉ pi la꞉ mea hala꞉la꞉ halima꞉ta꞉ haliweki pa꞉ta꞉ la hala꞉la꞉me. Kutupa ipikana꞉ma꞉ pi la꞉ mea halea꞉ka꞉na꞉ta꞉ kota꞉ mo wanda꞉hali tamba꞉ mina꞉la꞉ pi make ika꞉ puki epeaasa꞉ pi make epekeeki pina꞉ sutiaasa꞉ pi make ala꞉me.  
\v 4 Hande ta꞉ta꞉ ta꞉ta꞉ piki pi ala꞉ halima꞉ta꞉ ipiki kone tamba꞉ mina꞉la꞉pate hande Koda꞉na꞉ pi la꞉ mea hala꞉la꞉ halima꞉ta꞉ siosi wanda꞉hali paeyao tamba꞉ mina꞉la꞉me.   
\p
\v 5 Iki paeyaoma꞉ ta꞉ta꞉ ta꞉ta꞉ piki pi ala꞉eki pimika꞉na꞉ta꞉ ta꞉na꞉ma꞉ homolo polopate iki paeyaoma꞉ Koda꞉na꞉ pi la꞉ mea hala꞉la꞉eki pimika꞉na꞉ta꞉ kota꞉ ta꞉na꞉ma꞉ wopu homulueke. Hali ma꞉nda꞉ma꞉ iki ame̱le̱ mo da ta꞉ta꞉ ta꞉ta꞉ piki pi lea꞉ka꞉na꞉ta꞉ kota꞉ koto pima꞉ta꞉ mo siosi wanda꞉hali tamba꞉ mina꞉ lena꞉ pa hali ma꞉nda꞉ma꞉ mo somena꞉ pi na la꞉ka꞉lea꞉ka꞉na꞉ta꞉ kota꞉ koto someta꞉ mo siosi epeaasa꞉ hali na haliepate pa mo Koda꞉na꞉ pi la꞉ mea hala꞉la꞉ halima꞉ pita꞉la꞉ ekita꞉ mo tamba꞉ mina꞉la꞉ hau tieke yelieke.  
\v 6 Koto ekina꞉ kametitio. I̱ta꞉ iki pa꞉ta꞉ a꞉pa mo da ta꞉ta꞉ ta꞉ta꞉ piki pimanu kone loa꞉ka꞉na꞉ta꞉ ikita꞉ ekipa tamba꞉ muluepe. Dia꞉me. Iki na tamba꞉ mulueke. Koda꞉ma꞉ I̱ pa꞉ta꞉ la kita꞉la꞉eki ma꞉nda꞉ make handoloeki mandane ekimanu make iki pa꞉ta꞉ Koda꞉na꞉ pi la꞉ mea kulu poloeki ma꞉nda꞉ make pi walo poloeki ma꞉nda꞉ make kutupiki pimanu laa iki pa꞉ta꞉ loa꞉ka꞉na꞉ta꞉ ana꞉ pilieke.   
\p
\v 7 Hande tuli kanake soke yaapota꞉ pa ale yaapo ya꞉la꞉pate epeke tupa꞉ na lia꞉ka꞉na꞉ta꞉ e̱ ala꞉ ekita꞉ wotu na opulumeke.  
\v 8 Kutupa hande bukanake lita꞉la꞉ halima꞉ anekema꞉ na lia꞉ka꞉na꞉ta꞉ kota꞉ mo haliweki a꞉nda꞉ puluekema꞉ epi amedama꞉ tikitiki yao halimipe.  
\v 9 Koto tupa꞉ kone ikana꞉ma꞉ make mo da ta꞉ta꞉ ta꞉ta꞉ pimanu alo hata꞉ Koda꞉na꞉ pi walemeka꞉na꞉ta꞉ kota꞉ ma꞉nda꞉ma꞉ koto pi na opitolo hata꞉ teketa꞉ ekipa handa꞉ wiliepe. Ika꞉ aleme pita꞉ pa alupilieke.  
\v 10 Do kenke paeyao pa꞉ta꞉ da ta꞉ta꞉ ta꞉ta꞉ piki pimanu alemepate koto pi paeyao homeke ma꞉nda꞉ta꞉ pa hameke na alememe. Pi paeyaota꞉ teke ula꞉me.  
\v 11 Kutu pa꞉la꞉pate hande pi ala꞉ halina꞉ pita꞉ I̱ma꞉ na opua꞉ka꞉na꞉ta꞉ kota꞉ I̱ma꞉ ipikita꞉ da ma꞉nda꞉ nane hao a꞉pa hala꞉ halie hone ulueke. Kutupa ipikana꞉ma꞉ make I̱ta꞉ da ma꞉nda꞉ nane hao a꞉pa halo halie hone wilieke.  
\v 12 Koto ekina꞉ ikana꞉ma꞉ mo Sipitidima꞉ kita꞉la꞉ ekimanu muluekema꞉ hone wopu peleme ekina꞉yeke kota꞉ mo hande siosi wanda꞉hali daena꞉ lapeke ekimanu ota꞉ titina꞉ epeke tupa꞉ mea puluekema꞉ honkopu hao hapa꞉peke.   
\p
\v 13 Koto ekina꞉ mo da ta꞉ta꞉ ta꞉ta꞉ pi lapeke ya꞉la꞉ somema꞉ta꞉ mo Sipitidima꞉ kita꞉la꞉ pi la꞉ka꞉lapeke ya꞉la꞉ hau make muluekema꞉ yeni pea꞉peke ya꞉la꞉me.  
\v 14 Do ekina꞉yeke loa꞉me. I̱ma꞉ mo da ta꞉ta꞉ piki pima꞉ yeni pua꞉ka꞉na꞉ta꞉ kota꞉ yaka temokoma꞉ kone yeni pitolopate yaka honema꞉ na pitolome.  
\v 15 Koto ekina꞉ I̱ma꞉ta꞉ eki haumanu pulua꞉pe. Yaka temokoma꞉ yeni pulu polopate pa yaka honema꞉ make yeni pulueke. Emelita꞉ yaka temokoma꞉ lolo polopate pa yaka honema꞉ make lolueke.  
\v 16 Neketa꞉ pa naka꞉ temoko homekema꞉ da ta꞉ta꞉ piki pima꞉ Koda꞉ pa꞉ta꞉ keiyae pi laa yeni pika꞉na꞉ta꞉ kota꞉ mo iki ame̱le̱ pila꞉ hali ma꞉nda꞉ma꞉ hande da ta꞉ta꞉ piki pi ale ekita꞉ na opiki hata꞉ta꞉ Koda꞉ pa꞉ta꞉ Aowe. Kutu pina꞉e laa ekipa opua lena꞉pe.  
\v 17 Neketa꞉ Koda꞉ pa꞉ta꞉ keiyae pi alepateta꞉ mo halita꞉ na tamba꞉ mineleme.   
\p
\v 18 Do hande da ta꞉ta꞉ ta꞉ta꞉ pi ala꞉ hauta꞉ I̱ma꞉ alo ekima꞉ta꞉ iki paeyao ankulao halo ekina꞉ Koda꞉ pa꞉ta꞉ keiyae pi alome.  
\v 19 Pate hande siosi wanda꞉hali mombeleme ekina꞉ hata꞉ mo wanda꞉hali pa꞉ta꞉ pi waluekema꞉ mo iki opua꞉peke ya꞉la꞉ pi doka꞉tiki yunki hata꞉manu homeke loluekema꞉ waleke wia꞉ka꞉na꞉ta꞉ kota꞉ mo da ta꞉ta꞉ ta꞉ta꞉ pima꞉ ota꞉ hokulupeke 10 daoseni pimanu waluekema꞉ hone na wiki kiaalueke.   
\p
\v 20 Kametitio. Ikana꞉ma꞉ wekisunuma꞉ witeleme hone leke wia na hapa꞉peke. Hoke hau pita꞉la꞉ ekina꞉ta꞉ wekisunu leke hapeke ya꞉la꞉pate pa ika꞉ hone witeleme ekina꞉ta꞉ keileke wanda꞉hali hata꞉ witeleme hone leke wia꞉pa꞉peke.  
\v 21 Mo Baibolo bukana꞉ wape pa꞉la꞉eki ma꞉nda꞉ta꞉ dupa  
\q1 Tekehalima꞉ alota꞉ I̱ma꞉ mo mandane da ma꞉nda꞉ pi leke haliwekima꞉ aleme ekima꞉ make mo da ma꞉nda꞉ nane hao epeleme wanda꞉hali pa꞉ta꞉ yama꞉ do wanda꞉hali pa꞉ta꞉ pi loluepate pa kutupiki hau kone pua꞉ka꞉na꞉ta꞉ yaka pi pa na opilimikie  
\m laa wape pa꞉la꞉me.  
\v 22 Koto ekina꞉ mo Sipitidima꞉ kita꞉la꞉ da ta꞉ta꞉ ta꞉ta꞉ pi ala꞉ ekita꞉ mo pi mineleme wanda꞉halina꞉eki dia꞉me. Pate Koda꞉ma꞉ mo pi na miki wanda꞉hali patehau pina꞉ ka꞉la꞉me. Kutu pa꞉la꞉pate hande Koda꞉na꞉ pi la꞉ mea hala꞉la꞉ ekita꞉ kota꞉ Koda꞉ma꞉ tombo ula꞉ ekita꞉ pi na miki wanda꞉halima꞉ opina꞉yeke na kiki pi mineleme wanda꞉halima꞉ opina꞉yeke ka꞉la꞉me.   
\p
\v 23 Koto ekina꞉ mo siosi wanda꞉hali paeyaoma꞉ mombela pita꞉ paeyaoma꞉ da ta꞉ta꞉ ta꞉ta꞉ pimanu lemeka꞉na꞉ta꞉ kota꞉ mandane pa a꞉pa haleme wanda꞉hali o pi na miki wanda꞉hali make honda꞉ pamba mo pi manuta꞉ opitolo hata꞉ ikana꞉ma꞉ Do wanda꞉halita꞉ keaaso alememe laa lelimikie.  
\v 24 Koto lolo pelemepate mo siosi wanda꞉hali paeyaoma꞉ Koda꞉na꞉ pi la꞉ mea halelemeeki pimika꞉na꞉ta꞉ kota꞉ pa a꞉pa pila꞉ hali ma꞉nda꞉ma꞉ o pi na miki hali ma꞉nda꞉ma꞉ honda꞉ pamba pita꞉ kutupiki pi opitolo hata꞉ ipika꞉ hoke hau pa꞉la꞉ ekina꞉ hone wilieke. Kutupa mo la꞉ mea hala꞉la꞉ pi opitolo hata꞉ ipika꞉ hala꞉ ekita꞉ epekeeki make hokeeki make hone wilieke.  
\v 25 Koto ekina꞉ ipika꞉ a꞉mbao ula꞉ honemanu peneme yaeyeke handaata꞉ ipikana꞉ma꞉ panda꞉puniao Koda꞉ pa꞉ta꞉ yeni pitolo hata꞉ Ota꞉ alememe. Koda꞉ta꞉ iki ame̱le̱ do pa꞉ta꞉ hala꞉me laa lelieke.   
\s1 Siosi mombelemeeki pa꞉ta꞉ tiki tiki yao pulu pea꞉pekeeki  
\p
\v 26 Ya kametitio. Eki haumanu pea꞉peke ya꞉la꞉pe. Koda꞉ pa꞉ta꞉ yeni puluekema꞉ mombelemeka꞉na꞉ta꞉ kota꞉ hali homekema꞉ emeli lelieke. Kutupa hali ma꞉nda꞉ma꞉ pi walelieke. Kutupa hali ma꞉nda꞉ma꞉ Koda꞉ma꞉ ipiki pa꞉ta꞉ la hala꞉la꞉eki iki pa꞉ta꞉ la kilieke. Kutupa hali ma꞉nda꞉ma꞉ da ta꞉ta꞉ ta꞉ta꞉ pi laa leliepate hali ma꞉nda꞉ma꞉ koto ala꞉ pi lekelieke. Kutu pea꞉peke ya꞉la꞉pate mo hau paeyaoma꞉ mo siosi wanda꞉hali epeaaluekema꞉ pimika꞉na꞉ta꞉ epelieke.  
\v 27 Mandane haliwekima꞉ da ta꞉ta꞉ ta꞉ta꞉ pi loluekema꞉ hone pimika꞉na꞉ta꞉ kota꞉ hali yaapo tepoma꞉ homeke lemeka꞉na꞉ta꞉ ana꞉ pilieke. Ikana꞉ma꞉ mandake dina꞉ na lelimikie. Kutupa ika꞉ aleme pita꞉ ma꞉nda꞉ma꞉ la꞉ka꞉lena꞉ ota꞉ lapeke ya꞉la꞉me.  
\v 28 Kutu pea꞉peke ya꞉la꞉pate mo pi la꞉ka꞉la꞉la꞉ hali na haya꞉ka꞉na꞉ta꞉ kota꞉ mo momba꞉la pila꞉ pa꞉ta꞉ ma꞉nda꞉ma꞉ da ta꞉ta꞉ ta꞉ta꞉ piki pima꞉ pi ma꞉nda꞉ na lelieke. Ipikana꞉ma꞉ ipika꞉ honema꞉ kone Koda꞉ pa꞉ta꞉ homeke pi lelieke.  
\v 29 Koda꞉ma꞉ hala꞉la꞉eki mineleme hali yaapo tepoma꞉ta꞉ ika꞉ mineleme pimanu iki pa꞉ta꞉ la kia꞉peke ya꞉la꞉me. Kutupa opiteleme wanda꞉halima꞉ ika꞉ alemeeki opua honema꞉ mo ota꞉eki weilimikie.  
\v 30 Kutupa mo momba꞉la pila꞉ tukiki pa꞉ta꞉ pila꞉ hali homekema꞉ Koda꞉ma꞉ mo la hala꞉la꞉ pi ma꞉nda꞉ ipiki pa꞉ta꞉ a̱i̱ koto kone halea꞉ka꞉na꞉ta꞉ kota꞉ mo hande tiao pi wala꞉la꞉ halima꞉ lo naena꞉ loa꞉me.  
\v 31 Siosi wanda꞉halima꞉ opua minolo hata꞉ hone wopu wia honkopu hao haena꞉yeke iki paeyaoma꞉ ta꞉ta꞉ ta꞉ta꞉ lo Koda꞉ma꞉ la kita꞉la꞉ pimanu wanda꞉hali pa꞉ta꞉ wala꞉peke ya꞉la꞉me.  
\v 32 Koda꞉na꞉ pi la꞉ mea haleleme haliwekima꞉ta꞉ koto iki pa꞉ta꞉ ka꞉la꞉ hauta꞉ pa ika꞉ temokomanu handeteke hamena꞉e laa hone wia꞉peke ya꞉la꞉me.  
\v 33 Do ekina꞉yeke loa꞉me. Nikita꞉ meimei liao na hake pa yopu sembepelao hamonoyeke Koda꞉ma꞉ niki wi la꞉la꞉me.  
\p Mo hande siosi wanda꞉hali mombolo hata꞉ pu haleme tupa꞉  
\v 34 wanda꞉wekima꞉ta꞉ pi pi na leke pa pita꞉peke ya꞉la꞉me. Hande Lo Pi manuma꞉ wala꞉la꞉ tupa꞉ wanda꞉wekima꞉ta꞉ pi wala꞉peke na ya꞉la꞉ ekina꞉ ikita꞉ homu pea hao hapa꞉peke.  
\v 35 Wanda꞉wekima꞉ pi wala꞉la꞉ ekina꞉ pa lota꞉ puluekema꞉ hone pia꞉ka꞉na꞉ta꞉ kota꞉ ika꞉ da pa꞉ta꞉ pita꞉ kone ika꞉ halikititi pa꞉ta꞉ lota꞉ pea꞉peke aleo. Siosi wanda꞉hali paeyao momba꞉la pitina꞉ wanda꞉ma꞉ pi wala꞉la꞉ ekita꞉ ti na pilieke.   
\p
\v 36 Kutaata꞉ Koda꞉na꞉ pita꞉ iki pa꞉ta꞉ kini pea opolo epeekepe o iki pa꞉ta꞉ homeke a꞉pa꞉la꞉pe.  
\v 37 Hali ma꞉nda꞉ma꞉ta꞉ I̱ta꞉ Koda꞉na꞉ pi walolo hali hata꞉ mo Holi Sipitidima꞉ kita꞉la꞉eki ma꞉nda꞉ make amba꞉ molome hone wia꞉ka꞉na꞉ta꞉ kota꞉ koto somema꞉ta꞉ do I̱ma꞉ iki pa꞉ta꞉ wape polo ekita꞉ mo Tekehalima꞉ dupa꞉pe laa la꞉la꞉ ekie laa hone wina꞉ loa꞉me.  
\v 38 Kutu pea꞉peke ya꞉la꞉pate koto some epima꞉ do alo ekimanu na opia꞉ka꞉na꞉ta꞉ kota꞉ ikana꞉ma꞉ make mo halina꞉ pi na opua꞉pa꞉peke.   
\p
\v 39 Koto ekina꞉ ya kametitio. Ikana꞉ma꞉ ota꞉ Koda꞉na꞉ pi waluekema꞉ honkopu hao hata꞉ kone pa mo da ta꞉ta꞉ ta꞉ta꞉ pimanu ala꞉ ekita꞉ ikana꞉ma꞉ sa꞉sa꞉ na pea꞉pa꞉peke.  
\v 40 Kutupa ika꞉ pitelemeeki paeyaota꞉ tiki tiki yao hata꞉ epeke tupa꞉ pea꞉pa꞉peke.   
\c 15  
\s1 Yesu paa tiaeyekeeki  
\p
\v 1 Ya kametitio. Ame I̱ma꞉ iki pa꞉ta꞉ waloa꞉ Pi Seliapota꞉ ika꞉ hone u tiaaluekema꞉ alome. Koto pima꞉ta꞉ ikana꞉ma꞉ meata꞉ hone tulao honkopu hao hamina꞉ iki mea da꞉taala꞉me.  
\v 2 Hande Pi Seliapota꞉ mo I̱ma꞉ iki pa꞉ta꞉ waloa꞉ pi kone loa꞉me. Ikana꞉ma꞉ honkopu hao wopu miniki haemeka꞉na꞉ta꞉ kota꞉ koto pima꞉ iki homaapa꞉na꞉ pa꞉ta꞉la꞉ milieke. Kota꞉ a꞉nda꞉ dia꞉ya꞉ka꞉na꞉ta꞉ pi pa hameke opimika꞉ta꞉me.   
\p
\v 3 Mo hande pi teke tieketa꞉ I̱ma꞉ mua꞉ pi kone iki pa꞉ta꞉ la kua꞉ ekita꞉ dupae. Ketisota꞉ nika꞉ hoke hauna꞉ homeekeme. Koto mo Baibolo bukana꞉ wape pa꞉la꞉ tupa꞉ loa꞉me.  
\v 4 Kutupa ipiki toko toopi ka꞉ka꞉na꞉ pa꞉ta꞉ lapa꞉ pimikipate hoto tepona꞉ Koda꞉ma꞉ ipikita꞉ paa mea tiaeyekeme. Kutu pieke ekimanu make mo Baibolo bukana꞉ wape pa꞉la꞉ tupa꞉ piekeme.  
\v 5 Kutupa ipikana꞉ma꞉ Pida pa꞉ta꞉ pua ipika꞉ loke peneme yao walaata꞉ mo hande 12 aposolo haliweki pa꞉ta꞉ make pua waleekeme.  
\v 6 Kutupa wetepena꞉ mo mandake pa꞉ta꞉ momba꞉la haleme nika꞉ kametiti 500manu pa꞉ta꞉ ipiki pua waleekeme. Mo hande haliwekita꞉ mandane ekita꞉ homemekepate mandane haliweki woputa꞉ pa hao halememe.  
\v 7 Kutupa koto hoki naneta꞉ ipikita꞉ Dia꞉mesi pa꞉ta꞉ pua walaata꞉ mo aposolo haliweki paeyao pa꞉ta꞉ make paa pua waleekeme.   
\p
\v 8 Ota꞉ wetepe naneta꞉ ipikita꞉ I̱ pa꞉ta꞉ kone a꞉pa walea꞉me. I̱ta꞉ hande mu hoeyaasa꞉ weki leke hano kone a꞉pa walea꞉me.  
\v 9 Mo aposolo haliweki ame̱le̱ hata꞉ I̱ta꞉ ota꞉ hosiki halisiki halome. Koto biki muluekema꞉ epeke hali na haowa꞉me. I̱ma꞉ta꞉ Koda꞉na꞉ siosi wanda꞉hali pa꞉ta꞉ tanda tieke haloa꞉ ekina꞉ loa꞉me.  
\v 10 Kutu pua꞉pate ame pa I̱ do halo ekita꞉ Koda꞉ma꞉ ipika꞉ pa hameke a꞉ta꞉ma꞉ homa꞉la꞉ ekima꞉ peaala꞉me. Kutupa koto ipikana꞉ma꞉ I̱ pa꞉ta꞉ pa hameke a꞉ta꞉ma꞉ homa꞉la꞉ ekima꞉ta꞉ wele na piki paekie laa pi lapeke na ya꞉la꞉me. Dia꞉me. I̱ma꞉ta꞉ honkopu hao ipika꞉ e pokaaso hata꞉ mo hande aposolo haliweki paeyao kone wetepeaowa꞉me. Kutu pua꞉pate I̱ma꞉ ya kone na pua꞉me. Koda꞉na꞉ pa a꞉ta꞉ma꞉ homa꞉la꞉ ekima꞉ I̱ pa꞉ta꞉ pita꞉ peaeya꞉me.  
\v 11 Koto ekina꞉ I̱ma꞉ pua꞉ekipe o mo aposolo haliwekima꞉ pimiekipe pa mata꞉la꞉pate do walolo ekita꞉ niki paeyaoma꞉ waloloma꞉ ekita꞉ homeke kone kutupa ikana꞉ma꞉ opuata꞉ hone tulaalememe.   
\s1 Niki paa tiaalo poloma꞉eki  
\p
\v 12 Koto ekina꞉ Ketisota꞉ homeekepate Koda꞉ma꞉ paa mea tiaeyekeeki walo haloma꞉ ekina꞉ iki pa꞉ta꞉ haleme mandane haliwekima꞉ta꞉ Mo amba꞉ homemeke wanda꞉halita꞉ paa mea tiaapeke na ya꞉la꞉me la aleme ekita꞉ ekipeke alemepe.  
\v 13 Koto aleme ekita꞉ ota꞉ pi lemeka꞉na꞉ yoluta꞉ Koda꞉ma꞉ make Ketiso na mea tiaalo pia꞉me.  
\v 14 Kutupa make Ketisota꞉ na mea tiaeya꞉ka꞉na꞉ yoluta꞉ nikana꞉ma꞉ pi ma꞉nda꞉ wala꞉peke na yolo pia꞉me. Kutupa ikana꞉ma꞉ make ma꞉nda꞉ pa꞉ta꞉ hone tulaapeke na yolo pia꞉me.  
\v 15 Kutupa niki make Koda꞉ma꞉ Ketiso paa mea tiaeyekeeki walomeke handaata꞉ yayapiki pi aloma꞉ haliweki halo puma꞉me. Do ekina꞉yeke loa꞉me. Koda꞉ma꞉ homemeke wanda꞉hali paa na mea tiaeya꞉ka꞉na꞉ta꞉ kota꞉ Ketiso make na mea tiaalo pia꞉me.  
\v 16 Amba꞉ homemeke wanda꞉halita꞉ Koda꞉ma꞉ paa na mea tiaeya꞉ka꞉na꞉ta꞉ kota꞉ Ketiso make Koda꞉ma꞉ paa na mea tiaalo pia꞉me.  
\v 17 Kutupa Ketiso paa na mea tiaeya꞉ka꞉na꞉ yoluta꞉ ika꞉ hone tulaaleme ekita꞉ pa aleme handolo pia꞉me. Kutupa ika꞉ hoke haumanu make paa ulu pia꞉me.  
\v 18 Kutupa Ketiso pa꞉ta꞉ hone tulao hao homemeke wanda꞉hali make ota꞉ alu pulu pimime.  
\v 19 Nika꞉ Ketiso pa꞉ta꞉ hone tulao hata꞉ handeteke haloma꞉ ekita꞉ do kenkena꞉ haloma꞉eki homeke yoluta꞉ kota꞉ mo a꞉ta꞉ma꞉ homeleme wanda꞉halima꞉ta꞉ niki pa꞉ta꞉ amba꞉la a꞉ta꞉ma꞉ homa꞉peke aleo.   
\p
\v 20 Kutu pulu pia꞉pate kotoeki dia꞉me. Ota꞉eki dupae. Ketisota꞉ homeekepate Koda꞉ma꞉ paa mea tiaeyekeme. Puki napeke ne tupa꞉ Ketisota꞉ amba꞉ titina꞉ mea tiaeyeke halie.  
\v 21 Homa꞉la꞉ ekita꞉ hali homeke pa꞉ta꞉ epeeke tupa꞉ kota꞉ homaa paa tiaalo poloma꞉eki make hali homeke pa꞉ta꞉ epeekeme.  
\v 22 Kota꞉ mo A꞉da꞉ma꞉na꞉ tapake wanda꞉hali paeyaota꞉ homeleme tupa꞉ pa mo Ketisona꞉ tapake wanda꞉halita꞉ Koda꞉ma꞉ paa mea tiaalieke.  
\v 23 Kutu piliepate pa Koda꞉ma꞉ lelie natena꞉ kone paa tiaalieke. Dupae. Hande puki napeke ne tupa꞉ Ketiso titina꞉e. Kutupa wetepena꞉ mo Ketisona꞉ ipilie natena꞉ta꞉ ipika꞉ wanda꞉hali mea tiaalieke.  
\v 24 Kutu pilie dina꞉ta꞉ mo paeyaalo pa꞉la꞉eki pilieke. Ketisoma꞉ta꞉ mo handeteke haleme haliweki paeyaoma꞉ piteleme ekimanu make mo you haliweki paeyaoma꞉ piteleme ekimanu make wele piteleme ekimanu paeyao make ipikana꞉ma꞉ paeyao bepolaota꞉ hande Kilu Tumbuao Hala꞉ ekita꞉ ipika꞉ Ateke Koda꞉ pa꞉ta꞉ mea halieke.  
\v 25 Do ekina꞉yeke loa꞉me. Ipika꞉ a꞉nda꞉ tunkuliki haliweki paeyao kone ana꞉na꞉ lu tombuao haluekema꞉ta꞉ Ketisota꞉ ota꞉ you hali hapeke ya꞉la꞉me.  
\v 26 Kutupata꞉ ipika꞉ a꞉nda꞉ tunkuliki alemanu lu paeyaaso hata꞉ta꞉ mo ota꞉ homa꞉la꞉eki kone ipikana꞉ma꞉ bepolaaso hata꞉ paeyaalieke.  
\v 27 Kota꞉ mo Baibolo bukana꞉ wape pa꞉la꞉ ekita꞉ dupa. Ala꞉ta꞉ ala꞉ta꞉ paeyao ipika꞉ anke oto pa꞉ta꞉ Koda꞉ma꞉ mea wiaala꞉me laa wape pa꞉la꞉me. Do Koda꞉ma꞉ ala꞉ta꞉ ala꞉ta꞉ paeyao Ketisona꞉ anke oto pa꞉ta꞉ mea wiaala꞉me la꞉la꞉ ekita꞉ pa Koda꞉ kone Ketisona꞉ anke oto pa꞉ta꞉ wiala꞉ ekina꞉ na la꞉la꞉me hone witoloma꞉me.  
\v 28 Dia꞉me. Ala꞉ta꞉ ala꞉ta꞉ paeyao Ketisoma꞉ kilu tombuao hata꞉ta꞉ ipikana꞉ma꞉ kone Eiyeke hata꞉ mo ipika꞉ anke oto pa꞉ta꞉ ala꞉ta꞉ ala꞉ta꞉ paeyao mea wiaeyeke Koda꞉ pa꞉ta꞉ ipiki kone oto pa꞉ta꞉ halieke. Kutu pia꞉ka꞉na꞉ta꞉ kota꞉ Koda꞉ma꞉ta꞉ ota꞉ paeyao tapao manda hata꞉ ota꞉ kilu tombuao halieke.   
\p
\v 29 Pate Paa na tiaalumekee lemeka꞉na꞉ta꞉ kota꞉ mandane wanda꞉halima꞉ta꞉ mo amba꞉ homemeke wanda꞉hali pa꞉ta꞉ hone witolo hata꞉ bapitaisi piteleme hauta꞉ eki puluekema꞉ koto hau pitelemepe. Amba꞉ homemeke wanda꞉hali paa mea tiaapeke na ya꞉ka꞉na꞉ta꞉ kota꞉ mo wanda꞉halima꞉ta꞉ amba꞉ homemeke wanda꞉hali pa꞉ta꞉ hone witolo hata꞉ ekipeke bapitaisi hau pitelemepe.  
\v 30 Kutupa niki make pa ekipeke nika꞉ loke ota꞉ hoeyaalo pa꞉la꞉ alemanu pa꞉ta꞉ hao haloma꞉pe.  
\v 31 Ya kametitio. Homa꞉la꞉ ekita꞉ nate paeyao I̱ pa꞉ta꞉ a꞉pa꞉peke ya꞉la꞉me. Dota꞉ pa yapa꞉piki pi alope. Dia꞉me. Nika꞉ Tekehali Yesu Ketiso pa꞉ta꞉ ta꞉ma꞉ni pea haloma꞉ ekina꞉ I̱ma꞉ ika꞉ pi laaso hata꞉ pitolo tupa꞉ do alo pi make ota꞉ekie alome.  
\v 32 I̱ma꞉ do Epesese da pa꞉ta꞉ hata꞉ mandane sayalemanu pa꞉ta꞉ a꞉nda꞉ piki nono pua꞉ ekima꞉ta꞉ kota꞉ koto pua꞉ ekima꞉ta꞉ I̱ ekipa tamba꞉ miliepe. Pate amba꞉ homemeke wanda꞉hali paa mea tiaapeke na yea꞉ka꞉na꞉ta꞉ kota꞉ mo  
\q1 Belia tuneke homolo poloma꞉ ekina꞉ta꞉ kota꞉ ame ne ikali naa keamana꞉ pipe laa  
\m lo haleme ekina꞉ niki make lapeke ya꞉la꞉me.   
\p
\v 33 Makeaasa꞉eki na opua꞉pa꞉peke. Hoke wanda꞉hali ame̱le̱ pomuma꞉ka꞉na꞉ta꞉ kota꞉ nika꞉ epeke hau pitoloma꞉eki hoeyaapeke ya꞉la꞉me.  
\v 34 Ika꞉ hoke hau piteleme ekimanu mina꞉pa꞉lao ika꞉ hone tiki tiki yao epeke tupa꞉ paa hapa꞉peke. Iki pa꞉ta꞉ haleme mandane wanda꞉hali manuma꞉ta꞉ Koda꞉na꞉ hau na handelememe. Do alo ekina꞉ta꞉ yaala꞉ma꞉ homaamina꞉ alome.   
\s1 Nika꞉ paa tiaalo poloma꞉ loke  
\p
\v 35 Hali ma꞉nda꞉ma꞉ dupa lota꞉ pilieke. Homa꞉la꞉ wanda꞉halina꞉ paa mea tiaake hauta꞉ ekipape o pa ekipiki loke halimipe laa lota꞉ pilieke.  
\v 36 Neketa꞉ hone na wiki someo. Wae ale homeke kenkena꞉ pa nokepea꞉ka꞉na꞉ta꞉ kota꞉ aeyeke homaata꞉ paa opilieke.  
\v 37 Kutupa kenkena꞉ noka꞉pele aleta꞉ pa wae alesiki noka꞉pilipikie. Palaowa wae alesiki o wae alesiki ma꞉nda꞉pe mata꞉la꞉pate hande opolo pa꞉la꞉ ekita꞉ na noka꞉peleme.  
\v 38 Hande wae ale sikita꞉ opolo pa꞉la꞉ ekita꞉ Koda꞉ma꞉ ipika꞉ hone pa꞉la꞉ ekina꞉ peaasa꞉me. Mo wae ale ta꞉ta꞉ ta꞉ta꞉ pikieki manuna꞉ opolo pa꞉la꞉eki make ta꞉ta꞉ ta꞉ta꞉ peaasa꞉me.   
\p
\v 39 Kutupa do kenkena꞉ da꞉ta hala꞉eki manuna꞉ loke mindikita꞉ homeke tupa꞉ dia꞉me. Wanda꞉halina꞉eki ta꞉ta꞉ pa꞉la꞉me. Kutupa ma꞉na꞉ yeti ba ta꞉peli manuna꞉eki ta꞉ta꞉ ta꞉ta꞉ pa꞉la꞉me.   
\p
\v 40 Kutupa ya nane alemanu make kenke nane alemanu make halememe. Oli ya nane ale manuna꞉ seliapo piki au la꞉la꞉ ekimanu ta꞉ta꞉ pa꞉la꞉me. Kutupa kenke nane ale manuna꞉ seliapo piki au la꞉la꞉ ekimanu make ta꞉ta꞉ pa꞉la꞉me.  
\v 41 Oli nateta꞉ ipika꞉ au la꞉la꞉eki ta꞉ta꞉ pa꞉la꞉me. Kutupa oli sumba꞉na꞉eki make oli hombulanka꞉ manuna꞉eki make ta꞉ta꞉ pa꞉la꞉me. Kutupa make oli hombulanka꞉ manuna꞉ au lelemeeki make ta꞉ta꞉ ta꞉ta꞉ pa꞉la꞉me.   
\p
\v 42 Kutupa mo hande homemeke wanda꞉hali paa mea tiaeya꞉ka꞉na꞉ta꞉ kota꞉ koto tupa꞉ kone halumeke. Hali toko hoitolo haena꞉ homa꞉la꞉ ale ula꞉me. Paa mea tiaeya꞉ka꞉na꞉ta꞉ homa꞉peke na ya꞉la꞉eki halieke.  
\v 43 Hoitolo haena꞉ta꞉ pa hoke alema꞉ handaata꞉ honkopu na hao wita꞉la꞉pate kone paa mea tiaeya꞉ka꞉na꞉ta꞉ epekeeki hata꞉ honkopu hao halieke.  
\v 44 Hoitolo haena꞉ta꞉ kenke loke homeke ya꞉la꞉pate paa mea tiaeya꞉ka꞉na꞉ta꞉ pa epeke temokona꞉eki halieke. Do kenkena꞉ loke mindiki hala꞉ tupa꞉ kota꞉ pa mo epeke epeke temokona꞉eki make ota꞉ halieke.  
\v 45 Mo Baibolo bukana꞉ wape pa꞉la꞉ ekita꞉ dupa. Amba꞉ titina꞉ hali A꞉da꞉ma꞉ta꞉ wepia da꞉ta haena꞉ leeke halie wape pa꞉la꞉pate pa mo wetepe nane A꞉da꞉ma꞉ta꞉ mo deto haena꞉ la꞉la꞉ Temokoe.  
\v 46 Epeke temokona꞉eki amba꞉la haena꞉ la꞉la꞉ eki dia꞉me. Do kenke loke amba꞉la haena꞉ laata꞉ mo epeke temokona꞉ ekita꞉ wetepena꞉e.  
\v 47 Titina꞉ A꞉da꞉ma꞉ta꞉ kenke dokoloma꞉ wepia haena꞉ leeke halie. Namba 2 A꞉da꞉ma꞉ta꞉ hepeni nane hao epeeke halie.  
\v 48 Do kenkena꞉ wanda꞉halita꞉ hande kenkena꞉ wepia haena꞉ leeke halima꞉ handelememe. Kutupa mo hepeni nane halo peleme wanda꞉halita꞉ hande hepeni nane hao epeeke halima꞉ handoloma꞉me.  
\v 49 Ameta꞉ nikana꞉ma꞉ hande kenkema꞉ wepia haena꞉ leeke halima꞉ handoloma꞉ tupa꞉ kota꞉ wetepena꞉ mo hepeni nane hao epeeke halima꞉ handulumeke.   
\p
\v 50 Kametitio. Do ekina꞉ alome. Loke mindiki wema꞉ wa꞉pa꞉la꞉ ekita꞉ Koda꞉na꞉ Kilu Tombuao Hala꞉eki pa꞉ta꞉ pua hapeke na ya꞉la꞉me. Kutupa homa꞉peke ya꞉la꞉ ekita꞉ deto hala꞉eki mea꞉peke na ya꞉la꞉me.   
\p
\v 51 Do la kitoloma꞉ a꞉mbaasa꞉ pita꞉ opua꞉pe. Niki paeyao ota꞉ na homolo poloma꞉pate pa mo paeyaaso haena꞉ la꞉la꞉ ekina꞉ bu kanake litolo haya꞉ka꞉na꞉ta꞉ kota꞉  
\v 52 nikita꞉ leke handu handu pita꞉la꞉ tupa꞉ kuta kone wonu pila halumeke. Hande bu kanake lia꞉ka꞉na꞉ta꞉ kota꞉ homemeke wanda꞉halita꞉ mea tiao paa na homolo peleme wanda꞉hali halimikie. Kutupa niki paeyao wonu pila halumeke.  
\v 53 Do alu pea꞉peke loketa꞉ topo pitolo hata꞉ pa mo hao hala꞉ ekima꞉ yamilieke. Kutupa do homo hala꞉ ekita꞉ topo pitolo hata꞉ pa mo deto hala꞉ ekima꞉ yamilieke.  
\v 54 Koto ekina꞉ mo alu pea꞉peke ekita꞉ pa mo hao hala꞉ ekima꞉ yamia꞉ka꞉na꞉ta꞉ kutupa mo homo hala꞉ ekita꞉ pa mo deto hala꞉ ekima꞉ yamia꞉ka꞉na꞉ta꞉ kota꞉ hande Baibolo bukana꞉ wape pa꞉la꞉ ekita꞉ ota꞉ yaalieke. Dupa.  
\q1 Homo hala꞉ ekita꞉ ota꞉ hoeya꞉ la꞉pa pa꞉la꞉me. Koda꞉na꞉ bepolaasa꞉ ekita꞉ ota꞉ bepola꞉pa pa꞉la꞉me.   
\q1
\v 55 Homa꞉la꞉ekio. Naka꞉ wanda꞉hali pa homao bepolaalo pa꞉la꞉ ekita꞉ handope.  
\q1 Homa꞉la꞉ekio. Naka꞉ tanda peao homaaluekema꞉ wele peaasa꞉ ekita꞉ handope  
\m laa wape pa꞉la꞉me.  
\v 56 Homa꞉la꞉ ekima꞉ta꞉ ipika꞉ tanda peao homaaluekema꞉ wele peaasa꞉ ekita꞉ hoke hau pita꞉la꞉eki pa꞉ta꞉ yama꞉ mu hala꞉me. Kutupa hoke hau pita꞉la꞉ ekima꞉ta꞉ ipika꞉ wele peaasa꞉ ekita꞉ mo hande Lo Pimanu pa꞉ta꞉ yama꞉ mu hala꞉me.  
\v 57 Kutu pita꞉la꞉pate nikana꞉ma꞉ Koda꞉ pa꞉ta꞉ keiyae pi lomana꞉e. Ipikana꞉ma꞉ mo Tekehali Yesu Ketiso pa꞉ta꞉ yama꞉ mo tombuao bepolaeyekeeki niki pa꞉ta꞉ ku hala꞉me.   
\p
\v 58 Koto ekina꞉ ota꞉ ya kametonuo. Da̱o̱la hata꞉ taka꞉lao hapa꞉peke. Tekehalina꞉ e pokaaseme ekita꞉ nate wotu pokaatiki pu hapa꞉peke. Pa ekipeke mo Tekehalina꞉ e pokaaseme ekita꞉ ota꞉ homekesiki kone na alupea꞉peke ya꞉leke handa loa꞉me.   
\c 16  
\s1 Ketiso tapakemanu tamba꞉ mina꞉la꞉ mani  
\p
\v 1 Ikana꞉ma꞉ mo mandane Diutuseleme haleme Koda꞉na꞉ wanda꞉hali tamba꞉ muluekema꞉ mani amu pulu peleme ekita꞉ I̱ma꞉ mo Ka꞉leisia kenke nane haleme siosimanu pa꞉ta꞉ Dupa꞉pe laa loa꞉ tupa꞉ ikana꞉ma꞉ make pea꞉pa꞉peke.  
\v 2 Sande paeyaona꞉ iki paeyaona꞉ homeke homeke lo amba꞉ pulana꞉ melemeeki dimina handaata꞉ ana꞉na꞉ putupa pa mandaneeki ika꞉ da pa꞉ta꞉ wia꞉tiki pu hapa꞉peke. Koto ekina꞉ wetepena꞉ I̱ epoa꞉ka꞉na꞉ta꞉ ikana꞉ma꞉ mani weiyaama꞉na꞉ yeke loa꞉me.  
\v 3 I̱ opolo epoa꞉ka꞉na꞉ta꞉ mo ikana꞉ma꞉ tiki tiki yao wimi manita꞉ mo talopu mea haena꞉ leleme haliwekima꞉ta꞉ Diutuseleme nane mea puaena꞉yeke I̱ma꞉ pasemanu wape pea halaata꞉ tapaalueke.  
\v 4 I̱ make polueke hone ua꞉ka꞉na꞉ta꞉ kota꞉ niki mandakena꞉ polumeke.   
\s1 Poloma꞉ wetepena꞉ pulu piekeeki  
\p
\v 5 I̱ma꞉ Ma꞉sedonia nanema꞉ laala꞉ puata꞉ iki haleme alena꞉ opolo ipulueke. Ma꞉sedonia nane amba꞉la pua꞉peke ya꞉la꞉me loa꞉me.  
\v 6 Iki ame̱le̱ hosiki hao haluekema꞉ hone witolopate pa mata꞉la꞉me. Mo kosa꞉ ki paeyaona꞉ haluma꞉pe. Kutupa wetepena꞉ da ma꞉nda꞉ nane poa꞉ka꞉na꞉ta꞉ ikana꞉ma꞉ pota꞉ I̱ tapaamina꞉e hone witolome.  
\v 7 Iki ame̱le̱ pa ta꞉ka꞉li hamana꞉ hone na witolome. Tekehalima꞉ hone pia꞉ka꞉na꞉ta꞉ kota꞉ iki ame̱le̱ nate wopu haluekema꞉ loa꞉me.  
\v 8 Kutu pulu polopateta꞉ hande Pendikosi nate epena꞉ do Epesese da pa꞉ta꞉ handeteke halueke.  
\v 9 Do ekina꞉yeke loa꞉me. Do pa꞉ta꞉ta꞉ pota꞉ lomba꞉pa ula꞉me. Kutupa epeke epeke e tieke tieke pokaapeke ya꞉la꞉me. Kutu pulu polopate pa mo pota꞉ sa꞉sa꞉ pulu peleme haliweki wotu make halememe.   
\p
\v 10 Timodi iki pa꞉ta꞉ a꞉pa haya꞉ka꞉na꞉ta꞉ ikana꞉ma꞉ ipiki epeke tupa꞉ handa꞉ mea epeke tupa꞉ handeteke hapa꞉peke. Ipikana꞉ma꞉ make I̱ma꞉ pitolo tupa꞉ mo Tekehalina꞉ e pokaasa꞉ ekina꞉ loa꞉me.  
\v 11 Kutupa hali homeke a꞉nda꞉ma꞉ ipiki pa꞉ta꞉ honditi hone na wia꞉pa꞉peke. Ikana꞉ma꞉ ipiki I̱ pa꞉ta꞉ epena꞉ alo hata꞉ ta꞉na꞉ma꞉ homolo hata꞉ tapaapa꞉peke. Ipikana꞉ma꞉ mandane Ketiso yankeketiti ame̱le̱ do ane epena꞉yeke handeteke halome.   
\p
\v 12 I̱ma꞉ nika꞉ kame Apolosita꞉ mo mandane kametiti ame̱le̱ iki handolo pena꞉yeke hoto eleke eleke sutiaatiki pua꞉pate pa ipika꞉ honema꞉ta꞉ ame do kone a̱i̱ handolo pua꞉peke na ya꞉la꞉me. Wetepena꞉ nate ana꞉ pia꞉ka꞉na꞉ta꞉ iki handolo pelieke.   
\s1 Paeyaaso pimanu  
\p
\v 13 Ikana꞉ma꞉ kokele pea hata꞉ hone tulaaso hata꞉ make da̱o̱la hao hapa꞉peke. Kutupa puki hana꞉ noka꞉pa hata꞉ honkopu hao hapa꞉peke.  
\v 14 Koto ekina꞉ ika꞉ piteleme haumanu paeyaota꞉ pukima꞉ homolo hata꞉ pu hapa꞉peke.   
\p
\v 15 Some ma꞉nda꞉ Sitepanisita꞉ ipika꞉ weki wanda꞉ tonka꞉na꞉ ikana꞉ma꞉ handelememe. Koto tapaketa꞉ mo Akaya Potobinisi nane hata꞉ta꞉ ota꞉ amba꞉ titina꞉ pi mea hata꞉ pa Koda꞉na꞉ wanda꞉halina꞉ e pokaatiki pitelememe. Koto ekina꞉ ya kametiti iki pa꞉ta꞉ honke alo hata꞉ dupa alome.  
\v 16 Ikana꞉ma꞉ koto tapake make mo ika꞉ mandake e pokaaseme wanda꞉hali make iki oto pa꞉ta꞉ homu pea hao hapa꞉peke.   
\p
\v 17 Mo tepo halita꞉ Sitepanisi Potunatasi Akaikusi ikana꞉ma꞉ I̱ pa꞉ta꞉ epeleme ekina꞉ I̱ma꞉ta꞉ ta꞉na꞉ma꞉ homolome. Iki paeyaota꞉ a꞉pa꞉peke na yea꞉pate do hali tepota꞉ iki epolo pimi tupa꞉ epelememe.  
\v 18 Koto haliwekima꞉ iki ta꞉na꞉ peaala꞉ tupa꞉ I̱ make ta꞉na꞉ peaasememe. Kutu piki haliweki manuta꞉ ika꞉ pi laapa꞉peke.   
\p
\v 19 Mo Eisia Potobinisi nane haleme siosi manuma꞉ iki pa꞉ta꞉ mo keiyae pi la꞉niaasememe. Hande Akuila Pisila toolima꞉ make ipilika꞉ da pa꞉ta꞉ mombolo haleme siosi ikana꞉ma꞉ tonka꞉na꞉ ika꞉ keiyae pi make la꞉niaasememe.  
\v 20 Do pa꞉ta꞉ haloma꞉ kametitima꞉ make iki pa꞉ta꞉ mo keiyae pi la꞉niaasememe. Mombelemeka꞉na꞉ta꞉ kota꞉ iki paeyaoma꞉ ika꞉ ika꞉ kone hopula alu alu pea꞉pa꞉peke.   
\p
\v 21 Yaka kikima꞉ kone I̱ta꞉ Poloma꞉ iki pa꞉ta꞉ keiyae pi la꞉niaasome laa do wape pea polome.  
\v 22 Tekehali pa꞉ta꞉ pukima꞉ na homeke pa kiaasa꞉ hali epita꞉ ota꞉ hoeyaena꞉e. Nika꞉ Tekehalio. Epoe.  
\v 23 Mo Tekehali Yesuna꞉ pa a꞉ta꞉ma꞉ homa tamba꞉ mina꞉la꞉ ekita꞉ iki pa꞉ta꞉ haena꞉e.  
\v 24 I̱ma꞉ Yesu Ketiso pa꞉ta꞉ ta꞉ma꞉ni pea hata꞉ta꞉ iki paeyao pa꞉ta꞉ pukima꞉ homolome.