\id HEB - Kanasi NT [soq] -Papua New Guinea 1996 (DBL 2014) 
\h Ibru 
\toc1 Ibru Leta Ibru apanawa sumanailala mampo girumalena 
\toc2 Ibru 
\mt1 Ibru  
\mt2 Leta Ibru apanawa sumanailala mampo girumalena  
\c 1  
\s1 God me Otopa bedewee gagalowa ompa wade  
\p
\v 1 Mapo God peroweta bedeuwoe no nosinosimba Israel apanawa mampo inta daitada mampe osoweosowe gagalolen. Tane me gagalowa uduudu mai wapatuwapona, dia.  
\v 2 \bd Tauma walama ema ompa osowe God no mainimbo me Otopaida bedewee gagalolentuwan. God me Otopa sonabena nitu uduudu me witapesapia baiwa. Do me bedewe God uba ita tawo dewasano segalen.\bd*  
\v 3 \bd God sapawaida me Otopa bedewe enditewade, mo nata ipa sapau deawaa os. God Otopa me Mamba inainamba ita dewawa uduudu otentuwan. God Otopa aiawa mukamukaua mampe dewa uduudu wadadomodio badowa winei. Me bauta meba osinawa mampe apana kadiu mitenauben. Ema aupe me tawo ema ene odene alene uboo God debamawaida witapa on deneuwe aisidene waine wande.\bd*   
\s1 God Otopa ipa ionoido  
\p
\v 4 Ita ema baiwa God Otopa ensel amboiamone ionoidolene ita ebowa debamaia waden, mai ensel ebou ruau.  
\v 5 \x + \xo 1.5 \xt 2 Samuel 7.14\x*God mai ensel da diape waponase,  
\q1 “E ipa ne Otona, ande ne sabamoedina e ne Otonaida.”  
\m Tane do God mai ensel da diape waponase,  
\q1 “Ne ipa me Mamba wananteapa ita me ne Otona wanalepi.”  
\m God aia ema wana, sa ipa me Otopaida umanawa wade.   
\m
\v 6 Deawaa, God me Otopa ionoidoa tawo osowe wadiaubedie wane wanase,  
\q1 “Ne enselina uduudu me wawa bumpe imimpu emmisintopue me wadaposisapu.”   
\m
\v 7 God ensel umanau wadi wadiase,  
\q1 “Ne enselina dewamopo lanunu rua nolantompa, ita ne nolana dewalala dewamopo ia epawa wanantompa.”   
\m
\v 8 Tane God me Otopa umanawa peroweta bedewee wadi wadiase,  
\q1 \bd “E kolaiwataa, o God, ipa tauma ita ando winakasalala! E apana gonaa bedewe waimoia dodomana os oniadewasamoiana. \bd*  
\v 9 E dewa dodomana nuawadawadasaie ita kadiwa nibuasaiana. Sa baiwa God, e Goda sonabaena e nuaeua baiwa ia asiwa bonabonaua esapa osoawo itune warereen, ita sosoa bedeuwo ituposien.”   
\m
\v 10 Do peroweta ema epe wane wanase,  
\q1 “O Tatamba, bumpeido e tawo segasaana. Ita e eba witaa mampe uba dewasaana.   
\q1
\v 11 Uba ita tawo gara rua tontalepie diaidalepi, tane e ando wankasaitaa.  
\v 12 E uba ita tawo uduudu gara onapea rua wadaaube nukuite nambesaa, ewaewa gara tontawa wadeiaubeie aupawe sanaa tauia rua. \bd Tane e ipa wanwankasalala, e wanwana enawa mai ompalepi, dia.”\bd*   
\m
\v 13 \x + \xo 1.13 \xt Sam 110.1\x*God mai ensel da diape waponase,  
\q1 “Witana on deneuwe aisite wana, ne ideita e emalawoa apanawa waa atowe teamopa.”   
\m
\v 14 Tauma no ensel umanau ambi wata? Mo uduudu ipa aleu, God nolawa dewalala. God mo waaubamode apana mida inaida bedewe antoia simbiamompaa baiwa.   
\c 2  
\s1 Ina gagalowa asisudewantata!  
\p
\v 1 \bd God Otopa me ipa ionoido, mai ensel ruau. Sa baiwa no me ulaipa gagalowa eteitana deaitopa asisudewantata, ina intawa saiete nambe antataa sawa!\bd*  
\v 2 God gagalowa bautaa ensel bedeuwoe no nosinosimba wanamona ipa badowa nolaleidie. Apana mida gagalo sa mai etape ruawalepona ita ainpundena, me ipa sipoa matangela waden.  
\v 3 Tane ina gagalowa sanaa ipa pokawaaida, mai gagalo bautaa rua. No tauma ina gagalowa sanaa etate adiananasate ete, ambi no matangela saiete inantata? Diaida, mai inta da wineipona! Ina gagalowa sanaa ema Tatamba bumpe benemaleno aposel etane no mainimbo wane sabamosane badosaiena.  
\v 4 Tane do God ina gagalowa ema dewa mukamukaua daitada ita eueuwa isiwa dewamona mampe ipawanasan. Ita do Aleu kakaiwa amonawa apana deadea mampo me insaisawa rua wanamona mampe me gagalowa ulaipawanasan.   
\s1 Iesu no ruambalena no saunepia baiwa  
\p
\v 5 Ema baiwa do no ina gagalowa asisudewantata: No bauta uba ita tawo sanaa segalepia umanawa watana. Tane God uba ita tawo sanaa mai ensel atouwosapona, dia.  
\v 6 Tane buka bedewe naepe gagalo ema benemawaleidi wadiase,  
\q1 “O God, no ipa apana os, tane e no insaneiana.  
\q1 No apanaida, tane e no oniadewasaneiana.  
\v 7 E apana walama kerauda os ituaisideno ensel atouwolen. Tane ema aupe e apana sapaidasae ebowa debamasaana.  
\v 8 E nitu uduudu me atowesaana.”  
\m Aia ema bedewe God wadi wadiase, “Nitu uduudu ipa apana atowe.” Sa ipa mai nitu da epanosidepono di winakoaleipona, dia. Tane walama ema bedewe mai nitu uduudu apana atowe wineipono emambo eweipona, dia, ando os sabamoidolepi.  
\v 9 \bd Tane no Iesu ewate atentata. God me walama kerauda os bedewe itunaisideno ensel atouwolen. Me no uduudu baimba bolen, ipawa God no nuaparembalen. Tane tauma God me sapaidasane me ebowa debamasan, ipawa me bauta poka etene bolen.\bd*   
\p
\v 10 \bd God menasana apana uara me obampa wanantopue me sapawaida bedewe antopue wimopu. Ema segalepia baiwa me dewasano me Otopaida poka etene alene ompa osowe wisene sapaidalene ita inaida intawa enabodala wadenauben.\bd* God nitu uduudu segasana me os baiwa winei. Me ipa epe dewasapia rua.  
\v 11 Iesu meba ita apana mida me kakaimodie God mampemodia, mo ipa uwa dea os waimoi. Sa baiwa Iesu apana mida me kakaimodia mampo ebo Sosona wawawa mai malaleipona, dia.  
\v 12 Buka bedewe ema epe wadi wadiase,  
\q1 “God, e eboa ne sosona mampo wape sabamosapa, ita apana auweia bedeuwo e wadaposia sasawa wapina.”   
\m
\v 13 Ita do wadi wadiase,  
\q1 “Ne God sumanaiwantedine me bedewe insaisana itudina.”  
\m Ita do girumalene wadiase,  
\q1 “Ewaa, ne ema God obaina neana do eneitana.”   
\m
\v 14-15 Tane apana umanau God me perowetawa bedewee wadi wadiase, “Ne obaina.” Tane mo ipa apanaida. \bd Ita Iesu mo ruaulene apanaida wanalen. Me poka etene ita bolen. Iesu epe dewalena, me mida bo mukawa wadedia, sa ipa kadi mamba Seitan, kadisapie nanausisapia baiwa. Ita do me bowa bedewee apana mo wanwambu uduudu bedewe bo sawa mo taudomodia inamopia baiwa.\bd*   
\m
\v 16 Ema ipa sabamo no ateinimba: Iesu mai ensel insamoipona, dia, tane me Abraam nosinosiwa insamodie saumode.  
\v 17 \bd Sa baiwa God inta dea os ituno winede. Ema epe: Iesu me ideita apanaidalen dewa uduudu bedewe sosowaida ruaulen. Ema bedewe me Pirisi ionoidoa wanalene God baiwa noladewaleidie ita no nuaparemba do God ita apana sawanauwo enede. Me meba etepa itune en, apana kadiu siniepiaubepia baiwa.\bd*  
\v 18 \bd Iesu meba rubu bedewe pokaida etene atenlen, sa baiwa apana rubu bedewe antoia me saumompaa rua.\bd*   
\c 3  
\s1 Iesu ipa debamawaida, mai Moses rua  
\p
\v 1 Sumanai sosona kakaila, \bd God e apalen uboo awa baiwa. Iesu mida God wanaubena ita Pirisi ionoidoa wanalena e ewanadoe insenuna. Iesu ipa ema no sumanaiwantite ebowa wasabamosaitana.\bd*  
\v 2 Iesu God simbiadewasasan mida me sonabena nola ema dewasapia baiwa. Iesu God simbiasan Moses God duwa, sa ipa God apanawa, simbiadewasamona rua.  
\v 3 Du wadawada apanawa, me ebowa ipa debama, mai du me wadena rua. Deawaa, Iesu ebowa ipa debamawaida, mai Moses rua. Ipawa Iesu du wadawada apanawa, tane Moses ipa du iawa dea rua.  
\v 4 Du uduudu ipa apana wadei, tane God me ipa nitu uduudu dewalala.   
\p
\v 5 Moses me God nolawa dewalala, God duwa uduudu simbiadewasamon. Dima God ando gagalowalepia Moses bauta benemawalen.  
\v 6 \bd Tane Keriso ipa mai Moses rua, dia. Me du apanawa Otopaida rua God duwa uduudu simbiadewasamode. Tane no sumanailala ipa God duwa rua wainilana.\bd* No badowa enonte sumanaimba dima ando segalepia nuaeu do inseitana bedewe itunta, no epe wataa rua.   
\s1 God aiawa mai adiananasataa gagalowa  
\p
\v 7 \x + \xo 3.7 \xt Sam 95.7-11\x*Sa baiwa no God Aleu kakaiwa bedewee dima gagalowaleidia asisudewantata. Me epe wadi wadiase,  
\q1 \bd “Ande, walama ema bedewe e God aiawa etonune\bd*  
\v 8 \bd nuala mai anatene badosana.\bd* Mai Israel apanawa ruauitana, mo rubu walamawe sala makowa bedewe God aiawa etane tane adiananasane amboitusaiena.”   
\m
\v 9 Ita God mo umanau ema epe wane wanase,  
\q1 “E nosinosila sala makowa bedewe kadiwa dewasane mampe ne awasinaneiena. Tane ena 40 bedewe ne dima dewasana mo emauwo eweiena.”   
\m
\v 10 Mo dewa ema dewasaiena baiwa ne nuana kadiidalen walama sa apanawa mampo. Ita ne wane wanase,  
\q1 ‘Mo nuau nambeido aleide, mai ne insaneipona, ita do ne intana mo mai atentoipona, dia.   
\q1
\v 11 Sa baiwa ne nuakadi mampe saua badowa wane wanase, ‘Mo mai ne bubuana bolawa bedewe wimopue bubuantopu, diaida.’”   
\m
\v 12 \bd Sumanai sosona, ewanadewaitana mai mida e bedelawo kadi nuawe odepio sumanaiwa epiiepie ita God wanwankasalala adiananasapi.\bd*  
\v 13 Tane e walama ruawaitonune eda sauitonuna, kadi lagawa sola dea e bedelawo taupidodepio nuawa badosapia sawa. Walama ande bedewe dima God e nanlanepe itudia rua dewasana, mai ena!  
\v 14 \bd Naita bumpeido sumanaintena rua no insaisamba badowa Keriso bedewe itunte ita ideita ompa osowe wineta, no ipa Keriso do dea.\bd*  
\v 15 \x + \xo 3.15 \xt Sam 95.7,8\x*No epe dewantonta, ipawa buka bedewe wadi wadiase,  
\q1 “Ande, walama ema bedewe e God aiawa etonune mai nuala anatene badosana. Mai Israelwa ruauitana! Mo rubu walamawe sala makowa bedewe God aiawa etane tane adiananasaiena.”   
\m
\v 16 \x + \xo 3.16 \xt Nambas 14.1-35\x*E inseilana apana dainea God aiawa etane ita adiananasaiena? Apana ipa mida Moses Isibt bedewe banlamono nomoiena. Mo ipa sa God aiawa adiananasane amboitusaiena.  
\v 17 E inseilana mida mampo God nuakadiwa wineno ena 40 dialen? Apana mida kadi dewasane ita sala makowa bedewe bontoiena. Mo ipa sa!  
\v 18 Apana dainea mampo God saua badowa wane wanase, “Mo mai ne bubuana bolawa bedewe wimopue bubuantopu, diaida.” Sa ipa mo mida me aiawa etane adiananasaiena, God mo mampo epe gagalolen.  
\v 19 No ema bedewe ewate atentata: Mo mai sumanaintopona baiwa God bubuawa bolawa bedewe mai odapua rua, dia.   
\c 4  
\p
\v 1 \bd Tane God bubuawa bolawe odaodawa sauawalena, saua sa ipa badowa enede. Sa baiwa no ewatadewantata mai mida da e bedelawo bubua bolawe wisepona ampisudepio God me epe donsapi.\bd*  
\v 2 Gagalo euda mainimbo wiseno etatana Israel apanawa eteiena rua. Mo gagalo eteiena, tane mai euwa da donsapona, dia. Dima baiwa ema epe segalen? Ipawa mo gagalo etaetawa eteiena, tane mai sumanaibu dima eteiena bedewe itupona, dia.  
\v 3 \x + \xo 4.3 \xt Sam 95.11\x*\bd Tane no sumanailala bubua bolawa God sauawalena bedewe odate antitana.\bd* God wana rua segaleide. Me wane wanase,  
\q1 “Ne nuana kadilen ita saua badowa wana, mo mida sumanaisiawaia mai ne bubuana bolawa bedewe wimopue bubuantopu, diaida.”  
\m Tane God uba ita tawo dewasano dialeno bubua walama imaasane itun.  
\v 4 \x + \xo 4.4 \xt Bumpai 2.2\x*Ipawa buka bedewe naepe bubua walamawa umanawa ema epe wadi wadiase,  
\q1 “God nolawa uduudu diasane walama 7 bedewe bubuawalen.”   
\m
\v 5 \x + \xo 4.5 \xt Sam 95.11\x*Tane ema umanawa buka bedewe do epe wadi wadiase,  
\q1 “Mo mai ne bubuana bolawa bedewe wimopue bubuantopu, diaida.”   
\m
\v 6 Mo mida bauta Gagalo euda amonantoio eteiena ipa bubua bolawa bedewe mai odapona, ipawa God aiawa mo adiananasaiena. Tane apana isiwa baibu bubua bolawe odaodawa God sauawalena, saua sa ipa badowa enede.  
\v 7 \x + \xo 4.7 \xt Sam 95.7,8\x*Ambi no ema epe atentata? God walama da no odataa baiwa sonabene itun, ita walama sa me ebowa wadia Ande walamawa. Israelwa bubua bolawe mai odapona aupe ena uara dialeno God Dawid moawe gagalolene wanase,  
\q1 \bd “Ande, walama ema bedewe e God aiawa etonune nuala mai anatene badosana, dia!”\bd*  
\m Gagalo ema buka bedewe girumalena umanawa no bauta deawaa gagalowanten.   
\p
\v 8 \x + \xo 4.8 \xt Diutor 31.7\x*Iosua Israelwa banlamope bubua bolawaida God sauawalena bedewe odapono, sa ipa God ando bubua walamawa da mai umanawa wapona.  
\v 9 \bd God aiawa ema wana baiwa no atenten me apanawa bubuantopua walamawa dea ituno winede, me meba walama 7 osowe wisene bubualena rua.\bd*  
\v 10 \x + \xo 4.10 \xt Bumpai 2.2\x*Ne epe wadina, ipawa apana mida bubua bolawa God sauawalena bedewe odedia me nolawa bubuawaleide, God meba nolawa bubuawalena rua.  
\v 11 \bd Gagalo ema baiwa no sumanai bedewe badowa enonte weuwante antonta bubua bolawa sa bedewe odata. Ita mai mida no bedembo sumanaiwa epie omepi Israel apanawa ruau.\bd* Mo ipa God gagalowa etane, tane mai sumanaiwantopona, dia.  
\v 12 \bd Aia dima God wadia, sa ipa inawaa mukamukaua nolaleide. Me aiawa ipa isima moamoauaida rua apana etepa nodie bedeweido komempa ita merompa nopuiasade. Sa ipa apana nuawa naumba ita aleupa enidasade. God aiawa ema bedewe dima apana nuawa ita insaisawa bedewe euwa ita kadiwa winedia sabamosadie empuempusadie euwasade.\bd*  
\v 13 Nitu uduudu ipa God emawe wadaaubala sabamo winei, mai dima da me emawe werego wineipona, diaida, uduudu sabamo os. \bd Me mampe no dima dewasatana ando umanawa diata, mai dia.\bd*   
\s1 Iesu, me ipa Pirisi ionoidoa  
\p
\v 14 No Pirisimba debama ionoidoa uba bedewainta alene God danawe wisen. \bd Me ipa Iesu, God Otopa. Sa baiwa no sumanaimba wasabamosaitana badowa wadatadoe enonta!\bd*  
\v 15 \bd No Pirisimba ionoidoa Iesu no dewamba oauara mai atensialepona, tane no daumba etaetawa me atembaida. Ipawa me do no ruambalene rubu daitada donsan, tane mai kadiwa da dewasapona, dia.\bd*  
\v 16 \bd Iesu no Pirisimba ionoidoa God ita no sawanambo enedia baiwa no mai sa ba mala do dodomana God kolaiwatawa danawe ane wineta.\bd* No epe dewasanta no God sauwa menanempaa walamawe me nuaparewa ita amonawa euwa donsata.   
\c 5  
\p
\v 1 Pirisi ionoidoa uduudu Israel apanawa sosowa bedeuwo dea God sonabedie nolawa wanede mo baibu God mampe simbialepi. Me amona daitada ita pue do pulolempa kadi baiwa.  
\v 2 Me dewa oauara meba bedewe winedia baiwa sowa insakoaleidie nambe aleidia dauwa etedie aia bibia mampe wasausade.  
\v 3 Me oauaralena baiwa meba amonawa pulowa do itude. Me mai apana os kadiu baiwa pulo ituipe, dia, tane me meba kadiwa baiwa do itude.  
\v 4 \x + \xo 5.4 \xt Ekisod 28.1\x*Mai apana da meba pirisi ionoidoa wanalepia baiwa sonasonabaleipona, dia. Tane God os apana sonabedie apasadio pirisi ionoidoa wanaleide Aron dewalena rua.  
\v 5 Deawaa Keriso mai meba Pirisi ionoidoa wanalepona baiwa meba sonasonabalepona, dia. Tane God me diene wanase,  
\q1 \bd “E ipa ne Otona, ande ne sabamoedina e ne Otonaida.”\bd*   
\m
\v 6 \x + \xo 5.6 \xt Sam 110.4\x*Tane do buka bedewe naepe wane wanase,  
\q1 \bd “E ipa ne Pirisina wanwankasalala, pirisi Melikisedek rua.”\bd*   
\m
\v 7 \x + \xo 5.7 \xt Matiu 26.36-46; Mak 14.32-42; Luk 22.39-46\x*Iesu me apanaida tawo osowe wandia walamawe me raupariwa ita iririwa aiawa mukama mampe ke do God mampe nanalen. God me rua os Iesu etepa kakaisapi ita me bo mai donsapi. Iesu God sawalene simbiasana baiwa God me raupariwa etene sausan.  
\v 8 Iesu me ipa God Otopa, tane ideita poka etena mampe God aiawa simbiawa atenlene  
\v 9 odene alen. Me ompa osowe wisene sapaidalene inaida winakasalala bumpa wanalen, apana mo mida me aiawa ruawantoia baibu.  
\v 10 Ita God Iesu sonabeno me Pirisi ionoido Melikisedek ruawalen.   
\s1 Sumanai bedewe muntate antata!  
\p
\v 11 Ema umanawa no kaino wapona, tane ambi e waeuwaleta? E gagalo eteilana, tane etasia rua.  
\v 12 \x + \xo 5.12 \xt 1 Korint 3.2\x*\bd E tauma walama ema bedewe waeuwa apanawa wanaitapona, tane e ideita menaledia apana da God gagalowa bumpa e waeuwalepi. E nana badowa mai nana rua, dia. E ipa oto gegelawa rua ama os nanalala.\bd*  
\v 13 Tane ama nanalala me ideita gegela wande, mai muleipona ita inta dodomana awa mai atenlepona.  
\v 14 Tane nana badowa ipa apana muntoie debamantoia nanau. \bd Ita mo mida God gagalowa eueuwa osowe itune aten wadane euda ita kadiwa intawa ewaewawa atenton.\bd*   
\c 6  
\p
\v 1 No euda ita kadiwa intawa atentena baiwa \bd sumanaimba waeuwa bumpea antaboe ete inintate su ane winetaaubeta!\bd* Waeuwa bumpea tauma mai osowe waeuwaleta, dia. Tane sumanai waeuwawa bumpea ipa ema epe: Insaisala leusane dewala ipusiawaia emone winlene God mampe sumanaitana waeuwawa.  
\v 2 Ita babatutu waeuwau, apana sau euda wadepia baiwa witala osowe ituna waeuwa, apana bo bedewe enawisa waeuwa, ita dima God kotu walamawa ompa osowe wapia, kotu gagalowa sa ipa winakasalala. Ema ipa sumanai waeuwawa bumpea.  
\v 3 \bd God no saunempa no dewa ema bumpea amboiamote inintate ana!\bd*   
\p
\v 4 \bd Apana mida sumanaiwa epiiepie adiananasapia ambi me osowe insaisawa leusapie God mampe dodomanalepi? Mai inta da wineipona, dia!\bd* Dima baiwa? Ipawa me bauta God sapawa bedewe wandie, me God amonawa euda eueuwa osowe itune atenlen, ita do Aleu kakaiwa me waden.  
\v 5 Apana sa God aiawa eueuwa osowe itune ita atenlen God aiawa ipa euda. Tane do God mukawa ando wisepie sabamolepia me dewasane dauwa etaetawa atenlen.  
\v 6 \bd Apana mida epe dewalepie tane sumanaiwa epiiepie omepia, me mai osowe insaisawa leusapia rua, dia. Ipawa dewa ema bedewe me osowe God Otopa koros osowe bosadie apana emauwo malaidasade.\bd*   
\p
\v 7 Irai dogowa euda osowe unu kainokaino wadie nosedio nitu uduudu irai apanawa menasadia rua irailena inidewantoi. Dogo sa osowe God me sauwa euda itude.  
\v 8 \x + \xo 6.8 \xt Bumpai 3.17,18\x*Tane irai dogowa da osowe gedara ita bodu os inintoia. Dogo sa ipa ipasia, ita God irai dogowa sa wapidabuasapia baiwaleide, do ompa osowe ia bedewe ipituwapi.   
\p
\v 9 Nuana sosowa, no gagalo ema wamoitana, tane e baila no mai nuamba pola waipona. No badowa inseitana e euwa donsale inaida bedewe wainilana.  
\v 10 God dewawa ipa dodomana ita e nolala dewasale ita nuawadawada e me mampe sabamosalano me ewena, mai nuawa awawaleipona, dia. E nuawadawada, sa ipa e God apanawaida kakaibu simbiamolana ita tauma e ideita deawaa dewasailana.  
\v 11 \bd Tane no menaidanede e uduudu ompa osowe badowa enonune nolaitonuna, ita dima bedewe e insaisala ituilana ando ulaipa segalepi.\bd*  
\v 12 No mai menaneipona e nuala obasalepi! Tane apana mida sumanaintoie nuau aiaisiwa mampe odane antone ita dima God sauawalena wadeiena mo ruauitana, mai etedabuaitane ena.   
\s1 God sauawa ipa badowa ita ulaipa  
\p
\v 13-14 \x + \xo 6.13-14 \xt Bumpai 22.16,17\x*Gagalo ema do insena: God Abraam mampe badowa saualene wanase, \bd “Ne sauna euda e osoawo itupe e dana debamasapa.”\bd* Tane mai mida da debamawaida God rua wainipona baiwa God saua Abraam mampe wana meba ebowa mampe saisaisane ipawanasan.  
\v 15 God Abraam sauasano etene nuawa aiaisiwa mampe inta ewaewalene odene alene ita dima God sauasana donsan.   
\p
\v 16 Apana mida saualeidia me nitu da, ba apana da ebowa debamaia, mai meba ebowa rua, mampe sauawaleide. Saua aiawa ema mampe wakoa gagalowa uduudu dialepi.  
\v 17 Deawaa, God apana mida mo ando dima me sauawalen wadapua mampo sabamoidosana me insaisawa mai leusapi, dia, tane ideita dewasapi. Sa baiwa me saua badowa wane, ita me meba ebowa mampe wane saisaisan.  
\v 18 Dewa ema nata God mai lagau wapie insaisawa leusapia rua, dia. Sa baiwa gagalo ema no mida God gonaawa bedewe odate inantena wasauidanede. Ita dima no nainimbanepe inseitana badowa wadatado, mai etedabuantate eta.  
\v 19 \bd Tane no insaisamba ema ipa God duwa uboo garawa seudia bedewainta du pouweido God mampe wisene winede. No insaisamba ema ituitana ipa anika rua inawamba wadediitue badosade.\bd*  
\v 20 \x + \xo 6.20 \xt Sam 110.4\x*\bd Bola sa bedewe Iesu no baimba bautalene odene alene God danawe enede. Ita me ipa Pirisi ionoidoa wanwankasalala wanalen, pirisi Melikisedek rua.\bd*   
\c 7  
\p
\v 1 \x + \xo 7.1 \xt Bumpai 14.17-20\x*Tane no tauma Melikisedek umanawa waitana. Me ipa bola debama ebowa Salem warerewa ita do God ionoidoa pirisiwa. Abraam me warere uduudu 4 do onantoie me kasawogalene aupe ene leulene aleidio into Melikisedek me donsane God sauwa euwa Abraam osowe itun.  
\v 2 Tane Abraam nitu uduudu me onaleidie wadedia moawa dea Melikisedek wanen. Ita Melikisedek ebowa ipawaida ipa warere dodomanaida. Me ebowa da ipa Bola Salem warerewa. Ebo sa ipawaida ipa ema epe: Wanwan euwa obasa segalepia warerewa.   
\p
\v 3 Tane Melikisedek mamba, inawa ita gombawa dia. Me wanwamba bumpa ita ompa dia. Me God Otopa ruawalene pirisi wanwankasalala wande.  
\v 4 Melikisedek me debamalena ewane insena! No nosinosimba bumpau Abraam dima me onaleidie wadedia moawa dea Melikisedek wanen. Abraam epe dewalene sabamosan Melikisedek ipa debamaida, mai me meba rua.  
\v 5 Tane anaana wadia rua Israel pirisiu Liwai damba bedewe ieia uduudu mo sosou Israelwa mampo nana moawa wadeie. Tane Israelwa mo do ipa Abraam nosinosiwa.  
\v 6 Tane Melikisedek ipa mai Liwai damba bedewea, tane me Abraam mampe nana moawa wadene ita Abraam osowe God sauwa euda itun. Insena, Abraam me ipa God sauawa otena apanawa.  
\v 7 Ema ipa sabamo: Apana mida sowa osowe sau itudia me ipa debamawaida, mai mida sau wadedia rua.  
\v 8 Israel pirisiu nana moawa wadei, tane mo ipa bolala. Deawaa, Melikisedek do nana moawa waden, tane no atenten me ipa wanwankasalala.  
\v 9 Sa baiwa no ema epe wataa rua: Liwai mida me sosowa Israelwa mampo nana moawa wadena, meba Abraam bedewee Melikisedek nana moawa wanen.  
\v 10 Melikisedek Abraam donsane ita nana moawa wadena walamawe Liwai ipa mai mulepona, dia, tane me Abraam osinawe wandie. Inta ema bedewe ewaewa Liwai meba Melikisedek nana moawa wanen.   
\p
\v 11 Israel bedewe Liwai damba apanawa pirisi nolawa wadeiena. Mo nolau sa dewasaiena asiasi God Israelwa anaanawa wanamon. Mo nolau ipuipua segalepe sapaidalepono God mai pirisi da nambea Melikisedek rua umanawa wapona, dia. Tane Melikisedek, me mai Liwai damba bedewea pirisi bautaa Aron rua, dia.  
\v 12 Tane pirisi nolawa apana da wadepio sanaa wanalepia, sa ipa anaana do sanaalepi.   
\p
\v 13 Apana mida no umanawa waitana, me ipa dan da bedewea. Me damba bedewe mai mida da pirisi nolawa dewasapona, dia.  
\v 14 Ema ipa sabamo, apana uduudu atentoiena: No Tatamba Iesu ipa Iuda damba bedewe mulen. Tane Moses pirisi gagalouleidie Iuda damba umanawa da mai wapona, dia.   
\p
\v 15 Gagalo ema waitana sabamoleide: Pirisi inainamba da tauma segalen, me ipa Melikisedek rua.  
\v 16 Anaana tontawa bedewe Liwai damba os pirisi nolawa wadei. \bd Tane Tatamba Iesu mai anaana sa asiasi pirisilepona, dia. Me ipa inawinakasalala mukawa mampe pirisi nolawa waden.\bd*  
\v 17 \x + \xo 7.17 \xt Sam 110.4\x*Ipawa God Iesu umanawa benemaleidie wadiase,  
\q1 \bd “E ipa Pirisi wanwankasalala Melikisedek rua.”\bd*   
\m
\v 18 Ema bedewe no epe eweitana: God Moses gagalowa tontawa tauma nambesan, ipawa anaana sa mukawa obasalene ipasialen.  
\v 19 \bd Anaana Moses Israel apanawa wanamona bedewe mai dima da sapaidalepona, dia. Tane tauma God inta sanaa eudida wadenauben. Inta ema bedewe no insaisamba itunte God tampeidontonta.\bd*  
\v 20 Inta sanaa ema ipa God sauawa badowa wana bedewe segalen, mai di segalepona, dia. Apana isiwa mai God sauawa asiasi pirisintopona.  
\v 21 \x + \xo 7.21 \xt Sam 110.4\x*Tane Iesu God sauawa badowa mampe pirisi nolawa waden. Ipawa God me diene wanase,  
\q1 \bd “Ne, e Tataa, badowa sauaedine wadinase, ‘E ipa Pirisi wanwankasalala.’ Ne ando mai insaisana leusapa, dia.”\bd*   
\m
\v 22 \bd God sauawa ema wana, sa ipa me saua sanaa eudida apana me do deantopua baiwa wane ituna winede, mai gagalo tontawa rua. Iesu me ipa God sauawa saisaisana apanawa.\bd*   
\p
\v 23 Gagalo da ema do inseta: Bauta Israel bedewe pirisi nolawa wadeia apanawa deadea bontoio aupau sosou isiwa wadei, mai mida pirisi nolawa dewasaipe ompa osowe wisepona, dia.  
\v 24 \bd Tane Iesu ipa wanwankasalala! Sa baiwa me pirisiwa nolawa do winakasalala, mai mida da ando me aupawa wadepi, dia.\bd*  
\v 25 Ema baiwa me rua os mo mida me bedewainta God mampe wimoia me tauma ita ando inaidamopia rua. Ipawa me wanwankasalala, ita me walama uduudu God danawe mo baibu enedie rauparileide.   
\p
\v 26 \bd Tauma no Pirisimbaida ewate atenten! Iesu me ipa Pirisi ionoidoa, no menanedia rua. Me ipa kakaiwaida, mai kadi ba wawu da me bedewe wineipona, dia. Me bedewe euda os ita kadi apanawa dewau mai ruawalepona. Ita God me itunposideno ionoido uboo wande.\bd*  
\v 27 Israel pirisiwa ionoidoa uduudu walama ruawantoie bauta muba kadiu baiwa, ita muriwa apana kadiu baiwa pue pulontoie. Tane Iesu mai epe dewalepona, dia. \bd Me walama uduudu baiwa deasane pulowa dea os God mampe itun, sa ipa me meba etepaida nanalen.\bd* Ema aupe me mai pulo da itupi, dia.   
\p
\v 28 Moses anaanawa wadia rua apana insaisau oauarau sonabamodio pirisi ionoidoa nolawa wadei. Tane Moses anaanawa aupe \bd God meba sauawa badowa mampe me Otopaida sonabeno Pirisi ionoidoa wanalen. Me ipa pirisi nolawa God wanena diasane ompa osowe wisene wankasaleide.\bd*   
\c 8  
\s1 Iesu, me ipa Pirisimba ionoidoa  
\p
\v 1 \x + \xo 8.1 \xt Sam 110.1\x*Insena, gagalo ema ipawaida ema epe: \bd No Pirisimba ionoidoa ipa debamawaida, me uboo God mukawaaida kolaiwatawa witapa on deneuwe winedia osowe wande.\bd*  
\v 2 Do me sape bola kakaiwaida bedewe pirisi nolawa dewasade. Bola sa ipa God duwa kakaiwaida God eindodeno badowa enede, mai apana witapo dewasapona, dia.  
\v 3 Israel bedewe pirisi ionoidoa sonabamoie amona daitada ita do pue pulowa God mampe itumpaa baiwa. Sa baiwa no Pirisimba ionoidoa Iesu ideita deawaa God mampe nitu da pulolepi.  
\v 4 Tane no Pirisimba Iesu tawo osowe wainipono me mai pirisi nolawa da wadapona, ipawa apana isiwa Moses anaanawa wadia rua nola sa wadeie amonau itui.  
\v 5 \bd Tane du kakaiwa bedewe pirisi nolantoia, sa ipa dima uboo ipawaida winedia eueuwa, ba aleupa rua.\bd* Ne epe wadina, ipawa Moses God duwa kakaila rialala wadawada baiwaleidio God me diene wanase,  
\q1 “Ewadewaitaa, du kakaila ema aleupa wadi iwa osowe euwaeno ewaana ruawaida dewasaa.”   
\m
\v 6 \bd Tane tauma Iesu pirisi nolawa eudida waden, mai pirisi tawo osowe nolantoia rua.\bd*  
\p \bd Deawaa, God sauawa gagalowa sanaa dima Iesu meba ipawanasana ipa eudida,\bd* mai saua gagalowa tontawa rua. Ipawa gagalo sanaa ema bedewe God sauawa eudida itun, mai bauta wana rua.  
\v 7 God sauawa gagalowa tontawa noladewaleipono ando mai saua sanaa da segalepona, dia.   
\p
\v 8 \x + \xo 8.8 \xt Ierima 31.31-34\x*Tane God apana mampo kadi donsana baiwa epe wane wanase:  
\q1 “Ne, e Tatala, wadina. Walama iedia ando wisepio ne sauana gagalowa sanaa Israel ita Iuda apanawa baibu itupa.   
\q1
\v 9 Saua sanaa ema ipa mai gagalo tontawa ne mo nosinosiu mampo ituna rua. Ne bautantene mo witapu wadane Isibt bedewe banlamono nomone antoiena walamawe ne sauana gagalowa tontawa ituna. Tane saua ne wane ituna mo mai ruawantope wankasantopona, sa baiwa ne emone adiananamona. Ne, e Tatala, wadina.   
\q1
\v 10 \bd Ando walama iediawo ne saua gagalowa sanaa Israel apanawa baibu wape itupa. Walama sawo ne anaanana mo insaisau bedewe itupa, ita do nuau bedewe girumanteapa. Ne mo Godiu wananteapa ita mo ne apananaida wanantopu. Ne, e Tatala, ema epe wadina.\bd*   
\q1
\v 11 Walama sawo apana uduudu, kerakera ita debama ne ateineapu. Sa baiwa mai mida me sowa ando waeuwasapie wapiase, ‘Tatamba God ateitaa!’   
\q1
\v 12 \bd Ne mo nuapareuntape mo dewau kiokiou inse padabuasapa, ita do mo kadiu ando mai insepa, dia.”\bd*   
\m
\v 13 Gagalo ema bedewe God sauawa sanaa umanawa wade. Sa baiwa God sauawa tontawa ipasiasan. Ita dima ipasialene tontalena, sa ipa kerauda os dialepi.   
\c 9  
\p
\v 1 Saua gagalowa tontawa bedewe God simbiawa dewawa anaanawa wineie. Ita do saua gagalowa tontawa wadia rua Israel apanawa du kakaila tawo ema mampea wadeiena.  
\v 2 Du sa rialala bedewe bola empuempulala nata winei. Bola kakaila du nopea bedewe siwa endola nepa ita bured amonantoia watawa winei.  
\v 3 Bola ema adiwe du bedeweido sape ipa bola kakaiwaida gara mampe seunabodeiena.  
\v 4 \x + \xo 9.4 \xt Ekisod 25.10-16; Ekisod 25.16\x*Bola kakaiwaida sa bedewe ipa piupiu suia watawa gold mampe rupulala enede. Do sape bokis dea onapea ita bedewea gold mampe rupulala enede. Tane bokis kakaila, sa ipa God sauawa eueuwawa. Bokis sa bedewe Aron koinawa bauta inilene seuseulena, ita do onta moawa ambodalala winamoi. Onta sa gold mampe dewala bedewe ipa nana ebowa Manna waia winei. Tane do bokis kakaila bedewe God anaanawa uduudu 10 seu tabataba nata osowe girumalena winamoi.   
\p
\v 5 \x + \xo 9.5 \xt Ekisod 25.18-22\x*Bokis iwa osowe nitu nata ewaewau apana rua mabupu dolala waimoi. Mo ipa God sapawaida eueuwawa. Bokis iwa mo mabupu mampe itubodasai. Tane bokis iwa, sa ipa God apana kadiu insedidabuasadia eueuwawa. Nitu ema umanawa waeuwa uduudu no tauma mai wataa rua, dia.  
\v 6 Nitu ema uduudu intaweintawe winamoio pirisi walama ruawantoie du kakaila bola du nopea bedewe odeie simbia nolawa dewasai.  
\v 7 Tane bola du bedeweido pirisi ionoidoa me os ena dea bedewe walama dea os odedi aleide. Me mai di odeipona, tane pue osinawa wadedie do odedi aleide. Osina sa me du bedeweido meba baiwa ita do kadi apana insakoa mampe dewasaiena baiwa amonaleide.   
\p
\v 8 Ema mampe Aleu kakaiwa sabamosadie no epe waeuwanede: Walamaipa du kakaila tontawa bedewe simbia nolawa winediawo bola kakaiwaida uboo awa intawa mai wadapaaubepona, dia.  
\v 9 Dewa ema uduudu ipa eueuwa ande walamawa baiwa. Eueuwa ema epe sabamosade: \bd Nana ita pue pulowa God mampe amonantoia mai mukawa da wineipona ita apana God duwa bedewe odedia nuawa insaisawa dodomanasapi sapaidasapia rua, dia.\bd*  
\v 10 \bd Nana idilala, ba nanalala, do mitamita dewawa, sa ipa eueuwa onapea os dewasai. Tane God tauma inta sanaa ituno winede. Ita inta sanaa ema dewa onapea umanawa waitana ipasiasadie diasade.\bd*   
\s1 Iesu meba osinawa mampe inta wadenauben God mampe  
\p
\v 11 Tane Keriso no Pirisimba ionoidoa wisen ita nitu uduudu eubu intawa aitamana sabamosan. Me God duwa kakaiwaida eudida bedewe odene alene simbialeide. Du debama uboa, sa ipa eudida mai du kakaila tawo ema mampea apana witapo wadeiena rua, dia.  
\v 12 \bd Keriso God duwa kakaiwaida uboa bedeweido walama dea os deasane me meba osinawa mampe odene alen. Ita me no baimba malesa itune inawinakasala intawa wadenauben.\bd* Me mai pue gote, ba kau sanaa osinau wadape do odape alepona, dia.  
\v 13 Israel bedewe pirisi ionoidoa gote ita kau mona osinau, ita do kau otopa iwoa suieno intuwana isanawa otedie apana osouwo weisade. Mo mida mira do odeia inta ema bedewe etepu euleide.   
\p
\v 14 Gagalo ema ipa ulaipa: Pue osinawa apana etepu mirawa nambesan, tane \bd Iesu osinawa ipa mukawa debamaia, mai pue osinawa rua, dia. Iesu bedewe mai wawu da do, ita me Aleu wanwankasalala mukawa mampe meba etepa pulolene amona eudida God mampe itun. Ema mampe me no nuamba insaisawa dewawa bobopa mitedie eusadia, no God wanwankasalala simbiasantaa baiwa.\bd*  
\v 15 \bd Dewa ema uduudu mampe God sauawa sanaa apana me do deantopua baiwa wane ituna Keriso ipawanasan.\bd* Iesu meba bowa mampe apana God sauawa tontawa walamawe dewa kadiwa dewamoiena malesawa itune inamon. Sa baiwa mo mida God apamodia me amonawa euwa winakasala wadapu, me saualena rua.   
\p
\v 16 Tane saua gagalowa umanawa ema do insena. Apana e sauaepie wapiase, “Ne bonteapo aupanawo dima ne mainawoa edina e wadaa.” Tane apana sa waimpaa walamawe dima me sauawalena e mai wadaa rua, dia.  
\v 17 Saua me gagalowalena wandia walamawe ipasia, tane bolepio aupe saua sa ulaipalepi.  
\v 18 Ipawa ema baiwa God sauawa gagalowa tontawa pue osinawa mampe os ulaipalen.   
\p
\v 19 \x + \xo 9.19 \xt Ekisod 24.6-8\x*Inta ema rua Moses bauta dima uduudu anaana bedewe girumaleno winedia Israel apanawa diamon. Ema aupe me kau sanaau ita gote osinau wadene esa do deasane. Tauma me sipsip imba bumawa nitu inilala wasidawasida osowe taumone osina bedewe aine anaana bukawa ita apana uduudu sape eneia do osouwo uwakokosan.  
\v 20 Me dewa ema dewasadie wane wanase, “Osina ema ipa God sauawa gagalowa e baila ituno winedia ipawanasade.”  
\v 21 Dewa ipa deawaa Moses pue osinawa sa wadene God duwa kakaila rialala ita do nitu uduudu simbia nolawa baiwa du bedewe wineia osouwo weisane eumon.  
\v 22 \x + \xo 9.22 \xt Liwai 17.11\x*Ulaipa, kerauda os nitu uduudu osina memaaubala mampe euntoie Moses anaana wadia rua. \bd Tane osina diaewo apana kadiu mai insepadabuasapona, dia.\bd*   
\s1 Iesu osinawa apana kadiu mitediaubede  
\p
\v 23 Gagalo ema baiwa no epe ewate atenten: God duwa kakaila ita do dima bedewe wineia uduudu pue osinawa mampe euntoiena. Tane nitu sa tawo osowea ipa dima uboo wineia eueuwawa aleupa os. Nitu ipauida uboa mai pue osinawa mampe euntopua rua, dia, tane mo nitu eudida mampe os euntopu.  
\v 24 Keriso mai du kakaila apana witapo wadeiena bedewe odape alepona, dia. Du kakaila sa ipa dima uboo winedia aleupa os. \bd Tane Keriso ubaida bedewe odene alene ita tauma wisedie no baimba God danawe enede.\bd*  
\v 25 Israel pirisiu ionoidoa ena ruawaleidie mai me meba osinawa, tane pue osinawa wadedie do God duwa bedeweido bola kakaiwaidawo odede aleide. Tane Keriso me mai meba osoweosowe puloleipona, dia.  
\v 26 Me epe dewalepono me tawo segalena walamawe ita tauma ideita osoweosowe poka etapona. \bd Tane me tauma walama ompa osowe walama dea os deasane wisene me meba osinawa mampe pulo itun, kadi riasapie diasapia baiwa.\bd*   
\p
\v 27 \bd God insaisawa ituno winedia rua apana uduudu mo walama dea os bontopue ita aupe God danawe enapu kotu baiwa.\bd*  
\v 28 \x + \xo 9.28 \xt Aisaia 53.12\x*\bd Deawaa Keriso do walama dea os meba etepa pulolene ituna, apana uara kadiu awanepiaubepia baiwa. Ita me awa natawa wisepia, sa ipa mai kadi da awanepiaubepia baiwa, dia. Tane me wisepie mo mida me inta ewaewawantoie onioniawaidantoie waimoia inamopia baiwa.\bd*   
\c 10  
\p
\v 1 Moses anaanawa Israel apanawa wanamona eueuwa aleupa os ipawaida eudida ando segalepia baiwa. Anaana sa asiasi apana God mampentoia ena ruawantoie pue pulontoi. Tane epe dewantoia mo mai God emawe sapaidantopua rua, diaida.  
\v 2 Naita apana God mampentoia pulo dea os deasape itupona bedewe mo kadiu mitapaaubepono mo nuau ando mai wawumopona ita pue pulowa ena ruawantoie dewasaia do epona.  
\v 3-4 \bd Tane kau mona, ba pue gote osinau mai kadi mitepiaubepia rua, di diaida!\bd* Sa baiwa pue pulowa ena ruawantoie ituia apana nuaitumode mo kadiu ipa winakasaleide.   
\p
\v 5 Ema baiwa Keriso tawo osowe wisena walamawe me wane wanase,  
\q1 “God, e amona ita pue pulowa mai meneeipona, tane etena e ne neaana e nolaa baiwa.  
\v 6 Apana pue pulontoie sui, ita amonau kadiu mitepiaubepia baiwa dewasaia e nuaa mai euleipona, dia.”   
\m
\v 7 Ita me do wane wanase,  
\q1 \bd “O God, ne ema ambi, e insaisaa dewasapaa baiwa winen, buka ne umanana wadia rua.”\bd*   
\m
\v 8 Ema epe insena: Keriso bauta wane wanase, “E pue pulowa ita amonawa, pue susula pulowa, ita do amonau kadiu mitepiaubepia baiwa dewasaia e mai meneeipona ba nuaa euleipona, dia.” Tane pue pulowa ita amona me umanawa wadia, sa ipa Moses anaanawa wadia rua dewasai.  
\v 9 Ita Keriso osowesane wanase, “O God, ne ema ambi, e insaisaa dewasapaa baiwa winen.” Ema bedewe God pulo dewawa tontawa ipasiasan, ita me mampe wiwisa intawa sanaa ituno winede.  
\v 10 \bd Iesu Keriso God insaisawa rua dewasane meba etepa walama dea ita deasane pulolene itun. Ema bedewe me no kadiwamba mitenaubene God baiwa kakainen.\bd*   
\p
\v 11 Pirisi Israel bedewe walama ruawaleidie God duwe enedie me nolawa dewasade, ita pue pulowa inainamba deawaa osoweosowe itude. Tane pulo sa ipa mai kadi awanepiaubepia rua, diaida.  
\v 12 \x + \xo 10.12 \xt Sam 110.1\x*\bd Tane no Pirisimba Keriso kadi pulowa dea os deasane walama uduudu baiwa itun. Me nolawa diasane aupe me God witapa on deneuwe aisidene waine wande.\bd*  
\v 13 Sape me tauma onionialeidie wande ideita God me emalawoasaia apanawa otamopie wawa atowe teamopi.  
\v 14 \bd Me pulowa dea os ita deasane mampe apana mida God kakaimodie mampemodia tauma ita ando baiwa sapaidamon.\bd*   
\p
\v 15 God Aleupa kakaiwa bedewee ema umanawa epe wadi wadiase,   
\q1
\v 16 \x + \xo 10.16 \xt Ierima 31.33\x*\bd “Ando walama iediawo ne saua gagalowa sanaa Israel apanawa baibu wape itupa. Walama sawo ne anaanana mo nuau bedewe itupa, ita do insaisau bedewe girumanteapa. Ne, e Tatala, wadina.”\bd*   
\m
\v 17 \x + \xo 10.17 \xt Ierima 31.34\x*Ita me osowesane wanase,  
\q1 \bd “Mo kadiu ita dewau kiokiou ne ando mai insepa, dia.”\bd*   
\m
\v 18 God kadi ita dewa kiokiou insadabuamona baiwa ando mai kadi pulowa da segalepi, dia.   
\s1 Badowa enate God mampe wineta!  
\p
\v 19 \bd Sumanai sosona, no dodomana badowa enate Iesu osinawa mampe God duwe bola kakaiwaida bedewe God danawe wineta!\bd*  
\v 20 \bd Bauta inta no God mampe winepona gara God duwe seudia enenboden, tane tauma Iesu ina intawa sanaa meba etepa mampe wadenauben.\bd*  
\v 21 Me ipa no Pirisimba debama ionoidoa mida God duwa uboa oniadewasasade.  
\v 22 \x + \xo 10.22 \xt Isikel 36.25\x*\bd Sa baiwa insaisamba dodomana ita sumanaimba badowa mampe ane God mampentata! No epe dewantataa rua, ipawa Iesu no esa eudida, sa ipa me osinawa mampe no nuamba ita etemba uduudu mitene eusan. Ita mai dima da no nuamba wawusaipona, dia.\bd*   
\p
\v 23 Dima God wadia me ideita dewasapia rua. Sa baiwa dima God sauawalena ita no insaisamba itute waitana no badowa wadataitue antonta.  
\v 24 Ita inta daitada banuntate eda waninantonta nuawadawada ita simbia euda dewasantaa baiwa.  
\v 25 Do kainokaino awodeantonta, mai eta, sosomba isiwa dewantoia rua. \bd Tane no ideita sumanaimba bedewe eda wasauidantonta, ipawa no ewate atenten Tatamba God walamawa debama maidaleide.\bd*   
\p
\v 26 No Iesu Keriso gagalowa ulaipa waeuwa etate atenten. Tane naita ema aupe no insaisamba kadiwa dewawa bedewe ituite dewasaitana ando mai pulo intawa da wineipona ita kadi awanepiaubepi, dia.  
\v 27 \bd Apana mida epe dewaleidia, me ipa nuawa sa do God kotuwa ita ia iilala debama baiwa onionialeide.\bd* Ia sa ipa apana uduudu God emalawoasaia kadimopi.   
\p
\v 28 Israel dewawa tontawa ema insena: Apana mida Moses anaanawa etedie, tane mai ruawaleipona ita apana nata ba uara me dewawa kadiwa ewane kotu bedewe benemawantoi, apana sa dewawa kadiwa baiwa bolepi, mai umanawa da wapu, dia.  
\v 29 \x + \xo 10.29 \xt Ekisod 24.8\x*\bd Tane Iesu osinawa ipa kakaiwaida ita God sauawa gagalowa sanaa ipawanasade.\bd* Sa baiwa apana mida God Otopaida ansisisadie ita Iesu osinawa me kadiwa mitenaubena ipasiasadie, do God Aleupa no amona euwa nenedia wakadisasadia, me ando matangela inainamba ambi donsapi?  
\v 30 No matangela ema sawantata, ipawa no God atenten, me mida aiawa ema wadi wadiase,  
\q1 “Ne ipa dewa kadiwa sipoasape leusapa.”  
\p Tane do buka bedewe wadi wadiase,  
\q1 “Tatamba me apanawa kotumopi.”   
\m
\v 31 Dewamba kadiwa baiwa God wanwankasalala no kotunepia baiwa wadanepi, tane sa ipa nuasalalaida no mainimbo.   
\p
\v 32 Sumanai sosona, e bauta God sapawe odalana walamawa insenuna. Walama sawo e sumanai onawa daitada bedewe poka do etale badowa enalana, sumanaila mai epona, dia.  
\v 33 Walama isiwa bedewe mo e apana emauwo wakadisaleie ita kadileiena. Walama dawo mo apana da dewa ipa deawaa dewamoio e mo tampoitene saumolana.  
\v 34 Sumanai sosomba isiwa dibura bedewe waimoie poka eteia e do deawaa eteilana. \bd Mo mida dima e manlawoa anatamoio e nuaeu do wankasaiten, ipawa e ateiten e manlawo ipa nitu uwataubuida eubu winakasalala winei.\bd*  
\v 35 \bd Sa baiwa insaisala mai omepi, ipawa e epe dewaitonuna unela debamaia ando wadana.\bd*  
\v 36 \bd E poka bedewe ideita badowa enonune aitonuna. Inta ema bedewe e God insaisawa ruawaitane ita dima me sauawalena donsana.\bd*  
\v 37 Ema umanawa buka bedewe girumalena wadi wadiase,  
\q1 \bd “Walama kerauda os bedewe me mida iedia ando wisepi, mai alalepi, dia. \bd*  
\v 38 Ita ne apanana dodomana sumanaiwa mampe inawaa wampi. Tane apana mida insaisawa leusadie nambe aleidia, me mampe ne nuana mai eulepi, dia.”   
\m
\v 39 No ipa mai apana mida insaisawa leusadie kadi donsadia rua, dia. \bd Tane no ipa mo mida sumanaintoie inaida donsaia apanawa ruau wainitana.\bd*   
\c 11  
\s1 Sumanailala eueuwau  
\p
\v 1 \bd Tane sumanai ipawaida ipa dima? Sumanai bedewe no atenten dima bedewe no insaisamba ituitana, sa ipa ando ideita ipawanalepi. Do sumanai mampe no atenten nitu ewasiawaia ulaipaida winamoi.\bd* Sa ipa sumanaiida.  
\v 2 God apana mapoido wanwanlala sumanaibu epe rua ewene ita mo asou wan.   
\p
\v 3 \x + \xo 11.3 \xt Bumpai 1.1; Ion 1.3\x*Sumanai bedewe no atenten uba ita tawo ipa God aiawa mukawa mampe seganton. Ema epe inta nitu ewaewala sa ipa God nitu ewasiawaia mampe dewamon.   
\p
\v 4 \x + \xo 11.4 \xt Bumpai 4.3-10\x*Sumanai bedewe \bd Abel\bd* God mampe pulo eudida itun, mai me tatawa Kein rua. Abel sumanaiidalena baiwa God me gagalowa euda wane wanase, “E ipa apana dodomanaida.” God epe sabamosan, ipawa me Abel pulowa wadene nuawa eulen. Abel mapoido bolen, tane me sumanaiwa mampe no mainimbo ideita gagaloleide.   
\m
\v 5 \bd Enok\bd* God sumanaiwalena baiwa me wadenposideno di uboo odene alen, ita me bo dauwa da mai etapona, dia. Enok etepa mai mida da donsapona, ipawa God me mampesan. Buka bedewe girumalena epe wadi wadiase: ‘Me wandia walamawe God nuawa eusan, muriwa me uboo odene alen.’  
\v 6 \bd Tane mai mida da sumanaisia waimpe God nuawa eusapia rua, dia.\bd* Ipawa apana mida God mampelepia me ema sumanaiwalepie insepi: \bd God ipa wande, ita mo mida me banuidasaia uneu wanamode.\bd*   
\p
\v 7 \x + \xo 11.7 \xt Bumpai 6.13-22\x*God \bd Noa\bd* bautasane dima ewasiawaia ando segalepia umanawa dien. Sumanai bedewe Noa God aiawa etene Godida dauwa atenlene ruawalene waa debama dewasane me meba ita manainapa, obampa, ita tawatawabinawa do inantoiena. Dewa ema mampe Noa sumanaisiawaia apanawa dewau kadiwa sabamosan. \bd Tane me sumanailena baiwa God me diene wanase, “E ipa apana dodomanaida.”\bd*   
\p
\v 8 \x + \xo 11.8 \xt Bumpai 12.1-5\x*God \bd Abraam\bd* apasane diene wanase, “E tawoaida ee bola da ne eneedinawo aitaa!” Sumanai bedewe Abraam God aiawa etene ruawalene meba tawowaida ene mai atenlepona me naepe aleidie.  
\v 9 \x + \xo 11.9 \xt Bumpai 35.27\x*Sumanai bedewe Abraam bola sanaa God sauawalena bedewe ware rua du kerakeraleidie wandie. Muriwa \bd Aisak\bd* ita Iakob mo mida God sauawa do wadeiena deawaa dewantoiena.  
\v 10 Abraam epe dewalena, ipawa me bola debama badowa winakasalala God insaisawalene mampe wadena me insedie leidie.   
\p
\v 11 \x + \xo 11.11 \xt Bumpai 18.11-14; 21.2\x*Abraam gulauidalen, ita me manainapa Sara do aipoilen, mai oto sitaupona rua, dia. Tane sumanai bedewe Abraam etepa muka wadene ita otopu gamosaiena. Abraam insenase, “Me mida saualena dima me wana ulaipaida dewasapia rua.”   
\p
\v 12 \x + \xo 11.12 \xt Bumpai 15.5; 22.17; 32.12\x*Abraam me oauaralene ewaewa bolepona rua. Me apana dea, tane me bedewee nosinosiwa uaraia segantona kipora uboa ba owa tampa nelawa wineia ruau.   
\p
\v 13 Sumanai bedewe apana ema uduudu waimoie ompa osowe bontoiena. Nitu dima God mo sauamona mai da donsape wadapona, dia. Tane mo atentoiena dima God sauawalena ipa andoido segantopua mo ideita nuaeu do saua sa onieie waimoie. Mo sabamo wane waienase, \bd “No ipa tawo osowe ware ita wanriasalala apanawa wainitana.”\bd*  
\v 14 Apana mida epe waia muba sabasabamontoi mo ipa bolauida banusaie lai.  
\v 15 Mo bola eiena mai inseipe leipe, dia. Mo epe insepono mo ideita leuntope antopona bolauwoido.  
\v 16 Tane mo bola eudida uboa banusaie laie, mai bola bauta eiena banusaipe, dia. Mo God ebowa waie waiase, \bd “E ipa no Godimba.”\bd* Tane God mo epe waio baiwa mai malauleipona, ipawa me bola sanaa debama mo baibu imaasano winede.   
\p
\v 17-18 \x + \xo 11.17-18 \xt Bumpai 22.1-14\x*\x + \xo 11.17-18 \xt Bumpai 21.12\x*God Abraam rubusadio me sumanaiwa bedewe otopa Aisak pulo rua itupona baiwaleidie. Tane ema insena: Abraam mampe God saualene wanase, “E otoa Aisak mampee nosinosia uaraia segantopu.” Tane Abraam ideita me otopaida dea os pulo rua itupona baiwalen.  
\v 19 Abraam ema epe insenase: God me rua os Aisak bo bedewe inasapi. Sa baiwa no epe wataa rua: Abraam Aisak bo bedewe itun, tane leusane waden.   
\p
\v 20 Sumanai bedewe Aisak me obampa Iakob Esau nata osouwo sau gagalowa euda mo dima ando donsapua baiwa itun.   
\p
\v 21 \x + \xo 11.21 \xt Bumpai 48.1-20; Bumpai 47.31\x*Sumanai bedewe Iakob bo baiwaleidie me atatawa Iosep obampa nata osouwo sau gagalowa euda itun. Me koinawa wadendoe osowe enene God ebowa wadaposisan.   
\p
\v 22 \x + \xo 11.22 \xt Bumpai 50.24,25\x*Iosep bo baiwaleidie me sumanaiwa bedewe Israel apanawa Isibt epue nomopua umanawa wan. Do sumanai mampe me obampa diamodie ambi ando me etepa dewasapu.   
\p
\v 23 \x + \xo 11.23 \xt Ekisod 2.2; Ekisod 1.22\x*Moses muleno me gombawa sumanaibu mampe uaboa natadea bedewe me weregasaieno wain, ipawa mo atentoiena me ipa oto eudida, mai oto koakoau ruau, dia. Ita do mo Isibt warerewa aiawa mai sawantope ruawantopona.  
\v 24 \x + \xo 11.24 \xt Ekisod 2.10-12\x*Muriwa Isibt warerewa anoopa Moses bopawa gamosan. Moses eialene sumanaiwa mampe mai menasapona me Isibt warerewa atawa rua wampona, dia.  
\v 25 Me mai menasapona walama kerauda os dewa kadiwa bedewe nuaeulepona. Tane me sonasonabalen me God apanawaida do wampe ita Isibt apanawa mampo poka etapona.  
\v 26 Moses nuawa bedewe insenase, \bd “Ne mala osowe ituneapua God sonabamodia apanawa rua, sa ipa ide euda. Tane Isibt nituwa uwataubu uduudu ne mai menaneipona, dia.”\bd* Moses God sonabamodia apanawa umanawa wana, sa ipa me abo Keriso umanawa waipe. \bd Me insaisawa unewa God me ando wanepia bedewe ituna baiwa epe dewalen.\bd*  
\v 27 \bd Sumanai bedewe Moses bola Isibt en. Me warere nuakadiwa mai sawalepona, dia. Tane badowa enene me mampe alen, ipawa me sumanai bedewe God ewasiawaia ewen, abo ewaewalalaida rua.\bd*  
\v 28 \x + \xo 11.28 \xt Ekisod 12.21-30\x*Sumanai bedewe Moses Israelwa odau ebowa waia Pasowa uwaaleno dewasaiena. Ita do sumanai mampe me Israel apanawa diamono du nepe osina memene antoiena. Mo epe dewasaiena, ipawa Isibt obampu tautuau epaboiamopia aleupa mai wisepie Israel obampu do bomopi.   
\p
\v 29 \x + \xo 11.29 \xt Ekisod 14.21-31\x*Sumanai bedewe Israel apanawa owa bumawa bedewainta antoiena tawo makowa asiasi antopona rua. Tane Isibt apanawa mo wauwo antoio owa mo numamontuwan.   
\p
\v 30 Israel apanawa bola Ieriko gonaawa walama 7 bedewe panane antoieno dialeno aupe mo sumanaibu bedewe bola sa gonaawa debamaia seu mampe dewasaiena daberaralene nosentuwan.   
\p
\v 31 Sumanai bedewe i ninala ebowa Raab mai Ieriko apanawa isiwa God aiawa etasiawaia ruau bolepona, dia. Ipawa me Israel apanawa weregainta ona baiwa dewa uduudu sape ewapue atentopua awa wimoiena me banlamone duwe teamon.   
\p
\v 32 \x + \xo 11.32 \xt 1 Samuel 16.1–1 Kin 2.11; 1 Samuel 1.1–25.1\x*E inseilana ne kainokaino wape anteapa? Omo dialeidia baiwa ne mai Gideon, Barak, Samson, Iebita, Dawid, Samuel ita peroweta umanau wapa, dia.  
\v 33 Sumanai bedewe mo warere isiwa nanaumoiena. Do dewasaieno dewa dodomana euwa seganton, ita mo dima God sauawalena donsane dauwa eteiena. Isiwa sumanai bedewe pue onawaa laion moau wadabodamoiena.  
\v 34 Apana isiwa ia iilala debama epanaboleiena, tane isiwa isima mampe bomopua baiwantoio saiene ene inantoiena. Ita isiwa muba mukau dia, tane sumanai mampe mukau wadeiena. Sosou da kasawogantone ona apanawa uaraia bola da bedewe wimoiena tanamone nanausimoiena.  
\v 35 \x + \xo 11.35 \xt 1 Kin 17.17-24\x*Ioto isiwa God sumanaiwantoiena, ita God mo obampu bo bedewe inamon. \bd Tane sumanailala isiwa mai inantopona baiwa mai God lagawa wapona, dia. Tane pokaida etane bontoiena bo bedewe enapuwimopue ina eudida bedewe antopua baiwa.\bd*  
\v 36 \x + \xo 11.36 \xt Ierima 38.6\x*Mo sosou isiwa wareuwamone ita tai mampe epamoiena. Sosou da witapu seni mampe taune banlamone antoiena dibura bedewe.  
\v 37 Sumanailala da mo seu mampe epaboiamoiena, da mo nopuiamoiena ita isiwa isima mampe emboiamoiena. Mo pue gote ba sipsip etepa taune nomone antone laie. Mo ipa nuaparelala, do apana mo oniakadisamoieno pokaida eteiena.  
\v 38 Mo ipa apana dodomanau eubu, sa baiwa tawo ema apanawa mo nibuamoieno sala makowa bedewe, wadi osowe, guba ba tawo nagawa bedewainta waimoie laie.   
\p
\v 39 Apana ema uduudu sumanaibu dudunawa ipa eudida. Tane dima God sauawalena ipawaida mo mai donsape wadapona, dia.  
\v 40 Dima baiwa ema epe segalen? \bd God no baimba nitu eudida imaasane itun, sa baiwa sumanailala uduudu umanau waitana mai bautantope ompa osowe wimope sapaidantopona, dia. Tane mo no do awodeantate God sauawa ipawaida donsata.\bd*   
\c 12  
\s1 God me obampa dodomanamode  
\p
\v 1 Sumanai apanawa ema uaraia enane pananene sumanai intawa euda no waeuwanei. \bd Sa baiwa nitu uduudu dima sumanaimba surakausadia, tane do kadi no teinaaisinedia otawiamote nambemote ita weuwate ane intamba God ituna ompa osowe winete diasata, mai etedabuantata, dia.\bd*  
\v 2 \bd No weuwante bedewe Iesu ewadosante antonta. Tane Iesu, me ipa no sumanaimba bumpa ita ompa. Me nuaeuwa debama winedia ewene baiwa koros pokawa etedie do koros osowe bowa malawa mai insepona. Ita ompa osowe me God kolaiwatawa on deneuwe aisidene wain.\bd*  
\v 3 Kadi apanawa Iesu amboitusaieno poka eten, tane me mai sigabulepona, dia. Iesu me ambi dewalena insene ita mai sumanai bedewe omene nuala oauaralepi.   
\p
\v 4 E badowa eneile kadi amboiasaile aitilana, tane ona ema bedewe mai mida e bedelawo osinawa memepaaubepona, dia.  
\v 5 God wasauwa gagalowa e nuala awawalen, ba? Me e umanala wane wanase, \bd “E ipa ne obaina!”\bd* No ema atenten, ipawa buka bedewe girumalene wadi wadiase,  
\q1 \bd “Ne otona, Tatamba e dodomanaempo etaadewaitaa! Me e gagaloempo mai nuaa oauaralepi.\bd*  
\v 6 \bd Ipawa mida Tatamba nuawadawadasadia me dodomanasade, ita mida me otopa wanasadia me poka wanedio etede.”\bd*   
\m
\v 7-8 Insena, poka sa ipa e dodomanaitana baiwa! E ipa God obampa, sa baiwa me epe dewasade e manlawo. \bd God e mai poka enaleipono, sa ipa e mai me obampaida, tane inta obampa ruau wanleipona.\bd* Ne epe wadina, ipawa gombau uduudu mo obampu dodomanamoi, mai dia.  
\v 9 No gombambaida dodomananeio mo aiau etate simbianten. Sa ipa euda, tane no ideita Mamamba uboa aiawa etonte ruawantonta inaida bedewe wantaa baiwa.  
\v 10 No gombamba walama kerauda os bedewe dodomananeiena, mo insaisau rua. \bd Tane God no euntataa baiwa dodomananedia apana kakaiwaida wanantata, me meba kakaiwaida wandia rua.\bd*  
\v 11 Walamaipa God no dodomananedio poka eteitana, sa ipa ewaewa nuapare no mainimbo, mai nuaeu. Tane mo mida poka bedewainta dodomanantoia ando wanwan eudida obasa donsapu. Sa ipa mo uneu ipuipua.   
\s1 Wasau gagalowa isiwa  
\p
\v 12 \x + \xo 12.12 \xt Aisaia 35.3\x*Sa baiwa witala aiaisintona ita iminla oauarantona badomone sumanai bedewe enana.  
\v 13 Inta dodomana asiasi aitonuna ita mai mida tampa kadiwa wawa kadiidalepi, tane ideita inalepi.  
\v 14 \bd Mukala mampe nolaitonune apana uduudu do euda os wanlempa, do God apanawa dodomana kakaiwaida wanaitana! Mai mida di wankoalempe ando Tatamba ibuwa ewepi, diaida.\bd*  
\v 15 Ewanadewaitana, mai mida e bedelawo God nuawadawadawa amonawa euda wadepisudepi. Do mai mida lawuru naumba kadiwa rua inilepi debamalepie e bedelawo surakauwa segalepio sosowa uaraia do kadimopi.  
\v 16 \x + \xo 12.16 \xt Bumpai 25.29-34\x*Mai mida e bedelawo ninalepi, ba Esau, mida mai God insaisawa wadapona, ruawalepi. Me oto tautua, tane nana dea napona baiwa me wamba diene wanase, “Tauma nana sa neaa ita ne aupana wadee e oto tautua wanaitaa!” Me epe dewalene me mambaida sauwa, ita do God sauwa euda ipasiasan.  
\v 17 E ema ateiten: Me ema epe dewalena aupe Esau menaidasan me mamba mampe sau euda wadapona, tane mamba mai epe dewasapona rua, dia. Ita Esau ke do inta banusan insaisawa leusape me aupawa osowe wadapona, tane mai donsapona, dia.   
\p
\v 18 \x + \xo 12.18 \xt Ekisod 19.16-22\x*E ema do insena: Israelwa wadi Sainai mampentone mo ia iilala, sala iwimpa dubawaia ita lawara dauwa eteiena.  
\v 19 Do mo nitu bui rua tarampet aiawa debamaia ita do God aiawaida eteiena. Apana uduudu aia sa etane iririntone waienase, “No mai aia da osowe etataa rua, dia.”  
\v 20 \x + \xo 12.20 \xt Ekisod 19.12,13\x*Mo epe waiena, ipawa aia sa mo mampo badowaida. God aiawa ema epe wane wanase, “Mai mida wadi ema ibuwa wirasapie wadepi, dia. Apana ba pue epe dewantopua ideita seu mampe epaboiamopu.”  
\v 21 Dewa sa uduudu mo eteie ita eweia ipa nuasasana debamaia, sa baiwa Moses wane wanase, “Ne uwauwantedine saidantedina.”   
\p
\v 22 Tane e ipa mai Israel apanawa tontau ruau, dia. E ipa wadi Saion, sa ipa Ierusalem uboa God wanwankasalala bolawa debama bedewe wilen. Sape e ensel auweia uaraia wisiasiawaia mampo,  
\v 23 ita do \bd God ekelesiawa auweia bedeuwo wilen. Mo ebou buka uboa bedewe girumalena.\bd* E God mida apana uduudu kotumopia mampe wilen, ita apanawa tontau dodomanau eubu, mida God dewamono ompa osowe wimone sapaidantona, do mampoiten.  
\v 24 \x + \xo 12.24 \xt Bumpai 4.10\x*\bd E ipa Iesu, mida God sauawa gagalowa sanaa wano winedia ipawanasana, mampe wilen. Ita do e me osinawa memenaubena mampe wilen.\bd* Osina sa ipa nitu eubuida benemauleide, mai Abel osinawa rua.   
\p
\v 25 \bd Sa baiwa ewanadewaitana, God e manlawo gagaloleidia mai adiananasana!\bd* Mo mida God gagalowa tawo osowe gagaloleidio etane adiananasaiena matangela mai saiepe inantopona, dia. \bd Tane tauma God gagalowa uboe iedia no etate adiananasata ambi no matangela saiete inantata? Mai inta da wineipona, diaida!\bd*  
\v 26 Israel apanawa wadi Sainai mampentoieno God aiawa wano tawo uwen. Tane me tauma walamawa baiwa saualene wanase,  
\q1 “Ne osowe walama dea os tawo ita uba do dewamopo uwauwantopu.”   
\m
\v 27 God aiawa ema wana ipawaida ipa ema epe: Nitu uduudu segantoia ando uwauwantopue diantopu, ita ema inta nitu isiwa mai tepantopua mo ipa winakasantopu.  
\v 28-29 \bd No ipa God gonaawa mai tepala winakasalala baiwantitana. Sa baiwa no ideita God auwasanta, ita wiwira ita sa do God simbiasante me nuawa eusanta. No ideita epe dewantonta, ipawa God no simbiasaitana me ipa ia iilala nitu uduudu ituialepia rua.\bd*   
\c 13  
\p
\v 1 Tane ema do insena: Sumanai sosola isiwa do nuawadawadaitonuna.  
\v 2 \x + \xo 13.2 \xt Bumpai 18.1-8; 19.1-3\x*Sosola ware simbiamonuna, mai ena. Isiwa epe dewantoie mai atentopona, tane ensel simbiamoiena.  
\v 3 E sumanai sosola isiwa Iesu ebowa baiwa dibura bedewe waimoia insamonuna, ewaewa abo e mo do dibura bedewe wainipona rua. Do sosola da apana mampo poka eteia saumonuna, ewaewa abo e do poka deawaa eteipona rua.   
\p
\v 4 Nainai ipa dewa debama, e uduudu insene onienadewaitana. \bd Apana nainailala mo muba etepu oniepudewantopu,\bd* ipawa God apana ninalala ando kotumopie matangelamopi.  
\v 5 \x + \xo 13.5 \xt Diutor 31.6,8; Iosua 1.5\x*\bd Mane insaisawa mai nuala wadaidasapi.\bd* Tane dima e manlawo winedia, sa ipa ide, mai da insaisawaitana. Ipawa God meba ema epe saualene wanase,  
\q1 \bd “Ne tauma ita ando e mai nuaawawaepe insasiaepa, ba eepa, diaida.”\bd*   
\m
\v 6 Sa baiwa no mai santata, tane badowa enate wataase,  
\q1 \bd “Tatamba ipa ne sauna, ita ne mai santeapa! Apana mai dima dewasapua rua ne mainawo, dia.”\bd*   
\p
\v 7 Apana e banlaleie God aiawa amonantoie dialeia insamona. Mo wanwambu euda os waimoie ompa osowe wimoiena sumanaibu eueuwa ewane, ita mo dewantoiena rua deawaa dewasanuna.  
\v 8 \bd Tane Iesu, mo ita no do sumanaiwantitana, me ipa imanamampe, ande ita ando deawaa, wanwankasalala!\bd*   
\p
\v 9 Mai mida waeuwa isiwa nambea mampe e banlalepio nambe aitana, dia. Mai insenase, “No nana ba idi dewawa dewasate sau euda donsata.” Ipawa apana isiwa epe dewantoia mai sau euda donsaipona, dia. \bd Tane God nuawadawadawa amonawa mampe no nuamba badolepi, sa ipa ulaipaida euda.\bd*  
\v 10 Israel pirisiu mo God duwa bedewe wata enedia osowe pue pulontoia waiwa isiwa ipa mo mubaau oteie namoie. \bd Tane no mainimbo God pulowa da winede, sa ipa Iesu Keriso no baimba osinawa memenaubena.\bd* Pirisi anaana tontawa asiasi God simbiawantoia mai Iesu Keriso mo mubaau wanasapua rua, dia.   
\p
\v 11 Pirisi ionoidoa ena ruawaleidie pue osinawa wadedie God duwe bola kakaiwaida bedewe odedi aleidie kadi pulowa itude. Tane pue sa etepa wadeie bolau eie nambe antoie sui.  
\v 12 \bd Dewa ipa deawaa Iesu do gonaa adiwe poka etene bolen, me meba osinawa mampe apana eumopie kakaimopia baiwa.\bd*  
\v 13-14 \bd Sa baiwa no do nonete gonaa adiwe ane Iesu do ituaisi saiwa awaneta. Ipawa tawo ema osowe mai wanwankasalala bolawa da no baimba wineipona, dia. Tane no ipa wanwan bolawa euda wisepia inta ewaewawantite wainitana.\bd*   
\p
\v 15 \bd Sa baiwa no walama uduudu God wadaposisanta. Sa ipa no pulomba Iesu ebowa mampe God waneitana ita ema bedewe Iesu ebowa sabamosaitana.\bd*  
\v 16 \bd Walama uduudu sosola mampo dewa euda dewasanune ita dima e manlawo winedia do saumonuna, mai ena. Pulo inainamba epe rua God menasade.\bd*   
\p
\v 17 E onialeia apanawa aiau etane ruawaitana, ipawa mo e onialei ita ando mo nolau umanawa God danawe enapue benemawantopu. E mo aiau etane simbiaitana mo nuaeu do nolau dewasapu, mai saiwa wapi. Naita mo nolau saiwa wapia mai dima da euda e baila segalepi, dia.   
\p
\v 18 Tane do no baimba rauparitonuna, ipawa no menanedia dewa uduudu dodomana os dewasanta, ita atenten mai dima da no nuamba wawusaipona, dia.  
\v 19 Ne e badowa iririledina e rauparitana ita God inta wadepiaubepio ne tauwadea wineapa e manlawo.   
\p
\v 20 \bd God, mida wanwan euda obasa no nenedia, Tatamba Iesu bo bedewe inasano enenwisen. Iesu meba osinawa mampe God sauawa gagalowa winakasalala ipawanasane, ita ema bedewe sipsip onioniau apanawa eudida wanalen.\bd*  
\v 21 No rauparintitana God ipa sa e sau euda debama enalepi me insaisawa dewasana baiwa. Do rauparintitana God Iesu Keriso mukawa mampe dima me nuawa eusapia e bedelawo segalepi. \bd Iesu Keriso mampe sapaida ande ita ando winakasalepi!\bd* Ne epe menanede, amen!   
\s1 Gagalo ompa  
\p
\v 22 Sumanai sosona, ne leta kampaida girumanten e manlawo, sa baiwa nuala aiaisiwa mampe ne wasau gagalowa wadina asisusana.  
\v 23 Tane ema do e ateitana: No sumanai somba Timoti dibura bedewe wandio wadanaaubeieno nosen. Me tauwadea mainawo wisepia ne nata e manlawo wineta.   
\p
\v 24 No auwamba God apanawa kakaibu uduudu ita e onialeia apanawa diamona, no auwamoitana. Sumanai sosomba bola Italiwae wimoiena do e auwalei.   
\p
\v 25 God amonawa euwa e uduudu manlawo winompa, niapo!