\id REV - Kanasi NT [soq] -Papua New Guinea 1996 (DBL 2014) 
\h Gagalo sabamolala 
\toc1 Gagalo sabamolala Iesu Keriso dima weregalala sabamosana benemawa 
\toc2 Gagalo sabamolala 
\mt1 Gagalo sabamolala  
\mt2 Iesu Keriso dima weregalala sabamosana benemawa  
\c 1  
\p
\v 1 Buka ema ipa dima Iesu Keriso sabamosana benemawaleide. God dewa daitada walama kampaida dialepio aupe segaidantopua benemawa Iesu Keriso wanen, me nolawa dewalala mampo sabamosapia baiwa. Tane Iesu Keriso me enseliwa mampe dewa ema sabamosane ita wanaubena me nola dewalala Ion diepio atenlepia baiwa.   
\p
\v 2 Tane Ion dima uduudu God mampe ewene ita etena, do dima Iesu Keriso me mampe sabamosana buka ema bedewe benemawaleidie wadiase, “Ema uduudu ne ewamona ipa ulaipaida.”   
\p
\v 3 Walama kampaida os dewa ema segantopu. Sa baiwa me mida God benemawa ema apana mampo wisialepia sau euda donsapie nuaeulepi. Tane mo mida buka ema bedewe girumalena benemawa etompe ruawantompa do sau euda donsapue nuaeuntopu. Nuaeu debamawa me mampe mida God benemawa ema apana mampo wisialepia. Ita do mo mida buka ema bedewe girumalena benemawa eteie nuauwo ituie ruawantoia nuaeu debamawa mo mampo.   
\s1 Ion auwawa waaubaleide bola 7 ekelesiau mampo  
\p
\v 4 \x + \xo 1.4 \xt Ekisod 3.14; Gagalo 4.5\x*Ne Ion ekelesia uwa 7 bola Asia bedeuwo wainilana manlawo girumantedina: Sau amonawa euwa ita wanwan euda God mampea e manlawo. Me ipa mida tauma wanwankasalala ita bumpeido wandia, do me mida wisepia. Do sau amonawa euwa ita wanwan euda e manlawo aleu 7 mida God kolaiwatawa danawe waimoia mampo.  
\v 5 Tane do amona euwa ita wanwan euda e manlawo Iesu Keriso mampe, mida God gagalowa ulaipa mampe benemaleidia. Uduudu bedeuwo me bautalene bo bedewe enenwisen. Me ipa apana debamau tawo onieia uduudu oniamode, mo uduudu ipa me atowe. \bd Iesu Keriso no nuawadawadanede ita me osinawa kadi taunedia lotonauben.\bd*  
\v 6 \x + \xo 1.6 \xt Ekisod 19.6; Gagalo 5.10\x*\bd Tane me no dewaneno God gonaawa apanawa wananten. Do dewaneno pirisinten me Mamba God simbiasantaa baiwa.\bd* Sapaida ita muka Iesu Keriso mampe ande ita ando winakasalepi! Oa, no epe menaidanede, amen.   
\p
\v 7 \x + \xo 1.7 \xt Daniel 7.13; Matiu 24.30; Mak 13.26; Luk 21.27; 1 Tesal 4.17; Sakaria 12.10; Ion 19.34,37; Sakaria 12.10; Matiu 24.30\x*\bd Ewane, Iesu Keriso giou bedewainta iompo apana uduudu me ewapu. Tane do mo mida me tebipa eine bosaiena me ewapu. Ita me baiwa uwa daitada apanawa uduudu tawo osowe akaio, akaio wampe kakontompa!\bd* Oa, sa ipa sa, amen.   
\p
\v 8 \x + \xo 1.8 \xt Gagalo 22.13; Ekisod 3.14\x*Tatamba God mukamukauaida ionoidoa, me tauma wanwankasalala, mida bumpeido wandia, ita me mida wisepia wadi wadiase, \bd “Ne ipa Alpa ita Omega, bumpa ita ompa.”\bd*   
\s1 Ion auwen ruawa bedewe Iesu Keriso ewede  
\p
\v 9 Ne Ion, e sumanai sola, Iesu bedewe sumanaintedina baiwa poka e eteilana rua deawaa etedina. Ne e do God gonaawa bedewenten ita poka bedewe e mai etedabuaitipona rua ne deawaa dewasadina. Ne God aiawa amonantedina do ulaipa gagalowa Iesu waeuwanena benemawantedina baiwa mo ne wadaneane bonabona ebowa Patmos bedewe diburalala rua ituneiena.  
\v 10 Ne sape wainedino Tatamba walamawa Sande dea bedewe Aleu kakaiwa nopenene banlanedie. Ita ne adinawo aia debamawa nitu bui rua tarampet wadia etedino wane wanase,  
\v 11 “Dima e ewaa benemawa girumaitee ekelesia 7 bola Epesus, Simena, Peagamum, Taiatira, Sadis, Piladelwia ita Laodisia bedewe wanwanlala mampo waaubaitawo antopu.”   
\p
\v 12 Ne wainedine aia ema etane leuntene mida mainawo gagaloleidia ewapona baiwa. Ita leuntene siwa endowa nepa 7 gold mampe dewalala ewamona.  
\v 13 \x + \xo 1.13 \xt Daniel 7.13\x*Siwa endowa nepa sa eneio sawanauwo apana da ewaewawa apanaida ruawa gara daumawa tauno wawe nosena enedie. Me amatumba osowe nitu iga ruawa gold mampe dewalala taun.  
\v 14 \bd Me uwawa ita uwawa imba do sapusapuaida sipsip etepa imba ba giou sapusapua ruawa. Tane emawa ia idie bumedia epawa ruawa.\bd*  
\v 15 Me wawa ewaewawa abo irama ia bedewe suipono kalaleipona ruawa. \bd Do me aiawa etaetawa abaia debamaia nosedie guguadedia moinawa rua.\bd*  
\v 16 \bd Me kipora 7 witapa on osowe wineio wadadoleidie. Tane isima moamoaua moawa nata do me moawe winedie. Ita me namba ewaewawa omo enauto sapa wadia rua sapaida wan.\bd*  
\v 17 \x + \xo 1.17 \xt Gagalo 2.8; 22.13\x*Me epe enedio ewanee ne saidantene wawa bumpe bo rua aisintene itunten, mai tepanteapona. Tane me witapa on ne osonawo itune dianene wanase, “Mai saitaa! Ne ipa bumpeido ita ompeido wanwankasalala.  
\v 18 \bd Ne ipa inawaa wanwanlala. Ne bonten, tane tauma ita ando inawaa wainepina, mai bolala, dia. Ita bo kiwa, do bolala bolau ebowa Ades kiwa mainawo winei, ita bo mukawa ipa ne atonawo winede.\bd*  
\v 19 Dima tauma ita ando segantopua e auwen ruawa bedewe ewamoatuwana umanawa apana atentopua baiwa girumaitaa.  
\v 20 Ne kipora 7 witana on osowe wineio wadadontedino e ewaana ipawaida weregalala benemaepa. Siwa endowa nepa 7 gold mampe dewalala ipawaida benemawa do dieepa. Ema epe: Kipora 7, sa ipa ekelesia bola 7 bedeuwo waimoia enseliu. Tane siwa endowa nepa 7, sa ipa ekelesia 7.”   
\c 2  
\s1 Gagalo Epesus bedewe aleide  
\p
\v 1 Ita me ne dianene wanase, “Ne benema ema dieepo girumaite waaubewo bola Epesus ekelesiawa enseliu mampe alepi. Ema epe girumaite waa: Aia ema me mida kipora 7 witapa on osowe wineio wadadoleidia gagalowa, me ipa siwa enaenawa uduudu 7 gold mampe dewalala mampointa leidie ewamodia. Ita me e manlawo epe wade:  
\v 2 \bd E dewala uduudu dewamoilana do nolaidaitilana ne ateinaida.\bd* Tane do atenten sai badowa uduudu bedewe e mai etedabuaitape nolala epona, dia, tane ideita nolaitilana. Ita atenten apana kadiwa dewalala e mai menaleipona manlawontopu, dia. Do atenten apana isiwa e bedelawo muba umanau wane waienase, ‘No ipa aposel, Keriso waaubalala,’ tane e mo mainimole ewamole atenmolana mo ipa lagawaau. E ulaipa donsalana mo mampo, ipawa mo mai aposel, diaida.  
\v 3 Ne ateina e sai awanele poka etaidasalana ne ebona baiwa, tane e mai momoduitape etedabuaitapona, dia.  
\v 4 \bd Tane dea os dewasaile nuana kadisailana: Sumanaila bumpe e ne nuawadawadaidaneale simbiaiten, tane nuawadawada sa e amuwa elana.\bd*  
\v 5 E omaidasalana, insenadewaitana bauta ambi e ne nuawadawadaneale simbiaiten! \bd Insaisala leusane God mampe dodomanaitana ita dewa eubu bauta dewamoilana rua dewamona. Kadi bedewe e insaisala mai leusane God mampe dodomanaitana ne e manlawo wineape siwala eneiladodedia nepa naepe enedia wadapaaubepa.\bd*  
\v 6 Tane euda e dewasailana ipa ema: E Nikoros wawentoia dima dewasaio eweile dabuaidaitilana mai menaleipona, dia, ne dabuanedia rua.”   
\p
\v 7 \x + \xo 2.7 \xt Bumpai 2.9; Gagalo 22.2\x*Mida asiwa winedia me asisudewalepi Aleu kakaiwa ambi ekelesia mampo gagaloleide. \bd Apana mida badowa enompe poka iompo nanausampa, ne wapo me God bubua bolawa bedewe ina iawa ipawa aisepie napi.\bd*   
\s1 Gagalo Simena bedewe aleide  
\p
\v 8 \x + \xo 2.8 \xt Gagalo 1.17; 22.13\x*Ita me ne dianene wanase, “Ne benema ema dieepo e girumaite waaubewo bola Simena ekelesiawa enseliu mampe alepi. Ema epe girumaite waa: Aia ema me mida bumpeido wandia ita ompeido wanwankasalala gagalowa, me mida bolene tane bo bedewe enenwisene inawaa wandia. Me e manlawo ema epe wade:   
\p
\v 9 \bd E poka eteilana saiwa ne atenten ita dima uduudu e abolawaitile nuapareitilana ne ateinaida.\bd* Tane e manlawo ipa maura debamaia! E bedelawo apana isiwa muba umanau waie waiase, ‘No Ius apanawaida,’ tane mo mai Iuswa, dia, lagantoi. Mo Seitan apanawaida awodeantoie me wadaposisaia. Mo e wakadisaleie ituaisilei, tane dima mo dewasaia ne atententuwan.  
\v 10 E poka daitada etana baiwaitilana mai sawaitana, dia! Ne dialedina isiwa e bedelawo kadiwa mamba Seitan rubulepia baiwa wadalepie diburalepi. Ita e walama 10 bedewe poka daitada apana mampo etaidasana. \bd Mo e kadilempo boida baiwaitonune sumanaila mai ena, diaida, ne mainawo sumanaiidaitana. E epe dewaitano ne unela uwa benawa uwatauwa eudida, sa ipa inawinakasalala, enalepa.”\bd*   
\p
\v 11 \x + \xo 2.11 \xt Gagalo 20.14; 21.8\x*Mida asiwa winedia me asisudewalepi Aleu kakaiwa ambi ekelesia mampo gagaloleide.  
\p Apana mida badowa enompe poka iompo nanausampa, me mai ia iilala bedewe alepie bo natawa osowe poka etepie bolepi, diaida, tane me ideita wanwankasalala.   
\s1 Gagalo Peagamum bedewe aleide  
\p
\v 12 Ita me ne dianene wanase, “Ne benema ema dieepo girumaite waaubewo bola Peagamum ekelesiawa enseliu mampe alepi. Ema epe girumaite waa: Aia ema me mida isima moawa nata moamoaua mampe winedia gagalowa.   
\p
\v 13 \bd Ne ateina e naepe wainilana, sa ipa Seitan kolaiwatawa enediawo wainilana.\bd* Tane e ipa ne ebonawo sumanaitile wainilana. E bolalaida bedewe Seitan wandie bola sa oniede ita sape ne benemana wawalala sumanainaleidie simbianedia ebowa Antipas bosaiena. Ita ne ateina Antipas walamawa osowe e mai ne lagana wapona, dia, ita e sumanaila ne bedenawo mai epona.  
\v 14 \x + \xo 2.14 \xt Nambas 22.5,7; Nambas 25.1-3\x*\bd Tane dewa isiwa kadisailana ne dabuanedia benemaledina:\bd* E bolalawo apana isiwa mo mida apana ebowa Balaam waeuwawa wawentoia waimoi. Balaam Israel banlamodia apanawa ebowa Balak waeuwasano ita Balak waeuwa sa mampe me apanawa Israelwa banlakadisamodio kadi dewasaie. Mo apana da godiu lagawaau sumanaiwantoia dewawa bedewentone do pulowa ituia nanawa naiena. Tane do Balaam waeuwawa mampe Balak apana banlakadisamodio ninarebarebantoie.  
\v 15 Do apana isiwa e bedelawo Nikoros ita me sosowa waeuwau wawentoia dewasai.  
\v 16 \bd Sa baiwa insaisala leusane God mampe dodomanaitana! Naita dia, ne walama kampaida os bedewe manlawo wineapa ita isima moanawo winedia mampe Nikoros wawentoia apanawa do onantata.”\bd*   
\p
\v 17 \x + \xo 2.17 \xt Ekisod 16.14,15; Ion 6.48-50\x*Mida asiwa winedia me asisudewalepi Aleu kakaiwa ambi ekelesia mampo gagaloleide.  
\p \bd Apana mida badowa enompe poka iompo nanausampa ne nana mai sabamo winawinala ebowa Manna wanamopo napu. Ita do seu sapusapua osowe ebo sanaa girumalena winedia wanamopa.\bd* Tane ebo ema mo mida seu sa wadeiena os atenton, mai apana da, dia.   
\s1 Gagalo Taiatira bedewe aleide  
\p
\v 18 “Ne benema ema dieepo girumaite waaubewo bola Taiatira ekelesiawa enseliu mampe alepi. Ema epe girumaite waa: Aia ema ipa God Otopa gagalowa, me mida emawa ipa ia idie bumedia epawa rua. Ita me wawa irama badowa eudida sapaidaleidie kiboraleidia rua.  
\v 19 \bd Ne e dewala uduudu, nuawadawadala, sumanaila, ita simbiala nolawa ateinaida.\bd* Ita ne atenten e sai pokawa eteilana bedewe sumanaila mai epona, dia. Do ateina tauma e nola debamauida dewamoile wainilana, mai bauta dewamoilana rua.  
\v 20 \x + \xo 2.20 \xt 1 Kin 16.31\x*\bd Tane dea e dewasailana ne dabuanedia benemawaledina:\bd* I ebowa Iesebel, mida meba umanawa wadia me ipa God perowetawa, e bedelawo wande. Me waeuwawa osowe ne nolana dewalala banlakadisamodio kadi dewasaie ita ninantoi, do apana da godiu pulowa ituia nanawa nai. Tane e mai dabuasaipe taneipona, di manlawosailana.  
\v 21 Ne me walamawa itune onioniantedine kadiwa bedewe insaisawa leusape God mampe dodomanalepona. Tane me nina dewawa dewasadia God mampe dodomanalepona dabualen, mai menasapona, dia.  
\v 22 Sa baiwa ne dewasapo me kero pokawa etepie nuapareidalepi. Ita mo mida me do ninantoia ne dewamopo mo poka debamawaida etapu. Mo insaisau kadi bedewe leusapue God mampe dodomanantopua, sa ide! Naita dia, ne dewamopo mo poka debamaia etapue nuapareidantopu.  
\v 23 \x + \xo 2.23 \xt Ierima 17.10\x*Ne Iesebel obampa bomopatuwapi. \bd Ne ema dewasapo ekelesia uduudu atentopu ne ipa mida apana nuau bedewa do insaisauida ewedina ateinaida. Tane e deadea dima dewasalana ruawantape sipoa enalepa.\bd*   
\p
\v 24-25 Tane e Taiatira ekelesiawa bedelawo sumanailala nata os mai Iesebel waeuwawa waweitipona. Waeuwawa sa asiasi apana Seitan dewawa badowaida atentoie wadeie mamposai. Tane mo dabuantone mai wadapona, dia. Tauma e mida waeuwa sa mai waweitapona ema epe dialedina: \bd Dima e wadalana wadanadodepi ideita ne wineapa.\bd* Sa os dialedina, mai da, ne mai gagalo uara wape sai da e osolawo itupa, dia.   
\p
\v 26 \bd Apana mida badowa enompe poka iompo nanausampe ne insaisana ruawalempa tane mai epi ideita ompa osowe wisepia, apana sa ne Mamana mampe muka wadana rua ne me muka wanapo uwa daitada apanawa tawo osowe oniamopi.\bd*  
\v 27 Ita me koinawa irama mampe dewalala wadepie mo badowa oniamopi, ita me mo epamopio onta rua tutuwapue kadikadintopu.  
\v 28 \bd Ita do me mida badowa enompe ompa osowe wisepia ne walama kiporawa Tauragaraga wanapa.”\bd*   
\p
\v 29 Mida asiwa winedia me asisudewalepi Aleu kakaiwa ambi ekelesia mampo gagaloleide.   
\c 3  
\s1 Gagalo Sadis bedewe aleide  
\p
\v 1 “Ne benema ema dieepo girumaite waaubewo bola Sadis ekelesiawa enseliu mampe alepi. Ema epe girumaite waa: Aia ema me mida aleu 7 ita kipora 7 mampe wineia gagalowa. \bd E dima dewasailana ne atententuwan.\bd* E apana emauwo nolaitilana euda, ita mo e ewaleie waia e ide Aleu kakaiwa mukawa mampe nolaitilana. Tane sa ipa mai ulaipa. \bd Aleu kakaiwa inawawa mai e bedelawo, dia, e bobopa rua wainile ituidaitilana.\bd*  
\v 2 Ne e nolala dewamoilana ewamonatuwan ita ateina Mamamba emawe dewa isiwa mai dewamopadewaitapona, dia. Sa baiwa e itula bedewe enanawilena! Aleu kakaiwa nolawa e bedelawo winedia nolawaitana ita dewa euda bolepia baiwaleidia sausano badolepi.  
\v 3 \x + \xo 3.3 \xt Matiu 24.43,44; Luk 12.39,40; Gagalo 16.15\x*E dima bauta wadalana ita etalana insene ruawaitonuna, \bd ita insaisala leusane God mampe dodomanaitana! Naita e itula bedewe mai enanawilena ne poiwaa rua walama mai ateitonuno bedewe nuakadina do manlawo wineapa.\bd*  
\v 4 Tane e bola Sadis ekelesiawa bedelawo apana nata os garau mai miramirasaipona waimoi. Mo ipa dodomanauida, sa baiwa mo ando gara sapusapua taumopuo ne do wainente leunta.  
\v 5 \x + \xo 3.5 \xt Ekisod 32.32,33; Gagalo 20.12; Matiu 10.32; Luk 12.8\x*\bd Apana mida badowa enompe poka iompo nanausampa me gara sapusapua taumopi mo ruau. Ne ina bukawa bedewe me ebowa mai siniepaaubepa, diaida! Tane Mamana ita me enseliwa do danauwo ne me adiwentape wape wapaase, ‘Me ipa ne mainawoa.’”\bd*   
\p
\v 6 Mida asiwa winedia me asisudewalepi Aleu kakaiwa ambi ekelesia mampo gagaloleide.   
\s1 Gagalo Piladelwia bedewe aleide  
\p
\v 7 “Ne benema ema dieepo girumaite waaubewo bola Piladelwia ekelesiawa enseliu mampe alepi. Ema epe girumaite waa: Aia ema me mida kakaiwa dodomanaida gagalowa, me bedewe ulaipa os winede. Me ipa Dawid kiwa wadedidodedia apanawa. Ipawa Dawid mapo Israel bolawa oniedia ruawa \bd me ipa muka wadene God gonaawa oniede. Dima me wadediaubedia mai mida gudulepia rua, dia, ita dima me guduleidia mai mida wadepiaubepia rua, diaida!\bd*  
\v 8 Ne e dima dewamoilana ateina. Ne dialedina e nanlanepe ne du moawa wadanaaubena e baila ita du moawa sa mai mida da gudulepia rua, diaida! Ne atenten e mukala keraulen tane ideita aiana etale ruawaiten, ita e mai ne lagana wape wakoaneapona, dia.  
\v 9 E bolalawo mo mida Seitan apanawa awodeantoie me wadaposisaia waimoi. Mo muba umanau waia mo ipa Iuswa, God apanawaida. Tane mo ipa mai God mampea, dia, di lagantoi. Ne dialedina ne mo dewamopo wimopu manlawo e wala bumpe imimpu emmisintopue dunentopue auwadewadewalepu. Ita mo e ewalepue atentopu ne e nuawadawadaledina.  
\v 10 E sumanaila poka bedewe mai epona, tane ideita poka bedewe badowa enalana, sa ipa e ne waeuwana ruawaiten. \bd E epe dewaitena baiwa ne do e mai elepa, dia, tane tawo osowe poka debamaia iompo ne e saulepo kadiwa mai donsana.\bd* Poka walamawa sa tawo apanawa uduudu rubumopia baiwa iede.   
\p
\v 11 \bd Ne walama kerauda os bedewe wineapa! Dima e wadalana wadanadodepi e unela uwa benawa uwatauwa eudida e baila winedia wadapuaubepua sawa.\bd*  
\v 12 \x + \xo 3.12 \xt Gagalo 21.2\x*\bd Apana mida badowa enompe poka iompo nanausampa, ne me dewasapo ne Godna duwa bedewe tuatua euda badowa rua enepi.\bd* Ita me God duwa sa mai epie nosepi, dia, tane ideita sape os waimpa. Me osowe ne Godna ebowa girumanteapa. Tane do ne Godna bolawa debama ebowa Ierusalem sanaa me osowe girumanteapa. Bola debama ema uboe ne Godna mampee iepi. \bd Ita do ne nebaida ebona sanaa me osowe girumanteapa.”\bd*   
\p
\v 13 Mida asiwa winedia me asisudewalepi Aleu kakaiwa ambi ekelesia mampo gagaloleide.   
\s1 Gagalo Laodisia bedewe aleide  
\p
\v 14 \x + \xo 3.14 \xt Proweb 8.22\x*“Ne benema ema dieepo girumaite waaubewo bola Laodisia ekelesiawa enseliu mampe alepi. Ema epe girumaite waa: Aia ema me mida ebowa Amen gagalowa. Me ebo ema wadena, ipawa dima uduudu me God mampe ewedie atenleidia ulaipa os benemawaleide ita God insaisawa rua os dewasade, mai etedabualeipona, dia. God dima uduudu dewasana mamba ipa me, ipawa uduudu me mampee segalentuwan.  
\v 15 \bd E sumanaila bedewe mai dodomana, diaida,\bd* ita e dima dewamoile wainilana ne ateinaida. E ne waroroneilana bedewe mai nuala obasaidaleipona ba nuala polawaida waipona, e insaisala sawano winede. Ne menanedia e nuala obasalepi ba pola wapi.  
\v 16 \bd E mai obasawaida ba polawaida, tane e ipa sawano, sa baiwa ne e dabualedina moanawo toaubalepo nolena apana nana daasia naie eteie toiaubeia ruawa.\bd*  
\v 17 E eba umanala ateitile inseile wailanase, ‘No dima uduudu menanedia mai inseipona, dia, ipawa no mauraidanten, nitu uduudu no mainimbo rua os winamoi.’ Tane sa dia, e mai eba atendewaidaitipona. Ne emanawo e ipa mauradina boaboaua kadiwa, apana dabualei. E ipa nuaparelalaida, emala potawa ita monamonaua wainilana, mai gara taupe wanleipona.  
\v 18 Sa baiwa ne wasauledine dialedina ulaipa goldiwa ne mainawo iririwaitane wadane ita mauraitana. Do gara sapusapua ne mainawo wadane tauna ita monamonaua wainilana malawa dialepi. Tane emala potalena bunama ne mainawo iririwaitane wadane emala bunamaitano inalepio sala ewanadewaitana.  
\v 19 \x + \xo 3.19 \xt Ibru 12.6\x*\bd Mida nuawadawadamodina mampo ne epe dewasadina: Mo dima kadiwa dewasaia ne diaidamodine do poka wanamodina mo euwa dewasampaa baiwa.\bd* Sa baiwa ne dialedina ulaipa mampe insaisala leusane God mampe dodomanaitana.  
\v 20 Gagalona ema etanadewaitana! \bd Ne du moape enane kekesarantedina. Apana mida ne aiana etedie ita ne baina du moawa wadediaubedia ne me mampe odape me nata oda nanawa nata.\bd*   
\p
\v 21 \bd Apana mida badowa enompe poka iompo nanausampa, ne me diape muka wanapa ita ne nata kolaiwatana osowe wanta,\bd* ne badowa enane poka iedio nanausana ita Mamana nata me kolaiwatawa osowe wainitana ruawa.”   
\p
\v 22 Mida asiwa winedia me asisudewalepi Aleu kakaiwa ambi ekelesia mampo gagaloleide.   
\c 4  
\s1 Ion auwen ruawa God kolaiwatawa osowe wandia ewede  
\p
\v 1 Ema aupe du moawa uboo wadaaubalala ewana. Ita aia tarampet suio wadia rua bauta ne mainawo wadio etana, aia sa deawaa osowe dianene wanase, “Mape odaa! Dima ando God insaisawa ruawa segalepia euwaepo ewaa.”  
\v 2 Me epe wadio Aleu kakaiwa tauwadea ne bedenawolene oniadewasanedie ita uboo kolaiwata enedia ewana. Tane do me mida osowe wandia ewana.  
\v 3 Mida sape wandia ewaewawa eudida, seu nata uwataubu oau wasidawasida ebowa Iasipa ita bumawa ebowa Kanelian kiborantoia ruau. Ita wari oawa eudida kiboraleidia seu ebowa Emeral rua kolaiwata panene enedie.  
\v 4 Tane kolaiwata tampeinta kolaiwata isiwa 24 eneie. Kolaiwata sa osouwo 24 eiau waimoie. Mo garau sapusapua ita uwau benawa uwataubu eudida gold mampe dewalala taumone waimoie.  
\v 5 \x + \xo 4.5 \xt Ekisod 19.16; Gagalo 8.5; 11.19; 16.18; Gagalo 1.4\x*Kolaiwata sawano enediawo kelama lotodie nosedie do uma aiawa debamaia ita moina daitada sapee nosedie. Kolaiwata danawe siwa 7 imoie, siwa sa ipa God Aleupa 7 mida me nolawa dewasaia.  
\v 6 Ita do kolaiwata danawe nitu da owa ruawa ewaewawa garasiida sapa wadie eudida winedie. Nitu sa ipa sabamo ewaewawa garasi bedewe eweiana ruawa. Kolaiwata tampeinta nitu da wanwanlala 4 mo adiuwo ita danauwo emau uduudulen.  
\v 7 Nitu da wanwanlala bedeuwo dea bautalene enedia ewaewawa pue laion ruawa. Tane wawea kau mona rua ita wawea da me namba ipa apana namba ruawa. Tane ompaida enedia ewaewawa nene ebowa Inamoia iono aleidia ruawa.  
\v 8 \x + \xo 4.8 \xt Aisaia 6.2,3\x*Nitu da wanwanlala 4 mo deadea mabupu 6 do. Tane mabupu atowe ita onape emau uduudulen. Tadina ita walama mo kainokaino waie waiase,  
\p \bd “Tatamba God mukamukauaida ionoidoa, me ipa kakaiwa. Ulaipa, me ipa kakaiwaida os! Me ipa bumpeido wandia, tauma wanwankasalala ita wisepia.”\bd*  
\m Mo walama uduudu epe wai, mai dainantoipe eipona, dia.   
\p
\v 9 Nitu da wanwanlala sa kainokaino me mida wanwankasalala kolaiwata osowe wandia sapaidasai, ita do me wadaposisaie auwadewadewasai.  
\v 10 Mo epe dewantoio mo eiau uduudu 24 me mida wanwankasalala kolaiwata osowe wandia danawe imimpu emmisintone wadaposisaie ionoidosai. Ita mo uwau benawa uwataubu eubuida taumoia otaaubantoie kolaiwata danawe teamoie waiase,   
\p
\v 11 \bd “Tatamba no Godimba, uduudu winamoia e dewamoana, ema ipa insaisaitene dewamoano seganton. E os dodomanaida, sa baiwa eulena e os ionoidoente wadaposienta. Do eulena sapaida ita muka uduudu e wadaa!”\bd*   
\c 5  
\s1 Ion auwen ruawa bedewe buka lomiwa 7 do ewede  
\p
\v 1 Mida kolaiwata osowe wandia witapa on buka bedewa ita adiwa do girumalala wadedio ne ewedinee. Buka sa lomiwa 7 mampe gudulena, mai mida wadepiaubepia rua.  
\v 2 Ita ne ensel mukawaaida enedio ewedinee. Me aiawa mukaleidie benemaleidie wadiase, \bd “Mida euwaida dodomana buka ema lomiwa wadepiaubepie buka wadepike ewepi?”\bd*  
\v 3 Tane mai mida uboo wanwanlala, ba tawo osowe, ita do bolala bolau bedewe wanwanlala epe dewalepia rua, diaida!  
\v 4 Mo banuntone mida euwa dodomanaida buka sa wadapaaubepe bedewa ewapona baiwa, tane mai mida da donsapona, dia. Ne epe ewane insenalewalewantene ke debamaia wadine.  
\v 5 \x + \xo 5.5 \xt Bumpai 49.9; Aisaia 11.1,10\x*\bd Ita eiau sape waimoia bedeuwo dea ewanene dianene wanase, “Ke ea! Ipawa dea debamawaida, mida mo ebowa waia Iuda damba laioniwa, wande. Me ona debama bedewe kasawogaidalene emalawoawa nanaumono atowenton. Sa baiwa me rua os buka lomiwa 7 wadepiaubepie buka wadepike ewepi.\bd* Tane me ebowa da waia Dawid waapawa, ebo sa ipawaida ipa me Dawid atanosiwa debama.”   
\p
\v 6 \x + \xo 5.6 \xt Aisaia 53.7\x*Me epe dianeno \bd kolaiwata enediawo Sip sanaa enedio ewana. Me ewaewawa bosaiena ruawa pira do enedie,\bd* ita tampeinta nitu da wanwanlala 4 ita eiau do eneie. Tane Sip sanaa donawa 7 ita emawa 7 do enedie. Emawa sa ipa God Aleupa 7 waaubamona tawo uduudu bedewe alentuwan.  
\v 7 Tane Sip sanaa alene me mida kolaiwata osowe wandie buka witapa on mampe wadedia mampelene buka sa witape waden.  
\v 8 Ita me buka sa wadedio nitu da wanwanlala 4 ita eiau 24 do imimpu emmisintone me wawa bumpe dunentone wadaposisaie. Mo uduudu nitu gita rua otamoiena. Ita do mo deadea redu gold mampe dewalala piupiu bedewe nopelala otamoiena. Sa ipa apana mida God apanawaida kakaibu raupariu aimoia reduwa.   
\p
\v 9-10 \x + \xo 5.9-10 \xt Ekisod 19.6; Gagalo 1.6\x*Ita mo Sip sanaa danawe dunentone wadaposisaie sasa sanaawa sasantoie waiase,  
\p \bd “Mo e koros osowe seueieno boiteno ita osinaa mampe dan daitada bedeuwoe apana malesamoana God baiwa.\bd* Ita do aia daitada wawalala bedeuwoe, do ete daitada ita do uwa daitada bedeuwoe e apana malesamoana God baiwa. \bd Mo ipa God gonaawa apanawaida wananton. Ita e dewamoano pirisintona no Godimba simbiawantompe warere ruau tawo uduudu oniempa. E os epe dewaitene boitene apana God baiwa malesamoana, sa baiwa eulena e buka wadee lomiwa wadaaube wadaake ewaa.”\bd*   
\p
\v 11 Mo Sip sanaa epe wadaposisaieno dialeno aupe ensel uaraia, nambawa 100 milion ruawa, ewamone do aiau etana. Mo ipa kolaiwata ita nitu da wanwanlala ita do mo eiau mida kolaiwata tampeinta eneia enane paneiena.  
\v 12 Tane aiau debamaia etamodino waie waiase,  
\p \bd “Sip sanaa mida bosaiena ipa dodomanaida, sa baiwa eulena muka uduudu, maura uduudu, do aten insaisawa ita kasawoga uduudu me wadepi. Do eulena me ionoidosante sapasante wadaposisanta.”\bd*   
\p
\v 13 Ita ne uboo wanwanlala, tawo osowe wanwanlala do bolala bolau tawo atowe wanwanlala ita owa bedewe waimoia uduudu ne etamodino sasantoie waie waiase,  
\p \bd “Me mida kolaiwata osowe wandia ita Sip sanaa mampo sapaida ita muka uduudu winakasalepi. No mo ebou ande ita ando wadaposisante ionoidosanta!”\bd*   
\p
\v 14 Tauma nitu da wanwanlala 4 wane waienase, “Oa, sa no menaidanede, amen!”  
\p Ita eiau sape waimoia God ita Sip sanaa danauwo imimpu emmisintone mo wadaposimoie ionoidomoie.   
\c 6  
\s1 Sip sanaa buka lomiwa wadediaubede  
\p
\v 1 Ita ne ewedino Sip sanaa buka osowe lomi uduudu 7 wineia bedeuwo dea bauta winedia wadenauben. Tane etedino nitu da wanwanlala 4 bedeuwo dea uma aiawa wapia rua wane wanase, \bd “Winea!”\bd*  
\v 2 \bd Me epe wadio pue debama oas etepa sapusapua segaleidio ewana.\bd* Me mida oas osowe waine aleidia pidu wadedie ita uwawa benawa uwatauwa waneieno ain. Ona uduudu bedewe me kasawogaida. Tauma me aleidia osowe onalepie kasawogaidalepie emalawoawa nanausimopi.   
\p
\v 3 Sip sanaa buka lomiwa namba 2 wadediaubedio nitu wanwanlala 4 bedeuwo bautala wawea etedino wane wanase, \bd “Winea!”\bd*  
\v 4 \bd Me epe wadio oas da etepa osinaosinaua segaleidio ewana.\bd* Me mida oas osowe waine aleidia isima debamaia ita muka wanena tawo osowe wanwan euda obasa wadepiaubepie nambesapi ita apana onantopue epaepabobontopue bontopu.   
\p
\v 5 Sip sanaa buka lomiwa namba 3 wadediaubedio nitu da wanwanlala 4 bedeuwo bautala wawea da etedino wane wanase, \bd “Winea!” Me epe wadio oas da etepa dubawa segaleidio ewana.\bd* Me mida oas osowe waine aleidia sikere witape wadedie.  
\v 6 Ita ne aia etedino apanaida aiawa ruawa nitu da wanwanlala 4 sape eneia bedeuwoe wisene wane wanase, “Maraapore ipia baiwaleide, sa baiwa e walama dea bedewe nolaitilana manewa rua wadane aitane nana gimaraitane nana keraudaida wadana mane sa debama bedewe, mai mapo dewawa ruawa. Mane sa debamawa mampe wit lomawa dea os kerauda wadana, ba parawa nana ebowa Bali mampe dewala lomawa natadea kerakera otena.” Tane aia sa me mida oas osowe waine aleidia do diene wanase, “Olib ita wain iawa mai kadimona, emono di inintompe naumpa.”   
\p
\v 7 Sip sanaa buka lomiwa namba 4 wadediaubedio nitu da wanwanlala 4 bedeuwo ompa etedino wane wanase, \bd “Winea!”\bd*  
\v 8 \bd Me epe wadio oas da etepa lawalawaida segaleidio ne ewana.\bd* Tane me mida oas osowe waine aleidia ebowa ipa Bo. Bolala bolau tawo atowe winedia ebowa Ades wiseno nata antoiena. Ita God mo muka wanamona tawo moawa dea bedewe ona debamawa ita omana, do kero kadiu rebarebawa nawaialala, ita do pue onawaau segantopue apana uara kadimopue bomopu. Tane tawo moawa natadea bedeuwo apana wanwambu euda di wankasantopu.   
\p
\v 9 Sip sanaa buka lomiwa namba 5 wadediaubedio God pulowa pue ituia watawa atowe mo mida God aiawa sumanaiwantoie benemawantoia baiwa epaboiamoiena aleupu sape ewamona.  
\v 10 Ita mo mukantoie waie waiase, “Tatamba mukamukaua, e ipa kakaiwa dodomanaida ita e bedeawo ulaipa os winede. \bd Walama dainea apana tawo osowe wanwanlala kotumoe matangelamoe no osinamba sipoa osouwosaa?\bd* Mai oniewo daumalepi, no menanedia tauwadea dewasaa!”  
\v 11 Mo deadea garau daumawa sapusapua otamone taumoieno Tatamba God diamone wanase, \bd “Bauta e sumanai sosola ne nolana dewalala nambau ne sonabene ituna ruawa e epaboialeiena rua epaboiamopuo, muriwa ne tawo osowe wanwanlala kotumope matangelamopa.\bd* E walama kerauda os osowe onioniaitonune bubuaitonuna, muriwa e iririla dewasapa!”   
\p
\v 12 \x + \xo 6.12 \xt Gagalo 11.13; 16.18; Matiu 24.29; Mak 13.24,25; Luk 21.25\x*Sip sanaa buka lomiwa namba 6 wadediaubedio ewedinee. Ita wanatata debamaia wiseno omo dubalene sala iwinidalen ita uaboa bumena ewaewawa osina ruawa segalen.  
\v 13 Tane kipora uba tampe eneia tawo osowe nonosintoiena korou wasiipa iawa osowe wineio lawara debama wisedie uwamodio nomoia ruawa.  
\v 14 \x + \xo 6.14 \xt Gagalo 16.20\x*\bd Ita uba nogi nukula rua meba nukulene alene lawosalene diaidalen. Tane do wadi ita bonabona uduudu bolauwo eneia riantone lawosantone diaidanton.\bd*  
\v 15 Epe segaleno tawo warereu ita onioniau apanawa uduudu, do sorodia onioniau debamau, puraiwa apanawa, kasawogalala ita do apana debamau ita mo nolau dewalala uduudu saidantone antone guba ita nau nagawa bedewainta wereganton.  
\v 16 \x + \xo 6.16 \xt Luk 23.30\x*Ita mo weregantoie waimoie wadi ita nau iririmoie waie waiase, “No osombo iane wereganeno me mida kolaiwata osowe wandia mai ewanepi, ita Sip sanaa nuakadiwa mai no mainimbo wimpi.  
\v 17 \bd No wereganena, ipawa God ita Sip sanaa nuakadiu walamawa rebarebaida tauma wisenauben ita mai mida da nambunepe enepia ruawa, diaida!”\bd*   
\c 7  
\s1 Ensel apana mida God mampea makasamode  
\p
\v 1 Ema aupe ne ensel 4 ewamodinee. Mo tawo moawa 4 ruawantone deadea eneie tawo lanunuwa 4 tawo moawa sawo ieia enabodasaiena. Ita sala uduudu dainaidalen. Mai lanunu da tawo ita owa osowe weuwapona ba ia da tepasapona, diaida.  
\v 2 Tane ne ensel da omo wisediawo odedio ewedinee. Me God wanwankasalala makawa itumpaa nituwa witapa osowe wadene do odedie. Me ipa ensel 4, mida muka wadeiena tawo ita owa kadisapua baiwa, mukaidalene diamone wanase,  
\v 3 “Mai tawo, owa, ba ia da kadisana, dia! \bd Bauta apana mida God mampea simbiasaia nambu osowe no God makawa ituto, muriwa tawo ita owa kadimonatuwapi!”\bd*  
\v 4 Ensel epe wano ita aia da apana makalala nambau benemawaleidio etana. Namba benemalena ipa 144.000. Ita mo makalala ipa Israel damba uduudu 12 bedeuwo.  
\v 5 Iuda damba bedewe apana uduudu 12.000 makasamoiena. Do Ruben damba bedewe apana 12.000, ita Gad damba bedewe 12.000,  
\v 6 do Asea damba bedewe 12.000, ita Napitali damba bedewe 12.000, do Manase damba bedewe 12.000,  
\v 7 ita Simion damba bedewe 12.000, do Lewi damba bedewe 12.000, ita Isaka damba bedewe 12.000,  
\v 8 do Sebulun damba bedewe 12.000, do Iosep damba bedewe 12.000, ita do Beniamin damba bedewe apana 12.000 makasamoiena.   
\p
\v 9 Ema aupe apana uaraia wisiasiawaia ewamodinee. Mo uwa daitada bedeuwoe wimoiena. Mo ipa dan daitada apanawa, ita ete daitada, ita do aia daitada wawalala bedeuwoe wimone kolaiwata ita Sip sanaa danawe eneie. Mo garau sapusapua daumawa taumoie ita witapo notonkela asiwa otamoie do eneie.  
\v 10 Ita mo aiau mukama wane waienase, \bd “Ina intawa dea os no Godimba kolaiwatawa osowe wandia ita Sip sanaa mampo winede.”\bd*  
\v 11 Mo mukantone epe waio ensel uduudu wimone kolaiwata, ita mo eiau ita do nitu da wanwanlala 4 enane panamoiena. Tane muba ituaisintone uwau dunemone kolaiwata danawe ituntone wadapos mampe God ionoidosaie waiase,   
\p
\v 12 \bd “Amen! Tatamba Godimba, e ipa ionoidoa mukamukauaida. Aten ita muka uduudu, do sapaida e manawoa winakasaleidia. E ipa kakaiwa dodomanaida, apana uduudu ande ita ando auwadewasaempe, wadaposintompe, ionoidoempo wankasaitona. Amen.”\bd*   
\p
\v 13 Tane mo eiau bedeuwo dea ne waitaranene wanase, “Apana garau sapusapua daumawa tautaulala ewamoiana mo mida, nainta wimoiena, e ateiten, ba dia?”   
\p
\v 14 \x + \xo 7.14 \xt Daniel 12.1; Matiu 24.21; Mak 13.19\x*Ne me sipoasane wanase, “Debamana, sa ne mai atenteapona, e ateitena waa!” Ita me ne dianene wanase, \bd “Mo ipa poka debamaia rebarebaida walamawa osowe euda os nomone mape wimoiena apanawa. Mo Sip sanaa osinawa mampe garau mitamoieno sapusapuaida seganton.\bd*   
\p
\v 15 Sa baiwa mo God kolaiwatawa danawe waimoie tadina ita walama ruawantoie me duwa bedewe me simbiasaie nolawa dewasai. \bd Tane mida kolaiwata osowe wandia me mo do waimoie nuawemodie oniadewasamode.\bd*  
\v 16 Mo mai nana ba esa omanawatomopi, bauta mampo segaleidia rua, dia! Tane mo walama uduudu nana nampe pokamompo waimompa. Mai omo polawa ba dima polapolaua da etepu ipio kadilepi, bauta mampo dewaleidia rua, diaida!  
\v 17 \x + \xo 7.17 \xt Sam 23.1; Sam 23.2\x*\bd Ipawa Sip sanaa kolaiwata osowe sawano wandia me ipa gamo onioniau ruawa oniadewasamompa. Me banlamopie maneu esawa mampe wimopue inawinakasalala esawa napu. Ita God mo emauwo ke siniepiaubepi.”\bd*   
\c 8  
\p
\v 1 Sip sanaa buka lomiwa ompaida 7 wadediaubedio uboo sala dainaidalene winen. Ita walama kerauda bedewe mai aia ba dima moinawa etaetalala, diaida.  
\v 2 Tane ensel 7 mo mida God danawe eneia ewamodinee. Mo nitu bui rua tarampet 7 wanamono otene eneie.   
\p
\v 3 Ita ensel da wisene God pulowa piupiu ituia watawa danawe enedie redu debamawa gold mampe dewalala wadedio ita piupiu uaraia bedewe wineio ewedinee. Ensel sa pulo ituia watawa gold mampe dewalala kolaiwata danawe enedia osowe piupiu ema sudie ita God apanawaida kakaibu raupariu awodeasadie God wanede.  
\v 4 \bd Piupiu idia gasuwa ita God apanawaida kakaibu raupariu do awodea ensel witapee odedie aleide God mampe.\bd*  
\v 5 \x + \xo 8.5 \xt Ekisod 19.16; Gagalo 11.19; 16.18\x*Ema aupe ensel pulontoia watawa osowe ia emawa bubumala wadene piupiu reduwa debama bedewe itune aubeno tawo osowe ien. Tane tawo osowe noseno uma debamawa waie ita kelama lotoie, tane bedewe aia daitada do waie ita do wanatata segaleidie.   
\s1 Ensel uduudu 7 tarampet sui  
\p
\v 6 Tauma ensel 7 nitu bui rua tarampet otamone susuwa baiwa imaantoie.   
\p
\v 7 Ensel bautalene enedia me tarampetiwa sudio seu kerakera uboe unu rua nonosintoie ita do ia iilala uboe iedie. Tane unu badowa sa ita ia iilala sa osina do wiralala tawo osowe aubeno ien. Ita tawo moawa natadea bedeuwo waiwa dea idie bedewe ia uduudu ita ina wasiipa inintoia do ituiamon.   
\p
\v 8 Ema aupe ensel namba 2 me tarampetiwa sudio nitu da abo wadi debama osowe ia idie bumedia mida wadene aubeno owa bedewe alen. Ita waiwa natadea bedeuwo dea osowe noseno \bd owa sa osina uduudulen.\bd*  
\v 9 \bd Tane owa osinalena bedewe iana ita moia debamau daitada sape waimoia uduudu bontontuwan.\bd* Ita waa uduudu sape eneia do kadintontuwan.   
\p
\v 10 Ema aupe ensel namba 3 me tarampetiwa sudio kipora debamaia ia idie bumedia epawa rua bumene uboe nosen. Kipora sa tawo moawa natadea bedeuwo waiwa dea bedewe esa alala ita maneu osouwo iene nosen.  
\v 11 Tane kipora sa ebowa Sigau. \bd Me tawo waiwa dea bedewe esa ita maneu uduudu osouwo nosene kadimone sigaumon. Apana uaraia esa sigaula nane bontoiena.\bd*   
\p
\v 12 Ema aupe ensel namba 4 me tarampetiwa sudio omo waiwa natadea bedeuwo dea nitu da badowaida wisene epentuwano dubalen. Tane uaboa ita kipora mampo dewa ipa deawaa segaleno waiwa deadea dubanton. \bd Sa baiwa walamo omo isiwa bedewe omo mai ipona, sala dubaidalen. Deawaa, tadino omo isiwa bedewe uaboa ita kipora dubantono sala iwinidalen.\bd*   
\p
\v 13 Ema aupe nene ebowa Inamoia ionoido leidio ne ewedine ita aiawa debama wadio etedinee. Me wadi wadiase, \bd “Akaio, akaio, akaio! Kadi rebarebaida iepia baiwaleide tawo osowe wanwanlala uduudu mampo,\bd* ipawa ensel natadea da tauma tarampetiu supua baiwantoi.”   
\c 9  
\s1 Ensel namba 5 ita 6 tarampetiu sui  
\p
\v 1 Ema aupe ensel namba 5 me tarampetiwa sudio kipora uboe tawo osowe nosena ewedinee. Tawo osowe don totola dogo bedeweido iene aidalena tawo atoweido winedia. Ita kipora sa don ipa guduwa kiwa wadene do ien.  
\v 2 \x + \xo 9.2 \xt Bumpai 19.28\x*Tane kipora sa don guduwa moawa wadenaubeno gasu debamaia sape odene wisen kodara supua gasuwa rua. Ita gasu don bedewee odene wiseno omo ita sala uduudu dubalen.  
\v 3 \bd Gasu sa bedewe kapoi wimonatue tawo osowe antontuwan.\bd* Mo tabunka tawo osowe waimoia onau mukawa ruawa wadeiena.  
\v 4 Ne aia etedino kapoi anaanamone wanase, “Mai tawo osowe ina, ia ba nitu uduudu inintoia kadimona! \bd E apana mida mai God mampea ita God makawa nambu osowe mai wineipona mo os kadimona!\bd*  
\v 5 Uaboa 5 bedewe mo eimone poka debamaia wanamono boida dauwa etapu, tane mai boidamona!” Poka sa mo dauwa etompa gugu tabunka apana endio poka etedia rua.  
\v 6 Walama sawo ema segalempo apana poka eteia baiwa inseie menaidamodia bontopu, tane mo ideita inawaa waimompa, mai bontopua rua, dia. \bd Mo poka etompe wanwan dabuantopu di bontopua menamompa, tane mo mai bontopu, dia.\bd*   
\p
\v 7 Kapoi ewaewau pue oas ona baiwa benantopue enompaa rua. Mo uwau osowe nitu da ewaewawa bena uwatauwa gold mampe dewalala wineie. Tane nambu ewaewawa apanaida namba rua.  
\v 8 Mo uwau imba i uwawa imba daumawa rua, ita moau nepa debamawa moamoaua pue laion moawa rua.  
\v 9 Ita nitu da ewaewawa irama mampe dewalala rua danau enabodamoiena. Mo mabupu tepasaia moinawa etaetawa dai debamaia tuwadie seu uaraia ieio tawo guguadedia moinawa ruawa.  
\v 10 Kapoi wedopu ipa onawaau, gugu tabunka onawaa rua. Mo muka wadane uaboa 5 bedewe wedopu mampe apana eimoieno poka debamaia eteie.  
\v 11 Tane kapoi onioniau mambu oniamodia me ipa ensel mida don totola dogo bedeweido iene aidalena oniede. Me ebowa Ibru aiawa mampe waia Abadon, tane ebowa Girik aiawa mampe waia Apolion. Ebo sa ipawaida ipa kadisapia.   
\p
\v 12 Nene Inamoia kadi rebarebaida natadea bauta benemawalena segantopua tauma dea segalene dialen. Tane kadi rebarebaida natawa wimpia baiwaleide.   
\p
\v 13 Tauma ensel namba 6 me tarampetiwa sudio aiawa ne etedinee. Tane aia sa ipa dona 4 God pulowa ituia watawa susunapa 4 osowe eneiawo wisen. Pulowa watawa sa gold mampe dewalala God danawe enede.  
\v 14 Ita aia sa ensel namba 6 mida tarampetiwa wadedia diene wanase, “Ensel 4 taudolala mo ipa esa debama Eupirates waiwe waimoia e lotoaubamoa!”  
\v 15 Ensel 4 sape waimoia mai di waimoipee. Tane God mo imaamone teamona mo walamau bedewe nolantopua baiwa. Sa ipa God ena, uaboa, walama ita omo itudiawo lotoaubamopio nomopue tawo moawa natadea bedeuwo moawa dea apanawa uduudu epaboiamopua baiwa.  
\v 16 Tane mo saumopue onantopua apanawa uaraia pue oas asiasi antoie. Ita mo wisiau nambawa aia benemaleidio etana, mo ipa 200 milion.  
\v 17 Pue oas sa ita mida osowe waine antoia ne auwen ruawa ewedinee ita mo ewaewau ema epe: Mo nitu da irama rua otene taumone danau bodamoiena. Nitu sa oau natadea: Osinaosinaua ia idie bumedia rua, da dubawa uba tampa madialeidie winedia rua, ita da lawalawa o menapa rua. Oas sa uwau debamau pue laion uwawa rua. Tane ia idie bumedia epawa, do gasuwa debamaia, ita do seu iilala kalaidala moauwo nomoie.  
\v 18 Ia epawa, gasuwa ita seu pue oas moauwo nomoie tawo moawa natadea bedeuwo waiwa dea apanawa uduudu bomoiena.  
\v 19 Oas moau ita wedopu mampe apana bomopua rua. Mo wedopu ewaewawa mota ruawa ita wedopu ompa uwau do winei ita mo uwau sa mampe onantoio apana poka etaidasai.   
\p
\v 20 \bd Ita tawo osowe waiwa dea bedewe apana uduudu bontontuwan, tane sosou waiwa nata da bedewe euda waimoia dewa ema umanawa etane mai santope kadi bedewe insaisau leusape God mampe dodomanantopona, dia.\bd* Mo aleu kadiwa sauntoie wadaposimoia dewawa mai epona. Ita witapu mampe kokoitau gold, silwa, irama, seu ita ia kepau mampe dewamoia mai emopona, dia. Kokoitau sa emau ewasiawaia, mo asiu etasiawaia, do wau mai alala. Tane apana ideita mo nuawadawadamoie insaisau sape os ituie wadaposimoie.  
\v 21 Tane mo apana epaboialala, wene ita ginauri dewawa dewamoia, nina rebarebantoia ita pointoia mai epe kadi sa bedewe insaisau leusape God mampe dodomanantopona, dia.   
\c 10  
\s1 Buka kerauda wadaaubalala  
\p
\v 1 Ema aupe ne ensel da mukawaaida uboe iedio ewedinee. Me giou taunboden gara rupulepia ruawa do iedie. Tane uwawa osowe wari enedie. Me namba sapa wadia omo sapawa rua. Ita me wawa ewaewawa kodara idia epawa rua.  
\v 2 Me witape buka kerauda wadaaubalala wadedie, ita me wawa on owa osowe ain, tane wawa sen dogo osowe ain ita enedie.  
\v 3 Tane me epe enedie ka debamaia wadia etaetawa pue laion aiawa mukaleidie wadia rua. Me epe mukaleidie wadio uma 7 auwene waiena.  
\v 4 Uma 7 ema waie benemantoio ne dima etana rua girumanteapona baiwantedino aia uboe etedino wane wanase, “Dima uma 7 benemantoieno e etaana werego winakasalepi, sa baiwa mai girumaitaa, ea!”   
\p
\v 5 \x + \xo 10.5 \xt Ekisod 20.11\x*Ita ensel mida ne ewana owa ita dogo osowe wawa aimone enedia witapa on uba tampe wadenposidene  
\v 6 God ebowe badowa saualen. Tane Godida wanwankasalala ipa uba ita bedewe uduudu winamoia, do tawo ita uduudu osowe winamoia, ita do owa ita bedewe uduudu winamoia dewamono seganton. God wanwankasalala nitu uduudu dewalala ebowe ensel saualene wadi wadiase, \bd “Tauma onionia walamawa dialen, ipawa uduudu dima God insedie wadediitudedia tauma ulaipaidalepi.\bd*  
\v 7 Ensel namba 7 me tarampetiwa sumpaa walamawe dima uduudu God insaisawaleidie wadediitudedia dewasapitue diasapi. Sa ipa Gagalo euda me nolawa dewalala peroweta bauta diamona rua.”   
\p
\v 8 Ita aia bauta uboe gagaloleidio etana tauma osowe gagalolene dianene wanase, “Aite, ensel mida wawa owa ita dogo osowe aimone enedia mampe buka kerauda wadaaubalala witape wadaa!”   
\p
\v 9 Sa baiwa ne antene ensel diana buka sa kerauda nepi. Tane me ne dianene wanase, “Wadee naatuwapi! E nane moaawo daa euda awanai esapa rua etona, tane nae numewo iepi alepi bua bedewe poka wapi.”   
\p
\v 10 Ita ne buka kerauda ensel witape winedia wadane ita nana. Ne wadane nadino moanawo daa euda awanai esapa rua etana, tane nane diasane buna poka wan.  
\v 11 Ita me dianene wanase, “Dima ete daitada apanawa mampo, ita uwa daitada mampo, do aia daitada wawalala ita tawo warerewa mampo segantopua umanawa osowe benemawaitawo etapu.”   
\c 11  
\s1 God perowetawa nata waaubalala  
\p
\v 1 Ema aupe ensel koina makalala wadene ne nen, ita dianene wanase, “Ema wade aite ita God duwa, do pulo ituia watawa ruaitaa. Ita apana God duwa bedewe me wadaposisaia uduudu ambi waimoia wisiamoa.  
\v 2 \x + \xo 11.2 \xt Luk 21.24\x*Tane God duwa moape bola sawana debama gonaala mai ruaitaa, ea. Ipawa bola sa God uwa daitada apanawa, mai Iuswa, wanamona oniempa. Ita mo wimopue bola kakaiwa Ierusalem anasisisapue asowawa rua dewasampo uaboa 42 dialepi.  
\v 3 \bd Ita ne perowetana nata mida benemana waia ne diamope inta wadapaaubepa mo baibu. Ita mo antopue muka do benemana wampo walama 1260 dialepi. Mo mai bena euda benantopue antopu, dia, tane mo kadi segalepia eueuwa baiwa gara kadiwa imbu taumopu.”\bd*   
\p
\v 4 Tane peroweta sa, mo ipa ia olib nata ita do siwa enaenawa nepa nata, mo ipa Tatamba tawo oniedia danawe eneia apanawa.  
\v 5 Apana da mo kadimopia baiwalempo mo moauwo ia epawa nosepie emalawoau apanawa sa ipituwapi. Inta ema bedewe mo onau apanawa sa God insaisawa rua bolepi.  
\v 6 \x + \xo 11.6 \xt 1 Kin 17.1\x*Peroweta ema muka wadeiena God benemawa wampaa walamawe uba bodapuo unu mai nosepi, dia. Do muka wadeiena owa, esa, ita maneu tawo osowe wineia dewamopuo osinantopu. Tane do muka wadeiena ita inseia ruawa poka daitada tawo osowe dewasapuo segalepia rua.  
\v 7 \x + \xo 11.7 \xt Gagalo 13.5-7; 17.8\x*Dima God diamona rua benemawantone diasaieno pue kadiwa don totola dogo bedeweido iene aidalena bedewee wisepie mo do onantopu. \bd Tane pue kadiwa sa ona bedewe kasawogalepie peroweta nata aimopie bomopi.\bd*  
\v 8 Tane mo etepu bola debamawa, ebowa magi mampe waia Sodom ita Isibt, intawa osowe winamompa. Bola ipa deawaa bedewe mo Tatau koros osowe seuiena.  
\v 9 Walama natadea ita dea sawano dialepio bedewe peroweta nata etepu mai dobolala into di winamompa. Tane ete daitada apanawa bedeuwo, dan daitada ita aia daitada wawala bedeuwo, do uwa daitada apanawa bedeuwo wimompe mo bontoiena etepu ewompe mai dobowa insempa. Ita peroweta sosou dobowa wampo mo wadabuamopu.  
\v 10 Tawo osowe wanwanlala uduudu mo bontoiena baiwa nuaeuntompe odantompe amonau leusawanantompa. Mo bou osowe epe dewantoia, ipawa peroweta ema nata poka daitada dewasaieno tawo osowe waimoia uduudu poka eteiena.  
\v 11 \x + \xo 11.11 \xt Isikel 37.10\x*\bd Walama natadea ita dea sawano dialeno aupe God peroweta bolala ina wanamono inantone enanawimoiena.\bd* Ita apana uduudu mo eneiwimoio ewamone saidantoiena.  
\v 12 \x + \xo 11.12 \xt 2 Kin 2.11\x*Tane peroweta nata aia debamawa uboe eteio wane wanase, \bd “Odane winlena!” Aia wano dialeidio emalawoau ewamoio mo giou bedewainta odane antoiena uboo.\bd*  
\v 13 \x + \xo 11.13 \xt Gagalo 6.12; 16.18\x*Tane sawana sa bedewe wanatata debamaia segalen. Bola sa debamawa waiwa dea kerauda bedewe du uaraia tetewane kadinton. Ita apana 7000 wanatata sa bedewe bontoiena. Tane mo bola moawa da debamauwo wanwanlala wanatata sa bedewe mai kadiwa donsapona, dia. Mo nuau saidaleno God uboo wanwanlala mukawa eweiena baiwa sapaidasane ionoidosaiena.  
\v 14 Nene Inamoia kadi rebarebaida natadea bauta benemawalena segantopua tauma natawa segalene dialen. Tane kadi rebarebaida natadeawa wimpia baiwaleide.   
\s1 Ensel namba 7 tarampetiwa sude  
\p
\v 15 \x + \xo 11.15 \xt Ekisod 15.18; Daniel 7.14,27\x*Ema aupe ensel namba 7 me tarampetiwa sudio ne aia debamau uboo etedino waie waiase, \bd “No Tatamba God ita Keriso me sonabena tawo uduudu tauma mo gonaau wanalene witapoleno oniei. Ita mo onioniau winakasalala, mai dialepi.”\bd*  
\v 16 Ita eiau 24 mida kolaiwatau osowe God danawe waimoia God wawa bumpe imimpu emmisintone dunentone me wadaposisaie ionoidosaie waiase,   
\q1
\v 17 “Tatamba God, e ipa mukamukaua ionoidoa, uduudu ipa e atoawo. E ipa mida bumpeido ita tauma wainiana. No auwaeitana, ipawa e mukaa debamaia tauma sabamosae warereitie tawo onieiana.   
\q1
\v 18 \x + \xo 11.18 \xt Sam 110.5\x*Uwa daitada apanawa mida mai insaepona nuau kadileidie e manawo. Tauma e nuasigasigaa wisenaubeno sabamosaiana ita bolala kotumoa. Tane e nolaa dewalala peroweta ita e apanaaida kakaibu walamau wisena uneu wadapu. Do mo eboeboua ita ebousiawaia mida e eboa sawantoia walamau wisena uneu wadapu. \bd Tane apana mida tawo kadisaia tauma walamau wisena e kadimoatuwapi.”\bd*   
\p
\v 19 \x + \xo 11.19 \xt Gagalo 8.5; 16.18; Gagalo 16.21\x*Mo eiau ema waieno dialeno aupe God duwa uboo enedia moawa wadenauben ita ne du sa bedewe bokis da God anaanawa 10 girumalala bedewe winedia enedio ewana. Tane uma waio kelama lotoie, bedewe aia daitada waie ita wanatata do segaleidie. Tane do seu kerakera uboe unu debamaia rua nonosintoiena.   
\c 12  
\s1 Ion auwen ruawa bedewe i ita duragon ewamode  
\p
\v 1 Ema aupe ne dewa da pokawaaida uboo segaleno ewedinee. I garawa omo taune wandie ita wawa uaboa osowe enedie. Me uwawa osowe benawa uwatauwa eudida kipora 12 do winawinalala ain.  
\v 2 Me bu do ita oto mu baiwaleidio me poka debamaia etedie sidaleidie.   
\p
\v 3 Ita dewa da do uboo segaleno ewedinee. Duragon osinaosinaua debamawaia uwawa 7 do uboo enedie. Tane donawa ipa 10. Ita duragon uwawa 7 osouwo bena uwataubu ananla.  
\v 4 Duragon sa me wedopa mampe kipora waiwa natadea bedeuwo waiwa dea bedewe kipora uduudu weweramone epaaubamono tawo osowe nomoiena. Ita duragon i bulena oto mulepia baiwaleidia mampe alene danaweido enedia, oto muleipono adapaboe napona baiwa.  
\v 5 Ita i sa oto mona gamosan, me ipa mida koina irama mampe dewalala wadepie ita koina sa mampe uwa daitada apanawa uduudu badowa oniamopi. Tane duragon oto mai adapaboe napona rua, dia. Ipawa me muleno mida tauwadea os oto wadene odene alen God ita me kolaiwatawa mampe.  
\v 6 Ita i duragon sawalene weuwane sala makowa bedewe bola God me baiwa imaasanawo alen. Me sape God insaisawa rua walama 1260 waimpo dima menasadia rua mampe sausampe oniempa.   
\p
\v 7 \x + \xo 12.7 \xt Daniel 12.1; Iud 1.9\x*Tane uboo ona segalen. Ensel ebowa Maikel sosowa da do ona uwaantone duragon do onantoie. Tane duragon ita me enseliwa, sa ipa me sosowa enane Maikel do onantoiena.  
\v 8 Ona sa bedewe duragon mai kasawogalepona, dia, ita Maikel sosowa da do kasawogantone ona bedewe mo aimoiena. Sa baiwa duragon ita me enseliwa do mai uboo wampona rua, dia.  
\v 9 \x + \xo 12.9 \xt Bumpai 3.1; Luk 10.18\x*Ita duragon sa pokawaaida me enseliwa do uboo tanamoieno tawo osowe ieiena. \bd Tane duragon, sa ipa mota tontawa mapoido wandia, me ebowa ipa Seitan, ita ebowa da ipa Wawu wawalala. Me ipa tawo apanawa uduudu laga mampe banlakadisamodia kadi dewasampaa baiwa.\bd*   
\p
\v 10 \x + \xo 12.10 \xt Iob 1.9-11\x*Mape ne aia debamawa uboo wadio etana wadi wadiase,  
\p \bd “No God mukawa sabamosapia onioniawantite wainite ita walamawaida tauma wisen. God tauma me apanawa inamopi. Me emalawoa ansisimone mukawa debamaia sabamosan ita tawo uduudu me gonaawa wanalen. Ita Keriso mida God sonabasana tauma uduudu mampeleno oniede,\bd* ipawa wawu wawalala mida God mampe walama uduudu, tadino ita walamo, no sumanai sosomba wawumodia uboo taneieno tawo osowe ien.  
\v 11 \bd No sumanai sosomba Sip sanaa osinawa mampe duragon nanausane aneiena. Mo God aiawa sumanaiwantoie benemawantoia mai bo sawantope sumanaibu ita God aiawa amonawa epona, dia. Mo epaboiamopua baiwantoio mai bo sawantope etepu anatepona, dia, tane mo waienase, ‘Ide rua, no bontata.’ Ita mo sumanaibu baiwa epaboiamoiena. Mo epe dewantone duragon nanausaiena.\bd*  
\v 12 Seitan nanausane aneiena ita uboo taneieno uba en. Sa baiwa uba nuaeuitaa ita uboo wanwanlala uduudu nuaeuitana! Tane kadi rebarebaida iede tawo osowe wanwanlala do owa bedewe wainilana manlawo, ipawa Seitan e manlawo iede. \bd God Seitan nolalepia walamawa kampaida os ituno me atenlen, sa baiwa me nuawa sigaida wade.”\bd*   
\p
\v 13 Tane duragon uboe tawo osowe aubeieno nosena atenlen, ita me i mida oto mona gamosana banusadie ewene tanene alen.  
\v 14 Tane me mai i wadapona rua, dia. Ipawa God nene Inamoia debamaia mabupa nata i ampe teamon me lapopolepie naepe God me baiwa bola imaasanawo sala makowa bedewe alepi. Me uaboa 42 sape waimpo dima menasadia mampe oniempa. Ita duragon, sa ipa mota tontawa, mai donsapie wadepia rua, dia.  
\v 15 Ita mota tontawa moawe esa debamaia abaia ruawa nosene i wisunene alen awanepona baiwa.  
\v 16 Tane dogo i sausapia baiwa isuadene naga itun ita esa duragon moawe nosene aleidia naga ipa bedewe alentuwano i inalen.  
\v 17 I inaleno baiwa duragon nuawa kadiidaleno i tanatanawa ene i obampa uduudu mida God anaanawa ruawantoia ita Iesu sumanaiwantoie benemawantoia do onantopua baiwa alen. Ita me alene owa waiwe enedie.   
\c 13  
\s1 Pue kadiwa mai ewaewala owa bedewe odede  
\p
\v 1 \x + \xo 13.1 \xt Gagalo 17.3,7-12\x*Duragon owa waiwe enedio pue kadiwa mai ewaewala owa bedewe odedio ne ewedinee. Pue sa ipa donawa 10 ita uwawa 7 do. Ita pue sa donawa 10 osouwo bena uwatauwa ananla. Tane me uwawa 7 osouwo ebo girumalala wineie, ebo ipa God wadabuasaie wakadisasaia.  
\v 2 Pue kadiwa sa ewaewawa pue onawaaida ebowa Taiga rua. Ita wawa debamau pue onawaa ebowa Bea wawa rua, tane moawa nepa pue ebowa Laion moawa rua. Tane duragon kasawoga ita mukawa debamaia pue owa bedewe wisena waneno mukau deawaalen. Ita me kolaiwatawa do wanen osowe wampie nitu uduudu oniempaa baiwa.  
\v 3 Tane me uwawa 7 bedeuwo uwawa dea benewa debamaia pirawa do. Ita pira sa mida uduudu eweiena atenton me tonaboleiena tane inalene enenwisen. Tawo osowe wanwanlala uduudu pue kadiwa sa ewane memesantone wawe antoiena.  
\v 4 Duragon pue kadiwa sa mukawa debamaia wanena baiwa tawo apanawa uduudu duragon wadaposisaie ionoidosaie. Ita pue kadiwa sa do wadaposisaie ionoidosaie waie waiase, “Mai mida da me ruawa! Mai mida wisepie me do onantopue nanausapia rua, diaida!”   
\p
\v 5 Ita pue kadiwa sa kasawoga wadena gagalo debama wamompe meba ituposilempa, do kasawoga wadena God wakadisasampe wareuwasampa. \bd Ita God me nolawa walamawa uaboa 42 ituna bedewe nolalepi.\bd*  
\v 6 Tane me aia kadiu mampe God wakadisasapie, me ebowa ita wandia bolawa ita uboo wanwanlala uduudu do wadabuamopi.  
\v 7 \bd Tane me kasawoga wadena God apanawaida kakaibu do onantopue ona bedewe nanausimopi.\bd* Ita do muka uduudu wadena dan uduudu, ete daitada ita aia daitada wawalala, do uwa daitada apanawa oniamompa.  
\v 8 \bd Tawo osowe wanwanlala uduudu, mo mida ebou ina bukawa bedewe tawo segasia walamawe mai girumamopona, mo ipa pue kadiwa sa wadaposisampe ionoidosampa.\bd* Tane ina bukawa sa ipa Sip sanaa bosaiena mampea.   
\p
\v 9 Mida asiwa winedia asisudewalepi.  
\v 10 Mida God sonabena diburalepia baiwa, mo apana sa ideita wadapue taupue diburasapu. Tane mai inta da wineipona gudulepia rua, dia. Ita mida God sonabena isima mampe topubolepia baiwa, mo apana sa ideita isima mampe topubolepi. Tane mai inta da wineipona gudulepia rua, dia. Epe segalempo God apanawaida kakaibu poka saiwa sa bedewe mai momoduntopue etedabuantopu, tane sumanaibu bedewe badowa enapu.   
\s1 Pue kadiwa mai ewaewala da dogo bedewe odede  
\p
\v 11 Tauma ne pue kadiwa mai ewaewala da dogo bedewe odedio ewedinee. Me donawa nata do, sipsip mona donawa rua, tane aiawa wadia etaetawa duragon aiawa ruawa.  
\v 12 \bd Muka uduudu pue kadiwa owa bedewe wisena mampe winedia pue da dogo bedewe wisena waneno mo nata mukau deawaalen.\bd* Ita pue owa bedewe wisena sowa ewedio emawa osowe nolawaleidie. \bd Me apana tawo osowe wanwanlala uduudu diamodie banlakadisamono pue owa bedewe bene inalena pirawa do wisena wadaposisaie ionoidosaie.\bd* Pue ipa tonaboleieno tane inalena.  
\v 13 Pue kadiwa dogo bedewe wisena muka waden ginasa eueuwa debamau pue bauta wisena danawe dewamompaa baiwa. Me dewasano ia iilala uboe tawo osowe ieno apana uduudu eweiena.  
\v 14 Me ginasa eueuwa ema dewasane mampe tawo osowe wanwanlala nuau teinene banlakadisamono wawenton. Ita me mo diamona kokoitau ewaewawa pue kadiwa bauta owa bedewe wisena rua me nuaeuwawa baiwa dewasapue itupu. Pue sa ipa isima mampe tonaboleiena tane inalene wande.  
\v 15 Pue kadiwa dogo bedewe wisena mo diamona rua kokoitau dewasaiena. Tane pue sa ipa muka wanena kokoitau nonau wanepia baiwa. Ita me nonau kokoitau waneno aiawa wan. Ita kokoitau sa apana diamodie wadia mo uduudu mida me danawe mai imimpu emmisintompe wadaposisampa mo ipa bomopu.  
\v 16 Tane pue kadiwa dogo bedewe wisena apana uduudu, eboeboua do ebousiawaia, mauralala ita nuaparelala, apana debamau ita mo nolau dewalala diamodie wadiase, “E maka katuna rua witala on osowe ba nanlawo ituna!”  
\v 17 Apana mida mai maka osouwo winawinalala mo mai dima da gimarantopua rua, ita mai sitoantopu ba maketintopua rua, dia. \bd Tane maka sa ipa pue kadiwa owa bedewe wisena ebowa, ba ebo sa nambawa.\bd*   
\p
\v 18 Me mida aten dia dewa ema mai atenlepia rua, dia! Tane mida mampe aten winedia me ipa pue kadiwa owa bedewe wisena nambawa ipawaida banulepie donsapi. Namba 666, sa ipa apanaida nambawa.   
\c 14  
\s1 Sip sanaa apanawaida sasa sanaa sasantoi  
\p
\v 1 \x + \xo 14.1 \xt Gagalo 7.3\x*Ema aupe ne Sip sanaa wadi Saion osowe enedio ewedinee. Ita apana 144.000 me do eneie. Mo nambu osowe Sip sanaa ebowa ita do me Mamba ebowa girumalala winamoi.  
\v 2 Tane ne aia uboe etedinee. Aia sa moinawa etaetawa abaia debama nosedia moinawa rua, tane do etaeta uma aiawa debama wadia moinawa rua. Aia ipa etaetawa apana uara nitu gita rua epeia moinawa rua.  
\v 3 Apana 144.000 kolaiwata danawe, ita nitu da wanwanlala 4, ita do mo eiau danauwo eneie sasa sanaa sasantoie. \bd Mo mida tawo osowe wanwanlala bedeuwo Tatamba osinawa mampe malesamone inamona mo muba os sasa sanaa ema sasantoie,\bd* mai apana da sasa ema atenlepona rua, dia.  
\v 4 Mo ipa mida mai ioto do ninantoipe etepu miramirasapona, tane etepu kakaisaie di waimoia. Mo ipa sa Sip sanaa naepe aleidia ruawa wawe antoi. Nana bauta ipawa itudio uwauwantoia ruawa epe mo ipa tawo osowe wanwanlala uduudu bedeuwo gimaramona uwauwamon God ita Sip sanaa baibu.  
\v 5 Mo ipa dodomanaida, mai laga da wapona, dia.   
\p
\v 6 Tane ne ensel da ionoido aleidio ewedinee. God me wanaubeno alen tawo osowe wanwanlala uduudu, sa ipa uwa daitada apanawa, dan daitada, ita aia daitada wawalala, ita do ete daitada apanawa mampo Gagalo euda winakasalala benemawalepia baiwa.  
\v 7 Ita ensel sa aiawa mukalene wane wanase, \bd “God apana kotumopia walamawa tauma wisen. Sa baiwa e God sawaitane me ebowa sapaidasane debamasana. Ita God mida uba, tawo, owa ita esa uduudu dewamona wadaposisanune ionoidosanuna.”\bd*   
\p
\v 8 \x + \xo 14.8 \xt Gagalo 18.2\x*Tane ensel da bauta aleidio wawea aleidie wadi wadiase, “Bola pokawaaida Babilon kadisantuwano dialen. Bola sa tawo bolawa uduudu apanawa nuau teinene banlakadisamono ita esa badowa wain bola sawo winedia naiena. Sa ipa nina rebareba ewanuau kadiu daitada esawa naiena.”   
\p
\v 9 Ensel nata antoieno wauwo da ionoido aleidie mukaleidie wadi wadiase, \bd “Mo mida pue kadiwa owa bedewe wisena wadaposisaie ionoidosaia, ita me kokoitauwa danawe imimpu emmisintoie wadaposisaia, do nambu ba witapu osowe pue sa makawa wadeia God nuasigasigawa osouwo iepi!\bd*  
\v 10 \x + \xo 14.10 \xt Bumpai 19.24\x*God mo baibu wain badowaida imaasane me nuasigasigawa reduwa bedewe mai esa dola memene eindodeno mo baibu enedia napu. Ensel kakaila ita Sip sanaa mo ewamompo ia iikasalala seu do imoie moniantoia bedewe imompo poka debamaia etompa.  
\v 11 Tane ia iikasalala mo imodia gasuwa mai dialepi, dia, walama uduudu gasulempe winompa. Ita mo mida pue kadiwa owa bedewe wisena ita me kokoitauwa wadaposisaiena, do pue ebowa makawa mo osouwo winedia, ia iikasalala bedewe wankasantompa. Mo tadina ita walama poka debamaia etompa, mai bubuantopue nuau topi, diaida.   
\p
\v 12 Walama ompe poka daitada iompo God apanawaida kakaibu, mo mida me anaanawa onieie ruawantoia ita Iesu sumanaiwantoia mai momoduntopue etedabuantopu, dia. Tane mo poka saiwa bedewe badowa sumanaintompe waimompa.”   
\p
\v 13 Mape ne aia uboe etedino mainawo wadi wadiase, “Ema epe girumaitaa: \bd Nuaeu debamawa mo mampo mida poka daitada eteie mai etedabuantoipona, tane Tatamba mampe sumanaintoie simbiantoia ita poka sa bedewe bontoia. Mo mida ande ita ando epe bontompa mo ipa nuaeu debamawa wadapu!”\bd* Ita Aleu kakaiwa wane wanase, “Sa ipa ulaipa! \bd Mo nolau ita poka daitada eteia dialepio bubuawantopu. Ita dima uduudu sumanaibu mampe dewasaia God ewamodia atemba ita ruawantopue uneu wadapu.”\bd*   
\s1 Ion auwen ruawa bedewe ompaida kotuwa ewede  
\p
\v 14 \x + \xo 14.14 \xt Daniel 7.13\x*Ema aupe ne giou sapusapua ewedinee. Tane giou sa osowe me mida wandia ewaewawa Apana otopa ruawa. Me uwawa osowe bena uwatauwa eudida gold mampe dewalala ain, do witape peto moamoaua wadedie.  
\v 15 Ita ne ensel da God duwa bedewe nosedio ewedinee. Ensel sa me mida giou osowe wandia mukaleidie diedie wadiase, \bd “Uwauwa walamawa wisen, tawo osowe nana wit tontantoie winei. Tauma aite peto moamoaua wadeiana mampe wit topuiaite uwauwaitaa!”\bd*  
\v 16 Ita me mida giou osowe wandia peto moamoaua mampe wit topuialene auwen.  
\v 17 Mape ensel da God duwa uboo enedia bedewe nosedio ewedinee. Me do peto moamoaua wadene enedie.   
\p
\v 18 Tane ensel da mida ia epawa oniedia God duwa bedewe me pulo ituia watawa mampee nosedio ewedinee. Me sowa da mida peto moamoaua wadedia mukama diedie wadiase, \bd “Tawo osowe wain iawa ampe ipawa mena waie winei. Tauma aite peto moamoaua wadeiana mampe wain ipawa topuiamoe uwauwaitaa!”\bd*  
\v 19 Ita ensel sa peto rowinene tawo osowe wain iawa ampe ipawa topuiamone uwauwalene wain gadantoia abomawa debamaia bedewe aimon. \bd Tane aboma sa ipa God nuasigasigawa debamawa kotuwa.\bd*  
\v 20 \x + \xo 14.20 \xt Gagalo 19.15\x*Mo wain gadantoia abomawa Ierusalem tampe enedia bedewe wain ipawa, sa ipa kadi apanawa, ansisimoieno osinau debamaia abaia rua nosen. Ita osina sa esa bumpe alene waape nosena rua aleidia, kilomitawa daumawaia 300. Ita do esa sa nagaia apana bedewe enapono ampabolepona rua.   
\c 15  
\s1 God duwa uboo enedia bedewe ensel 7 nomoi  
\p
\v 1 Ema aupe dewa pokawaaida da uboo segaleno ewedinee. Ensel 7 sape eneie nolau wanamona mo kotu matangelawa ompa dewamopuo segantopu. Poka rebarebaida ema segantopuo aupe God nuakadiwa insaisawaleidia uduudu segantopue ita me nuakadiwa diaidalepi.  
\v 2 Ita ne nitu owa ruawa ewaewawa garasiida ewedinee bedewe ia bumedie kibokiboraleidie. Tane nitu sa owa ruawa waiwe apana uaraia nitu gita rua God wanamona otene eneie. \bd Mo ipa mida pue kadiwa owa bedewe wisena nanausimoiena. Mo sumanaibu bedewe badowaida eneiena mai pue kokoitauwa danawe imimpu emmisintope wadaposisapona, dia. Ita pue makawa ba ebowa nambawa 666 mai wadapona, dabuantona apanawa.\bd* Mo epe dewantone pue, me kokoitauwa ita me makawa nanausimoiena.  
\v 3 \x + \xo 15.3 \xt Ekisod 15.1\x*Mo sape nitu gita rua otene eneie God nolawa dewalala Moses sasawa ita do Sip sanaa sasawa waie waiase,  
\q1 “Tatamba God mukamukaua, e ipa ionoidoa, uduudu e atoawo. Dima uduudu dewamoiana ipa eubu pokawaau asowawalaida. E ipa uwa daitada apanawa oniamoiana. E dewaa dodomanaida, ulaipa os dewamoiana.   
\q1
\v 4 Tatamba God, e dea os kakaiwaida, sa baiwa apana uduudu e saantompe eboa sapasampe ionoidosampa. \bd E kotu dewawa dodomana os dewamoiano apana uduudu ewane atentoiena. Sa baiwa uwa daitada apanawa e manawo wimompe imimpu emmisintompe e wadaposiempa.”\bd*   
\p
\v 5 Ema aupe ne God duwa uboo me wandia bolawa kakaila moawa wadediaubedio ewedinee.  
\v 6 Ita ensel 7 kotu matangelawa ompa 7 do God duwa bedewe nomoie. Mo garau sapusapua eubuida daumau taumoie ita do igau gold mampe dewalala amatumbu osowe taumoiena.  
\v 7 Tauma nitu da wanwanlala 4 bedeuwo dea ensel 7 aboma gold mampe dewalala 7 wanamon. \bd God wanwankasalala nuakadiwa aboma sa nopemono wineie.\bd*  
\v 8 \x + \xo 15.8 \xt Ekisod 40.34; 1 Kin 8.10,11; Aisaia 6.4\x*Me aboma ema wanamodio God duwa bedewe God sapawaida ita mukawa sabamontona gasubu debamaia wisene ita God duwa bedewe gasu uduudulen. Ita mai mida da God duwa bedewe odapona rua, dia, ideita ensel 7 kotu matangelawa 7 dewamoieno dialeno aupe odaodawa rualen.   
\c 16  
\s1 God nuasigasiga aboma 7 bedewe wineia tawo osowe memamoi  
\p
\v 1 Tane ne aia debama God duwa bedewe wadia nosedio etedinee. Aia sa ensel 7 diamodie wadiase, \bd “Aitane, aboma bedewe God nuasigasigawa nopemono wineia 7 otene tawo osowe memamona!”\bd*   
\p
\v 2 Aia epe wadio ensel dea bauta alene abomawa God nuakadiwa bedewe winedia tawo osowe memen. Me epe dewaleno apana uduudu mida pue kadiwa makawa wadeiena ita me kokoitauwa danawe imimpu emmisintoie wadaposisaia etepu osowe bene kadiwaida boala segantono mo poka debama eteiena.   
\p
\v 3 Tauma bautalena wawea alene abomawa God nuasigasigawa bedewe winedia owa osowe memeno owa osinalen, apana bolalaida osinawa rua segalen. Ita owa moia uduudu bontonatuwaiena.   
\p
\v 4 Tauma ensel namba 3 alene abomawa God nuasigasigawa bedewe winedia esa ita maneu uduudu weuwaia osouwo memeno esa osinalentuwan.  
\v 5 Mape ensel mida esa onionialala aiawa etedino wadi wadiase,  
\p “E ipa God kakaiwaida, mapo ita tauma wanwankasalala. E kotua matangelawa ipa ruaitie dodomana os tawo osowe wanwanlala mampo dewamoiana.  
\v 6 \bd Mo e apanaa kakaibu ita perowetaa bomone osinau memenaaubeiena, sa baiwa e sipoasae osina wanamoano naiena. Mo dewasaiena rua deawaa mampo segalen.”\bd*   
\p
\v 7 Ita ne aia etedino God pulowa ituia watawa meba wane wanase, \bd “Oa, Tatamba God mukamukauaida, e kotua matangelawa dewamoiana ulaipa dodomana os.”\bd*  
\v 8 Tauma ensel namba 4 alene abomawa God nuasigasigawa bedewe winedia omo osowe memen. Me epe dewaleno omo muka waden polaida wampe ia ruawa apana iteiamompaa baiwa.  
\v 9 Ita omo polawa apana iteiaidamon. Poka sa eteia bedewe mo mai kadi bedewe insaisau leusape God mampe dodomanantopona, ita do mai me ebowa wadaposisapona, dia. Tane mo God mida meba os poka sa oniedie wanamodia ebowa wadabuasane wakadisasaiena.   
\p
\v 10 Tauma ensel namba 5 alene abomawa God nuasigasigawa bedewe winedia pue kadiwa owa bedewe wisena kolaiwatawa osowe memen. Me epe dewaleno pue kadiwa sa gonaawa uduudu bedewe sala dubalene iwinidalen. Ita mo omo imodia benewa pokawa etaidasaie do sala dubalene iwinleno bedewe waine asipu adeie.  
\v 11 \bd Tane mo kadiwa dewasaia bedewe insaisau leusape God mampe dodomanantopona dabuanton. Ita mo poka sa uduudu eteia baiwa God uboo wanwanlala wadabuasane wakadisasaiena.\bd*  
\v 12 Tauma ensel namba 6 alene abomawa God nuakadiwa bedewe winedia esa debamawa ebowa Eupirates osowe memeno tonalen. Sape inta segalen warere ona baiwantoia omo odediawo wimopue inta sa asiasi antopua baiwa.  
\v 13 Mape ne duragon ita pue kadiwa owa bedewe wisena, do peroweta lagawaa moauwo aleu kadiu kasawogauida natadea nomoio ewamodinee. Aleu kadiwa sa ewaewau teko rua.  
\v 14 Aleu kadiwa natadea sa ipa ginasa debama dewalala. Mo bola uduudu bedewainta tawo bolawa daitada warerewa mampo antoiena mo auwamopuo God do onantopua baiwa. Tane ona sa God mukamukaua ionoidoa walamawa debamawa bedewe segalepi.   
\p
\v 15 \x + \xo 16.15 \xt Matiu 24.43,44; Luk 12.39,40; Gagalo 3.3\x*Tatamba wadi wadiase, “Ewane, ne poi apanawa rua manlawo wineape melepa! Nuaeu debamaia me mampe mida mai ituleipona tane garawa taumodi imaae onionialeidie wandia. Apana epe dewalempa ne wineapo mai monamonaua nosepie apana emauwo alempe malalepi, dia.”   
\p
\v 16 \x + \xo 16.16 \xt Sakaria 12.11\x*Ita aleu kadiwa natadea sa tawo bolawa warerewa bola Ibru aiawa mampe ebowa waia \bd Amagedon\bd* bedewe auwamoiena.   
\p
\v 17 Tauma ensel namba 7 alene abomawa God nuasigasigawa bedewe winedia wadene sala uduudu osowe memen. Me epe dewaleno aia debamawa kolaiwatawoe God duwa bedewe nosedie wane wanase, \bd “Tauma uduudu segalene dialentuwan!”\bd*  
\v 18 \x + \xo 16.18 \xt Gagalo 8.5; 11.13,19\x*Aia epe wadio uma waie ita kelama lotoie, bedewe aia daitada waie ita wanatata debamawaia segaleidie. Tane God apana dewasanawo ita tauma wanatata debamaia ema rua mai segalepona, dia, tauma os.  
\v 19 Ita bola debama uduudu tawo osowe kadikadilentuwan. Tane wanatata sa bola pokawaaida ebowa Babilon isueno waiwa natadea segantone kadilentuwan. \bd God bola pokawaaida Babilon mai nuaawawasape epona, dia, ita esa badowa wain reduwa bedewe me nopeidosano winedia waneno nane diaidasan.\bd* Tane sa ipa God nuasigasigawa debamawaia waneno nan.  
\v 20 \x + \xo 16.20 \xt Gagalo 6.14\x*Mape bonabona ita wadi uduudu tawo osowe wineia lawosantone diaidanton.  
\v 21 \x + \xo 16.21 \xt Gagalo 11.19\x*Ita nitu seu debamau ruawa uboe nonosintoie unu nosedia rua. Nitu sa seu ruawa apana osouwo nonosintone epamoie. Tane nitu sa nonosintoia deadea saiwa ipa nela deuawa dea nopeidoleidia saiwa ruawa. \bd Apana kotu matangelawa debamawa rebarebaida eteie mo God wadabuasane wakadisasaiena poka sa baiwa.\bd*   
\c 17  
\s1 Bola Babilon ipa ninalala ita kadiwaida dewalala inau  
\p
\v 1 Tane ensel 7 mida aboma 7 oteia bedeuwo dea ne mainawo wisene dianedie wadiase, “Winewo, ne euwaepa ambi God i ninala pokawaaida esa uara sawanauwo wandia matangelasapi.  
\v 2 Tawo bolawa warerewa i sa do ninantoiena ita tawo osowe wanwanlala uduudu me esawa badowa wain nane koakoanton. Tane wain sa naia, ipawa i ninala dewawa kadiwa dewasadia ruawa dewasaiena.”   
\p
\v 3 \x + \xo 17.3 \xt Gagalo 13.1\x*Tane Aleu kakaiwa ne bedenawolene banlanedie ita ensel awananene sala makowa bedewe alen. Sape i pue kadiwa osinaosinaua owa bedewe wisena osowe wandio ewedinee. Pue sa ipa uwawa 7 ita donawa 10 do. Pue etepa osowe ebo girumalala uduudulen. Tane ebo sa etepa osowe winamoia God wadabuasaie wakadisasaie.  
\v 4 I sa garawa eubuida osinaosinaua taumodie ita me gold, seu uwataubu oau daitada eubuida, ita nitu da kopikopiua uwataubuida, malesau debamaia mampe benalen. Tane me witape reduwa gold mampe dewalala wadedie. Redu sa bedewe kadi ewanuauwa daitada ita mala dewawa kadiuida nina rebareba nopesan.  
\v 5 Tane me namba osowe ebo magilala girumalene wanase, ‘Babilon pokawaaida, ioto ninalala ita dewa nuadabualalaida dewalala bola daitada bedeuwo waimoia inau.’  
\v 6 \bd Ita ne i ewane atenten me God apanawaida kakaibu mida bomoiena osinau nane uwa koakoalen. Mo Iesu sumanaiwantone benemawantoiena baiwa epaboiamoiena.\bd* Ne i sa ewedinee memesantene saidanten.  
\v 7 Tane ensel ne dianene wanase, “E dima baiwa memesaitene saiten? I sa ita pue kadiwa uwawa 7 ita donawa 10 dola osowe wandia ipauida weregaleide. Tane ne benemawaidanteapo ateitaa.  
\v 8 \x + \xo 17.8 \xt Gagalo 11.7\x*Pue kadiwa e ewaana bauta inawaa wandie tane tauma me mai inawaa wainipona, dia. Tane me inalepie don totola dogo bedeweido iene aidalenawo odepie wisepie ita kadi debama donsapie diaidalepi. Ita tawo osowe wanwanlala uduudu, mida ebou ina bukawa bedewe tawo segasia walamawe mai girumalepona, mo pue kadiwa sa ewapue memesantopue saidantopu. Mo me ewapue insaisantopue wapuase, ‘Ipa ambi? Me bauta inawaa wandie, boidalene tane inawaa leulene wisen?’”   
\p
\v 9 E ema ateitapona aten wade tauma ateitaa! Pue kadiwa uwawa 7 ipa magi da. Uwawa 7, sa ipa wadi 7 eneio osouwo i wande, ita do warere 7.  
\v 10 Warere 7 sa bedeuwo warere 5 mapo tawo osowe waimoie apana oniamoie ita mo bontoiena. Tane warere namba 6 tauma wandie apana oniamode. Warere namba 7 tauma mai wainipona, dia, me ando segalepie wisepi. Tane me wisepie walama kampaida os apana oniamopi.   
\p
\v 11 Pue kadiwa bauta inawaa wandie tauma mai wainipona tane ando leulepie wisepi, sa ipa warere namba 8. Tane me ipa warere 7 bedeuwo sou dea. Ita me wisepie kadi donsapie diaidalepi.  
\v 12 Tane e donawa 10 ewamoana, sa ipa warere 10. Mo mai tauma apana oniamoipona, dia. Warere ipa ando wimopue apana oniamompa. Mo muka wadapue omo dea bedewe pue kadiwa owa bedewe wisena do auwepue warerentopue apana oniamopu.  
\v 13 Warere ema 10 insaisau dealepio warerentopua mukawa pue kadiwa wanapu ita mo uduudu me atowentopu.  
\v 14 \bd Ita pue kadiwa warere 10 dontopue Sip sanaa do onantopu. Tane Sip sanaa ita me warorowa dontopue ona bedewe mo nanausimopu.\bd* Ipawa me Tatamba ionoidoa, warere uduudu bedeuwo me dea os debamawaida. Me ipa warere mukamukauaida, ita me warorowa apanawa ipa mo mida God apamone sonabamona ita mo me os wawe antoie sumanaiwantoia.   
\p
\v 15 Ita ensel mainawo gagalolene wanase, “Esa uara ewamoana naepe i ninala wandia. Esa sa ipawa apana uaraia, mo ipa ete daitada, ita uwa daitada apanawa, ita do aia daitada wawalala.   
\p
\v 16 Pue kadiwa ita donawa 10 do e ewamoana mo i ninala nibuasapue me puraiwawa uduudu ampe otawiamopuo monamonaua enompo ita mo me etepa napue kampa supuo ipitue diaidalepi.  
\v 17 God insaisawa mo nuauwo ituna rua mo wanuauntopue insaisau deasapue warerentoia mukawa pue kadiwa wanapuo apana uduudu oniamopi. Epe dewantompo dima God bauta wana ideita segalepituwapi.   
\p
\v 18 Tane i e ewaana, sa ipa bola pokawaaida tawo warerewa uduudu oniamodio wawentoi.”   
\c 18  
\s1 Bola Babilon kadikadileide  
\p
\v 1 Ema aupe ne ensel da uboe iedio ewedinee. Me ipa mukawaaida ita me tampeinta sapa uduudulen, tane sapa sa tawo uduudu sapasan.  
\v 2 \x + \xo 18.2 \xt Gagalo 14.8\x*Me mukaidaleidie wadi wadiase, \bd “Bola pokawaaida Babilon kadisantuwan!\bd* Tauma bola ipa aleu kadiu daitada ita nene kadiu ewaewau nuadabualala sape waimompa bolau wanalen.  
\v 3 Tawo osowe bola uduudu apanawa wain badowa bola sawo winedia naiena. Sa ipa mo nina rebareba ewanuau kadiu daitada esawa naiena. Tawo warerewa i sa do ninantoiena. Ita sitoa debama dewalala tawo bolawa uduudu mampo i sa ewanuau daitada mauraidaleidia gimaralen. Ita sitoa dewalala mane debamaia wadane debamaidantoiena.”   
\p
\v 4 Tauma ne aia da uboe etedino wadi wadiase,  
\p “Ne apanana bola Babilon bedewe wainilana nolene ene aidaitana, me kadi dewasadia ruawa dewasano ita kotu matangelawa bola sa donsapia baiwaleidia e do wadana sawa.  
\v 5 \x + \xo 18.5 \xt Bumpai 18.20,21\x*E bola sa ena, ipawa i sa kadiwa sanaleno odene aidalene uba tampe wisena God ewede. Me i sa kadiwa uduudu mai nua awawasaipe eipona, dia, tane matangelasapia baiwaleide.”   
\m
\v 6 Tane aia uboe do wadi wadiase,  
\p “I sa apana mampo dima dewasana ruawaitane leusane wanana, tane sipoa da osowesane do wanana. Me reduwaida mampe apana wanamodio naia, redu ipa deawaa wain nopemona walama nata, ita me wanano napituwapi.  
\v 7 Me meba nuaeuwa baiwa walama uduudu puraiwawa, nana, mane, gara, bena ita nitu eubu uduudu auwamodie sapalene mauraidalen. Tane dima uduudu meba baiwa auwedio uaraia wineia e ruawaitane tauma poka daitada ita nuaparepare debamaia wanano ke debamawa wampe poka debamaia etompa. Me meba asowawaleidie insedia, ‘Ne ipa warere debamawaida kolaiwatana osowe wainedina! Ne mai obu wainipona, dia, ita mai nuaparepare mainawo wisepio ke wape nuaparenteapa, diaida!’  
\v 8 I ema epe insedia baiwa kotu matangelawa bo, ita nuaparepare kewa, do omana God walama dea bedewe wanepio ita me ipitue diaidalepi. Ipawa Tatamba God mida me kotusapia mukamukauaida.”   
\p
\v 9 Tane tawo warerewa me impatuwampo gasuwa odompo ewapue mo me kewa debamaia wampe nuaparewaidantompa. Mo ipa mida me do ninantoie ita ewanuau daitada me do dewasaia.  
\v 10 Mo poka rebarebaida me osowe segalempo saidantopue nambeido enapue ewompe wampaase, \bd “Akaio, akaio! Bola pokawaaida Babilon e mukawaaida, tane omo dea bedewe tauwadea os e kotua matangelawa manawo wiseno diaidaiten.”\bd*   
\p
\v 11 Ita sitoa debama dewalala tawo bolawa uduudu bedewe me kewa debamaia wampe nuaparewaidantompa, ipawa bola sa bedewe gimara dialen, mai apana da mo puraiwau gimaralepia rua, dia.  
\v 12 Mo puraiwau Babilon bedewe gimaramoia ipa: Gold, silwa, seu uwataubu eubuida, nitu da kopikopiua uwataubuida malesau debamauia, do gara daitada eubuida sapusapua, osinaosinaua ita oau daitada malesau debamau. Tane do ia badou eubu, ita nitu daitada eubuida pue elepent masawa mampe dewalala, do ia eubuida tasisamoia, ita do nitu da iramaida ita irama da bibia mampe dewalala. Tane do nitu daitada seu uwataubu eubuida mampe dewalala.  
\v 13 Ita nana daawa eusampa nituwa, do ia asiwa bonabonaua esapa etepu benasapuo bona wampaa baiwa, tane sowa da ebowa waia Mire, ita piupiu, do ia bodipa ia osowe supuo bona euda wisepia baiwa. Ita wain, oil, parawaida, wit, do pue kau, sipsip, ita pue oas, ita do nitu turaka rua apana osowe wandio pue oas teinedio aleidia. Tane mo apanaida do gimaramoie nolau dewasampaa baiwa.  
\v 14 Tane mo sitoa debama dewalala bola debama idituwadia mampe waie waiase, “Nana eubu nuaa wadedio menaidaedia tauma diantontuwan. Ita dima uduudu mampe debamaitie asowawaitiana diaidanton, mai ando dommoa rua, diaida!”  
\v 15 Mo puraiwau i sa mampesaieno gimaramono mane debamaia wadane debamaidantoiena. Mo poka rebarebaida me osowe segalempo saidantopue nambeido enapue ewompe mukama ke wampe wampaase,  
\v 16 “Akaio, akaio! Kadi rebarebaida segalen! Bola pokawaaida Babilon, e garaa uwataubu oau eubuida os taumoie wainie. Tane e benaa gold ita seu uwataubu eubu mampe dewalala ita do nitu da kopikopiua uwataubuida malesau debamaia mampe gimaralala benaitie wainie.  
\v 17 Tane omo dea bedewe tauwadea os e euwaa uduudu dialentuwan!” Waa oniedia apanawa ita mo mida waa asiasi antoia, do waa osowe nolantoia apanawa, tane do mo uduudu mida owa bedewe nolantoie mane wadeia mo ipa nambeido enapue  
\v 18 bola sa idie gasuwa odedia ewompe mukantopue wapuase, “Tawo bolawa uduudu bedewe mai bola da pokawaaida ema rua ewapona, dia!”  
\v 19 Mo dogo dubulawa otempe uwauwo weisampe ita nuapareparentompe me kewa mukantompe wampe wampaase, “Akaio, akaio! Bola pokawaaida Babilon me mampe waa apanau uduudu owa asiasi wimoie gimarantoie debamaidantoia. Tane omo dea bedewe tauwadea os me intue diaidalen!  
\v 20 \bd Tane e uba nuaeuitaa! Ita e uboo wanwanlala, do e God apanawaida kakaibu, ita do e aposel ita peroweta nuaeuitana! Ipawa God i sa dima e manlawo dewasana sipoa leusane matangelasan.”\bd*   
\p
\v 21 Mape ensel kasawogaida seu debamaia wadenposie owa bedewe mukalene aubene wanase, “Muka debama ema epe ruawa e bola pokawaaida Babilon aubaepio diaidaitaa, mai ando ewaewala.  
\v 22 Tane bolaawo apana nitu gita rua epeia moinawa ipa mai ando etaetala, dia! Mo sasa wawalala do kolago suia ita nitu bui rua tarampet suia moinawa e bedeawo mai etaetala, dia! Mai nola daitada apanawa da dima nolawaleidia e bolaawo nolalepi, dia! Ita wit seu mampe epasisisaia moinawa e bedeawo mai etaetala, dia!  
\v 23 Apana e bolaawo mai siwa da supuo e sapaepi, dia! Ita nainai apanawa odantoie nuaeuntoia moinawa e bedeawo mai etaetala, dia! E sitoa debama dewalala apanawa tawo osowe wanwanlala bedeuwo ipa debamauida! E wene, ginauri ita laga dewawa daitada mampe tawo bolawa uduudu apanawa nuau teinele banlakadisamolano kadi dewasaiena.   
\p
\v 24 Tane peroweta osinau, ita God apanawaida kakaibu osinau, ita do uduudu mo mida tawo osowe epaboiamoiena osinau e bolaawo winede.”   
\c 19  
\s1 Babilon kadilentuwana baiwa uboo wanwanlala nuaeuntoi  
\p
\v 1 Ema aupe ne apana uaraia, wisiasiawaia, aiau debamaia waipona moinawa rua etedinee. Aia sa uboo waie waiase, \bd “Aleluia, God wadaposisaitana! Inaida bumpa, sapaida ita muka uduudu no Godimba mampea!\bd*  
\v 2 \bd Me kotuwa matangelawa dewamodia ulaipa dodomana os. Me i ninala pokawaaida kotusane kadisantue diaidasan.\bd* I sa nina ita ewanuauwa kadiu daitada mampe tawo osowe wanwanlala nuau teinene banlakadisamono kadi dewasaiena. I ninala sa God nolawa dewalala bomono ita mo osinau God sipoa leusane me matangelasan.”  
\v 3 Ita mo osowe mukantoie waiase, \bd “Aleluia, God wadaposisaitana! Bola pokawaaida idia gasuwa mai dialepi, tauma ita ando gasulempe winompa.”\bd*  
\v 4 Mape mo eiau 24 ita nitu da wanwanlala 4 imimpu emmisintone dunentone God mida kolaiwatawa osowe wandia wadaposisaie waiase, “Amen, sa ipa sa! Aleluia, God wadaposisaitana!”   
\p
\v 5 Ita kolaiwatawoe aia nosedie wane wanase, “E mida God nolawa dewalala uduudu God wadaposisana! Do e eboeboua ita ebolasiawaia mida me sawaitilana no Godimba wadaposisana!”  
\v 6 Tane ne apana uaraia, wisiasiawaia, aiau debamaia waipona moinawa rua etedinee. Aia moinawa etaetawa abaia debama nosedia moinawa rua, ita do etaetawa uma uara wampaa moinawa rua. Mo waie waiase, \bd “Aleluia, God wadaposisaitana, ipawa no Tatamba God mukamukaua ionoidoa tauma mukawa uduudu sabamosane warereleide.\bd*  
\v 7 \bd Tauma no nuaeuntate nuamba eudidalepio God sapasate ionoidosata, ipawa Sip sanaa nainaiwa walamawa tauma wisen ita me iwa imaalene wande.”\bd*  
\v 8 Tane God i nainai garawa sapusapua eudida uwatauwa taupia baiwa wanen. Gara sa ipawa God apanawaida kakaibu dewau eubu dodomana dewasaia eueuwawa.   
\p
\v 9 \x + \xo 19.9 \xt Matiu 22.2,3\x*Mape ensel ne dianene wanase, \bd “Ema epe girumaitaa: Mo mida Sip sanaa nainaiwa odawa debamawa bedewe nisomoia nuaeuntompa!”\bd* Ita ensel mainawo aia ema saisaisane wanase, “Ema ipa God aiawa ulaipaida.”   
\p
\v 10 Me epe wadio ne ensel wawa bumpe imina emmisintene dunentene me wadaposisapaa baiwantedino me ne dianene wanase, “E ita sosoa do mida Iesu sumanaiwaitile benemawaitilana nola sola ipa ne. Sa baiwa mai epe dewaitaa, God os wadaposisana!” Iesu benemawa bumpa, sa ipa aia dima apana Aleu kakaiwa mukawa mampe gagalontoi.   
\s1 Me mida oas sapusapua osowe wandia emalawoa nanausimode  
\p
\v 11 \x + \xo 19.11 \xt Aisaia 11.4\x*Ema aupe ne uba wadaaubalala ewedinee ita sape pue oas sapusapua enedie. Me mida oas osowe wandia ebowa nata, Sumanaiwalala, ita ebowa da Ulaipa. Me kotuwa ita onawa dodomana os dewamode.  
\v 12 Me emawa ipa ia idie bumedia epawa rua, tane me uwawa osowe bena uara uwataubu eubuida aimon. Me osowe ebo girumalala winedie. Ebo ipa mai mida atenlepona, dia, me os atenlen.  
\v 13 Me garawa daumawa osina uduudulena ain, tane me ebowa ipa God Aiawa.  
\v 14 Ita uba sorodiawa garau eubu sapusapuaida aimone oas sapusapua osowe waine aleidia wawe mo oasiu asiasi antoie.  
\v 15 \x + \xo 19.15 \xt Gagalo 14.20\x*Me moawe isima moamoaua winedia, uwa daitada apanawa do onantopue aimopie nanausimopia baiwa. Me koina irama mampe dewalala wadepie ita koina sa mampe uwa daitada apanawa badowa enepie oniamopi. Ita me mo wain ipawa ruawa wain gadantoia abomawa debamaia bedewe weisamopie ansisimopi. Tane wain gadantoia abomawa, sa ipa God mukamukaua ionoidoa nuasigasigawa debamaia.  
\v 16 Ita me garawa ita abupa osowe ebo girumalala winedie. Giruma sa wadiase,  
\q1 \bd ‘Tatamba ionoidoa, warere uduudu bedeuwo me dea os debamawaida.’\bd*   
\p
\v 17 Mape ensel omo bedewe enedio ne ewedinee. Me aiawa mukaleidie nene uduudu iono laia apamodie diamodi wadiase, \bd “Winlena, God odawa nanawa debamaia baiwa auwenatuwapi.\bd*  
\v 18 E warere ita sorodia uwaantoia etepu, do apana debamau, ita do pue oas ita mida osowe waine antoia etepu namonatuwapi! Tane do apana uduudu etepu, apana debamau di wanwanlala ita mo nolau dewalala, do mo eboeboua ita ebousiawaia uduudu etepu namona.”  
\v 19 Tane ne pue kadiwa owa bedewe wisena ita tawo warerewa ita mo sorodiau uduudu auweituwadio ewamodinee. \bd Mo auweiena me mida oas osowe wandia ita me sorodiawa do onantopua baiwa.\bd*  
\v 20 \x + \xo 19.20 \xt Gagalo 13.1-18\x*\bd Tane mo kasawogantone pue kadiwa sa ita peroweta lagawaa otamone taumoiena.\bd* Peroweta lagawaa sa pue kadiwa owa bedewe wisena emawa osowe ginasa eueuwau dewamodie. Ita me ginasa eueuwau sa mampe mo mida pue kadiwa makawa wadane ita me kokoitauwa wadaposisaia nuau teinene banlakadisamono kadi dewasaiena. \bd Tane pue kadiwa sa ita peroweta lagawaa ia iikasalala seu do imoie moniantoia bedewe inawaa aubamoiena.\bd* Ia iikasalala sa ipa debamaia owa ruawa.  
\v 21 Ita mo sorodiau emoiena me mida pue oas osowe wandia moawe isima nosedia mampe toboiamon. Tane nene uduudu wimone mo etepu namone pokaidamon.   
\c 20  
\s1 Seitan taunadodeieno ena 1000 dialen  
\p
\v 1 Ema aupe ensel uboe iedio ne ewedinee. Me witape don totola dogo bedeweido iene aidalena kiwa ita do seni debamaia otamodie.  
\v 2-3 \x + \xo 20.2-3 \xt Bumpai 3.1\x*Me seni debamaia mampe duragon, sa ipa mota tontawa, ebowa nata, Wawu wawalala ita Seitan, wadene taundoden. Ita Seitan don totola dogo bedeweido iene aidalena bedewe noaneno iene aleno ita don moawa gudulenboden. Ensel lomi itun mai mida wisepie don sa moawa wadepiaubepi, diaida. \bd Seitan taudolala sape waimpo ena 1000 dialepi.\bd* Walama sa bedewe me tawo bolawa daitada apanawa mai laga mampe mo nuau teinepie banlakadisamopi, dia. \bd Tane ena 1000 dialepio aupe Seitan taundodena lotopuaubepuo nosepi God insaisawa ruawa. Ita God me walamawa kampaida ituna bedewe nolalepi.\bd*   
\p
\v 4 Ema aupe ne kolaiwata isiwa eneio ewamodinee. Mo mida God mukawa wanamona apana kotumopua baiwa kolaiwata sa osowe waimoie. Tane mo mida Iesu sumanaiwantoie benemawantoia ita do God aiawa baiwa imumbu topuiamoiena aleupu sape waimoio ewamodinee. Mo ipa mida pue kadiwa owa bedewe wisena mai wadaposisape ionoidosapona, dia. Do mo nambu ba witapu osowe pue kadiwa makawa mai wadapona, dia. Tane mo mida toboiamoiena bo bedewe enanawimone Keriso do warere ruawa ena 1000 bedewe warerentoiena.  
\v 5 Mo ipa bo bedewe bautantone enanawimoiena apanawa. Tane bolala isiwa mai walama sawo bo bedewe enapawimopona, dia. Mo ena 1000 dialeno aupe bo bedewe enanawimoiena.  
\v 6 \bd Mo mida bo bedewe bauta enanawimoiena apanawa nuaeu debamaia mo mampo, ita mo ipa God apanawaida kakaibu. Mo mai ia iikasalala bedewe antopue poka etapu, diaida. Ia iikasalala poka etaetala, sa ipa bo natawa mai dauwa etapu, dia. Tane mo God ita Keriso pirisiu wanantopue ita Keriso do ena 1000 bedewe warerentopu.\bd*   
\s1 Seitan ia iikasalala bedewe itui  
\p
\v 7 Ena 1000 dialepio aupe mo Seitan taunadodeiena lotopuaubepuo bola naepe diburasaienawo wandia epie nosepi.  
\v 8 Ita me nosepi alepie uwa daitada apanawa laga pokawaau mampe nuau teinepie banlakadisamopio me insaisawa dewasapu. Uwa daitada apanawa sa ebou waia Gog ita Magog, ita Seitan mo ona baiwa auwamopi. Tane mo auwauwala ipa uaraia owa nelawa waiwe wineia ruawa.  
\v 9 Mo nomone tawo bolawa daitadawo antone bola dainea God nuawadawadasadia ita God apanawaida kakaibu enane panamoiena ona baiwa. \bd Tane ia iilala uboe iene apana sa uduudu ituiamono dianton.\bd*  
\v 10 \bd Ita Seitan mida mo laga mampe nuau teinene banlakadisamona wadane ia iikasalala seu do imoie moniantoia bedewe aubeiena,\bd* naepe pue kadiwa owa bedewe wisena ita peroweta lagawaa bauta aubamoienawo. Ia iikasalala sa ipa debamaia owa ruawa. Sape mo walama uduudu tadina ita walama poka debama rebarebaida etompa, ita poka sa mai dialepi, winakasalala.   
\s1 Apana bolala kotubu walamawa  
\p
\v 11 Ema aupe kolaiwata sapusapua debamawa ita mida osowe wandia ne ewedinee. Tane mida kolaiwata osowe wandia danawe tawo ita uba tauwadea os lawosantone dianton, mai muriwa ewaewalala, diaida.  
\v 12 Tane ne apana bolala uduudu, eboeboua ita ebousiawaia, kolaiwata danawe eneio ewamodinee. Mo sape eneio kotu bukawa wadaaubantoiena. Ita buka da do wadenauben, sa ipa ina bukawa. \bd Tane apana bolala dima mo dewasaia ruawa buka bedewe girumaleno wineia kotuwantoiena.\bd*  
\v 13 Ita bolala uduudu owa bedewe bontoia kotu baiwa wimoiena. Tane bolala da uduudu, ita do bolala bola ebowa Ades bedewe wanwanlala wimoiena. Mo dima dewasaiena ruawa kotuwantoiena.  
\v 14 \bd Tane bo ita bolala bolau ia iikasalala bedewe aubeiena. Ia iikasalala sa debamaia owa ruawa, sa ipa bo natawa.\bd*  
\v 15 \bd Ita mo uduudu mida ebou ina bukawa bedewe mai girumalepona do ia iikasalala bedewe aubamoiena.\bd*   
\c 21  
\s1 Ierusalem sanaawa gagalowa  
\p
\v 1 \x + \xo 21.1 \xt 2 Pita 3.13\x*Ema aupe ne uba sanaa ita tawo sanaa ewamodinee. Tane uba ita tawo bauta segantone wineia lawosantone diaidanton. Ita owa do niniwadene diaidalen, mai ewaewalala.  
\v 2 \x + \xo 21.2 \xt Gagalo 3.12; Aisaia 61.10\x*\bd Mape ne bola debama kakaila Ierusalem sanaa God mampe uboe iedio ewedinee.\bd* Bola ipa ewaewawa eudida nainai iwa abo garawa eudida taupe benalepe imaalepe monawa onioniawaleipona ruawa.  
\v 3 Ita ne aia debamawa kolaiwatawo nosedia etedino wadi wadiase, \bd “God wandia bolawa tauma apana bedeuwolen, ande ita ando me mo do waimompa, ita mo ipa me apanawaida oniadewasamompa. Me mo bedeuwo waimpa ita me meba ipa mo Godiu.\bd*  
\v 4 \x + \xo 21.4 \xt Aisaia 35.10\x*\bd Me apana emauwo keu siniamopiaubepi. Sape bo dia, tane do nuaparepare kewa, kako, surakau ita poka uduudu dia. Sai ema uduudu tawo tontawa mampea, tane tawo sa ita tawo sa saiwa uduudu lawosantone diaidanton.”\bd*   
\p
\v 5 Mape me mida kolaiwata osowe wandia wadi wadiase, \bd “Ewane, ne nitu uduudu sanaa dewamodina!”\bd* Ita do wadiase, “E dewa ema uduudu umanawa girumaitaa, ipawa gagalo ema etaana ipa ulaipa, sumanaiwaidalala.”  
\v 6 \x + \xo 21.6 \xt Aisaia 55.1\x*Ita me dianene wanase, \bd “Tauma dewa uduudu ne insaisawantene dewasana segalentuwan. Ne ipa Alpa ita Omega. Ne bumpeido ita ompeido wanwankasalala. Ita me mida gadompawa makoleidia ina esawa maneuleidia ne di wanapo napi.\bd*  
\v 7 \x + \xo 21.7 \xt 2 Samuel 7.14\x*\bd Apana mida badowa enompe poka iompo nanausampa euwa uduudu ne mainawoa me mebaawa wanalepi. Ne ipa me Godiwa ita me ne otonaida.\bd*  
\v 8 Tane mo sawaa sakoubu, ita mo Iesu adiananalala, tane kadi daitada rebarebaida dewalala, apana epaboialala, ninalala, wene apanawa, ginauri wadawadalala, tane do kokoitau witapo dewalala asowa waie wadaposisaia apanawa, ita laga wawalala uduudu ia iikasalala seu do imoie moniantoia bedewe aubamopu. Ia iikasalala sa ipa debamaia owa ruawa. Sa ipa bo natawa.”   
\p
\v 9 Mape ensel mainawo wisen. Me ipa ensel mida aboma 7 bedewe poka rebarebaida 7 ompa wineio otamoia bedeuwo sou dea. Ita me ne dianene wanase, “Winea, ne mida Sip sanaa naisepia iwa euwaepa. I sa ipa Sip sanaa manainapa wanalepi.”  
\v 10 Tane Aleu kakaiwa ne bedenawolene oniadewasanedie ita ensel awananene wadi debama daumawa iwa osowe ituneno enedinee. \bd Ita me bola debamawa kakaiwa Ierusalem God mampe uboe iena euwanedie.\bd*  
\v 11 \bd God sapawaida bola sa sapasadio sapaidaleidie\bd* seu eudida uwatauwa ebowa Iasipa kiboraleidia ruawa. Ita bola ipa ewaewawa garasi kiboraleidie sapa wadia rua.  
\v 12-13 Bola ipa seu mampe badowa gonaala ita gonaantoiena daumawa iono. Tane gonaa moawa 12 wineie. Gonaa sainapa ipa 4, ita sainapa deadea osowe gonaa moawa natadea os winei. Gonaa ipa sa deadea moauwo ensel eneie. Tane moa deadea osouwo Israel damba 12 ebou girumalala wineie.  
\v 14 Bola sa gonaawa seu debamau 12 osouwo wadeiena badowa enompaa baiwa. Tane seu ipa deadea osouwo Sip sanaa aposeliwa 12 ebou girumalala wineie.  
\v 15 Ensel mida ne do gagalontena koina makalala gold mampe dewalala wadedie bola debama sa, do gonaawa ita gonaawa moawa rualepia baiwa.  
\v 16 Bola gonaawa sainapa 4 daumawa deawaau os. Me maka koinawa mampe bola sainapa rualeno 2400 kilomita waden. Tane bola gonaawa odena rualeno deawaa 2400 kilomita waden.  
\v 17 Bola gonaawa potopotowaida ita me rualeno 60 mita waden. Ensel sa apanaida koinawa makaleidia mampe uduudu ruasamon.  
\v 18 Gonaa sa seu eubu uwataubu ebowa Iasipa mampe wadawadala. \bd Tane bola ipa goldida os mampe wadawadalala kiboraleidie ewaewawa garasi euda ruawa.\bd*  
\v 19-20 Bola gonaawa seu debamau 12 osouwo wadawadalala. Seu sa ipa eubu uwataubuida oau daitada kibokiborantoia mampe benasaiena. Seu ipa bumpe reresala ebou wamoia: Iasipa, Sapaira, Aget, Emeral, Onik, Kanelian, Kirisolit, Beril, Topas, Kirisopes, Iasint ita Ametis. Tane seu 12 debamau deadea ipa seu eubu uwataubuida.  
\v 21 Ita bola gonaawa moawa 12. Tane deadea ipa nitu da kopiu uwataubu kibokiborala mampe dewamoiena. Tane bola sa intawa goldida os mampe dewalala ewaewawa garasi eudida ruawa.   
\p
\v 22 Bola ipa bedewe God duwa ne ewanalewanten, mai wineipona, dia. \bd Ipawa Tatamba God mukamukaua ionoidoa ita Sip sanaa mubaau ipa sa God duwa rua waimoi.\bd*  
\v 23 Ita bola ipa mai omo ba uaboa sapawa sapasapi, dia. \bd Ipawa God sapawaida bola ipa sapawa ita bola sa sapasade. Ita Sip sanaa ipa bola siwawa.\bd*  
\v 24 Tane uwa daitada apanawa bola sa sapawa bedewe waimompe leumpa. Ita tawo warerewa puraiwau eubu uwataubuida mampe bolau sapaleidia otepue bola sawo wimopue teamopu.  
\v 25 \bd Ita sape tadina dia, sa baiwa bola gonaawa moawa walama uduudu wadaaubalala winamompa, mai gudulala, dia.\bd*  
\v 26 Uwa daitada apanawa puraiwau eubu uwataubuida mampe debamaidantoia otepue bola sawo wimopue teamopu.  
\v 27 \bd Tane mai mida da nitu da kadiwa otamopue bola sawo odapu, dia. Do mai mida dewa nuadabuala dewasadia ba laga wadia sape odepi, diaida. Tane mo mida ina bukawa Sip sanaa mampea bedewe ebou girumalala os bola sawo odapu, mai mida da, dia.\bd*   
\c 22  
\s1 Ion auwen rua bedewe ina esawa ita ina iawa ewamode  
\p
\v 1 Mape ensel \bd ina esawa\bd* ne euwaneno ewana. Esa sa bedewa euda ewaewawa garasi eudida kiboraleidia rua. \bd Ita mida esa sa nampa inawaa wankasalepi.\bd* Tane esa bumpa ipa God kolaiwatawe ita Sip sanaa mampoe iene aleidie  
\v 2 \x + \xo 22.2 \xt Bumpai 2.9\x*ita bola intawa debama sawano nosedie. \bd Esa waiwa on deneuwe ita sen deneuwe ina iawa eneie, tane ena uduudu bedewe uaboa 12 ruawantoie ipawa naumoi. Ita me mida ina iawa ipawa nampa inawaa wankasalepi.\bd* Tane ia asiu uwa daitada apanawa inamompaa baiwa winei.  
\v 3 \x + \xo 22.3 \xt Bumpai 3.17\x*Mai apana da ba nitu da God wadabuamona bola sa bedewentopu, dia. \bd Tane God ita Sip sanaa kolaiwatau bola sa bedewe enede. Ita God nolawa dewalala me simbiasampe waimompa.\bd*  
\v 4 \bd Mo God ibuwaida ewapu ita mo nambu osowe me ebowa girumalepi.\bd*  
\v 5 \bd Sape tadina dia. Tane Tatamba God ipa mo sapau, sa baiwa mo siwa ba omo sapawa mai menamopi, dia. Ita mo sape nuaeuntompe warerekasantompa.\bd*   
\s1 Iesu walama kampaida os bedewe wisepi  
\p
\v 6 Mape ensel dianene wanase, “Aia ema ipa ipuipua sumanaiwalala. Tatamba God, me mida perowetawa mampoe gagaloleidie, me enseliwa wanaubeno dima God insaisawa rua walama kampaida os bedewe segalepia me nolawa dewalala euwamodia atentompe waimompaa baiwa.”   
\p
\v 7 Iesu wadi wadiase, \bd “Ewane, ne walama kampaida os bedewe wineapa! Me mida God benemawa buka ema bedewe girumalena wadediitue ruawaleidia sau euwa ita nuaeuwa debamawa donsapi.”\bd*   
\p
\v 8 Ne Ion ema uduudu etamodinee ita ewamodinee. Ema etamone ita ewamono dialeno aupe ne ensel mida dewa ema uduudu euwanena wawa bumpe imina emmisintena me wadaposisapona baiwa.  
\v 9 Ne me wadaposisapaa baiwantedino dianene wanase, “Ne ipa e ita e sosoa peroweta isiwa do sola da, do mo uduudu mida buka ema benemawa wadeiitue ruawantoia sou. Tane no uduudu God nolawa dewalala os. Sa baiwa mai epe dewaitaa, God os wadaposisana!”  
\v 10 Ita me ne dianene wanase, \bd “Benemawa buka bedewe girumalene winedia mai wade niabosaa, dia, ipawa benema ema ulaipalepia walamawa kampaleide.\bd*  
\v 11 Me mida kadiwa dewasadia ideita kadiwa dewasampa. Me mida miramiraleidia ideita miramiralempa. Tane me mida dewa euda dodomana os dewasadia ideita dewa euwa dodomana dewasampa. Ita apana mida kakaiwa wandia, sa ipa God aiawa ruawaleidia, me ideita kakaiwa waimpa.” Ensel ne epe dianen.   
\p
\v 12 \x + \xo 22.12 \xt Aisaia 40.10; Aisaia 40.10; Ierima 17.10\x*Tane Iesu wadi wadiase, \bd “Ewane, ne walama kampaida os bedewe unena do wineapa, ita apana uduudu dima dewasaiena rua wanamopa.\bd*  
\v 13 \x + \xo 22.13 \xt Gagalo 1.8; Gagalo 1.17; 2.8\x*Ne ipa Alpa ita Omega, ne ipa bumpeido ita ompeido wanwankasalala.   
\p
\v 14 \x + \xo 22.14 \xt Bumpai 2.9; 3.22\x*\bd Mo mida garau mitamoie waimoia sau euda ita nuaeu debamaia donsapu. Ita mida epe dewantoia mo rua os bola debama gonaawa moainta odapu antopue sape ina iawa ipawa nampe waimompa.\bd*  
\v 15 Tane bola sa gonaawa adiwe elo, sa ipa kadi daitada dewalala uduudu waimompa. Mo ipa wene ita ginauri dewalala, ninalala, wita kadilala, god lagawaau ita kokoitaubu wadaposisaia, ita do laga nuawadawadasaie dewasaia apanawa.   
\p
\v 16 \x + \xo 22.16 \xt Aisaia 11.1,10\x*Ne Iesu enselina wanaaubena e manawo benema ema dieepio e wadee ekelesia benemamoa baiwa. Ne ipa Dawid waapawa ita seupawa, ne ipa walama kiporawa sapaidaleidia Tauragaraga.   
\p
\v 17 \x + \xo 22.17 \xt Aisaia 55.1\x*Aleu kakaiwa ita i mida Sip sanaa naisepia, sa ipa God apanawaida, waie waiase,  
\p \bd ‘Winea!’ Ita me mida aia ema etedia do wapiase, ‘Winea!’ Me mida gadompawa makoleidio wandia esa awa wimpi. Ita apana uduudu bedeuwo mida esa nanawa menasadia me wimpie ina esawa di napia rua os, mai enabodawa intawa da wineipona, dia.”\bd*   
\p
\v 18 \x + \xo 22.18 \xt Diutor 4.2\x*Ne Ion apana uduudu mida buka ema benemawa eteia badowa diamodine wadinase, \bd “Mida benema da nambea God benemawa buka ema bedewe girumalena dosadia God apana sa poka rebarebaida uduudu buka ema bedewe girumalena wanepi.\bd*  
\v 19 \bd Ita me mida God benemawa buka ema bedewe girumalena aia isiwa mai waipe sabamosaipona emodia apana sa ina iawa ipawa me baiwa winedia napona God gudulepi. Ita bola debama kakaiwa, umanawa buka ema bedewe girumalena, me baiwa winedia do God gudulepi.”\bd*   
\p
\v 20 Me mida benema ema umanawa ne dianena wadiase, “Ema uduudu ipa ulaipaida.” Me do wadiase, \bd “Ulaipa, ne walama kampaida os bedewe wineapa.” Oa, sa ne menanedia, Tatamba Iesu winea!\bd*   
\p
\v 21 No Tatamba Iesu nuawadawadawa amonawa e manlawo winompa, amen.